੩. ਪੁਣ੍ਣੋਵਾਦਸੁਤ੍ਤਵਣ੍ਣਨਾ

੩੯੫. ਏਵਂ ਮੇ ਸੁਤਨ੍ਤਿ ਪੁਣ੍ਣੋਵਾਦਸੁਤ੍ਤਂ. ਤਤ੍ਥ ਪਟਿਸਲ੍ਲਾਨਾਤਿ ਏਕੀਭਾਵਾ. ਤਂ ਚੇਤਿ ਤਂ ਚਕ੍ਖੁਞ੍ਚੇਵ ਰੂਪਞ੍ਚ. ਨਨ੍ਦੀਸਮੁਦਯਾ ਦੁਕ੍ਖਸਮੁਦਯੋਤਿ ਨਨ੍ਦਿਯਾ ਤਣ੍ਹਾਯ ਸਮੋਧਾਨੇਨ ਪਞ੍ਚਕ੍ਖਨ੍ਧਦੁਕ੍ਖਸ੍ਸ ਸਮੋਧਾਨਂ ਹੋਤਿ. ਇਤਿ ਛਸੁ ਦ੍ਵਾਰੇਸੁ ਦੁਕ੍ਖਂ ਸਮੁਦਯੋਤਿ ਦ੍ਵਿਨ੍ਨਂ ਸਚ੍ਚਾਨਂ ਵਸੇਨ ਵਟ੍ਟਂ ਮਤ੍ਥਕਂ ਪਾਪੇਤ੍ਵਾ ਦਸ੍ਸੇਸਿ. ਦੁਤਿਯਨਯੇ ਨਿਰੋਧੋ ਮਗ੍ਗੋਤਿ ਦ੍ਵਿਨ੍ਨਂ ਸਚ੍ਚਾਨਂ ਵਸੇਨ ਵਿਵਟ੍ਟਂ ਮਤ੍ਥਕਂ ਪਾਪੇਤ੍ਵਾ ਦਸ੍ਸੇਸਿ. ਇਮਿਨਾ ਚ ਤ੍ਵਂ ਪੁਣ੍ਣਾਤਿ ਪਾਟਿਯੇਕ੍ਕੋ ਅਨੁਸਨ੍ਧਿ. ਏਵਂ ਤਾਵ ਵਟ੍ਟਵਿਵਟ੍ਟਵਸੇਨ ਦੇਸਨਂ ਅਰਹਤ੍ਤੇ ਪਕ੍ਖਿਪਿਤ੍ਵਾ ਇਦਾਨਿ ਪੁਣ੍ਣਤ੍ਥੇਰਂ ਸਤ੍ਤਸੁ ਠਾਨੇਸੁ ਸੀਹਨਾਦਂ ਨਦਾਪੇਤੁਂ ਇਮਿਨਾ ਚ ਤ੍ਵਨ੍ਤਿਆਦਿਮਾਹ.

੩੯੬. ਚਣ੍ਡਾਤਿ ਦੁਟ੍ਠਾ ਕਿਬ੍ਬਿਸਾ. ਫਰੁਸਾਤਿ ਕਕ੍ਖਲ਼ਾ. ਅਕ੍ਕੋਸਿਸ੍ਸਨ੍ਤੀਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਿਸ੍ਸਨ੍ਤਿ. ਪਰਿਭਾਸਿਸ੍ਸਨ੍ਤੀਤਿ ਕਿਂ ਸਮਣੋ ਨਾਮ ਤ੍ਵਂ, ਇਦਞ੍ਚ ਇਦਞ੍ਚ ਤੇ ਕਰਿਸ੍ਸਾਮਾਤਿ ਤਜ੍ਜੇਸ੍ਸਨ੍ਤਿ. ਏਵਮੇਤ੍ਥਾਤਿ ਏਵਂ ਮਯ੍ਹਂ ਏਤ੍ਥ ਭਵਿਸ੍ਸਤਿ.

ਦਣ੍ਡੇਨਾਤਿ ਚਤੁਹਤ੍ਥੇਨ ਦਣ੍ਡੇਨ ਵਾ ਘਟਿਕਮੁਗ੍ਗਰੇਨ ਵਾ. ਸਤ੍ਥੇਨਾਤਿ ਏਕਤੋਧਾਰਾਦਿਨਾ. ਸਤ੍ਥਹਾਰਕਂ ਪਰਿਯੇਸਨ੍ਤੀਤਿ ਜੀਵਿਤਹਾਰਕਂ ਸਤ੍ਥਂ ਪਰਿਯੇਸਨ੍ਤਿ. ਇਦਂ ਥੇਰੋ ਤਤਿਯਪਾਰਾਜਿਕਵਤ੍ਥੁਸ੍ਮਿਂ ਅਸੁਭਕਥਂ ਸੁਤ੍ਵਾ ਅਤ੍ਤਭਾਵੇਨ ਜਿਗੁਚ੍ਛਨ੍ਤਾਨਂ ਭਿਕ੍ਖੂਨਂ ਸਤ੍ਥਹਾਰਕਪਰਿਯੇਸਨਂ ਸਨ੍ਧਾਯਾਹ. ਦਮੂਪਸਮੇਨਾਤਿ ਏਤ੍ਥ ਦਮੋਤਿ ਇਨ੍ਦ੍ਰਿਯਸਂਵਰਾਦੀਨਂ ਏਤਂ ਨਾਮਂ. ‘‘ਸਚ੍ਚੇਨ ਦਨ੍ਤੋ ਦਮਸਾ ਉਪੇਤੋ, ਵੇਦਨ੍ਤਗੂ ਵੁਸਿਤਬ੍ਰਹ੍ਮਚਰਿਯੋ’’ਤਿ (ਸਂ. ਨਿ. ੧.੧੯੫; ਸੁ. ਨਿ. ੪੬੭) ਏਤ੍ਥ ਹਿ ਇਨ੍ਦ੍ਰਿਯਸਂਵਰੋ ਦਮੋਤਿ ਵੁਤ੍ਤੋ. ‘‘ਯਦਿ ਸਚ੍ਚਾ ਦਮਾ ਚਾਗਾ, ਖਨ੍ਤ੍ਯਾ ਭਿਯ੍ਯੋਧ ਵਿਜ੍ਜਤੀ’’ਤਿ (ਸਂ. ਨਿ. ੧.੨੪੬; ਸੁ. ਨਿ. ੧੯੧) ਏਤ੍ਥ ਪਞ੍ਞਾ ਦਮੋਤਿ ਵੁਤ੍ਤੋ. ‘‘ਦਾਨੇਨ ਦਮੇਨ ਸਂਯਮੇਨ ਸਚ੍ਚਵਜ੍ਜੇਨਾ’’ਤਿ (ਦੀ. ਨਿ. ੧.੧੬੬; ਮ. ਨਿ. ੨.੨੨੬) ਏਤ੍ਥ ਉਪੋਸਥਕਮ੍ਮਂ ਦਮੋਤਿ ਵੁਤ੍ਤਂ. ਇਮਸ੍ਮਿਂ ਪਨ ਸੁਤ੍ਤੇ ਖਨ੍ਤਿ ਦਮੋਤਿ ਵੇਦਿਤਬ੍ਬਾ. ਉਪਸਮੋਤਿ ਤਸ੍ਸੇਵ ਵੇਵਚਨਂ.

