੮. ਉਦ੍ਦੇਸਵਿਭਙ੍ਗਸੁਤ੍ਤਵਣ੍ਣਨਾ

੩੧੩. ਏਵਂ ਮੇ ਸੁਤਨ੍ਤਿ ਉਦ੍ਦੇਸਵਿਭਙ੍ਗਸੁਤ੍ਤਂ. ਤਤ੍ਥ ਉਦ੍ਦੇਸਵਿਭਙ੍ਗਨ੍ਤਿ ਉਦ੍ਦੇਸਞ੍ਚ ਵਿਭਙ੍ਗਞ੍ਚ, ਮਾਤਿਕਞ੍ਚ ਵਿਭਜਨਞ੍ਚਾਤਿ ਅਤ੍ਥੋ. ਉਪਪਰਿਕ੍ਖੇਯ੍ਯਾਤਿ ਤੁਲੇਯ੍ਯ ਤੀਰੇਯ੍ਯ ਪਰਿਗ੍ਗਣ੍ਹੇਯ੍ਯ ਪਰਿਚ੍ਛਿਨ੍ਦੇਯ੍ਯ. ਬਹਿਦ੍ਧਾਤਿ ਬਹਿਦ੍ਧਾਆਰਮ੍ਮਣੇਸੁ. ਅਵਿਕ੍ਖਿਤ੍ਤਂ ਅਵਿਸਟਨ੍ਤਿ ਨਿਕਨ੍ਤਿਵਸੇਨ ਆਰਮ੍ਮਣੇ ਤਿਟ੍ਠਮਾਨਂ ਵਿਕ੍ਖਿਤ੍ਤਂ ਵਿਸਟਂ ਨਾਮ ਹੋਤਿ, ਤਂ ਪਟਿਸੇਧੇਨ੍ਤੋ ਏਵਮਾਹ. ਅਜ੍ਝਤ੍ਤਂ ਅਸਣ੍ਠਿਤਨ੍ਤਿ ਗੋਚਰਜ੍ਝਤ੍ਤੇ ਨਿਕਨ੍ਤਿਵਸੇਨ ਅਸਣ੍ਠਿਤਂ. ਅਨੁਪਾਦਾਯ ਨ ਪਰਿਤਸ੍ਸੇਯ੍ਯਾਤਿ ਅਨੁਪਾਦਿਯਿਤ੍ਵਾ ਅਗ੍ਗਹੇਤ੍ਵਾ ਤਂ ਵਿਞ੍ਞਾਣਂ ਨ ਪਰਿਤਸ੍ਸੇਯ੍ਯ. ਯਥਾ ਵਿਞ੍ਞਾਣਂ ਬਹਿਦ੍ਧਾ ਅਵਿਕ੍ਖਿਤ੍ਤਂ ਅਵਿਸਟਂ, ਅਜ੍ਝਤ੍ਤਂ ਅਸਣ੍ਠਿਤਂ ਅਨੁਪਾਦਾਯ ਨ ਪਰਿਤਸ੍ਸੇਯ੍ਯ, ਏਵਂ ਭਿਕ੍ਖੁ ਉਪਪਰਿਕ੍ਖੇਯ੍ਯਾਤਿ ਵੁਤ੍ਤਂ ਹੋਤਿ. ਜਾਤਿਜਰਾਮਰਣਦੁਕ੍ਖਸਮੁਦਯਸਮ੍ਭਵੋਤਿ ਜਾਤਿਜਰਾਮਰਣਸ੍ਸ ਚੇਵ ਅਵਸੇਸਸ੍ਸ ਚ ਦੁਕ੍ਖਸ੍ਸ ਨਿਬ੍ਬਤ੍ਤਿ ਨ ਹੋਤੀਤਿ ਅਤ੍ਥੋ.

੩੧੬. ਰੂਪਨਿਮਿਤ੍ਤਾਨੁਸਾਰੀਤਿ ਰੂਪਨਿਮਿਤ੍ਤਂ ਅਨੁਸ੍ਸਰਤਿ ਅਨੁਧਾਵਤੀਤਿ ਰੂਪਨਿਮਿਤ੍ਤਾਨੁਸਾਰੀ.

