੪. ਮਾਰਸਂਯੁਤ੍ਤਂ

੧. ਪਠਮਵਗ੍ਗੋ

੧. ਤਪੋਕਮ੍ਮਸੁਤ੍ਤਵਣ੍ਣਨਾ

੧੩੭. ਮਾਰਸਂਯੁਤ੍ਤਸ੍ਸ ਪਠਮੇ ਉਰੁਵੇਲਾਯਂ ਵਿਹਰਤੀਤਿ ਪਟਿਵਿਦ੍ਧਸਬ੍ਬਞ੍ਞੁਤਞ੍ਞਾਣੋ ਉਰੁਵੇਲਗਾਮਂ ਉਪਨਿਸ੍ਸਾਯ ਵਿਹਰਤਿ. ਪਠਮਾਭਿਸਮ੍ਬੁਦ੍ਧੋਤਿ ਅਭਿਸਮ੍ਬੁਦ੍ਧੋ ਹੁਤ੍ਵਾ ਪਠਮਂ ਅਨ੍ਤੋਸਤ੍ਤਾਹਸ੍ਮਿਂਯੇਵ. ਦੁਕ੍ਕਰਕਾਰਿਕਾਯਾਤਿ ਛਬ੍ਬਸ੍ਸਾਨਿ ਕਤਾਯ ਦੁਕ੍ਕਰਕਾਰਿਕਾਯ. ਮਾਰੋ ਪਾਪਿਮਾਤਿ ਅਤ੍ਤਨੋ ਵਿਸਯਂ ਅਤਿਕ੍ਕਮਿਤੁਂ ਪਟਿਪਨ੍ਨੇ ਸਤ੍ਤੇ ਮਾਰੇਤੀਤਿ ਮਾਰੋ. ਪਾਪੇ ਨਿਯੋਜੇਤਿ, ਸਯਂ ਵਾ ਪਾਪੇ ਨਿਯੁਤ੍ਤੋਤਿ ਪਾਪਿਮਾ. ਅਞ੍ਞਾਨਿਪਿਸ੍ਸ ਕਣ੍ਹੋ, ਅਧਿਪਤਿ, ਵਸਵਤ੍ਤੀ, ਅਨ੍ਤਕੋ, ਨਮੁਚਿ, ਪਮਤ੍ਤਬਨ੍ਧੂਤਿਆਦੀਨਿ ਬਹੂਨਿ ਨਾਮਾਨਿ, ਇਧ ਪਨ ਨਾਮਦ੍ਵਯਮੇਵ ਗਹਿਤਂ. ਉਪਸਙ੍ਕਮੀਤਿ – ‘‘ਅਯਂ ਸਮਣੋ ਗੋਤਮੋ ‘ਮੁਤ੍ਤੋਸ੍ਮੀ’ਤਿ ਮਞ੍ਞਤਿ, ਅਮੁਤ੍ਤਭਾਵਮਸ੍ਸ ਕਥੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿ.

ਤਪੋਕਮ੍ਮਾ ਅਪਕ੍ਕਮ੍ਮਾਤਿ ਤਪੋਕਮ੍ਮਤੋ ਅਪਕ੍ਕਮਿਤ੍ਵਾ. ਅਪਰਦ੍ਧੋਤਿ ‘‘ਦੂਰੇ ਤ੍ਵਂ ਸੁਦ੍ਧਿਮਗ੍ਗਾ’’ਤਿ ਵਦਤਿ. ਅਮਰਂ ਤਪਨ੍ਤਿ ਅਮਰਤਪਂ ਅਮਰਭਾਵਤ੍ਥਾਯ ਕਤਂ ਲੂਖਤਪਂ, ਅਤ੍ਤਕਿਲਮਥਾਨੁਯੋਗੋ. ਸਬ੍ਬਾਨਤ੍ਥਾਵਹਂ ਹੋਤੀਤਿ, ‘‘ਸਬ੍ਬਂ ਤਪਂ ਮਯ੍ਹਂ ਅਤ੍ਥਾਵਹਂ ਨ ਭਵਤੀ’’ਤਿ ਞਤ੍ਵਾ. ਫਿਯਾਰਿਤ੍ਤਂਵ ਧਮ੍ਮਨੀਤਿ ਅਰਞ੍ਞੇ ਥਲੇ ਫਿਯਾਰਿਤ੍ਤਂ ਵਿਯ. ਇਦਂ ਵੁਤ੍ਤਂ ਹੋਤਿ – ਯਥਾ ਅਰਞ੍ਞੇ ਥਲੇ ਨਾਵਂ ਠਪੇਤ੍ਵਾ ਭਣ੍ਡਸ੍ਸ ਪੂਰੇਤ੍ਵਾ ਮਹਾਜਨਾ ਅਭਿਰੂਹਿਤ੍ਵਾ ਫਿਯਾਰਿਤ੍ਤਂ ਗਹੇਤ੍ਵਾ ਸਂਕਡ੍ਢੇਯ੍ਯੁਂ ਚੇਵ ਉਪ੍ਪੀਲੇਯ੍ਯੁਂ ਚ, ਸੋ ਮਹਾਜਨਸ੍ਸ ਵਾਯਾਮੋ ਏਕਙ੍ਗੁਲਦ੍ਵਙ੍ਗੁਲਮਤ੍ਤਮ੍ਪਿ ਨਾਵਾਯ ਗਮਨਂ ਅਸਾਧੇਨ੍ਤੋ ਨਿਰਤ੍ਥਕੋ ਭਵੇਯ੍ਯ ਨ ਅਨਤ੍ਥਾਵਹੋ, ਏਵਮੇਵ ਅਹਂ ‘ਸਬ੍ਬਂ ਅਮਰਂ ਤਪਂ ਅਨਤ੍ਥਾਵਹਂ ਹੋਤੀ’ਤਿ ਞਤ੍ਵਾ ਵਿਸ੍ਸਜ੍ਜੇਸਿਨ੍ਤਿ.

ਇਦਾਨਿ ਤਂ ਅਮਰਂ ਤਪਂ ਪਹਾਯ ਯੇਨ ਮਗ੍ਗੇਨ ਬੁਦ੍ਧੋ ਜਾਤੋ, ਤਂ ਦਸ੍ਸੇਨ੍ਤੋ ਸੀਲਨ੍ਤਿਆਦਿਮਾਹ. ਤਤ੍ਥ ਸੀਲਨ੍ਤਿ ਵਚਨੇਨ ਸਮ੍ਮਾਵਾਚਾਕਮ੍ਮਨ੍ਤਾਜੀਵਾ ਗਹਿਤਾ, ਸਮਾਧਿਨਾ ਸਮ੍ਮਾਵਾਯਾਮਸਤਿਸਮਾਧਯੋ, ਪਞ੍ਞਾਯ ਸਮ੍ਮਾਦਿਟ੍ਠਿਸਙ੍ਕਪ੍ਪਾ. ਮਗ੍ਗਂ ਬੋਧਾਯ ਭਾਵਯਨ੍ਤਿ ਇਮਂ ਅਟ੍ਠਙ੍ਗਿਕਮੇਵ ਅਰਿਯਮਗ੍ਗਂ ਬੋਧਤ੍ਥਾਯ ਭਾਵਯਨ੍ਤੋ. ਏਤ੍ਥ ਚ ਬੋਧਾਯਾਤਿ ਮਗ੍ਗਤ੍ਥਾਯ. ਯਥਾ ਹਿ ਯਾਗੁਤ੍ਥਾਯ ਯਾਗੁਮੇਵ ਪਚਨ੍ਤਿ, ਪੂਵਤ੍ਥਾਯ ਪੂਵਮੇਵ ਪਚਨ੍ਤਿ, ਨ ਅਞ੍ਞਂ ਕਿਞ੍ਚਿ ਕਰੋਨ੍ਤਿ, ਏਵਂ ਮਗ੍ਗਮੇਵ ਮਗ੍ਗਤ੍ਥਾਯ ਭਾਵੇਤਿ. ਤੇਨਾਹ ‘‘ਮਗ੍ਗਂ ਬੋਧਾਯ ਭਾਵਯ’’ਨ੍ਤਿ. ਪਰਮਂ ਸੁਦ੍ਧਿਨ੍ਤਿ ਅਰਹਤ੍ਤਂ. ਨਿਹਤੋਤਿ ਤ੍ਵਂ ਮਯਾ ਨਿਹਤੋ ਪਰਾਜਿਤੋ. ਪਠਮਂ.

੨. ਹਤ੍ਥਿਰਾਜਵਣ੍ਣਸੁਤ੍ਤਵਣ੍ਣਨਾ

੧੩੮. ਦੁਤਿਯੇ ਰਤ੍ਤਨ੍ਧਕਾਰਤਿਮਿਸਾਯਨ੍ਤਿ ਰਤ੍ਤਿਂ ਅਨ੍ਧਭਾਵਕਾਰਕੇ ਮਹਾਤਮੇ ਚਤੁਰਙ੍ਗੇ ਤਮਸਿ. ਅਬ੍ਭੋਕਾਸੇ ਨਿਸਿਨ੍ਨੋ ਹੋਤੀਤਿ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਚਙ੍ਕਮਨਕੋਟਿਯਂ ਪਾਸਾਣਫਲਕੇ ਮਹਾਚੀਵਰਂ ਸੀਸੇ ਠਪੇਤ੍ਵਾ ਪਧਾਨਂ ਪਰਿਗ੍ਗਣ੍ਹਮਾਨੋ ਨਿਸਿਨ੍ਨੋ ਹੋਤਿ.

ਨਨੁ ਚ ਤਥਾਗਤਸ੍ਸ ਅਭਾਵਿਤੋ ਵਾ ਮਗ੍ਗੋ, ਅਪ੍ਪਹੀਨਾ ਵਾ ਕਿਲੇਸਾ, ਅਪ੍ਪਟਿਵਿਦ੍ਧਂ ਵਾ ਅਕੁਪ੍ਪਂ, ਅਸਚ੍ਛਿਕਤੋ ਵਾ ਨਿਰੋਧੋ ਨਤ੍ਥਿ, ਕਸ੍ਮਾ ਏਵਮਕਾਸੀਤਿ? ਅਨਾਗਤੇ ਕੁਲਪੁਤ੍ਤਾਨਂ ਅਙ੍ਕੁਸਤ੍ਥਂ. ‘‘ਅਨਾਗਤੇ ਹਿ ਕੁਲਪੁਤ੍ਤਾ ਮਯਾ ਗਤਮਗ੍ਗਂ ਆਵਜ੍ਜਿਤ੍ਵਾ ਅਬ੍ਭੋਕਾਸਵਾਸਂ ਵਸਿਤਬ੍ਬਂ ਮਞ੍ਞਮਾਨਾ ਪਧਾਨਕਮ੍ਮਂ ਕਰਿਸ੍ਸਨ੍ਤੀ’’ਤਿ ਸਮ੍ਪਸ੍ਸਮਾਨੋ ਸਤ੍ਥਾ ਏਵਮਕਾਸਿ. ਮਹਾਤਿ ਮਹਨ੍ਤੋ. ਅਰਿਟ੍ਠਕੋਤਿ ਕਾਲ਼ਕੋ. ਮਣੀਤਿ ਪਾਸਾਣੋ. ਏਵਮਸ੍ਸ ਸੀਸਂ ਹੋਤੀਤਿ ਏਵਰੂਪਂ ਤਸ੍ਸ ਕਾਲ਼ਵਣ੍ਣਂ ਕੂਟਾਗਾਰਪ੍ਪਮਾਣਂ ਮਹਾਪਾਸਾਣਸਦਿਸਂ ਸੀਸਂ ਹੋਤਿ.

ਸੁਭਾਸੁਭਨ੍ਤਿ ਦੀਘਮਦ੍ਧਾਨਂ ਸਂਸਰਨ੍ਤੋ ਸੁਨ੍ਦਰਾਸੁਨ੍ਦਰਂ ਵਣ੍ਣਂ ਕਤ੍ਵਾ ਆਗਤੋਸੀਤਿ ਵਦਤਿ. ਅਥ ਵਾ ਸਂਸਰਨ੍ਤਿ ਸਂਸਰਨ੍ਤੋ ਆਗਚ੍ਛਨ੍ਤੋ. ਦੀਘਮਦ੍ਧਾਨਨ੍ਤਿ ਵਸਵਤ੍ਤਿਟ੍ਠਾਨਤੋ ਯਾਵ ਉਰੁਵੇਲਾਯ ਦੀਘਮਗ੍ਗਂ, ਪੁਰੇ ਬੋਧਾਯ ਵਾ ਛਬ੍ਬਸ੍ਸਾਨਿ ਦੁਕ੍ਕਰਕਾਰਿਕਸਮਯਸਙ੍ਖਾਤਂ ਦੀਘਕਾਲਂ. ਵਣ੍ਣਂ ਕਤ੍ਵਾ ਸੁਭਾਸੁਭਨ੍ਤਿ ਸੁਨ੍ਦਰਞ੍ਚ ਅਸੁਨ੍ਦਰਞ੍ਚ ਨਾਨਪ੍ਪਕਾਰਂ ਵਣ੍ਣਂ ਕਤ੍ਵਾ ਅਨੇਕਵਾਰਂ ਮਮ ਸਨ੍ਤਿਕਂ ਆਗਤੋਸੀਤਿ ਅਤ੍ਥੋ. ਸੋ ਕਿਰ ਵਣ੍ਣੋ ਨਾਮ ਨਤ੍ਥਿ, ਯੇਨ ਵਣ੍ਣੇਨ ਮਾਰੋ ਵਿਭਿਂਸਕਤ੍ਥਾਯ ਭਗਵਤੋ ਸਨ੍ਤਿਕਂ ਨ ਆਗਤਪੁਬ੍ਬੋ. ਤੇਨ ਤਂ ਭਗਵਾ ਏਵਮਾਹ. ਅਲਂ ਤੇ ਤੇਨਾਤਿ ਅਲਂ ਤੁਯ੍ਹਂ ਏਤੇਨ ਮਾਰਵਿਭਿਂਸਾਕਾਰਦਸ੍ਸਨਬ੍ਯਾਪਾਰੇਨ. ਦੁਤਿਯਂ.

੩. ਸੁਭਸੁਤ੍ਤਵਣ੍ਣਨਾ

੧੩੯. ਤਤਿਯੇ ਸੁਸਂਵੁਤਾਤਿ ਸੁਪਿਹਿਤਾ. ਨ ਤੇ ਮਾਰਵਸਾਨੁਗਾਤਿ, ਮਾਰ, ਤੇ ਤੁਯ੍ਹਂ ਵਸਾਨੁਗਾ ਨ ਹੋਨ੍ਤਿ. ਨ ਤੇ ਮਾਰਸ੍ਸ ਬਦ੍ਧਗੂਤਿ ਤੇ ਤੁਯ੍ਹਂ ਮਾਰਸ੍ਸ ਬਦ੍ਧਚਰਾ ਸਿਸ੍ਸਾ ਅਨ੍ਤੇਵਾਸਿਕਾ ਨ ਹੋਨ੍ਤਿ. ਤਤਿਯਂ.

੪. ਪਠਮਮਾਰਪਾਸਸੁਤ੍ਤਵਣ੍ਣਨਾ

੧੪੦. ਚਤੁਤ੍ਥੇ ਯੋਨਿਸੋ ਮਨਸਿਕਾਰਾਤਿ ਉਪਾਯਮਨਸਿਕਾਰੇਨ. ਯੋਨਿਸੋ ਸਮ੍ਮਪ੍ਪਧਾਨਾਤਿ ਉਪਾਯਵੀਰਿਯੇਨ ਕਾਰਣਵੀਰਿਯੇਨ. ਵਿਮੁਤ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿ. ਅਜ੍ਝਭਾਸੀਤਿ ‘‘ਅਯਂ ਅਤ੍ਤਨਾ ਵੀਰਿਯਂ ਕਤ੍ਵਾ ਅਰਹਤ੍ਤਂ ਪਤ੍ਵਾਪਿ ਨ ਤੁਸ੍ਸਤਿ, ਇਦਾਨਿ ਅਞ੍ਞੇਸਮ੍ਪਿ ‘ਪਾਪੁਣਾਥਾ’ਤਿ ਉਸ੍ਸਾਹਂ ਕਰੋਤਿ, ਪਟਿਬਾਹੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਅਭਾਸਿ.

