੪. ਲੋਮਸਕਙ੍ਗਿਯਭਦ੍ਦੇਕਰਤ੍ਤਸੁਤ੍ਤਵਣ੍ਣਨਾ

੨੮੬. ਏਵਂ ਮੇ ਸੁਤਨ੍ਤਿ ਲੋਮਸਕਙ੍ਗਿਯਭਦ੍ਦੇਕਰਤ੍ਤਸੁਤ੍ਤਂ. ਤਤ੍ਥ ਲੋਮਸਕਙ੍ਗਿਯੋਤਿ ਅਙ੍ਗਥੇਰੋ ਕਿਰ ਨਾਮੇਸ, ਕਾਯਸ੍ਸ ਪਨ ਈਸਕਲੋਮਸਾਕਾਰਤਾਯ ਲੋਮਸਕਙ੍ਗਿਯੋਤਿ ਪਾਕਟੋ ਜਾਤੋ. ਚਨ੍ਦਨੋ ਦੇਵਪੁਤ੍ਤੋਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਕਿਰੇਸ ਚਨ੍ਦਨੋ ਨਾਮ ਉਪਾਸਕੋ ਅਡ੍ਢੋ ਮਹਦ੍ਧਨੋ ਤੀਣਿ ਰਤਨਾਨਿ ਚਤੂਹਿ ਪਚ੍ਚਯੇਹਿ ਪੂਜੇਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ, ਪੁਰਿਮਨਾਮੇਨ ਚਨ੍ਦਨੋ ਦੇਵਪੁਤ੍ਤੋਤ੍ਵੇਵ ਸਙ੍ਖਂ ਗਤੋ. ਪਣ੍ਡੁਕਮ੍ਬਲਸਿਲਾਯਨ੍ਤਿ ਰਤ੍ਤਕਮ੍ਬਲਸਿਲਾਯਂ. ਤਸ੍ਸਾ ਕਿਰ ਰਤ੍ਤਕਮ੍ਬਲਸ੍ਸੇਵ ਜਯਸੁਮਨਪੁਪ੍ਫਰਾਸਿ ਵਿਯ ਵਣ੍ਣੋ, ਤਸ੍ਮਾ ‘‘ਪਣ੍ਡੁਕਮ੍ਬਲਸਿਲਾ’’ਤਿ ਵੁਚ੍ਚਤਿ.

ਕਦਾ ਪਨ ਤਤ੍ਥ ਭਗਵਾ ਵਿਹਾਸੀਤਿ? ਬੋਧਿਪਤ੍ਤਿਤੋ ਸਤ੍ਤਮੇ ਸਂਵਚ੍ਛਰੇ ਸਾਵਤ੍ਥਿਯਂ ਆਸਾਲ਼੍ਹੀਮਾਸਪੁਣ੍ਣਮਾਯ ਦ੍ਵਾਦਸਯੋਜਨਾਯ ਪਰਿਸਾਯ ਮਜ੍ਝੇ ਯਮਕਪਾਟਿਹਾਰਿਯਂ ਕਤ੍ਵਾ ਓਰੁਯ੍ਹ ਕਣ੍ਡਮ੍ਬਮੂਲੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸੀਦਿਤ੍ਵਾ ਧਮ੍ਮਦੇਸਨਾਯ ਮਹਾਜਨਂ ਮਹਾਵਿਦੁਗ੍ਗਤੋ ਉਦ੍ਧਰਿਤ੍ਵਾ ਬੁਦ੍ਧਾ ਨਾਮ ਯਸ੍ਮਾ ਪਾਟਿਹਾਰਿਯਂ ਕਤ੍ਵਾ ਮਨੁਸ੍ਸਪਥੇ ਨ ਵਸਨ੍ਤਿ, ਤਸ੍ਮਾ ਪਸ੍ਸਮਾਨਸ੍ਸੇਵ ਤਸ੍ਸ ਜਨਸ੍ਸ ਪਦਵੀਕ੍ਕਮਂ ਕਤ੍ਵਾ ਤਾਵਤਿਂਸਭਵਨੇ ਪਾਰਿਚ੍ਛਤ੍ਤਕਮੂਲੇ ਪਣ੍ਡੁਕਮ੍ਬਲਸਿਲਾਯਂ ਵਸ੍ਸਂ ਉਪਗਤੋ, ਤਸ੍ਮਿਂ ਸਮਯੇ ਵਿਹਾਸਿ.

