੫. ਭਿਕ੍ਖੁਨੀਸਂਯੁਤ੍ਤਂ

੧. ਆਲ਼ਵਿਕਾਸੁਤ੍ਤਵਣ੍ਣਨਾ

੧੬੨. ਭਿਕ੍ਖੁਨੀਸਂਯੁਤ੍ਤਸ੍ਸ ਪਠਮੇ ਆਲ਼ਵਿਕਾਤਿ ਆਲ਼ਵਿਯਂ ਜਾਤਾ ਆਲ਼ਵਿਨਗਰਤੋਯੇਵ ਚ ਨਿਕ੍ਖਮ੍ਮ ਪਬ੍ਬਜਿਤਾ. ਅਨ੍ਧਵਨਨ੍ਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਚੇਤਿਯੇ ਨਵਕਮ੍ਮਤ੍ਥਾਯ ਧਨਂ ਸਮਾਦਪੇਤ੍ਵਾ ਆਗਚ੍ਛਨ੍ਤਸ੍ਸ ਯਸੋਧਰਸ੍ਸ ਨਾਮ ਧਮ੍ਮਭਾਣਕਸ੍ਸ ਅਰਿਯਪੁਗ੍ਗਲਸ੍ਸ ਅਕ੍ਖੀਨਿ ਉਪ੍ਪਾਟੇਤ੍ਵਾ ਤਤ੍ਥੇਵ ਅਕ੍ਖਿਭੇਦਪ੍ਪਤ੍ਤੇਹਿ ਪਞ੍ਚਹਿ ਚੋਰਸਤੇਹਿ ਨਿਵੁਤ੍ਥਤ੍ਤਾ ਤਤੋ ਪਟ੍ਠਾਯ ‘‘ਅਨ੍ਧਵਨ’’ਨ੍ਤਿ ਸਙ੍ਖਂ ਗਤਂ ਵਨਂ. ਤਂ ਕਿਰ ਸਾਵਤ੍ਥਿਤੋ ਦਕ੍ਖਿਣਪਸ੍ਸੇ ਗਾਵੁਤਮਤ੍ਤੇ ਹੋਤਿ ਰਾਜਾਰਕ੍ਖਾਯ ਗੁਤ੍ਤਂ. ਤਤ੍ਥ ਪਵਿਵੇਕਕਾਮਾ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਚ੍ਛਨ੍ਤਿ. ਤਸ੍ਮਾ ਅਯਮ੍ਪਿ ਕਾਯਵਿਵੇਕਤ੍ਥਿਨੀ ਯੇਨ ਤਂ ਵਨਂ, ਤੇਨੁਪਸਙ੍ਕਮਿ. ਨਿਸ੍ਸਰਣਨ੍ਤਿ ਨਿਬ੍ਬਾਨਂ. ਪਞ੍ਞਾਯਾਤਿ ਪਚ੍ਚਵੇਕ੍ਖਣਞਾਣੇਨ. ਨ ਤ੍ਵਂ ਜਾਨਾਸਿ ਤਂ ਪਦਨ੍ਤਿ ਤ੍ਵਂ ਏਤਂ ਨਿਬ੍ਬਾਨਪਦਂ ਵਾ ਨਿਬ੍ਬਾਨਗਾਮਿਮਗ੍ਗਪਦਂ ਵਾ ਨ ਜਾਨਾਸਿ. ਸਤ੍ਤਿਸੂਲੂਪਮਾਤਿ ਵਿਨਿਵਿਜ੍ਝਨਤ੍ਥੇਨ ਸਤ੍ਤਿਸੂਲਸਦਿਸਾ. ਖਨ੍ਧਾਸਂ ਅਧਿਕੁਟ੍ਟਨਾਤਿ ਖਨ੍ਧਾ ਤੇਸਂ ਅਧਿਕੁਟ੍ਟਨਭਣ੍ਡਿਕਾ. ਪਠਮਂ.

