੬. ਮਹਾਕਮ੍ਮਵਿਭਙ੍ਗਸੁਤ੍ਤਵਣ੍ਣਨਾ

੨੯੮. ਏਵਂ ਮੇ ਸੁਤਨ੍ਤਿ ਮਹਾਕਮ੍ਮਵਿਭਙ੍ਗਸੁਤ੍ਤਂ. ਤਤ੍ਥ ਮੋਘਨ੍ਤਿ ਤੁਚ੍ਛਂ ਅਫਲਂ. ਸਚ੍ਚਨ੍ਤਿ ਤਥਂ ਭੂਤਂ. ਇਦਞ੍ਚ ਏਤੇਨ ਨ ਸਮ੍ਮੁਖਾ ਸੁਤਂ, ਉਪਾਲਿਸੁਤ੍ਤੇ (ਮ. ਨਿ. ੨.੫੬) ਪਨ – ‘‘ਮਨੋਕਮ੍ਮਂ ਮਹਾਸਾਵਜ੍ਜਤਰਂ ਪਞ੍ਞਪੇਮਿ ਪਾਪਸ੍ਸ ਕਮ੍ਮਸ੍ਸ ਕਿਰਿਯਾਯ ਪਾਪਸ੍ਸ ਕਮ੍ਮਸ੍ਸ ਪਵਤ੍ਤਿਯਾ, ਨੋ ਤਥਾ ਕਾਯਕਮ੍ਮਂ ਨੋ ਤਥਾ ਵਚੀਕਮ੍ਮ’’ਨ੍ਤਿ ਭਗਵਤਾ ਵੁਤ੍ਤਂ ਅਤ੍ਥਿ, ਸਾ ਕਥਾ ਤਿਤ੍ਥਿਯਾਨਂ ਅਨ੍ਤਰੇ ਪਾਕਟਾ ਜਾਤਾ, ਤਂ ਗਹੇਤ੍ਵਾ ਏਸ ਵਦਤਿ. ਅਤ੍ਥਿ ਚ ਸਾ ਸਮਾਪਤ੍ਤੀਤਿ ਇਦਂ – ‘‘ਕਥਂ ਨੁ ਖੋ, ਭੋ, ਅਭਿਸਞ੍ਞਾਨਿਰੋਧੋ ਹੋਤੀ’’ਤਿ ਪੋਟ੍ਠਪਾਦਸੁਤ੍ਤੇ (ਦੀ. ਨਿ. ੧.੪੦੬ ਆਦਯੋ) ਉਪ੍ਪਨ੍ਨਂ ਅਭਿਸਞ੍ਞਾਨਿਰੋਧਕਥਂ ਸਨ੍ਧਾਯ ਵਦਤਿ. ਨ ਕਿਞ੍ਚਿ ਵੇਦਿਯਤੀਤਿ ਏਕਵੇਦਨਮ੍ਪਿ ਨ ਵੇਦਿਯਤਿ. ਅਤ੍ਥਿ ਚ ਖੋਤਿ ਥੇਰੋ ਨਿਰੋਧਸਮਾਪਤ੍ਤਿਂ ਸਨ੍ਧਾਯ ਅਨੁਜਾਨਾਤਿ. ਪਰਿਰਕ੍ਖਿਤਬ੍ਬਨ੍ਤਿ ਗਰਹਤੋ ਮੋਚਨੇਨ ਰਕ੍ਖਿਤਬ੍ਬਂ. ਸਞ੍ਚੇਤਨਾ ਅਸ੍ਸ ਅਤ੍ਥੀਤਿ ਸਞ੍ਚੇਤਨਿਕਂ, ਸਾਭਿਸਨ੍ਧਿਕਂ ਸਞ੍ਚੇਤਨਿਕਕਮ੍ਮਂ ਕਤ੍ਵਾਤਿ ਅਤ੍ਥੋ. ਦੁਕ੍ਖਂ ਸੋਤਿ ਥੇਰੋ ‘‘ਅਕੁਸਲਮੇਵ ਸਨ੍ਧਾਯ ਪਰਿਬ੍ਬਾਜਕੋ ਪੁਚ੍ਛਤੀ’’ਤਿ ਸਞ੍ਞਾਯ ਏਵਂ ਵਦਤਿ.

