੬. ਆਨੇਞ੍ਜਸਪ੍ਪਾਯਸੁਤ੍ਤਵਣ੍ਣਨਾ

੬੬. ਏਵਂ ਮੇ ਸੁਤਨ੍ਤਿ ਆਨੇਞ੍ਜਸਪ੍ਪਾਯਸੁਤ੍ਤਂ. ਤਤ੍ਥ ਅਨਿਚ੍ਚਾਤਿ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾ. ਕਾਮਾਤਿ ਵਤ੍ਥੁਕਾਮਾਪਿ ਕਿਲੇਸਕਾਮਾਪਿ. ਤੁਚ੍ਛਾਤਿ ਨਿਚ੍ਚਸਾਰਧੁਵਸਾਰਅਤ੍ਤਸਾਰਵਿਰਹਿਤਤ੍ਤਾ ਰਿਤ੍ਤਾ, ਨ ਪਨ ਨਤ੍ਥੀਤਿ ਗਹੇਤਬ੍ਬਾ. ਨ ਹਿ ਤੁਚ੍ਛਮੁਟ੍ਠੀਤਿ ਵੁਤ੍ਤੇ ਮੁਟ੍ਠਿ ਨਾਮ ਨਤ੍ਥੀਤਿ ਵੁਤ੍ਤਂ ਹੋਤਿ. ਯਸ੍ਸ ਪਨ ਅਬ੍ਭਨ੍ਤਰੇ ਕਿਞ੍ਚਿ ਨਤ੍ਥਿ, ਸੋ ਵੁਚ੍ਚਤਿ ਤੁਚ੍ਛੋ. ਮੁਸਾਤਿ ਨਾਸਨਕਾ. ਮੋਸਧਮ੍ਮਾਤਿ ਨਸ੍ਸਨਸਭਾਵਾ, ਖੇਤ੍ਤਂ ਵਿਯ ਵਤ੍ਥੁ ਵਿਯ ਹਿਰਞ੍ਞਸੁਵਣ੍ਣਂ ਵਿਯ ਚ ਨ ਪਞ੍ਞਾਯਿਤ੍ਥ, ਕਤਿਪਾਹੇਨੇਵ ਸੁਪਿਨਕੇ ਦਿਟ੍ਠਾ ਵਿਯ ਨਸ੍ਸਨ੍ਤਿ ਨ ਪਞ੍ਞਾਯਨ੍ਤਿ. ਤੇਨ ਵੁਤ੍ਤਂ ‘‘ਮੋਸਧਮ੍ਮਾ’’ਤਿ, ਮਾਯਾਕਤਮੇਤਨ੍ਤਿ ਯਥਾ ਮਾਯਾਯ ਉਦਕਂ ਮਣੀਤਿ ਕਤ੍ਵਾ ਦਸ੍ਸਿਤਂ, ਬਦਰਿਪਣ੍ਣਂ ਕਹਾਪਣੋਤਿ ਕਤ੍ਵਾ ਦਸ੍ਸਿਤਂ, ਅਞ੍ਞਂ ਵਾ ਪਨ ਏਵਰੂਪਂ ਦਸ੍ਸਨੂਪਚਾਰੇ ਠਿਤਸ੍ਸੇਵ ਤਥਾ ਪਞ੍ਞਾਯਤਿ, ਉਪਚਾਰਾਤਿਕ੍ਕਮਤੋ ਪਟ੍ਠਾਯ ਪਾਕਤਿਕਮੇਵ ਪਞ੍ਞਾਯਤਿ. ਏਵਂ ਕਾਮਾਪਿ ਇਤ੍ਤਰਪਚ੍ਚੁਪਟ੍ਠਾਨਟ੍ਠੇਨ ‘‘ਮਾਯਾਕਤ’’ਨ੍ਤਿ ਵੁਤ੍ਤਾ. ਯਥਾ ਚ ਮਾਯਾਕਾਰੋ ਉਦਕਾਦੀਨਿ ਮਣਿਆਦੀਨਂ ਵਸੇਨ ਦਸ੍ਸੇਨ੍ਤੋ ਵਞ੍ਚੇਤਿ, ਏਵਂ ਕਾਮਾਪਿ ਅਨਿਚ੍ਚਾਦੀਨਿ ਨਿਚ੍ਚਾਦਿਸਭਾਵਂ ਦਸ੍ਸੇਨ੍ਤਾ ਵਞ੍ਚੇਨ੍ਤੀਤਿ ਵਞ੍ਚਨਕਟ੍ਠੇਨਪਿ ‘‘ਮਾਯਾਕਤ’’ਨ੍ਤਿ ਵੁਤ੍ਤਾ. ਬਾਲਲਾਪਨਨ੍ਤਿ ਮਯ੍ਹਂ ਪੁਤ੍ਤੋ, ਮਯ੍ਹਂ ਧੀਤਾ, ਮਯ੍ਹਂ ਹਿਰਞ੍ਞਂ ਮਯ੍ਹਂ ਸੁਵਣ੍ਣਨ੍ਤਿ ਏਵਂ ਬਾਲਾਨਂ ਲਾਪਨਤੋ ਬਾਲਲਾਪਨਂ. ਦਿਟ੍ਠਧਮ੍ਮਿਕਾ ਕਾਮਾਤਿ ਮਾਨੁਸਕਾ ਪਞ੍ਚ ਕਾਮਗੁਣਾ. ਸਮ੍ਪਰਾਯਿਕਾਤਿ ਤੇ ਠਪੇਤ੍ਵਾ ਅਵਸੇਸਾ. ਦਿਟ੍ਠਧਮ੍ਮਿਕਾ. ਕਾਮਸਞ੍ਞਾਤਿ ਮਾਨੁਸਕੇ ਕਾਮੇ ਆਰਬ੍ਭ ਉਪ੍ਪਨ੍ਨਸਞ੍ਞਾ. ਉਭਯਮੇਤਂ ਮਾਰਧੇਯ੍ਯਨ੍ਤਿ ਏਤੇ ਕਾਮਾ ਚ ਕਾਮਸਞ੍ਞਾ ਚ ਉਭਯਮ੍ਪਿ ਮਾਰਧੇਯ੍ਯਂ. ਯੇਹਿ ਉਭਯਮੇਤਂ ਗਹਿਤਂ, ਤੇਸਞ੍ਹਿ ਉਪਰਿ ਮਾਰੋ ਵਸਂ ਵਤ੍ਤੇਤਿ. ਤਂ ਸਨ੍ਧਾਯ ‘‘ਉਭਯਮੇਤਂ ਮਾਰਧੇਯ੍ਯ’’ਨ੍ਤਿ ਵੁਤ੍ਤਂ.

ਮਾਰਸ੍ਸੇਸ ਵਿਸਯੋਤਿਆਦੀਸੁਪਿ ਯਥਾ ਚੋਲ਼ਸ੍ਸ ਵਿਸਯੋ ਚੋਲ਼ਵਿਸਯੋ, ਪਣ੍ਡਸ੍ਸ ਵਿਸਯੋ ਪਣ੍ਡਵਿਸਯੋ, ਸਂਵਰਾਨਂ ਵਿਸਯੋ ਸਂਵਰਵਿਸਯੋਤਿ ਪਵਤ੍ਤਨਟ੍ਠਾਨਂ ਵਿਸਯੋਤਿ ਵੁਚ੍ਚਤਿ, ਏਵਂ ਯੇਹਿ ਏਤੇ ਕਾਮਾ ਗਹਿਤਾ, ਤੇਸਂ ਉਪਰਿ ਮਾਰੋ ਵਸਂ ਵਤ੍ਤੇਤਿ. ਤਂ ਸਨ੍ਧਾਯ ਮਾਰਸ੍ਸੇਸ ਵਿਸਯੋਤਿ ਵੁਤ੍ਤਂ. ਪਞ੍ਚ ਪਨ ਕਾਮਗੁਣੇ ਨਿਵਾਪਬੀਜਂ ਵਿਯ ਵਿਪ੍ਪਕਿਰਨ੍ਤੋ ਮਾਰੋ ਗਚ੍ਛਤਿ. ਯੇਹਿ ਪਨ ਤੇ ਗਹਿਤਾ, ਤੇਸਂ ਉਪਰਿ ਮਾਰੋ ਵਸਂ ਵਤ੍ਤੇਤਿ. ਤਂ ਸਨ੍ਧਾਯ ਮਾਰਸ੍ਸੇਸ ਨਿਵਾਪੋਤਿ ਵੁਤ੍ਤਂ. ਯਥਾ ਚ ਯਤ੍ਥ ਹਤ੍ਥਿਆਦਯੋ ਵਸਂ ਵਤ੍ਤੇਨ੍ਤਿ, ਸੋ ਹਤ੍ਥਿਗੋਚਰੋ ਅਸ੍ਸਗੋਚਰੋ ਅਜਗੋਚਰੋਤਿ ਵੁਚ੍ਚਤਿ, ਏਵਂ ਯੇਹਿ ਏਤੇ ਕਾਮਾ ਗਹਿਤਾ, ਤੇਸੁ ਮਾਰੋ ਵਸਂ ਵਤ੍ਤੇਤਿ. ਤਂ ਸਨ੍ਧਾਯ ਮਾਰਸ੍ਸੇਸ ਗੋਚਰੋਤਿ ਵੁਤ੍ਤਂ.