੨. ਸੋਮਾਸੁਤ੍ਤਵਣ੍ਣਨਾ

੧੬੩. ਦੁਤਿਯੇ ਠਾਨਨ੍ਤਿ ਅਰਹਤ੍ਤਂ. ਦੁਰਭਿਸਮ੍ਭਵਨ੍ਤਿ ਦੁਪ੍ਪਸਹਂ. ਦ੍ਵਙ੍ਗੁਲਪਞ੍ਞਾਯਾਤਿ ਪਰਿਤ੍ਤਪਞ੍ਞਾਯ. ਯਸ੍ਮਾ ਵਾ ਦ੍ਵੀਹਿ ਅਙ੍ਗੁਲੇਹਿ ਕਪ੍ਪਾਸਵਟ੍ਟਿਂ ਗਹੇਤ੍ਵਾ ਸੁਤ੍ਤਂ ਕਨ੍ਤਨ੍ਤਿ, ਤਸ੍ਮਾ ਇਤ੍ਥੀ ‘‘ਦ੍ਵਙ੍ਗੁਲਪਞ੍ਞਾ’’ਤਿ ਵੁਚ੍ਚਤਿ. ਞਾਣਮ੍ਹਿ ਵਤ੍ਤਮਾਨਮ੍ਹੀਤਿ ਫਲਸਮਾਪਤ੍ਤਿਞਾਣੇ ਪਵਤ੍ਤਮਾਨੇ. ਧਮ੍ਮਂ ਵਿਪਸ੍ਸਤੋਤਿ ਚਤੁਸਚ੍ਚਧਮ੍ਮਂ ਵਿਪਸ੍ਸਨ੍ਤਸ੍ਸ, ਪੁਬ੍ਬਭਾਗੇ ਵਾ ਵਿਪਸ੍ਸਨਾਯ ਆਰਮ੍ਮਣਭੂਤਂ ਖਨ੍ਧਪਞ੍ਚਕਮੇਵ. ਕਿਞ੍ਚਿ ਵਾ ਪਨ ਅਞ੍ਞਸ੍ਮੀਤਿ ਅਞ੍ਞਂ ਵਾ ਕਿਞ੍ਚਿ ‘‘ਅਹਂ ਅਸ੍ਮੀ’’ਤਿ ਤਣ੍ਹਾਮਾਨਦਿਟ੍ਠਿਵਸੇਨ ਯਸ੍ਸ ਸਿਯਾ. ਦੁਤਿਯਂ.

