੧੦. ਦੇਵਦੂਤਸੁਤ੍ਤਵਣ੍ਣਨਾ

੨੬੧. ਏਵਂ ਮੇ ਸੁਤਨ੍ਤਿ ਦੇਵਦੂਤਸੁਤ੍ਤਂ. ਤਤ੍ਥ ਦ੍ਵੇ ਅਗਾਰਾਤਿਆਦਿ ਅਸ੍ਸਪੁਰਸੁਤ੍ਤੇ ਵਿਤ੍ਥਾਰਿਤਮੇਵ.

੨੬੨. ਨਿਰਯਂ ਉਪਪਨ੍ਨਾਤਿ ਭਗਵਾ ਕਤ੍ਥਚਿ ਨਿਰਯਤੋ ਪਟ੍ਠਾਯ ਦੇਸਨਂ ਦੇਵਲੋਕੇਨ ਓਸਾਪੇਤਿ, ਕਤ੍ਥਚਿ ਦੇਵਲੋਕਤੋ ਪਟ੍ਠਾਯ ਨਿਰਯੇਨ ਓਸਾਪੇਤਿ. ਸਚੇ ਸਗ੍ਗਸਮ੍ਪਤ੍ਤਿਂ ਵਿਤ੍ਥਾਰੇਤ੍ਵਾ ਕਥੇਤੁਕਾਮੋ ਹੋਤਿ, ਨਿਰਯਦੁਕ੍ਖਂ ਏਕਦੇਸਤੋ ਕਥੇਤਿ, ਤਿਰਚ੍ਛਾਨਯੋਨਿਦੁਕ੍ਖਂ ਪੇਤ੍ਤਿਵਿਸਯਦੁਕ੍ਖਂ ਮਨੁਸ੍ਸਲੋਕਸਮ੍ਪਤ੍ਤਿਂ ਏਕਦੇਸਤੋ ਕਥੇਤਿ, ਸਗ੍ਗਸਮ੍ਪਤ੍ਤਿਮੇਵ ਵਿਤ੍ਥਾਰੇਤਿ. ਸਚੇ ਨਿਰਯਦੁਕ੍ਖਂ ਵਿਤ੍ਥਾਰੇਤ੍ਵਾ ਕਥੇਤੁਕਾਮੋ ਹੋਤਿ, ਦੇਵਲੋਕਮਨੁਸ੍ਸਲੋਕੇਸੁ ਸਮ੍ਪਤ੍ਤਿਂ ਤਿਰਚ੍ਛਾਨਯੋਨਿਪੇਤ੍ਤਿਵਿਸਯੇਸੁ ਚ ਦੁਕ੍ਖਂ ਏਕਦੇਸਤੋ ਕਥੇਤਿ, ਨਿਰਯਦੁਕ੍ਖਮੇਵ ਵਿਤ੍ਥਾਰੇਤਿ. ਸੋ ਇਮਸ੍ਮਿਂ ਸੁਤ੍ਤੇ ਨਿਰਯਦੁਕ੍ਖਂ ਵਿਤ੍ਥਾਰੇਤੁਕਾਮੋ, ਤਸ੍ਮਾ ਦੇਵਲੋਕਤੋ ਪਟ੍ਠਾਯ ਦੇਸਨਂ ਨਿਰਯੇਨ ਓਸਾਪੇਤਿ. ਦੇਵਲੋਕਮਨੁਸ੍ਸਲੋਕਸਮ੍ਪਤ੍ਤਿਯੋ ਤਿਰਚ੍ਛਾਨਯੋਨਿਪੇਤ੍ਤਿਵਿਸਯਦੁਕ੍ਖਾਨਿ ਚ ਏਕਦੇਸਤੋ ਕਥੇਤ੍ਵਾ ਨਿਰਯਦੁਕ੍ਖਮੇਵ ਵਿਤ੍ਥਾਰੇਨ ਕਥੇਤੁਂ ਤਮੇਨਂ, ਭਿਕ੍ਖਵੇ, ਨਿਰਯਪਾਲਾਤਿਆਦਿਮਾਹ.

ਤਤ੍ਥ ਏਕਚ੍ਚੇ ਥੇਰਾ ‘‘ਨਿਰਯਪਾਲਾ ਨਾਮ ਨਤ੍ਥਿ, ਯਨ੍ਤਰੂਪਂ ਵਿਯ ਕਮ੍ਮਮੇਵ ਕਾਰਣਂ ਕਾਰੇਤੀ’’ਤਿ ਵਦਨ੍ਤਿ. ਤੇਸਂ ਤਂ ‘‘ਅਤ੍ਥਿ ਨਿਰਯੇ ਨਿਰਯਪਾਲਾਤਿ, ਆਮਨ੍ਤਾ, ਅਤ੍ਥਿ ਚ ਕਾਰਣਿਕਾ’’ਤਿਆਦਿਨਾ ਨਯੇਨ ਅਭਿਧਮ੍ਮੇ (ਕਥਾ. ੮੬੬) ਪਟਿਸੇਧਿਤਮੇਵ. ਯਥਾ ਹਿ ਮਨੁਸ੍ਸਲੋਕੇ ਕਮ੍ਮਕਾਰਣਕਾਰਕਾ ਅਤ੍ਥਿ, ਏਵਮੇਵ ਨਿਰਯੇ ਨਿਰਯਪਾਲਾ ਅਤ੍ਥੀਤਿ. ਯਮਸ੍ਸ ਰਞ੍ਞੋਤਿ ਯਮਰਾਜਾ ਨਾਮ ਵੇਮਾਨਿਕਪੇਤਰਾਜਾ, ਏਕਸ੍ਮਿਂ ਕਾਲੇ ਦਿਬ੍ਬਵਿਮਾਨੇ ਦਿਬ੍ਬਕਪ੍ਪਰੁਕ੍ਖਦਿਬ੍ਬਉਯ੍ਯਾਨਦਿਬ੍ਬਨਾਟਕਾਦਿਸਮ੍ਪਤ੍ਤਿਂ ਅਨੁਭਵਤਿ, ਏਕਸ੍ਮਿਂ ਕਾਲੇ ਕਮ੍ਮਵਿਪਾਕਂ, ਧਮ੍ਮਿਕੋ ਰਾਜਾ. ਨ ਚੇਸ ਏਕੋਵ ਹੋਤਿ, ਚਤੂਸੁ ਪਨ ਦ੍ਵਾਰੇਸੁ ਚਤ੍ਤਾਰੋ ਜਨਾ ਹੋਨ੍ਤਿ. ਨਾਦ੍ਦਸਨ੍ਤਿ ਅਤ੍ਤਨੋ ਸਨ੍ਤਿਕੇ ਪੇਸਿਤਸ੍ਸ ਕਸ੍ਸਚਿ ਦੇਵਦੂਤਸ੍ਸ ਅਭਾਵਂ ਸਨ੍ਧਾਯ ਏਵਂ ਵਦਤਿ. ਅਥ ਨਂ ਯਮੋ ‘‘ਨਾਯਂ ਭਾਸਿਤਸ੍ਸ ਅਤ੍ਥਂ ਸਲ੍ਲਕ੍ਖੇਤੀ’’ਤਿ ਞਤ੍ਵਾ ਸਲ੍ਲਕ੍ਖਾਪੇਤੁਕਾਮੋ ਅਮ੍ਭੋਤਿਆਦਿਮਾਹ.

