੭. ਬ੍ਰਾਹ੍ਮਣਸਂਯੁਤ੍ਤਂ

੧. ਅਰਹਨ੍ਤਵਗ੍ਗੋ

੧. ਧਨਞ੍ਜਾਨੀਸੁਤ੍ਤਵਣ੍ਣਨਾ

੧੮੭. ਬ੍ਰਾਹ੍ਮਣਸਂਯੁਤ੍ਤਸ੍ਸ ਪਠਮੇ ਧਨਞ੍ਜਾਨੀਤਿ ਧਨਞ੍ਜਾਨਿਗੋਤ੍ਤਾ. ਉਕ੍ਕਟ੍ਠਗੋਤ੍ਤਾ ਕਿਰੇਸਾ. ਸੇਸਬ੍ਰਾਹ੍ਮਣਾ ਕਿਰ ਬ੍ਰਹ੍ਮੁਨੋ ਮੁਖਤੋ ਜਾਤਾ, ਧਨਞ੍ਜਾਨਿਗੋਤ੍ਤਾ ਮਤ੍ਥਕਂ ਭਿਨ੍ਦਿਤ੍ਵਾ ਨਿਕ੍ਖਨ੍ਤਾਤਿ ਤੇਸਂ ਲਦ੍ਧਿ. ਉਦਾਨਂ ਉਦਾਨੇਸੀਤਿ ਕਸ੍ਮਾ ਉਦਾਨੇਸਿ? ਸੋ ਕਿਰ ਬ੍ਰਾਹ੍ਮਣੋ ਮਿਚ੍ਛਾਦਿਟ੍ਠਿਕੋ ‘‘ਬੁਦ੍ਧੋ ਧਮ੍ਮੋ ਸਙ੍ਘੋ’’ਤਿ ਵੁਤ੍ਤੇ ਕਣ੍ਣੇ ਪਿਦਹਤਿ, ਥਦ੍ਧੋ ਖਦਿਰਖਾਣੁਸਦਿਸੋ. ਬ੍ਰਾਹ੍ਮਣੀ ਪਨ ਸੋਤਾਪਨ੍ਨਾ ਅਰਿਯਸਾਵਿਕਾ. ਬ੍ਰਾਹ੍ਮਣੋ ਦਾਨਂ ਦੇਨ੍ਤੋ ਪਞ੍ਚਸਤਾਨਂ ਬ੍ਰਾਹ੍ਮਣਾਨਂ ਅਪ੍ਪੋਦਕਂ ਪਾਯਾਸਂ ਦੇਤਿ, ਬ੍ਰਾਹ੍ਮਣੀ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਨਾਨਾਰਸਭੋਜਨਂ. ਬ੍ਰਾਹ੍ਮਣਸ੍ਸ ਦਾਨਦਿਵਸੇ ਬ੍ਰਾਹ੍ਮਣੀ ਤਸ੍ਸ ਵਸਵਤ੍ਤਿਤਾਯ ਪਹੀਨਮਚ੍ਛੇਰਤਾਯ ਚ ਸਹਤ੍ਥਾ ਪਰਿਵਿਸਤਿ. ਬ੍ਰਾਹ੍ਮਣਿਯਾ ਪਨ ਦਾਨਦਿਵਸੇ ਬ੍ਰਾਹ੍ਮਣੋ ਪਾਤੋਵ ਘਰਾ ਨਿਕ੍ਖਮਿਤ੍ਵਾ ਪਲਾਯਤਿ. ਅਥੇਕਦਿਵਸਂ ਬ੍ਰਾਹ੍ਮਣੋ ਬ੍ਰਾਹ੍ਮਣਿਯਾ ਸਦ੍ਧਿਂ ਅਸਮ੍ਮਨ੍ਤੇਤ੍ਵਾ ਪਞ੍ਚਸਤੇ ਬ੍ਰਾਹ੍ਮਣੇ ਨਿਮਨ੍ਤੇਤ੍ਵਾ ਬ੍ਰਾਹ੍ਮਣਿਂ ਆਹ – ‘‘ਸ੍ਵੇ ਭੋਤਿ ਅਮ੍ਹਾਕਂ ਘਰੇ ਪਞ੍ਚਸਤਾ ਬ੍ਰਾਹ੍ਮਣਾ ਭੁਞ੍ਜਿਸ੍ਸਨ੍ਤੀ’’ਤਿ. ਮਯਾ ਕਿਂ ਕਾਤਬ੍ਬਂ ਬ੍ਰਾਹ੍ਮਣਾਤਿ? ਤਯਾ ਅਞ੍ਞਂ ਕਿਞ੍ਚਿ ਕਾਤਬ੍ਬਂ ਨਤ੍ਥਿ, ਸਬ੍ਬਂ ਪਚਨਪਰਿਵੇਸਨਂ ਅਞ੍ਞੇ ਕਰਿਸ੍ਸਨ੍ਤਿ. ਯਂ ਪਨ ਤ੍ਵਂ ਠਿਤਾਪਿ ਨਿਸਿਨ੍ਨਾਪਿ ਖਿਪਿਤ੍ਵਾਪਿ ਉਕ੍ਕਾਸਿਤ੍ਵਾਪਿ ‘‘ਨਮੋ ਬੁਦ੍ਧਸ੍ਸਾ’’ਤਿ ਤਸ੍ਸ ਮੁਣ੍ਡਕਸ੍ਸ ਸਮਣਕਸ੍ਸ ਨਮਕ੍ਕਾਰਂ ਕਰੋਸਿ, ਤਂ ਸ੍ਵੇ ਏਕਦਿਵਸਮਤ੍ਤਂ ਮਾ ਅਕਾਸਿ. ਤਂ ਹਿ ਸੁਤ੍ਵਾ ਬ੍ਰਾਹ੍ਮਣਾ ਅਨਤ੍ਤਮਨਾ ਹੋਨ੍ਤਿ, ਮਾ ਮਂ ਬ੍ਰਾਹ੍ਮਣੇਹਿ ਭਿਨ੍ਦਸੀਤਿ. ਤ੍ਵਂ ਬ੍ਰਾਹ੍ਮਣੇਹਿ ਵਾ ਭਿਜ੍ਜ ਦੇਵੇਹਿ ਵਾ, ਅਹਂ ਪਨ ਸਤ੍ਥਾਰਂ ਅਨੁਸ੍ਸਰਿਤ੍ਵਾ ਨ ਸਕ੍ਕੋਮਿ ਅਨਮਸ੍ਸਮਾਨਾ ਸਣ੍ਠਾਤੁਨ੍ਤਿ. ਭੋਤਿ ਕੁਲਸਤਿਕੇ ਗਾਮੇ ਗਾਮਦ੍ਵਾਰਮ੍ਪਿ ਤਾਵ ਪਿਦਹਿਤੁਂ ਵਾਯਮਨ੍ਤਿ, ਤ੍ਵਂ ਦ੍ਵੀਹਙ੍ਗੁਲੇਹਿ ਪਿਦਹਿਤਬ੍ਬਂ ਮੁਖਂ ਬ੍ਰਾਹ੍ਮਣਾਨਂ ਭੋਜਨਕਾਲਮਤ੍ਤਂ ਪਿਦਹਿਤੁਂ ਨ ਸਕ੍ਕੋਸੀਤਿ. ਏਵਂ ਪੁਨਪ੍ਪੁਨਂ ਕਥੇਤ੍ਵਾਪਿ ਸੋ ਨਿਵਾਰੇਤੁਂ ਅਸਕ੍ਕੋਨ੍ਤੋ ਉਸ੍ਸੀਸਕੇ ਠਪਿਤਂ ਮਣ੍ਡਲਗ੍ਗਖਗ੍ਗਂ ਗਹੇਤ੍ਵਾ – ‘‘ਭੋਤਿ ਸਚੇ ਸ੍ਵੇ ਬ੍ਰਾਹ੍ਮਣੇਸੁ ਨਿਸਿਨ੍ਨੇਸੁ ਤਂ ਮੁਣ੍ਡਸਮਣਕਂ ਨਮਸ੍ਸਸਿ, ਇਮਿਨਾ ਤਂ ਖਗ੍ਗੇਨ ਪਾਦਤਲਤੋ ਪਟ੍ਠਾਯ ਯਾਵ ਕੇਸਮਤ੍ਥਕਾ ਕਲ਼ੀਰਂ ਵਿਯ ਕੋਟ੍ਟੇਤ੍ਵਾ ਰਾਸਿਂ ਕਰਿਸ੍ਸਾਮੀ’’ਤਿ ਇਮਂ ਗਾਥਂ ਅਭਾਸਿ –

‘‘ਇਮਿਨਾ ਮਣ੍ਡਲਗ੍ਗੇਨ, ਪਾਦਤੋ ਯਾਵ ਮਤ੍ਥਕਾ;

ਕਲ਼ੀਰਮਿਵ ਛੇਜ੍ਜਾਮਿ, ਯਦਿ ਮਿਚ੍ਛਂ ਨ ਕਾਹਸਿ.

‘‘ਸਚੇ ਬੁਦ੍ਧੋਤਿ ਭਣਸਿ, ਸਚੇ ਧਮ੍ਮੋਤਿ ਭਾਸਸਿ;

ਸਚੇ ਸਙ੍ਘੋਤਿ ਕਿਤ੍ਤੇਸਿ, ਜੀਵਨ੍ਤੀ ਮੇ ਨਿਵੇਸਨੇ’’ਤਿ.

ਅਰਿਯਸਾਵਿਕਾ ਪਨ ਪਥਵੀ ਵਿਯ ਦੁਪ੍ਪਕਮ੍ਪਾ, ਸਿਨੇਰੁ ਵਿਯ ਦੁਪ੍ਪਰਿਵਤ੍ਤਿਯਾ. ਸਾ ਤੇਨ ਨਂ ਏਵਮਾਹ –

‘‘ਸਚੇ ਮੇ ਅਙ੍ਗਮਙ੍ਗਾਨਿ, ਕਾਮਂ ਛੇਜ੍ਜਸਿ ਬ੍ਰਾਹ੍ਮਣ;

ਨੇਵਾਹਂ ਵਿਰਮਿਸ੍ਸਾਮਿ, ਬੁਦ੍ਧਸੇਟ੍ਠਸ੍ਸ ਸਾਸਨਾ.

‘‘ਨਾਹਂ ਓਕ੍ਕਾ ਵਰਧਰਾ, ਸਕ੍ਕਾ ਰੋਧਯਿਤੁਂ ਜਿਨਾ;

ਧੀਤਾਹਂ ਬੁਦ੍ਧਸੇਟ੍ਠਸ੍ਸ, ਛਿਨ੍ਦ ਵਾ ਮਂ ਵਧਸ੍ਸੁ ਵਾ’’ਤਿ.

ਏਵਂ ਧਨਞ੍ਜਾਨਿਗਜ੍ਜਿਤਂ ਨਾਮ ਗਜ੍ਜਨ੍ਤੀ ਪਞ੍ਚ ਗਾਥਾਸਤਾਨਿ ਅਭਾਸਿ. ਬ੍ਰਾਹ੍ਮਣੋ ਬ੍ਰਾਹ੍ਮਣਿਂ ਪਰਾਮਸਿਤੁਂ ਵਾ ਪਹਰਿਤੁਂ ਵਾ ਅਸਕ੍ਕੋਨ੍ਤੋ ‘‘ਭੋਤਿ ਯਂ ਤੇ ਰੁਚ੍ਚਤਿ, ਤਂ ਕਰੋਹੀ’’ਤਿ ਵਤ੍ਵਾ ਖਗ੍ਗਂ ਸਯਨੇ ਖਿਪਿ. ਪੁਨਦਿਵਸੇ ਗੇਹਂ ਹਰਿਤੁਪਲਿਤ੍ਤਂ ਕਾਰਾਪੇਤ੍ਵਾ ਲਾਜਾਪੁਣ੍ਣਘਟਮਾਲਾਗਨ੍ਧਾਦੀਹਿ ਤਤ੍ਥ ਤਤ੍ਥ ਅਲਙ੍ਕਾਰਾਪੇਤ੍ਵਾ ਪਞ੍ਚਨ੍ਨਂ ਬ੍ਰਾਹ੍ਮਣਸਤਾਨਂ ਨਵਸਪ੍ਪਿਸਕ੍ਖਰਮਧੁਯੁਤ੍ਤਂ ਅਪ੍ਪੋਦਕਪਾਯਾਸਂ ਪਟਿਯਾਦਾਪੇਤ੍ਵਾ ਕਾਲਂ ਆਰੋਚਾਪੇਸਿ.

ਬ੍ਰਾਹ੍ਮਣੀਪਿ ਪਾਤੋਵ ਗਨ੍ਧੋਦਕੇਨ ਸਯਂ ਨ੍ਹਾਯਿਤ੍ਵਾ ਸਹਸ੍ਸਗ੍ਘਨਕਂ ਅਹਤਵਤ੍ਥਂ ਨਿਵਾਸੇਤ੍ਵਾ ਪਞ੍ਚਸਤਗ੍ਘਨਕਂ ਏਕਂਸਂ ਕਤ੍ਵਾ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਸੁਵਣ੍ਣਕਟਚ੍ਛੁਂ ਗਹੇਤ੍ਵਾ ਭਤ੍ਤਗ੍ਗੇ ਬ੍ਰਾਹ੍ਮਣੇ ਪਰਿਵਿਸਮਾਨਾ ਤੇਹਿ ਸਦ੍ਧਿਂ ਏਕਪਨ੍ਤਿਯਂ ਨਿਸਿਨ੍ਨਸ੍ਸ ਤਸ੍ਸ ਬ੍ਰਾਹ੍ਮਣਸ੍ਸ ਭਤ੍ਤਂ ਉਪਸਂਹਰਨ੍ਤੀ ਦੁਨ੍ਨਿਕ੍ਖਿਤ੍ਤੇ ਦਾਰੁਭਣ੍ਡੇ ਪਕ੍ਖਲਿ. ਪਕ੍ਖਲਨਘਟ੍ਟਨਾਯ ਦੁਕ੍ਖਾ ਵੇਦਨਾ ਉਪ੍ਪਜ੍ਜਿ. ਤਸ੍ਮਿਂ ਸਮਯੇ ਦਸਬਲਂ ਸਰਿ. ਸਤਿਸਮ੍ਪਨ੍ਨਤਾਯ ਪਨ ਪਾਯਾਸਪਾਤਿਂ ਅਛਡ੍ਡੇਤ੍ਵਾ ਸਣਿਕਂ ਓਤਾਰੇਤ੍ਵਾ ਭੂਮਿਯਂ ਸਣ੍ਠਪੇਤ੍ਵਾ ਪਞ੍ਚਨ੍ਨਂ ਬ੍ਰਾਹ੍ਮਣਸਤਾਨਂ ਮਜ੍ਝੇ ਸਿਰਸਿ ਅਞ੍ਜਲਿਂ ਠਪੇਤ੍ਵਾ ਯੇਨ ਵੇਲ਼ੁਵਨਂ, ਤੇਨਞ੍ਜਲਿਂ ਪਣਾਮੇਤ੍ਵਾ ਇਮਂ ਉਦਾਨਂ ਉਦਾਨੇਸਿ.

ਤਸ੍ਮਿਞ੍ਚ ਸਮਯੇ ਤੇਸੁ ਬ੍ਰਾਹ੍ਮਣੇਸੁ ਕੇਚਿ ਭੁਤ੍ਤਾ ਹੋਨ੍ਤਿ, ਕੇਚਿ ਭੁਞ੍ਜਮਾਨਾ, ਕੇਚਿ ਹਤ੍ਥੇ ਓਤਾਰਿਤਮਤ੍ਤਾ, ਕੇਸਞ੍ਚਿ ਭੋਜਨਂ ਪੁਰਤੋ ਠਪਿਤਮਤ੍ਤਂ ਹੋਤਿ. ਤੇ ਤਂ ਸਦ੍ਦਂ ਸੁਤ੍ਵਾਵ ਸਿਨੇਰੁਮਤ੍ਤੇਨ ਮੁਗ੍ਗਰੇਨ ਸੀਸੇ ਪਹਟਾ ਵਿਯ ਕਣ੍ਣੇਸੁ ਸੂਲੇਨ ਵਿਦ੍ਧਾ ਵਿਯ ਦੁਕ੍ਖਦੋਮਨਸ੍ਸਂ ਪਟਿਸਂਵੇਦਿਯਮਾਨਾ ‘‘ਇਮਿਨਾ ਅਞ੍ਞਲਦ੍ਧਿਕੇਨ ਮਯਂ ਘਰਂ ਪਵੇਸਿਤਾ’’ਤਿ ਕੁਜ੍ਝਿਤ੍ਵਾ ਹਤ੍ਥੇ ਪਿਣ੍ਡਂ ਛਡ੍ਡੇਤ੍ਵਾ ਮੁਖੇਨ ਗਹਿਤਂ ਨਿਟ੍ਠੁਭਿਤ੍ਵਾ ਧਨੁਂ ਦਿਸ੍ਵਾ ਕਾਕਾ ਵਿਯ ਬ੍ਰਾਹ੍ਮਣਂ ਅਕ੍ਕੋਸਮਾਨਾ ਦਿਸਾਵਿਦਿਸਾ ਪਕ੍ਕਮਿਂਸੁ. ਬ੍ਰਾਹ੍ਮਣੋ ਏਵਂ ਭਿਜ੍ਜਿਤ੍ਵਾ ਗਚ੍ਛਨ੍ਤੇ ਬ੍ਰਾਹ੍ਮਣੇ ਦਿਸ੍ਵਾ ਬ੍ਰਾਹ੍ਮਣਿਂ ਸੀਸਤੋ ਪਟ੍ਠਾਯ ਓਲੋਕੇਤ੍ਵਾ, ‘‘ਇਦਮੇਵ ਭਯਂ ਸਮ੍ਪਸ੍ਸਮਾਨਾ ਮਯਂ ਹਿਯ੍ਯੋ ਪਟ੍ਠਾਯ ਭੋਤਿਂ ਯਾਚਨ੍ਤਾ ਨ ਲਭਿਮ੍ਹਾ’’ਤਿ ਨਾਨਪ੍ਪਕਾਰੇਹਿ ਬ੍ਰਾਹ੍ਮਣਿਂ ਅਕ੍ਕੋਸਿਤ੍ਵਾ, ਏਤਂ ‘‘ਏਵਮੇਵਂ ਪਨਾ’’ਤਿਆਦਿਵਚਨਂ ਅਵੋਚ.

ਉਪਸਙ੍ਕਮੀਤਿ ‘‘ਸਮਣੋ ਗੋਤਮੋ ਗਾਮਨਿਗਮਰਟ੍ਠਪੂਜਿਤੋ, ਨ ਸਕ੍ਕਾ ਗਨ੍ਤ੍ਵਾ ਯਂ ਵਾ ਤਂ ਵਾ ਵਤ੍ਵਾ ਸਨ੍ਤਜ੍ਜੇਤੁਂ, ਏਕਮੇਵ ਨਂ ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਗਚ੍ਛਨ੍ਤੋਵ ‘‘ਕਿਂਸੁ ਛੇਤ੍ਵਾ’’ਤਿ ਗਾਥਂ ਅਭਿਸਙ੍ਖਰਿਤ੍ਵਾ – ‘‘ਸਚੇ ‘ਅਸੁਕਸ੍ਸ ਨਾਮ ਵਧਂ ਰੋਚੇਮੀ’ਤਿ ਵਕ੍ਖਤਿ, ਅਥ ਨਂ ‘ਯੇ ਤੁਯ੍ਹਂ ਨ ਰੁਚ੍ਚਨ੍ਤਿ, ਤੇ ਮਾਰੇਤੁਕਾਮੋਸਿ, ਲੋਕਵਧਾਯ ਉਪ੍ਪਨ੍ਨੋ, ਕਿਂ ਤੁਯ੍ਹਂ ਸਮਣਭਾਵੇਨਾ’ਤਿ? ਨਿਗ੍ਗਹੇਸ੍ਸਾਮਿ. ਸਚੇ ‘ਨ ਕਸ੍ਸਚਿ ਵਧਂ ਰੋਚੇਮੀ’ਤਿ ਵਕ੍ਖਤਿ, ਅਥ ਨਂ ‘ਤ੍ਵਂ ਰਾਗਾਦੀਨਮ੍ਪਿ ਵਧਂ ਨ ਇਚ੍ਛਸਿ. ਕਸ੍ਮਾ ਸਮਣੋ ਹੁਤ੍ਵਾ ਆਹਿਣ੍ਡਸੀ’ਤਿ? ਨਿਗ੍ਗਹੇਸ੍ਸਾਮੀ. ਇਤਿ ਇਮਂ ਉਭਤੋਕੋਟਿਕਂ ਪਞ੍ਹਂ ਸਮਣੋ ਗੋਤਮੋ ਨੇਵ ਗਿਲਿਤੁਂ ਨ ਉਗ੍ਗਿਲਿਤੁਂ ਸਕ੍ਖਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿ. ਸਮ੍ਮੋਦੀਤਿ ਅਤ੍ਤਨੋ ਪਣ੍ਡਿਤਤਾਯ ਕੁਦ੍ਧਭਾਵਂ ਅਦਸ੍ਸੇਤ੍ਵਾ ਮਧੁਰਕਥਂ ਕਥੇਨ੍ਤੋ ਸਮ੍ਮੋਦਿ. ਪਞ੍ਹੋ ਦੇਵਤਾਸਂਯੁਤ੍ਤੇ ਕਥਿਤੋ. ਸੇਸਮ੍ਪਿ ਹੇਟ੍ਠਾ ਵਿਤ੍ਥਾਰਿਤਮੇਵਾਤਿ. ਪਠਮਂ.

੨. ਅਕ੍ਕੋਸਸੁਤ੍ਤਵਣ੍ਣਨਾ

੧੮੮. ਦੁਤਿਯੇ ਅਕ੍ਕੋਸਕਭਾਰਦ੍ਵਾਜੋਤਿ ਭਾਰਦ੍ਵਾਜੋਵ ਸੋ, ਪਞ੍ਚਮਤ੍ਤੇਹਿ ਪਨ ਗਾਥਾ ਸਤੇਹਿ ਤਥਾਗਤਂ ਅਕ੍ਕੋਸਨ੍ਤੋ ਆਗਤੋਤਿ. ‘‘ਅਕ੍ਕੋਸਕਭਾਰਦ੍ਵਾਜੋ’’ਤਿ ਤਸ੍ਸ ਸਙ੍ਗੀਤਿਕਾਰੇਹਿ ਨਾਮਂ ਗਹਿਤਂ. ਕੁਪਿਤੋ ਅਨਤ੍ਤਮਨੋਤਿ ‘‘ਸਮਣੇਨ ਗੋਤਮੇਨ ਮਯ੍ਹਂ ਜੇਟ੍ਠਕਭਾਤਰਂ ਪਬ੍ਬਾਜੇਨ੍ਤੇਨ ਜਾਨਿ ਕਤਾ, ਪਕ੍ਖੋ ਭਿਨ੍ਨੋ’’ਤਿ ਕੋਧੇਨ ਕੁਪਿਤੋ ਦੋਮਨਸ੍ਸੇਨ ਚ ਅਨਤ੍ਤਮਨੋ ਹੁਤ੍ਵਾਤਿ ਅਤ੍ਥੋ. ਅਕ੍ਕੋਸਤੀਤਿ ‘‘ਚੋਰੋਸਿ, ਬਾਲੋਸਿ, ਮੂਲ਼੍ਹੋਸਿ, ਥੇਨੋਸਿ, ਓਟ੍ਠੋਸਿ, ਮੇਣ੍ਡੋਸਿ, ਗੋਣੋਸਿ, ਗਦ੍ਰਭੋਸਿ, ਤਿਰਚ੍ਛਾਨਗਤੋਸਿ, ਨੇਰਯਿਕੋਸੀ’’ਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਤਿ. ਪਰਿਭਾਸਤੀਤਿ ‘‘ਹੋਤੁ ਮੁਣ੍ਡਕਸਮਣਕ, ‘ਅਦਣ੍ਡੋ ਅਹ’ਨ੍ਤਿ ਕਰੋਸਿ, ਇਦਾਨਿ ਤੇ ਰਾਜਕੁਲਂ ਗਨ੍ਤ੍ਵਾ ਦਣ੍ਡਂ ਆਰੋਪੇਸ੍ਸਾਮੀ’’ਤਿਆਦੀਨਿ ਵਦਨ੍ਤੋ ਪਰਿਭਾਸਤਿ ਨਾਮ.

ਸਮ੍ਭੁਞ੍ਜਤੀਤਿ ਏਕਤੋ ਭੁਞ੍ਜਤਿ. ਵੀਤਿਹਰਤੀਤਿ ਕਤਸ੍ਸ ਪਟਿਕਾਰਂ ਕਰੋਤਿ. ਭਗਵਨ੍ਤਂ ਖੋ, ਗੋਤਮਨ੍ਤਿ ਕਸ੍ਮਾ ਏਵਮਾਹ? ‘‘ਤਵੇਵੇਤਂ, ਬ੍ਰਾਹ੍ਮਣ, ਤਵੇਵੇਤਂ, ਬ੍ਰਾਹ੍ਮਣਾ’’ਤਿ ਕਿਰਸ੍ਸ ਸੁਤ੍ਵਾ. ‘‘ਇਸਯੋ ਨਾਮ ਕੁਪਿਤਾ ਸਪਨਂ ਦੇਨ੍ਤਿ ਕਿਸਵਚ੍ਛਾਦਯੋ ਵਿਯਾ’’ਤਿ ਅਨੁਸ੍ਸਵਵਸੇਨ ‘‘ਸਪਤਿ ਮਂ ਮਞ੍ਞੇ ਸਮਣੋ ਗੋਤਮੋ’’ਤਿ ਭਯਂ ਉਪ੍ਪਜ੍ਜਿ. ਤਸ੍ਮਾ ਏਵਮਾਹ.

ਦਨ੍ਤਸ੍ਸਾਤਿ ਨਿਬ੍ਬਿਸੇਵਨਸ੍ਸ. ਤਾਦਿਨੋਤਿ ਤਾਦਿਲਕ੍ਖਣਂ ਪਤ੍ਤਸ੍ਸ. ਤਸ੍ਸੇਵ ਤੇਨ ਪਾਪਿਯੋਤਿ ਤਸ੍ਸੇਵ ਪੁਗ੍ਗਲਸ੍ਸ ਤੇਨ ਕੋਧੇਨ ਪਾਪਂ ਹੋਤਿ. ਸਤੋ ਉਪਸਮ੍ਮਤੀਤਿ ਸਤਿਯਾ ਸਮਨ੍ਨਾਗਤੋ ਹੁਤ੍ਵਾ ਅਧਿਵਾਸੇਤਿ. ਉਭਿਨ੍ਨਂ ਤਿਕਿਚ੍ਛਨ੍ਤਾਨਨ੍ਤਿ ਉਭਿਨ੍ਨਂ ਤਿਕਿਚ੍ਛਨ੍ਤਂ. ਅਯਮੇਵ ਵਾ ਪਾਠੋ. ਯੋ ਪੁਗ੍ਗਲੋ ਸਤੋ ਉਪਸਮ੍ਮਤਿ, ਉਭਿਨ੍ਨਮਤ੍ਥਂ ਚਰਤਿ ਤਿਕਿਚ੍ਛਤਿ ਸਾਧੇਤਿ, ਤਂ ਪੁਗ੍ਗਲਂ ਜਨਾ ਬਾਲੋਤਿ ਮਞ੍ਞਨ੍ਤਿ. ਕੀਦਿਸਾ ਜਨਾ? ਯੇ ਧਮ੍ਮਸ੍ਸ ਅਕੋਵਿਦਾ. ਧਮ੍ਮਸ੍ਸਾਤਿ ਪਞ੍ਚਕ੍ਖਨ੍ਧਧਮ੍ਮਸ੍ਸ ਵਾ ਚਤੁਸਚ੍ਚਧਮ੍ਮਸ੍ਸ ਵਾ. ਅਕੋਵਿਦਾਤਿ ਤਸ੍ਮਿਂ ਧਮ੍ਮੇ ਅਕੁਸਲਾ ਅਨ੍ਧਬਾਲਪੁਥੁਜ੍ਜਨਾ. ਦੁਤਿਯਂ.

੩. ਅਸੁਰਿਨ੍ਦਕਸੁਤ੍ਤਵਣ੍ਣਨਾ

੧੮੯. ਤਤਿਯੇ ਅਸੁਰਿਨ੍ਦਕਭਾਰਦ੍ਵਾਜੋਤਿ ਅਕ੍ਕੋਸਕਭਾਰਦ੍ਵਾਜਸ੍ਸ ਕਨਿਟ੍ਠੋ. ਕੁਪਿਤੋਤਿ ਤੇਨੇਵ ਕਾਰਣੇਨ ਕੁਦ੍ਧੋ. ਜਯਞ੍ਚੇਵਸ੍ਸ ਤਂ ਹੋਤੀਤਿ ਅਸ੍ਸੇਵ ਤਂ ਜਯਂ ਹੋਤਿ, ਸੋ ਜਯੋ ਹੋਤੀਤਿ ਅਤ੍ਥੋ. ਕਤਮਸ੍ਸਾਤਿ? ਯਾ ਤਿਤਿਕ੍ਖਾ ਵਿਜਾਨਤੋ ਅਧਿਵਾਸਨਾਯ ਗੁਣਂ ਵਿਜਾਨਨ੍ਤਸ੍ਸ ਤਿਤਿਕ੍ਖਾ ਅਧਿਵਾਸਨਾ, ਅਯਂ ਤਸ੍ਸ ਵਿਜਾਨਤੋਵ ਜਯੋ. ਬਾਲੋ ਪਨ ਫਰੁਸਂ ਭਣਨ੍ਤੋ ‘‘ਮਯ੍ਹਂ ਜਯੋ’’ਤਿ ਕੇਵਲਂ ਜਯਂ ਮਞ੍ਞਤਿ. ਤਤਿਯਂ.

੪. ਬਿਲਙ੍ਗੀਕਸੁਤ੍ਤਵਣ੍ਣਨਾ

੧੯੦. ਚਤੁਤ੍ਥੇ ਬਿਲਙ੍ਗਿਕਭਾਰਦ੍ਵਾਜੋਤਿ ਭਾਰਦ੍ਵਾਜੋਵ ਸੋ, ਨਾਨਪ੍ਪਕਾਰਂ ਪਨ ਸੁਦ੍ਧਞ੍ਚ ਸਮ੍ਭਾਰਯੁਤ੍ਤਞ੍ਚ ਕਞ੍ਜਿਕਂ ਕਾਰੇਤ੍ਵਾ ਵਿਕ੍ਕਿਣਾਪੇਨ੍ਤੋ ਬਹੁਧਨਂ ਸਙ੍ਖਰੀਤਿ ‘‘ਬਿਲਙ੍ਗਿਕਭਾਰਦ੍ਵਾਜੋ’’ਤਿ ਤਸ੍ਸ ਸਙ੍ਗੀਤਿਕਾਰੇਹਿ ਨਾਮਂ ਗਹਿਤਂ. ਤੁਣ੍ਹੀਭੂਤੋਤਿ ‘‘ਤਯੋ ਮੇ ਜੇਟ੍ਠਕਭਾਤਰੋ ਇਮਿਨਾ ਪਬ੍ਬਾਜਿਤਾ’’ਤਿ ਅਤਿਵਿਯ ਕੁਦ੍ਧੋ ਕਿਞ੍ਚਿ ਵਤ੍ਤੁਂ ਅਸਕ੍ਕੋਨ੍ਤੋ ਤੁਣ੍ਹੀਭੂਤੋ ਅਟ੍ਠਾਸਿ. ਗਾਥਾ ਪਨ ਦੇਵਤਾਸਂਯੁਤ੍ਤੇ ਕਥਿਤਾਵ. ਚਤੁਤ੍ਥਂ.

੫. ਅਹਿਂਸਕਸੁਤ੍ਤਵਣ੍ਣਨਾ

੧੯੧. ਪਞ੍ਚਮੇ ਅਹਿਂਸਕਭਾਰਦ੍ਵਾਜੋਤਿ ਭਾਰਦ੍ਵਾਜੋਵੇਸ, ਅਹਿਂਸਕਪਞ੍ਹਂ ਪਨ ਪੁਚ੍ਛਿ, ਤੇਨਸ੍ਸੇਤਂ ਸਙ੍ਗੀਤਿਕਾਰੇਹਿ ਨਾਮਂ ਗਹਿਤਂ. ਨਾਮੇਨ ਵਾ ਏਸ ਅਹਿਂਸਕੋ, ਗੋਤ੍ਤੇਨ ਭਾਰਦ੍ਵਾਜੋ. ਅਹਿਂਸਕਾਹਨ੍ਤਿ ਅਹਿਂਸਕੋ ਅਹਂ, ਇਤਿ ਮੇ ਭਵਂ ਗੋਤਮੋ ਜਾਨਾਤੂਤਿ ਆਹ. ਤਥਾ ਚਸ੍ਸਾਤਿ ਤਥਾ ਚੇ ਅਸ੍ਸ, ਭਵੇਯ੍ਯਾਸੀਤਿ ਅਤ੍ਥੋ. ਨ ਹਿਂਸਤੀਤਿ ਨ ਵਿਹੇਠੇਤਿ ਨ ਦੁਕ੍ਖਾਪੇਤਿ. ਪਞ੍ਚਮਂ.

੬. ਜਟਾਸੁਤ੍ਤਵਣ੍ਣਨਾ

੧੯੨. ਛਟ੍ਠੇ ਜਟਾਭਾਰਦ੍ਵਾਜੋਤਿ ਭਾਰਦ੍ਵਾਜੋਵੇਸ, ਜਟਾਪਞ੍ਹਸ੍ਸ ਪਨ ਪੁਚ੍ਛਿਤਤ੍ਤਾ ਸਙ੍ਗੀਤਿਕਾਰੇਹਿ ਏਵਂ ਵੁਤ੍ਤੋ. ਸੇਸਂ ਦੇਵਤਾਸਂਯੁਤ੍ਤੇ ਕਥਿਤਮੇਵ. ਛਟ੍ਠਂ.

੭. ਸੁਦ੍ਧਿਕਸੁਤ੍ਤਵਣ੍ਣਨਾ

੧੯੩. ਸਤ੍ਤਮੇ ਸੁਦ੍ਧਿਕਭਾਰਦ੍ਵਾਜੋਤਿ ਅਯਮ੍ਪਿ ਭਾਰਦ੍ਵਾਜੋਵ, ਸੁਦ੍ਧਿਕਪਞ੍ਹਸ੍ਸ ਪਨ ਪੁਚ੍ਛਿਤਤ੍ਤਾ ਸਙ੍ਗੀਤਿਕਾਰੇਹਿ ਏਵਂ ਵੁਤ੍ਤੋ. ਸੀਲਵਾਪਿ ਤਪੋਕਰਨ੍ਤਿ ਸੀਲਸਮ੍ਪਨ੍ਨੋਪਿ ਤਪੋਕਮ੍ਮਂ ਕਰੋਨ੍ਤੋ. ਵਿਜ੍ਜਾਚਰਣਸਮ੍ਪਨ੍ਨੋਤਿ ਏਤ੍ਥ ਵਿਜ੍ਜਾਤਿ ਤਯੋ ਵੇਦਾ. ਚਰਣਨ੍ਤਿ ਗੋਤ੍ਤਚਰਣਂ. ਸੋ ਸੁਜ੍ਝਤਿ ਨ ਅਞ੍ਞਾ ਇਤਰਾ ਪਜਾਤਿ ਸੋ ਤੇਵਿਜ੍ਜੋ ਬ੍ਰਾਹ੍ਮਣੋ ਸੁਜ੍ਝਤਿ, ਅਯਂ ਪਨ ਅਞ੍ਞਾ ਨਾਮਿਕਾ ਪਜਾ ਨ ਸੁਜ੍ਝਤੀਤਿ ਵਦਤਿ. ਬਹੁਮ੍ਪਿ ਪਲਪਂ ਜਪ੍ਪਨ੍ਤਿ ਬਹੁਮ੍ਪਿ ਪਲਪਂ ਜਪ੍ਪਨ੍ਤੋ, ‘‘ਬ੍ਰਾਹ੍ਮਣੋਵ ਸੁਜ੍ਝਤੀ’’ਤਿ ਏਵਂ ਵਚਨਸਹਸ੍ਸਮ੍ਪਿ ਭਣਨ੍ਤੋਤਿ ਅਤ੍ਥੋ. ਅਨ੍ਤੋਕਸਮ੍ਬੂਤਿ ਅਨ੍ਤੋ ਕਿਲੇਸਪੂਤਿਸਭਾਵੇਨ ਪੂਤਿਕੋ. ਸਂਕਿਲਿਟ੍ਠੋਤਿ ਕਿਲਿਟ੍ਠੇਹਿ ਕਾਯਕਮ੍ਮਾਦੀਹਿ ਸਮਨ੍ਨਾਗਤੋ. ਸਤ੍ਤਮਂ.

