੭. ਸਮਯਸੁਤ੍ਤਵਣ੍ਣਨਾ

੩੭. ਸਤ੍ਤਮੇ ਸਕ੍ਕੇਸੂਤਿ ‘‘ਸਕ੍ਯਾ ਵਤ, ਭੋ ਕੁਮਾਰਾ’’ਤਿ (ਦੀ. ਨਿ. ੧.੨੬੭) ਉਦਾਨਂ ਪਟਿਚ੍ਚ ਸਕ੍ਕਾਤਿ ਲਦ੍ਧਨਾਮਾਨਂ ਰਾਜਕੁਮਾਰਾਨਂ ਨਿਵਾਸੋ ਏਕੋਪਿ ਜਨਪਦੋ ਰੂਲ਼੍ਹੀਸਦ੍ਦੇਨ ਸਕ੍ਕਾਤਿ ਵੁਚ੍ਚਤਿ. ਤਸ੍ਮਿਂ ਸਕ੍ਕੇਸੁ ਜਨਪਦੇ. ਮਹਾਵਨੇਤਿ ਸਯਂਜਾਤੇ ਅਰੋਪਿਮੇ ਹਿਮਵਨ੍ਤੇਨ ਸਦ੍ਧਿਂ ਏਕਾਬਦ੍ਧੇ ਮਹਤਿ ਵਨੇ. ਸਬ੍ਬੇਹੇਵ ਅਰਹਨ੍ਤੇਹੀਤਿ ਇਮਂ ਸੁਤ੍ਤਂ ਕਥਿਤਦਿਵਸੇਯੇਵ ਪਤ੍ਤਅਰਹਨ੍ਤੇਹਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਸਾਕਿਯਕੋਲਿਯਾ ਹਿ ਕਿਰ ਕਪਿਲਵਤ੍ਥੁਨਗਰਸ੍ਸ ਚ ਕੋਲਿਯਨਗਰਸ੍ਸ ਚ ਅਨ੍ਤਰੇ ਰੋਹਿਣਿਂ ਨਾਮ ਨਦਿਂ ਏਕੇਨੇਵ ਆਵਰਣੇਨ ਬਨ੍ਧਾਪੇਤ੍ਵਾ ਸਸ੍ਸਾਨਿ ਕਾਰੇਨ੍ਤਿ. ਅਥ ਜੇਟ੍ਠਮੂਲਮਾਸੇ ਸਸ੍ਸੇਸੁ ਮਿਲਾਯਨ੍ਤੇਸੁ ਉਭਯਨਗਰਵਾਸੀਨਮ੍ਪਿ ਕਮ੍ਮਕਾਰਾ ਸਨ੍ਨਿਪਤਿਂਸੁ. ਤਤ੍ਥ ਕੋਲਿਯਨਗਰਵਾਸਿਨੋ ਆਹਂਸੁ – ‘‘ਇਦਂ ਉਦਕਂ ਉਭਯਤੋ ਆਹਰਿਯਮਾਨਂ ਨ ਤੁਮ੍ਹਾਕਂ, ਨ ਅਮ੍ਹਾਕਂ ਪਹੋਸ੍ਸਤਿ, ਅਮ੍ਹਾਕਂ ਪਨ ਸਸ੍ਸਂ ਏਕੇਨ ਉਦਕੇਨੇਵ ਨਿਪ੍ਫਜ੍ਜਿਸ੍ਸਤਿ, ਇਦਂ ਉਦਕਂ ਅਮ੍ਹਾਕਂ ਦੇਥਾ’’ਤਿ. ਕਪਿਲਵਤ੍ਥੁਵਾਸਿਨੋ ਆਹਂਸੁ – ‘‘ਤੁਮ੍ਹੇਸੁ ਕੋਟ੍ਠੇ ਪੂਰੇਤ੍ਵਾ ਠਿਤੇਸੁ ਮਯਂ ਰਤ੍ਤਸੁਵਣ੍ਣਨੀਲਮਣਿਕਾਲ਼ਕਹਾਪਣੇ ਚ ਗਹੇਤ੍ਵਾ ਪਚ੍ਛਿਪਸਿਬ੍ਬਕਾਦਿਹਤ੍ਥਾ ਨ ਸਕ੍ਖਿਸ੍ਸਾਮ ਤੁਮ੍ਹਾਕਂ ਘਰਦ੍ਵਾਰੇ ਵਿਚਰਿਤੁਂ, ਅਮ੍ਹਾਕਮ੍ਪਿ ਸਸ੍ਸਂ ਏਕੇਨੇਵ ਉਦਕੇਨ ਨਿਪ੍ਫਜ੍ਜਿਸ੍ਸਤਿ, ਇਦਂ ਉਦਕਂ ਅਮ੍ਹਾਕਂ ਦੇਥਾ’’ਤਿ. ‘‘ਨ ਮਯਂ ਦਸ੍ਸਾਮਾ’’ਤਿ. ‘‘ਮਯਮ੍ਪਿ ਨ ਦਸ੍ਸਾਮਾ’’ਤਿ. ਏਵਂ ਕਥਂ ਵਡ੍ਢੇਤ੍ਵਾ ਏਕੋ ਉਟ੍ਠਾਯ ਏਕਸ੍ਸ ਪਹਾਰਂ ਅਦਾਸਿ, ਸੋਪਿ ਅਞ੍ਞਸ੍ਸਾਤਿ ਏਵਂ ਅਞ੍ਞਮਞ੍ਞਂ ਪਹਰਿਤ੍ਵਾ ਰਾਜਕੁਲਾਨਂ ਜਾਤਿਂ ਘਟ੍ਟੇਤ੍ਵਾ ਕਲਹਂ ਵਡ੍ਢਯਿਂਸੁ.

ਕੋਲਿਯਕਮ੍ਮਕਾਰਾ ਵਦਨ੍ਤਿ – ‘‘ਤੁਮ੍ਹੇ ਕਪਿਲਵਤ੍ਥੁਵਾਸਿਕੇ ਗਹੇਤ੍ਵਾ ਗਜ੍ਜਥ, ਯੇ ਸੋਣਸਿਙ੍ਗਾਲਾਦਯੋ ਵਿਯ ਅਤ੍ਤਨੋ ਭਗਿਨੀਹਿ ਸਦ੍ਧਿਂ ਸਂਵਸਿਂਸੁ, ਏਤੇਸਂ ਹਤ੍ਥਿਨੋ ਚ ਅਸ੍ਸਾ ਚ ਫਲਕਾਵੁਧਾਨਿ ਚ ਅਮ੍ਹਾਕਂ ਕਿਂ ਕਰਿਸ੍ਸਨ੍ਤੀ’’ਤਿ? ਸਾਕਿਯਕਮ੍ਮਕਾਰਾ ਵਦਨ੍ਤਿ – ‘‘ਤੁਮ੍ਹੇ ਦਾਨਿ ਕੁਟ੍ਠਿਨੋ ਦਾਰਕੇ ਗਹੇਤ੍ਵਾ ਗਜ੍ਜਥ, ਯੇ ਅਨਾਥਾ ਨਿਗ੍ਗਤਿਕਾ ਤਿਰਚ੍ਛਾਨਾ ਵਿਯ ਕੋਲਰੁਕ੍ਖੇ ਵਸਿਂਸੁ, ਏਤੇਸਂ ਹਤ੍ਥਿਨੋ ਚ ਅਸ੍ਸਾ ਚ ਫਲਕਾਵੁਧਾਨਿ ਚ ਅਮ੍ਹਾਕਂ ਕਿਂ ਕਰਿਸ੍ਸਨ੍ਤੀ’’ਤਿ? ਤੇ ਗਨ੍ਤ੍ਵਾ ਤਸ੍ਮਿਂ ਕਮ੍ਮੇ ਨਿਯੁਤ੍ਤਅਮਚ੍ਚਾਨਂ ਕਥੇਸੁਂ, ਅਮਚ੍ਚਾ ਰਾਜਕੁਲਾਨਂ ਕਥੇਸੁਂ. ਤਤੋ ਸਾਕਿਯਾ – ‘‘ਭਗਿਨੀਹਿ ਸਦ੍ਧਿਂ ਸਂਵਸਿਤਕਾਨਂ ਥਾਮਞ੍ਚ ਬਲਞ੍ਚ ਦਸ੍ਸੇਸ੍ਸਾਮਾ’’ਤਿ ਯੁਦ੍ਧਸਜ੍ਜਾ ਨਿਕ੍ਖਮਿਂਸੁ. ਕੋਲਿਯਾਪਿ – ‘‘ਕੋਲਰੁਕ੍ਖਵਾਸੀਨਂ ਥਾਮਞ੍ਚ ਬਲਞ੍ਚ ਦਸ੍ਸੇਸ੍ਸਾਮਾ’’ਤਿ ਯੁਦ੍ਧਸਜ੍ਜਾ ਨਿਕ੍ਖਮਿਂਸੁ.

