੪. ਨਨ੍ਦਕੋਵਾਦਸੁਤ੍ਤਵਣ੍ਣਨਾ

੩੯੮. ਏਵਂ ਮੇ ਸੁਤਨ੍ਤਿ ਨਨ੍ਦਕੋਵਾਦਸੁਤ੍ਤਂ. ਤਤ੍ਥ ਤੇਨ ਖੋ ਪਨ ਸਮਯੇਨਾਤਿ ਭਗਵਾ ਮਹਾਪਜਾਪਤਿਯਾ ਯਾਚਿਤੋ ਭਿਕ੍ਖੁਨਿਸਙ੍ਘਂ ਉਯ੍ਯੋਜੇਤ੍ਵਾ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਤ੍ਵਾ – ‘‘ਥੇਰਾ ਭਿਕ੍ਖੂ ਵਾਰੇਨ ਭਿਕ੍ਖੁਨਿਯੋ ਓਵਦਨ੍ਤੂ’’ਤਿ ਸਙ੍ਘਸ੍ਸ ਭਾਰਂ ਅਕਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਤਤ੍ਥ ਪਰਿਯਾਯੇਨਾਤਿ ਵਾਰੇਨ. ਨ ਇਚ੍ਛਤੀਤਿ ਅਤ੍ਤਨੋ ਵਾਰੇ ਸਮ੍ਪਤ੍ਤੇ ਦੂਰਂ ਗਾਮਂ ਵਾ ਗਨ੍ਤ੍ਵਾ ਸੂਚਿਕਮ੍ਮਾਦੀਨਿ ਵਾ ਆਰਭਿਤ੍ਵਾ ‘‘ਅਯਂ ਨਾਮਸ੍ਸ ਪਪਞ੍ਚੋ’’ਤਿ ਵਦਾਪੇਸਿ. ਇਮਂ ਪਨ ਪਰਿਯਾਯੇਨ ਓਵਾਦਂ ਭਗਵਾ ਨਨ੍ਦਕਤ੍ਥੇਰਸ੍ਸੇਵ ਕਾਰਣਾ ਅਕਾਸਿ. ਕਸ੍ਮਾ? ਇਮਾਸਞ੍ਹਿ ਭਿਕ੍ਖੁਨੀਨਂ ਥੇਰਂ ਦਿਸ੍ਵਾ ਚਿਤ੍ਤਂ ਏਕਗ੍ਗਂ ਹੋਤਿ ਪਸੀਦਤਿ. ਤੇਨ ਤਾ ਤਸ੍ਸ ਓਵਾਦਂ ਸਮ੍ਪਟਿਚ੍ਛਿਤੁਕਾਮਾ, ਧਮ੍ਮਕਥਂ ਸੋਤੁਕਾਮਾ. ਤਸ੍ਮਾ ਭਗਵਾ – ‘‘ਨਨ੍ਦਕੋ ਅਤ੍ਤਨੋ ਵਾਰੇ ਸਮ੍ਪਤ੍ਤੇ ਓਵਾਦਂ ਦਸ੍ਸਤਿ, ਧਮ੍ਮਕਥਂ ਕਥੇਸ੍ਸਤੀ’’ਤਿ ਵਾਰੇਨ ਓਵਾਦਂ ਅਕਾਸਿ. ਥੇਰੋ ਪਨ ਅਤ੍ਤਨੋ ਵਾਰਂ ਨ ਕਰੋਤਿ, ਕਸ੍ਮਾਤਿ ਚੇ? ਤਾ ਕਿਰ ਭਿਕ੍ਖੁਨਿਯੋ ਪੁਬ੍ਬੇ ਥੇਰਸ੍ਸ ਜਮ੍ਬੁਦੀਪੇ ਰਜ੍ਜਂ ਕਾਰੇਨ੍ਤਸ੍ਸ ਓਰੋਧਾ ਅਹੇਸੁਂ. ਥੇਰੋ ਪੁਬ੍ਬੇਨਿਵਾਸਞਾਣੇਨ ਤਂ ਕਾਰਣਂ ਞਤ੍ਵਾ ਚਿਨ੍ਤੇਸਿ – ‘‘ਮਂ ਇਮਸ੍ਸ ਭਿਕ੍ਖੁਨਿਸਙ੍ਘਸ੍ਸ ਮਜ੍ਝੇ ਨਿਸਿਨ੍ਨਂ ਉਪਮਾਯੋ ਚ ਕਾਰਣਾਨਿ ਚ ਆਹਰਿਤ੍ਵਾ ਧਮ੍ਮਂ ਕਥਯਮਾਨਂ ਦਿਸ੍ਵਾ ਅਞ੍ਞੋ ਪੁਬ੍ਬੇਨਿਵਾਸਞਾਣਲਾਭੀ ਭਿਕ੍ਖੁ ਇਮਂ ਕਾਰਣਂ ਓਲੋਕੇਤ੍ਵਾ ‘ਆਯਸ੍ਮਾ ਨਨ੍ਦਕੋ ਯਾਵਜ੍ਜਦਿਵਸਾ ਓਰੋਧੇ ਨ ਵਿਸ੍ਸਜ੍ਜੇਤਿ, ਸੋਭਤਾਯਮਾਯਸ੍ਮਾ ਓਰੋਧਪਰਿਵੁਤੋ’ਤਿ ਵਤ੍ਤਬ੍ਬਂ ਮਞ੍ਞੇਯ੍ਯਾ’’ਤਿ. ਏਤਮਤ੍ਥਂ ਸਮ੍ਪਸ੍ਸਮਾਨੋ ਥੇਰੋ ਅਤ੍ਤਨੋ ਵਾਰਂ ਨ ਕਰੋਤਿ. ਇਮਾਸਞ੍ਚ ਕਿਰ ਭਿਕ੍ਖੁਨੀਨਂ ਥੇਰਸ੍ਸੇਵ ਦੇਸਨਾ ਸਪ੍ਪਾਯਾ ਭਵਿਸ੍ਸਤੀਤਿ ਞਤ੍ਵਾ ਅਥ ਖੋ ਭਗਵਾ ਆਯਸ੍ਮਨ੍ਤਂ ਨਨ੍ਦਕਂ ਆਮਨ੍ਤੇਸਿ.

ਤਾਸਂ ਭਿਕ੍ਖੁਨੀਨਂ ਪੁਬ੍ਬੇ ਤਸ੍ਸ ਓਰੋਧਭਾਵਜਾਨਨਤ੍ਥਂ ਇਦਂ ਵਤ੍ਥੁਂ – ਪੁਬ੍ਬੇ ਕਿਰ ਬਾਰਾਣਸਿਯਂ ਪਞ੍ਚ ਦਾਸਸਤਾਨਿ ਪਞ੍ਚ ਦਾਸਿਸਤਾਨਿ ਚਾਤਿ ਜਙ੍ਘਸਹਸ੍ਸਂ ਏਕਤੋਵ ਕਮ੍ਮਂ ਕਤ੍ਵਾ ਏਕਸ੍ਮਿਂ ਠਾਨੇ ਵਸਿ. ਅਯਂ ਨਨ੍ਦਕਤ੍ਥੇਰੋ ਤਸ੍ਮਿਂ ਕਾਲੇ ਜੇਟ੍ਠਕਦਾਸੋ ਹੋਤਿ, ਗੋਤਮੀ ਜੇਟ੍ਠਕਦਾਸੀ. ਸਾ ਜੇਟ੍ਠਕਦਾਸਸ੍ਸ ਪਾਦਪਰਿਚਾਰਿਕਾ ਅਹੋਸਿ ਪਣ੍ਡਿਤਾ ਬ੍ਯਤ੍ਤਾ. ਜਙ੍ਘਸਹਸ੍ਸਮ੍ਪਿ ਪੁਞ੍ਞਕਮ੍ਮਂ ਕਰੋਨ੍ਤਂ ਏਕਤੋ ਕਰੋਤਿ. ਅਥ ਵਸ੍ਸੂਪਨਾਯਿਕਸਮਯੇ ਪਞ੍ਚ ਪਚ੍ਚੇਕਬੁਦ੍ਧਾ ਨਨ੍ਦਮੂਲਕਪਬ੍ਭਾਰਤੋ ਇਸਿਪਤਨੇ ਓਤਰਿਤ੍ਵਾ ਨਗਰੇ ਪਿਣ੍ਡਾਯ ਚਰਿਤ੍ਵਾ ਇਸਿਪਤਨਮੇਵ ਗਨ੍ਤ੍ਵਾ – ‘‘ਵਸ੍ਸੂਪਨਾਯਿਕਕੁਟਿਯਾ ਅਤ੍ਥਾਯ ਹਤ੍ਥਕਮ੍ਮਂ ਯਾਚਿਸ੍ਸਾਮਾ’’ਤਿ ਚੀਵਰਂ ਪਾਰੁਪਿਤ੍ਵਾ ਸਾਯਨ੍ਹਸਮਯੇ ਨਗਰਂ ਪਵਿਸਿਤ੍ਵਾ ਸੇਟ੍ਠਿਸ੍ਸ ਘਰਦ੍ਵਾਰੇ ਅਟ੍ਠਂਸੁ. ਜੇਟ੍ਠਕਦਾਸੀ ਕੁਟਂ ਗਹੇਤ੍ਵਾ ਉਦਕਤਿਤ੍ਥਂ ਗਚ੍ਛਨ੍ਤੀ ਪਚ੍ਚੇਕਬੁਦ੍ਧੇ ਨਗਰਂ ਪਵਿਸਨ੍ਤੇ ਅਦ੍ਦਸ. ਸੇਟ੍ਠਿ ਤੇਸਂ ਆਗਤਕਾਰਣਂ ਸੁਤ੍ਵਾ ‘‘ਅਮ੍ਹਾਕਂ ਓਕਾਸੋ ਨਤ੍ਥਿ, ਗਚ੍ਛਨ੍ਤੂ’’ਤਿ ਆਹ.

ਅਥ ਤੇ ਨਗਰਾ ਨਿਕ੍ਖਮਨ੍ਤੇ ਜੇਟ੍ਠਕਦਾਸੀ ਕੁਟਂ ਗਹੇਤ੍ਵਾ ਪਵਿਸਨ੍ਤੀ ਦਿਸ੍ਵਾ ਕੁਟਂ ਓਤਾਰੇਤ੍ਵਾ ਵਨ੍ਦਿਤ੍ਵਾ ਓਨਮਿਤ੍ਵਾ ਮੁਖਂ ਪਿਧਾਯ – ‘‘ਅਯ੍ਯਾ ਨਗਰਂ ਪਵਿਟ੍ਠਮਤ੍ਤਾਵ ਨਿਕ੍ਖਨ੍ਤਾ, ਕਿਂ ਨੁ ਖੋ’’ਤਿ ਪੁਚ੍ਛਿ. ਵਸ੍ਸੂਪਨਾਯਿਕਕੁਟਿਯਾ ਹਤ੍ਥਕਮ੍ਮਂ ਯਾਚਿਤੁਂ ਆਗਮਿਮ੍ਹਾਤਿ. ਲਦ੍ਧਂ, ਭਨ੍ਤੇਤਿ. ਨ ਲਦ੍ਧਂ ਉਪਾਸਿਕੇਤਿ? ਕਿਂ ਪਨੇਸਾ ਕੁਟਿ ਇਸ੍ਸਰੇਹੇਵ ਕਾਤਬ੍ਬਾ, ਦੁਗ੍ਗਤੇਹਿਪਿ ਸਕ੍ਕਾ ਕਾਤੁਨ੍ਤਿ. ਯੇਨ ਕੇਨਚਿ ਸਕ੍ਕਾਤਿ? ਸਾਧੁ, ਭਨ੍ਤੇ, ਮਯਂ ਕਰਿਸ੍ਸਾਮ. ਸ੍ਵੇ ਮਯ੍ਹਂ ਭਿਕ੍ਖਂ ਗਣ੍ਹਥਾਤਿ ਨਿਮਨ੍ਤੇਤ੍ਵਾ ਉਦਕਂ ਨੇਤ੍ਵਾ ਪੁਨ ਕੁਟਂ ਗਹੇਤ੍ਵਾ ਆਗਮ੍ਮ ਤਿਤ੍ਥਮਗ੍ਗੇ ਠਤ੍ਵਾ ਆਗਤਾ ਅਵਸੇਸਦਾਸਿਯੋ ‘‘ਏਤ੍ਥੇਵ ਹੋਥਾ’’ਤਿ ਵਤ੍ਵਾ ਸਬ੍ਬਾਸਂ ਆਗਤਕਾਲੇ ਆਹ – ‘‘ਅਮ੍ਮ ਕਿਂ ਨਿਚ੍ਚਮੇਵ ਪਰਸ੍ਸ ਦਾਸਕਮ੍ਮਂ ਕਰਿਸ੍ਸਥ, ਉਦਾਹੁ ਦਾਸਭਾਵਤੋ ਮੁਚ੍ਚਿਤੁਂ ਇਚ੍ਛਥਾ’’ਤਿ? ਅਜ੍ਜੇਵ ਮੁਚ੍ਚਿਤੁਮਿਚ੍ਛਾਮ ਅਯ੍ਯੇਤਿ. ਯਦਿ ਏਵਂ ਮਯਾ ਪਞ੍ਚ ਪਚ੍ਚੇਕਬੁਦ੍ਧਾ ਹਤ੍ਥਕਮ੍ਮਂ ਅਲਭਨ੍ਤਾ ਸ੍ਵਾਤਨਾਯ ਨਿਮਨ੍ਤਿਤਾ, ਤੁਮ੍ਹਾਕਂ ਸਾਮਿਕੇਹਿ ਏਕਦਿਵਸਂ ਹਤ੍ਥਕਮ੍ਮਂ ਦਾਪੇਥਾਤਿ. ਤਾ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਸਾਯਂ ਅਟਵਿਤੋ ਆਗਤਕਾਲੇ ਸਾਮਿਕਾਨਂ ਆਰੋਚੇਸੁਂ. ਤੇ ਸਾਧੂਤਿ ਜੇਟ੍ਠਕਦਾਸਸ੍ਸ ਗੇਹਦ੍ਵਾਰੇ ਸਨ੍ਨਿਪਤਿਂਸੁ.

