੮. ਉਪਕ੍ਕਿਲੇਸਸੁਤ੍ਤਵਣ੍ਣਨਾ

੨੩੬. ਏਵਂ ਮੇ ਸੁਤਨ੍ਤਿ ਉਪਕ੍ਕਿਲੇਸਸੁਤ੍ਤਂ. ਤਤ੍ਥ ਏਤਦਵੋਚਾਤਿ ਨੇਵ ਭੇਦਾਧਿਪ੍ਪਾਯੇਨ ਨ ਪਿਯਕਮ੍ਯਤਾਯ, ਅਥ ਖ੍ਵਾਸ੍ਸ ਏਤਦਹੋਸਿ – ‘‘ਇਮੇ ਭਿਕ੍ਖੂ ਮਮ ਵਚਨਂ ਗਹੇਤ੍ਵਾ ਨ ਓਰਮਿਸ੍ਸਨ੍ਤਿ, ਬੁਦ੍ਧਾ ਚ ਨਾਮ ਹਿਤਾਨੁਕਮ੍ਪਕਾ, ਅਦ੍ਧਾ ਨੇਸਂ ਭਗਵਾ ਏਕਂ ਕਾਰਣਂ ਕਥੇਸ੍ਸਤਿ, ਤਂ ਸੁਤ੍ਵਾ ਏਤੇ ਓਰਮਿਸ੍ਸਨ੍ਤਿ, ਤਤੋ ਤੇਸਂ ਫਾਸੁਵਿਹਾਰੋ ਭਵਿਸ੍ਸਤੀ’’ਤਿ. ਤਸ੍ਮਾ ਏਤਂ ‘‘ਇਧ, ਭਨ੍ਤੇ’’ਤਿਆਦਿਵਚਨਮਵੋਚ. ਮਾ ਭਣ੍ਡਨਨ੍ਤਿਆਦੀਸੁ ‘‘ਅਕਤ੍ਥਾ’’ਤਿ ਪਾਠਸੇਸਂ ਗਹੇਤ੍ਵਾ ‘‘ਮਾ ਭਣ੍ਡਨਂ ਅਕਤ੍ਥਾ’’ਤਿ ਏਵਂ ਅਤ੍ਥੋ ਦਟ੍ਠਬ੍ਬੋ. ਅਞ੍ਞਤਰੋਤਿ ਸੋ ਕਿਰ ਭਿਕ੍ਖੁ ਭਗਵਤੋ ਅਤ੍ਥਕਾਮੋ, ਅਯਂ ਕਿਰਸ੍ਸ ਅਧਿਪ੍ਪਾਯੋ – ‘‘ਇਮੇ ਭਿਕ੍ਖੂ ਕੋਧਾਭਿਭੂਤਾ ਸਤ੍ਥੁ ਵਚਨਂ ਨ ਗਣ੍ਹਨ੍ਤਿ, ਮਾ ਭਗਵਾ ਏਤੇ ਓਵਦਨ੍ਤੋ ਕਿਲਮੀ’’ਤਿ, ਤਸ੍ਮਾ ਏਵਮਾਹ.

