੯. ਧਮ੍ਮਚੇਤਿਯਸੁਤ੍ਤਵਣ੍ਣਨਾ

੩੬੪. ਏਵਂ ਮੇ ਸੁਤਨ੍ਤਿ ਧਮ੍ਮਚੇਤਿਯਸੁਤ੍ਤਂ. ਤਤ੍ਥ ਮੇਦਾਲ਼ੁਪਨ੍ਤਿ ਨਾਮੇਤਂ ਤਸ੍ਸ, ਤਸ੍ਸ ਹਿ ਨਿਗਮਸ੍ਸ ਮੇਦਵਣ੍ਣਾ ਪਾਸਾਣਾ ਕਿਰੇਤ੍ਥ ਉਸ੍ਸਨ੍ਨਾ ਅਹੇਸੁਂ, ਤਸ੍ਮਾ ਮੇਦਾਲ਼ੁਪਨ੍ਤਿ ਸਙ੍ਖਂ ਗਤਂ. ਸੇਨਾਸਨਂ ਪਨੇਤ੍ਥ ਅਨਿਯਤਂ, ਤਸ੍ਮਾ ਨ ਤਂ ਵੁਤ੍ਤਂ. ਨਗਰਕਨ੍ਤਿ ਏਵਂਨਾਮਕਂ ਸਕ੍ਯਾਨਂ ਨਿਗਮਂ. ਕੇਨਚਿਦੇਵ ਕਰਣੀਯੇਨਾਤਿ ਨ ਅਞ੍ਞੇਨ ਕਰਣੀਯੇਨ, ਅਯਂ ਪਨ ਬਨ੍ਧੁਲਸੇਨਾਪਤਿਂ ਸਦ੍ਧਿਂ ਦ੍ਵਤ੍ਤਿਂਸਾਯ ਪੁਤ੍ਤੇਹਿ ਏਕਦਿਵਸੇਨੇਵ ਗਣ੍ਹਥਾਤਿ ਆਣਾਪੇਸਿ, ਤਂਦਿਵਸਞ੍ਚਸ੍ਸ ਭਰਿਯਾਯ ਮਲ੍ਲਿਕਾਯ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਭਗਵਾ ਨਿਮਨ੍ਤਿਤੋ, ਬੁਦ੍ਧਪ੍ਪਮੁਖੇ ਭਿਕ੍ਖੁਸਙ੍ਘੇ ਘਰਂ ਆਗਨ੍ਤ੍ਵਾ ਨਿਸਿਨ੍ਨਮਤ੍ਤੇ ‘‘ਸੇਨਾਪਤਿ ਕਾਲਙ੍ਕਤੋ’’ਤਿ ਸਾਸਨਂ ਆਹਰਿਤ੍ਵਾ ਮਲ੍ਲਿਕਾਯ ਅਦਂਸੁ. ਸਾ ਪਣ੍ਣਂ ਗਹੇਤ੍ਵਾ ਮੁਖਸਾਸਨਂ ਪੁਚ੍ਛਿ. ‘‘ਰਞ੍ਞਾ ਅਯ੍ਯੇ ਸੇਨਾਪਤਿ ਸਦ੍ਧਿਂ ਦ੍ਵਤ੍ਤਿਂਸਾਯ ਪੁਤ੍ਤੇਹਿ ਏਕਪ੍ਪਹਾਰੇਨੇਵ ਗਹਾਪਿਤੋ’’ਤਿ ਆਰੋਚੇਸੁਂ. ਮਹਾਜਨਗਤਂ ਮਾ ਕਰਿਤ੍ਥਾਤਿ ਓਵਟ੍ਟਿਕਾਯ ਪਣ੍ਣਂ ਕਤ੍ਵਾ ਭਿਕ੍ਖੁਸਙ੍ਘਂ ਪਰਿਵਿਸਿ. ਤਸ੍ਮਿਂ ਸਮਯੇ ਏਕਾ ਸਪ੍ਪਿਚਾਟਿ ਨੀਹਰਿਤਾ, ਸਾ ਉਮ੍ਮਾਰੇ ਆਹਚ੍ਚ ਭਿਨ੍ਨਾ, ਤਂ ਅਪਨੇਤ੍ਵਾ ਅਞ੍ਞਂ ਆਹਰਾਪੇਤ੍ਵਾ ਭਿਕ੍ਖੁਸਙ੍ਘਂ ਪਰਿਵਿਸਿ.

