੧੦. ਧਾਤੁਵਿਭਙ੍ਗਸੁਤ੍ਤਵਣ੍ਣਨਾ

੩੪੨. ਏਵਂ ਮੇ ਸੁਤਨ੍ਤਿ ਧਾਤੁਵਿਭਙ੍ਗਸੁਤ੍ਤਂ. ਤਤ੍ਥ ਚਾਰਿਕਨ੍ਤਿ ਤੁਰਿਤਗਮਨਚਾਰਿਕਂ. ਸਚੇ ਤੇ ਭਗ੍ਗਵ ਅਗਰੂਤਿ ਸਚੇ ਤੁਯ੍ਹਂ ਭਾਰਿਯਂ ਅਫਾਸੁਕਂ ਕਿਞ੍ਚਿ ਨਤ੍ਥਿ. ਸਚੇ ਸੋ ਅਨੁਜਾਨਾਤੀਤਿ ਭਗ੍ਗਵਸ੍ਸ ਕਿਰ ਏਤਦਹੋਸਿ – ‘‘ਪਬ੍ਬਜਿਤਾ ਨਾਮ ਨਾਨਾਅਜ੍ਝਾਸਯਾ, ਏਕੋ ਗਣਾਭਿਰਤੋ ਹੋਤਿ, ਏਕੋ ਏਕਾਭਿਰਤੋ. ਸਚੇ ਸੋ ਏਕਾਭਿਰਤੋ ਭਵਿਸ੍ਸਤਿ, ‘ਆਵੁਸੋ, ਮਾ ਪਾਵਿਸਿ, ਮਯਾ ਸਾਲਾ ਲਦ੍ਧਾ’ਤਿ ਵਕ੍ਖਤਿ. ਸਚੇ ਅਯਂ ਏਕਾਭਿਰਤੋ ਭਵਿਸ੍ਸਤਿ, ‘ਆਵੁਸੋ, ਨਿਕ੍ਖਮ, ਮਯਾ ਸਾਲਾ ਲਦ੍ਧਾ’ਤਿ ਵਕ੍ਖਤਿ. ਏਵਂ ਸਨ੍ਤੇ ਅਹਂ ਉਭਿਨ੍ਨਂ ਵਿਵਾਦਕਾਰੇਤਾ ਨਾਮ ਭਵਿਸ੍ਸਾਮਿ, ਦਿਨ੍ਨਂ ਨਾਮ ਦਿਨ੍ਨਮੇਵ ਵਟ੍ਟਤਿ, ਕਤਂ ਕਤਮੇਵਾ’’ਤਿ. ਤਸ੍ਮਾ ਏਵਮਾਹ.

ਕੁਲਪੁਤ੍ਤੋਤਿ ਜਾਤਿਕੁਲਪੁਤ੍ਤੋਪਿ ਆਚਾਰਕੁਲਪੁਤ੍ਤੋਪਿ. ਵਾਸੂਪਗਤੋਤਿ ਵਾਸਂ ਉਪਗਤੋ. ਕੁਤੋ ਆਗਨ੍ਤ੍ਵਾਤਿ? ਤਕ੍ਕਸੀਲਨਗਰਤੋ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਮਜ੍ਝਿਮਪ੍ਪਦੇਸੇ ਕਿਰ ਰਾਜਗਹਨਗਰੇ ਬਿਮ੍ਬਿਸਾਰੇ ਰਜ੍ਜਂ ਕਾਰੇਨ੍ਤੇ ਪਚ੍ਚਨ੍ਤੇ ਤਕ੍ਕਸੀਲਨਗਰੇ ਪੁਕ੍ਕੁਸਾਤਿ ਰਾਜਾ ਰਜ੍ਜਂ ਕਾਰੇਸਿ. ਅਥ ਤਕ੍ਕਸੀਲਤੋ ਭਣ੍ਡਂ ਗਹੇਤ੍ਵਾ ਵਾਣਿਜਾ ਰਾਜਗਹਂ ਆਗਤਾ ਪਣ੍ਣਾਕਾਰਂ ਗਹੇਤ੍ਵਾ ਰਾਜਾਨਂ ਅਦ੍ਦਸਂਸੁ. ਰਾਜਾ ਤੇ ਵਨ੍ਦਿਤ੍ਵਾ ਠਿਤੇ ‘‘ਕਤ੍ਥਵਾਸਿਨੋ ਤੁਮ੍ਹੇ’’ਤਿ ਪੁਚ੍ਛਿ. ਤਕ੍ਕਸੀਲਵਾਸਿਨੋ ਦੇਵਾਤਿ. ਅਥ ਨੇ ਰਾਜਾ ਜਨਪਦਸ੍ਸ ਖੇਮਸੁਭਿਕ੍ਖਤਾਦੀਨਿ ਨਗਰਸ੍ਸ ਚ ਪਵਤ੍ਤਿਂ ਪੁਚ੍ਛਿਤ੍ਵਾ ‘‘ਕੋ ਨਾਮ ਤੁਮ੍ਹਾਕਂ ਰਾਜਾ’’ਤਿ ਪੁਚ੍ਛਿ. ਪੁਕ੍ਕੁਸਾਤਿ ਨਾਮ ਦੇਵਾਤਿ. ਧਮ੍ਮਿਕੋਤਿ? ਆਮ ਦੇਵ ਧਮ੍ਮਿਕੋ. ਚਤੂਹਿ ਸਙ੍ਗਹਵਤ੍ਥੂਹਿ ਜਨਂ ਸਙ੍ਗਣ੍ਹਾਤਿ, ਲੋਕਸ੍ਸ ਮਾਤਾਪਿਤਿਟ੍ਠਾਨੇ ਠਿਤੋ, ਅਙ੍ਗੇ ਨਿਪਨ੍ਨਦਾਰਕਂ ਵਿਯ ਜਨਂ ਤੋਸੇਤੀਤਿ. ਕਤਰਸ੍ਮਿਂ ਵਯੇ ਵਤ੍ਤਤੀਤਿ? ਅਥਸ੍ਸ ਵਯਂ ਆਚਿਕ੍ਖਿਂਸੁ. ਵਯੇਸੁਪਿ ਬਿਮ੍ਬਿਸਾਰੇਨ ਸਮਵਯੋ ਜਾਤੋ. ਅਥ ਤੇ ਰਾਜਾ ਆਹ – ‘‘ਤਾਤਾ ਤੁਮ੍ਹਾਕਂ ਰਾਜਾ ਧਮ੍ਮਿਕੋ, ਵਯੇਨ ਚ ਮੇ ਸਮਾਨੋ, ਸਕ੍ਕੁਣੇਯ੍ਯਾਥ ਤੁਮ੍ਹਾਕਂ ਰਾਜਾਨਂ ਮਮ ਮਿਤ੍ਤਂ ਕਾਤੁ’’ਨ੍ਤਿ. ਸਕ੍ਕੋਮ ਦੇਵਾਤਿ. ਰਾਜਾ ਤੇਸਂ ਸੁਙ੍ਕਂ ਵਿਸ੍ਸਜ੍ਜੇਤ੍ਵਾ ਗੇਹਞ੍ਚ ਦਾਪੇਤ੍ਵਾ – ‘‘ਗਚ੍ਛਥ ਭਣ੍ਡਂ ਵਿਕ੍ਕਿਣਿਤ੍ਵਾ ਗਮਨਕਾਲੇ ਮਂ ਦਿਸ੍ਵਾ ਗਚ੍ਛੇਯ੍ਯਾਥਾ’’ਤਿ ਆਹ. ਤੇ ਤਥਾ ਕਤ੍ਵਾ ਗਮਨਕਾਲੇ ਰਾਜਾਨਂ ਅਦ੍ਦਸਂਸੁ. ‘‘ਗਚ੍ਛਥ ਤੁਮ੍ਹਾਕਂ ਰਾਜਾਨਂ ਮਮ ਵਚਨੇਨ ਪੁਨਪ੍ਪੁਨਂ ਆਰੋਗ੍ਯਂ ਪੁਚ੍ਛਿਤ੍ਵਾ ‘ਰਾਜਾ ਤੁਮ੍ਹੇਹਿ ਸਦ੍ਧਿਂ ਮਿਤ੍ਤਭਾਵਂ ਇਚ੍ਛਤੀ’ਤਿ ਵਦਥਾ’’ਤਿ ਆਹ.

ਤੇ ਸਾਧੂਤਿ ਪਟਿਸ੍ਸੁਣਿਤ੍ਵਾ ਗਨ੍ਤ੍ਵਾ ਭਣ੍ਡਂ ਪਟਿਸਾਮੇਤ੍ਵਾ ਭੁਤ੍ਤਪਾਤਰਾਸਾ ਰਾਜਾਨਂ ਉਪਸਙ੍ਕਮਿਤ੍ਵਾ ਵਨ੍ਦਿਂਸੁ. ਰਾਜਾ ‘‘ਕਹਂ ਭਣੇ ਤੁਮ੍ਹੇ ਏਤ੍ਤਕੇ ਇਮੇ ਦਿਵਸੇ ਨ ਦਿਸ੍ਸਥਾ’’ਤਿ ਪੁਚ੍ਛਿ. ਤੇ ਸਬ੍ਬਂ ਪਵਤ੍ਤਿਂ ਆਰੋਚੇਸੁਂ. ਰਾਜਾ – ‘‘ਸਾਧੁ, ਤਾਤਾ, ਤੁਮ੍ਹੇ ਨਿਸ੍ਸਾਯ ਮਯਾ ਮਜ੍ਝਿਮਪ੍ਪਦੇਸੇ ਰਾਜਾ ਮਿਤ੍ਤੋ ਲਦ੍ਧੋ’’ਤਿ ਅਤ੍ਤਮਨੋ ਅਹੋਸਿ. ਅਪਰਭਾਗੇ ਰਾਜਗਹਵਾਸਿਨੋਪਿ ਵਾਣਿਜਾ ਤਕ੍ਕਸੀਲਂ ਅਗਮਂਸੁ. ਤੇ ਪਣ੍ਣਾਕਾਰਂ ਗਹੇਤ੍ਵਾ ਆਗਤੇ ਪੁਕ੍ਕੁਸਾਤਿ ਰਾਜਾ ‘‘ਕੁਤੋ ਆਗਤਤ੍ਥਾ’’ਤਿ ਪੁਚ੍ਛਿਤ੍ਵਾ ‘‘ਰਾਜਗਹਤੋ’’ਤਿ ਸੁਤ੍ਵਾ ‘‘ਮਯ੍ਹਂ ਸਹਾਯਸ੍ਸ ਨਗਰਤੋ ਆਗਤਾ ਤੁਮ੍ਹੇ’’ਤਿ. ਆਮ ਦੇਵਾਤਿ. ਆਰੋਗ੍ਯਂ ਮੇ ਸਹਾਯਸ੍ਸਾਤਿ ਆਰੋਗ੍ਯਂ ਪੁਚ੍ਛਿਤ੍ਵਾ ‘‘ਅਜ੍ਜ ਪਟ੍ਠਾਯ ਯੇ ਮਯ੍ਹਂ ਸਹਾਯਸ੍ਸ ਨਗਰਤੋ ਜਙ੍ਘਸਤ੍ਥੇਨ ਵਾ ਸਕਟਸਤ੍ਥੇਨ ਵਾ ਵਾਣਿਜਾ ਆਗਚ੍ਛਨ੍ਤਿ, ਸਬ੍ਬੇਸਂ ਮਮ ਵਿਸਯਂ ਪਵਿਟ੍ਠਕਾਲਤੋ ਪਟ੍ਠਾਯ ਵਸਨਗੇਹਾਨਿ, ਰਾਜਕੋਟ੍ਠਾਗਾਰਤੋ ਨਿਵਾਪਞ੍ਚ ਦੇਨ੍ਤੁ, ਸੁਙ੍ਕਂ ਵਿਸ੍ਸਜ੍ਜੇਨ੍ਤੁ, ਕਿਞ੍ਚਿ ਉਪਦ੍ਦਵਂ ਮਾ ਕਰੋਨ੍ਤੂ’’ਤਿ ਭੇਰਿਂ ਚਰਾਪੇਸਿ. ਬਿਮ੍ਬਿਸਾਰੋਪਿ ਅਤ੍ਤਨੋ ਨਗਰੇ ਤਥੇਵ ਭੇਰਿਂ ਚਰਾਪੇਸਿ.

ਅਥ ਬਿਮ੍ਬਿਸਾਰੋ ਪੁਕ੍ਕੁਸਾਤਿਸ੍ਸ ਪਣ੍ਣਂ ਪਹਿਣਿ – ‘‘ਪਚ੍ਚਨ੍ਤਦੇਸੇ ਨਾਮ ਮਣਿਮੁਤ੍ਤਾਦੀਨਿ ਰਤਨਾਨਿ ਉਪ੍ਪਜ੍ਜਨ੍ਤਿ, ਯਂ ਮਯ੍ਹਂ ਸਹਾਯਸ੍ਸ ਰਜ੍ਜੇ ਦਸ੍ਸਨੀਯਂ ਵਾ ਸਵਨੀਯਂ ਵਾ ਰਤਨਂ ਉਪ੍ਪਜ੍ਜਤਿ, ਤਤ੍ਥ ਮੇ ਮਾ ਮਚ੍ਛਰਾਯਤੂ’’ਤਿ. ਪੁਕ੍ਕੁਸਾਤਿਪਿ – ‘‘ਮਜ੍ਝਿਮਦੇਸੋ ਨਾਮ ਮਹਾਜਨਪਦੋ, ਯਂ ਤਤ੍ਥ ਏਵਰੂਪਂ ਰਤਨਂ ਉਪ੍ਪਜ੍ਜਤਿ, ਤਤ੍ਥ ਮੇ ਸਹਾਯੋ ਮਾ ਮਚ੍ਛਰਾਯਤੂ’’ਤਿ ਪਟਿਪਣ੍ਣਂ ਪਹਿਣਿ. ਏਵਂ ਤੇ ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਅਞ੍ਞਮਞ੍ਞਂ ਅਦਿਸ੍ਵਾਪਿ ਦਲ਼੍ਹਮਿਤ੍ਤਾ ਅਹੇਸੁਂ.

ਏਵਂ ਤੇਸਂ ਕਤਿਕਂ ਕਤ੍ਵਾ ਵਸਨ੍ਤਾਨਂ ਪਠਮਤਰਂ ਪੁਕ੍ਕੁਸਾਤਿਸ੍ਸ ਪਣ੍ਣਾਕਾਰੋ ਉਪ੍ਪਜ੍ਜਿ. ਰਾਜਾ ਕਿਰ ਅਟ੍ਠ ਪਞ੍ਚਵਣ੍ਣੇ ਅਨਗ੍ਘਕਮ੍ਬਲੇ ਲਭਿ. ਸੋ – ‘‘ਅਤਿਸੁਨ੍ਦਰਾ ਇਮੇ ਕਮ੍ਬਲਾ, ਅਹਂ ਸਹਾਯਸ੍ਸ ਪੇਸਿਸ੍ਸਾਮੀ’’ਤਿ ਲਾਖਾਗੁਲ਼ਮਤ੍ਤੇ ਅਟ੍ਠ ਸਾਰਕਰਣ੍ਡਕੇ ਲਿਖਾਪੇਤ੍ਵਾ ਤੇਸੁ ਤੇ ਕਮ੍ਬਲੇ ਪਕ੍ਖਿਪਿਤ੍ਵਾ ਲਾਖਾਯ ਵਟ੍ਟਾਪੇਤ੍ਵਾ ਸੇਤਵਤ੍ਥੇਨ ਵੇਠੇਤ੍ਵਾ ਸਮੁਗ੍ਗੇ ਪਕ੍ਖਿਪਿਤ੍ਵਾ ਵਤ੍ਥੇਨ ਵੇਠੇਤ੍ਵਾ ਰਾਜਮੁਦ੍ਦਿਕਾਯ ਲਞ੍ਛੇਤ੍ਵਾ ‘‘ਮਯ੍ਹਂ ਸਹਾਯਸ੍ਸ ਦੇਥਾ’’ਤਿ ਅਮਚ੍ਚੇ ਪੇਸੇਸਿ. ਸਾਸਨਞ੍ਚ ਅਦਾਸਿ – ‘‘ਅਯਂ ਪਣ੍ਣਾਕਾਰੋ ਨਗਰਮਜ੍ਝੇ ਅਮਚ੍ਚਾਦਿਪਰਿਵੁਤੇਨ ਦਟ੍ਠਬ੍ਬੋ’’ਤਿ. ਤੇ ਗਨ੍ਤ੍ਵਾ ਬਿਮ੍ਬਿਸਾਰਸ੍ਸ ਅਦਂਸੁ.

ਸੋ ਸਾਸਨਂ ਸੁਤ੍ਵਾ ਅਮਚ੍ਚਾਦਯੋ ਸਨ੍ਨਿਪਤਨ੍ਤੂਤਿ ਭੇਰਿਂ ਚਰਾਪੇਤ੍ਵਾ ਨਗਰਮਜ੍ਝੇ ਅਮਚ੍ਚਾਦਿਪਰਿਵੁਤੋ ਸੇਤਚ੍ਛਤ੍ਤੇਨ ਧਾਰਿਯਮਾਨੇਨ ਪਲ੍ਲਙ੍ਕਵਰੇ ਨਿਸਿਨ੍ਨੋ ਲਞ੍ਛਨਂ ਭਿਨ੍ਦਿਤ੍ਵਾ ਵਤ੍ਥਂ ਅਪਨੇਤ੍ਵਾ ਸਮੁਗ੍ਗਂ ਵਿਵਰਿਤ੍ਵਾ ਅਨ੍ਤੋ ਭਣ੍ਡਿਕਂ ਮੁਞ੍ਚਿਤ੍ਵਾ ਲਾਖਾਗੁਲ਼ੇ ਦਿਸ੍ਵਾ ‘‘ਮਯ੍ਹਂ ਸਹਾਯੋ ਪੁਕ੍ਕੁਸਾਤਿ ‘ਜੁਤਵਿਤ੍ਤਕੋ ਮੇ ਸਹਾਯੋ’ਤਿ ਮਞ੍ਞਮਾਨੋ ਮਞ੍ਞੇ ਇਮਂ ਪਣ੍ਣਾਕਾਰਂ ਪਹਿਣੀ’’ਤਿ ਏਕਂ ਗੁਲ਼ਂ ਗਹੇਤ੍ਵਾ ਹਤ੍ਥੇਨ ਵਟ੍ਟੇਤ੍ਵਾ ਤੁਲਯਨ੍ਤੋਵ ਅਨ੍ਤੋ ਦੁਸ੍ਸਭਣ੍ਡਿਕਂ ਅਤ੍ਥੀਤਿ ਅਞ੍ਞਾਸਿ. ਅਥ ਨਂ ਪਲ੍ਲਙ੍ਕਪਾਦੇ ਪਹਰਿਤ੍ਵਾ ਤਾਵਦੇਵ ਲਾਖਾ ਪਰਿਪਤਿ, ਸੋ ਨਖੇਨ ਕਰਣ੍ਡਕਂ ਵਿਵਰਿਤ੍ਵਾ ਅਨ੍ਤੋ ਕਮ੍ਬਲਰਤਨਂ ਦਿਸ੍ਵਾ ਇਤਰੇਪਿ ਵਿਵਰਾਪੇਸਿ, ਸਬ੍ਬੇਪਿ ਕਮ੍ਬਲਾ ਅਹੇਸੁਂ. ਅਥ ਨੇ ਪਤ੍ਥਰਾਪੇਸਿ, ਤੇ ਵਣ੍ਣਸਮ੍ਪਨ੍ਨਾ ਫਸ੍ਸਸਮ੍ਪਨ੍ਨਾ ਦੀਘਤੋ ਸੋਲ਼ਸਹਤ੍ਥਾ ਤਿਰਿਯਂ ਅਟ੍ਠਹਤ੍ਥਾ ਅਹੇਸੁਂ. ਮਹਾਜਨੋ ਦਿਸ੍ਵਾ ਅਙ੍ਗੁਲਿਯੋ ਪੋਠੇਸਿ, ਚੇਲੁਕ੍ਖੇਪਂ ਅਕਾਸਿ, – ‘‘ਅਮ੍ਹਾਕਂ ਰਞ੍ਞੋ ਅਦਿਟ੍ਠਸਹਾਯੋ ਪੁਕ੍ਕੁਸਾਤਿ ਅਦਿਸ੍ਵਾਵ ਏਵਰੂਪਂ ਪਣ੍ਣਾਕਾਰਂ ਪੇਸੇਸਿ, ਯੁਤ੍ਤਂ ਏਵਰੂਪਂ ਮਿਤ੍ਤਂ ਕਾਤੁ’’ਨ੍ਤਿ ਅਤ੍ਤਮਨੋ ਅਹੋਸਿ. ਰਾਜਾ ਏਕਮੇਕਂ ਕਮ੍ਬਲਂ ਅਗ੍ਘਾਪੇਸਿ, ਸਬ੍ਬੇ ਅਨਗ੍ਘਾ ਅਹੇਸੁਂ. ਤੇਸੁ ਚਤ੍ਤਾਰੋ ਸਮ੍ਮਾਸਮ੍ਬੁਦ੍ਧਸ੍ਸ ਪੇਸੇਸਿ, ਚਤ੍ਤਾਰੋ ਅਤ੍ਤਨੋ ਘਰੇ ਅਕਾਸਿ. ਤਤੋ ਚਿਨ੍ਤੇਸਿ – ‘‘ਪਚ੍ਛਾ ਪੇਸੇਨ੍ਤੇਨ ਪਠਮਂ ਪੇਸਿਤਪਣ੍ਣਾਕਾਰਤੋ ਅਤਿਰੇਕਂ ਪੇਸੇਤੁਂ ਵਟ੍ਟਤਿ, ਸਹਾਯੇਨ ਚ ਮੇ ਅਨਗ੍ਘੋ ਪਣ੍ਣਾਕਾਰੋ ਪੇਸਿਤੋ, ਕਿਂ ਨੁ ਖੋ ਪੇਸੇਮੀ’’ਤਿ?