ਪਿਣ੍ਡਾਯ ਪਾਵਿਸੀਤਿ ਨ ਕੇਵਲਂ ਪਾਵਿਸਿ, ਯੇਨਪਿ ਜਨੇਨ ਨ ਦਿਟ੍ਠੋ, ਸੋ ਮਂ ਪਸ੍ਸਤੂਤਿਪਿ ਅਧਿਟ੍ਠਾਸਿ. ਕਿਮਤ੍ਥਂ ਅਧਿਟ੍ਠਾਸੀਤਿ? ਤੇਸਂ ਭਿਕ੍ਖੂਨਂ ਦਮਨਤ੍ਥਂ. ਭਗਵਾ ਹਿ ਤਦਾ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ‘‘ਪੁਥੁਸਦ੍ਦੋ ਸਮਜਨੋ’’ਤਿਆਦਿਗਾਥਾ ਭਾਸਿਤ੍ਵਾ ਕੋਸਮ੍ਬਿਤੋ ਬਾਲਕਲੋਣਕਾਰਗਾਮਂ ਗਤੋ. ਤਤੋ ਪਾਚੀਨਵਂਸਦਾਯਂ, ਤਤੋ ਪਾਲਿਲੇਯ੍ਯਕਵਨਸਣ੍ਡਂ ਗਨ੍ਤ੍ਵਾ ਪਾਲਿਲੇਯ੍ਯਹਤ੍ਥਿਨਾਗੇਨ ਉਪਟ੍ਠਹਿਯਮਾਨੋ ਤੇਮਾਸਂ ਵਸਿ. ਨਗਰਵਾਸਿਨੋਪਿ – ‘‘ਸਤ੍ਥਾ ਵਿਹਾਰਂ ਗਤੋ, ਗਚ੍ਛਾਮ ਧਮ੍ਮਸ੍ਸਵਨਾਯਾ’’ਤਿ ਗਨ੍ਧਪੁਪ੍ਫਹਤ੍ਥਾ ਵਿਹਾਰਂ ਗਨ੍ਤ੍ਵਾ ‘‘ਕਹਂ, ਭਨ੍ਤੇ, ਸਤ੍ਥਾ’’ਤਿ ਪੁਚ੍ਛਿਂਸੁ. ‘‘ਕਹਂ ਤੁਮ੍ਹੇ ਸਤ੍ਥਾਰਂ ਦਕ੍ਖਥ, ਸਤ੍ਥਾ ‘ਇਮੇ ਭਿਕ੍ਖੂ ਸਮਗ੍ਗੇ ਕਰਿਸ੍ਸਾਮੀ’ਤਿ ਆਗਤੋ, ਸਮਗ੍ਗੇ ਕਾਤੁਂ ਅਸਕ੍ਕੋਨ੍ਤੋ ਨਿਕ੍ਖਮਿਤ੍ਵਾ ਗਤੋ’’ਤਿ. ‘‘ਮਯਂ ਸਤਮ੍ਪਿ ਸਹਸ੍ਸਮ੍ਪਿ ਦਤ੍ਵਾ ਸਤ੍ਥਾਰਂ ਆਨੇਤੁਂ ਨ ਸਕ੍ਕੋਮ, ਸੋ ਨੋ ਅਯਾਚਿਤੋ ਸਯਮੇਵ ਆਗਤੋ, ਮਯਂ ਇਮੇ ਭਿਕ੍ਖੂ ਨਿਸ੍ਸਾਯ ਸਤ੍ਥੁ ਸਮ੍ਮੁਖਾ ਧਮ੍ਮਕਥਂ ਸੋਤੁਂ ਨ ਲਭਿਮ੍ਹਾ. ਇਮੇ ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਤਾ, ਤਸ੍ਮਿਮ੍ਪਿ ਸਾਮਗ੍ਗਿਂ ਕਰੋਨ੍ਤੇ ਸਮਗ੍ਗਾ ਨ ਜਾਤਾ, ਕਸ੍ਸਾਞ੍ਞਸ੍ਸ ਵਚਨਂ ਕਰਿਸ੍ਸਨ੍ਤਿ. ਅਲਂ ਨ ਇਮੇਸਂ ਭਿਕ੍ਖਾ ਦਾਤਬ੍ਬਾ’’ਤਿ ਸਕਲਨਗਰੇ ਦਣ੍ਡਂ ਠਪਯਿਂਸੁ. ਤੇ ਪੁਨਦਿਵਸੇ ਸਕਲਨਗਰਂ ਪਿਣ੍ਡਾਯ ਚਰਿਤ੍ਵਾ ਕਟਚ੍ਛੁਮਤ੍ਤਮ੍ਪਿ ਭਿਕ੍ਖਂ ਅਲਭਿਤ੍ਵਾ ਵਿਹਾਰਂ ਆਗਮਂਸੁ. ਉਪਾਸਕਾਪਿ ਤੇ ਪੁਨ ਆਹਂਸੁ – ‘‘ਯਾਵ ਸਤ੍ਥਾਰਂ ਨ ਖਮਾਪੇਥ, ਤਾਵ ਵੋ ਤਮੇਵ ਦਣ੍ਡਕਮ੍ਮ’’ਨ੍ਤਿ. ਤੇ ‘‘ਸਤ੍ਥਾਰਂ ਖਮਾਪੇਸ੍ਸਾਮਾ’’ਤਿ ਭਗਵਤਿ ਸਾਵਤ੍ਥਿਯਂ ਅਨੁਪ੍ਪਤ੍ਤੇ ਤਤ੍ਥ ਅਗਮਂਸੁ. ਸਤ੍ਥਾ ਤੇਸਂ ਅਟ੍ਠਾਰਸ ਭੇਦਕਰਵਤ੍ਥੂਨਿ ਦੇਸੇਸੀਤਿ ਅਯਮੇਤ੍ਥ ਪਾਲ਼ਿਮੁਤ੍ਤਕਕਥਾ.

