੩. ਸੁਞ੍ਞਤਵਗ੍ਗੋ

੧. ਚੂਲ਼ਸੁਞ੍ਞਤਸੁਤ੍ਤਵਣ੍ਣਨਾ

੧੭੬. ਏਵਂ ਮੇ ਸੁਤਨ੍ਤਿ ਚੂਲ਼ਸੁਞ੍ਞਤਸੁਤ੍ਤਂ. ਤਤ੍ਥ ਏਕਮਿਦਨ੍ਤਿ ਥੇਰੋ ਕਿਰ ਭਗਵਤੋ ਵਤ੍ਤਂ ਕਤ੍ਵਾ ਅਤ੍ਤਨੋ ਦਿਵਾਟ੍ਠਾਨਂ ਗਨ੍ਤ੍ਵਾ ਕਾਲਪਰਿਚ੍ਛੇਦਂ ਕਤ੍ਵਾ ਨਿਬ੍ਬਾਨਾਰਮ੍ਮਣਂ ਸੁਞ੍ਞਤਾਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸਿਨ੍ਨੋ ਯਥਾਪਰਿਚ੍ਛੇਦੇਨ ਵੁਟ੍ਠਾਸਿ. ਅਥਸ੍ਸ ਸਙ੍ਖਾਰਾ ਸੁਞ੍ਞਤੋ ਉਪਟ੍ਠਹਿਂਸੁ. ਸੋ ਸੁਞ੍ਞਤਾਕਥਂ ਸੋਤੁਕਾਮੋ ਜਾਤੋ. ਅਥਸ੍ਸ ਏਤਦਹੋਸਿ – ‘‘ਨ ਖੋ ਪਨ ਸਕ੍ਕਾ ਧੁਰੇਨ ਧੁਰਂ ਪਹਰਨ੍ਤੇਨ ਵਿਯ ਗਨ੍ਤ੍ਵਾ ‘ਸੁਞ੍ਞਤਾਕਥਂ ਮੇ, ਭਨ੍ਤੇ, ਕਥੇਥਾ’ਤਿ ਭਗਵਨ੍ਤਂ ਵਤ੍ਤੁਂ, ਹਨ੍ਦਾਹਂ ਯਂ ਮੇ ਭਗਵਾ ਨਗਰਕਂ ਉਪਨਿਸ੍ਸਾਯ ਵਿਹਰਨ੍ਤੋ ਏਕਂ ਕਥਂ ਕਥੇਸਿ, ਤਂ ਸਾਰੇਮਿ, ਏਵਂ ਮੇ ਭਗਵਾ ਸੁਞ੍ਞਤਾਕਥਂ ਕਥੇਸ੍ਸਤੀ’’ਤਿ ਦਸਬਲਂ ਸਾਰੇਨ੍ਤੋ ਏਕਮਿਦਨ੍ਤਿਆਦਿਮਾਹ.

ਤਤ੍ਥ ਇਦਨ੍ਤਿ ਨਿਪਾਤਮਤ੍ਤਮੇਵ. ਕਚ੍ਚਿਮੇਤਂ, ਭਨ੍ਤੇਤਿ ਥੇਰੋ ਏਕਪਦੇ ਠਤ੍ਵਾ ਸਟ੍ਠਿਪਦਸਹਸ੍ਸਾਨਿ ਉਗ੍ਗਹੇਤ੍ਵਾ ਧਾਰੇਤੁਂ ਸਮਤ੍ਥੋ, ਕਿਂ ਸੋ ‘‘ਸੁਞ੍ਞਤਾਵਿਹਾਰੇਨਾ’’ਤਿ ਏਕਂ ਪਦਂ ਧਾਰੇਤੁਂ ਨ ਸਕ੍ਖਿਸ੍ਸਤਿ, ਸੋਤੁਕਾਮੇਨ ਪਨ ਜਾਨਨ੍ਤੇਨ ਵਿਯ ਪੁਚ੍ਛਿਤੁਂ ਨ ਵਟ੍ਟਤਿ, ਪਾਕਟਂ ਕਤ੍ਵਾ ਵਿਤ੍ਥਾਰਿਯਮਾਨਂ ਸੁਞ੍ਞਤਾਕਥਂ ਸੋਤੁਕਾਮੋ ਅਜਾਨਨ੍ਤੋ ਵਿਯ ਏਵਮਾਹ. ਏਕੋ ਅਜਾਨਨ੍ਤੋਪਿ ਜਾਨਨ੍ਤੋ ਵਿਯ ਹੋਤਿ, ਥੇਰੋ ਏਵਰੂਪਂ ਕੋਹਞ੍ਞਂ ਕਿਂ ਕਰਿਸ੍ਸਤਿ, ਅਤ੍ਤਨੋ ਜਾਨਨਟ੍ਠਾਨੇਪਿ ਭਗਵਤੋ ਅਪਚਿਤਿਂ ਦਸ੍ਸੇਤ੍ਵਾ ‘‘ਕਚ੍ਚਿਮੇਤ’’ਨ੍ਤਿਆਦਿਮਾਹ.

ਪੁਬ੍ਬੇਪੀਤਿ ਪਠਮਬੋਧਿਯਂ ਨਗਰਕਂ ਉਪਨਿਸ੍ਸਾਯ ਵਿਹਰਣਕਾਲੇਪਿ. ਏਤਰਹਿਪੀਤਿ ਇਦਾਨਿਪਿ. ਏਵਂ ਪਨ ਵਤ੍ਵਾ ਚਿਨ੍ਤੇਸਿ – ‘‘ਆਨਨ੍ਦੋ ਸੁਞ੍ਞਤਾਕਥਂ ਸੋਤੁਕਾਮੋ, ਏਕੋ ਪਨ ਸੋਤੁਂ ਸਕ੍ਕੋਤਿ, ਨ ਉਗ੍ਗਹੇਤੁਂ, ਏਕੋ ਸੋਤੁਮ੍ਪਿ ਉਗ੍ਗਹੇਤੁਮ੍ਪਿ ਸਕ੍ਕੋਤਿ, ਨ ਕਥੇਤੁਂ, ਆਨਨ੍ਦੋ ਪਨ ਸੋਤੁਮ੍ਪਿ ਸਕ੍ਕੋਤਿ ਉਗ੍ਗਹੇਤੁਮ੍ਪਿ ਕਥੇਤੁਮ੍ਪਿ, (ਕਥੇਮਿਸ੍ਸ) ਸੁਞ੍ਞਤਾਕਥ’’ਨ੍ਤਿ. ਇਤਿ ਤਂ ਕਥੇਨ੍ਤੋ ਸੇਯ੍ਯਥਾਪੀਤਿਆਦਿਮਾਹ. ਤਤ੍ਥ ਸੁਞ੍ਞੋ ਹਤ੍ਥਿਗਵਾਸ੍ਸਵਲ਼ਵੇਨਾਤਿ ਤਤ੍ਥ ਕਟ੍ਠਰੂਪਪੋਤ੍ਥਕਰੂਪਚਿਤ੍ਤਰੂਪਵਸੇਨ ਕਤਾ ਹਤ੍ਥਿਆਦਯੋ ਅਤ੍ਥਿ, ਵੇਸ੍ਸਵਣਮਨ੍ਧਾਤਾਦੀਨਂ ਠਿਤਟ੍ਠਾਨੇ ਚਿਤ੍ਤਕਮ੍ਮਵਸੇਨ ਕਤਮ੍ਪਿ, ਰਤਨਪਰਿਕ੍ਖਤਾਨਂ ਵਾਤਪਾਨਦ੍ਵਾਰਬਨ੍ਧਮਞ੍ਚਪੀਠਾਦੀਨਂ ਵਸੇਨ ਸਣ੍ਠਿਤਮ੍ਪਿ, ਜਿਣ੍ਣਪਟਿਸਙ੍ਖਰਣਤ੍ਥਂ ਠਪਿਤਮ੍ਪਿ ਜਾਤਰੂਪਰਜਤਂ ਅਤ੍ਥਿ, ਕਟ੍ਠਰੂਪਾਦਿਵਸੇਨ ਕਤਾ ਧਮ੍ਮਸਵਨਪਞ੍ਹਪੁਚ੍ਛਨਾਦਿਵਸੇਨ ਆਗਚ੍ਛਨ੍ਤਾ ਚ ਇਤ੍ਥਿਪੁਰਿਸਾਪਿ ਅਤ੍ਥਿ, ਤਸ੍ਮਾ ਨ ਸੋ ਤੇਹਿ ਸੁਞ੍ਞੋ. ਇਨ੍ਦ੍ਰਿਯਬਦ੍ਧਾਨਂ ਸਵਿਞ੍ਞਾਣਕਾਨਂ ਹਤ੍ਥਿਆਦੀਨਂ, ਇਚ੍ਛਿਤਿਚ੍ਛਿਤਕ੍ਖਣੇ ਪਰਿਭੁਞ੍ਜਿਤਬ੍ਬਸ੍ਸ ਜਾਤਰੂਪਰਜਤਸ੍ਸ, ਨਿਬਦ੍ਧਵਾਸਂ ਵਸਨ੍ਤਾਨਂ ਇਤ੍ਥਿਪੁਰਿਸਾਨਞ੍ਚ ਅਭਾਵਂ ਸਨ੍ਧਾਯੇਤਂ ਵੁਤ੍ਤਂ.

ਭਿਕ੍ਖੁਸਙ੍ਘਂ ਪਟਿਚ੍ਚਾਤਿ ਭਿਕ੍ਖੂਸੁ ਹਿ ਪਿਣ੍ਡਾਯ ਪਵਿਟ੍ਠੇਸੁਪਿ ਵਿਹਾਰਭਤ੍ਤਂ ਸਾਦਿਯਨ੍ਤੇਹਿ ਭਿਕ੍ਖੂਹਿ ਚੇਵ ਗਿਲਾਨਗਿਲਾਨੁਪਟ੍ਠਾਕਉਦ੍ਦੇਸਚੀਵਰਕਮ੍ਮਪਸੁਤਾਦੀਹਿ ਚ ਭਿਕ੍ਖੂਹਿ ਸੋ ਅਸੁਞ੍ਞੋਵ ਹੋਤਿ, ਇਤਿ ਨਿਚ੍ਚਮ੍ਪਿ ਭਿਕ੍ਖੂਨਂ ਅਤ੍ਥਿਤਾਯ ਏਵਮਾਹ. ਏਕਤ੍ਤਨ੍ਤਿ ਏਕਭਾਵਂ, ਏਕਂ ਅਸੁਞ੍ਞਤਂ ਅਤ੍ਥੀਤਿ ਅਤ੍ਥੋ. ਏਕੋ ਅਸੁਞ੍ਞਭਾਵੋ ਅਤ੍ਥੀਤਿ ਵੁਤ੍ਤਂ ਹੋਤਿ. ਅਮਨਸਿਕਰਿਤ੍ਵਾਤਿ ਚਿਤ੍ਤੇ ਅਕਤ੍ਵਾ ਅਨਾਵਜ੍ਜਿਤ੍ਵਾ ਅਪਚ੍ਚਵੇਕ੍ਖਿਤ੍ਵਾ. ਗਾਮਸਞ੍ਞਨ੍ਤਿ ਗਾਮੋਤਿ ਪਵਤ੍ਤਵਸੇਨ ਵਾ ਕਿਲੇਸਵਸੇਨ ਵਾ ਉਪ੍ਪਨ੍ਨਂ ਗਾਮਸਞ੍ਞਂ. ਮਨੁਸ੍ਸਸਞ੍ਞਾਯਪਿ ਏਸੇਵ ਨਯੋ. ਅਰਞ੍ਞਸਞ੍ਞਂ ਪਟਿਚ੍ਚ ਮਨਸਿ ਕਰੋਤਿ ਏਕਤ੍ਤਨ੍ਤਿ ਇਦਂ ਅਰਞ੍ਞਂ, ਅਯਂ ਰੁਕ੍ਖੋ, ਅਯਂ ਪਬ੍ਬਤੋ, ਅਯਂ ਨੀਲੋਭਾਸੋ ਵਨਸਣ੍ਡੋਤਿ ਏਵਂ ਏਕਂ ਅਰਞ੍ਞਂਯੇਵ ਪਟਿਚ੍ਚ ਅਰਞ੍ਞਸਞ੍ਞਂ ਮਨਸਿ ਕਰੋਤਿ. ਪਕ੍ਖਨ੍ਦਤੀਤਿ ਓਤਰਤਿ. ਅਧਿਮੁਚ੍ਚਤੀਤਿ ਏਵਨ੍ਤਿ ਅਧਿਮੁਚ੍ਚਤਿ. ਯੇ ਅਸ੍ਸੁ ਦਰਥਾਤਿ ਯੇ ਚ ਪਵਤ੍ਤਦਰਥਾ ਵਾ ਕਿਲੇਸਦਰਥਾ ਵਾ ਗਾਮਸਞ੍ਞਂ ਪਟਿਚ੍ਚ ਭਵੇਯ੍ਯੁਂ, ਤੇ ਇਧ ਅਰਞ੍ਞਸਞ੍ਞਾਯ ਨ ਸਨ੍ਤਿ. ਦੁਤਿਯਪਦੇਪਿ ਏਸੇਵ ਨਯੋ. ਅਤ੍ਥਿ ਚੇਵਾਯਨ੍ਤਿ ਅਯਂ ਪਨ ਏਕਂ ਅਰਞ੍ਞਸਞ੍ਞਂ ਪਟਿਚ੍ਚ ਉਪ੍ਪਜ੍ਜਮਾਨਾ ਪਵਤ੍ਤਦਰਥਮਤ੍ਤਾ ਅਤ੍ਥਿ.

ਯਞ੍ਹਿ ਖੋ ਤਤ੍ਥ ਨ ਹੋਤੀਤਿ ਯਂ ਮਿਗਾਰਮਾਤੁਪਾਸਾਦੇ ਹਤ੍ਥਿਆਦਯੋ ਵਿਯ ਇਮਿਸ੍ਸਾ ਅਰਞ੍ਞਸਞ੍ਞਾਯ ਗਾਮਸਞ੍ਞਾਮਨੁਸ੍ਸਸਞ੍ਞਾਵਸੇਨ ਉਪ੍ਪਜ੍ਜਮਾਨਂ ਪਵਤ੍ਤਦਰਥਕਿਲੇਸਦਰਥਜਾਤਂ, ਤਂ ਨ ਹੋਤਿ. ਯਂ ਪਨ ਤਤ੍ਥ ਅਵਸਿਟ੍ਠਨ੍ਤਿ ਯਂ ਮਿਗਾਰਮਾਤੁਪਾਸਾਦੇ ਭਿਕ੍ਖੁਸਙ੍ਘੋ ਵਿਯ ਤਤ੍ਥ ਅਰਞ੍ਞਸਞ੍ਞਾਯ ਪਵਤ੍ਤਦਰਥਮਤ੍ਤਂ ਅਵਸਿਟ੍ਠਂ ਹੋਤਿ. ਤਂ ਸਨ੍ਤਮਿਦਂ ਅਤ੍ਥੀਤਿ ਪਜਾਨਾਤੀਤਿ ਤਂ ਵਿਜ੍ਜਮਾਨਮੇਵ ‘‘ਅਤ੍ਥਿ ਇਦ’’ਨ੍ਤਿ ਪਜਾਨਾਤਿ, ਸੁਞ੍ਞਤਾਵਕ੍ਕਨ੍ਤੀਤਿ ਸੁਞ੍ਞਤਾਨਿਬ੍ਬਤ੍ਤਿ.

੧੭੭. ਅਮਨਸਿਕਰਿਤ੍ਵਾ ਮਨੁਸ੍ਸਸਞ੍ਞਨ੍ਤਿ ਇਧ ਗਾਮਸਞ੍ਞਂ ਨ ਗਣ੍ਹਾਤਿ. ਕਸ੍ਮਾ? ਏਵਂ ਕਿਰਸ੍ਸ ਅਹੋਸਿ – ‘‘ਮਨੁਸ੍ਸਸਞ੍ਞਾਯ ਗਾਮਸਞ੍ਞਂ ਨਿਵਤ੍ਤੇਤ੍ਵਾ, ਅਰਞ੍ਞਸਞ੍ਞਾਯ ਮਨੁਸ੍ਸਸਞ੍ਞਂ, ਪਥਵੀਸਞ੍ਞਾਯ ਅਰਞ੍ਞਸਞ੍ਞਂ, ਆਕਾਸਾਨਞ੍ਚਾਯਤਨਸਞ੍ਞਾਯ ਪਥਵੀਸਞ੍ਞਂ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਾਯ ਆਕਿਞ੍ਚਞ੍ਞਾਯਤਨਸਞ੍ਞਂ, ਵਿਪਸ੍ਸਨਾਯ ਨੇਵਸਞ੍ਞਾਨਾਸਞ੍ਞਾਯਤਨਸਞ੍ਞਂ, ਮਗ੍ਗੇਨ ਵਿਪਸ੍ਸਨਂ ਨਿਵਤ੍ਤੇਤ੍ਵਾ ਅਨੁਪੁਬ੍ਬੇਨ ਅਚ੍ਚਨ੍ਤਸੁਞ੍ਞਤਂ ਨਾਮ ਦਸ੍ਸੇਸ੍ਸਾਮੀ’’ਤਿ. ਤਸ੍ਮਾ ਏਵਂ ਦੇਸਨਂ ਆਰਭਿ. ਤਤ੍ਥ ਪਥਵੀਸਞ੍ਞਨ੍ਤਿ ਕਸ੍ਮਾ ਅਰਞ੍ਞਸਞ੍ਞਂ ਪਹਾਯ ਪਥਵੀਸਞ੍ਞਂ ਮਨਸਿ ਕਰੋਤਿ? ਅਰਞ੍ਞਸਞ੍ਞਾਯ ਵਿਸੇਸਾਨਧਿਗਮਨਤੋ. ਯਥਾ ਹਿ ਪੁਰਿਸਸ੍ਸ ਰਮਣੀਯਂ ਖੇਤ੍ਤਟ੍ਠਾਨਂ ਦਿਸ੍ਵਾ – ‘‘ਇਧ ਵੁਤ੍ਤਾ ਸਾਲਿਆਦਯੋ ਸੁਟ੍ਠੁ ਸਮ੍ਪਜ੍ਜਿਸ੍ਸਨ੍ਤਿ, ਮਹਾਲਾਭਂ ਲਭਿਸ੍ਸਾਮੀ’’ਤਿ ਸਤ੍ਤਕ੍ਖਤ੍ਤੁਮ੍ਪਿ ਖੇਤ੍ਤਟ੍ਠਾਨਂ ਓਲੋਕੇਨ੍ਤਸ੍ਸ ਸਾਲਿਆਦਯੋ ਨ ਸਮ੍ਪਜ੍ਜਨ੍ਤੇਵ, ਸਚੇ ਪਨ ਤਂ ਠਾਨਂ ਵਿਹਤਖਾਣੁਕਕਣ੍ਟਕਂ ਕਤ੍ਵਾ ਕਸਿਤ੍ਵਾ ਵਪਤਿ, ਏਵਂ ਸਨ੍ਤੇ ਸਮ੍ਪਜ੍ਜਨ੍ਤਿ, ਏਵਮੇਵ – ‘‘ਇਦਂ ਅਰਞ੍ਞਂ, ਅਯਂ ਰੁਕ੍ਖੋ, ਅਯਂ ਪਬ੍ਬਤੋ, ਅਯਂ ਨੀਲੋਭਾਸੋ ਵਨਸਣ੍ਡੋ’’ਤਿ ਸਚੇਪਿ ਸਤ੍ਤਕ੍ਖਤ੍ਤੁਂ ਅਰਞ੍ਞਸਞ੍ਞਂ ਮਨਸਿ ਕਰੋਤਿ, ਨੇਵੂਪਚਾਰਂ ਨ ਸਮਾਧਿਂ ਪਾਪੁਣਾਤਿ, ਪਥਵੀਸਞ੍ਞਾਯ ਪਨਸ੍ਸ ਧੁਵਸੇਵਨਂ ਕਮ੍ਮਟ੍ਠਾਨਂ ਪਥਵੀਕਸਿਣਂ ਪਰਿਕਮ੍ਮਂ ਕਤ੍ਵਾ ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਝਾਨਪਦਟ੍ਠਾਨਮ੍ਪਿ ਵਿਪਸ੍ਸਨਂ ਵਡ੍ਢੇਤ੍ਵਾ ਸਕ੍ਕਾ ਅਰਹਤ੍ਤਂ ਪਾਪੁਣਿਤੁਂ. ਤਸ੍ਮਾ ਅਰਞ੍ਞਸਞ੍ਞਂ ਪਹਾਯ ਪਥਵੀਸਞ੍ਞਂ ਮਨਸਿ ਕਰੋਤਿ. ਪਟਿਚ੍ਚਾਤਿ ਪਟਿਚ੍ਚ ਸਮ੍ਭੂਤਂ.

ਇਦਾਨਿ ਯਸ੍ਮਿਂ ਪਥਵੀਕਸਿਣੇ ਸੋ ਪਥਵੀਸਞ੍ਞੀ ਹੋਤਿ, ਤਸ੍ਸ ਓਪਮ੍ਮਦਸ੍ਸਨਤ੍ਥਂ ਸੇਯ੍ਯਥਾਪੀਤਿਆਦਿਮਾਹ. ਤਤ੍ਥ ਉਸਭਸ੍ਸ ਏਤਨ੍ਤਿ ਆਸਭਂ. ਅਞ੍ਞੇਸਂ ਪਨ ਗੁਨ੍ਨਂ ਗਣ੍ਡਾਪਿ ਹੋਨ੍ਤਿ ਪਹਾਰਾਪਿ. ਤੇਸਞ੍ਹਿ ਚਮ੍ਮਂ ਪਸਾਰਿਯਮਾਨਂ ਨਿਬ੍ਬਲਿਕਂ ਨ ਹੋਤਿ, ਉਸਭਸ੍ਸ ਲਕ੍ਖਣਸਮ੍ਪਨ੍ਨਤਾਯ ਤੇ ਦੋਸਾ ਨਤ੍ਥਿ. ਤਸ੍ਮਾ ਤਸ੍ਸ ਚਮ੍ਮਂ ਗਹਿਤਂ. ਸਙ੍ਕੁਸਤੇਨਾਤਿ ਖਿਲਸਤੇਨ. ਸੁਵਿਹਤਨ੍ਤਿ ਪਸਾਰੇਤ੍ਵਾ ਸੁਟ੍ਠੁ ਵਿਹਤਂ. ਊਨਕਸਤਸਙ੍ਕੁਵਿਹਤਞ੍ਹਿ ਨਿਬ੍ਬਲਿਕਂ ਨ ਹੋਤਿ, ਸਙ੍ਕੁਸਤੇਨ ਵਿਹਤਂ ਭੇਰਿਤਲਂ ਵਿਯ ਨਿਬ੍ਬਲਿਕਂ ਹੋਤਿ. ਤਸ੍ਮਾ ਏਵਮਾਹ. ਉਕ੍ਕੂਲਵਿਕ੍ਕੂਲਨ੍ਤਿ ਉਚ੍ਚਨੀਚਂ ਥਲਟ੍ਠਾਨਂ ਨਿਨ੍ਨਟ੍ਠਾਨਂ. ਨਦੀਵਿਦੁਗ੍ਗਨ੍ਤਿ ਨਦਿਯੋ ਚੇਵ ਦੁਗ੍ਗਮਟ੍ਠਾਨਞ੍ਚ. ਪਥਵੀਸਞ੍ਞਂ ਪਟਿਚ੍ਚ ਮਨਸਿ ਕਰੋਤਿ ਏਕਤ੍ਤਨ੍ਤਿ ਕਸਿਣਪਥਵਿਯਂਯੇਵ ਪਟਿਚ੍ਚ ਸਮ੍ਭੂਤਂ ਏਕਂ ਸਞ੍ਞਂ ਮਨਸਿ ਕਰੋਤਿ. ਦਰਥਮਤ੍ਤਾਤਿ ਇਤੋ ਪਟ੍ਠਾਯ ਸਬ੍ਬਵਾਰੇਸੁ ਪਵਤ੍ਤਦਰਥਵਸੇਨ ਦਰਥਮਤ੍ਤਾ ਵੇਦਿਤਬ੍ਬਾ.

੧੮੨. ਅਨਿਮਿਤ੍ਤਂ ਚੇਤੋਸਮਾਧਿਨ੍ਤਿ ਵਿਪਸ੍ਸਨਾਚਿਤ੍ਤਸਮਾਧਿਂ. ਸੋ ਹਿ ਨਿਚ੍ਚਨਿਮਿਤ੍ਤਾਦਿਵਿਰਹਿਤੋ ਅਨਿਮਿਤ੍ਤੋਤਿ ਵੁਚ੍ਚਤਿ. ਇਮਮੇਵ ਕਾਯਨ੍ਤਿ ਵਿਪਸ੍ਸਨਾਯ ਵਤ੍ਥੁਂ ਦਸ੍ਸੇਤਿ. ਤਤ੍ਥ ਇਮਮੇਵਾਤਿ ਇਮਂ ਏਵ ਚਤੁਮਹਾਭੂਤਿਕਂ. ਸਲ਼ਾਯਤਨਿਕਨ੍ਤਿ ਸਲ਼ਾਯਤਨਪਟਿਸਂਯੁਤ੍ਤਂ. ਜੀਵਿਤਪਚ੍ਚਯਾਤਿ ਯਾਵ ਜੀਵਿਤਿਨ੍ਦ੍ਰਿਯਾਨਂ ਪਵਤ੍ਤਿ, ਤਾਵ ਜੀਵਿਤਪਚ੍ਚਯਾ ਪਵਤ੍ਤਦਰਥਮਤ੍ਤਾ ਅਤ੍ਥੀਤਿ ਵੁਤ੍ਤਂ ਹੋਤਿ.

੧੮੩. ਪੁਨ ਅਨਿਮਿਤ੍ਤਨ੍ਤਿ ਵਿਪਸ੍ਸਨਾਯ ਪਟਿਵਿਪਸ੍ਸਨਂ ਦਸ੍ਸੇਤੁਂ ਵੁਤ੍ਤਂ. ਕਾਮਾਸਵਂ ਪਟਿਚ੍ਚਾਤਿ ਕਾਮਾਸਵਂ ਪਟਿਚ੍ਚ ਉਪ੍ਪਜ੍ਜਨਪਵਤ੍ਤਦਰਥਾ ਇਧ ਨ ਸਨ੍ਤਿ, ਅਰਿਯਮਗ੍ਗੇ ਚੇਵ ਅਰਿਯਫਲੇ ਚ ਨਤ੍ਥੀਤਿ ਵੁਤ੍ਤਂ ਹੋਤਿ. ਇਮਮੇਵ ਕਾਯਨ੍ਤਿ ਇਮਂ ਉਪਾਦਿਸੇਸਦਰਥਦਸ੍ਸਨਤ੍ਥਂ ਵੁਤ੍ਤਂ. ਇਤਿ ਮਨੁਸ੍ਸਸਞ੍ਞਾਯ ਗਾਮਸਞ੍ਞਂ ਨਿਵਤ੍ਤੇਤ੍ਵਾ…ਪੇ… ਮਗ੍ਗੇਨ ਵਿਪਸ੍ਸਨਂ ਨਿਵਤ੍ਤੇਤ੍ਵਾ ਅਨੁਪੁਬ੍ਬੇਨ ਅਚ੍ਚਨ੍ਤਸੁਞ੍ਞਤਾ ਨਾਮ ਦਸ੍ਸਿਤਾ ਹੋਤਿ.

੧੮੪. ਪਰਿਸੁਦ੍ਧਨ੍ਤਿ ਨਿਰੁਪਕ੍ਕਿਲੇਸਂ. ਅਨੁਤ੍ਤਰਨ੍ਤਿ ਉਤ੍ਤਰਵਿਰਹਿਤਂ ਸਬ੍ਬਸੇਟ੍ਠਂ. ਸੁਞ੍ਞਤਨ੍ਤਿ ਸੁਞ੍ਞਤਫਲਸਮਾਪਤ੍ਤਿਂ. ਤਸ੍ਮਾਤਿ ਯਸ੍ਮਾ ਅਤੀਤੇਪਿ, ਬੁਦ੍ਧਪਚ੍ਚੇਕਬੁਦ੍ਧਬੁਦ੍ਧਸਾਵਕਸਙ੍ਖਾਤਾ ਸਮਣਬ੍ਰਾਹ੍ਮਣਾ. ਅਨਾਗਤੇਪਿ, ਏਤਰਹਿਪਿ ਬੁਦ੍ਧਬੁਦ੍ਧਸਾਵਕਸਙ੍ਖਾਤਾ ਸਮਣਬ੍ਰਾਹ੍ਮਣਾ ਇਮਂਯੇਵ ਪਰਿਸੁਦ੍ਧਂ ਪਰਮਂ ਅਨੁਤ੍ਤਰਂ ਸੁਞ੍ਞਤਂ ਉਪਸਮ੍ਪਜ੍ਜ ਵਿਹਰਿਂਸੁ ਵਿਹਰਿਸ੍ਸਨ੍ਤਿ ਵਿਹਰਨ੍ਤਿ ਚ, ਤਸ੍ਮਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਚੂਲ਼ਸੁਞ੍ਞਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਮਹਾਸੁਞ੍ਞਤਸੁਤ੍ਤਵਣ੍ਣਨਾ

੧੮੫. ਏਵਂ ਮੇ ਸੁਤਨ੍ਤਿ ਮਹਾਸੁਞ੍ਞਤਸੁਤ੍ਤਂ. ਤਤ੍ਥ ਕਾਲ਼ਖੇਮਕਸ੍ਸਾਤਿ ਛਵਿਵਣ੍ਣੇਨ ਸੋ ਕਾਲ਼ੋ, ਖੇਮਕੋਤਿ ਪਨਸ੍ਸ ਨਾਮਂ. ਵਿਹਾਰੋਤਿ ਤਸ੍ਮਿਂਯੇਵ ਨਿਗ੍ਰੋਧਾਰਾਮੇ ਏਕਸ੍ਮਿਂ ਪਦੇਸੇ ਪਾਕਾਰੇਨ ਪਰਿਕ੍ਖਿਪਿਤ੍ਵਾ ਦ੍ਵਾਰਕੋਟ੍ਠਕਂ ਮਾਪੇਤ੍ਵਾ ਹਂਸਵਟ੍ਟਕਾਦਿਸੇਨਾਸਨਾਨਿ ਚੇਵ ਮਣ੍ਡਲਮਾਲ਼ਭੋਜਨਸਾਲਾਦੀਨਿ ਚ ਪਤਿਟ੍ਠਪੇਤ੍ਵਾ ਕਤੋ ਵਿਹਾਰੋ. ਸਮ੍ਬਹੁਲਾਨਿ ਸੇਨਾਸਨਾਨੀਤਿ ਮਞ੍ਚੋ ਪੀਠਂ ਭਿਸਿਬਿਮ੍ਬੋਹਨਂ ਤਟ੍ਟਿਕਾ ਚਮ੍ਮਖਣ੍ਡੋ ਤਿਣਸਨ੍ਥਾਰੋ ਪਣ੍ਣਸਨ੍ਥਾਰੋ ਪਲਾਲਸਨ੍ਥਾਰੋਤਿਆਦੀਨਿ ਪਞ੍ਞਤ੍ਤਾਨਿ ਹੋਨ੍ਤਿ, ਮਞ੍ਚੇਨ ਮਞ੍ਚਂ…ਪੇ… ਪਲਾਲਸਨ੍ਥਾਰੇਨੇਵ ਪਲਾਲਸਨ੍ਥਾਰਂ ਆਹਚ੍ਚ ਠਪਿਤਾਨਿ, ਗਣਭਿਕ੍ਖੂਨਂ ਵਸਨਟ੍ਠਾਨਸਦਿਸਂ ਅਹੋਸਿ.

ਸਮ੍ਬਹੁਲਾ ਨੁ ਖੋਤਿ ਭਗਵਤੋ ਬੋਧਿਪਲ੍ਲਙ੍ਕੇਯੇਵ ਸਬ੍ਬਕਿਲੇਸਾਨਂ ਸਮੁਗ੍ਘਾਟਿਤਤ੍ਤਾ ਸਂਸਯੋ ਨਾਮ ਨਤ੍ਥਿ, ਵਿਤਕ੍ਕਪੁਬ੍ਬਭਾਗਾ ਪੁਚ੍ਛਾ, ਵਿਤਕ੍ਕਪੁਬ੍ਬਭਾਗੇ ਚਾਯਂ ਨੁਕਾਰੋ ਨਿਪਾਤਮਤ੍ਤੋ. ਪਾਟਿਮਤ੍ਥਕਂ ਗਚ੍ਛਨ੍ਤੇ ਅਵਿਨਿਚ੍ਛਿਤੋ ਨਾਮ ਨ ਹੋਤਿ. ਇਤੋ ਕਿਰ ਪੁਬ੍ਬੇ ਭਗਵਤਾ ਦਸ ਦ੍ਵਾਦਸ ਭਿਕ੍ਖੂ ਏਕਟ੍ਠਾਨੇ ਵਸਨ੍ਤਾ ਨ ਦਿਟ੍ਠਪੁਬ੍ਬਾ.

ਅਥਸ੍ਸ ਏਤਦਹੋਸਿ – ਗਣਵਾਸੋ ਨਾਮਾਯਂ ਵਟ੍ਟੇ ਆਚਿਣ੍ਣਸਮਾਚਿਣ੍ਣੋ ਨਦੀਓਤਿਣ੍ਣਉਦਕਸਦਿਸੋ, ਨਿਰਯਤਿਰਚ੍ਛਾਨਯੋਨਿਪੇਤ੍ਤਿਵਿਸਯਾਸੁਰਕਾਯੇਸੁਪਿ, ਮਨੁਸ੍ਸਲੋਕ-ਦੇਵਲੋਕਬ੍ਰਹ੍ਮਲੋਕੇਸੁਪਿ ਗਣਵਾਸੋਵ ਆਚਿਣ੍ਣੋ. ਦਸਯੋਜਨਸਹਸ੍ਸੋ ਹਿ ਨਿਰਯੋ ਤਿਪੁਚੁਣ੍ਣਭਰਿਤਾ ਨਾਲ਼ਿ ਵਿਯ ਸਤ੍ਤੇਹਿ ਨਿਰਨ੍ਤਰੋ, ਪਞ੍ਚਵਿਧਬਨ੍ਧਨਕਮ੍ਮਕਾਰਣਕਰਣਟ੍ਠਾਨੇ ਸਤ੍ਤਾਨਂ ਪਮਾਣਂ ਵਾ ਪਰਿਚ੍ਛੇਦੋ ਵਾ ਨਤ੍ਥਿ, ਤਥਾ ਵਾਸੀਹਿ ਤਚ੍ਛਨਾਦਿਠਾਨੇਸੁ, ਇਤਿ ਗਣਭੂਤਾਵ ਪਚ੍ਚਨ੍ਤਿ. ਤਿਰਚ੍ਛਾਨਯੋਨਿਯਂ ਏਕਸ੍ਮਿਂ ਵਮ੍ਮਿਕੇ ਉਪਸਿਕਾਨਂ ਪਮਾਣਂ ਵਾ ਪਰਿਚ੍ਛੇਦੋ ਵਾ ਨਤ੍ਥਿ, ਤਥਾ ਏਕੇਕਬਿਲਾਦੀਸੁਪਿ ਕਿਪਿਲ੍ਲਿਕਾਦੀਨਂ. ਤਿਰਚ੍ਛਾਨਯੋਨਿਯਮ੍ਪਿ ਗਣਵਾਸੋਵ. ਪੇਤਨਗਰਾਨਿ ਚ ਗਾਵੁਤਿਕਾਨਿ ਅਡ੍ਢਯੋਜਨਿਕਾਨਿਪਿ ਪੇਤਭਰਿਤਾਨਿ ਹੋਨ੍ਤਿ. ਏਵਂ ਪੇਤ੍ਤਿਵਿਸਯੇਪਿ ਗਣਵਾਸੋਵ. ਅਸੁਰਭਵਨਂ ਦਸਯੋਜਨਸਹਸ੍ਸਂ ਕਣ੍ਣੇ ਪਕ੍ਖਿਤ੍ਤਸੂਚਿਯਾ ਕਣ੍ਣਬਿਲਂ ਵਿਯ ਹੋਤਿ. ਇਤਿ ਅਸੁਰਕਾਯੇਪਿ ਗਣਵਾਸੋਵ. ਮਨੁਸ੍ਸਲੋਕੇ ਸਾਵਤ੍ਥਿਯਂ ਸਤ੍ਤਪਣ੍ਣਾਸ ਕੁਲਸਤਸਹਸ੍ਸਾਨਿ, ਰਾਜਗਹੇ ਅਨ੍ਤੋ ਚ ਬਹਿ ਚ ਅਟ੍ਠਾਰਸ ਮਨੁਸ੍ਸਕੋਟਿਯੋ ਵਸਿਂਸੁ. ਏਵਂ ਅਞ੍ਞੇਸੁਪਿ ਠਾਨੇਸੂਤਿ ਮਨੁਸ੍ਸਲੋਕੇਪਿ ਗਣਵਾਸੋਵ. ਭੁਮ੍ਮਦੇਵਤਾ ਆਦਿਂ ਕਤ੍ਵਾ ਦੇਵਲੋਕਬ੍ਰਹ੍ਮਲੋਕੇਸੁਪਿ ਗਣਵਾਸੋਵ. ਏਕੇਕਸ੍ਸ ਹਿ ਦੇਵਪੁਤ੍ਤਸ੍ਸ ਅਡ੍ਢਤਿਯਾ ਨਾਟਕਕੋਟਿਯੋ ਹੋਨ੍ਤਿ, ਨਵਪਿ ਕੋਟਿਯੋ ਹੋਨ੍ਤਿ, ਏਕਟ੍ਠਾਨੇ ਦਸਸਹਸ੍ਸਾਪਿ ਬ੍ਰਹ੍ਮਾਨੋ ਵਸਨ੍ਤਿ.