੩੯੭. ਅਥ ਖੋ ਆਯਸ੍ਮਾ ਪੁਣ੍ਣੋਤਿ ਕੋ ਪਨੇਸ ਪੁਣ੍ਣੋ, ਕਸ੍ਮਾ ਪਨੇਤ੍ਥ ਗਨ੍ਤੁਕਾਮੋ ਅਹੋਸੀਤਿ. ਸੁਨਾਪਰਨ੍ਤਵਾਸਿਕੋ ਏਵ ਏਸੋ, ਸਾਵਤ੍ਥਿਯਂ ਪਨ ਅਸਪ੍ਪਾਯਵਿਹਾਰਂ ਸਲ੍ਲਕ੍ਖੇਤ੍ਵਾ ਤਤ੍ਥ ਗਨ੍ਤੁਕਾਮੋ ਅਹੋਸਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਸੁਨਾਪਰਨ੍ਤਰਟ੍ਠੇ ਕਿਰ ਏਕਸ੍ਮਿਂ ਵਾਣਿਜਕਗਾਮੇ ਏਤੇ ਦ੍ਵੇ ਭਾਤਰੋ. ਤੇਸੁ ਕਦਾਚਿ ਜੇਟ੍ਠੋ ਪਞ੍ਚ ਸਕਟਸਤਾਨਿ ਗਹੇਤ੍ਵਾ ਜਨਪਦਂ ਗਨ੍ਤ੍ਵਾ ਭਣ੍ਡਂ ਆਹਰਤਿ, ਕਦਾਚਿ ਕਨਿਟ੍ਠੋ. ਇਮਸ੍ਮਿਂ ਪਨ ਸਮਯੇ ਕਨਿਟ੍ਠਂ ਘਰੇ ਠਪੇਤ੍ਵਾ ਜੇਟ੍ਠਭਾਤਿਕੋ ਪਞ੍ਚ ਸਕਟਸਤਾਨਿ ਗਹੇਤ੍ਵਾ ਜਨਪਦਚਾਰਿਕਂ ਚਰਨ੍ਤੋ ਅਨੁਪੁਬ੍ਬੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨਸ੍ਸ ਨਾਤਿਦੂਰੇ ਸਕਟਸਤ੍ਥਂ ਨਿਵਾਸੇਤ੍ਵਾ ਭੁਤ੍ਤਪਾਤਰਾਸੋ ਪਰਿਜਨਪਰਿਵੁਤੋ ਫਾਸੁਕਟ੍ਠਾਨੇ ਨਿਸੀਦਿ.

