੩. ਮਹਾਕਚ੍ਚਾਨਭਦ੍ਦੇਕਰਤ੍ਤਸੁਤ੍ਤਵਣ੍ਣਨਾ
੨੭੯. ਏਵਂ ਮੇ ਸੁਤਨ੍ਤਿ ਮਹਾਕਚ੍ਚਾਨਭਦ੍ਦੇਕਰਤ੍ਤਸੁਤ੍ਤਂ. ਤਤ੍ਥ ਤਪੋਦਾਰਾਮੇਤਿ ਤਤ੍ਤੋਦਕਸ੍ਸ ਰਹਦਸ੍ਸ ਵਸੇਨ ਏਵਂਲਦ੍ਧਨਾਮੇ ਆਰਾਮੇ. ਵੇਭਾਰਪਬ੍ਬਤਸ੍ਸ ਕਿਰ ਹੇਟ੍ਠਾ ਭੂਮਟ੍ਠਕਨਾਗਾਨਂ ਪਞ੍ਚਯੋਜਨਸਤਿਕਂ ਨਾਗਭਵਨਂ ਦੇਵਲੋਕਸਦਿਸਂ ਮਣਿਮਯੇਨ ਤਲੇਨ ਆਰਾਮਉਯ੍ਯਾਨੇਹਿ ਚ ਸਮਨ੍ਨਾਗਤਂ, ਤਤ੍ਥ ਨਾਗਾਨਂ ਕੀਲ਼ਨਟ੍ਠਾਨੇ ਮਹਾਉਦਕਰਹਦੋ, ਤਤੋ ਤਪੋਦਾ ਨਾਮ ਨਦੀ ਸਨ੍ਦਤਿ ਕੁਥਿਤਾ ਉਣ੍ਹੋਦਕਾ. ਕਸ੍ਮਾ ਪਨੇਸਾ ਏਦਿਸਾ ਜਾਤਾ? ਰਾਜਗਹਂ ਕਿਰ ਪਰਿਵਾਰੇਤ੍ਵਾ ਮਹਾ ਪੇਤਲੋਕੋ, ਤਤ੍ਥ ਦ੍ਵਿਨ੍ਨਂ ਮਹਾਲੋਹਕੁਮ੍ਭਿਨਿਰਯਾਨਂ ਅਨ੍ਤਰੇਨ ਅਯਂ ਤਪੋਦਾ ਆਗਚ੍ਛਤਿ, ਤਸ੍ਮਾ ਸਾ ਕੁਥਿਤਾ ਸਨ੍ਦਤਿ. ਵੁਤ੍ਤਮ੍ਪਿ ਚੇਤਂ – ‘‘ਯਤਾਯਂ, ਭਿਕ੍ਖਵੇ, ਤਪੋਦਾ ਸਨ੍ਦਤਿ, ਸੋ ਦਹੋ ਅਚ੍ਛੋਦਕੋ ਸੀਤੋਦਕੋ ਸਾਤੋਦਕੋ ਸੇਤੋਦਕੋ ਸੁਪ੍ਪਤਿਤ੍ਥੋ ਰਮਣੀਯੋ ਪਹੂਤਮਚ੍ਛਕਚ੍ਛਪੋ, ਚਕ੍ਕਮਤ੍ਤਾਨਿ ਚ ਪਦੁਮਾਨਿ ਪੁਪ੍ਫਨ੍ਤਿ. ਅਪਿਚਾਯਂ, ਭਿਕ੍ਖਵੇ, ਤਪੋਦਾ ਦ੍ਵਿਨ੍ਨਂ ਮਹਾਨਿਰਯਾਨਂ ਅਨ੍ਤਰਿਕਾਯ ਆਗਚ੍ਛਤਿ, ਤੇਨਾਯਂ ਤਪੋਦਾ ਕੁਥਿਤਾ ਸਨ੍ਦਤੀ’’ਤਿ (ਪਾਰਾ. ੨੩੧). ਇਮਸ੍ਸ ਪਨ ਆਰਾਮਸ੍ਸ ਅਭਿਸਮ੍ਮੁਖਟ੍ਠਾਨੇ ਤਤੋ ਮਹਾਉਦਕਰਹਦੋ ਜਾਤੋ, ਤਸ੍ਸ ਨਾਮਵਸੇਨਾਯਂ ਵਿਹਾਰੋ ਤਪੋਦਾਰਾਮੋਤਿ ਵੁਚ੍ਚਤਿ.
