੪. ਸਾਮਗਾਮਸੁਤ੍ਤਵਣ੍ਣਨਾ

੪੧. ਏਵਂ ਮੇ ਸੁਤਨ੍ਤਿ ਸਾਮਗਾਮਸੁਤ੍ਤਂ. ਤਤ੍ਥ ਸਾਮਗਾਮੇਤਿ ਸਾਮਾਕਾਨਂ ਉਸ੍ਸਨ੍ਨਤ੍ਤਾ ਏਵਂਲਦ੍ਧਨਾਮੇ ਗਾਮੇ. ਅਧੁਨਾ ਕਾਲਙ੍ਕਤੋਤਿ ਸਮ੍ਪਤਿ ਕਾਲਂ ਕਤੋ. ਦ੍ਵੇਧਿਕਜਾਤਾਤਿ ਦ੍ਵੇਜ੍ਝਜਾਤਾ ਦ੍ਵੇਭਾਗਜਾਤਾ. ਭਣ੍ਡਨਾਦੀਸੁ ਭਣ੍ਡਨਂ ਪੁਬ੍ਬਭਾਗਕਲਹੋ, ਤਂ ਦਣ੍ਡਾਦਾਨਾਦਿਵਸੇਨ ਪਣ੍ਣਤ੍ਤਿਵੀਤਿਕ੍ਕਮਵਸੇਨ ਚ ਵਦ੍ਧਿਤਂ ਕਲਹੋ, ‘‘ਨ ਤ੍ਵਂ ਇਮਂ ਧਮ੍ਮਵਿਨਯਂ ਆਜਾਨਾਸੀ’’ਤਿਆਦਿਕਂ ਵਿਰੁਦ੍ਧਵਚਨਂ ਵਿਵਾਦੋ. ਵਿਤੁਦਨ੍ਤਾਤਿ ਵਿਤੁਜ੍ਜਨ੍ਤਾ. ਸਹਿਤਂ ਮੇਤਿ ਮਮ ਵਚਨਂ ਅਤ੍ਥਸਂਹਿਤਂ. ਅਧਿਚਿਣ੍ਣਂ ਤੇ ਵਿਪਰਾਵਤ੍ਤਨ੍ਤਿ ਯਂ ਤਵ ਅਧਿਚਿਣ੍ਣਂ ਚਿਰਕਾਲਸੇਵਨਵਸੇਨ ਪਗੁਣਂ, ਤਂ ਮਮ ਵਾਦਂ ਆਗਮ੍ਮ ਨਿਵਤ੍ਤਂ. ਆਰੋਪਿਤੋ ਤੇ ਵਾਦੋਤਿ ਤੁਯ੍ਹਂ ਉਪਰਿ ਮਯਾ ਦੋਸੋ ਆਰੋਪਿਤੋ. ਚਰ ਵਾਦਪ੍ਪਮੋਕ੍ਖਾਯਾਤਿ ਭਤ੍ਤਪੁਟਂ ਆਦਾਯ ਤਂ ਤਂ ਉਪਸਙ੍ਕਮਿਤ੍ਵਾ ਵਾਦਪ੍ਪਮੋਕ੍ਖਤ੍ਥਾਯ ਉਤ੍ਤਰਿ ਪਰਿਯੇਸਮਾਨੋ ਚਰ. ਨਿਬ੍ਬੇਠੇਹਿ ਵਾਤਿ ਅਥ ਮਯਾ ਆਰੋਪਿਤਵਾਦਤੋ ਅਤ੍ਤਾਨਂ ਮੋਚੇਹਿ. ਸਚੇ ਪਹੋਸੀਤਿ ਸਚੇ ਸਕ੍ਕੋਸਿ. ਵਧੋਯੇਵਾਤਿ ਮਰਣਮੇਵ.

ਨਾਟਪੁਤ੍ਤਿਯੇਸੂਤਿ ਨਾਟਪੁਤ੍ਤਸ੍ਸ ਅਨ੍ਤੇਵਾਸਿਕੇਸੁ. ਨਿਬ੍ਬਿਨ੍ਨਰੂਪਾਤਿ ਉਕ੍ਕਣ੍ਠਿਤਸਭਾਵਾ, ਅਭਿਵਾਦਨਾਦੀਨਿ ਨ ਕਰੋਨ੍ਤਿ. ਵਿਰਤ੍ਤਰੂਪਾਤਿ ਵਿਗਤਪੇਮਾ. ਪਟਿਵਾਨਰੂਪਾਤਿ ਤੇਸਂ ਨਿਪਚ੍ਚਕਿਰਿਯਤੋ ਨਿਵਤ੍ਤਸਭਾਵਾ. ਯਥਾ ਤਨ੍ਤਿ ਯਥਾ ਚ ਦੁਰਕ੍ਖਾਤਾਦਿਸਭਾਵੇ ਧਮ੍ਮਵਿਨਯੇ ਨਿਬ੍ਬਿਨ੍ਨਵਿਰਤ੍ਤਪਟਿਵਾਨਰੂਪੇਹਿ ਭਵਿਤਬ੍ਬਂ, ਤਥੇਵ ਜਾਤਾਤਿ ਅਤ੍ਥੋ. ਦੁਰਕ੍ਖਾਤੇਤਿ ਦੁਕ੍ਕਥਿਤੇ. ਦੁਪ੍ਪਵੇਦਿਤੇਤਿ ਦੁਵਿਞ੍ਞਾਪਿਤੇ. ਅਨੁਪਸਮਸਂਵਤ੍ਤਨਿਕੇਤਿ ਰਾਗਾਦੀਨਂ ਉਪਸਮਂ ਕਾਤੁਂ ਅਸਮਤ੍ਥੋ. ਭਿਨ੍ਨਥੂਪੇਤਿ ਭਿਨ੍ਨਪਤਿਟ੍ਠੇ. ਏਤ੍ਥ ਹਿ ਨਾਟਪੁਤ੍ਤੋਵ ਨੇਸਂ ਪਤਿਟ੍ਠੇਨ ਥੂਪੋ, ਸੋ ਪਨ ਭਿਨ੍ਨੋ ਮਤੋ. ਤੇਨ ਵੁਤ੍ਤਂ ‘‘ਭਿਨ੍ਨਥੂਪੇ’’ਤਿ. ਅਪ੍ਪਟਿਸਰਣੇਤਿ ਤਸ੍ਸੇਵ ਅਭਾਵੇਨ ਪਟਿਸਰਣਵਿਰਹਿਤੇ.

ਨਨੁ ਚਾਯਂ ਨਾਟਪੁਤ੍ਤੋ ਨਾਲ਼ਨ੍ਦਵਾਸਿਕੋ, ਸੋ ਕਸ੍ਮਾ ਪਾਵਾਯਂ ਕਾਲਂਕਤੋਤਿ. ਸੋ ਕਿਰ ਉਪਾਲਿਨਾ ਗਹਪਤਿਨਾ ਪਟਿਵਿਦ੍ਧਸਚ੍ਚੇਨ ਦਸਹਿ ਗਾਥਾਹਿ ਭਾਸਿਤੇ ਬੁਦ੍ਧਗੁਣੇ ਸੁਤ੍ਵਾ ਉਣ੍ਹਂ ਲੋਹਿਤਂ ਛਡ੍ਡੇਸਿ. ਅਥ ਨਂ ਅਫਾਸੁਕਂ ਗਹੇਤ੍ਵਾ ਪਾਵਂ ਅਗਮਂਸੁ, ਸੋ ਤਤ੍ਥ ਕਾਲਮਕਾਸਿ. ਕਾਲਂ ਕੁਰੁਮਾਨੋ ਚ ‘‘ਮਮ ਲਦ੍ਧਿ ਅਨਿਯ੍ਯਾਨਿਕਾ ਸਾਰਰਹਿਤਾ, ਮਯਂ ਤਾਵ ਨਟ੍ਠਾ, ਅਵਸੇਸਜਨੋ ਮਾ ਅਪਾਯਪੂਰਕੋ ਅਹੋਸਿ. ਸਚੇ ਪਨਾਹਂ ‘ਮਮ ਸਾਸਨਂ ਅਨਿਯ੍ਯਾਨਿਕ’ਨ੍ਤਿ ਵਕ੍ਖਾਮਿ, ਨ ਸਦ੍ਦਹਿਸ੍ਸਨ੍ਤਿ. ਯਂਨੂਨਾਹਂ ਦ੍ਵੇਪਿ ਜਨੇ ਨ ਏਕਨੀਹਾਰੇਨ ਉਗ੍ਗਣ੍ਹਾਪੇਯ੍ਯਂ, ਤੇ ਮਮਚ੍ਚਯੇਨ ਅਞ੍ਞਮਞ੍ਞਂ ਵਿਵਦਿਸ੍ਸਨ੍ਤਿ. ਸਤ੍ਥਾ ਤਂ ਵਿਵਾਦਂ ਪਟਿਚ੍ਚ ਏਕਂ ਧਮ੍ਮਕਥਂ ਕਥੇਸ੍ਸਤਿ, ਤਤੋ ਤੇ ਸਾਸਨਸ੍ਸ ਮਹਨ੍ਤਭਾਵਂ ਜਾਤਿਸ੍ਸਨ੍ਤੀ’’ਤਿ.

ਅਥ ਨਂ ਏਕੋ ਅਨ੍ਤੇਵਾਸਿਕੋ ਉਪਸਙ੍ਕਮਿਤ੍ਵਾ ਆਹ ‘‘ਭਨ੍ਤੇ, ਤੁਮ੍ਹੇ ਦੁਬ੍ਬਲਾ, ਮਯ੍ਹਂ ਇਮਸ੍ਮਿਂ ਧਮ੍ਮੇ ਸਾਰਂ ਆਚਿਕ੍ਖਥ ਆਚਰਿਯਪ੍ਪਮਾਣ’’ਨ੍ਤਿ. ਆਵੁਸੋ, ਤ੍ਵਂ ਮਮਚ੍ਚਯੇਨ ਸਸ੍ਸਤਨ੍ਤਿ ਗਣ੍ਹੇਯ੍ਯਾਸੀਤਿ. ਅਪਰੋਪਿ ਤਂ ਉਪਸਙ੍ਕਮਿ, ਤਂ ਉਚ੍ਛੇਦਂ ਗਣ੍ਹਾਪੇਸਿ. ਏਵਂ ਦ੍ਵੇਪਿ ਜਨੇ ਏਕਲਦ੍ਧਿਕੇ ਅਕਤ੍ਵਾ ਬਹੂ ਨਾਨਾਨੀਹਾਰੇਨ ਉਗ੍ਗਣ੍ਹਾਪੇਤ੍ਵਾ ਕਾਲਮਕਾਸਿ. ਤੇ ਤਸ੍ਸ ਸਰੀਰਕਿਚ੍ਚਂ ਕਤ੍ਵਾ ਸਨ੍ਨਿਪਤਿਤ੍ਵਾ ਅਞ੍ਞਮਞ੍ਞਂ ਪੁਚ੍ਛਿਂਸੁ ‘‘ਕਸ੍ਸਾਵੁਸੋ, ਆਚਰਿਯੋ ਸਾਰਮਾਚਿਕ੍ਖੀ’’ਤਿ? ਏਕੋ ਉਟ੍ਠਹਿਤ੍ਵਾ ਮਯ੍ਹਨ੍ਤਿ ਆਹ. ਕਿਂ ਆਚਿਕ੍ਖੀਤਿ? ਸਸ੍ਸਤਨ੍ਤਿ. ਅਪਰੋ ਤਂ ਪਟਿਬਾਹਿਤ੍ਵਾ ਮਯ੍ਹਂ ਸਾਰਂ ਆਚਿਕ੍ਖੀਤਿ ਆਹ. ਏਵਂ ਸਬ੍ਬੇ ‘‘ਮਯ੍ਹਂ ਸਾਰਂ ਆਚਿਕ੍ਖਿ, ਅਹਂ ਜੇਟ੍ਠਕੋ’’ਤਿ ਅਞ੍ਞਮਞ੍ਞਂ ਵਿਵਾਦਂ ਵਡ੍ਢੇਤ੍ਵਾ ਅਕ੍ਕੋਸੇ ਚੇਵ ਪਰਿਭਾਸੇ ਚ ਹਤ੍ਥਪਾਦਪਹਾਰਾਦੀਨਿ ਚ ਪਵਤ੍ਤੇਤ੍ਵਾ ਏਕਮਗ੍ਗੇਨ ਦ੍ਵੇ ਅਗਚ੍ਛਨ੍ਤਾ ਨਾਨਾਦਿਸਾਸੁ ਪਕ੍ਕਮਿਂਸੁ, ਏਕਚ੍ਚੇ ਗਿਹੀ ਅਹੇਸੁਂ.