੮. ਅਗ੍ਗਿਕਸੁਤ੍ਤਵਣ੍ਣਨਾ

੧੯੪. ਅਟ੍ਠਮੇ ਅਗ੍ਗਿਕਭਾਰਦ੍ਵਾਜੋਤਿ ਅਯਮ੍ਪਿ ਭਾਰਦ੍ਵਾਜੋਵ, ਅਗ੍ਗਿ ਪਰਿਚਰਣਵਸੇਨ ਪਨਸ੍ਸ ਸਙ੍ਗੀਤਿਕਾਰੇਹਿ ਏਤਂ ਨਾਮਂ ਗਹਿਤਂ. ਸਨ੍ਨਿਹਿਤੋ ਹੋਤੀਤਿ ਸਂਯੋਜਿਤੋ ਹੋਤਿ. ਅਟ੍ਠਾਸੀਤਿ ਕਸ੍ਮਾ ਤਤ੍ਥ ਅਟ੍ਠਾਸਿ? ਭਗਵਾ ਕਿਰ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਇਮਂ ਬ੍ਰਾਹ੍ਮਣਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਬ੍ਰਾਹ੍ਮਣੋ ਏਵਰੂਪਂ ਅਗ੍ਗਪਾਯਾਸਂ ਗਹੇਤ੍ਵਾ ‘ਮਹਾਬ੍ਰਹ੍ਮਾਨਂ ਭੋਜੇਮੀ’ਤਿ ਅਗ੍ਗਿਮ੍ਹਿ ਝਾਪੇਨ੍ਤੋ ਅਫਲਂ ਕਰੋਤਿ ਅਪਾਯਮਗ੍ਗਂ ਓਕ੍ਕਮਤਿ, ਇਮਂ ਲਦ੍ਧਿਂ ਅਵਿਸ੍ਸਜ੍ਜਨ੍ਤੋ ਅਪਾਯਪੂਰਕੋਵ ਭਵਿਸ੍ਸਤਿ, ਗਚ੍ਛਾਮਿਸ੍ਸ ਧਮ੍ਮਦੇਸਨਾਯ, ਮਿਚ੍ਛਾਦਿਟ੍ਠਿਂ ਭਿਨ੍ਦਿਤ੍ਵਾ ਪਬ੍ਬਾਜੇਤ੍ਵਾ ਚਤ੍ਤਾਰੋ ਮਗ੍ਗੇ ਚੇਵ ਚਤ੍ਤਾਰਿ ਚ ਫਲਾਨਿ ਦੇਮੀ’’ਤਿ, ਤਸ੍ਮਾ ਪੁਬ੍ਬਣ੍ਹਸਮਯੇ ਰਾਜਗਹਂ ਪਵਿਸਿਤ੍ਵਾ ਤਤ੍ਥ ਅਟ੍ਠਾਸਿ.

ਤੀਹਿ ਵਿਜ੍ਜਾਹੀਤਿ ਤੀਹਿ ਵੇਦੇਹਿ. ਜਾਤਿਮਾਤਿ ਯਾਵ ਸਤ੍ਤਮਾ ਪਿਤਾਮਹਯੁਗਾ ਪਰਿਸੁਦ੍ਧਾਯ ਜਾਤਿਯਾ ਸਮਨ੍ਨਾਗਤੋ. ਸੁਤਵਾ ਬਹੂਤਿ ਬਹੁ ਨਾਨਪ੍ਪਕਾਰੇ ਗਨ੍ਥੇ ਸੁਤਵਾ. ਸੋਮਂ ਭੁਞ੍ਜੇਯ੍ਯਾਤਿ ਸੋ ਤੇਵਿਜ੍ਜੋ ਬ੍ਰਾਹ੍ਮਣੋ ਇਮਂ ਪਾਯਾਸਂ ਭੁਞ੍ਜਿਤੁਂ ਯੁਤ੍ਤੋ, ਤੁਮ੍ਹਾਕਂ ਪਨੇਸ ਪਾਯਾਸੋ ਅਯੁਤ੍ਤੋਤਿ ਵਦਤਿ.

ਵੇਦੀਤਿ ਪੁਬ੍ਬੇਨਿਵਾਸਞਾਣੇਨ ਜਾਨਿ ਪਟਿਵਿਜ੍ਝਿ. ਸਗ੍ਗਾਪਾਯਨ੍ਤਿ ਦਿਬ੍ਬੇਨ ਚਕ੍ਖੁਨਾ ਸਗ੍ਗਮ੍ਪਿ ਅਪਾਯਮ੍ਪਿ ਪਸ੍ਸਤਿ. ਜਾਤਿਕ੍ਖਯਨ੍ਤਿ ਅਰਹਤ੍ਤਂ. ਅਭਿਞ੍ਞਾਵੋਸਿਤੋਤਿ ਜਾਨਿਤ੍ਵਾ ਵੋਸਿਤਵੋਸਾਨੋ. ਬ੍ਰਾਹ੍ਮਣੋ ਭਵਨ੍ਤਿ ਅਵੀਚਿਤੋ ਯਾਵ ਭਵਗ੍ਗਾ ਭੋਤਾ ਗੋਤਮੇਨ ਸਦਿਸੋ ਜਾਤਿਸਮ੍ਪਨ੍ਨੋ ਖੀਣਾਸਵਬ੍ਰਾਹ੍ਮਣੋ ਨਤ੍ਥਿ, ਭਵਂਯੇਵ ਬ੍ਰਾਹ੍ਮਣੋਤਿ.

ਏਵਞ੍ਚ ਪਨ ਵਤ੍ਵਾ ਸੁਵਣ੍ਣਪਾਤਿਂ ਪੂਰੇਤ੍ਵਾ ਦਸਬਲਸ੍ਸ ਪਾਯਾਸਂ ਉਪਨਾਮੇਸਿ. ਸਤ੍ਥਾ ਉਪ੍ਪਤ੍ਤਿਂ ਦੀਪੇਤ੍ਵਾ ਭੋਜਨਂ ਪਟਿਕ੍ਖਿਪਨ੍ਤੋ ਗਾਥਾਭਿਗੀਤਂ ਮੇਤਿਆਦਿਮਾਹ. ਤਤ੍ਥ ਗਾਥਾਭਿਗੀਤਨ੍ਤਿ ਗਾਥਾਹਿ ਅਭਿਗੀਤਂ. ਅਭੋਜਨੇਯ੍ਯਨ੍ਤਿ ਅਭੁਞ੍ਜਿਤਬ੍ਬਂ. ਇਦਂ ਵੁਤ੍ਤਂ ਹੋਤਿ – ਤ੍ਵਂ, ਬ੍ਰਾਹ੍ਮਣ, ਮਯ੍ਹਂ ਏਤ੍ਤਕਂ ਕਾਲਂ ਭਿਕ੍ਖਾਚਾਰਵਤ੍ਤੇਨ ਠਿਤਸ੍ਸ ਕਟਚ੍ਛੁਮਤ੍ਤਮ੍ਪਿ ਦਾਤੁਂ ਨਾਸਕ੍ਖਿ, ਇਦਾਨਿ ਪਨ ਮਯਾ ਤੁਯ੍ਹਂ ਕਿਲਞ੍ਜਮ੍ਹਿ ਤਿਲੇ ਵਿਤ੍ਥਾਰੇਨ੍ਤੇਨ ਵਿਯ ਸਬ੍ਬੇ ਬੁਦ੍ਧਗੁਣਾ ਪਕਾਸਿਤਾ, ਇਤਿ ਗਾਯਨੇਨ ਗਾਯਿਤ੍ਵਾ ਲਦ੍ਧਂ ਵਿਯ ਇਦਂ ਭੋਜਨਂ ਹੋਤਿ, ਤਸ੍ਮਾ ਇਦਂ ਗਾਥਾਭਿਗੀਤਂ ਮੇ ਅਭੋਜਨੇਯ੍ਯਨ੍ਤਿ. ਸਮ੍ਪਸ੍ਸਤਂ, ਬ੍ਰਾਹ੍ਮਣ, ਨੇਸ ਧਮ੍ਮੋਤਿ, ਬ੍ਰਾਹ੍ਮਣ, ਅਤ੍ਥਞ੍ਚ ਧਮ੍ਮਞ੍ਚ ਸਮ੍ਪਸ੍ਸਨ੍ਤਾਨਂ ‘‘ਏਵਰੂਪਂ ਭੋਜਨਂ ਭੁਞ੍ਜਿਤਬ੍ਬ’’ਨ੍ਤਿ ਏਸ ਧਮ੍ਮੋ ਨ ਹੋਤਿ. ਸੁਧਾਭੋਜਨਮ੍ਪਿ ਗਾਥਾਭਿਗੀਤਂ ਪਨੁਦਨ੍ਤਿ ਬੁਦ੍ਧਾ, ਗਾਥਾਹਿ ਗਾਯਿਤ੍ਵਾ ਲਦ੍ਧਂ ਬੁਦ੍ਧਾ ਨੀਹਰਨ੍ਤਿਯੇਵ. ਧਮ੍ਮੇ ਸਤਿ, ਬ੍ਰਾਹ੍ਮਣ, ਵੁਤ੍ਤਿਰੇਸਾਤਿ, ਬ੍ਰਾਹ੍ਮਣ, ਧਮ੍ਮੇ ਸਤਿ ਧਮ੍ਮਂ ਅਪੇਕ੍ਖਿਤ੍ਵਾ ਧਮ੍ਮੇ ਪਤਿਟ੍ਠਾਯ ਜੀਵਿਤਂ ਕਪ੍ਪੇਨ੍ਤਾਨਂ ਏਸਾ ਵੁਤ੍ਤਿ ਅਯਂ ਆਜੀਵੋ – ਏਵਰੂਪਂ ਨੀਹਰਿਤ੍ਵਾ ਧਮ੍ਮਲਦ੍ਧਮੇਵ ਭੁਞ੍ਜਿਤਬ੍ਬਨ੍ਤਿ.

ਅਥ ਬ੍ਰਾਹ੍ਮਣੋ ਚਿਨ੍ਤੇਸਿ – ਅਹਂ ਪੁਬ੍ਬੇ ਸਮਣਸ੍ਸ ਗੋਤਮਸ੍ਸ ਗੁਣੇ ਵਾ ਅਗੁਣੇ ਵਾ ਨ ਜਾਨਾਮਿ. ਇਦਾਨਿ ਪਨਸ੍ਸਾਹਂ ਗੁਣੇ ਞਤ੍ਵਾ ਮਮ ਗੇਹੇ ਅਸੀਤਿਕੋਟਿਮਤ੍ਤਂ ਧਨਂ ਸਾਸਨੇ ਵਿਪ੍ਪਕਿਰਿਤੁਕਾਮੋ ਜਾਤੋ, ਅਯਞ੍ਚ ‘‘ਮਯਾ ਦਿਨ੍ਨਪਚ੍ਚਯਾ ਅਕਪ੍ਪਿਯਾ’’ਤਿ ਵਦਤਿ. ਅਪ੍ਪਟਿਗ੍ਗਯ੍ਹੋ ਅਹਂ ਸਮਣੇਨ ਗੋਤਮੇਨਾਤਿ. ਅਥ ਭਗਵਾ ਸਬ੍ਬਞ੍ਞੁਤਞ੍ਞਾਣਂ ਪੇਸੇਤ੍ਵਾ ਤਸ੍ਸ ਚਿਤ੍ਤਾਚਾਰਂ ਵੀਮਂਸਨ੍ਤੋ, ‘‘ਅਯਂ ਸਬ੍ਬੇਪਿ ਅਤ੍ਤਨਾ ਦਿਨ੍ਨਪਚ੍ਚਯੇ ‘ਅਕਪ੍ਪਿਯਾ’ਤਿ ਸਲ੍ਲਕ੍ਖੇਤਿ. ਯਂ ਹਿ ਭੋਜਨਂ ਆਰਬ੍ਭ ਕਥਾ ਉਪ੍ਪਨ੍ਨਾ, ਏਤਦੇਵ ਨ ਵਟ੍ਟਤਿ, ਸੇਸਾ ਨਿਦ੍ਦੋਸਾ’’ਤਿ ਬ੍ਰਾਹ੍ਮਣਸ੍ਸ ਚਤੁਨ੍ਨਂ ਪਚ੍ਚਯਾਨਂ ਦਾਨਦ੍ਵਾਰਂ ਦਸ੍ਸੇਨ੍ਤੋ ਅਞ੍ਞੇਨ ਚਾਤਿਆਦਿਮਾਹ. ਤਤ੍ਥ ਕੁਕ੍ਕੁਚ੍ਚਵੂਪਸਨ੍ਤਨ੍ਤਿ ਹਤ੍ਥਕੁਕ੍ਕੁਚ੍ਚਾਦੀਨਂ ਵਸੇਨ ਵੂਪਸਨ੍ਤਕੁਕ੍ਕੁਚ੍ਚਂ. ਅਨ੍ਨੇਨ ਪਾਨੇਨਾਤਿ ਦੇਸਨਾਮਤ੍ਤਮੇਤਂ. ਅਯਂ ਪਨਤ੍ਥੋ – ਅਞ੍ਞੇਹਿ ਤਯਾ ‘‘ਪਰਿਚ੍ਚਜਿਸ੍ਸਾਮੀ’’ਤਿ ਸਲ੍ਲਕ੍ਖਿਤੇਹਿ ਚੀਵਰਾਦੀਹਿ ਪਚ੍ਚਯੇਹਿ ਉਪਟ੍ਠਹਸ੍ਸੁ. ਖੇਤ੍ਤਂ ਹਿ ਤਂ ਪੁਞ੍ਞਪੇਕ੍ਖਸ੍ਸ ਹੋਤੀਤਿ ਏਤਂ ਤਥਾਗਤਸਾਸਨਂ ਨਾਮ ਪੁਞ੍ਞਪੇਕ੍ਖਸ੍ਸ ਪੁਞ੍ਞਤ੍ਥਿਕਸ੍ਸ ਤੁਯ੍ਹਂ ਅਪ੍ਪੇਪਿ ਬੀਜੇ ਬਹੁਸਸ੍ਸਫਲਦਾਯਕਂ ਸੁਖੇਤ੍ਤਂ ਵਿਯ ਪਟਿਯਤ੍ਤਂ ਹੋਤਿ. ਅਟ੍ਠਮਂ.

੯. ਸੁਨ੍ਦਰਿਕਸੁਤ੍ਤਵਣ੍ਣਨਾ

੧੯੫. ਨਵਮੇ ਸੁਨ੍ਦਰਿਕਭਾਰਦ੍ਵਾਜੋਤਿ ਸੁਨ੍ਦਰਿਕਾਯ ਨਦਿਯਾ ਤੀਰੇ ਅਗ੍ਗਿਜੁਹਣੇਨ ਏਵਂਲਦ੍ਧਨਾਮੋ. ਸੁਨ੍ਦਰਿਕਾਯਾਤਿ ਏਵਂਨਾਮਿਕਾਯ ਨਦਿਯਾ. ਅਗ੍ਗਿਂ ਜੁਹਤੀਤਿ ਆਹੁਤਿਂ ਪਕ੍ਖਿਪਨੇਨ ਜਾਲੇਤਿ. ਅਗ੍ਗਿਹੁਤ੍ਤਂ ਪਰਿਚਰਤੀਤਿ ਅਗ੍ਯਾਯਤਨਂ ਸਮ੍ਮਜ੍ਜਨੁਪਲੇਪਨਬਲਿਕਮ੍ਮਾਦਿਨਾ ਪਯਿਰੁਪਾਸਤਿ. ਕੋ ਨੁ ਖੋ ਇਮਂ ਹਬ੍ਯਸੇਸਂ ਭੁਞ੍ਜੇਯ੍ਯਾਤਿ ਸੋ ਕਿਰ ਬ੍ਰਾਹ੍ਮਣੋ ਅਗ੍ਗਿਮ੍ਹਿ ਹੁਤਾਵਸੇਸਂ ਪਾਯਾਸਂ ਦਿਸ੍ਵਾ ਚਿਨ੍ਤੇਸਿ – ‘‘ਅਗ੍ਗਿਮ੍ਹਿ ਤਾਵ ਪਕ੍ਖਿਤ੍ਤਪਾਯਾਸੋ ਮਹਾਬ੍ਰਹ੍ਮੁਨਾ ਭੁਤ੍ਤੋ, ਅਯਂ ਪਨ ਅਵਸੇਸੋ ਅਤ੍ਥਿ, ਤਂ ਯਦਿ ਬ੍ਰਹ੍ਮੁਨੋ ਮੁਖਤੋ ਜਾਤਸ੍ਸ ਬ੍ਰਾਹ੍ਮਣਸ੍ਸ ਦਦੇਯ੍ਯਂ, ਏਵਂ ਮੇ ਪਿਤਰਾ ਸਹ ਪੁਤ੍ਤੋਪਿ ਸਨ੍ਤਪ੍ਪਿਤੋ ਭਵੇਯ੍ਯ, ਸੁਵਿਸੋਧਿਤੋ ਚਸ੍ਸ ਬ੍ਰਹ੍ਮਲੋਕਗਾਮਿਮਗ੍ਗੋ’’ਤਿ. ਸੋ ਬ੍ਰਾਹ੍ਮਣਸ੍ਸ ਦਸ੍ਸਨਤ੍ਥਂ ਉਟ੍ਠਾਯਾਸਨਾ ਚਤੁਦ੍ਦਿਸਾ ਅਨੁਵਿਲੋਕੇਸਿ, ‘‘ਕੋ ਨੁ ਖੋ ਇਮਂ ਹਬ੍ਯਸੇਸਂ ਭੁਞ੍ਜੇਯ੍ਯਾ’’ਤਿ?

ਰੁਕ੍ਖਮੂਲੇਤਿ ਤਸ੍ਮਿਂ ਵਨਸਣ੍ਡੇ ਜੇਟ੍ਠਕਰੁਕ੍ਖਸ੍ਸ ਮੂਲੇ. ਸਸੀਸਂ ਪਾਰੁਤਂ ਨਿਸਿਨ੍ਨਨ੍ਤਿ ਸਹ ਸੀਸੇਨ ਪਾਰੁਤਕਾਯਂ ਨਿਸਿਨ੍ਨਂ. ਕਸ੍ਮਾ ਪਨ ਭਗਵਾ ਤਤ੍ਥ ਨਿਸੀਦਿ? ਭਗਵਾ ਕਿਰ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਇਮਂ ਬ੍ਰਾਹ੍ਮਣਂ ਦਿਸ੍ਵਾ ਚਿਨ੍ਤੇਸਿ – ਅਯਂ ਬ੍ਰਾਹ੍ਮਣੋ ਏਵਰੂਪਂ ਅਗ੍ਗਪਾਯਾਸਂ ਗਹੇਤ੍ਵਾ ‘‘ਮਹਾਬ੍ਰਹ੍ਮਾਨਂ ਭੋਜੇਮੀ’’ਤਿ ਅਗ੍ਗਿਮ੍ਹਿ ਝਾਪੇਨ੍ਤੋ ਅਫਲਂ ਕਰੋਤਿ…ਪੇ… ਚਤ੍ਤਾਰੋ ਮਗ੍ਗੇ ਚੇਵ ਚਤ੍ਤਾਰਿ ਚ ਫਲਾਨਿ ਦੇਮੀਤਿ. ਤਸ੍ਮਾ ਕਾਲਸ੍ਸੇਵ ਵੁਟ੍ਠਾਯ ਸਰੀਰਪਟਿਜਗ੍ਗਨਂ ਕਤ੍ਵਾ ਪਤ੍ਤਚੀਵਰਂ ਆਦਾਯ ਗਨ੍ਤ੍ਵਾ ਵੁਤ੍ਤਨਯੇਨ ਤਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਅਥ ਕਸ੍ਮਾ ਸਸੀਸਂ ਪਾਰੁਪੀਤਿ? ਹਿਮਪਾਤਸ੍ਸ ਚ ਸੀਤਵਾਤਸ੍ਸ ਚ ਪਟਿਬਾਹਣਤ੍ਥਂ, ਪਟਿਬਲੋਵ ਏਤਂ ਤਥਾਗਤੋ ਅਧਿਵਾਸੇਤੁਂ. ਸਚੇ ਪਨ ਅਪਾਰੁਪਿਤ੍ਵਾ ਨਿਸੀਦੇਯ੍ਯ, ਬ੍ਰਾਹ੍ਮਣੋ ਦੂਰਤੋਵ ਸਞ੍ਜਾਨਿਤ੍ਵਾ ਨਿਵਤ੍ਤੇਯ੍ਯ, ਏਵਂ ਸਤਿ ਕਥਾ ਨਪ੍ਪਵਤ੍ਤੇਯ੍ਯ. ਇਤਿ ਭਗਵਾ – ‘‘ਬ੍ਰਾਹ੍ਮਣੇ ਆਗਤੇ ਸੀਸਂ ਵਿਵਰਿਸ੍ਸਾਮਿ, ਅਥ ਮਂ ਸੋ ਦਿਸ੍ਵਾ ਕਥਂ ਪਵਤ੍ਤੇਸ੍ਸਤਿ, ਤਸ੍ਸਾਹਂ ਕਥਾਨੁਸਾਰੇਨ ਧਮ੍ਮਂ ਦੇਸੇਸ੍ਸਾਮੀ’’ਤਿ ਕਥਾਪਵਤ੍ਤਨਤ੍ਥਂ ਏਵਮਕਾਸਿ.

ਉਪਸਙ੍ਕਮੀਤਿ ਬ੍ਰਾਹ੍ਮਣੋ – ‘‘ਅਯਂ ਸਸੀਸਂ ਪਾਰੁਪਿਤ੍ਵਾ ਸਬ੍ਬਰਤ੍ਤਿਂ ਪਧਾਨਮਨੁਯੁਤ੍ਤੋ. ਇਮਸ੍ਸ ਦਕ੍ਖਿਣੋਦਕਂ ਦਤ੍ਵਾ ਇਮਂ ਹਬ੍ਯਸੇਸਂ ਦਸ੍ਸਾਮੀ’’ਤਿ, ਬ੍ਰਾਹ੍ਮਣਸਞ੍ਞੀ ਹੁਤ੍ਵਾ ਉਪਸਙ੍ਕਮਿ. ਮੁਣ੍ਡੋ ਅਯਂ ਭਵਂ, ਮੁਣ੍ਡਕੋ ਅਯਂ ਭਵਨ੍ਤਿ ਸੀਸੇ ਵਿਵਰਿਤਮਤ੍ਤੇ ਨੀਚਕੇਸਨ੍ਤਂ ਦਿਸ੍ਵਾ ‘‘ਮੁਣ੍ਡੋ’’ਤਿ ਆਹ. ਤਤੋ ਸੁਟ੍ਠੁਤਰਂ ਓਲੋਕੇਨ੍ਤੋ ਪਵਤ੍ਤਮਤ੍ਤਮ੍ਪਿ ਸਿਖਂ ਅਦਿਸ੍ਵਾ ਹੀਲ਼ੇਨ੍ਤੋ ‘‘ਮੁਣ੍ਡਕੋ’’ਤਿ ਆਹ. ਤਤੋਵਾਤਿ ਯਤ੍ਥ ਠਿਤੋ ਅਦ੍ਦਸ, ਤਮ੍ਹਾਵ ਪਦੇਸਾ. ਮੁਣ੍ਡਾਪਿ ਹੀਤਿ ਕੇਨਚਿ ਕਾਰਣੇਨ ਮੁਣ੍ਡਿਤਸੀਸਾਪਿ ਹੋਨ੍ਤਿ.

ਮਾ ਜਾਤਿਂ ਪੁਚ੍ਛਾਤਿ ਯਦਿ ਦਾਨਸ੍ਸ ਮਹਪ੍ਫਲਤਂ ਪਚ੍ਚਾਸੀਸਸਿ, ਜਾਤਿਂ ਮਾ ਪੁਚ੍ਛ. ਅਕਾਰਣਂ ਹਿ ਦਕ੍ਖਿਣੇਯ੍ਯਭਾਵਸ੍ਸ ਜਾਤਿ. ਚਰਣਞ੍ਚ ਪੁਚ੍ਛਾਤਿ ਅਪਿਚ ਖੋ ਸੀਲਾਦਿਗੁਣਭੇਦਂ ਚਰਣਂ ਪੁਚ੍ਛ. ਏਤਂ ਹਿ ਦਕ੍ਖਿਣੇਯ੍ਯਭਾਵਸ੍ਸ ਕਾਰਣਂ. ਇਦਾਨਿਸ੍ਸ ਤਮਤ੍ਥਂ ਵਿਭਾਵੇਨ੍ਤੋ ਕਟ੍ਠਾ ਹਵੇ ਜਾਯਤਿ ਜਾਤਵੇਦੋਤਿਆਦਿਮਾਹ. ਤਤ੍ਰਾਯਂ ਅਧਿਪ੍ਪਾਯੋ – ਇਧ ਕਟ੍ਠਾ ਅਗ੍ਗਿ ਜਾਯਤਿ, ਨ ਚ ਸੋ ਸਾਲਾਦਿਕਟ੍ਠਾ ਜਾਤੋਵ ਅਗ੍ਗਿਕਿਚ੍ਚਂ ਕਰੋਤਿ, ਸਾਪਾਨ-ਦੋਣਿਆਦਿਕਟ੍ਠਾ ਜਾਤੋ ਨ ਕਰੋਤਿ, ਅਤ੍ਤਨੋ ਪਨ ਅਚ੍ਚਿਯਾਦਿਗੁਣਸਮ੍ਪਤ੍ਤਿਯਾ ਯਤੋ ਵਾ ਤਤੋ ਵਾ ਜਾਤੋ ਕਰੋਤਿਯੇਵ. ਏਵਂ ਨ ਬ੍ਰਾਹ੍ਮਣਕੁਲਾਦੀਸੁ ਜਾਤੋਵ ਦਕ੍ਖਿਣੇਯ੍ਯੋ ਹੋਤਿ, ਚਣ੍ਡਾਲਕੁਲਾਦੀਸੁ ਜਾਤੋ ਨ ਹੋਤਿ, ਅਪਿਚ ਖੋ ਨੀਚਕੁਲਿਨੋਪਿ ਉਚ੍ਚਕੁਲਿਨੋਪਿ ਖੀਣਾਸਵ-ਮੁਨਿ ਧਿਤਿਮਾ ਹਿਰੀਨਿਸੇਧੋ ਆਜਾਨੀਯੋ ਹੋਤਿ. ਇਮਾਯ ਧਿਤਿਹਿਰਿਪਮੋਕ੍ਖਾਯ ਗੁਣਸਮ੍ਪਤ੍ਤਿਯਾ ਜਾਤਿਮਾ ਉਤ੍ਤਮਦਕ੍ਖਿਣੇਯ੍ਯੋ ਹੋਤਿ. ਸੋ ਹਿ ਧਿਤਿਯਾ ਗੁਣੇ ਧਾਰੇਤਿ, ਹਿਰਿਯਾ ਦੋਸੇ ਨਿਸੇਧੇਤੀਤਿ. ਅਪਿਚੇਤ੍ਥ ਮੁਨੀਤਿ ਮੋਨਧਮ੍ਮੇਨ ਸਮਨ੍ਨਾਗਤੋ. ਧਿਤਿਮਾਤਿ ਵੀਰਿਯਵਾ. ਆਜਾਨੀਯੋਤਿ ਕਾਰਣਾਕਾਰਣਜਾਨਨਕੋ. ਹਿਰੀਨਿਸੇਧੋਤਿ ਹਿਰਿਯਾ ਪਾਪਾਨਿ ਨਿਸੇਧੇਤ੍ਵਾ ਠਿਤੋ.

ਸਚ੍ਚੇਨ ਦਨ੍ਤੋਤਿ ਪਰਮਤ੍ਥਸਚ੍ਚੇਨ ਦਨ੍ਤੋ. ਦਮਸਾ ਉਪੇਤੋਤਿ ਇਨ੍ਦ੍ਰਿਯਦਮੇਨ ਉਪੇਤੋ. ਵੇਦਨ੍ਤਗੂਤਿ ਚਤੁਨ੍ਨਂ ਮਗ੍ਗਵੇਦਾਨਂ ਅਨ੍ਤਂ, ਚਤੂਹਿ ਵਾ ਮਗ੍ਗਵੇਦੇਹਿ ਕਿਲੇਸਾਨਂ ਅਨ੍ਤਂ ਗਤੋ. ਵੁਸਿਤਬ੍ਰਹ੍ਮਚਰਿਯੋਤਿ ਮਗ੍ਗਬ੍ਰਹ੍ਮਚਰਿਯਵਾਸਂ ਵੁਤ੍ਥੋ. ਯਞ੍ਞੋਪਨੀਤੋਤਿ ਉਪਨੀਤਯਞ੍ਞੋ ਪਟਿਯਾਦਿਤਯਞ੍ਞੋ ਚ. ਤਮੁਪਵ੍ਹਯੇਥਾਤਿ ਯੇਨ ਯਞ੍ਞੋ ਪਟਿਯਾਦਿਤੋ, ਸੋ ਤਂ ਪਰਮਤ੍ਥਬ੍ਰਾਹ੍ਮਣਂ ਅਵ੍ਹਯੇਯ੍ਯ. ‘‘ਇਨ੍ਦਮਵ੍ਹਯਾਮ, ਸੋਮਮਵ੍ਹਯਾਮ, ਵਰੁਣਮਵ੍ਹਯਾਮ, ਈਸਾਨਮਵ੍ਹਯਾਮ, ਯਾਮਮਵ੍ਹਯਾਮਾ’’ਤਿ ਇਦਂ ਪਨ ਅਵ੍ਹਾਨਂ ਨਿਰਤ੍ਥਕਂ. ਕਾਲੇਨਾਤਿ ਅਵ੍ਹਯਨ੍ਤੋ ਚ ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ ਅਨ੍ਤੋਮਜ੍ਝਨ੍ਹਿਕਕਾਲੇਯੇਵ ਤਂ ਉਪਵ੍ਹਯੇਯ੍ਯ. ਸੋ ਜੁਹਤਿ ਦਕ੍ਖਿਣੇਯ੍ਯੇਤਿ ਯੋ ਏਵਂ ਕਾਲੇ ਖੀਣਾਸਵਂ ਆਮਨ੍ਤੇਤ੍ਵਾ ਤਤ੍ਥ ਚਤੁਪਚ੍ਚਯਦਕ੍ਖਿਣਂ ਪਤਿਟ੍ਠਪੇਤਿ, ਸੋ ਦਕ੍ਖਿਣੇਯ੍ਯੇ ਜੁਹਤਿ ਨਾਮ, ਨ ਅਚੇਤਨੇ ਅਗ੍ਗਿਮ੍ਹਿ ਪਕ੍ਖਿਪਨ੍ਤੋ.

ਇਤਿ ਬ੍ਰਾਹ੍ਮਣੋ ਭਗਵਤੋ ਕਥਂ ਸੁਣਨ੍ਤੋ ਪਸੀਦਿਤ੍ਵਾ ਇਦਾਨਿ ਅਤ੍ਤਨੋ ਪਸਾਦਂ ਆਵਿਕਰੋਨ੍ਤੋ ਅਦ੍ਧਾ ਸੁਯਿਟ੍ਠਨ੍ਤਿਆਦਿਮਾਹ. ਤਸ੍ਸਤ੍ਥੋ – ਅਦ੍ਧਾ ਮਮ ਯਿਦਂ ਇਦਾਨਿ ਸੁਯਿਟ੍ਠਞ੍ਚ ਸੁਹੁਤਞ੍ਚ ਭਵਿਸ੍ਸਤਿ, ਪੁਬ੍ਬੇ ਪਨ ਅਗ੍ਗਿਮ੍ਹਿ ਝਾਪਿਤਂ ਨਿਰਤ੍ਥਕਂ ਅਹੋਸੀਤਿ. ਅਞ੍ਞੋ ਜਨੋਤਿ ‘‘ਅਹਂ ਬ੍ਰਾਹ੍ਮਣੋ, ਅਹਂ ਬ੍ਰਾਹ੍ਮਣੋ’’ਤਿ ਵਦਨ੍ਤੋ ਅਨ੍ਧਬਾਲਪੁਥੁਜ੍ਜਨੋ. ਹਬ੍ਯਸੇਸਨ੍ਤਿ ਹੁਤਸੇਸਂ. ਭੁਞ੍ਜਤੁ ਭਵਨ੍ਤਿਆਦਿ ਪੁਰਿਮਸੁਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਨ ਖ੍ਵਾਹਨ੍ਤਿ ਨ ਖੋ ਅਹਂ. ਕਸ੍ਮਾ ਪਨੇਵਮਾਹਾਤਿ? ਤਸ੍ਮਿਂ ਕਿਰ ਭੋਜਨੇ ਉਪਹਟਮਤ੍ਤੇਵ ‘‘ਸਤ੍ਥਾ ਭੁਞ੍ਜਿਸ੍ਸਤੀ’’ਤਿ ਸਞ੍ਞਾਯ ਚਤੂਸੁ ਮਹਾਦੀਪੇਸੁ ਦ੍ਵੀਸੁ ਪਰਿਤ੍ਤਦੀਪਸਹਸ੍ਸੇਸੁ ਦੇਵਤਾ ਪੁਪ੍ਫਫਲਾਦੀਨਿ ਚੇਵ ਸਪ੍ਪਿਨਵਨੀਤਤੇਲਮਧੁਫਾਣਿਤਾਦੀਨਿ ਚ ਆਦਾਯ ਮਧੁਪਟਲਂ ਪੀਲ਼ੇਤ੍ਵਾ ਮਧੁਂ ਗਣ੍ਹਨ੍ਤਿਯੋ ਵਿਯ ਦਿਬ੍ਬਾਨੁਭਾਵੇਨ ਨਿਬ੍ਬਤ੍ਤਿਤੋਜਮੇਵ ਗਹੇਤ੍ਵਾ ਪਕ੍ਖਿਪਿਂਸੁ. ਤੇਨ ਤਂ ਸੁਖੁਮਤ੍ਤਂ ਗਤਂ, ਮਨੁਸ੍ਸਾਨਞ੍ਚ ਓਲ਼ਾਰਿਕਂ ਵਤ੍ਥੂਤਿ ਤੇਸਂ ਤਾਵ ਓਲ਼ਾਰਿਕਵਤ੍ਥੁਤਾਯ ਸਮ੍ਮਾ ਪਰਿਣਾਮਂ ਨ ਗਚ੍ਛਤਿ. ਗੋਯੂਸੇ ਪਨ ਤਿਲਬੀਜਾਨਿ ਪਕ੍ਖਿਪਿਤ੍ਵਾ ਪਕ੍ਕਤ੍ਤਾ ਓਲ਼ਾਰਿਕਮਿਸ੍ਸਕਂ ਜਾਤਂ, ਦੇਵਾਨਞ੍ਚ ਸੁਖੁਮਂ ਵਤ੍ਥੂਤਿ ਤੇਸਂ ਸੁਖੁਮਵਤ੍ਥੁਤਾਯ ਸਮ੍ਮਾ ਪਰਿਣਾਮਂ ਨ ਗਚ੍ਛਤਿ. ਸੁਕ੍ਖਵਿਪਸ੍ਸਕਖੀਣਾਸਵਸ੍ਸਾਪਿ ਕੁਚ੍ਛਿਯਂ ਨ ਪਰਿਣਮਤਿ. ਅਟ੍ਠਸਮਾਪਤ੍ਤਿਲਾਭੀਖੀਣਾਸਵਸ੍ਸ ਪਨ ਸਮਾਪਤ੍ਤਿਬਲੇਨ ਪਰਿਣਾਮੇਯ੍ਯ. ਭਗਵਤੋ ਪਨ ਪਾਕਤਿਕੇਨੇਵ ਕਮ੍ਮਜਤੇਜੇਨ ਪਰਿਣਾਮੇਯ੍ਯ.

ਅਪ੍ਪਹਰਿਤੇਤਿ ਅਹਰਿਤੇ. ਸਚੇ ਹਿ ਹਰਿਤੇਸੁ ਤਿਣੇਸੁ ਪਕ੍ਖਿਪੇਯ੍ਯ, ਸਿਨਿਦ੍ਧਪਾਯਾਸੇਨ ਤਿਣਾਨਿ ਪੂਤੀਨਿ ਭਵੇਯ੍ਯੁਂ. ਬੁਦ੍ਧਾ ਚ ਭੂਤਗਾਮਸਿਕ੍ਖਾਪਦਂ ਨ ਵੀਤਿਕ੍ਕਮਨ੍ਤਿ, ਤਸ੍ਮਾ ਏਵਮਾਹ. ਯਤ੍ਥ ਪਨ ਗਲਪ੍ਪਮਾਣਾਨਿ ਮਹਾਤਿਣਾਨਿ, ਤਾਦਿਸੇ ਠਾਨੇ ਪਕ੍ਖਿਪਿਤੁਂ ਵਟ੍ਟਤਿ. ਅਪ੍ਪਾਣਕੇਤਿ ਸਪ੍ਪਾਣਕਸ੍ਮਿਂ ਹਿ ਪਰਿਤ੍ਤਕੇ ਉਦਕੇ ਪਕ੍ਖਿਤ੍ਤੇ ਪਾਣਕਾ ਮਰਨ੍ਤਿ, ਤਸ੍ਮਾ ਏਵਮਾਹ. ਯਂ ਪਨ ਗਮ੍ਭੀਰਂ ਮਹਾਉਦਕਂ ਹੋਤਿ, ਪਾਤਿਸਤੇਪਿ ਪਾਤਿਸਹਸ੍ਸੇਪਿ ਪਕ੍ਖਿਤ੍ਤੇ ਨ ਆਲੁਲ਼ਤਿ, ਤਥਾਰੂਪੇ ਉਦਕੇ ਵਟ੍ਟਤਿ. ਓਪਿਲਾਪੇਸੀਤਿ ਸੁਵਣ੍ਣਪਾਤਿਯਾ ਸਦ੍ਧਿਂਯੇਵ ਨਿਮੁਜ੍ਜਾਪੇਸਿ. ਚਿਚ੍ਚਿਟਾਯਤਿ ਚਿਟਿਚਿਟਾਯਤੀਤਿ ਏਵਰੂਪਂ ਸਦ੍ਦਂ ਕਰੋਤਿ. ਕਿਂ ਪਨੇਸ ਪਾਯਾਸਸ੍ਸ ਆਨੁਭਾਵੋ, ਉਦਾਹੁ ਤਥਾਗਤਸ੍ਸਾਤਿ? ਤਥਾਗਤਸ੍ਸ. ਅਯਂ ਹਿ ਬ੍ਰਾਹ੍ਮਣੋ ਤਂ ਪਾਯਾਸਂ ਓਪਿਲਾਪੇਤ੍ਵਾ ਉਮ੍ਮਗ੍ਗਂ ਆਰੁਯ੍ਹ ਸਤ੍ਥੁ ਸਨ੍ਤਿਕਂ ਅਨਾਗਨ੍ਤ੍ਵਾਵ ਗਚ੍ਛੇਯ੍ਯ, ਅਥ ਭਗਵਾ – ‘‘ਏਤ੍ਤਕਂ ਅਚ੍ਛਰਿਯਂ ਦਿਸ੍ਵਾ ਮਮ ਸਨ੍ਤਿਕਂ ਆਗਮਿਸ੍ਸਤਿ. ਅਥਸ੍ਸਾਹਂ ਧਮ੍ਮਦੇਸਨਾਯ ਮਿਚ੍ਛਾਦਿਟ੍ਠਿਗਹਣਂ ਭਿਨ੍ਦਿਤ੍ਵਾ ਸਾਸਨੇ ਓਤਾਰੇਤ੍ਵਾ ਅਮਤਪਾਨਂ ਪਾਯੇਸ੍ਸਾਮੀ’’ਤਿ ਅਧਿਟ੍ਠਾਨਬਲੇਨ ਏਵਮਕਾਸਿ.

