੧. ਦੇਵਦਹਸੁਤ੍ਤਵਣ੍ਣਨਾ

੧. ਏਵਂ ਮੇ ਸੁਤਨ੍ਤਿ ਦੇਵਦਹਸੁਤ੍ਤਂ. ਤਤ੍ਥ ਦੇਵਦਹਂ ਨਾਮਾਤਿ ਦੇਵਾ ਵੁਚ੍ਚਨ੍ਤਿ ਰਾਜਾਨੋ, ਤਤ੍ਥ ਚ ਸਕ੍ਯਰਾਜੂਨਂ ਮਙ੍ਗਲਪੋਕ੍ਖਰਣੀ ਅਹੋਸਿ ਪਾਸਾਦਿਕਾ ਆਰਕ੍ਖਸਮ੍ਪਨ੍ਨਾ, ਸਾ ਦੇਵਾਨਂ ਦਹਤ੍ਤਾ ‘‘ਦੇਵਦਹ’’ਨ੍ਤਿ ਪਞ੍ਞਾਯਿਤ੍ਥ. ਤਦੁਪਾਦਾਯ ਸੋਪਿ ਨਿਗਮੋ ਦੇਵਦਹਨ੍ਤ੍ਵੇਵ ਸਙ੍ਖਂ ਗਤੋ. ਭਗਵਾ ਤਂ ਨਿਗਮਂ ਨਿਸ੍ਸਾਯ ਲੁਮ੍ਬਿਨਿਵਨੇ ਵਿਹਰਤਿ. ਸਬ੍ਬਂ ਤਂ ਪੁਬ੍ਬੇਕਤਹੇਤੂਤਿ ਪੁਬ੍ਬੇ ਕਤਕਮ੍ਮਪਚ੍ਚਯਾ. ਇਮਿਨਾ ਕਮ੍ਮਵੇਦਨਞ੍ਚ ਕਿਰਿਯਵੇਦਨਞ੍ਚ ਪਟਿਕ੍ਖਿਪਿਤ੍ਵਾ ਏਕਂ ਵਿਪਾਕਵੇਦਨਮੇਵ ਸਮ੍ਪਟਿਚ੍ਛਨ੍ਤੀਤਿ ਦਸ੍ਸੇਤਿ. ਏਵਂ ਵਾਦਿਨੋ, ਭਿਕ੍ਖਵੇ, ਨਿਗਣ੍ਠਾਤਿ ਇਮਿਨਾ ਪੁਬ੍ਬੇ ਅਨਿਯਮੇਤ੍ਵਾ ਵੁਤ੍ਤਂ ਨਿਯਮੇਤ੍ਵਾ ਦਸ੍ਸੇਤਿ.

ਅਹੁਵਮ੍ਹੇਵ ਮਯਨ੍ਤਿ ਇਦਂ ਭਗਵਾ ਤੇਸਂ ਅਜਾਨਨਭਾਵਂ ਜਾਨਨ੍ਤੋਵ ਕੇਵਲਂ ਕਲਿਸਾਸਨਂ ਆਰੋਪੇਤੁਕਾਮੋ ਪੁਚ੍ਛਤਿ. ਯੇ ਹਿ ‘‘ਮਯਂ ਅਹੁਵਮ੍ਹਾ’’ਤਿਪਿ ਨ ਜਾਨਨ੍ਤਿ, ਤੇ ਕਥਂ ਕਮ੍ਮਸ੍ਸ ਕਤਭਾਵਂ ਵਾ ਅਕਤਭਾਵਂ ਵਾ ਜਾਨਿਸ੍ਸਨ੍ਤਿ. ਉਤ੍ਤਰਿਪੁਚ੍ਛਾਯਪਿ ਏਸੇਵ ਨਯੋ.

੨. ਏਵਂ ਸਨ੍ਤੇਤਿ ਚੂਲ਼ਦੁਕ੍ਖਕ੍ਖਨ੍ਧੇ (ਮ. ਨਿ. ੧.੧੭੯-੧੮੦) ਮਹਾਨਿਗਣ੍ਠਸ੍ਸ ਵਚਨੇ ਸਚ੍ਚੇ ਸਨ੍ਤੇਤਿ ਅਤ੍ਥੋ, ਇਧ ਪਨ ਏਤ੍ਤਕਸ੍ਸ ਠਾਨਸ੍ਸ ਤੁਮ੍ਹਾਕਂ ਅਜਾਨਨਭਾਵੇ ਸਨ੍ਤੇਤਿ ਅਤ੍ਥੋ. ਨ ਕਲ੍ਲਨ੍ਤਿ ਨ ਯੁਤ੍ਤਂ.

੩. ਗਾਲ਼੍ਹੂਪਲੇਪਨੇਨਾਤਿ ਬਹਲੂਪਲੇਪਨੇਨ, ਪੁਨਪ੍ਪੁਨਂ ਵਿਸਰਞ੍ਜਿਤੇਨ, ਨ ਪਨ ਖਲਿਯਾ ਲਿਤ੍ਤੇਨ ਵਿਯ. ਏਸਨਿਯਾਤਿ ਏਸਨਿਸਲਾਕਾਯ ਅਨ੍ਤਮਸੋ ਨਨ੍ਤਕਵਟ੍ਟਿਯਾਪਿ. ਏਸੇਯ੍ਯਾਤਿ ਗਮ੍ਭੀਰਂ ਵਾ ਉਤ੍ਤਾਨਂ ਵਾਤਿ ਵੀਮਂਸੇਯ੍ਯ. ਅਗਦਙ੍ਗਾਰਨ੍ਤਿ ਝਾਮਹਰੀਤਕਸ੍ਸ ਵਾ ਆਮਲਕਸ੍ਸ ਵਾ ਚੁਣ੍ਣਂ. ਓਦਹੇਯ੍ਯਾਤਿ ਪਕ੍ਖਿਪੇਯ੍ਯ. ਅਰੋਗੋਤਿਆਦਿ ਮਾਗਣ੍ਡਿਯਸੁਤ੍ਤੇ (ਮ. ਨਿ. ੨.੨੧੩) ਵੁਤ੍ਤਮੇਵ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ, ਸਲ੍ਲੇਨ ਵਿਦ੍ਧਸ੍ਸ ਹਿ ਵਿਦ੍ਧਕਾਲੇ ਵੇਦਨਾਯ ਪਾਕਟਕਾਲੋ ਵਿਯ ਇਮੇਸਂ ‘‘ਮਯਂ ਪੁਬ੍ਬੇ ਅਹੁਵਮ੍ਹਾ ਵਾ ਨੋ ਵਾ, ਪਾਪਕਮ੍ਮਂ ਅਕਰਮ੍ਹਾ ਵਾ ਨੋ ਵਾ, ਏਵਰੂਪਂ ਵਾ ਪਾਪਂ ਕਰਮ੍ਹਾ’’ਤਿ ਜਾਨਨਕਾਲੋ ਸਿਯਾ. ਵਣਮੁਖਸ੍ਸ ਪਰਿਕਨ੍ਤਨਾਦੀਸੁ ਚਤੂਸੁ ਕਾਲੇਸੁ ਵੇਦਨਾਯ ਪਾਕਟਕਾਲੋ ਵਿਯ ‘‘ਏਤ੍ਤਕਂ ਵਾ ਨੋ ਦੁਕ੍ਖਂ ਨਿਜ੍ਜਿਣ੍ਣਂ, ਏਤ੍ਤਕੇ ਵਾ ਨਿਜ੍ਜਿਣ੍ਣੇ ਸਬ੍ਬਮੇਵ ਦੁਕ੍ਖਂ ਨਿਜ੍ਜਿਣ੍ਣਂ ਭਵਿਸ੍ਸਤਿ, ਸੁਦ੍ਧਨ੍ਤੇ ਪਤਿਟ੍ਠਿਤਾ ਨਾਮ ਭਵਿਸ੍ਸਾਮਾ’’ਤਿ ਜਾਨਨਕਾਲੋ ਸਿਯਾ. ਅਪਰਭਾਗੇ ਫਾਸੁਭਾਵਜਾਨਨਕਾਲੋ ਵਿਯ ਦਿਟ੍ਠੇਵ ਧਮ੍ਮੇ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ ਕੁਸਲਾਨਂ ਧਮ੍ਮਾਨਂ ਉਪਸਮ੍ਪਦਾਯ ਜਾਨਨਕਾਲੋ ਸਿਯਾ. ਏਵਮੇਤ੍ਥ ਏਕਾਯ ਉਪਮਾਯ ਤਯੋ ਅਤ੍ਥਾ, ਚਤੂਹਿ ਉਪਮਾਹਿ ਏਕੋ ਅਤ੍ਥੋ ਪਰਿਦੀਪਿਤੋ.

