੫. ਉਜ੍ਝਾਨਸਞ੍ਞਿਸੁਤ੍ਤਵਣ੍ਣਨਾ

੩੫. ਪਞ੍ਚਮੇ ਉਜ੍ਝਾਨਸਞ੍ਞਿਕਾਤਿ ਉਜ੍ਝਾਨਸਞ੍ਞੀ ਦੇਵਲੋਕੋ ਨਾਮ ਪਾਟਿਯੇਕ੍ਕੋ ਨਤ੍ਥਿ, ਇਮਾ ਪਨ ਦੇਵਤਾ ਤਥਾਗਤਸ੍ਸ ਚਤੁਪਚ੍ਚਯਪਰਿਭੋਗਂ ਨਿਸ੍ਸਾਯ ਉਜ੍ਝਾਯਮਾਨਾ ਆਗਤਾ. ਤਾਸਂ ਕਿਰ ਏਵਂ ਅਹੋਸਿ – ‘‘ਸਮਣੋ ਗੋਤਮੋ ਭਿਕ੍ਖੂਨਂ ਪਂਸੁਕੂਲਚੀਵਰ-ਪਿਣ੍ਡਿਯਾਲੋਪ-ਰੁਕ੍ਖਮੂਲਸੇਨਾਸਨਪੂਤਿਮੁਤ੍ਤਭੇਸਜ੍ਜੇਹਿ ਸਨ੍ਤੋਸਸ੍ਸੇਵ ਪਰਿਯਨ੍ਤਕਾਰਿਤਂ ਵਣ੍ਣੇਤਿ, ਸਯਂ ਪਨ ਪਤ੍ਤੁਣ੍ਣਦੁਕੂਲ ਖੋਮਾਦੀਨਿ ਪਣੀਤਚੀਵਰਾਨਿ ਧਾਰੇਤਿ, ਰਾਜਾਰਹਂ ਉਤ੍ਤਮਂ ਭੋਜਨਂ ਭੁਞ੍ਜਤਿ, ਦੇਵਵਿਮਾਨਕਪ੍ਪਾਯ ਗਨ੍ਧਕੁਟਿਯਾ ਵਰਸਯਨੇ ਸਯਤਿ, ਸਪ੍ਪਿਨਵਨੀਤਾਦੀਨਿ ਭੇਸਜ੍ਜਾਨਿ ਪਟਿਸੇਵਤਿ, ਦਿਵਸਂ ਮਹਾਜਨਸ੍ਸ ਧਮ੍ਮਂ ਦੇਸੇਤਿ, ਵਚਨਮਸ੍ਸ ਅਞ੍ਞਤੋ ਗਚ੍ਛਤਿ, ਕਿਰਿਯਾ ਅਞ੍ਞਤੋ’’ਤਿ ਉਜ੍ਝਾਯਮਾਨਾ ਆਗਮਿਂਸੁ. ਤੇਨ ਤਾਸਂ ਧਮ੍ਮਸਙ੍ਗਾਹਕਤ੍ਥੇਰੇਹਿ ‘‘ਉਜ੍ਝਾਨਸਞ੍ਞਿਕਾ’’ਤਿ ਨਾਮਂ ਗਹਿਤਂ.

