੩. ਕੋਸਲਸਂਯੁਤ੍ਤਂ
੧. ਪਠਮਵਗ੍ਗੋ
੧. ਦਹਰਸੁਤ੍ਤਵਣ੍ਣਨਾ
੧੧੨. ਕੋਸਲਸਂਯੁਤ੍ਤਸ੍ਸ ਪਠਮੇ ਭਗਵਤਾ ਸਦ੍ਧਿਂ ਸਮ੍ਮੋਦੀਤਿ ਯਥਾ ਖਮਨੀਯਾਦੀਨਿ ਪੁਚ੍ਛਨ੍ਤੋ ਭਗਵਾ ਤੇਨ, ਏਵਂ ਸੋਪਿ ਭਗਵਤਾ ਸਦ੍ਧਿਂ ਸਮਪ੍ਪਵਤ੍ਤਮੋਦੋ ਅਹੋਸਿ. ਸੀਤੋਦਕਂ ਵਿਯ ਉਣ੍ਹੋਦਕੇਨ ਸਮ੍ਮੋਦਿਤਂ ਏਕੀਭਾਵਂ ਅਗਮਾਸਿ. ਯਾਯ ਚ – ‘‘ਕਚ੍ਚਿ, ਭੋ ਗੋਤਮ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਭੋਤੋ ਚ ਗੋਤਮਸ੍ਸ ਸਾਵਕਾਨਞ੍ਚ ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰੋ’’ਤਿਆਦਿਕਾਯ ਕਥਾਯ ਸਮ੍ਮੋਦਿ, ਤਂ ਪੀਤਿਪਾਮੋਜ੍ਜਸਙ੍ਖਾਤਸਮ੍ਮੋਦਜਨਨਤੋ ਸਮ੍ਮੋਦਿਤੁਂ ਯੁਤ੍ਤਭਾਵਤੋ ਚ ਸਮ੍ਮੋਦਨੀਯਂ, ਅਤ੍ਥਬ੍ਯਞ੍ਜਨਮਧੁਰਤਾਯ ਚਿਰਮ੍ਪਿ ਕਾਲਂ ਸਾਰੇਤੁਂ ਨਿਰਨ੍ਤਰਂ ਪਵਤ੍ਤੇਤੁਂ ਅਰਹਰੂਪਤੋ ਸਰਿਤਬ੍ਬਭਾਵਤੋ ਚ ਸਾਰਣੀਯਂ. ਸੁਯ੍ਯਮਾਨਸੁਖਤੋ ਚ ਸਮ੍ਮੋਦਨੀਯਂ, ਅਨੁਸ੍ਸਰਿਯਮਾਨਸੁਖਤੋ ਸਾਰਣੀਯਂ. ਤਥਾ ਬ੍ਯਞ੍ਜਨਪਰਿਸੁਦ੍ਧਤਾਯ ਸਮ੍ਮੋਦਨੀਯਂ, ਅਤ੍ਥਪਰਿਸੁਦ੍ਧਤਾਯ ਸਾਰਣੀਯਨ੍ਤਿ ਏਵਂ ਅਨੇਕੇਹਿ ਪਰਿਯਾਯੇਹਿ ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਪਰਿਯੋਸਾਪੇਤ੍ਵਾ ਨਿਟ੍ਠਪੇਤ੍ਵਾ ਇਤੋ ਪੁਬ੍ਬੇ ਤਥਾਗਤਸ੍ਸ ਅਦਿਟ੍ਠਤ੍ਤਾ ਗੁਣਾਗੁਣਵਸੇਨ ਗਮ੍ਭੀਰਭਾਵਂ ਵਾ ਉਤ੍ਤਾਨਭਾਵਂ ਵਾ ਅਜਾਨਨ੍ਤੋ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨੋ ਖੋ ਯਂ ਓਵਟ੍ਟਿਕਸਾਰਂ ਕਤ੍ਵਾ ਆਗਤੋ ਲੋਕਨਿਸ੍ਸਰਣਭਵੋਕ੍ਕਨ੍ਤਿਪਞ੍ਹਂ ਸਤ੍ਥੁ ਸਮ੍ਮਾਸਮ੍ਬੁਦ੍ਧਤਂ ਪੁਚ੍ਛਿਤੁਂ ਭਵਮ੍ਪਿ ਨੋਤਿਆਦਿਮਾਹ.
ਤਤ੍ਥ ਭਵਮ੍ਪੀਤਿ ਪਿ-ਕਾਰੋ ਸਮ੍ਪਿਣ੍ਡਨਤ੍ਥੇ ਨਿਪਾਤੋ, ਤੇਨ ਚ ਛ ਸਤ੍ਥਾਰੇ ਸਮ੍ਪਿਣ੍ਡੇਤਿ. ਯਥਾ ਪੂਰਣਾਦਯੋ ‘‘ਸਮ੍ਮਾਸਮ੍ਬੁਦ੍ਧਮ੍ਹਾ’’ਤਿ ਪਟਿਜਾਨਨ੍ਤਿ, ਏਵਂ ਭਵਮ੍ਪਿ ਨੁ ਪਟਿਜਾਨਾਤੀਤਿ ਅਤ੍ਥੋ. ਇਦਂ ਪਨ ਰਾਜਾ ਨ ਅਤ੍ਤਨੋ ਲਦ੍ਧਿਯਾ, ਲੋਕੇ ਮਹਾਜਨੇਨ ਗਹਿਤਪਟਿਞ੍ਞਾਵਸੇਨ ਪੁਚ੍ਛਤਿ. ਅਥ ਭਗਵਾ ਬੁਦ੍ਧਸੀਹਨਾਦਂ ਨਦਨ੍ਤੋ ਯਂ ਹਿ ਤਂ ਮਹਾਰਾਜਾਤਿਆਦਿਮਾਹ. ਤਤ੍ਥ ਅਹਂ ਹਿ ਮਹਾਰਾਜਾਤਿ ਅਨੁਤ੍ਤਰਂ ਸਬ੍ਬਸੇਟ੍ਠਂ ਸਬ੍ਬਞ੍ਞੁਤਞ੍ਞਾਣਸਙ੍ਖਾਤਂ ਸਮ੍ਮਾਸਮ੍ਬੋਧਿਂ ਅਹਂ ਅਭਿਸਮ੍ਬੁਦ੍ਧੋਤਿ ਅਤ੍ਥੋ. ਸਮਣਬ੍ਰਾਹ੍ਮਣਾਤਿ ਪਬ੍ਬਜ੍ਜੂਪਗਮਨੇਨ ਸਮਣਾ, ਜਾਤਿਵਸੇਨ ਬ੍ਰਾਹ੍ਮਣਾ. ਸਙ੍ਘਿਨੋਤਿਆਦੀਸੁ ਪਬ੍ਬਜਿਤਸਮੂਹਸਙ੍ਖਾਤੋ ਸਙ੍ਘੋ ਏਤੇਸਂ ਅਤ੍ਥੀਤਿ ਸਙ੍ਘਿਨੋ. ਸ੍ਵੇਵ ਗਣੋ ਏਤੇਸਂ ਅਤ੍ਥੀਤਿ ਗਣਿਨੋ. ਆਚਾਰਸਿਕ੍ਖਾਪਨਵਸੇਨ ਤਸ੍ਸ ਗਣਸ੍ਸ ਆਚਰਿਯਾਤਿ ਗਣਾਚਰਿਯਾ. ਞਾਤਾਤਿ ਪਞ੍ਞਾਤਾ ਪਾਕਟਾ. ‘‘ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਅਪ੍ਪਿਚ੍ਛਤਾਯ ਵਤ੍ਥਮ੍ਪਿ ਨ ਨਿਵਾਸੇਨ੍ਤੀ’’ਤਿ ਏਵਂ ਸਮੁਗ੍ਗਤੋ ਯਸੋ ਏਤੇਸਂ ਅਤ੍ਥੀਤਿ ਯਸਸ੍ਸਿਨੋ. ਤਿਤ੍ਥਕਰਾਤਿ ਲਦ੍ਧਿਕਰਾ. ਸਾਧੁਸਮ੍ਮਤਾਤਿ ‘‘ਸਨ੍ਤੋ ਸਪ੍ਪੁਰਿਸਾ’’ਤਿ ਏਵਂ ਸਮ੍ਮਤਾ. ਬਹੁਜਨਸ੍ਸਾਤਿ ਅਸ੍ਸੁਤਵਤੋ ਅਨ੍ਧਬਾਲਪੁਥੁਜ੍ਜਨਸ੍ਸ. ਪੂਰਣੋਤਿਆਦੀਨਿ ਤੇਸਂ ਨਾਮਗੋਤ੍ਤਾਨਿ. ਪੂਰਣੋਤਿ ਹਿ ਨਾਮਮੇਵ. ਤਥਾ, ਮਕ੍ਖਲੀਤਿ. ਸੋ ਪਨ ਗੋਸਾਲਾਯ ਜਾਤਤ੍ਤਾ ਗੋਸਾਲੋਤਿ ਵੁਤ੍ਤੋ. ਨਾਟਪੁਤ੍ਤੋਤਿ ਨਾਟਸ੍ਸ ਪੁਤ੍ਤੋ. ਬੇਲਟ੍ਠਪੁਤ੍ਤੋਤਿ ਬੇਲਟ੍ਠਸ੍ਸ ਪੁਤ੍ਤੋ. ਕਚ੍ਚਾਯਨੋਤਿ ਪਕੁਧਸ੍ਸ ਗੋਤ੍ਤਂ. ਕੇਸਕਮ੍ਬਲਸ੍ਸ ਧਾਰਣਤੋ ਅਜਿਤੋ ਕੇਸਕਮ੍ਬਲੋਤਿ ਵੁਤ੍ਤੋ.
ਤੇਪਿ ਮਯਾਤਿ ਕਪ੍ਪਕੋਲਾਹਲਂ ਬੁਦ੍ਧਕੋਲਾਹਲਂ ਚਕ੍ਕਵਤ੍ਤਿਕੋਲਾਹਲਨ੍ਤਿ ਤੀਣਿ ਕੋਲਾਹਲਾਨਿ. ਤਤ੍ਥ ‘‘ਵਸ੍ਸਸਤਸਹਸ੍ਸਮਤ੍ਥਕੇ ਕਪ੍ਪੁਟ੍ਠਾਨਂ ਭਵਿਸ੍ਸਤੀ’’ਤਿ ਕਪ੍ਪਕੋਲਾਹਲਂ ਨਾਮ ਹੋਤਿ – ‘‘ਇਤੋ ਵਸ੍ਸਸਤਸਹਸ੍ਸਮਤ੍ਥਕੇ ਲੋਕੋ ਵਿਨਸ੍ਸਿਸ੍ਸਤਿ, ਮੇਤ੍ਤਂ ਮਾਰਿਸਾ, ਭਾਵੇਥ, ਕਰੁਣਂ ਮੁਦਿਤਂ ਉਪੇਕ੍ਖ’’ਨ੍ਤਿ ਮਨੁਸ੍ਸਪ੍ਪਥੇ ਦੇਵਤਾ ਘੋਸੇਨ੍ਤਿਯੋ ਵਿਚਰਨ੍ਤਿ. ‘‘ਵਸ੍ਸਸਹਸ੍ਸਮਤ੍ਥਕੇ ਪਨ ਬੁਦ੍ਧੋ ਉਪ੍ਪਜ੍ਜਿਸ੍ਸਤੀ’’ਤਿ ਬੁਦ੍ਧਕੋਲਾਹਲਂ ਨਾਮ ਹੋਤਿ – ‘‘ਇਤੋ ਵਸ੍ਸਸਹਸ੍ਸਮਤ੍ਥਕੇ ਬੁਦ੍ਧੋ ਉਪ੍ਪਜ੍ਜਿਤ੍ਵਾ ਧਮ੍ਮਾਨੁਧਮ੍ਮਪਟਿਪਦਂ ਪਟਿਪਨ੍ਨੇਨ ਸਙ੍ਘਰਤਨੇਨ ਪਰਿਵਾਰਿਤੋ ਧਮ੍ਮਂ ਦੇਸੇਨ੍ਤੋ ਵਿਚਰਿਸ੍ਸਤੀ’’ਤਿ ਦੇਵਤਾ ਉਗ੍ਘੋਸੇਨ੍ਤਿ. ‘‘ਵਸ੍ਸਸਤਮਤ੍ਥਕੇ ਪਨ ਚਕ੍ਕਵਤ੍ਤੀ ਉਪ੍ਪਜ੍ਜਿਸ੍ਸਤੀ’’ਤਿ ਚਕ੍ਕਵਤ੍ਤਿਕੋਲਾਹਲਂ ਨਾਮ ਹੋਤਿ – ‘‘ਇਤੋ ਵਸ੍ਸਸਤਮਤ੍ਥਕੇ ਸਤ੍ਤਰਤਨਸਮ੍ਪਨ੍ਨੋ ਚਤੁਦ੍ਦੀਪਿਸ੍ਸਰੋ ਸਹਸ੍ਸ ਪੁਤ੍ਤਪਰਿਵਾਰੋ ਵੇਹਾਸਙ੍ਗਮੋ ਚਕ੍ਕਵਤ੍ਤਿਰਾਜਾ ਉਪ੍ਪਜ੍ਜਿਸ੍ਸਤੀ’’ਤਿ ਦੇਵਤਾ ਉਗ੍ਘੋਸੇਨ੍ਤਿ.
ਇਮੇਸੁ ਤੀਸੁ ਕੋਲਾਹਲੇਸੁ ਇਮੇ ਛ ਸਤ੍ਥਾਰੋ ਬੁਦ੍ਧਕੋਲਾਹਲਂ ਸੁਤ੍ਵਾ ਆਚਰਿਯੇ ਪਯਿਰੁਪਾਸਿਤ੍ਵਾ ਚਿਨ੍ਤਾਮਾਣਿਵਿਜ੍ਜਾਦੀਨਿ ਉਗ੍ਗਣ੍ਹਿਤ੍ਵਾ – ‘‘ਮਯਂ ਬੁਦ੍ਧਮ੍ਹਾ’’ਤਿ ਪਟਿਞ੍ਞਂ ਕਤ੍ਵਾ ਮਹਾਜਨਪਰਿਵੁਤਾ ਜਨਪਦਂ ਵਿਚਰਨ੍ਤਾ ਅਨੁਪੁਬ੍ਬੇਨ ਸਾਵਤ੍ਥਿਯਂ ਪਤ੍ਤਾ. ਤੇਸਂ ਉਪਟ੍ਠਾਕਾ ਰਾਜਾਨਂ ਉਪਸਙ੍ਕਮਿਤ੍ਵਾ, ‘‘ਮਹਾਰਾਜ, ਪੂਰਣੋ ਕਸ੍ਸਪੋ…ਪੇ… ਅਜਿਤੋ ਕੇਸਕਮ੍ਬਲੋ ਬੁਦ੍ਧੋ ਕਿਰ ਸਬ੍ਬਞ੍ਞੂ ਕਿਰਾ’’ਤਿ ਆਰੋਚੇਸੁਂ. ਰਾਜਾ ‘‘ਤੁਮ੍ਹੇਵ ਨੇ ਨਿਮਨ੍ਤੇਤ੍ਵਾ ਆਨੇਥਾ’’ਤਿ ਆਹ. ਤੇ ਗਨ੍ਤ੍ਵਾ ਤੇਹਿ, ‘‘ਰਾਜਾ ਵੋ ਨਿਮਨ੍ਤੇਤਿ. ਰਞ੍ਞੋ ਗੇਹੇ ਭਿਕ੍ਖਂ ਗਣ੍ਹਥਾ’’ਤਿ ਵੁਤ੍ਤਾ ਗਨ੍ਤੁਂ ਨ ਉਸ੍ਸਹਨ੍ਤਿ, ਪੁਨਪ੍ਪੁਨਂ ਵੁਚ੍ਚਮਾਨਾ ਉਪਟ੍ਠਾਕਾਨਂ ਚਿਤ੍ਤਾਨੁਰਕ੍ਖਣਤ੍ਥਾਯ ਅਧਿਵਾਸੇਤ੍ਵਾ ਸਬ੍ਬੇ ਏਕਤੋਵ ਅਗਮਂਸੁ. ਰਾਜਾ ਆਸਨਾਨਿ ਪਞ੍ਞਾਪੇਤ੍ਵਾ ‘‘ਨਿਸੀਦਨ੍ਤੂ’’ਤਿ ਆਹ. ਨਿਗ੍ਗੁਣਾਨਂ ਅਤ੍ਤਭਾਵੇ ਰਾਜੁਸ੍ਮਾ ਨਾਮ ਫਰਤਿ, ਤੇ ਮਹਾਰਹੇਸੁ ਆਸਨੇਸੁ ਨਿਸੀਦਿਤੁਂ ਅਸਕ੍ਕੋਨ੍ਤਾ ਫਲਕੇਸੁ ਚੇਵ ਭੂਮਿਯਂ ਚ ਨਿਸੀਦਿਂਸੁ.
ਰਾਜਾ ‘‘ਏਤ੍ਤਕੇਨੇਵ ਨਤ੍ਥਿ ਤੇਸਂ ਅਨ੍ਤੋ ਸੁਕ੍ਕਧਮ੍ਮੋ’’ਤਿ ਵਤ੍ਵਾ ਆਹਾਰਂ ਅਦਤ੍ਵਾਵ ਤਾਲਤੋ ਪਤਿਤਂ ਮੁਗ੍ਗਰੇਨ ਪੋਥੇਨ੍ਤੋ ਵਿਯ ‘‘ਤੁਮ੍ਹੇ ਬੁਦ੍ਧਾ, ਨ ਬੁਦ੍ਧਾ’’ਤਿ ਪਞ੍ਹਂ ਪੁਚ੍ਛਿ. ਤੇ ਚਿਨ੍ਤਯਿਂਸੁ – ‘‘ਸਚੇ ‘ਬੁਦ੍ਧਮ੍ਹਾ’ਤਿ ਵਕ੍ਖਾਮ, ਰਾਜਾ ਬੁਦ੍ਧਵਿਸਯੇ ਪਞ੍ਹਂ ਪੁਚ੍ਛਿਤ੍ਵਾ ਕਥੇਤੁਂ ਅਸਕ੍ਕੋਨ੍ਤੇ ‘ਤੁਮ੍ਹੇ ਮਯਂ ਬੁਦ੍ਧਾਤਿ ਮਹਾਜਨਂ ਵਞ੍ਚੇਤ੍ਵਾ ਆਹਿਣ੍ਡਥਾ’ਤਿ ਜਿਵ੍ਹਮ੍ਪਿ ਛਿਨ੍ਦਾਪੇਯ੍ਯ, ਅਞ੍ਞਮ੍ਪਿ ਅਨਤ੍ਥਂ ਕਰੇਯ੍ਯਾ’’ਤਿ ਸਕਪਟਿਞ੍ਞਾਯ ਏਵ ‘ਨ ਮਯਂ ਬੁਦ੍ਧਾ’ਤਿ ਵਦਿਂਸੁ. ਅਥ ਨੇ ਰਾਜਾ ਗੇਹਤੋ ਨਿਕਡ੍ਢਾਪੇਸਿ. ਤੇ ਰਾਜਘਰਤੋ ਨਿਕ੍ਖਨ੍ਤੇ ਉਪਟ੍ਠਾਕਾ ਪੁਚ੍ਛਿਂਸੁ – ‘‘ਕਿਂ ਆਚਰਿਯਾ ਰਾਜਾ ਤੁਮ੍ਹੇ ਪਞ੍ਹਂ ਪੁਚ੍ਛਿਤ੍ਵਾ ਸਕ੍ਕਾਰਸਮ੍ਮਾਨਂ ਅਕਾਸੀ’’ਤਿ? ਰਾਜਾ ‘‘ਬੁਦ੍ਧਾ ਤੁਮ੍ਹੇ’’ਤਿ ਪੁਚ੍ਛਿ, ਤਤੋ ਮਯਂ – ‘‘ਸਚੇ ਅਯਂ ਰਾਜਾ ਬੁਦ੍ਧਵਿਸਯੇ ਪਞ੍ਹਂ ਕਥਿਯਮਾਨਂ ਅਜਾਨਨ੍ਤੋ ਅਮ੍ਹੇਸੁ ਮਨਂ ਪਦੋਸੇਸ੍ਸਤਿ, ਬਹੁਂ ਅਪੁਞ੍ਞਂ ਪਸਵਿਸ੍ਸਤੀ’’ਤਿ ਰਞ੍ਞੋ ਅਨੁਕਮ੍ਪਾਯ ‘ਨ ਮਯਂ ਬੁਦ੍ਧਾ’ਤਿ ਵਦਿਮ੍ਹਾ, ਮਯਂ ਪਨ ਬੁਦ੍ਧਾ ਏਵ, ਅਮ੍ਹਾਕਂ ਬੁਦ੍ਧਭਾਵੋ, ਉਦਕੇਨ ਧੋਵਿਤ੍ਵਾਪਿ ਹਰਿਤੁਂ ਨ ਸਕ੍ਕਾਤਿ. ਇਤਿ ਬਹਿਦ੍ਧਾ ‘ਬੁਦ੍ਧਮ੍ਹਾ’ਤਿ ਆਹਂਸੁ – ਰਞ੍ਞੋ ਸਨ੍ਤਿਕੇ ‘ਨ ਮਯਂ ਬੁਦ੍ਧਾ’ਤਿ ਵਦਿਂਸੂਤਿ, ਇਦਂ ਗਹੇਤ੍ਵਾ ਰਾਜਾ ਏਵਮਾਹ. ਤਤ੍ਥ ਕਿਂ ਪਨ ਭਵਂ ਗੋਤਮੋ ਦਹਰੋ ਚੇਵ ਜਾਤਿਯਾ, ਨਵੋ ਚ ਪਬ੍ਬਜ੍ਜਾਯਾਤਿ ਇਦਂ ਅਤ੍ਤਨੋ ਪਟਿਞ੍ਞਂ ਗਹੇਤ੍ਵਾ ਵਦਤਿ. ਤਤ੍ਥ ਕਿਨ੍ਤਿ ਪਟਿਕ੍ਖੇਪਵਚਨਂ. ਏਤੇ ਜਾਤਿਮਹਲ੍ਲਕਾ ਚ ਚਿਰਪਬ੍ਬਜਿਤਾ ਚ ‘‘ਬੁਦ੍ਧਮ੍ਹਾ’’ਤਿ ਨ ਪਟਿਜਾਨਨ੍ਤਿ, ਭਵਂ ਗੋਤਮੋ ਜਾਤਿਯਾ ਚ ਦਹਰੋ ਪਬ੍ਬਜ੍ਜਾਯ ਚ ਨਵੋ ਕਿਂ ਪਟਿਜਾਨਾਤਿ? ਮਾ ਪਟਿਜਾਨਾਹੀਤਿ ਅਤ੍ਥੋ.
ਨ ਉਞ੍ਞਾਤਬ੍ਬਾਤਿ ਨ ਅਵਜਾਨਿਤਬ੍ਬਾ. ਨ ਪਰਿਭੋਤਬ੍ਬਾਤਿ ਨ ਪਰਿਭਵਿਤਬ੍ਬਾ. ਕਤਮੇ ਚਤ੍ਤਾਰੋਤਿ ਕਥੇਤੁਕਮ੍ਯਤਾਪੁਚ੍ਛਾ. ਖਤ੍ਤਿਯੋਤਿ ਰਾਜਕੁਮਾਰੋ. ਉਰਗੋਤਿ ਆਸੀਵਿਸੋ. ਅਗ੍ਗੀਤਿ ਅਗ੍ਗਿਯੇਵ. ਭਿਕ੍ਖੂਤਿ ਇਮਸ੍ਮਿਂ ਪਨ ਪਦੇ ਦੇਸਨਾਕੁਸਲਤਾਯ ਅਤ੍ਤਾਨਂ ਅਬ੍ਭਨ੍ਤਰਂ ਕਤ੍ਵਾ ਸੀਲਵਨ੍ਤਂ ਪਬ੍ਬਜਿਤਂ ਦਸ੍ਸੇਤਿ. ਏਤ੍ਥ ਚ ਦਹਰਂ ਰਾਜਕੁਮਾਰਂ ਦਿਸ੍ਵਾ, ਉਕ੍ਕਮਿਤ੍ਵਾ ਮਗ੍ਗਂ ਅਦੇਨ੍ਤੋ, ਪਾਰੁਪਨਂ ਅਨਪਨੇਨ੍ਤੋ, ਨਿਸਿਨ੍ਨਾਸਨਤੋ ਅਨੁਟ੍ਠਹਨ੍ਤੋ, ਹਤ੍ਥਿਪਿਟ੍ਠਾਦੀਹਿ ਅਨੋਤਰਨ੍ਤੋ, ਹੇਟ੍ਠਾ ਕਤ੍ਵਾ ਮਞ੍ਞਨਵਸੇਨ ਅਞ੍ਞਮ੍ਪਿ ਏਵਰੂਪਂ ਅਨਾਚਾਰਂ ਕਰੋਨ੍ਤੋ ਖਤ੍ਤਿਯਂ ਅਵਜਾਨਾਤਿ ਨਾਮ. ‘‘ਭਦ੍ਦਕੋ ਵਤਾਯਂ ਰਾਜਕੁਮਾਰੋ, ਮਹਾਕਣ੍ਡੋ ਮਹੋਦਰੋ – ਕਿਂ ਨਾਮ ਯਂਕਿਞ੍ਚਿ ਚੋਰੂਪਦ੍ਦਵਂ ਵੂਪਸਮੇਤੁਂ ਯਤ੍ਥ ਕਤ੍ਥਚਿ ਠਾਨੇ ਰਜ੍ਜਂ ਅਨੁਸਾਸਿਤੁਂ ਸਕ੍ਖਿਸ੍ਸਤੀ’’ਤਿਆਦੀਨਿ ਵਦਨ੍ਤੋ ਪਰਿਭੋਤਿ ਨਾਮ. ਅਞ੍ਜਨਿਸਲਾਕਮਤ੍ਤਮ੍ਪਿ ਆਸੀਵਿਸਪੋਤਕਂ ਕਣ੍ਣਾਦੀਸੁ ਪਿਲ਼ਨ੍ਧਨ੍ਤੋ ਅਙ੍ਗੁਲਿਮ੍ਪਿ ਜਿਵ੍ਹਮ੍ਪਿ ਡਂਸਾਪੇਨ੍ਤੋ ਉਰਗਂ ਅਵਜਾਨਾਤਿ ਨਾਮ. ‘‘ਭਦ੍ਦਕੋ ਵਤਾਯਂ ਆਸੀਵਿਸੋ ਉਦਕਦੇਡ੍ਡੁਭੋ ਵਿਯ ਕਿਂ ਨਾਮ ਕਿਞ੍ਚਿਦੇਵ ਡਂਸਿਤੁਂ ਕਸ੍ਸਚਿਦੇਵ ਕਾਯੇ ਵਿਸਂ ਫਰਿਤੁਂ ਸਕ੍ਖਿਸ੍ਸਤੀ’’ਤਿਆਦੀਨਿ ਵਦਨ੍ਤੋ ਪਰਿਭੋਤਿ ਨਾਮ. ਖਜ੍ਜੋਪਨਕਮਤ੍ਤਮ੍ਪਿ ਅਗ੍ਗਿਂ ਗਹੇਤ੍ਵਾ ਹਤ੍ਥੇਨ ਕੀਲ਼ਨ੍ਤੋ ਭਣ੍ਡੁਕ੍ਖਲਿਕਾਯ ਖਿਪਨ੍ਤੋ ਚੂਲ਼ਾਯ ਵਾ ਸਯਨਪਿਟ੍ਠਸਾਟਕਪਸਿਬ੍ਬਕਾਦੀਸੁ ਵਾ ਠਪੇਨ੍ਤੋ ਅਗ੍ਗਿਂ ਅਵਜਾਨਾਤਿ ਨਾਮ. ‘‘ਭਦ੍ਦਕੋ ਵਤਾਯਂ ਅਗ੍ਗਿ ਕਤਰਂ ਨੁ ਖੋ ਯਾਗੁਭਤ੍ਤਂ ਪਚਿਸ੍ਸਤਿ, ਕਤਰਂ ਮਚ੍ਛਮਂਸਂ, ਕਸ੍ਸ ਸੀਤਂ ਵਿਨੋਦੇਸ੍ਸਤੀ’’ਤਿਆਦੀਨਿ ਵਦਨ੍ਤੋ ਪਰਿਭੋਤਿ ਨਾਮ. ਦਹਰਸਾਮਣੇਰਮ੍ਪਿ ਪਨ ਦਿਸ੍ਵਾ ਉਕ੍ਕਮਿਤ੍ਵਾ ਮਗ੍ਗਂ ਅਦੇਨ੍ਤੋਤਿ ਰਾਜਕੁਮਾਰੇ ਵੁਤ੍ਤਂ ਅਨਾਚਾਰਂ ਕਰੋਨ੍ਤੋ ਭਿਕ੍ਖੁਂ ਅਵਜਾਨਾਤਿ ਨਾਮ. ‘‘ਭਦ੍ਦਕੋ ਵਤਾਯਂ ਸਾਮਣੇਰੋ ਮਹਾਕਣ੍ਠੋ ਮਹੋਦਰੋ ਯਂਕਿਞ੍ਚਿ ਬੁਦ੍ਧਵਚਨਂ ਉਗ੍ਗਹੇਤੁਂ ਯਂਕਿਞ੍ਚਿ ਅਰਞ੍ਞਂ ਅਜ੍ਝੋਗਾਹੇਤ੍ਵਾ ਵਸਿਤੁਂ ਸਕ੍ਖਿਸ੍ਸਤਿ, ਸਙ੍ਘਤ੍ਥੇਰਕਾਲੇ ਮਨਾਪੋ ਭਵਿਸ੍ਸਤੀ’’ਤਿਆਦੀਨਿ ਵਦਨ੍ਤੋ ਪਰਿਭੋਤਿ ਨਾਮ. ਤਂ ਸਬ੍ਬਮ੍ਪਿ ਨ ਕਾਤਬ੍ਬਨ੍ਤਿ ਦਸ੍ਸੇਨ੍ਤੋ ਨ ਉਞ੍ਞਾਤਬ੍ਬੋ ਨ ਪਰਿਭੋਤਬ੍ਬੋਤਿ ਆਹ.
ਏਤਦਵੋਚਾਤਿ ਏਤਂ ਗਾਥਾਬਨ੍ਧਂ ਅਵੋਚ. ਗਾਥਾ ਚ ਨਾਮੇਤਾ ਤਦਤ੍ਥਦੀਪਨਾਪਿ ਹੋਨ੍ਤਿ ਵਿਸੇਸਤ੍ਥਦੀਪਨਾਪਿ, ਤਤ੍ਰਿਮਾ ਤਦਤ੍ਥਮ੍ਪਿ ਵਿਸੇਸਤ੍ਥਮ੍ਪਿ ਦੀਪੇਨ੍ਤਿਯੇਵ. ਤਤ੍ਥ ਖਤ੍ਤਿਯਨ੍ਤਿ ਖੇਤ੍ਤਾਨਂ ਅਧਿਪਤਿਂ. ਵੁਤ੍ਤਞ੍ਹੇਤਂ ‘‘ਖੇਤ੍ਤਾਨਂ ਅਧਿਪਤੀਤਿ ਖੋ, ਵਾਸੇਟ੍ਠ, ‘ਖਤ੍ਤਿਯੋ ਖਤ੍ਤਿਯੋ’ਤ੍ਵੇਵ ਦੁਤਿਯਂ ਅਕ੍ਖਰਂ ਉਪਨਿਬ੍ਬਤ੍ਤ’’ਨ੍ਤਿ (ਦੀ. ਨਿ. ੩.੧੩੧). ਜਾਤਿਸਮ੍ਪਨ੍ਨਨ੍ਤਿ ਤਾਯੇਵ ਖਤ੍ਤਿਯਜਾਤਿਯਾ ਜਾਤਿਸਮ੍ਪਨ੍ਨਂ. ਅਭਿਜਾਤਨ੍ਤਿ ਤੀਣਿ ਕੁਲਾਨਿ ਅਤਿਕ੍ਕਮਿਤ੍ਵਾ ਜਾਤਂ.
ਠਾਨਂ ਹੀਤਿ ਕਾਰਣਂ ਵਿਜ੍ਜਤਿ. ਮਨੁਜਿਨ੍ਦੋਤਿ ਮਨੁਸ੍ਸਜੇਟ੍ਠਕੋ. ਰਾਜਦਣ੍ਡੇਨਾਤਿ ਰਞ੍ਞੋ ਉਦ੍ਧਟਦਣ੍ਡੇਨ, ਸੋ ਅਪ੍ਪਕੋ ਨਾਮ ਨ ਹੋਤਿ, ਦਸਸਹਸ੍ਸਵੀਸਤਿਸਹਸ੍ਸਪ੍ਪਮਾਣੋ ਹੋਤਿਯੇਵ. ਤਸ੍ਮਿਂ ਪਕ੍ਕਮਤੇ ਭੁਸਨ੍ਤਿ ਤਸ੍ਮਿਂ ਪੁਗ੍ਗਲੇ ਬਲਵਉਪਕ੍ਕਮਂ ਉਪਕ੍ਕਮਤਿ. ਰਕ੍ਖਂ ਜੀਵਿਤਮਤ੍ਤਨੋਤਿ ਅਤ੍ਤਨੋ ਜੀਵਿਤਂ ਰਕ੍ਖਮਾਨੋ ਤਂ ਖਤ੍ਤਿਯਂ ਪਰਿਵਜ੍ਜੇਯ੍ਯ ਨ ਘਟ੍ਟੇਯ੍ਯ.
ਉਚ੍ਚਾਵਚੇਹੀਤਿ ਨਾਨਾਵਿਧੇਹਿ. ਵਣ੍ਣੇਹੀਤਿ ਸਣ੍ਠਾਨੇਹਿ. ਯੇਨ ਯੇਨ ਹਿ ਵਣ੍ਣੇਨ ਚਰਨ੍ਤੋ ਗੋਚਰਂ ਲਭਤਿ, ਯਦਿ ਸਪ੍ਪਵਣ੍ਣੇਨ, ਯਦਿ ਦੇਡ੍ਡੁਭਵਣ੍ਣੇਨ, ਯਦਿ ਧਮਨਿਵਣ੍ਣੇਨ, ਅਨ੍ਤਮਸੋ ਕਲਨ੍ਦਕਵਣ੍ਣੇਨਪਿ ਚਰਤਿਯੇਵ. ਆਸਜ੍ਜਾਤਿ ਪਤ੍ਵਾ. ਬਾਲਨ੍ਤਿ ਯੇਨ ਬਾਲੇਨ ਘਟ੍ਟਿਤੋ, ਤਂ ਬਾਲਂ ਨਰਂ ਵਾ ਨਾਰਿਂ ਵਾ ਡਂਸੇਯ੍ਯ.
