੧੨. ਦਕ੍ਖਿਣਾਵਿਭਙ੍ਗਸੁਤ੍ਤਵਣ੍ਣਨਾ

੩੭੬. ਏਵਂ ਮੇ ਸੁਤਨ੍ਤਿ ਦਕ੍ਖਿਣਾਵਿਭਙ੍ਗਸੁਤ੍ਤਂ. ਤਤ੍ਥ ਮਹਾਪਜਾਪਤਿ ਗੋਤਮੀਤਿ ਗੋਤਮੀਤਿ ਗੋਤ੍ਤਂ. ਨਾਮਕਰਣਦਿਵਸੇ ਪਨਸ੍ਸਾ ਲਦ੍ਧਸਕ੍ਕਾਰਾ ਬ੍ਰਾਹ੍ਮਣਾ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ – ‘‘ਸਚੇ ਅਯਂ ਧੀਤਰਂ ਲਭਿਸ੍ਸਤਿ, ਚਕ੍ਕਵਤ੍ਤਿਰਞ੍ਞੋ ਅਗ੍ਗਮਹੇਸੀ ਭਵਿਸ੍ਸਤਿ. ਸਚੇ ਪੁਤ੍ਤਂ ਲਭਿਸ੍ਸਤਿ, ਚਕ੍ਕਵਤ੍ਤਿਰਾਜਾ ਭਵਿਸ੍ਸਤੀਤਿ ਉਭਯਥਾਪਿ ਮਹਤੀਯੇਵਸ੍ਸਾ ਪਜਾ ਭਵਿਸ੍ਸਤੀ’’ਤਿ ਬ੍ਯਾਕਰਿਂਸੁ. ਅਥਸ੍ਸਾ ਮਹਾਪਜਾਪਤੀਤਿ ਨਾਮਂ ਅਕਂਸੁ. ਇਧ ਪਨ ਗੋਤ੍ਤੇਨ ਸਦ੍ਧਿਂ ਸਂਸਨ੍ਦਿਤ੍ਵਾ ਮਹਾਪਜਾਪਤਿਗੋਤਮੀਤਿ ਵੁਤ੍ਤਂ. ਨਵਨ੍ਤਿ ਅਹਤਂ. ਸਾਮਂ ਵਾਯਿਤਨ੍ਤਿ ਨ ਸਹਤ੍ਥੇਨੇਵ ਵਾਯਿਤਂ, ਏਕਦਿਵਸਂ ਪਨ ਧਾਤਿਗਣਪਰਿਵੁਤਾ ਸਿਪ੍ਪਿਕਾਨਂ ਵਾਯਨਟ੍ਠਾਨਂ ਆਗਨ੍ਤ੍ਵਾ ਵੇਮਕੋਟਿਂ ਗਹੇਤ੍ਵਾ ਵਾਯਨਾਕਾਰਂ ਅਕਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ.

ਕਦਾ ਪਨ ਗੋਤਮਿਯਾ ਭਗਵਤੋ ਦੁਸ੍ਸਯੁਗਂ ਦਾਤੁਂ ਚਿਤ੍ਤਂ ਉਪ੍ਪਨ੍ਨਨ੍ਤਿ. ਅਭਿਸਮ੍ਬੋਧਿਂ ਪਤ੍ਵਾ ਪਠਮਗਮਨੇਨ ਕਪਿਲਪੁਰਂ ਆਗਤਕਾਲੇ. ਤਦਾ ਹਿ ਪਿਣ੍ਡਾਯ ਪਵਿਟ੍ਠਂ ਸਤ੍ਥਾਰਂ ਗਹੇਤ੍ਵਾ ਸੁਦ੍ਧੋਦਨਮਹਾਰਾਜਾ ਸਕਂ ਨਿਵੇਸਨਂ ਪਵੇਸੇਸਿ, ਅਥ ਭਗਵਤੋ ਰੂਪਸੋਭਗ੍ਗਂ ਦਿਸ੍ਵਾ ਮਹਾਪਜਾਪਤਿਗੋਤਮੀ ਚਿਨ੍ਤੇਸਿ – ‘‘ਸੋਭਤਿ ਵਤ ਮੇ ਪੁਤ੍ਤਸ੍ਸ ਅਤ੍ਤਭਾਵੋ’’ਤਿ. ਅਥਸ੍ਸਾ ਬਲਵਸੋਮਨਸ੍ਸਂ ਉਪ੍ਪਜ੍ਜਿ. ਤਤੋ ਚਿਨ੍ਤੇਸਿ – ‘‘ਮਮ ਪੁਤ੍ਤਸ੍ਸ ਏਕੂਨਤਿਂਸ ਵਸ੍ਸਾਨਿ ਅਗਾਰਮਜ੍ਝੇ ਵਸਨ੍ਤਸ੍ਸ ਅਨ੍ਤਮਸੋ ਮੋਚਫਲਮਤ੍ਤਮ੍ਪਿ ਮਯਾ ਦਿਨ੍ਨਕਮੇਵ ਅਹੋਸਿ, ਇਦਾਨਿਪਿਸ੍ਸ ਚੀਵਰਸਾਟਕਂ ਦਸ੍ਸਾਮੀ’’ਤਿ. ‘‘ਇਮਸ੍ਮਿਂ ਖੋ ਪਨ ਰਾਜਗੇਹੇ ਬਹੂਨਿ ਮਹਗ੍ਘਾਨਿ ਵਤ੍ਥਾਨਿ ਅਤ੍ਥਿ, ਤਾਨਿ ਮਂ ਨ ਤੋਸੇਨ੍ਤਿ, ਸਹਤ੍ਥਾ ਕਤਮੇਵ ਮਂ ਤੋਸੇਤਿ, ਸਹਤ੍ਥਾ ਕਤ੍ਵਾ ਦਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਾਦੇਸਿ.

ਅਥਨ੍ਤਰਾਪਣਾ ਕਪ੍ਪਾਸਂ ਆਹਰਾਪੇਤ੍ਵਾ ਸਹਤ੍ਥੇਨੇਵ ਪਿਸਿਤ੍ਵਾ ਪੋਥੇਤ੍ਵਾ ਸੁਖੁਮਸੁਤ੍ਤਂ ਕਨ੍ਤਿਤ੍ਵਾ ਅਨ੍ਤੋਵਤ੍ਥੁਸ੍ਮਿਂਯੇਵ ਸਾਲਂ ਕਾਰਾਪੇਤ੍ਵਾ ਸਿਪ੍ਪਿਕੇ ਪਕ੍ਕੋਸਾਪੇਤ੍ਵਾ ਸਿਪ੍ਪਿਕਾਨਂ ਅਤ੍ਤਨੋ ਪਰਿਭੋਗਖਾਦਨੀਯਭੋਜਨੀਯਮੇਵ ਦਤ੍ਵਾ ਵਾਯਾਪੇਸਿ, ਕਾਲਾਨੁਕਾਲਞ੍ਚ ਧਾਤਿਗਣਪਰਿਵੁਤਾ ਗਨ੍ਤ੍ਵਾ ਵੇਮਕੋਟਿਂ ਅਗ੍ਗਹੇਸਿ. ਨਿਟ੍ਠਿਤਕਾਲੇ ਸਿਪ੍ਪਿਕਾਨਂ ਮਹਾਸਕ੍ਕਾਰਂ ਕਤ੍ਵਾ ਦੁਸ੍ਸਯੁਗਂ ਗਨ੍ਧਸਮੁਗ੍ਗੇ ਪਕ੍ਖਿਪਿਤ੍ਵਾ ਵਾਸਂ ਗਾਹਾਪੇਤ੍ਵਾ – ‘‘ਮਯ੍ਹਂ ਪੁਤ੍ਤਸ੍ਸ ਚੀਵਰਸਾਟਕਂ ਗਹੇਤ੍ਵਾ ਗਮਿਸ੍ਸਾਮੀ’’ਤਿ ਰਞ੍ਞੋ ਆਰੋਚੇਸਿ. ਰਾਜਾ ਮਗ੍ਗਂ ਪਟਿਯਾਦਾਪੇਸਿ, ਵੀਥਿਯੋ ਸਮ੍ਮਜ੍ਜਿਤ੍ਵਾ ਪੁਣ੍ਣਘਟੇ ਠਪੇਤ੍ਵਾ ਧਜਪਟਾਕਾ ਉਸ੍ਸਾਪੇਤ੍ਵਾ ਰਾਜਘਰਦ੍ਵਾਰਤੋ ਪਟ੍ਠਾਯ ਯਾਵ ਨਿਗ੍ਰੋਧਾਰਾਮਾ ਮਗ੍ਗਂ ਪਟਿਯਾਦਾਪੇਤ੍ਵਾ ਪੁਪ੍ਫਾਭਿਕਿਣ੍ਣਂ ਅਕਂਸੁ. ਮਹਾਪਜਾਪਤਿਪਿ ਸਬ੍ਬਾਲਙ੍ਕਾਰਂ ਅਲਙ੍ਕਰਿਤ੍ਵਾ ਧਾਤਿਗਣਪਰਿਵੁਤਾ ਸਮੁਗ੍ਗਂ ਸੀਸੇ ਠਪੇਤ੍ਵਾ ਭਗਵਤੋ ਸਨ੍ਤਿਕਂ ਗਨ੍ਤ੍ਵਾ ਇਦਂ ਮੇ, ਭਨ੍ਤੇ, ਨਵਂ ਦੁਸ੍ਸਯੁਗਨ੍ਤਿਆਦਿਮਾਹ.