ਦਸ੍ਸਨਮ੍ਪਿ ਖੋ ਅਹਨ੍ਤਿ ਭਗਵਾ ਚਤੁਰਙ੍ਗੇਪਿ ਅਨ੍ਧਕਾਰੇ ਸਮਨ੍ਤਾ ਯੋਜਨਟ੍ਠਾਨੇ ਤਿਲਮਤ੍ਤਮ੍ਪਿ ਸਙ੍ਖਾਰਂ ਮਂਸਚਕ੍ਖੁਨਾਵ ਪਸ੍ਸਤਿ, ਅਯਞ੍ਚ ਪਰਿਬ੍ਬਾਜਕੋ ਨ ਦੂਰੇ ਗਾਵੁਤਮਤ੍ਤਬ੍ਭਨ੍ਤਰੇ ਵਸਤਿ, ਕਸ੍ਮਾ ਭਗਵਾ ਏਵਮਾਹਾਤਿ? ਸਮਾਗਮਦਸ੍ਸਨਂ ਸਨ੍ਧਾਯੇਵਮਾਹ.

੨੯੯. ਉਦਾਯੀਤਿ ਲਾਲੁਦਾਯੀ. ਤਂ ਦੁਕ੍ਖਸ੍ਮਿਨ੍ਤਿ ਸਬ੍ਬਂ ਤਂ ਦੁਕ੍ਖਮੇਵ. ਇਤਿ ਇਮਂ ਵਟ੍ਟਦੁਕ੍ਖਂ ਕਿਲੇਸਦੁਕ੍ਖਂ ਸਙ੍ਖਾਰਦੁਕ੍ਖਂ ਸਨ੍ਧਾਯ ‘‘ਸਚੇ ਭਾਸਿਤਂ ਭਵੇਯ੍ਯ ਭਗਵਾ’’ਤਿ ਪੁਚ੍ਛਤਿ.

