੩. ਕਿਨ੍ਤਿਸੁਤ੍ਤਵਣ੍ਣਨਾ

੩੪. ਏਵਂ ਮੇ ਸੁਤਨ੍ਤਿ ਕਿਨ੍ਤਿਸੁਤ੍ਤਂ. ਤਤ੍ਥ ਪਿਸਿਨਾਰਾਯਨ੍ਤਿ ਏਵਂਨਾਮਕੇ ਮਣ੍ਡਲਪਦੇਸੇ. ਬਲਿਹਰਣੇਤਿ ਤਸ੍ਮਿਂ ਵਨਸਣ੍ਡੇ ਭੂਤਾਨਂ ਬਲਿਂ ਆਹਰਨ੍ਤਿ, ਤਸ੍ਮਾ ਸੋ ਬਲਿਹਰਣਨ੍ਤਿ ਵੁਤ੍ਤੋ. ਚੀਵਰਹੇਤੂਤਿ ਚੀਵਰਕਾਰਣਾ, ਚੀਵਰਂ ਪਚ੍ਚਾਸੀਸਮਾਨੋਤਿ ਅਤ੍ਥੋ. ਇਤਿਭਵਾਭਵਹੇਤੂਤਿ ਏਵਂ ਇਮਂ ਦੇਸਨਾਮਯਂ ਪੁਞ੍ਞਕਿਰਿਯਵਤ੍ਥੁਂ ਨਿਸ੍ਸਾਯ ਤਸ੍ਮਿਂ ਤਸ੍ਮਿਂ ਭਵੇ ਸੁਖਂ ਵੇਦਿਸ੍ਸਾਮੀਤਿ ਧਮ੍ਮਂ ਦੇਸੇਤੀਤਿ ਕਿਂ ਤੁਮ੍ਹਾਕਂ ਏਵਂ ਹੋਤੀਤਿ ਅਤ੍ਥੋ.

੩੫. ਚਤ੍ਤਾਰੋ ਸਤਿਪਟ੍ਠਾਨਾਤਿਆਦਯੋ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾ ਲੋਕਿਯਲੋਕੁਤ੍ਤਰਾਵ ਕਥਿਤਾ. ਤਤ੍ਥਾਤਿ ਤੇਸੁ ਸਤ੍ਤਤਿਂਸਾਯ ਧਮ੍ਮੇਸੁ. ਸਿਯਂਸੂਤਿ ਭਵੇਯ੍ਯੁਂ. ਅਭਿਧਮ੍ਮੇਤਿ ਵਿਸਿਟ੍ਠੇ ਧਮ੍ਮੇ, ਇਮੇਸੁ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮੇਸੂਤਿ ਅਤ੍ਥੋ. ਤਤ੍ਰ ਚੇਤਿ ਇਦਮ੍ਪਿ ਬੋਧਿਪਕ੍ਖਿਯਧਮ੍ਮੇਸ੍ਵੇਵ ਭੁਮ੍ਮਂ. ਅਤ੍ਥਤੋ ਚੇਵ ਨਾਨਂ ਬ੍ਯਞ੍ਜਨਤੋ ਚਾਤਿ ਏਤ੍ਥ ‘‘ਕਾਯੋਵ ਸਤਿਪਟ੍ਠਾਨਂ ਵੇਦਨਾਵ ਸਤਿਪਟ੍ਠਾਨ’’ਨ੍ਤਿ ਵੁਤ੍ਤੇ ਅਤ੍ਥਤੋ ਨਾਨਂ ਹੋਤਿ, ‘‘ਸਤਿਪਟ੍ਠਾਨਾ’’ਤਿ ਵੁਤ੍ਤੇ ਪਨ ਬ੍ਯਞ੍ਜਨਤੋ ਨਾਨਂ ਨਾਮ ਹੋਤਿ. ਤਦਮਿਨਾਪੀਤਿ ਤਂ ਤੁਮ੍ਹੇ ਇਮਿਨਾਪਿ ਕਾਰਣੇਨ ਜਾਨਾਥਾਤਿ ਅਤ੍ਥਞ੍ਚ ਬ੍ਯਞ੍ਜਨਞ੍ਚ ਸਮਾਨੇਤ੍ਵਾ ਅਥਸ੍ਸ ਚ ਅਞ੍ਞਥਾ ਗਹਿਤਭਾਵੋ ਬ੍ਯਞ੍ਜਨਸ੍ਸ ਚ ਮਿਚ੍ਛਾ ਰੋਪਿਤਭਾਵੋ ਦਸ੍ਸੇਤਬ੍ਬੋ. ਯੋ ਧਮ੍ਮੋ ਯੋ ਵਿਨਯੋਤਿ ਏਤ੍ਥ ਅਤ੍ਥਞ੍ਚ ਬ੍ਯਞ੍ਜਨਞ੍ਚ ਵਿਞ੍ਞਾਪਨਕਾਰਣਮੇਵ ਧਮ੍ਮੋ ਚ ਵਿਨਯੋ ਚ.

