੯. ਮਹਾਪੁਣ੍ਣਮਸੁਤ੍ਤਵਣ੍ਣਨਾ

੮੫. ਏਵਂ ਮੇ ਸੁਤਨ੍ਤਿ ਮਹਾਪੁਣ੍ਣਮਸੁਤ੍ਤਂ. ਤਤ੍ਥ ਤਦਹੂਤਿ ਤਸ੍ਮਿਂ ਅਹੁ, ਤਸ੍ਮਿਂ ਦਿਵਸੇਤਿ ਅਤ੍ਥੋ. ਉਪਵਸਨ੍ਤਿ ਏਤ੍ਥਾਤਿ ਉਪੋਸਥੋ. ਉਪਵਸਨ੍ਤੀਤਿ ਸੀਲੇਨ ਵਾ ਅਨਸਨੇਨ ਵਾ ਉਪੇਤਾ ਹੁਤ੍ਵਾ ਵਸਨ੍ਤੀਤਿ ਅਤ੍ਥੋ. ਅਯਂ ਪਨੇਤ੍ਥ ਅਤ੍ਥੁਦ੍ਧਾਰੋ – ‘‘ਆਯਾਮ, ਆਵੁਸੋ, ਕਪ੍ਪਿਨ, ਉਪੋਸਥਂ ਗਮਿਸ੍ਸਾਮਾ’’ਤਿਆਦੀਸੁ ਹਿ ਪਾਤਿਮੋਕ੍ਖੁਦ੍ਦੇਸੋ ਉਪੋਸਥੋ. ‘‘ਅਟ੍ਠਙ੍ਗਸਮਨ੍ਨਾਗਤੋ ਖੋ ਵਿਸਾਖੇ ਉਪੋਸਥੋ ਉਪਵੁਤ੍ਥੋ’’ਤਿਆਦੀਸੁ (ਅ. ਨਿ. ੮.੫੩) ਸੀਲਂ. ‘‘ਸੁਦ੍ਧਸ੍ਸ ਵੇ ਸਦਾ ਫਗ੍ਗੁ, ਸੁਦ੍ਧਸ੍ਸੁਪੋਸਥੋ ਸਦਾ’’ਤਿਆਦੀਸੁ (ਮ. ਨਿ. ੧.੭੯) ਉਪਵਾਸੋ. ‘‘ਉਪੋਸਥੋ ਨਾਮ ਨਾਗਰਾਜਾ’’ਤਿਆਦੀਸੁ (ਦੀ. ਨਿ. ੨.੨੪੬) ਪਞ੍ਞਤ੍ਤਿ. ‘‘ਨ, ਭਿਕ੍ਖਵੇ, ਤਦਹੁਪੋਸਥੇ ਸਭਿਕ੍ਖੁਕਾ ਆਵਾਸਾ’’ਤਿਆਦੀਸੁ (ਮਹਾਵ. ੧੮੧) ਉਪਵਸਿਤਬ੍ਬਦਿਵਸੋ. ਇਧਾਪਿ ਸੋਯੇਵ ਅਧਿਪ੍ਪੇਤੋ. ਸੋ ਪਨੇਸ ਅਟ੍ਠਮੀਚਾਤੁਦ੍ਦਸੀਪਨ੍ਨਰਸੀਭੇਦੇਨ ਤਿਵਿਧੋ. ਤਸ੍ਮਾ ਸੇਸਦ੍ਵਯਨਿਵਾਰਣਤ੍ਥਂ ਪਨ੍ਨਰਸੇਤਿ ਵੁਤ੍ਤਂ. ਤੇਨ ਵੁਤ੍ਤਂ ‘‘ਉਪਵਸਨ੍ਤਿ ਏਤ੍ਥਾਤਿ ਉਪੋਸਥੋ’’ਤਿ. ਮਾਸਪੁਣ੍ਣਤਾਯ ਪੁਣ੍ਣਾ ਸਂਪੁਣ੍ਣਾਤਿ ਪੁਣ੍ਣਾ. ਮਾ-ਇਤਿ ਚਨ੍ਦੋ ਵੁਚ੍ਚਤਿ, ਸੋ ਏਤ੍ਥ ਪੁਣ੍ਣੋਤਿ ਪੁਣ੍ਣਮਾ. ਏਵਂ ਪੁਣ੍ਣਾਯ ਪੁਣ੍ਣਮਾਯਾਤਿ ਇਮਸ੍ਮਿਂ ਪਦਦ੍ਵਯੇ ਅਤ੍ਥੋ ਵੇਦਿਤਬ੍ਬੋ.