ਏਤ੍ਥਾਤਿ ਏਤੇਸੁ ਕਾਮੇਸੁ. ਮਾਨਸਾਤਿ ਚਿਤ੍ਤਸਮ੍ਭੂਤਾ. ਤਤ੍ਥ ਸਿਯਾ – ਦੁਵਿਧੇ ਤਾਵ ਕਾਮੇ ਆਰਬ੍ਭ ਅਭਿਜ੍ਝਾਨਲਕ੍ਖਣਾ ਅਭਿਜ੍ਝਾ, ਕਰਣੁਤ੍ਤਰਿਯਲਕ੍ਖਣੋ ਸਾਰਮ੍ਭੋ ਚ ਉਪ੍ਪਜ੍ਜਤੁ, ਬ੍ਯਾਪਾਦੋ ਕਥਂ ਉਪ੍ਪਜ੍ਜਤੀਤਿ? ਮਮਾਯਿਤੇ ਵਤ੍ਥੁਸ੍ਮਿਂ ਅਚ੍ਛਿਨ੍ਨੇਪਿ ਸੋਚਨ੍ਤਿ, ਅਚ੍ਛਿਜ੍ਜਨ੍ਤੇਪਿ ਸੋਚਨ੍ਤਿ, ਅਚ੍ਛਿਨ੍ਨਸਙ੍ਕਿਨੋਪਿ ਸੋਚਨ੍ਤਿ, ਯੋ ਏਵਰੂਪੋ ਚਿਤ੍ਤਸ੍ਸ ਆਘਾਤੋਤਿ ਏਵਂ ਉਪ੍ਪਜ੍ਜਤਿ. ਤੇਵ ਅਰਿਯਸਾਵਕਸ੍ਸਾਤਿ ਤੇ ਅਰਿਯਸਾਵਕਸ੍ਸ. ਵਕਾਰੋ ਆਗਮਸਨ੍ਧਿਮਤ੍ਤਂ ਹੋਤਿ. ਇਧ ਮਨੁਸਿਕ੍ਖਤੋਤਿ ਇਮਸ੍ਮਿਂ ਸਾਸਨੇ ਸਿਕ੍ਖਨ੍ਤਸ੍ਸ ਤੇ ਤਯੋਪਿ ਕਿਲੇਸਾ ਅਨ੍ਤਰਾਯਕਰਾ ਹੋਨ੍ਤਿ. ਅਭਿਭੁਯ੍ਯ ਲੋਕਨ੍ਤਿ ਕਾਮਲੋਕਂ ਅਭਿਭਵਿਤ੍ਵਾ. ਅਧਿਟ੍ਠਾਯ ਮਨਸਾਤਿ ਝਾਨਾਰਮ੍ਮਣਚਿਤ੍ਤੇਨ ਅਧਿਟ੍ਠਹਿਤ੍ਵਾ. ਅਪਰਿਤ੍ਤਨ੍ਤਿ ਕਾਮਾਵਚਰਚਿਤ੍ਤਂ ਪਰਿਤ੍ਤਂ ਨਾਮ, ਤਸ੍ਸ ਪਟਿਕ੍ਖੇਪੇਨ ਮਹਗ੍ਗਤਂ ਅਪਰਿਤ੍ਤਂ ਨਾਮ. ਪਮਾਣਨ੍ਤਿਪਿ ਕਾਮਾਵਚਰਮੇਵ, ਰੂਪਾਵਚਰਂ ਅਰੂਪਾਵਚਰਂ ਅਪ੍ਪਮਾਣਂ. ਸੁਭਾਵਿਤਨ੍ਤਿ ਪਨ ਏਤਂ ਕਾਮਾਵਚਰਾਦੀਨਂ ਨਾਮਂ ਨ ਹੋਤਿ, ਲੋਕੁਤ੍ਤਰਸ੍ਸੇਵੇਤਂ ਨਾਮਂ. ਤਸ੍ਮਾ ਏਤਸ੍ਸ ਵਸੇਨ ਅਪਰਿਤ੍ਤਂ ਅਪ੍ਪਮਾਣਂ ਸੁਭਾਵਿਤਨ੍ਤਿ ਸਬ੍ਬਂ ਲੋਕੁਤ੍ਤਰਮੇਵ ਵਟ੍ਟਤਿ.

ਤਬ੍ਬਹੁਲਵਿਹਾਰਿਨੋਤਿ ਕਾਮਪਟਿਬਾਹਨੇਨ ਤਮੇਵ ਪਟਿਪਦਂ ਬਹੁਲਂ ਕਤ੍ਵਾ ਵਿਹਰਨ੍ਤਸ੍ਸ. ਆਯਤਨੇ ਚਿਤ੍ਤਂ ਪਸੀਦਤੀਤਿ ਕਾਰਣੇ ਚਿਤ੍ਤਂ ਪਸੀਦਤਿ. ਕਿਂ ਪਨੇਤ੍ਥ ਕਾਰਣਂ? ਅਰਹਤ੍ਤਂ ਵਾ, ਅਰਹਤ੍ਤਸ੍ਸ ਵਿਪਸ੍ਸਨਂ ਵਾ, ਚਤੁਤ੍ਥਜ੍ਝਾਨਂ ਵਾ, ਚਤੁਤ੍ਥਜ੍ਝਾਨਸ੍ਸ ਉਪਚਾਰਂ ਵਾ. ਸਮ੍ਪਸਾਦੇ ਸਤੀਤਿ ਏਤ੍ਥ ਦੁਵਿਧੋ ਸਮ੍ਪਸਾਦੋ ਅਧਿਮੋਕ੍ਖਸਮ੍ਪਸਾਦੋ ਚ ਪਟਿਲਾਭਸਮ੍ਪਸਾਦੋ ਚ. ਅਰਹਤ੍ਤਸ੍ਸ ਹਿ ਵਿਪਸ੍ਸਨਂ ਪਟ੍ਠਪੇਤ੍ਵਾ ਵਿਹਰਤੋ ਮਹਾਭੂਤਾਦੀਸੁ ਉਪਟ੍ਠਹਨ੍ਤੇਸੁ ਯੇਨਿਮੇ ਨੀਹਾਰੇਨ ਮਹਾਭੂਤਾ ਉਪਟ੍ਠਹਨ੍ਤਿ, ਉਪਾਦਾਰੂਪਾ ਉਪਟ੍ਠਹਨ੍ਤਿ ਨਾਮਰੂਪਾ ਉਪਟ੍ਠਹਨ੍ਤਿ, ਪਚ੍ਚਯਾ ਸਬ੍ਬਥਾ ਉਪਟ੍ਠਹਨ੍ਤਿ, ਲਕ੍ਖਣਾਰਮ੍ਮਣਾ ਵਿਪਸ੍ਸਨਾ ਉਪਟ੍ਠਹਤਿ, ਅਜ੍ਜੇਵ ਅਰਹਤ੍ਤਂ ਗਣ੍ਹਿਸ੍ਸਾਮੀਤਿ ਅਪ੍ਪਟਿਲਦ੍ਧੇਯੇਵ ਆਸਾ ਸਨ੍ਤਿਟ੍ਠਤਿ, ਅਧਿਮੋਕ੍ਖਂ ਪਟਿਲਭਤਿ. ਤਤਿਯਜ੍ਝਾਨਂ ਵਾ ਪਾਦਕਂ ਕਤ੍ਵਾ ਚਤੁਤ੍ਥਜ੍ਝਾਨਤ੍ਥਾਯ ਕਸਿਣਪਰਿਕਮ੍ਮਂ ਕਰੋਨ੍ਤਸ੍ਸ ਨੀਵਰਣਵਿਕ੍ਖਮ੍ਭਨਾਦੀਨਿ ਸਮਨੁਪਸ੍ਸਤੋ ਯੇਨਿਮੇ ਨੀਹਾਰੇਨ ਨੀਵਰਣਾ ਵਿਕ੍ਖਮ੍ਭਨ੍ਤਿ, ਕਿਲੇਸਾ ਸਨ੍ਨਿਸੀਦਨ੍ਤਿ, ਸਤਿ ਸਨ੍ਤਿਟ੍ਠਤਿ, ਸਙ੍ਖਾਰਗਤਂ ਵਾ ਵਿਭੂਤਂ ਪਾਕਟਂ ਹੁਤ੍ਵਾ ਦਿਬ੍ਬਚਕ੍ਖੁਕਸ੍ਸ ਪਰਲੋਕੋ ਵਿਯ ਉਪਟ੍ਠਾਤਿ, ਚਿਤ੍ਤੁਪ੍ਪਾਦੋ ਲੇਪਪਿਣ੍ਡੇ ਲਗ੍ਗਮਾਨੋ ਵਿਯ ਉਪਚਾਰੇਨ ਸਮਾਧਿਯਤਿ, ਅਜ੍ਜੇਵ ਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤੇਸ੍ਸਾਮੀਤਿ ਅਪਟਿਲਦ੍ਧੇਯੇਵ ਆਸਾ ਸਨ੍ਤਿਟ੍ਠਤਿ, ਅਧਿਮੋਕ੍ਖਂ ਪਟਿਲਭਤਿ. ਅਯਂ ਅਧਿਮੋਕ੍ਖਸਮ੍ਪਸਾਦੋ ਨਾਮ. ਤਸ੍ਮਿਂ ਸਮ੍ਪਸਾਦੇ ਸਤਿ. ਯੋ ਪਨ ਅਰਹਤ੍ਤਂ ਵਾ ਪਟਿਲਭਤਿ ਚਤੁਤ੍ਥਜ੍ਝਾਨਂ ਵਾ, ਤਸ੍ਸ ਚਿਤ੍ਤਂ ਵਿਪ੍ਪਸਨ੍ਨਂ ਹੋਤਿਯੇਵ. ਇਧ ਪਨ ‘‘ਆਯਤਨੇ ਚਿਤ੍ਤਂ ਪਸੀਦਤੀ’’ਤਿ ਵਚਨਤੋ ਅਰਹਤ੍ਤਵਿਪਸ੍ਸਨਾਯ ਚੇਵ ਚਤੁਤ੍ਥਜ੍ਝਾਨੂਪਚਾਰਸ੍ਸ ਚ ਪਟਿਲਾਭੋ ਪਟਿਲਾਭਸਮ੍ਪਸਾਦੋਤਿ ਵੇਦਿਤਬ੍ਬੋ. ਵਿਪਸ੍ਸਨਾ ਹਿ ਪਞ੍ਞਾਯ ਅਧਿਮੁਚ੍ਚਨਸ੍ਸ ਕਾਰਣਂ, ਉਪਚਾਰਂ ਆਨੇਞ੍ਜਸਮਾਪਤ੍ਤਿਯਾ.