ਕਿਂ ਪਨ ਰਾਜਗਹੇ ਤਤੋ ਅਧਿਕਂ ਰਤਨਂ ਨਤ੍ਥੀਤਿ? ਨੋ ਨਤ੍ਥਿ, ਮਹਾਪੁਞ੍ਞੋ ਰਾਜਾ, ਅਪਿਚ ਖੋ ਪਨਸ੍ਸ ਸੋਤਾਪਨ੍ਨਕਾਲਤੋ ਪਟ੍ਠਾਯ ਠਪੇਤ੍ਵਾ ਤੀਣਿ ਰਤਨਾਨਿ ਅਞ੍ਞਂ ਰਤਨਂ ਸੋਮਨਸ੍ਸਂ ਜਨੇਤੁਂ ਸਮਤ੍ਥਂ ਨਾਮ ਨਤ੍ਥਿ. ਸੋ ਰਤਨਂ ਵਿਚਿਨਿਤੁਂ ਆਰਦ੍ਧੋ – ਰਤਨਂ ਨਾਮ ਸਵਿਞ੍ਞਾਣਕਂ ਅਵਿਞ੍ਞਾਣਕਨ੍ਤਿ ਦੁਵਿਧਂ. ਤਤ੍ਥ ਅਵਿਞ੍ਞਾਣਕਂ ਸੁਵਣ੍ਣਰਜਤਾਦਿ, ਸਵਿਞ੍ਞਾਣਕਂ ਇਨ੍ਦ੍ਰਿਯਬਦ੍ਧਂ. ਅਵਿਞ੍ਞਾਣਕਂ ਸਵਿਞ੍ਞਾਣਕਸ੍ਸੇਵ ਅਲਙ੍ਕਾਰਾਦਿਵਸੇਨ ਪਰਿਭੋਗਂ ਹੋਤਿ, ਇਤਿ ਇਮੇਸੁ ਦ੍ਵੀਸੁ ਰਤਨੇਸੁ ਸਵਿਞ੍ਞਾਣਕਂ ਸੇਟ੍ਠਂ. ਸਵਿਞ੍ਞਾਣਕਮ੍ਪਿ ਦੁਵਿਧਂ ਤਿਰਚ੍ਛਾਨਰਤਨਂ ਮਨੁਸ੍ਸਰਤਨਨ੍ਤਿ. ਤਤ੍ਥ ਤਿਰਚ੍ਛਾਨਰਤਨਂ ਹਤ੍ਥਿਅਸ੍ਸਰਤਨਂ, ਤਮ੍ਪਿ ਮਨੁਸ੍ਸਾਨਂ ਉਪਭੋਗਤ੍ਥਮੇਵ ਨਿਬ੍ਬਤ੍ਤਤਿ, ਇਤਿ ਇਮੇਸੁਪਿ ਦ੍ਵੀਸੁ ਮਨੁਸ੍ਸਰਤਨਂ ਸੇਟ੍ਠਂ. ਮਨੁਸ੍ਸਰਤਨਮ੍ਪਿ ਦੁਵਿਧਂ ਇਤ੍ਥਿਰਤਨਂ ਪੁਰਿਸਰਤਨਨ੍ਤਿ. ਤਤ੍ਥ ਚਕ੍ਕਵਤ੍ਤਿਨੋ ਰਞ੍ਞੋ ਉਪ੍ਪਨ੍ਨਂ ਇਤ੍ਥਿਰਤਨਮ੍ਪਿ ਪੁਰਿਸਸ੍ਸੇਵ ਉਪਭੋਗਂ. ਇਤਿ ਇਮੇਸੁਪਿ ਦ੍ਵੀਸੁ ਪੁਰਿਸਰਤਨਮੇਵ ਸੇਟ੍ਠਂ.

ਪੁਰਿਸਰਤਨਮ੍ਪਿ ਦੁਵਿਧਂ ਅਗਾਰਿਯਰਤਨਂ ਅਨਗਾਰਿਯਰਤਨਞ੍ਚ. ਤਤ੍ਥ ਅਗਾਰਿਯਰਤਨੇਸੁਪਿ ਚਕ੍ਕਵਤ੍ਤਿਰਾਜਾ ਅਜ੍ਜ ਪਬ੍ਬਜਿਤਸਾਮਣੇਰਂ ਪਞ੍ਚਪਤਿਟ੍ਠਿਤੇਨ ਵਨ੍ਦਤਿ, ਇਤਿ ਇਮੇਸੁਪਿ ਦ੍ਵੀਸੁ ਅਨਗਾਰਿਯਰਤਨਮੇਵ ਸੇਟ੍ਠਂ. ਅਨਗਾਰਿਯਰਤਨਮ੍ਪਿ ਦੁਵਿਧਂ ਸੇਕ੍ਖਰਤਨਞ੍ਚ ਅਸੇਕ੍ਖਰਤਨਞ੍ਚ. ਤਤ੍ਥ ਸਤਸਹਸ੍ਸਮ੍ਪਿ ਸੇਕ੍ਖਾਨਂ ਅਸੇਕ੍ਖਸ੍ਸ ਪਦੇਸਂ ਨ ਪਾਪੁਣਾਤਿ, ਇਤਿ ਇਮੇਸੁਪਿ ਦ੍ਵੀਸੁ ਅਸੇਕ੍ਖਰਤਨਮੇਵ ਸੇਟ੍ਠਂ. ਤਮ੍ਪਿ ਦੁਵਿਧਂ ਬੁਦ੍ਧਰਤਨਂ ਸਾਵਕਰਤਨਨ੍ਤਿ. ਤਤ੍ਥ ਸਤਸਹਸ੍ਸਮ੍ਪਿ ਸਾਵਕਰਤਨਾਨਂ ਬੁਦ੍ਧਰਤਨਸ੍ਸ ਪਦੇਸਂ ਨ ਪਾਪੁਣਾਤਿ, ਇਤਿ ਇਮੇਸੁਪਿ ਦ੍ਵੀਸੂ ਬੁਦ੍ਧਰਤਨਮੇਵ ਸੇਟ੍ਠਂ.

ਬੁਦ੍ਧਰਤਨਮ੍ਪਿ ਦੁਵਿਧਂ ਪਚ੍ਚੇਕਬੁਦ੍ਧਰਤਨਂ ਸਬ੍ਬਞ੍ਞੁਬੁਦ੍ਧਰਤਨਨ੍ਤਿ. ਤਤ੍ਥ ਸਤਸਹਸ੍ਸਮ੍ਪਿ ਪਚ੍ਚੇਕਬੁਦ੍ਧਾਨਂ ਸਬ੍ਬਞ੍ਞੁਬੁਦ੍ਧਸ੍ਸ ਪਦੇਸਂ ਨ ਪਾਪੁਣਾਤਿ, ਇਤਿ ਇਮੇਸੁਪਿ ਦ੍ਵੀਸੁ ਸਬ੍ਬਞ੍ਞੁਬੁਦ੍ਧਰਤਨਂਯੇਵ ਸੇਟ੍ਠਂ. ਸਦੇਵਕਸ੍ਮਿਞ੍ਹਿ ਲੋਕੇ ਬੁਦ੍ਧਰਤਨਸਮਂ ਰਤਨਂ ਨਾਮ ਨਤ੍ਥਿ. ਤਸ੍ਮਾ ਅਸਦਿਸਮੇਵ ਰਤਨਂ ਮਯ੍ਹਂ ਸਹਾਯਸ੍ਸ ਪੇਸੇਸ੍ਸਾਮੀਤਿ ਚਿਨ੍ਤੇਤ੍ਵਾ ਤਕ੍ਕਸੀਲਵਾਸਿਨੋ ਪੁਚ੍ਛਿ – ‘‘ਤਾਤਾ ਤੁਮ੍ਹਾਕਂ ਜਨਪਦੇ ਬੁਦ੍ਧੋ ਧਮ੍ਮੋ ਸਙ੍ਘੋਤਿ ਇਮਾਨਿ ਤੀਣਿ ਰਤਨਾਨਿ ਦਿਸ੍ਸਨ੍ਤੀ’’ਤਿ. ਘੋਸੋਪਿ ਸੋ ਮਹਾਰਾਜ ਤਾਵ ਤਤ੍ਥ ਨਤ੍ਥਿ, ਦਸ੍ਸਨਂ ਪਨ ਕੁਤੋਤਿ.

‘‘ਸੁਨ੍ਦਰਂ ਤਾਤਾ’’ਤਿ ਰਾਜਾ ਤੁਟ੍ਠੋ ਚਿਨ੍ਤੇਸਿ – ‘‘ਸਕ੍ਕਾ ਭਵੇਯ੍ਯ ਜਨਸਙ੍ਗਹਤ੍ਥਾਯ ਮਯ੍ਹਂ ਸਹਾਯਸ੍ਸ ਵਸਨਟ੍ਠਾਨਂ ਸਮ੍ਮਾਸਮ੍ਬੁਦ੍ਧਂ ਪੇਸੇਤੁਂ, ਬੁਦ੍ਧਾ ਪਨ ਪਚ੍ਚਨ੍ਤਿਮੇਸੁ ਜਨਪਦੇਸੁ ਨ ਅਰੁਣਂ ਉਟ੍ਠਪੇਨ੍ਤਿ. ਤਸ੍ਮਾ ਸਤ੍ਥਾਰਾ ਗਨ੍ਤੁਂ ਨ ਸਕ੍ਕਾ. ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਮਹਾਸਾਵਕੇ ਪੇਸੇਤੁਂ ਸਕ੍ਕਾ ਭਵੇਯ੍ਯ. ਮਯਾ ਪਨ ‘ਥੇਰਾ ਪਚ੍ਚਨ੍ਤੇ ਵਸਨ੍ਤੀ’ਤਿ ਸੁਤ੍ਵਾਪਿ ਮਨੁਸ੍ਸੇ ਪੇਸੇਤ੍ਵਾ ਤੇ ਅਤ੍ਤਨੋ ਸਮੀਪਂ ਆਣਾਪੇਤ੍ਵਾ ਉਪਟ੍ਠਾਤੁਮੇਵ ਯੁਤ੍ਤਂ. ਤਸ੍ਮਾ ਨ ਥੇਰੇਹਿਪਿ ਸਕ੍ਕਾ ਗਨ੍ਤੁਂ. ਯੇਨ ਪਨਾਕਾਰੇਨ ਸਾਸਨੇ ਪੇਸਿਤੇ ਸਤ੍ਥਾ ਚ ਮਹਾਸਾਵਕਾ ਚ ਗਤਾ ਵਿਯ ਹੋਨ੍ਤਿ, ਤੇਨਾਕਾਰੇਨ ਸਾਸਨਂ ਪਹਿਣਿਸ੍ਸਾਮੀ’’ਤਿ. ਚਿਨ੍ਤੇਤ੍ਵਾ ਚਤੁਰਤਨਾਯਾਮਂ ਵਿਦਤ੍ਥਿਮਤ੍ਤਪੁਥੁਲਂ ਨਾਤਿਤਨੁਂ ਨਾਤਿਬਹਲਂ ਸੁਵਣ੍ਣਪਟ੍ਟਂ ਕਾਰਾਪੇਤ੍ਵਾ ‘‘ਤਤ੍ਥ ਅਜ੍ਜ ਅਕ੍ਖਰਾਨਿ ਲਿਖਿਸ੍ਸਾਮੀ’’ਤਿ. ਪਾਤੋਵ ਸੀਸਂ ਨ੍ਹਾਯਿਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਾਯ ਭੁਤ੍ਤਪਾਤਰਾਸੋ ਅਪਨੀਤਗਨ੍ਧਮਾਲਾਭਰਣੋ ਸੁਵਣ੍ਣਸਰਕੇਨ ਜਾਤਿਹਿਙ੍ਗੁਲਿਕਂ ਆਦਾਯ ਹੇਟ੍ਠਤੋ ਪਟ੍ਠਾਯ ਦ੍ਵਾਰਾਨਿ ਪਿਦਹਨ੍ਤੋ ਪਾਸਾਦਮਾਰੁਯ੍ਹ ਪੁਬ੍ਬਦਿਸਾਮੁਖਂ ਸੀਹਪਞ੍ਜਰਂ ਵਿਵਰਿਤ੍ਵਾ ਆਕਾਸਤਲੇ ਨਿਸੀਦਿਤ੍ਵਾ ਸੁਵਣ੍ਣਪਟ੍ਟੇ ਅਕ੍ਖਰਾਨਿ ਲਿਖਨ੍ਤੋ – ‘‘ਇਧ ਤਥਾਗਤੋ ਲੋਕੇ ਉਪ੍ਪਨ੍ਨੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’’ਤਿ. ਬੁਦ੍ਧਗੁਣੇ ਤਾਵ ਏਕਦੇਸੇਨ ਲਿਖਿ.

ਤਤੋ ‘‘ਏਵਂ ਦਸ ਪਾਰਮਿਯੋ ਪੂਰੇਤ੍ਵਾ ਤੁਸਿਤਭਵਨਤੋ ਚਵਿਤ੍ਵਾ ਮਾਤੁਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ, ਏਵਂ ਲੋਕਵਿਵਰਣਂ ਅਹੋਸਿ, ਮਾਤੁਕੁਚ੍ਛਿਯਂ ਵਸਮਾਨੇ ਇਦਂ ਨਾਮ ਅਹੋਸਿ, ਅਗਾਰਮਜ੍ਝੇ ਵਸਮਾਨੇ ਇਦਂ ਨਾਮ ਅਹੋਸਿ, ਏਵਂ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋ ਏਵਂ ਮਹਾਪਧਾਨਂ ਪਦਹਿ. ਏਵਂ ਦੁਕ੍ਕਰਕਾਰਿਕਂ ਕਤ੍ਵਾ ਮਹਾਬੋਧਿਮਣ੍ਡਂ ਆਰੁਯ੍ਹ ਅਪਰਾਜਿਤਪਲ੍ਲਙ੍ਕੇ ਨਿਸਿਨ੍ਨੋ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿ, ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਨ੍ਤਸ੍ਸ ਏਵਂ ਲੋਕਵਿਵਰਣਂ ਅਹੋਸਿ. ਸਦੇਵਕੇ ਲੋਕੇ ਅਞ੍ਞਂ ਏਵਰੂਪਂ ਰਤਨਂ ਨਾਮ ਨਤ੍ਥੀਤਿ.

ਯਂਕਿਞ੍ਚਿ ਵਿਤ੍ਤਂ ਇਧ ਵਾ ਹੁਰਂ ਵਾ,

ਸਗ੍ਗੇਸੁ ਵਾ ਯਂ ਰਤਨਂ ਪਣੀਤਂ;

ਨ ਨੋ ਸਮਂ ਅਤ੍ਥਿ ਤਥਾਗਤੇਨ,

ਇਦਮ੍ਪਿ ਬੁਦ੍ਧੇ ਰਤਨਂ ਪਣੀਤਂ;

ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੂ’’ਤਿ. (ਖੁ. ਪਾ. ੬.੩; ਸੁ. ਨਿ. ੨੨੬) –

ਏਵਂ ਏਕਦੇਸੇਨ ਬੁਦ੍ਧਗੁਣੇਪਿ ਲਿਖਿਤ੍ਵਾ ਦੁਤਿਯਂ ਧਮ੍ਮਰਤਨਂ ਥੋਮੇਨ੍ਤੋ – ‘‘ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ…ਪੇ… ਪਚ੍ਚਤ੍ਤਂ ਵੇਦਿਤਬ੍ਬੋ ਵਿਞ੍ਞੂਹੀ’’ਤਿ. ‘‘ਚਤ੍ਤਾਰੋ ਸਤਿਪਟ੍ਠਾਨਾ…ਪੇ… ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ’’ਤਿ. ‘‘ਸਤ੍ਥਾਰਾ ਦੇਸਿਤਧਮ੍ਮੋ ਨਾਮ ਏਵਰੂਪੋ ਚ ਏਵਰੂਪੋ ਚਾ’’ਤਿ ਸਤ੍ਤਤਿਂਸ ਬੋਧਿਪਕ੍ਖਿਯੇ ਏਕਦੇਸੇਨ ਲਿਖਿਤ੍ਵਾ –

‘‘ਯਂ ਬੁਦ੍ਧਸੇਟ੍ਠੋ ਪਰਿਵਣ੍ਣਯੀ ਸੁਚਿਂ,

ਸਮਾਧਿਮਾਨਨ੍ਤਰਿਕਞ੍ਞਮਾਹੁ;

ਸਮਾਧਿਨਾ ਤੇਨ ਸਮੋ ਨ ਵਿਜ੍ਜਤਿ,

ਇਦਮ੍ਪਿ ਧਮ੍ਮੇ ਰਤਨਂ ਪਣੀਤਂ;

ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੂ’’ਤਿ. (ਖੁ. ਪਾ. ੬.੫; ਸੁ. ਨਿ. ੨੨੮) –

ਏਵਂ ਏਕਦੇਸੇਨ ਧਮ੍ਮਗੁਣੇ ਲਿਖਿਤ੍ਵਾ ਤਤਿਯਂ ਸਙ੍ਘਰਤਨਂ ਥੋਮੇਨ੍ਤੋ – ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ…ਪੇ… ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾ’’ਤਿ. ‘‘ਕੁਲਪੁਤ੍ਤਾ ਨਾਮ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਏਵਂ ਨਿਕ੍ਖਮਿਤ੍ਵਾ ਪਬ੍ਬਜਨ੍ਤਿ, ਕੇਚਿ ਸੇਤਚ੍ਛਤ੍ਤਂ ਪਹਾਯ ਪਬ੍ਬਜਨ੍ਤਿ, ਕੇਚਿ ਉਪਰਜ੍ਜਂ, ਕੇਚਿ ਸੇਨਾਪਤਿਟ੍ਠਾਨਾਦੀਨਿ ਪਹਾਯ ਪਬ੍ਬਜਨ੍ਤਿ. ਪਬ੍ਬਜਿਤ੍ਵਾ ਚ ਪਨ ਇਮਞ੍ਚ ਪਟਿਪਤ੍ਤਿਂ ਪੂਰੇਨ੍ਤੀ’’ਤਿ ਚੂਲ਼ਸੀਲਮਜ੍ਝਿਮਸੀਲਮਹਾਸੀਲਾਦੀਨਿ ਏਕਦੇਸੇਨ ਲਿਖਿਤ੍ਵਾ ਛਦ੍ਵਾਰਸਂਵਰਂ ਸਤਿਸਮ੍ਪਜਞ੍ਞਂ ਚਤੁਪਚ੍ਚਯਸਨ੍ਤੋਸਂ ਨਵਵਿਧਂ ਸੇਨਾਸਨਂ, ਨੀਵਰਣਪ੍ਪਹਾਨਂ ਪਰਿਕਮ੍ਮਂ ਝਾਨਾਭਿਞ੍ਞਾ ਅਟ੍ਠਤਿਂਸ ਕਮ੍ਮਟ੍ਠਾਨਾਨਿ ਯਾਵ ਆਸਵਕ੍ਖਯਾ ਏਕਦੇਸੇਨ ਲਿਖਿ, ਸੋਲ਼ਸਵਿਧਂ ਆਨਾਪਾਨਸ੍ਸਤਿਕਮ੍ਮਟ੍ਠਾਨਂ ਵਿਤ੍ਥਾਰੇਨੇਵ ਲਿਖਿਤ੍ਵਾ ‘‘ਸਤ੍ਥੁ ਸਾਵਕਸਙ੍ਘੋ ਨਾਮ ਏਵਰੂਪੇਹਿ ਚ ਗੁਣੇਹਿ ਸਮਨ੍ਨਾਗਤੋ.

ਯੇ ਪੁਗ੍ਗਲਾ ਅਟ੍ਠਸਤਂ ਪਸਟ੍ਠਾ,

ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤਿ;

ਤੇ ਦਕ੍ਖਿਣੇਯ੍ਯਾ ਸੁਗਤਸ੍ਸ ਸਾਵਕਾ,

ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨਿ;

ਇਦਮ੍ਪਿ ਸਙ੍ਘੇ ਰਤਨਂ ਪਣੀਤਂ,

ਏਤੇਨ ਸਚ੍ਚੇਨ ਸੁਵਤ੍ਥਿ ਹੋਤੂ’’ਤਿ. (ਖੁ. ਪਾ. ੬.੬; ਸੁ. ਨਿ. ੨੨੯) –

ਏਵਂ ਏਕਦੇਸੇਨ ਸਙ੍ਘਗੁਣੇ ਲਿਖਿਤ੍ਵਾ – ‘‘ਭਗਵਤੋ ਸਾਸਨਂ ਸ੍ਵਾਕ੍ਖਾਤਂ ਨਿਯ੍ਯਾਨਿਕਂ, ਸਚੇ ਮਯ੍ਹਂ ਸਹਾਯੋ ਸਕ੍ਕੋਤਿ, ਨਿਕ੍ਖਮਿਤ੍ਵਾ ਪਬ੍ਬਜਤੂ’’ਤਿ ਲਿਖਿਤ੍ਵਾ ਸੁਵਣ੍ਣਪਟ੍ਟਂ ਸਂਹਰਿਤ੍ਵਾ ਸੁਖੁਮਕਮ੍ਬਲੇਨ ਵੇਠੇਤ੍ਵਾ ਸਾਰਸਮੁਗ੍ਗੇ ਪਕ੍ਖਿਪਿਤ੍ਵਾ ਤਂ ਸਮੁਗ੍ਗਂ ਸੁਵਣ੍ਣਮਯੇ, ਸੁਵਣ੍ਣਮਯਂ, ਰਜਤਮਯੇ ਰਜਤਮਯਂ ਮਣਿਮਯੇ, ਮਣਿਮਯਂ ਪਵਾਲ਼ਮਯੇ, ਪਵਾਲ਼ਮਯਂ ਲੋਹਿਤਙ੍ਕਮਯੇ, ਲੋਹਿਤਙ੍ਕਮਯਂ ਮਸਾਰਗਲ੍ਲਮਯੇ, ਮਸਾਰਗਲ੍ਲਮਯਂ ਫਲਿਕਮਯੇ, ਫਲਿਕਮਯਂ ਦਨ੍ਤਮਯੇ, ਦਨ੍ਤਮਯਂ ਸਬ੍ਬਰਤਨਮਯੇ, ਸਬ੍ਬਰਤਨਮਯਂ ਕਿਲਞ੍ਜਮਯੇ, ਕਿਲਞ੍ਜਮਯਂ ਸਮੁਗ੍ਗਂ ਸਾਰਕਰਣ੍ਡਕੇ ਠਪੇਸਿ.

ਪੁਨ ਸਾਰਕਰਣ੍ਡਕਂ ਸੁਵਣ੍ਣਕਰਣ੍ਡਕੇਤਿ ਪੁਰਿਮਨਯੇਨੇਵ ਹਰਿਤ੍ਵਾ ਸਬ੍ਬਰਤਨਮਯਂ ਕਰਣ੍ਡਕਂ ਕਿਲਞ੍ਜਮਯੇ ਕਰਣ੍ਡਕੇ ਠਪੇਸਿ. ਤਤੋ ਕਿਲਞ੍ਜਮਯਂ ਕਰਣ੍ਡਕਂ ਸਾਰਮਯਪੇਲ਼ਾਯਾਤਿ ਪੁਨ ਵੁਤ੍ਤਨਯੇਨੇਵ ਹਰਿਤ੍ਵਾ ਸਬ੍ਬਰਤਨਮਯਂ ਪੇਲ਼ਂ ਕਿਲਞ੍ਜਮਯਪੇਲ਼ਾਯ ਠਪੇਤ੍ਵਾ ਬਹਿ ਵਤ੍ਥੇਨ ਵੇਠੇਤ੍ਵਾ ਰਾਜਮੁਦ੍ਦਿਕਾਯ ਲਞ੍ਛੇਤ੍ਵਾ ਅਮਚ੍ਚੇ ਆਣਾਪੇਸਿ – ‘‘ਮਮ ਆਣਾਪਵਤ੍ਤਿਟ੍ਠਾਨੇ ਮਗ੍ਗਂ ਅਲਙ੍ਕਾਰਾਪੇਥ ਮਗ੍ਗੋ ਅਟ੍ਠੁਸਭਵਿਤ੍ਥਤੋ ਹੋਤੁ, ਚਤੁਉਸਭਟ੍ਠਾਨਂ ਸੋਧਿਤਮਤ੍ਤਕਮੇਵ ਹੋਤੁ, ਮਜ੍ਝੇ ਚਤੁਉਸਭਂ ਰਾਜਾਨੁਭਾਵੇਨ ਪਟਿਯਾਦੇਥਾ’’ਤਿ. ਤਤੋ ਮਙ੍ਗਲਹਤ੍ਥਿਂ ਅਲਙ੍ਕਾਰਾਪੇਤ੍ਵਾ ਤਸ੍ਸ ਉਪਰਿ ਪਲ੍ਲਙ੍ਕਂ ਪਞ੍ਞਪੇਤ੍ਵਾ ਸੇਤਚ੍ਛਤ੍ਤਂ ਉਸ੍ਸਾਪੇਤ੍ਵਾ ਨਗਰਵੀਥਿਯੋ ਸਿਤ੍ਤਸਮ੍ਮਟ੍ਠਾ ਸਮੁਸ੍ਸਿਤਦ੍ਧਜਪਟਾਕਾ ਕਦਲਿਪੁਣ੍ਣਘਟਗਨ੍ਧਧੂਮਪੁਪ੍ਫਾਦੀਹਿ ਸੁਪ੍ਪਟਿਮਣ੍ਡਿਤਾ ਕਾਰੇਤ੍ਵਾ ‘‘ਅਤ੍ਤਨੋ ਅਤ੍ਤਨੋ ਵਿਸਯਪ੍ਪਦੇਸੇ ਏਵਰੂਪਂ ਪੂਜਂ ਕਾਰੇਨ੍ਤੂ’’ਤਿ ਅਨ੍ਤਰਭੋਗਿਕਾਨਂ ਜਵਨਦੂਤੇ ਪੇਸੇਤ੍ਵਾ ਸਯਂ ਸਬ੍ਬਾਲਙ੍ਕਾਰੇਨ ਅਲਙ੍ਕਰਿਤ੍ਵਾ – ‘‘ਸਬ੍ਬਤਾਲ਼ਾਵਚਰਸਮ੍ਮਿਸ੍ਸਬਲਕਾਯਪਰਿਵੁਤੋ ਪਣ੍ਣਾਕਾਰਂ ਪੇਸੇਮੀ’’ਤਿ ਅਤ੍ਤਨੋ ਵਿਸਯਪਰਿਯਨ੍ਤਂ ਗਨ੍ਤ੍ਵਾ ਅਮਚ੍ਚਸ੍ਸ ਮੁਖਸਾਸਨਂ ਅਦਾਸਿ – ‘‘ਤਾਤ ਮਯ੍ਹਂ ਸਹਾਯੋ ਪੁਕ੍ਕੁਸਾਤਿ ਇਮਂ ਪਣ੍ਣਾਕਾਰਂ ਪਟਿਚ੍ਛਨ੍ਤੋ ਓਰੋਧਮਜ੍ਝੇ ਅਪਟਿਚ੍ਛਿਤ੍ਵਾ ਪਾਸਾਦਂ ਆਰੁਯ੍ਹ ਪਟਿਚ੍ਛਤੂ’’ਤਿ. ਏਵਂ ਸਾਸਨਂ ਦਤ੍ਵਾ ਪਚ੍ਚਨ੍ਤਦੇਸਂ ਸਤ੍ਥਾ ਗਚ੍ਛਤੀਤਿ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਨਿਵਤ੍ਤਿ. ਅਨ੍ਤਰਭੋਗਿਕਾ ਤੇਨੇਵ ਨਿਯਾਮੇਨ ਮਗ੍ਗਂ ਪਟਿਯਾਦੇਤ੍ਵਾ ਪਣ੍ਣਾਕਾਰਂ ਨਯਿਂਸੁ.

