੧੧. ਸਕ੍ਕਸਂਯੁਤ੍ਤਂ

੧. ਪਠਮਵਗ੍ਗੋ

੧. ਸੁਵੀਰਸੁਤ੍ਤਵਣ੍ਣਨਾ

੨੪੭. ਸਕ੍ਕਸਂਯੁਤ੍ਤਸ੍ਸ ਪਠਮੇ ਅਭਿਯਂਸੂਤਿ ਕਦਾ ਅਭਿਯਂਸੁ? ਯਦਾ ਬਲਵਨ੍ਤੋ ਅਹੇਸੁਂ, ਤਦਾ. ਤਤ੍ਰਾਯਂ ਅਨੁਪੁਬ੍ਬਿਕਥਾ – ਸਕ੍ਕੋ ਕਿਰ ਮਗਧਰਟ੍ਠੇ ਮਚਲਗਾਮਕੇ ਮਘੋ ਨਾਮ ਮਾਣਵੋ ਹੁਤ੍ਵਾ ਤੇਤ੍ਤਿਂਸ ਪੁਰਿਸੇ ਗਹੇਤ੍ਵਾ ਕਲ੍ਯਾਣਕਮ੍ਮਂ ਕਰੋਨ੍ਤੋ ਸਤ੍ਤ ਵਤਪਦਾਨਿ ਪੂਰੇਤ੍ਵਾ ਤਤ੍ਥ ਕਾਲਙ੍ਕਤੋ ਦੇਵਲੋਕੇ ਨਿਬ੍ਬਤ੍ਤਿ. ਤਂ ਬਲਵਕਮ੍ਮਾਨੁਭਾਵੇਨ ਸਪਰਿਸਂ ਸੇਸਦੇਵਤਾ ਦਸਹਿ ਠਾਨੇਹਿ ਅਧਿਗਣ੍ਹਨ੍ਤਂ ਦਿਸ੍ਵਾ ‘‘ਆਗਨ੍ਤੁਕਦੇਵਪੁਤ੍ਤਾ ਆਗਤਾ’’ਤਿ ਨੇਵਾਸਿਕਾ ਗਨ੍ਧਪਾਨਂ ਸਜ੍ਜਯਿਂਸੁ. ਸਕ੍ਕੋ ਸਕਪਰਿਸਾਯ ਸਞ੍ਞਂ ਅਦਾਸਿ – ‘‘ਮਾਰਿਸਾ ਮਾ ਗਨ੍ਧਪਾਨਂ ਪਿਵਿਤ੍ਥ, ਪਿਵਨਾਕਾਰਮਤ੍ਤਮੇਵ ਦਸ੍ਸੇਥਾ’’ਤਿ. ਤੇ ਤਤ੍ਥ ਅਕਂਸੁ. ਨੇਵਾਸਿਕਦੇਵਤਾ ਸੁਵਣ੍ਣਸਰਕੇਹਿ ਉਪਨੀਤਂ ਗਨ੍ਧਪਾਨਂ ਯਾਵਦਤ੍ਥਂ ਪਿਵਿਤ੍ਵਾ ਮਤ੍ਤਾ ਤਤ੍ਥ ਤਤ੍ਥ ਸੁਵਣ੍ਣਪਥਵਿਯਂ ਪਤਿਤ੍ਵਾ ਸਯਿਂਸੁ. ਸਕ੍ਕੋ ‘‘ਗਣ੍ਹਥ ਪੁਤ੍ਤਹਤਾਯ ਪੁਤ੍ਤੇ’’ਤਿ ਤੇ ਪਾਦੇਸੁ ਗਹੇਤ੍ਵਾ ਸਿਨੇਰੁਪਾਦੇ ਖਿਪਾਪੇਸਿ. ਸਕ੍ਕਸ੍ਸ ਪੁਞ੍ਞਤੇਜੇਨ ਤਦਨੁਵਤ੍ਤਕਾਪਿ ਸਬ੍ਬੇ ਤਤ੍ਥੇਵ ਪਤਿਂਸੁ. ਤੇ ਸਿਨੇਰੁਵੇਮਜ੍ਝਕਾਲੇ ਸਞ੍ਞਂ ਲਭਿਤ੍ਵਾ, ‘‘ਤਾਤਾ ਨ ਸੁਰਂ ਪਿਵਿਮ੍ਹ, ਨ ਸੁਰਂ ਪਿਵਿਮ੍ਹਾ’’ਤਿ ਆਹਂਸੁ. ਤਤੋ ਪਟ੍ਠਾਯ ਅਸੁਰਾ ਨਾਮ ਜਾਤਾ. ਅਥ ਨੇਸਂ ਕਮ੍ਮਪਚ੍ਚਯਉਤੁਸਮੁਟ੍ਠਾਨਂ ਸਿਨੇਰੁਸ੍ਸ ਹੇਟ੍ਠਿਮਤਲੇ ਦਸਯੋਜਨਸਹਸ੍ਸਂ ਅਸੁਰਭਵਨਂ ਨਿਬ੍ਬਤ੍ਤਿ. ਸਕ੍ਕੋ ਤੇਸਂ ਨਿਵਤ੍ਤੇਤ੍ਵਾ ਅਨਾਗਮਨਤ੍ਥਾਯ ਆਰਕ੍ਖਂ ਠਪੇਸਿ, ਯਂ ਸਨ੍ਧਾਯ ਵੁਤ੍ਤਂ –

‘‘ਅਨ੍ਤਰਾ ਦ੍ਵਿਨ੍ਨਂ ਅਯੁਜ੍ਝਪੁਰਾਨਂ,

ਪਞ੍ਚਵਿਧਾ ਠਪਿਤਾ ਅਭਿਰਕ੍ਖਾ;

ਉਦਕਂ ਕਰੋਟਿ-ਪਯਸ੍ਸ ਚ ਹਾਰੀ,

ਮਦਨਯੁਤਾ ਚਤੁਰੋ ਚ ਮਹਤ੍ਥਾ’’ਤਿ.

ਦ੍ਵੇ ਨਗਰਾਨਿ ਹਿ ਯੁਦ੍ਧੇਨ ਗਹੇਤੁਂ ਅਸਕ੍ਕੁਣੇਯ੍ਯਤਾਯ ਅਯੁਜ੍ਝਪੁਰਾਨਿ ਨਾਮ ਜਾਤਾਨਿ ਦੇਵਨਗਰਞ੍ਚ ਅਸੁਰਨਗਰਞ੍ਚ. ਯਦਾ ਹਿ ਅਸੁਰਾ ਬਲਵਨ੍ਤੋ ਹੋਨ੍ਤਿ, ਅਥ ਦੇਵੇਹਿ ਪਲਾਯਿਤ੍ਵਾ ਦੇਵਨਗਰਂ ਪਵਿਸਿਤ੍ਵਾ ਦ੍ਵਾਰੇ ਪਿਦਹਿਤੇ ਅਸੁਰਾਨਂ ਸਤਸਹਸ੍ਸਮ੍ਪਿ ਕਿਞ੍ਚਿ ਕਾਤੁਂ ਨ ਸਕ੍ਕੋਤਿ. ਯਦਾ ਦੇਵਾ ਬਲਵਨ੍ਤੋ ਹੋਨ੍ਤਿ, ਅਥਾਸੁਰੇਹਿ ਪਲਾਯਿਤ੍ਵਾ ਅਸੁਰਨਗਰਸ੍ਸ ਦ੍ਵਾਰੇ ਪਿਦਹਿਤੇ ਸਕ੍ਕਾਨਂ ਸਤਸਹਸ੍ਸਮ੍ਪਿ ਕਿਞ੍ਚਿ ਕਾਤੁਂ ਨ ਸਕ੍ਕੋਤਿ. ਇਤਿ ਇਮਾਨਿ ਦ੍ਵੇ ਨਗਰਾਨਿ ਅਯੁਜ੍ਝਪੁਰਾਨਿ ਨਾਮ. ਨੇਸਂ ਅਨ੍ਤਰਾ ਏਤੇਸੁ ਉਦਕਾਦੀਸੁ ਪਞ੍ਚਸੁ ਠਾਨੇਸੁ ਸਕ੍ਕੇਨ ਆਰਕ੍ਖਾ ਠਪਿਤਾ. ਤਤ੍ਥ ਉਦਕਸਦ੍ਦੇਨ ਨਾਗਾ ਗਹਿਤਾ. ਤੇ ਹਿ ਉਦਕੇ ਬਲਵਨ੍ਤੋ ਹੋਨ੍ਤਿ. ਤਸ੍ਮਾ ਸਿਨੇਰੁਸ੍ਸ ਪਠਮਾਲਿਨ੍ਦੇ ਤੇਸਂ ਆਰਕ੍ਖਾ. ਕਰੋਟਿਸਦ੍ਦੇਨ ਸੁਪਣ੍ਣਾ ਗਹਿਤਾ. ਤੇਸਂ ਕਿਰ ਕਰੋਟਿ ਨਾਮ ਪਾਨਭੋਜਨਂ, ਤੇਨ ਤਂ ਨਾਮਂ ਲਭਿਂਸੁ. ਦੁਤਿਯਾਲਿਨ੍ਦੇ ਤੇਸਂ ਆਰਕ੍ਖਾ. ਪਯਸ੍ਸਹਾਰੀਸਦ੍ਦੇਨ ਕੁਮ੍ਭਣ੍ਡਾ ਗਹਿਤਾ. ਦਾਨਵਰਕ੍ਖਸਾ ਕਿਰ ਤੇ. ਤਤਿਯਾਲਿਨ੍ਦੇ ਤੇਸਂ ਆਰਕ੍ਖਾ. ਮਦਨਯੁਤਸਦ੍ਦੇਨ ਯਕ੍ਖਾ ਗਹਿਤਾ. ਵਿਸਮਚਾਰਿਨੋ ਕਿਰਤੇ ਯੁਜ੍ਝਸੋਣ੍ਡਾ. ਚਤੁਤ੍ਥਾਲਿਨ੍ਦੇ ਤੇਸਂ ਆਰਕ੍ਖਾ. ਚਤੁਰੋ ਚ ਮਹਨ੍ਤਾਤਿ ਚਤ੍ਤਾਰੋ ਮਹਾਰਾਜਾਨੋ ਵੁਤ੍ਤਾ. ਪਞ੍ਚਮਾਲਿਨ੍ਦੇ ਤੇਸਂ ਆਰਕ੍ਖਾ. ਤਸ੍ਮਾ ਯਦਿ ਅਸੁਰਾ ਕੁਪਿਤਾਵਿਲਚਿਤ੍ਤਾ ਦੇਵਪੁਰਂ ਉਪਯਨ੍ਤਿ ਯੁਦ੍ਧੇਸੂ, ਯਂ ਗਿਰਿਨੋ ਪਠਮਂ ਪਰਿਭਣ੍ਡਂ, ਤਂ ਉਰਗਾ ਪਟਿਬਾਹਨ੍ਤਿ ਏਵਂ ਸੇਸੇਸੁ ਸੇਸਾ.

ਤੇ ਪਨ ਅਸੁਰਾ ਆਯੁਵਣ੍ਣਰਸਇਸ੍ਸਰਿਯਸਮ੍ਪਤ੍ਤੀਹਿ ਤਾਵਤਿਂਸਸਦਿਸਾਵ. ਤਸ੍ਮਾ ਅਨ੍ਤਰਾ ਅਤ੍ਤਾਨਂ ਅਜਾਨਿਤ੍ਵਾ ਪਾਟਲਿਯਾ ਪੁਪ੍ਫਿਤਾਯ, ‘‘ਨ ਇਦਂ ਦੇਵਨਗਰਂ, ਤਤ੍ਥ ਪਾਰਿਚ੍ਛਤ੍ਤਕੋ ਪੁਪ੍ਫਤਿ, ਇਧ ਪਨ ਚਿਤ੍ਤਪਾਟਲੀ, ਜਰਸਕ੍ਕੇਨਾਮ੍ਹਾਕਂ ਸੁਰਂ ਪਾਯੇਤ੍ਵਾ ਵਞ੍ਚਿਤਾ, ਦੇਵਨਗਰਞ੍ਚ ਨੋ ਗਹਿਤਂ, ਗਚ੍ਛਾਮ ਤੇਨ ਸਦ੍ਧਿਂ ਯੁਜ੍ਝਿਸ੍ਸਾਮਾ’’ਤਿ ਹਤ੍ਥਿਅਸ੍ਸਰਥੇ ਆਰੁਯ੍ਹ ਸੁਵਣ੍ਣਰਜਤਮਣਿਫਲਕਾਨਿ ਗਹੇਤ੍ਵਾ, ਯੁਦ੍ਧਸਜ੍ਜਾ ਹੁਤ੍ਵਾ, ਅਸੁਰਭੇਰਿਯੋ ਵਾਦੇਨ੍ਤਾ ਮਹਾਸਮੁਦ੍ਦੇ ਉਦਕਂ ਦ੍ਵਿਧਾ ਭੇਤ੍ਵਾ ਉਟ੍ਠਹਨ੍ਤਿ. ਤੇ ਦੇਵੇ ਵੁਟ੍ਠੇ ਵਮ੍ਮਿਕਮਕ੍ਖਿਕਾ ਵਮ੍ਮਿਕਂ ਵਿਯ ਸਿਨੇਰੁਂ ਅਭਿਰੁਹਿਤੁ ਆਰਭਨ੍ਤਿ. ਅਥ ਨੇਸਂ ਪਠਮਂ ਨਾਗੇਹਿ ਸਦ੍ਧਿਂ ਯੁਦ੍ਧਂ ਹੋਤਿ. ਤਸ੍ਮਿਂ ਖੋ ਪਨ ਯੁਦ੍ਧੇ ਨ ਕਸ੍ਸਚਿ ਛਵਿ ਵਾ ਚਮ੍ਮਂ ਵਾ ਛਿਜ੍ਜਤਿ, ਨ ਲੋਹਿਤਂ ਉਪ੍ਪਜ੍ਜਤਿ, ਕੇਵਲਂ ਕੁਮਾਰਕਾਨਂ ਦਾਰੁਮੇਣ੍ਡਕਯੁਦ੍ਧਂ ਵਿਯ ਅਞ੍ਞਮਞ੍ਞਂ ਸਨ੍ਤਾਸਨਮਤ੍ਤਮੇਵ ਹੋਤਿ. ਕੋਟਿਸਤਾਪਿ ਕੋਟਿਸਹਸ੍ਸਾਪਿ ਨਾਗਾ ਤੇਹਿ ਸਦ੍ਧਿਂ ਯੁਜ੍ਝਿਤ੍ਵਾ ਤੇ ਅਸੁਰਪੁਰਂਯੇਵ ਪਵੇਸੇਤ੍ਵਾ ਨਿਵਤ੍ਤਨ੍ਤਿ.