ਦੁਤਿਯਮ੍ਪਿ ਖੋਤਿ ‘‘ਸਙ੍ਘੇ ਗੋਤਮਿ ਦੇਹੀ’’ਤਿ ਵੁਤ੍ਤੇ – ‘‘ਪਹੋਮਹਂ, ਭਨ੍ਤੇ, ਦੁਸ੍ਸਕੋਟ੍ਠਾਗਾਰਤੋ ਭਿਕ੍ਖੁਸਤਸ੍ਸਾਪਿ ਭਿਕ੍ਖੁਸਹਸ੍ਸਸ੍ਸਾਪਿ ਭਿਕ੍ਖੁਸਤਸਹਸ੍ਸਸ੍ਸਾਪਿ ਚੀਵਰਦੁਸ੍ਸਾਨਿ ਦਾਤੁਂ, ਇਦਂ ਪਨ ਮੇ ਭਗਵਨ੍ਤਂ ਉਦ੍ਦਿਸ੍ਸ ਸਾਮਂ ਕਨ੍ਤਂ ਸਾਮਂ ਵਾਯਿਤਂ, ਤਂ ਮੇ, ਭਨ੍ਤੇ, ਭਗਵਾ ਪਟਿਗ੍ਗਣ੍ਹਾਤੂ’’ਤਿ ਨਿਮਨ੍ਤਯਮਾਨਾ ਆਹ. ਏਵਂ ਯਾਵਤਤਿਯਂ ਯਾਚਿ, ਭਗਵਾਪਿ ਪਟਿਕ੍ਖਿਪਿਯੇਵ.

ਕਸ੍ਮਾ ਪਨ ਭਗਵਾ ਅਤ੍ਤਨੋ ਦਿਯ੍ਯਮਾਨਂ ਭਿਕ੍ਖੁਸਙ੍ਘਸ੍ਸ ਦਾਪੇਤੀਤਿ? ਮਾਤਰਿ ਅਨੁਕਮ੍ਪਾਯ. ਏਵਂ ਕਿਰਸ੍ਸ ਅਹੋਸਿ – ‘‘ਇਮਿਸ੍ਸਾ ਮਂ ਆਰਬ੍ਭ ਪੁਬ੍ਬਚੇਤਨਾ ਮੁਞ੍ਚਚੇਤਨਾ ਪਰਚੇਤਨਾਤਿ ਤਿਸ੍ਸੋ ਚੇਤਨਾ ਉਪ੍ਪਨ੍ਨਾ, ਭਿਕ੍ਖੁਸਙ੍ਘਮ੍ਪਿਸ੍ਸਾ ਆਰਬ੍ਭ ਉਪ੍ਪਜ੍ਜਨ੍ਤੁ, ਏਵਮਸ੍ਸਾ ਛ ਚੇਤਨਾ ਏਕਤੋ ਹੁਤ੍ਵਾ ਦੀਘਰਤ੍ਤਂ ਹਿਤਾਯ ਸੁਖਾਯ ਪਵਤ੍ਤਿਸ੍ਸਨ੍ਤੀ’’ਤਿ. ਵਿਤਣ੍ਡਵਾਦੀ ਪਨਾਹ – ‘‘ਸਙ੍ਘੇ ਦਿਨ੍ਨਂ ਮਹਪ੍ਫਲਨ੍ਤਿ ਤਸ੍ਮਾ ਏਵਂ ਵੁਤ੍ਤ’’ਨ੍ਤਿ. ਸੋ ਵਤ੍ਤਬ੍ਬੋ – ‘‘ਕਿਂ ਤ੍ਵਂ ਸਤ੍ਥੁ ਦਿਨ੍ਨਤੋ ਸਙ੍ਘੇ ਦਿਨ੍ਨਂ ਮਹਪ੍ਫਲਤਰਂ ਵਦਸੀ’’ਤਿ ਆਮ ਵਦਾਮੀਤਿ. ਸੁਤ੍ਤਂ ਆਹਰਾਤਿ. ਸਙ੍ਘੇ ਗੋਤਮਿ ਦੇਹਿ, ਸਙ੍ਘੇ ਤੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ ਸਙ੍ਘੋ ਚਾਤਿ. ਕਿਂ ਪਨਸ੍ਸ ਸੁਤ੍ਤਸ੍ਸ ਅਯਮੇਵ ਅਤ੍ਥੋਤਿ? ਆਮ ਅਯਮੇਵਾਤਿ. ਯਦਿ ਏਵਂ ‘‘ਤੇਨ ਹਾਨਨ੍ਦ, ਵਿਘਾਸਾਦਾਨਂ ਪੂਵਂ ਦੇਹੀ’’ਤਿ ਚ (ਪਾਚਿ. ੨੬੯) ‘‘ਤੇਨ ਹਿ ਤ੍ਵ, ਕਚ੍ਚਾਨ, ਵਿਘਾਸਾਦਾਨਂ ਗੁਲ਼ਂ ਦੇਹੀ’’ਤਿ (ਮਹਾਵ. ੨੮੪) ਚ ਵਚਨਤੋ ਵਿਘਾਸਾਦਾਨਂ ਦਿਨ੍ਨਂ ਮਹਪ੍ਫਲਤਰਞ੍ਚ ਭਵੇਯ੍ਯ. ਏਵਮ੍ਪਿ ਹਿ ‘‘ਸਤ੍ਥਾ ਅਤ੍ਤਨੋ ਦਿਯ੍ਯਮਾਨਂ ਦਾਪੇਤੀ’’ਤਿ. ਰਾਜਰਾਜਮਹਾਮਤ੍ਤਾਦਯੋਪਿ ਅਤ੍ਤਨੋ ਆਗਤਂ ਪਣ੍ਣਾਕਾਰਂ ਹਤ੍ਥਿਗੋਪਕਾਦੀਨਂ ਦਾਪੇਨ੍ਤਿ, ਤੇ ਰਾਜਾਦੀਹਿ ਮਹਨ੍ਤਤਰਾ ਭਵੇਯ੍ਯੁਂ. ਤਸ੍ਮਾ ਮਾ ਏਵਂ ਗਣ੍ਹ –

‘‘ਨਯਿਮਸ੍ਮਿਂ ਲੋਕੇ ਪਰਸ੍ਮਿਂ ਵਾ ਪਨ,

ਬੁਦ੍ਧੇਨ ਸੇਟ੍ਠੋ ਸਦਿਸੋ ਵਾ ਵਿਜ੍ਜਤਿ;

ਯਮਾਹੁਨੇਯ੍ਯਾਨਮਗ੍ਗਤਂ ਗਤੋ,

ਪੁਞ੍ਞਤ੍ਥਿਕਾਨਂ ਵਿਪੁਲਫਲੇਸਿਨ’’ਨ੍ਤਿ. –

ਵਚਨਤੋ ਹਿ ਸਤ੍ਥਾਰਾ ਉਤ੍ਤਰਿਤਰੋ ਦਕ੍ਖਿਣੇਯ੍ਯੋ ਨਾਮ ਨਤ੍ਥਿ. ਏਵਮਸ੍ਸਾ ਛ ਚੇਤਨਾ ਏਕਤੋ ਹੁਤ੍ਵਾ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਨ੍ਤੀਤਿ ਸਨ੍ਧਾਯ ਯਾਵਤਤਿਯਂ ਪਟਿਬਾਹਿਤ੍ਵਾ ਸਙ੍ਘਸ੍ਸ ਦਾਪੇਸਿ.