ਭਗਵਾਪਿ ਰਤ੍ਤਿਯਾ ਪਚ੍ਚੂਸਸਮਯੇਵ ਮਹਾਕਰੁਣਾਸਮਾਪਤ੍ਤਿਤੋ ਉਟ੍ਠਾਯ ਲੋਕਂ ਵੋਲੋਕੇਨ੍ਤੋ ਇਮੇ ਏਵਂ ਯੁਦ੍ਧਸਜ੍ਜੇ ਨਿਕ੍ਖਮਨ੍ਤੇ ਅਦ੍ਦਸ. ਦਿਸ੍ਵਾ – ‘‘ਮਯਿ ਗਤੇ ਅਯਂ ਕਲਹੋ ਵੂਪਸਮ੍ਮਿਸ੍ਸਤਿ ਨੁ ਖੋ ਉਦਾਹੁ ਨੋ’’ਤਿ ਉਪਧਾਰੇਨ੍ਤੋ – ‘‘ਅਹਮੇਤ੍ਥ ਗਨ੍ਤ੍ਵਾ ਕਲਹਵੂਪਸਮਨਤ੍ਥਂ ਤੀਣਿ ਜਾਤਕਾਨਿ ਕਥੇਸ੍ਸਾਮਿ, ਤਤੋ ਕਲਹੋ ਵੂਪਸਮ੍ਮਿਸ੍ਸਤਿ. ਅਥ ਸਾਮਗ੍ਗਿਦੀਪਨਤ੍ਥਾਯ ਦ੍ਵੇ ਜਾਤਕਾਨਿ ਕਥੇਤ੍ਵਾ ਅਤ੍ਤਦਣ੍ਡਸੁਤ੍ਤਂ ਦੇਸੇਸ੍ਸਾਮਿ. ਦੇਸਨਂ ਸੁਤ੍ਵਾ ਉਭਯਨਗਰਵਾਸਿਨੋਪਿ ਅਡ੍ਢਤਿਯਾਨਿ ਅਡ੍ਢਤਿਯਾਨਿ ਕੁਮਾਰਸਤਾਨਿ ਦਸ੍ਸਨ੍ਤਿ, ਅਹਂ ਤੇ ਪਬ੍ਬਾਜੇਸ੍ਸਾਮਿ, ਤਦਾ ਮਹਾਸਮਾਗਮੋ ਭਵਿਸ੍ਸਤੀ’’ਤਿ ਸਨ੍ਨਿਟ੍ਠਾਨਂ ਅਕਾਸਿ. ਤਸ੍ਮਾ ਇਮੇਸੁ ਯੁਦ੍ਧਸਜ੍ਜੇਸੁ ਨਿਕ੍ਖਮਨ੍ਤੇਸੁ ਕਸ੍ਸਚਿ ਅਨਾਰੋਚੇਤ੍ਵਾ ਸਯਮੇਵ ਪਤ੍ਤਚੀਵਰਮਾਦਾਯ ਗਨ੍ਤ੍ਵਾ ਦ੍ਵਿਨ੍ਨਂ ਸੇਨਾਨਂ ਅਨ੍ਤਰੇ ਆਕਾਸੇ ਪਲ੍ਲਙ੍ਕਂ ਆਭੁਜਿਤ੍ਵਾ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਨਿਸੀਦਿ.

ਕਪਿਲਵਤ੍ਥੁਵਾਸਿਨੋ ਭਗਵਨ੍ਤਂ ਦਿਸ੍ਵਾਵ, ‘‘ਅਮ੍ਹਾਕਂ ਞਾਤਿਸੇਟ੍ਠੋ ਸਤ੍ਥਾ ਆਗਤੋ. ਦਿਟ੍ਠੋ ਨੁ ਖੋ ਤੇਨ ਅਮ੍ਹਾਕਂ ਕਲਹਕਰਣਭਾਵੋ’’ਤਿ ਚਿਨ੍ਤੇਤ੍ਵਾ, ‘‘ਨ ਖੋ ਪਨ ਸਕ੍ਕਾ ਭਗਵਤਿ ਆਗਤੇ ਅਮ੍ਹੇਹਿ ਪਰਸ੍ਸ ਸਰੀਰੇ ਸਤ੍ਥਂ ਪਾਤੇਤੁਂ. ਕੋਲਿਯਨਗਰਵਾਸਿਨੋ ਅਮ੍ਹੇ ਹਨਨ੍ਤੁ ਵਾ ਬਜ੍ਝਨ੍ਤੁ ਵਾ’’ਤਿ. ਆਵੁਧਾਨਿ ਛਡ੍ਡੇਤ੍ਵਾ, ਭਗਵਨ੍ਤਂ ਵਨ੍ਦਿਤ੍ਵਾ, ਨਿਸੀਦਿਂਸੁ. ਕੋਲਿਯਨਗਰਵਾਸਿਨੋਪਿ ਤਥੇਵ ਚਿਨ੍ਤੇਤ੍ਵਾ ਆਵੁਧਾਨਿ ਛਡ੍ਡੇਤ੍ਵਾ, ਭਗਵਨ੍ਤਂ ਵਨ੍ਦਿਤ੍ਵਾ, ਨਿਸੀਦਿਂਸੁ.

ਭਗਵਾ ਜਾਨਨ੍ਤੋਵ, ‘‘ਕਸ੍ਮਾ ਆਗਤਤ੍ਥ, ਮਹਾਰਾਜਾ’’ਤਿ ਪੁਚ੍ਛਿ? ‘‘ਨ, ਭਗਵਾ, ਤਿਤ੍ਥਕੀਲ਼ਾਯ ਨ ਪਬ੍ਬਤਕੀਲ਼ਾਯ, ਨ ਨਦੀਕੀਲ਼ਾਯ, ਨ ਗਿਰਿਦਸ੍ਸਨਤ੍ਥਂ, ਇਮਸ੍ਮਿਂ ਪਨ ਠਾਨੇ ਸਙ੍ਗਾਮਂ ਪਚ੍ਚੁਪਟ੍ਠਪੇਤ੍ਵਾ ਆਗਤਮ੍ਹਾ’’ਤਿ. ‘‘ਕਿਂ ਨਿਸ੍ਸਾਯ ਵੋ ਕਲਹੋ, ਮਹਾਰਾਜਾਤਿ? ਉਦਕਂ, ਭਨ੍ਤੇਤਿ. ਉਦਕਂ ਕਿਂ ਅਗ੍ਘਤਿ, ਮਹਾਰਾਜਾਤਿ? ਅਪ੍ਪਂ, ਭਨ੍ਤੇਤਿ. ਪਥਵੀ ਨਾਮ ਕਿਂ ਅਗ੍ਘਤਿ, ਮਹਾਰਾਜਾਤਿ? ਅਨਗ੍ਘਾ, ਭਨ੍ਤੇਤਿ. ਖਤ੍ਤਿਯਾ ਕਿਂ ਅਗ੍ਘਨ੍ਤੀਤਿ? ਖਤ੍ਤਿਯਾ ਨਾਮ ਅਨਗ੍ਘਾ, ਭਨ੍ਤੇਤਿ. ਅਪ੍ਪਮੂਲਂ ਉਦਕਂ ਨਿਸ੍ਸਾਯ ਕਿਮਤ੍ਥਂ ਅਨਗ੍ਘੇ ਖਤ੍ਤਿਯੇ ਨਾਸੇਥ, ਮਹਾਰਾਜ, ਕਲਹੇ ਅਸ੍ਸਾਦੋ ਨਾਮ ਨਤ੍ਥਿ, ਕਲਹਵਸੇਨ, ਮਹਾਰਾਜ, ਅਟ੍ਠਾਨੇ ਵੇਰਂ ਕਤ੍ਵਾ ਏਕਾਯ ਰੁਕ੍ਖਦੇਵਤਾਯ ਕਾਲ਼ਸੀਹੇਨ ਸਦ੍ਧਿਂ ਬਦ੍ਧਾਘਾਤੋ ਸਕਲਮ੍ਪਿ ਇਮਂ ਕਪ੍ਪਂ ਅਨੁਪ੍ਪਤ੍ਤੋਯੇਵਾਤਿ ਵਤ੍ਵਾ ਫਨ੍ਦਨਜਾਤਕਂ (ਜਾ. ੧.੧੩.੧੪ ਆਦਯੋ) ਕਥੇਸਿ’’. ਤਤੋ ‘‘ਪਰਪਤ੍ਤਿਯੇਨ ਨਾਮ, ਮਹਾਰਾਜ, ਨ ਭਵਿਤਬ੍ਬਂ. ਪਰਪਤ੍ਤਿਯਾ ਹੁਤ੍ਵਾ ਹਿ ਏਕਸ੍ਸ ਸਸਕਸ੍ਸ ਕਥਾਯ ਤਿਯੋਜਨਸਹਸ੍ਸਵਿਤ੍ਥਤੇ ਹਿਮਵਨ੍ਤੇ ਚਤੁਪ੍ਪਦਗਣਾ ਮਹਾਸਮੁਦ੍ਦਂ ਪਕ੍ਖਨ੍ਦਿਨੋ ਅਹੇਸੁਂ. ਤਸ੍ਮਾ ਪਰਪਤ੍ਤਿਯੇਨ ਨ ਭਵਿਤਬ੍ਬ’’ਨ੍ਤਿ ਵਤ੍ਵਾ, ਪਥਵੀਉਨ੍ਦ੍ਰਿਯਜਾਤਕਂ ਕਥੇਸਿ. ਤਤੋ ‘‘ਕਦਾਚਿ, ਮਹਾਰਾਜ, ਦੁਬ੍ਬਲੋਪਿ ਮਹਾਬਲਸ੍ਸ ਰਨ੍ਧਂ ਵਿਵਰਂ ਪਸ੍ਸਤਿ, ਕਦਾਚਿ ਮਹਾਬਲੋ ਦੁਬ੍ਬਲਸ੍ਸ. ਲਟੁਕਿਕਾਪਿ ਹਿ ਸਕੁਣਿਕਾ ਹਤ੍ਥਿਨਾਗਂ ਘਾਤੇਸੀ’’ਤਿ ਲਟੁਕਿਕਜਾਤਕਂ (ਜਾ. ੧.੫.੩੯ ਆਦਯੋ) ਕਥੇਸਿ. ਏਵਂ ਕਲਹਵੂਪਸਮਨਤ੍ਥਾਯ ਤੀਣਿ ਜਾਤਕਾਨਿ ਕਥੇਤ੍ਵਾ ਸਾਮਗ੍ਗਿਪਰਿਦੀਪਨਤ੍ਥਾਯ ਦ੍ਵੇ ਜਾਤਕਾਨਿ ਕਥੇਸਿ. ਕਥਂ? ‘‘ਸਮਗ੍ਗਾਨਞ੍ਹਿ, ਮਹਾਰਾਜ, ਕੋਚਿ ਓਤਾਰਂ ਨਾਮ ਪਸ੍ਸਿਤੁਂ ਨ ਸਕ੍ਕੋਤੀਤਿ ਵਤ੍ਵਾ, ਰੁਕ੍ਖਧਮ੍ਮਜਾਤਕਂ (ਜਾ. ੧.੧.੭੪) ਕਥੇਸਿ. ਤਤੋ ‘‘ਸਮਗ੍ਗਾਨਂ, ਮਹਾਰਾਜ, ਕੋਚਿ ਵਿਵਰਂ ਦਸ੍ਸਿਤੁਂ ਨ ਸਕ੍ਖਿ. ਯਦਾ ਪਨ ਅਞ੍ਞਮਞ੍ਞਂ ਵਿਵਾਦਮਕਂਸੁ, ਅਥ ਤੇ ਨੇਸਾਦਪੁਤ੍ਤੋ ਜੀਵਿਤਾ ਵੋਰੋਪੇਤ੍ਵਾ ਆਦਾਯ ਗਤੋਤਿ ਵਿਵਾਦੇ ਅਸ੍ਸਾਦੋ ਨਾਮ ਨਤ੍ਥੀ’’ਤਿ ਵਤ੍ਵਾ, ਵਟ੍ਟਕਜਾਤਕਂ (ਜਾ. ੧.੧.੧੧੮) ਕਥੇਸਿ. ਏਵਂ ਇਮਾਨਿ ਪਞ੍ਚ ਜਾਤਕਾਨਿ ਕਥੇਤ੍ਵਾ ਅਵਸਾਨੇ ਅਤ੍ਤਦਣ੍ਡਸੁਤ੍ਤਂ (ਸੁ. ਨਿ. ੯੪੧ ਆਦਯੋ) ਕਥੇਸਿ.