ਸਤ੍ਥਾ ਕਤਭਤ੍ਤਕਿਚ੍ਚੋ ਕਥਾਸਮੁਟ੍ਠਾਪਨਤ੍ਥਂ – ‘‘ਸਪ੍ਪਿਚਾਟਿਯਾ ਭਿਨ੍ਨਪਚ੍ਚਯਾ ਨ ਚਿਨ੍ਤੇਤਬ੍ਬ’’ਨ੍ਤਿ ਆਹ. ਤਸ੍ਮਿਂ ਸਮਯੇ ਮਲ੍ਲਿਕਾ ਪਣ੍ਣਂ ਨੀਹਰਿਤ੍ਵਾ ਭਗਵਤੋ ਪੁਰਤੋ ਠਪੇਤ੍ਵਾ – ‘‘ਭਗਵਾ ਇਮਂ ਦ੍ਵਤ੍ਤਿਂਸਾਯ ਪੁਤ੍ਤੇਹਿ ਸਦ੍ਧਿਂ ਸੇਨਾਪਤਿਨੋ ਮਤਸਾਸਨਂ, ਅਹਂ ਏਤਮ੍ਪਿ ਨ ਚਿਨ੍ਤਯਾਮਿ, ਸਪ੍ਪਿਚਾਟਿਪਚ੍ਚਯਾ ਕਿਂ ਚਿਨ੍ਤੇਯ੍ਯਾਮੀ’’ਤਿ ਆਹ. ਭਗਵਾ – ‘‘ਮਲ੍ਲਿਕੇ, ਮਾ ਚਿਨ੍ਤਯਿ, ਅਨਮਤਗ੍ਗੇ ਸਂਸਾਰੇ ਨਾਮ ਵਤ੍ਤਮਾਨਾਨਂ ਹੋਤਿ ਏਤ’’ਨ੍ਤਿ ਅਨਿਚ੍ਚਤਾਦਿਪਟਿਸਂਯੁਤ੍ਤਂ ਧਮ੍ਮਕਥਂ ਕਤ੍ਵਾ ਅਗਮਾਸਿ. ਮਲ੍ਲਿਕਾ ਦ੍ਵਤ੍ਤਿਂਸਸੁਣਿਸਾਯੋ ਪਕ੍ਕੋਸਾਪੇਤ੍ਵਾ ਓਵਾਦਂ ਅਦਾਸਿ. ਰਾਜਾ ਮਲ੍ਲਿਕਂ ਪਕ੍ਕੋਸਾਪੇਤ੍ਵਾ ‘‘ਸੇਨਾਪਤਿਨੋ ਅਮ੍ਹਾਕਂ ਅਨ੍ਤਰੇ ਭਿਨ੍ਨਦੋਸੋ ਅਤ੍ਥਿ ਨਤ੍ਥੀ’’ਤਿ ਪੁਚ੍ਛਿ. ਨਤ੍ਥਿ ਸਾਮੀਤਿ. ਸੋ ਤਸ੍ਸਾ ਵਚਨੇਨ ਤਸ੍ਸ ਨਿਦ੍ਦੋਸਭਾਵਂ ਞਤ੍ਵਾ ਵਿਪ੍ਪਟਿਸਾਰੀ ਬਲਵਦੋਮਨਸ੍ਸਂ ਉਪ੍ਪਾਦੇਸਿ. ਸੋ – ‘‘ਏਵਰੂਪਂ ਨਾਮ ਅਦੋਸਕਾਰਕਂ ਮਂ ਸਮ੍ਭਾਵਯਿਤ੍ਵਾ ਆਗਤਂ ਸਹਾਯਕਂ ਵਿਨਾਸੇਸਿ’’ਨ੍ਤਿ ਤਤੋ ਪਟ੍ਠਾਯ ਪਾਸਾਦੇ ਵਾ ਨਾਟਕੇਸੁ ਵਾ ਰਜ੍ਜਸੁਖੇਸੁ ਵਾ ਚਿਤ੍ਤਸ੍ਸਾਦਂ ਅਲਭਮਾਨੋ ਤਤ੍ਥ ਤਤ੍ਥ ਵਿਚਰਿਤੁਂ ਆਰਦ੍ਧੋ. ਏਤਦੇਵ ਕਿਚ੍ਚਂ ਅਹੋਸਿ. ਇਦਂ ਸਨ੍ਧਾਯ ਵੁਤ੍ਤਂ ‘‘ਕੇਨਚਿਦੇਵ ਕਰਣੀਯੇਨਾ’’ਤਿ.

