੪. ਰਾਜਵਗ੍ਗੋ
੧. ਘਟਿਕਾਰਸੁਤ੍ਤਵਣ੍ਣਨਾ
੨੮੨. ਏਵਂ ਮੇ ਸੁਤਨ੍ਤਿ ਘਟਿਕਾਰਸੁਤ੍ਤਂ. ਤਤ੍ਥ ਸਿਤਂ ਪਾਤ੍ਵਾਕਾਸੀਤਿ ਮਹਾਮਗ੍ਗੇਨ ਗਚ੍ਛਨ੍ਤੋ ਅਞ੍ਞਤਰਂ ਭੂਮਿਪ੍ਪਦੇਸਂ ਓਲੋਕੇਤ੍ਵਾ – ‘‘ਅਤ੍ਥਿ ਨੁ ਖੋ ਮਯਾ ਚਰਿਯਂ ਚਰਮਾਨੇਨ ਇਮਸ੍ਮਿਂ ਠਾਨੇ ਨਿਵੁਤ੍ਥਪੁਬ੍ਬ’’ਨ੍ਤਿ ਆਵਜ੍ਜਨ੍ਤੋ ਅਦ੍ਦਸ – ‘‘ਕਸ੍ਸਪਬੁਦ੍ਧਕਾਲੇ ਇਮਸ੍ਮਿਂ ਠਾਨੇ ਵੇਗਲ਼ਿਙ੍ਗਂ ਨਾਮ ਗਾਮਨਿਗਮੋ ਅਹੋਸਿ, ਅਹਂ ਤਦਾ ਜੋਤਿਪਾਲੋ ਨਾਮ ਮਾਣਵੋ ਅਹੋਸਿਂ, ਮਯ੍ਹਂ ਸਹਾਯੋ ਘਟਿਕਾਰੋ ਨਾਮ ਕੁਮ੍ਭਕਾਰੋ ਅਹੋਸਿ, ਤੇਨ ਸਦ੍ਧਿਂ ਮਯਾ ਇਧ ਏਕਂ ਸੁਕਾਰਣਂ ਕਤਂ, ਤਂ ਭਿਕ੍ਖੁਸਙ੍ਘਸ੍ਸ ਅਪਾਕਟਂ ਪਟਿਚ੍ਛਨ੍ਨਂ, ਹਨ੍ਦ ਨਂ ਭਿਕ੍ਖੁਸਙ੍ਘਸ੍ਸ ਪਾਕਟਂ ਕਰੋਮੀ’’ਤਿ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਪਦੇਸੇ ਠਿਤਕੋਵ ਸਿਤਪਾਤੁਕਮ੍ਮਮਕਾਸਿ, ਅਗ੍ਗਗ੍ਗਦਨ੍ਤੇ ਦਸ੍ਸੇਤ੍ਵਾ ਮਨ੍ਦਹਸਿਤਂ ਹਸਿ. ਯਥਾ ਹਿ ਲੋਕਿਯਮਨੁਸ੍ਸਾ ਉਰਂ ਪਹਰਨ੍ਤਾ – ‘‘ਕੁਹਂ ਕੁਹ’’ਨ੍ਤਿ ਹਸਨ੍ਤਿ, ਨ ਏਵਂ ਬੁਦ੍ਧਾ, ਬੁਦ੍ਧਾਨਂ ਪਨ ਹਸਿਤਂ ਹਟ੍ਠਪਹਟ੍ਠਾਕਾਰਮਤ੍ਤਮੇਵ ਹੋਤਿ.
ਹਸਿਤਞ੍ਚ ਨਾਮੇਤਂ ਤੇਰਸਹਿ ਸੋਮਨਸ੍ਸਸਹਗਤਚਿਤ੍ਤੇਹਿ ਹੋਤਿ. ਤਤ੍ਥ ਲੋਕਿਯਮਹਾਜਨੋ ਅਕੁਸਲਤੋ ਚਤੂਹਿ, ਕਾਮਾਵਚਰਕੁਸਲਤੋ ਚਤੂਹੀਤਿ ਅਟ੍ਠਹਿ ਚਿਤ੍ਤੇਹਿ ਹਸਤਿ, ਸੇਕ੍ਖਾ ਅਕੁਸਲਤੋ ਦਿਟ੍ਠਿਸਮ੍ਪਯੁਤ੍ਤਾਨਿ ਦ੍ਵੇ ਅਪਨੇਤ੍ਵਾ ਛਹਿ ਚਿਤ੍ਤੇਹਿ ਹਸਨ੍ਤਿ, ਖੀਣਾਸਵਾ ਚਤੂਹਿ ਸਹੇਤੁਕਕਿਰਿਯਚਿਤ੍ਤੇਹਿ ਏਕੇਨ ਅਹੇਤੁਕਕਿਰਿਯਚਿਤ੍ਤੇਨਾਤਿ ਪਞ੍ਚਹਿ ਚਿਤ੍ਤੇਹਿ ਹਸਨ੍ਤਿ. ਤੇਸੁਪਿ ਬਲਵਾਰਮ੍ਮਣੇ ਆਪਾਥਗਤੇ ਦ੍ਵੀਹਿ ਞਾਣਸਮ੍ਪਯੁਤ੍ਤਚਿਤ੍ਤੇਹਿ ਹਸਨ੍ਤਿ, ਦੁਬ੍ਬਲਾਰਮ੍ਮਣੇ ਦੁਹੇਤੁਕਚਿਤ੍ਤਦ੍ਵਯੇਨ ਚ ਅਹੇਤੁਕਚਿਤ੍ਤੇਨ ਚਾਤਿ ਤੀਹਿ ਚਿਤ੍ਤੇਹਿ ਹਸਨ੍ਤਿ. ਇਮਸ੍ਮਿਂ ਪਨ ਠਾਨੇ ਕਿਰਿਯਾਹੇਤੁਕਮਨੋਵਿਞ੍ਞਾਣਧਾਤੁਸੋਮਨਸ੍ਸਸਹਗਤਚਿਤ੍ਤਂ ਭਗਵਤੋ ਹਟ੍ਠਪਹਟ੍ਠਾਕਾਰਮਤ੍ਤਂ ਹਸਿਤਂ ਉਪ੍ਪਾਦੇਸਿ.
ਤਂ ਪਨੇਤਂ ਹਸਿਤਂ ਏਵਂ ਅਪ੍ਪਮਤ੍ਤਕਮ੍ਪਿ ਥੇਰਸ੍ਸ ਪਾਕਟਂ ਅਹੋਸਿ. ਕਥਂ? ਤਥਾਰੂਪੇ ਹਿ ਕਾਲੇ ਤਥਾਗਤਸ੍ਸ ਚਤੂਹਿ ਦਾਠਾਹਿ ਚਤੁਦ੍ਦੀਪਿਕਮਹਾਮੇਘਮੁਖਤੋ ਸਤੇਰਤਾਵਿਜ੍ਜੁਲਤਾ ਵਿਯ ਵਿਰੋਚਮਾਨਾ ਮਹਾਤਾਲਕ੍ਖਨ੍ਧਪਮਾਣਾ ਰਸ੍ਮਿਵਟ੍ਟਿਯੋ ਉਟ੍ਠਹਿਤ੍ਵਾ ਤਿਕ੍ਖਤ੍ਤੁਂ ਸੀਸਵਰਂ ਪਦਕ੍ਖਿਣਂ ਕਤ੍ਵਾ ਦਾਠਗ੍ਗੇਸੁਯੇਵ ਅਨ੍ਤਰਧਾਯਨ੍ਤਿ. ਤੇਨ ਸਞ੍ਞਾਣੇਨ ਆਯਸ੍ਮਾ ਆਨਨ੍ਦੋ ਭਗਵਤੋ ਪਚ੍ਛਤੋ ਗਚ੍ਛਮਾਨੋਪਿ ਸਿਤਪਾਤੁਭਾਵਂ ਜਾਨਾਤਿ.
ਭਗਵਨ੍ਤਂ ਏਤਦਵੋਚਾਤਿ – ‘‘ਏਤ੍ਥ ਕਿਰ ਕਸ੍ਸਪੋ ਭਗਵਾ ਭਿਕ੍ਖੁਸਙ੍ਘਂ ਓਵਦਿ, ਚਤੁਸਚ੍ਚਪ੍ਪਕਾਸਨਂ ਅਕਾਸਿ, ਭਗਵਤੋਪਿ ਏਤ੍ਥ ਨਿਸੀਦਿਤੁਂ ਰੁਚਿਂ ਉਪ੍ਪਾਦੇਸ੍ਸਾਮਿ, ਏਵਮਯਂ ਭੂਮਿਭਾਗੋ ਦ੍ਵੀਹਿ ਬੁਦ੍ਧੇਹਿ ਪਰਿਭੁਤ੍ਤੋ ਭਵਿਸ੍ਸਤਿ, ਮਹਾਜਨੋ ਗਨ੍ਧਮਾਲਾਦੀਹਿ ਪੂਜੇਤ੍ਵਾ ਚੇਤਿਯਟ੍ਠਾਨਂ ਕਤ੍ਵਾ ਪਰਿਚਰਨ੍ਤੋ ਸਗ੍ਗਮਗ੍ਗਪਰਾਯਣੋ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਤੇਨ ਹਿ, ਭਨ੍ਤੇ,’’ਤਿਆਦਿਵਚਨਂ ਅਵੋਚ.
੨੮੩. ਮੁਣ੍ਡਕੇਨ ਸਮਣਕੇਨਾਤਿ ਮੁਣ੍ਡਂ ਮੁਣ੍ਡੋਤਿ, ਸਮਣਂ ਵਾ ਸਮਣੋਤਿ ਵਤ੍ਤੁਂ ਵਟ੍ਟਤਿ, ਅਯਂ ਪਨ ਅਪਰਿਪਕ੍ਕਞਾਣਤ੍ਤਾ ਬ੍ਰਾਹ੍ਮਣਕੁਲੇ ਉਗ੍ਗਹਿਤਵੋਹਾਰਵਸੇਨੇਵ ਹੀਲ਼ੇਨ੍ਤੋ ਏਵਮਾਹ. ਸੋਤ੍ਤਿਸਿਨਾਨਿਨ੍ਤਿ ਸਿਨਾਨਤ੍ਥਾਯ ਕਤਸੋਤ੍ਤਿਂ. ਸੋਤ੍ਤਿ ਨਾਮ ਕੁਰੁਵਿਨ੍ਦਪਾਸਾਣਚੁਣ੍ਣਾਨਿ ਲਾਖਾਯ ਬਨ੍ਧਿਤ੍ਵਾ ਕਤਗੁਲ਼ਿਕਕਲਾਪਕਾ ਵੁਚ੍ਚਤਿ, ਯਂ ਸਨ੍ਧਾਯ – ‘‘ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਕੁਰੁਵਿਨ੍ਦਕਸੁਤ੍ਤਿਯਾ ਨਹਾਯਨ੍ਤੀ’’ਤਿ (ਚੂਲ਼ਵ. ੨੪੩) ਵੁਤ੍ਤਂ. ਤਂ ਉਭੋਸੁ ਅਨ੍ਤੇਸੁ ਗਹੇਤ੍ਵਾ ਸਰੀਰਂ ਘਂਸਨ੍ਤਿ. ਏਵਂ ਸਮ੍ਮਾਤਿ ਯਥਾ ਏਤਰਹਿਪਿ ਮਨੁਸ੍ਸਾ ‘‘ਚੇਤਿਯਵਨ੍ਦਨਾਯ ਗਚ੍ਛਾਮ, ਧਮ੍ਮਸ੍ਸਵਨਤ੍ਥਾਯ ਗਚ੍ਛਾਮਾ’’ਤਿ ਵੁਤ੍ਤਾ ਉਸ੍ਸਾਹਂ ਨ ਕਰੋਨ੍ਤਿ, ‘‘ਨਟਸਮਜ੍ਜਾਦਿਦਸ੍ਸਨਤ੍ਥਾਯ ਗਚ੍ਛਾਮਾ’’ਤਿ ਵੁਤ੍ਤਾ ਪਨ ਏਕਵਚਨੇਨੇਵ ਸਮ੍ਪਟਿਚ੍ਛਨ੍ਤਿ, ਤਥੇਵ ਸਿਨ੍ਹਾਯਿਤੁਨ੍ਤਿ ਵੁਤ੍ਤੇ ਏਕਵਚਨੇਨ ਸਮ੍ਪਟਿਚ੍ਛਨ੍ਤੋ ਏਵਮਾਹ.