ਰਾਜਾਨੋ ਪਸਨ੍ਨਾ – ‘‘ਸਚੇ ਸਤ੍ਥਾ ਨਾਗਮਿਸ੍ਸ, ਮਯਂ ਸਹਤ੍ਥਾ ਅਞ੍ਞਮਞ੍ਞਂ ਵਧਿਤ੍ਵਾ ਲੋਹਿਤਨਦਿਂ ਪਵਤ੍ਤਯਿਸ੍ਸਾਮ. ਅਮ੍ਹਾਕਂ ਪੁਤ੍ਤਭਾਤਰੋ ਚ ਗੇਹਦ੍ਵਾਰੇ ਨ ਪਸ੍ਸੇਯ੍ਯਾਮ, ਸਾਸਨਪਟਿਸਾਸਨਮ੍ਪਿ ਨੋ ਆਹਰਣਕੋ ਨਾਭਵਿਸ੍ਸ. ਸਤ੍ਥਾਰਂ ਨਿਸ੍ਸਾਯ ਨੋ ਜੀਵਿਤਂ ਲਦ੍ਧਂ. ਸਚੇ ਪਨ ਸਤ੍ਥਾ ਆਗਾਰਂ ਅਜ੍ਝਾਵਸਿਸ੍ਸ ਦੀਪਸਹਸ੍ਸਦ੍ਵਯਪਰਿਵਾਰਂ ਚਤੁਮਹਾਦੀਪਰਜ੍ਜਮਸ੍ਸ ਹਤ੍ਥਗਤਂ ਅਭਵਿਸ੍ਸ, ਅਤਿਰੇਕਸਹਸ੍ਸਂ ਖੋ ਪਨਸ੍ਸ ਪੁਤ੍ਤਾ ਅਭਵਿਸ੍ਸਂਸੁ, ਤਤੋ ਖਤ੍ਤਿਯਪਰਿਵਾਰੋ ਅਵਿਚਰਿਸ੍ਸ. ਤਂ ਖੋ ਪਨੇਸ ਸਮ੍ਪਤ੍ਤਿਂ ਪਹਾਯ ਨਿਕ੍ਖਮਿਤ੍ਵਾ ਸਮ੍ਬੋਧਿਂ ਪਤ੍ਤੋ. ਇਦਾਨਿਪਿ ਖਤ੍ਤਿਯਪਰਿਵਾਰੋਯੇਵ ਵਿਚਰਤੂ’’ਤਿ ਉਭਯਨਗਰਵਾਸਿਨੋ ਅਡ੍ਢਤਿਯਾਨਿ ਅਡ੍ਢਤਿਯਾਨਿ ਕੁਮਾਰਸਤਾਨਿ ਅਦਂਸੁ. ਭਗਵਾਪਿ ਤੇ ਪਬ੍ਬਾਜੇਤ੍ਵਾ ਮਹਾਵਨਂ ਅਗਮਾਸਿ. ਤੇਸਂ ਗਰੁਗਾਰਵੇਨ ਨ ਅਤ੍ਤਨੋ ਰੁਚਿਯਾ ਪਬ੍ਬਜਿਤਾਨਂ ਅਨਭਿਰਤਿ ਉਪ੍ਪਜ੍ਜਿ. ਪੁਰਾਣਦੁਤਿਯਿਕਾਯੋਪਿ ਤੇਸਂ – ‘‘ਅਯ੍ਯਪੁਤ੍ਤਾ ਉਕ੍ਕਣ੍ਠਨ੍ਤੁ, ਘਰਾਵਾਸੋ ਨ ਸਣ੍ਠਾਤੀ’’ਤਿਆਦੀਨਿ ਵਤ੍ਵਾ ਸਾਸਨਂ ਪੇਸੇਨ੍ਤਿ. ਤੇ ਚ ਅਤਿਰੇਕਤਰਂ ਉਕ੍ਕਣ੍ਠਿਂਸੁ.

ਭਗਵਾ ਆਵਜ੍ਜੇਨ੍ਤੋ ਤੇਸਂ ਅਨਭਿਰਤਿਭਾਵਂ ਞਤ੍ਵਾ – ‘‘ਇਮੇ ਭਿਕ੍ਖੂ ਮਾਦਿਸੇਨ ਬੁਦ੍ਧੇਨ ਸਦ੍ਧਿਂ ਏਕਤੋ ਵਸਨ੍ਤਾ ਉਕ੍ਕਣ੍ਠਨ੍ਤਿ, ਹਨ੍ਦ ਨੇਸਂ ਕੁਣਾਲਦਹਸ੍ਸ ਵਣ੍ਣਂ ਕਥੇਤ੍ਵਾ ਤਤ੍ਥ ਨੇਤ੍ਵਾ ਅਨਭਿਰਤਿਂ ਵਿਨੋਦੇਮੀ’’ਤਿ ਕੁਣਾਲਦਹਸ੍ਸ ਵਣ੍ਣਂ ਕਥੇਸਿ. ਤੇ ਤਂ ਦਟ੍ਠੁਕਾਮਾ ਅਹੇਸੁਂ. ਦਟ੍ਠੁਕਾਮਤ੍ਥ, ਭਿਕ੍ਖਵੇ, ਕੁਣਾਲਦਹਨ੍ਤਿ? ਆਮ ਭਗਵਾਤਿ. ਯਦਿ ਏਵਂ ਏਥ ਗਚ੍ਛਾਮਾਤਿ. ਇਦ੍ਧਿਮਨ੍ਤਾਨਂ ਭਗਵਾ ਗਮਨਟ੍ਠਾਨਂ ਮਯਂ ਕਥਂ ਗਮਿਸ੍ਸਾਮਾਤਿ. ਤੁਮ੍ਹੇ ਗਨ੍ਤੁਕਾਮਾ ਹੋਥ, ਅਹਂ ਮਮਾਨੁਭਾਵੇਨ ਗਹੇਤ੍ਵਾ ਗਮਿਸ੍ਸਾਮੀਤਿ. ਸਾਧੁ, ਭਨ੍ਤੇਤਿ. ਭਗਵਾ ਪਞ੍ਚ ਭਿਕ੍ਖੁਸਤਾਨਿ ਗਹੇਤ੍ਵਾ ਆਕਾਸੇ ਉਪ੍ਪਤਿਤ੍ਵਾ ਕੁਣਾਲਦਹੇ ਪਤਿਟ੍ਠਾਯ ਤੇ ਭਿਕ੍ਖੂ ਆਹ – ‘‘ਭਿਕ੍ਖਵੇ, ਇਮਸ੍ਮਿਂ ਕੁਣਾਲਦਹੇ ਯੇਸਂ ਮਚ੍ਛਾਨਂ ਨਾਮਂ ਨ ਜਾਨਾਥ ਮਮਂ ਪੁਚ੍ਛਥਾ’’ਤਿ.