ਯਦਾ ਪਨ ਅਸੁਰਾ ਬਲਵਨ੍ਤੋ ਹੋਨ੍ਤਿ, ਅਥ ਨਾਗਾ ਓਸਕ੍ਕਿਤ੍ਵਾ ਦੁਤਿਯੇ ਆਲਿਨ੍ਦੇ ਸੁਪਣ੍ਣੇਹਿ ਸਦ੍ਧਿਂ ਏਕਤੋਵ ਹੁਤ੍ਵਾ ਯੁਜ੍ਝਨ੍ਤਿ. ਏਸ ਨਯੋ ਸੁਪਣ੍ਣਾਦੀਸੂਪਿ. ਯਦਾ ਪਨ ਤਾਨਿ ਪਞ੍ਚਪਿ ਠਾਨਾਨਿ ਅਸੁਰਾ ਮਦ੍ਦਨ੍ਤਿ, ਤਦਾ ਏਕਤੋ ਸਮ੍ਪਿਣ੍ਡਿਤਾਨਿਪਿ ਪਞ੍ਚ ਬਲਾਨਿ ਓਸਕ੍ਕਨ੍ਤਿ. ਅਥ ਚਤ੍ਤਾਰੋ ਮਹਾਰਾਜਾਨੋ ਗਨ੍ਤ੍ਵਾ ਸਕ੍ਕਸ੍ਸ ਤਂ ਪਵਤ੍ਤਿਂ ਆਰੋਚੇਨ੍ਤਿ. ਸਕ੍ਕੋ ਤੇਸਂ ਵਚਨਂ ਸੁਤ੍ਵਾ ਦਿਯਡ੍ਢਯੋਜਨਸਤਿਕਂ ਵੇਜਯਨ੍ਤਰਥਂ ਆਰੁਯ੍ਹ ਸਯਂ ਵਾ ਨਿਕ੍ਖਮਤਿ, ਏਕਂ ਵਾ ਪੁਤ੍ਤਂ ਪੇਸੇਤਿ. ਇਮਸ੍ਮਿਂ ਪਨ ਕਾਲੇ ਪੁਤ੍ਤਂ ਪੇਸੇਤੁਕਾਮੋ, ਤਾਤ ਸੁਵੀਰਾਤਿਆਦਿਮਾਹ.

ਏਵਂ ਭਦ੍ਦਨ੍ਤਵਾਤਿ ਖੋਤਿ ਏਵਂ ਹੋਤੁ ਭਦ੍ਦਂ ਤਵ ਇਤਿ ਖੋ. ਪਮਾਦਂ ਆਪਾਦੇਸੀਤਿ ਪਮਾਦਂ ਅਕਾਸਿ. ਅਚ੍ਛਰਾਸਙ੍ਘਪਰਿਵੁਤੋ ਸਟ੍ਠਿਯੋਜਨਂ ਵਿਤ੍ਥਾਰੇਨ ਸੁਵਣ੍ਣਮਹਾਵੀਥਿਂ ਓਤਰਿਤ੍ਵਾ ਨਕ੍ਖਤ੍ਤਂ ਕੀਲ਼ਨ੍ਤੋ ਨਨ੍ਦਨਵਨਾਦੀਸੁ ਵਿਚਰਤੀਤਿ ਅਤ੍ਥੋ.

ਅਨੁਟ੍ਠਹਨ੍ਤਿ ਅਨੁਟ੍ਠਹਨ੍ਤੋ. ਅਵਾਯਾਮਨ੍ਤਿ ਅਵਾਯਮਨ੍ਤੋ. ਅਲਸ੍ਵਸ੍ਸਾਤਿ ਅਲਸੋ ਅਸ੍ਸ. ਨ ਚ ਕਿਚ੍ਚਾਨਿ ਕਾਰਯੇਤਿ ਕਿਞ੍ਚਿ ਕਿਚ੍ਚਂ ਨਾਮ ਨ ਕਰੇਯ੍ਯ. ਸਬ੍ਬਕਾਮਸਮਿਦ੍ਧਸ੍ਸਾਤਿ ਸਬ੍ਬਕਾਮੇਹਿ ਸਮਿਦ੍ਧੋ ਅਸ੍ਸ. ਤਂ ਮੇ, ਸਕ੍ਕ, ਵਰਂ ਦਿਸਾਤਿ, ਸਕ੍ਕ ਦੇਵਸੇਟ੍ਠ, ਤਂ ਮੇ ਵਰਂ ਉਤ੍ਤਮਂ ਠਾਨਂ ਓਕਾਸਂ ਦਿਸਂ ਆਚਿਕ੍ਖ ਕਥੇਹੀਤਿ ਵਦਤਿ. ਨਿਬ੍ਬਾਨਸ੍ਸ ਹਿ ਸੋ ਮਗ੍ਗੋਤਿ ਕਮ੍ਮਂ ਅਕਤ੍ਵਾ ਜੀਵਿਤਟ੍ਠਾਨਂ ਨਾਮ ਨਿਬ੍ਬਾਨਸ੍ਸ ਮਗ੍ਗੋ. ਪਠਮਂ.

੨. ਸੁਸੀਮਸੁਤ੍ਤਵਣ੍ਣਨਾ

੨੪੮. ਦੁਤਿਯੇ ਸੁਸੀਮਨ੍ਤਿ ਅਤ੍ਤਨੋ ਪੁਤ੍ਤਸਹਸ੍ਸਸ੍ਸ ਅਨ੍ਤਰੇ ਏਵਂਨਾਮਕਂ ਏਕਂ ਪੁਤ੍ਤਮੇਵ. ਦੁਤਿਯਂ.

੩. ਧਜਗ੍ਗਸੁਤ੍ਤਵਣ੍ਣਨਾ

੨੪੯. ਤਤਿਯੇ ਸਮੁਪਬ੍ਯੂਲ਼੍ਹੋਤਿ ਸਮ੍ਪਿਣ੍ਡਿਤੋ ਰਾਸਿਭੂਤੋ. ਧਜਗ੍ਗਂਉਲ੍ਲੋਕੇਯ੍ਯਥਾਤਿ ਸਕ੍ਕਸ੍ਸ ਕਿਰ ਦਿਯਡ੍ਢਯੋਜਨਸਤਾਯਾਮੋ ਰਥੋ. ਤਸ੍ਸ ਹਿ ਪਚ੍ਛਿਮਨ੍ਤੋ ਪਣ੍ਣਾਸਯੋਜਨੋ, ਮਜ੍ਝੇ ਰਥਪਞ੍ਜਰੋ ਪਣ੍ਣਾਸਯੋਜਨੋ, ਰਥਸਨ੍ਧਿਤੋ ਯਾਵ ਰਥਸੀਸਾ ਪਣ੍ਣਾਸਯੋਜਨਾਨਿ. ਤਦੇਵ ਪਮਾਣਂ ਦਿਗੁਣਂ ਕਤ੍ਵਾ ਤਿਯੋਜਨਸਤਾਯਾਮੋਤਿਪਿ ਵਦਨ੍ਤਿਯੇਵ. ਤਸ੍ਮਿਂ ਯੋਜਨਿਕਪਲ੍ਲਙ੍ਕੋ ਅਤ੍ਥਤੋ, ਤਿਯੋਜਨਿਕਂ ਸੇਤਚ੍ਛਤ੍ਤਂ ਮਤ੍ਥਕੇ ਠਪਿਤਂ, ਏਕਸ੍ਮਿਂਯੇਵ ਯੁਗੇ ਸਹਸ੍ਸਆਜਞ੍ਞਾ ਯੁਤ੍ਤਾ, ਸੇਸਾਲਙ੍ਕਾਰਸ੍ਸ ਪਮਾਣਂ ਨਤ੍ਥਿ. ਧਜੋ ਪਨਸ੍ਸ ਅਡ੍ਢਤਿਯਾਨਿ ਯੋਜਨਸਤਾਨਿ ਉਗ੍ਗਤੋ, ਯਸ੍ਸ ਵਾਤਾਹਤਸ੍ਸ ਪਞ੍ਚਙ੍ਗਿਕਤੂਰਿਯਸ੍ਸੇਵ ਸਦ੍ਦੋ ਨਿਚ੍ਛਰਤਿ, ਤਂ ਉਲ੍ਲੋਕੇਯ੍ਯਾਥਾਤਿ ਵਦਤਿ. ਕਸ੍ਮਾ? ਤਂ ਪਸ੍ਸਨ੍ਤਾਨਞ੍ਹਿ ਰਾਜਾ ਨੋ ਆਗਨ੍ਤ੍ਵਾ ਪਰਿਸਪਰਿਯਨ੍ਤੇ ਨਿਖਾਤਥਮ੍ਭੋ ਵਿਯ ਠਿਤੋ, ਕਸ੍ਸ ਮਯਂ ਭਾਯਾਮਾਤਿ ਭਯਂ ਨ ਹੋਤਿ. ਪਜਾਪਤਿਸ੍ਸਾਤਿ ਸੋ ਕਿਰ ਸਕ੍ਕੇਨ ਸਮਾਨਵਣ੍ਣੋ ਸਮਾਨਾਯੁਕੋ ਦੁਤਿਯਂ ਆਸਨਂ ਲਭਤਿ. ਤਥਾ ਵਰੁਣੋ ਈਸਾਨੋ ਚ. ਵਰੁਣੋ ਪਨ ਤਤਿਯਂ ਆਸਨਂ ਲਭਤਿ, ਈਸਾਨੋ ਚਤੁਤ੍ਥਂ. ਪਲਾਯੀਤਿ ਅਸੁਰੇਹਿ ਪਰਾਜਿਤੋ ਤਸ੍ਮਿਂ ਰਥੇ ਠਿਤੋ ਅਪ੍ਪਮਤ੍ਤਕਮ੍ਪਿ ਰਜਧਜਂ ਦਿਸ੍ਵਾ ਪਲਾਯਨਧਮ੍ਮੋ.

ਇਤਿਪਿ ਸੋ ਭਗਵਾਤਿਆਦੀਨਿ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾਨੇਵ. ਇਦਮਵੋਚਾਤਿ ਇਦਂ ਧਜਗ੍ਗਪਰਿਤ੍ਤਂ ਨਾਮ ਭਗਵਾ ਅਵੋਚ, ਯਸ੍ਸ ਆਣਾਖੇਤ੍ਤੇ ਕੋਟਿਸਤਸਹਸ੍ਸਚਕ੍ਕਵਾਲ਼ੇ ਆਨੁਭਾਵੋ ਵਤ੍ਤਤਿ. ਇਦਂ ਆਵਜ੍ਜੇਤ੍ਵਾ ਹਿ ਯਕ੍ਖਭਯਚੋਰਭਯਾਦੀਹਿ ਦੁਕ੍ਖੇਹਿ ਮੁਤ੍ਤਾਨਂ ਅਨ੍ਤੋ ਨਤ੍ਥਿ. ਤਿਟ੍ਠਤੁ ਅਞ੍ਞਦੁਕ੍ਖਵੂਪਸਮੋ, ਇਦਂ ਆਵਜ੍ਜਮਾਨੋ ਹਿ ਪਸਨ੍ਨਚਿਤ੍ਤੋ ਆਕਾਸੇਪਿ ਪਤਿਟ੍ਠਂ ਲਭਤਿ.

ਤਤ੍ਰਿਦਂ ਵਤ੍ਥੁ – ਦੀਘਵਾਪਿਚੇਤਿਯਮ੍ਹਿ ਕਿਰ ਸੁਧਾਕਮ੍ਮੇ ਕਯਿਰਮਾਨੇ ਏਕੋ ਦਹਰੋ ਮੁਦ੍ਧਵੇਦਿਕਾਪਾਦਤੋ ਪਤਿਤ੍ਵਾ ਚੇਤਿਯਕੁਚ੍ਛਿਯਾ ਭਸ੍ਸਤਿ. ਹੇਟ੍ਠਾ ਠਿਤੋ ਭਿਕ੍ਖੁਸਙ੍ਘੋ ‘‘ਧਜਗ੍ਗਪਰਿਤ੍ਤਂ, ਆਵੁਸੋ, ਆਵਜ੍ਜਾਹੀ’’ਤਿ ਆਹ. ਸੋ ਮਰਣਭਯੇਨ ਤਜ੍ਜਿਤੋ ‘‘ਧਜਗ੍ਗਪਰਿਤ੍ਤਂ ਮਂ ਰਕ੍ਖਤੂ’’ਤਿ ਆਹ. ਤਾਵਦੇਵਸ੍ਸ ਚੇਤਿਯਕੁਚ੍ਛਿਤੋ ਦ੍ਵੇ ਇਟ੍ਠਕਾ ਨਿਕ੍ਖਮਿਤ੍ਵਾ ਸੋਪਾਨਂ ਹੁਤ੍ਵਾ ਅਟ੍ਠਂਸੁ, ਉਪਰਿਟ੍ਠਿਤੋ ਵਲ੍ਲਿਨਿਸ੍ਸੇਣਿਂ ਓਤਾਰੇਸੁਂ. ਤਸ੍ਮਿਂ ਨਿਸ੍ਸੇਣਿਯਂ ਠਿਤੇ ਇਟ੍ਠਕਾ ਯਥਾਟ੍ਠਾਨੇਯੇਵ ਅਟ੍ਠਂਸੁ. ਤਤਿਯਂ.