ਮਾਰਪਾਸੇਨਾਤਿ ਕਿਲੇਸਪਾਸੇਨ. ਯੇ ਦਿਬ੍ਬਾ ਯੇ ਚ ਮਾਨੁਸਾਤਿ ਯੇ ਦਿਬ੍ਬਾ ਕਾਮਗੁਣਸਙ੍ਖਾਤਾ ਮਾਨੁਸਾ ਕਾਮਗੁਣਸਙ੍ਖਾਤਾ ਚ ਮਾਰਪਾਸਾ ਨਾਮ ਅਤ੍ਥਿ, ਸਬ੍ਬੇਹਿ ਤੇਹਿ ਤ੍ਵਂ ਬਦ੍ਧੋਤਿ ਵਦਤਿ. ਮਾਰਬਨ੍ਧਨਬਦ੍ਧੋਤਿ ਮਾਰਬਨ੍ਧਨੇਨ ਬਦ੍ਧੋ, ਮਾਰਬਨ੍ਧਨੇ ਵਾ ਬਦ੍ਧੋ. ਨ ਮੇ ਸਮਣ ਮੋਕ੍ਖਸੀਤਿ ਸਮਣ ਤ੍ਵਂ ਮਮ ਵਿਸਯਤੋ ਨ ਮੁਚ੍ਚਿਸ੍ਸਸਿ. ਚਤੁਤ੍ਥਂ.

੫. ਦੁਤਿਯਮਾਰਪਾਸਸੁਤ੍ਤਵਣ੍ਣਨਾ

੧੪੧. ਪਞ੍ਚਮੇ ਮੁਤ੍ਤਾਹਨ੍ਤਿ ਮੁਤ੍ਤੋ ਅਹਂ. ਪੁਰਿਮਂ ਸੁਤ੍ਤਂ ਅਨ੍ਤੋਵਸ੍ਸੇ ਵੁਤ੍ਤਂ, ਇਦਂ ਪਨ ਪਵਾਰੇਤ੍ਵਾ ਵੁਟ੍ਠਵਸ੍ਸਕਾਲੇ. ਚਾਰਿਕਨ੍ਤਿ ਅਨੁਪੁਬ੍ਬਗਮਨਚਾਰਿਕਂ. (ਪਵਾਰੇਤ੍ਵਾ) ਦਿਵਸੇ ਦਿਵਸੇ ਯੋਜਨਪਰਮਂ ਗਚ੍ਛਨ੍ਤਾ ਚਰਥਾਤਿ ਵਦਤਿ. ਮਾ ਏਕੇਨ ਦ੍ਵੇਤਿ ਏਕਮਗ੍ਗੇਨ ਦ੍ਵੇ ਜਨਾ ਮਾ ਅਗਮਿਤ੍ਥ. ਏਵਞ੍ਹਿ ਗਤੇਸੁ ਏਕਸ੍ਮਿਂ ਧਮ੍ਮਂ ਦੇਸੇਨ੍ਤੇ, ਏਕੇਨ ਤੁਣ੍ਹੀਭੂਤੇਨ ਠਾਤਬ੍ਬਂ ਹੋਤਿ. ਤਸ੍ਮਾ ਏਵਮਾਹ.

ਆਦਿਕਲ੍ਯਾਣਨ੍ਤਿ ਆਦਿਮ੍ਹਿ ਕਲ੍ਯਾਣਂ ਸੁਨ੍ਦਰਂ ਭਦ੍ਦਕਂ. ਤਥਾ ਮਜ੍ਝਪਰਿਯੋਸਾਨੇਸੁ. ਆਦਿਮਜ੍ਝਪਰਿਯੋਸਾਨਞ੍ਚ ਨਾਮੇਤਂ ਸਾਸਨਸ੍ਸ ਚ ਦੇਸਨਾਯ ਚ ਵਸੇਨ ਦੁਵਿਧਂ. ਤਤ੍ਥ ਸਾਸਨਸ੍ਸ ਸੀਲਂ ਆਦਿ, ਸਮਥਵਿਪਸ੍ਸਨਾਮਗ੍ਗਾ ਮਜ੍ਝਂ, ਫਲਨਿਬ੍ਬਾਨਾਨਿ ਪਰਿਯੋਸਾਨਂ. ਸੀਲਸਮਾਧਯੋ ਵਾ ਆਦਿ, ਵਿਪਸ੍ਸਨਾਮਗ੍ਗਾ ਮਜ੍ਝਂ, ਫਲਨਿਬ੍ਬਾਨਾਨਿ ਪਰਿਯੋਸਾਨਂ. ਸੀਲਸਮਾਧਿਵਿਪਸ੍ਸਨਾ ਵਾ ਆਦਿ, ਮਗ੍ਗੋ ਮਜ੍ਝਂ, ਫਲਨਿਬ੍ਬਾਨਾਨਿ ਪਰਿਯੋਸਾਨਂ. ਦੇਸਨਾਯ ਪਨ ਚਤੁਪ੍ਪਦਿਕਾਯ ਗਾਥਾਯ ਤਾਵ ਪਠਮਪਾਦੋ ਆਦਿ, ਦੁਤਿਯਤਤਿਯਾ ਮਜ੍ਝਂ, ਚਤੁਤ੍ਥੋ ਪਰਿਯੋਸਾਨਂ. ਪਞ੍ਚਪਦਛਪ੍ਪਦਾਨਂ ਪਠਮਪਾਦੋ ਆਦਿ, ਅਵਸਾਨਪਾਦੋ ਪਰਿਯੋਸਾਨਂ, ਅਵਸੇਸਾ ਮਜ੍ਝਂ. ਏਕਾਨੁਸਨ੍ਧਿਕਸੁਤ੍ਤਸ੍ਸ ਨਿਦਾਨਂ ਆਦਿ, ‘‘ਇਦਮਵੋਚਾ’’ਤਿ ਪਰਿਯੋਸਾਨਂ, ਸੇਸਂ ਮਜ੍ਝਂ. ਅਨੇਕਾਨੁਸਨ੍ਧਿਕਸ੍ਸ ਮਜ੍ਝੇ ਬਹੂਪਿ ਅਨੁਸਨ੍ਧਿ ਮਜ੍ਝਮੇਵ, ਨਿਦਾਨਂ ਆਦਿ, ‘‘ਇਦਮਵੋਚਾ’’ਤਿ ਪਰਿਯੋਸਾਨਂ.

ਸਾਤ੍ਥਨ੍ਤਿ ਸਾਤ੍ਥਕਂ ਕਤ੍ਵਾ ਦੇਸੇਥ. ਸਬ੍ਯਞ੍ਜਨਨ੍ਤਿ ਬ੍ਯਞ੍ਜਨੇਹਿ ਚੇਵ ਪਦੇਹਿ ਚ ਪਰਿਪੂਰਂ ਕਤ੍ਵਾ ਦੇਸੇਥ. ਕੇਵਲਪਰਿਪੁਣ੍ਣਨ੍ਤਿ ਸਕਲਪਰਿਪੁਣ੍ਣਂ. ਪਰਿਸੁਦ੍ਧਨ੍ਤਿ ਨਿਰੁਪਕ੍ਕਿਲੇਸਂ. ਬ੍ਰਹ੍ਮਚਰਿਯਨ੍ਤਿ ਸਿਕ੍ਖਤ੍ਤਯਸਙ੍ਗਹਂ ਸਾਸਨਬ੍ਰਹ੍ਮਚਰਿਯਂ. ਪਕਾਸੇਥਾਤਿ ਆਵਿਕਰੋਥ.

ਅਪ੍ਪਰਜਕ੍ਖਜਾਤਿਕਾਤਿ ਪਞ੍ਞਾਚਕ੍ਖੁਮ੍ਹਿ ਅਪ੍ਪਕਿਲੇਸਰਜਸਭਾਵਾ, ਦੁਕੂਲਸਾਣਿਯਾ ਪਟਿਚ੍ਛਨ੍ਨਾ ਵਿਯ ਚਤੁਪ੍ਪਦਿਕਗਾਥਾਪਰਿਯੋਸਾਨੇ ਅਰਹਤ੍ਤਂ ਪਤ੍ਤੁਂ ਸਮਤ੍ਥਾ ਸਨ੍ਤੀਤਿ ਅਤ੍ਥੋ. ਅਸ੍ਸਵਨਤਾਤਿ ਅਸ੍ਸਵਨਤਾਯ. ਪਰਿਹਾਯਨ੍ਤੀਤਿ ਅਲਾਭਪਰਿਹਾਨਿਯਾ ਧਮ੍ਮਤੋ ਪਰਿਹਾਯਨ੍ਤਿ. ਸੇਨਾਨਿਗਮੋਤਿ ਪਠਮਕਪ੍ਪਿਕਾਨਂ ਸੇਨਾਯ ਨਿਵਿਟ੍ਠੋਕਾਸੇ ਪਤਿਟ੍ਠਿਤਗਾਮੋ, ਸੁਜਾਤਾਯ ਵਾ ਪਿਤੁ ਸੇਨਾਨੀ ਨਾਮ ਨਿਗਮੋ. ਤੇਨੁਪਸਙ੍ਕਮਿਸ੍ਸਾਮੀਤਿ ਨਾਹਂ ਤੁਮ੍ਹੇ ਉਯ੍ਯੋਜੇਤ੍ਵਾ ਪਰਿਵੇਣਾਦੀਨਿ ਕਾਰੇਤ੍ਵਾ ਉਪਟ੍ਠਾਕਾਦੀਹਿ ਪਰਿਚਰਿਯਮਾਨੋ ਵਿਹਰਿਸ੍ਸਾਮਿ, ਤਿਣ੍ਣਂ ਪਨ ਜਟਿਲਾਨਂ ਅਡ੍ਢੁਡ੍ਢਾਨਿ ਪਾਟਿਹਾਰਿਯਸਹਸ੍ਸਾਨਿ ਦਸ੍ਸੇਤ੍ਵਾ ਧਮ੍ਮਮੇਵ ਦੇਸੇਤੁਂ ਉਪਸਙ੍ਕਮਿਸ੍ਸਾਮੀਤਿ. ਤੇਨੁਪਸਙ੍ਕਮੀਤਿ, ‘‘ਅਯਂ ਸਮਣੋ ਗੋਤਮੋ ਮਹਾਯੁਦ੍ਧਂ ਵਿਚਾਰੇਨ੍ਤੋ ਵਿਯ, ‘ਮਾ ਏਕੇਨ ਦ੍ਵੇ ਅਗਮਿਤ੍ਥ, ਧਮ੍ਮਂ ਦੇਸੇਥਾ’ਤਿ ਸਟ੍ਠਿ ਜਨੇ ਉਯ੍ਯੋਜੇਤਿ, ਇਮਸ੍ਮਿਂ ਪਨ ਏਕਸ੍ਮਿਮ੍ਪਿ ਧਮ੍ਮਂ ਦੇਸੇਨ੍ਤੇ ਮਯ੍ਹਂ ਚਿਤ੍ਤਸ੍ਸਾਦਂ ਨਤ੍ਥਿ, ਏਵਂ ਬਹੂਸੁ ਦੇਸੇਨ੍ਤੇਸੁ ਕੁਤੋ ਭਵਿਸ੍ਸਤਿ, ਪਟਿਬਾਹਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿ. ਪਞ੍ਚਮਂ.

੬. ਸਪ੍ਪਸੁਤ੍ਤਵਣ੍ਣਨਾ

੧੪੨. ਛਟ੍ਠੇ ਸੋਣ੍ਡਿਕਾਕਿਲਞ੍ਜਨ੍ਤਿ ਸੁਰਾਕਾਰਕਾਨਂ ਪਿਟ੍ਠਪਤ੍ਥਰਣਕਕਿਲਞ੍ਜਂ. ਕੋਸਲਿਕਾ ਕਂਸਪਾਤੀਤਿ ਕੋਸਲਰਞ੍ਞੋ ਰਥਚਕ੍ਕਪ੍ਪਮਾਣਾ ਪਰਿਭੋਗਪਾਤਿ. ਗਲ਼ਗਲ਼ਾਯਨ੍ਤੇਤਿ ਗਜ੍ਜਨ੍ਤੇ. ਕਮ੍ਮਾਰਗਗ੍ਗਰਿਯਾਤਿ ਕਮ੍ਮਾਰੁਦ੍ਧਨਪਣਾਲ਼ਿਯਾ. ਧਮਮਾਨਾਯਾਤਿ ਭਸ੍ਤਵਾਤੇਨ ਪੂਰਿਯਮਾਨਾਯ. ਇਤਿ ਵਿਦਿਤ੍ਵਾਤਿ – ‘‘ਸਮਣੋ ਗੋਤਮੋ ਪਧਾਨਮਨੁਯੁਤ੍ਤੋ ਸੁਖੇਨ ਨਿਸਿਨ੍ਨੋ, ਘਟ੍ਟਯਿਸ੍ਸਾਮਿ ਨ’’ਨ੍ਤਿ ਵੁਤ੍ਤਪ੍ਪਕਾਰਂ ਅਤ੍ਤਭਾਵਂ ਮਾਪੇਤ੍ਵਾ ਨਿਯਾਮਭੂਮਿਯਂ ਇਤੋ ਚਿਤੋ ਚ ਸਞ੍ਚਰਨ੍ਤਂ ਵਿਜ੍ਜੁਲਤਾਲੋਕੇਨ ਦਿਸ੍ਵਾ, ‘‘ਕੋ ਨੁ ਖੋ ਏਸੋ ਸਤ੍ਤੋ’’ਤਿ? ਆਵਜ੍ਜੇਨ੍ਤੋ, ‘‘ਮਾਰੋ ਅਯ’’ਨ੍ਤਿ ਏਵਂ ਵਿਦਿਤ੍ਵਾ.

ਸੁਞ੍ਞਗੇਹਾਨੀਤਿ ਸੁਞ੍ਞਾਗਾਰਾਨਿ. ਸੇਯ੍ਯਾਤਿ ਸੇਯ੍ਯਤ੍ਥਾਯ. ਠਸ੍ਸਾਮਿ ਚਙ੍ਕਮਿਸ੍ਸਾਮਿ ਨਿਸੀਦਿਸ੍ਸਾਮਿ ਨਿਪਜ੍ਜਿਸ੍ਸਾਮੀਤਿ ਏਤਦਤ੍ਥਾਯ ਯੋ ਸੁਞ੍ਞਾਗਾਰਾਨਿ ਸੇਵਤੀਤਿ ਅਤ੍ਥੋ. ਸੋ ਮੁਨਿ ਅਤ੍ਤਸਞ੍ਞਤੋਤਿ ਸੋ ਬੁਦ੍ਧਮੁਨਿ ਹਤ੍ਥਪਾਦਕੁਕ੍ਕੁਚ੍ਚਾਭਾਵੇਨ ਸਂਯਤਤ੍ਤਭਾਵੋ. ਵੋਸ੍ਸਜ੍ਜ ਚਰੇਯ੍ਯ ਤਤ੍ਥ ਸੋਤਿ ਸੋ ਤਸ੍ਮਿਂ ਅਤ੍ਤਭਾਵੇ ਆਲਯਂ ਨਿਕਨ੍ਤਿਂ ਵੋਸ੍ਸਜ੍ਜਿਤ੍ਵਾ ਪਹਾਯ ਚਰੇਯ੍ਯ. ਪਤਿਰੂਪਂ ਹਿ ਤਥਾਵਿਧਸ੍ਸ ਤਨ੍ਤਿ ਤਾਦਿਸਸ੍ਸ ਤਂਸਣ੍ਠਿਤਸ੍ਸ ਬੁਦ੍ਧਮੁਨਿਨੋ ਤਂ ਅਤ੍ਤਭਾਵੇ ਨਿਕਨ੍ਤਿਂ ਵੋਸ੍ਸਜ੍ਜਿਤ੍ਵਾ ਚਰਣਂ ਨਾਮ ਪਤਿਰੂਪਂ ਯੁਤ੍ਤਂ ਅਨੁਚ੍ਛਵਿਕਂ.

ਚਰਕਾਤਿ ਸੀਹਬ੍ਯਗ੍ਘਾਦਿਕਾ ਸਞ੍ਚਰਣਸਤ੍ਤਾ. ਭੇਰਵਾਤਿ ਸਵਿਞ੍ਞਾਣਕਅਵਿਞ੍ਞਾਣਕਭੇਰਵਾ. ਤਤ੍ਥ ਸਵਿਞ੍ਞਾਣਕਾ ਸੀਹਬ੍ਯਗ੍ਘਾਦਯੋ, ਅਵਿਞ੍ਞਾਣਕਾ ਰਤ੍ਤਿਭਾਗੇ ਖਾਣੁਵਮ੍ਮਿਕਾਦਯੋ. ਤੇਪਿ ਹਿ ਤਸ੍ਮਿਂ ਕਾਲੇ ਯਕ੍ਖਾ ਵਿਯ ਉਪਟ੍ਠਹਨ੍ਤਿ, ਰਜ੍ਜੁਵਲ੍ਲਿਯਾਦੀਨਿ ਸਬ੍ਬਾਨਿ ਸਪ੍ਪਾ ਵਿਯ ਉਪਟ੍ਠਹਨ੍ਤਿ. ਤਤ੍ਥਾਤਿ ਤੇਸੁ ਭੇਰਵੇਸੁ ਸੁਞ੍ਞਾਗਾਰਗਤੋ ਬੁਦ੍ਧਮੁਨਿ ਲੋਮਚਲਨਮਤ੍ਤਕਮ੍ਪਿ ਨ ਕਰੋਤਿ.