ਦੀਘਂ ਕਾਰਾਯਨਨ੍ਤਿ ਦੀਘਕਾਰਾਯਨੋ ਨਾਮ ਬਨ੍ਧੁਲਸੇਨਾਪਤਿਸ੍ਸ ਭਾਗਿਨੇਯ੍ਯੋ ‘‘ਏਤਸ੍ਸ ਮੇ ਮਾਤੁਲੋ ਅਦੋਸਕਾਰਕੋ ਨਿਕ੍ਕਾਰਣੇਨ ਘਾਤਿਤੋ’’ਤਿ ਰਞ੍ਞਾ ਸੇਨਾਪਤਿਟ੍ਠਾਨੇ ਠਪਿਤੋ. ਤਂ ਸਨ੍ਧਾਯੇਤਂ ਵੁਤ੍ਤਂ. ਮਹਚ੍ਚਾ ਰਾਜਾਨੁਭਾਵੇਨਾਤਿ ਮਹਤਾ ਰਾਜਾਨੁਭਾਵੇਨ, ਧਰਣਿਤਲਂ ਭਿਨ੍ਦਨ੍ਤੋ ਵਿਯ ਸਾਗਰਂ ਪਰਿਵਤ੍ਤੇਨ੍ਤੋ ਵਿਯ ਵਿਚਿਤ੍ਤਵੇਸਸੋਭੇਨ ਮਹਤਾ ਬਲਕਾਯੇਨਾਤਿ ਅਤ੍ਥੋ. ਪਾਸਾਦਿਕਾਨੀਤਿ ਦਸ੍ਸਨੇਨੇਵ ਸਹ ਰਞ੍ਜਨਕਾਨਿ. ਪਸਾਦਨੀਯਾਨੀਤਿ ਤਸ੍ਸੇਵ ਵੇਵਚਨਂ. ਅਥ ਵਾ ਪਾਸਾਦਿਕਾਨੀਤਿ ਪਸਾਦਜਨਕਾਨਿ. ਅਪ੍ਪਸਦ੍ਦਾਨੀਤਿ ਨਿਸ੍ਸਦ੍ਦਾਨਿ. ਅਪ੍ਪਨਿਗ੍ਘੋਸਾਨੀਤਿ ਅਵਿਭਾਵਿਤਤ੍ਥੇਨ ਨਿਗ੍ਘੋਸੇਨ ਰਹਿਤਾਨਿ. ਵਿਜਨਵਾਤਾਨੀਤਿ ਵਿਗਤਜਨਵਾਤਾਨਿ. ਮਨੁਸ੍ਸਰਾਹਸ੍ਸੇਯ੍ਯਕਾਨੀਤਿ ਮਨੁਸ੍ਸਾਨਂ ਰਹਸ੍ਸਕਮ੍ਮਾਨੁਚ੍ਛਵਿਕਾਨਿ, ਰਹਸ੍ਸਮਨ੍ਤਂ ਮਨ੍ਤੇਨ੍ਤਾਨਂ ਅਨੁਰੂਪਾਨੀਤਿ ਅਤ੍ਥੋ. ਪਟਿਸਲ੍ਲਾਨਸਾਰੁਪ੍ਪਾਨੀਤਿ ਨਿਲੀਯਨਭਾਵਸ੍ਸ ਏਕੀਭਾਵਸ੍ਸ ਅਨੁਚ੍ਛਵਿਕਾਨਿ. ਯਤ੍ਥ ਸੁਦਂ ਮਯਨ੍ਤਿ ਨ ਤੇਨ ਤਤ੍ਥ ਭਗਵਾ ਪਯਿਰੁਪਾਸਿਤਪੁਬ੍ਬੋ, ਤਾਦਿਸੇਸੁ ਪਨ ਪਯਿਰੁਪਾਸਿਤਪੁਬ੍ਬੋ, ਤਸ੍ਮਾ ਯਾਦਿਸੇਸੁ ਸੁਦਂ ਮਯਨ੍ਤਿ ਅਯਮੇਤ੍ਥ ਅਤ੍ਥੋ.

ਅਤ੍ਥਿ, ਮਹਾਰਾਜਾਤਿ ਪਣ੍ਡਿਤੋ ਸੇਨਾਪਤਿ ‘‘ਰਾਜਾ ਭਗਵਨ੍ਤਂ ਮਮਾਯਤੀ’’ਤਿ ਜਾਨਾਤਿ, ਸੋ ਸਚੇ ਮਂ ਰਾਜਾ ‘‘ਕਹਂ ਭਗਵਾ’’ਤਿ ਵਦੇਯ੍ਯ, ਅਦਨ੍ਧਾਯਨ੍ਤੇਨ ਆਚਿਕ੍ਖਿਤੁਂ ਯੁਤ੍ਤਨ੍ਤਿ ਚਰਪੁਰਿਸੇ ਪਯੋਜੇਤ੍ਵਾ ਭਗਵਤੋ ਨਿਵਾਸਨਟ੍ਠਾਨਂ ਞਤ੍ਵਾਵ ਵਿਹਰਤਿ. ਤਸ੍ਮਾ ਏਵਮਾਹ. ਆਰਾਮਂ ਪਾਵਿਸੀਤਿ ਬਹਿਨਿਗਮੇ ਖਨ੍ਧਾਵਾਰਂ ਬਨ੍ਧਾਪੇਤ੍ਵਾ ਕਾਰਾਯਨੇਨ ਸਦ੍ਧਿਂ ਪਾਵਿਸਿ.

੩੬੬. ਵਿਹਾਰੋਤਿ ਗਨ੍ਧਕੁਟਿਂ ਸਨ੍ਧਾਯਾਹਂਸੁ. ਆਲ਼ਿਨ੍ਦਨ੍ਤਿ ਪਮੁਖਂ. ਉਕ੍ਕਾਸਿਤ੍ਵਾਤਿ ਉਕ੍ਕਾਸਿਤਸਦ੍ਦਂ ਕਤ੍ਵਾ. ਅਗ੍ਗਲ਼ਨ੍ਤਿ ਕਵਾਟਂ. ਆਕੋਟੇਹੀਤਿ ਅਗ੍ਗਨਖੇਨ ਈਸਕਂ ਕੁਞ੍ਚਿਕਚ੍ਛਿਦ੍ਦਸਮੀਪੇ ਕੋਟੇਹੀਤਿ ਵੁਤ੍ਤਂ ਹੋਤਿ. ਦ੍ਵਾਰਂ ਕਿਰ ਅਤਿਉਪਰਿ ਅਮਨੁਸ੍ਸਾ, ਅਤਿਹੇਟ੍ਠਾ ਦੀਘਜਾਤਿਕਾ ਕੋਟੇਨ੍ਤਿ. ਤਥਾ ਅਕੋਟੇਤ੍ਵਾ ਮਜ੍ਝੇ ਛਿਦ੍ਦਸਮੀਪੇ ਕੋਟੇਤਬ੍ਬਂ, ਇਦਂ ਦ੍ਵਾਰਕੋਟ੍ਟਕਵਤ੍ਤਨ੍ਤਿ ਦੀਪੇਨ੍ਤਾ ਵਦਨ੍ਤਿ. ਤਤ੍ਥੇਵਾਤਿ ਭਿਕ੍ਖੂਹਿ ਵੁਤ੍ਤਟ੍ਠਾਨੇਯੇਵ. ਖਗ੍ਗਞ੍ਚ ਉਣ੍ਹੀਸਞ੍ਚਾਤਿ ਦੇਸਨਾਮਤ੍ਤਮੇਤਂ,