ਜਾਤਿਧਮ੍ਮੋਤਿ ਜਾਤਿਸਭਾਵੋ, ਅਪਰਿਮੁਤ੍ਤੋ ਜਾਤਿਯਾ, ਜਾਤਿ ਨਾਮ ਮਯ੍ਹਂ ਅਬ੍ਭਨ੍ਤਰੇਯੇਵ ਅਤ੍ਥੀਤਿ. ਪਰਤੋ ਜਰਾਧਮ੍ਮੋਤਿਆਦੀਸੁਪਿ ਏਸੇਵ ਨਯੋ.

੨੬੩. ਪਠਮਂ ਦੇਵਦੂਤਂ ਸਮਨੁਯੁਞ੍ਜਿਤ੍ਵਾਤਿ ਏਤ੍ਥ ਦਹਰਕੁਮਾਰੋ ਅਤ੍ਥਤੋ ਏਵਂ ਵਦਤਿ ਨਾਮ ‘‘ਪਸ੍ਸਥ, ਭੋ, ਮਯ੍ਹਮ੍ਪਿ ਤੁਮ੍ਹਾਕਂ ਵਿਯ ਹਤ੍ਥਪਾਦਾ ਅਤ੍ਥਿ, ਸਕੇ ਪਨਮ੍ਹਿ ਮੁਤ੍ਤਕਰੀਸੇ ਪਲਿਪਨ੍ਨੋ, ਅਤ੍ਤਨੋ ਧਮ੍ਮਤਾਯ ਉਟ੍ਠਹਿਤ੍ਵਾ ਨ੍ਹਾਯਿਤੁਂ ਨ ਸਕ੍ਕੋਮਿ, ਅਹਂ ਕਿਲਿਟ੍ਠਗਤ੍ਤੋਮ੍ਹਿ, ਨ੍ਹਾਪੇਥ ਮਨ੍ਤਿ ਵਤ੍ਤੁਮ੍ਪਿ ਨ ਸਕ੍ਕੋਮਿ, ਜਾਤਿਤੋਮ੍ਹਿ ਅਪਰਿਮੁਤ੍ਤਤਾਯ ਏਦਿਸੋ ਜਾਤੋ. ਨ ਖੋ ਪਨਾਹਮੇਵ, ਤੁਮ੍ਹੇਪਿ ਜਾਤਿਤੋ ਅਪਰਿਮੁਤ੍ਤਾਵ. ਯਥੇਵ ਹਿ ਮਯ੍ਹਂ, ਏਵਂ ਤੁਮ੍ਹਾਕਮ੍ਪਿ ਜਾਤਿ ਆਗਮਿਸ੍ਸਤਿ, ਇਤਿ ਤਸ੍ਸਾ ਪੁਰੇ ਆਗਮਨਾਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਸ ਦੇਵਦੂਤੋ ਨਾਮ ਜਾਤੋ, ਵਚਨਤ੍ਥੋ ਪਨ ਮਘਦੇਵਸੁਤ੍ਤੇ ਵੁਤ੍ਤੋਵ.

ਦੁਤਿਯਂ ਦੇਵਦੂਤਨ੍ਤਿ ਏਤ੍ਥਾਪਿ ਜਰਾਜਿਣ੍ਣਸਤ੍ਤੋ ਅਤ੍ਥਤੋ ਏਵਂ ਵਦਤਿ ਨਾਮ – ‘‘ਪਸ੍ਸਥ, ਭੋ, ਅਹਮ੍ਪਿ ਤੁਮ੍ਹੇ ਵਿਯ ਤਰੁਣੋ ਅਹੋਸਿਂ ਊਰੁਬਲਬਾਹੁਬਲਜਵਨਸਮ੍ਪਨ੍ਨੋ, ਤਸ੍ਸ ਮੇ ਤਾ ਬਲਜਵਨਸਮ੍ਪਤ੍ਤਿਯੋ ਅਨ੍ਤਰਹਿਤਾ, ਵਿਜ੍ਜਮਾਨਾਪਿ ਮੇ ਹਤ੍ਥਪਾਦਾ ਹਤ੍ਥਪਾਦਕਿਚ੍ਚਂ ਨ ਕਰੋਨ੍ਤਿ, ਜਰਾਯਮ੍ਹਿ ਅਪਰਿਮੁਤ੍ਤਤਾਯ ਏਦਿਸੋ ਜਾਤੋ. ਨ ਖੋ ਪਨਾਹਮੇਵ, ਤੁਮ੍ਹੇਪਿ ਜਰਾਯ ਅਪਰਿਮੁਤ੍ਤਾਵ. ਯਥੇਵ ਹਿ ਮਯ੍ਹਂ, ਏਵਂ ਤੁਮ੍ਹਾਕਮ੍ਪਿ ਜਰਾ ਆਗਮਿਸ੍ਸਤਿ, ਇਤਿ ਤਸ੍ਸਾ ਪੁਰੇ ਆਗਮਨਾਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਸ ਦੇਵਦੂਤੋ ਨਾਮ ਜਾਤੋ.