ਇਦਾਨਿ ਅਟ੍ਠਾਨਪਰਿਕਪ੍ਪਂ ਦਸ੍ਸੇਨ੍ਤੋ ਨਭਂ ਫਲੇਯ੍ਯਾਤਿਆਦਿਮਾਹ. ਤਤ੍ਥ ਫਲੇਯ੍ਯਾਤਿ ਕਾਕਪਦਂ ਵਿਯ ਹੀਰਹੀਰਸੋ ਫਲੇਯ੍ਯ. ਚਲੇਯ੍ਯਾਤਿ ਪੋਕ੍ਖਰਪਤ੍ਤੇ ਵਾਤਾਹਤੋ ਉਦਕਬਿਨ੍ਦੁ ਵਿਯ ਚਲੇਯ੍ਯ. ਸਲ੍ਲਮ੍ਪਿ ਚੇ ਉਰਸਿ ਪਕਪ੍ਪਯੇਯ੍ਯੁਨ੍ਤਿ ਤਿਖਿਣਸਤ੍ਤਿਸਲ੍ਲਂ ਚੇਪਿ ਉਰਸ੍ਮਿਂ ਚਾਰੇਯੇਯ੍ਯੁਂ. ਉਪਧੀਸੂਤਿ ਖਨ੍ਧੂਪਧੀਸੁ. ਤਾਣਂ ਨ ਕਰੋਨ੍ਤੀਤਿ ਤਿਖਿਣੇ ਸਲ੍ਲੇ ਉਰਸ੍ਮਿਂ ਚਾਰਿਯਮਾਨੇ ਭਯੇਨ ਗੁਮ੍ਬਨ੍ਤਰਕਨ੍ਦਰਾਦੀਨਿ ਪਵਿਸਨ੍ਤਾ ਤਾਣਂ ਕਰੋਨ੍ਤਿ ਨਾਮ. ਬੁਦ੍ਧਾ ਪਨ ਸਮੁਚ੍ਛਿਨ੍ਨਸਬ੍ਬਭਯਾ ਏਵਰੂਪਂ ਤਾਣਂ ਨਾਮ ਨ ਕਰੋਨ੍ਤਿ. ਛਟ੍ਠਂ.

੭. ਸੁਪਤਿਸੁਤ੍ਤਵਣ੍ਣਨਾ

੧੪੩. ਸਤ੍ਤਮੇ ਪਾਦੇ ਪਕ੍ਖਾਲੇਤ੍ਵਾਤਿ ਉਤੁਗਾਹਾਪਨਤ੍ਥਂ ਧੋਵਿਤ੍ਵਾ. ਬੁਦ੍ਧਾਨਂ ਪਨ ਸਰੀਰੇ ਰਜੋਜਲ੍ਲਂ ਨ ਉਪਲਿਮ੍ਪਤਿ, ਉਦਕਮ੍ਪਿ ਪੋਕ੍ਖਰਪਤ੍ਤੇ ਪਕ੍ਖਿਤ੍ਤਂ ਵਿਯ ਵਿਵਟ੍ਟਿਤ੍ਵਾ ਗਚ੍ਛਤਿ. ਅਪਿਚ ਖੋ ਧੋਤਪਾਦਕੇ ਗੇਹੇ ਪਾਦੇ ਧੋਵਿਤ੍ਵਾ ਪਵਿਸਨਂ ਪਬ੍ਬਜਿਤਾਨਂ ਵਤ੍ਤਂ. ਤਤ੍ਥ ਬੁਦ੍ਧਾਨਂ ਵਤ੍ਤਭੇਦੋ ਨਾਮ ਨਤ੍ਥਿ, ਵਤ੍ਤਸੀਸੇ ਪਨ ਠਤ੍ਵਾ ਧੋਵਨ੍ਤਿ. ਸਚੇ ਹਿ ਤਥਾਗਤੋ ਨੇਵ ਨ੍ਹਾਯੇਯ੍ਯ, ਨ ਪਾਦੇ ਧੋਵੇਯ੍ਯ, ‘‘ਨਾਯਂ ਮਨੁਸ੍ਸੋ’’ਤਿ ਵਦੇਯ੍ਯੁਂ. ਤਸ੍ਮਾ ਮਨੁਸ੍ਸਕਿਰਿਯਂ ਅਮੁਞ੍ਚਨ੍ਤੋ ਧੋਵਤਿ. ਸਤੋ ਸਮ੍ਪਜਾਨੋਤਿ ਸੋਪ੍ਪਪਰਿਗ੍ਗਾਹਕੇਨ ਸਤਿਸਮ੍ਪਜਞ੍ਞੇਨ ਸਮਨ੍ਨਾਗਤੋ. ਉਪਸਙ੍ਕਮੀਤਿ ਸਮਣੋ ਗੋਤਮੋ ਸਬ੍ਬਰਤ੍ਤਿਂ ਅਬ੍ਭੋਕਾਸੇ ਚਙ੍ਕਮਿਤ੍ਵਾ ਗਨ੍ਧਕੁਟਿਂ ਪਵਿਸਿਤ੍ਵਾ ਨਿਦ੍ਦਾਯਤਿ, ਅਤਿਵਿਯ ਸੁਖਸਯਿਤੋ ਭਵਿਸ੍ਸਤਿ, ਘਟ੍ਟਯਿਸ੍ਸਾਮਿ ਨਨ੍ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿ.

ਕਿਂ ਸੋਪ੍ਪਸੀਤਿ ਕਿਂ ਸੁਪਸਿ, ਕਿਂ ਸੋਪ੍ਪਂ ਨਾਮਿਦਂ ਤਵਾਤਿ ਵਦਤਿ. ਕਿਂ ਨੁ ਸੋਪ੍ਪਸੀਤਿ ਕਸ੍ਮਾ ਨੁ ਸੁਪਸਿ? ਦੁਬ੍ਭਗੋ ਵਿਯਾਤਿ ਮਤੋ ਵਿਯ, ਵਿਸਞ੍ਞੀ ਵਿਯ ਚ. ਸੁਞ੍ਞਮਗਾਰਨ੍ਤਿ ਸੁਞ੍ਞਂ ਮੇ ਘਰਂ ਲਦ੍ਧਨ੍ਤਿ ਸੋਪ੍ਪਸੀਤਿ ਵਦਤਿ. ਸੂਰਿਯੇ ਉਗ੍ਗਤੇਤਿ ਸੂਰਿਯਮ੍ਹਿ ਉਟ੍ਠਿਤੇ. ਇਦਾਨਿ ਹਿ ਅਞ੍ਞੇ ਭਿਕ੍ਖੂ ਸਮ੍ਮਜ੍ਜਨ੍ਤਿ, ਪਾਨੀਯਂ ਉਪਟ੍ਠਪੇਨ੍ਤਿ, ਭਿਕ੍ਖਾਚਾਰਗਮਨਸਜ੍ਜਾ ਭਵਨ੍ਤਿ, ਤ੍ਵਂ ਕਸ੍ਮਾ ਸੋਪ੍ਪਸਿਯੇਵ.

ਜਾਲਿਨੀਤਿ ਤਯੋ ਭਵੇ ਅਜ੍ਝੋਤ੍ਥਰਿਤ੍ਵਾ ਠਿਤੇਨ ‘‘ਅਜ੍ਝਤ੍ਤਿਕਸ੍ਸੁਪਾਦਾਯ ਅਟ੍ਠਾਰਸਤਣ੍ਹਾਵਿਚਰਿਤਾਨੀ’’ਤਿਆਦਿਨਾ (ਵਿਭ. ੮੪੨) ਤੇਨ ਤੇਨ ਅਤ੍ਤਨੋ ਕੋਟ੍ਠਾਸਭੂਤੇਨ ਜਾਲੇਨ ਜਾਲਿਨੀ. ਵਿਸਤ੍ਤਿਕਾਤਿ ਰੂਪਾਦੀਸੁ ਤਤ੍ਥ ਤਤ੍ਥ ਵਿਸਤ੍ਤਤਾਯ ਵਿਸਮੂਲਤਾਯ ਵਿਸਪਰਿਭੋਗਤਾਯ ਚ ਵਿਸਤ੍ਤਿਕਾ. ਕੁਹਿਞ੍ਚਿ ਨੇਤਵੇਤਿ ਕਤ੍ਥਚਿ ਨੇਤੁਂ. ਸਬ੍ਬੂਪਧਿ ਪਰਿਕ੍ਖਯਾਤਿ ਸਬ੍ਬੇਸਂ ਖਨ੍ਧਕਿਲੇਸਾਭਿਸਙ੍ਖਾਰਕਾਮਗੁਣਭੇਦਾਨਂ ਉਪਧੀਨਂ ਪਰਿਕ੍ਖਯਾ. ਕਿਂ ਤਵੇਤ੍ਥ, ਮਾਰਾਤਿ, ਮਾਰ, ਤੁਯ੍ਹਂ ਕਿਂ ਏਤ੍ਥ? ਕਸ੍ਮਾ ਤ੍ਵਂ ਉਣ੍ਹਯਾਗੁਯਂ ਨਿਲੀਯਿਤੁਂ ਅਸਕ੍ਕੋਨ੍ਤੀ ਖੁਦ੍ਦਕਮਕ੍ਖਿਕਾ ਵਿਯ ਅਨ੍ਤਨ੍ਤੇਨੇਵ ਉਜ੍ਝਾਯਨ੍ਤੋ ਆਹਿਣ੍ਡਸੀਤਿ. ਸਤ੍ਤਮਂ.

੮. ਨਨ੍ਦਤਿਸੁਤ੍ਤਵਣ੍ਣਨਾ

੧੪੪. ਅਟ੍ਠਮਂ ਦੇਵਤਾਸਂਯੁਤ੍ਤੇ ਵੁਤ੍ਤਤ੍ਥਮੇਵ. ਅਟ੍ਠਮਂ.

੯. ਪਠਮਆਯੁਸੁਤ੍ਤਵਣ੍ਣਨਾ

੧੪੫. ਨਵਮੇ ਅਪ੍ਪਂ ਵਾ ਭਿਯ੍ਯੋਤਿ ਭਿਯ੍ਯੋ ਜੀਵਨ੍ਤੋ ਅਪਰਂ ਵਸ੍ਸਸਤਂ ਜੀਵਿਤੁਂ ਨ ਸਕ੍ਕੋਤਿ, ਪਣ੍ਣਾਸਂ ਵਾ ਸਟ੍ਠਿ ਵਾ ਵਸ੍ਸਾਨਿ ਜੀਵਤਿ. ਅਜ੍ਝਭਾਸੀਤਿ ਸਮਣੋ ਗੋਤਮੋ ‘‘ਮਨੁਸ੍ਸਾਨਂ ਅਪ੍ਪਮਾਯੂ’’ਤਿ ਕਥੇਤਿ, ਦੀਘਭਾਵਮਸ੍ਸ ਕਥੇਸ੍ਸਾਮੀਤਿ ਪਚ੍ਚਨੀਕਸਾਤਤਾਯ ਅਭਿਭਵਿਤ੍ਵਾ ਅਭਾਸਿ.

ਨ ਨਂ ਹੀਲ਼ੇਤਿ ਤਂ ਆਯੁਂ ‘‘ਅਪ੍ਪਕਮਿਦ’’ਨ੍ਤਿ ਨ ਹੀਲ਼ੇਯ੍ਯ. ਖੀਰਮਤ੍ਤੋ ਵਾਤਿ ਯਥਾ ਦਹਰੋ ਕੁਮਾਰੋ ਉਤ੍ਤਾਨਸੇਯ੍ਯਕੋ ਖੀਰਂ ਪਿਵਿਤ੍ਵਾ ਦੁਕੂਲਚੁਮ੍ਬਟਕੇ ਨਿਪਨ੍ਨੋ ਅਸਞ੍ਞੀ ਵਿਯ ਨਿਦ੍ਦਾਯਤਿ, ਕਸ੍ਸਚਿ ਆਯੁਂ ਅਪ੍ਪਂ ਵਾ ਦੀਘਂ ਵਾਤਿ ਨ ਚਿਨ੍ਤੇਤਿ, ਏਵਂ ਸਪ੍ਪੁਰਿਸੋ. ਚਰੇਯ੍ਯਾਦਿਤ੍ਤਸੀਸੋ ਵਾਤਿ ਆਯੁਂ ਪਰਿਤ੍ਤਨ੍ਤਿ ਞਤ੍ਵਾ ਪਜ੍ਜਲਿਤਸੀਸੋ ਵਿਯ ਚਰੇਯ੍ਯ. ਨਵਮਂ.

੧੦. ਦੁਤਿਯਆਯੁਸੁਤ੍ਤਵਣ੍ਣਨਾ

੧੪੬. ਦਸਮੇ ਨੇਮੀਵ ਰਥਕੁਬ੍ਬਰਨ੍ਤਿ ਯਥਾ ਦਿਵਸਂ ਗਚ੍ਛਨ੍ਤਸ੍ਸ ਰਥਸ੍ਸ ਚਕ੍ਕਨੇਮਿ ਕੁਬ੍ਬਰਂ ਅਨੁਪਰਿਯਾਯਤਿ ਨ ਵਿਜਹਤਿ, ਏਵਂ ਆਯੁ ਅਨੁਪਰਿਯਾਯਤੀਤਿ. ਦਸਮਂ.

ਪਠਮੋ ਵਗ੍ਗੋ.

੨. ਦੁਤਿਯਵਗ੍ਗੋ

੧. ਪਾਸਾਣਸੁਤ੍ਤਵਣ੍ਣਨਾ

੧੪੭. ਦੁਤਿਯਵਗ੍ਗਸ੍ਸ ਪਠਮੇ ਨਿਸਿਨ੍ਨੋਤਿ ਪੁਬ੍ਬੇ ਵੁਤ੍ਤਨਯੇਨੇਵ ਪਧਾਨਂ ਪਰਿਗ੍ਗਣ੍ਹਨ੍ਤੋ ਨਿਸਿਨ੍ਨੋ. ਮਾਰੋਪਿਸ੍ਸ ਸੁਖਨਿਸਿਨ੍ਨਭਾਵਂ ਞਤ੍ਵਾ ਘਟ੍ਟਯਿਸ੍ਸਾਮੀਤਿ ਉਪਸਙ੍ਕਮਨ੍ਤੋ. ਪਦਾਲੇਸੀਤਿ ਪਬ੍ਬਤਪਿਟ੍ਠੇ ਠਤ੍ਵਾ ਪਵਿਜ੍ਝਿ. ਪਾਸਾਣਾ ਨਿਰਨ੍ਤਰਾ ਅਞ੍ਞਮਞ੍ਞਂ ਅਭਿਹਨਨ੍ਤਾ ਪਤਨ੍ਤਿ. ਕੇਵਲਨ੍ਤਿ ਸਕਲਂ. ਸਬ੍ਬਨ੍ਤਿ ਤਸ੍ਸੇਵ ਵੇਵਚਨਂ. ਪਠਮਂ.

੨. ਕਿਨ੍ਨੁਸੀਹਸੁਤ੍ਤਵਣ੍ਣਨਾ

੧੪੮. ਦੁਤਿਯੇ ਵਿਚਕ੍ਖੁਕਮ੍ਮਾਯਾਤਿ ਪਰਿਸਾਯ ਪਞ੍ਞਾਚਕ੍ਖੁਂ ਵਿਨਾਸੇਤੁਕਮ੍ਯਤਾਯ. ਬੁਦ੍ਧਾਨਂ ਪਨੇਸ ਪਞ੍ਞਾਚਕ੍ਖੁਂ ਵਿਨਾਸੇਤੁਂ ਨ ਸਕ੍ਕੋਤਿ, ਪਰਿਸਾਯ ਭੇਰਵਾਰਮ੍ਮਣਂ ਸਾਵੇਨ੍ਤੋ ਵਾ ਦਸ੍ਸੇਨ੍ਤੋ ਵਾ ਸਕ੍ਕੋਤਿ. ਵਿਜਿਤਾਵੀ ਨੁ ਮਞ੍ਞਸੀਤਿ ਕਿਂ ਨੁ ਤ੍ਵਂ ‘‘ਵਿਜਿਤਵਿਜਯੋ ਅਹ’’ਨ੍ਤਿ ਮਞ੍ਞਸਿ? ਮਾ ਏਵਂ ਮਞ੍ਞਿ, ਨਤ੍ਥਿ ਤੇ ਜਯੋ. ਪਰਿਸਾਸੂਤਿ, ਅਟ੍ਠਸੁ ਪਰਿਸਾਸੁ. ਬਲਪ੍ਪਤ੍ਤਾਤਿ ਦਸਬਲਪ੍ਪਤ੍ਤਾ. ਦੁਤਿਯਂ.

