੯. ਬਾਲਪਣ੍ਡਿਤਸੁਤ੍ਤਵਣ੍ਣਨਾ
੨੪੬. ਏਵਂ ਮੇ ਸੁਤਨ੍ਤਿ ਬਾਲਪਣ੍ਡਿਤਸੁਤ੍ਤਂ. ਤਤ੍ਥ ਬਾਲਲਕ੍ਖਣਾਨੀਤਿ ਬਾਲੋ ਅਯਨ੍ਤਿ ਏਤੇਹਿ ਲਕ੍ਖਿਯਤਿ ਞਾਯਤੀਤਿ ਬਾਲਲਕ੍ਖਣਾਨਿ. ਤਾਨੇਵ ਤਸ੍ਸ ਸਞ੍ਜਾਨਨਕਾਰਣਾਨੀਤਿ ਬਾਲਨਿਮਿਤ੍ਤਾਨਿ. ਬਾਲਸ੍ਸ ਅਪਦਾਨਾਨੀਤਿ ਬਾਲਾਪਦਾਨਾਨਿ. ਦੁਚ੍ਚਿਨ੍ਤਿਤਚਿਨ੍ਤੀਤਿ ਚਿਨ੍ਤਯਨ੍ਤੋ ਅਭਿਜ੍ਝਾਬ੍ਯਾਪਾਦਮਿਚ੍ਛਾਦਸ੍ਸਨਵਸੇਨ ਦੁਚ੍ਚਿਨ੍ਤਿਤਮੇਵ ਚਿਨ੍ਤੇਤਿ. ਦੁਬ੍ਭਾਸਿਤਭਾਸੀਤਿ ਭਾਸਮਾਨੋਪਿ ਮੁਸਾਵਾਦਾਦਿਭੇਦਂ ਦੁਬ੍ਭਾਸਿਤਮੇਵ ਭਾਸਤਿ. ਦੁਕ੍ਕਟਕਮ੍ਮਕਾਰੀਤਿ ਕਰੋਨ੍ਤੋਪਿ ਪਾਣਾਤਿਪਾਤਾਦਿਵਸੇਨ ਦੁਕ੍ਕਟਕਮ੍ਮਮੇਵ ਕਰੋਤਿ. ਤਤ੍ਰ ਚੇਤਿ ਯਤ੍ਥ ਨਿਸਿਨ੍ਨੋ, ਤਸ੍ਸਂ ਪਰਿਸਤਿ. ਤਜ੍ਜਂ ਤਸ੍ਸਾਰੁਪ੍ਪਨ੍ਤਿ ਤਜ੍ਜਾਤਿਕਂ ਤਦਨੁਚ੍ਛਵਿਕਂ, ਪਞ੍ਚਨ੍ਨਂ ਵੇਰਾਨਂ ਦਿਟ੍ਠਧਮ੍ਮਕਸਮ੍ਪਰਾਯਿਕਆਦੀਨਵਪ੍ਪਟਿਸਂਯੁਤ੍ਤਨ੍ਤਿ ਅਧਿਪ੍ਪਾਯੋ. ਤਤ੍ਰਾਤਿ ਤਾਯ ਕਥਾਯ ਕਚ੍ਛਮਾਨਾਯ. ਬਾਲਨ੍ਤਿਆਦੀਨਿ ਸਾਮਿਅਤ੍ਥੇ ਉਪਯੋਗਵਚਨਂ.
੨੪੮. ਓਲਮ੍ਬਨ੍ਤੀਤਿ ਉਪਟ੍ਠਹਨ੍ਤਿ. ਸੇਸਪਦਦ੍ਵਯਂ ਤਸ੍ਸੇਵ ਵੇਵਚਨਂ, ਓਲਮ੍ਬਨਾਦਿਆਕਾਰੇਨ ਹਿ ਤਾਨਿ ਉਪਟ੍ਠਹਨ੍ਤਿ, ਤਸ੍ਮਾ ਏਵਂ ਵੁਤ੍ਤਂ. ਪਥਵਿਯਾ ਓਲਮ੍ਬਨ੍ਤੀਤਿ ਪਥਵਿਤਲੇ ਪਤ੍ਥਰਨ੍ਤਿ. ਸੇਸਪਦਦ੍ਵਯਂ ਤਸ੍ਸੇਵ ਵੇਵਚਨਂ. ਪਤ੍ਥਰਣਾਕਾਰੋਯੇਵ ਹੇਸ. ਤਤ੍ਰ, ਭਿਕ੍ਖਵੇ, ਬਾਲਸ੍ਸਾਤਿ ਤਸ੍ਮਿਂ ਉਪਟ੍ਠਾਨਾਕਾਰੇ ਆਪਾਥਗਤੇ ਬਾਲਸ੍ਸ ਏਵਂ ਹੋਤਿ.
੨੪੯. ਏਤਦਵੋਚਾਤਿ ਅਨੁਸਨ੍ਧਿਕੁਸਲੋ ਭਿਕ੍ਖੁ ‘‘ਨਿਰਯਸ੍ਸ ਉਪਮਾ ਕਾਤੁਂ ਨ ਸਕ੍ਕਾ’’ਤਿ ਨ ਭਗਵਾ ਵਦਤਿ, ‘‘ਨ ਸੁਕਰਾ’’ਤਿ ਪਨ ਵਦਤਿ, ਨ ਸੁਕਰਂ ਪਨ ਸਕ੍ਕਾ ਹੋਤਿ ਕਾਤੁਂ, ਹਨ੍ਦਾਹਂ ਦਸਬਲਂ ਉਪਮਂ ਕਾਰਾਪੇਮੀਤਿ ਚਿਨ੍ਤੇਤ੍ਵਾ ਏਤਂ ‘‘ਸਕ੍ਕਾ, ਭਨ੍ਤੇ’’ਤਿ ਵਚਨਂ ਅਵੋਚ. ਹਨੇਯ੍ਯੁਨ੍ਤਿ ਵਿਨਿਵਿਜ੍ਝਿਤ੍ਵਾ ਗਮਨਵਸੇਨ ਯਥਾ ਏਕਸ੍ਮਿਂ ਠਾਨੇ ਦ੍ਵੇ ਪਹਾਰਾ ਨਿਪਤਨ੍ਤਿ, ਏਵਂ ਹਨੇਯ੍ਯੁਂ. ਤੇਨਸ੍ਸ ਦ੍ਵੇ ਵਣਮੁਖਸਤਾਨਿ ਹੋਨ੍ਤਿ. ਇਤੋ ਉਤ੍ਤਰਿਪਿ ਏਸੇਵ ਨਯੋ.
੨੫੦. ਪਾਣਿਮਤ੍ਤਨ੍ਤਿ ਅਨ੍ਤੋਮੁਟ੍ਠਿਯਂ ਠਪਨਮਤ੍ਤਂ. ਸਙ੍ਖਮ੍ਪਿ ਨ ਉਪੇਤੀਤਿ ਗਣਨਮਤ੍ਤਮ੍ਪਿ ਨ ਗਚ੍ਛਤਿ. ਕਲਭਾਗਮ੍ਪੀਤਿ ਸਤਿਮਂ ਕਲਂ ਸਹਸ੍ਸਿਮਂ ਕਲਂ ਸਤਸਹਸ੍ਸਿਮਂ ਵਾ ਕਲਂ ਉਪਗਚ੍ਛਤੀਤਿਪਿ ਵਤ੍ਤਬ੍ਬਤਂ ਨ ਉਪੇਤਿ. ਉਪਨਿਧਮ੍ਪੀਤਿ ਉਪਨਿਕ੍ਖੇਪਨਮਤ੍ਤਮ੍ਪਿ ਨ ਉਪੇਤਿ, ਓਲੋਕੇਨ੍ਤਸ੍ਸ ਓਲੋਕਿਤਮਤ੍ਤਮ੍ਪਿ ਨਤ੍ਥਿ. ਤਤ੍ਤਂ ਅਯੋਖਿਲਨ੍ਤਿ ਤਿਗਾਵੁਤਂ ਅਤ੍ਤਭਾਵਂ ਸਮ੍ਪਜ੍ਜਲਿਤਾਯ ਲੋਹਪਥਵਿਯਾ ਉਤ੍ਤਾਨਕਂ ਨਿਪਜ੍ਜਾਪੇਤ੍ਵਾ ਤਸ੍ਸ ਦਕ੍ਖਿਣਹਤ੍ਥੇ ਤਾਲਪ੍ਪਮਾਣਂ ਅਯਸੂਲਂ ਪਵੇਸੇਨ੍ਤਿ, ਤਥਾ ਵਾਮਹਤ੍ਥਾਦੀਸੁ. ਯਥਾ ਚ ਉਤ੍ਤਾਨਕਂ ਨਿਪਜ੍ਜਾਪੇਤ੍ਵਾ, ਏਵਂ ਉਰੇਨਪਿ ਦਕ੍ਖਿਣਪਸ੍ਸੇਨਪਿ ਵਾਮਪਸ੍ਸੇਨਪਿ ਨਿਪਜ੍ਜਾਪੇਤ੍ਵਾ ਤਂ ਕਮ੍ਮਕਾਰਣਂ ਕਰੋਨ੍ਤਿਯੇਵ. ਸਂਵੇਸੇਤ੍ਵਾਤਿ ਸਮ੍ਪਜ੍ਜਲਿਤਾਯ ਲੋਹਪਥਵਿਯਾ ਤਿਗਾਵੁਤਂ ਅਤ੍ਤਭਾਵਂ ਨਿਪਜ੍ਜਾਪੇਤ੍ਵਾ. ਕੁਠਾਰੀਹੀਤਿ ਮਹਤੀਹਿ ਗੇਹਸ੍ਸ ਏਕਪਕ੍ਖਛਦਨਮਤ੍ਤਾਹਿ ਕੁਠਾਰੀਹਿ ਤਚ੍ਛਨ੍ਤਿ. ਲੋਹਿਤਂ ਨਦੀ ਹੁਤ੍ਵਾ ਸਨ੍ਦਤਿ, ਲੋਹਪਥਵਿਤੋ ਜਾਲਾ ਉਟ੍ਠਹਿਤ੍ਵਾ ਤਚ੍ਛਿਤਟ੍ਠਾਨਂ ਗਣ੍ਹਨ੍ਤਿ. ਮਹਾਦੁਕ੍ਖਂ ਉਪ੍ਪਜ੍ਜਤਿ, ਤਚ੍ਛਨ੍ਤਾ ਪਨ ਸੁਤ੍ਤਾਹਤਂ ਕਰਿਤ੍ਵਾ ਦਾਰੂ ਵਿਯ ਅਟ੍ਠਂਸਮ੍ਪਿ ਛਲ਼ਂਸਮ੍ਪਿ ਕਰੋਨ੍ਤਿ. ਵਾਸੀਹੀਤਿ ਮਹਾਸੁਪ੍ਪਪਮਾਣਾਹਿ ਵਾਸੀਹਿ. ਤਾਹਿ ਤਚ੍ਛਨ੍ਤਾ ਤਚਤੋ ਯਾਵ ਅਟ੍ਠੀਨਿ ਸਣਿਕਂ ਤਚ੍ਛਨ੍ਤਿ, ਤਚ੍ਛਿਤਂ ਤਚ੍ਛਿਤਂ ਪਟਿਪਾਕਤਿਕਂ ਹੋਤਿ. ਰਥੇ ਯੋਜੇਤ੍ਵਾਤਿ ਸਦ੍ਧਿਂ ਯੁਗਯੋਤ੍ਤਪਞ੍ਚਰਚਕ੍ਕਕੁਬ੍ਬਰਪਾਚਨੇਹਿ ਸਬ੍ਬਤੋ ਸਮ੍ਪਜ੍ਜਲਿਤੇ ਰਥੇ ਯੋਜੇਤ੍ਵਾ. ਮਹਨ੍ਤਨ੍ਤਿ ਮਹਾਕੂਟਾਗਾਰਪ੍ਪਮਾਣਂ. ਆਰੋਪੇਨ੍ਤੀਤਿ ਸਮ੍ਪਜ੍ਜਲਿਤੇਹਿ ਅਯਮੁਗ੍ਗਰੇਹਿ ਪੋਥੇਨ੍ਤਾ ਆਰੋਪੇਨ੍ਤਿ. ਸਕਿਮ੍ਪਿ ਉਦ੍ਧਨ੍ਤਿ ਸੁਪਕ੍ਕੁਥਿਤਾਯ ਉਕ੍ਖਲਿਯਾ ਪਕ੍ਖਿਤ੍ਤਤਣ੍ਡੁਲਾ ਵਿਯ ਉਦ੍ਧਂ ਅਧੋ ਤਿਰਿਯਞ੍ਚ ਗਚ੍ਛਤਿ.
ਭਾਗਸੋ ਮਿਤੋਤਿ ਭਾਗੇ ਠਪੇਤ੍ਵਾ ਠਪੇਤ੍ਵਾ ਵਿਭਤ੍ਤੋ. ਪਰਿਯਨ੍ਤੋਤਿ ਪਰਿਕ੍ਖਿਤ੍ਤੋ. ਅਯਸਾਤਿ ਉਪਰਿ ਅਯਪਟ੍ਟੇਨ ਛਾਦਿਤੋ.
ਸਮਨ੍ਤਾ ਯੋਜਨਸਤਂ ਫਰਿਤ੍ਵਾ ਤਿਟ੍ਠਤੀਤਿ ਏਵਂ ਫਰਿਤ੍ਵਾ ਤਿਟ੍ਠਤਿ, ਯਥਾ ਸਮਨ੍ਤਾ ਯੋਜਨਸਤੇ ਠਾਨੇ ਠਤ੍ਵਾ ਓਲੋਕੇਨ੍ਤਸ੍ਸ ਅਕ੍ਖੀਨਿ ਯਮਕਗੋਲ਼ਕਾ ਵਿਯ ਨਿਕ੍ਖਮਨ੍ਤਿ.