ਪੁਕ੍ਕੁਸਾਤਿਪਿ ਅਤ੍ਤਨੋ ਰਜ੍ਜਸੀਮਤੋ ਪਟ੍ਠਾਯ ਤੇਨੇਵ ਨਿਯਾਮੇਨ ਮਗ੍ਗਂ ਪਟਿਯਾਦੇਤ੍ਵਾ ਨਗਰਂ ਅਲਙ੍ਕਾਰਾਪੇਤ੍ਵਾ ਪਣ੍ਣਾਕਾਰਸ੍ਸ ਪਚ੍ਚੁਗ੍ਗਮਨਂ ਅਕਾਸਿ. ਪਣ੍ਣਾਕਾਰੋ ਤਕ੍ਕਸੀਲਂ ਪਾਪੁਣਨ੍ਤੋ ਉਪੋਸਥਦਿਵਸੇ ਪਾਪੁਣਿ, ਪਣ੍ਣਾਕਾਰਂ ਗਹੇਤ੍ਵਾ ਗਤਅਮਚ੍ਚੋਪਿ ਰਞ੍ਞੋ ਵੁਤ੍ਤਸਾਸਨਂ ਆਰੋਚੇਸਿ. ਰਾਜਾ ਤਂ ਸੁਤ੍ਵਾ ਪਣ੍ਣਾਕਾਰੇਨ ਸਦ੍ਧਿਂ ਆਗਤਾਨਂ ਕਤ੍ਤਬ੍ਬਕਿਚ੍ਚਂ ਵਿਚਾਰੇਤ੍ਵਾ ਪਣ੍ਣਾਕਾਰਂ ਆਦਾਯ ਪਾਸਾਦਂ ਆਰੁਯ੍ਹ ‘‘ਮਾ ਇਧ ਕੋਚਿ ਪਵਿਸਤੂ’’ਤਿ ਦ੍ਵਾਰੇ ਆਰਕ੍ਖਂ ਕਾਰੇਤ੍ਵਾ ਸੀਹਪਞ੍ਜਰਂ ਵਿਵਰਿਤ੍ਵਾ ਪਣ੍ਣਾਕਾਰਂ ਉਚ੍ਚਾਸਨੇ ਠਪੇਤ੍ਵਾ ਸਯਂ ਨੀਚਾਸਨੇ ਨਿਸਿਨ੍ਨੋ ਲਞ੍ਛਨਂ ਭਿਨ੍ਦਿਤ੍ਵਾ ਨਿਵਾਸਨਂ ਅਪਨੇਤ੍ਵਾ ਕਿਲਞ੍ਜਪੇਲ਼ਤੋ ਪਟ੍ਠਾਯ ਅਨੁਪੁਬ੍ਬੇਨ ਵਿਵਰਨ੍ਤੋ ਸਾਰਮਯਂ ਸਮੁਗ੍ਗਂ ਦਿਸ੍ਵਾ ਚਿਨ੍ਤੇਸਿ – ‘‘ਮਹਾਪਰਿਹਾਰੋ ਨਾਯਂ ਅਞ੍ਞਸ੍ਸ ਰਤਨਸ੍ਸ ਭਵਿਸ੍ਸਤਿ, ਅਦ੍ਧਾ ਮਜ੍ਝਿਮਦੇਸੇ ਸੋਤਬ੍ਬਯੁਤ੍ਤਕਂ ਰਤਨਂ ਉਪ੍ਪਨ੍ਨ’’ਨ੍ਤਿ. ਅਥ ਤਂ ਸਮੁਗ੍ਗਂ ਵਿਵਰਿਤ੍ਵਾ ਰਾਜਲਞ੍ਛਨਂ ਭਿਨ੍ਦਿਤ੍ਵਾ ਸੁਖੁਮਕਮ੍ਬਲਂ ਉਭਤੋ ਵਿਯੂਹਿਤ੍ਵਾ ਸੁਵਣ੍ਣਪਟ੍ਟਂ ਅਦ੍ਦਸ.

ਸੋ ਤਂ ਪਸਾਰੇਤ੍ਵਾ – ‘‘ਮਨਾਪਾਨਿ ਵਤ ਅਕ੍ਖਰਾਨਿ ਸਮਸੀਸਾਨਿ ਸਮਪਨ੍ਤੀਨਿ ਚਤੁਰਸ੍ਸਾਨੀ’’ਤਿਆਦਿਤੋ ਪਟ੍ਠਾਯ ਵਾਚੇਤੁਂ ਆਰਭਿ. ਤਸ੍ਸ – ‘‘ਇਧ ਤਥਾਗਤੋ ਲੋਕੇ ਉਪ੍ਪਨ੍ਨੋ’’ਤਿ ਬੁਦ੍ਧਗੁਣੇ ਵਾਚੇਨ੍ਤਸ੍ਸ ਬਲਵਸੋਮਨਸ੍ਸਂ ਉਪ੍ਪਜ੍ਜਿ, ਨਵਨਵੁਤਿਲੋਮਕੂਪਸਹਸ੍ਸਾਨਿ ਉਦ੍ਧਗ੍ਗਲੋਮਾਨਿ ਅਹੇਸੁਂ. ਅਤ੍ਤਨੋ ਠਿਤਭਾਵਂ ਵਾ ਨਿਸਿਨ੍ਨਭਾਵਂ ਵਾ ਨ ਜਾਨਾਤਿ. ਅਥਸ੍ਸ – ‘‘ਕਪ੍ਪਕੋਟਿਸਤਸਹਸ੍ਸੇਹਿਪਿ ਏਤਂ ਦੁਲ੍ਲਭਸਾਸਨਂ ਸਹਾਯਂ ਨਿਸ੍ਸਾਯ ਸੋਤੁਂ ਲਭਾਮੀ’’ਤਿ ਭਿਯ੍ਯੋ ਬਲਵਪੀਤਿ ਉਦਪਾਦਿ. ਸੋ ਹਿ ਉਪਰਿ ਵਾਚੇਤੁਂ ਅਸਕ੍ਕੋਨ੍ਤੋ ਯਾਵ ਪੀਤਿਵੇਗਪਸ੍ਸਦ੍ਧਿਯਾ ਨਿਸੀਦਿਤ੍ਵਾ ਪਰਤੋ – ‘‘ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ’’ਤਿ ਧਮ੍ਮਗੁਣੇ ਆਰਭਿ. ਤਤ੍ਰਾਪਿਸ੍ਸ ਤਥੇਵ ਅਹੋਸਿ. ਸੋ ਪੁਨ ਯਾਵ ਪੀਤਿਵੇਗਪਸ੍ਸਦ੍ਧਿਯਾ ਨਿਸੀਦਿਤ੍ਵਾ ਪਰਤੋ ‘‘ਸੁਪ੍ਪਟਿਪਨ੍ਨੋ’’ਤਿ ਸਙ੍ਘਗੁਣੇ ਆਰਭਿ. ਤਤ੍ਰਾਪਿਸ੍ਸ ਤਥੇਵ ਅਹੋਸਿ. ਅਥ ਸਬ੍ਬਪਰਿਯਨ੍ਤੇ ਆਨਾਪਾਨਸ੍ਸਤਿਕਮ੍ਮਟ੍ਠਾਨਂ ਵਾਚੇਤ੍ਵਾ ਚਤੁਕ੍ਕਪਞ੍ਚਕਜ੍ਝਾਨਾਨਿ ਨਿਬ੍ਬਤ੍ਤੇਸਿ, ਸੋ ਝਾਨਸੁਖੇਨੇਵ ਵੀਤਿਨਾਮੇਸਿ. ਅਞ੍ਞੋ ਕੋਚਿ ਦਟ੍ਠੁਂ ਨ ਲਭਤਿ, ਏਕੋਵ ਚੂਲ਼ੁਪਟ੍ਠਾਕੋ ਪਵਿਸਤਿ. ਏਵਂ ਅਦ੍ਧਮਾਸਮਤ੍ਤਂ ਵੀਤਿਨਾਮੇਸਿ.

ਨਾਗਰਾ ਰਾਜਙ੍ਗਣੇ ਸਨ੍ਨਿਪਤਿਤ੍ਵਾ ਉਕ੍ਕੁਟ੍ਠਿਂ ਅਕਂਸੁ ‘‘ਪਣ੍ਣਾਕਾਰਂ ਪਟਿਚ੍ਛਿਤਦਿਵਸਤੋ ਪਟ੍ਠਾਯ ਬਲਦਸ੍ਸਨਂ ਵਾ ਨਾਟਕਦਸ੍ਸਨਂ ਵਾ ਨਤ੍ਥਿ, ਵਿਨਿਚ੍ਛਯਦਾਨਂ ਨਤ੍ਥਿ, ਰਾਜਾ ਸਹਾਯੇਨ ਪਹਿਤਂ ਪਣ੍ਣਾਕਾਰਂ ਯਸ੍ਸਿਚ੍ਛਤਿ ਤਸ੍ਸ ਦਸ੍ਸੇਤੁ, ਰਾਜਾਨੋ ਨਾਮ ਏਕਚ੍ਚਸ੍ਸ ਪਣ੍ਣਾਕਾਰਵਸੇਨਪਿ ਵਞ੍ਚੇਤ੍ਵਾ ਰਜ੍ਜਂ ਅਤ੍ਤਨੋ ਕਾਤੁਂ ਵਾਯਮਨ੍ਤਿ. ਕਿਂ ਨਾਮ ਅਮ੍ਹਾਕਂ ਰਾਜਾ ਕਰੋਤੀ’’ਤਿ? ਰਾਜਾ ਉਕ੍ਕੁਟ੍ਠਿਸਦ੍ਦਂ ਸੁਤ੍ਵਾ – ‘‘ਰਜ੍ਜਂ ਨੁ ਖੋ ਧਾਰੇਮਿ, ਉਦਾਹੁ ਸਤ੍ਥਾਰ’’ਨ੍ਤਿ ਚਿਨ੍ਤੇਸਿ. ਅਥਸ੍ਸ ਏਤਦਹੋਸਿ – ‘‘ਰਜ੍ਜਕਾਰਿਤਅਤ੍ਤਭਾਵੋ ਨਾਮ ਨੇਵ ਗਣਕੇਨ, ਨ ਗਣਕਮਹਾਮਤ੍ਤੇਨ ਗਣੇਤੁਂ ਸਕ੍ਕੋ. ਸਤ੍ਥੁਸਾਸਨਂ ਧਾਰੇਸ੍ਸਾਮੀ’’ਤਿ ਸਯਨੇ ਠਪਿਤਂ ਅਸਿਂ ਗਹੇਤ੍ਵਾ ਕੇਸੇ ਛਿਨ੍ਦਿਤ੍ਵਾ ਸੀਹਪਞ੍ਜਰਂ ਵਿਵਰਿਤ੍ਵਾ – ‘‘ਏਤਂ ਗਹੇਤ੍ਵਾ ਰਜ੍ਜਂ ਕਾਰੇਥਾ’’ਤਿ ਸਦ੍ਧਿਂ ਚੂਲ਼ਾਮਣਿਨਾ ਕੇਸਕਲਾਪਂ ਪਰਿਸਮਜ੍ਝੇ ਪਾਤੇਸਿ, ਮਹਾਜਨੋ ਤਂ ਉਕ੍ਖਿਪਿਤ੍ਵਾ – ‘‘ਸਹਾਯਕਸਨ੍ਤਿਕਾ ਲਦ੍ਧਪਣ੍ਣਾਕਾਰਾ ਨਾਮ ਰਾਜਾਨੋ ਤੁਮ੍ਹਾਦਿਸਾ ਹੋਨ੍ਤਿ ਦੇਵਾ’’ਤਿ ਏਕਪ੍ਪਹਾਰੇਨੇਵ ਵਿਰਵਿ. ਰਞ੍ਞੋਪਿ ਦ੍ਵਙ੍ਗੁਲਮਤ੍ਤਂ ਕੇਸਮਸ੍ਸੁ ਅਹੋਸਿ. ਬੋਧਿਸਤ੍ਤਸ੍ਸ ਪਬ੍ਬਜ੍ਜਾਸਦਿਸਮੇਵ ਕਿਰ ਜਾਤਂ.

ਤਤੋ ਚੂਲ਼ੁਪਟ੍ਠਾਕਂ ਪੇਸੇਤ੍ਵਾ ਅਨ੍ਤਰਾਪਣਾ ਦ੍ਵੇ ਕਾਸਾਯਵਤ੍ਥਾਨਿ ਮਤ੍ਤਿਕਾਪਤ੍ਤਞ੍ਚ ਆਹਰਾਪੇਤ੍ਵਾ – ‘‘ਯੇ ਲੋਕੇ ਅਰਹਨ੍ਤੋ, ਤੇ ਉਦ੍ਦਿਸ੍ਸ ਮਯ੍ਹਂ ਪਬ੍ਬਜ੍ਜਾ’’ਤਿ ਸਤ੍ਥਾਰਂ ਉਦ੍ਦਿਸ੍ਸ ਏਕਂ ਕਾਸਾਵਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਪਤ੍ਤਂ ਵਾਮਅਂਸਕੂਟੇ ਕਤ੍ਵਾ ਕਤ੍ਤਰਦਣ੍ਡਂ ਗਹੇਤ੍ਵਾ – ‘‘ਸੋਭਤਿ ਨੁ ਖੋ ਮੇ ਪਬ੍ਬਜ੍ਜਾ ਨੋ ਵਾ’’ਤਿ ਮਹਾਤਲੇ ਕਤਿਪਯਵਾਰੇ ਅਪਰਾਪਰਂ ਚਙ੍ਕਮਿਤ੍ਵਾ – ‘‘ਸੋਭਤਿ ਮੇ ਪਬ੍ਬਜ੍ਜਾ’’ਤਿ ਦ੍ਵਾਰਂ ਵਿਵਰਿਤ੍ਵਾ ਪਾਸਾਦਾ ਓਤਰਿ. ਓਤਰਨ੍ਤਂ ਪਨ ਨਂ ਤੀਸੁ ਦ੍ਵਾਰੇਸੁ ਠਿਤਨਾਟਕਾਦੀਨਿ ਦਿਸ੍ਵਾਪਿ ਨ ਸਞ੍ਜਾਨਿਂਸੁ. ‘‘ਏਕੋ ਪਚ੍ਚੇਕਬੁਦ੍ਧੋ ਅਮ੍ਹਾਕਂ ਰਞ੍ਞੋ ਧਮ੍ਮਕਥਂ ਕਥੇਤੁਂ ਆਗਤੋ’’ਤਿ ਕਿਰ ਚਿਨ੍ਤਯਿਂਸੁ. ਉਪਰਿਪਾਸਾਦਂ ਪਨ ਆਰੁਯ੍ਹ ਰਞ੍ਞੋ ਠਿਤਨਿਸਿਨ੍ਨਟ੍ਠਾਨਾਨਿ ਦਿਸ੍ਵਾ ਰਾਜਾ ਗਤੋਤਿ ਞਤ੍ਵਾ ਸਮੁਦ੍ਦਮਜ੍ਝੇ ਓਸੀਦਮਾਨਾਯ ਨਾਵਾਯ ਜਨੋ ਵਿਯ ਏਕਪ੍ਪਹਾਰੇਨੇਵ ਵਿਰਵਿਂਸੁ. ਕੁਲਪੁਤ੍ਤਂ ਭੂਮਿਤਲਂ ਓਤਿਣ੍ਣਮਤ੍ਤਂ ਅਟ੍ਠਾਰਸਸੇਨਿਯੋ ਸਬ੍ਬੇ ਨਾਗਰਾ ਬਲਕਾਯਾ ਚ ਪਰਿਵਾਰੇਤ੍ਵਾ ਮਹਾਵਿਰਵਂ ਵਿਰਵਿਂਸੁ. ਅਮਚ੍ਚਾਪਿ ਤਂ ਏਤਦਵੋਚੁਂ – ‘‘ਦੇਵ ਮਜ੍ਝਿਮਦੇਸਰਾਜਾਨੋ ਨਾਮ ਬਹੁਮਾਯਾ, ਸਾਸਨਂ ਪੇਸੇਤ੍ਵਾ ਬੁਦ੍ਧਰਤਨਂ ਨਾਮ ਲੋਕੇ ਉਪ੍ਪਨ੍ਨਂ ਵਾ ਨੋ ਵਾਤਿ ਞਤ੍ਵਾ ਗਮਿਸ੍ਸਥ, ਨਿਵਤ੍ਤਥ ਦੇਵਾ’’ਤਿ. ਸਦ੍ਦਹਾਮਹਂ ਮਯ੍ਹਂ ਸਹਾਯਕਸ੍ਸ, ਤਸ੍ਸ ਮਯਾ ਸਦ੍ਧਿਂ ਦ੍ਵੇਜ੍ਝਵਚਨਂ ਨਾਮ ਨਤ੍ਥਿ, ਤਿਟ੍ਠਥ ਤੁਮ੍ਹੇਤਿ. ਤੇ ਅਨੁਗਚ੍ਛਨ੍ਤਿਯੇਵ.

ਕੁਲਪੁਤ੍ਤੋ ਕਤ੍ਤਰਦਣ੍ਡੇਨ ਲੇਖਂ ਕਤ੍ਵਾ – ‘‘ਇਦਂ ਰਜ੍ਜਂ ਕਸ੍ਸਾ’’ਤਿ ਆਹ? ਤੁਮ੍ਹਾਕਂ ਦੇਵਾਤਿ. ਯੋ ਇਮਂ ਲੇਖਂ ਅਨ੍ਤਰਂ ਕਰੋਤਿ, ਰਾਜਾਣਾਯ ਕਾਰੇਤਬ੍ਬੋਤਿ. ਮਹਾਜਨਕਜਾਤਕੇ ਬੋਧਿਸਤ੍ਤੇਨ ਕਤਲੇਖਂ ਸੀਵਲਿਦੇਵੀ ਅਨ੍ਤਰਂ ਕਾਤੁਂ ਅਵਿਸਹਨ੍ਤੀ ਵਿਵਤ੍ਤਮਾਨਾ ਅਗਮਾਸਿ. ਤਸ੍ਸਾ ਗਤਮਗ੍ਗੇਨ ਮਹਾਜਨੋ ਅਗਮਾਸਿ. ਤਂ ਪਨ ਲੇਖਂ ਮਹਾਜਨੋ ਅਨ੍ਤਰਂ ਕਾਤੁਂ ਨ ਵਿਸਹਿ, ਲੇਖਂ ਉਸ੍ਸੀਸਕਂ ਕਤ੍ਵਾ ਵਿਵਤ੍ਤਮਾਨਾ ਵਿਰਵਿਂਸੁ. ਕੁਲਪੁਤ੍ਤੋ ‘‘ਅਯਂ ਮੇ ਗਤਟ੍ਠਾਨੇ ਦਨ੍ਤਕਟ੍ਠਂ ਵਾ ਮੁਖੋਦਕਂ ਵਾ ਦਸ੍ਸਤੀ’’ਤਿ ਅਨ੍ਤਮਸੋ ਏਕਚੇਟਕਮ੍ਪਿ ਅਗ੍ਗਹੇਤ੍ਵਾ ਪਕ੍ਕਾਮਿ. ਏਵਂ ਕਿਰਸ੍ਸ ਅਹੋਸਿ ‘‘ਮਮ ਸਤ੍ਥਾ ਚ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਏਕਕੋਵ ਪਬ੍ਬਜਿਤੋ’’ਤਿ ਏਕਕੋਵ ਅਗਮਾਸਿ. ‘‘ਸਤ੍ਥੁ ਲਜ੍ਜਾਮੀ’’ਤਿ ਚ – ‘‘ਸਤ੍ਥਾ ਕਿਰ ਮੇ ਪਬ੍ਬਜਿਤ੍ਵਾ ਯਾਨਂ ਨਾਰੁਲ਼੍ਹੋ’’ਤਿ ਚ ਅਨ੍ਤਮਸੋ ਏਕਪਟਲਿਕਮ੍ਪਿ ਉਪਾਹਨਂ ਨਾਰੁਹਿ, ਪਣ੍ਣਚ੍ਛਤ੍ਤਕਮ੍ਪਿ ਨ ਧਾਰੇਸਿ. ਮਹਾਜਨੋ ਰੁਕ੍ਖਪਾਕਾਰਟ੍ਟਾਲਕਾਦੀਨਿ ਆਰੁਯ੍ਹ ਏਸ ਅਮ੍ਹਾਕਂ ਰਾਜਾ ਗਚ੍ਛਤੀਤਿ ਓਲੋਕੇਸਿ. ਕੁਲਪੁਤ੍ਤੋ – ‘‘ਦੂਰਂ ਗਨ੍ਤਬ੍ਬਂ, ਨ ਸਕ੍ਕਾ ਏਕੇਨ ਮਗ੍ਗੋ ਨਿਤ੍ਥਰਿਤੁ’’ਨ੍ਤਿ ਏਕਂ ਸਤ੍ਥਵਾਹਂ ਅਨੁਬਨ੍ਧਿ. ਸੁਖੁਮਾਲਸ੍ਸ ਕੁਲਪੁਤ੍ਤਸ੍ਸ ਕਠਿਨਤਤ੍ਤਾਯ ਪਥਵਿਯਾ ਗਛਨ੍ਤਸ੍ਸ ਪਾਦਤਲੇਸੁ ਫੋਟਾ ਉਟ੍ਠਹਿਤ੍ਵਾ ਭਿਜ੍ਜਨ੍ਤਿ, ਦੁਕ੍ਖਾ ਵੇਦਨਾ ਉਪ੍ਪਜ੍ਜਨ੍ਤਿ. ਸਤ੍ਥਵਾਹੇ ਖਨ੍ਧਾਵਾਰਂ ਬਨ੍ਧਿਤ੍ਵਾ ਨਿਸਿਨ੍ਨੇ ਕੁਲਪੁਤ੍ਤੋ ਮਗ੍ਗਾ ਓਕ੍ਕਮ੍ਮ ਏਕਸ੍ਮਿਂ ਰੁਕ੍ਖਮੂਲੇ ਨਿਸੀਦਤਿ. ਨਿਸਿਨ੍ਨਟ੍ਠਾਨੇ ਪਾਦਪਰਿਕਮ੍ਮਂ ਵਾ ਪਿਟ੍ਠਿਪਰਿਕਮ੍ਮਂ ਵਾ ਕਤ੍ਤਾ ਨਾਮ ਨਤ੍ਥਿ, ਕੁਲਪੁਤ੍ਤੋ ਆਨਾਪਾਨਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਮਗ੍ਗਦਰਥਕਿਲਮਥਪਰਿਲ਼ਾਹਂ ਵਿਕ੍ਖਮ੍ਭੇਤ੍ਵਾ ਝਾਨਰਤਿਯਾ ਵੀਤਿਨਾਮੇਤਿ.

