੧. ਅਨਾਥਪਿਣ੍ਡਿਕੋਵਾਦਸੁਤ੍ਤਵਣ੍ਣਨਾ

੩੮੩. ਏਵਂ ਮੇ ਸੁਤਨ੍ਤਿ ਅਨਾਥਪਿਣ੍ਡਿਕੋਵਾਦਸੁਤ੍ਤਂ. ਤਤ੍ਥ ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗਿਲਾਨੋ ਮਰਣਸੇਯ੍ਯਂ ਉਪਗਤੋ. ਆਮਨ੍ਤੇਸੀਤਿ ਗਹਪਤਿਸ੍ਸ ਕਿਰ ਯਾਵ ਪਾਦਾ ਵਹਿਂਸੁ, ਤਾਵ ਦਿਵਸੇ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਤਿਕ੍ਖਤ੍ਤੁਂ ਵਾ ਬੁਦ੍ਧੁਪਟ੍ਠਾਨਂ ਅਖਣ੍ਡਂ ਅਕਾਸਿ. ਯਤ੍ਤਕਞ੍ਚਸ੍ਸ ਸਤ੍ਥੁ ਉਪਟ੍ਠਾਨਂ ਅਹੋਸਿ, ਤਤ੍ਤਕਂਯੇਵ ਮਹਾਥੇਰਾਨਂ. ਸੋ ਅਜ੍ਜ ਗਮਨਪਾਦਸ੍ਸ ਪਚ੍ਛਿਨ੍ਨਤ੍ਤਾ ਅਨੁਟ੍ਠਾਨਸੇਯ੍ਯਂ ਉਪਗਤੋ ਸਾਸਨਂ ਪੇਸੇਤੁਕਾਮੋ ਅਞ੍ਞਤਰਂ ਪੁਰਿਸਂ ਆਮਨ੍ਤੇਸਿ. ਤੇਨੁਪਸਙ੍ਕਮੀਤਿ ਭਗਵਨ੍ਤਂ ਆਪੁਚ੍ਛਿਤ੍ਵਾ ਸੂਰਿਯਤ੍ਥਙ੍ਗਮਨਵੇਲਾਯ ਉਪਸਙ੍ਕਮਿ.

੩੮੪. ਪਟਿਕ੍ਕਮਨ੍ਤੀਤਿ ਓਸਕ੍ਕਨ੍ਤਿ, ਤਨੁਕਾ ਭਵਨ੍ਤਿ. ਅਭਿਕ੍ਕਮਨ੍ਤੀਤਿ ਅਭਿਵਡ੍ਢਨ੍ਤਿ ਓਤ੍ਥਰਨ੍ਤਿ, ਬਲਵਤਿਯੋ ਹੋਨ੍ਤਿ.

ਅਭਿਕ੍ਕਮੋਸਾਨਂ ਪਞ੍ਞਾਯਤਿ ਨੋ ਪਟਿਕ੍ਕਮੋਤਿ ਯਸ੍ਮਿਞ੍ਹਿ ਸਮਯੇ ਮਾਰਣਨ੍ਤਿਕਾ ਵੇਦਨਾ ਉਪ੍ਪਜ੍ਜਤਿ, ਉਪਰਿਵਾਤੇ ਜਲਿਤਗ੍ਗਿ ਵਿਯ ਹੋਤਿ, ਯਾਵ ਉਸ੍ਮਾ ਨ ਪਰਿਯਾਦਿਯਤਿ, ਤਾਵ ਮਹਤਾਪਿ ਉਪਕ੍ਕਮੇਨ ਨ ਸਕ੍ਕਾ ਵੂਪਸਮੇਤੁਂ, ਉਸ੍ਮਾਯ ਪਨ ਪਰਿਯਾਦਿਨ੍ਨਾਯ ਵੂਪਸਮ੍ਮਤਿ.

੩੮੫. ਅਥਾਯਸ੍ਮਾ ਸਾਰਿਪੁਤ੍ਤੋ ਚਿਨ੍ਤੇਸਿ – ‘‘ਅਯਂ ਮਹਾਸੇਟ੍ਠਿਸ੍ਸ ਵੇਦਨਾ ਮਾਰਣਨ੍ਤਿਕਾ, ਨ ਸਕ੍ਕਾ ਪਟਿਬਾਹਿਤੁਂ, ਅਵਸੇਸਾ ਕਥਾ ਨਿਰਤ੍ਥਕਾ, ਧਮ੍ਮਕਥਮਸ੍ਸ ਕਥੇਸ੍ਸਾਮੀ’’ਤਿ. ਅਥ ਨਂ ਤਂ ਕਥੇਨ੍ਤੋ ਤਸ੍ਮਾਤਿਹਾਤਿਆਦਿਮਾਹ. ਤਤ੍ਥ ਤਸ੍ਮਾਤਿ ਯਸ੍ਮਾ ਚਕ੍ਖੁਂ ਤੀਹਿ ਗਾਹੇਹਿ ਗਣ੍ਹਨ੍ਤੋ ਉਪ੍ਪਨ੍ਨਂ ਮਾਰਣਨ੍ਤਿਕਂ ਵੇਦਨਂ ਪਟਿਬਾਹਿਤੁਂ ਸਮਤ੍ਥੋ ਨਾਮ ਨਤ੍ਥਿ, ਤਸ੍ਮਾ. ਨ ਚਕ੍ਖੁਂ ਉਪਾਦਿਯਿਸ੍ਸਾਮੀਤਿ ਚਕ੍ਖੁਂ ਤੀਹਿ ਗਾਹੇਹਿ ਨ ਗਣ੍ਹਿਸ੍ਸਾਮਿ. ਨ ਚ ਮੇ ਚਕ੍ਖੁਨਿਸ੍ਸਿਤਂ ਵਿਞ੍ਞਾਣਨ੍ਤਿ ਵਿਞ੍ਞਾਣਞ੍ਚਾਪਿ ਮੇ ਚਕ੍ਖੁਨਿਸ੍ਸਿਤਂ ਨ ਭਵਿਸ੍ਸਤਿ. ਨ ਰੂਪਨ੍ਤਿ ਹੇਟ੍ਠਾ ਆਯਤਨਰੂਪਂ ਕਥਿਤਂ, ਇਮਸ੍ਮਿਂ ਠਾਨੇ ਸਬ੍ਬਮ੍ਪਿ ਕਾਮਭਵਰੂਪਂ ਕਥੇਨ੍ਤੋ ਏਵਮਾਹ.

੩੮੬. ਨ ਇਧਲੋਕਨ੍ਤਿ ਵਸਨਟ੍ਠਾਨਂ ਵਾ ਘਾਸਚ੍ਛਾਦਨਂ ਵਾ ਨ ਉਪਾਦਿਯਿਸ੍ਸਾਮੀਤਿ ਅਤ੍ਥੋ. ਇਦਞ੍ਹਿ ਪਚ੍ਚਯੇਸੁ ਅਪਰਿਤਸ੍ਸਨਤ੍ਥਂ ਕਥਿਤਂ. ਨ ਪਰਲੋਕਨ੍ਤਿ ਏਤ੍ਥ ਪਨ ਮਨੁਸ੍ਸਲੋਕਂ ਠਪੇਤ੍ਵਾ ਸੇਸਾ ਪਰਲੋਕਾ ਨਾਮ. ਇਦਂ – ‘‘ਅਸੁਕਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਸੁਕਟ੍ਠਾਨੇ ਭਵਿਸ੍ਸਾਮਿ, ਇਦਂ ਨਾਮ ਖਾਦਿਸ੍ਸਾਮਿ ਭੁਞ੍ਜਿਸ੍ਸਾਮਿ ਨਿਵਾਸੇਸ੍ਸਾਮਿ ਪਾਰੁਪਿਸ੍ਸਾਮੀ’’ਤਿ ਏਵਰੂਪਾਯ ਪਰਿਤਸ੍ਸਨਾਯ ਪਹਾਨਤ੍ਥਂ ਵੁਤ੍ਤਂ. ਤਮ੍ਪਿ ਨ ਉਪਾਦਿਯਿਸ੍ਸਾਮਿ, ਨ ਚ ਮੇ ਤਨ੍ਨਿਸ੍ਸਿਤਂ ਵਿਞ੍ਞਾਣਂ ਭਵਿਸ੍ਸਤੀਤਿ ਏਵਂ ਤੀਹਿ ਗਾਹੇਹਿ ਪਰਿਮੋਚੇਤ੍ਵਾ ਥੇਰੋ ਦੇਸਨਂ ਅਰਹਤ੍ਤਨਿਕੂਟੇਨ ਨਿਟ੍ਠਪੇਸਿ.