ਦੇਸਨ੍ਤਿ ਕਾਰਣਂ. ਤੇਨ ਹਿ ਤ੍ਵਂ ਭਿਕ੍ਖੁ ਸਕੇ ਆਸਨੇ ਨਿਸੀਦਿਤ੍ਵਾ ਪੁਚ੍ਛਾਤਿ ਕਸ੍ਮਾ ਭਗਵਾ ਠਿਤਸ੍ਸ ਅਕਥੇਤ੍ਵਾ ਨਿਸੀਦਾਪੇਸੀਤਿ. ਅਯਂ ਕਿਰ ਭਿਕ੍ਖੁ ਸਟ੍ਠਿਮਤ੍ਤਾਨਂ ਪਧਾਨਿਯਭਿਕ੍ਖੂਨਂ ਸਙ੍ਘਤ੍ਥੇਰੋ ਸਟ੍ਠਿ ਭਿਕ੍ਖੂ ਗਹੇਤ੍ਵਾ ਅਰਞ੍ਞੇ ਵਸਤਿ, ਤੇ ਤਸ੍ਸ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਘਟੇਨ੍ਤਿ ਵਾਯਮਨ੍ਤਿ. ਮਹਾਭੂਤਾਨਿ ਪਰਿਗ੍ਗਣ੍ਹਨ੍ਤਿ ਉਪਾਦਾਰੂਪਾਨਿ, ਨਾਮਰੂਪਪਚ੍ਚਯਲਕ੍ਖਣਾਰਮ੍ਮਣਿਕਵਿਪਸ੍ਸਨਂ ਪਰਿਗ੍ਗਣ੍ਹਨ੍ਤਿ. ਅਥ ਨੇ ਆਚਰਿਯੁਪਟ੍ਠਾਨਂ ਆਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸਿਨ੍ਨੇ ਥੇਰੋ ਮਹਾਭੂਤਪਰਿਗ੍ਗਹਾਦੀਨਿ ਪੁਚ੍ਛਤਿ. ਤੇ ਸਬ੍ਬਂ ਕਥੇਨ੍ਤਿ, ਮਗ੍ਗਫਲਪਞ੍ਹਂ ਪੁਚ੍ਛਿਤਾ ਪਨ ਕਥੇਤੁਂ ਨ ਸਕ੍ਕੋਨ੍ਤਿ. ਅਥ ਥੇਰੋ ਚਿਨ੍ਤੇਸਿ – ‘‘ਮਮ ਸਨ੍ਤਿਕੇ ਏਤੇਸਂ ਓਵਾਦਸ੍ਸ ਪਰਿਹਾਨਿ ਨਤ੍ਥਿ, ਇਮੇ ਚ ਆਰਦ੍ਧਵੀਰਿਯਾ ਵਿਹਰਨ੍ਤਿ. ਕੁਕ੍ਕੁਟਸ੍ਸ ਪਾਨੀਯਪਿਵਨਕਾਲਮਤ੍ਤਮ੍ਪਿ ਨੇਸਂ ਪਮਾਦਕਿਰਿਯਾ ਨਤ੍ਥਿ. ਏਵਂ ਸਨ੍ਤੇਪਿ ਮਗ੍ਗਫਲਾਨਿ ਨਿਬ੍ਬਤ੍ਤੇਤੁਂ ਨ ਸਕ੍ਕੋਨ੍ਤਿ. ਅਹਂ ਇਮੇਸਂ ਅਜ੍ਝਾਸਯਂ ਨ ਜਾਨਾਮਿ, ਬੁਦ੍ਧਵੇਨੇਯ੍ਯਾ ਏਤੇ ਭਵਿਸ੍ਸਨ੍ਤਿ, ਗਹੇਤ੍ਵਾ ਨੇ ਸਤ੍ਥੁ ਸਨ੍ਤਿਕਂ ਗਚ੍ਛਾਮਿ, ਅਥ ਨੇਸਂ ਸਤ੍ਥਾ ਚਰਿਯਵਸੇਨ ਧਮ੍ਮਂ ਦੇਸੇਸ੍ਸਤੀ’’ਤਿ, ਤੇ ਭਿਕ੍ਖੂ ਗਹੇਤ੍ਵਾ ਸਤ੍ਥੁ ਸਨ੍ਤਿਕਂ ਆਗਤੋ.

