੫. ਸੁਨਕ੍ਖਤ੍ਤਸੁਤ੍ਤਵਣ੍ਣਨਾ

੫੫. ਏਵਂ ਮੇ ਸੁਤਨ੍ਤਿ ਸੁਨਕ੍ਖਤ੍ਤਸੁਤ੍ਤਂ. ਤਤ੍ਥ ਅਞ੍ਞਾਤਿ ਅਰਹਤ੍ਤਂ. ਬ੍ਯਾਕਤਾਤਿ ਖੀਣਾ ਜਾਤੀਤਿਆਦੀਹਿ ਚਤੂਹਿ ਪਦੇਹਿ ਕਥਿਤਾ. ਅਧਿਮਾਨੇਨਾਤਿ ਅਪ੍ਪਤ੍ਤੇ ਪਤ੍ਤਸਞ੍ਞਿਨੋ, ਅਨਧਿਗਤੇ ਅਧਿਗਤਸਞ੍ਞਿਨੋ ਹੁਤ੍ਵਾ ਅਧਿਗਤਂ ਅਮ੍ਹੇਹੀਤਿ ਮਾਨੇਨ ਬ੍ਯਾਕਰਿਂਸੁ.

੫੬. ਏਵਞ੍ਚੇਤ੍ਥ ਸੁਨਕ੍ਖਤ੍ਤ ਤਥਾਗਤਸ੍ਸ ਹੋਤੀਤਿ ਸੁਨਕ੍ਖਤ੍ਤ ਏਤ੍ਥ ਏਤੇਸਂ ਭਿਕ੍ਖੂਨਂ ਪਞ੍ਹਬ੍ਯਾਕਰਣੇ – ‘‘ਇਦਂ ਠਾਨਂ ਏਤੇਸਂ ਅਵਿਭੂਤਂ ਅਨ੍ਧਕਾਰਂ, ਤੇਨਿਮੇ ਅਨਧਿਗਤੇ ਅਧਿਗਤਸਞ੍ਞਿਨੋ, ਹਨ੍ਦ ਨੇਸਂ ਵਿਸੋਧੇਤ੍ਵਾ ਪਾਕਟਂ ਕਤ੍ਵਾ ਧਮ੍ਮਂ ਦੇਸੇਮੀ’’ਤਿ, ਏਵਞ੍ਚ ਤਥਾਗਤਸ੍ਸ ਹੋਤਿ. ਅਥ ਚ ਪਨਿਧੇਕਚ੍ਚੇ…ਪੇ… ਤਸ੍ਸਪਿ ਹੋਤਿ ਅਞ੍ਞਥਤ੍ਤਨ੍ਤਿ ਭਗਵਾ ਪਟਿਪਨ੍ਨਕਾਨਂ ਧਮ੍ਮਂ ਦੇਸੇਤਿ. ਯਤ੍ਥ ਪਨ ਇਚ੍ਛਾਚਾਰੇ ਠਿਤਾ ਏਕਚ੍ਚੇ ਮੋਘਪੁਰਿਸਾ ਹੋਨ੍ਤਿ, ਤਤ੍ਰ ਭਗਵਾ ਪਸ੍ਸਤਿ – ‘‘ਇਮੇ ਇਮਂ ਪਞ੍ਹਂ ਉਗ੍ਗਹੇਤ੍ਵਾ ਅਜਾਨਿਤ੍ਵਾਵ ਜਾਨਨ੍ਤਾ ਵਿਯ ਅਪ੍ਪਤ੍ਤੇ ਪਤ੍ਤਸਞ੍ਞਿਨੋ ਹੁਤ੍ਵਾ ਗਾਮਨਿਗਮਾਦੀਸੁ ਵਿਸੇਵਮਾਨਾ ਵਿਚਰਿਸ੍ਸਨ੍ਤਿ, ਤਂ ਨੇਸਂ ਭਵਿਸ੍ਸਤਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾ’’ਤਿ ਏਵਮਸ੍ਸਾਯਂ ਇਚ੍ਛਾਚਾਰੇ ਠਿਤਾਨਂ ਕਾਰਣਾ ਪਟਿਪਨ੍ਨਕਾਨਮ੍ਪਿ ਅਤ੍ਥਾਯ ‘‘ਧਮ੍ਮਂ ਦੇਸਿਸ੍ਸਾਮੀ’’ਤਿ ਉਪ੍ਪਨ੍ਨਸ੍ਸ ਚਿਤ੍ਤਸ੍ਸ ਅਞ੍ਞਥਾਭਾਵੋ ਹੋਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ.

