੯. ਕਾਯਗਤਾਸਤਿਸੁਤ੍ਤਵਣ੍ਣਨਾ
੧੫੩-੪. ਏਵਂ ਮੇ ਸੁਤਨ੍ਤਿ ਕਾਯਗਤਾਸਤਿਸੁਤ੍ਤਂ. ਤਤ੍ਥ ਗੇਹਸਿਤਾਤਿ ਪਞ੍ਚਕਾਮਗੁਣਨਿਸ੍ਸਿਤਾ. ਸਰਸਙ੍ਕਪ੍ਪਾਤਿ ਧਾਵਨਸਙ੍ਕਪ੍ਪਾ. ਸਰਨ੍ਤੀਤਿ ਹਿ ਸਰਾ, ਧਾਵਨ੍ਤੀਤਿ ਅਤ੍ਥੋ. ਅਜ੍ਝਤ੍ਤਮੇਵਾਤਿ ਗੋਚਰਜ੍ਝਤ੍ਤਸ੍ਮਿਂਯੇਵ. ਕਾਯਗਤਾਸਤਿਨ੍ਤਿ ਕਾਯਪਰਿਗ੍ਗਾਹਿਕਮ੍ਪਿ ਕਾਯਾਰਮ੍ਮਣਮ੍ਪਿ ਸਤਿਂ. ਕਾਯਪਰਿਗ੍ਗਾਹਿਕਨ੍ਤਿ ਵੁਤ੍ਤੇ ਸਮਥੋ ਕਥਿਤੋ ਹੋਤਿ, ਕਾਯਾਰਮ੍ਮਣਨ੍ਤਿ ਵੁਤ੍ਤੇ ਵਿਪਸ੍ਸਨਾ. ਉਭਯੇਨ ਸਮਥਵਿਪਸ੍ਸਨਾ ਕਥਿਤਾ ਹੋਨ੍ਤਿ.
ਪੁਨ ਚਪਰਂ…ਪੇ… ਏਵਮ੍ਪਿ, ਭਿਕ੍ਖਵੇ, ਭਿਕ੍ਖੁ ਕਾਯਗਤਾਸਤਿਂ ਭਾਵੇਤੀਤਿ ਸਤਿਪਟ੍ਠਾਨੇ ਚੁਦ੍ਦਸਵਿਧੇਨ ਕਾਯਾਨੁਪਸ੍ਸਨਾ ਕਥਿਤਾ.
੧੫੬. ਅਨ੍ਤੋਗਧਾਵਾਸ੍ਸਾਤਿ ਤਸ੍ਸ ਭਿਕ੍ਖੁਨੋ ਭਾਵਨਾਯ ਅਬ੍ਭਨ੍ਤਰਗਤਾਵ ਹੋਨ੍ਤਿ. ਵਿਜ੍ਜਾਭਾਗਿਯਾਤਿ ਏਤ੍ਥ ਸਮ੍ਪਯੋਗਵਸੇਨ ਵਿਜ੍ਜਂ ਭਜਨ੍ਤੀਤਿ ਵਿਜ੍ਜਾਭਾਗਿਯਾ. ਵਿਜ੍ਜਾਭਾਗੇ ਵਿਜ੍ਜਾਕੋਟ੍ਠਾਸੇ ਵਤ੍ਤਨ੍ਤੀਤਿਪਿ ਵਿਜ੍ਜਾਭਾਗਿਯਾ. ਤਤ੍ਥ ਵਿਪਸ੍ਸਨਾਞਾਣਂ, ਮਨੋਮਯਿਦ੍ਧਿ, ਛ ਅਭਿਞ੍ਞਾਤਿ ਅਟ੍ਠ ਵਿਜ੍ਜਾ. ਪੁਰਿਮੇਨ ਅਤ੍ਥੇਨ ਤਾਹਿ ਸਮ੍ਪਯੁਤ੍ਤਧਮ੍ਮਾਪਿ ਵਿਜ੍ਜਾਭਾਗਿਯਾ. ਪਚ੍ਛਿਮੇਨ ਅਤ੍ਥੇਨ ਤਾਸੁ ਯਾ ਕਾਚਿ ਏਕਾ ਵਿਜ੍ਜਾ ਵਿਜ੍ਜਾ, ਸੇਸਾ ਵਿਜ੍ਜਾਭਾਗਿਯਾਤਿ ਏਵਂ ਵਿਜ੍ਜਾਪਿ ਵਿਜ੍ਜਾਯ ਸਮ੍ਪਯੁਤ੍ਤਾ ਧਮ੍ਮਾਪਿ ਵਿਜ੍ਜਾਭਾਗਿਯਾਤੇਵ ਵੇਦਿਤਬ੍ਬਾ. ਚੇਤਸਾ ਫੁਟੋਤਿ ਏਤ੍ਥ ਦੁਵਿਧਂ ਫਰਣਂ ਆਪੋਫਰਣਞ੍ਚ, ਦਿਬ੍ਬਚਕ੍ਖੁਫਰਣਞ੍ਚ, ਤਤ੍ਥ ਆਪੋਕਸਿਣਂ ਸਮਾਪਜ੍ਜਿਤ੍ਵਾ ਆਪੇਨ ਫਰਣਂ ਆਪੋਫਰਣਂ ਨਾਮ. ਏਵਂ ਫੁਟੇਪਿ ਮਹਾਸਮੁਦ੍ਦੇ ਸਬ੍ਬਾ ਸਮੁਦ੍ਦਙ੍ਗਮਾ ਕੁਨ੍ਨਦਿਯੋ ਅਨ੍ਤੋਗਧਾਵ ਹੋਨ੍ਤਿ, ਆਲੋਕਂ ਪਨ ਵਡ੍ਢੇਤ੍ਵਾ ਦਿਬ੍ਬਚਕ੍ਖੁਨਾ ਸਕਲਸਮੁਦ੍ਦਸ੍ਸ ਦਸ੍ਸਨਂ ਦਿਬ੍ਬਚਕ੍ਖੁਫਰਣਂ ਨਾਮ. ਏਵਂ ਫਰਣੇਪਿ ਮਹਾਸਮੁਦ੍ਦੇ ਸਬ੍ਬਾ ਸਮੁਦ੍ਦਙ੍ਗਮਾ ਕੁਨ੍ਨਦਿਯੋ ਅਨ੍ਤੋਗਧਾਵ ਹੋਨ੍ਤਿ.