ਸਤ੍ਥਾਪਿ ਸਾਯਨ੍ਹਸਮਯੇ ਆਨਨ੍ਦਤ੍ਥੇਰੇਨ ਉਪਨੀਤਂ ਉਦਕਂ ਆਦਾਯ ਸਰੀਰਂ ਉਤੁਂ ਗਣ੍ਹਾਪੇਤ੍ਵਾ ਮਿਗਾਰਮਾਤੁਪਾਸਾਦਪਰਿਵੇਣੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸੀਦਿ, ਭਿਕ੍ਖੁਸਙ੍ਘੋਪਿ ਨਂ ਪਰਿਵਾਰੇਤ੍ਵਾ ਨਿਸੀਦਿ.

ਤਸ੍ਮਿਂ ਸਮਯੇ ਸੂਰਿਯੋ ਅਤ੍ਥਙ੍ਗਮੇਤਿ, ਚਨ੍ਦੋ ਉਗ੍ਗਚ੍ਛਤਿ, ਮਜ੍ਝਟ੍ਠਾਨੇ ਚ ਭਗਵਾ ਨਿਸਿਨ੍ਨੋ. ਚਨ੍ਦਸ੍ਸ ਪਭਾ ਨਤ੍ਥਿ, ਸੂਰਿਯਸ੍ਸ ਪਭਾ ਨਤ੍ਥਿ, ਚਨ੍ਦਿਮਸੂਰਿਯਾਨਂ ਪਭਂ ਮਕ੍ਖੇਤ੍ਵਾ ਛਬ੍ਬਣ੍ਣਾ ਯਮਕਬੁਦ੍ਧਰਸ੍ਮਿਯੋ ਵਿਜ੍ਜੋਤਮਾਨਾ ਪੁਞ੍ਜਾ ਪੁਞ੍ਜਾ ਹੁਤ੍ਵਾ ਦਿਸਾਵਿਦਿਸਾਸੁ ਧਾਵਨ੍ਤੀਤਿ ਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨ ਵਿਤ੍ਥਾਰੇਤਬ੍ਬਂ. ਵਣ੍ਣਭੂਮਿ ਨਾਮੇਸਾ, ਧਮ੍ਮਕਥਿਕਸ੍ਸੇਵੇਤ੍ਥ ਥਾਮੋ ਪਮਾਣਂ, ਯਤ੍ਤਕਂ ਸਕ੍ਕੋਤਿ, ਤਤ੍ਤਕਂ ਕਥੇਤਬ੍ਬਂ. ਦੁਕ੍ਕਥਿਤਨ੍ਤਿ ਨ ਵਤ੍ਤਬ੍ਬਂ. ਏਵਂ ਸਨ੍ਨਿਸਿਨ੍ਨਾਯ ਪਰਿਸਾਯ ਥੇਰੋ ਉਟ੍ਠਹਿਤ੍ਵਾ ਸਤ੍ਥਾਰਂ ਪਞ੍ਹਸ੍ਸ ਓਕਾਸਂ ਕਾਰੇਸਿ. ਤਤੋ ਭਗਵਾ – ‘‘ਸਚੇ ਇਮਸ੍ਮਿਂ ਠਿਤਕੇ ਪੁਚ੍ਛਨ੍ਤੇ ‘ਆਚਰਿਯੋ ਨੋ ਉਟ੍ਠਿਤੋ’ਤਿ ਸੇਸਭਿਕ੍ਖੂ ਉਟ੍ਠਹਿਸ੍ਸਨ੍ਤਿ, ਏਵਂ ਤਥਾਗਤੇ ਅਗਾਰਵੋ ਕਤੋ ਭਵਿਸ੍ਸਤਿ. ਅਥ ਨਿਸਿਨ੍ਨਾਵ ਪੁਚ੍ਛਿਸ੍ਸਨ੍ਤਿ, ਆਚਰਿਯੇ ਅਗਾਰਵੋ ਕਤੋ ਭਵਿਸ੍ਸਤਿ, ਏਕਗ੍ਗਾ ਹੁਤ੍ਵਾ ਧਮ੍ਮਦੇਸਨਂ ਪਟਿਚ੍ਛਿਤੁਂ ਨ ਸਕ੍ਕੁਣਿਸ੍ਸਨ੍ਤਿ. ਆਚਰਿਯੇ ਪਨ ਨਿਸਿਨ੍ਨੇ ਤੇਪਿ ਨਿਸੀਦਿਸ੍ਸਨ੍ਤਿ. ਤਤੋ ਏਕਗ੍ਗਾ ਧਮ੍ਮਦੇਸਨਂ ਪਟਿਚ੍ਛਿਤੁਂ ਸਕ੍ਕੁਣਿਸ੍ਸਨ੍ਤੀ’’ਤਿ ਇਮਿਨਾ ਕਾਰਣੇਨ ਭਗਵਾ ਠਿਤਸ੍ਸ ਅਕਥੇਤ੍ਵਾ ਨਿਸੀਦਾਪੇਤੀਤਿ.

