੭. ਅਦ੍ਧਵਗ੍ਗੋ
੧. ਨਾਮਸੁਤ੍ਤਵਣ੍ਣਨਾ
੬੧. ਅਦ੍ਧਵਗ੍ਗਸ੍ਸ ਪਠਮੇ ਨਾਮਂ ਸਬ੍ਬਂ ਅਦ੍ਧਭਵੀਤਿ ਨਾਮਂ ਸਬ੍ਬਂ ਅਭਿਭਵਤਿ ਅਨੁਪਤਤਿ. ਓਪਪਾਤਿਕੇਨ ਵਾ ਹਿ ਕਿਤ੍ਤਿਮੇਨ ਵਾ ਨਾਮੇਨ ਮੁਤ੍ਤੋ ਸਤ੍ਤੋ ਵਾ ਸਙ੍ਖਾਰੋ ਵਾ ਨਤ੍ਥਿ. ਯਸ੍ਸਪਿ ਹਿ ਰੁਕ੍ਖਸ੍ਸ ਵਾ ਪਾਸਾਣਸ੍ਸ ਵਾ ‘‘ਇਦਂ ਨਾਮ ਨਾਮ’’ਨ੍ਤਿ ਨ ਜਾਨਨ੍ਤਿ, ਅਨਾਮਕੋਤ੍ਵੇਵ ਤਸ੍ਸ ਨਾਮਂ ਹੋਤਿ. ਪਠਮਂ.
੨-੩. ਚਿਤ੍ਤਸੁਤ੍ਤਾਦਿਵਣ੍ਣਨਾ
੬੨. ਦੁਤਿਯੇ ਸਬ੍ਬੇਵ ਵਸਮਨ੍ਵਗੂਤਿ ਯੇ ਚਿਤ੍ਤਸ੍ਸ ਵਸਂ ਗਚ੍ਛਨ੍ਤਿ, ਤੇਸਂਯੇਵ ਅਨਵਸੇਸਪਰਿਯਾਦਾਨਮੇਤਂ. ਦੁਤਿਯਂ.
੬੩. ਤਤਿਯੇਪਿ ਏਸੇਵ ਨਯੋ. ਤਤਿਯਂ.
੪-੫. ਸਂਯੋਜਨਸੁਤ੍ਤਾਦਿਵਣ੍ਣਨਾ
੬੪. ਚਤੁਤ੍ਥੇ ਕਿਂ ਸੁ ਸਂਯੋਜਨੋਤਿ ਕਿਂ ਸਂਯੋਜਨੋ ਕਿਂ ਬਨ੍ਧਨੋ? ਵਿਚਾਰਣਨ੍ਤਿ ਵਿਚਰਣਾ ਪਾਦਾਨਿ. ਬਹੁਵਚਨੇ ਏਕਵਚਨਂ ਕਤਂ. ਵਿਤਕ੍ਕਸ੍ਸ ਵਿਚਾਰਣਨ੍ਤਿ ਵਿਤਕ੍ਕੋ ਤਸ੍ਸ ਪਾਦਾ. ਚਤੁਤ੍ਥਂ.
੬੫. ਪਞ੍ਚਮੇਪਿ ਏਸੇਵ ਨਯੋ. ਪਞ੍ਚਮਂ.
੬. ਅਤ੍ਤਹਤਸੁਤ੍ਤਵਣ੍ਣਨਾ
੬੬. ਛਟ੍ਠੇ ਕੇਨਸ੍ਸੁਬ੍ਭਾਹਤੋਤਿ ਕੇਨ ਅਬ੍ਭਾਹਤੋ. ਸੁ-ਕਾਰੋ ਨਿਪਾਤਮਤ੍ਤਂ. ਇਚ੍ਛਾਧੂਪਾਯਿਤੋਤਿ ਇਚ੍ਛਾਯ ਆਦਿਤ੍ਤੋ. ਛਟ੍ਠਂ.