੪. ਇਮੇ ਪਨ ਤਤੋ ਏਕਮ੍ਪਿ ਨ ਜਾਨਨ੍ਤਿ, ਵਿਰਜ੍ਝਿਤ੍ਵਾ ਗਤੇ ਸਲ੍ਲੇ ਅਵਿਦ੍ਧੋਵ ‘‘ਵਿਦ੍ਧੋਸਿ ਮਯਾ’’ਤਿ ਪਚ੍ਚਤ੍ਥਿਕਸ੍ਸ ਵਚਨਪ੍ਪਮਾਣੇਨੇਵ ‘‘ਵਿਦ੍ਧੋਸ੍ਮੀ’’ਤਿ ਸਞ੍ਞਂ ਉਪ੍ਪਾਦੇਤ੍ਵਾ ਦੁਕ੍ਖਪ੍ਪਤ੍ਤਪੁਰਿਸੋ ਵਿਯ ਕੇਵਲਂ ਮਹਾਨਿਗਣ੍ਠਸ੍ਸ ਵਚਨਪ੍ਪਮਾਣੇਨ ਸਬ੍ਬਮੇਤਂ ਸਦ੍ਦਹਨ੍ਤਾ ਏਵਂ ਸਲ੍ਲੋਪਮਾਯ ਭਗਵਤਾ ਨਿਗ੍ਗਹਿਤਾ ਪਚ੍ਚਾਹਰਿਤੁਂ ਅਸਕ੍ਕੋਨ੍ਤਾ ਯਥਾ ਨਾਮ ਦੁਬ੍ਬਲੋ ਸੁਨਖੋ ਮਿਗਂ ਉਟ੍ਠਾਪੇਤ੍ਵਾ ਸਾਮਿਕਸ੍ਸ ਅਭਿਮੁਖਂ ਕਰਿਤ੍ਵਾ ਅਤ੍ਤਨਾ ਓਸਕ੍ਕਤਿ, ਏਵਂ ਮਹਾਨਿਗਣ੍ਠਸ੍ਸ ਮਤ੍ਥਕੇ ਵਾਦਂ ਪਕ੍ਖਿਪਨ੍ਤਾ ਨਿਗਣ੍ਠੋ, ਆਵੁਸੋਤਿਆਦੀਮਾਹਂਸੁ.

੫. ਅਥ ਨੇ ਭਗਵਾ ਸਾਚਰਿਯਕੇ ਨਿਗ੍ਗਣ੍ਹਨ੍ਤੋ ਪਞ੍ਚ ਖੋ ਇਮੇਤਿਆਦਿਮਾਹ. ਤਤ੍ਰਾਯਸ੍ਮਨ੍ਤਾਨਨ੍ਤਿ ਤੇਸੁ ਪਞ੍ਚਸੁ ਧਮ੍ਮੇਸੁ ਆਯਸ੍ਮਨ੍ਤਾਨਂ. ਕਾ ਅਤੀਤਂਸੇ ਸਤ੍ਥਰਿ ਸਦ੍ਧਾਤਿ ਅਤੀਤਂਸਵਾਦਿਮ੍ਹਿ ਸਤ੍ਥਰਿ ਕਾ ਸਦ੍ਧਾ. ਯਾ ਅਤੀਤਵਾਦਂ ਸਦ੍ਦਹਨ੍ਤਾਨਂ ਤੁਮ੍ਹਾਕਂ ਮਹਾਨਿਗਣ੍ਠਸ੍ਸ ਸਦ੍ਧਾ, ਸਾ ਕਤਮਾ? ਕਿਂ ਭੂਤਤ੍ਥਾ ਅਭੂਤਤ੍ਥਾ, ਭੂਤਵਿਪਾਕਾ ਅਭੂਤਵਿਪਾਕਾਤਿ ਪੁਚ੍ਛਤਿ. ਸੇਸਪਦੇਸੁਪਿ ਏਸੇਵ ਨਯੋ. ਸਹਧਮ੍ਮਿਕਨ੍ਤਿ ਸਹੇਤੁਕਂ ਸਕਾਰਣਂ. ਵਾਦਪਟਿਹਾਰਨ੍ਤਿ ਪਚ੍ਚਾਗਮਨਕਵਾਦਂ. ਏਤ੍ਤਾਵਤਾ ਤੇਸਂ ‘‘ਅਪਨੇਥ ਸਦ੍ਧਂ, ਸਬ੍ਬਦੁਬ੍ਬਲਾ ਏਸਾ’’ਤਿ ਸਦ੍ਧਾਛੇਦਕਵਾਦਂ ਨਾਮ ਦਸ੍ਸੇਤਿ.

੬. ਅਵਿਜ੍ਜਾ ਅਞ੍ਞਾਣਾਤਿ ਅਵਿਜ੍ਜਾਯ ਅਞ੍ਞਾਣੇਨ. ਸਮ੍ਮੋਹਾਤਿ ਸਮ੍ਮੋਹੇਨ. ਵਿਪਚ੍ਚੇਥਾਤਿ ਵਿਪਰੀਤਤੋ ਸਦ੍ਦਹਥ, ਵਿਪਲ੍ਲਾਸਗ੍ਗਾਹਂ ਵਾ ਗਣ੍ਹਥਾਤਿ ਅਤ੍ਥੋ.

੭. ਦਿਟ੍ਠਧਮ੍ਮਵੇਦਨੀਯਨ੍ਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਦਾਯਕਂ. ਉਪਕ੍ਕਮੇਨਾਤਿ ਪਯੋਗੇਨ. ਪਧਾਨੇਨਾਤਿ ਵੀਰਿਯੇਨ. ਸਮ੍ਪਰਾਯਵੇਦਨੀਯਨ੍ਤਿ ਦੁਤਿਯੇ ਵਾ ਤਤਿਯੇ ਵਾ ਅਤ੍ਤਭਾਵੇ ਵਿਪਾਕਦਾਯਕਂ. ਸੁਖਵੇਦਨੀਯਨ੍ਤਿ ਇਟ੍ਠਾਰਮ੍ਮਣਵਿਪਾਕਦਾਯਕਂ ਕੁਸਲਕਮ੍ਮਂ. ਵਿਪਰੀਤਂ ਦੁਕ੍ਖਵੇਦਨੀਯਂ. ਪਰਿਪਕ੍ਕਵੇਦਨੀਯਨ੍ਤਿ ਪਰਿਪਕ੍ਕੇ ਨਿਪ੍ਫਨ੍ਨੇ ਅਤ੍ਤਭਾਵੇ ਵੇਦਨੀਯਂ, ਦਿਟ੍ਠਧਮ੍ਮਵੇਦਨੀਯਸ੍ਸੇਵੇਤਂ ਅਧਿਵਚਨਂ. ਅਪਰਿਪਕ੍ਕਵੇਦਨੀਯਨ੍ਤਿ ਅਪਰਿਪਕ੍ਕੇ ਅਤ੍ਤਭਾਵੇ ਵੇਦਨੀਯਂ, ਸਮ੍ਪਰਾਯਵੇਦਨੀਯਸ੍ਸੇਵੇਤਂ ਅਧਿਵਚਨਂ. ਏਵਂ ਸਨ੍ਤੇਪਿ ਅਯਮੇਤ੍ਥ ਵਿਸੇਸੋ – ਯਂ ਪਠਮਵਯੇ ਕਤਂ ਪਠਮਵਯੇ ਵਾ ਮਜ੍ਝਿਮਵਯੇ ਵਾ ਪਚ੍ਛਿਮਵਯੇ ਵਾ ਵਿਪਾਕਂ ਦੇਤਿ, ਮਜ੍ਝਿਮਵਯੇ ਕਤਂ ਮਜ੍ਝਿਮਵਯੇ ਵਾ ਪਚ੍ਛਿਮਵਯੇ ਵਾ ਵਿਪਾਕਂ ਦੇਤਿ, ਪਚ੍ਛਿਮਵਯੇ ਕਤਂ ਤਤ੍ਥੇਵ ਵਿਪਾਕਂ ਦੇਤਿ, ਤਂ ਦਿਟ੍ਠਧਮ੍ਮਵੇਦਨੀਯਂ ਨਾਮ. ਯਂ ਪਨ ਸਤ੍ਤਦਿਵਸਬ੍ਭਨ੍ਤਰੇ ਵਿਪਾਕਂ ਦੇਤਿ, ਤਂ ਪਰਿਪਕ੍ਕਵੇਦਨੀਯਂ ਨਾਮ. ਤਂ ਕੁਸਲਮ੍ਪਿ ਹੋਤਿ ਅਕੁਸਲਮ੍ਪਿ.