ਇਮੇ ਨੁ ਖੋ, ਭਨ੍ਤੇਤਿ ਵਿਮਤਿਪੁਚ੍ਛਾ ਵਿਯ ਕਥਿਤਾ. ਥੇਰੋ ਪਨ ਪਞ੍ਚਕ੍ਖਨ੍ਧਾਨਂ ਉਦਯਬ੍ਬਯਂ ਪਰਿਗ੍ਗਣ੍ਹਿਤ੍ਵਾ ਅਰਹਤ੍ਤਂ ਪਤ੍ਤੋ ਮਹਾਖੀਣਾਸਵੋ, ਨਤ੍ਥਿ ਏਤਸ੍ਸ ਵਿਮਤਿ. ਜਾਨਨ੍ਤੇਨਪਿ ਪਨ ਅਜਾਨਨ੍ਤੇਨ ਵਿਯ ਹੁਤ੍ਵਾ ਪੁਚ੍ਛਿਤੁਂ ਵਟ੍ਟਤਿ. ਸਚੇ ਹਿ ਜਾਨਨ੍ਤੋ ਵਿਯ ਪੁਚ੍ਛਤਿ, ‘‘ਜਾਨਾਤਿ ਅਯ’’ਨ੍ਤਿ ਤਸ੍ਸ ਤਸ੍ਸ ਵਿਸ੍ਸਜ੍ਜੇਨ੍ਤੋ ਏਕਦੇਸਮੇਵ ਕਥੇਤਿ. ਅਜਾਨਨ੍ਤੇਨ ਵਿਯ ਪੁਚ੍ਛਿਤੇ ਪਨ ਕਥੇਨ੍ਤੋ ਇਤੋ ਚ ਏਤ੍ਤੋ ਚ ਕਾਰਣਂ ਆਹਰਿਤ੍ਵਾ ਪਾਕਟਂ ਕਤ੍ਵਾ ਕਥੇਤਿ. ਕੋਚਿ ਪਨ ਅਜਾਨਨ੍ਤੋਪਿ ਜਾਨਨ੍ਤੋ ਵਿਯ ਪੁਚ੍ਛਤਿ. ਥੇਰੋ ਏਵਰੂਪਂ ਵਚਨਂ ਕਿਂ ਕਰਿਸ੍ਸਤਿ, ਜਾਨਨ੍ਤੋਯੇਵ ਪਨ ਅਜਾਨਨ੍ਤੋ ਵਿਯ ਪੁਚ੍ਛਤੀਤਿ ਵੇਦਿਤਬ੍ਬੋ.