੩. ਕਿਸਾਗੋਤਮੀਸੁਤ੍ਤਵਣ੍ਣਨਾ

੧੬੪. ਤਤਿਯੇ ਕਿਸਾਗੋਤਮੀਤਿ ਅਪ੍ਪਮਂਸਲੋਹਿਤਤਾਯ ਕਿਸਾ, ਗੋਤਮੀਤਿ ਪਨਸ੍ਸਾ ਨਾਮਂ. ਪੁਬ੍ਬੇ ਕਿਰ ਸਾਵਤ੍ਥਿਯਂ ਏਕਸ੍ਮਿਂ ਕੁਲੇ ਅਸੀਤਿਕੋਟਿਧਨਂ ਸਬ੍ਬਂ ਅਙ੍ਗਾਰਾਵ ਜਾਤਂ. ਕੁਟੁਮ੍ਬਿਕੋ ਅਙ੍ਗਾਰਜਾਤਾਨਿ ਅਨੀਹਰਿਤ੍ਵਾ – ‘‘ਅਵਸ੍ਸਂ ਕੋਚਿ ਪੁਞ੍ਞਵਾ ਭਵਿਸ੍ਸਤਿ, ਤਸ੍ਸ ਪੁਞ੍ਞੇਨ ਪੁਨ ਪਾਕਤਿਕਂ ਭਵਿਸ੍ਸਤੀ’’ਤਿ ਸੁਵਣ੍ਣਹਿਰਞ੍ਞਸ੍ਸ ਚਾਟਿਯੋ ਪੂਰੇਤ੍ਵਾ ਆਪਣੇ ਠਪੇਤ੍ਵਾ ਸਮੀਪੇ ਨਿਸੀਦਿ. ਅਥੇਕਾ ਦੁਗ੍ਗਤਕੁਲਸ੍ਸ ਧੀਤਾ – ‘‘ਅਡ੍ਢਮਾਸਕਂ ਗਹੇਤ੍ਵਾ ਦਾਰੁਸਾਕਂ ਆਹਰਿਸ੍ਸਾਮੀ’’ਤਿ ਵੀਥਿਂ ਗਤਾ ਤਂ ਦਿਸ੍ਵਾ ਕੁਟੁਮ੍ਬਿਕਂ ਆਹ – ‘‘ਆਪਣੇ ਤਾਵ ਧਨਂ ਏਤ੍ਤਕਂ, ਗੇਹੇ ਕਿਤ੍ਤਕਂ ਭਵਿਸ੍ਸਤੀ’’ਤਿ. ਕਿਂ ਦਿਸ੍ਵਾ ਅਮ੍ਮ ਏਵਂ ਕਥੇਸੀਤਿ? ਇਮਂ ਹਿਰਞ੍ਞਸੁਵਣ੍ਣਨ੍ਤਿ. ਸੋ ‘‘ਪੁਞ੍ਞਵਤੀ ਏਸਾ ਭਵਿਸ੍ਸਤੀ’’ਤਿ ਤਸ੍ਸਾ ਵਸਨਟ੍ਠਾਨਂ ਪੁਚ੍ਛਿਤ੍ਵਾ ਆਪਣੇ ਭਣ੍ਡਂ ਪਟਿਸਾਮੇਤ੍ਵਾ ਤਸ੍ਸਾ ਮਾਤਾਪਿਤਰੋ ਉਪਸਙ੍ਕਮਿਤ੍ਵਾ ਏਵਮਾਹ – ‘‘ਅਮ੍ਹਾਕਂ ਗੇਹੇ ਵਯਪ੍ਪਤ੍ਤੋ ਦਾਰਕੋ ਅਤ੍ਥਿ, ਤਸ੍ਸੇਤਂ ਦਾਰਿਕਂ ਦੇਥਾ’’ਤਿ. ਕਿਂ ਸਾਮਿ ਦੁਗ੍ਗਤੇਹਿ ਸਦ੍ਧਿਂ ਕੇਲ਼ਿਂ ਕਰੋਸੀਤਿ? ਮਿਤ੍ਤਸਨ੍ਥਵੋ ਨਾਮ ਦੁਗ੍ਗਤੇਹਿਪਿ ਸਦ੍ਧਿਂ ਹੋਤਿ, ਦੇਥ ਨਂ, ਕੁਟੁਮ੍ਬਸਾਮਿਨੀ ਭਵਿਸ੍ਸਤੀਤਿ ਨਂ ਗਹੇਤ੍ਵਾ ਘਰਂ ਆਨੇਸਿ. ਸਾ ਸਂਵਾਸਮਨ੍ਵਾਯ ਪੁਤ੍ਤਂ ਵਿਜਾਤਾ. ਪੁਤ੍ਤੋ ਪਦਸਾ ਆਹਿਣ੍ਡਨਕਾਲੇ ਕਾਲਮਕਾਸਿ. ਸਾ ਦੁਗ੍ਗਤਕੁਲੇ ਉਪ੍ਪਜ੍ਜਿਤ੍ਵਾ ਮਹਾਕੁਲਂ ਗਨ੍ਤ੍ਵਾਪਿ ‘‘ਪੁਤ੍ਤਵਿਨਾਸਂ ਪਤ੍ਤਾਮ੍ਹੀ’’ਤਿ ਉਪ੍ਪਨ੍ਨਬਲਵਸੋਕਾ ਪੁਤ੍ਤਸ੍ਸ ਸਰੀਰਕਿਚ੍ਚਂ ਵਾਰੇਤ੍ਵਾ ਤਂ ਮਤਕਲ਼ੇਵਰਂ ਆਦਾਯ ਨਗਰੇ ਵਿਪ੍ਪਲਪਨ੍ਤੀ ਚਰਤਿ.