ਪੁਨਦਿਵਸੇ ਉਟ੍ਠਿਤੇ ਅਰੁਣੇ ਸਰੀਰਪਟਿਜਗ੍ਗਨਂ ਕਤ੍ਵਾ ਪੁਨ ਸਤ੍ਥਵਾਹਂ ਅਨੁਬਨ੍ਧਤਿ. ਪਾਤਰਾਸਕਾਲੇ ਕੁਲਪੁਤ੍ਤਸ੍ਸ ਪਤ੍ਤਂ ਗਹੇਤ੍ਵਾ ਖਾਦਨੀਯਂ ਭੋਜਨੀਯਂ ਪਤ੍ਤੇ ਪਕ੍ਖਿਪਿਤ੍ਵਾ ਦੇਨ੍ਤਿ. ਤਂ ਉਤ੍ਤਣ੍ਡੁਲਮ੍ਪਿ ਹੋਤਿ ਕਿਲਿਨ੍ਨਮ੍ਪਿ ਸਮਸਕ੍ਖਰਮ੍ਪਿ ਅਲੋਣਾਤਿਲੋਣਮ੍ਪਿ, ਕੁਲਪੁਤ੍ਤੋ ਪਵਿਸਨਟ੍ਠਾਨਂ ਪਚ੍ਚਵੇਕ੍ਖਿਤ੍ਵਾ ਅਮਤਂ ਵਿਯ ਪਰਿਭੁਞ੍ਜਿਤ੍ਵਾ ਏਤੇਨ ਨਿਯਾਮੇਨ ਅਟ੍ਠਹਿ ਊਨਕਾਨਿ ਦ੍ਵੇ ਯੋਜਨਸਤਾਨਿ ਗਤੋ. ਜੇਤਵਨਦ੍ਵਾਰਕੋਟ੍ਠਕਸ੍ਸ ਪਨ ਸਮੀਪੇਨ ਗਚ੍ਛਨ੍ਤੋਪਿ – ‘‘ਕਹਂ ਸਤ੍ਥਾ ਵਸਤੀ’’ਤਿ ਨਾਪੁਚ੍ਛਿ. ਕਸ੍ਮਾ? ਸਤ੍ਥੁਗਾਰਵੇਨ ਚੇਵ ਰਞ੍ਞੋ ਪੇਸਿਤਸਾਸਨਵਸੇਨ ਚ. ਰਞ੍ਞੋ ਹਿ – ‘‘ਇਧ ਤਥਾਗਤੋ ਲੋਕੇ ਉਪ੍ਪਜ੍ਜਤੀ’’ਤਿ ਸਤ੍ਥਾਰਂ ਰਾਜਗਹੇ ਉਪ੍ਪਨ੍ਨਂ ਵਿਯ ਕਤ੍ਵਾ ਸਾਸਨਂ ਪੇਸਿਤਂ, ਤਸ੍ਮਾ ਨਂ ਅਪੁਚ੍ਛਿਤ੍ਵਾਵ ਪਞ੍ਚਚਤ੍ਤਾਲੀਸਯੋਜਨਮਤ੍ਤਂ ਮਗ੍ਗਂ ਅਤਿਕ੍ਕਨ੍ਤੋ. ਸੋ ਸੂਰਿਯਤ੍ਥਙ੍ਗਮਨਵੇਲਾਯ ਰਾਜਗਹਂ ਪਤ੍ਵਾ ਸਤ੍ਥਾ ਕਹਂ ਵਸਤੀਤਿ ਪੁਚ੍ਛਿ. ਕੁਤੋ ਨੁ, ਭਨ੍ਤੇ, ਆਗਤੋਤਿ? ਇਤੋ ਉਤ੍ਤਰਤੋਤਿ. ਸਤ੍ਥਾ ਤੁਯ੍ਹਂ ਆਗਤਮਗ੍ਗੇ ਇਤੋ ਪਞ੍ਚਚਤ੍ਤਾਲੀਸਯੋਜਨਮਤ੍ਤੇ ਸਾਵਤ੍ਥਿ ਨਾਮ ਅਤ੍ਥਿ, ਤਤ੍ਥ ਵਸਤੀਤਿ. ਕੁਲਪੁਤ੍ਤੋ ਚਿਨ੍ਤੇਸਿ – ‘‘ਇਦਾਨਿ ਅਕਾਲੋ ਨ ਸਕ੍ਕਾ ਗਨ੍ਤੁਂ, ਅਜ੍ਜ ਇਧੇਵ ਵਸਿਤ੍ਵਾ ਸ੍ਵੇ ਸਤ੍ਥੁ ਸਨ੍ਤਿਕਂ ਗਮਿਸ੍ਸਾਮੀ’’ਤਿ. ਤਤੋ – ‘‘ਵਿਕਾਲੇ ਸਮ੍ਪਤ੍ਤਪਬ੍ਬਜਿਤਾ ਕਹਂ ਵਸਨ੍ਤੀ’’ਤਿ ਪੁਚ੍ਛਿ. ਇਮਾਯ ਕੁਮ੍ਭਕਾਰਸਾਲਾਯ, ਭਨ੍ਤੇਤਿ. ਅਥ ਸੋ ਤਂ ਕੁਮ੍ਭਕਾਰਂ ਯਾਚਿਤ੍ਵਾ ਤਤ੍ਥ ਵਾਸਤ੍ਥਾਯ ਪਵਿਸਿਤ੍ਵਾ ਨਿਸੀਦਿ.

ਭਗਵਾਪਿ ਤਂਦਿਵਸਂ ਪਚ੍ਚੂਸਕਾਲੇ ਲੋਕਂ ਵੋਲੋਕੇਨ੍ਤੋ ਪੁਕ੍ਕੁਸਾਤਿਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਕੁਲਪੁਤ੍ਤੋ ਸਹਾਯੇਨ ਪੇਸਿਤਂ ਸਾਸਨਮਤ੍ਤਕਂ ਵਾਚੇਤ੍ਵਾ ਅਤਿਰੇਕਤਿਯੋਜਨਸਤਿਕਂ ਮਹਾਰਜ੍ਜਂ ਪਹਾਯ ਮਂ ਉਦ੍ਦਿਸ੍ਸ ਪਬ੍ਬਜਿਤ੍ਵਾ ਅਟ੍ਠਹਿ ਊਨਕਾਨਿ ਦ੍ਵੇ ਯੋਜਨਸਤਾਨਿ ਅਤਿਕ੍ਕਮ੍ਮ ਰਾਜਗਹਂ ਪਾਪੁਣਿਸ੍ਸਤਿ, ਮਯਿ ਅਗਚ੍ਛਨ੍ਤੇ ਪਨ ਤੀਣਿ ਸਾਮਞ੍ਞਫਲਾਨਿ ਅਪ੍ਪਟਿਵਿਜ੍ਝਿਤ੍ਵਾ ਏਕਰਤ੍ਤਿਵਾਸੇਨ ਅਨਾਥਕਾਲਕਿਰਿਯਂ ਕਰਿਸ੍ਸਤਿ, ਮਯਿ ਪਨ ਗਤੇ ਤੀਣਿ ਸਾਮਞ੍ਞਫਲਾਨਿ ਪਟਿਵਿਜ੍ਝਿਸ੍ਸਤਿ. ਜਨਸਙ੍ਗਹਤ੍ਥਾਯੇਵ ਪਨ ਮਯਾ ਸਤਸਹਸ੍ਸਕਪ੍ਪਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਪਾਰਮਿਯੋ ਪੂਰਿਤਾ, ਕਰਿਸ੍ਸਾਮਿ ਤਸ੍ਸ ਸਙ੍ਗਹ’’ਨ੍ਤਿ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਗਨ੍ਧਕੁਟਿਂ ਪਵਿਸਿਤ੍ਵਾ ਮੁਹੁਤ੍ਤਂ ਅਤ੍ਤਦਰਥਕਿਲਮਥਂ ਪਟਿਪਸ੍ਸਮ੍ਭੇਤ੍ਵਾ – ‘‘ਕੁਲਪੁਤ੍ਤੋ ਮਯਿ ਗਾਰਵੇਨ ਦੁਕ੍ਕਰਂ ਅਕਾਸਿ, ਅਤਿਰੇਕਯੋਜਨਸਤਂ ਰਜ੍ਜਂ ਪਹਾਯ ਅਨ੍ਤਮਸੋ ਮੁਖਧੋਵਨਦਾਯਕਮ੍ਪਿ ਚੇਟਕਂ ਅਗ੍ਗਹੇਤ੍ਵਾ ਏਕਕੋਵ ਨਿਕ੍ਖਨ੍ਤੋ’’ਤਿ ਸਾਰਿਪੁਤ੍ਤਮਹਾਮੋਗ੍ਗਲ੍ਲਾਨਾਦੀਸੁ ਕਞ੍ਚਿ ਅਨਾਮਨ੍ਤੇਤ੍ਵਾ ਸਯਮੇਵ ਅਤ੍ਤਨੋ ਪਤ੍ਤਚੀਵਰਂ ਗਹੇਤ੍ਵਾ ਏਕਕੋਵ ਨਿਕ੍ਖਨ੍ਤੋ. ਗਚ੍ਛਨ੍ਤੋ ਚ ਨੇਵ ਆਕਾਸੇ ਉਪ੍ਪਤਿ, ਨ ਪਥਵਿਂ ਸਂਖਿਪਿ, – ‘‘ਕੁਲਪੁਤ੍ਤੋ ਮਮ ਲਜ੍ਜਮਾਨੋ ਹਤ੍ਥਿਅਸ੍ਸਰਥਸੁਵਣ੍ਣਸਿਵਿਕਾਦੀਸੁ ਏਕਯਾਨੇਪਿ ਅਨਿਸੀਦਿਤ੍ਵਾ ਅਨ੍ਤਮਸੋ ਏਕਪਟਲਿਕਂ ਉਪਾਹਨਮ੍ਪਿ ਅਨਾਰੁਯ੍ਹ ਪਣ੍ਣਚ੍ਛਤ੍ਤਕਮ੍ਪਿ ਅਗ੍ਗਹੇਤ੍ਵਾ ਨਿਕ੍ਖਨ੍ਤੋ, ਮਯਾਪਿ ਪਦਸਾਵ ਗਨ੍ਤੁਂ ਵਟ੍ਟਤੀ’’ਤਿ ਪਨ ਚਿਨ੍ਤੇਤ੍ਵਾ ਪਦਸਾਵ ਅਗਮਾਸਿ.

ਸੋ ਅਸੀਤਿ ਅਨੁਬ੍ਯਞ੍ਜਨਾਨਿ ਬ੍ਯਾਮਪ੍ਪਭਾ ਬਾਤ੍ਤਿਂਸ ਮਹਾਪੁਰਿਸਲਕ੍ਖਣਾਨੀਤਿ ਇਮਂ ਬੁਦ੍ਧਸਿਰਿਂ ਪਟਿਚ੍ਛਾਦੇਤ੍ਵਾ ਵਲਾਹਕਪਟਿਚ੍ਛਨ੍ਨੋ ਪੁਣ੍ਣਚਨ੍ਦੋ ਵਿਯ ਅਞ੍ਞਤਰਭਿਕ੍ਖੁਵੇਸੇਨ ਗਚ੍ਛਨ੍ਤੋ ਏਕਪਚ੍ਛਾਭਤ੍ਤੇਨੇਵ ਪਞ੍ਚਚਤ੍ਤਾਲੀਸ ਯੋਜਨਾਨਿ ਅਤਿਕ੍ਕਮ੍ਮ ਸੂਰਿਯਤ੍ਥਙ੍ਗਮਲੀਵੇਲਾਯ ਕੁਲਪੁਤ੍ਤੇ ਪਵਿਟ੍ਠਮਤ੍ਤੇਯੇਵ ਤਂ ਕੁਮ੍ਭਕਾਰਸਾਲਂ ਪਾਪੁਣਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ, ਪੁਕ੍ਕੁਸਾਤਿ, ਨਾਮ ਕੁਲਪੁਤ੍ਤੋ ਭਗਵਨ੍ਤਂ ਉਦ੍ਦਿਸ੍ਸ ਸਦ੍ਧਾਯ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ, ਸੋ ਤਸ੍ਮਿਂ ਕੁਮ੍ਭਕਾਰਾਵੇਸਨੇ ਪਠਮਂ ਵਾਸੂਪਗਤੋ ਹੋਤੀ’’ਤਿ.

ਏਵਂ ਗਨ੍ਤ੍ਵਾਪਿ ਪਨ ਭਗਵਾ – ‘‘ਅਹਂ ਸਮ੍ਮਾਸਮ੍ਬੁਦ੍ਧੋ’’ਤਿ ਪਸਯ੍ਹ ਕੁਮ੍ਭਕਾਰਸਾਲਂ ਅਪਵਿਸਿਤ੍ਵਾ ਦ੍ਵਾਰੇ ਠਿਤੋਵ ਕੁਲਪੁਤ੍ਤਂ ਓਕਾਸਂ ਕਾਰੇਨ੍ਤੋ ਸਚੇ ਤੇ ਭਿਕ੍ਖੂਤਿਆਦਿਮਾਹ. ਉਰੁਨ੍ਦਨ੍ਤਿ ਵਿਵਿਤ੍ਤਂ ਅਸਮ੍ਬਾਧਂ. ਵਿਹਰਤਾਯਸ੍ਮਾ ਯਥਾਸੁਖਨ੍ਤਿ ਯੇਨ ਯੇਨ ਇਰਿਯਾਪਥੇਨ ਫਾਸੁ ਹੋਤਿ, ਤੇਨ ਤੇਨ ਯਥਾਸੁਖਂ ਆਯਸ੍ਮਾ ਵਿਹਰਤੂਤਿ ਓਕਾਸਂ ਅਕਾਸਿ. ਅਤਿਰੇਕਤਿਯੋਜਨਸਤਞ੍ਹਿ ਰਜ੍ਜਂ ਪਹਾਯ ਪਬ੍ਬਜਿਤੋ ਕੁਲਪੁਤ੍ਤੋ ਪਰਸ੍ਸ ਛਡ੍ਡਿਤਪਤਿਤਂ ਕੁਮ੍ਭਕਾਰਸਾਲਂ ਕਿਂ ਅਞ੍ਞਸ੍ਸ ਸਬ੍ਰਹ੍ਮਚਾਰਿਨੋ ਮਚ੍ਛਰਾਯਿਸ੍ਸਤਿ. ਏਕਚ੍ਚੇ ਪਨ ਮੋਘਪੁਰਿਸਾ ਸਾਸਨੇ ਪਬ੍ਬਜਿਤ੍ਵਾ ਆਵਾਸਮਚ੍ਛਰਿਯਾਦੀਹਿ ਅਭਿਭੂਤਾ ਅਤ੍ਤਨੋ ਵਸਨਟ੍ਠਾਨੇ ਮਯ੍ਹਂ ਕੁਟਿ ਮਯ੍ਹਂ ਪਰਿਵੇਣਨ੍ਤਿ ਅਞ੍ਞੇਸਂ ਅਵਾਸਾਯ ਪਰਕ੍ਕਮਨ੍ਤਿ. ਨਿਸੀਦੀਤਿ ਅਚ੍ਚਨ੍ਤਸੁਖੁਮਾਲੋ ਲੋਕਨਾਥੋ ਦੇਵਵਿਮਾਨਸਦਿਸਂ ਗਨ੍ਧਕੁਟਿਂ ਪਹਾਯ ਤਤ੍ਥ ਤਤ੍ਥ ਵਿਪ੍ਪਕਿਣ੍ਣਛਾਰਿਕਾਯ ਭਿਨ੍ਨਭਾਜਨਤਿਣਪਲਾਸਕੁਕ੍ਕੁਟਸੂਕਰਵਚ੍ਚਾਦਿਸਂਕਿਲਿਟ੍ਠਾਯ ਸਙ੍ਕਾਰਟ੍ਠਾਨਸਦਿਸਾਯ ਕੁਮ੍ਭਕਾਰਸਾਲਾਯ ਤਿਣਸਨ੍ਥਾਰਂ ਸਨ੍ਥਰਿਤ੍ਵਾ ਪਂਸੁਕੂਲਚੀਵਰਂ ਪਞ੍ਞਪੇਤ੍ਵਾ ਦੇਵਵਿਮਾਨਸਦਿਸਂ ਦਿਬ੍ਬਗਨ੍ਧਸੁਗਨ੍ਧਂ ਗਨ੍ਧਕੁਟਿਂ ਪਵਿਸਿਤ੍ਵਾ ਨਿਸੀਦਨ੍ਤੋ ਵਿਯ ਨਿਸੀਦਿ.

ਇਤਿ ਭਗਵਾਪਿ ਅਸਮ੍ਭਿਨ੍ਨਮਹਾਸਮ੍ਮਤਵਂਸੇ ਉਪ੍ਪਨ੍ਨੋ, ਕੁਲਪੁਤ੍ਤੋਪਿ ਖਤ੍ਤਿਯਗਬ੍ਭੇ ਵਡ੍ਢਿਤੋ. ਭਗਵਾਪਿ ਅਭਿਨੀਹਾਰਸਮ੍ਪਨ੍ਨੋ, ਕੁਲਪੁਤ੍ਤੋਪਿ ਅਭਿਨੀਹਾਰਸਮ੍ਪਨ੍ਨੋ. ਭਗਵਾਪਿ ਰਜ੍ਜਂ ਪਹਾਯ ਪਬ੍ਬਜਿਤੋ, ਕੁਲਪੁਤ੍ਤੋਪਿ. ਭਗਵਾਪਿ ਸੁਵਣ੍ਣਵਣ੍ਣੋ, ਕੁਲਪੁਤ੍ਤੋਪਿ. ਭਗਵਾਪਿ ਸਮਾਪਤ੍ਤਿਲਾਭੀ, ਕੁਲਪੁਤ੍ਤੋਪਿ. ਇਤਿ ਦ੍ਵੇਪਿ ਖਤ੍ਤਿਯਾ ਦ੍ਵੇਪਿ ਅਭਿਨੀਹਾਰਸਮ੍ਪਨ੍ਨਾ ਦ੍ਵੇਪਿ ਰਾਜਪਬ੍ਬਜਿਤਾ ਦ੍ਵੇਪਿ ਸੁਵਣ੍ਣਵਣ੍ਣਾ ਦ੍ਵੇਪਿ ਸਮਾਪਤ੍ਤਿਲਾਭਿਨੋ ਕੁਮ੍ਭਕਾਰਸਾਲਂ ਪਵਿਸਿਤ੍ਵਾ ਨਿਸਿਨ੍ਨਾਤਿ ਤੇਹਿ ਕੁਮ੍ਭਕਾਰਸਾਲਾ ਅਤਿਵਿਯ ਸੋਭਤਿ, ਦ੍ਵੀਹਿ ਸੀਹਾਦੀਹਿ ਪਵਿਟ੍ਠਗੁਹਾਦੀਹਿ ਆਹਰਿਤ੍ਵਾ ਦੀਪੇਤਬ੍ਬਂ. ਤੇਸੁ ਪਨ ਦ੍ਵੀਸੁ ਭਗਵਾ – ‘‘ਸੁਖੁਮਾਲੋ ਅਹਂ ਪਰਮਸੁਖੁਮਾਲੋ ਏਕਪਚ੍ਛਾਭਤ੍ਤੇਨ ਪਞ੍ਚਚਤ੍ਤਾਲੀਸ ਯੋਜਨਾਨਿ ਆਗਤੋ, ਮੁਹੁਤ੍ਤਂ ਤਾਵ ਸੀਹਸੇਯ੍ਯਂ ਕਪ੍ਪੇਤ੍ਵਾ ਮਗ੍ਗਦਰਥਂ ਪਟਿਪਸ੍ਸਮ੍ਭੇਮੀ’’ਤਿ ਚਿਤ੍ਤਮ੍ਪਿ ਅਨੁਪ੍ਪਾਦੇਤ੍ਵਾ ਨਿਸੀਦਨ੍ਤੋਵ ਫਲਸਮਾਪਤ੍ਤਿਂ ਸਮਾਪਜ੍ਜਿ. ਕੁਲਪੁਤ੍ਤੋਪਿ – ‘‘ਦ੍ਵਾਨਵੁਤਿਯੋਜਨਸਤਂ ਆਗਤੋਮ੍ਹਿ, ਮੁਹੁਤ੍ਤਂ ਤਾਵ ਨਿਪਜ੍ਜਿਤ੍ਵਾ ਮਗ੍ਗਦਰਥਂ ਵਿਨੋਦੇਮੀ’’ਤਿ ਚਿਤ੍ਤਂ ਅਨੁਪ੍ਪਾਦੇਤ੍ਵਾ ਨਿਸੀਦਮਾਨੋਵ ਆਨਾਪਾਨਚਤੁਤ੍ਥਜ੍ਝਾਨਂ ਸਮਾਪਜ੍ਜਿ. ਇਦਂ ਸਨ੍ਧਾਯ ਅਥ ਖੋ ਭਗਵਾ ਬਹੁਦੇਵ ਰਤ੍ਤਿਨ੍ਤਿਆਦਿ ਵੁਤ੍ਤਂ.

ਨਨੁ ਚ ਭਗਵਾ ਕੁਲਪੁਤ੍ਤਸ੍ਸ ਧਮ੍ਮਂ ਦੇਸੇਸ੍ਸਾਮੀਤਿ ਆਗਤੋ, ਕਸ੍ਮਾ ਨ ਦੇਸੇਸੀਤਿ? ਕੁਲਪੁਤ੍ਤਸ੍ਸ ਮਗ੍ਗਦਰਥੋ ਅਪ੍ਪਟਿਪਸ੍ਸਦ੍ਧੋ, ਨ ਸਕ੍ਖਿਸ੍ਸਤਿ ਧਮ੍ਮਦੇਸਨਂ ਸਮ੍ਪਟਿਚ੍ਛਿਤੁਂ, ਸੋ ਤਾਵਸ੍ਸ ਪਟਿਪਸ੍ਸਮ੍ਭਤੂਤਿ ਨ ਦੇਸੇਸਿ. ਅਪਰੇ – ‘‘ਰਾਜਗਹਂ ਨਾਮ ਆਕਿਣ੍ਣਮਨੁਸ੍ਸਂ ਅਵਿਵਿਤ੍ਤਂ ਦਸਹਿ ਸਦ੍ਦੇਹਿ, ਸੋ ਸਦ੍ਦੋ ਦਿਯਡ੍ਢਯਾਮਮਤ੍ਤੇਨ ਸਨ੍ਨਿਸੀਦਤਿ, ਤਂ ਆਗਮੇਨ੍ਤੋ ਨ ਦੇਸੇਸੀ’’ਤਿ ਵਦਨ੍ਤਿ. ਤਂ ਅਕਾਰਣਂ, ਬ੍ਰਹ੍ਮਲੋਕਪ੍ਪਮਾਣਮ੍ਪਿ ਹਿ ਸਦ੍ਦਂ ਭਗਵਾ ਅਤ੍ਤਨੋ ਆਨੁਭਾਵੇਨ ਵੂਪਸਮੇਤੁਂ ਸਕ੍ਕੋਤਿ, ਮਗ੍ਗਦਰਥਵੂਪਸਮਂ ਆਗਮੇਨ੍ਤੋਯੇਵ ਪਨ ਨ ਦੇਸੇਸਿ.