ਤੇਨ ਚ ਸਮਯੇਨ ਸਾਵਤ੍ਥਿਵਾਸਿਨੋ ਭੁਤ੍ਤਪਾਤਰਾਸਾ ਉਪੋਸਥਙ੍ਗਾਨਿ ਅਧਿਟ੍ਠਾਯ ਸੁਦ੍ਧੁਤ੍ਤਰਾਸਙ੍ਗਾ ਗਨ੍ਧਪੁਪ੍ਫਾਦਿਹਤ੍ਥਾ ਯੇਨ ਬੁਦ੍ਧੋ ਯੇਨ ਧਮ੍ਮੋ ਯੇਨ ਸਙ੍ਘੋ, ਤਨ੍ਨਿਨ੍ਨਾ ਤਪ੍ਪੋਣਾ ਤਪ੍ਪਾਬ੍ਭਾਰਾ ਹੁਤ੍ਵਾ ਦਕ੍ਖਿਣਦ੍ਵਾਰੇਨ ਨਿਕ੍ਖਮਿਤ੍ਵਾ ਜੇਤਵਨਂ ਗਚ੍ਛਨ੍ਤਿ. ਸੋ ਤੇ ਦਿਸ੍ਵਾ ‘‘ਕਹਂ ਇਮੇ ਗਚ੍ਛਨ੍ਤਿ’’ਤਿ ਏਕਮਨੁਸ੍ਸਂ ਪੁਚ੍ਛਿ. ਕਿਂ ਤ੍ਵਂ ਅਯ੍ਯੋ ਨ ਜਾਨਾਸਿ, ਲੋਕੇ ਬੁਦ੍ਧਧਮ੍ਮਸਙ੍ਘਰਤਨਾਨਿ ਨਾਮ ਉਪ੍ਪਨ੍ਨਾਨਿ, ਇਚ੍ਚੇਸ ਮਹਾਜਨੋ ਸਤ੍ਥੁ ਸਨ੍ਤਿਕੇ ਧਮ੍ਮਕਥਂ ਸੋਤੁਂ ਗਚ੍ਛਤੀਤਿ. ਤਸ੍ਸ ਬੁਦ੍ਧੋਤਿ ਵਚਨਂ ਛਵਿਚਮ੍ਮਾਦੀਨਿ ਛਿਨ੍ਦਿਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਅਟ੍ਠਾਸਿ. ਅਥ ਅਤ੍ਤਨੋ ਪਰਿਜਨਪਰਿਵੁਤੋ ਤਾਯ ਪਰਿਸਾਯ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਮਧੁਰਸ੍ਸਰੇਨ ਧਮ੍ਮਂ ਦੇਸੇਨ੍ਤਸ੍ਸ ਪਰਿਸਪਰਿਯਨ੍ਤੇ ਠਿਤੋ ਧਮ੍ਮਂ ਸੁਤ੍ਵਾ ਪਬ੍ਬਜ੍ਜਾਯ ਚਿਤ੍ਤਂ ਉਪ੍ਪਾਦੇਸਿ. ਅਥ ਤਥਾਗਤੇਨ ਕਾਲਂ ਵਿਦਿਤ੍ਵਾ ਪਰਿਸਾਯ ਉਯ੍ਯੋਜਿਤਾਯ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਦੁਤਿਯਦਿਵਸੇ ਮਣ੍ਡਪਂ ਕਾਰੇਤ੍ਵਾ ਆਸਨਾਨਿ ਪਞ੍ਞਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਭੁਤ੍ਤਪਾਤਰਾਸੋ ਉਪੋਸਥਙ੍ਗਾਨਿ ਅਧਿਟ੍ਠਾਯ ਭਣ੍ਡਾਗਾਰਿਕਂ ਪਕ੍ਕੋਸਾਪੇਤ੍ਵਾ, ਏਤ੍ਤਕਂ ਭਣ੍ਡਂ ਵਿਸ੍ਸਜ੍ਜਿਤਂ, ਏਤ੍ਤਕਂ ਨ ਵਿਸ੍ਸਜ੍ਜਿਤਨ੍ਤਿ ਸਬ੍ਬਂ ਆਚਿਕ੍ਖਿਤ੍ਵਾ – ‘‘ਇਮਂ ਸਾਪਤੇਯ੍ਯਂ ਮਯ੍ਹਂ ਕਨਿਟ੍ਠਸ੍ਸ ਦੇਹੀ’’ਤਿ ਸਬ੍ਬਂ ਨਿਯ੍ਯਾਤੇਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਪਰਾਯਣੋ ਅਹੋਸਿ.

ਅਥਸ੍ਸ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤਸ੍ਸ ਕਮ੍ਮਟ੍ਠਾਨਂ ਨ ਉਪਟ੍ਠਾਤਿ. ਤਤੋ ਚਿਨ੍ਤੇਸਿ – ‘‘ਅਯਂ ਜਨਪਦੋ ਮਯ੍ਹਂ ਅਸਪ੍ਪਾਯੋ, ਯਂਨੂਨਾਹਂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਸਕਟ੍ਠਾਨਮੇਵ ਗਚ੍ਛੇਯ੍ਯ’’ਨ੍ਤਿ. ਅਥ ਪੁਬ੍ਬਣ੍ਹਸਮਯੇ ਪਿਣ੍ਡਾਯ ਚਰਿਤ੍ਵਾ ਸਾਯਨ੍ਹਸਮਯੇ ਪਟਿਸਲ੍ਲਾਨਾ ਵੁਟ੍ਠਹਿਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਕਮ੍ਮਟ੍ਠਾਨਂ ਕਥਾਪੇਤ੍ਵਾ ਸਤ੍ਤ ਸੀਹਨਾਦੇ ਨਦਿਤ੍ਵਾ ਪਕ੍ਕਾਮਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਪੁਣ੍ਣੋ…ਪੇ… ਵਿਹਰਤੀ’’ਤਿ.

ਕਤ੍ਥ ਪਨਾਯਂ ਵਿਹਾਸੀਤਿ? ਚਤੂਸੁ ਠਾਨੇਸੁ ਵਿਹਾਸਿ, ਸੁਨਾਪਰਨ੍ਤਰਟ੍ਠਂ ਤਾਵ ਪਵਿਸਿਤ੍ਵਾ ਅਜ੍ਜੁਹਤ੍ਥਪਬ੍ਬਤੇ ਨਾਮ ਪਵਿਸਿਤ੍ਵਾ ਵਾਣਿਜਗਾਮਂ ਪਿਣ੍ਡਾਯ ਪਾਵਿਸਿ. ਅਥ ਨਂ ਕਨਿਟ੍ਠਭਾਤਾ ਸਞ੍ਜਾਨਿਤ੍ਵਾ ਭਿਕ੍ਖਂ ਦਤ੍ਵਾ, ‘‘ਭਨ੍ਤੇ, ਅਞ੍ਞਤ੍ਥ ਅਗਨ੍ਤ੍ਵਾ ਇਧੇਵ ਵਸਥਾ’’ਤਿ ਪਟਿਞ੍ਞਂ ਕਾਰੇਤ੍ਵਾ ਤਤ੍ਥੇਵ ਵਸਾਪੇਸਿ.

ਤਤੋ ਸਮੁਦ੍ਦਗਿਰਿਵਿਹਾਰਂ ਨਾਮ ਅਗਮਾਸਿ. ਤਤ੍ਥ ਅਯਕਨ੍ਤਪਾਸਾਣੇਹਿ ਪਰਿਚ੍ਛਿਨ੍ਦਿਤ੍ਵਾ ਕਤਚਙ੍ਕਮੋ ਅਤ੍ਥਿ, ਤਂ ਕੋਚਿ ਚਙ੍ਕਮਿਤੁਂ ਸਮਤ੍ਥੋ ਨਾਮ ਨਤ੍ਥਿ. ਤਤ੍ਥ ਸਮੁਦ੍ਦਵੀਚਿਯੋ ਆਗਨ੍ਤ੍ਵਾ ਅਯਕਨ੍ਤਪਾਸਾਣੇਸੁ ਪਹਰਿਤ੍ਵਾ ਮਹਾਸਦ੍ਦਂ ਕਰੋਨ੍ਤਿ. ਥੇਰੋਨਂ – ‘‘ਕਮ੍ਮਟ੍ਠਾਨਂ ਮਨਸਿਕਰੋਨ੍ਤਾਨਂ ਫਾਸੁਵਿਹਾਰੋ ਹੋਤੂ’’ਤਿ ਸਮੁਦ੍ਦਂ ਨਿਸ੍ਸਦ੍ਦਂ ਕਤ੍ਵਾ ਅਧਿਟ੍ਠਾਸਿ.

ਤਤੋ ਮਾਤੁਲਗਿਰਿਂ ਨਾਮ ਅਗਮਾਸਿ. ਤਤ੍ਥ ਸਕੁਣਸਙ੍ਘੋ ਉਸ੍ਸਨ੍ਨੋ, ਰਤ੍ਤਿਞ੍ਚ ਦਿਵਾ ਚ ਸਦ੍ਦੋ ਏਕਾਬਦ੍ਧੋਵ ਹੋਤਿ, ਥੇਰੋ ਇਮਂ ਠਾਨਂ ਅਫਾਸੁਕਨ੍ਤਿ ਤਤੋ ਮਕੁਲਕਾਰਾਮਵਿਹਾਰਂ ਨਾਮ ਗਤੋ. ਸੋ ਵਾਣਿਜਗਾਮਸ੍ਸ ਨਾਤਿਦੂਰੋ ਨਚ੍ਚਾਸਨ੍ਨੋ ਗਮਨਾਗਮਨਸਮ੍ਪਨ੍ਨੋ ਵਿਵਿਤ੍ਤੋ ਅਪ੍ਪਸਦ੍ਦੋ. ਥੇਰੋ ਇਮਂ ਠਾਨਂ ਫਾਸੁਕਨ੍ਤਿ ਤਤ੍ਥ ਰਤ੍ਤਿਟ੍ਠਾਨਦਿਵਾਟ੍ਠਾਨਚਙ੍ਕਮਨਾਦੀਨਿ ਕਾਰੇਤ੍ਵਾ ਵਸ੍ਸਂ ਉਪਗਚ੍ਛਿ. ਏਵਂ ਚਤੂਸੁ ਠਾਨੇਸੁ ਵਿਹਾਸਿ.

ਅਥੇਕਦਿਵਸਂ ਤਸ੍ਮਿਂਯੇਵ ਅਨ੍ਤੋਵਸ੍ਸੇ ਪਞ੍ਚ ਵਾਣਿਜਸਤਾਨਿ ਪਰਸਮੁਦ੍ਦਂ ਗਚ੍ਛਾਮਾਤਿ ਨਾਵਾਯ ਭਣ੍ਡਂ ਪਕ੍ਖਿਪਿਂਸੁ. ਨਾਵਾਰੋਹਨਦਿਵਸੇ ਥੇਰਸ੍ਸ ਕਨਿਟ੍ਠਭਾਤਾ ਥੇਰਂ ਭੋਜੇਤ੍ਵਾ ਥੇਰਸ੍ਸ ਸਨ੍ਤਿਕੇ ਸਿਕ੍ਖਾਪਦਾਨਿ ਗਹੇਤ੍ਵਾ ਵਨ੍ਦਿਤ੍ਵਾ ਗਚ੍ਛਨ੍ਤੋ, – ‘‘ਭਨ੍ਤੇ, ਮਹਾਸਮੁਦ੍ਦੋ ਨਾਮ ਅਪ੍ਪਮੇਯ੍ਯੋ ਅਨੇਕਨ੍ਤਰਾਯੋ, ਅਮ੍ਹੇ ਆਵਜ੍ਜੇਯ੍ਯਾਥਾ’’ਤਿ ਵਤ੍ਵਾ ਨਾਵਂ ਆਰੁਹਿ. ਨਾਵਾ ਉਤ੍ਤਮਜਵੇਨ ਗਚ੍ਛਮਾਨਾ ਅਞ੍ਞਤਰਂ ਦੀਪਕਂ ਪਾਪੁਣਿ. ਮਨੁਸ੍ਸਾ ਪਾਤਰਾਸਂ ਕਰਿਸ੍ਸਾਮਾਤਿ ਦੀਪਕੇ ਓਤਿਣ੍ਣਾ. ਤਸ੍ਮਿਂ ਦੀਪੇ ਅਞ੍ਞਂ ਕਿਞ੍ਚਿ ਨਤ੍ਥਿ, ਚਨ੍ਦਨਵਨਮੇਵ ਅਹੋਸਿ.

