੨. ਛਨ੍ਨੋਵਾਦਸੁਤ੍ਤਵਣ੍ਣਨਾ

੩੮੯. ਏਵਂ ਮੇ ਸੁਤਨ੍ਤਿ ਛਨ੍ਨੋਵਾਦਸੁਤ੍ਤਂ. ਤਤ੍ਥ ਛਨ੍ਨੋਤਿ ਏਵਂਨਾਮਕੋ ਥੇਰੋ, ਨ ਅਭਿਨਿਕ੍ਖਮਨਂ ਨਿਕ੍ਖਨ੍ਤਤ੍ਥੇਰੋ. ਪਟਿਸਲ੍ਲਾਨਾਤਿ ਫਲਸਮਾਪਤ੍ਤਿਤੋ. ਗਿਲਾਨਪੁਚ੍ਛਕਾਤਿ ਗਿਲਾਨੁਪਟ੍ਠਾਨਂ ਨਾਮ ਬੁਦ੍ਧਵਣ੍ਣਿਤਂ, ਤਸ੍ਮਾ ਏਵਮਾਹ. ਸਤ੍ਥਨ੍ਤਿ ਜੀਵਿਤਹਾਰਕਸਤ੍ਥਂ. ਨਾਵਕਙ੍ਖਾਮੀਤਿ ਇਚ੍ਛਾਮਿ.

੩੯੦. ਅਨੁਪਵਜ੍ਜਨ੍ਤਿ ਅਨੁਪ੍ਪਤ੍ਤਿਕਂ ਅਪ੍ਪਟਿਸਨ੍ਧਿਕਂ.

੩੯੧. ਏਤਂ ਮਮਾਤਿਆਦੀਨਿ ਤਣ੍ਹਾਮਾਨਦਿਟ੍ਠਿਗਾਹਵਸੇਨ ਵੁਤ੍ਤਾਨਿ. ਨਿਰੋਧਂ ਦਿਸ੍ਵਾਤਿ ਖਯਵਯਂ ਞਤ੍ਵਾ. ਨੇਤਂ ਮਮ ਨੇਸੋਹਮਸ੍ਮਿ ਨ ਮੇਸੋ ਅਤ੍ਤਾਤਿ ਸਮਨੁਪਸ੍ਸਾਮੀਤਿ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਸਮਨੁਪਸ੍ਸਾਮਿ.

੩੯੩. ਤਸ੍ਮਾਤਿ ਯਸ੍ਮਾ ਮਾਰਣਨ੍ਤਿਕਵੇਦਨਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਸਤ੍ਥਂ ਆਹਰਾਮੀਤਿ ਵਦਤਿ, ਤਸ੍ਮਾ. ਪੁਥੁਜ੍ਜਨੋ ਆਯਸ੍ਮਾ, ਤੇਨ ਇਦਮ੍ਪਿ ਮਨਸਿ ਕਰੋਹੀਤਿ ਦੀਪੇਤਿ. ਨਿਚ੍ਚਕਪ੍ਪਨ੍ਤਿ ਨਿਚ੍ਚਕਾਲਂ. ਨਿਸ੍ਸਿਤਸ੍ਸਾਤਿ ਤਣ੍ਹਾਦਿਟ੍ਠੀਹਿ ਨਿਸ੍ਸਿਤਸ੍ਸ. ਚਲਿਤਨ੍ਤਿ ਵਿਪ੍ਫਨ੍ਦਿਤਂ ਹੋਤਿ. ਪਸ੍ਸਦ੍ਧੀਤਿ ਕਾਯਚਿਤ੍ਤਪਸ੍ਸਦ੍ਧਿ, ਕਿਲੇਸਪਸ੍ਸਦ੍ਧਿ ਨਾਮ ਹੋਤੀਤਿ ਅਤ੍ਥੋ. ਨਤੀਤਿ ਤਣ੍ਹਾਨਤਿ. ਨਤਿਯਾ ਅਸਤੀਤਿ ਭਵਤ੍ਥਾਯ ਆਲਯਨਿਕਨ੍ਤਿਪਰਿਯੁਟ੍ਠਾਨੇਸੁ ਅਸਤਿ. ਆਗਤਿਗਤਿ ਨ ਹੋਤੀਤਿ ਪਟਿਸਨ੍ਧਿਵਸੇਨ ਆਗਤਿ ਨਾਮ ਨ ਹੋਤਿ, ਚੁਤਿਵਸੇਨ ਗਮਨਂ ਨਾਮ ਨ ਹੋਤਿ. ਚੁਤੂਪਪਾਤੋਤਿ ਚਵਨਵਸੇਨ ਚੁਤਿ, ਉਪਪਜ੍ਜਨਵਸੇਨ ਉਪਪਾਤੋ. ਨੇਵਿਧ ਨ ਹੁਰਂ ਨ ਉਭਯਮਨ੍ਤਰੇਨਾਤਿ ਨਯਿਧ ਲੋਕੇ, ਨ ਪਰਲੋਕੇ, ਨ ਉਭਯਤ੍ਥ ਹੋਤਿ. ਏਸੇਵਨ੍ਤੋ ਦੁਕ੍ਖਸ੍ਸਾਤਿ ਵਟ੍ਟਦੁਕ੍ਖਕਿਲੇਸਦੁਕ੍ਖਸ੍ਸ ਅਯਮੇਵ ਅਨ੍ਤੋ ਅਯਂ ਪਰਿਚ੍ਛੇਦੋ ਪਰਿਵਟੁਮਭਾਵੋ ਹੋਤਿ. ਅਯਮੇਵ ਹਿ ਏਤ੍ਥ ਅਤ੍ਥੋ. ਯੇ ਪਨ ‘‘ਨ ਉਭਯਮਨ੍ਤਰੇਨਾ’’ਤਿ ਵਚਨਂ ਗਹੇਤ੍ਵਾ ਅਨ੍ਤਰਾਭਵਂ ਇਚ੍ਛਨ੍ਤਿ, ਤੇਸਂ ਉਤ੍ਤਰਂ ਹੇਟ੍ਠਾ ਵੁਤ੍ਤਮੇਵ.