ਤਤ੍ਰਿਮਾਨਿ ਵਤ੍ਥੂਨਿ – ਪੁਣ੍ਣੋ ਨਾਮ ਕਿਰ ਦੁਗ੍ਗਤਮਨੁਸ੍ਸੋ ਰਾਜਗਹੇ ਸੁਮਨਸੇਟ੍ਠਿਂ ਨਿਸ੍ਸਾਯ ਵਸਤਿ. ਤਮੇਨਂ ਏਕਦਿਵਸਂ ਨਗਰਮ੍ਹਿ ਨਕ੍ਖਤ੍ਤੇ ਸਙ੍ਘੁਟ੍ਠੇ ਸੇਟ੍ਠਿ ਆਹ – ‘‘ਸਚੇ ਅਜ੍ਜ ਕਸਿਸ੍ਸਸਿ, ਦ੍ਵੇ ਚ ਗੋਣੇ ਨਙ੍ਗਲਞ੍ਚ ਲਭਿਸ੍ਸਸਿ. ਕਿਂ ਨਕ੍ਖਤ੍ਤਂ ਕੀਲ਼ਿਸ੍ਸਸਿ, ਕਸਿਸ੍ਸਸੀ’’ਤਿ. ਕਿਂ ਮੇ ਨਕ੍ਖਤ੍ਤੇਨ, ਕਸਿਸ੍ਸਾਮੀਤਿ? ਤੇਨ ਹਿ ਯੇ ਗੋਣੇ ਇਚ੍ਛਸਿ, ਤੇ ਗਹੇਤ੍ਵਾ ਕਸਾਹੀਤਿ. ਸੋ ਕਸਿਤੁਂ ਗਤੋ. ਤਂ ਦਿਵਸਂ ਸਾਰਿਪੁਤ੍ਤਤ੍ਥੇਰੋ ਨਿਰੋਧਾ ਵੁਟ੍ਠਾਯ ‘‘ਕਸ੍ਸ ਸਙ੍ਗਹਂ ਕਰੋਮੀ’’ਤਿ? ਆਵਜ੍ਜਨ੍ਤੋ ਪੁਣ੍ਣਂ ਦਿਸ੍ਵਾ ਪਤ੍ਤਚੀਵਰਂ ਆਦਾਯ ਤਸ੍ਸ ਕਸਨਟ੍ਠਾਨਂ ਗਤੋ. ਪੁਣ੍ਣੋ ਕਸਿਂ ਠਪੇਤ੍ਵਾ ਥੇਰਸ੍ਸ ਦਨ੍ਤਕਟ੍ਠਂ ਦਤ੍ਵਾ ਮੁਖੋਦਕਂ ਅਦਾਸਿ. ਥੇਰੋ ਸਰੀਰਂ ਪਟਿਜਗ੍ਗਿਤ੍ਵਾ ਕਮ੍ਮਨ੍ਤਸ੍ਸ ਅਵਿਦੂਰੇ ਨਿਸੀਦਿ ਭਤ੍ਤਾਭਿਹਾਰਂ ਓਲੋਕੇਨ੍ਤੋ. ਅਥਸ੍ਸ ਭਰਿਯਂ ਭਤ੍ਤਂ ਆਹਰਨ੍ਤਿਂ ਦਿਸ੍ਵਾ ਅਨ੍ਤਰਾਮਗ੍ਗੇਯੇਵ ਅਤ੍ਤਾਨਂ ਦਸ੍ਸੇਸਿ.

ਸਾ ਸਾਮਿਕਸ੍ਸ ਆਹਟਭਤ੍ਤਂ ਥੇਰਸ੍ਸ ਪਤ੍ਤੇ ਪਕ੍ਖਿਪਿਤ੍ਵਾ ਪੁਨ ਗਨ੍ਤ੍ਵਾ ਅਞ੍ਞਂ ਭਤ੍ਤਂ ਸਮ੍ਪਾਦੇਤ੍ਵਾ ਦਿਵਾ ਅਗਮਾਸਿ. ਪੁਣ੍ਣੋ ਏਕਵਾਰਂ ਕਸਿਤ੍ਵਾ ਨਿਸੀਦਿ. ਸਾਪਿ ਭਤ੍ਤਂ ਗਹੇਤ੍ਵਾ ਆਗਚ੍ਛਨ੍ਤੀ ਆਹ – ‘‘ਸਾਮਿ ਪਾਤੋਵ ਤੇ ਭਤ੍ਤਂ ਆਹਰਿਯਿਤ੍ਥ, ਅਨ੍ਤਰਾਮਗ੍ਗੇ ਪਨ ਸਾਰਿਪੁਤ੍ਤਤ੍ਥੇਰਂ ਦਿਸ੍ਵਾ ਤਂ ਤਸ੍ਸ ਦਤ੍ਵਾ ਅਞ੍ਞਂ ਪਚਿਤ੍ਵਾ ਆਹਰਨ੍ਤਿਯਾ ਮੇ ਉਸ੍ਸੂਰੋ ਜਾਤੋ, ਮਾ ਕੁਜ੍ਝਿ ਸਾਮੀ’’ਤਿ. ਭਦ੍ਦਕਂ ਤੇ ਭਦ੍ਦੇ ਕਤਂ, ਮਯਾ ਥੇਰਸ੍ਸ ਪਾਤੋਵ ਦਨ੍ਤਕਟ੍ਠਞ੍ਚ ਮੁਖੋਦਕਞ੍ਚ ਦਿਨ੍ਨਂ, ਅਮ੍ਹਾਕਂਯੇਵਾਨੇਨ ਪਿਣ੍ਡਪਾਤੋਪਿ ਪਰਿਭੁਤ੍ਤੋ, ਅਜ੍ਜ ਥੇਰੇਨ ਕਤਸਮਣਧਮ੍ਮਸ੍ਸ ਮਯਂ ਭਾਗਿਨੋ ਜਾਤਾਤਿ ਚਿਤ੍ਤਂ ਪਸਾਦੇਸਿ. ਏਕਵਾਰਂ ਕਸਿਤਟ੍ਠਾਨਂ ਸੁਵਣ੍ਣਮੇਵ ਅਹੋਸਿ. ਸੋ ਭੁਞ੍ਜਿਤ੍ਵਾ ਕਸਿਤਟ੍ਠਾਨਂ ਓਲੋਕੇਨ੍ਤੋ ਵਿਜ੍ਜੋਤਮਾਨਂ ਦਿਸ੍ਵਾ ਉਟ੍ਠਾਯ ਯਟ੍ਠਿਯਾ ਪਹਰਿਤ੍ਵਾ ਰਤ੍ਤਸੁਵਣ੍ਣਭਾਵਂ ਜਾਨਿਤ੍ਵਾ ‘‘ਰਞ੍ਞੋ ਅਕਥੇਤ੍ਵਾ ਪਰਿਭੁਞ੍ਜਿਤੁਂ ਨ ਸਕ੍ਕਾ’’ਤਿ ਗਨ੍ਤ੍ਵਾ ਰਞ੍ਞੋ ਆਰੋਚੇਸਿ. ਰਾਜਾ ਤਂ ਸਬ੍ਬਂ ਸਕਟੇਹਿ ਆਹਰਾਪੇਤ੍ਵਾ ਰਾਜਙ੍ਗਣੇ ਰਾਸਿਂ ਕਾਰੇਤ੍ਵਾ ‘‘ਕਸ੍ਸਿਮਸ੍ਮਿਂ ਨਗਰੇ ਏਤ੍ਤਕਂ ਸੁਵਣ੍ਣਂ ਅਤ੍ਥੀ’’ਤਿ ਪੁਚ੍ਛਿ. ਕਸ੍ਸਚਿ ਨਤ੍ਥੀਤਿ ਚ ਵੁਤ੍ਤੇ ਸੇਟ੍ਠਿਟ੍ਠਾਨਮਸ੍ਸ ਅਦਾਸਿ. ਸੋ ਪੁਣ੍ਣਸੇਟ੍ਠਿ ਨਾਮ ਜਾਤੋ.

ਅਪਰਮ੍ਪਿ ਵਤ੍ਥੁ – ਤਸ੍ਮਿਂਯੇਵ ਰਾਜਗਹੇ ਕਾਲ਼ਵੇਲ਼ਿਯੋ ਨਾਮ ਦੁਗ੍ਗਤੋ ਅਤ੍ਥਿ. ਤਸ੍ਸ ਭਰਿਯਾ ਪਣ੍ਣਮ੍ਬਿਲਯਾਗੁਂ ਪਚਿ. ਮਹਾਕਸ੍ਸਪਤ੍ਥੇਰੋ ਨਿਰੋਧਾ ਵੁਟ੍ਠਾਯ ‘‘ਕਸ੍ਸ ਸਙ੍ਗਹਂ ਕਰੋਮੀ’’ਤਿ ਆਵਜ੍ਜਨ੍ਤੋ ਤਂ ਦਿਸ੍ਵਾ ਗਨ੍ਤ੍ਵਾ ਗੇਹਦ੍ਵਾਰੇ ਅਟ੍ਠਾਸਿ. ਸਾ ਪਤ੍ਤਂ ਗਹੇਤ੍ਵਾ ਸਬ੍ਬਂ ਤਤ੍ਥ ਪਕ੍ਖਿਪਿਤ੍ਵਾ ਥੇਰਸ੍ਸ ਅਦਾਸਿ, ਥੇਰੋ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਉਪਨਾਮੇਸਿ. ਸਤ੍ਥਾ ਅਤ੍ਤਨੋ ਯਾਪਨਮਤ੍ਤਂ ਗਣ੍ਹਿ, ਸੇਸਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਪਹੋਸਿ. ਕਾਲ਼ਵਲ਼ਿਯੋਪਿ ਤਂ ਠਾਨਂ ਪਤ੍ਤੋ ਚੂਲ਼ਕਂ ਲਭਿ. ਮਹਾਕਸ੍ਸਪੋ ਸਤ੍ਥਾਰਂ ਕਾਲ਼ਵਲ਼ਿਯਸ੍ਸ ਵਿਪਾਕਂ ਪੁਚ੍ਛਿ. ਸਤ੍ਥਾ ‘‘ਇਤੋ ਸਤ੍ਤਮੇ ਦਿਵਸੇ ਸੇਟ੍ਠਿਚ੍ਛਤ੍ਤਂ ਲਭਿਸ੍ਸਤੀ’’ਤਿ ਆਹ. ਕਾਲ਼ਵਲ਼ਿਯੋ ਤਂ ਕਥਂ ਸੁਤ੍ਵਾ ਗਨ੍ਤ੍ਵਾ ਭਰਿਯਾਯ ਆਰੋਚੇਸਿ.