ਅਥੇਕੋ ਵਾਸਿਯਾ ਰੁਕ੍ਖਂ ਆਕੋਟੇਤ੍ਵਾ ਲੋਹਿਤਚਨ੍ਦਨਭਾਵਂ ਞਤ੍ਵਾ ਆਹ – ‘‘ਭੋ ਮਯਂ ਲਾਭਤ੍ਥਾਯ ਪਰਸਮੁਦ੍ਦਂ ਗਚ੍ਛਾਮ, ਇਤੋ ਚ ਉਤ੍ਤਰਿ ਲਾਭੋ ਨਾਮ ਨਤ੍ਥਿ, ਚਤੁਰਙ੍ਗੁਲਮਤ੍ਤਾ ਘਟਿਕਾ ਸਤਸਹਸ੍ਸਂ ਅਗ੍ਘਤਿ, ਹਾਰੇਤਬ੍ਬਕਯੁਤ੍ਤਂ ਭਣ੍ਡਂ ਹਾਰੇਤ੍ਵਾ ਚਨ੍ਦਨਸ੍ਸ ਪੂਰੇਮਾ’’ਤਿ. ਤੇ ਤਥਾ ਕਰਿਂਸੁ. ਚਨ੍ਦਨਵਨੇ ਅਧਿਵਤ੍ਥਾ ਅਮਨੁਸ੍ਸਾ ਕੁਜ੍ਝਿਤ੍ਵਾ – ‘‘ਇਮੇਹਿ ਅਮ੍ਹਾਕਂ ਚਨ੍ਦਨਵਨਂ ਨਾਸਿਤਂ, ਘਾਤੇਸ੍ਸਾਮ ਨੇ’’ਤਿ ਚਿਨ੍ਤੇਤ੍ਵਾ – ‘‘ਇਧੇਵ ਘਾਤਿਤੇਸੁ ਸਬ੍ਬਂ ਵਨਂ ਏਕਂ ਕੁਣਪਂ ਭਵਿਸ੍ਸਤਿ, ਸਮੁਦ੍ਦਮਜ੍ਝੇ ਨੇਸਂ ਨਾਵਂ ਓਸੀਦੇਸ੍ਸਾਮਾ’’ਤਿ ਆਹਂਸੁ. ਅਥ ਤੇਸਂ ਨਾਵਂ ਆਰੁਯ੍ਹ ਮੁਹੁਤ੍ਤਂ ਗਤਕਾਲੇਯੇਵ ਉਪ੍ਪਾਦਿਕਂ ਉਟ੍ਠਪੇਤ੍ਵਾ ਸਯਮ੍ਪਿ ਤੇ ਅਮਨੁਸ੍ਸਾ ਭਯਾਨਕਾਨਿ ਰੂਪਾਨਿ ਦਸ੍ਸਯਿਂਸੁ. ਭੀਤਾ ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਦੇਵਤਾ ਨਮਸ੍ਸਨ੍ਤਿ. ਥੇਰਸ੍ਸ ਕਨਿਟ੍ਠੋ ਚੂਲ਼ਪੁਣ੍ਣਕੁਟੁਮ੍ਬਿਕੋ – ‘‘ਮਯ੍ਹਂ ਭਾਤਾ ਅਵਸ੍ਸਯੋ ਹੋਤੂ’’ਤਿ ਥੇਰਸ੍ਸ ਨਮਸ੍ਸਮਾਨੋ ਅਟ੍ਠਾਸਿ.

ਥੇਰੋਪਿ ਕਿਰ ਤਸ੍ਮਿਂਯੇਵ ਖਣੇ ਆਵਜ੍ਜਿਤ੍ਵਾ ਤੇਸਂ ਬ੍ਯਸਨੁਪ੍ਪਤ੍ਤਿਂ ਞਤ੍ਵਾ ਵੇਹਾਸਂ ਉਪ੍ਪਤਿਤ੍ਵਾ ਸਮ੍ਮੁਖੇ ਅਟ੍ਠਾਸਿ. ਅਮਨੁਸ੍ਸਾ ਥੇਰਂ ਦਿਸ੍ਵਾ ‘‘ਅਯ੍ਯੋ ਪੁਣ੍ਣਤ੍ਥੇਰੋ ਏਤੀ’’ਤਿ ਪਕ੍ਕਮਿਂਸੁ, ਉਪ੍ਪਾਦਿਕਂ ਸਨ੍ਨਿਸੀਦਿ. ਥੇਰੋ ਮਾ ਭਾਯਥਾਤਿ ਤੇ ਅਸ੍ਸਾਸੇਤ੍ਵਾ ‘‘ਕਹਂ ਗਨ੍ਤੁਕਾਮਤ੍ਥਾ’’ਤਿ ਪੁਚ੍ਛਿ. ਭਨ੍ਤੇ, ਅਮ੍ਹਾਕਂ ਸਕਟ੍ਠਾਨਮੇਵ ਗਚ੍ਛਾਮਾਤਿ. ਥੇਰੋ ਨਾਵਂ ਫਲੇ ਅਕ੍ਕਮਿਤ੍ਵਾ ‘‘ਏਤੇਸਂ ਇਚ੍ਛਿਤਟ੍ਠਾਨਂ ਗਚ੍ਛਤੂ’’ਤਿ ਅਧਿਟ੍ਠਾਸਿ. ਵਾਣਿਜਾ ਸਕਟ੍ਠਾਨਂ ਗਨ੍ਤ੍ਵਾ ਤਂ ਪਵਤ੍ਤਿਂ ਪੁਤ੍ਤਦਾਰਸ੍ਸ ਆਰੋਚੇਤ੍ਵਾ ‘‘ਏਥ ਥੇਰਂ ਸਰਣਂ ਗਚ੍ਛਾਮਾ’’ਤਿ ਪਞ੍ਚਸਤਾ ਅਤ੍ਤਨੋ ਪਞ੍ਚਮਾਤੁਗਾਮਸਤੇਹਿ ਸਦ੍ਧਿਂ ਤੀਸੁ ਸਰਣੇਸੁ ਪਤਿਟ੍ਠਾਯ ਉਪਾਸਕਤ੍ਤਂ ਪਟਿਵੇਦੇਸੁਂ. ਤਤੋ ਨਾਵਾਯ ਭਣ੍ਡਂ ਓਤਾਰੇਤ੍ਵਾ ਥੇਰਸ੍ਸ ਏਕਂ ਕੋਟ੍ਠਾਸਂ ਕਤ੍ਵਾ – ‘‘ਅਯਂ, ਭਨ੍ਤੇ, ਤੁਮ੍ਹਾਕਂ ਕੋਟ੍ਠਾਸੋ’’ਤਿ ਆਹਂਸੁ. ਥੇਰੋ – ‘‘ਮਯ੍ਹਂ ਵਿਸੁਂ ਕੋਟ੍ਠਾਸਕਿਚ੍ਚਂ ਨਤ੍ਥਿ, ਸਤ੍ਥਾ ਪਨ ਤੁਮ੍ਹੇਹਿ ਦਿਟ੍ਠਪੁਬ੍ਬੋ’’ਤਿ. ਨ ਦਿਟ੍ਠਪੁਬ੍ਬੋ, ਭਨ੍ਤੇਤਿ. ਤੇਨ ਹਿ ਇਮਿਨਾ ਸਤ੍ਥੁ ਮਣ੍ਡਲਮਾਲ਼ਂ ਕਰੋਥ, ਏਵਂ ਸਤ੍ਥਾਰਂ ਪਸ੍ਸਿਸ੍ਸਥਾਤਿ. ਤੇ ਸਾਧੁ, ਭਨ੍ਤੇਤਿ ਤੇਨ ਚ ਕੋਟ੍ਠਾਸੇਨ ਅਤ੍ਤਨੋ ਚ ਕੋਟ੍ਠਾਸੇਹਿ ਮਣ੍ਡਲਮਾਲ਼ਂ ਕਾਤੁਂ ਆਰਭਿਂਸੁ.

