੧੦. ਕਣ੍ਣਕਤ੍ਥਲਸੁਤ੍ਤਵਣ੍ਣਨਾ
੩੭੫. ਏਵਂ ਮੇ ਸੁਤਨ੍ਤਿ ਕਣ੍ਣਕਤ੍ਥਲਸੁਤ੍ਤਂ. ਤਤ੍ਥ ਉਰੁਞ੍ਞਾਯਨ੍ਤਿ ਉਰੁਞ੍ਞਾਤਿ ਤਸ੍ਸ ਰਟ੍ਠਸ੍ਸਪਿ ਨਗਰਸ੍ਸਪਿ ਏਤਦੇਵ ਨਾਮਂ, ਭਗਵਾ ਉਰੁਞ੍ਞਾਨਗਰਂ ਉਪਨਿਸ੍ਸਾਯ ਵਿਹਰਤਿ. ਕਣ੍ਣਕਤ੍ਥਲੇ ਮਿਗਦਾਯੇਤਿ ਤਸ੍ਸ ਨਗਰਸ੍ਸ ਅਵਿਦੂਰੇ ਕਣ੍ਣਕਤ੍ਥਲਂ ਨਾਮ ਏਕੋ ਰਮਣੀਯੋ ਭੂਮਿਭਾਗੋ ਅਤ੍ਥਿ, ਸੋ ਮਿਗਾਨਂ ਅਭਯਤ੍ਥਾਯ ਦਿਨ੍ਨਤ੍ਤਾ ਮਿਗਦਾਯੋਤਿ ਵੁਚ੍ਚਤਿ, ਤਸ੍ਮਿਂ ਕਣ੍ਣਕਤ੍ਥਲੇ ਮਿਗਦਾਯੇ. ਕੇਨਚਿਦੇਵ ਕਰਣੀਯੇਨਾਤਿ ਨ ਅਞ੍ਞੇਨ, ਅਨਨ੍ਤਰਸੁਤ੍ਤੇ ਵੁਤ੍ਤਕਰਣੀਯੇਨੇਵ. ਸੋਮਾ ਚ ਭਗਿਨੀ ਸਕੁਲਾ ਚ ਭਗਿਨੀਤਿ ਇਮਾ ਦ੍ਵੇ ਭਗਿਨਿਯੋ ਰਞ੍ਞੋ ਪਜਾਪਤਿਯੋ. ਭਤ੍ਤਾਭਿਹਾਰੇਤਿ ਭਤ੍ਤਂ ਅਭਿਹਰਣਟ੍ਠਾਨੇ. ਰਞ੍ਞੋ ਭੁਞ੍ਜਨਟ੍ਠਾਨਞ੍ਹਿ ਸਬ੍ਬਾਪਿ ਓਰੋਧਾ ਕਟਚ੍ਛੁਆਦੀਨਿ ਗਹੇਤ੍ਵਾ ਰਾਜਾਨਂ ਉਪਟ੍ਠਾਤੁਂ ਗਚ੍ਛਨ੍ਤਿ, ਤਾਪਿ ਤਥੇਵ ਅਗਮਂਸੁ.
੩੭੬. ਕਿਂ ਪਨ, ਮਹਾਰਾਜਾਤਿ ਕਸ੍ਮਾ ਏਵਮਾਹ? ਰਞ੍ਞੋ ਗਰਹਪਰਿਮੋਚਨਤ੍ਥਂ. ਏਵਞ੍ਹਿ ਪਰਿਸਾ ਚਿਨ੍ਤੇਯ੍ਯ – ‘‘ਅਯਂ ਰਾਜਾ ਆਗਚ੍ਛਮਾਨੋਵ ਮਾਤੁਗਾਮਾਨਂ ਸਾਸਨਂ ਆਰੋਚੇਤਿ, ਮਯਂ ਅਤ੍ਤਨੋ ਧਮ੍ਮਤਾਯ ਭਗਵਨ੍ਤਂ ਦਟ੍ਠੁਂ ਆਗਤੋਤਿ ਮਞ੍ਞਾਮ, ਅਯਂ ਪਨ ਮਾਤੁਗਾਮਾਨਂ ਸਾਸਨਂ ਗਹੇਤ੍ਵਾ ਆਗਤੋ, ਮਾਤੁਗਾਮਦਾਸੋ ਮਞ੍ਞੇ, ਏਸ ਪੁਬ੍ਬੇਪਿ ਇਮਿਨਾਵ ਕਾਰਣੇਨ ਆਗਚ੍ਛਤੀ’’ਤਿ. ਪੁਚ੍ਛਿਤੋ ਪਨ ਸੋ ਅਤ੍ਤਨੋ ਆਗਮਨਕਾਰਣਂ ਕਥੇਸ੍ਸਤਿ, ਏਵਮਸ੍ਸ ਅਯਂ ਗਰਹਾ ਨ ਉਪ੍ਪਜ੍ਜਿਸ੍ਸਤੀਤਿ ਗਰਹਮੋਚਨਤ੍ਥਂ ਏਵਮਾਹ.