ਪਚ੍ਛਿਮਾਯ ਜਨਤਾਯ ਸਙ੍ਘੇ ਚਿਤ੍ਤੀਕਾਰਜਨਨਤ੍ਥਂ ਚਾਪਿ ਏਵਮਾਹ. ਏਵਂ ਕਿਰਸ੍ਸ ਅਹੋਸਿ – ‘‘ਅਹਂ ਨ ਚਿਰਟ੍ਠਿਤਿਕੋ, ਮਯ੍ਹਂ ਪਨ ਸਾਸਨਂ ਭਿਕ੍ਖੁਸਙ੍ਘੇ ਪਤਿਟ੍ਠਹਿਸ੍ਸਤਿ, ਪਚ੍ਛਿਮਾ ਜਨਤਾ ਸਙ੍ਘੇ ਚਿਤ੍ਤੀਕਾਰਂ ਜਨੇਤੂ’’ਤਿ ਯਾਵਤਤਿਯਂ ਪਟਿਬਾਹਿਤ੍ਵਾ ਸਙ੍ਘਸ੍ਸ ਦਾਪੇਸਿ. ਏਵਞ੍ਹਿ ਸਤਿ – ‘‘ਸਤ੍ਥਾ ਅਤ੍ਤਨੋ ਦਿਯ੍ਯਮਾਨਮ੍ਪਿ ਸਙ੍ਘਸ੍ਸ ਦਾਪੇਸਿ, ਸਙ੍ਘੋ ਨਾਮ ਦਕ੍ਖਿਣੇਯ੍ਯੋ’’ਤਿ ਪਚ੍ਛਿਮਾ ਜਨਤਾ ਸਙ੍ਘੇ ਚਿਤ੍ਤੀਕਾਰਂ ਉਪ੍ਪਾਦੇਤ੍ਵਾ ਚਤ੍ਤਾਰੋ ਪਚ੍ਚਯੇ ਦਾਤਬ੍ਬੇ ਮਞ੍ਞਿਸ੍ਸਤਿ, ਸਙ੍ਘੋ ਚਤੂਹਿ ਪਚ੍ਚਯੇਹਿ ਅਕਿਲਮਨ੍ਤੋ ਬੁਦ੍ਧਵਚਨਂ ਉਗ੍ਗਹੇਤ੍ਵਾ ਸਮਣਧਮ੍ਮਂ ਕਰਿਸ੍ਸਤਿ. ਏਵਂ ਮਮ ਸਾਸਨਂ ਪਞ੍ਚ ਵਸ੍ਸਸਹਸ੍ਸਾਨਿ ਠਸ੍ਸਤੀਤਿ. ‘‘ਪਟਿਗ੍ਗਣ੍ਹਾਤੁ, ਭਨ੍ਤੇ, ਭਗਵਾ’’ਤਿ ਵਚਨਤੋਪਿ ਚੇਤਂ ਵੇਦਿਤਬ੍ਬਂ ‘‘ਸਤ੍ਥਾਰਾ ਉਤ੍ਤਰਿਤਰੋ ਦਕ੍ਖਿਣੇਯ੍ਯੋ ਨਾਮ ਨਤ੍ਥੀ’’ਤਿ. ਨ ਹਿ ਆਨਨ੍ਦਤ੍ਥੇਰਸ੍ਸ ਮਹਾਪਜਾਪਤਿਯਾ ਆਘਾਤੋ ਵਾ ਵੇਰਂ ਵਾ ਅਤ੍ਥਿ. ਨ ਥੇਰੋ – ‘‘ਤਸ੍ਸਾ ਦਕ੍ਖਿਣਾ ਮਾ ਮਹਪ੍ਫਲਾ ਅਹੋਸੀ’’ਤਿ ਇਚ੍ਛਤਿ. ਪਣ੍ਡਿਤੋ ਹਿ ਥੇਰੋ ਬਹੁਸ੍ਸੁਤੋ ਸੇਕ੍ਖਪਟਿਸਮ੍ਭਿਦਾਪਤ੍ਤੋ, ਸੋ ਸਤ੍ਥੁ ਦਿਨ੍ਨਸ੍ਸ ਮਹਪ੍ਫਲਭਾਵੇ ਸਮ੍ਪਸ੍ਸਮਾਨੋਵ ਪਟਿਗ੍ਗਣ੍ਹਾਤੁ, ਭਨ੍ਤੇ, ਭਗਵਾਤਿ ਗਹਣਤ੍ਥਂ ਯਾਚਿ.

ਪੁਨ ਵਿਤਣ੍ਡਵਾਦੀ ਆਹ – ‘‘ਸਙ੍ਘੇ ਤੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ ਸਙ੍ਘੋ ਚਾ’’ਤਿ ਵਚਨਤੋ ਸਤ੍ਥਾ ਸਙ੍ਘਪਰਿਯਾਪਨ੍ਨੋ ਵਾਤਿ. ਸੋ ਵਤ੍ਤਬ੍ਬੋ – ‘‘ਜਾਨਾਸਿ ਪਨ ਤ੍ਵਂ ਕਤਿ ਸਰਣਾਨਿ, ਕਤਿ ਅਵੇਚ੍ਚਪ੍ਪਸਾਦਾ’’ਤਿ ਜਾਨਨ੍ਤੋ ਤੀਣੀਤਿ ਵਕ੍ਖਤਿ, ਤਤੋ ਵਤ੍ਤਬ੍ਬੋ – ਤਵ ਲਦ੍ਧਿਯਾ ਸਤ੍ਥੁ ਸਙ੍ਘਪਰਿਯਾਪਨ੍ਨਤ੍ਤਾ ਦ੍ਵੇਯੇਵ ਹੋਨ੍ਤਿ. ਏਵਂ ਸਨ੍ਤੇ ਚ – ‘‘ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਤੀਹਿ ਸਰਣਗਮਨੇਹਿ ਪਬ੍ਬਜ੍ਜਂ ਉਪਸਮ੍ਪਦ’’ਨ੍ਤਿ (ਮਹਾਵ. ੩੪) ਏਵਂ ਅਨੁਞ੍ਞਾਤਾ ਪਬ੍ਬਜ੍ਜਾਪਿ ਉਪਸਮ੍ਪਦਾਪਿ ਨ ਰੁਹਤਿ. ਤਤੋ ਤ੍ਵਂ ਨੇਵ ਪਬ੍ਬਜਿਤੋ ਅਸਿ, ਨ ਗਿਹਿ. ਸਮ੍ਮਾਸਮ੍ਬੁਦ੍ਧੇ ਚ ਗਨ੍ਧਕੁਟਿਯਂ ਨਿਸਿਨ੍ਨੇ ਭਿਕ੍ਖੂ ਉਪੋਸਥਮ੍ਪਿ ਪਵਾਰਣਮ੍ਪਿ ਸਙ੍ਘਕਮ੍ਮਾਨਿਪਿ ਕਰੋਨ੍ਤਿ, ਤਾਨਿ ਸਤ੍ਥੁ ਸਙ੍ਘਪਰਿਯਾਪਨ੍ਨਤ੍ਤਾ ਕੁਪ੍ਪਾਨਿ ਭਵੇਯ੍ਯੁਂ, ਨ ਚ ਹੋਨ੍ਤਿ. ਤਸ੍ਮਾ ਨ ਵਤ੍ਤਬ੍ਬਮੇਤਂ ‘‘ਸਤ੍ਥਾ ਸਙ੍ਘਪਰਿਯਾਪਨ੍ਨੋ’’ਤਿ.

੩੭੭. ਆਪਾਦਿਕਾਤਿ ਸਂਵਡ੍ਢਿਕਾ, ਤੁਮ੍ਹਾਕਂ ਹਤ੍ਥਪਾਦੇਸੁ ਹਤ੍ਥਪਾਦਕਿਚ੍ਚਂ ਅਸਾਧੇਨ੍ਤੇਸੁ ਹਤ੍ਥੇ ਚ ਪਾਦੇ ਚ ਵਡ੍ਢੇਤ੍ਵਾ ਪਟਿਜਗ੍ਗਿਕਾਤਿ ਅਤ੍ਥੋ. ਪੋਸਿਕਾਤਿ ਦਿਵਸਸ੍ਸ ਦ੍ਵੇ ਤਯੋ ਵਾਰੇ ਨ੍ਹਾਪੇਤ੍ਵਾ ਭੋਜੇਤ੍ਵਾ ਪਾਯੇਤ੍ਵਾ ਤੁਮ੍ਹੇ ਪੋਸੇਸਿ. ਥਞ੍ਞਂ ਪਾਯੇਸੀਤਿ ਨਨ੍ਦਕੁਮਾਰੋ ਕਿਰ ਬੋਧਿਸਤ੍ਤਤੋ ਕਤਿਪਾਹੇਨੇਵ ਦਹਰੋ, ਤਸ੍ਮਿਂ ਜਾਤੇ ਮਹਾਪਜਾਪਤਿ ਅਤ੍ਤਨੋ ਪੁਤ੍ਤਂ ਧਾਤੀਨਂ ਦਤ੍ਵਾ ਸਯਂ ਬੋਧਿਸਤ੍ਤਸ੍ਸ ਧਾਤਿਕਿਚ੍ਚਂ ਸਾਧਯਮਾਨਾ ਅਤ੍ਤਨੋ ਥਞ੍ਞਂ ਪਾਯੇਸਿ. ਤਂ ਸਨ੍ਧਾਯ ਥੇਰੋ ਏਵਮਾਹ. ਇਤਿ ਮਹਾਪਜਾਪਤਿਯਾ ਬਹੂਪਕਾਰਤਂ ਕਥੇਤ੍ਵਾ ਇਦਾਨਿ ਤਥਾਗਤਸ੍ਸ ਬਹੂਪਕਾਰਤਂ ਦਸ੍ਸੇਨ੍ਤੋ ਭਗਵਾਪਿ, ਭਨ੍ਤੇਤਿਆਦਿਮਾਹ. ਤਤ੍ਥ ਭਗਵਨ੍ਤਂ, ਭਨ੍ਤੇ, ਆਗਮ੍ਮਾਤਿ ਭਗਵਨ੍ਤਂ ਪਟਿਚ੍ਚ ਨਿਸ੍ਸਾਯ ਸਨ੍ਧਾਯ.

