੮. ਛੇਤ੍ਵਾਵਗ੍ਗੋ

੧. ਛੇਤ੍ਵਾਸੁਤ੍ਤਵਣ੍ਣਨਾ

੭੧. ਛੇਤ੍ਵਾਵਗ੍ਗਸ੍ਸ ਪਠਮੇ ਛੇਤ੍ਵਾਤਿ ਵਧਿਤ੍ਵਾ. ਸੁਖਂ ਸੇਤੀਤਿ ਕੋਧਪਰਿਲ਼ਾਹੇਨ ਅਪਰਿਦਯ੍ਹਮਾਨਤ੍ਤਾ ਸੁਖਂ ਸਯਤਿ. ਨ ਸੋਚਤੀਤਿ ਕੋਧਵਿਨਾਸੇਨ ਵਿਨਟ੍ਠਦੋਮਨਸ੍ਸਤ੍ਤਾ ਨ ਸੋਚਤਿ. ਵਿਸਮੂਲਸ੍ਸਾਤਿ ਦੁਕ੍ਖਵਿਪਾਕਸ੍ਸ. ਮਧੁਰਗ੍ਗਸ੍ਸਾਤਿ ਕੁਦ੍ਧਸ੍ਸ ਪਟਿਕੁਜ੍ਝਿਤ੍ਵਾ, ਅਕ੍ਕੁਟ੍ਠਸ੍ਸ ਪਚ੍ਚਕ੍ਕੋਸਿਤ੍ਵਾ, ਪਹਟਸ੍ਸ ਚ ਪਟਿਪਹਰਿਤ੍ਵਾ ਸੁਖਂ ਉਪ੍ਪਜ੍ਜਤਿ, ਤਂ ਸਨ੍ਧਾਯ ਮਧੁਰਗ੍ਗੋਤਿ ਵੁਤ੍ਤੋ. ਇਮਸ੍ਮਿਂ ਹਿ ਠਾਨੇ ਪਰਿਯੋਸਾਨਂ ਅਗ੍ਗਨ੍ਤਿ ਵੁਤ੍ਤਂ. ਅਰਿਯਾਤਿ ਬੁਦ੍ਧਾਦਯੋ. ਪਠਮਂ.

੨. ਰਥਸੁਤ੍ਤਵਣ੍ਣਨਾ

੭੨. ਦੁਤਿਯੇ ਪਞ੍ਞਾਯਤਿ ਏਤੇਨਾਤਿ ਪਞ੍ਞਾਣਂ. ਧਜੋ ਰਥਸ੍ਸਾਤਿ ਮਹਨ੍ਤਸ੍ਮਿਂ ਹਿ ਸਙ੍ਗਾਮਸੀਸੇ ਦੂਰਤੋਵ ਧਜਂ ਦਿਸ੍ਵਾ ‘‘ਅਸੁਕਰਞ੍ਞੋ ਨਾਮ ਅਯਂ ਰਥੋ’’ਤਿ ਰਥੋ ਪਾਕਟੋ ਹੋਤਿ. ਤੇਨ ਵੁਤ੍ਤਂ ‘‘ਧਜੋ ਰਥਸ੍ਸ ਪਞ੍ਞਾਣ’’ਨ੍ਤਿ. ਅਗ੍ਗਿਪਿ ਦੂਰਤੋਵ ਧੂਮੇਨ ਪਞ੍ਞਾਯਤਿ. ਚੋਲ਼ਰਟ੍ਠਂ ਪਣ੍ਡੁਰਟ੍ਠਨ੍ਤਿ ਏਵਂ ਰਟ੍ਠਮ੍ਪਿ ਰਞ੍ਞਾ ਪਞ੍ਞਾਯਤਿ. ਚਕ੍ਕਵਤ੍ਤਿਰਞ੍ਞੋ ਧੀਤਾਪਿ ਪਨ ਇਤ੍ਥੀ ‘‘ਅਸੁਕਸ੍ਸ ਨਾਮ ਭਰਿਯਾ’’ਤਿ ਭਤ੍ਤਾਰਂ ਪਤ੍ਵਾਵ ਪਞ੍ਞਾਯਤਿ. ਤਸ੍ਮਾ ਧੂਮੋ ਪਞ੍ਞਾਣਮਗ੍ਗਿਨੋਤਿਆਦਿ ਵੁਤ੍ਤਂ. ਦੁਤਿਯਂ.