ਅਥ ਨੇ ਜੇਟ੍ਠਕਦਾਸੀ ਸ੍ਵੇ ਤਾਤਾ ਪਚ੍ਚੇਕਬੁਦ੍ਧਾਨਂ ਹਤ੍ਥਕਮ੍ਮਂ ਦੇਥਾਤਿ ਆਨਿਸਂਸਂ ਆਚਿਕ੍ਖਿਤ੍ਵਾ ਯੇਪਿ ਨ ਕਾਤੁਕਾਮਾ, ਤੇ ਗਾਲ਼੍ਹੇਨ ਓਵਾਦੇਨ ਤਜ੍ਜੇਤ੍ਵਾ ਪਟਿਚ੍ਛਾਪੇਸਿ. ਸਾ ਪੁਨਦਿਵਸੇ ਪਚ੍ਚੇਕਬੁਦ੍ਧਾਨਂ ਭਤ੍ਤਂ ਦਤ੍ਵਾ ਸਬ੍ਬੇਸਂ ਦਾਸਪੁਤ੍ਤਾਨਂ ਸਞ੍ਞਂ ਅਦਾਸਿ. ਤੇ ਤਾਵਦੇਵ ਅਰਞ੍ਞਂ ਪਵਿਸਿਤ੍ਵਾ ਦਬ੍ਬਸਮ੍ਭਾਰੇ ਸਮੋਧਾਨੇਤ੍ਵਾ ਸਤਂ ਸਤਂ ਹੁਤ੍ਵਾ ਏਕੇਕਕੁਟਿਂ ਏਕੇਕਚਙ੍ਕਮਨਾਦਿਪਰਿਵਾਰਂ ਕਤ੍ਵਾ ਮਞ੍ਚਪੀਠਪਾਨੀਯਪਰਿਭੋਜਨੀਯਭਾਜਨਾਦੀਨਿ ਠਪੇਤ੍ਵਾ ਪਚ੍ਚੇਕਬੁਦ੍ਧੇ ਤੇਮਾਸਂ ਤਤ੍ਥ ਵਸਨਤ੍ਥਾਯ ਪਟਿਞ੍ਞਂ ਕਾਰੇਤ੍ਵਾ ਵਾਰਭਿਕ੍ਖਂ ਪਟ੍ਠਪੇਸੁਂ. ਯੋ ਅਤ੍ਤਨੋ ਵਾਰਦਿਵਸੇ ਨ ਸਕ੍ਕੋਤਿ. ਤਸ੍ਸ ਜੇਟ੍ਠਕਦਾਸੀ ਸਕਗੇਹਤੋ ਆਹਰਿਤ੍ਵਾ ਦੇਤਿ. ਏਵਂ ਤੇਮਾਸਂ ਜਗ੍ਗਿਤ੍ਵਾ ਜੇਟ੍ਠਕਦਾਸੀ ਏਕੇਕਂ ਦਾਸਂ ਏਕੇਕਂ ਸਾਟਕਂ ਵਿਸ੍ਸਜ੍ਜਾਪੇਸਿ. ਪਞ੍ਚ ਥੂਲਸਾਟਕਸਤਾਨਿ ਅਹੇਸੁਂ. ਤਾਨਿ ਪਰਿਵਤ੍ਤਾਪੇਤ੍ਵਾ ਪਞ੍ਚਨ੍ਨਂ ਪਚ੍ਚੇਕਬੁਦ੍ਧਾਨਂ ਤਿਚੀਵਰਾਨਿ ਕਤ੍ਵਾ ਅਦਾਸਿ. ਪਚ੍ਚੇਕਬੁਦ੍ਧਾ ਯਥਾਫਾਸੁਕਂ ਅਗਮਂਸੁ. ਤਮ੍ਪਿ ਜਙ੍ਘਸਹਸ੍ਸਂ ਏਕਤੋ ਕੁਸਲਂ ਕਤ੍ਵਾ ਕਾਯਸ੍ਸ ਭੇਦਾ ਦੇਵਲੋਕੇ ਨਿਬ੍ਬਤ੍ਤਿ. ਤਾਨਿ ਪਞ੍ਚ ਮਾਤੁਗਾਮਸਤਾਨਿ ਕਾਲੇਨ ਕਾਲਂ ਤੇਸਂ ਪਞ੍ਚਨ੍ਨਂ ਪੁਰਿਸਸਤਾਨਂ ਗੇਹੇ ਹੋਨ੍ਤਿ, ਕਾਲੇਨ ਕਾਲਂ ਸਬ੍ਬਾਪਿ ਜੇਟ੍ਠਕਦਾਸਪੁਤ੍ਤਸ੍ਸੇਵ ਗੇਹੇ ਹੋਨ੍ਤਿ. ਅਥ ਏਕਸ੍ਮਿਂ ਕਾਲੇ ਜੇਟ੍ਠਕਦਾਸਪੁਤ੍ਤੋ ਦੇਵਲੋਕਤੋ ਚਵਿਤ੍ਵਾ ਰਾਜਕੁਲੇ ਨਿਬ੍ਬਤ੍ਤੋ. ਤਾਪਿ ਪਞ੍ਚਸਤਾ ਦੇਵਕਞ੍ਞਾ ਮਹਾਭੋਗਕੁਲੇਸੁ ਨਿਬ੍ਬਤ੍ਤਿਤ੍ਵਾ ਤਸ੍ਸ ਰਜ੍ਜੇ ਠਿਤਸ੍ਸ ਗੇਹਂ ਅਗਮਂਸੁ. ਏਤੇਨ ਨਿਯਾਮੇਨ ਸਂਸਰਨ੍ਤਿਯੋ ਅਮ੍ਹਾਕਂ ਭਗਵਤੋ ਕਾਲੇ ਕੋਲਿਯਨਗਰੇ ਦੇਵਦਹਨਗਰੇ ਚ ਖਤ੍ਤਿਯਕੁਲੇਸੁ ਨਿਬ੍ਬਤ੍ਤਾ.