੩੭੮. ਅਥ ਭਗਵਾ ਦ੍ਵੀਸੁ ਉਪਕਾਰੇਸੁ ਅਤਿਰੇਕਤਰਂ ਅਨੁਮੋਦਨ੍ਤੋ ਏਵਮੇਤਨ੍ਤਿਆਦਿਮਾਹ. ਤਤ੍ਥ ਯਂ ਹਾਨਨ੍ਦ, ਪੁਗ੍ਗਲੋ ਪੁਗ੍ਗਲਂ ਆਗਮ੍ਮਾਤਿ ਯਂ ਆਚਰਿਯਪੁਗ੍ਗਲਂ ਅਨ੍ਤੇਵਾਸਿਕਪੁਗ੍ਗਲੋ ਆਗਮ੍ਮ. ਇਮਸ੍ਸਾਨਨ੍ਦ, ਪੁਗ੍ਗਲਸ੍ਸ ਇਮਿਨਾ ਪੁਗ੍ਗਲੇਨਾਤਿ ਇਮਸ੍ਸ ਆਚਰਿਯਪੁਗ੍ਗਲਸ੍ਸ ਇਮਿਨਾ ਅਨ੍ਤੇਵਾਸਿਕਪੁਗ੍ਗਲੇਨ. ਨ ਸੁਪ੍ਪਟਿਕਾਰਂ ਵਦਾਮੀਤਿ ਪਚ੍ਚੂਪਕਾਰਂ ਨ ਸੁਕਰਂ ਵਦਾਮਿ, ਅਭਿਵਾਦਨਾਦੀਸੁ ਆਚਰਿਯਂ ਦਿਸ੍ਵਾ ਅਭਿਵਾਦਨਕਰਣਂ ਅਭਿਵਾਦਨਂ ਨਾਮ. ਯਸ੍ਮਿਂ ਵਾ ਦਿਸਾਭਾਗੇ ਆਚਰਿਯੋ ਵਸਤਿ, ਇਰਿਯਾਪਥੇ ਵਾ ਕਪ੍ਪੇਨ੍ਤੋ ਤਦਭਿਮੁਖੋ ਵਨ੍ਦਿਤ੍ਵਾ ਗਚ੍ਛਤਿ, ਵਨ੍ਦਿਤ੍ਵਾ ਨਿਸੀਦਤਿ, ਵਨ੍ਦਿਤ੍ਵਾ ਨਿਪਜ੍ਜਤਿ, ਆਚਰਿਯਂ ਪਨ ਦੂਰਤੋਵ ਦਿਸ੍ਵਾ ਪਚ੍ਚੁਟ੍ਠਾਯ ਪਚ੍ਚੁਗ੍ਗਮਨਕਰਣਂ ਪਚ੍ਚੁਟ੍ਠਾਨਂ ਨਾਮ. ਆਚਰਿਯਂ ਪਨ ਦਿਸ੍ਵਾ ਅਞ੍ਜਲਿਂ ਪਗ੍ਗਯ੍ਹ ਸੀਸੇ ਠਪੇਤ੍ਵਾ ਆਚਰਿਯਂ ਨਮਸ੍ਸਤਿ, ਯਸ੍ਮਿਂ ਵਾ ਦਿਸਾਭਾਗੇ ਸੋ ਵਸਤਿ, ਤਦਭਿਮੁਖੋਪਿ ਤਥੇਵ ਨਮਸ੍ਸਤਿ, ਗਚ੍ਛਨ੍ਤੋਪਿ ਠਿਤੋਪਿ ਨਿਸਿਨ੍ਨੋਪਿ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਤਿਯੇਵਾਤਿ ਇਦਂ ਅਞ੍ਜਲਿਕਮ੍ਮਂ ਨਾਮ. ਅਨੁਚ੍ਛਵਿਕਕਮ੍ਮਸ੍ਸ ਪਨ ਕਰਣਂ ਸਾਮੀਚਿਕਮ੍ਮਂ ਨਾਮ. ਚੀਵਰਾਦੀਸੁ ਚੀਵਰਂ ਦੇਨ੍ਤੋ ਨ ਯਂ ਵਾ ਤਂ ਵਾ ਦੇਤਿ, ਮਹਗ੍ਘਂ ਸਤਮੂਲਿਕਮ੍ਪਿ ਪਞ੍ਚਸਤਮੂਲਿਕਮ੍ਪਿ ਸਹਸ੍ਸਮੂਲਿਕਮ੍ਪਿ ਦੇਤਿਯੇਵ. ਪਿਣ੍ਡਪਾਤਾਦੀਸੁਪਿ ਏਸੇਵ ਨਯੋ. ਕਿਂ ਬਹੁਨਾ, ਚਤੂਹਿ ਪਣੀਤਪਚ੍ਚਯੇਹਿ ਚਕ੍ਕਵਾਲ਼ਨ੍ਤਰਂ ਪੂਰੇਤ੍ਵਾ ਸਿਨੇਰੁਪਬ੍ਬਤੇਨ ਕੂਟਂ ਗਹੇਤ੍ਵਾ ਦੇਨ੍ਤੋਪਿ ਆਚਰਿਯਸ੍ਸ ਅਨੁਚ੍ਛਵਿਕਂ ਕਿਰਿਯਂ ਕਾਤੁਂ ਨ ਸਕ੍ਕੋਤਿਯੇਵ.

੩੭੯. ਚੁਦ੍ਦਸ ਖੋ ਪਨਿਮਾਤਿ ਕਸ੍ਮਾ ਆਰਭਿ? ਇਦਂ ਸੁਤ੍ਤਂ ਪਾਟਿਪੁਗ੍ਗਲਿਕਂ ਦਕ੍ਖਿਣਂ ਆਰਬ੍ਭ ਸਮੁਟ੍ਠਿਤਂ. ਆਨਨ੍ਦਤ੍ਥੇਰੋਪਿ ‘‘ਪਟਿਗ੍ਗਣ੍ਹਾਤੁ, ਭਨ੍ਤੇ, ਭਗਵਾ’’ਤਿ ਪਾਟਿਪੁਗ੍ਗਲਿਕਦਕ੍ਖਿਣਂਯੇਵ ਸਮਾਦਪੇਤਿ, ਚੁਦ੍ਦਸਸੁ ਚ ਠਾਨੇਸੁ ਦਿਨ੍ਨਦਾਨਂ ਪਾਟਿਪੁਗ੍ਗਲਿਕਂ ਨਾਮ ਹੋਤੀਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਅਯਂ ਪਠਮਾਤਿ ਅਯਂ ਦਕ੍ਖਿਣਾ ਗੁਣਵਸੇਨਪਿ ਪਠਮਾ ਜੇਟ੍ਠਕਵਸੇਨਪਿ. ਅਯਞ੍ਹਿ ਪਠਮਾ ਅਗ੍ਗਾ ਜੇਟ੍ਠਿਕਾ, ਇਮਿਸ੍ਸਾ ਦਕ੍ਖਿਣਾਯ ਪਮਾਣਂ ਨਾਮ ਨਤ੍ਥਿ. ਦੁਤਿਯਤਤਿਯਾਪਿ ਪਰਮਦਕ੍ਖਿਣਾਯੇਵ, ਸੇਸਾ ਪਰਮਦਕ੍ਖਿਣਭਾਵਂ ਨ ਪਾਪੁਣਨ੍ਤਿ. ਬਾਹਿਰਕੇ ਕਾਮੇਸੁ ਵੀਤਰਾਗੇਤਿ ਕਮ੍ਮਵਾਦਿਕਿਰਿਯਵਾਦਿਮ੍ਹਿ ਲੋਕਿਯਪਞ੍ਚਾਭਿਞ੍ਞੇ. ਪੁਥੁਜ੍ਜਨਸੀਲਵਨ੍ਤੇਤਿ ਪੁਥੁਜ੍ਜਨਸੀਲਵਾ ਨਾਮ ਗੋਸੀਲਧਾਤੁਕੋ ਹੋਤਿ, ਅਸਠੋ ਅਮਾਯਾਵੀ ਪਰਂ ਅਪੀਲ਼ੇਤ੍ਵਾ ਧਮ੍ਮੇਨ ਸਮੇਨ ਕਸਿਯਾ ਵਾ ਵਣਿਜ੍ਜਾਯ ਵਾ ਜੀਵਿਕਂ ਕਪ੍ਪੇਤਾ. ਪੁਥੁਜ੍ਜਨਦੁਸ੍ਸੀਲੇਤਿ ਪੁਥੁਜ੍ਜਨਦੁਸ੍ਸੀਲਾ ਨਾਮ ਕੇਵਟ੍ਟਮਚ੍ਛਬਨ੍ਧਾਦਯੋ ਪਰਂ ਪੀਲ਼ਾਯ ਜੀਵਿਕਂ ਕਪ੍ਪੇਤਾ.