੩੦੦. ਉਮ੍ਮਙ੍ਗਨ੍ਤਿ ਪਞ੍ਹਾਉਮ੍ਮਙ੍ਗਂ. ਉਮ੍ਮੁਜ੍ਜਮਾਨੋਤਿ ਸੀਸਂ ਨੀਹਰਮਾਨੋ. ਅਯੋਨਿਸੋ ਉਮ੍ਮੁਜ੍ਜਿਸ੍ਸਤੀਤਿ ਅਨੁਪਾਯੇਨ ਸੀਸਂ ਨੀਹਰਿਸ੍ਸਤਿ. ਇਦਞ੍ਚ ਪਨ ਭਗਵਾ ਜਾਨਨ੍ਤੋ ਨੇਵ ਦਿਬ੍ਬਚਕ੍ਖੁਨਾ ਨ ਚੇਤੋਪਰਿਯਞਾਣੇਨ ਨ ਸਬ੍ਬਞ੍ਞੁਤਞਾਣੇਨ ਜਾਨਿ, ਅਧਿਪ੍ਪਾਯੇਨੇਵ ਪਨ ਅਞ੍ਞਾਸਿ. ਕਥੇਨ੍ਤਸ੍ਸ ਹਿ ਅਧਿਪ੍ਪਾਯੋ ਨਾਮ ਸੁਵਿਜਾਨੋ ਹੋਤਿ, ਕਥੇਤੁਕਾਮੋ ਗੀਵਂ ਪਗ੍ਗਣ੍ਹਾਤਿ, ਹਨੁਕਂ ਚਾਲੇਤਿ, ਮੁਖਮਸ੍ਸ ਫਨ੍ਦਤਿ, ਸਨ੍ਨਿਸੀਦਿਤੁਂ ਨ ਸਕ੍ਕੋਤਿ. ਭਗਵਾ ਤਸ੍ਸ ਤਂ ਆਕਾਰਂ ਦਿਸ੍ਵਾ ‘‘ਅਯਂ ਉਦਾਯੀ ਸਨ੍ਨਿਸੀਦਿਤੁਂ ਨ ਸਕ੍ਕੋਤਿ, ਯਂ ਅਭੂਤਂ, ਤਦੇਵ ਕਥੇਸ੍ਸਤੀ’’ਤਿ ਓਲੋਕੇਤ੍ਵਾਵ ਅਞ੍ਞਾਸਿ. ਆਦਿਂ ਯੇਵਾਤਿਆਦਿਮ੍ਹਿਯੇਵ. ਤਿਸ੍ਸੋ ਵੇਦਨਾਤਿ ‘‘ਕਿਂ ਸੋ ਵੇਦਿਯਤੀ’’ਤਿ? ਪੁਚ੍ਛਨ੍ਤੇਨ ‘‘ਤਿਸ੍ਸੋ ਵੇਦਨਾ ਪੁਚ੍ਛਾਮੀ’’ਤਿ ਏਵਂ ਵਵਤ੍ਥਪੇਤ੍ਵਾਵ ਤਿਸ੍ਸੋ ਵੇਦਨਾ ਪੁਚ੍ਛਿਤਾ. ਸੁਖਵੇਦਨਿਯਨ੍ਤਿ ਸੁਖਵੇਦਨਾਯ ਪਚ੍ਚਯਭੂਤਂ. ਸੇਸੇਸੁਪਿ ਏਸੇਵ ਨਯੋ.

ਏਤ੍ਥ ਚ ਕਾਮਾਵਚਰਕੁਸਲਤੋ ਸੋਮਨਸ੍ਸਸਹਗਤਚਿਤ੍ਤਸਮ੍ਪਯੁਤ੍ਤਾ ਚਤਸ੍ਸੋ ਚੇਤਨਾ, ਹੇਟ੍ਠਾ ਤਿਕਜ੍ਝਾਨਚੇਤਨਾਤਿ ਏਵਂ ਪਟਿਸਨ੍ਧਿਪਵਤ੍ਤੇਸੁ ਸੁਖਵੇਦਨਾਯ ਜਨਨਤੋ ਸੁਖਵੇਦਨਿਯਂ ਕਮ੍ਮਂ ਨਾਮ. ਕਾਮਾਵਚਰਞ੍ਚੇਤ੍ਥ ਪਟਿਸਨ੍ਧਿਯਂਯੇਵ ਏਕਨ੍ਤੇਨ ਸੁਖਂ ਜਨੇਤਿ, ਪਵਤ੍ਤੇ ਇਟ੍ਠਮਜ੍ਝਤ੍ਤਾਰਮ੍ਮਣੇ ਅਦੁਕ੍ਖਮਸੁਖਮ੍ਪਿ.

ਅਕੁਸਲਚੇਤਨਾ ਪਟਿਸਨ੍ਧਿਪਵਤ੍ਤੇਸੁ ਦੁਕ੍ਖਸ੍ਸੇਵ ਜਨਨਤੋ ਦੁਕ੍ਖਵੇਦਨਿਯਂ ਕਮ੍ਮਂ ਨਾਮ. ਕਾਯਦ੍ਵਾਰੇ ਪਵਤ੍ਤੇਯੇਵ ਚੇਤਂ ਏਕਨ੍ਤੇਨ ਦੁਕ੍ਖਂ ਜਨੇਤਿ, ਅਞ੍ਞਤ੍ਥ ਅਦੁਕ੍ਖਮਸੁਖਮ੍ਪਿ, ਸਾ ਪਨ ਵੇਦਨਾ ਅਨਿਟ੍ਠਾਨਿਟ੍ਠਮਜ੍ਝਤ੍ਤੇਸੁਯੇਵ ਆਰਮ੍ਮਣੇਸੁ ਉਪ੍ਪਜ੍ਜਨਤੋ ਦੁਕ੍ਖਾਤ੍ਵੇਵ ਸਙ੍ਖਂ ਗਤਾ.

ਕਾਮਾਵਚਰਕੁਸਲਤੋ ਪਨ ਉਪੇਕ੍ਖਾਸਹਗਤਚਿਤ੍ਤਸਮ੍ਪਯੁਤ੍ਤਾ ਚਤਸ੍ਸੋ ਚੇਤਨਾ, ਰੂਪਾਵਚਰਕੁਸਲਤੋ ਚਤੁਤ੍ਥਜ੍ਝਾਨਚੇਤਨਾਤਿ ਏਵਂ ਪਟਿਸਨ੍ਧਿਪਵਤ੍ਤੇਸੁ ਤਤਿਯਵੇਦਨਾਯ ਜਨਨਤੋ ਅਦੁਕ੍ਖਮਸੁਖਵੇਦਨਿਯਂ ਕਮ੍ਮਂ ਨਾਮ. ਏਤ੍ਥ ਚ ਕਾਮਾਵਚਰਂ ਪਟਿਸਨ੍ਧਿਯਂਯੇਵ ਏਕਨ੍ਤੇਨ ਅਦੁਕ੍ਖਮਸੁਖਂ ਜਨੇਤਿ, ਪਵਤ੍ਤੇ ਇਟ੍ਠਾਰਮ੍ਮਣੇ ਸੁਖਮ੍ਪਿ. ਅਪਿਚ ਸੁਖਵੇਦਨਿਯਕਮ੍ਮਂ ਪਟਿਸਨ੍ਧਿਪਵਤ੍ਤਿਵਸੇਨ ਵਟ੍ਟਤਿ, ਤਥਾ ਅਦੁਕ੍ਖਮਸੁਖਵੇਦਨਿਯਂ, ਦੁਕ੍ਖਵੇਦਨਿਯਂ ਪਵਤ੍ਤਿਵਸੇਨੇਵ ਵਟ੍ਟਤਿ. ਏਤਸ੍ਸ ਪਨ ਵਸੇਨ ਸਬ੍ਬਂ ਪਵਤ੍ਤਿਵਸੇਨੇਵ ਵਟ੍ਟਤਿ.

ਏਤਸ੍ਸ ਭਗਵਾਤਿ ਥੇਰੋ ਤਥਾਗਤੇਨ ਮਹਾਕਮ੍ਮਵਿਭਙ੍ਗਕਥਨਤ੍ਥਂ ਆਲਯੋ ਦਸ੍ਸਿਤੋ, ਤਥਾਗਤਂ ਯਾਚਿਤ੍ਵਾ ਮਹਾਕਮ੍ਮਵਿਭਙ੍ਗਞਾਣਂ ਭਿਕ੍ਖੁਸਙ੍ਘਸ੍ਸ ਪਾਕਟਂ ਕਰਿਸ੍ਸਾਮੀਤਿ ਚਿਨ੍ਤੇਤ੍ਵਾ ਅਨੁਸਨ੍ਧਿਕੁਸਲਤਾਯ ਏਵਮਾਹ. ਤਤ੍ਥ ਮਹਾਕਮ੍ਮਵਿਭਙ੍ਗਨ੍ਤਿ ਮਹਾਕਮ੍ਮਵਿਭਜਨਂ. ਕਤਮੇ ਚਤ੍ਤਾਰੋ…ਪੇ… ਇਧਾਨਨ੍ਦ, ਏਕਚ੍ਚੋ ਪੁਗ੍ਗਲੋ…ਪੇ… ਨਿਰਯਂ ਉਪਪਜ੍ਜਤੀਤਿ ਇਦਂ ਨ ਮਹਾਕਮ੍ਮਵਿਭਙ੍ਗਞਾਣਭਾਜਨਂ, ਮਹਾਕਮ੍ਮਵਿਭਙ੍ਗਞਾਣਭਾਜਨਤ੍ਥਾਯ ਪਨ ਮਾਤਿਕਾਟ੍ਠਪਨਂ.