ਵਾਲਬੀਜਨਿਮੁਣ੍ਹੀਸਂ, ਖਗ੍ਗਂ ਛਤ੍ਤਞ੍ਚੁਪਾਹਨਂ;

ਓਰੁਯ੍ਹ ਰਾਜਾ ਯਾਨਮ੍ਹਾ, ਠਪਯਿਤ੍ਵਾ ਪਟਿਚ੍ਛਦਨ੍ਤਿ. –

ਆਗਤਾਨਿ ਪਨ ਪਞ੍ਚਪਿ ਰਾਜਕਕੁਧਭਣ੍ਡਾਨਿ ਅਦਾਸਿ. ਕਸ੍ਮਾ ਪਨ ਅਦਾਸੀਤਿ. ਅਤਿਗਰੁਨੋ ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕਂ ਉਦ੍ਧਤਵੇਸੇਨ ਗਨ੍ਤੁਂ ਨ ਯੁਤ੍ਤਨ੍ਤਿ ਚ, ਏਕਕੋਵ ਉਪਸਙ੍ਕਮਿਤ੍ਵਾ ਅਤ੍ਤਨੋ ਰੁਚਿਵਸੇਨ ਸਮ੍ਮੋਦਿਸ੍ਸਾਮਿ ਚਾਤਿ. ਪਞ੍ਚਸੁ ਹਿ ਰਾਜਕਕੁਧਭਣ੍ਡੇਸੁ ਨਿਵਤ੍ਤਿਤੇਸੁ ਤ੍ਵਂ ਨਿਵਤ੍ਤਾਤਿ ਵਤ੍ਤਬ੍ਬਂ ਨ ਹੋਤਿ, ਸਬ੍ਬੇ ਸਯਮੇਵ ਨਿਵਤ੍ਤਨ੍ਤਿ. ਇਤਿ ਇਮੇਹਿ ਦ੍ਵੀਹਿ ਕਾਰਣੇਹਿ ਅਦਾਸਿ. ਰਹਾਯਤੀਤਿ ਰਹਸ੍ਸਂ ਕਰੋਤਿ ਨਿਗੂਹਤਿ. ਅਯਂ ਕਿਰਸ੍ਸ ਅਧਿਪ੍ਪਾਯੋ ‘‘ਪੁਬ੍ਬੇਪਿ ਅਯਂ ਰਾਜਾ ਸਮਣੇਨ ਗੋਤਮੇਨ ਸਦ੍ਧਿਂ ਚਤੁਕ੍ਕਣ੍ਣਮਨ੍ਤਂ ਮਨ੍ਤੇਤ੍ਵਾ ਮਯ੍ਹਂ ਮਾਤੁਲਂ ਸਦ੍ਧਿਂ ਦ੍ਵਤ੍ਤਿਂਸਾਯ ਪੁਤ੍ਤੇਹਿ ਗਣ੍ਹਾਪੇਸਿ, ਇਦਾਨਿਪਿ ਚਤੁਕ੍ਕਣ੍ਣਮਨ੍ਤਂ ਮਨ੍ਤੇਤੁਕਾਮੋ, ਕਚ੍ਚਿ ਨੁ ਖੋ ਮਂ ਗਣ੍ਹਾਪੇਸ੍ਸਤੀ’’ਤਿ. ਏਵਂ ਕੋਪਵਸੇਨਸ੍ਸ ਏਤਦਹੋਸਿ.