ਤੇ ਪੁਚ੍ਛਿਂਸੁ. ਭਗਵਾ ਪੁਚ੍ਛਿਤਂ ਪੁਚ੍ਛਿਤਂ ਕਥੇਸਿ. ਨ ਕੇਵਲਞ੍ਚ, ਮਚ੍ਛਾਨਂਯੇਵ, ਤਸ੍ਮਿਂ ਵਨਸਣ੍ਡੇ ਰੁਕ੍ਖਾਨਮ੍ਪਿ ਪਬ੍ਬਤਪਾਦੇ ਦ੍ਵਿਪਦਚਤੁਪ੍ਪਦਸਕੁਣਾਨਮ੍ਪਿ ਨਾਮਾਨਿ ਪੁਚ੍ਛਾਪੇਤ੍ਵਾ ਕਥੇਸਿ. ਅਥ ਦ੍ਵੀਹਿ ਸਕੁਣੇਹਿ ਮੁਖਤੁਣ੍ਡਕੇਨ ਡਂਸਿਤ੍ਵਾ ਗਹਿਤਦਣ੍ਡਕੇ ਨਿਸਿਨ੍ਨੋ ਕੁਣਾਲਸਕੁਣਰਾਜਾ ਪੁਰਤੋ ਪਚ੍ਛਤੋ ਉਭੋਸੁ ਚ ਪਸ੍ਸੇਸੁ ਸਕੁਣਸਙ੍ਘਪਰਿਵੁਤੋ ਆਗਚ੍ਛਤਿ. ਭਿਕ੍ਖੂ ਤਂ ਦਿਸ੍ਵਾ – ‘‘ਏਸ, ਭਨ੍ਤੇ, ਇਮੇਸਂ ਸਕੁਣਾਨਂ ਰਾਜਾ ਭਵਿਸ੍ਸਤਿ, ਪਰਿਵਾਰਾ ਏਤੇ ਏਤਸ੍ਸਾ’’ਤਿ ਮਞ੍ਞਾਮਾਤਿ. ਏਵਮੇਤਂ, ਭਿਕ੍ਖਵੇ, ਅਯਮ੍ਪਿ ਮਮੇਵ ਵਂਸੋ ਮਮ ਪਵੇਣੀਤਿ. ਇਦਾਨਿ ਤਾਵ ਮਯਂ, ਭਨ੍ਤੇ, ਏਤੇ ਸਕੁਣੇ ਪਸ੍ਸਾਮ. ਯਂ ਪਨ ਭਗਵਾ ‘‘ਅਯਮ੍ਪਿ ਮਮੇਵ ਵਂਸੋ ਮਮ ਪਵੇਣੀ’’ਤਿ ਆਹ, ਤਂ ਸੋਤੁਕਾਮਮ੍ਹਾਤਿ. ਸੋਤੁਕਾਮਤ੍ਥ, ਭਿਕ੍ਖਵੇਤਿ? ਆਮ ਭਗਵਾਤਿ. ਤੇਨ ਹਿ ਸੁਣਾਥਾਤਿ ਤੀਹਿ ਗਾਥਾਸਤੇਹਿ ਮਣ੍ਡੇਤ੍ਵਾ ਕੁਣਾਲਜਾਤਕਂ (ਜਾ. ੨.੨੧.ਕੁਣਾਲਜਾਤਕ) ਕਥੇਨ੍ਤੋ ਅਨਭਿਰਤਿਂ ਵਿਨੋਦੇਸਿ. ਦੇਸਨਾਪਰਿਯੋਸਾਨੇ ਸਬ੍ਬੇਪਿ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ, ਮਗ੍ਗੇਨੇਵ ਚ ਨੇਸਂ ਇਦ੍ਧਿਪਿ ਆਗਤਾ. ਭਗਵਾ ‘‘ਹੋਤੁ ਤਾਵ ਏਤ੍ਤਕਂ ਤੇਸਂ ਭਿਕ੍ਖੂਨ’’ਨ੍ਤਿ ਆਕਾਸੇ ਉਪ੍ਪਤਿਤ੍ਵਾ ਮਹਾਵਨਮੇਵ ਅਗਮਾਸਿ. ਤੇਪਿ ਭਿਕ੍ਖੂ ਗਮਨਕਾਲੇ ਦਸਬਲਸ੍ਸ ਆਨੁਭਾਵੇਨ ਗਨ੍ਤ੍ਵਾ ਆਗਮਨਕਾਲੇ ਅਤ੍ਤਨੋ ਆਨੁਭਾਵੇਨ ਭਗਵਨ੍ਤਂ ਪਰਿਵਾਰੇਤ੍ਵਾ ਮਹਾਵਨੇ ਓਤਰਿਂਸੁ.

ਭਗਵਾ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ਤੇ ਭਿਕ੍ਖੂ ਆਮਨ੍ਤੇਤ੍ਵਾ – ‘‘ਏਥ, ਭਿਕ੍ਖਵੇ, ਨਿਸੀਦਥ. ਉਪਰਿਮਗ੍ਗਤ੍ਤਯਵਜ੍ਝਾਨਂ ਵੋ ਕਿਲੇਸਾਨਂ ਕਮ੍ਮਟ੍ਠਾਨਂ ਕਥੇਸ੍ਸਾਮੀ’’ਤਿ ਕਮ੍ਮਟ੍ਠਾਨਂ ਕਥੇਸਿ. ਭਿਕ੍ਖੂ ਚਿਨ੍ਤਯਿਂਸੁ – ‘‘ਭਗਵਾ ਅਮ੍ਹਾਕਂ ਅਨਭਿਰਤਭਾਵਂ ਞਤ੍ਵਾ ਕੁਣਾਲਦਹਂ ਨੇਤ੍ਵਾ ਅਨਭਿਰਤਿਂ ਵਿਨੋਦੇਸਿ, ਤਤ੍ਥ ਸੋਤਾਪਤ੍ਤਿਫਲਂ ਪਤ੍ਤਾਨਂ ਨੋ ਇਦਾਨਿ ਇਧ ਤਿਣ੍ਣਂ ਮਗ੍ਗਾਨਂ ਕਮ੍ਮਟ੍ਠਾਨਂ ਅਦਾਸਿ, ਨ ਖੋ ਪਨ ਅਮ੍ਹੇਹਿ ‘ਸੋਤਾਪਨ੍ਨਾ ਮਯ’ਨ੍ਤਿ ਵੀਤਿਨਾਮੇਤੁਂ ਵਟ੍ਟਤਿ, ਪੁਰਿਸਪੁਰਿਸੇਹਿ ਨੋ ਭਵਿਤੁਂ ਵਟ੍ਟਤੀ’’ਤਿ ਤੇ ਦਸਬਲਸ੍ਸ ਪਾਦੇ ਵਨ੍ਦਿਤ੍ਵਾ ਉਟ੍ਠਾਯ ਨਿਸੀਦਨਂ ਪਪ੍ਫੋਟੇਤ੍ਵਾ ਵਿਸੁਂ ਵਿਸੁਂ ਪਬ੍ਭਾਰਰੁਕ੍ਖਮੂਲੇਸੁ ਨਿਸੀਦਿਂਸੁ.

ਭਗਵਾ ਚਿਨ੍ਤੇਸਿ – ‘‘ਇਮੇ ਭਿਕ੍ਖੂ ਪਕਤਿਯਾਪਿ ਅਵਿਸ੍ਸਟ੍ਠਕਮ੍ਮਟ੍ਠਾਨਾ, ਲਦ੍ਧੁਪਾਯਸ੍ਸ ਪਨ ਭਿਕ੍ਖੁਨੋ ਕਿਲਮਨਕਾਰਣਂ ਨਾਮ ਨਤ੍ਥਿ. ਗਚ੍ਛਨ੍ਤਾ ਗਚ੍ਛਨ੍ਤਾ ਚ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਤ੍ਵਾ ‘ਅਤ੍ਤਨਾ ਪਟਿਵਿਦ੍ਧਗੁਣਂ ਆਰੋਚੇਸ੍ਸਾਮਾ’ਤਿ ਮਮ ਸਨ੍ਤਿਕਂ ਆਗਮਿਸ੍ਸਨ੍ਤਿ. ਏਤੇਸੁ ਆਗਤੇਸੁ ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਏਕਚਕ੍ਕਵਾਲ਼ੇ ਸਨ੍ਨਿਪਤਿਸ੍ਸਨ੍ਤਿ, ਮਹਾਸਮਯੋ ਭਵਿਸ੍ਸਤਿ, ਵਿਵਿਤ੍ਤੇ ਓਕਾਸੇ ਮਯਾ ਨਿਸੀਦਿਤੁਂ ਵਟ੍ਟਤੀ’’ਤਿ ਤਤੋ ਵਿਵਿਤ੍ਤੇ ਓਕਾਸੇ ਬੁਦ੍ਧਾਸਨਂ ਪਞ੍ਞਾਪੇਤ੍ਵਾ ਨਿਸੀਦਿ.