ਦਾਰੁ ਸਮਾਦਹਾਨੋਤਿ ਦਾਰੁਂ ਝਾਪਯਮਾਨੋ. ਬਹਿਦ੍ਧਾ ਹਿ ਏਤਨ੍ਤਿ ਏਤਂ ਦਾਰੁਜ੍ਝਾਪਨਂ ਨਾਮ ਅਰਿਯਧਮ੍ਮਤੋ ਬਹਿਦ੍ਧਾ. ਯਦਿ ਏਤੇਨ ਸੁਦ੍ਧਿ ਭਵੇਯ੍ਯ, ਯੇ ਦਵਡਾਹਕਾਦਯੋ ਬਹੂਨਿ ਦਾਰੂਨਿ ਝਾਪੇਨ੍ਤਿ, ਤੇ ਪਠਮਤਰਂ ਸੁਜ੍ਝੇਯ੍ਯੁਂ. ਕੁਸਲਾਤਿ ਖਨ੍ਧਾਦੀਸੁ ਕੁਸਲਾ. ਅਜ੍ਝਤ੍ਤਮੇਵੁਜ੍ਜਲਯਾਮਿ ਜੋਤਿਨ੍ਤਿ ਨਿਯਕਜ੍ਝਤ੍ਤੇ ਅਤ੍ਤਨੋ ਸਨ੍ਤਾਨਸ੍ਮਿਂਯੇਵ ਞਾਣਜੋਤਿਂ ਜਾਲੇਮਿ. ਨਿਚ੍ਚਗ੍ਗਿਨੀਤਿ ਆਵਜ੍ਜਨਪਟਿਬਦ੍ਧੇਨ ਸਬ੍ਬਞ੍ਞੁਤਞ੍ਞਾਣੇਨ ਨਿਚ੍ਚਂ ਪਜ੍ਜਲਿਤਗ੍ਗਿ. ਨਿਚ੍ਚਸਮਾਹਿਤਤ੍ਤੋਤਿ ਨਿਚ੍ਚਂ ਸਮ੍ਮਾ ਠਪਿਤਚਿਤ੍ਤੋ. ਬ੍ਰਹ੍ਮਚਰਿਯਂ ਚਰਾਮੀਤਿ ਬੋਧਿਮਣ੍ਡੇ ਚਰਿਤਂ ਬ੍ਰਹ੍ਮਚਰਿਯਂ ਗਹੇਤ੍ਵਾ ਏਵਂ ਵਦਤਿ.

ਮਾਨੋ ਹਿ ਤੇ, ਬ੍ਰਾਹ੍ਮਣ, ਖਾਰਿਭਾਰੋਤਿ ਯਥਾ ਖਾਰਿਭਾਰੋ ਖਨ੍ਧੇਨ ਵਯ੍ਹਮਾਨੋ ਉਪਰਿ ਠਿਤੋਪਿ ਅਕ੍ਕਨ੍ਤਕ੍ਕਨ੍ਤਟ੍ਠਾਨੇ ਪਥਵਿਯਾ ਸਦ੍ਧਿਂ ਫੁਸੇਤਿ, ਏਵਮੇਵ ਜਾਤਿਗੋਤ੍ਤਕੁਲਾਦੀਨਿ ਮਾਨਵਤ੍ਥੂਨਿ ਨਿਸ੍ਸਾਯ ਉਸ੍ਸਾਪਿਤੋ ਮਾਨੋਪਿ ਤਤ੍ਥ ਤਤ੍ਥ ਇਸ੍ਸਂ ਉਪ੍ਪਾਦੇਨ੍ਤੋ ਚਤੂਸੁ ਅਪਾਯੇਸੁ ਸਂਸੀਦਾਪੇਤਿ. ਤੇਨਾਹ ‘‘ਮਾਨੋ ਹਿ ਤੇ, ਬ੍ਰਾਹ੍ਮਣ, ਖਾਰਿਭਾਰੋ’’ਤਿ. ਕੋਧੋ ਧੂਮੋਤਿ ਤਵ ਞਾਣਗ੍ਗਿਸ੍ਸ ਉਪਕ੍ਕਿਲੇਸਟ੍ਠੇਨ ਕੋਧੋ ਧੁਮੋ. ਤੇਨ ਹਿ ਤੇ ਉਪਕ੍ਕਿਲਿਟ੍ਠੋ ਞਾਣਗ੍ਗਿ ਨ ਵਿਰੋਚਤਿ. ਭਸ੍ਮਨਿ ਮੋਸਵਜ੍ਜਨ੍ਤਿ ਨਿਰੋਜਟ੍ਠੇਨ ਮੁਸਾਵਾਦੋ ਛਾਰਿਕਾ ਨਾਮ. ਯਥਾ ਹਿ ਛਾਰਿਕਾਯ ਪਟਿਚ੍ਛਨ੍ਨੋ ਅਗ੍ਗਿ ਨ ਜੋਤੇਤਿ, ਏਵਂ ਤੇ ਮੁਸਾਵਾਦੇਨ ਪਟਿਚ੍ਛਨ੍ਨਂ ਞਾਣਨ੍ਤਿ ਦਸ੍ਸੇਤਿ. ਜਿਵ੍ਹਾ ਸੁਜਾਤਿ ਯਥਾ ਤੁਯ੍ਹਂ ਸੁਵਣ੍ਣਰਜਤਲੋਹਕਟ੍ਠਮਤ੍ਤਿਕਾਸੁ ਅਞ੍ਞਤਰਮਯਾ ਯਾਗਯਜਨਤ੍ਥਾਯ ਸੁਜਾ ਹੋਤਿ, ਏਵਂ ਮਯ੍ਹਂ ਧਮ੍ਮਯਾਗਂ ਯਜਨਤ੍ਥਾਯ ਪਹੂਤਜਿਵ੍ਹਾ ਸੁਜਾਤਿ ਵਦਤਿ. ਹਦਯਂ ਜੋਤਿਟ੍ਠਾਨਨ੍ਤਿ ਯਥਾ ਤੁਯ੍ਹਂ ਨਦੀਤੀਰੇ ਜੋਤਿਟ੍ਠਾਨਂ, ਏਵਂ ਮਯ੍ਹਂ ਧਮ੍ਮਯਾਗਸ੍ਸ ਯਜਨਟ੍ਠਾਨਤ੍ਥੇਨ ਸਤ੍ਤਾਨਂ ਹਦਯਂ ਜੋਤਿਟ੍ਠਾਨਂ. ਅਤ੍ਤਾਤਿ ਚਿਤ੍ਤਂ.

ਧਮ੍ਮੋ ਰਹਦੋਤਿ ਯਥਾ ਤ੍ਵਂ ਅਗ੍ਗਿਂ ਪਰਿਚਰਿਤ੍ਵਾ ਧੂਮਛਾਰਿਕਸੇਦਕਿਲਿਟ੍ਠਸਰੀਰੋ ਸੁਨ੍ਦਰਿਕਂ ਨਦਿਂ ਓਤਰਿਤ੍ਵਾ ਨ੍ਹਾਯਸਿ, ਏਵਂ ਮਯ੍ਹਂ ਸੁਨ੍ਦਰਿਕਾਸਦਿਸੇਨ ਬਾਹਿਰੇਨ ਰਹਦੇਨ ਅਤ੍ਥੋ ਨਤ੍ਥਿ, ਅਟ੍ਠਙ੍ਗਿਕਮਗ੍ਗਧਮ੍ਮੋ ਪਨ ਮਯ੍ਹਂ ਰਹਦੋ, ਤਤ੍ਰਾਹਂ ਪਾਣਸਤਮ੍ਪਿ ਪਾਣਸਹਸ੍ਸਮ੍ਪਿ ਚਤੁਰਾਸੀਤਿਪਾਣਸਹਸ੍ਸਾਨਿਪਿ ਏਕਪ੍ਪਹਾਰੇਨ ਨ੍ਹਾਪੇਮਿ. ਸੀਲਤਿਤ੍ਥੋਤਿ ਤਸ੍ਸ ਪਨ ਮੇ ਧਮ੍ਮਰਹਦਸ੍ਸ ਚਤੁਪਾਰਿਸੁਦ੍ਧਿਸੀਲਂ ਤਿਤ੍ਥਨ੍ਤਿ ਦਸ੍ਸੇਤਿ. ਅਨਾਵਿਲੋਤਿ ਯਥਾ ਤੁਯ੍ਹਂ ਸੁਨ੍ਦਰਿਕਾ ਨਦੀ ਚਤੂਹਿ ਪਞ੍ਚਹਿ ਏਕਤੋ ਨ੍ਹਾਯਨ੍ਤੇਹਿ ਹੇਟ੍ਠੁਪਰਿਯਵਾਲਿਕਾ ਆਲੁਲ਼ਾ ਹੋਤਿ, ਨ ਏਵਂ ਮਯ੍ਹਂ ਰਹਦੋ, ਅਨੇਕਸਤਸਹਸ੍ਸੇਸੁਪਿ ਪਾਣੇਸੁ ਓਤਰਿਤ੍ਵਾ ਨ੍ਹਾਯਨ੍ਤੇਸੁ ਸੋ ਅਨਾਵਿਲੋ ਵਿਪ੍ਪਸਨ੍ਨੋਵ ਹੋਤਿ. ਸਬ੍ਭਿ ਸਤਂ ਪਸਤ੍ਥੋਤਿ ਪਣ੍ਡਿਤੇਹਿ ਪਣ੍ਡਿਤਾਨਂ ਪਸਟ੍ਠੋ. ਉਤ੍ਤਮਤ੍ਥੇਨ ਵਾ ਸੋ ਸਬ੍ਭੀਤਿ ਵੁਚ੍ਚਤਿ, ਪਣ੍ਡਿਤੇਹਿ ਪਸਤ੍ਥਤ੍ਤਾ ਸਤਂ ਪਸਤ੍ਥੋ. ਤਰਨ੍ਤਿ ਪਾਰਨ੍ਤਿ ਨਿਬ੍ਬਾਨਪਾਰਂ ਗਚ੍ਛਨ੍ਤਿ.

ਇਦਾਨਿ ਅਰਿਯਮਗ੍ਗਰਹਦਸ੍ਸ ਅਙ੍ਗਾਨਿ ਉਦ੍ਧਰਿਤ੍ਵਾ ਦਸ੍ਸੇਨ੍ਤੋ ਸਚ੍ਚਂ ਧਮ੍ਮੋਤਿਆਦਿਮਾਹ. ਤਤ੍ਥ ਸਚ੍ਚਨ੍ਤਿ ਵਚੀਸਚ੍ਚਂ. ਧਮ੍ਮੋਤਿ ਇਮਿਨਾ ਦਿਟ੍ਠਿਸਙ੍ਕਪ੍ਪਵਾਯਾਮਸਤਿਸਮਾਧਯੋ ਦਸ੍ਸੇਤਿ. ਸਂਯਮੋਤਿ ਇਮਿਨਾ ਕਮ੍ਮਨ੍ਤਾਜੀਵਾ ਗਹਿਤਾ. ਸਚ੍ਚਨ੍ਤਿ ਵਾ ਇਮਿਨਾ ਮਗ੍ਗਸਚ੍ਚਂ ਗਹਿਤਂ. ਸਾ ਅਤ੍ਥਤੋ ਸਮ੍ਮਾਦਿਟ੍ਠਿ. ਵੁਤ੍ਤਞ੍ਹੇਤਂ – ‘‘ਸਮ੍ਮਾਦਿਟ੍ਠਿ ਮਗ੍ਗੋ ਚੇਵ ਹੇਤੁ ਚਾ’’ਤਿ (ਧ. ਸ. ੧੦੩੯). ਸਮ੍ਮਾਦਿਟ੍ਠਿਯਾ ਪਨ ਗਹਿਤਾਯ ਤਗ੍ਗਤਿਕਤ੍ਤਾ ਸਮ੍ਮਾਸਙ੍ਕਪ੍ਪੋ ਗਹਿਤੋਵ ਹੋਤਿ. ਧਮ੍ਮੋਤਿ ਇਮਿਨਾ ਵਾਯਾਮਸਤਿਸਮਾਧਯੋ. ਸਂਯਮੋਤਿ ਇਮਿਨਾ ਵਾਚਾਕਮ੍ਮਨ੍ਤਾਜੀਵਾ. ਏਵਮ੍ਪਿ ਅਟ੍ਠਙ੍ਗਿਕੋ ਮਗ੍ਗੋ ਦਸ੍ਸਿਤੋ ਹੋਤਿ. ਅਥ ਵਾ ਸਚ੍ਚਨ੍ਤਿ ਪਰਮਤ੍ਥਸਚ੍ਚਂ, ਤਂ ਅਤ੍ਥਤੋ ਨਿਬ੍ਬਾਨਂ. ਧਮ੍ਮੋਤਿਪਦੇਨ ਦਿਟ੍ਠਿ ਸਙ੍ਕਪ੍ਪੋ ਵਾਯਾਮੋ ਸਤਿ ਸਮਾਧੀਤਿ ਪਞ੍ਚਙ੍ਗਾਨਿ ਗਹਿਤਾਨਿ. ਸਂਯਮੋਤਿ ਵਾਚਾ ਕਮ੍ਮਨ੍ਤੋ ਆਜੀਵੋਤਿ ਤੀਣਿ. ਏਵਮ੍ਪਿ ਅਟ੍ਠਙ੍ਗਿਕੋ ਮਗ੍ਗੋ ਦਸ੍ਸਿਤੋ ਹੋਤਿ. ਬ੍ਰਹ੍ਮਚਰਿਯਨ੍ਤਿ ਏਤਂ ਬ੍ਰਹ੍ਮਚਰਿਯਂ ਨਾਮ. ਮਜ੍ਝੇ ਸਿਤਾਤਿ ਸਸ੍ਸਤੁਚ੍ਛੇਦੇ ਵਜ੍ਜੇਤ੍ਵਾ ਮਜ੍ਝੇ ਨਿਸ੍ਸਿਤਾ. ਬ੍ਰਹ੍ਮਪਤ੍ਤੀਤਿ ਸੇਟ੍ਠਪਤ੍ਤਿ. ਸ ਤੁਜ੍ਜੁਭੂਤੇਸੁ ਨਮੋ ਕਰੋਹੀਤਿ ਏਤ੍ਥ ਤ-ਕਾਰੋ ਪਦਸਨ੍ਧਿਕਰੋ, ਸ ਤ੍ਵਂ ਉਜੁਭੂਤੇਸੁ ਖੀਣਾਸਵੇਸੁ ਨਮੋ ਕਰੋਹੀਤਿ ਅਤ੍ਥੋ. ਤਮਹਂ ਨਰਂ ਧਮ੍ਮਸਾਰੀਤਿ ਬ੍ਰੂਮੀਤਿ ਯੋ ਏਵਂ ਪਟਿਪਜ੍ਜਤਿ, ਤਮਹਂ ਪੁਗ੍ਗਲਂ ‘‘ਧਮ੍ਮਸਾਰੀ ਏਸੋ ਧਮ੍ਮਸਾਰਿਯਾ ਪਟਿਚ੍ਛਨ੍ਨੋ’’ਤਿ ਚ ‘‘ਕੁਸਲਧਮ੍ਮੇਹਿ ਅਕੁਸਲਧਮ੍ਮੇ ਸਾਰੇਤ੍ਵਾ ਠਿਤੋ’’ਤਿ ਵਾਤਿ ਵਦਾਮੀਤਿ. ਨਵਮਂ.

੧੦. ਬਹੁਧੀਤਰਸੁਤ੍ਤਵਣ੍ਣਨਾ

੧੯੬. ਦਸਮੇ ਅਞ੍ਞਤਰਸ੍ਮਿਂ ਵਨਸਣ੍ਡੇਤਿ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਸ੍ਸ ਬ੍ਰਾਹ੍ਮਣਸ੍ਸ ਅਰਹਤ੍ਤਸ੍ਸ ਉਪਨਿਸ੍ਸਯਂ ਦਿਸ੍ਵਾ ‘‘ਗਚ੍ਛਾਮਿਸ੍ਸ ਸਙ੍ਗਹਂ ਕਰਿਸ੍ਸਾਮੀ’’ਤਿ ਗਨ੍ਤ੍ਵਾ ਤਸ੍ਮਿਂ ਵਨਸਣ੍ਡੇ ਵਿਹਰਤਿ. ਨਟ੍ਠਾ ਹੋਨ੍ਤੀਤਿ ਕਸਿਤ੍ਵਾ ਵਿਸ੍ਸਟ੍ਠਾ ਅਟਵਿਮੁਖਾ ਚਰਮਾਨਾ ਬ੍ਰਾਹ੍ਮਣੇ ਭੁਞ੍ਜਿਤੁਂ ਗਤੇ ਪਲਾਤਾ ਹੋਨ੍ਤਿ. ਪਲ੍ਲਙ੍ਕਨ੍ਤਿ ਸਮਨ੍ਤਤੋ ਊਰੁਬਦ੍ਧਾਸਨਂ. ਆਭੁਜਿਤ੍ਵਾਤਿ ਬਨ੍ਧਿਤ੍ਵਾ. ਉਜੁਂ ਕਾਯਂ ਪਣਿਧਾਯਾਤਿ ਉਪਰਿਮਂ ਸਰੀਰਂ ਉਜੁਕਂ ਠਪੇਤ੍ਵਾ, ਅਟ੍ਠਾਰਸ ਪਿਟ੍ਠਿਕਣ੍ਟਕੇ ਕੋਟਿਯਾ ਕੋਟਿਂ ਪਟਿਪਾਦੇਤ੍ਵਾ. ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾਤਿ ਕਮ੍ਮਟ੍ਠਾਨਾਭਿਮੁਖਂ ਸਤਿਂ ਠਪਯਿਤ੍ਵਾ, ਮੁਖਸਮੀਪੇ ਵਾ ਕਤ੍ਵਾਤਿ ਅਤ੍ਥੋ. ਤੇਨੇਵ ਵਿਭਙ੍ਗੇ ਵੁਤ੍ਤਂ – ‘‘ਅਯਂ ਸਤਿ ਉਪਟ੍ਠਿਤਾ ਹੋਤਿ ਸੂਪਟ੍ਠਿਤਾ ਨਾਸਿਕਗ੍ਗੇ ਵਾ ਮੁਖਨਿਮਿਤ੍ਤੇ ਵਾ, ਤੇਨ ਵੁਚ੍ਚਤਿ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ’’ਤਿ (ਵਿਭ. ੫੩੭). ਅਥ ਵਾ ‘‘ਪਰੀਤਿ ਪਰਿਗ੍ਗਹਟ੍ਠੋ. ਮੁਖਨ੍ਤਿ ਨਿਯ੍ਯਾਨਟ੍ਠੋ. ਸਤੀਤਿ ਉਪਟ੍ਠਾਨਟ੍ਠੋ. ਤੇਨ ਵੁਚ੍ਚਤਿ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ’’ਤਿ ਏਵਂ ਪਟਿਸਮ੍ਭਿਦਾਯਂ (ਪਟਿ. ਮ. ੧.੧੬੪) ਵੁਤ੍ਤਨਯੇਨਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਤਤ੍ਰਾਯਂ ਸਙ੍ਖੇਪੋ – ‘‘ਪਰਿਗ੍ਗਹਿਤਨਿਯ੍ਯਾਨਂ ਸਤਿਂ ਕਤ੍ਵਾ’’ਤਿ. ਏਵਂ ਨਿਸੀਦਨ੍ਤੋ ਚ ਪਨ ਛਬ੍ਬਣ੍ਣਾ ਘਨਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਨਿਸੀਦਿ. ਉਪਸਙ੍ਕਮੀਤਿ ਦੋਮਨਸ੍ਸਾਭਿਭੂਤੋ ਆਹਿਣ੍ਡਨ੍ਤੋ, ‘‘ਸੁਖੇਨ ਵਤਾਯਂ ਸਮਣੋ ਨਿਸਿਨ੍ਨੋ’’ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿ.

ਅਜ੍ਜਸਟ੍ਠਿਂ ਨ ਦਿਸ੍ਸਨ੍ਤੀਤਿ ਅਜ੍ਜ ਛਦਿਵਸਮਤ੍ਤਕਾ ਪਟ੍ਠਾਯ ਨ ਦਿਸ੍ਸਨ੍ਤਿ. ਪਾਪਕਾਤਿ ਲਾਮਕਾ ਤਿਲਖਾਣੁਕਾ. ਤੇਨ ਕਿਰ ਤਿਲਖੇਤ੍ਤੇ ਵਪਿਤੇ ਤਦਹੇਵ ਦੇਵੋ ਵਸ੍ਸਿਤ੍ਵਾ ਤਿਲੇ ਪਂਸੁਮ੍ਹਿ ਓਸੀਦਾਪੇਸਿ, ਪੁਪ੍ਫਂ ਵਾ ਫਲਂ ਵਾ ਗਹੇਤੁਂ ਨਾਸਕ੍ਖਿਂਸੁ. ਯੇਪਿ ਵਡ੍ਢਿਂਸੁ, ਤੇਸਂ ਉਪਰਿ ਪਾਣਕਾ ਪਤਿਤ੍ਵਾ ਪਣ੍ਣਾਨਿ ਖਾਦਿਂਸੁ, ਏਕਪਣ੍ਣਦੁਪਣ੍ਣਾ ਖਾਣੁਕਾ ਅਵਸਿਸ੍ਸਿਂਸੁ. ਬ੍ਰਾਹ੍ਮਣੋ ਖੇਤ੍ਤਂ ਓਲੋਕੇਤੁਂ ਗਤੋ ਤੇ ਦਿਸ੍ਵਾ – ‘‘ਵਡ੍ਢਿਯਾ ਮੇ ਤਿਲਾ ਗਹਿਤਾ, ਤੇਪਿ ਨਟ੍ਠਾ’’ਤਿ ਦੋਮਨਸ੍ਸਜਾਤੋ ਅਹੋਸਿ, ਤਂ ਗਹੇਤ੍ਵਾ ਇਮਂ ਗਾਥਮਾਹ.

ਉਸ੍ਸੋਲ਼੍ਹਿਕਾਯਾਤਿ ਉਸ੍ਸਾਹੇਨ ਕਣ੍ਣਨਙ੍ਗੁਟ੍ਠਾਦੀਨਿ ਉਕ੍ਖਿਪਿਤ੍ਵਾ ਵਿਚਰਨ੍ਤਾ ਉਪ੍ਪਤਨ੍ਤਿ. ਤਸ੍ਸ ਕਿਰ ਅਨੁਪੁਬ੍ਬੇਨ ਭੋਗੇਸੁ ਪਰਿਕ੍ਖੀਣੇਸੁ ਪਕ੍ਖਿਪਿਤਬ੍ਬਸ੍ਸ ਅਭਾਵੇਨ ਤੁਚ੍ਛਕੋਟ੍ਠਾ ਅਹੇਸੁਂ. ਤਸ੍ਸ ਇਤੋ ਚਿਤੋ ਚ ਸਤ੍ਤਹਿ ਘਰੇਹਿ ਆਗਤਾ ਮੂਸਿਕਾ ਤੇ ਤੁਚ੍ਛਕੋਟ੍ਠੇ ਪਵਿਸਿਤ੍ਵਾ ਉਯ੍ਯਾਨਕੀਲ਼ਂ ਕੀਲ਼ਨ੍ਤਾ ਵਿਯ ਨਚ੍ਚਨ੍ਤਿ, ਤਂ ਗਹੇਤ੍ਵਾ ਏਵਮਾਹ.

ਉਪ੍ਪਾਟਕੇਹਿ ਸਞ੍ਛਨ੍ਨੋਤਿ ਉਪ੍ਪਾਟਕਪਾਣਕੇਹਿ ਸਞ੍ਛਨ੍ਨੋ. ਤਸ੍ਸ ਕਿਰ ਬ੍ਰਾਹ੍ਮਣਸ੍ਸ ਸਯਨਤ੍ਥਾਯ ਸਨ੍ਥਤਂ ਤਿਣਪਣ੍ਣਸਨ੍ਥਾਰਂ ਕੋਚਿ ਅਨ੍ਤਰਨ੍ਤਰਾ ਪਟਿਜਗ੍ਗਨ੍ਤੋ ਨਤ੍ਥਿ. ਸੋ ਦਿਵਸਂ ਅਰਞ੍ਞੇ ਕਮ੍ਮਂ ਕਤ੍ਵਾ ਸਾਯਂ ਆਗਨ੍ਤ੍ਵਾ ਤਸ੍ਮਿਂ ਨਿਪਜ੍ਜਤਿ. ਅਥਸ੍ਸ ਉਪ੍ਪਾਟਕਪਾਣਕਾ ਸਰੀਰਂ ਏਕਚ੍ਛਨ੍ਨਂ ਕਰੋਨ੍ਤਾ ਖਾਦਨ੍ਤਿ, ਤਂ ਗਹੇਤ੍ਵਾ ਏਵਮਾਹ.

ਵਿਧਵਾਤਿ ਮਤਪਤਿਕਾ. ਯਾਵ ਕਿਰ ਤਸ੍ਸ ਬ੍ਰਾਹ੍ਮਣਸ੍ਸ ਗੇਹੇ ਵਿਭਵਮਤ੍ਤਾ ਅਹੋਸਿ, ਤਾਵ ਤਾ ਵਿਧਵਾਪਿ ਹੁਤ੍ਵਾ ਪਤਿਕੁਲੇਸੁ ਵਸਿਤੁਂ ਲਭਿਂਸੁ. ਯਦਾ ਪਨ ਸੋ ਨਿਦ੍ਧਨੋ ਜਾਤੋ, ਤਦਾ ਤਾ ‘‘ਪਿਤੁਘਰਂ ਗਚ੍ਛਥਾ’’ਤਿ ਸਸ੍ਸੁਸਸੁਰਾਦੀਹਿ ਨਿਕ੍ਕਡ੍ਢਿਤਾ ਤਤੋ ਤਸ੍ਸੇਵ ਘਰਂ ਆਗਨ੍ਤ੍ਵਾ ਵਸਨ੍ਤਿਯੋ ਬ੍ਰਾਹ੍ਮਣਸ੍ਸ ਭੋਜਨਕਾਲੇ ‘‘ਗਚ੍ਛਥ ਅਯ੍ਯਕੇਨ ਸਦ੍ਧਿਂ ਭੁਞ੍ਜਥਾ’’ਤਿ ਪੁਤ੍ਤੇ ਪੇਸੇਨ੍ਤਿ, ਤੇਹਿ ਪਾਤਿਯਂ ਹਤ੍ਥੇਸੁ ਓਤਾਰਿਤੇਸੁ ਬ੍ਰਾਹ੍ਮਣੋ ਹਤ੍ਥਸ੍ਸ ਓਕਾਸਂ ਨ ਲਭਤਿ. ਤਂ ਗਹੇਤ੍ਵਾ ਇਮਂ ਗਾਥਮਾਹ.

ਪਿਙ੍ਗਲਾਤਿ ਕਲ਼ਾਰਪਿਙ੍ਗਲਾ. ਤਿਲਕਾਹਤਾਤਿ ਕਾਲ਼ਸੇਤਾਦਿਵਣ੍ਣੇਹਿ ਤਿਲਕੇਹਿ ਆਹਤਗਤ੍ਤਾ. ਸੋਤ੍ਤਂ ਪਾਦੇਨ ਬੋਧੇਤੀਤਿ ਨਿਦ੍ਦਂ ਓਕ੍ਕਨ੍ਤਂ ਪਾਦੇਨ ਪਹਰਿਤ੍ਵਾ ਪਬੋਧੇਤਿ. ਅਯਂ ਕਿਰ ਬ੍ਰਾਹ੍ਮਣੋ ਮੂਸਿਕਸਦ੍ਦੇਨ ਉਬ੍ਬਾਲ਼੍ਹੋ ਉਪ੍ਪਾਟਕੇਹਿ ਚ ਖਜ੍ਜਮਾਨੋ ਸਬ੍ਬਰਤ੍ਤਿਂ ਨਿਦ੍ਦਂ ਅਲਭਿਤ੍ਵਾ ਪਚ੍ਚੂਸਕਾਲੇ ਨਿਦ੍ਦਾਯਤਿ. ਅਥ ਨਂ ਅਕ੍ਖੀਸੁ ਨਿਮ੍ਮਿਲਿਤਮਤ੍ਤੇਸ੍ਵੇਵ – ‘‘ਕਿਂ ਕਰੋਸਿ, ਬ੍ਰਾਹ੍ਮਣ, ਪਚ੍ਛਾ ਚ ਪੁਬ੍ਬੇ ਚ ਗਹਿਤਸ੍ਸ ਇਣਸ੍ਸ? ਵਡ੍ਢਿ ਮਤ੍ਥਕਂ ਪਤ੍ਤਾ, ਸਤ੍ਤ ਧੀਤਰੋ ਪੋਸੇਤਬ੍ਬਾ. ਇਦਾਨਿ ਇਣਾਯਿਕਾ ਆਗਨ੍ਤ੍ਵਾ ਗੇਹਂ ਪਰਿਵਾਰੇਸ੍ਸਨ੍ਤਿ, ਗਚ੍ਛ ਕਮ੍ਮਂ ਕਰੋਹੀ’’ਤਿ ਪਾਦੇਨ ਪਹਰਿਤ੍ਵਾ ਪਬੋਧੇਤਿ. ਤਂ ਗਹੇਤ੍ਵਾ ਇਮਂ ਗਾਥਮਾਹ.

ਇਣਾਯਿਕਾਤਿ ਯੇਸਂ ਅਨੇਨ ਹਤ੍ਥਤੋ ਇਣਂ ਗਹਿਤਂ. ਸੋ ਕਿਰ ਕਸ੍ਸਚਿ ਹਤ੍ਥਤੋ ਏਕਂ ਕਹਾਪਣਂ ਕਸ੍ਸਚਿ ਦ੍ਵੇ ਕਸ੍ਸਚਿ ਦਸ…ਪੇ… ਕਸ੍ਸਚਿ ਸਤਨ੍ਤਿ ਏਵਂ ਬਹੂਨਂ ਹਤ੍ਥਤੋ ਇਣਂ ਅਗ੍ਗਹੇਸਿ. ਤੇ ਦਿਵਾ ਬ੍ਰਾਹ੍ਮਣਂ ਅਪਸ੍ਸਨ੍ਤਾ ‘‘ਗੇਹਤੋ ਤਂ ਨਿਕ੍ਖਨ੍ਤਮੇਵ ਗਣ੍ਹਿਸ੍ਸਾਮਾ’’ਤਿ ਬਲਵਪਚ੍ਚੂਸੇ ਗਨ੍ਤ੍ਵਾ ਚੋਦੇਨ੍ਤਿ. ਤਂ ਗਹੇਤ੍ਵਾ ਇਮਂ ਗਾਥਮਾਹ.

ਭਗਵਾ ਤੇਨ ਬ੍ਰਾਹ੍ਮਣੇਨ ਇਮਾਹਿ ਸਤ੍ਤਹਿ ਗਾਥਾਹਿ ਦੁਕ੍ਖੇ ਕਥਿਤੇ ‘‘ਯਂ ਯਂ, ਬ੍ਰਾਹ੍ਮਣ, ਤਯਾ ਦੁਕ੍ਖਂ ਕਥਿਤਂ, ਸਬ੍ਬਮੇਤਂ ਮਯ੍ਹਂ ਨਤ੍ਥੀ’’ਤਿ ਦਸ੍ਸੇਨ੍ਤੋ ਪਟਿਗਾਥਾਹਿ ਬ੍ਰਾਹ੍ਮਣਸ੍ਸ ਧਮ੍ਮਦੇਸਨਂ ਵਡ੍ਢੇਸਿ. ਬ੍ਰਾਹ੍ਮਣੋ ਤਾ ਗਾਥਾ ਸੁਤ੍ਵਾ ਭਗਵਤਿ ਪਸਨ੍ਨੋ ਸਰਣੇਸੁ ਪਤਿਟ੍ਠਾਯ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ. ਤਂ ਦਸ੍ਸੇਤੁਂ ਏਵਂ ਵੁਤ੍ਤੇ ਭਾਰਦ੍ਵਾਜਗੋਤ੍ਤੋਤਿਆਦਿ ਵੁਤ੍ਤਂ. ਤਤ੍ਥ ਅਲਤ੍ਥਾਤਿ ਲਭਿ.

ਤਞ੍ਚ ਪਨ ਬ੍ਰਾਹ੍ਮਣਂ ਭਗਵਾ ਪਬ੍ਬਾਜੇਤ੍ਵਾ ਆਦਾਯ ਜੇਤਵਨਂ ਗਨ੍ਤ੍ਵਾ ਪੁਨਦਿਵਸੇ ਤੇਨ ਥੇਰੇਨ ਪਚ੍ਛਾਸਮਣੇਨ ਕੋਸਲਰਞ੍ਞੋ ਗੇਹਦ੍ਵਾਰਂ ਅਗਮਾਸਿ. ਰਾਜਾ ‘‘ਸਤ੍ਥਾ ਆਗਤੋ’’ਤਿ ਸੁਤ੍ਵਾ ਪਾਸਾਦਾ ਓਰੁਯ੍ਹ ਵਨ੍ਦਿਤ੍ਵਾ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਤਥਾਗਤਂ ਉਪਰਿਪਾਸਾਦਂ ਆਰੋਪੇਤ੍ਵਾ ਵਰਾਸਨੇ ਨਿਸੀਦਾਪੇਤ੍ਵਾ ਗਨ੍ਧੋਦਕੇਨ ਪਾਦੇ ਧੋਵਿਤ੍ਵਾ ਸਤਪਾਕਤੇਲੇਨ ਮਕ੍ਖੇਤ੍ਵਾ ਯਾਗੁਂ ਆਹਰਾਪੇਤ੍ਵਾ ਰਜਤਦਣ੍ਡਂ ਸੁਵਣ੍ਣਕਟਚ੍ਛੁਂ ਗਹੇਤ੍ਵਾ ਸਤ੍ਥੁ ਉਪਨਾਮੇਸਿ. ਸਤ੍ਥਾ ਪਤ੍ਤਂ ਪਿਦਹਿ. ਰਾਜਾ ਤਥਾਗਤਸ੍ਸ ਪਾਦੇਸੁ ਪਤਿਤ੍ਵਾ, ‘‘ਸਚੇ ਮੇ, ਭਨ੍ਤੇ, ਦੋਸੋ ਅਤ੍ਥਿ, ਖਮਥਾ’’ਤਿ ਆਹ. ਨਤ੍ਥਿ, ਮਹਾਰਾਜਾਤਿ. ਅਥ ਕਸ੍ਮਾ ਯਾਗੁਂ ਨ ਗਣ੍ਹਥਾਤਿ? ਪਲਿਬੋਧੋ ਅਤ੍ਥਿ, ਮਹਾਰਾਜਾਤਿ. ਕਿਂ ਪਨ, ਭਨ੍ਤੇ, ਯਾਗੁਂ ਅਗਣ੍ਹਨ੍ਤੇਹੇਵ ਲਭਿਤਬ੍ਬੋ ਏਸ ਪਲਿਬੋਧੋ, ਪਟਿਬਲੋ ਅਹਂ ਪਲਿਬੋਧਂ ਦਾਤੁਂ, ਗਣ੍ਹਥ, ਭਨ੍ਤੇਤਿ. ਸਤ੍ਥਾ ਅਗ੍ਗਹੇਸਿ. ਮਹਲ੍ਲਕਤ੍ਥੇਰੋਪਿ ਦੀਘਰਤ੍ਤਂ ਛਾਤੋ ਯਾਵਦਤ੍ਥਂ ਯਾਗੁਂ ਪਿਵਿ. ਰਾਜਾ ਖਾਦਨੀਯਭੋਜਨੀਯਂ ਦਤ੍ਵਾ ਭਤ੍ਤਕਿਚ੍ਚਾਵਸਾਨੇ ਭਗਵਨ੍ਤਂ ਵਨ੍ਦਿਤ੍ਵਾ ਆਹ – ‘‘ਭਗਵਾ ਤੁਮ੍ਹੇ ਪਵੇਣਿਯਾ ਆਗਤੇ ਓਕ੍ਕਾਕਵਂਸੇ ਉਪ੍ਪਜ੍ਜਿਤ੍ਵਾ ਚਕ੍ਕਵਤ੍ਤਿਸਿਰਿਂ ਪਹਾਯ ਪਬ੍ਬਜਿਤ੍ਵਾ ਲੋਕੇ ਅਗ੍ਗਤਂ ਪਤ੍ਤੋ, ਕੋ ਨਾਮ, ਭਨ੍ਤੇ, ਤੁਮ੍ਹਾਕਂ ਪਲਿਬੋਧੋ’’ਤਿ? ਮਹਾਰਾਜ, ਏਤਸ੍ਸ ਮਹਲ੍ਲਕਤ੍ਥੇਰਸ੍ਸ ਪਲਿਬੋਧੋ ਅਮ੍ਹਾਕਂ ਪਲਿਬੋਧਸਦਿਸੋਵਾਤਿ.