੨੩੭. ਇਦਾਨਿ ਪੁਥੁਸਦ੍ਦੋਤਿਆਦਿਗਾਥਾਸੁ ਪੁਥੁ ਮਹਾਸਦ੍ਦੋ ਅਸ੍ਸਾਤਿ ਪੁਥੁਸਦ੍ਦੋ. ਸਮਜਨੋਤਿ ਸਮਾਨੋ ਏਕਸਦਿਸੋ ਜਨੋ, ਸਬ੍ਬੋਵਾਯਂ ਭਣ੍ਡਨਕਾਰਕਜਨੋ ਸਮਨ੍ਤਤੋ ਸਦ੍ਦਨਿਚ੍ਛਰਣੇਨ ਪੁਥੁਸਦ੍ਦੋ ਚੇਵ ਸਦਿਸੋ ਚਾਤਿ ਵੁਤ੍ਤਂ ਹੋਤਿ. ਨ ਬਾਲੋ ਕੋਚਿ ਮਞ੍ਞਥਾਤਿ ਤਤ੍ਰ ਕੋਚਿ ਏਕੋਪਿ ਅਹਂ ਬਾਲੋਤਿ ਨ ਮਞ੍ਞਤਿ, ਸਬ੍ਬੇਪਿ ਪਣ੍ਡਿਤਮਾਨਿਨੋਯੇਵ. ਨਾਞ੍ਞਂ ਭਿਯ੍ਯੋ ਅਮਞ੍ਞਰੁਨ੍ਤਿ ਕੋਚਿ ਏਕੋਪਿ ਅਹਂ ਬਾਲੋਤਿ ਨ ਚ ਮਞ੍ਞਿ, ਭਿਯ੍ਯੋ ਚ ਸਙ੍ਘਸ੍ਮਿਂ ਭਿਜ੍ਜਮਾਨੇ ਅਞ੍ਞਮ੍ਪਿ ਏਕਂ ‘‘ਮਯ੍ਹਂ ਕਾਰਣਾ ਸਙ੍ਘੋ ਭਿਜ੍ਜਤੀ’’ਤਿ ਇਦਂ ਕਾਰਣਂ ਨ ਮਞ੍ਞੀਤਿ ਅਤ੍ਥੋ.

ਪਰਿਮੁਟ੍ਠਾਤਿ ਮੁਟ੍ਠਸ੍ਸਤਿਨੋ. ਵਾਚਾਗੋਚਰਭਾਣਿਨੋਤਿ ਰਾਕਾਰਸ੍ਸ ਰਸ੍ਸਾਦੇਸੋ ਕਤੋ; ਵਾਚਾਗੋਚਰਾਵ, ਨ ਸਤਿਪਟ੍ਠਾਨਗੋਚਰਾ, ਭਾਣਿਨੋ ਚ, ਕਥਂ ਭਾਣਿਨੋ? ਯਾਵਿਚ੍ਛਨ੍ਤਿ ਮੁਖਾਯਾਮਂ, ਯਾਵ ਮੁਖਂ ਪਸਾਰੇਤੁਂ ਇਚ੍ਛਨ੍ਤਿ, ਤਾਵ ਪਸਾਰੇਤ੍ਵਾ ਭਾਣਿਨੋ, ਏਕੋਪਿ ਸਙ੍ਘਗਾਰਵੇਨ ਮੁਖਸਙ੍ਕੋਚਨਂ ਨ ਕਰੋਤੀਤਿ ਅਤ੍ਥੋ. ਯੇਨ ਨੀਤਾਤਿ ਯੇਨ ਕਲਹੇਨ ਇਮਂ ਨਿਲ੍ਲਜ੍ਜਭਾਵਂ ਨੀਤਾ. ਨ ਤਂ ਵਿਦੂ ਨ ਤਂ ਜਾਨਨ੍ਤਿ ‘‘ਏਵਂ ਸਾਦੀਨਵੋ ਅਯ’’ਨ੍ਤਿ.

ਯੇ ਚ ਤਂ ਉਪਨਯ੍ਹਨ੍ਤੀਤਿ ਤਂ ਅਕ੍ਕੋਚ੍ਛਿ ਮਨ੍ਤਿਆਦਿਕਂ ਆਕਾਰਂ ਯੇ ਉਪਨਯ੍ਹਨ੍ਤਿ. ਸਨਨ੍ਤਨੋਤਿ ਪੋਰਾਣੋ.