ਨ ਸੁਕਰਾ ਅਕ੍ਖਾਨੇਨ ਪਾਪੁਣਿਤੁਨ੍ਤਿ ਨਿਰਯੋ ਨਾਮ ਏਵਮ੍ਪਿ ਦੁਕ੍ਖੋ ਏਵਮ੍ਪਿ ਦੁਕ੍ਖੋਤਿ ਵਸ੍ਸਸਤਂ ਵਸ੍ਸਸਹਸ੍ਸਂ ਕਥੇਨ੍ਤੇਨਾਪਿ ਮਤ੍ਥਕਂ ਪਾਪੇਤ੍ਵਾ ਕਥੇਤੁਂ ਨ ਸੁਕਰਾਤਿ ਅਤ੍ਥੋ.
੨੫੧. ਦਨ੍ਤੁਲ੍ਲੇਹਕਨ੍ਤਿ ਦਨ੍ਤੇਹਿ ਉਲ੍ਲੇਹਿਤ੍ਵਾ, ਲੁਞ੍ਚਿਤ੍ਵਾਤਿ ਵੁਤ੍ਤਂ ਹੋਤਿ. ਰਸਾਦੋਤਿ ਰਸਗੇਧੇਨ ਪਰਿਭੁਤ੍ਤਰਸੋ.
੨੫੨. ਅਞ੍ਞਮਞ੍ਞਖਾਦਿਕਾਤਿ ਅਞ੍ਞਮਞ੍ਞਖਾਦਨਂ.
ਦੁਬ੍ਬਣ੍ਣੋਤਿ ਦੁਰੂਪੋ. ਦੁਦ੍ਦਸਿਕੋਤਿ ਦਾਰਕਾਨਂ ਭਯਾਪਨਤ੍ਥਂ ਕਤਯਕ੍ਖੋ ਵਿਯ ਦੁਦ੍ਦਸੋ. ਓਕੋਟਿਮਕੋਤਿ ਲਕੁਣ੍ਡਕੋ ਪਵਿਟ੍ਠਗੀਵੋ ਮਹੋਦਰੋ. ਕਾਣੋਤਿ ਏਕਕ੍ਖਿਕਾਣੋ ਵਾ ਉਭਯਕ੍ਖਿਕਾਣੋ ਵਾ. ਕੁਣੀਤਿ ਏਕਹਤ੍ਥਕੁਣੀ ਵਾ ਉਭਯਹਤ੍ਥਕੁਣੀ ਵਾ. ਪਕ੍ਖਹਤੋਤਿ ਪੀਠਸਪ੍ਪੀ. ਸੋ ਕਾਯੇਨਾਤਿ ਇਦਮਸ੍ਸ ਦੁਕ੍ਖਾਨੁਪਬਨ੍ਧਦਸ੍ਸਨਤ੍ਥਂ ਆਰਦ੍ਧਂ.
ਕਲਿਗ੍ਗਹੇਨਾਤਿ ਪਰਾਜਯੇਨ. ਅਧਿਬਨ੍ਧਂ ਨਿਗਚ੍ਛੇਯ੍ਯਾਤਿ ਯਸ੍ਮਾ ਬਹੁਂ ਜਿਤੋ ਸਬ੍ਬਸਾਪਤੇਯ੍ਯਮ੍ਪਿਸ੍ਸ ਨਪ੍ਪਹੋਤਿ, ਤਸ੍ਮਾ ਅਤ੍ਤਨਾਪਿ ਬਨ੍ਧਂ ਨਿਗਚ੍ਛੇਯ੍ਯ. ਕੇਵਲਾ ਪਰਿਪੂਰਾ ਬਾਲਭੂਮੀਤਿ ਬਾਲੋ ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾ ਨਿਰਯੇ ਨਿਬ੍ਬਤ੍ਤਤਿ, ਤਤ੍ਥ ਪਕ੍ਕਾਵਸੇਸੇਨ ਮਨੁਸ੍ਸਤ੍ਤਂ ਆਗਤੋ ਪਞ੍ਚਸੁ ਨੀਚਕੁਲੇਸੁ ਨਿਬ੍ਬਤ੍ਤਿਤ੍ਵਾ ਪੁਨ ਤੀਣਿ ਦੁਚ੍ਚਰਿਤਾਨਿ ਪੂਰੇਤ੍ਵਾ ਨਿਰਯੇ ਨਿਬ੍ਬਤ੍ਤਤੀਤਿ ਅਯਂ ਸਕਲਾ ਪਰਿਪੁਣ੍ਣਾ ਬਾਲਭੂਮਿ.
੨੫੩. ਪਣ੍ਡਿਤਲਕ੍ਖਣਾਨੀਤਿਆਦਿ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ. ਸੁਚਿਨ੍ਤਿਤਚਿਨ੍ਤੀਤਿਆਦੀਨਿ ਚੇਤ੍ਥ ਮਨੋਸੁਚਰਿਤਾਦੀਨਂ ਵਸੇਨ ਯੋਜੇਤਬ੍ਬਾਨਿ.
ਚਕ੍ਕਰਤਨਵਣ੍ਣਨਾ
੨੫੬. ਸੀਸਂ ਨ੍ਹਾਤਸ੍ਸਾਤਿ ਸੀਸੇਨ ਸਦ੍ਧਿਂ ਗਨ੍ਧੋਦਕੇਨ ਨ੍ਹਾਤਸ੍ਸ. ਉਪੋਸਥਿਕਸ੍ਸਾਤਿ ਸਮਾਦਿਨ੍ਨਉਪੋਸਥਙ੍ਗਸ੍ਸ. ਉਪਰਿਪਾਸਾਦਵਰਗਤਸ੍ਸਾਤਿ ਪਾਸਾਦਵਰਸ੍ਸ ਉਪਰਿ ਗਤਸ੍ਸ ਸੁਭੋਜਨਂ ਭੁਞ੍ਜਿਤ੍ਵਾ ਪਾਸਾਦਵਰਸ੍ਸ ਉਪਰਿ ਮਹਾਤਲੇ ਸਿਰੀਗਬ੍ਭਂ ਪਵਿਸਿਤ੍ਵਾ ਸੀਲਾਨਿ ਆਵਜ੍ਜਨ੍ਤਸ੍ਸ. ਤਦਾ ਕਿਰ ਰਾਜਾ ਪਾਤੋਵ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਮਹਾਦਾਨਂ ਦਤ੍ਵਾ ਪੁਨਪਿ ਸੋਲ਼ਸਹਿ ਗਨ੍ਧੋਦਕਘਟੇਹਿ ਸੀਸਂ ਨ੍ਹਾਯਿਤ੍ਵਾ ਕਤਪਾਤਰਾਸੋ ਸੁਦ੍ਧਂ ਉਤ੍ਤਰਾਸਙ੍ਗਂ ਏਕਂਸਂ ਕਤ੍ਵਾ ਉਪਰਿਪਾਸਾਦਸ੍ਸ ਸਿਰੀਸਯਨੇ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨੋ ਅਤ੍ਤਨੋ ਦਾਨਮਯਪੁਞ੍ਞਸਮੁਦਯਂ ਆਵਜ੍ਜੇਤ੍ਵਾ ਨਿਸੀਦਤਿ, ਅਯਂ ਸਬ੍ਬਚਕ੍ਕਵਤ੍ਤੀਨਂ ਧਮ੍ਮਤਾ.
ਤੇਸਂ ਤਂ ਆਵਜ੍ਜਨ੍ਤਾਨਂਯੇਵ ਵੁਤ੍ਤਪ੍ਪਕਾਰਪੁਞ੍ਞਕਮ੍ਮਪਚ੍ਚਯਂ ਉਤੁਸਮੁਟ੍ਠਾਨਂ ਨੀਲਮਣਿਸਙ੍ਘਾਟਸਦਿਸਂ ਪਾਚੀਨਸਮੁਦ੍ਦਜਲਤਲਂ ਛਿਨ੍ਦਮਾਨਂ ਵਿਯ ਆਕਾਸਂ ਅਲਙ੍ਕੁਰੁਮਾਨਂ ਵਿਯ ਦਿਬ੍ਬਂ ਚਕ੍ਕਰਤਨਂ ਪਾਤੁਭਵਤਿ. ਤਯਿਦਂ ਦਿਬ੍ਬਾਨੁਭਾਵਯੁਤ੍ਤਤ੍ਤਾ ਦਿਬ੍ਬਨ੍ਤਿ ਵੁਤ੍ਤਂ. ਸਹਸ੍ਸਂ ਅਸ੍ਸ ਅਰਾਨਨ੍ਤਿ ਸਹਸ੍ਸਾਰਂ. ਸਹ ਨੇਮਿਯਾ ਸਹ ਨਾਭਿਯਾ ਚਾਤਿ ਸਨੇਮਿਕਂ ਸਨਾਭਿਕਂ. ਸਬ੍ਬੇਹਿ ਆਕਾਰੇਹਿ ਪਰਿਪੂਰਨ੍ਤਿ ਸਬ੍ਬਾਕਾਰਪਰਿਪੂਰਂ.
ਤਤ੍ਥ ਚਕ੍ਕਞ੍ਚ ਤਂ ਰਤਿਜਨਨਟ੍ਠੇਨ ਰਤਨਞ੍ਚਾਤਿ ਚਕ੍ਕਰਤਨਂ. ਯਾਯ ਪਨ ਤਂ ਨਾਭਿਯਾ ‘‘ਸਨਾਭਿਕ’’ਨ੍ਤਿ ਵੁਤ੍ਤਂ, ਸਾ ਇਨ੍ਦਨੀਲਮਣਿਮਯਾ ਹੋਤਿ. ਮਜ੍ਝੇ ਪਨਸ੍ਸਾ ਰਜਤਮਯਾ ਪਨਾਲ਼ਿ, ਯਾਯ ਸੁਦ੍ਧਸਿਨਿਦ੍ਧਦਨ੍ਤਪਨ੍ਤਿਯਾ ਹਸਮਾਨਂ ਵਿਯ ਵਿਰੋਚਤਿ. ਮਜ੍ਝੇ ਛਿਦ੍ਦੇਨ ਵਿਯ ਚਨ੍ਦਮਣ੍ਡਲੇਨ ਉਭੋਸੁਪਿ ਬਾਹਿਰਨ੍ਤੇਸੁ ਰਜਤਪਟ੍ਟੇਨ ਕਤਪਰਿਕ੍ਖੇਪੋ ਹੋਤਿ. ਤੇਸੁ ਪਨਸ੍ਸਾ ਨਾਭਿਪਨਾਲ਼ਿ ਪਰਿਕ੍ਖੇਪਪਟ੍ਟੇਸੁ ਯੁਤ੍ਤਟ੍ਠਾਨੇ ਪਰਿਚ੍ਛੇਦਲੇਖਾ ਸੁਵਿਭਤ੍ਤਾਵ ਹੁਤ੍ਵਾ ਪਞ੍ਞਾਯਨ੍ਤਿ. ਅਯਂ ਤਾਵਸ੍ਸ ਨਾਭਿਯਾ ਸਬ੍ਬਾਕਾਰਪਰਿਪੂਰਤਾ.
ਯੇਹਿ ਪਨ ਤਂ ਅਰੇਹਿ ‘‘ਸਹਸ੍ਸਾਰ’’ਨ੍ਤਿ ਵੁਤ੍ਤਂ, ਤੇ ਸਤ੍ਤਰਤਨਮਯਾ ਸੂਰਿਯਰਸ੍ਮਿਯੋ ਵਿਯ ਪਭਾਸਮ੍ਪਨ੍ਨਾ ਹੋਨ੍ਤਿ. ਤੇਸਮ੍ਪਿ ਘਟਮਣਿਕਪਰਿਚ੍ਛੇਦਲੇਖਾਦੀਨਿ ਸੁਵਿਭਤ੍ਤਾਨੇਵ ਪਞ੍ਞਾਯਨ੍ਤਿ. ਅਯਮਸ੍ਸ ਅਰਾਨਂ ਸਬ੍ਬਾਕਾਰਪਰਿਪੂਰਤਾ.
ਯਾਯ ਪਨ ਤਂ ਨੇਮਿਯਾ ਸਹ ‘‘ਸਨੇਮਿਕ’’ਨ੍ਤਿ ਵੁਤ੍ਤਂ, ਸਾ ਬਾਲਸੂਰਿਯਰਸ੍ਮਿਕਲਾਪਸਿਰਿਂ ਅਵਹਸਮਾਨਾ ਵਿਯ ਸੁਰਤ੍ਤਸੁਦ੍ਧਸਿਨਿਦ੍ਧਪਵਾਲ਼ਮਯਾ ਹੋਤਿ. ਸਨ੍ਧੀਸੁ ਪਨਸ੍ਸਾ ਸਞ੍ਝਾਰਾਗਸਸ੍ਸਿਰਿਕਰਤ੍ਤਜਮ੍ਬੋਨਦਪਟ੍ਟਾ ਵਟ੍ਟਪਰਿਚ੍ਛੇਦਲੇਖਾ ਚ ਸੁਵਿਭਤ੍ਤਾ ਪਞ੍ਞਾਯਨ੍ਤਿ. ਅਯਮਸ੍ਸ ਨੇਮਿਯਾ ਸਬ੍ਬਾਕਾਰਪਰਿਪੂਰਤਾ.