ਸਬ੍ਬਪਠਮਂ ਕਮ੍ਮਟ੍ਠਾਨਂ ਗਹੇਤ੍ਵਾ ਗਤਤ੍ਥੇਰੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤਤੋ ਅਪਰੋ ਤਤੋ ਅਪਰੋਤਿ ਪਞ੍ਚਸਤਾਪਿ ਪਦੁਮਿਨਿਯਂ ਪਦੁਮਾਨਿ ਵਿਯ ਵਿਕਸਿਂਸੁ. ਸਬ੍ਬਪਠਮਂ ਅਰਹਤ੍ਤਂ ਪਤ੍ਤਭਿਕ੍ਖੁ ‘‘ਭਗਵਤੋ ਆਰੋਚੇਸ੍ਸਾਮੀ’’ਤਿ ਪਲ੍ਲਙ੍ਕਂ ਵਿਨਿਬ੍ਭੁਜਿਤ੍ਵਾ ਨਿਸੀਦਨਂ ਪਪ੍ਫੋਟੇਤ੍ਵਾ ਉਟ੍ਠਾਯ ਦਸਬਲਾਭਿਮੁਖੋ ਅਹੋਸਿ. ਏਵਂ ਅਪਰੋਪਿ ਅਪਰੋਪੀਤਿ ਪਞ੍ਚਸਤਾ ਭਤ੍ਤਸਾਲਂ ਪਵਿਸਨ੍ਤਾ ਵਿਯ ਪਟਿਪਾਟਿਯਾਵ ਆਗਮਿਂਸੁ. ਪਠਮਂ ਆਗਤੋ ਵਨ੍ਦਿਤ੍ਵਾ ਨਿਸੀਦਨਂ ਪਞ੍ਞਾਪੇਤ੍ਵਾ, ਏਕਮਨ੍ਤਂ ਨਿਸੀਦਿਤ੍ਵਾ, ਪਟਿਵਿਦ੍ਧਗੁਣਂ ਆਰੋਚੇਤੁਕਾਮੋ ‘‘ਅਤ੍ਥਿ ਨੁ ਖੋ ਅਞ੍ਞੋ ਕੋਚਿ? ਨਤ੍ਥੀ’’ਤਿ ਨਿਵਤ੍ਤਿਤ੍ਵਾ ਆਗਤਮਗ੍ਗਂ ਓਲੋਕੇਨ੍ਤੋ ਅਪਰਮ੍ਪਿ ਅਦ੍ਦਸ ਅਪਰਮ੍ਪਿ ਅਦ੍ਦਸਯੇਵਾਤਿ ਸਬ੍ਬੇਪਿ ਤੇ ਆਗਨ੍ਤ੍ਵਾ ਏਕਮਨ੍ਤਂ ਨਿਸੀਦਿਤ੍ਵਾ, ਅਯਂ ਇਮਸ੍ਸ ਹਰਾਯਮਾਨੋ ਨ ਕਥੇਸਿ, ਅਯਂ ਇਮਸ੍ਸ ਹਰਾਯਮਾਨੋ ਨ ਕਥੇਸਿ. ਖੀਣਾਸਵਾਨਂ ਕਿਰ ਦ੍ਵੇ ਆਕਾਰਾ ਹੋਨ੍ਤਿ – ‘‘ਅਹੋ ਵਤ ਮਯਾ ਪਟਿਵਿਦ੍ਧਗੁਣਂ ਸਦੇਵਕੋ ਲੋਕੋ ਖਿਪ੍ਪਮੇਵ ਪਟਿਵਿਜ੍ਝੇਯ੍ਯਾ’’ਤਿ ਚਿਤ੍ਤਂ ਉਪ੍ਪਜ੍ਜਤਿ. ਪਟਿਵਿਦ੍ਧਭਾਵਂ ਪਨ ਨਿਧਿਲਦ੍ਧਪੁਰਿਸੋ ਵਿਯ ਨ ਅਞ੍ਞਸ੍ਸ ਆਰੋਚੇਤੁਕਾਮਾ ਹੋਨ੍ਤਿ.

ਏਵਂ ਓਸਟਮਤ੍ਤੇ ਪਨ ਤਸ੍ਮਿਂ ਅਰਿਯਮਣ੍ਡਲੇ ਪਾਚੀਨਯੁਗਨ੍ਧਰਪਰਿਕ੍ਖੇਪਤੋ ਅਬ੍ਭਾ ਮਹਿਕਾ ਧੂਮੋ ਰਜੋ ਰਾਹੂਤਿ, ਇਮੇਹਿ ਉਪਕ੍ਕਿਲੇਸੇਹਿ ਵਿਪ੍ਪਮੁਤ੍ਤਂ ਬੁਦ੍ਧੁਪ੍ਪਾਦਪਟਿਮਣ੍ਡਿਤਸ੍ਸ ਲੋਕਸ੍ਸ ਰਾਮਣੇਯ੍ਯਕਦਸ੍ਸਨਤ੍ਥਂ ਪਾਚੀਨਦਿਸਾਯ ਉਕ੍ਖਿਤ੍ਤਰਜਤਮਯਮਹਾਆਦਾਸਮਣ੍ਡਲਂ ਵਿਯ, ਨੇਮਿਵਟ੍ਟਿਯਂ ਗਹੇਤ੍ਵਾ, ਪਰਿਵਤ੍ਤਿਯਮਾਨਰਜਤਚਕ੍ਕਸਸ੍ਸਿਰਿਕਂ ਪੁਣ੍ਣਚਨ੍ਦਮਣ੍ਡਲਂ ਉਲ੍ਲਙ੍ਘਿਤ੍ਵਾ, ਅਨਿਲਪਥਂ ਪਟਿਪਜ੍ਜਿਤ੍ਥ. ਇਤਿ ਏਵਰੂਪੇ ਖਣੇ ਲਯੇ ਮੁਹੁਤ੍ਤੇ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਮਹਾਵਨੇ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਬ੍ਬੇਹੇਵ ਅਰਹਨ੍ਤੇਹਿ.

ਤਤ੍ਥ ਭਗਵਾਪਿ ਮਹਾਸਮ੍ਮਤਸ੍ਸ ਵਂਸੇ ਉਪ੍ਪਨ੍ਨੋ, ਤੇਪਿ ਪਞ੍ਚਸਤਾ ਭਿਕ੍ਖੂ ਮਹਾਸਮ੍ਮਤਸ੍ਸ ਕੁਲੇ ਉਪ੍ਪਨ੍ਨਾ. ਭਗਵਾਪਿ ਖਤ੍ਤਿਯਗਬ੍ਭੇ ਜਾਤੋ, ਤੇਪਿ ਖਤ੍ਤਿਯਗਬ੍ਭੇ ਜਾਤਾ. ਭਗਵਾਪਿ ਰਾਜਪਬ੍ਬਜਿਤੋ, ਤੇਪਿ ਰਾਜਪਬ੍ਬਜਿਤਾ. ਭਗਵਾਪਿ ਸੇਤਚ੍ਛਤ੍ਤਂ ਪਹਾਯ ਹਤ੍ਥਗਤਂ ਚਕ੍ਕਵਤ੍ਤਿਰਜ੍ਜਂ ਨਿਸ੍ਸਜ੍ਜਿਤ੍ਵਾ ਪਬ੍ਬਜਿਤੋ, ਤੇਪਿ ਸੇਤਚ੍ਛਤ੍ਤਂ ਪਹਾਯ ਹਤ੍ਥਗਤਾਨਿ ਰਜ੍ਜਾਨਿ ਵਿਸ੍ਸਜ੍ਜਿਤ੍ਵਾ ਪਬ੍ਬਜਿਤਾ. ਇਤਿ ਭਗਵਾ ਪਰਿਸੁਦ੍ਧੇ ਓਕਾਸੇ, ਪਰਿਸੁਦ੍ਧੇ ਰਤ੍ਤਿਭਾਗੇ, ਸਯਂ ਪਰਿਸੁਦ੍ਧੋ ਪਰਿਸੁਦ੍ਧਪਰਿਵਾਰੋ, ਵੀਤਰਾਗੋ ਵੀਤਰਾਗਪਰਿਵਾਰੋ, ਵੀਤਦੋਸੋ ਵੀਤਦੋਸਪਰਿਵਾਰੋ, ਵੀਤਮੋਹੋ ਵੀਤਮੋਹਪਰਿਵਾਰੋ, ਨਿਤ੍ਤਣ੍ਹੋ ਨਿਤ੍ਤਣ੍ਹਪਰਿਵਾਰੋ, ਨਿਕ੍ਕਿਲੇਸੋ ਨਿਕ੍ਕਿਲੇਸਪਰਿਵਾਰੋ, ਸਨ੍ਤੋ ਸਨ੍ਤਪਰਿਵਾਰੋ, ਦਨ੍ਤੋ ਦਨ੍ਤਪਰਿਵਾਰੋ, ਮੁਤ੍ਤੋ ਮੁਤ੍ਤਪਰਿਵਾਰੋ, ਅਤਿਵਿਯ ਵਿਰੋਚਤੀਤਿ. ਵਣ੍ਣਭੂਮਿ ਨਾਮੇਸਾ, ਯਤ੍ਤਕਂ ਸਕ੍ਕੋਤਿ, ਤਤ੍ਤਕਂ ਵਤ੍ਤਬ੍ਬਂ. ਇਤਿ ਇਮੇ ਭਿਕ੍ਖੂ ਸਨ੍ਧਾਯ ਵੁਤ੍ਤਂ, ‘‘ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਬ੍ਬੇਹੇਵ ਅਰਹਨ੍ਤੇਹੀ’’ਤਿ.