ਇਦਾਨਿ ਪਾਟਿਪੁਗ੍ਗਲਿਕਦਕ੍ਖਿਣਾਯ ਵਿਪਾਕਂ ਪਰਿਚ੍ਛਿਨ੍ਦਨ੍ਤੋ ਤਤ੍ਰਾਨਨ੍ਦਾਤਿਆਦਿਮਾਹ. ਤਤ੍ਥ ਤਿਰਚ੍ਛਾਨਗਤੇਤਿ ਯਂ ਗੁਣਵਸੇਨ ਉਪਕਾਰਵਸੇਨ ਪੋਸਨਤ੍ਥਂ ਦਿਨ੍ਨਂ, ਇਦਂ ਨ ਗਹਿਤਂ. ਯਮ੍ਪਿ ਆਲੋਪਅਡ੍ਢਆਲੋਪਮਤ੍ਤਂ ਦਿਨ੍ਨਂ, ਤਮ੍ਪਿ ਨ ਗਹਿਤਂ. ਯਂ ਪਨ ਸੁਨਖਸੂਕਰਕੁਕ੍ਕੁਟਕਾਕਾਦੀਸੁ ਯਸ੍ਸ ਕਸ੍ਸਚਿ ਸਮ੍ਪਤ੍ਤਸ੍ਸ ਫਲਂ ਪਟਿਕਙ੍ਖਿਤ੍ਵਾ ਯਾਵਦਤ੍ਥਂ ਦਿਨ੍ਨਂ, ਇਦਂ ਸਨ੍ਧਾਯ ਵੁਤ੍ਤਂ ‘‘ਤਿਰਚ੍ਛਾਨਗਤੇ ਦਾਨਂ ਦਤ੍ਵਾ’’ਤਿ. ਸਤਗੁਣਾਤਿ ਸਤਾਨਿਸਂਸਾ. ਪਾਟਿਕਙ੍ਖਿਤਬ੍ਬਾਤਿ ਇਚ੍ਛਿਤਬ੍ਬਾ. ਇਦਂ ਵੁਤ੍ਤਂ ਹੋਤਿ – ਅਯਂ ਦਕ੍ਖਿਣਾ ਆਯੁਸਤਂ ਵਣ੍ਣਸਤਂ ਸੁਖਸਤਂ ਬਲਸਤਂ ਪਟਿਭਾਨਸਤਨ੍ਤਿ ਪਞ੍ਚ ਆਨਿਸਂਸਸਤਾਨਿ ਦੇਤਿ, ਅਤ੍ਤਭਾਵਸਤੇ ਆਯੁਂ ਦੇਤਿ, ਵਣ੍ਣਂ, ਸੁਖਂ, ਬਲਂ, ਪਟਿਭਾਨਂ ਦੇਤਿ, ਨਿਪ੍ਪਰਿਤਸਂ ਕਰੋਤਿ. ਭਵਸਤੇਪਿ ਵੁਤ੍ਤੇ ਅਯਮੇਵ ਅਤ੍ਥੋ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਨਯੋ ਨੇਤਬ੍ਬੋ.

ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇਤਿ ਏਤ੍ਥ ਹੇਟ੍ਠਿਮਕੋਟਿਯਾ ਤਿਸਰਣਂ ਗਤੋ ਉਪਾਸਕੋਪਿ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਨਾਮ, ਤਸ੍ਮਿਂ ਦਿਨ੍ਨਦਾਨਮ੍ਪਿ ਅਸਙ੍ਖ੍ਯੇਯ੍ਯਂ ਅਪ੍ਪਮੇਯ੍ਯਂ. ਪਞ੍ਚਸੀਲੇ ਪਤਿਟ੍ਠਿਤਸ੍ਸ ਤਤੋ ਉਤ੍ਤਰਿ ਮਹਪ੍ਫਲਂ, ਦਸਸੀਲੇ ਪਤਿਟ੍ਠਿਤਸ੍ਸ ਤਤੋ ਉਤ੍ਤਰਿ, ਤਦਹੁਪਬ੍ਬਜਿਤਸ੍ਸ ਸਾਮਣੇਰਸ੍ਸ ਤਤੋ ਉਤ੍ਤਰਿ, ਉਪਸਮ੍ਪਨ੍ਨਭਿਕ੍ਖੁਨੋ ਤਤੋ ਉਤ੍ਤਰਿ, ਉਪਸਮ੍ਪਨ੍ਨਸ੍ਸੇਵ ਵਤ੍ਤਸਮ੍ਪਨ੍ਨਸ੍ਸ ਤਤੋ ਉਤ੍ਤਰਿ, ਵਿਪਸ੍ਸਕਸ੍ਸ ਤਤੋ ਉਤ੍ਤਰਿ, ਆਰਦ੍ਧਵਿਪਸ੍ਸਕਸ੍ਸ ਤਤੋ ਉਤ੍ਤਰਿ, ਉਤ੍ਤਮਕੋਟਿਯਾ ਪਨ ਮਗ੍ਗਸਮਙ੍ਗੀ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਨਾਮ. ਏਤਸ੍ਸ ਦਿਨ੍ਨਦਾਨਂ ਤਤੋ ਉਤ੍ਤਰਿ ਮਹਪ੍ਫਲਮੇਵ.

ਕਿਂ ਪਨ ਮਗ੍ਗਸਮਙ੍ਗਿਸ੍ਸ ਸਕ੍ਕਾ ਦਾਨਂ ਦਾਤੁਨ੍ਤਿ? ਆਮ ਸਕ੍ਕਾ. ਆਰਦ੍ਧਵਿਪਸ੍ਸਕੋ ਹਿ ਪਤ੍ਤਚੀਵਰਮਾਦਾਯ ਗਾਮਂ ਪਿਣ੍ਡਾਯ ਪਵਿਸਤਿ, ਤਸ੍ਸ ਗੇਹਦ੍ਵਾਰੇ ਠਿਤਸ੍ਸ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਖਾਦਨੀਯਭੋਜਨੀਯਂ ਪਕ੍ਖਿਪਨ੍ਤਿ. ਤਸ੍ਮਿਂ ਖਣੇ ਭਿਕ੍ਖੁਨੋ ਮਗ੍ਗਵੁਟ੍ਠਾਨਂ ਹੋਤਿ, ਇਦਂ ਦਾਨਂ ਮਗ੍ਗਸਮਙ੍ਗਿਨੋ ਦਿਨ੍ਨਂ ਨਾਮ ਹੋਤਿ. ਅਥ ਵਾ ਪਨੇਸ ਆਸਨਸਾਲਾਯ ਨਿਸਿਨ੍ਨੋ ਹੋਤਿ, ਮਨੁਸ੍ਸਾ ਗਨ੍ਤ੍ਵਾ ਪਤ੍ਤੇ ਖਾਦਨੀਯਭੋਜਨੀਯਂ ਠਪੇਨ੍ਤਿ, ਤਸ੍ਮਿਂ ਖਣੇ ਤਸ੍ਸ ਮਗ੍ਗਵੁਟ੍ਠਾਨਂ ਹੋਤਿ, ਇਦਮ੍ਪਿ ਦਾਨਂ ਮਗ੍ਗਸਮਙ੍ਗਿਨੋ ਦਿਨ੍ਨਂ ਨਾਮ. ਅਥ ਵਾ ਪਨਸ੍ਸ ਵਿਹਾਰੇ ਵਾ ਆਸਨਸਾਲਾਯ ਵਾ ਨਿਸਿਨ੍ਨਸ੍ਸ ਉਪਾਸਕਾ ਪਤ੍ਤਂ ਆਦਾਯ ਅਤ੍ਤਨੋ ਘਰਂ ਗਨ੍ਤ੍ਵਾ ਖਾਦਨੀਯਭੋਜਨੀਯਂ ਪਕ੍ਖਿਪਨ੍ਤਿ, ਤਸ੍ਮਿਂ ਖਣੇ ਤਸ੍ਸ ਮਗ੍ਗਵੁਟ੍ਠਾਨਂ ਹੋਤਿ, ਇਦਮ੍ਪਿ ਦਾਨਂ ਮਗ੍ਗਸਮਙ੍ਗਿਨੋ ਦਿਨ੍ਨਂ ਨਾਮ. ਤਤ੍ਥ ਸੋਣ੍ਡਿਯਂ ਉਦਕਸ੍ਸ ਵਿਯ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ ਦਿਨ੍ਨਦਾਨਸ੍ਸ ਅਸਙ੍ਖ੍ਯੇਯ੍ਯਤਾ ਵੇਦਿਤਬ੍ਬਾ. ਤਾਸੁ ਤਾਸੁ ਮਹਾਨਦੀਸੁ ਮਹਾਸਮੁਦ੍ਦੇ ਚ ਉਦਕਸ੍ਸ ਵਿਯ ਸੋਤਾਪਨ੍ਨਾਦੀਸੁ ਦਿਨ੍ਨਦਾਨਸ੍ਸ ਉਤ੍ਤਰਿਤਰਵਸੇਨ ਅਸਙ੍ਖ੍ਯੇਯ੍ਯਤਾ ਵੇਦਿਤਬ੍ਬਾ. ਪਥਵਿਯਾ ਖਯਮਣ੍ਡਲਮਤ੍ਤੇ ਪਦੇਸੇ ਪਂਸੁਂ ਆਦਿਂ ਕਤ੍ਵਾ ਯਾਵ ਮਹਾਪਥਵਿਯਾ ਪਂਸੁਨੋ ਅਪ੍ਪਮੇਯ੍ਯਤਾਯਪਿ ਅਯਮਤ੍ਥੋ ਦੀਪੇਤਬ੍ਬੋ.

