੭. ਗਣਕਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ

੭੪. ਏਵਂ ਮੇ ਸੁਤਨ੍ਤਿ ਗਣਕਮੋਗ੍ਗਲ੍ਲਾਨਸੁਤ੍ਤਂ. ਤਤ੍ਥ ਯਾਵ ਪਚ੍ਛਿਮਸੋਪਾਨਕਲ਼ੇਵਰਾਤਿ ਯਾਵ ਪਠਮਸੋਪਾਨਫਲਕਾ ਏਕਦਿਵਸੇਨੇਵ ਸਤ੍ਤਭੂਮਿਕੋ ਪਾਸਾਦੋ ਨ ਸਕ੍ਕਾ ਕਾਤੁਂ, ਵਤ੍ਥੁਂ ਸੋਧੇਤ੍ਵਾ ਥਮ੍ਭੁਸ੍ਸਾਪਨਤੋ ਪਟ੍ਠਾਯ ਪਨ ਯਾਵ ਚਿਤ੍ਤਕਮ੍ਮਕਰਣਾ ਅਨੁਪੁਬ੍ਬਕਿਰਿਯਾ ਚੇਤ੍ਥ ਪਞ੍ਞਾਯਤੀਤਿ ਦਸ੍ਸੇਤਿ. ਯਦਿਦਂ ਅਜ੍ਝੇਨੇਤਿ ਤਯੋਪਿ ਵੇਦਾ ਨ ਸਕ੍ਕਾ ਏਕਦਿਵਸੇਨੇਵ ਅਧੀਯਿਤੁਂ, ਏਤੇਸਂ ਅਜ੍ਝੇਨੇਪਿ ਪਨ ਅਨੁਪੁਬ੍ਬਕਿਰਿਯਾਵ ਪਞ੍ਞਾਯਤੀਤਿ ਦਸ੍ਸੇਤਿ. ਇਸ੍ਸਤ੍ਥੇਤਿ ਆਵੁਧਵਿਜ੍ਜਾਯਪਿ ਏਕਦਿਵਸੇਨੇਵ ਵਾਲਵੇਧਿ ਨਾਮ ਨ ਸਕ੍ਕਾ ਕਾਤੁਂ, ਠਾਨਸਮ੍ਪਾਦਨਮੁਟ੍ਠਿਕਰਣਾਦੀਹਿ ਪਨ ਏਤ੍ਥਾਪਿ ਅਨੁਪੁਬ੍ਬਕਿਰਿਯਾ ਪਞ੍ਞਾਯਤੀਤਿ ਦਸ੍ਸੇਤਿ. ਸਙ੍ਖਾਨੇਤਿ ਗਣਨਾਯ. ਤਤ੍ਥ ਅਨੁਪੁਬ੍ਬਕਿਰਿਯਂ ਅਤ੍ਤਨਾਵ ਦਸ੍ਸੇਨ੍ਤੋ ਏਵਂ ਗਣਾਪੇਮਾਤਿਆਦਿਮਾਹ.

੭੫. ਸੇਯ੍ਯਥਾਪਿ ਬ੍ਰਾਹ੍ਮਣਾਤਿ ਇਧ ਭਗਵਾ ਯਸ੍ਮਾ ਬਾਹਿਰਸਮਯੇ ਯਥਾ ਯਥਾ ਸਿਪ੍ਪਂ ਉਗ੍ਗਣ੍ਹਨ੍ਤਿ, ਤਥਾ ਤਥਾ ਕੇਰਾਟਿਕਾ ਹੋਨ੍ਤਿ, ਤਸ੍ਮਾ ਅਤ੍ਤਨੋ ਸਾਸਨਂ ਬਾਹਿਰਸਮਯੇਨ ਅਨੁਪਮੇਤ੍ਵਾ ਭਦ੍ਰਅਸ੍ਸਾਜਾਨੀਯੇਨ ਉਪਮੇਨ੍ਤੋ ਸੇਯ੍ਯਥਾਪੀਤਿਆਦਿਮਾਹ. ਭਦ੍ਰੋ ਹਿ ਅਸ੍ਸਾਜਾਨੀਯੋ ਯਸ੍ਮਿਂ ਕਾਰਣੇ ਦਮਿਤੋ ਹੋਤਿ, ਤਂ ਜੀਵਿਤਹੇਤੁਪਿ ਨਾਤਿਕ੍ਕਮਤਿ. ਏਵਮੇਵ ਸਾਸਨੇ ਸਮ੍ਮਾਪਟਿਪਨ੍ਨੋ ਕੁਲਪੁਤ੍ਤੋ ਸੀਲਵੇਲਂ ਨਾਤਿਕ੍ਕਮਤਿ. ਮੁਖਾਧਾਨੇਤਿ ਮੁਖਟ੍ਠਪਨੇ.