੩. ਵਿਤ੍ਤਸੁਤ੍ਤਵਣ੍ਣਨਾ

੭੩. ਤਤਿਯੇ ਸਦ੍ਧੀਧ ਵਿਤ੍ਤਨ੍ਤਿ ਯਸ੍ਮਾ ਸਦ੍ਧੋ ਸਦ੍ਧਾਯ ਮੁਤ੍ਤਮਣਿਆਦੀਨਿਪਿ ਵਿਤ੍ਤਾਨਿ ਲਭਤਿ, ਤਿਸ੍ਸੋਪਿ ਕੁਲਸਮ੍ਪਦਾ, ਛ ਕਾਮਸਗ੍ਗਾਨਿ, ਨਵ ਬ੍ਰਹ੍ਮਲੋਕੇ ਪਤ੍ਵਾ ਪਰਿਯੋਸਾਨੇ ਅਮਤਮਹਾਨਿਬ੍ਬਾਨਦਸ੍ਸਨਮ੍ਪਿ ਲਭਤਿ, ਤਸ੍ਮਾ ਮਣਿਮੁਤ੍ਤਾਦੀਹਿ ਵਿਤ੍ਤੇਹਿ ਸਦ੍ਧਾਵਿਤ੍ਤਮੇਵ ਸੇਟ੍ਠਂ. ਧਮ੍ਮੋਤਿ ਦਸਕੁਸਲਕਮ੍ਮਪਥੋ. ਸੁਖਮਾਵਹਤੀਤਿ ਸਬ੍ਬਮ੍ਪਿ ਸਾਸਵਾਨਾਸਵਂ ਅਸਂਕਿਲਿਟ੍ਠਸੁਖਂ ਆਵਹਤਿ. ਸਾਦੁਤਰਨ੍ਤਿ ਲੋਕਸ੍ਮਿਂ ਲੋਣਮ੍ਬਿਲਾਦੀਨਂ ਸਬ੍ਬਰਸਾਨਂ ਸਚ੍ਚਮੇਵ ਮਧੁਰਤਰਂ. ਸਚ੍ਚਸ੍ਮਿਂ ਹਿ ਠਿਤਾ ਸੀਘਵੇਗਂ ਨਦਿਮ੍ਪਿ ਨਿਵਤ੍ਤੇਨ੍ਤਿ, ਵਿਸਮ੍ਪਿ ਨਿਮ੍ਮਦ੍ਦੇਨ੍ਤਿ, ਅਗ੍ਗਿਮ੍ਪਿ ਪਟਿਬਾਹਨ੍ਤਿ, ਦੇਵਮ੍ਪਿ ਵਸ੍ਸਾਪੇਨ੍ਤਿ, ਤਸ੍ਮਾ ਤਂ ਸਬ੍ਬਰਸਾਨਂ ਮਧੁਰਤਰਨ੍ਤਿ ਵੁਤ੍ਤਂ. ਪਞ੍ਞਾਜੀਵਿਂ ਜੀਵਿਤਮਾਹੁ ਸੇਟ੍ਠਨ੍ਤਿ ਯੋ ਪਞ੍ਞਾਜੀਵੀ ਗਹਟ੍ਠੋ ਸਮਾਨੋ ਪਞ੍ਚਸੁ ਸੀਲੇਸੁ ਪਤਿਟ੍ਠਾਯ ਸਲਾਕਭਤ੍ਤਾਦੀਨਿ ਪਟ੍ਠਪੇਤ੍ਵਾ ਪਞ੍ਞਾਯ ਜੀਵਤਿ, ਪਬ੍ਬਜਿਤੋ ਵਾ ਪਨ ਧਮ੍ਮੇਨ ਉਪ੍ਪਨ੍ਨੇ ਪਚ੍ਚਯੇ ‘‘ਇਦਮਤ੍ਥ’’ਨ੍ਤਿ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨ੍ਤੋ ਕਮ੍ਮਟ੍ਠਾਨਂ ਆਦਾਯ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਿਯਫਲਾਧਿਗਮਵਸੇਨ ਪਞ੍ਞਾਯ ਜੀਵਤਿ, ਤਂ ਪਞ੍ਞਾਜੀਵਿਂ ਪੁਗ੍ਗਲਂ ਸੇਟ੍ਠਂ ਜੀਵਿਤਂ ਜੀਵਤੀਤਿ ਆਹੁ. ਤਤਿਯਂ.

