੭. ਮਹਾਚਤ੍ਤਾਰੀਸਕਸੁਤ੍ਤਵਣ੍ਣਨਾ
੧੩੬. ਏਵਂ ਮੇ ਸੁਤਨ੍ਤਿ ਮਹਾਚਤ੍ਤਾਰੀਸਕਸੁਤ੍ਤਂ. ਤਤ੍ਥ ਅਰਿਯਨ੍ਤਿ ਨਿਦ੍ਦੋਸਂ ਲੋਕੁਤ੍ਤਰਂ, ਨਿਦ੍ਦੋਸਞ੍ਹਿ ‘‘ਅਰਿਯ’’ਨ੍ਤਿ ਵੁਚ੍ਚਤਿ. ਸਮ੍ਮਾਸਮਾਧਿਨ੍ਤਿ ਮਗ੍ਗਸਮਾਧਿਂ. ਸਉਪਨਿਸਨ੍ਤਿ ਸਪਚ੍ਚਯਂ. ਸਪਰਿਕ੍ਖਾਰਨ੍ਤਿ ਸਪਰਿਵਾਰਂ.
ਪਰਿਕ੍ਖਤਾਤਿ ਪਰਿਵਾਰਿਤਾ. ਸਮ੍ਮਾਦਿਟ੍ਠਿ ਪੁਬ੍ਬਙ੍ਗਮਾ ਹੋਤੀਤਿ ਦ੍ਵਿਧਾ ਸਮ੍ਮਾਦਿਟ੍ਠਿ ਪੁਬ੍ਬਙ੍ਗਮਾ ਹੋਤਿ ਪੁਰੇਚਾਰਿਕਾ ਵਿਪਸ੍ਸਨਾਸਮ੍ਮਾਦਿਟ੍ਠਿ ਚ ਮਗ੍ਗਸਮ੍ਮਾਦਿਟ੍ਠਿ ਚ. ਵਿਪਸ੍ਸਨਾਸਮ੍ਮਾਦਿਟ੍ਠਿ ਤੇਭੂਮਕਸਙ੍ਖਾਰੇ ਅਨਿਚ੍ਚਾਦਿਵਸੇਨ ਪਰਿਵੀਮਂਸਤਿ; ਮਗ੍ਗਸਮ੍ਮਾਦਿਟ੍ਠਿ ਪਨ ਪਰਿਵੀਮਂਸਨਪਰਿਯੋਸਾਨੇ ਭੂਮਿਲਦ੍ਧਂ ਵਟ੍ਟਂ ਸਮੁਗ੍ਘਾਟਯਮਾਨਾ ਵੂਪਸਮਯਮਾਨਾ ਸੀਤੁਦਕਘਟਸਹਸ੍ਸਂ ਮਤ੍ਥਕੇ ਆਸਿਞ੍ਚਮਾਨਾ ਵਿਯ ਉਪ੍ਪਜ੍ਜਤਿ. ਯਥਾ ਹਿ ਖੇਤ੍ਤਂ ਕੁਰੁਮਾਨੋ ਕਸ੍ਸਕੋ ਪਠਮਂ ਅਰਞ੍ਞੇ ਰੁਕ੍ਖੇ ਛਿਨ੍ਦਤਿ, ਪਚ੍ਛਾ ਅਗ੍ਗਿਂ ਦੇਤਿ, ਸੋ ਅਗ੍ਗਿ ਪਠਮਂ ਛਿਨ੍ਨੇ ਰੁਕ੍ਖੇ ਅਨਵਸੇਸੇ ਝਾਪੇਤਿ, ਏਵਮੇਵ ਵਿਪਸ੍ਸਨਾਸਮ੍ਮਾਦਿਟ੍ਠਿ ਪਠਮਂ ਅਨਿਚ੍ਚਾਦਿਵਸੇਨ ਸਙ੍ਖਾਰੇ ਵੀਮਂਸਤਿ, ਮਗ੍ਗਸਮ੍ਮਾਦਿਟ੍ਠਿ ਤਾਯ ਵੀਮਂਸਨਤ੍ਥਂ ਸਙ੍ਖਾਰੇ ਪੁਨ ਅਪ੍ਪਵਤ੍ਤਿਵਸੇਨ ਸਮੁਗ੍ਘਾਟਯਮਾਨਾ ਉਪ੍ਪਜ੍ਜਤਿ, ਸਾ ਦੁਵਿਧਾਪਿ ਇਧ ਅਧਿਪ੍ਪੇਤਾ.