੩੮੦. ਸਤ੍ਤ ਖੋ ਪਨਿਮਾਤਿ ਕਸ੍ਮਾ ਆਰਭਿ? ‘‘ਸਙ੍ਘੇ ਗੋਤਮਿ ਦੇਹਿ, ਸਙ੍ਘੇ ਤੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ ਸਙ੍ਘੋ ਚਾ’’ਤਿ ਹਿ ਵੁਤ੍ਤਂ, ਤਤ੍ਥ ਸਤ੍ਤਸੁ ਠਾਨੇਸੁ ਦਿਨ੍ਨਦਾਨਂ ਸਙ੍ਘੇ ਦਿਨ੍ਨਂ ਨਾਮ ਹੋਤੀਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਤਤ੍ਥ ਬੁਦ੍ਧਪ੍ਪਮੁਖੇ ਉਭਤੋਸਙ੍ਘੇਤਿ ਏਕਤੋ ਭਿਕ੍ਖੁਸਙ੍ਘੋ, ਏਕਤੋ ਭਿਕ੍ਖੁਨਿਸਙ੍ਘੋ, ਸਤ੍ਥਾ ਮਜ੍ਝੇ ਨਿਸਿਨ੍ਨੋ ਹੋਤੀਤਿ ਅਯਂ ਬੁਦ੍ਧਪ੍ਪਮੁਖੋ ਉਭਤੋਸਙ੍ਘੋ ਨਾਮ. ਅਯਂ ਪਠਮਾਤਿ ਇਮਾਯ ਦਕ੍ਖਿਣਾਯ ਸਮਪ੍ਪਮਾਣਾ ਦਕ੍ਖਿਣਾ ਨਾਮ ਨਤ੍ਥਿ. ਦੁਤਿਯਦਕ੍ਖਿਣਾਦਯੋ ਪਨ ਏਤਂ ਪਰਮਦਕ੍ਖਿਣਂ ਨ ਪਾਪੁਣਨ੍ਤਿ.

ਕਿਂ ਪਨ ਤਥਾਗਤੇ ਪਰਿਨਿਬ੍ਬੁਤੇ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦਾਤੁਂ ਸਕ੍ਕਾਤਿ? ਸਕ੍ਕਾ. ਕਥਂ? ਉਭਤੋਸਙ੍ਘਸ੍ਸ ਹਿ ਪਮੁਖੇ ਸਧਾਤੁਕਂ ਪਟਿਮਂ ਆਸਨੇ ਠਪੇਤ੍ਵਾ ਆਧਾਰਕਂ ਠਪੇਤ੍ਵਾ ਦਕ੍ਖਿਣੋਦਕਂ ਆਦਿਂ ਕਤ੍ਵਾ ਸਬ੍ਬਂ ਸਤ੍ਥੁ ਪਠਮਂ ਦਤ੍ਵਾ ਉਭਤੋਸਙ੍ਘਸ੍ਸ ਦਾਤਬ੍ਬਂ, ਏਵਂ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦਿਨ੍ਨਂ ਨਾਮ ਹੋਤਿ. ਤਤ੍ਥ ਯਂ ਸਤ੍ਥੁ ਦਿਨ੍ਨਂ, ਤਂ ਕਿਂ ਕਾਤਬ੍ਬਨ੍ਤਿ? ਯੋ ਸਤ੍ਥਾਰਂ ਪਟਿਜਗ੍ਗਤਿ ਵਤ੍ਤਸਮ੍ਪਨ੍ਨੋ ਭਿਕ੍ਖੁ, ਤਸ੍ਸ ਦਾਤਬ੍ਬਂ. ਪਿਤੁਸਨ੍ਤਕਞ੍ਹਿ ਪੁਤ੍ਤਸ੍ਸ ਪਾਪੁਣਾਤਿ, ਭਿਕ੍ਖੁਸਙ੍ਘਸ੍ਸ ਦਾਤੁਮ੍ਪਿ ਵਟ੍ਟਤਿ, ਸਪ੍ਪਿਤੇਲਾਨਿ ਪਨ ਗਹੇਤ੍ਵਾ ਦੀਪਾ ਜਲਿਤਬ੍ਬਾ, ਸਾਟਕਂ ਗਹੇਤ੍ਵਾ ਪਟਾਕਾ ਆਰੋਪੇਤਬ੍ਬਾਤਿ. ਭਿਕ੍ਖੁਸਙ੍ਘੇਤਿ ਅਪਰਿਚ੍ਛਿਨ੍ਨਕਮਹਾਭਿਕ੍ਖੁਸਙ੍ਘੇ. ਭਿਕ੍ਖੁਨਿਸਙ੍ਘੇਪਿ ਏਸੇਵ ਨਯੋ.

ਗੋਤ੍ਰਭੁਨੋਤਿ ਗੋਤ੍ਤਮਤ੍ਤਕਮੇਵ ਅਨੁਭਵਮਾਨਾ, ਨਾਮਮਤ੍ਤਸਮਣਾਤਿ ਅਤ੍ਥੋ. ਕਾਸਾਵਕਣ੍ਠਾਤਿ ਕਾਸਾਵਕਣ੍ਠਨਾਮਕਾ. ਤੇ ਕਿਰ ਏਕਂ ਕਾਸਾਵਖਣ੍ਡਂ ਹਤ੍ਥੇ ਵਾ ਗੀਵਾਯ ਵਾ ਬਨ੍ਧਿਤ੍ਵਾ ਵਿਚਰਿਸ੍ਸਨ੍ਤਿ. ਘਰਦ੍ਵਾਰਂ ਪਨ ਤੇਸਂ ਪੁਤ੍ਤਭਰਿਯਾ ਕਸਿਵਣਿਜ੍ਜਾਦਿਕਮ੍ਮਾਨਿ ਚ ਪਾਕਤਿਕਾਨੇਵ ਭਵਿਸ੍ਸਨ੍ਤਿ. ਤੇਸੁ ਦੁਸ੍ਸੀਲੇਸੁ ਸਙ੍ਘਂ ਉਦ੍ਦਿਸ੍ਸ ਦਾਨਂ ਦਸ੍ਸਨ੍ਤੀਤਿ ਏਤ੍ਥ ਦੁਸ੍ਸੀਲਸਙ੍ਘਨ੍ਤਿ ਨ ਵੁਤ੍ਤਂ. ਸਙ੍ਘੋ ਹਿ ਦੁਸ੍ਸੀਲੋ ਨਾਮ ਨਤ੍ਥਿ. ਦੁਸ੍ਸੀਲਾ ਪਨ ਉਪਾਸਕਾ ਤੇਸੁ ਦੁਸ੍ਸੀਲੇਸੁ ਭਿਕ੍ਖੁਸਙ੍ਘਂ ਉਦ੍ਦਿਸ੍ਸ ਸਙ੍ਘਸ੍ਸ ਦੇਮਾਤਿ ਦਾਨਂ ਦਸ੍ਸਨ੍ਤਿ. ਇਤਿ ਭਗਵਤਾ ਬੁਦ੍ਧਪ੍ਪਮੁਖੇ ਸਙ੍ਘੇ ਦਿਨ੍ਨਦਕ੍ਖਿਣਾਪਿ ਗੁਣਸਙ੍ਖਾਯ ਅਸਙ੍ਖ੍ਯੇਯ੍ਯਾਤਿ ਵੁਤ੍ਤਂ. ਕਾਸਾਵਕਣ੍ਠਸਙ੍ਘੇ ਦਿਨ੍ਨਦਕ੍ਖਿਣਾਪਿ ਗੁਣਸਙ੍ਖਾਯੇਵ ਅਸਙ੍ਖ੍ਯੇਯ੍ਯਾਤਿ ਵੁਤ੍ਤਾ. ਸਙ੍ਘਗਤਾ ਦਕ੍ਖਿਣਾ ਹਿ ਸਙ੍ਘੇ ਚਿਤ੍ਤੀਕਾਰਂ ਕਾਤੁਂ ਸਕ੍ਕੋਨ੍ਤਸ੍ਸ ਹੋਤਿ, ਸਙ੍ਘੇ ਪਨ ਚਿਤ੍ਤੀਕਾਰੋ ਦੁਕ੍ਕਰੋ ਹੋਤਿ.

ਯੋ ਹਿ ਸਙ੍ਘਗਤਂ ਦਕ੍ਖਿਣਂ ਦਸ੍ਸਾਮੀਤਿ ਦੇਯ੍ਯਧਮ੍ਮਂ ਪਟਿਯਾਦੇਤ੍ਵਾ ਵਿਹਾਰਂ ਗਨ੍ਤ੍ਵਾ, – ‘‘ਭਨ੍ਤੇ, ਸਙ੍ਘਂ ਉਦ੍ਦਿਸ੍ਸ ਏਕਂ ਥੇਰਂ ਦੇਥਾ’’ਤਿ ਵਦਤਿ, ਅਥ ਸਙ੍ਘਤੋ ਸਾਮਣੇਰਂ ਲਭਿਤ੍ਵਾ ‘‘ਸਾਮਣੇਰੋ ਮੇ ਲਦ੍ਧੋ’’ਤਿ ਅਞ੍ਞਥਤ੍ਤਂ ਆਪਜ੍ਜਤਿ, ਤਸ੍ਸ ਦਕ੍ਖਿਣਾ ਸਙ੍ਘਗਤਾ ਨ ਹੋਤਿ. ਮਹਾਥੇਰਂ ਲਭਿਤ੍ਵਾਪਿ ‘‘ਮਹਾਥੇਰੋ ਮੇ ਲਦ੍ਧੋ’’ਤਿ ਸੋਮਨਸ੍ਸਂ ਉਪ੍ਪਾਦੇਨ੍ਤਸ੍ਸਾਪਿ ਨ ਹੋਤਿਯੇਵ. ਯੋ ਪਨ ਸਾਮਣੇਰਂ ਵਾ ਉਪਸਮ੍ਪਨ੍ਨਂ ਵਾ ਦਹਰਂ ਵਾ ਥੇਰਂ ਵਾ ਬਾਲਂ ਵਾ ਪਣ੍ਡਿਤਂ ਵਾ ਯਂਕਿਞ੍ਚਿ ਸਙ੍ਘਤੋ ਲਭਿਤ੍ਵਾ ਨਿਬ੍ਬੇਮਤਿਕੋ ਹੁਤ੍ਵਾ ਸਙ੍ਘਸ੍ਸ ਦੇਮੀਤਿ ਸਙ੍ਘੇ ਚਿਤ੍ਤੀਕਾਰਂ ਕਾਤੁਂ ਸਕ੍ਕੋਤਿ, ਤਸ੍ਸ ਦਕ੍ਖਿਣਾ ਸਙ੍ਘਗਤਾ ਨਾਮ ਹੋਤਿ. ਪਰਸਮੁਦ੍ਦਵਾਸਿਨੋ ਕਿਰ ਏਵਂ ਕਰੋਨ੍ਤਿ.