ਅਞ੍ਞਥਾ ਸਨ੍ਤਨ੍ਤਿ ਅਞ੍ਞੇਨਾਕਾਰੇਨ ਭੂਤਂ. ਨਿਕਚ੍ਚਾਤਿ ਨਿਕਤਿਯਾ ਵਞ੍ਚਨਾਯ, ਵਞ੍ਚੇਤ੍ਵਾਤਿ ਅਤ੍ਥੋ. ਕਿਤਵਸ੍ਸੇਵਾਤਿ ਕਿਤਵੋ ਵੁਚ੍ਚਤਿ ਸਾਕੁਣਿਕੋ. ਸੋ ਹਿ ਅਗੁਮ੍ਬੋਵ ਸਮਾਨੋ ਸਾਖਪਣ੍ਣਾਦਿਪਟਿਚ੍ਛਾਦਨੇਨ ਗੁਮ੍ਬਵਣ੍ਣਂ ਦਸ੍ਸੇਤ੍ਵਾ ਉਪਗਤੇ ਮੋਰਤਿਤ੍ਤਿਰਾਦਯੋ ਸਕੁਣੇ ਮਾਰੇਤ੍ਵਾ ਦਾਰਭਰਣਂ ਕਰੋਤਿ. ਇਤਿ ਤਸ੍ਸ ਕਿਤਵਸ੍ਸ ਇਮਾਯ ਵਞ੍ਚਨਾਯ ਏਵਂ ਵਞ੍ਚੇਤ੍ਵਾ ਸਕੁਣਮਂਸਭੋਜਨਂ ਵਿਯ ਕੁਹਕਸ੍ਸਾਪਿ ਪਂਸੁਕੂਲੇਨ ਅਤ੍ਤਾਨਂ ਪਟਿਚ੍ਛਾਦੇਤ੍ਵਾ ਕਥਾਛੇਕਤਾਯ ਮਹਾਜਨਂ ਵਞ੍ਚੇਤ੍ਵਾ ਖਾਦਮਾਨਸ੍ਸ ਵਿਚਰਤੋ. ਭੁਤ੍ਤਂ ਥੇਯ੍ਯੇਨ ਤਸ੍ਸ ਤਨ੍ਤਿ ਸਬ੍ਬੋਪਿ ਤਸ੍ਸ ਚਤੁਪਚ੍ਚਯਪਰਿਭੋਗੋ ਥੇਯ੍ਯੇਨ ਪਰਿਭੁਤ੍ਤੋ ਨਾਮ ਹੋਤੀਤਿ ਦੇਵਤਾ ਭਗਵਨ੍ਤਂ ਸਨ੍ਧਾਯ ਵਦਤਿ. ਪਰਿਜਾਨਨ੍ਤਿ ਪਣ੍ਡਿਤਾਤਿ ਅਯਂ ਕਾਰਕੋ ਵਾ ਅਕਾਰਕੋ ਵਾਤਿ ਪਣ੍ਡਿਤਾ ਜਾਨਨ੍ਤਿ. ਇਤਿ ਤਾ ਦੇਵਤਾ ‘‘ਤਥਾਗਤਾਪਿ ਮਯਮੇਵ ਪਣ੍ਡਿਤਾ’’ਤਿ ਮਞ੍ਞਮਾਨਾ ਏਵਮਾਹਂਸੁ.

ਅਥ ਭਗਵਾ ਨਯਿਦਨ੍ਤਿਆਦਿਮਾਹ. ਤਤ੍ਥ ਯਾਯਂ ਪਟਿਪਦਾ ਦਲ਼੍ਹਾਤਿ ਅਯਂ ਧਮ੍ਮਾਨੁਧਮ੍ਮਪਟਿਪਦਾ ਦਲ਼੍ਹਾ ਥਿਰਾ. ਯਾਯ ਪਟਿਪਦਾਯ ਧੀਰਾ ਪਣ੍ਡਿਤਾ ਆਰਮ੍ਮਣੂਪਨਿਜ੍ਝਾਨੇਨ ਲਕ੍ਖਣੂਪਨਿਜ੍ਝਾਨੇਨ ਚਾਤਿ ਦ੍ਵੀਹਿ ਝਾਨੇਹਿ ਝਾਯਿਨੋ ਮਾਰਬਨ੍ਧਨਾ ਪਮੁਚ੍ਚਨ੍ਤਿ, ਤਂ ਪਟਿਪਦਂ ਭਾਸਿਤਮਤ੍ਤੇਨ ਵਾ ਸਵਨਮਤ੍ਤੇਨ ਵਾ ਓਕ੍ਕਮਿਤੁਂ ਪਟਿਪਜ੍ਜਿਤੁਂ ਨ ਸਕ੍ਕਾਤਿ ਅਤ੍ਥੋ. ਨ ਵੇ ਧੀਰਾ ਪਕੁਬ੍ਬਨ੍ਤੀਤਿ ਧੀਰਾ ਪਣ੍ਡਿਤਾ ਵਿਦਿਤ੍ਵਾ ਲੋਕਪਰਿਯਾਯਂ ਸਙ੍ਖਾਰਲੋਕਸ੍ਸ ਉਦਯਬ੍ਬਯਂ ਞਤ੍ਵਾ ਚਤੁਸਚ੍ਚਧਮ੍ਮਞ੍ਚ ਅਞ੍ਞਾਯ ਕਿਲੇਸਨਿਬ੍ਬਾਨੇਨ ਨਿਬ੍ਬੁਤਾ ਲੋਕੇ ਵਿਸਤ੍ਤਿਕਂ ਤਿਣ੍ਣਾ ਏਵਂ ਨ ਕੁਬ੍ਬਨ੍ਤਿ, ਮਯਂ ਏਵਰੂਪਾਨਿ ਨ ਕਥੇਮਾਤਿ ਅਤ੍ਥੋ.

ਪਥਵਿਯਂ ਪਤਿਟ੍ਠਹਿਤ੍ਵਾਤਿ ‘‘ਅਯੁਤ੍ਤਂ ਅਮ੍ਹੇਹਿ ਕਤਂ, ਅਕਾਰਕਮੇਵ ਮਯਂ ਕਾਰਕਵਾਦੇਨ ਸਮੁਦਾਚਰਿਮ੍ਹਾ’’ਤਿ ਲਜ੍ਜਮਾਨਾ ਮਹਾਬ੍ਰਹ੍ਮਨਿ ਵਿਯ ਭਗਵਤਿ ਗਾਰਵਂ ਪਚ੍ਚੁਪਟ੍ਠਪੇਤ੍ਵਾ ਅਗ੍ਗਿਕ੍ਖਨ੍ਧਂ ਵਿਯ ਭਗਵਨ੍ਤਂ ਦੁਰਾਸਦਂ ਕਤ੍ਵਾ ਪਸ੍ਸਮਾਨਾ ਆਕਾਸਤੋ ਓਤਰਿਤ੍ਵਾ ਭੂਮਿਯਂ ਠਤ੍ਵਾਤਿ ਅਤ੍ਥੋ. ਅਚ੍ਚਯੋਤਿ ਅਪਰਾਧੋ. ਨੋ, ਭਨ੍ਤੇ, ਅਚ੍ਚਾਗਮਾਤਿ ਅਮ੍ਹੇ ਅਤਿਕ੍ਕਮ੍ਮ ਅਭਿਭਵਿਤ੍ਵਾ ਪਵਤ੍ਤੋ. ਆਸਾਦੇਤਬ੍ਬਨ੍ਤਿ ਘਟ੍ਟਯਿਤਬ੍ਬਂ. ਤਾ ਕਿਰ ਦੇਵਤਾ ਭਗਵਨ੍ਤਂ ਕਾਯੇਨ ਵਾਚਾਯਾਤਿ ਦ੍ਵੀਹਿਪਿ ਘਟ੍ਟਯਿਂਸੁ. ਤਥਾਗਤਂ ਅਵਨ੍ਦਿਤ੍ਵਾ ਆਕਾਸੇ ਪਤਿਟ੍ਠਮਾਨਾ ਕਾਯੇਨ ਘਟ੍ਟਯਿਂਸੁ, ਕਿਤਵੋਪਮਂ ਆਹਰਿਤ੍ਵਾ ਨਾਨਪ੍ਪਕਾਰਕਂ ਅਸਬ੍ਭਿਵਾਦਂ ਵਦਮਾਨਾ ਵਾਚਾਯ ਘਟ੍ਟਯਿਂਸੁ. ਤਸ੍ਮਾ ਆਸਾਦੇਤਬ੍ਬਂ ਅਮਞ੍ਞਿਮ੍ਹਾਤਿ ਆਹਂਸੁ. ਪਟਿਗ੍ਗਣ੍ਹਾਤੂਤਿ ਖਮਤੁ. ਆਯਤਿਂ ਸਂਵਰਾਯਾਤਿ ਅਨਾਗਤੇ ਸਂਵਰਣਤ੍ਥਾਯ, ਪੁਨ ਏਵਰੂਪਸ੍ਸ ਅਪਰਾਧਸ੍ਸ ਦੋਸਸ੍ਸ ਅਕਰਣਤ੍ਥਾਯ.