ਭਗਵਤੋ ਪਨ ਧਰਮਾਨਕਾਲੇਪਿ ਭਿਕ੍ਖੁਸਙ੍ਘੇ ਵਿਵਾਦੋ ਨ ਉਪ੍ਪਜ੍ਜਿ. ਸਤ੍ਥਾ ਹਿ ਤੇਸਂ ਵਿਵਾਦਕਾਰਣੇ ਉਪ੍ਪਨ੍ਨਮਤ੍ਤੇਯੇਵ ਸਯਂ ਵਾ ਗਨ੍ਤ੍ਵਾ ਤੇ ਵਾ ਭਿਕ੍ਖੂ ਪਕ੍ਕੋਸਾਪੇਤ੍ਵਾ ਖਨ੍ਤਿ ਮੇਤ੍ਤਾ ਪਟਿਸਙ੍ਖਾ ਅਵਿਹਿਂਸਾ ਸਾਰਣੀਯਧਮ੍ਮੇਸੁ ਏਕਂ ਕਾਰਣਂ ਕਥੇਤ੍ਵਾ ਵਿਵਾਦਂ ਵੂਪਸਮੇਤਿ. ਏਵਂ ਧਰਮਾਨੋਪਿ ਸਙ੍ਘਸ੍ਸ ਪਤਿਟ੍ਠਾਵ ਅਹੋਸਿ. ਪਰਿਨਿਬ੍ਬਾਯਮਾਨੋਪਿ ਅਵਿਵਾਦਕਾਰਣਂ ਕਤ੍ਵਾਵ ਪਰਿਨਿਬ੍ਬਾਯਿ. ਭਗਵਤਾ ਹਿ ਸੁਤ੍ਤੇ ਦੇਸਿਤਾ ਚਤ੍ਤਾਰੋ ਮਹਾਪਦੇਸਾ (ਅ. ਨਿ. ੪.੧੮੦; ਦੀ. ਨਿ. ੨.੧੮੭) ਯਾਵਜ੍ਜਦਿਵਸਾ ਭਿਕ੍ਖੂਨਂ ਪਤਿਟ੍ਠਾ ਚ ਅਵਸ੍ਸਯੋ ਚ. ਤਥਾ ਖਨ੍ਧਕੇ ਦੇਸਿਤਾ ਚਤ੍ਤਾਰੋ ਮਹਾਪਦੇਸਾ (ਮਹਾਵ. ੩੦੫) ਸੁਤ੍ਤੇ ਵੁਤ੍ਤਾਨਿ ਚਤ੍ਤਾਰਿ ਪਞ੍ਹਬ੍ਯਾਕਰਣਾਨਿ (ਅ. ਨਿ. ੪.੪੨) ਚ. ਤੇਨੇਵਾਹ – ‘‘ਯੋ ਵੋ ਮਯਾ, ਆਨਨ੍ਦ, ਧਮ੍ਮੋ ਚ ਵਿਨਯੋ ਚ ਦੇਸਿਤੋ ਪਞ੍ਞਤ੍ਤੋ, ਸੋ ਵੋ ਮਮਚ੍ਚਯੇਨ ਸਤ੍ਥਾ’’ਤਿ (ਦੀ. ਨਿ. ੨.੨੧੬).

੪੨. ਅਥ ਖੋ ਚੁਨ੍ਦੋ ਸਮਣੁਦ੍ਦੇਸੋਤਿ ਅਯਂ ਥੇਰੋ ਧਮ੍ਮਸੇਨਾਪਤਿਸ੍ਸ ਕਨਿਟ੍ਠਭਾਤਿਕੋ. ਤਂ ਭਿਕ੍ਖੂ ਅਨੁਪਸਮ੍ਪਨ੍ਨਕਾਲੇ ਚੁਨ੍ਦੋ ਸਮਣੁਦ੍ਦੇਸੋਤਿ ਸਮੁਦਾਚਰਿਤ੍ਵਾ ਥੇਰਕਾਲੇਪਿ ਤਥੇਵ ਸਮੁਦਾਚਰਿਂਸੁ. ਤੇਨ ਵੁਤ੍ਤਂ ‘‘ਚੁਨ੍ਦੋ ਸਮਣੁਦ੍ਦੇਸੋ’’ਤਿ. ਉਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਨਾਟਪੁਤ੍ਤੇ ਕਿਰ ਕਾਲਂਕਤੇ ਜਮ੍ਬੁਦੀਪੇ ਮਨੁਸ੍ਸਾ ਤਤ੍ਥ ਤਤ੍ਥ ਕਥਂ ਪਵਤ੍ਤਯਿਂਸੁ – ‘‘ਨਿਗਣ੍ਠੋ ਨਾਟਪੁਤ੍ਤੋ ਏਕੋ ਸਤ੍ਥਾਤਿ ਪਞ੍ਞਾਯਿਤ੍ਥ, ਤਸ੍ਸ ਕਾਲਕਿਰਿਯਾਯ ਸਾਵਕਾਨਂ ਏਵਰੂਪੋ ਵਿਵਾਦੋ ਜਾਤੋ, ਸਮਣੋ ਪਨ ਗੋਤਮੋ ਜਮ੍ਬੁਦੀਪੇ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਪਾਕਟੋਯੇਵ, ਕੀਦਿਸੋ ਨੁ ਖੋ ਸਮਣੇ ਗੋਤਮੇ ਪਰਿਨਿਬ੍ਬੁਤੇ ਸਾਵਕਾਨਂ ਵਿਵਾਦੋ ਭਵਿਸ੍ਸਤੀ’’ਤਿ. ਥੇਰੋ ਤਂ ਕਥਂ ਸੁਤ੍ਵਾ ਚਿਨ੍ਤੇਸਿ – ‘‘ਇਮਂ ਕਥਂ ਗਹੇਤ੍ਵਾ ਦਸਬਲਸ੍ਸ ਆਰੋਚੇਸ੍ਸਾਮਿ, ਸਤ੍ਥਾ ਚ ਏਤਂ ਅਤ੍ਥੁਪ੍ਪਤ੍ਤਿਂ ਕਤ੍ਵਾ ਏਕਂ ਦੇਸਨਂ ਕਥੇਸ੍ਸਤੀ’’ਤਿ. ਸੋ ਨਿਕ੍ਖਮਿਤ੍ਵਾ ਯੇਨ ਸਾਮਗਾਮੋ, ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ. ਉਜੁਮੇਵ ਭਗਵਤੋ ਸਨ੍ਤਿਕਂ ਅਗਨ੍ਤ੍ਵਾ ਯੇਨਸ੍ਸ ਉਪਜ੍ਝਾਯੋ ਆਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮੀਤਿ ਅਤ੍ਥੋ. ਏਵਂ ਕਿਰਸ੍ਸ ਅਹੋਸਿ – ‘‘ਉਪਜ੍ਝਾਯੋ ਮੇ ਮਹਾਪਞ੍ਞੋ, ਸੋ ਇਮਂ ਸਾਸਨਂ ਸਤ੍ਥੁ ਆਰੋਚੇਸ੍ਸਤਿ, ਅਥ ਸਤ੍ਥਾ ਤਦਨੁਰੂਪਂ ਧਮ੍ਮਂ ਦੇਸੇਸ੍ਸਤੀ’’ਤਿ. ਕਥਾਪਾਭਤਨ੍ਤਿ ਕਥਾਮੂਲਂ, ਮੂਲਞ੍ਹਿ ਪਾਭਤਨ੍ਤਿ ਵੁਚ੍ਚਤਿ. ਯਥਾਹ –

‘‘ਅਪ੍ਪਕੇਨਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;

ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ. (ਜਾ. ੨.੧.੪);

ਦਸ੍ਸਨਾਯਾਤਿ ਦਸ੍ਸਨਤ੍ਥਾਯ. ਕਿਂ ਪਨਿਮਿਨਾ ਭਗਵਾ ਨ ਦਿਟ੍ਠਪੁਬ੍ਬੋਤਿ? ਨੋ ਨ ਦਿਟ੍ਠਪੁਬ੍ਬੋ, ਅਯਞ੍ਹਿ ਆਯਸ੍ਮਾ ਦਿਵਾ ਨਵ ਵਾਰੇ ਰਤ੍ਤਿਂ ਨਵ ਵਾਰੇਤਿ ਏਕਾਹਂ ਅਟ੍ਠਾਰਸ ਵਾਰੇ ਉਪਟ੍ਠਾਨਮੇਵ ਗਚ੍ਛਤਿ. ਦਿਵਸਸ੍ਸ ਪਨ ਸਤਕ੍ਖਤ੍ਤੁਂ ਵਾ ਸਹਸ੍ਸਕ੍ਖਤ੍ਤੁਂ ਵਾ ਗਨ੍ਤੁਕਾਮੋ ਸਮਾਨੋਪਿ ਨ ਅਕਾਰਣਾ ਗਚ੍ਛਤਿ, ਏਕਂ ਪਞ੍ਹੁਦ੍ਧਾਰਂ ਗਹੇਤ੍ਵਾਵ ਗਚ੍ਛਤਿ. ਸੋ ਤਂਦਿਵਸਂ ਤੇਨ ਗਨ੍ਤੁਕਾਮੋ ਏਵਮਾਹ.

ਅਹਿਤਾਯ ਦੁਕ੍ਖਾਯ ਦੇਵਮਨੁਸ੍ਸਾਨਨ੍ਤਿ ਏਕਸ੍ਮਿਂ ਵਿਹਾਰੇ ਸਙ੍ਘਮਜ੍ਝੇ ਉਪ੍ਪਨ੍ਨੋ ਵਿਵਾਦੋ ਕਥਂ ਦੇਵਮਨੁਸ੍ਸਾਨਂ ਅਹਿਤਾਯ ਦੁਕ੍ਖਾਯ ਸਂਵਤ੍ਤਤਿ? ਕੋਸਮ੍ਬਕਕ੍ਖਨ੍ਧਕੇ (ਮਹਾਵ. ੪੫੧) ਵਿਯ ਹਿ ਦ੍ਵੀਸੁ ਭਿਕ੍ਖੂਸੁ ਵਿਵਾਦਂ ਆਪਨ੍ਨੇਸੁ ਤਸ੍ਮਿਂ ਵਿਹਾਰੇ ਤੇਸਂ ਅਨ੍ਤੇਵਾਸਿਕਾ ਵਿਵਦਨ੍ਤਿ, ਤੇਸਂ ਓਵਾਦਂ ਗਣ੍ਹਨ੍ਤੋ ਭਿਕ੍ਖੁਨਿਸਙ੍ਘੋ ਵਿਵਦਤਿ, ਤਤੋ ਤੇਸਂ ਉਪਟ੍ਠਾਕਾ ਵਿਵਦਨ੍ਤਿ, ਅਥ ਮਨੁਸ੍ਸਾਨਂ ਆਰਕ੍ਖਦੇਵਤਾ ਦ੍ਵੇ ਕੋਟ੍ਠਾਸਾ ਹੋਨ੍ਤਿ. ਤਤ੍ਥ ਧਮ੍ਮਵਾਦੀਨਂ ਆਰਕ੍ਖਦੇਵਤਾ ਧਮ੍ਮਵਾਦਿਨਿਯੋ ਹੋਨ੍ਤਿ, ਅਧਮ੍ਮਵਾਦੀਨਂ ਅਧਮ੍ਮਵਾਦਿਨਿਯੋ ਹੋਨ੍ਤਿ. ਤਤੋ ਤਾਸਂ ਆਰਕ੍ਖਦੇਵਤਾਨਂ ਮਿਤ੍ਤਾ ਭੁਮ੍ਮਦੇਵਤਾ ਭਿਜ੍ਜਨ੍ਤਿ. ਏਵਂ ਪਰਮ੍ਪਰਾਯ ਯਾਵ ਬ੍ਰਹ੍ਮਲੋਕਾ ਠਪੇਤ੍ਵਾ ਅਰਿਯਸਾਵਕੇ ਸਬ੍ਬੇ ਦੇਵਮਨੁਸ੍ਸਾ ਦ੍ਵੇ ਕੋਟ੍ਠਾਸਾ ਹੋਨ੍ਤਿ. ਧਮ੍ਮਵਾਦੀਹਿ ਪਨ ਅਧਮ੍ਮਵਾਦਿਨੋਵ ਬਹੁਤਰਾ ਹੋਨ੍ਤਿ, ਤਤੋ ਯਂ ਬਹੂਹਿ ਗਹਿਤਂ, ਤਂ ਗਣ੍ਹਨ੍ਤਿ. ਧਮ੍ਮਂ ਵਿਸ੍ਸਜ੍ਜੇਤ੍ਵਾ ਬਹੁਤਰਾਵ ਅਧਮ੍ਮਂ ਗਣ੍ਹਨ੍ਤਿ. ਤੇ ਅਧਮ੍ਮਂ ਪੂਰੇਤ੍ਵਾ ਵਿਹਰਨ੍ਤਾ ਅਪਾਯੇ ਨਿਬ੍ਬਤ੍ਤਨ੍ਤਿ. ਏਵਂ ਏਕਸ੍ਮਿਂ ਵਿਹਾਰੇ ਸਙ੍ਘਮਜ੍ਝੇ ਉਪ੍ਪਨ੍ਨੋ ਵਿਵਾਦੋ ਬਹੂਨਂ ਅਹਿਤਾਯ ਦੁਕ੍ਖਾਯ ਹੋਤਿ.