ਨੇਮਿਮਣ੍ਡਲਪਿਟ੍ਠਿਯਂ ਪਨਸ੍ਸ ਦਸਨ੍ਨਂ ਦਸਨ੍ਨਂ ਅਰਾਨਮਨ੍ਤਰੇ ਧਮਨਵਂਸੋ ਵਿਯ ਅਨ੍ਤੋਸੁਸਿਰੋ ਛਿਦ੍ਦਮਣ੍ਡਲਚਿਤ੍ਤੋ ਵਾਤਗਾਹੀ ਪਵਾਲ਼ਦਣ੍ਡੋ ਹੋਤਿ, ਯਸ੍ਸ ਵਾਤੇਨ ਪਹਰਿਤਸ੍ਸ ਸੁਕੁਸਲਸਮਨ੍ਨਾਹਤਸ੍ਸ ਪਞ੍ਚਙ੍ਗਿਕਤੂਰਿਯਸ੍ਸ ਵਿਯ ਸਦ੍ਦੋ ਵਗ੍ਗੁ ਚ ਰਜਨੀਯੋ ਚ ਕਮਨੀਯੋ ਚ ਹੋਤਿ. ਤਸ੍ਸ ਖੋ ਪਨ ਪਵਾਲ਼ਦਣ੍ਡਸ੍ਸ ਉਪਰਿ ਸੇਤਚ੍ਛਤ੍ਤਂ, ਉਭੋਸੁ ਪਸ੍ਸੇਸੁ ਸਮੋਸਰਿਤਕੁਸੁਮਦਾਮਪਨ੍ਤਿਯੋਤਿ ਏਵਂ ਸਮੋਸਰਿਤਕੁਸੁਮਦਾਮਪਨ੍ਤਿਸਤਦ੍ਵਯਪਰਿਵਾਰੇਨ ਸੇਤਚ੍ਛਤ੍ਤਸਤਧਾਰਿਨਾ ਪਵਾਲ਼ਦਣ੍ਡਸਤੇਨ ਸਮੁਪਸੋਭਿਤਨੇਮਿਪਰਿਕ੍ਖੇਪਸ੍ਸ ਦ੍ਵਿਨ੍ਨਮ੍ਪਿ ਨਾਭਿਪਨਾਲ਼ੀਨਂ ਅਨ੍ਤੋ ਦ੍ਵੇ ਸੀਹਮੁਖਾਨਿ ਹੋਨ੍ਤਿ, ਯੇਹਿ ਤਾਲਕ੍ਖਨ੍ਧਪ੍ਪਮਾਣਾ ਪੁਣ੍ਣਚਨ੍ਦਕਿਰਣਕਲਾਪਸਸ੍ਸਿਰਿਕਾ ਤਰੁਣਰਵਿਸਮਾਨਰਤ੍ਤਕਮ੍ਬਲਗੇਣ੍ਡੁਕਪਰਿਯਨ੍ਤਾ ਆਕਾਸਗਙ੍ਗਾਗਤਿਸੋਭਂ ਅਭਿਭਵਮਾਨਾ ਵਿਯ ਦ੍ਵੇ ਮੁਤ੍ਤਕਲਾਪਾ ਓਲਮ੍ਬਨ੍ਤਿ, ਯੇਹਿ ਚਕ੍ਕਰਤਨੇਨ ਸਦ੍ਧਿਂ ਆਕਾਸੇ ਸਮ੍ਪਰਿਵਤ੍ਤਮਾਨੇਹਿ ਤੀਣਿ ਚਕ੍ਕਾਨਿ ਏਕਤੋ ਪਰਿਵਤ੍ਤਨ੍ਤਾਨਿ ਵਿਯ ਖਾਯਨ੍ਤਿ. ਅਯਮਸ੍ਸ ਸਬ੍ਬਸੋ ਸਬ੍ਬਾਕਾਰਪਰਿਪੂਰਤਾ.
ਤਂ ਪਨੇਤਂ ਏਵਂ ਸਬ੍ਬਾਕਾਰਪਰਿਪੂਰਂ ਪਕਤਿਯਾ ਸਾਯਮਾਸਭਤ੍ਤਂ ਭੁਞ੍ਜਿਤ੍ਵਾ ਅਤ੍ਤਨੋ ਅਤ੍ਤਨੋ ਘਰਦ੍ਵਾਰੇ ਪਞ੍ਞਤ੍ਤਾਸਨੇਸੁ ਨਿਸੀਦਿਤ੍ਵਾ ਪਵਤ੍ਤਕਥਾਸਲ੍ਲਾਪੇਸੁ ਮਨੁਸ੍ਸੇਸੁ ਵੀਥਿਚਤੁਕ੍ਕਾਦੀਸੁ ਕੀਲ਼ਮਾਨੇ ਦਾਰਕਜਨੇ ਨਾਤਿਉਚ੍ਚੇਨ ਨਾਤਿਨੀਚੇਨ ਵਨਸਣ੍ਡਮਤ੍ਥਕਾਸਨ੍ਨੇਨ ਆਕਾਸਪ੍ਪਦੇਸੇਨ ਉਪਸੋਭਯਮਾਨਂ ਵਿਯ ਰੁਕ੍ਖਸਾਖਗ੍ਗਾਨਿ, ਦ੍ਵਾਦਸਯੋਜਨਤੋ ਪਟ੍ਠਾਯ ਸੁਯ੍ਯਮਾਨੇਨ ਮਧੁਰਸ੍ਸਰੇਨ ਸਤ੍ਤਾਨਂ ਸੋਤਾਨਿ ਓਧਾਪਯਮਾਨਂ ਯੋਜਨਤੋ ਪਟ੍ਠਾਯ ਨਾਨਪ੍ਪਭਾਸਮੁਦਯਸਮੁਜ੍ਜਲੇਨ ਵਣ੍ਣੇਨ ਨਯਨਾਨਿ ਸਮਾਕਡ੍ਢਨ੍ਤਂ ਰਞ੍ਞੋ ਚਕ੍ਕਵਤ੍ਤਿਸ੍ਸ ਪੁਞ੍ਞਾਨੁਭਾਵਂ ਉਗ੍ਘੋਸਯਨ੍ਤਂ ਵਿਯ ਰਾਜਧਾਨਿਅਭਿਮੁਖਂ ਆਗਚ੍ਛਤਿ.
ਅਥ ਤਸ੍ਸ ਚਕ੍ਕਰਤਨਸ੍ਸ ਸਦ੍ਦਸ੍ਸਵਨੇਨੇਵ ‘‘ਕੁਤੋ ਨੁ ਖੋ, ਕਸ੍ਸ ਨੁ ਖੋ ਅਯਂ ਸਦ੍ਦੋ’’ਤਿ ਆਵਜ੍ਜਿਤਹਦਯਾਨਂ ਪੁਰਤ੍ਥਿਮਦਿਸਂ ਓਲੋਕਯਮਾਨਾਨਂ ਤੇਸਂ ਮਨੁਸ੍ਸਾਨਂ ਅਞ੍ਞਤਰੋ ਅਞ੍ਞਤਰਂ ਏਵਮਾਹ – ‘‘ਪਸ੍ਸ ਭੋ ਅਚ੍ਛਰਿਯਂ, ਅਯਂ ਪੁਣ੍ਣਚਨ੍ਦੋ ਪੁਬ੍ਬੇ ਏਕੋ ਉਗ੍ਗਚ੍ਛਤਿ, ਅਜ੍ਜ ਪਨ ਅਤ੍ਤਦੁਤਿਯੋ ਉਗ੍ਗਤੋ, ਏਤਞ੍ਹਿ ਰਾਜਹਂਸਮਿਥੁਨਂ ਵਿਯ ਪੁਣ੍ਣਚਨ੍ਦਮਿਥੁਨਂ ਪੁਬ੍ਬਾਪਰਿਯੇਨ ਗਗਨਤਲਂ ਅਭਿਲਙ੍ਘਤੀ’’ਤਿ. ਤਮਞ੍ਞੋ ਆਹ – ‘‘ਕਿਂ ਕਥੇਸਿ ਸਮ੍ਮ ਕਹਂ ਨਾਮ ਤਯਾ ਦ੍ਵੇ ਪੁਣ੍ਣਚਨ੍ਦਾ ਏਕਤੋ ਉਗ੍ਗਚ੍ਛਨ੍ਤਾ ਦਿਟ੍ਠਪੁਬ੍ਬਾ, ਨਨੁ ਏਸ ਤਪਨੀਯਰਂਸਿਧਾਰੋ ਪਿਞ੍ਛਰਕਿਰਣੋ ਦਿਵਾਕਰੋ ਉਗ੍ਗਤੋ’’ਤਿ. ਤਮਞ੍ਞੋ ਸਿਤਂ ਕਤ੍ਵਾ ਏਵਮਾਹ – ‘‘ਕਿਂ ਉਮ੍ਮਤ੍ਤੋਸਿ, ਨਨੁ ਖੋ ਇਦਾਨਿਮੇਵ ਦਿਵਾਕਰੋ ਅਤ੍ਥਙ੍ਗਤੋ, ਸੋ ਕਥਂ ਇਮਂ ਪੁਣ੍ਣਚਨ੍ਦਂ ਅਨੁਬਨ੍ਧਮਾਨੋ ਉਗ੍ਗਚ੍ਛਿਸ੍ਸਤਿ, ਅਦ੍ਧਾ ਪਨੇਤਂ ਅਨੇਕਰਤਨਪ੍ਪਭਾਸਮੁਜ੍ਜਲਂ ਏਕਸ੍ਸ ਪੁਞ੍ਞਵਤੋ ਵਿਮਾਨਂ ਭਵਿਸ੍ਸਤੀ’’ਤਿ. ਤੇ ਸਬ੍ਬੇਪਿ ਅਪਸਾਦਯਨ੍ਤਾ ਅਞ੍ਞੇ ਏਵਮਾਹਂਸੁ – ‘‘ਕਿਂ ਬਹੁਂ ਵਿਪ੍ਪਲਪਥ, ਨੇਵੇਸ ਪੁਣ੍ਣਚਨ੍ਦੋ, ਨ ਸੂਰਿਯੋ ਨ ਦੇਵਵਿਮਾਨਂ. ਨ ਹੇਤੇਸਂ ਏਵਰੂਪਾ ਸਿਰਿਸਮ੍ਪਤ੍ਤਿ ਅਤ੍ਥਿ, ਚਕ੍ਕਰਤਨੇਨ ਪਨੇਤੇਨ ਭਵਿਤਬ੍ਬ’’ਨ੍ਤਿ.
ਏਵਂ ਪਵਤ੍ਤਸਲ੍ਲਾਪਸ੍ਸੇਵ ਤਸ੍ਸ ਜਨਸ੍ਸ ਚਨ੍ਦਮਣ੍ਡਲਂ ਓਹਾਯ ਤਂ ਚਕ੍ਕਰਤਨਂ ਅਭਿਮੁਖਂ ਹੋਤਿ. ਤਤੋ ਤੇਹਿ ‘‘ਕਸ੍ਸ ਨੁ ਖੋ ਇਦਂ ਨਿਬ੍ਬਤ੍ਤ’’ਨ੍ਤਿ ਵੁਤ੍ਤੇ ਭਵਨ੍ਤਿ ਵਤ੍ਤਾਰੋ – ‘‘ਨ ਕਸ੍ਸਚਿ ਅਞ੍ਞਸ੍ਸ, ਨਨੁ ਅਮ੍ਹਾਕਂ ਰਾਜਾ ਪੂਰਿਤਚਕ੍ਕਵਤ੍ਤਿਵਤ੍ਤੋ, ਤਸ੍ਸੇਤਂ ਨਿਬ੍ਬਤ੍ਤ’’ਨ੍ਤਿ. ਅਥ ਸੋ ਚ ਮਹਾਜਨੋ, ਯੋ ਚ ਅਞ੍ਞੋ ਪਸ੍ਸਤਿ, ਸਬ੍ਬੋ ਚਕ੍ਕਰਤਨਮੇਵ ਅਨੁਗਚ੍ਛਤਿ. ਤਮ੍ਪਿ ਚਕ੍ਕਰਤਨਂ ਰਞ੍ਞੋਯੇਵ ਅਤ੍ਥਾਯ ਅਤ੍ਤਨੋ ਆਗਤਭਾਵਂ ਞਾਪੇਤੁਕਾਮਂ ਵਿਯ ਸਤ੍ਤਕ੍ਖਤ੍ਤੁਂ ਪਾਕਾਰਮਤ੍ਥਕੇਨੇਵ ਨਗਰਂ ਅਨੁਸਂਯਾਯਿਤ੍ਵਾ ਰਞ੍ਞੋ ਅਨ੍ਤੇਪੁਰਂ ਪਦਕ੍ਖਿਣਂ ਕਤ੍ਵਾ ਅਨ੍ਤੇਪੁਰਸ੍ਸ ਉਤ੍ਤਰਸੀਹਪਞ੍ਜਰਆਸਨ੍ਨੇ ਠਾਨੇ ਯਥਾ ਗਨ੍ਧਪੁਪ੍ਫਾਦੀਹਿ ਸੁਖੇਨ ਸਕ੍ਕਾ ਹੋਤਿ ਪੂਜੇਤੁਂ, ਏਵਂ ਅਕ੍ਖਾਹਤਂ ਵਿਯ ਤਿਟ੍ਠਤਿ.