੩੦੧. ਇਧਾਨਨ੍ਦ, ਏਕਚ੍ਚੋ ਸਮਣੋ ਵਾਤਿ ਪਾਟਿਯੇਕ੍ਕੋ ਅਨੁਸਨ੍ਧਿ. ਇਦਞ੍ਹਿ ਭਗਵਾ – ‘‘ਦਿਬ੍ਬਚਕ੍ਖੁਕਾ ਸਮਣਬ੍ਰਾਹ੍ਮਣਾ ਇਦਂ ਆਰਮ੍ਮਣਂ ਕਤ੍ਵਾ ਇਮਂ ਪਚ੍ਚਯਂ ਲਭਿਤ੍ਵਾ ਇਦਂ ਦਸ੍ਸਨਂ ਗਣ੍ਹਨ੍ਤੀ’’ਤਿ ਪਕਾਸਨਤ੍ਥਂ ਆਰਭਿ. ਤਤ੍ਥ ਆਤਪ੍ਪਨ੍ਤਿਆਦੀਨਿ ਪਞ੍ਚਪਿ ਵੀਰਿਯਸ੍ਸੇਵ ਨਾਮਾਨਿ. ਚੇਤੋਸਮਾਧਿਨ੍ਤਿ ਦਿਬ੍ਬਚਕ੍ਖੁਸਮਾਧਿਂ. ਪਸ੍ਸਤੀਤਿ ‘‘ਸੋ ਸਤ੍ਤੋ ਕੁਹਿਂ ਨਿਬ੍ਬਤ੍ਤੋ’’ਤਿ ਓਲੋਕੇਨ੍ਤੋ ਪਸ੍ਸਤਿ. ਯੇ ਅਞ੍ਞਥਾਤਿ ਯੇ ‘‘ਦਸਨ੍ਨਂ ਕੁਸਲਾਨਂ ਕਮ੍ਮਪਥਾਨਂ ਪੂਰਿਤਤ੍ਤਾ ਨਿਰਯਂ ਉਪਪਜ੍ਜਤੀ’’ਤਿ ਜਾਨਨ੍ਤਿ, ਮਿਚ੍ਛਾ ਤੇਸਂ ਞਾਣਨ੍ਤਿ ਵਦਤਿ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਵਿਦਿਤਨ੍ਤਿ ਪਾਕਟਂ. ਥਾਮਸਾਤਿ ਦਿਟ੍ਠਿਥਾਮੇਨ. ਪਰਾਮਾਸਾਤਿ ਦਿਟ੍ਠਿਪਰਾਮਾਸੇਨ. ਅਭਿਨਿਵਿਸ੍ਸ ਵੋਹਰਤੀਤਿ ਅਧਿਟ੍ਠਹਿਤ੍ਵਾ ਆਦਿਯਿਤ੍ਵਾ ਵੋਹਰਤਿ.