ਤਤਿਯਂ ਦੇਵਦੂਤਨ੍ਤਿ ਏਤ੍ਥਾਪਿ ਗਿਲਾਨਸਤ੍ਤੋ ਅਤ੍ਥਤੋ ਏਵ ਵਦਤਿ ਨਾਮ – ‘‘ਪਸ੍ਸਥ, ਭੋ, ਅਹਮ੍ਪਿ ਤੁਮ੍ਹੇ ਵਿਯ ਨਿਰੋਗੋ ਅਹੋਸਿਂ, ਸੋਮ੍ਹਿ ਏਤਰਹਿ ਬ੍ਯਾਧਿਨਾ ਅਭਿਹਤੋ ਸਕੇ ਮੁਤ੍ਤਕਰੀਸੇ ਪਲਿਪਨ੍ਨੋ, ਉਟ੍ਠਾਤੁਮ੍ਪਿ ਨ ਸਕ੍ਕੋਮਿ, ਵਿਜ੍ਜਮਾਨਾਪਿ ਮੇ ਹਤ੍ਥਪਾਦਾ ਹਤ੍ਥਪਾਦਕਿਚ੍ਚਂ ਨ ਕਰੋਨ੍ਤਿ, ਬ੍ਯਾਧਿਤੋਮ੍ਹਿ ਅਪਰਿਮੁਤ੍ਤਤਾਯ ਏਦਿਸੋ ਜਾਤੋ. ਨ ਖੋ ਪਨਾਹਮੇਵ, ਤੁਮ੍ਹੇਪਿ ਬ੍ਯਾਧਿਤੋ ਅਪਰਿਮੁਤ੍ਤਾਵ. ਯਥੇਵ ਹਿ ਮਯ੍ਹਂ, ਏਵਂ ਤੁਮ੍ਹਾਕਂ ਬ੍ਯਾਧਿ ਆਗਮਿਸ੍ਸਤਿ, ਇਤਿ ਤਸ੍ਸ ਪੁਰੇ ਆਗਮਨਾਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਸ ਦੇਵਦੂਤੋ ਨਾਮ ਜਾਤੋ.

੨੬੫. ਚਤੁਤ੍ਥਂ ਦੇਵਦੂਤਨ੍ਤਿ ਏਤ੍ਥ ਪਨ ਕਮ੍ਮਕਾਰਣਾ ਵਾ ਦੇਵਦੂਤਾਤਿ ਕਾਤਬ੍ਬਾ ਕਮ੍ਮਕਾਰਣਿਕਾ ਵਾ. ਤਤ੍ਥ ਪਨ ਕਮ੍ਮਕਾਰਣਪਕ੍ਖੇ ਬਾਤ੍ਤਿਂਸ ਤਾਵ ਕਮ੍ਮਕਾਰਣਾ ਅਤ੍ਥਤੋ ਏਵਂ ਵਦਨ੍ਤਿ ਨਾਮ – ‘‘ਮਯਂ ਨਿਬ੍ਬਤ੍ਤਮਾਨਾ ਨ ਰੁਕ੍ਖੇ ਵਾ ਪਾਸਾਣੇ ਵਾ ਨਿਬ੍ਬਤ੍ਤਾਮ, ਤੁਮ੍ਹਾਦਿਸਾਨਂ ਸਰੀਰੇ ਨਿਬ੍ਬਤ੍ਤਾਮ, ਇਤਿ ਅਮ੍ਹਾਕਂ ਪੁਰੇ ਨਿਬ੍ਬਤ੍ਤਿਤੋਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਤੇ ਦੇਵਦੂਤਾ ਨਾਮ ਜਾਤਾ. ਕਮ੍ਮਕਾਰਣਿਕਾਪਿ ਅਤ੍ਥਤੋ ਏਵਂ ਵਦਨ੍ਤਿ ਨਾਮ – ‘‘ਮਯਂ ਦ੍ਵਤ੍ਤਿਂਸ ਕਮ੍ਮਕਾਰਣਾ ਕਰੋਨ੍ਤਾ ਨ ਰੁਕ੍ਖਾਦੀਸੁ ਕਰੋਮ, ਤੁਮ੍ਹਾਦਿਸੇਸੁ ਸਤ੍ਤੇਸੁਯੇਵ ਕਰੋਮ, ਇਤਿ ਅਮ੍ਹਾਕਂ ਤੁਮ੍ਹੇਸੁ ਪੁਰੇ ਕਮ੍ਮਕਾਰਣਾਕਰਣਤੋਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਤੇਪਿ ਦੇਵਦੂਤਾ ਨਾਮ ਜਾਤਾ.

੨੬੬. ਪਞ੍ਚਮਂ ਦੇਵਦੂਤਨ੍ਤਿ ਏਤ੍ਥ ਮਤਕਸਤ੍ਤੋ ਅਤ੍ਥਤੋ ਏਵਂ ਵਦਤਿ ਨਾਮ – ‘‘ਪਸ੍ਸਥ ਭੋ ਮਂ ਆਮਕਸੁਸਾਨੇ ਛਡ੍ਡਿਤਂ ਉਦ੍ਧੁਮਾਤਕਾਦਿਭਾਵਂ ਪਤ੍ਤਂ, ਮਰਣਤੋਮ੍ਹਿ ਅਪਰਿਮੁਤ੍ਤਤਾਯ ਏਦਿਸੋ ਜਾਤੋ. ਨ ਖੋ ਪਨਾਹਮੇਵ, ਤੁਮ੍ਹੇਪਿ ਮਰਣਤੋ ਅਪਰਿਮੁਤ੍ਤਾਵ. ਯਥੇਵ ਹਿ ਮਯ੍ਹਂ, ਏਵਂ ਤੁਮ੍ਹਾਕਮ੍ਪਿ ਮਰਣਂ ਆਗਮਿਸ੍ਸਤਿ, ਇਤਿ ਤਸ੍ਸ ਪੁਰੇ ਆਗਮਨਾਵ ਕਲ੍ਯਾਣਂ ਕਰੋਥਾ’’ਤਿ. ਤੇਨੇਸ ਦੇਵਦੂਤੋ ਨਾਮ ਜਾਤੋ.

