੯. ਅਰਣਵਿਭਙ੍ਗਸੁਤ੍ਤਵਣ੍ਣਨਾ

੩੨੩. ਏਵਂ ਮੇ ਸੁਤਨ੍ਤਿ ਅਰਣਵਿਭਙ੍ਗਸੁਤ੍ਤਂ. ਤਤ੍ਥ ਨੇਵੁਸ੍ਸਾਦੇਯ੍ਯ ਨ ਅਪਸਾਦੇਯ੍ਯਾਤਿ ਗੇਹਸਿਤਵਸੇਨ ਕਞ੍ਚਿ ਪੁਗ੍ਗਲਂ ਨੇਵ ਉਕ੍ਖਿਪੇਯ੍ਯ ਨ ਅਵਕ੍ਖਿਪੇਯ੍ਯ. ਧਮ੍ਮਮੇਵ ਦੇਸੇਯ੍ਯਾਤਿ ਸਭਾਵਮੇਵ ਕਥੇਯ੍ਯ. ਸੁਖਵਿਨਿਚ੍ਛਯਨ੍ਤਿ ਵਿਨਿਚ੍ਛਿਤਸੁਖਂ. ਰਹੋ ਵਾਦਨ੍ਤਿ ਪਰਮ੍ਮੁਖਾ ਅਵਣ੍ਣਂ, ਪਿਸੁਣਵਾਚਨ੍ਤਿ ਅਤ੍ਥੋ. ਸਮ੍ਮੁਖਾ ਨ ਖੀਣਨ੍ਤਿ ਸਮ੍ਮੁਖਾਪਿ ਖੀਣਂ ਆਕਿਣ੍ਣਂ ਸਂਕਿਲਿਟ੍ਠਂ ਵਾਚਂ ਨ ਭਣੇਯ੍ਯ. ਨਾਭਿਨਿਵੇਸੇਯ੍ਯਾਤਿ ਨ ਅਧਿਟ੍ਠਹਿਤ੍ਵਾ ਆਦਾਯ ਵੋਹਰੇਯ੍ਯ. ਸਮਞ੍ਞਨ੍ਤਿ ਲੋਕਸਮਞ੍ਞਂ ਲੋਕਪਣ੍ਣਤ੍ਤਿਂ. ਨਾਤਿਧਾਵੇਯ੍ਯਾਤਿ ਨਾਤਿਕ੍ਕਮੇਯ੍ਯ.

੩੨੪. ਕਾਮਪਟਿਸਨ੍ਧਿਸੁਖਿਨੋਤਿ ਕਾਮਪਟਿਸਨ੍ਧਿਨਾ ਕਾਮੂਪਸਂਹਿਤੇਨ ਸੁਖੇਨ ਸੁਖਿਤਸ੍ਸ. ਸਦੁਕ੍ਖੋਤਿ ਵਿਪਾਕਦੁਕ੍ਖੇਨ ਸਂਕਿਲੇਸਦੁਕ੍ਖੇਨਪਿ ਸਦੁਕ੍ਖੋ. ਸਉਪਘਾਤੋਤਿ ਵਿਪਾਕੂਪਘਾਤਕਿਲੇਸੂਪਘਾਤੇਹੇਵ ਸਉਪਘਾਤੋ. ਤਥਾ ਸਪਰਿਲ਼ਾਹੋ. ਮਿਚ੍ਛਾਪਟਿਪਦਾਤਿ ਅਯਾਥਾਵਪਟਿਪਦਾ ਅਕੁਸਲਪਟਿਪਦਾ.

੩੨੬. ਇਤ੍ਥੇਕੇ ਅਪਸਾਦੇਤੀਤਿ ਏਵਂ ਗੇਹਸਿਤਵਸੇਨ ਏਕਚ੍ਚੇ ਪੁਗ੍ਗਲੇ ਅਪਸਾਦੇਤਿ. ਉਸ੍ਸਾਦਨੇਪਿ ਏਸੇਵ ਨਯੋ. ਭਵਸਂਯੋਜਨਨ੍ਤਿ ਭਵਬਨ੍ਧਨਂ, ਤਣ੍ਹਾਯੇਤਂ ਨਾਮਂ.