ਏਵਂ ਠਿਤਸ੍ਸ ਪਨਸ੍ਸ ਵਾਤਪਾਨਚ੍ਛਿਦ੍ਦਾਦੀਹਿ ਪਵਿਸਿਤ੍ਵਾ ਨਾਨਾਵਿਰਾਗਰਤਨਪ੍ਪਭਾਸਮੁਜ੍ਜਲਂ ਅਨ੍ਤੋ ਪਾਸਾਦਂ ਅਲਙ੍ਕੁਰੁਮਾਨਂ ਪਭਾਸਮੂਹਂ ਦਿਸ੍ਵਾ ਦਸ੍ਸਨਤ੍ਥਾਯ ਸਞ੍ਜਾਤਾਭਿਲਾਸੋ ਰਾਜਾ ਹੋਤਿ. ਪਰਿਜਨੋਪਿਸ੍ਸ ਪਿਯਵਚਨਪਾਭਤੇਨ ਆਗਨ੍ਤ੍ਵਾ ਤਮਤ੍ਥਂ ਨਿਵੇਦੇਤਿ. ਅਥ ਰਾਜਾ ਬਲਵਪੀਤਿਪਾਮੋਜ੍ਜਫੁਟਸਰੀਰੋ ਪਲ੍ਲਙ੍ਕਂ ਮੋਚੇਤ੍ਵਾ ਉਟ੍ਠਾਯਾਸਨਾ ਸੀਹਪਞ੍ਜਰਸਮੀਪਂ ਗਨ੍ਤ੍ਵਾ ਤਂ ਚਕ੍ਕਰਤਨਂ ਦਿਸ੍ਵਾ ‘‘ਸੁਤਂ ਖੋ ਪਨ ਮੇਤ’’ਨ੍ਤਿਆਦਿਕਂ ਚਿਨ੍ਤਨਂ ਚਿਨ੍ਤੇਸਿ. ਤੇਨ ਵੁਤ੍ਤਂ – ‘‘ਦਿਸ੍ਵਾਨ ਰਞ੍ਞੋ ਖਤ੍ਤਿਯਸ੍ਸ…ਪੇ… ਅਸ੍ਸਂ ਨੁ ਖੋ ਅਹਂ ਰਾਜਾ ਚਕ੍ਕਵਤ੍ਤੀ’’ਤਿ. ਤਤ੍ਥ ਸੋ ਹੋਤਿ ਰਾਜਾ ਚਕ੍ਕਵਤ੍ਤੀਤਿ ਕਿਤ੍ਤਾਵਤਾ ਚਕ੍ਕਵਤ੍ਤੀ ਹੋਤਿ? ਏਕਙ੍ਗੁਲਦ੍ਵਙ੍ਗੁਲਮਤ੍ਤਮ੍ਪਿ ਚਕ੍ਕਰਤਨੇ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਪਵਤ੍ਤੇ.
ਇਦਾਨਿ ਤਸ੍ਸ ਪਵਤ੍ਤਾਪਨਤ੍ਥਂ ਯਂ ਕਾਤਬ੍ਬਂ ਤਂ ਦਸ੍ਸੇਨ੍ਤੋ ਅਥ ਖੋ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਉਟ੍ਠਾਯਾਸਨਾਤਿ ਨਿਸਿਨ੍ਨਾਸਨਤੋ ਉਟ੍ਠਹਿਤ੍ਵਾ ਚਕ੍ਕਰਤਨਸਮੀਪਂ ਆਗਨ੍ਤ੍ਵਾ. ਭਿਙ੍ਕਾਰਂ ਗਹੇਤ੍ਵਾਤਿ ਹਤ੍ਥਿਸੋਣ੍ਡਸਦਿਸਪਨਾਲ਼ਿਂ ਸੁਵਣ੍ਣਭਿਙ੍ਕਾਰਂ ਉਕ੍ਖਿਪਿਤ੍ਵਾ ਵਾਮਹਤ੍ਥੇਨ ਉਦਕਂ ਗਹੇਤ੍ਵਾ. ਪਵਤ੍ਤਤੁ ਭਵਂ ਚਕ੍ਕਰਤਨਂ, ਅਭਿਵਿਜਿਨਾਤੁ ਭਵਂ ਚਕ੍ਕਰਤਨਨ੍ਤਿ. ਅਨ੍ਵਦੇਵ ਰਾਜਾ ਚਕ੍ਕਵਤ੍ਤੀ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯਾਤਿ ਸਬ੍ਬਚਕ੍ਕਵਤ੍ਤੀਨਞ੍ਹਿ ਉਦਕੇਨ ਅਭਿਸਿਞ੍ਚਿਤ੍ਵਾ ‘‘ਅਭਿਵਿਜਾਨਾਤੁ ਭਵਂ ਚਕ੍ਕਰਤਨ’’ਨ੍ਤਿ ਵਚਨਸਮਨਨ੍ਤਰਮੇਵ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਚਕ੍ਕਰਤਨਂ ਪਵਤ੍ਤਤਿ, ਯਸ੍ਸ ਪਵਤ੍ਤਿਸਮਕਾਲਮੇਵ ਸੋ ਰਾਜਾ ਚਕ੍ਕਵਤ੍ਤੀ ਨਾਮ ਹੋਤਿ.
ਪਵਤ੍ਤੇ ਪਨ ਚਕ੍ਕਰਤਨੇ ਤਂ ਅਨੁਬਨ੍ਧਮਾਨੋਵ ਰਾਜਾ ਚਕ੍ਕਵਤ੍ਤੀ ਯਾਨਵਰਂ ਆਰੁਯ੍ਹ ਵੇਹਾਸਂ ਅਬ੍ਭੁਗ੍ਗਚ੍ਛਤਿ, ਅਥਸ੍ਸ ਛਤ੍ਤਚਾਮਰਾਦਿਹਤ੍ਥੋ ਪਰਿਜਨੋ ਚੇਵ ਅਨ੍ਤੇਪੁਰਜਨੋ ਚ. ਤਤੋ ਨਾਨਪ੍ਪਕਾਰਕਞ੍ਚੁਕਕਵਚਾਦਿਸਨ੍ਨਾਹਵਿਭੂਸਿਤੇਨ ਵਿਵਿਧਾਹਰਣਪ੍ਪਭਾਸਮੁਜ੍ਜਲਿਤੇਨ ਸਮੁਸ੍ਸਿਤਦ੍ਧਜਪਟਾਕਪਟਿਮਣ੍ਡਿਤੇਨ ਅਤ੍ਤਨੋ ਅਤ੍ਤਨੋ ਬਲਕਾਯੇਨ ਸਦ੍ਧਿਂ ਉਪਰਾਜਸੇਨਾਪਤਿ ਪਭੂਤਯੋਪਿ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਰਾਜਾਨਮੇਵ ਪਰਿਵਾਰੇਨ੍ਤਿ. ਰਾਜਯੁਤ੍ਤਾ ਪਨ ਜਨਸਙ੍ਗਹਤ੍ਥਂ ਨਗਰਵੀਥੀਸੁ ਭੇਰਿਯੋ ਚਰਾਪੇਨ੍ਤਿ ‘‘ਤਾਤਾ ਅਮ੍ਹਾਕਂ ਰਞ੍ਞੋ ਚਕ੍ਕਰਤਨਂ ਨਿਬ੍ਬਤ੍ਤਂ, ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪੇਨ ਮਣ੍ਡਿਤਪ੍ਪਸਾਧਿਤਾ ਸਨ੍ਨਿਪਤਥਾ’’ਤਿ. ਮਹਾਜਨੋ ਪਨ ਪਕਤਿਯਾ ਚਕ੍ਕਰਤਨਸਦ੍ਦੇਨੇਵ ਸਬ੍ਬਕਿਚ੍ਚਾਨਿ ਪਹਾਯ ਗਨ੍ਧਪੁਪ੍ਫਾਦੀਨਿ ਆਦਾਯ ਸਨ੍ਨਿਪਤਿਤੋਵ, ਸੋਪਿ ਸਬ੍ਬੋ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਰਾਜਾਨਮੇਵ ਪਰਿਵਾਰੇਤਿ. ਯਸ੍ਸ ਯਸ੍ਸ ਹਿ ਰਞ੍ਞਾ ਸਦ੍ਧਿਂ ਗਨ੍ਤੁਕਾਮਤਾ ਉਪ੍ਪਜ੍ਜਤਿ, ਸੋ ਸੋ ਆਕਾਸਗਤੋਵ ਹੋਤਿ. ਏਵਂ ਦ੍ਵਾਦਸਯੋਜਨਾਯਾਮਵਿਤ੍ਥਾਰਾ ਪਰਿਸਾ ਹੋਤਿ. ਤਤ੍ਥ ਏਕਪੁਰਿਸੋਪਿ ਛਿਨ੍ਨਭਿਨ੍ਨਸਰੀਰੋ ਵਾ ਕਿਲਿਟ੍ਠਵਤ੍ਥੋ ਵਾ ਨਤ੍ਥਿ. ਸੁਚਿਪਰਿਵਾਰੋ ਹਿ ਰਾਜਾ ਚਕ੍ਕਵਤ੍ਤੀ. ਚਕ੍ਕਵਤ੍ਤਿਪਰਿਸਾ ਨਾਮ ਵਿਜ੍ਜਾਧਰਪਰਿਸਾ ਵਿਯ ਆਕਾਸੇ ਗਚ੍ਛਮਾਨਾ ਇਨ੍ਦਨੀਲਮਣਿਤਲੇ ਵਿਪ੍ਪਕਿਣ੍ਣਰਤਨਸਦਿਸਾ ਹੋਤਿ. ਤੇਨ ਵੁਤ੍ਤਂ ‘‘ਅਨ੍ਵਦੇਵ ਰਾਜਾ ਚਕ੍ਕਵਤ੍ਤੀ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯਾ’’ਤਿ.
ਤਮ੍ਪਿ ਚਕ੍ਕਰਤਨਂ ਰੁਕ੍ਖਗ੍ਗਾਨਂ ਉਪਰੂਪਰਿ ਨਾਤਿਉਚ੍ਚੇਨ ਗਗਨਪਦੇਸੇਨ ਪਵਤ੍ਤਤਿ, ਯਥਾ ਰੁਕ੍ਖਾਨਂ ਪੁਪ੍ਫਫਲਪਲ੍ਲਵੇਹਿ ਅਤ੍ਥਿਕਾ ਤਾਨਿ ਸੁਖੇਨ ਗਹੇਤੁਂ ਸਕ੍ਕੋਨ੍ਤਿ, ਭੂਮਿਯਂ ਠਿਤਾ ‘‘ਏਸ ਰਾਜਾ, ਏਸ ਉਪਰਾਜਾ, ਏਸ ਸੇਨਾਪਤੀ’’ਤਿ ਸਲ੍ਲਕ੍ਖੇਤੁਂ ਸਕ੍ਕੋਨ੍ਤਿ. ਠਾਨਾਦੀਸੁਪਿ ਇਰਿਯਾਪਥੇਸੁ ਯੋ ਯੇਨ ਇਚ੍ਛਤਿ, ਸੋ ਤੇਨੇਵ ਗਚ੍ਛਤਿ. ਚਿਤ੍ਤਕਮ੍ਮਾਦਿਸਿਪ੍ਪਪਸੁਤਾ ਚੇਤ੍ਥ ਅਤ੍ਤਨੋ ਅਤ੍ਤਨੋ ਕਿਚ੍ਚਂ ਕਰੋਨ੍ਤਾਯੇਵ ਗਚ੍ਛਨ੍ਤਿ. ਯਥੇਵ ਹਿ ਭੂਮਿਯਂ, ਤਥਾ ਨੇਸਂ ਸਬ੍ਬਕਿਚ੍ਚਾਨਿ ਆਕਾਸੇ ਇਜ੍ਝਨ੍ਤਿ. ਏਵਂ ਚਕ੍ਕਵਤ੍ਤਿਪਰਿਸਂ ਗਹੇਤ੍ਵਾ ਤਂ ਚਕ੍ਕਰਤਨਂ ਵਾਮਪਸ੍ਸੇਨ ਸਿਨੇਰੁਂ ਪਹਾਯ ਸਮੁਦ੍ਦਸ੍ਸ ਉਪਰਿਭਾਗੇਨ ਅਟ੍ਠਯੋਜਨਸਹਸ੍ਸਪ੍ਪਮਾਣਂ ਪੁਬ੍ਬਵਿਦੇਹਂ ਗਚ੍ਛਤਿ.
ਤਤ੍ਥ ਯੋ ਵਿਨਿਬ੍ਬੇਧੇਨ ਦ੍ਵਾਦਸਯੋਜਨਾਯ ਪਰਿਕ੍ਖੇਪਤੋ ਛਤ੍ਤਿਂਸਯੋਜਨਪਰਿਸਾਯ ਸਨ੍ਨਿਵੇਸਕ੍ਖਮੋ ਸੁਲਭਾਹਾਰੂਪਕਰਣੋ ਛਾਯੂਦਕਸਮ੍ਪਨ੍ਨੋ ਸੁਚਿਸਮਤਲੋ ਰਮਣੀਯੋ ਭੂਮਿਭਾਗੋ, ਤਸ੍ਸ ਉਪਰਿਭਾਗੇ ਤਂ ਚਕ੍ਕਰਤਨਂ ਆਕਾਸੇ ਅਕ੍ਖਾਹਤਂ ਵਿਯ ਤਿਟ੍ਠਤਿ. ਅਥ ਤੇਨ ਸਞ੍ਞਾਣੇਨ ਸੋ ਮਹਾਜਨੋ ਓਤਰਿਤ੍ਵਾ ਯਥਾਰੁਚਿ ਨ੍ਹਾਨਭੋਜਨਾਦੀਨਿ ਸਬ੍ਬਕਿਚ੍ਚਾਨਿ ਕਰੋਨ੍ਤੋ ਵਾਸਂ ਕਪ੍ਪੇਤਿ, ਤੇਨ ਵੁਤ੍ਤਂ ‘‘ਯਸ੍ਮਿਂ ਖੋ ਪਨ, ਭਿਕ੍ਖਵੇ, ਪਦੇਸੇ ਤਂ ਚਕ੍ਕਰਤਨਂ ਪਤਿਟ੍ਠਾਤਿ, ਤਤ੍ਥ ਰਾਜਾ ਚਕ੍ਕਵਤ੍ਤੀ ਵਾਸਂ ਉਪੇਤਿ ਸਦ੍ਧਿਂ ਚਤੁਰਙ੍ਗਿਨਿਯਾ ਸੇਨਾਯਾ’’ਤਿ.