੩੭. ਅਤ੍ਥਤੋ ਹਿ ਖੋ ਸਮੇਤੀਤਿ ਸਤਿਯੇਵ ਸਤਿਪਟ੍ਠਾਨਨ੍ਤਿ ਗਹਿਤਾ. ਬ੍ਯਞ੍ਜਨਤੋ ਨਾਨਨ੍ਤਿ ਕੇਵਲਂ ਬ੍ਯਞ੍ਜਨਮੇਵ ਸਤਿਪਟ੍ਠਾਨੋਤਿ ਵਾ ਸਤਿਪਟ੍ਠਾਨਾਤਿ ਵਾ ਮਿਚ੍ਛਾ ਰੋਪੇਥ. ਅਪ੍ਪਮਤ੍ਤਕਂ ਖੋਤਿ ਸੁਤ੍ਤਨ੍ਤਂ ਪਤ੍ਵਾ ਬ੍ਯਞ੍ਜਨਂ ਅਪ੍ਪਮਤ੍ਤਕਂ ਨਾਮ ਹੋਤਿ. ਪਰਿਤ੍ਤਮਤ੍ਤਂ ਧਨਿਤਂ ਕਤ੍ਵਾ ਰੋਪਿਤੇਪਿ ਹਿ ਨਿਬ੍ਬੁਤਿਂ ਪਤ੍ਤੁਂ ਸਕ੍ਕਾ ਹੋਤਿ.

ਤਤ੍ਰਿਦਂ ਵਤ੍ਥੁ – ਵਿਜਯਾਰਾਮਵਿਹਾਰਵਾਸੀ ਕਿਰੇਕੋ ਖੀਣਾਸਵਤ੍ਥੇਰੋ ਦ੍ਵਿਨ੍ਨਂ ਭਿਕ੍ਖੂਨਂ ਸੁਤ੍ਤਂ ਆਹਰਿਤ੍ਵਾ ਕਮ੍ਮਟ੍ਠਾਨਂ ਕਥੇਨ੍ਤੋ – ‘‘ਸਮੁਦ੍ਧੋ ਸਮੁਦ੍ਧੋਤਿ, ਭਿਕ੍ਖਵੇ, ਅਸ੍ਸੁਤਵਾ ਪੁਥੁਜ੍ਜਨੋ ਭਾਸਤੀ’’ਤਿ ਧਨਿਤਂ ਕਤ੍ਵਾ ਆਹ. ਏਕੋ ਭਿਕ੍ਖੁ ‘‘ਸਮੁਦ੍ਧੋ ਨਾਮ, ਭਨ੍ਤੇ’’ਤਿ ਆਹ. ਆਵੁਸੋ, ਸਮੁਦ੍ਧੋਤਿ ਵੁਤ੍ਤੇਪਿ ਸਮੁਦ੍ਦੋਤਿ ਵੁਤ੍ਤੇਪਿ ਮਯਂ ਲੋਣਸਾਗਰਮੇਵ ਜਾਨਾਮ, ਤੁਮ੍ਹੇ ਪਨ ਨੋ ਅਤ੍ਥਗਵੇਸਕਾ, ਬ੍ਯਞ੍ਜਨਗਵੇਸਕਾ, ਗਚ੍ਛਥ ਮਹਾਵਿਹਾਰੇ ਪਗੁਣਬ੍ਯਞ੍ਜਨਾਨਂ ਭਿਕ੍ਖੂਨਂ ਸਨ੍ਤਿਕੇ ਬ੍ਯਞ੍ਜਨਂ ਸੋਧਾਪੇਥਾਤਿ ਕਮ੍ਮਟ੍ਠਾਨਂ ਅਕਥੇਤ੍ਵਾਵ ਉਟ੍ਠਾਪੇਸਿ. ਸੋ ਅਪਰਭਾਗੇ ਮਹਾਵਿਹਾਰੇ ਭੇਰਿਂ ਪਹਰਾਪੇਤ੍ਵਾ ਭਿਕ੍ਖੁਸਙ੍ਘਸ੍ਸ ਚਤੂਸੁ ਮਗ੍ਗੇਸੁ ਪਞ੍ਹਂ ਕਥੇਤ੍ਵਾਵ ਪਰਿਨਿਬ੍ਬੁਤੋ. ਏਵਂ ਸੁਤ੍ਤਨ੍ਤਂ ਪਤ੍ਵਾ ਬ੍ਯਞ੍ਜਨਂ ਅਪ੍ਪਮਤ੍ਤਕਂ ਨਾਮ ਹੋਤਿ.

