੨. ਦੇਵਪੁਤ੍ਤਸਂਯੁਤ੍ਤਂ
੧. ਪਠਮਵਗ੍ਗੋ
੧. ਪਠਮਕਸ੍ਸਪਸੁਤ੍ਤਵਣ੍ਣਨਾ
੮੨. ਦੇਵਪੁਤ੍ਤਸਂਯੁਤ੍ਤਸ੍ਸ ਪਠਮੇ ਦੇਵਪੁਤ੍ਤੋਤਿ ਦੇਵਾਨਞ੍ਹਿ ਅਙ੍ਕੇ ਨਿਬ੍ਬਤ੍ਤਾ ਪੁਰਿਸਾ ਦੇਵਪੁਤ੍ਤਾ ਨਾਮ, ਇਤ੍ਥਿਯੋ ਦੇਵਧੀਤਰੋ ਨਾਮ ਹੋਨ੍ਤਿ. ਨਾਮਵਸੇਨ ਅਪਾਕਟਾਵ ‘‘ਅਞ੍ਞਤਰਾ ਦੇਵਤਾ’’ਤਿ ਵੁਚ੍ਚਤਿ, ਪਾਕਟੋ ‘‘ਇਤ੍ਥਨ੍ਨਾਮੋ ਦੇਵਪੁਤ੍ਤੋ’’ਤਿ. ਤਸ੍ਮਾ ਹੇਟ੍ਠਾ ‘‘ਅਞ੍ਞਤਰਾ ਦੇਵਤਾ’’ਤਿ ਵਤ੍ਵਾ ਇਧ ‘‘ਦੇਵਪੁਤ੍ਤੋ’’ਤਿ ਵੁਤ੍ਤਂ. ਅਨੁਸਾਸਨ੍ਤਿ ਅਨੁਸਿਟ੍ਠਿਂ. ਅਯਂ ਕਿਰ ਦੇਵਪੁਤ੍ਤੋ ਭਗਵਤਾ ਸਮ੍ਬੋਧਿਤੋ ਸਤ੍ਤਮੇ ਵਸ੍ਸੇ ਯਮਕਪਾਟਿਹਾਰਿਯਂ ਕਤ੍ਵਾ ਤਿਦਸਪੁਰੇ ਵਸ੍ਸਂ ਉਪਗਮ੍ਮ ਅਭਿਧਮ੍ਮਂ ਦੇਸੇਨ੍ਤੇਨ ਝਾਨਵਿਭਙ੍ਗੇ – ‘‘ਭਿਕ੍ਖੂਤਿ ਸਮਞ੍ਞਾਯ ਭਿਕ੍ਖੁ, ਪਟਿਞ੍ਞਾਯ ਭਿਕ੍ਖੂ’’ਤਿ (ਵਿਭ. ੫੧੦). ਏਵਂ ਭਿਕ੍ਖੁਨਿਦ੍ਦੇਸਂ ਕਥਿਯਮਾਨਂ ਅਸ੍ਸੋਸਿ. ‘‘ਏਵਂ ਵਿਤਕ੍ਕੇਥ, ਮਾ ਏਵਂ ਵਿਤਕ੍ਕਯਿਤ੍ਥ, ਏਵਂ ਮਨਸਿਕਰੋਥ, ਮਾ ਏਵਂ ਮਨਸਾਕਤ੍ਥ. ਇਦਂ ਪਜਹਥ, ਇਦਂ ਉਪਸਮ੍ਪਜ੍ਜ ਵਿਹਰਥਾ’’ਤਿ (ਪਾਰਾ. ੧੯). ਏਵਰੂਪਂ ਪਨ ਭਿਕ੍ਖੁਓਵਾਦਂ ਭਿਕ੍ਖੁਅਨੁਸਾਸਨਂ ਨ ਅਸ੍ਸੋਸਿ. ਸੋ ਤਂ ਸਨ੍ਧਾਯ – ‘‘ਭਿਕ੍ਖੁਂ ਭਗਵਾ ਪਕਾਸੇਸਿ, ਨੋ ਚ ਭਿਕ੍ਖੁਨੋ ਅਨੁਸਾਸ’’ਨ੍ਤਿ ਆਹ.
ਤੇਨ ਹੀਤਿ ਯਸ੍ਮਾ ਮਯਾ ਭਿਕ੍ਖੁਨੋ ਅਨੁਸਿਟ੍ਠਿ ਨ ਪਕਾਸਿਤਾਤਿ ਵਦਸਿ, ਤਸ੍ਮਾ. ਤਞ੍ਞੇਵੇਤ੍ਥ ਪਟਿਭਾਤੂਤਿ ਤੁਯ੍ਹੇਵੇਸਾ ਅਨੁਸਿਟ੍ਠਿਪਕਾਸਨਾ ਉਪਟ੍ਠਾਤੂਤਿ. ਯੋ ਹਿ ਪਞ੍ਹਂ ਕਥੇਤੁਕਾਮੋ ਹੋਤਿ, ਨ ਚ ਸਕ੍ਕੋਤਿ ਸਬ੍ਬਞ੍ਞੁਤਞ੍ਞਾਣੇਨ ਸਦ੍ਧਿਂ ਸਂਸਨ੍ਦਿਤ੍ਵਾ ਕਥੇਤੁਂ. ਯੋ ਵਾ ਨ ਕਥੇਤੁਕਾਮੋ ਹੋਤਿ, ਸਕ੍ਕੋਤਿ ਪਨ ਕਥੇਤੁਂ. ਯੋ ਵਾ ਨੇਵ ਕਥੇਤੁਕਾਮੋ ਹੋਤਿ, ਕਥੇਤੁਂ ਨ ਚ ਸਕ੍ਕੋਤਿ. ਸਬ੍ਬੇਸਮ੍ਪਿ ਤੇਸਂ ਭਗਵਾ ਪਞ੍ਹਂ ਭਾਰਂ ਨ ਕਰੋਤਿ. ਅਯਂ ਪਨ ਦੇਵਪੁਤ੍ਤੋ ਕਥੇਤੁਕਾਮੋ ਚੇਵ, ਸਕ੍ਕੋਤਿ ਚ ਕਥੇਤੁਂ. ਤਸ੍ਮਾ ਤਸ੍ਸੇਵ ਭਾਰਂ ਕਰੋਨ੍ਤੋ ਭਗਵਾ ਏਵਮਾਹ. ਸੋਪਿ ਪਞ੍ਹਂ ਕਥੇਸਿ.
ਤਤ੍ਥ ਸੁਭਾਸਿਤਸ੍ਸ ਸਿਕ੍ਖੇਥਾਤਿ ਸੁਭਾਸਿਤਂ ਸਿਕ੍ਖੇਯ੍ਯ, ਚਤੁਸਚ੍ਚਨਿਸ੍ਸਿਤਂ ਦਸਕਥਾਵਤ੍ਥੁਨਿਸ੍ਸਿਤਂ ਸਤ੍ਤਤਿਂਸਬੋਧਿਪਕ੍ਖਿਯਨਿਸ੍ਸਿਤਂ ਚਤੁਬ੍ਬਿਧਂ ਵਚੀਸੁਚਰਿਤਮੇਵ ਸਿਕ੍ਖੇਯ੍ਯ. ਸਮਣੂਪਾਸਨਸ੍ਸ ਚਾਤਿ ਸਮਣੇਹਿ ਉਪਾਸਿਤਬ੍ਬਂ ਸਮਣੂਪਾਸਨਂ ਨਾਮ ਅਟ੍ਠਤਿਂਸਭੇਦਂ ਕਮ੍ਮਟ੍ਠਾਨਂ, ਤਮ੍ਪਿ ਸਿਕ੍ਖੇਯ੍ਯ ਭਾਵੇਯ੍ਯਾਤਿ ਅਤ੍ਥੋ. ਬਹੁਸ੍ਸੁਤਾਨਂ ਵਾ ਭਿਕ੍ਖੂਨਂ ਉਪਾਸਨਮ੍ਪਿ ਸਮਣੂਪਾਸਨਂ. ਤਮ੍ਪਿ ‘ਕਿਂ, ਭਨ੍ਤੇ, ਕੁਸਲ’’ਨ੍ਤਿਆਦਿਨਾ ਪਞ੍ਹਪੁਚ੍ਛਨੇਨ ਪਞ੍ਞਾਵੁਦ੍ਧਤ੍ਥਂ ਸਿਕ੍ਖੇਯ੍ਯ. ਚਿਤ੍ਤਵੂਪਸਮਸ੍ਸ ਚਾਤਿ ਅਟ੍ਠਸਮਾਪਤ੍ਤਿਵਸੇਨ ਚਿਤ੍ਤਵੂਪਸਮਂ ਸਿਕ੍ਖੇਯ੍ਯ. ਇਤਿ ਦੇਵਪੁਤ੍ਤੇਨ ਤਿਸ੍ਸੋ ਸਿਕ੍ਖਾ ਕਥਿਤਾ ਹੋਨ੍ਤਿ. ਪੁਰਿਮਪਦੇਨ ਹਿ ਅਧਿਸੀਲਸਿਕ੍ਖਾ ਕਥਿਤਾ, ਦੁਤਿਯਪਦੇਨ ਅਧਿਪਞ੍ਞਾਸਿਕ੍ਖਾ, ਚਿਤ੍ਤਵੂਪਸਮੇਨ ਅਧਿਚਿਤ੍ਤਸਿਕ੍ਖਾਤਿ ਏਵਂ ਇਮਾਯ ਗਾਥਾਯ ਸਕਲਮ੍ਪਿ ਸਾਸਨਂ ਪਕਾਸਿਤਮੇਵ ਹੋਤਿ. ਪਠਮਂ.
੨. ਦੁਤਿਯਕਸ੍ਸਪਸੁਤ੍ਤਵਣ੍ਣਨਾ
੮੩. ਦੁਤਿਯੇ ਝਾਯੀਤਿ ਦ੍ਵੀਹਿ ਝਾਨੇਹਿ ਝਾਯੀ. ਵਿਮੁਤ੍ਤਚਿਤ੍ਤੋਤਿ ਕਮ੍ਮਟ੍ਠਾਨਵਿਮੁਤ੍ਤਿਯਾ ਵਿਮੁਤ੍ਤਚਿਤ੍ਤੋ. ਹਦਯਸ੍ਸਾਨੁਪਤ੍ਤਿਨ੍ਤਿ ਅਰਹਤ੍ਤਂ. ਲੋਕਸ੍ਸਾਤਿ ਸਙ੍ਖਾਰਲੋਕਸ੍ਸ. ਅਨਿਸ੍ਸਿਤੋਤਿ ਤਣ੍ਹਾਦਿਟ੍ਠੀਹਿ ਅਨਿਸ੍ਸਿਤੋ, ਤਣ੍ਹਾਦਿਟ੍ਠਿਯੋ ਵਾ ਅਨਿਸ੍ਸਿਤੋ. ਤਦਾਨਿਸਂਸੋਤਿ ਅਰਹਤ੍ਤਾਨਿਸਂਸੋ. ਇਦਂ ਵੁਤ੍ਤਂ ਹੋਤਿ – ਅਰਹਤ੍ਤਾਨਿਸਂਸੋ ਭਿਕ੍ਖੁ ਅਰਹਤ੍ਤਂ ਪਤ੍ਥੇਨ੍ਤੋ ਝਾਯੀ ਭਵੇਯ੍ਯ, ਸੁਵਿਮੁਤ੍ਤਚਿਤ੍ਤੋ ਭਵੇਯ੍ਯ, ਲੋਕਸ੍ਸ ਉਦਯਬ੍ਬਯਂ ਞਤ੍ਵਾ ਅਨਿਸ੍ਸਿਤੋ ਭਵੇਯ੍ਯ. ਤਨ੍ਤਿਧਮ੍ਮੋ ਪਨ ਇਮਸ੍ਮਿਂ ਸਾਸਨੇ ਪੁਬ੍ਬਭਾਗੋਤਿ. ਦੁਤਿਯਂ.
੩-੪. ਮਾਘਸੁਤ੍ਤਾਦਿਵਣ੍ਣਨਾ
੮੪. ਤਤਿਯੇ ਮਾਘੋਤਿ ਸਕ੍ਕਸ੍ਸੇਤਂ ਨਾਮਂ. ਸ੍ਵੇਵ ਵਤ੍ਤੇਨ ਅਞ੍ਞੇ ਅਭਿਭਵਿਤ੍ਵਾ ਦੇਵਿਸ੍ਸਰਿਯਂ ਪਤ੍ਤੋਤਿ ਵਤ੍ਰਭੂ, ਵਤ੍ਰਨਾਮਕਂ ਵਾ ਅਸੁਰਂ ਅਭਿਭਵਤੀਤਿ ਵਤ੍ਰਭੂ. ਤਤਿਯਂ.
੮੫. ਚਤੁਤ੍ਥਂ ਵੁਤ੍ਤਤ੍ਥਮੇਵ. ਚਤੁਤ੍ਥਂ.
੫. ਦਾਮਲਿਸੁਤ੍ਤਵਣ੍ਣਨਾ
੮੬. ਪਞ੍ਚਮੇ ਨ ਤੇਨਾਸੀਸਤੇ ਭਵਨ੍ਤਿ ਤੇਨ ਕਾਰਣੇਨ ਯਂ ਕਿਞ੍ਚਿ ਭਵਂ ਨ ਪਤ੍ਥੇਤਿ. ਆਯਤਪਗ੍ਗਹੋ ਨਾਮੇਸ ਦੇਵਪੁਤ੍ਤੋ, ਖੀਣਾਸਵਸ੍ਸ ਕਿਚ੍ਚਵੋਸਾਨਂ ਨਤ੍ਥਿ. ਖੀਣਾਸਵੇਨ ਹਿ ਆਦਿਤੋ ਅਰਹਤ੍ਤਪ੍ਪਤ੍ਤਿਯਾ ਵੀਰਿਯਂ ਕਤਂ, ਅਪਰਭਾਗੇ ਮਯਾ ਅਰਹਤ੍ਤਂ ਪਤ੍ਤਨ੍ਤਿ ਮਾ ਤੁਣ੍ਹੀ ਭਵਤੁ, ਤਥੇਵ ਵੀਰਿਯਂ ਦਲ਼੍ਹਂ ਕਰੋਤੁ ਪਰਕ੍ਕਮਤੂਤਿ ਚਿਨ੍ਤੇਤ੍ਵਾ ਏਵਮਾਹ.
ਅਥ ਭਗਵਾ ‘‘ਅਯਂ ਦੇਵਪੁਤ੍ਤੋ ਖੀਣਾਸਵਸ੍ਸ ਕਿਚ੍ਚਵੋਸਾਨਂ ਅਕਥੇਨ੍ਤੋ ਮਮ ਸਾਸਨਂ ਅਨਿਯ੍ਯਾਨਿਕਂ ਕਥੇਤਿ, ਕਿਚ੍ਚਵੋਸਾਨਮਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਤ੍ਥਿ ਕਿਚ੍ਚਨ੍ਤਿਆਦਿਮਾਹ. ਤੀਸੁ ਕਿਰ ਪਿਟਕੇਸੁ ਅਯਂ ਗਾਥਾ ਅਸਂਕਿਣ੍ਣਾ. ਭਗਵਤਾ ਹਿ ਅਞ੍ਞਤ੍ਥ ਵੀਰਿਯਸ੍ਸ ਦੋਸੋ ਨਾਮ ਦਸ੍ਸਿਤੋ ਨਤ੍ਥਿ. ਇਧ ਪਨ ਇਮਂ ਦੇਵਪੁਤ੍ਤਂ ਪਟਿਬਾਹਿਤ੍ਵਾ ‘‘ਖੀਣਾਸਵੇਨ ਪੁਬ੍ਬਭਾਗੇ ਆਸਵਕ੍ਖਯਤ੍ਥਾਯ ਅਰਞ੍ਞੇ ਵਸਨ੍ਤੇਨ ਕਮ੍ਮਟ੍ਠਾਨਂ ਆਦਾਯ ਵੀਰਿਯਂ ਕਤਂ, ਅਪਰਭਾਗੇ ਸਚੇ ਇਚ੍ਛਤਿ, ਕਰੋਤੁ, ਨੋ ਚੇ ਇਚ੍ਛਤਿ, ਯਥਾਸੁਖਂ ਵਿਹਰਤੂ’’ਤਿ ਖੀਣਾਸਵਸ੍ਸ ਕਿਚ੍ਚਵੋਸਾਨਦਸ੍ਸਨਤ੍ਥਂ ਏਵਮਾਹ. ਤਤ੍ਥ ਗਾਧਨ੍ਤਿ ਪਤਿਟ੍ਠਂ. ਪਞ੍ਚਮਂ.
੬. ਕਾਮਦਸੁਤ੍ਤਵਣ੍ਣਨਾ
੮੭. ਛਟ੍ਠੇ ਦੁਕ੍ਕਰਨ੍ਤਿ ਅਯਂ ਕਿਰ ਦੇਵਪੁਤ੍ਤੋ ਪੁਬ੍ਬਯੋਗਾਵਚਰੋ ਬਹਲਕਿਲੇਸਤਾਯ ਸਪ੍ਪਯੋਗੇਨ ਕਿਲੇਸੇ ਵਿਕ੍ਖਮ੍ਭੇਨ੍ਤੋ ਸਮਣਧਮ੍ਮਂ ਕਤ੍ਵਾ ਪੁਬ੍ਬੂਪਨਿਸ੍ਸਯਮਨ੍ਦਤਾਯ ਅਰਿਯਭੂਮਿਂ ਅਪ੍ਪਤ੍ਵਾਵ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ. ਸੋ ‘‘ਤਥਾਗਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਦੁਕ੍ਕਰਭਾਵਂ ਆਰੋਚੇਸ੍ਸਾਮੀ’’ਤਿ ਆਗਨ੍ਤ੍ਵਾ ਏਵਮਾਹ. ਤਤ੍ਥ ਦੁਕ੍ਕਰਨ੍ਤਿ ਦਸਪਿ ਵਸ੍ਸਾਨਿ…ਪੇ… ਸਟ੍ਠਿਪਿ ਯਦੇਤਂ ਏਕਨ੍ਤਪਰਿਸੁਦ੍ਧਸ੍ਸ ਸਮਣਧਮ੍ਮਸ੍ਸ ਕਰਣਂ ਨਾਮ, ਤਂ ਦੁਕ੍ਕਰਂ. ਸੇਖਾਤਿ ਸਤ੍ਤ ਸੇਖਾ. ਸੀਲਸਮਾਹਿਤਾਤਿ ਸੀਲੇਨ ਸਮਾਹਿਤਾ ਸਮੁਪੇਤਾ. ਠਿਤਤ੍ਤਾਤਿ ਪਤਿਟ੍ਠਿਤਸਭਾਵਾ. ਏਵਂ ਪੁਚ੍ਛਿਤਪਞ੍ਹਂ ਵਿਸ੍ਸਜ੍ਜੇਤ੍ਵਾ ਇਦਾਨਿ ਉਪਰਿਪਞ੍ਹਸਮੁਟ੍ਠਾਪਨਤ੍ਥਂ ਅਨਗਾਰਿਯੁਪੇਤਸ੍ਸਾਤਿਆਦਿਮਾਹ. ਤਤ੍ਥ ਅਨਗਾਰਿਯੁਪੇਤਸ੍ਸਾਤਿ ਅਨਗਾਰਿਯਂ ਨਿਗ੍ਗੇਹਭਾਵਂ ਉਪੇਤਸ੍ਸ. ਸਤ੍ਤਭੂਮਿਕੇਪਿ ਹਿ ਪਾਸਾਦੇ ਵਸਨ੍ਤੋ ਭਿਕ੍ਖੁ ਵੁਡ੍ਢਤਰੇਨ ਆਗਨ੍ਤ੍ਵਾ ‘‘ਮਯ੍ਹਂ ਇਦਂ ਪਾਪੁਣਾਤੀ’’ਤਿ ਵੁਤ੍ਤੇ ਪਤ੍ਤਚੀਵਰਂ ਆਦਾਯ ਨਿਕ੍ਖਮਤੇਵ. ਤਸ੍ਮਾ ‘‘ਅਨਗਾਰਿਯੁਪੇਤੋ’’ਤਿ ਵੁਚ੍ਚਤਿ. ਤੁਟ੍ਠੀਤਿ ਚਤੁਪਚ੍ਚਯਸਨ੍ਤੋਸੋ. ਭਾਵਨਾਯਾਤਿ ਚਿਤ੍ਤਵੂਪਸਮਭਾਵਨਾਯ.