ਤਦਾ ਚ ਰਾਜਾ ਨਗਰਂ ਅਨੁਸਞ੍ਚਰਨ੍ਤੋ ਬਹਿਨਗਰੇ ਜੀਵਸੂਲੇ ਨਿਸਿਨ੍ਨਂ ਪੁਰਿਸਂ ਅਦ੍ਦਸ. ਪੁਰਿਸੋ ਰਾਜਾਨਂ ਦਿਸ੍ਵਾ ਉਚ੍ਚਾਸਦ੍ਦਂ ਅਕਾਸਿ ‘‘ਤੁਮ੍ਹਾਕਂ ਮੇ ਭੁਞ੍ਜਨਭਤ੍ਤਂ ਪਹਿਣਥ ਦੇਵਾ’’ਤਿ. ਰਾਜਾ ‘‘ਪੇਸੇਸ੍ਸਾਮੀ’’ਤਿ ਵਤ੍ਵਾ ਸਾਯਮਾਸਭਤ੍ਤੇ ਉਪਨੀਤੇ ਸਰਿਤ੍ਵਾ ‘‘ਇਮਂ ਹਰਿਤੁਂ ਸਮਤ੍ਥਂ ਜਾਨਾਥਾ’’ਤਿ ਆਹ, ਨਗਰੇ ਸਹਸ੍ਸਭਣ੍ਡਿਕਂ ਚਾਰੇਸੁਂ. ਤਤਿਯਵਾਰੇ ਕਾਲ਼ਵਲ਼ਿਯਸ੍ਸ ਭਰਿਯਾ ਅਗ੍ਗਹੇਸਿ. ਅਥ ਨਂ ਰਞ੍ਞੋ ਦਸ੍ਸੇਸੁਂ, ਸਾ ਪੁਰਿਸਵੇਸਂ ਗਹੇਤ੍ਵਾ ਪਞ੍ਚਾਵੁਧਸਨ੍ਨਦ੍ਧਾ ਭਤ੍ਤਪਾਤਿਂ ਗਹੇਤ੍ਵਾ ਨਗਰਾ ਨਿਕ੍ਖਮਿ. ਬਹਿਨਗਰੇ ਤਾਲੇ ਅਧਿਵਤ੍ਥੋ ਦੀਘਤਾਲੋ ਨਾਮ ਯਕ੍ਖੋ ਤਂ ਰੁਕ੍ਖਮੂਲੇਨ ਗਚ੍ਛਨ੍ਤਿਂ ਦਿਸ੍ਵਾ ‘‘ਤਿਟ੍ਠ ਤਿਟ੍ਠ ਭਕ੍ਖੋਸਿ ਮੇ’’ਤਿ ਆਹ. ਨਾਹਂ ਤਵ ਭਕ੍ਖੋ, ਰਾਜਦੂਤੋ ਅਹਨ੍ਤਿ. ਕਤ੍ਥ ਗਚ੍ਛਸੀਤਿ. ਜੀਵਸੂਲੇ ਨਿਸਿਨ੍ਨਸ੍ਸ ਪੁਰਿਸਸ੍ਸ ਸਨ੍ਤਿਕਨ੍ਤਿ. ਮਮਪਿ ਏਕਂ ਸਾਸਨਂ ਹਰਿਤੁਂ ਸਕ੍ਖਿਸ੍ਸਸੀਤਿ. ਆਮ ਸਕ੍ਖਿਸ੍ਸਾਮੀਤਿ. ‘‘ਦੀਘਤਾਲਸ੍ਸ ਭਰਿਯਾ ਸੁਮਨਦੇਵਰਾਜਧੀਤਾ ਕਾਲ਼ੀ ਪੁਤ੍ਤਂ ਵਿਜਾਤਾ’’ਤਿ ਆਰੋਚੇਯ੍ਯਾਸਿ. ਇਮਸ੍ਮਿਂ ਤਾਲਮੂਲੇ ਸਤ੍ਤ ਨਿਧਿਕੁਮ੍ਭਿਯੋ ਅਤ੍ਥਿ, ਤਾ ਤ੍ਵਂ ਗਣ੍ਹੇਯ੍ਯਾਸੀਤਿ. ਸਾ ‘‘ਦੀਘਤਾਲਸ੍ਸ ਭਰਿਯਾ ਸੁਮਨਦੇਵਰਾਜਧੀਤਾ ਕਾਲ਼ੀ ਪੁਤ੍ਤਂ ਵਿਜਾਤਾ’’ਤਿ ਉਗ੍ਘੋਸੇਨ੍ਤੀ ਅਗਮਾਸਿ.

ਸੁਮਨਦੇਵੋ ਯਕ੍ਖਸਮਾਗਮੇ ਨਿਸਿਨ੍ਨੋ ਸੁਤ੍ਵਾ ‘‘ਏਕੋ ਮਨੁਸ੍ਸੋ ਅਮ੍ਹਾਕਂ ਪਿਯਪਵਤ੍ਤਿਂ ਆਹਰਤਿ, ਪਕ੍ਕੋਸਥ ਨ’’ਨ੍ਤਿ ਸਾਸਨਂ ਸੁਤ੍ਵਾ ਪਸਨ੍ਨੋ ‘‘ਇਮਸ੍ਸ ਰੁਕ੍ਖਸ੍ਸ ਪਰਿਮਣ੍ਡਲਚ੍ਛਾਯਾਯ ਫਰਣਟ੍ਠਾਨੇ ਨਿਧਿਕੁਮ੍ਭਿਯੋ ਤੁਯ੍ਹਂ ਦਮ੍ਮੀ’’ਤਿ ਆਹ. ਜੀਵਸੂਲੇ ਨਿਸਿਨ੍ਨਪੁਰਿਸੋ ਭਤ੍ਤਂ ਭੁਞ੍ਜਿਤ੍ਵਾ ਮੁਖਪੁਞ੍ਛਨਕਾਲੇ ਇਤ੍ਥਿਫਸ੍ਸੋਤਿ ਞਤ੍ਵਾ ਚੂਲ਼ਾਯ ਡਂਸਿ, ਸਾ ਅਸਿਨਾ ਅਤ੍ਤਨੋ ਚੂਲ਼ਂ ਛਿਨ੍ਦਿਤ੍ਵਾ ਰਞ੍ਞੋ ਸਨ੍ਤਿਕਂਯੇਵ ਗਤਾ. ਰਾਜਾ ਭਤ੍ਤਭੋਜਿਤਭਾਵੋ ਕਥਂ ਜਾਨਿਤਬ੍ਬੋਤਿ? ਚੂਲ਼ਸਞ੍ਞਾਯਾਤਿ ਵਤ੍ਵਾ ਰਞ੍ਞੋ ਆਚਿਕ੍ਖਿਤ੍ਵਾ ਤਂ ਧਨਂ ਆਹਰਾਪੇਸਿ. ਰਾਜਾ ਅਞ੍ਞਸ੍ਸ ਏਤ੍ਤਕਂ ਧਨਂ ਨਾਮ ਅਤ੍ਥੀਤਿ. ਨਤ੍ਥਿ ਦੇਵਾਤਿ. ਰਾਜਾ ਤਸ੍ਸਾ ਪਤਿਂ ਤਸ੍ਮਿਂ ਨਗਰੇ ਧਨਸੇਟ੍ਠਿਂ ਅਕਾਸਿ. ਮਲ੍ਲਿਕਾਯਪਿ ਦੇਵਿਯਾ ਵਤ੍ਥੁ ਕਥੇਤਬ੍ਬਂ. ਇਮਾਨਿ ਤਾਵ ਕੁਸਲਕਮ੍ਮੇ ਵਤ੍ਥੂਨਿ.