ਓਤਾਰਨ੍ਤਿ ਵਿਵਰਂ ਛਿਦ੍ਦਂ. ਆਰਮ੍ਮਣਨ੍ਤਿ ਕਿਲੇਸੁਪ੍ਪਤ੍ਤਿਪਚ੍ਚਯਂ. ਲਭੇਥ ਓਤਾਰਨ੍ਤਿ ਲਭੇਯ੍ਯ ਪਵੇਸਨਂ, ਵਿਨਿਵਿਜ੍ਝਿਤ੍ਵਾ ਯਾਵ ਪਰਿਯੋਸਾਨਾ ਗਚ੍ਛੇਯ੍ਯਾਤਿ ਅਤ੍ਥੋ. ਨਿਕ੍ਖੇਪਨਨ੍ਤਿ ਨਿਕ੍ਖਿਪਨਟ੍ਠਾਨਂ.
੧੫੭. ਏਵਂ ਅਭਾਵਿਤਕਾਯਗਤਾਸਤਿਂ ਪੁਗ੍ਗਲਂ ਅਲ੍ਲਮਤ੍ਤਿਕਪੁਞ੍ਜਾਦੀਹਿ ਉਪਮੇਤ੍ਵਾ ਇਦਾਨਿ ਭਾਵਿਤਕਾਯਗਤਾਸਤਿਂ ਸਾਰਫਲਕਾਦੀਹਿ ਉਪਮੇਤੁਂ ਸੇਯ੍ਯਥਾਪੀਤਿਆਦਿਮਾਹ. ਤਤ੍ਥ ਅਗ੍ਗਲ਼ਫਲਕਨ੍ਤਿ ਕਵਾਟਂ.
੧੫੮. ਕਾਕਪੇਯ੍ਯੋਤਿ ਮੁਖਵਟ੍ਟਿਯਂ ਨਿਸੀਦਿਤ੍ਵਾ ਕਾਕੇਨ ਗੀਵਂ ਅਨਾਮੇਤ੍ਵਾਵ ਪਾਤਬ੍ਬੋ. ਅਭਿਞ੍ਞਾਸਚ੍ਛਿਕਰਣੀਯਸ੍ਸਾਤਿ ਅਭਿਞ੍ਞਾਯ ਸਚ੍ਛਿਕਾਤਬ੍ਬਸ੍ਸ. ਸਕ੍ਖਿਭਬ੍ਬਤਂ ਪਾਪੁਣਾਤੀਤਿ ਪਚ੍ਚਕ੍ਖਭਾਵਂ ਪਾਪੁਣਾਤਿ. ਸਤਿ ਸਤਿ ਆਯਤਨੇਤਿ ਸਤਿਸਤਿ ਕਾਰਣੇ. ਕਿਂ ਪਨੇਤ੍ਥ ਕਾਰਣਨ੍ਤਿ? ਅਭਿਞ੍ਞਾਵ ਕਾਰਣਂ. ਆਲ਼ਿਬਨ੍ਧਾਤਿ ਮਰਿਯਾਦਬਦ੍ਧਾ.
ਯਾਨੀਕਤਾਯਾਤਿ ਯੁਤ੍ਤਯਾਨਂ ਵਿਯ ਕਤਾਯ. ਵਤ੍ਥੁਕਤਾਯਾਤਿ ਪਤਿਟ੍ਠਾਕਤਾਯ. ਅਨੁਟ੍ਠਿਤਾਯਾਤਿ ਅਨੁਪ੍ਪਵਤ੍ਤਿਤਾਯ. ਪਰਿਚਿਤਾਯਾਤਿ ਪਰਿਚਯਕਤਾਯ. ਸੁਸਮਾਰਦ੍ਧਾਯਾਤਿ ਸੁਟ੍ਠੁ ਸਮਾਰਦ੍ਧਾਯ ਸੁਸਮ੍ਪਗ੍ਗਹਿਤਾਯ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਕਾਯਗਤਾਸਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.