੩. ਸਕਲਿਕਸੁਤ੍ਤਵਣ੍ਣਨਾ

੧੪੯. ਤਤਿਯੇ ਮਨ੍ਦਿਯਾ ਨੂਤਿ ਮਨ੍ਦਭਾਵੇਨ ਮੋਮੂਹਭਾਵੇਨ. ਉਦਾਹੁ ਕਾਵੇਯ੍ਯਮਤ੍ਤੋਤਿ ਉਦਾਹੁ ਯਥਾ ਕਵਿ ਕਬ੍ਬਂ ਚਿਨ੍ਤੇਨ੍ਤੋ ਤੇਨ ਕਬ੍ਬਕਰਣੇਨ ਮਤ੍ਤੋ ਸਯਤਿ, ਏਵਂ ਸਯਸਿ. ਸਮ੍ਪਚੁਰਾਤਿ ਬਹਵੋ. ਕਿਮਿਦਂ ਸੋਪ੍ਪਸੇ ਵਾਤਿ ਕਸ੍ਮਾ ਇਦਂ ਸੋਪ੍ਪਂ ਸੋਪ੍ਪਸਿਯੇਵ? ਅਤ੍ਥਂ ਸਮੇਚ੍ਚਾਤਿ ਅਤ੍ਥਂ ਸਮਾਗਨ੍ਤ੍ਵਾ ਪਾਪੁਣਿਤ੍ਵਾ. ਮਯ੍ਹਂ ਹਿ ਅਸਙ੍ਗਹੋ ਨਾਮ ਸਙ੍ਗਹਵਿਪਨ੍ਨੋ ਵਾ ਅਤ੍ਥੋ ਨਤ੍ਥਿ. ਸਲ੍ਲਨ੍ਤਿ ਤਿਖਿਣਂ ਸਤ੍ਤਿਸਲ੍ਲਂ. ਜਗ੍ਗਂ ਨ ਸਙ੍ਕੇਤਿ ਯਥਾ ਏਕਚ੍ਚੋ ਸੀਹਪਥਾਦੀਸੁ ਜਗ੍ਗਨ੍ਤੋ ਸਙ੍ਕਤਿ, ਤਥਾ ਅਹਂ ਜਗ੍ਗਨ੍ਤੋਪਿ ਨ ਸਙ੍ਕਾਮਿ. ਨਪਿ ਭੇਮਿ ਸੋਤ੍ਤੁਨ੍ਤਿ ਯਥਾ ਏਕਚ੍ਚੋ ਸੀਹਪਥਾਦੀਸੁਯੇਵ ਸੁਪਿਤੁਂ ਭਾਯਤਿ, ਏਵਂ ਅਹਂ ਸੁਪਿਤੁਮ੍ਪਿ ਨ ਭਾਯਾਮਿ. ਨਾਨੁਤਪਨ੍ਤਿ ਮਾਮਨ੍ਤਿ ਯਥਾ ਆਚਰਿਯਸ੍ਸ ਵਾ ਅਨ੍ਤੇਵਾਸਿਕਸ੍ਸ ਵਾ ਅਫਾਸੁਕੇ ਜਾਤੇ ਉਦ੍ਦੇਸਪਰਿਪੁਚ੍ਛਾਯ ਠਿਤਤ੍ਤਾ ਅਨ੍ਤੇਵਾਸਿਂ ਰਤ੍ਤਿਨ੍ਦਿਵਾ ਅਤਿਕ੍ਕਮਨ੍ਤਾ ਅਨੁਤਪਨ੍ਤਿ, ਏਵਂ ਮਂ ਨਾਨੁਤਪਨ੍ਤਿ. ਨ ਹਿ ਮਯ੍ਹਂ ਕਿਞ੍ਚਿ ਅਪਰਿਨਿਟ੍ਠਿਤਕਮ੍ਮਂ ਨਾਮ ਅਤ੍ਥਿ. ਤੇਨੇਵਾਹ ਹਾਨਿਂ ਨ ਪਸ੍ਸਾਮਿ ਕੁਹਿਞ੍ਚਿ ਲੋਕੇਤਿ. ਤਤਿਯਂ.

੪. ਪਤਿਰੂਪਸੁਤ੍ਤਵਣ੍ਣਨਾ

੧੫੦. ਚਤੁਤ੍ਥੇ ਅਨੁਰੋਧਵਿਰੋਧੇਸੂਤਿ ਰਾਗਪਟਿਘੇਸੁ. ਮਾ ਸਜ੍ਜਿਤ੍ਥੋ ਤਦਾਚਰਨ੍ਤਿ ਏਵਂ ਧਮ੍ਮਕਥਂ ਆਚਰਨ੍ਤੋ ਮਾ ਲਗ੍ਗਿ. ਧਮ੍ਮਕਥਂ ਕਥੇਨ੍ਤਸ੍ਸ ਹਿ ਏਕਚ੍ਚੇ ਸਾਧੁਕਾਰਂ ਦਦਨ੍ਤਿ, ਤੇਸੁ ਰਾਗੋ ਉਪ੍ਪਜ੍ਜਤਿ. ਏਕਚ੍ਚੇ ਅਸਕ੍ਕਚ੍ਚਂ ਸੁਣਨ੍ਤਿ, ਤੇਸੁ ਪਟਿਘੋ ਉਪ੍ਪਜ੍ਜਤਿ. ਇਤਿ ਧਮ੍ਮਕਥਿਕੋ ਅਨੁਰੋਧਵਿਰੋਧੇਸੁ ਸਜ੍ਜਤਿ ਨਾਮ. ਤ੍ਵਂ ਏਵਂ ਮਾ ਸਜ੍ਜਿਤ੍ਥੋਤਿ ਵਦਤਿ. ਯਦਞ੍ਞਮਨੁਸਾਸਤੀਤਿ ਯਂ ਅਞ੍ਞਂ ਅਨੁਸਾਸਤਿ, ਤਂ. ਸਮ੍ਬੁਦ੍ਧੋ ਹਿਤਾਨੁਕਮ੍ਪੀ ਹਿਤੇਨ ਅਨੁਪਕਮ੍ਪਤਿ. ਯਸ੍ਮਾ ਚ ਹਿਤਾਨੁਕਮ੍ਪੀ, ਤਸ੍ਮਾ ਅਨੁਰੋਧਵਿਰੋਧੇਹਿ ਵਿਪ੍ਪਮੁਤ੍ਤੋ ਤਥਾਗਤੋਤਿ. ਚਤੁਤ੍ਥਂ.

੫. ਮਾਨਸਸੁਤ੍ਤਵਣ੍ਣਨਾ

੧੫੧. ਪਞ੍ਚਮੇ ਆਕਾਸੇ ਚਰਨ੍ਤੇਪਿ ਬਨ੍ਧਤੀਤਿ ਅਨ੍ਤਲਿਕ੍ਖਚਰੋ. ਪਾਸੋਤਿ ਰਾਗਪਾਸੋ. ਮਾਨਸੋਤਿ ਮਨਸਮ੍ਪਯੁਤ੍ਤੋ. ਪਞ੍ਚਮਂ.

੬. ਪਤ੍ਤਸੁਤ੍ਤਵਣ੍ਣਨਾ

੧੫੨. ਛਟ੍ਠੇ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਉਪਾਦਾਯਾਤਿ ਪਞ੍ਚ ਉਪਾਦਾਨਕ੍ਖਨ੍ਧੇ ਆਦਿਯਿਤ੍ਵਾ, ਸਭਾਵਸਾਮਞ੍ਞਲਕ੍ਖਣਵਸੇਨ ਨਾਨਪ੍ਪਕਾਰਤੋ ਵਿਭਜਿਤ੍ਵਾ ਦਸ੍ਸੇਨ੍ਤੋ. ਸਨ੍ਦਸ੍ਸੇਤੀਤਿ ਖਨ੍ਧਾਨਂ ਸਭਾਵਲਕ੍ਖਣਾਦੀਨਿ ਦਸ੍ਸੇਤਿ. ਸਮਾਦਪੇਤੀਤਿ ਗਣ੍ਹਾਪੇਤਿ. ਸਮੁਤ੍ਤੇਜੇਤੀਤਿ ਸਮਾਦਾਨਮ੍ਹਿ ਉਸ੍ਸਾਹਂ ਜਨੇਤਿ. ਸਮ੍ਪਹਂਸੇਤੀਤਿ ਪਟਿਵਿਦ੍ਧਗੁਣੇਨ ਵੋਦਾਪੇਤਿ ਜੋਤਾਪੇਤਿ. ਅਟ੍ਠਿਂ ਕਤ੍ਵਾਤਿ ਅਤ੍ਥਿਕਂ ਕਤ੍ਵਾ, ‘‘ਅਯਂ ਨੋ ਅਧਿਗਨ੍ਤਬ੍ਬੋ ਅਤ੍ਥੋ’’ਤਿ ਏਵਂ ਸਲ੍ਲਕ੍ਖੇਤ੍ਵਾ ਤਾਯ ਦੇਸਨਾਯ ਅਤ੍ਥਿਕਾ ਹੁਤ੍ਵਾ. ਮਨਸਿ ਕਤ੍ਵਾਤਿ ਚਿਤ੍ਤੇ ਠਪੇਤ੍ਵਾ. ਸਬ੍ਬਚੇਤਸੋ ਸਮਨ੍ਨਾਹਰਿਤ੍ਵਾਤਿ ਸਬ੍ਬੇਨ ਤੇਨ ਕਮ੍ਮਕਾਰਕਚਿਤ੍ਤੇਨ ਸਮਨ੍ਨਾਹਰਿਤ੍ਵਾ. ਓਹਿਤਸੋਤਾਤਿ ਠਪਿਤਾਸੋਤਾ. ਅਬ੍ਭੋਕਾਸੇ ਨਿਕ੍ਖਿਤ੍ਤਾਤਿ ਓਤਾਪਨਤ੍ਥਾਯ ਠਪਿਤਾ.

ਰੂਪਂ ਵੇਦਯਿਤਂ ਸਞ੍ਞਾਨ੍ਤਿ, ਏਤੇ ਰੂਪਾਦਯੋ ਤਯੋ ਖਨ੍ਧਾ. ਯਞ੍ਚ ਸਙ੍ਖਤਨ੍ਤਿ ਇਮਿਨਾ ਸਙ੍ਖਾਰਕ੍ਖਨ੍ਧੋ ਗਹਿਤੋ. ਏਵਂ ਤਤ੍ਥ ਵਿਰਜ੍ਜਤੀਤਿ ‘‘ਏਸੋ ਅਹਂ ਨ ਹੋਮਿ, ਏਤਂ ਮਯ੍ਹਂ ਨ ਹੋਤੀ’’ਤਿ ਪਸ੍ਸਨ੍ਤੋ ਏਵਂ ਤੇਸੁ ਖਨ੍ਧੇਸੁ ਵਿਰਜ੍ਜਤਿ. ਖੇਮਤ੍ਤਨ੍ਤਿ ਖੇਮੀਭੂਤਂ ਅਤ੍ਤਭਾਵਂ. ਇਮਿਨਾ ਫਲਕ੍ਖਣਂ ਦਸ੍ਸੇਤਿ. ਅਨ੍ਵੇਸਨ੍ਤਿ ਭਵਯੋਨਿਗਤਿਠਿਤਿਸਤ੍ਤਾਵਾਸਸਙ੍ਖਾਤੇਸੁ ਸਬ੍ਬਟ੍ਠਾਨੇਸੁ ਪਰਿਯੇਸਮਾਨਾ. ਨਾਜ੍ਝਗਾਤਿ ਨ ਪਸ੍ਸੀਤਿ. ਛਟ੍ਠਂ.

੭. ਛਫਸ੍ਸਾਯਤਨਸੁਤ੍ਤਵਣ੍ਣਨਾ

੧੫੩. ਸਤ੍ਤਮੇ ਫਸ੍ਸਾਯਤਨਾਨਨ੍ਤਿ ਸਞ੍ਜਾਤਿਸਮੋਸਰਣਟ੍ਠੇਨ ਛਦ੍ਵਾਰਿਕਸ੍ਸ ਫਸ੍ਸਸ੍ਸ ਆਯਤਨਾਨਂ. ਭਯਭੇਰਵਂ ਸਦ੍ਦਨ੍ਤਿ ਮੇਘਦੁਨ੍ਦੁਭਿਅਸਨਿਪਾਤਸਦ੍ਦਸਦਿਸਂ ਭਯਜਨਕਂ ਸਦ੍ਦਂ. ਪਥਵੀ ਮਞ੍ਞੇ ਉਨ੍ਦ੍ਰੀਯਤੀਤਿ ਅਯਂ ਮਹਾਪਥਵੀ ਪਟਪਟਸਦ੍ਦਂ ਕੁਰੁਮਾਨਾ ਵਿਯ ਅਹੋਸਿ. ਏਤ੍ਥ ਲੋਕੋ ਵਿਮੁਚ੍ਛਿਤੋਤਿ ਏਤੇਸੁ ਛਸੁ ਆਰਮ੍ਮਣੇਸੁ ਲੋਕੋ ਅਧਿਮੁਚ੍ਛਿਤੋ. ਮਾਰਧੇਯ੍ਯਨ੍ਤਿ ਮਾਰਸ੍ਸ ਠਾਨਭੂਤਂ ਤੇਭੂਮਕਵਟ੍ਟਂ. ਸਤ੍ਤਮਂ.

੮. ਪਿਣ੍ਡਸੁਤ੍ਤਵਣ੍ਣਨਾ

੧੫੪. ਅਟ੍ਠਮੇ ਪਾਹੁਨਕਾਨਿ ਭਵਨ੍ਤੀਤਿ ਤਥਾਰੂਪੇ ਨਕ੍ਖਤ੍ਤੇ ਤਤ੍ਥ ਤਤ੍ਥ ਪੇਸੇਤਬ੍ਬਾਨਿ ਪਾਹੁਨਕਾਨਿ ਭਵਨ੍ਤਿ, ਆਗਨ੍ਤੁਕਪਣ੍ਣਾਕਾਰਦਾਨਾਨਿ ਵਾ. ਸਯਂਚਰਣਦਿਵਸੇ ਸਮਵਯਜਾਤਿਗੋਤ੍ਤਾ ਕੁਮਾਰਕਾ ਤਤੋ ਤਤੋ ਸਨ੍ਨਿਪਤਨ੍ਤਿ. ਕੁਮਾਰਿਕਾਯੋਪਿ ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪੇਨ ਅਲਙ੍ਕਤਾ ਤਹਂ ਤਹਂ ਵਿਚਰਨ੍ਤਿ. ਤਤ੍ਰ ਕੁਮਾਰਿਕਾਯੋਪਿ ਯਥਾਰੁਚਿਕਾਨਂ ਕੁਮਾਰਕਾਨਂ ਪਣ੍ਣਾਕਾਰਂ ਪੇਸੇਨ੍ਤਿ, ਕੁਮਾਰਕਾਪਿ ਕੁਮਾਰਿਕਾਨਂ ਅਞ੍ਞਸ੍ਮਿਂ ਅਸਤਿ ਅਨ੍ਤਮਸੋ ਮਾਲਾਗੁਲ਼ੇਨਪਿ ਪਰਿਕ੍ਖਿਪਨ੍ਤਿ. ਅਨ੍ਵਾਵਿਟ੍ਠਾਤਿ ਅਨੁ ਆਵਿਟ੍ਠਾ. ਤਂਦਿਵਸਂ ਕਿਰ ਪਞ੍ਚਸਤਾ ਕੁਮਾਰਿਕਾਯੋ ਉਯ੍ਯਾਨਕੀਲ਼ਂ ਗਚ੍ਛਨ੍ਤਿਯੋ ਪਟਿਪਥੇ ਸਤ੍ਥਾਰਂ ਦਿਸ੍ਵਾ ਛਣਪੂਵਂ ਦਦੇਯ੍ਯੁਂ. ਸਤ੍ਥਾ ਤਾਸਂ ਦਾਨਾਨੁਮੋਦਨਤ੍ਥਂ ਪਕਿਣ੍ਣਕਧਮ੍ਮਦੇਸਨਂ ਦੇਸੇਯ੍ਯ, ਦੇਸਨਾਪਰਿਯੋਸਾਨੇ ਸਬ੍ਬਾਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹੇਯ੍ਯੁਂ. ਮਾਰੋ ਤਾਸਂ ਸਮ੍ਪਤ੍ਤਿਯਾ ਅਨ੍ਤਰਾਯਂ ਕਰਿਸ੍ਸਾਮੀਤਿ ਅਨ੍ਵਾਵਿਸਿ. ਪਾਲ਼ਿਯਂ ਪਨ ਮਾ ਸਮਣੋ ਗੋਤਮੋ ਪਿਣ੍ਡਮਲਤ੍ਥਾਤਿ ਏਤ੍ਤਕਂਯੇਵ ਵੁਤ੍ਤਨ੍ਤਿ.