ਨਨ੍ਦਮਾਣਵਕੋ ਪਨ ਉਪ੍ਪਲਵਣ੍ਣਾਯ ਥੇਰਿਯਾ ਵਿਪ੍ਪਟਿਪਜ੍ਜਿ, ਤਸ੍ਸ ਮਞ੍ਚਤੋ ਉਟ੍ਠਾਯ ਨਿਕ੍ਖਮਿਤ੍ਵਾ ਗਚ੍ਛਨ੍ਤਸ੍ਸ ਮਹਾਪਥਵੀ ਭਿਜ੍ਜਿਤ੍ਵਾ ਓਕਾਸਮਦਾਸਿ, ਤਤ੍ਥੇਵ ਮਹਾਨਰਕਂ ਪਵਿਟ੍ਠੋ. ਨਨ੍ਦੋਪਿ ਗੋਘਾਤਕੋ ਪਣ੍ਣਾਸ ਵਸ੍ਸਾਨਿ ਗੋਘਾਤਕਕਮ੍ਮਂ ਕਤ੍ਵਾ ਏਕਦਿਵਸਂ ਭੋਜਨਕਾਲੇ ਮਂਸਂ ਅਲਭਨ੍ਤੋ ਏਕਸ੍ਸ ਜੀਵਮਾਨਕਗੋਣਸ੍ਸ ਜਿਵ੍ਹਂ ਛਿਨ੍ਦਿਤ੍ਵਾ ਅਙ੍ਗਾਰੇਸੁ ਪਚਾਪੇਤ੍ਵਾ ਖਾਦਿਤੁਂ ਆਰਦ੍ਧੋ. ਅਥਸ੍ਸ ਜਿਵ੍ਹਾ ਮੂਲੇ ਛਿਜ੍ਜਿਤ੍ਵਾ ਭਤ੍ਤਪਾਤਿਯਂਯੇਵ ਪਤਿਤਾ, ਸੋ ਵਿਰਵਨ੍ਤੋ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤਿ. ਨਨ੍ਦੋਪਿ ਯਕ੍ਖੋ ਅਞ੍ਞੇਨ ਯਕ੍ਖੇਨ ਸਦ੍ਧਿਂ ਆਕਾਸੇਨ ਗਚ੍ਛਨ੍ਤੋ ਸਾਰਿਪੁਤ੍ਤਤ੍ਥੇਰਂ ਨਵੋਰੋਪਿਤੇਹਿ ਕੇਸੇਹਿ ਰਤ੍ਤਿਭਾਗੇ ਅਬ੍ਭੋਕਾਸੇ ਨਿਸਿਨ੍ਨਂ ਦਿਸ੍ਵਾ ਸੀਸੇ ਪਹਰਿਤੁਕਾਮੋ ਇਤਰਸ੍ਸ ਯਕ੍ਖਸ੍ਸ ਆਰੋਚੇਤ੍ਵਾ ਤੇਨ ਵਾਰਿਯਮਾਨੋਪਿ ਪਹਾਰਂ ਦਤ੍ਵਾ ਡਯ੍ਹਾਮਿ ਡਯ੍ਹਾਮੀਤਿ ਵਿਰਵਨ੍ਤੋ ਤਸ੍ਮਿਂਯੇਵ ਠਾਨੇ ਭੂਮਿਂ ਪਵਿਸਿਤ੍ਵਾ ਮਹਾਨਿਰਯੇ ਨਿਬ੍ਬਤ੍ਤੋਤਿ ਇਮਾਨਿ ਅਕੁਸਲਕਮ੍ਮੇ ਵਤ੍ਥੂਨਿ.

ਯਂ ਪਨ ਅਨ੍ਤਮਸੋ ਮਰਣਸਨ੍ਤਿਕੇਪਿ ਕਤਂ ਕਮ੍ਮਂ ਭਵਨ੍ਤਰੇ ਵਿਪਾਕਂ ਦੇਤਿ, ਤਂ ਸਬ੍ਬਂ ਸਮ੍ਪਰਾਯਵੇਦਨੀਯਂ ਨਾਮ. ਤਤ੍ਥ ਯੋ ਅਪਰਿਹੀਨਸ੍ਸ ਝਾਨਸ੍ਸ ਵਿਪਾਕੋ ਨਿਬ੍ਬਤ੍ਤਿਸ੍ਸਤਿ, ਸੋ ਇਧ ਨਿਬ੍ਬਤ੍ਤਿਤਵਿਪਾਕੋਤਿ ਵੁਤ੍ਤੋ. ਤਸ੍ਸ ਮੂਲਭੂਤਂ ਕਮ੍ਮਂ ਨੇਵ ਦਿਟ੍ਠਧਮ੍ਮਵੇਦਨੀਯਂ ਨ ਸਮ੍ਪਰਾਯਵੇਦਨੀਯਨ੍ਤਿ, ਨ ਵਿਚਾਰਿਤਂ, ਕਿਞ੍ਚਾਪਿ ਨ ਵਿਚਾਰਿਤਂ, ਸਮ੍ਪਰਾਯਵੇਦਨੀਯਮੇਵ ਪਨੇਤਨ੍ਤਿ ਵੇਦਿਤਬ੍ਬਂ. ਯੋ ਪਠਮਮਗ੍ਗਾਦੀਨਂ ਭਵਨ੍ਤਰੇ ਫਲਸਮਾਪਤ੍ਤਿਵਿਪਾਕੋ, ਸੋ ਇਧ ਨਿਬ੍ਬਤ੍ਤਿਤਗੁਣੋਤ੍ਵੇਵ ਵੁਤ੍ਤੋ. ਕਿਞ੍ਚਾਪਿ ਏਵਂ ਵੁਤ੍ਤੋ, ਮਗ੍ਗਕਮ੍ਮਂ ਪਨ ਪਰਿਪਕ੍ਕਵੇਦਨੀਯਨ੍ਤਿ ਵੇਦਿਤਬ੍ਬਂ. ਮਗ੍ਗਚੇਤਨਾਯੇਵ ਹਿ ਸਬ੍ਬਲਹੁਂ ਫਲਦਾਯਿਕਾ ਅਨਨ੍ਤਰਫਲਤ੍ਤਾਤਿ.

੮. ਬਹੁਵੇਦਨੀਯਨ੍ਤਿ ਸਞ੍ਞਾਭਵੂਪਗਂ. ਅਪ੍ਪਵੇਦਨੀਯਨ੍ਤਿ ਅਸਞ੍ਞਾਭਵੂਪਗਂ. ਸਵੇਦਨੀਯਨ੍ਤਿ ਸਵਿਪਾਕਂ ਕਮ੍ਮਂ. ਅਵੇਦਨੀਯਨ੍ਤਿ ਅਵਿਪਾਕਂ ਕਮ੍ਮਂ. ਏਵਂ ਸਨ੍ਤੇਤਿ ਇਮੇਸਂ ਦਿਟ੍ਠਧਮ੍ਮਵੇਦਨੀਯਾਦੀਨਂ ਕਮ੍ਮਾਨਂ ਉਪਕ੍ਕਮੇਨ ਸਮ੍ਪਰਾਯਵੇਦਨੀਯਾਦਿ ਭਾਵਕਾਰਣਸ੍ਸ ਅਲਾਭੇ ਸਤਿ. ਅਫਲੋਤਿ ਨਿਪ੍ਫਲੋ ਨਿਰਤ੍ਥਕੋਤਿ. ਏਤ੍ਤਾਵਤਾ ਅਨਿਯ੍ਯਾਨਿਕਸਾਸਨੇ ਪਯੋਗਸ੍ਸ ਅਫਲਤਂ ਦਸ੍ਸੇਤ੍ਵਾ ਪਧਾਨਚ੍ਛੇਦਕਵਾਦੋ ਨਾਮ ਦਸ੍ਸਿਤੋਤਿ ਵੇਦਿਤਬ੍ਬੋ. ਸਹਧਮ੍ਮਿਕਾ ਵਾਦਾਨੁਵਾਦਾਤਿ ਪਰੇਹਿ ਵੁਤ੍ਤਕਾਰਣੇਨ ਸਕਾਰਣਾ ਹੁਤ੍ਵਾ ਨਿਗਣ੍ਠਾਨਂ ਵਾਦਾ ਚ ਅਨੁਵਾਦਾ ਚ. ਗਾਰਯ੍ਹਂ ਠਾਨਂ ਆਗਚ੍ਛਨ੍ਤੀਤਿ ਵਿਞ੍ਞੂਹਿ ਗਰਹਿਤਬ੍ਬਂ ਕਾਰਣਂ ਆਗਚ੍ਛਨ੍ਤਿ. ‘‘ਵਾਦਾਨੁਪ੍ਪਤ੍ਤਾ ਗਾਰਯ੍ਹਟ੍ਠਾਨਾ’’ਤਿਪਿ ਪਾਠੋ. ਤਸ੍ਸਤ੍ਥੋ – ਪਰੇਹਿ ਵੁਤ੍ਤੇਨ ਕਾਰਣੇਨ ਸਕਾਰਣਾ ਨਿਗਣ੍ਠਾਨਂ ਵਾਦਂ ਅਨੁਪ੍ਪਤ੍ਤਾ ਤਂ ਵਾਦਂ ਸੋਸੇਨ੍ਤਾ ਮਿਲਾਪੇਨ੍ਤਾ ਦੁਕ੍ਕਟਕਮ੍ਮਕਾਰਿਨੋਤਿਆਦਯੋ ਦਸ ਗਾਰਯ੍ਹਟ੍ਠਾਨਾ ਆਗਚ੍ਛਨ੍ਤਿ.

੯. ਸਙ੍ਗਤਿਭਾਵਹੇਤੂਤਿ ਨਿਯਤਿਭਾਵਕਾਰਣਾ. ਪਾਪਸਙ੍ਗਤਿਕਾਤਿ ਪਾਪਨਿਯਤਿਨੋ. ਅਭਿਜਾਤਿਹੇਤੂਤਿ ਛਲ਼ਭਿਜਾਤਿਹੇਤੁ.