ਰਾਜਾ ਥੇਰਂ ਵਨ੍ਦਿਤ੍ਵਾ – ‘‘ਕੋ, ਭਨ੍ਤੇ, ਤੁਮ੍ਹਾਕਂ ਪਲਿਬੋਧੋ’’ਤਿ ਪੁਚ੍ਛਿ? ਇਣਪਲਿਬੋਧੋ, ਮਹਾਰਾਜਾਤਿ. ਕਿਤ੍ਤਕੋ, ਭਨ੍ਤੇਤਿ? ਗਣੇਹਿ, ਮਹਾਰਾਜਾਤਿ. ਰਞ੍ਞੋ ‘‘ਏਕਂ ਦ੍ਵੇ ਸਤਂ ਸਹਸ੍ਸ’’ਨ੍ਤਿ ਗਣੇਨ੍ਤਸ੍ਸ ਅਙ੍ਗੁਲਿਯੋ ਨਪ੍ਪਹੋਨ੍ਤਿ. ਅਥੇਕਂ ਪੁਰਿਸਂ ਪਕ੍ਕੋਸਿਤ੍ਵਾ, ‘‘ਗਚ੍ਛ, ਭਣੇ, ਨਗਰੇ ਭੇਰਿਂ ਚਰਾਪੇਹਿ ‘ਸਬ੍ਬੇ ਬਹੁਧੀਤਿਕਬ੍ਰਾਹ੍ਮਣਸ੍ਸ ਇਣਾਯਿਕਾ ਰਾਜਙ੍ਗਣੇ ਸਨ੍ਨਿਪਤਨ੍ਤੂ’’ਤਿ. ਮਨੁਸ੍ਸਾ ਭੇਰਿਂ ਸੁਤ੍ਵਾ ਸਨ੍ਨਿਪਤਿਂਸੁ. ਰਾਜਾ ਤੇਸਂ ਹਤ੍ਥਤੋ ਪਣ੍ਣਾਨਿ ਆਹਰਾਪੇਤ੍ਵਾ ਸਬ੍ਬੇਸਂ ਅਨੂਨਂ ਧਨਮਦਾਸਿ. ਤਤ੍ਥ ਸੁਵਣ੍ਣਮੇਵ ਸਤਸਹਸ੍ਸਗ੍ਘਨਕਂ ਅਹੋਸਿ. ਪੁਨ ਰਾਜਾ ਪੁਚ੍ਛਿ – ‘‘ਅਞ੍ਞੋਪਿ ਅਤ੍ਥਿ, ਭਨ੍ਤੇ, ਪਲਿਬੋਧੋ’’ਤਿ. ਇਣਂ ਨਾਮ, ਮਹਾਰਾਜ, ਦਤ੍ਵਾ ਮੁਚ੍ਚਿਤੁਂ ਸਕ੍ਕਾ, ਏਤਾ ਪਨ ਸਤ੍ਤ ਦਾਰਿਕਾ ਮਹਾਪਲਿਬੋਧਾ ਮਯ੍ਹਨ੍ਤਿ. ਰਾਜਾ ਯਾਨਾਨਿ ਪੇਸੇਤ੍ਵਾ ਤਸ੍ਸ ਧੀਤਰੋ ਆਹਰਾਪੇਤ੍ਵਾ ਅਤ੍ਤਨੋ ਧੀਤਰੋ ਕਤ੍ਵਾ ਤਂ ਤਂ ਕੁਲਘਰਂ ਪੇਸੇਤ੍ਵਾ, ‘‘ਅਞ੍ਞੋਪਿ, ਭਨ੍ਤੇ, ਅਤ੍ਥਿ ਪਲਿਬੋਧੋ’’ਤਿ ਪੁਚ੍ਛਿ? ਬ੍ਰਾਹ੍ਮਣੀ, ਮਹਾਰਾਜਾਤਿ. ਰਾਜਾ ਯਾਨਂ ਪੇਸੇਤ੍ਵਾ, ਤਸ੍ਸ ਬ੍ਰਾਹ੍ਮਣਿਂ ਆਹਰਾਪੇਤ੍ਵਾ, ਅਯ੍ਯਿਕਟ੍ਠਾਨੇ ਠਪੇਤ੍ਵਾ ਪੁਨ ਪੁਚ੍ਛਿ – ‘‘ਅਞ੍ਞੋਪਿ, ਭਨ੍ਤੇ, ਅਤ੍ਥਿ ਪਲਿਬੋਧੋ’’ਤਿ? ਨਤ੍ਥਿ, ਮਹਾਰਾਜਾਤਿ ਵੁਤ੍ਤੇ ਰਾਜਾਪਿ ਚੀਵਰਦੁਸ੍ਸਾਨਿ ਦਾਪੇਤ੍ਵਾ, ‘‘ਭਨ੍ਤੇ, ਮਮ ਸਨ੍ਤਕਂ ਤੁਮ੍ਹਾਕਂ ਭਿਕ੍ਖੁਭਾਵਂ ਜਾਨਾਥਾ’’ਤਿ ਆਹ. ਆਮ, ਮਹਾਰਾਜਾਤਿ. ਅਥ ਨਂ ਰਾਜਾ ਆਹ – ‘‘ਭਨ੍ਤੇ, ਚੀਵਰਪਿਣ੍ਡਪਾਤਾਦਯੋਪਿ ਸਬ੍ਬੇ ਪਚ੍ਚਯਾ ਅਮ੍ਹਾਕਂ ਸਨ੍ਤਕਾ ਭਵਿਸ੍ਸਨ੍ਤਿ. ਤੁਮ੍ਹੇ ਤਥਾਗਤਸ੍ਸ ਮਨਂ ਗਹੇਤ੍ਵਾ ਸਮਣਧਮ੍ਮਂ ਕਰੋਥਾ’’ਤਿ. ਥੇਰੋ ਤਥੇਵ ਅਪ੍ਪਮਤ੍ਤੋ ਸਮਣਧਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਆਸਵਕ੍ਖਯਂ ਪਤ੍ਤੋਤਿ. ਦਸਮਂ.

ਪਠਮੋ ਵਗ੍ਗੋ.

੨. ਉਪਾਸਕਵਗ੍ਗੋ

੧. ਕਸਿਭਾਰਦ੍ਵਾਜਸੁਤ੍ਤਵਣ੍ਣਨਾ

੧੯੭. ਦੁਤਿਯਵਗ੍ਗਸ੍ਸ ਪਠਮੇ ਮਗਧੇਸੂਤਿ ਏਵਂਨਾਮਕੇ ਜਨਪਦੇ. ਦਕ੍ਖਿਣਾਗਿਰਿਸ੍ਮਿਨ੍ਤਿ ਰਾਜਗਹਂ ਪਰਿਵਾਰੇਤ੍ਵਾ ਠਿਤਸ੍ਸ ਗਿਰਿਨੋ ਦਕ੍ਖਿਣਭਾਗੇ ਜਨਪਦੋ ਅਤ੍ਥਿ, ਤਸ੍ਮਿਂ ਜਨਪਦੇ, ਤਤ੍ਥ ਵਿਹਾਰਸ੍ਸਾਪਿ ਤਦੇਵ ਨਾਮਂ. ਏਕਨਾਲ਼ਾਯਂ ਬ੍ਰਾਹ੍ਮਣਗਾਮੇਤਿ ਏਕਨਾਲ਼ਾਤਿ ਤਸ੍ਸ ਗਾਮਸ੍ਸ ਨਾਮਂ. ਬ੍ਰਾਹ੍ਮਣਾ ਪਨੇਤ੍ਥ ਸਮ੍ਬਹੁਲਾ ਪਟਿਵਸਨ੍ਤਿ, ਬ੍ਰਾਹ੍ਮਣਭੋਗੋ ਏਵ ਵਾ ਸੋ. ਤਸ੍ਮਾ ‘‘ਬ੍ਰਾਹ੍ਮਣਗਾਮੋ’’ਤਿ ਵੁਚ੍ਚਤਿ.

ਤੇਨ ਖੋ ਪਨ ਸਮਯੇਨਾਤਿ ਯਂ ਸਮਯਂ ਭਗਵਾ ਮਗਧਰਟ੍ਠੇ ਏਕਨਾਲ਼ਂ ਬ੍ਰਾਹ੍ਮਣਗਾਮਂ ਉਪਨਿਸ੍ਸਾਯ ਦਕ੍ਖਿਣਗਿਰਿਮਹਾਵਿਹਾਰੇ ਬ੍ਰਾਹ੍ਮਣਸ੍ਸ ਇਨ੍ਦ੍ਰਿਯਪਰਿਪਾਕਂ ਆਗਮਯਮਾਨੋ ਵਿਹਰਤਿ, ਤੇਨ ਸਮਯੇਨ. ਕਸਿਭਾਰਦ੍ਵਾਜਸ੍ਸਾਤਿ ਸੋ ਬ੍ਰਾਹ੍ਮਣੋ ਕਸਿਂ ਨਿਸ੍ਸਾਯ ਜੀਵਤਿ, ਭਾਰਦ੍ਵਾਜੋਤਿ ਚਸ੍ਸ ਗੋਤ੍ਤਂ. ਪਞ੍ਚਮਤ੍ਤਾਨੀਤਿ ਪਞ੍ਚ ਪਮਾਣਾਨਿ, ਅਨੂਨਾਨਿ ਅਨਧਿਕਾਨਿ ਪਞ੍ਚਨਙ੍ਗਲਸਤਾਨੀਤਿ ਵੁਤ੍ਤਂ ਹੋਤਿ. ਪਯੁਤ੍ਤਾਨੀਤਿ ਯੋਜਿਤਾਨਿ, ਬਲੀਬਦ੍ਦਾਨਂ ਖਨ੍ਧੇਸੁ ਠਪੇਤ੍ਵਾ ਯੁਗੇ ਯੋਤ੍ਤੇਹਿ ਯੋਜਿਤਾਨੀਤਿ ਅਤ੍ਥੋ.

ਵਪ੍ਪਕਾਲੇਤਿ ਵਪ੍ਪਨਕਾਲੇ ਬੀਜਨਿਕ੍ਖੇਪਸਮਯੇ. ਤਤ੍ਥ ਦ੍ਵੇ ਵਪ੍ਪਾਨਿ ਕਲਲਵਪ੍ਪਞ੍ਚ ਪਂਸੁਵਪ੍ਪਞ੍ਚ. ਪਂਸੁਵਪ੍ਪਂ ਇਧ ਅਧਿਪ੍ਪੇਤਂ, ਤਞ੍ਚ ਖੋ ਪਠਮਦਿਵਸੇ ਮਙ੍ਗਲਵਪ੍ਪਂ. ਤਤ੍ਥਾਯਂ ਉਪਕਰਣਸਮ੍ਪਦਾ – ਤੀਣਿ ਬਲਿਬਦ੍ਦਸਹਸ੍ਸਾਨਿ ਉਪਟ੍ਠਾਪਿਤਾਨਿ ਹੋਨ੍ਤਿ, ਸਬ੍ਬੇਸਂ ਸੁਵਣ੍ਣਮਯਾਨਿ ਸਿਙ੍ਗਾਨਿ ਪਟਿਮੁਕ੍ਕਾਨਿ, ਰਜਤਮਯਾ ਖੁਰਾ, ਸਬ੍ਬੇ ਸੇਤਮਾਲਾਹਿ ਚੇਵ ਗਨ੍ਧਪਞ੍ਚਙ੍ਗੁਲੀਹਿ ਚ ਅਲਙ੍ਕਤਾ ਪਰਿਪੁਣ੍ਣਪਞ੍ਚਙ੍ਗਾ ਸਬ੍ਬਲਕ੍ਖਣਸਮ੍ਪਨ੍ਨਾ, ਏਕਚ੍ਚੇ ਕਾਲ਼ਾ ਅਞ੍ਜਨਵਣ੍ਣਾ, ਏਕਚ੍ਚੇ ਸੇਤਾ ਫਲਿਕਵਣ੍ਣਾ, ਏਕਚ੍ਚੇ ਰਤ੍ਤਾ ਪਵਾਲ਼ਵਣ੍ਣਾ, ਏਕਚ੍ਚੇ ਕਮ੍ਮਾਸਾ ਮਸਾਰਗਲ੍ਲਵਣ੍ਣਾ. ਏਵਂ ਪਞ੍ਚਸਤਾ ਕਸ੍ਸਕਾ ਸਬ੍ਬੇ ਅਹਤਸੇਤਵਤ੍ਥਾ ਗਨ੍ਧਮਾਲਾਲਙ੍ਕਤਾ ਦਕ੍ਖਿਣਅਂਸਕੂਟੇਸੁ ਪਤਿਟ੍ਠਿਤਪੁਪ੍ਫਚੁਮ੍ਬਟਕਾ ਹਰਿਤਾਲਮਨੋਸਿਲਾਲਞ੍ਜਨੁਜ੍ਜਲਗਤ੍ਤਾ ਦਸ ਦਸ ਨਙ੍ਗਲਾ ਏਕੇਕਗੁਮ੍ਬਾ ਹੁਤ੍ਵਾ ਗਚ੍ਛਨ੍ਤਿ. ਨਙ੍ਗਲਾਨਂ ਸੀਸਞ੍ਚ ਯੁਗਞ੍ਚ ਪਤੋਦਾ ਚ ਸੁਵਣ੍ਣਖਚਿਤਾ. ਪਠਮਨਙ੍ਗਲੇ ਅਟ੍ਠ ਬਲੀਬਦ੍ਦਾ ਯੁਤ੍ਤਾ, ਸੇਸੇਸੁ ਚਤ੍ਤਾਰੋ ਚਤ੍ਤਾਰੋ, ਅਵਸੇਸਾ ਕਿਲਨ੍ਤਪਰਿਵਤ੍ਤਨਤ੍ਥਂ ਆਨੀਤਾ. ਏਕੇਕਗੁਮ੍ਬੇ ਏਕੇਕਬੀਜਸਕਟਂ ਏਕੇਕੋ ਕਸਤਿ, ਏਕੇਕੋ ਵਪ੍ਪਤਿ.

ਬ੍ਰਾਹ੍ਮਣੋ ਪਨ ਪਗੇਵ ਮਸ੍ਸੁਕਮ੍ਮਂ ਕਾਰਾਪੇਤ੍ਵਾ ਨ੍ਹਾਯਿਤ੍ਵਾ ਸੁਗਨ੍ਧਗਨ੍ਧੇਹਿ ਵਿਲਿਤ੍ਤੋ ਪਞ੍ਚਸਤਗ੍ਘਨਕਂ ਵਤ੍ਥਂ ਨਿਵਾਸੇਤ੍ਵਾ ਸਹਸ੍ਸਗ੍ਘਨਕਂ ਏਕਂਸਂ ਕਰਿਤ੍ਵਾ ਏਕੇਕਿਸ੍ਸਾ ਅਙ੍ਗੁਲਿਯਾ ਦ੍ਵੇ ਦ੍ਵੇਤਿ ਵੀਸਤਿ ਅਙ੍ਗੁਲਿਮੁਦ੍ਦਿਕਾਯੋ ਕਣ੍ਣੇਸੁ ਸੀਹਕੁਣ੍ਡਲਾਨਿ ਸੀਸੇ ਬ੍ਰਹ੍ਮਵੇਠਨਂ ਪਟਿਮੁਞ੍ਚਿਤ੍ਵਾ ਸੁਵਣ੍ਣਮਾਲਂ ਕਣ੍ਠੇ ਕਤ੍ਵਾ ਬ੍ਰਾਹ੍ਮਣਗਣਪਰਿਵੁਤੋ ਕਮ੍ਮਨ੍ਤਂ ਵੋਸਾਸਤਿ. ਅਥਸ੍ਸ ਬ੍ਰਾਹ੍ਮਣੀ ਅਨੇਕਸਤਭਾਜਨੇਸੁ ਪਾਯਾਸਂ ਪਚਾਪੇਤ੍ਵਾ ਮਹਾਸਕਟੇਸੁ ਆਰੋਪੇਤ੍ਵਾ ਗਨ੍ਧੋਦਕੇਨ ਨ੍ਹਾਯਿਤ੍ਵਾ ਸਬ੍ਬਾਲਙ੍ਕਾਰਵਿਭੂਸਿਤਾ ਬ੍ਰਾਹ੍ਮਣੀਗਣਪਰਿਵੁਤਾ ਕਮ੍ਮਨ੍ਤਂ ਅਗਮਾਸਿ. ਗੇਹਮ੍ਪਿਸ੍ਸ ਹਰਿਤੁਪਲਿਤ੍ਤਂ ਵਿਪ੍ਪਕਿਣ੍ਣਲਾਜਂ ਪੁਣ੍ਣਘਟਕਦਲਿਧਜਪਟਾਕਾਹਿ ਅਲਙ੍ਕਤਂ ਗਨ੍ਧਪੁਪ੍ਫਾਦੀਹਿ ਸੁਕਤਬਲਿਕਮ੍ਮਂ, ਖੇਤ੍ਤਞ੍ਚ ਤੇਸੁ ਤੇਸੁ ਠਾਨੇਸੁ ਸਮੁਸ੍ਸਿਤਦ੍ਧਜਪਟਾਕਂ ਅਹੋਸਿ. ਪਰਿਜਨਕਮ੍ਮਕਾਰੇਹਿ ਸਦ੍ਧਿਂ ਓਸਟਪਰਿਸਾ ਅਡ੍ਢਤੇਯ੍ਯਸਹਸ੍ਸਾ ਅਹੋਸਿ, ਸਬ੍ਬੇ ਅਹਤਵਤ੍ਥਾ, ਸਬ੍ਬੇਸਂ ਪਾਯਾਸਭੋਜਨਮੇਵ ਪਟਿਯਤ੍ਤਂ.

ਅਥ ਬ੍ਰਾਹ੍ਮਣੋ ਸੁਵਣ੍ਣਪਾਤਿਂ ਧੋਵਾਪੇਤ੍ਵਾ ਪਾਯਾਸਸ੍ਸ ਪੂਰੇਤ੍ਵਾ ਸਪ੍ਪਿਮਧੁਫਾਣਿਤੇਹਿ ਅਭਿਸਙ੍ਖਰਿਤ੍ਵਾ ਨਙ੍ਗਲਬਲਿਕਮ੍ਮਂ ਕਾਰਾਪੇਸਿ. ਬ੍ਰਾਹ੍ਮਣੀ ਪਞ੍ਚਨ੍ਨਂ ਕਸ੍ਸਕਸਤਾਨਂ ਸੁਵਣ੍ਣਰਜਤਕਂਸਤਮ੍ਬਲੋਹਮਯਾਨਿ ਭਾਜਨਾਨਿ ਦਾਪੇਤ੍ਵਾ ਸੁਵਣ੍ਣਕਟਚ੍ਛੁਂ ਗਹੇਤ੍ਵਾ ਪਾਯਾਸੇਨ ਪਰਿਵਿਸਨ੍ਤੀ ਗਚ੍ਛਤਿ. ਬ੍ਰਾਹ੍ਮਣੋ ਪਨ ਬਲਿਕਮ੍ਮਂ ਕਾਰੇਤ੍ਵਾ ਰਤ੍ਤਬਨ੍ਧਿਕਾਯੋ ਉਪਾਹਨਾਯੋ ਆਰੋਹਿਤ੍ਵਾ ਰਤ੍ਤਸੁਵਣ੍ਣਦਣ੍ਡਕਂ ਗਹੇਤ੍ਵਾ, ‘‘ਇਧ ਪਾਯਾਸਂ ਦੇਥ, ਇਧ ਸਪ੍ਪਿਂ ਦੇਥ, ਇਧ ਸਕ੍ਖਰਂ ਦੇਥਾ’’ਤਿ ਵੋਸਾਸਮਾਨੋ ਵਿਚਰਤਿ. ਅਯਂ ਤਾਵ ਕਮ੍ਮਨ੍ਤੇ ਪਵਤ੍ਤਿ.

ਵਿਹਾਰੇ ਪਨ ਯਤ੍ਥ ਯਤ੍ਥ ਬੁਦ੍ਧਾ ਵਸਨ੍ਤਿ, ਤਤ੍ਥ ਤਤ੍ਥ ਨੇਸਂ ਦੇਵਸਿਕਂ ਪਞ੍ਚ ਕਿਚ੍ਚਾਨਿ ਭਵਨ੍ਤਿ, ਸੇਯ੍ਯਥਿਦਂ – ਪੁਰੇਭਤ੍ਤਕਿਚ੍ਚਂ ਪਚ੍ਛਾਭਤ੍ਤਕਿਚ੍ਚਂ ਪੁਰਿਮਯਾਮਕਿਚ੍ਚਂ ਮਜ੍ਝਿਮਯਾਮਕਿਚ੍ਚਂ ਪਚ੍ਛਿਮਯਾਮਕਿਚ੍ਚਨ੍ਤਿ.

ਤਤ੍ਰਿਦਂ ਪੁਰੇਭਤ੍ਤਕਿਚ੍ਚਂ – ਭਗਵਾ ਹਿ ਪਾਤੋਵ ਉਟ੍ਠਾਯ ਉਪਟ੍ਠਾਕਾਨੁਗ੍ਗਹਤ੍ਥਂ ਸਰੀਰਫਾਸੁਕਤ੍ਥਞ੍ਚ ਮੁਖਧੋਵਨਾਦਿਪਰਿਕਮ੍ਮਂ ਕਤ੍ਵਾ ਯਾਵ ਭਿਕ੍ਖਾਚਾਰਵੇਲਾ, ਤਾਵ ਵਿਵਿਤ੍ਤਾਸਨੇ ਵੀਤਿਨਾਮੇਤ੍ਵਾ ਭਿਕ੍ਖਾਚਾਰਵੇਲਾਯ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਚੀਵਰਂ ਪਾਰੁਪਿਤ੍ਵਾ ਪਤ੍ਤਮਾਦਾਯ ਕਦਾਚਿ ਏਕਕੋ ਕਦਾਚਿ ਭਿਕ੍ਖੁਸਙ੍ਘਪਰਿਵੁਤੋ ਗਾਮਂ ਵਾ ਨਿਗਮਂ ਵਾ ਪਿਣ੍ਡਾਯ ਪਵਿਸਤਿ ਕਦਾਚਿ ਪਕਤਿਯਾ, ਕਦਾਚਿ ਅਨੇਕੇਹਿ ਪਾਟਿਹਾਰਿਯੇਹਿ ਵਤ੍ਤਮਾਨੇਹਿ. ਸੇਯ੍ਯਥਿਦਂ – ਪਿਣ੍ਡਾਯ ਪਵਿਸਤੋ ਲੋਕਨਾਥਸ੍ਸ ਪੁਰਤੋ ਪੁਰਤੋ ਗਨ੍ਤ੍ਵਾ ਮੁਦੁਗਤਿਯੋ ਵਾਤਾ ਪਥਵਿਂ ਸੋਧੇਨ੍ਤਿ, ਵਲਾਹਕਾ ਉਦਕਫੁਸਿਤਾਨਿ ਮੁਞ੍ਚਨ੍ਤਾ ਮਗ੍ਗੇ ਰੇਣੁਂ ਵੂਪਸਮੇਤ੍ਵਾ ਉਪਰਿ ਵਿਤਾਨਂ ਹੁਤ੍ਵਾ ਤਿਟ੍ਠਨ੍ਤਿ, ਅਪਰੇ ਵਾਤਾ ਪੁਪ੍ਫਾਨਿ ਉਪਹਰਿਤ੍ਵਾ ਮਗ੍ਗੇ ਓਕਿਰਨ੍ਤਿ. ਉਨ੍ਨਤਾ ਭੂਮਿਪ੍ਪਦੇਸਾ ਓਨਮਨ੍ਤਿ, ਓਨਤਾ ਉਨ੍ਨਮਨ੍ਤਿ. ਪਾਦਨਿਕ੍ਖੇਪਸਮਯੇ ਸਮਾਵ ਭੂਮਿ ਹੋਤਿ, ਸੁਖਸਮ੍ਫਸ੍ਸਾਨਿ ਪਦੁਮਪੁਪ੍ਫਾਨਿ ਵਾ ਪਾਦੇ ਸਮ੍ਪਟਿਚ੍ਛਨ੍ਤਿ. ਇਨ੍ਦਖੀਲਸ੍ਸ ਅਨ੍ਤੋ ਠਪਿਤਮਤ੍ਤੇ ਦਕ੍ਖਿਣਪਾਦੇ ਸਰੀਰਾ ਛਬ੍ਬਣ੍ਣਰਸ੍ਮਿਯੋ ਨਿਕ੍ਖਮਿਤ੍ਵਾ ਸੁਵਣ੍ਣਰਸਸਿਞ੍ਚਨਾਨਿ ਵਿਯ ਚਿਤ੍ਰਪਟਪਰਿਕ੍ਖਿਤ੍ਤਾਨਿ ਵਿਯ ਚ ਪਾਸਾਦਕੂਟਾਗਾਰਾਦੀਨਿ ਕਰੋਨ੍ਤਿਯੋ ਇਤੋ ਚਿਤੋ ਚ ਵਿਧਾਵਨ੍ਤਿ. ਹਤ੍ਥਿਅਸ੍ਸਵਿਹਙ੍ਗਾਦਯੋ ਸਕਸਕਟ੍ਠਾਨੇਸੁ ਠਿਤਾਯੇਵ ਮਧੁਰੇਨਾਕਾਰੇਨ ਸਦ੍ਦਂ ਕਰੋਨ੍ਤਿ, ਤਥਾ ਭੇਰਿਵੀਣਾਦੀਨਿ ਤੂਰਿਯਾਨਿ ਮਨੁਸ੍ਸਾਨਞ੍ਚ ਕਾਯੂਪਗਾਨਿ ਆਭਰਣਾਨਿ. ਤੇਨ ਸਞ੍ਞਾਣੇਨ ਮਨੁਸ੍ਸਾ ਜਾਨਨ੍ਤਿ ‘‘ਅਜ੍ਜ ਭਗਵਾ ਇਧ ਪਿਣ੍ਡਾਯ ਪਵਿਟ੍ਠੋ’’ਤਿ. ਤੇ ਸੁਨਿਵਤ੍ਥਾ ਸੁਪਾਰੁਤਾ ਗਨ੍ਧਪੁਪ੍ਫਾਦੀਨਿ ਆਦਾਯ ਘਰਾ ਨਿਕ੍ਖਮਿਤ੍ਵਾ ਅਨ੍ਤਰਵੀਥਿਂ ਪਟਿਪਜ੍ਜਿਤ੍ਵਾ ਭਗਵਨ੍ਤਂ ਗਨ੍ਧਪੁਪ੍ਫਾਦੀਹਿ ਸਕ੍ਕਚ੍ਚਂ ਪੂਜੇਤ੍ਵਾ ਵਨ੍ਦਿਤ੍ਵਾ – ‘‘ਅਮ੍ਹਾਕਂ, ਭਨ੍ਤੇ, ਦਸ ਭਿਕ੍ਖੂ, ਅਮ੍ਹਾਕਂ ਵੀਸਤਿ, ਅਮ੍ਹਾਕਂ ਭਿਕ੍ਖੁਸਤਂ ਦੇਥਾ’’ਤਿ ਯਾਚਿਤ੍ਵਾ ਭਗਵਤੋਪਿ ਪਤ੍ਤਂ ਗਹੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਸਕ੍ਕਚ੍ਚਂ ਪਿਣ੍ਡਪਾਤੇਨ ਪਟਿਮਾਨੇਨ੍ਤਿ.

ਭਗਵਾ ਕਤਭਤ੍ਤਕਿਚ੍ਚੋ ਤੇਸਂ ਸਨ੍ਤਾਨਾਨਿ ਓਲੋਕੇਤ੍ਵਾ ਤਥਾ ਧਮ੍ਮਂ ਦੇਸੇਤਿ, ਯਥਾ ਕੇਚਿ ਸਰਣਗਮਨੇ ਪਤਿਟ੍ਠਹਨ੍ਤਿ, ਕੇਚਿ ਪਞ੍ਚਸੁ ਸੀਲੇਸੁ, ਕੇਚਿ ਸੋਤਾਪਤ੍ਤਿਸਕਦਾਗਾਮਿਅਨਾਗਾਮਿਫਲਾਨਂ ਅਞ੍ਞਤਰਸ੍ਮਿਂ, ਕੇਚਿ ਪਬ੍ਬਜਿਤ੍ਵਾ ਅਗ੍ਗਫਲੇ ਅਰਹਤ੍ਤੇਤਿ. ਏਵਂ ਮਹਾਜਨਂ ਅਨੁਗ੍ਗਹੇਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਗਚ੍ਛਤਿ. ਤਤ੍ਥ ਗਨ੍ਧਮਣ੍ਡਲਮਾਲ਼ੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸੀਦਤਿ ਭਿਕ੍ਖੂਨਂ ਭਤ੍ਤਕਿਚ੍ਚਪਰਿਯੋਸਾਨਂ ਆਗਮਯਮਾਨੋ. ਤਤੋ ਭਿਕ੍ਖੂਨਂ ਭਤ੍ਤਕਿਚ੍ਚਪਰਿਯੋਸਾਨੇ ਉਪਟ੍ਠਾਕੋ ਭਗਵਤੋ ਨਿਵੇਦੇਤਿ. ਅਥ ਭਗਵਾ ਗਨ੍ਧਕੁਟਿਂ ਪਵਿਸਤਿ. ਇਦਂ ਤਾਵ ਪੁਰੇਭਤ੍ਤਕਿਚ੍ਚਂ.

ਅਥ ਭਗਵਾ ਏਵਂ ਕਤਪੁਰੇਭਤ੍ਤਕਿਚ੍ਚੋ ਗਨ੍ਧਕੁਟਿਯਾ ਉਪਟ੍ਠਾਨੇ ਨਿਸੀਦਿਤ੍ਵਾ ਪਾਦੇ ਪਕ੍ਖਾਲੇਤ੍ਵਾ ਪਾਦਪੀਠੇ ਠਤ੍ਵਾ ਭਿਕ੍ਖੁਸਙ੍ਘਂ ਓਵਦਤਿ – ‘‘ਭਿਕ੍ਖਵੇ, ਅਪ੍ਪਮਾਦੇਨ ਸਮ੍ਪਾਦੇਥ, ਦੁਲ੍ਲਭੋ ਬੁਦ੍ਧੁਪ੍ਪਾਦੋ ਲੋਕਸ੍ਮਿਂ, ਦੁਲ੍ਲਭੋ ਮਨੁਸ੍ਸਤ੍ਤਪਟਿਲਾਭੋ, ਦੁਲ੍ਲਭਾ ਸਦ੍ਧਾਸਮ੍ਪਤ੍ਤਿ, ਦੁਲ੍ਲਭਾ ਪਬ੍ਬਜ੍ਜਾ, ਦੁਲ੍ਲਭਂ ਸਦ੍ਧਮ੍ਮਸ੍ਸਵਨ’’ਨ੍ਤਿ. ਤਤ੍ਥ ਕੇਚਿ ਭਗਵਨ੍ਤਂ ਕਮ੍ਮਟ੍ਠਾਨਂ ਪੁਚ੍ਛਨ੍ਤਿ. ਭਗਵਾ ਤੇਸਂ ਅਤ੍ਤਨੋ ਚਰਿਯਾਨੁਰੂਪਂ ਕਮ੍ਮਟ੍ਠਾਨਂ ਦੇਤਿ. ਤਤੋ ਸਬ੍ਬੇਪਿ ਭਗਵਨ੍ਤਂ ਵਨ੍ਦਿਤ੍ਵਾ ਅਤ੍ਤਨੋ ਅਤ੍ਤਨੋ ਰਤ੍ਤਿਟ੍ਠਾਨਦਿਵਾਟ੍ਠਾਨਾਨਿ ਗਚ੍ਛਨ੍ਤਿ, ਕੇਚਿ ਅਰਞ੍ਞਂ, ਕੇਚਿ ਰੁਕ੍ਖਮੂਲਂ, ਕੇਚਿ ਪਬ੍ਬਤਾਦੀਨਂ ਅਞ੍ਞਤਰਂ, ਕੇਚਿ ਚਾਤੁਮਹਾਰਾਜਿਕਭਵਨਂ…ਪੇ… ਕੇਚਿ ਵਸਵਤ੍ਤਿਭਵਨਨ੍ਤਿ. ਤਤੋ ਭਗਵਾ ਗਨ੍ਧਕੁਟਿਂ ਪਵਿਸਿਤ੍ਵਾ ਸਚੇ ਆਕਙ੍ਖਤਿ, ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋ ਮੁਹੁਤ੍ਤਂ ਸੀਹਸੇਯ੍ਯਂ ਕਪ੍ਪੇਤਿ. ਅਥ ਸਮਸ੍ਸਾਸਿਤਕਾਯੋ ਉਟ੍ਠਹਿਤ੍ਵਾ ਦੁਤਿਯਭਾਗੇ ਲੋਕਂ ਵੋਲੋਕੇਤਿ. ਤਤਿਯਭਾਗੇ ਯਂ ਗਾਮਂ ਵਾ ਨਿਗਮਂ ਵਾ ਉਪਨਿਸ੍ਸਾਯ ਵਿਹਰਤਿ, ਤਤ੍ਥ ਮਹਾਜਨੋ ਪੁਰੇਭਤ੍ਤਂ ਦਾਨਂ ਦਤ੍ਵਾ ਪਚ੍ਛਾਭਤ੍ਤਂ ਸੁਨਿਵਤ੍ਥੋ ਸੁਪਾਰੁਤੋ ਗਨ੍ਧਪੁਪ੍ਫਾਦੀਨਿ ਆਦਾਯ ਵਿਹਾਰੇ ਸਨ੍ਨਿਪਤਤਿ. ਤਤੋ ਭਗਵਾ ਸਮ੍ਪਤ੍ਤਪਰਿਸਾਯ ਅਨੁਰੂਪੇਨ ਪਾਟਿਹਾਰਿਯੇਨ ਗਨ੍ਤ੍ਵਾ ਧਮ੍ਮਸਭਾਯਂ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਜ੍ਜ ਧਮ੍ਮਂ ਦੇਸੇਤਿ ਕਾਲਯੁਤ੍ਤਂ ਸਮਯਯੁਤ੍ਤਂ. ਅਥ ਕਾਲਂ ਵਿਦਿਤ੍ਵਾ ਪਰਿਸਂ ਉਯ੍ਯੋਜੇਤਿ, ਮਨੁਸ੍ਸਾ ਭਗਵਨ੍ਤਂ ਵਨ੍ਦਿਤ੍ਵਾ ਪਕ੍ਕਮਨ੍ਤਿ. ਇਦਂ ਪਚ੍ਛਾਭਤ੍ਤਕਿਚ੍ਚਂ.

ਸੋ ਏਵਂ ਨਿਟ੍ਠਿਤਪਚ੍ਛਾਭਤ੍ਤਕਿਚ੍ਚੋ ਸਚੇ ਗਤ੍ਤਾਨਿ ਓਸਿਞ੍ਚਿਤੁਕਾਮੋ ਹੋਤਿ, ਬੁਦ੍ਧਾਸਨਾ ਵੁਟ੍ਠਾਯ ਨ੍ਹਾਨਕੋਟ੍ਠਕਂ ਪਵਿਸਿਤ੍ਵਾ ਉਪਟ੍ਠਾਕੇਨ ਪਟਿਯਾਦਿਤਉਦਕੇਨ ਗਤ੍ਤਾਨਿ ਉਤੁਂ ਗਾਹਾਪੇਤਿ. ਉਪਟ੍ਠਾਕੋਪਿ ਬੁਦ੍ਧਾਸਨਂ ਆਨੇਤ੍ਵਾ ਪਪ੍ਫੋਟੇਤ੍ਵਾ ਗਨ੍ਧਕੁਟਿਪਰਿਵੇਣੇ ਪਞ੍ਞਾਪੇਤਿ. ਭਗਵਾ ਸੁਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਉਤ੍ਤਰਾਸਙ੍ਗਂ ਕਤ੍ਵਾ ਤਤ੍ਥ ਆਗਨ੍ਤ੍ਵਾ ਨਿਸੀਦਤਿ ਏਕਕੋਵ ਮੁਹੁਤ੍ਤਂ ਪਟਿਸਲ੍ਲੀਨੋ. ਅਥ ਭਿਕ੍ਖੂ ਤਤੋ ਤਤੋ ਆਗਮ੍ਮ ਭਗਵਤੋ ਉਪਟ੍ਠਾਨਂ ਗਚ੍ਛਨ੍ਤਿ. ਤਤ੍ਥ ਏਕਚ੍ਚੇ ਪਞ੍ਹਂ ਪੁਚ੍ਛਨ੍ਤਿ, ਏਕਚ੍ਚੇ ਕਮ੍ਮਟ੍ਠਾਨਂ, ਏਕਚ੍ਚੇ ਧਮ੍ਮਸ੍ਸਵਨਂ ਯਾਚਨ੍ਤਿ. ਭਗਵਾ ਤੇਸਂ ਅਧਿਪ੍ਪਾਯਂ ਸਮ੍ਪਾਦੇਨ੍ਤੋ ਪੁਰਿਮਯਾਮਂ ਵੀਤਿਨਾਮੇਤਿ. ਇਦਂ ਪੁਰਿਮਯਾਮਕਿਚ੍ਚਂ.

ਪੁਰਿਮਯਾਮਕਿਚ੍ਚਪਰਿਯੋਸਾਨੇ ਪਨ ਭਿਕ੍ਖੂਸੁ ਭਗਵਨ੍ਤਂ ਵਨ੍ਦਿਤ੍ਵਾ ਪਕ੍ਕਮਨ੍ਤੇਸੁ ਸਕਲਦਸਸਹਸ੍ਸਿਲੋਕਧਾਤੁਦੇਵਤਾਯੋ ਓਕਾਸਂ ਲਭਮਾਨਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਨ੍ਤਿ ਯਥਾਭਿਸਙ੍ਖਤਂ ਅਨ੍ਤਮਸੋ ਚਤੁਰਕ੍ਖਰਮ੍ਪਿ. ਭਗਵਾ ਤਾਸਂ ਤਾਸਂ ਦੇਵਤਾਨਂ ਪਞ੍ਹਂ ਵਿਸ੍ਸਜ੍ਜੇਨ੍ਤੋ ਮਜ੍ਝਿਮਯਾਮਂ ਵੀਤਿਨਾਮੇਤਿ. ਇਦਂ ਮਜ੍ਝਿਮਯਾਮਕਿਚ੍ਚਂ.