੫੮. ਲੋਕਾਮਿਸਾਧਿਮੁਤ੍ਤੋਤਿ ਵਟ੍ਟਾਮਿਸ-ਕਾਮਾਮਿਸ-ਲੋਕਾਮਿਸਭੂਤੇਸੁ ਪਞ੍ਚਸੁ ਕਾਮਗੁਣੇਸੁ ਅਧਿਮੁਤ੍ਤੋ ਤਨ੍ਨਿਨ੍ਨੋ ਤਗ੍ਗਰੁਕੋ ਤਪ੍ਪਬ੍ਭਾਰੋ. ਤਪ੍ਪਤਿਰੂਪੀਤਿ ਕਾਮਗੁਣਸਭਾਗਾ. ਆਨੇਞ੍ਜਪਟਿਸਂਯੁਤ੍ਤਾਯਾਤਿ ਆਨੇਞ੍ਜਸਮਾਪਤ੍ਤਿਪਟਿਸਂਯੁਤ੍ਤਾਯ. ਸਂਸੇਯ੍ਯਾਤਿ ਕਥੇਯ੍ਯ. ਆਨੇਞ੍ਜਸਂਯੋਜਨੇਨ ਹਿ ਖੋ ਵਿਸਂਯੁਤ੍ਤੋਤਿ ਆਨੇਞ੍ਜਸਮਾਪਤ੍ਤਿਸਂਯੋਜਨੇਨ ਵਿਸਂਸਟ੍ਠੋ. ਲੋਕਾਮਿਸਾਧਿਮੁਤ੍ਤੋਤਿ ਏਵਰੂਪੋ ਹਿ ਲੂਖਚੀਵਰਧਰੋ ਮਤ੍ਤਿਕਾਪਤ੍ਤਂ ਆਦਾਯ ਅਤ੍ਤਨੋ ਸਦਿਸੇਹਿ ਕਤਿਪਯੇਹਿ ਸਦ੍ਧਿਂ ਪਚ੍ਚਨ੍ਤਜਨਪਦਂ ਗਚ੍ਛਤਿ, ਗਾਮਂ ਪਿਣ੍ਡਾਯ ਪਵਿਟ੍ਠਕਾਲੇ ਮਨੁਸ੍ਸਾ ਦਿਸ੍ਵਾ ‘‘ਮਹਾਪਂਸੁਕੁਲਿਕਾ ਆਗਤਾ’’ਤਿ ਯਾਗੁਭਤ੍ਤਾਦੀਨਿ ਸਮ੍ਪਾਦੇਤ੍ਵਾ ਸਕ੍ਕਚ੍ਚਂ ਦਾਨਂ ਦੇਨ੍ਤਿ, ਭਤ੍ਤਕਿਚ੍ਚੇ ਨਿਟ੍ਠਿਤੇ ਅਨੁਮੋਦਨਂ ਸੁਤ੍ਵਾ – ‘‘ਸ੍ਵੇਪਿ, ਭਨ੍ਤੇ, ਇਧੇਵ ਪਿਣ੍ਡਾਯ ਪਵਿਸਥਾ’’ਤਿ ਵਦਨ੍ਤਿ. ਅਲਂ ਉਪਾਸਕਾ, ਅਜ੍ਜਾਪਿ ਵੋ ਬਹੂਨਂ ਦਿਨ੍ਨਨ੍ਤਿ. ਤੇਨ ਹਿ, ਭਨ੍ਤੇ, ਅਨ੍ਤੋਵਸ੍ਸਂ ਇਧ ਵਸੇਯ੍ਯਾਥਾਤਿ ਅਧਿਵਾਸੇਤ੍ਵਾ ਵਿਹਾਰਮਗ੍ਗਂ ਪੁਚ੍ਛਿਤ੍ਵਾ ਵਿਹਾਰਂ ਗਚ੍ਛਨ੍ਤਿ. ਤਤ੍ਥ ਸੇਨਾਸਨਂ ਗਹੇਤ੍ਵਾ ਪਤ੍ਤਚੀਵਰਂ ਪਟਿਸਾਮੇਨ੍ਤਿ. ਸਾਯਂ ਏਕੋ ਆਵਾਸਿਕੋ ਤੇ ਭਿਕ੍ਖੂ ਪੁਚ੍ਛਤਿ ‘‘ਕਤ੍ਥ ਪਿਣ੍ਡਾਯ ਚਰਿਤ੍ਥਾ’’ਤਿ? ਅਸੁਕਗਾਮੇਤਿ. ਭਿਕ੍ਖਾਸਮ੍ਪਨ੍ਨਾਤਿ? ਆਮ ਏਵਰੂਪਾ ਨਾਮ ਮਨੁਸ੍ਸਾਨਂ ਸਦ੍ਧਾ ਹੋਤਿ. ‘‘ਅਜ੍ਜੇਵ ਨੁ ਖੋ ਏਤੇ ਏਦਿਸਾ, ਨਿਚ੍ਚਮ੍ਪਿ ਏਦਿਸਾ’’ਤਿ? ਸਦ੍ਧਾ ਤੇ ਮਨੁਸ੍ਸਾ ਨਿਚ੍ਚਮ੍ਪਿ ਏਦਿਸਾ, ਤੇ ਨਿਸ੍ਸਾਯੇਵ ਅਯਂ ਵਿਹਾਰੋ ਵਡ੍ਢਤੀਤਿ. ਤਤੋ ਤੇ ਪਂਸੁਕੁਲਿਕਾ ਪੁਨਪ੍ਪੁਨਂ ਤੇਸਂ ਵਣ੍ਣਂ ਕਥੇਨ੍ਤਿ, ਦਿਵਸਾਵਸੇਸਂ ਕਥੇਤ੍ਵਾ ਰਤ੍ਤਿਮ੍ਪਿ ਕਥੇਨ੍ਤਿ. ਏਤ੍ਤਾਵਤਾ ਇਚ੍ਛਾਚਾਰੇ ਠਿਤਸ੍ਸ ਸੀਸਂ ਨਿਕ੍ਖਨ੍ਤਂ ਹੋਤਿ ਉਦਰਂ ਫਾਲਿਤਂ. ਏਵਂ ਲੋਕਾਮਿਸਾਧਿਮੁਤ੍ਤੋ ਵੇਦਿਤਬ੍ਬੋ.