ਪਰੇਤਿ ਪਣ੍ਡਿਤੇ ਠਪੇਤ੍ਵਾ ਤਤੋ ਅਞ੍ਞੇ ਭਣ੍ਡਨਕਾਰਕਾ ਪਰੇ ਨਾਮ. ਤੇ ਏਤ੍ਥ ਸਙ੍ਘਮਜ੍ਝੇ ਕਲਹਂ ਕਰੋਨ੍ਤਾ ‘‘ਮਯਂ ਯਮਾਮਸੇ ਉਪਯਮਾਮ ਨਸ੍ਸਾਮ ਸਤਤਂ ਸਮਿਤਂ ਮਚ੍ਚੁਸਨ੍ਤਿਕਂ ਗਚ੍ਛਾਮਾ’’ਤਿ ਨ ਜਾਨਨ੍ਤਿ. ਯੇ ਚ ਤਤ੍ਥ ਵਿਜਾਨਨ੍ਤੀਤਿ ਯੇ ਚ ਤਤ੍ਥ ਪਣ੍ਡਿਤਾ ‘‘ਮਯਂ ਮਚ੍ਚੁਨੋ ਸਮੀਪਂ ਗਚ੍ਛਾਮਾ’’ਤਿ ਵਿਜਾਨਨ੍ਤਿ. ਤਤੋ ਸਮ੍ਮਨ੍ਤਿ ਮੇਧਗਾਤਿ ਏਵਞ੍ਹਿ ਤੇ ਜਾਨਨ੍ਤਾ ਯੋਨਿਸੋਮਨਸਿਕਾਰਂ ਉਪ੍ਪਾਦੇਤ੍ਵਾ ਮੇਧਗਾਨਂ ਕਲਹਾਨਂ ਵੂਪਸਮਾਯ ਪਟਿਪਜ੍ਜਨ੍ਤਿ.

ਅਟ੍ਠਿਚ੍ਛਿਨ੍ਨਾਤਿ ਅਯਂ ਗਾਥਾ ਜਾਤਕੇ (ਜਾ. ੧.੯.੧੬) ਆਗਤਾ, ਬ੍ਰਹ੍ਮਦਤ੍ਤਞ੍ਚ ਦੀਘਾਵੁਕੁਮਾਰਞ੍ਚ ਸਨ੍ਧਾਯ ਵੁਤ੍ਤਾ. ਅਯਞ੍ਹੇਤ੍ਥ ਅਤ੍ਥੋ – ਤੇਸਮ੍ਪਿ ਤਥਾ ਪਵਤ੍ਤਵੇਰਾਨਂ ਹੋਤਿ ਸਙ੍ਗਤਿ, ਕਸ੍ਮਾ ਤੁਮ੍ਹਾਕਂ ਨ ਹੋਤਿ, ਯੇਸਂ ਵੋ ਨੇਵ ਮਾਤਾਪਿਤੂਨਂ ਅਟ੍ਠੀਨਿ ਛਿਨ੍ਨਾਨਿ, ਨ ਪਾਣਾ ਹਟਾ ਨ ਗਵਾਸ੍ਸਧਨਾਨਿ ਹਟਾਨੀਤਿ.

ਸਚੇ ਲਭੇਥਾਤਿਆਦਿਗਾਥਾ ਪਣ੍ਡਿਤਸਹਾਯਸ੍ਸ ਚ ਬਾਲਸਹਾਯਸ੍ਸ ਚ ਵਣ੍ਣਾਵਣ੍ਣਦੀਪਨਤ੍ਥਂ ਵੁਤ੍ਤਾ. ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨੀਤਿ ਪਾਕਟਪਰਿਸ੍ਸਯੇ ਚ ਪਟਿਚ੍ਛਨ੍ਨਪਰਿਸ੍ਸਯੇ ਚ ਅਭਿਭਵਿਤ੍ਵਾ ਤੇਨ ਸਦ੍ਧਿਂ ਅਤ੍ਤਮਨੋ ਸਤਿਮਾ ਚਰੇਯ੍ਯਾਤਿ.

ਰਾਜਾਵ ਰਟ੍ਠਂ ਵਿਜਿਤਨ੍ਤਿ ਯਥਾ ਅਤ੍ਤਨੋ ਵਿਜਿਤਰਟ੍ਠਂ ਮਹਾਜਨਕਰਾਜਾ ਚ ਅਰਿਨ੍ਦਮਮਹਾਰਾਜਾ ਚ ਪਹਾਯ ਏਕਕਾ ਵਿਚਰਿਂਸੁ, ਏਵਂ ਵਿਚਰੇਯ੍ਯਾਤਿ ਅਤ੍ਥੋ. ਮਾਤਙ੍ਗਰਞ੍ਞੇਵ ਨਾਗੋਤਿ ਮਾਤਙ੍ਗੋ ਅਰਞ੍ਞੇ ਨਾਗੋਵ. ਮਾਤਙ੍ਗੋਤਿ ਹਤ੍ਥਿ ਵੁਚ੍ਚਤਿ. ਨਾਗੋਤਿ ਮਹਨ੍ਤਾਧਿਵਚਨਮੇਤਂ. ਯਥਾ ਹਿ ਮਾਤੁਪੋਸਕੋ ਮਾਤਙ੍ਗਨਾਗੋ ਅਰਞ੍ਞੇ ਏਕੋ ਚਰਿ, ਨ ਚ ਪਾਪਾਨਿ ਅਕਾਸਿ, ਯਥਾ ਚ ਪਾਲਿਲੇਯ੍ਯਕੋ, ਏਵਂ ਏਕੋ ਚਰੇ, ਨ ਚ ਪਾਪਾਨਿ ਕਯਿਰਾਤਿ ਵੁਤ੍ਤਂ ਹੋਤਿ.