੧੦. ਏਵਂ ਨਿਗਣ੍ਠਾਨਂ ਉਪਕ੍ਕਮਸ੍ਸ ਅਫਲਤਂ ਦਸ੍ਸੇਤ੍ਵਾ ਇਦਾਨਿ ਨਿਯ੍ਯਾਨਿਕਸਾਸਨੇ ਉਪਕ੍ਕਮਸ੍ਸ ਵੀਰਿਯਸ੍ਸ ਚ ਸਫਲਤਂ ਦਸ੍ਸੇਤੁਂ ਕਥਞ੍ਚ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਅਨਦ੍ਧਭੂਤਨ੍ਤਿ ਅਨਧਿਭੂਤਂ. ਦੁਕ੍ਖੇਨ ਅਨਧਿਭੂਤੋ ਨਾਮ ਮਨੁਸ੍ਸਤ੍ਤਭਾਵੋ ਵੁਚ੍ਚਤਿ, ਨ ਤਂ ਅਦ੍ਧਭਾਵੇਤਿ ਨਾਭਿਭਵਤੀਤਿ ਅਤ੍ਥੋ. ਤਮ੍ਪਿ ਨਾਨਪ੍ਪਕਾਰਾਯ ਦੁਕ੍ਕਰਕਾਰਿਕਾਯ ਪਯੋਜੇਨ੍ਤੋ ਦੁਕ੍ਖੇਨ ਅਦ੍ਧਭਾਵੇਤਿ ਨਾਮ. ਯੇ ਪਨ ਸਾਸਨੇ ਪਬ੍ਬਜਿਤ੍ਵਾ ਆਰਞ੍ਞਕਾ ਵਾ ਹੋਨ੍ਤਿ ਰੁਕ੍ਖਮੂਲਿਕਾਦਯੋ ਵਾ, ਤੇ ਦੁਕ੍ਖੇਨ ਨ ਅਦ੍ਧਭਾਵੇਨ੍ਤਿ ਨਾਮ. ਨਿਯ੍ਯਾਨਿਕਸਾਸਨਸ੍ਮਿਞ੍ਹਿ ਵੀਰਿਯਂ ਸਮ੍ਮਾਵਾਯਾਮੋ ਨਾਮ ਹੋਤਿ.

ਥੇਰੋ ਪਨਾਹ – ਯੋ ਇਸ੍ਸਰਕੁਲੇ ਨਿਬ੍ਬਤ੍ਤੋ ਸਤ੍ਤਵਸ੍ਸਿਕੋ ਹੁਤ੍ਵਾ ਅਲਙ੍ਕਤਪ੍ਪਟਿਯਤ੍ਤੋ ਪਿਤੁਅਙ੍ਕੇ ਨਿਸਿਨ੍ਨੋ ਘਰੇ ਭਤ੍ਤਕਿਚ੍ਚਂ ਕਤ੍ਵਾ ਨਿਸਿਨ੍ਨੇਨ ਭਿਕ੍ਖੁਸਙ੍ਘੇਨ ਅਨੁਮੋਦਨਾਯ ਕਰਿਯਮਾਨਾਯ ਤਿਸ੍ਸੋ ਸਮ੍ਪਤ੍ਤਿਯੋ ਦਸ੍ਸੇਤ੍ਵਾ ਸਚ੍ਚੇਸੁ ਪਕਾਸਿਤੇਸੁ ਅਰਹਤ੍ਤਂ ਪਾਪੁਣਾਤਿ, ਮਾਤਾਪਿਤੂਹਿ ਵਾ ‘‘ਪਬ੍ਬਜਿਸ੍ਸਸਿ ਤਾਤਾ’’ਤਿ ਵੁਤ੍ਤੋ ‘‘ਆਮ ਪਬ੍ਬਜਿਸ੍ਸਾਮੀ’’ਤਿ ਵਤ੍ਵਾ ਨ੍ਹਾਪੇਤ੍ਵਾ ਅਲਙ੍ਕਰਿਤ੍ਵਾ ਵਿਹਾਰਂ ਨੀਤੋ ਤਚਪਞ੍ਚਕਂ ਉਗ੍ਗਣ੍ਹਿਤ੍ਵਾ ਨਿਸਿਨ੍ਨੋ ਕੇਸੇਸੁ ਓਹਾਰਿਯਮਾਨੇਸੁ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਾਤਿ, ਨਵਪਬ੍ਬਜਿਤੋ ਵਾ ਪਨ ਮਨੋਸਿਲਾਤੇਲਮਕ੍ਖਿਤੇਨ ਸੀਸੇਨ ਪੁਨਦਿਵਸੇ ਮਾਤਾਪਿਤੂਹਿ ਪੇਸਿਤਂ ਕਾਜਭਤ੍ਤਂ ਭੁਞ੍ਜਿਤ੍ਵਾ ਵਿਹਾਰੇ ਨਿਸਿਨ੍ਨੋਵ ਅਰਹਤ੍ਤਂ ਪਾਪੁਣਾਤਿ, ਅਯਂ ਨ ਦੁਕ੍ਖੇਨ ਅਤ੍ਤਾਨਂ ਅਦ੍ਧਭਾਵੇਤਿ ਨਾਮ. ਅਯਂ ਪਨ ਉਕ੍ਕਟ੍ਠਸਕ੍ਕਾਰੋ. ਯੋ ਦਾਸਿਕੁਚ੍ਛਿਯਂ ਨਿਬ੍ਬਤ੍ਤੋ ਅਨ੍ਤਮਸੋ ਰਜਤਮੁਦ੍ਦਿਕਮ੍ਪਿ ਪਿਲ਼ਨ੍ਧਿਤ੍ਵਾ ਗੋਰਕਪਿਯਙ੍ਗੁਮਤ੍ਤੇਨਾਪਿ ਸਰੀਰਂ ਵਿਲਿਮ੍ਪੇਤ੍ਵਾ ‘‘ਪਬ੍ਬਾਜੇਥ ਨ’’ਨ੍ਤਿ ਨੀਤੋ ਖੁਰਗ੍ਗੇ ਵਾ ਪੁਨਦਿਵਸੇ ਵਾ ਅਰਹਤ੍ਤਂ ਪਾਪੁਣਾਤਿ, ਅਯਮ੍ਪਿ ਨ ਅਨਦ੍ਧਭੂਤਂ ਅਤ੍ਤਾਨਂ ਦੁਕ੍ਖੇਨ ਅਦ੍ਧਭਾਵੇਤਿ ਨਾਮ.

ਧਮ੍ਮਿਕਂ ਸੁਖਂ ਨਾਮ ਸਙ੍ਘਤੋ ਵਾ ਗਣਤੋ ਵਾ ਉਪ੍ਪਨ੍ਨਂ ਚਤੁਪਚ੍ਚਯਸੁਖਂ. ਅਨਧਿਮੁਚ੍ਛਿਤੋਤਿ ਤਣ੍ਹਾਮੁਚ੍ਛਨਾਯ ਅਮੁਚ੍ਛਿਤੋ. ਧਮ੍ਮਿਕਞ੍ਹਿ ਸੁਖਂ ਨ ਪਰਿਚ੍ਚਜਾਮੀਤਿ ਨ ਤਤ੍ਥ ਗੇਧੋ ਕਾਤਬ੍ਬੋ. ਸਙ੍ਘਤੋ ਹਿ ਉਪ੍ਪਨ੍ਨਂ ਸਲਾਕਭਤ੍ਤਂ ਵਾ ਵਸ੍ਸਾਵਾਸਿਕਂ ਵਾ ‘‘ਇਦਮਤ੍ਥਂ ਏਤ’’ਨ੍ਤਿ ਪਰਿਚ੍ਛਿਨ੍ਦਿਤ੍ਵਾ ਸਙ੍ਘਮਜ੍ਝੇ ਭਿਕ੍ਖੂਨਂ ਅਨ੍ਤਰੇ ਪਰਿਭੁਞ੍ਜਨ੍ਤੋ ਪਤ੍ਤਨ੍ਤਰੇ ਪਦੁਮਂ ਵਿਯ ਸੀਲਸਮਾਧਿਵਿਪਸ੍ਸਨਾਮਗ੍ਗਫਲੇਹਿ ਵਡ੍ਢਤਿ. ਇਮਸ੍ਸਾਤਿ ਪਚ੍ਚੁਪ੍ਪਨ੍ਨਾਨਂ ਪਞ੍ਚਨ੍ਨਂ ਖਨ੍ਧਾਨਂ ਮੂਲਭੂਤਸ੍ਸ. ਦੁਕ੍ਖਨਿਦਾਨਸ੍ਸਾਤਿ ਤਣ੍ਹਾਯ. ਸਾ ਹਿ ਪਞ੍ਚਕ੍ਖਨ੍ਧਦੁਕ੍ਖਸ੍ਸ ਨਿਦਾਨਂ. ਸਙ੍ਖਾਰਂ ਪਦਹਤੋਤਿ ਸਮ੍ਪਯੋਗਵੀਰਿਯਂ ਕਰੋਨ੍ਤਸ੍ਸ. ਵਿਰਾਗੋ ਹੋਤੀਤਿ ਮਗ੍ਗੇਨ ਵਿਰਾਗੋ ਹੋਤਿ. ਇਦਂ ਵੁਤ੍ਤਂ ਹੋਤਿ ‘‘ਸਙ੍ਖਾਰਪਧਾਨੇਨ ਮੇ ਇਮਸ੍ਸ ਦੁਕ੍ਖਨਿਦਾਨਸ੍ਸ ਵਿਰਾਗੋ ਹੋਤੀ’’ਤਿ ਏਵਂ ਪਜਾਨਾਤੀਤਿ ਇਮਿਨਾ ਸੁਖਾਪਟਿਪਦਾ ਖਿਪ੍ਪਾਭਿਞ੍ਞਾ ਕਥਿਤਾ. ਦੁਤਿਯਵਾਰੇਨ ਤਸ੍ਸ ਸਮ੍ਪਯੋਗਵੀਰਿਯਸ੍ਸ ਮਜ੍ਝਤ੍ਤਤਾਕਾਰੋ ਕਥਿਤੋ. ਸੋ ਯਸ੍ਸ ਹਿ ਖ੍ਵਾਸ੍ਸਾਤਿ ਏਤ੍ਥ ਅਯਂ ਸਙ੍ਖੇਪਤ੍ਥੋ – ਸੋ ਪੁਗ੍ਗਲੋ ਯਸ੍ਸ ਦੁਕ੍ਖਨਿਦਾਨਸ੍ਸ ਸਙ੍ਖਾਰਪਧਾਨੇਨ ਵਿਰਾਗੋ ਹੋਤਿ, ਸਙ੍ਖਾਰਂ ਤਤ੍ਥ ਪਦਹਤਿ, ਮਗ੍ਗਪਧਾਨੇਨ ਪਦਹਤਿ. ਯਸ੍ਸ ਪਨ ਦੁਕ੍ਖਨਿਦਾਨਸ੍ਸ ਅਜ੍ਝੁਪੇਕ੍ਖਤੋ ਉਪੇਕ੍ਖਂ ਭਾਵੇਨ੍ਤਸ੍ਸ ਵਿਰਾਗੋ ਹੋਤਿ, ਉਪੇਕ੍ਖਂ ਤਤ੍ਥ ਭਾਵੇਤਿ, ਮਗ੍ਗਭਾਵਨਾਯ ਭਾਵੇਤਿ. ਤਸ੍ਸਾਤਿ ਤਸ੍ਸ ਪੁਗ੍ਗਲਸ੍ਸ.