੪੩. ਅਭਿਞ੍ਞਾ ਦੇਸਿਤਾਤਿ ਮਹਾਬੋਧਿਮੂਲੇ ਨਿਸਿਨ੍ਨੇਨ ਪਚ੍ਚਕ੍ਖਂ ਕਤ੍ਵਾ ਪਵੇਦਿਤਾ. ਪਤਿਸ੍ਸਯਮਾਨਰੂਪਾ ਵਿਹਰਨ੍ਤੀਤਿ ਉਪਨਿਸ੍ਸਾਯ ਵਿਹਰਨ੍ਤਿ. ਭਗਵਤੋ ਅਚ੍ਚਯੇਨਾਤਿ ਏਤਰਹਿ ਭਗਵਨ੍ਤਂ ਜੇਟ੍ਠਕਂ ਕਤ੍ਵਾ ਸਗਾਰਵਾ ਵਿਹਰਨ੍ਤਿ, ਤੁਮ੍ਹਾਕਂ, ਭਨ੍ਤੇ, ਉਗ੍ਗਤੇਜਤਾਯ ਦੁਰਾਸਦਤਾਯ ਵਿਵਾਦਂ ਜਨੇਤੁਂ ਨ ਸਕ੍ਕੋਨ੍ਤਿ, ਭਗਵਤੋ ਪਨ ਅਚ੍ਚਯੇਨ ਵਿਵਾਦਂ ਜਨੇਯ੍ਯੁਨ੍ਤਿ ਵਦਤਿ. ਯਤ੍ਥ ਪਨ ਤਂ ਵਿਵਾਦਂ ਜਨੇਯ੍ਯੁਂ, ਤਂ ਦਸ੍ਸੇਨ੍ਤੋ ਅਜ੍ਝਾਜੀਵੇ ਵਾ ਅਧਿਪਾਤਿਮੋਕ੍ਖੇ ਵਾਤਿ ਆਹ. ਤਤ੍ਥ ਅਜ੍ਝਾਜੀਵੇਤਿ ਆਜੀਵਹੇਤੁ ਆਜੀਵਕਾਰਣਾ – ‘‘ਭਿਕ੍ਖੁ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ ਆਪਤ੍ਤਿ ਪਾਰਾਜਿਕਸ੍ਸਾ’’ਤਿਆਦਿਨਾ (ਪਰਿ. ੨੮੭) ਨਯੇਨ ਪਰਿਵਾਰੇ ਪਞ੍ਞਤ੍ਤਾਨਿ ਛ ਸਿਕ੍ਖਾਪਦਾਨਿ, ਤਾਨਿ ਠਪੇਤ੍ਵਾ ਸੇਸਾਨਿ ਸਬ੍ਬਸਿਕ੍ਖਾਪਦਾਨਿ ਅਧਿਪਾਤਿਮੋਕ੍ਖਂ ਨਾਮ. ਅਪ੍ਪਮਤ੍ਤਕੋ ਸੋ ਆਨਨ੍ਦਾਤਿ ਅਜ੍ਝਾਜੀਵਂ ਅਧਿਪਾਤਿਮੋਕ੍ਖਞ੍ਚ ਆਰਬ੍ਭ ਉਪ੍ਪਨ੍ਨਵਿਵਾਦੋ ਨਾਮ ਯਸ੍ਮਾ ਪਰਸ੍ਸ ਕਥਾਯਪਿ ਅਤ੍ਤਨੋ ਧਮ੍ਮਤਾਯਪਿ ਸਲ੍ਲਕ੍ਖੇਤ੍ਵਾ ਸੁਪ੍ਪਜਹੋ ਹੋਤਿ, ਤਸ੍ਮਾ ‘‘ਅਪ੍ਪਮਤ੍ਤਕੋ’’ਤਿ ਵੁਤ੍ਤੋ.

ਤਤ੍ਰਾਯਂ ਨਯੋ – ਇਧੇਕਚ੍ਚੋ ‘‘ਨ ਸਕ੍ਕਾ ਉਤ੍ਤਰਿਮਨੁਸ੍ਸਧਮ੍ਮਂ ਅਨੁਲ੍ਲਪਨ੍ਤੇਨ ਕਿਞ੍ਚਿ ਲਦ੍ਧੁ’’ਨ੍ਤਿਆਦੀਨਿ ਚਿਨ੍ਤੇਤ੍ਵਾ ਆਜੀਵਹੇਤੁ ਉਤ੍ਤਰਿਮਨੁਸ੍ਸਧਮ੍ਮਂ ਵਾ ਉਲ੍ਲਪਤਿ ਸਞ੍ਚਰਿਤ੍ਤਂ ਵਾ ਆਪਜ੍ਜਤਿ, ਯੋ ਤੇ ਵਿਹਾਰੇ ਵਸਤਿ, ਸੋ ਭਿਕ੍ਖੁ ਅਰਹਾਤਿਆਦਿਨਾ ਨਯੇਨ ਸਾਮਨ੍ਤਜਪ੍ਪਨਂ ਵਾ ਕਰੋਤਿ, ਅਗਿਲਾਨੋ ਵਾ ਅਤ੍ਤਨੋ ਅਤ੍ਥਾਯ ਪਣੀਤਭੋਜਨਾਨਿ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਭਿਕ੍ਖੁਨੀ ਵਾ ਪਨ ਤਾਨਿ ਵਿਞ੍ਞਾਪੇਤ੍ਵਾ ਪਾਟਿਦੇਸਨੀਯਂ ਆਪਜ੍ਜਤਿ, ਯੋ ਕੋਚਿ ਦੁਕ੍ਕਟਵਤ੍ਥੁਕਂ ਯਂਕਿਞ੍ਚਿ ਸੂਪੋਦਨਵਿਞ੍ਞਤ੍ਤਿਮੇਵ ਵਾ ਕਰੋਤਿ, ਅਞ੍ਞਤਰਂ ਵਾ ਪਨ ਪਣ੍ਣਤ੍ਤਿਵੀਤਿਕ੍ਕਮਂ ਕਰੋਨ੍ਤੋ ਵਿਹਰਤਿ, ਤਮੇਨਂ ਸਬ੍ਰਹ੍ਮਚਾਰੀ ਏਵਂ ਸਞ੍ਜਾਨਨ੍ਤਿ – ‘‘ਕਿਂ ਇਮਸ੍ਸ ਇਮਿਨਾ ਲਾਭੇਨ ਲਦ੍ਧੇਨ, ਯੋ ਸਾਸਨੇ ਪਬ੍ਬਜਿਤ੍ਵਾ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਤਿ, ਪਣ੍ਣਤ੍ਤਿਵੀਤਿਕ੍ਕਮਂ ਕਰੋਤੀ’’ਤਿ. ਅਤ੍ਤਨੋ ਧਮ੍ਮਤਾਯਪਿਸ੍ਸ ਏਵਂ ਹੋਤਿ – ‘‘ਕਿਸ੍ਸ ਮਯ੍ਹਂ ਇਮਿਨਾ ਲਾਭੇਨ, ਯ੍ਵਾਹਂ ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਪਬ੍ਬਜਿਤ੍ਵਾ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਮਿ, ਪਣ੍ਣਤ੍ਤਿਵੀਤਿਕ੍ਕਮਂ ਕਰੋਮੀ’’ਤਿ ਸਲ੍ਲਕ੍ਖੇਤ੍ਵਾ ਤਤੋ ਓਰਮਤਿ. ਏਵਂ ਪਰਸ੍ਸ ਕਥਾਯਪਿ ਅਤ੍ਤਨੋ ਧਮ੍ਮਤਾਯਪਿ ਸਲ੍ਲਕ੍ਖੇਤ੍ਵਾ ਸੁਪ੍ਪਜਹੋ ਹੋਤਿ. ਤੇਨ ਭਗਵਾ ‘‘ਅਪ੍ਪਮਤ੍ਤਕੋ’’ਤਿ ਆਹ.

ਮਗ੍ਗੇ ਵਾ ਹਿ, ਆਨਨ੍ਦ, ਪਟਿਪਦਾਯ ਵਾਤਿ ਲੋਕੁਤ੍ਤਰਮਗ੍ਗਂ ਪਤ੍ਵਾ ਵਿਵਾਦੋ ਨਾਮ ਸਬ੍ਬਸੋ ਵੂਪਸਮ੍ਮਤਿ, ਨਤ੍ਥਿ ਅਧਿਗਤਮਗ੍ਗਾਨਂ ਵਿਵਾਦੋ. ਪੁਬ੍ਬਭਾਗਮਗ੍ਗਂ ਪਨ ਪੁਬ੍ਬਭਾਗਪਟਿਪਦਞ੍ਚ ਸਨ੍ਧਾਯੇਤਂ ਵੁਤ੍ਤਂ.

ਤਤ੍ਰਾਯਂ ਨਯੋ – ਏਵਂ ਭਿਕ੍ਖੁਂ ਮਨੁਸ੍ਸਾ ਲੋਕੁਤ੍ਤਰਧਮ੍ਮੇ ਸਮ੍ਭਾਵੇਨ੍ਤਿ. ਸੋ ਸਦ੍ਧਿਵਿਹਾਰਿਕਾਦਯੋ ਆਗਨ੍ਤ੍ਵਾ ਵਨ੍ਦਿਤ੍ਵਾ ਠਿਤੇ ਪੁਚ੍ਛਤਿ ‘‘ਕਿਂ ਆਗਤਤ੍ਥਾ’’ਤਿ. ਮਨਸਿਕਾਤਬ੍ਬਕਮ੍ਮਟ੍ਠਾਨਂ ਪੁਚ੍ਛਿਤੁਂ, ਭਨ੍ਤੇਤਿ. ਨਿਸੀਦਥ, ਖਣੇਨੇਵ ਅਰਹਤ੍ਤਂ ਪਾਪੇਤੁਂ ਸਮਤ੍ਥਕਮ੍ਮਟ੍ਠਾਨਕਥਂ ਆਚਿਕ੍ਖਿਸ੍ਸਾਮੀਤਿ ਵਤ੍ਵਾ ਵਦਤਿ – ‘‘ਇਧ ਭਿਕ੍ਖੁ ਅਤ੍ਤਨੋ ਵਸਨਟ੍ਠਾਨਂ ਪਵਿਸਿਤ੍ਵਾ ਨਿਸਿਨ੍ਨੋ ਮੂਲਕਮ੍ਮਟ੍ਠਾਨਂ ਮਨਸਿ ਕਰੋਤਿ, ਤਸ੍ਸ ਤਂ ਮਨਸਿਕਰੋਤੋ ਓਭਾਸੋ ਉਪ੍ਪਜ੍ਜਤਿ. ਅਯਂ ਪਠਮਮਗ੍ਗੋ ਨਾਮ. ਸੋ ਦੁਤਿਯਂ ਓਭਾਸਞਾਣਂ ਨਿਬ੍ਬਤ੍ਤੇਤਿ, ਦੁਤਿਯਮਗ੍ਗੋ ਅਧਿਗਤੋ ਹੋਤਿ, ਏਵਂ ਤਤਿਯਞ੍ਚ ਚਤੁਤ੍ਥਞ੍ਚ. ਏਤ੍ਤਾਵਤਾ ਮਗ੍ਗਪ੍ਪਤ੍ਤੋ ਚੇਵ ਫਲਪ੍ਪਤ੍ਤੋ ਚ ਹੋਤੀ’’ਤਿ. ਅਥ ਤੇ ਭਿਕ੍ਖੂ ‘‘ਅਖੀਣਾਸਵੋ ਨਾਮ ਏਵਂ ਕਮ੍ਮਟ੍ਠਾਨਂ ਕਥੇਤੁਂ ਨ ਸਕ੍ਕੋਤਿ, ਅਦ੍ਧਾਯਂ ਖੀਣਾਸਵੋ’’ਤਿ ਨਿਟ੍ਠਂ ਗਚ੍ਛਨ੍ਤਿ.