ਪਚ੍ਛਿਮਯਾਮਂ ਪਨ ਤਯੋ ਕੋਟ੍ਠਾਸੇ ਕਤ੍ਵਾ ਪੁਰੇਭਤ੍ਤਤੋ ਪਟ੍ਠਾਯ ਨਿਸਜ੍ਜਾਪੀਲ਼ਿਤਸ੍ਸ ਸਰੀਰਸ੍ਸ ਕਿਲਾਸੁਭਾਵਮੋਚਨਤ੍ਥਂ ਏਕਂ ਕੋਟ੍ਠਾਸਂ ਚਙ੍ਕਮੇਨ ਵੀਤਿਨਾਮੇਤਿ. ਦੁਤਿਯਕੋਟ੍ਠਾਸੇ ਗਨ੍ਧਕੁਟਿਂ ਪਵਿਸਿਤ੍ਵਾ ਦਕ੍ਖਿਣੇਨ ਪਸ੍ਸੇਨ ਸਤੋ ਸਮ੍ਪਜਾਨੋ ਸੀਹਸੇਯ੍ਯਂ ਕਪ੍ਪੇਤਿ. ਤਤਿਯਕੋਟ੍ਠਾਸੇ ਪਚ੍ਚੁਟ੍ਠਾਯ ਨਿਸੀਦਿਤ੍ਵਾ ਪੁਰਿਮਬੁਦ੍ਧਾਨਂ ਸਨ੍ਤਿਕੇ ਦਾਨਸੀਲਾਦਿਵਸੇਨ ਕਤਾਧਿਕਾਰਪੁਗ੍ਗਲਦਸ੍ਸਨਤ੍ਥਂ ਬੁਦ੍ਧਚਕ੍ਖੁਨਾ ਲੋਕਂ ਓਲੋਕੇਤਿ. ਇਦਂ ਪਚ੍ਛਿਮਯਾਮਕਿਚ੍ਚਂ.

ਤਦਾਪਿ ਏਵਂ ਓਲੋਕੇਨ੍ਤੋ ਕਸਿਭਾਰਦ੍ਵਾਜਂ ਬ੍ਰਾਹ੍ਮਣਂ ਅਰਹਤ੍ਤਸ੍ਸ ਉਪਨਿਸ੍ਸਯਸਮ੍ਪਨ੍ਨਂ ਦਿਸ੍ਵਾ – ‘‘ਤਤ੍ਥ ਮਯਿ ਗਤੇ ਕਥਾ ਪਵਤ੍ਤਿਸ੍ਸਤਿ, ਕਥਾਵਸਾਨੇ ਧਮ੍ਮਦੇਸਨਂ ਸੁਤ੍ਵਾ ਏਸੋ ਬ੍ਰਾਹ੍ਮਣੋ ਸਪੁਤ੍ਤਦਾਰੋ ਤੀਸੁ ਸਰਣੇਸੁ ਪਤਿਟ੍ਠਾਯ ਅਸੀਤਿਕੋਟਿਧਨਂ ਮਮ ਸਾਸਨੇ ਵਿਪ੍ਪਕਿਰਿਤ੍ਵਾ ਅਪਰਭਾਗੇ ਨਿਕ੍ਖਮ੍ਮ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਤੀ’’ਤਿ ਞਤ੍ਵਾ ਤਤ੍ਥ ਗਨ੍ਤ੍ਵਾ ਕਥਂ ਸਮੁਟ੍ਠਾਪੇਤ੍ਵਾ ਧਮ੍ਮਂ ਦੇਸੇਸਿ. ਏਤਮਤ੍ਥਂ ਦਸ੍ਸੇਤੁਂ ਅਥ ਖੋ ਭਗਵਾਤਿਆਦਿ ਵੁਤ੍ਤਂ.

ਤਤ੍ਥ ਪੁਬ੍ਬਣ੍ਹਸਮਯਨ੍ਤਿ ਭੁਮ੍ਮਤ੍ਥੇ ਉਪਯੋਗਵਚਨਂ, ਪੁਬ੍ਬਣ੍ਹਸਮਯੇਤਿ ਅਤ੍ਥੋ. ਨਿਵਾਸੇਤ੍ਵਾਤਿ ਪਰਿਦਹਿਤ੍ਵਾ. ਵਿਹਾਰਚੀਵਰਪਰਿਵਤ੍ਤਨਵਸੇਨੇਤਂ ਵੁਤ੍ਤਂ. ਪਤ੍ਤਚੀਵਰਮਾਦਾਯਾਤਿ ਪਤ੍ਤਂ ਹਤ੍ਥੇਹਿ, ਚੀਵਰਂ ਕਾਯੇਨ ਆਦਿਯਿਤ੍ਵਾ, ਸਮ੍ਪਟਿਚ੍ਛਿਤ੍ਵਾ ਧਾਰੇਤ੍ਵਾਤਿ ਅਤ੍ਥੋ. ਭਗਵਤੋ ਕਿਰ ਪਿਣ੍ਡਾਯ ਪਵਿਸਿਤੁਕਾਮਸ੍ਸ ਭਮਰੋ ਵਿਯ ਵਿਕਸਿਤਪਦੁਮਦ੍ਵਯਮਜ੍ਝਂ, ਇਨ੍ਦਨੀਲਮਣਿਵਣ੍ਣਸੇਲਮਯਪਤ੍ਤੋ ਹਤ੍ਥਦ੍ਵਯਮਜ੍ਝਂ ਆਗਚ੍ਛਤਿ. ਤਂ ਏਵਮਾਗਤਂ ਪਤ੍ਤਂ ਹਤ੍ਥੇਹਿ ਸਮ੍ਪਟਿਚ੍ਛਿਤ੍ਵਾ ਚੀਵਰਞ੍ਚ ਪਰਿਮਣ੍ਡਲਂ ਪਾਰੁਤਂ ਕਾਯੇਨ ਧਾਰੇਤ੍ਵਾਤਿ ਵੁਤ੍ਤਂ ਹੋਤਿ. ਤੇਨੁਪਸਙ੍ਕਮੀਤਿ ਯੇਨ ਮਗ੍ਗੇਨ ਕਮ੍ਮਨ੍ਤੋ ਗਨ੍ਤਬ੍ਬੋ, ਤੇਨ ਏਕਕੋਵ ਉਪਸਙ੍ਕਮਿ. ਕਸ੍ਮਾ ਪਨ ਨਂ ਭਿਕ੍ਖੂ ਨਾਨੁਬਨ੍ਧਿਂਸੂਤਿ? ਯਦਾ ਹਿ ਭਗਵਾ ਏਕਕੋਵ ਕਤ੍ਥਚਿ ਗਨ੍ਤੁਕਾਮੋ ਹੋਤਿ, ਯਾਵ ਭਿਕ੍ਖਾਚਾਰਵੇਲਾ ਦ੍ਵਾਰਂ ਪਿਦਹਿਤ੍ਵਾ ਅਨ੍ਤੋਗਨ੍ਧਕੁਟਿਯਂ ਨਿਸੀਦਤਿ. ਭਿਕ੍ਖੂ ਤਾਯ ਸਞ੍ਞਾਯ ਜਾਨਨ੍ਤਿ ‘‘ਅਜ੍ਜ ਭਗਵਾ ਏਕਕੋਵ ਪਿਣ੍ਡਾਯ ਚਰਿਤੁਕਾਮੋ, ਅਦ੍ਧਾ ਕਞ੍ਚਿ ਏਵ ਵਿਨੇਤਬ੍ਬਪੁਗ੍ਗਲਂ ਅਦ੍ਦਸਾ’’ਤਿ. ਤੇ ਅਤ੍ਤਨੋ ਪਤ੍ਤਚੀਵਰਂ ਗਹੇਤ੍ਵਾ ਗਨ੍ਧਕੁਟਿਂ ਪਦਕ੍ਖਿਣਂ ਕਤ੍ਵਾ ਵਨ੍ਦਿਤ੍ਵਾ ਭਿਕ੍ਖਾਚਾਰਂ ਗਚ੍ਛਨ੍ਤਿ. ਤਦਾ ਚ ਭਗਵਾ ਏਵਮਕਾਸਿ, ਤਸ੍ਮਾ ਭਿਕ੍ਖੂ ਨਾਨੁਬਨ੍ਧਿਂਸੂਤਿ.

ਪਰਿਵੇਸਨਾ ਵਤ੍ਤਤੀਤਿ ਤੇਸਂ ਸੁਵਣ੍ਣਭਾਜਨਾਦੀਨਿ ਗਹੇਤ੍ਵਾ ਨਿਸਿਨ੍ਨਾਨਂ ਪਞ੍ਚਸਤਾਨਂ ਕਸ੍ਸਕਾਨਂ ਪਰਿਵਿਸਨਾ ਵਿਪ੍ਪਕਤਾ ਹੋਤਿ. ਏਕਮਨ੍ਤਂ ਅਟ੍ਠਾਸੀਤਿ ਯਤ੍ਥ ਠਿਤਂ ਬ੍ਰਾਹ੍ਮਣੋ ਪਸ੍ਸਤਿ, ਤਥਾਰੂਪੇ ਦਸ੍ਸਨੂਪਚਾਰੇ ਕਥਾਸਵਨਫਾਸੁਕੇ ਉਚ੍ਚਟ੍ਠਾਨੇ ਅਟ੍ਠਾਸਿ. ਠਤ੍ਵਾ ਚ ਰਜਤਸੁਵਣ੍ਣਰਸਪਿਞ੍ਜਰਂ ਚਨ੍ਦਿਮਸੂਰਿਯਾਨਂ ਪਭਂ ਅਤਿਰੋਚਮਾਨਂ ਸਮਨ੍ਤਤੋ ਸਰੀਰਪ੍ਪਭਂ ਮੁਞ੍ਚਿ, ਯਾਯ ਅਜ੍ਝੋਤ੍ਥਟਤ੍ਤਾ ਬ੍ਰਾਹ੍ਮਣਸ੍ਸ ਕਮ੍ਮਨ੍ਤਸਾਲਾਭਿਤ੍ਤਿਰੁਕ੍ਖਕਸਿਤਮਤ੍ਤਿਕਪਿਣ੍ਡਾਦਯੋ ਸੁਵਣ੍ਣਮਯਾ ਵਿਯ ਅਹੇਸੁਂ. ਅਥ ਮਨੁਸ੍ਸਾ ਭੁਞ੍ਜਨ੍ਤਾ ਚ ਕਸਨ੍ਤਾ ਚ ਸਬ੍ਬਕਿਚ੍ਚਾਨਿ ਪਹਾਯ ਅਸੀਤਿਅਨੁਬ੍ਯਞ੍ਜਨਪਰਿਵਾਰਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਪਟਿਮਣ੍ਡਿਤਂ ਸਰੀਰਂ ਬ੍ਯਾਮਪ੍ਪਭਾਪਰਿਕ੍ਖੇਪਵਿਭੂਸਿਤਂ ਬਾਹੁਯੁਗਲਂ ਜਙ੍ਗਮਂ ਵਿਯ ਪਦੁਮਸਰਂ, ਰਸ੍ਮਿਜਾਲਸਮੁਜ੍ਜਲਿਤਤਾਰਾਗਣਮਿਵ ਗਗਨਤਲਂ, ਵਿਜ੍ਜੁਲਤਾਵਿਨਦ੍ਧਮਿਵ ਚ ਕਨਕਸਿਖਰਂ ਸਿਰਿਯਾ ਜਲਮਾਨਂ ਸਮ੍ਮਾਸਮ੍ਬੁਦ੍ਧਂ ਏਕਮਨ੍ਤਂ ਠਿਤਂ ਦਿਸ੍ਵਾ ਹਤ੍ਥਪਾਦੇ ਧੋਵਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਸਮ੍ਪਰਿਵਾਰੇਤ੍ਵਾ ਅਟ੍ਠਂਸੁ. ਏਵਂ ਤੇਹਿ ਸਮ੍ਪਰਿਵਾਰਿਤਂ ਅਦ੍ਦਸਾ ਖੋ ਕਸਿਭਾਰਦ੍ਵਾਜੋ ਬ੍ਰਾਹ੍ਮਣੋ ਭਗਵਨ੍ਤਂ ਪਿਣ੍ਡਾਯ ਠਿਤਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ਅਹਂ ਖੋ, ਸਮਣ, ਕਸਾਮਿ ਚ ਵਪਾਮਿ ਚਾਤਿ.

ਕਸ੍ਮਾ ਪਨਾਯਂ ਏਵਮਾਹ, ਕਿਂ ਸਮਨ੍ਤਪਾਸਾਦਿਕੇ ਪਸਾਦਨੀਯੇ ਉਤ੍ਤਮਦਮਥਸਮਥਮਨੁਪ੍ਪਤ੍ਤੇਪਿ ਤਥਾਗਤੇ ਅਪ੍ਪਸਾਦੇਨ, ਉਦਾਹੁ ਅਡ੍ਢਤਿਯਾਨਂ ਜਨਸਹਸ੍ਸਾਨਂ ਪਾਯਾਸਂ ਪਟਿਯਾਦੇਤ੍ਵਾਪਿ ਕਟਚ੍ਛੁਭਿਕ੍ਖਾਯ ਮਚ੍ਛੇਰੇਨਾਤਿ? ਉਭਯਥਾਪਿ ਨੋ, ਭਗਵਤੋ ਪਨਸ੍ਸ ਦਸ੍ਸਨੇਨ ਅਤਿਤ੍ਤਂ ਨਿਕ੍ਖਿਤ੍ਤਕਮ੍ਮਨ੍ਤਂ ਜਨਂ ਦਿਸ੍ਵਾ ‘‘ਕਮ੍ਮਭਙ੍ਗਂ ਮੇ ਕਾਤੁਂ ਆਗਤੋ’’ਤਿ ਅਨਤ੍ਤਮਨਤਾ ਅਹੋਸਿ, ਤਸ੍ਮਾ ਏਵਮਾਹ. ਭਗਵਤੋ ਚ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ – ‘‘ਸਚਾਯਂ ਕਮ੍ਮਨ੍ਤੇ ਅਪ੍ਪਯੋਜਯਿਸ੍ਸ, ਸਕਲਜਮ੍ਬੁਦੀਪੇ ਮਨੁਸ੍ਸਾਨਂ ਸੀਸੇ ਚੂਲ਼ਾਮਣਿ ਵਿਯ ਅਭਵਿਸ੍ਸ, ਕੋ ਨਾਮਸ੍ਸ ਅਤ੍ਥੋ ਨ ਸਮ੍ਪਜ੍ਜਿਸ੍ਸਤਿ, ਏਵਮੇਵਂ ਅਲਸਤਾਯ ਕਮ੍ਮਨ੍ਤੇ ਅਪ੍ਪਯੋਜੇਤ੍ਵਾ ਵਪ੍ਪਮਙ੍ਗਲਾਦੀਸੁ ਪਿਣ੍ਡਾਯ ਚਰਤੀ’’ਤਿਪਿਸ੍ਸ ਅਨਤ੍ਤਮਨਤਾ ਅਹੋਸਿ. ਤੇਨਾਹ – ‘‘ਅਹਂ ਖੋ, ਸਮਣ, ਕਸਾਮਿ ਚ ਵਪਾਮਿ ਚ, ਕਸਿਤ੍ਵਾ ਚ ਵਪਿਤ੍ਵਾ ਚ ਭੁਞ੍ਜਾਮੀ’’ਤਿ.

ਅਯਂ ਕਿਰਸ੍ਸ ਅਧਿਪ੍ਪਾਯੋ – ਮਯ੍ਹਮ੍ਪਿ ਤਾਵ ਕਮ੍ਮਨ੍ਤਾ ਨ ਬ੍ਯਾਪਜ੍ਜਨ੍ਤਿ, ਨ ਚਮ੍ਹਿ ਯਥਾ ਤ੍ਵਂ ਏਵਂ ਲਕ੍ਖਣਸਮ੍ਪਨ੍ਨੋ, ਤ੍ਵਮ੍ਪਿ ਕਸਿਤ੍ਵਾ ਚ ਵਪਿਤ੍ਵਾ ਚ ਭੁਞ੍ਜਸ੍ਸੁ, ਕੋ ਤੇ ਅਤ੍ਥੋ ਨ ਸਮ੍ਪਜ੍ਜੇਯ੍ਯ ਏਵਂ ਲਕ੍ਖਣਸਮ੍ਪਨ੍ਨਸ੍ਸਾਤਿ. ਅਪਿਚਾਯਂ ਅਸ੍ਸੋਸਿ – ‘‘ਸਕ੍ਯਰਾਜਕੁਲੇ ਕਿਰ ਕੁਮਾਰੋ ਉਪ੍ਪਨ੍ਨੋ, ਸੋ ਚਕ੍ਕਵਤ੍ਤਿਰਜ੍ਜਂ ਪਹਾਯ ਪਬ੍ਬਜਿਤੋ’’ਤਿ. ਤਸ੍ਮਾ ਇਦਾਨਿ ‘‘ਅਯਂ ਸੋ’’ਤਿ ਞਤ੍ਵਾ ‘‘ਚਕ੍ਕਵਤ੍ਤਿਰਜ੍ਜਂ ਪਹਾਯ ਕਿਲਨ੍ਤੋਸੀ’’ਤਿ ਉਪਾਰਮ੍ਭਂ ਆਰੋਪੇਨ੍ਤੋ ਏਵਮਾਹ. ਅਪਿਚ ਤਿਕ੍ਖਪਞ੍ਞੋ ਏਸ ਬ੍ਰਾਹ੍ਮਣੋ, ਨ ਭਗਵਨ੍ਤਂ ਅਪਸਾਦੇਨ੍ਤੋ ਭਣਤਿ, ਭਗਵਤੋ ਪਨ ਰੂਪਸਮ੍ਪਤ੍ਤਿਂ ਦਿਸ੍ਵਾ ਪੁਞ੍ਞਸਮ੍ਪਤ੍ਤਿਂ ਸਮ੍ਭਾਵਯਮਾਨੋ ਕਥਾਪਵਤ੍ਤਨਤ੍ਥਮ੍ਪਿ ਏਵਮਾਹ. ਅਥ ਭਗਵਾ ਵੇਨੇਯ੍ਯਵਸੇਨ ਸਦੇਵਕੇ ਲੋਕੇ ਅਗ੍ਗਕਸ੍ਸਕਵਪ੍ਪਕਭਾਵਂ ਅਤ੍ਤਨੋ ਦਸ੍ਸੇਨ੍ਤੋ ਅਹਮ੍ਪਿ ਖੋ ਬ੍ਰਾਹ੍ਮਣੋਤਿਆਦਿਮਾਹ.

ਅਥ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਅਯਂ ਸਮਣੋ’’ ‘ਅਹਮ੍ਪਿ ਕਸਾਮਿ ਚ ਵਪਾਮਿ ਚਾ’ਤਿ ਭਣਤਿ. ਨ ਚਸ੍ਸ ਓਲ਼ਾਰਿਕਾਨਿ ਯੁਗਨਙ੍ਗਲਾਦੀਨਿ ਕਸਿਭਣ੍ਡਾਨਿ ਪਸ੍ਸਾਮਿ, ਕਿਂ ਨੁ ਖੋ ਮੁਸਾ ਭਣਤੀ’’ਤਿ? ਭਗਵਨ੍ਤਂ ਪਾਦਤਲਤੋ ਪਟ੍ਠਾਯ ਯਾਵ ਕੇਸਗ੍ਗਾ ਓਲੋਕਯਮਾਨੋ, ਅਙ੍ਗਵਿਜ੍ਜਾਯ ਕਤਾਧਿਕਾਰਤ੍ਤਾ ਦ੍ਵਤ੍ਤਿਂਸਵਰਲਕ੍ਖਣਸਮ੍ਪਤ੍ਤਿਮਸ੍ਸ ਞਤ੍ਵਾ, ‘‘ਅਟ੍ਠਾਨਮੇਤਂ ਯਂ ਏਵਰੂਪੋ ਮੁਸਾ ਭਣੇਯ੍ਯਾ’’ਤਿ ਸਞ੍ਜਾਤਬਹੁਮਾਨੋ ਭਗਵਤਿ ਸਮਣਵਾਦਂ ਪਹਾਯ ਗੋਤ੍ਤੇਨ ਭਗਵਨ੍ਤਂ ਸਮੁਦਾਚਰਮਾਨੋ ਨ ਖੋ ਪਨ ਮਯਂ ਪਸ੍ਸਾਮ ਭੋਤੋ ਗੋਤਮਸ੍ਸਾਤਿਆਦਿਮਾਹ. ਭਗਵਾ ਪਨ ਯਸ੍ਮਾ ਪੁਬ੍ਬਧਮ੍ਮਸਭਾਗਤਾਯ ਕਥਨਂ ਨਾਮ ਬੁਦ੍ਧਾਨਂ ਆਨੁਭਾਵੋ, ਤਸ੍ਮਾ ਬੁਦ੍ਧਾਨੁਭਾਵਂ ਦੀਪੇਨ੍ਤੋ ਸਦ੍ਧਾ ਬੀਜਨ੍ਤਿਆਦਿਮਾਹ.

ਕਾ ਪਨੇਤ੍ਥ ਪੁਬ੍ਬਧਮ੍ਮਸਭਾਗਤਾ? ਨਨੁ ਬ੍ਰਾਹ੍ਮਣੇਨ ਭਗਵਾ ਨਙ੍ਗਲਾਦਿਕਸਿਸਮ੍ਭਾਰਸਮਾਯੋਗਂ ਪੁਟ੍ਠੋ ਅਪੁਚ੍ਛਿਤਸ੍ਸ ਬੀਜਸ੍ਸ ਸਭਾਗਤਾਯ ਆਹ ‘‘ਸਦ੍ਧਾ ਬੀਜ’’ਨ੍ਤਿ, ਏਵਞ੍ਚ ਸਤਿ ਕਥਾਪਿ ਅਨਨੁਸਨ੍ਧਿਕਾ ਹੋਤਿ? ਨ ਹਿ ਬੁਦ੍ਧਾਨਂ ਅਨਨੁਸਨ੍ਧਿਕਕਥਾ ਨਾਮ ਅਤ੍ਥਿ, ਨਪਿ ਪੁਬ੍ਬਧਮ੍ਮਸ੍ਸ ਅਸਭਾਗਤਾਯ ਕਥੇਨ੍ਤਿ. ਏਵਂ ਪਨੇਤ੍ਥ ਅਨੁਸਨ੍ਧਿ ਵੇਦਿਤਬ੍ਬਾ – ਬ੍ਰਾਹ੍ਮਣੇਨ ਹਿ ਭਗਵਾ ਯੁਗਨਙ੍ਗਲਾਦਿਕਸਿਸਮ੍ਭਾਰਵਸੇਨ ਕਸਿਂ ਪੁਚ੍ਛਿਤੋ. ਸੋ ਤਸ੍ਸ ਅਨੁਕਮ੍ਪਾਯ ‘‘ਇਦਂ ਅਪੁਚ੍ਛਿਤ’’ਨ੍ਤਿ ਅਪਰਿਹਾਪੇਤ੍ਵਾ ਸਮੂਲਂ ਸਉਪਕਾਰਂ ਸਸਮ੍ਭਾਰਂ ਸਫਲਂ ਕਸਿਂ ਪਞ੍ਞਾਪੇਤੁਂ ਮੂਲਤੋ ਪਟ੍ਠਾਯ ਦਸ੍ਸੇਨ੍ਤੋ ‘‘ਸਦ੍ਧਾ ਬੀਜ’’ਨ੍ਤਿਆਦਿਮਾਹ. ਤਤ੍ਥ ਬੀਜਂ ਕਸਿਯਾ ਮੂਲਂ, ਤਸ੍ਮਿਂ ਸਤਿ ਕਤ੍ਤਬ੍ਬਤੋ, ਅਸਤਿ ਅਕਤ੍ਤਬ੍ਬਤੋ, ਤਪ੍ਪਮਾਣੇਨ ਚ ਕਤ੍ਤਬ੍ਬਤੋ. ਬੀਜੇ ਹਿ ਸਤਿ ਕਸਿਂ ਕਰੋਨ੍ਤਿ, ਨ ਅਸਤਿ. ਬੀਜਪ੍ਪਮਾਣੇਨ ਚ ਕੁਸਲਾ ਕਸ੍ਸਕਾ ਖੇਤ੍ਤਂ ਕਸਨ੍ਤਿ, ਨ ਊਨਂ ‘‘ਮਾ ਨੋ ਸਸ੍ਸਂ ਪਰਿਹਾਯੀ’’ਤਿ, ਨ ਅਧਿਕਂ ‘‘ਮਾ ਨੋ ਮੋਘੋ ਵਾਯਾਮੋ ਅਹੋਸੀ’’ਤਿ. ਯਸ੍ਮਾ ਚ ਬੀਜਮੇਵ ਮੂਲਂ, ਤਸ੍ਮਾ ਭਗਵਾ ਮੂਲਤੋ ਪਟ੍ਠਾਯ ਕਸਿਸਮ੍ਭਾਰਂ ਦਸ੍ਸੇਨ੍ਤੋ ਤਸ੍ਸ ਬ੍ਰਾਹ੍ਮਣਸ੍ਸ ਕਸਿਯਾ ਪੁਬ੍ਬਧਮ੍ਮਸ੍ਸ ਬੀਜਸ੍ਸ ਸਭਾਗਤਾਯ ਅਤ੍ਤਨੋ ਕਸਿਯਾ ਪੁਬ੍ਬਧਮ੍ਮਂ ਦਸ੍ਸੇਨ੍ਤੋ ਆਹ ‘‘ਸਦ੍ਧਾ ਬੀਜ’’ਨ੍ਤਿ. ਏਵਮੇਤ੍ਥ ਪੁਬ੍ਬਧਮ੍ਮਸਭਾਗਤਾਪਿ ਵੇਦਿਤਬ੍ਬਾ.

ਪੁਚ੍ਛਿਤਂਯੇਵ ਵਤ੍ਵਾ ਅਪੁਚ੍ਛਿਤਂ ਪਚ੍ਛਾ ਕਿਂ ਨ ਵੁਤ੍ਤਨ੍ਤਿ ਚੇ? ਤਸ੍ਸ ਉਪਕਾਰਭਾਵਤੋ ਚ ਧਮ੍ਮਸਮ੍ਬਨ੍ਧਸਮਤ੍ਥਭਾਵਤੋ ਚ. ਅਯਂ ਹਿ ਬ੍ਰਾਹ੍ਮਣੋ ਪਞ੍ਞਵਾ, ਮਿਚ੍ਛਾਦਿਟ੍ਠਿਕੁਲੇ ਪਨ ਜਾਤਤ੍ਤਾ ਸਦ੍ਧਾਰਹਿਤੋ, ਸਦ੍ਧਾਰਹਿਤੋ ਚ ਪਞ੍ਞਵਾ ਪਰੇਸਂ ਸਦ੍ਧਾਯ ਅਤ੍ਤਨੋ ਅਵਿਸਯੇ ਅਪਟਿਪਜ੍ਜਮਾਨੋ ਵਿਸੇਸਂ ਨਾਧਿਗਚ੍ਛਤਿ, ਕਿਲੇਸਕਾਲੁਸ੍ਸਿਯਪਰਾਮਟ੍ਠਾਪਿ ਚਸ੍ਸ ਦੁਬ੍ਬਲਾ ਸਦ੍ਧਾ ਬਲਵਤਿਯਾ ਪਞ੍ਞਾਯ ਸਹਸਾ ਵਤ੍ਤਮਾਨਾ ਅਤ੍ਥਸਿਦ੍ਧਿਂ ਨ ਕਰੋਤਿ ਹਤ੍ਥਿਨਾ ਸਦ੍ਧਿਂ ਏਕਧੁਰੇ ਯੁਤ੍ਤੋ ਗੋਣੋ ਵਿਯ. ਇਤਿਸ੍ਸ ਸਦ੍ਧਾ ਉਪਕਾਰਿਕਾਤਿ ਤਂ ਬ੍ਰਾਹ੍ਮਣਂ ਸਦ੍ਧਾਯ ਪਤਿਟ੍ਠਾਪੇਨ੍ਤੇਨ ਪਚ੍ਛਾਪਿ ਵਤ੍ਤਬ੍ਬੋ ਅਯਮਤ੍ਥੋ ਦੇਸਨਾਕੁਸਲਤਾਯ ਪੁਬ੍ਬੇ ਵੁਤ੍ਤੋ. ਬੀਜਸ੍ਸ ਚ ਉਪਕਾਰਿਕਾ ਵੁਟ੍ਠਿ, ਸਾ ਤਦਨਨ੍ਤਰਂਯੇਵ ਵੁਚ੍ਚਮਾਨਾ ਸਮਤ੍ਥਾ ਹੋਤਿ. ਏਵਂ ਧਮ੍ਮਸਮ੍ਬਨ੍ਧਸਮਤ੍ਥਭਾਵਤੋ ਪਚ੍ਛਾਪਿ ਵਤ੍ਤਬ੍ਬੋ ਅਯਮਤ੍ਥੋ, ਅਞ੍ਞੋ ਚ ਏਵਰੂਪੋ ਈਸਾਯੋਤ੍ਤਾਦਿ ਪੁਬ੍ਬੇ ਵੁਤ੍ਤੋਤਿ ਵੇਦਿਤਬ੍ਬੋ.

ਤਤ੍ਥ ਸਮ੍ਪਸਾਦਲਕ੍ਖਣਾ ਸਦ੍ਧਾ, ਓਕਪ੍ਪਨਲਕ੍ਖਣਾ ਵਾ. ਬੀਜਨ੍ਤਿ ਪਞ੍ਚਵਿਧਂ ਬੀਜਂ ਮੂਲਬੀਜਂ ਖਨ੍ਧਬੀਜਂ ਫਲੁਬੀਜਂ ਅਗ੍ਗਬੀਜਂ ਬੀਜਬੀਜਮੇਵ ਪਞ੍ਚਮਨ੍ਤਿ. ਤਂ ਸਬ੍ਬਮ੍ਪਿ ਵਿਰੁਹਣਟ੍ਠੇਨ ਬੀਜਨ੍ਤੇਵ ਸਙ੍ਖਂ ਗਚ੍ਛਤਿ.

ਤਤ੍ਥ ਯਥਾ ਬ੍ਰਾਹ੍ਮਣਸ੍ਸ ਕਸਿਯਾ ਮੂਲਭੂਤਂ ਬੀਜਂ ਦ੍ਵੇ ਕਿਚ੍ਚਾਨਿ ਕਰੋਤਿ, ਹੇਟ੍ਠਾ ਮੂਲੇਨ ਪਤਿਟ੍ਠਾਤਿ, ਉਪਰਿ ਅਙ੍ਕੁਰਂ ਉਟ੍ਠਾਪੇਤਿ, ਏਵਂ ਭਗਵਤੋ ਕਸਿਯਾ ਮੂਲਭੂਤਾ ਸਦ੍ਧਾ ਹੇਟ੍ਠਾ ਸੀਲਮੂਲੇਨ ਪਤਿਟ੍ਠਾਤਿ, ਉਪਰਿ ਸਮਥਵਿਪਸ੍ਸਨਙ੍ਕੁਰਂ ਉਟ੍ਠਾਪੇਤਿ. ਯਥਾ ਚ ਤਂ ਮੂਲੇਨ ਪਥਵਿਰਸਂ ਆਪੋਰਸਂ ਗਹੇਤ੍ਵਾ ਨਾਲ਼ੇਨ ਧਞ੍ਞਪਰਿਪਾਕਗਹਣਤ੍ਥਂ ਵਡ੍ਢਤਿ, ਏਵਮਯਂ ਸੀਲਮੂਲੇਨ ਸਮਥਵਿਪਸ੍ਸਨਾਰਸਂ ਗਹੇਤ੍ਵਾ ਅਰਿਯਮਗ੍ਗਨਾਲ਼ੇਨ ਅਰਿਯਫਲਧਞ੍ਞਪਰਿਪਾਕਗਹਣਤ੍ਥਂ ਵਡ੍ਢਤਿ. ਯਥਾ ਚ ਤਂ ਸੁਭੂਮਿਯਂ ਪਤਿਟ੍ਠਹਿਤ੍ਵਾ ਮੂਲਙ੍ਕੁਰਪਣ੍ਣਨਾਲ਼ਕਣ੍ਡਪਸਵੇਹਿ ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਪਤ੍ਵਾ ਖੀਰਂ ਜਨੇਤ੍ਵਾ ਅਨੇਕਸਾਲਿਫਲਭਰਿਤਂ ਸਾਲਿਸੀਸਂ ਨਿਪ੍ਫਾਦੇਤਿ, ਏਵਮੇਸਾ ਚਿਤ੍ਤਸਨ੍ਤਾਨੇ ਪਤਿਟ੍ਠਹਿਤ੍ਵਾ ਛਹਿ ਵਿਸੁਦ੍ਧੀਹਿ ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਪਤ੍ਵਾ ਞਾਣਦਸ੍ਸਨਵਿਸੁਦ੍ਧਿਖੀਰਂ ਜਨੇਤ੍ਵਾ ਅਨੇਕਪਟਿਸਮ੍ਭਿਦਾਭਿਞ੍ਞਾਭਰਿਤਂ ਅਰਹਤ੍ਤਫਲਂ ਨਿਪ੍ਫਾਦੇਤਿ. ਤੇਨ ਵੁਤ੍ਤਂ ‘‘ਸਦ੍ਧਾ ਬੀਜ’’ਨ੍ਤਿ.

ਕਸ੍ਮਾ ਪਨ ਅਞ੍ਞੇਸੁ ਪਰੋਪਞ੍ਞਾਸਾਯ ਕੁਸਲਧਮ੍ਮੇਸੁ ਏਕਤੋ ਉਪ੍ਪਜ੍ਜਮਾਨੇਸੁ ਸਦ੍ਧਾਵ ‘‘ਬੀਜ’’ਨ੍ਤਿ ਵੁਤ੍ਤਾਤਿ ਚੇ? ਬੀਜਕਿਚ੍ਚਕਰਣਤੋ. ਯਥਾ ਹਿ ਤੇਸੁ ਵਿਞ੍ਞਾਣਂਯੇਵ ਵਿਜਾਨਨਕਿਚ੍ਚਂ ਕਰੋਤਿ, ਏਵਂ ਸਦ੍ਧਾ ਬੀਜਕਿਚ੍ਚਂ. ਸਾ ਚ ਸਬ੍ਬਕੁਸਲਾਨਂ ਮੂਲਭੂਤਾ. ਯਥਾਹ – ‘‘ਸਦ੍ਧਾਜਾਤੋ ਉਪਸਙ੍ਕਮਤਿ, ਉਪਸਙ੍ਕਮਨ੍ਤੋ ਪਯਿਰੁਪਾਸਤਿ…ਪੇ… ਪਞ੍ਞਾਯ ਚ ਨਂ ਅਤਿਵਿਜ੍ਝ ਪਸ੍ਸਤੀ’’ਤਿ (ਮ. ਨਿ. ੨.੧੮੩).

ਅਕੁਸਲਧਮ੍ਮੇ ਚੇਵ ਕਾਯਞ੍ਚ ਤਪਤੀਤਿ ਤਪੋ. ਇਨ੍ਦ੍ਰਿਯਸਂਵਰਵੀਰਿਯਧੁਤਙ੍ਗਦੁਕ੍ਕਰਕਾਰਿਕਾਨਂ ਏਤਂ ਅਧਿਵਚਨਂ, ਇਧ ਪਨ ਇਨ੍ਦ੍ਰਿਯਸਂਵਰੋ ਅਧਿਪ੍ਪੇਤੋ. ਵੁਟ੍ਠੀਤਿ ਵਸ੍ਸਵੁਟ੍ਠਿ ਵਾਤਵੁਟ੍ਠੀਤਿਆਦਿ ਅਨੇਕਵਿਧਾ, ਇਧ ਵਸ੍ਸਵੁਟ੍ਠਿ ਅਧਿਪ੍ਪੇਤਾ. ਯਥਾ ਹਿ ਬ੍ਰਾਹ੍ਮਣਸ੍ਸ ਵਸ੍ਸਵੁਟ੍ਠਿਸਮਨੁਗ੍ਗਹਿਤਂ ਬੀਜਂ ਬੀਜਮੂਲਕਞ੍ਚ ਸਸ੍ਸਂ ਵਿਰੁਹਤਿ ਨ ਮਿਲਾਯਤਿ ਨਿਪ੍ਫਤ੍ਤਿਂ ਗਚ੍ਛਤਿ, ਏਵਂ ਭਗਵਤੋ ਇਨ੍ਦ੍ਰਿਯਸਂਵਰਸਮਨੁਗ੍ਗਹਿਤਾ ਸਦ੍ਧਾ, ਸਦ੍ਧਾਮੂਲਾ ਚ ਸੀਲਾਦਯੋ ਧਮ੍ਮਾ ਵਿਰੁਹਨ੍ਤਿ, ਨ ਮਿਲਾਯਨ੍ਤਿ ਨਿਪ੍ਫਤ੍ਤਿਂ ਗਚ੍ਛਨ੍ਤਿ. ਤੇਨਾਹ ‘‘ਤਪੋ ਵੁਟ੍ਠੀ’’ਤਿ.

ਪਞ੍ਞਾ ਮੇਤਿ ਏਤ੍ਥ ਵੁਤ੍ਤੋ ਮੇ-ਸਦ੍ਦੋ ਪੁਰਿਮਪਦੇਸੁਪਿ ਯੋਜੇਤਬ੍ਬੋ ‘‘ਸਦ੍ਧਾ ਮੇ ਬੀਜਂ, ਤਪੋ ਮੇ ਵੁਟ੍ਠੀ’’ਤਿ ਤੇਨ ਕਿਂ ਦੀਪੇਤਿ? ਯਥਾ, ਬ੍ਰਾਹ੍ਮਣ, ਤਯਾ ਵਪਿਤੇ ਖੇਤ੍ਤੇ ਸਚੇ ਵੁਟ੍ਠਿ ਅਤ੍ਥਿ, ਇਚ੍ਚੇਤਂ ਕੁਸਲਂ. ਨੋ ਚੇ ਅਤ੍ਥਿ, ਉਦਕਮ੍ਪਿ ਤਾਵ ਦਾਤਬ੍ਬਂ ਹੋਤਿ. ਤਥਾ ਮਯਾ ਹਿਰਿਈਸੇ ਪਞ੍ਞਾਯੁਗਨਙ੍ਗਲੇ ਮਨੋਯੋਤ੍ਤੇਨ ਏਕਾਬਦ੍ਧੇ ਕਤੇ ਵੀਰਿਯਬਲੀਬਦ੍ਦੇ ਯੋਜੇਤ੍ਵਾ ਸਤਿਪਾਚਨੇਨ ਵਿਜ੍ਝਿਤ੍ਵਾ ਅਤ੍ਤਨੋ ਚਿਤ੍ਤਸਨ੍ਤਾਨਖੇਤ੍ਤਮ੍ਹਿ ਸਦ੍ਧਾਬੀਜੇ ਵਪਿਤੇ ਵੁਟ੍ਠਿਯਾ ਅਭਾਵੋ ਨਾਮ ਨਤ੍ਥਿ, ਅਯਂ ਪਨ ਮੇ ਨਿਚ੍ਚਕਾਲਂ ਇਨ੍ਦ੍ਰਿਯਸਂਵਰਤਪੋ ਵੁਟ੍ਠੀਤਿ.

