੩. ਸਾਧੁਸੁਤ੍ਤਵਣ੍ਣਨਾ

੩੩. ਤਤਿਯੇ ਉਦਾਨਂ ਉਦਾਨੇਸੀਤਿ ਉਦਾਹਾਰਂ ਉਦਾਹਰਿ. ਯਥਾ ਹਿ ਯਂ ਤੇਲਂ ਮਾਨਂ ਗਹੇਤੁਂ ਨ ਸਕ੍ਕੋਤਿ ਵਿਸ੍ਸਨ੍ਦਿਤ੍ਵਾ ਗਚ੍ਛਤਿ, ਤਂ ਅਵਸੇਸਕੋਤਿ ਵੁਚ੍ਚਤਿ. ਯਞ੍ਚ ਜਲਂ ਤਲ਼ਾਕਂ ਗਹੇਤੁਂ ਨ ਸਕ੍ਕੋਤਿ, ਅਜ੍ਝੋਤ੍ਥਰਿਤ੍ਵਾ ਗਚ੍ਛਤਿ, ਤਂ ਓਘੋਤਿ ਵੁਚ੍ਚਤਿ, ਏਵਮੇਵਂ ਯਂ ਪੀਤਿਵਚਨਂ ਹਦਯਂ ਗਹੇਤੁਂ ਨ ਸਕ੍ਕੋਤਿ, ਅਧਿਕਂ ਹੁਤ੍ਵਾ ਅਨ੍ਤੋ ਅਸਣ੍ਠਹਿਤ੍ਵਾ ਬਹਿ ਨਿਕ੍ਖਮਤਿ, ਤਂ ਉਦਾਨਨ੍ਤਿ ਵੁਚ੍ਚਤਿ. ਏਵਰੂਪਂ ਪੀਤਿਮਯਂ ਵਚਨਂ ਨਿਚ੍ਛਾਰੇਸੀਤਿ ਅਤ੍ਥੋ. ਸਦ੍ਧਾਯਪਿ ਸਾਹੁ ਦਾਨਨ੍ਤਿ ਕਮ੍ਮਞ੍ਚ ਕਮ੍ਮਫਲਞ੍ਚ ਸਦ੍ਦਹਿਤ੍ਵਾਪਿ ਦਿਨ੍ਨਦਾਨਂ ਸਾਹੁ ਲਦ੍ਧਕਂ ਭਦ੍ਦਕਮੇਵ. ਆਹੂਤਿ ਕਥੇਨ੍ਤਿ. ਕਥਂ ਪਨੇਤਂ ਉਭਯਂ ਸਮਂ ਨਾਮ ਹੋਤੀਤਿ? ਜੀਵਿਤਭੀਰੁਕੋ ਹਿ ਯੁਜ੍ਝਿਤੁਂ ਨ ਸਕ੍ਕੋਤਿ, ਖਯਭੀਰੁਕੋ ਦਾਤੁਂ ਨ ਸਕ੍ਕੋਤਿ. ‘‘ਜੀਵਿਤਞ੍ਚ ਰਕ੍ਖਿਸ੍ਸਾਮਿ ਯੁਜ੍ਝਿਸ੍ਸਾਮਿ ਚਾ’’ਤਿ ਹਿ ਵਦਨ੍ਤੋ ਨ ਯੁਜ੍ਝਤਿ. ਜੀਵਿਤੇ ਪਨ ਆਲਯਂ ਵਿਸ੍ਸਜ੍ਜੇਤ੍ਵਾ, ‘‘ਛੇਜ੍ਜਂ ਵਾ ਹੋਤੁ ਮਰਣਂ ਵਾ, ਗਣ੍ਹਿਸ੍ਸਾਮੇਤਂ ਇਸ੍ਸਰਿਯ’’ਨ੍ਤਿ ਉਸ੍ਸਹਨ੍ਤੋਵ ਯੁਜ੍ਝਤਿ. ‘‘ਭੋਗੇ ਚ ਰਕ੍ਖਿਸ੍ਸਾਮਿ, ਦਾਨਞ੍ਚ ਦਸ੍ਸਾਮੀ’’ਤਿ ਵਦਨ੍ਤੋ ਨ ਦਦਾਤਿ. ਭੋਗੇਸੁ ਪਨ ਆਲਯਂ ਵਿਸ੍ਸਜ੍ਜੇਤ੍ਵਾ ਮਹਾਦਾਨਂ ਦਸ੍ਸਾਮੀਤਿ ਉਸ੍ਸਹਨ੍ਤੋਵ ਦੇਤਿ. ਏਵਂ ਦਾਨਞ੍ਚ ਯੁਦ੍ਧਞ੍ਚ ਸਮਂ ਹੋਤਿ. ਕਿਞ੍ਚ ਭਿਯ੍ਯੋ? ਅਪ੍ਪਾਪਿ ਸਨ੍ਤਾ ਬਹੁਕੇ ਜਿਨਨ੍ਤੀਤਿ ਯਥਾ ਚ ਯੁਦ੍ਧੇ ਅਪ੍ਪਕਾਪਿ ਵੀਰਪੁਰਿਸਾ ਬਹੁਕੇ ਭੀਰੁਪੁਰਿਸੇ ਜਿਨਨ੍ਤਿ, ਏਵਂ ਸਦ੍ਧਾਦਿਸਮ੍ਪਨ੍ਨੋ ਅਪ੍ਪਕਮ੍ਪਿ ਦਾਨਂ ਦਦਨ੍ਤੋ ਬਹੁਮਚ੍ਛੇਰਂ ਮਦ੍ਦਤਿ, ਬਹੁਞ੍ਚ ਦਾਨਵਿਪਾਕਂ ਅਧਿਗਚ੍ਛਤਿ. ਏਵਮ੍ਪਿ ਦਾਨਞ੍ਚ ਯੁਦ੍ਧਞ੍ਚ ਸਮਾਨਂ. ਤੇਨੇਵਾਹ –