ਸੋ ਅਪਰੇਨ ਸਮਯੇਨ ਕਾਲਂ ਕਰੋਤਿ. ਸਮਨ੍ਤਾ ਭਿਕ੍ਖਾਚਾਰਗਾਮੇਹਿ ਮਨੁਸ੍ਸਾ ਆਗਨ੍ਤ੍ਵਾ ਪੁਚ੍ਛਨ੍ਤਿ ‘‘ਕੇਨਚਿ, ਭਨ੍ਤੇ, ਥੇਰੋ ਪਞ੍ਹਂ ਪੁਚ੍ਛਿਤੋ’’ਤਿ. ਉਪਾਸਕਾ ਪੁਬ੍ਬੇਵ ਥੇਰੇਨ ਪਞ੍ਹੋ ਕਥਿਤੋ ਅਮ੍ਹਾਕਨ੍ਤਿ. ਤੇ ਪੁਪ੍ਫਮਣ੍ਡਪਂ ਪੁਪ੍ਫਕੂਟਾਗਾਰਂ ਸਜ੍ਜੇਤ੍ਵਾ ਸੁਵਣ੍ਣੇਨ ਅਕ੍ਖਿਪਿਧਾਨਮੁਖਪਿਧਾਨਾਦਿਂ ਕਰਿਤ੍ਵਾ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਸਤ੍ਤਾਹਂ ਸਾਧੁਕੀਲ਼ਿਕਂ ਕੀਲ਼ੇਤ੍ਵਾ ਝਾਪੇਤ੍ਵਾ ਅਟ੍ਠੀਨਿ ਆਦਾਯ ਚੇਤਿਯਂ ਕਰੋਨ੍ਤਿ. ਅਞ੍ਞੇ ਆਗਨ੍ਤੁਕਾ ਵਿਹਾਰਂ ਆਗਨ੍ਤ੍ਵਾ ਪਾਦੇ ਧੋਵਿਤ੍ਵਾ ‘‘ਮਹਾਥੇਰਂ ਪਸ੍ਸਿਸ੍ਸਾਮ, ਕਹਂ, ਆਵੁਸੋ, ਮਹਾਥੇਰੋ’’ਤਿ ਪੁਚ੍ਛਨ੍ਤਿ. ਪਰਿਨਿਬ੍ਬੁਤੋ, ਭਨ੍ਤੇਤਿ. ਦੁਕ੍ਕਰਂ, ਆਵੁਸੋ, ਥੇਰੇਨ ਕਤਂ ਮਗ੍ਗਫਲਾਨਿ ਨਿਬ੍ਬਤ੍ਤੇਨ੍ਤੇਨ, ਪਞ੍ਹਂ ਪੁਚ੍ਛਿਤ੍ਥ, ਆਵੁਸੋਤਿ. ਭਿਕ੍ਖੂਨਂ ਕਮ੍ਮਟ੍ਠਾਨਂ ਕਥੇਨ੍ਤੋ ਇਮਿਨਾ ਨਿਯਾਮੇਨ ਕਥੇਸਿ, ਭਨ੍ਤੇਤਿ. ਨ ਏਸੋ, ਆਵੁਸੋ, ਮਗ੍ਗੋ, ਵਿਪਸ੍ਸਨੁਪਕ੍ਕਿਲੇਸੋ ਨਾਮੇਸ, ਨ ਤੁਮ੍ਹੇ ਜਾਨਿਤ੍ਥ, ਪੁਥੁਜ੍ਜਨੋ, ਆਵੁਸੋ, ਥੇਰੋਤਿ. ਤੇ ਕਲਹਂ ਕਰੋਨ੍ਤਾ ਉਟ੍ਠਹਿਤ੍ਵਾ ‘‘ਸਕਲਵਿਹਾਰੇ ਭਿਕ੍ਖੂ ਚ ਭਿਕ੍ਖਾਚਾਰਗਾਮੇਸੁ ਮਨੁਸ੍ਸਾ ਚ ਨ ਜਾਨਨ੍ਤਿ, ਤੁਮ੍ਹੇਯੇਵ ਜਾਨਾਥ. ਕਤਰਮਗ੍ਗੇਨ ਤੁਮ੍ਹੇ ਆਗਤਾ, ਕਿਂ ਵੋ ਵਿਹਾਰਦ੍ਵਾਰੇ ਚੇਤਿਯਂ ਨ ਦਿਟ੍ਠ’’ਨ੍ਤਿ. ਏਵਂਵਾਦੀਨਂ ਪਨ ਭਿਕ੍ਖੂਨਂ ਸਤਂ ਵਾ, ਹੋਤੁ ਸਹਸ੍ਸਂ ਵਾ, ਯਾਵ ਤਂ ਲਦ੍ਧਿਂ ਨਪ੍ਪਜਹਨ੍ਤਿ, ਸਗ੍ਗੋਪਿ ਮਗ੍ਗੋਪਿ ਵਾਰਿਤੋਯੇਵ.

ਅਪਰੋਪਿ ਤਾਦਿਸੋਵ ਕਮ੍ਮਟ੍ਠਾਨਂ ਕਥੇਨ੍ਤੋ ਏਵਂ ਕਥੇਤਿ – ਚਿਤ੍ਤੇਨੇਵ ਤੀਸੁ ਉਦ੍ਧਨੇਸੁ ਤੀਣਿ ਕਪਲ੍ਲਾਨਿ ਆਰੋਪੇਤ੍ਵਾ ਹੇਟ੍ਠਾ ਅਗ੍ਗਿਂ ਕਤ੍ਵਾ ਚਿਤ੍ਤੇਨੇਵ ਅਤ੍ਤਨੋ ਦ੍ਵਤ੍ਤਿਂਸਾਕਾਰਂ ਉਪ੍ਪਾਟੇਤ੍ਵਾ ਕਪਲ੍ਲੇਸੁ ਪਕ੍ਖਿਪਿਤ੍ਵਾ ਚਿਤ੍ਤੇਨੇਵ ਦਣ੍ਡਕੇਨ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਭਜ੍ਜਿਤਬ੍ਬਂ, ਯਾ ਝਾਯਮਾਨੇ ਛਾਰਿਕਾ ਹੋਤਿ, ਸਾ ਮੁਖਵਾਤੇਨ ਪਲਾਸੇਤਬ੍ਬਾ. ਏਤ੍ਤਕੇਨ ਧੂਤਪਾਪੋ ਨਾਮੇਸ ਸਮਣੋ ਹੋਤਿ. ਸੇਸਂ ਪੁਰਿਮਨਯੇਨੇਵ ਵਿਤ੍ਥਾਰੇਤਬ੍ਬਂ.

ਅਪਰੋ ਏਵਂ ਕਥੇਤਿ – ਚਿਤ੍ਤੇਨੇਵ ਮਹਾਚਾਟਿਂ ਠਪੇਤ੍ਵਾ ਮਤ੍ਥੁਂ ਯੋਜੇਤ੍ਵਾ ਚਿਤ੍ਤੇਨੇਵ ਅਤ੍ਤਨੋ ਦ੍ਵਤ੍ਤਿਂਸਾਕਾਰਂ ਉਪ੍ਪਾਟੇਤ੍ਵਾ ਤਤ੍ਥ ਪਕ੍ਖਿਪਿਤ੍ਵਾ ਮਤ੍ਥੁਂ ਓਤਾਰੇਤ੍ਵਾ ਮਨ੍ਥਿਤਬ੍ਬਂ. ਮਥਿਯਮਾਨਂ ਵਿਲੀਯਤਿ, ਵਿਲੀਨੇ ਉਪਰਿ ਫੇਣੋ ਉਗ੍ਗਚ੍ਛਤਿ. ਸੋ ਫੇਣੋ ਪਰਿਭੁਞ੍ਜਿਤਬ੍ਬੋ. ਏਤ੍ਤਾਵਤਾ ਵੋ ਅਮਤਂ ਪਰਿਭੁਤ੍ਤਂ ਨਾਮ ਭਵਿਸ੍ਸਤਿ. ਇਤੋ ਪਰਂ ‘‘ਅਥ ਤੇ ਭਿਕ੍ਖੂ’’ਤਿਆਦਿ ਸਬ੍ਬਂ ਪੁਰਿਮਨਯੇਨੇਵ ਵਿਤ੍ਥਾਰੇਤਬ੍ਬਂ.

੪੪. ਇਦਾਨਿ ਯੋ ਏਵਂ ਵਿਵਾਦੋ ਉਪ੍ਪਜ੍ਜੇਯ੍ਯ, ਤਸ੍ਸ ਮੂਲਂ ਦਸ੍ਸੇਨ੍ਤੋ ਛਯਿਮਾਨੀਤਿਆਦਿਮਾਹ. ਤਤ੍ਥ ਅਗਾਰਵੋਤਿ ਗਾਰਵਵਿਰਹਿਤੋ. ਅਪ੍ਪਤਿਸ੍ਸੋਤਿ ਅਪ੍ਪਤਿਸ੍ਸਯੋ ਅਨੀਚਵੁਤ੍ਤਿ. ਏਤ੍ਥ ਪਨ ਯੋ ਭਿਕ੍ਖੁ ਸਤ੍ਥਰਿ ਧਰਮਾਨੇ ਤੀਸੁ ਕਾਲੇਸੁ ਉਪਟ੍ਠਾਨਂ ਨ ਯਾਤਿ, ਸਤ੍ਥਰਿ ਅਨੁਪਾਹਨੇ ਚਙ੍ਕਮਨ੍ਤੇ ਸਉਪਾਹਨੋ ਚਙ੍ਕਮਤਿ, ਨੀਚੇ ਚਙ੍ਕਮੇ ਚਙ੍ਕਮਨ੍ਤੇ ਉਚ੍ਚੇ ਚਙ੍ਕਮੇ ਚਙ੍ਕਮਤਿ, ਹੇਟ੍ਠਾ ਵਸਨ੍ਤੇ ਉਪਰਿ ਵਸਤਿ, ਸਤ੍ਥੁ ਦਸ੍ਸਨਟ੍ਠਾਨੇ ਉਭੋ ਅਂਸੇ ਪਾਰੁਪਤਿ, ਛਤ੍ਤਂ ਧਾਰੇਤਿ, ਉਪਾਹਨਂ ਧਾਰੇਤਿ, ਨ੍ਹਾਨਤਿਤ੍ਥੇ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਕਰੋਤਿ, ਪਰਿਨਿਬ੍ਬੁਤੇ ਵਾ ਪਨ ਚੇਤਿਯਂ ਵਨ੍ਦਿਤੁਂ ਨ ਗਚ੍ਛਤਿ, ਚੇਤਿਯਸ੍ਸ ਪਞ੍ਞਾਯਨਟ੍ਠਾਨੇ ਸਤ੍ਥੁਦਸ੍ਸਨਟ੍ਠਾਨੇ ਵੁਤ੍ਤਂ ਸਬ੍ਬਂ ਕਰੋਤਿ, ਅਞ੍ਞੇਹਿ ਚ ਭਿਕ੍ਖੂਹਿ ‘‘ਕਸ੍ਮਾ ਏਵਂ ਕਰੋਸਿ, ਨ ਇਦਂ ਵਟ੍ਟਤਿ, ਸਮ੍ਮਾਸਬੁਦ੍ਧਸ੍ਸ ਨਾਮ ਲਜ੍ਜਿਤੁਂ ਵਟ੍ਟਤੀ’’ਤਿ ਵੁਤ੍ਤੇ ‘‘ਤੂਣ੍ਹੀ ਹੋਤਿ, ਕਿਂ ਬੁਦ੍ਧੋ ਬੁਦ੍ਧੋਤਿ ਵਦਸੀ’’ਤਿ ਭਣਤਿ, ਅਯਂ ਸਤ੍ਥਰਿ ਅਗਾਰਵੋ ਨਾਮ.