ਮਿਚ੍ਛਾਦਿਟ੍ਠੀਤਿ ਪਜਾਨਾਤੀਤਿ ਮਿਚ੍ਛਾਦਿਟ੍ਠਿਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਲਕ੍ਖਣਪਟਿਵੇਧੇਨ ਆਰਮ੍ਮਣਤੋ ਪਜਾਨਾਤਿ, ਸਮ੍ਮਾਦਿਟ੍ਠਿਂ ਕਿਚ੍ਚਤੋ ਅਸਮ੍ਮੋਹਤੋ ਪਜਾਨਾਤਿ. ਸਾਸ੍ਸ ਹੋਤਿ ਸਮ੍ਮਾਦਿਟ੍ਠੀਤਿ ਸਾ ਏਵਂ ਪਜਾਨਨਾ ਅਸ੍ਸ ਸਮ੍ਮਾਦਿਟ੍ਠਿ ਨਾਮ ਹੋਤਿ.
ਦ੍ਵਾਯਂ ਵਦਾਮੀਤਿ ਦ੍ਵਯਂ ਵਦਾਮਿ, ਦੁਵਿਧਕੋਟ੍ਠਾਸਂ ਵਦਾਮੀਤਿ ਅਤ੍ਥੋ. ਪੁਞ੍ਞਭਾਗਿਯਾਤਿ ਪੁਞ੍ਞਕੋਟ੍ਠਾਸਭੂਤਾ. ਉਪਧਿਵੇਪਕ੍ਕਾਤਿ ਉਪਧਿਸਙ੍ਖਾਤਸ੍ਸ ਵਿਪਾਕਸ੍ਸ ਦਾਯਿਕਾ.
ਪਞ੍ਞਾ ਪਞ੍ਞਿਨ੍ਦ੍ਰਿਯਨ੍ਤਿਆਦੀਸੁ ਵਿਭਜਿਤ੍ਵਾ ਵਿਭਜਿਤ੍ਵਾ ਅਮਤਦ੍ਵਾਰਂ ਪਞ੍ਞਪੇਤਿ ਦਸ੍ਸੇਤੀਤਿ ਪਞ੍ਞਾ. ਤਸ੍ਮਿਂ ਅਤ੍ਥੇ ਇਨ੍ਦਤ੍ਤਂ ਕਰੋਤੀਤਿ ਪਞ੍ਞਿਨ੍ਦ੍ਰਿਯਂ. ਅਵਿਜ੍ਜਾਯ ਨ ਕਮ੍ਪਤੀਤਿ ਪਞ੍ਞਾਬਲਂ. ਬੋਜ੍ਝਙ੍ਗਪ੍ਪਤ੍ਤਾ ਹੁਤ੍ਵਾ ਚਤੁਸਚ੍ਚਧਮ੍ਮੇ ਵਿਚਿਨਾਤੀਤਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ. ਮਗ੍ਗਸਮ੍ਪਤ੍ਤਿਯਾ ਪਸਟ੍ਠਾ ਸੋਭਨਾ ਦਿਟ੍ਠੀਤਿ ਸਮ੍ਮਾਦਿਟ੍ਠਿ. ਅਰਿਯਮਗ੍ਗਸ੍ਸ ਅਙ੍ਗਨ੍ਤਿ ਮਗ੍ਗਙ੍ਗਂ. ਸੋਤਿ ਸੋ ਭਿਕ੍ਖੁ. ਪਹਾਨਾਯਾਤਿ ਪਜਹਨਤ੍ਥਾਯ. ਉਪਸਮ੍ਪਦਾਯਾਤਿ ਪਟਿਲਾਭਤ੍ਥਾਯ. ਸਮ੍ਮਾਵਾਯਾਮੋਤਿ ਨਿਯ੍ਯਾਨਿਕੋ ਕੁਸਲਵਾਯਾਮੋ. ਸਤੋਤਿ ਸਤਿਯਾ ਸਮਨ੍ਨਾਗਤੋ ਹੁਤ੍ਵਾ. ਅਨੁਪਰਿਧਾਵਨ੍ਤਿ ਅਨੁਪਰਿਵਤ੍ਤਨ੍ਤੀਤਿ ਸਹਜਾਤਾ ਚ ਪੁਰੇਜਾਤਾ ਚ ਹੁਤ੍ਵਾ ਪਰਿਵਾਰੇਨ੍ਤਿ. ਏਤ੍ਥ ਹਿ ਸਮ੍ਮਾਵਾਯਾਮੋ ਚ ਸਮ੍ਮਾਸਤਿ ਚ ਲੋਕੁਤ੍ਤਰਸਮ੍ਮਾਦਿਟ੍ਠਿਂ ਸਹਜਾਤਾ ਪਰਿਵਾਰੇਨ੍ਤਿ ਰਾਜਾਨਂ ਵਿਯ ਏਕਰਥੇ ਠਿਤਾ ਅਸਿਗ੍ਗਾਹਛਤ੍ਤਗ੍ਗਾਹਾ. ਵਿਪਸ੍ਸਨਾਸਮ੍ਮਾਦਿਟ੍ਠਿ ਪਨ ਪੁਰੇਜਾਤਾ ਹੁਤ੍ਵਾ ਪਰਿਵਾਰੇਤਿ ਰਥਸ੍ਸ ਪੁਰਤੋ ਪਤ੍ਤਿਕਾਦਯੋ ਵਿਯ. ਦੁਤਿਯਪਬ੍ਬਤੋ ਪਟ੍ਠਾਯ ਪਨ ਸਮ੍ਮਾਸਙ੍ਕਪ੍ਪਾਦੀਨਂ ਤਯੋਪਿ ਸਹਜਾਤਪਰਿਵਾਰਾਵ ਹੋਨ੍ਤੀਤਿ ਵੇਦਿਤਬ੍ਬਾ.