ਨਨ੍ਦਕਤ੍ਥੇਰੋਪਿ ਪਬ੍ਬਜਿਤ੍ਵਾ ਅਰਹਤ੍ਤਂ ਪਤ੍ਤੋ, ਜੇਟ੍ਠਕਦਾਸਿਧੀਤਾ ਵਯਂ ਆਗਮ੍ਮ ਸੁਦ੍ਧੋਦਨਮਹਾਰਾਜਸ੍ਸ ਅਗ੍ਗਮਹੇਸਿਟ੍ਠਾਨੇ ਠਿਤਾ, ਇਤਰਾਪਿ ਤੇਸਂ ਤੇਸਂ ਰਾਜਪੁਤ੍ਤਾਨਂਯੇਵ ਘਰਂ ਗਤਾ. ਤਾਸਂ ਸਾਮਿਕਾ ਪਞ੍ਚਸਤਾ ਰਾਜਕੁਮਾਰਾ ਉਦਕਚੁਮ੍ਬਟਕਲਹੇ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਬ੍ਬਜਿਤਾ, ਰਾਜਧੀਤਰੋ ਤੇਸਂ ਉਕ੍ਕਣ੍ਠਨਤ੍ਥਂ ਸਾਸਨਂ ਪੇਸੇਸੁਂ. ਤੇ ਉਕ੍ਕਣ੍ਠਿਤੇ ਭਗਵਾ ਕੁਣਾਲਦਹਂ ਨੇਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਪੇਤ੍ਵਾ ਮਹਾਸਮਯਦਿਵਸੇ ਅਰਹਤ੍ਤੇ ਪਤਿਟ੍ਠਾਪੇਸਿ. ਤਾਪਿ ਪਞ੍ਚਸਤਾ ਰਾਜਧੀਤਰੋ ਨਿਕ੍ਖਮਿਤ੍ਵਾ ਮਹਾਪਜਾਪਤਿਯਾ ਸਨ੍ਤਿਕੇ ਪਬ੍ਬਜਿਂਸੁ. ਅਯਮਾਯਸ੍ਮਾ ਨਨ੍ਦਕੋ ਏਤ੍ਤਾਵ ਤਾ ਭਿਕ੍ਖੁਨਿਯੋਤਿ ਏਵਮੇਤਂ ਵਤ੍ਥੁ ਦੀਪੇਤਬ੍ਬਂ.

ਰਾਜਕਾਰਾਮੋਤਿ ਪਸੇਨਦਿਨਾ ਕਾਰਿਤੋ ਨਗਰਸ੍ਸ ਦਕ੍ਖਿਣਦਿਸਾਭਾਗੇ ਥੂਪਾਰਾਮਸਦਿਸੇ ਠਾਨੇ ਵਿਹਾਰੋ.