੩੭੮. ਅਬ੍ਭੁਦਾਹਾਸੀਤਿ ਕਥੇਸਿ. ਸਕਿਦੇਵ ਸਬ੍ਬਂ ਉਸ੍ਸਤਿ ਸਬ੍ਬਂ ਦਕ੍ਖਿਤੀਤਿ ਯੋ ਏਕਾਵਜ੍ਜਨੇਨ ਏਕਚਿਤ੍ਤੇਨ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਸਬ੍ਬਂ ਉਸ੍ਸਤਿ ਵਾ ਦਕ੍ਖਿਤਿ ਵਾ, ਸੋ ਨਤ੍ਥੀਤਿ ਅਤ੍ਥੋ. ਏਕੇਨ ਹਿ ਚਿਤ੍ਤੇਨ ਅਤੀਤਂ ਸਬ੍ਬਂ ਜਾਨਿਸ੍ਸਾਮੀਤਿ ਆਵਜ੍ਜਿਤ੍ਵਾਪਿ ਅਤੀਤਂ ਸਬ੍ਬਂ ਜਾਨਿਤੁਂ ਨ ਸਕ੍ਕਾ, ਏਕਦੇਸਮੇਵ ਜਾਨਾਤਿ. ਅਨਾਗਤਪਚ੍ਚੁਪ੍ਪਨ੍ਨਂ ਪਨ ਤੇਨ ਚਿਤ੍ਤੇਨ ਸਬ੍ਬੇਨੇਵ ਸਬ੍ਬਂ ਨ ਜਾਨਾਤੀਤਿ. ਏਸ ਨਯੋ ਇਤਰੇਸੁ. ਏਵਂ ਏਕਚਿਤ੍ਤਵਸੇਨਾਯਂ ਪਞ੍ਹੋ ਕਥਿਤੋ. ਹੇਤੁਰੂਪਨ੍ਤਿ ਹੇਤੁਸਭਾਵਂ ਕਾਰਣਜਾਤਿਕਂ. ਸਹੇਤੁਰੂਪਨ੍ਤਿ ਸਕਾਰਣਜਾਤਿਕਂ. ਸਮ੍ਪਰਾਯਿਕਾਹਂ, ਭਨ੍ਤੇਤਿ ਸਮ੍ਪਰਾਯਗੁਣਂ ਅਹਂ, ਭਨ੍ਤੇ, ਪੁਚ੍ਛਾਮਿ.
੩੭੯. ਪਞ੍ਚਿਮਾਨੀਤਿ ਇਮਸ੍ਮਿਂ ਸੁਤ੍ਤੇ ਪਞ੍ਚ ਪਧਾਨਿਯਙ੍ਗਾਨਿ ਲੋਕੁਤ੍ਤਰਮਿਸ੍ਸਕਾਨਿ ਕਥਿਤਾਨਿ. ਕਥਿਨਙ੍ਗਣਵਾਸੀਚੂਲ਼ਸਮੁਦ੍ਦਤ੍ਥੇਰੋ ਪਨ ‘‘ਤੁਮ੍ਹਾਕਂ, ਭਨ੍ਤੇ, ਕਿਂ ਰੁਚ੍ਚਤੀ’’ਤਿ ਵੁਤ੍ਤੇ ‘‘ਮਯ੍ਹਂ ਲੋਕੁਤ੍ਤਰਾਨੇਵਾਤਿ ਰੁਚ੍ਚਤੀ’’ਤਿ ਆਹ. ਪਧਾਨਵੇਮਤ੍ਤਤਨ੍ਤਿ ਪਧਾਨਨਾਨਤ੍ਤਂ. ਅਞ੍ਞਾਦਿਸਮੇਵ ਹਿ ਪੁਥੁਜ੍ਜਨਸ੍ਸ ਪਧਾਨਂ, ਅਞ੍ਞਾਦਿਸਂ ਸੋਤਾਪਨ੍ਨਸ੍ਸ, ਅਞ੍ਞਾਦਿਸਂ ਸਕਦਾਗਾਮਿਨੋ, ਅਞ੍ਞਾਦਿਸਂ ਅਨਾਗਾਮਿਨੋ, ਅਞ੍ਞਾਦਿਸਂ ਅਰਹਤੋ, ਅਞ੍ਞਾਦਿਸਂ ਅਸੀਤਿਮਹਾਸਾਵਕਾਨਂ, ਅਞ੍ਞਾਦਿਸਂ ਦ੍ਵਿਨ੍ਨਂ ਅਗ੍ਗਸਾਵਕਾਨਂ, ਅਞ੍ਞਾਦਿਸਂ ਪਚ੍ਚੇਕਬੁਦ੍ਧਾਨਂ, ਅਞ੍ਞਾਦਿਸਂ ਸਬ੍ਬਞ੍ਞੁਬੁਦ੍ਧਾਨਂ. ਪੁਥੁਜ੍ਜਨਸ੍ਸ ਪਧਾਨਂ ਸੋਤਾਪਨ੍ਨਸ੍ਸ ਪਧਾਨਂ ਨ ਪਾਪੁਣਾਤਿ…ਪੇ… ਪਚ੍ਚੇਕਬੁਦ੍ਧਸ੍ਸ ਪਧਾਨਂ ਸਬ੍ਬਞ੍ਞੁਬੁਦ੍ਧਸ੍ਸ ਪਧਾਨਂ ਨ ਪਾਪੁਣਾਤਿ. ਇਮਮਤ੍ਥਂ ਸਨ੍ਧਾਯ ‘‘ਪਧਾਨਵੇਮਤ੍ਤਤਂ ਵਦਾਮੀ’’ਤਿ ਆਹ. ਦਨ੍ਤਕਾਰਣਂ ਗਚ੍ਛੇਯ੍ਯੁਨ੍ਤਿ ਯਂ ਅਕੂਟਕਰਣਂ, ਅਨਵਚ੍ਛਿਨ੍ਦਨਂ, ਧੁਰਸ੍ਸ ਅਚ੍ਛਿਨ੍ਦਨਨ੍ਤਿ ਦਨ੍ਤੇਸੁ ਕਾਰਣਂ ਦਿਸ੍ਸਤਿ, ਤਂ ਕਾਰਣਂ ਉਪਗਚ੍ਛੇਯ੍ਯੁਨ੍ਤਿ ਅਤ੍ਥੋ. ਦਨ੍ਤਭੂਮਿਨ੍ਤਿ ਦਨ੍ਤੇਹਿ ਗਨ੍ਤਬ੍ਬਭੂਮਿਂ. ਅਸ੍ਸਦ੍ਧੋਤਿਆਦੀਸੁ ਪੁਥੁਜ੍ਜਨਸੋਤਾਪਨ੍ਨਸਕਦਾਗਾਮਿਅਨਾਗਾਮਿਨੋ ਚਤ੍ਤਾਰੋਪਿ ਅਸ੍ਸਦ੍ਧਾ ਨਾਮ. ਪੁਥੁਜ੍ਜਨੋ ਹਿ ਸੋਤਾਪਨ੍ਨਸ੍ਸ ਸਦ੍ਧਂ ਅਪ੍ਪਤ੍ਤੋਤਿ ਅਸ੍ਸਦ੍ਧੋ, ਸੋਤਾਪਨ੍ਨੋ ਸਕਦਾਗਾਮਿਸ੍ਸ, ਸਕਦਾਗਾਮੀ ਅਨਾਗਾਮਿਸ੍ਸ, ਅਨਾਗਾਮੀ ਅਰਹਤੋ ਸਦ੍ਧਂ ਅਪ੍ਪਤ੍ਤੋਤਿ ਅਸ੍ਸਦ੍ਧੋ, ਆਬਾਧੋ ਅਰਹਤੋਪਿ ਉਪ੍ਪਜ੍ਜਤੀਤਿ ਪਞ੍ਚਪਿ ਬਹ੍ਵਾਬਾਧਾ ਨਾਮ ਹੋਨ੍ਤਿ. ਅਰਿਯਸਾਵਕਸ੍ਸ ਪਨ ਸਠੋ ਮਾਯਾਵੀਤਿ ਨਾਮਂ ਨਤ੍ਥਿ. ਤੇਨੇਵ ਥੇਰੋ – ‘‘ਪਞ੍ਚ ਪਧਾਨਿਯਙ੍ਗਾਨਿ ਲੋਕੁਤ੍ਤਰਾਨਿ ਕਥਿਤਾਨੀਤਿ ਮਯ੍ਹਂ ਰੁਚ੍ਚਤੀ’’ਤਿ ਆਹ. ਅਸ੍ਸਖਲ਼ੁਙ੍ਕਸੁਤ੍ਤਨ੍ਤੇ ਪਨ – ‘‘ਤਯੋ ਚ, ਭਿਕ੍ਖਵੇ, ਅਸ੍ਸਖਲ਼ੁਙ੍ਕੇ ਤਯੋ ਚ ਪੁਰਿਸਖਲ਼ੁਙ੍ਕੇ ਦੇਸੇਸ੍ਸਾਮੀ’’ਤਿ (ਅ. ਨਿ. ੩.੧੪੧) ਏਤ੍ਥ ਅਰਿਯਸਾਵਕਸ੍ਸਾਪਿ ਸਮ੍ਬੋਧਿਨਾਮਂ ਆਗਤਂ, ਤਸ੍ਸ ਵਸੇਨ ਲੋਕੁਤ੍ਤਰਮਿਸ੍ਸਕਾ ਕਥਿਤਾਤਿ ਵੁਤ੍ਤਂ. ਪੁਥੁਜ੍ਜਨੋ ਪਨ ਸੋਤਾਪਤ੍ਤਿਮਗ੍ਗਵੀਰਿਯਂ ਅਸਮ੍ਪਤ੍ਤੋ…ਪੇ… ਅਨਾਗਾਮੀ ਅਰਹਤ੍ਤਮਗ੍ਗਵੀਰਿਯਂ ਅਸਮ੍ਪਤ੍ਤੋਤਿ ਕੁਸੀਤੋਪਿ ਅਸ੍ਸਦ੍ਧੋ ਵਿਯ ਚਤ੍ਤਾਰੋਵ ਹੋਨ੍ਤਿ, ਤਥਾ ਦੁਪ੍ਪਞ੍ਞੋ.
ਏਵਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ ਵੇਦਿਤਬ੍ਬਂ – ਅਦਨ੍ਤਹਤ੍ਥਿਆਦਯੋ ਵਿਯ ਹਿ ਮਗ੍ਗਪਧਾਨਰਹਿਤੋ ਪੁਗ੍ਗਲੋ. ਦਨ੍ਤਹਤ੍ਥਿਆਦਯੋ ਵਿਯ ਮਗ੍ਗਪਧਾਨਵਾ. ਯਥਾ ਅਦਨ੍ਤਾ ਹਤ੍ਥਿਆਦਯੋ ਕੂਟਾਕਾਰਂ ਅਕਤ੍ਵਾ ਅਵਿਚ੍ਛਿਨ੍ਦਿਤ੍ਵਾ ਧੁਰਂ ਅਪਾਤੇਤ੍ਵਾ ਦਨ੍ਤਗਮਨਂ ਵਾ ਗਨ੍ਤੁਂ ਦਨ੍ਤਭੂਮਿਂ ਵਾ ਪਤ੍ਤੁਂ ਨ ਸਕ੍ਕੋਨ੍ਤਿ, ਏਵਮੇਵਂ ਮਗ੍ਗਪਧਾਨਰਹਿਤੋ ਮਗ੍ਗਪਧਾਨਵਤਾ ਪਤ੍ਤਬ੍ਬਂ ਪਾਪੁਣਿਤੁਂ ਨਿਬ੍ਬਤ੍ਤੇਤਬ੍ਬਂ ਗੁਣਂ ਨਿਬ੍ਬਤ੍ਤੇਤੁਂ ਨ ਸਕ੍ਕੋਤਿ. ਯਥਾ ਪਨ ਦਨ੍ਤਹਤ੍ਥਿਆਦਯੋ ਕੂਟਾਕਾਰਂ ਅਕਤ੍ਵਾ ਅਵਿਚ੍ਛਿਨ੍ਦਿਤ੍ਵਾ ਧੁਰਂ ਅਪਾਤੇਤ੍ਵਾ ਦਨ੍ਤਗਮਨਂ ਵਾ ਗਨ੍ਤੁਂ ਦਨ੍ਤਭੂਮਿਂ ਵਾ ਪਤ੍ਤੁਂ ਸਕ੍ਕੋਨ੍ਤਿ, ਏਵਮੇਵਂ ਮਗ੍ਗਪਧਾਨਵਾ ਮਗ੍ਗਪਧਾਨਵਤਾ ਪਤ੍ਤਬ੍ਬਂ ਪਾਪੁਣਿਤੁਂ ਨਿਬ੍ਬਤ੍ਤੇਤਬ੍ਬਂ ਗੁਣਂ ਨਿਬ੍ਬਤ੍ਤੇਤੁਂ ਸਕ੍ਕੋਤਿ. ਇਦਂ ਵੁਤ੍ਤਂ ਹੋਤਿ – ‘‘ਸੋਤਾਪਤ੍ਤਿਮਗ੍ਗਪਧਾਨਵਾ ਸੋਤਾਪਤ੍ਤਿਮਗ੍ਗਪਧਾਨਵਤਾ ਪਤ੍ਤੋਕਾਸਂ ਪਾਪੁਣਿਤੁਂ ਨਿਬ੍ਬਤ੍ਤੇਤਬ੍ਬਂ ਗੁਣਂ ਨਿਬ੍ਬਤ੍ਤੇਤੁਂ ਸਕ੍ਕੋਤਿ…ਪੇ… ਅਰਹਤ੍ਤਮਗ੍ਗਪਧਾਨਵਾ ਅਰਹਤ੍ਤਮਗ੍ਗਪਧਾਨਵਤਾ ਪਤ੍ਤੋਕਾਸਂ ਪਾਪੁਣਿਤੁਂ ਨਿਬ੍ਬਤ੍ਤੇਤਬ੍ਬਂ ਗੁਣਂ ਨਿਬ੍ਬਤ੍ਤੇਤੁਂ ਸਕ੍ਕੋਤੀ’’ਤਿ.
੩੮੦. ਸਮ੍ਮਪ੍ਪਧਾਨਾਤਿ ਮਗ੍ਗਪਧਾਨੇਨ ਸਮ੍ਮਪ੍ਪਧਾਨਾ. ਨ ਕਿਞ੍ਚਿ ਨਾਨਾਕਰਣਂ ਵਦਾਮਿ ਯਦਿਦਂ ਵਿਮੁਤ੍ਤਿਯਾ ਵਿਮੁਤ੍ਤਿਨ੍ਤਿ ਯਂ ਏਕਸ੍ਸ ਫਲਵਿਮੁਤ੍ਤਿਯਾ ਇਤਰਸ੍ਸ ਫਲਵਿਮੁਤ੍ਤਿਂ ਆਰਬ੍ਭ ਨਾਨਾਕਰਣਂ ਵਤ੍ਤਬ੍ਬਂ ਸਿਯਾ, ਤਂ ਨ ਕਿਞ੍ਚਿ ਵਦਾਮੀਤਿ ਅਤ੍ਥੋ. ਅਚ੍ਚਿਯਾ ਵਾ ਅਚ੍ਚਿਨ੍ਤਿ ਅਚ੍ਚਿਯਾ ਵਾ ਅਚ੍ਚਿਮ੍ਹਿ. ਸੇਸਪਦਦ੍ਵਯੇਪਿ ਏਸੇਵ ਨਯੋ, ਭੁਮ੍ਮਤ੍ਥੇ ਹਿ ਏਤਂ ਉਪਯੋਗਵਚਨਂ. ਕਿਂ ਪਨ ਤ੍ਵਂ, ਮਹਾਰਾਜਾਤਿ, ਮਹਾਰਾਜ, ਕਿਂ ਤ੍ਵਂ? ‘‘ਸਨ੍ਤਿ ਦੇਵਾ ਚਾਤੁਮਹਾਰਾਜਿਕਾ, ਸਨ੍ਤਿ ਦੇਵਾ ਤਾਵਤਿਂਸਾ…ਪੇ… ਸਨ੍ਤਿ ਦੇਵਾ ਪਰਨਿਮ੍ਮਿਤਵਸਵਤ੍ਤਿਨੋ, ਸਨ੍ਤਿ ਦੇਵਾ ਤਤੁਤ੍ਤਰਿ’’ਨ੍ਤਿ ਏਵਂ ਦੇਵਾਨਂ ਅਤ੍ਥਿਭਾਵਂ ਨ ਜਾਨਾਸਿ, ਯੇਨ ਏਵਂ ਵਦੇਸੀਤਿ. ਤਤੋ ਅਤ੍ਥਿਭਾਵਂ ਜਾਨਾਮਿ, ਮਨੁਸ੍ਸਲੋਕਂ ਪਨ ਆਗਚ੍ਛਨ੍ਤਿ ਨਾਗਚ੍ਛਨ੍ਤੀਤਿ ਇਦਂ ਪੁਚ੍ਛਨ੍ਤੋ ਯਦਿ ਵਾ ਤੇ, ਭਨ੍ਤੇਤਿਆਦਿਮਾਹ. ਸਬ੍ਯਾਬਜ੍ਝਾਤਿ ਸਦੁਕ੍ਖਾ, ਸਮੁਚ੍ਛੇਦਪ੍ਪਹਾਨੇਨ ਅਪ੍ਪਹੀਨਚੇਤਸਿਕਦੁਕ੍ਖਾ. ਆਗਨ੍ਤਾਰੋਤਿ ਉਪਪਤ੍ਤਿਵਸੇਨ ਆਗਨ੍ਤਾਰੋ. ਅਬ੍ਯਾਬਜ੍ਝਾਤਿ ਸਮੁਚ੍ਛਿਨ੍ਨਦੁਕ੍ਖਾ. ਅਨਾਗਨ੍ਤਾਰੋਤਿ ਉਪਪਤ੍ਤਿਵਸੇਨ ਅਨਾਗਨ੍ਤਾਰੋ.
੩੮੧. ਪਹੋਤੀਤਿ ਸਕ੍ਕੋਤਿ. ਰਾਜਾ ਹਿ ਪੁਞ੍ਞਵਨ੍ਤਮ੍ਪਿ ਲਾਭਸਕ੍ਕਾਰਸਮ੍ਪਨ੍ਨਂ ਯਥਾ ਨ ਕੋਚਿ ਉਪਸਙ੍ਕਮਤਿ, ਏਵਂ ਕਰੋਨ੍ਤੋ ਤਮ੍ਹਾ ਠਾਨਾ ਚਾਵੇਤੁਂ ਸਕ੍ਕੋਤਿ. ਤਂ ਅਪੁਞ੍ਞਵਨ੍ਤਮ੍ਪਿ ਸਕਲਗਾਮਂ ਪਿਣ੍ਡਾਯ ਚਰਿਤ੍ਵਾ ਯਾਪਨਮਤ੍ਤਂ ਅਲਭਨ੍ਤਂ ਯਥਾ ਲਾਭਸਕ੍ਕਾਰਸਮ੍ਪਨ੍ਨੋ ਹੋਤਿ, ਏਵਂ ਕਰੋਨ੍ਤੋ ਤਮ੍ਹਾ ਠਾਨਾ ਚਾਵੇਤੁਂ ਸਕ੍ਕੋਤਿ. ਬ੍ਰਹ੍ਮਚਰਿਯਵਨ੍ਤਮ੍ਪਿ ਇਤ੍ਥੀਹਿ ਸਦ੍ਧਿਂ ਸਮ੍ਪਯੋਜੇਤ੍ਵਾ ਸੀਲਵਿਨਾਸਂ ਪਾਪੇਨ੍ਤੋ ਬਲਕ੍ਕਾਰੇਨ ਵਾ ਉਪ੍ਪਬ੍ਬਾਜੇਨ੍ਤੋ ਤਮ੍ਹਾ ਠਾਨਾ ਚਾਵੇਤੁਂ ਸਕ੍ਕੋਤਿ. ਅਬ੍ਰਹ੍ਮਚਰਿਯਵਨ੍ਤਮ੍ਪਿ ਸਮ੍ਪਨ੍ਨਕਾਮਗੁਣਂ ਅਮਚ੍ਚਂ ਬਨ੍ਧਨਾਗਾਰਂ ਪਵੇਸੇਤ੍ਵਾ ਇਤ੍ਥੀਨਂ ਮੁਖਮ੍ਪਿ ਪਸ੍ਸਿਤੁਂ ਅਦੇਨ੍ਤੋ ਤਮ੍ਹਾ ਠਾਨਾ ਚਾਵੇਤਿ ਨਾਮ. ਰਟ੍ਠਤੋ ਪਨ ਯਂ ਇਚ੍ਛਤਿ, ਤਂ ਪਬ੍ਬਾਜੇਤਿ ਨਾਮ.