੩੦੨. ਤਤ੍ਰਾਨਨ੍ਦਾਤਿ ਇਦਮ੍ਪਿ ਨ ਮਹਾਕਮ੍ਮਵਿਭਙ੍ਗਞਾਣਸ੍ਸ ਭਾਜਨਂ, ਅਥ ਖ੍ਵਾਸ੍ਸ ਮਾਤਿਕਾਟ੍ਠਪਨਮੇਵ. ਏਤ੍ਥ ਪਨ ਏਤੇਸਂ ਦਿਬ੍ਬਚਕ੍ਖੁਕਾਨਂ ਵਚਨੇ ਏਤ੍ਤਕਾ ਅਨੁਞ੍ਞਾਤਾ, ਏਤ੍ਤਕਾ ਅਨਨੁਞ੍ਞਾਤਾਤਿ ਇਦਂ ਦਸ੍ਸਿਤਂ. ਤਤ੍ਥ ਤਤ੍ਰਾਤਿ ਤੇਸੁ ਚਤੂਸੁ ਸਮਣਬ੍ਰਾਹ੍ਮਣੇਸੁ. ਇਦਮਸ੍ਸਾਤਿ ਇਦਂ ਵਚਨਂ ਅਸ੍ਸ. ਅਞ੍ਞਥਾਤਿ ਅਞ੍ਞੇਨਾਕਾਰੇਨ. ਇਤਿ ਇਮੇਸਂ ਸਮਣਬ੍ਰਾਹ੍ਮਣਾਨਂ ਵਾਦੇ ਦ੍ਵੀਸੁ ਠਾਨੇਸੁ ਅਨੁਞ੍ਞਾਤਾ, ਤੀਸੁ ਅਨਨੁਞ੍ਞਾਤਾਤਿ ਏਵਂ ਸਬ੍ਬਤ੍ਥ ਅਨੁਞ੍ਞਾ ਨਾਨੁਞ੍ਞਾ ਵੇਦਿਤਬ੍ਬਾ.

੩੦੩. ਏਵਂ ਦਿਬ੍ਬਚਕ੍ਖੁਕਾਨਂ ਵਚਨੇ ਅਨੁਞ੍ਞਾ ਚ ਅਨਨੁਞ੍ਞਾ ਚ ਦਸ੍ਸੇਤ੍ਵਾ ਇਦਾਨਿ ਮਹਾਕਮ੍ਮਵਿਭਙ੍ਗਞਾਣਂ ਵਿਭਜਨ੍ਤੋ ਤਤ੍ਰਾਨਨ੍ਦ, ਯ੍ਵਾਯਂ ਪੁਗ੍ਗਲੋਤਿਆਦਿਮਾਹ.

ਪੁਬ੍ਬੇ ਵਾਸ੍ਸ ਤਂ ਕਤਂ ਹੋਤੀਤਿ ਯਂ ਇਮਿਨਾ ਦਿਬ੍ਬਚਕ੍ਖੁਕੇਨ ਕਮ੍ਮਂ ਕਰੋਨ੍ਤੋ ਦਿਟ੍ਠੋ, ਤਤੋ ਪੁਬ੍ਬੇ ਕਤਂ. ਪੁਬ੍ਬੇ ਕਤੇਨਪਿ ਹਿ ਨਿਰਯੇ ਨਿਬ੍ਬਤ੍ਤਤਿ, ਪਚ੍ਛਾ ਕਤੇਨਪਿ ਨਿਬ੍ਬਤ੍ਤਤਿ, ਮਰਣਕਾਲੇ ਵਾ ਪਨ – ‘‘ਖਨ੍ਦੋ ਸੇਟ੍ਠੋ ਸਿਵੋ ਸੇਟ੍ਠੋ, ਪਿਤਾਮਹੋ ਸੇਟ੍ਠੋ, ਇਸ੍ਸਰਾਦੀਹਿ ਵਾ ਲੋਕੋ ਵਿਸਟ੍ਠੋ’’ਤਿਆਦਿਨਾ ਮਿਚ੍ਛਾਦਸ੍ਸਨੇਨਪਿ ਨਿਬ੍ਬਤ੍ਤਤੇਵ. ਦਿਟ੍ਠੇਵ ਧਮ੍ਮੇਤਿ ਯਂ ਤਤ੍ਥ ਦਿਟ੍ਠਧਮ੍ਮਵੇਦਨੀਯਂ ਹੋਤਿ, ਤਸ੍ਸ ਦਿਟ੍ਠੇਵ ਧਮ੍ਮੇ, ਯਂ ਉਪਪਜ੍ਜਵੇਦਨੀਯਂ, ਤਸ੍ਸ ਉਪਪਜ੍ਜਿਤ੍ਵਾ, ਯਂ ਅਪਰਾਪਰਿਯਵੇਦਨੀਯਂ, ਤਸ੍ਸ ਅਪਰਸ੍ਮਿਂ ਪਰਿਯਾਯੇ ਵਿਪਾਕਂ ਪਟਿਸਂਵੇਦੇਤਿ.