੨੮੪. ਜੋਤਿਪਾਲਂ ਮਾਣਵਂ ਆਮਨ੍ਤੇਸੀਤਿ ਏਕਪਸ੍ਸੇ ਅਰਿਯਪਰਿਹਾਰੇਨ ਪਠਮਤਰਂ ਨ੍ਹਾਯਿਤ੍ਵਾ ਪਚ੍ਚੁਤ੍ਤਰਿਤ੍ਵਾ ਠਿਤੋ ਤਸ੍ਸ ਮਹਨ੍ਤੇਨ ਇਸ੍ਸਰਿਯਪਰਿਹਾਰੇਨ ਨ੍ਹਾਯਨ੍ਤਸ੍ਸ ਨ੍ਹਾਨਪਰਿਯੋਸਾਨਂ ਆਗਮੇਤ੍ਵਾ ਤਂ ਨਿਵਤ੍ਥਨਿਵਾਸਨਂ ਕੇਸੇ ਵੋਦਕੇ ਕੁਰੁਮਾਨਂ ਆਮਨ੍ਤੇਸਿ. ਅਯਨ੍ਤਿ ਆਸਨ੍ਨਤ੍ਤਾ ਦਸ੍ਸੇਨ੍ਤੋ ਆਹ. ਓਵਟ੍ਟਿਕਂ ਵਿਨਿਵਟ੍ਠੇਤ੍ਵਾਤਿ ਨਾਗਬਲੋ ਬੋਧਿਸਤ੍ਤੋ ‘‘ਅਪੇਹਿ ਸਮ੍ਮਾ’’ਤਿ ਈਸਕਂ ਪਰਿਵਤ੍ਤਮਾਨੋਵ ਤੇਨ ਗਹਿਤਗਹਣਂ ਵਿਸ੍ਸਜ੍ਜਾਪੇਤ੍ਵਾਤਿ ਅਤ੍ਥੋ. ਕੇਸੇਸੁ ਪਰਾਮਸਿਤ੍ਵਾ ਏਤਦਵੋਚਾਤਿ ਸੋ ਕਿਰ ਚਿਨ੍ਤੇਸਿ – ‘‘ਅਯਂ ਜੋਤਿਪਾਲੋ ਪਞ੍ਞਵਾ, ਸਕਿਂ ਦਸ੍ਸਨਂ ਲਭਮਾਨੋ ਤਥਾਗਤਸ੍ਸ ਦਸ੍ਸਨੇਪਿ ਪਸੀਦਿਸ੍ਸਤਿ, ਧਮ੍ਮਕਥਾਯਪਿ ਪਸੀਦਿਸ੍ਸਤਿ, ਪਸਨ੍ਨੋ ਚ ਪਸਨ੍ਨਾਕਾਰਂ ਕਾਤੁਂ ਸਕ੍ਖਿਸ੍ਸਤਿ, ਮਿਤ੍ਤਾ ਨਾਮ ਏਤਦਤ੍ਥਂ ਹੋਨ੍ਤਿ, ਯਂਕਿਞ੍ਚਿ ਕਤ੍ਵਾ ਮਮ ਸਹਾਯਂ ਗਹੇਤ੍ਵਾ ਦਸਬਲਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ. ਤਸ੍ਮਾ ਨਂ ਕੇਸੇਸੁ ਪਰਾਮਸਿਤ੍ਵਾ ਏਤਦਵੋਚ.
ਇਤ੍ਤਰਜਚ੍ਚੋਤਿ ਅਞ੍ਞਜਾਤਿਕੋ, ਮਯਾ ਸਦ੍ਧਿਂ ਅਸਮਾਨਜਾਤਿਕੋ, ਲਾਮਕਜਾਤਿਕੋਤਿ ਅਤ੍ਥੋ. ਨ ਵਤਿਦਨ੍ਤਿ ਇਦਂ ਅਮ੍ਹਾਕਂ ਗਮਨਂ ਨ ਵਤ ਓਰਕਂ ਭਵਿਸ੍ਸਤਿ ਨ ਖੁਦ੍ਦਕਂ, ਮਹਨ੍ਤਂ ਭਵਿਸ੍ਸਤਿ. ਅਯਞ੍ਹਿ ਨ ਅਤ੍ਤਨੋ ਥਾਮੇਨ ਗਣ੍ਹਿ, ਸਤ੍ਥੁ ਥਾਮੇਨ ਗਣ੍ਹੀਤਿ ਗਹਣਸ੍ਮਿਂਯੇਵ ਨਿਟ੍ਠਂ ਅਗਮਾਸਿ. ਯਾਵਤਾਦੋਹਿਪੀਤਿ ਏਤ੍ਥ ਦੋਕਾਰਹਿਕਾਰਪਿਕਾਰਾ ਨਿਪਾਤਾ, ਯਾਵਤੁਪਰਿਮਨ੍ਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ‘‘ਵਾਚਾਯ ਆਲਪਨਂ ਓਵਟ੍ਟਿਕਾਯ ਗਹਣਞ੍ਚ ਅਤਿਕ੍ਕਮਿਤ੍ਵਾ ਯਾਵ ਕੇਸਗ੍ਗਹਣਮ੍ਪਿ ਤਤ੍ਥ ਗਮਨਤ੍ਥਂ ਪਯੋਗੋ ਕਤ੍ਤਬ੍ਬੋ’’ਤਿ.
੨੮੫. ਧਮ੍ਮਿਯਾ ਕਥਾਯਾਤਿ ਇਧ ਸਤਿਪਟਿਲਾਭਤ੍ਥਾਯ ਪੁਬ੍ਬੇਨਿਵਾਸਪਟਿਸਂਯੁਤ੍ਤਾ ਧਮ੍ਮੀ ਕਥਾ ਵੇਦਿਤਬ੍ਬਾ. ਤਸ੍ਸ ਹਿ ਭਗਵਾ, – ‘‘ਜੋਤਿਪਾਲ, ਤ੍ਵਂ ਨ ਲਾਮਕਟ੍ਠਾਨਂ ਓਤਿਣ੍ਣਸਤ੍ਤੋ, ਮਹਾਬੋਧਿਪਲ੍ਲਙ੍ਕੇ ਪਨ ਸਬ੍ਬਞ੍ਞੁਤਞ੍ਞਾਣਂ ਪਤ੍ਥੇਤ੍ਵਾ ਓਤਿਣ੍ਣੋਸਿ, ਤਾਦਿਸਸ੍ਸ ਨਾਮ ਪਮਾਦਵਿਹਾਰੋ ਨ ਯੁਤ੍ਤੋ’’ਤਿਆਦਿਨਾ ਨਯੇਨ ਸਤਿਪਟਿਲਾਭਾਯ ਧਮ੍ਮਂ ਕਥੇਸਿ. ਪਰਸਮੁਦ੍ਦਵਾਸੀਥੇਰਾ ਪਨ ਵਦਨ੍ਤਿ – ‘‘ਜੋਤਿਪਾਲ, ਯਥਾ ਅਹਂ ਦਸਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ ਵੀਸਤਿਸਹਸ੍ਸਭਿਕ੍ਖੁਪਰਿਵਾਰੋ ਲੋਕੇ ਵਿਚਰਾਮਿ, ਏਵਮੇਵਂ ਤ੍ਵਮ੍ਪਿ ਦਸਪਾਰਮਿਯੋ ਪੂਰੇਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ ਸਮਣਗਣਪਰਿਵਾਰੋ ਲੋਕੇ ਵਿਚਰਿਸ੍ਸਸਿ. ਏਵਰੂਪੇਨ ਨਾਮ ਤਯਾ ਪਮਾਦਂ ਆਪਜ੍ਜਿਤੁਂ ਨ ਯੁਤ੍ਤ’’ਨ੍ਤਿ ਯਥਾਸ੍ਸ ਪਬ੍ਬਜ੍ਜਾਯ ਚਿਤ੍ਤਂ ਨਮਤਿ, ਏਵਂ ਕਾਮੇਸੁ ਆਦੀਨਵਂ ਨੇਕ੍ਖਮ੍ਮੇ ਚ ਆਨਿਸਂਸਂ ਕਥੇਸੀਤਿ.
੨੮੬. ਅਲਤ੍ਥ ਖੋ, ਆਨਨ੍ਦ,…ਪੇ… ਪਬ੍ਬਜ੍ਜਂ ਅਲਤ੍ਥ ਉਪਸਮ੍ਪਦਨ੍ਤਿ ਪਬ੍ਬਜਿਤ੍ਵਾ ਕਿਮਕਾਸਿ? ਯਂ ਬੋਧਿਸਤ੍ਤੇਹਿ ਕਤ੍ਤਬ੍ਬਂ. ਬੋਧਿਸਤ੍ਤਾ ਹਿ ਬੁਦ੍ਧਾਨਂ ਸਮ੍ਮੁਖੇ ਪਬ੍ਬਜਨ੍ਤਿ. ਪਬ੍ਬਜਿਤ੍ਵਾ ਚ ਪਨ ਇਤ੍ਤਰਸਤ੍ਤਾ ਵਿਯ ਪਤਿਤਸਿਙ੍ਗਾ ਨ ਹੋਨ੍ਤਿ, ਚਤੁਪਾਰਿਸੁਦ੍ਧਿਸੀਲੇ ਪਨ ਸੁਪਤਿਟ੍ਠਾਯ ਤੇਪਿਟਕਂ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਤੇਰਸ ਧੁਤਙ੍ਗਾਨਿ ਸਮਾਦਾਯ ਅਰਞ੍ਞਂ ਪਵਿਸਿਤ੍ਵਾ ਗਤਪਚ੍ਚਾਗਤਵਤ੍ਤਂ ਪੂਰਯਮਾਨਾ ਸਮਣਧਮ੍ਮਂ ਕਰੋਨ੍ਤਾ ਵਿਪਸ੍ਸਨਂ ਵਡ੍ਢੇਤ੍ਵਾ ਯਾਵ ਅਨੁਲੋਮਞਾਣਂ ਆਹਚ੍ਚ ਤਿਟ੍ਠਨ੍ਤਿ, ਮਗ੍ਗਫਲਤ੍ਥਂ ਵਾਯਾਮਂ ਨ ਕਰੋਨ੍ਤਿ. ਜੋਤਿਪਾਲੋਪਿ ਤਥੇਵ ਅਕਾਸਿ.
੨੮੭. ਅਡ੍ਢਮਾਸੁਪਸਮ੍ਪਨ੍ਨੇਤਿ ਕੁਲਦਾਰਕਞ੍ਹਿ ਪਬ੍ਬਾਜੇਤ੍ਵਾ ਅਡ੍ਢਮਾਸਮ੍ਪਿ ਅਵਸਿਤ੍ਵਾ ਗਤੇ ਮਾਤਾਪਿਤੂਨਂ ਸੋਕੋ ਨ ਵੂਪਸਮ੍ਮਤਿ, ਸੋਪਿ ਪਤ੍ਤਚੀਵਰਗ੍ਗਹਣਂ ਨ ਜਾਨਾਤਿ, ਦਹਰਭਿਕ੍ਖੁਸਾਮਣੇਰੇਹਿ ਸਦ੍ਧਿਂ ਵਿਸ੍ਸਾਸੋ ਨ ਉਪ੍ਪਜ੍ਜਤਿ, ਥੇਰੇਹਿ ਸਦ੍ਧਿਂ ਸਿਨੇਹੋ ਨ ਪਤਿਟ੍ਠਾਤਿ, ਗਤਗਤਟ੍ਠਾਨੇ ਅਨਭਿਰਤਿ ਉਪ੍ਪਜ੍ਜਤਿ. ਏਤ੍ਤਕਂ ਪਨ ਕਾਲਂ ਨਿਵਾਸੇ ਸਤਿ ਮਾਤਾਪਿਤਰੋ ਪਸ੍ਸਿਤੁਂ ਲਭਨ੍ਤਿ. ਤੇਨ ਤੇਸਂ ਸੋਕੋ ਤਨੁਭਾਵਂ ਗਚ੍ਛਤਿ, ਪਤ੍ਤਚੀਵਰਗ੍ਗਹਣਂ ਜਾਨਾਤਿ, ਸਾਮਣੇਰਦਹਰਭਿਕ੍ਖੂਹਿ ਸਦ੍ਧਿਂ ਵਿਸ੍ਸਾਸੋ ਜਾਯਤਿ, ਥੇਰੇਹਿ ਸਦ੍ਧਿਂ ਸਿਨੇਹੋ ਪਤਿਟ੍ਠਾਤਿ, ਗਤਗਤਟ੍ਠਾਨੇ ਅਭਿਰਮਤਿ, ਨ ਉਕ੍ਕਣ੍ਠਤਿ. ਤਸ੍ਮਾ ਏਤ੍ਤਕਂ ਵਸਿਤੁਂ ਵਟ੍ਟਤੀਤਿ ਅਡ੍ਢਮਾਸਂ ਵਸਿਤ੍ਵਾ ਪਕ੍ਕਾਮਿ.