ਤੇ ਛੇਤ੍ਵਾ ਮਚ੍ਚੁਨੋ ਜਾਲਨ੍ਤਿ ਯੇ ਰਤ੍ਤਿਨ੍ਦਿਵਂ ਇਨ੍ਦ੍ਰਿਯੂਪਸਮੇ ਰਤਾ, ਤੇ ਦੁਸ੍ਸਮਾਦਹਂ ਚਿਤ੍ਤਂ ਸਮਾਦਹਨ੍ਤਿ. ਯੇ ਚ ਸਮਾਹਿਤਚਿਤ੍ਤਾ, ਤੇ ਚਤੁਪਚ੍ਚਯਸਨ੍ਤੋਸਂ ਪੂਰੇਨ੍ਤਾ ਨ ਕਿਲਮਨ੍ਤਿ. ਯੇ ਸਨ੍ਤੁਟ੍ਠਾ, ਤੇ ਸੀਲਂ ਪੂਰੇਨ੍ਤਾ ਨ ਕਿਲਮਨ੍ਤਿ. ਯੇ ਸੀਲੇ ਪਤਿਟ੍ਠਿਤਾ ਸਤ੍ਤ ਸੇਖਾ, ਤੇ ਅਰਿਯਾ ਮਚ੍ਚੁਨੋ ਜਾਲਸਙ੍ਖਾਤਂ ਕਿਲੇਸਜਾਲਂ ਛਿਨ੍ਦਿਤ੍ਵਾ ਗਚ੍ਛਨ੍ਤਿ. ਦੁਗ੍ਗਮੋਤਿ ‘‘ਸਚ੍ਚਮੇਤਂ, ਭਨ੍ਤੇ, ਯੇ ਇਨ੍ਦ੍ਰਿਯੂਪਸਮੇ ਰਤਾ, ਤੇ ਦੁਸ੍ਸਮਾਦਹਂ ਸਮਾਦਹਨ੍ਤਿ…ਪੇ… ਯੇ ਸੀਲੇ ਪਤਿਟ੍ਠਿਤਾ, ਤੇ ਮਚ੍ਚੁਨੋ ਜਾਲਂ ਛਿਨ੍ਦਿਤ੍ਵਾ ਗਚ੍ਛਨ੍ਤਿ’’. ਕਿਂ ਨ ਗਚ੍ਛਿਸ੍ਸਨ੍ਤਿ? ਅਯਂ ਪਨ ਦੁਗ੍ਗਮੋ ਭਗਵਾ ਵਿਸਮੋ ਮਗ੍ਗੋਤਿ ਆਹ. ਤਤ੍ਥ ਕਿਞ੍ਚਾਪਿ ਅਰਿਯਮਗ੍ਗੋ ਨੇਵ ਦੁਗ੍ਗਮੋ ਨ ਵਿਸਮੋ, ਪੁਬ੍ਬਭਾਗਪਟਿਪਦਾਯ ਪਨਸ੍ਸ ਬਹੂ ਪਰਿਸ੍ਸਯਾ ਹੋਨ੍ਤਿ. ਤਸ੍ਮਾ ਏਵਂ ਵੁਤ੍ਤੋ. ਅਵਂਸਿਰਾਤਿ ਞਾਣਸਿਰੇਨ ਅਧੋਸਿਰਾ ਹੁਤ੍ਵਾ ਪਪਤਨ੍ਤਿ. ਅਰਿਯਮਗ੍ਗਂ ਆਰੋਹਿਤੁਂ ਅਸਮਤ੍ਥਤਾਯੇਵ ਚ ਤੇ ਅਨਰਿਯਮਗ੍ਗੇ ਪਪਤਨ੍ਤੀਤਿ ਚ ਵੁਚ੍ਚਨ੍ਤਿ. ਅਰਿਯਾਨਂ ਸਮੋ ਮਗ੍ਗੋਤਿ ਸ੍ਵੇਵ ਮਗ੍ਗੋ ਅਰਿਯਾਨਂ ਸਮੋ ਹੋਤਿ. ਵਿਸਮੇ ਸਮਾਤਿ ਵਿਸਮੇਪਿ ਸਤ੍ਤਕਾਯੇ ਸਮਾਯੇਵ. ਛਟ੍ਠਂ.
੭. ਪਞ੍ਚਾਲਚਣ੍ਡਸੁਤ੍ਤਵਣ੍ਣਨਾ
੮੮. ਸਤ੍ਤਮੇ ਸਮ੍ਬਾਧੇਤਿ ਨੀਵਰਣਸਮ੍ਬਾਧਂ ਕਾਮਗੁਣਸਮ੍ਬਾਧਨ੍ਤਿ ਦ੍ਵੇ ਸਮ੍ਬਾਧਾ. ਤੇਸੁ ਇਧ ਨੀਵਰਣਸਮ੍ਬਾਧਂ ਅਧਿਪ੍ਪੇਤਂ. ਓਕਾਸਨ੍ਤਿ ਝਾਨਸ੍ਸੇਤਂ ਨਾਮਂ. ਪਟਿਲੀਨਨਿਸਭੋਤਿ ਪਟਿਲੀਨਸੇਟ੍ਠੋ. ਪਟਿਲੀਨੋ ਨਾਮ ਪਹੀਨਮਾਨੋ ਵੁਚ੍ਚਤਿ. ਯਥਾਹ – ‘‘ਕਥਞ੍ਚ, ਭਿਕ੍ਖਵੇ, ਭਿਕ੍ਖੁ ਪਟਿਲੀਨੋ ਹੋਤਿ. ਇਧ, ਭਿਕ੍ਖਵੇ, ਭਿਕ੍ਖੁਨੋ ਅਸ੍ਮਿਮਾਨੋ ਪਹੀਨੋ ਹੋਤਿ ਉਚ੍ਛਿਨ੍ਨਮੂਲੋ ਤਾਲਾਵਤ੍ਥੁਕਤੋ ਅਨਭਾਵਂਕਤੋ ਆਯਤਿਂ ਅਨੁਪ੍ਪਾਦਧਮ੍ਮੋ’’ਤਿ (ਅ. ਨਿ. ੪.੩੮; ਮਹਾਨਿ. ੮੭). ਪਚ੍ਚਲਤ੍ਥਂਸੂਤਿ ਪਟਿਲਭਿਂਸੁ. ਸਮ੍ਮਾ ਤੇਤਿ ਯੇ ਨਿਬ੍ਬਾਨਪਤ੍ਤਿਯਾ ਸਤਿਂ ਪਟਿਲਭਿਂਸੁ, ਤੇ ਲੋਕੁਤ੍ਤਰਸਮਾਧਿਨਾਪਿ ਸੁਸਮਾਹਿਤਾਤਿ ਮਿਸ੍ਸਕਜ੍ਝਾਨਂ ਕਥਿਤਂ. ਸਤ੍ਤਮਂ.
੮. ਤਾਯਨਸੁਤ੍ਤਵਣ੍ਣਨਾ
੮੯. ਅਟ੍ਠਮੇ ਪੁਰਾਣਤਿਤ੍ਥਕਰੋਤਿ ਪੁਬ੍ਬੇ ਤਿਤ੍ਥਕਰੋ. ਏਤ੍ਥ ਚ ਤਿਤ੍ਥਂ ਨਾਮ ਦ੍ਵਾਸਟ੍ਠਿ ਦਿਟ੍ਠਿਯੋ, ਤਿਤ੍ਥਕਰੋ ਨਾਮ ਤਾਸਂ ਉਪ੍ਪਾਦਕੋ ਸਤ੍ਥਾ. ਸੇਯ੍ਯਥਿਦਂ ਨਨ੍ਦੋ, ਵਚ੍ਛੋ, ਕਿਸੋ, ਸਂਕਿਚ੍ਚੋ. ਪੁਰਾਣਾਦਯੋ ਪਨ ਤਿਤ੍ਥਿਯਾ ਨਾਮ. ਅਯਂ ਪਨ ਦਿਟ੍ਠਿਂ ਉਪ੍ਪਾਦੇਤ੍ਵਾ ਕਥਂ ਸਗ੍ਗੇ ਨਿਬ੍ਬਤ੍ਤੋਤਿ? ਕਮ੍ਮਵਾਦਿਤਾਯ. ਏਸ ਕਿਰ ਉਪੋਸਥਭਤ੍ਤਾਦੀਨਿ ਅਦਾਸਿ, ਅਨਾਥਾਨਂ ਵਤ੍ਤਂ ਪਟ੍ਠਪੇਸਿ, ਪਤਿਸ੍ਸਯੇ ਅਕਾਸਿ, ਪੋਕ੍ਖਰਣਿਯੋ ਖਣਾਪੇਸਿ, ਅਞ੍ਞਮ੍ਪਿ ਬਹੁਂ ਕਲ੍ਯਾਣਂ ਅਕਾਸਿ. ਸੋ ਤਸ੍ਸ ਨਿਸ੍ਸਨ੍ਦੇਨ ਸਗ੍ਗੇ ਨਿਬ੍ਬਤ੍ਤੋ, ਸਾਸਨਸ੍ਸ ਪਨ ਨਿਯ੍ਯਾਨਿਕਭਾਵਂ ਜਾਨਾਤਿ. ਸੋ ਤਥਾਗਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸਾਸਨਾਨੁਚ੍ਛਵਿਕਾ ਵੀਰਿਯਪ੍ਪਟਿਸਂਯੁਤ੍ਤਾ ਗਾਥਾ ਵਕ੍ਖਾਮੀਤਿ ਆਗਨ੍ਤ੍ਵਾ ਛਿਨ੍ਦ ਸੋਤਨ੍ਤਿਆਦਿਮਾਹ.
ਤਤ੍ਥ ਛਿਨ੍ਦਾਤਿ ਅਨਿਯਮਿਤਆਣਤ੍ਤਿ. ਸੋਤਨ੍ਤਿ ਤਣ੍ਹਾਸੋਤਂ. ਪਰਕ੍ਕਮ੍ਮਾਤਿ ਪਰਕ੍ਕਮਿਤ੍ਵਾ ਵੀਰਿਯਂ ਕਤ੍ਵਾ. ਕਾਮੇਤਿ ਕਿਲੇਸਕਾਮੇਪਿ ਵਤ੍ਥੁਕਾਮੇਪਿ. ਪਨੁਦਾਤਿ ਨੀਹਰ. ਏਕਤ੍ਤਨ੍ਤਿ ਝਾਨਂ. ਇਦਂ ਵੁਤ੍ਤਂ ਹੋਤਿ – ਕਾਮੇ ਅਜਹਿਤ੍ਵਾ ਮੁਨਿ ਝਾਨਂ ਨ ਉਪਪਜ੍ਜਤਿ, ਨ ਪਟਿਲਭਤੀਤਿ ਅਤ੍ਥੋ. ਕਯਿਰਾ ਚੇ ਕਯਿਰਾਥੇਨਨ੍ਤਿ ਯਦਿ ਵੀਰਿਯਂ ਕਰੇਯ੍ਯ, ਕਰੇਯ੍ਯਾਥ, ਤਂ ਵੀਰਿਯਂ ਨ ਓਸਕ੍ਕੇਯ੍ਯ. ਦਲ਼੍ਹਮੇਨਂ ਪਰਕ੍ਕਮੇਤਿ ਦਲ਼੍ਹਂ ਏਨਂ ਕਰੇਯ੍ਯ. ਸਿਥਿਲੋ ਹਿ ਪਰਿਬ੍ਬਾਜੋਤਿ ਸਿਥਿਲਗਹਿਤਾ ਪਬ੍ਬਜ੍ਜਾ. ਭਿਯ੍ਯੋ ਆਕਿਰਤੇ ਰਜਨ੍ਤਿ ਅਤਿਰੇਕਂ ਉਪਰਿ ਕਿਲੇਸਰਜਂ ਆਕਿਰਤਿ. ਅਕਤਂ ਦੁਕ੍ਕਟਂ ਸੇਯ੍ਯੋਤਿ ਦੁਕ੍ਕਟਂ ਅਕਤਮੇਵ ਸੇਯ੍ਯੋ. ਯਂ ਕਿਞ੍ਚੀਤਿ ਨ ਕੇਵਲਂ ਦੁਕ੍ਕਟਂ ਕਤ੍ਵਾ ਕਤਸਾਮਞ੍ਞਮੇਵ, ਅਞ੍ਞਮ੍ਪਿ ਯਂ ਕਿਞ੍ਚਿ ਸਿਥਿਲਂ ਕਤਂ ਏਵਰੂਪਮੇਵ ਹੋਤਿ. ਸਂਕਿਲਿਟ੍ਠਨ੍ਤਿ ਦੁਕ੍ਕਰਕਾਰਿਕਵਤਂ. ਇਮਸ੍ਮਿਂ ਹਿ ਸਾਸਨੇ ਪਚ੍ਚਯਹੇਤੁ ਸਮਾਦਿਨ੍ਨਧੁਤਙ੍ਗਵਤਂ ਸਂਕਿਲਿਟ੍ਠਮੇਵ. ਸਙ੍ਕਸ੍ਸਰਨ੍ਤਿ ਸਙ੍ਕਾਯ ਸਰਿਤਂ, ‘‘ਇਦਮ੍ਪਿ ਇਮਿਨਾ ਕਤਂ ਭਵਿਸ੍ਸਤਿ, ਇਦਮ੍ਪਿ ਇਮਿਨਾ’’ਤਿ ਏਵਂ ਆਸਙ੍ਕਿਤਪਰਿਸਙ੍ਕਿਤਂ. ਆਦਿਬ੍ਰਹ੍ਮਚਰਿਯਿਕਾਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾ ਪੁਬ੍ਬਪਧਾਨਭੂਤਾ. ਅਟ੍ਠਮਂ.
੯. ਚਨ੍ਦਿਮਸੁਤ੍ਤਵਣ੍ਣਨਾ
੯੦. ਨਵਮੇ ਚਨ੍ਦਿਮਾਤਿ ਚਨ੍ਦਵਿਮਾਨਵਾਸੀ ਦੇਵਪੁਤ੍ਤੋ. ਸਬ੍ਬਧੀਤਿ ਸਬ੍ਬੇਸੁ ਖਨ੍ਧਆਯਤਨਾਦੀਸੁ. ਲੋਕਾਨੁਕਮ੍ਪਕਾਤਿ ਤੁਯ੍ਹਮ੍ਪਿ ਏਤਸ੍ਸਪਿ ਤਾਦਿਸਾ ਏਵ. ਸਨ੍ਤਰਮਾਨੋਵਾਤਿ ਤੁਰਿਤੋ ਵਿਯ. ਪਮੁਞ੍ਚਸੀਤਿ ਅਤੀਤਤ੍ਥੇ ਵਤ੍ਤਮਾਨਵਚਨਂ. ਨਵਮਂ.
੧੦. ਸੂਰਿਯਸੁਤ੍ਤਵਣ੍ਣਨਾ
੯੧. ਦਸਮੇ ਸੂਰਿਯੋਤਿ ਸੂਰਿਯਵਿਮਾਨਵਾਸੀ ਦੇਵਪੁਤ੍ਤੋ. ਅਨ੍ਧਕਾਰੇਤਿ ਚਕ੍ਖੁਵਿਞ੍ਞਾਣੁਪ੍ਪਤ੍ਤਿਨਿਵਾਰਣੇਨ ਅਨ੍ਧਭਾਵਕਰਣੇ. ਵਿਰੋਚਤੀਤਿ ਵੇਰੋਚਨੋ. ਮਣ੍ਡਲੀਤਿ ਮਣ੍ਡਲਸਣ੍ਠਾਨੋ. ਮਾ, ਰਾਹੁ, ਗਿਲੀ ਚਰਮਨ੍ਤਲਿਕ੍ਖੇਤਿ ਅਨ੍ਤਲਿਕ੍ਖੇ ਚਰਂ ਸੂਰਿਯਂ, ਰਾਹੁ, ਮਾ ਗਿਲੀਤਿ ਵਦਤਿ. ਕਿਂ ਪਨੇਸ ਤਂ ਗਿਲਤੀਤਿ? ਆਮ, ਗਿਲਤਿ. ਰਾਹੁਸ੍ਸ ਹਿ ਅਤ੍ਤਭਾਵੋ ਮਹਾ, ਉਚ੍ਚਤ੍ਤਨੇਨ ਅਟ੍ਠਯੋਜਨਸਤਾਧਿਕਾਨਿ ਚਤ੍ਤਾਰਿ ਯੋਜਨਸਹਸ੍ਸਾਨਿ, ਬਾਹਨ੍ਤਰਮਸ੍ਸ ਦ੍ਵਾਦਸਯੋਜਨਸਤਾਨਿ, ਬਹਲਤ੍ਤੇਨ ਛ ਯੋਜਨਸਤਾਨਿ, ਸੀਸਂ ਨਵ ਯੋਜਨਸਤਂ, ਨਲਾਟਂ ਤਿਯੋਜਨਸਤਂ, ਭਮੁਕਨ੍ਤਰਂ ਪਣ੍ਣਾਸਯੋਜਨਂ, ਮੁਖਂ ਦ੍ਵਿਯੋਜਨਸਤਂ, ਘਾਨਂ ਤਿਯੋਜਨਸਤਂ, ਮੁਖਾਧਾਨਂ ਤਿਯੋਜਨਸਤਗਮ੍ਭੀਰਂ ਹਤ੍ਥਤਲਪਾਦਤਲਾਨਿ ਪੁਥੁਲਤੋ ਦ੍ਵਿਯੋਜਨਸਤਾਨਿ. ਅਙ੍ਗੁਲਿਪਬ੍ਬਾਨਿ ਪਣ੍ਣਾਸ ਯੋਜਨਾਨਿ. ਸੋ ਚਨ੍ਦਿਮਸੂਰਿਯੇ ਵਿਰੋਚਮਾਨੇ ਦਿਸ੍ਵਾ ਇਸ੍ਸਾਪਕਤੋ ਤੇਸਂ ਗਮਨਵੀਥਿਂ ਓਤਰਿਤ੍ਵਾ ਮੁਖਂ ਵਿਵਰਿਤ੍ਵਾ ਤਿਟ੍ਠਤਿ. ਚਨ੍ਦਵਿਮਾਨਂ ਸੂਰਿਯਵਿਮਾਨਂ ਵਾ ਤਿਯੋਜਨਸਤਿਕੇ ਮਹਾਨਰਕੇ ਪਕ੍ਖਿਤ੍ਤਂ ਵਿਯ ਹੋਤਿ. ਵਿਮਾਨੇ ਅਧਿਵਤ੍ਥਾ ਦੇਵਤਾ ਮਰਣਭਯਤਜ੍ਜਿਤਾ ਏਕਪ੍ਪਹਾਰੇਨੇਵ ਵਿਰਵਨ੍ਤਿ. ਸੋ ਪਨ ਵਿਮਾਨਂ ਕਦਾਚਿ ਹਤ੍ਥੇਨ ਛਾਦੇਤਿ, ਕਦਾਚਿ ਹਨੁਕਸ੍ਸ ਹੇਟ੍ਠਾ ਪਕ੍ਖਿਪਤਿ, ਕਦਾਚਿ ਜਿਵ੍ਹਾਯ ਪਰਿਮਜ੍ਜਤਿ, ਕਦਾਚਿ ਅਵਗਣ੍ਡਕਾਰਕਂ ਭੁਞ੍ਜਨ੍ਤੋ ਵਿਯ ਕਪੋਲਨ੍ਤਰੇ ਠਪੇਤਿ. ਵੇਗਂ ਪਨ ਵਾਰੇਤੁਂ ਨ ਸਕ੍ਕੋਤਿ. ਸਚੇ ਵਾਰੇਸ੍ਸਾਮੀਤਿ ਗਣ੍ਡਕਂ ਕਤ੍ਵਾ ਤਿਟ੍ਠੇਯ੍ਯ, ਮਤ੍ਥਕਂ ਤਸ੍ਸ ਭਿਨ੍ਦਿਤ੍ਵਾ ਨਿਕ੍ਖਮੇਯ੍ਯ, ਆਕਡ੍ਢਿਤ੍ਵਾ ਵਾ ਨਂ ਓਨਮੇਯ੍ਯ. ਤਸ੍ਮਾ ਵਿਮਾਨੇਨ ਸਹੇਵ ਗਚ੍ਛਤਿ. ਪਜਂ ਮਮਨ੍ਤਿ ਚਨ੍ਦਿਮਸੂਰਿਯਾ ਕਿਰ ਦ੍ਵੇਪਿ ਦੇਵਪੁਤ੍ਤਾ ਮਹਾਸਮਯਸੁਤ੍ਤਕਥਨਦਿਵਸੇ ਸੋਤਾਪਤ੍ਤਿਫਲਂ ਪਤ੍ਤਾ. ਤੇਨ ਭਗਵਾ ‘‘ਪਜਂ ਮਮ’’ਨ੍ਤਿ ਆਹ, ਪੁਤ੍ਤੋ ਮਮ ਏਸੋਤਿ ਅਤ੍ਥੋ. ਦਸਮਂ.
