੬. ਇਸਿਗਿਲਿਸੁਤ੍ਤਵਣ੍ਣਨਾ

੧੩੩. ਏਵਂ ਮੇ ਸੁਤਨ੍ਤਿ ਇਸਿਗਿਲਿਸੁਤ੍ਤਂ. ਤਤ੍ਥ ਅਞ੍ਞਾਵ ਸਮਞ੍ਞਾ ਅਹੋਸੀਤਿ ਇਸਿਗਿਲਿਸ੍ਸ ਇਸਿਗਿਲੀਤਿ ਸਮਞ੍ਞਾਯ ਉਪ੍ਪਨ੍ਨਕਾਲੇ ਵੇਭਾਰੋ ਨ ਵੇਭਾਰੋਤਿ ਪਞ੍ਞਾਯਿਤ੍ਥ, ਅਞ੍ਞਾਯੇਵਸ੍ਸ ਸਮਞ੍ਞਾ ਅਹੋਸਿ. ਅਞ੍ਞਾ ਪਞ੍ਞਤ੍ਤੀਤਿ ਇਦਂ ਪੁਰਿਮਪਦਸ੍ਸੇਵ ਵੇਵਚਨਂ. ਸੇਸੇਸੁਪਿ ਏਸੇਵ ਨਯੋ.

ਤਦਾ ਕਿਰ ਭਗਵਾ ਸਾਯਨ੍ਹਸਮਯੇ ਸਮਾਪਤ੍ਤਿਤੋ ਵੁਟ੍ਠਾਯ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਯਸ੍ਮਿਂ ਠਾਨੇ ਨਿਸਿਨ੍ਨਾਨਂ ਪਞ੍ਚ ਪਬ੍ਬਤਾ ਪਞ੍ਞਾਯਨ੍ਤਿ, ਤਤ੍ਥ ਭਿਕ੍ਖੁਸਙ੍ਘਪਰਿਵੁਤੋ ਨਿਸੀਦਿਤ੍ਵਾ ਇਮੇ ਪਞ੍ਚ ਪਬ੍ਬਤੇ ਪਟਿਪਾਟਿਯਾ ਆਚਿਕ੍ਖਿ. ਤਤ੍ਥ ਨ ਭਗਵਤੋ ਪਬ੍ਬਤੇਹਿ ਅਤ੍ਥੋ ਅਤ੍ਥਿ, ਇਤਿ ਇਮੇਸੁ ਪਨ ਪਬ੍ਬਤੇਸੁ ਪਟਿਪਾਟਿਯਾ ਕਥਿਯਮਾਨੇਸੁ ਇਸਿਗਿਲਿਸ੍ਸ ਇਸਿਗਿਲਿਭਾਵੋ ਕਥੇਤਬ੍ਬੋ ਹੋਤਿ. ਤਸ੍ਮਿਂ ਕਥਿਯਮਾਨੇ ਪਦੁਮਵਤਿਯਾ ਪੁਤ੍ਤਾਨਂ ਪਞ੍ਚਸਤਾਨਂ ਪਚ੍ਚੇਕਬੁਦ੍ਧਾਨਂ ਨਾਮਾਨਿ ਚੇਵ ਪਦੁਮਵਤਿਯਾ ਚ ਪਤ੍ਥਨਾ ਕਥੇਤਬ੍ਬਾ ਭਵਿਸ੍ਸਤੀਤਿ ਭਗਵਾ ਇਮਂ ਪਞ੍ਚ ਪਬ੍ਬਤਪਟਿਪਾਟਿਂ ਆਚਿਕ੍ਖਿ.

ਪਵਿਸਨ੍ਤਾ ਦਿਸ੍ਸਨ੍ਤਿ ਪਵਿਟ੍ਠਾ ਨ ਦਿਸ੍ਸਨ੍ਤੀਤਿ ਯਥਾਫਾਸੁਕਟ੍ਠਾਨੇ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚਾ ਆਗਨ੍ਤ੍ਵਾ ਚੇਤਿਯਗਬ੍ਭੇ ਯਮਕਮਹਾਦ੍ਵਾਰਂ ਵਿਵਰਨ੍ਤਾ ਵਿਯ ਤਂ ਪਬ੍ਬਤਂ ਦ੍ਵੇਧਾ ਕਤ੍ਵਾ ਅਨ੍ਤੋ ਪਵਿਸਿਤ੍ਵਾ ਰਤ੍ਤਿਟ੍ਠਾਨਦਿਵਾਟ੍ਠਾਨਾਨਿ ਮਾਪੇਤ੍ਵਾ ਤਤ੍ਥ ਵਸਿਂਸੁ, ਤਸ੍ਮਾ ਏਵਮਾਹ. ਇਮੇ ਇਸੀਤਿ ਇਮੇ ਪਚ੍ਚੇਕਬੁਦ੍ਧਇਸੀ.