ਯੇਭੁਯ੍ਯੇਨਾਤਿ ਬਹੁਤਰਾ ਸਨ੍ਨਿਪਤਿਤਾ, ਮਨ੍ਦਾ ਨ ਸਨ੍ਨਿਪਤਿਤਾ ਅਸਞ੍ਞੀ ਅਰੂਪਾਵਚਰਦੇਵਤਾ ਸਮਾਪਨ੍ਨਦੇਵਤਾਯੋ ਚ. ਤਤ੍ਰਾਯਂ ਸਨ੍ਨਿਪਾਤਕ੍ਕਮੋ – ਮਹਾਵਨਸ੍ਸ ਕਿਰ ਸਾਮਨ੍ਤਾ ਦੇਵਤਾ ਚਲਿਂਸੁ, ‘‘ਆਯਾਮ ਭੋ! ਬੁਦ੍ਧਦਸ੍ਸਨਂ ਨਾਮ ਬਹੂਪਕਾਰਂ, ਧਮ੍ਮਸ੍ਸਵਨਂ ਬਹੂਪਕਾਰਂ, ਭਿਕ੍ਖੁਸਙ੍ਘਦਸ੍ਸਨਂ ਬਹੂਪਕਾਰਂ. ਆਯਾਮ ਆਯਾਮਾ’’ਤਿ! ਮਹਾਸਦ੍ਦਂ ਕੁਰੁਮਾਨਾ ਆਗਨ੍ਤ੍ਵਾ ਭਗਵਨ੍ਤਞ੍ਚ ਤਂਮੁਹੁਤ੍ਤਂ ਅਰਹਤ੍ਤਪ੍ਪਤ੍ਤਖੀਣਾਸਵੇ ਚ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਤੇਨੇਵ ਉਪਾਯੇਨ ਤਾਸਂ ਤਾਸਂ ਸਦ੍ਦਂ ਸੁਤ੍ਵਾ ਸਦ੍ਦਨ੍ਤਰਅਡ੍ਢਗਾਵੁਤਗਾਵੁਤਅਡ੍ਢਯੋਜਨਯੋਜਨਾਦਿਵਸੇਨ ਤਿਯੋਜਨਸਹਸ੍ਸਵਿਤ੍ਥਤੇ ਹਿਮਵਨ੍ਤੇ, ਤਿਕ੍ਖਤ੍ਤੁਂ ਤੇਸਟ੍ਠਿਯਾ ਨਗਰਸਹਸ੍ਸੇਸੁ, ਨਵਨਵੁਤਿਯਾ ਦੋਣਮੁਖਸਤਸਹਸ੍ਸੇਸੁ, ਛਨਵੁਤਿਯਾ ਪਟ੍ਟਨਕੋਟਿਸਤਸਹਸ੍ਸੇਸੁ, ਛਪਣ੍ਣਾਸਾਯ ਰਤਨਾਕਰੇਸੂਤਿ ਸਕਲਜਮ੍ਬੁਦੀਪੇ, ਪੁਬ੍ਬਵਿਦੇਹੇ, ਅਪਰਗੋਯਾਨੇ, ਉਤ੍ਤਰਕੁਰੁਮ੍ਹਿ, ਦ੍ਵੀਸੁ ਪਰਿਤ੍ਤਦੀਪਸਹਸ੍ਸੇਸੂਤਿ ਸਕਲਚਕ੍ਕਵਾਲ਼ੇ, ਤਤੋ ਦੁਤਿਯਤਤਿਯਚਕ੍ਕਵਾਲ਼ੇਤਿ ਏਵਂ ਦਸਸਹਸ੍ਸਚਕ੍ਕਵਾਲ਼ੇਸੁ ਦੇਵਤਾ ਸਨ੍ਨਿਪਤਿਤਾਤਿ ਵੇਦਿਤਬ੍ਬਾ. ਦਸਸਹਸ੍ਸਚਕ੍ਕਵਾਲ਼ਞ੍ਹਿ ਇਧ ਦਸਲੋਕਧਾਤੁਯੋਤਿ ਅਧਿਪ੍ਪੇਤਂ. ਤੇਨ ਵੁਤ੍ਤਂ – ‘‘ਦਸਹਿ ਚ ਲੋਕਧਾਤੂਹਿ ਦੇਵਤਾ ਯੇਭੁਯ੍ਯੇਨ ਸਨ੍ਨਿਪਤਿਤਾ ਹੋਨ੍ਤੀ’’ਤਿ.

ਏਵਂ ਸਨ੍ਨਿਪਤਿਤਾਹਿ ਦੇਵਤਾਹਿ ਸਕਲਚਕ੍ਕਵਾਲ਼ਗਬ੍ਭਂ ਯਾਵ ਬ੍ਰਹ੍ਮਲੋਕਾ ਸੂਚਿਘਰੇ ਨਿਰਨ੍ਤਰਂ ਪਕ੍ਖਿਤ੍ਤਸੂਚੀਹਿ ਵਿਯ ਪਰਿਪੁਣ੍ਣਂ ਹੋਤਿ. ਤਤ੍ਥ ਬ੍ਰਹ੍ਮਲੋਕਸ੍ਸ ਏਵਂ ਉਚ੍ਚਤ੍ਤਨਂ ਵੇਦਿਤਬ੍ਬਂ – ਲੋਹਪਾਸਾਦੇ ਕਿਰ ਸਤ੍ਤਕੂਟਾਗਾਰਸਮੋ ਪਾਸਾਣੋ ਬ੍ਰਹ੍ਮਲੋਕੇ ਠਤ੍ਵਾ ਅਧੋ ਖਿਤ੍ਤੋ ਚਤੂਹਿ ਮਾਸੇਹਿ ਪਥਵਿਂ ਪਾਪੁਣਾਤਿ. ਏਵਂ ਮਹਨ੍ਤੇ ਓਕਾਸੇ ਯਥਾ ਹੇਟ੍ਠਾ ਠਤ੍ਵਾ ਖਿਤ੍ਤਾਨਿ ਪੁਪ੍ਫਾਨਿ ਵਾ ਧੂਮੋ ਵਾ ਉਪਰਿ ਗਨ੍ਤੁਂ, ਉਪਰਿ ਵਾ ਠਤ੍ਵਾ ਖਿਤ੍ਤਸਾਸਪਾ ਹੇਟ੍ਠਾ ਓਤਰਿਤੁਂ ਅਨ੍ਤਰਂ ਨ ਲਭਨ੍ਤਿ, ਏਵਂ ਨਿਰਨ੍ਤਰਾ ਦੇਵਤਾ ਅਹੇਸੁਂ. ਯਥਾ ਖੋ ਪਨ ਚਕ੍ਕਵਤ੍ਤਿਰਞ੍ਞੋ ਨਿਸਿਨ੍ਨਟ੍ਠਾਨਂ ਅਸਮ੍ਬਾਧਂ ਹੋਤਿ, ਆਗਤਾਗਤਾ ਮਹੇਸਕ੍ਖਾ ਖਤ੍ਤਿਯਾ ਓਕਾਸਂ ਲਭਨ੍ਤਿਯੇਵ, ਪਰਤੋ ਪਰਤੋ ਪਨ ਅਤਿਸਮ੍ਬਾਧਂ ਹੋਤਿ. ਏਵਮੇਵ ਭਗਵਤੋ ਨਿਸਿਨ੍ਨਟ੍ਠਾਨਂ ਅਸਮ੍ਬਾਧਂ, ਆਗਤਾਗਤਾ ਮਹੇਸਕ੍ਖਾ ਦੇਵਾ ਚ ਬ੍ਰਹ੍ਮਾਨੋ ਚ ਓਕਾਸਂ ਲਭਨ੍ਤਿਯੇਵ. ਅਪਿ ਸੁਦਂ ਭਗਵਤੋ ਆਸਨ੍ਨਾਸਨ੍ਨਟ੍ਠਾਨੇ ਵਾਲਗ੍ਗਨਿਤ੍ਤੁਦਨਮਤ੍ਤੇ ਪਦੇਸੇ ਦਸਪਿ ਵੀਸਤਿਪਿ ਦੇਵਾ ਸੁਖੁਮੇ ਅਤ੍ਤਭਾਵੇ ਮਾਪੇਤ੍ਵਾ ਅਟ੍ਠਂਸੁ. ਸਬ੍ਬਪਰਤੋ ਸਟ੍ਠਿ ਸਟ੍ਠਿ ਦੇਵਤਾ ਅਟ੍ਠਂਸੁ.