ਏਤਰਹਿ ਵਾ ਆਨੇਞ੍ਜਂ ਸਮਾਪਜ੍ਜਤਿ. ਪਞ੍ਞਾਯ ਵਾ ਅਧਿਮੁਚ੍ਚਤੀਤਿ ਏਤ੍ਥ ਏਤਰਹਿ ਵਾ ਪਞ੍ਞਾਯ ਅਧਿਮੁਚ੍ਚਤਿ, ਆਨੇਞ੍ਜਂ ਵਾ ਸਮਾਪਜ੍ਜਤੀਤਿ ਏਵਂ ਪਦਪਰਿਵਤ੍ਤਨਂ ਕਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਇਦਞ੍ਹਿ ਵੁਤ੍ਤਂ ਹੋਤਿ – ਤਸ੍ਮਿਂ ਸਮ੍ਪਸਾਦੇ ਸਤਿ ਏਤਰਹਿ ਵਾ ਪਞ੍ਞਾਯ ਅਧਿਮੁਚ੍ਚਤਿ, ਅਰਹਤ੍ਤਂ ਸਚ੍ਛਿਕਰੋਤੀਤਿ ਅਤ੍ਥੋ. ਤਂ ਅਨਭਿਸਮ੍ਭੁਣਨ੍ਤੋ ਆਨੇਞ੍ਜਂ ਵਾ ਸਮਾਪਜ੍ਜਤਿ, ਅਥ ਵਾ ਪਞ੍ਞਾਯ ਵਾ ਅਧਿਮੁਚ੍ਚਤੀਤਿ ਅਰਹਤ੍ਤਮਗ੍ਗਂ ਭਾਵੇਤਿ, ਤਂ ਅਨਭਿਸਮ੍ਭੁਣਨ੍ਤੋ ਆਨੇਞ੍ਜਂ ਵਾ ਸਮਾਪਜ੍ਜਤਿ. ਅਰਹਤ੍ਤਮਗ੍ਗਂ ਭਾਵੇਤੁਂ ਅਸਕ੍ਕੋਨ੍ਤੋ ਏਤਰਹਿ ਚਤੁਸਚ੍ਚਂ ਵਾ ਸਚ੍ਛਿਕਰੋਤਿ. ਤਂ ਅਨਭਿਸਮ੍ਭੁਣਨ੍ਤੋ ਆਨੇਞ੍ਜਂ ਵਾ ਸਮਾਪਜ੍ਜਤੀਤਿ.

ਤਤ੍ਰਾਯਂ ਨਯੋ – ਇਧ ਭਿਕ੍ਖੁ ਤਤਿਯਜ੍ਝਾਨਂ ਪਾਦਕਂ ਕਤ੍ਵਾ ਚਤੁਤ੍ਥਜ੍ਝਾਨਸ੍ਸ ਕਸਿਣਪਰਿਕਮ੍ਮਂ ਕਰੋਤਿ. ਤਸ੍ਸ ਨੀਵਰਣਾ ਵਿਕ੍ਖਮ੍ਭਨ੍ਤਿ, ਸਤਿ ਸਨ੍ਤਿਟ੍ਠਤਿ, ਉਪਚਾਰੇਨ ਚਿਤ੍ਤਂ ਸਮਾਧਿਯਤਿ. ਸੋ ਰੂਪਾਰੂਪਂ ਪਰਿਗਣ੍ਹਾਤਿ, ਪਚ੍ਚਯਂ ਪਰਿਗ੍ਗਣ੍ਹਾਤਿ, ਲਕ੍ਖਣਾਰਮ੍ਮਣਿਕਂ ਵਿਪਸ੍ਸਨਂ ਵਵਤ੍ਥਪੇਤਿ, ਤਸ੍ਸ ਏਵਂ ਹੋਤਿ – ‘‘ਉਪਚਾਰੇਨ ਮੇ ਝਾਨਂ ਵਿਸੇਸਭਾਗਿਯਂ ਭਵੇਯ੍ਯ, ਤਿਟ੍ਠਤੁ ਵਿਸੇਸਭਾਗਿਯਤਾ, ਨਿਬ੍ਬੇਧਭਾਗਿਯਂ ਨਂ ਕਰਿਸ੍ਸਾਮੀ’’ਤਿ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਸਚ੍ਛਿਕਰੋਤਿ. ਏਤ੍ਤਕੇਨਸ੍ਸ ਕਿਚ੍ਚਂ ਕਤਂ ਨਾਮ ਹੋਤਿ. ਅਰਹਤ੍ਤਂ ਸਚ੍ਛਿਕਾਤੁਂ ਅਸਕ੍ਕੋਨ੍ਤੋ ਪਨ ਤਤੋ ਓਸਕ੍ਕਿਤਮਾਨਸੋ ਅਨ੍ਤਰਾ ਨ ਤਿਟ੍ਠਤਿ, ਚਤੁਤ੍ਥਜ੍ਝਾਨਂ ਸਮਾਪਜ੍ਜਤਿਯੇਵ. ਯਥਾ ਕਿਂ? ਯਥਾ ਪੁਰਿਸੋ ‘‘ਵਨਮਹਿਂਸਂ ਘਾਤੇਸ੍ਸਾਮੀ’’ਤਿ ਸਤ੍ਤਿਂ ਗਹੇਤ੍ਵਾ ਅਨੁਬਨ੍ਧਨ੍ਤੋ ਸਚੇ ਤਂ ਘਾਤੇਤਿ, ਸਕਲਗਾਮਵਾਸਿਨੋ ਤੋਸੇਸ੍ਸਤਿ, ਅਸਕ੍ਕੋਨ੍ਤੋ ਪਨ ਅਨ੍ਤਰਾਮਗ੍ਗੇ ਸਸਗੋਧਾਦਯੋ ਖੁਦ੍ਦਕਮਿਗੇ ਘਾਤੇਤ੍ਵਾ ਕਾਜਂ ਪੂਰੇਤ੍ਵਾ ਏਤਿਯੇਵ.