ਇਮਂ ਪਨ ਦੇਵਦੂਤਾਨੁਯੋਗਂ ਕੋ ਲਭਤਿ, ਕੋ ਨ ਲਭਤੀਤਿ? ਯੇਨ ਤਾਵ ਬਹੁਂ ਪਾਪਂ ਕਤਂ, ਸੋ ਗਨ੍ਤ੍ਵਾ ਨਿਰਯੇ ਨਿਬ੍ਬਤ੍ਤਤਿਯੇਵ. ਯੇਨ ਪਨ ਪਰਿਤ੍ਤਂ ਪਾਪਕਮ੍ਮਂ ਕਤਂ, ਸੋ ਲਭਤਿ. ਯਥਾ ਹਿ ਸਭਣ੍ਡਂ ਚੋਰਂ ਗਹੇਤ੍ਵਾ ਕਤ੍ਤਬ੍ਬਮੇਵ ਕਰੋਨ੍ਤਿ, ਨ ਵਿਨਿਚ੍ਛਿਨਨ੍ਤਿ. ਅਨੁਵਿਜ੍ਜਿਤ੍ਵਾ ਗਹਿਤਂ ਪਨ ਵਿਨਿਚ੍ਛਯਟ੍ਠਾਨਂ ਨਯਨ੍ਤਿ, ਸੋ ਵਿਨਿਚ੍ਛਯਂ ਲਭਤਿ. ਏਵਂਸਮ੍ਪਦਮੇਤਂ. ਪਰਿਤ੍ਤਪਾਪਕਮ੍ਮਾ ਹਿ ਅਤ੍ਤਨੋ ਧਮ੍ਮਤਾਯਪਿ ਸਰਨ੍ਤਿ, ਸਾਰਿਯਮਾਨਾਪਿ ਸਰਨ੍ਤਿ.

ਤਤ੍ਥ ਦੀਘਜਯਨ੍ਤਦਮਿਲ਼ੋ ਨਾਮ ਅਤ੍ਤਨੋ ਧਮ੍ਮਤਾਯ ਸਰਿ. ਸੋ ਕਿਰ ਦਮਿਲ਼ੋ ਸੁਮਨਗਿਰਿਵਿਹਾਰੇ ਆਕਾਸਚੇਤਿਯਂ ਰਤ੍ਤਪਟੇਨ ਪੂਜੇਸਿ. ਅਥ ਨਿਰਯੇ ਉਸ੍ਸਦਸਾਮਨ੍ਤੇ ਨਿਬ੍ਬਤ੍ਤੋ ਅਗ੍ਗਿਜਾਲਸਦ੍ਦਂ ਸੁਤ੍ਵਾਵ ਅਤ੍ਤਨੋ ਪੂਜਿਤਪਟਂ ਅਨੁਸ੍ਸਰਿ, ਸੋ ਗਨ੍ਤ੍ਵਾ ਸਗ੍ਗੇ ਨਿਬ੍ਬਤ੍ਤੋ. ਅਪਰੋਪਿ ਪੁਤ੍ਤਸ੍ਸ ਦਹਰਭਿਕ੍ਖੁਨੋ ਖਲਿਸਾਟਕਂ ਦੇਨ੍ਤੋ ਪਾਦਮੂਲੇ ਠਪੇਸਿ, ਮਰਣਕਾਲਮ੍ਹਿ ਪਟਪਟਾਤਿ ਸਦ੍ਦੇ ਨਿਮਿਤ੍ਤਂ ਗਣ੍ਹਿ, ਸੋਪਿ ਉਸ੍ਸਦਸਾਮਨ੍ਤੇ ਨਿਬ੍ਬਤ੍ਤੋ ਜਾਲਸਦ੍ਦੇਨ ਤਂ ਸਾਟਕਂ ਅਨੁਸ੍ਸਰਿਤ੍ਵਾ ਸਗ੍ਗੇ ਨਿਬ੍ਬਤ੍ਤੋ. ਏਵਂ ਤਾਵ ਅਤ੍ਤਨੋ ਧਮ੍ਮਤਾਯ ਕੁਸਲਂ ਕਮ੍ਮਂ ਸਰਿਤ੍ਵਾ ਸਗ੍ਗੇ ਨਿਬ੍ਬਤ੍ਤਤੀਤਿ.