ਯੋ ਪਨ ਧਮ੍ਮਸ੍ਸਵਨੇ ਸਙ੍ਘੁਟ੍ਠੇ ਸਕ੍ਕਚ੍ਚਂ ਨ ਗਚ੍ਛਤਿ, ਸਕ੍ਕਚ੍ਚਂ ਧਮ੍ਮਂ ਨ ਸੁਣਾਤਿ, ਨਿਦ੍ਦਾਯਤਿ ਵਾ ਸਲ੍ਲਪੇਨ੍ਤੋ ਵਾ ਨਿਸੀਦਤਿ, ਸਕ੍ਕਚ੍ਚਂ ਨ ਗਣ੍ਹਾਤਿ ਨ ਧਾਰੇਤਿ, ‘‘ਕਿਂ ਧਮ੍ਮੇ ਅਗਾਰਵਂ ਕਰੋਸੀ’’ਤਿ ਵੁਤ੍ਤੇ ‘‘ਤੁਣ੍ਹੀ ਹੋਤਿ, ਧਮ੍ਮੋ ਧਮ੍ਮੋਤਿ ਵਦਸਿ, ਕਿਂ ਧਮ੍ਮੋ ਨਾਮਾ’’ਤਿ ਵਦਤਿ, ਅਯਂ ਧਮ੍ਮੇ ਅਗਾਰਵੋ ਨਾਮ.

ਯੋ ਪਨ ਥੇਰੇਨ ਭਿਕ੍ਖੁਨਾ ਅਨਜ੍ਝਿਟ੍ਠੋ ਧਮ੍ਮਂ ਦੇਸੇਤਿ, ਨਿਸੀਦਤਿ ਪਞ੍ਹਂ ਕਥੇਤਿ, ਵੁਡ੍ਢੇ ਭਿਕ੍ਖੂ ਘਟ੍ਟੇਨ੍ਤੋ ਗਚ੍ਛਤਿ, ਤਿਟ੍ਠਤਿ ਨਿਸੀਦਤਿ, ਦੁਸ੍ਸਪਲ੍ਲਤ੍ਥਿਕਂ ਵਾ ਹਤ੍ਥਪਲ੍ਲਤ੍ਥਿਕਂ ਵਾ ਕਰੋਤਿ, ਸਙ੍ਘਮਜ੍ਝੇ ਉਭੋ ਅਂਸੇ ਪਾਰੁਪਤਿ, ਛਤ੍ਤੁਪਾਹਨਂ ਧਾਰੇਤਿ, ‘‘ਭਿਕ੍ਖੁਸਙ੍ਘਸ੍ਸ ਲਜ੍ਜਿਤੁਂ ਵਟ੍ਟਤੀ’’ਤਿ ਵੁਤ੍ਤੇਪਿ ‘‘ਤੁਣ੍ਹੀ ਹੋਤਿ, ਸਙ੍ਘੋ ਸਙ੍ਘੋਤਿ ਵਦਸਿ, ਕਿਂ ਸਙ੍ਘੋ, ਮਿਗਸਙ੍ਘੋ ਅਜਸਙ੍ਘੋ’’ਤਿਆਦੀਨਿ ਵਦਤਿ, ਅਯਂ ਸਙ੍ਘੇ ਅਗਾਰਵੋ ਨਾਮ. ਏਕਭਿਕ੍ਖੁਸ੍ਮਿਮ੍ਪਿ ਹਿ ਅਗਾਰਵੇ ਕਤੇ ਸਙ੍ਘੇ ਕਤੋਯੇਵ ਹੋਤਿ. ਤਿਸ੍ਸੋ ਸਿਕ੍ਖਾ ਪਨ ਅਪਰਿਪੂਰਯਮਾਨੋਵ ਸਿਕ੍ਖਾਯ ਨ ਪਰਿਪੂਰਕਾਰੀ ਨਾਮ.

ਅਜ੍ਝਤ੍ਤਂ ਵਾਤਿ ਅਤ੍ਤਨਿ ਵਾ ਅਤ੍ਤਨੋ ਪਰਿਸਾਯ ਵਾ. ਬਾਹਿਦ੍ਧਾਤਿ ਪਰਸ੍ਮਿਂ ਵਾ ਪਰਸ੍ਸ ਪਰਿਸਾਯ ਵਾ.

੪੬. ਇਦਾਨਿ ਅਯਂ ਛ ਠਾਨਾਨਿ ਨਿਸ੍ਸਾਯ ਉਪ੍ਪਨ੍ਨਵਿਵਾਦੋ ਵਡ੍ਢਨ੍ਤੋ ਯਾਨਿ ਅਧਿਕਰਣਾਨਿ ਪਾਪੁਣਾਤਿ, ਤਾਨਿ ਦਸ੍ਸੇਤੁਂ ਚਤ੍ਤਾਰਿਮਾਨੀਤਿਆਦਿਮਾਹ. ਤਤ੍ਥ ਵੂਪਸਮਨਤ੍ਥਾਯ ਪਵਤ੍ਤਮਾਨੇਹਿ ਸਮਥੇਹਿ ਅਧਿਕਾਤਬ੍ਬਾਨੀਤਿ ਅਧਿਕਰਣਾਨਿ. ਵਿਵਾਦੋਵ ਅਧਿਕਰਣਂ ਵਿਵਾਦਾਧਿਕਰਣਂ. ਇਤਰੇਸੁਪਿ ਏਸੇਵ ਨਯੋ.

ਇਦਾਨਿ ਇਮਾਨਿਪਿ ਚਤ੍ਤਾਰਿ ਅਧਿਕਰਣਾਨਿ ਪਤ੍ਵਾ ਉਪਰਿ ਵਡ੍ਢੇਨ੍ਤੋ ਸੋ ਵਿਵਾਦੋ ਯੇਹਿ ਸਮਥੇਹਿ ਵੂਪਸਮ੍ਮਤਿ, ਤੇਸਂ ਦਸ੍ਸਨਤ੍ਥਂ ਸਤ੍ਤ ਖੋ ਪਨਿਮੇਤਿਆਦਿਮਾਹ. ਤਤ੍ਥ ਅਧਿਕਰਣਾਨਿ ਸਮੇਨ੍ਤਿ ਵੂਪਸਮੇਨ੍ਤੀਤਿ ਅਧਿਕਰਣਸਮਥਾ. ਉਪ੍ਪਨ੍ਨੁਪ੍ਪਨ੍ਨਾਨਨ੍ਤਿ ਉਪ੍ਪਨ੍ਨਾਨਂ ਉਪ੍ਪਨ੍ਨਾਨਂ. ਅਧਿਕਰਣਾਨਨ੍ਤਿ ਏਤੇਸਂ ਵਿਵਾਦਾਧਿਕਰਣਾਦੀਨਂ ਚਤੁਨ੍ਨਂ. ਸਮਥਾਯ ਵੂਪਸਮਾਯਾਤਿ ਸਮਨਤ੍ਥਞ੍ਚੇਵ ਵੂਪਸਮਨਤ੍ਥਞ੍ਚ. ਸਮ੍ਮੁਖਾਵਿਨਯੋ ਦਾਤਬ੍ਬੋ…ਪੇ… ਤਿਣਵਤ੍ਥਾਰਕੋਤਿ ਇਮੇ ਸਤ੍ਤ ਸਮਥਾ ਦਾਤਬ੍ਬਾ.

ਤਤ੍ਰਾਯਂ ਵਿਨਿਚ੍ਛਯਕਥਾ – ਅਧਿਕਰਣੇਸੁ ਤਾਵ ਧਮ੍ਮੋਤਿ ਵਾ ਅਧਮ੍ਮੋਤਿ ਵਾਤਿ ਅਟ੍ਠਾਰਸਹਿ ਵਤ੍ਥੂਹਿ ਵਿਵਦਨ੍ਤਾਨਂ ਭਿਕ੍ਖੂਨਂ ਯੋ ਵਿਵਾਦੋ, ਇਦਂ ਵਿਵਾਦਾਧਿਕਰਣਂ ਨਾਮ. ਸੀਲਵਿਪਤ੍ਤਿਯਾ ਵਾ ਆਚਾਰਦਿਟ੍ਠਿਆਜੀਵਵਿਪਤ੍ਤਿਯਾ ਵਾ ਅਨੁਵਦਨ੍ਤਾਨਂ ਯੋ ਅਨੁਵਾਦੋ ਉਪਵਦਨਾ ਚੇਵ ਚੋਦਨਾ ਚ, ਇਦਂ ਅਨੁਵਾਦਾਧਿਕਰਣਂ ਨਾਮ. ਮਾਤਿਕਾਯਂ ਆਗਤਾ ਪਞ੍ਚ ਵਿਭਙ੍ਗੇ ਦ੍ਵੇਤਿ ਸਤ੍ਤ ਆਪਤ੍ਤਿਕ੍ਖਨ੍ਧਾ ਆਪਤ੍ਤਾਧਿਕਰਣਂ ਨਾਮ. ਯਂ ਸਙ੍ਘਸ੍ਸ ਅਪਲੋਕਨਾਦੀਨਂ ਚਤੁਨ੍ਨਂ ਕਮ੍ਮਾਨਂ ਕਰਣਂ, ਇਦਂ ਕਿਚ੍ਚਾਧਿਕਰਣਂ ਨਾਮ.

ਤਤ੍ਥ ਵਿਵਾਦਾਧਿਕਰਣਂ ਦ੍ਵੀਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ. ਸਮ੍ਮੁਖਾਵਿਨਯੇਨੇਵ ਸਮ੍ਮਮਾਨਂ ਯਸ੍ਮਿਂ ਵਿਹਾਰੇ ਉਪ੍ਪਨ੍ਨਂ, ਤਸ੍ਮਿਂਯੇਵ ਵਾ, ਅਞ੍ਞਤ੍ਥ ਵੂਪਸਮੇਤੁਂ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ ਵਾ, ਯਤ੍ਥ ਗਨ੍ਤ੍ਵਾ ਸਙ੍ਘਸ੍ਸ ਨਿਯ੍ਯਾਤਿਤਂ, ਤਤ੍ਥ ਸਙ੍ਘੇਨ ਵਾ ਗਣੇਨ ਵਾ ਵੂਪਸਮੇਤੁਂ ਅਸਕ੍ਕੋਨ੍ਤੇ ਤਤ੍ਥੇਵ ਉਬ੍ਬਾਹਿਕਾਯ ਸਮ੍ਮਤਪੁਗ੍ਗਲੇਹਿ ਵਾ ਵਿਨਿਚ੍ਛਿਤਂ ਸਮ੍ਮਤਿ. ਏਵਂ ਸਮ੍ਮਮਾਨੇ ਪਨ ਤਸ੍ਮਿਂ ਯਾ ਸਙ੍ਘਸਮ੍ਮੁਖਤਾ ਧਮ੍ਮਸਮ੍ਮੁਖਤਾ, ਵਿਨਯਸਮ੍ਮੁਖਤਾ, ਪੁਗ੍ਗਲਸਮ੍ਮੁਖਤਾ, ਅਯਂ ਸਮ੍ਮੁਖਾਵਿਨਯੋ ਨਾਮ.

ਤਤ੍ਥ ਚ ਕਾਰਕਸਙ੍ਘਸ੍ਸ ਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋ ਸਙ੍ਘਸਮ੍ਮੁਖਤਾ. ਸਮੇਤਬ੍ਬਸ੍ਸ ਵਤ੍ਥੁਨੋ ਭੂਤਤਾ ਧਮ੍ਮਸਮ੍ਮੁਖਤਾ. ਯਥਾ ਤਂ ਸਮੇਤਬ੍ਬਂ, ਤਥੇਵ ਸਮਨਂ ਵਿਨਯਸਮ੍ਮੁਖਤਾ. ਯੋ ਚ ਵਿਵਦਤਿ, ਯੇਨ ਚ ਵਿਵਦਤਿ, ਤੇਸਂ ਉਭਿਨ੍ਨਂ ਅਤ੍ਤਪਚ੍ਚਤ੍ਥਿਕਾਨਂ ਸਮ੍ਮੁਖੀਭਾਵੋ ਪੁਗ੍ਗਲਸਮ੍ਮੁਖਤਾ. ਉਬ੍ਬਾਹਿਕਾਯ ਵੂਪਸਮੇ ਪਨੇਤ੍ਥ ਸਙ੍ਘਸਮ੍ਮੁਖਤਾ ਪਰਿਹਾਯਤਿ. ਏਵਂ ਤਾਵ ਸਮ੍ਮੁਖਾਵਿਨਯੇਨੇਵ ਸਮ੍ਮਤਿ.

