੮. ਗੋਪਕਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ

੭੯. ਏਵਂ ਮੇ ਸੁਤਨ੍ਤਿ ਗੋਪਕਮੋਗ੍ਗਲ੍ਲਾਨਸੁਤ੍ਤਂ. ਤਤ੍ਥ ਅਚਿਰਪਰਿਨਿਬ੍ਬੁਤੇ ਭਗਵਤੀਤਿ ਭਗਵਤਿ ਅਚਿਰਪਰਿਨਿਬ੍ਬੁਤੇ, ਧਾਤੁਭਾਜਨੀਯਂ ਕਤ੍ਵਾ ਧਮ੍ਮਸਙ੍ਗੀਤਿਂ ਕਾਤੁਂ ਰਾਜਗਹਂ ਆਗਤਕਾਲੇ. ਰਞ੍ਞੋ ਪਜ੍ਜੋਤਸ੍ਸ ਆਸਙ੍ਕਮਾਨੋਤਿ ਚਣ੍ਡਪਜ੍ਜੋਤੋ ਨਾਮੇਸ ਰਾਜਾ ਬਿਮ੍ਬਿਸਾਰਮਹਾਰਾਜਸ੍ਸ ਸਹਾਯੋ ਅਹੋਸਿ, ਜੀਵਕਂ ਪੇਸੇਤ੍ਵਾ ਭੇਸਜ੍ਜਕਾਰਿਤਕਾਲਤੋ ਪਟ੍ਠਾਯ ਪਨ ਦਲ਼੍ਹਮਿਤ੍ਤੋਵ ਜਾਤੋ, ਸੋ ‘‘ਅਜਾਤਸਤ੍ਤੁਨਾ ਦੇਵਦਤ੍ਤਸ੍ਸ ਵਚਨਂ ਗਹੇਤ੍ਵਾ ਪਿਤਾ ਘਾਤਿਤੋ’’ਤਿ ਸੁਤ੍ਵਾ ‘‘ਮਮ ਪਿਯਮਿਤ੍ਤਂ ਘਾਤੇਤ੍ਵਾ ਏਸ ਰਜ੍ਜਂ ਕਰਿਸ੍ਸਾਮੀਤਿ ਮਞ੍ਞਤਿ, ਮਯ੍ਹਂ ਸਹਾਯਸ੍ਸ ਸਹਾਯਾਨਂ ਅਤ੍ਥਿਕਭਾਵਂ ਜਾਨਾਪੇਸ੍ਸਾਮੀ’’ਤਿ ਪਰਿਸਤਿ ਵਾਚਂ ਅਭਾਸਿ. ਤਂ ਸੁਤ੍ਵਾ ਤਸ੍ਸ ਆਸਙ੍ਕਾ ਉਪ੍ਪਨ੍ਨਾ. ਤੇਨ ਵੁਤ੍ਤਂ ‘‘ਰਞ੍ਞੋ ਪਜ੍ਜੋਤਸ੍ਸ ਆਸਙ੍ਕਮਾਨੋ’’ਤਿ. ਕਮ੍ਮਨ੍ਤੋਤਿ ਬਹਿਨਗਰੇ ਨਗਰਪਟਿਸਙ੍ਖਾਰਾਪਨਤ੍ਥਾਯ ਕਮ੍ਮਨ੍ਤਟ੍ਠਾਨਂ.