ਪਞ੍ਞਾਤਿ ਕਾਮਾਵਚਰਾਦਿਭੇਦਤੋ ਅਨੇਕਵਿਧਾ. ਇਧ ਪਨ ਸਹ ਵਿਪਸ੍ਸਨਾਯ ਮਗ੍ਗਪਞ੍ਞਾ ਅਧਿਪ੍ਪੇਤਾ. ਯੁਗਨਙ੍ਗਲਨ੍ਤਿ ਯੁਗਞ੍ਚ ਨਙ੍ਗਲਞ੍ਚ ਯੁਗਨਙ੍ਗਲਂ. ਯਥਾ ਹਿ ਬ੍ਰਾਹ੍ਮਣਸ੍ਸ ਯੁਗਨਙ੍ਗਲਂ, ਏਵਂ ਭਗਵਤੋ ਦੁਵਿਧਾਪਿ ਵਿਪਸ੍ਸਨਾ ਪਞ੍ਞਾ ਚ. ਤਤ੍ਥ ਯਥਾ ਯੁਗਂ ਈਸਾਯ ਉਪਨਿਸ੍ਸਯਂ ਹੋਤਿ, ਪੁਰਤੋ ਚ ਈਸਾਬਦ੍ਧਂ ਹੋਤਿ, ਯੋਤ੍ਤਾਨਂ ਨਿਸ੍ਸਯਂ ਹੋਤਿ, ਬਲੀਬਦ੍ਦਾਨਂ ਏਕਤੋ ਗਮਨਂ ਧਾਰੇਤਿ, ਏਵਂ ਪਞ੍ਞਾ ਹਿਰਿਪ੍ਪਮੁਖਾਨਂ ਧਮ੍ਮਾਨਂ ਉਪਨਿਸ੍ਸਯਾ ਹੋਤਿ. ਯਥਾਹ – ‘‘ਪਞ੍ਞੁਤ੍ਤਰਾ ਸਬ੍ਬੇ ਕੁਸਲਾ ਧਮ੍ਮਾ’’ਤਿ (ਅ. ਨਿ. ੮.੮੩; ੧੦.੫੮) ਚ, ‘‘ਪਞ੍ਞਾ ਹਿ ਸੇਟ੍ਠਾ ਕੁਸਲਾ ਵਦਨ੍ਤਿ, ਨਕ੍ਖਤ੍ਤਰਾਜਾਰਿਵ ਤਾਰਕਾਨ’’ਨ੍ਤਿ (ਜਾ. ੨.੧੭.੮੧) ਚ. ਕੁਸਲਾਨਂ ਧਮ੍ਮਾਨਂ ਪੁਬ੍ਬਙ੍ਗਮਟ੍ਠੇਨ ਪੁਰਤੋ ਚ ਹੋਤਿ. ਯਥਾਹ – ‘‘ਸੀਲਂ ਸਿਰੀ ਚਾਪਿ ਸਤਞ੍ਚ ਧਮ੍ਮੋ, ਅਨ੍ਵਾਯਿਕਾ ਪਞ੍ਞਵਤੋ ਭਵਨ੍ਤੀ’’ਤਿ ਹਿਰਿਵਿਪ੍ਪਯੋਗੇਨ ਅਨੁਪ੍ਪਤ੍ਤਿਤੋ ਪਨ ਈਸਾਬਦ੍ਧੋ ਹੋਤਿ. ਮਨੋਸਙ੍ਖਾਤਸ੍ਸ ਸਮਾਧਿਯੋਤ੍ਤਸ੍ਸ ਨਿਸ੍ਸਯਪਚ੍ਚਯਤੋ ਯੋਤ੍ਤਾਨਂ ਨਿਸ੍ਸਯੋ ਹੋਤਿ. ਅਚ੍ਚਾਰਦ੍ਧਾਤਿਲੀਨਭਾਵਪਟਿਸੇਧਨਤੋ ਵੀਰਿਯਬਲੀਬਦ੍ਦਾਨਂ ਏਕਤੋ ਗਮਨਂ ਧਾਰੇਤਿ, ਯਥਾ ਚ ਨਙ੍ਗਲਂ ਫਾਲਯੁਤ੍ਤਂ ਕਸਨਕਾਲੇ ਪਥਵਿਘਨਂ ਭਿਨ੍ਦਤਿ, ਮੂਲਸਨ੍ਤਾਨਕਾਨਿ ਪਦਾਲੇਤਿ, ਏਵਂ ਸਤਿਯੁਤ੍ਤਾ ਪਞ੍ਞਾ ਵਿਪਸ੍ਸਨਾਕਾਲੇ ਧਮ੍ਮਾਨਂ ਸਨ੍ਤਤਿਸਮੂਹਕਿਚ੍ਚਾਰਮ੍ਮਣਘਨਂ ਭਿਨ੍ਦਤਿ, ਸਬ੍ਬਕਿਲੇਸਮੂਲਸਨ੍ਤਾਨਕਾਨਿ ਪਦਾਲੇਤਿ. ਸਾ ਚ ਖੋ ਲੋਕੁਤ੍ਤਰਾਵ, ਇਤਰਾ ਪਨ ਲੋਕਿਕਾਪਿ ਸਿਯਾ. ਤੇਨਾਹ ‘‘ਪਞ੍ਞਾ ਮੇ ਯੁਗਨਙ੍ਗਲ’’ਨ੍ਤਿ.

ਹਿਰੀਯਤਿ ਪਾਪਕੇਹਿ ਧਮ੍ਮੇਹੀਤਿ ਹਿਰੀ. ਤਗ੍ਗਹਣੇਨ ਤਾਯ ਅਵਿਪ੍ਪਯੁਤ੍ਤਂ ਓਤ੍ਤਪ੍ਪਮ੍ਪਿ ਗਹਿਤਮੇਵ ਹੋਤਿ. ਈਸਾਤਿ ਯੁਗਨਙ੍ਗਲਸਨ੍ਧਾਰਿਕਾ ਰੁਕ੍ਖਲਟ੍ਠਿ. ਯਥਾ ਹਿ ਬ੍ਰਾਹ੍ਮਣਸ੍ਸ ਈਸਾ ਯੁਗਨਙ੍ਗਲਂ ਧਾਰੇਤਿ, ਏਵਂ ਭਗਵਤੋਪਿ ਹਿਰੀ ਲੋਕਿਯਲੋਕੁਤ੍ਤਰਪਞ੍ਞਾਸਙ੍ਖਾਤਂ ਯੁਗਨਙ੍ਗਲਂ ਧਾਰੇਤਿ ਹਿਰਿਅਭਾਵੇ ਪਞ੍ਞਾਯ ਅਭਾਵਤੋ. ਯਥਾ ਚ ਈਸਾਪਟਿਬਦ੍ਧਯੁਗਨਙ੍ਗਲਂ ਕਿਚ੍ਚਕਰਂ ਹੋਤਿ ਅਚਲਂ ਅਸਿਥਿਲਂ, ਏਵਂ ਹਿਰਿਪਟਿਬਦ੍ਧਾ ਚ ਪਞ੍ਞਾ ਕਿਚ੍ਚਕਾਰੀ ਹੋਤਿ ਅਚਲਾ ਅਸਿਥਿਲਾ ਅਬ੍ਬੋਕਿਣ੍ਣਾ ਅਹਿਰਿਕੇਨ. ਤੇਨਾਹ ‘‘ਹਿਰੀ ਈਸਾ’’ਤਿ. ਮੁਨਾਤੀਤਿ ਮਨੋ, ਚਿਤ੍ਤਸ੍ਸੇਤਂ ਨਾਮਂ. ਇਧ ਪਨ ਮਨੋਸੀਸੇਨ ਤਂਸਮ੍ਪਯੁਤ੍ਤੋ ਸਮਾਧਿ ਅਧਿਪ੍ਪੇਤੋ. ਯੋਤ੍ਤਨ੍ਤਿ ਰਜ੍ਜੁਬਨ੍ਧਨਂ. ਤਂ ਤਿਵਿਧਂ ਈਸਾਯ ਸਹ ਯੁਗਸ੍ਸ ਬਨ੍ਧਨਂ, ਯੁਗੇਨ ਸਹ ਬਲੀਬਦ੍ਦਾਨਂ ਬਨ੍ਧਨਂ, ਸਾਰਥਿਨਾ ਸਹ ਬਲੀਬਦ੍ਦਾਨਂ ਏਕਾਬਨ੍ਧਨਨ੍ਤਿ. ਤਤ੍ਥ ਯਥਾ ਬ੍ਰਾਹ੍ਮਣਸ੍ਸ ਯੋਤ੍ਤਂ ਈਸਾਯੁਗਬਲੀਬਦ੍ਦੇ ਏਕਾਬਦ੍ਧੇ ਕਤ੍ਵਾ ਸਕਕਿਚ੍ਚੇ ਪਟਿਪਾਦੇਤਿ, ਏਵਂ ਭਗਵਤੋ ਸਮਾਧਿ ਸਬ੍ਬੇਵ ਤੇ ਹਿਰਿਪਞ੍ਞਾਵੀਰਿਯਧਮ੍ਮੇ ਏਕਾਰਮ੍ਮਣੇ ਅਵਿਕ੍ਖੇਪਸਭਾਵੇਨ ਬਨ੍ਧਿਤ੍ਵਾ ਸਕਕਿਚ੍ਚੇ ਪਟਿਪਾਦੇਤਿ. ਤੇਨਾਹ ‘‘ਮਨੋ ਯੋਤ੍ਤ’’ਨ੍ਤਿ.

ਚਿਰਕਤਾਦਿਮਤ੍ਥਂ ਸਰਤੀਤਿ ਸਤਿ. ਫਾਲੇਤੀਤਿ ਫਾਲੋ. ਪਾਜੇਨ੍ਤਿ ਏਤੇਨਾਤਿ ਪਾਜਨਂ. ਤਂ ਇਧ ‘‘ਪਾਚਨ’’ਨ੍ਤਿ ਵੁਤ੍ਤਂ. ਪਤੋਦਸ੍ਸੇਤਂ ਨਾਮਂ. ਫਾਲੋ ਚ ਪਾਚਨਞ੍ਚ ਫਾਲਪਾਚਨਂ. ਯਥਾ ਹਿ ਬ੍ਰਾਹ੍ਮਣਸ੍ਸ ਫਾਲਪਾਚਨਂ, ਏਵਂ ਭਗਵਤੋ ਵਿਪਸ੍ਸਨਾਸਮ੍ਪਯੁਤ੍ਤਾ ਮਗ੍ਗਸਮ੍ਪਯੁਤ੍ਤਾ ਚ ਸਤਿ. ਤਤ੍ਥ ਯਥਾ ਫਾਲੋ ਨਙ੍ਗਲਂ ਅਨੁਰਕ੍ਖਤਿ, ਪੁਰਤੋ ਚਸ੍ਸ ਗਚ੍ਛਤਿ, ਏਵਂ ਸਤਿ ਕੁਸਲਾਕੁਸਲਾਨਂ ਧਮ੍ਮਾਨਂ ਗਤਿਯੋ ਸਮਨ੍ਵੇਸਮਾਨਾ ਆਰਮ੍ਮਣੇ ਵਾ ਉਪਟ੍ਠਾਪਯਮਾਨਾ ਪਞ੍ਞਾਨਙ੍ਗਲਂ ਰਕ੍ਖਤਿ. ਤੇਨੇਵੇਸਾ ‘‘ਸਤਾਰਕ੍ਖੇਨ ਚੇਤਸਾ ਵਿਹਰਤੀ’’ਤਿਆਦੀਸੁ (ਅ. ਨਿ. ੧੦.੨੦) ਵਿਯ ਆਰਕ੍ਖਾਤਿ ਵੁਤ੍ਤਾ. ਅਪ੍ਪਮੁਸ੍ਸਨਵਸੇਨ ਚਸ੍ਸਾ ਪੁਰਤੋ ਹੋਤਿ. ਸਤਿਪਰਿਚਿਤੇ ਹਿ ਧਮ੍ਮੇ ਪਞ੍ਞਾ ਪਜਾਨਾਤਿ, ਨੋ ਪਮੁਟ੍ਠੇ. ਯਥਾ ਚ ਪਾਚਨਂ ਬਲੀਬਦ੍ਦਾਨਂ ਵਿਜ੍ਝਨਭਯਂ ਦਸ੍ਸੇਨ੍ਤਂ ਸਂਸੀਦਿਤੁਂ ਨ ਦੇਤਿ, ਉਪ੍ਪਥਗਮਨਂ ਵਾਰੇਤਿ, ਏਵਂ ਸਤਿ ਵੀਰਿਯਬਲੀਬਦ੍ਦਾਨਂ ਅਪਾਯਭਯਂ ਦਸ੍ਸੇਨ੍ਤੀ ਕੋਸਜ੍ਜਸਂਸੀਦਨਂ ਨ ਦੇਤਿ, ਕਾਮਗੁਣਸਙ੍ਖਾਤੇ ਅਗੋਚਰੇ ਚਾਰਂ ਨਿਵਾਰੇਤ੍ਵਾ ਕਮ੍ਮਟ੍ਠਾਨੇ ਨਿਯੋਜੇਨ੍ਤੀ ਉਪ੍ਪਥਗਮਨਂ ਵਾਰੇਤਿ. ਤੇਨਾਹ ‘‘ਸਤਿ ਮੇ ਫਾਲਪਾਚਨ’’ਨ੍ਤਿ.

ਕਾਯਗੁਤ੍ਤੋਤਿ ਤਿਵਿਧੇਨ ਕਾਯਸੁਚਰਿਤੇਨ ਗੁਤ੍ਤੋ. ਵਚੀਗੁਤ੍ਤੋਤਿ ਚਤੁਬ੍ਬਿਧੇਨ ਵਚੀਸੁਚਰਿਤੇਨ ਗੁਤ੍ਤੋ. ਏਤ੍ਤਾਵਤਾ ਪਾਤਿਮੋਕ੍ਖਸਂਵਰਸੀਲਂ ਵੁਤ੍ਤਂ. ਆਹਾਰੇ ਉਦਰੇ ਯਤੋਤਿ ਏਤ੍ਥ ਆਹਾਰਮੁਖੇਨ ਸਬ੍ਬਪਚ੍ਚਯਾਨਂ ਗਹਿਤਤ੍ਤਾ ਚਤੁਬ੍ਬਿਧੇਪਿ ਪਚ੍ਚਯੇ ਯਤੋ ਸਂਯਤੋ ਨਿਰੁਪਕ੍ਕਿਲੇਸੋਤਿ ਅਤ੍ਥੋ. ਇਮਿਨਾ ਆਜੀਵਪਾਰਿਸੁਦ੍ਧਿਸੀਲਂ ਵੁਤ੍ਤਂ. ਉਦਰੇ ਯਤੋਤਿ ਉਦਰੇ ਯਤੋ ਸਂਯਤੋ ਮਿਤਭੋਜੀ, ਆਹਾਰੇ ਮਤ੍ਤਞ੍ਞੂਤਿ ਵੁਤ੍ਤਂ ਹੋਤਿ. ਇਮਿਨਾ ਭੋਜਨੇ ਮਤ੍ਤਞ੍ਞੁਤਾਮੁਖੇਨ ਪਚ੍ਚਯਪਟਿਸੇਵਨਸੀਲਂ ਵੁਤ੍ਤਂ. ਤੇਨ ਕਿਂ ਦੀਪੇਤਿ? ਯਥਾ ਤ੍ਵਂ, ਬ੍ਰਾਹ੍ਮਣ, ਬੀਜਂ ਵਪਿਤ੍ਵਾ ਸਸ੍ਸਪਰਿਪਾਲਨਤ੍ਥਂ ਕਣ੍ਟਕਵਤਿਂ ਵਾ ਰੁਕ੍ਖਵਤਿਂ ਵਾ ਪਾਕਾਰਪਰਿਕ੍ਖੇਪਂ ਵਾ ਕਰੋਸਿ, ਤੇਨ ਤੇ ਗੋਮਹਿਂਸਮਿਗਗਣਾ ਪਵੇਸਂ ਅਲਭਨ੍ਤਾ ਸਸ੍ਸਂ ਨ ਵਿਲੁਮ੍ਪਨ੍ਤਿ, ਏਵਮਹਮ੍ਪਿ ਤਂ ਸਦ੍ਧਾਬੀਜਂ ਵਪਿਤ੍ਵਾ ਨਾਨਪ੍ਪਕਾਰਕੁਸਲਸਸ੍ਸਪਰਿਪਾਲਨਤ੍ਥਂ ਕਾਯਵਚੀਆਹਾਰਗੁਤ੍ਤਿਮਯਂ ਤਿਵਿਧਂ ਪਰਿਕ੍ਖੇਪਂ ਕਰੋਮਿ, ਤੇਨ ਮੇ ਰਾਗਾਦਿਅਕੁਸਲਧਮ੍ਮਗੋਮਹਿਂਸਮਿਗਗਣਾ ਪਵੇਸਂ ਅਲਭਨ੍ਤਾ ਨਾਨਪ੍ਪਕਾਰਕਂ ਕੁਸਲਸਸ੍ਸਂ ਨ ਵਿਲੁਮ੍ਪਨ੍ਤੀਤਿ.

ਸਚ੍ਚਂ ਕਰੋਮਿ ਨਿਦ੍ਦਾਨਨ੍ਤਿ ਏਤ੍ਥ ਦ੍ਵੀਹਾਕਾਰੇਹਿ ਅਵਿਸਂਵਾਦਨਂ ਸਚ੍ਚਂ. ਨਿਦ੍ਦਾਨਨ੍ਤਿ ਛੇਦਨਂ ਲੁਨਨਂ ਉਪ੍ਪਾਟਨਂ. ਕਰਣਤ੍ਥੇ ਚੇਤਂ ਉਪਯੋਗਵਚਨਂ ਵੇਦਿਤਬ੍ਬਂ. ਅਯਂ ਹੇਤ੍ਥ ਅਤ੍ਥੋ ‘‘ਸਚ੍ਚੇਨ ਕਰੋਮਿ ਨਿਦ੍ਦਾਨ’’ਨ੍ਤਿ. ਕਿਂ ਵੁਤ੍ਤਂ ਹੋਤਿ – ‘‘ਯਥਾ ਤ੍ਵਂ ਬਾਹਿਰਂ ਕਸਿਂ ਕਤ੍ਵਾ ਸਸ੍ਸਦੂਸਕਾਨਂ ਤਿਣਾਨਂ ਹਤ੍ਥੇਨ ਵਾ ਅਸਿਤੇਨ ਵਾ ਨਿਦ੍ਦਾਨਂ ਕਰੋਸਿ, ਏਵਂ ਅਹਮ੍ਪਿ ਅਜ੍ਝਤ੍ਤਿਕਂ ਕਸਿਂ ਕਤ੍ਵਾ ਕੁਸਲਸਸ੍ਸਦੂਸਕਾਨਂ ਵਿਸਂਵਾਦਨਤਿਣਾਨਂ ਸਚ੍ਚੇਨ ਨਿਦ੍ਦਾਨਂ ਕਰੋਮੀ’’ਤਿ. ਯਥਾਭੂਤਞਾਣਂ ਵਾ ਏਤ੍ਥ ਸਚ੍ਚਨ੍ਤਿ ਵੇਦਿਤਬ੍ਬਂ. ਤੇਨ ਅਤ੍ਤਸਞ੍ਞਾਦੀਨਂ ਤਿਣਾਨਂ ਨਿਦ੍ਦਾਨਂ ਕਰੋਮੀਤਿ ਦਸ੍ਸੇਤਿ. ਅਥ ਵਾ ਨਿਦ੍ਦਾਨਨ੍ਤਿ ਛੇਦਕਂ ਲਾਵਕਂ ਉਪ੍ਪਾਟਕਨ੍ਤਿ ਅਤ੍ਥੋ. ਯਥਾ ਤ੍ਵਂ ਦਾਸਂ ਵਾ ਕਮ੍ਮਕਰਂ ਵਾ ਨਿਦ੍ਦਾਨਂ ਕਰੋਸਿ, ‘‘ਨਿਦ੍ਦੇਹਿ ਤਿਣਾਨੀ’’ਤਿ ਤਿਣਾਨਂ ਛੇਦਕਂ ਲਾਵਕਂ ਉਪ੍ਪਾਟਕਂ ਕਰੋਸਿ, ਏਵਮਹਂ ਸਚ੍ਚਂ ਕਰੋਮੀਤਿ ਦਸ੍ਸੇਤਿ, ਅਥ ਵਾ ਸਚ੍ਚਨ੍ਤਿ ਦਿਟ੍ਠਿਸਚ੍ਚਂ. ਤਮਹਂ ਨਿਦ੍ਦਾਨਂ ਕਰੋਮਿ, ਛਿਨ੍ਦਿਤਬ੍ਬਂ ਲੁਨਿਤਬ੍ਬਂ ਉਪ੍ਪਾਟੇਤਬ੍ਬਂ ਕਰੋਮੀਤਿ. ਇਤਿ ਇਮੇਸੁ ਦ੍ਵੀਸੁ ਵਿਕਪ੍ਪੇਸੁ ਉਪਯੋਗੇਨੇਵਤ੍ਥੋ ਯੁਜ੍ਜਤਿ.

ਸੋਰਚ੍ਚਂ ਮੇ ਪਮੋਚਨਨ੍ਤਿ ਏਤ੍ਥ ਯਂ ਤਂ ‘‘ਕਾਯਿਕੋ ਅਵੀਤਿਕ੍ਕਮੋ ਵਾਚਸਿਕੋ ਅਵੀਤਿਕ੍ਕਮੋ’’ਤਿ ਸੀਲਮੇਵ ‘‘ਸੋਰਚ੍ਚ’’ਨ੍ਤਿ ਵੁਤ੍ਤਂ, ਨ ਤਂ ਅਧਿਪ੍ਪੇਤਂ. ‘‘ਕਾਯਗੁਤ੍ਤੋ’’ਤਿਆਦਿਨਾ ਹਿ ਤਂ ਵੁਤ੍ਤਮੇਵ. ਅਰਹਤ੍ਤਫਲਂ ਪਨ ਅਧਿਪ੍ਪੇਤਂ. ਤਂ ਹਿ ਸੁਨ੍ਦਰੇ ਨਿਬ੍ਬਾਨੇ ਰਤਤ੍ਤਾ ‘‘ਸੋਰਚ੍ਚ’’ਨ੍ਤਿ ਵੁਚ੍ਚਤਿ. ਪਮੋਚਨਨ੍ਤਿ ਯੋਗਵਿਸ੍ਸਜ੍ਜਨਂ. ਇਦਂ ਵੁਤ੍ਤਂ ਹੋਤਿ – ਯਥਾ ਤਵ ਪਮੋਚਨਂ ਪੁਨਪਿ ਸਾਯਨ੍ਹੇ ਵਾ ਦੁਤਿਯਦਿਵਸੇ ਵਾ ਅਨਾਗਤਸਂਵਚ੍ਛਰੇ ਵਾ ਯੋਜੇਤਬ੍ਬਤੋ ਅਪ੍ਪਮੋਚਨਮੇਵ ਹੋਤਿ, ਨ ਮਮ ਏਵਂ. ਨ ਹਿ ਮਮ ਅਨ੍ਤਰਾ ਮੋਚਨਂ ਨਾਮ ਅਤ੍ਥਿ. ਅਹਂ ਹਿ ਦੀਪਙ੍ਕਰਦਸਬਲਕਾਲਤੋ ਪਟ੍ਠਾਯ ਪਞ੍ਞਾਨਙ੍ਗਲੇ ਵੀਰਿਯਬਲੀਬਦ੍ਦੇ ਯੋਜੇਤ੍ਵਾ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਮਹਾਕਸਿਂ ਕਸਨ੍ਤੋ ਤਾਵ ਨ ਮੁਞ੍ਚਿਂ, ਯਾਵ ਨ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਜ੍ਝਿਂ. ਯਦਾ ਚ ਮੇ ਸਬ੍ਬਂ ਤਂ ਕਾਲਂ ਖੇਪੇਤ੍ਵਾ ਬੋਧਿਮੂਲੇ ਅਪਰਾਜਿਤਪਲ੍ਲਙ੍ਕੇ ਨਿਸਿਨ੍ਨਸ੍ਸ ਸਬ੍ਬਗੁਣਪਰਿਵਾਰਂ ਅਰਹਤ੍ਤਫਲਂ ਉਦਪਾਦਿ, ਤਦਾ ਮਯਾ ਤਂ ਸਬ੍ਬੁਸ੍ਸੁਕ੍ਕਪਟਿਪ੍ਪਸ੍ਸਦ੍ਧਿਯਾ ਪਮੁਤ੍ਤਂ, ਨ ਦਾਨਿ ਪੁਨ ਯੋਜੇਤਬ੍ਬਂ ਭਵਿਸ੍ਸਤੀਤਿ. ਏਤਮਤ੍ਥਂ ਸਨ੍ਧਾਯਾਹ ‘‘ਸੋਰਚ੍ਚਂ ਮੇ ਪਮੋਚਨ’’ਨ੍ਤਿ.

ਵੀਰਿਯਂ ਮੇ ਧੁਰਧੋਰਯ੍ਹਨ੍ਤਿ ਏਤ੍ਥ ਵੀਰਿਯਨ੍ਤਿ ਕਾਯਿਕਚੇਤਸਿਕੋ ਵੀਰਿਯਾਰਮ੍ਭੋ. ਧੁਰਧੋਰਯ੍ਹਨ੍ਤਿ ਧੁਰਾਯਂ ਧੋਰਯ੍ਹਂ, ਧੁਰਾਵਹਨ੍ਤਿ ਅਤ੍ਥੋ. ਯਥਾ ਹਿ ਬ੍ਰਾਹ੍ਮਣਸ੍ਸ ਧੁਰਾਯਂ ਧੋਰਯ੍ਹਾਕਡ੍ਢਿਤਂ ਨਙ੍ਗਲਂ ਭੂਮਿਘਨਂ ਭਿਨ੍ਦਤਿ, ਮੂਲਸਨ੍ਤਾਨਕਾਨਿ ਚ ਪਦਾਲੇਤਿ, ਏਵਂ ਭਗਵਤੋ ਵੀਰਿਯਾਕਡ੍ਢਿਤਂ ਪਞ੍ਞਾਨਙ੍ਗਲਂ ਯਥਾ ਵੁਤ੍ਤਂ ਘਨਂ ਭਿਨ੍ਦਤਿ, ਕਿਲੇਸਸਨ੍ਤਾਨਕਾਨਿ ਚ ਪਦਾਲੇਤਿ. ਤੇਨਾਹ ‘‘ਵੀਰਿਯਂ ਮੇ ਧੁਰਧੋਰਯ੍ਹ’’ਨ੍ਤਿ. ਅਥ ਵਾ ਪੁਰਿਮਧੁਰਾਵਹਤ੍ਤਾ ਧੁਰਾ, ਮੂਲਧੁਰਾਵਹਤ੍ਤਾ ਧੋਰਯ੍ਹਾ, ਧੁਰਾ ਚ ਧੋਰਯ੍ਹਾ ਚ ਧੁਰਧੋਰਯ੍ਹਾ. ਇਤਿ ਯਥਾ ਬ੍ਰਾਹ੍ਮਣਸ੍ਸ ਏਕੇਕਸ੍ਮਿਂ ਨਙ੍ਗਲੇ ਚਤੁਬਲੀਬਦ੍ਦਪਭੇਦਂ ਧੁਰਧੋਰਯ੍ਹਂ ਵਹਨ੍ਤਂ ਉਪ੍ਪਨ੍ਨੁਪ੍ਪਨ੍ਨਂ ਤਿਣਮੂਲਘਾਤਞ੍ਚੇਵ ਸਸ੍ਸਸਮ੍ਪਤ੍ਤਿਞ੍ਚ ਸਾਧੇਤਿ, ਏਵਂ ਭਗਵਤੋ ਚਤੁਸਮ੍ਮਪ੍ਪਧਾਨਵੀਰਿਯਭੇਦਂ ਧੁਰਧੋਰਯ੍ਹਂ ਵਹਨ੍ਤਂ ਉਪ੍ਪਨ੍ਨੁਪ੍ਪਨ੍ਨਂ ਅਕੁਸਲਘਾਤਞ੍ਚੇਵ ਕੁਸਲਸਮ੍ਪਤ੍ਤਿਞ੍ਚ ਸਾਧੇਤਿ. ਤੇਨਾਹ ‘‘ਵੀਰਿਯਂ ਮੇ ਧੁਰਧੋਰਯ੍ਹ’’ਨ੍ਤਿ.

ਯੋਗਕ੍ਖੇਮਾਧਿਵਾਹਨਨ੍ਤਿ ਏਤ੍ਥ ਯੋਗੇਹਿ ਖੇਮਤ੍ਤਾ ਨਿਬ੍ਬਾਨਂ ਯੋਗਕ੍ਖੇਮਂ ਨਾਮ, ਤਂ ਅਧਿਕਿਚ੍ਚ ਵਾਹੀਯਤਿ, ਅਭਿਮੁਖਂ ਵਾ ਵਾਹੀਯਤੀਤਿ ਅਧਿਵਾਹਨਂ, ਯੋਗਕ੍ਖੇਮਸ੍ਸ ਅਧਿਵਾਹਨਂ ਯੋਗਕ੍ਖੇਮਾਧਿਵਾਹਨਨ੍ਤਿ. ਇਦਂ ਵੁਤ੍ਤਂ ਹੋਤਿ – ਯਥਾ ਤਵ ਧੁਰਧੋਰਯ੍ਹਂ ਪੁਰਤ੍ਥਿਮਾਦੀਸੁ ਅਞ੍ਞਤਰਦਿਸਾਭਿਮੁਖਂ ਵਾਹੀਯਤਿ, ਤਥਾ ਮਮ ਧੁਰਧੋਰਯ੍ਹਂ ਨਿਬ੍ਬਾਨਾਭਿਮੁਖਂ ਵਾਹੀਯਤੀਤਿ. ਏਵਂ ਵਾਹੀਯਮਾਨਂਵ ਗਚ੍ਛਤਿ ਅਨਿਵਤ੍ਤਨ੍ਤਂ. ਯਥਾ ਤਵ ਨਙ੍ਗਲਂ ਵਹਨ੍ਤਂ ਧੁਰਧੋਰਯ੍ਹਂ ਖੇਤ੍ਤਕੋਟਿਂ ਪਤ੍ਵਾ ਪੁਨ ਨਿਵਤ੍ਤਤਿ, ਏਵਂ ਅਨਿਵਤ੍ਤਨ੍ਤਂ ਦੀਪਙ੍ਕਰਕਾਲਤੋ ਪਟ੍ਠਾਯ ਗਚ੍ਛਤੇਵ. ਯਸ੍ਮਾ ਵਾ ਤੇਨ ਤੇਨ ਮਗ੍ਗੇਨ ਪਹੀਨਾ ਕਿਲੇਸਾ ਨ ਪੁਨਪ੍ਪੁਨਂ ਪਹਾਤਬ੍ਬਾ ਹੋਨ੍ਤਿ, ਯਥਾ ਤਵ ਨਙ੍ਗਲੇਨ ਛਿਨ੍ਨਾਨਿ ਤਿਣਾਨਿ ਪੁਨ ਅਪਰਸ੍ਮਿਂ ਸਮਯੇ ਛਿਨ੍ਦਿਤਬ੍ਬਾਨਿ ਹੋਨ੍ਤਿ, ਤਸ੍ਮਾਪਿ ਏਵਂ ਪਠਮਮਗ੍ਗਵਸੇਨ ਦਿਟ੍ਠੇਕਟ੍ਠੇ ਕਿਲੇਸੇ, ਦੁਤਿਯਵਸੇਨ ਓਲ਼ਾਰਿਕੇ, ਤਤਿਯਵਸੇਨ ਅਣੁਸਹਗਤੇ, ਚਤੁਤ੍ਥਵਸੇਨ ਸਬ੍ਬਕਿਲੇਸੇ ਪਜਹਨ੍ਤਂ ਗਚ੍ਛਤਿ ਅਨਿਵਤ੍ਤਨ੍ਤਂ. ਅਥ ਵਾ ਗਚ੍ਛਤਿ ਅਨਿਵਤ੍ਤਨ੍ਤਿ ਨਿਵਤ੍ਤਨਰਹਿਤਂ ਹੁਤ੍ਵਾ ਗਚ੍ਛਤੀਤਿ ਅਤ੍ਥੋ. ਤਨ੍ਤਿ ਤਂ ਧੁਰਧੋਰਯ੍ਹਂ. ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਏਵਂ ਗਚ੍ਛਨ੍ਤਞ੍ਚ ਯਥਾ ਤਵ ਧੁਰਧੋਰਯ੍ਹਂ ਨ ਤਂ ਠਾਨਂ ਗਚ੍ਛਤਿ, ਯਤ੍ਥ ਗਨ੍ਤ੍ਵਾ ਕਸ੍ਸਕੋ ਅਸੋਕੋ ਵਿਰਜੋ ਹੁਤ੍ਵਾ ਨ ਸੋਚਤਿ. ਏਤਂ ਪਨ ਤਂ ਠਾਨਂ ਗਚ੍ਛਤਿ ਯਤ੍ਥ ਗਨ੍ਤ੍ਵਾ ਨ ਸੋਚਤਿ. ਯਤ੍ਥ ਸਤਿਪਾਚਨੇਨ ਏਤਂ ਵੀਰਿਯਧੁਰਧੋਰਯ੍ਹਂ ਚੋਦੇਨ੍ਤੋ ਗਨ੍ਤ੍ਵਾ ਮਾਦਿਸੋ ਕਸ੍ਸਕੋ ਅਸੋਕੋ ਵਿਰਜੋ ਹੁਤ੍ਵਾ ਨ ਸੋਚਤਿ, ਤਂ ਸਬ੍ਬਸੋਕਸਲ੍ਲਸਮੁਗ੍ਘਾਤਭੂਤਂ ਨਿਬ੍ਬਾਨਂ ਨਾਮ ਅਸਙ੍ਖਤਂ ਠਾਨਂ ਗਚ੍ਛਤੀਤਿ.

ਇਦਾਨਿ ਨਿਗਮਨਂ ਕਰੋਨ੍ਤੋ ਏਵਮੇਸਾ ਕਸੀਤਿ ਗਾਥਮਾਹ. ਤਸ੍ਸਾਯਂ ਸਙ੍ਖੇਪਤ੍ਥੋ – ਯਸ੍ਸ, ਬ੍ਰਾਹ੍ਮਣ, ਏਸਾ ਸਦ੍ਧਾਬੀਜਾ ਤਪੋਵੁਟ੍ਠਿਯਾ ਅਨੁਗ੍ਗਹਿਤਾ ਕਸੀ ਪਞ੍ਞਾਮਯਂ ਯੁਗਨਙ੍ਗਲਂ ਹਿਰਿਮਯਞ੍ਚ ਈਸਂ ਮਨੋਮਯੇਨ ਯੋਤ੍ਤੇਨ ਏਕਾਬਦ੍ਧਂ ਕਤ੍ਵਾ ਪਞ੍ਞਾਨਙ੍ਗਲੇਨ ਸਤਿਫਾਲਂ ਆਕੋਟੇਤ੍ਵਾ ਸਤਿਪਾਚਨਂ ਗਹੇਤ੍ਵਾ ਕਾਯਵਚੀਆਹਾਰਗੁਤ੍ਤਿਯਾ ਗੋਪੇਤ੍ਵਾ ਸਚ੍ਚਂ ਨਿਦ੍ਦਾਨਂ ਕਤ੍ਵਾ ਸੋਰਚ੍ਚਪਮੋਚਨਂ ਵੀਰਿਯਧੁਰਧੋਰਯ੍ਹਂ ਯੋਗਕ੍ਖੇਮਾਭਿਮੁਖਂ ਅਨਿਵਤ੍ਤਨ੍ਤਂ ਵਾਹਨ੍ਤੇਨ ਕਟ੍ਠਾ ਕਸੀ ਕਮ੍ਮਪਰਿਯੋਸਾਨਂ ਚਤੁਬ੍ਬਿਧਂ ਸਾਮਞ੍ਞਫਲਂ ਪਾਪਿਤਾ, ਸਾ ਹੋਤਿ ਅਮਤਪ੍ਫਲਾ, ਸਾ ਏਸਾ ਕਸੀ ਅਮਤਪ੍ਫਲਾ ਹੋਤਿ. ਅਮਤਂ ਵੁਚ੍ਚਤਿ ਨਿਬ੍ਬਾਨਂ, ਨਿਬ੍ਬਾਨਾਨਿਸਂਸਾ ਹੋਤੀਤਿ ਅਤ੍ਥੋ. ਸਾ ਖੋ ਪਨੇਸਾ ਕਸੀ ਨ ਮਮੇਵੇਕਸ੍ਸ ਅਮਤਪ੍ਫਲਾ ਹੋਤਿ, ਅਥ ਖੋ ਯੋ ਕੋਚਿ ਖਤ੍ਤਿਯੋ ਵਾ ਬ੍ਰਾਹ੍ਮਣੋ ਵਾ ਵੇਸ੍ਸੋ ਵਾ ਸੁਦ੍ਦੋ ਵਾ ਗਹਟ੍ਠੋ ਵਾ ਪਬ੍ਬਜਿਤੋ ਵਾ ਏਤਂ ਕਸਿਂ ਕਸਤਿ, ਸੋ ਸਬ੍ਬੋਪਿ ਏਤਂ ਕਸਿਤ੍ਵਾਨ ਸਬ੍ਬਦੁਕ੍ਖਾ ਪਮੁਚ੍ਚਤੀਤਿ.