ਕਦਾ ਪਨ ਤੇ ਤਤ੍ਥ ਵਸਿਂਸੁ? ਅਤੀਤੇ ਕਿਰ ਅਨੁਪ੍ਪਨ੍ਨੇ ਤਥਾਗਤੇ ਬਾਰਾਣਸਿਂ ਉਪਨਿਸ੍ਸਾਯ ਏਕਸ੍ਮਿਂ ਗਾਮਕੇ ਏਕਾ ਕੁਲਧੀਤਾ ਖੇਤ੍ਤਂ ਰਕ੍ਖਮਾਨਾ ਏਕਸ੍ਸ ਪਚ੍ਚੇਕਬੁਦ੍ਧਸ੍ਸ ਪਞ੍ਚਹਿ ਲਾਜਾਸਤੇਹਿ ਸਦ੍ਧਿਂ ਏਕਂ ਪਦੁਮਪੁਪ੍ਫਂ ਦਤ੍ਵਾ ਪਞ੍ਚ ਪੁਤ੍ਤਸਤਾਨਿ ਪਤ੍ਥੇਸਿ. ਤਸ੍ਮਿਂਯੇਵ ਚ ਖਣੇ ਪਞ੍ਚਸਤਾ ਮਿਗਲੁਦ੍ਦਕਾ ਮਧੁਰਮਂਸਂ ਦਤ੍ਵਾ ‘‘ਏਤਿਸ੍ਸਾ ਪੁਤ੍ਤਾ ਭਵੇਯ੍ਯਾਮਾ’’ਤਿ ਪਤ੍ਥਯਿਂਸੁ. ਸਾ ਯਾਵਤਾਯੁਕਂ ਠਤ੍ਵਾ ਦੇਵਲੋਕੇ ਨਿਬ੍ਬਤ੍ਤਾ, ਤਤੋ ਚੁਤਾ ਜਾਤਸ੍ਸਰੇ ਪਦੁਮਗਬ੍ਭੇ ਨਿਬ੍ਬਤ੍ਤਿ. ਤਮੇਕੋ ਤਾਪਸੋ ਦਿਸ੍ਵਾ ਪਟਿਜਗ੍ਗਿ, ਤਸ੍ਸਾ ਵਿਚਰਨ੍ਤਿਯਾਵ ਪਾਦੁਦ੍ਧਾਰੇ ਪਾਦੁਦ੍ਧਾਰੇ ਭੂਮਿਤੋ ਪਦੁਮਾਨਿ ਉਟ੍ਠਹਨ੍ਤਿ. ਏਕੋ ਵਨਚਰਕੋ ਦਿਸ੍ਵਾ ਬਾਰਾਣਸਿਰਞ੍ਞੋ ਆਰੋਚੇਸਿ. ਰਾਜਾ ਨਂ ਆਹਰਾਪੇਤ੍ਵਾ ਅਗ੍ਗਮਹੇਸਿਂ ਅਕਾਸਿ, ਤਸ੍ਸਾ ਗਬ੍ਭੋ ਸਣ੍ਠਾਸਿ. ਮਹਾਪਦੁਮਕੁਮਾਰੋ ਮਾਤੁਕੁਚ੍ਛਿਯਂ ਵਸਿ, ਸੇਸਾ ਗਬ੍ਭਮਲਂ ਨਿਸ੍ਸਾ ਨਿਬ੍ਬਤ੍ਤਾ. ਵਯਪ੍ਪਤ੍ਤਾ ਉਯ੍ਯਾਨੇ ਪਦੁਮਸ੍ਸਰੇ ਕੀਲ਼ਨ੍ਤਾ ਏਕੇਕਸ੍ਮਿਂ ਪਦੁਮੇ ਨਿਸੀਦਿਤ੍ਵਾ ਖਯਵਯਂ ਪਟ੍ਠਪੇਤ੍ਵਾ ਪਚ੍ਚੇਕਬੋਧਿਞਾਣਂ ਨਿਬ੍ਬਤ੍ਤਯਿਂਸੁ. ਅਯਂ ਤੇਸਂ ਬ੍ਯਾਕਰਣਗਾਥਾ ਅਹੋਸਿ –

‘‘ਸਰੋਰੁਹਂ ਪਦੁਮਪਲਾਸਪਤ੍ਤਜਂ, ਸੁਪੁਪ੍ਫਿਤਂ ਭਮਰਗਣਾਨੁਚਿਣ੍ਣਂ;

ਅਨਿਚ੍ਚਤਾਯੁਪਗਤਂ ਵਿਦਿਤ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ’’ਤਿ.