੩੯੪. ਸਤ੍ਥਂ ਆਹਰੇਸੀਤਿ ਜੀਵਿਤਹਾਰਕਂ ਸਤ੍ਥਂ ਆਹਰਿ, ਕਣ੍ਠਨਾਲ਼ਿਂ ਛਿਨ੍ਦਿ. ਅਥਸ੍ਸ ਤਸ੍ਮਿਂ ਖਣੇ ਮਰਣਭਯਂ ਓਕ੍ਕਮਿ, ਗਤਿਨਿਮਿਤ੍ਤਂ ਉਪਟ੍ਠਾਸਿ. ਸੋ ਅਤ੍ਤਨੋ ਪੁਥੁਜ੍ਜਨਭਾਵਂ ਞਤ੍ਵਾ ਸਂਵਿਗ੍ਗੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਸਙ੍ਖਾਰੇ ਪਰਿਗ੍ਗਣ੍ਹਨ੍ਤੋ ਅਰਹਤ੍ਤਂ ਪਤ੍ਵਾ ਸਮਸੀਸੀ ਹੁਤ੍ਵਾ ਪਰਿਨਿਬ੍ਬਾਯਿ. ਸਮ੍ਮੁਖਾਯੇਵ ਅਨੁਪਵਜ੍ਜਤਾ ਬ੍ਯਾਕਤਾਤਿ ਕਿਞ੍ਚਾਪਿ ਇਦਂ ਥੇਰਸ੍ਸ ਪੁਥੁਜ੍ਜਨਕਾਲੇ ਬ੍ਯਾਕਰਣਂ ਹੋਤਿ, ਏਤੇਨ ਪਨ ਬ੍ਯਾਕਰਣੇਨ ਅਨਨ੍ਤਰਾਯਮਸ੍ਸ ਪਰਿਨਿਬ੍ਬਾਨਂ ਅਹੋਸਿ. ਤਸ੍ਮਾ ਭਗਵਾ ਤਮੇਵ ਬ੍ਯਾਕਰਣਂ ਗਹੇਤ੍ਵਾ ਕਥੇਸਿ. ਉਪਵਜ੍ਜਕੁਲਾਨੀਤਿ ਉਪਸਙ੍ਕਮਿਤਬ੍ਬਕੁਲਾਨਿ. ਇਮਿਨਾ ਥੇਰੋ, – ‘‘ਭਨ੍ਤੇ, ਏਵਂ ਉਪਟ੍ਠਾਕੇਸੁ ਚ ਉਪਟ੍ਠਾਯਿਕਾਸੁ ਚ ਵਿਜ੍ਜਮਾਨਾਸੁ ਸੋ ਭਿਕ੍ਖੁ ਤੁਮ੍ਹਾਕਂ ਸਾਸਨੇ ਪਰਿਨਿਬ੍ਬਾਯਿਸ੍ਸਤੀ’’ਤਿ ਪੁਚ੍ਛਤਿ. ਅਥਸ੍ਸ ਭਗਵਾ ਕੁਲੇਸੁ ਸਂਸਗ੍ਗਾਭਾਵਂ ਦੀਪੇਨ੍ਤੋ ਹੋਨ੍ਤਿ ਹੇਤੇ ਸਾਰਿਪੁਤ੍ਤਾਤਿਆਦਿਮਾਹ. ਇਮਸ੍ਮਿਂ ਕਿਰ ਠਾਨੇ ਥੇਰਸ੍ਸ ਕੁਲੇਸੁ ਅਸਂਸਟ੍ਠਭਾਵੋ ਪਾਕਟੋ ਅਹੋਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਛਨ੍ਨੋਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.