ਏਵਂ ਵਾਸਂ ਉਪਗਤੇ ਚਕ੍ਕਵਤ੍ਤਿਮ੍ਹਿ ਯੇ ਤਤ੍ਥ ਰਾਜਾਨੋ, ਤੇ ‘‘ਪਰਚਕ੍ਕਂ ਆਗਤ’’ਨ੍ਤਿ ਸੁਤ੍ਵਾਪਿ ਨ ਬਲਕਾਯਂ ਸਨ੍ਨਿਪਾਤੇਤ੍ਵਾ ਯੁਦ੍ਧਸਜ੍ਜਾ ਹੋਨ੍ਤਿ. ਚਕ੍ਕਰਤਨਸ੍ਸ ਉਪ੍ਪਤ੍ਤਿਸਮਨਨ੍ਤਰਮੇਵ ਨਤ੍ਥਿ ਸੋ ਸਤ੍ਤੋ ਨਾਮ, ਯੋ ਪਚ੍ਚਤ੍ਥਿਕਸਞ੍ਞਾਯ ਰਾਜਾਨਂ ਆਰਬ੍ਭ ਆਵੁਧਂ ਉਕ੍ਖਿਪਿਤੁਂ ਵਿਸਹੇਯ੍ਯ. ਅਯਮਨੁਭਾਵੋ ਚਕ੍ਕਰਤਨਸ੍ਸ.
ਚਕ੍ਕਾਨੁਭਾਵੇਨ ਹਿ ਤਸ੍ਸ ਰਞ੍ਞੋ,
ਅਰੀ ਅਸੇਸਾ ਦਮਥਂ ਉਪੇਨ੍ਤਿ;
ਅਰਿਨ੍ਦਮਂ ਨਾਮ ਨਰਾਧਿਪਸ੍ਸ,
ਤੇਨੇਵ ਤਂ ਵੁਚ੍ਚਤਿ ਤਸ੍ਸ ਚਕ੍ਕਂ.
ਤਸ੍ਮਾ ਸਬ੍ਬੇਪਿ ਤੇ ਰਾਜਾਨੋ ਅਤ੍ਤਨੋ ਅਤ੍ਤਨੋ ਰਜ੍ਜਸਿਰਿਵਿਭਵਾਨੁਰੂਪਂ ਪਾਭਤਂ ਗਹੇਤ੍ਵਾ ਤਂ ਰਾਜਾਨਂ ਉਪਗਮ੍ਮ ਓਨਤਸਿਰਾ ਅਤ੍ਤਨੋ ਮੋਲ਼ਿਯਮਣਿਪ੍ਪਭਾਭਿਸੇਕੇਨਸ੍ਸ ਪਾਦਪੂਜਂ ਕਰੋਨ੍ਤੋ ‘‘ਏਹਿ ਖੋ ਮਹਾਰਾਜਾ’’ਤਿਆਦੀਹਿ ਵਚਨੇਹਿ ਤਸ੍ਸ ਕਿਙ੍ਕਾਰਪ੍ਪਟਿਸ੍ਸਾਵਿਤਂ ਆਪਜ੍ਜਨ੍ਤਿ. ਤੇਨ ਵੁਤ੍ਤਂ ਯੇ ਖੋ ਪਨ, ਭਿਕ੍ਖਵੇ, ਪੁਰਤ੍ਥਿਮਾਯ…ਪੇ… ਅਨੁਸਾਸ ਮਹਾਰਾਜਾਤਿ.
ਤਤ੍ਥ ਸ੍ਵਾਗਤਨ੍ਤਿ ਸੁਆਗਮਨਂ. ਏਕਸ੍ਮਿਞ੍ਹਿ ਆਗਤੇ ਸੋਚਨ੍ਤਿ, ਗਤੇ ਨਨ੍ਦਨ੍ਤਿ. ਏਕਸ੍ਮਿਂ ਆਗਤੇ ਨਨ੍ਦਨ੍ਤਿ, ਗਤੇ ਸੋਚਨ੍ਤਿ. ਤਾਦਿਸੋ ਤ੍ਵਂ ਆਗਤਨਨ੍ਦਨੋ ਗਮਨਸੋਚਨੋ, ਤਸ੍ਮਾ ਤਵ ਆਗਮਨਂ ਸੁਆਗਮਨਨ੍ਤਿ ਵੁਤ੍ਤਂ ਹੋਤਿ. ਏਵਂ ਵੁਤ੍ਤੇ ਪਨ ਚਕ੍ਕਵਤ੍ਤੀ ਨਾਪਿ ‘‘ਏਤ੍ਤਕਂ ਨਾਮ ਮੇ ਅਨੁਵਸ੍ਸਂ ਬਲਿਂ ਉਪਕਪ੍ਪੇਥਾ’’ਤਿ ਵਦਤਿ, ਨਾਪਿ ਅਞ੍ਞਸ੍ਸ ਭੋਗਂ ਅਚ੍ਛਿਨ੍ਦਿਤ੍ਵਾ ਅਞ੍ਞਸ੍ਸ ਦੇਤਿ. ਅਤ੍ਤਨੋ ਪਨ ਧਮ੍ਮਰਾਜਭਾਵਸ੍ਸ ਅਨੁਰੂਪਾਯ ਪਞ੍ਞਾਯ ਪਾਣਾਤਿਪਾਤਾਦੀਨਿ ਉਪਪਰਿਕ੍ਖਿਤ੍ਵਾ ਪੇਮਨੀਯੇਨ ਮਞ੍ਜੁਨਾ ਸਰੇਨ ‘‘ਪਸ੍ਸਥ ਤਾਤਾ, ਪਾਣਾਤਿਪਾਤੋ ਨਾਮੇਸ ਆਸੇਵਿਤੋ ਭਾਵਿਤੋ ਬਹੁਲੀਕਤੋ ਨਿਰਯਸਂਵਤ੍ਤਨਿਕੋ ਹੋਤੀ’’ਤਿਆਦਿਨਾ ਨਯੇਨ ਧਮ੍ਮਂ ਦੇਸੇਤ੍ਵਾ ‘‘ਪਾਣੋ ਨ ਹਨ੍ਤਬ੍ਬੋ’’ਤਿਆਦਿਕਂ ਓਵਾਦਂ ਦੇਤਿ. ਤੇਨ ਵੁਤ੍ਤਂ ਰਾਜਾ ਚਕ੍ਕਵਤ੍ਤੀ ਏਵਮਾਹ ਪਾਣੋ ਨ ਹਨ੍ਤਬ੍ਬੋ…ਪੇ… ਯਥਾਭੁਤ੍ਤਞ੍ਚ ਭੁਞ੍ਜਥਾਤਿ.
ਕਿਂ ਪਨ ਸਬ੍ਬੇਪਿ ਰਞ੍ਞੋ ਇਮਂ ਓਵਾਦਂ ਗਣ੍ਹਨ੍ਤੀਤਿ. ਬੁਦ੍ਧਸ੍ਸਪਿ ਤਾਵ ਸਬ੍ਬੇ ਨ ਗਣ੍ਹਨ੍ਤਿ, ਰਞ੍ਞੋ ਕਿਂ ਗਣ੍ਹਿਸ੍ਸਨ੍ਤਿ. ਤਸ੍ਮਾ ਯੇ ਪਣ੍ਡਿਤਾ ਵਿਭਾਵਿਨੋ, ਤੇ ਗਣ੍ਹਨ੍ਤਿ. ਸਬ੍ਬੇ ਪਨ ਅਨੁਯਨ੍ਤਾ ਭਵਨ੍ਤਿ. ਤਸ੍ਮਾ ‘‘ਯੇ ਖੋ ਪਨ, ਭਿਕ੍ਖਵੇ’’ਤਿਆਦਿਮਾਹ.
ਅਥ ਤਂ ਚਕ੍ਕਰਤਨਂ ਏਵਂ ਪੁਬ੍ਬਵਿਦੇਹਵਾਸੀਨਂ ਓਵਾਦੇ ਦਿਨ੍ਨੇ ਕਤਪਾਤਰਾਸੇ ਚਕ੍ਕਵਤ੍ਤੀਬਲੇਨ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪੁਰਤ੍ਥਿਮਂ ਸਮੁਦ੍ਦਂ ਅਜ੍ਝੋਗਾਹਤਿ. ਯਥਾ ਯਥਾ ਚ ਤਂ ਅਜ੍ਝੋਗਾਹਤਿ, ਤਥਾ ਤਥਾ ਅਗਦਗਨ੍ਧਂ ਘਾਯਿਤ੍ਵਾ ਸਂਖਿਤ੍ਤਫਣੋ ਨਾਗਰਾਜਾ ਵਿਯ ਸਂਖਿਤ੍ਤਊਮਿਵਿਪ੍ਫਾਰਂ ਹੁਤ੍ਵਾ ਓਗਚ੍ਛਮਾਨਂ ਮਹਾਸਮੁਦ੍ਦਸਲਿਲਂ ਯੋਜਨਮਤ੍ਤਂ ਓਗਨ੍ਤ੍ਵਾ ਅਨ੍ਤੋਸਮੁਦ੍ਦੇ ਵੇਲ਼ੁਰਿਯਭਿਤ੍ਤਿ ਵਿਯ ਤਿਟ੍ਠਤਿ. ਤਙ੍ਖਣਞ੍ਞੇਵ ਚ ਤਸ੍ਸ ਰਞ੍ਞੋ ਪੁਞ੍ਞਸਿਰਿਂ ਦਟ੍ਠੁਕਾਮਾਨਿ ਵਿਯ ਮਹਾਸਮੁਦ੍ਦਤਲੇ ਵਿਪ੍ਪਕਿਣ੍ਣਾਨਿ ਨਾਨਾਰਤਨਾਨਿ ਤਤੋ ਤਤੋ ਆਗਨ੍ਤ੍ਵਾ ਤਂ ਪਦੇਸਂ ਪੂਰਯਨ੍ਤਿ. ਅਥ ਸਾ ਰਾਜਪਰਿਸਾ ਤਂ ਨਾਨਾਰਤਨਪਰਿਪੂਰਂ ਮਹਾਸਮੁਦ੍ਦਤਲਂ ਦਿਸ੍ਵਾ ਯਥਾਰੁਚਿ ਉਚ੍ਛਙ੍ਗਾਦੀਹਿ ਆਦਿਯਤਿ, ਯਥਾਰੁਚਿ ਆਦਿਨ੍ਨਰਤਨਾਯ ਪਨ ਪਰਿਸਾਯ ਤਂ ਚਕ੍ਕਰਤਨਂ ਪਟਿਨਿਵਤ੍ਤਤਿ. ਪਟਿਨਿਵਤ੍ਤਮਾਨੇ ਚ ਤਸ੍ਮਿਂ ਪਰਿਸਾ ਅਗ੍ਗਤੋ ਹੋਤਿ, ਮਜ੍ਝੇ ਰਾਜਾ, ਅਨ੍ਤੇ ਚਕ੍ਕਰਤਨਂ. ਤਮ੍ਪਿ ਜਲਨਿਧਿਜਲਂ ਪਲੋਭਿਯਮਾਨਮਿਵ ਚਕ੍ਕਰਤਨਸਿਰਿਯਾ, ਅਸਹਮਾਨਮਿਵ ਚ ਤੇਨ ਵਿਯੋਗਂ, ਨੇਮਿਮਣ੍ਡਲਪਰਿਯਨ੍ਤਂ ਅਭਿਹਨਨ੍ਤਂ ਨਿਰਨ੍ਤਰਮੇਵ ਉਪਗਚ੍ਛਤਿ.
੨੫੭. ਏਵਂ ਰਾਜਾ ਚਕ੍ਕਵਤ੍ਤੀ ਪੁਰਤ੍ਥਿਮਸਮੁਦ੍ਦਪਰਿਯਨ੍ਤਂ ਪੁਬ੍ਬਵਿਦੇਹਂ ਅਭਿਵਿਜਿਨਿਤ੍ਵਾ ਦਕ੍ਖਿਣਸਮੁਦ੍ਦਪਰਿਯਨ੍ਤਂ ਜਮ੍ਬੁਦੀਪਂ ਵਿਜੇਤੁਕਾਮੋ ਚਕ੍ਕਰਤਨਦੇਸਿਤੇਨ ਮਗ੍ਗੇਨ ਦਕ੍ਖਿਣਸਮੁਦ੍ਦਾਭਿਮੁਖੋ ਗਚ੍ਛਤਿ. ਤੇਨ ਵੁਤ੍ਤਂ ਅਥ ਖੋ ਤਂ, ਭਿਕ੍ਖਵੇ, ਚਕ੍ਕਰਤਨਂ ਪੁਰਤ੍ਥਿਮਸਮੁਦ੍ਦਂ ਅਜ੍ਝੋਗਾਹੇਤ੍ਵਾ ਪਚ੍ਚੁਤ੍ਤਰਿਤ੍ਵਾ ਦਕ੍ਖਿਣਂ ਦਿਸਂ ਪਵਤ੍ਤਤੀਤਿ. ਏਵਂ ਪਵਤ੍ਤਮਾਨਸ੍ਸ ਪਨ ਤਸ੍ਸ ਪਵਤ੍ਤਨਵਿਧਾਨਂ ਸੇਨਾਸਨ੍ਨਿਵੇਸੋ ਪਟਿਰਾਜਗਮਨਂ ਤੇਸਂ ਅਨੁਸਾਸਨਿਪ੍ਪਦਾਨਂ ਦਕ੍ਖਿਣਸਮੁਦ੍ਦਂ ਅਜ੍ਝੋਗਾਹਨਂ ਸਮੁਦ੍ਦਸਲਿਲਸ੍ਸ ਓਗਚ੍ਛਨਂ ਰਤਨਾਦਾਨਨ੍ਤਿ ਸਬ੍ਬਂ ਪੁਰਿਮਨਯੇਨੇਵ ਵੇਦਿਤਬ੍ਬਂ.