ਤਤੋ ਚਿਨ੍ਤੇਸਿ – ‘‘ਮਯਾ ਸਤਸਹਸ੍ਸਕਪ੍ਪਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਗਣਵਾਸਵਿਦ੍ਧਂਸਨਤ੍ਥਂ ਦਸ ਪਾਰਮਿਯੋ ਪੂਰਿਤਾ, ਇਮੇ ਚ ਭਿਕ੍ਖੂ ਇਤੋ ਪਟ੍ਠਾਯੇਵ ਗਣਂ ਬਨ੍ਧਿਤ੍ਵਾ ਗਣਾਭਿਰਤਾ ਜਾਤਾ ਅਨਨੁਚ੍ਛਵਿਕਂ ਕਰੋਨ੍ਤੀ’’ਤਿ. ਸੋ ਧਮ੍ਮਸਂਵੇਗਂ ਉਪ੍ਪਾਦੇਤ੍ਵਾ ਪੁਨ ਚਿਨ੍ਤੇਸਿ – ‘‘ਸਚੇ ‘ਏਕਟ੍ਠਾਨੇ ਦ੍ਵੀਹਿ ਭਿਕ੍ਖੂਹਿ ਨ ਵਸਿਤਬ੍ਬ’ਨ੍ਤਿ ਸਕ੍ਕਾ ਭਵੇਯ੍ਯ ਸਿਕ੍ਖਾਪਦਂ ਪਞ੍ਞਪੇਤੁਂ, ਸਿਕ੍ਖਾਪਦਂ ਪਞ੍ਞਾਪੇਯ੍ਯਂ, ਨ ਖੋ ਪਨੇਤਂ ਸਕ੍ਕਾ. ਹਨ੍ਦਾਹਂ ਮਹਾਸੁਞ੍ਞਤਾਪਟਿਪਤ੍ਤਿਂ ਨਾਮ ਸੁਤ੍ਤਨ੍ਤਂ ਦੇਸੇਮਿ, ਯਂ ਸਿਕ੍ਖਾਕਾਮਾਨਂ ਕੁਲਪੁਤ੍ਤਾਨਂ ਸਿਕ੍ਖਾਪਦਪਞ੍ਞਤ੍ਤਿ ਵਿਯ ਨਗਰਦ੍ਵਾਰੇ ਨਿਕ੍ਖਿਤ੍ਤਸਬ੍ਬਕਾਯਿਕਆਦਾਸੋ ਵਿਯ ਚ ਭਵਿਸ੍ਸਤਿ. ਤਤੋ ਯਥਾ ਨਾਮੇਕਸ੍ਮਿਂ ਆਦਾਸੇ ਖਤ੍ਤਿਯਾਦਯੋ ਅਤ੍ਤਨੋ ਵਜ੍ਜਂ ਦਿਸ੍ਵਾ ਤਂ ਪਹਾਯ ਅਨਵਜ੍ਜਾ ਹੋਨ੍ਤਿ, ਏਵਮੇਵਂ ਮਯਿ ਪਰਿਨਿਬ੍ਬੁਤੇਪਿ ਪਞ੍ਚਵਸ੍ਸਸਹਸ੍ਸਾਨਿ ਇਮਂ ਸੁਤ੍ਤਂ ਆਵਜ੍ਜਿਤ੍ਵਾ ਗਣਂ ਵਿਨੋਦੇਤ੍ਵਾ ਏਕੀਭਾਵਾਭਿਰਤਾ ਕੁਲਪੁਤ੍ਤਾ ਵਟ੍ਟਦੁਕ੍ਖਸ੍ਸ ਅਨ੍ਤਂ ਕਰਿਸ੍ਸਨ੍ਤੀ’’ਤਿ. ਭਗਵਤੋ ਚ ਮਨੋਰਥਂ ਪੂਰੇਨ੍ਤਾ ਵਿਯ ਇਮਂ ਸੁਤ੍ਤਂ ਆਵਜ੍ਜਿਤ੍ਵਾ ਗਣਂ ਵਿਨੋਦੇਤ੍ਵਾ ਵਟ੍ਟਦੁਕ੍ਖਂ ਖੇਪੇਤ੍ਵਾ ਪਰਿਨਿਬ੍ਬੁਤਾ ਕੁਲਪੁਤ੍ਤਾ ਗਣਨਪਥਂ ਵੀਤਿਵਤ੍ਤਾ. ਵਾਲਿਕਪਿਟ੍ਠਿਵਿਹਾਰੇਪਿ ਹਿ ਆਭਿਧਮ੍ਮਿਕਅਭਯਤ੍ਥੇਰੋ ਨਾਮ ਵਸ੍ਸੂਪਨਾਯਿਕਸਮਯੇ ਸਮ੍ਬਹੁਲੇਹਿ ਭਿਕ੍ਖੂਹਿ ਸਦ੍ਧਿਂ ਇਮਂ ਸੁਤ੍ਤਂ ਸਞ੍ਝਾਯਿਤ੍ਵਾ ‘‘ਸਮ੍ਮਾਸਮ੍ਬੁਦ੍ਧੋ ਏਵਂ ਕਾਰੇਤਿ, ਮਯਂ ਕਿਂ ਕਰੋਮਾ’’ਤਿ ਆਹ. ਤੇ ਸਬ੍ਬੇਪਿ ਅਨ੍ਤੋਵਸ੍ਸੇ ਗਣਂ ਵਿਨੋਦੇਤ੍ਵਾ ਏਕੀਭਾਵਾਭਿਰਤਾ ਅਰਹਤ੍ਤਂ ਪਾਪੁਣਿਂਸੁ. ਗਣਭੇਦਨਂ ਨਾਮ ਇਦਂ ਸੁਤ੍ਤਨ੍ਤਿ.

੧੮੬. ਘਟਾਯਾਤਿ ਏਵਂਨਾਮਕਸ੍ਸ ਸਕ੍ਕਸ੍ਸ. ਵਿਹਾਰੇਤਿ ਅਯਮ੍ਪਿ ਵਿਹਾਰੋ ਨਿਗ੍ਰੋਧਾਰਾਮਸ੍ਸੇਵ ਏਕਦੇਸੇ ਕਾਲ਼ਖੇਮਕਸ੍ਸ ਵਿਹਾਰੋ ਵਿਯ ਕਤੋਤਿ ਵੇਦਿਤਬ੍ਬੋ. ਚੀਵਰਕਮ੍ਮਨ੍ਤਿ ਜਿਣ੍ਣਮਲਿਨਾਨਂ ਅਗ੍ਗਲ਼ਟ੍ਠਾਨੁਪ੍ਪਾਦਨਧੋਵਨਾਦੀਹਿ ਕਤਪਰਿਭਣ੍ਡਮ੍ਪਿ, ਚੀਵਰਤ੍ਥਾਯ ਉਪ੍ਪਨ੍ਨਵਤ੍ਥਾਨਂ ਵਿਚਾਰਣਸਿਬ੍ਬਨਾਦੀਹਿ ਅਕਤਂ ਸਂਵਿਧਾਨਮ੍ਪਿ ਵਟ੍ਟਤਿ, ਇਧ ਪਨ ਅਕਤਂ ਸਂਵਿਧਾਨਂ ਅਧਿਪ੍ਪੇਤਂ. ਮਨੁਸ੍ਸਾ ਹਿ ਆਨਨ੍ਦਤ੍ਥੇਰਸ੍ਸ ਚੀਵਰਸਾਟਕੇ ਅਦਂਸੁ. ਤਸ੍ਮਾ ਥੇਰੋ ਸਮ੍ਬਹੁਲੇ ਭਿਕ੍ਖੂ ਗਹੇਤ੍ਵਾ ਤਤ੍ਥ ਚੀਵਰਕਮ੍ਮਂ ਅਕਾਸਿ. ਤੇਪਿ ਭਿਕ੍ਖੂ ਪਾਤੋਵ ਸੂਚਿਪਾਸਕਸ੍ਸ ਪਞ੍ਞਾਯਨਕਾਲਤੋ ਪਟ੍ਠਾਯ ਨਿਸਿਨ੍ਨਾ ਅਪਞ੍ਞਾਯਨਕਾਲੇ ਉਟ੍ਠਹਨ੍ਤਿ. ਸੂਚਿਕਮ੍ਮੇ ਨਿਟ੍ਠਿਤੇਯੇਵ ਸੇਨਾਸਨਾਨਿ ਸਂਵਿਦਹਿਸ੍ਸਾਮਾਤਿ ਨ ਸਂਵਿਦਹਿਂਸੁ. ਚੀਵਰਕਾਰਸਮਯੋ ਨੋਤਿ ਥੇਰੋ ਕਿਰ ਚਿਨ੍ਤੇਸਿ – ‘‘ਅਦ੍ਧਾ ਏਤੇਹਿ ਭਿਕ੍ਖੂਹਿ ਨ ਪਟਿਸਾਮਿਤਾਨਿ ਸੇਨਾਸਨਾਨਿ, ਭਗਵਤਾ ਚ ਦਿਟ੍ਠਾਨਿ ਭਵਿਸ੍ਸਨ੍ਤਿ. ਇਤਿ ਅਨਤ੍ਤਮਨੋ ਸਤ੍ਥਾ ਸੁਟ੍ਠੁ ਨਿਗ੍ਗਹੇਤੁਕਾਮੋ, ਇਮੇਸਂ ਭਿਕ੍ਖੂਨਂ ਉਪਤ੍ਥਮ੍ਭੋ ਭਵਿਸ੍ਸਾਮੀ’’ਤਿ; ਤਸ੍ਮਾ ਏਵਮਾਹ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ‘‘ਨ, ਭਨ੍ਤੇ, ਇਮੇ ਭਿਕ੍ਖੂ ਕਮ੍ਮਾਰਾਮਾ ਏਵ, ਚੀਵਰਕਿਚ੍ਚਵਸੇਨ ਪਨ ਏਵਂ ਵਸਨ੍ਤੀ’’ਤਿ.

ਨ ਖੋ, ਆਨਨ੍ਦਾਤਿ, ਆਨਨ੍ਦ, ਕਮ੍ਮਸਮਯੋ ਵਾ ਹੋਤੁ ਅਕਮ੍ਮਸਮਯੋ ਵਾ, ਚੀਵਰਕਾਰਸਮਯੋ ਵਾ ਹੋਤੁ ਅਚੀਵਰਕਾਰਸਮਯੋ ਵਾ, ਅਥ ਖੋ ਸਙ੍ਗਣਿਕਾਰਾਮੋ ਭਿਕ੍ਖੁ ਨ ਸੋਭਤਿਯੇਵ. ਮਾ ਤ੍ਵਂ ਅਨੁਪਤ੍ਥਮ੍ਭਟ੍ਠਾਨੇ ਉਪਤ੍ਥਮ੍ਭੋ ਅਹੋਸੀਤਿ. ਤਤ੍ਥ ਸਙ੍ਗਣਿਕਾਤਿ ਸਕਪਰਿਸਸਮੋਧਾਨਂ. ਗਣੋਤਿ ਨਾਨਾਜਨਸਮੋਧਾਨਂ. ਇਤਿ ਸਙ੍ਗਣਿਕਾਰਾਮੋ ਵਾ ਹੋਤੁ ਗਣਾਰਾਮੋ ਵਾ, ਸਬ੍ਬਥਾਪਿ ਗਣਬਾਹੁਲ੍ਲਾਭਿਰਤੋ ਗਣਬਨ੍ਧਨਬਦ੍ਧੋ ਭਿਕ੍ਖੁ ਨ ਸੋਭਤਿ. ਪਚ੍ਛਾਭਤ੍ਤੇ ਪਨ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਸੁਧੋਤਹਤ੍ਥਪਾਦੋ ਮੂਲਕਮ੍ਮਟ੍ਠਾਨਂ ਗਹੇਤ੍ਵਾ ਏਕਾਰਾਮਤਮਨੁਯੁਤ੍ਤੋ ਭਿਕ੍ਖੁ ਬੁਦ੍ਧਸਾਸਨੇ ਸੋਭਤਿ. ਨੇਕ੍ਖਮ੍ਮਸੁਖਨ੍ਤਿ ਕਾਮਤੋ ਨਿਕ੍ਖਨ੍ਤਸ੍ਸ ਸੁਖਂ. ਪਵਿਵੇਕਸੁਖਮ੍ਪਿ ਕਾਮਪਵਿਵੇਕਸੁਖਮੇਵ. ਰਾਗਾਦੀਨਂ ਪਨ ਵੂਪਸਮਤ੍ਥਾਯ ਸਂਵਤ੍ਤਤੀਤਿ ਉਪਸਮਸੁਖਂ. ਮਗ੍ਗਸਮ੍ਬੋਧਤ੍ਥਾਯ ਸਂਵਤ੍ਤਤੀਤਿ ਸਮ੍ਬੋਧਿਸੁਖਂ. ਨਿਕਾਮਲਾਭੀਤਿ ਕਾਮਲਾਭੀ ਇਚ੍ਛਿਤਲਾਭੀ. ਅਕਿਚ੍ਛਲਾਭੀਤਿ ਅਦੁਕ੍ਖਲਾਭੀ. ਅਕਸਿਰਲਾਭੀਤਿ ਵਿਪੁਲਲਾਭੀ.

ਸਾਮਾਯਿਕਨ੍ਤਿ ਅਪ੍ਪਿਤਪ੍ਪਿਤਸਮਯੇ ਕਿਲੇਸੇਹਿ ਵਿਮੁਤ੍ਤਂ. ਕਨ੍ਤਨ੍ਤਿ ਮਨਾਪਂ. ਚੇਤੋਵਿਮੁਤ੍ਤਿਨ੍ਤਿ ਰੂਪਾਰੂਪਾਵਚਰਚਿਤ੍ਤਵਿਮੁਤ੍ਤਿਂ. ਵੁਤ੍ਤਞ੍ਹੇਤਂ – ‘‘ਚਤ੍ਤਾਰਿ ਚ ਝਾਨਾਨਿ ਚਤਸ੍ਸੋ ਚ ਅਰੂਪਸਮਾਪਤ੍ਤਿਯੋ, ਅਯਂ ਸਾਮਾਯਿਕੋ ਵਿਮੋਕ੍ਖੋ’’ਤਿ (ਪਟਿ. ਮ. ੧.੨੧੩). ਅਸਾਮਾਯਿਕਨ੍ਤਿ ਨ ਸਮਯਵਸੇਨ ਕਿਲੇਸੇਹਿ ਵਿਮੁਤ੍ਤਂ, ਅਥ ਖੋ ਅਚ੍ਚਨ੍ਤਵਿਮੁਤ੍ਤਂ ਲੋਕੁਤ੍ਤਰਂ ਵੁਤ੍ਤਂ. ਵੁਤ੍ਤਞ੍ਹੇਤਂ – ‘‘ਚਤ੍ਤਾਰੋ ਚ ਅਰਿਯਮਗ੍ਗਾ ਚਤ੍ਤਾਰਿ ਚ ਸਾਮਞ੍ਞਫਲਾਨਿ, ਅਯਂ ਅਸਾਮਾਯਿਕੋ ਵਿਮੋਕ੍ਖੋ’’ਤਿ. ਅਕੁਪ੍ਪਨ੍ਤਿ ਕਿਲੇਸੇਹਿ ਅਕੋਪੇਤਬ੍ਬਂ.

ਏਤ੍ਤਾਵਤਾ ਕਿਂ ਕਥਿਤਂ ਹੋਤਿ? ਸਙ੍ਗਣਿਕਾਰਾਮੋ ਭਿਕ੍ਖੁ ਗਣਬਨ੍ਧਨਬਦ੍ਧੋ ਨੇਵ ਲੋਕਿਯਗੁਣਂ, ਨ ਚ ਲੋਕੁਤ੍ਤਰਗੁਣਂ ਨਿਬ੍ਬਤ੍ਤੇਤੁਂ ਸਕ੍ਕੋਤਿ, ਗਣਂ ਵਿਨੋਦੇਤ੍ਵਾ ਪਨ ਏਕਾਭਿਰਤੋ ਸਕ੍ਕੋਤਿ. ਤਥਾ ਹਿ ਵਿਪਸ੍ਸੀ ਬੋਧਿਸਤ੍ਤੋ ਚਤੁਰਾਸੀਤਿਯਾ ਪਬ੍ਬਜਿਤਸਹਸ੍ਸੇਹਿ ਪਰਿਵੁਤੋ ਸਤ੍ਤ ਵਸ੍ਸਾਨਿ ਵਿਚਰਨ੍ਤੋ ਸਬ੍ਬਞ੍ਞੁਗੁਣਂ ਨਿਬ੍ਬਤ੍ਤੇਤੁਂ ਨਾਸਕ੍ਖਿ, ਗਣਂ ਵਿਨੋਦੇਤ੍ਵਾ ਸਤ੍ਤਦਿਵਸੇ ਏਕੀਭਾਵਾਭਿਰਤੋ ਬੋਧਿਮਣ੍ਡਂ ਆਰੁਯ੍ਹ ਸਬ੍ਬਞ੍ਞੁਗੁਣਂ ਨਿਬ੍ਬਤ੍ਤੇਸਿ. ਅਮ੍ਹਾਕਂ ਬੋਧਿਸਤ੍ਤੋ ਪਞ੍ਚਵਗ੍ਗਿਯੇਹਿ ਸਦ੍ਧਿਂ ਛਬ੍ਬਸ੍ਸਾਨਿ ਵਿਚਰਨ੍ਤੋ ਸਬ੍ਬਞ੍ਞੁਗੁਣਂ ਨਿਬ੍ਬਤ੍ਤੇਤੁਂ ਨਾਸਕ੍ਖਿ, ਤੇਸੁ ਪਕ੍ਕਨ੍ਤੇਸੁ ਏਕੀਭਾਵਾਭਿਰਤੋ ਬੋਧਿਮਣ੍ਡਂ ਆਰੁਯ੍ਹ ਸਬ੍ਬਞ੍ਞੁਗੁਣਂ ਨਿਬ੍ਬਤ੍ਤੇਸਿ.

ਏਵਂ ਸਙ੍ਗਣਿਕਾਰਾਮਸ੍ਸ ਗੁਣਾਧਿਗਮਾਭਾਵਂ ਦਸ੍ਸੇਤ੍ਵਾ ਇਦਾਨਿ ਦੋਸੁਪ੍ਪਤ੍ਤਿਂ ਦਸ੍ਸੇਨ੍ਤੋ ਨਾਹਂ ਆਨਨ੍ਦਾਤਿਆਦਿਮਾਹ. ਤਤ੍ਥ ਰੂਪਨ੍ਤਿ ਸਰੀਰਂ. ਯਤ੍ਥ ਰਤ੍ਤਸ੍ਸਾਤਿ ਯਸ੍ਮਿਂ ਰੂਪੇ ਰਾਗਵਸੇਨ ਰਤ੍ਤਸ੍ਸ. ਨ ਉਪ੍ਪਜ੍ਜੇਯ੍ਯੁਨ੍ਤਿ ਯਸ੍ਮਿਂ ਰੂਪੇ ਰਤ੍ਤਸ੍ਸ ਨ ਉਪ੍ਪਜ੍ਜੇਯ੍ਯੁਂ, ਤਂ ਰੂਪਂ ਨ ਸਮਨੁਪਸ੍ਸਾਮਿ, ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾਨਂ ਦਸਬਲਸਾਵਕਤ੍ਤੁਪਗਮਨਸਙ੍ਖਾਤੇਨ ਅਞ੍ਞਥਾਭਾਵੇਨ ਸਞ੍ਚਯਸ੍ਸ ਵਿਯ, ਉਪਾਲਿਗਹਪਤਿਨੋ ਅਞ੍ਞਥਾਭਾਵੇਨ ਨਾਟਪੁਤ੍ਤਸ੍ਸ ਵਿਯ, ਪਿਯਜਾਤਿਕਸੁਤ੍ਤੇ ਸੇਟ੍ਠਿਆਦੀਨਂ ਵਿਯ ਚ ਉਪ੍ਪਜ੍ਜਨ੍ਤਿਯੇਵ.

੧੮੭. ਅਯਂ ਖੋ ਪਨਾਨਨ੍ਦਾਤਿ ਕੋ ਅਨੁਸਨ੍ਧਿ? ਸਚੇ ਹਿ ਕੋਚਿ ਦੁਬ੍ਬੁਦ੍ਧੀ ਨਵਪਬ੍ਬਜਿਤੋ ਵਦੇਯ੍ਯ – ‘‘ਸਮ੍ਮਾਸਮ੍ਬੁਦ੍ਧੋ ਖੇਤ੍ਤਂ ਪਵਿਟ੍ਠਾ ਗਾਵਿਯੋ ਵਿਯ ਅਮ੍ਹੇਯੇਵ ਗਣਤੋ ਨੀਹਰਤਿ, ਏਕੀਭਾਵੇ ਨਿਯੋਜੇਤਿ, ਸਯਂ ਪਨ ਰਾਜਰਾਜਮਹਾਮਤ੍ਤਾਦੀਹਿ ਪਰਿਵੁਤੋ ਵਿਹਰਤੀ’’ਤਿ, ਤਸ੍ਸ ਵਚਨੋਕਾਸੁਪਚ੍ਛੇਦਨਤ੍ਥਂ – ‘‘ਚਕ੍ਕਵਾਲ਼ਪਰਿਯਨ੍ਤਾਯ ਪਰਿਸਾਯ ਮਜ੍ਝੇ ਨਿਸਿਨ੍ਨੋਪਿ ਤਥਾਗਤੋ ਏਕਕੋਵਾ’’ਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਤਤ੍ਥ ਸਬ੍ਬਨਿਮਿਤ੍ਤਾਨਨ੍ਤਿ ਰੂਪਾਦੀਨਂ ਸਙ੍ਖਨਿਮਿਤ੍ਤਾਨਂ. ਅਜ੍ਝਤ੍ਤਨ੍ਤਿ ਵਿਸਯਜ੍ਝਤ੍ਤਂ. ਸੁਞ੍ਞਤਨ੍ਤਿ ਸੁਞ੍ਞਤਫਲਸਮਾਪਤ੍ਤਿਂ. ਤਤ੍ਰ ਚੇਤਿ ਉਪਯੋਗਤ੍ਥੇ ਭੁਮ੍ਮਂ, ਤਂ ਚੇਤਿ ਵੁਤ੍ਤਂ ਹੋਤਿ. ਪੁਨ ਤਤ੍ਰਾਤਿ ਤਸ੍ਮਿਂ ਪਰਿਸਮਜ੍ਝੇ ਠਿਤੋ. ਵਿਵੇਕਨਿਨ੍ਨੇਨਾਤਿ ਨਿਬ੍ਬਾਨਨਿਨ੍ਨੇਨ. ਬ੍ਯਨ੍ਤੀਭੂਤੇਨਾਤਿ ਆਸਵਟ੍ਠਾਨੀਯਧਮ੍ਮੇਹਿ ਵਿਗਤਨ੍ਤੇਨ ਨਿਸ੍ਸਟੇਨ ਵਿਸਂਯੁਤ੍ਤੇਨ. ਉਯ੍ਯੋਜਨਿਕਪਟਿਸਂਯੁਤ੍ਤਨ੍ਤਿ ਗਚ੍ਛਥ ਤੁਮ੍ਹੇਤਿ ਏਵਂ ਉਯ੍ਯੋਜਨਿਕੇਨ ਵਚਨੇਨ ਪਟਿਸਂਯੁਤ੍ਤਂ.

ਕਾਯ ਪਨ ਵੇਲਾਯ ਭਗਵਾ ਏਵਂ ਕਥੇਤਿ? ਪਚ੍ਛਾਭਤ੍ਤਕਿਚ੍ਚਵੇਲਾਯ, ਵਾ ਪੁਰਿਮਯਾਮਕਿਚ੍ਚਵੇਲਾਯ ਵਾ. ਭਗਵਾ ਹਿ ਪਚ੍ਛਾਭਤ੍ਤੇ ਗਨ੍ਧਕੁਟਿਯਂ ਸੀਹਸੇਯ੍ਯਂ ਕਪ੍ਪੇਤ੍ਵਾ ਵੁਟ੍ਠਾਯ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਤਿ. ਤਸ੍ਮਿਂ ਸਮਯੇ ਧਮ੍ਮਸ੍ਸਵਨਤ੍ਥਾਯ ਪਰਿਸਾ ਸਨ੍ਨਿਪਤਨ੍ਤਿ. ਅਥ ਭਗਵਾ ਕਾਲਂ ਵਿਦਿਤ੍ਵਾ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਬੁਦ੍ਧਾਸਨਵਰਗਤੋ ਧਮ੍ਮਂ ਦੇਸੇਤ੍ਵਾ ਭੇਸਜ੍ਜਤੇਲਪਾਕਂ ਗਣ੍ਹਨ੍ਤੋ ਵਿਯ ਕਾਲਂ ਅਨਤਿਕ੍ਕਮਿਤ੍ਵਾ ਵਿਵੇਕਨਿਨ੍ਨੇਨ ਚਿਤ੍ਤੇਨ ਪਰਿਸਂ ਉਯ੍ਯੋਜੇਤਿ. ਪੁਰਿਮਯਾਮੇਪਿ ‘‘ਅਭਿਕ੍ਕਨ੍ਤਾ ਖੋ ਵਾਸੇਟ੍ਠਾ ਰਤ੍ਤਿ, ਯਸ੍ਸ ਦਾਨਿ ਕਾਲਂ ਮਞ੍ਞਥਾ’’ਤਿ (ਦੀ. ਨਿ. ੩.੨੯੯) ਏਵਂ ਉਯ੍ਯੋਜੇਤਿ. ਬੁਦ੍ਧਾਨਞ੍ਹਿ ਬੋਧਿਪਤ੍ਤਿਤੋ ਪਟ੍ਠਾਯ ਦ੍ਵੇ ਪਞ੍ਚਵਿਞ੍ਞਾਣਾਨਿਪਿ ਨਿਬ੍ਬਾਨਨਿਨ੍ਨਾਨੇਵ. ਤਸ੍ਮਾਤਿਹਾਨਨ੍ਦਾਤਿ ਯਸ੍ਮਾ ਸੁਞ੍ਞਤਾਵਿਹਾਰੋ ਸਨ੍ਤੋ ਪਣੀਤੋ, ਤਸ੍ਮਾ.

੧੮੮. ਅਜ੍ਝਤ੍ਤਮੇਵਾਤਿ ਗੋਚਰਜ੍ਝਤ੍ਤਮੇਵ. ਅਜ੍ਝਤ੍ਤਂ ਸੁਞ੍ਞਤਨ੍ਤਿ ਇਧ ਨਿਯਕਜ੍ਝਤ੍ਤਂ, ਅਤ੍ਤਨੋ ਪਞ੍ਚਸੁ ਖਨ੍ਧੇਸੁ ਨਿਸ੍ਸਿਤਨ੍ਤਿ ਅਤ੍ਥੋ. ਸਮ੍ਪਜਾਨੋ ਹੋਤੀਤਿ ਕਮ੍ਮਟ੍ਠਾਨਸ੍ਸ ਅਸਮ੍ਪਜ੍ਜਨਭਾਵਜਾਨਨੇਨ ਸਮ੍ਪਜਾਨੋ. ਬਹਿਦ੍ਧਾਤਿ ਪਰਸ੍ਸ ਪਞ੍ਚਸੁ ਖਨ੍ਧੇਸੁ. ਅਜ੍ਝਤ੍ਤਬਹਿਦ੍ਧਾਤਿ ਕਾਲੇਨ ਅਜ੍ਝਤ੍ਤਂ ਕਾਲੇਨ ਬਹਿਦ੍ਧਾ. ਆਨੇਞ੍ਜਨ੍ਤਿ ਉਭਤੋਭਾਗਵਿਮੁਤ੍ਤੋ ਭਵਿਸ੍ਸਾਮਾਤਿ ਆਨੇਞ੍ਜਂ ਅਰੂਪਸਮਾਪਤ੍ਤਿਂ ਮਨਸਿ ਕਰੋਤਿ.

ਤਸ੍ਮਿਂਯੇਵ ਪੁਰਿਮਸ੍ਮਿਨ੍ਤਿ ਪਾਦਕਜ੍ਝਾਨਂ ਸਨ੍ਧਾਯ ਵੁਤ੍ਤਂ. ਅਪਗੁਣਪਾਦਕਜ੍ਝਾਨਤੋ ਵੁਟ੍ਠਿਤਸ੍ਸ ਹਿ ਅਜ੍ਝਤ੍ਤਂ ਸੁਞ੍ਞਤਂ ਮਨਸਿਕਰੋਤੋ ਤਤ੍ਥ ਚਿਤ੍ਤਂ ਨ ਪਕ੍ਖਨ੍ਦਤਿ. ਤਤੋ ‘‘ਪਰਸ੍ਸ ਸਨ੍ਤਾਨੇ ਨੁ ਖੋ ਕਥ’’ਨ੍ਤਿ ਬਹਿਦ੍ਧਾ ਮਨਸਿ ਕਰੋਤਿ, ਤਤ੍ਥਪਿ ਨ ਪਕ੍ਖਨ੍ਦਤਿ. ਤਤੋ – ‘‘ਕਾਲੇਨ ਅਤ੍ਤਨੋ ਸਨ੍ਤਾਨੇ, ਕਾਲੇਨ ਪਰਸ੍ਸ ਸਨ੍ਤਾਨੇ ਨੁ ਖੋ ਕਥ’’ਨ੍ਤਿ ਅਜ੍ਝਤ੍ਤਬਹਿਦ੍ਧਾ ਮਨਸਿ ਕਰੋਤਿ, ਤਤ੍ਥਪਿ ਨ ਪਕ੍ਖਨ੍ਦਤਿ. ਤਤੋ ਉਭਤੋਭਾਗਵਿਮੁਤ੍ਤੋ ਹੋਤੁਕਾਮੋ ‘‘ਅਰੂਪਸਮਾਪਤ੍ਤਿਯਂ ਨੁ ਖੋ ਕਥ’’ਨ੍ਤਿ ਆਨੇਞ੍ਜਂ ਮਨਸਿ ਕਰੋਤਿ, ਤਤ੍ਥਪਿ ਨ ਪਕ੍ਖਨ੍ਦਤਿ. ਇਦਾਨਿ – ‘‘ਨ ਮੇ ਚਿਤ੍ਤਂ ਪਕ੍ਖਨ੍ਦਤੀਤਿ ਵਿਸ੍ਸਟ੍ਠਵੀਰਿਯੇਨ ਉਪਟ੍ਠਾਕਾਦੀਨਂ ਪਚ੍ਛਤੋ ਨ ਚਰਿਤਬ੍ਬਂ, ਪਾਦਕਜ੍ਝਾਨਮੇਵ ਪਨ ਸਾਧੁਕਂ ਪੁਨਪ੍ਪੁਨਂ ਮਨਸਿਕਾਤਬ੍ਬਂ. ਏਵਮਸ੍ਸ ਰੁਕ੍ਖੇ ਛਿਨ੍ਦਤੋ ਫਰਸੁਮ੍ਹਿ ਅਵਹਨ੍ਤੇ ਪੁਨ ਨਿਸਿਤਂ ਕਾਰੇਤ੍ਵਾ ਛਿਨ੍ਦਨ੍ਤਸ੍ਸ ਛਿਜ੍ਜੇਸੁ ਫਰਸੁ ਵਿਯ ਕਮ੍ਮਟ੍ਠਾਨੇ ਮਨਸਿਕਾਰੋ ਵਹਤੀ’’ਤਿ ਦਸ੍ਸੇਤੁਂ ਤਸ੍ਮਿਂਯੇਵਾਤਿਆਦਿਮਾਹ. ਇਦਾਨਿਸ੍ਸ ਏਵਂ ਪਟਿਪਨ੍ਨਸ੍ਸ ਯਂ ਯਂ ਮਨਸਿ ਕਰੋਤਿ, ਤਤ੍ਥ ਤਤ੍ਥ ਮਨਸਿਕਾਰੋ ਸਮ੍ਪਜ੍ਜਤੀਤਿ ਦਸ੍ਸੇਨ੍ਤੋ ਪਕ੍ਖਨ੍ਦਤੀਤਿ ਆਹ.

੧੮੯. ਇਮਿਨਾ ਵਿਹਾਰੇਨਾਤਿ ਇਮਿਨਾ ਸਮਥਵਿਪਸ੍ਸਨਾਵਿਹਾਰੇਨ. ਇਤਿਹ ਤਤ੍ਥ ਸਮ੍ਪਜਾਨੋਤਿ ਇਤਿ ਚਙ੍ਕਮਨ੍ਤੋਪਿ ਤਸ੍ਮਿਂ ਕਮ੍ਮਟ੍ਠਾਨੇ ਸਮ੍ਪਜ੍ਜਮਾਨੇ ‘‘ਸਮ੍ਪਜ੍ਜਤਿ ਮੇ ਕਮ੍ਮਟ੍ਠਾਨ’’ਨ੍ਤਿ ਜਾਨਨੇਨ ਸਮ੍ਪਜਾਨੋ ਹੋਤਿ. ਸਯਤੀਤਿ ਨਿਪਜ੍ਜਤਿ. ਏਤ੍ਥ ਕਞ੍ਚਿ ਕਾਲਂ ਚਙ੍ਕਮਿਤ੍ਵਾ – ‘‘ਇਦਾਨਿ ਏਤ੍ਤਕਂ ਕਾਲਂ ਚਙ੍ਕਮਿਤੁਂ ਸਕ੍ਖਿਸ੍ਸਾਮੀ’’ਤਿ ਞਤ੍ਵਾ ਇਰਿਯਾਪਥਂ ਅਹਾਪੇਤ੍ਵਾ ਠਾਤਬ੍ਬਂ. ਏਸ ਨਯੋ ਸਬ੍ਬਵਾਰੇਸੁ. ਨ ਕਥੇਸ੍ਸਾਮੀਤਿ, ਇਤਿਹ ਤਤ੍ਥਾਤਿ ਏਵਂ ਨ ਕਥੇਸ੍ਸਾਮੀਤਿ ਜਾਨਨੇਨ ਤਤ੍ਥ ਸਮ੍ਪਜਾਨਕਾਰੀ ਹੋਤਿ.