ਸੁਦ੍ਧਾਵਾਸਕਾਯਿਕਾਨਨ੍ਤਿ ਸੁਦ੍ਧਾਵਾਸਵਾਸੀਨਂ. ਸੁਦ੍ਧਾਵਾਸਾ ਨਾਮ ਸੁਦ੍ਧਾਨਂ ਅਨਾਗਾਮਿਖੀਣਾਸਵਾਨਂ ਆਵਾਸਾ ਪਞ੍ਚ ਬ੍ਰਹ੍ਮਲੋਕਾ. ਏਤਦਹੋਸੀਤਿ ਕਸ੍ਮਾ ਅਹੋਸਿ? ਤੇ ਕਿਰ ਬ੍ਰਹ੍ਮਾਨੋ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਯਥਾ ਪਰਿਚ੍ਛੇਦੇਨ ਵੁਟ੍ਠਿਤਾ ਬ੍ਰਹ੍ਮਭਵਨਂ ਓਲੋਕੇਨ੍ਤਾ ਪਚ੍ਛਾਭਤ੍ਤੇ ਭਤ੍ਤਗੇਹਂ ਵਿਯ ਸੁਞ੍ਞਤਂ ਅਦ੍ਦਸਂਸੁ. ਤਤੋ ‘‘ਕੁਹਿਂ ਬ੍ਰਹ੍ਮਾਨੋ ਗਤਾ’’ਤਿ ਆਵਜ੍ਜਨ੍ਤਾ ਮਹਾਸਮਾਗਮਂ ਞਤ੍ਵਾ – ‘‘ਅਯਂ ਸਮਾਗਮੋ ਮਹਾ, ਮਯਂ ਓਹੀਨਾ, ਓਹੀਨਕਾਨਂ ਪਨ ਓਕਾਸੋ ਦੁਲ੍ਲਭੋ ਹੋਤਿ, ਤਸ੍ਮਾ ਗਚ੍ਛਨ੍ਤਾ ਅਤੁਚ੍ਛਹਤ੍ਥਾ ਹੁਤ੍ਵਾ ਏਕੇਕਂ ਗਾਥਂ ਅਭਿਸਙ੍ਖਰਿਤ੍ਵਾ ਗਚ੍ਛਾਮ. ਤਾਯ ਮਹਾਸਮਾਗਮੇ ਚ ਅਤ੍ਤਨੋ ਆਗਤਭਾਵਂ ਜਾਨਾਪੇਸ੍ਸਾਮ, ਦਸਬਲਸ੍ਸ ਚ ਵਣ੍ਣਂ ਭਾਸਿਸ੍ਸਾਮਾ’’ਤਿ. ਇਤਿ ਤੇਸਂ ਸਮਾਪਤ੍ਤਿਤੋ ਉਟ੍ਠਾਯ ਆਵਜ੍ਜਿਤਤ੍ਤਾ ਏਤਦਹੋਸਿ.

ਭਗਵਤੋ ਪੁਰਤੋ ਪਾਤੁਰਹੇਸੁਨ੍ਤਿ ਪਾਲ਼ਿਯਂ ਭਗਵਤੋ ਸਨ੍ਤਿਕੇ ਅਭਿਮੁਖਟ੍ਠਾਨੇਯੇਵ ਓਤਿਣ੍ਣਾ ਵਿਯ ਕਤ੍ਵਾ ਵੁਤ੍ਤਾ, ਨ ਖੋ ਪਨੇਤ੍ਥ ਏਵਂ ਅਤ੍ਥੋ ਵੇਦਿਤਬ੍ਬੋ. ਤੇ ਪਨ ਬ੍ਰਹ੍ਮਲੋਕੇ ਠਿਤਾਯੇਵ ਗਾਥਾ ਅਭਿਸਙ੍ਖਰਿਤ੍ਵਾ ਏਕੋ ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂ ਓਤਰਿ, ਏਕੋ ਦਕ੍ਖਿਣਚਕ੍ਕਵਾਲ਼ਮੁਖਵਟ੍ਟਿਯਂ, ਏਕੋ ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਯਂ, ਏਕੋ ਉਤ੍ਤਰਚਕ੍ਕਵਾਲ਼ਮੁਖਵਟ੍ਟਿਯਂ ਓਤਰਿ. ਤਤੋ ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂ ਓਤਿਣ੍ਣਬ੍ਰਹ੍ਮਾ ਨੀਲਕਸਿਣਂ ਸਮਾਪਜ੍ਜਿਤ੍ਵਾ ਨੀਲਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਮਣਿਵਮ੍ਮਂ ਪਟਿਮੁਞ੍ਚਨ੍ਤੋ ਵਿਯ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਬੁਦ੍ਧਵੀਥਿ ਨਾਮ ਕੇਨਚਿ ਉਤ੍ਤਰਿਤੁਂ ਨ ਸਕ੍ਕਾ, ਤਸ੍ਮਾ ਮਹਤਿਯਾ ਬੁਦ੍ਧਵੀਥਿਯਾਵ ਆਗਨ੍ਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਅਤ੍ਤਨਾ ਅਭਿਸਙ੍ਖਤਂ ਗਾਥਂ ਅਭਾਸਿ.

ਦਕ੍ਖਿਣਚਕ੍ਕਵਾਲ਼ਮੁਖਵਟ੍ਟਿਯਂ ਓਤਿਣ੍ਣਬ੍ਰਹ੍ਮਾ ਪੀਤਕਸਿਣਂ ਸਮਾਪਜ੍ਜਿਤ੍ਵਾ ਸੁਵਣ੍ਣਪਭਂ ਮੁਞ੍ਚਿਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਸੁਵਣ੍ਣਪਟਂ ਪਾਰੁਪਨ੍ਤੋ ਵਿਯ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਤਥੇਵ ਅਕਾਸਿ. ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਯਂ ਓਤਿਣ੍ਣਬ੍ਰਹ੍ਮਾ ਲੋਹਿਤਕਸਿਣਂ ਸਮਾਪਜ੍ਜਿਤ੍ਵਾ ਲੋਹਿਤਕਰਸ੍ਮਿਯੋ ਮੁਞ੍ਚਿਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਰਤ੍ਤਵਰਕਮ੍ਬਲੇਨ ਪਰਿਕ੍ਖਿਪਨ੍ਤੋ ਵਿਯ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਤਥੇਵ ਅਕਾਸਿ. ਉਤ੍ਤਰਚਕ੍ਕਵਾਲ਼ਮੁਖਵਟ੍ਟਿਯਂ ਓਤਿਣ੍ਣਬ੍ਰਹ੍ਮਾ ਓਦਾਤਕਸਿਣਂ ਸਮਾਪਜ੍ਜਿਤ੍ਵਾ ਓਦਾਤਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਨਂ ਸੁਮਨਕੁਸੁਮਪਟਂ ਪਾਰੁਪਨ੍ਤੋ ਵਿਯ ਅਤ੍ਤਨੋ ਆਗਤਭਾਵਂ ਜਾਨਾਪੇਤ੍ਵਾ ਤਥੇਵ ਅਕਾਸਿ.

ਪਾਲ਼ਿਯਂ ਪਨ ਭਗਵਤੋ ਪੁਰਤੋ ਪਾਤੁਰਹੇਸੁਂ. ਅਥ ਖੋ ਤਾ ਦੇਵਤਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੂਤਿ ਏਵਂ ਏਕਕ੍ਖਣੇ ਵਿਯ ਪੁਰਤੋ ਪਾਤੁਭਾਵੋ ਚ ਅਭਿਵਾਦੇਤ੍ਵਾ ਏਕਮਨ੍ਤਂ ਠਿਤਭਾਵੋ ਚ ਵੁਤ੍ਤੋ, ਸੋ ਇਮਿਨਾ ਅਨੁਕ੍ਕਮੇਨ ਅਹੋਸਿ, ਏਕਤੋ ਕਤ੍ਵਾ ਪਨ ਦਸ੍ਸਿਤੋ. ਗਾਥਾਭਾਸਨਂ ਪਨ ਪਾਲ਼ਿਯਮ੍ਪਿ ਵਿਸੁਂ ਵਿਸੁਂਯੇਵ ਵੁਤ੍ਤਂ.