ਉਪਸਙ੍ਕਮੀਤਿ ਮਯਂ ਧਮ੍ਮਵਿਨਯਸਙ੍ਗੀਤਿਂ ਕਾਰੇਸ੍ਸਾਮਾਤਿ ਵਿਚਰਾਮ, ਅਯਞ੍ਚ ਮਹੇਸਕ੍ਖੋ ਰਾਜਵਲ੍ਲਭੋ ਸਙ੍ਗਹੇ ਕਤੇ ਵੇਲ਼ੁਵਨਸ੍ਸ ਆਰਕ੍ਖਂ ਕਰੇਯ੍ਯਾਤਿ ਮਞ੍ਞਮਾਨੋ ਉਪਸਙ੍ਕਮਿ. ਤੇਹਿ ਧਮ੍ਮੇਹੀਤਿ ਤੇਹਿ ਸਬ੍ਬਞ੍ਞੁਤਞ੍ਞਾਣਧਮ੍ਮੇਹਿ. ਸਬ੍ਬੇਨ ਸਬ੍ਬਨ੍ਤਿ ਸਬ੍ਬਾਕਾਰੇਨ ਸਬ੍ਬਂ. ਸਬ੍ਬਥਾ ਸਬ੍ਬਨ੍ਤਿ ਸਬ੍ਬਕੋਟ੍ਠਾਸੇਹਿ ਸਬ੍ਬਂ. ਕਿਂ ਪੁਚ੍ਛਾਮੀਤਿ ਪੁਚ੍ਛਤਿ? ਛ ਹਿ ਸਤ੍ਥਾਰੋ ਪਠਮਤਰਂ ਅਪ੍ਪਞ੍ਞਾਤਕੁਲੇਹਿ ਨਿਕ੍ਖਮਿਤ੍ਵਾ ਪਬ੍ਬਜਿਤਾ, ਤੇ ਤਥਾਗਤੇ ਧਰਮਾਨੇਯੇਵ ਕਾਲਂਕਤਾ, ਸਾਵਕਾਪਿ ਨੇਸਂ ਅਪ੍ਪਞ੍ਞਾਤਕੁਲੇਹੇਵ ਪਬ੍ਬਜਿਤਾ. ਤੇ ਤੇਸਂ ਅਚ੍ਚਯੇਨ ਮਹਾਵਿਵਾਦਂ ਅਕਂਸੁ. ਸਮਣੋ ਪਨ ਗੋਤਮੋ ਮਹਾਕੁਲਾ ਪਬ੍ਬਜਿਤੋ, ਤਸ੍ਸ ਅਚ੍ਚਯੇਨ ਸਾਵਕਾਨਂ ਮਹਾਵਿਵਾਦੋ ਭਵਿਸ੍ਸਤੀਤਿ ਅਯਂ ਕਥਾ ਸਕਲਜਮ੍ਬੁਦੀਪਂ ਪਤ੍ਥਰਮਾਨਾ ਉਦਪਾਦਿ. ਸਮ੍ਮਾਸਮ੍ਬੁਦ੍ਧੇ ਚ ਧਰਨ੍ਤੇ ਭਿਕ੍ਖੂਨਂ ਵਿਵਾਦੋ ਨਾਹੋਸਿ. ਯੋਪਿ ਅਹੋਸਿ, ਸੋਪਿ ਤਤ੍ਥੇਵ ਵੂਪਸਮਿਤੋ. ਪਰਿਨਿਬ੍ਬੁਤਕਾਲੇ ਪਨਸ੍ਸ – ‘‘ਅਟ੍ਠਸਟ੍ਠਿਯੋਜਨਸਤਸਹਸ੍ਸੁਬ੍ਬੇਧਂ ਸਿਨੇਰੁਂ ਅਪਵਾਹਿਤੁਂ ਸਮਤ੍ਥਸ੍ਸ ਵਾਤਸ੍ਸ ਪੁਰਤੋ ਪੁਰਾਣਪਣ੍ਣਂ ਕਿਂ ਠਸ੍ਸਤਿ, ਦਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਤ੍ਤਸ੍ਸ ਸਤ੍ਥੁ ਅਲਜ੍ਜਮਾਨੋ ਮਚ੍ਚੁਰਾਜਾ ਕਸ੍ਸ ਲਜ੍ਜਿਸ੍ਸਤੀ’’ਤਿ ਮਹਾਸਂਵੇਗਂ ਜਨੇਤ੍ਵਾ ਭਿਯ੍ਯੋਸੋਮਤ੍ਤਾਯ ਭਿਕ੍ਖੂ ਸਮਗ੍ਗਾ ਜਾਤਾ ਅਤਿਵਿਯ ਉਪਸਨ੍ਤੁਪਸਨ੍ਤਾ, ਕਿਂ ਨੁ ਖੋ ਏਤਨ੍ਤਿ ਇਦਂ ਪੁਚ੍ਛਾਮੀਤਿ ਪੁਚ੍ਛਤਿ. ਅਨੁਸਞ੍ਞਾਯਮਾਨੋਤਿ ਅਨੁਸਞ੍ਜਾਯਮਾਨੋ, ਕਤਾਕਤਂ ਜਨਨ੍ਤੋਤਿ ਅਤ੍ਥੋ. ਅਨੁਵਿਚਰਮਾਨੋ ਵਾ.

੮੦. ਅਤ੍ਥਿ ਨੁ ਖੋਤਿ ਅਯਮ੍ਪਿ ਹੇਟ੍ਠਿਮਪੁਚ੍ਛਮੇਵ ਪੁਚ੍ਛਤਿ. ਅਪ੍ਪਟਿਸਰਣੇਤਿ ਅਪ੍ਪਟਿਸਰਣੇ ਧਮ੍ਮਵਿਨਯੇ. ਕੋ ਹੇਤੁ ਸਾਮਗ੍ਗਿਯਾਤਿ ਤੁਮ੍ਹਾਕਂ ਸਮਗ੍ਗਭਾਵਸ੍ਸ ਕੋ ਹੇਤੁ ਕੋ ਪਚ੍ਚਯੋ. ਧਮ੍ਮਪ੍ਪਟਿਸਰਣਾਤਿ ਧਮ੍ਮੋ ਅਮ੍ਹਾਕਂ ਪਟਿਸਰਣਂ, ਧਮ੍ਮੋ ਅਵਸ੍ਸਯੋਤਿ ਦੀਪੇਤਿ.