ਸਚੇ ਪਨੇਵਮ੍ਪਿ ਨ ਸਮ੍ਮਤਿ, ਅਥ ਨਂ ਉਬ੍ਬਾਹਿਕਾਯ ਸਮ੍ਮਤਾ ਭਿਕ੍ਖੂ ‘‘ਨ ਮਯਂ ਸਕ੍ਕੋਮ ਵੂਪਸਮੇਤੁ’’ਨ੍ਤਿ ਸਙ੍ਘਸ੍ਸੇਵ ਨਿਯ੍ਯਾਤੇਨ੍ਤਿ. ਤਤੋ ਸਙ੍ਘੋ ਪਞ੍ਚਙ੍ਗਸਮਨ੍ਨਾਗਤਂ ਭਿਕ੍ਖੁਂ ਸਲਾਕਗ੍ਗਾਹਕਂ ਸਮ੍ਮਨ੍ਨਿਤ੍ਵਾ ਤੇਨ ਗੁਲ਼੍ਹਕਵਿਵਟਕਸਕਣ੍ਣਜਪ੍ਪਕੇਸੁ ਤੀਸੁ ਸਲਾਕਗ੍ਗਾਹੇਸੁ ਅਞ੍ਞਤਰਵਸੇਨ ਸਲਾਕਂ ਗਾਹੇਤ੍ਵਾ ਸਨ੍ਨਿਪਤਿਤਪਰਿਸਾਯ ਧਮ੍ਮਵਾਦੀਨਂ ਯੇਭੁਯ੍ਯਤਾਯ ਯਥਾ ਤੇ ਧਮ੍ਮਵਾਦਿਨੋ ਵਦਨ੍ਤਿ, ਏਵਂ ਵੂਪਸਨ੍ਤਂ ਅਧਿਕਰਣਂ ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ ਵੂਪਸਨ੍ਤਂ ਹੋਤਿ. ਤਤ੍ਥ ਸਮ੍ਮੁਖਾਵਿਨਯੋ ਵੁਤ੍ਤਨਯੋ ਏਵ. ਯਂ ਪਨ ਯੇਭੁਯ੍ਯਸਿਕਾਯ ਕਮ੍ਮਸ੍ਸ ਕਰਣਂ, ਅਯਂ ਯੇਭੁਯ੍ਯਸਿਕਾ ਨਾਮ. ਏਵਂ ਵਿਵਾਦਾਧਿਕਰਣਂ ਦ੍ਵੀਹਿ ਸਮਥੇਹਿ ਸਮ੍ਮਤਿ.

ਅਨੁਵਾਦਾਧਿਕਰਣਂ ਚਤੂਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਸਤਿਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਤਸ੍ਸਪਾਪਿਯਸਿਕਾਯ ਚ. ਸਮ੍ਮੁਖਾਵਿਨਯੇਨੇਵ ਸਮ੍ਮਮਾਨਂ ਯੋ ਚ ਅਨੁਵਦਤਿ, ਯਞ੍ਚ ਅਨੁਵਦਤਿ, ਤੇਸਂ ਵਚਨਂ ਸੁਤ੍ਵਾ, ਸਚੇ ਕਾਚਿ ਆਪਤ੍ਤਿ ਨਤ੍ਥਿ, ਉਭੋ ਖਮਾਪੇਤ੍ਵਾ, ਸਚੇ ਅਤ੍ਥਿ, ਅਯਂ ਨਾਮੇਤ੍ਥ ਆਪਤ੍ਤੀਤਿ ਏਵਂ ਵਿਨਿਚ੍ਛਿਤਂ ਵੂਪਸਮ੍ਮਤਿ. ਤਤ੍ਥ ਸਮ੍ਮੁਖਾਵਿਨਯਲਕ੍ਖਣਂ ਵੁਤ੍ਤਨਯਮੇਵ.

ਯਦਾ ਪਨ ਖੀਣਾਸਵਸ੍ਸ ਭਿਕ੍ਖੁਨੋ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸਿਤਸ੍ਸ ਸਤਿਵਿਨਯਂ ਯਾਚਮਾਨਸ੍ਸ ਸਙ੍ਘੋ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਸਤਿਵਿਨਯਂ ਦੇਤਿ, ਤਦਾ ਸਮ੍ਮੁਖਾਵਿਨਯੇਨ ਚ ਸਤਿਵਿਨਯੇਨ ਚ ਵੂਪਸਨ੍ਤਂ ਹੋਤਿ. ਦਿਨ੍ਨੇ ਪਨ ਸਤਿਵਿਨਯੇ ਪੁਨ ਤਸ੍ਮਿਂ ਪੁਗ੍ਗਲੇ ਕਸ੍ਸਚਿ ਅਨੁਵਾਦੋ ਨ ਰੁਹਤਿ.

ਯਦਾ ਉਮ੍ਮਤ੍ਤਕੋ ਭਿਕ੍ਖੁ ਉਮ੍ਮਾਦਵਸੇਨ ਕਤੇ ਅਸ੍ਸਾਮਣਕੇ ਅਜ੍ਝਾਚਾਰੇ ‘‘ਸਰਤਾਯਸ੍ਮਾ ਏਵਰੂਪਿਂ ਆਪਤ੍ਤਿ’’ਨ੍ਤਿ ਭਿਕ੍ਖੂਹਿ ਵੁਚ੍ਚਮਾਨੋ – ‘‘ਉਮ੍ਮਤ੍ਤਕੇਨ ਮੇ, ਆਵੁਸੋ, ਏਤਂ ਕਤਂ, ਨਾਹਂ ਤਂ ਸਰਾਮੀ’’ਤਿ ਭਣਨ੍ਤੋਪਿ ਭਿਕ੍ਖੂਹਿ ਚੋਦਿਯਮਾਨੋਵ ਪੁਨ ਅਚੋਦਨਤ੍ਥਾਯ ਅਮੂਲ਼੍ਹਵਿਨਯਂ ਯਾਚਤਿ, ਸਙ੍ਘੋ ਚਸ੍ਸ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਅਮੂਲ਼੍ਹਵਿਨਯਂ ਦੇਤਿ, ਤਦਾ ਸਮ੍ਮੁਖਾਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਵੂਪਸਨ੍ਤਂ ਹੋਤਿ. ਦਿਨ੍ਨੇ ਪਨ ਅਮੂਲ਼੍ਹਵਿਨਯੇ ਪੁਨ ਤਸ੍ਮਿਂ ਪੁਗ੍ਗਲੇ ਕਸ੍ਸਚਿ ਤਪ੍ਪਚ੍ਚਯਾ ਅਨੁਵਾਦੋ ਨ ਰੁਹਤਿ.

ਯਦਾ ਪਨ ਪਾਰਾਜਿਕੇਨ ਵਾ ਪਾਰਾਜਿਕਸਾਮਨ੍ਤੇਨ ਵਾ ਚੋਦਿਯਮਾਨਸ੍ਸ ਅਞ੍ਞੇਨਾਞ੍ਞਂ ਪਟਿਚਰਤੋ ਪਾਪੁਸ੍ਸਨ੍ਨਤਾਯ ਪਾਪਿਯਸ੍ਸ ਪੁਗ੍ਗਲਸ੍ਸ – ‘‘ਸਚਾਯਂ ਅਚ੍ਛਿਨ੍ਨਮੂਲੋ ਭਵਿਸ੍ਸਤਿ, ਸਮ੍ਮਾ ਵਤ੍ਤਿਤ੍ਵਾ ਓਸਾਰਣਂ ਲਭਿਸ੍ਸਤਿ, ਸਚੇ ਛਿਨ੍ਨਮੂਲੋ, ਅਯਮੇਵਸ੍ਸ ਨਾਸਨਾ ਭਵਿਸ੍ਸਤੀ’’ਤਿ ਮਞ੍ਞਮਾਨੋ ਸਙ੍ਘੋ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਤਸ੍ਸਪਾਪਿਯਸਿਕਂ ਕਰੋਤਿ, ਤਦਾ ਸਮ੍ਮੁਖਾਵਿਨਯੇਨ ਚ ਤਸ੍ਸ ਪਾਪਿਯਸਿਕਾਯ ਚ ਵੂਪਸਨ੍ਤਂ ਹੋਤਿ. ਏਵਂ ਅਨੁਵਾਦਾਧਿਕਰਣਂ ਚਤੂਹਿ ਸਮਥੇਹਿ ਸਮ੍ਮਤਿ.

ਆਪਤ੍ਤਾਧਿਕਰਣਂ ਤੀਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਤਿਣਵਤ੍ਥਾਰਕੇਨ ਚ. ਤਸ੍ਸ ਸਮ੍ਮੁਖਾਵਿਨਯੇਨੇਵ ਵੂਪਸਮੋ ਨਤ੍ਥਿ. ਯਦਾ ਪਨ ਏਕਸ੍ਸ ਵਾ ਭਿਕ੍ਖੁਨੋ ਸਨ੍ਤਿਕੇ ਸਙ੍ਘਗਣਮਜ੍ਝੇਸੁ ਵਾ ਭਿਕ੍ਖੁ ਲਹੁਕਂ ਆਪਤ੍ਤਿਂ ਦੇਸੇਤਿ, ਤਦਾ ਆਪਤ੍ਤਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਵੂਪਸਮ੍ਮਤਿ. ਤਤ੍ਥ ਸਮ੍ਮੁਖਾਵਿਨਯੋ ਤਾਵ ਯੋ ਚ ਦੇਸੇਤਿ, ਯਸ੍ਸ ਚ ਦੇਸੇਤਿ, ਤੇਸਂ ਸਮ੍ਮੁਖਤਾ. ਸੇਸਂ ਵੁਤ੍ਤਨਯਮੇਵ. ਪੁਗ੍ਗਲਸ੍ਸ ਚ ਗਣਸ੍ਸ ਚ ਦੇਸਨਾਕਾਲੇ ਸਙ੍ਘਸਮ੍ਮੁਖਤਾ ਪਰਿਹਾਯਤਿ. ਯਂ ਪਨੇਤ੍ਥ ‘‘ਅਹਂ, ਭਨ੍ਤੇ, ਇਤ੍ਥਨ੍ਨਾਮਂ ਆਪਤ੍ਤਿਂ ਅਪਨ੍ਨੋ’’ਤਿ ਚ, ਆਮ ‘‘ਪਸ੍ਸਾਮੀ’’ਤਿ ਚ ਪਟਿਞ੍ਞਾਤਾਯ ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ ਕਰਣਂ, ਤਂ ਪਟਿਞ੍ਞਾਤਕਰਣਂ ਨਾਮ. ਸਙ੍ਘਾਦਿਸੇਸੇ ਪਰਿਵਾਸਾਦਿਯਾਚਨਾ ਪਟਿਞ੍ਞਾ, ਪਰਿਵਾਸਾਦੀਨਂ ਦਾਨਂ ਪਟਿਞ੍ਞਾਤਕਰਣਂ ਨਾਮ.

ਦ੍ਵੇਪਕ੍ਖਜਾਤਾ ਪਨ ਭਣ੍ਡਨਕਾਰਕਾ ਭਿਕ੍ਖੂ ਬਹੁਂ ਅਸ੍ਸਾਮਣਕਂ ਅਜ੍ਝਾਚਾਰਂ ਚਰਿਤ੍ਵਾ ਪੁਨ ਲਜ੍ਜਿਧਮ੍ਮੇ ਉਪ੍ਪਨ੍ਨੇ ‘‘ਸਚੇ ਮਯਂ ਇਮਾਹਿ ਆਪਤ੍ਤੀਹਿ ਅਞ੍ਞਮਞ੍ਞਂ ਕਾਰੇਸ੍ਸਾਮ, ਸਿਯਾਪਿ ਤਂ ਅਧਿਕਰਣਂ ਕਕ੍ਖਲ਼ਤ੍ਤਾਯ ਸਂਵਤ੍ਤੇਯ੍ਯਾ’’ਤਿ ਅਞ੍ਞਮਞ੍ਞਂ ਆਪਤ੍ਤਿਯਾ ਕਾਰਾਪਨੇ ਦੋਸਂ ਦਿਸ੍ਵਾ ਯਦਾ ਤਿਣਵਤ੍ਥਾਰਕਕਮ੍ਮਂ ਕਰੋਨ੍ਤਿ, ਤਦਾ ਆਪਤ੍ਤਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਤਿਣਵਤ੍ਥਾਰਕੇਨ ਚ ਸਮ੍ਮਤਿ. ਤਤ੍ਰ ਹਿ ਯਤ੍ਤਕਾ ਹਤ੍ਥਪਾਸੁਪਗਤਾ ‘‘ਨ ਮੇ ਤਂ ਖਮਤੀ’’ਤਿ ਏਵਂ ਦਿਟ੍ਠਾਵਿਕਮ੍ਮਂ ਅਕਤ੍ਵਾ ‘‘ਦੁਕ੍ਕਟਂ ਕਮ੍ਮਂ ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ ਨ ਉਕ੍ਕੋਟੇਨ੍ਤਿ, ਨਿਦ੍ਦਮ੍ਪਿ ਓਕ੍ਕਨ੍ਤਾ ਹੋਨ੍ਤਿ, ਸਬ੍ਬੇਸਮ੍ਪਿ ਠਪੇਤ੍ਵਾ ਥੁਲ੍ਲਵਜ੍ਜਞ੍ਚ ਗਿਹਿਪਟਿਸਂਯੁਤ੍ਤਞ੍ਚ ਸਬ੍ਬਾਪਤ੍ਤਿਯੋ ਵੁਟ੍ਠਹਨ੍ਤਿ. ਏਵਂ ਆਪਤ੍ਤਾਧਿਕਰਣਂ ਤੀਹਿ ਸਮਥੇਹਿ ਸਮ੍ਮਤਿ. ਕਿਚ੍ਚਾਧਿਕਰਣਂ ਏਕੇਨ ਸਮਥੇਨ ਸਮ੍ਮਤਿ ਸਮ੍ਮੁਖਾਵਿਨਯੇਨੇਵ.