ਵਿਵਰਿ ਭਗਵਾ ਦ੍ਵਾਰਨ੍ਤਿ ਨ ਭਗਵਾ ਉਟ੍ਠਾਯ ਦ੍ਵਾਰਂ ਵਿਵਰਿ, ਵਿਵਰਤੂਤਿ ਪਨ ਹਤ੍ਥਂ ਪਸਾਰੇਸਿ. ਤਤੋ – ‘‘ਭਗਵਾ ਤੁਮ੍ਹੇਹਿ ਅਨੇਕੇਸੁ ਕਪ੍ਪਕੋਟੀਸੁ ਦਾਨਂ ਦਦਮਾਨੇਹਿ ਨ ਸਹਤ੍ਥਾ ਦ੍ਵਾਰਵਿਵਰਣਕਮ੍ਮਂ ਕਤ’’ਨ੍ਤਿ ਸਯਮੇਵ ਦ੍ਵਾਰਂ ਵਿਵਟਂ. ਤਂ ਪਨ ਯਸ੍ਮਾ ਭਗਵਤੋ ਮਨੇਨ ਵਿਵਟਂ, ਤਸ੍ਮਾ ‘‘ਵਿਵਰਿ ਭਗਵਾ ਦ੍ਵਾਰ’’ਨ੍ਤਿ ਵਤ੍ਤੁਂ ਵਟ੍ਟਤਿ. ਵਿਹਾਰਂ ਪਵਿਸਿਤ੍ਵਾਤਿ ਗਨ੍ਧਕੁਟਿਂ ਪਵਿਸਿਤ੍ਵਾ. ਤਸ੍ਮਿਂ ਪਨ ਪਵਿਟ੍ਠਮਤ੍ਤੇਯੇਵ ਕਾਰਾਯਨੋ ਪਞ੍ਚ ਰਾਜਕਕੁਧਭਣ੍ਡਾਨਿ ਗਹੇਤ੍ਵਾ ਖਨ੍ਧਾਵਾਰਂ ਗਨ੍ਤ੍ਵਾ ਵਿਟਟੂਭਂ ਆਮਨ੍ਤੇਸਿ ‘‘ਛਤ੍ਤਂ ਸਮ੍ਮ ਉਸ੍ਸਾਪੇਹੀ’’ਤਿ. ਮਯ੍ਹਂ ਪਿਤਾ ਕਿਂ ਗਤੋਤਿ? ਪਿਤਰਂ ਮਾ ਪੁਚ੍ਛ, ਸਚੇ ਤ੍ਵਂ ਨ ਉਸ੍ਸਾਪੇਸਿ, ਤਂ ਗਣ੍ਹਿਤ੍ਵਾ ਅਹਂ ਉਸ੍ਸਾਪੇਮੀਤਿ. ‘‘ਉਸ੍ਸਾਪੇਮਿ ਸਮ੍ਮਾ’’ਤਿ ਸਮ੍ਪਟਿਚ੍ਛਿ. ਕਾਰਾਯਨੋ ਰਞ੍ਞੋ ਏਕਂ ਅਸ੍ਸਞ੍ਚ ਅਸਿਞ੍ਚ ਏਕਮੇਵ ਚ ਪਰਿਚਾਰਿਕਂ ਇਤ੍ਥਿਂ ਠਪੇਤ੍ਵਾ – ‘‘ਸਚੇ ਰਾਜਾ ਜੀਵਿਤੇਨ ਅਤ੍ਥਿਕੋ, ਮਾ ਆਗਚ੍ਛਤੂ’’ਤਿ ਵਿਟਟੂਭਸ੍ਸ ਛਤ੍ਤਂ ਉਸ੍ਸਾਪੇਤ੍ਵਾ ਤਂ ਗਹੇਤ੍ਵਾ ਸਾਵਤ੍ਥਿਮੇਵ ਗਤੋ.

੩੬੭. ਧਮ੍ਮਨ੍ਵਯੋਤਿ ਪਚ੍ਚਕ੍ਖਞਾਣਸਙ੍ਖਾਤਸ੍ਸ ਧਮ੍ਮਸ੍ਸ ਅਨੁਨਯੋ ਅਨੁਮਾਨਂ, ਅਨੁਬੁਦ੍ਧੀਤਿ ਅਤ੍ਥੋ. ਇਦਾਨਿ ਯੇਨਸ੍ਸ ਧਮ੍ਮਨ੍ਵਯੇਨ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ’’ਤਿਆਦਿ ਹੋਤਿ, ਤਂ ਦਸ੍ਸੇਤੁਂ ਇਧ ਪਨਾਹਂ, ਭਨ੍ਤੇਤਿਆਦਿਮਾਹ. ਤਤ੍ਥ ਆਪਾਣਕੋਟਿਕਨ੍ਤਿ ਪਾਣੋਤਿ ਜੀਵਿਤਂ, ਤਂ ਮਰਿਯਾਦਂ ਅਨ੍ਤੋ ਕਰਿਤ੍ਵਾ, ਮਰਣਸਮਯੇਪਿ ਚਰਨ੍ਤਿਯੇਵ, ਤਂ ਨ ਵੀਤਿਕ੍ਕਮਨ੍ਤੀਤਿ ਵੁਤ੍ਤਂ ਹੋਤਿ. ‘‘ਅਪਾਣਕੋਟਿਕ’’ਨ੍ਤਿਪਿ ਪਾਠੋ, ਆਜੀਵਿਤਪਰਿਯਨ੍ਤਨ੍ਤਿ ਅਤ੍ਥੋ. ਯਥਾ ਏਕਚ੍ਚੇ ਜੀਵਿਤਹੇਤੁ ਅਤਿਕ੍ਕਮਨ੍ਤਾ ਪਾਣਕੋਟਿਕਂ ਕਤ੍ਵਾ ਚਰਨ੍ਤਿ, ਨ ਏਵਨ੍ਤਿ ਅਤ੍ਥੋ. ਅਯਮ੍ਪਿ ਖੋ ਮੇ, ਭਨ੍ਤੇਤਿ ਬੁਦ੍ਧਸੁਬੁਦ੍ਧਤਾਯ ਧਮ੍ਮਸ੍ਵਾਕ੍ਖਾਤਤਾਯ ਸਙ੍ਘਸੁਪ੍ਪਟਿਪਨ੍ਨਤਾਯ ਚ ਏਤਂ ਏਵਂ ਹੋਤਿ, ਏਵਞ੍ਹਿ ਮੇ, ਭਨ੍ਤੇ, ਅਯਂ ਭਗਵਤਿ ਧਮ੍ਮਨ੍ਵਯੋ ਹੋਤੀਤਿ ਦੀਪੇਤਿ. ਏਸੇਵ ਨਯੋ ਸਬ੍ਬਤ੍ਥ.