ਪਠਮੋ ਵਗ੍ਗੋ.
੨. ਅਨਾਥਪਿਣ੍ਡਿਕਵਗ੍ਗੋ
੧. ਚਨ੍ਦਿਮਸਸੁਤ੍ਤਵਣ੍ਣਨਾ
੯੨. ਦੁਤਿਯਵਗ੍ਗਸ੍ਸ ਪਠਮੇ ਕਚ੍ਛੇਵਾਤਿ ਕਚ੍ਛੇ ਵਿਯ. ਕਚ੍ਛੇਤਿ ਪਬ੍ਬਤਕਚ੍ਛੇਪਿ ਨਦੀਕਚ੍ਛੇਪਿ. ਏਕੋਦਿ ਨਿਪਕਾਤਿ ਏਕਗ੍ਗਚਿਤ੍ਤਾ ਚੇਵ ਪਞ੍ਞਾਨੇਪਕ੍ਕੇਨ ਚ ਸਮਨ੍ਨਾਗਤਾ. ਸਤਾਤਿ ਸਤਿਮਨ੍ਤੋ. ਇਦਂ ਵੁਤ੍ਤਂ ਹੋਤਿ – ਯੇ ਝਾਨਾਨਿ ਲਭਿਤ੍ਵਾ ਏਕੋਦੀ ਨਿਪਕਾ ਸਤਾ ਵਿਹਰਨ੍ਤਿ, ਤੇ ਅਮਕਸੇ ਪਬ੍ਬਤਕਚ੍ਛੇ ਵਾ ਨਦੀਕਚ੍ਛੇ ਵਾ ਮਗਾ ਵਿਯ ਸੋਤ੍ਥਿਂ ਗਮਿਸ੍ਸਨ੍ਤੀਤਿ. ਪਾਰਨ੍ਤਿ ਨਿਬ੍ਬਾਨਂ. ਅਮ੍ਬੁਜੋਤਿ ਮਚ੍ਛੋ. ਰਣਞ੍ਜਹਾਤਿ ਕਿਲੇਸਞ੍ਜਹਾ. ਯੇਪਿ ਝਾਨਾਨਿ ਲਭਿਤ੍ਵਾ ਅਪ੍ਪਮਤ੍ਤਾ ਕਿਲੇਸੇ ਜਹਨ੍ਤਿ, ਤੇ ਸੁਤ੍ਤਜਾਲਂ ਭਿਨ੍ਦਿਤ੍ਵਾ ਮਚ੍ਛਾ ਵਿਯ ਨਿਬ੍ਬਾਨਂ ਗਮਿਸ੍ਸਨ੍ਤੀਤਿ ਵੁਤ੍ਤਂ ਹੋਤਿ. ਪਠਮਂ.
੨. ਵੇਣ੍ਡੁਸੁਤ੍ਤਵਣ੍ਣਨਾ
੯੩. ਦੁਤਿਯੇ ਵੇਣ੍ਡੂਤਿ ਤਸ੍ਸ ਦੇਵਪੁਤ੍ਤਸ੍ਸ ਨਾਮਂ. ਪਯਿਰੁਪਾਸਿਯਾਤਿ ਪਰਿਰੁਪਾਸਿਤ੍ਵਾ. ਅਨੁਸਿਕ੍ਖਰੇਤਿ ਸਿਕ੍ਖਨ੍ਤਿ. ਸਿਟ੍ਠਿਪਦੇਤਿ ਅਨੁਸਿਟ੍ਠਿਪਦੇ. ਕਾਲੇ ਤੇ ਅਪ੍ਪਮਜ੍ਜਨ੍ਤਾਤਿ ਕਾਲੇ ਤੇ ਅਪ੍ਪਮਾਦਂ ਕਰੋਨ੍ਤਾ. ਦੁਤਿਯਂ.
੩. ਦੀਘਲਟ੍ਠਿਸੁਤ੍ਤਵਣ੍ਣਨਾ
੯੪. ਤਤਿਯੇ ਦੀਘਲਟ੍ਠੀਤਿ ਦੇਵਲੋਕੇ ਸਬ੍ਬੇ ਸਮਪ੍ਪਮਾਣਾ ਤਿਗਾਵੁਤਿਕਾਵ ਹੋਨ੍ਤਿ, ਮਨੁਸ੍ਸਲੋਕੇ ਪਨਸ੍ਸ ਦੀਘਤ੍ਤਭਾਵਤਾਯ ਏਵਂਨਾਮਂ ਅਹੋਸਿ. ਸੋ ਪੁਞ੍ਞਾਨਿ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋਪਿ ਤਥੇਵ ਪਞ੍ਞਾਯਿ. ਤਤਿਯਂ.
੪. ਨਨ੍ਦਨਸੁਤ੍ਤਵਣ੍ਣਨਾ
੯੫. ਚਤੁਤ੍ਥੇ ਗੋਤਮਾਤਿ ਭਗਵਨ੍ਤਂ ਗੋਤ੍ਤੇਨ ਆਲਪਤਿ. ਅਨਾਵਟਨ੍ਤਿ ਤਥਾਗਤਸ੍ਸ ਹਿ ਸਬ੍ਬਞ੍ਞੁਤਞ੍ਞਾਣਂ ਪੇਸੇਨ੍ਤਸ੍ਸ ਰੁਕ੍ਖੋ ਵਾ ਪਬ੍ਬਤੋ ਵਾ ਆਵਰਿਤੁਂ ਸਮਤ੍ਥੋ ਨਾਮ ਨਤ੍ਥਿ. ਤੇਨਾਹ ‘‘ਅਨਾਵਟ’’ਨ੍ਤਿ. ਇਤਿ ਤਥਾਗਤਂ ਥੋਮੇਤ੍ਵਾ ਦੇਵਲੋਕੇ ਅਭਿਸਙ੍ਖਤਪਞ੍ਹਂ ਪੁਚ੍ਛਨ੍ਤੋ ਕਥਂਵਿਧਨ੍ਤਿਆਦਿਮਾਹ. ਤਤ੍ਥ ਦੁਕ੍ਖਮਤਿਚ੍ਚ ਇਰਿਯਤੀਤਿ ਦੁਕ੍ਖਂ ਅਤਿਕ੍ਕਮਿਤ੍ਵਾ ਵਿਹਰਤਿ. ਸੀਲਵਾਤਿ ਲੋਕਿਯਲੋਕੁਤ੍ਤਰੇਨ ਸੀਲੇਨ ਸਮਨ੍ਨਾਗਤੋ ਖੀਣਾਸਵੋ. ਪਞ੍ਞਾਦਯੋਪਿ ਮਿਸ੍ਸਕਾਯੇਵ ਵੇਦਿਤਬ੍ਬਾ. ਪੂਜਯਨ੍ਤੀਤਿ ਗਨ੍ਧਪੁਪ੍ਫਾਦੀਹਿ ਪੂਜੇਨ੍ਤਿ. ਚਤੁਤ੍ਥਂ.
੫-੬. ਚਨ੍ਦਨਸੁਤ੍ਤਾਦਿਵਣ੍ਣਨਾ
੯੬. ਪਞ੍ਚਮੇ ਅਪ੍ਪਤਿਟ੍ਠੇ ਅਨਾਲਮ੍ਬੇਤਿ ਹੇਟ੍ਠਾ ਅਪਤਿਟ੍ਠੇ ਉਪਰਿ ਅਨਾਲਮ੍ਬਨੇ. ਸੁਸਮਾਹਿਤੋਤਿ ਅਪ੍ਪਨਾਯਪਿ ਉਪਚਾਰੇਨਪਿ ਸੁਟ੍ਠੁ ਸਮਾਹਿਤੋ. ਪਹਿਤਤ੍ਤੋਤਿ ਪੇਸਿਤਤ੍ਤੋ. ਨਨ੍ਦੀਰਾਗਪਰਿਕ੍ਖੀਣੋਤਿ ਪਰਿਕ੍ਖੀਣਨਨ੍ਦੀਰਾਗੋ. ਨਨ੍ਦੀਰਾਗੋ ਨਾਮ ਤਯੋ ਕਮ੍ਮਾਭਿਸਙ੍ਖਾਰਾ. ਇਤਿ ਇਮਾਯ ਗਾਥਾਯ ਕਾਮਸਞ੍ਞਾਗਹਣੇਨ ਪਞ੍ਚੋਰਮ੍ਭਾਗਿਯਸਂਯੋਜਨਾਨਿ, ਰੂਪਸਂਯੋਜਨਗਹਣੇਨ ਪਞ੍ਚ ਉਦ੍ਧਮ੍ਭਾਗਿਯਸਂਯੋਜਨਾਨਿ, ਨਨ੍ਦੀਰਾਗੇਨ ਤਯੋ ਕਮ੍ਮਾਭਿਸਙ੍ਖਾਰਾ ਗਹਿਤਾ. ਏਵਂ ਯਸ੍ਸ ਦਸ ਸਂਯੋਜਨਾਨਿ ਤਯੋ ਚ ਕਮ੍ਮਾਭਿਸਙ੍ਖਾਰਾ ਪਹੀਨਾ, ਸੋ ਗਮ੍ਭੀਰੇ ਮਹੋਘੇ ਨ ਸੀਦਤੀਤਿ. ਕਾਮਸਞ੍ਞਾਯ ਵਾ ਕਾਮਭਵੋ, ਰੂਪਸਂਯੋਜਨੇਨ ਰੂਪਭਵੋ ਗਹਿਤੋ, ਤੇਸਂ ਗਹਣੇਨ ਅਰੂਪਭਵੋ ਗਹਿਤੋਵ, ਨਨ੍ਦੀਰਾਗੇਨ ਤਯੋ ਕਮ੍ਮਾਭਿਸਙ੍ਖਾਰਾ ਗਹਿਤਾਤਿ ਏਵਂ ਯਸ੍ਸ ਤੀਸੁ ਭਵੇਸੁ ਤਯੋ ਸਙ੍ਖਾਰਾ ਨਤ੍ਥਿ, ਸੋ ਗਮ੍ਭੀਰੇ ਨ ਸੀਦਤੀਤਿਪਿ ਦਸ੍ਸੇਤਿ. ਪਞ੍ਚਮਂ.
੯੭. ਛਟ੍ਠਂ ਵੁਤ੍ਤਤ੍ਥਮੇਵ. ਛਟ੍ਠਂ.
੭. ਸੁਬ੍ਰਹ੍ਮਸੁਤ੍ਤਵਣ੍ਣਨਾ
੯੮. ਸਤ੍ਤਮੇ ਸੁਬ੍ਰਹ੍ਮਾਤਿ ਸੋ ਕਿਰ ਦੇਵਪੁਤ੍ਤੋ ਅਚ੍ਛਰਾਸਙ੍ਘਪਰਿਵੁਤੋ ਨਨ੍ਦਨਕੀਲ਼ਿਕਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਮੂਲੇ ਪਞ੍ਞਤ੍ਤਾਸਨੇ ਨਿਸੀਦਿ. ਤਂ ਪਞ੍ਚਸਤਾ ਦੇਵਧੀਤਰੋ ਪਰਿਵਾਰੇਤ੍ਵਾ ਨਿਸਿਨ੍ਨਾ, ਪਞ੍ਚਸਤਾ ਰੁਕ੍ਖਂ ਅਭਿਰੁਲ਼੍ਹਾ. ਨਨੁ ਚ ਦੇਵਤਾਨਂ ਚਿਤ੍ਤਵਸੇਨ ਯੋਜਨਸਤਿਕੋਪਿ ਰੁਕ੍ਖੋ ਓਨਮਿਤ੍ਵਾ ਹਤ੍ਥਂ ਆਗਚ੍ਛਤਿ, ਕਸ੍ਮਾ ਤਾ ਅਭਿਰੁਲ਼੍ਹਾਤਿ. ਖਿਡ੍ਡਾਪਸੁਤਤਾਯ. ਅਭਿਰੁਯ੍ਹ ਪਨ ਮਧੁਰਸ੍ਸਰੇਨ ਗਾਯਿਤ੍ਵਾ ਗਾਯਿਤ੍ਵਾ ਪੁਪ੍ਫਾਨਿ ਪਾਤੇਨ੍ਤਿ, ਤਾਨਿ ਗਹੇਤ੍ਵਾ ਇਤਰਾ ਏਕਤੋਵਣ੍ਟਿਕਮਾਲਾਦਿਵਸੇਨ ਗਨ੍ਥੇਨ੍ਤਿ. ਅਥ ਰੁਕ੍ਖਂ ਅਭਿਰੁਲ਼੍ਹਾ ਉਪਚ੍ਛੇਦਕਕਮ੍ਮਵਸੇਨ ਏਕਪ੍ਪਹਾਰੇਨੇਵ ਕਾਲਂ ਕਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤਾ ਮਹਾਦੁਕ੍ਖਂ ਅਨੁਭਵਨ੍ਤਿ.
ਅਥ ਕਾਲੇ ਗਚ੍ਛਨ੍ਤੇ ਦੇਵਪੁਤ੍ਤੋ ‘‘ਇਮਾਸਂ ਨੇਵ ਸਦ੍ਦੋ ਸੁਯ੍ਯਤਿ, ਨ ਪੁਪ੍ਫਾਨਿ ਪਾਤੇਨ੍ਤਿ. ਕਹਂ ਨੁ ਖੋ ਗਤਾ’’ਤਿ? ਆਵਜ੍ਜੇਨ੍ਤੋ ਨਿਰਯੇ ਨਿਬ੍ਬਤ੍ਤਭਾਵਂ ਦਿਸ੍ਵਾ ਪਿਯਵਤ੍ਥੁਕਸੋਕੇਨ ਰੁਪ੍ਪਮਾਨੋ ਚਿਨ੍ਤੇਸਿ – ‘‘ਏਤਾ ਤਾਵ ਯਥਾਕਮ੍ਮੇਨ ਗਤਾ, ਮਯ੍ਹਂ ਆਯੁਸਙ੍ਖਾਰੋ ਕਿਤ੍ਤਕੋ’’ਤਿ. ਸੋ – ‘‘ਸਤ੍ਤਮੇ ਦਿਵਸੇ ਮਯਾਪਿ ਅਵਸੇਸਾਹਿ ਪਞ੍ਚਸਤਾਹਿ ਸਦ੍ਧਿਂ ਕਾਲਂ ਕਤ੍ਵਾ ਤਤ੍ਥੇਵ ਨਿਬ੍ਬਤ੍ਤਿਤਬ੍ਬ’’ਨ੍ਤਿ ਦਿਸ੍ਵਾ ਬਲਵਤਰੇਨ ਸੋਕੇਨ ਰੁਪ੍ਪਿ. ਸੋ – ‘‘ਇਮਂ ਮਯ੍ਹਂ ਸੋਕਂ ਸਦੇਵਕੇ ਲੋਕੇ ਅਞ੍ਞਤ੍ਰ ਤਥਾਗਤਾ ਨਿਦ੍ਧਮਿਤੁਂ ਸਮਤ੍ਥੋ ਨਾਮ ਨਤ੍ਥੀ’’ਤਿ ਚਿਨ੍ਤੇਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਨਿਚ੍ਚਂ ਉਤ੍ਰਸ੍ਤਨ੍ਤਿ ਗਾਥਮਾਹ.
ਤਤ੍ਥ ਇਦਨ੍ਤਿ ਅਤ੍ਤਨੋ ਚਿਤ੍ਤਂ ਦਸ੍ਸੇਤਿ. ਦੁਤਿਯਪਦਂ ਪੁਰਿਮਸ੍ਸੇਵ ਵੇਵਚਨਂ. ਨਿਚ੍ਚਨ੍ਤਿ ਚ ਪਦਸ੍ਸ ਦੇਵਲੋਕੇ ਨਿਬ੍ਬਤ੍ਤਕਾਲਤੋ ਪਟ੍ਠਾਯਾਤਿ ਅਤ੍ਥੋ ਨ ਗਹੇਤਬ੍ਬੋ, ਸੋਕੁਪ੍ਪਤ੍ਤਿਕਾਲਤੋ ਪਨ ਪਟ੍ਠਾਯ ਨਿਚ੍ਚਨ੍ਤਿ ਵੇਦਿਤਬ੍ਬਂ. ਅਨੁਪ੍ਪਨ੍ਨੇਸੁ ਕਿਚ੍ਛੇਸੂਤਿ ਇਤੋ ਸਤ੍ਤਾਹਚ੍ਚਯੇਨ ਯਾਨਿ ਦੁਕ੍ਖਾਨਿ ਉਪ੍ਪਜ੍ਜਿਸ੍ਸਨ੍ਤਿ, ਤੇਸੁ. ਅਥੋ ਉਪ੍ਪਤਿਤੇਸੁ ਚਾਤਿ ਯਾਨਿ ਪਞ੍ਚਸਤਾਨਂ ਅਚ੍ਛਰਾਨਂ ਨਿਰਯੇ ਨਿਬ੍ਬਤ੍ਤਾਨਂ ਦਿਟ੍ਠਾਨਿ, ਤੇਸੁ ਚਾਤਿ ਏਵਂ ਇਮੇਸੁ ਉਪ੍ਪਨ੍ਨਾਨੁਪ੍ਪਨ੍ਨੇਸੁ ਦੁਕ੍ਖੇਸੁ ਨਿਚ੍ਚਂ ਮਮ ਉਤ੍ਰਸ੍ਤਂ ਚਿਤ੍ਤਂ, ਅਬ੍ਭਨ੍ਤਰੇ ਡਯ੍ਹਮਾਨੋ ਵਿਯ ਹੋਮਿ ਭਗਵਾਤਿ ਦਸ੍ਸੇਤਿ.
ਨਾਞ੍ਞਤ੍ਰ ਬੋਜ੍ਝਾ ਤਪਸਾਤਿ ਬੋਜ੍ਝਙ੍ਗਭਾਵਨਞ੍ਚ ਤਪੋਗੁਣਞ੍ਚ ਅਞ੍ਞਤ੍ਰ ਮੁਞ੍ਚਿਤ੍ਵਾ ਸੋਤ੍ਥਿਂ ਨ ਪਸ੍ਸਾਮੀਤਿ ਅਤ੍ਥੋ. ਸਬ੍ਬਨਿਸ੍ਸਗ੍ਗਾਤਿ ਨਿਬ੍ਬਾਨਤੋ. ਏਤ੍ਥ ਕਿਞ੍ਚਾਪਿ ਬੋਜ੍ਝਙ੍ਗਭਾਵਨਾ ਪਠਮਂ ਗਹਿਤਾ, ਇਨ੍ਦ੍ਰਿਯਸਂਵਰੋ ਪਚ੍ਛਾ, ਅਤ੍ਥਤੋ ਪਨ ਇਨ੍ਦ੍ਰਿਯਸਂਵਰੋਵ ਪਠਮਂ ਵੇਦਿਤਬ੍ਬੋ. ਇਨ੍ਦਿਯਸਂਵਰੇ ਹਿ ਗਹਿਤੇ ਚਤੁਪਾਰਿਸੁਦ੍ਧਿਸੀਲਂ ਗਹਿਤਂ ਹੋਤਿ. ਤਸ੍ਮਿਂ ਪਤਿਟ੍ਠਿਤੋ ਭਿਕ੍ਖੁ ਨਿਸ੍ਸਯਮੁਤ੍ਤਕੋ ਧੁਤਙ੍ਗਸਙ੍ਖਾਤਂ ਤਪੋਗੁਣਂ ਸਮਾਦਾਯ ਅਰਞ੍ਞਂ ਪਵਿਸਿਤ੍ਵਾ ਕਮ੍ਮਟ੍ਠਾਨਂ ਭਾਵੇਨ੍ਤੋ ਸਹ ਵਿਪਸ੍ਸਨਾਯ ਬੋਜ੍ਝਙ੍ਗੇ ਭਾਵੇਤਿ. ਤਸ੍ਸ ਅਰਿਯਮਗ੍ਗੋ ਯਂ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਉਪ੍ਪਜ੍ਜਤਿ, ਸੋ ‘‘ਸਬ੍ਬਨਿਸ੍ਸਗ੍ਗੋ’’ਤਿ ਭਗਵਾ ਚਤੁਸਚ੍ਚਵਸੇਨ ਦੇਸਨਂ ਵਿਨਿਵਤ੍ਤੇਸਿ. ਦੇਵਪੁਤ੍ਤੋ ਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹੀਤਿ. ਸਤ੍ਤਮਂ.