੫੯. ਇਦਾਨਿ ਆਨੇਞ੍ਜਸਮਾਪਤ੍ਤਿਲਾਭਿਂ ਅਧਿਮਾਨਿਕਂ ਦਸ੍ਸੇਨ੍ਤੋ ਠਾਨਂ ਖੋ ਪਨੇਤਨ੍ਤਿਆਦਿਮਾਹ. ਆਨੇਞ੍ਜਾਧਿਮੁਤ੍ਤਸ੍ਸਾਤਿ ਕਿਲੇਸਸਿਞ੍ਚਨਵਿਰਹਿਤਾਸੁ ਹੇਟ੍ਠਿਮਾਸੁ ਛਸੁ ਸਮਾਪਤ੍ਤੀਸੁ ਅਧਿਮੁਤ੍ਤਸ੍ਸ ਤਨ੍ਨਿਨ੍ਨਸ੍ਸ ਤਗ੍ਗਰੁਨੋ ਤਪ੍ਪਬ੍ਭਾਰਸ੍ਸ. ਸੇ ਪਵੁਤ੍ਤੇਤਿ ਤਂ ਪਵੁਤ੍ਤਂ. ਛ ਸਮਾਪਤ੍ਤਿਲਾਭਿਨੋ ਹਿ ਅਧਿਮਾਨਿਕਸ੍ਸ ਪਞ੍ਚਕਾਮਗੁਣਾਮਿਸਬਨ੍ਧਨਾ ਪਤਿਤਪਣ੍ਡੁਪਲਾਸੋ ਵਿਯ ਉਪਟ੍ਠਾਤਿ. ਤੇਨੇਤਂ ਵੁਤ੍ਤਂ.