ਪੁਨ ਦੁਤਿਯਵਾਰੇ ਏਵਰੂਪਿਂ ਕਥਂ ਕਥੇਸ੍ਸਾਮੀਤਿ ਜਾਨਨੇਨ ਸਮ੍ਪਜਾਨਕਾਰੀ ਹੋਤਿ, ਇਮਸ੍ਸ ਭਿਕ੍ਖੁਨੋ ਸਮਥਵਿਪਸ੍ਸਨਾ ਤਰੁਣਾਵ, ਤਾਸਂ ਅਨੁਰਕ੍ਖਣਤ੍ਥਂ –

‘‘ਆਵਾਸੋ ਗੋਚਰੋ ਭਸ੍ਸਂ, ਪੁਗ੍ਗਲੋ ਅਥ ਭੋਜਨਂ;

ਉਤੁ ਇਰਿਯਾਪਥੋ ਚੇਵ, ਸਪ੍ਪਾਯੋ ਸੇਵਿਤਬ੍ਬਕੋ’’ਤਿ.

ਸਤ੍ਤ ਸਪ੍ਪਾਯਾਨਿ ਇਚ੍ਛਿਤਬ੍ਬਾਨਿ. ਤੇਸਂ ਦਸ੍ਸਨਤ੍ਥਮਿਦਂ ਵੁਤ੍ਤਂ. ਵਿਤਕ੍ਕਵਾਰੇਸੁ ਅਵਿਤਕ੍ਕਨਸ੍ਸ ਚ ਵਿਤਕ੍ਕਨਸ੍ਸ ਚ ਜਾਨਨੇਨ ਸਮ੍ਪਜਾਨਤਾ ਵੇਦਿਤਬ੍ਬਾ.

੧੯੦. ਇਤਿ ਵਿਤਕ੍ਕਪਹਾਨੇਨ ਦ੍ਵੇ ਮਗ੍ਗੇ ਕਥੇਤ੍ਵਾ ਇਦਾਨਿ ਤਤਿਯਮਗ੍ਗਸ੍ਸ ਵਿਪਸ੍ਸਨਂ ਆਚਿਕ੍ਖਨ੍ਤੋ ਪਞ੍ਚ ਖੋ ਇਮੇ, ਆਨਨ੍ਦ, ਕਾਮਗੁਣਾਤਿਆਦਿਮਾਹ. ਆਯਤਨੇਤਿ ਤੇਸੁਯੇਵ ਕਾਮਗੁਣੇਸੁ ਕਿਸ੍ਮਿਞ੍ਚਿਦੇਵ ਕਿਲੇਸੁਪ੍ਪਤ੍ਤਿਕਾਰਣੇ. ਸਮੁਦਾਚਾਰੋਤਿ ਸਮੁਦਾਚਰਣਤੋ ਅਪ੍ਪਹੀਨਕਿਲੇਸੋ. ਏਵਂ ਸਨ੍ਤਨ੍ਤਿ ਏਵਂ ਵਿਜ੍ਜਮਾਨਮੇਵ. ਸਮ੍ਪਜਾਨੋਤਿ ਕਮ੍ਮਟ੍ਠਾਨਸ੍ਸ ਅਸਮ੍ਪਤ੍ਤਿਜਾਨਨੇਨ ਸਮ੍ਪਜਾਨੋ. ਦੁਤਿਯਵਾਰੇ ਏਵਂ ਸਨ੍ਤਮੇਤਨ੍ਤਿ ਏਵਂ ਸਨ੍ਤੇ ਏਤਂ. ਸਮ੍ਪਜਾਨੋਤਿ ਕਮ੍ਮਟ੍ਠਾਨਸਮ੍ਪਤ੍ਤਿਜਾਨਨੇਨ ਸਮ੍ਪਜਾਨੋ. ਅਯਞ੍ਹਿ ‘‘ਪਹੀਨੋ ਨੁ ਖੋ ਮੇ ਪਞ੍ਚਸੁ ਕਾਮਗੁਣੇਸੁ ਛਨ੍ਦਰਾਗੋ ਨੋ’’ਤਿ ਪਚ੍ਚਵੇਕ੍ਖਮਾਨੋ ਅਪਹੀਨਭਾਵਂ ਞਤ੍ਵਾ ਵੀਰਿਯਂ ਪਗ੍ਗਹੇਤ੍ਵਾ ਤਂ ਅਨਾਗਾਮਿਮਗ੍ਗੇਨ ਸਮੁਗ੍ਘਾਟੇਤਿ, ਤਤੋ ਮਗ੍ਗਾਨਨ੍ਤਰਂ ਫਲਂ, ਫਲਤੋ ਵੁਟ੍ਠਾਯ ਪਚ੍ਚਵੇਕ੍ਖਮਾਨੋ ਪਹੀਨਭਾਵਂ ਜਾਨਾਤਿ, ਤਸ੍ਸ ਜਾਨਨੇਨ ‘‘ਸਮ੍ਪਜਾਨੋ ਹੋਤੀ’’ਤਿ ਵੁਤ੍ਤਂ.

੧੯੧. ਇਦਾਨਿ ਅਰਹਤ੍ਤਮਗ੍ਗਸ੍ਸ ਵਿਪਸ੍ਸਨਂ ਆਚਿਕ੍ਖਨ੍ਤੋ ਪਞ੍ਚ ਖੋ ਇਮੇ, ਆਨਨ੍ਦ, ਉਪਾਦਾਨਕ੍ਖਨ੍ਧਾਤਿਆਦਿਮਾਹ. ਤਤ੍ਥ ਸੋ ਪਹੀਯਤੀਤਿ ਰੂਪੇ ਅਸ੍ਮੀਤਿ ਮਾਨੋ ਅਸ੍ਮੀਤਿ ਛਨ੍ਦੋ ਅਸ੍ਮੀਤਿ ਅਨੁਸਯੋ ਪਹੀਯਤਿ. ਤਥਾ ਵੇਦਨਾਦੀਸੁ ਸਮ੍ਪਜਾਨਤਾ ਵੁਤ੍ਤਨਾਯੇਨੇਵ ਵੇਦਿਤਬ੍ਬਾ.

ਇਮੇ ਖੋ ਤੇ, ਆਨਨ੍ਦ, ਧਮ੍ਮਾਤਿ ਹੇਟ੍ਠਾ ਕਥਿਤੇ ਸਮਥਵਿਪਸ੍ਸਨਾਮਗ੍ਗਫਲਧਮ੍ਮੇ ਸਨ੍ਧਾਯਾਹ. ਕੁਸਲਾਯਤਿਕਾਤਿ ਕੁਸਲਤੋ ਆਗਤਾ. ਕੁਸਲਾ ਹਿ ਕੁਸਲਾਪਿ ਹੋਨ੍ਤਿ ਕੁਸਲਾਯਤਿਕਾਪਿ, ਸੇਯ੍ਯਥਿਦਂ, ਪਠਮਜ੍ਝਾਨਂ ਕੁਸਲਂ, ਦੁਤਿਯਜ੍ਝਾਨਂ ਕੁਸਲਞ੍ਚੇਵ ਕੁਸਲਾਯਤਿਕਞ੍ਚ…ਪੇ… ਆਕਿਞ੍ਚਞ੍ਞਾਯਤਨਂ ਕੁਸਲਂ, ਨੇਵਸਞ੍ਞਾਨਾਸਞ੍ਞਾਯਤਨਂ ਕੁਸਲਞ੍ਚੇਵ ਕੁਸਲਾਯਤਿਕਞ੍ਚ, ਨੇਵਸਞ੍ਞਾਨਾਸਞ੍ਞਾਯਤਨਂ ਕੁਸਲਂ, ਸੋਤਾਪਤ੍ਤਿਮਗ੍ਗੋ ਕੁਸਲੋ ਚੇਵ ਕੁਸਲਾਯਤਿਕੋ ਚ…ਪੇ… ਅਨਾਗਾਮਿਮਗ੍ਗੋ ਕੁਸਲੋ, ਅਰਹਤ੍ਤਮਗ੍ਗੋ ਕੁਸਲੋ ਚੇਵ ਕੁਸਲਾਯਤਿਕੋ ਚ. ਤਥਾ ਪਠਮਜ੍ਝਾਨਂ ਕੁਸਲਂ, ਤਂਸਮ੍ਪਯੁਤ੍ਤਕਾ ਧਮ੍ਮਾ ਕੁਸਲਾ ਚੇਵ ਕੁਸਲਾਯਤਿਕਾ ਚ…ਪੇ… ਅਰਹਤ੍ਤਮਗ੍ਗੋ ਕੁਸਲੋ, ਤਂਸਮ੍ਪਯੁਤ੍ਤਕਾ ਧਮ੍ਮਾ ਕੁਸਲਾ ਚੇਵ ਕੁਸਲਾਯਤਿਕਾ ਚ.

ਅਰਿਯਾਤਿ ਨਿਕ੍ਕਿਲੇਸਾ ਵਿਸੁਦ੍ਧਾ. ਲੋਕੁਤ੍ਤਰਾਤਿ ਲੋਕੇ ਉਤ੍ਤਰਾ ਵਿਸਿਟ੍ਠਾ. ਅਨਵਕ੍ਕਨ੍ਤਾ ਪਾਪਿਮਤਾਤਿ ਪਾਪਿਮਨ੍ਤੇਨ ਮਾਰੇਨ ਅਨੋਕ੍ਕਨ੍ਤਾ. ਵਿਪਸ੍ਸਨਾਪਾਦਕਾ ਅਟ੍ਠ ਸਮਾਪਤ੍ਤਿਯੋ ਅਪ੍ਪੇਤ੍ਵਾ ਨਿਸਿਨ੍ਨਸ੍ਸ ਹਿ ਭਿਕ੍ਖੁਨੋ ਚਿਤ੍ਤਂ ਮਾਰੋ ਨ ਪਸ੍ਸਤਿ, ‘‘ਇਦਂ ਨਾਮ ਆਰਮ੍ਮਣਂ ਨਿਸ੍ਸਾਯ ਸਂਵਤ੍ਤਤੀ’’ਤਿ ਜਾਤਿਤੁਂ ਨ ਸਕ੍ਕੋਤਿ. ਤਸ੍ਮਾ ‘‘ਅਨਵਕ੍ਕਨ੍ਤਾ’’ਤਿ ਵੁਤ੍ਤਂ.

ਤਂ ਕਿਂ ਮਞ੍ਞਸੀਤਿ ਇਦਂ ਕਸ੍ਮਾ ਆਹ? ਗਣੇਪਿ ਏਕੋ ਆਨਿਸਂਸੋ ਅਤ੍ਥਿ, ਤਂ ਦਸ੍ਸੇਤੁਂ ਇਦਮਾਹ. ਅਨੁਬਨ੍ਧਿਤੁਨ੍ਤਿ ਅਨੁਗਚ੍ਛਿਤੁਂ ਪਰਿਚਰਿਤੁਂ.

ਨ ਖੋ, ਆਨਨ੍ਦਾਤਿ ਏਤ੍ਥ ਕਿਞ੍ਚਾਪਿ ਭਗਵਤਾ – ‘‘ਸੁਤਾਵੁਧੋ, ਭਿਕ੍ਖਵੇ, ਅਰਿਯਸਾਵਕੋ ਅਕੁਸਲਂ ਪਜਹਤਿ, ਕੁਸਲਂ ਭਾਵੇਤਿ, ਸਾਵਜ੍ਜਂ ਪਜਹਤਿ, ਅਨਵਜ੍ਜਂ ਭਾਵੇਤਿ, ਸੁਦ੍ਧਂ ਅਤ੍ਤਾਨਂ ਪਰਿਹਰਤੀ’’ਤਿ (ਅ. ਨਿ. ੭.੬੭) ਬਹੁਸ੍ਸੁਤੋ ਪਞ੍ਚਾਵੁਧਸਮ੍ਪਨ੍ਨੋ ਯੋਧੋ ਵਿਯ ਕਤੋ. ਯਸ੍ਮਾ ਪਨ ਸੋ ਸੁਤਪਰਿਯਤ੍ਤਿਂ ਉਗ੍ਗਹੇਤ੍ਵਾਪਿ ਤਦਨੁਚ੍ਛਵਿਕਂ ਅਨੁਲੋਮਪਟਿਪਦਂ ਨ ਪਟਿਪਜ੍ਜਤਿ, ਨ ਤਸ੍ਸ ਤਂ ਆਵੁਧਂ ਹੋਤਿ. ਯੋ ਪਟਿਪਜ੍ਜਤਿ, ਤਸ੍ਸੇਵ ਹੋਤਿ. ਤਸ੍ਮਾ ਏਤਦਤ੍ਥਂ ਅਨੁਬਨ੍ਧਿਤੁਂ ਨਾਰਹਤੀਤਿ ਦਸ੍ਸੇਨ੍ਤੋ ਨ ਖੋ, ਆਨਨ੍ਦਾਤਿ ਆਹ.

ਇਦਾਨਿ ਯਦਤ੍ਥਂ ਅਨੁਬਨ੍ਧਿਤਬ੍ਬੋ, ਤਂ ਦਸ੍ਸੇਤੁਂ ਯਾ ਚ ਖੋਤਿਆਦਿਮਾਹ. ਇਤਿ ਇਮਸ੍ਮਿਂ ਸੁਤ੍ਤੇ ਤੀਸੁ ਠਾਨੇਸੁ ਦਸ ਕਥਾਵਤ੍ਥੂਨਿ ਆਗਤਾਨਿ. ‘‘ਇਤਿ ਏਵਰੂਪਂ ਕਥਂ ਕਥੇਸ੍ਸਾਮੀ’’ਤਿ ਸਪ੍ਪਾਯਾਸਪ੍ਪਾਯਵਸੇਨ ਆਗਤਾਨਿ, ‘‘ਯਦਿਦਂ ਸੁਤ੍ਤਂ ਗੇਯ੍ਯ’’ਨ੍ਤਿ ਏਤ੍ਥ ਸੁਤਪਰਿਯਤ੍ਤਿਵਸੇਨ ਆਗਤਾਨਿ, ਇਮਸ੍ਮਿਂ ਠਾਨੇ ਪਰਿਪੂਰਣਵਸੇਨ ਆਗਤਾਨਿ. ਤਸ੍ਮਾ ਇਮਸ੍ਮਿਂ ਸੁਤ੍ਤੇ ਦਸ ਕਥਾਵਤ੍ਥੂਨਿ ਕਥੇਨ੍ਤੇਨ ਇਮਸ੍ਮਿਂ ਠਾਨੇ ਠਤ੍ਵਾ ਕਥੇਤਬ੍ਬਾਨਿ.

ਇਦਾਨਿ ਯਸ੍ਮਾ ਏਕਚ੍ਚਸ੍ਸ ਏਕਕਸ੍ਸ ਵਿਹਰਤੋਪਿ ਅਤ੍ਥੋ ਨ ਸਮ੍ਪਜ੍ਜਤਿ, ਤਸ੍ਮਾ ਤਂ ਸਨ੍ਧਾਯ ਏਕੀਭਾਵੇ ਆਦੀਨਵਂ ਦਸ੍ਸੇਨ੍ਤੋ ਏਵਂ ਸਨ੍ਤੇ ਖੋ, ਆਨਨ੍ਦਾਤਿਆਦਿਮਾਹ. ਤਤ੍ਥ ਏਵਂ ਸਨ੍ਤੇਤਿ ਏਵਂ ਏਕੀਭਾਵੇ ਸਨ੍ਤੇ.

੧੯੩. ਸਤ੍ਥਾਤਿ ਬਾਹਿਰਕੋ ਤਿਤ੍ਥਕਰਸਤ੍ਥਾ. ਅਨ੍ਵਾਵਤ੍ਤਨ੍ਤੀਤਿ ਅਨੁਆਵਤ੍ਤਨ੍ਤਿ ਉਪਸਙ੍ਕਮਨ੍ਤਿ. ਮੁਚ੍ਛਂ ਕਾਮਯਤੀਤਿ ਮੁਚ੍ਛਨਤਣ੍ਹਂ ਪਤ੍ਥੇਤਿ, ਪਵਤ੍ਤੇਤੀਤਿ ਅਤ੍ਥੋ. ਆਚਰਿਯੂਪਦ੍ਦਵੇਨਾਤਿ ਅਬ੍ਭਨ੍ਤਰੇ ਉਪ੍ਪਨ੍ਨੇਨ ਕਿਲੇਸੂਪਦ੍ਦਵੇਨ ਆਚਰਿਯਸ੍ਸੁਪਦ੍ਦਵੋ. ਸੇਸੁਪਦ੍ਦਵੇਸੁਪਿ ਏਸੇਵ ਨਯੋ. ਅਵਧਿਂਸੁ ਨਨ੍ਤਿ ਮਾਰਯਿਂਸੁ ਨਂ. ਏਤੇਨ ਹਿ ਗੁਣਮਰਣਂ ਕਥਿਤਂ.

ਵਿਨਿਪਾਤਾਯਾਤਿ ਸੁਟ੍ਠੁ ਨਿਪਤਨਾਯ. ਕਸ੍ਮਾ ਪਨ ਬ੍ਰਹ੍ਮਚਾਰੁਪਦ੍ਦਵੋਵ – ‘‘ਦੁਕ੍ਖਵਿਪਾਕਤਰੋ ਚ ਕਟੁਕਵਿਪਾਕਤਰੋ ਚ ਵਿਨਿਪਾਤਾਯ ਚ ਸਂਵਤ੍ਤਤੀ’’ਤਿ ਵੁਤ੍ਤੋਤਿ. ਬਾਹਿਰਪਬ੍ਬਜ੍ਜਾ ਹਿ ਅਪ੍ਪਲਾਭਾ, ਤਤ੍ਥ ਮਹਨ੍ਤੋ ਨਿਬ੍ਬਤ੍ਤੇਤਬ੍ਬਗੁਣੋ ਨਤ੍ਥਿ, ਅਟ੍ਠਸਮਾਪਤ੍ਤਿਪਞ੍ਚਾਭਿਞ੍ਞਾਮਤ੍ਤਕਮੇਵ ਹੋਤਿ. ਇਤਿ ਯਥਾ ਗਦ੍ਰਭਪਿਟ੍ਠਿਤੋ ਪਤਿਤਸ੍ਸ ਮਹਨ੍ਤਂ ਦੁਕ੍ਖਂ ਨ ਹੋਤਿ, ਸਰੀਰਸ੍ਸ ਪਂਸੁਮਕ੍ਖਨਮਤ੍ਤਮੇਵ ਹੋਤਿ, ਏਵਂ ਬਾਹਿਰਸਮਯੇ ਲੋਕਿਯਗੁਣਮਤ੍ਤਤੋਵ ਪਰਿਹਾਯਤਿ, ਤੇਨ ਪੁਰਿਮਂ ਉਪਦ੍ਦਵਦ੍ਵਯਂ ਨ ਏਵਂ ਵੁਤ੍ਤਂ. ਸਾਸਨੇ ਪਨ ਪਬ੍ਬਜ੍ਜਾ ਮਹਾਲਾਭਾ, ਤਤ੍ਥ ਚਤ੍ਤਾਰੋ ਮਗ੍ਗਾ ਚਤ੍ਤਾਰਿ ਫਲਾਨਿ ਨਿਬ੍ਬਾਨਨ੍ਤਿ ਮਹਨ੍ਤਾ ਅਧਿਗਨ੍ਤਬ੍ਬਗੁਣਾ. ਇਤਿ ਯਥਾ ਉਭਤੋ ਸੁਜਾਤੋ ਖਤ੍ਤਿਯਕੁਮਾਰੋ ਹਤ੍ਥਿਕ੍ਖਨ੍ਧਵਰਗਤੋ ਨਗਰਂ ਅਨੁਸਞ੍ਚਰਨ੍ਤੋ ਹਤ੍ਥਿਕ੍ਖਨ੍ਧਤੋ ਪਤਿਤੋ ਮਹਾਦੁਕ੍ਖਂ ਨਿਗਚ੍ਛਤਿ, ਏਵਂ ਸਾਸਨਤੋ ਪਰਿਹਾਯਮਾਨੋ ਨਵਹਿ ਲੋਕੁਤ੍ਤਰਗੁਣੇਹਿ ਪਰਿਹਾਯਤਿ. ਤੇਨਾਯਂ ਬ੍ਰਹ੍ਮਚਾਰੁਪਦ੍ਦਵੋ ਏਵਂ ਵੁਤ੍ਤੋ.

੧੯੬. ਤਸ੍ਮਾਤਿ ਯਸ੍ਮਾ ਸੇਸੁਪਦ੍ਦਵੇਹਿ ਬ੍ਰਹ੍ਮਚਾਰੁਪਦ੍ਦਵੋ ਦੁਕ੍ਖਵਿਪਾਕਤਰੋ, ਯਸ੍ਮਾ ਵਾ ਸਪਤ੍ਤਪਟਿਪਤ੍ਤਿਂ ਵੀਤਿਕ੍ਕਮਨ੍ਤੋ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਸਂਵਤ੍ਤਤਿ, ਮਿਤ੍ਤਪਟਿਪਤ੍ਤਿ ਹਿਤਾਯ, ਤਸ੍ਮਾ. ਏਵਂ ਉਪਰਿਮੇਨਪਿ ਹੇਟ੍ਠਿਮੇਨਪਿ ਅਤ੍ਥੇਨ ਯੋਜੇਤਬ੍ਬਂ. ਮਿਤ੍ਤਵਤਾਯਾਤਿ ਮਿਤ੍ਤਪਟਿਪਤ੍ਤਿਯਾ. ਸਪਤ੍ਤਵਤਾਯਾਤਿ ਵੇਰਪਟਿਪਤ੍ਤਿਯਾ.

ਵੋਕ੍ਕਮ੍ਮ ਚ ਸਤ੍ਥੁਸਾਸਨਾਤਿ ਦੁਕ੍ਕਟਦੁਬ੍ਭਾਸਿਤਮਤ੍ਤਮ੍ਪਿ ਹਿ ਸਞ੍ਚਿਚ੍ਚ ਵੀਤਿਕ੍ਕਮਨ੍ਤੋ ਵੋਕ੍ਕਮ੍ਮ ਵਤ੍ਤਤਿ ਨਾਮ. ਤਦੇਵ ਅਵੀਤਿਕ੍ਕਮਨ੍ਤੋ ਨ ਵੋਕ੍ਕਮ੍ਮ ਵਤ੍ਤਤਿ ਨਾਮ.

ਨ ਵੋ ਅਹਂ, ਆਨਨ੍ਦ, ਤਥਾ ਪਰਕ੍ਕਮਿਸ੍ਸਾਮੀਤਿ ਅਹਂ ਤੁਮ੍ਹੇਸੁ ਤਥਾ ਨ ਪਟਿਪਜ੍ਜਿਸ੍ਸਾਮਿ. ਆਮਕੇਤਿ ਅਪਕ੍ਕੇ. ਆਮਕਮਤ੍ਤੇਤਿ ਆਮਕੇ ਨਾਤਿਸੁਕ੍ਖੇ ਭਾਜਨੇ. ਕੁਮ੍ਭਕਾਰੋ ਹਿ ਆਮਕਂ ਨਾਤਿਸੁਕ੍ਖਂ ਅਪਕ੍ਕਂ ਉਭੋਹਿ ਹਤ੍ਥੇਹਿ ਸਣ੍ਹਿਕਂ ਗਣ੍ਹਾਤਿ ‘‘ਮਾ ਭਿਜ੍ਜਤੂ’’ਤਿ. ਇਤਿ ਯਥਾ ਕੁਮ੍ਭਕਾਰੋ ਤਤ੍ਥ ਪਟਿਪਜ੍ਜਤਿ, ਨਾਹਂ ਤੁਮ੍ਹੇਸੁ ਤਥਾ ਪਟਿਪਜ੍ਜਿਸ੍ਸਾਮਿ. ਨਿਗ੍ਗਯ੍ਹ ਨਿਗ੍ਗਯ੍ਹਾਤਿ ਸਕਿਂ ਓਵਦਿਤ੍ਵਾ ਤੁਣ੍ਹੀ ਨ ਭਵਿਸ੍ਸਾਮਿ, ਨਿਗ੍ਗਣ੍ਹਿਤ੍ਵਾ ਨਿਗ੍ਗਣ੍ਹਿਤ੍ਵਾ ਪੁਨਪ੍ਪੁਨਂ ਓਵਦਿਸ੍ਸਾਮਿ ਅਨੁਸਾਸਿਸ੍ਸਾਮਿ. ਪਵਯ੍ਹ ਪਵਯ੍ਹਾਤਿ ਦੋਸੇ ਪਵਾਹੇਤ੍ਵਾ ਪਵਾਹੇਤ੍ਵਾ. ਯਥਾ ਪਕ੍ਕਭਾਜਨੇਸੁ ਕੁਮ੍ਭਕਾਰੋ ਭਿਨ੍ਨਛਿਨ੍ਨਜਜ੍ਜਰਾਨਿ ਪਵਾਹੇਤ੍ਵਾ ਏਕਤੋ ਕਤ੍ਵਾ ਸੁਪਕ੍ਕਾਨੇਵ ਆਕੋਟੇਤ੍ਵਾ ਆਕੋਟੇਤ੍ਵਾ ਗਣ੍ਹਾਤਿ, ਏਵਮੇਵ ਅਹਮ੍ਪਿ ਪਵਾਹੇਤ੍ਵਾ ਪਵਾਹੇਤ੍ਵਾ ਪੁਨਪ੍ਪੁਨਂ ਓਵਦਿਸ੍ਸਾਮਿ ਅਨੁਸਾਸਿਸ੍ਸਾਮਿ. ਯੋ ਸਾਰੋ ਸੋ ਠਸ੍ਸਤੀਤਿ ਏਵਂ ਵੋ ਮਯਾ ਓਵਦਿਯਮਾਨਾਨਂ ਯੋ ਮਗ੍ਗਫਲਸਾਰੋ, ਸੋ ਠਸ੍ਸਤਿ. ਅਪਿਚ ਲੋਕਿਯਗੁਣਾਪਿ ਇਧ ਸਾਰੋਤ੍ਵੇਵ ਅਧਿਪ੍ਪੇਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਸੁਞ੍ਞਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਚ੍ਛਰਿਯਅਬ੍ਭੁਤਸੁਤ੍ਤਵਣ੍ਣਨਾ

੧੯੭. ਏਵਂ ਮੇ ਸੁਤਨ੍ਤਿ ਅਚ੍ਛਰਿਯਅਬ੍ਭੁਤਸੁਤ੍ਤਂ. ਤਤ੍ਥ ਯਤ੍ਰ ਹਿ ਨਾਮਾਤਿ ਅਚ੍ਛਰਿਯਤ੍ਥੇ ਨਿਪਾਤੋ. ਯੋ ਨਾਮ ਤਥਾਗਤੋਤਿ ਅਤ੍ਥੋ. ਛਿਨ੍ਨਪਪਞ੍ਚੇਤਿ ਏਤ੍ਥ ਪਪਞ੍ਚਾ ਨਾਮ ਤਣ੍ਹਾ ਮਾਨੋ ਦਿਟ੍ਠੀਤਿ ਇਮੇ ਤਯੋ ਕਿਲੇਸਾ. ਛਿਨ੍ਨਵਟੁਮੇਤਿ ਏਤ੍ਥ ਵਟੁਮਨ੍ਤਿ ਕੁਸਲਾਕੁਸਲਕਮ੍ਮਵਟ੍ਟਂ ਵੁਚ੍ਚਤਿ. ਪਰਿਯਾਦਿਨ੍ਨਵਟ੍ਟੇਤਿ ਤਸ੍ਸੇਵ ਵੇਵਚਨਂ. ਸਬ੍ਬਦੁਕ੍ਖਵੀਤਿਵਤ੍ਤੇਤਿ ਸਬ੍ਬਂ ਵਿਪਾਕਵਟ੍ਟਸਙ੍ਖਾਤਂ ਦੁਕ੍ਖਂ ਵੀਤਿਵਤ੍ਤੇ. ਅਨੁਸ੍ਸਰਿਸ੍ਸਤੀਤਿ ਇਦਂ ਯਤ੍ਰਾਤਿ ਨਿਪਾਤਵਸੇਨ ਅਨਾਗਤਵਚਨਂ, ਅਤ੍ਥੋ ਪਨੇਤ੍ਥ ਅਤੀਤਵਸੇਨ ਵੇਦਿਤਬ੍ਬੋ. ਭਗਵਾ ਹਿ ਤੇ ਬੁਦ੍ਧੇ ਅਨੁਸ੍ਸਰਿ, ਨ ਇਦਾਨਿ ਅਨੁਸ੍ਸਰਿਸ੍ਸਤਿ. ਏਵਂਜਚ੍ਚਾਤਿ ਵਿਪਸ੍ਸੀਆਦਯੋ ਖਤ੍ਤਿਯਜਚ੍ਚਾ, ਕਕੁਸਨ੍ਧਾਦਯੋ ਬ੍ਰਾਹ੍ਮਣਜਚ੍ਚਾਤਿ. ਏਵਂਗੋਤ੍ਤਾਤਿ ਵਿਪਸ੍ਸੀਆਦਯੋ ਕੋਣ੍ਡਞ੍ਞਗੋਤ੍ਤਾ, ਕਕੁਸਨ੍ਧਾਦਯੋ ਕਸ੍ਸਪਗੋਤ੍ਤਾਤਿ. ਏਵਂਸੀਲਾਤਿ ਲੋਕਿਯਲੋਕੁਤ੍ਤਰਸੀਲੇਨ ਏਵਂਸੀਲਾ. ਏਵਂਧਮ੍ਮਾਤਿ ਏਤ੍ਥ ਸਮਾਧਿਪਕ੍ਖਾ ਧਮ੍ਮਾ ਅਧਿਪ੍ਪੇਤਾ. ਲੋਕਿਯਲੋਕੁਤ੍ਤਰੇਨ ਸਮਾਧਿਨਾ ਏਵਂਸਮਾਧਿਨੋਤਿ ਅਤ੍ਥੋ. ਏਵਂਪਞ੍ਞਾਤਿ ਲੋਕਿਯਲੋਕੁਤ੍ਤਰਪਞ੍ਞਾਯ ਏਵਂਪਞ੍ਞਾ. ਏਵਂਵਿਹਾਰੀਤਿ ਏਤ੍ਥ ਪਨ ਹੇਟ੍ਠਾ ਸਮਾਧਿਪਕ੍ਖਾਨਂ ਧਮ੍ਮਾਨਂ ਗਹਿਤਤ੍ਤਾ ਵਿਹਾਰੋ ਗਹਿਤੋਵ, ਪੁਨ ਕਸ੍ਮਾ ਗਹਿਤਮੇਵ ਗਣ੍ਹਾਤੀਤਿ ਚੇ, ਨ ਇਦਂ ਗਹਿਤਮੇਵ. ਇਦਞ੍ਹਿ ਨਿਰੋਧਸਮਾਪਤ੍ਤਿਦੀਪਨਤ੍ਥਂ, ਤਸ੍ਮਾ ਏਵਂਨਿਰੋਧਸਮਾਪਤ੍ਤਿਵਿਹਾਰੀਤਿ ਅਯਮੇਤ੍ਥ ਅਤ੍ਥੋ.

ਏਵਂਵਿਮੁਤ੍ਤਾਤਿ ਏਤ੍ਥ ਵਿਕ੍ਖਮ੍ਭਨਵਿਮੁਤ੍ਤਿ ਤਦਙ੍ਗਵਿਮੁਤ੍ਤਿ ਸਮੁਚ੍ਛੇਦਵਿਮੁਤ੍ਤਿ ਪਟਿਪ੍ਪਸ੍ਸਦ੍ਧਿਵਿਮੁਤ੍ਤਿ ਨਿਸ੍ਸਰਣਵਿਮੁਤ੍ਤੀਤਿ ਪਞ੍ਚਵਿਧਾ ਵਿਮੁਤ੍ਤਿਯੋ. ਤਤ੍ਥ ਅਟ੍ਠ ਸਮਾਪਤ੍ਤਿਯੋ ਸਯਂ ਵਿਕ੍ਖਮ੍ਭਿਤੇਹਿ ਨੀਵਰਣਾਦੀਹਿ ਵਿਮੁਤ੍ਤਤ੍ਤਾ ਵਿਕ੍ਖਮ੍ਭਨਵਿਮੁਤ੍ਤੀਤਿ ਸਙ੍ਖਂ ਗਚ੍ਛਨ੍ਤਿ. ਅਨਿਚ੍ਚਾਨੁਪਸ੍ਸਨਾਦਿਕਾ ਸਤ੍ਤ ਅਨੁਪਸ੍ਸਨਾ ਸਯਂ ਤਸ੍ਸ ਤਸ੍ਸ ਪਚ੍ਚਨੀਕਙ੍ਗਵਸੇਨ ਪਰਿਚਤ੍ਤਾਹਿ ਨਿਚ੍ਚਸਞ੍ਞਾਦੀਹਿ ਵਿਮੁਤ੍ਤਤ੍ਤਾ ਤਦਙ੍ਗਵਿਮੁਤ੍ਤੀਤਿ ਸਙ੍ਖਂ ਗਚ੍ਛਨ੍ਤਿ. ਚਤ੍ਤਾਰੋ ਅਰਿਯਮਗ੍ਗਾ ਸਯਂ ਸਮੁਚ੍ਛਿਨ੍ਨੇਹਿ ਕਿਲੇਸੇਹਿ ਵਿਮੁਤ੍ਤਤ੍ਤਾ ਸਮੁਚ੍ਛੇਦਵਿਮੁਤ੍ਤੀਤਿ ਸਙ੍ਖਂ ਗਚ੍ਛਨ੍ਤਿ. ਚਤ੍ਤਾਰਿ ਸਾਮਞ੍ਞਫਲਾਨਿ ਮਗ੍ਗਾਨੁਭਾਵੇਨ ਕਿਲੇਸਾਨਂ ਪਟਿਪ੍ਪਸ੍ਸਦ੍ਧਨ੍ਤੇ ਉਪ੍ਪਨ੍ਨਤ੍ਤਾ ਪਟਿਪ੍ਪਸ੍ਸਦ੍ਧਿਵਿਮੁਤ੍ਤੀਤਿ ਸਙ੍ਖਂ ਗਚ੍ਛਨ੍ਤਿ. ਨਿਬ੍ਬਾਨਂ ਸਬ੍ਬਕਿਲੇਸੇਹਿ ਨਿਸ੍ਸਟਤ੍ਤਾ ਅਪਗਤਤ੍ਤਾ ਦੂਰੇ ਠਿਤਤ੍ਤਾ ਨਿਸ੍ਸਰਣਵਿਮੁਤ੍ਤੀਤਿ ਸਙ੍ਖਂ ਗਤਂ. ਇਤਿ ਇਮਾਸਂ ਪਞ੍ਚਨ੍ਨਂ ਵਿਮੁਤ੍ਤੀਨਂ ਵਸੇਨ ਏਵਂਵਿਮੁਤ੍ਤਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.