੮-੧੦. ਕਕੁਧਸੁਤ੍ਤਾਦਿਵਣ੍ਣਨਾ
੯੯. ਅਟ੍ਠਮੇ ਕਕੁਧੋ ਦੇਵਪੁਤ੍ਤੋਤਿ ਅਯਂ ਕਿਰ ਕੋਲਨਗਰੇ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਉਪਟ੍ਠਾਕਪੁਤ੍ਤੋ ਦਹਰਕਾਲੇਯੇਵ ਥੇਰਸ੍ਸ ਸਨ੍ਤਿਕੇ ਵਸਨ੍ਤੋ ਝਾਨਂ ਨਿਬ੍ਬਤ੍ਤੇਤ੍ਵਾ ਕਾਲਙ੍ਕਤੋ, ਬ੍ਰਹ੍ਮਲੋਕੇ ਉਪ੍ਪਜ੍ਜਿ. ਤਤ੍ਰਾਪਿ ਨਂ ਕਕੁਧੋ ਬ੍ਰਹ੍ਮਾਤ੍ਵੇਵ ਸਞ੍ਜਾਨਨ੍ਤਿ. ਨਨ੍ਦਸੀਤਿ ਤੁਸ੍ਸਸਿ. ਕਿਂ ਲਦ੍ਧਾਤਿ ਤੁਟ੍ਠਿ ਨਾਮ ਕਿਞ੍ਚਿ ਮਨਾਪਂ ਲਭਿਤ੍ਵਾ ਹੋਤਿ, ਤਸ੍ਮਾ ਏਵਮਾਹ. ਕਿਂ ਜੀਯਿਤ੍ਥਾਤਿ ਯਸ੍ਸ ਹਿ ਕਿਞ੍ਚਿ ਮਨਾਪਂ ਚੀਵਰਾਦਿਵਤ੍ਥੁ ਜਿਣ੍ਣਂ ਹੋਤਿ, ਸੋ ਸੋਚਤਿ, ਤਸ੍ਮਾ ਏਵਮਾਹ. ਅਰਤੀ ਨਾਭਿਕੀਰਤੀਤਿ ਉਕ੍ਕਣ੍ਠਿਤਾ ਨਾਭਿਭਵਤਿ. ਅਘਜਾਤਸ੍ਸਾਤਿ ਦੁਕ੍ਖਜਾਤਸ੍ਸ, ਵਟ੍ਟਦੁਕ੍ਖੇ ਠਿਤਸ੍ਸਾਤਿ ਅਤ੍ਥੋ. ਨਨ੍ਦੀਜਾਤਸ੍ਸਾਤਿ ਜਾਤਤਣ੍ਹਸ੍ਸ. ਅਘਨ੍ਤਿ ਏਵਰੂਪਸ੍ਸ ਹਿ ਵਟ੍ਟਦੁਕ੍ਖਂ ਆਗਤਮੇਵ ਹੋਤਿ. ‘‘ਦੁਕ੍ਖੀ ਸੁਖਂ ਪਤ੍ਥਯਤੀ’’ਤਿ ਹਿ ਵੁਤ੍ਤਂ. ਇਤਿ ਅਘਜਾਤਸ੍ਸ ਨਨ੍ਦੀ ਹੋਤਿ, ਸੁਖਵਿਪਰਿਣਾਮੇਨ ਦੁਕ੍ਖਂ ਆਗਤਮੇਵਾਤਿ ਨਨ੍ਦੀਜਾਤਸ੍ਸ ਅਘਂ ਹੋਤਿ. ਅਟ੍ਠਮਂ.
੧੦੦. ਨਵਮਂ ਵੁਤ੍ਤਤ੍ਥਮੇਵ. ਨਵਮਂ.
੧੦੧. ਦਸਮੇ ਆਨਨ੍ਦਤ੍ਥੇਰਸ੍ਸ ਅਨੁਮਾਨਬੁਦ੍ਧਿਯਾ ਆਨੁਭਾਵਪ੍ਪਕਾਸਨਤ੍ਥਂ ਅਞ੍ਞਤਰੋਤਿ ਆਹ. ਦਸਮਂ.
ਦੁਤਿਯੋ ਵਗ੍ਗੋ.
੩. ਨਾਨਾਤਿਤ੍ਥਿਯਵਗ੍ਗੋ
੧-੨. ਸਿਵਸੁਤ੍ਤਾਦਿਵਣ੍ਣਨਾ
੧੦੨. ਤਤਿਯਵਗ੍ਗਸ੍ਸ ਪਠਮਂ ਵੁਤ੍ਤਤ੍ਥਮੇਵ. ਪਠਮਂ.
੧੦੩. ਦੁਤਿਯੇ ਪਟਿਕਚ੍ਚੇਵਾਤਿ ਪਠਮਂਯੇਵ. ਅਕ੍ਖਚ੍ਛਿਨ੍ਨੋਵਝਾਯਤੀਤਿ ਅਕ੍ਖਚ੍ਛਿਨ੍ਨੋ ਅਵਝਾਯਤਿ, ਬਲਵਚਿਨ੍ਤਨਂ ਚਿਨ੍ਤੇਤਿ. ਦੁਤਿਯਗਾਥਾਯ ਅਕ੍ਖਚ੍ਛਿਨ੍ਨੋਵਾਤਿ ਅਕ੍ਖਚ੍ਛਿਨ੍ਨੋ ਵਿਯ. ਦੁਤਿਯਂ.
੩-੪. ਸੇਰੀਸੁਤ੍ਤਾਦਿਵਣ੍ਣਨਾ
੧੦੪. ਤਤਿਯੇ ਦਾਯਕੋਤਿ ਦਾਨਸੀਲੋ. ਦਾਨਪਤੀਤਿ ਯਂ ਦਾਨਂ ਦੇਮਿ, ਤਸ੍ਸ ਪਤਿ ਹੁਤ੍ਵਾ ਦੇਮਿ, ਨ ਦਾਸੋ ਨ ਸਹਾਯੋ. ਯੋ ਹਿ ਅਤ੍ਤਨਾ ਮਧੁਰਂ ਭੁਞ੍ਜਤਿ, ਪਰੇਸਂ ਅਮਧੁਰਂ ਦੇਤਿ, ਸੋ ਦਾਨਸਙ੍ਖਾਤਸ੍ਸ ਦੇਯ੍ਯਧਮ੍ਮਸ੍ਸ ਦਾਸੋ ਹੁਤ੍ਵਾ ਦੇਤਿ. ਯੋ ਯਂ ਅਤ੍ਤਨਾ ਭੁਞ੍ਜਤਿ, ਤਦੇਵ ਦੇਤਿ, ਸੋ ਸਹਾਯੋ ਹੁਤ੍ਵਾ ਦੇਤਿ. ਯੋ ਪਨ ਅਤ੍ਤਨਾ ਯੇਨ ਤੇਨ ਯਾਪੇਤਿ, ਪਰੇਸਂ ਮਧੁਰਂ ਦੇਤਿ, ਸੋ ਪਤਿ ਜੇਟ੍ਠਕੋ ਸਾਮਿ ਹੁਤ੍ਵਾ ਦੇਤਿ. ਅਹਂ ‘‘ਤਾਦਿਸੋ ਅਹੋਸਿ’’ਨ੍ਤਿ ਵਦਤਿ.
ਚਤੂਸੁ ਦ੍ਵਾਰੇਸੁਤਿ ਤਸ੍ਸ ਕਿਰ ਰਞ੍ਞੋ ਸਿਨ੍ਧਵਰਟ੍ਠਂ ਸੋਧਿਵਾਕਰਟ੍ਠਨ੍ਤਿ ਦ੍ਵੇ ਰਟ੍ਠਾਨਿ ਅਹੇਸੁਂ, ਨਗਰਂ ਰੋਰੁਵਂ ਨਾਮ. ਤਸ੍ਸ ਏਕੇਕਸ੍ਮਿਂ ਦ੍ਵਾਰੇ ਦੇਵਸਿਕਂ ਸਤਸਹਸ੍ਸਂ ਉਪ੍ਪਜ੍ਜਤਿ, ਅਨ੍ਤੋਨਗਰੇ ਵਿਨਿਚ੍ਛਯਟ੍ਠਾਨੇ ਸਤਸਹਸ੍ਸਂ. ਸੋ ਬਹੁਹਿਰਞ੍ਞਸੁਵਣ੍ਣਂ ਰਾਸਿਭੂਤਂ ਦਿਸ੍ਵਾ ਕਮ੍ਮਸ੍ਸਕਤਞਾਣਂ ਉਪ੍ਪਾਦੇਤ੍ਵਾ ਚਤੂਸੁ ਦ੍ਵਾਰੇਸੁ ਦਾਨਸਾਲਾਯੋ ਕਾਰੇਤ੍ਵਾ ਤਸ੍ਮਿਂ ਤਸ੍ਮਿਂ ਦ੍ਵਾਰੇ ਉਟ੍ਠਿਤਆਯੇਨ ਦਾਨਂ ਦੇਥਾਤਿ ਅਮਚ੍ਚੇ ਠਪੇਸਿ. ਤੇਨਾਹ – ‘‘ਚਤੂਸੁ ਦ੍ਵਾਰੇਸੁ ਦਾਨਂ ਦੀਯਿਤ੍ਥਾ’’ਤਿ.
ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਨ੍ਤਿ ਏਤ੍ਥ ਸਮਣਾਤਿ ਪਬ੍ਬਜ੍ਜੂਪਗਤਾ. ਬ੍ਰਾਹ੍ਮਣਾਤਿ ਭੋਵਾਦਿਨੋ. ਸਮਿਤਪਾਪਬਾਹਿਤਪਾਪੇ ਪਨ ਸਮਣਬ੍ਰਾਹ੍ਮਣੇ ਏਸ ਨਾਲਤ੍ਥ. ਕਪਣਾਤਿ ਦੁਗ੍ਗਤਾ ਦਲਿਦ੍ਦਮਨੁਸ੍ਸਾ ਕਾਣਕੁਣਿਆਦਯੋ. ਅਦ੍ਧਿਕਾਤਿ ਪਥਾਵਿਨੋ. ਵਨਿਬ੍ਬਕਾਤਿ ਯੇ ‘‘ਇਟ੍ਠਂ, ਦਿਨ੍ਨਂ, ਕਨ੍ਤਂ, ਮਨਾਪਂ, ਕਾਲੇਨ, ਅਨਵਜ੍ਜਂ ਦਿਨ੍ਨਂ, ਦਦਂ ਚਿਤ੍ਤਂ ਪਸਾਦੇਯ੍ਯ, ਗਚ੍ਛਤੁ ਭਵਂ ਬ੍ਰਹ੍ਮਲੋਕ’’ਨ੍ਤਿਆਦਿਨਾ ਨਯੇਨ ਦਾਨਸ੍ਸ ਵਣ੍ਣਂ ਥੋਮਯਮਾਨਾ ਵਿਚਰਨ੍ਤਿ. ਯਾਚਕਾਤਿ ਯੇ ‘‘ਪਸਤਮਤ੍ਤਂ ਦੇਥ, ਸਰਾਵਮਤ੍ਤਂ ਦੇਥਾ’’ਤਿਆਦੀਨਿ ਚ ਵਤ੍ਵਾ ਯਾਚਮਾਨਾ ਵਿਚਰਨ੍ਤਿ. ਇਤ੍ਥਾਗਾਰਸ੍ਸ ਦਾਨਂ ਦੀਯਿਤ੍ਥਾਤਿ ਪਠਮਦ੍ਵਾਰਸ੍ਸ ਲਦ੍ਧਤ੍ਤਾ ਤਤ੍ਥ ਉਪ੍ਪਜ੍ਜਨਕਸਤਸਹਸ੍ਸੇ ਅਞ੍ਞਮ੍ਪਿ ਧਨਂ ਪਕ੍ਖਿਪਿਤ੍ਵਾ ਰਞ੍ਞੋ ਅਮਚ੍ਚੇ ਹਾਰੇਤ੍ਵਾ ਅਤ੍ਤਨੋ ਅਮਚ੍ਚੇ ਠਪੇਤ੍ਵਾ ਰਞ੍ਞਾ ਦਿਨ੍ਨਦਾਨਤੋ ਰਾਜਿਤ੍ਥਿਯੋ ਮਹਨ੍ਤਤਰਂ ਦਾਨਂ ਅਦਂਸੁ. ਤਂ ਸਨ੍ਧਾਯੇਵਮਾਹ. ਮਮ ਦਾਨਂ ਪਟਿਕ੍ਕਮੀਤਿ ਯਂ ਮਮ ਦਾਨਂ ਤਤ੍ਥ ਦੀਯਿਤ੍ਥ, ਤਂ ਪਟਿਨਿਵਤ੍ਤਿ. ਸੇਸਦ੍ਵਾਰੇਸੁਪਿ ਏਸੇਵ ਨਯੋ. ਕੋਚੀਤਿ ਕਤ੍ਥਚਿ. ਦੀਘਰਤ੍ਤਨ੍ਤਿ ਅਸੀਤਿਵਸ੍ਸਸਹਸ੍ਸਾਨਿ. ਏਤ੍ਤਕਂ ਕਿਰ ਕਾਲਂ ਤਸ੍ਸ ਰਞ੍ਞੋ ਦਾਨਂ ਦੀਯਿਤ੍ਥ. ਤਤਿਯਂ.
੧੦੫. ਚਤੁਤ੍ਥਂ ਵੁਤ੍ਤਤ੍ਥਮੇਵ. ਚਤੁਤ੍ਥਂ.
੫. ਜਨ੍ਤੁਸੁਤ੍ਤਵਣ੍ਣਨਾ
੧੦੬. ਪਞ੍ਚਮੇ ਕੋਸਲੇਸੁ ਵਿਹਰਨ੍ਤੀਤਿ ਭਗਵਤੋ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਤਤ੍ਥ ਗਨ੍ਤ੍ਵਾ ਵਿਹਰਨ੍ਤਿ. ਉਦ੍ਧਤਾਤਿ ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾਯ ਚ ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਯ ਚ ਅਨਵਜ੍ਜੇ ਸਾਵਜ੍ਜਸਞ੍ਞਿਤਾਯ ਚ ਸਾਵਜ੍ਜੇ ਅਨਵਜ੍ਜਸਞ੍ਞਿਤਾਯ ਚ ਉਦ੍ਧਚ੍ਚਪਕਤਿਕਾ ਹੁਤ੍ਵਾ. ਉਨ੍ਨਲ਼ਾਤਿ ਉਗ੍ਗਤਨਲ਼ਾ, ਉਟ੍ਠਿਤਤੁਚ੍ਛਮਾਨਾਤਿ ਵੁਤ੍ਤਂ ਹੋਤਿ. ਚਪਲਾਤਿ ਪਤ੍ਤਚੀਵਰਮਣ੍ਡਨਾਦਿਨਾ ਚਾਪਲ੍ਲੇਨ ਯੁਤ੍ਤਾ. ਮੁਖਰਾਤਿ ਮੁਖਖਰਾ, ਖਰਵਚਨਾਤਿ ਵੁਤ੍ਤਂ ਹੋਤਿ. ਵਿਕਿਣ੍ਣਵਾਚਾਤਿ ਅਸਂਯਤਵਚਨਾ, ਦਿਵਸਮ੍ਪਿ ਨਿਰਤ੍ਥਕਵਚਨਪਲਾਪਿਨੋ. ਮੁਟ੍ਠਸ੍ਸਤਿਨੋਤਿ ਨਟ੍ਠਸ੍ਸਤਿਨੋ ਸਤਿਵਿਰਹਿਤਾ, ਇਧ ਕਤਂ ਏਤ੍ਥ ਪਮੁਸ੍ਸਨ੍ਤਿ. ਅਸਮ੍ਪਜਾਨਾਤਿ ਨਿਪ੍ਪਞ੍ਞਾ. ਅਸਮਾਹਿਤਾਤਿ ਅਪ੍ਪਨਾਉਪਚਾਰਸਮਾਧਿਰਹਿਤਾ, ਚਣ੍ਡਸੋਤੇ ਬਦ੍ਧਨਾਵਾਸਦਿਸਾ. ਵਿਬ੍ਭਨ੍ਤਚਿਤ੍ਤਾਤਿ ਅਨਵਟ੍ਠਿਤਚਿਤ੍ਤਾ, ਪਨ੍ਥਾਰੁਲ਼੍ਹਬਾਲਮਿਗਸਦਿਸਾ. ਪਾਕਤਿਨ੍ਦ੍ਰਿਯਾਤਿ ਸਂਵਰਾਭਾਵੇਨ ਗਿਹਿਕਾਲੇ ਵਿਯ ਵਿਵਟਇਨ੍ਦ੍ਰਿਯਾ.
ਜਨ੍ਤੂਤਿ ਏਵਂਨਾਮਕੋ ਦੇਵਪੁਤ੍ਤੋ. ਤਦਹੁਪੋਸਥੇਤਿ ਤਸ੍ਮਿਂ ਅਹੁ ਉਪੋਸਥੇ, ਉਪੋਸਥਦਿਵਸੇਤਿ ਅਤ੍ਥੋ. ਪਨ੍ਨਰਸੇਤਿ ਚਾਤੁਦ੍ਦਸਿਕਾਦਿਪਟਿਕ੍ਖੇਪੋ. ਉਪਸਙ੍ਕਮੀਤਿ ਚੋਦਨਤ੍ਥਾਯ ਉਪਗਤੋ. ਸੋ ਕਿਰ ਚਿਨ੍ਤੇਸਿ – ‘‘ਇਮੇ ਭਿਕ੍ਖੂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਨਿਕ੍ਖਨ੍ਤਾ, ਇਦਾਨਿ ਪਮਤ੍ਤਾ ਵਿਹਰਨ੍ਤਿ, ਨ ਖੋ ਪਨੇਤੇ ਪਾਟਿਯੇਕ੍ਕਂ ਨਿਸਿਨ੍ਨਟ੍ਠਾਨੇ ਚੋਦਿਯਮਾਨਾ ਕਥਂ ਗਣ੍ਹਿਸ੍ਸਨ੍ਤਿ, ਸਮਾਗਮਨਕਾਲੇ ਚੋਦਿਸ੍ਸਾਮੀ’’ਤਿ ਉਪੋਸਥਦਿਵਸੇ ਤੇਸਂ ਸਨ੍ਨਿਪਤਿਤਭਾਵਂ ਞਤ੍ਵਾ ਉਪਸਙ੍ਕਮਿ. ਗਾਥਾਹਿ ਅਜ੍ਝਭਾਸੀਤਿ ਸਬ੍ਬੇਸਂ ਮਜ੍ਝੇ ਠਤ੍ਵਾ ਗਾਥਾ ਅਭਾਸਿ.
ਤਤ੍ਥ ਯਸ੍ਮਾ ਗੁਣਕਥਾਯ ਸਦ੍ਧਿਂ ਨਿਗ੍ਗੁਣਸ੍ਸ ਅਗੁਣੋ ਪਾਕਟੋ ਹੋਤਿ, ਤਸ੍ਮਾ ਗੁਣਂ ਤਾਵ ਕਥੇਨ੍ਤੋ ਸੁਖਜੀਵਿਨੋ ਪੁਰੇ ਆਸੁਨ੍ਤਿਆਦਿਮਾਹ. ਤਤ੍ਥ ਸੁਖਜੀਵਿਨੋ ਪੁਰੇ ਆਸੁਨ੍ਤਿ ਪੁਬ੍ਬੇ ਭਿਕ੍ਖੂ ਸੁਪ੍ਪੋਸਾ ਸੁਭਰਾ ਅਹੇਸੁਂ, ਉਚ੍ਚਨੀਚਕੁਲੇਸੁ ਸਪਦਾਨਂ ਚਰਿਤ੍ਵਾ ਲਦ੍ਧੇਨ ਮਿਸ੍ਸਕਪਿਣ੍ਡੇਨ ਯਾਪੇਸੁਨ੍ਤਿ ਅਧਿਪ੍ਪਾਯੇਨ ਏਵਮਾਹ. ਅਨਿਚ੍ਛਾਤਿ ਨਿਤ੍ਤਣ੍ਹਾ ਹੁਤ੍ਵਾ.