ਅਤ੍ਤਨੋ ਧਮ੍ਮਤਾਯ ਅਸਰਨ੍ਤੇ ਪਨ ਪਞ੍ਚ ਦੇਵਦੂਤੇ ਪੁਚ੍ਛਤਿ. ਤਤ੍ਥ ਕੋਚਿ ਪਠਮੇਨ ਦੇਵਦੂਤੇਨ ਸਰਤਿ, ਕੋਚਿ ਦੁਤਿਯਾਦੀਹਿ. ਯੋ ਪਨ ਪਞ੍ਚਹਿਪਿ ਨ ਸਰਤਿ, ਤਂ ਯਮੋ ਰਾਜਾ ਸਯਂ ਸਾਰੇਤਿ. ਏਕੋ ਕਿਰ ਅਮਚ੍ਚੋ ਸੁਮਨਪੁਪ੍ਫਕੁਮ੍ਭੇਨ ਮਹਾਚੇਤਿਯਂ ਪੂਜੇਤ੍ਵਾ ਯਮਸ੍ਸ ਪਤ੍ਤਿਂ ਅਦਾਸਿ, ਤਂ ਅਕੁਸਲਕਮ੍ਮੇਨ ਨਿਰਯੇ ਨਿਬ੍ਬਤ੍ਤਂ ਯਮਸ੍ਸ ਸਨ੍ਤਿਕਂ ਨਯਿਂਸੁ. ਤਸ੍ਮਿਂ ਪਞ੍ਚਹਿਪਿ ਦੇਵਦੂਤੇਹਿ ਕੁਸਲੇ ਅਸਰਨ੍ਤੇ ਯਮੋ ਸਯਂ ਓਲੋਕੇਨ੍ਤੋ ਦਿਸ੍ਵਾ – ‘‘ਨਨੁ ਤ੍ਵਂ ਮਹਾਚੇਤਿਯਂ ਸੁਮਨਪੁਪ੍ਫਕੁਮ੍ਭੇਨ ਪੂਜੇਤ੍ਵਾ ਮਯ੍ਹਂ ਪਤ੍ਤਿਂ ਅਦਾਸੀ’’ਤਿ ਸਾਰੇਸਿ, ਸੋ ਤਸ੍ਮਿਂ ਕਾਲੇ ਸਰਿਤ੍ਵਾ ਦੇਵਲੋਕਂ ਗਤੋ. ਯਮੋ ਪਨ ਸਯਂ ਓਲੋਕੇਤ੍ਵਾਪਿ ਅਪਸ੍ਸਨ੍ਤੋ – ‘‘ਮਹਾਦੁਕ੍ਖਂ ਨਾਮ ਅਨੁਭਵਿਸ੍ਸਤਿ ਅਯਂ ਸਤ੍ਤੋ’’ਤਿ ਤੁਣ੍ਹੀ ਹੋਤਿ.

੨੬੭. ਮਹਾਨਿਰਯੇਤਿ ਅਵੀਚਿਮਹਾਨਿਰਯਮ੍ਹਿ. ਕਿਂ ਪਨਸ੍ਸ ਪਮਾਣਂ? ਅਬ੍ਭਨ੍ਤਰਂ ਆਯਾਮੇਨ ਚ ਵਿਤ੍ਥਾਰੇਨ ਚ ਯੋਜਨਸਤਂ ਹੋਤਿ. ਲੋਹਪਥਵੀ ਲੋਹਛਦਨਂ ਏਕੇਕਾ ਚ ਭਿਤ੍ਤਿ ਨਵਨਵਯੋਜਨਿਕਾ ਹੋਤਿ. ਪੁਰਤ੍ਥਿਮਾਯ ਭਿਤ੍ਤਿਯਾ ਅਚ੍ਚਿ ਉਟ੍ਠਿਤਾ ਪਚ੍ਛਿਮਂ ਭਿਤ੍ਤਿਂ ਗਹੇਤ੍ਵਾ ਤਂ ਵਿਨਿਵਿਜ੍ਝਿਤ੍ਵਾ ਪਰਤੋ ਯੋਜਨਸਤਂ ਗਚ੍ਛਤਿ. ਸੇਸਦਿਸਾਸੁਪਿ ਏਸੇਵ ਨਯੋ. ਇਤਿ ਜਾਲਪਰਿਯਨ੍ਤਵਸੇਨ ਆਯਾਮਵਿਤ੍ਥਾਰਤੋ ਅਟ੍ਠਾਰਸਯੋਜਨਾਧਿਕਾਨਿ ਤੀਣਿ ਯੋਜਨਸਤਾਨਿ, ਪਰਿਕ੍ਖੇਪਤੋ ਪਨ ਨਵਯੋਜਨਸਤਾਨਿ ਚਤੁਪਣ੍ਣਾਸਯੋਜਨਾਨਿ, ਸਮਨ੍ਤਾ ਪਨ ਉਸ੍ਸਦੇਹਿ ਸਦ੍ਧਿਂ ਦਸਯੋਜਨਸਹਸ੍ਸਂ ਹੋਤਿ.

੨੬੮. ਉਬ੍ਭਤਂ ਤਾਦਿਸਮੇਵ ਹੋਤੀਤਿ ਏਤ੍ਥ ਅਕ੍ਕਨ੍ਤਪਦਂ ਯਾਵ ਅਟ੍ਠਿਤੋ ਦਲ਼੍ਹਂ ਉਦ੍ਧਰਿਤੁਮੇਵ ਨ ਸਕ੍ਕਾ. ਅਯਂ ਪਨੇਤ੍ਥ ਅਤ੍ਥੋ – ਹੇਟ੍ਠਤੋ ਪਟ੍ਠਾਯ ਡਯ੍ਹਤਿ, ਉਪਰਿਤੋ ਪਟ੍ਠਾਯ ਝਾਯਤਿ, ਇਤਿ ਅਕ੍ਕਮਨਕਾਲੇ ਡਯ੍ਹਮਾਨਂ ਪਞ੍ਞਾਯਤਿ, ਉਦ੍ਧਰਣਕਾਲੇ ਤਾਦਿਸਮੇਵ, ਤਸ੍ਮਾ ਏਵਂ ਵੁਤ੍ਤਂ. ਬਹੁਸਮ੍ਪਤ੍ਤੋਤਿ ਬਹੂਨਿ ਵਸ੍ਸਸਤਵਸ੍ਸਸਹਸ੍ਸਾਨਿ ਸਮ੍ਪਤ੍ਤੋ.

ਕਸ੍ਮਾ ਪਨੇਸ ਨਰਕੋ ਅਵੀਚੀਤਿ ਸਙ੍ਖਂ ਗਤੋਤਿ. ਵੀਚਿ ਨਾਮ ਅਨ੍ਤਰਂ ਵੁਚ੍ਚਤਿ, ਤਤ੍ਥ ਚ ਅਗ੍ਗਿਜਾਲਾਨਂ ਵਾ ਸਤ੍ਤਾਨਂ ਵਾ ਦੁਕ੍ਖਸ੍ਸ ਵਾ ਅਨ੍ਤਰਂ ਨਤ੍ਥਿ. ਤਸ੍ਮਾ ਸੋ ਅਵੀਚੀਤਿ ਸਙ੍ਖਂ ਗਤੋਤਿ. ਤਸ੍ਸ ਹਿ ਪੁਰਤ੍ਥਿਮਭਿਤ੍ਤਿਤੋ ਜਾਲਾ ਉਟ੍ਠਿਤਾ ਸਂਸਿਬ੍ਬਮਾਨਾ ਯੋਜਨਸਤਂ ਗਨ੍ਤ੍ਵਾ ਪਚ੍ਛਿਮਭਿਤ੍ਤਿਂ ਵਿਨਿਵਿਜ੍ਝਿਤ੍ਵਾ ਪਰਤੋ ਯੋਜਨਸਤਂ ਗਚ੍ਛਤਿ. ਸੇਸਦਿਸਾਸੁਪਿ ਏਸੇਵ ਨਯੋ.