‘‘ਅਪ੍ਪਮ੍ਪਿ ਚੇ ਸਦ੍ਦਹਾਨੋ ਦਦਾਤਿ,

ਤੇਨੇਵ ਸੋ ਹੋਤਿ ਸੁਖੀ ਪਰਤ੍ਥਾ’’ਤਿ.

ਇਮਸ੍ਸ ਚ ਪਨਤ੍ਥਸ੍ਸ ਪਕਾਸਨਤ੍ਥਂ ਏਕਸਾਟਕਬ੍ਰਾਹ੍ਮਣਵਤ੍ਥੁ ਚ ਅਙ੍ਕੁਰਵਤ੍ਥੁ ਚ ਵਿਤ੍ਥਾਰੇਤਬ੍ਬਂ.

ਧਮ੍ਮਲਦ੍ਧਸ੍ਸਾਤਿ ਧਮ੍ਮੇਨ ਸਮੇਨ ਲਦ੍ਧਸ੍ਸ ਭੋਗਸ੍ਸ ਧਮ੍ਮਲਦ੍ਧਸ੍ਸ ਚ ਪੁਗ੍ਗਲਸ੍ਸ. ਏਤ੍ਥ ਪੁਗ੍ਗਲੋ ਲਦ੍ਧਧਮ੍ਮੋ ਨਾਮ ਅਧਿਗਤਧਮ੍ਮੋ ਅਰਿਯਪੁਗ੍ਗਲੋ. ਇਤਿ ਯਂ ਧਮ੍ਮਲਦ੍ਧਸ੍ਸ ਭੋਗਸ੍ਸ ਦਾਨਂ ਧਮ੍ਮਲਦ੍ਧਸ੍ਸ ਅਰਿਯਪੁਗ੍ਗਲਸ੍ਸ ਦੀਯਤਿ, ਤਮ੍ਪਿ ਸਾਧੂਤਿ ਅਤ੍ਥੋ. ਯੋ ਧਮ੍ਮਲਦ੍ਧਸ੍ਸਾਤਿ ਇਮਸ੍ਮਿਮ੍ਪਿ ਗਾਥਾਪਦੇ ਅਯਮੇਵ ਅਤ੍ਥੋ. ਉਟ੍ਠਾਨਵੀਰਿਯਾਧਿਗਤਸ੍ਸਾਤਿ ਉਟ੍ਠਾਨੇਨ ਚ ਵੀਰਿਯੇਨ ਚ ਅਧਿਗਤਸ੍ਸ ਭੋਗਸ੍ਸ. ਵੇਤਰਣਿਨ੍ਤਿ ਦੇਸਨਾਸੀਸਮਤ੍ਤਮੇਤਂ. ਯਮਸ੍ਸ ਪਨ ਵੇਤਰਣਿਮ੍ਪਿ ਸਞ੍ਜੀਵਕਾਲ਼ਸੁਤ੍ਤਾਦਯੋਪਿ ਏਕਤਿਂਸਮਹਾਨਿਰਯੇਪਿ ਸਬ੍ਬਸੋਵ ਅਤਿਕ੍ਕਮਿਤ੍ਵਾਤਿ ਅਤ੍ਥੋ.