੧੩੭. ਮਿਚ੍ਛਾਸਙ੍ਕਪ੍ਪੋਤਿ ਪਜਾਨਾਤੀਤਿ ਮਿਚ੍ਛਾਸਙ੍ਕਪ੍ਪਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਲਕ੍ਖਣਪਟਿਵੇਧੇਨ ਆਰਮ੍ਮਣਤੋ ਪਜਾਨਾਤਿ ਸਮ੍ਮਾਸਙ੍ਕਪ੍ਪਂ ਕਿਚ੍ਚਤੋ ਅਸਮ੍ਮੋਹਤੋ ਪਜਾਨਾਤਿ. ਇਤੋ ਅਪਰੇਸੁ ਸਮ੍ਮਾਵਾਚਾਦੀਸੁਪਿ ਏਵਮੇਵ ਯੋਜਨਾ ਵੇਦਿਤਬ੍ਬਾ. ਕਾਮਸਙ੍ਕਪ੍ਪਾਦਯੋ ਦ੍ਵੇਧਾਵਿਤਕ੍ਕਸੁਤ੍ਤੇ (ਮ. ਨਿ. ੧.੨੦੬) ਵੁਤ੍ਤਾਯੇਵ.
ਤਕ੍ਕੋਤਿਆਦੀਸੁ ਤਕ੍ਕਨਵਸੇਨ ਤਕ੍ਕੋ. ਸ੍ਵੇਵ ਚ ਉਪਸਗ੍ਗੇਨ ਪਦਂ ਵਡ੍ਢੇਤ੍ਵਾ ਵਿਤਕ੍ਕੋਤਿ ਵੁਤ੍ਤੋ, ਸ੍ਵੇਵ ਸਙ੍ਕਪ੍ਪਨਵਸੇਨ ਸਙ੍ਕਪ੍ਪੋ. ਏਕਗ੍ਗੋ ਹੁਤ੍ਵਾ ਆਰਮ੍ਮਣੇ ਅਪ੍ਪੇਤੀਤਿ ਅਪ੍ਪਨਾ. ਉਪਸਗ੍ਗੇਨ ਪਨ ਪਦਂ ਵਡ੍ਢੇਤ੍ਵਾ ਬ੍ਯਪ੍ਪਨਾਤਿ ਵੁਤ੍ਤਂ. ਚੇਤਸੋ ਅਭਿਨਿਰੋਪਨਾਤਿ ਚਿਤ੍ਤਸ੍ਸ ਅਭਿਨਿਰੋਪਨਾ. ਵਿਤਕ੍ਕਸ੍ਮਿਞ੍ਹਿ ਸਤਿ ਵਿਤਕ੍ਕੋ ਆਰਮ੍ਮਣੇ ਚਿਤ੍ਤਂ ਅਭਿਨਿਰੋਪੇਤਿ ਵਿਤਕ੍ਕੇ ਪਨ ਅਸਤਿ ਅਤ੍ਤਨੋਯੇਵ ਧਮ੍ਮਤਾਯ ਚਿਤ੍ਤਂ ਆਰਮ੍ਮਣਂ ਅਭਿਰੁਹਤਿ ਜਾਤਿਸਮ੍ਪਨ੍ਨੋ ਅਭਿਞ੍ਞਾਤਪੁਰਿਸੋ ਵਿਯ ਰਾਜਗੇਹਂ. ਅਨਭਿਞ੍ਞਾਤਸ੍ਸ ਹਿ ਪਟਿਹਾਰੇਨ ਵਾ ਦੋਵਾਰਿਕੇਨ ਵਾ ਅਤ੍ਥੋ ਹੋਤਿ, ਅਭਿਞ੍ਞਾਤਂ ਜਾਤਿਸਮ੍ਪਨ੍ਨਂ ਸਬ੍ਬੇ ਰਾਜਰਾਜਮਹਾਮਤ੍ਤਾ ਜਾਨਨ੍ਤੀਤਿ ਅਤ੍ਤਨੋਵ ਧਮ੍ਮਤਾਯ ਨਿਕ੍ਖਮਤਿ ਚੇਵ ਪਵਿਸਤਿ ਚ, ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ. ਵਾਚਂ ਸਙ੍ਖਰੋਤੀਤਿ ਵਚੀਸਙ੍ਖਾਰੋ. ਏਤ੍ਥ ਚ ਲੋਕਿਯਵਿਤਕ੍ਕੋ ਵਾਚਂ ਸਙ੍ਖਰੋਤਿ, ਨ ਲੋਕੁਤ੍ਤਰੋ. ਕਿਞ੍ਚਾਪਿ ਨ ਸਙ੍ਖਰੋਤਿ, ਵਚੀਸਙ੍ਖਾਰੋਤ੍ਵੇਵ ਚ ਪਨਸ੍ਸ ਨਾਮਂ ਹੋਤਿ. ਸਮ੍ਮਾਸਙ੍ਕਪ੍ਪਂ ਅਨੁਪਰਿਧਾਵਨ੍ਤੀਤਿ ਲੋਕੁਤ੍ਤਰਸਮ੍ਮਾਸਙ੍ਕਪ੍ਪਂ ਪਰਿਵਾਰੇਨ੍ਤਿ. ਏਤ੍ਥ ਚ ਤਯੋਪਿ ਨੇਕ੍ਖਮ੍ਮਸਙ੍ਕਪ੍ਪਾਦਯੋ ਪੁਬ੍ਬਭਾਗੇ ਨਾਨਾਚਿਤ੍ਤੇਸੁ ਲਬ੍ਭਨ੍ਤਿ, ਮਗ੍ਗਕ੍ਖਣੇ ਪਨ ਤਿਣ੍ਣਮ੍ਪਿ ਕਾਮਸਙ੍ਕਪ੍ਪਾਦੀਨਞ੍ਚ ਪਦਚ੍ਛੇਦਂ ਸਮੁਗ੍ਘਾਤਂ ਕਰੋਨ੍ਤੋ ਮਗ੍ਗਙ੍ਗਂ ਪੂਰਯਮਾਨੋ ਏਕੋਵ ਸਮ੍ਮਾਸਙ੍ਕਪ੍ਪੋ ਉਪ੍ਪਜ੍ਜਿਤ੍ਵਾ ਨੇਕ੍ਖਮ੍ਮਸਙ੍ਕਪ੍ਪਾਦਿਵਸੇਨ ਤੀਣਿ ਨਾਮਾਨਿ ਲਭਤਿ. ਪਰਤੋ ਸਮ੍ਮਾਵਾਚਾਦੀਸੁਪਿ ਏਸੇਵ ਨਯੋ.
੧੩੮. ਮੁਸਾਵਾਦਾ ਵੇਰਮਣੀਤਿਆਦੀਸੁ ਵਿਰਤਿਪਿ ਚੇਤਨਾਪਿ ਵਟ੍ਟਤਿ. ਆਰਤੀਤਿਆਦੀਸੁ ਵਚੀਦੁਚ੍ਚਰਿਤੇਹਿ ਆਰਕਾ ਰਮਤੀਤਿ ਆਰਤਿ. ਵਿਨਾ ਤੇਹਿ ਰਮਤੀਤਿ ਵਿਰਤਿ. ਤਤੋ ਤਤੋ ਪਟਿਨਿਵਤ੍ਤਾਵ ਹੁਤ੍ਵਾ ਤੇਹਿ ਵਿਨਾ ਰਮਤੀਤਿ ਪਟਿਵਿਰਤਿ. ਉਪਸਗ੍ਗਵਸੇਨ ਵਾ ਪਦਂ ਵਡ੍ਢਿਤਂ, ਸਬ੍ਬਮਿਦਂ ਓਰਮਨਭਾਵਸ੍ਸੇਵ ਅਧਿਵਚਨਂ. ਵੇਰਂ ਮਣਤਿ ਵਿਨਾਸੇਤੀਤਿ ਵੇਰਮਣਿ. ਇਦਮ੍ਪਿ ਓਰਮਨਸ੍ਸੇਵ ਵੇਵਚਨਂ.
੧੩੯. ਪਾਣਾਤਿਪਾਤਾ ਵੇਰਮਣੀਤਿਆਦੀਸੁਪਿ ਚੇਤਨਾ ਵਿਰਤੀਤਿ ਉਭਯਮ੍ਪਿ ਵਟ੍ਟਤਿਯੇਵ.