ਸਤ੍ਥਾਪਿ ਕਿਰ ਆਰਦ੍ਧਕਾਲਤੋ ਪਟ੍ਠਾਯ ਪਰਿਭੋਗਂ ਅਕਾਸਿ. ਆਰਕ੍ਖਮਨੁਸ੍ਸਾ ਰਤ੍ਤਿਂ ਓਭਾਸਂ ਦਿਸ੍ਵਾ ‘‘ਮਹੇਸਕ੍ਖਾ ਦੇਵਤਾ ਅਤ੍ਥੀ’’ਤਿ ਸਞ੍ਞਂ ਕਰਿਂਸੁ. ਉਪਾਸਕਾ ਮਣ੍ਡਲਮਾਲ਼ਞ੍ਚ ਭਿਕ੍ਖੁਸਙ੍ਘਸ੍ਸ ਚ ਸੇਨਾਸਨਾਨਿ ਨਿਟ੍ਠਪੇਤ੍ਵਾ ਦਾਨਸਮ੍ਭਾਰਂ ਸਜ੍ਜੇਤ੍ਵਾ – ‘‘ਕਤਂ, ਭਨ੍ਤੇ, ਅਮ੍ਹੇਹਿ ਅਤ੍ਤਨੋ ਕਿਚ੍ਚਂ, ਸਤ੍ਥਾਰਂ ਪਕ੍ਕੋਸਥਾ’’ਤਿ ਥੇਰਸ੍ਸ ਆਰੋਚੇਸੁਂ. ਥੇਰੋ ਸਾਯਨ੍ਹਸਮਯੇ ਇਦ੍ਧਿਯਾ ਸਾਵਤ੍ਥਿਂ ਪਤ੍ਵਾ, ‘‘ਭਨ੍ਤੇ, ਵਾਣਿਜਗਾਮਵਾਸਿਨੋ ਤੁਮ੍ਹੇ ਦਟ੍ਠੁਕਾਮਾ, ਤੇਸਂ ਅਨੁਕਮ੍ਪਂ ਕਰੋਥਾ’’ਤਿ ਭਗਵਨ੍ਤਂ ਯਾਚਿ. ਭਗਵਾ ਅਧਿਵਾਸੇਸਿ. ਥੇਰੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਸਕਟ੍ਠਾਨਮੇਵ ਪਚ੍ਚਾਗਤੋ.

ਭਗਵਾਪਿ ਆਨਨ੍ਦਥੇਰਂ ਆਮਨ੍ਤੇਸਿ, – ‘‘ਆਨਨ੍ਦ, ਸ੍ਵੇ ਸੁਨਾਪਰਨ੍ਤੇ ਵਾਣਿਜਗਾਮੇ ਪਿਣ੍ਡਾਯ ਚਰਿਸ੍ਸਾਮ, ਤ੍ਵਂ ਏਕੂਨਪਞ੍ਚਸਤਾਨਂ ਭਿਕ੍ਖੂਨਂ ਸਲਾਕਂ ਦੇਹੀ’’ਤਿ. ਥੇਰੋ ਸਾਧੁ, ਭਨ੍ਤੇਤਿ ਭਿਕ੍ਖੁਸਙ੍ਘਸ੍ਸ ਤਮਤ੍ਥਂ ਆਰੋਚੇਤ੍ਵਾ ਨਭਚਾਰਿਕਾ ਭਿਕ੍ਖੂ ਸਲਾਕਂ ਗਣ੍ਹਨ੍ਤੂਤਿ ਆਹ. ਤਂਦਿਵਸਂ ਕੁਣ੍ਡਧਾਨਤ੍ਥੇਰੋ ਪਠਮਂ ਸਲਾਕਂ ਅਗ੍ਗਹੇਸਿ. ਵਾਣਿਜਗਾਮਵਾਸਿਨੋਪਿ ‘‘ਸ੍ਵੇ ਕਿਰ ਸਤ੍ਥਾ ਆਗਮਿਸ੍ਸਤੀ’’ਤਿ ਗਾਮਮਜ੍ਝੇ ਮਣ੍ਡਪਂ ਕਤ੍ਵਾ ਦਾਨਗ੍ਗਂ ਸਜ੍ਜਯਿਂਸੁ. ਭਗਵਾ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਗਨ੍ਧਕੁਟਿਂ ਪਵਿਸਿਤ੍ਵਾ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿ. ਸਕ੍ਕਸ੍ਸ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਂ ਅਹੋਸਿ. ਸੋ ਕਿਂ ਇਦਨ੍ਤਿ ਆਵਜ੍ਜੇਤ੍ਵਾ ਸਤ੍ਥੁ ਸੁਨਾਪਰਨ੍ਤਗਮਨਂ ਦਿਸ੍ਵਾ ਵਿਸ੍ਸਕਮ੍ਮਂ ਆਮਨ੍ਤੇਸਿ – ‘‘ਤਾਤ ਅਜ੍ਜ ਭਗਵਾ ਤਿਮਤ੍ਤਾਨਿ ਯੋਜਨਸਤਾਨਿ ਪਿਣ੍ਡਾਚਾਰਂ ਕਰਿਸ੍ਸਤਿ, ਪਞ੍ਚ ਕੂਟਾਗਾਰਸਤਾਨਿ ਮਾਪੇਤ੍ਵਾ ਜੇਤਵਨਦ੍ਵਾਰਕੋਟ੍ਠਮਤ੍ਥਕੇ ਗਮਨਸਜ੍ਜਾਨਿ ਕਤ੍ਵਾ ਠਪੇਹੀ’’ਤਿ. ਸੋ ਤਥਾ ਅਕਾਸਿ. ਭਗਵਤੋ ਕੂਟਾਗਾਰਂ ਚਤੁਮੁਖਂ ਅਹੋਸਿ, ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਦ੍ਵਿਮੁਖਾਨਿ, ਸੇਸਾਨਿ ਏਕਮੁਖਾਨਿ. ਸਤ੍ਥਾ ਗਨ੍ਧਕੁਟਿਤੋ ਨਿਕ੍ਖਮ੍ਮ ਪਟਿਪਾਟਿਯਾ ਠਪਿਤਕੂਟਾਗਾਰੇਸੁ ਧੁਰਕੂਟਾਗਾਰਂ ਪਾਵਿਸਿ. ਦ੍ਵੇ ਅਗ੍ਗਸਾਵਕੇ ਆਦਿਂ ਕਤ੍ਵਾ ਏਕੂਨਪਞ੍ਚਭਿਕ੍ਖੁਸਤਾਨਿਪਿ ਕੂਟਾਗਾਰਂ ਗਨ੍ਤ੍ਵਾ ਨਿਸਿਨ੍ਨਾ ਅਹੇਸੁਂ. ਏਕਂ ਤੁਚ੍ਛਕੂਟਾਗਾਰਂ ਅਹੋਸਿ, ਪਞ੍ਚਪਿ ਕੂਟਾਗਾਰਸਤਾਨਿ ਆਕਾਸੇ ਉਪ੍ਪਤਿਂਸੁ.