੨੩੮. ਬਾਲਕਲੋਣਕਾਰਗਾਮੋਤਿ ਉਪਾਲਿਗਹਪਤਿਸ੍ਸ ਭੋਗਗਾਮੋ. ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਗਣੇ ਕਿਰਸ੍ਸ ਆਦੀਨਵਂ ਦਿਸ੍ਵਾ ਏਕਵਿਹਾਰਿਂ ਭਿਕ੍ਖੁਂ ਪਸ੍ਸਿਤੁਕਾਮਤਾ ਉਦਪਾਦਿ, ਤਸ੍ਮਾ ਸੀਤਾਦੀਹਿ ਪੀਲ਼ਿਤੋ ਉਣ੍ਹਾਦੀਨਿ ਪਤ੍ਥਯਮਾਨੋ ਵਿਯ ਉਪਸਙ੍ਕਮਿ. ਧਮ੍ਮਿਯਾ ਕਥਾਯਾਤਿ ਏਕੀਭਾਵੇ ਆਨਿਸਂਸਪ੍ਪਟਿਸਂਯੁਤ੍ਤਾਯ. ਯੇਨ ਪਾਚੀਨਵਂਸਦਾਯੋ, ਤਤ੍ਥ ਕਸ੍ਮਾ ਉਪਸਙ੍ਕਮਿ? ਕਲਹਕਾਰਕੇ ਕਿਰਸ੍ਸ ਦਿਟ੍ਠਾਦੀਨਵਤ੍ਤਾ ਸਮਗ੍ਗਵਾਸਿਨੋ ਭਿਕ੍ਖੂ ਪਸ੍ਸਿਤੁਕਾਮਤਾ ਉਦਪਾਦਿ, ਤਸ੍ਮਾ ਸੀਤਾਦੀਹਿ ਪੀਲ਼ਿਤੋ ਉਣ੍ਹਾਦੀਨਿ ਪਤ੍ਥਯਮਾਨੋ ਵਿਯ ਤਤ੍ਥ ਉਪਸਙ੍ਕਮਿ. ਆਯਸ੍ਮਾ ਚ ਅਨੁਰੁਦ੍ਧੋਤਿਆਦਿ ਵੁਤ੍ਤਨਯਮੇਵ.

੨੪੧. ਅਤ੍ਥਿ ਪਨ ਵੋਤਿ ਪਚ੍ਛਿਮਪੁਚ੍ਛਾਯ ਲੋਕੁਤ੍ਤਰਧਮ੍ਮਂ ਪੁਚ੍ਛੇਯ੍ਯ. ਸੋ ਪਨ ਥੇਰਾਨਂ ਨਤ੍ਥਿ, ਤਸ੍ਮਾ ਤਂ ਪੁਚ੍ਛਿਤੁਂ ਨ ਯੁਤ੍ਤਨ੍ਤਿ ਪਰਿਕਮ੍ਮੋਭਾਸਂ ਪੁਚ੍ਛਤਿ. ਓਭਾਸਞ੍ਚੇਵ ਸਞ੍ਜਾਨਾਮਾਤਿ ਪਰਿਕਮ੍ਮੋਭਾਸਂ ਸਞ੍ਜਾਨਾਮ. ਦਸ੍ਸਨਞ੍ਚ ਰੂਪਾਨਨ੍ਤਿ ਦਿਬ੍ਬਚਕ੍ਖੁਨਾ ਰੂਪਦਸ੍ਸਨਞ੍ਚ ਸਞ੍ਜਾਨਾਮ. ਤਞ੍ਚ ਨਿਮਿਤ੍ਤਂ ਨਪ੍ਪਟਿਵਿਜ੍ਝਾਮਾਤਿ ਤਞ੍ਚ ਕਾਰਣਂ ਨ ਜਾਨਾਮ, ਯੇਨ ਨੋ ਓਭਾਸੋ ਚ ਰੂਪਦਸ੍ਸਨਞ੍ਚ ਅਨ੍ਤਰਧਾਯਤਿ.