ਏਕਦਿਵਸਂ ਮਹਤਿਯਾ ਬੁਦ੍ਧਵੀਥਿਯਾ ਦਸਬਲਸ੍ਸ ਸਨ੍ਤਿਕਂ ਗਨ੍ਤ੍ਵਾ – ‘‘ਪੁਤ੍ਤਸ੍ਸ ਮੇ ਅਰੋਗਭਾਵਤ੍ਥਾਯ ਭੇਸਜ੍ਜਂ ਦੇਥ ਭਗਵਾ’’ਤਿ ਆਹ. ਗਚ੍ਛ ਸਾਵਤ੍ਥਿਂ ਆਹਿਣ੍ਡਿਤ੍ਵਾ ਯਸ੍ਮਿਂ ਗੇਹੇ ਮਤਪੁਬ੍ਬੋ ਨਤ੍ਥਿ, ਤਤੋ ਸਿਦ੍ਧਤ੍ਥਕਂ ਆਹਰ, ਪੁਤ੍ਤਸ੍ਸ ਤੇ ਭੇਸਜ੍ਜਂ ਭਵਿਸ੍ਸਤੀਤਿ. ਸਾ ਨਗਰਂ ਪਵਿਸਿਤ੍ਵਾ ਧੁਰਗੇਹਤੋ ਪਟ੍ਠਾਯ ਭਗਵਤਾ ਵੁਤ੍ਤਨਯੇਨ ਗਨ੍ਤ੍ਵਾ ਸਿਦ੍ਧਤ੍ਥਕਂ ਯਾਚਨ੍ਤੀ ਘਰੇ ਘਰੇ, ‘‘ਕੁਤੋ ਤ੍ਵਂ ਏਵਰੂਪਂ ਘਰਂ ਪਸ੍ਸਿਸ੍ਸਸੀ’’ਤਿ ਵੁਤ੍ਤਾ ਕਤਿਪਯਾਨਿ ਗੇਹਾਨਿ ਆਹਿਣ੍ਡਿਤ੍ਵਾ – ‘‘ਸਬ੍ਬੇਸਮ੍ਪਿ ਕਿਰਾਯਂ ਧਮ੍ਮਤਾ, ਨ ਮਯ੍ਹਂ ਪੁਤ੍ਤਸ੍ਸੇਵਾ’’ਤਿ ਸਾਲਾਯਂ ਛਵਂ ਛਡ੍ਡੇਤ੍ਵਾ ਪਬ੍ਬਜ੍ਜਂ ਯਾਚਿ. ਸਤ੍ਥਾ ‘‘ਇਮਂ ਪਬ੍ਬਾਜੇਤੂ’’ਤਿ ਭਿਕ੍ਖੁਨਿਉਪਸ੍ਸਯਂ ਪੇਸੇਸਿ. ਸਾ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਿ. ਇਮਂ ਥੇਰਿਂ ਸਨ੍ਧਾਯ ‘‘ਅਥ ਖੋ ਕਿਸਾਗੋਤਮੀ’’ਤਿ ਵੁਤ੍ਤਂ.

ਏਕਮਾਸੀਤਿ ਏਕਾ ਆਸਿ. ਰੁਦਮ੍ਮੁਖੀਤਿ ਰੁਦਮਾਨਮੁਖੀ ਵਿਯ. ਅਚ੍ਚਨ੍ਤਂ ਮਤਪੁਤ੍ਤਾਮ੍ਹੀਤਿ ਏਤ੍ਥ ਅਨ੍ਤਂ ਅਤੀਤਂ ਅਚ੍ਚਨ੍ਤਂ, ਭਾਵਨਪੁਂਸਕਮੇਤਂ. ਇਦਂ ਵੁਤ੍ਤਂ ਹੋਤਿ – ਯਥਾ ਪੁਤ੍ਤਮਰਣਂ ਅਨ੍ਤਂ ਅਤੀਤਂ ਹੋਤਿ, ਏਵਂ ਮਤਪੁਤ੍ਤਾ ਅਹਂ, ਇਦਾਨਿ ਮਮ ਪੁਨ ਪੁਤ੍ਤਮਰਣਂ ਨਾਮ ਨਤ੍ਥਿ. ਪੁਰਿਸਾ ਏਤਦਨ੍ਤਿਕਾਤਿ ਪੁਰਿਸਾਪਿ ਮੇ ਏਤਦਨ੍ਤਿਕਾਵ. ਯੋ ਮੇ ਪੁਤ੍ਤਮਰਣਸ੍ਸ ਅਨ੍ਤੋ, ਪੁਰਿਸਾਨਮ੍ਪਿ ਮੇ ਏਸੇਵਨ੍ਤੋ, ਅਭਬ੍ਬਾ ਅਹਂ ਇਦਾਨਿ ਪੁਰਿਸਂ ਗਵੇਸਿਤੁਨ੍ਤਿ. ਸਬ੍ਬਤ੍ਥ ਵਿਹਤਾ ਨਨ੍ਦੀਤਿ ਸਬ੍ਬੇਸੁ ਖਨ੍ਧਾਯਤਨਧਾਤੁਭਵਯੋਨਿਗਤਿਠਿਤਿਨਿਵਾਸੇਸੁ ਮਮ ਤਣ੍ਹਾਨਨ੍ਦੀ ਵਿਹਤਾ. ਤਮੋਕ੍ਖਨ੍ਧੋਤਿ ਅਵਿਜ੍ਜਾਕ੍ਖਨ੍ਧੋ. ਪਦਾਲਿਤੋਤਿ ਞਾਣੇਨ ਭਿਨ੍ਨੋ. ਤਤਿਯਂ.