ਪਹੂਤਭਕ੍ਖਨ੍ਤਿ ਬਹੁਭਕ੍ਖਂ. ਅਗ੍ਗਿਸ੍ਸ ਹਿ ਅਭਕ੍ਖਂ ਨਾਮ ਨਤ੍ਥਿ. ਜਾਲਿਨਨ੍ਤਿ ਜਾਲਵਨ੍ਤਂ. ਪਾਵਕਨ੍ਤਿ ਅਗ੍ਗਿਂ. ਪਾਵਗਨ੍ਤਿਪਿ ਪਾਠੋ. ਕਣ੍ਹਵਤ੍ਤਨਿਨ੍ਤਿ ਵਤ੍ਤਨੀਤਿ ਮਗ੍ਗੋ, ਅਗ੍ਗਿਨਾ ਗਤਮਗ੍ਗੋ ਕਣ੍ਹੋ ਹੋਤਿ ਕਾਲ਼ਕੋ, ਤਸ੍ਮਾ ‘‘ਕਣ੍ਹਵਤ੍ਤਨੀ’’ਤਿ ਵੁਚ੍ਚਤਿ.
ਮਹਾ ਹੁਤ੍ਵਾਨਾਤਿ ਮਹਨ੍ਤੋ ਹੁਤ੍ਵਾ. ਅਗ੍ਗਿ ਹਿ ਏਕਦਾ ਯਾਵਬ੍ਰਹ੍ਮਲੋਕਪ੍ਪਮਾਣੋਪਿ ਹੋਤਿ. ਜਾਯਨ੍ਤਿ ਤਤ੍ਥ ਪਾਰੋਹਾਤਿ ਤਤ੍ਥ ਅਗ੍ਗਿਨਾ ਦਡ੍ਢਵਨੇ ਪਾਰੋਹਾ ਜਾਯਨ੍ਤਿ. ਪਾਰੋਹਾਤਿ ਤਿਣਰੁਕ੍ਖਾਦਯੋ ਵੁਚ੍ਚਨ੍ਤਿ. ਤੇ ਹਿ ਅਗ੍ਗਿਨਾ ਦਡ੍ਢਟ੍ਠਾਨੇ ਮੂਲਮਤ੍ਤੇਪਿ ਅਵਸਿਟ੍ਠੇ ਪਾਦਤੋ ਰੋਹਨ੍ਤਿ ਜਾਯਨ੍ਤਿ ਵਡ੍ਢਨ੍ਤਿ, ਤਸ੍ਮਾ ‘‘ਪਾਰੋਹਾ’’ਤਿ ਵੁਚ੍ਚਨ੍ਤਿ. ਪੁਨ ਰੋਹਨਤ੍ਥੇਨ ਵਾ ਪਾਰੋਹਾ. ਅਹੋਰਤ੍ਤਾਨਮਚ੍ਚਯੇਤਿ ਰਤ੍ਤਿਨ੍ਦਿਵਾਨਂ ਅਤਿਕ੍ਕਮੇ. ਨਿਦਾਘੇਪਿ ਦੇਵੇ ਵੁਟ੍ਠਮਤ੍ਤੇ ਜਾਯਨ੍ਤਿ.
ਭਿਕ੍ਖੁ ਡਹਤਿ ਤੇਜਸਾਤਿ ਏਤ੍ਥ ਅਕ੍ਕੋਸਨ੍ਤਂ ਪਚ੍ਚਕ੍ਕੋਸਨ੍ਤੋ ਭਣ੍ਡਨ੍ਤਂ ਪਟਿਭਣ੍ਡਨ੍ਤੋ ਪਹਰਨ੍ਤਂ ਪਟਿਪਹਰਨ੍ਤੋ ਭਿਕ੍ਖੁ ਨਾਮ ਕਿਞ੍ਚਿ ਭਿਕ੍ਖੁਤੇਜਸਾ ਡਹਿਤੁਂ ਨ ਸਕ੍ਕੋਤਿ. ਯੋ ਪਨ ਅਕ੍ਕੋਸਨ੍ਤਂ ਨ ਪਚ੍ਚਕ੍ਕੋਸਤਿ, ਭਣ੍ਡਨ੍ਤਂ ਨ ਪਟਿਭਣ੍ਡਤਿ. ਪਹਰਨ੍ਤਂ ਨ ਪਟਿਪਹਰਤਿ, ਤਸ੍ਮਿਂ ਵਿਪ੍ਪਟਿਪਨ੍ਨੋ ਤਸ੍ਸ ਸੀਲਤੇਜੇਨ ਡਯ੍ਹਤਿ. ਤੇਨੇਵੇਤਂ ਵੁਤ੍ਤਂ. ਨ ਤਸ੍ਸ ਪੁਤ੍ਤਾ ਪਸਵੋਤਿ ਤਸ੍ਸ ਪੁਤ੍ਤਧੀਤਰੋਪਿ ਗੋਮਹਿਂਸਕੁਕ੍ਕੁਟਸੂਕਰਾਦਯੋ ਪਸਵੋਪਿ ਨ ਭਵਨ੍ਤਿ, ਵਿਨਸ੍ਸਨ੍ਤੀਤਿ ਅਤ੍ਥੋ. ਦਾਯਾਦਾ ਵਿਨ੍ਦਰੇ ਧਨਨ੍ਤਿ ਤਸ੍ਸ ਦਾਯਾਦਾਪਿ ਧਨਂ ਨ ਵਿਨ੍ਦਨ੍ਤਿ. ਤਾਲਾਵਤ੍ਥੂ ਭਵਨ੍ਤਿ ਤੇਤਿ ਤੇ ਭਿਕ੍ਖੁਤੇਜਸਾ ਦਡ੍ਢਾ ਵਤ੍ਥੁਮਤ੍ਤਾਵਸਿਟ੍ਠੋ ਮਤ੍ਥਕਚ੍ਛਿਨ੍ਨਤਾਲੋ ਵਿਯ ਭਵਨ੍ਤਿ, ਪੁਤ੍ਤਧੀਤਾਦਿਵਸੇਨ ਨ ਵਡ੍ਢਨ੍ਤੀਤਿ ਅਤ੍ਥੋ.
ਤਸ੍ਮਾਤਿ ਯਸ੍ਮਾ ਸਮਣਤੇਜੇਨ ਦਡ੍ਢਾ ਮਤ੍ਥਕਚ੍ਛਿਨ੍ਨਤਾਲੋ ਵਿਯ ਅਵਿਰੁਲ਼੍ਹਿਧਮ੍ਮਾ ਭਵਨ੍ਤਿ, ਤਸ੍ਮਾ. ਸਮ੍ਮਦੇਵ ਸਮਾਚਰੇਤਿ ਸਮ੍ਮਾ ਸਮਾਚਰੇਯ੍ਯ. ਸਮ੍ਮਾ ਸਮਾਚਰਨ੍ਤੇਨ ਪਨ ਕਿਂ ਕਾਤਬ੍ਬਨ੍ਤਿ? ਖਤ੍ਤਿਯਂ ਤਾਵ ਨਿਸ੍ਸਾਯ ਲਦ੍ਧਬ੍ਬਂ ਗਾਮਨਿਗਮਯਾਨਵਾਹਨਾਦਿਆਨਿਸਂਸਂ, ਉਰਗਂ ਨਿਸ੍ਸਾਯ ਤਸ੍ਸ ਕੀਲ਼ਾਪਨੇਨ ਲਦ੍ਧਬ੍ਬਂ ਵਤ੍ਥਹਿਰਞ੍ਞਸੁਵਣ੍ਣਾਦਿਆਨਿਸਂਸਂ ਅਗ੍ਗਿਂ ਨਿਸ੍ਸਾਯ ਤਸ੍ਸਾਨੁਭਾਵੇਨ ਪਤ੍ਤਬ੍ਬਂ ਯਾਗੁਭਤ੍ਤਪਚਨਸੀਤਵਿਨੋਦਨਾਦਿਆਨਿਸਂਸਂ, ਭਿਕ੍ਖੁਂ ਨਿਸ੍ਸਾਯ ਤਸ੍ਸ ਵਸੇਨ ਪਤ੍ਤਬ੍ਬਂ ਅਸੁਤਸਵਨਸੁਤਪਰਿਯੋਦਪਨ-ਸਗ੍ਗਮਗ੍ਗਾਧਿਗਮਾਦਿਆਨਿਸਂਸਂ ਸਮ੍ਪਸ੍ਸਮਾਨੇਨ ‘‘ਏਤੇ ਨਿਸ੍ਸਾਯ ਪੁਬ੍ਬੇ ਵੁਤ੍ਤਪ੍ਪਕਾਰੋ ਆਦੀਨਵੋ ਅਤ੍ਥਿ. ਕਿਂ ਇਮੇਹੀ’’ਤਿ? ਨ ਸਬ੍ਬਸੋ ਪਹਾਤਬ੍ਬਾ. ਇਸ੍ਸਰਿਯਤ੍ਥਿਕੇਨ ਪਨ ਵੁਤ੍ਤਪ੍ਪਕਾਰਂ ਅਵਜਾਨਨਞ੍ਚ ਪਰਿਭਵਨਞ੍ਚ ਅਕਤ੍ਵਾ ਪੁਬ੍ਬੁਟ੍ਠਾਯਿਪਚ੍ਛਾਨਿਪਾਤਿਤਾਦੀਹਿ ਉਪਾਯੇਹਿ ਖਤ੍ਤਿਯਕੁਮਾਰੋ ਤੋਸੇਤਬ੍ਬੋ, ਏਵਂ ਤਤੋ ਇਸ੍ਸਰਿਯਂ ਅਧਿਗਮਿਸ੍ਸਤਿ. ਅਹਿਤੁਣ੍ਡਿਕੇਨ ਉਰਗੇ ਵਿਸ੍ਸਾਸਂ ਅਕਤ੍ਵਾ ਨਾਗਵਿਜ੍ਜਂ ਪਰਿਵਤ੍ਤੇਤ੍ਵਾ ਅਜਪਦੇਨ ਦਣ੍ਡੇਨ ਗੀਵਾਯ ਗਹੇਤ੍ਵਾ ਵਿਸਹਰੇਨ ਮੂਲੇਨ ਦਾਠਾ ਧੋਵਿਤ੍ਵਾ ਪੇਲ਼ਾਯਂ ਪਕ੍ਖਿਪਿਤ੍ਵਾ ਕੀਲ਼ਾਪੇਨ੍ਤੇਨ ਚਰਿਤਬ੍ਬਂ. ਏਵਂ ਤਂ ਨਿਸ੍ਸਾਯ ਘਾਸਚ੍ਛਾਦਨਾਦੀਨਿ ਲਭਿਸ੍ਸਤਿ. ਯਾਗੁਪਚਨਾਦੀਨਿ ਕਤ੍ਤੁਕਾਮੇਨ ਅਗ੍ਗਿਂ ਵਿਸ੍ਸਾਸੇਨ ਭਣ੍ਡੁਕ੍ਖਲਿਕਾਦੀਸੁ ਅਪਕ੍ਖਿਪਿਤ੍ਵਾ ਹਤ੍ਥੇਹਿ ਅਨਾਮਸਨ੍ਤੇਨ ਗੋਮਯਚੁਣ੍ਣਾਦੀਹਿ ਜਾਲੇਤ੍ਵਾ ਯਾਗੁਪਚਨਾਦੀਨਿ ਕਤ੍ਤਬ੍ਬਾਨਿ, ਏਵਂ ਤਂ ਨਿਸ੍ਸਾਯ ਆਨਿਸਂਸਂ ਲਭਿਸ੍ਸਤਿ. ਅਸੁਤਸਵਨਾਦੀਨਿ ਪਤ੍ਥਯਨ੍ਤੇਨਪਿ ਭਿਕ੍ਖੁਂ ਅਤਿਵਿਸ੍ਸਾਸੇਨ ਵੇਜ੍ਜਕਮ੍ਮਨਵਕਮ੍ਮਾਦੀਸੁ ਅਯੋਜੇਤ੍ਵਾ ਚਤੂਹਿ ਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਾਤਬ੍ਬੋ, ਏਵਂ ਤਂ ਨਿਸ੍ਸਾਯ ਅਸੁਤਪੁਬ੍ਬਂ ਬੁਦ੍ਧਵਚਨਂ ਅਸੁਤਪੁਬ੍ਬਂ ਪਞ੍ਹਾਵਿਨਿਚ੍ਛਯਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਅਤ੍ਥਂ ਤਿਸ੍ਸੋ ਕੁਲਸਮ੍ਪਤ੍ਤਿਯੋ ਛ ਕਾਮਸਗ੍ਗਾਨਿ ਨਵ ਚ ਬ੍ਰਹ੍ਮਲੋਕੇ ਪਤ੍ਵਾ ਅਮਤਮਹਾਨਿਬ੍ਬਾਨਦਸ੍ਸਨਮ੍ਪਿ ਲਭਿਸ੍ਸਤੀਤਿ ਇਮਮਤ੍ਥਂ ਸਨ੍ਧਾਯ ਸਮ੍ਮਦੇਵ ਸਮਾਚਰੇਤਿ ਆਹ.
ਏਤਦਵੋਚਾਤਿ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨੋ ਪਸਾਦਂ ਆਵਿਕਰੋਨ੍ਤੋ ਏਤਂ ‘‘ਅਭਿਕ੍ਕਨ੍ਤ’’ਨ੍ਤਿਆਦਿਵਚਨਂ ਅਵੋਚ. ਤਤ੍ਥ ਅਭਿਕ੍ਕਨ੍ਤਨ੍ਤਿ ਅਭਿਕਨ੍ਤਂ ਅਤਿਇਟ੍ਠਂ ਅਤਿਮਨਾਪਂ, ਅਤਿਸੁਨ੍ਦਰਨ੍ਤਿ ਅਤ੍ਥੋ. ਏਤ੍ਥ ਏਕੇਨ ਅਭਿਕ੍ਕਨ੍ਤਸਦ੍ਦੇਨ ਦੇਸਨਂ ਥੋਮੇਤਿ ‘‘ਅਭਿਕ੍ਕਨ੍ਤਂ, ਭਨ੍ਤੇ, ਯਦਿਦਂ ਭਗਵਤੋ ਧਮ੍ਮਦੇਸਨਾ’’ਤਿ. ਏਕੇਨ ਅਤ੍ਤਨੋ ਪਸਾਦਂ ‘‘ਅਭਿਕ੍ਕਨ੍ਤਂ, ਭਨ੍ਤੇ, ਯਦਿਦਂ ਭਗਵਤੋ ਧਮ੍ਮਦੇਸਨਂ ਆਗਮ੍ਮ ਮਮ ਪਸਾਦੋ’’ਤਿ.
ਤਤੋ ਪਰਂ ਚਤੂਹਿ ਉਪਮਾਹਿ ਦੇਸਨਂਯੇਵ ਥੋਮੇਤਿ. ਤਤ੍ਥ ਨਿਕ੍ਕੁਜ੍ਜਿਤਨ੍ਤਿ ਅਧੋਮੁਖਠਪਿਤਂ, ਹੇਟ੍ਠਾਮੁਖਜਾਤਂ ਵਾ. ਉਕ੍ਕੁਜ੍ਜੇਯ੍ਯਾਤਿ ਉਪਰਿਮੁਖਂ ਕਰੇਯ੍ਯ. ਪਟਿਚ੍ਛਨ੍ਨਨ੍ਤਿ ਤਿਣਪਣ੍ਣਾਦਿਛਾਦਿਤਂ. ਵਿਵਰੇਯ੍ਯਾਤਿ ਉਗ੍ਘਾਟੇਯ੍ਯ. ਮੂਲ਼੍ਹਸ੍ਸਾਤਿ ਦਿਸਾਮੂਲ਼੍ਹਸ੍ਸ. ਮਗ੍ਗਂ ਆਚਿਕ੍ਖੇਯ੍ਯਾਤਿ ਹਤ੍ਥੇ ਗਹੇਤ੍ਵਾ ‘‘ਏਸ ਮਗ੍ਗੋ’’ਤਿ ਵਦੇਯ੍ਯ. ਅਨ੍ਧਕਾਰੇਤਿ ਕਾਲ਼ਪਕ੍ਖਚਾਤੁਦ੍ਦਸੀ ਅਡ੍ਢਰਤ੍ਤਘਨਵਨਸਣ੍ਡ ਮੇਘਪਟਲੇਹਿ ਚਤੁਰਙ੍ਗੇ ਤਮੇ. ਇਦਂ ਵੁਤ੍ਤਂ ਹੋਤਿ – ਯਥਾ ਕੋਚਿ ਨਿਕ੍ਕੁਜ੍ਜਿਤਂ ਉਕ੍ਕੁਜ੍ਜੇਯ੍ਯ, ਏਵਂ ਸਦ੍ਧਮ੍ਮਵਿਮੁਖਂ ਅਸਦ੍ਧਮ੍ਮੇ ਪਤਿਤਂ ਮਂ ਅਸਦ੍ਧਮ੍ਮਾ ਵੁਟ੍ਠਾਪੇਨ੍ਤੇਨ, ਯਥਾ ਪਟਿਚ੍ਛਨ੍ਨਂ ਵਿਵਰੇਯ੍ਯ, ਏਵਂ ਕਸ੍ਸਪਸ੍ਸ ਭਗਵਤੋ ਸਾਸਨਨ੍ਤਰਧਾਨਾ ਪਭੁਤਿ ਮਿਚ੍ਛਾਦਿਟ੍ਠਿਗਹਨਪਟਿਚ੍ਛਨ੍ਨਂ ਸਾਸਨਂ ਵਿਵਰਨ੍ਤੇਨ, ਯਥਾ ਮੂਲ਼੍ਹਸ੍ਸ ਮਗ੍ਗਂ ਆਚਿਕ੍ਖੇਯ੍ਯ, ਏਵਂ ਕੁਮ੍ਮਗ੍ਗਮਿਚ੍ਛਾਮਗ੍ਗਪਟਿਪਨ੍ਨਸ੍ਸ ਮੇ ਸਗ੍ਗਮੋਕ੍ਖਮਗ੍ਗਂ ਆਵਿਕਰੋਨ੍ਤੇਨ, ਯਥਾ ਅਨ੍ਧਕਾਰੇ ਤੇਲਪਜ੍ਜੋਤਂ ਧਾਰੇਯ੍ਯ, ਏਵਂ ਮੋਹਨ੍ਧਕਾਰੇ ਨਿਮੁਗ੍ਗਸ੍ਸ ਮੇ ਬੁਦ੍ਧਾਦਿਰਤਨਰੂਪਾਨਿ ਅਪਸ੍ਸਤੋ ਤਪ੍ਪਟਿਚ੍ਛਾਦਕਮੋਹਨ੍ਧਕਾਰਵਿਦ੍ਧਂਸਕਦੇਸਨਾਪਜ੍ਜੋਤਂ ਧਾਰੇਨ੍ਤੇਨ ਮਯ੍ਹਂ ਭਗਵਤਾ ਏਤੇਹਿ ਪਰਿਯਾਯੇਹਿ ਪਕਾਸਿਤਤ੍ਤਾ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋਤਿ.
ਏਵਂ ਦੇਸਨਂ ਥੋਮੇਤ੍ਵਾ ਇਮਾਯ ਦੇਸਨਾਯ ਰਤਨਤ੍ਤਯੇ ਪਸਨ੍ਨਚਿਤ੍ਤੋ ਪਸਨ੍ਨਾਕਾਰਂ ਕਰੋਨ੍ਤੋ ਏਸਾਹਨ੍ਤਿਆਦਿਮਾਹ. ਤਤ੍ਥ ਏਸਾਹਨ੍ਤਿ ਏਸੋ ਅਹਂ. ਭਗਵਨ੍ਤਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚਾਤਿ ਭਗਵਨ੍ਤਞ੍ਚ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚਾਤਿ ਇਮਂ ਰਤਨਤ੍ਤਯਂ ਸਰਣਂ ਗਚ੍ਛਾਮਿ. ਉਪਾਸਕਂ ਮਂ, ਭਨ੍ਤੇ, ਭਗਵਾ ਧਾਰੇਤੂਤਿ ਮਂ ਭਗਵਾ ‘ਉਪਾਸਕੋ ਅਯ’ਨ੍ਤਿ ਏਵਂ ਧਾਰੇਤੁ, ਜਾਨਾਤੂਤਿ ਅਤ੍ਥੋ. ਅਜ੍ਜਤਗ੍ਗੇਤਿ ਅਜ੍ਜਤਂ ਆਦਿਂ ਕਤ੍ਵਾ. ਅਜ੍ਜਦਗ੍ਗੇਤਿ ਵਾ ਪਾਠੋ, ਦ-ਕਾਰੋ ਪਦਸਨ੍ਧਿਕਰੋ, ਅਜ੍ਜ ਅਗ੍ਗਂ ਕਤ੍ਵਾਤਿ ਅਤ੍ਥੋ. ਪਾਣੁਪੇਤਨ੍ਤਿ ਪਾਣੇਹਿ ਉਪੇਤਂ ਯਾਵ ਮੇ ਜੀਵਿਤਂ ਪਵਤ੍ਤਤਿ, ਤਾਵ ਉਪੇਤਂ ਅਨਞ੍ਞਸਤ੍ਥੁਕਂ ਤੀਹਿ ਸਰਣਗਮਨੇਹਿ ਸਰਣਂ ਗਤਂ ਉਪਾਸਕਂ ਕਪ੍ਪਿਯਕਾਰਕਂ ਮਂ ਭਗਵਾ ਧਾਰੇਤੂਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ ਸਾਮਞ੍ਞਫਲਸੁਤ੍ਤੇ ਸਬ੍ਬਾਕਾਰੇਨ ਵੁਤ੍ਤੋਤਿ. ਪਠਮਂ.
੨. ਪੁਰਿਸਸੁਤ੍ਤਵਣ੍ਣਨਾ
੧੧੩. ਦੁਤਿਯੇ ਅਭਿਵਾਦੇਤ੍ਵਾਤਿ ਪੁਰਿਮਸੁਤ੍ਤੇ ਸਰਣਗਤਤ੍ਤਾ ਇਧ ਅਭਿਵਾਦੇਸਿ. ਅਜ੍ਝਤ੍ਤਨ੍ਤਿ ਨਿਯਕਜ੍ਝਤ੍ਤਂ, ਅਤ੍ਤਨੋ ਸਨ੍ਤਾਨੇ ਉਪ੍ਪਜ੍ਜਨ੍ਤੀਤਿ ਅਤ੍ਥੋ. ਲੋਭਾਦੀਸੁ ਲੁਬ੍ਭਨਲਕ੍ਖਣੋ ਲੋਭੋ, ਦੁਸ੍ਸਨਲਕ੍ਖਣੋ ਦੋਸੋ, ਮੁਯ੍ਹਨਲਕ੍ਖਣੋ ਮੋਹੋਤਿ. ਹਿਂਸਨ੍ਤੀਤਿ ਵਿਹੇਠੇਨ੍ਤਿ ਨਾਸੇਨ੍ਤਿ ਵਿਨਾਸੇਨ੍ਤਿ. ਅਤ੍ਤਸਮ੍ਭੂਤਾਤਿ ਅਤ੍ਤਨਿ ਸਮ੍ਭੂਤਾ. ਤਚਸਾਰਂਵ ਸਮ੍ਫਲਨ੍ਤਿ ਯਥਾ ਤਚਸਾਰਂ ਵੇਲ਼ੁਂ ਵਾ ਨਲ਼ਂ ਵਾ ਅਤ੍ਤਨੋ ਫਲਂ ਹਿਂਸਤਿ ਵਿਨਾਸੇਤਿ, ਏਵਂ ਹਿਂਸਨ੍ਤਿ ਵਿਨਾਸੇਨ੍ਤੀਤਿ. ਦੁਤਿਯਂ.
੩. ਜਰਾਮਰਣਸੁਤ੍ਤਵਣ੍ਣਨਾ
੧੧੪. ਤਤਿਯੇ ਅਞ੍ਞਤ੍ਰ ਜਰਾਮਰਣਾਤਿ ਜਰਾਮਰਣਤੋ ਮੁਤ੍ਤੋ ਨਾਮ ਅਤ੍ਥੀਤਿ ਵੁਚ੍ਚਤਿ. ਖਤ੍ਤਿਯਮਹਾਸਾਲਾਤਿ ਖਤ੍ਤਿਯਮਹਾਸਾਲਾ ਨਾਮ ਮਹਾਸਾਰਪ੍ਪਤ੍ਤਾ ਖਤ੍ਤਿਯਾ. ਯੇਸਂ ਹਿ ਖਤ੍ਤਿਯਾਨਂ ਹੇਟ੍ਠਿਮਨ੍ਤੇਨ ਕੋਟਿਸਤਂ ਨਿਧਾਨਗਤਂ ਹੋਤਿ, ਤਯੋ ਕਹਾਪਣਕੁਮ੍ਭਾ ਵਲਞ੍ਜਨਤ੍ਥਾਯ ਗੇਹਮਜ੍ਝੇ ਰਾਸਿਂ ਕਤ੍ਵਾ ਠਪਿਤਾ ਹੋਨ੍ਤਿ, ਤੇ ਖਤ੍ਤਿਯਮਹਾਸਾਲਾ ਨਾਮ. ਯੇਸਂ ਬ੍ਰਾਹ੍ਮਣਾਨਂ ਅਸੀਤਿਕੋਟਿਧਨਂ ਨਿਹਿਤਂ ਹੋਤਿ, ਦਿਯਡ੍ਢੋ ਕਹਾਪਣਕੁਮ੍ਭੋ ਵਲਞ੍ਜਨਤ੍ਥਾਯ ਗੇਹਮਜ੍ਝੇ ਰਾਸਿਂ ਕਤ੍ਵਾ ਠਪਿਤੋ ਹੋਤਿ, ਤੇ ਬ੍ਰਾਹ੍ਮਣਮਹਾਸਾਲਾ ਨਾਮ. ਯੇਸਂ ਗਹਪਤੀਨਂ ਚਤ੍ਤਾਲੀਸਕੋਟਿਧਨਂ ਨਿਹਿਤਂ ਹੋਤਿ, ਕਹਾਪਣਕੁਮ੍ਭੋ ਵਲਞ੍ਜਨਤ੍ਥਾਯ ਗੇਹਮਜ੍ਝੇ ਰਾਸਿਂ ਕਤ੍ਵਾ ਠਪਿਤੋ ਹੋਤਿ, ਤੇ ਗਹਪਤਿਮਹਾਸਾਲਾ ਨਾਮ.
ਅਡ੍ਢਾਤਿ ਇਸ੍ਸਰਾ. ਨਿਧਾਨਗਤਧਨਸ੍ਸ ਮਹਨ੍ਤਤਾਯ ਮਹਦ੍ਧਨਾ. ਸੁਵਣ੍ਣਰਜਤਭਾਜਨਾਦੀਨਂ ਉਪਭੋਗਭਣ੍ਡਾਨਂ ਮਹਨ੍ਤਤਾਯ ਮਹਾਭੋਗਾ. ਅਨਿਧਾਨਗਤਸ੍ਸ ਜਾਤਰੂਪਰਜਤਸ੍ਸ ਪਹੂਤਤਾਯ, ਪਹੂਤਜਾਤਰੂਪਰਜਤਾ. ਵਿਤ੍ਤੂਪਕਰਣਸ੍ਸ ਤੁਟ੍ਠਿਕਰਣਸ੍ਸ ਪਹੂਤਤਾਯ ਪਹੂਤਵਿਤ੍ਤੂਪਕਰਣਾ. ਗੋਧਨਾਦੀਨਞ੍ਚ ਸਤ੍ਤਵਿਧਧਞ੍ਞਾਨਞ੍ਚ ਪਹੂਤਤਾਯ ਪਹੂਤਧਨਧਞ੍ਞਾ. ਤੇਸਮ੍ਪਿ ਜਾਤਾਨਂ ਨਤ੍ਥਿ ਅਞ੍ਞਤ੍ਰ ਜਰਾਮਰਣਾਤਿ ਤੇਸਮ੍ਪਿ ਏਵਂ ਇਸ੍ਸਰਾਨਂ ਜਾਤਾਨਂ ਨਿਬ੍ਬਤ੍ਤਾਨਂ ਨਤ੍ਥਿ ਅਞ੍ਞਤ੍ਰ ਜਰਾਮਰਣਾ, ਜਾਤਤ੍ਤਾਯੇਵ ਜਰਾਮਰਣਤੋ ਮੋਕ੍ਖੋ ਨਾਮ ਨਤ੍ਥਿ, ਅਨ੍ਤੋਜਰਾਮਰਣੇਯੇਵ ਹੋਤਿ.
ਅਰਹਨ੍ਤੋਤਿਆਦੀਸੁ ਆਰਕਾ ਕਿਲੇਸੇਹੀਤਿ ਅਰਹਨ੍ਤੋ. ਖੀਣਾ ਏਤੇਸਂ ਚਤ੍ਤਾਰੋ ਆਸਵਾਤਿ ਖੀਣਾਸਵਾ. ਬ੍ਰਹ੍ਮਚਰਿਯਵਾਸਂ ਵੁਟ੍ਠਾ ਪਰਿਨਿਟ੍ਠਿਤਵਾਸਾਤਿ ਵੁਸਿਤਵਨ੍ਤੋ. ਚਤੂਹਿ ਮਗ੍ਗੇਹਿ ਕਰਣੀਯਂ ਏਤੇਸਂ ਕਤਨ੍ਤਿ ਕਤਕਰਣੀਯਾ. ਖਨ੍ਧਭਾਰੋ ਕਿਲੇਸਭਾਰੋ ਅਭਿਸਙ੍ਖਾਰਭਾਰੋ ਕਾਮਗੁਣਭਾਰੋਤਿ, ਇਮੇ ਓਹਿਤਾ ਭਾਰਾ ਏਤੇਸਨ੍ਤਿ ਓਹਿਤਭਾਰਾ. ਅਨੁਪ੍ਪਤ੍ਤੋ ਅਰਹਤ੍ਤਸਙ੍ਖਾਤੋ ਸਕੋ ਅਤ੍ਥੋ ਏਤੇਸਨ੍ਤਿ ਅਨੁਪ੍ਪਤ੍ਤਸਦਤ੍ਥਾ. ਦਸਵਿਧਮ੍ਪਿ ਪਰਿਕ੍ਖੀਣਂ ਭਵਸਂਯੋਜਨਂ ਏਤੇਸਨ੍ਤਿ ਪਰਿਕ੍ਖੀਣਭਵਸਂਯੋਜਨਾ. ਸਮ੍ਮਾ ਕਾਰਣੇਹਿ ਜਾਨਿਤ੍ਵਾ ਵਿਮੁਤ੍ਤਾਤਿ ਸਮ੍ਮਦਞ੍ਞਾਵਿਮੁਤ੍ਤਾ. ਮਗ੍ਗਪਞ੍ਞਾਯ ਚਤੁਸਚ੍ਚਧਮ੍ਮਂ ਞਤ੍ਵਾ ਫਲਵਿਮੁਤ੍ਤਿਯਾ ਵਿਮੁਤ੍ਤਾਤਿ ਅਤ੍ਥੋ. ਭੇਦਨਧਮ੍ਮੋਤਿ ਭਿਜ੍ਜਨਸਭਾਵੋ. ਨਿਕ੍ਖੇਪਨਧਮ੍ਮੋਤਿ ਨਿਕ੍ਖਿਪਿਤਬ੍ਬਸਭਾਵੋ. ਖੀਣਾਸਵਸ੍ਸ ਹਿ ਅਜੀਰਣਧਮ੍ਮੋਪਿ ਅਤ੍ਥਿ, ਆਰਮ੍ਮਣਤੋ ਪਟਿਵਿਦ੍ਧਂ ਨਿਬ੍ਬਾਨਂ, ਤਂ ਹਿ ਨ ਜੀਰਤਿ. ਇਧ ਪਨਸ੍ਸ ਜੀਰਣਧਮ੍ਮਂ ਦਸ੍ਸੇਨ੍ਤੋ ਏਵਮਾਹ. ਅਤ੍ਥੁਪ੍ਪਤ੍ਤਿਕੋ ਕਿਰਸ੍ਸ ਸੁਤ੍ਤਸ੍ਸ ਨਿਕ੍ਖੇਪੋ. ਸਿਵਿਕਸਾਲਾਯ ਨਿਸੀਦਿਤ੍ਵਾ ਕਥਿਤਨ੍ਤਿ ਵਦਨ੍ਤਿ. ਤਤ੍ਥ ਭਗਵਾ ਚਿਤ੍ਰਾਨਿ ਰਥਯਾਨਾਦੀਨਿ ਦਿਸ੍ਵਾ ਦਿਟ੍ਠਮੇਵ ਉਪਮਂ ਕਤ੍ਵਾ, ‘‘ਜੀਰਨ੍ਤਿ ਵੇ ਰਾਜਰਥਾ’’ਤਿ ਗਾਥਮਾਹ.