ਸੁਭੂਤਿਤ੍ਥੇਰੋ ਕਿਰ ਇਮਂ ਚਤੁਕ੍ਕਂ ਨਿਸ੍ਸਾਯ ਏਤਦਗ੍ਗੇ ਠਪਿਤੋ. ਭਗਵਤੋ ਹਿ ਧਮ੍ਮਂ ਦੇਸੇਨ੍ਤਸ੍ਸ ਪੁਗ੍ਗਲਾਨਂ ਉਸ੍ਸਾਦਨਾਅਪਸਾਦਨਾ ਪਞ੍ਞਾਯਨ੍ਤਿ, ਤਥਾ ਸਾਰਿਪੁਤ੍ਤਤ੍ਥੇਰਾਦੀਨਂ. ਸੁਭੂਤਿਤ੍ਥੇਰਸ੍ਸ ਪਨ ਧਮ੍ਮਦੇਸਨਾਯ ‘‘ਅਯਂ ਪੁਗ੍ਗਲੋ ਅਪ੍ਪਟਿਪਨ੍ਨਕੋ ਅਨਾਰਾਧਕੋ’’ਤਿ ਵਾ, ‘‘ਅਯਂ ਸੀਲਵਾ ਗੁਣਵਾ ਲਜ੍ਜਿਪੇਸਲੋ ਆਚਾਰਸਮ੍ਪਨ੍ਨੋ’’ਤਿ ਵਾ ਨਤ੍ਥਿ, ਧਮ੍ਮਦੇਸਨਾਯ ਪਨਸ੍ਸ ‘‘ਅਯਂ ਮਿਚ੍ਛਾਪਟਿਪਦਾ, ਅਯਂ ਸਮ੍ਮਾਪਟਿਪਦਾ’’ਤ੍ਵੇਵ ਪਞ੍ਞਾਯਤਿ. ਤਸ੍ਮਾ ਭਗਵਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਅਰਣਵਿਹਾਰੀਨਂ ਯਦਿਦਂ ਸੁਭੂਤੀ’’ਤਿ ਆਹ.

੩੨੯. ਕਾਲਞ੍ਞੂ ਅਸ੍ਸਾਤਿ ਅਸਮ੍ਪਤ੍ਤੇ ਚ ਅਤਿਕ੍ਕਨ੍ਤੇ ਚ ਕਾਲੇ ਅਕਥੇਤ੍ਵਾ ‘‘ਇਦਾਨਿ ਵੁਚ੍ਚਮਾਨਂ ਮਹਾਜਨੋ ਗਣ੍ਹਿਸ੍ਸਤੀ’’ਤਿ ਯੁਤ੍ਤਪਤ੍ਤਕਾਲਂ ਞਤ੍ਵਾਵ ਪਰਮ੍ਮੁਖਾ ਅਵਣ੍ਣਂ ਭਾਸੇਯ੍ਯ. ਖੀਣਵਾਦੇਪਿ ਏਸੇਵ ਨਯੋ.

੩੩੦. ਉਪਹਞ੍ਞਤੀਤਿ ਘਾਤਿਯਤਿ. ਸਰੋਪਿ ਉਪਹਞ੍ਞਤੀਤਿ ਸਦ੍ਦੋਪਿ ਭਿਜ੍ਜਤਿ. ਆਤੁਰੀਯਤੀਤਿ ਆਤੁਰੋ ਹੋਤਿ ਗੇਲਞ੍ਞਪ੍ਪਤ੍ਤੋ ਸਾਬਾਧੋ. ਅਵਿਸ੍ਸਟ੍ਠਨ੍ਤਿ ਵਿਸ੍ਸਟ੍ਠਂ ਅਪਲਿਬੁਦ੍ਧਂ ਨ ਹੋਤਿ.

੩੩੧. ਤਦੇਵਾਤਿ ਤਂਯੇਵ ਭਾਜਨਂ. ਅਭਿਨਿਵਿਸ੍ਸ ਵੋਹਰਤੀਤਿ ਪਤ੍ਤਨ੍ਤਿ ਸਞ੍ਜਾਨਨਜਨਪਦਂ ਗਨ੍ਤ੍ਵਾ ‘‘ਪਤ੍ਤਂ ਆਹਰਥ ਧੋਵਥਾ’’ਤਿ ਸੁਤ੍ਵਾ ‘‘ਅਨ੍ਧਬਾਲਪੁਥੁਜ੍ਜਨੋ, ਨਯਿਦਂ ਪਤ੍ਤਂ, ਪਾਤਿ ਨਮੇਸਾ, ਏਵਂ ਵਦਾਹੀ’’ਤਿ ਅਭਿਨਿਵਿਸ੍ਸ ਵੋਹਰਤਿ. ਏਵਂ ਸਬ੍ਬਪਦੇਹਿ ਯੋਜੇਤਬ੍ਬਂ. ਅਤਿਸਾਰੋਤਿ ਅਤਿਧਾਵਨਂ.