੧੯੯. ਤਸ੍ਮਾਤਿਹਾਤਿ ਯਸ੍ਮਾ ਤ੍ਵਂ ‘‘ਤਥਾਗਤਾ ਅਚ੍ਛਰਿਯਾ’’ਤਿ ਵਦਸਿ, ਤਸ੍ਮਾ ਤਂ ਭਿਯ੍ਯੋਸੋ ਮਤ੍ਤਾਯ ਪਟਿਭਨ੍ਤੁ ਤਥਾਗਤਸ੍ਸ ਅਚ੍ਛਰਿਯਾ ਅਬ੍ਭੁਤਧਮ੍ਮਾਤਿ. ਸਤੋ ਸਮ੍ਪਜਾਨੋਤਿ ਏਤ੍ਥ ਦ੍ਵੇਸਮ੍ਪਜਞ੍ਞਾਨਿ ਮਨੁਸ੍ਸਲੋਕੇ ਦੇਵਲੋਕੇ ਚ. ਤਤ੍ਥ ਵੇਸ੍ਸਨ੍ਤਰਜਾਤਕੇ ਬ੍ਰਾਹ੍ਮਣਸ੍ਸ ਦ੍ਵੇ ਪੁਤ੍ਤੇ ਦਤ੍ਵਾ ਪੁਨਦਿਵਸੇ ਸਕ੍ਕਸ੍ਸ ਦੇਵਿਂ ਦਤ੍ਵਾ ਸਕ੍ਕੇਨ ਪਸੀਦਿਤ੍ਵਾ ਦਿਨ੍ਨੇ ਅਟ੍ਠ ਵਰੇ ਗਣ੍ਹਨ੍ਤੋ –

‘‘ਇਤੋ ਵਿਮੁਚ੍ਚਮਾਨਾਹਂ, ਸਗ੍ਗਗਾਮੀ ਵਿਸੇਸਗੂ;

ਅਨਿਵਤ੍ਤੀ ਤਤੋ ਅਸ੍ਸਂ, ਅਟ੍ਠਮੇਤਂ ਵਰਂ ਵਰੇ’’ਤਿ. (ਜਾ. ੨.੨੨.੨੩੦੦) –

ਏਵਂ ਤੁਸਿਤਭਵਨੇ ਮੇ ਪਟਿਸਨ੍ਧਿ ਹੋਤੂਤਿ ਵਰਂ ਅਗ੍ਗਹੇਸਿ, ਤਤੋ ਪਟ੍ਠਾਯ ਤੁਸਿਤਭਵਨੇ ਉਪ੍ਪਜ੍ਜਿਸ੍ਸਾਮੀਤਿ ਜਾਨਾਤਿ, ਇਦਂ ਮਨੁਸ੍ਸਲੋਕੇ ਸਮ੍ਪਜਞ੍ਞਂ. ਵੇਸ੍ਸਨ੍ਤਰਤ੍ਤਭਾਵਤੋ ਪਨ ਚੁਤੋ ਪੁਨ ਤੁਸਿਤਭਵਨੇ ਨਿਬ੍ਬਤ੍ਤਿਤ੍ਵਾ ਨਿਬ੍ਬਤ੍ਤੋਸ੍ਮੀਤਿ ਅਞ੍ਞਾਸਿ, ਇਦਂ ਦੇਵਲੋਕੇ ਸਮ੍ਪਜਞ੍ਞਂ.

ਕਿਂ ਪਨ ਸੇਸਦੇਵਤਾ ਨ ਜਾਨਨ੍ਤੀਤਿ? ਨੋ ਨ ਜਾਨਨ੍ਤਿ. ਤਾ ਪਨ ਉਯ੍ਯਾਨਵਿਮਾਨਕਪ੍ਪਰੁਕ੍ਖੇ ਓਲੋਕੇਤ੍ਵਾ ਦੇਵਨਾਟਕੇਹਿ ਤੂਰਿਯਸਦ੍ਦੇਨ ਪਬੋਧਿਤਾ ‘‘ਮਾਰਿਸ ਅਯਂ ਦੇਵਲੋਕੋ ਤੁਮ੍ਹੇ ਇਧ ਨਿਬ੍ਬਤ੍ਤਾ’’ਤਿ ਸਾਰਿਤਾ ਜਾਨਨ੍ਤਿ. ਬੋਧਿਸਤ੍ਤੋ ਪਠਮਜਵਨਵਾਰੇ ਨ ਜਾਨਾਤਿ, ਦੁਤਿਯਜਵਨਤੋ ਪਟ੍ਠਾਯ ਜਾਨਾਤਿ. ਇਚ੍ਚਸ੍ਸ ਅਞ੍ਞੇਹਿ ਅਸਾਧਾਰਣਜਾਨਨਂ ਹੋਤਿ.

ਅਟ੍ਠਾਸੀਤਿ ਏਤ੍ਥ ਕਿਞ੍ਚਾਪਿ ਅਞ੍ਞੇਪਿ ਦੇਵਾ ਤਤ੍ਥ ਠਿਤਾ ਠਿਤਮ੍ਹਾਤਿ ਜਾਨਨ੍ਤਿ, ਤੇ ਪਨ ਛਸੁ ਦ੍ਵਾਰੇਸੁ ਬਲਵਤਾ ਇਟ੍ਠਾਰਮ੍ਮਣੇਨ ਅਭਿਭੁਯ੍ਯਮਾਨਾ ਸਤਿਂ ਵਿਸ੍ਸਜ੍ਜੇਤ੍ਵਾ ਅਤ੍ਤਨੋ ਭੁਤ੍ਤਪੀਤਭਾਵਮ੍ਪਿ ਅਜਾਨਨ੍ਤਾ ਆਹਾਰੂਪਚ੍ਛੇਦੇਨ ਕਾਲਂ ਕਰੋਨ੍ਤਿ. ਬੋਧਿਸਤ੍ਤਸ੍ਸ ਕਿਂ ਤਥਾਰੂਪਂ ਆਰਮ੍ਮਣਂ ਨਤ੍ਥੀਤਿ? ਨੋ ਨਤ੍ਥਿ. ਸੋ ਹਿ ਸੇਸਦੇਵੇ ਦਸਹਿ ਠਾਨੇਹਿ ਅਧਿਗ੍ਗਣ੍ਹਾਤਿ, ਆਰਮ੍ਮਣੇਨ ਪਨ ਅਤ੍ਤਾਨਂ ਮਦ੍ਦਿਤੁਂ ਨ ਦੇਤਿ, ਤਂ ਆਰਮ੍ਮਣਂ ਅਭਿਭਵਿਤ੍ਵਾ ਤਿਟ੍ਠਤਿ. ਤੇਨ ਵੁਤ੍ਤਂ – ‘‘ਸਤੋ ਸਮ੍ਪਜਾਨੋ, ਆਨਨ੍ਦ, ਬੋਧਿਸਤ੍ਤੋ ਤੁਸਿਤੇ ਕਾਯੇ ਅਟ੍ਠਾਸੀ’’ਤਿ.

੨੦੦. ਯਾਵਤਾਯੁਕਨ੍ਤਿ ਸੇਸਤ੍ਤਭਾਵੇਸੁ ਕਿਂ ਯਾਵਤਾਯੁਕਂ ਨ ਤਿਟ੍ਠਤ੍ਤੀਤਿ? ਆਮ ਨ ਤਿਟ੍ਠਤਿ. ਅਞ੍ਞਦਾ ਹਿ ਦੀਘਾਯੁਕਦੇਵਲੋਕੇ ਨਿਬ੍ਬਤ੍ਤੋ ਤਤ੍ਥ ਪਾਰਮਿਯੋ ਨ ਸਕ੍ਕਾ ਪੂਰੇਤੁਨ੍ਤਿ ਅਕ੍ਖੀਨਿ ਨਿਮੀਲੇਤ੍ਵਾ ਅਧਿਮੁਤ੍ਤਿਕਾਲਂਕਿਰਿਯਂ ਨਾਮ ਕਤ੍ਵਾ ਮਨੁਸ੍ਸਲੋਕੇ ਨਿਬ੍ਬਤ੍ਤਤਿ. ਅਯਂ ਕਾਲਙ੍ਕਿਰਿਯਾ ਅਞ੍ਞੇਸਂ ਨ ਹੋਤਿ. ਤਦਾ ਪਨ ਅਦਿਨ੍ਨਦਾਨਂ ਨਾਮ ਨਤ੍ਥਿ, ਅਰਕ੍ਖਿਤਸੀਲਂ ਨਾਮ ਨਤ੍ਥਿ, ਸਬ੍ਬਪਾਰਮੀਨਂ ਪੂਰਿਤਤ੍ਤਾ ਯਾਵਤਾਯੁਕਂ ਅਟ੍ਠਾਸਿ.

ਸਤੋ ਸਮ੍ਪਜਾਨੋ ਤੁਸਿਤਾ ਕਾਯਾ ਚਵਿਤ੍ਵਾ ਮਾਤੁਕੁਚ੍ਛਿਂ ਓਕ੍ਕਮਤੀਤਿ ਏਵਂ ਤਾਵ ਸਬ੍ਬਪਾਰਮਿਯੋ ਪੂਰੇਤ੍ਵਾ ਤਦਾ ਬੋਧਿਸਤ੍ਤੋ ਯਾਵਤਾਯੁਕਂ ਅਟ੍ਠਾਸਿ. ਦੇਵਤਾਨਂ ਪਨ – ‘‘ਮਨੁਸ੍ਸਗਣਨਾਵਸੇਨ ਇਦਾਨਿ ਸਤ੍ਤਹਿ ਦਿਵਸੇਹਿ ਚੁਤਿ ਭਵਿਸ੍ਸਤੀ’’ਤਿ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਉਪ੍ਪਜ੍ਜਨ੍ਤਿ – ਮਾਲਾ ਮਿਲਾਯਨ੍ਤਿ, ਵਤ੍ਥਾਨਿ ਕਿਲਿਸ੍ਸਨ੍ਤਿ, ਕਚ੍ਛੇਹਿ ਸੇਦਾ ਮੁਚ੍ਚਨ੍ਤਿ, ਕਾਯੇ ਦੁਬ੍ਬਣ੍ਣਿਯਂ ਓਕ੍ਕਮਤਿ, ਦੇਵੋ ਦੇਵਾਸਨੇ ਨ ਸਣ੍ਠਾਤਿ.

ਤਤ੍ਥ ਮਾਲਾਤਿ ਪਟਿਸਨ੍ਧਿਗ੍ਗਹਣਦਿਵਸੇ ਪਿਲ਼ਨ੍ਧਨਮਾਲਾ. ਤਾ ਕਿਰ ਸਟ੍ਠਿਸਤਸਹਸ੍ਸਾਧਿਕਾ ਸਤ੍ਤਪਣ੍ਣਾਸ-ਵਸ੍ਸਕੋਟਿਯੋ ਅਮਿਲਾਯਿਤ੍ਵਾ ਤਦਾ ਮਿਲਾਯਨ੍ਤਿ. ਵਤ੍ਥੇਸੁਪਿ ਏਸੇਵ ਨਯੋ. ਏਤ੍ਤਕਂ ਪਨ ਕਾਲਂ ਦੇਵਾਨਂ ਨੇਵ ਸੀਤਂ ਨ ਉਣ੍ਹਂ ਹੋਤਿ, ਤਸ੍ਮਿਂ ਕਾਲੇ ਸਰੀਰਤੋ ਬਿਨ੍ਦੁਬਿਨ੍ਦੁਵਸੇਨ ਸੇਦਾ ਮੁਚ੍ਚਨ੍ਤਿ. ਏਤ੍ਤਕਞ੍ਚ ਕਾਲਂ ਤੇਸਂ ਸਰੀਰੇ ਖਣ੍ਡਿਚ੍ਚਪਾਲਿਚ੍ਚਾਦਿਵਸੇਨ ਵਿਵਣ੍ਣਤਾ ਨ ਪਞ੍ਞਾਯਤਿ, ਦੇਵਧੀਤਾ ਸੋਲ਼ਸਵਸ੍ਸੁਦ੍ਦੇਸਿਕਾ ਵਿਯ, ਦੇਵਪੁਤ੍ਤਾ ਵੀਸਤਿਵਸ੍ਸੁਦ੍ਦੇਸਿਕਾ ਵਿਯ ਖਾਯਨ੍ਤਿ. ਮਰਣਕਾਲੇ ਪਨ ਨੇਸਂ ਕਿਲਨ੍ਤਰੂਪੋ ਅਤ੍ਤਭਾਵੋ ਹੋਤਿ. ਏਤ੍ਤਕਞ੍ਚ ਨੇਸਂ ਕਾਲਂ ਦੇਵਲੋਕੇ ਉਕ੍ਕਣ੍ਠਿਤਾ ਨਾਮ ਨਤ੍ਥਿ, ਮਰਣਕਾਲੇ ਪਨ ਨਿਸ੍ਸਸਨ੍ਤਿ ਵਿਜਮ੍ਭਨ੍ਤਿ, ਸਕੇ ਆਸਨੇ ਨਾਭਿਰਮਨ੍ਤਿ.

ਇਮਾਨਿ ਪਨ ਪੁਬ੍ਬਨਿਮਿਤ੍ਤਾਨਿ, ਯਥਾ ਲੋਕੇ ਮਹਾਪੁਞ੍ਞਾਨਂ ਰਾਜਰਾਜਮਹਾਮਤ੍ਤਾਦੀਨਂਯੇਵ ਉਕ੍ਕਾਪਾਤਭੂਮਿਚਾਲਚਨ੍ਦਗ੍ਗਾਹਾਦੀਨਿ ਨਿਮਿਤ੍ਤਾਨਿ ਪਞ੍ਞਾਯਨ੍ਤਿ, ਨ ਸਬ੍ਬੇਸਂ, ਏਵਮੇਵ ਮਹੇਸਕ੍ਖਾਨਂ ਦੇਵਤਾਨਂਯੇਵ ਪਞ੍ਞਾਯਨ੍ਤਿ, ਨ ਸਬ੍ਬੇਸਂ. ਯਥਾ ਚ ਮਨੁਸ੍ਸੇਸੁ ਪੁਬ੍ਬਨਿਮਿਤ੍ਤਾਨਿ ਨਕ੍ਖਤ੍ਤਪਾਠਕਾਦਯੋਵ ਜਾਨਨ੍ਤਿ, ਨ ਸਬ੍ਬੇ, ਏਵਮੇਵ ਤਾਨਿਪਿ ਸਬ੍ਬੇ ਦੇਵਾ ਨ ਜਾਨਨ੍ਤਿ, ਪਣ੍ਡਿਤਾ ਏਵ ਪਨ ਜਾਨਨ੍ਤਿ. ਤਤ੍ਥ ਯੇ ਚ ਮਨ੍ਦੇਨ ਕੁਸਲਕਮ੍ਮੇਨ ਨਿਬ੍ਬਤ੍ਤਾ ਦੇਵਪੁਤ੍ਤਾ, ਤੇ ਤੇਸੁ ਉਪ੍ਪਨ੍ਨੇਸੁ – ‘‘ਇਦਾਨਿ ਕੋ ਜਾਨਾਤਿ, ਕੁਹਿਂ ਨਿਬ੍ਬਤ੍ਤਿਸ੍ਸਾਮਾ’’ਤਿ ਭਾਯਨ੍ਤਿ. ਯੇ ਮਹਾਪੁਞ੍ਞਾ, ਤੇ – ‘‘ਅਮ੍ਹੇਹਿ ਦਿਨ੍ਨਂ ਦਾਨਂ ਰਕ੍ਖਿਤਂ ਸੀਲਂ ਭਾਵਿਤਂ ਭਾਵਨਂ ਆਗਮ੍ਮ ਉਪਰਿਦੇਵਲੋਕੇਸੁ ਸਮ੍ਪਤ੍ਤਿਂ ਅਨੁਭਵਿਸ੍ਸਾਮਾ’’ਤਿ ਨ ਭਾਯਨ੍ਤਿ. ਬੋਧਿਸਤ੍ਤੋਪਿ ਤਾਨਿ ਪੁਬ੍ਬਨਿਮਿਤ੍ਤਾਨਿ ਦਿਸ੍ਵਾ ‘‘ਇਦਾਨਿ ਅਨਨ੍ਤਰੇ ਅਤ੍ਤਭਾਵੇ ਬੁਦ੍ਧੋ ਭਵਿਸ੍ਸਾਮੀ’’ਤਿ ਨ ਭਾਯਿ. ਅਥਸ੍ਸ ਤੇਸੁ ਨਿਮਿਤ੍ਤੇਸੁ ਪਾਤੁਭੂਤੇਸੁ ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਸਨ੍ਨਿਪਤਿਤ੍ਵਾ – ‘‘ਮਾਰਿਸ ਤੁਮ੍ਹੇਹਿ ਦਸ ਪਾਰਮਿਯੋ ਪੂਰੇਨ੍ਤੇਹਿ ਨ ਸਕ੍ਕਸਮ੍ਪਤ੍ਤਿਂ ਨ ਮਾਰਬ੍ਰਹ੍ਮਚਕ੍ਕਵਤ੍ਤਿਸਮ੍ਪਤ੍ਤਿਂ ਪਤ੍ਥੇਨ੍ਤੇਹਿ ਪੂਰਿਤਾ, ਲੋਕਨਿਤ੍ਥਰਣਤ੍ਥਾਯ ਪਨ ਬੁਦ੍ਧਤ੍ਤਂ ਪਤ੍ਥਯਮਾਨੇਹਿ ਪੂਰਿਤਾ. ਸੋ ਵੋ ਇਦਾਨਿ ਕਾਲੋ ਮਾਰਿਸ ਬੁਦ੍ਧਤ੍ਤਾਯ, ਸਮਯੋ ਮਾਰਿਸ ਬੁਦ੍ਧਤ੍ਤਾਯਾ’’ਤਿ ਯਾਚਨ੍ਤਿ.

ਅਥ ਮਹਾਸਤ੍ਤੋ ਦੇਵਤਾਨਂ ਪਟਿਞ੍ਞਂ ਅਦਤ੍ਵਾਵ ਕਾਲਦੀਪਦੇਸਕੁਲਜਨੇਤ੍ਤਿਆਯੁਪਰਿਚ੍ਛੇਦਵਸੇਨ ਪਞ੍ਚਮਹਾਵਿਲੋਕਨਂ ਨਾਮ ਵਿਲੋਕੇਸਿ. ਤਤ੍ਥ ‘‘ਕਾਲੋ ਨੁ ਖੋ, ਨ ਕਾਲੋ’’ਤਿ ਪਠਮਂ ਕਾਲਂ ਵਿਲੋਕੇਸਿ. ਤਤ੍ਥ ਵਸ੍ਸਸਤਸਹਸ੍ਸਤੋ ਉਦ੍ਧਂ ਵਡ੍ਢਿਤਆਯੁਕਾਲੋ ਕਾਲੋ ਨਾਮ ਨ ਹੋਤਿ. ਕਸ੍ਮਾ? ਤਦਾ ਹਿ ਸਤ੍ਤਾਨਂ ਜਾਤਿਜਰਾਮਰਣਾਨਿ ਨ ਪਞ੍ਞਾਯਨ੍ਤਿ, ਬੁਦ੍ਧਾਨਞ੍ਚ ਧਮ੍ਮਦੇਸਨਾ ਨਾਮ ਤਿਲਕ੍ਖਣਮੁਤ੍ਤਾ ਨਤ੍ਥਿ, ਤੇਸਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਕਥੇਨ੍ਤਾਨਂ ‘‘ਕਿਂ ਨਾਮੇਤਂ ਕਥੇਨ੍ਤੀ’’ਤਿ ਨੇਵ ਸੋਤੁਂ ਨ ਸਦ੍ਧਾਤੁਂ ਮਞ੍ਞਨ੍ਤਿ, ਤਤੋ ਅਭਿਸਮਯੋ ਨ ਹੋਤਿ, ਤਸ੍ਮਿਂ ਅਸਤਿ ਅਨਿਯ੍ਯਾਨਿਕਂ ਸਾਸਨਂ ਹੋਤਿ. ਤਸ੍ਮਾ ਸੋ ਅਕਾਲੋ. ਵਸ੍ਸਸਤਤੋ ਊਨਆਯੁਕਾਲੋਪਿ ਕਾਲੋ ਨਾਮ ਨ ਹੋਤਿ. ਕਸ੍ਮਾ? ਤਦਾ ਹਿ ਸਤ੍ਤਾ ਉਸ੍ਸਨ੍ਨਕਿਲੇਸਾ ਹੋਨ੍ਤਿ, ਉਸ੍ਸਨ੍ਨਕਿਲੇਸਾਨਞ੍ਚ ਦਿਨ੍ਨੋਵਾਦੋ ਓਵਾਦਟ੍ਠਾਨੇ ਨ ਤਿਟ੍ਠਤਿ. ਉਦਕੇ ਦਣ੍ਡਰਾਜਿ ਵਿਯ ਖਿਪ੍ਪਂ ਵਿਗਚ੍ਛਤਿ. ਤਸ੍ਮਾ ਸੋਪਿ ਅਕਾਲੋ. ਸਤਸਹਸ੍ਸਤੋ ਪਨ ਪਟ੍ਠਾਯ ਹੇਟ੍ਠਾ ਵਸ੍ਸਸਤਤੋ ਪਟ੍ਠਾਯ ਉਦ੍ਧਂ ਆਯੁਕਾਲੋ ਕਾਲੋ ਨਾਮ. ਤਦਾ ਚ ਵਸ੍ਸਸਤਕਾਲੋ ਹੋਤਿ. ਅਥ ਮਹਾਸਤ੍ਤੋ ‘‘ਨਿਬ੍ਬਤ੍ਤਿਤਬ੍ਬਕਾਲੋ’’ਤਿ ਕਾਲਂ ਪਸ੍ਸਿ.

ਤਤੋ ਦੀਪਂ ਵਿਲੋਕੇਨ੍ਤੋ ਸਪਰਿਵਾਰੇ ਚਤ੍ਤਾਰੋ ਦੀਪੇ ਓਲੋਕੇਤ੍ਵਾ – ‘‘ਤੀਸੁ ਦੀਪੇਸੁ ਬੁਦ੍ਧਾ ਨ ਨਿਬ੍ਬਤ੍ਤਨ੍ਤਿ, ਜਮ੍ਬੁਦੀਪੇਯੇਵ ਨਿਬ੍ਬਤ੍ਤਨ੍ਤੀ’’ਤਿ ਦੀਪਂ ਪਸ੍ਸਿ.

ਤਤੋ – ‘‘ਜਮ੍ਬੁਦੀਪੋ ਨਾਮ ਮਹਾ, ਦਸਯੋਜਨਸਹਸ੍ਸਪਰਿਮਾਣੋ, ਕਤਰਸ੍ਮਿਂ ਨੁ ਖੋ ਪਦੇਸੇ ਬੁਦ੍ਧਾ ਨਿਬ੍ਬਤ੍ਤਨ੍ਤੀ’’ਤਿ ਦੇਸਂ ਵਿਲੋਕੇਨ੍ਤੋ ਮਜ੍ਝਿਮਦੇਸਂ ਪਸ੍ਸਿ. ਮਜ੍ਝਿਮਦੇਸੋ ਨਾਮ ‘‘ਪੁਰਤ੍ਥਿਮਾਯ ਦਿਸਾਯ ਗਜਙ੍ਗਲਂ ਨਾਮ ਨਿਗਮੋ’’ਤਿਆਦਿਨਾ ਨਯੇਨ ਵਿਨਯੇ (ਮਹਾਵ. ੨੫੯) ਵੁਤ੍ਤੋਵ. ਸੋ ਪਨ ਆਯਾਮਤੋ ਤੀਣਿ ਯੋਜਨਸਤਾਨਿ. ਵਿਤ੍ਥਾਰਤੋ ਅਡ੍ਢਤਿਯਾਨਿ, ਪਰਿਕ੍ਖੇਪਤੋ ਨਵਯੋਜਨਸਤਾਨੀਤਿ. ਏਤਸ੍ਮਿਞ੍ਹਿ ਪਦੇਸੇ ਚਤ੍ਤਾਰਿ ਅਟ੍ਠ ਸੋਲ਼ਸ ਵਾ ਅਸਙ੍ਖ੍ਯੇਯ੍ਯਾਨਿ, ਕਪ੍ਪਸਤਸਹਸ੍ਸਞ੍ਚ ਪਾਰਮਿਯੋ ਪੂਰੇਤ੍ਵਾ ਸਮ੍ਮਾਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ. ਦ੍ਵੇ ਅਸਙ੍ਖ੍ਯੇਯ੍ਯਾਨਿ, ਕਪ੍ਪਸਤਸਹਸ੍ਸਞ੍ਚ ਪਾਰਮਿਯੋ ਪੂਰੇਤ੍ਵਾ ਪਚ੍ਚੇਕਬੁਦ੍ਧਾ ਉਪ੍ਪਜ੍ਜਨ੍ਤਿ, ਏਕਂ ਅਸਙ੍ਖ੍ਯੇਯ੍ਯਂ, ਕਪ੍ਪਸਤਸਹਸ੍ਸਞ੍ਚ ਪਾਰਮਿਯੋ ਪੂਰੇਤ੍ਵਾ ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਮਹਾਸਾਵਕਾ ਉਪ੍ਪਜ੍ਜਨ੍ਤਿ, ਚਤੁਨ੍ਨਂ ਮਹਾਦੀਪਾਨਂ ਦ੍ਵਿਸਹਸ੍ਸਾਨਂ ਪਰਿਤ੍ਤਦੀਪਾਨਞ੍ਚ ਇਸ੍ਸਰਿਯਾਧਿਪਚ੍ਚਕਾਰਕਚਕ੍ਕਵਤ੍ਤਿਰਾਜਾਨੋ ਉਪ੍ਪਜ੍ਜਨ੍ਤਿ, ਅਞ੍ਞੇ ਚ ਮਹੇਸਕ੍ਖਾ ਖਤ੍ਤਿਯਬ੍ਰਾਹ੍ਮਣਗਹਪਤਿਮਹਾਸਾਲਾ ਉਪ੍ਪਜ੍ਜਨ੍ਤਿ. ਇਦਞ੍ਚੇਤ੍ਥ ਕਪਿਲਵਤ੍ਥੁ ਨਾਮ ਨਗਰਂ, ਤਤ੍ਥ ਮਯਾ ਨਿਬ੍ਬਤ੍ਤਿਤਬ੍ਬਨ੍ਤਿ ਨਿਟ੍ਠਮਗਮਾਸਿ.

ਤਤੋ ਕੁਲਂ ਵਿਲੋਕੇਨ੍ਤੋ – ‘‘ਬੁਦ੍ਧਾ ਨਾਮ ਲੋਕਸਮ੍ਮਤੇ ਕੁਲੇ ਨਿਬ੍ਬਤ੍ਤਨ੍ਤਿ, ਇਦਾਨਿ ਚ ਖਤ੍ਤਿਯਕੁਲਂ ਲੋਕਸਮ੍ਮਤਂ, ਤਤ੍ਥ ਨਿਬ੍ਬਤ੍ਤਿਸ੍ਸਾਮਿ, ਸੁਦ੍ਧੋਦਨੋ ਨਾਮ ਰਾਜਾ ਮੇ ਪਿਤਾ ਭਵਿਸ੍ਸਤੀ’’ਤਿ ਕੁਲਂ ਪਸ੍ਸਿ.

ਤਤੋ ਮਾਤਰਂ ਵਿਲੋਕੇਨ੍ਤੋ – ‘‘ਬੁਦ੍ਧਮਾਤਾ ਨਾਮ ਲੋਲਾ ਸੁਰਾਧੁਤ੍ਤਾ ਨ ਹੋਤਿ, ਕਪ੍ਪਸਤਸਹਸ੍ਸਂ ਪੂਰਿਤਪਾਰਮੀ ਜਾਤਿਤੋ ਪਟ੍ਠਾਯ ਅਖਣ੍ਡਪਞ੍ਚਸੀਲਾ ਹੋਤਿ, ਅਯਞ੍ਚ ਮਹਾਮਾਯਾ ਨਾਮ ਦੇਵੀ ਏਦਿਸਾ. ਅਯਂ ਮੇ ਮਾਤਾ ਭਵਿਸ੍ਸਤਿ. ਕਿਤ੍ਤਕਂ ਪਨਸ੍ਸਾ ਆਯੂ’’ਤਿ ਆਵਜ੍ਜਨ੍ਤੋ – ‘‘ਦਸਨ੍ਨਂ ਮਾਸਾਨਂ ਉਪਰਿ ਸਤ੍ਤ ਦਿਵਸਾਨੀ’’ਤਿ ਪਸ੍ਸਿ.

ਇਤਿ ਇਮਂ ਪਞ੍ਚਮਹਾਵਿਲੋਕਨਂ ਵਿਲੋਕੇਤ੍ਵਾ – ‘‘ਕਾਲੋ ਮੇ ਮਾਰਿਸਾ ਬੁਦ੍ਧਭਾਵਾਯਾ’’ਤਿ ਦੇਵਤਾਨਂ ਸਙ੍ਗਹਂ ਕਰੋਨ੍ਤੋ ਪਟਿਞ੍ਞਂ ਦਤ੍ਵਾ ‘‘ਗਚ੍ਛਥ ਤੁਮ੍ਹੇ’’ਤਿ ਤਾ ਦੇਵਤਾ ਉਯ੍ਯੋਜੇਤ੍ਵਾ ਤੁਸਿਤਦੇਵਤਾਹਿ ਪਰਿਵੁਤੋ ਤੁਸਿਤਪੁਰੇ ਨਨ੍ਦਨਵਨਂ ਪਾਵਿਸਿ. ਸਬ੍ਬਦੇਵਲੋਕੇਸੁ ਹਿ ਨਨ੍ਦਨਵਨਂ ਅਤ੍ਥਿਯੇਵ. ਤਤ੍ਥ ਨਂ ਦੇਵਤਾ – ‘‘ਇਤੋ ਚੁਤੋ ਸੁਗਤਿਂ ਗਚ੍ਛ, ਇਤੋ ਚੁਤੋ ਸੁਗਤਿਂ ਗਚ੍ਛਾ’’ਤਿ ਪੁਬ੍ਬੇਕਤਕੁਸਲਕਮ੍ਮੋਕਾਸਂ ਸਾਰਯਮਾਨਾ ਵਿਚਰਨ੍ਤਿ. ਸੋ ਏਵਂ ਦੇਵਤਾਹਿ ਕੁਸਲਂ ਸਾਰਯਮਾਨਾਹਿ ਪਰਿਵੁਤੋ ਤਤ੍ਥ ਵਿਚਰਨ੍ਤੋਵ ਚਵਿ.

ਏਵਂ ਚੁਤੋ ਚਵਾਮੀਤਿ ਪਜਾਨਾਤਿ, ਚੁਤਿਚਿਤ੍ਤਂ ਨ ਜਾਨਾਤਿ. ਪਟਿਸਨ੍ਧਿਂ ਗਹੇਤ੍ਵਾਪਿ ਪਟਿਸਨ੍ਧਿਚਿਤ੍ਤਂ ਨ ਜਾਨਾਤਿ, ਇਮਸ੍ਮਿਂ ਮੇ ਠਾਨੇ ਪਟਿਸਨ੍ਧਿ ਗਹਿਤਾਤਿ ਏਵਂ ਪਨ ਜਾਨਾਤਿ. ਕੇਚਿ ਪਨ ਥੇਰਾ ‘‘ਆਵਜ੍ਜਨਪਰਿਯਾਯੋ ਨਾਮ ਲਦ੍ਧੁਂ ਵਟ੍ਟਤਿ, ਦੁਤਿਯਤਤਿਯਚਿਤ੍ਤਵਾਰੇਯੇਵ ਜਾਨਿਸ੍ਸਤੀ’’ਤਿ ਵਦਨ੍ਤਿ. ਤਿਪਿਟਕਮਹਾਸੀਵਤ੍ਥੇਰੋ ਪਨਾਹ – ‘‘ਮਹਾਸਤ੍ਤਾਨਂ ਪਟਿਸਨ੍ਧਿ ਨ ਅਞ੍ਞੇਸਂ ਪਟਿਸਨ੍ਧਿਸਦਿਸਾ, ਕੋਟਿਪ੍ਪਤ੍ਤਂ ਤੇਸਂ ਸਤਿਸਮ੍ਪਜਞ੍ਞਂ. ਯਸ੍ਮਾ ਪਨ ਤੇਨੇਵ ਚਿਤ੍ਤੇਨ ਤਂ ਚਿਤ੍ਤਂ ਞਾਤੁਂ ਨ ਸਕ੍ਕਾ, ਤਸ੍ਮਾ ਚੁਤਿਚਿਤ੍ਤਂ ਨ ਜਾਨਾਤਿ. ਚੁਤਿਕ੍ਖਣੇਪਿ ਚਵਾਮੀਤਿ ਪਜਾਨਾਤਿ, ਪਟਿਸਨ੍ਧਿਂ ਗਹੇਤ੍ਵਾਪਿ ਪਟਿਸਨ੍ਧਿਚਿਤ੍ਤਂ ਨ ਜਾਨਾਤਿ, ਅਸੁਕਸ੍ਮਿਂ ਠਾਨੇ ਪਟਿਸਨ੍ਧਿ ਗਹਿਤਾਤਿ ਪਜਾਨਾਤਿ, ਤਸ੍ਮਿਂ ਕਾਲੇ ਦਸਸਹਸ੍ਸੀ ਕਮ੍ਪਤੀ’’ਤਿ. ਏਵਂ ਸਤੋ ਸਮ੍ਪਜਾਨੋ ਮਾਤੁਕੁਚ੍ਛਿਂ ਓਕ੍ਕਮਨ੍ਤੋ ਪਨ ਏਕੂਨਵੀਸਤਿਯਾ ਪਟਿਸਨ੍ਧਿਚਿਤ੍ਤੇਸੁ ਮੇਤ੍ਤਾਪੁਬ੍ਬਭਾਗਸ੍ਸ ਸੋਮਨਸ੍ਸ-ਸਹਗਤ-ਞਾਣਸਮ੍ਪਯੁਤ੍ਤ-ਅਸਙ੍ਖਾਰਿਕ-ਕੁਸਲਚਿਤ੍ਤਸ੍ਸ ਸਦਿਸਮਹਾਵਿਪਾਕਚਿਤ੍ਤੇਨ ਪਟਿਸਨ੍ਧਿਂ ਗਣ੍ਹਿ. ਮਹਾਸੀਵਤ੍ਥੇਰੋ ਪਨ ‘‘ਉਪੇਕ੍ਖਾਸਹਗਤੇਨਾ’’ਤਿ ਆਹ.

ਪਟਿਸਨ੍ਧਿਂ ਗਣ੍ਹਨ੍ਤੋ ਪਨ ਆਸਾਲ਼੍ਹੀਪੁਣ੍ਣਮਾਯਂ ਉਤ੍ਤਰਾਸਾਲ਼੍ਹਨਕ੍ਖਤ੍ਤੇਨ ਅਗ੍ਗਹੇਸਿ. ਤਦਾ ਕਿਰ ਮਹਾਮਾਯਾ ਪੁਰੇ ਪੁਣ੍ਣਮਾਯ ਸਤ੍ਤਮਦਿਵਸਤੋ ਪਟ੍ਠਾਯ ਵਿਗਤਸੁਰਾਪਾਨਂ ਮਾਲਾਗਨ੍ਧਵਿਭੂਸਨਸਮ੍ਪਨ੍ਨਂ ਨਕ੍ਖਤ੍ਤਕੀਲ਼ਂ ਅਨੁਭਵਮਾਨਾ ਸਤ੍ਤਮੇ ਦਿਵਸੇ ਪਾਤੋ ਵੁਟ੍ਠਾਯ ਗਨ੍ਧੋਦਕੇਨ ਨ੍ਹਾਯਿਤ੍ਵਾ ਸਬ੍ਬਾਲਙ੍ਕਾਰਵਿਭੂਸਿਤਾ ਵਰਭੋਜਨਂ ਭੁਞ੍ਜਿਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਾਯ ਸਿਰੀਗਬ੍ਭਂ ਪਵਿਸਿਤ੍ਵਾ ਸਿਰੀਸਯਨੇ ਨਿਪਨ੍ਨਾ ਨਿਦ੍ਦਂ ਓਕ੍ਕਮਮਾਨਾ ਇਦਂ ਸੁਪਿਨਂ ਅਦ੍ਦਸ – ‘‘ਚਤ੍ਤਾਰੋ ਕਿਰ ਨਂ ਮਹਾਰਾਜਾਨੋ ਸਯਨੇਨੇਵ ਸਦ੍ਧਿਂ ਉਕ੍ਖਿਪਿਤ੍ਵਾ ਅਨੋਤਤ੍ਤਦਹਂ ਨੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਅਥ ਨੇਸਂ ਦੇਵਿਯੋ ਆਗਨ੍ਤ੍ਵਾ ਮਨੁਸ੍ਸਮਲਹਰਣਤ੍ਥਂ ਨ੍ਹਾਪੇਤ੍ਵਾ ਦਿਬ੍ਬਵਤ੍ਥਂ ਨਿਵਾਸੇਤ੍ਵਾ ਗਨ੍ਧੇਹਿ ਵਿਲਿਮ੍ਪੇਤ੍ਵਾ ਦਿਬ੍ਬਪੁਪ੍ਫਾਨਿ ਪਿਲ਼ਨ੍ਧਿਤ੍ਵਾ ਤਤੋ ਅਵਿਦੂਰੇ ਰਜਤਪਬ੍ਬਤੋ, ਤਸ੍ਸ ਅਨ੍ਤੋ ਕਨਕਵਿਮਾਨਂ ਅਤ੍ਥਿ, ਤਸ੍ਮਿਂ ਪਾਚੀਨਤੋ ਸੀਸਂ ਕਤ੍ਵਾ ਨਿਪਜ੍ਜਾਪੇਸੁਂ. ਅਥ ਬੋਧਿਸਤ੍ਤੋ ਸੇਤਵਰਵਾਰਣੋ ਹੁਤ੍ਵਾ ਤਤੋ ਅਵਿਦੂਰੇ ਏਕੋ ਸੁਵਣ੍ਣਪਬ੍ਬਤੋ, ਤਤ੍ਥ ਚਰਿਤ੍ਵਾ ਤਤੋ ਓਰੁਯ੍ਹ ਰਜਤਪਬ੍ਬਤਂ ਅਭਿਰੁਹਿਤ੍ਵਾ ਉਤ੍ਤਰਦਿਸਤੋ ਆਗਮ੍ਮ ਕਨਕਵਿਮਾਨਂ ਪਵਿਸਿਤ੍ਵਾ ਮਾਤਰਂ ਪਦਕ੍ਖਿਣਂ ਕਤ੍ਵਾ ਦਕ੍ਖਿਣਪਸ੍ਸਂ ਫਾਲੇਤ੍ਵਾ ਕੁਚ੍ਛਿਂ ਪਵਿਟ੍ਠਸਦਿਸੋ ਅਹੋਸਿ.