ਤਤ੍ਥ ਬਹੁਦੇਵ ਰਤ੍ਤਿਨ੍ਤਿ ਦਿਯਡ੍ਢਯਾਮਮਤ੍ਤਂ. ਏਤਦਹੋਸੀਤਿ ਭਗਵਾ ਫਲਸਮਾਪਤ੍ਤਿਤੋ ਵੁਟ੍ਠਾਯ ਸੁਵਣ੍ਣਵਿਮਾਨੇ ਮਣਿਸੀਹਪਞ੍ਜਰਂ ਵਿਵਰਨ੍ਤੋ ਵਿਯ ਪਞ੍ਚਪਸਾਦਪ੍ਪਟਿਮਣ੍ਡਿਤਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕੇਸਿ, ਅਥਸ੍ਸ ਹਤ੍ਥਕੁਕ੍ਕੁਚ੍ਚਪਾਦਕੁਕ੍ਕੁਚ੍ਚਸੀਸਕਮ੍ਪਨਵਿਰਹਿਤਂ ਸੁਨਿਖਾਤਇਨ੍ਦਖੀਲਂ ਵਿਯ ਨਿਚ੍ਚਲਂ ਅਵਿਬ੍ਭਨ੍ਤਂ ਸੁਵਣ੍ਣਪਟਿਮਂ ਵਿਯ ਨਿਸਿਨ੍ਨਂ ਕੁਲਪੁਤ੍ਤਂ ਦਿਸ੍ਵਾ ਏਤਂ – ‘‘ਪਾਸਾਦਿਕਂ ਖੋ’’ਤਿਆਦਿ ਅਹੋਸਿ. ਤਤ੍ਥ ਪਾਸਾਦਿਕਨ੍ਤਿ ਪਸਾਦਾਵਹਂ. ਭਾਵਨਪੁਂਸਕਂ ਪਨੇਤਂ, ਪਾਸਾਦਿਕੇਨ ਇਰਿਯਾਪਥੇਨ ਇਰਿਯਤਿ. ਯਥਾ ਇਰਿਯਤੋ ਇਰਿਯਾਪਥੋ ਪਾਸਾਦਿਕੋ ਹੋਤਿ, ਏਵਂ ਇਰਿਯਤੀਤਿ ਅਯਮੇਤ੍ਥ ਅਤ੍ਥੋ. ਚਤੂਸੁ ਹਿ ਇਰਿਯਾਪਥੇਸੁ ਤਯੋ ਇਰਿਯਾਪਥਾ ਨ ਸੋਭਨ੍ਤਿ. ਗਚ੍ਛਨ੍ਤਸ੍ਸ ਹਿ ਭਿਕ੍ਖੁਨੋ ਹਤ੍ਥਾ ਚਲਨ੍ਤਿ, ਪਾਦਾ ਚਲਨ੍ਤਿ, ਸੀਸਂ ਚਲਤਿ, ਠਿਤਸ੍ਸ ਕਾਯੋ ਥਦ੍ਧੋ ਹੋਤਿ, ਨਿਪਨ੍ਨਸ੍ਸਾਪਿ ਇਰਿਯਾਪਥੋ ਅਮਨਾਪੋ ਹੋਤਿ, ਪਚ੍ਛਾਭਤ੍ਤੇ ਪਨ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਚਮ੍ਮਖਣ੍ਡਂ ਪਞ੍ਞਪੇਤ੍ਵਾ ਸੁਧੋਤਹਤ੍ਥਪਾਦਸ੍ਸ ਚਤੁਸਨ੍ਧਿਕਪਲ੍ਲਙ੍ਕਂ ਆਭੁਜਿਤ੍ਵਾ ਨਿਪਨ੍ਨਸ੍ਸੇਵ ਇਰਿਯਾਪਥੋ ਸੋਭਤਿ. ਅਯਞ੍ਚ ਕੁਲਪੁਤ੍ਤੋ ਪਲ੍ਲਙ੍ਕਂ ਆਭੁਜਿਤ੍ਵਾ ਆਨਾਪਾਨਚਤੁਤ੍ਥਜ੍ਝਾਨਂ ਅਪ੍ਪੇਤ੍ਵਾ ਨਿਸੀਦਿ. ਇਤਿਸ੍ਸ ਇਰਿਯਾਪਥੇਨੇਵ ਪਸਨ੍ਨੋ ਭਗਵਾ – ‘‘ਪਾਸਾਦਿਕਂ ਖੋ’’ਤਿ ਪਰਿਵਿਤਕ੍ਕੇਸਿ.

ਯਂਨੂਨਾਹਂ ਪੁਚ੍ਛੇਯ੍ਯਨ੍ਤਿ ਕਸ੍ਮਾ ਪੁਚ੍ਛਤਿ? ਕਿਂ ਭਗਵਾ ਅਤ੍ਤਾਨਂ ਉਦ੍ਦਿਸ੍ਸ ਪਬ੍ਬਜਿਤਭਾਵਂ ਨ ਜਾਨਾਤੀਤਿ? ਨੋ ਨ ਜਾਨਾਤਿ, ਅਪੁਚ੍ਛਿਤੇ ਪਨ ਕਥਾ ਨ ਪਤਿਟ੍ਠਾਤਿ, ਅਪਤਿਟ੍ਠਿਤਾਯ ਕਥਾਯ ਕਥਾ ਨ ਸਞ੍ਜਾਯਤੀਤਿ ਕਥਾਪਤਿਟ੍ਠਾਪਨਤ੍ਥਂ ਪੁਚ੍ਛਿ.

ਦਿਸ੍ਵਾ ਚ ਪਨ ਜਾਨੇਯ੍ਯਾਸੀਤਿ ਤਥਾਗਤਂ ਬੁਦ੍ਧਸਿਰਿਯਾ ਵਿਰੋਚਨ੍ਤਂ ਅਯਂ ਬੁਦ੍ਧੋਤਿ ਸਬ੍ਬੇ ਜਾਨਨ੍ਤਿ. ਅਨਚ੍ਛਰਿਯਮੇਤਂ ਜਾਨਨਂ, ਬੁਦ੍ਧਸਿਰਿਂ ਪਨ ਪਟਿਚ੍ਛਾਦੇਤ੍ਵਾ ਅਞ੍ਞਤਰਪਿਣ੍ਡਪਾਤਿਕਵੇਸੇਨ ਚਰਨ੍ਤੋ ਦੁਜ੍ਜਾਨੋ ਹੋਤਿ. ਇਚ੍ਚਾਯਸ੍ਮਾ, ਪੁਕ੍ਕੁਸਾਤਿ, ‘‘ਨ ਜਾਨੇਯ੍ਯ’’ਨ੍ਤਿ ਸਭਾਵਮੇਵ ਕਥੇਤਿ. ਤਥਾ ਹਿ ਨਂ ਏਕਕੁਮ੍ਭਕਾਰਸਾਲਾਯ ਨਿਸਿਨ੍ਨਮ੍ਪਿ ਨ ਜਾਨਾਤਿ.

ਏਤਦਹੋਸੀਤਿ ਮਗ੍ਗਦਰਥਸ੍ਸ ਵੂਪਸਮਭਾਵਂ ਞਤ੍ਵਾ ਅਹੋਸਿ. ਏਵਮਾਵੁਸੋਤਿ ਕੁਲਪੁਤ੍ਤੋ ਸਹਾਯੇਨ ਪੇਸਿਤਂ ਸਾਸਨਮਤ੍ਤਂ ਵਾਚੇਤ੍ਵਾ ਰਜ੍ਜਂ ਪਹਾਯ ਪਬ੍ਬਜਮਾਨੋ – ‘‘ਦਸਬਲਸ੍ਸ ਮਧੁਰਧਮ੍ਮਦੇਸਨਂ ਸੋਤੁਂ ਲਭਿਸ੍ਸਾਮੀ’’ਤਿ. ਪਬ੍ਬਜਿਤੋ, ਪਬ੍ਬਜਿਤ੍ਵਾ ਏਤ੍ਤਕਂ ਅਦ੍ਧਾਨਂ ਆਗਚ੍ਛਨ੍ਤੋ – ‘‘ਧਮ੍ਮਂ ਤੇ ਭਿਕ੍ਖੁ ਦੇਸੇਸ੍ਸਾਮੀ’’ਤਿ ਪਦਮਤ੍ਤਸ੍ਸ ਵਤ੍ਤਾਰਂ ਨਾਲਤ੍ਥ, ਸੋ ‘‘ਧਮ੍ਮਂ ਤੇ ਭਿਕ੍ਖੁ ਦੇਸੇਸ੍ਸਾਮੀ’’ਤਿ ਵੁਤ੍ਤਂ ਕਿਂ ਸਕ੍ਕਚ੍ਚਂ ਨ ਸੁਣਿਸ੍ਸਤਿ. ਪਿਪਾਸਿਤਸੋਣ੍ਡੋ ਵਿਯ ਹਿ ਪਿਪਾਸਿਤਹਤ੍ਥੀ ਵਿਯ ਚਾਯਂ, ਤਸ੍ਮਾ ਸਕ੍ਕਚ੍ਚਂ ਸਵਨਂ ਪਟਿਜਾਨਨ੍ਤੋ ‘‘ਏਵਮਾਵੁਸੋ’’ਤਿ ਆਹ.

੩੪੩. ਛਧਾਤੁਰੋ ਅਯਨ੍ਤਿ ਭਗਵਾ ਕੁਲਪੁਤ੍ਤਸ੍ਸ ਪੁਬ੍ਬਭਾਗਪਟਿਪਦਂ ਅਕਥੇਤ੍ਵਾ ਆਦਿਤੋਵ ਅਰਹਤ੍ਤਸ੍ਸ ਪਦਟ੍ਠਾਨਭੂਤਂ ਅਚ੍ਚਨ੍ਤਸੁਞ੍ਞਤਂ ਵਿਪਸ੍ਸਨਾਲਕ੍ਖਣਮੇਵ ਆਚਿਕ੍ਖਿਤੁਂ ਆਰਦ੍ਧੋ. ਯਸ੍ਸ ਹਿ ਪੁਬ੍ਬਭਾਗਪਟਿਪਦਾ ਅਪਰਿਸੁਦ੍ਧਾ ਹੋਤਿ, ਤਸ੍ਸ ਪਠਮਮੇਵ ਸੀਲਸਂਵਰਂ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਂ ਭੋਜਨੇ ਮਤ੍ਤਞ੍ਞੁਤਂ ਜਾਗਰਿਯਾਨੁਯੋਗਂ ਸਤ੍ਤ ਸਦ੍ਧਮ੍ਮੇ ਚਤ੍ਤਾਰਿ ਝਾਨਾਨੀਤਿ ਇਮਂ ਪੁਬ੍ਬਭਾਗਪਟਿਪਦਂ ਆਚਿਕ੍ਖਤਿ. ਯਸ੍ਸ ਪਨੇਸਾ ਪਰਿਸੁਦ੍ਧਾ, ਤਸ੍ਸ ਤਂ ਅਕਥੇਤ੍ਵਾ ਅਰਹਤ੍ਤਸ੍ਸ ਪਦਟ੍ਠਾਨਭੂਤਂ ਵਿਪਸ੍ਸਨਮੇਵ ਆਚਿਕ੍ਖਤਿ. ਕੁਲਪੁਤ੍ਤਸ੍ਸ ਚ ਪੁਬ੍ਬਭਾਗਪਟਿਪਦਾ ਪਰਿਸੁਦ੍ਧਾ. ਤਥਾ ਹਿ ਅਨੇਨ ਸਾਸਨਂ ਵਾਚੇਤ੍ਵਾ ਪਾਸਾਦਵਰਗਤੇਨੇਵ ਆਨਾਪਾਨਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤਿਤਂ, ਯਦਸ੍ਸ ਦ੍ਵਾਨਵੁਤਿਯੋਜਨਸਭਂ ਆਗਚ੍ਛਨ੍ਤਸ੍ਸ ਯਾਨਕਿਚ੍ਚਂ ਸਾਧੇਸਿ, ਸਾਮਣੇਰਸੀਲਮ੍ਪਿਸ੍ਸ ਪਰਿਪੁਣ੍ਣਂ. ਤਸ੍ਮਾ ਪੁਬ੍ਬਭਾਗਪਟਿਪਦਂ ਅਕਥੇਤ੍ਵਾ ਅਰਹਤ੍ਤਸ੍ਸ ਪਦਟ੍ਠਾਨਭੂਤਂ ਅਚ੍ਚਨ੍ਤਸੁਞ੍ਞਤਂ ਵਿਪਸ੍ਸਨਾਲਕ੍ਖਣਮੇਵਸ੍ਸ ਆਚਿਕ੍ਖਿਤੁਂ ਆਰਦ੍ਧੋ.

ਤਤ੍ਥ ਛਧਾਤੁਰੋਤਿ ਧਾਤੁਯੋ ਵਿਜ੍ਜਮਾਨਾ, ਪੁਰਿਸੋ ਅਵਿਜ੍ਜਮਾਨੋ. ਭਗਵਾ ਹਿ ਕਤ੍ਥਚਿ ਵਿਜ੍ਜਮਾਨੇਨ ਅਵਿਜ੍ਜਮਾਨਂ ਦਸ੍ਸੇਤਿ, ਕਤ੍ਥਚਿ ਅਵਿਜ੍ਜਮਾਨੇਨ ਵਿਜ੍ਜਮਾਨਂ, ਕਤ੍ਥਚਿ ਵਿਜ੍ਜਮਾਨੇਨ ਵਿਜ੍ਜਮਾਨਂ, ਕਤ੍ਥਚਿ ਅਵਿਜ੍ਜਮਾਨੇਨ ਅਵਿਜ੍ਜਮਾਨਨ੍ਤਿ ਸਬ੍ਬਾਸਵੇ ਵੁਤ੍ਤਨਯੇਨੇਵ ਵਿਤ੍ਥਾਰੇਤਬ੍ਬਂ. ਇਧ ਪਨ ਵਿਜ੍ਜਮਾਨੇਨ ਅਵਿਜ੍ਜਮਾਨਂ ਦਸ੍ਸੇਨ੍ਤੋ ਏਵਮਾਹ. ਸਚੇ ਹਿ ਭਗਵਾ ਪੁਰਿਸੋਤਿ ਪਣ੍ਣਤ੍ਤਿਂ ਵਿਸ੍ਸਜ੍ਜੇਤ੍ਵਾ ਧਾਤੁਯੋ ਇਚ੍ਚੇਵ ਵਤ੍ਵਾ ਚਿਤ੍ਤਂ ਉਪਟ੍ਠਾਪੇਯ੍ਯ, ਕੁਲਪੁਤ੍ਤੋ ਸਨ੍ਦੇਹਂ ਕਰੇਯ੍ਯ, ਸਮ੍ਮੋਹਂ ਆਪਜ੍ਜੇਯ੍ਯ, ਦੇਸਨਂ ਸਮ੍ਪਟਿਚ੍ਛਿਤੁਂ ਨ ਸਕ੍ਕੁਣੇਯ੍ਯ. ਤਸ੍ਮਾ ਤਥਾਗਤੋ ਅਨੁਪੁਬ੍ਬੇਨ ਪੁਰਿਸੋਤਿ ਪਣ੍ਣਤ੍ਤਿਂ ਪਹਾਯ ‘‘ਸਤ੍ਤੋਤਿ ਵਾ ਪੁਰਿਸੋਤਿ ਵਾ ਪੁਗ੍ਗਲੋਤਿ ਵਾ ਪਣ੍ਣਤ੍ਤਿਮਤ੍ਤਮੇਵ, ਪਰਮਤ੍ਥਤੋ ਸਤ੍ਤੋ ਨਾਮ ਨਤ੍ਥਿ, ਧਾਤੁਮਤ੍ਤੇਯੇਵ ਚਿਤ੍ਤਂ ਠਪਾਪੇਤ੍ਵਾ ਤੀਣਿ ਫਲਾਨਿ ਪਟਿਵਿਜ੍ਝਾਪੇਸ੍ਸਾਮੀ’’ਤਿ ਅਨਙ੍ਗਣਸੁਤ੍ਤੇ (ਮ. ਨਿ. ੧.੫੭ ਆਦਯੋ) ਵੁਤ੍ਤਭਾਸਨ੍ਤਰਕੁਸਲੋ ਤਾਯ ਤਾਯ ਭਾਸਾਯ ਸਿਪ੍ਪਂ ਉਗ੍ਗਣ੍ਹਾਪੇਨ੍ਤੋ ਆਚਰਿਯੋ ਵਿਯ ਏਵਮਾਹ.

ਤਤ੍ਥ ਛ ਧਾਤੁਯੋ ਅਸ੍ਸਾਤਿ ਛਧਾਤੁਰੋ. ਇਦਂ ਵੁਤ੍ਤਂ ਹੋਤਿ – ਯਂ ਤ੍ਵਂ ਪੁਰਿਸੋਤਿ ਸਞ੍ਜਾਨਾਸਿ, ਸੋ ਛਧਾਤੁਕੋ, ਨ ਚੇਤ੍ਥ ਪਰਮਤ੍ਥਤੋ ਪੁਰਿਸੋ ਅਤ੍ਥਿ, ਪੁਰਿਸੋਤਿ ਪਨ ਪਣ੍ਣਤ੍ਤਿਮਤ੍ਤਮੇਵਾਤਿ. ਸੇਸਪਦੇਸੁਪਿ ਏਸੇਵ ਨਯੋ. ਚਤੁਰਾਧਿਟ੍ਠਾਨੋਤਿ ਏਤ੍ਥ ਅਧਿਟ੍ਠਾਨਂ ਵੁਚ੍ਚਤਿ ਪਤਿਟ੍ਠਾ, ਚਤੁਪਤਿਟ੍ਠਾਨੋਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਸ੍ਵਾਯਂ ਭਿਕ੍ਖੁ ਪੁਰਿਸੋ ਛਧਾਤੁਰੋ ਛਫਸ੍ਸਾਯਤਨੋ ਅਟ੍ਠਾਰਸਮਨੋਪਵਿਚਾਰੋ, ਸੋ ਏਤ੍ਤੋਵ ਵਿਵਟ੍ਟਿਤ੍ਵਾ ਉਤ੍ਤਮਸਿਦ੍ਧਿਭੂਤਂ ਅਰਹਤ੍ਤਂ ਗਣ੍ਹਮਾਨੋ ਇਮੇਸੁ ਚਤੂਸੁ ਠਾਨੇਸੁ ਪਤਿਟ੍ਠਾਯ ਗਣ੍ਹਾਤੀਤਿ ਚਤੁਰਾਧਿਟ੍ਠਾਨੋਤਿ. ਯਤ੍ਥ ਠਿਤਨ੍ਤਿ ਯੇਸੁ ਅਧਿਟ੍ਠਾਨੇਸੁ ਪਤਿਟ੍ਠਿਤਂ. ਮਞ੍ਞਸ੍ਸ ਵਾ ਨਪ੍ਪਵਤ੍ਤਨ੍ਤੀਤਿ ਮਞ੍ਞਸ੍ਸ ਵਾ ਮਾਨਸ੍ਸ ਵਾ ਨਪ੍ਪਵਤ੍ਤਨ੍ਤਿ. ਮੁਨਿ ਸਨ੍ਤੋਤਿ ਵੁਚ੍ਚਤੀਤਿ ਖੀਣਾਸਵਮੁਨਿ ਉਪਸਨ੍ਤੋ ਨਿਬ੍ਬੁਤੋਤਿ ਵੁਚ੍ਚਤਿ. ਪਞ੍ਞਂ ਨਪ੍ਪਮਜ੍ਜੇਯ੍ਯਾਤਿ ਅਰਹਤ੍ਤਫਲਪਞ੍ਞਾਯ ਪਟਿਵਿਜ੍ਝਨਤ੍ਥਂ ਆਦਿਤੋਵ ਸਮਾਧਿਵਿਪਸ੍ਸਨਾਪਞ੍ਞਂ ਨਪ੍ਪਮਜ੍ਜੇਯ੍ਯ. ਸਚ੍ਚਮਨੁਰਕ੍ਖੇਯ੍ਯਾਤਿ ਪਰਮਤ੍ਥਸਚ੍ਚਸ੍ਸ ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਤ੍ਥਂ ਆਦਿਤੋਵ ਵਚੀਸਚ੍ਚਂ ਰਕ੍ਖੇਯ੍ਯ. ਚਾਗਮਨੁਬ੍ਰੂਹੇਯ੍ਯਾਤਿ ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਪਰਿਚ੍ਚਾਗਕਰਣਤ੍ਥਂ ਆਦਿਤੋਵ ਕਿਲੇਸਪਰਿਚ੍ਚਾਗਂ ਬ੍ਰੂਹੇਯ੍ਯ. ਸਨ੍ਤਿਮੇਵ ਸੋ ਸਿਕ੍ਖੇਯ੍ਯਾਤਿ ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਵੂਪਸਮਨਤ੍ਥਂ ਆਦਿਤੋਵ ਕਿਲੇਸਵੂਪਸਮਨਂ ਸਿਕ੍ਖੇਯ੍ਯ. ਇਤਿ ਪਞ੍ਞਾਧਿਟ੍ਠਾਨਾਦੀਨਂ ਅਧਿਗਮਤ੍ਥਾਯ ਇਮਾਨਿ ਸਮਥਵਿਪਸ੍ਸਨਾਪਞ੍ਞਾਦੀਨਿ ਪੁਬ੍ਬਭਾਗਾਧਿਟ੍ਠਾਨਾਨਿ ਵੁਤ੍ਤਾਨਿ.

੩੪੫. ਫਸ੍ਸਾਯਤਨਨ੍ਤਿ ਫਸ੍ਸਸ੍ਸ ਆਯਤਨਂ, ਆਕਰੋਤਿ ਅਤ੍ਥੋ. ਪਞ੍ਞਾਧਿਟ੍ਠਾਨਨ੍ਤਿਆਦੀਨਿ ਪੁਬ੍ਬੇ ਵੁਤ੍ਤਾਨਂ ਅਰਹਤ੍ਤਫਲਪਞ੍ਞਾਦੀਨਂ ਵਸੇਨ ਵੇਦਿਤਬ੍ਬਾਨਿ.