ਵਿਚੇਯ੍ਯ ਦਾਨਨ੍ਤਿ ਵਿਚਿਨਿਤ੍ਵਾ ਦਿਨ੍ਨਦਾਨਂ. ਤਤ੍ਥ ਦ੍ਵੇ ਵਿਚਿਨਨਾ ਦਕ੍ਖਿਣਾਵਿਚਿਨਨਂ ਦਕ੍ਖਿਣੇਯ੍ਯਵਿਚਿਨਨਞ੍ਚ. ਤੇਸੁ ਲਾਮਕਲਾਮਕੇ ਪਚ੍ਚਯੇ ਅਪਨੇਤ੍ਵਾ ਪਣੀਤਪਣੀਤੇ ਵਿਚਿਨਿਤ੍ਵਾ ਤੇਸਂ ਦਾਨਂ ਦਕ੍ਖਿਣਾਵਿਚਿਨਨਂ ਨਾਮ. ਵਿਪਨ੍ਨਸੀਲੇ ਇਤੋ ਬਹਿਦ੍ਧਾ ਪਞ੍ਚਨਵੁਤਿਪਾਸਣ੍ਡਭੇਦੇ ਵਾ ਦਕ੍ਖਿਣੇਯ੍ਯੇ ਪਹਾਯ ਸੀਲਾਦਿਗੁਣਸਮ੍ਪਨ੍ਨਾਨਂ ਸਾਸਨੇ ਪਬ੍ਬਜਿਤਾਨਂ ਦਾਨਂ ਦਕ੍ਖਿਣੇਯ੍ਯਵਿਚਿਨਨਂ ਨਾਮ. ਏਵਂ ਦ੍ਵੀਹਾਕਾਰੇਹਿ ਵਿਚੇਯ੍ਯ ਦਾਨਂ. ਸੁਗਤਪ੍ਪਸਤ੍ਥਨ੍ਤਿ ਸੁਗਤੇਨ ਵਣ੍ਣਿਤਂ. ਤਤ੍ਥ ਦਕ੍ਖਿਣੇਯ੍ਯਵਿਚਿਨਨਂ ਦਸ੍ਸੇਨ੍ਤੋ ਯੇ ਦਕ੍ਖਿਣੇਯ੍ਯਾਤਿਆਦਿਮਾਹ. ਬੀਜਾਨਿ ਵੁਤ੍ਤਾਨਿ ਯਥਾਤਿ ਇਮਿਨਾ ਪਨ ਦਕ੍ਖਿਣਾਵਿਚਿਨਨਂ ਆਹ. ਅਵਿਪਨ੍ਨਬੀਜਸਦਿਸਾ ਹਿ ਵਿਚਿਨਿਤ੍ਵਾ ਗਹਿਤਾ ਪਣੀਤਪਣੀਤਾ ਦੇਯ੍ਯਧਮ੍ਮਾਤਿ.

ਪਾਣੇਸੁਪਿ ਸਾਧੁ ਸਂਯਮੋਤਿ ਪਾਣੇਸੁ ਸਂਯਤਭਾਵੋਪਿ ਭਦ੍ਦਕੋ. ਅਯਂ ਦੇਵਤਾ ਇਤਰਾਹਿ ਕਥਿਤਂ ਦਾਨਾਨਿਸਂਸਂ ਅਤਿਕ੍ਕਮਿਤ੍ਵਾ ਸੀਲਾਨਿਸਂਸਂ ਕਥੇਤੁਮਾਰਦ੍ਧਾ. ਅਹੇਠਯਂ ਚਰਨ੍ਤਿ ਅਵਿਹਿਂਸਨ੍ਤੋ ਚਰਮਾਨੋ. ਪਰੂਪਵਾਦਾਤਿ ਪਰਸ੍ਸ ਉਪਵਾਦਭਯੇਨ. ਭਯਾਤਿ ਉਪਵਾਦਭਯਾ. ਦਾਨਾ ਚ ਖੋ ਧਮ੍ਮਪਦਂਵ ਸੇਯ੍ਯੋਤਿ ਦਾਨਤੋ ਨਿਬ੍ਬਾਨਸਙ੍ਖਾਤਂ ਧਮ੍ਮਪਦਮੇਵ ਸੇਯ੍ਯੋ. ਪੁਬ੍ਬੇ ਚ ਹਿ ਪੁਬ੍ਬਤਰੇ ਚ ਸਨ੍ਤੋਤਿ ਪੁਬ੍ਬੇ ਚ ਕਸ੍ਸਪਬੁਦ੍ਧਾਦਿਕਾਲੇ ਪੁਬ੍ਬਤਰੇ ਚ ਕੋਣਾਗਮਨਬੁਦ੍ਧਾਦਿਕਾਲੇ, ਸਬ੍ਬੇਪਿ ਵਾ ਏਤੇ ਪੁਬ੍ਬੇ ਚ ਪੁਬ੍ਬਤਰੇ ਚ ਸਨ੍ਤੋ ਨਾਮਾਤਿ. ਤਤਿਯਂ.