੧੪੦. ਕੁਹਨਾਤਿਆਦੀਸੁ ਤਿਵਿਧੇਨ ਕੁਹਨਵਤ੍ਥੁਨਾ ਲੋਕਂ ਏਤਾਯ ਕੁਹਯਨ੍ਤਿ ਵਿਮ੍ਹਾਪਯਨ੍ਤੀਤਿ ਕੁਹਨਾ. ਲਾਭਸਕ੍ਕਾਰਤ੍ਥਿਕਾ ਹੁਤ੍ਵਾ ਏਤਾਯ ਲਪਨ੍ਤੀਤਿ ਲਪਨਾ. ਨਿਮਿਤ੍ਤਂ ਸੀਲਮੇਤੇਸਨ੍ਤਿ ਨੇਮਿਤ੍ਤਿਕਾ, ਤੇਸਂ ਭਾਵੋ ਨੇਮਿਤ੍ਤਿਕਤਾ. ਨਿਪ੍ਪੇਸੋ ਸੀਲਮੇਤੇਸਨ੍ਤਿ ਨਿਪ੍ਪੇਸਿਕਾ, ਤੇਸਂ ਭਾਵੋ ਨਿਪ੍ਪੇਸਿਕਤਾ. ਲਾਭੇਨ ਲਾਭਂ ਨਿਜਿਗੀਸਨ੍ਤਿ ਮਗ੍ਗਨ੍ਤਿ ਪਰਿਯੇਸਨ੍ਤੀਤਿ ਲਾਭੇਨ ਲਾਭਂ ਨਿਜਿਗੀਸਨਾ, ਤੇਸਂ ਭਾਵੋ ਲਾਭੇਨ ਲਾਭਂ ਨਿਜਿਗੀਸਨਤਾ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੇਨ ਪਨੇਤਾ ਕੁਹਨਾਦਿਕਾ ਵਿਸੁਦ੍ਧਿਮਗ੍ਗੇ ਸੀਲਨਿਦ੍ਦੇਸੇਯੇਵ ਪਾਲ਼ਿਞ੍ਚ ਅਟ੍ਠਕਥਞ੍ਚ ਆਹਰਿਤ੍ਵਾ ਪਕਾਸਿਤਾ. ਮਿਚ੍ਛਾਆਜੀਵਸ੍ਸ ਪਹਾਨਾਯਾਤਿ ਏਤ੍ਥ ਨ ਕੇਵਲਂ ਪਾਲ਼ਿਯਂ ਆਗਤੋਵ ਮਿਚ੍ਛਾਆਜੀਵੋ, ਆਜੀਵਹੇਤੁ ਪਨ ਪਵਤ੍ਤਿਤਾ ਪਾਣਾਤਿਪਾਤਾਦਯੋ ਸਤ੍ਤਕਮ੍ਮਪਥਚੇਤਨਾਪਿ ਮਿਚ੍ਛਾਆਜੀਵੋਵ. ਤਾਸਂਯੇਵ ਸਤ੍ਤਨ੍ਨਂ ਚੇਤਨਾਨਂ ਪਦਪਚ੍ਛੇਦਂ ਸਮੁਗ੍ਘਾਤਂ ਕੁਰੁਮਾਨਂ ਮਗ੍ਗਙ੍ਗਂ ਪੂਰਯਮਾਨਾ ਉਪ੍ਪਨ੍ਨਾ ਵਿਰਤਿ ਸਮ੍ਮਾਆਜੀਵੋ ਨਾਮ.