ਵਿਜਿਨਿਤ੍ਵਾ ਪਨ ਤਂ ਦਸਸਹਸ੍ਸਯੋਜਨਪ੍ਪਮਾਣਂ ਜਮ੍ਬੁਦੀਪਂ ਦਕ੍ਖਿਣਸਮੁਦ੍ਦਤੋਪਿ ਪਚ੍ਚੁਤ੍ਤਰਿਤ੍ਵਾ ਸਤ੍ਤਯੋਜਨਸਹਸ੍ਸਪ੍ਪਮਾਣਂ ਅਪਰਗੋਯਾਨਂ ਵਿਜੇਤੁਂ ਪੁਬ੍ਬੇ ਵੁਤ੍ਤਨਯੇਨੇਵ ਗਨ੍ਤ੍ਵਾ ਤਮ੍ਪਿ ਸਮੁਦ੍ਦਪਰਿਯਨ੍ਤਂ ਤਥੇਵ ਅਭਿਵਿਜਿਨਿਤ੍ਵਾ ਪਚ੍ਛਿਮਸਮੁਦ੍ਦਤੋਪਿ ਪਚ੍ਚੁਤ੍ਤਰਿਤ੍ਵਾ ਅਟ੍ਠਯੋਜਨਸਹਸ੍ਸਪ੍ਪਮਾਣਂ ਉਤ੍ਤਰਕੁਰੁਂ ਵਿਜੇਤੁਂ ਤਥੇਵ ਗਨ੍ਤ੍ਵਾ ਤਮ੍ਪਿ ਸਮੁਦ੍ਦਪਰਿਯਨ੍ਤਂ ਤਥੇਵ ਅਭਿਵਿਜਿਯ ਉਤ੍ਤਰਸਮੁਦ੍ਦਤੋਪਿ ਪਚ੍ਚੁਤ੍ਤਰਤਿ.
ਏਤ੍ਤਾਵਤਾ ਰਞ੍ਞਾ ਚਕ੍ਕਵਤ੍ਤਿਨਾ ਚਾਤੁਰਨ੍ਤਾਯ ਪਥਵਿਯਾ ਆਧਿਪਚ੍ਚਂ ਅਧਿਗਤਂ ਹੋਤਿ. ਸੋ ਏਵਂ ਵਿਜਿਤਵਿਜਯੋ ਅਤ੍ਤਨੋ ਰਜ੍ਜਸਿਰਿਸਮ੍ਪਤ੍ਤਿਦਸ੍ਸਨਤ੍ਥਂ ਸਪਰਿਸੋ ਉਦ੍ਧਂ ਗਗਨਤਲਂ ਅਭਿਲਙ੍ਘਿਤ੍ਵਾ ਸੁਵਿਕਸਿਤਪਦੁਮੁਪ੍ਪਲਪੁਣ੍ਡਰੀਕਵਨਵਿਚਿਤ੍ਤੇ ਚਤ੍ਤਾਰੋ ਜਾਤਸ੍ਸਰੇ ਵਿਯ ਪਞ੍ਚਸਤਪਞ੍ਚਸਤਪਰਿਤ੍ਤਦੀਪਪਰਿਵਾਰੇ ਚਤ੍ਤਾਰੋ ਮਹਾਦੀਪੇ ਓਲੋਕੇਤ੍ਵਾ ਚਕ੍ਕਰਤਨਦੇਸਿਤੇਨੇਵ ਮਗ੍ਗੇਨ ਯਥਾਨੁਕ੍ਕਮਂ ਅਤ੍ਤਨੋ ਰਾਜਧਾਨਿਮੇਵ ਪਚ੍ਚਾਗਚ੍ਛਤਿ. ਅਥ ਤਂ ਚਕ੍ਕਰਤਨਂ ਅਨ੍ਤੇਪੁਰਦ੍ਵਾਰਂ ਸੋਭਯਮਾਨਂ ਵਿਯ ਹੁਤ੍ਵਾ ਤਿਟ੍ਠਤਿ.
ਏਵਂ ਪਤਿਟ੍ਠਿਤੇ ਪਨ ਤਸ੍ਮਿਂ ਚਕ੍ਕਰਤਨੇ ਰਾਜਨ੍ਤੇਪੁਰੇ ਉਕ੍ਕਾਹਿ ਵਾ ਦੀਪਿਕਾਹਿ ਵਾ ਕਿਞ੍ਚਿ ਕਰਣੀਯਂ ਨ ਹੋਤਿ, ਚਕ੍ਕਰਤਨੋਭਾਸੋਯੇਵ ਰਤ੍ਤਿਂ ਅਨ੍ਧਕਾਰਂ ਵਿਧਮਤਿ. ਯੇ ਚ ਪਨ ਰਤ੍ਤਿਂ ਅਨ੍ਧਕਾਰਤ੍ਥਿਕਾ ਹੋਨ੍ਤਿ, ਤੇਸਂ ਅਨ੍ਧਕਾਰਮੇਵ ਹੋਤਿ. ਤੇਨ ਵੁਤ੍ਤਂ ਦਕ੍ਖਿਣਸਮੁਦ੍ਦਂ ਅਜ੍ਝੋਗਾਹੇਤ੍ਵਾ…ਪੇ… ਏਵਰੂਪਂ ਚਕ੍ਕਰਤਨਂ ਪਾਤੁਭਵਤੀਤਿ.
ਹਤ੍ਥਿਰਤਨਵਣ੍ਣਨਾ
੨੫੮. ਏਵਂ ਪਾਤੁਭੂਤਚਕ੍ਕਰਤਨਸ੍ਸ ਪਨਸ੍ਸ ਚਕ੍ਕਵਤ੍ਤਿਨੋ ਅਮਚ੍ਚਾ ਪਕਤਿਮਙ੍ਗਲਹਤ੍ਥਿਟ੍ਠਾਨਂ ਸੁਚਿਭੂਮਿਭਾਗਂ ਕਾਰੇਤ੍ਵਾ ਹਰਿਚਨ੍ਦਨਾਦੀਹਿ ਸੁਰਭਿਗਨ੍ਧੇਹਿ ਉਪਲਿਮ੍ਪਾਪੇਤ੍ਵਾ ਹੇਟ੍ਠਾ ਵਿਚਿਤ੍ਤਵਣ੍ਣਸੁਰਭਿਕੁਸੁਮਸਮਾਕਿਣ੍ਣਂ ਉਪਰਿ ਸੁਵਣ੍ਣਤਾਰਕਾਨਂ ਅਨ੍ਤਰਨ੍ਤਰਾ ਸਮੋਸਰਿਤਮਨੁਞ੍ਞ-ਕੁਸੁਮਦਾਮਪ੍ਪਟਿਮਣ੍ਡਿਤਵਿਤਾਨਂ ਦੇਵਵਿਮਾਨਂ ਵਿਯ ਅਭਿਸਙ੍ਖਰਿਤ੍ਵਾ ‘‘ਏਵਰੂਪਸ੍ਸ ਨਾਮ ਦੇਵ ਹਤ੍ਥਿਰਤਨਸ੍ਸ ਆਗਮਨਂ ਚਿਨ੍ਤੇਥਾ’’ਤਿ ਵਦਨ੍ਤਿ. ਸੋ ਪੁਬ੍ਬੇ ਵੁਤ੍ਤਨਯੇਨੇਵ ਮਹਾਦਾਨਂ ਦਤ੍ਵਾ ਸੀਲਾਨਿ ਸਮਾਦਾਯ ਤਂ ਪੁਞ੍ਞਸਮ੍ਪਤ੍ਤਿਂ ਆਵਜ੍ਜਨ੍ਤੋ ਨਿਸੀਦਤਿ, ਅਥਸ੍ਸ ਪੁਞ੍ਞਾਨੁਭਾਵਚੋਦਿਤੋ ਛਦ੍ਦਨ੍ਤਕੁਲਾ ਵਾ ਉਪੋਸਥਕੁਲਾ ਵਾ ਤਂ ਸਕ੍ਕਾਰਵਿਸੇਸਂ ਅਨੁਭਵਿਤੁਕਾਮੋ ਤਰੁਣਰਵਿਮਣ੍ਡਲਾਭਿਰਤ੍ਤਚਰਣ-ਗੀਵਮੁਖਪ੍ਪਟਿਮਣ੍ਡਿਤਵਿਸੁਦ੍ਧਸੇਤਸਰੀਰੋ ਸਤ੍ਤਪ੍ਪਤਿਟ੍ਠੋ ਸੁਸਣ੍ਠਿਤਙ੍ਗਪਚ੍ਚਙ੍ਗਸਨ੍ਨਿਵੇਸੋ ਵਿਕਸਿਤਰਤ੍ਤ-ਪਦੁਮਚਾਰੁਪੋਕ੍ਖਰੋ ਇਦ੍ਧਿਮਾ ਯੋਗੀ ਵਿਯ ਵੇਹਾਸਂ ਗਮਨਸਮਤ੍ਥੋ ਮਨੋਸਿਲਾਚੁਣ੍ਣਰਞ੍ਜਿਤਪਰਿਯਨ੍ਤੋ ਵਿਯ ਰਜਤਪਬ੍ਬਤੋ ਹਤ੍ਥਿਸੇਟ੍ਠੋ ਤਸ੍ਮਿਂ ਪਦੇਸੇ ਪਤਿਟ੍ਠਾਤਿ. ਸੋ ਛਦ੍ਦਨ੍ਤਕੁਲਾ ਆਗਚ੍ਛਨ੍ਤੋ ਸਬ੍ਬਕਨਿਟ੍ਠੋ ਆਗਚ੍ਛਤਿ, ਉਪੋਸਥਕੁਲਾ ਸਬ੍ਬਜੇਟ੍ਠੋ. ਪਾਲ਼ਿਯਂ ਪਨ ‘‘ਉਪੋਸਥੋ ਨਾਗਰਾਜਾ’’ ਇਚ੍ਚੇਵ ਆਗਚ੍ਛਤਿ. ਸ੍ਵਾਯਂ ਪੂਰਿਤਚਕ੍ਕਵਤ੍ਤਿਵਤ੍ਤਾਨਂ ਚਕ੍ਕਵਤ੍ਤੀਨਂ ਸੁਤ੍ਤੇ ਵੁਤ੍ਤਨਯੇਨੇਵ ਚਿਨ੍ਤਯਨ੍ਤਾਨਂ ਆਗਚ੍ਛਤਿ, ਨ ਇਤਰੇਸਂ. ਸਯਮੇਵ ਪਕਤਿਮਙ੍ਗਲਹਤ੍ਥਿਟ੍ਠਾਨਂ ਆਗਨ੍ਤ੍ਵਾ ਮਙ੍ਗਲਹਤ੍ਥਿਂ ਅਪਨੇਤ੍ਵਾ ਤਤ੍ਥ ਤਿਟ੍ਠਤਿ. ਤੇਨ ਵੁਤ੍ਤਂ ਪੁਨ ਚਪਰਂ, ਭਿਕ੍ਖਵੇ…ਪੇ… ਨਾਗਰਾਜਾਤਿ.
ਏਵਂ ਪਾਤੁਭੂਤਂ ਪਨ ਤਂ ਹਤ੍ਥਿਰਤਨਂ ਦਿਸ੍ਵਾ ਹਤ੍ਥਿਗੋਪਕਾਦਯੋ ਹਟ੍ਠਤੁਟ੍ਠਾ ਵੇਗੇਨ ਗਨ੍ਤ੍ਵਾ ਰਞ੍ਞੋ ਆਰੋਚੇਨ੍ਤਿ. ਰਾਜਾ ਤੁਰਿਤਤੁਰਿਤਂ ਆਗਨ੍ਤ੍ਵਾ ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ‘‘ਭਦ੍ਦਕਂ ਵਤ ਭੋ ਹਤ੍ਥਿਯਾਨਂ, ਸਚੇ ਦਮਥਂ ਉਪੇਯ੍ਯਾ’’ਤਿ ਚਿਨ੍ਤਯਨ੍ਤੋ ਹਤ੍ਥਂ ਪਸਾਰੇਤਿ. ਅਥ ਸੋ ਘਰਧੇਨੁਵਚ੍ਛਕੋ ਵਿਯ ਕਣ੍ਣੇ ਓਲਮ੍ਬੇਤ੍ਵਾ ਸੂਰਤਭਾਵਂ ਦਸ੍ਸੇਨ੍ਤੋ ਰਾਜਾਨਂ ਉਪਸਙ੍ਕਮਤਿ, ਰਾਜਾ ਤਂ ਅਭਿਰੁਹਿਤੁਕਾਮੋ ਹੋਤਿ. ਅਥਸ੍ਸ ਪਰਿਜਨਾ ਅਧਿਪ੍ਪਾਯਂ ਞਤ੍ਵਾ ਤਂ ਹਤ੍ਥਿਰਤਨਂ ਸੋਵਣ੍ਣਦ੍ਧਜਂ ਸੋਵਣ੍ਣਾਲਙ੍ਕਾਰਂ ਹੇਮਜਾਲਪਟਿਚ੍ਛਨ੍ਨਂ ਕਤ੍ਵਾ ਉਪਨੇਨ੍ਤਿ. ਰਾਜਾ ਤਂ ਅਨਿਸੀਦਾਪੇਤ੍ਵਾਵ ਸਤ੍ਤਰਤਨਮਯਾਯ ਨਿਸ੍ਸੇਣਿਯਾ ਅਭਿਰੁਯ੍ਹ ਆਕਾਸਂ ਗਮਨਨਿਨ੍ਨਚਿਤ੍ਤੋ ਹੋਤਿ. ਤਸ੍ਸ ਸਹ ਚਿਤ੍ਤੁਪ੍ਪਾਦੇਨੇਵ ਸੋ ਹਤ੍ਥਿਰਾਜਾ ਰਾਜਹਂਸੋ ਵਿਯ ਇਨ੍ਦਨੀਲਮਣਿਪ੍ਪਭਾਜਾਲਨੀਲਗਗਨਤਲਂ ਅਭਿਲਙ੍ਘਤਿ, ਤਤੋ ਚਕ੍ਕਚਾਰਿਕਾਯ ਵੁਤ੍ਤਨਯੇਨੇਵ ਸਕਲਰਾਜਪਰਿਸਾ. ਇਤਿ ਸਪਰਿਸੋ ਰਾਜਾ ਅਨ੍ਤੋਪਾਤਰਾਸੇਯੇਵ ਸਕਲਪਥਵਿਂ ਅਨੁਸਂਯਾਯਿਤ੍ਵਾ ਰਾਜਧਾਨਿਂ ਪਚ੍ਚਾਗਚ੍ਛਤਿ, ਏਵਂ ਮਹਿਦ੍ਧਿਕਂ ਚਕ੍ਕਵਤ੍ਤਿਨੋ ਹਤ੍ਥਿਰਤਨਂ ਹੋਤਿ. ਤੇਨ ਵੁਤ੍ਤਂ ਦਿਸ੍ਵਾਨ ਰਞ੍ਞੋ ਚਕ੍ਕਵਤ੍ਤਿਸ੍ਸ…ਪੇ… ਏਵਰੂਪਂ ਹਤ੍ਥਿਰਤਨਂ ਪਾਤੁਭਵਤੀਤਿ.