੨੮੦. ਸਮਿਦ੍ਧੀਤਿ ਤਸ੍ਸ ਕਿਰ ਥੇਰਸ੍ਸ ਅਤ੍ਤਭਾਵੋ ਸਮਿਦ੍ਧੋ ਅਭਿਰੂਪੋ ਪਾਸਾਦਿਕੋ, ਤਸ੍ਮਾ ਸਮਿਦ੍ਧਿਤ੍ਵੇਵ ਸਙ੍ਖਂ ਗਤੋ. ਆਦਿਬ੍ਰਹ੍ਮਚਰਿਯਕੋਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿ ਪੁਬ੍ਬਭਾਗਪ੍ਪਟਿਪਤ੍ਤਿਭੂਤੋ. ਇਦਂ ਵਤ੍ਵਾਨ ਸੁਗਤੋ ਉਟ੍ਠਾਯਾਸਨਾਤਿ ਮਧੁਪਿਣ੍ਡਿਕਸੁਤ੍ਤੇ (ਮ. ਨਿ. ੧.੧੯੯ ਆਦਯੋ) ਵੁਤ੍ਤਨਯੇਨੇਵ ਵਿਤ੍ਥਾਰੇਤਬ੍ਬਂ.
੨੮੨. ਇਤਿ ਮੇ ਚਕ੍ਖੁਨ੍ਤਿ ਇਮਸ੍ਮਿਂ ਕਿਰ ਸੁਤ੍ਤੇ ਭਗਵਾ ਦ੍ਵਾਦਸਾਯਤਨਵਸੇਨੇਵ ਮਾਤਿਕਂ ਠਪੇਸਿ. ਥੇਰੋਪਿ ‘‘ਭਗਵਤਾ ਹੇਟ੍ਠਾ ਦ੍ਵੀਸੁ, ਉਪਰਿ ਚਤੁਤ੍ਥੇ ਚਾਤਿ ਇਮੇਸੁ ਤੀਸੁ ਸੁਤ੍ਤੇਸੁ ਪਞ੍ਚਕ੍ਖਨ੍ਧਵਸੇਨ ਮਾਤਿਕਾ ਚ ਵਿਭਙ੍ਗੋ ਚ ਕਤੋ, ਇਧ ਪਨ ਦ੍ਵਾਦਸਾਯਤਨਵਸੇਨੇਵ ਵਿਭਜਨਤ੍ਥਂ ਮਾਤਿਕਾ ਠਪਿਤਾ’’ਤਿ ਨਯਂ ਪਟਿਲਭਿਤ੍ਵਾ ਏਵਮਾਹ. ਇਮਂ ਪਨ ਨਯਂ ਲਭਨ੍ਤੇਨ ਥੇਰੇਨ ਭਾਰਿਯਂ ਕਤਂ, ਅਪਦੇ ਪਦਂ ਦਸ੍ਸਿਤਂ, ਆਕਾਸੇ ਪਦਂ ਕਤਂ, ਤੇਨ ਨਂ ਭਗਵਾ ਇਮਮੇਵ ਸੁਤ੍ਤਂ ਸਨ੍ਧਾਯ – ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਵਿਭਜਨ੍ਤਾਨਂ ਯਦਿਦਂ ਮਹਾਕਚ੍ਚਾਨੋ’’ਤਿ (ਅ. ਨਿ. ੧.੧੯੭) ਏਤਦਗ੍ਗੇ ਠਪੇਸਿ. ਏਤ੍ਥ ਪਨ ਚਕ੍ਖੂਤਿ ਚਕ੍ਖੁਪਸਾਦੋ. ਰੂਪਾਤਿ ਚਤੁਸਮੁਟ੍ਠਾਨਿਕਰੂਪਾ. ਇਮਿਨਾ ਨਯੇਨ ਸੇਸਾਯਤਨਾਨਿਪਿ ਵੇਦਿਤਬ੍ਬਾਨਿ. ਵਿਞ੍ਞਾਣਨ੍ਤਿ ਨਿਕਨ੍ਤਿਵਿਞ੍ਞਾਣਂ. ਤਦਭਿਨਨ੍ਦਤੀਤਿ ਤਂ ਚਕ੍ਖੁਞ੍ਚੇਵ ਰੂਪਞ੍ਚ ਤਣ੍ਹਾਦਿਟ੍ਠਿਵਸੇਨ ਅਭਿਨਨ੍ਦਤਿ. ਅਨ੍ਵਾਗਮੇਤੀਤਿ ਤਣ੍ਹਾਦਿਟ੍ਠੀਹਿ ਅਨੁਗਚ੍ਛਤਿ.
ਇਤਿ ਮੇ ਮਨੋ ਅਹੋਸਿ ਅਤੀਤਮਦ੍ਧਾਨਂ ਇਤਿ ਧਮ੍ਮਾਤਿ ਏਤ੍ਥ ਪਨ ਮਨੋਤਿ ਭਵਙ੍ਗਚਿਤ੍ਤਂ. ਧਮ੍ਮਾਤਿ ਤੇਭੂਮਕਧਮ੍ਮਾਰਮ੍ਮਣਂ.
੨੮੩. ਪਣਿਦਹਤੀਤਿ ਪਤ੍ਥਨਾਵਸੇਨ ਠਪੇਸਿ. ਪਣਿਧਾਨਪਚ੍ਚਯਾਤਿ ਪਤ੍ਥਨਾਟ੍ਠਪਨਕਾਰਣਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਮਹਾਕਚ੍ਚਾਨਭਦ੍ਦੇਕਰਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.