ਸਤ੍ਥਾ ਸਚ੍ਚਬਨ੍ਧਪਬ੍ਬਤਂ ਨਾਮ ਪਤ੍ਵਾ ਕੂਟਾਗਾਰਂ ਆਕਾਸੇ ਠਪੇਸਿ. ਤਸ੍ਮਿਂ ਪਬ੍ਬਤੇ ਸਚ੍ਚਬਨ੍ਧੋ ਨਾਮ ਮਿਚ੍ਛਾਦਿਟ੍ਠਿਕਤਾਪਸੋ ਮਹਾਜਨਂ ਮਿਚ੍ਛਾਦਿਟ੍ਠਿਂ ਉਗ੍ਗਣ੍ਹਾਪੇਨ੍ਤੋ ਲਾਭਗ੍ਗਯਸਗ੍ਗਪ੍ਪਤ੍ਤੋ ਹੁਤ੍ਵਾ ਵਸਤਿ. ਅਬ੍ਭਨ੍ਤਰੇ ਚਸ੍ਸ ਅਨ੍ਤੋਚਾਟਿਯਂ ਪਦੀਪੋ ਵਿਯ ਅਰਹਤ੍ਤਸ੍ਸ ਉਪਨਿਸ੍ਸਯੋ ਜਲਤਿ. ਤਂ ਦਿਸ੍ਵਾ ਧਮ੍ਮਮਸ੍ਸ ਕਥੇਸ੍ਸਾਮੀਤਿ ਗਨ੍ਤ੍ਵਾ ਧਮ੍ਮਂ ਦੇਸੇਸਿ. ਤਾਪਸੋ ਦੇਸਨਾਪਰਿਯੋਸਾਨੇ ਅਰਹਤ੍ਤਂ ਪਾਪੁਣਿ, ਮਗ੍ਗੇਨੇਵਾਸ੍ਸ ਅਭਿਞ੍ਞਾ ਆਗਤਾ. ਏਹਿਭਿਕ੍ਖੁ ਹੁਤ੍ਵਾ ਇਦ੍ਧਿਮਯਪਤ੍ਤਚੀਵਰਧਰੋ ਹੁਤ੍ਵਾ ਕੂਟਾਗਾਰਂ ਪਾਵਿਸਿ.

ਭਗਵਾ ਕੂਟਾਗਾਰਗਤੇਹਿ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਵਾਣਿਜਗਾਮਂ ਗਨ੍ਤ੍ਵਾ ਕੂਟਾਗਾਰਾਨਿ ਅਦਿਸ੍ਸਮਾਨਾਨਿ ਕਤ੍ਵਾ ਵਾਣਿਜਗਾਮਂ ਪਾਵਿਸਿ. ਵਾਣਿਜਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਸਤ੍ਥਾਰਂ ਮਕੁਲਕਾਰਾਮਂ ਨਯਿਂਸੁ. ਸਤ੍ਥਾ ਮਣ੍ਡਲਮਾਲ਼ਂ ਪਾਵਿਸਿ. ਮਹਾਜਨੋ ਯਾਵ ਸਤ੍ਥਾ ਭਤ੍ਤਦਰਥਂ ਪਟਿਪਸ੍ਸਮ੍ਭੇਤਿ, ਤਾਵ ਪਾਤਰਾਸਂ ਕਤ੍ਵਾ ਉਪੋਸਥਙ੍ਗਾਨਿ ਸਮਾਦਾਯ ਬਹੁਂ ਗਨ੍ਧਞ੍ਚ ਪੁਪ੍ਫਞ੍ਚ ਆਦਾਯ ਧਮ੍ਮਸ੍ਸਵਨਤ੍ਥਾਯ ਆਰਾਮਂ ਪਚ੍ਚਾਗਮਾਸਿ. ਸਤ੍ਥਾ ਧਮ੍ਮਂ ਦੇਸੇਸਿ. ਮਹਾਜਨਸ੍ਸ ਬਨ੍ਧਨਮੋਕ੍ਖੋ ਜਾਤੋ, ਮਹਨ੍ਤਂ ਬੁਦ੍ਧਕੋਲਾਹਲਂ ਅਹੋਸਿ.