ਅਥ ਪਬੁਦ੍ਧਾ ਦੇਵੀ ਤਂ ਸੁਪਿਨਂ ਰਞ੍ਞੋ ਆਰੋਚੇਸਿ. ਰਾਜਾ ਪਭਾਤਾਯ ਰਤ੍ਤਿਯਾ ਚਤੁਸਟ੍ਠਿਮਤ੍ਤੇ ਬ੍ਰਾਹ੍ਮਣਪਾਮੋਕ੍ਖੇ ਪਕ੍ਕੋਸਾਪੇਤ੍ਵਾ ਹਰਿਤੂਪਲਿਤ੍ਤਾਯ ਲਾਜਾਦੀਹਿ ਕਤਮਙ੍ਗਲਸਕ੍ਕਾਰਾਯ ਭੂਮਿਯਾ ਮਹਾਰਹਾਨਿ ਆਸਨਾਨਿ ਪਞ੍ਞਾਪੇਤ੍ਵਾ ਤਤ੍ਥ ਨਿਸਿਨ੍ਨਾਨਂ ਬ੍ਰਾਹ੍ਮਣਾਨਂ ਸਪ੍ਪਿਮਧੁਸਕ੍ਕਰਾਭਿਸਙ੍ਖਾਰਸ੍ਸ ਵਰਪਾਯਾਸਸ੍ਸ ਸੁਵਣ੍ਣਰਜਤਪਾਤਿਯੋ ਪੂਰੇਤ੍ਵਾ ਸੁਵਣ੍ਣਰਜਤਪਾਤੀਤਿਹੇਵ ਪਟਿਕੁਜ੍ਜਿਤ੍ਵਾ ਅਦਾਸਿ, ਅਞ੍ਞੇਹਿ ਚ ਅਹਤਵਤ੍ਥਕਪਿਲਗਾਵੀਦਾਨਾਦੀਹਿ ਤੇ ਸਨ੍ਤਪ੍ਪੇਸਿ. ਅਥ ਨੇਸਂ ਸਬ੍ਬਕਾਮਸਨ੍ਤਪ੍ਪਿਤਾਨਂ ਸੁਪਿਨਂ ਆਰੋਚਾਪੇਤ੍ਵਾ – ‘‘ਕਿਂ ਭਵਿਸ੍ਸਤੀ’’ਤਿ ਪੁਚ੍ਛਿ. ਬ੍ਰਾਹ੍ਮਣਾ ਆਹਂਸੁ – ‘‘ਮਾ ਚਿਨ੍ਤਯਿ ਮਹਾਰਾਜ, ਦੇਵਿਯਾ ਤੇ ਕੁਚ੍ਛਿਮ੍ਹਿ ਗਬ੍ਭੋ ਪਤਿਟ੍ਠਿਤੋ, ਸੋ ਚ ਖੋ ਪੁਰਿਸਗਬ੍ਭੋ, ਨ ਇਤ੍ਥਿਗਬ੍ਭੋ, ਪੁਤ੍ਤੋ ਤੇ ਭਵਿਸ੍ਸਤਿ. ਸੋ ਸਚੇ ਅਗਾਰਂ ਅਜ੍ਝਾਵਸਿਸ੍ਸਤਿ, ਰਾਜਾ ਭਵਿਸ੍ਸਤਿ ਚਕ੍ਕਵਤ੍ਤੀ. ਸਚੇ ਅਗਾਰਾ ਨਿਕ੍ਖਮ੍ਮ ਪਬ੍ਬਜਿਸ੍ਸਤਿ, ਬੁਦ੍ਧੋ ਭਵਿਸ੍ਸਤਿ ਲੋਕੇ ਵਿਵਟ੍ਟਚ੍ਛਦੋ’’ਤਿ. ਏਵਂ ਸਤੋ ਸਮ੍ਪਜਾਨੋ ਬੋਧਿਸਤ੍ਤੋ ਤੁਸਿਤਕਾਯਾ ਚਵਿਤ੍ਵਾ ਮਾਤੁਕੁਚ੍ਛਿਂ ਓਕ੍ਕਮਤਿ.

ਤਤ੍ਥ ਸਤੋ ਸਮ੍ਪਜਾਨੋਤਿ ਇਮਿਨਾ ਚਤੁਤ੍ਥਾਯ ਗਬ੍ਭਾਵਕ੍ਕਨ੍ਤਿਯਾ ਓਕ੍ਕਮਤੀਤਿ ਦਸ੍ਸੇਤਿ. ਚਤਸ੍ਸੋ ਹਿ ਗਬ੍ਭਾਵਕ੍ਕਨ੍ਤਿਯੋ.

‘‘ਚਤਸ੍ਸੋ ਇਮਾ, ਭਨ੍ਤੇ, ਗਬ੍ਭਾਵਕ੍ਕਨ੍ਤਿਯੋ. ਇਧ, ਭਨ੍ਤੇ, ਏਕਚ੍ਚੋ ਅਸਮ੍ਪਜਾਨੋ ਮਾਤੁਕੁਚ੍ਛਿਂ ਓਕ੍ਕਮਤਿ, ਅਸਮ੍ਪਜਾਨੋ ਮਾਤੁਕੁਚ੍ਛਿਸ੍ਮਿਂ ਠਾਤਿ, ਅਸਮ੍ਪਜਾਨੋ ਮਾਤੁਕੁਚ੍ਛਿਮ੍ਹਾ ਨਿਕ੍ਖਮਤਿ, ਅਯਂ ਪਠਮਾ ਗਬ੍ਭਾਵਕ੍ਕਨ੍ਤਿ.

ਪੁਨ ਚਪਰਂ, ਭਨ੍ਤੇ, ਇਧੇਕਚ੍ਚੋ ਸਮ੍ਪਜਾਨੋ ਮਾਤੁਕੁਚ੍ਛਿਂ ਓਕ੍ਕਮਤਿ, ਅਸਮ੍ਪਜਾਨੋ ਮਾਤੁਕੁਚ੍ਛਿਸ੍ਮਿਂ ਠਾਤਿ, ਅਸਮ੍ਪਜਾਨੋ ਮਾਤੁਕੁਚ੍ਛਿਮ੍ਹਾ ਨਿਕ੍ਖਮਤਿ, ਅਯਂ ਦੁਤਿਯਾ ਗਬ੍ਭਾਵਕ੍ਕਨ੍ਤਿ.

ਪੁਨ ਚਪਰਂ, ਭਨ੍ਤੇ, ਇਧੇਕਚ੍ਚੋ ਸਮ੍ਪਜਾਨੋ ਮਾਤੁਕੁਚ੍ਛਿਂ ਓਕ੍ਕਮਤਿ, ਸਮ੍ਪਜਾਨੋ ਮਾਤੁਕੁਚ੍ਛਿਸ੍ਮਿਂ ਠਾਤਿ, ਅਸਮ੍ਪਜਾਨੋ ਮਾਤੁਕੁਚ੍ਛਿਮ੍ਹਾ ਨਿਕ੍ਖਮਤਿ, ਅਯਂ ਤਤਿਯਾ ਗਬ੍ਭਾਵਕ੍ਕਨ੍ਤਿ.

ਪੁਨ ਚਪਰਂ, ਭਨ੍ਤੇ, ਇਧੇਕਚ੍ਚੋ ਸਮ੍ਪਜਾਨੋ ਮਾਤੁਕੁਚ੍ਛਿਂ ਓਕ੍ਕਮਤਿ, ਸਮ੍ਪਜਾਨੋ ਮਾਤੁਕੁਚ੍ਛਿਸ੍ਮਿਂ ਠਾਤਿ, ਸਮ੍ਪਜਾਨੋ ਮਾਤੁਕੁਚ੍ਛਿਮ੍ਹਾ ਨਿਕ੍ਖਮਤਿ, ਅਯਂ ਚਤੁਤ੍ਥਾ ਗਬ੍ਭਾਵਕ੍ਕਨ੍ਤੀ’’ਤਿ (ਦੀ. ਨਿ. ੩.੧੪੭).

ਏਤਾਸੁ ਪਠਮਾ ਲੋਕਿਯਮਨੁਸ੍ਸਾਨਂ ਹੋਤਿ, ਦੁਤਿਯਾ ਅਸੀਤਿਮਹਾਸਾਵਕਾਨਂ, ਤਤਿਯਾ ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਪਚ੍ਚੇਕਬੋਧਿਸਤ੍ਤਾਨਞ੍ਚ. ਤੇ ਕਿਰ ਕਮ੍ਮਜਵਾਤੇਹਿ ਉਦ੍ਧਂਪਾਦਾ ਅਧੋਸਿਰਾ ਅਨੇਕਸਤਪੋਰਿਸੇ ਪਪਾਤੇ ਵਿਯ ਯੋਨਿਮੁਖੇ ਤਾਲ਼ਚ੍ਛਿਗ੍ਗਲੇਨ ਹਤ੍ਥੀ ਵਿਯ ਅਤਿਵਿਯ ਸਮ੍ਬਾਧੇਨ ਯੋਨਿਮੁਖੇਨ ਨਿਕ੍ਖਮਮਾਨਾ ਅਨਨ੍ਤਂ ਦੁਕ੍ਖਂ ਪਾਪੁਣਨ੍ਤਿ. ਤੇਨ ਨੇਸਂ ‘‘ਮਯਂ ਨਿਕ੍ਖਮਾਮਾ’’ਤਿ ਸਮ੍ਪਜਾਨਤਾ ਨ ਹੋਤਿ. ਚਤੁਤ੍ਥਾ ਸਬ੍ਬਞ੍ਞੁਬੋਧਿਸਤ੍ਤਾਨਂ. ਤੇ ਹਿ ਮਾਤੁਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਨ੍ਤਾਪਿ ਜਾਨਨ੍ਤਿ, ਤਤ੍ਥ ਵਸਨ੍ਤਾਪਿ ਜਾਨਨ੍ਤਿ. ਨਿਕ੍ਖਮਨਕਾਲੇਪਿ ਨੇਸਂ ਕਮ੍ਮਜਵਾਤਾ ਉਦ੍ਧਂਪਾਦੇ ਅਧੋਸਿਰੇ ਕਤ੍ਵਾ ਖਿਪਿਤੁਂ ਨ ਸਕ੍ਕੋਨ੍ਤਿ, ਦ੍ਵੇ ਹਤ੍ਥੇ ਪਸਾਰੇਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਠਿਤਕਾਵ ਨਿਕ੍ਖਮਨ੍ਤਿ.

੨੦੧. ਮਾਤੁਕੁਚ੍ਛਿਂ ਓਕ੍ਕਮਤੀਤਿ ਏਤ੍ਥ ਮਾਤੁਕੁਚ੍ਛਿਂ ਓਕ੍ਕਨ੍ਤੋ ਹੋਤੀਤਿ ਅਤ੍ਥੋ. ਓਕ੍ਕਨ੍ਤੇ ਹਿ ਤਸ੍ਮਿਂ ਏਵਂ ਹੋਤਿ, ਨ ਓਕ੍ਕਮਮਾਨੇ. ਅਪ੍ਪਮਾਣੋਤਿ ਬੁਦ੍ਧਪ੍ਪਮਾਣੋ, ਵਿਪੁਲੋਤਿ ਅਤ੍ਥੋ. ਉਲ਼ਾਰੋਤਿ ਤਸ੍ਸੇਵ ਵੇਵਚਨਂ. ਦੇਵਾਨੁਭਾਵਨ੍ਤਿ ਏਤ੍ਥ ਦੇਵਾਨਂ ਅਯਮਾਨੁਭਾਵੋ – ਨਿਵਤ੍ਥਵਤ੍ਥਸ੍ਸ ਪਭਾ ਦ੍ਵਾਦਸ ਯੋਜਨਾਨਿ ਫਰਤਿ, ਤਥਾ ਸਰੀਰਸ੍ਸ, ਤਥਾ ਅਲਙ੍ਕਾਰਸ੍ਸ, ਤਥਾ ਵਿਮਾਨਸ੍ਸ, ਤਂ ਅਤਿਕ੍ਕਮਿਤ੍ਵਾਤਿ ਅਤ੍ਥੋ.

ਲੋਕਨ੍ਤਰਿਕਾਤਿ ਤਿਣ੍ਣਂ ਤਿਣ੍ਣਂ ਚਕ੍ਕਵਾਲ਼ਾਨਂ ਅਨ੍ਤਰਾ ਏਕੇਕੋ ਲੋਕਨ੍ਤਰਿਕਾ ਹੋਤਿ, ਤਿਣ੍ਣਂ ਸਕਟਚਕ੍ਕਾਨਂ ਪਤ੍ਤਾਨਂ ਵਾ ਅਞ੍ਞਮਞ੍ਞਂ ਆਹਚ੍ਚ ਠਪਿਤਾਨਂ ਮਜ੍ਝੇ ਓਕਾਸੋ ਵਿਯ. ਸੋ ਪਨ ਲੋਕਨ੍ਤਰਿਕਨਿਰਯੋ ਪਰਿਮਾਣਤੋ ਅਟ੍ਠਯੋਜਨਸਹਸ੍ਸੋ ਹੋਤਿ. ਅਘਾਤਿ ਨਿਚ੍ਚਵਿਵਟਾ. ਅਸਂਵੁਤਾਤਿ ਹੇਟ੍ਠਾਪਿ ਅਪ੍ਪਤਿਟ੍ਠਾ. ਅਨ੍ਧਕਾਰਾਤਿ ਤਮਭੂਤਾ. ਅਨ੍ਧਕਾਰਤਿਮਿਸਾਤਿ ਚਕ੍ਖੁਵਿਞ੍ਞਾਣੁਪ੍ਪਤ੍ਤਿਨਿਵਾਰਣਤੋ ਅਨ੍ਧਭਾਵਕਰਣਤਿਮਿਸੇਨ ਸਮਨ੍ਨਾਗਤਾ. ਤਤ੍ਥ ਕਿਰ ਚਕ੍ਖੁਵਿਞ੍ਞਾਣਂ ਨ ਜਾਯਤਿ. ਏਵਂਮਹਿਦ੍ਧਿਕਾਤਿ ਚਨ੍ਦਿਮਸੂਰਿਯਾ ਕਿਰ ਏਕਪ੍ਪਹਾਰੇਨੇਵ ਤੀਸੁ ਦੀਪੇਸੁ ਪਞ੍ਞਾਯਨ੍ਤਿ, ਏਵਂਮਹਿਦ੍ਧਿਕਾ. ਏਕੇਕਾਯ ਦਿਸਾਯ ਨਵਨਵਯੋਜਨਸਤਸਹਸ੍ਸਾਨਿ ਅਨ੍ਧਕਾਰਂ ਵਿਧਮਿਤ੍ਵਾ ਆਲੋਕਂ ਦਸ੍ਸੇਨ੍ਤਿ, ਏਵਂ ਮਹਾਨੁਭਾਵਾ. ਆਭਾਯ ਨਾਨੁਭੋਨ੍ਤੀਤਿ ਅਤ੍ਤਨੋ ਪਭਾਯ ਨਪ੍ਪਹੋਨ੍ਤਿ. ਤੇ ਕਿਰ ਚਕ੍ਕਵਾਲ਼ਪਬ੍ਬਤਸ੍ਸ ਵੇਮਜ੍ਝੇਨ ਚਰਨ੍ਤਿ, ਚਕ੍ਕਵਾਲ਼ਪਬ੍ਬਤਞ੍ਚ ਅਤਿਕ੍ਕਮ੍ਮ ਲੋਕਨ੍ਤਰਿਕਨਿਰਯੋ, ਤਸ੍ਮਾ ਤੇ ਤਤ੍ਥ ਆਭਾਯ ਨਪ੍ਪਹੋਨ੍ਤਿ.

ਯੇਪਿ ਤਤ੍ਥ ਸਤ੍ਤਾਤਿ ਯੇਪਿ ਤਸ੍ਮਿਂ ਲੋਕਨ੍ਤਰਮਹਾਨਿਰਯੇ ਸਤ੍ਤਾ ਉਪਪਨ੍ਨਾ. ਕਿਂ ਪਨ ਕਮ੍ਮਂ ਕਤ੍ਵਾ ਤੇ ਤਤ੍ਥ ਉਪ੍ਪਜ੍ਜਨ੍ਤੀਤਿ? ਭਾਰਿਯਂ ਦਾਰੁਣਂ ਮਾਤਾਪਿਤੂਨਂ ਧਮ੍ਮਿਕਸਮਣਬ੍ਰਾਹ੍ਮਣਾਨਞ੍ਚ ਉਪਰਿ ਅਪਰਾਧਂ ਅਞ੍ਞਞ੍ਚ ਦਿਵਸੇ ਦਿਵਸੇ ਪਾਣਵਧਾਦਿਸਾਹਸਿਕਕਮ੍ਮਂ ਕਤ੍ਵਾ ਉਪ੍ਪਜ੍ਜਨ੍ਤਿ ਤਮ੍ਬਪਣ੍ਣਿਦੀਪੇ ਅਭਯਚੋਰਨਾਗਚੋਰਾਦਯੋ ਵਿਯ. ਤੇਸਂ ਅਤ੍ਤਭਾਵੋ ਤਿਗਾਵੁਤਿਕੋ ਹੋਤਿ, ਵਗ੍ਗੁਲੀਨਂ ਵਿਯ ਦੀਘਨਖਾ ਹੋਨ੍ਤਿ. ਤੇ ਰੁਕ੍ਖੇ ਵਗ੍ਗੁਲਿਯੋ ਵਿਯ ਨਖੇਹਿ ਚਕ੍ਕਵਾਲ਼ਪਾਦੇ ਲਗ੍ਗਨ੍ਤਿ. ਯਦਾ ਪਨ ਸਂਸਪ੍ਪਨ੍ਤਾ ਅਞ੍ਞਮਞ੍ਞਸ੍ਸ ਹਤ੍ਥਪਾਸਂ ਗਤਾ ਹੋਨ੍ਤਿ, ਅਥ ‘‘ਭਕ੍ਖੋ ਨੋ ਲਦ੍ਧੋ’’ਤਿ ਮਞ੍ਞਮਾਨਾ ਤਤ੍ਥ ਵਾਵਟਾ ਵਿਪਰਿਵਤ੍ਤਿਤ੍ਵਾ ਲੋਕਸਨ੍ਧਾਰਕਉਦਕੇ ਪਤਨ੍ਤਿ. ਵਾਤੇ ਪਹਰਨ੍ਤੇ ਮਧੁਕਫਲਾਨਿ ਵਿਯ ਛਿਜ੍ਜਿਤ੍ਵਾ ਉਦਕੇ ਪਤਨ੍ਤਿ. ਪਤਿਤਮਤ੍ਤਾ ਚ ਅਚ੍ਚਨ੍ਤਖਾਰੇ ਉਦਕੇ ਪਿਟ੍ਠਪਿਣ੍ਡਿ ਵਿਯ ਵਿਲੀਯਨ੍ਤਿ.

ਅਞ੍ਞੇਪਿ ਕਿਰ ਭੋ ਸਨ੍ਤਿ ਸਤ੍ਤਾਤਿ – ‘‘ਯਥਾ ਮਯਂ ਮਹਾਦੁਕ੍ਖਂ ਅਨੁਭਵਾਮ, ਏਵਂ ਅਞ੍ਞੇਪਿ ਕਿਰ ਸਤ੍ਤਾ ਇਦਂ ਦੁਕ੍ਖਂ ਅਨੁਭਵਨ੍ਤਾ ਇਧੂਪਪਨ੍ਨਾ’’ਤਿ ਤਂ ਦਿਵਸਂ ਪਸ੍ਸਨ੍ਤਿ. ਅਯਂ ਪਨ ਓਭਾਸੋ ਏਕਯਾਗੁਪਾਨਮਤ੍ਤਮ੍ਪਿ ਨ ਤਿਟ੍ਠਤਿ, ਯਾਵਤਾ ਨਿਦ੍ਦਾਯਿਤ੍ਵਾ ਪਬੁਦ੍ਧੋ ਆਰਮ੍ਮਣਂ ਵਿਭਾਵੇਤਿ, ਤਤ੍ਤਕਂ ਕਾਲਂ ਹੋਤਿ. ਦੀਘਭਾਣਕਾ ਪਨ ‘‘ਅਚ੍ਛਰਾਸਙ੍ਘਾਟਮਤ੍ਤਮੇਵ ਵਿਜ੍ਜੁਭਾਸੋ ਵਿਯ ਨਿਚ੍ਛਰਿਤ੍ਵਾ ਕਿਂ ਇਦਨ੍ਤਿ ਭਣਨ੍ਤਾਨਂਯੇਵ ਅਨ੍ਤਰਧਾਯਤੀ’’ਤਿ ਵਦਨ੍ਤਿ. ਸਙ੍ਕਮ੍ਪਤੀਤਿ ਸਮਨ੍ਤਤੋ ਕਮ੍ਪਤਿ. ਇਤਰਦ੍ਵਯਂ ਪੁਰਿਮਪਸ੍ਸੇਵ ਵੇਵਚਨਂ. ਪੁਨ ਅਪ੍ਪਮਾਣੋ ਚਾਤਿਆਦਿ ਨਿਗਮਨਤ੍ਥਂ ਵੁਤ੍ਤਂ.

੨੦੨. ਚਤ੍ਤਾਰੋ ਦੇਵਪੁਤ੍ਤਾ ਚਤੁਦ੍ਦਿਸਂ ਆਰਕ੍ਖਾਯ ਉਪਗਚ੍ਛਨ੍ਤੀਤਿ ਏਤ੍ਥ ਚਤ੍ਤਾਰੋਤਿ ਚਤੁਨ੍ਨਂ ਮਹਾਰਾਜੂਨਂ ਵਸੇਨ ਵੁਤ੍ਤਂ, ਦਸਸਹਸ੍ਸਚਕ੍ਕਵਾਲ਼ੇ ਪਨ ਚਤ੍ਤਾਰੋ ਚਤ੍ਤਾਰੋ ਕਤ੍ਵਾ ਚਤ੍ਤਾਲੀਸਦਸਸਹਸ੍ਸਾ ਹੋਨ੍ਤਿ. ਤਤ੍ਥ ਇਮਸ੍ਮਿਂ ਚਕ੍ਕਵਾਲ਼ੇ ਮਹਾਰਾਜਾਨੋ ਖਗ੍ਗਹਤ੍ਥਾ ਆਗਨ੍ਤ੍ਵਾ ਬੋਧਿਸਤ੍ਤਸ੍ਸ ਆਰਕ੍ਖਣਤ੍ਥਾਯ ਉਪਗਨ੍ਤ੍ਵਾ ਸਿਰੀਗਬ੍ਭਂ ਪਵਿਟ੍ਠਾ, ਇਤਰੇ ਗਬ੍ਭਦ੍ਵਾਰਤੋ ਪਟ੍ਠਾਯ ਅਵਰੁਦ੍ਧਪਂਸੁਪਿਸਾਚਕਾਦਿਯਕ੍ਖਗਣੇ ਪਟਿਕ੍ਕਮਾਪੇਤ੍ਵਾ ਯਾਵ ਚਕ੍ਕਵਾਲ਼ਾ ਆਰਕ੍ਖਂ ਗਣ੍ਹਿਂਸੁ.

ਕਿਮਤ੍ਥਂ ਪਨਾਯਂ ਰਕ੍ਖਾ ਆਗਤਾ? ਨਨੁ ਪਟਿਸਨ੍ਧਿਕ੍ਖਣੇ ਕਲਲਕਾਲਤੋ ਪਟ੍ਠਾਯ ਸਚੇਪਿ ਕੋਟਿਸਤਸਹਸ੍ਸਾ ਮਾਰਾ ਕੋਟਿਸਤਸਹਸ੍ਸਂ ਸਿਨੇਰੁਂ ਉਕ੍ਖਿਪਿਤ੍ਵਾ ਬੋਧਿਸਤ੍ਤਸ੍ਸ ਵਾ ਬੋਧਿਸਤ੍ਤਮਾਤੁਯਾ ਵਾ ਅਨ੍ਤਰਾਯਕਰਣਤ੍ਥਂ ਆਗਚ੍ਛੇਯ੍ਯੁਂ, ਸਬ੍ਬੇ ਅਨ੍ਤਰਾਵ ਅਨ੍ਤਰਧਾਯੇਯ੍ਯੁਂ. ਵੁਤ੍ਤਮ੍ਪਿ ਚੇਤਂ ਭਗਵਤਾ ਰੁਹਿਰੁਪ੍ਪਾਦਵਤ੍ਥੁਸ੍ਮਿਂ – ‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਪਰੂਪਕ੍ਕਮੇਨ ਤਥਾਗਤਂ ਜੀਵਿਤਾ ਵੋਰੋਪੇਯ੍ਯ. ਅਨੁਪਕ੍ਕਮੇਨ, ਭਿਕ੍ਖਵੇ, ਤਥਾਗਤਾ ਪਰਿਨਿਬ੍ਬਾਯਨ੍ਤਿ. ਗਚ੍ਛਥ ਤੁਮ੍ਹੇ, ਭਿਕ੍ਖਵੇ, ਯਥਾਵਿਹਾਰਂ, ਅਰਕ੍ਖਿਯਾ, ਭਿਕ੍ਖਵੇ, ਤਥਾਗਤਾ’’ਤਿ (ਚੂਲ਼ਵ. ੩੪੧). ਏਵਮੇਤਂ, ਨ ਪਰੂਪਕ੍ਕਮੇਨ ਤੇਸਂ ਜੀਵਿਤਨ੍ਤਰਾਯੋ ਅਤ੍ਥਿ. ਸਨ੍ਤਿ ਖੋ ਪਨ ਅਮਨੁਸ੍ਸਾ ਵਿਰੂਪਾ ਦੁਦ੍ਦਸਿਕਾ, ਭੇਰਵਰੁਪਾ ਪਕ੍ਖਿਨੋ, ਯੇਸਂ ਰੂਪਂ ਦਿਸ੍ਵਾ ਸਦ੍ਦਂ ਵਾ ਸੁਤ੍ਵਾ ਬੋਧਿਸਤ੍ਤਮਾਤੁ ਭਯਂ ਵਾ ਸਨ੍ਤਾਸੋ ਵਾ ਉਪ੍ਪਜ੍ਜੇਯ੍ਯ, ਤੇਸਂ ਨਿਵਾਰਣਤ੍ਥਾਯ ਰਕ੍ਖਂ ਅਗ੍ਗਹੇਸੁਂ. ਅਪਿਚ ਖੋ ਬੋਧਿਸਤ੍ਤਸ੍ਸ ਪੁਞ੍ਞਤੇਜੇਨ ਸਞ੍ਜਾਤਗਾਰਵਾ ਅਤ੍ਤਨੋ ਗਾਰਵਚੋਦਿਤਾਪਿ ਤੇ ਏਵਮਕਂਸੁ.

ਕਿਂ ਪਨ ਤੇ ਅਨ੍ਤੋਗਬ੍ਭਂ ਪਵਿਸਿਤ੍ਵਾ ਠਿਤਾ ਚਤ੍ਤਾਰੋ ਮਹਾਰਾਜਾਨੋ ਬੋਧਿਸਤ੍ਤਮਾਤੁਯਾ ਅਤ੍ਤਾਨਂ ਦਸ੍ਸੇਨ੍ਤਿ ਨ ਦਸ੍ਸੇਨ੍ਤੀਤਿ? ਨਹਾਨਮਣ੍ਡਨਭੋਜਨਾਦਿਸਰੀਰਕਿਚ੍ਚਕਾਲੇ ਨ ਦਸ੍ਸੇਨ੍ਤਿ, ਸਿਰੀਗਬ੍ਭਂ ਪਵਿਸਿਤ੍ਵਾ ਵਰਸਯਨੇ ਨਿਪਨ੍ਨਕਾਲੇ ਪਨ ਦਸ੍ਸੇਨ੍ਤਿ. ਤਤ੍ਥ ਕਿਞ੍ਚਾਪਿ ਅਮਨੁਸ੍ਸਦਸ੍ਸਨਂ ਨਾਮ ਮਨੁਸ੍ਸਾਨਂ ਸਪ੍ਪਟਿਭਯਂ ਹੋਤਿ, ਬੋਧਿਸਤ੍ਤਮਾਤਾ ਪਨ ਅਤ੍ਤਨੋ ਚੇਵ ਪੁਤ੍ਤਸ੍ਸ ਚ ਪੁਞ੍ਞਾਨੁਭਾਵੇਨ ਤੇ ਦਿਸ੍ਵਾ ਨ ਭਾਯਤਿ, ਪਕਤਿਅਨ੍ਤੇਪੁਰਪਾਲਕੇਸੁ ਵਿਯ ਅਸ੍ਸਾ ਤੇਸੁ ਚਿਤ੍ਤਂ ਉਪ੍ਪਜ੍ਜਤਿ.

੨੦੩. ਪਕਤਿਯਾ ਸੀਲਵਤੀਤਿ ਸਭਾਵੇਨੇਵ ਸੀਲਸਮ੍ਪਨ੍ਨਾ. ਅਨੁਪ੍ਪਨ੍ਨੇ ਕਿਰ ਬੁਦ੍ਧੇ ਮਨੁਸ੍ਸਾ ਤਾਪਸਪਰਿਬ੍ਬਾਜਕਾਨਂ ਸਨ੍ਤਿਕੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਸੀਲਂ ਗਣ੍ਹਨ੍ਤਿ, ਬੋਧਿਸਤ੍ਤਮਾਤਾਪਿ ਕਾਲਦੇਵਿਲਸ੍ਸ ਇਸਿਨੋ ਸਨ੍ਤਿਕੇ ਗਣ੍ਹਾਤਿ. ਬੋਧਿਸਤ੍ਤੇ ਪਨ ਕੁਚ੍ਛਿਗਤੇ ਅਞ੍ਞਸ੍ਸ ਪਾਦਮੂਲੇ ਨਿਸੀਦਿਤੁਂ ਨਾਮ ਨ ਸਕ੍ਕਾ, ਸਮਾਸਨੇ ਨਿਸੀਦਿਤ੍ਵਾ ਗਹਿਤਸੀਲਮ੍ਪਿ ਅਵਞ੍ਞਾ ਕਾਰਣਮਤ੍ਤਂ ਹੋਤਿ. ਤਸ੍ਮਾ ਸਯਮੇਵ ਸੀਲਂ ਅਗ੍ਗਹੇਸੀਤਿ ਵੁਤ੍ਤਂ ਹੋਤਿ.

ਪੁਰਿਸੇਸੂਤਿ ਬੋਧਿਸਤ੍ਤਸ੍ਸ ਪਿਤਰਂ ਆਦਿਂ ਕਤ੍ਵਾ ਕੇਸੁਚਿ ਮਨੁਸ੍ਸੇਸੁ ਪੁਰਿਸਾਧਿਪ੍ਪਾਯਚਿਤ੍ਤਂ ਨੁਪ੍ਪਜ੍ਜਤਿ. ਤਞ੍ਚ ਖੋ ਬੋਧਿਸਤ੍ਤੇ ਗਾਰਵੇਨ, ਨ ਪਹੀਨਕਿਲੇਸਤਾਯ. ਬੋਧਿਸਤ੍ਤਮਾਤੁ ਰੂਪਂ ਪਨ ਸੁਕੁਸਲਾਪਿ ਸਿਪ੍ਪਿਕਾ ਪੋਤ੍ਥਕਮ੍ਮਾਦੀਸੁਪਿ ਕਾਤੁਂ ਨ ਸਕ੍ਕੋਨ੍ਤਿ, ਤਂ ਦਿਸ੍ਵਾ ਪੁਰਿਸਸ੍ਸ ਰਾਗੋ ਨੁਪ੍ਪਜ੍ਜਤੀਤਿ ਨ ਸਕ੍ਕਾ ਵਤ੍ਤੁਂ. ਸਚੇ ਪਨ ਤਂ ਰਤ੍ਤਚਿਤ੍ਤੋ ਉਪਸਙ੍ਕਮਿਤੁਕਾਮੋ ਹੋਤਿ, ਪਾਦਾ ਨ ਵਹਨ੍ਤਿ, ਦਿਬ੍ਬਸਙ੍ਖਲਿਕਾ ਵਿਯ ਬਜ੍ਝਨ੍ਤਿ. ਤਸ੍ਮਾ ‘‘ਅਨਤਿਕ੍ਕਮਨੀਯਾ’’ਤਿਆਦਿ ਵੁਤ੍ਤਂ.

ਪਞ੍ਚਨ੍ਨਂ ਕਾਮਗੁਣਾਨਨ੍ਤਿ ਪੁਬ੍ਬੇ ‘‘ਕਾਮਗੁਣੂਪਸਂਹਿਤ’’ਨ੍ਤਿ ਪੁਰਿਸਾਧਿਪ੍ਪਾਯਵਸੇਨ ਵਤ੍ਥੁਪਟਿਕ੍ਖੇਪੋ ਕਥਿਤੋ, ਇਧ ਆਰਮ੍ਮਣਪ੍ਪਟਿਲਾਭੋ ਦਸ੍ਸਿਤੋ. ਤਦਾ ਕਿਰ ‘‘ਦੇਵਿਯਾ ਏਵਰੂਪੋ ਪੁਤ੍ਤੋ ਕੁਚ੍ਛਿਸ੍ਮਿਂ ਉਪ੍ਪਨ੍ਨੋ’’ਤਿ, ਸੁਤ੍ਵਾ ਸਮਨ੍ਤਤੋ ਰਾਜਾਨੋ ਮਹਗ੍ਘਆਭਰਣਤੂਰਿਯਾਦਿਵਸੇਨ ਪਞ੍ਚਦ੍ਵਾਰਾਰਮ੍ਮਣਵਤ੍ਥੁਭੂਤਂ ਪਣ੍ਣਾਕਾਰਂ ਪੇਸੇਨ੍ਤਿ, ਬੋਧਿਸਤ੍ਤਸ੍ਸ ਚ ਬੋਧਿਸਤ੍ਤਮਾਤੁਯਾ ਚ ਕਤਕਮ੍ਮਸ੍ਸ ਉਸ੍ਸਨ੍ਨਤ੍ਤਾ ਲਾਭਸਕ੍ਕਾਰਸ੍ਸ ਪਮਾਣਪਰਿਚ੍ਛੇਦੋ ਨਾਮ ਨਤ੍ਥਿ.