੧੪੧. ਸਮ੍ਮਾਦਿਟ੍ਠਿਸ੍ਸਾਤਿ ਮਗ੍ਗਸਮ੍ਮਾਦਿਟ੍ਠਿਯਂ ਠਿਤਸ੍ਸ ਪੁਗ੍ਗਲਸ੍ਸ. ਸਮ੍ਮਾਸਙ੍ਕਪ੍ਪੋ ਪਹੋਤੀਤਿ ਮਗ੍ਗਸਮ੍ਮਾਸਙ੍ਕਪ੍ਪੋ ਪਹੋਤਿ, ਫਲਸਮ੍ਮਾਦਿਟ੍ਠਿਸ੍ਸਪਿ ਫਲਸਮ੍ਮਾਸਙ੍ਕਪ੍ਪੋ ਪਹੋਤੀਤਿ ਏਵਂ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਸਮ੍ਮਾਞਾਣਸ੍ਸ ਸਮ੍ਮਾਵਿਮੁਤ੍ਤੀਤਿ ਏਤ੍ਥ ਪਨ ਮਗ੍ਗਸਮ੍ਮਾਸਮਾਧਿਮ੍ਹਿ ਠਿਤਸ੍ਸ ਮਗ੍ਗਪਚ੍ਚਵੇਕ੍ਖਣਂ ਸਮ੍ਮਾਞਾਣਂ ਪਹੋਤਿ, ਫਲਸਮ੍ਮਾਸਮਾਧਿਮ੍ਹਿ ਠਿਤਸ੍ਸ ਫਲਪਚ੍ਚਵੇਕ੍ਖਣਂ ਸਮ੍ਮਾਞਾਣਂ ਪਹੋਤਿ. ਮਗ੍ਗਪਚ੍ਚਵੇਕ੍ਖਣਸਮ੍ਮਾਞਾਣੇ ਚ ਠਿਤਸ੍ਸ ਮਗ੍ਗਸਮ੍ਮਾਵਿਮੁਤ੍ਤਿ ਪਹੋਤਿ, ਫਲਪਚ੍ਚਵੇਕ੍ਖਣਸਮ੍ਮਾਞਾਣੇ ਠਿਤਸ੍ਸ ਫਲਸਮ੍ਮਾਵਿਮੁਤ੍ਤਿ ਪਹੋਤੀਤਿ ਅਤ੍ਥੋ. ਏਤ੍ਥ ਚ ਠਪੇਤ੍ਵਾ ਅਟ੍ਠ ਫਲਙ੍ਗਾਨਿ ਸਮ੍ਮਾਞਾਣਂ ਪਚ੍ਚਵੇਕ੍ਖਣਂ ਕਤ੍ਵਾ ਸਮ੍ਮਾਵਿਮੁਤ੍ਤਿਂ ਫਲਂ ਕਾਤੁਂ ਵਟ੍ਟਤੀਤਿ ਵੁਤ੍ਤਂ.
੧੪੨. ਸਮ੍ਮਾਦਿਟ੍ਠਿਸ੍ਸ, ਭਿਕ੍ਖਵੇ, ਮਿਚ੍ਛਾਦਿਟ੍ਠਿ ਨਿਜ੍ਜਿਣ੍ਣਾ ਹੋਤੀਤਿਆਦੀਸੁ ਅਵਸੇਸਨਿਕਾਯਭਾਣਕਾ ਫਲਂ ਕਥਿਤਨ੍ਤਿ ਵਦਨ੍ਤਿ, ਮਜ੍ਝਿਮਭਾਣਕਾ ਪਨ ਦਸਨ੍ਨਂ ਨਿਜ੍ਜਰਵਤ੍ਥੂਨਂ ਆਗਤਟ੍ਠਾਨੇ ਮਗ੍ਗੋ ਕਥਿਤੋਤਿ ਵਦਨ੍ਤਿ. ਤਤ੍ਥ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਵੇਦਿਤਬ੍ਬਾ, ਵਿਦਿਤਕਰਣਟ੍ਠੇਨ ਸਮ੍ਮਾਞਾਣਂ, ਤਦਧਿਮੁਤ੍ਤਟ੍ਠੇਨ ਸਮ੍ਮਾਵਿਮੁਤ੍ਤਿ.
ਵੀਸਤਿ ਕੁਸਲਪਕ੍ਖਾਤਿ ਸਮ੍ਮਾਦਿਟ੍ਠਿਆਦਯੋ ਦਸ, ‘‘ਸਮ੍ਮਾਦਿਟ੍ਠਿਪਚ੍ਚਯਾ ਚ ਅਨੇਕੇ ਕੁਸਲਾ ਧਮ੍ਮਾ’’ਤਿਆਦਿਨਾ ਨਯੇਨ ਵੁਤ੍ਤਾ ਦਸਾਤਿ ਏਵਂ ਵੀਸਤਿ ਕੁਸਲਪਕ੍ਖਾ ਹੋਨ੍ਤਿ. ਵੀਸਤਿ ਅਕੁਸਲਪਕ੍ਖਾਤਿ ‘‘ਮਿਚ੍ਛਾਦਿਟ੍ਠਿ ਨਿਜ੍ਜਿਣ੍ਣਾ ਹੋਤੀ’’ਤਿਆਦਿਨਾ ਨਯੇਨ ਵੁਤ੍ਤਾ ਮਿਚ੍ਛਾਦਿਟ੍ਠਿਆਦਯੋ ਦਸ, ‘‘ਯੇ ਚ ਮਿਚ੍ਛਾਦਿਟ੍ਠਿਪਚ੍ਚਯਾ ਅਨੇਕੇ ਪਾਪਕਾ’’ਤਿਆਦਿਨਾ ਵੁਤ੍ਤਾ ਦਸ ਚਾਤਿ ਏਵਂ ਵੀਸਤਿ ਅਕੁਸਲਪਕ੍ਖਾ ਵੇਦਿਤਬ੍ਬਾ. ਮਹਾਚਤ੍ਤਾਰੀਸਕੋਤਿ ਮਹਾਵਿਪਾਕਦਾਨੇਨ ਮਹਨ੍ਤਾਨਂ ਕੁਸਲਪਕ੍ਖਿਕਾਨਞ੍ਚੇਵ ਅਕੁਸਲਪਕ੍ਖਿਕਾਨਞ੍ਚ ਚਤ੍ਤਾਰੀਸਾਯ ਧਮ੍ਮਾਨਂ ਪਕਾਸਿਤਤ੍ਤਾ ਮਹਾਚਤ੍ਤਾਰੀਸਕੋਤਿ.