੩੮੭. ਓਲੀਯਸੀਤਿ ਅਤ੍ਤਨੋ ਸਮ੍ਪਤ੍ਤਿਂ ਦਿਸ੍ਵਾ ਆਰਮ੍ਮਣੇਸੁ ਬਜ੍ਝਸਿ ਅਲ੍ਲੀਯਸੀਤਿ. ਇਤਿ ਆਯਸ੍ਮਾ ਆਨਨ੍ਦੋ – ‘‘ਅਯਮ੍ਪਿ ਨਾਮ ਗਹਪਤਿ ਏਵਂ ਸਦ੍ਧੋ ਪਸਨ੍ਨੋ ਮਰਣਭਯਸ੍ਸ ਭਾਯਤਿ, ਅਞ੍ਞੋ ਕੋ ਨ ਭਾਯਿਸ੍ਸਤੀ’’ਤਿ ਮਞ੍ਞਮਾਨੋ ਤਸ੍ਸ ਗਾਲ਼੍ਹਂ ਕਤ੍ਵਾ ਓਵਾਦਂ ਦੇਨ੍ਤੋ ਏਵਮਾਹ. ਨ ਚ ਮੇ ਏਵਰੂਪੀ ਧਮ੍ਮੀਕਥਾ ਸੁਤਪੁਬ੍ਬਾਤਿ ਅਯਂ ਉਪਾਸਕੋ – ‘‘ਸਤ੍ਥੁ ਸਨ੍ਤਿਕਾਪਿ ਮੇ ਏਵਰੂਪੀ ਧਮ੍ਮਕਥਾ ਨ ਸੁਤਪੁਬ੍ਬਾ’’ਤਿ ਵਦਤਿ, ਕਿਂ ਸਤ੍ਥਾ ਏਵਰੂਪਿ ਸੁਖੁਮਂ ਗਮ੍ਭੀਰਕਥਂ ਨ ਕਥੇਤੀਤਿ? ਨੋ ਨ ਕਥੇਤਿ. ਏਵਂ ਪਨ ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ ਛ ਬਾਹਿਰਾਨਿ ਛ ਵਿਞ੍ਞਾਣਕਾਯੇ ਛ ਫਸ੍ਸਕਾਯੇ ਛ ਵੇਦਨਾਕਾਯੇ ਛ ਧਾਤੁਯੋ ਪਞ੍ਚਕ੍ਖਨ੍ਧੇ ਚਤ੍ਤਾਰੋ ਅਰੂਪੇ ਇਧਲੋਕਞ੍ਚ ਪਰਲੋਕਞ੍ਚ ਦਸ੍ਸੇਤ੍ਵਾ ਦਿਟ੍ਠਸੁਤਮੁਤਵਿਞ੍ਞਾਤਵਸੇਨ ਅਰਹਤ੍ਤੇ ਪਕ੍ਖਿਪਿਤ੍ਵਾ ਕਥਿਤਕਥਾ ਏਤੇਨ ਨ ਸੁਤਪੁਬ੍ਬਾ, ਤਸ੍ਮਾ ਏਵਂ ਵਦਤਿ.