੪. ਵੁਟ੍ਠਿਸੁਤ੍ਤਵਣ੍ਣਨਾ

੭੪. ਚਤੁਤ੍ਥੇ ਬੀਜਨ੍ਤਿ ਉਪ੍ਪਤਨ੍ਤਾਨਂ ਸਤ੍ਤਵਿਧਂ ਧਞ੍ਞਬੀਜਂ ਸੇਟ੍ਠਂ. ਤਸ੍ਮਿਞ੍ਹਿ ਉਗ੍ਗਤੇ ਜਨਪਦੋ ਖੇਮੋ ਹੋਤਿ ਸੁਭਿਕ੍ਖੋ. ਨਿਪਤਤਨ੍ਤਿ ਨਿਪਤਨ੍ਤਾਨਂ ਮੇਘਵੁਟ੍ਠਿ ਸੇਟ੍ਠਾ. ਮੇਘਵੁਟ੍ਠਿਯਞ੍ਹਿ ਸਤਿ ਵਿਵਿਧਾਨਿ ਸਸ੍ਸਾਨਿ ਉਪ੍ਪਜ੍ਜਨ੍ਤਿ, ਜਨਪਦਾ ਫੀਤਾ ਹੋਨ੍ਤਿ ਖੇਮਾ ਸੁਭਿਕ੍ਖਾ. ਪਵਜਮਾਨਾਨਨ੍ਤਿ ਜਙ੍ਗਮਾਨਂ ਪਦਸਾ ਚਰਮਾਨਾਨਂ ਗਾਵੋ ਸੇਟ੍ਠਾ. ਤਾ ਨਿਸ੍ਸਾਯ ਹਿ ਸਤ੍ਤਾ ਪਞ੍ਚ ਗੋਰਸੇ ਪਰਿਭੁਞ੍ਜਮਾਨਾ ਸੁਖਂ ਵਿਹਰਨ੍ਤਿ. ਪਵਦਤਨ੍ਤਿ ਰਾਜਕੁਲਮਜ੍ਝਾਦੀਸੁ ਵਦਨ੍ਤਾਨਂ ਪੁਤ੍ਤੋ ਵਰੋ. ਸੋ ਹਿ ਮਾਤਾਪਿਤੂਨਂ ਅਨਤ੍ਥਾਵਹਂ ਨ ਵਦਤਿ.

ਵਿਜ੍ਜਾ ਉਪ੍ਪਤਤਂ ਸੇਟ੍ਠਾਤਿ ਪੁਰਿਮਪਞ੍ਹੇ ਕਿਰ ਸੁਤ੍ਵਾ ਸਮੀਪੇ ਠਿਤਾ ਏਕਾ ਦੇਵਤਾ ‘‘ਦੇਵਤੇ, ਕਸ੍ਮਾ ਤ੍ਵਂ ਏਤਂ ਪਞ੍ਹਂ ਦਸਬਲਂ ਪੁਚ੍ਛਸਿ? ਅਹਂ ਤੇ ਕਥੇਸ੍ਸਾਮੀ’’ਤਿ ਅਤ੍ਤਨੋ ਖਨ੍ਤਿਯਾ ਲਦ੍ਧਿਯਾ ਪਞ੍ਹਂ ਕਥੇਸਿ. ਅਥ ਨਂ ਇਤਰਾ ਦੇਵਤਾ ਆਹ – ‘‘ਯਾਵ ਪਧਂਸੀ ਵਦੇਸਿ ਦੇਵਤੇ ਯਾਵ ਪਗਬ੍ਭਾ ਮੁਖਰਾ, ਅਹਂ ਬੁਦ੍ਧਂ ਭਗਵਨ੍ਤਂ ਪੁਚ੍ਛਾਮਿ. ਤ੍ਵਂ ਮਯ੍ਹਂ ਕਸ੍ਮਾ ਕਥੇਸੀ’’ਤਿ? ਨਿਵਤ੍ਤੇਤ੍ਵਾ ਤਦੇਵ ਪਞ੍ਹਂ ਦਸਬਲਂ ਪੁਚ੍ਛਿ. ਅਥਸ੍ਸਾ ਸਤ੍ਥਾ ਵਿਸ੍ਸਜ੍ਜੇਨ੍ਤੋ ਵਿਜ੍ਜਾ ਉਪ੍ਪਤਤਨ੍ਤਿਆਦਿਮਾਹ. ਤਤ੍ਥ ਵਿਜ੍ਜਾਤਿ ਚਤੁਮਗ੍ਗਵਿਜ੍ਜਾ. ਸਾ ਹਿ ਉਪ੍ਪਤਮਾਨਾ ਸਬ੍ਬਾਕੁਸਲਧਮ੍ਮੇ ਸਮੁਗ੍ਘਾਤੇਤਿ. ਤਸ੍ਮਾ ‘‘ਉਪ੍ਪਤਤਂ ਸੇਟ੍ਠਾ’’ਤਿ ਵੁਤ੍ਤਾ. ਅਵਿਜ੍ਜਾਤਿ ਵਟ੍ਟਮੂਲਕਮਹਾਅਵਿਜ੍ਜਾ. ਸਾ ਹਿ ਨਿਪਤਨ੍ਤਾਨਂ ਓਸੀਦਨ੍ਤਾਨਂ ਵਰਾ. ਪਵਜਮਾਨਾਨਨ੍ਤਿ ਪਦਸਾ ਚਰਮਾਨਾਨਂ ਜਙ੍ਗਮਾਨਂ ਅਨੋਮਪੁਞ੍ਞਕ੍ਖੇਤ੍ਤਭੂਤੋ ਸਙ੍ਘੋ ਵਰੋ. ਤਞ੍ਹਿ ਤਤ੍ਥ ਤਤ੍ਥ ਦਿਸ੍ਵਾ ਪਸਨ੍ਨਚਿਤ੍ਤਾ ਸਤ੍ਤਾ ਸੋਤ੍ਥਿਂ ਪਾਪੁਣਨ੍ਤਿ. ਬੁਦ੍ਧੋਤਿ ਯਾਦਿਸੋ ਪੁਤ੍ਤੋ ਵਾ ਹੋਤੁ ਅਞ੍ਞੋ ਵਾ, ਯੇਸਂ ਕੇਸਞ੍ਚਿ ਵਦਮਾਨਾਨਂ ਬੁਦ੍ਧੋ ਵਰੋ. ਤਸ੍ਸ ਹਿ ਧਮ੍ਮਦੇਸਨਂ ਆਗਮ੍ਮ ਅਨੇਕਸਤਸਹਸ੍ਸਾਨਂ ਪਾਣਾਨਂ ਬਨ੍ਧਨਮੋਕ੍ਖੋ ਹੋਤੀਤਿ. ਚਤੁਤ੍ਥਂ.