ਇਮੇਸਂ ਛਨ੍ਨਂ ਜਾਲਾਨਂ ਮਜ੍ਝੇ ਨਿਬ੍ਬਤ੍ਤੋ ਦੇਵਦਤ੍ਤੋ, ਤਸ੍ਸ ਯੋਜਨਸਤਪ੍ਪਮਾਣੋ ਅਤ੍ਤਭਾਵੋ, ਦ੍ਵੇ ਪਾਦਾ ਯਾਵ ਗੋਪ੍ਫਕਾ ਲੋਹਪਥਵਿਂ ਪਵਿਟ੍ਠਾ, ਦ੍ਵੇ ਹਤ੍ਥਾ ਯਾਵ ਮਣਿਬਨ੍ਧਾ ਲੋਹਭਿਤ੍ਤਿਯੋ ਪਵਿਟ੍ਠਾ, ਸੀਸਂ ਯਾਵ ਭਮੁਕਟ੍ਠਿਤੋ ਲੋਹਛਦਨੇ ਪਵਿਟ੍ਠਂ, ਅਧੋਭਾਗੇਨ ਏਕਂ ਲੋਹਸੂਲਂ ਪਵਿਸਿਤ੍ਵਾ ਕਾਯਂ ਵਿਨਿਵਿਜ੍ਝਨ੍ਤਂ ਛਦਨੇ ਪਵਿਟ੍ਠਂ, ਪਾਚੀਨਭਿਤ੍ਤਿਤੋ ਨਿਕ੍ਖਨ੍ਤਸੂਲਂ ਹਦਯਂ ਵਿਨਿਵਿਜ੍ਝਿਤ੍ਵਾ ਪਚ੍ਛਿਮਭਿਤ੍ਤਿਂ ਪਵਿਟ੍ਠਂ, ਉਤ੍ਤਰਭਿਤ੍ਤਿਤੋ ਨਿਕ੍ਖਨ੍ਤਸੂਲਂ ਫਾਸੁਕਾ ਵਿਨਿਵਿਜ੍ਝਿਤ੍ਵਾ ਦਕ੍ਖਿਣਭਿਤ੍ਤਿਂ ਪਵਿਟ੍ਠਂ. ਨਿਚ੍ਚਲੇ ਤਥਾਗਤਮ੍ਹਿ ਅਪਰਦ੍ਧਤ੍ਤਾ ਨਿਚ੍ਚਲੋਵ ਹੁਤ੍ਵਾ ਪਚ੍ਚਤੀਤਿ ਕਮ੍ਮਸਰਿਕ੍ਖਤਾਯ ਏਦਿਸੋ ਜਾਤੋ. ਏਵਂ ਜਾਲਾਨਂ ਨਿਰਨ੍ਤਰਤਾਯ ਅਵੀਚਿ ਨਾਮ.

ਅਬ੍ਭਨ੍ਤਰੇ ਪਨਸ੍ਸ ਯੋਜਨਸਤਿਕੇ ਠਾਨੇ ਨਾਲ਼ਿਯਂ ਕੋਟ੍ਟੇਤ੍ਵਾ ਪੂਰਿਤਪਿਟ੍ਠਂ ਵਿਯ ਸਤ੍ਤਾ ਨਿਰਨ੍ਤਰਾ, ‘‘ਇਮਸ੍ਮਿਂ ਠਾਨੇ ਸਤ੍ਤੋ ਅਤ੍ਥਿ, ਇਮਸ੍ਮਿਂ ਨਤ੍ਥੀ’’ਤਿ ਨ ਵਤ੍ਤਬ੍ਬਂ, ਗਚ੍ਛਨ੍ਤਾਨਂ ਠਿਤਾਨਂ ਨਿਸਿਨ੍ਨਾਨਂ ਨਿਪਨ੍ਨਾਨਂ ਅਨ੍ਤੋ ਨਤ੍ਥਿ, ਗਚ੍ਛਨ੍ਤੇ ਵਾ ਠਿਤੇ ਵਾ ਨਿਸਿਨ੍ਨੇ ਵਾ ਨਿਪਨ੍ਨੇ ਵਾ ਅਞ੍ਞਮਞ੍ਞਂ ਨ ਬਾਧਨ੍ਤਿ. ਏਵਂ ਸਤ੍ਤਾਨਂ ਨਿਰਨ੍ਤਰਤਾਯ ਅਵੀਚਿ.

ਕਾਯਦ੍ਵਾਰੇ ਪਨ ਛ ਉਪੇਕ੍ਖਾਸਹਗਤਾਨਿ ਚਿਤ੍ਤਾਨਿ ਉਪ੍ਪਜ੍ਜਨ੍ਤਿ, ਏਕਂ ਦੁਕ੍ਖਸਹਗਤਂ. ਏਵਂ ਸਨ੍ਤੇਪਿ ਯਥਾ ਜਿਵ੍ਹਗ੍ਗੇ ਛ ਮਧੁਬਿਨ੍ਦੂਨਿ ਠਪੇਤ੍ਵਾ ਏਕਸ੍ਮਿਂ ਤਮ੍ਬਲੋਹਬਿਨ੍ਦੁਮ੍ਹਿ ਠਪਿਤੇ ਅਨੁਦਹਨਬਲਵਤਾਯ ਤਦੇਵ ਪਞ੍ਞਾਯਤਿ, ਇਤਰਾਨਿ ਅਬ੍ਬੋਹਾਰਿਕਾਨਿ ਹੋਨ੍ਤਿ, ਏਵਂ ਅਨੁਦਹਨਬਲਵਤਾਯ ਦੁਕ੍ਖਮੇਵੇਤ੍ਥ ਨਿਰਨ੍ਤਰਂ, ਇਤਰਾਨਿ ਅਬ੍ਬੋਹਾਰਿਕਾਨੀਤਿ. ਏਵਂ ਦੁਕ੍ਖਸ੍ਸ ਨਿਰਨ੍ਤਰਤਾਯ ਅਵੀਚਿ.