ਦਸ੍ਸਨਾਯਪਿ ਨਪ੍ਪਹੋਨ੍ਤੀਤਿ ਕਾਮਾਵਚਰੇ ਤਾਵ ਅਬ੍ਯਾਬਜ੍ਝੇ ਦੇਵੇ ਸਬ੍ਯਾਬਜ੍ਝਾ ਦੇਵਾ ਚਕ੍ਖੁਵਿਞ੍ਞਾਣਦਸ੍ਸਨਾਯਪਿ ਨਪ੍ਪਹੋਨ੍ਤਿ. ਕਸ੍ਮਾ? ਅਰਹਤੋ ਤਤ੍ਥ ਠਾਨਾਭਾਵਤੋ. ਰੂਪਾਵਚਰੇ ਪਨ ਏਕਵਿਮਾਨਸ੍ਮਿਂਯੇਵ ਤਿਟ੍ਠਨ੍ਤਿ ਚ ਨਿਸੀਦਨ੍ਤਿ ਚਾਤਿ ਚਕ੍ਖੁਵਿਞ੍ਞਾਣਦਸ੍ਸਨਾਯ ਪਹੋਨ੍ਤਿ, ਏਤੇਹਿ ਦਿਟ੍ਠਂ ਪਨ ਸਲ੍ਲਕ੍ਖਿਤਂ ਪਟਿਵਿਦ੍ਧਂ ਲਕ੍ਖਣਂ ਦਟ੍ਠੁਂ ਸਲ੍ਲਕ੍ਖਿਤੁਂ ਪਟਿਵਿਜ੍ਝਿਤੁਂ ਨ ਸਕ੍ਕੋਨ੍ਤੀਤਿ ਞਾਣਚਕ੍ਖੁਨਾ ਦਸ੍ਸਨਾਯ ਨਪ੍ਪਹੋਨ੍ਤਿ, ਉਪਰਿਦੇਵੇ ਚ ਚਕ੍ਖੁਵਿਞ੍ਞਾਣਦਸ੍ਸਨੇਨਾਪੀਤਿ.
੩੮੨. ਕੋ ਨਾਮੋ ਅਯਂ, ਭਨ੍ਤੇਤਿ ਰਾਜਾ ਥੇਰਂ ਜਾਨਨ੍ਤੋਪਿ ਅਜਾਨਨ੍ਤੋ ਵਿਯ ਪੁਚ੍ਛਤਿ. ਕਸ੍ਮਾ? ਪਸਂਸਿਤੁਕਾਮਤਾਯ. ਆਨਨ੍ਦਰੂਪੋਤਿ ਆਨਨ੍ਦਸਭਾਵੋ. ਬ੍ਰਹ੍ਮਪੁਚ੍ਛਾਪਿ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਅਥ ਖੋ ਅਞ੍ਞਤਰੋ ਪੁਰਿਸੋਤਿ ਸਾ ਕਿਰ ਕਥਾ ਵਿਟਟੂਭੇਨੇਵ ਕਥਿਤਾ, ਤੇ ‘‘ਤਯਾ ਕਥਿਤਾ, ਤਯਾ ਕਥਿਤਾ’’ਤਿ ਕੁਪਿਤਾ ਅਞ੍ਞਮਞ੍ਞਂ ਇਮਸ੍ਮਿਂਯੇਵ ਠਾਨੇ ਅਤ੍ਤਨੋ ਅਤ੍ਤਨੋ ਬਲਕਾਯਂ ਉਟ੍ਠਾਪੇਤ੍ਵਾ ਕਲਹਮ੍ਪਿ ਕਰੇਯ੍ਯੁਨ੍ਤਿ ਨਿਵਾਰਣਤ੍ਥਂ ਸੋ ਰਾਜਪੁਰਿਸੋ ਏਤਦਵੋਚ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਅਯਂ ਪਨ ਦੇਸਨਾ ਨੇਯ੍ਯਪੁਗ੍ਗਲਸ੍ਸ ਵਸੇਨ ਨਿਟ੍ਠਿਤਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਕਣ੍ਣਕਤ੍ਥਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਚਤੁਤ੍ਥਵਗ੍ਗਵਣ੍ਣਨਾ ਨਿਟ੍ਠਿਤਾ.