ਤਸ੍ਮਿਂ ਕਾਲੇ ਤੇ ਤਤ੍ਥ ਵਸਿਂਸੁ, ਤਦਾ ਚਸ੍ਸ ਪਬ੍ਬਤਸ੍ਸ ਇਸਿਗਿਲੀਤਿ ਸਮਞ੍ਞਾ ਉਦਪਾਦਿ.

੧੩੫. ਯੇ ਸਤ੍ਤਸਾਰਾਤਿ ਅਰਿਟ੍ਠੋ ਉਪਰਿਟ੍ਠੋ ਤਗਰਸਿਖੀ ਯਸਸ੍ਸੀ ਸੁਦਸ੍ਸਨੋ ਪਿਯਦਸ੍ਸੀ ਗਨ੍ਧਾਰੋ ਪਿਣ੍ਡੋਲੋ ਉਪਾਸਭੋ ਨੀਤੋ ਤਥੋ ਸੁਤਵਾ ਭਾਵਿਤਤ੍ਤੋਤਿ ਤੇਰਸਨ੍ਨਂ ਪਚ੍ਚੇਕਬੁਦ੍ਧਾਨਂ ਨਾਮਾਨਿ ਵਤ੍ਵਾ ਇਦਾਨਿ ਤੇਸਞ੍ਚ ਅਞ੍ਞੇਸਞ੍ਚ ਗਾਥਾਬਨ੍ਧੇਨ ਨਾਮਾਨਿ ਆਚਿਕ੍ਖਨ੍ਤੋ ਯੇ ਸਤ੍ਤਸਾਰਾਤਿਆਦਿਮਾਹ. ਤਤ੍ਥ ਸਤ੍ਤਸਾਰਾਤਿ ਸਤ੍ਤਾਨਂ ਸਾਰਭੂਤਾ. ਅਨੀਘਾਤਿ ਨਿਦ੍ਦੁਕ੍ਖਾ. ਨਿਰਾਸਾਤਿ ਨਿਤ੍ਤਣ੍ਹਾ.

ਦ੍ਵੇ ਜਾਲਿਨੋਤਿ ਚੂਲ਼ਜਾਲਿ ਮਹਾਜਾਲੀਤਿ ਦ੍ਵੇ ਜਾਲਿਨਾਮਕਾ. ਸਨ੍ਤਚਿਤ੍ਤੋਤਿ ਇਦਮ੍ਪਿ ਏਕਸ੍ਸ ਨਾਮਮੇਵ. ਪਸ੍ਸਿ ਜਹਿ ਉਪਧਿਦੁਕ੍ਖਮੂਲਨ੍ਤਿ ਏਤ੍ਥ ਪਸ੍ਸਿ ਨਾਮ ਸੋ ਪਚ੍ਚੇਕਬੁਦ੍ਧੋ, ਦੁਕ੍ਖਸ੍ਸ ਪਨ ਮੂਲਂ ਉਪਧਿਂ ਜਹੀਤਿ ਅਯਮਸ੍ਸ ਥੁਤਿ. ਅਪਰਾਜਿਤੋਤਿਪਿ ਏਕਸ੍ਸ ਨਾਮਮੇਵ.

ਸਤ੍ਥਾ ਪਵਤ੍ਤਾ ਸਰਭਙ੍ਗੋ ਲੋਮਹਂਸੋ ਉਚ੍ਚਙ੍ਗਮਾਯੋਤਿ ਇਮੇ ਪਞ੍ਚ ਜਨਾ. ਅਸਿਤੋ ਅਨਾਸਵੋ ਮਨੋਮਯੋਤਿ ਇਮੇਪਿ ਤਯੋ ਜਨਾ. ਮਾਨਚ੍ਛਿਦੋ ਚ ਬਨ੍ਧੁਮਾਤਿ ਬਨ੍ਧੁਮਾ ਨਾਮ ਏਕੋ, ਮਾਨਸ੍ਸ ਪਨ ਛਿਨ੍ਨਤ੍ਤਾ ਮਾਨਚ੍ਛਿਦੋਤਿ ਵੁਤ੍ਤੋ. ਤਦਾਧਿਮੁਤ੍ਤੋਤਿਪਿ ਨਾਮਮੇਵ.