੪. ਵਿਜਯਾਸੁਤ੍ਤਵਣ੍ਣਨਾ

੧੬੫. ਚਤੁਤ੍ਥੇ ਪਞ੍ਚਙ੍ਗਿਕੇਨਾਤਿ ਆਤਤਂ ਵਿਤਤਂ ਆਤਤਵਿਤਤਂ ਘਨਂ ਸੁਸਿਰਨ੍ਤਿ ਏਵਂ ਪਞ੍ਚਙ੍ਗਸਮਨ੍ਨਾਗਤੇਨ. ਨਿਯ੍ਯਾਤਯਾਮਿ ਤੁਯ੍ਹੇਵਾਤਿ ਸਬ੍ਬੇ ਤੁਯ੍ਹਂਯੇਵ ਦੇਮਿ. ਨਾਹਂ ਤੇਨਤ੍ਥਿਕਾਤਿ ਨਾਹਂ ਤੇਨ ਅਤ੍ਥਿਕਾ. ਪੂਤਿਕਾਯੇਨਾਤਿ ਸੁਵਣ੍ਣਵਣ੍ਣੋਪਿ ਕਾਯੋ ਨਿਚ੍ਚਂ ਉਗ੍ਘਰਿਤਪਗ੍ਘਰਿਤਟ੍ਠੇਨ ਪੂਤਿਕਾਯੋਵ, ਤਸ੍ਮਾ ਏਵਮਾਹ. ਭਿਨ੍ਦਨੇਨਾਤਿ ਭਿਜ੍ਜਨਸਭਾਵੇਨ. ਪਭਙ੍ਗੁਨਾਤਿ ਚੁਣ੍ਣਵਿਚੁਣ੍ਣਂ ਆਪਜ੍ਜਨਧਮ੍ਮੇਨ. ਅਟ੍ਟੀਯਾਮੀਤਿ ਅਟ੍ਟਾ ਪੀਲ਼ਿਤਾ ਹੋਮਿ. ਹਰਾਯਾਮੀਤਿ ਲਜ੍ਜਾਮਿ. ਸਨ੍ਤਾ ਸਮਾਪਤ੍ਤੀਤਿ ਅਟ੍ਠਵਿਧਾ ਲੋਕਿਯਸਮਾਪਤ੍ਤਿ ਆਰਮ੍ਮਣਸਨ੍ਤਤਾਯ ਅਙ੍ਗਸਨ੍ਤਤਾਯ ਚ ਸਨ੍ਤਾਤਿ ਵੁਤ੍ਤਾ. ਸਬ੍ਬਤ੍ਥਾਤਿ ਸਬ੍ਬੇਸੁ ਰੂਪਾਰੂਪਭਵੇਸੁ, ਤੇਸਂ ਦ੍ਵਿਨ੍ਨਂ ਭਵਾਨਂ ਗਹਿਤਤ੍ਤਾ ਗਹਿਤੇ ਕਾਮਭਵੇ ਅਟ੍ਠਸੁ ਚ ਸਮਾਪਤ੍ਤੀਸੂਤਿ ਏਤੇਸੁ ਸਬ੍ਬੇਸੁ ਠਾਨੇਸੁ ਮਯ੍ਹਂ ਅਵਿਜ੍ਜਾਤਮੋ ਵਿਹਤੋਤਿ ਵਦਤਿ. ਚਤੁਤ੍ਥਂ.