ਤਤ੍ਥ ਮਹਾਸਮਯੋਤਿ ਮਹਾਸਮੂਹੋ. ਪਵਨਂ ਵੁਚ੍ਚਤਿ ਵਨਸਣ੍ਡੋ. ਉਭਯੇਨਪਿ ਭਗਵਾ ‘‘ਇਮਸ੍ਮਿਂ ਪਨ ਵਨਸਣ੍ਡੇ ਅਜ੍ਜ ਮਹਾਸਮੂਹੋ ਸਨ੍ਨਿਪਾਤੋ’’ਤਿ ਆਹ. ਤਤੋ ਯੇਸਂ ਸੋ ਸਨ੍ਨਿਪਾਤੋ, ਤੇ ਦਸ੍ਸੇਤੁਂ ਦੇਵਕਾਯਾ ਸਮਾਗਤਾਤਿ ਆਹ. ਤਤ੍ਥ ਦੇਵਕਾਯਾਤਿ ਦੇਵਘਟਾ. ਆਗਤਮ੍ਹ ਇਮਂ ਧਮ੍ਮਸਮਯਨ੍ਤਿ ਏਵਂ ਸਮਾਗਤੇ ਦੇਵਕਾਯੇ ਦਿਸ੍ਵਾ ਮਯਮ੍ਪਿ ਇਮਂ ਧਮ੍ਮਸਮੂਹਂ ਆਗਤਾ. ਕਿਂ ਕਾਰਣਾ? ਦਕ੍ਖਿਤਾਯੇ ਅਪਰਾਜਿਤਸਙ੍ਘਨ੍ਤਿ ਕੇਨਚਿ ਅਪਰਾਜਿਤਂ ਅਜ੍ਜੇਵ ਤਯੋ ਮਾਰੇ ਮਦ੍ਦਿਤ੍ਵਾ ਵਿਜਿਤਸਙ੍ਗਾਮਂ ਇਮਂ ਅਪਰਾਜਿਤਸਙ੍ਘਂ ਦਸ੍ਸਨਤ੍ਥਾਯ ਆਗਤਮ੍ਹਾਤਿ ਅਤ੍ਥੋ. ਸੋ ਪਨ, ਬ੍ਰਹ੍ਮਾ, ਇਮਂ ਗਾਥਂ ਭਾਸਿਤ੍ਵਾ, ਭਗਵਨ੍ਤਂ ਅਭਿਵਾਦੇਤ੍ਵਾ, ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂਯੇਵ ਅਟ੍ਠਾਸਿ.

ਅਥ ਦੁਤਿਯੋ ਵੁਤ੍ਤਨਯੇਨੇਵ ਆਗਨ੍ਤ੍ਵਾ ਅਭਾਸਿ. ਤਤ੍ਥ ਤਤ੍ਰ ਭਿਕ੍ਖਵੋਤਿ ਤਸ੍ਮਿਂ ਸਨ੍ਨਿਪਾਤਟ੍ਠਾਨੇ ਭਿਕ੍ਖੂ. ਸਮਾਦਹਂਸੂਤਿ ਸਮਾਧਿਨਾ ਯੋਜੇਸੁਂ. ਚਿਤ੍ਤਮਤ੍ਤਨੋ ਉਜੁਕਂ ਅਕਂਸੂਤਿ ਅਤ੍ਤਨੋ ਚਿਤ੍ਤੇ ਸਬ੍ਬੇ ਵਙ੍ਕਕੁਟਿਲਜਿਮ੍ਹਭਾਵੇ ਹਰਿਤ੍ਵਾ ਉਜੁਕਂ ਅਕਰਿਂਸੁ. ਸਾਰਥੀਵ ਨੇਤ੍ਤਾਨਿ ਗਹੇਤ੍ਵਾਤਿ ਯਥਾ ਸਮਪ੍ਪਵਤ੍ਤੇਸੁ ਸਿਨ੍ਧਵੇਸੁ ਓਧਸ੍ਤਪਤੋਦੋ ਸਾਰਥੀ ਸਬ੍ਬਯੋਤ੍ਤਾਨਿ ਗਹੇਤ੍ਵਾ ਅਚੋਦੇਨ੍ਤੋ ਅਵਾਰੇਨ੍ਤੋ ਤਿਟ੍ਠਤਿ, ਏਵਂ ਛਲ਼ਙ੍ਗੁਪੇਕ੍ਖਾਯ ਸਮਨ੍ਨਾਗਤਾ ਗੁਤ੍ਤਦ੍ਵਾਰਾ ਸਬ੍ਬੇਪੇਤੇ ਪਞ੍ਚਸਤਾ ਭਿਕ੍ਖੂ ਇਨ੍ਦ੍ਰਿਯਾਨਿ ਰਕ੍ਖਨ੍ਤਿ ਪਣ੍ਡਿਤਾ, ਏਤੇ ਦਟ੍ਠੁਂ ਇਧਾਗਤਮ੍ਹਾ ਭਗਵਾਤਿ, ਸੋਪਿ ਗਨ੍ਤ੍ਵਾ ਯਥਾਠਾਨੇਯੇਵ ਅਟ੍ਠਾਸਿ.

ਅਥ ਤਤਿਯੋ ਵੁਤ੍ਤਨਯੇਨੇਵ ਆਗਨ੍ਤ੍ਵਾ ਅਭਾਸਿ. ਤਤ੍ਥ ਛੇਤ੍ਵਾ ਖੀਲਨ੍ਤਿ ਰਾਗਦੋਸਮੋਹਖੀਲਂ ਛਿਨ੍ਦਿਤ੍ਵਾ. ਪਲਿਘਨ੍ਤਿ ਰਾਗਦੋਸਮੋਹਪਲਿਘਮੇਵ. ਇਨ੍ਦਖੀਲਨ੍ਤਿ ਰਾਗਦੋਸਮੋਹਇਨ੍ਦਖੀਲਮੇਵ. ਊਹਚ੍ਚ ਮਨੇਜਾਤਿ ਏਤੇ ਤਣ੍ਹਾਏਜਾਯ ਅਨੇਜਾ ਭਿਕ੍ਖੂ ਇਨ੍ਦਖੀਲਂ ਊਹਚ੍ਚ ਸਮੂਹਨਿਤ੍ਵਾ ਚਤੂਸੁ ਦਿਸਾਸੁ ਅਪ੍ਪਟਿਹਤਚਾਰਿਕਂ ਚਰਨ੍ਤਿ. ਸੁਦ੍ਧਾਤਿ ਨਿਰੁਪਕ੍ਕਿਲੇਸਾ. ਵਿਮਲਾਤਿ ਨਿਮ੍ਮਲਾ. ਇਦਂ ਤਸ੍ਸੇਵ ਵੇਵਚਨਂ. ਚਕ੍ਖੁਮਤਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਨ੍ਤੇਨ. ਸੁਦਨ੍ਤਾਤਿ ਚਕ੍ਖੁਤੋਪਿ ਦਨ੍ਤਾ ਸੋਤਤੋਪਿ ਘਾਨਤੋਪਿ ਜਿਵ੍ਹਾਤੋਪਿ ਕਾਯਤੋਪਿ ਮਨਤੋਪਿ ਦਨ੍ਤਾ. ਸੁਸੁਨਾਗਾਤਿ ਤਰੁਣਨਾਗਾ. ਤਤ੍ਰਾਯਂ ਵਚਨਤ੍ਥੋ – ਛਨ੍ਦਾਦੀਹਿ ਨ ਗਚ੍ਛਨ੍ਤੀਤਿ ਨਾਗਾ, ਤੇਨ ਤੇਨ ਮਗ੍ਗੇਨ ਪਹੀਨੇ ਕਿਲੇਸੇ ਨ ਆਗਚ੍ਛਨ੍ਤੀਤਿ ਨਾਗਾ, ਨਾਨਪ੍ਪਕਾਰਂ ਆਗੁਂ ਨ ਕਰੋਨ੍ਤੀਤਿ ਨਾਗਾ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਮਹਾਨਿਦ੍ਦੇਸੇ (ਮਹਾਨਿ. ੮੦) ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਅਪਿਚ –

‘‘ਆਗੁਂ ਨ ਕਰੋਤਿ ਕਿਞ੍ਚਿ ਲੋਕੇ,

ਸਬ੍ਬਸਂਯੋਗ ਵਿਸਜ੍ਜ ਬਨ੍ਧਨਾਨਿ;

ਸਬ੍ਬਤ੍ਥ ਨ ਸਜ੍ਜਤੀ ਵਿਮੁਤ੍ਤੋ,

ਨਾਗੋ ਤਾਦਿ ਪਵੁਚ੍ਚਤੇ ਤਥਤ੍ਤਾ’’ਤਿ. –

ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਸੁਸੁਨਾਗਾਤਿ ਸੁਸੂ ਨਾਗਾ, ਸੁਸੁਨਾਗਭਾਵਸਮ੍ਪਤ੍ਤਿਂ ਪਤ੍ਤਾਤਿ ਅਤ੍ਥੋ. ਤੇ ਏਵਰੂਪੇ ਅਨੁਤ੍ਤਰੇਨ ਯੋਗ੍ਗਾਚਰਿਯੇਨ ਦਮਿਤੇ ਤਰੁਣਨਾਗੇ ਦਸ੍ਸਨਾਯ ਆਗਤਮ੍ਹ ਭਗਵਾਤਿ. ਸੋਪਿ ਗਨ੍ਤ੍ਵਾ ਯਥਾਠਾਨੇਯੇਵ ਅਟ੍ਠਾਸਿ.

ਅਥ ਚਤੁਤ੍ਥੋ ਵੁਤ੍ਤਨਯੇਨੇਵ ਆਗਨ੍ਤ੍ਵਾ ਅਭਾਸਿ. ਤਤ੍ਥ ਗਤਾਸੇਤਿ ਨਿਬ੍ਬੇਮਤਿਕਸਰਣਗਮਨੇਨ ਗਤਾ. ਸੋਪਿ ਗਨ੍ਤ੍ਵਾ ਯਥਾਠਾਨੇਯੇਵ ਅਟ੍ਠਾਸੀਤਿ. ਸਤ੍ਤਮਂ.