੧੦. ਚੂਲ਼ਪੁਣ੍ਣਮਸੁਤ੍ਤਵਣ੍ਣਨਾ
੯੧. ਏਵਂ ਮੇ ਸੁਤਨ੍ਤਿ ਚੂਲ਼ਪੁਣ੍ਣਮਸੁਤ੍ਤਂ. ਤਤ੍ਥ ਤੁਣ੍ਹੀਭੂਤਂ ਤੁਣ੍ਹੀਭੂਤਨ੍ਤਿ ਯਂ ਯਂ ਦਿਸਂ ਅਨੁਵਿਲੋਕੇਤਿ, ਤਤ੍ਥ ਤਤ੍ਥ ਤੁਣ੍ਹੀਭੂਤਮੇਵ. ਅਨੁਵਿਲੋਕੇਤ੍ਵਾਤਿ ਪਞ੍ਚਪਸਾਦਪਟਿਮਣ੍ਡਿਤਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਤਤੋ ਤਤੋ ਵਿਲੋਕੇਤ੍ਵਾ ਅਨ੍ਤਮਸੋ ਹਤ੍ਥਕੁਕ੍ਕੁਚ੍ਚਪਾਦਕੁਕ੍ਕੁਚ੍ਚਾਨਮ੍ਪਿ ਅਭਾਵਂ ਦਿਸ੍ਵਾ. ਅਸਪ੍ਪੁਰਿਸੋਤਿ ਪਾਪਪੁਰਿਸੋ. ਨੋ ਹੇਤਂ, ਭਨ੍ਤੇਤਿ ਯਸ੍ਮਾ ਅਨ੍ਧੋ ਅਨ੍ਧਂ ਵਿਯ ਸੋ ਤਂ ਜਾਨਿਤੁਂ ਨ ਸਕ੍ਕੋਤਿ, ਤਸ੍ਮਾ ਏਵਮਾਹਂਸੁ. ਏਤੇਨੇਵ ਨਯੇਨ ਇਤੋ ਪਰੇਸੁਪਿ ਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਅਸ੍ਸਦ੍ਧਸਮਨ੍ਨਾਗਤੋਤਿ ਪਾਪਧਮ੍ਮਸਮਨ੍ਨਾਗਤੋ. ਅਸਪ੍ਪੁਰਿਸਭਤ੍ਤੀਤਿ ਅਸਪ੍ਪੁਰਿਸਸੇਵਨੋ. ਅਸਪ੍ਪੁਰਿਸਚਿਨ੍ਤੀਤਿ ਅਸਪ੍ਪੁਰਿਸਚਿਨ੍ਤਾਯ ਚਿਨ੍ਤਕੋ. ਅਸਪ੍ਪੁਰਿਸਮਨ੍ਤੀਤਿ ਅਸਪ੍ਪੁਰਿਸਮਨ੍ਤਨਂ ਮਨ੍ਤੇਤਾ. ਅਸਪ੍ਪੁਰਿਸਵਾਚੋਤਿ ਅਸਪ੍ਪੁਰਿਸਵਾਚਂ ਭਾਸਿਤਾ. ਅਸਪ੍ਪੁਰਿਸਕਮ੍ਮਨ੍ਤੋਤਿ ਅਸਪ੍ਪੁਰਿਸਕਮ੍ਮਾਨਂ ਕਤ੍ਤਾ. ਅਸਪ੍ਪੁਰਿਸਦਿਟ੍ਠੀਤਿ ਅਸਪ੍ਪੁਰਿਸਦਿਟ੍ਠਿਯਾ ਸਮਨ੍ਨਾਗਤੋ. ਅਸਪ੍ਪੁਰਿਸਦਾਨਨ੍ਤਿ ਅਸਪ੍ਪੁਰਿਸੇਹਿ ਦਾਤਬ੍ਬਂ ਦਾਨਂ. ਤ੍ਯਾਸ੍ਸ ਮਿਤ੍ਤਾਤਿ ਤੇ ਅਸ੍ਸ ਮਿਤ੍ਤਾ. ਅਤ੍ਤਬ੍ਯਾਬਾਧਾਯਪਿ ਚੇਤੇਤੀਤਿ ਪਾਣਂ ਹਨਿਸ੍ਸਾਮਿ, ਅਦਿਨ੍ਨਂ ਆਦਿਯਿਸ੍ਸਾਮਿ, ਮਿਚ੍ਛਾ ਚਰਿਸ੍ਸਾਮਿ, ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਿਸ੍ਸਾਮੀਤਿ ਏਵਂ ਅਤ੍ਤਨੋ ਦੁਕ੍ਖਤ੍ਥਾਯ ਚਿਨ੍ਤੇਤਿ. ਪਰਬ੍ਯਾਬਾਧਾਯਾਤਿ ਯਥਾ ਅਸੁਕੋ ਅਸੁਕਂ ਪਾਣਂ ਹਨ੍ਤਿ, ਅਸੁਕਸ੍ਸ ਸਨ੍ਤਕਂ ਅਦਿਨ੍ਨਂ ਆਦਿਯਤਿ, ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਤਿ, ਏਵਂ ਨਂ ਆਣਾਪੇਸ੍ਸਾਮੀਤਿ ਏਵਂ ਪਰਸ੍ਸ ਦੁਕ੍ਖਤ੍ਥਾਯ ਚਿਨ੍ਤੇਤਿ. ਉਭਯਬ੍ਯਾਬਾਧਾਯਾਤਿ ਅਹਂ ਅਸੁਕਞ੍ਚ ਅਸੁਕਞ੍ਚ ਗਹੇਤ੍ਵਾ ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਿਸ੍ਸਾਮੀਤਿ ਏਵਂ ਉਭਯਦੁਕ੍ਖਤ੍ਥਾਯ ਚਿਨ੍ਤੇਤੀਤਿ.