੧੧. ਪਟਿਬਦ੍ਧਚਿਤ੍ਤੋਤਿ ਛਨ੍ਦਰਾਗੇਨ ਬਦ੍ਧਚਿਤ੍ਤੋ. ਤਿਬ੍ਬਚ੍ਛਨ੍ਦੋਤਿ ਬਹਲਚ੍ਛਨ੍ਦੋ. ਤਿਬ੍ਬਾਪੇਕ੍ਖੋਤਿ ਬਹਲਪਤ੍ਥਨੋ. ਸਨ੍ਤਿਟ੍ਠਨ੍ਤਿਨ੍ਤਿ ਏਕਤੋ ਤਿਟ੍ਠਨ੍ਤਿਂ. ਸਞ੍ਜਗ੍ਘਨ੍ਤਿਨ੍ਤਿ ਮਹਾਹਸਿਤਂ ਹਸਮਾਨਂ. ਸਂਹਸਨ੍ਤਿਨ੍ਤਿ ਸਿਤਂ ਕੁਰੁਮਾਨਂ.

ਏਵਮੇਵ ਖੋ, ਭਿਕ੍ਖਵੇਤਿ ਏਤ੍ਥ ਇਦਂ ਓਪਮ੍ਮਵਿਭਾਵਨਂ – ਏਕੋ ਹਿ ਪੁਰਿਸੋ ਏਕਿਸ੍ਸਾ ਇਤ੍ਥਿਯਾ ਸਾਰਤ੍ਤੋ ਘਾਸਚ੍ਛਾਦਨਮਾਲਾਲਙ੍ਕਾਰਾਦੀਨਿ ਦਤ੍ਵਾ ਘਰੇ ਵਾਸੇਤਿ. ਸਾ ਤਂ ਅਤਿਚਰਿਤ੍ਵਾ ਅਞ੍ਞਂ ਸੇਵਤਿ. ਸੋ ‘‘ਨੂਨ ਅਹਂ ਅਸ੍ਸਾ ਅਨੁਰੂਪਂ ਸਕ੍ਕਾਰਂ ਨ ਕਰੋਮੀ’’ਤਿ ਸਕ੍ਕਾਰਂ ਵਡ੍ਢੇਸਿ. ਸਾ ਭਿਯ੍ਯੋਸੋਮਤ੍ਤਾਯ ਅਤਿਚਰਤਿਯੇਵ. ਸੋ – ‘‘ਅਯਂ ਸਕ੍ਕਰਿਯਮਾਨਾਪਿ ਅਤਿਚਰਤੇਵ, ਘਰੇ ਮੇ ਵਸਮਾਨਾ ਅਨਤ੍ਥਮ੍ਪਿ ਕਰੇਯ੍ਯ, ਨੀਹਰਾਮਿ ਨ’’ਨ੍ਤਿ ਪਰਿਸਮਜ੍ਝੇ ਅਲਂਵਚਨੀਯਂ ਕਤ੍ਵਾ ‘‘ਮਾ ਪੁਨ ਗੇਹਂ ਪਾਵਿਸੀ’’ਤਿ ਵਿਸ੍ਸਜ੍ਜੇਸਿ. ਸਾ ਕੇਨਚਿ ਉਪਾਯੇਨ ਤੇਨ ਸਦ੍ਧਿਂ ਸਨ੍ਥਵਂ ਕਾਤੁਂ ਅਸਕ੍ਕੋਨ੍ਤੀ ਨਟਨਚ੍ਚਕਾਦੀਹਿ ਸਦ੍ਧਿਂ ਵਿਚਰਤਿ. ਤਸ੍ਸ ਪੁਰਿਸਸ੍ਸ ਤਂ ਦਿਸ੍ਵਾ ਨੇਵ ਉਪ੍ਪਜ੍ਜਤਿ ਦੋਮਨਸ੍ਸਂ, ਸੋਮਨਸ੍ਸਂ ਪਨ ਉਪ੍ਪਜ੍ਜਤਿ.

ਤਤ੍ਥ ਪੁਰਿਸਸ੍ਸ ਇਤ੍ਥਿਯਾ ਸਾਰਤ੍ਤਕਾਲੋ ਵਿਯ ਇਮਸ੍ਸ ਭਿਕ੍ਖੁਨੋ ਅਤ੍ਤਭਾਵੇ ਆਲਯੋ. ਘਾਸਚ੍ਛਾਦਨਾਦੀਨਿ ਦਤ੍ਵਾ ਘਰੇ ਵਸਾਪਨਕਾਲੋ ਵਿਯ ਅਤ੍ਤਭਾਵਸ੍ਸ ਪਟਿਜਗ੍ਗਨਕਾਲੋ. ਤਸ੍ਸਾ ਅਤਿਚਰਣਕਾਲੋ ਵਿਯ ਜਗ੍ਗਿਯਮਾਨਸ੍ਸੇਵ ਅਤ੍ਤਭਾਵਸ੍ਸ ਪਿਤ੍ਤਪਕੋਪਾਦੀਨਂ ਵਸੇਨ ਸਾਬਾਧਤਾ. ‘‘ਅਤ੍ਤਨੋ ਅਨੁਰੂਪਂ ਸਕ੍ਕਾਰਂ ਅਲਭਨ੍ਤੀ ਅਤਿਚਰਤੀ’’ਤਿ ਸਲ੍ਲਕ੍ਖੇਤ੍ਵਾ ਸਕ੍ਕਾਰਵਡ੍ਢਨਂ ਵਿਯ ‘‘ਭੇਸਜ੍ਜਂ ਅਲਭਨ੍ਤੋ ਏਵਂ ਹੋਤੀ’’ਤਿ ਸਲ੍ਲਕ੍ਖੇਤ੍ਵਾ ਭੇਸਜ੍ਜਕਰਣਕਾਲੋ. ਸਕ੍ਕਾਰੇ ਵਡ੍ਢਿਤੇਪਿ ਪੁਨ ਅਤਿਚਰਣਂ ਵਿਯ ਪਿਤ੍ਤਾਦੀਸੁ ਏਕਸ੍ਸ ਭੇਸਜ੍ਜੇ ਕਰਿਯਮਾਨੇ ਸੇਸਾਨਂ ਪਕੋਪਵਸੇਨ ਪੁਨ ਸਾਬਾਧਤਾ. ਪਰਿਸਮਜ੍ਝੇ ਅਲਂਵਚਨੀਯਂ ਕਤ੍ਵਾ ਗੇਹਾ ਨਿਕ੍ਕਡ੍ਢਨਂ ਵਿਯ ‘‘ਇਦਾਨਿ ਤੇ ਨਾਹਂ ਦਾਸੋ ਨ ਕਮ੍ਮਕਰੋ, ਅਨਮਤਗ੍ਗੇ ਸਂਸਾਰੇ ਤਂਯੇਵ ਉਪਟ੍ਠਹਨ੍ਤੋ ਵਿਚਰਿਂ, ਕੋ ਮੇ ਤਯਾ ਅਤ੍ਥੋ, ਛਿਜ੍ਜ ਵਾ ਭਿਜ੍ਜ ਵਾ’’ਤਿ ਤਸ੍ਮਿਂ ਅਨਪੇਕ੍ਖਤਂ ਆਪਜ੍ਜਿਤ੍ਵਾ ਵੀਰਿਯਂ ਥਿਰਂ ਕਤ੍ਵਾ ਮਗ੍ਗੇਨ ਕਿਲੇਸਸਮੁਗ੍ਘਾਤਨਂ. ਨਟਨਚ੍ਚਕਾਦੀਹਿ ਨਚ੍ਚਮਾਨਂ ਵਿਚਰਨ੍ਤਿਂ ਦਿਸ੍ਵਾ ਯਥਾ ਤਸ੍ਸ ਪੁਰਿਸਸ੍ਸ ਦੋਮਨਸ੍ਸਂ ਨ ਉਪ੍ਪਜ੍ਜਤਿ, ਸੋਮਨਸ੍ਸਮੇਵ ਉਪ੍ਪਜ੍ਜਤਿ, ਏਵਮੇਵ ਇਮਸ੍ਸ ਭਿਕ੍ਖੁਨੋ ਅਰਹਤ੍ਤਂ ਪਤ੍ਤਸ੍ਸ ਪਿਤ੍ਤਪਕੋਪਾਦੀਨਂ ਵਸੇਨ ਆਬਾਧਿਕਂ ਅਤ੍ਤਭਾਵਂ ਦਿਸ੍ਵਾ ਦੋਮਨਸ੍ਸਂ ਨ ਉਪ੍ਪਜ੍ਜਤਿ, ‘‘ਮੁਚ੍ਚਿਸ੍ਸਾਮਿ ਵਤ ਖਨ੍ਧਪਰਿਹਾਰਦੁਕ੍ਖਤੋ’’ਤਿ ਸੋਮਨਸ੍ਸਮੇਵ ਉਪ੍ਪਜ੍ਜਤੀਤਿ. ਅਯਂ ਪਨ ਉਪਮਾ ‘‘ਪਟਿਬਦ੍ਧਚਿਤ੍ਤਸ੍ਸ ਦੋਮਨਸ੍ਸਂ ਉਪ੍ਪਜ੍ਜਤਿ, ਅਪ੍ਪਟਿਬਦ੍ਧਚਿਤ੍ਤਸ੍ਸ ਨਤ੍ਥੇਤਨ੍ਤਿ ਞਤ੍ਵਾ ਇਤ੍ਥਿਯਾ ਛਨ੍ਦਰਾਗਂ ਪਜਹਤਿ, ਏਵਮਯਂ ਭਿਕ੍ਖੁ ਸਙ੍ਖਾਰਂ ਵਾ ਪਦਹਨ੍ਤਸ੍ਸ ਉਪੇਕ੍ਖਂ ਵਾ ਭਾਵੇਨ੍ਤਸ੍ਸ ਦੁਕ੍ਖਨਿਦਾਨਂ ਪਹੀਯਤਿ, ਨੋ ਅਞ੍ਞਥਾਤਿ ਞਤ੍ਵਾ ਤਦੁਭਯਂ ਸਮ੍ਪਾਦੇਨ੍ਤੋ ਦੁਕ੍ਖਨਿਦਾਨਂ ਪਜਹਤੀ’’ਤਿ ਏਤਮਤ੍ਥਂ ਵਿਭਾਵੇਤੁਂ ਆਗਤਾਤਿ ਵੇਦਿਤਬ੍ਬਾ.