ਇਮਸ੍ਮਿਞ੍ਚ ਪਨ ਸੁਤ੍ਤੇ ਪਞ੍ਚ ਸਮ੍ਮਾਦਿਟ੍ਠਿਯੋ ਕਥਿਤਾ ਵਿਪਸ੍ਸਨਾਸਮ੍ਮਾਦਿਟ੍ਠਿ ਕਮ੍ਮਸ੍ਸਕਤਾਸਮ੍ਮਾਦਿਟ੍ਠਿ ਮਗ੍ਗਸਮ੍ਮਾਦਿਟ੍ਠਿ ਫਲਸਮ੍ਮਾਦਿਟ੍ਠਿ ਪਚ੍ਚਵੇਕ੍ਖਣਾਸਮ੍ਮਾਦਿਟ੍ਠੀਤਿ. ਤਤ੍ਥ ‘‘ਮਿਚ੍ਛਾਦਿਟ੍ਠਿਂ ਮਿਚ੍ਛਾਦਿਟ੍ਠੀਤਿ ਪਜਾਨਾਤੀ’’ਤਿਆਦਿਨਾ ਨਯੇਨ ਵੁਤ੍ਤਾ ਵਿਪਸ੍ਸਨਾਸਮ੍ਮਾਦਿਟ੍ਠਿ ਨਾਮ. ‘‘ਅਤ੍ਥਿ ਦਿਨ੍ਨ’’ਨ੍ਤਿਆਦਿਨਾ ਨਯੇਨ ਵੁਤ੍ਤਾ ਕਮ੍ਮਸ੍ਸਕਤਾਸਮ੍ਮਾਦਿਟ੍ਠਿ ਨਾਮ. ‘‘ਸਮ੍ਮਾਦਿਟ੍ਠਿਸ੍ਸ, ਭਿਕ੍ਖਵੇ, ਸਮ੍ਮਾਸਙ੍ਕਪ੍ਪੋ ਪਹੋਤੀ’’ਤਿ ਏਤ੍ਥ ਪਨ ਮਗ੍ਗਸਮ੍ਮਾਦਿਟ੍ਠਿ ਫਲਸਮ੍ਮਾਦਿਟ੍ਠੀਤਿ ਦ੍ਵੇਪਿ ਕਥਿਤਾ. ‘‘ਸਮ੍ਮਾਞਾਣਂ ਪਹੋਤੀ’’ਤਿ. ਏਤ੍ਥ ਪਨ ਪਚ੍ਚਵੇਕ੍ਖਣਾਸਮ੍ਮਾਦਿਟ੍ਠਿ ਕਥਿਤਾਤਿ ਵੇਦਿਤਬ੍ਬਾ.
੧੪੩. ਸਮ੍ਮਾਦਿਟ੍ਠਿਂ ਚੇ ਭਵਂ ਗਰਹਤੀਤਿ ਮਿਚ੍ਛਾਦਿਟ੍ਠਿ ਨਾਮਾਯਂ ਸੋਭਨਾਤਿ ਵਦਨ੍ਤੋਪਿ ਸਮ੍ਮਾਦਿਟ੍ਠਿ ਨਾਮਾਯਂ ਨ ਸੋਭਨਾਤਿ ਵਦਨ੍ਤੋਪਿ ਸਮ੍ਮਾਦਿਟ੍ਠਿਂ ਗਰਹਤਿ ਨਾਮ. ਓਕ੍ਕਲਾਤਿ ਓਕ੍ਕਲਜਨਪਦਵਾਸਿਨੋ. ਵਸ੍ਸਭਞ੍ਞਾਤਿ ਵਸ੍ਸੋ ਚ ਭਞ੍ਞੋ ਚਾਤਿ ਦ੍ਵੇ ਜਨਾ. ਅਹੇਤੁਵਾਦਾਤਿ ਨਤ੍ਥਿ ਹੇਤੁ ਨਤ੍ਥਿ ਪਚ੍ਚਯੋ ਸਤ੍ਤਾਨਂ ਵਿਸੁਦ੍ਧਿਯਾਤਿ ਏਵਮਾਦਿਵਾਦਿਨੋ. ਅਕਿਰਿਯਵਾਦਾਤਿ ਕਰੋਤੋ ਨ ਕਰੀਯਤਿ ਪਾਪਨ੍ਤਿ ਏਵਂ ਕਿਰਿਯਪਟਿਕ੍ਖੇਪਵਾਦਿਨੋ. ਨਤ੍ਥਿਕਵਾਦਾਤਿ ਨਤ੍ਥਿ ਦਿਨ੍ਨਨ੍ਤਿਆਦਿਵਾਦਿਨੋ. ਤੇ ਇਮੇਸੁ ਤੀਸੁਪਿ ਦਸ੍ਸਨੇਸੁ ਓਕ੍ਕਨ੍ਤਨਿਯਾਮਾ ਅਹੇਸੁਂ. ਕਥਂ ਪਨੇਤੇਸੁ ਨਿਯਾਮੋ ਹੋਤੀਤਿ. ਯੋ ਹਿ ਏਵਰੂਪਂ ਲਦ੍ਧਿਂ ਗਹੇਤ੍ਵਾ ਰਤ੍ਤਿਟ੍ਠਾਨਦਿਵਾਟ੍ਠਾਨੇ ਨਿਸਿਨ੍ਨੋ ਸਜ੍ਝਾਯਤਿ ਵੀਮਂਸਤਿ, ਤਸ੍ਸ ‘‘ਨਤ੍ਥਿ ਹੇਤੁ ਨਤ੍ਥਿ ਪਚ੍ਚਯੋ ਕਰੋਤੋ ਨ ਕਰੀਯਤਿ ਪਾਪਂ, ਨਤ੍ਥਿ ਦਿਨ੍ਨਂ, ਕਾਯਸ੍ਸ ਭੇਦਾ ਉਚ੍ਛਿਜ੍ਜਤੀ’’ਤਿ ਤਸ੍ਮਿਂ ਆਰਮ੍ਮਣੇ ਮਿਚ੍ਛਾਸਤਿ ਸਨ੍ਤਿਟ੍ਠਤਿ, ਚਿਤ੍ਤਂ ਏਕਗ੍ਗਂ ਹੋਤਿ, ਜਵਨਾਨਿ ਜਵਨ੍ਤਿ. ਪਠਮਜਵਨੇ ਸਤੇਕਿਚ੍ਛੋ ਹੋਤਿ, ਤਥਾ ਦੁਤਿਯਾਦੀਸੁ. ਸਤ੍ਤਮੇ ਬੁਦ੍ਧਾਨਮ੍ਪਿ ਅਤੇਕਿਚ੍ਛੋ ਅਨਿਵਤ੍ਤੀ ਅਰਿਟ੍ਠਕਣ੍ਡਕਸਦਿਸੋ ਹੋਤਿ.
ਤਤ੍ਥ ਕੋਚਿ ਏਕਂ ਦਸ੍ਸਨਂ ਓਕ੍ਕਮਤਿ, ਕੋਚਿ ਦ੍ਵੇ, ਕੋਚਿ ਤੀਣਿਪਿ, ਨਿਯਤਮਿਚ੍ਛਾਦਿਟ੍ਠਿਕੋਵ ਹੋਤਿ, ਪਤ੍ਤੋ ਸਗ੍ਗਮਗ੍ਗਾਵਰਣਞ੍ਚੇਵ ਮੋਕ੍ਖਮਗ੍ਗਾਵਰਣਞ੍ਚ. ਅਭਬ੍ਬੋ ਤਸ੍ਸ ਅਤ੍ਤਭਾਵਸ੍ਸ ਅਨਨ੍ਤਰਂ ਸਗ੍ਗਮ੍ਪਿ ਗਨ੍ਤੁਂ, ਪਗੇਵ ਮੋਕ੍ਖਂ, ਵਟ੍ਟਖਾਣੁ ਨਾਮੇਸ ਸਤ੍ਤੋ ਪਥਵੀਗੋਪਕੋ, ਯੇਭੁਯ੍ਯੇਨ ਏਵਰੂਪਸ੍ਸ ਭਵਤੋ ਵੁਟ੍ਠਾਨਂ ਨਤ੍ਥਿ. ਵਸ੍ਸਭਞ੍ਞਾਪਿ ਏਦਿਸਾ ਅਹੇਸੁਂ. ਨਿਨ੍ਦਾਬ੍ਯਾਰੋਸਉਪਾਰਮ੍ਭਭਯਾਤਿ ਅਤ੍ਤਨੋ ਨਿਨ੍ਦਾਭਯੇਨ ਘਟ੍ਟਨਭਯੇਨ ਉਪਵਾਦਭਯੇਨ ਚਾਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਮਹਾਚਤ੍ਤਾਰੀਸਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.