੬੦. ਇਦਾਨਿ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿ ਲਾਭਿਨੋ ਅਧਿਮਾਨਿਕਸ੍ਸ ਨਿਘਂਸਂ ਦਸ੍ਸੇਤੁਂ ਠਾਨਂ ਖੋ ਪਨਾਤਿਆਦਿਮਾਹ. ਤਤ੍ਥ ਦ੍ਵੇਧਾ ਭਿਨ੍ਨਾਤਿ ਮਜ੍ਝੇ ਭਿਨ੍ਨਾ. ਅਪ੍ਪਟਿਸਨ੍ਧਿਕਾਤਿ ਖੁਦ੍ਦਕਾ ਮੁਟ੍ਠਿਪਾਸਾਣਮਤ੍ਤਾ ਜਤੁਨਾ ਵਾ ਸਿਲੇਸੇਨ ਵਾ ਅਲ੍ਲੀਯਾਪੇਤ੍ਵਾ ਪਟਿਸਨ੍ਧਾਤੁਂ ਸਕ੍ਕਾ. ਮਹਨ੍ਤਂ ਪਨ ਕੁਟਾਗਾਰਪ੍ਪਮਾਣਂ ਸਨ੍ਧਾਯੇਤਂ ਵੁਤ੍ਤਂ. ਸੇ ਭਿਨ੍ਨੇਤਿ ਤਂ ਭਿਨ੍ਨਂ. ਉਪਰਿ ਸਮਾਪਤ੍ਤਿਲਾਭਿਨੋ ਹਿ ਹੇਟ੍ਠਾਸਮਾਪਤ੍ਤਿ ਦ੍ਵੇਧਾਭਿਨ੍ਨਾ ਸੇਲਾ ਵਿਯ ਹੋਤਿ, ਤਂ ਸਮਾਪਜ੍ਜਿਸ੍ਸਾਮੀਤਿ ਚਿਤ੍ਤਂ ਨ ਉਪ੍ਪਜ੍ਜਤਿ. ਤੇਨੇਤਂ ਵੁਤ੍ਤਂ.

੬੧. ਇਦਾਨਿ ਨੇਵਸਞ੍ਞਾਨਾਸਞ੍ਞਾਯਤਨਲਾਭਿਨੋ ਅਧਿਮਾਨਿਕਸ੍ਸ ਚ ਨਿਘਂਸਂ ਦਸ੍ਸੇਨ੍ਤੋ ਠਾਨਂ ਖੋ ਪਨਾਤਿਆਦਿਮਾਹ. ਤਤ੍ਥ ਸੇ ਵਨ੍ਤੇਤਿ ਤਂ ਵਨ੍ਤਂ. ਅਟ੍ਠਸਮਾਪਤ੍ਤਿਲਾਭਿਨੋ ਹਿ ਹੇਟ੍ਠਾਸਮਾਪਤ੍ਤਿਯੋ ਵਨ੍ਤਸਦਿਸਾ ਹੁਤ੍ਵਾ ਉਪਟ੍ਠਹਨ੍ਤਿ, ਪੁਨ ਸਮਾਪਜ੍ਜਿਸ੍ਸਾਮੀਤਿ ਚਿਤ੍ਤਂ ਨ ਉਪ੍ਪਜ੍ਜਤਿ. ਤੇਨੇਤਂ ਵੁਤ੍ਤਂ.

