੧੦. ਸਙ੍ਖਾਰੁਪਪਤ੍ਤਿਸੁਤ੍ਤਵਣ੍ਣਨਾ
੧੬੦. ਏਵਂ ਮੇ ਸੁਤਨ੍ਤਿ ਸਙ੍ਖਾਰੁਪਪਤ੍ਤਿਸੁਤ੍ਤਂ. ਤਤ੍ਥ ਸਙ੍ਖਾਰੁਪਪਤ੍ਤਿਨ੍ਤਿ ਸਙ੍ਖਾਰਾਨਂਯੇਵ ਉਪਪਤ੍ਤਿਂ, ਨ ਸਤ੍ਤਸ੍ਸ, ਨ ਪੋਸਸ੍ਸ, ਪੁਞ੍ਞਾਭਿਸਙ੍ਖਾਰੇਨ ਵਾ ਭਵੂਪਗਕ੍ਖਨ੍ਧਾਨਂ ਉਪਪਤ੍ਤਿਂ.
੧੬੧. ਸਦ੍ਧਾਯ ਸਮਨ੍ਨਾਗਤੋਤਿ ਸਦ੍ਧਾਦਯੋ ਪਞ੍ਚ ਧਮ੍ਮਾ ਲੋਕਿਕਾ ਵਟ੍ਟਨ੍ਤਿ. ਦਹਤੀਤਿ ਠਪੇਤਿ. ਅਧਿਟ੍ਠਾਤੀਤਿ ਪਤਿਟ੍ਠਾਪੇਤਿ. ਸਙ੍ਖਾਰਾ ਚ ਵਿਹਾਰਾ ਚਾਤਿ ਸਹ ਪਤ੍ਥਨਾਯ ਸਦ੍ਧਾਦਯੋਵ ਪਞ੍ਚ ਧਮ੍ਮਾ. ਤਤ੍ਰੁਪਪਤ੍ਤਿਯਾਤਿ ਤਸ੍ਮਿਂ ਠਾਨੇ ਨਿਬ੍ਬਤ੍ਤਨਤ੍ਥਾਯ. ਅਯਂ ਮਗ੍ਗੋ ਅਯਂ ਪਟਿਪਦਾਤਿ ਸਹ ਪਤ੍ਥਨਾਯ ਪਞ੍ਚ ਧਮ੍ਮਾਵ. ਯਸ੍ਸ ਹਿ ਪਞ੍ਚ ਧਮ੍ਮਾ ਅਤ੍ਥਿ, ਨ ਪਤ੍ਥਨਾ, ਤਸ੍ਸ ਗਤਿ ਅਨਿਬਦ੍ਧਾ. ਯਸ੍ਸ ਪਤ੍ਥਨਾ ਅਤ੍ਥਿ, ਨ ਪਞ੍ਚ ਧਮ੍ਮਾ, ਤਸ੍ਸਪਿ ਅਨਿਬਦ੍ਧਾ. ਯੇਸਂ ਉਭਯਂ ਅਤ੍ਥਿ, ਤੇਸਂ ਗਤਿ ਨਿਬਦ੍ਧਾ. ਯਥਾ ਹਿ ਆਕਾਸੇ ਖਿਤ੍ਤਦਣ੍ਡੋ ਅਗ੍ਗੇਨ ਵਾ ਮਜ੍ਝੇਨ ਵਾ ਮੂਲੇਨ ਵਾ ਨਿਪਤਿਸ੍ਸਤੀਤਿ ਨਿਯਮੋ ਨਤ੍ਥਿ, ਏਵਂ ਸਤ੍ਤਾਨਂ ਪਟਿਸਨ੍ਧਿਗ੍ਗਹਣਂ ਅਨਿਯਤਂ. ਤਸ੍ਮਾ ਕੁਸਲਂ ਕਮ੍ਮਂ ਕਤ੍ਵਾ ਏਕਸ੍ਮਿਂ ਠਾਨੇ ਪਤ੍ਥਨਂ ਕਾਤੁਂ ਵਟ੍ਟਤਿ.
੧੬੫. ਆਮਣ੍ਡਨ੍ਤਿ ਆਮਲਕਂ. ਯਥਾ ਤਂ ਪਰਿਸੁਦ੍ਧਚਕ੍ਖੁਸ੍ਸ ਪੁਰਿਸਸ੍ਸ ਸਬ੍ਬਸੋਵ ਪਾਕਟਂ ਹੋਤਿ, ਏਵਂ ਤਸ੍ਸ ਬ੍ਰਹ੍ਮੁਨੋ ਸਦ੍ਧਿਂ ਤਤ੍ਥ ਨਿਬ੍ਬਤ੍ਤਸਤ੍ਤੇਹਿ ਸਹਸ੍ਸੀ ਲੋਕਧਾਤੁ. ਏਸ ਨਯੋ ਸਬ੍ਬਤ੍ਥ.
੧੬੭. ਸੁਭੋਤਿ ਸੁਨ੍ਦਰੋ. ਜਾਤਿਮਾਤਿ ਆਕਰਸਮ੍ਪਨ੍ਨੋ. ਸੁਪਰਿਕਮ੍ਮਕਤੋਤਿ ਧੋਵਨਾਦੀਹਿ ਸੁਟ੍ਠੁਕਤਪਰਿਕਮ੍ਮੋ. ਪਣ੍ਡੁਕਮ੍ਬਲੇ ਨਿਕ੍ਖਿਤ੍ਤੋਤਿ ਰਤ੍ਤਕਮ੍ਬਲੇ ਠਪਿਤੋ.
੧੬੮. ਸਤਸਹਸ੍ਸੋਤਿ ਲੋਕਧਾਤੁਸਤਸਹਸ੍ਸਮ੍ਹਿ ਆਲੋਕਫਰਣਬ੍ਰਹ੍ਮਾ. ਨਿਕ੍ਖਨ੍ਤਿ ਨਿਕ੍ਖੇਨ ਕਤਂ ਪਿਲ਼ਨ੍ਧਨਂ, ਨਿਕ੍ਖਂ ਨਾਮ ਪਞ੍ਚਸੁਵਣ੍ਣਂ, ਊਨਕਨਿਕ੍ਖੇਨ ਕਤਂ ਪਸਾਧਨਞ੍ਹਿ ਘਟ੍ਟਨਮਜ੍ਜਨਕ੍ਖਮਂ ਨ ਹੋਤਿ, ਅਤਿਰੇਕੇਨ ਕਤਂ ਘਟ੍ਟਨਮਜ੍ਜਨਂ ਖਮਤਿ, ਵਣ੍ਣਵਨ੍ਤਂ ਪਨ ਨ ਹੋਤਿ, ਫਰੁਸਧਾਤੁਕਂ ਖਾਯਤਿ. ਨਿਕ੍ਖੇਨ ਕਤਂ ਘਟ੍ਟਨਮਜ੍ਜਨਞ੍ਚੇਵ ਖਮਤਿ, ਵਣ੍ਣਵਨ੍ਤਞ੍ਚ ਹੋਤਿ. ਜਮ੍ਬੋਨਦਨ੍ਤਿ ਜਮ੍ਬੁਨਦਿਯਂ ਨਿਬ੍ਬਤ੍ਤਂ. ਮਹਾਜਮ੍ਬੁਰੁਕ੍ਖਸ੍ਸ ਹਿ ਏਕੇਕਾ ਸਾਖਾ ਪਣ੍ਣਾਸ ਪਣ੍ਣਾਸ ਯੋਜਨਾਨਿ ਵਡ੍ਢਿਤਾ, ਤਾਸੁ ਮਹਨ੍ਤਾ ਨਦਿਯੋ ਸਨ੍ਦਨ੍ਤਿ, ਤਾਸਂ ਨਦੀਨਂ ਉਭਯਤੀਰੇਸੁ ਜਮ੍ਬੁਪਕ੍ਕਾਨਂ ਪਤਿਤਟ੍ਠਾਨੇ ਸੁਵਣ੍ਣਙ੍ਕੁਰਾ ਉਟ੍ਠਹਨ੍ਤਿ, ਤੇ ਨਦੀਜਲੇਨ ਵੁਯ੍ਹਮਾਨਾ ਅਨੁਪੁਬ੍ਬੇਨ ਮਹਾਸਮੁਦ੍ਦਂ ਪਵਿਸਨ੍ਤਿ. ਤਂ ਸਨ੍ਧਾਯ ਜਮ੍ਬੋਨਦਨ੍ਤਿ ਵੁਤ੍ਤਂ. ਦਕ੍ਖਕਮ੍ਮਾਰਪੁਤ੍ਤਉਕ੍ਕਾਮੁਖਸੁਕੁਸਲਸਮ੍ਪਹਟ੍ਠਨ੍ਤਿ ਦਕ੍ਖੇਨ ਸੁਕੁਸਲੇਨ ਕਮ੍ਮਾਰਪੁਤ੍ਤੇਨ ਉਕ੍ਕਾਮੁਖੇ ਪਚਿਤ੍ਵਾ ਸਮ੍ਪਹਟ੍ਠਂ. ਉਕ੍ਕਾਮੁਖੇਤਿ ਉਦ੍ਧਨੇ. ਸਮ੍ਪਹਟ੍ਠਨ੍ਤਿ ਧੋਤਘਟ੍ਟਿਤਮਜ੍ਜਿਤਂ. ਵਤ੍ਥੋਪਮੇ (ਮ. ਨਿ. ੧.੭੫-੭੬) ਚ ਧਾਤੁਵਿਭਙ੍ਗੇ (ਮ. ਨਿ. ੩.੩੫੭-੩੬੦) ਚ ਪਿਣ੍ਡਸੋਧਨਂ ਵੁਤ੍ਤਂ. ਇਮਸ੍ਮਿਂ ਸੁਤ੍ਤੇ ਕਤਭਣ੍ਡਸੋਧਨਂ ਵੁਤ੍ਤਂ.
ਯਂ ਪਨ ਸਬ੍ਬਵਾਰੇਸੁ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾਤਿ ਵੁਤ੍ਤਂ, ਤਤ੍ਥ ਪਞ੍ਚਵਿਧਂ ਫਰਣਂ ਚੇਤੋਫਰਣਂ ਕਸਿਣਫਰਣਂ ਦਿਬ੍ਬਚਕ੍ਖੁਫਰਣਂ ਆਲੋਕਫਰਣਂ ਸਰੀਰਫਰਣਨ੍ਤਿ. ਤਤ੍ਥ ਚੇਤੋਫਰਣਂ ਨਾਮ ਲੋਕਧਾਤੁਸਹਸ੍ਸੇ ਸਤ੍ਤਾਨਂ ਚਿਤ੍ਤਜਾਨਨਂ. ਕਸਿਣਫਰਣਂ ਨਾਮ ਲੋਕਧਾਤੁਸਹਸ੍ਸੇ ਕਸਿਣਪਤ੍ਥਰਣਂ. ਦਿਬ੍ਬਚਕ੍ਖੁਫਰਣਂ ਨਾਮ ਆਲੋਕਂ ਵਡ੍ਢੇਤ੍ਵਾ ਦਿਬ੍ਬੇਨ ਚਕ੍ਖੁਨਾ ਸਹਸ੍ਸਲੋਕਧਾਤੁਦਸ੍ਸਨਂ. ਆਲੋਕਫਰਣਮ੍ਪਿ ਏਤਦੇਵ. ਸਰੀਰਫਰਣਂ ਨਾਮ ਲੋਕਧਾਤੁਸਹਸ੍ਸੇ ਸਰੀਰਪਭਾਯ ਪਤ੍ਥਰਣਂ. ਸਬ੍ਬਤ੍ਥ ਇਮਾਨਿ ਪਞ੍ਚ ਫਰਣਾਨਿ ਅਵਿਨਾਸੇਨ੍ਤੇਨ ਕਥੇਤਬ੍ਬਨ੍ਤਿ.