ਤਤ੍ਥ ਜੀਰਨ੍ਤੀਤਿ ਜਰਂ ਪਾਪੁਣਨ੍ਤਿ. ਰਾਜਰਥਾਤਿ ਰਞ੍ਞੋ ਅਭਿਰੂਹਨਰਥਾ. ਸੁਚਿਤ੍ਤਾਤਿ ਸੁਵਣ੍ਣਰਜਤਾਦੀਹਿ ਸੁਟ੍ਠੁ ਚਿਤ੍ਤਿਤਾ. ਅਥੋ ਸਰੀਰਮ੍ਪਿ ਜਰਂ ਉਪੇਤੀਤਿ ਏਵਰੂਪੇਸੁ ਅਨੁਪਾਦਿਣ੍ਣਕੇਸੁ ਸਾਰਦਾਰੁਮਯੇਸੁ ਰਥੇਸੁ ਜੀਰਨ੍ਤੇਸੁ ਇਮਸ੍ਮਿਂ ਅਜ੍ਝਤ੍ਤਿਕੇ ਉਪਾਦਿਣ੍ਣਕੇ ਮਂਸਲੋਹਿਤਾਦਿਮਯੇ ਸਰੀਰੇ ਕਿਂ ਵਤ੍ਤਬ੍ਬਂ? ਸਰੀਰਮ੍ਪਿ ਜਰਂ ਉਪੇਤਿਯੇਵਾਤਿ ਅਤ੍ਥੋ. ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤੀਤਿ ਸਨ੍ਤੋ ਸਬ੍ਭੀਹਿ ਸਦ੍ਧਿਂ ਸਤਂ ਧਮ੍ਮੋ ਨ ਜਰਂ ਉਪੇਤੀਤਿ ਏਵਂ ਪਵੇਦਯਨ੍ਤਿ. ‘‘ਸਤਂ ਧਮ੍ਮੋ ਨਾਮ ਨਿਬ੍ਬਾਨਂ, ਤਂ ਨ ਜੀਰਤਿ, ਅਜਰਂ ਅਮਤਨ੍ਤਿ ਏਵਂ ਕਥੇਨ੍ਤੀ’’ਤਿ ਅਤ੍ਥੋ. ਯਸ੍ਮਾ ਵਾ ਨਿਬ੍ਬਾਨਂ ਆਗਮ੍ਮ ਸੀਦਨਸਭਾਵਾ ਕਿਲੇਸਾ ਭਿਜ੍ਜਨ੍ਤਿ, ਤਸ੍ਮਾ ਤਂ ਸਬ੍ਭੀਤਿ ਵੁਚ੍ਚਤਿ. ਇਤਿ ਪੁਰਿਮਪਦਸ੍ਸ ਕਾਰਣਂ ਦਸ੍ਸੇਨ੍ਤੋ ‘‘ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤੀ’’ਤਿ ਆਹ. ਇਦਂ ਹਿ ਵੁਤ੍ਤਂ ਹੋਤਿ – ਸਤਂ ਧਮ੍ਮੋ ਨ ਜਰਂ ਉਪੇਤਿ, ਤਸ੍ਮਾ ਸਨ੍ਤੋ ਸਬ੍ਭਿ ਪਵੇਦਯਨ੍ਤਿ. ਅਜਰਂ ਨਿਬ੍ਬਾਨਂ ਸਤਂ ਧਮ੍ਮੋਤਿ ਆਚਿਕ੍ਖਨ੍ਤੀਤਿ ਅਤ੍ਥੋ. ਸੁਨ੍ਦਰਾਧਿਵਚਨਂ ਵਾ ਏਤਂ ਸਬ੍ਭੀਤਿ. ਯਂ ਸਬ੍ਭਿਧਮ੍ਮਭੂਤਂ ਨਿਬ੍ਬਾਨਂ ਸਨ੍ਤੋ ਪਵੇਦਯਨ੍ਤਿ ਕਥਯਨ੍ਤਿ, ਸੋ ਸਤਂ ਧਮ੍ਮੋ ਨ ਜਰਂ ਉਪੇਤੀਤਿਪਿ ਅਤ੍ਥੋ. ਤਤਿਯਂ.
੪. ਪਿਯਸੁਤ੍ਤਵਣ੍ਣਨਾ
੧੧੫. ਚਤੁਤ੍ਥੇ ਰਹੋਗਤਸ੍ਸਾਤਿ ਰਹਸਿ ਗਤਸ੍ਸ. ਪਟਿਸਲ੍ਲੀਨਸ੍ਸਾਤਿ ਨਿਲੀਨਸ੍ਸ ਏਕੀਭੂਤਸ੍ਸ. ਏਵਮੇਤਂ, ਮਹਾਰਾਜਾਤਿ ਇਧ ਭਗਵਾ ਇਮਂ ਸੁਤ੍ਤਂ ਸਬ੍ਬਞ੍ਞੁਭਾਸਿਤਂ ਕਰੋਨ੍ਤੋ ਆਹ. ਅਨ੍ਤਕੇਨਾਧਿਪਨ੍ਨਸ੍ਸਾਤਿ ਮਰਣੇਨ ਅਜ੍ਝੋਤ੍ਥਟਸ੍ਸ. ਚਤੁਤ੍ਥਂ.
੫. ਅਤ੍ਤਰਕ੍ਖਿਤਸੁਤ੍ਤਵਣ੍ਣਨਾ
੧੧੬. ਪਞ੍ਚਮੇ ਹਤ੍ਥਿਕਾਯੋਤਿ ਹਤ੍ਥਿਘਟਾ. ਸੇਸੇਸੁਪਿ ਏਸੇਵ ਨਯੋ. ਸਂਵਰੋਤਿ ਪਿਦਹਨਂ. ਸਾਧੁ ਸਬ੍ਬਤ੍ਥ ਸਂਵਰੋਤਿ ਇਮਿਨਾ ਕਮ੍ਮਪਥਭੇਦਂ ਅਪਤ੍ਤਸ੍ਸ ਕਮ੍ਮਸ੍ਸ ਸਂਵਰਂ ਦਸ੍ਸੇਤਿ. ਲਜ੍ਜੀਤਿ ਹਿਰਿਮਾ. ਲਜ੍ਜੀਗਹਣੇਨ ਚੇਤ੍ਥ ਓਤ੍ਤਪ੍ਪਮ੍ਪਿ ਗਹਿਤਮੇਵ ਹੋਤਿ. ਪਞ੍ਚਮਂ.
੬. ਅਪ੍ਪਕਸੁਤ੍ਤਵਣ੍ਣਨਾ
੧੧੭. ਛਟ੍ਠੇ ਉਲ਼ਾਰੇ ਉਲ਼ਾਰੇਤਿ ਪਣੀਤੇ ਚ ਬਹੁਕੇ ਚ. ਮਜ੍ਜਨ੍ਤੀਤਿ ਮਾਨਮਜ੍ਜਨੇਨ ਮਜ੍ਜਨ੍ਤਿ. ਅਤਿਸਾਰਨ੍ਤਿ ਅਤਿਕ੍ਕਮਂ. ਕੂਟਨ੍ਤਿ ਪਾਸਂ. ਪਚ੍ਛਾਸਨ੍ਤਿ ਪਚ੍ਛਾ ਤੇਸਂ. ਛਟ੍ਠਂ.
੭. ਅਡ੍ਡਕਰਣਸੁਤ੍ਤਵਣ੍ਣਨਾ
੧੧੮. ਸਤ੍ਤਮੇ ਕਾਮਹੇਤੂਤਿ ਕਾਮਮੂਲਕਂ. ਕਾਮਨਿਦਾਨਨ੍ਤਿ ਕਾਮਪਚ੍ਚਯਾ. ਕਾਮਾਧਿਕਰਣਨ੍ਤਿ ਕਾਮਕਾਰਣਾ. ਸਬ੍ਬਾਨਿ ਹੇਤਾਨਿ ਅਞ੍ਞਮਞ੍ਞਵੇਵਚਨਾਨੇਵ. ਭਦ੍ਰਮੁਖੋਤਿ ਸੁਨ੍ਦਰਮੁਖੋ. ਏਕਦਿਵਸਂ ਕਿਰ ਰਾਜਾ ਅਡ੍ਡਕਰਣੇ ਨਿਸੀਦਿ. ਤਤ੍ਥ ਪਠਮਤਰਂ ਲਞ੍ਜਂ ਗਹੇਤ੍ਵਾ ਨਿਸਿਨ੍ਨਾ ਅਮਚ੍ਚਾ ਅਸ੍ਸਾਮਿਕੇਪਿ ਸਾਮਿਕੇ ਕਰਿਂਸੁ. ਰਾਜਾ ਤਂ ਞਤ੍ਵਾ – ‘‘ਮਯ੍ਹਂ ਤਾਵ ਪਥਵਿਸ੍ਸਰਸ੍ਸ ਸਮ੍ਮੁਖਾਪੇਤੇ ਏਵਂ ਕਰੋਨ੍ਤਿ, ਪਰਮ੍ਮੁਖਾ ਕਿਂ ਨਾਮ ਨ ਕਰਿਸ੍ਸਨ੍ਤਿ? ਪਞ੍ਞਾਯਿਸ੍ਸਤਿ ਦਾਨਿ ਵਿਟਟੂਭੋ ਸੇਨਾਪਤਿ ਸਕੇਨ ਰਜ੍ਜੇਨ, ਕਿਂ ਮਯ੍ਹਂ ਏਵਰੂਪੇਹਿ ਲਞ੍ਜਖਾਦਕੇਹਿ ਮੁਸਾਵਾਦੀਹਿ ਸਦ੍ਧਿਂ ਏਕਟ੍ਠਾਨੇ ਨਿਸਜ੍ਜਾਯਾ’’ਤਿ ਚਿਨ੍ਤੇਸਿ. ਤਸ੍ਮਾ ਏਵਮਾਹ. ਖਿਪ੍ਪਂਵ ਓਡ੍ਡਿਤਨ੍ਤਿ ਕੁਮਿਨਂ ਵਿਯ ਓਡ੍ਡਿਤਂ. ਯਥਾ ਮਚ੍ਛਾ ਓਡ੍ਡਿਤਂ ਕੁਮਿਨਂ ਪਵਿਸਨ੍ਤਾ ਨ ਜਾਨਨ੍ਤਿ, ਏਵਂ ਸਤ੍ਤਾ ਕਿਲੇਸਕਾਮੇਨ ਵਤ੍ਥੁਕਾਮਂ ਵੀਤਿਕ੍ਕਮਨ੍ਤਾ ਨ ਜਾਨਨ੍ਤੀਤਿ ਅਤ੍ਥੋ. ਸਤ੍ਤਮਂ.
੮. ਮਲ੍ਲਿਕਾਸੁਤ੍ਤਵਣ੍ਣਨਾ
੧੧੯. ਅਟ੍ਠਮੇ ਅਤ੍ਥਿ ਨੁ ਖੋ ਤੇ ਮਲ੍ਲਿਕੇਤਿ ਕਸ੍ਮਾ ਪੁਚ੍ਛਤਿ? ਅਯਂ ਕਿਰ ਮਲ੍ਲਿਕਾ ਦੁਗ੍ਗਤਮਾਲਾਕਾਰਸ੍ਸ ਧੀਤਾ, ਏਕਦਿਵਸਂ ਆਪਣਤੋ ਪੂਵਂ ਗਹੇਤ੍ਵਾ ‘‘ਮਾਲਾਰਾਮਂ ਗਨ੍ਤ੍ਵਾਵ ਖਾਦਿਸ੍ਸਾਮੀ’’ਤਿ ਗਚ੍ਛਨ੍ਤੀ ਪਟਿਪਥੇ ਭਿਕ੍ਖੁਸਙ੍ਘਪਰਿਵਾਰਂ ਭਗਵਨ੍ਤਂ ਭਿਕ੍ਖਾਚਾਰਂ ਪਵਿਸਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤਾ ਤਂ ਭਗਵਤੋ ਅਦਾਸਿ. ਸਤ੍ਥਾ ਨਿਸੀਦਨਾਕਾਰਂ ਦਸ੍ਸੇਸਿ. ਆਨਨ੍ਦਤ੍ਥੇਰੋ ਚੀਵਰਂ ਪਞ੍ਞਾਪੇਤ੍ਵਾ ਅਦਾਸਿ. ਭਗਵਾ ਤਤ੍ਥ ਨਿਸੀਦਿਤ੍ਵਾ ਤਂ ਪੂਵਂ ਪਰਿਭੁਞ੍ਜਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਸਿਤਂ ਪਾਤ੍ਵਾਕਾਸਿ. ਥੇਰੋ ‘‘ਇਮਿਸ੍ਸਾ, ਭਨ੍ਤੇ, ਕੋ ਵਿਪਾਕੋ ਭਵਿਸ੍ਸਤੀ’’ਤਿ ਪੁਚ੍ਛਿ. ਆਨਨ੍ਦ, ਅਜ੍ਜੇਸਾ ਤਥਾਗਤਸ੍ਸ ਪਠਮਭੋਜਨਂ ਅਦਾਸਿ, ਅਜ੍ਜੇਵ ਕੋਸਲਰਞ੍ਞੋ ਅਗ੍ਗਮਹੇਸੀ ਭਵਿਸ੍ਸਤੀਤਿ. ਤਂਦਿਵਸਮੇਵ ਚ ਰਾਜਾ ਕਾਸਿਗਾਮੇ ਭਾਗਿਨੇਯ੍ਯੇਨ ਯੁਦ੍ਧੇਨ ਪਰਾਜਿਤੋ ਪਲਾਯਿਤ੍ਵਾ ਨਗਰਂ ਆਗਚ੍ਛਨ੍ਤੋ ਮਾਲਾਰਾਮਂ ਪਵਿਸਿਤ੍ਵਾ ਬਲਕਾਯਸ੍ਸ ਆਗਮਨਂ ਆਗਮੇਸਿ. ਤਸ੍ਸ ਸਾ ਵਤ੍ਤਂ ਅਕਾਸਿ. ਸੋ ਤਾਯ ਵਤ੍ਤੇ ਪਸੀਦਿਤ੍ਵਾ ਤਂ ਅਨ੍ਤੇਪੂਰਂ ਅਤਿਹਾਰਾਪੇਤ੍ਵਾ ਤਂ ਅਗ੍ਗਮਹੇਸਿਟ੍ਠਾਨੇ ਠਪੇਸਿ.
ਅਥੇਕਦਿਵਸਂ ਚਿਨ੍ਤੇਸਿ – ‘‘ਮਯਾ ਇਮਿਸ੍ਸਾ ਦੁਗ੍ਗਤਕੁਲਸ੍ਸ ਧੀਤੁਯਾ ਮਹਨ੍ਤਂ ਇਸ੍ਸਰਿਯਂ ਦਿਨ੍ਨਂ, ਯਂਨੂਨਾਹਂ ਇਮਂ ਪੁਚ੍ਛੇਯ੍ਯਂ ‘ਕੋ ਤੇ ਪਿਯੋ’ਤਿ? ਸਾ ‘ਤ੍ਵਂ ਮੇ, ਮਹਾਰਾਜ, ਪਿਯੋ’ਤਿ ਵਤ੍ਵਾ ਪੁਨ ਮਂ ਪੁਚ੍ਛਿਸ੍ਸਤਿ. ਅਥਸ੍ਸਾਹਂ ‘ਮਯ੍ਹਮ੍ਪਿ ਤ੍ਵਂਯੇਵ ਪਿਯਾ’ਤਿ ਵਕ੍ਖਾਮੀ’’ਤਿ. ਇਤਿ ਸੋ ਅਞ੍ਞਮਞ੍ਞਂ ਵਿਸ੍ਸਾਸਜਨਨਤ੍ਥਂ ਸਮ੍ਮੋਦਨੀਯਂ ਕਥਂ ਕਥੇਨ੍ਤੋ ਪੁਚ੍ਛਤਿ. ਸਾ ਪਨ ਦੇਵੀ ਪਣ੍ਡਿਤਾ ਬੁਦ੍ਧੁਪਟ੍ਠਾਯਿਕਾ ਧਮ੍ਮੁਪਟ੍ਠਾਯਿਕਾ ਸਙ੍ਘੁਪਟ੍ਠਾਯਿਕਾ ਮਹਾਪਞ੍ਞਾ, ਤਸ੍ਮਾ ਏਵਂ ਚਿਨ੍ਤੇਸਿ – ‘‘ਨਾਯਂ ਪਞ੍ਹੋ ਰਞ੍ਞੋ ਮੁਖਂ ਓਲੋਕੇਤ੍ਵਾ ਕਥੇਤਬ੍ਬੋ’’ਤਿ. ਸਾ ਸਰਸੇਨੇਵ ਕਥੇਤ੍ਵਾ ਰਾਜਾਨਂ ਪੁਚ੍ਛਿ. ਰਾਜਾ ਤਾਯ ਸਰਸੇਨ ਕਥਿਤਤ੍ਤਾ ਨਿਵਤ੍ਤਿਤੁਂ ਅਲਭਨ੍ਤੋ ਸਯਮ੍ਪਿ ਸਰਸੇਨੇਵ ਕਥੇਤ੍ਵਾ ‘‘ਸਕਾਰਣਂ ਇਦਂ, ਤਥਾਗਤਸ੍ਸ ਨਂ ਆਰੋਚੇਸ੍ਸਾਮੀ’’ਤਿ ਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਨੇਵਜ੍ਝਗਾਤਿ ਨਾਧਿਗਚ੍ਛਤਿ. ਏਵਂ ਪਿਯੋ ਪੁਥੁ ਅਤ੍ਤਾ ਪਰੇਸਨ੍ਤਿ ਯਥਾ ਏਕਸ੍ਸ ਅਤ੍ਤਾ ਪਿਯੋ, ਏਵਂ ਪਰੇਸਂ ਪੁਥੁਸਤ੍ਤਾਨਮ੍ਪਿ ਅਤ੍ਤਾ ਪਿਯੋਤਿ ਅਤ੍ਥੋ. ਅਟ੍ਠਮਂ.
੯. ਯਞ੍ਞਸੁਤ੍ਤਵਣ੍ਣਨਾ
੧੨੦. ਨਵਮੇ ਥੂਣੂਪਨੀਤਾਨੀਤਿ ਥੂਣਂ ਉਪਨੀਤਾਨਿ, ਥੂਣਾਯ ਬਦ੍ਧਾਨਿ ਹੋਨ੍ਤਿ. ਪਰਿਕਮ੍ਮਾਨਿ ਕਰੋਨ੍ਤੀਤਿ ਏਤ੍ਤਾਵਤਾ ਤੇਹਿ ਭਿਕ੍ਖੂਹਿ ਰਞ੍ਞੋ ਆਰਦ੍ਧਯਞ੍ਞੋ ਤਥਾਗਤਸ੍ਸ ਆਰੋਚਿਤੋ. ਕਸ੍ਮਾ ਪਨ ਰਞ੍ਞਾ ਅਯਂ ਯਞ੍ਞੋ ਆਰਦ੍ਧੋ? ਦੁਸ੍ਸੁਪਿਨਪਟਿਘਾਤਾਯ. ਏਕਦਿਵਸਂ ਕਿਰ ਰਾਜਾ ਸਬ੍ਬਾਲਙ੍ਕਾਰਪ੍ਪਟਿਮਣ੍ਡਿਤੋ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਅਨੁਸਞ੍ਚਰਨ੍ਤੋ ਵਾਤਪਾਨਂ ਵਿਵਰਿਤ੍ਵਾ ਓਲੋਕਯਮਾਨਂ ਏਕਂ ਇਤ੍ਥਿਂ ਦਿਸ੍ਵਾ ਤਸ੍ਸਾ ਪਟਿਬਦ੍ਧਚਿਤ੍ਤੋ ਤਤੋਵ ਪਟਿਨਿਵਤ੍ਤਿਤ੍ਵਾ ਅਨ੍ਤੇਪੁਰਂ ਪਵਿਸਿਤ੍ਵਾ ਏਕਸ੍ਸ ਪੁਰਿਸਸ੍ਸ ਤਮਤ੍ਥਂ ਆਰੋਚੇਤ੍ਵਾ ‘‘ਗਚ੍ਛ ਤਸ੍ਸਾ ਸਸ੍ਸਾਮਿਕਭਾਵਂ ਵਾ ਅਸ੍ਸਾਮਿਕਭਾਵਂ ਵਾ ਜਾਨਾਹੀ’’ਤਿ ਪੇਸੇਸਿ. ਸੋ ਗਨ੍ਤ੍ਵਾ ਪੁਚ੍ਛਿ. ਸਾ ‘‘ਏਸੋ ਮੇ ਸਾਮਿਕੋ ਆਪਣੇ ਨਿਸਿਨ੍ਨੋ’’ਤਿ ਦਸ੍ਸੇਸਿ. ਰਾਜਪੁਰਿਸੋ ਰਞ੍ਞੋ ਤਮਤ੍ਥਂ ਆਚਿਕ੍ਖਿ. ਰਾਜਾ ਤਂ ਪੁਰਿਸਂ ਪਕ੍ਕੋਸਾਪੇਤ੍ਵਾ ‘‘ਮਂ ਉਪਟ੍ਠਹਾ’’ਤਿ ਆਹ. ‘‘ਨਾਹਂ, ਦੇਵ, ਉਪਟ੍ਠਹਿਤੁਂ ਜਾਨਾਮੀ’’ਤਿ ਚ ਵੁਤ੍ਤੇ ‘‘ਉਪਟ੍ਠਾਨਂ ਨਾਮ ਨ ਆਚਰਿਯਸ੍ਸ ਸਨ੍ਤਿਕੇ ਉਗ੍ਗਹੇਤਬ੍ਬ’’ਨ੍ਤਿ ਬਲਕ੍ਕਾਰੇਨ ਆਵੁਧਫਲਕਂ ਗਾਹਾਪੇਤ੍ਵਾ ਉਪਟ੍ਠਾਕਂ ਅਕਾਸਿ. ਉਪਟ੍ਠਹਿਤ੍ਵਾ ਗੇਹਂ ਗਤਮਤ੍ਤਮੇਵ ਚ ਨਂ ਪੁਨ ਪਕ੍ਕੋਸਾਪੇਤ੍ਵਾ ‘‘ਉਪਟ੍ਠਾਕੇਨ ਨਾਮ ਰਞ੍ਞੋ ਵਚਨਂ ਕਤ੍ਤਬ੍ਬਂ, ਗਚ੍ਛ ਇਤੋ ਯੋਜਨਮਤ੍ਤੇ ਅਮ੍ਹਾਕਂ ਸੀਸਧੋਵਨਪੋਕ੍ਖਰਣੀ ਅਤ੍ਥਿ, ਤਤੋ ਅਰੁਣਮਤ੍ਤਿਕਞ੍ਚ ਲੋਹਿਤੁਪ੍ਪਲਮਾਲਞ੍ਚ ਗਣ੍ਹਿਤ੍ਵਾ ਏਹਿ. ਸਚੇ ਅਜ੍ਜੇਵ ਨਾਗਚ੍ਛਸਿ, ਰਾਜਦਣ੍ਡਂ ਕਰਿਸ੍ਸਾਮੀ’’ਤਿ ਵਤ੍ਵਾ ਪੇਸੇਸਿ. ਸੋ ਰਾਜਭਯੇਨ ਨਿਕ੍ਖਮਿਤ੍ਵਾ ਗਤੋ.
ਰਾਜਾਪਿ ਤਸ੍ਮਿਂ ਗਤੇ ਦੋਵਾਰਿਕਂ ਪਕ੍ਕੋਸਾਪੇਤ੍ਵਾ, ‘‘ਅਜ੍ਜ ਸਾਯਨ੍ਹੇਯੇਵ ਦ੍ਵਾਰਂ ਪਿਦਹਿਤ੍ਵਾ ‘ਅਹਂ ਰਾਜਦੂਤੋ’ਤਿ ਵਾ ‘ਉਪਰਾਜਦੂਤੋ’ਤਿ ਵਾ ਭਣਨ੍ਤਾਨਮ੍ਪਿ ਮਾ ਵਿਵਰੀ’’ਤਿ ਆਹ. ਸੋ ਪੁਰਿਸੋ ਮਤ੍ਤਿਕਞ੍ਚ ਉਪ੍ਪਲਾਨਿ ਚ ਗਹੇਤ੍ਵਾ ਦ੍ਵਾਰੇ ਪਿਹਿਤਮਤ੍ਤੇ ਆਗਨ੍ਤ੍ਵਾ ਬਹੁਂ ਵਦਨ੍ਤੋਪਿ ਦ੍ਵਾਰਂ ਅਲਭਿਤ੍ਵਾ ਪਰਿਸ੍ਸਯਭਯੇਨ ਜੇਤਵਨਂ ਗਤੋ. ਰਾਜਾਪਿ ਰਾਗਪਰਿਲ਼ਾਹੇਨ ਅਭਿਭੂਤੋ ਕਾਲੇ ਨਿਸੀਦਤਿ, ਕਾਲੇ ਤਿਟ੍ਠਤਿ, ਕਾਲੇ ਨਿਪਜ੍ਜਤਿ, ਸਨ੍ਨਿਟ੍ਠਾਨਂ ਅਲਭਨ੍ਤੋ ਯਤ੍ਥ ਕਤ੍ਥਚਿ ਨਿਸਿਨ੍ਨਕੋਵ ਮਕ੍ਕਟਨਿਦ੍ਦਾਯ ਨਿਦ੍ਦਾਯਤਿ.
ਪੁਬ੍ਬੇ ਚ ਤਸ੍ਮਿਂਯੇਵ ਨਗਰੇ ਚਤ੍ਤਾਰੋ ਸੇਟ੍ਠਿਪੁਤ੍ਤਾ ਪਰਦਾਰਿਕਕਮ੍ਮਂ ਕਤ੍ਵਾ ਨਨ੍ਦੋਪਨਨ੍ਦਾਯ ਨਾਮ ਲੋਹਕੁਮ੍ਭਿਯਾ ਨਿਬ੍ਬਤ੍ਤਿਂਸੁ. ਤੇ ਫੇਣੁਦ੍ਦੇਹਕਂ ਪਚ੍ਚਮਾਨਾ ਤਿਂਸਵਸ੍ਸਸਹਸ੍ਸਾਨਿ ਹੇਟ੍ਠਾ ਗਚ੍ਛਨ੍ਤਾ ਕੁਮ੍ਭਿਯਾ ਤਲਂ ਪਾਪੁਣਨ੍ਤਿ, ਤਿਂਸਵਸ੍ਸਸਹਸ੍ਸਾਨਿ ਉਪਰਿ ਗਚ੍ਛਨ੍ਤਾ ਮਤ੍ਥਕਂ ਪਾਪੁਣਨ੍ਤਿ. ਤੇ ਤਂ ਦਿਵਸਂ ਆਲੋਕਂ ਓਲੋਕੇਤ੍ਵਾ ਅਤ੍ਤਨੋ ਦੁਕ੍ਕਟਭਯੇਨ ਏਕੇਕਂ ਗਾਥਂ ਵਤ੍ਤੁਕਾਮਾ ਵਤ੍ਤੁਂ ਅਸਕ੍ਕੋਨ੍ਤਾ ਏਕੇਕਂ ਅਕ੍ਖਰਮੇਵ ਆਹਂਸੁ. ਏਕੋ ਸ-ਕਾਰਂ, ਏਕੋ ਸੋ-ਕਾਰਂ, ਏਕੋ ਨ-ਕਾਰਂ, ਏਕੋ ਦੁ-ਕਾਰਂ ਆਹ. ਰਾਜਾ ਤੇਸਂ ਨੇਰਯਿਕਸਤ੍ਤਾਨਂ ਸਦ੍ਦਂ ਸੁਤਕਾਲਤੋ ਪਟ੍ਠਾਯ ਸੁਖਂ ਅਵਿਨ੍ਦਮਾਨੋਵ ਤਂਰਤ੍ਤਾਵਸੇਸਂ ਵੀਤਿਨਾਮੇਸਿ.
ਅਰੁਣੇ ਉਟ੍ਠਿਤੇ ਪੁਰੋਹਿਤੋ ਆਗਨ੍ਤ੍ਵਾ ਤਂ ਸੁਖਸੇਯ੍ਯਂ ਪੁਚ੍ਛਿ. ਸੋ ‘‘ਕੁਤੋ ਮੇ, ਆਚਰਿਯ, ਸੁਖ’’ਨ੍ਤਿ? ਵਤ੍ਵਾ, ‘‘ਸੁਪਿਨੇ ਏਵਰੂਪੇ ਸਦ੍ਦੇ ਅਸ੍ਸੋਸਿ’’ਨ੍ਤਿ ਆਚਿਕ੍ਖਿ. ਬ੍ਰਾਹ੍ਮਣੋ – ‘‘ਇਮਸ੍ਸ ਰਞ੍ਞੋ ਇਮਿਨਾ ਸੁਪਿਨੇਨ ਵੁਡ੍ਢਿ ਵਾ ਹਾਨਿ ਵਾ ਨਤ੍ਥਿ, ਅਪਿਚ ਖੋ ਪਨ ਯਂ ਇਮਸ੍ਸ ਗੇਹੇ ਅਤ੍ਥਿ, ਤਂ ਸਮਣਸ੍ਸ ਗੋਤਮਸ੍ਸ ਹੋਤਿ, ਗੋਤਮਸਾਵਕਾਨਂ ਹੋਤਿ, ਬ੍ਰਾਹ੍ਮਣਾ ਕਿਞ੍ਚਿ ਨ ਲਭਨ੍ਤਿ, ਬ੍ਰਾਹ੍ਮਣਾਨਂ ਭਿਕ੍ਖਂ ਉਪ੍ਪਾਦੇਸ੍ਸਾਮੀ’’ਤਿ, ‘‘ਭਾਰਿਯੋ ਅਯਂ, ਮਹਾਰਾਜ, ਸੁਪਿਨੋ ਤੀਸੁ ਜਾਨੀਸੁ ਏਕਾ ਪਞ੍ਞਾਯਤਿ, ਰਜ੍ਜਨ੍ਤਰਾਯੋ ਵਾ ਭਵਿਸ੍ਸਤਿ ਜੀਵਿਤਨ੍ਤਰਾਯੋ ਵਾ, ਦੇਵੋ ਵਾ ਨ ਵਸ੍ਸਿਸ੍ਸਤੀ’’ਤਿ ਆਹ. ਕਥਂ ਸੋਤ੍ਥਿ ਭਵੇਯ੍ਯ ਆਚਰਿਯਾਤਿ? ‘‘ਮਨ੍ਤੇਤ੍ਵਾ ਞਾਤੁਂ ਸਕ੍ਕਾ, ਮਹਾਰਾਜਾਤਿ. ਗਚ੍ਛਥ ਆਚਰਿਯੇਹਿ ਸਦ੍ਧਿਂ ਮਨ੍ਤੇਤ੍ਵਾ ਅਮ੍ਹਾਕਂ ਸੋਤ੍ਥਿਂ ਕਰੋਥਾ’’ਤਿ.
ਸੋ ਸਿਵਿਕਸਾਲਾਯਂ ਬ੍ਰਾਹ੍ਮਣੇ ਸਨ੍ਨਿਪਾਤੇਤ੍ਵਾ ਤਮਤ੍ਥਂ ਆਰੋਚੇਤ੍ਵਾ, ‘‘ਵਿਸੁਂ ਵਿਸੁਂ ਗਨ੍ਤ੍ਵਾ ਏਵਂ ਵਦਥਾ’’ਤਿ ਤਯੋ ਵਗ੍ਗੇ ਅਕਾਸਿ. ਬ੍ਰਾਹ੍ਮਣਾ ਪਵਿਸਿਤ੍ਵਾ ਰਾਜਾਨਂ ਸੁਖਸੇਯ੍ਯਂ ਪੁਚ੍ਛਿਂਸੁ. ਰਾਜਾ ਪੁਰੋਹਿਤਸ੍ਸ ਕਥਿਤਨਿਯਾਮੇਨੇਵ ਕਥੇਤ੍ਵਾ ‘‘ਕਥਂ ਸੋਤ੍ਥਿ ਭਵੇਯ੍ਯਾ’’ਤਿ ਪੁਚ੍ਛਿ. ਮਹਾਬ੍ਰਾਹ੍ਮਣਾ – ‘‘ਸਬ੍ਬਪਞ੍ਚਸਤਂ ਯਞ੍ਞਂ ਯਜਿਤ੍ਵਾ ਏਤਸ੍ਸ ਕਮ੍ਮਸ੍ਸ ਸੋਤ੍ਥਿ ਭਵੇਯ੍ਯ, ਏਵਂ, ਮਹਾਰਾਜ, ਆਚਰਿਯਾ ਕਥੇਨ੍ਤੀ’’ਤਿ ਆਹਂਸੁ. ਰਾਜਾ ਤੇਸਂ ਸੁਤ੍ਵਾ ਅਨਭਿਨਨ੍ਦਿਤ੍ਵਾ ਅਪ੍ਪਟਿਕ੍ਕੋਸਿਤ੍ਵਾ ਤੁਣ੍ਹੀ ਅਹੋਸਿ. ਅਥ ਦੁਤਿਯਵਗ੍ਗਬ੍ਰਾਹ੍ਮਣਾਪਿ ਆਗਨ੍ਤ੍ਵਾ ਤਤ੍ਥੇਵ ਕਥੇਸੁਂ. ਤਥਾ ਤਤਿਯਵਗ੍ਗਬ੍ਰਾਹ੍ਮਣਾਪਿ. ਅਥ ਰਾਜਾ ‘‘ਯਞ੍ਞਂ ਕਰੋਨ੍ਤੂ’’ਤਿ ਆਣਾਪੇਸਿ. ਤਤੋ ਪਟ੍ਠਾਯ ਬ੍ਰਾਹ੍ਮਣਾ ਉਸਭਾਦਯੋ ਪਾਣੇ ਆਹਰਾਪੇਸੁਂ. ਨਗਰੇ ਮਹਾਸਦ੍ਦੋ ਉਦਪਾਦਿ. ਤਂ ਪਵਤ੍ਤਿਂ ਞਤ੍ਵਾ ਮਲ੍ਲਿਕਾ ਰਾਜਾਨਂ ਤਥਾਗਤਸ੍ਸ ਸਨ੍ਤਿਕਂ ਪੇਸੇਸਿ. ਸੋ ਗਨ੍ਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਨਂ ਭਗਵਾ – ‘‘ਹਨ੍ਦ ਕੁਤੋ ਨੁ ਤ੍ਵਂ, ਮਹਾਰਾਜ, ਆਗਚ੍ਛਸਿ ਦਿਵਾਦਿਵਸ੍ਸਾ’’ਤਿ ਆਹ. ਰਾਜਾ – ‘‘ਅਜ੍ਜ ਮੇ, ਭਨ੍ਤੇ, ਸੁਪਿਨਕੇ ਚਤ੍ਤਾਰੋ ਸਦ੍ਦਾ ਸੁਤਾ, ਸੋਹਂ ਬ੍ਰਾਹ੍ਮਣੇ ਪੁਚ੍ਛਿਂ. ਬ੍ਰਾਹ੍ਮਣਾ ‘ਭਾਰਿਯੋ, ਮਹਾਰਾਜ, ਸੁਪਿਨੋ, ਸਬ੍ਬਪਞ੍ਚਸਤਂ ਯਞ੍ਞਂ ਯਜਿਤ੍ਵਾ ਪਟਿਕਮ੍ਮਂ ਕਰੋਮਾਤਿ ਆਰਦ੍ਧਾ’’’ਤਿ ਆਹ. ਕਿਨ੍ਤਿ ਤੇ, ਮਹਾਰਾਜ, ਸਦ੍ਦਾ ਸੁਤਾਤਿ. ਸੋ ਯਥਾਸੁਤਂ ਆਰੋਚੇਸਿ. ਅਥ ਨਂ ਭਗਵਾ ਆਹ – ਪੁਬ੍ਬੇ, ਮਹਾਰਾਜ, ਇਮਸ੍ਮਿਂਯੇਵ ਨਗਰੇ ਚਤ੍ਤਾਰੋ ਸੇਟ੍ਠਿਪੁਤ੍ਤਾ ਪਰਦਾਰਿਕਾ ਹੁਤ੍ਵਾ ਨਨ੍ਦੋਪਨਨ੍ਦਾਯ ਲੋਹਕੁਮ੍ਭਿਯਾ ਨਿਬ੍ਬਤ੍ਤਾ ਸਟ੍ਠਿਵਸ੍ਸਸਹਸ੍ਸਮਤ੍ਥਕੇ ਉਗ੍ਗਚ੍ਛਿਂਸੁ.
ਤਤ੍ਥ ਏਕੋ –
‘‘ਸਟ੍ਠਿਵਸ੍ਸਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;
ਨਿਰਯੇ ਪਚ੍ਚਮਾਨਾਨਂ, ਕਦਾ ਅਨ੍ਤੋ ਭਵਿਸ੍ਸਤੀ’’ਤਿ.(ਪੇ. ਵ. ੮੦੨; ਜਾ. ੧.੪.੫੪) –
ਇਮਂ ਗਾਥਂ ਵਤ੍ਥੁਕਾਮੋ ਅਹੋਸਿ. ਦੁਤਿਯੋ –
‘‘ਸੋਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;
ਵਦਞ੍ਞੂ ਸੀਲਸਮ੍ਪਨ੍ਨੋ, ਕਾਹਾਮਿ ਕੁਸਲਂ ਬਹੁ’’ਨ੍ਤਿ. (ਪੇ. ਵ. ੮੦੫; ਜਾ. ੧.੪.੫੬) –
ਇਮਂ ਗਾਥਂ ਵਤ੍ਥੁਕਾਮੋ ਅਹੋਸਿ. ਤਤਿਯੋ –
‘‘ਨਤ੍ਥਿ ਅਨ੍ਤੋ ਕੁਤੋ ਅਨ੍ਤੋ, ਨ ਅਨ੍ਤੋ ਪਟਿਦਿਸ੍ਸਤਿ;
ਤਦਾ ਹਿ ਪਕਤਂ ਪਾਪਂ, ਮਮ ਤੁਯ੍ਹਞ੍ਚ ਮਾਰਿਸਾ’’ਤਿ. (ਪੇ. ਵ. ੮੦੩; ਜਾ. ੧.੪.੫੫) –
ਇਮਂ ਗਾਥਂ ਵਤ੍ਥੁਕਾਮੋ ਅਹੋਸਿ. ਚਤੁਤ੍ਥੋ –
‘‘ਦੁਜ੍ਜੀਵਿਤਮਜੀਵਿਮ੍ਹਾ, ਯੇ ਸਨ੍ਤੇ ਨ ਦਦਮ੍ਹਸੇ;
ਵਿਜ੍ਜਮਾਨੇਸੁ ਭੋਗੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ’’ਤਿ. (ਪੇ. ਵ. ੮੦੪; ਜਾ. ੧.੪.੫੩) –
ਇਮਂ. ਤੇ ਇਮਾ ਗਾਥਾ ਵਤ੍ਤੁਂ ਅਸਕ੍ਕੋਨ੍ਤਾ ਏਕੇਕਂ ਅਕ੍ਖਰਂ ਵਤ੍ਵਾ ਤਤ੍ਥੇਵ ਨਿਮੁਗ੍ਗਾ. ਇਤਿ, ਮਹਾਰਾਜ, ਤੇ ਨੇਰਯਿਕਸਤ੍ਤਾ ਯਥਾਕਮ੍ਮੇਨ ਵਿਰਵਿਂਸੁ. ਤਸ੍ਸ ਸਦ੍ਦਸ੍ਸ ਸੁਤਪਚ੍ਚਯਾ ਤੁਯ੍ਹਂ ਹਾਨਿ ਵਾ ਵੁਡ੍ਢਿ ਵਾ ਨਤ੍ਥਿ. ਏਤ੍ਤਕਾਨਂ ਪਨ ਪਸੂਨਂ ਘਾਤਨਕਮ੍ਮਂ ਨਾਮ ਭਾਰਿਯਨ੍ਤਿ ਨਿਰਯਭਯੇਨ ਤਜ੍ਜੇਤ੍ਵਾ ਧਮ੍ਮਕਥਂ ਕਥੇਸਿ. ਰਾਜਾ ਦਸਬਲੇ ਪਸੀਦਿਤ੍ਵਾ, ‘‘ਮੁਞ੍ਚਾਮਿ, ਨੇਸਂ ਜੀਵਿਤਂ ਦਦਾਮਿ, ਹਰਿਤਾਨਿ ਚੇਵ ਤਿਣਾਨਿ ਖਾਦਨ੍ਤੁ, ਸੀਤਲਾਨਿ ਚ ਪਾਨੀਯਾਨਿ ਪਿਵਨ੍ਤੁ, ਸੀਤੋ ਚ ਨੇਸਂ ਵਾਤੋ ਉਪਵਾਯਤੂ’’ਤਿ ਵਤ੍ਵਾ, ‘‘ਗਚ੍ਛਥ ਹਾਰੇਥਾ’’ਤਿ ਮਨੁਸ੍ਸੇ ਆਣਾਪੇਸਿ. ਤੇ ਗਨ੍ਤ੍ਵਾ ਬ੍ਰਾਹ੍ਮਣੇ ਪਲਾਪੇਤ੍ਵਾ ਤਂ ਪਾਣਸਙ੍ਘਂ ਬਨ੍ਧਨਤੋ ਮੋਚੇਤ੍ਵਾ ਨਗਰੇ ਧਮ੍ਮਭੇਰਿਂ ਚਰਾਪੇਸੁਂ.
ਅਥ ਰਾਜਾ ਦਸਬਲਸ੍ਸ ਸਨ੍ਤਿਕੇ ਨਿਸਿਨ੍ਨੋ ਆਹ – ‘‘ਭਨ੍ਤੇ, ਏਕਰਤ੍ਤਿ ਨਾਮ ਤਿਯਾਮਾ ਹੋਤਿ, ਮਯ੍ਹਂ ਪਨ ਅਜ੍ਜ ਦ੍ਵੇ ਰਤ੍ਤਿਯੋ ਏਕਤੋ ਘਟਿਤਾ ਵਿਯ ਅਹੇਸੁ’’ਨ੍ਤਿ. ਸੋਪਿ ਪੁਰਿਸੋ ਤਤ੍ਥੇਵ ਨਿਸਿਨ੍ਨੋ ਆਹ – ‘‘ਭਨ੍ਤੇ, ਯੋਜਨਂ ਨਾਮ ਚਤੁਗਾਵੁਤਂ ਹੋਤਿ, ਮਯ੍ਹਂ ਪਨ ਅਜ੍ਜ ਦ੍ਵੇ ਯੋਜਨਾਨਿ ਏਕਤੋ ਕਤਾਨਿ ਵਿਯ ਅਹੇਸੁ’’ਨ੍ਤਿ. ਅਥ ਭਗਵਾ – ‘‘ਜਾਗਰਸ੍ਸ ਤਾਵ ਰਤ੍ਤਿਯਾ ਦੀਘਭਾਵੋ ਪਾਕਟੋ, ਸਨ੍ਤਸ੍ਸ ਯੋਜਨਸ੍ਸ ਦੀਘਭਾਵੋ ਪਾਕਟੋ, ਵਟ੍ਟਪਤਿਤਸ੍ਸ ਪਨ ਬਾਲਪੁਥੁਜ੍ਜਨਸ੍ਸ ਅਨਮਤਗ੍ਗਸਂਸਾਰਵਟ੍ਟਂ ਏਕਨ੍ਤਦੀਘਮੇਵਾ’’ਤਿ ਰਾਜਾਨਞ੍ਚ ਤਞ੍ਚ ਪੁਰਿਸਂ ਨੇਰਯਿਕਸਤ੍ਤੇ ਚ ਆਰਬ੍ਭ ਧਮ੍ਮਪਦੇ ਇਮਂ ਗਾਥਂ ਅਭਾਸਿ –
‘‘ਦੀਘਾ ਜਾਗਰਤੋ ਰਤ੍ਤਿ, ਦੀਘਂ ਸਨ੍ਤਸ੍ਸ ਯੋਜਨਂ;
ਦੀਘੋ ਬਾਲਾਨਂ ਸਂਸਾਰੋ, ਸਦ੍ਧਮ੍ਮਂ ਅਵਿਜਾਨਤ’’ਨ੍ਤਿ. (ਧ. ਪ. ੬੦);
ਗਾਥਾਪਰਿਯੋਸਾਨੇ ਸੋ ਇਤ੍ਥਿਸਾਮਿਕੋ ਪੁਰਿਸੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਕਾਰਣਂ ਜਾਨਿਤ੍ਵਾ.
ਅਸ੍ਸਮੇਧਨ੍ਤਿਆਦੀਸੁ – ਪੋਰਾਣਰਾਜਕਾਲੇ ਕਿਰ ਸਸ੍ਸਮੇਧਂ ਪੁਰਿਸਮੇਧਂ ਸਮ੍ਮਾਪਾਸਂ ਵਾਚਾਪੇਯ੍ਯਨ੍ਤਿ ਚਤ੍ਤਾਰਿ ਸਙ੍ਗਹਵਤ੍ਥੂਨਿ ਅਹੇਸੁਂ, ਯੇਹਿ ਰਾਜਾਨੋ ਲੋਕਂ ਸਙ੍ਗਣ੍ਹਿਂਸੁ. ਤਤ੍ਥ ਨਿਪ੍ਫਨ੍ਨਸਸ੍ਸਤੋ ਦਸਮਭਾਗਗ੍ਗਹਣਂ ਸਸ੍ਸਮੇਧਂ ਨਾਮ, ਸਸ੍ਸਸਮ੍ਪਾਦਨੇ ਮੇਧਾਵਿਤਾਤਿ ਅਤ੍ਥੋ. ਮਹਾਯੋਧਾਨਂ ਛਮਾਸਿਕਂ ਭਤ੍ਤ-ਵੇਤਨਾਨੁਪ੍ਪਦਾਨਂ ਪੁਰਿਸਮੇਧਂ ਨਾਮ, ਪੁਰਿਸਸਙ੍ਗਣ੍ਹਨੇ ਮੇਧਾਵਿਤਾਤਿ ਅਤ੍ਥੋ. ਦਲਿਦ੍ਦਮਨੁਸ੍ਸਾਨਂ ਹਤ੍ਥਤੋ ਲੇਖਂ ਗਹੇਤ੍ਵਾ ਤੀਣਿ ਵਸ੍ਸਾਨਿ ਵਿਨਾਵ ਵਡ੍ਢਿਯਾ ਸਹਸ੍ਸਦ੍ਵਿਸਹਸ੍ਸਮਤ੍ਤਧਨਾਨੁਪ੍ਪਦਾਨਂ ਸਮ੍ਮਾਪਾਸਂ ਨਾਮ. ਤਞ੍ਹਿ ਸਮ੍ਮਾ ਮਨੁਸ੍ਸੇ ਪਾਸੇਤਿ, ਹਦਯੇ ਬਨ੍ਧਿਤ੍ਵਾ ਵਿਯ ਠਪੇਤਿ, ਤਸ੍ਮਾ ਸਮ੍ਮਾਪਾਸਨ੍ਤਿ ਵੁਚ੍ਚਤਿ. ‘‘ਤਾਤ ਮਾਤੁਲਾ’’ਤਿਆਦਿਨਾ ਨਯੇਨ ਸਣ੍ਹਵਾਚਾਭਣਨਂ ਵਾਚਾਪੇਯ੍ਯਂ ਨਾਮ, ਪਿਯਵਾਚਾਤਿ ਅਤ੍ਥੋ. ਏਵਂ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਹਿਤਂ ਰਟ੍ਠਂ ਇਦ੍ਧਞ੍ਚੇਵ ਹੋਤਿ ਫੀਤਞ੍ਚ ਪਹੂਤਅਨ੍ਨਪਾਨਂ ਖੇਮਂ ਨਿਰਬ੍ਬੁਦਂ. ਮਨੁਸ੍ਸਾ ਮੁਦਾ ਮੋਦਮਾਨਾ ਉਰੇ ਪੁਤ੍ਤੇ ਨਚ੍ਚੇਨ੍ਤਾ ਅਪਾਰੁਤਘਰਦ੍ਵਾਰਾ ਵਿਹਰਨ੍ਤਿ. ਇਦਂ ਘਰਦ੍ਵਾਰੇਸੁ ਅਗ੍ਗਲ਼ਾਨਂ ਅਭਾਵਤੋ ਨਿਰਗ੍ਗਲ਼ਨ੍ਤਿ ਵੁਚ੍ਚਤਿ. ਅਯਂ ਪੋਰਾਣਿਕਾ ਪਵੇਣੀ.
ਅਪਰਭਾਗੇ ਪਨ ਓਕ੍ਕਾਕਰਾਜਕਾਲੇ ਬ੍ਰਾਹ੍ਮਣਾ ਇਮਾਨਿ ਚਤ੍ਤਾਰਿ ਸਙ੍ਗਹਵਤ੍ਥੂਨਿ ਇਮਞ੍ਚ ਰਟ੍ਠਸਮ੍ਪਤ੍ਤਿਂ ਪਰਿਵਤ੍ਤੇਤ੍ਵਾ ਉਦ੍ਧਂਮੂਲਕਂ ਕਤ੍ਵਾ ਅਸ੍ਸਮੇਧਂ ਪੁਰਿਸਮੇਧਨ੍ਤਿ ਆਦਿਕੇ ਪਞ੍ਚ ਯਞ੍ਞੇ ਨਾਮ ਅਕਂਸੁ. ਤੇਸੁ ਅਸ੍ਸਮੇਤ੍ਥ ਮੇਧਨ੍ਤਿ ਵਧਨ੍ਤੀਤਿ ਅਸ੍ਸਮੇਧੋ. ਦ੍ਵੀਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਏਕਵੀਸਤਿਯੂਪਸ੍ਸ ਏਕਸ੍ਮਿਂ ਮਜ੍ਝਿਮਦਿਵਸੇਯੇਵ ਸਤ੍ਤਨਵੁਤਿਪਞ੍ਚਪਸੁਸਤਘਾਤਭਿਂਸਨਸ੍ਸ ਠਪੇਤ੍ਵਾ ਭੂਮਿਞ੍ਚ ਪੁਰਿਸੇ ਚ ਅਵਸੇਸਸਬ੍ਬਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਪੁਰਿਸਮੇਤ੍ਥ ਮੇਧਨ੍ਤੀਤਿ ਪੁਰਿਸਮੇਧੋ. ਚਤੂਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਸਮ੍ਮਮੇਤ੍ਥ ਪਾਸੇਨ੍ਤੀਤਿ ਸਮ੍ਮਾਪਾਸੋ. ਦਿਵਸੇ ਦਿਵਸੇ ਸਮ੍ਮਂ ਖਿਪਿਤ੍ਵਾ ਤਸ੍ਸ ਪਤਿਤੋਕਾਸੇ ਵੇਦਿਂ ਕਤ੍ਵਾ ਸਂਹਾਰਿਮੇਹਿ ਯੂਪਾਦੀਹਿ ਸਰਸ੍ਸਤਿਨਦਿਯਾ ਨਿਮੁਗ੍ਗੋਕਾਸਤੋ ਪਭੁਤਿ ਪਟਿਲੋਮਂ ਗਚ੍ਛਨ੍ਤੇਨ ਯਜਿਤਬ੍ਬਸ੍ਸ ਸਤ੍ਰਯਾਗਸ੍ਸੇਤਂ ਅਧਿਵਚਨਂ. ਵਾਜਮੇਤ੍ਥ ਪਿਵਨ੍ਤੀਤਿ ਵਾਜਪੇਯ੍ਯੋ. ਏਕੇਨ ਪਰਿਯਞ੍ਞੇਨ ਸਤ੍ਤਰਸਹਿ ਪਸੂਹਿ ਯਜਿਤਬ੍ਬਸ੍ਸ ਬੇਲੁਵਯੂਪਸ੍ਸ ਸਤ੍ਤਰਸਕਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਨਤ੍ਥਿ ਏਤ੍ਥ ਅਗ੍ਗਲ਼ਾਤਿ ਨਿਰਗ੍ਗਲ਼ੋ. ਨਵਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਚ ਪੁਰਿਸੇਹਿ ਚ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਸਬ੍ਬਮੇਧਪਰਿਯਾਯਨਾਮਸ੍ਸ ਅਸ੍ਸਮੇਧਵਿਕਪ੍ਪਸ੍ਸੇਵੇਤਂ ਅਧਿਵਚਨਂ. ਮਹਾਰਮ੍ਭਾਤਿ ਮਹਾਕਿਚ੍ਚਾ ਮਹਾਕਰਣੀਯਾ. ਸਮ੍ਮਗ੍ਗਤਾਤਿ ਸਮ੍ਮਾ ਪਟਿਪਨ੍ਨਾ ਬੁਦ੍ਧਾਦਯੋ. ਨਿਰਾਰਮ੍ਭਾਤਿ ਅਪ੍ਪਤ੍ਥਾ ਅਪ੍ਪਕਿਚ੍ਚਾ. ਯਜਨ੍ਤਿ ਅਨੁਕੁਲਨ੍ਤਿ ਅਨੁਕੁਲੇਸੁ ਯਜਨ੍ਤਿ, ਯਂ ਨਿਚ੍ਚਭਤ੍ਤਾਦਿ ਪੁਬ੍ਬਪੁਰਿਸੇਹਿ ਪਟ੍ਠਪਿਤਂ, ਤਂ ਅਪਰਾਪਰਂ ਅਨੁਪਚ੍ਛਿਨ੍ਨਤ੍ਤਾ ਮਨੁਸ੍ਸਾ ਦਦਨ੍ਤੀਤਿ ਅਤ੍ਥੋ. ਨਵਮਂ.
੧੦. ਬਨ੍ਧਨਸੁਤ੍ਤਵਣ੍ਣਨਾ
੧੨੧. ਦਸਮੇ ਇਧ, ਭਨ੍ਤੇ, ਰਞ੍ਞਾਤਿ ਇਦਂ ਤੇ ਭਿਕ੍ਖੂ ਤੇਸੁ ਮਨੁਸ੍ਸੇਸੁ ਆਨਨ੍ਦਤ੍ਥੇਰਸ੍ਸ ਸੁਕਤਕਾਰਣਂ ਆਰੋਚੇਨ੍ਤਾ ਆਰੋਚੇਸੁਂ. ਰਞ੍ਞੋ ਕਿਰ ਸਕ੍ਕੇਨ ਕੁਸਰਾਜਸ੍ਸ ਦਿਨ੍ਨੋ ਅਟ੍ਠਵਙ੍ਕੋ ਮਣਿ ਪਵੇਣਿਯਾ ਆਗਤੋ. ਰਾਜਾ ਅਲਙ੍ਕਰਣਕਾਲੇ ਤਂ ਮਣਿਂ ਆਹਰਥਾਤਿ ਆਹ. ਮਨੁਸ੍ਸਾ ‘‘ਠਪਿਤਟ੍ਠਾਨੇ ਨ ਪਸ੍ਸਾਮਾ’’ਤਿ ਆਰੋਚੇਸੁਂ. ਰਾਜਾ ਅਨ੍ਤੋਘਰਚਾਰਿਨੋ ‘‘ਮਣਿਂ ਪਰਿਯੇਸਿਤ੍ਵਾ ਦੇਥਾ’’ਤਿ ਬਨ੍ਧਾਪੇਸਿ. ਆਨਨ੍ਦਤ੍ਥੇਰੋ ਤੇ ਦਿਸ੍ਵਾ ਮਣਿਪਟਿਸਾਮਕਾਨਂ ਏਕਂ ਉਪਾਯਂ ਆਚਿਕ੍ਖਿ. ਤੇ ਰਞ੍ਞੋ ਆਰੋਚੇਸੁਂ. ਰਾਜਾ ‘‘ਪਣ੍ਡਿਤੋ ਥੇਰੋ, ਥੇਰਸ੍ਸ ਵਚਨਂ ਕਰੋਥਾ’’ਤਿ. ਪਟਿਸਾਮਕਮਨੁਸ੍ਸਾ ਰਾਜਙ੍ਗਣੇ ਉਦਕਚਾਟਿਂ ਠਪੇਤ੍ਵਾ ਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਤੇ ਮਨੁਸ੍ਸੇ ਆਹਂਸੁ – ‘‘ਸਾਟਕਂ ਪਾਰੁਪਿਤ੍ਵਾ ਏਤ੍ਥ ਗਨ੍ਤ੍ਵਾ ਹਤ੍ਥਂ ਓਤਾਰੇਥਾ’’ਤਿ. ਮਣਿਚੋਰੋ ਚਿਨ੍ਤੇਸਿ – ‘‘ਰਾਜਭਣ੍ਡਂ ਵਿਸ੍ਸਜ੍ਜੇਤੁਂ ਵਾ ਵਲਞ੍ਜੇਤੁਂ ਵਾ ਨ ਸਕ੍ਕਾ’’ਤਿ. ਸੋ ਗੇਹਂ ਗਨ੍ਤ੍ਵਾ ਮਣਿਂ ਉਪਕਚ੍ਛਕੇ ਠਪੇਤ੍ਵਾ ਸਾਟਕਂ ਪਾਰੁਪਿਤ੍ਵਾ ਆਗਮ੍ਮ ਉਦਕਚਾਟਿਯਂ ਪਕ੍ਖਿਪਿਤ੍ਵਾ ਪਕ੍ਕਾਮਿ. ਮਹਾਜਨੇ ਪਟਿਕ੍ਕਨ੍ਤੇ ਰਾਜਮਨੁਸ੍ਸਾ ਚਾਟਿਯਂ ਹਤ੍ਥਂ ਓਤਾਰੇਤ੍ਵਾ ਮਣਿਂ ਦਿਸ੍ਵਾ ਆਹਰਿਤ੍ਵਾ ਰਞ੍ਞੋ ਅਦਂਸੁ. ‘‘ਆਨਨ੍ਦਤ੍ਥੇਰੇਨ ਕਿਰ ਦਸ੍ਸਿਤਨਯੇਨ ਮਣਿ ਦਿਟ੍ਠੋ’’ਤਿ ਮਹਾਜਨੋ ਕੋਲਾਹਲਂ ਅਕਾਸਿ. ਤੇ ਭਿਕ੍ਖੂ ਤਂ ਕਾਰਣਂ ਤਥਾਗਤਸ੍ਸ ਆਰੋਚੇਨ੍ਤਾ ਇਮਂ ਪਵਤ੍ਤਿਂ ਆਰੋਚੇਸੁਂ. ਸਤ੍ਥਾ – ‘‘ਅਨਚ੍ਛਰਿਯਂ, ਭਿਕ੍ਖਵੇ, ਯਂ ਆਨਨ੍ਦੋ ਮਨੁਸ੍ਸਾਨਂ ਹਤ੍ਥਾਰੁਲ਼੍ਹਮਣਿਂ ਆਹਰਾਪੇਯ੍ਯ, ਯਤ੍ਥ ਪੁਬ੍ਬੇ ਪਣ੍ਡਿਤਾ ਅਤ੍ਤਨੋ ਞਾਣੇ ਠਤ੍ਵਾ ਅਹੇਤੁਕਪਟਿਸਨ੍ਧਿਯਂ ਨਿਬ੍ਬਤ੍ਤਾਨਂ ਤਿਰਚ੍ਛਾਨਗਤਾਨਮ੍ਪਿ ਹਤ੍ਥਾਰੁਲ਼੍ਹਂ ਭਣ੍ਡਂ ਆਹਰਾਪੇਤ੍ਵਾ ਰਞ੍ਞੋ ਅਦਂਸੂ’’ਤਿ ਵਤ੍ਵਾ –
‘‘ਉਕ੍ਕਟ੍ਠੇ ਸੂਰਮਿਚ੍ਛਨ੍ਤਿ, ਮਨ੍ਤੀਸੁ ਅਕੁਤੂਹਲਂ;
ਪਿਯਞ੍ਚ ਅਨ੍ਨਪਾਨਮ੍ਹਿ, ਅਤ੍ਥੇ ਜਾਤੇ ਚ ਪਣ੍ਡਿਤ’’ਨ੍ਤਿ. (ਜਾ. ੧.੧.੯੨) –
ਮਹਾਸਾਰਜਾਤਕਂ ਕਥੇਸਿ.
ਨ ਤਂ ਦਲ਼੍ਹਨ੍ਤਿ ਤਂ ਬਨ੍ਧਨਂ ਥਿਰਨ੍ਤਿ ਨ ਕਥੇਨ੍ਤਿ. ਯਦਾਯਸਨ੍ਤਿ ਯਂ ਆਯਸਾ ਕਤਂ. ਸਾਰਤ੍ਤਰਤ੍ਤਾਤਿ ਸੁਟ੍ਠੁ ਰਤ੍ਤਰਤ੍ਤਾ, ਸਾਰਤ੍ਤੇਨ ਵਾ ਰਤ੍ਤਾ ਸਾਰਤ੍ਤਰਤ੍ਤਾ, ਸਾਰਂ ਇਦਨ੍ਤਿ ਮਞ੍ਞਨਾਯ ਰਤ੍ਤਾਤਿ ਅਤ੍ਥੋ. ਅਪੇਕ੍ਖਾਤਿ ਆਲਯੋ ਨਿਕਨ੍ਤਿ. ਆਹੂਤਿ ਕਥੇਨ੍ਤਿ. ਓਹਾਰਿਨਨ੍ਤਿ ਚਤੂਸੁ ਅਪਾਯੇਸੁ ਆਕਡ੍ਢਨਕਂ. ਸਿਥਿਲਨ੍ਤਿ ਨ ਆਯਸਾਦਿਬਨ੍ਧਨਂ ਵਿਯ ਇਰਿਯਾਪਥਂ ਨਿਵਾਰੇਤ੍ਵਾ ਠਿਤਂ. ਤੇਨ ਹਿ ਬਨ੍ਧਨੇਨ ਬਦ੍ਧਾ ਪਰਦੇਸਮ੍ਪਿ ਗਚ੍ਛਨ੍ਤਿਯੇਵ. ਦੁਪ੍ਪਮੁਞ੍ਚਨ੍ਤਿ ਅਞ੍ਞਤ੍ਰ ਲੋਕੁਤ੍ਤਰਞਾਣੇਨ ਮੁਞ੍ਚਿਤੁਂ ਅਸਕ੍ਕੁਣੇਯ੍ਯਨ੍ਤਿ. ਦਸਮਂ.
ਪਠਮੋ ਵਗ੍ਗੋ.
੨. ਦੁਤਿਯਵਗ੍ਗੋ
੧. ਸਤ੍ਤਜਟਿਲਸੁਤ੍ਤਵਣ੍ਣਨਾ
੧੨੨. ਦੁਤਿਯਵਗ੍ਗਸ੍ਸ ਪਠਮੇ ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇਤਿ ਪੁਬ੍ਬਾਰਾਮਸਙ੍ਖਾਤੇ ਵਿਹਾਰੇ ਮਿਗਾਰਮਾਤੁਯਾ ਪਾਸਾਦੇ. ਤਤ੍ਰਾਯਂ ਅਨੁਪੁਬ੍ਬਿਕਥਾ – ਅਤੀਤੇ ਸਤਸਹਸ੍ਸਕਪ੍ਪਮਤ੍ਥਕੇ ਏਕਾ ਉਪਾਸਿਕਾ ਪਦੁਮੁਤ੍ਤਰਂ ਭਗਵਨ੍ਤਂ ਨਿਮਨ੍ਤੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤਸਹਸ੍ਸਦਾਨਂ ਦਤ੍ਵਾ ਭਗਵਤੋ ਪਾਦਮੂਲੇ ਨਿਪਜ੍ਜਿਤ੍ਵਾ – ‘‘ਅਨਾਗਤੇ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਅਗ੍ਗੁਪਟ੍ਠਾਯਿਕਾ ਹੋਮੀ’’ਤਿ ਪਤ੍ਥਨਂ ਅਕਾਸਿ. ਸਾ ਕਪ੍ਪਸਤਸਹਸ੍ਸਂ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਿਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਭਦ੍ਦਿਯਨਗਰੇ ਮੇਣ੍ਡਕਪੁਤ੍ਤਸ੍ਸ ਧਨਞ੍ਚਯਸੇਟ੍ਠਿਨੋ ਗੇਹੇ ਸੁਮਨਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ. ਜਾਤਕਾਲੇ ਚਸ੍ਸਾ ਵਿਸਾਖਾਤਿ ਨਾਮਂ ਅਕਂਸੁ. ਸਾ ਯਦਾ ਭਗਵਾ ਭਦ੍ਦਿਯਨਗਰਂ ਅਗਮਾਸਿ, ਤਦਾ ਪਞ੍ਚਹਿ ਦਾਰਿਕਾਸਤੇਹਿ ਸਦ੍ਧਿਂ ਭਗਵਤੋ ਪਚ੍ਚੁਗ੍ਗਮਨਂ ਗਤਾ ਪਠਮਦਸ੍ਸਨਮ੍ਹਿਯੇਵ ਸੋਤਾਪਨ੍ਨਾ ਅਹੋਸਿ. ਅਪਰਭਾਗੇ ਸਾਵਤ੍ਥਿਯਂ ਮਿਗਾਰਸੇਟ੍ਠਿਪੁਤ੍ਤਸ੍ਸ ਪੁਣ੍ਣਵਡ੍ਢਨਕੁਮਾਰਸ੍ਸ ਗੇਹਂ ਗਤਾ. ਤਤ੍ਥ ਨਂ ਮਿਗਾਰਸੇਟ੍ਠਿ ਮਾਤਿਟ੍ਠਾਨੇ ਠਪੇਸਿ, ਤਸ੍ਮਾ ਮਿਗਾਰਮਾਤਾਤਿ ਵੁਚ੍ਚਤਿ. ਤਾਯ ਕਾਰਿਤੇ ਪਾਸਾਦੇ.
ਬਹਿ ਦ੍ਵਾਰਕੋਟ੍ਠਕੇਤਿ ਪਾਸਾਦਦ੍ਵਾਰਕੋਟ੍ਠਕਸ੍ਸ ਬਹਿ, ਨ ਵਿਹਾਰਦ੍ਵਾਰਕੋਟ੍ਠਕਸ੍ਸ. ਸੋ ਕਿਰ ਪਾਸਾਦੋ ਲੋਹਪਾਸਾਦੋ ਵਿਯ ਸਮਨ੍ਤਾ ਚਤੁਦ੍ਵਾਰਕੋਟ੍ਠਕਯੁਤ੍ਤੇਨ ਪਾਕਾਰੇਨ ਪਰਿਕ੍ਖਿਤ੍ਤੋ. ਤੇਸੁ ਪਾਚੀਨਦ੍ਵਾਰਕੋਟ੍ਠਕਸ੍ਸ ਬਹਿ ਪਾਸਾਦਚ੍ਛਾਯਾਯਂ ਪਾਚੀਨਲੋਕਧਾਤੁਂ ਓਲੋਕੇਨ੍ਤੋ ਪਞ੍ਞਤ੍ਤੇ ਵਰਬੁਦ੍ਧਾਸਨੇ ਨਿਸਿਨ੍ਨੋ ਹੋਤਿ.
ਪਰੂਲ਼੍ਹਕਚ੍ਛਨਖਲੋਮਾਤਿ ਪਰੂਲ਼੍ਹਕਚ੍ਛਾ ਪਰੂਲ਼੍ਹਨਖਾ ਪਰੂਲ਼੍ਹਲੋਮਾ, ਕਚ੍ਛਾਦੀਸੁ ਦੀਘਲੋਮਾ ਦੀਘਨਖਾ ਚਾਤਿ ਅਤ੍ਥੋ. ਖਾਰਿਵਿਵਿਧਨ੍ਤਿ ਵਿਵਿਧਖਾਰਿਂ ਨਾਨਪ੍ਪਕਾਰਕਂ ਪਬ੍ਬਜਿਤਪਰਿਕ੍ਖਾਰਭਣ੍ਡਕਂ. ਅਵਿਦੂਰੇ ਅਤਿਕ੍ਕਮਨ੍ਤੀਤਿ ਅਵਿਦੂਰਮਗ੍ਗੇਨ ਨਗਰਂ ਪਵਿਸਨ੍ਤਿ. ਰਾਜਾਹਂ, ਭਨ੍ਤੇਤਿ ਅਹਂ, ਭਨ੍ਤੇ, ਰਾਜਾ ਪਸੇਨਦਿ ਕੋਸਲੋ, ਮਯ੍ਹਂ ਨਾਮਂ ਤੁਮ੍ਹੇ ਜਾਨਾਥਾਤਿ. ਕਸ੍ਮਾ ਪਨ ਰਾਜਾ ਲੋਕੇ ਅਗ੍ਗਪੁਗ੍ਗਲਸ੍ਸ ਸਨ੍ਤਿਕੇ ਨਿਸਿਨ੍ਨੋ ਏਵਰੂਪਾਨਂ ਨਗ੍ਗਭੋਗ੍ਗਨਿਸ੍ਸਿਰਿਕਾਨਂ ਅਞ੍ਜਲਿਂ ਪਗ੍ਗਣ੍ਹਾਤੀਤਿ. ਸਙ੍ਗਣ੍ਹਨਤ੍ਥਾਯ. ਏਵਂ ਹਿਸ੍ਸ ਅਹੋਸਿ – ‘‘ਸਚਾਹਂ ਏਤ੍ਤਕਮ੍ਪਿ ਏਤੇਸਂ ਨ ਕਰਿਸ੍ਸਾਮਿ, ‘ਮਯਂ ਪੁਤ੍ਤਦਾਰਂ ਪਹਾਯ ਏਤਸ੍ਸਤ੍ਥਾਯ ਦੁਬ੍ਭੋਜਨਦੁਕ੍ਖਸੇਯ੍ਯਾਦੀਨਿ ਅਨੁਭੋਮ, ਅਯਂ ਅਮ੍ਹਾਕਂ ਅਞ੍ਜਲਿਮਤ੍ਤਮ੍ਪਿ ਨ ਕਰੋਤੀ’ਤਿ ਅਤ੍ਤਨਾ ਦਿਟ੍ਠਂ ਸੁਤਂ ਪਟਿਚ੍ਛਾਦੇਤ੍ਵਾ ਨ ਕਥੇਯ੍ਯੁਂ. ਏਵਂ ਕਤੇ ਪਨ ਅਨਿਗੂਹਿਤ੍ਵਾ ਕਥੇਸ੍ਸਨ੍ਤੀ’’ਤਿ. ਤਸ੍ਮਾ ਏਵਮਕਾਸਿ. ਅਪਿਚ ਸਤ੍ਥੁ ਅਜ੍ਝਾਸਯਜਾਨਨਤ੍ਥਂ ਏਵਮਕਾਸਿ.
ਕਾਸਿਕਚਨ੍ਦਨਨ੍ਤਿ ਸਣ੍ਹਚਨ੍ਦਨਂ. ਮਾਲਾਗਨ੍ਧਵਿਲੇਪਨਨ੍ਤਿ ਵਣ੍ਣਗਨ੍ਧਤ੍ਥਾਯ ਮਾਲਂ, ਸੁਗਨ੍ਧਭਾਵਤ੍ਥਾਯ ਗਨ੍ਧਂ, ਵਣ੍ਣਗਨ੍ਧਤ੍ਥਾਯ ਵਿਲੇਪਨਞ੍ਚ ਧਾਰੇਨ੍ਤੇਨ.