੮੧. ਪਵਤ੍ਤਤੀਤਿ ਪਗੁਣਂ ਹੁਤ੍ਵਾ ਆਗਚ੍ਛਤਿ. ਆਪਤ੍ਤਿ ਹੋਤਿ ਵੀਤਿਕ੍ਕਮੋਤਿ ਉਭਯਮੇਤਂ ਬੁਦ੍ਧਸ੍ਸ ਆਣਾਤਿਕ੍ਕਮਨਮੇਵ. ਯਥਾਧਮ੍ਮਂ ਯਥਾਨੁਸਿਟ੍ਠਂ ਕਾਰੇਮਾਤਿ ਯਥਾ ਧਮ੍ਮੋ ਚ ਅਨੁਸਿਟ੍ਠਿ ਚ ਠਿਤਾ, ਏਵਂ ਕਾਰੇਮਾਤਿ ਅਤ੍ਥੋ.

ਨ ਕਿਰ ਨੋ ਭਵਨ੍ਤੋ ਕਾਰੇਨ੍ਤਿ ਧਮ੍ਮੋ ਨੋ ਕਾਰੇਤੀਤਿ ਪਦਦ੍ਵਯੇਪਿ ਨੋ ਕਾਰੋ ਨਿਪਾਤਮਤ੍ਤਂ. ਏਵਂ ਸਨ੍ਤੇ ਨ ਕਿਰ ਭਵਨ੍ਤੋ ਕਾਰੇਨ੍ਤਿ, ਧਮ੍ਮੋਵ ਕਾਰੇਤੀਤਿ ਅਯਮੇਤ੍ਥ ਅਤ੍ਥੋ.

੮੩. ਤਗ੍ਘਾਤਿ ਏਕਂਸੇ ਨਿਪਾਤੋ. ਕਹਂ ਪਨ ਭਵਂ ਆਨਨ੍ਦੋਤਿ ਕਿਂ ਥੇਰਸ੍ਸ ਵੇਲ਼ੁਵਨੇ ਵਸਨਭਾਵਂ ਨ ਜਾਨਾਤੀਤਿ? ਜਾਨਾਤਿ. ਵੇਲ਼ੁਵਨਸ੍ਸ ਪਨ ਅਨੇਨ ਆਰਕ੍ਖਾ ਦਿਨ੍ਨਾ, ਤਸ੍ਮਾ ਅਤ੍ਤਾਨਂ ਉਕ੍ਕਂਸਾਪੇਤੁਕਾਮੋ ਪੁਚ੍ਛਤਿ. ਕਸ੍ਮਾ ਪਨ ਤੇਨ ਤਤ੍ਥ ਆਰਕ੍ਖਾ ਦਿਨ੍ਨਾ? ਸੋ ਕਿਰ ਏਕਦਿਵਸਂ ਮਹਾਕਚ੍ਚਾਯਨਤ੍ਥੇਰਂ ਗਿਜ੍ਝਕੂਟਾ ਓਤਰਨ੍ਤਂ ਦਿਸ੍ਵਾ – ‘‘ਮਕ੍ਕਟੋ ਵਿਯ ਏਸੋ’’ਤਿ ਆਹ. ਭਗਵਾ ਤਂ ਕਥਂ ਸੁਤ੍ਵਾ – ‘‘ਸਚੇ ਖਮਾਪੇਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਖਮਾਪੇਤਿ, ਇਮਸ੍ਮਿਂ ਵੇਲ਼ੁਵਨੇ ਗੋਨਙ੍ਗਲਮਕ੍ਕਟੋ ਭਵਿਸ੍ਸਤੀ’’ਤਿ ਆਹ. ਸੋ ਤਂ ਕਥਂ ਸੁਤ੍ਵਾ – ‘‘ਸਮਣਸ੍ਸ ਗੋਤਮਸ੍ਸ ਕਥਾਯ ਦ੍ਵੇਧਾਭਾਵੋ ਨਾਮ ਨਤ੍ਥਿ, ਪਚ੍ਛਾ ਮੇ ਮਕ੍ਕਟਭੂਤਕਾਲੇ ਗੋਚਰਟ੍ਠਾਨਂ ਭਵਿਸ੍ਸਤੀ’’ਤਿ ਵੇਲ਼ੁਵਨੇ ਨਾਨਾਵਿਧੇ ਰੁਕ੍ਖੇ ਰੋਪੇਤ੍ਵਾ ਆਰਕ੍ਖਂ ਅਦਾਸਿ. ਅਪਰਭਾਗੇ ਕਾਲਂ ਕਤ੍ਵਾ ਮਕ੍ਕਟੋ ਹੁਤ੍ਵਾ ਨਿਬ੍ਬਤ੍ਤਿ. ‘‘ਵਸ੍ਸਕਾਰਾ’’ਤਿ ਵੁਤ੍ਤੇ ਆਗਨ੍ਤ੍ਵਾ ਸਮੀਪੇ ਅਟ੍ਠਾਸਿ. ਤਗ੍ਘਾਤਿ ਸਬ੍ਬਵਾਰੇਸੁ ਏਕਂਸਵਚਨੇਯੇਵ ਨਿਪਾਤੋ. ਤਗ੍ਘ, ਭੋ ਆਨਨ੍ਦਾਤਿ ਏਵਂ ਥੇਰੇਨ ਪਰਿਸਮਜ੍ਝੇ ਅਤ੍ਤਨੋ ਉਕ੍ਕਂਸਿਤਭਾਵਂ ਞਤ੍ਵਾ ਅਹਮ੍ਪਿ ਥੇਰਂ ਉਕ੍ਕਂਸਿਸ੍ਸਾਮੀਤਿ ਏਵਮਾਹ.