੩੪੮. ਇਦਾਨਿ ਨਿਕ੍ਖਿਤ੍ਤਮਾਤਿਕਾਵਸੇਨ ‘‘ਯਤ੍ਥ ਠਿਤਂ ਮਞ੍ਞਸ੍ਸ ਵਾ ਨਪ੍ਪਵਤ੍ਤਨ੍ਤੀ’’ਤਿ ਵਤ੍ਤਬ੍ਬਂ ਭਵੇਯ੍ਯ, ਅਰਹਤ੍ਤੇ ਪਨ ਪਤ੍ਤੇ ਪੁਨ ‘‘ਪਞ੍ਞਂ ਨਪ੍ਪਮਜ੍ਜੇਯ੍ਯਾ’’ਤਿਆਦੀਹਿ ਕਿਚ੍ਚਂ ਨਤ੍ਥਿ. ਇਤਿ ਭਗਵਾ ਮਾਤਿਕਂ ਉਪ੍ਪਟਿਪਾਟਿਧਾਤੁਕਂ ਠਪੇਤ੍ਵਾਪਿ ਯਥਾਧਮ੍ਮਵਸੇਨੇਵ ਵਿਭਙ੍ਗਂ ਵਿਭਜਨ੍ਤੋ ਪਞ੍ਞਂ ਨਪ੍ਪਮਜ੍ਜੇਯ੍ਯਾਤਿਆਦਿਮਾਹ. ਤਤ੍ਥ ਕੋ ਪਞ੍ਞਂ ਪਮਜ੍ਜਤਿ, ਕੋ ਨਪ੍ਪਮਜ੍ਜਤਿ? ਯੋ ਤਾਵ ਇਮਸ੍ਮਿਂ ਸਾਸਨੇ ਪਬ੍ਬਜਿਤ੍ਵਾ ਵੇਜ੍ਜਕਮ੍ਮਾਦਿਵਸੇਨ ਏਕਵੀਸਤਿਵਿਧਾਯ ਅਨੇਸਨਾਯ ਜੀਵਿਕਂ ਕਪ੍ਪੇਨ੍ਤੋ ਪਬ੍ਬਜ੍ਜਾਨੁਰੂਪੇਨ ਚਿਤ੍ਤੁਪ੍ਪਾਦਂ ਠਪੇਤੁਂ ਨ ਸਕ੍ਕੋਤਿ, ਅਯਂ ਪਞ੍ਞਂ ਪਮਜ੍ਜਤਿ ਨਾਮ. ਯੋ ਪਨ ਸਾਸਨੇ ਪਬ੍ਬਜਿਤ੍ਵਾ ਸੀਲੇ ਪਤਿਟ੍ਠਾਯ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਸਪ੍ਪਾਯਂ ਧੁਤਙ੍ਗਂ ਸਮਾਦਾਯ ਚਿਤ੍ਤਰੁਚਿਤਂ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਵਿਤ੍ਤਂ ਸੇਨਾਸਨਂ ਨਿਸ੍ਸਾਯ ਕਸਿਣਪਰਿਕਮ੍ਮਂ ਕਤ੍ਵਾ ਸਮਾਪਤ੍ਤਿਂ ਪਤ੍ਵਾ ਅਜ੍ਜੇਵ ਅਰਹਤ੍ਤਨ੍ਤਿ ਵਿਪਸ੍ਸਨਂ ਵਡ੍ਢੇਤ੍ਵਾ ਵਿਚਰਤਿ, ਅਯਂ ਪਞ੍ਞਂ ਨਪ੍ਪਮਜ੍ਜਤਿ ਨਾਮ. ਇਮਸ੍ਮਿਂ ਪਨ ਸੁਤ੍ਤੇ ਧਾਤੁਕਮ੍ਮਟ੍ਠਾਨਵਸੇਨ ਏਸ ਪਞ੍ਞਾਯ ਅਪ੍ਪਮਾਦੋ ਵੁਤ੍ਤੋ. ਧਾਤੁਕਮ੍ਮਟ੍ਠਾਨੇ ਪਨੇਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਹਤ੍ਥਿਪਦੋਪਮਸੁਤ੍ਤਾਦੀਸੁ ਵੁਤ੍ਤਮੇਵ.

੩੫੪. ਅਥਾਪਰਂ ਵਿਞ੍ਞਾਣਂਯੇਵ ਅਵਸਿਸ੍ਸਤੀਤਿ ਅਯਮ੍ਪੇਤ੍ਥ ਪਾਟਿਯੇਕ੍ਕੋ ਅਨੁਸਨ੍ਧਿ. ਹੇਟ੍ਠਤੋ ਹਿ ਰੂਪਕਮ੍ਮਟ੍ਠਾਨਂ ਕਥਿਤਂ, ਇਦਾਨਿ ਅਰੂਪਕਮ੍ਮਟ੍ਠਾਨਂ ਵੇਦਨਾਵਸੇਨ ਨਿਬ੍ਬਤ੍ਤੇਤ੍ਵਾ ਦਸ੍ਸੇਤੁਂ ਅਯਂ ਦੇਸਨਾ ਆਰਦ੍ਧਾ. ਯਂ ਵਾ ਪਨੇਤਂ ਇਮਸ੍ਸ ਭਿਕ੍ਖੁਨੋ ਪਥਵੀਧਾਤੁਆਦੀਸੁ ਆਗਮਨਿਯਵਿਪਸ੍ਸਨਾਵਸੇਨ ਕਮ੍ਮਕਾਰਕਵਿਞ੍ਞਾਣਂ, ਤਂ ਵਿਞ੍ਞਾਣਧਾਤੁਵਸੇਨ ਭਾਜੇਤ੍ਵਾ ਦਸ੍ਸੇਨ੍ਤੋਪਿ ਇਮਂ ਦੇਸਨਂ ਆਰਭਿ. ਤਤ੍ਥ ਅਵਸਿਸ੍ਸਤੀਤਿ ਕਿਮਤ੍ਥਾਯ ਅਵਸਿਸ੍ਸਤਿ? ਸਤ੍ਥੁ ਕਥਨਤ੍ਥਾਯ ਕੁਲਪੁਤ੍ਤਸ੍ਸ ਚ ਪਟਿਵਿਜ੍ਝਨਤ੍ਥਾਯ ਅਵਸਿਸ੍ਸਤਿ. ਪਰਿਸੁਦ੍ਧਨ੍ਤਿ ਨਿਰੁਪਕ੍ਕਿਲੇਸਂ. ਪਰਿਯੋਦਾਤਨ੍ਤਿ ਪਭਸ੍ਸਰਂ. ਸੁਖਨ੍ਤਿਪਿ ਵਿਜਾਨਾਤੀਤਿ ਸੁਖਵੇਦਨਂ ਵੇਦਯਮਾਨੋ ਸੁਖਵੇਦਨਂ ਵੇਦਯਾਮੀਤਿ ਪਜਾਨਾਤਿ. ਸੇਸਪਦਦ੍ਵਯੇਸੁਪਿ ਏਸੇਵ ਨਯੋ. ਸਚੇ ਪਨਾਯਂ ਵੇਦਨਾਕਥਾ ਹੇਟ੍ਠਾ ਨ ਕਥਿਤਾ ਭਵੇਯ੍ਯ, ਇਧ ਠਤ੍ਵਾ ਕਥੇਤੁਂ ਵਟ੍ਟੇਯ੍ਯ. ਸਤਿਪਟ੍ਠਾਨੇ ਪਨੇਸਾ ਕਥਿਤਾਵਾਤਿ ਤਤ੍ਥ ਕਥਿਤਨਯੇਨੇਵ ਵੇਦਿਤਬ੍ਬਾ. ਸੁਖਵੇਦਨਿਯਨ੍ਤਿ ਏਵਮਾਦਿ ਪਚ੍ਚਯਵਸੇਨ ਉਦਯਤ੍ਥਙ੍ਗਮਨਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ਸੁਖਵੇਦਨਿਯਨ੍ਤਿ ਸੁਖਵੇਦਨਾਯ ਪਚ੍ਚਯਭੂਤਂ. ਸੇਸਪਦੇਸੁਪਿ ਏਸੇਵ ਨਯੋ.

੩੬੦. ਉਪੇਕ੍ਖਾਯੇਵ ਅਵਸਿਸ੍ਸਤੀਤਿ ਏਤ੍ਤਾਵਤਾ ਹਿ ਯਥਾ ਨਾਮ ਛੇਕੇਨ ਮਣਿਕਾਰਾਚਰਿਯੇਨ ਵਜਿਰਸੂਚਿਯਾ ਵਿਜ੍ਝਿਤ੍ਵਾ ਚਮ੍ਮਖਣ੍ਡੇ ਪਾਤੇਤ੍ਵਾ ਪਾਤੇਤ੍ਵਾ ਦਿਨ੍ਨਮੁਤ੍ਤਂ ਅਨ੍ਤੇਵਾਸਿਕੋ ਗਹੇਤ੍ਵਾ ਗਹੇਤ੍ਵਾ ਸੁਤ੍ਤਗਤਂ ਕਰੋਨ੍ਤੋ ਮੁਤ੍ਤੋਲਮ੍ਬਕਮੁਤ੍ਤਜਾਲਾਦੀਨਿ ਕਰੋਤਿ, ਏਵਮੇਵ ਭਗਵਤਾ ਕਥੇਤ੍ਵਾ ਕਥੇਤ੍ਵਾ ਦਿਨ੍ਨਂ ਕਮ੍ਮਟ੍ਠਾਨਂ ਅਯਂ ਕੁਲਪੁਤ੍ਤੋ ਮਨਸਿਕਰੋਨ੍ਤੋ ਮਨਸਿਕਰੋਨ੍ਤੋ ਪਗੁਣਂ ਅਕਾਸੀਤਿ ਰੂਪਕਮ੍ਮਟ੍ਠਾਨਮ੍ਪਿਸ੍ਸ ਅਰੂਪਕਮ੍ਮਟ੍ਠਾਨਮ੍ਪਿ ਪਗੁਣਂ ਜਾਤਂ, ਅਥ ਭਗਵਾ ‘‘ਅਥਾਪਰਂ ਉਪੇਕ੍ਖਾਯੇਵ ਅਵਸਿਸ੍ਸਤੀ’’ਤਿ ਆਹ.

ਕਿਮਤ੍ਥਂ ਪਨ ਅਵਸਿਸ੍ਸਤੀਤਿ? ਸਤ੍ਥੁ ਕਥਨਤ੍ਥਂ. ਕੁਲਪੁਤ੍ਤਸ੍ਸ ਪਟਿਵਿਜ੍ਝਨਤ੍ਥਨ੍ਤਿਪਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਕੁਲਪੁਤ੍ਤੇਨ ਹਿ ਸਹਾਯਸ੍ਸ ਸਾਸਨਂ ਵਾਚੇਤ੍ਵਾ ਪਾਸਾਦਤਲੇ ਠਿਤੇਨੇਵ ਆਨਾਪਾਨਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤਿਤਂ, ਯਦਸ੍ਸ ਏਤ੍ਤਕਂ ਮਗ੍ਗਂ ਆਗਚ੍ਛਨ੍ਤਸ੍ਸ ਯਾਨਕਿਚ੍ਚਂ ਸਾਧੇਤਿ. ਸਤ੍ਥੁ ਕਥਨਤ੍ਥਂਯੇਵ ਅਵਸਿਸ੍ਸਤਿ. ਇਮਸ੍ਮਿਞ੍ਹਿ ਠਾਨੇ ਸਤ੍ਥਾ ਕੁਲਪੁਤ੍ਤਸ੍ਸ ਰੂਪਾਵਚਰਜ੍ਝਾਨੇ ਵਣ੍ਣਂ ਕਥੇਸਿ. ਇਦਞ੍ਹਿ ਵੁਤ੍ਤਂ ਹੋਤਿ ‘‘ਭਿਕ੍ਖੁ ਪਗੁਣਂ ਤਵ ਇਦਂ ਰੂਪਾਵਚਰਚਤੁਤ੍ਥਜ੍ਝਾਨ’’ਨ੍ਤਿ. ਪਰਿਸੁਦ੍ਧਾਤਿਆਦਿ ਤਸ੍ਸਾਯੇਵ ਉਪੇਕ੍ਖਾਯ ਵਣ੍ਣਭਣਨਂ. ਉਕ੍ਕਂ ਬਨ੍ਧੇਯ੍ਯਾਤਿ ਅਙ੍ਗਾਰਕਪਲ੍ਲਂ ਸਜ੍ਜੇਯ੍ਯ. ਆਲਿਮ੍ਪੇਯ੍ਯਾਤਿ ਤਤ੍ਥ ਅਙ੍ਗਾਰੇ ਪਕ੍ਖਿਪਿਤ੍ਵਾ ਅਗ੍ਗਿਂ ਦਤ੍ਵਾ ਨਾਲ਼ਿਕਾਯ ਧਮੇਨ੍ਤੋ ਅਗ੍ਗਿਂ ਜਾਲੇਯ੍ਯ. ਉਕ੍ਕਾਮੁਖੇ ਪਕ੍ਖਿਪੇਯ੍ਯਾਤਿ ਅਙ੍ਗਾਰੇ ਵਿਯੂਹਿਤ੍ਵਾ ਅਙ੍ਗਾਰਮਤ੍ਥਕੇ ਵਾ ਠਪੇਯ੍ਯ, ਤਤ੍ਤਕੇ ਵਾ ਪਕ੍ਖਿਪੇਯ੍ਯ. ਨੀਹਟਨ੍ਤਿ ਨੀਹਟਦੋਸਂ. ਨਿਨ੍ਨੀਤਕਸਾਵਨ੍ਤਿ ਅਪਨੀਤਕਸਾਵਂ. ਏਵਮੇਵ ਖੋਤਿ ਯਥਾ ਤਂ ਸੁਵਣ੍ਣਂ ਇਚ੍ਛਿਤਿਚ੍ਛਿਤਾਯ ਪਿਲ਼ਨ੍ਧਨਵਿਕਤਿਯਾ ਸਂਵਤ੍ਤਤਿ, ਏਵਮੇਵ ਅਯਂ ਤਾਵ ਚਤੁਤ੍ਥਜ੍ਝਾਨੁਪੇਕ੍ਖਾ ਵਿਪਸ੍ਸਨਾ ਅਭਿਞ੍ਞਾ ਨਿਰੋਧੋ ਭਵੋਕ੍ਕਨ੍ਤੀਤਿ ਇਮੇਸੁ ਯਂ ਇਚ੍ਛਤਿ, ਤਸ੍ਸਤ੍ਥਾਯ ਹੋਤੀਤਿ ਵਣ੍ਣਂ ਕਥੇਸਿ.

ਕਸ੍ਮਾ ਪਨ ਭਗਵਾ ਇਮਸ੍ਮਿਂ ਰੂਪਾਵਚਰਚਤੁਤ੍ਥਜ੍ਝਾਨੇ ਨਿਕਨ੍ਤਿਪਰਿਯਾਦਾਨਤ੍ਥਂ ਅਵਣ੍ਣਂ ਅਕਥੇਤ੍ਵਾ ਵਣ੍ਣਂ ਕਥੇਸੀਤਿ. ਕੁਲਪੁਤ੍ਤਸ੍ਸ ਹਿ ਚਤੁਤ੍ਥਜ੍ਝਾਨੇ ਨਿਕਨ੍ਤਿਪਰਿਯੁਟ੍ਠਾਨਂ ਬਲਵਂ. ਸਚੇ ਅਵਣ੍ਣਂ ਕਥੇਯ੍ਯ, – ‘‘ਮਯ੍ਹਂ ਪਬ੍ਬਜਿਤ੍ਵਾ ਦ੍ਵਾਨਵੁਤਿਯੋਜਨਸਤਂ ਆਗਚ੍ਛਨ੍ਤਸ੍ਸ ਇਮਂ ਚਤੁਤ੍ਥਜ੍ਝਾਨਂ ਯਾਨਕਿਚ੍ਚਂ ਸਾਧੇਸਿ, ਅਹਂ ਏਤ੍ਤਕਂ ਮਗ੍ਗਂ ਆਗਚ੍ਛਨ੍ਤੋ ਝਾਨਸੁਖੇਨ ਝਾਨਰਤਿਯਾ ਆਗਤੋ, ਏਵਰੂਪਸ੍ਸ ਨਾਮ ਪਣੀਤਧਮ੍ਮਸ੍ਸ ਅਵਣ੍ਣਂ ਕਥੇਤਿ, ਜਾਨਂ ਨੁ ਖੋ ਕਥੇਤਿ ਅਜਾਨ’’ਨ੍ਤਿ ਕੁਲਪੁਤ੍ਤੋ ਸਂਸਯਂ ਸਮ੍ਮੋਹਂ ਆਪਜ੍ਜੇਯ੍ਯ, ਤਸ੍ਮਾ ਭਗਵਾ ਵਣ੍ਣਂ ਕਥੇਸਿ.

੩੬੧. ਤਦਨੁਧਮ੍ਮਨ੍ਤਿ ਏਤ੍ਥ ਅਰੂਪਾਵਚਰਜ੍ਝਾਨਂ ਧਮ੍ਮੋ ਨਾਮ, ਤਂ ਅਨੁਗਤਤ੍ਤਾ ਰੂਪਾਵਚਰਜ੍ਝਾਨਂ ਅਨੁਧਮ੍ਮੋਤਿ ਵੁਤ੍ਤਂ. ਵਿਪਾਕਜ੍ਝਾਨਂ ਵਾ ਧਮ੍ਮੋ, ਕੁਸਲਜ੍ਝਾਨਂ ਅਨੁਧਮ੍ਮੋ. ਤਦੁਪਾਦਾਨਾਤਿ ਤਗ੍ਗਹਣਾ. ਚਿਰਂ ਦੀਘਮਦ੍ਧਾਨਨ੍ਤਿ ਵੀਸਤਿਕਪ੍ਪਸਹਸ੍ਸਾਨਿ. ਵਿਪਾਕਵਸੇਨ ਹੇਤਂ ਵੁਤ੍ਤਂ. ਇਤੋ ਉਤ੍ਤਰਿਮ੍ਪਿ ਏਸੇਵ ਨਯੋ.

੩੬੨. ਏਵਂ ਚਤੂਹਿ ਵਾਰੇਹਿ ਅਰੂਪਾਵਚਰਜ੍ਝਾਨਸ੍ਸ ਵਣ੍ਣਂ ਕਥੇਤ੍ਵਾ ਇਦਾਨਿ ਤਸ੍ਸੇਵ ਆਦੀਨਵਂ ਦਸ੍ਸੇਨ੍ਤੋ ਸੋ ਏਵਂ ਪਜਾਨਾਤੀਤਿਆਦਿਮਾਹ. ਤਤ੍ਥ ਸਙ੍ਖਤਮੇਤਨ੍ਤਿ ਕਿਞ੍ਚਾਪਿ ਏਤ੍ਥ ਵੀਸਤਿਕਪ੍ਪਸਹਸ੍ਸਾਨਿ ਆਯੁ ਅਤ੍ਥਿ, ਏਤਂ ਪਨ ਸਙ੍ਖਤਂ ਪਕਪ੍ਪਿਤਂ ਆਯੂਹਿਤਂ, ਕਰੋਨ੍ਤੇਨ ਕਰੀਯਤਿ, ਅਨਿਚ੍ਚਂ ਅਧੁਵਂ ਅਸਸ੍ਸਤਂ ਤਾਵਕਾਲਿਕਂ, ਚਵਨਪਰਿਭੇਦਨਵਿਦ੍ਧਂਸਨਧਮ੍ਮਂ, ਜਾਤਿਯਾ ਅਨੁਗਤਂ, ਜਰਾਯ ਅਨੁਸਟਂ, ਮਰਣੇਨ ਅਬ੍ਭਾਹਤਂ, ਦੁਕ੍ਖੇ ਪਤਿਟ੍ਠਿਤਂ, ਅਤਾਣਂ ਅਲੇਣਂ ਅਸਰਣਂ ਅਸਰਣੀਭੂਤਨ੍ਤਿ. ਵਿਞ੍ਞਾਣਞ੍ਚਾਯਤਨਾਦੀਸੁਪਿ ਏਸੇਵ ਨਯੋ.

ਇਦਾਨਿ ਅਰਹਤ੍ਤਨਿਕੂਟੇਨ ਦੇਸਨਂ ਗਣ੍ਹਨ੍ਤੋ ਸੋ ਨੇਵ ਤਂ ਅਭਿਸਙ੍ਖਰੋਤੀਤਿਆਦਿਮਾਹ. ਯਥਾ ਹਿ ਛੇਕੋ ਭਿਸਕ੍ਕੋ ਵਿਸਵਿਕਾਰਂ ਦਿਸ੍ਵਾ ਵਮਨਂ ਕਾਰੇਤ੍ਵਾ ਵਿਸਂ ਠਾਨਤੋ ਚਾਵੇਤ੍ਵਾ ਉਪਰਿ ਆਰੋਪੇਤ੍ਵਾ ਖਨ੍ਧਂ ਵਾ ਸੀਸਂ ਵਾ ਗਹੇਤੁਂ ਅਦਤ੍ਵਾ ਵਿਸਂ ਓਤਾਰੇਤ੍ਵਾ ਪਥਵਿਯਂ ਪਾਤੇਯ੍ਯ, ਏਵਮੇਵ ਭਗਵਾ ਕੁਲਪੁਤ੍ਤਸ੍ਸ ਅਰੂਪਾਵਚਰਜ੍ਝਾਨੇ ਵਣ੍ਣਂ ਕਥੇਸਿ. ਤਂ ਸੁਤ੍ਵਾ ਕੁਲਪੁਤ੍ਤੋ ਰੂਪਾਵਚਰਜ੍ਝਾਨੇ ਨਿਕਨ੍ਤਿਂ ਪਰਿਯਾਦਾਯ ਅਰੂਪਾਵਚਰਜ੍ਝਾਨੇ ਪਤ੍ਥਨਂ ਠਪੇਸਿ.

ਭਗਵਾ ਤਂ ਞਤ੍ਵਾ ਤਂ ਅਸਮ੍ਪਤ੍ਤਸ੍ਸ ਅਪ੍ਪਟਿਲਦ੍ਧਸ੍ਸੇਵ ਭਿਕ੍ਖੁਨੋ ‘‘ਅਤ੍ਥੇਸਾ ਆਕਾਸਾਨਞ੍ਚਾਯਤਨਾਦੀਸੁ ਸਮ੍ਪਤ੍ਤਿ ਨਾਮ. ਤੇਸਞ੍ਹਿ ਪਠਮਬ੍ਰਹ੍ਮਲੋਕੇ ਵੀਸਤਿਕਪ੍ਪਸਹਸ੍ਸਾਨਿ ਆਯੁ, ਦੁਤਿਯੇ ਚਤ੍ਤਾਲੀਸਂ, ਤਤਿਯੇ ਸਟ੍ਠਿ, ਚਤੁਤ੍ਥੇ ਚਤੁਰਾਸੀਤਿ ਕਪ੍ਪਸਹਸ੍ਸਾਨਿ ਆਯੁ. ਤਂ ਪਨ ਅਨਿਚ੍ਚਂ ਅਧੁਵਂ ਅਸਸ੍ਸਤਂ ਤਾਵਕਾਲਿਕਂ, ਚਵਨਪਰਿਭੇਦਨਵਿਦ੍ਧਂਸਨਧਮ੍ਮਂ, ਜਾਤਿਯਾ ਅਨੁਗਤਂ, ਜਰਾਯ ਅਨੁਸਟਂ, ਮਰਣੇਨ ਅਬ੍ਭਾਹਤਂ, ਦੁਕ੍ਖੇ ਪਤਿਟ੍ਠਿਤਂ, ਅਤਾਣਂ ਅਲੇਣਂ ਅਸਰਣਂ ਅਸਰਣੀਭੂਤਂ, ਏਤ੍ਤਕਂ ਕਾਲਂ ਤਤ੍ਥ ਸਮ੍ਪਤ੍ਤਿਂ ਅਨੁਭਵਿਤ੍ਵਾਪਿ ਪੁਥੁਜ੍ਜਨਕਾਲਕਿਰਿਯਂ ਕਤ੍ਵਾ ਪੁਨ ਚਤੂਸੁ ਅਪਾਯੇਸੁ ਪਤਿਤਬ੍ਬ’’ਨ੍ਤਿ ਸਬ੍ਬਮੇਤਂ ਆਦੀਨਵਂ ਏਕਪਦੇਨੇਵ ‘‘ਸਙ੍ਖਤਮੇਤ’’ਨ੍ਤਿ ਕਥੇਸਿ. ਕੁਲਪੁਤ੍ਤੋ ਤਂ ਸੁਤ੍ਵਾ ਅਰੂਪਾਵਚਰਜ੍ਝਾਨੇ ਨਿਕਨ੍ਤਿਂ ਪਰਿਯਾਦਿਯਿ, ਭਗਵਾ ਤਸ੍ਸ ਰੂਪਾਵਚਰਾਰੂਪਾਵਚਰੇਸੁ ਨਿਕਨ੍ਤਿਯਾ ਪਰਿਯਾਦਿਨ੍ਨਭਾਵਂ ਞਤ੍ਵਾ ਅਰਹਤ੍ਤਨਿਕੂਟਂ ਗਣ੍ਹਨ੍ਤੋ ‘‘ਸੋ ਨੇਵ ਤਂ ਅਭਿਸਙ੍ਖਰੋਤੀ’’ਤਿਆਦਿਮਾਹ.