ਕਿਂ ਪਨ ਸਤ੍ਥਾ ਮਾਰਾਵਟ੍ਟਨਂ ਅਜਾਨਿਤ੍ਵਾ ਪਵਿਟ੍ਠੋਤਿ? ਆਮ ਅਜਾਨਿਤ੍ਵਾ. ਕਸ੍ਮਾ? ਅਨਾਵਜ੍ਜਨਤਾਯ. ਬੁਦ੍ਧਾਨਞ੍ਹਿ – ‘‘ਅਸੁਕਟ੍ਠਾਨੇ ਭਤ੍ਤਂ ਲਭਿਸ੍ਸਾਮ, ਨ ਲਭਿਸ੍ਸਾਮਾ’’ਤਿ ਆਵਜ੍ਜਨਂ ਨ ਅਨਨੁਚ੍ਛਵਿਕਂ. ਪਵਿਟ੍ਠੋ ਪਨ ਮਨੁਸ੍ਸਾਨਂ ਉਪਚਾਰਭੇਦਂ ਦਿਸ੍ਵਾ, ‘‘ਕਿਂ ਇਦ’’ਨ੍ਤਿ? ਆਵਜ੍ਜੇਨ੍ਤੋ ਞਤ੍ਵਾ, ‘‘ਆਮਿਸਤ੍ਥਂ ਮਾਰਾਵਟ੍ਟਨਂ ਭਿਨ੍ਦਿਤੁਂ ਅਨਨੁਚ੍ਛਵਿਕ’’ਨ੍ਤਿ ਅਭਿਨ੍ਦਿਤ੍ਵਾਵ ਨਿਕ੍ਖਨ੍ਤੋ.

ਉਪਸਙ੍ਕਮੀਤਿ ਅਮਿਤ੍ਤਵਿਜਯੇਨ ਵਿਯ ਤੁਟ੍ਠੋ ਸਕਲਗਾਮੇ ਕਟਚ੍ਛੁਮਤ੍ਤਮ੍ਪਿ ਭਤ੍ਤਂ ਅਲਭਿਤ੍ਵਾ ਗਾਮਤੋ ਨਿਕ੍ਖਮਨ੍ਤਂ ਭਗਵਨ੍ਤਂ ਗਾਮਿਯਮਨੁਸ੍ਸਵੇਸੇਨ ਉਪਸਙ੍ਕਮਿ. ਤਥਾਹਂ ਕਰਿਸ੍ਸਾਮੀਤਿ ਇਦਂ ਸੋ ਮੁਸਾ ਭਾਸਤਿ. ਏਵਂ ਕਿਰਸ੍ਸ ਅਹੋਸਿ – ‘‘ਮਯਾ ਏਵਂ ਵੁਤ੍ਤੇ ਪੁਨ ਪਵਿਸਿਸ੍ਸਤਿ, ਅਥ ਨਂ ਗਾਮਦਾਰਕਾ ‘ਸਕਲਗਾਮੇ ਚਰਿਤ੍ਵਾ ਕਟਚ੍ਛੁਭਿਕ੍ਖਮ੍ਪਿ ਅਲਭਿਤ੍ਵਾ ਗਾਮਤੋ ਨਿਕ੍ਖਮ੍ਮ ਪੁਨ ਪਵਿਟ੍ਠੋਸੀ’ਤਿਆਦੀਨਿ ਵਤ੍ਵਾ ਉਪ੍ਪਣ੍ਡੇਸ੍ਸਨ੍ਤੀ’’ਤਿ. ਭਗਵਾ ਪਨ – ‘‘ਸਚਾਯਂ ਮਂ ਏਵਂ ਵਿਹੇਠੇਸ੍ਸਤਿ ਮੁਦ੍ਧਮਸ੍ਸੇਵ ਸਤ੍ਤਧਾ ਫਲਿਸ੍ਸਤੀ’’ਤਿ ਤਸ੍ਮਿਂ ਅਨੁਕਮ੍ਪਾਯ ਅਪਵਿਸਿਤ੍ਵਾ ਗਾਥਾਦ੍ਵਯਮਾਹ.

ਤਤ੍ਥ ਪਸਵੀਤਿ ਜਨੇਸਿ ਨਿਪ੍ਫਾਦੇਸਿ. ਆਸਜ੍ਜਾਤਿ ਆਸਾਦੇਤ੍ਵਾ ਘਟ੍ਟੇਤ੍ਵਾ. ਨ ਮੇ ਪਾਪਂ ਵਿਪਚ੍ਚਤੀਤਿ ਮਮ ਪਾਪਂ ਨ ਪਚ੍ਚਤਿ. ਨਿਪ੍ਫਲਂ ਏਤਨ੍ਤਿ ਕਿਂ ਨੁ ਤ੍ਵਂ ਏਵਂ ਮਞ੍ਞਸਿ? ਮਾ ਏਵਂ ਮਞ੍ਞਿ, ਅਤ੍ਥਿ ਤਯਾ ਕਤਸ੍ਸ ਪਾਪਸ੍ਸ ਫਲਨ੍ਤਿ ਦੀਪੇਤਿ. ਕਿਞ੍ਚਨਨ੍ਤਿ ਮਦ੍ਦਿਤੁਂ ਸਮਤ੍ਥਂ ਰਾਗਕਿਞ੍ਚਨਾਦਿ ਕਿਲੇਸਜਾਤਂ. ਆਭਸ੍ਸਰਾ ਯਥਾਤਿ ਯਥਾ ਆਭਸ੍ਸਰਾ ਦੇਵਾ ਸਪ੍ਪੀਤਿਕਜ੍ਝਾਨੇਨ ਯਾਪੇਨ੍ਤਾ ਪੀਤਿਭਕ੍ਖਾ ਨਾਮ ਹੋਨ੍ਤਿ, ਏਵਂ ਭਵਿਸ੍ਸਾਮਾਤਿ. ਅਟ੍ਠਮਂ.

੯. ਕਸ੍ਸਕਸੁਤ੍ਤਵਣ੍ਣਨਾ

੧੫੫. ਨਵਮੇ ਨਿਬ੍ਬਾਨਪਟਿਸਂਯੁਤ੍ਤਾਯਾਤਿ ਨਿਬ੍ਬਾਨਂ ਅਪਦਿਸਿਤ੍ਵਾ ਪਵਤ੍ਤਾਯ. ਹਟਹਟਕੇਸੋਤਿ ਪੁਰਿਮਕੇਸੇ ਪਚ੍ਛਤੋ, ਪਚ੍ਛਿਮਕੇਸੇ ਪੁਰਤੋ ਵਾਮਪਸ੍ਸਕੇਸੇ ਦਕ੍ਖਿਣਤੋ, ਦਕ੍ਖਿਣਪਸ੍ਸਕੇਸੇ ਵਾਮਤੋ ਫਰਿਤ੍ਵਾ ਫਰਿਤ੍ਵਾ ਵਿਪ੍ਪਕਿਣ੍ਣਕੇਸੋ. ਮਮ ਚਕ੍ਖੁਸਮ੍ਫਸ੍ਸਵਿਞ੍ਞਾਣਾਯਤਨਨ੍ਤਿ ਚਕ੍ਖੁਵਿਞ੍ਞਾਣੇਨ ਸਮ੍ਪਯੁਤ੍ਤੋ ਚਕ੍ਖੁਸਮ੍ਫਸ੍ਸੋਪਿ ਵਿਞ੍ਞਾਣਾਯਤਨਮ੍ਪਿ ਮਮੇਵਾਤਿ. ਏਤ੍ਥ ਚ ਚਕ੍ਖੁਸਮ੍ਫਸ੍ਸੇਨ ਵਿਞ੍ਞਾਣਸਮ੍ਪਯੁਤ੍ਤਕਾ ਧਮ੍ਮਾ ਗਹਿਤਾ, ਵਿਞ੍ਞਾਣਾਯਤਨੇਨ ਸਬ੍ਬਾਨਿਪਿ ਚਕ੍ਖੁਦ੍ਵਾਰੇ ਉਪ੍ਪਨ੍ਨਾਨਿ ਆਵਜ੍ਜਨਾਦਿਵਿਞ੍ਞਾਣਾਨਿ. ਸੋਤਦ੍ਵਾਰਾਦੀਸੁਪਿ ਏਸੇਵ ਨਯੋ. ਮਨੋਦ੍ਵਾਰੇ ਪਨ ਮਨੋਤਿ ਸਾਵਜ੍ਜਨਕਂ ਭਵਙ੍ਗਚਿਤ੍ਤਂ. ਧਮ੍ਮਾਤਿ ਆਰਮ੍ਮਣਧਮ੍ਮਾ. ਮਨੋਸਮ੍ਫਸ੍ਸੋਤਿ ਸਾਵਜ੍ਜਨੇਨ ਭਵਙ੍ਗੇਨ ਸਮ੍ਪਯੁਤ੍ਤਫਸ੍ਸੋ. ਵਿਞ੍ਞਾਣਾਯਤਨਨ੍ਤਿ ਜਵਨਚਿਤ੍ਤਂ ਤਦਾਰਮ੍ਮਣਮ੍ਪਿ ਵਟ੍ਟਤਿ.

ਤਵੇਵ ਪਾਪਿਮ, ਚਕ੍ਖੂਤਿ ਯਂ ਲੋਕੇ ਤਿਮਿਰਕਾਚਾਦੀਹਿ ਉਪਦ੍ਦੁਤਂ ਅਨੇਕਰੋਗਾਯਤਨਂ ਉਪਕ੍ਕਵਿਪਕ੍ਕਂ ਅਨ੍ਤਮਸੋ ਕਾਣਚਕ੍ਖੁਪਿ, ਸਬ੍ਬਂ ਤਂ ਤਵੇਵ ਭਵਤੁ. ਰੂਪਾਦੀਸੁਪਿ ਏਸੇਵ ਨਯੋ.

ਯਂ ਵਦਨ੍ਤੀਤਿ ਯਂ ਭਣ੍ਡਕਂ ‘‘ਮਮ ਇਦ’’ਨ੍ਤਿ ਵਦਨ੍ਤਿ. ਯੇ ਵਦਨ੍ਤਿ ਮਮਨ੍ਤਿ ਚਾਤਿ ਯੇ ਚ ਪੁਗ੍ਗਲਾ ‘‘ਮਮ’’ਨ੍ਤਿ ਵਦਨ੍ਤਿ. ਏਤ੍ਥ ਚੇ ਤੇ ਮਨੋ ਅਤ੍ਥੀਤਿ ਏਤੇਸੁ ਚ ਠਾਨੇਸੁ ਯਦਿ ਚਿਤ੍ਤਂ ਅਤ੍ਥਿ. ਨ ਮੇ ਸਮਣ ਮੋਕ੍ਖਸੀਤਿ ਸਮਣ ਮਯ੍ਹਂ ਵਿਸਯਤੋ ਨ ਮੁਚ੍ਚਿਸ੍ਸਸਿ. ਯਂ ਵਦਨ੍ਤੀਤਿ ਯਂ ਭਣ੍ਡਕਂ ਵਦਨ੍ਤਿ, ਨ ਤਂ ਮਯ੍ਹਂ. ਯੇ ਵਦਨ੍ਤੀਤਿ ਯੇਪਿ ਪੁਗ੍ਗਲਾ ਏਵਂ ਵਦਨ੍ਤਿ, ਨ ਤੇ ਅਹਂ. ਨ ਮੇ ਮਗ੍ਗਮ੍ਪਿ ਦਕ੍ਖਸੀਤਿ ਭਵਯੋਨਿਗਤਿਆਦੀਸੁ ਮਯ੍ਹਂ ਗਤਮਗ੍ਗਮ੍ਪਿ ਨ ਪਸ੍ਸਸਿ. ਨਵਮਂ.

੧੦. ਰਜ੍ਜਸੁਤ੍ਤਵਣ੍ਣਨਾ

੧੫੬. ਦਸਮੇ ਅਹਨਂ ਅਘਾਤਯਨ੍ਤਿ ਅਹਨਨ੍ਤੇਨ ਅਘਾਤਯਨ੍ਤੇਨ. ਅਜਿਨਂ ਅਜਾਪਯਨ੍ਤਿ ਪਰਸ੍ਸ ਧਨਜਾਨਿਂ ਅਕਰੋਨ੍ਤੇਨ ਅਕਾਰਾਪੇਨ੍ਤੇਨ. ਅਸੋਚਂ ਅਸੋਚਾਪਯਨ੍ਤਿ ਅਸੋਚਨ੍ਤੇਨ ਅਸੋਚਾਪਯਨ੍ਤੇਨ. ਇਤਿ ਭਗਵਾ ਅਧਮ੍ਮਿਕਰਾਜੂਨਂ ਰਜ੍ਜੇ ਵਿਜਿਤੇ ਦਣ੍ਡਕਰਪੀਲ਼ਿਤੇ ਮਨੁਸ੍ਸੇ ਦਿਸ੍ਵਾ ਕਾਰੁਞ੍ਞਵਸੇਨ ਏਵਂ ਚਿਨ੍ਤੇਸਿ. ਉਪਸਙ੍ਕਮੀਤਿ ‘‘ਸਮਣੋ ਗੋਤਮੋ ‘ਸਕ੍ਕਾ ਨੁ ਖੋ ਰਜ੍ਜਂ ਕਾਰੇਤੁ’ਨ੍ਤਿ ਚਿਨ੍ਤੇਸਿ, ਰਜ੍ਜਂ ਕਾਰੇਤੁਕਾਮੋ ਭਵਿਸ੍ਸਤਿ, ਰਜ੍ਜਞ੍ਚ ਨਾਮੇਤਂ ਪਮਾਦਟ੍ਠਾਨਂ, ਰਜ੍ਜਂ ਕਾਰੇਨ੍ਤੇ ਸਕ੍ਕਾ ਓਤਾਰਂ ਲਭਿਤੁਂ, ਗਚ੍ਛਾਮਿ ਉਸ੍ਸਾਹਮਸ੍ਸ ਜਨੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਉਪਸਙ੍ਕਮਿ. ਇਦ੍ਧਿਪਾਦਾਤਿ ਇਜ੍ਝਨਕਕੋਟ੍ਠਾਸਾ. ਭਾਵਿਤਾਤਿ ਵਡ੍ਢਿਤਾ. ਬਹੁਲੀਕਤਾਤਿ ਪੁਨਪ੍ਪੁਨਂ ਕਤਾ. ਯਾਨੀਕਤਾਤਿ ਯੁਤ੍ਤਯਾਨਂ ਵਿਯ ਕਤਾ. ਵਤ੍ਥੁਕਤਾਤਿ ਪਤਿਟ੍ਠਟ੍ਠੇਨਵਤ੍ਥੁਕਤਾ. ਅਨੁਟ੍ਠਿਤਾਤਿ ਅਵਿਜਹਿਤਾ ਨਿਚ੍ਚਾਨੁਬਦ੍ਧਾ. ਪਰਿਚਿਤਾਤਿ ਸਾਤਚ੍ਚਕਿਰਿਯਾਯ ਸੁਪਰਿਚਿਤਾ ਕਤਾ ਇਸ੍ਸਾਸਸ੍ਸ ਅਵਿਰਾਧਿਤਵੇਧਿਹਤ੍ਥੋ ਵਿਯ. ਸੁਸਮਾਰਦ੍ਧਾਤਿ ਸੁਟ੍ਠੁ ਸਮਾਰਦ੍ਧਾ ਪਰਿਪੁਣ੍ਣਭਾਵਨਾ. ਅਧਿਮੁਚ੍ਚੇਯ੍ਯਾਤਿ ਚਿਨ੍ਤੇਯ੍ਯ.