ਪਣ੍ਡੁਪੁਟਕਸ੍ਸ ਸਾਲਿਨੋਤਿ ਪੁਟਕੇ ਕਤ੍ਵਾ ਸੁਕ੍ਖਾਪਿਤਸ੍ਸ ਰਤ੍ਤਸਾਲਿਨੋ. ਤਸ੍ਸ ਕਿਰ ਸਾਲਿਨੋ ਵਪ੍ਪਕਾਲਤੋ ਪਟ੍ਠਾਯ ਅਯਂ ਪਰਿਹਾਰੋ – ਕੇਦਾਰਾ ਸੁਪਰਿਕਮ੍ਮਕਤਾ ਹੋਨ੍ਤਿ, ਤਤ੍ਥ ਬੀਜਾਨਿ ਪਤਿਟ੍ਠਾਪੇਤ੍ਵਾ ਗਨ੍ਧੋਦਕੇਨ ਸਿਞ੍ਚਿਂਸੁ, ਵਪ੍ਪਕਾਲੇ ਵਿਤਾਨਂ ਵਿਯ ਉਪਰਿ ਵਤ੍ਥਕਿਲਞ੍ਜਂ ਬਨ੍ਧਿਤ੍ਵਾ ਪਰਿਪਕ੍ਕਕਾਲੇ ਵੀਹਿਸੀਸਾਨਿ ਛਿਨ੍ਦਿਤ੍ਵਾ ਮੁਟ੍ਠਿਮਤ੍ਤੇ ਪੁਟਕੇ ਕਤ੍ਵਾ ਯੋਤ੍ਤਬਦ੍ਧੇ ਵੇਹਾਸਂਯੇਵ ਸੁਕ੍ਖਾਪੇਤ੍ਵਾ ਗਨ੍ਧਚੁਣ੍ਣਾਨਿ ਅਤ੍ਥਰਿਤ੍ਵਾ ਕੋਟ੍ਠਕੇਸੁ ਪੂਰੇਤ੍ਵਾ ਤਤਿਯੇ ਵਸ੍ਸੇ ਵਿਵਰਿਂਸੁ. ਏਵਂ ਤਿਵਸ੍ਸਂ ਪਰਿਵੁਤ੍ਥਸ੍ਸ ਸੁਗਨ੍ਧਰਤ੍ਤਸਾਲਿਨੋ ਅਪਗਤਕਾਲ਼ਕੇ ਸੁਪਰਿਸੁਦ੍ਧੇ ਤਣ੍ਡੁਲੇ ਗਹੇਤ੍ਵਾ ਖਜ੍ਜਕਵਿਕਤਿਮ੍ਪਿ ਭਤ੍ਤਮ੍ਪਿ ਪਟਿਯਾਦਿਯਿਂਸੁ. ਤਂ ਸਨ੍ਧਾਯ ਵੁਤ੍ਤਂ ਪਣੀਤਂ ਖਾਦਨੀਯਂ ਭੋਜਨੀਯਂ…ਪੇ… ਕਾਲਂ ਆਰੋਚਾਪੇਸੀਤਿ.
੨੮੮. ਅਧਿਵੁਟ੍ਠੋ ਮੇਤਿ ਕਿਂ ਸਨ੍ਧਾਯ ਵਦਤਿ? ਵੇਗਲ਼ਿਙ੍ਗਤੋ ਨਿਕ੍ਖਮਨਕਾਲੇ ਘਟਿਕਾਰੋ ਅਤ੍ਤਨੋ ਸਨ੍ਤਿਕੇ ਵਸ੍ਸਾਵਾਸਂ ਵਸਨਤ੍ਥਾਯ ਪਟਿਞ੍ਞਂ ਅਗ੍ਗਹੇਸਿ, ਤਂ ਸਨ੍ਧਾਯ ਵਦਤਿ. ਅਹੁਦੇਵ ਅਞ੍ਞਥਤ੍ਤਂ ਅਹੁ ਦੋਮਨਸ੍ਸਨ੍ਤਿ ਤੇਮਾਸਂ ਦਾਨਂ ਦਾਤੁਂ, ਧਮ੍ਮਞ੍ਚ ਸੋਤੁਂ, ਇਮਿਨਾ ਚ ਨਿਯਾਮੇਨ ਵੀਸਤਿ ਭਿਕ੍ਖੁਸਹਸ੍ਸਾਨਿ ਪਟਿਜਗ੍ਗਿਤੁਂ ਨਾਲਤ੍ਥਨ੍ਤਿ ਅਲਾਭਂ ਆਰਬ੍ਭ ਚਿਤ੍ਤਞ੍ਞਥਤ੍ਤਂ ਚਿਤ੍ਤਦੋਮਨਸ੍ਸਂ ਅਹੋਸਿ, ਨ ਤਥਾਗਤਂ ਆਰਬ੍ਭ. ਕਸ੍ਮਾ? ਸੋਤਾਪਨ੍ਨਤ੍ਤਾ. ਸੋ ਕਿਰ ਪੁਬ੍ਬੇ ਬ੍ਰਾਹ੍ਮਣਭਤ੍ਤੋ ਅਹੋਸਿ. ਅਥੇਕਸ੍ਮਿਂ ਸਮਯੇ ਪਚ੍ਚਨ੍ਤੇ ਕੁਪਿਤੇ ਵੂਪਸਮਨਤ੍ਥਂ ਗਚ੍ਛਨ੍ਤੋ ਉਰਚ੍ਛਦਂ ਨਾਮ ਧੀਤਰਮਾਹ – ‘‘ਅਮ੍ਮ ਅਮ੍ਹਾਕਂ ਦੇਵੇ ਮਾ ਪਮਜ੍ਜੀ’’ਤਿ. ਬ੍ਰਾਹ੍ਮਣਾ ਤਂ ਰਾਜਧੀਤਰਂ ਦਿਸ੍ਵਾ ਵਿਸਞ੍ਞਿਨੋ ਅਹੇਸੁਂ. ਕੇ ਇਮੇ ਚਾਤਿ ਵੁਤ੍ਤੇ ਤੁਮ੍ਹਾਕਂ ਭੂਮਿਦੇਵਾਤਿ. ਭੂਮਿਦੇਵਾ ਨਾਮ ਏਵਰੂਪਾ ਹੋਨ੍ਤੀਤਿ ਨਿਟ੍ਠੁਭਿਤ੍ਵਾ ਪਾਸਾਦਂ ਅਭਿਰੁਹਿ. ਸਾ ਏਕਦਿਵਸਂ ਵੀਥਿਂ ਓਲੋਕੇਨ੍ਤੀ ਠਿਤਾ ਕਸ੍ਸਪਸ੍ਸ ਭਗਵਤੋ ਅਗ੍ਗਸਾਵਕਂ ਦਿਸ੍ਵਾ ਪਕ੍ਕੋਸਾਪੇਤ੍ਵਾ ਪਿਣ੍ਡਪਾਤਂ ਦਤ੍ਵਾ ਅਨੁਮੋਦਨਂ ਸੁਣਮਾਨਾਯੇਵ ਸੋਤਾਪਨ੍ਨਾ ਹੁਤ੍ਵਾ ‘‘ਅਞ੍ਞੇਪਿ ਭਿਕ੍ਖੂ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ‘‘ਸਤ੍ਥਾ ਵੀਸਤਿਯਾ ਭਿਕ੍ਖੁਸਹਸ੍ਸੇਹਿ ਸਦ੍ਧਿਂ ਇਸਿਪਤਨੇ ਵਸਤੀ’’ਤਿ ਚ ਸੁਤ੍ਵਾ ਨਿਮਨ੍ਤੇਤ੍ਵਾ ਦਾਨਂ ਅਦਾਸਿ.
ਰਾਜਾ ਪਚ੍ਚਨ੍ਤਂ ਵੂਪਸਮੇਤ੍ਵਾ ਆਗਤੋ. ਅਥ ਨਂ ਪਠਮਤਰਮੇਵ ਬ੍ਰਾਹ੍ਮਣਾ ਆਗਨ੍ਤ੍ਵਾ ਧੀਤੁ ਅਵਣ੍ਣਂ ਵਤ੍ਵਾ ਪਰਿਭਿਨ੍ਦਿਂਸੁ. ਰਾਜਾ ਪਨ ਧੀਤੁ ਜਾਤਕਾਲੇਯੇਵ ਵਰਂ ਅਦਾਸਿ. ਤਸ੍ਸਾ ‘‘ਸਤ੍ਤ ਦਿਵਸਾਨਿ ਰਜ੍ਜਂ ਦਾਤਬ੍ਬ’’ਨ੍ਤਿ ਵਰਂ ਗਣ੍ਹਿਂਸੁ. ਅਥਸ੍ਸਾ ਰਾਜਾ ਸਤ੍ਤ ਦਿਵਸਾਨਿ ਰਜ੍ਜਂ ਨਿਯ੍ਯਾਤੇਸਿ. ਸਾ ਸਤ੍ਥਾਰਂ ਭੋਜਯਮਾਨਾ ਰਾਜਾਨਂ ਪਕ੍ਕੋਸਾਪੇਤ੍ਵਾ ਬਹਿਸਾਣਿਯਂ ਨਿਸੀਦਾਪੇਸਿ. ਰਾਜਾ ਸਤ੍ਥੁ ਅਨੁਮੋਦਨਂ ਸੁਤ੍ਵਾਵ ਸੋਤਾਪਨ੍ਨੋ ਜਾਤੋ. ਸੋਤਾਪਨ੍ਨਸ੍ਸ ਚ ਨਾਮ ਤਥਾਗਤਂ ਆਰਬ੍ਭ ਆਘਾਤੋ ਨਤ੍ਥਿ. ਤੇਨ ਵੁਤ੍ਤਂ – ‘‘ਨ ਤਥਾਗਤਂ ਆਰਬ੍ਭਾ’’ਤਿ.
ਯਂ ਇਚ੍ਛਤਿ ਤਂ ਹਰਤੂਤਿ ਸੋ ਕਿਰ ਭਾਜਨਾਨਿ ਪਚਿਤ੍ਵਾ ਕਯਵਿਕ੍ਕਯਂ ਨ ਕਰੋਤਿ, ਏਵਂ ਪਨ ਵਤ੍ਵਾ ਦਾਰੁਤ੍ਥਾਯ ਵਾ ਮਤ੍ਤਿਕਤ੍ਥਾਯ ਵਾ ਪਲਾਲਤ੍ਥਾਯ ਵਾ ਅਰਞ੍ਞਂ ਗਚ੍ਛਤਿ. ਮਹਾਜਨਾ ‘‘ਘਟਿਕਾਰੇਨ ਭਾਜਨਾਨਿ ਪਕ੍ਕਾਨੀ’’ਤਿ ਸੁਤ੍ਵਾ ਪਰਿਸੁਦ੍ਧਤਣ੍ਡੁਲਲੋਣਦਧਿਤੇਲਫਾਣਿਤਾਦੀਨਿ ਗਹੇਤ੍ਵਾ ਆਗਚ੍ਛਨ੍ਤਿ. ਸਚੇ ਭਾਜਨਂ ਮਹਗ੍ਘਂ ਹੋਤਿ, ਮੂਲਂ ਅਪ੍ਪਂ, ਯਂ ਵਾ ਤਂ ਵਾ ਦਤ੍ਵਾ ਗਣ੍ਹਾਮਾਤਿ ਤਂ ਨ ਗਣ੍ਹਨ੍ਤਿ. ਧਮ੍ਮਿਕੋ ਵਾਣਿਜੋ ਮਾਤਾਪਿਤਰੋ ਪਟਿਜਗ੍ਗਤਿ, ਸਮ੍ਮਾਸਮ੍ਬੁਦ੍ਧਂ ਉਪਟ੍ਠਹਤਿ, ਬਹੁ ਨੋ ਅਕੁਸਲਂ ਭਵਿਸ੍ਸਤੀਤਿ ਪੁਨ ਗਨ੍ਤ੍ਵਾ ਮੂਲਂ ਆਹਰਨ੍ਤਿ. ਸਚੇ ਪਨ ਭਾਜਨਂ ਅਪ੍ਪਗ੍ਘਂ ਹੋਤਿ, ਆਭਤਂ ਮੂਲਂ ਬਹੁ, ਧਮ੍ਮਿਕੋ ਵਾਣਿਜੋ, ਅਮ੍ਹਾਕਂ ਪੁਞ੍ਞਂ ਭਵਿਸ੍ਸਤੀਤਿ ਯਥਾਭਤਂ ਘਰਸਾਮਿਕਾ ਵਿਯ ਸਾਧੁਕਂ ਪਟਿਸਾਮੇਤ੍ਵਾ ਗਚ੍ਛਨ੍ਤਿ. ਏਵਂਗੁਣੋ ਪਨ ਕਸ੍ਮਾ ਨ ਪਬ੍ਬਜਤੀਤਿ. ਰਞ੍ਞੋ ਵਚਨਪਥਂ ਪਚ੍ਛਿਨ੍ਦਨ੍ਤੋ ਅਨ੍ਧੇ ਜਿਣ੍ਣੇ ਮਾਤਾਪਿਤਰੋ ਪੋਸੇਤੀਤਿ ਆਹ.
੨੮੯. ਕੋ ਨੁ ਖੋਤਿ ਕੁਹਿਂ ਨੁ ਖੋ. ਕੁਮ੍ਭਿਯਾਤਿ ਉਕ੍ਖਲਿਤੋ. ਪਰਿਯੋਗਾਤਿ ਸੂਪਭਾਜਨਤੋ. ਪਰਿਭੁਞ੍ਜਾਤਿ ਭੁਞ੍ਜ. ਕਸ੍ਮਾ ਪਨੇਤੇ ਏਵਂ ਵਦਨ੍ਤਿ? ਘਟਿਕਾਰੋ ਕਿਰ ਭਤ੍ਤਂ ਪਚਿਤ੍ਵਾ ਸੂਪਂ ਸਮ੍ਪਾਦੇਤ੍ਵਾ ਮਾਤਾਪਿਤਰੋ ਭੋਜੇਤ੍ਵਾ ਸਯਮ੍ਪਿ ਭੁਞ੍ਜਿਤ੍ਵਾ ਭਗਵਤੋ ਵਡ੍ਢਮਾਨਕਂ ਭਤ੍ਤਸੂਪਂ ਪਟ੍ਠਪੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਆਧਾਰਕਂ ਉਪਟ੍ਠਪੇਤ੍ਵਾ ਉਦਕਂ ਪਚ੍ਚੁਪਟ੍ਠਪੇਤ੍ਵਾ ਮਾਤਾਪਿਤੂਨਂ ਸਞ੍ਞਂ ਦਤ੍ਵਾ ਅਰਞ੍ਞਂ ਗਚ੍ਛਤਿ. ਤਸ੍ਮਾ ਏਵਂ ਵਦਨ੍ਤਿ. ਅਭਿਵਿਸ੍ਸਤ੍ਥੋਤਿ ਅਤਿਵਿਸ੍ਸਤ੍ਥੋ. ਪੀਤਿਸੁਖਂ ਨ ਵਿਜਹਤੀਤਿ ਨ ਨਿਰਨ੍ਤਰਂ ਵਿਜਹਤਿ, ਅਥ ਖੋ ਰਤ੍ਤਿਭਾਗੇ ਵਾ ਦਿਵਸਭਾਗੇ ਵਾ ਗਾਮੇ ਵਾ ਅਰਞ੍ਞੇ ਵਾ ਯਸ੍ਮਿਂ ਯਸ੍ਮਿਂ ਖਣੇ – ‘‘ਸਦੇਵਕੇ ਨਾਮ ਲੋਕੇ ਅਗ੍ਗਪੁਗ੍ਗਲੋ ਮਯ੍ਹਂ ਗੇਹਂ ਪਵਿਸਿਤ੍ਵਾ ਸਹਤ੍ਥੇਨ ਆਮਿਸਂ ਗਹੇਤ੍ਵਾ ਪਰਿਭੁਞ੍ਜਤਿ, ਲਾਭਾ ਵਤ ਮੇ’’ਤਿ ਅਨੁਸ੍ਸਰਤਿ, ਤਸ੍ਮਿਂ ਤਸ੍ਮਿਂ ਖਣੇ ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਤਿ. ਤਂ ਸਨ੍ਧਾਯ ਏਵਂ ਵੁਤ੍ਤਂ.
੨੯੦. ਕਲ਼ੋਪਿਯਾਤਿ ਪਚ੍ਛਿਤੋ. ਕਿਂ ਪਨ ਭਗਵਾ ਏਵਮਕਾਸੀਤਿ. ਪਚ੍ਚਯੋ ਧਮ੍ਮਿਕੋ, ਭਿਕ੍ਖੂਨਂ ਪਤ੍ਤੇ ਭਤ੍ਤਸਦਿਸੋ, ਤਸ੍ਮਾ ਏਵਮਕਾਸਿ. ਸਿਕ੍ਖਾਪਦਪਞ੍ਞਤ੍ਤਿਪਿ ਚ ਸਾਵਕਾਨਂਯੇਵ ਹੋਤਿ, ਬੁਦ੍ਧਾਨਂ ਸਿਕ੍ਖਾਪਦਵੇਲਾ ਨਾਮ ਨਤ੍ਥਿ. ਯਥਾ ਹਿ ਰਞ੍ਞੋ ਉਯ੍ਯਾਨੇ ਪੁਪ੍ਫਫਲਾਨਿ ਹੋਨ੍ਤਿ, ਅਞ੍ਞੇਸਂ ਤਾਨਿ ਗਣ੍ਹਨ੍ਤਾਨਂ ਨਿਗ੍ਗਹਂ ਕਰੋਨ੍ਤਿ, ਰਾਜਾ ਯਥਾਰੁਚਿਯਾ ਪਰਿਭੁਞ੍ਜਤਿ, ਏਵਂਸਮ੍ਪਦਮੇਤਂ. ਪਰਸਮੁਦ੍ਦਵਾਸੀਥੇਰਾ ਪਨ ‘‘ਦੇਵਤਾ ਕਿਰ ਪਟਿਗ੍ਗਹੇਤ੍ਵਾ ਅਦਂਸੂ’’ਤਿ ਵਦਨ੍ਤਿ.
੨੯੧. ਹਰਥ, ਭਨ੍ਤੇ, ਹਰਥ ਭਦ੍ਰਮੁਖਾਤਿ ਅਮ੍ਹਾਕਂ ਪੁਤ੍ਤੋ ‘‘ਕੁਹਿਂ ਗਤੋਸੀ’’ਤਿ ਵੁਤ੍ਤੇ – ‘‘ਦਸਬਲਸ੍ਸ ਸਨ੍ਤਿਕ’’ਨ੍ਤਿ ਵਦਤਿ, ਕੁਹਿਂ ਨੁ ਖੋ ਗਚ੍ਛਤਿ, ਸਤ੍ਥੁ ਵਸਨਟ੍ਠਾਨਸ੍ਸ ਓਵਸ੍ਸਕਭਾਵਮ੍ਪਿ ਨ ਜਾਨਾਤੀਤਿ ਪੁਤ੍ਤੇ ਅਪਰਾਧਸਞ੍ਞਿਨੋ ਗਹਣੇ ਤੁਟ੍ਠਚਿਤ੍ਤਾ ਏਵਮਾਹਂਸੁ.
ਤੇਮਾਸਂ ਆਕਾਸਚ੍ਛਦਨਂ ਅਟ੍ਠਾਸੀਤਿ ਭਗਵਾ ਕਿਰ ਚਤੁਨ੍ਨਂ ਵਸ੍ਸਿਕਾਨਂ ਮਾਸਾਨਂ ਏਕਂ ਮਾਸਂ ਅਤਿਕ੍ਕਮਿਤ੍ਵਾ ਤਿਣਂ ਆਹਰਾਪੇਸਿ, ਤਸ੍ਮਾ ਏਵਮਾਹ. ਅਯਂ ਪਨੇਤ੍ਥ ਪਦਤ੍ਥੋ – ਆਕਾਸਂ ਛਦਨਮਸ੍ਸਾਤਿ ਆਕਾਸਚ੍ਛਦਨਂ. ਨ ਦੇਵੋਤਿਵਸ੍ਸੀਤਿ ਕੇਵਲਂ ਨਾਤਿਵਸ੍ਸਿ, ਯਥਾ ਪਨੇਤ੍ਥ ਪਕਤਿਯਾ ਚ ਨਿਬ੍ਬਕੋਸਸ੍ਸ ਉਦਕਪਾਤਟ੍ਠਾਨਬ੍ਭਨ੍ਤਰੇ ਏਕਮ੍ਪਿ ਉਦਕਬਿਨ੍ਦੁ ਨਾਤਿਵਸ੍ਸਿ, ਏਵਂ ਘਨਛਦਨਗੇਹਬ੍ਭਨ੍ਤਰੇ ਵਿਯ ਨ ਵਾਤਾਤਪਾਪਿ ਆਬਾਧਂ ਅਕਂਸੁ, ਪਕਤਿਯਾ ਉਤੁਫਰਣਮੇਵ ਅਹੋਸਿ. ਅਪਰਭਾਗੇ ਤਸ੍ਮਿਂ ਨਿਗਮੇ ਛਡ੍ਡਿਤੇਪਿ ਤਂ ਠਾਨਂ ਅਨੋਵਸ੍ਸਕਮੇਵ ਅਹੋਸਿ. ਮਨੁਸ੍ਸਾ ਕਮ੍ਮਂ ਕਰੋਨ੍ਤਾ ਦੇਵੇ ਵਸ੍ਸਨ੍ਤੇ ਤਤ੍ਥ ਸਾਟਕੇ ਠਪੇਤ੍ਵਾ ਕਮ੍ਮਂ ਕਰੋਨ੍ਤਿ. ਯਾਵ ਕਪ੍ਪੁਟ੍ਠਾਨਾ ਤਂ ਠਾਨਂ ਤਾਦਿਸਮੇਵ ਭਵਿਸ੍ਸਤਿ. ਤਞ੍ਚ ਖੋ ਪਨ ਨ ਤਥਾਗਤਸ੍ਸ ਇਦ੍ਧਾਨੁਭਾਵੇਨ, ਤੇਸਂਯੇਵ ਪਨ ਗੁਣਸਮ੍ਪਤ੍ਤਿਯਾ. ਤੇਸਞ੍ਹਿ – ‘‘ਸਮ੍ਮਾਸਮ੍ਬੁਦ੍ਧੋ ਕਤ੍ਥ ਨ ਲਭੇਯ੍ਯ, ਅਮ੍ਹਾਕਂ ਨਾਮ ਦ੍ਵਿਨ੍ਨਂ ਅਨ੍ਧਕਾਨਂ ਨਿਵੇਸਨਂ ਉਤ੍ਤਿਣਂ ਕਾਰੇਸੀ’’ਤਿ ਨ ਤਪ੍ਪਚ੍ਚਯਾ ਦੋਮਨਸ੍ਸਂ ਉਦਪਾਦਿ – ‘‘ਸਦੇਵਕੇ ਲੋਕੇ ਅਗ੍ਗਪੁਗ੍ਗਲੋ ਅਮ੍ਹਾਕਂ ਨਿਵੇਸਨਾ ਤਿਣਂ ਆਹਰਾਪੇਤ੍ਵਾ ਗਨ੍ਧਕੁਟਿਂ ਛਾਦਾਪੇਸੀ’’ਤਿ ਪਨ ਤੇਸਂ ਅਨਪ੍ਪਕਂ ਬਲਵਸੋਮਨਸ੍ਸਂ ਉਦਪਾਦਿ. ਇਤਿ ਤੇਸਂਯੇਵ ਗੁਣਸਮ੍ਪਤ੍ਤਿਯਾ ਇਦਂ ਪਾਟਿਹਾਰਿਯਂ ਜਾਤਨ੍ਤਿ ਵੇਦਿਤਬ੍ਬਂ.