ਤਿਪਿਟਕਚੂਲ਼ਾਭਯਤ੍ਥੇਰੋ ਪਨਾਹ – ‘‘ਮਣਿਓਪਮ੍ਮੇ ਕਸਿਣਫਰਣਂ ਵਿਯ ਨਿਕ੍ਖੋਪਮ੍ਮੇ ਸਰੀਰਫਰਣਂ ਵਿਯ ਦਿਸ੍ਸਤੀ’’ਤਿ. ਤਸ੍ਸ ਵਾਦਂ ਵਿਯ ਅਟ੍ਠਕਥਾ ਨਾਮ ਨਤ੍ਥੀਤਿ ਪਟਿਕ੍ਖਿਤ੍ਵਾ ਸਰੀਰਫਰਣਂ ਨ ਸਬ੍ਬਕਾਲਿਕਂ, ਚਤ੍ਤਾਰਿਮਾਨਿ ਫਰਣਾਨਿ ਅਵਿਨਾਸੇਤ੍ਵਾਵ ਕਥੇਤਬ੍ਬਨ੍ਤਿ ਵੁਤ੍ਤਂ. ਅਧਿਮੁਚ੍ਚਤੀਤਿ ਪਦਂ ਫਰਣਪਦਸ੍ਸੇਵ ਵੇਵਚਨਂ, ਅਥ ਵਾ ਫਰਤੀਤਿ ਪਤ੍ਥਰਤਿ. ਅਧਿਮੁਚ੍ਚਤੀਤਿ ਜਾਨਾਤਿ.
੧੬੯. ਆਭਾਤਿਆਦੀਸੁ ਆਭਾਦਯੋ ਨਾਮ ਪਾਟਿਯੇਕ੍ਕਾ ਦੇਵਾ ਨਤ੍ਥਿ, ਤਯੋ ਪਰਿਤ੍ਤਾਭਾਦਯੋ ਦੇਵਾ ਆਭਾ ਨਾਮ, ਪਰਿਤ੍ਤਾਸੁਭਾਦਯੋ ਚ. ਸੁਭਕਿਣ੍ਹਾਦਯੋ ਚ ਸੁਭਾ ਨਾਮ. ਵੇਹਪ੍ਫਲਾਦਿਵਾਰਾ ਪਾਕਟਾਯੇਵ.
ਇਮੇ ਤਾਵ ਪਞ੍ਚ ਧਮ੍ਮੇ ਭਾਵੇਤ੍ਵਾ ਕਾਮਾਵਚਰੇਸੁ ਨਿਬ੍ਬਤ੍ਤਤੁ. ਬ੍ਰਹ੍ਮਲੋਕੇ ਨਿਬ੍ਬਤ੍ਤਂ ਪਨ ਆਸਵਕ੍ਖਯਞ੍ਚ ਕਥਂ ਪਾਪੁਣਾਤੀਤਿ? ਇਮੇ ਪਞ੍ਚ ਧਮ੍ਮਾ ਸੀਲਂ, ਸੋ ਇਮਸ੍ਮਿਂ ਸੀਲੇ ਪਤਿਟ੍ਠਾਯ ਕਸਿਣਪਰਿਕਮ੍ਮਂ ਕਤ੍ਵਾ ਤਾ ਤਾ ਸਮਾਪਤ੍ਤਿਯੋ ਭਾਵੇਤ੍ਵਾ ਰੂਪੀਬ੍ਰਹ੍ਮਲੋਕੇ ਨਿਬ੍ਬਤ੍ਤਤਿ, ਅਰੂਪਜ੍ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਅਰੂਪੀਬ੍ਰਹ੍ਮਲੋਕੇ, ਸਮਾਪਤ੍ਤਿਪਦਟ੍ਠਾਨਂ ਵਿਪਸ੍ਸਨਂ ਵਡ੍ਢੇਤ੍ਵਾ ਅਨਾਗਾਮਿਫਲਂ ਸਚ੍ਛਿਕਤ੍ਵਾ ਪਞ੍ਚਸੁ ਸੁਦ੍ਧਾਵਾਸੇਸੁ ਨਿਬ੍ਬਤ੍ਤਤਿ. ਉਪਰਿਮਗ੍ਗਂ ਭਾਵੇਤ੍ਵਾ ਆਸਵਕ੍ਖਯਂ ਪਾਪੁਣਾਤੀਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਸਙ੍ਖਾਰੁਪਪਤ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.