ਏਵਂ ਪੋਰਾਣਕਭਿਕ੍ਖੂਨਂ ਵਣ੍ਣਂ ਕਥੇਤ੍ਵਾ ਇਦਾਨਿ ਤੇਸਂ ਅਵਣ੍ਣਂ ਕਥੇਨ੍ਤੋ ਦੁਪ੍ਪੋਸਨ੍ਤਿਆਦਿਮਾਹ. ਤਤ੍ਥ ਗਾਮੇ ਗਾਮਣਿਕਾ ਵਿਯਾਤਿ ਯਥਾ ਗਾਮੇ ਗਾਮਕੁਟਾ ਨਾਨਪ੍ਪਕਾਰੇਨ ਜਨਂ ਪੀਲ਼ੇਤ੍ਵਾ ਖੀਰਦਧਿਤਣ੍ਡੁਲਾਦੀਨਿ ਆਹਰਾਪੇਤ੍ਵਾ ਭੁਞ੍ਜਨ੍ਤਿ, ਏਵਂ ਤੁਮ੍ਹੇਪਿ ਅਨੇਸਨਾਯ ਠਿਤਾ ਤੁਮ੍ਹਾਕਂ ਜੀਵਿਕਂ ਕਪ੍ਪੇਥਾਤਿ ਅਧਿਪ੍ਪਾਯੇਨ ਵਦਤਿ. ਨਿਪਜ੍ਜਨ੍ਤੀਤਿ ਉਦ੍ਦੇਸਪਰਿਪੁਚ੍ਛਾਮਨਸਿਕਾਰੇਹਿ ਅਨਤ੍ਥਿਕਾ ਹੁਤ੍ਵਾ ਸਯਨਮ੍ਹਿ ਹਤ੍ਥਪਾਦੇ ਵਿਸ੍ਸਜ੍ਜੇਤ੍ਵਾ ਨਿਪਜ੍ਜਨ੍ਤਿ. ਪਰਾਗਾਰੇਸੂਤਿ ਪਰਗੇਹੇਸੁ, ਕੁਲਸੁਣ੍ਹਾਦੀਸੂਤਿ ਅਤ੍ਥੋ. ਮੁਚ੍ਛਿਤਾਤਿ ਕਿਲੇਸਮੁਚ੍ਛਾਯ ਮੁਚ੍ਛਿਤਾ.
ਏਕਚ੍ਚੇਤਿ ਵਤ੍ਤਬ੍ਬਯੁਤ੍ਤਕੇਯੇਵ. ਅਪਵਿਦ੍ਧਾਤਿ ਛਡ੍ਡਿਤਕਾ. ਅਨਾਥਾਤਿ ਅਪਤਿਟ੍ਠਾ. ਪੇਤਾਤਿ ਸੁਸਾਨੇ ਛਡ੍ਡਿਤਾ ਕਾਲਙ੍ਕਤਮਨੁਸ੍ਸਾ. ਯਥਾ ਹਿ ਸੁਸਾਨੇ ਛਡ੍ਡਿਤਾ ਨਾਨਾਸਕੁਣਾਦੀਹਿ ਖਜ੍ਜਨ੍ਤਿ, ਞਾਤਕਾਪਿ ਨੇਸਂ ਨਾਥਕਿਚ੍ਚਂ ਨ ਕਰੋਨ੍ਤਿ, ਨ ਰਕ੍ਖਨ੍ਤਿ, ਨ ਗੋਪਯਨ੍ਤਿ, ਏਵਮੇਵਂ ਏਵਰੂਪਾਪਿ ਆਚਰਿਯੁਪਜ੍ਝਾਯਾਦੀਨਂ ਸਨ੍ਤਿਕਾ ਓਵਾਦਾਨੁਸਾਸਨਿਂ ਨ ਲਭਨ੍ਤੀਤਿ ਅਪਵਿਦ੍ਧਾ ਅਨਾਥਾ, ਯਥਾ ਪੇਤਾ, ਤਥੇਵ ਹੋਨ੍ਤਿ. ਪਞ੍ਚਮਂ.
੬. ਰੋਹਿਤਸ੍ਸਸੁਤ੍ਤਵਣ੍ਣਨਾ
੧੦੭. ਛਟ੍ਠੇ ਯਤ੍ਥਾਤਿ ਚਕ੍ਕਵਾਲ਼ਲੋਕਸ੍ਸ ਏਕੋਕਾਸੇ ਭੁਮ੍ਮਂ. ਨ ਚਵਤਿ ਨ ਉਪਪਜ੍ਜਤੀਤਿ ਇਦਂ ਅਪਰਾਪਰਂ ਚੁਤਿਪਟਿਸਨ੍ਧਿਵਸੇਨ ਗਹਿਤਂ. ਗਮਨੇਨਾਤਿ ਪਦਗਮਨੇਨ. ਨਾਹਂ ਤਂ ਲੋਕਸ੍ਸ ਅਨ੍ਤਨ੍ਤਿ ਸਤ੍ਥਾ ਸਙ੍ਖਾਰਲੋਕਸ੍ਸ ਅਨ੍ਤਂ ਸਨ੍ਧਾਯ ਵਦਤਿ. ਞਾਤੇਯ੍ਯਨ੍ਤਿਆਦੀਸੁ ਞਾਤਬ੍ਬਂ, ਦਟ੍ਠਬ੍ਬਂ, ਪਤ੍ਤਬ੍ਬਨ੍ਤਿ ਅਤ੍ਥੋ.
ਇਤਿ ਦੇਵਪੁਤ੍ਤੇਨ ਚਕ੍ਕਵਾਲ਼ਲੋਕਸ੍ਸ ਅਨ੍ਤੋ ਪੁਚ੍ਛਿਤੋ, ਸਤ੍ਥਾਰਾ ਸਙ੍ਖਾਰਲੋਕਸ੍ਸ ਕਥਿਤੋ. ਸੋ ਪਨ ਅਤ੍ਤਨੋ ਪਞ੍ਹੇਨ ਸਦ੍ਧਿਂ ਸਤ੍ਥੁ ਬ੍ਯਾਕਰਣਂ ਸਮੇਤੀਤਿ ਸਞ੍ਞਾਯ ਪਸਂਸਨ੍ਤੋ ਅਚ੍ਛਰਿਯਨ੍ਤਿਆਦਿਮਾਹ.
ਦਲ਼੍ਹਧਮ੍ਮੋਤਿ ਦਲ਼੍ਹਧਨੁ, ਉਤ੍ਤਮਪ੍ਪਮਾਣੇਨ ਧਨੁਨਾ ਸਮਨ੍ਨਾਗਤੋ. ਧਨੁਗ੍ਗਹੋਤਿ ਧਨੁਆਚਰਿਯੋ. ਸੁਸਿਕ੍ਖਿਤੋਤਿ ਦਸ ਦ੍ਵਾਦਸ ਵਸ੍ਸਾਨਿ ਧਨੁਸਿਪ੍ਪਂ ਸਿਕ੍ਖਿਤੋ. ਕਤਹਤ੍ਥੋਤਿ ਉਸਭਪ੍ਪਮਾਣੇਪਿ ਵਾਲਗ੍ਗਂ ਵਿਜ੍ਝਿਤੁਂ ਸਮਤ੍ਥਭਾਵੇਨ ਕਤਹਤ੍ਥੋ. ਕਤੂਪਾਸਨੋਤਿ ਕਤਸਰਕ੍ਖੇਪੋ ਦਸ੍ਸਿਤਸਿਪ੍ਪੋ. ਅਸਨੇਨਾਤਿ ਕਣ੍ਡੇਨ. ਅਤਿਪਾਤੇਯ੍ਯਾਤਿ ਅਤਿਕ੍ਕਮੇਯ੍ਯ. ਯਾਵਤਾ ਸੋ ਤਾਲਚ੍ਛਾਯਂ ਅਤਿਕ੍ਕਮੇਯ੍ਯ, ਤਾਵਤਾ ਕਾਲੇਨ ਏਕਚਕ੍ਕਵਾਲ਼ਂ ਅਤਿਕ੍ਕਮਾਮੀਤਿ ਅਤ੍ਤਨੋ ਜਵਸਮ੍ਪਤ੍ਤਿਂ ਦਸ੍ਸੇਤਿ.
ਪੁਰਤ੍ਥਿਮਾ ਸਮੁਦ੍ਦਾ ਪਚ੍ਛਿਮੋਤਿ ਯਥਾ ਪੁਰਤ੍ਥਿਮਸਮੁਦ੍ਦਾ ਪਚ੍ਛਿਮਸਮੁਦ੍ਦੋ ਦੂਰੇ, ਏਵਂ ਮੇ ਦੂਰੇ ਪਦਵੀਤਿਹਾਰੋ ਅਹੋਸੀਤਿ ਵਦਤਿ. ਸੋ ਕਿਰ ਪਾਚੀਨਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤੋ ਪਾਦਂ ਪਸਾਰੇਤ੍ਵਾ ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਯਂ ਅਕ੍ਕਮਤਿ, ਪੁਨ ਦੁਤਿਯਂ ਪਾਦਂ ਪਸਾਰੇਤ੍ਵਾ ਪਰਚਕ੍ਕਵਾਲ਼ਮੁਖਵਟ੍ਟਿਯਂ ਅਕ੍ਕਮਤਿ. ਇਚ੍ਛਾਗਤਨ੍ਤਿ ਇਚ੍ਛਾ ਏਵ. ਅਞ੍ਞਤ੍ਰੇਵਾਤਿ ਨਿਪ੍ਪਪਞ੍ਚਤਂ ਦਸ੍ਸੇਤਿ. ਭਿਕ੍ਖਾਚਾਰਕਾਲੇ ਕਿਰੇਸ ਨਾਗਲਤਾਦਨ੍ਤਕਟ੍ਠਂ ਖਾਦਿਤ੍ਵਾ ਅਨੋਤਤ੍ਤੇ ਮੁਖਂ ਧੋਵਿਤ੍ਵਾ ਕਾਲੇ ਸਮ੍ਪਤ੍ਤੇ ਉਤ੍ਤਰਕੁਰੁਮ੍ਹਿ ਪਿਣ੍ਡਾਯ ਚਰਿਤ੍ਵਾ ਚਕ੍ਕਵਾਲ਼ਮੁਖਵਟ੍ਟਿਯਂ ਨਿਸਿਨ੍ਨੋ ਭਤ੍ਤਕਿਚ੍ਚਂ ਕਰੋਤਿ, ਤਤ੍ਥ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਪੁਨ ਜਵਤਿ. ਵਸ੍ਸਸਤਾਯੁਕੋਤਿ ਤਦਾ ਦੀਘਾਯੁਕਕਾਲੋ ਹੋਤਿ, ਅਯਂ ਪਨ ਵਸ੍ਸਸਤਾਵਸਿਟ੍ਠੇ ਆਯੁਮ੍ਹਿ ਗਮਨਂ ਆਰਭਿ. ਵਸ੍ਸਸਤਜੀਵੀਤਿ ਤਂ ਵਸ੍ਸਸਤਂ ਅਨਨ੍ਤਰਾਯੇਨ ਜੀਵਨ੍ਤੋ. ਅਨ੍ਤਰਾਵ ਕਾਲਙ੍ਕਤੋਤਿ ਚਕ੍ਕਵਾਲ਼ਲੋਕਸ੍ਸ ਅਨ੍ਤਂ ਅਪ੍ਪਤ੍ਵਾ ਅਨ੍ਤਰਾਵ ਮਤੋ. ਸੋ ਪਨ ਤਤ੍ਥ ਕਾਲਂ ਕਤ੍ਵਾਪਿ ਆਗਨ੍ਤ੍ਵਾ ਇਮਸ੍ਮਿਂਯੇਵ ਚਕ੍ਕਵਾਲ਼ੇ ਨਿਬ੍ਬਤ੍ਤਿ. ਅਪ੍ਪਤ੍ਵਾਤਿ ਸਙ੍ਖਾਰਲੋਕਸ੍ਸ ਅਨ੍ਤਂ ਅਪ੍ਪਤ੍ਵਾ. ਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਸ੍ਸ. ਅਨ੍ਤਕਿਰਿਯਨ੍ਤਿ ਪਰਿਯਨ੍ਤਕਰਣਂ. ਕਲ਼ੇਵਰੇਤਿ ਅਤ੍ਤਭਾਵੇ. ਸਸਞ੍ਞਿਮ੍ਹਿ ਸਮਨਕੇਤਿ ਸਸਞ੍ਞੇ ਸਚਿਤ੍ਤੇ. ਲੋਕਨ੍ਤਿ ਦੁਕ੍ਖਸਚ੍ਚਂ. ਲੋਕਸਮੁਦਯਨ੍ਤਿ ਸਮੁਦਯਸਚ੍ਚਂ. ਲੋਕਨਿਰੋਧਨ੍ਤਿ ਨਿਰੋਧਸਚ੍ਚਂ. ਪਟਿਪਦਨ੍ਤਿ ਮਗ੍ਗਸਚ੍ਚਂ. ਇਤਿ – ‘‘ਨਾਹਂ, ਆਵੁਸੋ, ਇਮਾਨਿ ਚਤ੍ਤਾਰਿ ਸਚ੍ਚਾਨਿ ਤਿਣਕਟ੍ਠਾਦੀਸੁ ਪਞ੍ਞਪੇਮਿ, ਇਮਸ੍ਮਿਂ ਪਨ ਚਾਤੁਮਹਾਭੂਤਿਕੇ ਕਾਯਸ੍ਮਿਂ ਯੇਵ ਪਞ੍ਞਪੇਮੀ’’ਤਿ ਦਸ੍ਸੇਤਿ. ਸਮਿਤਾਵੀਤਿ ਸਮਿਤਪਾਪੋ. ਨਾਸੀਸਤੀਤਿ ਨ ਪਤ੍ਥੇਤਿ. ਛਟ੍ਠਂ.
੧੦੮-੧੦੯. ਸਤ੍ਤਮਟ੍ਠਮਾਨਿ ਵੁਤ੍ਤਤ੍ਥਾਨੇਵ. ਸਤ੍ਤਮਂ, ਅਟ੍ਠਮਂ.
੯. ਸੁਸਿਮਸੁਤ੍ਤਵਣ੍ਣਨਾ
੧੧੦. ਨਵਮੇ ਤੁਯ੍ਹਮ੍ਪਿ ਨੋ, ਆਨਨ੍ਦ, ਸਾਰਿਪੁਤ੍ਤੋ ਰੁਚ੍ਚਤੀਤਿ ਸਤ੍ਥਾ ਥੇਰਸ੍ਸ ਵਣ੍ਣਂ ਕਥੇਤੁਕਾਮੋ, ਵਣ੍ਣੋ ਚ ਨਾਮੇਸ ਵਿਸਭਾਗਪੁਗ੍ਗਲਸ੍ਸ ਸਨ੍ਤਿਕੇ ਕਥੇਤੁਂ ਨ ਵਟ੍ਟਤਿ. ਤਸ੍ਸ ਸਨ੍ਤਿਕੇ ਕਥਿਤੋ ਹਿ ਮਤ੍ਥਕਂ ਨ ਪਾਪੁਣਾਤਿ. ਸੋ ਹਿ ‘‘ਅਸੁਕੋ ਨਾਮ ਭਿਕ੍ਖੁ ਸੀਲਵਾ’’ਤਿ ਵੁਤ੍ਤੇ. ‘‘ਕਿਂ ਤਸ੍ਸ ਸੀਲਂ? ਗੋਰੂਪਸੀਲੋ ਸੋ. ਕਿਂ ਤਯਾ ਅਞ੍ਞੋ ਸੀਲਵਾ ਨ ਦਿਟ੍ਠਪੁਬ੍ਬੋ’’ਤਿ ਵਾ? ‘‘ਪਞ੍ਞਵਾ’’ਤਿ ਵੁਤ੍ਤੇ, ‘‘ਕਿਂ ਪਞ੍ਞੋ ਸੋ? ਕਿਂ ਤਯਾ ਅਞ੍ਞੋ ਪਞ੍ਞਵਾ ਨ ਦਿਟ੍ਠਪੁਬ੍ਬੋ’’ਤਿ? ਵਾ, ਆਦੀਨਿ ਵਤ੍ਵਾ ਵਣ੍ਣਕਥਾਯ ਅਨ੍ਤਰਾਯਂ ਕਰੋਤਿ. ਆਨਨ੍ਦਤ੍ਥੇਰੋ ਪਨ ਸਾਰਿਪੁਤ੍ਤਤ੍ਥੇਰਸ੍ਸ ਸਭਾਗੋ, ਪਣੀਤਾਨਿ ਲਭਿਤ੍ਵਾ ਥੇਰਸ੍ਸ ਦੇਤਿ, ਅਤ੍ਤਨੋ ਉਪਟ੍ਠਾਕਦਾਰਕੇ ਪਬ੍ਬਾਜੇਤ੍ਵਾ ਥੇਰਸ੍ਸ ਸਨ੍ਤਿਕੇ ਉਪਜ੍ਝਂ ਗਣ੍ਹਾਪੇਤਿ, ਉਪਸਮ੍ਪਾਦੇਤਿ. ਸਾਰਿਪੁਤ੍ਤਤ੍ਥੇਰੋਪਿ ਆਨਨ੍ਦਤ੍ਥੇਰਸ੍ਸ ਤਥੇਵ ਕਰੋਤਿ. ਕਿਂ ਕਾਰਣਾ? ਅਞ੍ਞਮਞ੍ਞਸ੍ਸ ਗੁਣੇਸੁ ਪਸੀਦਿਤ੍ਵਾ. ਆਨਨ੍ਦਤ੍ਥੇਰੋ ਹਿ – ‘‘ਅਮ੍ਹਾਕਂ ਜੇਟ੍ਠਭਾਤਿਕੋ ਏਕਂ ਅਸਙ੍ਖ੍ਯੇਯ੍ਯਂ ਸਤਸਹਸ੍ਸਞ੍ਚ ਕਪ੍ਪੇ ਪਾਰਮਿਯੋ ਪੂਰੇਤ੍ਵਾ ਸੋਲ਼ਸਵਿਧਂ ਪਞ੍ਞਂ ਪਟਿਵਿਜ੍ਝਿਤ੍ਵਾ ਧਮ੍ਮਸੇਨਾਪਤਿਟ੍ਠਾਨੇ ਠਿਤੋ’’ਤਿ ਥੇਰਸ੍ਸ ਗੁਣੇਸੁ ਪਸੀਦਿਤ੍ਵਾਵ ਥੇਰਂ ਮਮਾਯਤਿ. ਸਾਰਿਪੁਤ੍ਤਤ੍ਥੇਰੋਪਿ – ‘‘ਸਮ੍ਮਾਸਮ੍ਬੁਦ੍ਧਸ੍ਸ ਮਯਾ ਕਤ੍ਤਬ੍ਬਂ ਮੁਖੋਦਕਦਾਨਾਦਿਕਿਚ੍ਚਂ ਸਬ੍ਬਂ ਆਨਨ੍ਦੋ ਕਰੋਤਿ. ਆਨਨ੍ਦਂ ਨਿਸ੍ਸਾਯ ਅਹਂ ਇਚ੍ਛਿਤਿਚ੍ਛਿਤਂ ਸਮਾਪਤ੍ਤਿਂ ਸਮਾਪਜ੍ਜਿਤੁਂ ਲਭਾਮੀ’’ਤਿ ਆਯਸ੍ਮਤੋ ਆਨਨ੍ਦਸ੍ਸ ਗੁਣੇਸੁ ਪਸੀਦਿਤ੍ਵਾਵ ਤਂ ਮਮਾਯਤਿ. ਤਸ੍ਮਾ ਭਗਵਾ ਸਾਰਿਪੁਤ੍ਤਤ੍ਥੇਰਸ੍ਸ ਵਣ੍ਣਂ ਕਥੇਤੁਕਾਮੋ ਆਨਨ੍ਦਤ੍ਥੇਰਸ੍ਸ ਸਨ੍ਤਿਕੇ ਕਥੇਤੁਂ ਆਰਦ੍ਧੋ.
ਤਤ੍ਥ ਤੁਯ੍ਹਮ੍ਪੀਤਿ ਸਮ੍ਪਿਣ੍ਡਨਤ੍ਥੋ ਪਿ-ਕਾਰੋ. ਇਦਂ ਵੁਤ੍ਤਂ ਹੋਤਿ – ‘‘ਆਨਨ੍ਦ, ਸਾਰਿਪੁਤ੍ਤਸ੍ਸ ਆਚਾਰੋ ਗੋਚਰੋ ਵਿਹਾਰੋ ਅਭਿਕ੍ਕਮੋ ਪਟਿਕ੍ਕਮੋ ਆਲੋਕਿਤਵਿਲੋਕਿਤਂ ਸਮਿਞ੍ਜਿਤਪਸਾਰਣਂ ਮਯ੍ਹਂ ਰੁਚ੍ਚਤਿ, ਅਸੀਤਿਮਹਾਥੇਰਾਨਂ ਰੁਚ੍ਚਤਿ, ਸਦੇਵਕਸ੍ਸ ਲੋਕਸ੍ਸ ਰੁਚ੍ਚਤਿ. ਤੁਯ੍ਹਮ੍ਪਿ ਰੁਚ੍ਚਤੀ’’ਤਿ?