੫. ਭੀਤਾਸੁਤ੍ਤਵਣ੍ਣਨਾ

੭੫. ਪਞ੍ਚਮੇ ਕਿਂਸੂਧ ਭੀਤਾਤਿ ਕਿਂ ਭੀਤਾ? ਮਗ੍ਗੋ ਚਨੇਕਾਯਤਨਪ੍ਪਵੁਤ੍ਤੋਤਿ ਅਟ੍ਠਤਿਂਸਾਰਮ੍ਮਣਵਸੇਨ ਅਨੇਕੇਹਿ ਕਾਰਣੇਹਿ ਕਥਿਤੋ. ਏਵਂ ਸਨ੍ਤੇ ਕਿਸ੍ਸ ਭੀਤਾ ਹੁਤ੍ਵਾ ਅਯਂ ਜਨਤਾ ਦ੍ਵਾਸਟ੍ਠਿ ਦਿਟ੍ਠਿਯੋ ਅਗ੍ਗਹੇਸੀਤਿ ਵਦਤਿ. ਭੂਰਿਪਞ੍ਞਾਤਿ ਬਹੁਪਞ੍ਞ ਉਸ੍ਸਨ੍ਨਪਞ੍ਞ. ਪਰਲੋਕਂ ਨ ਭਾਯੇਤਿ ਇਮਸ੍ਮਾ ਲੋਕਾ ਪਰਂ ਲੋਕਂ ਗਚ੍ਛਨ੍ਤੋ ਨ ਭਾਯੇਯ੍ਯ. ਪਣਿਧਾਯਾਤਿ ਠਪੇਤ੍ਵਾ. ਬਹ੍ਵਨ੍ਨਪਾਨਂ ਘਰਮਾਵਸਨ੍ਤੋਤਿ ਅਨਾਥਪਿਣ੍ਡਿਕਾਦਯੋ ਵਿਯ ਬਹ੍ਵਨ੍ਨਪਾਨੇ ਘਰੇ ਵਸਨ੍ਤੋ. ਸਂਵਿਭਾਗੀਤਿ ਅਚ੍ਛਰਾਯ ਗਹਿਤਮ੍ਪਿ ਨਖੇਨ ਫਾਲੇਤ੍ਵਾ ਪਰਸ੍ਸ ਦਤ੍ਵਾਵ ਭੁਞ੍ਜਨਸੀਲੋ. ਵਦਞ੍ਞੂਤਿ ਵੁਤ੍ਤਤ੍ਥਮੇਵ.