੫. ਉਪ੍ਪਲਵਣ੍ਣਾਸੁਤ੍ਤਵਣ੍ਣਨਾ

੧੬੬. ਪਞ੍ਚਮੇ ਸੁਪੁਪ੍ਫਿਤਗ੍ਗਨ੍ਤਿ ਅਗ੍ਗਤੋ ਪਟ੍ਠਾਯ ਸੁਟ੍ਠੁ ਪੁਪ੍ਫਿਤਂ ਸਾਲਰੁਕ੍ਖਂ. ਨ ਚਤ੍ਥਿ ਤੇ ਦੁਤਿਯਾ ਵਣ੍ਣਧਾਤੂਤਿ ਤਵ ਵਣ੍ਣਧਾਤੁਸਦਿਸਾ ਦੁਤਿਯਾ ਵਣ੍ਣਧਾਤੁ ਨਤ੍ਥਿ, ਤਯਾ ਸਦਿਸਾ ਅਞ੍ਞਾ ਭਿਕ੍ਖੁਨੀ ਨਤ੍ਥੀਤਿ ਵਦਤਿ. ਇਧਾਗਤਾ ਤਾਦਿਸਿਕਾ ਭਵੇਯ੍ਯੁਨ੍ਤਿ ਯਥਾ ਤ੍ਵਂ ਇਧਾਗਤਾ ਕਿਞ੍ਚਿ ਸਨ੍ਥਵਂ ਵਾ ਸਿਨੇਹਂ ਵਾ ਨ ਲਭਸਿ, ਏਵਮੇਵਂ ਤੇਪਿ ਤਯਾਵ ਸਦਿਸਾ ਭਵੇਯ੍ਯੁਂ. ਪਖੁਮਨ੍ਤਰਿਕਾਯਨ੍ਤਿ ਦ੍ਵਿਨ੍ਨਂ ਅਕ੍ਖੀਨਂ ਮਜ੍ਝੇ ਨਾਸਵਂਸੇਪਿ ਤਿਟ੍ਠਨ੍ਤਿਂ ਮਂ ਨ ਪਸ੍ਸਸਿ. ਵਸੀਭੂਤਮ੍ਹੀਤਿ ਵਸੀਭੂਤਾ ਅਸ੍ਮਿ. ਪਞ੍ਚਮਂ.

੬. ਚਾਲਾਸੁਤ੍ਤਵਣ੍ਣਨਾ

੧੬੭. ਛਟ੍ਠੇ ਕੋ ਨੁ ਤਂ ਇਦਮਾਦਪਯੀਤਿ ਕੋ ਨੁ ਮਨ੍ਦਬੁਦ੍ਧਿ ਬਾਲੋ ਤਂ ਏਵਂ ਗਾਹਾਪੇਸਿ? ਪਰਿਕ੍ਲੇਸਨ੍ਤਿ ਅਞ੍ਞਮ੍ਪਿ ਨਾਨਪ੍ਪਕਾਰਂ ਉਪਦ੍ਦਵਂ. ਇਦਾਨਿ ਯਂ ਮਾਰੋ ਆਹ – ‘‘ਕੋ ਨੁ ਤਂ ਇਦਮਾਦਪਯੀ’’ਤਿ, ਤਂ ਮਦ੍ਦਨ੍ਤੀ – ‘‘ਨ ਮਂ ਅਨ੍ਧਬਾਲੋ ਆਦਪੇਸਿ, ਲੋਕੇ ਪਨ ਅਗ੍ਗਪੁਗ੍ਗਲੋ ਸਤ੍ਥਾ ਧਮ੍ਮਂ ਦੇਸੇਸੀ’’ਤਿ ਦਸ੍ਸੇਤੁਂ, ਬੁਦ੍ਧੋਤਿਆਦਿਮਾਹ. ਤਤ੍ਥ ਸਚ੍ਚੇ ਨਿਵੇਸਯੀਤਿ ਪਰਮਤ੍ਥਸਚ੍ਚੇ ਨਿਬ੍ਬਾਨੇ ਨਿਵੇਸੇਸਿ. ਨਿਰੋਧਂ ਅਪ੍ਪਜਾਨਨ੍ਤਾਤਿ ਨਿਰੋਧਸਚ੍ਚਂ ਅਜਾਨਨ੍ਤਾ. ਛਟ੍ਠਂ.