ਤਤੋ ਥੇਰੋ ਸਾਟਕਨ੍ਤਰੇ ਲਦ੍ਧੋਕਾਸੋ ਬਲਵਮਲ੍ਲੋ ਵਿਯ ਤੁਟ੍ਠਮਾਨਸੋ ਹੁਤ੍ਵਾ – ‘‘ਸਤ੍ਥਾ ਮਯ੍ਹਂ ਪਿਯਸਹਾਯਸ੍ਸ ਵਣ੍ਣਂ ਕਥਾਪੇਤੁਕਾਮੋ. ਲਭਿਸ੍ਸਾਮਿ ਨੋ ਅਜ੍ਜ, ਦੀਪਧਜਭੂਤਂ ਮਹਾਜਮ੍ਬੁਂ ਵਿਧੁਨਨ੍ਤੋ ਵਿਯ ਵਲਾਹਕਨ੍ਤਰਤੋ ਚਨ੍ਦਂ ਨੀਹਰਿਤ੍ਵਾ ਦਸ੍ਸੇਨ੍ਤੋ ਵਿਯ ਸਾਰਿਪੁਤ੍ਤਤ੍ਥੇਰਸ੍ਸ ਵਣ੍ਣਂ ਕਥੇਤੁ’’ਨ੍ਤਿ ਚਿਨ੍ਤੇਤ੍ਵਾ ਪਠਮਤਰਂ ਤਾਵ ਚਤੂਹਿ ਪਦੇਹਿ ਪੁਗ੍ਗਲਪਲਾਪੇ ਹਰਨ੍ਤੋ ਕਸ੍ਸ ਹਿ ਨਾਮ, ਭਨ੍ਤੇ, ਅਬਾਲਸ੍ਸਾਤਿਆਦਿਮਾਹ. ਬਾਲੋ ਹਿ ਬਾਲਤਾਯ, ਦੁਟ੍ਠੋ ਦੋਸਤਾਯ, ਮੂਲ਼੍ਹੋ ਮੋਹੇਨ, ਵਿਪਲ੍ਲਤ੍ਥਚਿਤ੍ਤੋ ਉਮ੍ਮਤ੍ਤਕੋ ਚਿਤ੍ਤਵਿਪਲ੍ਲਾਸੇਨ ਵਣ੍ਣਂ ‘‘ਵਣ੍ਣੋ’’ਤਿ ਵਾ ਅਵਣ੍ਣਂ ‘‘ਅਵਣ੍ਣੇ’’ਤਿ ਵਾ, ‘‘ਅਯਂ ਬੁਦ੍ਧੋ, ਅਯਂ ਸਾਵਕੋ’’ਤਿ ਵਾ ਨ ਜਾਨਾਤਿ. ਅਬਾਲਾਦਯੋ ਪਨ ਜਾਨਨ੍ਤਿ, ਤਸ੍ਮਾ ਅਬਾਲਸ੍ਸਾਤਿਆਦਿਮਾਹ. ਨ ਰੁਚ੍ਚੇਯ੍ਯਾਤਿ ਬਾਲਾਦੀਨਂਯੇਵ ਹਿ ਸੋ ਨ ਰੁਚ੍ਚੇਯ੍ਯ, ਨ ਅਞ੍ਞਸ੍ਸ ਕਸ੍ਸਚਿ ਨ ਰੁਚ੍ਚੇਯ੍ਯ.
ਏਵਂ ਪੁਗ੍ਗਲਪਲਾਪੇ ਹਰਿਤ੍ਵਾ ਇਦਾਨਿ ਸੋਲ਼ਸਹਿ ਪਦੇਹਿ ਯਥਾਭੂਤਂ ਵਣ੍ਣਂ ਕਥੇਨ੍ਤੋ ਪਣ੍ਡਿਤੋ, ਭਨ੍ਤੇਤਿਆਦਿਮਾਹ. ਤਤ੍ਥ ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ, ਚਤੂਸੁ ਕੋਸਲ੍ਲੇਸੁ ਠਿਤਸ੍ਸੇਤਂ ਨਾਮਂ. ਵੁਤ੍ਤਞ੍ਹੇਤਂ – ‘‘ਯਤੋ ਖੋ, ਆਨਨ੍ਦ, ਭਿਕ੍ਖੁ ਧਾਤੁਕੁਸਲੋ ਚ ਹੋਤਿ ਆਯਤਨਕੁਸਲੋ ਚ ਪਟਿਚ੍ਚਸਮੁਪ੍ਪਾਦਕੁਸਲੋ ਚ ਠਾਨਾਟ੍ਠਾਨਕੁਸਲੋ ਚ, ਏਤ੍ਤਾਵਤਾ ਖੋ, ਆਨਨ੍ਦ, ‘ਪਣ੍ਡਿਤੋ ਭਿਕ੍ਖੂ’ਤਿ ਅਲਂ ਵਚਨਾਯਾ’’ਤਿ (ਮ. ਨਿ. ੩.੧੨੪). ਮਹਾਪਞ੍ਞੋਤਿਆਦੀਸੁ ਮਹਾਪਞ੍ਞਾਦੀਹਿ ਸਮਨ੍ਨਾਗਤੋਤਿ ਅਤ੍ਥੋ. ਤਤ੍ਰਿਦਂ ਮਹਾਪਞ੍ਞਾਦੀਨਂ ਨਾਨਤ੍ਤਂ (ਪਟਿ. ਮ. ੩.੪) – ਕਤਮਾ ਮਹਾਪਞ੍ਞਾ? ਮਹਨ੍ਤੇ ਸੀਲਕ੍ਖਨ੍ਧੇ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ, ਮਹਨ੍ਤੇ ਸਮਾਧਿਕ੍ਖਨ੍ਧੇ, ਪਞ੍ਞਾਕ੍ਖਨ੍ਧੇ, ਵਿਮੁਤ੍ਤਿਕ੍ਖਨ੍ਧੇ, ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ. ਮਹਨ੍ਤਾਨਿ ਠਾਨਾਟ੍ਠਾਨਾਨਿ, ਮਹਾਵਿਹਾਰਸਮਾਪਤ੍ਤਿਯੋ, ਮਹਨ੍ਤਾਨਿ ਅਰਿਯਸਚ੍ਚਾਨਿ, ਮਹਨ੍ਤੇ ਸਤਿਪਟ੍ਠਾਨੇ, ਸਮ੍ਮਪ੍ਪਧਾਨੇ, ਇਦ੍ਧਿਪਾਦੇ, ਮਹਨ੍ਤਾਨਿ ਇਨ੍ਦ੍ਰਿਯਾਨਿ, ਬਲਾਨਿ, ਬੋਜ੍ਝਙ੍ਗਾਨਿ, ਮਹਨ੍ਤੇ ਅਰਿਯਮਗ੍ਗੇ, ਮਹਨ੍ਤਾਨਿ ਸਾਮਞ੍ਞਫਲਾਨਿ, ਮਹਾਅਭਿਞ੍ਞਾਯੋ, ਮਹਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ.
ਸਾ ਪਨ ਥੇਰਸ੍ਸ ਦੇਵੋਰੋਹਨਂ ਕਤ੍ਵਾ ਸਙ੍ਕਸ੍ਸਨਗਰਦ੍ਵਾਰੇ ਠਿਤੇਨ ਸਤ੍ਥਾਰਾ ਪੁਥੁਜ੍ਜਨਪਞ੍ਚਕੇ ਪਞ੍ਹੇ ਪੁਚ੍ਛਿਤੇ ਤਂ ਵਿਸ੍ਸਜ੍ਜੇਨ੍ਤਸ੍ਸ ਪਾਕਟਾ ਜਾਤਾ.
ਕਤਮਾ ਪੁਥੁਪਞ੍ਞਾ? ਪੁਥੁ ਨਾਨਾਖਨ੍ਧੇਸੁ, (ਞਾਣਂ ਪਵਤ੍ਤਤੀਤਿ ਪੁਥੁਪਞ੍ਞਾ.) ਪੁਥੁ ਨਾਨਾਧਾਤੂਸੁ, ਪੁਥੁ ਨਾਨਾਆਯਤਨੇਸੁ, ਪੁਥੁ ਨਾਨਾਪਟਿਚ੍ਚਸਮੁਪ੍ਪਾਦੇਸੁ, ਪੁਥੁ ਨਾਨਾਸੁਞ੍ਞਤਮਨੁਪਲਬ੍ਭੇਸੁ, ਪੁਥੁ ਨਾਨਾਅਤ੍ਥੇਸੁ, ਧਮ੍ਮੇਸੁ ਨਿਰੁਤ੍ਤੀਸੁ ਪਟਿਭਾਨੇਸੁ, ਪੁਥੁ ਨਾਨਾਸੀਲਕ੍ਖਨ੍ਧੇਸੁ, ਪੁਥੁ ਨਾਨਾਸਮਾਧਿ-ਪਞ੍ਞਾਵਿਮੁਤ੍ਤਿ-ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਸੁ, ਪੁਥੁ ਨਾਨਾਠਾਨਾਟ੍ਠਾਨੇਸੁ, ਪੁਥੁ ਨਾਨਾਵਿਹਾਰਸਮਾਪਤ੍ਤੀਸੁ, ਪੁਥੁ ਨਾਨਾਅਰਿਯਸਚ੍ਚੇਸੁ, ਪੁਥੁ ਨਾਨਾਸਤਿਪਟ੍ਠਾਨੇਸੁ, ਸਮ੍ਮਪ੍ਪਧਾਨੇਸੁ, ਇਦ੍ਧਿਪਾਦੇਸੁ, ਇਨ੍ਦ੍ਰਿਯੇਸੁ, ਬਲੇਸੁ, ਬੋਜ੍ਝਙ੍ਗੇਸੁ, ਪੁਥੁ ਨਾਨਾਅਰਿਯਮਗ੍ਗੇਸੁ, ਸਾਮਞ੍ਞਫਲੇਸੁ, ਅਭਿਞ੍ਞਾਸੁ, ਪੁਥੁ ਨਾਨਾਜਨਸਾਧਾਰਣੇ ਧਮ੍ਮੇ ਸਮਤਿਕ੍ਕਮ੍ਮ ਪਰਮਤ੍ਥੇ ਨਿਬ੍ਬਾਨੇ ਞਾਣਂ ਪਵਤ੍ਤਤੀਤਿ ਪੁਥੁਪਞ੍ਞਾ.
ਕਤਮਾ ਹਾਸਪਞ੍ਞਾ? ਇਧੇਕਚ੍ਚੋ ਹਾਸਬਹੁਲੋ ਵੇਦਬਹੁਲੋ ਤੁਟ੍ਠਿਬਹੁਲੋ ਪਾਮੋਜ੍ਜਬਹੁਲੋ ਸੀਲਂ ਪਰਿਪੂਰੇਤਿ, ਇਨ੍ਦ੍ਰਿਯਸਂਵਰਂ ਪਰਿਪੂਰੇਤਿ, ਭੋਜਨੇ ਮਤ੍ਤਞ੍ਞੁਤਂ, ਜਾਗਰਿਯਾਨੁਯੋਗਂ, ਸੀਲਕ੍ਖਨ੍ਧਂ, ਸਮਾਧਿਕ੍ਖਨ੍ਧਂ, ਪਞ੍ਞਾਕ੍ਖਨ੍ਧਂ, ਵਿਮੁਤ੍ਤਿਕ੍ਖਨ੍ਧਂ, ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧਂ ਪਰਿਪੂਰੇਤੀਤਿ, ਹਾਸਪਞ੍ਞਾ. ਹਾਸਬਹੁਲੋ ਪਾਮੋਜ੍ਜਬਹੁਲੋ ਠਾਨਾਟ੍ਠਾਨਂ ਪਟਿਵਿਜ੍ਝਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਵਿਹਾਰਸਮਾਪਤ੍ਤਿਯੋ ਪਰਿਪੂਰੇਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਅਰਿਯਸਚ੍ਚਾਨਿ ਪਟਿਵਿਜ੍ਝਤਿ. ਸਤਿਪਟ੍ਠਾਨੇ, ਸਮ੍ਮਪ੍ਪਧਾਨੇ, ਇਦ੍ਧਿਪਾਦੇ, ਇਨ੍ਦ੍ਰਿਯਾਨਿ, ਬਲਾਨਿ, ਬੋਜ੍ਝਙ੍ਗਾਨਿ, ਅਰਿਯਮਗ੍ਗਂ ਭਾਵੇਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਸਾਮਞ੍ਞਫਲਾਨਿ ਸਚ੍ਛਿਕਰੋਤਿ, ਅਭਿਞ੍ਞਾਯੋ ਪਟਿਵਿਜ੍ਝਤੀਤਿ ਹਾਸਪਞ੍ਞਾ, ਹਾਸਬਹੁਲੋ ਵੇਦਤੁਟ੍ਠਿਪਾਮੋਜ੍ਜਬਹੁਲੋ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਤੀਤਿ ਹਾਸਪਞ੍ਞਾ.
ਥੇਰੋ ਚ ਸਰਦੋ ਨਾਮ ਤਾਪਸੋ ਹੁਤ੍ਵਾ ਅਨੋਮਦਸ੍ਸਿਸ੍ਸ ਭਗਵਤੋ ਪਾਦਮੂਲੇ ਅਗ੍ਗਸਾਵਕਪਤ੍ਥਨਂ ਪਟ੍ਠਪੇਸਿ. ਤਂਕਾਲਤੋ ਪਟ੍ਠਾਯ ਹਾਸਬਹੁਲੋ ਸੀਲਪਰਿਪੂਰਣਾਦੀਨਿ ਅਕਾਸੀਤਿ ਹਾਸਪਞ੍ਞੋ.
ਕਤਮਾ ਜਵਨਪਞ੍ਞਾ? ਯਂਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ…ਪੇ… ਯਂ ਦੂਰੇ ਸਨ੍ਤਿਕੇ ਵਾ, ਸਬ੍ਬਂ ਰੂਪਂ ਅਨਿਚ੍ਚਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਦੁਕ੍ਖਤੋ ਖਿਪ੍ਪਂ, ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਯਾ ਕਾਚਿ ਵੇਦਨਾ…ਪੇ… ਯਾ ਕਾਚਿ ਸਞ੍ਞਾ… ਯੇ ਕੇਚਿ ਸਙ੍ਖਾਰਾ… ਯਂਕਿਞ੍ਚਿ ਵਿਞ੍ਞਾਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ…ਪੇ… ਸਬ੍ਬਂ ਵਿਞ੍ਞਾਣਂ ਅਨਿਚ੍ਚਤੋ, ਦੁਕ੍ਖਤੋ, ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਚਕ੍ਖੁ…ਪੇ… ਜਰਾਮਰਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਤੋ, ਦੁਕ੍ਖਤੋ, ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਂ ਖਯਟ੍ਠੇਨ, ਦੁਕ੍ਖਂ ਭਯਟ੍ਠੇਨ, ਅਨਤ੍ਤਾ ਅਸਾਰਕਟ੍ਠੇਨਾਤਿ ਤੁਲਯਿਤ੍ਵਾ ਤੀਰਯਿਤ੍ਵਾ ਵਿਭਾਵਯਿਤ੍ਵਾ ਵਿਭੂਤਂ ਕਤ੍ਵਾ ਰੂਪਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਵੇਦਨਾ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਂ… ਚਕ੍ਖੁ…ਪੇ… ਜਰਾਮਰਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਂ ਖਯਟ੍ਠੇਨ…ਪੇ… ਵਿਭੂਤਂ ਕਤ੍ਵਾ ਜਰਾਮਰਣਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ…ਪੇ… ਵਿਞ੍ਞਾਣਂ. ਚਕ੍ਖੁ…ਪੇ… ਜਰਾਮਰਣਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਨ੍ਤਿ ਤੁਲਯਿਤ੍ਵਾ ਤੀਰਯਿਤ੍ਵਾ ਵਿਭਾਵਯਿਤ੍ਵਾ ਵਿਭੂਤਂ ਕਤ੍ਵਾ ਜਰਾਮਰਣਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ.
ਕਤਮਾ ਤਿਕ੍ਖਪਞ੍ਞਾ? ਖਿਪ੍ਪਂ ਕਿਲੇਸੇ ਛਿਨ੍ਦਤੀਤਿ ਤਿਕ੍ਖਪਞ੍ਞਾ. ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤਿ, ਉਪ੍ਪਨ੍ਨਂ ਬ੍ਯਾਪਾਦਵਿਤਕ੍ਕਂ… ਉਪ੍ਪਨ੍ਨਂ ਵਿਹਿਂਸਾਵਿਤਕ੍ਕਂ… ਉਪ੍ਪਨ੍ਨੁਪ੍ਪਨ੍ਨੇ ਪਾਪਕੇ ਅਕੁਸਲੇ ਧਮ੍ਮੇ… ਉਪ੍ਪਨ੍ਨਂ ਰਾਗਂ… ਦੋਸਂ… ਮੋਹਂ… ਕੋਧਂ… ਉਪਨਾਹਂ… ਮਕ੍ਖਂ… ਪਲ਼ਾਸਂ… ਇਸ੍ਸਂ… ਮਚ੍ਛਰਿਯਂ… ਮਾਯਂ… ਸਾਠੇਯ੍ਯਂ… ਥਮ੍ਭਂ… ਸਾਰਮ੍ਭਂ… ਮਾਨਂ… ਅਤਿਮਾਨਂ… ਮਦਂ… ਪਮਾਦਂ… ਸਬ੍ਬੇ ਕਿਲੇਸੇ… ਸਬ੍ਬੇ ਦੁਚ੍ਚਰਿਤੇ… ਸਬ੍ਬੇ ਅਭਿਸਙ੍ਖਾਰੇ… ਸਬ੍ਬੇ ਭਵਗਾਮਿਕਮ੍ਮੇ ਨਾਧਿਵਾਸੇਤਿ ਪਜਹਤਿ ਵਿਨੋਦੇਤਿ, ਬ੍ਯਨ੍ਤੀਕਰੋਤਿ, ਅਨਭਾਵਂ ਗਮੇਤੀਤਿ ਤਿਕ੍ਖਪਞ੍ਞਾ. ਏਕਸ੍ਮਿਂ ਆਸਨੇ ਚਤ੍ਤਾਰੋ ਚ ਅਰਿਯਮਗ੍ਗਾ, ਚਤ੍ਤਾਰਿ ਚ ਸਾਮਞ੍ਞਫਲਾਨਿ, ਚਤਸ੍ਸੋ ਚ ਪਟਿਸਮ੍ਭਿਦਾਯੋ, ਛ ਚ ਅਭਿਞ੍ਞਾਯੋ ਅਧਿਗਤਾ ਹੋਨ੍ਤਿ ਸਚ੍ਛਿਕਤਾ ਫਸ੍ਸਿਤਾ ਪਞ੍ਞਾਯਾਤਿ ਤਿਕ੍ਖਪਞ੍ਞਾ.
ਥੇਰੋ ਚ ਭਾਗਿਨੇਯ੍ਯਸ੍ਸ ਦੀਘਨਖਪਰਿਬ੍ਬਾਜਕਸ੍ਸ ਵੇਦਨਾਪਰਿਗ੍ਗਹਸੁਤ੍ਤੇ ਦੇਸਿਯਮਾਨੇ ਠਿਤਕੋਵ ਸਬ੍ਬਕਿਲੇਸੇ ਛਿਨ੍ਦਿਤ੍ਵਾ ਸਾਵਕਪਾਰਮਿਞਾਣਂ ਪਟਿਵਿਦ੍ਧਕਾਲਤੋ ਪਟ੍ਠਾਯ ਤਿਕ੍ਖਪਞ੍ਞੋ ਨਾਮ ਜਾਤੋ. ਤੇਨਾਹ – ‘‘ਤਿਕ੍ਖਪਞ੍ਞੋ, ਭਨ੍ਤੇ, ਆਯਸ੍ਮਾ ਸਾਰਿਪੁਤ੍ਤੋ’’ਤਿ.