ਤਤ੍ਥ ਪੁਰਿਸਸ੍ਸ ਸਤ੍ਤਿਂ ਗਹੇਤ੍ਵਾ ਵਨਮਹਿਂਸਾਨੁਬਨ੍ਧਨਂ ਵਿਯ ਇਮਸ੍ਸ ਭਿਕ੍ਖੁਨੋ ਤਤਿਯਜ੍ਝਾਨਂ ਪਾਦਕਂ ਕਤ੍ਵਾ ਚਤੁਤ੍ਥਜ੍ਝਾਨਸ੍ਸ ਪਰਿਕਮ੍ਮਕਰਣਂ, ਵਨਮਹਿਂਸਘਾਤਨਂ ਵਿਯ – ‘‘ਨੀਵਰਣਵਿਕ੍ਖਮ੍ਭਨਾਦੀਨਿ ਸਮਨੁਪਸ੍ਸਤੋ ਵਿਸੇਸਭਾਗਿਯਂ ਭਵੇਯ੍ਯ, ਤਿਟ੍ਠਤੁ ਵਿਸੇਸਭਾਗਿਯਤਾ, ਨਿਬ੍ਬੇਧਭਾਗਿਯਂ ਨਂ ਕਰਿਸ੍ਸਾਮੀ’’ਤਿ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਸ੍ਸ ਸਚ੍ਛਿਕਰਣਂ, ਮਹਿਂਸਂ ਘਾਤੇਤੁਂ ਅਸਕ੍ਕੋਨ੍ਤਸ੍ਸ ਅਨ੍ਤਰਾਮਗ੍ਗੇ ਸਸਗੋਧਾਦਯੋ ਖੁਦ੍ਦਕਮਿਗੇ ਘਾਤੇਤ੍ਵਾ ਕਾਜਂ ਪੂਰੇਤ੍ਵਾ ਗਮਨਂ ਵਿਯ ਅਰਹਤ੍ਤਂ ਸਚ੍ਛਿਕਾਤੁਂ ਅਸਕ੍ਕੋਨ੍ਤਸ੍ਸ, ਤਤੋ ਓਸਕ੍ਕਿਤ੍ਵਾ ਚਤੁਤ੍ਥਜ੍ਝਾਨਸਮਾਪਜ੍ਜਨਂ ਵੇਦਿਤਬ੍ਬਂ. ਮਗ੍ਗਭਾਵਨਾ ਚਤੁਸਚ੍ਚਸਚ੍ਛਿਕਿਰਿਯਾਯੋਜਨਾਸੁਪਿ ਏਸੇਵ ਨਯੋ.

ਇਦਾਨਿ ਅਰਹਤ੍ਤਂ ਸਚ੍ਛਿਕਾਤੁਂ ਅਸਕ੍ਕੋਨ੍ਤਸ੍ਸ ਨਿਬ੍ਬਤ੍ਤਟ੍ਠਾਨਂ ਦਸ੍ਸੇਨ੍ਤੋ ਕਾਯਸ੍ਸ ਭੇਦਾਤਿਆਦਿਮਾਹ. ਤਤ੍ਥ ਯਨ੍ਤਿ ਯੇਨ ਕਾਰਣੇਨ ਤਂ ਸਂਵਤ੍ਤਨਿਕਂ ਵਿਞ੍ਞਾਣਂ ਅਸ੍ਸ ਆਨੇਞ੍ਜੂਪਗਂ, ਤਂ ਕਾਰਣਂ ਵਿਜ੍ਜਤੀਤਿ ਅਤ੍ਥੋ. ਏਤ੍ਥ ਚ ਤਂਸਂਵਤ੍ਤਨਿਕਨ੍ਤਿ ਤਸ੍ਸ ਭਿਕ੍ਖੁਨੋ ਸਂਵਤ੍ਤਨਿਕਂ. ਯੇਨ ਵਿਪਾਕਵਿਞ੍ਞਾਣੇਨ ਸੋ ਭਿਕ੍ਖੁ ਸਂਵਤ੍ਤਤਿ ਨਿਬ੍ਬਤ੍ਤਤਿ, ਤਂ ਵਿਞ੍ਞਾਣਂ. ਆਨੇਞ੍ਜੂਪਗਨ੍ਤਿ ਕੁਸਲਾਨੇਞ੍ਜਸਭਾਵੂਪਗਤਂ ਅਸ੍ਸ, ਤਾਦਿਸਮੇਵ ਭਵੇਯ੍ਯਾਤਿ ਅਤ੍ਥੋ. ਕੇਚਿ ਕੁਸਲਵਿਞ੍ਞਾਣਂ ਵਦਨ੍ਤਿ. ਯਂ ਤਸ੍ਸ ਭਿਕ੍ਖੁਨੋ ਸਂਵਤ੍ਤਨਿਕਂ ਉਪਪਤ੍ਤਿਹੇਤੁਭੂਤਂ ਕੁਸਲਵਿਞ੍ਞਾਣਂ ਆਨੇਞ੍ਜੂਪਗਤਂ ਅਸ੍ਸ, ਵਿਪਾਕਕਾਲੇਪਿ ਤਨ੍ਨਾਮਕਮੇਵ ਅਸ੍ਸਾਤਿ ਅਤ੍ਥੋ. ਸੋ ਪਨਾਯਮਤ੍ਥੋ – ‘‘ਪੁਞ੍ਞਂ ਚੇ ਸਙ੍ਖਾਰਂ ਅਭਿਸਙ੍ਖਰੋਤਿ, ਪੁਞ੍ਞੂਪਗਂ ਹੋਤਿ ਵਿਞ੍ਞਾਣਂ. ਅਪੁਞ੍ਞਂ ਚੇ ਸਙ੍ਖਾਰਂ ਅਭਿਸਙ੍ਖਾਰੋਤਿ, ਅਪੁਞ੍ਞੁਪਗਂ ਹੋਤਿ ਵਿਞ੍ਞਾਣਂ. ਆਨੇਞ੍ਜਂ ਚੇ ਸਙ੍ਖਾਰਂ ਅਭਿਸਙ੍ਖਰੋਤਿ, ਆਨੇਞ੍ਜੂਪਗਂ ਹੋਤਿ ਵਿਞ੍ਞਾਣ’’ਨ੍ਤਿ (ਸਂ. ਨਿ. ੨.੫੧) ਇਮਿਨਾ ਨਯੇਨ ਵੇਦਿਤਬ੍ਬੋ. ਆਨੇਞ੍ਜਸਪ੍ਪਾਯਾਤਿ ਆਨੇਞ੍ਜਸ੍ਸ ਚਤੁਤ੍ਥਜ੍ਝਾਨਸ੍ਸ ਸਪ੍ਪਾਯਾ. ਨ ਕੇਵਲਞ੍ਚ ਸਾ ਆਨੇਞ੍ਜਸ੍ਸੇਵ, ਉਪਰਿ ਅਰਹਤ੍ਤਸ੍ਸਾਪਿ ਸਪ੍ਪਾਯਾਵ ਉਪਕਾਰਭੂਤਾਯੇਵਾਤਿ ਵੇਦਿਤਬ੍ਬਾ. ਇਤਿ ਇਮਸ੍ਮਿਂ ਪਠਮਕਆਨੇਞ੍ਜੇ ਸਮਾਧਿਵਸੇਨ ਓਸਕ੍ਕਨਾ ਕਥਿਤਾ.