੨੦੪. ਅਕਿਲਨ੍ਤਕਾਯਾਤਿ ਯਥਾ ਅਞ੍ਞਾ ਇਤ੍ਥਿਯੋ ਗਬ੍ਭਭਾਰੇਨ ਕਿਲਮਨ੍ਤਿ, ਹਤ੍ਥਪਾਦਾ ਉਦ੍ਧੁਮਾਤਕਾਦੀਨਿ ਪਾਪੁਣਨ੍ਤਿ, ਨ ਏਵਂ ਤਸ੍ਸਾ ਕੋਚਿ ਕਿਲਮਥੋ ਅਹੋਸਿ. ਤਿਰੋਕੁਚ੍ਛਿਗਤਨ੍ਤਿ ਅਨ੍ਤੋਕੁਚ੍ਛਿਗਤਂ. ਕਲਲਾਦਿਕਾਲਂ ਅਤਿਕ੍ਕਮਿਤ੍ਵਾ ਸਞ੍ਜਾਤਅਙ੍ਗਪਚ੍ਚਙ੍ਗਂ ਅਹੀਨਿਨ੍ਦ੍ਰਿਯਭਾਵਂ ਉਪਗਤਂਯੇਵ ਪਸ੍ਸਤਿ. ਕਿਮਤ੍ਥਂ ਪਸ੍ਸਤਿ? ਸੁਖਵਾਸਤ੍ਥਂ. ਯਥੇਵ ਹਿ ਮਾਤਾ ਪੁਤ੍ਤੇਨ ਸਦ੍ਧਿਂ ਨਿਸਿਨ੍ਨਾ ਵਾ ਨਿਪਨ੍ਨਾ ਵਾ ‘‘ਹਤ੍ਥਂ ਵਾ ਪਾਦਂ ਵਾ ਓਲਮ੍ਬਨ੍ਤਂ ਉਕ੍ਖਿਪਿਤ੍ਵਾ ਸਣ੍ਠਪੇਸ੍ਸਾਮੀ’’ਤਿ ਸੁਖਵਾਸਤ੍ਥਂ ਪੁਤ੍ਤਂ ਓਲੋਕੇਤਿ, ਏਵਂ ਬੋਧਿਸਤ੍ਤਮਾਤਾਪਿ ਯਂ ਤਂ ਮਾਤੁ ਉਟ੍ਠਾਨਗਮਨਪਰਿਵਤ੍ਤਨਨਿਸਜ੍ਜਾਦੀਸੁ ਉਣ੍ਹਸੀਤਲੋਣਿਕਤਿਤ੍ਤਕਕਟੁਕਾਹਾਰਅਜ੍ਝੋਹਰਣਕਾਲੇਸੁ ਚ ਗਬ੍ਭਸ੍ਸ ਦੁਕ੍ਖਂ ਉਪ੍ਪਜ੍ਜਤਿ, ਅਤ੍ਥਿ ਨੁ ਖੋ ਮੇ ਤਂ ਪੁਤ੍ਤਸ੍ਸਾਤਿ ਸੁਖਵਾਸਤ੍ਥਂ ਬੋਧਿਸਤ੍ਤਂ ਓਲੋਕਯਮਾਨਾ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨਂ ਬੋਧਿਸਤ੍ਤਂ ਪਸ੍ਸਤਿ. ਯਥਾ ਹਿ ਅਞ੍ਞੇ ਅਨ੍ਤੋਕੁਚ੍ਛਿਗਤਾ ਪਕ੍ਕਾਸਯਂ ਅਜ੍ਝੋਤ੍ਥਰਿਤ੍ਵਾ ਆਮਾਸਯਂ ਉਕ੍ਖਿਪਿਤ੍ਵਾ ਉਦਰਪਟਲਂ ਪਿਟ੍ਠਿਤੋ ਕਤ੍ਵਾ ਪਿਟ੍ਠਿਕਣ੍ਟਕਂ ਨਿਸ੍ਸਾਯ ਉਕ੍ਕੁਟਿਕਾ ਦ੍ਵੀਸੁ ਮੁਟ੍ਠੀਸੁ ਹਨੁਕਂ ਠਪੇਤ੍ਵਾ ਦੇਵੇ ਵਸ੍ਸਨ੍ਤੇ ਰੁਕ੍ਖਸੁਸਿਰੇ ਮਕ੍ਕਟਾ ਵਿਯ ਨਿਸੀਦਨ੍ਤਿ, ਨ ਏਵਂ ਬੋਧਿਸਤ੍ਤੋ. ਬੋਧਿਸਤ੍ਤੋ ਪਨ ਪਿਟ੍ਠਿਕਣ੍ਟਕਂ ਪਿਟ੍ਠਿਤੋ ਕਤ੍ਵਾ ਧਮ੍ਮਾਸਨੇ ਧਮ੍ਮਕਥਿਕੋ ਵਿਯ ਪਲ੍ਲਙ੍ਕਂ ਆਭੁਜਿਤ੍ਵਾ ਪੁਰਤ੍ਥਾਭਿਮੁਖੋ ਨਿਸੀਦਤਿ. ਪੁਬ੍ਬੇ ਕਤਕਮ੍ਮਂ ਪਨਸ੍ਸਾ ਵਤ੍ਥੁਂ ਸੋਧੇਤਿ, ਸੁਦ੍ਧੇ ਵਤ੍ਥੁਮ੍ਹਿ ਸੁਖੁਮਚ੍ਛਵਿਲਕ੍ਖਣਂ ਨਿਬ੍ਬਤ੍ਤਤਿ. ਅਥ ਨਂ ਕੁਚ੍ਛਿਗਤਂ ਤਚੋ ਪਟਿਚ੍ਛਾਦੇਤੁਂ ਨ ਸਕ੍ਕੋਤਿ, ਓਲੋਕੇਨ੍ਤਿਯਾ ਬਹਿ ਠਿਤੋ ਵਿਯ ਪਞ੍ਞਾਯਤਿ. ਤਮਤ੍ਥਂ ਉਪਮਾਯ ਵਿਭਾਵੇਨ੍ਤੋ ਸੇਯ੍ਯਥਾਪੀਤਿਆਦਿਮਾਹ. ਬੋਧਿਸਤ੍ਤੋ ਪਨ ਅਨ੍ਤੋਕੁਚ੍ਛਿਗਤੋ ਮਾਤਰਂ ਨ ਪਸ੍ਸਤਿ. ਨ ਹਿ ਅਨ੍ਤੋਕੁਚ੍ਛਿਯਂ ਚਕ੍ਖੁਵਿਞ੍ਞਾਣਂ ਉਪ੍ਪਜ੍ਜਤਿ.

੨੦੫. ਕਾਲਂ ਕਰੋਤੀਤਿ ਨ ਵਿਜਾਤਭਾਵਪਚ੍ਚਯਾ, ਆਯੁਪਰਿਕ੍ਖਯੇਨੇਵ. ਬੋਧਿਸਤ੍ਤੇਨ ਵਸਿਤਟ੍ਠਾਨਞ੍ਹਿ ਚੇਤਿਯਕੁਟਿਸਦਿਸਂ ਹੋਤਿ ਅਞ੍ਞੇਸਂ ਅਪਰਿਭੋਗਂ, ਨ ਚ ਸਕ੍ਕਾ ਬੋਧਿਸਤ੍ਤਮਾਤਰਂ ਅਪਨੇਤ੍ਵਾ ਅਞ੍ਞਂ ਅਗ੍ਗਮਹੇਸਿਟ੍ਠਾਨੇ ਠਪੇਤੁਨ੍ਤਿ ਤਤ੍ਤਕਂਯੇਵ ਬੋਧਿਸਤ੍ਤਮਾਤੁ ਆਯੁਪ੍ਪਮਾਣਂ ਹੋਤਿ, ਤਸ੍ਮਾ ਤਦਾ ਕਾਲਂ ਕਰੋਤਿ. ਕਤਰਸ੍ਮਿਂ ਪਨ ਵਯੇ ਕਾਲਂ ਕਰੋਤੀਤਿ? ਮਜ੍ਝਿਮਵਯੇ. ਪਠਮਵਯਸ੍ਮਿਞ੍ਹਿ ਸਤ੍ਤਾਨਂ ਅਤ੍ਤਭਾਵੇ ਛਨ੍ਦਰਾਗੋ ਬਲਵਾ ਹੋਤਿ, ਤੇਨ ਤਦਾ ਸਞ੍ਜਾਤਗਬ੍ਭਾ ਇਤ੍ਥੀ ਤਂ ਗਬ੍ਭਂ ਅਨੁਰਕ੍ਖਿਤੁਂ ਨ ਸਕ੍ਕੋਨ੍ਤਿ, ਗਬ੍ਭੋ ਬਹ੍ਵਾਬਾਧੋ ਹੋਤਿ. ਮਜ੍ਝਿਮਵਯਸ੍ਸ ਪਨ ਦ੍ਵੇ ਕੋਟ੍ਠਾਸੇ ਅਤਿਕ੍ਕਮ੍ਮ ਤਤਿਯਕੋਟ੍ਠਾਸੇ ਵਤ੍ਥੁਂ ਵਿਸਦਂ ਹੋਤਿ, ਵਿਸਦੇ ਵਤ੍ਥੁਮ੍ਹਿ ਨਿਬ੍ਬਤ੍ਤਾ ਦਾਰਕਾ ਅਰੋਗਾ ਹੋਨ੍ਤਿ. ਤਸ੍ਮਾ ਬੋਧਿਸਤ੍ਤਮਾਤਾਪਿ ਪਠਮਵਯੇ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਮਜ੍ਝਿਮਵਯਸ੍ਸ ਤਤਿਯਕੋਟ੍ਠਾਸੇ ਵਿਜਾਯਿਤ੍ਵਾ ਕਾਲਂ ਕਰੋਤਿ.

ਨਵ ਵਾ ਦਸ ਵਾਤਿ ਏਤ੍ਥ ਵਾ-ਸਦ੍ਦੇਨ ਵਿਕਪ੍ਪਨਵਸੇਨ ਸਤ੍ਤ ਵਾ ਅਟ੍ਠ ਵਾ ਏਕਾਦਸ ਵਾ ਦ੍ਵਾਦਸ ਵਾਤਿ ਏਵਮਾਦੀਨਮ੍ਪਿ ਸਙ੍ਗਹੋ ਵੇਦਿਤਬ੍ਬੋ. ਤਤ੍ਥ ਸਤ੍ਤਮਾਸਜਾਤੋ ਜੀਵਤਿ, ਸੀਤੁਣ੍ਹਕ੍ਖਮੋ ਪਨ ਨ ਹੋਤਿ. ਅਟ੍ਠਮਾਸਜਾਤੋ ਨ ਜੀਵਤਿ, ਸੇਸਾ ਜੀਵਨ੍ਤਿ.

ਠਿਤਾਵਾਤਿ ਠਿਤਾਵ ਹੁਤ੍ਵਾ. ਮਹਾਮਾਯਾਪਿ ਦੇਵੀ ਉਪਵਿਜਞ੍ਞਾ ਞਾਤਿਕੁਲਘਰਂ ਗਮਿਸ੍ਸਾਮੀਤਿ ਰਞ੍ਞੋ ਆਰੋਚੇਸਿ. ਰਾਜਾ ਕਪਿਲਵਤ੍ਥੁਤੋ ਦੇਵਦਹਨਗਰਗਾਮਿਮਗ੍ਗਂ ਅਲਙ੍ਕਾਰਾਪੇਤ੍ਵਾ ਦੇਵਿਂ ਸੁਵਣ੍ਣਸਿਵਿਕਾਯ ਨਿਸੀਦਾਪੇਸਿ. ਸਕਲਨਗਰਵਾਸਿਨੋ ਸਕ੍ਯਾ ਪਰਿਵਾਰੇਤ੍ਵਾ ਗਨ੍ਧਮਾਲਾਦੀਹਿ ਪੂਜਯਮਾਨਾ ਦੇਵਿਂ ਗਹੇਤ੍ਵਾ ਪਾਯਿਂਸੁ. ਸਾ ਦੇਵਦਹਨਗਰਸ੍ਸ ਅਵਿਦੂਰੇ ਲੁਮ੍ਬਿਨਿਸਾਲਵਨੁਯ੍ਯਾਨਂ ਦਿਸ੍ਵਾ ਉਯ੍ਯਾਨਵਿਚਰਣਤ੍ਥਾਯ ਚਿਤ੍ਤਂ ਉਪ੍ਪਾਦੇਤ੍ਵਾ ਰਞ੍ਞੋ ਸਞ੍ਞਂ ਅਦਾਸਿ. ਰਾਜਾ ਉਯ੍ਯਾਨਂ ਪਟਿਜਗ੍ਗਾਪੇਤ੍ਵਾ ਆਰਕ੍ਖਂ ਸਂਵਿਦਹਾਪੇਸਿ. ਦੇਵਿਯਾ ਉਯ੍ਯਾਨਂ ਪਵਿਟ੍ਠਮਤ੍ਤਾਯ ਕਾਯਦੁਬ੍ਬਲ੍ਯਂ ਅਹੋਸਿ, ਅਥਸ੍ਸਾ ਮਙ੍ਗਲਸਾਲਮੂਲੇ ਸਿਰੀਸਯਨਂ ਪਞ੍ਞਾਪੇਤ੍ਵਾ ਸਾਣਿਯਾ ਪਰਿਕ੍ਖਿਪਿਂਸੁ. ਸਾ ਅਨ੍ਤੋਸਾਣਿਂ ਪਵਿਸਿਤ੍ਵਾ ਸਾਲਸਾਖਂ ਹਤ੍ਥੇਨ ਗਹੇਤ੍ਵਾ ਅਟ੍ਠਾਸਿ. ਅਥਸ੍ਸਾ ਤਾਵਦੇਵ ਗਬ੍ਭਵੁਟ੍ਠਾਨਂ ਅਹੋਸਿ.

ਦੇਵਾ ਨਂ ਪਠਮਂ ਪਟਿਗ੍ਗਣ੍ਹਨ੍ਤੀਤਿ ਖੀਣਾਸਵਾ ਸੁਦ੍ਧਾਵਾਸਬ੍ਰਹ੍ਮਾਨੋ ਪਟਿਗ੍ਗਣ੍ਹਨ੍ਤਿ. ਕਥਂ? ਸੂਤਿਵੇਸਂ ਗਣ੍ਹਿਤ੍ਵਾਤਿ ਏਕੇ. ਤਂ ਪਨ ਪਟਿਕ੍ਖਿਪਿਤ੍ਵਾ ਇਦਂ ਵੁਤ੍ਤਂ – ਤਦਾ ਬੋਧਿਸਤ੍ਤਮਾਤਾ ਸੁਵਣ੍ਣਖਚਿਤਂ ਵਤ੍ਥਂ ਨਿਵਾਸੇਤ੍ਵਾ ਮਚ੍ਛਕ੍ਖਿਸਦਿਸਂ ਦੁਕੂਲਪਟਂ ਯਾਵ ਪਾਦਨ੍ਤਾਵ ਪਾਰੁਪਿਤ੍ਵਾ ਅਟ੍ਠਾਸਿ. ਅਥਸ੍ਸਾ ਸਲ੍ਲਹੁਕਂ ਗਬ੍ਭਵੁਟ੍ਠਾਨਂ ਅਹੋਸਿ ਧਮ੍ਮਕਰਣਤੋ ਉਦਕਨਿਕ੍ਖਮਨਸਦਿਸਂ. ਅਥ ਤੇ ਪਕਤਿਬ੍ਰਹ੍ਮਵੇਸੇਨੇਵ ਉਪਸਙ੍ਕਮਿਤ੍ਵਾ ਪਠਮਂ ਸੁਵਣ੍ਣਜਾਲੇਨ ਪਟਿਗ੍ਗਹੇਸੁਂ. ਤੇਸਂ ਹਤ੍ਥਤੋ ਮਨੁਸ੍ਸਾ ਦੁਕੂਲਚੁਮ੍ਬਟਕੇਨ ਪਟਿਗ੍ਗਹੇਸੁਂ. ਤੇਨ ਵੁਤ੍ਤਂ – ‘‘ਦੇਵਾ ਨਂ ਪਠਮਂ ਪਟਿਗ੍ਗਣ੍ਹਨ੍ਤਿ ਪਚ੍ਛਾ ਮਨੁਸ੍ਸਾ’’ਤਿ.

੨੦੬. ਚਤ੍ਤਾਰੋ ਨਂ ਦੇਵਪੁਤ੍ਤਾਤਿ ਚਤ੍ਤਾਰੋ ਮਹਾਰਾਜਾਨੋ. ਪਟਿਗ੍ਗਹੇਤ੍ਵਾਤਿ ਅਜਿਨਪ੍ਪਵੇਣਿਯਾ ਪਟਿਗ੍ਗਹੇਤ੍ਵਾ. ਮਹੇਸਕ੍ਖੋਤਿ ਮਹਾਤੇਜੋ ਮਹਾਯਸੋ ਲਕ੍ਖਣਸਮ੍ਪਨ੍ਨੋਤਿ ਅਤ੍ਥੋ.

ਵਿਸਦੋਵ ਨਿਕ੍ਖਮਤੀਤਿ ਯਥਾ ਅਞ੍ਞੇ ਸਤ੍ਤਾ ਯੋਨਿਮਗ੍ਗੇ ਲਗ੍ਗਨ੍ਤਾ ਭਗ੍ਗਵਿਭਗ੍ਗਾ ਨਿਕ੍ਖਮਨ੍ਤਿ, ਨ ਏਵਂ ਨਿਕ੍ਖਮਤਿ, ਅਲਗ੍ਗੋ ਹੁਤ੍ਵਾ ਨਿਕ੍ਖਮਤੀਤਿ ਅਤ੍ਥੋ. ਉਦੇਨਾਤਿ ਉਦਕੇਨ. ਕੇਨਚਿ ਅਸੁਚਿਨਾਤਿ ਯਥਾ ਅਞ੍ਞੇ ਸਤ੍ਤਾ ਕਮ੍ਮਜਵਾਤੇਹਿ ਉਦ੍ਧਂਪਾਦਾ ਅਧੋਸਿਰਾ ਯੋਨਿਮਗ੍ਗੇ ਪਕ੍ਖਿਤ੍ਤਾ ਸਤਪੋਰਿਸਨਰਕਪਪਾਤਂ ਪਤਨ੍ਤਾ ਵਿਯ ਤਾਲ਼ਚ੍ਛਿਦ੍ਦੇਨ ਨਿਕ੍ਕਡ੍ਢਿਯਮਾਨਾ ਹਤ੍ਥੀ ਵਿਯ ਮਹਾਦੁਕ੍ਖਂ ਅਨੁਭਵਨ੍ਤਾ ਨਾਨਾਅਸੁਚਿਮਕ੍ਖਿਤਾਵ ਨਿਕ੍ਖਮਨ੍ਤਿ, ਨ ਏਵਂ ਬੋਧਿਸਤ੍ਤੋ. ਬੋਧਿਸਤ੍ਤਞ੍ਹਿ ਕਮ੍ਮਜਵਾਤਾ ਉਦ੍ਧਂਪਾਦਂ ਅਧੋਸਿਰਂ ਕਾਤੁਂ ਨ ਸਕ੍ਕੋਨ੍ਤਿ. ਸੋ ਧਮ੍ਮਾਸਨਤੋ ਓਤਰਨ੍ਤੋ ਧਮ੍ਮਕਥਿਕੋ ਵਿਯ ਨਿਸ੍ਸੇਣਿਤੋ ਓਤਰਨ੍ਤੋ ਪੁਰਿਸੋ ਵਿਯ ਚ ਦ੍ਵੇ ਹਤ੍ਥੇ ਚ ਪਾਦੇ ਚ ਪਸਾਰੇਤ੍ਵਾ ਠਿਤਕੋਵ ਮਾਤੁਕੁਚ੍ਛਿਸਮ੍ਭਵੇਨ ਕੇਨਚਿ ਅਸੁਚਿਨਾ ਅਮਕ੍ਖਿਤੋਵ ਨਿਕ੍ਖਮਤਿ.

ਉਦਕਸ੍ਸ ਧਾਰਾਤਿ ਉਦਕਵਟ੍ਟਿਯੋ. ਤਾਸੁ ਸੀਤਾ ਸੁਵਣ੍ਣਕਟਾਹੇ ਪਤਤਿ, ਉਣ੍ਹਾ ਰਜਤਕਟਾਹੇ. ਇਦਞ੍ਚ ਪਥਵੀਤਲੇ ਕੇਨਚਿ ਅਸੁਚਿਨਾ ਅਸਮ੍ਮਿਸ੍ਸਂ ਤੇਸਂ ਪਾਨੀਯਪਰਿਭੋਜਨੀਯਉਦਕਞ੍ਚੇਵ ਅਞ੍ਞੇਹਿ ਅਸਾਧਾਰਣਂ ਕੀਲ਼ਨਉਦਕਞ੍ਚ ਦਸ੍ਸੇਤੁਂ ਵੁਤ੍ਤਂ. ਅਞ੍ਞਸ੍ਸ ਪਨ ਸੁਵਣ੍ਣਰਜਤਘਟੇਹਿ ਆਹਰਿਯਮਾਨਉਦਕਸ੍ਸ ਚੇਵ ਹਂਸਵਟ੍ਟਕਾਦਿਪੋਕ੍ਖਰਣਿਗਤਸ੍ਸ ਚ ਉਦਕਸ੍ਸ ਪਰਿਚ੍ਛੇਦੋ ਨਤ੍ਥਿ.

੨੦੭. ਸਮ੍ਪਤਿਜਾਤੋਤਿ ਮੁਹੁਤ੍ਤਜਾਤੋ. ਪਾਲ਼ਿਯਂ ਪਨ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਮਤ੍ਤੋ ਵਿਯ ਦਸ੍ਸਿਤੋ, ਨ ਪਨ ਏਵਂ ਦਟ੍ਠਬ੍ਬਂ. ਨਿਕ੍ਖਨ੍ਤਮਤ੍ਤਞ੍ਹਿ ਤਂ ਪਠਮਂ ਬ੍ਰਹ੍ਮਾਨੋ ਸੁਵਣ੍ਣਜਾਲੇਨ ਪਟਿਗ੍ਗਣ੍ਹਿਂਸੁ, ਤੇਸਂ ਹਤ੍ਥਤੋ ਚਤ੍ਤਾਰੋ ਮਹਾਰਾਜਾਨੋ ਮਙ੍ਗਲਸਮ੍ਮਤਾਯ ਸੁਖਸਮ੍ਫਸ੍ਸਾਯ ਅਜਿਨਪ੍ਪਵੇਣਿਯਾ, ਤੇਸਂ ਹਤ੍ਥਤੋ ਮਨੁਸ੍ਸਾ ਦੁਕੂਲਚੁਮ੍ਬਟਕੇਨ, ਮਨੁਸ੍ਸਾਨਂ ਹਤ੍ਥਤੋ ਮੁਚ੍ਚਿਤ੍ਵਾ ਪਥਵਿਯਂ ਪਤਿਟ੍ਠਿਤੋ.

ਸੇਤਮ੍ਹਿ ਛਤ੍ਤੇ ਅਨੁਧਾਰਿਯਮਾਨੇਤਿ ਦਿਬ੍ਬਸੇਤਚ੍ਛਤ੍ਤੇ ਅਨੁਧਾਰਿਯਮਾਨੇ. ਏਤ੍ਥ ਚ ਛਤ੍ਤਸ੍ਸ ਪਰਿਵਾਰਾਨਿ ਖਗ੍ਗਾਦੀਨਿ ਪਞ੍ਚ ਰਾਜਕਕੁਧਭਣ੍ਡਾਨਿਪਿ ਆਗਤਾਨੇਵ. ਪਾਲ਼ਿਯਂ ਪਨ ਰਾਜਗਮਨੇ ਰਾਜਾ ਵਿਯ ਛਤ੍ਤਮੇਵ ਵੁਤ੍ਤਂ. ਤੇਸੁ ਛਤ੍ਤਮੇਵ ਪਞ੍ਞਾਯਤਿ, ਨ ਛਤ੍ਤਗ੍ਗਾਹਕਾ. ਤਥਾ ਖਗ੍ਗ-ਤਾਲਵਣ੍ਟ-ਮੋਰਹਤ੍ਥਕ-ਵਾਲ਼ਬੀਜਨਿ-ਉਣ੍ਹੀਸਮਤ੍ਤਾਯੇਵ ਪਞ੍ਞਾਯਨ੍ਤਿ, ਨ ਤੇਸਂ ਗਾਹਕਾ. ਸਬ੍ਬਾਨਿ ਕਿਰ ਤਾਨਿ ਅਦਿਸ੍ਸਮਾਨਰੂਪਾ ਦੇਵਤਾ ਗਣ੍ਹਿਂਸੁ. ਵੁਤ੍ਤਮ੍ਪਿ ਚੇਤਂ –

‘‘ਅਨੇਕਸਾਖਞ੍ਚ ਸਹਸ੍ਸਮਣ੍ਡਲਂ,

ਛਤ੍ਤਂ ਮਰੂ ਧਾਰਯੁਮਨ੍ਤਲਿਕ੍ਖੇ;

ਸੁਵਣ੍ਣਦਣ੍ਡਾ ਵਿਪਤਨ੍ਤਿ ਚਾਮਰਾ,

ਨ ਦਿਸ੍ਸਰੇ ਚਾਮਰਛਤ੍ਤਗਾਹਕਾ’’ਤਿ. (ਸੁ. ਨਿ. ੬੯੩);

ਸਬ੍ਬਾ ਚ ਦਿਸਾਤਿ ਇਦਂ ਸਤ੍ਤਪਦਵੀਤਿਹਾਰੂਪਰਿ ਠਿਤਸ੍ਸ ਵਿਯ ਸਬ੍ਬਦਿਸਾਨੁਵਿਲੋਕਨਂ ਵੁਤ੍ਤਂ, ਨ ਖੋ ਪਨੇਵਂ ਦਟ੍ਠਬ੍ਬਂ. ਮਹਾਸਤ੍ਤੋ ਹਿ ਮਨੁਸ੍ਸਾਨਂ ਹਤ੍ਥਤੋ ਮੁਚ੍ਚਿਤ੍ਵਾ ਪੁਰਤ੍ਥਿਮਦਿਸਂ ਓਲੋਕੇਸਿ, ਅਨੇਕਚਕ੍ਕਵਾਲ਼ਸਹਸ੍ਸਾਨਿ ਏਕਙ੍ਗਣਾਨਿ ਅਹੇਸੁਂ. ਤਤ੍ਥ ਦੇਵਮਨੁਸ੍ਸਾ ਗਨ੍ਧਮਾਲਾਦੀਹਿ ਪੂਜਯਮਾਨਾ – ‘‘ਮਹਾਪੁਰਿਸ ਇਧ ਤੁਮ੍ਹੇਹਿ ਸਦਿਸੋਪਿ ਨਤ੍ਥਿ, ਕੁਤੋ ਉਤ੍ਤਰਿਤਰੋ’’ਤਿ ਆਹਂਸੁ. ਏਵਂ ਚਤਸ੍ਸੋ ਦਿਸਾ, ਚਤਸ੍ਸੋ ਅਨੁਦਿਸਾ, ਹੇਟ੍ਠਾ, ਉਪਰੀਤਿ ਦਸਪਿ ਦਿਸਾ ਅਨੁਵਿਲੋਕੇਤ੍ਵਾ ਅਤ੍ਤਨਾ ਸਦਿਸਂ ਅਦਿਸ੍ਵਾ ਅਯਂ ਉਤ੍ਤਰਾ ਦਿਸਾਤਿ ਸਤ੍ਤਪਦਵੀਤਿਹਾਰੇਨ ਅਗਮਾਸੀਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਆਸਭਿਨ੍ਤਿ ਉਤ੍ਤਮਂ. ਅਗ੍ਗੋਤਿ ਗੁਣੇਹਿ ਸਬ੍ਬਪਠਮੋ. ਇਤਰਾਨਿ ਦ੍ਵੇ ਪਦਾਨਿ ਏਤਸ੍ਸੇਵ ਵੇਵਚਨਾਨਿ. ਅਯਮਨ੍ਤਿਮਾ ਜਾਤਿ, ਨਤ੍ਥਿ ਦਾਨਿ ਪੁਨਬ੍ਭਵੋਤਿ ਪਦਦ੍ਵਯੇਨ ਇਮਸ੍ਮਿਂ ਅਤ੍ਤਭਾਵੇ ਪਤ੍ਤਬ੍ਬਂ ਅਰਹਤ੍ਤਂ ਬ੍ਯਾਕਾਸਿ.

ਏਤ੍ਥ ਚ ਸਮੇਹਿ ਪਾਦੇਹਿ ਪਥਵਿਯਂ ਪਤਿਟ੍ਠਾਨਂ ਚਤੁਇਦ੍ਧਿਪਾਦਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਉਤ੍ਤਰਾਭਿਮੁਖਭਾਵੋ ਮਹਾਜਨਂ ਅਜ੍ਝੋਤ੍ਥਰਿਤ੍ਵਾ ਅਭਿਭਵਿਤ੍ਵਾ ਗਮਨਸ੍ਸ ਪੁਬ੍ਬਨਿਮਿਤ੍ਤਂ, ਸਤ੍ਤਪਦਗਮਨਂ ਸਤ੍ਤਬੋਜ੍ਝਙ੍ਗਰਤਨਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਦਿਬ੍ਬਸੇਤਚ੍ਛਤ੍ਤਧਾਰਣਂ ਵਿਮੁਤ੍ਤਿਚ੍ਛਤ੍ਤਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਪਞ੍ਚਰਾਜਕਕੁਧਭਣ੍ਡਾਨਿ ਪਞ੍ਚਹਿ ਵਿਮੁਤ੍ਤੀਹਿ ਵਿਮੁਚ੍ਚਨਸ੍ਸ ਪੁਬ੍ਬਨਿਮਿਤ੍ਤਂ, ਦਿਸਾਨੁਵਿਲੋਕਨਂ ਅਨਾਵਰਣਞਾਣਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਆਸਭੀਵਾਚਾਭਾਸਨਂ ਅਪ੍ਪਟਿਵਤ੍ਤਿਯਧਮ੍ਮਚਕ੍ਕਪ੍ਪਵਤ੍ਤਨਸ੍ਸ ਪੁਬ੍ਬਨਿਮਿਤ੍ਤਂ. ‘‘ਅਯਮਨ੍ਤਿਮਾ ਜਾਤੀ’’ਤਿ ਸੀਹਨਾਦੋ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਨਸ੍ਸ ਪੁਬ੍ਬਨਿਮਿਤ੍ਤਨ੍ਤਿ ਵੇਦਿਤਬ੍ਬਂ. ਇਮੇ ਵਾਰਾ ਪਾਲ਼ਿਯਂ ਆਗਤਾ, ਸਮ੍ਬਹੁਲਵਾਰੋ ਪਨ ਆਗਤੋ, ਆਹਰਿਤ੍ਵਾ ਦੀਪੇਤਬ੍ਬੋ.

ਮਹਾਪੁਰਿਸਸ੍ਸ ਹਿ ਜਾਤਦਿਵਸੇ ਦਸਸਹਸ੍ਸਿਲੋਕਧਾਤੁ ਕਮ੍ਪਿ. ਦਸਸਹਸ੍ਸਿਲੋਕਧਾਤੁਮ੍ਹਿ ਦੇਵਤਾ ਏਕਚਕ੍ਕਵਾਲ਼ੇ ਸਨ੍ਨਿਪਤਿਂਸੁ. ਪਠਮਂ ਦੇਵਾ ਪਟਿਗ੍ਗਹਿਂਸੁ, ਪਚ੍ਛਾ ਮਨੁਸ੍ਸਾ. ਤਨ੍ਤਿਬਦ੍ਧਾ ਵੀਣਾ ਚਮ੍ਮਬਦ੍ਧਾ ਭੇਰਿਯੋ ਚ ਕੇਨਚਿ ਅਵਾਦਿਤਾ ਸਯਮੇਵ ਵਜ੍ਜਿਂਸੁ, ਮਨੁਸ੍ਸਾਨਂ ਅਨ੍ਦੁਬਨ੍ਧਨਾਦੀਨਿ ਖਣ੍ਡਾਖਣ੍ਡਂ ਭਿਜ੍ਜਿਂਸੁ. ਸਬ੍ਬਰੋਗਾ ਅਮ੍ਬਿਲੇਨ ਧੋਤਤਮ੍ਬਮਲਂ ਵਿਯ ਵਿਗਚ੍ਛਿਂਸੁ, ਜਚ੍ਚਨ੍ਧਾ ਰੂਪਾਨਿ ਪਸ੍ਸਿਂਸੁ. ਜਚ੍ਚਬਧਿਰਾ ਸਦ੍ਦਂ ਸੁਣਿਂਸੁ, ਪੀਠਸਪ੍ਪੀ ਜਵਨਸਮ੍ਪਨ੍ਨਾ ਅਹੇਸੁਂ, ਜਾਤਿਜਲ਼ਾਨਮ੍ਪਿ ਏਲ਼ਮੂਗਾਨਂ ਸਤਿ ਪਤਿਟ੍ਠਾਸਿ, ਵਿਦੇਸੇ ਪਕ੍ਖਨ੍ਦਨਾਵਾ ਸੁਪਟ੍ਟਨਂ ਪਾਪੁਣਿਂਸੁ, ਆਕਾਸਟ੍ਠਕਭੂਮਟ੍ਠਕਰਤਨਾਨਿ ਸਕਤੇਜੋਭਾਸਿਤਾਨਿ ਅਹੇਸੁਂ, ਵੇਰਿਨੋ ਮੇਤ੍ਤਚਿਤ੍ਤਂ ਪਟਿਲਭਿਂਸੁ, ਅਵੀਚਿਮ੍ਹਿ ਅਗ੍ਗਿ ਨਿਬ੍ਬਾਯਿ. ਲੋਕਨ੍ਤਰੇ ਆਲੋਕੋ ਉਦਪਾਦਿ, ਨਦੀਸੁ ਜਲਂ ਨ ਪਵਤ੍ਤਿ, ਮਹਾਸਮੁਦ੍ਦੇਸੁ ਮਧੁਰਸਦਿਸਂ ਉਦਕਂ ਅਹੋਸਿ, ਵਾਤੋ ਨ ਵਾਯਿ, ਆਕਾਸਪਬ੍ਬਤਰੁਕ੍ਖਗਤਾ ਸਕੁਣਾ ਭਸ੍ਸਿਤ੍ਵਾ ਪਥਵੀਗਤਾ ਅਹੇਸੁਂ, ਚਨ੍ਦੋ ਅਤਿਰੋਚਿ, ਸੂਰਿਯੋ ਨ ਉਣ੍ਹੋ ਨ ਸੀਤਲੋ ਨਿਮ੍ਮਲੋ ਉਤੁਸਮ੍ਪਨ੍ਨੋ ਅਹੋਸਿ, ਦੇਵਤਾ ਅਤ੍ਤਨੋ ਅਤ੍ਤਨੋ ਵਿਮਾਨਦ੍ਵਾਰੇ ਠਤ੍ਵਾ ਅਪ੍ਫੋਟਨਸੇਲ਼ਨਚੇਲੁਕ੍ਖੇਪਾਦੀਹਿ ਮਹਾਕੀਲ਼ਂ ਕੀਲ਼ਿਂਸੁ, ਚਾਤੁਦ੍ਦੀਪਿਕਮਹਾਮੇਘੋ ਵਸ੍ਸਿ, ਮਹਾਜਨਂ ਨੇਵ ਖੁਦਾ ਨ ਪਿਪਾਸਾ ਪੀਲ਼ੇਸਿ, ਦ੍ਵਾਰਕਵਾਟਾਨਿ ਸਯਮੇਵ ਵਿਵਰਿਂਸੁ, ਪੁਪ੍ਫੂਪਗਫਲੂਪਗਾ ਰੁਕ੍ਖਾ ਪੁਪ੍ਫਫਲਾਨਿ ਗਣ੍ਹਿਂਸੁ, ਦਸਸਹਸ੍ਸਿਲੋਕਧਾਤੁ ਏਕਦ੍ਧਜਮਾਲਾ ਅਹੋਸੀਤਿ.