ਛਨ੍ਦਮੂਲਕਾਤਿ ਤਣ੍ਹਾਮੂਲਕਾ. ਏਵਂਰੂਪੋ ਸਿਯਨ੍ਤਿ ਸਚੇ ਓਦਾਤੋ ਹੋਤੁਕਾਮੋ, ਹਰਿਤਾਲਵਣ੍ਣੋ ਵਾ ਮਨੋਸਿਲਾਵਣ੍ਣੋ ਵਾ ਸਿਯਨ੍ਤਿ ਪਤ੍ਥੇਤਿ. ਸਚੇ ਕਾਲ਼ੋ ਹੋਤੁਕਾਮੋ, ਨੀਲੁਪ੍ਪਲਵਣ੍ਣੋ ਵਾ ਅਞ੍ਜਨਵਣ੍ਣੋ ਵਾ ਅਤਸੀਪੁਪ੍ਫਵਣ੍ਣੋ ਵਾ ਸਿਯਨ੍ਤਿ ਪਤ੍ਥੇਤਿ. ਏਵਂਵੇਦਨੋਤਿ ਕੁਸਲਵੇਦਨੋ ਵਾ ਸੁਖਵੇਦਨੋ ਵਾ ਸਿਯਨ੍ਤਿ ਪਤ੍ਥੇਤਿ. ਸਞ੍ਞਾਦੀਸੁਪਿ ਏਸੇਵ ਨਯੋ. ਯਸ੍ਮਾ ਪਨ ਅਤੀਤੇ ਪਤ੍ਥਨਾ ਨਾਮ ਨਤ੍ਥਿ, ਪਤ੍ਥੇਨ੍ਤੇਨਾਪਿ ਚ ਨ ਸਕ੍ਕਾ ਤਂ ਲਦ੍ਧੁਂ, ਪਚ੍ਚੁਪ੍ਪਨ੍ਨੇਪਿ ਨ ਹੋਤਿ, ਨ ਹਿ ਓਦਾਤੋ ਕਾਲ਼ਭਾਵਂ ਪਤ੍ਥੇਤ੍ਵਾ ਪਚ੍ਚੁਪ੍ਪਨ੍ਨੇ ਕਾਲ਼ੋ ਹੋਤਿ, ਨ ਕਾਲ਼ੋ ਵਾ ਓਦਾਤੋ, ਦੀਘੋ ਵਾ ਰਸ੍ਸੋ, ਰਸ੍ਸੋ ਵਾ ਦੀਘੋ, ਦਾਨਂ ਪਨ ਦਤ੍ਵਾ ਸੀਲਂ ਵਾ ਸਮਾਦਿਯਿਤ੍ਵਾ ‘‘ਅਨਾਗਤੇ ਖਤ੍ਤਿਯੋ ਵਾ ਹੋਮਿ ਬ੍ਰਾਹ੍ਮਣੋ ਵਾ’’ਤਿ ਪਤ੍ਥੇਨ੍ਤਸ੍ਸ ਪਤ੍ਥਨਾ ਸਮਿਜ੍ਝਤਿ. ਤਸ੍ਮਾ ਅਨਾਗਤਮੇਵ ਗਹਿਤਂ.

ਖਨ੍ਧਾਧਿਵਚਨਨ੍ਤਿ ਖਨ੍ਧਾਨਂ ਖਨ੍ਧਪਣ੍ਣਤ੍ਤਿ ਕਿਤ੍ਤਕੇਨ ਹੋਤੀਤਿ ਪੁਚ੍ਛਤਿ.

ਮਹਾਭੂਤਾ ਹੇਤੂਤਿ ‘‘ਤਯੋ ਕੁਸਲਹੇਤੂ’’ਤਿਆਦੀਸੁ (ਧ. ਸ. ੧੪੪੧) ਹਿ ਹੇਤੁਹੇਤੁ ਵੁਤ੍ਤੋ. ਅਵਿਜ੍ਜਾ ਪੁਞ੍ਞਾਭਿਸਙ੍ਖਾਰਾਦੀਨਂ ਸਾਧਾਰਣਤ੍ਤਾ ਸਾਧਾਰਣਹੇਤੁ. ਕੁਸਲਾਕੁਸਲਂ ਅਤ੍ਤਨੋ ਅਤ੍ਤਨੋ ਵਿਪਾਕਦਾਨੇ ਉਤ੍ਤਮਹੇਤੁ. ਇਧ ਪਚ੍ਚਯਹੇਤੁ ਅਧਿਪ੍ਪੇਤੋ. ਤਤ੍ਥ ਪਥਵੀਧਾਤੁ ਮਹਾਭੂਤਂ ਇਤਰੇਸਂ ਤਿਣ੍ਣਂ ਭੂਤਾਨਂ ਉਪਾਦਾਰੂਪਸ੍ਸ ਚ ਪਞ੍ਞਾਪਨਾਯ ਦਸ੍ਸਨਤ੍ਥਾਯ ਹੇਤੁ ਚੇਵ ਪਚ੍ਚਯੋ ਚ. ਏਵਂ ਸੇਸੇਸੁਪਿ ਯੋਜਨਾ ਵੇਦਿਤਬ੍ਬਾ.