ਇਦਾਨਿ ਗਾਥਾਯ ਅਙ੍ਗਾਨਿ ਉਦ੍ਧਰਿਤ੍ਵਾ ਦਸ੍ਸੇਤਬ੍ਬਾਨਿ – ‘‘ਵਾਚ’’ਨ੍ਤਿ ਹਿ ਇਮਿਨਾ ਚਤ੍ਤਾਰਿ ਵਚੀਸੁਚਰਿਤਾਨਿ ਗਹਿਤਾਨਿ, ‘‘ਮਨੇਨਾ’’ਤਿਪਦੇਨ ਤੀਣਿ ਮਨੋਸੁਚਰਿਤਾਨਿ, ‘‘ਕਾਯੇਨਾ’’ਤਿ ਪਦੇਨ ਤੀਣਿ ਕਾਯਸੁਚਰਿਤਾਨਿ. ਇਤਿ ਇਮੇ ਦਸ ਕੁਸਲਕਮ੍ਮਪਥਾ ਪੁਬ੍ਬਸੁਦ੍ਧਿਅਙ੍ਗਂ ਨਾਮ. ਬਹ੍ਵਨ੍ਨਪਾਨਂ ਘਰਮਾਵਸਨ੍ਤੋਤਿ ਇਮਿਨਾ ਯਞ੍ਞਉਪਕ੍ਖਰੋ ਗਹਿਤੋ. ਸਦ੍ਧੋਤਿ ਏਕਮਙ੍ਗਂ, ਮੁਦੂਤਿ ਏਕਂ, ਸਂਵਿਭਾਗੀਤਿ ਏਕਂ, ਵਦਞ੍ਞੂਤਿ ਏਕਂ. ਇਤਿ ਇਮਾਨਿ ਚਤ੍ਤਾਰਿ ਅਙ੍ਗਾਨਿ ਸਨ੍ਧਾਯ ‘‘ਏਤੇਸੁ ਧਮ੍ਮੇਸੁ ਠਿਤੋ ਚਤੂਸੂ’’ਤਿ ਆਹ.

ਅਪਰੋਪਿ ਪਰਿਯਾਯੋ – ਵਾਚਨ੍ਤਿਆਦੀਨਿ ਤੀਣਿ ਅਙ੍ਗਾਨਿ, ਬਹ੍ਵਨ੍ਨਪਾਨਨ੍ਤਿ ਇਮਿਨਾ ਯਞ੍ਞਉਪਕ੍ਖਰੋਵ ਗਹਿਤੋ, ਸਦ੍ਧੋ ਮੁਦੂ ਸਂਵਿਭਾਗੀ ਵਦਞ੍ਞੂਤਿ ਏਕਂ ਅਙ੍ਗਂ. ਅਪਰੋ ਦੁਕਨਯੋ ਨਾਮ ਹੋਤਿ. ‘‘ਵਾਚਂ ਮਨਞ੍ਚਾ’’ਤਿ ਇਦਮੇਕਂ ਅਙ੍ਗਂ, ‘‘ਕਾਯੇਨ ਪਾਪਾਨਿ ਅਕੁਬ੍ਬਮਾਨੋ, ਬਹ੍ਵਨ੍ਨਪਾਨਂ ਘਰਮਾਵਸਨ੍ਤੋ’’ਤਿ ਏਕਂ, ‘‘ਸਦ੍ਧੋ ਮੁਦੂ’’ਤਿ ਏਕਂ, ‘‘ਸਂਵਿਭਾਗੀ ਵਦਞ੍ਞੂ’’ਤਿ ਏਕਂ. ਏਤੇਸੁ ਚਤੂਸੁ ਧਮ੍ਮੇਸੁ ਠਿਤੋ ਧਮ੍ਮੇ ਠਿਤੋ ਨਾਮ ਹੋਤਿ. ਸੋ ਇਤੋ ਪਰਲੋਕਂ ਗਚ੍ਛਨ੍ਤੋ ਨ ਭਾਯਤਿ. ਪਞ੍ਚਮਂ.