ਤਤ੍ਰਾਪਿਸ੍ਸ ਦਸਸਹਸ੍ਸਿਲੋਕਧਾਤੁਕਮ੍ਪੋ ਸਬ੍ਬਞ੍ਞੁਤਞਾਣਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਦੇਵਤਾਨਂ ਏਕਚਕ੍ਕਵਾਲ਼ੇ ਸਨ੍ਨਿਪਾਤੋ ਧਮ੍ਮਚਕ੍ਕਪ੍ਪਵਤ੍ਤਨਕਾਲੇ ਏਕਪ੍ਪਹਾਰੇਨ ਸਨ੍ਨਿਪਤਿਤ੍ਵਾ ਧਮ੍ਮਪਟਿਗ੍ਗਣ੍ਹਨਸ੍ਸ ਪੁਬ੍ਬਨਿਮਿਤ੍ਤਂ, ਪਠਮਂ ਦੇਵਤਾਨਂ ਪਟਿਗ੍ਗਹਣਂ ਚਤੁਨ੍ਨਂ ਰੂਪਾਵਚਰਜ੍ਝਾਨਾਨਂ ਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ. ਪਚ੍ਛਾ ਮਨੁਸ੍ਸਾਨਂ ਪਟਿਗ੍ਗਹਣਂ ਚਤੁਨ੍ਨਂ ਅਰੂਪਜ੍ਝਾਨਾਨਂ ਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਤਨ੍ਤਿਬਦ੍ਧਵੀਣਾਨਂ ਸਯਂ ਵਜ੍ਜਨਂ ਅਨੁਪੁਬ੍ਬਵਿਹਾਰਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਚਮ੍ਮਬਦ੍ਧਭੇਰੀਨਂ ਵਜ੍ਜਨਂ ਮਹਤਿਯਾ ਧਮ੍ਮਭੇਰਿਯਾ ਅਨੁਸ੍ਸਾਵਨਸ੍ਸ ਪੁਬ੍ਬਨਿਮਿਤ੍ਤਂ, ਅਨ੍ਦੁਬਨ੍ਧਨਾਦੀਨਂ ਛੇਦੋ ਅਸ੍ਮਿਮਾਨਸਮੁਚ੍ਛੇਦਸ੍ਸ ਪੁਬ੍ਬਨਿਮਿਤ੍ਤਂ, ਸਬ੍ਬਰੋਗਵਿਗਮੋ ਸਬ੍ਬਕਿਲੇਸਵਿਗਮਸ੍ਸ ਪੁਬ੍ਬਨਿਮਿਤ੍ਤਂ, ਜਚ੍ਚਨ੍ਧਾਨਂ ਰੂਪਦਸ੍ਸਨਂ ਦਿਬ੍ਬਚਕ੍ਖੁਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਜਚ੍ਚਬਧਿਰਾਨਂ ਸਦ੍ਦਸ੍ਸਵਨਂ ਦਿਬ੍ਬਸੋਤਧਾਤੁਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਪੀਠਸਪ੍ਪੀਨਂ ਜਵਨਸਮ੍ਪਦਾ ਚਤੁਇਦ੍ਧਿਪਾਦਾਧਿਗਮਸ੍ਸ ਪੁਬ੍ਬਨਿਮਿਤ੍ਤਂ, ਜਲ਼ਾਨਂ ਸਤਿਪਤਿਟ੍ਠਾਨਂ ਚਤੁਸਤਿਪਟ੍ਠਾਨਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਵਿਦੇਸਪਕ੍ਖਨ੍ਦਨਾਵਾਨਂ ਸੁਪਟ੍ਟਨਸਮ੍ਪਾਪੁਣਨਂ ਚਤੁਪਟਿਸਮ੍ਭਿਦਾਧਿਗਮਸ੍ਸ ਪੁਬ੍ਬਨਿਮਿਤ੍ਤਂ, ਰਤਨਾਨਂ ਸਕਤੇਜੋਭਾਸਿਤਤ੍ਤਂ ਯਂ ਲੋਕਸ੍ਸ ਧਮ੍ਮੋਭਾਸਂ ਦਸ੍ਸੇਸ੍ਸਤਿ ਤਸ੍ਸ ਪੁਬ੍ਬਨਿਮਿਤ੍ਤਂ.

ਵੇਰੀਨਂ ਮੇਤ੍ਤਚਿਤ੍ਤਪਟਿਲਾਭੋ ਚਤੁਬ੍ਰਹ੍ਮਵਿਹਾਰਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਅਵੀਚਿਮ੍ਹਿ ਅਗ੍ਗਿਨਿਬ੍ਬਾਨਂ ਏਕਾਦਸਅਗ੍ਗਿਨਿਬ੍ਬਾਨਸ੍ਸ ਪੁਬ੍ਬਨਿਮਿਤ੍ਤਂ, ਲੋਕਨ੍ਤਰਾਲੋਕੋ ਅਵਿਜ੍ਜਨ੍ਧਕਾਰਂ ਵਿਧਮਿਤ੍ਵਾ ਞਾਣਾਲੋਕਦਸ੍ਸਨਸ੍ਸ ਪੁਬ੍ਬਨਿਮਿਤ੍ਤਂ, ਮਹਾਸਮੁਦ੍ਦਸ੍ਸ ਮਧੁਰਤਾ ਨਿਬ੍ਬਾਨਰਸੇਨ ਏਕਰਸਭਾਵਸ੍ਸ ਪੁਬ੍ਬਨਿਮਿਤ੍ਤਂ, ਵਾਤਸ੍ਸ ਅਵਾਯਨਂ ਦ੍ਵਾਸਟ੍ਠਿਦਿਟ੍ਠਿਗਤਭਿਨ੍ਦਨਸ੍ਸ ਪੁਬ੍ਬਨਿਮਿਤ੍ਤਂ, ਸਕੁਣਾਨਂ ਪਥਵੀਗਮਨਂ ਮਹਾਜਨਸ੍ਸ ਓਵਾਦਂ ਸੁਤ੍ਵਾ ਪਾਣੇਹਿ ਸਰਣਗਮਨਸ੍ਸ ਪੁਬ੍ਬਨਿਮਿਤ੍ਤਂ, ਚਨ੍ਦਸ੍ਸ ਅਤਿਵਿਰੋਚਨਂ ਬਹੁਜਨਕਨ੍ਤਤਾਯ ਪੁਬ੍ਬਨਿਮਿਤ੍ਤਂ, ਸੂਰਿਯਸ੍ਸ ਉਣ੍ਹਸੀਤਵਿਵਜ੍ਜਨਉਤੁਸੁਖਤਾ ਕਾਯਿਕਚੇਤਸਿਕਸੁਖੁਪ੍ਪਤ੍ਤਿਯਾ ਪੁਬ੍ਬਨਿਮਿਤ੍ਤਂ, ਦੇਵਤਾਨਂ ਵਿਮਾਨਦ੍ਵਾਰੇਸੁ ਅਪ੍ਫੋਟਨਾਦੀਹਿ ਕੀਲ਼ਨਂ ਬੁਦ੍ਧਭਾਵਂ ਪਤ੍ਵਾ ਉਦਾਨਂ ਉਦਾਨਸ੍ਸ ਪੁਬ੍ਬਨਿਮਿਤ੍ਤਂ, ਚਾਤੁਦ੍ਦੀਪਿਕਮਹਾਮੇਘਵਸ੍ਸਨਂ ਮਹਤੋ ਧਮ੍ਮਮੇਘਵਸ੍ਸਨਸ੍ਸ ਪੁਬ੍ਬਨਿਮਿਤ੍ਤਂ, ਖੁਦਾਪੀਲ਼ਨਸ੍ਸ ਅਭਾਵੋ ਕਾਯਗਤਾਸਤਿਅਮਤਪਟਿਲਾਭਸ੍ਸ ਪੁਬ੍ਬਨਿਮਿਤ੍ਤਂ, ਪਿਪਾਸਾਪੀਲ਼ਨਸ੍ਸ ਅਭਾਵੋ ਵਿਮੁਤ੍ਤਿਸੁਖੇਨ ਸੁਖਿਤਭਾਵਸ੍ਸ ਪੁਬ੍ਬਨਿਮਿਤ੍ਤਂ, ਦ੍ਵਾਰਕਵਾਟਾਨਂ ਸਯਮੇਵ ਵਿਵਰਣਂ ਅਟ੍ਠਙ੍ਗਿਕਮਗ੍ਗਦ੍ਵਾਰਵਿਵਰਣਸ੍ਸ ਪੁਬ੍ਬਨਿਮਿਤ੍ਤਂ, ਰੁਕ੍ਖਾਨਂ ਪੁਪ੍ਫਫਲਗਹਣਂ ਵਿਮੁਤ੍ਤਿਪੁਪ੍ਫੇਹਿ ਪੁਪ੍ਫਿਤਸ੍ਸ ਚ ਸਾਮਞ੍ਞਫਲਭਾਰਭਰਿਤਭਾਵਸ੍ਸ ਚ ਪੁਬ੍ਬਨਿਮਿਤ੍ਤਂ, ਦਸਸਹਸ੍ਸਿਲੋਕਧਾਤੁਯਾ ਏਕਦ੍ਧਜਮਾਲਤਾ ਅਰਿਯਦ੍ਧਜਮਾਲਾਮਾਲਿਤਾਯ ਪੁਬ੍ਬਨਿਮਿਤ੍ਤਨ੍ਤਿ ਵੇਦਿਤਬ੍ਬਂ. ਅਯਂ ਸਮ੍ਬਹੁਲਵਾਰੋ ਨਾਮ.

ਏਤ੍ਥ ਪਞ੍ਹੇ ਪੁਚ੍ਛਨ੍ਤਿ – ‘‘ਯਦਾ ਮਹਾਪੁਰਿਸੋ ਪਥਵਿਯਂ ਪਤਿਟ੍ਠਹਿਤ੍ਵਾ ਉਤ੍ਤਰਾਭਿਮੁਖੋ ਗਨ੍ਤ੍ਵਾ ਆਸਭਿਂ ਵਾਚਂ ਭਾਸਤਿ, ਤਦਾ ਕਿਂ ਪਥਵਿਯਾ ਗਤੋ, ਉਦਾਹੁ ਆਕਾਸੇਨ? ਦਿਸ੍ਸਮਾਨੋ ਗਤੋ, ਉਦਾਹੁ ਅਦਿਸ੍ਸਮਾਨੋ? ਅਚੇਲਕੋ ਗਤੋ, ਉਦਾਹੁ ਅਲਙ੍ਕਤਪ੍ਪਟਿਯਤ੍ਤੋ? ਦਹਰੋ ਹੁਤ੍ਵਾ ਗਤੋ, ਉਦਾਹੁ ਮਹਲ੍ਲਕੋ? ਪਚ੍ਛਾਪਿ ਕਿਂ ਤਾਦਿਸੋਵ ਅਹੋਸਿ, ਉਦਾਹੁ ਪੁਨ ਬਾਲਦਾਰਕੋ’’ਤਿ? ਅਯਂ ਪਨ ਪਞ੍ਹੋ ਹੇਟ੍ਠਾ ਲੋਹਪਾਸਾਦੇ ਸਙ੍ਘਸਨ੍ਨਿਪਾਤੇ ਤਿਪਿਟਕਚੂਲ਼ਾਭਯਤ੍ਥੇਰੇਨ ਵਿਸ੍ਸਜ੍ਜਿਤੋਵ. ਥੇਰੋ ਕਿਰੇਤ੍ਥ ਨਿਯਤਿ ਪੁਬ੍ਬੇਕਤਕਮ੍ਮ-ਇਸ੍ਸਰਨਿਮ੍ਮਾਨਵਾਦਵਸੇਨ ਤਂ ਤਂ ਬਹੁਂ ਵਤ੍ਵਾ ਅਵਸਾਨੇ ਏਵਂ ਬ੍ਯਾਕਾਸਿ – ‘‘ਮਹਾਪੁਰਿਸੋ ਪਥਵਿਯਂ ਗਤੋ, ਮਹਾਜਨਸ੍ਸ ਪਨ ਆਕਾਸੇ ਗਚ੍ਛਨ੍ਤੋ ਵਿਯ ਅਹੋਸਿ. ਦਿਸ੍ਸਮਾਨੋ ਗਤੋ, ਮਹਾਜਨਸ੍ਸ ਪਨ ਅਦਿਸ੍ਸਮਾਨੋ ਵਿਯ ਅਹੋਸਿ. ਅਚੇਲਕੋ ਗਤੋ, ਮਹਾਜਨਸ੍ਸ ਪਨ ਅਲਙ੍ਕਤਪ੍ਪਟਿਯਤ੍ਤੋਵ ਉਪਟ੍ਠਾਸਿ. ਦਹਰੋਵ ਗਤੋ, ਮਹਾਜਨਸ੍ਸ ਪਨ ਸੋਲ਼ਸਵਸ੍ਸੁਦ੍ਦੇਸਿਕੋ ਵਿਯ ਅਹੋਸਿ. ਪਚ੍ਛਾ ਪਨ ਬਾਲਦਾਰਕੋਵ ਅਹੋਸਿ, ਨ ਤਾਦਿਸੋ’’ਤਿ. ਏਵਂ ਵੁਤ੍ਤੇ ਪਰਿਸਾ ਚਸ੍ਸ ‘‘ਬੁਦ੍ਧੇਨ ਵਿਯ ਹੁਤ੍ਵਾ ਭੋ ਥੇਰੇਨ ਪਞ੍ਹੋ ਕਥਿਤੋ’’ਤਿ ਅਤ੍ਤਮਨਾ ਅਹੋਸਿ. ਲੋਕਨ੍ਤਰਿਕਵਾਰੋ ਵੁਤ੍ਤਨਯੋ ਏਵ.

ਵਿਦਿਤਾਤਿ ਪਾਕਟਾ ਹੁਤ੍ਵਾ. ਯਥਾ ਹਿ ਸਾਵਕਾ ਨਹਾਨਮੁਖਧੋਵਨਖਾਦਨਪਿਵਨਾਦਿਕਾਲੇ ਅਨੋਕਾਸਗਤੇ ਅਤੀਤਸਙ੍ਖਾਰੇ ਨਿਪ੍ਪਦੇਸੇ ਸਮ੍ਮਸਿਤੁਂ ਨ ਸਕ੍ਕੋਨ੍ਤਿ, ਓਕਾਸਪਤ੍ਤਯੇਵ ਸਮ੍ਮਸਨ੍ਤਿ, ਨ ਏਵਂ ਬੁਦ੍ਧਾ. ਬੁਦ੍ਧਾ ਹਿ ਸਤ੍ਤਦਿਵਸਬ੍ਭਨ੍ਤਰੇ ਵਵਤ੍ਥਿਤਸਙ੍ਖਾਰੇ ਆਦਿਤੋ ਪਟ੍ਠਾਯ ਸਮ੍ਮਸਿਤ੍ਵਾ ਤਿਲਕ੍ਖਣਂ ਆਰੋਪੇਤ੍ਵਾਵ ਵਿਸ੍ਸਜ੍ਜੇਨ੍ਤਿ, ਤੇਸਂ ਅਵਿਪਸ੍ਸਿਤਧਮ੍ਮੋ ਨਾਮ ਨਤ੍ਥਿ, ਤਸ੍ਮਾ ‘‘ਵਿਦਿਤਾ’’ਤਿ ਆਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਚ੍ਛਰਿਯਅਬ੍ਭੁਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਬਾਕੁਲਸੁਤ੍ਤਵਣ੍ਣਨਾ

੨੦੯. ਏਵਂ ਮੇ ਸੁਤਨ੍ਤਿ ਬਾਕੁਲਸੁਤ੍ਤਂ. ਤਤ੍ਥ ਬਾਕੁਲੋਤਿ ਯਥਾ ਦ੍ਵਾਵੀਸਤਿ ਦ੍ਵਤ੍ਤਿਂਸਾਤਿਆਦਿਮ੍ਹਿ ਵਤ੍ਤਬ੍ਬੇ ਬਾਵੀਸਤਿ ਬਾਤ੍ਤਿਂਸਾਤਿਆਦੀਨਿ ਵੁਚ੍ਚਨ੍ਤਿ, ਏਵਮੇਵ ਦ੍ਵਿਕੁਲੋਤਿ ਵਤ੍ਤਬ੍ਬੇ ਬਾਕੁਲੋਤਿ ਵੁਤ੍ਤਂ. ਤਸ੍ਸ ਹਿ ਥੇਰਸ੍ਸ ਦ੍ਵੇ ਕੁਲਾਨਿ ਅਹੇਸੁਂ. ਸੋ ਕਿਰ ਦੇਵਲੋਕੋ ਚਵਿਤ੍ਵਾ ਕੋਸਮ੍ਬਿਨਗਰੇ ਨਾਮ ਮਹਾਸੇਟ੍ਠਿਕੁਲੇ ਨਿਬ੍ਬਤ੍ਤੋ, ਤਮੇਨਂ ਪਞ੍ਚਮੇ ਦਿਵਸੇ ਸੀਸਂ ਨ੍ਹਾਪੇਤ੍ਵਾ ਗਙ੍ਗਾਕੀਲ਼ਂ ਅਕਂਸੁ. ਧਾਤਿਯਾ ਦਾਰਕਂ ਉਦਕੇ ਨਿਮੁਜ੍ਜਨੁਮ੍ਮੁਜ੍ਜਨਵਸੇਨ ਕੀਲ਼ਾਪੇਨ੍ਤਿਯਾ ਏਕੋ ਮਚ੍ਛੋ ਦਾਰਕਂ ਦਿਸ੍ਵਾ ‘‘ਭਕ੍ਖੋ ਮੇ ਅਯ’’ਨ੍ਤਿ ਮਞ੍ਞਮਾਨੋ ਮੁਖਂ ਵਿਵਰਿਤ੍ਵਾ ਉਪਗਤੋ. ਧਾਤੀ ਦਾਰਕਂ ਛਡ੍ਡੇਤ੍ਵਾ ਪਲਾਤਾ. ਮਚ੍ਛੋ ਤਂ ਗਿਲਿ. ਪੁਞ੍ਞਵਾ ਸਤ੍ਤੋ ਦੁਕ੍ਖਂ ਨ ਪਾਪੁਣਿ, ਸਯਨਗਬ੍ਭਂ ਪਵਿਸਿਤ੍ਵਾ ਨਿਪਨ੍ਨੋ ਵਿਯ ਅਹੋਸਿ. ਮਚ੍ਛੋ ਦਾਰਕਸ੍ਸ ਤੇਜੇਨ ਤਤ੍ਤਕਪਲ੍ਲਂ ਗਿਲਿਤ੍ਵਾ ਦਯ੍ਹਮਾਨੋ ਵਿਯ ਵੇਗੇਨ ਤਿਂਸਯੋਜਨਮਗ੍ਗਂ ਗਨ੍ਤ੍ਵਾ ਬਾਰਾਣਸਿਨਗਰਵਾਸਿਨੋ ਮਚ੍ਛਬਨ੍ਧਸ੍ਸ ਜਾਲਂ ਪਾਵਿਸਿ, ਮਹਾਮਚ੍ਛਾ ਨਾਮ ਜਾਲਬਦ੍ਧਾ ਪਹਰਿਯਮਾਨਾ ਮਰਨ੍ਤਿ. ਅਯਂ ਪਨ ਦਾਰਕਸ੍ਸ ਤੇਜੇਨ ਜਾਲਤੋ ਨੀਹਟਮਤ੍ਤੋਵ ਮਤੋ. ਮਚ੍ਛਬਨ੍ਧਾ ਚ ਮਹਨ੍ਤਂ ਮਚ੍ਛਂ ਲਭਿਤ੍ਵਾ ਫਾਲੇਤ੍ਵਾ ਵਿਕ੍ਕਿਣਨ੍ਤਿ. ਤਂ ਪਨ ਦਾਰਕਸ੍ਸ ਆਨੁਭਾਵੇਨ ਅਫਾਲੇਤ੍ਵਾ ਸਕਲਮੇਵ ਕਾਜੇਨ ਹਰਿਤ੍ਵਾ ਸਹਸ੍ਸੇਨ ਦੇਮਾਤਿ ਵਦਨ੍ਤਾ ਨਗਰੇ ਵਿਚਰਿਂਸੁ. ਕੋਚਿ ਨ ਗਣ੍ਹਾਤਿ.

ਤਸ੍ਮਿਂ ਪਨ ਨਗਰੇ ਅਪੁਤ੍ਤਕਂ ਅਸੀਤਿਕੋਟਿਵਿਭਵਂ ਸੇਟ੍ਠਿਕੁਲਂ ਅਤ੍ਥਿ, ਤਸ੍ਸ ਦ੍ਵਾਰਮੂਲਂ ਪਤ੍ਵਾ ‘‘ਕਿਂ ਗਹੇਤ੍ਵਾ ਦੇਥਾ’’ਤਿ ਵੁਤ੍ਤਾ ਕਹਾਪਣਨ੍ਤਿ ਆਹਂਸੁ. ਤੇਹਿ ਕਹਾਪਣਂ ਦਤ੍ਵਾ ਗਹਿਤੋ. ਸੇਟ੍ਠਿਭਰਿਯਾਪਿ ਅਞ੍ਞੇਸੁ ਦਿਵਸੇਸੁ ਮਚ੍ਛੇ ਨ ਕੇਲਾਯਤਿ, ਤਂ ਦਿਵਸਂ ਪਨ ਮਚ੍ਛਂ ਫਲਕੇ ਠਪੇਤ੍ਵਾ ਸਯਮੇਵ ਫਾਲੇਸਿ. ਮਚ੍ਛਞ੍ਚ ਨਾਮ ਕੁਚ੍ਛਿਤੋ ਫਾਲੇਨ੍ਤਿ, ਸਾ ਪਨ ਪਿਟ੍ਠਿਤੋ ਫਾਲੇਨ੍ਤੀ ਮਚ੍ਛਕੁਚ੍ਛਿਯਂ ਸੁਵਣ੍ਣਵਣ੍ਣਂ ਦਾਰਕਂ ਦਿਸ੍ਵਾ – ‘‘ਮਚ੍ਛਕੁਚ੍ਛਿਯਂ ਮੇ ਪੁਤ੍ਤੋ ਲਦ੍ਧੋ’’ਤਿ ਨਾਦਂ ਨਦਿਤ੍ਵਾ ਦਾਰਕਂ ਆਦਾਯ ਸਾਮਿਕਸ੍ਸ ਸਨ੍ਤਿਕਂ ਅਗਮਾਸਿ. ਸੇਟ੍ਠਿ ਤਾਵਦੇਵ ਭੇਰਿਂ ਚਰਾਪੇਤ੍ਵਾ ਦਾਰਕਂ ਆਦਾਯ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ – ‘‘ਮਚ੍ਛਕੁਚ੍ਛਿਯਂ ਮੇ ਦੇਵ ਦਾਰਕੋ ਲਦ੍ਧੋ, ਕਿਂ ਕਰੋਮੀ’’ਤਿ ਆਹ. ਪੁਞ੍ਞਵਾ ਏਸ, ਯੋ ਮਚ੍ਛਕੁਚ੍ਛਿਯਂ ਅਰੋਗੋ ਵਸਿ, ਪੋਸੇਹਿ ਨਨ੍ਤਿ.

ਅਸ੍ਸੋਸਿ ਖੋ ਇਤਰਂ ਕੁਲਂ – ‘‘ਬਾਰਾਣਸਿਯਂ ਕਿਰ ਏਕਂ ਸੇਟ੍ਠਿਕੁਲਂ ਮਚ੍ਛਕੁਚ੍ਛਿਯਂ ਦਾਰਕਂ ਲਭਤੀ’’ਤਿ, ਤੇ ਤਤ੍ਥ ਅਗਮਂਸੁ. ਅਥਸ੍ਸ ਮਾਤਾ ਦਾਰਕਂ ਅਲਙ੍ਕਰਿਤ੍ਵਾ ਕੀਲ਼ਾਪਿਯਮਾਨਂ ਦਿਸ੍ਵਾਵ ‘‘ਮਨਾਪੋ ਵਤਾਯਂ ਦਾਰਕੋ’’ਤਿ ਗਨ੍ਤ੍ਵਾ ਪਵਤਿਂ ਆਚਿਕ੍ਖਿ. ਇਤਰਾ ਮਯ੍ਹਂ ਪੁਤ੍ਤੋਤਿਆਦਿਮਾਹ. ਕਹਂ ਤੇ ਲਦ੍ਧੋਤਿ? ਮਚ੍ਛਕੁਚ੍ਛਿਯਨ੍ਤਿ. ਨੋ ਤੁਯ੍ਹਂ ਪੁਤ੍ਤੋ, ਮਯ੍ਹਂ ਪੁਤ੍ਤੋਤਿ. ਕਹਂ ਤੇ ਲਦ੍ਧੋਤਿ? ਮਯਾ ਦਸਮਾਸੇ ਕੁਚ੍ਛਿਯਾ ਧਾਰਿਤੋ, ਅਥ ਨਂ ਨਦਿਯਾ ਕੀਲ਼ਾਪਿਯਮਾਨਂ ਮਚ੍ਛੋ ਗਿਲੀਤਿ. ਤੁਯ੍ਹਂ ਪੁਤ੍ਤੋ ਅਞ੍ਞੇਨ ਮਚ੍ਛੇਨ ਗਿਲਿਤੋ ਭਵਿਸ੍ਸਤਿ, ਅਯਂ ਪਨ ਮਯਾ ਮਚ੍ਛਕੁਚ੍ਛਿਯਂ ਲਦ੍ਧੋਤਿ, ਉਭੋਪਿ ਰਾਜਕੁਲਂ ਅਗਮਂਸੁ. ਰਾਜਾ ਆਹ – ‘‘ਅਯਂ ਦਸ ਮਾਸੇ ਕੁਚ੍ਛਿਯਾ ਧਾਰਿਤਤ੍ਤਾ ਅਮਾਤਾ ਕਾਤੁਂ ਨ ਸਕ੍ਕਾ, ਮਚ੍ਛਂ ਗਣ੍ਹਨ੍ਤਾਪਿ ਵਕ੍ਕਯਕਨਾਦੀਨਿ ਬਹਿ ਕਤ੍ਵਾ ਗਣ੍ਹਨ੍ਤਾ ਨਾਮ ਨਤ੍ਥੀਤਿ ਮਚ੍ਛਕੁਚ੍ਛਿਯਂ ਲਦ੍ਧਤ੍ਤਾ ਅਯਮ੍ਪਿ ਅਮਾਤਾ ਕਾਤੁਂ ਨ ਸਕ੍ਕਾ, ਦਾਰਕੋ ਉਭਿਨ੍ਨਮ੍ਪਿ ਕੁਲਾਨਂ ਦਾਯਾਦੋ ਹੋਤੁ, ਉਭੋਪਿ ਨਂ ਜਗ੍ਗਥਾ’’ਤਿ ਉਭੋਪਿ ਜਗ੍ਗਿਂਸੁ.

ਵਿਞ੍ਞੁਤਂ ਪਤ੍ਤਸ੍ਸ ਦ੍ਵੀਸੁਪਿ ਨਗਰੇਸੁ ਪਾਸਾਦਂ ਕਾਰੇਤ੍ਵਾ ਨਾਟਕਾਨਿ ਪਚ੍ਚੁਪਟ੍ਠਾਪੇਸੁਂ. ਏਕੇਕਸ੍ਮਿਂ ਨਗਰੇ ਚਤ੍ਤਾਰੋ ਚਤ੍ਤਾਰੋ ਮਾਸੇ ਵਸਤਿ, ਏਕਸ੍ਮਿਂ ਨਗਰੇ ਚਤ੍ਤਾਰੋ ਮਾਸੇ ਵੁਟ੍ਠਸ੍ਸ ਸਙ੍ਘਾਟਨਾਵਾਯ ਮਣ੍ਡਪਂ ਕਾਰੇਤ੍ਵਾ ਤਤ੍ਥ ਨਂ ਸਦ੍ਧਿਂ ਨਾਟਕਾਹਿ ਆਰੋਪੇਨ੍ਤਿ. ਸੋ ਸਮ੍ਪਤ੍ਤਿਂ ਅਨੁਭਵਮਾਨੋ ਇਤਰਂ ਨਗਰਂ ਗਚ੍ਛਤਿ. ਤਂਨਗਰਵਾਸਿਨੋ ਨਾਟਕਾਨਿ ਉਪਡ੍ਢਮਗ੍ਗਂ ਅਗਮਂਸੁ. ਤੇ ਪਚ੍ਚੁਗ੍ਗਨ੍ਤ੍ਵਾ ਤਂ ਪਰਿਵਾਰੇਤ੍ਵਾ ਅਤ੍ਤਨੋ ਪਾਸਾਦਂ ਨਯਨ੍ਤਿ. ਇਤਰਾਨਿ ਨਾਟਕਾਨਿ ਨਿਵਤ੍ਤਿਤ੍ਵਾ ਅਤ੍ਤਨੋ ਨਗਰਮੇਵ ਗਚ੍ਛਨ੍ਤਿ. ਤਤ੍ਥ ਚਤ੍ਤਾਰੋ ਮਾਸੇ ਵਸਿਤ੍ਵਾ ਤੇਨੇਵ ਨਿਯਾਮੇਨ ਪੁਨ ਇਤਰਂ ਨਗਰਂ ਗਚ੍ਛਤਿ. ਏਵਮਸ੍ਸ ਸਮ੍ਪਤ੍ਤਿਂ ਅਨੁਭਵਨ੍ਤਸ੍ਸ ਅਸੀਤਿ ਵਸ੍ਸਾਨਿ ਪਰਿਪੁਣ੍ਣਾਨਿ.

ਅਥ ਭਗਵਾ ਚਾਰਿਕਂ ਚਰਮਾਨੋ ਬਾਰਾਣਸਿਂ ਪਤ੍ਤੋ. ਸੋ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤੋ. ਪਬ੍ਬਜਿਤ੍ਵਾ ਸਤ੍ਤਾਹਮੇਵ ਪੁਥੁਜ੍ਜਨੋ ਅਹੋਸਿ, ਅਟ੍ਠਮੇ ਪਨ ਸੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣੀਤਿ ਏਵਮਸ੍ਸ ਦ੍ਵੇ ਕੁਲਾਨਿ ਅਹੇਸੁਂ. ਤਸ੍ਮਾ ਬਾਕੁਲੋਤਿ ਸਙ੍ਖਂ ਅਗਮਾਸੀਤਿ.

ਪੁਰਾਣਗਿਹਿਸਹਾਯੋਤਿ ਪੁਬ੍ਬੇ ਗਿਹਿਕਾਲੇ ਸਹਾਯੋ. ਅਯਮ੍ਪਿ ਦੀਘਾਯੁਕੋਵ ਥੇਰਂ ਪਬ੍ਬਜਿਤਂ ਪਸ੍ਸਿਤੁਂ ਗਚ੍ਛਨ੍ਤੋ ਅਸੀਤਿਮੇ ਵਸ੍ਸੇ ਗਤੋ. ਮੇਥੁਨੋ ਧਮ੍ਮੋਤਿ ਬਾਲੋ ਨਗ੍ਗਸਮਣਕੋ ਬਾਲਪੁਚ੍ਛਂ ਪੁਚ੍ਛਤਿ, ਨ ਸਾਸਨਵਚਨਂ, ਇਦਾਨਿ ਥੇਰੇਨ ਦਿਨ੍ਨਨਯੇ ਠਿਤੋ ਇਮੇਹਿ ਪਨ ਤੇਤਿ ਪੁਚ੍ਛਿ.

੨੧੦. ਯਂਪਾਯਸ੍ਮਾਤਿਆਦੀਨਿ ਪਦਾਨਿ ਸਬ੍ਬਵਾਰੇਸੁ ਧਮ੍ਮਸਙ੍ਗਾਹਕਤ੍ਥੇਰੇਹਿ ਨਿਯਮੇਤ੍ਵਾ ਠਪਿਤਾਨਿ. ਤਤ੍ਥ ਸਞ੍ਞਾ ਉਪ੍ਪਨ੍ਨਮਤ੍ਤਾਵ, ਵਿਤਕ੍ਕੋ ਕਮ੍ਮਪਥਭੇਦਕੋਤਿ. ਥੇਰੋ ਪਨਾਹ – ‘‘ਕਸ੍ਮਾ ਵਿਸੁਂ ਕਰੋਥ, ਉਭਯਮ੍ਪੇਤਂ ਕਮ੍ਮਪਥਭੇਦਕਮੇਵਾ’’ਤਿ.

੨੧੧. ਗਹਪਤਿਚੀਵਰਨ੍ਤਿ ਵਸ੍ਸਾਵਾਸਿਕਂ ਚੀਵਰਂ. ਸਤ੍ਥੇਨਾਤਿ ਪਿਪ੍ਫਲਕੇਨ. ਸੂਚਿਯਾਤਿ ਸੂਚਿਂ ਗਹੇਤ੍ਵਾ ਸਿਬ੍ਬਿਤਭਾਵਂ ਨ ਸਰਾਮੀਤਿ ਅਤ੍ਥੋ. ਕਥਿਨੇ ਚੀਵਰਨ੍ਤਿ ਕਥਿਨਚੀਵਰਂ, ਕਥਿਨਚੀਵਰਮ੍ਪਿ ਹਿ ਵਸ੍ਸਾਵਾਸਿਕਗਤਿਕਮੇਵ. ਤਸ੍ਮਾ ਤਤ੍ਥ ‘‘ਸਿਬ੍ਬਿਤਾ ਨਾਭਿਜਾਨਾਮੀ’’ਤਿ ਆਹ.

ਏਤ੍ਤਕਂ ਪਨਸ੍ਸ ਕਾਲਂ ਗਹਪਤਿਚੀਵਰਂ ਅਸਾਦਿਯਨ੍ਤਸ੍ਸ ਛਿਨ੍ਦਨਸਿਬ੍ਬਨਾਦੀਨਿ ਅਕਰੋਨ੍ਤਸ੍ਸ ਕੁਤੋ ਚੀਵਰਂ ਉਪ੍ਪਜ੍ਜਤੀਤਿ. ਦ੍ਵੀਹਿ ਨਗਰੇਹਿ. ਥੇਰੋ ਹਿ ਮਹਾਯਸਸ੍ਸੀ, ਤਸ੍ਸ ਪੁਤ੍ਤਧੀਤਰੋ ਨਤ੍ਤਪਨਤ੍ਤਕਾ ਸੁਖੁਮਸਾਟਕੇਹਿ ਚੀਵਰਾਨਿ ਕਾਰੇਤ੍ਵਾ ਰਜਾਪੇਤ੍ਵਾ ਸਮੁਗ੍ਗੇ ਪਕ੍ਖਿਪਿਤ੍ਵਾ ਪਹਿਣਨ੍ਤਿ. ਥੇਰਸ੍ਸ ਨ੍ਹਾਨਕਾਲੇ ਨ੍ਹਾਨਕੋਟ੍ਠਕੇ ਠਪੇਨ੍ਤਿ. ਥੇਰੋ ਤਾਨਿ ਨਿਵਾਸੇਤਿ ਚੇਵ ਪਾਰੁਪਤਿ ਚ, ਪੁਰਾਣਚੀਵਰਾਨਿ ਸਮ੍ਪਤ੍ਤਪਬ੍ਬਜਿਤਾਨਂ ਦੇਤਿ. ਥੇਰੋ ਤਾਨਿ ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਨਵਕਮ੍ਮਂ ਨ ਕਰੋਤਿ, ਕਿਞ੍ਚਿ ਆਯੂਹਨਕਮ੍ਮਂ ਨਤ੍ਥਿ. ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਅਪ੍ਪੇਤ੍ਵਾ ਨਿਸੀਦਤਿ. ਚਤੂਸੁ ਮਾਸੇਸੁ ਪਤ੍ਤੇਸੁ ਲੋਮਕਿਲਿਟ੍ਠਾਨਿ ਹੋਨ੍ਤਿ, ਅਥਸ੍ਸ ਪੁਨ ਤੇਨੇਵ ਨਿਯਾਮੇਨ ਪਹਿਣਿਤ੍ਵਾ ਦੇਨ੍ਤਿ. ਅਡ੍ਢਮਾਸੇ ਅਡ੍ਢਮਾਸੇ ਪਰਿਵਤ੍ਤਤੀਤਿਪਿ ਵਦਨ੍ਤਿਯੇਵ.