ਤਂ ਖੋ ਪਨ ਵੋ ਅਨੁਰੁਦ੍ਧਾ ਨਿਮਿਤ੍ਤਂ ਪਟਿਵਿਜ੍ਝਿਤਬ੍ਬਨ੍ਤਿ ਤਂ ਵੋ ਕਾਰਣਂ ਜਾਨਿਤਬ੍ਬਂ. ਅਹਮ੍ਪਿ ਸੁਦਨ੍ਤਿ ਅਨੁਰੁਦ੍ਧਾ ਤੁਮ੍ਹੇ ਕਿਂ ਨ ਆਲ਼ੁਲੇਸ੍ਸਨ੍ਤਿ, ਅਹਮ੍ਪਿ ਇਮੇਹਿ ਏਕਾਦਸਹਿ ਉਪਕ੍ਕਿਲੇਸੇਹਿ ਆਲ਼ੁਲਿਤਪੁਬ੍ਬੋਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਵਿਚਿਕਿਚ੍ਛਾ ਖੋ ਮੇਤਿਆਦੀਸੁ ਮਹਾਸਤ੍ਤਸ੍ਸ ਆਲੋਕਂ ਵਡ੍ਢੇਤ੍ਵਾ ਦਿਬ੍ਬਚਕ੍ਖੁਨਾ ਨਾਨਾਵਿਧਾਨਿ ਰੂਪਾਨਿ ਦਿਸ੍ਵਾ ‘‘ਇਦਂ ਖੋ ਕਿ’’ਨ੍ਤਿ ਵਿਚਿਕਿਚ੍ਛਾ ਉਦਪਾਦਿ. ਸਮਾਧਿ ਚਵੀਤਿ ਪਰਿਕਮ੍ਮਸਮਾਧਿ ਚਵਿ. ਓਭਾਸੋਤਿ ਪਰਿਕਮ੍ਮੋਭਾਸੋਪਿ ਅਨ੍ਤਰਧਾਯਿ, ਦਿਬ੍ਬਚਕ੍ਖੁਨਾਪਿ ਰੂਪਂ ਨ ਪਸ੍ਸਿ. ਅਮਨਸਿਕਾਰੋਤਿ ਰੂਪਾਨਿ ਪਸ੍ਸਤੋ ਵਿਚਿਕਿਚ੍ਛਾ ਉਪ੍ਪਜ੍ਜਤਿ, ਇਦਾਨਿ ਕਿਞ੍ਚਿ ਨ ਮਨਸਿਕਰਿਸ੍ਸਾਮੀਤਿ ਅਮਨਸਿਕਾਰੋ ਉਦਪਾਦਿ.

ਥਿਨਮਿਦ੍ਧਨ੍ਤਿ ਕਿਞ੍ਚਿ ਅਮਨਸਿਕਰੋਨ੍ਤਸ੍ਸ ਥਿਨਮਿਦ੍ਧਂ ਉਦਪਾਦਿ.

ਛਮ੍ਭਿਤਤ੍ਤਨ੍ਤਿ ਹਿਮਵਨ੍ਤਾਭਿਮੁਖਂ ਆਲੋਕਂ ਵਡ੍ਢੇਤ੍ਵਾ ਦਾਨਵਰਕ੍ਖਸਅਜਗਰਾਦਯੋ ਅਦ੍ਦਸ, ਅਥਸ੍ਸ ਛਮ੍ਭਿਤਤ੍ਤਂ ਉਦਪਾਦਿ.

ਉਪ੍ਪਿਲਨ੍ਤਿ ‘‘ਮਯਾ ਦਿਟ੍ਠਭਯਂ ਪਕਤਿਯਾ ਓਲੋਕਿਯਮਾਨਂ ਨਤ੍ਥਿ. ਅਦਿਟ੍ਠੇ ਕਿਂ ਨਾਮ ਭਯ’’ਨ੍ਤਿ ਚਿਨ੍ਤਯਤੋ ਉਪ੍ਪਿਲਾਵਿਤਤ੍ਤਂ ਉਦਪਾਦਿ. ਸਕਿਦੇਵਾਤਿ ਏਕਪਯੋਗੇਨੇਵ ਪਞ੍ਚ ਨਿਧਿਕੁਮ੍ਭਿਯੋਪਿ ਪਸ੍ਸੇਯ੍ਯ.

ਦੁਟ੍ਠੁਲ੍ਲਨ੍ਤਿ ਮਯਾ ਵੀਰਿਯਂ ਗਾਲ਼੍ਹਂ ਪਗ੍ਗਹਿਤਂ, ਤੇਨ ਮੇ ਉਪ੍ਪਿਲਂ ਉਪ੍ਪਨ੍ਨਨ੍ਤਿ ਵੀਰਿਯਂ ਸਿਥਿਲਮਕਾਸਿ, ਤਤੋ ਕਾਯਦਰਥੋ ਕਾਯਦੁਟ੍ਠੁਲ੍ਲਂ ਕਾਯਾਲਸਿਯਂ ਉਦਪਾਦਿ.