੪. ਵੇਪਚਿਤ੍ਤਿਸੁਤ੍ਤਵਣ੍ਣਨਾ

੨੫੦. ਚਤੁਤ੍ਥੇ ਵੇਪਚਿਤ੍ਤੀਤਿ ਸੋ ਕਿਰ ਅਸੁਰਾਨਂ ਸਬ੍ਬਜੇਟ੍ਠਕੋ. ਯੇਨਾਤਿ ਨਿਪਾਤਮਤ੍ਤਂ ਨਨ੍ਤਿ ਚ. ਕਣ੍ਠਪਞ੍ਚਮੇਹੀਤਿ ਦ੍ਵੀਸੁ ਹਤ੍ਥੇਸੁ ਪਾਦੇਸੁ ਕਣ੍ਠੇ ਚਾਤਿ ਏਵਂ ਪਞ੍ਚਹਿ ਬਨ੍ਧਨੇਹਿ. ਤਾਨਿ ਪਨ ਨਲ਼ਿਨਸੁਤ੍ਤਂ ਵਿਯ ਮਕ੍ਕਟਕਸੁਤ੍ਤਂ ਵਿਯ ਚ ਚਕ੍ਖੁਸ੍ਸਾਪਾਥਂ ਆਗਚ੍ਛਨ੍ਤਿ, ਇਰਿਯਾਪਥਂ ਰੁਜ੍ਝਨ੍ਤਿ. ਤੇਹਿ ਪਨ ਚਿਤ੍ਤੇਨੇਵ ਬਜ੍ਝਤਿ, ਚਿਤ੍ਤੇਨੇਵ ਮੁਚ੍ਚਤਿ. ਅਕ੍ਕੋਸਤੀਤਿ ਚੋਰੋਸਿ ਬਾਲੋਸਿ ਮੂਲ਼੍ਹੋਸਿ ਥੇਨੋਸਿ ਓਟ੍ਠੋਸਿ ਗੋਣੋਸਿ ਗਦ੍ਰਭੋਸਿ ਨੇਰਯਿਕੋਸਿ ਤਿਰਚ੍ਛਾਨਗਤੋਸਿ, ਨਤ੍ਥਿ ਤੁਯ੍ਹਂ ਸੁਗਤਿ, ਦੁਗ੍ਗਤਿਯੇਵ ਤੁਯ੍ਹਂ ਪਾਟਿਕਙ੍ਖਾਤਿ ਇਮੇਹਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਤਿ. ਪਰਿਭਾਸਤੀਤਿ, ਜਰਸਕ੍ਕ, ਨ ਤ੍ਵਂ ਸਬ੍ਬਕਾਲਂ ਜਿਨਿਸ੍ਸਸਿ, ਯਦਾ ਅਸੁਰਾਨਂ ਜਯੋ ਭਵਿਸ੍ਸਤਿ, ਤਦਾ ਤਮ੍ਪਿ ਏਵਂ ਬਨ੍ਧਿਤ੍ਵਾ ਅਸੁਰਭਵਨਸ੍ਸ ਦ੍ਵਾਰੇ ਨਿਪਜ੍ਜਾਪੇਤ੍ਵਾ ਪੋਥਾਪੇਸ੍ਸਾਮੀਤਿ ਆਦੀਨਿ ਵਤ੍ਵਾ ਤਜ੍ਜੇਤਿ. ਸਕ੍ਕੋ ਵਿਜਿਤਵਿਜਯੋ ਨ ਤਂ ਮਨਸਿ ਕਰੋਤਿ, ਮਹਾਪਟਿਗ੍ਗਹਣਂ ਪਨਸ੍ਸ ਮਤ੍ਥਕੇ ਵਿਧੁਨਨ੍ਤੋ ਸੁਧਮ੍ਮਦੇਵਸਭਂ ਪਵਿਸਤਿ ਚੇਵ ਨਿਕ੍ਖਮਤਿ ਚ. ਅਜ੍ਝਭਾਸੀਤਿ ‘‘ਕਿਂ ਨੁ ਖੋ ਏਸ ਸਕ੍ਕੋ ਇਮਾਨਿ ਫਰੁਸਵਚਨਾਨਿ ਭਯੇਨ ਤਿਤਿਕ੍ਖਤਿ, ਉਦਾਹੁ ਅਧਿਵਾਸਨਖਨ੍ਤਿਯਾ ਸਮਨ੍ਨਾਗਤਤ੍ਤਾ’’ਤਿ? ਵੀਮਂਸਨ੍ਤੋ ਅਭਾਸਿ.

ਦੁਬ੍ਬਲ੍ਯਾ ਨੋਤਿ ਦੁਬ੍ਬਲਭਾਵੇਨ ਨੁ. ਪਟਿਸਂਯੁਜੇਤਿ ਪਟਿਸਂਯੁਜੇਯ੍ਯ ਪਟਿਪ੍ਫਰੇਯ੍ਯ. ਪਭਿਜ੍ਜੇਯ੍ਯੁਨ੍ਤਿ ਵਿਰਜ੍ਜੇਯ੍ਯੁਂ. ਪਕੁਜ੍ਝੇਯ੍ਯੁਨ੍ਤਿਪਿ ਪਾਠੋ. ਪਰਨ੍ਤਿ ਪਚ੍ਚਤ੍ਥਿਕਂ. ਯੋ ਸਤੋ ਉਪਸਮ੍ਮਤੀਤਿ ਯੋ ਸਤਿਮਾ ਹੁਤ੍ਵਾ ਉਪਸਮ੍ਮਤਿ, ਤਸ੍ਸ ਉਪਸਮਂਯੇਵਾਹਂ ਬਾਲਸ੍ਸ ਪਟਿਸੇਧਨਂ ਮਞ੍ਞੇਤਿ ਅਤ੍ਥੋ. ਯਦਾ ਨਂ ਮਞ੍ਞਤੀਤਿ ਯਸ੍ਮਾ ਤਂ ਮਞ੍ਞਤਿ. ਅਜ੍ਝਾਰੁਹਤੀਤਿ ਅਜ੍ਝੋਤ੍ਥਰਤਿ. ਗੋਵ ਭਿਯ੍ਯੋ ਪਲਾਯਿਨਨ੍ਤਿ ਯਥਾ ਗੋਯੁਦ੍ਧੇ ਤਾਵਦੇਵ ਦ੍ਵੇ ਗਾਵੋ ਯੁਜ੍ਝਨ੍ਤੇ ਗੋਗਣੋ ਓਲੋਕੇਨ੍ਤੋ ਤਿਟ੍ਠਤਿ, ਯਦਾ ਪਨ ਏਕੋ ਪਲਾਯਤਿ, ਅਥ ਨਂ ਪਲਾਯਨ੍ਤਂ ਸਬ੍ਬੋ ਗੋਗਣੋ ਭਿਯ੍ਯੋ ਅਜ੍ਝੋਤ੍ਥਰਤਿ. ਏਵਂ ਦੁਮ੍ਮੇਧੋ ਖਮਨ੍ਤਂ ਭਿਯ੍ਯੋ ਅਜ੍ਝੋਤ੍ਥਰਤੀਤਿ ਅਤ੍ਥੋ.

ਸਦਤ੍ਥਪਰਮਾਤਿ ਸਕਤ੍ਥਪਰਮਾ. ਖਨ੍ਤ੍ਯਾ ਭਿਯ੍ਯੋ ਨ ਵਿਜ੍ਜਤੀਤਿ ਤੇਸੁ ਸਕਅਤ੍ਥਪਰਮੇਸੁ ਅਤ੍ਥੇਸੁ ਖਨ੍ਤਿਤੋ ਉਤ੍ਤਰਿਤਰੋ ਅਞ੍ਞੋ ਅਤ੍ਥੋ ਨ ਵਿਜ੍ਜਤਿ. ਤਮਾਹੁ ਪਰਮਂ ਖਨ੍ਤਿਨ੍ਤਿ ਯੋ ਬਲਵਾ ਤਿਤਿਕ੍ਖਤਿ, ਤਸ੍ਸ ਤਂ ਖਨ੍ਤਿਂ ਪਰਮਂ ਆਹੁ. ਬਾਲਬਲਂ ਨਾਮ ਅਞ੍ਞਾਣਬਲਂ. ਤਂ ਯਸ੍ਸ ਬਲਂ, ਅਬਲਮੇਵ ਤਂ ਬਲਨ੍ਤਿ ਆਹੁ ਕਥੇਨ੍ਤੀਤਿ ਦੀਪੇਤਿ. ਧਮ੍ਮਗੁਤ੍ਤਸ੍ਸਾਤਿ ਧਮ੍ਮੇਨ ਰਕ੍ਖਿਤਸ੍ਸ, ਧਮ੍ਮਂ ਵਾ ਰਕ੍ਖਨ੍ਤਸ੍ਸ. ਪਟਿਵਤ੍ਤਾਤਿ ਪਟਿਪ੍ਫਰਿਤ੍ਵਾ ਵਤ੍ਤਾ, ਪਟਿਪ੍ਫਰਿਤ੍ਵਾ ਵਾ ਬਾਲਬਲਨ੍ਤਿ ਵਦੇਯ੍ਯਾਪਿ, ਧਮ੍ਮਟ੍ਠਂ ਪਨ ਚਾਲੇਤੁਂ ਸਮਤ੍ਥੋ ਨਾਮ ਨਤ੍ਥਿ. ਤਸ੍ਸੇਵ ਤੇਨ ਪਾਪਿਯੋਤਿ ਤੇਨ ਕੋਧੇਨ ਤਸ੍ਸੇਵ ਪੁਗ੍ਗਲਸ੍ਸ ਪਾਪਂ. ਕਤਰਸ੍ਸ? ਯੋ ਕੁਦ੍ਧਂ ਪਟਿਕੁਜ੍ਝਤਿ. ਤਿਕਿਚ੍ਛਨ੍ਤਾਨਨ੍ਤਿ ਏਕਵਚਨੇ ਬਹੁਵਚਨਂ, ਤਿਕਿਚ੍ਛਨ੍ਤਨ੍ਤਿ ਅਤ੍ਥੋ. ਜਨਾ ਮਞ੍ਞਨ੍ਤੀਤਿ ਏਵਰੂਪਂ ਅਤ੍ਤਨੋ ਚ ਪਰਸ੍ਸ ਚਾਤਿ ਉਭਿਨ੍ਨਂ ਅਤ੍ਥਂ ਤਿਕਿਚ੍ਛਨ੍ਤਂ ਨਿਪ੍ਫਾਦੇਨ੍ਤਂ ਪੁਗ੍ਗਲਂ ‘‘ਅਨ੍ਧਬਾਲੋ ਅਯ’’ਨ੍ਤਿ ਅਨ੍ਧਬਾਲਪੁਥੁਜ੍ਜਨਾਵ ਏਵਂ ਮਞ੍ਞਨ੍ਤਿ. ਧਮ੍ਮਸ੍ਸ ਅਕੋਵਿਦਾਤਿ ਚਤੁਸਚ੍ਚਧਮ੍ਮੇ ਅਛੇਕਾ. ਇਧਾਤਿ ਇਮਸ੍ਮਿਂ ਸਾਸਨੇ. ਖੋਤਿ ਨਿਪਾਤਮਤ੍ਤਂ. ਚਤੁਤ੍ਥਂ.

੫. ਸੁਭਾਸਿਤਜਯਸੁਤ੍ਤਵਣ੍ਣਨਾ

੨੫੧. ਪਞ੍ਚਮੇ ਅਸੁਰਿਨ੍ਦਂ ਏਤਦਵੋਚਾਤਿ ਛੇਕਤਾਯ ਏਤਂ ਅਵੋਚ. ਏਵਂ ਕਿਰਸ੍ਸ ਅਹੋਸਿ ‘‘ਪਰਸ੍ਸ ਨਾਮ ਗਾਹਂ ਮੋਚੇਤ੍ਵਾ ਪਠਮਂ ਵਤ੍ਤੁਂ ਗਰੁ. ਪਰਸ੍ਸ ਵਚਨਂ ਅਨੁਗਨ੍ਤ੍ਵਾ ਪਨ ਪਚ੍ਛਾ ਸੁਖਂ ਵਤ੍ਤੁ’’ਨ੍ਤਿ. ਪੁਬ੍ਬਦੇਵਾਤਿ ਦੇਵਲੋਕੇ ਚਿਰਨਿਵਾਸਿਨੋ ਪੁਬ੍ਬਸਾਮਿਕਾ, ਤੁਮ੍ਹਾਕਂ ਤਾਵ ਪਵੇਣਿਆਗਤਂ ਭਣਥਾਤਿ. ਅਦਣ੍ਡਾਵਚਰਾਤਿ ਦਣ੍ਡਾਵਚਰਣਰਹਿਤਾ, ਦਣ੍ਡਂ ਵਾ ਸਤ੍ਥਂ ਵਾ ਗਹੇਤਬ੍ਬਨ੍ਤਿ ਏਵਮੇਤ੍ਥ ਨਤ੍ਥੀਤਿ ਅਤ੍ਥੋ. ਪਞ੍ਚਮਂ.

੬. ਕੁਲਾਵਕਸੁਤ੍ਤਵਣ੍ਣਨਾ

੨੫੨. ਛਟ੍ਠੇ ਅਜ੍ਝਭਾਸੀਤਿ ਤਸ੍ਸ ਕਿਰ ਸਿਮ੍ਬਲਿਵਨਾਭਿਮੁਖਸ੍ਸ ਜਾਤਸ੍ਸ ਰਥਸਦ੍ਦੋ ਚ ਆਜਾਨੀਯਸਦ੍ਦੋ ਧਜਸਦ੍ਦੋ ਚ ਸਮਨ੍ਤਾ ਅਸਨਿਪਾਤਸਦ੍ਦੋ ਵਿਯ ਅਹੋਸਿ. ਤਂ ਸੁਤ੍ਵਾ ਸਿਮ੍ਬਲਿਵਨੇ ਬਲਵਸੁਪਣ੍ਣਾ ਪਲਾਯਿਂਸੁ, ਜਰਾਜਿਣ੍ਣਾ ਚੇਵ ਰੋਗਦੁਬ੍ਬਲਾ ਚ ਅਸਞ੍ਜਾਤਪਕ੍ਖਪੋਤਕਾ ਚ ਪਲਾਯਿਤੁਂ ਅਸਕ੍ਕੋਨ੍ਤਾ, ਮਰਣਭਯੇਨ ਤਜ੍ਜਿਤਾ ਏਕਪ੍ਪਹਾਰੇਨੇਵ ਮਹਾਵਿਰਵਂ ਵਿਰਵਿਂਸੁ. ਸਕ੍ਕੋ ਤਂ ਸੁਤ੍ਵਾ ‘‘ਕਸ੍ਸ ਸਦ੍ਦੋ, ਤਾਤਾ’’ਤਿ? ਮਾਤਲਿਂ ਪੁਚ੍ਛਿ. ਰਥਸਦ੍ਦਂ, ਤੇ ਦੇਵ, ਸੁਤ੍ਵਾ ਸੁਪਣ੍ਣਾ ਪਲਾਯਿਤੁਂ ਅਸਕ੍ਕੋਨ੍ਤਾ ਵਿਰਵਨ੍ਤੀਤਿ. ਤਂ ਸੁਤ੍ਵਾ ਕਰੁਣਾਸਮਾਵਜ੍ਜਿਤਹਦਯੋ ਅਭਾਸਿ. ਈਸਾਮੁਖੇਨਾਤਿ ਰਥਸ੍ਸ ਈਸਾਮੁਖੇਨ. ਯਥਾ ਕੁਲਾਵਕੇ ਈਸਾਮੁਖਂ ਨ ਸਞ੍ਚੁਣ੍ਣੇਤਿ, ਏਵਂ ਇਮਿਨਾ ਈਸਾਮੁਖੇਨ ਤੇ ਪਰਿਵਜ੍ਜਯ. ਸੋ ਹਿ ਰਥੋ ਪੁਞ੍ਞਪਚ੍ਚਯਨਿਬ੍ਬਤ੍ਤੋ ਚਕ੍ਕਵਾਲ਼ਪਬ੍ਬਤੇਪਿ ਸਿਨੇਰੁਮ੍ਹਿਪਿ ਸਮ੍ਮੁਖੀਭੂਤੇ ਵਿਨਿਵਿਜ੍ਝਿਤ੍ਵਾਵ ਗਚ੍ਛਤਿ ਨ ਸਜ੍ਜਤਿ, ਆਕਾਸਗਤਸਦਿਸੇਨੇਵ ਗਚ੍ਛਤਿ. ਸਚੇ ਤੇਨ ਸਿਮ੍ਬਲਿਵਨੇਨ ਗਤੋ ਭਵੇਯ੍ਯ, ਯਥਾ ਮਹਾਸਕਟੇ ਕਦਲਿਵਨਮਜ੍ਝੇਨ ਵਾ ਏਰਣ੍ਡਵਨਮਜ੍ਝੇਨ ਵਾ ਗਚ੍ਛਨ੍ਤੇ ਸਬ੍ਬਵਨਂ ਵਿਭਗ੍ਗਂ ਨਿਮ੍ਮਥਿਤਂ ਹੋਤਿ, ਏਵਂ ਤਮ੍ਪਿ ਸਿਮ੍ਬਲਿਵਨਂ ਭਵੇਯ੍ਯ. ਛਟ੍ਠਂ.