ਇਮਾਨਿ ਚਤ੍ਤਾਰਿ ਅਧਿਕਰਣਾਨਿ ਯਥਾਨੁਰੂਪਂ ਇਮੇਹਿ ਸਤ੍ਤਹਿ ਸਮਥੇਹਿ ਸਮ੍ਮਨ੍ਤਿ. ਤੇਨ ਵੁਤ੍ਤਂ ‘‘ਉਪ੍ਪਨ੍ਨੁਪ੍ਪਨ੍ਨਾਨਂ ਅਧਿਕਰਣਾਨਂ ਸਮਥਾਯ ਵੂਪਸਮਾਯ ਸਮ੍ਮੁਖਾਵਿਨਯੋ ਦਾਤਬ੍ਬੋ…ਪੇ… ਤਿਣਵਤ੍ਥਾਰਕੋ’’ਤਿ. ਅਯਮੇਤ੍ਥ ਵਿਨਿਚ੍ਛਯਨਯੋ, ਵਿਤ੍ਥਾਰੋ ਪਨ ਸਮਥਕ੍ਖਨ੍ਧਕੇ (ਚੂਲ਼ਵ. ੧੮੫) ਆਗਤੋਯੇਵ. ਵਿਨਿਚ੍ਛਯੋਪਿਸ੍ਸ ਸਮਨ੍ਤਪਾਸਾਦਿਕਾਯ ਵੁਤ੍ਤੋ.

੪੭. ਯੋ ਪਨਾਯਂ ਇਮਸ੍ਮਿਂ ਸੁਤ੍ਤੇ ‘‘ਇਧਾਨਨ੍ਦ, ਭਿਕ੍ਖੂ ਵਿਵਦਨ੍ਤੀ’’ਤਿਆਦਿਕੋ ਵਿਤ੍ਥਾਰੋ ਵੁਤ੍ਤੋ, ਸੋ ਏਤੇਨ ਨਯੇਨ ਸਙ੍ਖੇਪਤੋਵ ਵੁਤ੍ਤੋਤਿ ਵੇਦਿਤਬ੍ਬੋ. ਤਤ੍ਥ ਧਮ੍ਮੋਤਿਆਦੀਸੁ ਸੁਤ੍ਤਨ੍ਤਪਰਿਯਾਯੇਨ ਤਾਵ ਦਸ ਕੁਸਲਕਮ੍ਮਪਥਾ ਧਮ੍ਮੋ, ਅਕੁਸਲਕਮ੍ਮਪਥਾ ਅਧਮ੍ਮੋ. ਤਥਾ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਹੇਟ੍ਠਾ ਆਗਤਾ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾ, ਤਯੋ ਸਤਿਪਟ੍ਠਾਨਾ ਤਯੋ ਸਮ੍ਮਪ੍ਪਧਾਨਾ ਤਯੋ ਇਦ੍ਧਿਪਾਦਾ ਛ ਇਨ੍ਦ੍ਰਿਯਾਨਿ ਛ ਬਲਾਨਿ ਅਟ੍ਠ ਬੋਜ੍ਝਙ੍ਗਾ ਨਵਙ੍ਗਿਕੋ ਮਗ੍ਗੋ ਚਾਤਿ, ਚਤ੍ਤਾਰੋ ਉਪਾਦਾਨਾ ਪਞ੍ਚ ਨੀਵਰਣਾਨੀਤਿਆਦਯੋ ਸਙ੍ਕਲਿਟ੍ਠਧਮ੍ਮਾ ਚਾਤਿ ਅਯਂ ਅਧਮ੍ਮੋ.

ਤਤ੍ਥ ਯਂਕਿਞ੍ਚਿ ਏਕਂ ਅਧਮ੍ਮਕੋਟ੍ਠਾਸਂ ਗਹੇਤ੍ਵਾ ‘‘ਇਮਂ ਅਧਮ੍ਮਂ ਧਮ੍ਮੋਤਿ ਕਰਿਸ੍ਸਾਮ, ਏਵਂ ਅਮ੍ਹਾਕਂ ਆਚਰਿਯਕੁਲਂ ਨਿਯ੍ਯਾਨਿਕਂ ਭਵਿਸ੍ਸਤਿ, ਮਯਞ੍ਚ ਲੋਕੇ ਪਾਕਟਾ ਭਵਿਸ੍ਸਾਮਾ’’ਤਿ ਤਂ ਅਧਮ੍ਮਂ ‘‘ਧਮ੍ਮੋ ਅਯ’’ਨ੍ਤਿ ਕਥੇਨ੍ਤਾ ਧਮ੍ਮੋਤਿ ਵਿਵਦਨ੍ਤਿ. ਤਤ੍ਥੇਵ ਧਮ੍ਮਕੋਟ੍ਠਾਸੇਸੁ ਏਕਂ ਗਹੇਤ੍ਵਾ ‘‘ਅਧਮ੍ਮੋ ਅਯ’’ਨ੍ਤਿ ਕਥੇਨ੍ਤਾ ਅਧਮ੍ਮੋਤਿ ਵਿਵਦਨ੍ਤਿ.

ਵਿਨਯਪਰਿਯਾਯੇਨ ਪਨ ਭੂਤੇਨ ਵਤ੍ਥੁਨਾ ਚੋਦੇਤ੍ਵਾ ਸਾਰੇਤ੍ਵਾ ਯਥਾਪਟਿਞ੍ਞਾਯ ਕਾਤਬ੍ਬਕਮ੍ਮਂ ਧਮ੍ਮੋ ਨਾਮ, ਅਭੂਤੇਨ ਪਨ ਵਤ੍ਥੁਨਾ ਅਚੋਦੇਤ੍ਵਾ ਅਸਾਰੇਤ੍ਵਾ ਅਪਟਿਞ੍ਞਾਯ ਕਤਬ੍ਬਕਮ੍ਮਂ ਅਧਮ੍ਮੋ ਨਾਮ. ਤੇਸੁਪਿ ਅਧਮ੍ਮਂ ‘‘ਧਮ੍ਮੋ ਅਯ’’ਨ੍ਤਿ ਕਥੇਨ੍ਤਾ ਧਮ੍ਮੋਤਿ ਵਿਵਦਨ੍ਤਿ, ‘‘ਅਧਮ੍ਮੋ ਅਯ’’ਨ੍ਤਿ ਕਥੇਨ੍ਤਾ ਅਧਮ੍ਮੋਤਿ ਵਿਵਦਨ੍ਤਿ.

ਸੁਤ੍ਤਨ੍ਤਪਰਿਯਾਯੇਨ ਪਨ ਰਾਗਵਿਨਯੋ ਦੋਸਵਿਨਯੋ ਮੋਹਵਿਨਯੋ ਸਂਵਰੋ ਪਹਾਨਂ ਪਟਿਸਙ੍ਖਾਤਿ ਅਯਂ ਵਿਨਯੋ ਨਾਮ, ਰਾਗਾਦੀਨਂ ਅਵਿਨਯੋ ਅਸਂਵਰੋ ਅਪ੍ਪਹਾਨਂ ਅਪ੍ਪਟਿਸਙ੍ਖਾਤਿ ਅਯਂ ਅਵਿਨਯੋ ਨਾਮ. ਵਿਨਯਪਰਿਯਾਯੇਨ ਵਤ੍ਥੁਸਮ੍ਪਤ੍ਤਿ ਞਤ੍ਤਿਸਮ੍ਪਤ੍ਤਿ ਅਨੁਸਾਵਨਸਮ੍ਪਤ੍ਤਿ ਸੀਮਸਮ੍ਪਤਿ ਪਰਿਸਸਮ੍ਪਤ੍ਤੀਤਿ ਅਯਂ ਵਿਨਯੋ ਨਾਮ, ਵਤ੍ਥੁਵਿਪਤ੍ਤਿ…ਪੇ… ਪਰਿਸਵਿਪਤ੍ਤੀਤਿ ਅਯਂ ਅਵਿਨਯੋ ਨਾਮ. ਤੇਸੁਪਿ ਯਂਕਿਞ੍ਚਿ ਅਵਿਨਯਂ ‘‘ਵਿਨਯੋ ਅਯ’’ਨ੍ਤਿ ਕਥੇਨ੍ਤਾ ਵਿਨਯੋਤਿ ਵਿਵਦਨ੍ਤਿ, ਵਿਨਯਂ ਅਵਿਨਯੋਤਿ ਕਥੇਨ੍ਤਾ ਅਵਿਨਯੋਤਿ ਵਿਵਦਨ੍ਤਿ.

ਧਮ੍ਮਨੇਤ੍ਤਿ ਸਮਨੁਮਜ੍ਜਿਤਬ੍ਬਾਤਿ ਧਮ੍ਮਰਜ੍ਜੁ ਅਨੁਮਜ੍ਜਿਤਬ੍ਬਾ ਞਾਣੇਨ ਘਂਸਿਤਬ੍ਬਾ ਉਪਪਰਿਕ੍ਖਿਤਬ੍ਬਾ. ਸਾ ਪਨੇਸਾ ਧਮ੍ਮਨੇਤ੍ਤਿ ‘‘ਇਤਿ ਖੋ ਵਚ੍ਛ ਇਮੇ ਦਸ ਧਮ੍ਮਾ ਅਕੁਸਲਾ ਦਸ ਧਮ੍ਮਾ ਕੁਸਲਾ’’ਤਿ ਏਵਂ ਮਹਾਵਚ੍ਛਗੋਤ੍ਤਸੁਤ੍ਤੇ (ਮ. ਨਿ. ੨.੧੯੪) ਆਗਤਾਤਿ ਵੁਤ੍ਤਾ. ਸਾ ਏਵ ਵਾ ਹੋਤੁ, ਯੋ ਵਾ ਇਧ ਧਮ੍ਮੋਤਿ ਚ ਵਿਨਯੋ ਚ ਵੁਤ੍ਤੋ. ਯਥਾ ਤਤ੍ਥ ਸਮੇਤੀਤਿ ਯਥਾ ਤਾਯ ਧਮ੍ਮਨੇਤ੍ਤਿਯਾ ਸਮੇਤਿ, ‘‘ਧਮ੍ਮੋ ਧਮ੍ਮੋਵ ਹੋਤਿ, ਅਧਮ੍ਮੋ ਅਧਮ੍ਮੋਵ, ਵਿਨਯੋ ਵਿਨਯੋਵ ਹੋਤਿ, ਅਵਿਨਯੋ ਅਵਿਨਯੋਵ’’. ਤਥਾ ਤਨ੍ਤਿ ਏਵਂ ਤਂ ਅਧਿਕਰਣਂ ਵੂਪਸਮੇਤਬ੍ਬਂ. ਏਕਚ੍ਚਾਨਂ ਅਧਿਕਰਣਾਨਨ੍ਤਿ ਇਧ ਵਿਵਾਦਾਧਿਕਰਣਮੇਵ ਦਸ੍ਸਿਤਂ, ਸਮ੍ਮੁਖਾਵਿਨਯੋ ਪਨ ਨ ਕਿਸ੍ਮਿਞ੍ਚਿ ਅਧਿਕਰਣੇ ਨ ਲਬ੍ਭਤਿ.