ਇਤਿ ਅਯਂ ਸਮਣੋ ਵਾ ਬ੍ਰਾਹ੍ਮਣੋ ਵਾ ਏਕਂ ਕਮ੍ਮਰਾਸਿਂ ਏਕਞ੍ਚ ਵਿਪਾਕਰਾਸਿਂ ਅਦ੍ਦਸ, ਸਮ੍ਮਾਸਮ੍ਬੁਦ੍ਧੋ ਇਮਿਨਾ ਅਦਿਟ੍ਠੇ ਤਯੋ ਕਮ੍ਮਰਾਸੀ, ਦ੍ਵੇ ਚ ਵਿਪਾਕਰਾਸੀ ਅਦ੍ਦਸ. ਇਮਿਨਾ ਪਨ ਦਿਟ੍ਠੇ ਅਦਿਟ੍ਠੇ ਚ ਚਤ੍ਤਾਰੋ ਕਮ੍ਮਰਾਸੀ ਤਯੋ ਚ ਵਿਪਾਕਰਾਸੀ ਅਦ੍ਦਸ. ਇਮਾਨਿ ਸਤ੍ਤ ਠਾਨਾਨਿ ਜਾਨਨਞਾਣਂ ਤਥਾਗਤਸ੍ਸ ਮਹਾਕਮ੍ਮਵਿਭਙ੍ਗਞਾਣਂ ਨਾਮ. ਦੁਤਿਯਵਾਰੇ ਦਿਬ੍ਬਚਕ੍ਖੁਕੇਨ ਕਿਞ੍ਚਿ ਨ ਦਿਟ੍ਠਂ, ਤਥਾਗਤੇਨ ਪਨ ਤਯੋ ਕਮ੍ਮਰਾਸੀ, ਦ੍ਵੇ ਚ ਵਿਪਾਕਰਾਸੀ ਦਿਟ੍ਠਾਤਿ. ਇਮਾਨਿਪਿ ਪਞ੍ਚ ਪਚ੍ਚਤ੍ਤਟ੍ਠਾਨਾਨਿ ਜਾਨਨਞਾਣਂ ਤਥਾਗਤਸ੍ਸ ਮਹਾਕਮ੍ਮਵਿਭਙ੍ਗਞਾਣਂ ਨਾਮ. ਸੇਸਵਾਰਦ੍ਵਯੇਪਿ ਏਸੇਵ ਨਯੋ.