੭-੯. ਉਡ੍ਡਿਤਸੁਤ੍ਤਾਦਿਵਣ੍ਣਨਾ
੬੭. ਸਤ੍ਤਮੇ ਤਣ੍ਹਾਯ ਉਡ੍ਡਿਤੋਤਿ ਤਣ੍ਹਾਯ ਉਲ੍ਲਙ੍ਘਿਤੋ. ਚਕ੍ਖੁਞ੍ਹਿ ਤਣ੍ਹਾਰਜ੍ਜੁਨਾ ਆਵੁਨਿਤ੍ਵਾ ਰੂਪਨਾਗਦਨ੍ਤੇ ਉਡ੍ਡਿਤਂ, ਸੋਤਾਦੀਨਿ ਸਦ੍ਦਾਦੀਸੂਤਿ ਤਣ੍ਹਾਯ ਉਡ੍ਡਿਤੋ ਲੋਕੋ. ਮਚ੍ਚੁਨਾ ਪਿਹਿਤੋਤਿ ਅਨਨ੍ਤਰੇ ਅਤ੍ਤਭਾਵੇ ਕਤਂ ਕਮ੍ਮਂ ਨ ਦੂਰਂ ਏਕਚਿਤ੍ਤਨ੍ਤਰਂ, ਬਲਵਤਿਯਾ ਪਨ ਮਾਰਣਨ੍ਤਿਕਵੇਦਨਾਯ ਪਬ੍ਬਤੇਨ ਵਿਯ ਓਤ੍ਥਟਤ੍ਤਾ ਸਤ੍ਤਾ ਤਂ ਨ ਬੁਜ੍ਝਨ੍ਤੀਤਿ ‘‘ਮਚ੍ਚੁਨਾ ਪਿਹਿਤੋ ਲੋਕੋ’’ਤਿ ਵੁਤ੍ਤਂ. ਸਤ੍ਤਮਂ.
੬੮. ਅਟ੍ਠਮੇ ਸ੍ਵੇਵ ਪਞ੍ਹੋ ਦੇਵਤਾਯ ਹੇਟ੍ਠੁਪਰਿਯਾਯਵਸੇਨ ਪੁਚ੍ਛਿਤੋ. ਅਟ੍ਠਮਂ.
੬੯. ਨਵਮੇ ਸਬ੍ਬਂ ਉਤ੍ਤਾਨਮੇਵ. ਨਵਮਂ.
੧੦. ਲੋਕਸੁਤ੍ਤਵਣ੍ਣਨਾ
੭੦. ਦਸਮੇ ਕਿਸ੍ਮਿਂ ਲੋਕੋ ਸਮੁਪ੍ਪਨ੍ਨੋਤਿ ਕਿਸ੍ਮਿਂ ਉਪ੍ਪਨ੍ਨੇ ਲੋਕੋ ਉਪ੍ਪਨ੍ਨੋਤਿ ਪੁਚ੍ਛਤਿ. ਛਸੂਤਿ ਛਸੁ ਅਜ੍ਝਤ੍ਤਿਕੇਸੁ ਆਯਤਨੇਸੁ ਉਪ੍ਪਨ੍ਨੇਸੁ ਉਪ੍ਪਨ੍ਨੋਤਿ ਵੁਚ੍ਚਤਿ. ਛਸੁ ਕੁਬ੍ਬਤੀਤਿ ਤੇਸੁਯੇਵ ਛਸੁ ਸਨ੍ਥਵਂ ਕਰੋਤਿ. ਉਪਾਦਾਯਾਤਿ ਤਾਨਿਯੇਵ ਚ ਉਪਾਦਾਯ ਆਗਮ੍ਮ ਪਟਿਚ੍ਚ ਪਵਤ੍ਤਤਿ. ਵਿਹਞ੍ਞਤੀਤਿ ਤੇਸੁਯੇਵ ਛਸੁ ਵਿਹਞ੍ਞਤਿ ਪੀਲ਼ਿਯਤਿ. ਇਤਿ ਅਜ੍ਝਤ੍ਤਿਕਾਯਤਨਵਸੇਨ ਅਯਂ ਪਞ੍ਹੋ ਆਗਤੋ, ਅਜ੍ਝਤ੍ਤਿਕਬਾਹਿਰਾਨਂ ਪਨ ਵਸੇਨ ਆਹਰਿਤੁਂ ਵਟ੍ਟਤਿ. ਛਸੁ ਹਿ ਅਜ੍ਝਤ੍ਤਿਕਾਯਤਨੇਸੁ ਉਪ੍ਪਨ੍ਨੇਸੁ ਅਯਂ ਉਪ੍ਪਨ੍ਨੋ ਨਾਮ ਹੋਤਿ, ਛਸੁ ਬਾਹਿਰੇਸੁ ਸਨ੍ਥਵਂ ਕਰੋਤਿ, ਛਨ੍ਨਂ ਅਜ੍ਝਤ੍ਤਿਕਾਨਂ ਉਪਾਦਾਯ ਛਸੁ ਬਾਹਿਰੇਸੁ ਵਿਹਞ੍ਞਤੀਤਿ. ਦਸਮਂ.
ਅਦ੍ਧਵਗ੍ਗੋ ਸਤ੍ਤਮੋ.