ਵਿਨਯਂ ਪਨ ਪਤ੍ਵਾ ਨੋ ਅਪ੍ਪਮਤ੍ਤਕਂ. ਸਾਮਣੇਰਪਬ੍ਬਜ੍ਜਾਪਿ ਹਿ ਉਭਤੋਸੁਦ੍ਧਿਤੋ ਵਟ੍ਟਤਿ, ਉਪਸਮ੍ਪਦਾਦਿਕਮ੍ਮਾਨਿਪਿ ਸਿਥਿਲਾਦੀਨਂ ਧਨਿਤਾਦਿਕਰਣਮਤ੍ਤੇਨੇਵ ਕੁਪ੍ਪਨ੍ਤਿ. ਇਧ ਪਨ ਸੁਤ੍ਤਨ੍ਤਬ੍ਯਞ੍ਜਨਂ ਸਨ੍ਧਾਯੇਤਂ ਵੁਤ੍ਤਂ.

੩੮. ਅਥ ਚਤੁਤ੍ਥਵਾਰੇ ਵਿਵਾਦੋ ਕਸ੍ਮਾ? ਸਞ੍ਞਾਯ ਵਿਵਾਦੋ. ‘‘ਅਹਂ ਸਤਿਮੇਵ ਸਤਿਪਟ੍ਠਾਨਂ ਵਦਾਮਿ, ਅਯਂ ‘ਕਾਯੋ ਸਤਿਪਟ੍ਠਾਨ’ਨ੍ਤਿ ਵਦਤੀ’’ਤਿ ਹਿ ਨੇਸਂ ਸਞ੍ਞਾ ਹੋਤਿ. ਬ੍ਯਞ੍ਜਨੇਪਿ ਏਸੇਵ ਨਯੋ.

੩੯. ਨ ਚੋਦਨਾਯ ਤਰਿਤਬ੍ਬਨ੍ਤਿ ਨ ਚੋਦਨਤ੍ਥਾਯ ਵੇਗਾਯਿਤਬ੍ਬਂ. ਏਕਚ੍ਚੋ ਹਿ ਪੁਗ੍ਗਲੋ ‘‘ਨਲਾਟੇ ਤੇ ਸਾਸਪਮਤ੍ਤਾ ਪਿਲ਼ਕਾ’’ਤਿ ਵੁਤ੍ਤੋ ‘‘ਮਯ੍ਹਂ ਨਲਾਟੇ ਸਾਸਪਮਤ੍ਤਂ ਪਿਲ਼ਕਂ ਪਸ੍ਸਸਿ, ਅਤ੍ਤਨੋ ਨਲਾਟੇ ਤਾਲਪਕ੍ਕਮਤ੍ਤਂ ਮਹਾਗਣ੍ਡਂ ਨ ਪਸ੍ਸਸੀ’’ਤਿ ਵਦਤਿ. ਤਸ੍ਮਾ ਪੁਗ੍ਗਲੋ ਉਪਪਰਿਕ੍ਖਿਤਬ੍ਬੋ. ਅਦਲ਼੍ਹਦਿਟ੍ਠੀਤਿ ਅਨਾਦਾਨਦਿਟ੍ਠੀ ਸੁਂਸੁਮਾਰਂ ਹਦਯੇ ਪਕ੍ਖਿਪਨ੍ਤੋ ਵਿਯ ਦਲ਼੍ਹਂ ਨ ਗਣ੍ਹਾਤਿ.