ਅਪਿਚਾਯਂ ਉਪਾਸਕੋ ਦਾਨਾਧਿਮੁਤ੍ਤੋ ਦਾਨਾਭਿਰਤੋ ਬੁਦ੍ਧਾਨਂ ਸਨ੍ਤਿਕਂ ਗਚ੍ਛਨ੍ਤੋ ਤੁਚ੍ਛਹਤ੍ਥੋ ਨ ਗਤਪੁਬ੍ਬੋ. ਪੁਰੇਭਤ੍ਤਂ ਗਚ੍ਛਨ੍ਤੋ ਯਾਗੁਖਜ੍ਜਕਾਦੀਨਿ ਗਾਹਾਪੇਤ੍ਵਾ ਗਚ੍ਛਤਿ, ਪਚ੍ਛਾਭਤ੍ਤਂ ਸਪ੍ਪਿਮਧੁਫਾਣਿਤਾਦੀਨਿ. ਤਸ੍ਮਿਂ ਅਸਤਿ ਵਾਲਿਕਂ ਗਾਹਾਪੇਤ੍ਵਾ ਗਨ੍ਧਕੁਟਿਪਰਿਵੇਣੇ ਓਕਿਰਾਪੇਤਿ, ਦਾਨਂ ਦਤ੍ਵਾ ਸੀਲਂ ਰਕ੍ਖਿਤ੍ਵਾ ਗੇਹਂ ਗਤੋ. ਬੋਧਿਸਤ੍ਤਗਤਿਕੋ ਕਿਰੇਸ ਉਪਾਸਕੋ, ਤਸ੍ਮਾ ਭਗਵਾ ਚਤੁਵੀਸਤਿ ਸਂਵਚ੍ਛਰਾਨਿ ਉਪਾਸਕਸ੍ਸ ਯੇਭੁਯ੍ਯੇਨ ਦਾਨਕਥਮੇਵ ਕਥੇਸਿ – ‘‘ਉਪਾਸਕ, ਇਦਂ ਦਾਨਂ ਨਾਮ ਬੋਧਿਸਤ੍ਤਾਨਂ ਗਤਮਗ੍ਗੋ, ਮਯ੍ਹਮ੍ਪਿ ਗਤਮਗ੍ਗੋ, ਮਯਾ ਸਤਸਹਸ੍ਸਕਪ੍ਪਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਾਨਂ ਦਿਨ੍ਨਂ, ਤ੍ਵਂ ਮਯਾ ਗਤਮਗ੍ਗਮੇਵ ਅਨੁਗਚ੍ਛਸੀ’’ਤਿ. ਧਮ੍ਮਸੇਨਾਪਤਿਆਦਯੋ ਮਹਾਸਾਵਕਾਪਿ ਅਤ੍ਤਨੋ ਅਤ੍ਤਨੋ ਸਨ੍ਤਿਕਂ ਆਗਤਕਾਲੇ ਦਾਨਕਥਮੇਵਸ੍ਸ ਕਥੇਨ੍ਤਿ. ਤੇਨੇਵਾਹ ਨ ਖੋ ਗਹਪਤਿ ਗਿਹੀਨਂ ਓਦਾਤਵਸਨਾਨਂ ਏਵਰੂਪੀ ਧਮ੍ਮੀਕਥਾ ਪਟਿਭਾਤੀਤਿ. ਇਦਂ ਵੁਤ੍ਤਂ ਹੋਤਿ – ਗਹਪਤਿ ਗਿਹੀਨਂ ਨਾਮ ਖੇਤ੍ਤਵਤ੍ਥੁਹਿਰਞ੍ਞਸੁਵਣ੍ਣਦਾਸੀਦਾਸਪੁਤ੍ਤਭਰਿਯਾਦੀਸੁ ਤਿਬ੍ਬੋ ਆਲਯੋ ਤਿਬ੍ਬਂ ਨਿਕਨ੍ਤਿਪਰਿਯੁਟ੍ਠਾਨਂ, ਤੇਸਂ – ‘‘ਏਤ੍ਥ ਆਲਯੋ ਨ ਕਾਤਬ੍ਬੋ, ਨਿਕਨ੍ਤਿ ਨ ਕਾਤਬ੍ਬਾ’’ਤਿ ਕਥਾ ਨ ਪਟਿਭਾਤਿ ਨ ਰੁਚ੍ਚਤੀਤਿ.

ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਤੁਸਿਤਭਵਨੇ ਕਿਰਸ੍ਸ ਨਿਬ੍ਬਤ੍ਤਮਤ੍ਤਸ੍ਸੇਵ ਤਿਗਾਵੁਤਪ੍ਪਮਾਣਂ ਸੁਵਣ੍ਣਕ੍ਖਨ੍ਧਂ ਵਿਯ ਵਿਜ੍ਜੋਤਮਾਨਂ ਅਤ੍ਤਭਾਵਂ ਉਯ੍ਯਾਨਵਿਮਾਨਾਦਿਸਮ੍ਪਤ੍ਤਿਞ੍ਚ ਦਿਸ੍ਵਾ – ‘‘ਮਹਤੀ ਅਯਂ ਮਯ੍ਹਂ ਸਮ੍ਪਤ੍ਤਿ, ਕਿਂ ਨੁ ਖੋ ਮੇ ਮਨੁਸ੍ਸਪਥੇ ਕਮ੍ਮਂ ਕਤ’’ਨ੍ਤਿ ਓਲੋਕੇਨ੍ਤੋ ਤੀਸੁ ਰਤਨੇਸੁ ਅਧਿਕਾਰਂ ਦਿਸ੍ਵਾ ਚਿਨ੍ਤੇਸਿ ‘‘ਪਮਾਦਟ੍ਠਾਨਮਿਦਂ ਦੇਵਤ੍ਤਂ ਨਾਮ, ਇਮਾਯ ਹਿ ਮੇ ਸਮ੍ਪਤ੍ਤਿਯਾ ਮੋਦਮਾਨਸ੍ਸ ਸਤਿਸਮ੍ਮੋਸੋਪਿ ਸਿਯਾ, ਹਨ੍ਦਾਹਂ ਗਨ੍ਤ੍ਵਾ ਮਮ ਜੇਤਵਨਸ੍ਸ ਚੇਵ ਭਿਕ੍ਖੁਸਙ੍ਘਸ੍ਸ ਚ ਤਥਾਗਤਸ੍ਸ ਚ ਅਰਿਯਮਗ੍ਗਸ੍ਸ ਚ ਸਾਰਿਪੁਤ੍ਤਤ੍ਥੇਰਸ੍ਸ ਚ ਵਣ੍ਣਂ ਕਥੇਤ੍ਵਾ ਤਤੋ ਆਗਨ੍ਤ੍ਵਾ ਸਮ੍ਪਤ੍ਤਿਂ ਅਨੁਭਵਿਸ੍ਸਾਮੀ’’ਤਿ. ਸੋ ਤਥਾ ਅਕਾਸਿ. ਤਂ ਦਸ੍ਸੇਤੁਂ ਅਥ ਖੋ ਅਨਾਥਪਿਣ੍ਡਿਕੋਤਿਆਦਿ ਵੁਤ੍ਤਂ.

ਤਤ੍ਥ ਇਸਿਸਙ੍ਘਨਿਸੇਵਿਤਨ੍ਤਿ ਭਿਕ੍ਖੁਸਙ੍ਘਨਿਸੇਵਿਤਂ. ਏਵਂ ਪਠਮਗਾਥਾਯ ਜੇਤਵਨਸ੍ਸ ਵਣ੍ਣਂ ਕਥੇਤ੍ਵਾ ਇਦਾਨਿ ਅਰਿਯਮਗ੍ਗਸ੍ਸ ਵਣ੍ਣਂ ਕਥੇਨ੍ਤੋ ਕਮ੍ਮਂ ਵਿਜ੍ਜਾ ਚਾਤਿਆਦਿਮਾਹ. ਤਤ੍ਥ ਕਮ੍ਮਨ੍ਤਿ ਮਗ੍ਗਚੇਤਨਾ. ਵਿਜ੍ਜਾਤਿ ਮਗ੍ਗਪਞ੍ਞਾ. ਧਮ੍ਮੋਤਿ ਸਮਾਧਿਪਕ੍ਖਿਕੋ ਧਮ੍ਮੋ. ਸੀਲਂ ਜੀਵਿਤਮੁਤ੍ਤਮਨ੍ਤਿ ਸੀਲੇ ਪਤਿਟ੍ਠਿਤਸ੍ਸ ਜੀਵਿਤਂ ਉਤ੍ਤਮਨ੍ਤਿ ਦਸ੍ਸੇਤਿ. ਅਥ ਵਾ ਵਿਜ੍ਜਾਤਿ ਦਿਟ੍ਠਿਸਙ੍ਕਪ੍ਪੋ. ਧਮ੍ਮੋਤਿ ਵਾਯਾਮਸਤਿਸਮਾਧਯੋ. ਸੀਲਨ੍ਤਿ ਵਾਚਾਕਮ੍ਮਨ੍ਤਾਜੀਵਾ. ਜੀਵਿਤਮੁਤ੍ਤਮਨ੍ਤਿ ਏਤਸ੍ਮਿਂ ਸੀਲੇ ਪਤਿਟ੍ਠਿਤਸ੍ਸ ਜੀਵਿਤਂ ਨਾਮ ਉਤ੍ਤਮਂ. ਏਤੇਨ ਮਚ੍ਚਾ ਸੁਜ੍ਝਨ੍ਤੀਤਿ ਏਤੇਨ ਅਟ੍ਠਙ੍ਗਿਕੇਨ ਮਗ੍ਗੇਨ ਸਤ੍ਤਾ ਵਿਸੁਜ੍ਝਨ੍ਤਿ.