ਫਸ੍ਸੋਤਿ ‘‘ਫੁਟ੍ਠੋ, ਭਿਕ੍ਖਵੇ, ਵੇਦੇਤਿ, ਫੁਟ੍ਠੋ ਸਞ੍ਜਾਨਾਤਿ, ਫੁਟ੍ਠੋ ਚੇਤੇਤੀ’’ਤਿ (ਸਂ. ਨਿ. ੪.੯੩) ਵਚਨਤੋ ਫਸ੍ਸੋ ਤਿਣ੍ਣਂ ਖਨ੍ਧਾਨਂ ਪਞ੍ਞਾਪਨਾਯ ਹੇਤੁ ਚੇਵ ਪਚ੍ਚਯੋ ਚ. ਵਿਞ੍ਞਾਣਕ੍ਖਨ੍ਧਸ੍ਸਾਤਿ ਏਤ੍ਥ ਪਟਿਸਨ੍ਧਿਵਿਞ੍ਞਾਣੇਨ ਤਾਵ ਸਦ੍ਧਿਂ ਗਬ੍ਭਸੇਯ੍ਯਕਾਨਂ ਉਪਰਿਮਪਰਿਚ੍ਛੇਦੇਨ ਸਮਤਿਂਸ ਰੂਪਾਨਿ ਸਮ੍ਪਯੁਤ੍ਤਾ ਚ ਤਯੋ ਖਨ੍ਧਾ ਉਪ੍ਪਜ੍ਜਨ੍ਤਿ, ਤਂ ਨਾਮਰੂਪਂ ਪਟਿਸਨ੍ਧਿਵਿਞ੍ਞਾਣਸ੍ਸ ਪਞ੍ਞਾਪਨਾਯ ਹੇਤੁ ਚੇਵ ਪਚ੍ਚਯੋ ਚ. ਚਕ੍ਖੁਦ੍ਵਾਰੇ ਚਕ੍ਖੁਪਸਾਦੋ ਚੇਵ ਰੂਪਾਰਮ੍ਮਣਞ੍ਚ ਰੂਪਂ, ਸਮ੍ਪਯੁਤ੍ਤਾ ਤਯੋ ਖਨ੍ਧਾ ਨਾਮਂ. ਤਂ ਨਾਮਰੂਪਂ ਚਕ੍ਖੁਵਿਞ੍ਞਾਣਸ੍ਸ ਪਞ੍ਞਾਪਨਾਯ ਹੇਤੁ ਚੇਵ ਪਚ੍ਚਯੋ ਚ. ਏਸੇਵ ਨਯੋ ਸੇਸਵਿਞ੍ਞਾਣੇਸੁ.

੮੭. ਕਥਂ ਪਨ, ਭਨ੍ਤੇਤਿ ਇਦਂ ਕਿਤ੍ਤਕੇਨ ਨੁ ਖੋਤਿ ਵਟ੍ਟਂ ਪੁਚ੍ਛਨ੍ਤੋ ਏਵਮਾਹ. ਸਕ੍ਕਾਯਦਿਟ੍ਠਿ ਨ ਹੋਤੀਤਿ ਇਦਂ ਵਿਵਟ੍ਟਂ ਪੁਚ੍ਛਨ੍ਤੋ ਏਵਮਾਹ.