ਅਭਬ੍ਬਨ੍ਤਿ ਭੂਤਵਿਰਹਿਤਂ ਅਕੁਸਲਂ. ਅਭਬ੍ਬਾਭਾਸਨ੍ਤਿ ਅਭਬ੍ਬਂ ਆਭਾਸਤਿ ਅਭਿਭਵਤਿ ਪਟਿਬਾਹਤੀਤਿ ਅਤ੍ਥੋ. ਬਹੁਕਸ੍ਮਿਞ੍ਹਿ ਅਕੁਸਲਕਮ੍ਮੇ ਆਯੂਹਿਤੇ ਬਲਵਕਮ੍ਮਂ ਦੁਬ੍ਬਲਕਮ੍ਮਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤਿ ਇਦਂ ਅਭਬ੍ਬਞ੍ਚੇਵ ਅਭਬ੍ਬਾਭਾਸਞ੍ਚ. ਕੁਸਲਂ ਪਨ ਆਯੂਹਿਤ੍ਵਾ ਆਸਨ੍ਨੇ ਅਕੁਸਲਂ ਕਤਂ ਹੋਤਿ, ਤਂ ਕੁਸਲਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤਿ, ਇਦਂ ਅਭਬ੍ਬਂ ਭਬ੍ਬਾਭਾਸਂ. ਬਹੁਮ੍ਹਿ ਕੁਸਲੇ ਆਯੂਹਿਤੇਪਿ ਬਲਵਕਮ੍ਮਂ ਦੁਬ੍ਬਲਕਮ੍ਮਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤਿ, ਇਦਂ ਭਬ੍ਬਞ੍ਚੇਵ ਭਬ੍ਬਾਭਾਸਞ੍ਚ. ਅਕੁਸਲਂ ਪਨ ਆਯੂਹਿਤ੍ਵਾ ਆਸਨ੍ਨੇ ਕੁਸਲਂ ਕਤਂ ਹੋਤਿ, ਤਂ ਅਕੁਸਲਸ੍ਸ ਵਿਪਾਕਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਸ੍ਸ ਓਕਾਸਂ ਕਰੋਤਿ, ਇਦਂ ਭਬ੍ਬਂ ਅਭਬ੍ਬਾਭਾਸਂ.

ਅਪਿਚ ਉਪਟ੍ਠਾਨਾਕਾਰੇਨਪੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਇਦਞ੍ਹਿ ਵੁਤ੍ਤਂ ਹੋਤਿ, ਅਭਬ੍ਬਤੋ ਆਭਾਸਤਿ ਉਪਟ੍ਠਾਤੀਤਿ ਅਭਬ੍ਬਾਭਾਸਂ. ਤਤ੍ਥ ‘‘ਯ੍ਵਾਯਂ ਪੁਗ੍ਗਲੋ ਇਧ ਪਾਣਾਤਿਪਾਤੀ’’ਤਿਆਦਿਨਾ ਨਯੇਨ ਚਤ੍ਤਾਰੋ ਪੁਗ੍ਗਲਾ ਵੁਤ੍ਤਾ, ਤੇਸੁ ਪਠਮਸ੍ਸ ਕਮ੍ਮਂ ਅਭਬ੍ਬਂ ਅਭਬ੍ਬਾਭਾਸਂ, ਤਞ੍ਹਿ ਅਕੁਸਲਤ੍ਤਾ ਅਭਬ੍ਬਂ, ਤਸ੍ਸ ਚ ਨਿਰਯੇ ਨਿਬ੍ਬਤ੍ਤਤ੍ਤਾ ਤਤ੍ਥ ਨਿਬ੍ਬਤ੍ਤਿਕਾਰਣਭੂਤਂ ਅਕੁਸਲਂ ਹੁਤ੍ਵਾ ਉਪਟ੍ਠਾਤਿ. ਦੁਤਿਯਸ੍ਸ ਕਮ੍ਮਂ ਅਭਬ੍ਬਂ ਭਬ੍ਬਾਭਾਸਂ, ਤਞ੍ਹਿ ਅਕੁਸਲਤ੍ਤਾ ਅਭਬ੍ਬਂ. ਤਸ੍ਸ ਪਨ ਸਗ੍ਗੇ ਨਿਬ੍ਬਤ੍ਤਤ੍ਤਾ ਅਞ੍ਞਤਿਤ੍ਥਿਯਾਨਂ ਸਗ੍ਗੇ ਨਿਬ੍ਬਤ੍ਤਿਕਾਰਣਭੂਤਂ ਕੁਸਲਂ ਹੁਤ੍ਵਾ ਉਪਟ੍ਠਾਤਿ. ਇਤਰਸ੍ਮਿਮ੍ਪਿ ਕਮ੍ਮਦ੍ਵਯੇ ਏਸੇਵ ਨਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਕਮ੍ਮਵਿਭਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.