੩੩੨. ਤਥਾ ਤਥਾ ਵੋਹਰਤਿ ਅਪਰਾਮਸਨ੍ਤਿ ਅਮ੍ਹਾਕਂ ਜਨਪਦੇ ਭਾਜਨਂ ਪਾਤੀਤਿ ਵੁਚ੍ਚਤਿ, ਇਮੇ ਪਨ ਨਂ ਪਤ੍ਤਨ੍ਤਿ ਵਦਨ੍ਤੀਤਿ ਤਤੋ ਪਟ੍ਠਾਯ ਜਨਪਦਵੋਹਾਰਂ ਮੁਞ੍ਚਿਤ੍ਵਾ ਪਤ੍ਤਂ ਪਤ੍ਤਨ੍ਤੇਵ ਅਪਰਾਮਸਨ੍ਤੋ ਵੋਹਰਤਿ. ਸੇਸਪਦੇਸੁਪਿ ਏਸੇਵ ਨਯੋ.

੩੩੩. ਇਦਾਨਿ ਮਰਿਯਾਦਭਾਜਨੀਯਂ ਕਰੋਨ੍ਤੋ ਤਤ੍ਰ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਸਰਣੋਤਿ ਸਰਜੋ ਸਕਿਲੇਸੋ. ਅਰਣੋਤਿ ਅਰਜੋ ਨਿਕ੍ਕਿਲੇਸੋ. ਸੁਭੂਤਿ ਚ ਪਨ, ਭਿਕ੍ਖਵੇਤਿ ਅਯਂ ਥੇਰੋ ਦ੍ਵੀਸੁ ਠਾਨੇਸੁ ਏਤਦਗ੍ਗਂ ਆਰੁਲ਼੍ਹੋ ‘‘ਅਰਣਵਿਹਾਰੀਨਂ ਯਦਿਦਂ ਸੁਭੂਤਿ, ਦਕ੍ਖਿਣੇਯ੍ਯਾਨਂ ਯਦਿਦਂ ਸੁਭੂਤੀ’’ਤਿ (ਅ. ਨਿ. ੧.੨੦੨).

ਧਮ੍ਮਸੇਨਾਪਤਿ ਕਿਰ ਵਤ੍ਥੁਂ ਸੋਧੇਤਿ, ਸੁਭੂਤਿਤ੍ਥੇਰੋ ਦਕ੍ਖਿਣਂ ਸੋਧੇਤਿ. ਤਥਾ ਹਿ ਧਮ੍ਮਸੇਨਾਪਤਿ ਪਿਣ੍ਡਾਯ ਚਰਨ੍ਤੋ ਗੇਹਦ੍ਵਾਰੇ ਠਿਤੋ ਯਾਵ ਭਿਕ੍ਖਂ ਆਹਰਨ੍ਤਿ, ਤਾਵ ਪੁਬ੍ਬਭਾਗੇ ਪਰਿਚ੍ਛਿਨ੍ਦਿਤ੍ਵਾ ਨਿਰੋਧਂ ਸਮਾਪਜ੍ਜਤਿ, ਨਿਰੋਧਾ ਵੁਟ੍ਠਾਯ ਦੇਯ੍ਯਧਮ੍ਮਂ ਪਟਿਗ੍ਗਣ੍ਹਾਤਿ. ਸੁਭੂਤਿਤ੍ਥੇਰੋ ਚ ਤਥੇਵ ਮੇਤ੍ਤਾਝਾਨਂ ਸਮਾਪਜ੍ਜਤਿ, ਮੇਤ੍ਤਾਝਾਨਾ ਵੁਟ੍ਠਾਯ ਦੇਯ੍ਯਧਮ੍ਮਂ ਪਟਿਗ੍ਗਣ੍ਹਾਤਿ. ਏਵਂ ਪਨ ਕਾਤੁਂ ਸਕ੍ਕਾਤਿ. ਆਮ ਸਕ੍ਕਾ, ਨੇਵ ਅਚ੍ਛਰਿਯਞ੍ਚੇਤਂ, ਯਂ ਮਹਾਭਿਞ੍ਞਪ੍ਪਤ੍ਤਾ ਸਾਵਕਾ ਏਵਂ ਕਰੇਯ੍ਯੁਂ. ਇਮਸ੍ਮਿਮ੍ਪਿ ਹਿ ਤਮ੍ਬਪਣ੍ਣਿਦੀਪੇ ਪੋਰਾਣਕਰਾਜਕਾਲੇ ਪਿਙ੍ਗਲਬੁਦ੍ਧਰਕ੍ਖਿਤਤ੍ਥੇਰੋ ਨਾਮ ਉਤ੍ਤਰਗਾਮਂ ਨਿਸ੍ਸਾਯ ਵਿਹਾਸਿ. ਤਤ੍ਥ ਸਤ੍ਤ ਕੁਲਸਤਾਨਿ ਹੋਨ੍ਤਿ, ਏਕਮ੍ਪਿ ਤਂ ਕੁਲਦ੍ਵਾਰਂ ਨਤ੍ਥਿ, ਯਤ੍ਥ ਥੇਰੋ ਸਮਾਪਤ੍ਤਿਂ ਨ ਸਮਾਪਜ੍ਜਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਰਣਵਿਭਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.