੬. ਨਜੀਰਤਿਸੁਤ੍ਤਵਣ੍ਣਨਾ

੭੬. ਛਟ੍ਠੇ ਨਾਮਗੋਤ੍ਤਂ ਨ ਜੀਰਤੀਤਿ ਅਤੀਤਬੁਦ੍ਧਾਨਂ ਯਾਵਜ੍ਜਦਿਵਸਾ ਨਾਮਗੋਤ੍ਤਂ ਕਥਿਯਤਿ, ਤਸ੍ਮਾ ਨ ਜੀਰਤੀਤਿ ਵੁਚ੍ਚਤਿ. ਪੋਰਾਣਾ ਪਨ ‘‘ਅਦ੍ਧਾਨੇ ਗਚ੍ਛਨ੍ਤੇ ਨ ਪਞ੍ਞਾਯਿਸ੍ਸਤਿ, ਜੀਰਣਸਭਾਵੋ ਪਨ ਨ ਹੋਤਿਯੇਵਾ’’ਤਿ ਵਦਨ੍ਤਿ. ਆਲਸ੍ਯਨ੍ਤਿ ਆਲਸਿਯਂ, ਯੇਨ ਠਿਤਟ੍ਠਾਨੇ ਠਿਤੋਵ, ਨਿਸਿਨ੍ਨਟ੍ਠਾਨੇ ਨਿਸਿਨ੍ਨੋਵ ਹੋਤਿ, ਤੇਲੇਪਿ ਉਤ੍ਤਰਨ੍ਤੇ ਠਿਤਿਂ ਨ ਕਰੋਤਿ. ਪਮਾਦੋਤਿ ਨਿਦ੍ਦਾਯ ਵਾ ਕਿਲੇਸਵਸੇਨ ਵਾ ਪਮਾਦੋ. ਅਨੁਟ੍ਠਾਨਨ੍ਤਿ ਕਮ੍ਮਸਮਯੇ ਕਮ੍ਮਕਰਣਵੀਰਿਯਾਭਾਵੋ. ਅਸਂਯਮੋਤਿ ਸੀਲਸਞ੍ਞਮਾਭਾਵੋ ਵਿਸ੍ਸਟ੍ਠਾਚਾਰਤਾ. ਨਿਦ੍ਦਾਤਿ ਸੋਪ੍ਪਬਹੁਲਤਾ. ਤਾਯ ਗਚ੍ਛਨ੍ਤੋਪਿ ਠਿਤੋਪਿ ਨਿਸਿਨ੍ਨੋਪਿ ਨਿਦ੍ਦਾਯਤਿ, ਪਗੇਵ ਨਿਪਨ੍ਨੋ. ਤਨ੍ਦੀਤਿ ਅਤਿਚ੍ਛਾਤਾਦਿਵਸੇਨ ਆਗਨ੍ਤੁਕਾਲਸਿਯਂ. ਤੇ ਛਿਦ੍ਦੇਤਿ ਤਾਨਿ ਛ ਛਿਦ੍ਦਾਨਿ ਵਿਵਰਾਨਿ. ਸਬ੍ਬਸੋਤਿ ਸਬ੍ਬਾਕਾਰੇਨ. ਤਨ੍ਤਿ ਨਿਪਾਤਮਤ੍ਤਂ. ਵਿਵਜ੍ਜਯੇਤਿ ਵਜ੍ਜੇਯ੍ਯ ਜਹੇਯ੍ਯ. ਛਟ੍ਠਂ.

੭. ਇਸ੍ਸਰਿਯਸੁਤ੍ਤਵਣ੍ਣਨਾ

੭੭. ਸਤ੍ਤਮੇ ਸਤ੍ਥਮਲਨ੍ਤਿ ਮਲਗ੍ਗਹਿਤਸਤ੍ਥਂ. ਕਿਂ ਸੁ ਹਰਨ੍ਤਂ ਵਾਰੇਨ੍ਤੀਤਿ ਕਂ ਹਰਨ੍ਤਂ ਨਿਸੇਧੇਨ੍ਤਿ. ਵਸੋਤਿ ਆਣਾਪਵਤ੍ਤਨਂ. ਇਤ੍ਥੀਤਿ ਅਵਿਸ੍ਸਜ੍ਜਨੀਯਭਣ੍ਡਤ੍ਤਾ ‘‘ਇਤ੍ਥੀ ਭਣ੍ਡਾਨਮੁਤ੍ਤਮਂ, ਵਰਭਣ੍ਡ’’ਨ੍ਤਿ ਆਹ. ਅਥ ਵਾ ਸਬ੍ਬੇਪਿ ਬੋਧਿਸਤ੍ਤਾ ਚ ਚਕ੍ਕਵਤ੍ਤਿਨੋ ਚ ਮਾਤੁਕੁਚ੍ਛਿਯਂਯੇਵ ਨਿਬ੍ਬਤ੍ਤਨ੍ਤੀਤਿ ‘‘ਇਤ੍ਥੀ ਭਣ੍ਡਾਨਮੁਤ੍ਤਮ’’ਨ੍ਤਿ ਆਹ. ਕੋਧੋ ਸਤ੍ਥਮਲਨ੍ਤਿ ਕੋਧੋ ਮਲਗ੍ਗਹਿਤਸਤ੍ਥਸਦਿਸੋ, ਪਞ੍ਞਾਸਤ੍ਥਸ੍ਸ ਵਾ ਮਲਨ੍ਤਿ ਸਤ੍ਥਮਲਂ. ਅਬ੍ਬੁਦਨ੍ਤਿ ਵਿਨਾਸਕਾਰਣਂ, ਚੋਰਾ ਲੋਕਸ੍ਮਿਂ ਵਿਨਾਸਕਾਤਿ ਅਤ੍ਥੋ. ਹਰਨ੍ਤੋਤਿ ਸਲਾਕਭਤ੍ਤਾਦੀਨਿ ਗਹੇਤ੍ਵਾ ਗਚ੍ਛਨ੍ਤੋ. ਸਲਾਕਭਤ੍ਤਾਦੀਨਿ ਹਿ ਪਟ੍ਠਪਿਤਕਾਲੇਯੇਵ ਮਨੁਸ੍ਸੇਹਿ ਪਰਿਚ੍ਚਤ੍ਤਾਨਿ. ਤੇਸਂ ਤਾਨਿ ਹਰਨ੍ਤੋ ਸਮਣੋ ਪਿਯੋ ਹੋਤਿ, ਅਨਾਹਰਨ੍ਤੇ ਪੁਞ੍ਞਹਾਨਿਂ ਨਿਸ੍ਸਾਯ ਵਿਪ੍ਪਟਿਸਾਰਿਨੋ ਹੋਨ੍ਤਿ. ਸਤ੍ਤਮਂ.