੬੨. ਇਦਾਨਿ ਖੀਣਾਸਵਸ੍ਸ ਨਿਘਂਸਂ ਦਸ੍ਸੇਨ੍ਤੋ ਠਾਨਂ ਖੋ ਪਨਾਤਿਆਦਿਮਾਹ. ਤਤ੍ਥ ਸੇ ਉਚ੍ਛਿਨ੍ਨਮੂਲੇਤਿ ਸੋ ਉਚ੍ਛਿਨ੍ਨਮੂਲੋ. ਉਪਰਿ ਸਮਾਪਤ੍ਤਿਲਾਭਿਨੋ ਹਿ ਹੇਟ੍ਠਾਸਮਾਪਤ੍ਤਿ ਮੂਲਚ੍ਛਿਨ੍ਨਤਾਲੋ ਵਿਯ ਉਪਟ੍ਠਾਤਿ, ਤਂ ਸਮਾਪਜ੍ਜਿਸ੍ਸਾਮੀਤਿ ਚਿਤ੍ਤਂ ਨ ਉਪ੍ਪਜ੍ਜਤਿ. ਤੇਨੇਤਂ ਵੁਤ੍ਤਂ.

੬੩. ਠਾਨਂ ਖੋ ਪਨਾਤਿ ਪਾਟਿਯੇਕ੍ਕੋ ਅਨੁਸਨ੍ਧਿ. ਹੇਟ੍ਠਾ ਹਿ ਸਮਾਪਤ੍ਤਿਲਾਭਿਨੋ ਅਧਿਮਾਨਿਕਸ੍ਸਪਿ ਖੀਣਾਸਵਸ੍ਸਪਿ ਨਿਘਂਸੋ ਕਥਿਤੋ, ਸੁਕ੍ਖਵਿਪਸ੍ਸਕਸ੍ਸ ਪਨ ਅਧਿਮਾਨਿਕਸ੍ਸਪਿ ਖੀਣਾਸਵਸ੍ਸਪਿ ਨ ਕਥਿਤੋ. ਤੇਸਂ ਦ੍ਵਿਨ੍ਨਮ੍ਪਿ ਨਿਘਂਸਂ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਤਂ ਪਨ ਪਟਿਕ੍ਖਿਤ੍ਤਂ. ਸਮਾਪਤ੍ਤਿਲਾਭਿਨੋ ਹਿ ਅਧਿਮਾਨਿਕਸ੍ਸ ਨਿਘਂਸੇ ਕਥਿਤੇ ਸੁਕ੍ਖਵਿਪਸ੍ਸਕਸ੍ਸਪਿ ਅਧਿਮਾਨਿਕਸ੍ਸ ਕਥਿਤੋਵ ਹੋਤਿ, ਸਮਾਪਤ੍ਤਿਲਾਭਿਨੋ ਚ ਖੀਣਾਸਵਸ੍ਸ ਕਥਿਤੇ ਸੁਕ੍ਖਵਿਪਸ੍ਸਕਖੀਣਾਸਵਸ੍ਸ ਕਥਿਤੋਵ ਹੋਤਿ. ਏਤੇਸਂ ਪਨ ਦ੍ਵਿਨ੍ਨਂ ਭਿਕ੍ਖੂਨਂ ਸਪ੍ਪਾਯਾਸਪ੍ਪਾਯਂ ਕਥੇਤੁਂ ਇਮਂ ਦੇਸਨਂ ਆਰਭਿ.