੨੯੨. ਤਣ੍ਡੁਲਵਾਹਸਤਾਨੀਤਿ ਏਤ੍ਥ ਦ੍ਵੇ ਸਕਟਾਨਿ ਏਕੋ ਵਾਹੋਤਿ ਵੇਦਿਤਬ੍ਬੋ. ਤਦੁਪਿਯਞ੍ਚ ਸੂਪੇਯ੍ਯਨ੍ਤਿ ਸੂਪਤ੍ਥਾਯ ਤਦਨੁਰੂਪਂ ਤੇਲਫਾਣਿਤਾਦਿਂ. ਵੀਸਤਿਭਿਕ੍ਖੁਸਹਸ੍ਸਸ੍ਸ ਤੇਮਾਸਤ੍ਥਾਯ ਭਤ੍ਤਂ ਭਵਿਸ੍ਸਤੀਤਿ ਕਿਰ ਸਞ੍ਞਾਯ ਰਾਜਾ ਏਤ੍ਤਕਂ ਪੇਸੇਸਿ. ਅਲਂ ਮੇ ਰਞ੍ਞੋਵ ਹੋਤੂਤਿ ਕਸ੍ਮਾ ਪਟਿਕ੍ਖਿਪਿ? ਅਧਿਗਤਅਪ੍ਪਿਚ੍ਛਤਾਯ. ਏਵਂ ਕਿਰਸ੍ਸ ਅਹੋਸਿ – ‘‘ਨਾਹਂ ਰਞ੍ਞਾ ਦਿਟ੍ਠਪੁਬ੍ਬੋ, ਕਥਂ ਨੁ ਖੋ ਪੇਸੇਸੀ’’ਤਿ. ਤਤੋ ਚਿਨ੍ਤੇਸਿ – ‘‘ਸਤ੍ਥਾ ਬਾਰਾਣਸਿਂ ਗਤੋ, ਅਦ੍ਧਾ ਸੋ ਰਞ੍ਞੋ ਵਸ੍ਸਾਵਾਸਂ ਯਾਚਿਯਮਾਨੋ ਮਯ੍ਹਂ ਪਟਿਞ੍ਞਾਤਭਾਵਂ ਆਰੋਚੇਤ੍ਵਾ ਮਮ ਗੁਣਕਥਂ ਕਥੇਸਿ, ਗੁਣਕਥਾਯ ਲਦ੍ਧਲਾਭੋ ਪਨ ਨਟੇਨ ਨਚ੍ਚਿਤ੍ਵਾ ਲਦ੍ਧਂ ਵਿਯ ਗਾਯਕੇਨ ਗਾਯਿਤ੍ਵਾ ਲਦ੍ਧਂ ਵਿਯ ਚ ਹੋਤਿ. ਕਿਂ ਮਯ੍ਹਂ ਇਮਿਨਾ, ਕਮ੍ਮਂ ਕਤ੍ਵਾ ਉਪ੍ਪਨ੍ਨੇਨ ਮਾਤਾਪਿਤੂਨਮ੍ਪਿ ਸਮ੍ਮਾਸਮ੍ਬੁਦ੍ਧਸ੍ਸਪਿ ਉਪਟ੍ਠਾਨਂ ਸਕ੍ਕਾ ਕਾਤੁ’’ਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਘਟਿਕਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਰਟ੍ਠਪਾਲਸੁਤ੍ਤਵਣ੍ਣਨਾ
੨੯੩. ਏਵਂ ਮੇ ਸੁਤਨ੍ਤਿ ਰਟ੍ਠਪਾਲਸੁਤ੍ਤਂ. ਤਤ੍ਥ ਥੁਲ੍ਲਕੋਟ੍ਠਿਕਨ੍ਤਿ ਥੁਲ੍ਲਕੋਟ੍ਠਂ ਪਰਿਪੁਣ੍ਣਕੋਟ੍ਠਾਗਾਰਂ. ਸੋ ਕਿਰ ਜਨਪਦੋ ਨਿਚ੍ਚਸਸ੍ਸੋ ਸਦਾ ਬੀਜਭਣ੍ਡਂ ਨਿਕ੍ਖਮਤਿ, ਖਲਭਣ੍ਡਂ ਪਵਿਸਤਿ. ਤੇਨ ਤਸ੍ਮਿਂ ਨਿਗਮੇ ਕੋਟ੍ਠਾ ਨਿਚ੍ਚਪੂਰਾਵ ਹੋਨ੍ਤਿ. ਤਸ੍ਮਾ ਸੋ ਥੁਲ੍ਲਕੋਟ੍ਠਿਕਨ੍ਤੇਵ ਸਙ੍ਖਂ ਗਤੋ.
੨੯੪. ਰਟ੍ਠਪਾਲੋਤਿ ਕਸ੍ਮਾ ਰਟ੍ਠਪਾਲੋ? ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਪਾਲੇਤੁਂ ਸਮਤ੍ਥੋਤਿ ਰਟ੍ਠਪਾਲੋ. ਕਦਾ ਪਨਸ੍ਸੇਤਂ ਨਾਮਂ ਉਪ੍ਪਨ੍ਨਨ੍ਤਿ. ਪਦੁਮੁਤ੍ਤਰਸਮ੍ਮਾਸਮ੍ਬੁਦ੍ਧਕਾਲੇ. ਇਤੋ ਹਿ ਪੁਬ੍ਬੇ ਸਤਸਹਸ੍ਸਕਪ੍ਪਮਤ੍ਥਕੇ ਵਸ੍ਸਸਤਸਹਸ੍ਸਾਯੁਕੇਸੁ ਮਨੁਸ੍ਸੇਸੁ ਪਦੁਮੁਤ੍ਤਰੋ ਨਾਮ ਸਤ੍ਥਾ ਉਪ੍ਪਜ੍ਜਿਤ੍ਵਾ ਭਿਕ੍ਖੁਸਤਸਹਸ੍ਸਪਰਿਵਾਰੋ ਲੋਕਹਿਤਾਯ ਚਾਰਿਕਂ ਚਰਿ, ਯਂ ਸਨ੍ਧਾਯ ਵੁਤ੍ਤਂ –
‘‘ਨਗਰਂ ਹਂਸਵਤੀ ਨਾਮ, ਆਨਨ੍ਦੋ ਨਾਮ ਖਤ੍ਤਿਯੋ;
ਸੁਜਾਤਾ ਨਾਮ ਜਨਿਕਾ, ਪਦੁਮੁਤ੍ਤਰਸ੍ਸ ਸਤ੍ਥੁਨੋ’’ਤਿ. (ਬੁ. ਵਂ. ੧੨.੧੯);
ਪਦੁਮੁਤ੍ਤਰੇ ਪਨ ਅਨੁਪ੍ਪਨ੍ਨੇ ਏਵ ਹਂਸਵਤਿਯਾ ਦ੍ਵੇ ਕੁਟੁਮ੍ਬਿਕਾ ਸਦ੍ਧਾ ਪਸਨ੍ਨਾ ਕਪਣਦ੍ਧਿਕਯਾਚਕਾਦੀਨਂ ਦਾਨਂ ਪਟ੍ਠਪਯਿਂਸੁ. ਤਦਾ ਪਬ੍ਬਤਵਾਸਿਨੋ ਪਞ੍ਚਸਤਾ ਤਾਪਸਾ ਹਂਸਵਤਿਂ ਅਨੁਪ੍ਪਤ੍ਤਾ. ਤੇ ਦ੍ਵੇਪਿ ਜਨਾ ਤਾਪਸਗਣਂ ਮਜ੍ਝੇ ਭਿਨ੍ਦਿਤ੍ਵਾ ਉਪਟ੍ਠਹਿਂਸੁ. ਤਾਪਸਾ ਕਿਞ੍ਚਿਕਾਲਂ ਵਸਿਤ੍ਵਾ ਪਬ੍ਬਤਪਾਦਮੇਵ ਗਤਾ. ਦ੍ਵੇ ਸਙ੍ਘਤ੍ਥੇਰਾ ਓਹੀਯਿਂਸੁ. ਤਦਾ ਤੇਸਂ ਤੇ ਯਾਵਜੀਵਂ ਉਪਟ੍ਠਾਨਂ ਅਕਂਸੁ. ਤਾਪਸੇਸੁ ਭੁਞ੍ਜਿਤ੍ਵਾ ਅਨੁਮੋਦਨਂ ਕਰੋਨ੍ਤੇਸੁ ਏਕੋ ਸਕ੍ਕਭਵਨਸ੍ਸ ਵਣ੍ਣਂ ਕਥੇਸਿ, ਏਕੋ ਭੂਮਿਨ੍ਧਰਨਾਗਰਾਜਭਵਨਸ੍ਸ.
ਕੁਟੁਮ੍ਬਿਕੇਸੁ ਏਕੋ ਸਕ੍ਕਭਵਨਂ ਪਤ੍ਥਨਂ ਕਤ੍ਵਾ ਸਕ੍ਕੋ ਹੁਤ੍ਵਾ ਨਿਬ੍ਬਤ੍ਤੋ, ਏਕੋ ਨਾਗਭਵਨੇ ਪਾਲਿਤਨਾਗਰਾਜਾ ਨਾਮ. ਤਂ ਸਕ੍ਕੋ ਅਤ੍ਤਨੋ ਉਪਟ੍ਠਾਨਂ ਆਗਤਂ ਦਿਸ੍ਵਾ ਨਾਗਯੋਨਿਯਂ ਅਭਿਰਮਸੀਤਿ ਪੁਚ੍ਛਿ. ਸੋ ਨਾਭਿਰਮਾਮੀਤਿ ਆਹ. ਤੇਨ ਹਿ ਪਦੁਮੁਤ੍ਤਰਸ੍ਸ ਭਗਵਤੋ ਦਾਨਂ ਦਤ੍ਵਾ ਇਮਸ੍ਮਿਂ ਠਾਨੇ ਪਤ੍ਥਨਂ ਕਰੋਹਿ, ਉਭੋ ਸੁਖਂ ਵਸਿਸ੍ਸਾਮਾਤਿ. ਨਾਗਰਾਜਾ ਸਤ੍ਥਾਰਂ ਨਿਮਨ੍ਤੇਤ੍ਵਾ ਭਿਕ੍ਖੁਸਤਸਹਸ੍ਸਪਰਿਵਾਰਸ੍ਸ ਭਗਵਤੋ ਸਤ੍ਤਾਹਂ ਮਹਾਦਾਨਂ ਦਦਮਾਨੋ ਪਦੁਮੁਤ੍ਤਰਸ੍ਸ ਦਸਬਲਸ੍ਸ ਪੁਤ੍ਤਂ ਉਪਰੇਵਤਂ ਨਾਮ ਸਾਮਣੇਰਂ ਦਿਸ੍ਵਾ ਸਤ੍ਤਮੇ ਦਿਵਸੇ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਦਿਬ੍ਬਵਤ੍ਥਾਨਿ ਦਤ੍ਵਾ ਸਾਮਣੇਰਸ੍ਸ ਠਾਨਨ੍ਤਰਂ ਪਤ੍ਥੇਸਿ. ਭਗਵਾ ਅਨਾਗਤਂ ਓਲੋਕੇਤ੍ਵਾ – ‘‘ਅਨਾਗਤੇ ਗੋਤਮਸ੍ਸ ਨਾਮ ਬੁਦ੍ਧਸ੍ਸ ਪੁਤ੍ਤੋ ਰਾਹੁਲਕੁਮਾਰੋ ਭਵਿਸ੍ਸਤੀ’’ਤਿ ਦਿਸ੍ਵਾ ‘‘ਸਮਿਜ੍ਝਿਸ੍ਸਤਿ ਤੇ ਪਤ੍ਥਨਾ’’ਤਿ ਕਥੇਸਿ. ਨਾਗਰਾਜਾ ਤਮਤ੍ਥਂ ਸਕ੍ਕਸ੍ਸ ਕਥੇਸਿ. ਸਕ੍ਕੋ ਤਸ੍ਸ ਵਚਨਂ ਸੁਤ੍ਵਾ ਤਥੇਵ ਸਤ੍ਤਾਹਂ ਦਾਨਂ ਦਤ੍ਵਾ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਪਾਲੇਤੁਂ ਸਮਤ੍ਥਕੁਲੇ ਨਿਬ੍ਬਤ੍ਤਿਤ੍ਵਾ ਸਦ੍ਧਾਪਬ੍ਬਜਿਤਂ ਰਟ੍ਠਪਾਲਂ ਨਾਮ ਕੁਲਪੁਤ੍ਤਂ ਦਿਸ੍ਵਾ – ‘‘ਅਹਮ੍ਪਿ ਅਨਾਗਤੇ ਲੋਕਸ੍ਮਿਂ ਤੁਮ੍ਹਾਦਿਸੇ ਬੁਦ੍ਧੇ ਉਪ੍ਪਨ੍ਨੇ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਪਾਲੇਤੁਂ ਸਮਤ੍ਥਕੁਲੇ ਨਿਬ੍ਬਤ੍ਤਿਤ੍ਵਾ ਅਯਂ ਕੁਲਪੁਤ੍ਤੋ ਵਿਯ ਸਦ੍ਧਾਪਬ੍ਬਜਿਤੋ ਰਟ੍ਠਪਾਲੋ ਨਾਮ ਭਵੇਯ੍ਯ’’ਨ੍ਤਿ ਪਤ੍ਥਨਮਕਾਸਿ. ਸਤ੍ਥਾ ਸਮਿਜ੍ਝਨਕਭਾਵਂ ਞਤ੍ਵਾ ਇਮਂ ਗਾਥਮਾਹ –
‘‘ਸਰਾਜਿਕਂ ਚਾਤੁਵਣ੍ਣਂ, ਪੋਸੇਤੁਂ ਯਂ ਪਹੋਸ੍ਸਤਿ;
ਰਟ੍ਠਪਾਲਕੁਲਂ ਨਾਮ, ਤਤ੍ਥ ਜਾਯਿਸ੍ਸਤੇ ਅਯ’’ਨ੍ਤਿ. –
ਏਵਂ ਪਦੁਮੁਤ੍ਤਰਸਮ੍ਮਾਸਮ੍ਬੁਦ੍ਧਕਾਲੇ ਤਸ੍ਸੇਤਂ ਨਾਮਂ ਉਪ੍ਪਨ੍ਨਨ੍ਤਿ ਵੇਦਿਤਬ੍ਬਂ.