੮੮. ਅਯਂ ਰੂਪੇ ਅਸ੍ਸਾਦੋਤਿ ਇਮਿਨਾ ਪਰਿਞ੍ਞਾਪਟਿਵੇਧੋ ਚੇਵ ਦੁਕ੍ਖਸਚ੍ਚਞ੍ਚ ਕਥਿਤਂ. ਅਯਂ ਰੂਪੇ ਆਦੀਨਵੋਤਿ ਇਮਿਨਾ ਪਹਾਨਪਟਿਵੇਧੋ ਚੇਵ ਸਮੁਦਯਸਚ੍ਚਞ੍ਚ. ਇਦਂ ਰੂਪੇ ਨਿਸ੍ਸਰਣਨ੍ਤਿ ਇਮਿਨਾ ਸਚ੍ਛਿਕਿਰਿਯਾਪਟਿਵੇਧੋ ਚੇਵ ਨਿਰੋਧਸਚ੍ਚਞ੍ਚ. ਯੇ ਇਮੇਸੁ ਤੀਸੁ ਠਾਨੇਸੁ ਸਮ੍ਮਾਦਿਟ੍ਠਿਆਦਯੋ ਧਮ੍ਮਾ, ਅਯਂ ਭਾਵਨਾਪਟਿਵੇਧੋ ਮਗ੍ਗਸਚ੍ਚਂ. ਸੇਸਪਦੇਸੁਪਿ ਏਸੇਵ ਨਯੋ.

੮੯. ਬਹਿਦ੍ਧਾਤਿ ਪਰਸ੍ਸ ਸਵਿਞ੍ਞਾਣਕੇ ਕਾਯੇ. ਸਬ੍ਬਨਿਮਿਤ੍ਤੇਸੂਤਿ ਇਮਿਨਾ ਪਨ ਅਨਿਨ੍ਦ੍ਰਿਯਬਦ੍ਧਮ੍ਪਿ ਸਙ੍ਗਣ੍ਹਾਤਿ. ‘‘ਸਵਿਞ੍ਞਾਣਕੇ ਕਾਯੇ’’ਤਿ ਵਚਨੇਨ ਵਾ ਅਤ੍ਤਨੋ ਚ ਪਰਸ੍ਸ ਚ ਕਾਯੋ ਗਹਿਤੋਵ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤਗ੍ਗਹਣੇਨ ਅਨਿਨ੍ਦ੍ਰਿਯਬਦ੍ਧਂ ਗਣ੍ਹਾਤਿ.

੯੦. ਅਨਤ੍ਤਕਤਾਨੀਤਿ ਅਨਤ੍ਤਨਿ ਠਤ੍ਵਾ ਕਤਾਨਿ. ਕਮਤ੍ਤਾਨਂ ਫੁਸਿਸ੍ਸਨ੍ਤੀਤਿ ਕਤਰਸ੍ਮਿਂ ਅਤ੍ਤਨਿ ਠਤ੍ਵਾ ਵਿਪਾਕਂ ਦਸ੍ਸੇਨ੍ਤੀਤਿ ਸਸ੍ਸਤਦਸ੍ਸਨਂ ਓਕ੍ਕਮਨ੍ਤੋ ਏਵਮਾਹ. ਤਣ੍ਹਾਧਿਪਤੇਯ੍ਯੇਨਾਤਿ ਤਣ੍ਹਾਜੇਟ੍ਠਕੇਨ. ਤਤ੍ਰ ਤਤ੍ਰਾਤਿ ਤੇਸੁ ਤੇਸੁ ਧਮ੍ਮੇਸੁ. ਸਟ੍ਠਿਮਤ੍ਤਾਨਨ੍ਤਿ ਇਮੇ ਭਿਕ੍ਖੂ ਪਕਤਿਕਮ੍ਮਟ੍ਠਾਨਂ ਜਹਿਤ੍ਵਾ ਅਞ੍ਞਂ ਨਵਕਮ੍ਮਟ੍ਠਾਨਂ ਸਮ੍ਮਸਨ੍ਤਾ ਪਲ੍ਲਙ੍ਕਂ ਅਭਿਨ੍ਦਿਤ੍ਵਾ ਤਸ੍ਮਿਂਯੇਵ ਆਸਨੇ ਅਰਹਤ੍ਤਂ ਪਾਪੁਣਿਂਸੁ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਪੁਣ੍ਣਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.