ਸਂਵਾਸੇਨਾਤਿ ਸਹਵਾਸੇਨ. ਸੀਲਂ ਵੇਦਿਤਬ੍ਬਨ੍ਤਿ ਅਯਂ ਸੁਸੀਲੋ ਵਾ ਦੁਸ੍ਸੀਲੋ ਵਾਤਿ ਸਂਵਸਨ੍ਤੇਨ ਉਪਸਙ੍ਕਮਨ੍ਤੇਨ ਜਾਨਿਤਬ੍ਬੋ. ਤਞ੍ਚ ਖੋ ਦੀਘੇਨ ਅਦ੍ਧੁਨਾ ਨ ਇਤ੍ਤਰਨ੍ਤਿ ਤਞ੍ਚ ਸੀਲਂ ਦੀਘੇਨ ਕਾਲੇਨ ਵੇਦਿਤਬ੍ਬਂ, ਨ ਇਤ੍ਤਰੇਨ. ਦ੍ਵੀਹਤੀਹਞ੍ਹਿ ਸਂਯਤਾਕਾਰੋ ਚ ਸਂਵੁਤਿਨ੍ਦ੍ਰਿਯਾਕਾਰੋ ਚ ਨ ਸਕ੍ਕਾ ਦਸ੍ਸੇਤੁਂ. ਮਨਸਿਕਰੋਤਾਤਿ ਸੀਲਮਸ੍ਸ ਪਰਿਗ੍ਗਹੇਸ੍ਸਾਮੀਤਿ ਮਨਸਿਕਰੋਨ੍ਤੇਨ ਪਚ੍ਚਵੇਕ੍ਖਨ੍ਤੇਨੇਵ ਸਕ੍ਕਾ ਜਾਨਿਤੁਂ, ਨ ਇਤਰੇਨ. ਪਞ੍ਞਵਤਾਤਿ ਤਮ੍ਪਿ ਸਪ੍ਪਞ੍ਞੇਨੇਵ ਪਣ੍ਡਿਤੇਨ. ਬਾਲੋ ਹਿ ਮਨਸਿਕਰੋਨ੍ਤੋਪਿ ਜਾਨਿਤੁਂ ਨ ਸਕ੍ਕੋਤਿ.
ਸਂਵੋਹਾਰੇਨਾਤਿ ਕਥਨੇਨ.
‘‘ਯੋ ਹਿ ਕੋਚਿ ਮਨੁਸ੍ਸੇਸੁ, ਵੋਹਾਰਂ ਉਪਜੀਵਤਿ;
ਏਵਂ ਵਾਸੇਟ੍ਠ ਜਾਨਾਹਿ, ਵਾਣਿਜੋ ਸੋ ਨ ਬ੍ਰਾਹ੍ਮਣੋ’’ਤਿ. (ਮ. ਨਿ. ੨.੪੫੭) –
ਏਤ੍ਥ ਹਿ ਬ੍ਯਵਹਾਰੋ ਵੋਹਾਰੋ ਨਾਮ. ‘‘ਚਤ੍ਤਾਰੋ ਅਰਿਯਵੋਹਾਰਾ ਚਤ੍ਤਾਰੋ ਅਨਰਿਯਵੋਹਾਰਾ’’ਤਿ (ਦੀ. ਨਿ. ੩.੩੧੩) ਏਤ੍ਥ ਚੇਤਨਾ. ‘‘ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ ਵੋਹਾਰੋ’’ਤਿ (ਧ. ਸ. ੧੩੧੩-੧੩੧੫) ਏਤ੍ਥ ਪਞ੍ਞਤ੍ਤਿ. ‘‘ਵੋਹਾਰਮਤ੍ਤੇਨ ਸੋ ਵੋਹਰੇਯ੍ਯਾ’’ਤਿ (ਸਂ. ਨਿ. ੧.੨੫) ਏਤ੍ਥ ਕਥਾ ਵੋਹਾਰੋ. ਇਧਾਪਿ ਏਸੋਵ ਅਧਿਪ੍ਪੇਤੋ. ਏਕਚ੍ਚਸ੍ਸ ਹਿ ਸਮ੍ਮੁਖਾ ਕਥਾ ਪਰਮ੍ਮੁਖਾਯ ਕਥਾਯ ਨ ਸਮੇਤਿ, ਪਰਮ੍ਮੁਖਾ ਕਥਾ ਚ ਸਮ੍ਮੁਖਾਯ ਕਥਾਯ, ਤਥਾ ਪੁਰਿਮਕਥਾ ਚ ਪਚ੍ਛਿਮਕਥਾਯ, ਪਚ੍ਛਿਮਕਥਾ ਚ ਪੁਰਿਮਕਥਾਯ. ਸੋ ਕਥੇਨ੍ਤੇਨੇਵ ਸਕ੍ਕਾ ਜਾਨਿਤੁਂ ‘‘ਅਸੁਚਿ ਏਸੋ ਪੁਗ੍ਗਲੋ’’ਤਿ. ਸੁਚਿਸੀਲਸ੍ਸ ਪਨ ਪੁਰਿਮਂ ਪਚ੍ਛਿਮੇਨ, ਪਚ੍ਛਿਮਞ੍ਚ ਪੁਰਿਮੇਨ ਸਮੇਤਿ, ਸਮ੍ਮੁਖਾਕਥਿਤਂ ਪਰਮ੍ਮੁਖਾਕਥਿਤੇਨ, ਪਰਮ੍ਮੁਖਾਕਥਿਤਞ੍ਚ ਸਮ੍ਮੁਖਾਕਥਿਤੇਨ, ਤਸ੍ਮਾ ਕਥੇਨ੍ਤੇਨ ਸਕ੍ਕਾ ਸੁਚਿਭਾਵੋ ਜਾਨਿਤੁਨ੍ਤਿ ਪਕਾਸੇਨ੍ਤੋ ਏਵਮਾਹ.
ਥਾਮੋਤਿ ਞਾਣਥਾਮੋ. ਯਸ੍ਸ ਹਿ ਞਾਣਥਾਮੋ ਨਤ੍ਥਿ, ਸੋ ਉਪ੍ਪਨ੍ਨੇਸੁ ਉਪਦ੍ਦਵੇਸੁ ਗਹੇਤਬ੍ਬਗ੍ਗਹਣਂ ਕਤਬ੍ਬਕਿਚ੍ਚਂ ਅਪਸ੍ਸਨ੍ਤੋ ਅਦ੍ਵਾਰਘਰਂ ਪਵਿਟ੍ਠੋ ਵਿਯ ਚਰਤਿ. ਤੇਨਾਹ ਆਪਦਾਸੁ ਖੋ, ਮਹਾਰਾਜ, ਥਾਮੋ ਵੇਦਿਤਬ੍ਬੋਤਿ. ਸਾਕਚ੍ਛਾਯਾਤਿ ਸਂਕਥਾਯ. ਦੁਪ੍ਪਞ੍ਞਸ੍ਸ ਹਿ ਕਥਾ ਉਦਕੇ ਗੇਣ੍ਡੁ ਵਿਯ ਉਪ੍ਪਲਵਤਿ, ਪਞ੍ਞਵਤੋ ਕਥੇਨ੍ਤਸ੍ਸ ਪਟਿਭਾਨਂ ਅਨਨ੍ਤਰਂ ਹੋਤਿ. ਉਦਕਵਿਪ੍ਫਨ੍ਦਿਤੇਨੇਵ ਹਿ ਮਚ੍ਛੋ ਖੁਦ੍ਦਕੋ ਵਾ ਮਹਨ੍ਤੋ ਵਾਤਿ ਞਾਯਤਿ. ਓਚਰਕਾਤਿ ਹੇਟ੍ਠਾਚਰਕਾ. ਚਰਾ ਹਿ ਪਬ੍ਬਤਮਤ੍ਥਕੇਨ ਚਰਨ੍ਤਾਪਿ ਹੇਟ੍ਠਾ – ਚਰਕਾਵ ਹੋਨ੍ਤਿ. ਓਚਰਿਤ੍ਵਾਤਿ ਅਵਚਰਿਤ੍ਵਾ ਵੀਮਂਸਿਤ੍ਵਾ, ਤਂ ਤਂ ਪਵਤ੍ਤਿਂ ਞਤ੍ਵਾਤਿ ਅਤ੍ਥੋ. ਰਜੋਜਲ੍ਲਨ੍ਤਿ ਰਜਞ੍ਚ ਜਲ੍ਲਞ੍ਚ. ਵਣ੍ਣਰੂਪੇਨਾਤਿ ਵਣ੍ਣਸਣ੍ਠਾਨੇਨ. ਇਤ੍ਤਰਦਸ੍ਸਨੇਨਾਤਿ ਲਹੁਕਦਸ੍ਸਨੇਨ. ਵਿਯਞ੍ਜਨੇਨਾਤਿ ਪਰਿਕ੍ਖਾਰਭਣ੍ਡਕੇਨ. ਪਤਿਰੂਪਕੋ ਮਤ੍ਤਿਕਾਕੁਣ੍ਡਲੋਵਾਤਿ ਸੁਵਣ੍ਣਕੁਣ੍ਡਲਪਤਿਰੂਪਕੋ ਮਤ੍ਤਿਕਾਕੁਣ੍ਡਲੋਵ. ਲੋਹਡ੍ਢਮਾਸੋਤਿ ਲੋਹਡ੍ਢਮਾਸਕੋ. ਪਠਮਂ.
੨. ਪਞ੍ਚਰਾਜਸੁਤ੍ਤਵਣ੍ਣਨਾ
੧੨੩. ਦੁਤਿਯੇ ਰੂਪਾਤਿ ਨੀਲਪੀਤਾਦਿਭੇਦਂ ਰੂਪਾਰਮ੍ਮਣਂ. ਕਾਮਾਨਂ ਅਗ੍ਗਨ੍ਤਿ ਏਤਂ ਕਾਮਾਨਂ ਉਤ੍ਤਮਂ ਸੇਟ੍ਠਨ੍ਤਿ ਰੂਪਗਰੁਕੋ ਆਹ. ਸੇਸੇਸੁਪਿ ਏਸੇਵ ਨਯੋ. ਯਤੋਤਿ ਯਦਾ. ਮਨਾਪਪਰਿਯਨ੍ਤਨ੍ਤਿ ਮਨਾਪਨਿਪ੍ਫਤ੍ਤਿਕਂ ਮਨਾਪਕੋਟਿਕਂ. ਤਤ੍ਥ ਦ੍ਵੇ ਮਨਾਪਾਨਿ ਪੁਗ੍ਗਲਮਨਾਪਂ ਸਮ੍ਮੁਤਿਮਨਾਪਞ੍ਚ. ਪੁਗ੍ਗਲਮਨਾਪਂ ਨਾਮ ਯਂ ਏਕਸ੍ਸ ਪੁਗ੍ਗਲਸ੍ਸ ਇਟ੍ਠਂ ਕਨ੍ਤਂ ਹੋਤਿ, ਤਦੇਵ ਅਞ੍ਞਸ੍ਸ ਅਨਿਟ੍ਠਂ ਅਕਨ੍ਤਂ. ਪਚ੍ਚਨ੍ਤਵਾਸੀਨਞ੍ਹਿ ਗਣ੍ਡੁਪ੍ਪਾਦਾਪਿ ਇਟ੍ਠਾ ਹੋਨ੍ਤਿ ਕਨ੍ਤਾ ਮਨਾਪਾ, ਮਜ੍ਝਿਮਦੇਸਵਾਸੀਨਂ ਅਤਿਜੇਗੁਚ੍ਛਾ. ਤੇਸਞ੍ਚ ਮੋਰਮਂਸਾਦੀਨਿ ਇਟ੍ਠਾਨਿ ਹੋਨ੍ਤਿ, ਇਤਰੇਸਂ ਤਾਨਿ ਅਤਿਜੇਗੁਚ੍ਛਾਨਿ. ਇਦਂ ਪੁਗ੍ਗਲਮਨਾਪਂ. ਇਤਰਂ ਸਮ੍ਮੁਤਿਮਨਾਪਂ.
ਇਟ੍ਠਾਨਿਟ੍ਠਾਰਮ੍ਮਣਂ ਨਾਮ ਲੋਕੇ ਪਟਿਵਿਭਤ੍ਤਂ ਨਤ੍ਥਿ, ਵਿਭਜਿਤ੍ਵਾ ਪਨ ਦਸ੍ਸੇਤਬ੍ਬਂ. ਵਿਭਜਨ੍ਤੇਨ ਚ ਨ ਅਤਿਇਸ੍ਸਰਾਨਂ ਮਹਾਸਮ੍ਮਤਮਹਾਸੁਦਸ੍ਸਨਧਮ੍ਮਾਸੋਕਾਦੀਨਂ ਵਸੇਨ ਵਿਭਜਿਤਬ੍ਬਂ. ਤੇਸਞ੍ਹਿ ਦਿਪ੍ਪਕਪ੍ਪਮ੍ਪਿ ਆਰਮ੍ਮਣਂ ਅਮਨਾਪਂ ਉਪਟ੍ਠਾਤਿ. ਅਤਿਦੁਗ੍ਗਤਾਨਂ ਦੁਲ੍ਲਭਨ੍ਨਪਾਨਾਨਂ ਵਸੇਨਪਿ ਨ ਵਿਭਜਿਤਬ੍ਬਂ. ਤੇਸਞ੍ਹਿ ਕਣਾਜਕਭਤ੍ਤਸਿਤ੍ਥਾਨਿਪਿ ਪੂਤਿਮਂਸਸ੍ਸ ਰਸੋਪਿ ਅਤਿਮਧੁਰੋ ਅਮਤਸਦਿਸੋ ਹੋਤਿ. ਮਜ੍ਝਿਮਾਨਂ ਪਨ ਗਣਕਮਹਾਮਤ੍ਤਸੇਟ੍ਠਿ ਕੁਟੁਮ੍ਬਿਕਵਾਣਿਜਾਦੀਨਂ ਕਾਲੇਨ ਇਟ੍ਠਂ ਕਾਲੇਨ ਅਨਿਟ੍ਠਂ ਲਭਮਾਨਾਨਂ ਵਸੇਨ ਵਿਭਜਿਤਬ੍ਬਂ. ਤਞ੍ਚ ਪਨੇਤਂ ਆਰਮ੍ਮਣਂ ਜਵਨਂ ਪਰਿਚ੍ਛਿਨ੍ਦਿਤੁਂ ਨ ਸਕ੍ਕੋਤਿ. ਜਵਨਞ੍ਹਿ ਇਟ੍ਠੇਪਿ ਰਜ੍ਜਤਿ ਅਨਿਟ੍ਠੇਪਿ, ਇਟ੍ਠੇਪਿ ਦੁਸ੍ਸਤਿ ਅਨਿਟ੍ਠੇਪਿ. ਏਕਨ੍ਤਤੋ ਪਨ ਵਿਪਾਕਚਿਤ੍ਤਂ ਇਟ੍ਠਾਨਿਟ੍ਠਂ ਪਰਿਚ੍ਛਿਨ੍ਦਤਿ. ਕਿਞ੍ਚਾਪਿ ਹਿ ਮਿਚ੍ਛਾਦਿਟ੍ਠਿਕਾ ਬੁਦ੍ਧਂ ਵਾ ਸਙ੍ਘਂ ਵਾ ਮਹਾਚੇਤਿਯਾਦੀਨਿ ਵਾ ਉਲ਼ਾਰਾਨਿ ਆਰਮ੍ਮਣਾਨਿ ਦਿਸ੍ਵਾ ਅਕ੍ਖੀਨਿ ਪਿਦਹਨ੍ਤਿ ਦੋਮਨਸ੍ਸਂ ਆਪਜ੍ਜਨ੍ਤਿ, ਧਮ੍ਮਸਦ੍ਦਂ ਸੁਤ੍ਵਾ ਕਣ੍ਣੇ ਥਕੇਨ੍ਤਿ, ਚਕ੍ਖੁਵਿਞ੍ਞਾਣਸੋਤਵਿਞ੍ਞਾਣਾਨਿ ਪਨ ਤੇਸਂ ਕੁਸਲਵਿਪਾਕਾਨੇਵ ਹੋਨ੍ਤਿ. ਕਿਞ੍ਚਾਪਿ ਗੂਥਸੂਕਰਾਦਯੋ ਗੂਥਗਨ੍ਧਂ ਘਾਯਿਤ੍ਵਾ ਖਾਦਿਤੁਂ ਲਭਿਸ੍ਸਾਮਾਤਿ ਸੋਮਨਸ੍ਸਜਾਤਾ ਹੋਨ੍ਤਿ, ਗੂਥਦਸ੍ਸਨੇ ਪਨ ਨੇਸਂ ਚਕ੍ਖੁਵਿਞ੍ਞਾਣਂ, ਤਸ੍ਸ ਗਨ੍ਧਘਾਯਨੇ ਘਾਨਵਿਞ੍ਞਾਣਂ, ਰਸਸਾਯਨੇ ਜਿਵ੍ਹਾਵਿਞ੍ਞਾਣਞ੍ਚ ਅਕੁਸਲਵਿਪਾਕਮੇਵ ਹੋਤਿ. ਭਗਵਾ ਪਨ ਪੁਗ੍ਗਲਮਨਾਪਤਂ ਸਨ੍ਧਾਯ ਤੇ ਚ, ਮਹਾਰਾਜ, ਰੂਪਾਤਿਆਦਿਮਾਹ.
ਚਨ੍ਦਨਙ੍ਗਲਿਕੋਤਿ ਇਦਂ ਤਸ੍ਸ ਉਪਾਸਕਸ੍ਸ ਨਾਮਂ. ਪਟਿਭਾਤਿ ਮਂ ਭਗਵਾਤਿ ਭਗਵਾ ਮਯ੍ਹਂ ਏਕਂ ਕਾਰਣਂ ਉਪਟ੍ਠਾਤਿ ਪਞ੍ਞਾਯਤਿ. ਤਸ੍ਸ ਤੇ ਪਞ੍ਚ ਰਾਜਾਨੋ ਆਮੁਤ੍ਤਮਣਿਕੁਣ੍ਡਲੇ ਸਜ੍ਜਿਤਾਯ ਆਪਾਨਭੂਮਿਯਾ ਨਿਸਿਨ੍ਨਵਸੇਨੇਵ ਮਹਤਾ ਰਾਜਾਨੁਭਾਵੇਨ ਪਰਮੇਨ ਇਸ੍ਸਰਿਯਵਿਭਵੇਨ ਆਗਨ੍ਤ੍ਵਾਪਿ ਦਸਬਲਸ੍ਸ ਸਨ੍ਤਿਕੇ ਠਿਤਕਾਲਤੋ ਪਟ੍ਠਾਯ ਦਿਵਾ ਪਦੀਪੇ ਵਿਯ ਉਦਕਾਭਿਸਿਤ੍ਤੇ ਅਙ੍ਗਾਰੇ ਵਿਯ ਸੂਰਿਯੁਟ੍ਠਾਨੇ ਖਜ੍ਜੋਪਨਕੇ ਵਿਯ ਚ ਹਤਪ੍ਪਭੇ ਹਤਸੋਭੇ ਤਂ ਤਥਾਗਤਞ੍ਚ ਤੇਹਿ ਸਤਗੁਣੇਨ ਸਹਸ੍ਸਗੁਣੇਨ ਵਿਰੋਚਮਾਨਂ ਦਿਸ੍ਵਾ, ‘‘ਮਹਨ੍ਤਾ ਵਤ ਭੋ ਬੁਦ੍ਧਾ ਨਾਮਾ’’ਤਿ ਪਟਿਭਾਨਂ ਉਦਪਾਦਿ. ਤਸ੍ਮਾ ਏਵਮਾਹ.
ਕੋਕਨਦਨ੍ਤਿ ਪਦੁਮਸ੍ਸੇਵੇਤਂ ਵੇਵਚਨਂ. ਪਾਤੋਤਿ ਕਾਲਸ੍ਸੇਵ. ਸਿਯਾਤਿ ਭਵੇਯ੍ਯ. ਅਵੀਤਗਨ੍ਧਨ੍ਤਿ ਅਵਿਗਤਗਨ੍ਧਂ. ਅਙ੍ਗੀਰਸਨ੍ਤਿ ਸਮ੍ਮਾਸਮ੍ਬੁਦ੍ਧਂ. ਭਗਵਤੋ ਹਿ ਅਙ੍ਗਤੋ ਰਸ੍ਮਿਯੋ ਨਿਕ੍ਖਮਨ੍ਤਿ, ਤਸ੍ਮਾ ਅਙ੍ਗੀਰਸੋਤਿ ਵੁਚ੍ਚਤਿ. ਯਥਾ ਕੋਕਨਦਸਙ੍ਖਾਤਂ ਪਦੁਮਂ ਪਾਤੋਵ ਫੁਲ੍ਲਂ ਅਵੀਤਗਨ੍ਧਂ ਸਿਯਾ, ਏਵਮੇਵ ਭਗਵਨ੍ਤਂ ਅਙ੍ਗੀਰਸਂ ਤਪਨ੍ਤਂ ਆਦਿਚ੍ਚਮਿਵ ਅਨ੍ਤਲਿਕ੍ਖੇ ਵਿਰੋਚਮਾਨਂ ਪਸ੍ਸਾਤਿ ਅਯਮੇਤ੍ਥ ਸਙ੍ਖੇਪਤ੍ਥੋ. ਭਗਵਨ੍ਤਂ ਅਚ੍ਛਾਦੇਸੀਤਿ ਭਗਵਤੋ ਅਦਾਸੀਤਿ ਅਤ੍ਥੋ. ਲੋਕਵੋਹਾਰਤੋ ਪਨੇਤ੍ਥ ਈਦਿਸਂ ਵਚਨਂ ਹੋਤਿ. ਸੋ ਕਿਰ ਉਪਾਸਕੋ – ‘‘ਏਤੇ ਤਥਾਗਤਸ੍ਸ ਗੁਣੇਸੁ ਪਸੀਦਿਤ੍ਵਾ ਮਯ੍ਹਂ ਪਞ੍ਚ ਉਤ੍ਤਰਾਸਙ੍ਗੇ ਦੇਨ੍ਤਿ, ਅਹਮ੍ਪਿ ਤੇ ਭਗਵਤੋਵ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਦਾਸਿ. ਦੁਤਿਯਂ.
੩. ਦੋਣਪਾਕਸੁਤ੍ਤਵਣ੍ਣਨਾ
੧੨੪. ਤਤਿਯੇ ਦੋਣਪਾਕਕੁਰਨ੍ਤਿ ਦੋਣਪਾਕਂ ਕੁਰਂ, ਦੋਣਸ੍ਸ ਤਣ੍ਡੁਲਾਨਂ ਪਕ੍ਕਭਤ੍ਤਂ ਤਦੂਪਿਯਞ੍ਚ ਸੂਪਬ੍ਯਞ੍ਜਨਂ ਭੁਞ੍ਜਤੀਤਿ ਅਤ੍ਥੋ. ਭੁਤ੍ਤਾਵੀਤਿ ਪੁਬ੍ਬੇ ਭਤ੍ਤਸਮ੍ਮਦਂ ਵਿਨੋਦੇਤ੍ਵਾ ਮੁਹੁਤ੍ਤਂ ਵਿਸ੍ਸਮਿਤ੍ਵਾ ਬੁਦ੍ਧੁਪਟ੍ਠਾਨਂ ਗਚ੍ਛਤਿ, ਤਂਦਿਵਸਂ ਪਨ ਭੁਞ੍ਜਨ੍ਤੋਵ ਦਸਬਲਂ ਸਰਿਤ੍ਵਾ ਹਤ੍ਥੇ ਧੋਵਿਤ੍ਵਾ ਅਗਮਾਸਿ. ਮਹਸ੍ਸਾਸੀਤਿ ਤਸ੍ਸ ਗਚ੍ਛਤੋ ਬਲਵਾ ਭਤ੍ਤਪਰੀਲ਼ਾਹੋ ਉਦਪਾਦਿ, ਤਸ੍ਮਾ ਮਹਨ੍ਤੇਹਿ ਅਸ੍ਸਾਸੇਹਿ ਅਸ੍ਸਸਤਿ, ਗਤ੍ਤਤੋਪਿਸ੍ਸ ਸੇਦਬਿਨ੍ਦੂਨਿ ਮੁਚ੍ਚਨ੍ਤਿ, ਤਮੇਨਂ ਉਭੋਸੁ ਪਸ੍ਸੇਸੁ ਠਤ੍ਵਾ ਯਮਕਤਾਲਵਣ੍ਟੇਹਿ ਬੀਜਨ੍ਤਿ, ਬੁਦ੍ਧਗਾਰਵੇਨ ਪਨ ਨਿਪਜ੍ਜਿਤੁਂ ਨ ਉਸ੍ਸਹਤੀਤਿ ਇਦਂ ਸਨ੍ਧਾਯ ‘‘ਮਹਸ੍ਸਾਸੀ’’ਤਿ ਵੁਤ੍ਤਂ. ਇਮਂ ਗਾਥਂ ਅਭਾਸੀਤਿ, ਰਾਜਾ ਭੋਜਨੇ ਅਮਤ੍ਤਞ੍ਞੁਤਾਯ ਕਿਲਮਤਿ, ਫਾਸੁ ਵਿਹਾਰਂ ਦਾਨਿਸ੍ਸ ਕਰਿਸ੍ਸਾਮੀਤਿ ਚਿਨ੍ਤੇਤ੍ਵਾ ਅਭਾਸਿ. ਮਨੁਜਸ੍ਸਾਤਿ ਸਤ੍ਤਸ੍ਸ. ਕਹਾਪਣਸਤਨ੍ਤਿ ਪਾਤਰਾਸੇ ਪਣ੍ਣਾਸਂ ਸਾਯਮਾਸੇ ਪਣ੍ਣਾਸਨ੍ਤਿ ਏਵਂ ਕਹਾਪਣਸਤਂ. ਪਰਿਯਾਪੁਣਿਤ੍ਵਾਤਿ ਰਞ੍ਞਾ ਸਦ੍ਧਿਂ ਥੋਕਂ ਗਨ੍ਤ੍ਵਾ ‘‘ਇਮਂ ਮਙ੍ਗਲਅਸਿਂ ਕਸ੍ਸ ਦਮ੍ਮਿ, ਮਹਾਰਾਜਾ’’ਤਿ? ਅਸੁਕਸ੍ਸ ਨਾਮ ਦੇਹੀਤਿ ਸੋ ਤਂ ਅਸਿਂ ਦਤ੍ਵਾ ਦਸਬਲਸ੍ਸ ਸਨ੍ਤਿਕਂ ਆਗਮ੍ਮ ਵਨ੍ਦਿਤ੍ਵਾ ਠਿਤਕੋਵ ‘‘ਗਾਥਂ ਵਦਥ, ਭੋ ਗੋਤਮਾ’’ਤਿ ਵਤ੍ਵਾ ਭਗਵਤਾ ਵੁਤ੍ਤਂ ਪਰਿਯਾਪੁਣਿਤ੍ਵਾਤਿ ਅਤ੍ਥੋ.
ਭਤ੍ਤਾਭਿਹਾਰੇ ਸੁਦਂ ਭਾਸਤੀਤਿ ਕਥਂ ਭਾਸਤਿ? ਭਗਵਤਾ ਅਨੁਸਿਟ੍ਠਿਨਿਯਾਮੇਨ. ਭਗਵਾ ਹਿ ਨਂ ਏਵਂ ਅਨੁਸਾਸਿ – ‘‘ਮਾਣਵ, ਇਮਂ ਗਾਥਂ ਨਟੋ ਵਿਯ ਪਤ੍ਤਪਤ੍ਤਟ੍ਠਾਨੇ ਮਾ ਅਵਚ, ਰਞ੍ਞੋ ਭੁਞ੍ਜਨਟ੍ਠਾਨੇ ਠਤ੍ਵਾ ਪਠਮਪਿਣ੍ਡਾਦੀਸੁਪਿ ਅਵਤ੍ਵਾ ਵੋਸਾਨਪਿਣ੍ਡੇ ਗਹਿਤੇ ਵਦੇਯ੍ਯਾਸਿ, ਰਾਜਾ ਸੁਤ੍ਵਾਵ ਭਤ੍ਤਪਿਣ੍ਡਂ ਛਡ੍ਡੇਸ੍ਸਤਿ. ਅਥ ਰਞ੍ਞੋ ਹਤ੍ਥੇਸੁ ਧੋਤੇਸੁ ਪਾਤਿਂ ਅਪਨੇਤ੍ਵਾ ਸਿਤ੍ਥਾਨਿ ਗਣੇਤ੍ਵਾ ਤਦੁਪਿਯਂ ਬ੍ਯਞ੍ਜਨਂ ਞਤ੍ਵਾ ਪੁਨਦਿਵਸੇ ਤਾਵਤਕੇ ਤਣ੍ਡੁਲੇ ਹਾਰੇਯ੍ਯਾਸਿ, ਪਾਤਰਾਸੇ ਚ ਵਤ੍ਵਾ ਸਾਯਮਾਸੇ ਮਾ ਵਦੇਯ੍ਯਾਸੀ’’ਤਿ. ਸੋ ਸਾਧੂਤਿ ਪਟਿਸ੍ਸੁਣਿਤ੍ਵਾ ਤਂਦਿਵਸਂ ਰਞ੍ਞੋ ਪਾਤਰਾਸਂ ਭੁਤ੍ਵਾ ਗਤਤ੍ਤਾ ਸਾਯਮਾਸੇ ਭਗਵਤੋ ਅਨੁਸਿਟ੍ਠਿਨਿਯਾਮੇਨ ਗਾਥਂ ਅਭਾਸਿ. ਰਾਜਾ ਦਸਬਲਸ੍ਸ ਵਚਨਂ ਸਰਿਤ੍ਵਾ ਭਤ੍ਤਪਿਣ੍ਡਂ ਪਾਤਿਯਂਯੇਵ ਛਡ੍ਡੇਸਿ. ਰਞ੍ਞੋ ਹਤ੍ਥੇਸੁ ਧੋਤੇਸੁ ਪਾਤਿਂ ਅਪਨੇਤ੍ਵਾ ਸਿਤ੍ਥਾਨਿ ਗਣੇਤ੍ਵਾ ਤਦੁਪਿਯਂ ਬ੍ਯਞ੍ਜਨਂ ਞਤ੍ਵਾ ਪੁਨਦਿਵਸੇ ਤਤ੍ਤਕੇ ਤਣ੍ਡੁਲੇ ਹਰਿਂਸੁ.
ਨਾਲ਼ਿਕੋਦਨਪਰਮਤਾਯ ਸਣ੍ਠਾਸੀਤਿ ਸੋ ਕਿਰ ਮਾਣਵੋ ਦਿਵਸੇ ਦਿਵਸੇ ਤਥਾਗਤਸ੍ਸ ਸਨ੍ਤਿਕਂ ਗਚ੍ਛਤਿ, ਦਸਬਲਸ੍ਸ ਵਿਸ੍ਸਾਸਿਕੋ ਅਹੋਸਿ. ਅਥ ਨਂ ਏਕਦਿਵਸਂ ਪੁਚ੍ਛਿ ‘‘ਰਾਜਾ ਕਿਤ੍ਤਕਂ ਭੁਞ੍ਜਤੀ’’ਤਿ? ਸੋ ‘‘ਨਾਲ਼ਿਕੋਦਨ’’ਨ੍ਤਿ ਆਹ. ਵਟ੍ਟਿਸ੍ਸਤਿ ਏਤ੍ਤਾਵਤਾ ਪੁਰਿਸਭਾਗੋ ਏਸ, ਇਤੋ ਪਟ੍ਠਾਯ ਗਾਥਂ ਮਾ ਵਦੀਤਿ. ਇਤਿ ਰਾਜਾ ਤਤ੍ਥੇਵ ਸਣ੍ਠਾਸਿ. ਦਿਟ੍ਠਧਮ੍ਮਿਕੇਨ ਚੇਵ ਅਤ੍ਥੇਨ ਸਮ੍ਪਰਾਯਿਕੇਨ ਚਾਤਿ ਏਤ੍ਥ ਸਲ੍ਲਿਖਿਤਸਰੀਰਤਾ ਦਿਟ੍ਠਧਮ੍ਮਿਕਤ੍ਥੋ ਨਾਮ, ਸੀਲਂ ਸਮ੍ਪਰਾਯਿਕਤ੍ਥੋ. ਭੋਜਨੇ ਮਤ੍ਤਞ੍ਞੁਤਾ ਹਿ ਸੀਲਙ੍ਗਂ ਨਾਮ ਹੋਤੀਤਿ. ਤਤਿਯਂ.
੪. ਪਠਮਸਙ੍ਗਾਮਸੁਤ੍ਤਵਣ੍ਣਨਾ
੧੨੫. ਚਤੁਤ੍ਥੇ ਵੇਦੇਹਿਪੁਤ੍ਤੋਤਿ ਵੇਦੇਹੀਤਿ ਪਣ੍ਡਿਤਾਧਿਵਚਨਮੇਤਂ, ਪਣ੍ਡਿਤਿਤ੍ਥਿਯਾ ਪੁਤ੍ਤੋਤਿ ਅਤ੍ਥੋ. ਚਤੁਰਙ੍ਗਿਨਿਨ੍ਤਿ ਹਤ੍ਥਿਅਸ੍ਸਰਥਪਤ੍ਤਿਸਙ੍ਖਾਤੇਹਿ ਚਤੂਹਿ ਅਙ੍ਗੇਹਿ ਸਮਨ੍ਨਾਗਤਂ. ਸਨ੍ਨਯ੍ਹਿਤ੍ਵਾਤਿ ਚਮ੍ਮਪਟਿਮੁਞ੍ਚਨਾਦੀਹਿ ਸਨ੍ਨਾਹਂ ਕਾਰੇਤ੍ਵਾ. ਸਙ੍ਗਾਮੇਸੁਨ੍ਤਿ ਯੁਜ੍ਝਿਂਸੁ. ਕੇਨ ਕਾਰਣੇਨ? ਮਹਾਕੋਸਲਰਞ੍ਞਾ ਕਿਰ ਬਿਮ੍ਬਿਸਾਰਸ੍ਸ ਧੀਤਰਂ ਦੇਨ੍ਤੇਨ ਦ੍ਵਿਨ੍ਨਂ ਰਜ੍ਜਾਨਂ ਅਨ੍ਤਰੇ ਸਤਸਹਸ੍ਸੁਟ੍ਠਾਨੋ ਕਾਸਿਗਾਮੋ ਨਾਮ ਧੀਤੁ ਦਿਨ੍ਨੋ. ਅਜਾਤਸਤ੍ਤੁਨਾ ਚ ਪਿਤਰਿ ਮਾਰਿਤੇ ਮਾਤਾਪਿਸ੍ਸ ਰਞ੍ਞੋ ਵਿਯੋਗਸੋਕੇਨ ਨਚਿਰਸ੍ਸੇਵ ਮਤਾ. ਤਤੋ ਰਾਜਾ ਪਸੇਨਦਿ ਕੋਸਲੋ – ‘‘ਅਜਾਤਸਤ੍ਤੁਨਾ ਮਾਤਾਪਿਤਰੋ ਮਾਰਿਤਾ, ਮਯ੍ਹਂ ਪਿਤੁ ਸਨ੍ਤਕੋ ਗਾਮੋ’’ਤਿ ਤਸ੍ਸਤ੍ਥਾਯ ਅਡ੍ਡਂ ਕਰੋਤਿ. ਅਜਾਤਸਤ੍ਤੁਪਿ ‘‘ਮਯ੍ਹਂ ਮਾਤੁ ਸਨ੍ਤਕੋ’’ਤਿ ਤਸ੍ਸ ਗਾਮਸ੍ਸਤ੍ਥਾਯ ਦ੍ਵੇਪਿ ਮਾਤੁਲਭਾਗਿਨੇਯ੍ਯਾ ਯੁਜ੍ਝਿਂਸੁ.
ਪਾਪਾ ਦੇਵਦਤ੍ਤਾਦਯੋ ਮਿਤ੍ਤਾ ਅਸ੍ਸਾਤਿ ਪਾਪਮਿਤ੍ਤੋ. ਤੇਯੇਵਸ੍ਸ ਸਹਾਯਾਤਿ ਪਾਪਸਹਾਯੋ. ਤੇਸ੍ਵੇਵਸ੍ਸ ਚਿਤ੍ਤਂ ਨਿਨ੍ਨਂ ਸਮ੍ਪਵਙ੍ਕਨ੍ਤਿ ਪਾਪਸਮ੍ਪਵਙ੍ਕੋ. ਪਸੇਨਦਿਸ੍ਸ ਸਾਰਿਪੁਤ੍ਤਤ੍ਥੇਰਾਦੀਨਂ ਵਸੇਨ ਕਲ੍ਯਾਣਮਿਤ੍ਤਾਦਿਤਾ ਵੇਦਿਤਬ੍ਬਾ. ਦੁਕ੍ਖਂ ਸੇਤੀਤਿ ਜਿਤਾਨਿ ਹਤ੍ਥਿਆਦੀਨਿ ਅਨੁਸੋਚਨ੍ਤੋ ਦੁਕ੍ਖਂ ਸਯਿਸ੍ਸਤਿ. ਇਦਂ ਭਗਵਾ ਪੁਨ ਤਸ੍ਸ ਜਯਕਾਰਣਂ ਦਿਸ੍ਵਾ ਆਹ. ਜਯਂ ਵੇਰਂ ਪਸਵਤੀਤਿ ਜਿਨਨ੍ਤੋ ਵੇਰਂ ਪਸਵਤਿ, ਵੇਰਿਪੁਗ੍ਗਲਂ ਲਭਤਿ. ਚਤੁਤ੍ਥਂ.
੫. ਦੁਤਿਯਸਙ੍ਗਾਮਸੁਤ੍ਤਵਣ੍ਣਨਾ
੧੨੬. ਪਞ੍ਚਮੇ ਅਬ੍ਭੁਯ੍ਯਾਸੀਤਿ ਪਰਾਜਯੇ ਗਰਹਪ੍ਪਤ੍ਤੋ ‘‘ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਕਥਾਸਲ੍ਲਾਪਂ ਸੁਣਾਥਾ’’ਤਿ ਰਤ੍ਤਿਭਾਗੇ ਬੁਦ੍ਧਰਕ੍ਖਿਤੇਨ ਨਾਮ ਵੁਡ੍ਢਪਬ੍ਬਜਿਤੇਨ ਧਮ੍ਮਰਕ੍ਖਿਤਸ੍ਸ ਵੁਡ੍ਢਪਬ੍ਬਜਿਤਸ੍ਸ ‘‘ਸਚੇ ਰਾਜਾ ਇਮਞ੍ਚ ਉਪਾਯਂ ਕਤ੍ਵਾ ਗਚ੍ਛੇਯ੍ਯ, ਪੁਨ ਜਿਨੇਯ੍ਯਾ’’ਤਿ ਵੁਤ੍ਤਜਯਕਾਰਣਂ ਸੁਤ੍ਵਾ ਅਭਿਉਯ੍ਯਾਸਿ.
ਯਾਵਸ੍ਸ ਉਪਕਪ੍ਪਤੀਤਿ ਯਾਵ ਤਸ੍ਸ ਉਪਕਪ੍ਪਤਿ ਸਯ੍ਹਂ ਹੋਤਿ. ਯਦਾ ਚਞ੍ਞੇਤਿ ਯਦਾ ਅਞ੍ਞੇ. ਵਿਲੁਮ੍ਪਨ੍ਤੀਤਿ ਤਂ ਵਿਲੁਮ੍ਪਿਤ੍ਵਾ ਠਿਤਪੁਗ੍ਗਲਂ ਵਿਲੁਮ੍ਪਨ੍ਤਿ. ਵਿਲੁਮ੍ਪਤੀਤਿ ਵਿਲੁਮ੍ਪਿਯਤਿ. ਠਾਨਂ ਹਿ ਮਞ੍ਞਤੀਤਿ ‘‘ਕਾਰਣ’’ਨ੍ਤਿ ਹਿ ਮਞ੍ਞਤਿ. ਯਦਾਤਿ ਯਸ੍ਮਿਂ ਕਾਲੇ. ਜੇਤਾਰਂ ਲਭਤੇ ਜਯਨ੍ਤਿ ਜਯਨ੍ਤੋ ਪੁਗ੍ਗਲੋ ਪਚ੍ਛਾ ਜੇਤਾਰਮ੍ਪਿ ਲਭਤਿ. ਰੋਸੇਤਾਰਨ੍ਤਿ ਘਟ੍ਟੇਤਾਰਂ. ਰੋਸਕੋਤਿ ਘਟ੍ਟਕੋ. ਕਮ੍ਮਵਿਵਟ੍ਟੇਨਾਤਿ ਕਮ੍ਮਪਰਿਣਾਮੇਨ, ਤਸ੍ਸ ਵਿਲੁਮ੍ਪਨਕਮ੍ਮਸ੍ਸ ਵਿਪਾਕਦਾਨੇਨ. ਸੋ ਵਿਲੁਤ੍ਤੋ ਵਿਲੁਪ੍ਪਤੀਤਿ ਸੋ ਵਿਲੁਮ੍ਪਕੋ ਵਿਲੁਮ੍ਪਿਯਤਿ. ਪਞ੍ਚਮਂ.
੬. ਮਲ੍ਲਿਕਾਸੁਤ੍ਤਵਣ੍ਣਨਾ
੧੨੭. ਛਟ੍ਠੇ ਉਪਸਙ੍ਕਮੀਤਿ ਮਲ੍ਲਿਕਾਯ ਦੇਵਿਯਾ ਗਬ੍ਭਵੁਟ੍ਠਾਨਕਾਲੇ ਸੂਤਿਘਰਂ ਪਟਿਜਗ੍ਗਾਪੇਤ੍ਵਾ ਆਰਕ੍ਖਂ ਦਤ੍ਵਾ ਉਪਸਙ੍ਕਮਿ. ਅਨਤ੍ਤਮਨੋ ਅਹੋਸੀਤਿ, ‘‘ਦੁਗ੍ਗਤਕੁਲਸ੍ਸ ਮੇ ਧੀਤੁ ਮਹਨ੍ਤਂ ਇਸ੍ਸਰਿਯਂ ਦਿਨ੍ਨਂ, ਸਚੇ ਪੁਤ੍ਤਂ ਅਲਭਿਸ੍ਸ, ਮਹਨ੍ਤਂ ਸਕ੍ਕਾਰਂ ਅਧਿਗਮਿਸ੍ਸ, ਤਤੋ ਦਾਨਿ ਪਰਿਹੀਨਾ’’ਤਿ ਅਨਤ੍ਤਮਨੋ ਅਹੋਸਿ. ਸੇਯ੍ਯਾਤਿ ਦਨ੍ਧਪਞ੍ਞਸ੍ਮਾ ਏਲਮੂਗਪੁਤ੍ਤਤੋ ਏਕਚ੍ਚਾ ਇਤ੍ਥੀਯੇਵ ਸੇਯ੍ਯਾ. ਪੋਸਾਤਿ ਪੋਸੇਹਿ. ਜਨਾਧਿਪਾਤਿ ਜਨਾਧਿਭੁਂ ਰਾਜਾਨਂ ਆਲਪਤਿ. ਸਸ੍ਸੁਦੇਵਾਤਿ ਸਸ੍ਸੁਸਸੁਰਦੇਵਤਾ. ਦਿਸਮ੍ਪਤੀਤਿ ਦਿਸਾਜੇਟ੍ਠਕਾ. ਤਾਦਿਸਾ ਸੁਭਗਿਯਾਤਿ ਤਾਦਿਸਾਯ ਸੁਭਰਿਯਾਯ. ਛਟ੍ਠਂ.
੭. ਅਪ੍ਪਮਾਦਸੁਤ੍ਤਵਣ੍ਣਨਾ
੧੨੮. ਸਤ੍ਤਮੇ ਸਮਧਿਗ੍ਗਯ੍ਹਾਤਿ ਸਮਧਿਗ੍ਗਣ੍ਹਿਤ੍ਵਾ, ਆਦਿਯਿਤ੍ਵਾਤਿ ਅਤ੍ਥੋ. ਅਪ੍ਪਮਾਦੋਤਿ ਕਾਰਾਪਕਅਪ੍ਪਮਾਦੋ. ਸਮੋਧਾਨਨ੍ਤਿ ਸਮਵਧਾਨਂ ਉਪਕ੍ਖੇਪਂ. ਏਵਮੇਵ ਖੋਤਿ ਹਤ੍ਥਿਪਦਂ ਵਿਯ ਹਿ ਕਾਰਾਪਕਅਪ੍ਪਮਾਦੋ, ਸੇਸਪਦਜਾਤਾਨਿ ਵਿਯ ਅਵਸੇਸਾ ਚਤੁਭੂਮਕਾ ਕੁਸਲਧਮ੍ਮਾ. ਤੇ ਹਤ੍ਥਿਪਦੇ ਸੇਸਪਦਾਨਿ ਵਿਯ ਅਪ੍ਪਮਾਦੇ ਸਮੋਧਾਨਂ ਗਚ੍ਛਨ੍ਤਿ, ਅਪ੍ਪਮਾਦਸ੍ਸ ਅਨ੍ਤੋ ਪਰਿਵਤ੍ਤਨ੍ਤਿ. ਯਥਾ ਚ ਹਤ੍ਥਿਪਦਂ ਸੇਸਪਦਾਨਂ ਅਗ੍ਗਂ ਸੇਟ੍ਠਂ, ਏਵਂ ਅਪ੍ਪਮਾਦੋ ਸੇਸਧਮ੍ਮਾਨਨ੍ਤਿ ਦਸ੍ਸੇਤਿ. ਮਹਗ੍ਗਤਲੋਕੁਤ੍ਤਰਧਮ੍ਮਾਨਮ੍ਪਿ ਹੇਸ ਪਟਿਲਾਭਕਟ੍ਠੇਨ ਲੋਕਿਯੋਪਿ ਸਮਾਨੋ ਅਗ੍ਗੋਵ ਹੋਤਿ.
ਅਪ੍ਪਮਾਦਂ ਪਸਂਸਨ੍ਤੀਤਿ ‘‘ਏਤਾਨਿ ਆਯੁਆਦੀਨਿ ਪਤ੍ਥਯਨ੍ਤੇਨ ਅਪ੍ਪਮਾਦੋਵ ਕਾਤਬ੍ਬੋ’’ਤਿ ਅਪ੍ਪਮਾਦਮੇਵ ਪਸਂਸਨ੍ਤਿ. ਯਸ੍ਮਾ ਵਾ ਪੁਞ੍ਞਕਿਰਿਯਾਸੁ ਪਣ੍ਡਿਤਾ ਅਪ੍ਪਮਾਦਂ ਪਸਂਸਨ੍ਤਿ, ਤਸ੍ਮਾ ਆਯੁਆਦੀਨਿ ਪਤ੍ਥਯਨ੍ਤੇਨ ਅਪ੍ਪਮਾਦੋਵ ਕਾਤਬ੍ਬੋਤਿ ਅਤ੍ਥੋ. ਅਤ੍ਥਾਭਿਸਮਯਾਤਿ ਅਤ੍ਥਪਟਿਲਾਭਾ. ਸਤ੍ਤਮਂ.
੮. ਕਲ੍ਯਾਣਮਿਤ੍ਤਸੁਤ੍ਤਵਣ੍ਣਨਾ
੧੨੯. ਅਟ੍ਠਮੇ ਸੋ ਚ ਖੋ ਕਲ੍ਯਾਣਮਿਤ੍ਤਸ੍ਸਾਤਿ ਸੋ ਚਾਯਂ ਧਮ੍ਮੋ ਕਲ੍ਯਾਣਮਿਤ੍ਤਸ੍ਸੇਵ ਸ੍ਵਾਕ੍ਖਾਤੋ ਨਾਮ ਹੋਤਿ, ਨ ਪਾਪਮਿਤ੍ਤਸ੍ਸਾਤਿ. ਕਿਞ੍ਚਾਪਿ ਹਿ ਧਮ੍ਮੋ ਸਬ੍ਬੇਸਮ੍ਪਿ ਸ੍ਵਾਕ੍ਖਾਤੋਵ, ਕਲ੍ਯਾਣਮਿਤ੍ਤਸ੍ਸ ਪਨ ਸੁਸ੍ਸੂਸਨ੍ਤਸ੍ਸ ਸਦ੍ਦਹਨ੍ਤਸ੍ਸ ਅਤ੍ਥਂ ਪੂਰੇਤਿ ਭੇਸਜ੍ਜਂ ਵਿਯ ਵਲ਼ਞ੍ਜਨ੍ਤਸ੍ਸ ਨ ਇਤਰਸ੍ਸਾਤਿ. ਤੇਨੇਤਂ ਵੁਤ੍ਤਂ. ਧਮ੍ਮੋਤਿ ਚੇਤ੍ਥ ਦੇਸਨਾਧਮ੍ਮੋ ਵੇਦਿਤਬ੍ਬੋ.
ਉਪਡ੍ਢਮਿਦਨ੍ਤਿ ਥੇਰੋ ਕਿਰ ਰਹੋਗਤੋ ਚਿਨ੍ਤੇਸਿ – ‘‘ਅਯਂ ਸਮਣਧਮ੍ਮੋ ਨਾਮ ਓਵਾਦਕੇ ਅਨੁਸਾਸਕੇ ਕਲ੍ਯਾਣਮਿਤ੍ਤੇ ਸਤਿ ਪਚ੍ਚਤ੍ਤਪੁਰਿਸਕਾਰੇ ਠਿਤਸ੍ਸ ਸਮ੍ਪਜ੍ਜਤਿ, ਉਪਡ੍ਢਂ ਕਲ੍ਯਾਣਮਿਤ੍ਤਤੋ ਹੋਤਿ, ਉਪਡ੍ਢਂ ਪਚ੍ਚਤ੍ਤਪੁਰਿਸਕਾਰਤੋ’’ਤਿ. ਅਥਸ੍ਸ ਏਤਦਹੋਸਿ – ‘‘ਅਹਂ ਪਦੇਸਞਾਣੇ ਠਿਤੋ ਨਿਪ੍ਪਦੇਸਂ ਚਿਨ੍ਤੇਤੁਂ ਨ ਸਕ੍ਕੋਮਿ, ਸਤ੍ਥਾਰਂ ਪੁਚ੍ਛਿਤ੍ਵਾ ਨਿਕ੍ਕਙ੍ਖੋ ਭਵਿਸ੍ਸਾਮੀ’’ਤਿ. ਤਸ੍ਮਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਏਵਮਾਹ. ਬ੍ਰਹ੍ਮਚਰਿਯਸ੍ਸਾਤਿ ਅਰਿਯਮਗ੍ਗਸ੍ਸ. ਯਦਿਦਂ ਕਲ੍ਯਾਣਮਿਤ੍ਤਤਾਤਿ ਯਾ ਏਸਾ ਕਲ੍ਯਾਣਮਿਤ੍ਤਤਾ ਨਾਮ, ਸਾ ਉਪਡ੍ਢਂ, ਤਤੋ ਉਪਡ੍ਢਂ ਆਗਚ੍ਛਤੀਤਿ ਅਤ੍ਥੋ. ਇਤਿ ਥੇਰੇਨ ‘‘ਉਪਡ੍ਢੁਪਡ੍ਢਾ ਸਮ੍ਮਾਦਿਟ੍ਠਿਆਦਯੋ ਕਲ੍ਯਾਣਮਿਤ੍ਤਤੋ ਆਗਚ੍ਛਨ੍ਤਿ, ਉਪਡ੍ਢੁਪਡ੍ਢਾ ਪਚ੍ਚਤ੍ਤਪੁਰਿਸਕਾਰਤੋ’’ਤਿ ਵੁਤ੍ਤਂ. ਕਿਞ੍ਚਾਪਿ ਥੇਰਸ੍ਸ ਅਯਂ ਮਨੋਰਥੋ, ਯਥਾ ਪਨ ਬਹੂਹਿ ਸਿਲਾਥਮ੍ਭੇ ਉਸ੍ਸਾਪਿਤੇ, ‘‘ਏਤ੍ਤਕਂ ਠਾਨਂ ਅਸੁਕੇਨ ਉਸ੍ਸਾਪਿਤਂ, ਏਤ੍ਤਕਂ ਅਸੁਕੇਨਾ’’ਤਿ ਵਿਨਿਬ੍ਭੋਗੋ ਨਤ੍ਥਿ, ਯਥਾ ਚ ਮਾਤਾਪਿਤਰੋ ਨਿਸ੍ਸਾਯ ਉਪ੍ਪਨ੍ਨੇਸੁ ਪੁਤ੍ਤੇਸੁ ‘‘ਏਤ੍ਤਕਂ ਮਾਤਿਤੋ ਨਿਬ੍ਬਤ੍ਤਂ, ਏਤ੍ਤਕਂ ਪਿਤਿਤੋ’’ਤਿ ਵਿਨਿਬ੍ਭੋਗੋ ਨਤ੍ਥਿ, ਏਵਂ ਇਧਾਪਿ ਅਵਿਨਿਬ੍ਭੋਗਧਮ੍ਮੋ ਹੇਸ, ‘‘ਏਤ੍ਤਕਂ ਸਮ੍ਮਾਦਿਟ੍ਠਿਆਦੀਨਂ ਕਲ੍ਯਾਣਮਿਤ੍ਤਤੋ ਨਿਬ੍ਬਤ੍ਤਂ, ਏਤ੍ਤਕਂ ਪਚ੍ਚਤ੍ਤਪੁਰਿਸਕਾਰਤੋ’’ਤਿ ਨ ਸਕ੍ਕਾ ਲਦ੍ਧੁਂ, ਕਲ੍ਯਾਣਮਿਤ੍ਤਤਾਯ ਪਨ ਉਪਡ੍ਢਗੁਣੋ ਲਬ੍ਭਤੀਤਿ ਥੇਰਸ੍ਸ ਅਜ੍ਝਾਸਯੇਨ ਉਪਡ੍ਢਂ ਨਾਮ ਜਾਤਂ, ਸਕਲਗੁਣੋ ਪਟਿਲਬ੍ਭਤੀਤਿ ਭਗਵਤੋ ਅਜ੍ਝਾਸਯੇਨ ਸਕਲਂ ਨਾਮ ਜਾਤਂ. ਕਲ੍ਯਾਣਮਿਤ੍ਤਤਾਤਿ ਚੇਤਂ ਪੁਬ੍ਬਭਾਗਪਟਿਲਾਭਙ੍ਗਂ ਨਾਮਾਤਿ ਗਹਿਤਂ. ਅਤ੍ਥਤੋ ਕਲ੍ਯਾਣਮਿਤ੍ਤਂ ਨਿਸ੍ਸਾਯ ਲਦ੍ਧਾ ਸੀਲਸਮਾਧਿਵਿਪਸ੍ਸਨਾਵਸੇਨ ਚਤ੍ਤਾਰੋ ਖਨ੍ਧਾ. ਸਙ੍ਖਾਰਕ੍ਖਨ੍ਧੋਤਿਪਿ ਵਦਨ੍ਤਿਯੇਵ.
ਮਾ ਹੇਵਂ, ਆਨਨ੍ਦਾਤਿ, ਆਨਨ੍ਦ, ਮਾ ਏਵਂ ਅਭਣਿ, ਬਹੁਸ੍ਸੁਤੋ ਤ੍ਵਂ ਸੇਖਪਟਿਸਮ੍ਭਿਦਪ੍ਪਤ੍ਤੋ ਅਟ੍ਠ ਵਰੇ ਗਹੇਤ੍ਵਾ ਮਂ ਉਪਟ੍ਠਹਸਿ, ਚਤੂਹਿ ਅਚ੍ਛਰਿਯਬ੍ਭੁਤਧਮ੍ਮੇਹਿ ਸਮਨ੍ਨਾਗਤੋ, ਤਾਦਿਸਸ੍ਸ ਏਵਂ ਕਥੇਤੁਂ ਨ ਵਟ੍ਟਤਿ. ਸਕਲਮੇਵ ਹਿਦਂ, ਆਨਨ੍ਦ, ਬ੍ਰਹ੍ਮਚਰਿਯਂ, ਯਦਿਦਂ ਕਲ੍ਯਾਣਮਿਤ੍ਤਤਾਤਿ ਇਦਂ ਭਗਵਾ – ‘‘ਚਤ੍ਤਾਰੋ ਮਗ੍ਗਾ ਚਤ੍ਤਾਰਿ ਫਲਾਨਿ ਤਿਸ੍ਸੋ ਵਿਜ੍ਜਾ ਛ ਅਭਿਞ੍ਞਾ ਸਬ੍ਬਂ ਕਲ੍ਯਾਣਮਿਤ੍ਤਮੂਲਕਮੇਵ ਹੋਤੀ’’ਤਿ ਸਨ੍ਧਾਯਾਹ. ਇਦਾਨਿ ਵਚੀਭੇਦੇਨੇਵ ਕਾਰਣਂ ਦਸ੍ਸੇਨ੍ਤੋ ਕਲ੍ਯਾਣਮਿਤ੍ਤਸ੍ਸੇਤਨ੍ਤਿਆਦਿਮਾਹ. ਤਤ੍ਥ ਪਾਟਿਕਙ੍ਖਨ੍ਤਿ ਪਾਟਿਕਙ੍ਖਿਤਬ੍ਬਂ ਇਚ੍ਛਿਤਬ੍ਬਂ, ਅਵਸ੍ਸਂਭਾਵੀਤਿ ਅਤ੍ਥੋ.
ਇਧਾਤਿ ਇਮਸ੍ਮਿਂ ਸਾਸਨੇ. ਸਮ੍ਮਾਦਿਟ੍ਠਿਂ ਭਾਵੇਤੀਤਿਆਦੀਸੁ ਅਟ੍ਠਨ੍ਨਂ ਆਦਿਪਦਾਨਂਯੇਵ ਤਾਵ ਅਯਂ ਸਙ੍ਖੇਪਵਣ੍ਣਨਾ – ਸਮ੍ਮਾ ਦਸ੍ਸਨਲਕ੍ਖਣਾ ਸਮ੍ਮਾਦਿਟ੍ਠਿ. ਸਮ੍ਮਾ ਅਭਿਨਿਰੋਪਨਲਕ੍ਖਣੋ ਸਮ੍ਮਾਸਙ੍ਕਪ੍ਪੋ. ਸਮ੍ਮਾ ਪਰਿਗ੍ਗਹਣਲਕ੍ਖਣਾ ਸਮ੍ਮਾਵਾਚਾ. ਸਮ੍ਮਾ ਸਮੁਟ੍ਠਾਪਨਲਕ੍ਖਣੋ ਸਮ੍ਮਾਕਮ੍ਮਨ੍ਤੋ. ਸਮ੍ਮਾ ਵੋਦਾਪਨਲਕ੍ਖਣਾ ਸਮ੍ਮਾਆਜੀਵੋ. ਸਮ੍ਮਾ ਪਗ੍ਗਹਲਕ੍ਖਣੋ ਸਮ੍ਮਾਵਾਯਾਮੋ. ਸਮ੍ਮਾ ਉਪਟ੍ਠਾਨਲਕ੍ਖਣਾ ਸਮ੍ਮਾਸਤਿ. ਸਮ੍ਮਾ ਸਮਾਧਾਨਲਕ੍ਖਣੋ ਸਮ੍ਮਾਸਮਾਧਿ.
ਤੇਸੁ ਏਕੇਕਸ੍ਸ ਤੀਣਿ ਕਿਚ੍ਚਾਨਿ ਹੋਨ੍ਤਿ. ਸੇਯ੍ਯਾਥਿਦਂ – ਸਮ੍ਮਾਦਿਟ੍ਠਿ ਤਾਵ ਅਞ੍ਞੇਹਿਪਿ ਅਤ੍ਤਨੋ ਪਚ੍ਚਨੀਕਕਿਲੇਸੇਹਿ ਸਦ੍ਧਿਂ ਮਿਚ੍ਛਾਦਿਟ੍ਠਿਂ ਪਜਹਤਿ, ਨਿਰੋਧਂ ਆਰਮ੍ਮਣਂ ਕਰੋਤਿ, ਸਮ੍ਪਯੁਤ੍ਤਧਮ੍ਮੇ ਚ ਪਸ੍ਸਤਿ ਤਪ੍ਪਟਿਚ੍ਛਾਦਕਮੋਹਵਿਧਮਨਵਸੇਨ ਅਸਮ੍ਮੋਹਤੋ. ਸਮ੍ਮਾਸਙ੍ਕਪ੍ਪਾਦਯੋਪਿ ਤਥੇਵ ਮਿਚ੍ਛਾਸਙ੍ਕਪ੍ਪਾਦੀਨਿ ਚ ਪਜਹਨ੍ਤਿ, ਨਿਰੋਧਞ੍ਚ ਆਰਮ੍ਮਣਂ ਕਰੋਨ੍ਤਿ. ਵਿਸੇਸਤੋ ਪਨੇਤ੍ਥ ਸਮ੍ਮਾਦਿਟ੍ਠਿ ਸਹਜਾਤਧਮ੍ਮੇ ਸਮ੍ਮਾ ਦਸ੍ਸੇਤਿ. ਸਮ੍ਮਾਸਙ੍ਕਪ੍ਪੋ ਸਹਜਾਤਧਮ੍ਮੇ ਅਭਿਨਿਰੋਪੇਤਿ, ਸਮ੍ਮਾਵਾਚਾ ਸਮ੍ਮਾ ਪਰਿਗ੍ਗਣ੍ਹਾਤਿ, ਸਮ੍ਮਾਕਮ੍ਮਨ੍ਤੋ ਸਮ੍ਮਾ ਸਮੁਟ੍ਠਾਪੇਤਿ, ਸਮ੍ਮਾਆਜੀਵੋ ਸਮ੍ਮਾ ਵੋਦਾਪੇਤਿ, ਸਮ੍ਮਾਵਾਯਾਮੋ ਸਮ੍ਮਾ ਪਗ੍ਗਣ੍ਹਾਤਿ, ਸਮ੍ਮਾਸਤਿ ਸਮ੍ਮਾ ਉਪਟ੍ਠਾਪੇਤਿ, ਸਮ੍ਮਾਸਮਾਧਿ ਸਮ੍ਮਾ ਦਹਤਿ.
ਅਪਿਚੇਸਾ ਸਮ੍ਮਾਦਿਟ੍ਠਿ ਨਾਮ ਪੁਬ੍ਬਭਾਗੇ ਨਾਨਾਖਣਾ ਨਾਨਾਰਮ੍ਮਣਾ ਹੋਤਿ, ਮਗ੍ਗਕਾਲੇ ਏਕਕ੍ਖਣਾ ਏਕਾਰਮ੍ਮਣਾ. ਕਿਚ੍ਚਤੋ ਪਨ ਸਮ੍ਮਾਦਿਟ੍ਠਿ ਦੁਕ੍ਖੇ ਞਾਣਨ੍ਤਿਆਦੀਨਿ ਚਤ੍ਤਾਰਿ ਨਾਮਾਨਿ ਲਭਤਿ. ਸਮ੍ਮਾਸਙ੍ਕਪ੍ਪਾਦਯੋਪਿ ਪੁਬ੍ਬਭਾਗੇ ਨਾਨਾਖਣਾ ਨਾਨਾਰਮ੍ਮਣਾ ਹੋਨ੍ਤਿ, ਮਗ੍ਗਕਾਲੇ ਏਕਕ੍ਖਣਾ ਏਕਾਰਮ੍ਮਣਾ. ਤੇਸੁ ਸਮ੍ਮਾਸਙ੍ਕਪ੍ਪੋ ਕਿਚ੍ਚਤੋ ਨੇਕ੍ਖਮ੍ਮਸਙ੍ਕਪ੍ਪੋਤਿਆਦੀਨਿ ਤੀਣਿ ਨਾਮਾਨਿ ਲਭਤਿ. ਸਮ੍ਮਾਵਾਚਾਦਯੋ ਤਯੋ ਵਿਰਤਿਯੋਪਿ ਹੋਨ੍ਤਿ ਚੇਤਨਾਯੋਪਿ, ਮਗ੍ਗਕ੍ਖਣੇ ਪਨ ਵਿਰਤਿਯੋਵ. ਸਮ੍ਮਾਵਾਯਾਮੋ ਸਮ੍ਮਾਸਤੀਤਿ ਇਦਮ੍ਪਿ ਦ੍ਵਯਂ ਕਿਚ੍ਚਤੋ ਸਮ੍ਮਪ੍ਪਧਾਨਸਤਿਪਟ੍ਠਾਨਵਸੇਨ ਚਤ੍ਤਾਰਿ ਨਾਮਾਨਿ ਲਭਤਿ. ਸਮ੍ਮਾਸਮਾਧਿ ਪਨ ਪੁਬ੍ਬਭਾਗੇਪਿ ਮਗ੍ਗਕ੍ਖਣੇਪਿ ਸਮ੍ਮਾਸਮਾਧਿਯੇਵ.
ਏਵਂ ਤਾਵ ‘‘ਸਮ੍ਮਾਦਿਟ੍ਠਿ’’ਨ੍ਤਿਆਦਿਨਾ ਨਯੇਨ ਵੁਤ੍ਤਾਨਂ ਅਟ੍ਠਨ੍ਨਂ ਆਦਿਪਦਾਨਂਯੇਵ ਅਤ੍ਥਵਣ੍ਣਨਂ ਞਤ੍ਵਾ ਇਦਾਨਿ ਭਾਵੇਤਿ ਵਿਵੇਕਨਿਸ੍ਸਿਤਨ੍ਤਿਆਦੀਸੁ ਏਵਂ ਞਾਤਬ੍ਬੋ. ਭਾਵੇਤੀਤਿ ਵਡ੍ਢੇਤਿ, ਅਤ੍ਤਨੋ ਚਿਤ੍ਤਸਨ੍ਤਾਨੇ ਪੁਨਪ੍ਪੁਨਂ ਜਨੇਤਿ, ਅਭਿਨਿਬ੍ਬਤ੍ਤੇਤੀਤਿ ਅਤ੍ਥੋ. ਵਿਵੇਕਨਿਸ੍ਸਿਤਨ੍ਤਿ ਵਿਵੇਕਂ ਨਿਸ੍ਸਿਤਂ, ਵਿਵੇਕੇ ਵਾ ਨਿਸ੍ਸਿਤਨ੍ਤਿ ਵਿਵੇਕਨਿਸ੍ਸਿਤਂ. ਵਿਵੇਕੋਤਿ ਵਿਵਿਤ੍ਤਤਾ. ਵਿਵਿਤ੍ਤਤਾ ਚਾਯਂ ਤਦਙ੍ਗਵਿਵੇਕੋ, ਵਿਕ੍ਖਮ੍ਭਨ-ਸਮੁਚ੍ਛੇਦ-ਪਟਿਪ੍ਪਸ੍ਸਦ੍ਧਿ-ਨਿਸ੍ਸਰਣਵਿਵੇਕੋਤਿ ਪਞ੍ਚਵਿਧੋ. ਏਵਮੇਤਸ੍ਮਿਂ ਪਞ੍ਚਵਿਧੇ ਵਿਵੇਕੇ. ਵਿਵੇਕਨਿਸ੍ਸਿਤਨ੍ਤਿ ਤਦਙ੍ਗਵਿਵੇਕਨਿਸ੍ਸਿਤਂ ਸਮੁਚ੍ਛੇਦਵਿਵੇਕਨਿਸ੍ਸਿਤਂ ਨਿਸ੍ਸਰਣਵਿਵੇਕਨਿਸ੍ਸਿਤਞ੍ਚ ਸਮ੍ਮਾਦਿਟ੍ਠਿਂ ਭਾਵੇਤੀਤਿ ਅਯਮਤ੍ਥੋ ਵੇਦਿਤਬ੍ਬੋ. ਤਥਾ ਹਿ ਅਯਂ ਅਰਿਯਮਗ੍ਗਭਾਵਨਾਨੁਯੁਤ੍ਤੋ ਯੋਗੀ ਵਿਪਸ੍ਸਨਾਕ੍ਖਣੇ ਕਿਚ੍ਚਤੋ ਤਦਙ੍ਗਵਿਵੇਕਨਿਸ੍ਸਿਤਂ, ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤਂ, ਮਗ੍ਗਕਾਲੇ ਪਨ ਕਿਚ੍ਚਤੋ ਸਮੁਚ੍ਛੇਦਵਿਵੇਕਨਿਸ੍ਸਿਤਂ, ਆਰਮ੍ਮਣਤੋ ਨਿਸ੍ਸਰਣਵਿਵੇਕਨਿਸ੍ਸਿਤਂ ਸਮ੍ਮਾਦਿਟ੍ਠਿਂ ਭਾਵੇਤਿ. ਏਸ ਨਯੋ ਵਿਰਾਗਨਿਸ੍ਸਿਤਾਦੀਸੁ. ਵਿਵੇਕਤ੍ਥਾ ਏਵ ਹਿ ਵਿਰਾਗਾਦਯੋ.