ਸਿਤਂ ਪਾਤ੍ਵਾਕਾਸੀਤਿ ਅਗ੍ਗਦਨ੍ਤੇ ਦਸ੍ਸੇਨ੍ਤੋ ਪਹਟ੍ਠਾਕਾਰਂ ਦਸ੍ਸੇਸਿ. ਕਸ੍ਮਾ? ਤਾ ਕਿਰ ਦੇਵਤਾ ਨ ਸਭਾਵੇਨ ਖਮਾਪੇਨ੍ਤਿ, ਲੋਕਿਯਮਹਾਜਨਞ੍ਚ ਸਦੇਵਕੇ ਲੋਕੇ ਅਗ੍ਗਪੁਗ੍ਗਲਂ ਤਥਾਗਤਞ੍ਚ ਏਕਸਦਿਸਂ ਕਰੋਨ੍ਤਿ. ਅਥ ਭਗਵਾ ‘‘ਪਰਤੋ ਕਥਾਯ ਉਪ੍ਪਨ੍ਨਾਯ ਬੁਦ੍ਧਬਲਂ ਦੀਪੇਤ੍ਵਾ ਪਚ੍ਛਾ ਖਮਿਸ੍ਸਾਮੀ’’ਤਿ ਸਿਤਂ ਪਾਤ੍ਵਾਕਾਸਿ. ਭਿਯ੍ਯੋਸੋ ਮਤ੍ਤਾਯਾਤਿ ਅਤਿਰੇਕਪ੍ਪਮਾਣੇਨ. ਇਮਂ ਗਾਥਂ ਅਭਾਸੀਤਿ ਕੁਪਿਤੋ ਏਸ ਅਮ੍ਹਾਕਨ੍ਤਿ ਮਞ੍ਞਮਾਨਾ ਅਭਾਸਿ.

ਨ ਪਟਿਗਣ੍ਹਤੀਤਿ ਨ ਖਮਤਿ ਨਾਧਿਵਾਸੇਤਿ. ਕੋਪਨ੍ਤਰੋਤਿ ਅਬ੍ਭਨ੍ਤਰੇ ਉਪ੍ਪਨ੍ਨਕੋਪੋ. ਦੋਸਗਰੂਤਿ ਦੋਸਂ ਗਰੁਂ ਕਤ੍ਵਾ ਆਦਾਯ ਵਿਹਰਨ੍ਤੋ. ਸ ਵੇਰਂ ਪਟਿਮੁਞ੍ਚਤੀਤਿ ਸੋ ਏਵਰੂਪੋ ਗਣ੍ਠਿਕਂ ਪਟਿਮੁਞ੍ਚਨ੍ਤੋ ਵਿਯ ਤਂ ਵੇਰਂ ਅਤ੍ਤਨਿ ਪਟਿਮੁਞ੍ਚਤਿ ਠਪੇਤਿ, ਨ ਪਟਿਨਿਸ੍ਸਜ੍ਜਤੀਤਿ ਅਤ੍ਥੋ. ਅਚ੍ਚਯੋ ਚੇ ਨ ਵਿਜ੍ਜੇਥਾਤਿ ਸਚੇ ਅਚ੍ਚਾਯਿਕਕਮ੍ਮਂ ਨ ਭਵੇਯ੍ਯ. ਨੋ ਚਿਧਾਪਗਤਂ ਸਿਯਾਤਿ ਯਦਿ ਅਪਰਾਧੋ ਨਾਮ ਨ ਭਾਵੇਯ੍ਯ. ਕੇਨੀਧ ਕੁਸਲੋ ਸਿਯਾਤਿ ਯਦਿ ਵੇਰਾਨਿ ਨ ਸਮ੍ਮੇਯ੍ਯੁਂ, ਕੇਨ ਕਾਰਣੇਨ ਕੁਸਲੋ ਭਵੇਯ੍ਯ.