੧੨. ਯਥਾ ਸੁਖਂ ਖੋ ਮੇ ਵਿਹਰਤੋਤਿ ਯੇਨ ਸੁਖੇਨ ਵਿਹਰਿਤੁਂ ਇਚ੍ਛਾਮਿ ਤੇਨ, ਮੇ ਵਿਹਰਤੋ. ਪਦਹਤੋਤਿ ਪੇਸੇਨ੍ਤਸ੍ਸ. ਏਤ੍ਥ ਚ ਯਸ੍ਸ ਸੁਖਾ ਪਟਿਪਦਾ ਅਸਪ੍ਪਾਯਾ, ਸੁਖੁਮਚੀਵਰਾਨਿ ਧਾਰੇਨ੍ਤਸ੍ਸ ਪਾਸਾਦਿਕੇ ਸੇਨਾਸਨੇ ਵਸਨ੍ਤਸ੍ਸ ਚਿਤ੍ਤਂ ਵਿਕ੍ਖਿਪਤਿ, ਦੁਕ੍ਖਾ ਪਟਿਪਦਾ ਸਪ੍ਪਾਯਾ, ਛਿਨ੍ਨਭਿਨ੍ਨਾਨਿ ਥੂਲਚੀਵਰਾਨਿ ਧਾਰੇਨ੍ਤਸ੍ਸ ਸੁਸਾਨਰੁਕ੍ਖਮੂਲਾਦੀਸੁ ਵਸਨ੍ਤਸ੍ਸ ਚਿਤ੍ਤਂ ਏਕਗ੍ਗਂ ਹੋਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ.

ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ, ਉਸੁਕਾਰੋ ਵਿਯ ਹਿ ਜਾਤਿਜਰਾਮਰਣਭੀਤੋ ਯੋਗੀ ਦਟ੍ਠਬ੍ਬੋ, ਵਙ੍ਕਕੁਟਿਲਜਿਮ੍ਹਤੇਜਨਂ ਵਿਯ ਵਙ੍ਕਕੁਟਿਲਜਿਮ੍ਹਚਿਤ੍ਤਂ, ਦ੍ਵੇ ਅਲਾਤਾ ਵਿਯ ਕਾਯਿਕਚੇਤਸਿਕਵੀਰਿਯਂ, ਤੇਜਨਂ ਉਜੁਂ ਕਰੋਨ੍ਤਸ੍ਸ ਕਞ੍ਜਿਕਤੇਲਂ ਵਿਯ ਸਦ੍ਧਾ, ਨਮਨਦਣ੍ਡਕੋ ਵਿਯ ਲੋਕੁਤ੍ਤਰਮਗ੍ਗੋ, ਉਸ੍ਸੁਕਾਰਸ੍ਸ ਵਙ੍ਕਕੁਟਿਲਜਿਮ੍ਹਤੇਜਨਂ ਕਞ੍ਜਿਕਤੇਲੇਨ ਸਿਨੇਹੇਤ੍ਵਾ ਅਲਾਤੇਸੁ ਤਾਪੇਤ੍ਵਾ ਨਮਨਦਣ੍ਡਕੇਨ ਉਜੁਕਰਣਂ ਵਿਯ ਇਮਸ੍ਸ ਭਿਕ੍ਖੁਨੋ ਵਙ੍ਕਕੁਟਿਲਜਿਮ੍ਹਚਿਤ੍ਤਂ ਸਦ੍ਧਾਯ ਸਿਨੇਹੇਤ੍ਵਾ ਕਾਯਿਕਚੇਤਸਿਕਵੀਰਿਯੇਨ ਤਾਪੇਤ੍ਵਾ ਲੋਕੁਤ੍ਤਰਮਗ੍ਗੇਨ ਉਜੁਕਰਣਂ, ਉਸੁਕਾਰਸ੍ਸੇਵ ਏਵਂ ਉਜੁਕਤੇਨ ਤੇਜਨੇਨ ਸਪਤ੍ਤਂ ਵਿਜ੍ਝਿਤ੍ਵਾ ਸਮ੍ਪਤ੍ਤਿਅਨੁਭਵਨਂ ਵਿਯ ਇਮਸ੍ਸ ਯੋਗਿਨੋ ਤਥਾ ਉਜੁਕਤੇਨ ਚਿਤ੍ਤੇਨ ਕਿਲੇਸਗਣਂ ਵਿਜ੍ਝਿਤ੍ਵਾ ਪਾਸਾਦਿਕੇ ਸੇਨਾਸਨੇ ਨਿਰੋਧਵਰਤਲਗਤਸ੍ਸ ਫਲਸਮਾਪਤ੍ਤਿਸੁਖਾਨੁਭਵਨਂ ਦਟ੍ਠਬ੍ਬਂ. ਇਧ ਤਥਾਗਤੋ ਸੁਖਾਪਟਿਪਦਾਖਿਪ੍ਪਾਭਿਞ੍ਞਭਿਕ੍ਖੁਨੋ, ਦੁਕ੍ਖਾਪਟਿਪਦਾਦਨ੍ਧਾਭਿਞ੍ਞਭਿਕ੍ਖੁਨੋ ਚ ਪਟਿਪਤ੍ਤਿਯੋ ਕਥਿਤਾ, ਇਤਰੇਸਂ ਦ੍ਵਿਨ੍ਨਂ ਨ ਕਥਿਤਾ, ਤਾ ਕਥੇਤੁਂ ਇਮਂ ਦੇਸਨਂ ਆਰਭਿ. ਇਮਾਸੁ ਵਾ ਦ੍ਵੀਸੁ ਕਥਿਤਾਸੁ ਇਤਰਾਪਿ ਕਥਿਤਾਵ ਹੋਨ੍ਤਿ, ਆਗਮਨੀਯਪਟਿਪਦਾ ਪਨ ਨ ਕਥਿਤਾ, ਤਂ ਕਥੇਤੁਂ ਇਮਂ ਦੇਸਨਂ ਆਰਭਿ. ਸਹਾਗਮਨੀਯਾਪਿ ਵਾ ਪਟਿਪਦਾ ਕਥਿਤਾਵ, ਅਦਸ੍ਸਿਤਂ ਪਨ ਏਕਂ ਬੁਦ੍ਧੁਪ੍ਪਾਦਂ ਦਸ੍ਸੇਤ੍ਵਾ ਏਕਸ੍ਸ ਕੁਲਪੁਤ੍ਤਸ੍ਸ ਨਿਕ੍ਖਮਨਦੇਸਨਂ ਅਰਹਤ੍ਤੇਨ ਵਿਨਿਵਟ੍ਟੇਸ੍ਸਾਮੀਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਦੇਵਦਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.