ਯਥਾ ਵਾ ਪਨੇਕੋ ਮਹਾਯੋਧੋ ਏਕਂ ਰਾਜਾਨਂ ਆਰਾਧੇਤ੍ਵਾ ਸਤਸਹਸ੍ਸੁਟ੍ਠਾਨਕਂ ਗਾਮਵਰਂ ਲਭੇਯ੍ਯ, ਪੁਨ ਰਾਜਾ ਤਸ੍ਸਾਨੁਭਾਵਂ ਸਰਿਤ੍ਵਾ – ‘‘ਮਹਾਨੁਭਾਵੋ ਯੋਧੋ, ਅਪ੍ਪਕਂ ਤੇਨ ਲਦ੍ਧ’’ਨ੍ਤਿ – ‘‘ਨਾਯਂ ਤਾਤ ਗਾਮੋ ਤੁਯ੍ਹਂ ਅਨੁਚ੍ਛਵਿਕੋ, ਅਞ੍ਞਂ ਚਤੁਸਤਸਹਸ੍ਸੁਟ੍ਠਾਨਕਂ ਗਣ੍ਹਾਹੀ’’ਤਿ ਦਦੇਯ੍ਯ ਸੋ ਸਾਧੁ ਦੇਵਾਤਿ ਤਂ ਵਿਸ੍ਸਜ੍ਜੇਤ੍ਵਾ ਇਤਰਂ ਗਾਮਂ ਗਣ੍ਹੇਯ੍ਯ. ਰਾਜਾ ਅਸਮ੍ਪਤ੍ਤਮੇਵ ਚ ਨਂ ਪਕ੍ਕੋਸਾਪੇਤ੍ਵਾ – ‘‘ਕਿਂ ਤੇ ਤੇਨ, ਅਹਿਵਾਤਰੋਗੋ ਏਤ੍ਥ ਉਪ੍ਪਜ੍ਜਤਿ? ਅਸੁਕਸ੍ਮਿਂ ਪਨ ਠਾਨੇ ਮਹਨ੍ਤਂ ਨਗਰਂ ਅਤ੍ਥਿ, ਤਤ੍ਥ ਛਤ੍ਤਂ ਉਸ੍ਸਾਪੇਤ੍ਵਾ ਰਜ੍ਜਂ ਕਾਰੇਹੀ’’ਤਿ ਪਹਿਣੇਯ੍ਯ, ਸੋ ਤਥਾ ਕਰੇਯ੍ਯ.

ਤਤ੍ਥ ਰਾਜਾ ਵਿਯ ਸਮ੍ਮਾਸਮ੍ਬੁਦ੍ਧੋ ਦਟ੍ਠਬ੍ਬੋ, ਮਹਾਯੋਧੋ ਵਿਯ ਪੁਕ੍ਕੁਸਾਤਿ ਕੁਲਪੁਤ੍ਤੋ, ਪਠਮਲਦ੍ਧਗਾਮੋ ਵਿਯ ਆਨਾਪਾਨਚਤੁਤ੍ਥਜ੍ਝਾਨਂ, ਤਂ ਵਿਸ੍ਸਜ੍ਜੇਤ੍ਵਾ ਇਤਰਂ ਗਾਮਂ ਗਣ੍ਹਾਹੀਤਿ ਵੁਤ੍ਤਕਾਲੋ ਵਿਯ ਆਨਾਪਾਨਚਤੁਤ੍ਥਜ੍ਝਾਨੇ ਨਿਕਨ੍ਤਿਪਰਿਯਾਦਾਨਂ ਕਤ੍ਵਾ ਆਰੁਪ੍ਪਕਥਨਂ, ਤਂ ਗਾਮਂ ਅਸਮ੍ਪਤ੍ਤਮੇਵ ਪਕ੍ਕੋਸਾਪੇਤ੍ਵਾ ‘‘ਕਿਂ ਤੇ ਤੇਨ, ਅਹਿਵਾਤਰੋਗੋ ਏਤ੍ਥ ਉਪ੍ਪਜ੍ਜਤਿ? ਅਸੁਕਸ੍ਮਿਂ ਠਾਨੇ ਨਗਰਂ ਅਤ੍ਥਿ, ਤਤ੍ਥ ਛਤ੍ਤਂ ਉਸ੍ਸਾਪੇਤ੍ਵਾ ਰਜ੍ਜਂ ਕਾਰੇਹੀ’’ਤਿ ਵੁਤ੍ਤਕਾਲੋ ਵਿਯ ਅਰੂਪੇ ਸਙ੍ਖਤਮੇਤਨ੍ਤਿ ਆਦੀਨਵਕਥਨੇਨ ਅਪ੍ਪਤ੍ਤਾਸੁਯੇਵ ਤਾਸੁ ਸਮਾਪਤ੍ਤੀਸੁ ਪਤ੍ਥਨਂ ਨਿਵਤ੍ਥਾਪੇਤ੍ਵਾ ਉਪਰਿ ਅਰਹਤ੍ਤਨਿਕੂਟੇਨ ਦੇਸਨਾਗਹਣਂ.

ਤਤ੍ਥ ਨੇਵ ਅਭਿਸਙ੍ਖਰੋਤੀਤਿ ਨਾਯੂਹਤਿ ਨ ਰਾਸਿਂ ਕਰੋਤਿ. ਨ ਅਭਿਸਞ੍ਚੇਤਯਤੀਤਿ ਨ ਕਪ੍ਪੇਤਿ. ਭਵਾਯ ਵਾ ਵਿਭਵਾਯ ਵਾਤਿ ਵੁਦ੍ਧਿਯਾ ਵਾ ਪਰਿਹਾਨਿਯਾ ਵਾ, ਸਸ੍ਸਤੁਚ੍ਛੇਦਵਸੇਨਪਿ ਯੋਜੇਤਬ੍ਬਂ. ਨ ਕਿਞ੍ਚਿ ਲੋਕੇ ਉਪਾਦਿਯਤੀਤਿ ਲੋਕੇ ਰੂਪਾਦੀਸੁ ਕਿਞ੍ਚਿ ਏਕਧਮ੍ਮਮ੍ਪਿ ਤਣ੍ਹਾਯ ਨ ਗਣ੍ਹਾਤਿ, ਨ ਪਰਾਮਸਤਿ. ਨਾਪਰਂ ਇਤ੍ਥਤ੍ਤਾਯਾਤਿ ਪਜਾਨਾਤੀਤਿ ਭਗਵਾ ਅਤ੍ਤਨੋ ਬੁਦ੍ਧਵਿਸਯੇ ਠਤ੍ਵਾ ਦੇਸਨਾਯ ਅਰਹਤ੍ਤਨਿਕੂਟਂ ਗਣ੍ਹਿ. ਕੁਲਪੁਤ੍ਤੋ ਪਨ ਅਤ੍ਤਨੋ ਯਥੋਪਨਿਸ੍ਸਯੇਨ ਤੀਣਿ ਸਾਮਞ੍ਞਫਲਾਨਿ ਪਟਿਵਿਜ੍ਝਿ. ਯਥਾ ਨਾਮ ਰਾਜਾ ਸੁਵਣ੍ਣਭਾਜਨੇਨ ਨਾਨਾਰਸਭੋਜਨਂ ਭੁਞ੍ਜਨ੍ਤੋ ਅਤ੍ਤਨੋ ਪਮਾਣੇਨ ਪਿਣ੍ਡਂ ਵਟ੍ਟੇਤ੍ਵਾ ਅਙ੍ਕੇ ਨਿਸਿਨ੍ਨੇਨ ਰਾਜਕੁਮਾਰੇਨ ਪਿਣ੍ਡਮ੍ਹਿ ਆਲਯੇ ਦਸ੍ਸਿਤੇ ਤਂ ਪਿਣ੍ਡਂ ਉਪਨਾਮੇਯ੍ਯ, ਕੁਮਾਰੋ ਅਤ੍ਤਨੋ ਮੁਖਪ੍ਪਮਾਣੇਨੇਵ ਕਬਲ਼ਂ ਕਰੇਯ੍ਯ, ਸੇਸਂ ਰਾਜਾ ਸਯਂ ਵਾ ਭੁਞ੍ਜੇਯ੍ਯ, ਪਾਤਿਯਂ ਵਾ ਪਕ੍ਖਿਪੇਯ੍ਯ, ਏਵਂ ਧਮ੍ਮਰਾਜਾ ਤਥਾਗਤੋ ਅਤ੍ਤਨੋ ਪਮਾਣੇਨ ਅਰਹਤ੍ਤਨਿਕੂਟਂ ਗਣ੍ਹਨ੍ਤੋ ਦੇਸਨਂ ਦੇਸੇਸਿ, ਕੁਲਪੁਤ੍ਤੋ ਅਤ੍ਤਨੋ ਯਥੋਪਨਿਸ੍ਸਯੇਨ ਤੀਣਿ ਸਾਮਞ੍ਞਫਲਾਨਿ ਪਟਿਵਿਜ੍ਝਿ.

ਇਤੋ ਪੁਬ੍ਬੇ ਪਨਸ੍ਸ ਖਨ੍ਧਾ ਧਾਤੁਯੋ ਆਯਤਨਾਨੀਤਿ ਏਵਰੂਪਂ ਅਚ੍ਚਨ੍ਤਸੁਞ੍ਞਤਂ ਤਿਲਕ੍ਖਣਾਹਤਂ ਕਥਂ ਕਥੇਨ੍ਤਸ੍ਸ ਨੇਵ ਕਙ੍ਖਾ, ਨ ਵਿਮਤਿ, ਨਾਪਿ – ‘‘ਏਵਂ ਕਿਰ ਤਂ, ਏਵਂ ਮੇ ਆਚਰਿਯੇਨ ਵੁਤ੍ਤ’’ਨ੍ਤਿ ਇਤਿ ਕਿਰ ਨ ਦਨ੍ਧਾਯਿਤਤ੍ਤਂ ਨ ਵਿਤ੍ਥਾਯਿਤਤ੍ਤਂ ਅਤ੍ਥਿ. ਏਕਚ੍ਚੇਸੁ ਚ ਕਿਰ ਠਾਨੇਸੁ ਬੁਦ੍ਧਾ ਅਞ੍ਞਾਤਕਵੇਸੇਨ ਵਿਚਰਨ੍ਤਿ, ਸਮ੍ਮਾਸਮ੍ਬੁਦ੍ਧੋ ਨੁ ਖੋ ਏਸੋਤਿ ਅਹੁਦੇਵ ਸਂਸਯੋ, ਅਹੁ ਵਿਮਤਿ. ਯਤੋ ਅਨੇਨ ਅਨਾਗਾਮਿਫਲਂ ਪਟਿਵਿਦ੍ਧਂ, ਅਥ ਅਯਂ ਮੇ ਸਤ੍ਥਾਤਿ ਨਿਟ੍ਠਂ ਗਤੋ. ਯਦਿ ਏਵਂ ਕਸ੍ਮਾ ਅਚ੍ਚਯਂ ਨ ਦੇਸੇਸੀਤਿ. ਓਕਾਸਾਭਾਵਤੋ. ਭਗਵਾ ਹਿ ਯਥਾਨਿਕ੍ਖਿਤ੍ਤਾਯ ਮਾਤਿਕਾਯ ਅਚ੍ਛਿਨ੍ਨਧਾਰਂ ਕਤ੍ਵਾ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਦੇਸਨਂ ਦੇਸੇਸਿਯੇਵ.

੩੬੩. ਸੋਤਿ ਅਰਹਾ. ਅਨਜ੍ਝੋਸਿਤਾਤਿ ਗਿਲਿਤ੍ਵਾ ਪਰਿਨਿਟ੍ਠਾਪੇਤ੍ਵਾ ਗਹੇਤੁਂ ਨ ਯੁਤ੍ਥਾਤਿ ਪਜਾਨਾਤਿ. ਅਨਭਿਨਨ੍ਦਿਤਾਤਿ ਤਣ੍ਹਾਦਿਟ੍ਠਿਵਸੇਨ ਅਭਿਨਨ੍ਦਿਤੁਂ ਨ ਯੁਤ੍ਤਾਤਿ ਪਜਾਨਾਤਿ.

੩੬੪. ਵਿਸਂਯੁਤ੍ਤੋ ਨਂ ਵੇਦੇਤੀਤਿ ਸਚੇ ਹਿਸ੍ਸ ਸੁਖਵੇਦਨਂ ਆਰਬ੍ਭ ਰਾਗਾਨੁਸਯੋ, ਦੁਕ੍ਖਵੇਦਨਂ ਆਰਬ੍ਭ ਪਟਿਘਾਨੁਸਯੋ, ਇਤਰਂ ਆਰਬ੍ਭ ਅਵਿਜ੍ਜਾਨੁਸਯੋ ਉਪ੍ਪਜ੍ਜੇਯ੍ਯ, ਸਂਯੁਤ੍ਤੋ ਵੇਦਿਯੇਯ੍ਯ ਨਾਮ. ਅਨੁਪ੍ਪਜ੍ਜਨਤੋ ਪਨ ਵਿਸਂਯੁਤ੍ਤੋ ਨਂ ਵੇਦੇਤਿ ਨਿਸ੍ਸਟੋ ਵਿਪ੍ਪਮੁਤ੍ਤੋ. ਕਾਯਪਰਿਯਨ੍ਤਿਕਨ੍ਤਿ ਕਾਯਕੋਟਿਕਂ. ਯਾਵ ਕਾਯਪਵਤ੍ਤਾ ਉਪ੍ਪਜ੍ਜਿਤ੍ਵਾ ਤਤੋ ਪਰਂ ਅਨੁਪ੍ਪਜ੍ਜਨਵੇਦਨਨ੍ਤਿ ਅਤ੍ਥੋ. ਦੁਤਿਯਪਦੇਪਿ ਏਸੇਵ ਨਯੋ. ਅਨਭਿਨਨ੍ਦਿਤਾਨਿ ਸੀਤੀਭਵਿਸ੍ਸਨ੍ਤੀਤਿ ਦ੍ਵਾਦਸਸੁ ਆਯਤਨੇਸੁ ਕਿਲੇਸਾਨਂ ਵਿਸੇਵਨਸ੍ਸ ਨਤ੍ਥਿਤਾਯ ਅਨਭਿਨਨ੍ਦਿਤਾਨਿ ਹੁਤ੍ਵਾ ਇਧ ਦ੍ਵਾਦਸਸੁਯੇਵ ਆਯਤਨੇਸੁ ਨਿਰੁਜ੍ਝਿਸ੍ਸਨ੍ਤਿ. ਕਿਲੇਸਾ ਹਿ ਨਿਬ੍ਬਾਨਂ ਆਗਮ੍ਮ ਨਿਰੁਦ੍ਧਾਪਿ ਯਤ੍ਥ ਨਤ੍ਥਿ, ਤਤ੍ਥ ਨਿਰੁਦ੍ਧਾਤਿ ਵੁਚ੍ਚਨ੍ਤਿ. ਸ੍ਵਾਯਮਤ੍ਥੋ – ‘‘ਏਤ੍ਥੇਸਾ ਤਣ੍ਹਾ ਨਿਰੁਜ੍ਝਮਾਨਾ ਨਿਰੁਜ੍ਝਤੀ’’ਤਿ ਸਮੁਦਯਪਞ੍ਹੇਨ ਦੀਪੇਤਬ੍ਬੋ. ਤਸ੍ਮਾ ਭਗਵਾ ਨਿਬ੍ਬਾਨਂ ਆਗਮ੍ਮ ਸੀਤਿਭੂਤਾਨਿਪਿ ਇਧੇਵ ਸੀਤੀਭਵਿਸ੍ਸਨ੍ਤੀਤਿ ਆਹ. ਨਨੁ ਚ ਇਧ ਵੇਦਯਿਤਾਨਿ ਵੁਤ੍ਤਾਨਿ, ਨ ਕਿਲੇਸਾਤਿ. ਵੇਦਯਿਤਾਨਿਪਿ ਕਿਲੇਸਾਭਾਵੇਨੇਵ ਸੀਤੀਭਵਨ੍ਤਿ. ਇਤਰਥਾ ਨੇਸਂ ਸੀਤਿਭਾਵੋ ਨਾਮ ਨਤ੍ਥੀਤਿ ਸੁਵੁਤ੍ਤਮੇਤਂ.

੩੬੫. ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਯਥਾ ਹਿ ਏਕੋ ਪੁਰਿਸੋ ਤੇਲਪਦੀਪਸ੍ਸ ਝਾਯਤੋ ਤੇਲੇ ਖੀਣੇ ਤੇਲਂ ਆਸਿਞ੍ਚਤਿ, ਵਟ੍ਟਿਯਾ ਖੀਣਾਯ ਵਟ੍ਟਿਂ ਪਕ੍ਖਿਪਤਿ, ਏਵਂ ਦੀਪਸਿਖਾਯ ਅਨੁਪਚ੍ਛੇਦੋਵ ਹੋਤਿ, ਏਵਮੇਵ ਪੁਥੁਜ੍ਜਨੋ ਏਕਸ੍ਮਿਂ ਭਵੇ ਠਿਤੋ ਕੁਸਲਾਕੁਸਲਂ ਕਰੋਤਿ, ਸੋ ਤੇਨ ਸੁਗਤਿਯਞ੍ਚ ਅਪਾਯੇਸੁ ਚ ਨਿਬ੍ਬਤ੍ਤਤਿਯੇਵ, ਏਵਂ ਵੇਦਨਾਨਂ ਅਨੁਪਚ੍ਛੇਦੋਵ ਹੋਤਿ. ਯਥਾ ਪਨੇਕੋ ਦੀਪਸਿਖਾਯ ਉਕ੍ਕਣ੍ਠਿਤੋ – ‘‘ਇਮਂ ਪੁਰਿਸਂ ਆਗਮ੍ਮ ਦੀਪਸਿਖਾ ਨ ਉਪਚ੍ਛਿਜ੍ਜਤੀ’’ਤਿ ਨਿਲੀਨੋ ਤਸ੍ਸ ਪੁਰਿਸਸ੍ਸ ਸੀਸਂ ਛਿਨ੍ਦੇਯ੍ਯ, ਏਵਂ ਵਟ੍ਟਿਯਾ ਚ ਤੇਲਸ੍ਸ ਚ ਅਨੁਪਹਾਰਾ ਦੀਪਸਿਖਾ ਅਨਾਹਾਰਾ ਨਿਬ੍ਬਾਯਤਿ, ਏਵਮੇਵ ਵਟ੍ਟੇ ਉਕ੍ਕਣ੍ਠਿਤੋ ਯੋਗਾਵਚਰੋ ਅਰਹਤ੍ਤਮਗ੍ਗੇਨ ਕੁਸਲਾਕੁਸਲਂ ਸਮੁਚ੍ਛਿਨ੍ਦਤਿ, ਤਸ੍ਸ ਸਮੁਚ੍ਛਿਨ੍ਨਤ੍ਤਾ ਖੀਣਾਸਵਸ੍ਸ ਭਿਕ੍ਖੁਨੋ ਕਾਯਸ੍ਸ ਭੇਦਾ ਪੁਨ ਵੇਦਯਿਤਾਨਿ ਨ ਉਪ੍ਪਜ੍ਜਨ੍ਤੀਤਿ.

ਤਸ੍ਮਾਤਿ ਯਸ੍ਮਾ ਆਦਿਮ੍ਹਿ ਸਮਾਧਿਵਿਪਸ੍ਸਨਾਪਞ੍ਞਾਹਿ ਅਰਹਤ੍ਤਫਲਪਞ੍ਞਾ ਉਤ੍ਤਰਿਤਰਾ, ਤਸ੍ਮਾ. ਏਵਂ ਸਮਨ੍ਨਾਗਤੋਤਿ ਇਮਿਨਾ ਉਤ੍ਤਮੇਨ ਅਰਹਤ੍ਤਫਲਪਞ੍ਞਾਧਿਟ੍ਠਾਨੇਨ ਸਮਨ੍ਨਾਗਤੋ. ਸਬ੍ਬਦੁਕ੍ਖਕ੍ਖਯੇ ਞਾਣਂ ਨਾਮ ਅਰਹਤ੍ਤਮਗ੍ਗੇ ਞਾਣਂ, ਇਮਸ੍ਮਿਂ ਪਨ ਸੁਤ੍ਤੇ ਅਰਹਤ੍ਤਫਲੇ ਞਾਣਂ ਅਧਿਪ੍ਪੇਤਂ. ਤੇਨੇਵਾਹ ਤਸ੍ਸ ਸਾ ਵਿਮੁਤ੍ਤਿ ਸਚ੍ਚੇ ਠਿਤਾ ਅਕੁਪ੍ਪਾ ਹੋਤੀਤਿ.

੩੬੬. ਏਤ੍ਥ ਹਿ ਵਿਮੁਤ੍ਤੀਤਿ ਅਰਹਤ੍ਤਫਲਵਿਮੁਤ੍ਤਿ, ਸਚ੍ਚਨ੍ਤਿ ਪਰਮਤ੍ਥਸਚ੍ਚਂ ਨਿਬ੍ਬਾਨਂ. ਇਤਿ ਅਕੁਪ੍ਪਾਰਮ੍ਮਣਕਰਣੇਨ ਅਕੁਪ੍ਪਾਤਿ ਵੁਤ੍ਤਾ. ਮੁਸਾਤਿ ਵਿਤਥਂ. ਮੋਸਧਮ੍ਮਨ੍ਤਿ ਨਸ੍ਸਨਸਭਾਵਂ. ਤਂ ਸਚ੍ਚਨ੍ਤਿ ਤਂ ਅਵਿਤਥਂ ਸਭਾਵੋ. ਅਮੋਸਧਮ੍ਮਨ੍ਤਿ ਅਨਸ੍ਸਨਸਭਾਵਂ.

ਤਸ੍ਮਾਤਿ ਯਸ੍ਮਾ ਆਦਿਤੋ ਸਮਥਵਿਪਸ੍ਸਨਾਵਸੇਨ ਵਚੀਸਚ੍ਚਤੋ ਦੁਕ੍ਖਸਚ੍ਚਸਮੁਦਯਸਚ੍ਚੇਹਿ ਚ ਪਰਮਤ੍ਥਸਚ੍ਚਂ ਨਿਬ੍ਬਾਨਮੇਵ ਉਤ੍ਤਰਿਤਰਂ, ਤਸ੍ਮਾ. ਏਵਂ ਸਮਨ੍ਨਾਗਤੋਤਿ ਇਮਿਨਾ ਉਤ੍ਤਮੇਨ ਪਰਮਤ੍ਥਸਚ੍ਚਾਧਿਟ੍ਠਾਨੇਨ ਸਮਨ੍ਨਾਗਤੋ.