੭. ਨਦੁਬ੍ਭਿਯਸੁਤ੍ਤਵਣ੍ਣਨਾ

੨੫੩. ਸਤ੍ਤਮੇ ਉਪਸਙ੍ਕਮੀਤਿ ‘‘ਅਯਂ ਸਕ੍ਕੋ ‘ਯੋਪਿ ਮੇ ਅਸ੍ਸ ਸੁਪਚ੍ਚਤ੍ਥਿਕੋ, ਤਸ੍ਸ ਪਾਹਂ ਨ ਦੁਬ੍ਭੇਯ੍ਯ’ਨ੍ਤਿ ਚਿਨ੍ਤੇਤਿ, ਮਯਾ ਤਸ੍ਸ ਪਚ੍ਚਤ੍ਥਿਕਤਰੋ ਨਾਮ ਨਤ੍ਥਿ, ਵੀਮਂਸਿਸ੍ਸਾਮਿ ਤਾਵ ਨਂ, ਕਿਂ ਨੁ ਖੋ ਮਂ ਪਸ੍ਸਿਤ੍ਵਾ ਦੁਬ੍ਭਤਿ, ਨ ਦੁਬ੍ਭਤੀ’’ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿ. ਤਿਟ੍ਠ ਵੇਪਚਿਤ੍ਤਿ ਗਹਿਤੋਸੀਤਿ ਵੇਪਚਿਤ੍ਤਿ, ਏਤ੍ਥੇਵ ਤਿਟ੍ਠ, ਗਹਿਤੋ ਤ੍ਵਂ ਮਯਾਤਿ ਵਦਤਿ. ਸਹ ਵਚਨੇਨੇਵਸ੍ਸ ਸੋ ਕਣ੍ਠਪਞ੍ਚਮੇਹਿ ਬਨ੍ਧਨੇਹਿ ਬਦ੍ਧੋਵ ਅਹੋਸਿ. ਸਪਸ੍ਸੁ ਚ ਮੇਤਿ ਮਯਿ ਅਦੁਬ੍ਭਤ੍ਥਾਯ ਸਪਥਂ ਕਰੋਹੀਤਿ ਵਦਤਿ. ਯਂ ਮੁਸਾਭਣਤੋ ਪਾਪਨ੍ਤਿ ਇਮਸ੍ਮਿਂ ਕਪ੍ਪੇ ਪਠਮਕਪ੍ਪਿਕੇਸੁ ਚੇਤਿਯਰਞ੍ਞੋ ਪਾਪਂ ਸਨ੍ਧਾਯਾਹ. ਅਰਿਯੂਪਵਾਦਿਨੋਤਿ ਕੋਕਲਿਕਸ੍ਸ ਵਿਯ ਪਾਪਂ. ਮਿਤ੍ਤਦ੍ਦੁਨੋ ਚ ਯਂ ਪਾਪਨ੍ਤਿ ਮਹਾਕਪਿਜਾਤਕੇ ਮਹਾਸਤ੍ਤੇ ਦੁਟ੍ਠਚਿਤ੍ਤਸ੍ਸ ਪਾਪਂ. ਅਕਤਞ੍ਞੁਨੋਤਿ ਦੇਵਦਤ੍ਤਸਦਿਸਸ੍ਸ ਅਕਤਞ੍ਞੁਨੋ ਪਾਪਂ. ਇਮਾਨਿ ਕਿਰ ਇਮਸ੍ਮਿਂ ਕਪ੍ਪੇ ਚਤ੍ਤਾਰਿ ਮਹਾਪਾਪਾਨਿ. ਸਤ੍ਤਮਂ.

੮. ਵੇਰੋਚਨਅਸੁਰਿਨ੍ਦਸੁਤ੍ਤਵਣ੍ਣਨਾ

੨੫੪. ਅਟ੍ਠਮੇ ਅਟ੍ਠਂਸੂਤਿ ਦ੍ਵਾਰਪਾਲਰੂਪਕਾਨਿ ਵਿਯ ਠਿਤਾ. ਨਿਪ੍ਫਦਾਤਿ ਨਿਪ੍ਫਤ੍ਤਿ, ਯਾਵ ਅਤ੍ਥੋ ਨਿਪ੍ਫਜ੍ਜਤਿ, ਤਾਵ ਵਾਯਮੇਥੇਵਾਤਿ ਵਦਤਿ. ਦੁਤਿਯਗਾਥਾ ਸਕ੍ਕਸ੍ਸ. ਤਤ੍ਥ ਖਨ੍ਤ੍ਯਾ ਭਿਯ੍ਯੋਤਿ ਨਿਪ੍ਫਨ੍ਨਸੋਭਨੇਸੁ ਅਤ੍ਥੇਸੁ ਖਨ੍ਤਿਤੋ ਉਤ੍ਤਰਿਤਰੋ ਅਤ੍ਥੋ ਨਾਮ ਨਤ੍ਥਿ. ਅਤ੍ਥਜਾਤਾਤਿ ਕਿਚ੍ਚਜਾਤਾ. ਸੋਣਸਿਙ੍ਗਾਲਾਦਯੋਪਿ ਹਿ ਉਪਾਦਾਯ ਅਕਿਚ੍ਚਜਾਤੋ ਸਤ੍ਤੋ ਨਾਮ ਨਤ੍ਥਿ. ਇਤੋ ਏਤ੍ਤੋ ਗਮਨਮਤ੍ਤਮ੍ਪਿ ਕਿਚ੍ਚਮੇਵ ਹੋਤਿ. ਸਂਯੋਗਪਰਮਾ ਤ੍ਵੇਵ, ਸਮ੍ਭੋਗਾ ਸਬ੍ਬਪਾਣਿਨਨ੍ਤਿ ਪਾਰਿਵਾਸਿਕਓਦਨਾਦੀਨਿ ਹਿ ਅਸਮ੍ਭੋਗਾਰਹਾਨਿ ਹੋਨ੍ਤਿ, ਤਾਨਿ ਪੁਨ ਉਣ੍ਹਾਪੇਤ੍ਵਾ ਭਜ੍ਜਿਤ੍ਵਾ ਸਪ੍ਪਿਮਧੁਫਾਣਿਤਾਦੀਹਿ ਸਂਯੋਜਿਤਾਨਿ ਸਮ੍ਭੋਗਾਰਹਾਨਿ ਹੋਨ੍ਤਿ. ਤੇਨਾਹ ‘‘ਸਂਯੋਗਪਰਮਾ ਤ੍ਵੇਵ, ਸਮ੍ਭੋਗਾ ਸਬ੍ਬਪਾਣਿਨ’’ਨ੍ਤਿ. ਨਿਪ੍ਫਨ੍ਨਸੋਭਨੋ ਅਤ੍ਥੋਤਿ ਇਮੇ ਅਤ੍ਥਾ ਨਾਮ ਨਿਪ੍ਫਨ੍ਨਾਵ ਸੋਭਨ੍ਤਿ. ਪੁਨ ਚਤੁਤ੍ਥਗਾਥਾ ਸਕ੍ਕਸ੍ਸ. ਤਤ੍ਥਾਪਿ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਅਟ੍ਠਮਂ.

੯. ਅਰਞ੍ਞਾਯਤਨਇਸਿਸੁਤ੍ਤਵਣ੍ਣਨਾ

੨੫੫. ਨਵਮੇ ਪਣ੍ਣਕੁਟੀਸੁ ਸਮ੍ਮਨ੍ਤੀਤਿ ਹਿਮਵਨ੍ਤਪਦੇਸੇ ਰਮਣੀਯੇ ਅਰਞ੍ਞਾਯਤਨੇ ਰਤ੍ਤਿਟ੍ਠਾਨਦਿਵਾਟ੍ਠਾਨਚਙ੍ਕਮਨਾਦੀਹਿ ਸਮ੍ਪਨ੍ਨਾਸੁ ਪਣ੍ਣਸਾਲਾਸੁ ਵਸਨ੍ਤਿ. ਸਕ੍ਕੋ ਚ ਦੇਵਾਨਮਿਨ੍ਦੋ ਵੇਪਚਿਤ੍ਤਿ ਚਾਤਿ ਇਮੇ ਦ੍ਵੇ ਜਨਾ ਜਾਮਾਤਿਕਸਸੁਰਾ ਕਾਲੇਨ ਕਲਹਂ ਕਰੋਨ੍ਤਿ, ਕਾਲੇਨ ਏਕਤੋ ਚਰਨ੍ਤਿ, ਇਮਸ੍ਮਿਂ ਪਨ ਕਾਲੇ ਏਕਤੋ ਚਰਨ੍ਤਿ. ਪਟਲਿਯੋਤਿ ਗਣਙ੍ਗਣੂਪਾਹਨਾ. ਖਗ੍ਗਂ ਓਲਗ੍ਗੇਤ੍ਵਾਤਿ ਖਗ੍ਗਂ ਅਂਸੇ ਓਲਗ੍ਗੇਤ੍ਵਾ. ਛਤ੍ਤੇਨਾਤਿ ਦਿਬ੍ਬਸੇਤਚ੍ਛਤ੍ਤੇਨ ਮਤ੍ਥਕੇ ਧਾਰਯਮਾਨੇਨ. ਅਪਬ੍ਯਾਮਤੋ ਕਰਿਤ੍ਵਾਤਿ ਬ੍ਯਾਮਤੋ ਅਕਤ੍ਵਾ. ਚਿਰਦਿਕ੍ਖਿਤਾਨਨ੍ਤਿ ਚਿਰਸਮਾਦਿਣ੍ਣਵਤਾਨਂ. ਇਤੋ ਪਟਿਕ੍ਕਮ੍ਮਾਤਿ ‘‘ਇਤੋ ਪਕ੍ਕਮ ਪਰਿਵਜ੍ਜਯ, ਮਾ ਉਪਰਿਵਾਤੇ ਤਿਟ੍ਠਾ’’ਤਿ ਵਦਨ੍ਤਿ. ਨ ਹੇਤ੍ਥ ਦੇਵਾਤਿ ਏਤਸ੍ਮਿਂ ਸੀਲਵਨ੍ਤਾਨਂ ਗਨ੍ਧੇ ਦੇਵਾ ਨ ਪਟਿਕ੍ਕੂਲਸਞ੍ਞਿਨੋ, ਇਟ੍ਠਕਨ੍ਤਮਨਾਪਸਞ੍ਞਿਨੋਯੇਵਾਤਿ ਦੀਪੇਤਿ. ਨਵਮਂ.

੧੦. ਸਮੁਦ੍ਦਕਸੁਤ੍ਤਵਣ੍ਣਨਾ

੨੫੬. ਦਸਮੇ ਸਮੁਦ੍ਦਤੀਰੇ ਪਣ੍ਣਕੁਟੀਸੂਤਿ ਚਕ੍ਕਵਾਲ਼ਮਹਾਸਮੁਦ੍ਦਪਿਟ੍ਠਿਯਂ ਰਜਤਪਟ੍ਟਵਣ੍ਣੇ ਵਾਲੁਕਪੁਲ਼ਿਨੇ ਵੁਤ੍ਤਪ੍ਪਕਾਰਾਸੁ ਪਣ੍ਣਸਾਲਾਸੁ ਵਸਨ੍ਤਿ. ਸਿਯਾਪਿ ਨੋਤਿ ਸਿਯਾਪਿ ਅਮ੍ਹਾਕਂ. ਅਭਯਦਕ੍ਖਿਣਂ ਯਾਚੇਯ੍ਯਾਮਾਤਿ ਅਭਯਦਾਨਂ ਯਾਚੇਯ੍ਯਾਮ. ਯੇਭੁਯ੍ਯੇਨ ਕਿਰ ਦੇਵਾਸੁਰਸਙ੍ਗਾਮੋ ਮਹਾਸਮੁਦ੍ਦਪਿਟ੍ਠੇ ਹੋਤਿ. ਅਸੁਰਾਨਂ ਨ ਸਬ੍ਬਕਾਲਂ ਜਯੋ ਹੋਤਿ, ਬਹੁਵਾਰੇ ਪਰਾਜਯੋਵ ਹੋਤਿ. ਤੇ ਦੇਵੇਹਿ ਪਰਾਜਿਤਾ ਪਲਾਯਨ੍ਤਾ ਇਸੀਨਂ ਅਸ੍ਸਮਪਦੇਨ ਗਚ੍ਛਨ੍ਤਾ ‘‘ਸਕ੍ਕੋ ਇਮੇਹਿ ਸਦ੍ਧਿਂ ਮਨ੍ਤੇਤ੍ਵਾ ਅਮ੍ਹੇ ਨਾਸੇਤਿ, ਗਣ੍ਹਥ ਪੁਤ੍ਤਹਤਾਯ ਪੁਤ੍ਤੇ’’ਤਿ ਕੁਪਿਤਾ ਅਸ੍ਸਮਪਦੇ ਪਾਨੀਯਘਟਚਙ੍ਕਮਨਸਾਲਾਦੀਨਿ ਵਿਦ੍ਧਂਸੇਨ੍ਤਿ. ਇਸਯੋ ਅਰਞ੍ਞਤੋ ਫਲਾਫਲਂ ਆਦਾਯ ਆਗਤਾ ਨਂ ਦਿਸ੍ਵਾ ਪੁਨ ਦੁਕ੍ਖੇਨ ਪਟਿਪਾਕਤਿਕਂ ਕਰੋਨ੍ਤਿ. ਤੇਪਿ ਪੁਨਪ੍ਪੁਨਂ ਤਥੇਵ ਵਿਨਾਸੇਨ੍ਤਿ. ਤਸ੍ਮਾ ‘‘ਇਦਾਨਿ ਤੇਸਂ ਸਙ੍ਗਾਮੋ ਪਚ੍ਚੁਪਟ੍ਠਿਤੋ’’ਤਿ ਸੁਤ੍ਵਾ ਏਵਂ ਚਿਨ੍ਤਯਿਂਸੁ.

ਕਾਮਂਕਰੋਤਿ ਇਚ੍ਛਿਤਕਰੋ. ਭਯਸ੍ਸ ਅਭਯਸ੍ਸ ਵਾਤਿ ਭਯਂ ਵਾ ਅਭਯਂ ਵਾ. ਇਦਂ ਵੁਤ੍ਤਂ ਹੋਤਿ – ਸਚੇ ਤ੍ਵਂ ਅਭਯਂ ਦਾਤੁਕਾਮੋ, ਅਭਯਂ ਦਾਤੁਂ ਪਹੋਸਿ. ਸਚੇ ਭਯਂ ਦਾਤੁਕਾਮੋ. ਭਯਂ ਦਾਤੁਂ ਪਹੋਸਿ. ਅਮ੍ਹਾਕਂ ਪਨ ਅਭਯਦਾਨਂ ਦੇਹੀਤਿ. ਦੁਟ੍ਠਾਨਨ੍ਤਿ ਵਿਰੁਦ੍ਧਾਨਂ. ਪਵੁਤ੍ਤਨ੍ਤਿ ਖੇਤ੍ਤੇ ਪਤਿਟ੍ਠਾਪਿਤਂ.