ਕਤਮਾ ਨਿਬ੍ਬੇਧਿਕਪਞ੍ਞਾ? ਇਧੇਕਚ੍ਚੋ ਸਬ੍ਬਸਙ੍ਖਾਰੇਸੁ ਉਬ੍ਬੇਗਬਹੁਲੋ ਹੋਤਿ ਉਤ੍ਤਾਸਬਹੁਲੋ ਉਕ੍ਕਣ੍ਠਨਬਹੁਲੋ ਅਰਤਿਬਹੁਲੋ ਅਨਭਿਰਤਿਬਹੁਲੋ ਬਹਿਮੁਖੋ ਨ ਰਮਤਿ ਸਬ੍ਬਸਙ੍ਖਾਰੇਸੁ, ਅਨਿਬ੍ਬਿਦ੍ਧਪੁਬ੍ਬਂ ਅਪ੍ਪਦਾਲਿਤਪੁਬ੍ਬਂ ਲੋਭਕ੍ਖਨ੍ਧਂ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਪਞ੍ਞਾ. ਅਨਿਬ੍ਬਿਦ੍ਧਪੁਬ੍ਬਂ ਅਪ੍ਪਦਾਲਿਤਪੁਬ੍ਬਂ ਦੋਸਕ੍ਖਨ੍ਧਂ… ਮੋਹਕ੍ਖਨ੍ਧਂ… ਕੋਧਂ… ਉਪਨਾਹਂ…ਪੇ… ਸਬ੍ਬੇ ਭਵਗਾਮਿਕਮ੍ਮੇ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਪਞ੍ਞਾ.
ਅਪ੍ਪਿਚ੍ਛੋਤਿ ਸਨ੍ਤਗੁਣਨਿਗੁਹਨਤਾ, ਪਚ੍ਚਯਪਟਿਗ੍ਗਹਣੇ ਚ ਮਤ੍ਤਞ੍ਞੁਤਾ, ਏਤਂ ਅਪ੍ਪਿਚ੍ਛਲਕ੍ਖਣਨ੍ਤਿ ਇਮਿਨਾ ਲਕ੍ਖਣੇਨ ਸਮਨ੍ਨਾਗਤੋ. ਸਨ੍ਤੁਟ੍ਠੋਤਿ ਚਤੂਸੁ ਪਚ੍ਚਯੇਸੁ ਯਥਾਲਾਭਸਨ੍ਤੋਸੋ ਯਥਾਬਲਸਨ੍ਤੋਸੋ ਯਥਾਸਾਰੁਪ੍ਪਸਨ੍ਤੋਸੋਤਿ, ਇਮੇਹਿ ਤੀਹਿ ਸਨ੍ਤੋਸੇਹਿ ਸਮਨ੍ਨਾਗਤੋ. ਪਵਿਵਿਤ੍ਤੋਤਿ ਕਾਯਵਿਵੇਕੋ ਚ ਵਿਵੇਕਟ੍ਠਕਾਯਾਨਂ ਨੇਕ੍ਖਮ੍ਮਾਭਿਰਤਾਨਂ, ਚਿਤ੍ਤਵਿਵੇਕੋ ਚ ਪਰਿਸੁਦ੍ਧਚਿਤ੍ਤਾਨਂ ਪਰਮਵੋਦਾਨਪ੍ਪਤ੍ਤਾਨਂ, ਉਪਧਿਵਿਵੇਕੋ ਚ ਨਿਰੁਪਧੀਨਂ ਪੁਗ੍ਗਲਾਨਂ ਵਿਸਙ੍ਖਾਰਗਤਾਨਨ੍ਤਿ, ਇਮੇਸਂ ਤਿਣ੍ਣਂ ਵਿਵੇਕਾਨਂ ਲਾਭੀ. ਅਸਂਸਟ੍ਠੋਤਿ ਦਸ੍ਸਨਸਂਸਗ੍ਗੋ ਸਵਨਸਂਸਗ੍ਗੋ ਸਮੁਲ੍ਲਪਨਸਂਸਗ੍ਗੋ ਪਰਿਭੋਗਸਂਸਗ੍ਗੋ ਕਾਯਸਂਸਗ੍ਗੋਤਿ, ਇਮੇਹਿ ਪਞ੍ਚਹਿ ਸਂਸਗ੍ਗੇਹਿ ਵਿਰਹਿਤੋ. ਅਯਞ੍ਚ ਪਞ੍ਚਵਿਧੋ ਸਂਸਗ੍ਗੋ ਰਾਜੂਹਿ ਰਾਜਮਹਾਮਤ੍ਤੇਹਿ ਤਿਤ੍ਥਿਯੇਹਿ ਤਿਤ੍ਥਿਯਸਾਵਕੇਹਿ ਉਪਾਸਕੇਹਿ ਉਪਸਿਕਾਹਿ ਭਿਕ੍ਖੂਹਿ ਭਿਕ੍ਖੁਨੀਹੀਤਿ ਅਟ੍ਠਹਿ ਪੁਗ੍ਗਲੇਹਿ ਸਦ੍ਧਿਂ ਜਾਯਤਿ, ਸੋ ਸਬ੍ਬੋਪਿ ਥੇਰਸ੍ਸ ਨਤ੍ਥੀਤਿ ਅਸਂਸਟ੍ਠੋ.
ਆਰਦ੍ਧਵੀਰਿਯੋਤਿ ਪਗ੍ਗਹਿਤਵੀਰਿਯੋ ਪਰਿਪੁਣ੍ਣਵੀਰਿਯੋ. ਤਤ੍ਥ ਆਰਦ੍ਧਵੀਰਿਯੋ ਭਿਕ੍ਖੁ ਗਮਨੇ ਉਪ੍ਪਨ੍ਨਕਿਲੇਸਸ੍ਸ ਠਾਨਂ ਪਾਪੁਣਿਤੁਂ ਨ ਦੇਤਿ, ਠਾਨੇ ਉਪ੍ਪਨ੍ਨਸ੍ਸ ਨਿਸਜ੍ਜਂ, ਨਿਸਜ੍ਜਾਯ ਉਪ੍ਪਨ੍ਨਸ੍ਸ ਸੇਯ੍ਯਂ ਪਾਪੁਣਿਤੁਂ ਨ ਦੇਤਿ, ਤਸ੍ਮਿਂ ਤਸ੍ਮਿਂ ਇਰਿਯਾਪਥੇ ਉਪ੍ਪਨ੍ਨਂ ਤਤ੍ਥ ਤਤ੍ਥੇਵ ਨਿਗ੍ਗਣ੍ਹਾਤਿ. ਥੇਰੋ ਪਨ ਚਤੁਚਤ੍ਤਾਲੀਸ ਵਸ੍ਸਾਨਿ ਮਞ੍ਚੇ ਪਿਟ੍ਠਿਂ ਨ ਪਸਾਰੇਤਿ. ਤਂ ਸਨ੍ਧਾਯ ‘‘ਆਰਦ੍ਧਵੀਰਿਯੋ’’ਤਿ ਆਹ. ਵਤ੍ਤਾਤਿ ਓਧੁਨਨਵਤ੍ਤਾ. ਭਿਕ੍ਖੂਨਂ ਅਜ੍ਝਾਚਾਰਂ ਦਿਸ੍ਵਾ ‘‘ਅਜ੍ਜ ਕਥੇਸ੍ਸਾਮਿ, ਸ੍ਵੇ ਕਥੇਸ੍ਸਾਮੀ’’ਤਿ ਕਥਾਵਵਤ੍ਥਾਨਂ ਨ ਕਰੋਤਿ, ਤਸ੍ਮਿਂ ਤਸ੍ਮਿਂ ਯੇਵ ਠਾਨੇ ਓਵਦਤਿ ਅਨੁਸਾਸਤੀਤਿ ਅਤ੍ਥੋ.
ਵਚਨਕ੍ਖਮੋਤਿ ਵਚਨਂ ਖਮਤਿ. ਏਕੋ ਹਿ ਪਰਸ੍ਸ ਓਵਾਦਂ ਦੇਤਿ, ਸਯਂ ਪਨ ਅਞ੍ਞੇਨ ਓਵਦਿਯਮਾਨੋ ਕੁਜ੍ਝਤਿ. ਥੇਰੋ ਪਨ ਪਰਸ੍ਸਪਿ ਓਵਾਦਂ ਦੇਤਿ, ਸਯਂ ਓਵਦਿਯਮਾਨੋਪਿ ਸਿਰਸਾ ਸਮ੍ਪਟਿਚ੍ਛਤਿ. ਏਕਦਿਵਸਂ ਕਿਰ ਸਾਰਿਪੁਤ੍ਤਤ੍ਥੇਰਂ ਸਤ੍ਤਵਸ੍ਸਿਕੋ ਸਾਮਣੇਰੋ – ‘‘ਭਨ੍ਤੇ, ਸਾਰਿਪੁਤ੍ਤ, ਤੁਮ੍ਹਾਕਂ ਨਿਵਾਸਨਕਣ੍ਣੋ ਓਲਮ੍ਬਤੀ’’ਤਿ ਆਹ. ਥੇਰੋ ਕਿਞ੍ਚਿ ਅਵਤ੍ਵਾਵ ਏਕਮਨ੍ਤਂ ਗਨ੍ਤ੍ਵਾ ਪਰਿਮਣ੍ਡਲਂ ਨਿਵਾਸੇਤ੍ਵਾ ਆਗਮ੍ਮ ‘‘ਏਤ੍ਤਕਂ ਵਟ੍ਟਤਿ ਆਚਰਿਯਾ’’ਤਿ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ.
‘‘ਤਦਹੁ ਪਬ੍ਬਜਿਤੋ ਸਨ੍ਤੋ, ਜਾਤਿਯਾ ਸਤ੍ਤਵਸ੍ਸਿਕੋ;
ਸੋਪਿ ਮਂ ਅਨੁਸਾਸੇਯ੍ਯ, ਸਮ੍ਪਟਿਚ੍ਛਾਮਿ ਮਤ੍ਥਕੇ’’ਤਿ. (ਮਿ. ਪ. ੬.੪.੮) –
ਆਹ.
ਚੋਦਕੋਤਿ ਵਤ੍ਥੁਸ੍ਮਿਂ ਓਤਿਣ੍ਣੇ ਵਾ ਅਨੋਤਿਣ੍ਣੇ ਵਾ ਵੀਤਿਕ੍ਕਮਂ ਦਿਸ੍ਵਾ – ‘‘ਆਵੁਸੋ, ਭਿਕ੍ਖੁਨਾ ਨਾਮ ਏਵਂ ਨਿਵਾਸੇਤਬ੍ਬਂ, ਏਵਂ ਪਾਰੁਪਿਤਬ੍ਬਂ, ਏਵਂ ਗਨ੍ਤਬ੍ਬਂ, ਏਵਂ ਠਾਤਬ੍ਬਂ, ਏਵਂ ਨਿਸੀਦਿਤਬ੍ਬਂ, ਏਵਂ ਖਾਦਿਤਬ੍ਬਂ, ਏਵਂ ਭੁਞ੍ਜਿਤਬ੍ਬ’’ਨ੍ਤਿ ਤਨ੍ਤਿਵਸੇਨ ਅਨੁਸਿਟ੍ਠਿਂ ਦੇਤਿ.
ਪਾਪਗਰਹੀਤਿ ਪਾਪਪੁਗ੍ਗਲੇ ਨ ਪਸ੍ਸੇ, ਨ ਤੇਸਂ ਵਚਨਂ ਸੁਣੇ, ਤੇਹਿ ਸਦ੍ਧਿਂ ਏਕਚਕ੍ਕਵਾਲ਼ੇਪਿ ਨ ਵਸੇਯ੍ਯਂ.
‘‘ਮਾ ਮੇ ਕਦਾਚਿ ਪਾਪਿਚ੍ਛੋ, ਕੁਸੀਤੋ ਹੀਨਵੀਰਿਯੋ;
ਅਪ੍ਪਸ੍ਸੁਤੋ ਅਨਾਦਰੋ, ਸਮੇਤੋ ਅਹੁ ਕਤ੍ਥਚੀ’’ਤਿ. –
ਏਵਂ ਪਾਪਪੁਗ੍ਗਲੇਪਿ ਗਰਹਤਿ, ‘‘ਸਮਣੇਨ ਨਾਮ ਰਾਗਵਸਿਕੇਨ ਦੋਸਮੋਹਵਸਿਕੇਨ ਨ ਹੋਤਬ੍ਬਂ, ਉਪ੍ਪਨ੍ਨੋ ਰਾਗੋ ਦੋਸੋ ਮੋਹੋ ਪਹਾਤਬ੍ਬੋ’’ਤਿ ਏਵਂ ਪਾਪਧਮ੍ਮੇਪਿ ਗਰਹਤੀਤਿ ਦ੍ਵੀਹਿ ਕਾਰਣੇਹਿ ‘‘ਪਾਪਗਰਹੀ, ਭਨ੍ਤੇ, ਆਯਸ੍ਮਾ ਸਾਰਿਪੁਤ੍ਤੋ’’ਤਿ ਵਦਤਿ.
ਏਵਂ ਆਯਸ੍ਮਤਾ ਆਨਨ੍ਦੇਨ ਸੋਲ਼ਸਹਿ ਪਦੇਹਿ ਥੇਰਸ੍ਸ ਯਥਾਭੂਤਵਣ੍ਣਪ੍ਪਕਾਸਨੇ ਕਤੇ – ‘‘ਕਿਂ ਆਨਨ੍ਦੋ ਅਤ੍ਤਨੋ ਪਿਯਸਹਾਯਸ੍ਸ ਵਣ੍ਣਂ ਕਥੇਤੁਂ ਨ ਲਭਤਿ, ਕਥੇਤੁ ਕਿਂ ਪਨ ਤੇਨ ਕਥਿਤਂ ਤਥੇਵ ਹੋਤਿ, ਕਿਂ ਸੋ ਸਬ੍ਬਞ੍ਞੂ’’ਤਿ? ਕੋਚਿ ਪਾਪਪੁਗ੍ਗਲੋ ਵਤ੍ਤੁਂ ਮਾ ਲਭਤੂਤਿ ਸਤ੍ਥਾ ਤਂ ਵਣ੍ਣਭਣਨਂ ਅਕੁਪ੍ਪਂ ਸਬ੍ਬਞ੍ਞੁਭਾਸਿਤਂ ਕਰੋਨ੍ਤੋ ਜਿਨਮੁਦ੍ਦਿਕਾਯ ਲਞ੍ਛਨ੍ਤੋ ਏਵਮੇਤਨ੍ਤਿਆਦਿਮਾਹ.
ਏਵਂ ਤਥਾਗਤੇਨ ਚ ਆਨਨ੍ਦਤ੍ਥੇਰੇਨ ਚ ਮਹਾਥੇਰਸ੍ਸ ਵਣ੍ਣੇ ਕਥਿਯਮਾਨੇ ਭੁਮਟ੍ਠਕਾ ਦੇਵਤਾ ਉਟ੍ਠਹਿਤ੍ਵਾ ਏਤੇਹੇਵ ਸੋਲ਼ਸਹਿ ਪਦੇਹਿ ਵਣ੍ਣਂ ਕਥਯਿਂਸੁ. ਤਤੋ ਆਕਾਸਟ੍ਠਕਦੇਵਤਾ ਸੀਤਵਲਾਹਕਾ ਉਣ੍ਹਵਲਾਹਕਾ ਚਾਤੁਮਹਾਰਾਜਿਕਾਤਿ ਯਾਵ ਅਕਨਿਟ੍ਠਬ੍ਰਹ੍ਮਲੋਕਾ ਦੇਵਤਾ ਉਟ੍ਠਹਿਤ੍ਵਾ ਏਤੇਹੇਵ ਸੋਲ਼ਸਹਿ ਪਦੇਹਿ ਵਣ੍ਣਂ ਕਥਯਿਂਸੁ. ਏਤੇਨੁਪਾਯੇਨ ਏਕਚਕ੍ਕਵਾਲ਼ਂ ਆਦਿਂ ਕਤ੍ਵਾ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਦੇਵਤਾ ਉਟ੍ਠਹਿਤ੍ਵਾ ਕਥਯਿਂਸੁ. ਅਥਾਯਸ੍ਮਤੋ ਸਾਰਿਪੁਤ੍ਤਸ੍ਸ ਸਦ੍ਧਿਵਿਹਾਰਿਕੋ ਸੁਸੀਮੋ ਦੇਵਪੁਤ੍ਤੋ ਚਿਨ੍ਤੇਸਿ – ‘‘ਇਮਾ ਦੇਵਤਾ ਅਤ੍ਤਨੋ ਅਤ੍ਤਨੋ ਨਕ੍ਖਤ੍ਤਕੀਲ਼ਂ ਪਹਾਯ ਤਤ੍ਥ ਤਤ੍ਥ ਗਨ੍ਤ੍ਵਾ ਮਯ੍ਹਂ ਉਪਜ੍ਝਾਯਸ੍ਸੇਵ ਵਣ੍ਣਂ ਕਥੇਨ੍ਤਿ, ਗਚ੍ਛਾਮਿ ਤਥਾਗਤਸ੍ਸ ਸਨ੍ਤਿਕਂ, ਗਨ੍ਤ੍ਵਾ ਏਤਦੇਵ ਵਣ੍ਣਭਣਨਂ ਦੇਵਤਾਭਾਸਿਤਂ ਕਰੋਮੀ’’ਤਿ, ਸੋ ਤਥਾ ਅਕਾਸਿ. ਤਂ ਦਸ੍ਸੇਤੁਂ ਅਥ ਖੋ ਸੁਸੀਮੋਤਿਆਦਿ ਵੁਤ੍ਤਂ.
ਉਚ੍ਚਾਵਚਾਤਿ ਅਞ੍ਞੇਸੁ ਠਾਨੇਸੁ ਪਣੀਤਂ ਉਚ੍ਚਂ ਵੁਚ੍ਚਤਿ, ਹੀਨਂ ਅਵਚਂ. ਇਧ ਪਨ ਉਚ੍ਚਾਵਚਾਤਿ ਨਾਨਾਵਿਧਾ ਵਣ੍ਣਨਿਭਾ. ਤਸ੍ਸਾ ਕਿਰ ਦੇਵਪਰਿਸਾਯ ਨੀਲਟ੍ਠਾਨਂ ਅਤਿਨੀਲਂ, ਪੀਤਕਟ੍ਠਾਨਂ ਅਤਿਪੀਤਕਂ, ਲੋਹਿਤਟ੍ਠਾਨਂ ਅਤਿਲੋਹਿਤਂ, ਓਦਾਤਟ੍ਠਾਨਂ ਅਚ੍ਚੋਦਾਤਨ੍ਤਿ, ਚਤੁਬ੍ਬਿਧਾ ਵਣ੍ਣਨਿਭਾ ਪਾਤੁਭਵਿ. ਤੇਨੇਵ ਸੇਯ੍ਯਥਾਪਿ ਨਾਮਾਤਿ ਚਤਸ੍ਸੋ ਉਪਮਾ ਆਗਤਾ. ਤਤ੍ਥ ਸੁਭੋਤਿ ਸੁਨ੍ਦਰੋ. ਜਾਤਿਮਾਤਿ ਜਾਤਿਸਮ੍ਪਨ੍ਨੋ. ਸੁਪਰਿਕਮ੍ਮਕਤੋਤਿ ਧੋਵਨਾਦਿਪਰਿਕਮ੍ਮੇਨ ਸੁਟ੍ਠੁ ਪਰਿਕਮ੍ਮਕਤੋ. ਪਣ੍ਡੁਕਮ੍ਬਲੇ ਨਿਕ੍ਖਿਤ੍ਤੋਤਿ ਰਤ੍ਤਕਮ੍ਬਲੇ ਠਪਿਤੋ. ਏਵਮੇਵਨ੍ਤਿ ਰਤ੍ਤਕਮ੍ਬਲੇ ਨਿਕ੍ਖਿਤ੍ਤਮਣਿ ਵਿਯ ਸਬ੍ਬਾ ਏਕਪ੍ਪਹਾਰੇਨੇਵ ਵਿਰੋਚਿਤੁਂ ਆਰਦ੍ਧਾ. ਨਿਕ੍ਖਨ੍ਤਿ ਅਤਿਰੇਕਪਞ੍ਚਸੁਵਣ੍ਣੇਨ ਕਤਪਿਲ਼ਨ੍ਧਨਂ. ਤਞ੍ਹਿ ਘਟ੍ਟਨਮਜ੍ਜਨਕ੍ਖਮਂ ਹੋਤਿ. ਜਮ੍ਬੋਨਦਨ੍ਤਿ ਮਹਾਜਮ੍ਬੁਸਾਖਾਯ ਪਵਤ੍ਤਨਦਿਯਂ ਨਿਬ੍ਬਤ੍ਤਂ, ਮਹਾਜਮ੍ਬੁਫਲਰਸੇ ਵਾ ਪਥਵਿਯਂ ਪਵਿਟ੍ਠੇ ਸੁਵਣ੍ਣਙ੍ਕੁਰਾ ਉਟ੍ਠਹਨ੍ਤਿ, ਤੇਨ ਸੁਵਣ੍ਣੇਨ ਕਤਪਿਲ਼ਨ੍ਧਨਨ੍ਤਿਪਿ ਅਤ੍ਥੋ. ਦਕ੍ਖਕਮ੍ਮਾਰਪੁਤ੍ਤਉਕ੍ਕਾਮੁਖਸੁਕੁਸਲਸਮ੍ਪਹਟ੍ਠਨ੍ਤਿ ਸੁਕੁਸਲੇਨ ਕਮ੍ਮਾਰਪੁਤ੍ਤੇਨ ਉਕ੍ਕਾਮੁਖੇ ਪਚਿਤ੍ਵਾ ਸਮ੍ਪਹਟ੍ਠਂ. ਧਾਤੁਵਿਭਙ੍ਗੇ (ਮ. ਨਿ. ੩.੩੫੭ ਆਦਯੋ) ਅਕਤਭਣ੍ਡਂ ਗਹਿਤਂ, ਇਧ ਪਨ ਕਤਭਣ੍ਡਂ.