ਏਤਦਹੋਸੀਤਿ ਕਿਂ ਅਹੋਸਿ? ਯਥਾ ਯਥਾ ਖੋਤਿਆਦਿ. ਤਤ੍ਰਾਯਂ ਸਙ੍ਖੇਪਕਥਾ – ਅਹਂ ਖੋ ਯੇਨ ਯੇਨ ਕਾਰਣੇਨ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮਿ, ਤੇਨ ਤੇਨ ਮੇ ਉਪਪਰਿਕ੍ਖਤੋ ਏਵਂ ਹੋਤਿ – ‘‘ਯਦੇਤਂ ਸਿਕ੍ਖਤ੍ਤਯਬ੍ਰਹ੍ਮਚਰਿਯਂ ਏਕਦਿਵਸਮ੍ਪਿ ਅਖਣ੍ਡਂ ਕਤ੍ਵਾ ਚਰਿਮਕਚਿਤ੍ਤਂ ਪਾਪੇਤਬ੍ਬਤਾਯ ਏਕਨ੍ਤਪਰਿਪੁਣ੍ਣਂ ਚਰਿਤਬ੍ਬਂ, ਏਕਦਿਵਸਮ੍ਪਿ ਚ ਕਿਲੇਸਮਲੇਨ ਅਮਲੀਨਂ ਕਤ੍ਵਾ ਚਰਿਮਕਚਿਤ੍ਤਂ ਪਾਪੇਤਬ੍ਬਤਾਯ ਏਕਨ੍ਤਪਰਿਸੁਦ੍ਧਂ, ਸਙ੍ਖਲਿਖਿਤਂ ਵਿਲਿਖਿਤਸਙ੍ਖਸਦਿਸਂ ਧੋਤਸਙ੍ਖਸਪ੍ਪਟਿਭਾਗਂ ਕਤ੍ਵਾ ਚਰਿਤਬ੍ਬਂ, ਨਯਿਦਂ ਸੁਕਰਂ ਅਗਾਰਂ ਅਜ੍ਝਾਵਸਤਾ ਅਗਾਰਮਜ੍ਝੇ ਵਸਨ੍ਤੇਨ ਏਕਨ੍ਤਪਰਿਪੁਣ੍ਣਂ…ਪੇ… ਚਰਿਤੁਂ, ਯਂਨੂਨਾਹਂ ਕੇਸਞ੍ਚ ਮਸ੍ਸੁਞ੍ਚ ਓਹਾਰੇਤ੍ਵਾ ਕਾਸਾਯਰਸਪੀਤਤਾਯ ਕਾਸਾਯਾਨਿ ਬ੍ਰਹ੍ਮਚਰਿਯਂ ਚਰਨ੍ਤਾਨਂ ਅਨੁਚ੍ਛਵਿਕਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਅਗਾਰਸ੍ਮਾ ਨਿਕ੍ਖਮਿਤ੍ਵਾ ਅਨਗਾਰਿਯਂ ਪਬ੍ਬਜੇਯ੍ਯ’’ਨ੍ਤਿ.
ਅਚਿਰਪਕ੍ਕਨ੍ਤੇਸੁ ਥੁਲ੍ਲਕੋਟ੍ਠਿਕੇਸੁ ਬ੍ਰਾਹ੍ਮਣਗਹਪਤਿਕੇਸੁ ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਰਟ੍ਠਪਾਲੋ ਅਨੁਟ੍ਠਿਤੇਸੁ ਤੇਸੁ ਨ ਭਗਵਨ੍ਤਂ ਪਬ੍ਬਜ੍ਜਂ ਯਾਚਿ. ਕਸ੍ਮਾ? ਤਤ੍ਥਸ੍ਸ ਬਹੂ ਞਾਤਿਸਾਲੋਹਿਤਾ ਮਿਤ੍ਤਾਮਚ੍ਚਾ ਸਨ੍ਤਿ, ਤੇ – ‘‘ਤ੍ਵਂ ਮਾਤਾਪਿਤੂਨਂ ਏਕਪੁਤ੍ਤਕੋ, ਨ ਲਬ੍ਭਾ ਤਯਾ ਪਬ੍ਬਜਿਤੁ’’ਨ੍ਤਿ ਬਾਹਾਯਮ੍ਪਿ ਗਹੇਤ੍ਵਾ ਆਕਡ੍ਢੇਯ੍ਯੁਂ, ਤਤੋ ਪਬ੍ਬਜ੍ਜਾਯ ਅਨ੍ਤਰਾਯੋ ਭਵਿਸ੍ਸਤੀਤਿ ਸਹੇਵ ਪਰਿਸਾਯ ਉਟ੍ਠਹਿਤ੍ਵਾ ਥੋਕਂ ਗਨ੍ਤ੍ਵਾ ਪੁਨ ਕੇਨਚਿ ਸਰੀਰਕਿਚ੍ਚਲੇਸੇਨ ਨਿਵਤ੍ਤਿਤ੍ਵਾ ਭਗਵਨ੍ਤਂ ਉਪਸਙ੍ਕਮ੍ਮ ਪਬ੍ਬਜ੍ਜਂ ਯਾਚਿ. ਤੇਨ ਵੁਤ੍ਤਂ – ‘‘ਅਥ ਖੋ ਰਟ੍ਠਪਾਲੋ ਕੁਲਪੁਤ੍ਤੋ ਅਚਿਰਪਕ੍ਕਨ੍ਤੇਸੁ ਥੁਲ੍ਲਕੋਟ੍ਠਿਕੇਸੁ…ਪੇ… ਪਬ੍ਬਾਜੇਤੁ ਮਂ ਭਗਵਾ’’ਤਿ. ਭਗਵਾ ਪਨ ਯਸ੍ਮਾ ਰਾਹੁਲਕੁਮਾਰਸ੍ਸ ਪਬ੍ਬਜਿਤਤੋ ਪਭੁਤਿ ਮਾਤਾਪਿਤੂਹਿ ਅਨਨੁਞ੍ਞਾਤਂ ਪੁਤ੍ਤਂ ਨ ਪਬ੍ਬਾਜੇਤਿ, ਤਸ੍ਮਾ ਨਂ ਪੁਚ੍ਛਿ ਅਨੁਞ੍ਞਾਤੋਸਿ ਪਨ ਤ੍ਵਂ, ਰਟ੍ਠਪਾਲ, ਮਾਤਾਪਿਤੂਹਿ…ਪੇ… ਪਬ੍ਬਜ੍ਜਾਯਾਤਿ.
੨੯੫. ਅਮ੍ਮਤਾਤਾਤਿ ਏਤ੍ਥ ਅਮ੍ਮਾਤਿ ਮਾਤਰਂ ਆਲਪਤਿ, ਤਾਤਾਤਿ ਪਿਤਰਂ. ਏਕਪੁਤ੍ਤਕੋਤਿ ਏਕੋਵ ਪੁਤ੍ਤਕੋ, ਅਞ੍ਞੋ ਕੋਚਿ ਜੇਟ੍ਠੋ ਵਾ ਕਨਿਟ੍ਠੋ ਵਾ ਨਤ੍ਥਿ. ਏਤ੍ਥ ਚ ਏਕਪੁਤ੍ਤੋਤਿ ਵਤ੍ਤਬ੍ਬੇ ਅਨੁਕਮ੍ਪਾਵਸੇਨ ਏਕਪੁਤ੍ਤਕੋਤਿ ਵੁਤ੍ਤਂ. ਪਿਯੋਤਿ ਪੀਤਿਜਨਕੋ. ਮਨਾਪੋਤਿ ਮਨਵਡ੍ਢਨਕੋ. ਸੁਖੇਧਿਤੋਤਿ ਸੁਖੇਨ ਏਧਿਤੋ, ਸੁਖਸਂਵਡ੍ਢਿਤੋਤਿ ਅਤ੍ਥੋ. ਸੁਖਪਰਿਭਤੋਤਿ ਸੁਖੇਨ ਪਰਿਭਤੋ, ਜਾਤਕਾਲਤੋ ਪਭੁਤਿ ਧਾਤੀਹਿ ਅਙ੍ਕਤੋ ਅਙ੍ਕਂ ਆਹਰਿਤ੍ਵਾ ਧਾਰਿਯਮਾਨੋ ਅਸ੍ਸਕਰਥਕਾਦੀਹਿ ਬਾਲਕੀਲ਼ਨਕੇਹਿ ਕੀਲ਼ਯਮਾਨੋ ਸਾਦੁਰਸਭੋਜਨਂ ਭੋਜਯਮਾਨੋ ਸੁਖੇਨ ਪਰਿਹਟੋ. ਨ ਤ੍ਵਂ, ਤਾਤ ਰਟ੍ਠਪਾਲ, ਕਸ੍ਸਚਿ ਦੁਕ੍ਖਸ੍ਸ ਜਾਨਾਸੀਤਿ ਤ੍ਵਂ, ਤਾਤ ਰਟ੍ਠਪਾਲ ਅਪ੍ਪਮਤ੍ਤਕਮ੍ਪਿ ਕਲਭਾਗਂ ਦੁਕ੍ਖਸ੍ਸ ਨ ਜਾਨਾਸਿ ਨ ਸਰਸੀਤਿ ਅਤ੍ਥੋ. ਮਰਣੇਨਪਿ ਤੇ ਮਯਂ ਅਕਾਮਕਾ ਵਿਨਾ ਭਵਿਸ੍ਸਾਮਾਤਿ ਸਚੇਪਿ ਤਵ ਅਮ੍ਹੇਸੁ ਜੀਵਮਾਨੇਸੁ ਮਰਣਂ ਭਵੇਯ੍ਯ, ਤੇਨ ਤੇ ਮਰਣੇਨਪਿ ਮਯਂ ਅਕਾਮਕਾ ਅਨਿਚ੍ਛਕਾ ਨ ਅਤ੍ਤਨੋ ਰੁਚਿਯਾ ਵਿਨਾ ਭਵਿਸ੍ਸਾਮ, ਤਯਾ ਵਿਯੋਗਂ ਪਾਪੁਣਿਸ੍ਸਾਮਾਤਿ ਅਤ੍ਥੋ. ਕਿਂ ਪਨ ਮਯਂ ਤਨ੍ਤਿ ਏਵਂ ਸਨ੍ਤੇ ਕਿਂ ਪਨ ਕਿਂ ਨਾਮ ਤਂ ਕਾਰਣਂ, ਯੇਨ ਮਯਂ ਤਂ ਜੀਵਨ੍ਤਂ ਅਨੁਜਾਨਿਸ੍ਸਾਮ. ਅਥ ਵਾ ਕਿਂ ਪਨ ਮਯਂ ਤਨ੍ਤਿ ਕੇਨ ਪਨ ਕਾਰਣੇਨ ਮਯਂ ਤਂ ਜੀਵਨ੍ਤਂ ਅਨੁਜਾਨਿਸ੍ਸਾਮਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.