ਤਿਕ੍ਖਤ੍ਤੁਂ ਉਬ੍ਬਿਜ੍ਜੀਤਿ ਸਾਯਮਾਸਭਤ੍ਤਂ ਭੁਞ੍ਜਿਤ੍ਵਾ ਸਯਨਂ ਅਭਿਰੁਯ੍ਹ ਨਿਪਨ੍ਨੋ ਨਿਦ੍ਦਾਯ ਓਕ੍ਕਨ੍ਤਮਤ੍ਤਾਯ ਸਮਨ੍ਤਾ ਠਤ੍ਵਾ ਸਤ੍ਤਿਸਤੇਨ ਪਹਟੋ ਵਿਯ ਵਿਰਵਨ੍ਤੋ ਉਟ੍ਠਹਤਿ, ਦਸਯੋਜਨਸਹਸ੍ਸਂ ਅਸੁਰਭਵਨਂ ‘‘ਕਿਮਿਦ’’ਨ੍ਤਿ ਸਙ੍ਖੋਭਂ ਆਪਜ੍ਜਤਿ. ਅਥ ਨਂ ਆਗਨ੍ਤ੍ਵਾ ‘‘ਕਿਮਿਦ’’ਨ੍ਤਿ ਪੁਚ੍ਛਨ੍ਤਿ. ਸੋ ‘‘ਨ ਕਿਞ੍ਚੀ’’ਤਿ ਵਦਤਿ. ਦੁਤਿਯਯਾਮਾਦੀਸੁਪਿ ਏਸੇਵ ਨਯੋ. ਇਤਿ ਅਸੁਰਾਨਂ ‘‘ਮਾ ਭਾਯਿ, ਮਹਾਰਾਜਾ’’ਤਿ ਤਂ ਅਸ੍ਸਾਸੇਨ੍ਤਾਨਂਯੇਵ ਅਰੁਣਂ ਉਗ੍ਗਚ੍ਛਤਿ. ਏਵਮਸ੍ਸ ਤਤੋ ਪਟ੍ਠਾਯ ਗੇਲਞ੍ਞਜਾਤਂ ਚਿਤ੍ਤਂ ਵੇਪਤਿ. ਤੇਨੇਵ ਚਸ੍ਸ ‘‘ਵੇਪਚਿਤ੍ਤੀ’’ਤਿ ਅਪਰਂ ਨਾਮਂ ਉਦਪਾਦੀਤਿ. ਦਸਮਂ.

ਪਠਮੋ ਵਗ੍ਗੋ.

੨. ਦੁਤਿਯਵਗ੍ਗੋ

੧. ਵਤਪਦਸੁਤ੍ਤਵਣ੍ਣਨਾ

੨੫੭. ਦੁਤਿਯਵਗ੍ਗਸ੍ਸ ਪਠਮੇ ਵਤਪਦਾਨੀਤਿ ਵਤਕੋਟ੍ਠਾਸਾਨਿ. ਸਮਤ੍ਤਾਨੀਤਿ ਪਰਿਪੁਣ੍ਣਾਨਿ. ਸਮਾਦਿਨ੍ਨਾਨੀਤਿ ਗਹਿਤਾਨਿ. ਕੁਲੇ ਜੇਟ੍ਠਾਪਚਾਯੀਤਿ ਕੁਲਜੇਟ੍ਠਕਾਨਂ ਮਹਾਪਿਤਾ ਮਹਾਮਾਤਾ ਚੂਲ਼ਪਿਤਾ ਚੂਲ਼ਮਾਤਾ ਮਾਤੁਲੋ ਮਾਤੁਲਾਨੀਤਿਆਦੀਨਂ ਅਪਚਿਤਿਕਾਰਕੋ. ਸਣ੍ਹਵਾਚੋਤਿ ਪਿਯਮੁਦੁਮਧੁਰਵਾਚੋ. ਮੁਤ੍ਤਚਾਗੋਤਿ ਵਿਸ੍ਸਟ੍ਠਚਾਗੋ. ਪਯਤਪਾਣੀਤਿ ਦੇਯ੍ਯਧਮ੍ਮਦਾਨਤ੍ਥਾਯ ਸਦਾ ਧੋਤਹਤ੍ਥੋ. ਵੋਸ੍ਸਗ੍ਗਰਤੋਤਿ ਵੋਸ੍ਸਜ੍ਜਨੇ ਰਤੋ. ਯਾਚਯੋਗੋਤਿ ਪਰੇਹਿ ਯਾਚਿਤਬ੍ਬਾਰਹੋ, ਯਾਚਯੋਗੋਤਿ ਵਾ ਯਾਚਯੋਗੇਨੇਵ ਯੁਤ੍ਤੋ. ਦਾਨਸਂਵਿਭਾਗਰਤੋਤਿ ਦਾਨੇ ਚ ਸਂਵਿਭਾਗੇ ਚ ਰਤੋ. ਪਠਮਂ.

੨. ਸਕ੍ਕਨਾਮਸੁਤ੍ਤਵਣ੍ਣਨਾ

੨੫੮. ਦੁਤਿਯੇ ਮਨੁਸ੍ਸਭੂਤੋਤਿ ਮਗਧਰਟ੍ਠੇ ਮਚਲਗਾਮੇ ਮਨੁਸ੍ਸਭੂਤੋ. ਆਵਸਥਂ ਅਦਾਸੀਤਿ ਚਤੁਮਹਾਪਥੇ ਮਹਾਜਨਸ੍ਸ ਆਵਸਥਂ ਕਾਰੇਤ੍ਵਾ ਅਦਾਸਿ. ਸਹਸ੍ਸਮ੍ਪਿ ਅਤ੍ਥਾਨਨ੍ਤਿ ਸਹਸ੍ਸਮ੍ਪਿ ਕਾਰਣਾਨਂ, ਜਨਸਹਸ੍ਸੇਨ ਵਾ ਵਚਨਸਹਸ੍ਸੇਨ ਵਾ ਓਸਾਰਿਤੇ ‘‘ਅਯਂ ਇਮਸ੍ਸ ਅਤ੍ਥੋ, ਅਯਂ ਇਮਸ੍ਸ ਅਤ੍ਥੋ’’ਤਿ ਏਕਪਦੇ ਠਿਤੋਵ ਵਿਨਿਚ੍ਛਿਨਤਿ. ਦੁਤਿਯਂ.

੩. ਮਹਾਲਿਸੁਤ੍ਤਵਣ੍ਣਨਾ

੨੫੯. ਤਤਿਯੇ ਉਪਸਙ੍ਕਮੀਤਿ ‘‘ਸਕ੍ਕੋ ਦੇਵਰਾਜਾਤਿ ਕਥੇਨ੍ਤਿ, ਅਤ੍ਥਿ ਨੁ ਖੋ ਸੋ ਸਕ੍ਕੋ, ਯੇਨ ਸੋ ਦਿਟ੍ਠਪੁਬ੍ਬੋਤਿ ਇਮਮਤ੍ਥਂ ਦਸਬਲਂ ਪੁਚ੍ਛਿਸ੍ਸਾਮੀ’’ਤਿ ਉਪਸਙ੍ਕਮਿ. ਤਞ੍ਚ ਪਜਾਨਾਮੀਤਿ ਬਹੁਵਚਨੇ ਏਕਵਚਨਂ, ਤੇ ਚ ਧਮ੍ਮੇ ਪਜਾਨਾਮੀਤਿ ਅਤ੍ਥੋ. ਸਕ੍ਕੋ ਕਿਰ ਅਨਨ੍ਤਰੇ ਅਤ੍ਤਭਾਵੇ ਮਗਧਰਟ੍ਠੇ ਮਚਲਗਾਮੇ ਮਘੋ ਨਾਮ ਮਾਣਵੋ ਅਹੋਸਿ ਪਣ੍ਡਿਤੋ ਬ੍ਯਤ੍ਤੋ, ਬੋਧਿਸਤ੍ਤਚਰਿਯਾ ਵਿਯ ਚ ਤਸ੍ਸ ਚਰਿਯਾ ਅਹੋਸਿ. ਸੋ ਤੇਤ੍ਤਿਂਸ ਪੁਰਿਸੇ ਗਹੇਤ੍ਵਾ ਕਲ੍ਯਾਣਮਕਾਸਿ. ਏਕਦਿਵਸਂ ਅਤ੍ਤਨੋਵ ਪਞ੍ਞਾਯ ਉਪਪਰਿਕ੍ਖਿਤ੍ਵਾ ਗਾਮਮਜ੍ਝੇ ਮਹਾਜਨਸ੍ਸ ਸਨ੍ਨਿਪਤਿਤਟ੍ਠਾਨੇ ਕਚਵਰਂ ਉਭਤੋਪਸ੍ਸੇਸੁ ਅਪਬ੍ਯੂਹਿਤ੍ਵਾ ਤਂ ਠਾਨਂ ਰਮਣੀਯਂ ਅਕਾਸਿ. ਪੁਨ ਤਤ੍ਥੇਵ ਮਣ੍ਡਪਂ ਕਾਰੇਸਿ. ਪੁਨ ਗਚ੍ਛਨ੍ਤੇ ਕਾਲੇ ਸਾਲਂ ਕਾਰੇਸਿ. ਗਾਮਤੋ ਚ ਨਿਕ੍ਖਮਿਤ੍ਵਾ ਗਾਵੁਤਮ੍ਪਿ ਅਡ੍ਢਯੋਜਨਮ੍ਪਿ ਤਿਗਾਵੁਤਮ੍ਪਿ ਯੋਜਨਮ੍ਪਿ ਵਿਚਰਿਤ੍ਵਾ ਤੇਹਿ ਸਹਾਯੇਹਿ ਸਦ੍ਧਿਂ ਵਿਸਮਂ ਸਮਂ ਅਕਾਸਿ. ਤੇ ਸਬ੍ਬੇਵ ਏਕਚ੍ਛਨ੍ਦਾ ਤਤ੍ਥ ਤਤ੍ਥ ਸੇਤੁਯੁਤ੍ਤਟ੍ਠਾਨੇ ਸੇਤੁਂ, ਮਣ੍ਡਪਸਾਲਾਪੋਕ੍ਖਰਣਿਮਾਲਾਵਚ੍ਛਰੋਪਨਪਦੀਨਂ ਯੁਤ੍ਤਟ੍ਠਾਨੇਸੁ ਮਣ੍ਡਪਸਾਲਾਪੋਕ੍ਖਰਣਿਮਾਲਾਵਚ੍ਛਰੋਪਨਾਦੀਨਿ ਕਰੋਨ੍ਤਾ ਬਹੁਂ ਪੁਞ੍ਞਮਕਂਸੁ. ਮਘੋ ਸਤ੍ਤ ਵਤਪਦਾਨਿ ਪੂਰੇਤ੍ਵਾ ਕਾਯਸ੍ਸ ਭੇਦਾ ਸਦ੍ਧਿਂ ਸਹਾਯੇਹਿ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਤਂ ਸਬ੍ਬਂ ਭਗਵਾ ਜਾਨਾਤਿ. ਤੇਨਾਹ – ਯੇਸਂ ਧਮ੍ਮਾਨਂ ਸਮਾਦਿਨ੍ਨਤ੍ਤਾ ਸਕ੍ਕੋ ਸਕ੍ਕਤ੍ਤਂ ਅਜ੍ਝਗਾ, ਤਞ੍ਚ ਪਜਾਨਾਮੀਤਿ. ਅਯਂ ਸਕ੍ਕਸ੍ਸ ਸਕ੍ਕਤ੍ਤਾਧਿਗਮੇ ਸਙ੍ਖੇਪਕਥਾ, ਵਿਤ੍ਥਾਰੋ ਪਨ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ ਸਕ੍ਕਪਣ੍ਹਵਣ੍ਣਨਾਯਂ ਵੁਤ੍ਤੋ. ਤਤਿਯਂ.