੬੭. ਇਤਿ ਪਟਿਸਞ੍ਚਿਕ੍ਖਤੀਤਿ ਚਤੁਤ੍ਥਜ੍ਝਾਨਂ ਪਤ੍ਵਾ ਏਵਂ ਪਟਿਸਞ੍ਚਿਕ੍ਖਤਿ. ਅਯਞ੍ਹਿ ਭਿਕ੍ਖੁ ਹੇਟ੍ਠਿਮੇਨ ਭਿਕ੍ਖੁਨਾ ਪਞ੍ਞਵਨ੍ਤਤਰੋ ਤਸ੍ਸ ਚ ਭਿਕ੍ਖੁਨੋ ਅਤ੍ਤਨੋ ਚਾਤਿ ਦ੍ਵਿਨ੍ਨਮ੍ਪਿ ਕਮ੍ਮਟ੍ਠਾਨਂ ਏਕਤੋ ਕਤ੍ਵਾ ਸਮ੍ਮਸਤਿ. ਤਬ੍ਬਹੁਲਵਿਹਾਰਿਨੋਤਿ ਰੂਪਪਟਿਬਾਹਨੇਨ ਤਮੇਵ ਪਟਿਪਦਂ ਬਹੁਲਂ ਕਤ੍ਵਾ ਵਿਹਰਨ੍ਤਸ੍ਸ. ਆਨੇਞ੍ਜਂ ਸਮਾਪਜ੍ਜਤੀਤਿ ਆਕਾਸਾਨਞ੍ਚਾਯਤਾਨਾਨੇਞ੍ਜਂ ਸਮਾਪਜ੍ਜਤਿ. ਸੇਸਂ ਪੁਰਿਮਸਦਿਸਮੇਵ. ਯਥਾ ਚ ਇਧ, ਏਵਂ ਸਬ੍ਬਤ੍ਥ ਵਿਸੇਸਮਤ੍ਤਮੇਵ ਪਨ ਵਕ੍ਖਾਮ. ਇਤਿ ਇਮਸ੍ਮਿਂ ਦੁਤਿਯਆਨੇਞ੍ਜੇ ਵਿਪਸ੍ਸਨਾਵਸੇਨ ਓਸਕ੍ਕਨਾ ਕਥਿਤਾ, ‘‘ਯਂਕਿਞ੍ਚਿ ਰੂਪ’’ਨ੍ਤਿ ਏਵਂ ਵਿਪਸ੍ਸਨਾਮਗ੍ਗਂ ਦਸ੍ਸੇਨ੍ਤੇਨ ਕਥਿਤਾਤਿ ਅਤ੍ਥੋ.

ਇਤਿ ਪਟਿਸਞ੍ਚਿਕ੍ਖਤੀਤਿ ਆਕਾਸਾਨਞ੍ਚਾਯਤਨਂ ਪਤ੍ਵਾ ਏਵਂ ਪਟਿਸਞ੍ਚਿਕ੍ਖਤਿ. ਅਯਞ੍ਹਿ ਹੇਟ੍ਠਾ ਦ੍ਵੀਹਿ ਭਿਕ੍ਖੂਹਿ ਪਞ੍ਞਵਨ੍ਤਤਰੋ ਤੇਸਞ੍ਚ ਭਿਕ੍ਖੂਨਂ ਅਤ੍ਤਨੋ ਚਾਤਿ ਤਿਣ੍ਣਮ੍ਪਿ ਕਮ੍ਮਟ੍ਠਾਨਂ ਏਕਤੋ ਕਤ੍ਵਾ ਸਮ੍ਮਸਤਿ. ਉਭਯਮੇਤਂ ਅਨਿਚ੍ਚਨ੍ਤਿ ਏਤ੍ਥ ਅਟ੍ਠ ਏਕੇਕਕੋਟ੍ਠਾਸਾ ਦਿਟ੍ਠਧਮ੍ਮਿਕਸਮ੍ਪਰਾਯਿਕਵਸੇਨ ਪਨ ਸਙ੍ਖਿਪਿਤ੍ਵਾ ਉਭਯਨ੍ਤਿ ਵੁਤ੍ਤਂ. ਨਾਲਂ ਅਭਿਨਨ੍ਦਿਤੁਨ੍ਤਿ ਤਣ੍ਹਾਦਿਟ੍ਠਿਵਸੇਨ ਅਭਿਨਨ੍ਦਿਤੁਂ ਨ ਯੁਤ੍ਤਂ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਤਬ੍ਬਹੁਲਵਿਹਾਰਿਨੋਤਿ ਕਾਮਪਟਿਬਾਹਨੇਨ ਚ ਰੂਪਪਟਿਬਾਹਨੇਨ ਚ ਤਮੇਵ ਪਟਿਪਦਂ ਬਹੁਲਂ ਕਤ੍ਵਾ ਵਿਹਰਨ੍ਤਸ੍ਸ. ਆਨੇਞ੍ਜਂ ਸਮਾਪਜ੍ਜਤੀਤਿ ਵਿਞ੍ਞਾਣਞ੍ਚਾਯਤਨਾਨੇਞ੍ਜਂ ਸਮਾਪਜ੍ਜਤਿ. ਇਮਸ੍ਮਿਂ ਤਤਿਯਆਨੇਞ੍ਜੇ ਵਿਪਸ੍ਸਨਾਵਸੇਨ ਓਸਕ੍ਕਨਾ ਕਥਿਤਾ.

੬੮. ਇਤਿ ਪਟਿਸਞ੍ਚਿਕ੍ਖਤੀਤਿ ਵਿਞ੍ਞਾਣਞ੍ਚਾਯਤਨਂ ਪਤ੍ਵਾ ਏਵਂ ਪਟਿਸਞ੍ਚਿਕ੍ਖਤਿ. ਅਯਞ੍ਹਿ ਹੇਟ੍ਠਾ ਤੀਹਿ ਭਿਕ੍ਖੂਹਿ ਪਞ੍ਞਵਨ੍ਤਤਰੋ ਤੇਸਞ੍ਚ ਭਿਕ੍ਖੂਨਂ ਅਤ੍ਤਨੋ ਚਾਤਿ ਚਤੁਨ੍ਨਮ੍ਪਿ ਕਮ੍ਮਟ੍ਠਾਨਂ ਏਕਤੋ ਕਤ੍ਵਾ ਸਮ੍ਮਸਤਿ. ਯਤ੍ਥੇਤਾ ਅਪਰਿਸੇਸਾ ਨਿਰੁਜ੍ਝਨ੍ਤੀਤਿ ਯਂ ਆਕਿਞ੍ਚਞ੍ਞਾਯਤਨਂ ਪਤ੍ਵਾ ਏਤਾ ਹੇਟ੍ਠਾ ਵੁਤ੍ਤਾ ਸਬ੍ਬਸਞ੍ਞਾ ਨਿਰੁਜ੍ਝਨ੍ਤਿ. ਏਤਂ ਸਨ੍ਤਂ ਏਤਂ ਪਣੀਤਨ੍ਤਿ ਏਤਂ ਅਙ੍ਗਸਨ੍ਤਤਾਯ ਆਰਮ੍ਮਣਸਨ੍ਤਤਾਯ ਚ ਸਨ੍ਤਂ, ਅਤਪ੍ਪਕਟ੍ਠੇਨ ਪਣੀਤਂ. ਤਬ੍ਬਹੁਲਵਿਹਾਰਿਨੋਤਿ ਤਾਸਂ ਸਞ੍ਞਾਨਂ ਪਟਿਬਾਹਨੇਨ ਤਮੇਵ ਪਟਿਪਦਂ ਬਹੁਲਂ ਕਤ੍ਵਾ ਵਿਹਰਨ੍ਤਸ੍ਸ. ਇਮਸ੍ਮਿਂ ਪਠਮਾਕਿਞ੍ਚਞ੍ਞਾਯਤਨੇ ਸਮਾਧਿਵਸੇਨ ਓਸਕ੍ਕਨਾ ਕਥਿਤਾ.

ਇਤਿ ਪਟਿਸਞ੍ਚਿਕ੍ਖਤੀਤਿ ਵਿਞ੍ਞਾਣਞ੍ਚਾਯਤਨਮੇਵ ਪਤ੍ਵਾ ਏਵਂ ਪਟਿਸਞ੍ਚਿਕ੍ਖਤਿ. ਅਯਞ੍ਹਿ ਹੇਟ੍ਠਾ ਚਤੂਹਿ ਭਿਕ੍ਖੂਹਿ ਪਞ੍ਞਵਨ੍ਤਤਰੋ ਤੇਸਞ੍ਚ ਭਿਕ੍ਖੂਨਂ ਅਤ੍ਤਨੋ ਚਾਤਿ ਪਞ੍ਚਨ੍ਨਮ੍ਪਿ ਕਮ੍ਮਟ੍ਠਾਨਂ ਏਕਤੋ ਕਤ੍ਵਾ ਸਮ੍ਮਸਤਿ. ਅਤ੍ਤੇਨ ਵਾ ਅਤ੍ਤਨਿਯੇਨ ਵਾਤਿ ਅਹਂ ਮਮਾਤਿ ਗਹੇਤਬ੍ਬੇਨ ਸੁਞ੍ਞਂ ਤੁਚ੍ਛਂ ਰਿਤ੍ਤਂ. ਏਵਮੇਤ੍ਥ ਦ੍ਵਿਕੋਟਿਕਾ ਸੁਞ੍ਞਤਾ ਦਸ੍ਸਿਤਾ. ਤਬ੍ਬਹੁਲਵਿਹਾਰਿਨੋਤਿ ਹੇਟ੍ਠਾ ਵੁਤ੍ਤਪਟਿਪਦਞ੍ਚ ਇਮਞ੍ਚ ਸੁਞ੍ਞਤਪਟਿਪਦਂ ਬਹੁਲਂ ਕਤ੍ਵਾ ਵਿਹਰਨ੍ਤਸ੍ਸ. ਇਮਸ੍ਮਿਂ ਦੁਤਿਯਾਕਿਞ੍ਚਞ੍ਞਾਯਤਨੇ ਵਿਪਸ੍ਸਨਾਵਸੇਨ ਓਸਕ੍ਕਨਾ ਕਥਿਤਾ.