ਕੇਵਲਞ੍ਚੇਤ੍ਥ ਵੋਸ੍ਸਗ੍ਗੋ ਦੁਵਿਧੋ ਪਰਿਚ੍ਚਾਗਵੋਸ੍ਸਗ੍ਗੋ ਚ ਪਕ੍ਖਨ੍ਦਨਵੋਸ੍ਸਗ੍ਗੋ ਚਾਤਿ. ਤਤ੍ਥ ਪਰਿਚ੍ਚਾਗਵੋਸ੍ਸਗ੍ਗੋਤਿ ਵਿਪਸ੍ਸਨਾਕ੍ਖਣੇ ਚ ਤਦਙ੍ਗਵਸੇਨ, ਮਗ੍ਗਕ੍ਖਣੇ ਚ ਸਮੁਚ੍ਛੇਦਵਸੇਨ ਕਿਲੇਸਪ੍ਪਹਾਨਂ. ਪਕ੍ਖਨ੍ਦਨਵੋਸ੍ਸਗ੍ਗੋਤਿ ਵਿਪਸ੍ਸਨਾਕ੍ਖਣੇ ਤਨ੍ਨਿਨ੍ਨਭਾਵੇਨ, ਮਗ੍ਗਕ੍ਖਣੇ ਪਨ ਆਰਮ੍ਮਣਕਰਣੇਨ ਨਿਬ੍ਬਾਨਪਕ੍ਖਨ੍ਦਨਂ, ਤਦੁਭਯਮ੍ਪਿ ਇਮਸ੍ਮਿਂ ਲੋਕਿਯਲੋਕੁਤ੍ਤਰਮਿਸ੍ਸਕੇ ਅਤ੍ਥਵਣ੍ਣਨਾਨਯੇ ਵਟ੍ਟਤਿ. ਤਥਾ ਹਿ ਅਯਂ ਸਮ੍ਮਾਦਿਟ੍ਠਿ ਯਥਾਵੁਤ੍ਤੇਨ ਪਕਾਰੇਨ ਕਿਲੇਸੇ ਚ ਪਰਿਚ੍ਚਜਤਿ, ਨਿਬ੍ਬਾਨਞ੍ਚ ਪਕ੍ਖਨ੍ਦਤਿ.
ਵੋਸ੍ਸਗ੍ਗਪਰਿਣਾਮਿਨ੍ਤਿ ਇਮਿਨਾ ਪਨ ਸਕਲੇਨ ਵਚਨੇਨ ਵੋਸ੍ਸਗ੍ਗਤ੍ਥਂ ਪਰਿਣਮਨ੍ਤਂ ਪਰਿਣਤਞ੍ਚ, ਪਰਿਪਚ੍ਚਨ੍ਤਂ ਪਰਿਪਕ੍ਕਞ੍ਚਾਤਿ ਇਦਂ ਵੁਤ੍ਤਂ ਹੋਤਿ. ਅਯਞ੍ਹਿ ਅਰਿਯਮਗ੍ਗਭਾਵਨਾਨੁਯੁਤ੍ਤੋ ਭਿਕ੍ਖੁ ਯਥਾ ਸਮ੍ਮਾਦਿਟ੍ਠਿ ਕਿਲੇਸਪਰਿਚ੍ਚਾਗਵੋਸ੍ਸਗ੍ਗਤ੍ਥਂ ਨਿਬ੍ਬਾਨਪਕ੍ਖਨ੍ਦਨਵੋਸ੍ਸਗ੍ਗਤ੍ਥਞ੍ਚ ਪਰਿਪਚ੍ਚਤਿ, ਯਥਾ ਚ ਪਰਿਪਕ੍ਕਾ ਹੋਤਿ, ਤਥਾ ਨਂ ਭਾਵੇਤੀਤਿ. ਏਸ ਨਯੋ ਸੇਸਮਗ੍ਗਙ੍ਗੇਸੁ.
ਆਗਮ੍ਮਾਤਿ ਆਰਬ੍ਭ ਸਨ੍ਧਾਯ ਪਟਿਚ੍ਚ. ਜਾਤਿਧਮ੍ਮਾਤਿ ਜਾਤਿਸਭਾਵਾ ਜਾਤਿਪਕਤਿਕਾ. ਤਸ੍ਮਾਤਿ ਯਸ੍ਮਾ ਸਕਲੋ ਅਰਿਯਮਗ੍ਗੋਪਿ ਕਲ੍ਯਾਣਮਿਤ੍ਤਂ ਨਿਸ੍ਸਾਯ ਲਬ੍ਭਤਿ, ਤਸ੍ਮਾ. ਹਨ੍ਦਾਤਿ ਵਵਸ੍ਸਗ੍ਗਤ੍ਥੇ ਨਿਪਾਤੋ. ਅਪ੍ਪਮਾਦਂ ਪਸਂਸਨ੍ਤੀਤਿ ਅਪ੍ਪਮਾਦਂ ਵਣ੍ਣਯਨ੍ਤਿ, ਤਸ੍ਮਾ ਅਪ੍ਪਮਾਦੋ ਕਾਤਬ੍ਬੋ. ਅਤ੍ਥਾਭਿਸਮਯਾਤਿ ਅਤ੍ਥਪਟਿਲਾਭਾ. ਅਟ੍ਠਮਂ.
੯. ਪਠਮਅਪੁਤ੍ਤਕਸੁਤ੍ਤਵਣ੍ਣਨਾ
੧੩੦. ਨਵਮੇ ਦਿਵਾ ਦਿਵਸ੍ਸਾਤਿ ਦਿਵਸਸ੍ਸ ਦਿਵਾ, ਮਜ੍ਝਨ੍ਹਿਕਸਮਯੇਤਿ ਅਤ੍ਥੋ. ਸਾਪਤੇਯ੍ਯਨ੍ਤਿ ਧਨਂ. ਕੋ ਪਨ ਵਾਦੋ ਰੂਪਿਯਸ੍ਸਾਤਿ ਸੁਵਣ੍ਣਰਜਤਤਮ੍ਬਲੋਹਕਾਲ਼ਲੋਹਫਾਲਕਚ੍ਛਪਕਾਦਿਭੇਦਸ੍ਸ ਘਨਕਤਸ੍ਸ ਚੇਵ ਪਰਿਭੋਗਭਾਜਨਾਦਿਭੇਦਸ੍ਸ ਚ ਰੂਪਿਯਭਣ੍ਡਸ੍ਸ ਪਨ ਕੋ ਵਾਦੋ? ‘‘ਏਤ੍ਤਕਂ ਨਾਮਾ’’ਤਿ ਕਾ ਪਰਿਚ੍ਛੇਦਕਥਾਤਿ ਅਤ੍ਥੋ. ਕਣਾਜਕਨ੍ਤਿ ਸਕੁਣ੍ਡਕਭਤ੍ਤਂ. ਬਿਲਙ੍ਗਦੁਤਿਯਨ੍ਤਿ ਕਞ੍ਜਿਕਦੁਤਿਯਂ. ਸਾਣਨ੍ਤਿ ਸਾਣਵਾਕਮਯਂ. ਤਿਪਕ੍ਖਵਸਨਨ੍ਤਿ ਤੀਣਿ ਖਣ੍ਡਾਨਿ ਦ੍ਵੀਸੁ ਠਾਨੇਸੁ ਸਿਬ੍ਬਿਤ੍ਵਾ ਕਤਨਿਵਾਸਨਂ.
ਅਸਪ੍ਪੁਰਿਸੋਤਿ ਲਾਮਕਪੁਰਿਸੋ. ਉਦ੍ਧਗ੍ਗਿਕਨ੍ਤਿਆਦੀਸੁ ਉਪਰੂਪਰਿਭੂਮੀਸੁ ਫਲਦਾਨਵਸੇਨ ਉਦ੍ਧਂ ਅਗ੍ਗਮਸ੍ਸਾਤਿ ਉਦ੍ਧਗ੍ਗਿਕਾ. ਸਗ੍ਗਸ੍ਸ ਹਿਤਾ ਤਤ੍ਰੁਪਪਤ੍ਤਿਜਨਨਤੋਤਿ ਸੋਵਗ੍ਗਿਕਾ. ਨਿਬ੍ਬਤ੍ਤਟ੍ਠਾਨੇਸੁ ਸੁਖੋ ਵਿਪਾਕੋ ਅਸ੍ਸਾਤਿ ਸੁਖਵਿਪਾਕਾ. ਸੁਟ੍ਠੁ ਅਗ੍ਗਾਨਂ ਦਿਬ੍ਬਵਣ੍ਣਾਦੀਨਂ ਵਿਸੇਸਾਨਂ ਨਿਬ੍ਬਤ੍ਤਨਤੋ ਸਗ੍ਗਸਂਵਤ੍ਤਨਿਕਾ. ਏਵਰੂਪਂ ਦਕ੍ਖਿਣਦਾਨਂ ਨ ਪਤਿਟ੍ਠਾਪੇਤੀਤਿ.
ਸਾਤੋਦਕਾਤਿ ਮਧੁਰੋਦਕਾ. ਸੇਤ੍ਤੋਦਕਾਤਿ ਵੀਚੀਨਂ ਭਿਨ੍ਨਟ੍ਠਾਨੇ ਉਦਕਸ੍ਸ ਸੇਤਤਾਯ ਸੇਤੋਦਕਾ. ਸੁਪਤਿਤ੍ਥਾਤਿ ਸੁਨ੍ਦਰਤਿਤ੍ਥਾ. ਤਂ ਜਨੋਤਿ ਯੇਨ ਉਦਕੇਨ ਸਾਤੋਦਕਾ, ਤਂ ਉਦਕਂ ਜਨੋ ਭਾਜਨਾਨਿ ਪੂਰੇਤ੍ਵਾ ਨੇਵ ਹਰੇਯ੍ਯ. ਨ ਯਥਾਪਚ੍ਚਯਂ ਵਾ ਕਰੇਯ੍ਯਾਤਿ, ਯਂ ਯਂ ਉਦਕੇਨ ਉਦਕਕਿਚ੍ਚਂ ਕਾਤਬ੍ਬਂ, ਤਂ ਤਂ ਨ ਕਰੇਯ੍ਯ. ਤਦਪੇਯ੍ਯਮਾਨਨ੍ਤਿ ਤਂ ਅਪੇਯ੍ਯਮਾਨਂ. ਕਿਚ੍ਚਕਰੋ ਚ ਹੋਤੀਤਿ ਅਤ੍ਤਨਾ ਕਤ੍ਤਬ੍ਬਕਿਚ੍ਚਕਰੋ ਚੇਵ ਕੁਸਲਕਿਚ੍ਚਕਰੋ ਚ, ਭੁਞ੍ਜਤਿ ਚ, ਕਮ੍ਮਨ੍ਤੇ ਚ ਪਯੋਜੇਤਿ, ਦਾਨਞ੍ਚ ਦੇਤੀਤਿ ਅਤ੍ਥੋ. ਨਵਮਂ.
੧੦. ਦੁਤਿਯਅਪੁਤ੍ਤਕਸੁਤ੍ਤਵਣ੍ਣਨਾ
੧੩੧. ਦਸਮੇ ਪਿਣ੍ਡਪਾਤੇਨ ਪਟਿਪਾਦੇਸੀਤਿ ਪਿਣ੍ਡਪਾਤੇਨ ਸਦ੍ਧਿਂ ਸਂਯੋਜੇਸਿ, ਪਿਣ੍ਡਪਾਤਂ ਅਦਾਸੀਤਿ ਅਤ੍ਥੋ. ਪਕ੍ਕਾਮੀਤਿ ਕੇਨਚਿਦੇਵ ਰਾਜੁਪਟ੍ਠਾਨਾਦਿਨਾ ਕਿਚ੍ਚੇਨ ਗਤੋ. ਪਚ੍ਛਾ ਵਿਪ੍ਪਟਿਸਾਰੀ ਅਹੋਸੀਤਿ ਸੋ ਕਿਰ ਅਞ੍ਞੇਸੁਪਿ ਦਿਵਸੇਸੁ ਤਂ ਪਚ੍ਚੇਕਸਮ੍ਬੁਦ੍ਧਂ ਪਸ੍ਸਤਿ, ਦਾਤੁਂ ਪਨਸ੍ਸ ਚਿਤ੍ਤਂ ਨ ਉਪ੍ਪਜ੍ਜਤਿ. ਤਸ੍ਮਿਂ ਪਨ ਦਿਵਸੇ ਅਯਂ ਪਦੁਮਵਤਿਦੇਵਿਯਾ ਤਤਿਯਪੁਤ੍ਤੋ ਤਗ੍ਗਰਸਿਖੀ ਪਚ੍ਚੇਕਬੁਦ੍ਧੋ ਗਨ੍ਧਮਾਦਨਪਬ੍ਬਤੇ ਫਲਸਮਾਪਤ੍ਤਿਸੁਖੇਨ ਵੀਤਿਨਾਮੇਤ੍ਵਾ ਪੁਬ੍ਬਣ੍ਹਸਮਯੇ ਵੁਟ੍ਠਾਯ ਅਨੋਤਤ੍ਤਦਹੇ ਮੁਖਂ ਧੋਵਿਤ੍ਵਾ ਮਨੋਸਿਲਾਤਲੇ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਪਤ੍ਤਚੀਵਰਮਾਦਾਯ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਇਦ੍ਧਿਯਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਨਗਰਦ੍ਵਾਰੇ ਓਰੁਯ੍ਹ ਚੀਵਰਂ ਪਾਰੁਪਿਤ੍ਵਾ ਪਤ੍ਤਮਾਦਾਯ ਨਗਰਵਾਸੀਨਂ ਘਰਦ੍ਵਾਰੇਸੁ ਸਹਸ੍ਸਭਣ੍ਡਿਕਂ ਠਪੇਨ੍ਤੋ ਵਿਯ ਪਾਸਾਦਿਕੇਹਿ ਅਭਿਕ੍ਕਨ੍ਤਾਦੀਹਿ ਅਨੁਪੁਬ੍ਬੇਨ ਸੇਟ੍ਠਿਨੋ ਘਰਦ੍ਵਾਰਂ ਸਮ੍ਪਤ੍ਤੋ. ਤਂਦਿਵਸਞ੍ਚ ਸੇਟ੍ਠਿ ਪਾਤੋਵ ਉਟ੍ਠਾਯ ਪਣੀਤਭੋਜਨਂ ਭੁਞ੍ਜਿਤ੍ਵਾ, ਘਰਦ੍ਵਾਰਕੋਟ੍ਠਕੇ ਆਸਨਂ ਪਞ੍ਞਾਪੇਤ੍ਵਾ, ਦਨ੍ਤਨ੍ਤਰਾਨਿ ਸੋਧੇਨ੍ਤੋ ਨਿਸਿਨ੍ਨੋ ਹੋਤਿ. ਸੋ ਪਚ੍ਚੇਕਬੁਦ੍ਧਂ ਦਿਸ੍ਵਾ, ਤਂਦਿਵਸਂ ਪਾਤੋ ਭੁਤ੍ਵਾ ਨਿਸਿਨ੍ਨਤ੍ਤਾ ਦਾਨਚਿਤ੍ਤਂ ਉਪ੍ਪਾਦੇਤ੍ਵਾ, ਭਰਿਯਂ ਪਕ੍ਕੋਸਾਪੇਤ੍ਵਾ, ‘‘ਇਮਸ੍ਸ ਸਮਣਸ੍ਸ ਪਿਣ੍ਡਪਾਤਂ ਦੇਹੀ’’ਤਿ ਵਤ੍ਵਾ ਪਕ੍ਕਾਮਿ.
ਸੇਟ੍ਠਿਭਰਿਯਾ ਚਿਨ੍ਤੇਸਿ – ‘‘ਮਯਾ ਏਤ੍ਤਕੇਨ ਕਾਲੇਨ ਇਮਸ੍ਸ ‘ਦੇਥਾ’ਤਿ ਵਚਨਂ ਨ ਸੁਤਪੁਬ੍ਬਂ, ਦਾਪੇਨ੍ਤੋਪਿ ਚ ਅਜ੍ਜ ਨ ਯਸ੍ਸ ਵਾ ਤਸ੍ਸ ਵਾ ਦਾਪੇਤਿ, ਵੀਤਰਾਗਦੋਸਮੋਹਸ੍ਸ ਵਨ੍ਤਕਿਲੇਸਸ੍ਸ ਓਹਿਤਭਾਰਸ੍ਸ ਪਚ੍ਚੇਕਬੁਦ੍ਧਸ੍ਸ ਦਾਪੇਤਿ, ਯਂ ਵਾ ਤਂ ਵਾ ਅਦਤ੍ਵਾ ਪਣੀਤਂ ਪਿਣ੍ਡਪਾਤਂ ਦਸ੍ਸਾਮੀ’’ਤਿ, ਘਰਾ ਨਿਕ੍ਖਮ੍ਮ ਪਚ੍ਚੇਕਬੁਦ੍ਧਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਪਤ੍ਤਂ ਆਦਾਯ ਅਨ੍ਤੋਨਿਵੇਸਨੇ ਪਞ੍ਞਤ੍ਤਾਸਨੇ ਨਿਸੀਦਾਪੇਤ੍ਵਾ ਸੁਪਰਿਸੁਦ੍ਧੇਹਿ ਸਾਲਿਤਣ੍ਡੁਲੇਹਿ ਭਤ੍ਤਂ ਸਮ੍ਪਾਦੇਤ੍ਵਾ ਤਦਨੁਰੂਪਂ ਖਾਦਨੀਯਂ ਬ੍ਯਞ੍ਜਨਂ ਸੁਪੇਯ੍ਯਞ੍ਚ ਸਲ੍ਲਕ੍ਖੇਤ੍ਵਾ ਪਤ੍ਤਂ ਪੂਰੇਤ੍ਵਾ ਬਹਿ ਗਨ੍ਧੇਹਿ ਸਮਲਙ੍ਕਰਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਹਤ੍ਥੇਸੁ ਪਤਿਟ੍ਠਪੇਤ੍ਵਾ ਵਨ੍ਦਿ. ਪਚ੍ਚੇਕਬੁਦ੍ਧੋ – ‘‘ਅਞ੍ਞੇਸਮ੍ਪਿ ਪਚ੍ਚੇਕਬੁਦ੍ਧਾਨਂ ਸਙ੍ਗਹਂ ਕਰਿਸ੍ਸਾਮੀ’’ਤਿ ਅਪਰਿਭੁਞ੍ਜਿਤ੍ਵਾਵ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸੋਪਿ ਖੋ ਸੇਟ੍ਠਿ ਬਾਹਿਰਤੋ ਆਗਚ੍ਛਨ੍ਤੋ ਪਚ੍ਚੇਕਬੁਦ੍ਧਂ ਦਿਸ੍ਵਾ ਮਯਂ ‘‘ਤੁਮ੍ਹਾਕਂ ਪਿਣ੍ਡਪਾਤਂ ਦੇਥਾ’’ਤਿ ਵਤ੍ਵਾ ਪਕ੍ਕਨ੍ਤਾ, ਅਪਿ ਵੋ ਲਦ੍ਧੋਤਿ? ਆਮ, ਸੇਟ੍ਠਿ ਲਦ੍ਧੋਤਿ. ‘‘ਪਸ੍ਸਾਮੀ’’ਤਿ ਗੀਵਂ ਉਕ੍ਖਿਪਿਤ੍ਵਾ ਓਲੋਕੇਸਿ. ਅਥਸ੍ਸ ਪਿਣ੍ਡਪਾਤਗਨ੍ਧੋ ਉਟ੍ਠਹਿਤ੍ਵਾ ਨਾਸਾਪੁਟਂ ਪਹਰਿ. ਸੋ ਚਿਤ੍ਤਂ ਸਂਯਮੇਤੁਂ ਅਸਕ੍ਕੋਨ੍ਤੋ ਪਚ੍ਛਾ ਵਿਪ੍ਪਟਿਸਾਰੀ ਆਹੋਸੀਤਿ.
ਵਰਮੇਤਨ੍ਤਿਆਦਿ ਵਿਪ੍ਪਟਿਸਾਰਸ੍ਸ ਉਪ੍ਪਨ੍ਨਾਕਾਰਦਸ੍ਸਨਂ. ਭਾਤੁ ਚ ਪਨ ਏਕਪੁਤ੍ਤਕਂ ਸਾਪਤੇਯ੍ਯਸ੍ਸ ਕਾਰਣਾ ਜੀਵਿਤਾ ਵੋਰੋਪੇਸੀਤਿ ਤਦਾ ਕਿਰਸ੍ਸ ਅਵਿਭਤ੍ਤੇਯੇਵ ਕੁਟੁਮ੍ਬੇ ਮਾਤਾਪਿਤਰੋ ਚ ਜੇਟ੍ਠਭਾਤਾ ਚ ਕਾਲਮਕਂਸੁ. ਸੋ ਭਾਤੁਜਾਯਾਯ ਸਦ੍ਧਿਂਯੇਵ ਸਂਵਾਸਂ ਕਪ੍ਪੇਸਿ. ਭਾਤੁ ਪਨਸ੍ਸ ਏਕੋ ਪੁਤ੍ਤੋ ਹੋਤਿ, ਤਂ ਵੀਥਿਯਾ ਕੀਲ਼ਨ੍ਤਂ ਮਨੁਸ੍ਸਾ ਵਦਨ੍ਤਿ – ‘‘ਅਯਂ ਦਾਸੋ ਅਯਂ ਦਾਸੀ ਇਦਂ ਯਾਨਂ ਇਦਂ ਧਨਂ ਤਵ ਸਨ੍ਤਕ’’ਨ੍ਤਿ. ਸੋ ਤੇਸਂ ਕਥਂ ਗਹੇਤ੍ਵਾ – ‘‘ਅਯਂ ਦਾਸੋ ਮਯ੍ਹਂ ਸਨ੍ਤਕ’’ਨ੍ਤਿਆਦੀਨਿ ਕਥੇਤਿ.
ਅਥਸ੍ਸ ਚੂਲ਼ਪਿਤਾ ਚਿਨ੍ਤੇਸਿ – ‘‘ਅਯਂ ਦਾਰਕੋ ਇਦਾਨੇਵ ਏਵਂ ਕਥੇਸਿ, ਮਹਲ੍ਲਕਕਾਲੇ ਕੁਟੁਮ੍ਬਂ ਮਜ੍ਝੇ ਭਿਨ੍ਦਾਪੇਯ੍ਯ, ਇਦਾਨੇਵਸ੍ਸ ਕਤ੍ਤਬ੍ਬਂ ਕਰਿਸ੍ਸਾਮੀ’’ਤਿ ਏਕਦਿਵਸਂ ਵਾਸਿਂ ਆਦਾਯ – ‘‘ਏਹਿ ਪੁਤ੍ਤ, ਅਰਞ੍ਞਂ ਗਚ੍ਛਾਮਾ’’ਤਿ ਤਂ ਅਰਞ੍ਞਂ ਨੇਤ੍ਵਾ ਵਿਰਵਨ੍ਤਂ ਵਿਰਵਨ੍ਤਂ ਮਾਰੇਤ੍ਵਾ ਆਵਾਟੇ ਪਕ੍ਖਿਪਿਤ੍ਵਾ ਪਂਸੁਨਾ ਪਟਿਚ੍ਛਾਦੇਸਿ. ਇਦਂ ਸਨ੍ਧਾਯੇਤਂ ਵੁਤ੍ਤਂ. ਸਤ੍ਤਕ੍ਖਤ੍ਤੁਨ੍ਤਿ ਸਤ੍ਤਵਾਰੇ. ਪੁਬ੍ਬਪਚ੍ਛਿਮਚੇਤਨਾਵਸੇਨ ਚੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਏਕਪਿਣ੍ਡਪਾਤਦਾਨਸ੍ਮਿਞ੍ਹਿ ਏਕਾਵ ਚੇਤਨਾ ਦ੍ਵੇ ਪਟਿਸਨ੍ਧਿਯੋ ਨ ਦੇਤਿ, ਪੁਬ੍ਬਪਚ੍ਛਿਮਚੇਤਨਾਹਿ ਪਨੇਸ ਸਤ੍ਤਕ੍ਖਤ੍ਤੁਂ ਸਗ੍ਗੇ, ਸਤ੍ਤਕ੍ਖਤ੍ਤੁਂ ਸੇਟ੍ਠਿਕੁਲੇ ਨਿਬ੍ਬਤ੍ਤੋ. ਪੁਰਾਣਨ੍ਤਿ ਪਚ੍ਚੇਕਸਮ੍ਬੁਦ੍ਧਸ੍ਸ ਦਿਨ੍ਨਪਿਣ੍ਡਪਾਤਚੇਤਨਾਕਮ੍ਮਂ.
ਪਰਿਗ੍ਗਹਨ੍ਤਿ ਪਰਿਗ੍ਗਹਿਤਵਤ੍ਥੁ. ਅਨੁਜੀਵਿਨੋਤਿ ਏਕਂ ਮਹਾਕੁਲਂ ਨਿਸ੍ਸਾਯ ਪਣ੍ਣਾਸਮ੍ਪਿ ਸਟ੍ਠਿਪਿ ਕੁਲਾਨਿ ਜੀਵਨ੍ਤਿ, ਤੇ ਮਨੁਸ੍ਸੇ ਸਨ੍ਧਾਯੇਤਂ ਵੁਤ੍ਤਂ. ਸਬ੍ਬਂ ਨਾਦਾਯ ਗਨ੍ਤਬ੍ਬਨ੍ਤਿ ਸਬ੍ਬਮੇਤਂ ਨ ਆਦਿਯਿਤ੍ਵਾ ਗਨ੍ਤਬ੍ਬਂ. ਸਬ੍ਬਂ ਨਿਕ੍ਖਿਪ੍ਪਗਾਮਿਨਨ੍ਤਿ ਸਬ੍ਬਮੇਤਂ ਨਿਕ੍ਖਿਪ੍ਪਸਭਾਵਂ, ਪਰਿਚ੍ਚਜਿਤਬ੍ਬਸਭਾਵਮੇਵਾਤਿ ਅਤ੍ਥੋ. ਦਸਮਂ.
ਦੁਤਿਯੋ ਵਗ੍ਗੋ.
੩. ਤਤਿਯਵਗ੍ਗੋ
੧. ਪੁਗ੍ਗਲਸੁਤ੍ਤਵਣ੍ਣਨਾ
੧੩੨. ਤਤਿਯਵਗ੍ਗਸ੍ਸ ਪਠਮੇ ‘‘ਨੀਚੇ ਕੁਲੇ ਪਚ੍ਚਾਜਾਤੋ’’ਤਿਆਦਿਕੇਨ ਤਮੇਨ ਯੁਤ੍ਤੋਤਿ ਤਮੋ. ਕਾਯਦੁਚ੍ਚਰਿਤਾਦੀਹਿ ਪੁਨ ਨਿਰਯਤਮੂਪਗਮਨਤੋ ਤਮਪਰਾਯਣੋ. ਇਤਿ ਉਭਯੇਨਪਿ ਖਨ੍ਧਤਮੋਵ ਕਥਿਤੋ ਹੋਤਿ. ‘‘ਉਚ੍ਚੇ ਕੁਲੇ ਪਚ੍ਚਾਜਾਤੋ’’ਤਿਆਦਿਕੇਨ ਜੋਤਿਨਾ ਯੁਤ੍ਤਤੋ ਜੋਤਿ, ਆਲੋਕੀਭੂਤੋਤਿ ਵੁਤ੍ਤਂ ਹੋਤਿ. ਕਾਯਸੁਚਰਿਤਾਦੀਹਿ ਪੁਨ ਸਗ੍ਗੂਪਪਤ੍ਤਿਜੋਤਿਭਾਵੂਪਗਮਨਤੋ ਜੋਤਿਪਰਾਯਣੋ. ਇਮਿਨਾ ਨਯੇਨ ਇਤਰੇਪਿ ਦ੍ਵੇ ਵੇਦਿਤਬ੍ਬਾ.
ਵੇਨਕੁਲੇਤਿ ਵਿਲੀਵਕਾਰਕੁਲੇ. ਨੇਸਾਦਕੁਲੇਤਿ ਮਿਗਲੁਦ੍ਦਕਾਦੀਨਂ ਕੁਲੇ. ਰਥਕਾਰਕੁਲੇਤਿ ਚਮ੍ਮਕਾਰਕੁਲੇ. ਪੁਕ੍ਕੁਸਕੁਲੇਤਿ ਪੁਪ੍ਫਛਡ੍ਡਕਕੁਲੇ. ਕਸਿਰਵੁਤ੍ਤਿਕੇਤਿ ਦੁਕ੍ਖਵੁਤ੍ਤਿਕੇ. ਦੁਬ੍ਬਣ੍ਣੋਤਿ ਪਂਸੁਪਿਸਾਚਕੋ ਵਿਯ ਝਾਮਖਾਣੁਵਣ੍ਣੋ. ਦੁਦ੍ਦਸਿਕੋਤਿ ਵਿਜਾਤਮਾਤੁਯਾਪਿ ਅਮਨਾਪਦਸ੍ਸਨੋ. ਓਕੋਟਿਮਕੋਤਿ ਲਕੁਣ੍ਡਕੋ. ਕਾਣੋਤਿ ਏਕਕ੍ਖਿਕਾਣੋ ਵਾ ਉਭਯਕ੍ਖਿਕਾਣੋ ਵਾ. ਕੁਣੀਤਿ ਏਕਹਤ੍ਥਕੁਣੀ ਵਾ ਉਭਯਹਤ੍ਥਕੁਣੀ ਵਾ. ਖਞ੍ਜੋਤਿ ਏਕਪਾਦਖਞ੍ਜੋ ਵਾ ਉਭਯਪਾਦਖਞ੍ਜੋ ਵਾ. ਪਕ੍ਖਹਤੋਤਿ ਹਤਪਕ੍ਖੋ ਪੀਠਸਪ੍ਪੀ. ਪਦੀਪੇਯ੍ਯਸ੍ਸਾਤਿ ਤੇਲਕਪਲ੍ਲਕਾਦਿਨੋ ਪਦੀਪਉਪਕਰਣਸ੍ਸ. ਏਵਂ ਖੋ, ਮਹਾਰਾਜਾਤਿ ਏਤ੍ਥ ਏਕੋ ਪੁਗ੍ਗਲੋ ਬਹਿਦ੍ਧਾ ਆਲੋਕਂ ਅਦਿਸ੍ਵਾ ਮਾਤੁਕੁਚ੍ਛਿਸ੍ਮਿਂਯੇਵ ਕਾਲਂ ਕਤ੍ਵਾ ਅਪਾਯੇਸੁ ਨਿਬ੍ਬਤ੍ਤਨ੍ਤੋ ਸਕਲਂ ਕਪ੍ਪਮ੍ਪਿ ਸਂਸਰਤਿ, ਸੋਪਿ ਤਮੋਤਮਪਰਾਯਣੋਵ. ਸੋ ਪਨ ਕੁਹਕਪੁਗ੍ਗਲੋ ਭਵੇਯ੍ਯ. ਕੁਹਕਸ੍ਸ ਹਿ ਏਵਰੂਪਾ ਨਿਬ੍ਬਤ੍ਤਿ ਹੋਤੀਤਿ ਵੁਤ੍ਤਂ.
ਏਤ੍ਥ ਚ ‘‘ਨੀਚੇ ਕੁਲੇ ਪਚ੍ਚਾਜਾਤੋ ਹੋਤਿ ਚਣ੍ਡਾਲਕੁਲੇ ਵਾ’’ਤਿਆਦੀਹਿ ਆਗਮਨਵਿਪਤ੍ਤਿ ਚੇਵ ਪੁਬ੍ਬੁਪ੍ਪਨ੍ਨਪਚ੍ਚਯਵਿਪਤ੍ਤਿ ਚ ਦਸ੍ਸਿਤਾ. ਦਲਿਦ੍ਦੇਤਿਆਦੀਹਿ ਪਵਤ੍ਤਪਚ੍ਚਯਵਿਪਤ੍ਤਿ. ਕਸਿਰਵੁਤ੍ਤਿਕੇਤਿਆਦੀਹਿ ਆਜੀਵੁਪਾਯਵਿਪਤ੍ਤਿ. ਦੁਬ੍ਬਣ੍ਣੋਤਿਆਦੀਹਿ ਅਤ੍ਤਭਾਵਵਿਪਤ੍ਤਿ. ਬਵ੍ਹਾਬਾਧੋਤਿਆਦੀਹਿ ਦੁਕ੍ਖਕਾਰਣਸਮਾਯੋਗੋ. ਨ ਲਾਭੀਤਿਆਦੀਹਿ ਸੁਖਕਾਰਣਵਿਪਤ੍ਤਿ ਚੇਵ ਉਪਭੋਗਵਿਪਤ੍ਤਿ ਚ. ਕਾਯੇਨ ਦੁਚ੍ਚਰਿਤਨ੍ਤਿਆਦੀਹਿ ਤਮਪਰਾਯਣਭਾਵਸ੍ਸ ਕਾਰਣਸਮਾਯੋਗੋ. ਕਾਯਸ੍ਸ ਭੇਦਾਤਿਆਦੀਹਿ ਸਮ੍ਪਰਾਯਿਕਤਮੂਪਗਮੋ. ਸੁਕ੍ਕਪਕ੍ਖੋ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬੋ.
ਅਕ੍ਕੋਸਤੀਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਤਿ. ਪਰਿਭਾਸਤੀਤਿ, ‘‘ਕਸ੍ਮਾ ਤਿਟ੍ਠਥ? ਕਿਂ ਤੁਮ੍ਹੇਹਿ ਅਮ੍ਹਾਕਂ ਕਸਿਕਮ੍ਮਾਦੀਨਿ ਕਤਾਨੀ’’ਤਿਆਦੀਹਿ? ਪਰਿਭਵਵਚਨੇਹਿ ਪਰਿਭਾਸਤਿ. ਰੋਸਕੋਤਿ ਘਟ੍ਟਕੋ. ਅਬ੍ਯਗ੍ਗਮਨਸੋਤਿ ਏਕਗ੍ਗਚਿਤ੍ਤੋ. ਪਠਮਂ.