੩੧੮. ਏਵਂ ਖੋ, ਆਵੁਸੋ, ਅਜ੍ਝਤ੍ਤਂ ਅਸਣ੍ਠਿਤਨ੍ਤਿ ਨਿਕਨ੍ਤਿਵਸੇਨ ਅਸਣ੍ਠਿਤਂ. ਨਿਕਨ੍ਤਿਵਸੇਨ ਹਿ ਅਤਿਟ੍ਠਮਾਨਂ ਹਾਨਭਾਗਿਯਂ ਨ ਹੋਤਿ, ਵਿਸੇਸਭਾਗਿਯਮੇਵ ਹੋਤਿ.

੩੨੦. ਅਨੁਪਾਦਾ ਪਰਿਤਸ੍ਸਨਾਤਿ ਸਤ੍ਥਾਰਾ ਖਨ੍ਧਿਯਵਗ੍ਗੇ ‘‘ਉਪਾਦਾਪਰਿਤਸ੍ਸਨਞ੍ਚ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਅਨੁਪਾਦਾਅਪਰਿਤਸ੍ਸਨਞ੍ਚਾ’’ਤਿ (ਸਂ. ਨਿ. ੩.੭) ਏਵਂ ਗਹੇਤ੍ਵਾ ਪਰਿਤਸ੍ਸਨਾ, ਅਗ੍ਗਹੇਤ੍ਵਾਵ ਅਪਰਿਤਸ੍ਸਨਾ ਚ ਕਥਿਤਾ, ਤਂ ਮਹਾਥੇਰੋ ਉਪਾਦਾਪਰਿਤਸ੍ਸਨਮੇਵ ਅਨੁਪਾਦਾਪਰਿਤਸ੍ਸਨਨ੍ਤਿ ਕਤ੍ਵਾ ਦਸ੍ਸੇਨ੍ਤੋ ਏਵਮਾਹ. ਕਥਂ ਪਨੇਸਾ ਅਨੁਪਾਦਾਪਰਿਤਸ੍ਸਨਾ ਹੋਤੀਤਿ. ਉਪਾਦਾਤਬ੍ਬਸ੍ਸ ਅਭਾਵਤੋ. ਯਦਿ ਹਿ ਕੋਚਿ ਸਙ੍ਖਾਰੋ ਨਿਚ੍ਚੋ ਵਾ ਧੁਵੋ ਵਾ ਅਤ੍ਤਾ ਵਾ ਅਤ੍ਤਨਿਯੋ ਵਾਤਿ ਗਹੇਤਬ੍ਬਯੁਤ੍ਤਕੋ ਅਭਵਿਸ੍ਸ, ਅਯਂ ਪਰਿਤਸ੍ਸਨਾ ਉਪਾਦਾਪਰਿਤਸ੍ਸਨਾਵ ਅਸ੍ਸ. ਯਸ੍ਮਾ ਪਨ ਏਵਂ ਉਪਾਦਾਤਬ੍ਬੋ ਸਙ੍ਖਾਰੋ ਨਾਮ ਨਤ੍ਥਿ, ਤਸ੍ਮਾ ਰੂਪਂ ਅਤ੍ਤਾਤਿਆਦਿਨਾ ਨਯੇਨ ਰੂਪਾਦਯੋ ਉਪਾਦਿਨ੍ਨਾਪਿ ਅਨੁਪਾਦਿਨ੍ਨਾਵ ਹੋਨ੍ਤਿ. ਏਵਮੇਸਾ ਦਿਟ੍ਠਿਵਸੇਨ ਉਪਾਦਾਪਰਿਤਸ੍ਸਨਾਪਿ ਸਮਾਨਾ ਅਤ੍ਥਤੋ ਅਨੁਪਾਦਾਪਰਿਤਸ੍ਸਨਾਯੇਵ ਨਾਮ ਹੋਤੀਤਿ ਵੇਦਿਤਬ੍ਬਾ.