ਕੇਤੁਮ੍ਭਰਾਗੋ ਚ ਮਾਤਙ੍ਗੋ ਅਰਿਯੋਤਿ ਇਮੇ ਤਯੋ ਜਨਾ. ਅਥਚ੍ਚੁਤੋਤਿ ਅਥ ਅਚ੍ਚੁਤੋ. ਅਚ੍ਚੁਤਗਾਮਬ੍ਯਾਮਙ੍ਕੋਤਿ ਇਮੇ ਦ੍ਵੇ ਜਨਾ. ਖੇਮਾਭਿਰਤੋ ਚ ਸੋਰਤੋਤਿ ਇਮੇ ਦ੍ਵੇਯੇਵ.

ਸਯ੍ਹੋ ਅਨੋਮਨਿਕ੍ਕਮੋਤਿ ਸਯ੍ਹੋ ਨਾਮ ਸੋ ਬੁਦ੍ਧੋ, ਅਨੋਮਵੀਰਿਯਤ੍ਤਾ ਪਨ ਅਨੋਮਨਿਕ੍ਕਮੋਤਿ ਵੁਤ੍ਤੋ. ਆਨਨ੍ਦੋ ਨਨ੍ਦੋ ਉਪਨਨ੍ਦੋ ਦ੍ਵਾਦਸਾਤਿ ਚਤ੍ਤਾਰੋ ਆਨਨ੍ਦਾ, ਚਤ੍ਤਾਰੋ ਨਨ੍ਦਾ ਚਤ੍ਤਾਰੋ ਉਪਨਨ੍ਦਾਤਿ ਏਵਂ ਦ੍ਵਾਦਸ. ਭਾਰਦ੍ਵਾਜੋ ਅਨ੍ਤਿਮਦੇਹਧਾਰੀਤਿ ਭਾਰਦ੍ਵਾਜੋ ਨਾਮ ਸੋ ਬੁਦ੍ਧੋ. ਅਨ੍ਤਿਮਦੇਹਧਾਰੀਤਿ ਥੁਤਿ.

ਤਣ੍ਹਚ੍ਛਿਦੋਤਿ ਸਿਖਰਿਸ੍ਸਾਯਂ ਥੁਤਿ. ਵੀਤਰਾਗੋਤਿ ਮਙ੍ਗਲਸ੍ਸ ਥੁਤਿ. ਉਸਭਚ੍ਛਿਦਾ ਜਾਲਿਨਿਂ ਦੁਕ੍ਖਮੂਲਨ੍ਤਿ ਉਸਭੋ ਨਾਮ ਸੋ ਬੁਦ੍ਧੋ ਦੁਕ੍ਖਮੂਲਭੂਤਂ ਜਾਲਿਨਿਂ ਅਚ੍ਛਿਦਾਤਿ ਅਤ੍ਥੋ. ਸਨ੍ਤਂ ਪਦਂ ਅਜ੍ਝਗਮੋਪਨੀਤੋਤਿ ਉਪਨੀਤੋ ਨਾਮ ਸੋ ਬੁਦ੍ਧੋ ਸਨ੍ਤਂ ਪਦਂ ਅਜ੍ਝਗਮਾ. ਵੀਤਰਾਗੋਤਿਪਿ ਏਕਸ੍ਸ ਨਾਮਮੇਵ. ਸੁਵਿਮੁਤ੍ਤਚਿਤ੍ਤੋਤਿ ਅਯਂ ਕਣ੍ਹਸ੍ਸ ਥੁਤਿ.

ਏਤੇ ਚ ਅਞ੍ਞੇ ਚਾਤਿ ਏਤੇ ਪਾਲ਼ਿਯਂ ਆਗਤਾ ਚ ਪਾਲ਼ਿਯਂ ਅਨਾਗਤਾ ਅਞ੍ਞੇ ਚ ਏਤੇਸਂ ਏਕਨਾਮਕਾਯੇਵ. ਇਮੇਸੁ ਹਿ ਪਞ੍ਚਸੁ ਪਚ੍ਚੇਕਬੁਦ੍ਧਸਤੇਸੁ ਦ੍ਵੇਪਿ ਤਯੋਪਿ ਦਸਪਿ ਦ੍ਵਾਦਸਪਿ ਆਨਨ੍ਦਾਦਯੋ ਵਿਯ ਏਕਨਾਮਕਾ ਅਹੇਸੁਂ. ਇਤਿ ਪਾਲ਼ਿਯਂ ਆਗਤਨਾਮੇਹੇਵ ਸਬ੍ਬੇਸਂ ਨਾਮਾਨਿ ਵੁਤ੍ਤਾਨਿ ਹੋਨ੍ਤੀਤਿ ਇਤੋ ਪਰਂ ਵਿਸੁਂ ਵਿਸੁਂ ਅਵਤ੍ਵਾ ‘‘ਏਤੇ ਚ ਅਞ੍ਞੇ ਚਾ’’ਤਿ ਆਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਇਸਿਗਿਲਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.