੩੬੯. ਨ ਵਿਯ ਮਞ੍ਞੇ ਚਕ੍ਖੁਂ ਬਨ੍ਧਨ੍ਤੇਤਿ ਚਕ੍ਖੁਂ ਅਬਨ੍ਧਨ੍ਤੇ ਵਿਯ. ਅਪਾਸਾਦਿਕਞ੍ਹਿ ਦਿਸ੍ਵਾ ਪੁਨ ਓਲੋਕਨਕਿਚ੍ਚਂ ਨ ਹੋਤਿ, ਤਸ੍ਮਾ ਸੋ ਚਕ੍ਖੁਂ ਨ ਬਨ੍ਧਤਿ ਨਾਮ. ਪਾਸਾਦਿਕਂ ਦਿਸ੍ਵਾ ਪੁਨਪ੍ਪੁਨਂ ਓਲੋਕਨਕਿਚ੍ਚਂ ਹੋਤਿ, ਤਸ੍ਮਾ ਸੋ ਚਕ੍ਖੁਂ ਬਨ੍ਧਤਿ ਨਾਮ. ਇਮੇ ਚ ਅਪਾਸਾਦਿਕਾ, ਤਸ੍ਮਾ ਏਵਮਾਹ. ਬਨ੍ਧੁਕਰੋਗੋ ਨੋਤਿ ਕੁਲਰੋਗੋ. ਅਮ੍ਹਾਕਂ ਕੁਲੇ ਜਾਤਾ ਏਵਰੂਪਾ ਹੋਨ੍ਤੀਤਿ ਵਦਨ੍ਤਿ. ਉਲ਼ਾਰਨ੍ਤਿ ਮਹੇਸਕ੍ਖਂ. ਪੁਬ੍ਬੇਨਾਪਰਨ੍ਤਿ ਪੁਬ੍ਬਤੋ ਅਪਰਂ ਵਿਸੇਸਂ. ਤਤ੍ਥ ਕਸਿਣਪਰਿਕਮ੍ਮਂ ਕਤ੍ਵਾ ਸਮਾਪਤ੍ਤਿਂ ਨਿਬ੍ਬਤ੍ਤੇਨ੍ਤੋ ਉਲ਼ਾਰਂ ਪੁਬ੍ਬੇ ਵਿਸੇਸਂ ਸਞ੍ਜਾਨਾਤਿ ਨਾਮ, ਸਮਾਪਤ੍ਤਿਂ ਪਦਟ੍ਠਾਨਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਗਣ੍ਹਨ੍ਤੋ ਉਲ਼ਾਰਂ ਪੁਬ੍ਬਤੋ ਅਪਰਂ ਵਿਸੇਸਂ ਸਞ੍ਜਾਨਾਤਿ ਨਾਮ.

੩੭੦. ਘਾਤੇਤਾਯਂ ਵਾ ਘਾਤੇਤੁਨ੍ਤਿ ਘਾਤੇਤਬ੍ਬਯੁਤ੍ਤਕਂ ਘਾਤੇਤੁਂ. ਜਾਪੇਤਾਯਂ ਵਾ ਜਾਪੇਤੁਨ੍ਤਿ ਧਨੇਨ ਵਾ ਜਾਪੇਤਬ੍ਬਯੁਤ੍ਤਕਂ ਜਾਪੇਤੁਂ ਜਾਨਿਤੁਂ ਅਧਨਂ ਕਾਤੁਂ. ਪਬ੍ਬਾਜੇਤਾਯਂ ਵਾ ਪਬ੍ਬਾਜੇਤੁਨ੍ਤਿ ਰਟ੍ਠਤੋ ਵਾ ਪਬ੍ਬਾਜੇਤਬ੍ਬਯੁਤ੍ਤਕਂ ਪਬ੍ਬਾਜੇਤੁਂ.