੭. ਉਪਚਾਲਾਸੁਤ੍ਤਵਣ੍ਣਨਾ

੧੬੮. ਸਤ੍ਤਮੇ ਏਨ੍ਤਿ ਮਾਰਵਸਂ ਪੁਨਾਤਿ ਪੁਨਪ੍ਪੁਨਂ ਮਰਣਮਾਰਕਿਲੇਸਮਾਰਦੇਵਪੁਤ੍ਤਮਾਰਾਨਂ ਵਸਂ ਆਗਚ੍ਛਨ੍ਤਿ. ਪਧੂਪਿਤੋਤਿ ਸਨ੍ਤਾਪਿਤੋ. ਅਗਤਿ ਯਤ੍ਥ ਮਾਰਸ੍ਸਾਤਿ ਯਤ੍ਥ ਤੁਯ੍ਹਂ ਮਾਰਸ੍ਸ ਅਗਤਿ. ਤਤ੍ਥਾਤਿ ਤਸ੍ਮਿਂ ਨਿਬ੍ਬਾਨੇ. ਸਤ੍ਤਮਂ.

੮. ਸੀਸੁਪਚਾਲਾਸੁਤ੍ਤਵਣ੍ਣਨਾ

੧੬੯. ਅਟ੍ਠਮੇ ਸਮਣੀ ਵਿਯ ਦਿਸ੍ਸਸੀਤਿ ਸਮਣਿਸਦਿਸਾ ਦਿਸ੍ਸਸਿ. ਕਿਮਿਵ ਚਰਸਿ ਮੋਮੂਹਾਤਿ ਕਿਂ ਕਾਰਣਾ ਮੋਮੂਹਾ ਵਿਯ ਚਰਸਿ? ਇਤੋ ਬਹਿਦ੍ਧਾਤਿ ਇਮਮ੍ਹਾ ਸਾਸਨਾ ਬਹਿ. ਪਾਸਂ ਡੇਨ੍ਤੀਤਿ ਪਾਸਣ੍ਡਾ, ਸਤ੍ਤਾਨਂ ਚਿਤ੍ਤੇਸੁ ਦਿਟ੍ਠਿਪਾਸਂ ਖਿਪਨ੍ਤੀਤਿ ਅਤ੍ਥੋ. ਸਾਸਨਂ ਪਨ ਪਾਸੇ ਮੋਚੇਤਿ, ਤਸ੍ਮਾ ਪਾਸਣ੍ਡੋਤਿ ਨ ਵੁਚ੍ਚਤਿ, ਇਤੋ ਬਹਿਦ੍ਧਾਯੇਵ ਪਾਸਣ੍ਡਾ ਹੋਨ੍ਤਿ. ਪਸੀਦਨ੍ਤੀਤਿ ਸਂਸੀਦਨ੍ਤਿ ਲਗ੍ਗਨ੍ਤਿ.