ਏਵਂ ਭਗਵਾ ਬ੍ਰਾਹ੍ਮਣਸ੍ਸ ਅਰਹਤ੍ਤਨਿਕੂਟੇਨ ਨਿਬ੍ਬਾਨਪਰਿਯੋਸਾਨਂ ਕਤ੍ਵਾ ਦੇਸਨਂ ਨਿਟ੍ਠਾਪੇਸਿ. ਤਤੋ ਬ੍ਰਾਹ੍ਮਣੋ ਗਮ੍ਭੀਰਤ੍ਥਂ ਦੇਸਨਂ ਸੁਤ੍ਵਾ – ‘‘ਮਮ ਕਸਿਫਲਂ ਭੁਞ੍ਜਿਤ੍ਵਾ ਪੁਨਪਿ ਦਿਵਸੇਯੇਵ ਛਾਤੋ ਹੋਤਿ, ਇਮਸ੍ਸ ਪਨ ਕਸੀ ਅਮਤਪ੍ਫਲਾ, ਤਸ੍ਸ ਫਲਂ ਭੁਞ੍ਜਿਤ੍ਵਾ ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ ਞਤ੍ਵਾ ਪਸਨ੍ਨੋ ਪਸਨ੍ਨਾਕਾਰਂ ਕਰੋਨ੍ਤੋ ਭੁਞ੍ਜਤੁ ਭਵਂ ਗੋਤਮੋਤਿਆਦਿਮਾਹ. ਤਂ ਸਬ੍ਬਂ ਤਤੋ ਪਰਞ੍ਚ ਵੁਤ੍ਤਤ੍ਥਮੇਵਾਤਿ. ਪਠਮਂ.

੨. ਉਦਯਸੁਤ੍ਤਵਣ੍ਣਨਾ

੧੯੮. ਦੁਤਿਯੇ ਓਦਨੇਨ ਪੂਰੇਸੀਤਿ ਅਤ੍ਤਨੋ ਅਤ੍ਥਾਯ ਸਮ੍ਪਾਦਿਤੇਨ ਸੂਪਬ੍ਯਞ੍ਜਨੇਨ ਓਦਨੇਨ ਪੂਰੇਤ੍ਵਾ ਅਦਾਸਿ. ਭਗਵਾ ਕਿਰ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋਵ ਤਂ ਬ੍ਰਾਹ੍ਮਣਂ ਦਿਸ੍ਵਾ, ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ, ਗਨ੍ਧਕੁਟਿਂ ਪਵਿਸਿਤ੍ਵਾ, ਦ੍ਵਾਰਂ ਪਿਧਾਯ, ਨਿਸਿਨ੍ਨੋ ਤਸ੍ਸ ਭੋਜਨਂ ਉਪਸਂਹਰਿਯਮਾਨਂ ਦਿਸ੍ਵਾ, ਏਕਕੋਵ ਪਤ੍ਤਂ ਅਂਸਕੂਟੇ ਲਗ੍ਗੇਤ੍ਵਾ, ਗਨ੍ਧਕੁਟਿਤੋ ਨਿਕ੍ਖਮ੍ਮ, ਨਗਰਦ੍ਵਾਰੇ ਪਤ੍ਤਂ ਨੀਹਰਿਤ੍ਵਾ, ਅਨ੍ਤੋਨਗਰਂ ਪਵਿਸਿਤ੍ਵਾ, ਪਟਿਪਾਟਿਯਾ ਗਚ੍ਛਨ੍ਤੋ ਬ੍ਰਾਹ੍ਮਣਸ੍ਸ ਦ੍ਵਾਰਕੋਟ੍ਠਕੇ ਅਟ੍ਠਾਸਿ. ਬ੍ਰਾਹ੍ਮਣੋ ਭਗਵਨ੍ਤਂ ਦਿਸ੍ਵਾ, ਅਤ੍ਤਨੋ ਸਜ੍ਜਿਤਂ ਭੋਜਨਂ ਅਦਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਦੁਤਿਯਮ੍ਪੀਤਿ ਦੁਤਿਯਦਿਵਸੇਪਿ. ਤਤਿਯਮ੍ਪੀਤਿ ਤਤਿਯਦਿਵਸੇਪਿ. ਤਾਨਿ ਕਿਰ ਤੀਣਿ ਦਿਵਸਾਨਿ ਨਿਰਨ੍ਤਰਂ ਬ੍ਰਾਹ੍ਮਣਸ੍ਸ ਘਰਦ੍ਵਾਰਂ ਗਚ੍ਛਨ੍ਤਸ੍ਸ ਭਗਵਤੋ ਅਨ੍ਤਰਾ ਅਞ੍ਞੋ ਕੋਚਿ ਉਟ੍ਠਾਯ ਪਤ੍ਤਂ ਗਹੇਤੁਂ ਸਮਤ੍ਥੋ ਨਾਮ ਨਾਹੋਸਿ, ਮਹਾਜਨੋ ਓਲੋਕੇਨ੍ਤੋਵ ਅਟ੍ਠਾਸਿ.

ਏਤਦਵੋਚਾਤਿ ਬ੍ਰਾਹ੍ਮਣੋ ਤੀਣਿ ਦਿਵਸਾਨਿ ਪਤ੍ਤਂ ਪੂਰੇਤ੍ਵਾ ਦੇਨ੍ਤੋਪਿ ਨ ਸਦ੍ਧਾਯ ਅਦਾਸਿ, ‘‘ਘਰਦ੍ਵਾਰਂ ਆਗਨ੍ਤ੍ਵਾ ਠਿਤਸ੍ਸ ਪਬ੍ਬਜਿਤਸ੍ਸ ਭਿਕ੍ਖਾਮਤ੍ਤਮ੍ਪਿ ਅਦਤ੍ਵਾ ਭੁਞ੍ਜਤੀ’’ਤਿ ਉਪਾਰਮ੍ਭਭਯੇਨ ਅਦਾਸਿ. ਦਦਨ੍ਤੋ ਚ ਦ੍ਵੇ ਦਿਵਸਾਨਿ ਦਤ੍ਵਾ ਕਿਞ੍ਚਿ ਅਵਤ੍ਵਾਵ ਨਿਵਤ੍ਤੋ. ਭਗਵਾਪਿ ਕਿਞ੍ਚਿ ਅਵਤ੍ਵਾਵ ਪਕ੍ਕਨ੍ਤੋ. ਤਤਿਯਦਿਵਸੇ ਪਨ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਏਤਂ ‘‘ਪਕਟ੍ਠਕੋ’’ਤਿਆਦਿਵਚਨਂ ਅਵੋਚ. ਭਗਵਾਪਿ ਏਤਂ ਵਚਨਂ ਨਿਚ੍ਛਾਰਾਪਨਤ੍ਥਮੇਵ ਯਾਵ ਤਤਿਯਮਗਮਾਸਿ. ਤਤ੍ਥ ਪਕਟ੍ਠਕੋਤਿ ਰਸਗਿਦ੍ਧੋ.

ਪੁਨਪ੍ਪੁਨਂ ਚੇਵ ਵਪਨ੍ਤਿ ਬੀਜਨ੍ਤਿ ਸਤ੍ਥਾ ਬ੍ਰਾਹ੍ਮਣਸ੍ਸ ਵਚਨਂ ਸੁਤ੍ਵਾ, ‘‘ਬ੍ਰਾਹ੍ਮਣ, ਤ੍ਵਂ ਤੀਣਿ ਦਿਵਸਾਨਿ ਪਿਣ੍ਡਪਾਤਂ ਦਤ੍ਵਾ ਓਸਕ੍ਕਸਿ, ਪੁਨਪ੍ਪੁਨਂ ਕਾਤਬ੍ਬਾ ਨਾਮ ਲੋਕਸ੍ਮਿਂ ਸੋਲ਼ਸ ਧਮ੍ਮਾ’’ਤਿ ਵਤ੍ਵਾ ਤੇ ਧਮ੍ਮੇ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਤਤ੍ਥ ਪੁਨਪ੍ਪੁਨਂ ਚੇਵ ਵਪਨ੍ਤੀਤਿ ਏਕਸ੍ਮਿਂ ਸਸ੍ਸਵਾਰੇ ਵੁਤ੍ਤਂ ‘‘ਅਲਮੇਤ੍ਤਾਵਤਾ’’ਤਿ ਅਨੋਸਕ੍ਕਿਤ੍ਵਾ ਅਪਰਾਪਰੇਸੁਪਿ ਸਸ੍ਸਵਾਰੇਸੁ ਚ ਵਪਨ੍ਤਿਯੇਵ. ਪੁਨਪ੍ਪੁਨਂ ਵਸ੍ਸਤੀਤਿ ਨ ਏਕਦਿਵਸਂ ਵਸ੍ਸਿਤ੍ਵਾ ਤਿਟ੍ਠਤਿ, ਪੁਨਪ੍ਪੁਨਦਿਵਸੇਸੁਪਿ ਪੁਨਪ੍ਪੁਨਸਂਵਚ੍ਛਰੇਸੁਪਿ ਵਸ੍ਸਤਿਯੇਵ, ਏਵਂ ਜਨਪਦਾ ਇਦ੍ਧਾ ਹੋਨ੍ਤਿ. ਏਤੇਨੁਪਾਯੇਨ ਸਬ੍ਬਤ੍ਥ ਨਯੋ ਵੇਦਿਤਬ੍ਬੋ.

ਯਾਚਕਾਤਿ ਇਮਸ੍ਮਿਂ ਪਦੇ ਸਤ੍ਥਾ ਦੇਸਨਾਕੁਸਲਤਾਯ ਅਤ੍ਤਾਨਮ੍ਪਿ ਪਕ੍ਖਿਪਿਤ੍ਵਾ ਦਸ੍ਸੇਤਿ. ਖੀਰਨਿਕਾਤਿ ਖੀਰਕਾਰਕਾ ਗੋਦੋਹਕਾ. ਨ ਹਿ ਤੇ ਏਕਵਾਰਮੇਵ ਥਨਂ ਅਞ੍ਛਨ੍ਤਿ, ਪੁਨਪ੍ਪੁਨਂ ਅਞ੍ਛਨ੍ਤਾ ਧੇਨੁਂ ਦੁਹਨ੍ਤੀਤਿ ਅਤ੍ਥੋ. ਕਿਲਮਤਿ ਫਨ੍ਦਤਿ ਚਾਤਿ ਅਯਂ ਸਤ੍ਤੋ ਤੇਨ ਇਰਿਯਾਪਥੇਨ ਕਿਲਮਤਿ ਚੇਵ ਫਨ੍ਦਤਿ ਚ. ਗਬ੍ਭਨ੍ਤਿ ਸੋਣਸਿਙ੍ਗਾਲਾਦੀਨਮ੍ਪਿ ਤਿਰਚ੍ਛਾਨਗਤਾਨਂ ਕੁਚ੍ਛਿਂ. ਸਿਵਥਿਕਨ੍ਤਿ ਸੁਸਾਨਂ, ਮਤਂ ਮਤਂ ਸਤ੍ਤਂ ਤਤ੍ਥ ਪੁਨਪ੍ਪੁਨਂ ਹਰਨ੍ਤੀਤਿ ਅਤ੍ਥੋ. ਮਗ੍ਗਞ੍ਚ ਲਦ੍ਧਾ ਅਪੁਨਬ੍ਭਵਾਯਾਤਿ ਅਪੁਨਬ੍ਭਵਾਯ ਮਗ੍ਗੋ ਨਾਮ ਨਿਬ੍ਬਾਨਂ, ਤਂ ਲਭਿਤ੍ਵਾਤਿ ਅਤ੍ਥੋ.

ਏਵਂ ਵੁਤ੍ਤੇਤਿ ਏਵਂ ਭਗਵਤਾ ਅਨ੍ਤਰਵੀਥਿਯਂ ਠਤ੍ਵਾਵ ਸੋਲ਼ਸ ਪੁਨਪ੍ਪੁਨਧਮ੍ਮੇ ਦੇਸੇਨ੍ਤੇਨ ਵੁਤ੍ਤੇ. ਏਤਦਵੋਚਾਤਿ ਦੇਸਨਾਪਰਿਯੋਸਾਨੇ ਪਸਨ੍ਨੋ ਸਦ੍ਧਿਂ ਪੁਤ੍ਤਦਾਰਮਿਤ੍ਤਞਾਤਿਵਗ੍ਗੇਨ ਭਗਵਤੋ ਪਾਦੇ ਵਨ੍ਦਿਤ੍ਵਾ ਏਤਂ ‘‘ਅਭਿਕ੍ਕਨ੍ਤਂ ਭੋ’’ਤਿਆਦਿਵਚਨਂ ਅਵੋਚ. ਦੁਤਿਯਂ.

੩. ਦੇਵਹਿਤਸੁਤ੍ਤਵਣ੍ਣਨਾ

੧੯੯. ਤਤਿਯੇ ਵਾਤੇਹੀਤਿ ਉਦਰਵਾਤੇਹਿ. ਭਗਵਤੋ ਕਿਰ ਛਬ੍ਬਸ੍ਸਾਨਿ ਦੁਕ੍ਕਰਕਾਰਿਕਂ ਕਰੋਨ੍ਤਸ੍ਸ ਪਸਤਮੁਗ੍ਗਯੂਸਾਦੀਨਿ ਆਹਾਰਯਤੋ ਦੁਬ੍ਭੋਜਨੇਨ ਚੇਵ ਦੁਕ੍ਖਸੇਯ੍ਯਾਯ ਚ ਉਦਰਵਾਤੋ ਕੁਪ੍ਪਿ. ਅਪਰਭਾਗੇ ਸਮ੍ਬੋਧਿਂ ਪਤ੍ਵਾ ਪਣੀਤਭੋਜਨਂ ਭੁਞ੍ਜਨ੍ਤਸ੍ਸਾਪਿ ਅਨ੍ਤਰਨ੍ਤਰਾ ਸੋ ਆਬਾਧੋ ਅਤ੍ਤਾਨਂ ਦਸ੍ਸੇਤਿਯੇਵ. ਤਂ ਸਨ੍ਧਾਯੇਤਂ ਵੁਤ੍ਤਂ. ਉਪਟ੍ਠਾਕੋ ਹੋਤੀਤਿ ਪਠਮਬੋਧਿਯਂ ਅਨਿਬਦ੍ਧੁਪਟ੍ਠਾਕਕਾਲੇ ਉਪਟ੍ਠਾਕੋ ਹੋਤਿ. ਤਸ੍ਮਿਂ ਕਿਰ ਕਾਲੇ ਸਤ੍ਥੁਅਸੀਤਿਮਹਾਥੇਰੇਸੁ ਉਪਟ੍ਠਾਕੋ ਅਭੂਤਪੁਬ੍ਬੋ ਨਾਮ ਨਤ੍ਥਿ. ਨਾਗਸਮਾਲੋ ਉਪਵਾਨੋ ਸੁਨਕ੍ਖਤ੍ਤੋ ਚੁਨ੍ਦੋ ਸਮਣੁਦ੍ਦੇਸੋ ਸਾਗਤੋ ਬੋਧਿ ਮੇਘਿਯੋਤਿ ਇਮੇ ਪਨ ਪਾਲ਼ਿਯਂ ਆਗਤੁਪਟ੍ਠਾਕਾ. ਇਮਸ੍ਮਿਂ ਪਨ ਕਾਲੇ ਉਪਵਾਨਤ੍ਥੇਰੋ ਪਾਤੋਵ ਉਟ੍ਠਾਯ ਪਰਿਵੇਣਸਮ੍ਮਜ੍ਜਨਂ ਦਨ੍ਤਕਟ੍ਠਦਾਨਂ ਨ੍ਹਾਨੋਦਕਪਰਿਯਾਦਨਂ ਪਤ੍ਤਚੀਵਰਂ ਗਹੇਤ੍ਵਾ ਅਨੁਗਮਨਨ੍ਤਿ ਸਬ੍ਬਂ ਭਗਵਤੋ ਉਪਟ੍ਠਾਨਮਕਾਸਿ. ਉਪਸਙ੍ਕਮੀਤਿ ਪਠਮਬੋਧਿਯਂ ਕਿਰ ਵੀਸਤਿ ਵਸ੍ਸਾਨਿ ਨਿਦ੍ਧੂਮਂ ਅਰਞ੍ਞਮੇਵ ਹੋਤਿ, ਭਿਕ੍ਖੁਸਙ੍ਘਸ੍ਸ ਉਦਕਤਾਪਨਮ੍ਪਿ ਨ ਭਗਵਤਾ ਅਨੁਞ੍ਞਾਤਂ. ਸੋ ਚ ਬ੍ਰਾਹ੍ਮਣੋ ਉਦ੍ਧਨਪਾਲ਼ਿਂ ਬਨ੍ਧਾਪੇਤ੍ਵਾ ਮਹਾਚਾਟਿਯੋ ਉਦ੍ਧਨਮਾਰੋਪੇਤ੍ਵਾ ਉਣ੍ਹੋਦਕਂ ਕਾਰੇਤ੍ਵਾ, ਨ੍ਹਾਨੀਯਚੁਣ੍ਣਾਦੀਹਿ ਸਦ੍ਧਿਂ ਤਂ ਵਿਕ੍ਕਿਣਨ੍ਤੋ ਜੀਵਿਕਂ ਕਪ੍ਪੇਤਿ. ਨ੍ਹਾਯਿਤੁਕਾਮਾ ਤਤ੍ਥ ਗਨ੍ਤ੍ਵਾ ਮੂਲਂ ਦਤ੍ਵਾ ਨ੍ਹਾਯਿਤ੍ਵਾ ਗਨ੍ਧੇ ਵਿਲਿਮ੍ਪਿਤ੍ਵਾ ਮਾਲਂ ਪਿਲ਼ਨ੍ਧਿਤ੍ਵਾ ਪਕ੍ਕਮਨ੍ਤਿ. ਤਸ੍ਮਾ ਥੇਰੋ ਤਤ੍ਥ ਉਪਸਙ੍ਕਮਿ.

ਕਿਂ ਪਤ੍ਥਯਾਨੋਤਿ ਕਿਂ ਇਚ੍ਛਨ੍ਤੋ. ਕਿਂ ਏਸਨ੍ਤਿ ਕਿਂ ਗਵੇਸਨ੍ਤੋ. ਪੂਜਿਤੋ ਪੂਜਨੇਯ੍ਯਾਨਨ੍ਤਿ ਇਦਂ ਥੇਰੋ ਦਸਬਲਸ੍ਸ ਵਣ੍ਣਂ ਕਥੇਤੁਮਾਰਭਿ. ਗਿਲਾਨਭੇਸਜ੍ਜਤ੍ਥਂ ਗਤੇਨ ਕਿਰ ਗਿਲਾਨਸ੍ਸ ਵਣ੍ਣੋ ਕਥੇਤਬ੍ਬੋਤਿ ਵਤ੍ਤਮੇਤਂ. ਵਣ੍ਣਂ ਹਿ ਸੁਤ੍ਵਾ ਮਨੁਸ੍ਸਾ ਸਕ੍ਕਚ੍ਚਂ ਭੇਸਜ੍ਜਂ ਦਾਤਬ੍ਬਂ ਮਞ੍ਞਨ੍ਤਿ. ਸਪ੍ਪਾਯਭੇਸਜ੍ਜਂ ਲਦ੍ਧਾ ਗਿਲਾਨੋ ਖਿਪ੍ਪਮੇਵ ਵੁਟ੍ਠਾਤਿ. ਕਥੇਨ੍ਤੇਨ ਚ ਝਾਨਵਿਮੋਕ੍ਖਸਮਾਪਤ੍ਤਿਮਗ੍ਗਫਲਾਨਿ ਆਰਬ੍ਭ ਕਥੇਤੁਂ ਨ ਵਟ੍ਟਤਿ. ‘‘ਸੀਲਵਾ ਲਜ੍ਜੀ ਕੁਕ੍ਕੁਚ੍ਚਕੋ ਬਹੁਸ੍ਸੁਤੋ ਆਗਮਧਰੋ ਵਂਸਾਨੁਰਕ੍ਖਕੋ’’ਤਿ ਏਵਂ ਪਨ ਆਗਮਨੀਯਪਟਿਪਦਂਯੇਵ ਕਥੇਤੁਂ ਵਟ੍ਟਤਿ. ਪੂਜਨੇਯ੍ਯਾਨਨ੍ਤਿ ਅਸੀਤਿਮਹਾਥੇਰਾ ਸਦੇਵਕੇਨ ਲੋਕੇਨ ਪੂਜੇਤਬ੍ਬਾਤਿ ਪੂਜਨੇਯ੍ਯਾ. ਤੇਯੇਵ ਸਕ੍ਕਾਤਬ੍ਬਾਤਿ ਸਕ੍ਕਰੇਯ੍ਯਾ. ਤੇਸਂਯੇਵ ਅਪਚਿਤਿ ਕਤ੍ਤਬ੍ਬਾਤਿ ਅਪਚੇਯ੍ਯਾ. ਭਗਵਾ ਤੇਸਂ ਪੂਜਿਤੋ ਸਕ੍ਕਤੋ ਅਪਚਿਤੋ ਚ, ਇਚ੍ਚਸ੍ਸ ਤਂ ਗੁਣਂ ਪਕਾਸੇਨ੍ਤੋ ਥੇਰੋ ਏਵਮਾਹ. ਹਾਤਵੇਤਿ ਹਰਿਤੁਂ.

ਫਾਣਿਤਸ੍ਸ ਚ ਪੁਟਨ੍ਤਿ ਮਹਨ੍ਤਂ ਨਿਚ੍ਛਾਰਿਕਂ ਗੁਲ਼ਪਿਣ੍ਡਂ. ਸੋ ਕਿਰ ‘‘ਕਿਂ ਸਮਣਸ੍ਸ ਗੋਤਮਸ੍ਸ ਅਫਾਸੁਕ’’ਨ੍ਤਿ? ਪੁਚ੍ਛਿਤ੍ਵਾ, ‘‘ਉਦਰਵਾਤੋ’’ਤਿ ਸੁਤ੍ਵਾ, ‘‘ਤੇਨ ਹਿ ਮਯਮੇਤ੍ਥ ਭੇਸਜ੍ਜਂ ਜਾਨਾਮ, ਇਤੋ ਥੋਕੇਨ ਉਦਕੇਨ ਇਦਂ ਫਾਣਿਤਂ ਆਲੋਲ਼ੇਤ੍ਵਾ ਨ੍ਹਾਨਪਰਿਯੋਸਾਨੇ ਪਾਤੁਂ ਦੇਥ, ਇਤਿ ਉਣ੍ਹੋਦਕੇਨ ਬਹਿ ਪਰਿਸੇਦੋ ਭਵਿਸ੍ਸਤਿ, ਇਮਿਨਾ ਅਨ੍ਤੋਤਿ ਏਵਂ ਸਮਣਸ੍ਸ ਗੋਤਮਸ੍ਸ ਫਾਸੁਕਂ ਭਵਿਸ੍ਸਤੀ’’ਤਿ ਵਤ੍ਵਾ ਥੇਰਸ੍ਸ ਪਤ੍ਤੇ ਪਕ੍ਖਿਪਿਤ੍ਵਾ ਅਦਾਸਿ.

ਉਪਸਙ੍ਕਮੀਤਿ ਤਸ੍ਮਿਂ ਕਿਰ ਆਬਾਧੇ ਪਟਿਪ੍ਪਸ੍ਸਦ੍ਧੇ ‘‘ਦੇਵਹਿਤੇਨ ਤਥਾਗਤਸ੍ਸ ਭੇਸਜ੍ਜਂ ਦਿਨ੍ਨਂ, ਤੇਨੇਵ ਰੋਗੋ ਵੂਪਸਨ੍ਤੋ, ਅਹੋ ਦਾਨਂ ਪਰਮਦਾਨਂ ਬ੍ਰਾਹ੍ਮਣਸ੍ਸਾ’’ਤਿ ਕਥਾ ਵਿਤ੍ਥਾਰਿਤਾ ਜਾਤਾ. ਤਂ ਸੁਤ੍ਵਾ ਕਿਤ੍ਤਿਕਾਮੋ ਬ੍ਰਾਹ੍ਮਣੋ ‘‘ਏਤ੍ਤਕੇਨਪਿ ਤਾਵ ਮੇ ਅਯਂ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ’’ਤਿ ਸੋਮਨਸ੍ਸਜਾਤੋ ਅਤ੍ਤਨਾ ਕਤਭਾਵਂ ਜਾਨਾਪੇਤੁਕਾਮੋ ਤਾਵਤਕੇਨੇਵ ਦਸਬਲੇ ਵਿਸ੍ਸਾਸਂ ਆਪਜ੍ਜਿਤ੍ਵਾ ਉਪਸਙ੍ਕਮਿ.

ਦਜ੍ਜਾਤਿ ਦਦੇਯ੍ਯ. ਕਥਂ ਹਿ ਯਜਮਾਨਸ੍ਸਾਤਿ ਕੇਨ ਕਾਰਣੇਨ ਯਜਨ੍ਤਸ੍ਸ. ਇਜ੍ਝਤੀਤਿ ਸਮਿਜ੍ਝਤਿ ਮਹਪ੍ਫਲੋ ਹੋਤਿ. ਯੋਵੇਦੀਤਿ ਯੋ ਅਵੇਦਿ ਅਞ੍ਞਾਸਿ, ਵਿਦਿਤਂ ਪਾਕਟਮਕਾਸਿ ‘‘ਯੋਵੇਤੀ’’ਤਿਪਿ ਪਾਠੋ, ਯੋ ਅਵੇਤਿ ਜਾਨਾਤੀਤਿ ਅਤ੍ਥੋ. ਪਸ੍ਸਤੀਤਿ ਦਿਬ੍ਬਚਕ੍ਖੁਨਾ ਪਸ੍ਸਤਿ. ਜਾਤਿਕ੍ਖਯਨ੍ਤਿ ਅਰਹਤ੍ਤਂ. ਅਭਿਞ੍ਞਾਵੋਸਿਤੋਤਿ ਜਾਨਿਤ੍ਵਾ ਵੋਸਿਤੋ ਵੋਸਾਨਂ ਕਤਕਿਚ੍ਚਤਂ ਪਤ੍ਤੋ. ਏਵਂ ਹਿ ਯਜਮਾਨਸ੍ਸਾਤਿ ਇਮਿਨਾ ਖੀਣਾਸਵੇ ਯਜਨਾਕਾਰੇਨ ਯਜਨ੍ਤਸ੍ਸ. ਤਤਿਯਂ.

੪. ਮਹਾਸਾਲਸੁਤ੍ਤਵਣ੍ਣਨਾ

੨੦੦. ਚਤੁਤ੍ਥੇ ਲੂਖੋ ਲੂਖਪਾਵੁਰਣੋਤਿ ਜਿਣ੍ਣੋ ਜਿਣ੍ਣਪਾਵੁਰਣੋ. ਉਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਤਸ੍ਸ ਕਿਰ ਘਰੇ ਅਟ੍ਠਸਤਸਹਸ੍ਸਧਨਂ ਅਹੋਸਿ. ਸੋ ਚਤੁਨ੍ਨਂ ਪੁਤ੍ਤਾਨਂ ਆਵਾਹਂ ਕਤ੍ਵਾ ਚਤ੍ਤਾਰਿ ਸਤਸਹਸ੍ਸਾਨਿ ਅਦਾਸਿ. ਅਥਸ੍ਸ ਬ੍ਰਾਹ੍ਮਣਿਯਾ ਕਾਲਙ੍ਕਤਾਯ ਪੁਤ੍ਤਾ ਸਮ੍ਮਨ੍ਤਯਿਂਸੁ – ‘‘ਸਚੇ ਅਞ੍ਞਂ ਬ੍ਰਾਹ੍ਮਣਿਂ ਆਨੇਸ੍ਸਤਿ, ਤਸ੍ਸਾ ਕੁਚ੍ਛਿਯਂ ਨਿਬ੍ਬਤ੍ਤਵਸੇਨ ਕੁਲਂ ਭਿਜ੍ਜਿਸ੍ਸਤਿ. ਹਨ੍ਦ ਨਂ ਮਯਂ ਸਙ੍ਗਣ੍ਹਾਮਾ’’ਤਿ. ਤੇ ਚਤ੍ਤਾਰੋਪਿ ਪਣੀਤੇਹਿ ਘਾਸਚ੍ਛਾਦਨਾਦੀਹਿ ਉਪਟ੍ਠਹਨ੍ਤਾ ਹਤ੍ਥਪਾਦਸਮ੍ਬਾਹਨਾਦੀਨਿ ਕਰੋਨ੍ਤਾ ਸਙ੍ਗਣ੍ਹਿਤ੍ਵਾ ਏਕਦਿਵਸਂ ਦਿਵਾ ਨਿਦ੍ਦਾਯਿਤ੍ਵਾ ਵੁਟ੍ਠਿਤਸ੍ਸ ਹਤ੍ਥਪਾਦੇ ਸਮ੍ਬਾਹਮਾਨਾ ਪਾਟਿਯੇਕ੍ਕਂ ਘਰਾਵਾਸੇ ਆਦੀਨਵਂ ਵਤ੍ਵਾ – ‘‘ਮਯਂ ਤੁਮ੍ਹੇ ਇਮਿਨਾ ਨੀਹਾਰੇਨ ਯਾਵਜੀਵਂ ਉਪਟ੍ਠਹਿਸ੍ਸਾਮ, ਸੇਸਧਨਮ੍ਪਿ ਨੋ ਦੇਥਾ’’ਤਿ ਯਾਚਿਂਸੁ. ਬ੍ਰਾਹ੍ਮਣੋ ਪੁਨ ਏਕੇਕਸ੍ਸ ਸਤਸਹਸ੍ਸਂ ਸਤਸਹਸ੍ਸਂ ਦਤ੍ਵਾ ਅਤ੍ਤਨੋ ਨਿਵਤ੍ਥਪਾਰੁਪਨਮਤ੍ਤਂ ਠਪੇਤ੍ਵਾ ਸਬ੍ਬਂ ਉਪਭੋਗਪਰਿਭੋਗਂ ਚਤ੍ਤਾਰੋ ਕੋਟ੍ਠਾਸੇ ਕਤ੍ਵਾ ਨਿਯ੍ਯਾਦੇਸਿ. ਤਂ ਜੇਟ੍ਠਪੁਤ੍ਤੋ ਕਤਿਪਾਹਂ ਉਪਟ੍ਠਹਿ.

ਅਥ ਨਂ ਏਕਦਿਵਸਂ ਨ੍ਹਤ੍ਵਾ ਆਗਚ੍ਛਨ੍ਤਂ ਦ੍ਵਾਰਕੋਟ੍ਠਕੇ ਠਤ੍ਵਾ ਸੁਣ੍ਹਾ ਏਵਮਾਹ – ‘‘ਕਿਂ ਤਯਾ ਜੇਟ੍ਠਪੁਤ੍ਤਸ੍ਸ ਸਤਂ ਵਾ ਸਹਸ੍ਸਂ ਵਾ ਅਤਿਰੇਕਂ ਦਿਨ੍ਨਮਤ੍ਥਿ? ਨਨੁ ਸਬ੍ਬੇਸਂ ਦ੍ਵੇ ਦ੍ਵੇ ਸਤਸਹਸ੍ਸਾਨਿ ਦਿਨ੍ਨਾਨਿ, ਕਿਂ ਸੇਸਪੁਤ੍ਤਾਨਂ ਘਰਸ੍ਸ ਮਗ੍ਗਂ ਨ ਜਾਨਾਸੀ’’ਤਿ? ਸੋ ‘‘ਨਸ੍ਸ ਵਸਲੀ’’ਤਿ ਕੁਜ੍ਝਿਤ੍ਵਾ ਅਞ੍ਞਸ੍ਸ ਘਰਂ ਅਗਮਾਸਿ, ਤਤੋਪਿ ਕਤਿਪਾਹਚ੍ਚਯੇਨ ਇਮਿਨਾਵ ਉਪਾਯੇਨ ਪਲਾਪਿਤੋ ਅਞ੍ਞਸ੍ਸਾਤਿ ਏਵਂ ਏਕਘਰੇਪਿ ਪਵੇਸਨਂ ਅਲਭਮਾਨੋ ਪਣ੍ਡਰਙ੍ਗਪਬ੍ਬਜ੍ਜਂ ਪਬ੍ਬਜਿਤ੍ਵਾ ਭਿਕ੍ਖਾਯ ਚਰਨ੍ਤੋ ਕਾਲਾਨਮਚ੍ਚਯੇਨ ਜਰਾਜਿਣ੍ਣੋ ਦੁਬ੍ਭੋਜਨਦੁਕ੍ਖਸੇਯ੍ਯਾਹਿ ਮਿਲਾਤਸਰੀਰੋ ਭਿਕ੍ਖਾਚਾਰਤੋ ਆਗਮ੍ਮ, ਪੀਠਕਾਯ ਨਿਪਨ੍ਨੋ ਨਿਦ੍ਦਂ ਓਕ੍ਕਮਿਤ੍ਵਾ ਵੁਟ੍ਠਾਯ ਨਿਸਿਨ੍ਨੋ ਅਤ੍ਤਾਨਂ ਓਲੋਕੇਤ੍ਵਾ ਪੁਤ੍ਤੇਸੁ ਪਤਿਟ੍ਠਂ ਅਪਸ੍ਸਨ੍ਤੋ ਚਿਨ੍ਤੇਸਿ – ‘‘ਸਮਣੋ ਕਿਰ ਗੋਤਮੋ ਅਬ੍ਭਾਕੁਟਿਕੋ ਉਤ੍ਤਾਨਮੁਖੋ ਸੁਖਸਮ੍ਭਾਸੋ ਪਟਿਸਨ੍ਥਾਰਕੁਸਲੋ, ਸਕ੍ਕਾ ਸਮਣਂ ਗੋਤਮਂ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਲਭਿਤੁ’’ਨ੍ਤਿ ਨਿਵਾਸਨਪਾਵੁਰਣਂ ਸਣ੍ਠਪੇਤ੍ਵਾ ਭਿਕ੍ਖਾਭਾਜਨਮਾਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ.

ਦਾਰੇਹਿ ਸਂਪੁਚ੍ਛ ਘਰਾ ਨਿਕ੍ਖਾਮੇਨ੍ਤੀਤਿ ਸਬ੍ਬਂ ਮਮ ਸਨ੍ਤਕਂ ਗਹੇਤ੍ਵਾ ਮਯ੍ਹਂ ਨਿਦ੍ਧਨਭਾਵਂ ਞਤ੍ਵਾ ਅਤ੍ਤਨੋ ਭਰਿਯਾਹਿ ਸਦ੍ਧਿਂ ਮਨ੍ਤਯਿਤ੍ਵਾ ਮਂ ਘਰਾ ਨਿਕ੍ਕਡ੍ਢਾਪੇਨ੍ਤਿ.

ਨਨ੍ਦਿਸ੍ਸਨ੍ਤਿ ਨਨ੍ਦਿਜਾਤੋ ਤੁਟ੍ਠੋ ਪਮੁਦਿਤੋ ਅਹੋਸਿਂ. ਭਵਮਿਚ੍ਛਿਸਨ੍ਤਿ ਵੁਡ੍ਢਿਂ ਪਤ੍ਥਯਿਂ. ਸਾਵ ਵਾਰੇਨ੍ਤਿ ਸੂਕਰਨ੍ਤਿ ਯਥਾ ਸੁਨਖਾ ਵਗ੍ਗਵਗ੍ਗਾ ਹੁਤ੍ਵਾ ਭੁਸ੍ਸਨ੍ਤਾ ਭੁਸ੍ਸਨ੍ਤਾ ਸੂਕਰਂ ਵਾਰੇਨ੍ਤਿ, ਪੁਨਪ੍ਪੁਨਂ ਮਹਾਰਵਂ ਰਵਾਪੇਨ੍ਤਿ, ਏਵਂ ਦਾਰੇਹਿ ਸਦ੍ਧਿਂ ਮਂ ਬਹੁਂ ਵਤ੍ਵਾ ਵਿਰਵਨ੍ਤਂ ਪਲਾਪੇਨ੍ਤੀਤਿ ਅਤ੍ਥੋ.

ਅਸਨ੍ਤਾਤਿ ਅਸਪ੍ਪੁਰਿਸਾ. ਜਮ੍ਮਾਤਿ ਲਾਮਕਾ. ਭਾਸਰੇਤਿ ਭਾਸਨ੍ਤਿ. ਪੁਤ੍ਤਰੂਪੇਨਾਤਿ ਪੁਤ੍ਤਵੇਸੇਨ. ਵਯੋਗਤਨ੍ਤਿ ਤਯੋ ਵਯੇ ਗਤਂ ਅਤਿਕ੍ਕਨ੍ਤਂ ਪਚ੍ਛਿਮਵਯੇ ਠਿਤਂ ਮਂ. ਜਹਨ੍ਤੀਤਿ ਪਰਿਚ੍ਚਜਨ੍ਤਿ.

ਨਿਬ੍ਭੋਗੋਤਿ ਨਿਪ੍ਪਰਿਭੋਗੋ. ਖਾਦਨਾ ਅਪਨੀਯਤੀਤਿ ਅਸ੍ਸੋ ਹਿ ਯਾਵਦੇਵ ਤਰੁਣੋ ਹੋਤਿ ਜਵਸਮ੍ਪਨ੍ਨੋ, ਤਾਵਸ੍ਸ ਨਾਨਾਰਸਂ ਖਾਦਨਂ ਦਦਨ੍ਤਿ, ਜਿਣ੍ਣਂ ਨਿਬ੍ਭੋਗਂ ਤਤੋ ਅਪਨੇਨ੍ਤਿ, ਅਨ੍ਤਿਮਵਯੇ ਤਂ ਵਤ੍ਤਂ ਨ ਲਭਤਿ, ਗਾਵੀਹਿ ਸਦ੍ਧਿਂ ਅਟਵਿਯਂ ਸੁਕ੍ਖਤਿਣਾਨਿ ਖਾਦਨ੍ਤੋ ਚਰਤਿ. ਯਥਾ ਸੋ ਅਸ੍ਸੋ, ਏਵਂ ਜਿਣ੍ਣਕਾਲੇ ਵਿਲੁਤ੍ਤਸਬ੍ਬਧਨਤ੍ਤਾ ਨਿਬ੍ਭੋਗੋ ਮਾਦਿਸੋਪਿ ਬਾਲਕਾਨਂ ਪਿਤਾ ਥੇਰੋ ਪਰਘਰੇਸੁ ਭਿਕ੍ਖਤਿ.