ਪਬ੍ਬਤਸ੍ਸਾਤਿ ਪਬ੍ਬਤੋ ਭਵੇਯ੍ਯ. ਦ੍ਵਿਤ੍ਤਾਵਾਤਿ ਤਿਟ੍ਠਤੁ ਏਕੋ ਪਬ੍ਬਤੋ, ਦ੍ਵਿਕ੍ਖਤ੍ਤੁਮ੍ਪਿ ਤਾਵ ਮਹਨ੍ਤੋ ਸੁਵਣ੍ਣਪਬ੍ਬਤੋ ਏਕਸ੍ਸ ਨਾਲਂ, ਨ ਪਰਿਯਤ੍ਤੋਤਿ ਅਤ੍ਥੋ. ਇਤਿ ਵਿਦ੍ਵਾ ਸਮਞ੍ਚਰੇਤਿ ਏਵਂ ਜਾਨਨ੍ਤੋ ਸਮਂ ਚਰੇਯ੍ਯ. ਯਤੋਨਿਦਾਨਨ੍ਤਿ ਦੁਕ੍ਖਂ ਨਾਮ ਪਞ੍ਚਕਾਮਗੁਣਨਿਦਾਨਂ, ਤਂ ਯਤੋਨਿਦਾਨਂ ਹੋਤਿ, ਏਵਂ ਯੋ ਅਦਕ੍ਖਿ. ਕਥਂ ਨਮੇਯ੍ਯਾਤਿ ਸੋ ਜਨ੍ਤੁ ਤੇਸੁ ਦੁਕ੍ਖਸ੍ਸ ਨਿਦਾਨਭੂਤੇਸੁ ਕਾਮੇਸੁ ਕੇਨ ਕਾਰਣੇਨ ਨਮੇਯ੍ਯ. ਉਪਧਿਂ ਵਿਦਿਤ੍ਵਾਤਿ ਕਾਮਗੁਣਉਪਧਿਂ ‘‘ਸਙ੍ਗੋ ਏਸੋ, ਲਗ੍ਗਨਮੇਤ’’ਨ੍ਤਿ ਏਵਂ ਵਿਦਿਤ੍ਵਾ. ਤਸ੍ਸੇਵ ਜਨ੍ਤੁ ਵਿਨਯਾਯ ਸਿਕ੍ਖੇਤਿ ਤਸ੍ਸੇਵ ਉਪਧਿਸ੍ਸ ਵਿਨਯਾਯ ਸਿਕ੍ਖੇਯ੍ਯ. ਦਸਮਂ.

ਦੁਤਿਯੋ ਵਗ੍ਗੋ.

੩. ਤਤਿਯਵਗ੍ਗੋ

੧. ਸਮ੍ਬਹੁਲਸੁਤ੍ਤਵਣ੍ਣਨਾ

੧੫੭. ਤਤਿਯਵਗ੍ਗਸ੍ਸ ਪਠਮੇ ਜਟਣ੍ਡੁਵੇਨਾਤਿ ਜਟਾਚੁਮ੍ਬਟਕੇਨ. ਅਜਿਨਕ੍ਖਿਪਨਿਵਤ੍ਥੋਤਿ ਸਖੁਰਂ ਅਜਿਨਚਮ੍ਮਂ ਏਕਂ ਨਿਵਤ੍ਥੋ ਏਕਂ ਪਾਰੁਤੋ. ਉਦੁਮ੍ਬਰਦਣ੍ਡਨ੍ਤਿ ਅਪ੍ਪਿਚ੍ਛਭਾਵਪ੍ਪਕਾਸਨਤ੍ਥਂ ਈਸਕਂ ਵਙ੍ਕਂ ਉਦੁਮ੍ਬਰਦਣ੍ਡਂ ਗਹੇਤ੍ਵਾ. ਏਤਦਵੋਚਾਤਿ ਲੋਕੇ ਬ੍ਰਾਹ੍ਮਣਸ੍ਸ ਵਚਨਂ ਨਾਮ ਸੁਸ੍ਸੂਸਨ੍ਤਿ, ਬ੍ਰਾਹ੍ਮਣੇਸੁਪਿ ਪਬ੍ਬਜਿਤਸ੍ਸ, ਪਬ੍ਬਜਿਤੇਸੁਪਿ ਮਹਲ੍ਲਕਸ੍ਸਾਤਿ ਮਹਲ੍ਲਕਬ੍ਰਾਹ੍ਮਣਸ੍ਸ ਪਬ੍ਬਜਿਤਵੇਸਂ ਗਹੇਤ੍ਵਾ ਪਧਾਨਭੂਮਿਯਂ ਕਮ੍ਮਂ ਕਰੋਨ੍ਤੇ ਤੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਹਤ੍ਥਂ ਉਕ੍ਖਿਪਿਤ੍ਵਾ ਏਤਂ ‘‘ਦਹਰਾ ਭਵਨ੍ਤੋ’’ਤਿਆਦਿਵਚਨਂ ਅਵੋਚ. ਓਕਮ੍ਪੇਤ੍ਵਾਤਿ ਹਨੁਕੇਨ ਉਰਂ ਪਹਰਨ੍ਤੋ ਅਧੋਨਤਂ ਕਤ੍ਵਾ. ਜਿਵ੍ਹਂ ਨਿਲ੍ਲਾਲੇਤ੍ਵਾਤਿ ਕਬਰਮਹਾਜਿਵ੍ਹਂ ਨੀਹਰਿਤ੍ਵਾ ਉਦ੍ਧਮਧੋ ਉਭਯਪਸ੍ਸੇਸੁ ਚ ਲਾਲੇਤ੍ਵਾ. ਤਿਵਿਸਾਖਨ੍ਤਿ ਤਿਸਾਖਂ. ਨਲਾਟਿਕਨ੍ਤਿ ਭਕੁਟਿਂ, ਨਲਾਟੇ ਉਟ੍ਠਿਤਂ ਵਲਿਤ੍ਤਯਨ੍ਤਿ ਅਤ੍ਥੋ. ਪਕ੍ਕਾਮੀਤਿ ਤੁਮ੍ਹੇ ਜਾਨਨ੍ਤਾਨਂ ਵਚਨਂ ਅਕਤ੍ਵਾ ਅਤ੍ਤਨੋਵ ਤੇਲੇ ਪਚ੍ਚਿਸ੍ਸਥਾਤਿ ਵਤ੍ਵਾ ਏਕਂ ਮਗ੍ਗਂ ਗਹੇਤ੍ਵਾ ਗਤੋ. ਪਠਮਂ.

੨. ਸਮਿਦ੍ਧਿਸੁਤ੍ਤਵਣ੍ਣਨਾ

੧੫੮. ਦੁਤਿਯੇ ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇਤਿ ਏਵਰੂਪਸ੍ਸ ਸਤ੍ਥੁ ਚੇਵ ਧਮ੍ਮਸ੍ਸ ਚ ਸਬ੍ਰਹ੍ਮਚਾਰੀਨਞ੍ਚ ਲਦ੍ਧਤ੍ਤਾ ਮਯ੍ਹਂ ਲਾਭਾ ਮਯ੍ਹਂ ਸੁਲਦ੍ਧਨ੍ਤਿ. ਸੋ ਕਿਰਾਯਸ੍ਮਾ ਪਚ੍ਛਾ ਮੂਲਕਮ੍ਮਟ੍ਠਾਨਂ ਸਮ੍ਮਸਿਤ੍ਵਾ ‘‘ਅਰਹਤ੍ਤਂ ਗਹੇਸ੍ਸਾਮੀ’’ਤਿ ਪਾਸਾਦਿਕਂ ਤਾਵ ਕਮ੍ਮਟ੍ਠਾਨਂ ਗਹੇਤ੍ਵਾ ਬੁਦ੍ਧਧਮ੍ਮਸਙ੍ਘਗੁਣੇ ਆਵਜ੍ਜੇਤ੍ਵਾ ਚਿਤ੍ਤਕਲ੍ਲਤਂ ਉਪ੍ਪਾਦੇਤ੍ਵਾ ਚਿਤ੍ਤਂ ਹਾਸੇਤ੍ਵਾ ਤੋਸੇਤ੍ਵਾ ਨਿਸਿਨ੍ਨੋ. ਤੇਨਸ੍ਸ ਏਵਮਹੋਸਿ. ਉਪਸਙ੍ਕਮੀਤਿ ‘‘ਅਯਂ ਸਮਿਦ੍ਧਿ ਭਿਕ੍ਖੁ ਪਾਸਾਦਿਕਂ ਕਮ੍ਮਟ੍ਠਾਨਂ ਗਹੇਤ੍ਵਾ ਨਿਸਿਨ੍ਨਸਦਿਸੋ, ਯਾਵ ਮੂਲਕਮ੍ਮਟ੍ਠਾਨਂ ਗਹੇਤ੍ਵਾ ਅਰਹਤ੍ਤਂ ਨ ਗਣ੍ਹਾਤਿ, ਤਾਵਸ੍ਸ ਅਨ੍ਤਰਾਯਂ ਕਰਿਸ੍ਸਾਮੀ’’ਤਿ ਉਪਸਙ੍ਕਮਿ. ਗਚ੍ਛ ਤ੍ਵਨ੍ਤਿ ਸਤ੍ਥਾ ਸਕਲਜਮ੍ਬੁਦੀਪਂ ਓਲੋਕੇਨ੍ਤੋ ‘‘ਤਸ੍ਮਿਂਯੇਵ ਠਾਨੇ ਤਸ੍ਸ ਕਮ੍ਮਟ੍ਠਾਨਂ ਸਪ੍ਪਾਯਂ ਭਵਿਸ੍ਸਤੀ’’ਤਿ ਅਦ੍ਦਸ, ਤਸ੍ਮਾ ਏਵਮਾਹ. ਸਤਿਪਞ੍ਞਾ ਚ ਮੇ ਬੁਦ੍ਧਾਤਿ ਮਯਾ ਸਤਿ ਚ ਪਞ੍ਞਾ ਚ ਞਾਤਾ. ਕਰਸ੍ਸੁ ਰੂਪਾਨੀਤਿ ਬਹੂਨਿਪਿ ਵਿਭਿਂਸਕਾਰਹਾਨਿ ਰੂਪਾਨਿ ਕਰਸ੍ਸੁ. ਨੇਵ ਮਂ ਬ੍ਯਾਧਯਿਸ੍ਸਸੀਤਿ ਮਂ ਨੇਵ ਵੇਧਯਿਸ੍ਸਸਿ ਨ ਕਮ੍ਪਸ੍ਸੇਸਿ. ਦੁਤਿਯਂ.

੩. ਗੋਧਿਕਸੁਤ੍ਤਵਣ੍ਣਨਾ

੧੫੯. ਤਤਿਯੇ ਇਸਿਗਿਲਿਪਸ੍ਸੇਤਿ ਇਸਿਗਿਲਿਸ੍ਸ ਨਾਮ ਪਬ੍ਬਤਸ੍ਸ ਪਸ੍ਸੇ. ਕਾਲ਼ਸਿਲਾਯਨ੍ਤਿ ਕਾਲ਼ਵਣ੍ਣਾਯ ਸਿਲਾਯਂ. ਸਾਮਯਿਕਂ ਚੇਤੋਵਿਮੁਤ੍ਤਿਨ੍ਤਿ ਅਪ੍ਪਿਤਪ੍ਪਿਤਕ੍ਖਣੇ ਪਚ੍ਚਨੀਕਧਮ੍ਮੇਹਿ ਵਿਮੁਚ੍ਚਤਿ, ਆਰਮ੍ਮਣੇ ਚ ਅਧਿਮੁਚ੍ਚਤੀਤਿ ਲੋਕਿਯਸਮਾਪਤ੍ਤਿ ਸਾਮਯਿਕਾ ਚੇਤੋਵਿਮੁਤ੍ਤਿ ਨਾਮ. ਫੁਸੀਤਿ ਪਟਿਲਭਿ. ਪਰਿਹਾਯੀਤਿ ਕਸ੍ਮਾ ਯਾਵ ਛਟ੍ਠਂ ਪਰਿਹਾਯਿ? ਸਾਬਾਧਤ੍ਤਾ. ਥੇਰਸ੍ਸ ਕਿਰ ਵਾਤਪਿਤ੍ਤਸੇਮ੍ਹਵਸੇਨ ਅਨੁਸਾਯਿਕੋ ਆਬਾਧੋ ਅਤ੍ਥਿ, ਤੇਨ ਸਮਾਧਿਸ੍ਸ ਸਪ੍ਪਾਯੇ ਉਪਕਾਰਕਧਮ੍ਮੇ ਪੂਰੇਤੁਂ ਨ ਸਕ੍ਕੋਤਿ, ਅਪ੍ਪਿਤਪ੍ਪਿਤਾਯ ਸਮਾਪਤ੍ਤਿਯਾ ਪਰਿਹਾਯਤਿ.

ਯਂਨੂਨਾਹਂ ਸਤ੍ਥਂ ਆਹਰੇਯ੍ਯਨ੍ਤਿ ਸੋ ਕਿਰ ਚਿਨ੍ਤੇਸਿ, ਯਸ੍ਮਾ ਪਰਿਹੀਨਜ੍ਝਾਨਸ੍ਸ ਕਾਲਙ੍ਕਰੋਤੋ ਅਨਿਬਦ੍ਧਾ ਗਤਿ ਹੋਤਿ, ਅਪਰਿਹੀਨਜ੍ਝਾਨਸ੍ਸ ਨਿਬਦ੍ਧਾ ਗਤਿ ਹੋਤਿ, ਬ੍ਰਹ੍ਮਲੋਕੇ ਨਿਬ੍ਬਤ੍ਤਤਿ, ਤਸ੍ਮਾ ਸਤ੍ਥਂ ਆਹਰਿਤੁਕਾਮੋ ਅਹੋਸਿ. ਉਪਸਙ੍ਕਮੀਤਿ – ‘‘ਅਯਂ ਸਮਣੋ ਸਤ੍ਥਂ ਆਹਰਿਤੁਕਾਮੋ, ਸਤ੍ਥਾਹਰਣਞ੍ਚ ਨਾਮੇਤਂ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖਸ੍ਸ ਹੋਤਿ. ਯੋ ਏਵਂ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖੋ ਹੋਤਿ, ਸੋ ਮੂਲਕਮ੍ਮਟ੍ਠਾਨਂ ਸਮ੍ਮਸਿਤ੍ਵਾ ਅਰਹਤ੍ਤਮ੍ਪਿ ਗਹੇਤੁਂ ਸਮਤ੍ਥੋ ਹੋਤਿ, ਮਯਾ ਪਨ ਪਟਿਬਾਹਿਤੋਪਿ ਏਸ ਨ ਓਰਮਿਸ੍ਸਤਿ, ਸਤ੍ਥਾਰਾ ਪਟਿਬਾਹਿਤੋ ਓਰਮਿਸ੍ਸਤੀ’’ਤਿ ਥੇਰਸ੍ਸ ਅਤ੍ਥਕਾਮੋ ਵਿਯ ਹੁਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ.

ਜਲਾਤਿ ਜਲਮਾਨਾ. ਪਾਦੇ ਵਨ੍ਦਾਮਿ ਚਕ੍ਖੁਮਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ ਤਵ ਪਾਦੇ ਵਨ੍ਦਾਮਿ. ਜੁਤਿਨ੍ਧਰਾਤਿ ਆਨੁਭਾਵਧਰਾ. ਅਪ੍ਪਤ੍ਤਮਾਨਸੋਤਿ ਅਪ੍ਪਤ੍ਤਅਰਹਤ੍ਤੋ. ਸੇਖੋਤਿ ਸੀਲਾਦੀਨਿ ਸਿਕ੍ਖਮਾਨੋ ਸਕਰਣੀਯੋ. ਜਨੇ ਸੁਤਾਤਿ ਜਨੇ ਵਿਸ੍ਸੁਤਾ. ਸਤ੍ਥਂ ਆਹਰਿਤਂ ਹੋਤੀਤਿ ਥੇਰੋ ਕਿਰ ‘‘ਕਿਂ ਮਯ੍ਹਂ ਇਮਿਨਾ ਜੀਵਿਤੇਨਾ’’ਤਿ? ਉਤ੍ਤਾਨੋ ਨਿਪਜ੍ਜਿਤ੍ਵਾ ਸਤ੍ਥੇਨ ਗਲਨਾਲ਼ਿਂ ਛਿਨ੍ਦਿ, ਦੁਕ੍ਖਾ ਵੇਦਨਾ ਉਪ੍ਪਜ੍ਜਿਂਸੁ. ਥੇਰੋ ਵੇਦਨਂ ਵਿਕ੍ਖਮ੍ਭੇਤ੍ਵਾ ਤਂਯੇਵ ਵੇਦਨਂ ਪਰਿਗ੍ਗਹੇਤ੍ਵਾ ਸਤਿਂ ਉਪਟ੍ਠਪੇਤ੍ਵਾ ਮੂਲਕਮ੍ਮਟ੍ਠਾਨਂ ਸਮ੍ਮਸਨ੍ਤੋ ਅਰਹਤ੍ਤਂ ਪਤ੍ਵਾ ਸਮਸੀਸੀ ਹੁਤ੍ਵਾ ਪਰਿਨਿਬ੍ਬਾਯਿ. ਸਮਸੀਸੀ ਨਾਮ ਤਿਵਿਧੋ ਹੋਤਿ ਇਰਿਯਾਪਥਸਮਸੀਸੀ, ਰੋਗਸਮਸੀਸੀ, ਜੀਵਿਤਸਮਸੀਸੀਤਿ.