ਅਞ੍ਞਥਾ ਹੋਤੀਤਿ ਪਰਿਵਤ੍ਤਤਿ ਪਕਤਿਜਹਨੇਨ ਨਸ੍ਸਤਿ, ਰੂਪਵਿਪਰਿਣਾਮਾਨੁਪਰਿਵਤ੍ਤੀਤਿ ‘‘ਮਮ ਰੂਪਂ ਵਿਪਰਿਣਤ’’ਨ੍ਤਿ ਵਾ, ‘‘ਯਂ ਅਹੁ, ਤਂ ਵਤ ਮੇ ਨਤ੍ਥੀ’’ਤਿ ਵਾ ਆਦਿਨਾ (ਮ. ਨਿ. ੧.੨੪੨) ਨਯੇਨ ਕਮ੍ਮਵਿਞ੍ਞਾਣਂ ਰੂਪਸ੍ਸ ਭੇਦਾਨੁਪਰਿਵਤ੍ਤਿ ਹੋਤਿ. ਵਿਪਰਿਣਾਮਾਨੁਪਰਿਵਤ੍ਤਜਾਤਿ ਵਿਪਰਿਣਾਮਸ੍ਸ ਅਨੁਪਰਿਵਤ੍ਤਨਤੋ ਵਿਪਰਿਣਾਮਾਰਮ੍ਮਣਚਿਤ੍ਤਤੋ ਜਾਤਾ. ਪਰਿਤਸ੍ਸਨਾ ਧਮ੍ਮਸਮੁਪ੍ਪਾਦਾਤਿ ਤਣ੍ਹਾਪਰਿਤਸ੍ਸਨਾ ਚ ਅਕੁਸਲਧਮ੍ਮਸਮੁਪ੍ਪਾਦਾ ਚ. ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤੀਤਿ ਕੁਸਲਚਿਤ੍ਤਂ ਪਰਿਯਾਦਿਯਿਤ੍ਵਾ ਗਹੇਤ੍ਵਾ ਖੇਪੇਤ੍ਵਾ ਤਿਟ੍ਠਨ੍ਤਿ. ਉਤ੍ਤਾਸਵਾਤਿ ਭਯਤਾਸੇਨਪਿ ਸਉਤ੍ਤਾਸੋ ਤਣ੍ਹਾਤਾਸੇਨਪਿ ਸਉਤ੍ਤਾਸੋ. ਵਿਘਾਤਵਾਤਿ ਸਵਿਘਾਤੋ ਸਦੁਕ੍ਖੋ. ਅਪੇਕ੍ਖਵਾਤਿ ਸਾਲਯੋ ਸਸਿਨੇਹੋ. ਏਵਂ ਖੋ, ਆਵੁਸੋ, ਅਨੁਪਾਦਾ ਪਰਿਤਸ੍ਸਨਾ ਹੋਤੀਤਿ ਏਵਂ ਮਣਿਕਰਣ੍ਡਕਸਞ੍ਞਾਯ ਤੁਚ੍ਛਕਰਣ੍ਡਕਂ ਗਹੇਤ੍ਵਾ ਤਸ੍ਮਿਂ ਨਟ੍ਠੇ ਪਚ੍ਛਾ ਵਿਘਾਤਂ ਆਪਜ੍ਜਨ੍ਤਸ੍ਸ ਵਿਯ ਪਚ੍ਛਾ ਅਗ੍ਗਹੇਤ੍ਵਾ ਪਰਿਤਸ੍ਸਨਾ ਹੋਤਿ.

੩੨੧. ਨ ਚ ਰੂਪਵਿਪਰਿਣਾਮਾਨੁਪਰਿਵਤ੍ਤੀਤਿ ਖੀਣਾਸਵਸ੍ਸ ਕਮ੍ਮਵਿਞ੍ਞਾਣਮੇਵ ਨਤ੍ਥਿ, ਤਸ੍ਮਾ ਰੂਪਭੇਦਾਨੁਪਰਿਵਤ੍ਤਿ ਨ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਉਦ੍ਦੇਸਵਿਭਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.