੨੬੯. ਮਹਨ੍ਤੋਤਿ ਯੋਜਨਸਤਿਕੋ. ਸੋ ਤਤ੍ਥ ਪਤਤੀਤਿ ਏਕੋ ਪਾਦੋ ਮਹਾਨਿਰਯੇ ਹੋਤਿ, ਏਕੋ ਗੂਥਨਿਰਯੇ ਨਿਪਤਤਿ. ਸੂਚਿਮੁਖਾਤਿ ਸੂਚਿਸਦਿਸਮੁਖਾ, ਤੇ ਹਤ੍ਥਿਗੀਵਪ੍ਪਮਾਣਾ ਏਕਦੋਣਿਕਨਾਵਾਪ੍ਪਮਾਣਾ ਵਾ ਹੋਨ੍ਤਿ.

ਕੁਕ੍ਕੁਲਨਿਰਯੋਤਿ ਯੋਜਨਸਤਪ੍ਪਮਾਣੋਵ ਅਨ੍ਤੋ ਕੂਟਾਗਾਰਮਤ੍ਤਵਿਤਚ੍ਚਿਤਅਙ੍ਗਾਰਪੁਣ੍ਣੋ ਆਦਿਤ੍ਤਛਾਰਿਕਨਿਰਯੋ, ਯਤ੍ਥ ਪਤਿਤਪਤਿਤਾ ਕੁਦ੍ਰੂਸਕਰਾਸਿਮ੍ਹਿ ਖਿਤ੍ਤਫਾਲਵਾਸਿਸਿਲਾਦੀਨਿ ਵਿਯ ਹੇਟ੍ਠਿਮਤਲਮੇਵ ਗਣ੍ਹਨ੍ਤਿ.

ਆਰੋਪੇਨ੍ਤੀਤਿ ਅਯਦਣ੍ਡੇਹਿ ਪੋਥੇਨ੍ਤਾ ਆਰੋਪੇਨ੍ਤਿ. ਤੇਸਂ ਆਰੋਹਨਕਾਲੇ ਤੇ ਕਣ੍ਟਕਾ ਅਧੋਮੁਖਾ ਹੋਨ੍ਤਿ, ਓਰੋਹਨਕਾਲੇ ਉਦ੍ਧਂਮੁਖਾ.

ਵਾਤੇਰਿਤਾਨੀਤਿ ਕਮ੍ਮਮਯੇਨ ਵਾਤੇਨ ਚਲਿਤਾਨਿ. ਹਤ੍ਥਮ੍ਪਿ ਛਿਨ੍ਦਨ੍ਤੀਤਿ ਫਲਕੇ ਮਂਸਂ ਵਿਯ ਕੋਟ੍ਟਯਮਾਨਾਨਿ ਛਿਨ੍ਦਨ੍ਤਿ. ਸਚੇ ਉਟ੍ਠਾਯ ਪਲਾਯਤਿ, ਅਯੋਪਾਕਾਰੋ ਸਮੁਟ੍ਠਹਿਤ੍ਵਾ ਪਰਿਕ੍ਖਿਪਤਿ, ਹੇਟ੍ਠਾ ਖੁਰਧਾਰਾ ਸਮੁਟ੍ਠਾਤਿ.

ਖਾਰੋਦਕਾ ਨਦੀਤਿ ਵੇਤਰਣੀ ਨਾਮ ਤਮ੍ਬਲੋਹਨਦੀ. ਤਤ੍ਥ ਅਯੋਮਯਾਨਿ ਖਰਵਾਲਿਕ-ਪੋਕ੍ਖਰਪਤ੍ਤਾਨਿ, ਹੇਟ੍ਠਾ ਖੁਰਧਾਰਾ ਉਭੋਸੁ ਤੀਰੇਸੁ ਵੇਤ੍ਤਲਤਾ ਚ ਕੁਸਤਿਣਾਨਿ ਚ. ਸੋ ਤਤ੍ਥ ਦੁਕ੍ਖਾ ਤਿਬ੍ਬਾ ਖਰਾਤਿ ਸੋ ਤਤ੍ਥ ਉਦ੍ਧਞ੍ਚ ਅਧੋ ਚ ਵੁਯ੍ਹਮਾਨੋ ਪੋਕ੍ਖਰਪਤ੍ਤੇਸੁ ਛਿਜ੍ਜਤਿ. ਸਿਙ੍ਘਾਟਕਸਣ੍ਠਾਨਾਯ ਖਰਵਾਲਿਕਾਯ ਕਣ੍ਟਕੇਹਿ ਵਿਜ੍ਝਿਯਤਿ, ਖੁਰਧਾਰਾਹਿ ਫਾਲਿਯਤਿ, ਉਭੋਸੁ ਤੀਰੇਸੁ ਕੁਸਤਿਣੇਹਿ ਵਿਲੇਖਤਿ, ਵੇਤ੍ਤਲਤਾਹਿ ਆਕਡ੍ਢਿਯਤਿ, ਤਿਕ੍ਖਸਤ੍ਤੀਹਿ ਫਾਲਿਯਤਿ.