ਅਚ੍ਚਾਰਦ੍ਧਵੀਰਿਯਨ੍ਤਿ ਮਮ ਵੀਰਿਯਂ ਸਿਥਿਲਂ ਕਰੋਤੋ ਦੁਟ੍ਠੁਲ੍ਲਂ ਉਪ੍ਪਨ੍ਨਨ੍ਤਿ ਪੁਨ ਵੀਰਿਯਂ ਪਗ੍ਗਣ੍ਹਤੋ ਅਚ੍ਚਾਰਦ੍ਧਵੀਰਿਯਂ ਉਦਪਾਦਿ. ਪਤਮੇਯ੍ਯਾਤਿ ਮਰੇਯ੍ਯ.

ਅਤਿਲੀਨਵੀਰਿਯਨ੍ਤਿ ਮਮ ਵੀਰਿਯਂ ਪਗ੍ਗਣ੍ਹਤੋ ਏਵਂ ਜਾਤਨ੍ਤਿ ਪੁਨ ਵੀਰਿਯਂ ਸਿਥਿਲਂ ਕਰੋਤੋ ਅਤਿਲੀਨਵੀਰਿਯਂ ਉਦਪਾਦਿ.

ਅਭਿਜਪ੍ਪਾਤਿ ਦੇਵਲੋਕਾਭਿਮੁਖਂ ਆਲੋਕਂ ਵਡ੍ਢੇਤ੍ਵਾ ਦੇਵਸਙ੍ਘਂ ਪਸ੍ਸਤੋ ਤਣ੍ਹਾ ਉਦਪਾਦਿ.

ਨਾਨਤ੍ਤਸਞ੍ਞਾਤਿ ਮਯ੍ਹਂ ਏਕਜਾਤਿਕਂ ਰੂਪਂ ਮਨਸਿਕਰੋਨ੍ਤਸ੍ਸ ਅਭਿਜਪ੍ਪਾ ਉਪ੍ਪਨ੍ਨਾ, ਨਾਨਾਵਿਧਰੂਪਂ ਮਨਸਿ ਕਰਿਸ੍ਸਾਮੀਤਿ ਕਾਲੇਨ ਦੇਵਲੋਕਾਭਿਮੁਖਂ ਕਾਲੇਨ ਮਨੁਸ੍ਸਲੋਕਾਭਿਮੁਖਂ ਵਡ੍ਢੇਤ੍ਵਾ ਨਾਨਾਵਿਧਾਨਿ ਰੂਪਾਨਿ ਮਨਸਿਕਰੋਤੋ ਨਾਨਤ੍ਤਸਞ੍ਞਾ ਉਦਪਾਦਿ.

ਅਤਿਨਿਜ੍ਝਾਯਿਤਤ੍ਤਨ੍ਤਿ ਮਯ੍ਹਂ ਨਾਨਾਵਿਧਾਨਿ ਰੂਪਾਨਿ ਮਨਸਿਕਰੋਨ੍ਤਸ੍ਸ ਨਾਨਤ੍ਤਸਞ੍ਞਾ ਉਦਪਾਦਿ, ਇਟ੍ਠਂ ਵਾ ਅਨਿਟ੍ਠਂ ਵਾ ਏਕਜਾਤਿਕਮੇਵ ਮਨਸਿ ਕਰਿਸ੍ਸਾਮੀਤਿ ਤਥਾ ਮਨਸਿਕਰੋਤੋ ਅਤਿਨਿਜ੍ਝਾਯਿਤਤ੍ਤਂ ਰੂਪਾਨਂ ਉਦਪਾਦਿ.

੨੪੩. ਓਭਾਸਨਿਮਿਤ੍ਤਂ ਮਨਸਿ ਕਰੋਮੀਤਿ ਪਰਿਕਮ੍ਮੋਭਾਸਮੇਵ ਮਨਸਿ ਕਰੋਮਿ. ਨ ਚ ਰੂਪਾਨਿ ਪਸ੍ਸਾਮੀਤਿ ਦਿਬ੍ਬਚਕ੍ਖੁਨਾ ਰੂਪਾਨਿ ਨ ਪਸ੍ਸਾਮਿ. ਰੂਪਨਿਮਿਤ੍ਤਂ ਮਨਸਿ ਕਰੋਮੀਤਿ ਦਿਬ੍ਬਚਕ੍ਖੁਨਾ ਵਿਸਯਰੂਪਮੇਵ ਮਨਸਿ ਕਰੋਮਿ.