੩੯੯. ਸਮ੍ਮਪ੍ਪਞ੍ਞਾਯ ਸੁਦਿਟ੍ਠਨ੍ਤਿ ਹੇਤੁਨਾ ਕਾਰਣੇਨ ਵਿਪਸ੍ਸਨਾਪਞ੍ਞਾਯ ਯਾਥਾਵਸਰਸਤੋ ਦਿਟ੍ਠਂ.

੪੦੧. ਤਜ੍ਜਂ ਤਜ੍ਜਨ੍ਤਿ ਤਂਸਭਾਵਂ ਤਂਸਭਾਵਂ, ਅਤ੍ਥਤੋ ਪਨ ਤਂ ਤਂ ਪਚ੍ਚਯਂ ਪਟਿਚ੍ਚ ਤਾ ਤਾ ਵੇਦਨਾ ਉਪ੍ਪਜ੍ਜਨ੍ਤੀਤਿ ਵੁਤ੍ਤਂ ਹੋਤਿ.

੪੦੨. ਪਗੇਵਸ੍ਸ ਛਾਯਾਤਿ ਮੂਲਾਦੀਨਿ ਨਿਸ੍ਸਾਯ ਨਿਬ੍ਬਤ੍ਤਾ ਛਾਯਾ ਪਠਮਤਰਂਯੇਵ ਅਨਿਚ੍ਚਾ.

੪੧੩. ਅਨੁਪਹਚ੍ਚਾਤਿ ਅਨੁਪਹਨਿਤ੍ਵਾ. ਤਤ੍ਥ ਮਂਸਂ ਪਿਣ੍ਡਂ ਪਿਣ੍ਡਂ ਕਤ੍ਵਾ ਚਮ੍ਮਂ ਅਲ੍ਲਿਯਾਪੇਨ੍ਤੋ ਮਂਸਕਾਯਂ ਉਪਹਨਤਿ ਨਾਮ. ਚਮ੍ਮਂ ਬਦ੍ਧਂ ਬਦ੍ਧਂ ਕਤ੍ਵਾ ਮਂਸੇ ਅਲ੍ਲਿਯਾਪੇਨ੍ਤੋ ਮਂਸਕਾਯਂ ਉਪਹਨਤਿ ਨਾਮ. ਏਵਂ ਅਕਤ੍ਵਾ. ਵਿਲਿਮਂਸਂ ਨ੍ਹਾਰੁਬਨ੍ਧਨਨ੍ਤਿ ਸਬ੍ਬਚਮ੍ਮੇ ਲਗ੍ਗਵਿਲੀਪਨਮਂਸਮੇਵ. ਅਨ੍ਤਰਾਕਿਲੇਸਸਂਯੋਜਨਬਨ੍ਧਨਨ੍ਤਿ ਸਬ੍ਬਂ ਅਨ੍ਤਰਕਿਲੇਸਮੇਵ ਸਨ੍ਧਾਯ ਵੁਤ੍ਤਂ.