ਵਿਦ੍ਧੇਤਿ ਦੂਰੀਭੂਤੇ. ਦੇਵੇਤਿ ਆਕਾਸੇ. ਨਭਂ ਅਬ੍ਭੁਸ੍ਸਕ੍ਕਮਾਨੋਤਿ ਆਕਾਸਂ ਅਭਿਲਙ੍ਘਨ੍ਤੋ. ਇਮਿਨਾ ਤਰੁਣਸੂਰਿਯਭਾਵੋ ਦਸ੍ਸਿਤੋ. ਸੋਰਤੋਤਿ ਸੋਰਚ੍ਚੇਨ ਸਮਨ੍ਨਾਗਤੋ. ਦਨ੍ਤੋਤਿ ਨਿਬ੍ਬਿਸੇਵਨੋ. ਸਤ੍ਥੁਵਣ੍ਣਾਭਤੋਤਿ ਸਤ੍ਥਾਰਾ ਆਭਤਵਣ੍ਣੋ. ਸਤ੍ਥਾ ਹਿ ਅਟ੍ਠਪਰਿਸਮਜ੍ਝੇ ਨਿਸੀਦਿਤ੍ਵਾ ‘‘ਸੇਵਥ, ਭਿਕ੍ਖਵੇ, ਸਾਰਿਪੁਤ੍ਤਮੋਗ੍ਗਲ੍ਲਾਨੇ’’ਤਿਆਦਿਨਾ (ਮ. ਨਿ. ੩.੩੭੧) ਨਯੇਨ ਥੇਰਸ੍ਸ ਵਣ੍ਣਂ ਆਹਰੀਤਿ ਥੇਰੋ ਆਭਤਵਣ੍ਣੋ ਨਾਮ ਹੋਤਿ. ਕਾਲਂ ਕਙ੍ਖਤੀਤਿ ਪਰਿਨਿਬ੍ਬਾਨਕਾਲਂ ਪਤ੍ਥੇਤਿ. ਖੀਣਾਸਵੋ ਹਿ ਨੇਵ ਮਰਣਂ ਅਭਿਨਨ੍ਦਤਿ, ਨ ਜੀਵਿਤਂ ਪਤ੍ਥੇਤਿ, ਦਿਵਸਸਙ੍ਖੇਪਂ ਵੇਤਨਂ ਗਹੇਤ੍ਵਾ ਠਿਤਪੁਰਿਸੋ ਵਿਯ ਕਾਲਂ ਪਨ ਪਤ੍ਥੇਤਿ, ਓਲੋਕੇਨ੍ਤੋ ਤਿਟ੍ਠਤੀਤਿ ਅਤ੍ਥੋ. ਤੇਨੇਵਾਹ –
‘‘ਨਾਭਿਨਨ੍ਦਾਮਿ ਮਰਣਂ, ਨਾਭਿਨਨ੍ਦਾਮਿ ਜੀਵਿਤਂ;
ਕਾਲਞ੍ਚ ਪਟਿਕਙ੍ਖਾਮਿ, ਨਿਬ੍ਬਿਸਂ ਭਤਕੋ ਯਥਾ’’ਤਿ. (ਥੇਰਗਾ. ੧੦੦੧-੧੦੦੨); ਨਵਮਂ;
੧੦. ਨਾਨਾਤਿਤ੍ਥਿਯਸਾਵਕਸੁਤ੍ਤਵਣ੍ਣਨਾ
੧੧੧. ਦਸਮੇ ਨਾਨਾਤਿਤ੍ਥਿਯਸਾਵਕਾਤਿ ਤੇ ਕਿਰ ਕਮ੍ਮਵਾਦਿਨੋ ਅਹੇਸੁਂ, ਤਸ੍ਮਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਾ, ਤੇ ‘‘ਅਤ੍ਤਨੋ ਅਤ੍ਤਨੋ ਸਤ੍ਥਰਿ ਪਸਾਦੇਨ ਨਿਬ੍ਬਤ੍ਤਮ੍ਹਾ’’ਤਿ ਸਞ੍ਞਿਨੋ ਹੁਤ੍ਵਾ ‘‘ਗਚ੍ਛਾਮ ਦਸਬਲਸ੍ਸ ਸਨ੍ਤਿਕੇ ਠਤ੍ਵਾ ਅਮ੍ਹਾਕਂ ਸਤ੍ਥਾਰਾਨਂ ਵਣ੍ਣਂ ਕਥੇਸ੍ਸਾਮਾ’’ਤਿ ਆਗਨ੍ਤ੍ਵਾ ਪਚ੍ਚੇਕਗਾਥਾਹਿ ਕਥਯਿਂਸੁ. ਤਤ੍ਥ ਛਿਨ੍ਦਿਤਮਾਰਿਤੇਤਿ ਛਿਨ੍ਦਿਤੇ ਚ ਮਾਰਿਤੇ ਚ. ਹਤਜਾਨੀਸੂਤਿ ਪੋਥਨੇ ਚ ਧਨਜਾਨੀਸੁ ਚ. ਪੁਞ੍ਞਂ ਵਾ ਪਨਾਤਿ ਅਤ੍ਤਨੋ ਪੁਞ੍ਞਮ੍ਪਿ ਨ ਸਮਨੁਪਸ੍ਸਤਿ, ਸਙ੍ਖੇਪਤੋ ਪੁਞ੍ਞਾਪੁਞ੍ਞਾਨਂ ਵਿਪਾਕੋ ਨਤ੍ਥੀਤਿ ਵਦਤਿ. ਸ ਵੇ ਵਿਸ੍ਸਾਸਮਾਚਿਕ੍ਖੀਤਿ ਸੋ – ‘‘ਏਵਂ ਕਤਪਾਪਾਨਮ੍ਪਿ ਕਤਪੁਞ੍ਞਾਨਮ੍ਪਿ ਵਿਪਾਕੋ ਨਤ੍ਥੀ’’ਤਿ ਵਦਨ੍ਤੋ ਸਤ੍ਤਾਨਂ ਵਿਸ੍ਸਾਸਂ ਅਵਸ੍ਸਯਂ ਪਤਿਟ੍ਠਂ ਆਚਿਕ੍ਖਤਿ, ਤਸ੍ਮਾ ਮਾਨਨਂ ਵਨ੍ਦਨਂ ਪੂਜਨਂ ਅਰਹਤੀਤਿ ਵਦਤਿ.
ਤਪੋਜਿਗੁਚ੍ਛਾਯਾਤਿ ਕਾਯਕਿਲਮਥਤਪੇਨ ਪਾਪਜਿਗੁਚ੍ਛਨੇਨ. ਸੁਸਂਵੁਤਤ੍ਤੋਤਿ ਸਮਨ੍ਨਾਗਤੋ ਪਿਹਿਤੋ ਵਾ. ਜੇਗੁਚ੍ਛੀਤਿ ਤਪੇਨ ਪਾਪਜਿਗੁਚ੍ਛਕੋ. ਨਿਪਕੋਤਿ ਪਣ੍ਡਿਤੋ. ਚਾਤੁਯਾਮਸੁਸਂਵੁਤੋਤਿ ਚਾਤੁਯਾਮੇਨ ਸੁਸਂਵੁਤੋ. ਚਾਤੁਯਾਮੋ ਨਾਮ ਸਬ੍ਬਵਾਰਿਵਾਰਿਤੋ ਚ ਹੋਤਿ ਸਬ੍ਬਵਾਰਿਯੁਤ੍ਤੋ ਚ ਸਬ੍ਬਵਾਰਿਧੁਤੋ ਚ ਸਬ੍ਬਵਾਰਿਫੁਟੋ ਚਾਤਿ ਇਮੇ ਚਤ੍ਤਾਰੋ ਕੋਟ੍ਠਾਸਾ. ਤਤ੍ਥ ਸਬ੍ਬਵਾਰਿਵਾਰਿਤੋਤਿ ਵਾਰਿਤਸਬ੍ਬਉਦਕੋ, ਪਟਿਕ੍ਖਿਤ੍ਤਸਬ੍ਬਸੀਤੋਦਕੋਤਿ ਅਤ੍ਥੋ. ਸੋ ਕਿਰ ਸੀਤੋਦਕੇ ਸਤ੍ਤਸਞ੍ਞੀ ਹੋਤਿ, ਤਸ੍ਮਾ ਤਂ ਨ ਵਲਞ੍ਜੇਤਿ. ਸਬ੍ਬਵਾਰਿਯੁਤ੍ਤੋਤਿ ਸਬ੍ਬੇਨ ਪਾਪਵਾਰਣੇਨ ਯੁਤੋ. ਸਬ੍ਬਵਾਰਿਧੁਤੋਤਿ ਸਬ੍ਬੇਨ ਪਾਪਵਾਰਣੇਨ ਧੁਤਪਾਪੋ. ਸਬ੍ਬਵਾਰਿਫੁਟੋਤਿ ਸਬ੍ਬੇਨ ਪਾਪਵਾਰਣੇਨ ਫੁਟ੍ਠੋ. ਦਿਟ੍ਠਂ ਸੁਤਞ੍ਚ ਆਚਿਕ੍ਖਨ੍ਤਿ ਦਿਟ੍ਠਂ ‘‘ਦਿਟ੍ਠਂ ਮੇ’’ਤਿ ਸੁਤਂ ‘‘ਸੁਤਂ ਮੇ’’ਤਿ ਆਚਿਕ੍ਖਨ੍ਤੋ, ਨ ਨਿਗੁਹਨ੍ਤੋ. ਨ ਹਿ ਨੂਨ ਕਿਬ੍ਬਿਸੀਤਿ ਏਵਰੂਪੋ ਸਤ੍ਥਾ ਕਿਬ੍ਬਿਸਕਾਰਕੋ ਨਾਮ ਨ ਹੋਤਿ.
ਨਾਨਾਤਿਤ੍ਥਿਯੇਤਿ ਸੋ ਕਿਰ ਨਾਨਾਤਿਤ੍ਥਿਯਾਨਂਯੇਵ ਉਪਟ੍ਠਾਕੋ, ਤਸ੍ਮਾ ਤੇ ਆਰਬ੍ਭ ਵਦਤਿ. ਪਕੁਧਕੋ ਕਾਤਿਯਾਨੋਤਿ ਪਕੁਧੋ ਕਚ੍ਚਾਯਨੋ. ਨਿਗਣ੍ਠੋਤਿ ਨਾਟਪੁਤ੍ਤੋ. ਮਕ੍ਖਲਿਪੂਰਣਾਸੇਤਿ ਮਕ੍ਖਲਿ ਚ ਪੂਰਣੋ ਚ. ਸਾਮਞ੍ਞਪ੍ਪਤ੍ਤਾਤਿ ਸਮਣਧਮ੍ਮੇ ਕੋਟਿਪ੍ਪਤ੍ਤਾ. ਨ ਹਿ ਨੂਨ ਤੇਤਿ ਸਪ੍ਪੁਰਿਸੇਹਿ ਨ ਦੂਰੇ, ਤੇਯੇਵ ਲੋਕੇ ਸਪ੍ਪੁਰਿਸਾਤਿ ਵਦਤਿ. ਪਚ੍ਚਭਾਸੀਤਿ ‘‘ਅਯਂ ਆਕੋਟਕੋ ਇਮੇਸਂ ਨਗ੍ਗਨਿਸ੍ਸਿਰਿਕਾਨਂ ਦਸਬਲਸ੍ਸ ਸਨ੍ਤਿਕੇ ਠਤ੍ਵਾ ਵਣ੍ਣਂ ਕਥੇਤੀਤਿ ਤੇਸਂ ਅਵਣ੍ਣਂ ਕਥੇਸ੍ਸਾਮੀ’’ਤਿ ਪਤਿਅਭਾਸੀਤਿ.
ਤਤ੍ਥ ਸਹਾਚਰਿਤੇਨਾਤਿ ਸਹ ਚਰਿਤਮਤ੍ਤੇਨ. ਛਵੋ ਸਿਗਾਲੋਤਿ ਲਾਮਕੋ ਕਾਲਸਿਗਾਲੋ. ਕੋਤ੍ਥੁਕੋਤਿ ਤਸ੍ਸੇਵ ਵੇਵਚਨਂ. ਸਙ੍ਕਸ੍ਸਰਾਚਾਰੋਤਿ ਆਸਙ੍ਕਿਤਸਮਾਚਾਰੋ. ਨ ਸਤਂ ਸਰਿਕ੍ਖੋਤਿ ਪਣ੍ਡਿਤਾਨਂ ਸਪ੍ਪੁਰਿਸਾਨਂ ਸਦਿਸੋ ਨ ਹੋਤਿ, ਕਿਂ ਤ੍ਵਂ ਕਾਲਸਿਗਾਲਸਦਿਸੇ ਤਿਤ੍ਥਿਯੇ ਸੀਹੇ ਕਰੋਸੀਤਿ?
ਅਨ੍ਵਾਵਿਸਿਤ੍ਵਾਤਿ ‘‘ਅਯਂ ਏਵਰੂਪਾਨਂ ਸਤ੍ਥਾਰਾਨਂ ਅਵਣ੍ਣਂ ਕਥੇਤਿ, ਤੇਨੇਵ ਨਂ ਮੁਖੇਨ ਵਣ੍ਣਂ ਕਥਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਸ੍ਸ ਸਰੀਰੇ ਅਨੁਆਵਿਸਿ ਅਧਿਮੁਚ੍ਚਿ, ਏਵਂ ਅਨ੍ਵਾਵਿਸਿਤ੍ਵਾ. ਆਯੁਤ੍ਤਾਤਿ ਤਪੋਜਿਗੁਚ੍ਛਨੇ ਯੁਤ੍ਤਪਯੁਤ੍ਤਾ. ਪਾਲਯਂ ਪਵਿਵੇਕਿਯਨ੍ਤਿ ਪਵਿਵੇਕਂ ਪਾਲਯਨ੍ਤਾ. ਤੇ ਕਿਰ ‘‘ਨ੍ਹਾਪਿਤਪਵਿਵੇਕਂ ਪਾਲੇਸ੍ਸਾਮਾ’’ਤਿ ਸਯਂ ਕੇਸੇ ਲੁਞ੍ਚਨ੍ਤਿ. ‘‘ਚੀਵਰਪਵਿਵੇਕਂ ਪਾਤੇਸ੍ਸਾਮਾ’’ਤਿ ਨਗ੍ਗਾ ਵਿਚਰਨ੍ਤਿ. ‘‘ਪਿਣ੍ਡਪਾਤਪਵਿਵੇਕਂ ਪਾਲੇਸ੍ਸਾਮਾ’’ਤਿ ਸੁਨਖਾ ਵਿਯ ਭੂਮਿਯਂ ਵਾ ਭੁਞ੍ਜਨ੍ਤਿ ਹਤ੍ਥੇਸੁ ਵਾ. ‘‘ਸੇਨਾਸਨਪਵਿਵੇਕਂ ਪਾਲੇਸ੍ਸਾਮਾ’’ਤਿ ਕਣ੍ਟਕਸੇਯ੍ਯਾਦੀਨਿ ਕਪ੍ਪੇਨ੍ਤਿ. ਰੂਪੇ ਨਿਵਿਟ੍ਠਾਤਿ ਤਣ੍ਹਾਦਿਟ੍ਠੀਹਿ ਰੂਪੇ ਪਤਿਟ੍ਠਿਤਾ. ਦੇਵਲੋਕਾਭਿਨਨ੍ਦਿਨੋਤਿ ਦੇਵਲੋਕਪਤ੍ਥਨਕਾਮਾ. ਮਾਤਿਯਾਤਿ ਮਚ੍ਚਾ, ਤੇ ਵੇ ਮਚ੍ਚਾ ਪਰਲੋਕਤ੍ਥਾਯ ਸਮ੍ਮਾ ਅਨੁਸਾਸਨ੍ਤੀਤਿ ਵਦਤਿ.
ਇਤਿ ਵਿਦਿਤ੍ਵਾਤਿ ‘‘ਅਯਂ ਪਠਮਂ ਏਤੇਸਂ ਅਵਣ੍ਣਂ ਕਥੇਤ੍ਵਾ ਇਦਾਨਿ ਵਣ੍ਣਂ ਕਥੇਤਿ, ਕੋ ਨੁ ਖੋ ਏਸੋ’’ਤਿ ਆਵਜ੍ਜੇਨ੍ਤੋ ਜਾਨਿਤ੍ਵਾਵ. ਯੇ ਚਨ੍ਤਲਿਕ੍ਖਸ੍ਮਿਂ ਪਭਾਸਵਣ੍ਣਾਤਿ ਯੇ ਅਨ੍ਤਲਿਕ੍ਖੇ ਚਨ੍ਦੋਭਾਸਸੂਰਿਯੋਭਾਸਸਞ੍ਝਾਰਾਗਇਨ੍ਦਧਨੁਤਾਰਕਰੂਪਾਨਂ ਪਭਾਸਵਣ੍ਣਾ. ਸਬ੍ਬੇਵ ਤੇ ਤੇਤਿ ਸਬ੍ਬੇਵ ਤੇ ਤਯਾ. ਨਮੁਚੀਤਿ ਮਾਰਂ ਆਲਪਤਿ. ਆਮਿਸਂਵ ਮਚ੍ਛਾਨਂ ਵਧਾਯ ਖਿਤ੍ਤਾਤਿ ਯਥਾ ਮਚ੍ਛਾਨਂ ਵਧਤ੍ਥਾਯ ਬਲ਼ਿਸਲਗ੍ਗਂ ਆਮਿਸਂ ਖਿਪਤਿ, ਏਵਂ ਤਯਾ ਪਸਂਸਮਾਨੇਨ ਏਤੇ ਰੂਪਾ ਸਤ੍ਤਾਨਂ ਵਧਾਯ ਖਿਤ੍ਤਾਤਿ ਵਦਤਿ.
ਮਾਣਵਗਾਮਿਯੋਤਿ ਅਯਂ ਕਿਰ ਦੇਵਪੁਤ੍ਤੋ ਬੁਦ੍ਧੁਪਟ੍ਠਾਕੋ. ਰਾਜਗਹੀਯਾਨਨ੍ਤਿ ਰਾਜਗਹਪਬ੍ਬਤਾਨਂ. ਸੇਤੋਤਿ ਕੇਲਾਸੋ. ਅਘਗਾਮਿਨਨ੍ਤਿ ਆਕਾਸਗਾਮੀਨਂ. ਉਦਧਿਨਨ੍ਤਿ ਉਦਕਨਿਧਾਨਾਨਂ. ਇਦਂ ਵੁਤ੍ਤਂ ਹੋਤਿ – ਯਥਾ ਰਾਜਗਹੀਯਾਨਂ ਪਬ੍ਬਤਾਨਂ ਵਿਪੁਲੋ ਸੇਟ੍ਠੋ, ਹਿਮਵਨ੍ਤਪਬ੍ਬਤਾਨਂ ਕੇਲਾਸੋ, ਆਕਾਸਗਾਮੀਨਂ ਆਦਿਚ੍ਚੋ, ਉਦਕਨਿਧਾਨਾਨਂ ਸਮੁਦ੍ਦੋ, ਨਕ੍ਖਤ੍ਤਾਨਂ ਚਨ੍ਦੋ, ਏਵਂ ਸਦੇਵਕਸ੍ਸ ਲੋਕਸ੍ਸ ਬੁਦ੍ਧੋ ਸੇਟ੍ਠੋਤਿ. ਦਸਮਂ.
ਨਾਨਾਤਿਤ੍ਥਿਯਵਗ੍ਗੋ ਤਤਿਯੋ.
ਇਤਿ ਸਾਰਤ੍ਥਪ੍ਪਕਾਸਿਨਿਯਾ
ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਦੇਵਪੁਤ੍ਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.