ਤਤ੍ਥ ਯੋ ਠਾਨਾਦੀਸੁ ਇਰਿਯਾਪਥੇਸੁ ਅਞ੍ਞਤਰਂ ਅਧਿਟ੍ਠਾਯ – ‘‘ਇਮਂ ਅਕੋਪੇਤ੍ਵਾਵ ਅਰਹਤ੍ਤਂ ਪਾਪੁਣਿਸ੍ਸਾਮੀ’’ਤਿ ਵਿਪਸ੍ਸਨਂ ਪਟ੍ਠਪੇਤਿ, ਅਥਸ੍ਸ ਅਰਹਤ੍ਤਪ੍ਪਤ੍ਤਿ ਚ ਇਰਿਯਾਪਥਕੋਪਨਞ੍ਚ ਏਕਪ੍ਪਹਾਰੇਨੇਵ ਹੋਤਿ. ਅਯਂ ਇਰਿਯਾਪਥਸਮਸੀਸੀ ਨਾਮ. ਯੋ ਪਨ ਚਕ੍ਖੁਰੋਗਾਦੀਸੁ ਅਞ੍ਞਤਰਸ੍ਮਿਂ ਸਤਿ – ‘‘ਇਤੋ ਅਨੁਟ੍ਠਿਤੋਵ ਅਰਹਤ੍ਤਂ ਪਾਪੁਣਿਸ੍ਸਾਮੀ’’ਤਿ ਵਿਪਸ੍ਸਨਂ ਪਟ੍ਠਪੇਤਿ, ਅਥਸ੍ਸ ਅਰਹਤ੍ਤਪ੍ਪਤ੍ਤਿ ਚ ਰੋਗਤੋ ਵੁਟ੍ਠਾਨਞ੍ਚ ਏਕਪ੍ਪਹਾਰੇਨੇਵ ਹੋਤਿ. ਅਯਂ ਰੋਗਸਮਸੀਸੀ ਨਾਮ. ਕੇਚਿ ਪਨ ਤਸ੍ਮਿਂਯੇਵ ਇਰਿਯਾਪਥੇ ਤਸ੍ਮਿਞ੍ਚ ਰੋਗੇ ਪਰਿਨਿਬ੍ਬਾਨਵਸੇਨੇਤ੍ਥ ਸਮਸੀਸਿਤਂ ਪਞ੍ਞਾਪੇਨ੍ਤਿ. ਯਸ੍ਸ ਪਨ ਆਸਵਕ੍ਖਯੋ ਚ ਜੀਵਿਤਕ੍ਖਯੋ ਚ ਏਕਪ੍ਪਹਾਰੇਨੇਵ ਹੋਤਿ. ਅਯਂ ਜੀਵਿਤਸਮਸੀਸੀ ਨਾਮ. ਵੁਤ੍ਤਮ੍ਪਿ ਚੇਤਂ – ‘‘ਯਸ੍ਸ ਪੁਗ੍ਗਲਸ੍ਸ ਅਪੁਬ੍ਬਂ ਅਚਰਿਮਂ ਆਸਵਪਰਿਯਾਦਾਨਞ੍ਚ ਹੋਤਿ ਜੀਵਿਤਪਰਿਯਾਦਾਨਞ੍ਚ, ਅਯਂ ਵੁਚ੍ਚਤਿ ਪੁਗ੍ਗਲੋ ਸਮਸੀਸੀ’’ਤਿ (ਪੁ. ਪ. ੧੬).

ਏਤ੍ਥ ਚ ਪਵਤ੍ਤਿਸੀਸਂ ਕਿਲੇਸਸੀਸਨ੍ਤਿ ਦ੍ਵੇ ਸੀਸਾਨਿ. ਤਤ੍ਥ ਪਵਤ੍ਤਿਸੀਸਂ ਨਾਮ ਜੀਵਿਤਿਨ੍ਦ੍ਰਿਯਂ, ਕਿਲੇਸਸੀਸਂ ਨਾਮ ਅਵਿਜ੍ਜਾ. ਤੇਸੁ ਜੀਵਿਤਿਨ੍ਦ੍ਰਿਯਂ ਚੁਤਿਚਿਤ੍ਤਂ ਖੇਪੇਤਿ, ਅਵਿਜ੍ਜਾ ਮਗ੍ਗਚਿਤ੍ਤਂ. ਦ੍ਵਿਨ੍ਨਂ ਚਿਤ੍ਤਾਨਂ ਏਕਤੋ ਉਪ੍ਪਾਦੋ ਨਤ੍ਥਿ. ਮਗ੍ਗਾਨਨ੍ਤਰਂ ਪਨ ਫਲਂ, ਫਲਾਨਨ੍ਤਰਂ ਭਵਙ੍ਗਂ, ਭਵਙ੍ਗਤੋ ਵੁਟ੍ਠਾਯ ਪਚ੍ਚਵੇਕ੍ਖਣਂ, ਤਂ ਪਰਿਪੁਣ੍ਣਂ ਵਾ ਹੋਤਿ ਅਪਰਿਪੁਣ੍ਣਂ ਵਾ. ਤਿਖਿਣੇਨ ਅਸਿਨਾ ਸੀਸੇ ਛਿਜ੍ਜਨ੍ਤੇਪਿ ਹਿ ਏਕੋ ਵਾ ਦ੍ਵੇ ਵਾ ਪਚ੍ਚਵੇਕ੍ਖਣਵਾਰਾ ਅਵਸ੍ਸਂ ਉਪ੍ਪਜ੍ਜਨ੍ਤਿਯੇਵ, ਚਿਤ੍ਤਾਨਂ ਪਨ ਲਹੁਪਰਿਵਤ੍ਤਿਤਾਯ ਆਸਵਕ੍ਖਯੋ ਚ ਜੀਵਿਤਪਰਿਯਾਦਾਨਞ੍ਚ ਏਕਕ੍ਖਣੇ ਵਿਯ ਪਞ੍ਞਾਯਤਿ.

ਸਮੂਲਂ ਤਣ੍ਹਮਬ੍ਬੁਯ੍ਹਾਤਿ ਅਵਿਜ੍ਜਾਮੂਲੇਨ ਸਮੂਲਕਂ ਤਣ੍ਹਂ ਅਰਹਤ੍ਤਮਗ੍ਗੇਨ ਉਪ੍ਪਾਟੇਤ੍ਵਾ. ਪਰਿਨਿਬ੍ਬੁਤੋਤਿ ਅਨੁਪਾਦਿਸੇਸਨਿਬ੍ਬਾਨੇਨ ਪਰਿਨਿਬ੍ਬੁਤੋ.

ਵਿਵਤ੍ਤਕ੍ਖਨ੍ਧਨ੍ਤਿ ਪਰਿਵਤ੍ਤਕ੍ਖਨ੍ਧਂ. ਸੇਮਾਨਨ੍ਤਿ ਉਤ੍ਤਾਨਂ ਹੁਤ੍ਵਾ ਸਯਿਤਂ ਹੋਤਿ. ਥੇਰੋ ਪਨ ਕਿਞ੍ਚਾਪਿ ਉਤ੍ਤਾਨਕੋ ਸਯਿਤੋ, ਤਥਾਪਿਸ੍ਸ ਦਕ੍ਖਿਣੇਨ ਪਸ੍ਸੇਨ ਪਰਿਚਿਤਸਯਨਤ੍ਤਾ ਸੀਸਂ ਦਕ੍ਖਿਣਤੋਵ ਪਰਿਵਤ੍ਤਿਤ੍ਵਾ ਠਿਤਂ. ਧੂਮਾਯਿਤਤ੍ਤਨ੍ਤਿ ਧੂਮਾਯਿਤਭਾਵਂ. ਤਸ੍ਮਿਂ ਹਿ ਖਣੇ ਧੂਮਵਲਾਹਕਾ ਵਿਯ ਤਿਮਿਰਵਲਾਹਕਾ ਵਿਯ ਚ ਉਟ੍ਠਹਿਂਸੁ. ਵਿਞ੍ਞਾਣਂ ਸਮਨ੍ਵੇਸਤੀਤਿ ਪਟਿਸਨ੍ਧਿਚਿਤ੍ਤਂ ਪਰਿਯੇਸਤਿ. ਅਪ੍ਪਤਿਟ੍ਠਿਤੇਨਾਤਿ ਪਟਿਸਨ੍ਧਿਵਿਞ੍ਞਾਣੇਨ ਅਪ੍ਪਤਿਟ੍ਠਿਤੇਨ, ਅਪ੍ਪਤਿਟ੍ਠਿਤਕਾਰਣਾਤਿ ਅਤ੍ਥੋ. ਬੇਲੁਵਪਣ੍ਡੁਵੀਣਨ੍ਤਿ ਬੇਲੁਵਪਕ੍ਕਂ ਵਿਯ ਪਣ੍ਡੁਵਣ੍ਣਂ ਸੁਵਣ੍ਣਮਹਾਵੀਣਂ. ਆਦਾਯਾਤਿ ਕਚ੍ਛੇ ਠਪੇਤ੍ਵਾ. ਉਪਸਙ੍ਕਮੀਤਿ ‘‘ਗੋਧਿਕਤ੍ਥੇਰਸ੍ਸ ਨਿਬ੍ਬਤ੍ਤਟ੍ਠਾਨਂ ਨ ਜਾਨਾਮਿ, ਸਮਣਂ ਗੋਤਮਂ ਪੁਚ੍ਛਿਤ੍ਵਾ ਨਿਕ੍ਕਙ੍ਖੋ ਭਵਿਸ੍ਸਾਮੀ’’ਤਿ ਖੁਦ੍ਦਕਦਾਰਕਵਣ੍ਣੀ ਹੁਤ੍ਵਾ ਉਪਸਙ੍ਕਮਿ. ਨਾਧਿਗਚ੍ਛਾਮੀਤਿ ਨ ਪਸ੍ਸਾਮਿ. ਸੋਕਪਰੇਤਸ੍ਸਾਤਿ ਸੋਕੇਨ ਫੁਟ੍ਠਸ੍ਸ. ਅਭਸ੍ਸਥਾਤਿ ਪਾਦਪਿਟ੍ਠਿਯਂ ਪਤਿਤਾ. ਤਤਿਯਂ.

੪. ਸਤ੍ਤਵਸ੍ਸਾਨੁਬਨ੍ਧਸੁਤ੍ਤਵਣ੍ਣਨਾ

੧੬੦. ਚਤੁਤ੍ਥੇ ਸਤ੍ਤ ਵਸ੍ਸਾਨੀਤਿ ਪੁਰੇ ਬੋਧਿਯਾ ਛਬ੍ਬਸ੍ਸਾਨਿ, ਬੋਧਿਤੋ ਪਚ੍ਛਾ ਏਕਂ ਵਸ੍ਸਂ. ਓਤਾਰਾਪੇਕ੍ਖੋਤਿ ‘‘ਸਚੇ ਸਮਣਸ੍ਸ ਗੋਤਮਸ੍ਸ ਕਾਯਦ੍ਵਾਰਾਦੀਸੁ ਕਿਞ੍ਚਿਦੇਵ ਅਨਨੁਚ੍ਛਵਿਕਂ ਪਸ੍ਸਾਮਿ, ਚੋਦੇਸ੍ਸਾਮਿ ਨ’’ਨ੍ਤਿ ਏਵਂ ਵਿਵਰਂ ਅਪੇਕ੍ਖਮਾਨੋ. ਅਲਭਮਾਨੋਤਿ ਰਥਰੇਣੁਮਤ੍ਤਮ੍ਪਿ ਅਵਕ੍ਖਲਿਤਂ ਅਪਸ੍ਸਨ੍ਤੋ. ਤੇਨਾਹ –

‘‘ਸਤ੍ਤ ਵਸ੍ਸਾਨਿ ਭਗਵਨ੍ਤਂ, ਅਨੁਬਨ੍ਧਿਂ ਪਦਾਪਦਂ;

ਓਤਾਰਂ ਨਾਧਿਗਚ੍ਛਿਸ੍ਸਂ, ਸਮ੍ਬੁਦ੍ਧਸ੍ਸ ਸਤੀਮਤੋ’’ਤਿ. (ਸੁ. ਨਿ. ੪੪੮);

ਉਪਸਙ੍ਕਮੀਤਿ ‘‘ਅਜ੍ਜ ਸਮਣਂ ਗੋਤਮਂ ਅਤਿਗਹੇਤ੍ਵਾ ਗਮਿਸ੍ਸਾਮੀ’’ਤਿ ਉਪਸਙ੍ਕਮਿ.

ਝਾਯਸੀਤਿ ਝਾਯਨ੍ਤੋ ਅਵਜ੍ਝਾਯਨ੍ਤੋ ਨਿਸਿਨ੍ਨੋਸੀਤਿ ਵਦਤਿ. ਵਿਤ੍ਤਂ ਨੁ ਜੀਨੋਤਿ ਸਤਂ ਵਾ ਸਹਸ੍ਸਂ ਵਾ ਜਿਤੋਸਿ ਨੁ. ਆਗੁਂ ਨੁ ਗਾਮਸ੍ਮਿਨ੍ਤਿ, ਕਿਂ ਨੁ ਅਨ੍ਤੋਗਾਮੇ ਪਮਾਣਾਤਿਕ੍ਕਨ੍ਤਂ ਪਾਪਕਮ੍ਮਂ ਅਕਾਸਿ, ਯੇਨ ਅਞ੍ਞੇਸਂ ਮੁਖਂ ਓਲੋਕੇਤੁਂ ਅਵਿਸਹਨ੍ਤੋ ਅਰਞ੍ਞੇ ਵਿਚਰਸਿ? ਸਕ੍ਖਿਨ੍ਤਿ ਮਿਤ੍ਤਭਾਵਂ.

ਪਲਿਖਾਯਾਤਿ ਖਣਿਤ੍ਵਾ. ਭਵਲੋਭਜਪ੍ਪਨ੍ਤਿ ਭਵਲੋਭਸਙ੍ਖਾਤਂ ਤਣ੍ਹਂ. ਅਨਾਸਵੋ ਝਾਯਾਮੀਤਿ ਨਿਤ੍ਤਣ੍ਹੋ ਹੁਤ੍ਵਾ ਦ੍ਵੀਹਿ ਝਾਨੇਹਿ ਝਾਯਾਮਿ. ਪਮਤ੍ਤਬਨ੍ਧੂਤਿ ਮਾਰਂ ਆਲਪਤਿ. ਸੋ ਹਿ ਯੇਕੇਚਿ ਲੋਕੇ ਪਮਤ੍ਤਾ, ਤੇਸਂ ਬਨ੍ਧੁ.

ਸਚੇ ਮਗ੍ਗਂ ਅਨੁਬੁਦ੍ਧਨ੍ਤਿ ਯਦਿ ਤਯਾ ਮਗ੍ਗੋ ਅਨੁਬੁਦ੍ਧੋ. ਅਪੇਹੀਤਿ ਅਪਯਾਹਿ. ਅਮਚ੍ਚੁਧੇਯ੍ਯਨ੍ਤਿ ਮਚ੍ਚੁਨੋ ਅਨੋਕਾਸਭੂਤਂ ਨਿਬ੍ਬਾਨਂ. ਪਾਰਗਾਮਿਨੋਤਿ ਯੇਪਿ ਪਾਰਂ ਗਤਾ, ਤੇਪਿ ਪਾਰਗਾਮਿਨੋ. ਯੇਪਿ ਪਾਰਂ ਗਚ੍ਛਿਸ੍ਸਨ੍ਤਿ, ਯੇਪਿ ਪਾਰਂ ਗਨ੍ਤੁਕਾਮਾ, ਤੇਪਿ ਪਾਰਗਾਮਿਨੋ.