ਤਤ੍ਥ ਹਿ ਏਕੋ ਵਿਹਾਰਸਾਮਿ ਕੁਟੁਮ੍ਬਿਕੋ ‘‘ਸਙ੍ਘਗਤਂ ਦਕ੍ਖਿਣਂ ਦਸ੍ਸਾਮੀ’’ਤਿ ਸਙ੍ਘਤੋ ਉਦ੍ਦਿਸਿਤ੍ਵਾ ਏਕਂ ਭਿਕ੍ਖੁਂ ਦੇਥਾਤਿ ਯਾਚਿ. ਸੋ ਏਕਂ ਦੁਸ੍ਸੀਲਭਿਕ੍ਖੁਂ ਲਭਿਤ੍ਵਾ ਨਿਸਿਨ੍ਨਟ੍ਠਾਨਂ ਓਪੁਞ੍ਜਾਪੇਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਉਪਰਿ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਧੂਮਪੁਪ੍ਫੇਹਿ ਪੂਜੇਤ੍ਵਾ ਪਾਦੇ ਧੋਵਿਤ੍ਵਾ ਤੇਲੇਨ ਮਕ੍ਖੇਤ੍ਵਾ ਬੁਦ੍ਧਸ੍ਸ ਨਿਪਚ੍ਚਕਾਰਂ ਕਰੋਨ੍ਤੋ ਵਿਯ ਸਙ੍ਘੇ ਚਿਤ੍ਤੀਕਾਰੇਨ ਦੇਯ੍ਯਧਮ੍ਮਂ ਅਦਾਸਿ. ਸੋ ਭਿਕ੍ਖੁ ਪਚ੍ਛਾਭਤ੍ਤਂ ਵਿਹਾਰਜਗ੍ਗਨਤ੍ਥਾਯ ਕੁਦਾਲਕਂ ਦੇਥਾਤਿ ਘਰਦ੍ਵਾਰਂ ਆਗਤੋ, ਉਪਾਸਕੋ ਨਿਸਿਨ੍ਨੋਵ ਕੁਦਾਲਂ ਪਾਦੇਨ ਖਿਪਿਤ੍ਵਾ ‘‘ਗਣ੍ਹਾ’’ਤਿ ਅਦਾਸਿ. ਤਮੇਨਂ ਮਨੁਸ੍ਸਾ ਆਹਂਸੁ – ‘‘ਤੁਮ੍ਹੇਹਿ ਪਾਤੋਵ ਏਤਸ੍ਸ ਕਤਸਕ੍ਕਾਰੋ ਵਤ੍ਤੁਂ ਨ ਸਕ੍ਕਾ, ਇਦਾਨਿ ਉਪਚਾਰਮਤ੍ਤਕਮ੍ਪਿ ਨਤ੍ਥਿ, ਕਿਂ ਨਾਮੇਤ’’ਨ੍ਤਿ. ਉਪਾਸਕੋ – ‘‘ਸਙ੍ਘਸ੍ਸ ਸੋ ਅਯ੍ਯਾ ਚਿਤ੍ਤੀਕਾਰੋ, ਨ ਏਤਸ੍ਸਾ’’ਤਿ ਆਹ. ਕਾਸਾਵਕਣ੍ਠਸਙ੍ਘਸ੍ਸ ਦਿਨ੍ਨਦਕ੍ਖਿਣਂ ਪਨ ਕੋ ਸੋਧੇਤੀਤਿ? ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਅਸੀਤਿ ਮਹਾਥੇਰਾ ਸੋਧੇਨ੍ਤੀਤਿ. ਅਪਿਚ ਥੇਰਾ ਚਿਰਪਰਿਨਿਬ੍ਬੁਤਾ, ਥੇਰੇ ਆਦਿਂ ਕਤ੍ਵਾ ਯਾਵਜ੍ਜ ਧਰਮਾਨਾ ਖੀਣਾਸਵਾ ਸੋਧੇਨ੍ਤਿਯੇਵ.

ਨ ਤ੍ਵੇਵਾਹਂ, ਆਨਨ੍ਦ, ਕੇਨਚਿ ਪਰਿਯਾਯੇਨ ਸਙ੍ਘਗਤਾਯ ਦਕ੍ਖਿਣਾਯਾਤਿ ਏਤ੍ਥ ਅਤ੍ਥਿ ਬੁਦ੍ਧਪ੍ਪਮੁਖੋ ਸਙ੍ਘੋ, ਅਤ੍ਥਿ ਏਤਰਹਿ ਸਙ੍ਘੋ, ਅਤ੍ਥਿ ਅਨਾਗਤੇ ਕਾਸਾਵਕਣ੍ਠਸਙ੍ਘੋ. ਬੁਦ੍ਧਪ੍ਪਮੁਖੋ ਸਙ੍ਘੋ ਏਤਰਹਿ ਸਙ੍ਘੇਨ ਨ ਉਪਨੇਤਬ੍ਬੋ, ਏਤਰਹਿ ਸਙ੍ਘੋ ਅਨਾਗਤੇ ਕਾਸਾਵਕਣ੍ਠਸਙ੍ਘੇਨ ਸਦ੍ਧਿਂ ਨ ਉਪਨੇਤਬ੍ਬੋ. ਤੇਨ ਤੇਨੇਵ ਸਮਯੇਨ ਕਥੇਤਬ੍ਬਂ. ਸਙ੍ਘਤੋ ਉਦ੍ਦਿਸਿਤ੍ਵਾ ਗਹਿਤਸਮਣਪੁਥੁਜ੍ਜਨੋ ਹਿ ਪਾਟਿਪੁਗ੍ਗਲਿਕੋ ਸੋਤਾਪਨ੍ਨੋ, ਸਙ੍ਘੇ ਚਿਤ੍ਤੀਕਾਰਂ ਕਾਤੁਂ ਸਕ੍ਕੋਨ੍ਤਸ੍ਸ ਪੁਥੁਜ੍ਜਨਸਮਣੇ ਦਿਨ੍ਨਂ ਮਹਪ੍ਫਲਤਰਂ. ਉਦ੍ਦਿਸਿਤ੍ਵਾ ਗਹਿਤੋ ਸੋਤਾਪਨ੍ਨੋ ਪਾਟਿਪੁਗ੍ਗਲਿਕੋ ਸਕਦਾਗਾਮੀਤਿਆਦੀਸੁਪਿ ਏਸੇਵ ਨਯੋ. ਸਙ੍ਘੇ ਚਿਤ੍ਤੀਕਾਰਂ ਕਾਤੁਂ ਸਕ੍ਕੋਨ੍ਤਸ੍ਸ ਹਿ ਖੀਣਾਸਵੇ ਦਿਨ੍ਨਦਾਨਤੋ ਉਦ੍ਦਿਸਿਤ੍ਵਾ ਗਹਿਤੇ ਦੁਸ੍ਸੀਲੇਪਿ ਦਿਨ੍ਨਂ ਮਹਪ੍ਫਲਤਰਮੇਵ. ਯਂ ਪਨ ਵੁਤ੍ਤਂ ‘‘ਸੀਲਵਤੋ ਖੋ, ਮਹਾਰਾਜ, ਦਿਨ੍ਨਂ ਮਹਪ੍ਫਲਂ, ਨੋ ਤਥਾ ਦੁਸ੍ਸੀਲੇ’’ਤਿ, ਤਂ ਇਮਂ ਨਯਂ ਪਹਾਯ ‘‘ਚਤਸ੍ਸੋ ਖੋ ਇਮਾਨਨ੍ਦ, ਦਕ੍ਖਿਣਾ ਵਿਸੁਦ੍ਧਿਯੋ’’ਤਿ ਇਮਸ੍ਮਿਂ ਚਤੁਕ੍ਕੇ ਦਟ੍ਠਬ੍ਬਂ.