੩੭੩. ਇਸਿਦਤ੍ਤਪੁਰਾਣਾਤਿ ਇਸਿਦਤ੍ਤੋ ਚ ਪੁਰਾਣੋ ਚ. ਤੇਸੁ ਏਕੋ ਬ੍ਰਹ੍ਮਚਾਰੀ, ਏਕੋ ਸਦਾਰਸਨ੍ਤੁਟ੍ਠੋ. ਮਮਭਤ੍ਤਾਤਿ ਮਮ ਸਨ੍ਤਕਂ ਭਤ੍ਤਂ ਏਤੇਸਨ੍ਤਿ ਮਮਭਤ੍ਤਾ. ਮਮਯਾਨਾਤਿ ਮਮ ਸਨ੍ਤਕਂ ਯਾਨਂ ਏਤੇਸਨ੍ਤਿ ਮਮਯਾਨਾ. ਜੀਵਿਕਾਯ ਦਾਤਾਤਿ ਜੀਵਿਤਵੁਤ੍ਤਿਂ ਦਾਤਾ. ਵੀਮਂਸਮਾਨੋਤਿ ਉਪਪਰਿਕ੍ਖਮਾਨੋ. ਤਦਾ ਕਿਰ ਰਾਜਾ ਨਿਦ੍ਦਂ ਅਨੋਕ੍ਕਨ੍ਤੋਵ ਓਕ੍ਕਨ੍ਤੋ ਵਿਯ ਹੁਤ੍ਵਾ ਨਿਪਜ੍ਜਿ. ਅਥ ਤੇ ਥਪਤਯੋ ‘‘ਕਤਰਸ੍ਮਿਂ ਦਿਸਾਭਾਗੇ ਭਗਵਾ’’ਤਿ ਪੁਚ੍ਛਿਤ੍ਵਾ ‘‘ਅਸੁਕਸ੍ਮਿਂ ਨਾਮਾ’’ਤਿ ਸੁਤ੍ਵਾ ਮਨ੍ਤਯਿਂਸੁ – ‘‘ਯੇਨ ਸਮ੍ਮਾਸਮ੍ਬੁਦ੍ਧੋ, ਤੇਨ ਸੀਸੇ ਕਤੇ ਰਾਜਾ ਪਾਦਤੋ ਹੋਤਿ. ਯੇਨ ਰਾਜਾ, ਤੇਨ ਸੀਸੇ ਕਤੇ ਸਤ੍ਥਾ ਪਾਦਤੋ ਹੋਤਿ, ਕਿਂ ਕਰਿਸ੍ਸਾਮਾ’’ਤਿ? ਤਤੋ ਨੇਸਂ ਏਤਦਹੋਸਿ – ‘‘ਰਾਜਾ ਕੁਪ੍ਪਮਾਨੋ ਯਂ ਅਮ੍ਹਾਕਂ ਦੇਤਿ, ਤਂ ਅਚ੍ਛਿਨ੍ਦੇਯ੍ਯ. ਨ ਖੋ ਪਨ ਮਯਂ ਸਕ੍ਕੋਮ ਜਾਨਮਾਨਾ ਸਤ੍ਥਾਰਂ ਪਾਦਤੋ ਕਾਤੁ’’ਨ੍ਤਿ ਰਾਜਾਨਂ ਪਾਦਤੋ ਕਤ੍ਵਾ ਨਿਪਜ੍ਜਿਂਸੁ. ਤਂ ਸਨ੍ਧਾਯ ਅਯਂ ਰਾਜਾ ਏਵਮਾਹ.