੪. ਦਲਿਦ੍ਦਸੁਤ੍ਤਵਣ੍ਣਨਾ

੨੬੦. ਚਤੁਤ੍ਥੇ ਮਨੁਸ੍ਸਦਲਿਦ੍ਦੋਤਿ ਮਨੁਸ੍ਸਅਧਨੋ. ਮਨੁਸ੍ਸਕਪਣੋਤਿ ਮਨੁਸ੍ਸਕਾਰੁਞ੍ਞਤਂ ਪਤ੍ਤੋ. ਮਨੁਸ੍ਸਵਰਾਕੋਤਿ ਮਨੁਸ੍ਸਲਾਮਕੋ. ਤਤ੍ਰਾਤਿ ਤਸ੍ਮਿਂ ਠਾਨੇ, ਤਸ੍ਮਿਂ ਵਾ ਅਤਿਰੋਚਨੇ. ਉਜ੍ਝਾਯਨ੍ਤੀਤਿ ਅਵਜ੍ਝਾਯਨ੍ਤਿ ਲਾਮਕਤੋ ਚਿਨ੍ਤੇਨ੍ਤਿ. ਖਿਯਨ੍ਤੀਤਿ ਕਥੇਨ੍ਤਿ ਪਕਾਸੇਨ੍ਤਿ. ਵਿਪਾਚੇਨ੍ਤੀਤਿ ਤਤ੍ਥ ਤਤ੍ਥ ਕਥੇਨ੍ਤਿ ਵਿਤ੍ਥਾਰੇਨ੍ਤਿ. ਏਸੋ ਖੋ ਮਾਰਿਸਾਤਿ ਏਤ੍ਥ ਅਯਮਨੁਪੁਬ੍ਬਿਕਥਾ – ਸੋ ਕਿਰ ਅਨੁਪ੍ਪਨ੍ਨੇ ਬੁਦ੍ਧੇ ਕਾਸਿਰਟ੍ਠੇ ਬਾਰਾਣਸਿਰਾਜਾ ਹੁਤ੍ਵਾ ਸਮੁਸ੍ਸਿਤਦ੍ਧਜਪਟਾਕਨਾਨਾਲਙ੍ਕਾਰੇਨ ਸੁਟ੍ਠੁ ਅਲਙ੍ਕਤਂ ਨਗਰਂ ਪਦਕ੍ਖਿਣਂ ਅਕਾਸਿ ਅਤ੍ਤਨੋ ਸਿਰਿਸਮ੍ਪਤ੍ਤਿਯਾ ਸਮਾਕਡ੍ਢਿਤਨੇਤ੍ਤੇਨ ਜਨਕਾਯੇਨ ਸਮੁਲ੍ਲੋਕਿਯਮਾਨੋ. ਤਸ੍ਮਿਞ੍ਚ ਸਮਯੇ ਏਕੋ ਪਚ੍ਚੇਕਬੁਦ੍ਧੋ ਗਨ੍ਧਮਾਦਨਪਬ੍ਬਤਾ ਆਗਮ੍ਮ ਤਸ੍ਮਿਂ ਨਗਰੇ ਪਿਣ੍ਡਾਯ ਚਰਤਿ, ਸਨ੍ਤਿਨ੍ਦ੍ਰਿਯੋ ਸਨ੍ਤਮਾਨਸੋ ਉਤ੍ਤਮਦਮਥਸਮਨ੍ਨਾਗਤੋ. ਮਹਾਜਨੋਪਿ ਰਾਜਗਤਂ ਚਿਤ੍ਤੀਕਾਰਂ ਪਹਾਯ ਪਚ੍ਚੇਕਬੁਦ੍ਧਮੇਵ ਓਲੋਕੇਸਿ. ਰਾਜਾ – ‘‘ਇਦਾਨਿ ਇਮਸ੍ਮਿਂ ਜਨਕਾਯੇ ਏਕੋਪਿ ਮਂ ਨ ਓਲੋਕੇਤਿ. ਕਿਂ ਨੁ ਖੋ ਏਤ’’ਨ੍ਤਿ? ਓਲੋਕੇਨ੍ਤੋ ਪਚ੍ਚੇਕਬੁਦ੍ਧਂ ਅਦ੍ਦਸ. ਸੋਪਿ ਪਚ੍ਚੇਕਬੁਦ੍ਧੋ ਮਹਲ੍ਲਕੋ ਹੋਤਿ ਪਚ੍ਛਿਮਵਯੇ ਠਿਤੋ. ਚੀਵਰਾਨਿਪਿਸ੍ਸ ਜਿਣ੍ਣਾਨਿ, ਤਤੋ ਤਤੋ ਸੁਤ੍ਤਾਨਿ ਗਲ਼ਨ੍ਤਿ. ਰਞ੍ਞੋ ਸਤਸਹਸ੍ਸਾਧਿਕਾਨਿ ਦ੍ਵੇ ਅਸਙ੍ਖ੍ਯੇਯ੍ਯਾਨਿ ਪੂਰਿਤਪਾਰਮਿਂ ਪਚ੍ਚੇਕਬੁਦ੍ਧਂ ਦਿਸ੍ਵਾ ਚਿਤ੍ਤਪਸਾਦਮਤ੍ਤਂ ਵਾ ਹਤ੍ਥਂ ਪਸਾਰੇਤ੍ਵਾ ਵਨ੍ਦਨਮਤ੍ਤਂ ਵਾ ਨਾਹੋਸਿ. ਸੋ ਰਾਜਾ ‘‘ਪਬ੍ਬਜਿਤੋ ਮਞ੍ਞੇ ਏਸ ਉਸੂਯਾਯ ਮਂ ਨ ਓਲੋਕੇਤੀ’’ਤਿ ਕੁਜ੍ਝਿਤ੍ਵਾ ‘‘ਕ੍ਵਾਯਂ ਕੁਟ੍ਠਿਚੀਵਰਾਨਿ ਪਾਰੁਤੋ’’ਤਿ ਨਿਟ੍ਠੁਭਿਤ੍ਵਾ ਪਕ੍ਕਾਮਿ. ਤਸ੍ਸ ਕਮ੍ਮਸ੍ਸ ਵਿਪਾਕੇਨ ਮਹਾਨਿਰਯੇ ਨਿਬ੍ਬਤ੍ਤਿਤ੍ਵਾ ਵਿਪਾਕਾਵਸੇਸੇਨ ਮਨੁਸ੍ਸਲੋਕਂ ਆਗਚ੍ਛਨ੍ਤੋ ਰਾਜਗਹੇ ਪਰਮਕਪਣਾਯ ਇਤ੍ਥਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਗਹਿਤਕਾਲਤੋ ਪਟ੍ਠਾਯ ਸਾ ਇਤ੍ਥੀ ਕਞ੍ਜਿਕਮਤ੍ਤਮ੍ਪਿ ਉਦਰਪੂਰਂ ਨਾਲਤ੍ਥ. ਤਸ੍ਸ ਕੁਚ੍ਛਿਗਤਸ੍ਸੇਵ ਕਣ੍ਣਨਾਸਾ ਵਿਲੀਨਾ, ਸਙ੍ਖਪਲਿਤਕੁਟ੍ਠੀ ਹੁਤ੍ਵਾ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤੋ. ਮਾਤਾਪਿਤਰੋ ਨਾਮ ਦੁਕ੍ਕਰਕਾਰਿਕਾ ਹੋਨ੍ਤਿ, ਤੇਨਸ੍ਸ ਮਾਤਾ ਯਾਵ ਕਪਾਲਂ ਗਹੇਤ੍ਵਾ ਚਰਿਤੁਂ ਨ ਸਕ੍ਕੋਤਿ, ਤਾਵਸ੍ਸ ਕਞ੍ਜਿਕਮ੍ਪਿ ਉਦਕਮ੍ਪਿ ਆਹਰਿਤ੍ਵਾ ਅਦਾਸਿ. ਭਿਕ੍ਖਾਯ ਚਰਿਤੁਂ ਸਮਤ੍ਥਕਾਲੇ ਪਨਸ੍ਸ ਕਪਾਲਂ ਹਤ੍ਥੇ ਦਤ੍ਵਾ ‘‘ਪਞ੍ਞਾਯਿਸ੍ਸਸਿ ਸਕੇਨ ਕਮ੍ਮੇਨਾ’’ਤਿ ਪਕ੍ਕਾਮਿ.

ਅਥਸ੍ਸ ਤਤੋ ਪਟ੍ਠਾਯ ਸਕਲਸਰੀਰਤੋ ਮਂਸਾਨਿ ਛਿਜ੍ਜਿਤ੍ਵਾ ਛਿਜ੍ਜਿਤ੍ਵਾ ਪਤਨ੍ਤਿ, ਯੂਸਂ ਪਗ੍ਘਰਤਿ, ਮਹਾਵੇਦਨਾ ਵਤ੍ਤਨ੍ਤਿ. ਯਂ ਯਂ ਰਚ੍ਛਂ ਨਿਸ੍ਸਾਯ ਸਯਤਿ, ਸਬ੍ਬਰਤ੍ਤਿਂ ਮਹਾਰਵੇਨ ਰਵਤਿ. ਤਸ੍ਸ ਕਾਰੁਞ੍ਞਪਰਿਦੇਵਿਤਸਦ੍ਦੇਨ ਸਕਲਵੀਥਿਯਂ ਮਨੁਸ੍ਸਾ ਸਬ੍ਬਰਤ੍ਤਿਂ ਨਿਦ੍ਦਂ ਨ ਲਭਨ੍ਤਿ. ਤਸ੍ਸ ਤਤੋ ਪਟ੍ਠਾਯ ਸੁਖਸਯਿਤੇ ਪਬੋਧੇਤੀਤਿ ਸੁਪ੍ਪਬੁਦ੍ਧੋਤ੍ਵੇਵ ਨਾਮਂ ਉਦਪਾਦਿ. ਅਥਾਪਰੇਨ ਸਮਯੇਨ ਭਗਵਤਿ ਰਾਜਗਹਂ ਸਮ੍ਪਤ੍ਤੇ ਨਾਗਰਾ ਸਤ੍ਥਾਰਂ ਨਿਮਨ੍ਤੇਤ੍ਵਾ ਨਗਰਮਜ੍ਝੇ ਮਹਾਮਣ੍ਡਪਂ ਕਤ੍ਵਾ ਦਾਨਂ ਅਦਂਸੁ. ਸੁਪ੍ਪਬੁਦ੍ਧੋਪਿ ਕੁਟ੍ਠੀ ਗਨ੍ਤ੍ਵਾ ਦਾਨਗ੍ਗਮਣ੍ਡਪਸ੍ਸ ਅਵਿਦੂਰੇ ਨਿਸੀਦਿ. ਨਾਗਰਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਪਰਿਵਿਸਨ੍ਤਾ ਤਸ੍ਸਾਪਿ ਯਾਗੁਭਤ੍ਤਂ ਅਦਂਸੁ. ਤਸ੍ਸ ਪਣੀਤਭੋਜਨਂ ਭੁਤ੍ਤਸ੍ਸ ਚਿਤ੍ਤਂ ਏਕਗ੍ਗਂ ਅਹੋਸਿ. ਸਤ੍ਥਾ ਭਤ੍ਤਕਿਚ੍ਚਾਵਸਾਨੇ ਅਨੁਮੋਦਨਂ ਕਤ੍ਵਾ ਸਚ੍ਚਾਨਿ ਦੀਪੇਸਿ, ਸੁਪ੍ਪਬੁਦ੍ਧੋ ਨਿਸਿਨ੍ਨਟ੍ਠਾਨੇ ਨਿਸਿਨ੍ਨੋਵ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋ. ਸਤ੍ਥਾ ਉਟ੍ਠਾਯ ਵਿਹਾਰਂ ਗਤੋ. ਸੋਪਿ ਚੁਮ੍ਬਟਂ ਆਰੁਯ੍ਹ ਕਪਾਲਮਾਦਾਯ ਦਣ੍ਡਮੋਲੁਬ੍ਭ ਅਤ੍ਤਨੋ ਵਸਨਟ੍ਠਾਨਂ ਗਚ੍ਛਨ੍ਤੋ ਵਿਬ੍ਭਨ੍ਤਾਯ ਗਾਵਿਯਾ ਜੀਵਿਤਾ ਵੋਰੋਪਿਤੋ ਮਤ੍ਤਿਕਪਾਤਿਂ ਭਿਨ੍ਦਿਤ੍ਵਾ ਸੁਵਣ੍ਣਪਾਤਿਂ ਪਟਿਲਭਨ੍ਤੋ ਵਿਯ ਦੁਤਿਯਚਿਤ੍ਤਵਾਰੇ ਦੇਵਲੋਕੇ ਨਿਬ੍ਬਤ੍ਤੋ ਅਤ੍ਤਨੋ ਪੁਞ੍ਞਂ ਨਿਸ੍ਸਾਯ ਅਞ੍ਞੇ ਦੇਵੇ ਅਤਿਕ੍ਕਮ੍ਮ ਵਿਰੋਚਿਤ੍ਥ. ਤਂ ਕਾਰਣਂ ਦਸ੍ਸੇਨ੍ਤੋ ਸਕ੍ਕੋ ਦੇਵਾਨਮਿਨ੍ਦੋ ਏਸੋ ਖੋ ਮਾਰਿਸਾਤਿਆਦਿਮਾਹ.

ਸਦ੍ਧਾਤਿ ਮਗ੍ਗੇਨਾਗਤਸਦ੍ਧਾ. ਸੀਲਞ੍ਚ ਯਸ੍ਸ ਕਲ੍ਯਾਣਨ੍ਤਿ ਕਲ੍ਯਾਣਸੀਲਂ ਨਾਮ ਅਰਿਯਸਾਵਕਸ੍ਸ ਅਰਿਯਕਨ੍ਤਸੀਲਂ ਵੁਚ੍ਚਤਿ. ਤਤ੍ਥ ਕਿਞ੍ਚਾਪਿ ਅਰਿਯਸਾਵਕਸ੍ਸ ਏਕਸੀਲਮ੍ਪਿ ਅਕਨ੍ਤਂ ਨਾਮ ਨਤ੍ਥਿ, ਇਮਸ੍ਮਿਂ ਪਨਤ੍ਥੇ ਭਵਨ੍ਤਰੇਪਿ ਅਪ੍ਪਹੀਨਂ ਪਞ੍ਚਸੀਲਂ ਅਧਿਪ੍ਪੇਤਂ. ਚਤੁਤ੍ਥਂ.

੫. ਰਾਮਣੇਯ੍ਯਕਸੁਤ੍ਤਵਣ੍ਣਨਾ

੨੬੧. ਪਞ੍ਚਮੇ ਆਰਾਮਚੇਤ੍ਯਾਤਿ ਆਰਾਮਚੇਤਿਯਾਨਿ. ਵਨਚੇਤ੍ਯਾਤਿ ਵਨਚੇਤਿਯਾਨਿ. ਉਭਯਤ੍ਥਾਪਿ ਚਿਤ੍ਤੀਕਤਟ੍ਠੇਨ ਚੇਤ੍ਯਂ ਵੇਦਿਤਬ੍ਬਂ. ਮਨੁਸ੍ਸਰਾਮਣੇਯ੍ਯਸ੍ਸਾਤਿ ਮਨੁਸ੍ਸਰਮਣੀਯਭਾਵਸ੍ਸ. ਇਦਾਨਿ ਮਨੁਸ੍ਸਰਮਣੀਯਕਵਸੇਨ ਭੂਮਿਰਮਣੀਯਕਂ ਦਸ੍ਸੇਨ੍ਤੋ ਗਾਮੇ ਵਾਤਿਆਦਿਮਾਹ. ਪਞ੍ਚਮਂ.