ਯਞ੍ਚੇਤਿ ਨਿਪਾਤੋ. ਇਦਂ ਵੁਤ੍ਤਂ ਹੋਤਿ – ਯੇ ਮਮ ਪੁਤ੍ਤਾ ਅਨਸ੍ਸਵਾ ਅਪ੍ਪਤਿਸ੍ਸਾ ਅਵਸਵਤ੍ਤਿਨੋ, ਤੇਹਿ ਦਣ੍ਡੋਵ ਕਿਰ ਸੇਯ੍ਯੋ ਸੁਨ੍ਦਰਤਰੋਤਿ. ਇਦਾਨਿਸ੍ਸ ਸੇਯ੍ਯਭਾਵਂ ਦਸ੍ਸੇਤੁਂ ਚਣ੍ਡਮ੍ਪਿ ਗੋਣਨ੍ਤਿਆਦਿ ਵੁਤ੍ਤਂ.

ਪੁਰੇ ਹੋਤੀਤਿ ਅਗ੍ਗਤੋ ਹੋਤਿ, ਤਂ ਪੁਰਤੋ ਕਤ੍ਵਾ ਗਨ੍ਤੁਂ ਸੁਖਂ ਹੋਤੀਤਿ ਅਤ੍ਥੋ. ਗਾਧਮੇਧਤੀਤਿ ਉਦਕਂ ਓਤਰਣਕਾਲੇ ਗਮ੍ਭੀਰੇ ਉਦਕੇ ਪਤਿਟ੍ਠਂ ਲਭਤਿ.

ਪਰਿਯਾਪੁਣਿਤ੍ਵਾਤਿ ਉਗ੍ਗਣ੍ਹਿਤ੍ਵਾ ਵਾ ਵਾਚੁਗ੍ਗਤਾ ਕਤ੍ਵਾ. ਸਨ੍ਨਿਸਿਨ੍ਨੇਸੂਤਿ ਤਥਾਰੂਪੇ ਬ੍ਰਾਹ੍ਮਣਾਨਂ ਸਮਾਗਮਦਿਵਸੇ ਸਬ੍ਬਾਲਙ੍ਕਾਰਪਟਿਮਣ੍ਡਿਤੇਸੁ ਪੁਤ੍ਤੇਸੁ ਤਂ ਸਭਂ ਓਗਾਹੇਤ੍ਵਾ ਬ੍ਰਾਹ੍ਮਣਾਨਂ ਮਜ੍ਝੇ ਮਹਾਰਹੇ ਆਸਨੇ ਨਿਸਿਨ੍ਨੇਸੁ. ਅਭਾਸੀਤਿ ‘ਅਯਂ ਮੇ ਕਾਲੋ’ਤਿ ਸਭਾਯ ਮਜ੍ਝੇ ਪਵਿਸਿਤ੍ਵਾ ਹਤ੍ਥਂ ਉਕ੍ਖਿਪਿਤ੍ਵਾ, ‘‘ਭੋ ਅਹਂ ਤੁਮ੍ਹਾਕਂ ਗਾਥਾ ਭਾਸਿਤੁਕਾਮੋ, ਭਾਸਿਤੇ ਸੁਣਿਸ੍ਸਥਾ’’ਤਿ ਵਤ੍ਵਾ – ‘‘ਭਾਸ, ਬ੍ਰਾਹ੍ਮਣ, ਸੁਣੋਮਾ’’ਤਿ ਵੁਤ੍ਤੋ ਠਿਤਕੋਵ ਅਭਾਸਿ. ‘‘ਤੇਨ ਚ ਸਮਯੇਨ ਮਨੁਸ੍ਸਾਨਂ ਵਤ੍ਤਂ ਹੋਤਿ ਯੋ ਮਾਤਾਪਿਤੂਨਂ ਸਨ੍ਤਕਂ ਖਾਦਨ੍ਤੋ ਮਾਤਾਪਿਤਰੋ ਨ ਪੋਸੇਤਿ, ਸੋ ਮਾਰੇਤਬ੍ਬੋ’’ਤਿ. ਤਸ੍ਮਾ ਤੇ ਬ੍ਰਾਹ੍ਮਣਪੁਤ੍ਤਾ ਪਿਤੁਪਾਦੇਸੁ ਨਿਪਤਿਤ੍ਵਾ ‘‘ਜੀਵਿਤਂ ਨੋ ਤਾਤ, ਦੇਹੀ’’ਤਿ ਯਾਚਿਂਸੁ. ਸੋ ਪਿਤੁਹਦਯਸ੍ਸ ਪੁਤ੍ਤਾਨਂ ਮੁਦੁਤ੍ਤਾ ‘‘ਮਾ ਮੇ, ਭੋ, ਬਾਲਕੇ ਵਿਨਾਸਯਿਤ੍ਥ, ਪੋਸਿਸ੍ਸਨ੍ਤਿ ਮ’’ਨ੍ਤਿ ਆਹ.

ਅਥਸ੍ਸ ਪੁਤ੍ਤੇ ਮਨੁਸ੍ਸਾ ਆਹਂਸੁ – ‘‘ਸਚੇ, ਭੋ, ਅਜ੍ਜ ਪਟ੍ਠਾਯ ਪਿਤਰਂ ਨ ਸਮ੍ਮਾ ਪਟਿਜਗ੍ਗਿਸ੍ਸਥ, ਘਾਤੇਸ੍ਸਾਮ ਵੋ’’ਤਿ. ਤੇ ਭੀਤਾ ਘਰਂ ਨੇਤ੍ਵਾ ਪਟਿਜਗ੍ਗਿਂਸੁ. ਤਂ ਦਸ੍ਸੇਤੁਂ ਅਥ ਖੋ ਨਂ ਬ੍ਰਾਹ੍ਮਣਮਹਾਸਾਲਨ੍ਤਿਆਦਿ ਵੁਤ੍ਤਂ. ਤਤ੍ਥ ਨੇਤ੍ਵਾਤਿ ਪੀਠੇ ਨਿਸੀਦਾਪੇਤ੍ਵਾ ਸਯਂ ਉਕ੍ਖਿਪਿਤ੍ਵਾ ਨਯਿਂਸੁ. ਨ੍ਹਾਪੇਤ੍ਵਾਤਿ ਸਰੀਰਂ ਤੇਲੇਨ ਅਬ੍ਭਞ੍ਜਿਤ੍ਵਾ ਉਬ੍ਬਟ੍ਟੇਤ੍ਵਾ ਗਨ੍ਧਚੁਣ੍ਣਾਦੀਹਿ ਨ੍ਹਾਪੇਸੁਂ. ਬ੍ਰਾਹ੍ਮਣਿਯੋਪਿ ਪਕ੍ਕੋਸਾਪੇਤ੍ਵਾ, ‘‘ਅਜ੍ਜ ਪਟ੍ਠਾਯ ਅਮ੍ਹਾਕਂ ਪਿਤਰਂ ਸਮ੍ਮਾ ਪਟਿਜਗ੍ਗਥ. ਸਚੇ ਪਮਾਦਂ ਆਪਜ੍ਜਿਸ੍ਸਥ, ਘਰਤੋ ਵੋ ਨਿਕ੍ਕਡ੍ਢਿਸ੍ਸਾਮਾ’’ਤਿ ਵਤ੍ਵਾ, ਪਣੀਤਭੋਜਨਂ ਭੋਜੇਸੁਂ.

ਬ੍ਰਾਹ੍ਮਣੋ ਸੁਭੋਜਨਞ੍ਚ ਸੁਖਸੇਯ੍ਯਞ੍ਚ ਆਗਮ੍ਮ ਕਤਿਪਾਹਚ੍ਚਯੇਨ ਸਞ੍ਜਾਤਬਲੋ ਪੀਣਿਤਿਨ੍ਦ੍ਰਿਯੋ ਅਤ੍ਤਭਾਵਂ ਓਲੋਕੇਤ੍ਵਾ, ‘‘ਅਯਂ ਮੇ ਸਮ੍ਪਤ੍ਤਿ ਸਮਣਂ ਗੋਤਮਂ ਨਿਸ੍ਸਾਯ ਲਦ੍ਧਾ’’ਤਿ ਪਣ੍ਣਾਕਾਰਂ ਆਦਾਯ ਭਗਵਤੋ ਸਨ੍ਤਿਕਂ ਅਗਮਾਸਿ. ਤਂ ਦਸ੍ਸੇਤੁਂ ਅਥ ਖੋ ਸੋਤਿਆਦਿ ਵੁਤ੍ਤਂ. ਤਤ੍ਥ ਏਤਦਵੋਚਾਤਿ ਦੁਸ੍ਸਯੁਗਂ ਪਾਦਮੂਲੇ ਠਪੇਤ੍ਵਾ ਏਤਂ ਅਵੋਚ. ਸਰਣਗਮਨਾਵਸਾਨੇ ਚਾਪਿ ਭਗਵਨ੍ਤਂ ਏਵਮਾਹ – ‘‘ਭੋ ਗੋਤਮ, ਮਯ੍ਹਂ ਪੁਤ੍ਤੇਹਿ ਚਤ੍ਤਾਰਿ ਧੁਰਭਤ੍ਤਾਨਿ ਦਿਨ੍ਨਾਨਿ, ਤਤੋ ਅਹਂ ਦ੍ਵੇ ਤੁਮ੍ਹਾਕਂ ਦਮ੍ਮਿ, ਦ੍ਵੇ ਸਯਂ ਪਰਿਭੁਞ੍ਜਿਸ੍ਸਾਮੀ’’ਤਿ. ਕਲ੍ਯਾਣਂ, ਬ੍ਰਾਹ੍ਮਣ, ਪਾਟਿਯੇਕ੍ਕਂ ਪਨ ਮਾ ਨਿਯ੍ਯਾਦੇਹਿ, ਅਮ੍ਹਾਕਂ ਰੁਚ੍ਚਨਟ੍ਠਾਨਮੇਵ ਗਮਿਸ੍ਸਾਮਾਤਿ. ‘‘ਏਵਂ, ਭੋ’’ਤਿ ਖੋ ਬ੍ਰਾਹ੍ਮਣੋ ਭਗਵਨ੍ਤਂ ਵਨ੍ਦਿਤ੍ਵਾ ਘਰਂ ਗਨ੍ਤ੍ਵਾ ਪੁਤ੍ਤੇ ਆਮਨ੍ਤੇਸਿ ‘‘ਤਾਤਾ, ਸਮਣੋ ਗੋਤਮੋ ਮਯ੍ਹਂ ਸਹਾਯੋ, ਤਸ੍ਸ ਦ੍ਵੇ ਧੁਰਭਤ੍ਤਾਨਿ ਦਿਨ੍ਨਾਨਿ, ਤੁਮ੍ਹੇ ਤਸ੍ਮਿਂ ਸਮ੍ਪਤ੍ਤੇ ਮਾ ਪਮਜ੍ਜਥਾ’’ਤਿ. ਸਾਧੁ, ਤਾਤਾਤਿ. ਪੁਨਦਿਵਸੇ ਭਗਵਾ ਪੁਬ੍ਬਣ੍ਹਸਮਯੇ ਪਤ੍ਤਚੀਵਰਂ ਆਦਾਯ ਜੇਟ੍ਠਪੁਤ੍ਤਸ੍ਸ ਨਿਵੇਸਨਦ੍ਵਾਰਂ ਗਤੋ. ਸੋ ਸਤ੍ਥਾਰਂ ਦਿਸ੍ਵਾਵ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਘਰਂ ਪਵੇਸੇਤ੍ਵਾ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਪਣੀਤਭੋਜਨਮਦਾਸਿ. ਸਤ੍ਥਾ ਪੁਨਦਿਵਸੇ ਇਤਰਸ੍ਸ, ਪੁਨਦਿਵਸੇ ਇਤਰਸ੍ਸਾਤਿ ਪਟਿਪਾਟਿਯਾ ਸਬ੍ਬੇਸਂ ਘਰਾਨਿ ਅਗਮਾਸਿ. ਸਬ੍ਬੇ ਤਥੇਵ ਸਕ੍ਕਾਰਂ ਅਕਂਸੁ.

ਅਥੇਕਦਿਵਸਂ ਜੇਟ੍ਠਪੁਤ੍ਤਸ੍ਸ ਘਰੇ ਮਙ੍ਗਲਂ ਪਚ੍ਚੁਪਟ੍ਠਿਤਂ. ਸੋ ਪਿਤਰਂ ਆਹ – ‘‘ਤਾਤ, ਕਸ੍ਸ ਮਙ੍ਗਲਂ ਦੇਮਾ’’ਤਿ. ਅਮ੍ਹੇ ਅਞ੍ਞਂ ਨ ਜਾਨਾਮ? ਨਨੁ ਸਮਣੋ ਗੋਤਮੋ ਮਯ੍ਹਂ ਸਹਾਯੋਤਿ? ਤੇਨ ਹਿ ਤੁਮ੍ਹੇ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸ੍ਵਾਤਨਾਯ ਸਮਣਂ ਗੋਤਮਂ ਨਿਮਨ੍ਤੇਥਾਤਿ. ਬ੍ਰਾਹ੍ਮਣੋ ਤਥਾ ਅਕਾਸਿ. ਭਗਵਾ ਅਧਿਵਾਸੇਤ੍ਵਾ ਪੁਨਦਿਵਸੇ ਭਿਕ੍ਖੁਸਙ੍ਘਪਰਿਵੁਤੋ ਤਸ੍ਸ ਗੇਹਦ੍ਵਾਰਂ ਅਗਮਾਸਿ. ਸੋ ਹਰਿਤੁਪਲਿਤ੍ਤਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਗੇਹਂ ਸਤ੍ਥਾਰਂ ਪਵੇਸੇਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਞ੍ਞਤ੍ਤਾਸਨੇਸੁ ਨਿਸੀਦਾਪੇਤ੍ਵਾ ਅਪ੍ਪੋਦਕਪਾਯਾਸਞ੍ਚੇਵ ਖਜ੍ਜਕਵਿਕਤਿਞ੍ਚ ਅਦਾਸਿ. ਅਨ੍ਤਰਭਤ੍ਤਸ੍ਮਿਂਯੇਵ ਬ੍ਰਾਹ੍ਮਣਸ੍ਸ ਚਤ੍ਤਾਰੋਪਿ ਪੁਤ੍ਤਾ ਸਤ੍ਥੁ ਸਨ੍ਤਿਕੇ ਨਿਸੀਦਿਤ੍ਵਾ ਆਹਂਸੁ – ‘‘ਭੋ ਗੋਤਮ, ਮਯਂ ਅਮ੍ਹਾਕਂ ਪਿਤਰਂ ਪਟਿਜਗ੍ਗਾਮ ਨਪ੍ਪਮਜ੍ਜਾਮ, ਪਸ੍ਸਥਸ੍ਸ ਅਤ੍ਤਭਾਵ’’ਨ੍ਤਿ. ਸਤ੍ਥਾ ‘‘ਕਲ੍ਯਾਣਂ ਵੋ ਕਤਂ, ਮਾਤਾਪਿਤੁਪੋਸਕਂ ਨਾਮ ਪੋਰਾਣਕਪਣ੍ਡਿਤਾਨਂ ਆਚਿਣ੍ਣਮੇਵਾ’’ਤਿ ਵਤ੍ਵਾ ਮਹਾਨਾਗਜਾਤਕਂ (ਜਾ. ੧.੧੧.੧ ਆਦਯੋ; ਚਰਿਯਾ. ੨.੧ ਆਦਯੋ) ਨਾਮ ਕਥੇਤ੍ਵਾ, ਚਤ੍ਤਾਰਿ ਸਚ੍ਚਾਨਿ ਦੀਪੇਤ੍ਵਾ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਬ੍ਰਾਹ੍ਮਣੋ ਸਦ੍ਧਿਂ ਚਤੂਹਿ ਪੁਤ੍ਤੇਹਿ ਚਤੂਹਿ ਚ ਸੁਣ੍ਹਾਹਿ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋ. ਤਤੋ ਪਟ੍ਠਾਯ ਸਤ੍ਥਾ ਨ ਸਬ੍ਬਕਾਲਂ ਤੇਸਂ ਗੇਹਂ ਅਗਮਾਸੀਤਿ. ਚਤੁਤ੍ਥਂ.

੫. ਮਾਨਤ੍ਥਦ੍ਧਸੁਤ੍ਤਵਣ੍ਣਨਾ

੨੦੧. ਪਞ੍ਚਮੇ ਮਾਨਤ੍ਥਦ੍ਧੋਤਿ ਵਾਤਭਰਿਤਭਸ੍ਤਾ ਵਿਯ ਮਾਨੇਨ ਥਦ੍ਧੋ. ਆਚਰਿਯਨ੍ਤਿ ਸਿਪ੍ਪੁਗ੍ਗਹਣਕਾਲੇ ਆਚਰਿਯੋ ਅਨਭਿਵਾਦੇਨ੍ਤਸ੍ਸ ਸਿਪ੍ਪਂ ਨ ਦੇਤਿ, ਅਞ੍ਞਸ੍ਮਿਂ ਪਨ ਕਾਲੇ ਤਂ ਨ ਅਭਿਵਾਦੇਤਿ, ਅਤ੍ਥਿਭਾਵਮ੍ਪਿਸ੍ਸ ਨ ਜਾਨਾਤਿ. ਨਾਯਂ ਸਮਣੋਤਿ ਏਵਂ ਕਿਰਸ੍ਸ ਅਹੋਸਿ – ‘‘ਯਸ੍ਮਾ ਅਯਂ ਸਮਣੋ ਮਾਦਿਸੇ ਜਾਤਿਸਮ੍ਪਨ੍ਨਬ੍ਰਾਹ੍ਮਣੇ ਸਮ੍ਪਤ੍ਤੇ ਪਟਿਸਨ੍ਥਾਰਮਤ੍ਤਮ੍ਪਿ ਨ ਕਰੋਤਿ, ਤਸ੍ਮਾ ਨ ਕਿਞ੍ਚਿ ਜਾਨਾਤੀ’’ਤਿ.

ਅਬ੍ਭੁਤਵਿਤ੍ਤਜਾਤਾਤਿ ਅਭੂਤਪੁਬ੍ਬਾਯ ਤੁਟ੍ਠਿਯਾ ਸਮਨ੍ਨਾਗਤਾ. ਕੇਸੁ ਚਸ੍ਸਾਤਿ ਕੇਸੁ ਭਵੇਯ੍ਯ. ਕ੍ਯਸ੍ਸਾਤਿ ਕੇ ਅਸ੍ਸ ਪੁਗ੍ਗਲਸ੍ਸ. ਅਪਚਿਤਾ ਅਸ੍ਸੂਤਿ ਅਪਚਿਤਿਂ ਦਸ੍ਸੇਤੁਂ ਯੁਤ੍ਤਾ ਭਵੇਯ੍ਯੁਂ. ਅਰਹਨ੍ਤੇਤਿ ਇਮਾਯ ਗਾਥਾਯ ਦੇਸਨਾਕੁਸਲਤ੍ਤਾ ਅਤ੍ਤਾਨਂ ਅਨ੍ਤੋਕਤ੍ਵਾ ਪੂਜਨੇਯ੍ਯਂ ਦਸ੍ਸੇਤਿ. ਪਞ੍ਚਮਂ.

੬. ਪਚ੍ਚਨੀਕਸੁਤ੍ਤਵਣ੍ਣਨਾ

੨੦੨. ਛਟ੍ਠੇ ‘‘ਸਬ੍ਬਂ ਸੇਤ’’ਨ੍ਤਿ ਵੁਤ੍ਤੇ ‘‘ਸਬ੍ਬਂ ਕਣ੍ਹ’’ਨ੍ਤਿਆਦਿਨਾ ਨਯੇਨ ਪਚ੍ਚਨੀਕਂ ਕਰੋਨ੍ਤਸ੍ਸੇਵਸ੍ਸ ਸਾਤਂ ਸੁਖਂ ਹੋਤੀਤਿ ਪਚ੍ਚਨੀਕਸਾਤੋ. ਯੋ ਚ ਵਿਨੇਯ੍ਯ ਸਾਰਮ੍ਭਨ੍ਤਿ ਯੋ ਕਰਣੁਤ੍ਤਰਿਯਲਕ੍ਖਣਂ ਸਾਰਮ੍ਭਂ ਵਿਨੇਤ੍ਵਾ ਸੁਣਾਤੀਤਿ ਅਤ੍ਥੋ. ਛਟ੍ਠਂ.

੭. ਨਵਕਮ੍ਮਿਕਸੁਤ੍ਤਵਣ੍ਣਨਾ

੨੦੩. ਸਤ੍ਤਮੇ ਨਵਕਮ੍ਮਿਕਭਾਰਦ੍ਵਾਜੋਤਿ ਸੋ ਕਿਰ ਅਰਞ੍ਞੇ ਰੁਕ੍ਖਂ ਛਿਨ੍ਦਾਪੇਤ੍ਵਾ ਤਤ੍ਥੇਵ ਪਾਸਾਦਕੂਟਾਗਾਰਾਦੀਨਿ ਯੋਜੇਤ੍ਵਾ ਨਗਰਂ ਆਹਰਿਤ੍ਵਾ ਵਿਕ੍ਕਿਣਾਤਿ, ਇਤਿ ਨਵਕਮ੍ਮਂ ਨਿਸ੍ਸਾਯ ਜੀਵਤੀਤਿ ਨਵਕਮ੍ਮਿਕੋ, ਗੋਤ੍ਤੇਨ ਭਾਰਦ੍ਵਾਜੋਤਿ ਨਵਕਮ੍ਮਿਕਭਾਰਦ੍ਵਾਜੋ. ਦਿਸ੍ਵਾਨਸ੍ਸ ਏਤਦਹੋਸੀਤਿ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਨਿਸਿਨ੍ਨਂ ਭਗਵਨ੍ਤਂ ਦਿਸ੍ਵਾਨ ਅਸ੍ਸ ਏਤਂ ਅਹੋਸਿ. ਵਨਸ੍ਮਿਨ੍ਤਿ ਇਮਸ੍ਮਿਂ ਵਨਸਣ੍ਡੇ. ਉਚ੍ਛਿਨ੍ਨਮੂਲਂ ਮੇ ਵਨਨ੍ਤਿ ਮਯ੍ਹਂ ਕਿਲੇਸਵਨਂ ਉਚ੍ਛਿਨ੍ਨਮੂਲਂ. ਨਿਬ੍ਬਨਥੋਤਿ ਨਿਕ੍ਕਿਲੇਸਵਨੋ. ਏਕੋ ਰਮੇਤਿ ਏਕਕੋ ਅਭਿਰਮਾਮਿ. ਅਰਤਿਂ ਵਿਪ੍ਪਹਾਯਾਤਿ ਪਨ੍ਤਸੇਨਾਸਨੇਸੁ ਚੇਵ ਭਾਵਨਾਯ ਚ ਉਕ੍ਕਣ੍ਠਿਤਂ ਜਹਿਤ੍ਵਾ. ਸਤ੍ਤਮਂ.

੮. ਕਟ੍ਠਹਾਰਸੁਤ੍ਤਵਣ੍ਣਨਾ

੨੦੪. ਅਟ੍ਠਮੇ ਅਨ੍ਤੇਵਾਸਿਕਾਤਿ ਵੇਯ੍ਯਾਵਚ੍ਚਂ ਕਤ੍ਵਾ ਸਿਪ੍ਪੁਗ੍ਗਣ੍ਹਨਕਾ ਧਮ੍ਮਨ੍ਤੇਵਾਸਿਕਾ. ਨਿਸਿਨ੍ਨਨ੍ਤਿ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਨਿਸਿਨ੍ਨਂ. ਗਮ੍ਭੀਰਰੂਪੇਤਿ ਗਮ੍ਭੀਰਸਭਾਵੇ.

ਬਹੁਭੇਰਵੇਤਿ ਤਤ੍ਰਟ੍ਠਕਸਵਿਞ੍ਞਾਣਕਅਵਿਞ੍ਞਾਣਕਭੇਰਵੇਹਿ ਬਹੁਭੇਰਵੇ. ਵਿਗਾਹਿਯਾਤਿ ਅਨੁਪਵਿਸਿਤ੍ਵਾ. ਅਨਿਞ੍ਜਮਾਨੇਨਾਤਿਆਦੀਨਿ ਕਾਯਵਿਸੇਸਨਾਨਿ, ਏਵਰੂਪੇਨ ਕਾਯੇਨਾਤਿ ਅਤ੍ਥੋ. ਸੁਚਾਰੁਰੂਪਂ ਵਤਾਤਿ ਅਤਿਸੁਨ੍ਦਰਂ ਵਤ ਝਾਨਂ ਝਾਯਸੀਤਿ ਵਦਤਿ.

ਵਨਵਸ੍ਸਿਤੋ ਮੁਨੀਤਿ ਵਨਂ ਅਵਸ੍ਸਿਤੋ ਬੁਦ੍ਧਮੁਨਿ. ਇਦਨ੍ਤਿ ਇਦਂ ਤੁਮ੍ਹਾਕਂ ਏਵਂ ਵਨੇ ਨਿਸਿਨ੍ਨਕਾਰਣਂ ਮਯ੍ਹਂ ਅਚ੍ਛੇਰਰੂਪਂ ਪਟਿਭਾਤਿ. ਪੀਤਿਮਨੋਤਿ ਤੁਟ੍ਠਚਿਤ੍ਤੋ. ਵਨੇ ਵਸੇਤਿ ਵਨਮ੍ਹਿ ਵਸਿ.

ਮਞ੍ਞਾਮਹਨ੍ਤਿ ਮਞ੍ਞਾਮਿ ਅਹਂ. ਲੋਕਾਧਿਪਤਿਸਹਬ੍ਯਤਨ੍ਤਿ ਲੋਕਾਧਿਪਤਿਮਹਾਬ੍ਰਹ੍ਮੁਨਾ ਸਹਭਾਵਂ. ਆਕਙ੍ਖਮਾਨੋਤਿ ਇਚ੍ਛਮਾਨੋ. ਤਿਦਿਵਂ ਅਨੁਤ੍ਤਰਨ੍ਤਿ ਇਦਂ ਬ੍ਰਹ੍ਮਲੋਕਮੇਵ ਸਨ੍ਧਾਯਾਹ. ਕਸ੍ਮਾ ਭਵਂ ਵਿਜਨਮਰਞ੍ਞਮਸ੍ਸਿਤੋਤਿ ਅਹਂ ਤਾਵ ਬ੍ਰਹ੍ਮਲੋਕਂ ਆਕਙ੍ਖਮਾਨੋਤਿ ਮਞ੍ਞਾਮਿ. ਯਦਿ ਏਵਂ ਨ ਹੋਤਿ, ਅਥ ਮੇ ਆਚਿਕ੍ਖ, ਕਸ੍ਮਾ ਭਵਨ੍ਤਿ? ਪੁਚ੍ਛਤਿ. ਬ੍ਰਹ੍ਮਪਤ੍ਤਿਯਾਤਿ ਸੇਟ੍ਠਪਤ੍ਤਿਯਾ. ਇਧ ਇਦਂ ਤਪੋ ਕਸ੍ਮਾ ਕਰੋਸੀਤਿ ਅਪਰੇਨਪਿ ਆਕਾਰੇਨ ਪੁਚ੍ਛਤਿ.

ਕਙ੍ਖਾਤਿ ਤਣ੍ਹਾ. ਅਭਿਨਨ੍ਦਨਾਤਿ ਅਭਿਨਨ੍ਦਨਵਸੇਨ ਤਣ੍ਹਾਵ ਵੁਤ੍ਤਾ. ਅਨੇਕਧਾਤੂਸੂਤਿ ਅਨੇਕਸਭਾਵੇਸੁ ਆਰਮ੍ਮਣੇਸੁ. ਪੁਥੂਤਿ ਨਾਨਪ੍ਪਕਾਰਾ ਤਣ੍ਹਾ ਸੇਸਕਿਲੇਸਾ ਵਾ. ਸਦਾਸਿਤਾਤਿ ਨਿਚ੍ਚਕਾਲਂ ਅਵਸ੍ਸਿਤਾ. ਅਞ੍ਞਾਣਮੂਲਪ੍ਪਭਵਾਤਿ ਅਵਿਜ੍ਜਾਮੂਲਾ ਹੁਤ੍ਵਾ ਜਾਤਾ. ਪਜਪ੍ਪਿਤਾਤਿ ਤਣ੍ਹਾਵ ‘‘ਇਦਮ੍ਪਿ ਮਯ੍ਹਂ, ਇਦਮ੍ਪਿ ਮਯ੍ਹ’’ਨ੍ਤਿ ਪਜਪ੍ਪਾਪਨਵਸੇਨ ਪਜਪ੍ਪਿਤਾ ਨਾਮਾਤਿ ਵੁਤ੍ਤਾ. ਸਬ੍ਬਾ ਮਯਾ ਬ੍ਯਨ੍ਤਿਕਤਾਤਿ ਸਬ੍ਬਾ ਤਣ੍ਹਾ ਮਯਾ ਅਗ੍ਗਮਗ੍ਗੇਨ ਵਿਗਤਨ੍ਤਾ ਨਿਰਨ੍ਤਾ ਕਤਾ. ਸਮੂਲਿਕਾਤਿ ਸਦ੍ਧਿਂ ਅਞ੍ਞਾਣਮੂਲੇਨ.

ਅਨੂਪਯੋਤਿ ਅਨੁਪਗਮਨੋ. ਸਬ੍ਬੇਸੁ ਧਮ੍ਮੇਸੁ ਵਿਸੁਦ੍ਧਦਸ੍ਸਨੋਤਿ ਇਮਿਨਾ ਸਬ੍ਬਞ੍ਞੁਤਞ੍ਞਾਣਂ ਦੀਪੇਤਿ. ਸਮ੍ਬੋਧਿਮਨੁਤ੍ਤਰਨ੍ਤਿ ਅਰਹਤ੍ਤਂ ਸਨ੍ਧਾਯਾਹ. ਸਿਵਨ੍ਤਿ ਸੇਟ੍ਠਂ. ਝਾਯਾਮੀਤਿ ਦ੍ਵੀਹਿ ਝਾਨੇਹਿ ਝਾਯਾਮਿ. ਵਿਸਾਰਦੋਤਿ ਵਿਗਤਸਾਰਜ੍ਜੋ. ਅਟ੍ਠਮਂ.

੯. ਮਾਤੁਪੋਸਕਸੁਤ੍ਤਵਣ੍ਣਨਾ

੨੦੫. ਨਵਮੇ ਪੇਚ੍ਚਾਤਿ ਇਤੋ ਪਟਿਗਨ੍ਤ੍ਵਾ. ਨਵਮਂ.

੧੦. ਭਿਕ੍ਖਕਸੁਤ੍ਤਵਣ੍ਣਨਾ

੨੦੬. ਦਸਮੇ ਇਧਾਤਿ ਇਮਸ੍ਮਿਂ ਭਿਕ੍ਖੁਭਾਵੇ. ਵਿਸ੍ਸਂ ਧਮ੍ਮਨ੍ਤਿ ਦੁਗ੍ਗਨ੍ਧਂ ਅਕੁਸਲਧਮ੍ਮਂ. ਬਾਹਿਤ੍ਵਾਤਿ ਅਗ੍ਗਮਗ੍ਗੇਨ ਜਹਿਤ੍ਵਾ. ਸਙ੍ਖਾਯਾਤਿ ਞਾਣੇਨ. ਸ ਵੇ ਭਿਕ੍ਖੂਤਿ ਵੁਚ੍ਚਤੀਤਿ ਸੋ ਵੇ ਭਿਨ੍ਨਕਿਲੇਸਤ੍ਤਾ ਭਿਕ੍ਖੁ ਨਾਮ ਵੁਚ੍ਚਤਿ. ਦਸਮਂ.

੧੧. ਸਙ੍ਗਾਰਵਸੁਤ੍ਤਵਣ੍ਣਨਾ

੨੦੭. ਏਕਾਦਸਮੇ ਪਚ੍ਚੇਤੀਤਿ ਇਚ੍ਛਤਿ ਪਤ੍ਥੇਤਿ. ਸਾਧੁ, ਭਨ੍ਤੇਤਿ ਆਯਾਚਮਾਨੋ ਆਹ. ਥੇਰਸ੍ਸ ਕਿਰੇਸ ਗਿਹਿਸਹਾਯੋ, ਤਸ੍ਮਾ ਥੇਰੋ ‘‘ਅਯਂ ਵਰਾਕੋ ਮਂ ਸਹਾਯਂ ਲਭਿਤ੍ਵਾਪਿ ਮਿਚ੍ਛਾਦਿਟ੍ਠਿਂ ਗਹੇਤ੍ਵਾ ਮਾ ਅਪਾਯਪੂਰਕੋ ਅਹੋਸੀ’’ਤਿ ਆਯਾਚਤਿ. ਅਪਿਚੇਸ ਮਹਾਪਰਿਵਾਰੋ, ਤਸ੍ਮਿਂ ਪਸਨ੍ਨੇ ਪਞ੍ਚਕੁਲਸਤਾਨਿ ਅਨੁਵਤ੍ਤਿਸ੍ਸਨ੍ਤੀਤਿ ਮਞ੍ਞਮਾਨੋਪਿ ਆਯਾਚਤਿ. ਅਤ੍ਥਵਸਨ੍ਤਿ ਅਤ੍ਥਾਨਿਸਂਸਂ ਅਤ੍ਥਕਾਰਣਂ. ਪਾਪਨ੍ਤਿ ਪਾਣਾਤਿਪਾਤਾਦਿਅਕੁਸਲਂ. ਪਵਾਹੇਮੀਤਿ ਗਲਪ੍ਪਮਾਣਂ ਉਦਕਂ ਓਤਰਿਤ੍ਵਾ ਪਵਾਹੇਮਿ ਪਲਾਪੇਮਿ. ਧਮ੍ਮੋਤਿ ਗਾਥਾ ਵੁਤ੍ਤਤ੍ਥਾਵ. ਏਕਾਦਸਮਂ.

੧੨. ਖੋਮਦੁਸ੍ਸਸੁਤ੍ਤਵਣ੍ਣਨਾ

੨੦੮. ਦ੍ਵਾਦਸਮੇ ਖੋਮਦੁਸ੍ਸਂ ਨਾਮਾਤਿ ਖੋਮਦੁਸ੍ਸਾਨਂ ਉਸ੍ਸਨ੍ਨਤ੍ਤਾ ਏਵਂਲਦ੍ਧਨਾਮਂ. ਸਭਾਯਨ੍ਤਿ ਸਾਲਾਯਂ. ਫੁਸਾਯਤੀਤਿ ਫੁਸਿਤਾਨਿ ਮੁਞ੍ਚਤਿ ਵਸ੍ਸਤਿ. ਸਤ੍ਥਾ ਕਿਰ ਤਂ ਸਭਂ ਉਪਸਙ੍ਕਮਿਤੁਕਾਮੋ – ‘‘ਮਯਿ ਏਵਮੇਵਂ ਉਪਸਙ੍ਕਮਨ੍ਤੇ ਅਫਾਸੁਕਧਾਤੁਕਂ ਹੋਤਿ, ਏਕਂ ਕਾਰਣਂ ਪਟਿਚ੍ਚ ਉਪਸਙ੍ਕਮਿਸ੍ਸਾਮੀ’’ਤਿ ਅਧਿਟ੍ਠਾਨਵਸੇਨ ਵੁਟ੍ਠਿਂ ਉਪ੍ਪਾਦੇਸਿ. ਸਭਾਧਮ੍ਮਨ੍ਤਿ ਸੁਖਨਿਸਿਨ੍ਨੇ ਕਿਰ ਅਸਞ੍ਚਾਲੇਤ੍ਵਾ ਏਕਪਸ੍ਸੇਨ ਪਵਿਸਨਂ ਤੇਸਂ ਸਭਾਧਮ੍ਮੋ ਨਾਮ, ਨ ਮਹਾਜਨਂ ਚਾਲੇਤ੍ਵਾ ਉਜੁਕਮੇਵ ਪਵਿਸਨਂ. ਭਗਵਾ ਚ ਉਜੁਕਮੇਵ ਆਗਚ੍ਛਤਿ, ਤੇਨ ਤੇ ਕੁਪਿਤਾ ਭਗਵਨ੍ਤਂ ਹੀਲ਼ੇਨ੍ਤਾ ‘‘ਕੇ ਚ ਮੁਣ੍ਡਕਾ ਸਮਣਕਾ, ਕੇ ਚ ਸਭਾਧਮ੍ਮਂ ਜਾਨਿਸ੍ਸਨ੍ਤੀ’’ਤਿ ਆਹਂਸੁ. ਸਨ੍ਤੋਤਿ ਪਣ੍ਡਿਤਾ ਸਪ੍ਪੁਰਿਸਾ. ਪਹਾਯਾਤਿ ਏਤੇ ਰਾਗਾਦਯੋ ਜਹਿਤ੍ਵਾ ਰਾਗਾਦਿਵਿਨਯਾਯ ਧਮ੍ਮਂ ਭਣਨ੍ਤਿ, ਤਸ੍ਮਾ ਤੇ ਸਨ੍ਤੋ ਨਾਮਾਤਿ. ਦ੍ਵਾਦਸਮਂ.

ਉਪਾਸਕਵਗ੍ਗੋ ਦੁਤਿਯੋ.

ਇਤਿ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਬ੍ਰਾਹ੍ਮਣਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.