ਤਤ੍ਥ ਸਿਯਾ – ਪੁਥੁਜ੍ਜਨਸ੍ਸ ਤਾਵ ਆਰਮ੍ਮਣਂ ਅਸਪ੍ਪਾਯਂ ਹੋਤੁ, ਖੀਣਾਸਵਸ੍ਸ ਕਥਂ ਅਸਪ੍ਪਾਯਨ੍ਤਿ. ਯਦਗ੍ਗੇਨ ਪੁਥੁਜ੍ਜਨਸ੍ਸ ਅਸਪ੍ਪਾਯਂ, ਤਦਗ੍ਗੇਨ ਖੀਣਾਸਵਸ੍ਸਾਪਿ ਅਸਪ੍ਪਾਯਮੇਵ. ਵਿਸਂ ਨਾਮ ਜਾਨਿਤ੍ਵਾ ਖਾਦਿਤਮ੍ਪਿ ਅਜਾਨਿਤ੍ਵਾ ਖਾਦਿਤਮ੍ਪਿ ਵਿਸਮੇਵ. ਨ ਹਿ ਖੀਣਾਸਵੇਨਪਿ ‘‘ਅਹਂ ਖੀਣਾਸਵੋ’’ਤਿ ਅਸਂਵੁਤੇਨ ਭਵਿਤਬ੍ਬਂ. ਖੀਣਾਸਵੇਨਪਿ ਯੁਤ੍ਤਪਯੁਤ੍ਤੇਨੇਵ ਭਵਿਤੁਂ ਵਟ੍ਟਤਿ.

੬੪. ਤਤ੍ਥ ਸਮਣੇਨਾਤਿ ਬੁਦ੍ਧਸਮਣੇਨ. ਛਨ੍ਦਰਾਗਬ੍ਯਾਪਾਦੇਨਾਤਿ ਸੋ ਅਵਿਜ੍ਜਾਸਙ੍ਖਾਤੋ ਵਿਸਦੋਸੋ ਛਨ੍ਦਰਾਗੇਨ ਚ ਬ੍ਯਾਪਾਦੇਨ ਚ ਰੁਪ੍ਪਤਿ ਕੁਪ੍ਪਤਿ. ਅਸਪ੍ਪਾਯਾਨੀਤਿ ਅਵਡ੍ਢਿਕਰਾਨਿ ਆਰਮ੍ਮਣਾਨਿ. ਅਨੁਦ੍ਧਂਸੇਯ੍ਯਾਤਿ ਸੋਸੇਯ੍ਯ ਮਿਲਾਪੇਯ੍ਯ. ਸਉਪਾਦਿਸੇਸਨ੍ਤਿ ਸਗਹਣਸੇਸਂ, ਉਪਾਦਿਤਬ੍ਬਂ ਗਣ੍ਹਿਤਬ੍ਬਂ ਇਧ ਉਪਾਦੀਤਿ ਵੁਤ੍ਤਂ. ਅਨਲਞ੍ਚ ਤੇ ਅਨ੍ਤਰਾਯਾਯਾਤਿ ਜੀਵਿਤਨ੍ਤਰਾਯਂ ਤੇ ਕਾਤੁਂ ਅਸਮਤ੍ਥਂ. ਰਜੋਸੂਕਨ੍ਤਿ ਰਜੋ ਚ ਵੀਹਿਸੁਕਾਦਿ ਚ ਸੂਕਂ. ਅਸੁ ਚ ਵਿਸਦੋਸੋਤਿ ਸੋ ਚ ਵਿਸਦੋਸੋ. ਤਦੁਭਯੇਨਾਤਿ ਯਾ ਸਾ ਅਸਪ੍ਪਾਯਕਿਰਿਯਾ ਚ ਯੋ ਵਿਸਦੋਸੋ ਚ, ਤੇਨ ਉਭਯੇਨ. ਪੁਥੁਤ੍ਤਨ੍ਤਿ ਮਹਨ੍ਤਭਾਵਂ.