੩੬੭. ਪੁਬ੍ਬੇਤਿ ਪੁਥੁਜ੍ਜਨਕਾਲੇ. ਉਪਧੀ ਹੋਨ੍ਤੀਤਿ ਖਨ੍ਧੂਪਧਿ ਕਿਲੇਸੂਪਧਿ ਅਭਿਸਙ੍ਖਾਰੂਪਧਿ ਪਞ੍ਚਕਾਮਗੁਣੂਪਧੀਤਿ ਇਮੇ ਉਪਧਯੋ ਹੋਨ੍ਤਿ. ਸਮਤ੍ਤਾ ਸਮਾਦਿਨ੍ਨਾਤਿ ਪਰਿਪੂਰਾ ਗਹਿਤਾ ਪਰਮਟ੍ਠਾ. ਤਸ੍ਮਾਤਿ ਯਸ੍ਮਾ ਆਦਿਤੋ ਸਮਥਵਿਪਸ੍ਸਨਾਵਸੇਨ ਕਿਲੇਸਪਰਿਚ੍ਚਾਗਤੋ, ਸੋਤਾਪਤ੍ਤਿਮਗ੍ਗਾਦੀਹਿ ਚ ਕਿਲੇਸਪਰਿਚ੍ਚਾਗਤੋ ਅਰਹਤ੍ਤਮਗ੍ਗੇਨੇਵ ਕਿਲੇਸਪਰਿਚ੍ਚਾਗੋ ਉਤ੍ਤਰਿਤਰੋ, ਤਸ੍ਮਾ. ਏਵਂ ਸਮਨ੍ਨਾਗਤੋਤਿ ਇਮਿਨਾ ਉਤ੍ਤਮੇਨ ਚਾਗਾਧਿਟ੍ਠਾਨੇਨ ਸਮਨ੍ਨਾਗਤੋ.

੩੬੮. ਆਘਾਤੋਤਿਆਦੀਸੁ ਆਘਾਤਕਰਣਵਸੇਨ ਆਘਾਤੋ, ਬ੍ਯਾਪਜ੍ਜਨਵਸੇਨ ਬ੍ਯਾਪਾਦੋ, ਸਮ੍ਪਦੁਸ੍ਸਨਵਸੇਨ ਸਮ੍ਪਦੋਸੋਤਿ ਤੀਹਿ ਪਦੇਹਿ ਦੋਸਾਕੁਸਲਮੂਲਮੇਵ ਵੁਤ੍ਤਂ. ਤਸ੍ਮਾਤਿ ਯਸ੍ਮਾ ਆਦਿਤੋ ਸਮਥਵਿਪਸ੍ਸਨਾਵਸੇਨ ਕਿਲੇਸਵੂਪਸਮਤੋ, ਸੋਤਾਪਤ੍ਤਿਮਗ੍ਗਾਦੀਹਿ ਕਿਲੇਸਵੂਪਸਮਤੋ ਚ ਅਰਹਤ੍ਤਮਗ੍ਗੇਨੇਵ ਕਿਲੇਸਵੂਪਸਮੋ ਉਤ੍ਤਰਿਤਰੋ, ਤਸ੍ਮਾ. ਏਵਂ ਸਮਨ੍ਨਾਗਤੋਤਿ ਇਮਿਨਾ ਉਤ੍ਤਮੇਨ ਉਪਸਮਾਧਿਟ੍ਠਾਨੇਨ ਸਮਨ੍ਨਾਗਤੋ.

੩੬੯. ਮਞ੍ਞਿਤਮੇਤਨ੍ਤਿ ਤਣ੍ਹਾਮਞ੍ਞਿਤਂ ਮਾਨਮਞ੍ਞਿਤਂ ਦਿਟ੍ਠਿਮਞ੍ਞਿਤਨ੍ਤਿ ਤਿਵਿਧਮ੍ਪਿ ਵਟ੍ਟਤਿ. ਅਯਮਹਮਸ੍ਮੀਤਿ ਏਤ੍ਥ ਪਨ ਅਯਮਹਨ੍ਤਿ ਏਕਂ ਤਣ੍ਹਾਮਞ੍ਞਿਤਮੇਵ ਵਟ੍ਟਤਿ. ਰੋਗੋਤਿਆਦੀਸੁ ਆਬਾਧਟ੍ਠੇਨ ਰੋਗੋ, ਅਨ੍ਤੋਦੋਸਟ੍ਠੇਨ ਗਣ੍ਡੋ, ਅਨੁਪਵਿਟ੍ਠਟ੍ਠੇਨ ਸਲ੍ਲਂ. ਮੁਨਿ ਸਨ੍ਤੋਤਿ ਵੁਚ੍ਚਤੀਤਿ ਖੀਣਾਸਵਮੁਨਿ ਸਨ੍ਤੋ ਨਿਬ੍ਬੁਤੋਤਿ ਵੁਚ੍ਚਤਿ. ਯਤ੍ਥ ਠਿਤਨ੍ਤਿ ਯਸ੍ਮਿਂ ਠਾਨੇ ਠਿਤਂ. ਸਂਖਿਤ੍ਤੇਨਾਤਿ ਬੁਦ੍ਧਾਨਂ ਕਿਰ ਸਬ੍ਬਾਪਿ ਧਮ੍ਮਦੇਸਨਾ ਸਂਖਿਤ੍ਤਾਵ, ਵਿਤ੍ਥਾਰਦੇਸਨਾ ਨਾਮ ਨਤ੍ਥਿ, ਸਮਨ੍ਤਪਟ੍ਠਾਨਕਥਾਪਿ ਸਂਖਿਤ੍ਤਾਯੇਵ. ਇਤਿ ਭਗਵਾ ਦੇਸਨਂ ਯਥਾਨੁਸਨ੍ਧਿਂ ਪਾਪੇਸਿ. ਉਗ੍ਘਾਟਿਤਞ੍ਞੂਤਿਆਦੀਸੁ ਪਨ ਚਤੂਸੁ ਪੁਗ੍ਗਲੇਸੁ ਪੁਕ੍ਕੁਸਾਤਿ ਕੁਲਪੁਤ੍ਤੋ ਵਿਪਞ੍ਚਿਤਞ੍ਞੂ, ਇਤਿ ਵਿਪਞ੍ਚਿਤਞ੍ਞੁਵਸੇਨ ਭਗਵਾ ਇਮਂ ਧਾਤੁਵਿਭਙ੍ਗਸੁਤ੍ਤਂ ਕਥੇਸਿ.

੩੭੦. ਨ ਖੋ ਮੇ, ਭਨ੍ਤੇ, ਪਰਿਪੁਣ੍ਣਂ ਪਤ੍ਤਚੀਵਰਨ੍ਤਿ ਕਸ੍ਮਾ ਕੁਲਪੁਤ੍ਤਸ੍ਸ ਇਦ੍ਧਿਮਯਪਤ੍ਤਚੀਵਰਂ ਨ ਨਿਬ੍ਬਤ੍ਤਨ੍ਤਿ. ਪੁਬ੍ਬੇ ਅਟ੍ਠਨ੍ਨਂ ਪਰਿਕ੍ਖਾਰਾਨਂ ਅਦਿਨ੍ਨਤ੍ਤਾ. ਕੁਲਪੁਤ੍ਤੋ ਹਿ ਦਿਨ੍ਨਦਾਨੋ ਕਤਾਭਿਨੀਹਾਰੋ, ਨ ਦਿਨ੍ਨਤ੍ਤਾਤਿ ਨ ਵਤ੍ਤਬ੍ਬਂ. ਇਦ੍ਧਿਮਯਪਤ੍ਤਚੀਵਰਂ ਪਨ ਪਚ੍ਛਿਮਭਵਿਕਾਨਂਯੇਵ ਨਿਬ੍ਬਤ੍ਤਤਿ, ਅਯਞ੍ਚ ਪੁਨਪਟਿਸਨ੍ਧਿਕੋ, ਤਸ੍ਮਾ ਨ ਨਿਬ੍ਬਤ੍ਤਨ੍ਤਿ. ਅਥ ਭਗਵਾ ਸਯਂ ਪਰਿਯੇਸਿਤ੍ਵਾ ਕਸ੍ਮਾ ਨ ਉਪਸਮ੍ਪਾਦੇਸੀਤਿ. ਓਕਾਸਾਭਾਵਤੋ. ਕੁਲਪੁਤ੍ਤਸ੍ਸ ਆਯੁ ਪਰਿਕ੍ਖੀਣਂ, ਸੁਦ੍ਧਾਵਾਸਿਕੋ ਅਨਾਗਾਮੀ ਮਹਾਬ੍ਰਹ੍ਮਾ ਕੁਮ੍ਭਕਾਰਸਾਲਂ ਆਗਨ੍ਤ੍ਵਾ ਨਿਸਿਨ੍ਨੋ ਵਿਯ ਅਹੋਸਿ. ਤਸ੍ਮਾ ਸਯਂ ਨ ਪਰਿਯੇਸਿ.

ਪਤ੍ਤਚੀਵਰਪਰਿਯੇਸਨਂ ਪਕ੍ਕਾਮੀਤਿ ਕਾਯ ਵੇਲਾਯ ਪਕ੍ਕਾਮਿ? ਉਟ੍ਠਿਤੇ ਅਰੁਣੇ. ਭਗਵਤੋ ਕਿਰ ਧਮ੍ਮਦੇਸਨਾਪਰਿਨਿਟ੍ਠਾਨਞ੍ਚ ਅਰੁਣੁਟ੍ਠਾਨਞ੍ਚ ਰਸ੍ਮਿਵਿਸ੍ਸਜ੍ਜਨਞ੍ਚ ਏਕਕ੍ਖਣੇ ਅਹੋਸਿ. ਭਗਵਾ ਕਿਰ ਦੇਸਨਂ ਨਿਟ੍ਠਪੇਤ੍ਵਾਵ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜਿ, ਸਕਲਕੁਮ੍ਭਕਾਰਨਿਵੇਸਨਂ ਏਕਪਜ੍ਜੋਤਂ ਅਹੋਸਿ, ਛਬ੍ਬਣ੍ਣਰਸ੍ਮਿਯੋ ਜਾਲਜਾਲਾ ਪੁਞ੍ਜਪੁਞ੍ਜਾ ਹੁਤ੍ਵਾ ਵਿਧਾਵਨ੍ਤਿਯੋ ਸਬ੍ਬਦਿਸਾਭਾਗੇ ਸੁਵਣ੍ਣਪਟਪਰਿਯੋਨਦ੍ਧੇ ਵਿਯ ਚ ਨਾਨਾਵਣ੍ਣਕੁਸੁਮਰਤਨਵਿਸਰਸਮੁਜ੍ਜਲੇ ਵਿਯ ਚ ਅਕਂਸੁ. ਭਗਵਾ ‘‘ਨਗਰਵਾਸਿਨੋ ਮਂ ਪਸ੍ਸਨ੍ਤੂ’’ਤਿ ਅਧਿਟ੍ਠਾਸਿ. ਨਗਰਵਾਸਿਨੋ ਭਗਵਨ੍ਤਂ ਦਿਸ੍ਵਾਵ ‘‘ਸਤ੍ਥਾ ਕਿਰ ਆਗਤੋ, ਕੁਮ੍ਭਕਾਰਸਾਲਾਯ ਕਿਰ ਨਿਸਿਨ੍ਨੋ’’ਤਿ ਅਞ੍ਞਮਞ੍ਞਸ੍ਸ ਆਰੋਚੇਤ੍ਵਾ ਰਞ੍ਞੋ ਆਰੋਚੇਸੁਂ.

ਰਾਜਾ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ, ‘‘ਭਨ੍ਤੇ, ਕਾਯ ਵੇਲਾਯ ਆਗਤਤ੍ਥਾ’’ਤਿ ਪੁਚ੍ਛਿ. ਹਿਯ੍ਯੋ ਸੂਰਿਯਤ੍ਥਙ੍ਗਮਨਵੇਲਾਯ ਮਹਾਰਾਜਾਤਿ. ਕੇਨ ਕਮ੍ਮੇਨ ਭਗਵਾਤਿ? ਤੁਮ੍ਹਾਕਂ ਸਹਾਯੋ ਪੁਕ੍ਕੁਸਾਤਿ ਰਾਜਾ ਤੁਮ੍ਹੇਹਿ ਪਹਿਤਂ ਸਾਸਨਂ ਸੁਤ੍ਵਾ ਨਿਕ੍ਖਮਿਤ੍ਵਾ ਪਬ੍ਬਜਿਤ੍ਵਾ ਮਂ ਉਦ੍ਦਿਸ੍ਸ ਆਗਚ੍ਛਨ੍ਤੋ ਸਾਵਤ੍ਥਿਂ ਅਤਿਕ੍ਕਮ੍ਮ ਪਞ੍ਚਚਤ੍ਤਾਲੀਸ ਯੋਜਨਾਨਿ ਆਗਨ੍ਤ੍ਵਾ ਇਮਂ ਕੁਮ੍ਭਕਾਰਸਾਲਂ ਪਵਿਸਿਤ੍ਵਾ ਨਿਸੀਦਿ, ਅਹਂ ਤਸ੍ਸ ਸਙ੍ਗਹਤ੍ਥਂ ਆਗਨ੍ਤ੍ਵਾ ਧਮ੍ਮਕਥਂ ਕਥੇਸਿਂ, ਕੁਲਪੁਤ੍ਤੋ ਤੀਣਿ ਫਲਾਨਿ ਪਟਿਵਿਜ੍ਝਿ ਮਹਾਰਾਜਾਤਿ. ਇਦਾਨਿ ਕਹਂ, ਭਨ੍ਤੇਤਿ? ਉਪਸਮ੍ਪਦਂ ਯਾਚਿਤ੍ਵਾ ਅਪਰਿਪੁਣ੍ਣਪਤ੍ਤਚੀਵਰਤਾਯ ਪਤ੍ਤਚੀਵਰਪਰਿਯੇਸਨਤ੍ਥਂ ਗਤੋ ਮਹਾਰਾਜਾਤਿ. ਰਾਜਾ ਕੁਲਪੁਤ੍ਤਸ੍ਸ ਗਤਦਿਸਾਭਾਗੇਨ ਅਗਮਾਸਿ. ਭਗਵਾਪਿ ਆਕਾਸੇਨਾਗਨ੍ਤ੍ਵਾ ਜੇਤਵਨਗਨ੍ਧਕੁਟਿਮ੍ਹਿਯੇਵ ਪਾਤੁਰਹੋਸਿ.

ਕੁਲਪੁਤ੍ਤੋਪਿ ਪਤ੍ਤਚੀਵਰਂ ਪਰਿਯੇਸਮਾਨੋ ਨੇਵ ਬਿਮ੍ਬਿਸਾਰਰਞ੍ਞੋ ਨ ਤਕ੍ਕਸੀਲਕਾਨਂ ਜਙ੍ਘਵਾਣਿਜਾਨਂ ਸਨ੍ਤਿਕਂ ਅਗਮਾਸਿ. ਏਵਂ ਕਿਰਸ੍ਸ ਅਹੋਸਿ – ‘‘ਨ ਖੋ ਮੇ ਕੁਕ੍ਕੁਟਸ੍ਸ ਵਿਯ ਤਤ੍ਥ ਤਤ੍ਥ ਮਨਾਪਾਮਨਾਪਮੇਵ ਵਿਚਿਨਿਤ੍ਵਾ ਪਤ੍ਤਚੀਵਰਂ ਪਰਿਯੇਸਿਤੁਂ ਯੁਤ੍ਤਂ, ਮਹਨ੍ਤਂ ਨਗਰਂ ਵਜ੍ਜਿਤ੍ਵਾ ਉਦਕਤਿਤ੍ਥਸੁਸਾਨਸਙ੍ਕਾਰਟ੍ਠਾਨਅਨ੍ਤਰਵੀਥੀਸੁ ਪਰਿਯੇਸਿਸ੍ਸਾਮੀ’’ਤਿ ਅਨ੍ਤਰਵੀਥਿਯਂ ਸਙ੍ਕਾਰਕੂਟੇਸੁ ਤਾਵ ਪਿਲੋਤਿਕਂ ਪਰਿਯੇਸਿਤੁਂ ਆਰਦ੍ਧੋ.

ਜੀਵਿਤਾ ਵੋਰੋਪੇਸੀਤਿ ਏਤਸ੍ਮਿਂ ਸਙ੍ਕਾਰਕੂਟੇ ਪਿਲੋਤਿਕਂ ਓਲੋਕੇਨ੍ਤਂ ਵਿਬ੍ਭਨ੍ਤਾ ਤਰੁਣਵਚ੍ਛਾ ਗਾਵੀ ਉਪਧਾਵਿਤ੍ਵਾ ਸਿਙ੍ਗੇਨ ਵਿਜ੍ਝਿਤ੍ਵਾ ਘਾਤੇਸਿ. ਛਾਤਕਜ੍ਝਤ੍ਤੋ ਕੁਲਪੁਤ੍ਤੋ ਆਕਾਸੇਯੇਵ ਆਯੁਕ੍ਖਯਂ ਪਤ੍ਵਾ ਪਤਿਤੋ. ਸਙ੍ਕਾਰਟ੍ਠਾਨੇ ਅਧੋਮੁਖਟ੍ਠਪਿਤਾ ਸੁਵਣ੍ਣਪਟਿਮਾ ਵਿਯ ਅਹੋਸਿ, ਕਾਲਙ੍ਕਤੋ ਚ ਪਨ ਅਵਿਹਾਬ੍ਰਹ੍ਮਲੋਕੇ ਨਿਬ੍ਬਤ੍ਤਿ, ਨਿਬ੍ਬਤ੍ਤਮਤ੍ਤੋਵ ਅਰਹਤ੍ਤਂ ਪਾਪੁਣਿ. ਅਵਿਹਾਬ੍ਰਹ੍ਮਲੋਕੇ ਕਿਰ ਨਿਬ੍ਬਤ੍ਤਮਤ੍ਤਾਵ ਸਤ੍ਤ ਜਨਾ ਅਰਹਤ੍ਤਂ ਪਾਪੁਣਿਂਸੁ. ਵੁਤ੍ਤਞ੍ਹੇਤਂ –

‘‘ਅਵਿਹਂ ਉਪਪਨ੍ਨਾਸੇ, ਵਿਮੁਤ੍ਤਾ ਸਤ੍ਤ ਭਿਕ੍ਖਵੋ;

ਰਾਗਦੋਸਪਰਿਕ੍ਖੀਣਾ, ਤਿਣ੍ਣਾ ਲੋਕੇ ਵਿਸਤ੍ਤਿਕਂ.

ਕੇ ਚ ਤੇ ਅਤਰੁਂ ਪਙ੍ਕਂ, ਮਚ੍ਚੁਧੇਯ੍ਯਂ ਸੁਦੁਤ੍ਤਰਂ;

ਕੇ ਹਿਤ੍ਵਾ ਮਾਨੁਸਂ ਦੇਹਂ, ਦਿਬ੍ਬਯੋਗਂ ਉਪਚ੍ਚਗੁਂ.

ਉਪਕੋ ਪਲਗਣ੍ਡੋ ਚ, ਪੁਕ੍ਕੁਸਾਤਿ ਚ ਤੇ ਤਯੋ;

ਭਦ੍ਦਿਯੋ ਖਣ੍ਡਦੇਵੋ ਚ, ਬਾਹੁਰਗ੍ਗਿ ਚ ਸਿਙ੍ਗਿਯੋ;

ਤੇ ਹਿਤ੍ਵਾ ਮਾਨੁਸਂ ਦੇਹਂ, ਦਿਬ੍ਬਯੋਗਂ ਉਪਚ੍ਚਗੁ’’ਨ੍ਤਿ. (ਸਂ. ਨਿ. ੧.੫੦, ੧੦੫);

ਬਿਮ੍ਬਿਸਾਰੋਪਿ ‘‘ਮਯ੍ਹਂ ਸਹਾਯੋ ਮਯਾ ਪੇਸਿਤਸਾਸਨਮਤ੍ਤਂ ਵਾਚੇਤ੍ਵਾ ਹਤ੍ਥਗਤਂ ਰਜ੍ਜਂ ਪਹਾਯ ਏਤ੍ਤਕਂ ਅਦ੍ਧਾਨਂ ਆਗਤੋ, ਦੁਕ੍ਕਰਂ ਕਤਂ ਕੁਲਪੁਤ੍ਤੇਨ, ਪਬ੍ਬਜਿਤਸਕ੍ਕਾਰੇਨ ਤਂ ਸਕ੍ਕਰਿਸ੍ਸਾਮੀ’’ਤਿ ‘‘ਪਰਿਯੇਸਥ ਮੇ ਸਹਾਯਕ’’ਨ੍ਤਿ ਤਤ੍ਥ ਤਤ੍ਥ ਪੇਸੇਸਿ. ਪੇਸਿਤਾ ਤਂ ਅਦ੍ਦਸਂਸੁ ਸਙ੍ਕਾਰਟ੍ਠਾਨੇ ਪਤਿਤਂ, ਦਿਸ੍ਵਾ ਆਗਮ੍ਮ ਰਞ੍ਞੋ ਆਰੋਚੇਸੁਂ. ਰਾਜਾ ਗਨ੍ਤ੍ਵਾ ਕੁਲਪੁਤ੍ਤਂ ਦਿਸ੍ਵਾ – ‘‘ਨ ਵਤ, ਭੋ, ਲਭਿਮ੍ਹਾ ਸਹਾਯਕਸ੍ਸ ਸਕ੍ਕਾਰਂ ਕਾਤੁਂ, ਅਨਾਥੋ ਮੇ ਜਾਤੋ ਸਹਾਯਕੋ’’ਤਿ. ਪਰਿਦੇਵਿਤ੍ਵਾ ਕੁਲਪੁਤ੍ਤਂ ਮਞ੍ਚਕੇਨ ਗਣ੍ਹਾਪੇਤ੍ਵਾ ਯੁਤ੍ਤੋਕਾਸੇ ਠਪੇਤ੍ਵਾ ਅਨੁਪਸਮ੍ਪਨ੍ਨਸ੍ਸ ਸਕ੍ਕਾਰਂ ਕਾਤੁਂ ਜਾਨਨਾਭਾਵੇਨ ਨ੍ਹਾਪਕਕਪ੍ਪਕਾਦਯੋ ਪਕ੍ਕੋਸਾਪੇਤ੍ਵਾ ਕੁਲਪੁਤ੍ਤਂ ਸੀਸਂ ਨ੍ਹਾਪੇਤ੍ਵਾ ਸੁਦ੍ਧਵਤ੍ਥਾਨਿ ਨਿਵਾਸਾਪੇਤ੍ਵਾ ਰਾਜਵੇਸੇਨ ਅਲਙ੍ਕਾਰਾਪੇਤ੍ਵਾ ਸੋਵਣ੍ਣਸਿਵਿਕਂ ਆਰੋਪੇਤ੍ਵਾ ਸਬ੍ਬਤਾਲ਼ਾਵਚਰਗਨ੍ਧਮਾਲਾਦੀਹਿ ਪੂਜਂ ਕਰੋਨ੍ਤੋ ਨਗਰਾ ਨੀਹਰਿਤ੍ਵਾ ਬਹੂਹਿ ਗਨ੍ਧਕਟ੍ਠੇਹਿ ਮਹਾਚਿਤਕਂ ਕਾਰੇਤ੍ਵਾ ਕੁਲਪੁਤ੍ਤਸ੍ਸ ਸਰੀਰਕਿਚ੍ਚਂ ਕਤ੍ਵਾ ਧਾਤੁਯੋ ਆਦਾਯ ਚੇਤਿਯਂ ਪਤਿਟ੍ਠਪੇਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਧਾਤੁਵਿਭਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.