੭੦. ਇਤਿ ਪਟਿਸਞ੍ਚਿਕ੍ਖਤੀਤਿ ਵਿਞ੍ਞਾਣਞ੍ਚਾਯਤਨਮੇਵ ਪਤ੍ਵਾ ਏਵਂ ਪਟਿਸਞ੍ਚਿਕ੍ਖਤਿ. ਅਯਞ੍ਹਿ ਹੇਟ੍ਠਾ ਪਞ੍ਚਹਿ ਭਿਕ੍ਖੂਹਿ ਪਞ੍ਞਵਨ੍ਤਤਰੋ ਤੇਸਞ੍ਚ ਭਿਕ੍ਖੂਨਂ ਅਤ੍ਤਨੋ ਚਾਤਿ ਛਨ੍ਨਮ੍ਪਿ ਕਮ੍ਮਟ੍ਠਾਨਂ ਏਕਤੋ ਕਤ੍ਵਾ ਸਮ੍ਮਸਤਿ. ਨਾਹਂ ਕ੍ਵਚਨਿ ਕਸ੍ਸਚਿ ਕਿਞ੍ਚਨਤਸ੍ਮਿਂ, ਨ ਚ ਮਮ ਕ੍ਵਚਨਿ ਕਿਸ੍ਮਿਞ੍ਚਿ ਕਿਞ੍ਚਨਂ ਨਤ੍ਥੀਤਿ ਏਤ੍ਥ ਪਨ ਚਤੁਕੋਟਿਕਾ ਸੁਞ੍ਞਤਾ ਕਥਿਤਾ. ਕਥਂ? ਅਯਞ੍ਹਿ ਨਾਹਂ ਕ੍ਵਚਨੀਤਿ ਕ੍ਵਚਿ ਅਤ੍ਤਾਨਂ ਨ ਪਸ੍ਸਤਿ, ਕਸ੍ਸਚਿ ਕਿਞ੍ਚਨਤਸ੍ਮਿਨ੍ਤਿ ਅਤ੍ਤਨੋ ਅਤ੍ਤਾਨਂ ਕਸ੍ਸਚਿ ਪਰਸ੍ਸ ਕਿਞ੍ਚਨਭਾਵੇ ਉਪਨੇਤਬ੍ਬਂ ਨ ਪਸ੍ਸਤਿ, ਅਤ੍ਤਨੋ ਭਾਤਿਟ੍ਠਾਨੇ ਭਾਤਰਂ ਸਹਾਯਟ੍ਠਾਨੇ ਸਹਾਯਂ ਪਰਿਕ੍ਖਾਰਟ੍ਠਾਨੇ ਵਾ ਪਰਿਕ੍ਖਾਰਂ ਮਞ੍ਞਿਤ੍ਵਾ ਉਪਗਨ੍ਤ੍ਵਾ ਉਪਨੇਤਬ੍ਬਂ ਨ ਪਸ੍ਸਤੀਤਿ ਅਤ੍ਥੋ. ਨ ਚ ਮਮ ਕ੍ਵਚਨੀਤਿ ਏਤ੍ਥ ਮਮ – ਸਦ੍ਦਂ ਤਾਵ ਠਪੇਤ੍ਵਾ ਨ ਚ ਕ੍ਵਚਨਿ ਪਰਸ੍ਸ ਚ ਅਤ੍ਤਾਨਂ ਕ੍ਵਚਿ ਨ ਪਸ੍ਸਤੀਤਿ ਅਯਮਤ੍ਥੋ. ਇਦਾਨਿ ਮਮ – ਸਦ੍ਦਂ ਆਹਰਿਤ੍ਵਾ ਮਮ ਕਿਸ੍ਮਿਞ੍ਚਿ ਕਿਞ੍ਚਨਂ ਨਤ੍ਥੀਤਿ ਸੋ ਪਰਸ੍ਸ ਅਤ੍ਤਾ ਮਮ ਕਿਸ੍ਮਿਞ੍ਚਿ ਕਿਞ੍ਚਨਭਾਵੇ ਅਤ੍ਥੀਤਿ ਨ ਪਸ੍ਸਤਿ. ਅਤ੍ਤਨੋ ਭਾਤਿਟ੍ਠਾਨੇ ਭਾਤਰਂ ਸਹਾਯਟ੍ਠਾਨੇ ਸਹਾਯਂ ਪਰਿਕ੍ਖਾਰਟ੍ਠਾਨੇ ਵਾ ਪਰਿਕ੍ਖਾਰਨ੍ਤਿ ਕਿਸ੍ਮਿਞ੍ਚਿ ਠਾਨੇ ਪਰਸ੍ਸ ਅਤ੍ਤਾਨਂ ਇਮਿਨਾ ਕਿਞ੍ਚਨਭਾਵੇਨ ਉਪਨੇਤਬ੍ਬਂ ਨ ਪਸ੍ਸਤੀਤਿ ਅਤ੍ਥੋ. ਏਵਮਯਂ ਯਸ੍ਮਾ ਨੇਵ ਕਤ੍ਥਚਿ ਅਤ੍ਤਾਨਂ ਪਸ੍ਸਤਿ, ਨ ਤਂ ਪਰਸ੍ਸ ਕਿਞ੍ਚਨਭਾਵੇ ਉਪਨੇਤਬ੍ਬਂ ਪਸ੍ਸਤਿ, ਨ ਪਰਸ੍ਸ ਅਤ੍ਤਾਨਂ ਪਸ੍ਸਤਿ, ਨ ਪਰਸ੍ਸ ਅਤ੍ਤਾਨਂ ਅਤ੍ਤਨੋ ਕਿਞ੍ਚਨਭਾਵੇ ਉਪਨੇਤਬ੍ਬਂ ਪਸ੍ਸਤਿ, ਤਸ੍ਮਾ ਅਯਂ ਸੁਞ੍ਞਤਾ ਚਤੁਕੋਟਿਕਾਤਿ ਵੇਦਿਤਬ੍ਬਾ. ਤਬ੍ਬਹੁਲਵਿਹਾਰਿਨੋਤਿ ਹੇਟ੍ਠਾ ਵੁਤ੍ਤਪ੍ਪਟਿਪਦਂ ਇਮਂ ਚਤੁਕੋਟਿਸੁਞ੍ਞਤਞ੍ਚ ਬਹੁਲਂ ਕਤ੍ਵਾ ਵਿਹਰਨ੍ਤਸ੍ਸ. ਇਮਸ੍ਮਿਂ ਤਤਿਯਾਕਿਞ੍ਚਞ੍ਞਾਯਤਨੇਪਿ ਵਿਪਸ੍ਸਨਾਵਸੇਨੇਵ ਓਸਕ੍ਕਨਾ ਕਥਿਤਾ.

ਇਤਿ ਪਟਿਸਞ੍ਚਿਕ੍ਖਤੀਤਿ ਆਕਿਞ੍ਚਞ੍ਞਾਯਤਨਂ ਪਤ੍ਵਾ ਏਵਂ ਪਟਿਸਞ੍ਚਿਕ੍ਖਤਿ. ਅਯਞ੍ਹਿ ਹੇਟ੍ਠਾ ਛਹਿ ਭਿਕ੍ਖੂਹਿ ਪਞ੍ਞਵਨ੍ਤਤਰੋ ਤੇਸਞ੍ਚ ਭਿਕ੍ਖੂਨਂ ਅਤ੍ਤਨੋ ਚਾਤਿ ਸਤ੍ਤਨ੍ਨਮ੍ਪਿ ਕਮ੍ਮਟ੍ਠਾਨਂ ਏਕਤੋ ਕਤ੍ਵਾ ਸਮ੍ਮਸਤਿ. ਯਤ੍ਥੇਤਾ ਅਪਰਿਸੇਸਾ ਨਿਰੁਜ੍ਝਨ੍ਤੀਤਿ ਯਂ ਨੇਵਸਞ੍ਞਾਨਾਸਞ੍ਞਾਯਤਨਂ ਪਤ੍ਵਾ ਏਤ੍ਥ ਏਤਾ ਹੇਟ੍ਠਾ ਵੁਤ੍ਤਾ ਸਬ੍ਬਸਞ੍ਞਾ ਨਿਰੁਜ੍ਝਨ੍ਤਿ. ਤਬ੍ਬਹੁਲਵਿਹਾਰਿਨੋਤਿ ਤਾਸਂ ਸਞ੍ਞਾਨਂ ਪਟਿਬਾਹਨੇਨ ਤਮੇਵ ਪਟਿਪਦਂ ਬਹੁਲਂ ਕਤ੍ਵਾ ਵਿਹਰਨ੍ਤਸ੍ਸ. ਇਮਸ੍ਮਿਂ ਨੇਵਸਞ੍ਞਾਨਾਸਞ੍ਞਾਯਤਨੇ ਸਮਾਧਿਵਸੇਨ ਓਸਕ੍ਕਨਾ ਕਥਿਤਾ.