ਤਸ੍ਮਾਤਿ ਯਸ੍ਮਾ ਮਗ੍ਗੇਨ ਸੁਜ੍ਝਨ੍ਤਿ, ਨ ਗੋਤ੍ਤਧਨੇਹਿ, ਤਸ੍ਮਾ. ਯੋਨਿਸੋ ਵਿਚਿਨੇ ਧਮ੍ਮਨ੍ਤਿ ਉਪਾਯੇਨ ਸਮਾਧਿਪਕ੍ਖਿਯਂ ਧਮ੍ਮਂ ਵਿਚਿਨੇਯ੍ਯ. ਏਵਂ ਤਤ੍ਥ ਵਿਸੁਜ੍ਝਤੀਤਿ ਏਵਂ ਤਸ੍ਮਿਂ ਅਰਿਯਮਗ੍ਗੇ ਵਿਸੁਜ੍ਝਤਿ. ਅਥ ਵਾ ਯੋਨਿਸੋ ਵਿਚਿਨੇ ਧਮ੍ਮਨ੍ਤਿ ਉਪਾਯੇਨ ਪਞ੍ਚਕ੍ਖਨ੍ਧਧਮ੍ਮਂ ਵਿਚਿਨੇਯ੍ਯ. ਏਵਂ ਤਤ੍ਥ ਵਿਸੁਜ੍ਝਤੀਤਿ ਏਵਂ ਤੇਸੁ ਚਤੂਸੁ ਸਚ੍ਚੇਸੁ ਵਿਸੁਜ੍ਝਤਿ.

ਇਦਾਨਿ ਸਾਰਿਪੁਤ੍ਤਤ੍ਥੇਰਸ੍ਸ ਵਣ੍ਣਂ ਕਥੇਨ੍ਤੋ ਸਾਰਿਪੁਤ੍ਤੋ ਵਾਤਿਆਦਿਮਾਹ. ਤਤ੍ਥ ਸਾਰਿਪੁਤ੍ਤੋ ਵਾਤਿ ਅਵਧਾਰਣਵਚਨਂ. ਏਤੇਹਿ ਪਞ੍ਞਾਦੀਹਿ ਸਾਰਿਪੁਤ੍ਤੋਵ ਸੇਯ੍ਯੋਤਿ ਵਦਤਿ. ਉਪਸਮੇਨਾਤਿ ਕਿਲੇਸਉਪਸਮੇਨ. ਪਾਰਙ੍ਗਤੋਤਿ ਨਿਬ੍ਬਾਨਂ ਗਤੋ. ਯੋ ਕੋਚਿ ਨਿਬ੍ਬਾਨਂ ਪਤ੍ਤੋ ਭਿਕ੍ਖੁ, ਸੋ ਏਤਾਵਪਰਮੋ ਸਿਯਾ, ਨ ਥੇਰੇਨ ਉਤ੍ਤਰਿਤਰੋ ਨਾਮ ਅਤ੍ਥੀਤਿ ਵਦਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਨਾਥਪਿਣ੍ਡਿਕੋਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.