੪੧੪. ਸਤ੍ਤ ਖੋ ਪਨਿਮੇਤਿ ਕਸ੍ਮਾ ਆਹਾਤਿ? ਯਾ ਹਿ ਏਸਾ ਪਞ੍ਞਾ ਕਿਲੇਸੇ ਛਿਨ੍ਦਤੀਤਿ ਵੁਤ੍ਤਾ, ਸਾ ਨ ਏਕਿਕਾਵ ਅਤ੍ਤਨੋ ਧਮ੍ਮਤਾਯ ਛਿਨ੍ਦਿਤੁਂ ਸਕ੍ਕੋਤਿ. ਯਥਾ ਪਨ ਕੁਠਾਰੀ ਨ ਅਤ੍ਤਨੋ ਧਮ੍ਮਤਾਯ ਛੇਜ੍ਜਂ ਛਿਨ੍ਦਤਿ, ਪੁਰਿਸਸ੍ਸ ਤਜ੍ਜਂ ਵਾਯਾਮਂ ਪਟਿਚ੍ਚੇਵ ਛਿਨ੍ਦਤਿ, ਏਵਂ ਨ ਵਿਨਾ ਛਹਿ ਬੋਜ੍ਝਙ੍ਗੇਹਿ ਪਞ੍ਞਾ ਕਿਲੇਸੇ ਛਿਨ੍ਦਿਤੁਂ ਸਕ੍ਕੋਤਿ. ਤਸ੍ਮਾ ਏਵਮਾਹ. ਤੇਨ ਹੀਤਿ ਯੇਨ ਕਾਰਣੇਨ ਤਯਾ ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ, ਛ ਬਾਹਿਰਾਨਿ, ਛ ਵਿਞ੍ਞਾਣਕਾਯੇ, ਦੀਪੋਪਮਂ, ਰੁਕ੍ਖੋਪਮਂ, ਗਾਵੂਪਮਞ੍ਚ ਦਸ੍ਸੇਤ੍ਵਾ ਸਤ੍ਤਹਿ ਬੋਜ੍ਝਙ੍ਗੇਹਿ ਆਸਵਕ੍ਖਯੇਨ ਦੇਸਨਾ ਨਿਟ੍ਠਪਿਤਾ, ਤੇਨ ਕਾਰਣੇਨ ਤ੍ਵਂ ਸ੍ਵੇਪਿ ਤਾ ਭਿਕ੍ਖੁਨਿਯੋ ਤੇਨੇਵ ਓਵਾਦੇਨ ਓਵਦੇਯ੍ਯਾਸੀਤਿ.

੪੧੫. ਸਾ ਸੋਤਾਪਨ੍ਨਾਤਿ ਯਾ ਸਾ ਗੁਣੇਹਿ ਸਬ੍ਬਪਚ੍ਛਿਮਿਕਾ, ਸਾ ਸੋਤਾਪਨ੍ਨਾ. ਸੇਸਾ ਪਨ ਸਕਦਾਗਾਮਿਅਨਾਗਾਮਿਨਿਯੋ ਚ ਖੀਣਾਸਵਾ ਚ. ਯਦਿ ਏਵਂ ਕਥਂ ਪਰਿਪੁਣ੍ਣਸਙ੍ਕਪ੍ਪਾਤਿ. ਅਜ੍ਝਾਸਯਪਾਰਿਪੂਰਿਯਾ. ਯਸ੍ਸਾ ਹਿ ਭਿਕ੍ਖੁਨਿਯਾ ਏਵਮਹੋਸਿ – ‘‘ਕਦਾ ਨੁ ਖੋ ਅਹਂ ਅਯ੍ਯਸ੍ਸ ਨਨ੍ਦਕਸ੍ਸ ਧਮ੍ਮਦੇਸਨਂ ਸੁਣਨ੍ਤੀ ਤਸ੍ਮਿਂਯੇਵ ਆਸਨੇ ਸੋਤਾਪਤ੍ਤਿਫਲਂ ਸਚ੍ਛਿਕਰੇਯ੍ਯ’’ਨ੍ਤਿ, ਸਾ ਸੋਤਾਪਤ੍ਤਿਫਲਂ ਸਚ੍ਛਾਕਾਸਿ. ਯਸ੍ਸਾ ਅਹੋਸਿ ‘‘ਸਕਦਾਗਾਮਿਫਲਂ ਅਨਾਗਾਮਿਫਲਂ ਅਰਹਤ੍ਤ’’ਨ੍ਤਿ, ਸਾ ਅਰਹਤ੍ਤਂ ਸਚ੍ਛਾਕਾਸਿ. ਤੇਨਾਹ ਭਗਵਾ ‘‘ਅਤ੍ਤਮਨਾ ਚੇਵ ਪਰਿਪੁਣ੍ਣਸਙ੍ਕਪ੍ਪਾ ਚਾ’’ਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਨਨ੍ਦਕੋਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.