ਅਤ੍ਤਬ੍ਯਾਬਾਧਾਯਪਿ ਮਨ੍ਤੇਤੀਤਿਆਦੀਸੁ ਅਹਂ ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਿਸ੍ਸਾਮੀਤਿ ਮਨ੍ਤੇਨ੍ਤੋ ਅਤ੍ਤਬ੍ਯਾਬਾਧਾਯ ਮਨ੍ਤੇਤਿ ਨਾਮ. ਅਸੁਕਂ ਦਸ ਅਕੁਸਲਕਮ੍ਮਪਥੇ ਸਮਾਦਪੇਸ੍ਸਾਮੀਤਿ ਮਨ੍ਤੇਨ੍ਤੋ ਪਰਬ੍ਯਾਬਾਧਾਯ ਮਨ੍ਤੇਤਿ ਨਾਮ. ਅਞ੍ਞੇਨ ਸਦ੍ਧਿਂ – ‘‘ਮਯਂ ਉਭੋਪਿ ਏਕਤੋ ਹੁਤ੍ਵਾ ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਿਸ੍ਸਾਮਾ’’ਤਿ ਮਨ੍ਤੇਨ੍ਤੋ ਉਭਯਬ੍ਯਾਬਾਧਾਯ ਮਨ੍ਤੇਤਿ ਨਾਮ.
ਅਸਕ੍ਕਚ੍ਚਂ ਦਾਨਂ ਦੇਤੀਤਿ ਦੇਯ੍ਯਧਮ੍ਮਮ੍ਪਿ ਪੁਗ੍ਗਲਮ੍ਪਿ ਨ ਸਕ੍ਕਰੋਤਿ. ਦੇਯ੍ਯਧਮ੍ਮਂ ਨ ਸਕ੍ਕਰੋਤਿ ਨਾਮ ਉਤ੍ਤਣ੍ਡੁਲਾਦਿਦੋਸਸਮਨ੍ਨਾਗਤਂ ਆਹਾਰਂ ਦੇਤਿ, ਨ ਪਸਨ੍ਨਂ ਕਰੋਤਿ. ਪੁਗ੍ਗਲਂ ਨ ਸਕ੍ਕਰੋਤਿ ਨਾਮ ਨਿਸੀਦਨਟ੍ਠਾਨਂ ਅਸਮ੍ਮਜ੍ਜਿਤ੍ਵਾ ਯਤ੍ਥ ਵਾ ਤਤ੍ਥ ਵਾ ਨਿਸੀਦਾਪੇਤ੍ਵਾ ਯਂ ਵਾ ਤਂ ਵਾ ਆਧਾਰਕਂ ਠਪੇਤ੍ਵਾ ਦਾਨਂ ਦੇਤਿ. ਅਸਹਤ੍ਥਾਤਿ ਅਤ੍ਤਨੋ ਹਤ੍ਥੇਨ, ਨ ਦੇਤਿ, ਦਾਸਕਮ੍ਮਕਾਰਾਦੀਹਿ ਦਾਪੇਤਿ. ਅਚਿਤ੍ਤਿਕਤ੍ਵਾਤਿ ਹੇਟ੍ਠਾ ਵੁਤ੍ਤਨਯੇਨ ਦੇਯ੍ਯਧਮ੍ਮੇਪਿ ਪੁਗ੍ਗਲੇਪਿ ਨ ਚਿਤ੍ਤੀਕਾਰਂ ਕਤ੍ਵਾ ਦੇਤਿ. ਅਪਵਿਦ੍ਧਨ੍ਤਿ ਛਡ੍ਡੇਤੁਕਾਮੋ ਹੁਤ੍ਵਾ ਵਮ੍ਮਿਕੇ ਉਰਗਂ ਪਕ੍ਖਿਪਨ੍ਤੋ ਵਿਯ ਦੇਤਿ. ਅਨਾਗਮਨਦਿਟ੍ਠਿਕੋਤਿ ਨੋ ਫਲਪਾਟਿਕਙ੍ਖੀ ਹੁਤ੍ਵਾ ਦੇਤਿ.
ਤਤ੍ਥ ਉਪਪਜ੍ਜਤੀਤਿ ਨ ਦਾਨਂ ਦਤ੍ਵਾ ਨਿਰਯੇ ਉਪਪਜ੍ਜਤਿ. ਯਂ ਪਨ ਤੇਨ ਪਾਪਲਦ੍ਧਿਕਾਯ ਮਿਚ੍ਛਾਦਸ੍ਸਨਂ ਗਹਿਤਂ, ਤਾਯ ਮਿਚ੍ਛਾਦਿਟ੍ਠਿਯਾ ਨਿਰਯੇ ਉਪਪਜ੍ਜਤਿ. ਸੁਕ੍ਕਪਕ੍ਖੋ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬੋ. ਦੇਵਮਹਤ੍ਤਤਾਤਿ ਛਕਾਮਾਵਚਰਦੇਵਾ. ਮਨੁਸ੍ਸਮਹਤ੍ਤਤਾਤਿ ਤਿਣ੍ਣਂ ਕੁਲਾਨਂ ਸਮ੍ਪਤ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਇਦਂ ਪਨ ਸੁਤ੍ਤਂ ਸੁਦ੍ਧਵਟ੍ਟਵਸੇਨੇਵ ਕਥਿਤਨ੍ਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਚੂਲ਼ਪੁਣ੍ਣਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.