੨੯੬. ਤਤ੍ਥੇਵਾਤਿ ਯਤ੍ਥ ਨਂ ਠਿਤਂ ਮਾਤਾਪਿਤਰੋ ਨਾਨੁਜਾਨਿਂਸੁ, ਤਤ੍ਥੇਵ ਠਾਨੇ. ਅਨਨ੍ਤਰਹਿਤਾਯਾਤਿ ਕੇਨਚਿ ਅਤ੍ਥਰਣੇਨ ਅਨਤ੍ਥਤਾਯ. ਪਰਿਚਾਰੇਹੀਤਿ ਗਨ੍ਧਬ੍ਬਨਟਨਾਟਕਾਦੀਨਿ ਪਚ੍ਚੁਪਟ੍ਠਪੇਤ੍ਵਾ ਤਤ੍ਥ ਸਹਾਯਕੇਹਿ ਸਦ੍ਧਿਂ ਯਥਾਸੁਖਂ ਇਨ੍ਦ੍ਰਿਯਾਨਿ ਚਾਰੇਹਿ ਸਞ੍ਚਾਰੇਹਿ, ਇਤੋ ਚਿਤੋ ਚ ਉਪਨੇਹੀਤਿ ਵੁਤ੍ਤਂ ਹੋਤਿ. ਅਥ ਵਾ ਪਰਿਚਾਰੇਹੀਤਿ ਗਨ੍ਧਬ੍ਬਨਟਨਾਟਕਾਦੀਨਿ ਪਚ੍ਚੁਪਟ੍ਠਪੇਤ੍ਵਾ ਸਹਾਯਕੇਹਿ ਸਦ੍ਧਿਂ ਲਲ਼ ਉਪਲਲ਼ ਰਮ, ਕੀਲ਼ਸ੍ਸੂਤਿਪਿ ਵੁਤ੍ਤਂ ਹੋਤਿ. ਕਾਮੇ ਪਰਿਭੁਞ੍ਜਨ੍ਤੋਤਿ ਅਤ੍ਤਨੋ ਪੁਤ੍ਤਦਾਰੇਹਿ ਸਦ੍ਧਿਂ ਭੋਗੇ ਭੁਞ੍ਜਨ੍ਤੋ. ਪੁਞ੍ਞਾਨਿ ਕਰੋਨ੍ਤੋਤਿ ਬੁਦ੍ਧਞ੍ਚ ਧਮ੍ਮਞ੍ਚ ਸਙ੍ਘਞ੍ਚ ਆਰਬ੍ਭ ਦਾਨਪ੍ਪਦਾਨਾਦੀਨਿ ਸੁਗਤਿਮਗ੍ਗਸਂਸੋਧਕਾਨਿ ਕੁਸਲਕਮ੍ਮਾਨਿ ਕਰੋਨ੍ਤੋ. ਤੁਣ੍ਹੀ ਅਹੋਸੀਤਿ ਕਥਾਨੁਪ੍ਪਬਨ੍ਧਵਿਚ੍ਛੇਦਨਤ੍ਥਂ ਨਿਰਾਲਾਪਸਲ੍ਲਾਪੋ ਅਹੋਸਿ.
ਅਥਸ੍ਸ ਮਾਤਾਪਿਤਰੋ ਤਿਕ੍ਖਤ੍ਤੁਂ ਵਤ੍ਵਾ ਪਟਿਵਚਨਮ੍ਪਿ ਅਲਭਮਾਨਾ ਸਹਾਯਕੇ ਪਕ੍ਕੋਸਾਪੇਤ੍ਵਾ ‘‘ਏਸ ਵੋ ਸਹਾਯਕੋ ਪਬ੍ਬਜਿਤੁਕਾਮੋ, ਨਿਵਾਰੇਥ ਨ’’ਨ੍ਤਿ ਆਹਂਸੁ. ਤੇਪਿ ਤਂ ਉਪਸਙ੍ਕਮਿਤ੍ਵਾ ਤਿਕ੍ਖਤ੍ਤੁਂ ਅਵੋਚੁਂ, ਤੇਸਮ੍ਪਿ ਤੁਣ੍ਹੀ ਅਹੋਸਿ. ਤੇਨ ਵੁਤ੍ਤਂ – ਅਥ ਖੋ ਰਟ੍ਠਪਾਲਸ੍ਸ ਕੁਲਪੁਤ੍ਤਸ੍ਸ ਸਹਾਯਕਾ…ਪੇ… ਤੁਣ੍ਹੀ ਅਹੋਸੀਤਿ. ਅਥਸ੍ਸ ਸਹਾਯਕਾਨਂ ਤਿਕ੍ਖਤ੍ਤੁਂ ਵਤ੍ਵਾ ਏਤਦਹੋਸਿ – ‘‘ਸਚੇ ਅਯਂ ਪਬ੍ਬਜ੍ਜਂ ਅਲਭਮਾਨੋ ਮਰਿਸ੍ਸਤਿ, ਨ ਕੋਚਿ ਗੁਣੋ ਲਬ੍ਭਤਿ. ਪਬ੍ਬਜਿਤਂ ਪਨ ਨਂ ਮਾਤਾਪਿਤਰੋਪਿ ਕਾਲੇਨ ਕਾਲਂ ਪਸ੍ਸਿਸ੍ਸਨ੍ਤਿ, ਮਯਮ੍ਪਿ ਪਸ੍ਸਿਸ੍ਸਾਮ, ਪਬ੍ਬਜ੍ਜਾਪਿ ਚ ਨਾਮੇਸਾ ਭਾਰਿਯਾ, ਦਿਵਸੇ ਦਿਵਸੇ ਮਤ੍ਤਿਕਾਪਤ੍ਤਂ ਗਹੇਤ੍ਵਾ ਪਿਣ੍ਡਾਯ ਚਰਿਤਬ੍ਬਂ, ਏਕਸੇਯ੍ਯਂ ਏਕਭਤ੍ਤਂ ਬ੍ਰਹ੍ਮਚਰਿਯਂ ਅਤਿਦੁਕ੍ਕਰਂ, ਅਯਞ੍ਚ ਸੁਖੁਮਾਲੋ ਨਾਗਰਿਕਜਾਤਿਯੋ, ਸੋ ਤਂ ਚਰਿਤੁਂ ਅਸਕ੍ਕੋਨ੍ਤੋ ਪੁਨ ਇਧੇਵ ਆਗਮਿਸ੍ਸਤਿ, ਹਨ੍ਦਸ੍ਸ ਮਾਤਾਪਿਤਰੋ ਅਨੁਜਾਨਾਪੇਸ੍ਸਾਮਾ’’ਤਿ. ਤੇ ਤਥਾ ਅਕਂਸੁ. ਮਾਤਾਪਿਤਰੋਪਿ ਨਂ ‘‘ਪਬ੍ਬਜਿਤੇਨ ਚ ਪਨ ਤੇ ਮਾਤਾਪਿਤਰੋ ਉਦ੍ਦਸ੍ਸੇਤਬ੍ਬਾ’’ਤਿ ਇਮਂ ਕਤਿਕਂ ਕਤ੍ਵਾ ਅਨੁਜਾਨਿਂਸੁ. ਤੇਨ ਵੁਤ੍ਤਂ – ‘‘ਅਥ ਖੋ ਰਟ੍ਠਪਾਲਸ੍ਸ ਕੁਲਪੁਤ੍ਤਸ੍ਸ ਸਹਾਯਕਾ ਯੇਨ ਰਟ੍ਠਪਾਲਸ੍ਸ ਕੁਲਪੁਤ੍ਤਸ੍ਸ ਮਾਤਾਪਿਤਰੋ…ਪੇ… ਅਨੁਞ੍ਞਾਤੋਸਿ ਮਾਤਾਪਿਤੂਹਿ…ਪੇ… ਉਦ੍ਦਸ੍ਸੇਤਬ੍ਬਾ’’ਤਿ. ਤਤ੍ਥ ਉਦ੍ਦਸ੍ਸੇਤਬ੍ਬਾਤਿ ਉਦ੍ਧਂ ਦਸ੍ਸੇਤਬ੍ਬਾ, ਯਥਾ ਤਂ ਕਾਲੇਨ ਕਾਲਂ ਪਸ੍ਸਨ੍ਤਿ, ਏਵਂ ਆਗਨ੍ਤ੍ਵਾ ਅਤ੍ਤਾਨਂ ਦਸ੍ਸੇਤਬ੍ਬਾ.
੨੯੯. ਬਲਂ ਗਹੇਤ੍ਵਾਤਿ ਸਪ੍ਪਾਯਭੋਜਨਾਨਿ ਭੁਞ੍ਜਨ੍ਤੋ ਉਚ੍ਛਾਦਨਾਦੀਹਿ ਚ ਕਾਯਂ ਪਰਿਹਰਨ੍ਤੋ ਕਾਯਬਲਂ ਜਨੇਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਅਸ੍ਸੁਮੁਖਂ ਞਾਤਿਪਰਿਵਟ੍ਟਂ ਪਹਾਯ ਯੇਨ ਭਗਵਾ ਤੇਨੁਪਸਙ੍ਕਮਿ…ਪੇ… ਪਬ੍ਬਾਜੇਤੁ ਮਂ, ਭਨ੍ਤੇ, ਭਗਵਾਤਿ. ਭਗਵਾ ਸਮੀਪੇ ਠਿਤਂ ਅਞ੍ਞਤਰਂ ਭਿਕ੍ਖੁਂ ਆਮਨ੍ਤੇਸਿ – ‘‘ਤੇਨ ਹਿ ਭਿਕ੍ਖੁ ਰਟ੍ਠਪਾਲਂ ਪਬ੍ਬਾਜੇਹਿ ਚੇਵ ਉਪਸਮ੍ਪਾਦੇਹਿ ਚਾ’’ਤਿ. ਸਾਧੁ, ਭਨ੍ਤੇਤਿ ਖੋ ਸੋ ਭਿਕ੍ਖੁ ਭਗਵਤੋ ਪਟਿਸ੍ਸੁਤ੍ਵਾ ਰਟ੍ਠਪਾਲਂ ਕੁਲਪੁਤ੍ਤਂ ਜਿਨਦਤ੍ਤਿਯਂ ਸਦ੍ਧਿਵਿਹਾਰਿਕਂ ਲਦ੍ਧਾ ਪਬ੍ਬਾਜੇਸਿ ਚੇਵ ਉਪਸਮ੍ਪਾਦੇਸਿ ਚ. ਤੇਨ ਵੁਤ੍ਤਂ – ‘‘ਅਲਤ੍ਥ ਖੋ ਰਟ੍ਠਪਾਲੋ ਕੁਲਪੁਤ੍ਤੋ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਅਲਤ੍ਥ ਉਪਸਮ੍ਪਦ’’ਨ੍ਤਿ.