ਅਸ੍ਸਰਤਨਵਣ੍ਣਨਾ
ਏਵਂ ਪਾਤੁਭੂਤਹਤ੍ਥਿਰਤਨਸ੍ਸ ਪਨ ਚਕ੍ਕਵਤ੍ਤਿਨੋ ਪਰਿਸਾ ਪਕਤਿਮਙ੍ਗਲਅਸ੍ਸਟ੍ਠਾਨਂ ਸੁਚਿਸਮਤਲਂ ਕਾਰੇਤ੍ਵਾ ਅਲਙ੍ਕਰਿਤ੍ਵਾ ਚ ਪੁਰਿਮਨਯੇਨੇਵ ਰਞ੍ਞੋ ਤਸ੍ਸ ਆਗਮਨਚਿਨ੍ਤਨਤ੍ਥਂ ਉਸ੍ਸਾਹਂ ਜਨੇਨ੍ਤਿ. ਸੋ ਪੁਰਿਮਨਯੇਨੇਵ ਕਤਦਾਨਸਕ੍ਕਾਰੋ ਸਮਾਦਿਨ੍ਨਸੀਲੋਵ ਪਾਸਾਦਤਲੇ ਨਿਸਿਨ੍ਨੋ ਪੁਞ੍ਞਸਮ੍ਪਤ੍ਤਿਂ ਸਮਨੁਸ੍ਸਰਤਿ, ਅਥਸ੍ਸ ਪੁਞ੍ਞਾਨੁਭਾਵਚੋਦਿਤੋ ਸਿਨ੍ਧਵਕੁਲਤੋ ਵਿਜ੍ਜੁਲ੍ਲਤਾਵਿਨਦ੍ਧਸਰਦਕਾਲਸੇਤਵਲਾਹਕਰਾਸਿਸਸ੍ਸਿਰਿਕੋ ਰਤ੍ਤਪਾਦੋ ਰਤ੍ਤਤੁਣ੍ਡੋ ਚਨ੍ਦਪ੍ਪਭਾਪੁਞ੍ਜਸਦਿਸਸੁਦ੍ਧਸਿਨਿਦ੍ਧਘਨਸਙ੍ਘਾਤਸਰੀਰੋ ਕਾਕਗੀਵਾ ਵਿਯ ਇਨ੍ਦਨੀਲਮਣਿ ਵਿਯ ਚ ਕਾਲ਼ਵਣ੍ਣੇਨ ਸੀਸੇਨ ਸਮਨ੍ਨਾਗਤਤ੍ਤਾ ਕਾਲ਼ਸੀਸੋ ਸੁਟ੍ਠੁ ਕਪ੍ਪੇਤ੍ਵਾ ਠਪਿਤੇਹਿ ਵਿਯ ਮੁਞ੍ਜਸਦਿਸੇਹਿ ਸਣ੍ਹਵਟ੍ਟਉਜੁਗਤਿਗਤੇਹਿ ਕੇਸੇਹਿ ਸਮਨ੍ਨਾਗਤਤ੍ਤਾ ਮੁਞ੍ਜਕੇਸੋ ਵੇਹਾਸਙ੍ਗਮੋ ਵਲਾਹਕੋ ਨਾਮ ਅਸ੍ਸਰਾਜਾ ਆਗਨ੍ਤ੍ਵਾ ਤਸ੍ਮਿਂ ਠਾਨੇ ਪਤਿਟ੍ਠਾਤਿ. ਸੇਸਂ ਸਬ੍ਬਂ ਹਤ੍ਥਿਰਤਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਏਵਰੂਪਂ ਅਸ੍ਸਰਤਨਂ ਸਨ੍ਧਾਯ ਭਗਵਾ ਪੁਨ ਚਪਰਨ੍ਤਿਆਦਿਮਾਹ.
ਮਣਿਰਤਨਵਣ੍ਣਨਾ
ਏਵਂ ਪਾਤੁਭੂਤਅਸ੍ਸਰਤਨਸ੍ਸ ਪਨ ਰਞ੍ਞੋ ਚਕ੍ਕਵਤ੍ਤਿਸ੍ਸ ਚਤੁਹਤ੍ਥਾਯਾਮਂ ਸਕਟਨਾਭਿਸਮਪ੍ਪਮਾਣਂ ਉਭੋਸੁ ਅਨ੍ਤੇਸੁ ਕਣ੍ਣਿਕਪਰਿਯਨ੍ਤਤੋ ਵਿਨਿਗ੍ਗਤਸੁਪਰਿਸੁਦ੍ਧਮੁਤ੍ਤਾਕਲਾਪੇਹਿ ਦ੍ਵੀਹਿ ਕਞ੍ਚਨਪਦੁਮੇਹਿ ਅਲਙ੍ਕਤਂ ਚਤੁਰਾਸੀਤਿਮਣਿਸਹਸ੍ਸਪਰਿਵਾਰਂ ਤਾਰਾਗਣਪਰਿਵੁਤਸ੍ਸ ਪੁਣ੍ਣਚਨ੍ਦਸ੍ਸ ਸਿਰਿਂ ਪਟਿਪ੍ਫਰਮਾਨਂ ਵਿਯ ਵੇਪੁਲ੍ਲਪਬ੍ਬਤਤੋ ਮਣਿਰਤਨਂ ਆਗਚ੍ਛਤਿ. ਤਸ੍ਸੇਵਂ ਆਗਤਸ੍ਸ ਮੁਤ੍ਤਾਜਾਲਕੇ ਠਪੇਤ੍ਵਾ ਵੇਲ਼ੁਪਰਮ੍ਪਰਾਯ ਸਟ੍ਠਿਹਤ੍ਥਪ੍ਪਮਾਣਂ ਆਕਾਸਂ ਆਰੋਪਿਤਸ੍ਸ ਰਤ੍ਤਿਭਾਗੇ ਸਮਨ੍ਤਾ ਯੋਜਨਪ੍ਪਮਾਣਂ ਓਕਾਸਂ ਆਭਾ ਫਰਤਿ, ਯਾਯ ਸਬ੍ਬੋ ਸੋ ਓਕਾਸੋ ਅਰੁਣੁਗ੍ਗਮਨਵੇਲਾ ਵਿਯ ਸਞ੍ਜਾਤਾਲੋਕੋ ਹੋਤਿ. ਤਤੋ ਕਸ੍ਸਕਾ ਕਸਿਕਮ੍ਮਂ, ਵਾਣਿਜਾ ਆਪਣੁਗ੍ਘਾਟਨਂ, ਤੇ ਤੇ ਚ ਸਿਪ੍ਪਿਨੋ ਤਂ ਤਂ ਕਮ੍ਮਨ੍ਤਂ ਪਯੋਜੇਨ੍ਤਿ ਦਿਵਾਤਿ ਮਞ੍ਞਮਾਨਾ. ਤੇਨ ਵੁਤ੍ਤਂ ਪੁਨ ਚਪਰਂ, ਭਿਕ੍ਖਵੇ…ਪੇ… ਮਣਿਰਤਨਂ ਪਾਤੁਭਵਤੀਤਿ.
ਇਤ੍ਥਿਰਤਨਵਣ੍ਣਨਾ
ਏਵਂ ਪਾਤੁਭੂਤਮਣਿਰਤਨਸ੍ਸ ਪਨ ਚਕ੍ਕਵਤ੍ਤਿਸ੍ਸ ਵਿਸਯਸੁਖਵਿਸੇਸਕਾਰਣਂ ਇਤ੍ਥਿਰਤਨਂ ਪਾਤੁਭਵਤਿ. ਮਦ੍ਦਰਾਜਕੁਲਤੋ ਵਾ ਹਿਸ੍ਸ ਅਗ੍ਗਮਹੇਸਿਂ ਆਨੇਨ੍ਤਿ, ਉਤ੍ਤਰਕੁਰੁਤੋ ਵਾ ਪੁਞ੍ਞਾਨੁਭਾਵੇਨ ਸਯਂ ਆਗਚ੍ਛਤਿ. ਅਵਸੇਸਾ ਪਨਸ੍ਸਾ ਸਮ੍ਪਤ੍ਤਿ ‘‘ਪੁਨ ਚਪਰਂ, ਭਿਕ੍ਖਵੇ, ਰਞ੍ਞੋ ਚਕ੍ਕਵਤ੍ਤਿਸ੍ਸ ਇਤ੍ਥਿਰਤਨਂ ਪਾਤੁਭਵਤਿ ਅਭਿਰੂਪਾ ਦਸ੍ਸਨੀਯਾ’’ਤਿਆਦਿਨਾ ਨਯੇਨ ਪਾਲ਼ਿਯਂਯੇਵ ਆਗਤਾ.
ਤਤ੍ਥ ਸਣ੍ਠਾਨਪਾਰਿਪੂਰਿਯਾ ਅਧਿਕਂ ਰੂਪਂ ਅਸ੍ਸਾਤਿ ਅਭਿਰੂਪਾ. ਦਿਸ੍ਸਮਾਨਾ ਚ ਚਕ੍ਖੂਨਿ ਪੀਣਯਤਿ, ਤਸ੍ਮਾ ਅਞ੍ਞਂ ਕਿਚ੍ਚਵਿਕ੍ਖੇਪਂ ਹਿਤ੍ਵਾਪਿ ਦਟ੍ਠਬ੍ਬਾਤਿ ਦਸ੍ਸਨੀਯਾ. ਦਿਸ੍ਸਮਾਨਾ ਚ ਸੋਮਨਸ੍ਸਵਸੇਨ ਚਿਤ੍ਤਂ ਪਸਾਦੇਤੀਤਿ ਪਾਸਾਦਿਕਾ. ਪਰਮਾਯਾਤਿ ਏਵਂ ਪਸਾਦਾਵਹਤ੍ਤਾ ਉਤ੍ਤਮਾਯ. ਵਣ੍ਣਪੋਕ੍ਖਰਤਾਯਾਤਿ ਵਣ੍ਣਸੁਨ੍ਦਰਤਾਯ. ਸਮਨ੍ਨਾਗਤਾਤਿ ਉਪੇਤਾ. ਅਭਿਰੂਪਾ ਵਾ ਯਸ੍ਮਾ ਨਾਤਿਦੀਘਾ ਨਾਤਿਰਸ੍ਸਾ ਦਸ੍ਸਨੀਯਾ ਯਸ੍ਮਾ ਨਾਤਿਕਿਸਾ ਨਾਤਿਥੂਲਾ, ਪਾਸਾਦਿਕਾ ਯਸ੍ਮਾ ਨਾਤਿਕਾਲ਼ਿਕਾ ਨਚ੍ਚੋਦਾਤਾ. ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ ਯਸ੍ਮਾ ਅਤਿਕ੍ਕਨ੍ਤਾ ਮਾਨੁਸਂ ਵਣ੍ਣਂ ਅਪ੍ਪਤ੍ਤਾ ਦਿਬ੍ਬਵਣ੍ਣਂ. ਮਨੁਸ੍ਸਾਨਞ੍ਹਿ ਵਣ੍ਣਾਭਾ ਬਹਿ ਨ ਨਿਚ੍ਛਰਤਿ, ਦੇਵਾਨਂ ਅਤਿਦੂਰਂ ਨਿਚ੍ਛਰਤਿ, ਤਸ੍ਸਾ ਪਨ ਦ੍ਵਾਦਸਹਤ੍ਥਪ੍ਪਮਾਣਂ ਪਦੇਸਂ ਸਰੀਰਾਭਾ ਓਭਾਸੇਤਿ.
ਨਾਤਿਦੀਘਾਦੀਸੁ ਚਸ੍ਸਾ ਪਠਮਯੁਗਲ਼ੇਨ ਆਰੋਹਸਮ੍ਪਤ੍ਤਿ, ਦੁਤਿਯਯੁਗਲ਼ੇਨ ਪਰਿਣਾਹਸਮ੍ਪਤ੍ਤਿ, ਤਤਿਯਯੁਗਲ਼ੇਨ ਵਣ੍ਣਸਮ੍ਪਤ੍ਤਿ ਵੁਤ੍ਤਾ. ਛਹਿ ਵਾਪਿ ਏਤੇਹਿ ਕਾਯਵਿਪਤ੍ਤਿਯਾ ਅਭਾਵੋ, ਅਤਿਕ੍ਕਨ੍ਤਾ ਮਾਨੁਸਂ ਵਣ੍ਣਨ੍ਤਿ ਇਮਿਨਾ ਕਾਯਸਮ੍ਪਤ੍ਤਿ ਵੁਤ੍ਤਾ.