੨. ਅਯ੍ਯਿਕਾਸੁਤ੍ਤਵਣ੍ਣਨਾ
੧੩੩. ਦੁਤਿਯੇ ਜਿਣ੍ਣਾਤਿ ਜਰਾਜਿਣ੍ਣਾ. ਵੁਡ੍ਢਾਤਿ ਵਯੋਵੁਡ੍ਢਾ. ਮਹਲ੍ਲਿਕਾਤਿ ਜਾਤਿਮਹਲ੍ਲਿਕਾ. ਅਦ੍ਧਗਤਾਤਿ ਅਦ੍ਧਂ ਚਿਰਕਾਲਂ ਅਤਿਕ੍ਕਨ੍ਤਾ. ਵਯੋਅਨੁਪ੍ਪਤ੍ਤਾਤਿ ਪਚ੍ਛਿਮਵਯਂ ਸਮ੍ਪਤ੍ਤਾ. ਪਿਯਾ ਮਨਾਪਾਤਿ ਰਞ੍ਞੋ ਕਿਰ ਮਾਤਰਿ ਮਤਾਯ ਅਯ੍ਯਿਕਾ ਮਾਤੁਟ੍ਠਾਨੇ ਠਤ੍ਵਾ ਪਟਿਜਗ੍ਗਿ, ਤੇਨਸ੍ਸ ਅਯ੍ਯਿਕਾਯ ਬਲਵਪੇਮਂ ਉਪ੍ਪਜ੍ਜਿ. ਤਸ੍ਮਾ ਏਵਮਾਹ. ਹਤ੍ਥਿਰਤਨੇਨਾਤਿ ਸਤਸਹਸ੍ਸਗ੍ਘਨਕੋ ਹਤ੍ਥੀ ਸਤਸਹਸ੍ਸਗ੍ਘਨਕੇਨ ਅਲਙ੍ਕਾਰੇਨ ਅਲਙ੍ਕਤੋ ਹਤ੍ਥਿਰਤਨਂ ਨਾਮ. ਅਸ੍ਸਰਤਨੇਪਿ ਏਸੇਵ ਨਯੋ. ਗਾਮਵਰੋਪਿ ਸਤਸਹਸ੍ਸੁਟ੍ਠਾਨਕਗਾਮੋਵ. ਸਬ੍ਬਾਨਿ ਤਾਨਿ ਭੇਦਨਧਮ੍ਮਾਨੀਤਿ ਤੇਸੁ ਹਿ ਕਿਞ੍ਚਿ ਕਰਿਯਮਾਨਮੇਵ ਭਿਜ੍ਜਤਿ, ਕਿਞ੍ਚਿ ਕਤਪਰਿਯੋਸਿਤਂ ਚਕ੍ਕਤੋ ਅਨਪਨੀਤਮੇਵ, ਕਿਞ੍ਚਿ ਅਪਨੇਤ੍ਵਾ ਭੂਮਿਯਂ ਠਪਿਤਮਤ੍ਤਂ, ਕਿਞ੍ਚਿ ਤਤੋ ਪਰਂ, ਏਵਮੇਵ ਸਤ੍ਤੇਸੁਪਿ ਕੋਚਿ ਪਟਿਸਨ੍ਧਿਂ ਗਹੇਤ੍ਵਾ ਮਰਤਿ, ਕੋਚਿ ਮੂਲ਼੍ਹਗਬ੍ਭਾਯ ਮਾਤਰਿ ਮਾਤੁਕੁਚ੍ਛਿਤੋ ਅਨਿਕ੍ਖਨ੍ਤੋਵ, ਕੋਚਿ ਨਿਕ੍ਖਨ੍ਤਮਤ੍ਤੋ, ਕੋਚਿ ਤਤੋ ਪਰਨ੍ਤਿ. ਤਸ੍ਮਾ ਏਵਮਾਹ. ਦੁਤਿਯਂ.
੧੩੪. ਤਤਿਯੇ ਸਬ੍ਬਂ ਉਤ੍ਤਾਨਮੇਵ. ਤਤਿਯਂ.
੪. ਇਸ੍ਸਤ੍ਤਸੁਤ੍ਤਵਣ੍ਣਨਾ
੧੩੫. ਚਤੁਤ੍ਥਸ੍ਸ ਅਟ੍ਠੁਪ੍ਪਤ੍ਤਿਕੋ ਨਿਕ੍ਖੇਪੋ. ਭਗਵਤੋ ਕਿਰ ਪਠਮਬੋਧਿਯਂ ਮਹਾਲਾਭਸਕ੍ਕਾਰੋ ਉਦਪਾਦਿ ਭਿਕ੍ਖੁਸਙ੍ਘਸ੍ਸ ਚ. ਤਿਤ੍ਥਿਯਾ ਹਤਲਾਭਸਕ੍ਕਾਰਾ ਹੁਤ੍ਵਾ ਕੁਲੇਸੁ ਏਵਂ ਕਨ੍ਥੇਨ੍ਤਾ ਵਿਚਰਨ੍ਤਿ – ‘‘ਸਮਣੋ ਗੋਤਮੋ ਏਵਮਾਹ, ‘ਮਯ੍ਹਮੇਵ ਦਾਨਂ ਦਾਤਬ੍ਬਂ, ਨ ਅਞ੍ਞੇਸਂ ਦਾਨਂ ਦਾਤਬ੍ਬਂ. ਮਯ੍ਹਮੇਵ ਸਾਵਕਾਨਂ ਦਾਨਂ ਦਾਤਬ੍ਬਂ, ਨ ਅਞ੍ਞੇਸਂ ਸਾਵਕਾਨਂ ਦਾਨਂ ਦਾਤਬ੍ਬਂ. ਮਯ੍ਹਮੇਵ ਦਿਨ੍ਨਂ ਮਹਪ੍ਫਲਂ, ਨ ਅਞ੍ਞੇਸਂ ਦਿਨ੍ਨਂ ਮਹਪ੍ਫਲਂ. ਮਯ੍ਹਮੇਵ ਸਾਵਕਾਨਂ ਦਿਨ੍ਨਂ ਮਹਪ੍ਫਲਂ, ਨ ਅਞ੍ਞੇਸਂ ਸਾਵਕਾਨਂ ਦਿਨ੍ਨਂ ਮਹਪ੍ਫਲ’ਨ੍ਤਿ. ਯੁਤ੍ਤਂ ਨੁ ਖੋ ਸਯਮ੍ਪਿ ਭਿਕ੍ਖਾਚਾਰਨਿਸ੍ਸਿਤੇਨ ਪਰੇਸਂ ਭਿਕ੍ਖਾਚਾਰਨਿਸ੍ਸਿਤਾਨਂ ਚਤੁਨ੍ਨਂ ਪਚ੍ਚਯਾਨਂ ਅਨ੍ਤਰਾਯਂ ਕਾਤੁਂ, ਅਯੁਤ੍ਤਂ ਕਰੋਤਿ ਅਨਨੁਚ੍ਛਵਿਕ’’ਨ੍ਤਿ. ਸਾ ਕਥਾ ਪਤ੍ਥਰਮਾਨਾ ਰਾਜਕੁਲਂ ਸਮ੍ਪਤ੍ਤਾ. ਰਾਜਾ ਸੁਤ੍ਵਾ ਚਿਨ੍ਤੇਸਿ – ‘‘ਅਟ੍ਠਾਨਮੇਤਂ ਯਂ ਤਥਾਗਤੋ ਪਰੇਸਂ ਲਾਭਨ੍ਤਰਾਯਂ ਕਰੇਯ੍ਯ. ਏਤੇ ਤਥਾਗਤਸ੍ਸ ਅਲਾਭਾਯ ਅਯਸਾਯ ਪਰਿਸਕ੍ਕਨ੍ਤਿ. ਸਚਾਹਂ ਇਧੇਵ ਠਤ੍ਵਾ ‘ਮਾ ਏਵਂ ਅਵੋਚੁਤ੍ਥ, ਨ ਸਤ੍ਥਾ ਏਵਂ ਕਥੇਤੀ’ਤਿ ਵਦੇਯ੍ਯਂ, ਏਵਂ ਸਾ ਕਥਾ ਨਿਜ੍ਝਤ੍ਤਿਂ ਨ ਗਚ੍ਛੇਯ੍ਯ, ਇਮਸ੍ਸ ਮਹਾਜਨਸ੍ਸ ਸਨ੍ਨਿਪਤਿਤਕਾਲੇਯੇਵ ਨਂ ਨਿਜ੍ਝਾਪੇਸ੍ਸਾਮੀ’’ਤਿ ਏਕਂ ਛਣਦਿਵਸਂ ਆਗਮੇਨ੍ਤੋ ਤੁਣ੍ਹੀ ਅਹੋਸਿ.
ਅਪਰੇਨ ਸਮਯੇਨ ਮਹਾਛਣੇ ਸਮ੍ਪਤ੍ਤੇ ‘‘ਅਯਂ ਇਮਸ੍ਸ ਕਾਲੋ’’ਤਿ ਨਗਰੇ ਭੇਰਿਂ ਚਰਾਪੇਸਿ – ‘‘ਸਦ੍ਧਾ ਵਾ ਅਸ੍ਸਦ੍ਧਾ ਵਾ ਸਮ੍ਮਾਦਿਟ੍ਠਿਕਾ ਵਾ ਮਿਚ੍ਛਾਦਿਟ੍ਠਿਕਾ ਵਾ ਗੇਹਰਕ੍ਖਕੇ ਦਾਰਕੇ ਵਾ ਮਾਤੁਗਾਮੇ ਵਾ ਠਪੇਤ੍ਵਾ ਅਵਸੇਸਾ ਯੇ ਵਿਹਾਰਂ ਨਾਗਚ੍ਛਨ੍ਤਿ, ਪਞ੍ਞਾਸਂ ਦਣ੍ਡੋ’’ਤਿ. ਸਯਮ੍ਪਿ ਪਾਤੋਵ ਨ੍ਹਤ੍ਵਾ ਕਤਪਾਤਰਾਸੋ ਸਬ੍ਬਾਭਰਣਪਟਿਮਣ੍ਡਿਤੋ ਮਹਤਾ ਬਲਕਾਯੇਨ ਸਦ੍ਧਿਂ ਵਿਹਾਰਂ ਅਗਮਾਸਿ. ਗਚ੍ਛਨ੍ਤੋ ਚ ਚਿਨ੍ਤੇਸਿ – ‘‘ਭਗਵਾ ਤੁਮ੍ਹੇ ਕਿਰ ਏਵਂ ਵਦਥ ‘ਮਯ੍ਹਮੇਵ ਦਾਨਂ ਦਾਤਬ੍ਬਂ…ਪੇ… ਨ ਅਞ੍ਞੇਸਂ ਸਾਵਕਾਨਂ ਦਿਨ੍ਨਂ ਮਹਪ੍ਫਲ’ਨ੍ਤਿ ਏਵਂ ਪੁਚ੍ਛਿਤੁਂ ਅਯੁਤ੍ਤਂ, ਪਞ੍ਹਮੇਵ ਪੁਚ੍ਛਿਸ੍ਸਾਮਿ, ਪਞ੍ਹਂ ਕਥੇਨ੍ਤੋ ਚ ਮੇ ਭਗਵਾ ਅਵਸਾਨੇ ਤਿਤ੍ਥਿਯਾਨਂ ਵਾਦਂ ਭਞ੍ਜਿਸ੍ਸਤੀ’’ਤਿ. ਸੋ ਪਞ੍ਹਂ ਪੁਚ੍ਛਨ੍ਤੋ ਕਤ੍ਥ ਨੁ ਖੋ, ਭਨ੍ਤੇ, ਦਾਨਂ ਦਾਤਬ੍ਬਨ੍ਤਿ ਆਹ. ਯਤ੍ਥਾਤਿ ਯਸ੍ਮਿਂ ਪੁਗ੍ਗਲੇ ਚਿਤ੍ਤਂ ਪਸੀਦਤਿ, ਤਸ੍ਮਿਂ ਦਾਤਬ੍ਬਂ, ਤਸ੍ਸ ਵਾ ਦਾਤਬ੍ਬਨ੍ਤਿ ਅਤ੍ਥੋ.
ਏਵਂ ਵੁਤ੍ਤੇ ਰਾਜਾ ਯੇਹਿ ਮਨੁਸ੍ਸੇਹਿ ਤਿਤ੍ਥਿਯਾਨਂ ਵਚਨਂ ਆਰੋਚਿਤਂ, ਤੇ ਓਲੋਕੇਸਿ. ਤੇ ਰਞ੍ਞਾ ਓਲੋਕਿਤਮਤ੍ਤਾਵ ਮਙ੍ਕੁਭੂਤਾ ਅਧੋਮੁਖਾ ਪਾਦਙ੍ਗੁਟ੍ਠਕੇਨ ਭੂਮਿਂ ਲੇਖਮਾਨਾ ਅਟ੍ਠਂਸੁ. ਰਾਜਾ – ‘‘ਏਕਪਦੇਨੇਵ, ਭਨ੍ਤੇ, ਹਤਾ ਤਿਤ੍ਥਿਯਾ’’ਤਿ ਮਹਾਜਨਂ ਸਾਵੇਨ੍ਤੋ ਮਹਾਸਦ੍ਦੇਨ ਅਭਾਸਿ. ਏਵਞ੍ਚ ਪਨ ਭਾਸਿਤ੍ਵਾ – ‘‘ਭਗਵਾ ਚਿਤ੍ਤਂ ਨਾਮ ਨਿਗਣ੍ਠਾਚੇਲਕਪਰਿਬ੍ਬਾਜਕਾਦੀਸੁ ਯਤ੍ਥ ਕਤ੍ਥਚਿ ਪਸੀਦਤਿ, ਕਤ੍ਥ ਪਨ, ਭਨ੍ਤੇ, ਦਿਨ੍ਨਂ ਮਹਪ੍ਫਲ’’ਨ੍ਤਿ ਪੁਚ੍ਛਿ. ਅਞ੍ਞਂ ਖੋ ਏਤਨ੍ਤਿ, ‘‘ਮਹਾਰਾਜ, ਅਞ੍ਞਂ ਤਯਾ ਪਠਮਂ ਪੁਚ੍ਛਿਤਂ, ਅਞ੍ਞਂ ਪਚ੍ਛਾ, ਸਲ੍ਲਕ੍ਖੇਹਿ ਏਤਂ, ਪਞ੍ਹਾਕਥਨਂ ਪਨ ਮਯ੍ਹਂ ਭਾਰੋ’’ਤਿ ਵਤ੍ਵਾ ਸੀਲਵਤੋ ਖੋਤਿਆਦਿਮਾਹ. ਤਤ੍ਥ ਇਧ ਤ੍ਯਸ੍ਸਾਤਿ ਇਧ ਤੇ ਅਸ੍ਸ. ਸਮੁਪਬ੍ਯੂਲ਼੍ਹੋਤਿ ਰਾਸਿਭੂਤੋ. ਅਸਿਕ੍ਖਿਤੋਤਿ ਧਨੁਸਿਪ੍ਪੇ ਅਸਿਕ੍ਖਿਤੋ. ਅਕਤਹਤ੍ਥੋਤਿ ਮੁਟ੍ਠਿਬਨ੍ਧਾਦਿਵਸੇਨ ਅਸਮ੍ਪਾਦਿਤਹਤ੍ਥੋ. ਅਕਤਯੋਗ੍ਗੋਤਿ ਤਿਣਪੁਞ੍ਜਮਤ੍ਤਿਕਾਪੁਞ੍ਜਾਦੀਸੁ ਅਕਤਪਰਿਚਯੋ. ਅਕਤੂਪਾਸਨੋਤਿ ਰਾਜਰਾਜਮਹਾਮਤ੍ਤਾਨਂ ਅਦਸ੍ਸਿਤਸਰਕ੍ਖੇਪੋ. ਛਮ੍ਭੀਤਿ ਪਵੇਧਿਤਕਾਯੋ.
ਕਾਮਚ੍ਛਨ੍ਦੋ ਪਹੀਨੋਤਿਆਦੀਸੁ ਅਰਹਤ੍ਤਮਗ੍ਗੇਨ ਕਾਮਚ੍ਛਨ੍ਦੋ ਪਹੀਨੋ ਹੋਤਿ, ਅਨਾਗਾਮਿਮਗ੍ਗੇਨ ਬ੍ਯਾਪਾਦੋ, ਅਰਹਤ੍ਤਮਗ੍ਗੇਨੇਵ ਥਿਨਮਿਦ੍ਧਂ, ਤਥਾ ਉਦ੍ਧਚ੍ਚਂ, ਤਤਿਯੇਨੇਵ ਕੁਕ੍ਕੁਚ੍ਚਂ, ਪਠਮਮਗ੍ਗੇਨ ਵਿਚਿਕਿਚ੍ਛਾ ਪਹੀਨਾ ਹੋਤਿ. ਅਸੇਕ੍ਖੇਨ ਸੀਲਕ੍ਖਨ੍ਧੇਨਾਤਿ ਅਸੇਕ੍ਖਸ੍ਸ ਸੀਲਕ੍ਖਨ੍ਧੋ ਅਸੇਕ੍ਖੋ ਸੀਲਕ੍ਖਨ੍ਧੋ ਨਾਮ. ਏਸ ਨਯੋ ਸਬ੍ਬਤ੍ਥ. ਏਤ੍ਥ ਚ ਪੁਰਿਮੇਹਿ ਚਤੂਹਿ ਪਦੇਹਿ ਲੋਕਿਯਲੋਕੁਤ੍ਤਰਸੀਲਸਮਾਧਿਪਞ੍ਞਾਵਿਮੁਤ੍ਤਿਯੋ ਕਥਿਤਾ. ਵਿਮੁਤ੍ਤਿਞਾਣਦਸ੍ਸਨਂ ਪਚ੍ਚਵੇਕ੍ਖਣਞਾਣਂ ਹੋਤਿ, ਤਂ ਲੋਕਿਯਮੇਵ.
ਇਸ੍ਸਤ੍ਤਨ੍ਤਿ ਉਸੁਸਿਪ੍ਪਂ. ਬਲਵੀਰਿਯਨ੍ਤਿ ਏਤ੍ਥ ਬਲਂ ਨਾਮ ਵਾਯੋਧਾਤੁ, ਵੀਰਿਯਂ ਕਾਯਿਕਚੇਤਸਿਕਵੀਰਿਯਮੇਵ. ਭਰੇਤਿ ਭਰੇਯ੍ਯ. ਨਾਸੂਰਂ ਜਾਤਿਪਚ੍ਚਯਾਤਿ, ‘‘ਅਯਂ ਜਾਤਿਸਮ੍ਪਨ੍ਨੋ’’ਤਿ ਏਵਂ ਜਾਤਿਕਾਰਣਾ ਅਸੂਰਂ ਨ ਭਰੇਯ੍ਯ.
ਖਨ੍ਤਿਸੋਰਚ੍ਚਨ੍ਤਿ ਏਤ੍ਥ ਖਨ੍ਤੀਤਿ ਅਧਿਵਾਸਨਖਨ੍ਤਿ, ਸੋਰਚ੍ਚਨ੍ਤਿ ਅਰਹਤ੍ਤਂ. ਧਮ੍ਮਾਤਿ ਏਤੇ ਦ੍ਵੇ ਧਮ੍ਮਾ. ਅਸ੍ਸਮੇਤਿ ਆਵਸਥੇ. ਵਿਵਨੇਤਿ ਅਰਞ੍ਞਟ੍ਠਾਨੇ, ਨਿਰੁਦਕੇ ਅਰਞ੍ਞੇ ਚਤੁਰਸ੍ਸਪੋਕ੍ਖਰਣਿਆਦੀਨਿ ਕਾਰਯੇਤਿ ਅਤ੍ਥੋ. ਦੁਗ੍ਗੇਤਿ ਵਿਸਮਟ੍ਠਾਨੇ. ਸਙ੍ਕਮਨਾਨੀਤਿ ਪਣ੍ਣਾਸਹਤ੍ਥਸਟ੍ਠਿਹਤ੍ਥਾਨਿ ਸਮੋਕਿਣ੍ਣਪਰਿਸੁਦ੍ਧਵਾਲਿਕਾਨਿ ਸਙ੍ਕਮਨਾਨਿ ਕਰੇਯ੍ਯ.
ਇਦਾਨਿ ਏਤੇਸੁ ਅਰਞ੍ਞਸੇਨਾਸਨੇਸੁ ਵਸਨ੍ਤਾਨਂ ਭਿਕ੍ਖੂਨਂ ਭਿਕ੍ਖਾਚਾਰਵਤ੍ਤਂ ਆਚਿਕ੍ਖਨ੍ਤੋ ਅਨ੍ਨਂ ਪਾਨਨ੍ਤਿਆਦਿਮਾਹ. ਤਤ੍ਥ ਸੇਨਾਸਨਾਨੀਤਿ ਮਞ੍ਚਪੀਠਾਦੀਨਿ. ਵਿਪ੍ਪਸਨ੍ਨੇਨਾਤਿ ਖੀਣਾਸਵਸ੍ਸ ਦੇਨ੍ਤੋਪਿ ਸਕਙ੍ਖੇਨ ਕਿਲੇਸਮਲਿਨੇਨ ਚਿਤ੍ਤੇਨ ਅਦਤ੍ਵਾ ਵਿਪ੍ਪਸਨ੍ਨੇਨੇਵ ਚਿਤ੍ਤੇਨ ਦਦੇਯ੍ਯ. ਥਨਯਨ੍ਤਿ ਗਜ੍ਜਨ੍ਤੋ. ਸਤਕ੍ਕਕੂਤਿ ਸਤਸਿਖਰੋ, ਅਨੇਕਕੂਟੋਤਿ ਅਤ੍ਥੋ. ਅਭਿਸਙ੍ਖਚ੍ਚਾਤਿ ਅਭਿਸਙ੍ਖਰਿਤ੍ਵਾ ਸਮੋਧਾਨੇਤ੍ਵਾ ਰਾਸਿਂ ਕਤ੍ਵਾ.
ਆਮੋਦਮਾਨੋਤਿ ਤੁਟ੍ਠਮਾਨਸੋ ਹੁਤ੍ਵਾ. ਪਕਿਰੇਤੀਤਿ ਦਾਨਗ੍ਗੇ ਵਿਚਿਰਤਿ, ਪਕਿਰਨ੍ਤੋ ਵਿਯ ਵਾ ਦਾਨਂ ਦੇਤਿ. ਪੁਞ੍ਞਧਾਰਾਤਿ ਅਨੇਕਦਾਨਚੇਤਨਾਮਯਾ ਪੁਞ੍ਞਧਾਰਾ. ਦਾਤਾਰਂ ਅਭਿਵਸ੍ਸਤੀਤਿ ਯਥਾ ਆਕਾਸੇ ਸਮੁਟ੍ਠਿਤਮੇਘਤੋ ਨਿਕ੍ਖਨ੍ਤਾ ਉਦਕਧਾਰਾ ਪਥਵਿਂ ਸਿਨੇਹਯਨ੍ਤੀ ਤੇਮੇਨ੍ਤੀ ਕਿਲੇਦਯਨ੍ਤੀ ਅਭਿਵਸ੍ਸਤਿ, ਏਵਮੇਵ ਅਯਮ੍ਪਿ ਦਾਯਕਸ੍ਸ ਅਬ੍ਭਨ੍ਤਰੇ ਉਪ੍ਪਨ੍ਨਾ ਪੁਞ੍ਞਧਾਰਾ ਤਮੇਵ ਦਾਤਾਰਂ ਅਨ੍ਤੋ ਸਿਨੇਹੇਤਿ ਪੂਰੇਤਿ ਅਭਿਸਨ੍ਦੇਤਿ. ਤੇਨ ਵੁਤ੍ਤਂ ‘‘ਦਾਤਾਰਂ ਅਭਿਵਸ੍ਸਤੀ’’ਤਿ. ਚਤੁਤ੍ਥਂ.
੫. ਪਬ੍ਬਤੂਪਮਸੁਤ੍ਤਵਣ੍ਣਨਾ
੧੩੬. ਪਞ੍ਚਮੇ ਮੁਦ੍ਧਾਵਸਿਤ੍ਤਾਨਨ੍ਤਿ ਖਤ੍ਤਿਯਾਭਿਸੇਕੇਨ ਮੁਦ੍ਧਨਿ ਅਵਸਿਤ੍ਤਾਨਂ ਕਤਾਭਿਸੇਕਾਨਂ. ਕਾਮਗੇਧਪਰਿਯੁਟ੍ਠਿਤਾਨਨ੍ਤਿ ਕਾਮੇਸੁ ਗੇਧੇਨ ਪਰਿਯੁਟ੍ਠਿਤਾਨਂ ਅਭਿਭੂਤਾਨਂ. ਜਨਪਦਤ੍ਥਾਵਰਿਯਪ੍ਪਤ੍ਤਾਨਨ੍ਤਿ ਜਨਪਦੇ ਥਿਰਭਾਵਪ੍ਪਤ੍ਤਾਨਂ. ਰਾਜਕਰਣੀਯਾਨੀਤਿ ਰਾਜਕਮ੍ਮਾਨਿ ਰਾਜੂਹਿ ਕਤ੍ਤਬ੍ਬਕਿਚ੍ਚਾਨਿ. ਤੇਸੁ ਖ੍ਵਾਹਨ੍ਤਿ ਤੇਸੁ ਅਹਂ. ਉਸੁਕ੍ਕਮਾਪਨ੍ਨੋਤਿ ਬ੍ਯਾਪਾਰਂ ਆਪਨ੍ਨੋ. ਏਸ ਕਿਰ ਰਾਜਾ ਦਿਵਸਸ੍ਸ ਤਿਕ੍ਖਤ੍ਤੁਂ ਭਗਵਤੋ ਉਪਟ੍ਠਾਨਂ ਗਚ੍ਛਤਿ, ਅਨ੍ਤਰਾਗਮਨਾਨਿ ਬਹੂਨਿਪਿ ਹੋਨ੍ਤਿ. ਤਸ੍ਸ ਨਿਬਦ੍ਧਂ ਗਚ੍ਛਤੋ ਬਲਕਾਯੋ ਮਹਾਪਿ ਹੋਤਿ ਅਪ੍ਪੋਪਿ. ਅਥੇਕਦਿਵਸਂ ਪਞ੍ਚਸਤਾ ਚੋਰਾ ਚਿਨ੍ਤਯਿਂਸੁ – ‘‘ਅਯਂ ਰਾਜਾ ਅਵੇਲਾਯ ਅਪ੍ਪੇਨ ਬਲੇਨ ਸਮਣਸ੍ਸ ਗੋਤਮਸ੍ਸ ਉਪਟ੍ਠਾਨਂ ਗਚ੍ਛਤਿ, ਅਨ੍ਤਰਾਮਗ੍ਗੇ ਨਂ ਗਹੇਤ੍ਵਾ ਰਜ੍ਜਂ ਗਣ੍ਹਿਸ੍ਸਾਮਾ’’ਤਿ. ਤੇ ਅਨ੍ਧਵਨੇ ਨਿਲੀਯਿਂਸੁ. ਰਾਜਾਨੋ ਚ ਨਾਮ ਮਹਾਪੁਞ੍ਞਾ ਹੋਨ੍ਤਿ. ਅਥ ਤੇਸਂਯੇਵ ਅਬ੍ਭਨ੍ਤਰਤੋ ਏਕੋ ਪੁਰਿਸੋ ਨਿਕ੍ਖਮਿਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਮਹਨ੍ਤਂ ਬਲਕਾਯਂ ਆਦਾਯ ਅਨ੍ਧਵਨਂ ਪਰਿਵਾਰੇਤ੍ਵਾ ਤੇ ਸਬ੍ਬੇ ਗਹੇਤ੍ਵਾ ਅਨ੍ਧਵਨਤੋ ਯਾਵ ਨਗਰਦ੍ਵਾਰਾ ਮਗ੍ਗਸ੍ਸ ਉਭੋਸੁ ਪਸ੍ਸੇਸੁ ਯਥਾ ਅਞ੍ਞਮਞ੍ਞਂ ਚਕ੍ਖੁਨਾ ਚਕ੍ਖੁਂ ਉਪਨਿਬਨ੍ਧਿਤ੍ਵਾ ਓਲੋਕੇਨ੍ਤਿ, ਏਵਂ ਆਸਨ੍ਨਾਨਿ ਸੂਲਾਨਿ ਰੋਪਾਪੇਤ੍ਵਾ ਸੂਲੇਸੁ ਉਤ੍ਤਾਸੇਸਿ. ਇਦਂ ਸਨ੍ਧਾਯ ਏਵਮਾਹ.
ਅਥ ਸਤ੍ਥਾ ਚਿਨ੍ਤੇਸਿ – ‘‘ਸਚਾਹਂ ਵਕ੍ਖਾਮਿ, ‘ਮਹਾਰਾਜ, ਮਾਦਿਸੇ ਨਾਮ ਸਮ੍ਮਾਸਮ੍ਬੁਦ੍ਧੇ ਧੁਰਵਿਹਾਰੇ ਵਸਨ੍ਤੇ ਤਯਾ ਏਵਰੂਪਂ ਦਾਰੁਣਂ ਕਮ੍ਮਂ ਕਤਂ, ਅਯੁਤ੍ਤਂ ਤੇ ਕਤ’ਨ੍ਤਿ, ਅਥਾਯਂ ਰਾਜਾ ਮਙ੍ਕੁ ਹੁਤ੍ਵਾ ਸਨ੍ਥਮ੍ਭਿਤੁਂ ਨ ਸਕ੍ਕੁਣੇਯ੍ਯ, ਪਰਿਯਾਯੇਨ ਧਮ੍ਮਂ ਕਥੇਨ੍ਤਸ੍ਸੇਵ ਮੇ ਸਲ੍ਲਕ੍ਖੇਸ੍ਸਤੀ’’ਤਿ ਧਮ੍ਮਦੇਸਨਂ ਆਰਭਨ੍ਤੋ ਤਂ ਕਿਂ ਮਞ੍ਞਸੀਤਿਆਦਿਮਾਹ. ਤਤ੍ਥ ਸਦ੍ਧਾਯਿਕੋਤਿ ਸਦ੍ਧਾਤਬ੍ਬੋ, ਯਸ੍ਸ ਤ੍ਵਂ ਵਚਨਂ ਸਦ੍ਦਹਸੀਤਿ ਅਤ੍ਥੋ. ਪਚ੍ਚਯਿਕੋਤਿ ਤਸ੍ਸੇਵ ਵੇਵਚਨਂ, ਯਸ੍ਸ ਵਚਨਂ ਪਤ੍ਤਿਯਾਯਸੀਤਿ ਅਤ੍ਥੋ. ਅਬ੍ਭਸਮਨ੍ਤਿ ਆਕਾਸਸਮਂ. ਨਿਪ੍ਪੋਥੇਨ੍ਤੋ ਆਗਚ੍ਛਤੀਤਿ ਪਥਵਿਤਲਤੋ ਯਾਵ ਅਕਨਿਟ੍ਠਬ੍ਰਹ੍ਮਲੋਕਾ ਸਬ੍ਬੇ ਸਤ੍ਤੇ ਸਣ੍ਹਕਰਣੀਯਂ ਤਿਣਚੁਣ੍ਣਂ ਵਿਯ ਕਰੋਨ੍ਤੋ ਪਿਸਨ੍ਤੋ ਆਗਚ੍ਛਤਿ.
ਅਞ੍ਞਤ੍ਰ ਧਮ੍ਮਚਰਿਯਾਯਾਤਿ ਠਪੇਤ੍ਵਾ ਧਮ੍ਮਚਰਿਯਂ ਅਞ੍ਞਂ ਕਾਤਬ੍ਬਂ ਨਤ੍ਥਿ, ਦਸਕੁਸਲਕਮ੍ਮਪਥਸਙ੍ਖਾਤਾ ਧਮ੍ਮਚਰਿਯਾਵ ਕਤ੍ਤਬ੍ਬਾ, ਭਨ੍ਤੇਤਿ – ਸਮਚਰਿਯਾਦੀਨਿ ਤਸ੍ਸੇਵ ਵੇਵਚਨਾਨਿ. ਆਰੋਚੇਮੀਤਿ ਆਚਿਕ੍ਖਾਮਿ. ਪਟਿਵੇਦਯਾਮੀਤਿ ਜਾਨਾਪੇਮਿ. ਅਧਿਵਤ੍ਤਤੀਤਿ ਅਜ੍ਝੋਤ੍ਥਰਤਿ. ਹਤ੍ਥਿਯੁਦ੍ਧਾਨੀਤਿ ਨਾਲ਼ਾਗਿਰਿਸਦਿਸੇ ਹੇਮਕਪ੍ਪਨੇ ਨਾਗੇ ਅਭਿਰੁਯ੍ਹ ਯੁਜ੍ਝਿਤਬ੍ਬਯੁਦ੍ਧਾਨਿ. ਗਤੀਤਿ ਨਿਪ੍ਫਤ੍ਤਿ. ਵਿਸਯੋਤਿ ਓਕਾਸੋ, ਸਮਤ੍ਥਭਾਵੋ ਵਾ. ਨ ਹਿ ਸਕ੍ਕਾ ਤੇਹਿ ਜਰਾਮਰਣਂ ਪਟਿਬਾਹਿਤੁਂ. ਮਨ੍ਤਿਨੋ ਮਹਾਮਤ੍ਤਾਤਿ ਮਨ੍ਤਸਮ੍ਪਨ੍ਨਾ ਮਹੋਸਧਵਿਧੁਰਪਣ੍ਡਿਤਾਦਿਸਦਿਸਾ ਮਹਾਅਮਚ੍ਚਾ. ਭੂਮਿਗਤਨ੍ਤਿ ਮਹਾਲੋਹਕੁਮ੍ਭਿਯੋ ਪੂਰੇਤ੍ਵਾ ਭੂਮਿਯਂ ਠਪਿਤਂ. ਵੇਹਾਸਟ੍ਠਨ੍ਤਿ ਚਮ੍ਮਪਸਿਬ੍ਬਕੇ ਪੂਰੇਤ੍ਵਾ ਤੁਲਾਸਙ੍ਘਾਟਾਦੀਸੁ ਲਗ੍ਗੇਤ੍ਵਾ ਚੇਵ ਨਿਯ੍ਯੁਹਾਦੀਸੁ ਚ ਪੂਰੇਤ੍ਵਾ ਠਪਿਤਂ. ਉਪਲਾਪੇਤੁਨ੍ਤਿ ਅਞ੍ਞਮਞ੍ਞਂ ਭਿਨ੍ਦਿਤੁਂ. ਯਥਾ ਦ੍ਵੇ ਜਨਾ ਏਕੇਨ ਮਗ੍ਗੇਨ ਨ ਗਚ੍ਛਨ੍ਤਿ ਏਵਂ ਕਾਤੁਂ.
ਨਭਂ ਆਹਚ੍ਚਾਤਿ ਆਕਾਸਂ ਪੂਰੇਤ੍ਵਾ. ਏਵਂ ਜਰਾ ਚ ਮਚ੍ਚੁ ਚਾਤਿ ਇਧ ਦ੍ਵੇਯੇਵ ਪਬ੍ਬਤਾ ਗਹਿਤਾ, ਰਾਜੋਵਾਦੇ ਪਨ ‘‘ਜਰਾ ਆਗਚ੍ਛਤਿ ਸਬ੍ਬਯੋਬ੍ਬਨਂ ਵਿਲੁਮ੍ਪਮਾਨਾ’’ਤਿ ਏਵਂ ਜਰਾ ਮਰਣਂ ਬ੍ਯਾਧਿ ਵਿਪਤ੍ਤੀਤਿ ਚਤ੍ਤਾਰੋਪੇਤੇ ਆਗਤਾਵ. ਤਸ੍ਮਾਤਿ ਯਸ੍ਮਾ ਹਤ੍ਥਿਯੁਦ੍ਧਾਦੀਹਿ ਜਰਾਮਰਣਂ ਜਿਨਿਤੁਂ ਨ ਸਕ੍ਕਾ, ਤਸ੍ਮਾ. ਸਦ੍ਧਂ ਨਿਵੇਸਯੇਤਿ ਸਦ੍ਧਂ ਨਿਵੇਸੇਯ੍ਯ, ਪਤਿਟ੍ਠਾਪੇਯ੍ਯਾਤਿ. ਪਞ੍ਚਮਂ.
ਤਤਿਯੋ ਵਗ੍ਗੋ.
ਇਤਿ ਸਾਰਤ੍ਥਪ੍ਪਕਾਸਿਨਿਯਾ
ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਕੋਸਲਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.