੭੧. ਨੋ ਚਸ੍ਸ ਨੋ ਚ ਮੇ ਸਿਯਾਤਿ ਸਚੇ ਮਯ੍ਹਂ ਪੁਬ੍ਬੇ ਪਞ੍ਚਵਿਧਂ ਕਮ੍ਮਵਟ੍ਟਂ ਨ ਆਯੂਹਿਤਂ ਅਸ੍ਸ, ਯਂ ਮੇ ਇਦਂ ਏਤਰਹਿ ਏਵਂ ਪਞ੍ਚਵਿਧਂ ਵਿਪਾਕਵਟ੍ਟਂ ਏਤਂ ਮੇ ਨ ਸਿਯਾ ਨਪ੍ਪਵਤ੍ਤੇਯ੍ਯਾਤਿ ਅਤ੍ਥੋ. ਨ ਭਵਿਸ੍ਸਤੀਤਿ ਸਚੇ ਏਤਰਹਿ ਪਞ੍ਚਵਿਧਂ ਕਮ੍ਮਵਟ੍ਟਂ ਆਯੂਹਿਤਂ ਨ ਭਵਿਸ੍ਸਤਿ. ਨ ਮੇ ਭਵਿਸ੍ਸਤੀਤਿ ਤਸ੍ਮਿਂ ਅਸਤਿ ਅਨਾਗਤੇ ਮੇ ਪਞ੍ਚਵਿਧਂ ਵਿਪਾਕਵਟ੍ਟਂ ਨ ਭਵਿਸ੍ਸਤਿ. ਯਦਤ੍ਥਿ ਯਂ ਭੂਤਂ ਤਂ ਪਜਹਾਮੀਤਿ ਯਂ ਅਤ੍ਥਿ ਯਂ ਭੂਤਂ ਏਤਰਹਿ ਖਨ੍ਧਪਞ੍ਚਕਂ, ਤਂ ਪਜਹਾਮਿ. ਏਵਂ ਉਪੇਕ੍ਖਂ ਪਟਿਲਭਤੀਤਿ ਸੋ ਭਿਕ੍ਖੁ ਏਵਂ ਵਿਪਸ੍ਸਨੁਪੇਕ੍ਖਂ ਲਭਤੀਤਿ ਅਤ੍ਥੋ.

ਪਰਿਨਿਬ੍ਬਾਯੇਯ੍ਯ ਨੁ ਖੋ ਸੋ, ਭਨ੍ਤੇ, ਭਿਕ੍ਖੁ ਨ ਵਾ ਪਰਿਨਿਬ੍ਬਾਯੇਯ੍ਯਾਤਿ ਕਿਂ ਪੁਚ੍ਛਾਮੀਤਿ ਪੁਚ੍ਛਤਿ, ਤਤਿਯਜ੍ਝਾਨਂ ਪਾਦਕਂ ਕਤ੍ਵਾ ਠਿਤਸ੍ਸ ਅਰਹਤ੍ਤਮ੍ਪਿ ਓਸਕ੍ਕਨਾਪਿ ਪਟਿਪਦਾਪਿ ਪਟਿਸਨ੍ਧਿਪਿ ਕਥਿਤਾ, ਤਥਾ ਚਤੁਤ੍ਥਜ੍ਝਾਨਾਦੀਨਿ ਪਾਦਕਾਨਿ ਕਤ੍ਵਾ ਠਿਤਾਨਂ, ਨੇਵਸਞ੍ਞਾਨਾਸਞ੍ਞਾਯਤਨਂ ਪਾਦਕਂ ਕਤ੍ਵਾ ਠਿਤਸ੍ਸ ਨ ਕਿਞ੍ਚਿ ਕਥਿਤਂ, ਤਂ ਪੁਚ੍ਛਾਮੀਤਿ ਪੁਚ੍ਛਤਿ. ਅਪੇਤ੍ਥਾਤਿ ਅਪਿ ਏਤ੍ਥ. ਸੋ ਤਂ ਉਪੇਕ੍ਖਂ ਅਭਿਨਨ੍ਦਤੀਤਿ ਸੋ ਤਂ ਵਿਪਸ੍ਸਨੁਪੇਕ੍ਖਂ ਤਣ੍ਹਾਦਿਟ੍ਠਿਅਭਿਨਨ੍ਦਨਾਹਿ ਅਭਿਨਨ੍ਦਤਿ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਤਨ੍ਨਿਸ੍ਸਿਤਂ ਹੋਤਿ ਵਿਞ੍ਞਾਣਨ੍ਤਿ ਵਿਞ੍ਞਾਣਂ ਵਿਪਸ੍ਸਨਾਨਿਸ੍ਸਿਤਂ ਹੋਤਿ. ਤਦੁਪਾਦਾਨਨ੍ਤਿ ਯਂ ਨਿਕਨ੍ਤਿਵਿਞ੍ਞਾਣਂ, ਤਂ ਤਸ੍ਸ ਉਪਾਦਾਨਂ ਨਾਮ ਗਹਣਂ ਨਾਮ ਹੋਤਿ. ਸਉਪਾਦਾਨੋਤਿ ਸਗਹਣੋ. ਨ ਪਰਿਨਿਬ੍ਬਾਯਤੀਤਿ ਵਿਪਸ੍ਸਨਾਯ ਸਾਲਯੋ ਭਿਕ੍ਖੁ ਮਮ ਸਾਸਨੇ ਨ ਪਰਿਨਿਬ੍ਬਾਯਤਿ. ਯੋ ਪਨ ਵਿਹਾਰਪਰਿਵੇਣਉਪਟ੍ਠਾਕਾਦੀਸੁ ਸਾਲਯੋ, ਤਸ੍ਮਿਂ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸੇਤਿ. ਕਹਂ ਪਨਾਤਿ? ਕਤ੍ਥ ਪਨ? ਉਪਾਦਿਯਮਾਨੋ ਉਪਾਦਿਯਤੀਤਿ ਪਟਿਸਨ੍ਧਿਂ ਗਣ੍ਹਮਾਨੋ ਗਣ੍ਹਾਤਿ. ਉਪਾਦਾਨਸੇਟ੍ਠਂ ਕਿਰ ਸੋ, ਭਨ੍ਤੇਤਿ, ਭਨ੍ਤੇ, ਸੋ ਕਿਰ ਭਿਕ੍ਖੁ ਗਹੇਤਬ੍ਬਟ੍ਠਾਨਂ ਸੇਟ੍ਠਂ ਉਤ੍ਤਮਂ ਭਵਂ ਉਪਾਦਿਯਤਿ, ਸੇਟ੍ਠਭਵੇ ਪਟਿਸਨ੍ਧਿਂ ਗਣ੍ਹਾਤੀਤਿ ਅਤ੍ਥੋ. ਇਮਿਨਾ ਤਸ੍ਸ ਭਿਕ੍ਖੁਨੋ ਪਟਿਸਨ੍ਧਿ ਕਥਿਤਾ. ਇਦਾਨਿਸ੍ਸ ਅਰਹਤ੍ਤਂ ਕਥੇਤੁਂ ਇਧਾਨਨ੍ਦਾਤਿਆਦਿਮਾਹ.

੭੩. ਨਿਸ੍ਸਾਯ ਨਿਸ੍ਸਾਯਾਤਿ ਤਂ ਤਂ ਸਮਾਪਤ੍ਤਿਂ ਨਿਸ੍ਸਾਯ. ਓਘਸ੍ਸ ਨਿਤ੍ਥਰਣਾ ਅਕ੍ਖਾਤਾਤਿ ਓਘਤਰਣਂ ਕਥਿਤਂ, ਤਤਿਯਜ੍ਝਾਨਂ ਪਾਦਕਂ ਕਤ੍ਵਾ ਠਿਤਭਿਕ੍ਖੁਨੋ ਓਘਨਿਤ੍ਥਰਣਾ ਕਥਿਤਾ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਂ ਪਾਦਕਂ ਕਤ੍ਵਾ ਠਿਤਭਿਕ੍ਖੁਨੋ ਓਘਨਿਤ੍ਥਰਣਾ ਕਥਿਤਾਤਿ ਵਦਤਿ.