੬. ਯਜਮਾਨਸੁਤ੍ਤਵਣ੍ਣਨਾ

੨੬੨. ਛਟ੍ਠੇ ਯਜਮਾਨਾਨਨ੍ਤਿ ਯਜਨ੍ਤਾਨਂ. ਤਦਾ ਕਿਰ ਅਙ੍ਗਮਗਧਵਾਸਿਕਾ ਮਨੁਸ੍ਸਾ ਅਨੁਸਂਵਚ੍ਛਰਂ ਸਪ੍ਪਿਮਧੁਫਾਣਿਤਾਦੀਸੁ ਅਗ੍ਗਂ ਗਹੇਤ੍ਵਾ ਏਕਸ੍ਮਿਂ ਠਾਨੇ ਦਾਰੂਨਂ ਸਟ੍ਠਿਮਤ੍ਤੇ ਸਕਟਭਾਰੇ ਰਾਸਿਂ ਕਤ੍ਵਾ ਅਗ੍ਗਿਂ ਦਤ੍ਵਾ ਪਜ੍ਜਲਿਤਕਾਲੇ ‘‘ਮਹਾਬ੍ਰਹ੍ਮੁਨੋ ਯਜਾਮਾ’’ਤਿ ਤਂ ਸਬ੍ਬਂ ਪਕ੍ਖਿਪਨ੍ਤਿ. ‘‘ਏਕਵਾਰਂ ਪਕ੍ਖਿਤ੍ਤਂ ਸਹਸ੍ਸਗੁਣਫਲਂ ਦੇਤੀ’’ਤਿ ਨੇਸਂ ਲਦ੍ਧਿ. ਸਕ੍ਕੋ ਦੇਵਰਾਜਾ ‘‘ਸਬ੍ਬੇਪਿਮੇ ਸਬ੍ਬਅਗ੍ਗਾਨਿ ਗਹੇਤ੍ਵਾ ‘ਮਹਾਬ੍ਰਹ੍ਮੁਨੋ ਯਜਾਮਾ’ਤਿ ਅਗ੍ਗਿਮ੍ਹਿ ਝਾਪੇਨ੍ਤਿ. ਅਫਲਂ ਕਰੋਨ੍ਤਿ, ਮਯਿ ਪਸ੍ਸਨ੍ਤੇ ਮਾ ਨਸ੍ਸਨ੍ਤੁ, ਯਥਾ ਬੁਦ੍ਧਸ੍ਸ ਚੇਵ ਸਙ੍ਘਸ੍ਸ ਚ ਦਤ੍ਵਾ ਬਹੁਂ ਪੁਞ੍ਞਂ ਪਸਵਨ੍ਤਿ, ਏਵਂ ਕਰਿਸ੍ਸਾਮੀ’’ਤਿ ਦਾਰੁਰਾਸਿਂ ਜਲਾਪੇਤ੍ਵਾ ਓਲੋਕੇਨ੍ਤੇਸੁ ਮਨੁਸ੍ਸੇਸੁ ਪੁਣ੍ਣਮਦਿਵਸੇ ਬ੍ਰਹ੍ਮਤ੍ਤਭਾਵਂ ਮਾਪੇਤ੍ਵਾ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ਚਨ੍ਦਮਣ੍ਡਲਂ ਭਿਨ੍ਦਿਤ੍ਵਾ ਨਿਕ੍ਖਨ੍ਤੋ ਵਿਯ ਅਹੋਸਿ. ਮਹਾਜਨੋ ਦਿਸ੍ਵਾ ‘‘ਇਮਂ ਯਞ੍ਞਂ ਪਟਿਗ੍ਗਹੇਤੁਂ ਮਹਾਬ੍ਰਹ੍ਮਾ ਆਗਚ੍ਛਤੀ’’ਤਿ ਜਣ੍ਣੁਕੇਹਿ ਭੂਮਿਯਂ ਪਤਿਟ੍ਠਾਯ, ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨੋ ਅਟ੍ਠਾਸਿ. ਬ੍ਰਾਹ੍ਮਣਾ ਆਹਂਸੁ ‘‘ਤੁਮ੍ਹੇ ‘ਮਯਂ ਤਕ੍ਕੇਨ ਕਥੇਮਾ’ਤਿ ਮਞ੍ਞਥ, ਇਦਾਨਿ ਪਸ੍ਸਥ, ਅਯਂ ਵੋ ਬ੍ਰਹ੍ਮਾ ਸਹਤ੍ਥਾ ਯਞ੍ਞਂ ਪਟਿਗ੍ਗਹੇਤੁਂ ਆਗਚ੍ਛਤੀ’’ਤਿ. ਸਕ੍ਕੋ ਆਗਨ੍ਤ੍ਵਾ ਦਾਰੁਚਿਤਕਮਤ੍ਥਕੇ ਆਕਾਸੇ ਠਤ੍ਵਾ ‘‘ਕਸ੍ਸਾਯਂ ਸਕ੍ਕਾਰੋ’’ਤਿ ਪੁਚ੍ਛਿ? ਤੁਮ੍ਹਾਕਂ, ਭਨ੍ਤੇ, ਪਟਿਗ੍ਗਣ੍ਹਥ ਨੋ ਯਞ੍ਞਨ੍ਤਿ. ਤੇਨ ਹਿ ਆਗਚ੍ਛਥ, ਮਾ ਤੁਲਂ ਛਡ੍ਡੇਤ੍ਵਾ ਹਤ੍ਥੇਨ ਤੁਲਯਿਤ੍ਥ, ਅਯਂ ਸਤ੍ਥਾ ਧੁਰਵਿਹਾਰੇ ਵਸਤਿ, ਤਂ ਪੁਚ੍ਛਿਸ੍ਸਾਮ ‘‘ਕਸ੍ਸ ਦਿਨ੍ਨਂ ਮਹਪ੍ਫਲਂ ਹੋਤੀ’’ਤਿ? ਉਭਯਰਟ੍ਠਵਾਸਿਨੋ ਗਹੇਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਨ੍ਤੋ ਏਵਮਾਹ.

ਤਤ੍ਥ ਪੁਞ੍ਞਪੇਕ੍ਖਾਨਨ੍ਤਿ ਪੁਞ੍ਞਂ ਇਚ੍ਛਨ੍ਤਾਨਂ ਪੁਞ੍ਞਤ੍ਥਿਕਾਨਂ. ਓਪਧਿਕਂ ਪੁਞ੍ਞਨ੍ਤਿ ਉਪਧਿਵਿਪਾਕਂ ਪੁਞ੍ਞਂ. ਸਙ੍ਘੇ ਦਿਨ੍ਨਂ ਮਹਪ੍ਫਲਨ੍ਤਿ ਅਰਿਯਸਙ੍ਘੇ ਦਿਨ੍ਨਂ ਵਿਪ੍ਫਾਰਵਨ੍ਤਂ ਹੋਤਿ. ਦੇਸਨਾਵਸਾਨੇ ਚਤੁਰਾਸੀਤਿਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੁ. ਤਤੋ ਪਟ੍ਠਾਯ ਮਨੁਸ੍ਸਾ ਸਬ੍ਬਾਨਿ ਅਗ੍ਗਦਾਨਾਨਿ ਭਿਕ੍ਖੁਸਙ੍ਘਸ੍ਸ ਅਦਂਸੁ. ਛਟ੍ਠਂ.

੭. ਬੁਦ੍ਧਵਨ੍ਦਨਾਸੁਤ੍ਤਵਣ੍ਣਨਾ

੨੬੩. ਸਤ੍ਤਮੇ ਉਟ੍ਠੇਹੀਤਿ ਉਟ੍ਠਹ, ਘਟ, ਵਾਯਮ. ਵਿਜਿਤਸਙ੍ਗਾਮਾਤਿ ਰਾਗਾਦੀਨਞ੍ਚੇਵ ਦ੍ਵਾਦਸਯੋਜਨਿਕਸ੍ਸ ਚ ਮਾਰਬਲਸ੍ਸ ਜਿਤਤ੍ਤਾ ਭਗਵਨ੍ਤਂ ਏਵਂ ਆਲਪਤਿ. ਪਨ੍ਨਭਾਰਾਤਿ ਓਰੋਪਿਤਖਨ੍ਧਕਿਲੇਸਾਭਿਸਙ੍ਖਾਰਭਾਰ. ਪਨ੍ਨਰਸਾਯ ਰਤ੍ਤਿਨ੍ਤਿ ਪਨ੍ਨਰਸਾਯ ਪੁਣ੍ਣਮਾਯ ਰਤ੍ਤਿਂ. ਸਤ੍ਤਮਂ.

੮. ਗਹਟ੍ਠਵਨ੍ਦਨਾਸੁਤ੍ਤਵਣ੍ਣਨਾ

੨੬੪. ਅਟ੍ਠਮੇ ਪੁਥੁਦ੍ਦਿਸਾਤਿ ਚਤਸ੍ਸੋ ਦਿਸਾ ਚਤਸ੍ਸੋ ਅਨੁਦਿਸਾ ਚ. ਭੁਮ੍ਮਾਤਿ ਭੂਮਿਵਾਸਿਨੋ. ਚਿਰਰਤ੍ਤਸਮਾਹਿਤੇਤਿ ਉਪਚਾਰਪ੍ਪਨਾਹਿ ਚਿਰਰਤ੍ਤਸਮਾਹਿਤਚਿਤ੍ਤੇ. ਵਨ੍ਦੇਤਿ ਵਨ੍ਦਾਮਿ. ਬ੍ਰਹ੍ਮਚਰਿਯਪਰਾਯਣੇਤਿ ਦਸਪਿ ਵਸ੍ਸਾਨਿ ਵੀਸਤਿਪਿ ਵਸ੍ਸਾਨਿ…ਪੇ… ਸਟ੍ਠਿਪਿ ਵਸ੍ਸਾਨਿ ਆਪਾਣਕੋਟਿਕਂ ਏਕਸੇਯ੍ਯਂ ਏਕਭਤ੍ਤਨ੍ਤਿਆਦਿਕਂ ਸੇਟ੍ਠਚਰਿਯਂ ਬ੍ਰਹ੍ਮਚਰਿਯਂ ਚਰਮਾਨੇਤਿ ਅਤ੍ਥੋ. ਪੁਞ੍ਞਕਰਾਤਿ ਚਤੁਪਚ੍ਚਯਦਾਨਂ ਕੁਸੁਮ੍ਭਸੁਮਨਪੂਜਾ ਦੀਪਸਹਸ੍ਸਜਾਲਨ੍ਤਿ ਏਵਮਾਦਿਪੁਞ੍ਞਕਾਰਕਾ. ਸੀਲਵਨ੍ਤੋਤਿ ਉਪਾਸਕਤ੍ਤੇ ਪਤਿਟ੍ਠਾਯ ਪਞ੍ਚਹਿਪਿ ਦਸਹਿਪਿ ਸੀਲੇਹਿ ਸਮਨ੍ਨਾਗਤਾ. ਧਮ੍ਮੇਨ ਦਾਰਂ ਪੋਸੇਨ੍ਤੀਤਿ ਉਮਙ੍ਗਭਿਨ੍ਦਨਾਦੀਨਿ ਅਕਤ੍ਵਾ ਧਮ੍ਮਿਕੇਹਿ ਕਸਿਗੋਰਕ੍ਖਵਣਿਜ੍ਜਾਦੀਹਿ ਪੁਤ੍ਤਦਾਰਂ ਪੋਸੇਨ੍ਤਿ. ਪਮੁਖੋ ਰਥਮਾਰੁਹੀਤਿ ਦੇਵਾਨਂ ਪਮੁਖੋ ਸੇਟ੍ਠੋ ਰਥਂ ਆਰੁਹਿ. ਅਟ੍ਠਮਂ.

੯. ਸਤ੍ਥਾਰਵਨ੍ਦਨਾਸੁਤ੍ਤਵਣ੍ਣਨਾ

੨੬੫. ਨਵਮੇ ਭਗਵਨ੍ਤਂ ਨਮਸ੍ਸਤੀਤਿ ਏਕਂਸਂ ਉਤ੍ਤਰਿਯਂ ਦੁਕੁਲਂ ਕਤ੍ਵਾ, ਬ੍ਰਹ੍ਮਜਾਣੁਕੋ ਹੁਤ੍ਵਾ ਸਿਰਸਿ ਅਞ੍ਜਲਿਂ ਠਪੇਤ੍ਵਾ ਨਮਸ੍ਸਤਿ. ਸੋ ਯਕ੍ਖੋਤਿ ਸੋ ਸਕ੍ਕੋ. ਅਨੋਮਨਾਮਨ੍ਤਿ ਸਬ੍ਬਗੁਣੇਹਿ ਓਮਕਭਾਵਸ੍ਸ ਨਤ੍ਥਿਤਾਯ ਸਬ੍ਬਗੁਣਨੇਮਿਤ੍ਤਕੇਹਿ ਨਾਮੇਹਿ ਅਨੋਮਨਾਮਂ. ਅਵਿਜ੍ਜਾਸਮਤਿਕ੍ਕਮਾਤਿ ਚਤੁਸਚ੍ਚਪਟਿਚ੍ਛਾਦਿਕਾਯ ਵਟ੍ਟਮੂਲਕਅਵਿਜ੍ਜਾਯ ਸਮਤਿਕ੍ਕਮੇਨ. ਸੇਕ੍ਖਾਤਿ ਸਤ੍ਤ ਸੇਕ੍ਖਾ. ਅਪਚਯਾਰਾਮਾਤਿ ਵਟ੍ਟਵਿਦ੍ਧਂਸਨੇ ਰਤਾ. ਸਿਕ੍ਖਰੇਤਿ ਸਿਕ੍ਖਨ੍ਤਿ. ਨਵਮਂ.

੧੦. ਸਙ੍ਘਵਨ੍ਦਨਾਸੁਤ੍ਤਵਣ੍ਣਨਾ

੨੬੬. ਦਸਮੇ ਅਜ੍ਝਭਾਸੀਤਿ ਕਸ੍ਮਾ ਏਸ ਪੁਨਪ੍ਪੁਨਂ ਏਵਂ ਭਾਸਤੀਤਿ? ਸਕ੍ਕਸ੍ਸ ਕਿਰ ਦੇਵਰਞ੍ਞੋ ਸਦ੍ਦੋ ਮਧੁਰੋ, ਸੁਫਸਿਤਂ ਦਨ੍ਤਾਵਰਣਂ, ਕਥਨਕਾਲੇ ਸੁਵਣ੍ਣਕਿਙ੍ਕਿਣਿਕਸਦ੍ਦੋ ਵਿਯ ਨਿਚ੍ਛਰਤਿ. ਤਂ ਪੁਨਪ੍ਪੁਨਂ ਸੋਤੁਂ ਲਭਿਸ੍ਸਾਮੀਤਿ ਭਾਸਤਿ. ਪੂਤਿਦੇਹਸਯਾਤਿ ਪੂਤਿਮ੍ਹਿ ਮਾਤੁਸਰੀਰੇ ਵਾ, ਅਤ੍ਤਨੋਯੇਵ ਵਾ ਸਰੀਰਂ ਅਵਤ੍ਥਰਿਤ੍ਵਾ ਸਯਨਤੋ ਪੂਤਿਦੇਹਸਯਾ. ਨਿਮੁਗ੍ਗਾ ਕੁਣਪਮ੍ਹੇਤੇਤਿ ਦਸਮਾਸੇ ਮਾਤੁਕੁਚ੍ਛਿਸਙ੍ਖਾਤੇ ਕੁਣਪਸ੍ਮਿਂ ਏਤੇ ਨਿਮੁਗ੍ਗਾ. ਏਤਂ ਤੇਸਂ ਪਿਹਯਾਮੀਤਿ ਏਤੇਸਂ ਏਤਂ ਪਿਹਯਾਮਿ ਪਤ੍ਥਯਾਮਿ. ਨ ਤੇ ਸਂ ਕੋਟ੍ਠੇ ਓਪੇਨ੍ਤੀਤਿ ਨ ਤੇ ਸਂ ਸਨ੍ਤਕਂ ਧਞ੍ਞਂ ਕੋਟ੍ਠੇ ਪਕ੍ਖਿਪਨ੍ਤਿ. ਨ ਹਿ ਏਤੇਸਂ ਧਞ੍ਞਂ ਅਤ੍ਥਿ. ਨ ਕੁਮ੍ਭੀਤਿ ਨ ਕੁਮ੍ਭਿਯਂ. ਨ ਕਲ਼ੋਪਿਯਨ੍ਤਿ ਨ ਪਚ੍ਛਿਯਂ. ਪਰਨਿਟ੍ਠਿਤਮੇਸਾਨਾਤਿ ਪਰੇਸਂ ਨਿਟ੍ਠਿਤਂ ਪਰਘਰੇ ਪਕ੍ਕਂ ਭਿਕ੍ਖਾਚਾਰਵਤ੍ਤੇਨ ਏਸਮਾਨਾ ਗਵੇਸਮਾਨਾ. ਤੇਨਾਤਿ ਏਵਂ ਪਰਿਯਿਟ੍ਠੇਨ. ਸੁਬ੍ਬਤਾਤਿ ਦਸਪਿ…ਪੇ… ਸਟ੍ਠਿਪਿ ਵਸ੍ਸਾਨਿ ਸੁਸਮਾਦਿਨ੍ਨਸੁਨ੍ਦਰਵਤਾ.