ਤਤ੍ਰ ਭਗਵਾਤਿ ਤਤ੍ਰ ਵਿਹਰਨ੍ਤੋ ਭਗਵਾ ਯੇਭੁਯ੍ਯੇਨ ਦਸਹਿ ਚਕ੍ਕਵਾਲ਼ਸਹਸ੍ਸੇਹਿ ਸਨ੍ਨਿਪਤਿਤਾਹਿ ਦੇਵਤਾਹਿ ਪਰਿਵੁਤੋ ਮਾਤਰਂ ਕਾਯਸਕ੍ਖਿਂ ਕਤ੍ਵਾ ਅਭਿਧਮ੍ਮਪਿਟਕਂ ਕਥੇਨ੍ਤੋ ਗਮ੍ਭੀਰਂ ਨਿਪੁਣਂ ਤਿਲਕ੍ਖਣਾਹਤਂ ਰੂਪਾਰੂਪਪਰਿਚ੍ਛੇਦਕਥਂ ਪਟਿਵਿਜ੍ਝਿਤੁਂ ਅਸਕ੍ਕੋਨ੍ਤਾਨਂ ਦੇਵਾਨਂ ਸਂਵੇਗਜਨਨਤ੍ਥਂ ਅਨ੍ਤਰਨ੍ਤਰਾ ਭਦ੍ਦੇਕਰਤ੍ਤਸ੍ਸ ਉਦ੍ਦੇਸਞ੍ਚ ਵਿਭਙ੍ਗਞ੍ਚ ਅਭਾਸਿ. ਤਤ੍ਰਾਯਂ ਦੇਵਪੁਤ੍ਤੋ ਉਗ੍ਗਣ੍ਹਨ੍ਤੋ ਇਮਾ ਗਾਥਾ ਸਦ੍ਧਿਂ ਵਿਭਙ੍ਗੇਨ ਉਗ੍ਗਣ੍ਹਿ, ਦੇਵਤ੍ਤਸ੍ਸ ਪਨ ਪਮਾਦਾਧਿਟ੍ਠਾਨਤ੍ਤਾ ਦਿਬ੍ਬੇਹਿ ਆਰਮ੍ਮਣੇਹਿ ਨਿਪ੍ਪੀਲ਼ਿਯਮਾਨੋ ਅਨੁਪੁਬ੍ਬੇਨ ਸੁਤ੍ਤਂ ਸਮ੍ਮੁਟ੍ਠੋ ਗਾਥਾਮਤ੍ਤਮੇਵ ਧਾਰੇਸਿ. ਤੇਨਾਹ ‘‘ਏਵਂ ਖੋ ਅਹਂ ਭਿਕ੍ਖੁ ਧਾਰੇਮਿ ਭਦ੍ਦੇਕਰਤ੍ਤਿਯੋ ਗਾਥਾ’’ਤਿ.

ਉਗ੍ਗਣ੍ਹਾਹਿ ਤ੍ਵਨ੍ਤਿਆਦੀਸੁ ਤੁਣ੍ਹੀਭੂਤੋ ਨਿਸੀਦਿਤ੍ਵਾ ਸੁਣਨ੍ਤੋ ਉਗ੍ਗਣ੍ਹਾਤਿ ਨਾਮ, ਵਾਚਾਯ ਸਜ੍ਝਾਯਂ ਕਰੋਨ੍ਤੋ ਪਰਿਯਾਪੁਣਾਤਿ ਨਾਮ, ਅਞ੍ਞੇਸਂ ਵਾਚੇਨ੍ਤੋ ਧਾਰੇਤਿ ਨਾਮ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਲੋਮਸਕਙ੍ਗਿਯਭਦ੍ਦੇਕਰਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.