੮. ਕਾਮਸੁਤ੍ਤਵਣ੍ਣਨਾ

੭੮. ਅਟ੍ਠਮੇ ਅਤ੍ਤਾਨਂ ਨ ਦਦੇਤਿ ਪਰਸ੍ਸ ਦਾਸਂ ਕਤ੍ਵਾ ਅਤ੍ਤਾਨਂ ਨ ਦਦੇਯ੍ਯ ਠਪੇਤ੍ਵਾ ਸਬ੍ਬਬੋਧਿਸਤ੍ਤੇਤਿ ਵੁਤ੍ਤਂ. ਨ ਪਰਿਚ੍ਚਜੇਤਿ ਸੀਹਬ੍ਯਗ੍ਘਾਦੀਨਂ ਨ ਪਰਿਚ੍ਚਜੇਯ੍ਯ ਸਬ੍ਬਬੋਧਿਸਤ੍ਤੇ ਠਪੇਤ੍ਵਾਯੇਵਾਤਿ ਵੁਤ੍ਤਂ. ਕਲ੍ਯਾਣਨ੍ਤਿ ਸਣ੍ਹਂ ਮੁਦੁਕਂ. ਪਾਪਿਕਨ੍ਤਿ ਫਰੁਸਂ ਵਾਚਂ. ਅਟ੍ਠਮਂ.

੯. ਪਾਥੇਯ੍ਯਸੁਤ੍ਤਵਣ੍ਣਨਾ

੭੯. ਨਵਮੇ ਸਦ੍ਧਾ ਬਨ੍ਧਤਿ ਪਾਥੇਯ੍ਯਨ੍ਤਿ ਸਦ੍ਧਂ ਉਪ੍ਪਾਦੇਤ੍ਵਾ ਦਾਨਂ ਦੇਤਿ, ਸੀਲਂ ਰਕ੍ਖਤਿ, ਉਪੋਸਥਕਮ੍ਮਂ ਕਰੋਤਿ, ਤੇਨੇਤਂ ਵੁਤ੍ਤਂ. ਸਿਰੀਤਿ ਇਸ੍ਸਰਿਯਂ. ਆਸਯੋਤਿ ਵਸਨਟ੍ਠਾਨਂ. ਇਸ੍ਸਰਿਯੇ ਹਿ ਅਭਿਮੁਖੀਭੂਤੇ ਥਲਤੋਪਿ ਜਲਤੋਪਿ ਭੋਗਾ ਆਗਚ੍ਛਨ੍ਤਿਯੇਵ. ਤੇਨੇਤਂ ਵੁਤ੍ਤਂ. ਪਰਿਕਸ੍ਸਤੀਤਿ ਪਰਿਕਡ੍ਢਤਿ. ਨਵਮਂ.