ਸਤ੍ਥਾ ਮਹਾਜਨਸ੍ਸ ਸਙ੍ਗਹਤ੍ਥਂ ਕਤਿਪਾਹਂ ਤਤ੍ਥੇਵ ਵਸਿ, ਅਰੁਣਂ ਪਨ ਮਹਾਗਨ੍ਧਕੁਟਿਯਂਯੇਵ ਉਟ੍ਠਪੇਸਿ. ਤਤ੍ਥ ਕਤਿਪਾਹਂ ਵਸਿਤ੍ਵਾ ਵਾਣਿਜਗਾਮੇ ਪਿਣ੍ਡਾਯ ਚਰਿਤ੍ਵਾ ‘‘ਤ੍ਵਂ ਇਧੇਵ ਵਸਾਹੀ’’ਤਿ ਪੁਣ੍ਣਤ੍ਥੇਰਂ ਨਿਵਤ੍ਤੇਤ੍ਵਾ ਅਨ੍ਤਰੇ ਨਮ੍ਮਦਾਨਦੀ ਨਾਮ ਅਤ੍ਥਿ, ਤਸ੍ਸਾ ਤੀਰਂ ਅਗਮਾਸਿ. ਨਮ੍ਮਦਾਨਾਗਰਾਜਾ ਸਤ੍ਥੁ ਪਚ੍ਚੁਗ੍ਗਮਨਂ ਕਤ੍ਵਾ ਨਾਗਭਵਨਂ ਪਵੇਸੇਤ੍ਵਾ ਤਿਣ੍ਣਂ ਰਤਨਾਨਂ ਸਕ੍ਕਾਰਂ ਅਕਾਸਿ. ਸਤ੍ਥਾ ਤਸ੍ਸ ਧਮ੍ਮਂ ਕਥੇਤ੍ਵਾ ਨਾਗਭਵਨਾ ਨਿਕ੍ਖਮਿ. ਸੋ – ‘‘ਮਯ੍ਹਂ, ਭਨ੍ਤੇ, ਪਰਿਚਰਿਤਬ੍ਬਂ ਦੇਥਾ’’ਤਿ ਯਾਚਿ, ਭਗਵਾ ਨਮ੍ਮਦਾਨਦੀਤੀਰੇ ਪਦਚੇਤਿਯਂ ਦਸ੍ਸੇਸਿ. ਤਂ ਵੀਚੀਸੁ ਆਗਤਾਸੁ ਪਿਧੀਯਤਿ, ਗਤਾਸੁ ਵਿਵਰੀਯਤਿ, ਮਹਾਸਕ੍ਕਾਰਪ੍ਪਤ੍ਤਂ ਅਹੋਸਿ. ਸਤ੍ਥਾ ਤਤੋ ਨਿਕ੍ਖਮ੍ਮ ਸਚ੍ਚਬਨ੍ਧਪਬ੍ਬਤਂ ਗਨ੍ਤ੍ਵਾ ਸਚ੍ਚਬਨ੍ਧਂ ਆਹ – ‘‘ਤਯਾ ਮਹਾਜਨੋ ਅਪਾਯਮਗ੍ਗੇ ਓਤਾਰਿਤੋ, ਤ੍ਵਂ ਇਧੇਵ ਵਸਿਤ੍ਵਾ ਏਤੇਸਂ ਲਦ੍ਧਿਂ ਵਿਸ੍ਸਜ੍ਜਾਪੇਤ੍ਵਾ ਨਿਬ੍ਬਾਨਮਗ੍ਗੇ ਪਤਿਟ੍ਠਾਪੇਹੀ’’ਤਿ. ਸੋਪਿ ਪਰਿਚਰਿਤਬ੍ਬਂ ਯਾਚਿ. ਸਤ੍ਥਾ ਘਨਪਿਟ੍ਠਿਪਾਸਾਣੇ ਅਲ੍ਲਮਤ੍ਤਿਕਪਿਣ੍ਡਮ੍ਹਿ ਲਞ੍ਛਨਂ ਵਿਯ ਪਦਚੇਤਿਯਂ ਦਸ੍ਸੇਸਿ, ਤਤੋ ਜੇਤਵਨਮੇਵ ਗਤੋ. ਏਤਮਤ੍ਥਂ ਸਨ੍ਧਾਯ ਤੇਨੇਵਨ੍ਤਰਵਸ੍ਸੇਨਾਤਿਆਦਿ ਵੁਤ੍ਤਂ.

ਪਰਿਨਿਬ੍ਬਾਯੀਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ. ਮਹਾਜਨੋ ਥੇਰਸ੍ਸ ਸਤ੍ਤ ਦਿਵਸਾਨਿ ਸਰੀਰਪੂਜਂ ਕਤ੍ਵਾ ਬਹੂਨਿ ਗਨ੍ਧਕਟ੍ਠਾਨਿ ਸਮੋਧਾਨੇਤ੍ਵਾ ਸਰੀਰਂ ਝਾਪੇਤ੍ਵਾ ਧਾਤੁਯੋ ਆਦਾਯ ਚੇਤਿਯਂ ਅਕਾਸਿ. ਸਮ੍ਬਹੁਲਾ ਭਿਕ੍ਖੂਤਿ ਥੇਰਸ੍ਸ ਆਲ਼ਾਹਨੇ ਠਿਤਭਿਕ੍ਖੂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਪੁਣ੍ਣੋਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.