ਇਦਾਨਿ ‘‘ਕਂ ਨੁ ਉਦ੍ਦਿਸ੍ਸ ਮੁਣ੍ਡਾਸੀ’’ਤਿ ਪਞ੍ਹਂ ਕਥੇਨ੍ਤੀ ਅਤ੍ਥਿ ਸਕ੍ਯਕੁਲੇ ਜਾਤੋਤਿਆਦਿਮਾਹ. ਤਤ੍ਥ ਸਬ੍ਬਾਭਿਭੂਤਿ ਸਬ੍ਬਾਨਿ ਖਨ੍ਧਾਯਤਨਧਾਤੁਭਵਯੋਨਿਗਤਿਆਦੀਨਿ ਅਭਿਭਵਿਤ੍ਵਾ ਠਿਤੋ. ਮਰਣਮਾਰਾਦਯੋ ਨੁਦਿ ਨੀਹਰੀਤਿ ਮਾਰਨੁਦੋ. ਸਬ੍ਬਤ੍ਥਮਪਰਾਜਿਤੋਤਿ ਸਬ੍ਬੇਸੁ ਰਾਗਾਦੀਸੁ ਵਾ ਮਾਰਯੁਦ੍ਧੇ ਵਾ ਅਜਿਤੋ. ਸਬ੍ਬਤ੍ਥ ਮੁਤ੍ਤੋਤਿ ਸਬ੍ਬੇਸੁ ਖਨ੍ਧਾਦੀਸੁ ਮੁਤ੍ਤੋ. ਅਸਿਤੋਤਿ ਤਣ੍ਹਾਦਿਟ੍ਠਿਨਿਸ੍ਸਯੇਨ ਅਨਿਸ੍ਸਿਤੋ. ਸਬ੍ਬਕਮ੍ਮਕ੍ਖਯਂ ਪਤ੍ਤੋਤਿ ਸਬ੍ਬਕਮ੍ਮਕ੍ਖਯਸਙ੍ਖਾਤਂ ਅਰਹਤ੍ਤਂ ਪਤ੍ਤੋ. ਉਪਧਿਸਙ੍ਖਯੇਤਿ ਉਪਧਿਸਙ੍ਖਯਸਙ੍ਖਾਤੇ ਨਿਬ੍ਬਾਨੇ ਆਰਮ੍ਮਣਤੋ ਵਿਮੁਤ੍ਤੋ. ਅਟ੍ਠਮਂ.

੯. ਸੇਲਾਸੁਤ੍ਤਵਣ੍ਣਨਾ

੧੭੦. ਨਵਮੇ ਕੇਨਿਦਂ ਪਕਤਨ੍ਤਿ ਕੇਨ ਇਦਂ ਕਤਂ. ਬਿਮ੍ਬਨ੍ਤਿ ਅਤ੍ਤਭਾਵਂ ਸਨ੍ਧਾਯ ਵਦਤਿ. ਅਘਨ੍ਤਿ ਦੁਕ੍ਖਪਤਿਟ੍ਠਾਨਤ੍ਤਾ ਅਤ੍ਤਭਾਵਮੇਵ ਵਦਤਿ. ਹੇਤੁਭਙ੍ਗਾਤਿ ਹੇਤੁਨਿਰੋਧੇਨ ਪਚ੍ਚਯਵੇਕਲ੍ਲੇਨ. ਨਵਮਂ.

੧੦. ਵਜਿਰਾਸੁਤ੍ਤਵਣ੍ਣਨਾ

੧੭੧. ਦਸਮੇ ਨਯਿਧ ਸਤ੍ਤੁਪਲਬ੍ਭਤੀਤਿ ਇਮਸ੍ਮਿਂ ਸੁਦ੍ਧਸਙ੍ਖਾਰਪੁਞ੍ਜੇ ਪਰਮਤ੍ਥਤੋ ਸਤ੍ਤੋ ਨਾਮ ਨ ਉਪਲਬ੍ਭਤਿ. ਖਨ੍ਧੇਸੁ ਸਨ੍ਤੇਸੂਤਿ ਪਞ੍ਚਸੁ ਖਨ੍ਧੇਸੁ ਵਿਜ੍ਜਮਾਨੇਸੁ ਤੇਨ ਤੇਨਾਕਾਰੇਨ ਵਵਤ੍ਥਿਤੇਸੁ. ਸਮ੍ਮੁਤੀਤਿ ਸਤ੍ਤੋਤਿ ਸਮਞ੍ਞਾਮਤ੍ਤਮੇਵ ਹੋਤਿ. ਦੁਕ੍ਖਨ੍ਤਿ ਪਞ੍ਚਕ੍ਖਨ੍ਧਦੁਕ੍ਖਂ. ਨਾਞ੍ਞਤ੍ਰ ਦੁਕ੍ਖਾਤਿ ਠਪੇਤ੍ਵਾ ਦੁਕ੍ਖਂ ਅਞ੍ਞੋ ਨੇਵ ਸਮ੍ਭੋਤਿ ਨ ਨਿਰੁਜ੍ਝਤੀਤਿ. ਦਸਮਂ.

ਇਤਿ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਭਿਕ੍ਖੁਨੀਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.