ਕਤਮੋ ਪਨ, ਭਨ੍ਤੇ, ਅਰਿਯੋ ਵਿਮੋਕ੍ਖੋਤਿ ਇਧ ਕਿਂ ਪੁਚ੍ਛਤਿ? ਸਮਾਪਤ੍ਤਿਂ ਤਾਵ ਪਦਟ੍ਠਾਨਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਗਣ੍ਹਨ੍ਤੋ ਭਿਕ੍ਖੁ ਨਾਵਂ ਵਾ ਉਲ਼ੁਮ੍ਪਾਦੀਨਿ ਵਾ ਨਿਸ੍ਸਾਯ ਮਹੋਘਂ ਤਰਿਤ੍ਵਾ ਪਾਰਂ ਗਚ੍ਛਨ੍ਤੋ ਵਿਯ ਨ ਕਿਲਮਤਿ. ਸੁਕ੍ਖਵਿਪਸ੍ਸਕੋ ਪਨ ਪਕਿਣ੍ਣਕਸਙ੍ਖਾਰੇ ਸਮ੍ਮਸਿਤ੍ਵਾ ਅਰਹਤ੍ਤਂ ਗਣ੍ਹਨ੍ਤੋ ਬਾਹੁਬਲੇਨ ਸੋਤਂ ਛਿਨ੍ਦਿਤ੍ਵਾ ਪਾਰਂ ਗਚ੍ਛਨ੍ਤੋ ਵਿਯ ਕਿਲਮਤਿ. ਇਤਿ ਇਮਸ੍ਸ ਸੁਕ੍ਖਵਿਪਸ੍ਸਕਸ੍ਸ ਅਰਹਤ੍ਤਂ ਪੁਚ੍ਛਾਮੀਤਿ ਪੁਚ੍ਛਤਿ. ਅਰਿਯਸਾਵਕੋਤਿ ਸੁਕ੍ਖਵਿਪਸ੍ਸਕੋ ਅਰਿਯਸਾਵਕੋ. ਅਯਞ੍ਹਿ ਹੇਟ੍ਠਾ ਅਟ੍ਠਹਿ ਭਿਕ੍ਖੂਹਿ ਪਞ੍ਞਵਨ੍ਤਤਰੋ ਤੇਸਞ੍ਚ ਭਿਕ੍ਖੂਨਂ ਅਤ੍ਤਨੋ ਚਾਤਿ ਨਵਨ੍ਨਮ੍ਪਿ ਕਮ੍ਮਟ੍ਠਾਨਂ ਏਕਤੋ ਕਤ੍ਵਾ ਸਮ੍ਮਸਤਿ. ਏਸ ਸਕ੍ਕਾਯੋ ਯਾਵਤਾ ਸਕ੍ਕਾਯੋਤਿ ਯਤ੍ਤਕੋ ਤੇਭੂਮਕਵਟ੍ਟਸਙ੍ਖਾਤੋ ਸਕ੍ਕਾਯੋ ਨਾਮ ਅਤ੍ਥਿ, ਸਬ੍ਬੋਪਿ ਸੋ ਏਸ ਸਕ੍ਕਾਯੋ, ਨ ਇਤੋ ਪਰਂ ਸਕ੍ਕਾਯੋ ਅਤ੍ਥੀਤਿ ਪਟਿਸਞ੍ਚਿਕ੍ਖਤਿ.

ਏਤਂ ਅਮਤਂ ਯਦਿਦਂ ਅਨੁਪਾਦਾ ਚਿਤ੍ਤਸ੍ਸ ਵਿਮੋਕ੍ਖੋਤਿ ਯੋ ਪਨੇਸ ਚਿਤ੍ਤਸ੍ਸ ਅਨੁਪਾਦਾਵਿਮੋਕ੍ਖੋ ਨਾਮ, ਏਤਂ ਅਮਤਂ ਏਤਂ ਸਨ੍ਤਂ ਏਤਂ ਪਣੀਤਨ੍ਤਿ ਪਟਿਸਞ੍ਚਿਕ੍ਖਤਿ. ਅਞ੍ਞਤ੍ਥ ਚ ‘‘ਅਨੁਪਾਦਾ ਚਿਤ੍ਤਸ੍ਸ ਵਿਮੋਕ੍ਖੋ’’ਤਿ ਨਿਬ੍ਬਾਨਂ ਵੁਚ੍ਚਤਿ. ਇਮਸ੍ਮਿਂ ਪਨ ਸੁਤ੍ਤੇ ਸੁਕ੍ਖਵਿਪਸ੍ਸਕਸ੍ਸ ਅਰਹਤ੍ਤਂ ਕਥਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.

ਕੇਵਲਂ ਪਨ ਇਮਸ੍ਮਿਂ ਸੁਤ੍ਤੇ ਸਤ੍ਤਸੁ ਠਾਨੇਸੁ ਓਸਕ੍ਕਨਾ ਕਥਿਤਾ, ਅਟ੍ਠਸੁ ਠਾਨੇਸੁ ਪਟਿਸਨ੍ਧਿ, ਨਵਸੁ ਠਾਨੇਸੁ ਅਰਹਤ੍ਤਂ ਕਥਿਤਨ੍ਤਿ ਵੇਦਿਤਬ੍ਬਂ. ਕਥਂ? ਤਤਿਯਂ ਝਾਨਂ ਤਾਵ ਪਾਦਕਂ ਕਤ੍ਵਾ ਠਿਤਸ੍ਸ ਭਿਕ੍ਖੁਨੋ ਓਸਕ੍ਕਨਾ ਕਥਿਤਾ, ਪਟਿਸਨ੍ਧਿ ਕਥਿਤਾ, ਅਰਹਤ੍ਤਂ ਕਥਿਤਂ, ਤਥਾ ਚਤੁਤ੍ਥਜ੍ਝਾਨਂ, ਤਥਾ ਆਕਾਸਾਨਞ੍ਚਾਯਤਨਂ. ਵਿਞ੍ਞਾਣਞ੍ਚਾਯਤਨਂ ਪਨ ਪਦਟ੍ਠਾਨਂ ਕਤ੍ਵਾ ਠਿਤਾਨਂ ਤਿਣ੍ਣਂ ਭਿਕ੍ਖੂਨਂ ਓਸਕ੍ਕਨਾ ਕਥਿਤਾ, ਪਟਿਸਨ੍ਧਿ ਕਥਿਤਾ, ਅਰਹਤ੍ਤਂ ਕਥਿਤਂ. ਤਥਾ ਆਕਿਞ੍ਚਞ੍ਞਾਯਤਨਂ ਪਾਦਕਂ ਕਤ੍ਵਾ ਠਿਤਸ੍ਸ ਭਿਕ੍ਖੁਨੋ. ਨੇਵਸਞ੍ਞਾਨਾਸਞ੍ਞਾਯਤਨਂ ਪਾਦਕਂ ਕਤ੍ਵਾ ਠਿਤਸ੍ਸ ਪਨ ਓਸਕ੍ਕਨਾ ਨਤ੍ਥਿ, ਪਟਿਸਨ੍ਧਿ ਪਨ ਅਰਹਤ੍ਤਞ੍ਚ ਕਥਿਤਂ. ਸੁਕ੍ਖਵਿਪਸ੍ਸਕਸ੍ਸ ਅਰਹਤ੍ਤਮੇਵ ਕਥਿਤਨ੍ਤਿ. ਏਵਂ ਸਤ੍ਤਸੁ ਠਾਨੇਸੁ ਓਸਕ੍ਕਨਾ ਕਥਿਤਾ, ਅਟ੍ਠਸੁ ਠਾਨੇਸੁ ਪਟਿਸਨ੍ਧਿ, ਨਵਸੁ ਠਾਨੇਸੁ ਅਰਹਤ੍ਤਂ ਕਥਿਤਨ੍ਤਿ ਵੇਦਿਤਬ੍ਬਂ. ਇਮਞ੍ਚ ਪਨ ਸਤ੍ਤਸੁ ਠਾਨੇਸੁ ਓਸਕ੍ਕਨਂ ਅਟ੍ਠਸੁ ਪਟਿਸਨ੍ਧਿਂ ਨਵਸੁ ਅਰਹਤ੍ਤਂ ਸਮੋਧਾਨੇਤ੍ਵਾ ਕਥੇਨ੍ਤੇਨ ਇਮਂ ਆਨੇਞ੍ਜਸਪ੍ਪਾਯਸੁਤ੍ਤਂ ਸੁਕਥਿਤਂ ਨਾਮ ਹੋਤੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਆਨੇਞ੍ਜਸਪ੍ਪਾਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.