੧੦. ਪਜ੍ਜੋਤਸੁਤ੍ਤਵਣ੍ਣਨਾ

੮੦. ਦਸਮੇ ਪਜ੍ਜੋਤੋਤਿ ਪਦੀਪੋ ਵਿਯ ਹੋਤਿ. ਜਾਗਰੋਤਿ ਜਾਗਰਬ੍ਰਾਹ੍ਮਣੋ ਵਿਯ ਹੋਤਿ. ਗਾਵੋ ਕਮ੍ਮੇ ਸਜੀਵਾਨਨ੍ਤਿ ਕਮ੍ਮੇਨ ਸਹ ਜੀਵਨ੍ਤਾਨਂ ਗਾਵੋਵ ਕਮ੍ਮੇ ਕਮ੍ਮਸਹਾਯਾ ਕਮ੍ਮਦੁਤਿਯਕਾ ਨਾਮ ਹੋਨ੍ਤਿ. ਗੋਮਣ੍ਡਲੇਹਿ ਸਦ੍ਧਿਂ ਕਸਿਕਮ੍ਮਾਦੀਨਿ ਨਿਪ੍ਫਜ੍ਜਨ੍ਤਿ. ਸੀਤਸ੍ਸ ਇਰਿਯਾਪਥੋਤਿ ਸੀਤਂ ਅਸ੍ਸ ਸਤ੍ਤਕਾਯਸ੍ਸ ਇਰਿਯਾਪਥੋ ਜੀਵਿਤਵੁਤ੍ਤਿ. ਸੀਤਨ੍ਤਿ ਨਙ੍ਗਲਂ. ਯਸ੍ਸ ਹਿ ਨਙ੍ਗਲੇਹਿ ਖੇਤ੍ਤਂ ਅਪ੍ਪਮਤ੍ਤਕਮ੍ਪਿ ਕਟ੍ਠਂ ਨ ਹੋਤਿ, ਸੋ ਕਥਂ ਜੀਵਿਸ੍ਸਤੀਤਿ ਵਦਤਿ. ਦਸਮਂ.

੧੧. ਅਰਣਸੁਤ੍ਤਵਣ੍ਣਨਾ

੮੧. ਏਕਾਦਸਮੇ ਅਰਣਾਤਿ ਨਿਕ੍ਕਿਲੇਸਾ. ਵੁਸਿਤਨ੍ਤਿ ਵੁਸਿਤਵਾਸੋ. ਭੋਜਿਸ੍ਸਿਯਨ੍ਤਿ ਅਦਾਸਭਾਵੋ. ਸਮਣਾਤਿ ਖੀਣਾਸਵਸਮਣਾ. ਤੇ ਹਿ ਏਕਨ੍ਤੇਨ ਅਰਣਾ ਨਾਮ. ਵੁਸਿਤਂ ਨ ਨਸ੍ਸਤੀਤਿ ਤੇਸਂ ਅਰਿਯਮਗ੍ਗਵਾਸੋ ਨ ਨਸ੍ਸਤਿ. ਪਰਿਜਾਨਨ੍ਤੀਤਿ ਪੁਥੁਜ੍ਜਨਕਲ੍ਯਾਣਕਤੋ ਪਟ੍ਠਾਯ ਸੇਖਾ ਲੋਕਿਯਲੋਕੁਤ੍ਤਰਾਯ ਪਰਿਞ੍ਞਾਯ ਪਰਿਜਾਨਨ੍ਤਿ. ਭੋਜਿਸ੍ਸਿਯਨ੍ਤਿ ਖੀਣਾਸਵਸਮਣਾਨਂਯੇਵ ਨਿਚ੍ਚਂ ਭੁਜਿਸ੍ਸਭਾਵੋ ਨਾਮ. ਵਨ੍ਦਨ੍ਤੀਤਿ ਪਬ੍ਬਜਿਤਦਿਵਸਤੋ ਪਟ੍ਠਾਯ ਵਨ੍ਦਨ੍ਤਿ. ਪਤਿਟ੍ਠਿਤਨ੍ਤਿ ਸੀਲੇ ਪਤਿਟ੍ਠਿਤਂ. ਸਮਣੀਧਾਤਿ ਸਮਣਂ ਇਧ. ਜਾਤਿਹੀਨਨ੍ਤਿ ਅਪਿ ਚਣ੍ਡਾਲਕੁਲਾ ਪਬ੍ਬਜਿਤਂ. ਖਤ੍ਤਿਯਾਤਿ ਨ ਕੇਵਲਂ ਖਤ੍ਤਿਯਾਵ, ਦੇਵਾਪਿ ਸੀਲਸਮ੍ਪਨ੍ਨਂ ਸਮਣਂ ਵਨ੍ਦਨ੍ਤਿਯੇਵਾਤਿ. ਏਕਾਦਸਮਂ.

ਛੇਤ੍ਵਾਵਗ੍ਗੋ ਅਟ੍ਠਮੋ.

ਇਤਿ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਦੇਵਤਾਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.