੩੮੧. ਦਾਯਕਤੋ ਵਿਸੁਜ੍ਝਤੀਤਿ ਮਹਪ੍ਫਲਭਾਵੇਨ ਵਿਸੁਜ੍ਝਤਿ, ਮਹਪ੍ਫਲਾ ਹੋਤੀਤਿ ਅਤ੍ਥੋ. ਕਲ੍ਯਾਣਧਮ੍ਮੋਤਿ ਸੁਚਿਧਮ੍ਮੋ, ਨ ਪਾਪਧਮ੍ਮੋ. ਦਾਯਕਤੋ ਵਿਸੁਜ੍ਝਤੀਤਿ ਚੇਤ੍ਥ ਵੇਸ੍ਸਨ੍ਤਰਮਹਾਰਾਜਾ ਕਥੇਤਬ੍ਬੋ. ਸੋ ਹਿ ਜੂਜਕਬ੍ਰਾਹ੍ਮਣਸ੍ਸ ਦਾਰਕੇ ਦਤ੍ਵਾ ਪਥਵਿਂ ਕਮ੍ਪੇਸਿ.

ਪਟਿਗ੍ਗਾਹਕਤੋ ਵਿਸੁਜ੍ਝਤੀਤਿ ਏਤ੍ਥ ਕਲ੍ਯਾਣੀਨਦੀਮੁਖਦ੍ਵਾਰਵਾਸਿਕੇਵਟ੍ਟੋ ਕਥੇਤਬ੍ਬੋ. ਸੋ ਕਿਰ ਦੀਘਸੋਮਤ੍ਥੇਰਸ੍ਸ ਤਿਕ੍ਖਤ੍ਤੁਮ੍ਪਿ ਪਿਣ੍ਡਪਾਤਂ ਦਤ੍ਵਾ ਮਰਣਮਞ੍ਚੇ ਨਿਪਨ੍ਨੋ ‘‘ਅਯ੍ਯਸ੍ਸ ਮਂ ਦੀਘਸੋਮਤ੍ਥੇਰਸ੍ਸ ਦਿਨ੍ਨਪਿਣ੍ਡਪਾਤੋ ਉਦ੍ਧਰਤੀ’’ਤਿ ਆਹ.

ਨੇਵ ਦਾਯਕਤੋਤਿ ਏਤ੍ਥ ਵਡ੍ਢਮਾਨਵਾਸਿਲੁਦ੍ਦਕੋ ਕਥੇਤਬ੍ਬੋ. ਸੋ ਕਿਰ ਪੇਤਦਕ੍ਖਿਣਂ ਦੇਨ੍ਤੋ ਏਕਸ੍ਸ ਦੁਸ੍ਸੀਲਸ੍ਸੇਵ ਤਯੋ ਵਾਰੇ ਅਦਾਸਿ, ਤਤਿਯਵਾਰੇ ‘‘ਅਮਨੁਸ੍ਸੋ ਦੁਸ੍ਸੀਲੋ ਮਂ ਵਿਲੁਮ੍ਪਤੀ’’ਤਿ ਵਿਰਵਿ, ਏਕਸ੍ਸ ਸੀਲਵਨ੍ਤਭਿਕ੍ਖੁਨੋ ਦਤ੍ਵਾ ਪਾਪਿਤਕਾਲੇਯੇਵਸ੍ਸ ਪਾਪੁਣਿ.

ਦਾਯਕਤੋ ਚੇਵ ਵਿਸੁਜ੍ਝਤੀਤਿ ਏਤ੍ਥ ਅਸਦਿਸਦਾਨਂ ਕਥੇਤਬ੍ਬਂ.

ਸਾ ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤੀਤਿ ਏਤ੍ਥ ਯਥਾ ਨਾਮ ਛੇਕੋ ਕਸ੍ਸਕੋ ਅਸਾਰਮ੍ਪਿ ਖੇਤ੍ਤਂ ਲਭਿਤ੍ਵਾ ਸਮਯੇ ਕਸਿਤ੍ਵਾ ਪਂਸੁਂ ਅਪਨੇਤ੍ਵਾ ਸਾਰਬੀਜਾਨਿ ਪਤਿਟ੍ਠਪੇਤ੍ਵਾ ਰਤ੍ਤਿਨ੍ਦਿਵਂ ਆਰਕ੍ਖੇ ਪਮਾਦਂ ਅਨਾਪਜ੍ਜਨ੍ਤੋ ਅਞ੍ਞਸ੍ਸ ਸਾਰਖੇਤ੍ਤਤੋ ਅਧਿਕਤਰਂ ਧਞ੍ਞਂ ਲਭਤਿ, ਏਵਂ ਸੀਲਵਾ ਦੁਸ੍ਸੀਲਸ੍ਸ ਦਤ੍ਵਾਪਿ ਫਲਂ ਮਹਨ੍ਤਂ ਅਧਿਗਚ੍ਛਤੀਤਿ. ਇਮਿਨਾ ਉਪਾਯੇਨ ਸਬ੍ਬਪਦੇਸੁ ਵਿਸੁਜ੍ਝਨਂ ਵੇਦਿਤਬ੍ਬਂ.

ਵੀਤਰਾਗੋ ਵੀਤਰਾਗੇਸੂਤਿ ਏਤ੍ਥ ਵੀਤਰਾਗੋ ਨਾਮ ਅਨਾਗਾਮੀ, ਅਰਹਾ ਪਨ ਏਕਨ੍ਤਵੀਤਰਾਗੋਵ, ਤਸ੍ਮਾ ਅਰਹਤਾ ਅਰਹਤੋ ਦਿਨ੍ਨਦਾਨਮੇਵ ਅਗ੍ਗਂ. ਕਸ੍ਮਾ? ਭਵਾਲਯਸ੍ਸ ਭਵਪਤ੍ਥਨਾਯ ਅਭਾਵਤੋ. ਨਨੁ ਖੀਣਾਸਵੋ ਦਾਨਫਲਂ ਨ ਸਦ੍ਦਹਤੀਤਿ? ਦਾਨਫਲਂ ਸਦ੍ਦਹਨ੍ਤਾ ਖੀਣਾਸਵਸਦਿਸਾ ਨ ਹੋਨ੍ਤਿ. ਖੀਣਾਸਵੇਨ ਕਤਕਮ੍ਮਂ ਪਨ ਨਿਚ੍ਛਨ੍ਦਰਾਗਤ੍ਤਾ ਕੁਸਲਂ ਵਾ ਅਕੁਸਲਂ ਵਾ ਨ ਹੋਤਿ, ਕਿਰਿਯਟ੍ਠਾਨੇ ਤਿਟ੍ਠਤਿ, ਤੇਨੇਵਸ੍ਸ ਦਾਨਂ ਅਗ੍ਗਂ ਹੋਤੀਤਿ ਵਦਨ੍ਤਿ.

ਕਿਂ ਪਨ ਸਮ੍ਮਾਸਮ੍ਬੁਦ੍ਧੇਨ ਸਾਰਿਪੁਤ੍ਤਤ੍ਥੇਰਸ੍ਸ ਦਿਨ੍ਨਂ ਮਹਪ੍ਫਲਂ, ਉਦਾਹੁ ਸਾਰਿਪੁਤ੍ਤਤ੍ਥੇਰੇਨ ਸਮ੍ਮਾਸਮ੍ਬੁਦ੍ਧਸ੍ਸ ਦਿਨ੍ਨਨ੍ਤਿ. ਸਮ੍ਮਾਸਮ੍ਬੁਦ੍ਧੇਨ ਸਾਰਿਪੁਤ੍ਤਤ੍ਥੇਰਸ੍ਸ ਦਿਨ੍ਨਂ ਮਹਪ੍ਫਲਨ੍ਤਿ ਵਦਨ੍ਤਿ. ਸਮ੍ਮਾਸਮ੍ਬੁਦ੍ਧਞ੍ਹਿ ਠਪੇਤ੍ਵਾ ਅਞ੍ਞੋ ਦਾਨਸ੍ਸ ਵਿਪਾਕਂ ਜਾਨਿਤੁਂ ਸਮਤ੍ਥੋ ਨਾਮ ਨਤ੍ਥਿ. ਦਾਨਞ੍ਹਿ ਚਤੂਹਿ ਸਮ੍ਪਦਾਹਿ ਦਾਤੁਂ ਸਕ੍ਕੋਨ੍ਤਸ੍ਸ ਤਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦੇਤਿ. ਤਤ੍ਰਿਮਾ ਸਮ੍ਪਦਾ – ਦੇਯ੍ਯਧਮ੍ਮਸ੍ਸ ਧਮ੍ਮੇਨ ਸਮੇਨ ਪਰਂ ਅਪੀਲ਼ੇਤ੍ਵਾ ਉਪ੍ਪਨ੍ਨਤਾ, ਪੁਬ੍ਬਚੇਤਨਾਦਿਵਸੇਨ ਚੇਤਨਾਯ ਮਹਤ੍ਤਤਾ, ਖੀਣਾਸਵਭਾਵੇਨ ਗੁਣਾਤਿਰੇਕਤਾ, ਤਂਦਿਵਸਂ ਨਿਰੋਧਤੋ ਵੁਟ੍ਠਿਤਭਾਵੇਨ ਵਤ੍ਥੁਸਮ੍ਪਨ੍ਨਤਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਦਕ੍ਖਿਣਾਵਿਭਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਚਤੁਤ੍ਥਵਗ੍ਗਵਣ੍ਣਨਾ ਨਿਟ੍ਠਿਤਾ.