੯. ਪਿਣ੍ਡਪਾਤਪਾਰਿਸੁਦ੍ਧਿਸੁਤ੍ਤਵਣ੍ਣਨਾ

੪੩੮. ਏਵਂ ਮੇ ਸੁਤਨ੍ਤਿ ਪਿਣ੍ਡਪਾਤਪਾਰਿਸੁਦ੍ਧਿਸੁਤ੍ਤਂ. ਤਤ੍ਥ ਪਟਿਸਲ੍ਲਾਨਾਤਿ ਫਲਸਮਾਪਤ੍ਤਿਤੋ.

ਵਿਪ੍ਪਸਨ੍ਨਾਨੀਤਿ ਓਕਾਸਵਸੇਨੇਤਂ ਵੁਤ੍ਤਂ. ਫਲਸਮਾਪਤ੍ਤਿਤੋ ਹਿ ਵੁਟ੍ਠਿਤਸ੍ਸ ਪਞ੍ਚਹਿ ਪਸਾਦੇਹਿ ਪਤਿਟ੍ਠਿਤੋਕਾਸੋ ਵਿਪ੍ਪਸਨ੍ਨੋ ਹੋਤਿ, ਛਵਿਵਣ੍ਣੋ ਪਰਿਸੁਦ੍ਧੋ. ਤਸ੍ਮਾ ਏਵਮਾਹ. ਸੁਞ੍ਞਤਵਿਹਾਰੇਨਾਤਿ ਸੁਞ੍ਞਤਫਲਸਮਾਪਤ੍ਤਿਵਿਹਾਰੇਨ. ਮਹਾਪੁਰਿਸਵਿਹਾਰੋਤਿ ਬੁਦ੍ਧਪਚ੍ਚੇਕਬੁਦ੍ਧਤਥਾਗਤਮਹਾਸਾਵਕਾਨਂ ਮਹਾਪੁਰਿਸਾਨਂ ਵਿਹਾਰੋ. ਯੇਨ ਚਾਹਂ ਮਗ੍ਗੇਨਾਤਿਆਦੀਸੁ ਵਿਹਾਰਤੋ ਪਟ੍ਠਾਯ ਯਾਵ ਗਾਮਸ੍ਸ ਇਨ੍ਦਖੀਲਾ ਏਸ ਪਵਿਟ੍ਠਮਗ੍ਗੋ ਨਾਮ, ਅਨ੍ਤੋਗਾਮਂ ਪਵਿਸਿਤ੍ਵਾ ਗੇਹਪਟਿਪਾਟਿਯਾ ਚਰਿਤ੍ਵਾ ਯਾਵ ਨਗਰਦ੍ਵਾਰੇਨ ਨਿਕ੍ਖਮਨਾ ਏਸ ਚਰਿਤਬ੍ਬਪਦੇਸੋ ਨਾਮ, ਬਹਿ ਇਨ੍ਦਖੀਲਤੋ ਪਟ੍ਠਾਯ ਯਾਵ ਵਿਹਾਰਾ ਏਸ ਪਟਿਕ੍ਕਨ੍ਤਮਗ੍ਗੋ ਨਾਮ. ਪਟਿਘਂ ਵਾਪਿ ਚੇਤਸੋਤਿ ਚਿਤ੍ਤੇ ਪਟਿਹਞ੍ਞਨਕਿਲੇਸਜਾਤਂ ਕਿਞ੍ਚਿ ਅਤ੍ਥਿ ਨਤ੍ਥੀਤਿ. ਅਹੋਰਤ੍ਤਾਨੁਸਿਕ੍ਖਿਨਾਤਿ ਦਿਵਸਞ੍ਚ ਰਤ੍ਤਿਞ੍ਚ ਅਨੁਸਿਕ੍ਖਨ੍ਤੇਨ.

੪੪੦. ਪਹੀਨਾ ਨੁ ਖੋ ਮੇ ਪਞ੍ਚ ਕਾਮਗੁਣਾਤਿਆਦੀਸੁ ਏਕਭਿਕ੍ਖੁਸ੍ਸ ਪਚ੍ਚਵੇਕ੍ਖਣਾ ਨਾਨਾ, ਨਾਨਾਭਿਕ੍ਖੂਨਂ ਪਚ੍ਚਵੇਕ੍ਖਣਾ ਨਾਨਾਤਿ. ਕਥਂ? ਏਕੋ ਹਿ ਭਿਕ੍ਖੁ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਪਤ੍ਤਚੀਵਰਂ ਪਟਿਸਾਮੇਤ੍ਵਾ ਵਿਵਿਤ੍ਤੋਕਾਸੇ ਨਿਸਿਨ੍ਨੋ ਪਚ੍ਚਵੇਕ੍ਖਤਿ ‘‘ਪਹੀਨਾ ਨੁ ਖੋ ਮੇ ਪਞ੍ਚਕਾਮਗੁਣਾ’’ਤਿ. ਸੋ ‘‘ਅਪ੍ਪਹੀਨਾ’’ਤਿ ਞਤ੍ਵਾ ਵੀਰਿਯਂ ਪਗ੍ਗਯ੍ਹ ਅਨਾਗਾਮਿਮਗ੍ਗੇਨ ਪਞ੍ਚਕਾਮਗੁਣਿਕਰਾਗਂ ਸਮੁਗ੍ਘਾਟੇਤ੍ਵਾ ਮਗ੍ਗਾਨਨ੍ਤਰਂ ਫਲਂ ਫਲਾਨਨ੍ਤਰਂ ਮਗ੍ਗਂ ਤਤੋ ਵੁਟ੍ਠਾਯ ਪਚ੍ਚਵੇਕ੍ਖਨ੍ਤੋ ‘‘ਪਹੀਨਾ’’ਤਿ ਪਜਾਨਾਤਿ. ਨੀਵਰਣਾਦੀਸੁਪਿ ਏਸੇਵ ਨਯੋ. ਏਤੇਸਂ ਪਨ ਅਰਹਤ੍ਤਮਗ੍ਗੇਨ ਪਹਾਨਾਦੀਨਿ ਹੋਨ੍ਤਿ, ਏਵਂ ਏਕਭਿਕ੍ਖੁਸ੍ਸ ਨਾਨਾਪਚ੍ਚਵੇਕ੍ਖਣਾ ਹੋਤਿ. ਏਤਾਸੁ ਪਨ ਪਚ੍ਚਵੇਕ੍ਖਣਾਸੁ ਅਞ੍ਞੋ ਭਿਕ੍ਖੁ ਏਕਂ ਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਤਿ, ਅਞ੍ਞੋ ਏਕਨ੍ਤਿ ਏਵਂ ਨਾਨਾਭਿਕ੍ਖੂਨਂ ਨਾਨਾਪਚ੍ਚਵੇਕ੍ਖਣਾ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਪਿਣ੍ਡਪਾਤਪਾਰਿਸੁਦ੍ਧਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.