ਅਨਚ੍ਛਰਿਯਞ੍ਚੇਤਂ ਥੇਰਸ੍ਸ ਮਹਾਪੁਞ੍ਞਸ੍ਸ ਮਹਾਭਿਞ੍ਞਸ੍ਸ ਸਤਸਹਸ੍ਸਕਪ੍ਪੇ ਪੂਰਿਤਪਾਰਮਿਸ੍ਸ, ਅਸੋਕਧਮ੍ਮਰਞ੍ਞੋ ਕੁਲੂਪਕੋ ਨਿਗ੍ਰੋਧਤ੍ਥੇਰੋ ਦਿਵਸਸ੍ਸ ਨਿਕ੍ਖਤ੍ਤੁਂ ਚੀਵਰਂ ਪਰਿਵਤ੍ਤੇਸਿ. ਤਸ੍ਸ ਹਿ ਤਿਚੀਵਰਂ ਹਤ੍ਥਿਕ੍ਖਨ੍ਧੇ ਠਪੇਤ੍ਵਾ ਪਞ੍ਚਹਿ ਚ ਗਨ੍ਧਸਮੁਗ੍ਗਸਤੇਹਿ ਪਞ੍ਚਹਿ ਚ ਮਾਲਾਸਮੁਗ੍ਗਸਤੇਹਿ ਸਦ੍ਧਿਂ ਪਾਤੋਵ ਆਹਰਿਯਿਤ੍ਥ, ਤਥਾ ਦਿਵਾ ਚੇਵ ਸਾਯਞ੍ਚ. ਰਾਜਾ ਕਿਰ ਦਿਵਸਸ੍ਸ ਨਿਕ੍ਖਤ੍ਤੁਂ ਸਾਟਕੇ ਪਰਿਵਤ੍ਤੇਨ੍ਤੋ ‘‘ਥੇਰਸ੍ਸ ਚੀਵਰਂ ਨੀਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਆਮ ਨੀਤ’’ਨ੍ਤਿ ਸੁਤ੍ਵਾਵ ਪਰਿਵਤ੍ਤੇਸਿ. ਥੇਰੋਪਿ ਨ ਭਣ੍ਡਿਕਂ ਬਨ੍ਧਿਤ੍ਵਾ ਠਪੇਸਿ, ਸਮ੍ਪਤ੍ਤਸਬ੍ਰਹ੍ਮਚਾਰੀਨਂ ਅਦਾਸਿ. ਤਦਾ ਕਿਰ ਜਮ੍ਬੁਦੀਪੇ ਭਿਕ੍ਖੁਸਙ੍ਘਸ੍ਸ ਯੇਭੁਯ੍ਯੇਨ ਨਿਗ੍ਰੋਧਸ੍ਸੇਵ ਸਨ੍ਤਕਂ ਚੀਵਰਂ ਅਹੋਸਿ.

ਅਹੋ ਵਤ ਮਂ ਕੋਚਿ ਨਿਮਨ੍ਤੇਯ੍ਯਾਤਿ ਕਿਂ ਪਨ ਚਿਤ੍ਤਸ੍ਸ ਅਨੁਪ੍ਪਾਦਨਂ ਭਾਰਿਯਂ, ਉਪ੍ਪਨ੍ਨਸ੍ਸ ਪਹਾਨਨ੍ਤਿ. ਚਿਤ੍ਤਂ ਨਾਮ ਲਹੁਕਪਰਿਵਤ੍ਤਂ, ਤਸ੍ਮਾ ਅਨੁਪ੍ਪਾਦਨਂ ਭਾਰਿਯਂ, ਉਪ੍ਪਨ੍ਨਸ੍ਸ ਪਹਾਨਮ੍ਪਿ ਭਾਰਿਯਮੇਵ. ਅਨ੍ਤਰਘਰੇਤਿ ਮਹਾਸਕੁਲੁਦਾਯਿਸੁਤ੍ਤੇ (ਮ. ਨਿ. ੨.੨੩੭) ਇਨ੍ਦਖੀਲਤੋ ਪਟ੍ਠਾਯ ਅਨ੍ਤਰਘਰਂ ਨਾਮ ਇਧ ਨਿਮ੍ਬੋਦਕਪਤਨਟ੍ਠਾਨਂ ਅਧਿਪ੍ਪੇਤਂ. ਕੁਤੋ ਪਨਸ੍ਸ ਭਿਕ੍ਖਾ ਉਪ੍ਪਜ੍ਜਿਤ੍ਥਾਤਿ. ਥੇਰੋ ਦ੍ਵੀਸੁ ਨਗਰੇਸੁ ਅਭਿਞ੍ਞਾਤੋ, ਗੇਹਦ੍ਵਾਰਂ ਆਗਤਸ੍ਸੇਵਸ੍ਸ ਪਤ੍ਤਂ ਗਹੇਤ੍ਵਾ ਨਾਨਾਰਸਭੋਜਨਸ੍ਸ ਪੂਰੇਤ੍ਵਾ ਦੇਨ੍ਤਿ. ਸੋ ਲਦ੍ਧਟ੍ਠਾਨਤੋ ਨਿਵਤ੍ਤਤਿ, ਭਤ੍ਤਕਿਚ੍ਚਕਰਣਟ੍ਠਾਨਂ ਪਨਸ੍ਸ ਨਿਬਦ੍ਧਮੇਵ ਅਹੋਸਿ. ਅਨੁਬ੍ਯਞ੍ਜਨਸੋਤਿ ਥੇਰੇਨ ਕਿਰ ਰੂਪੇ ਨਿਮਿਤ੍ਤਂ ਗਹੇਤ੍ਵਾ ਮਾਤੁਗਾਮੋ ਨ ਓਲੋਕਿਤਪੁਬ੍ਬੋ. ਮਾਤੁਗਾਮਸ੍ਸ ਧਮ੍ਮਨ੍ਤਿ ਮਾਤੁਗਾਮਸ੍ਸ ਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤੁਂ ਵਟ੍ਟਤਿ, ਪਞ੍ਹਂ ਪੁਟ੍ਠੇਨ ਗਾਥਾਸਹਸ੍ਸਮ੍ਪਿ ਵਤ੍ਤੁਂ ਵਟ੍ਟਤਿਯੇਵ. ਥੇਰੋ ਪਨ ਕਪ੍ਪਿਯਮੇਵ ਨ ਅਕਾਸਿ. ਯੇਭੁਯ੍ਯੇਨ ਹਿ ਕੁਲੂਪਕਥੇਰਾਨਮੇਤਂ ਕਮ੍ਮਂ ਹੋਤਿ. ਭਿਕ੍ਖੁਨੁਪਸ੍ਸਯਨ੍ਤਿ ਭਿਕ੍ਖੁਨਿਉਪਸ੍ਸਯਂ. ਤਂ ਪਨ ਗਿਲਾਨਪੁਚ੍ਛਕੇਨ ਗਨ੍ਤੁਂ ਵਟ੍ਟਤਿ, ਥੇਰੋ ਪਨ ਕਪ੍ਪਿਯਮੇਵ ਨ ਅਕਾਸਿ. ਏਸ ਨਯੋ ਸਬ੍ਬਤ੍ਥ. ਚੁਣ੍ਣੇਨਾਤਿ ਕੋਸਮ੍ਬਚੁਣ੍ਣਾਦਿਨਾ. ਗਤ੍ਤਪਰਿਕਮ੍ਮੇਤਿ ਸਰੀਰਸਮ੍ਬਾਹਨਕਮ੍ਮੇ. ਵਿਚਾਰਿਤਾਤਿ ਪਯੋਜਯਿਤਾ. ਗਦ੍ਦੂਹਨਮਤ੍ਤਨ੍ਤਿ ਗਾਵਿਂ ਥਨੇ ਗਹੇਤ੍ਵਾ ਏਕਂ ਖੀਰਬਿਨ੍ਦੁਂ ਦੂਹਨਕਾਲਮਤ੍ਤਮ੍ਪਿ.

ਕੇਨ ਪਨ ਕਾਰਣੇਨ ਥੇਰੋ ਨਿਰਾਬਾਧੋ ਅਹੋਸਿ. ਪਦੁਮੁਤ੍ਤਰੇ ਕਿਰ ਭਗਵਤਿ ਸਤਸਹਸ੍ਸਭਿਕ੍ਖੁਪਰਿਵਾਰੇ ਚਾਰਿਕਂ ਚਰਮਾਨੇ ਹਿਮਵਤਿ ਵਿਸਰੁਕ੍ਖਾ ਪੁਪ੍ਫਿਂਸੁ. ਭਿਕ੍ਖੁਸਤਸਹਸ੍ਸਾਨਮ੍ਪਿ ਤਿਣਪੁਪ੍ਫਕਰੋਗੋ ਉਪ੍ਪਜ੍ਜਤਿ. ਥੇਰੋ ਤਸ੍ਮਿਂ ਸਮਯੇ ਇਦ੍ਧਿਮਾ ਤਾਪਸੋ ਹੋਤਿ, ਸੋ ਆਕਾਸੇਨ ਗਚ੍ਛਨ੍ਤੋ ਭਿਕ੍ਖੁਸਙ੍ਘਂ ਦਿਸ੍ਵਾ ਓਤਰਿਤ੍ਵਾ ਰੋਗਂ ਪੁਚ੍ਛਿਤ੍ਵਾ ਹਿਮਵਨ੍ਤਤੋ ਓਸਧਂ ਆਹਰਿਤ੍ਵਾ ਅਦਾਸਿ. ਉਪਸਿਙ੍ਘਨਮਤ੍ਤੇਨੇਵ ਰੋਗੋ ਵੂਪਸਮਿ. ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇਪਿ ਪਠਮਵਪ੍ਪਦਿਵਸੇ ਵਪ੍ਪਂ ਠਪੇਤ੍ਵਾ ਭਿਕ੍ਖੁਸਙ੍ਘਸ੍ਸ ਪਰਿਭੋਗਂ ਅਗ੍ਗਿਸਾਲਞ੍ਚੇਵ ਵਚ੍ਚਕੁਟਿਞ੍ਚ ਕਾਰੇਤ੍ਵਾ ਭਿਕ੍ਖੁਸਙ੍ਘਸ੍ਸ ਭੇਸਜ੍ਜਵਤ੍ਤਂ ਨਿਬਨ੍ਧਿ, ਇਮਿਨਾ ਕਮ੍ਮੇਨ ਨਿਰਾਬਾਧੋ ਅਹੋਸਿ. ਉਕ੍ਕਟ੍ਠਨੇਸਜ੍ਜਿਕੋ ਪਨੇਸ ਉਕ੍ਕਟ੍ਠਾਰਞ੍ਞਕੋ ਚ ਤਸ੍ਮਾ ‘‘ਨਾਭਿਜਾਨਾਮਿ ਅਪਸ੍ਸੇਨਕਂ ਅਪਸ੍ਸਯਿਤਾ’’ਤਿਆਦਿਮਾਹ.

ਸਰਣੋਤਿ ਸਕਿਲੇਸੋ. ਅਞ੍ਞਾ ਉਦਪਾਦੀਤਿ ਅਨੁਪਸਮ੍ਪਨ੍ਨਸ੍ਸ ਅਞ੍ਞਂ ਬ੍ਯਾਕਾਤੁਂ ਨ ਵਟ੍ਟਤਿ. ਥੇਰੋ ਕਸ੍ਮਾ ਬ੍ਯਾਕਾਸਿ? ਨ ਥੇਰੋ ਅਹਂ ਅਰਹਾਤਿ ਆਹ, ਅਞ੍ਞਾ ਉਦਪਾਦੀਤਿ ਪਨਾਹ. ਅਪਿਚ ਥੇਰੋ ਅਰਹਾਤਿ ਪਾਕਟੋ, ਤਸ੍ਮਾ ਏਵਮਾਹ.

੨੧੨. ਪਬ੍ਬਜ੍ਜਨ੍ਤਿ ਥੇਰੋ ਸਯਂ ਨੇਵ ਪਬ੍ਬਾਜੇਸਿ, ਨ ਉਪਸਮ੍ਪਾਦੇਸਿ ਅਞ੍ਞੇਹਿ ਪਨ ਭਿਕ੍ਖੂਹਿ ਏਵਂ ਕਾਰਾਪੇਸਿ. ਅਵਾਪੁਰਣਂ ਆਦਾਯਾਤਿ ਕੁਞ੍ਚਿਕਂ ਗਹੇਤ੍ਵਾ.

ਨਿਸਿਨ੍ਨਕੋਵ ਪਰਿਨਿਬ੍ਬਾਯੀਤਿ ਅਹਂ ਧਰਮਾਨੋਪਿ ਨ ਅਞ੍ਞਸ੍ਸ ਭਿਕ੍ਖੁਸ੍ਸ ਭਾਰੋ ਅਹੋਸਿਂ, ਪਰਿਨਿਬ੍ਬੁਤਸ੍ਸਾਪਿ ਮੇ ਸਰੀਰਂ ਭਿਕ੍ਖੁਸਙ੍ਘਸ੍ਸ ਪਲਿਬੋਧੋ ਮਾ ਅਹੋਸੀਤਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਪਰਿਨਿਬ੍ਬਾਯਿ. ਸਰੀਰਤੋ ਜਾਲਾ ਉਟ੍ਠਹਿ, ਛਵਿਮਂਸਲੋਹਿਤਂ ਸਪ੍ਪਿ ਵਿਯ ਝਾਯਮਾਨਂ ਪਰਿਕ੍ਖਯਂ ਗਤਂ, ਸੁਮਨਮਕੁਲਸਦਿਸਾ ਧਾਤੁਯੋਵ ਅਵਸੇਸਿਂਸੁ. ਸੇਸਂ ਸਬ੍ਬਤ੍ਥ ਪਾਕਟਮੇਵ. ਇਦਂ ਪਨ ਸੁਤ੍ਤਂ ਦੁਤਿਯਸਙ੍ਗਹੇ ਸਙ੍ਗੀਤਨ੍ਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਬਾਕੁਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਦਨ੍ਤਭੂਮਿਸੁਤ੍ਤਵਣ੍ਣਨਾ

੨੧੩. ਏਵਂ ਮੇ ਸੁਤਨ੍ਤਿ ਦਨ੍ਤਭੂਮਿਸੁਤ੍ਤਂ. ਤਤ੍ਥ ਅਰਞ੍ਞਕੁਟਿਕਾਯਨ੍ਤਿ ਤਸ੍ਸੇਵ ਵੇਲ਼ੁਵਨਸ੍ਸ ਏਕਸ੍ਮਿਂ ਵਿਵਿਤ੍ਤਟ੍ਠਾਨੇ ਪਧਾਨਕਮ੍ਮਿਕਾਨਂ ਭਿਕ੍ਖੂਨਂ ਅਤ੍ਥਾਯ ਕਤਸੇਨਾਸਨੇ. ਰਾਜਕੁਮਾਰੋਤਿ ਬਿਮ੍ਬਿਸਾਰਸ੍ਸ ਪੁਤ੍ਤੋ ਓਰਸਕੋ.

ਫੁਸੇਯ੍ਯਾਤਿ ਲਭੇਯ੍ਯ. ਏਕਗ੍ਗਤਨ੍ਤਿ ਏਵਂ ਪਟਿਪਨ੍ਨੋ ਸਮਾਪਤ੍ਤਿਂ ਨਾਮ ਲਭਤਿ, ਝਾਨਂ ਨਾਮ ਲਭਤੀਤਿ ਇਦਂ ਮਯਾ ਸੁਤਨ੍ਤਿ ਵਦਤਿ. ਕਿਲਮਥੋਤਿ ਕਾਯਕਿਲਮਥੋ. ਵਿਹੇਸਾਤਿ ਸ੍ਵੇਵ ਕਿਲਮਥੋ ਵੁਤ੍ਤੋ. ਯਥਾਸਕੇ ਤਿਟ੍ਠੇਯ੍ਯਾਸੀਤਿ ਅਤ੍ਤਨੋ ਅਜਾਨਨਕੋਟ੍ਠਾਸੇਯੇਵ ਤਿਟ੍ਠੇਯ੍ਯਾਸੀਤਿ.

੨੧੪. ਦੇਸੇਸੀਤਿ ਚਿਤ੍ਤੇਕਗ੍ਗਤਂ ਨਾਮ ਏਵਂ ਲਭਤਿ, ਸਮਾਪਤ੍ਤਿਂ ਏਵਂ ਨਿਬ੍ਬਤ੍ਤੇਤੀਤਿ ਅਪ੍ਪਨਾਉਪਚਾਰਂ ਪਾਪੇਤ੍ਵਾ ਏਕਕਸਿਣਪਰਿਕਮ੍ਮਂ ਕਥੇਸਿ. ਪਵੇਦੇਤ੍ਵਾਤਿ ਪਕਾਸੇਤ੍ਵਾ.

ਨੇਕ੍ਖਮ੍ਮੇਨ ਞਾਤਬ੍ਬਨ੍ਤਿ ਕਾਮਤੋ ਨਿਸ੍ਸਟਗੁਣੇਨ ਞਾਤਬ੍ਬਂ. ਕਾਮਤੋ ਨਿਸ੍ਸਟਗੁਣੇ ਠਿਤੇਨ ਪੁਗ੍ਗਲੇਨ ਏਕਗ੍ਗਂ ਨਾਮ ਜਾਨਿਤਬ੍ਬਨ੍ਤਿ ਅਧਿਪ੍ਪਾਯੇਨੇਤਂ ਵੁਤ੍ਤਂ. ਸੇਸਾਨਿ ਤਸ੍ਸੇਵ ਵੇਵਚਨਾਨਿ. ਕਾਮੇ ਪਰਿਭੁਞ੍ਜਨ੍ਤੋਤਿ ਦੁਵਿਧੇਪਿ ਕਾਮੇ ਭੁਞ੍ਜਮਾਨੋ.

੨੧੫. ਹਤ੍ਥਿਦਮ੍ਮਾ ਵਾ ਅਸ੍ਸਦਮ੍ਮਾ ਵਾ ਗੋਦਮ੍ਮਾ ਵਾਤਿ ਏਤ੍ਥ ਅਦਨ੍ਤਹਤ੍ਥਿਦਮ੍ਮਾਦਯੋ ਵਿਯ ਚਿਤ੍ਤੇਕਗ੍ਗਰਹਿਤਾ ਪੁਗ੍ਗਲਾ ਦਟ੍ਠਬ੍ਬਾ. ਦਨ੍ਤਹਤ੍ਥਿਆਦਯੋ ਵਿਯ ਚਿਤ੍ਤੇਕਗ੍ਗਸਮ੍ਪਨ੍ਨਾ. ਯਥਾ ਅਦਨ੍ਤਹਤ੍ਥਿਦਮ੍ਮਾਦਯੋ ਕੂਟਾਕਾਰਂ ਅਕਤ੍ਵਾ ਧੁਰਂ ਅਛਡ੍ਡੇਤ੍ਵਾ ਦਨ੍ਤਗਮਨਂ ਵਾ ਗਨ੍ਤੁਂ, ਦਨ੍ਤੇਹਿ ਵਾ ਪਤ੍ਤਬ੍ਬਂ ਭੂਮਿਂ ਪਾਪੁਣਿਤੁਂ ਨ ਸਕ੍ਕੋਨ੍ਤਿ, ਏਵਮੇਵ ਚਿਤ੍ਤੇਕਗ੍ਗਰਹਿਤਾ ਸਮ੍ਪਨ੍ਨਚਿਤ੍ਤੇਕਗ੍ਗੇਹਿ ਨਿਬ੍ਬਤ੍ਤਿਤਗੁਣਂ ਵਾ ਨਿਬ੍ਬਤ੍ਤੇਤੁਂ ਪਤ੍ਤਭੂਮਿਂ ਵਾ ਪਾਪੁਣਿਤੁਂ ਨ ਸਕ੍ਕੋਨ੍ਤਿ.

੨੧੬. ਹਤ੍ਥਵਿਲਙ੍ਘਕੇਨਾਤਿ ਹਤ੍ਥੇਨ ਹਤ੍ਥਂ ਗਹੇਤ੍ਵਾ.

ਦਟ੍ਠੇਯ੍ਯਨ੍ਤਿ ਪਸ੍ਸਿਤਬ੍ਬਯੁਤ੍ਤਕਂ. ਆਵੁਤੋਤਿ ਆਵਰਿਤੋ. ਨਿਵੁਤੋਤਿ ਨਿਵਾਰਿਤੋ. ਓਫੁਟੋਤਿ ਓਨਦ੍ਧੋ.

੨੧੭. ਨਾਗਵਨਿਕਨ੍ਤਿ ਹਤ੍ਥਿਪਦੋਪਮੇ (ਮ. ਨਿ. ੧.੨੮੮ ਆਦਯੋ) ਨਾਗਵਨਚਰਕੋ ਪੁਰਿਸੋ ‘‘ਨਾਗਵਨਿਕੋ’’ਤਿ ਵੁਤ੍ਤੋ, ਇਧ ਹਤ੍ਥਿਸਿਕ੍ਖਾਯ ਕੁਸਲੋ ਹਤ੍ਥਿਂ ਗਹੇਤੁਂ ਸਮਤ੍ਥੋ. ਅਤਿਪਸ੍ਸਿਤ੍ਵਾਤਿ ਦਿਸ੍ਵਾ. ਏਤ੍ਥਗੇਧਾਤਿ ਏਤਸ੍ਮਿਂ ਪਵਤ੍ਤਗੇਧਾ. ਸਰਸਙ੍ਕਪ੍ਪਾਨਨ੍ਤਿ ਧਾਵਨਸਙ੍ਕਪ੍ਪਾਨਂ. ਮਨੁਸ੍ਸਕਨ੍ਤੇਸੁ ਸੀਲੇਸੁ ਸਮਾਦਪਨਾਯਾਤਿ ਏਤ੍ਥ ਯਦਾ ਨਾਗੋ ਇਤ੍ਥਿਪੁਰਿਸੇਹਿ ਕੁਮਾਰਕੁਮਾਰਿਕਾਹਿ ਸੋਣ੍ਡਾਦੀਸੁ ਗਹੇਤ੍ਵਾ ਉਪਕੇਲ਼ਯਮਾਨੋ ਵਿਕਾਰਂ ਨ ਕਰੋਤਿ ਸੁਖਾਯਤਿ, ਤਦਾਨੇਨ ਮਨੁਸ੍ਸਕਨ੍ਤਾਨਿ ਸੀਲਾਨਿ ਸਮਾਦਿਨ੍ਨਾਨਿ ਨਾਮ ਹੋਨ੍ਤਿ.

ਪੇਮਨੀਯਾਤਿ ਤਾਤ ਰਾਜਾ ਤੇ ਪਸਨ੍ਨੋ ਮਙ੍ਗਲਹਤ੍ਥਿਟ੍ਠਾਨੇਵ ਠਪੇਸ੍ਸਤਿ, ਰਾਜਾਰਹਾਨਿ ਭੋਜਨਾਦੀਨਿ ਲਭਿਸ੍ਸਸੀਤਿ ਏਵਰੂਪੀ ਨਾਗੇਹਿ ਪਿਯਾਪਿਤਬ੍ਬਾ ਕਥਾ. ਸੁਸ੍ਸੂਸਤੀਤਿ ਤਂ ਪੇਮਨੀਯਕਥਂ ਸੋਤੁਕਾਮੋ ਹੋਤਿ. ਤਿਣਘਾਸੋਦਕਨ੍ਤਿ ਤਿਣਘਾਸਞ੍ਚੇਵ ਉਦਕਞ੍ਚ, ਤਿਣਘਾਸਨ੍ਤਿ ਘਾਸਿਤਬ੍ਬਂ ਤਿਣਂ, ਖਾਦਿਤਬ੍ਬਨ੍ਤਿ ਅਤ੍ਥੋ.

ਪਣਵੋਤਿ ਡਿਣ੍ਡਿਮੋ. ਸਬ੍ਬਵਙ੍ਕਦੋਸਨਿਹਿਤਨਿਨ੍ਨੀਤਕਸਾਵੋਤਿ ਨਿਹਿਤਸਬ੍ਬਵਙ੍ਕਦੋਸੋ ਚੇਵ ਅਪਨੀਤਕਸਾਵੋ ਚ. ਅਙ੍ਗਨ੍ਤੇਵ ਸਙ੍ਖਂ ਗਚ੍ਛਤੀਤਿ ਅਙ੍ਗਸਮੋ ਹੋਤਿ.

੨੧੯. ਗੇਹਸਿਤਸੀਲਾਨਨ੍ਤਿ ਪਞ੍ਚਕਾਮਗੁਣਨਿਸ੍ਸਿਤਸੀਲਾਨਂ. ਞਾਯਸ੍ਸਾਤਿ ਅਟ੍ਠਙ੍ਗਿਕਮਗ੍ਗਸ੍ਸ.

੨੨੨. ਅਦਨ੍ਤਮਰਣਂ ਮਹਲ੍ਲਕੋ ਰਞ੍ਞੋ ਨਾਗੋ ਕਾਲਙ੍ਕਤੋਤਿ ਰਞ੍ਞੋ ਮਹਲ੍ਲਕੋ ਨਾਗੋ ਅਦਨ੍ਤਮਰਣਂ ਮਤੋ ਕਾਲਂ ਕਤੋ ਹੋਤਿ, ਅਦਨ੍ਤਮਰਣਂ ਕਾਲਂਕਿਰਿਯਂ ਨਾਮ ਕਰਿਯਤੀਤਿ ਅਯਮੇਤ੍ਥ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ. ਸੇਸਂ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਦਨ੍ਤਭੂਮਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਭੂਮਿਜਸੁਤ੍ਤਵਣ੍ਣਨਾ

੨੨੩. ਏਵਂ ਮੇ ਸੁਤਨ੍ਤਿ ਭੂਮਿਜਸੁਤ੍ਤਂ. ਤਤ੍ਥ ਭੂਮਿਜੋਤਿ ਅਯਂ ਥੇਰੋ ਜਯਸੇਨਰਾਜਕੁਮਾਰਸ੍ਸ ਮਾਤੁਲੋ. ਆਸਞ੍ਚ ਅਨਾਸਞ੍ਚਾਤਿ ਕਾਲੇਨ ਆਸਂ ਕਾਲੇਨ ਅਨਾਸਂ. ਸਕੇਨ ਥਾਲਿਪਾਕੇਨਾਤਿ ਪਕਤਿਪਵਤ੍ਤਾਯ ਭਿਕ੍ਖਾਯ ਅਤ੍ਤਨੋ ਨਿਟ੍ਠਿਤਭਤ੍ਤਤੋਪਿ ਭਤ੍ਤੇਨ ਪਰਿਵਿਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਭੂਮਿਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਅਨੁਰੁਦ੍ਧਸੁਤ੍ਤਵਣ੍ਣਨਾ

੨੩੦. ਏਵਂ ਮੇ ਸੁਤਨ੍ਤਿ ਅਨੁਰੁਦ੍ਧਸੁਤ੍ਤਂ. ਤਤ੍ਥ ਏਵਮਾਹਂਸੂਤਿ ਤਸ੍ਸ ਉਪਾਸਕਸ੍ਸ ਅਫਾਸੁਕਕਾਲੋ ਅਹੋਸਿ, ਤਦਾ ਉਪਸਙ੍ਕਮਿਤ੍ਵਾ ਏਵਮਾਹਂਸੁ. ਅਪਣ੍ਣਕਨ੍ਤਿ ਅਵਿਰਾਧਿਤਂ. ਏਕਤ੍ਥਾਤਿ ਅਪ੍ਪਮਾਣਾਤਿ ਵਾ ਮਹਗ੍ਗਤਾਤਿ ਵਾ ਝਾਨਮੇਵ ਚਿਤ੍ਤੇਕਗ੍ਗਤਾਯੇਵ ਏਵਂ ਵੁਚ੍ਚਤੀਤਿ ਇਮਂ ਸਨ੍ਧਾਯ ਏਵਮਾਹ.

੨੩੧. ਯਾਵਤਾ ਏਕਂ ਰੁਕ੍ਖਮੂਲਂ ਮਹਗ੍ਗਤਨ੍ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ ਵਿਹਰਤੀਤਿ ਏਕਰੁਕ੍ਖਮੂਲਪਮਾਣਟ੍ਠਾਨਂ ਕਸਿਣਨਿਮਿਤ੍ਤੇਨ ਓਤ੍ਥਰਿਤ੍ਵਾ ਤਸ੍ਮਿਂ ਕਸਿਣਨਿਮਿਤ੍ਤੇ ਮਹਗ੍ਗਤਜ੍ਝਾਨਂ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ ਵਿਹਰਤਿ. ਮਹਗ੍ਗਤਨ੍ਤਿ ਪਨਸ੍ਸ ਆਭੋਗੋ ਨਤ੍ਥਿ, ਕੇਵਲਂ ਮਹਗ੍ਗਤਜ੍ਝਾਨਪਵਤ੍ਤਿਵਸੇਨ ਪਨੇਤਂ ਵੁਤ੍ਤਂ. ਏਸ ਨਯੋ ਸਬ੍ਬਤ੍ਥ. ਇਮਿਨਾ ਖੋ ਏਤਂ ਗਹਪਤਿ ਪਰਿਯਾਯੇਨਾਤਿ ਇਮਿਨਾ ਕਾਰਣੇਨ. ਏਤ੍ਥ ਹਿ ਅਪ੍ਪਮਾਣਾਤਿ ਵੁਤ੍ਤਾਨਂ ਬ੍ਰਹ੍ਮਵਿਹਾਰਾਨਂ ਨਿਮਿਤ੍ਤਂ ਨ ਵਡ੍ਢਤਿ, ਉਗ੍ਘਾਟਨਂ ਨ ਜਾਯਤਿ, ਤਾਨਿ ਝਾਨਾਨਿ ਅਭਿਞ੍ਞਾਨਂ ਵਾ ਨਿਰੋਧਸ੍ਸ ਵਾ ਪਾਦਕਾਨਿ ਨ ਹੋਨ੍ਤਿ, ਵਿਪਸ੍ਸਨਾਪਾਦਕਾਨਿ ਪਨ ਵਟ੍ਟਪਾਦਕਾਨਿ ਭਵੋਕ੍ਕਮਨਾਨਿ ਚ ਹੋਨ੍ਤਿ. ‘‘ਮਹਗ੍ਗਤਾ’’ਤਿ ਵੁਤ੍ਤਾਨਂ ਪਨ ਕਸਿਣਜ੍ਝਾਨਾਨਂ ਨਿਮਿਤ੍ਤਂ ਵਡ੍ਢਤਿ, ਉਗ੍ਘਾਟਨਂ ਜਾਯਤਿ, ਸਮਤਿਕ੍ਕਮਾ ਹੋਨ੍ਤਿ, ਅਭਿਞ੍ਞਾਪਾਦਕਾਨਿ ਨਿਰੋਧਪਾਦਕਾਨਿ ਵਟ੍ਟਪਾਦਕਾਨਿ ਭਵੋਕ੍ਕਮਨਾਨਿ ਚ ਹੋਨ੍ਤਿ. ਏਵਮਿਮੇ ਧਮ੍ਮਾ ਨਾਨਤ੍ਥਾ, ਅਪ੍ਪਮਾਣਾ ਮਹਗ੍ਗਤਾਤਿ ਏਵਂ ਨਾਨਾਬ੍ਯਞ੍ਜਨਾ ਚ.

੨੩੨. ਇਦਾਨਿ ਮਹਗ੍ਗਤਸਮਾਪਤ੍ਤਿਤੋ ਨੀਹਰਿਤ੍ਵਾ ਭਵੂਪਪਤ੍ਤਿਕਾਰਣਂ ਦਸ੍ਸੇਨ੍ਤੋ ਚਤਸ੍ਸੋ ਖੋ ਇਮਾਤਿਆਦਿਮਾਹ. ਪਰਿਤ੍ਤਾਭਾਤਿ ਫਰਿਤ੍ਵਾ ਜਾਨਨ੍ਤਸ੍ਸ ਅਯਮਾਭੋਗੋ ਅਤ੍ਥਿ, ਪਰਿਤ੍ਤਾਭੇਸੁ ਪਨ ਦੇਵੇਸੁ ਨਿਬ੍ਬਤ੍ਤਿਕਾਰਣਂ ਝਾਨਂ ਭਾਵੇਨ੍ਤੋ ਏਵਂ ਵੁਤ੍ਤੋ. ਏਸ ਨਯੋ ਸਬ੍ਬਤ੍ਥ. ਪਰਿਤ੍ਤਾਭਾ ਸਿਯਾ ਸਂਕਿਲਿਟ੍ਠਾਭਾ ਹੋਨ੍ਤਿ ਸਿਯਾ ਪਰਿਸੁਦ੍ਧਾਭਾ, ਅਪ੍ਪਮਾਣਾਭਾ ਸਿਯਾ ਸਂਕਿਲਿਟ੍ਠਾਭਾ ਹੋਨ੍ਤਿ ਸਿਯਾ ਪਰਿਸੁਦ੍ਧਾਭਾ. ਕਥਂ? ਸੁਪ੍ਪਮਤ੍ਤੇ ਵਾ ਸਰਾਵਮਤ੍ਤੇ ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਸਮਾਪਤ੍ਤਿਂ ਨਿਬ੍ਬਤ੍ਤੇਤ੍ਵਾ ਪਞ੍ਚਹਾਕਾਰੇਹਿ ਆਚਿਣ੍ਣਵਸਿਭਾਵੋ ਪਚ੍ਚਨੀਕਧਮ੍ਮਾਨਂ ਸੁਟ੍ਠੁ ਅਪਰਿਸੋਧਿਤਤ੍ਤਾ ਦੁਬ੍ਬਲਮੇਵ ਸਮਾਪਤ੍ਤਿਂ ਵਲ਼ਞ੍ਜਿਤ੍ਵਾ ਅਪ੍ਪਗੁਣਜ੍ਝਾਨੇ ਠਿਤੋ ਕਾਲਂ ਕਤ੍ਵਾ ਪਰਿਤ੍ਤਾਭੇਸੁ ਨਿਬ੍ਬਤ੍ਤਤਿ, ਵਣ੍ਣੋ ਪਨਸ੍ਸ ਪਰਿਤ੍ਤੋ ਚੇਵ ਹੋਤਿ ਸਂਕਿਲਿਟ੍ਠੋ ਚ. ਪਞ੍ਚਹਿ ਪਨਾਕਾਰੇਹਿ ਆਚਿਣ੍ਣਵਸਿਭਾਵੋ ਪਚ੍ਚਨੀਕਧਮ੍ਮਾਨਂ ਸੁਟ੍ਠੁ ਪਰਿਸੋਧਿਤਤ੍ਤਾ ਸੁਵਿਸੁਦ੍ਧਂ ਸਮਾਪਤ੍ਤਿਂ ਵਲ਼ਞ੍ਜਿਤ੍ਵਾ ਪਗੁਣਜ੍ਝਾਨੇ ਠਿਤੋ ਕਾਲਂ ਕਤ੍ਵਾ ਪਰਿਤ੍ਤਾਭੇਸੁ ਨਿਬ੍ਬਤ੍ਤਤਿ, ਵਣ੍ਣੋ ਪਨਸ੍ਸ ਪਰਿਤ੍ਤੋ ਚੇਵ ਹੋਤਿ ਪਰਿਸੁਦ੍ਧੋ ਚ. ਏਵਂ ਪਰਿਤ੍ਤਾਭਾ ਸਿਯਾ ਸਂਕਿਲਿਟ੍ਠਾਭਾ ਹੋਨ੍ਤਿ ਸਿਯਾ ਪਰਿਸੁਦ੍ਧਾਭਾ. ਕਸਿਣੇ ਪਨ ਵਿਪੁਲਪਰਿਕਮ੍ਮਂ ਕਤ੍ਵਾ ਸਮਾਪਤ੍ਤਿਂ ਨਿਬ੍ਬਤ੍ਤੇਤ੍ਵਾ ਪਞ੍ਚਹਾਕਾਰੇਹਿ ਆਚਿਣ੍ਣਵਸਿਭਾਵੋਤਿ ਸਬ੍ਬਂ ਪੁਰਿਮਸਦਿਸਮੇਵ ਵੇਦਿਤਬ੍ਬਂ. ਏਵਂ ਅਪ੍ਪਮਾਣਾਭਾ ਸਿਯਾ ਸਂਕਿਲਿਟ੍ਠਾਭਾ ਹੋਨ੍ਤਿ ਸਿਯਾ ਪਰਿਸੁਦ੍ਧਾਭਾਤਿ.