ਪਰਿਤ੍ਤਞ੍ਚੇਵ ਓਭਾਸਨ੍ਤਿ ਪਰਿਤ੍ਤਕਟ੍ਠਾਨੇ ਓਭਾਸਂ. ਪਰਿਤ੍ਤਾਨਿ ਚ ਰੂਪਾਨੀਤਿ ਪਰਿਤ੍ਤਕਟ੍ਠਾਨੇ ਰੂਪਾਨਿ. ਵਿਪਰਿਯਾਯੇਨ ਦੁਤਿਯਵਾਰੋ ਵੇਦਿਤਬ੍ਬੋ. ਪਰਿਤ੍ਤੋ ਸਮਾਧੀਤਿ ਪਰਿਤ੍ਤਕੋ ਪਰਿਕਮ੍ਮੋਭਾਸੋ, ਓਭਾਸਪਰਿਤ੍ਤਤਞ੍ਹਿ ਸਨ੍ਧਾਯ ਇਧ ਪਰਿਕਮ੍ਮਸਮਾਧਿ ‘‘ਪਰਿਤ੍ਤੋ’’ਤਿ ਵੁਤ੍ਤੋ. ਪਰਿਤ੍ਤਂ ਮੇ ਤਸ੍ਮਿਂ ਸਮਯੇਤਿ ਤਸ੍ਮਿਂ ਸਮਯੇ ਦਿਬ੍ਬਚਕ੍ਖੁਪਿ ਪਰਿਤ੍ਤਕਂ ਹੋਤਿ. ਅਪ੍ਪਮਾਣਵਾਰੇਪਿ ਏਸੇਵ ਨਯੋ.

੨੪੫. ਅਵਿਤਕ੍ਕਮ੍ਪਿ ਵਿਚਾਰਮਤ੍ਤਨ੍ਤਿ ਪਞ੍ਚਕਨਯੇ ਦੁਤਿਯਜ੍ਝਾਨਸਮਾਧਿਂ. ਅਵਿਤਕ੍ਕਮ੍ਪਿ ਅਵਿਚਾਰਨ੍ਤਿ ਚਤੁਕ੍ਕਨਯੇਪਿ ਪਞ੍ਚਕਨਯੇਪਿ ਝਾਨਤ੍ਤਯਸਮਾਧਿਂ. ਸਪ੍ਪੀਤਿਕਨ੍ਤਿ ਦੁਕਤਿਕਜ੍ਝਾਨਸਮਾਧਿਂ. ਨਿਪ੍ਪੀਤਿਕਨ੍ਤਿ ਦੁਕਜ੍ਝਾਨਸਮਾਧਿਂ. ਸਾਤਸਹਗਤਨ੍ਤਿ ਤਿਕਚਤੁਕ੍ਕਜ੍ਝਾਨਸਮਾਧਿਂ. ਉਪੇਕ੍ਖਾਸਹਗਤਨ੍ਤਿ ਚਤੁਕ੍ਕਨਯੇ ਚਤੁਤ੍ਥਜ੍ਝਾਨਸਮਾਧਿਂ ਪਞ੍ਚਕਨਯੇ ਪਞ੍ਚਮਜ੍ਝਾਨਸਮਾਧਿਂ.

ਕਦਾ ਪਨ ਭਗਵਾ ਇਮਂ ਤਿਵਿਧਂ ਸਮਾਧਿਂ ਭਾਵੇਤਿ? ਮਹਾਬੋਧਿਮੂਲੇ ਨਿਸਿਨ੍ਨੋ ਪਚ੍ਛਿਮਯਾਮੇ. ਭਗਵਤੋ ਹਿ ਪਠਮਮਗ੍ਗੋ ਪਠਮਜ੍ਝਾਨਿਕੋ ਅਹੋਸਿ, ਦੁਤਿਯਾਦਯੋ ਦੁਤਿਯਤਤਿਯਚਤੁਤ੍ਥਜ੍ਝਾਨਿਕਾ. ਪਞ੍ਚਕਨਯੇ ਪਞ੍ਚਮਜ੍ਝਾਨਸ੍ਸ ਮਗ੍ਗੋ ਨਤ੍ਥੀਤਿ ਸੋ ਲੋਕਿਯੋ ਅਹੋਸੀਤਿ ਲੋਕਿਯਲੋਕੁਤ੍ਤਰਮਿਸ੍ਸਕਂ ਸਨ੍ਧਾਯੇਤਂ ਵੁਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਉਪਕ੍ਕਿਲੇਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.