੪੮. ਤਂ ਪਨੇਤਂ ਯਸ੍ਮਾ ਦ੍ਵੀਹਿ ਸਮਥੇਹਿ ਸਮ੍ਮਤਿ ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ, ਤਸ੍ਮਾ ਹੇਟ੍ਠਾ ਮਾਤਿਕਾਯ ਠਪਿਤਾਨੁਕ੍ਕਮੇਨ ਇਦਾਨਿ ਸਤਿਵਿਨਯਸ੍ਸ ਵਾਰੇ ਪਤ੍ਤੇਪਿ ਤਂ ਅਵਤ੍ਵਾ ਵਿਵਾਦਾਧਿਕਰਣਯੇਵ ਤਾਵ ਦੁਤਿਯਸਮਥਂ ਦਸ੍ਸੇਨ੍ਤੋ ਕਥਞ੍ਚਾਨਨ੍ਦ, ਯੇਭੁਯ੍ਯਸਿਕਾਤਿਆਦਿਮਾਹ. ਤਤ੍ਥ ਬਹੁਤਰਾਤਿ ਅਨ੍ਤਮਸੋ ਦ੍ਵੀਹਿ ਤੀਹਿਪਿ ਅਤਿਰੇਕਤਰਾ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੪੯. ਇਦਾਨਿ ਹੇਟ੍ਠਾ ਅਵਿਤ੍ਥਾਰਿਤਂ ਸਤਿਵਿਨਯਂ ਆਦਿਂ ਕਤ੍ਵਾ ਵਿਤ੍ਥਾਰਿਤਾਵਸੇਸਸਮਥੇ ਪਟਿਪਾਟਿਯਾ ਵਿਤ੍ਥਾਰੇਤੁਂ ਕਥਞ੍ਚਾਨਨ੍ਦ, ਸਤਿਵਿਨਯੋਤਿਆਦਿਮਾਹ. ਤਤ੍ਥ ਪਾਰਾਜਿਕਸਾਮਨ੍ਤੇਨ ਵਾਤਿ ਦ੍ਵੇ ਸਾਮਨ੍ਤਾਨਿ ਖਨ੍ਧਸਾਮਨ੍ਤਞ੍ਚ ਆਪਤ੍ਤਿਸਾਮਨ੍ਤਞ੍ਚ. ਤਤ੍ਥ ਪਾਰਾਜਿਕਾਪਤ੍ਤਿਕ੍ਖਨ੍ਧੋ ਸਙ੍ਘਾਦਿਸੇਸਾਪਤ੍ਤਿਕ੍ਖਨ੍ਧੋ ਥੁਲ੍ਲਚ੍ਚਯ-ਪਾਚਿਤ੍ਤਿਯ-ਪਾਟਿਦੇਸਨੀਯ-ਦੁਕ੍ਕਟ-ਦੁਬ੍ਭਾਸਿਤਾਪਤ੍ਤਿਕ੍ਖਨ੍ਧੋਤਿ ਏਵਂ ਪੁਰਿਮਸ੍ਸ ਪਚ੍ਛਿਮਖਨ੍ਧਂ ਖਨ੍ਧਸਾਮਨ੍ਤਂ ਨਾਮ ਹੋਤਿ. ਪਠਮਪਾਰਾਜਿਕਸ੍ਸ ਪਨ ਪੁਬ੍ਬਭਾਗੇ ਦੁਕ੍ਕਟਂ, ਸੇਸਾਨਂ ਥੁਲ੍ਲਚ੍ਚਯਨ੍ਤਿ ਇਦਂ ਆਪਤ੍ਤਿਸਾਮਨ੍ਤਂ ਨਾਮ. ਤਤ੍ਥ ਖਨ੍ਧਸਾਮਨ੍ਤੇ ਪਾਰਾਜਿਕਸਾਮਨ੍ਤਂ ਗਰੁਕਾਪਤ੍ਤਿ ਨਾਮ ਹੋਤਿ. ਸਰਤਾਯਸ੍ਮਾਤਿ ਸਰਤੁ ਆਯਸ੍ਮਾ. ਏਕਚ੍ਚਾਨਂ ਅਧਿਕਰਣਾਨਨ੍ਤਿ ਇਧ ਅਨੁਵਾਦਾਧਿਕਰਣਮੇਵ ਦਸ੍ਸਿਤਂ.

੫੦. ਭਾਸਿਤਪਰਿਕ੍ਕਨ੍ਤਨ੍ਤਿ ਵਾਚਾਯ ਭਾਸਿਤਂ ਕਾਯੇਨ ਚ ਪਰਿਕ੍ਕਨ੍ਤਂ, ਪਰਕ੍ਕਮਿਤ੍ਵਾ ਕਤਨ੍ਤਿ ਅਤ੍ਥੋ. ਏਕਚ੍ਚਾਨਨ੍ਤਿ ਇਧਾਪਿ ਅਨੁਵਾਦਾਧਿਕਰਣਮੇਵ ਅਧਿਪ੍ਪੇਤਂ. ਪਟਿਞ੍ਞਾਤਕਰਣੇ ‘‘ਏਕਚ੍ਚਾਨ’’ਨ੍ਤਿ ਆਪਤ੍ਤਾਧਿਕਰਣਂ ਦਸ੍ਸਿਤਂ.

੫੨. ਦਵਾਤਿ ਸਹਸਾ. ਰਵਾਤਿ ਅਞ੍ਞਂ ਭਣਿਤੁਕਾਮੇਨ ਅਞ੍ਞਂ ਵੁਤ੍ਤਂ. ਏਵਂ ਖੋ, ਆਨਨ੍ਦ, ਤਸ੍ਸਪਾਪਿਯਸਿਕਾ ਹੋਤੀਤਿ ਤਸ੍ਸਪੁਗ੍ਗਲਸ੍ਸ ਪਾਪੁਸ੍ਸਨ੍ਨਤਾ ਪਾਪਿਯਸਿਕਾ ਹੋਤਿ. ਇਮਿਨਾ ਕਮ੍ਮਸ੍ਸ ਵਤ੍ਥੁ ਦਸ੍ਸਿਤਂ. ਏਵਰੂਪਸ੍ਸ ਹਿ ਪੁਗ੍ਗਲਸ੍ਸ ਕਮ੍ਮਂ ਕਾਤ੍ਤਬ੍ਬਂ. ਕਮ੍ਮੇਨ ਹਿ ਅਧਿਕਰਣਸ੍ਸ ਵੂਪਸਮੋ ਹੋਤਿ, ਨ ਪੁਗ੍ਗਲਸ੍ਸ ਪਾਪੁਸ੍ਸਨ੍ਨਤਾਯ. ਇਧਾਪਿ ਚ ਅਨੁਵਾਦਾਧਿਕਰਣਮੇਵ ਅਧਿਕਰਣਨ੍ਤਿ ਵੇਦਿਤਬ੍ਬਂ.

੫੩. ਕਥਞ੍ਚਾਨਨ੍ਦ, ਤਿਣਵਤ੍ਥਾਰਕੋਤਿ ਏਤ੍ਥ ਇਦਂ ਕਮ੍ਮਂ ਤਿਣਵਤ੍ਥਾਰਕਸਦਿਸਤ੍ਤਾ ਤਿਣਵਤ੍ਥਾਰਕੋਤਿ ਵੁਤ੍ਤਂ. ਯਥਾ ਹਿ ਗੂਥਂ ਵਾ ਮੁਤ੍ਤਂ ਵਾ ਘਟ੍ਟਿਯਮਾਨਂ ਦੁਗ੍ਗਨ੍ਧਤਾਯ ਬਾਧਤਿ, ਤਿਣੇਹਿ ਅਵਤ੍ਥਰਿਤ੍ਵਾ ਸੁਪ੍ਪਟਿਚ੍ਛਾਦਿਤਸ੍ਸ ਪਨਸ੍ਸ ਸੋ ਗਨ੍ਧੋ ਨ ਬਾਧਤਿ, ਏਵਮੇਵ ਯਂ ਅਧਿਕਰਣਂ ਮੂਲਾਨੁਮੂਲਂ ਗਨ੍ਤ੍ਵਾ ਵੂਪਸਮਿਯਮਾਨਂ ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯ ਭੇਦਾਯ ਸਂਵਤ੍ਤਤਿ, ਤਂ ਇਮਿਨਾ ਕਮ੍ਮੇਨ ਵੂਪਸਨ੍ਤਂ ਗੂਥਂ ਵਿਯ ਤਿਣਵਤ੍ਥਾਰਕੇਨ ਪਟਿਚ੍ਛਨ੍ਨਂ ਵੂਪਸਨ੍ਤਂ ਹੋਤੀਤਿ ਇਦਂ ਕਮ੍ਮਂ ਤਿਣਵਤ੍ਥਾਰਕਸਦਿਸਤ੍ਤਾ ਤਿਣਵਤ੍ਥਾਰਕੋਤਿ ਵੁਤ੍ਤਂ. ਤਸ੍ਸ ਇਧਾਨਨ੍ਦ, ਭਿਕ੍ਖੂਨਂ ਭਣ੍ਡਨਜਾਤਾਨਨ੍ਤਿਆਦਿਵਚਨੇਨ ਆਕਾਰਮਤ੍ਤਮੇਵ ਦਸ੍ਸਿਤਂ, ਖਨ੍ਧਕੇ ਆਗਤਾਯੇਵ ਪਨੇਤ੍ਥ ਕਮ੍ਮਵਾਚਾ ਪਮਾਣਂ. ਠਪੇਤ੍ਵਾ ਥੁਲ੍ਲਵਜ੍ਜਂ ਠਪੇਤ੍ਵਾ ਗਿਹਿਪਟਿਸਂਯੁਤ੍ਤਨ੍ਤਿ. ਏਤ੍ਥ ਪਨ ਥੁਲ੍ਲਵਜ੍ਜਨ੍ਤਿ ਥੂਲ੍ਲਵਜ੍ਜਂ ਪਾਰਾਜਿਕਞ੍ਚੇਵ ਸਙ੍ਘਾਦਿਸੇਸਞ੍ਚ. ਗਿਹਿਪਟਿਸਂਯੁਤ੍ਤਨ੍ਤਿ ਗਿਹੀਨਂ ਹੀਨੇਨ ਖੁਂਸਨਵਮ੍ਭਨਧਮ੍ਮਿਕਪਟਿਸ੍ਸਵੇਸੁ ਆਪਨ੍ਨਾ ਆਪਤ੍ਤਿ. ਅਧਿਕਰਣਾਨਨ੍ਤਿ ਇਧ ਆਪਤ੍ਤਾਧਿਕਰਣਮੇਵ ਵੇਦਿਤਬ੍ਬਂ. ਕਿਚ੍ਚਾਧਿਕਰਣਸ੍ਸ ਪਨ ਵਸੇਨ ਇਧ ਨ ਕਿਞ੍ਚਿ ਵੁਤ੍ਤਂ. ਕਿਞ੍ਚਾਪਿ ਨ ਵੁਤ੍ਤਂ, ਸਮ੍ਮੁਖਾਵਿਨਯੇਨੇਵ ਪਨਸ੍ਸ ਵੂਪਸਮੋ ਹੋਤੀਤਿ ਵੇਦਿਤਬ੍ਬੋ.

੫੪. ਛਯਿਮੇ, ਆਨਨ੍ਦ, ਧਮ੍ਮਾ ਸਾਰਣੀਯਾਤਿ ਹੇਟ੍ਠਾ ਕਲਹਵਸੇਨ ਸੁਤ੍ਤਂ ਆਰਦ੍ਧਂ, ਉਪਰਿ ਸਾਰਣੀਯਧਮ੍ਮਾ ਆਗਤਾ. ਇਤਿ ਯਥਾਨੁਸਨ੍ਧਿਨਾਵ ਦੇਸਨਾ ਗਤਾ ਹੋਤਿ. ਹੇਟ੍ਠਾ ਕੋਸਮ੍ਬਿਯਸੁਤ੍ਤੇ (ਮ. ਨਿ. ੧.੪੯੮-੫੦੦) ਪਨ ਸੋਤਾਪਤ੍ਤਿਮਗ੍ਗਸਮ੍ਮਾਦਿਟ੍ਠਿ ਕਥਿਤਾ, ਇਮਸ੍ਮਿਂ ਸੁਤ੍ਤੇ ਸੋਤਾਪਤ੍ਤਿਫਲਸਮ੍ਮਾਦਿਟ੍ਠਿ ਵੁਤ੍ਤਾਤਿ ਵੇਦਿਤਬ੍ਬਾ. ਅਣੁਨ੍ਤਿ ਅਪ੍ਪਸਾਵਜ੍ਜਂ. ਥੂਲਨ੍ਤਿ ਮਹਾਸਾਵਜ੍ਜਂ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਸਾਮਗਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.