ਵਿਸੂਕਾਯਿਕਾਨੀਤਿ ਮਾਰਵਿਸੂਕਾਨਿ. ਵਿਸੇਵਿਤਾਨੀਤਿ ਵਿਰੁਦ੍ਧਸੇਵਿਤਾਨਿ, ‘‘ਅਪ੍ਪਮਾਯੁ ਮਨੁਸ੍ਸਾਨਂ, ਅਚ੍ਚਯਨ੍ਤਿ ਅਹੋਰਤ੍ਤਾ’’ਤਿ ਵੁਤ੍ਤੇ. ‘‘ਦੀਘਮਾਯੁ ਮਨੁਸ੍ਸਾਨਂ, ਨਾਚ੍ਚਯਨ੍ਤਿ ਅਹੋਰਤ੍ਤਾ’’ਤਿਆਦੀਨਿ ਪਟਿਲੋਮਕਾਰਣਾਨਿ. ਵਿਪ੍ਫਨ੍ਦਿਤਾਨੀਤਿ, ਤਮ੍ਹਿ ਤਮ੍ਹਿ ਕਾਲੇ ਹਤ੍ਥਿਰਾਜਵਣ੍ਣਸਪ੍ਪਵਣ੍ਣਾਦਿਦਸ੍ਸਨਾਨਿ. ਨਿਬ੍ਬੇਜਨੀਯਾਤਿ ਉਕ੍ਕਣ੍ਠਨੀਯਾ.

ਅਨੁਪਰਿਯਗਾਤਿਆਦੀਸੁ ਕਿਞ੍ਚਾਪਿ ਅਤੀਤਵਚਨਂ ਕਤਂ, ਅਤ੍ਥੋ ਪਨ ਵਿਕਪ੍ਪਵਸੇਨ ਵੇਦਿਤਬ੍ਬੋ. ਇਦਂ ਵੁਤ੍ਤਂ ਹੋਤਿ – ਯਥਾ ਮੇਦਵਣ੍ਣਂ ਪਾਸਾਣਂ ਵਾਯਸੋ ਦਿਸ੍ਵਾ – ‘‘ਅਪਿ ਨਾਮੇਤ੍ਥ ਮੁਦੁਂ ਵਿਨ੍ਦੇਯ੍ਯਾਮ, ਅਪਿ ਅਸ੍ਸਾਦੋ ਸਿਯਾ’’ਤਿ ਅਨੁਪਰਿਗਚ੍ਛੇਯ੍ਯ, ਅਥ ਸੋ ਤਤ੍ਥ ਅਸ੍ਸਾਦਂ ਅਲਭਿਤ੍ਵਾਵ ਵਾਯਸੋ ਏਤ੍ਤੋ ਅਪਕ੍ਕਮੇਯ੍ਯ, ਤਤੋ ਪਾਸਾਣਾ ਅਪਗਚ੍ਛੇਯ੍ਯ, ਏਵਂ ਮਯਮ੍ਪਿ ਸੋ ਕਾਕੋ ਵਿਯ ਸੇਲਂ ਗੋਤਮਂ ਆਸਜ੍ਜ ਅਸ੍ਸਾਦਂ ਵਾ ਸਨ੍ਥਵਂ ਵਾ ਅਲਭਨ੍ਤਾ ਗੋਤਮਾ ਨਿਬ੍ਬਿਨ੍ਦਿਤ੍ਵਾ ਅਪਗਚ੍ਛਾਮ. ਚਤੁਤ੍ਥਂ.

੫. ਮਾਰਧੀਤੁਸੁਤ੍ਤਵਣ੍ਣਨਾ

੧੬੧. ਪਞ੍ਚਮੇ ਅਭਾਸਿਤ੍ਵਾਤਿ ਏਤ੍ਥ ਅ-ਕਾਰੋ ਨਿਪਾਤਮਤ੍ਤਂ, ਭਾਸਿਤ੍ਵਾਤਿ ਅਤ੍ਥੋ. ਅਭਾਸਯਿਤ੍ਵਾਤਿਪਿ ਪਾਠੋ. ਉਪਸਙ੍ਕਮਿਂਸੂਤਿ ‘‘ਗੋਪਾਲਕਦਾਰਕਂ ਵਿਯ ਦਣ੍ਡਕੇਨ ਭੂਮਿਂ ਲੇਖਂ ਦਤ੍ਵਾ ਅਤਿਵਿਯ ਦੁਮ੍ਮਨੋ ਹੁਤ੍ਵਾ ਨਿਸਿਨ੍ਨੋ. ‘ਕਿਨ੍ਨੁ ਖੋ ਕਾਰਣ’ਨ੍ਤਿ? ਪੁਚ੍ਛਿਤ੍ਵਾ, ਜਾਨਿਸ੍ਸਾਮਾ’’ਤਿ ਉਪਸਙ੍ਕਮਿਂਸੁ.

ਸੋਚਸੀਤਿ ਚਿਨ੍ਤੇਸਿ. ਆਰਞ੍ਞਮਿਵ ਕੁਞ੍ਜਰਨ੍ਤਿ ਯਥਾ ਅਰਞ੍ਞਤੋ ਪੇਸਿਤਗਣਿਕਾਰਹਤ੍ਥਿਨਿਯੋ ਆਰਞ੍ਞਕਂ ਕੁਞ੍ਜਰਂ ਇਤ੍ਥਿਕੁਤ੍ਤਦਸ੍ਸਨੇਨ ਪਲੋਭੇਤ੍ਵਾ ਬਨ੍ਧਿਤ੍ਵਾ ਆਨਯਨ੍ਤਿ, ਏਵਂ ਆਨਯਿਸ੍ਸਾਮ. ਮਾਰਧੇਯ੍ਯਨ੍ਤਿ ਤੇਭੂਮਕਵਟ੍ਟਂ.

ਉਪਸਙ੍ਕਮਿਂਸੂਤਿ – ‘‘ਤੁਮ੍ਹੇ ਥੋਕਂ ਅਧਿਵਾਸੇਥ, ਮਯਂ ਤਂ ਆਨੇਸ੍ਸਾਮਾ’’ਤਿ ਪਿਤਰਂ ਸਮਸ੍ਸਾਸੇਤ੍ਵਾ ਉਪਸਙ੍ਕਮਿਂਸੁ. ਉਚ੍ਚਾਵਚਾਤਿ ਨਾਨਾਵਿਧਾ. ਏਕਸਤਂ ਏਕਸਤਨ੍ਤਿ ਏਕੇਕਂ ਸਤਂ ਸਤਂ ਕਤ੍ਵਾ. ਕੁਮਾਰਿਵਣ੍ਣਸਤਨ੍ਤਿ ਇਮਿਨਾ ਨਯੇਨ ਕੁਮਾਰਿਅਤ੍ਤਭਾਵਾਨਂ ਸਤਂ.

ਅਤ੍ਥਸ੍ਸ ਪਤ੍ਤਿਂ ਹਦਯਸ੍ਸ ਸਨ੍ਤਿਨ੍ਤਿ, ਦ੍ਵੀਹਿਪਿ ਪਦੇਹਿ ਅਰਹਤ੍ਤਮੇਵ ਕਥੇਸਿ. ਸੇਨਨ੍ਤਿ ਕਿਲੇਸਸੇਨਂ. ਸਾ ਹਿ ਪਿਯਰੂਪਸਾਤਰੂਪਾ ਨਾਮ. ਏਕਾਹਂ ਝਾਯਨ੍ਤਿ ਏਕੋ ਅਹਂ ਝਾਯਨ੍ਤੋ. ਸੁਖਮਨੁਬੋਧਿਨ੍ਤਿ ਅਰਹਤ੍ਤਸੁਖਂ ਅਨੁਬੁਜ੍ਝਿਂ. ਇਦਂ ਵੁਤ੍ਤਂ ਹੋਤਿ – ਪਿਯਰੂਪਂ ਸਾਤਰੂਪਂ ਸੇਨਂ ਜਿਨਿਤ੍ਵਾ ਅਹਂ ਏਕੋ ਝਾਯਨ੍ਤੋ ‘‘ਅਤ੍ਥਸ੍ਸ ਪਤ੍ਤਿਂ ਹਦਯਸ੍ਸ ਸਨ੍ਤਿ’’ਨ੍ਤਿ ਸਙ੍ਖਂ ਗਤਂ ਅਰਹਤ੍ਤਸੁਖਂ ਅਨੁਬੁਜ੍ਝਿਂ. ਤਸ੍ਮਾ ਜਨੇਨ ਮਿਤ੍ਤਸਨ੍ਥਵਂ ਨ ਕਰੋਮਿ, ਤੇਨੇਵ ਚ ਮੇ ਕਾਰਣੇਨ ਕੇਨਚਿ ਸਦ੍ਧਿਂ ਸਕ੍ਖੀ ਨ ਸਮ੍ਪਜ੍ਜਤੀਤਿ.

ਕਥਂਵਿਹਾਰੀਬਹੁਲੋਤਿ ਕਤਮੇਨ ਵਿਹਾਰੇਨ ਬਹੁਲਂ ਵਿਹਰਨ੍ਤੋ. ਅਲਦ੍ਧਾਤਿ ਅਲਭਿਤ੍ਵਾ. ਯੋਤਿ ਨਿਪਾਤਮਤ੍ਤਂ. ਇਦਂ ਵੁਤ੍ਤਂ ਹੋਤਿ – ਕਤਮੇਨ ਝਾਨੇਨ ਬਹੁਲਂ ਝਾਯਨ੍ਤਂ ਤਂ ਪੁਗ੍ਗਲਂ ਕਾਮਸਞ੍ਞਾ ਅਲਭਿਤ੍ਵਾਵ ਪਰਿਬਾਹਿਰਾ ਹੋਨ੍ਤੀਤਿ.

ਪਸ੍ਸਦ੍ਧਕਾਯੋਤਿ ਚਤੁਤ੍ਥਜ੍ਝਾਨੇਨ ਅਸ੍ਸਾਸਪਸ੍ਸਾਸਕਾਯਸ੍ਸ ਪਸ੍ਸਦ੍ਧਤ੍ਤਾ ਪਸ੍ਸਦ੍ਧਕਾਯੋ. ਸੁਵਿਮੁਤ੍ਤਚਿਤ੍ਤੋਤਿ ਅਰਹਤ੍ਤਫਲਵਿਮੁਤ੍ਤਿਯਾ ਸੁਟ੍ਠੁ ਵਿਮੁਤ੍ਤਚਿਤ੍ਤੋ. ਅਸਙ੍ਖਰਾਨੋਤਿ ਤਯੋ ਕਮ੍ਮਾਭਿਸਙ੍ਖਾਰੇ ਅਨਭਿਸਙ੍ਖਰੋਨ੍ਤੋ. ਅਨੋਕੋਤਿ ਅਨਾਲਯੋ. ਅਞ੍ਞਾਯ ਧਮ੍ਮਨ੍ਤਿ ਚਤੁਸਚ੍ਚਧਮ੍ਮਂ ਜਾਨਿਤ੍ਵਾ. ਅਵਿਤਕ੍ਕਝਾਯੀਤਿ ਅਵਿਤਕ੍ਕੇਨ ਚਤੁਤ੍ਥਜ੍ਝਾਨੇਨ ਝਾਯਨ੍ਤੋ. ਨ ਕੁਪ੍ਪਤੀਤਿਆਦੀਸੁ ਦੋਸੇਨ ਨ ਕੁਪ੍ਪਤਿ, ਰਾਗੇਨ ਨ ਸਰਤਿ, ਮੋਹੇਨ ਨ ਥੀਨੋ. ਇਮੇਸੁ ਤੀਸੁ ਮੂਲਕਿਲੇਸੇਸੁ ਗਹਿਤੇਸੁ ਦਿਯਡ੍ਢਕਿਲੇਸਸਹਸ੍ਸਂ ਗਹਿਤਮੇਵ ਹੋਤਿ. ਪਠਮਪਦੇਨ ਵਾ ਬ੍ਯਾਪਾਦਨੀਵਰਣਂ ਗਹਿਤਂ, ਦੁਤਿਯੇਨ ਕਾਮਚ੍ਛਨ੍ਦਨੀਵਰਣਂ, ਤਤਿਯੇਨ ਥਿਨਂ ਆਦਿਂ ਕਤ੍ਵਾ ਸੇਸਨੀਵਰਣਾਨਿ. ਇਤਿ ਇਮਿਨਾ ਨੀਵਰਣਪ੍ਪਹਾਨੇਨ ਖੀਣਾਸਵਂ ਦਸ੍ਸੇਤਿ.

ਪਞ੍ਚੋਘਤਿਣ੍ਣੋਤਿ ਪਞ੍ਚਦ੍ਵਾਰਿਕਂ ਕਿਲੇਸੋਘਂ ਤਿਣ੍ਣੋ. ਛਟ੍ਠਨ੍ਤਿ ਮਨੋਦ੍ਵਾਰਿਕਮ੍ਪਿ ਛਟ੍ਠਂ ਕਿਲੇਸੋਘਂ ਅਤਰਿ. ਪਞ੍ਚੋਘਗ੍ਗਹਣੇਨ ਵਾ ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ, ਛਟ੍ਠਗ੍ਗਹਣੇਨ ਪਞ੍ਚੁਦ੍ਧਮ੍ਭਾਗਿਯਾਨਿ ਵੇਦਿਤਬ੍ਬਾਨਿ. ਗਣਸਙ੍ਘਚਾਰੀਤਿ ਗਣੇ ਚ ਸਙ੍ਘੇ ਚ ਚਰਤੀਤਿ ਸਤ੍ਥਾ ਗਣਸਙ੍ਘਚਾਰੀ ਨਾਮ. ਅਦ੍ਧਾ ਚਰਿਸ੍ਸਨ੍ਤੀਤਿ ਅਞ੍ਞੇਪਿ ਸਦ੍ਧਾ ਬਹੁਜਨਾ ਏਕਂਸੇਨ ਚਰਿਸ੍ਸਨ੍ਤਿ. ਅਯਨ੍ਤਿ ਅਯਂ ਸਤ੍ਥਾ. ਅਨੋਕੋਤਿ ਅਨਾਲਯੋ.

ਅਚ੍ਛੇਜ੍ਜ ਨੇਸ੍ਸਤੀਤਿ ਅਚ੍ਛਿਨ੍ਦਿਤ੍ਵਾ ਨਯਿਸ੍ਸਤਿ, ਮਚ੍ਚੁਰਾਜਸ੍ਸ ਹਤ੍ਥਤੋ ਅਚ੍ਛਿਨ੍ਦਿਤ੍ਵਾ ਨਿਬ੍ਬਾਨਪਾਰਂ ਨਯਿਸ੍ਸਤੀਤਿ ਵੁਤ੍ਤਂ ਹੋਤਿ. ਨਯਮਾਨਾਨਨ੍ਤਿ ਨਯਮਾਨੇਸੁ.

ਸੇਲਂਵ ਸਿਰਸੂਹਚ੍ਚ, ਪਾਤਾਲੇ ਗਾਧਮੇਸਥਾਤਿ ਮਹਨ੍ਤਂ ਕੂਟਾਗਾਰਪ੍ਪਮਾਣਂ ਸਿਲਂ ਸੀਸੇ ਠਪੇਤ੍ਵਾ ਪਾਤਾਲੇ ਪਤਿਟ੍ਠਗਵੇਸਨਂ ਵਿਯ. ਖਾਣੁਂਵ ਉਰਸਾਸਜ੍ਜਾਤਿ ਉਰਸਿ ਖਾਣੁਂ ਪਹਰਿਤ੍ਵਾ ਵਿਯ. ਅਪੇਥਾਤਿ ਅਪਗਚ੍ਛਥ. ਇਮਸ੍ਮਿਂ ਠਾਨੇ ਸਙ੍ਗੀਤਿਕਾਰਾ ‘‘ਇਦਮਵੋਚਾ’’ਤਿ ਦੇਸਨਂ ਨਿਟ੍ਠਪੇਤ੍ਵਾ ਦਦ੍ਦਲ੍ਲਮਾਨਾਤਿ ਗਾਥਂ ਆਹਂਸੁ. ਤਤ੍ਥ ਦਦ੍ਦਲ੍ਲਮਾਨਾਤਿ ਅਤਿਵਿਯ ਜਲਮਾਨਾ ਸੋਭਮਾਨਾ. ਆਗਞ੍ਛੁਨ੍ਤਿ ਆਗਤਾ. ਪਨੁਦੀਤਿ ਨੀਹਰਿ. ਤੂਲਂ ਭਟ੍ਠਂਵ ਮਾਲੁਤੋਤਿ ਯਥਾ ਫਲਤੋ ਭਟ੍ਠਂ ਸਿਮ੍ਬਲਿਤੂਲਂ ਵਾ ਪੋਟਕਿਤੂਲਂ ਵਾ ਵਾਤੋ ਪਨੁਦਤਿ ਨੀਹਰਤਿ, ਏਵਂ ਪਨੁਦੀਤਿ. ਪਞ੍ਚਮਂ.

ਤਤਿਯੋ ਵਗ੍ਗੋ.

ਇਤਿ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਮਾਰਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.