ਉਪਘਾਤੋਤਿ ਚਣ੍ਡਭਾਵੇਨ ਵਣਘਟ੍ਟਿਤਸ੍ਸ ਵਿਯ ਦੁਕ੍ਖੁਪ੍ਪਤ੍ਤਿ. ਸੁਪ੍ਪਟਿਨਿਸ੍ਸਗ੍ਗੀਤਿ ‘‘ਕਿਂ ਨਾਮ ਅਹਂ ਆਪਨ੍ਨੋ, ਕਦਾ ਆਪਨ੍ਨੋ’’ਤਿ ਵਾ ‘‘ਤ੍ਵਂ ਆਪਨ੍ਨੋ, ਤਵ ਉਪਜ੍ਝਾਯੋ ਆਪਨ੍ਨੋ’’ਤਿ ਵਾ ਏਕਂ ਦ੍ਵੇ ਵਾਰੇ ਵਤ੍ਵਾਪਿ ‘‘ਅਸੁਕਂ ਨਾਮ ਅਸੁਕਦਿਵਸੇ ਨਾਮ, ਭਨ੍ਤੇ, ਆਪਨ੍ਨਤ੍ਥ, ਸਣਿਕਂ ਅਨੁਸ੍ਸਰਥਾ’’ਤਿ ਸਰਿਤ੍ਵਾ ਤਾਵਦੇਵ ਵਿਸ੍ਸਜ੍ਜੇਤਿ. ਵਿਹੇਸਾਤਿ ਬਹੁਂ ਅਤ੍ਥਞ੍ਚ ਕਾਰਣਞ੍ਚ ਆਹਰਨ੍ਤਸ੍ਸ ਕਾਯਚਿਤ੍ਤਕਿਲਮਥੋ. ਸਕ੍ਕੋਮੀਤਿ ਏਵਰੂਪੋ ਹਿ ਪੁਗ੍ਗਲੋ ਓਕਾਸਂ ਕਾਰੇਤ੍ਵਾ ‘‘ਆਪਤ੍ਤਿਂ ਆਪਨ੍ਨਤ੍ਥ, ਭਨ੍ਤੇ’’ਤਿ ਵੁਤ੍ਤੋ ‘‘ਕਦਾ ਕਿਸ੍ਮਿਂ ਵਤ੍ਥੁਸ੍ਮਿ’’ਨ੍ਤਿ ਵਤ੍ਵਾ ‘‘ਅਸੁਕਦਿਵਸੇ ਅਸੁਕਸ੍ਮਿਂ ਵਤ੍ਥੁਸ੍ਮਿ’’ਨ੍ਤਿ ਵੁਤ੍ਤੇ ‘‘ਨ ਸਰਾਮਿ, ਆਵੁਸੋ’’ਤਿ ਵਦਤਿ, ਤਤੋ ‘‘ਸਣਿਕਂ, ਭਨ੍ਤੇ, ਸਰਥਾ’’ਤਿ ਬਹੁਂ ਵਤ੍ਵਾ ਸਾਰਿਤੋ ਸਰਿਤ੍ਵਾ ਵਿਸ੍ਸਜ੍ਜੇਤਿ. ਤੇਨਾਹ ‘‘ਸਕ੍ਕੋਮੀ’’ਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਉਪੇਕ੍ਖਾ ਨਾਤਿਮਞ੍ਞਿਤਬ੍ਬਾਤਿ ਉਪੇਕ੍ਖਾ ਨ ਅਤਿਕ੍ਕਮਿਤਬ੍ਬਾ, ਕਤ੍ਤਬ੍ਬਾ ਜਨੇਤਬ੍ਬਾਤਿ ਅਤ੍ਥੋ. ਯੋ ਹਿ ਏਵਰੂਪਂ ਪੁਗ੍ਗਲਂ ਠਿਤਕਂਯੇਵ ਪਸ੍ਸਾਵਂ ਕਰੋਨ੍ਤਂ ਦਿਸ੍ਵਾਪਿ ‘‘ਨਨੁ, ਆਵੁਸੋ, ਨਿਸੀਦਿਤਬ੍ਬ’’ਨ੍ਤਿ ਵਦਤਿ, ਸੋ ਉਪੇਕ੍ਖਂ ਅਤਿਮਞ੍ਞਤਿ ਨਾਮ.

੪੦. ਵਚੀਸਂਹਾਰੋਤਿ ਵਚਨਸਞ੍ਚਾਰੋ. ਇਮੇਹਿ ਕਥਿਤਂ ਅਮੂਸਂ ਅਨ੍ਤਰਂ ਪਵੇਸੇਯ੍ਯ, ਤੁਮ੍ਹੇ ਇਮੇਹਿ ਇਦਞ੍ਚਿਦਞ੍ਚ ਵੁਤ੍ਤਾਤਿ ਅਮੂਹਿ ਕਥਿਤਂ ਇਮੇਸਂ ਅਨ੍ਤਰਂ ਪਵੇਸੇਯ੍ਯਾਤਿ ਅਤ੍ਥੋ. ਦਿਟ੍ਠਿਪਲ਼ਾਸੋਤਿਆਦੀਹਿ ਚਿਤ੍ਤਸ੍ਸ ਅਨਾਰਾਧਨਿਯਭਾਵੋ ਕਥਿਤੋ. ਤਂ ਜਾਨਮਾਨੋ ਸਮਾਨੋ ਗਰਹੇਯ੍ਯਾਤਿ ਤਂ ਸਤ੍ਥਾ ਜਾਨਮਾਨੋ ਸਮਾਨੋ ਨਿਨ੍ਦੇਯ੍ਯ ਅਮ੍ਹੇਤਿ. ਏਤਂ ਪਨਾਵੁਸੋ, ਧਮ੍ਮਨ੍ਤਿ ਏਤਂ ਕਲਹਭਣ੍ਡਨਧਮ੍ਮਂ.