ਤੂਲਪਿਚੁਨੋ ਵਾ ਕਪ੍ਪਾਸਪਿਚੁਨੋ ਵਾਤਿ ਸਪ੍ਪਿਮਣ੍ਡੇ ਪਕ੍ਖਿਪਿਤ੍ਵਾ ਠਪਿਤਸ੍ਸ ਸਤਵਿਹਤਸ੍ਸ ਤੂਲਪਿਚੁਨੋ ਵਾ ਸਤਵਿਹਤਸ੍ਸ ਕਪ੍ਪਾਸਪਿਚੁਨੋ ਵਾ ਕਾਯਸਮ੍ਫਸ੍ਸੋ ਹੋਤਿ. ਸੀਤੇਤਿ ਰਞ੍ਞੋ ਸੀਤਕਾਲੇ. ਉਣ੍ਹੇਤਿ ਰਞ੍ਞੋ ਉਣ੍ਹਕਾਲੇ. ਚਨ੍ਦਨਗਨ੍ਧੋਤਿ ਨਿਚ੍ਚਕਾਲਮੇਵ ਸੁਪਿਸਿਤਸ੍ਸ ਅਭਿਨਵਸ੍ਸ ਚਤੁਜ੍ਜਾਤਿਸਮਾਯੋਜਿਤਸ੍ਸ ਹਰਿਚਨ੍ਦਨਸ੍ਸ ਗਨ੍ਧੋ ਕਾਯਤੋ ਵਾਯਤਿ. ਉਪ੍ਪਲਗਨ੍ਧੋਤਿ ਹਸਿਤਕਥਿਤਕਾਲੇਸੁ ਮੁਖਤੋ ਨਿਕ੍ਖਨ੍ਤੋ ਤਙ੍ਖਣਂ ਵਿਕਸਿਤਸ੍ਸੇਵ ਨੀਲੁਪ੍ਪਲਸ੍ਸ ਅਤਿਸੁਰਭਿਗਨ੍ਧੋ ਵਾਯਤਿ.
ਏਵਂ ਰੂਪਸਮ੍ਫਸ੍ਸਗਨ੍ਧਸਮ੍ਪਤ੍ਤਿਯੁਤ੍ਤਾਯ ਪਨਸ੍ਸਾ ਸਰੀਰਸਮ੍ਪਤ੍ਤਿਯਾ ਅਨੁਰੂਪਂ ਆਚਾਰਂ ਦਸ੍ਸੇਤੁਂ ਤਂ ਖੋ ਪਨਾਤਿਆਦਿ ਵੁਤ੍ਤਂ. ਤਤ੍ਥ ਰਾਜਾਨਂ ਦਿਸ੍ਵਾ ਨਿਸਿਨ੍ਨਾਸਨਤੋ ਅਗ੍ਗਿਦਡ੍ਢਾ ਵਿਯ ਪਠਮਮੇਵ ਉਟ੍ਠਾਤੀਤਿ ਪੁਬ੍ਬੁਟ੍ਠਾਯਿਨੀ. ਤਸ੍ਮਿਂ ਨਿਸਿਨ੍ਨੇ ਤਸ੍ਸ ਰਞ੍ਞੋ ਤਾਲਵਣ੍ਟੇਨ ਬੀਜਨਾਦਿਕਿਚ੍ਚਂ ਕਤ੍ਵਾ ਪਚ੍ਛਾ ਨਿਪਤਤਿ ਨਿਸੀਦਤੀਤਿ ਪਚ੍ਛਾਨਿਪਾਤਿਨੀ. ਕਿਂ ਕਰੋਮਿ ਦੇਵਾਤਿ ਤਸ੍ਸ ਕਿਂਕਾਰਂ ਪਟਿਸ੍ਸਾਵੇਤੀਤਿ ਕਿਂਕਾਰਪਟਿਸ੍ਸਾਵਿਨੀ. ਰਞ੍ਞੋ ਮਨਾਪਮੇਵ ਚਰਤਿ ਕਰੋਤੀਤਿ ਮਨਾਪਚਾਰਿਨੀ. ਯਂ ਰਞ੍ਞੋ ਪਿਯਂ, ਤਦੇਵ ਵਦਤੀਤਿ ਪਿਯਵਾਦਿਨੀ.
ਇਦਾਨਿ ਸ੍ਵਾਸ੍ਸਾ ਆਚਾਰੋ ਭਾਵਸੁਦ੍ਧਿਯਾ ਏਵ, ਨ ਸਾਠੇਯ੍ਯੇਨਾਤਿ ਦਸ੍ਸੇਤੁਂ ਤਂ ਖੋ ਪਨਾਤਿਆਦਿਮਾਹ. ਤਤ੍ਥ ਨੋ ਅਤਿਚਰਤੀਤਿ ਨ ਅਤਿਕ੍ਕਮਿਤ੍ਵਾ ਚਰਤਿ, ਅਞ੍ਞਂ ਪੁਰਿਸਂ ਚਿਤ੍ਤੇਨਪਿ ਨ ਪਤ੍ਥੇਤੀਤਿ ਵੁਤ੍ਤਂ ਹੋਤਿ. ਤਤ੍ਥ ਯੇ ਤਸ੍ਸਾ ਆਦਿਮ੍ਹਿ ‘‘ਅਭਿਰੂਪਾ’’ਤਿਆਦਯੋ ਅਨ੍ਤੇ ‘‘ਪੁਬ੍ਬੁਟ੍ਠਾਯਿਨੀ’’ਤਿਆਦਯੋ ਗੁਣਾ ਵੁਤ੍ਤਾ, ਤੇ ਪਕਤਿਗੁਣਾ ਏਵ ‘‘ਅਤਿਕ੍ਕਨ੍ਤਾ ਮਾਨੁਸਂ ਵਣ੍ਣ’’ਨ੍ਤਿਆਦਯੋ ਪਨ ਚਕ੍ਕਵਤ੍ਤਿਨੋ ਪੁਞ੍ਞਂ ਉਪਨਿਸ੍ਸਾਯ ਚਕ੍ਕਰਤਨਪਾਤੁਭਾਵਤੋ ਪਟ੍ਠਾਯ ਪੁਰਿਮਕਮ੍ਮਾਨੁਭਾਵੇਨ ਨਿਬ੍ਬਤ੍ਤਨ੍ਤੀਤਿ ਵੇਦਿਤਬ੍ਬਾ. ਅਭਿਰੂਪਤਾਦਿਕਾਪਿ ਵਾ ਚਕ੍ਕਰਤਨਪਾਤੁਭਾਵਤੋ ਪਟ੍ਠਾਯ ਸਬ੍ਬਾਕਾਰਪਾਰਿਪੂਰਾ ਜਾਤਾ. ਤੇਨਾਹ ਏਵਰੂਪਂ ਇਤ੍ਥਿਰਤਨਂ ਪਾਤੁਭਵਤੀਤਿ.
ਗਹਪਤਿਰਤਨਵਣ੍ਣਨਾ
ਏਵਂ ਪਾਤੁਭੂਤਇਤ੍ਥਿਰਤਨਸ੍ਸ ਪਨ ਰਞ੍ਞੋ ਚਕ੍ਕਵਤ੍ਤਿਸ੍ਸ ਧਨਕਰਣੀਯਾਨਂ ਕਿਚ੍ਚਾਨਂ ਯਥਾਸੁਖਪ੍ਪਵਤ੍ਤਨਤ੍ਥਂ ਗਹਪਤਿਰਤਨਂ ਪਾਤੁਭਵਤਿ. ਸੋ ਪਕਤਿਯਾਵ ਮਹਾਭੋਗੋ ਮਹਾਭੋਗਕੁਲੇ ਜਾਤੋ ਰਞ੍ਞੋ ਧਨਰਾਸਿਵਡ੍ਢਕੋ ਸੇਟ੍ਠਿ ਗਹਪਤਿ ਹੋਤਿ, ਚਕ੍ਕਰਤਨਾਨੁਭਾਵਸਹਿਤਂ ਪਨਸ੍ਸ ਕਮ੍ਮਵਿਪਾਕਜਂ ਦਿਬ੍ਬਚਕ੍ਖੁ ਪਾਤੁਭਵਤਿ, ਯੇਨ ਅਨ੍ਤੋਪਥਵਿਯਂ ਯੋਜਨਬ੍ਭਨ੍ਤਰੇ ਨਿਧਿਂ ਪਸ੍ਸਤਿ. ਸੋ ਤਂ ਸਮ੍ਪਤ੍ਤਿਂ ਦਿਸ੍ਵਾ ਤੁਟ੍ਠਹਦਯੋ ਗਨ੍ਤ੍ਵਾ ਰਾਜਾਨਂ ਧਨੇਨ ਪਵਾਰੇਤ੍ਵਾ ਸਬ੍ਬਾਨਿ ਧਨਕਰਣੀਯਾਨਿ ਸਮ੍ਪਾਦੇਤਿ. ਤੇਨ ਵੁਤ੍ਤਂ ਪੁਨ ਚਪਰਂ, ਭਿਕ੍ਖਵੇ…ਪੇ… ਏਵਰੂਪਂ ਗਹਪਤਿਰਤਨਂ ਪਾਤੁਭਵਤੀਤਿ.
ਪਰਿਣਾਯਕਰਤਨਵਣ੍ਣਨਾ
ਏਵਂ ਪਾਤੁਭੂਤਗਹਪਤਿਰਤਨਸ੍ਸ ਪਨ ਰਞ੍ਞੋ ਚਕ੍ਕਵਤ੍ਤਿਸ੍ਸ ਸਬ੍ਬਕਿਚ੍ਚਸਂਵਿਧਾਨਸਮਤ੍ਥਂ ਪਰਿਣਾਯਕਰਤਨਂ ਪਾਤੁਭਵਤਿ. ਸੋ ਰਞ੍ਞੋ ਜੇਟ੍ਠਪੁਤ੍ਤੋਵ ਹੋਤਿ. ਪਕਤਿਯਾ ਏਵ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ, ਰਞ੍ਞੋ ਪੁਞ੍ਞਾਨੁਭਾਵਂ ਨਿਸ੍ਸਾਯ ਪਨਸ੍ਸ ਅਤ੍ਤਨੋ ਕਮ੍ਮਾਨੁਭਾਵੇਨ ਪਰਚਿਤ੍ਤਞਾਣਂ ਉਪ੍ਪਜ੍ਜਤਿ. ਯੇਨ ਦ੍ਵਾਦਸਯੋਜਨਾਯ ਰਾਜਪਰਿਸਾਯ ਚਿਤ੍ਤਾਚਾਰਂ ਞਤ੍ਵਾ ਰਞ੍ਞੋ ਅਹਿਤੇ ਹਿਤੇ ਚ ਵਵਤ੍ਥਪੇਤੁਂ ਸਮਤ੍ਥੋ ਹੋਤਿ. ਸੋਪਿ ਤਂ ਅਤ੍ਤਨੋ ਆਨੁਭਾਵਂ ਦਿਸ੍ਵਾ ਤੁਟ੍ਠਹਦਯੋ ਰਾਜਾਨਂ ਸਬ੍ਬਕਿਚ੍ਚਾਨੁਸਾਸਨੇਨ ਪਵਾਰੇਤਿ. ਤੇਨ ਵੁਤ੍ਤਂ ਪੁਨ ਚਪਰਂ…ਪੇ… ਪਰਿਣਾਯਕਰਤਨਂ ਪਾਤੁਭਵਤੀਤਿ. ਤਤ੍ਥ ਠਪੇਤਬ੍ਬਂ ਠਪੇਤੁਨ੍ਤਿ ਤਸ੍ਮਿਂ ਤਸ੍ਮਿਂ ਠਾਨਨ੍ਤਰੇ ਠਪੇਤਬ੍ਬਂ ਠਪੇਤੁਂ.
੨੫੯. ਸਮਵੇਪਾਕਿਨਿਯਾਤਿਆਦਿ ਹੇਟ੍ਠਾ ਵੁਤ੍ਤਮੇਵ.
੨੬੦. ਕਟਗ੍ਗਹੇਨਾਤਿ ਜਯਗ੍ਗਾਹੇਨ. ਮਹਨ੍ਤਂ ਭੋਗਕ੍ਖਨ੍ਧਨ੍ਤਿ ਏਕਪ੍ਪਹਾਰੇਨੇਵ ਦ੍ਵੇ ਵਾ ਤੀਣਿ ਵਾ ਸਤਸਹਸ੍ਸਾਨਿ. ਕੇਵਲਾ ਪਰਿਪੂਰਾ ਪਣ੍ਡਿਤਭੂਮੀਤਿ ਪਣ੍ਡਿਤੋ ਤੀਣਿ ਸੁਚਰਿਤਾਨਿ ਪੂਰੇਤ੍ਵਾ ਸਗ੍ਗੇ ਨਿਬ੍ਬਤ੍ਤਤਿ, ਤਤੋ ਮਨੁਸ੍ਸਲੋਕਂ ਆਗਚ੍ਛਨ੍ਤੋ ਕੁਲਰੂਪਭੋਗਸਮ੍ਪਤ੍ਤਿਯਂ ਨਿਬ੍ਬਤ੍ਤਤਿ, ਤਤ੍ਥ ਠਿਤੋ ਤੀਣਿ ਚ ਸੁਚਰਿਤਾਨਿ ਪੂਰੇਤ੍ਵਾ ਪੁਨ ਸਗ੍ਗੇ ਨਿਬ੍ਬਤ੍ਤਤੀਤਿ ਅਯਂ ਸਕਲਾ ਪਰਿਪੁਣ੍ਣਾ ਪਣ੍ਡਿਤਭੂਮਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਬਾਲਪਣ੍ਡਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.