੩੭੪. ਪਕ੍ਕਾਮੀਤਿ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਕਾਰਾਯਨਸ੍ਸ ਠਿਤਟ੍ਠਾਨਂ ਗਤੋ, ਤਂ ਤਤ੍ਥ ਅਦਿਸ੍ਵਾ ਖਨ੍ਧਾਵਾਰਟ੍ਠਾਨਂ ਗਤੋ, ਤਤ੍ਥਾਪਿ ਅਞ੍ਞਂ ਅਦਿਸ੍ਵਾ ਤਂ ਇਤ੍ਥਿਂ ਪੁਚ੍ਛਿ. ਸਾ ਸਬ੍ਬਂ ਪਵਤ੍ਤਿਂ ਆਚਿਕ੍ਖਿ. ਰਾਜਾ – ‘‘ਨ ਇਦਾਨਿ ਮਯਾ ਏਕਕੇਨ ਤਤ੍ਥ ਗਨ੍ਤਬ੍ਬਂ, ਰਾਜਗਹਂ ਗਨ੍ਤ੍ਵਾ ਭਾਗਿਨੇਯ੍ਯੇਨ ਸਦ੍ਧਿਂ ਆਗਨ੍ਤ੍ਵਾ ਮਯ੍ਹਂ ਰਜ੍ਜਂ ਗਣ੍ਹਿਸ੍ਸਾਮੀ’’ਤਿ ਰਾਜਗਹਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਕਣਾਜਕਭਤ੍ਤਞ੍ਚੇਵ ਭੁਞ੍ਜਿ, ਬਹਲਉਦਕਞ੍ਚ ਪਿਵਿ. ਤਸ੍ਸ ਸੁਖੁਮਾਲਪਕਤਿਕਸ੍ਸ ਆਹਾਰੋ ਨ ਸਮ੍ਮਾ ਪਰਿਣਾਮਿ. ਸੋ ਰਾਜਗਹਂ ਪਾਪੁਣਨ੍ਤੋਪਿ ਵਿਕਾਲੇ ਦ੍ਵਾਰੇਸੁ ਪਿਹਿਤੇਸੁ ਪਾਪੁਣਿ. ‘‘ਅਜ੍ਜ ਸਾਲਾਯਂ ਸਯਿਤ੍ਵਾ ਸ੍ਵੇ ਮਯ੍ਹਂ ਭਾਗਿਨੇਯ੍ਯਂ ਪਸ੍ਸਿਸ੍ਸਾਮੀ’’ਤਿ ਬਹਿਨਗਰੇ ਸਾਲਾਯ ਨਿਪਜ੍ਜਿ. ਤਸ੍ਸ ਰਤ੍ਤਿਭਾਗੇ ਉਟ੍ਠਾਨਾਨਿ ਪਵਤ੍ਤਿਂਸੁ, ਕਤਿਪਯਵਾਰੇ ਬਹਿ ਨਿਕ੍ਖਮਿ. ਤਤੋ ਪਟ੍ਠਾਯ ਪਦਸਾ ਗਨ੍ਤੁਂ ਅਸਕ੍ਕੋਨ੍ਤੋ ਤਸ੍ਸਾ ਇਤ੍ਥਿਯਾ ਅਙ੍ਕੇ ਨਿਪਜ੍ਜਿਤ੍ਵਾ ਬਲਵਪਚ੍ਚੂਸੇ ਕਾਲਮਕਾਸਿ. ਸਾ ਤਸ੍ਸ ਮਤਭਾਵਂ ਞਤ੍ਵਾ – ‘‘ਦ੍ਵੀਸੁ ਰਜ੍ਜੇਸੁ ਰਜ੍ਜਂ ਕਾਰੇਤ੍ਵਾ ਇਦਾਨਿ ਪਰਸ੍ਸ ਬਹਿਨਗਰੇ ਅਨਾਥਸਾਲਾਯ ਅਨਾਥਕਾਲਕਿਰਿਯਂ ਕਤ੍ਵਾ ਨਿਪਨ੍ਨੋ ਮਯ੍ਹਂ ਸਾਮਿ ਕੋਸਲਰਾਜਾ’’ਤਿਆਦੀਨਿ ਵਦਮਾਨਾ ਉਚ੍ਚਾਸਦ੍ਦੇਨ ਪਰਿਦੇਵਿਤੁਂ ਆਰਭਿ. ਮਨੁਸ੍ਸਾ ਸੁਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਆਗਨ੍ਤ੍ਵਾ ਦਿਸ੍ਵਾ ਸਞ੍ਜਾਨਿਤ੍ਵਾ ਆਗਤਕਾਰਣਂ ਞਤ੍ਵਾ ਮਹਾਪਰਿਹਾਰੇਨ ਸਰੀਰਕਿਚ੍ਚਂ ਕਰਿਤ੍ਵਾ ‘‘ਵਿਟਟੂਭਂ ਗਣ੍ਹਿਸ੍ਸਾਮੀ’’ਤਿ ਭੇਰਿਂ ਚਰਾਪੇਤ੍ਵਾ ਬਲਕਾਯਂ ਸਨ੍ਨਿਪਾਤੇਸਿ. ਅਮਚ੍ਚਾ ਪਾਦੇਸੁ ਪਤਿਤ੍ਵਾ – ‘‘ਸਚੇ, ਦੇਵ, ਤੁਮ੍ਹਾਕਂ ਮਾਤੁਲੋ ਅਰੋਗੋ ਅਸ੍ਸ, ਤੁਮ੍ਹਾਕਂ ਗਨ੍ਤੁਂ ਯੁਤ੍ਤਂ ਭਵੇਯ੍ਯ, ਇਦਾਨਿ ਪਨ ਵਿਟਟੂਭੋਪਿ ਤੁਮ੍ਹੇ ਨਿਸ੍ਸਾਯ ਛਤ੍ਤਂ ਉਸ੍ਸਾਪੇਤੁਂ ਅਰਹਤਿਯੇਵਾ’’ਤਿ ਸਞ੍ਞਾਪੇਤ੍ਵਾ ਨਿਵਾਰੇਸੁਂ.

ਧਮ੍ਮਚੇਤਿਯਾਨੀਤਿ ਧਮ੍ਮਸ੍ਸ ਚਿਤ੍ਤੀਕਾਰਵਚਨਾਨਿ. ਤੀਸੁ ਹਿ ਰਤਨੇਸੁ ਯਤ੍ਥ ਕਤ੍ਥਚਿ ਚਿਤ੍ਤੀਕਾਰੇ ਕਤੇ ਸਬ੍ਬਤ੍ਥ ਕਤੋਯੇਵ ਹੋਤਿ, ਤਸ੍ਮਾ ਭਗਵਤਿ ਚਿਤ੍ਤੀਕਾਰੇ ਕਤੇ ਧਮ੍ਮੋਪਿ ਕਤੋਵ ਹੋਤੀਤਿ ਭਗਵਾ ‘‘ਧਮ੍ਮਚੇਤਿਯਾਨੀ’’ਤਿ ਆਹ. ਆਦਿਬ੍ਰਹ੍ਮਚਰਿਯਕਾਨੀਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾਨਿ, ਪੁਬ੍ਬਭਾਗਪਟਿਪਤ੍ਤਿਭੂਤਾਨੀਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਧਮ੍ਮਚੇਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.