ਕਸ੍ਸਚ੍ਚਯਾਤਿ ਗਾਥਾਯ ਕਸ੍ਸ ਅਤਿਕ੍ਕਮੋ ਨਤ੍ਥਿ? ਕਸ੍ਸ ਅਪਰਾਧੋ ਨਤ੍ਥਿ? ਕੋ ਸਮ੍ਮੋਹਂ ਨਾਪਜ੍ਜਤਿ? ਕੋ ਨਿਚ੍ਚਮੇਵ ਪਣ੍ਡਿਤੋ ਨਾਮਾਤਿ ਅਤ੍ਥੋ? ਇਮਂ ਕਿਰ ਗਾਥਂ ਭਣਾਪਨਤ੍ਥਂ ਭਗਵਤੋ ਸਿਤਪਾਤੁਕਮ੍ਮਂ. ਤਸ੍ਮਾ ਇਦਾਨਿ ਦੇਵਤਾਨਂ ਬੁਦ੍ਧਬਲਂ ਦੀਪੇਤ੍ਵਾ ਖਮਿਸ੍ਸਾਮੀਤਿ ਤਥਾਗਤਸ੍ਸ ਬੁਦ੍ਧਸ੍ਸਾਤਿਆਦਿਮਾਹ. ਤਤ੍ਥ ਤਥਾਗਤਸ੍ਸਾਤਿ ਤਥਾ ਆਗਤੋਤਿ ਏਵਮਾਦੀਹਿ ਕਾਰਣੇਹਿ ਤਥਾਗਤਸ੍ਸ. ਬੁਦ੍ਧਸ੍ਸਾਤਿ ਚਤੁਨ੍ਨਂ ਸਚ੍ਚਾਨਂ ਬੁਦ੍ਧਤ੍ਤਾਦੀਹਿ ਕਾਰਣੇਹਿ ਵਿਮੋਕ੍ਖਨ੍ਤਿਕਪਣ੍ਣਤ੍ਤਿਵਸੇਨ ਏਵਂ ਲਦ੍ਧਨਾਮਸ੍ਸ. ਅਚ੍ਚਯਂ ਦੇਸਯਨ੍ਤੀਨਨ੍ਤਿ ਯਂ ਵੁਤ੍ਤਂ ਤੁਮ੍ਹੇਹਿ ‘‘ਅਚ੍ਚਯਂ ਦੇਸਯਨ੍ਤੀਨਂ…ਪੇ… ਸ ਵੇਰਂ ਪਟਿਮੁਞ੍ਚਤੀ’’ਤਿ, ਤਂ ਸਾਧੁ ਵੁਤ੍ਤਂ, ਅਹਂ ਪਨ ਤਂ ਵੇਰਂ ਨਾਭਿਨਨ੍ਦਾਮਿ ਨ ਪਤ੍ਥਯਾਮੀਤਿ ਅਤ੍ਥੋ. ਪਟਿਗ੍ਗਣ੍ਹਾਮਿ ਵੋਚ੍ਚਯਨ੍ਤਿ ਤੁਮ੍ਹਾਕਂ ਅਪਰਾਧਂ ਖਮਾਮੀਤਿ. ਪਞ੍ਚਮਂ.