੮੪. ਨ ਚ ਖੋ, ਬ੍ਰਾਹ੍ਮਣਾਤਿ ਥੇਰੋ ਕਿਰ ਚਿਨ੍ਤੇਸਿ ‘‘ਸਮ੍ਮਾਸਮ੍ਬੁਦ੍ਧੇਨ ਵਣ੍ਣਿਤਜ੍ਝਾਨਮ੍ਪਿ ਅਤ੍ਥਿ, ਅਵਣ੍ਣਿਤਜ੍ਝਾਨਮ੍ਪਿ ਅਤ੍ਥਿ, ਅਯਂ ਪਨ ਬ੍ਰਾਹ੍ਮਣੋ ਸਬ੍ਬਮੇਵ ਵਣ੍ਣੇਤੀਤਿ ਪਞ੍ਹਂ ਵਿਸਂਵਾਦੇਤਿ, ਨ ਖੋ ਪਨ ਸਕ੍ਕਾ ਇਮਸ੍ਸ ਮੁਖਂ ਉਲ੍ਲੋਕੇਤੁਂ ਨ ਪਿਣ੍ਡਪਾਤਂ ਰਕ੍ਖਿਤੁਂ, ਪਞ੍ਹਂ ਉਜੁਂ ਕਤ੍ਵਾ ਕਥੇਸ੍ਸਾਮੀ’’ਤਿ ਇਦਂ ਵਤ੍ਤੁਂ ਆਰਦ੍ਧਂ. ਅਨ੍ਤਰਂ ਕਰਿਤ੍ਵਾਤਿ ਅਬ੍ਭਨ੍ਤਰਂ ਕਰਿਤ੍ਵਾ. ਏਵਰੂਪਂ ਖੋ, ਬ੍ਰਾਹ੍ਮਣ, ਸੋ ਭਗਵਾ ਝਾਨਂ ਵਣ੍ਣੇਸੀਤਿ ਇਧ ਸਬ੍ਬਸਙ੍ਗਾਹਕਜ੍ਝਾਨਂ ਨਾਮ ਕਥਿਤਂ.

ਯਂ ਨੋ ਮਯਨ੍ਤਿ ਅਯਂ ਕਿਰ ਬ੍ਰਾਹ੍ਮਣੋ ਵਸ੍ਸਕਾਰਬ੍ਰਾਹ੍ਮਣਂ ਉਸੂਯਤਿ, ਤੇਨ ਪੁਚ੍ਛਿਤਪਞ੍ਹਸ੍ਸ ਅਕਥਨਂ ਪਚ੍ਚਾਸੀਸਮਾਨੋ ਕਥਿਤਭਾਵਂ ਞਤ੍ਵਾ ‘‘ਵਸ੍ਸਕਾਰੇਨ ਪੁਚ੍ਛਿਤਂ ਪਞ੍ਹਂ ਪੁਨਪ੍ਪੁਨਂ ਤਸ੍ਸ ਨਾਮਂ ਗਣ੍ਹਨ੍ਤੋ ਵਿਤ੍ਥਾਰੇਤ੍ਵਾ ਕਥੇਸਿ, ਮਯਾ ਪੁਚ੍ਛਿਤਪਞ੍ਹਂ ਪਨ ਯਟ੍ਠਿਕੋਟਿਯਾ ਉਪ੍ਪੀਲ਼ੇਨ੍ਤੋ ਵਿਯ ਏਕਦੇਸਮੇਵ ਕਥੇਸੀ’’ਤਿ ਅਨਤ੍ਤਮਨੋ ਅਹੋਸਿ, ਤਸ੍ਮਾ ਏਵਮਾਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਗੋਪਕਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.