ਏਵਮੇਵ ਖੋਤਿ ਏਤ੍ਥ ਸਉਪਾਦਾਨਸਲ੍ਲੁਦ੍ਧਾਰੋ ਵਿਯ ਅਪ੍ਪਹੀਨੋ ਅਵਿਜ੍ਜਾਵਿਸਦੋਸੋ ਦਟ੍ਠਬ੍ਬੋ, ਅਸਪ੍ਪਾਯਕਿਰਿਯਾਯ ਠਿਤਭਾਵੋ ਵਿਯ ਛਸੁ ਦ੍ਵਾਰੇਸੁ ਅਸਂਵੁਤਕਾਲੋ, ਤਦੁਭਯੇਨ ਵਣੇ ਪੁਥੁਤ੍ਤਂ ਗਤੇ ਮਰਣਂ ਵਿਯ ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾਵਤ੍ਤਨਂ, ਮਰਣਮਤ੍ਤਂ ਦੁਕ੍ਖਂ ਵਿਯ ਅਞ੍ਞਤਰਾਯ ਗਰੁਕਾਯ ਸਂਕਿਲਿਟ੍ਠਾਯ ਆਪਤ੍ਤਿਯਾ ਆਪਜ੍ਜਨਂ ਦਟ੍ਠਬ੍ਬਂ. ਸੁਕ੍ਕਪਕ੍ਖੇਪਿ ਇਮਿਨਾਵ ਨਯੇਨ ਓਪਮ੍ਮਸਂਸਨ੍ਦਨਂ ਵੇਦਿਤਬ੍ਬਂ.

੬੫. ਸਤਿਯਾਯੇਤਂ ਅਧਿਵਚਨਨ੍ਤਿ ਏਤ੍ਥ ਸਤਿ ਪਞ੍ਞਾਗਤਿਕਾ. ਲੋਕਿਕਾਯ ਪਞ੍ਞਾਯ ਲੋਕਿਕਾ ਹੋਤਿ, ਲੋਕੁਤ੍ਤਰਾਯ ਲੋਕੁਤ੍ਤਰਾ. ਅਰਿਯਾਯੇਤਂ ਪਞ੍ਞਾਯਾਤਿ ਪਰਿਸੁਦ੍ਧਾਯ ਵਿਪਸ੍ਸਨਾਪਞ੍ਞਾਯ.

ਇਦਾਨਿ ਖੀਣਾਸਵਸ੍ਸ ਬਲਂ ਦਸ੍ਸੇਨ੍ਤੋ ਸੋ ਵਤਾਤਿਆਦਿਮਾਹ. ਤਤ੍ਥ ਸਂਵੁਤਕਾਰੀਤਿ ਪਿਹਿਤਕਾਰੀ. ਇਤਿ ਵਿਦਿਤ੍ਵਾ ਨਿਰੁਪਧੀਤਿ ਏਵਂ ਜਾਨਿਤ੍ਵਾ ਕਿਲੇਸੁਪਧਿਪਹਾਨਾ ਨਿਰੁਪਧਿ ਹੋਤਿ, ਨਿਰੁਪਾਦਾਨੋਤਿ ਅਤ੍ਥੋ. ਉਪਧਿਸਙ੍ਖਯੇ ਵਿਮੁਤ੍ਤੋਤਿ ਉਪਧੀਨਂ ਸਙ੍ਖਯਭੂਤੇ ਨਿਬ੍ਬਾਨੇ ਆਰਮ੍ਮਣਤੋ ਵਿਮੁਤ੍ਤੋ. ਉਪਧਿਸ੍ਮਿਨ੍ਤਿ ਕਾਮੁਪਧਿਸ੍ਮਿਂ. ਕਾਯਂ ਉਪਸਂਹਰਿਸ੍ਸਤੀਤਿ ਕਾਯਂ ਅਲ੍ਲੀਯਾਪੇਸ੍ਸਤਿ. ਇਦਂ ਵੁਤ੍ਤਂ ਹੋਤਿ – ਤਣ੍ਹਕ੍ਖਯੇ ਨਿਬ੍ਬਾਨੇ ਆਰਮ੍ਮਣਤੋ ਵਿਮੁਤ੍ਤੋ ਖੀਣਾਸਵੋ ਪਞ੍ਚ ਕਾਮਗੁਣੇ ਸੇਵਿਤੁਂ, ਕਾਯਂ ਵਾ ਉਪਸਂਹਰਿਸ੍ਸਤਿ ਚਿਤ੍ਤਂ ਵਾ ਉਪ੍ਪਾਦੇਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਸੁਨਕ੍ਖਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.