੨੭੦. ਤਤ੍ਤੇਨ ਅਯੋਸਙ੍ਕੁਨਾਤਿ ਤੇਨ ਜਿਗਚ੍ਛਿਤੋਮ੍ਹੀਤਿ ਵੁਤ੍ਤੇ ਮਹਨ੍ਤਂ ਲੋਹਪਚ੍ਛਿਂ ਲੋਹਗੁਲ਼ਾਨਂ ਪੂਰੇਤ੍ਵਾ ਤਂ ਉਪਗਚ੍ਛਨ੍ਤਿ, ਸੋ ਲੋਹਗੁਲ਼ਭਾਵਂ ਞਤ੍ਵਾ ਦਨ੍ਤੇ ਸਮ੍ਫੁਸੇਤਿ, ਅਥਸ੍ਸ ਤੇ ਤਤ੍ਤੇਨ ਅਯੋਸਙ੍ਕੁਨਾ ਮੁਖਂ ਵਿਵਰਨ੍ਤਿ, ਤਮ੍ਬਲੋਹਧਾਰੇਹਿ ਮਹਨ੍ਤੇਨ ਲੋਹਕਟਾਹੇਨ ਤਮ੍ਬਲੋਹਂ ਉਪਨੇਤ੍ਵਾ ਏਵਮੇਵਂ ਕਰੋਨ੍ਤਿ. ਪੁਨ ਮਹਾਨਿਰਯੇਤਿ ਏਵਂ ਪਞ੍ਚਵਿਧਬਨ੍ਧਨਤੋ ਪਟ੍ਠਾਯ ਯਾਵ ਤਮ੍ਬਲੋਹਪਾਨਾ ਤਮ੍ਬਲੋਹਪਾਨਤੋ ਪਟ੍ਠਾਯ ਪੁਨ ਪਞ੍ਚਵਿਧਬਨ੍ਧਨਾਦੀਨਿ ਕਾਰੇਤ੍ਵਾ ਮਹਾਨਿਰਯੇ ਪਕ੍ਖਿਪਨ੍ਤਿ. ਤਤ੍ਥ ਕੋਚਿ ਪਞ੍ਚਵਿਧਬਨ੍ਧਨੇਨੇਵ ਮੁਚ੍ਚਤਿ, ਕੋਚਿ ਦੁਤਿਯੇਨ, ਕੋਚਿ ਤਤਿਯੇਨ, ਕੋਚਿ ਤਮ੍ਬਲੋਹਪਾਨੇਨ ਮੁਚ੍ਚਤਿ, ਕਮ੍ਮੇ ਪਨ ਅਪਰਿਕ੍ਖੀਣੇ ਪੁਨ ਮਹਾਨਿਰਯੇ ਪਕ੍ਖਿਪਨ੍ਤਿ.

ਇਦਂ ਪਨ ਸੁਤ੍ਤਂ ਗਣ੍ਹਨ੍ਤੋ ਏਕੋ ਦਹਰਭਿਕ੍ਖੁ, – ‘‘ਭਨ੍ਤੇ, ਏਤ੍ਤਕਂ ਦੁਕ੍ਖਮਨੁਭਵਿਤਸਤ੍ਤਂ ਪੁਨਪਿ ਮਹਾਨਿਰਯੇ ਪਕ੍ਖਿਪਨ੍ਤੀ’’ਤਿ ਆਹ. ਆਮ, ਆਵੁਸੋ, ਕਮ੍ਮੇ ਅਪਰਿਕ੍ਖੀਣੇ ਪੁਨਪ੍ਪੁਨਂ ਏਵਂ ਕਰੋਨ੍ਤੀਤਿ. ਤਿਟ੍ਠਤੁ, ਭਨ੍ਤੇ, ਉਦ੍ਦੇਸੋ, ਕਮ੍ਮਟ੍ਠਾਨਮੇਵ ਕਥੇਥਾਤਿ ਕਮ੍ਮਟ੍ਠਾਨਂ ਕਥਾਪੇਤ੍ਵਾ ਸੋਤਾਪਨ੍ਨੋ ਹੁਤ੍ਵਾ ਆਗਮ੍ਮ ਉਦ੍ਦੇਸਂ ਅਗ੍ਗਹੇਸਿ. ਅਞ੍ਞੇਸਮ੍ਪਿ ਇਮਸ੍ਮਿਂ ਪਦੇਸੇ ਉਦ੍ਦੇਸਂ ਠਪੇਤ੍ਵਾ ਅਰਹਤ੍ਤਂ ਪਤ੍ਤਾਨਂ ਗਣਨਾ ਨਤ੍ਥਿ. ਸਬ੍ਬਬੁਦ੍ਧਾਨਞ੍ਚੇਤਂ ਸੁਤ੍ਤਂ ਅਵਿਜਹਿਤਮੇਵ ਹੋਤਿ.

੨੭੧. ਹੀਨਕਾਯੂਪਗਾਤਿ ਹੀਨਕਾਯਂ ਉਪਗਤਾ ਹੁਤ੍ਵਾ. ਉਪਾਦਾਨੇਤਿ ਤਣ੍ਹਾਦਿਟ੍ਠਿਗਹਣੇ. ਜਾਤਿਮਰਣਸਮ੍ਭਵੇਤਿ ਜਾਤਿਯਾ ਚ ਮਰਣਸ੍ਸ ਚ ਕਾਰਣਭੂਤੇ. ਅਨੁਪਾਦਾਤਿ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਿਤ੍ਵਾ. ਜਾਤਿਮਰਣਸਙ੍ਖਯੇਤਿ ਜਾਤਿਮਰਣਸਙ੍ਖਯਸਙ੍ਖਾਤੇ ਨਿਬ੍ਬਾਨੇ ਵਿਮੁਚ੍ਚਨ੍ਤਿ.

ਦਿਟ੍ਠਧਮ੍ਮਾਭਿਨਿਬ੍ਬੁਤਾਤਿ ਦਿਟ੍ਠਧਮ੍ਮੇ ਇਮਸ੍ਮਿਂਯੇਵ ਅਤ੍ਤਭਾਵੇ ਸਬ੍ਬਕਿਲੇਸਨਿਬ੍ਬਾਨੇਨ ਨਿਬ੍ਬੁਤਾ. ਸਬ੍ਬਦੁਕ੍ਖਂ ਉਪਚ੍ਚਗੁਨ੍ਤਿ ਸਬ੍ਬਦੁਕ੍ਖਾਤਿਕ੍ਕਨ੍ਤਾ ਨਾਮ ਹੋਨ੍ਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਦੇਵਦੂਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.