੭੬. ਸਤਿਸਮ੍ਪਜਞ੍ਞਾਯ ਚਾਤਿ ਸਤਿਸਮ੍ਪਜਞ੍ਞਾਹਿ ਸਮਙ੍ਗਿਭਾਵਤ੍ਥਾਯ. ਦ੍ਵੇ ਹਿ ਖੀਣਾਸਵਾ ਸਤਤਵਿਹਾਰੀ ਚ ਨੋਸਤਤਵਿਹਾਰੀ ਚ. ਤਤ੍ਥ ਸਤਤਵਿਹਾਰੀ ਯਂਕਿਞ੍ਚਿ ਕਮ੍ਮਂ ਕਤ੍ਵਾਪਿ ਫਲਸਮਾਪਤ੍ਤਿਂ ਸਮਾਪਜ੍ਜਿਤੁਂ ਸਕ੍ਕੋਤਿ, ਨੋ ਸਤਤਵਿਹਾਰੀ ਪਨ ਅਪ੍ਪਮਤ੍ਤਕੇਪਿ ਕਿਚ੍ਚੇ ਕਿਚ੍ਚਪ੍ਪਸੁਤੋ ਹੁਤ੍ਵਾ ਫਲਸਮਾਪਤ੍ਤਿਂ ਅਪ੍ਪੇਤੁਂ ਨ ਸਕ੍ਕੋਤਿ.

ਤਤ੍ਰਿਦਂ ਵਤ੍ਥੁ – ਏਕੋ ਕਿਰ ਖੀਣਾਸਵਤ੍ਥੇਰੋ ਖੀਣਾਸਵਸਾਮਣੇਰਂ ਗਹੇਤ੍ਵਾ ਅਰਞ੍ਞਵਾਸਂ ਗਤੋ, ਤਤ੍ਥ ਮਹਾਥੇਰਸ੍ਸ ਸੇਨਾਸਨਂ ਪਤ੍ਤਂ, ਸਾਮਣੇਰਸ੍ਸ ਨ ਪਾਪੁਣਾਤਿ, ਤਂ ਵਿਤਕ੍ਕੇਨ੍ਤੋ ਥੇਰੋ ਏਕਦਿਵਸਮ੍ਪਿ ਫਲਸਮਾਪਤ੍ਤਿਂ ਅਪ੍ਪੇਤੁਂ ਨਾਸਕ੍ਖਿ. ਸਾਮਣੇਰੋ ਪਨ ਤੇਮਾਸਂ ਫਲਸਮਾਪਤ੍ਤਿਰਤਿਯਾ ਵੀਤਿਨਾਮੇਤ੍ਵਾ ‘‘ਸਪ੍ਪਾਯੋ, ਭਨ੍ਤੇ, ਅਰਞ੍ਞਵਾਸੋ ਜਾਤੋ’’ਤਿ ਥੇਰਂ ਪੁਚ੍ਛਿ. ਥੇਰੋ ‘‘ਨ ਜਾਤੋ, ਆਵੁਸੋ’’ਤਿ ਆਹ. ਇਤਿ ਯੋ ਏਵਰੂਪੋ ਖੀਣਾਸਵੋ, ਸੋ ਇਮੇ ਧਮ੍ਮੇ ਆਦਿਤੋ ਪਟ੍ਠਾਯ ਆਵਜ੍ਜਿਤ੍ਵਾਵ ਸਮਾਪਜ੍ਜਿਤੁਂ ਸਕ੍ਖਿਸ੍ਸਤੀਤਿ ਦਸ੍ਸੇਨ੍ਤੋ ‘‘ਸਤਿਸਮ੍ਪਜਞ੍ਞਾਯ ਚਾ’’ਤਿ ਆਹ.

੭੮. ਯੇਮੇ, ਭੋ ਗੋਤਮਾਤਿ ਤਥਾਗਤੇ ਕਿਰ ਕਥਯਨ੍ਤੇਵ ਬ੍ਰਾਹ੍ਮਣਸ੍ਸ ‘‘ਇਮੇ ਪੁਗ੍ਗਲਾ ਨ ਆਰਾਧੇਨ੍ਤਿ, ਇਮੇ ਆਰਾਧੇਨ੍ਤੀ’’ਤਿ ਨਯੋ ਉਦਪਾਦਿ, ਤਂ ਦਸ੍ਸੇਨ੍ਤੋ ਏਵਂ ਵਤ੍ਤੁਮਾਰਦ੍ਧੋ.

ਪਰਮਜ੍ਜਧਮ੍ਮੇਸੂਤਿ ਅਜ੍ਜਧਮ੍ਮਾ ਨਾਮ ਛਸਤ੍ਥਾਰਧਮ੍ਮਾ, ਤੇਸੁ ਗੋਤਮਵਾਦੋਵ, ਪਰਮੋ ਉਤ੍ਤਮੋਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਗਣਕਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.