ਸੁਮਨ੍ਤਮਨ੍ਤਿਨੋਤਿ ਧਮ੍ਮਂ ਸਜ੍ਝਾਯਿਸ੍ਸਾਮ, ਧੁਤਙ੍ਗਂ ਸਮਾਦਿਯਿਸ੍ਸਾਮ, ਅਮਤਂ ਪਰਿਭੁਞ੍ਜਿਸ੍ਸਾਮ, ਸਮਣਧਮ੍ਮਂ ਕਰਿਸ੍ਸਾਮਾਤਿ ਏਵਂ ਸੁਭਾਸਿਤਭਾਸਿਨੋ. ਤੁਣ੍ਹੀਭੂਤਾ ਸਮਞ੍ਚਰਾਤਿ ਤਿਯਾਮਰਤ੍ਤਿਂ ਅਸਨਿਘੋਸੇਨ ਘੋਸਿਤਾ ਵਿਯ ਧਮ੍ਮਂ ਕਥੇਨ੍ਤਾਪਿ ਤੁਣ੍ਹੀਭੂਤਾ ਸਮਂ ਚਰਨ੍ਤਿਯੇਵ ਨਾਮ. ਕਸ੍ਮਾ? ਨਿਰਤ੍ਥਕਵਚਨਸ੍ਸਾਭਾਵਾ. ਪੁਥੁਮਚ੍ਚਾ ਚਾਤਿ ਬਹੁਸਤ੍ਤਾ ਚ ਅਞ੍ਞਮਞ੍ਞਂ ਵਿਰੁਦ੍ਧਾ. ਅਤ੍ਤਦਣ੍ਡੇਸੁ ਨਿਬ੍ਬੁਤਾਤਿ ਪਰਵਿਹੇਠਨਤ੍ਥਂ ਗਹਿਤਦਣ੍ਡੇਸੁ ਸਤ੍ਤੇਸੁ ਨਿਬ੍ਬੁਤਾ ਵਿਸ੍ਸਟ੍ਠਦਣ੍ਡਾ. ਸਾਦਾਨੇਸੁ ਅਨਾਦਾਨਾਤਿ ਸਗਹਣੇਸੁ ਸਤ੍ਤੇਸੁ ਚ ਭਵਯੋਨਿਆਦੀਨਂ ਏਕਕੋਟ੍ਠਾਸਸ੍ਸਾਪਿ ਅਗਹਿਤਤ੍ਤਾ ਅਗਹਣਾ. ਦਸਮਂ.

ਦੁਤਿਯੋ ਵਗ੍ਗੋ.

੩. ਤਤਿਯਵਗ੍ਗੋ

੧. ਛੇਤ੍ਵਾਸੁਤ੍ਤਵਣ੍ਣਨਾ

੨੬੭. ਤਤਿਯਵਗ੍ਗਸ੍ਸ ਪਠਮਂ ਵੁਤ੍ਤਤ੍ਥਮੇਵ. ਪਠਮਂ.

੨. ਦੁਬ੍ਬਣ੍ਣਿਯਸੁਤ੍ਤਵਣ੍ਣਨਾ

੨੬੮. ਦੁਤਿਯੇ ਦੁਬ੍ਬਣ੍ਣੋਤਿ ਝਾਮਖਾਣੁਵਣ੍ਣੋ. ਓਕੋਟਿਮਕੋਤਿ ਲਕੁਣ੍ਡਕੋ ਮਹੋਦਰੋ. ਆਸਨੇਤਿ ਪਣ੍ਡੁਕਮ੍ਬਲਸਿਲਾਯਂ. ਕੋਧਭਕ੍ਖੋਤਿ ਸਕ੍ਕੇਨ ਗਹਿਤਨਾਮਮੇਵੇਤਂ. ਸੋ ਪਨ ਏਕੋ ਰੂਪਾਵਚਰਬ੍ਰਹ੍ਮਾ, ‘‘ਸਕ੍ਕੋ ਕਿਰ ਖਨ੍ਤਿਬਲੇਨ ਸਮਨ੍ਨਾਗਤੋ’’ਤਿ ਸੁਤ੍ਵਾ ਵੀਮਂਸਨਤ੍ਥਂ ਆਗਤੋ. ਅਵਰੁਦ੍ਧਕਯਕ੍ਖਾ ਪਨ ਏਵਰੂਪਂ ਸਂਵਿਹਿਤਾਰਕ੍ਖਂ ਠਾਨਂ ਪਵਿਸਿਤੁਂ ਨ ਸਕ੍ਕੋਨ੍ਤਿ. ਉਪਸਙ੍ਕਮੀਤਿ ਦੇਵਾਨਂ ਸੁਤ੍ਵਾ ‘‘ਨ ਸਕ੍ਕਾ ਏਸ ਫਰੁਸੇਨ ਚਾਲੇਤੁਂ, ਨੀਚਵੁਤ੍ਤਿਨਾ ਪਨ ਖਨ੍ਤਿਯਂ ਠਿਤੇਨ ਸਕ੍ਕਾ ਪਲਾਪੇਤੁ’’ਨ੍ਤਿ ਤਥਾ ਪਲਾਪੇਤੁਕਾਮੋ ਉਪਸਙ੍ਕਮਿ. ਅਨ੍ਤਰਧਾਯੀਤਿ ਖਨ੍ਤਿਯਂ ਠਤ੍ਵਾ ਬਲਵਚਿਤ੍ਤੀਕਾਰਂ ਪਚ੍ਚੁਪਟ੍ਠਪੇਤ੍ਵਾ ਨੀਚਵੁਤ੍ਤਿਯਾ ਦਸ੍ਸਿਯਮਾਨਾਯ ਸਕ੍ਕਾਸਨੇ ਠਾਤੁਂ ਅਸਕ੍ਕੋਨ੍ਤੋ ਅਨ੍ਤਰਧਾਯਿ. ਨ ਸੂਪਹਤਚਿਤ੍ਤੋਮ੍ਹੀਤਿ ਏਤ੍ਥ ਸੂਤਿ ਨਿਪਾਤਮਤ੍ਤਂ, ਉਪਹਤਚਿਤ੍ਤੋਮ੍ਹੀਤਿ ਆਹ. ਨਾਵਤ੍ਤੇਨ ਸੁਵਾਨਯੋਤਿ ਨ ਕੋਧਾਵਤ੍ਤੇਨ ਸੁਆਨਯੋ, ਕੋਧਵਸੇ ਵਤ੍ਤੇਤੁਂ ਨ ਸੁਕਰੋਮ੍ਹੀਤਿ ਵਦਤਿ. ਨ ਵੋ ਚਿਰਾਹਨ੍ਤਿ ਵੋਤਿ ਨਿਪਾਤਮਤ੍ਤਂ, ਅਹਂ ਚਿਰਂ ਨ ਕੁਜ੍ਝਾਮੀਤਿ ਵਦਤਿ. ਦੁਤਿਯਂ.

੩. ਸਮ੍ਬਰਿਮਾਯਾਸੁਤ੍ਤਵਣ੍ਣਨਾ

੨੬੯. ਤਤਿਯੇ ਆਬਾਧਿਕੋਤਿ ਇਸਿਗਣੇਨ ਅਭਿਸਪਕਾਲੇ ਉਪ੍ਪਨ੍ਨਾਬਾਧੇਨ ਆਬਾਧਿਕੋ. ਵਾਚੇਹਿ ਮਨ੍ਤਿ ਸਚੇ ਮਂ ਸਮ੍ਬਰਿਮਾਯਂ ਵਾਚੇਸਿ, ਏਵਮਹਂ ਤਮ੍ਪਿ ਤਿਕਿਚ੍ਛਿਸ੍ਸਾਮੀਤਿ ਵਦਤਿ. ਮਾ ਖੋ ਤ੍ਵਂ, ਮਾਰਿਸ, ਵਾਚੇਸੀਤਿ ਵਿਨਾਪਿ ਤਾਵ ਸਮ੍ਬਰਿਮਾਯਂ ਸਕ੍ਕੋ ਅਮ੍ਹੇ ਬਾਧਤਿ, ਯਦਿ ਪਨ ਤਂ ਜਾਨਿਸ੍ਸਤਿ, ਨਟ੍ਠਾ ਮਯਂ, ਮਾ ਅਤ੍ਤਨੋ ਏਕਸ੍ਸ ਅਤ੍ਥਾਯ ਅਮ੍ਹੇ ਨਾਸੇਹੀਤਿ ਵਤ੍ਵਾ ਨਿਵਾਰਯਿਂਸੁ. ਸਮ੍ਬਰੋਵ ਸਤਂ ਸਮਨ੍ਤਿ ਯਥਾ ਸਮ੍ਬਰੋ ਅਸੁਰਿਨ੍ਦੋ ਮਾਯਾਵੀ ਮਾਯਂ ਪਯੋਜੇਤ੍ਵਾ ਵਸ੍ਸਸਤਂ ਨਿਰਯੇ ਪਕ੍ਕੋ, ਏਵਂ ਪਚ੍ਚਤਿ. ਤੁਮ੍ਹੇ ਧਮ੍ਮਿਕਾਵ, ਅਲਂ ਵੋ ਮਾਯਾਯਾਤਿ ਵਦਤਿ. ਕਿਂ ਪਨ ਸਕ੍ਕੋ ਤਸ੍ਸ ਕੋਧਂ ਤਿਕਿਚ੍ਛਿਤੁਂ ਸਕ੍ਕੁਣੇਯ੍ਯਾਤਿ? ਆਮ ਸਕ੍ਕੁਣੇਯ੍ਯ. ਕਥਂ? ਤਦਾ ਕਿਰ ਸੋ ਇਸਿਗਣੋ ਧਰਤਿਯੇਵ, ਤਸ੍ਮਾ ਨਂ ਇਸੀਨਂ ਸਨ੍ਤਿਕਂ ਨੇਤ੍ਵਾ ਖਮਾਪੇਯ੍ਯ, ਏਵਮਸ੍ਸ ਫਾਸੁ ਭਵੇਯ੍ਯ. ਤੇਨ ਪਨ ਵਞ੍ਚਿਤਤ੍ਤਾ ਤਥਾ ਅਕਤ੍ਵਾ ਪਕ੍ਕਨ੍ਤੋਵ. ਤਤਿਯਂ.

੪. ਅਚ੍ਚਯਸੁਤ੍ਤਵਣ੍ਣਨਾ

੨੭੦. ਚਤੁਤ੍ਥੇ ਸਮ੍ਪਯੋਜੇਸੁਨ੍ਤਿ ਕਲਹਂ ਅਕਂਸੁ. ਅਚ੍ਚਸਰਾਤਿ ਅਤਿਕ੍ਕਮਿ, ਏਕੋ ਭਿਕ੍ਖੁ ਏਕਂ ਭਿਕ੍ਖੁਂ ਅਤਿਕ੍ਕਮ੍ਮ ਵਚਨਂ ਅਵੋਚਾਤਿ ਅਤ੍ਥੋ. ਯਥਾਧਮ੍ਮਂ ਨਪ੍ਪਟਿਗ੍ਗਣ੍ਹਾਤੀਤਿ ਨ ਖਮਤਿ. ਕੋਧੋ ਵੋ ਵਸਮਾਯਾਤੂਤਿ ਕੋਧੋ ਤੁਮ੍ਹਾਕਂ ਵਸਂ ਆਗਚ੍ਛਤੁ, ਮਾ ਤੁਮ੍ਹੇ ਕੋਧਵਸਂ ਗਮਿਤ੍ਥਾਤਿ ਦੀਪੇਤਿ. ਮਾ ਚ ਮਿਤ੍ਤੇ ਹਿ ਵੋ ਜਰਾਤਿ ਏਤ੍ਥ ਹੀਤਿ ਨਿਪਾਤਮਤ੍ਤਂ, ਤੁਮ੍ਹਾਕਂ ਮਿਤ੍ਤਧਮ੍ਮੇ ਜਰਾ ਨਾਮ ਮਾ ਨਿਬ੍ਬਤ੍ਤਿ. ਭੁਮ੍ਮਤ੍ਥੇ ਵਾ ਕਰਣਵਚਨਂ, ਮਿਤ੍ਤੇਸੁ ਵੋ ਜਰਾ ਮਾ ਨਿਬ੍ਬਤ੍ਤਿ, ਮਿਤ੍ਤਭਾਵਤੋ ਅਞ੍ਞਥਾਭਾਵੋ ਮਾ ਹੋਤੂਤਿ ਅਤ੍ਥੋ. ਅਗਰਹਿਯਂ ਮਾ ਗਰਹਿਤ੍ਥਾਤਿ ਅਗਾਰਯ੍ਹਂ ਖੀਣਾਸਵਪੁਗ੍ਗਲਂ ਮਾ ਗਰਹਿਤ੍ਥ. ਚਤੁਤ੍ਥਂ.

੫. ਅਕ੍ਕੋਧਸੁਤ੍ਤਵਣ੍ਣਨਾ

੨੭੧. ਪਞ੍ਚਮੇ ਮਾ ਵੋ ਕੋਧੋ ਅਜ੍ਝਭਵੀਤਿ ਕੋਧੋ ਤੁਮ੍ਹੇ ਮਾ ਅਭਿਭਵਿ, ਤੁਮ੍ਹੇਵ ਕੋਧਂ ਅਭਿਭਵਥ. ਮਾ ਚ ਕੁਜ੍ਝਿਤ੍ਥ ਕੁਜ੍ਝਿਤਨ੍ਤਿ ਕੁਜ੍ਝਨ੍ਤਾਨਂ ਮਾ ਪਟਿਕੁਜ੍ਝਿਤ੍ਥ. ਅਕ੍ਕੋਧੋਤਿ ਮੇਤ੍ਤਾ ਚ ਮੇਤ੍ਤਾਪੁਬ੍ਬਭਾਗੋ ਚ. ਅਵਿਹਿਂਸਾਤਿ ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ. ਅਥ ਪਾਪਜਨਂ ਕੋਧੋ, ਪਬ੍ਬਤੋਵਾਭਿਮਦ੍ਦਤੀਤਿ ਲਾਮਕਜਨਂ ਪਬ੍ਬਤੋ ਵਿਯ ਕੋਧੋ ਅਭਿਮਦ੍ਦਤੀਤਿ. ਪਞ੍ਚਮਂ.

ਤਤਿਯੋ ਵਗ੍ਗੋ.

ਸਕ੍ਕਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

ਇਤਿ ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਸਗਾਥਾਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ ਪਠਮੋ ਭਾਗੋ.