ਤਞ੍ਚੇਤਿ ਤਂ ਸਞ੍ਞਤ੍ਤਿਕਾਰਕਂ ਭਿਕ੍ਖੁਂ. ਏਵਂ ਬ੍ਯਾਕਰੇਯ੍ਯਾਤਿ ਮਯਾ ਏਤੇ ਸੁਦ੍ਧਨ੍ਤੇ ਪਤਿਟ੍ਠਾਪਿਤਾਤਿ ਅਵਤ੍ਵਾ ਯੇਨ ਕਾਰਣੇਨ ਸਞ੍ਞਤ੍ਤਿ ਕਤਾ, ਤਦੇਵ ਦਸ੍ਸੇਨ੍ਤੋ ਏਵਂ ਬ੍ਯਾਕਰੇਯ੍ਯ. ਤਾਹਂ ਧਮ੍ਮਂ ਸੁਤ੍ਵਾਤਿ ਏਤ੍ਥ ਧਮ੍ਮੋਤਿ ਸਾਰਣੀਯਧਮ੍ਮੋ ਅਧਿਪ੍ਪੇਤੋ. ਨ ਚੇਵ ਅਤ੍ਤਾਨਨ੍ਤਿਆਦੀਸੁ ‘‘ਬ੍ਰਹ੍ਮਲੋਕਪ੍ਪਮਾਣੋ ਹੇਸ ਅਗ੍ਗਿ ਉਟ੍ਠਾਸਿ, ਕੋ ਏਤਮਞ੍ਞਤ੍ਰ ਮਯਾ ਨਿਬ੍ਬਾਪੇਤੁਂ ਸਮਤ੍ਥੋ’’ਤਿ ਹਿ ਵਦਨ੍ਤੋ ਅਤ੍ਤਾਨਂ ਉਕ੍ਕਂਸੇਤਿ ਨਾਮ. ‘‘ਏਤ੍ਤਕਾ ਜਨਾ ਵਿਚਰਨ੍ਤਿ, ਓਕਾਸੋ ਲਦ੍ਧੁਂ ਨ ਸਕ੍ਕਾ, ਏਕੋਪਿ ਏਤ੍ਤਕਮਤ੍ਤਂ ਨਿਬ੍ਬਾਪੇਤੁਂ ਸਮਤ੍ਥੋ ਨਾਮ ਨਤ੍ਥੀ’’ਤਿ ਵਦਮਾਨੋ ਪਰਂ ਵਮ੍ਭੇਤਿ ਨਾਮ. ਤਦੁਭਯਮ੍ਪੇਸ ਨ ਕਰੋਤਿ. ਧਮ੍ਮੋ ਪਨੇਤ੍ਥ ਸਮ੍ਮਾਸਮ੍ਬੁਦ੍ਧਸ੍ਸ ਬ੍ਯਾਕਰਣਂ, ਤੇਸਂ ਭਿਕ੍ਖੂਨਂ ਸਞ੍ਞਤ੍ਤਿਕਰਣਂ ਅਨੁਧਮ੍ਮੋ, ਤਦੇਵ ਬ੍ਯਾਕਰੋਤਿ ਨਾਮ. ਨ ਚ ਕੋਚਿ ਸਹਧਮ੍ਮਿਕੋਤਿ ਅਞ੍ਞੋ ਚਸ੍ਸ ਕੋਚਿ ਸਹੇਤੁਕੋ ਪਰੇਹਿ ਵੁਤ੍ਤੋ ਵਾਦੋ ਵਾ ਅਨੁਵਾਦੋ ਵਾ ਗਰਹਿਤਬ੍ਬਭਾਵਂ ਆਗਚ੍ਛਨ੍ਤੋ ਨਾਮ ਨਤ੍ਥਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਕਿਨ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.