ਪਹਿਤਤ੍ਤੋ ਵਿਹਰਨ੍ਤੋਤਿ ਦ੍ਵਾਦਸ ਸਂਵਚ੍ਛਰਾਨਿ ਏਵਂ ਵਿਹਰਨ੍ਤੋ. ਨੇਯ੍ਯਪੁਗ੍ਗਲੋ ਹਿ ਅਯਮਾਯਸ੍ਮਾ, ਤਸ੍ਮਾ ਪੁਞ੍ਞਵਾ ਅਭਿਨੀਹਾਰਸਮ੍ਪਨ੍ਨੋਪਿ ਸਮਾਨੋ ‘‘ਅਜ੍ਜ ਅਜ੍ਜੇਵ ਅਰਹਤ੍ਤ’’ਨ੍ਤਿ ਸਮਣਧਮ੍ਮਂ ਕਰੋਨ੍ਤੋਪਿ ਦ੍ਵਾਦਸਮੇ ਵਸ੍ਸੇ ਅਰਹਤ੍ਤਂ ਪਾਪੁਣਿ.
ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਮਯ੍ਹਂ ਮਾਤਾਪਿਤਰੋ ਪਬ੍ਬਜ੍ਜਂ ਅਨੁਜਾਨਮਾਨਾ – ‘‘ਤਯਾ ਕਾਲੇਨ ਕਾਲਂ ਆਗਨ੍ਤ੍ਵਾ ਅਮ੍ਹਾਕਂ ਦਸ੍ਸਨਂ ਦਾਤਬ੍ਬ’’ਨ੍ਤਿ ਵਤ੍ਵਾ ਅਨੁਜਾਨਿਂਸੁ, ਦੁਕ੍ਕਰਕਾਰਿਕਾ ਖੋ ਪਨ ਮਾਤਾਪਿਤਰੋ, ਅਹਞ੍ਚ ਯੇਨਜ੍ਝਾਸਯੇਨ ਪਬ੍ਬਜਿਤੋ, ਸੋ ਮੇ ਮਤ੍ਥਕਂ ਪਤ੍ਤੋ, ਇਦਾਨਿ ਭਗਵਨ੍ਤਂ ਆਪੁਚ੍ਛਿਤ੍ਵਾ ਅਤ੍ਤਾਨਂ ਮਾਤਾਪਿਤੂਨਂ ਦਸ੍ਸੇਸ੍ਸਾਮੀਤਿ ਚਿਨ੍ਤੇਤ੍ਵਾ ਆਪੁਚ੍ਛਿਤੁਕਾਮੋ ਉਪਸਙ੍ਕਮਿ. ਮਨਸਾਕਾਸੀਤਿ ‘‘ਕਿਂ ਨੁ ਖੋ ਰਟ੍ਠਪਾਲੇ ਗਤੇ ਕੋਚਿ ਉਪਦ੍ਦਵੋ ਭਵਿਸ੍ਸਤੀ’’ਤਿ ਮਨਸਿ ਅਕਾਸਿ. ਤਤੋ ‘‘ਭਵਿਸ੍ਸਤੀ’’ਤਿ ਞਤ੍ਵਾ ‘‘ਸਕ੍ਖਿਸ੍ਸਤਿ ਨੁ ਖੋ ਰਟ੍ਠਪਾਲੋ ਤਂ ਮਦ੍ਦਿਤੁ’’ਨ੍ਤਿ ਓਲੋਕੇਨ੍ਤੋ ਤਸ੍ਸ ਅਰਹਤ੍ਤਸਮ੍ਪਤ੍ਤਿਂ ਦਿਸ੍ਵਾ ‘‘ਸਕ੍ਖਿਸ੍ਸਤੀ’’ਤਿ ਅਞ੍ਞਾਸਿ. ਤੇਨ ਵੁਤ੍ਤਂ – ਯਥਾ ਭਗਵਾ ਅਞ੍ਞਾਸਿ…ਪੇ… ਕਾਲਂ ਮਞ੍ਞਸੀਤਿ.
ਮਿਗਚੀਰੇਤਿ ਏਵਂਨਾਮਕੇ ਉਯ੍ਯਾਨੇ. ਤਞ੍ਹਿ ਰਞ੍ਞਾ – ‘‘ਅਕਾਲੇ ਸਮ੍ਪਤ੍ਤਪਬ੍ਬਜਿਤਾਨਂ ਦਿਨ੍ਨਮੇਵ ਇਦਂ, ਯਥਾਸੁਖਂ ਪਰਿਭੁਞ੍ਜਨ੍ਤੂ’’ਤਿ ਏਵਮਨੁਞ੍ਞਾਤਮੇਵ ਅਹੋਸਿ, ਤਸ੍ਮਾ ਥੇਰੋ – ‘‘ਮਮ ਆਗਤਭਾਵਂ ਮਾਤਾਪਿਤੂਨਂ ਆਰੋਚੇਸ੍ਸਾਮਿ, ਤੇ ਮੇ ਪਾਦਧੋਵਨਉਣ੍ਹੋਦਕਪਾਦਮਕ੍ਖਨਤੇਲਾਦੀਨਿ ਪੇਸਿਸ੍ਸਨ੍ਤੀ’’ਤਿ ਚਿਤ੍ਤਮ੍ਪਿ ਅਨੁਪ੍ਪਾਦੇਤ੍ਵਾ ਉਯ੍ਯਾਨਮੇਵ ਪਾਵਿਸਿ. ਪਿਣ੍ਡਾਯ ਪਾਵਿਸੀਤਿ ਦੁਤਿਯਦਿਵਸੇ ਪਾਵਿਸਿ.
ਮਜ੍ਝਿਮਾਯਾਤਿ ਸਤ੍ਤਦ੍ਵਾਰਕੋਟ੍ਠਕਸ੍ਸ ਘਰਸ੍ਸ ਮਜ੍ਝਿਮੇ ਦ੍ਵਾਰਕੋਟ੍ਠਕੇ. ਉਲ੍ਲਿਖਾਪੇਤੀਤਿ ਕਪ੍ਪਕੇਨ ਕੇਸੇ ਪਹਰਾਪੇਤਿ. ਏਤਦਵੋਚਾਤਿ – ‘‘ਇਮੇ ਸਮਣਕਾ ਅਮ੍ਹਾਕਂ ਪਿਯਪੁਤ੍ਤਕਂ ਪਬ੍ਬਾਜੇਤ੍ਵਾ ਚੋਰਾਨਂ ਹਤ੍ਥੇ ਨਿਕ੍ਖਿਪਿਤ੍ਵਾ ਵਿਯ ਏਕਦਿਵਸਮ੍ਪਿ ਨ ਦਸ੍ਸਾਪੇਨ੍ਤਿ, ਏਵਂ ਫਰੁਸਕਾਰਕਾ ਏਤੇ ਪੁਨ ਇਮਂ ਠਾਨਂ ਉਪਸਙ੍ਕਮਿਤਬ੍ਬਂ ਮਞ੍ਞਨ੍ਤਿ, ਏਤ੍ਤੋਵ ਨਿਕਡ੍ਢਿਤਬ੍ਬਾ ਏਤੇ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਇਮੇਹਿ ਮੁਣ੍ਡਕੇਹੀ’’ਤਿਆਦਿਵਚਨਂ ਅਵੋਚ. ਞਾਤਿਦਾਸੀਤਿ ਞਾਤਕਾਨਂ ਦਾਸੀ. ਆਭਿਦੋਸਿਕਨ੍ਤਿ ਪਾਰਿਵਾਸਿਕਂ ਏਕਰਤ੍ਤਾਤਿਕ੍ਕਨ੍ਤਂ ਪੂਤਿਭੂਤਂ. ਤਤ੍ਥਾਯਂ ਪਦਤ੍ਥੋ – ਪੂਤਿਭਾਵਦੋਸੇਨ ਅਭਿਭੂਤੋਤਿ ਅਭਿਦੋਸੋ, ਅਭਿਦੋਸੋਵ ਆਭਿਦੋਸਿਕੋ. ਏਕਰਤ੍ਤਾਤਿਕ੍ਕਨ੍ਤਸ੍ਸੇਵ ਨਾਮਸਞ੍ਞਾ ਏਸਾ ਯਦਿਦਂ ਆਭਿਦੋਸਿਕੋਤਿ, ਤਂ ਆਭਿਦੋਸਿਕਂ. ਕੁਮ੍ਮਾਸਨ੍ਤਿ ਯਵਕੁਮ੍ਮਾਸਂ. ਛਡ੍ਡੇਤੁਕਾਮਾ ਹੋਤੀਤਿ ਯਸ੍ਮਾ ਅਨ੍ਤਮਸੋ ਦਾਸਕਮ੍ਮਕਾਰਾਨਂ ਗੋਰੂਪਾਨਮ੍ਪਿ ਅਪਰਿਭੋਗਾਰਹੋ, ਤਸ੍ਮਾ ਨਂ ਕਚਵਰਂ ਵਿਯ ਬਹਿ ਛਡ੍ਡੇਤੁਕਾਮਾ ਹੋਤਿ. ਸਚੇਤਨ੍ਤਿ ਸਚੇ ਏਤਂ. ਭਗਿਨੀਤਿ ਅਰਿਯਵੋਹਾਰੇਨ ਅਤ੍ਤਨੋ ਧਾਤਿਂ ਞਾਤਿਦਾਸਿਂ ਆਲਪਤਿ. ਛਡ੍ਡਨੀਯਧਮ੍ਮਨ੍ਤਿ ਛਡ੍ਡੇਤਬ੍ਬਸਭਾਵਂ. ਇਦਂ ਵੁਤ੍ਤਂ ਹੋਤਿ – ‘‘ਭਗਿਨਿ ਏਤਂ ਸਚੇ ਬਹਿ ਛਡ੍ਡਨੀਯਧਮ੍ਮਂ ਨਿਸ੍ਸਟ੍ਠਪਰਿਗ੍ਗਹਂ, ਇਧ ਮੇ ਪਤ੍ਤੇ ਆਕਿਰਾਹੀ’’ਤਿ. ਕਿਂ ਪਨ ਏਵਂ ਵਤ੍ਤੁਂ ਲਬ੍ਭਤਿ, ਵਿਞ੍ਞਤ੍ਤਿ ਵਾ ਪਯੁਤ੍ਤਵਾਚਾ ਵਾ ਨ ਹੋਤੀਤਿ. ਨ ਹੋਤਿ. ਕਸ੍ਮਾ? ਨਿਸ੍ਸਟ੍ਠਪਰਿਗ੍ਗਹਤ੍ਤਾ. ਯਞ੍ਹਿ ਛਡ੍ਡਨੀਯਧਮ੍ਮਂ ਨਿਸ੍ਸਟ੍ਠਪਰਿਗ੍ਗਹਂ, ਯਤ੍ਥ ਸਾਮਿਕਾ ਅਨਾਲਯਾ ਹੋਨ੍ਤਿ, ਤਂ ਸਬ੍ਬਂ ‘‘ਦੇਥ ਆਹਰਥ ਆਕਿਰਥਾ’’ਤਿ ਵਤ੍ਤੁਂ ਵਟ੍ਟਤਿ. ਤੇਨੇਵ ਹਿ ਅਯਮਾਯਸ੍ਮਾ ਅਗ੍ਗਅਰਿਯਵਂਸਿਕੋ ਸਮਾਨੋਪਿ ਏਵਮਾਹ.
ਹਤ੍ਥਾਨਨ੍ਤਿ ਭਿਕ੍ਖਾਗਹਣਤ੍ਥਂ ਪਤ੍ਤਂ ਉਪਨਾਮਯਤੋ ਮਣਿਬਨ੍ਧਤੋ ਪਭੁਤਿ ਦ੍ਵਿਨ੍ਨਮ੍ਪਿ ਹਤ੍ਥਾਨਂ. ਪਾਦਾਨਨ੍ਤਿ ਨਿਵਾਸਨਨ੍ਤਤੋ ਪਟ੍ਠਾਯ ਦ੍ਵਿਨ੍ਨਮ੍ਪਿ ਪਾਦਾਨਂ. ਸਰਸ੍ਸਾਤਿ ਸਚੇ ਤਂ ਭਗਿਨੀਤਿ ਵਾਚਂ ਨਿਚ੍ਛਾਰਯਤੋ ਸਰਸ੍ਸ ਚ. ਨਿਮਿਤ੍ਤਂ ਅਗ੍ਗਹੇਸੀਤਿ ਹਤ੍ਥਪਿਟ੍ਠਿਆਦੀਨਿ ਓਲੋਕਯਮਾਨਾ – ‘‘ਪੁਤ੍ਤਸ੍ਸ ਮੇ ਰਟ੍ਠਪਾਲਸ੍ਸ ਵਿਯ ਸੁਵਣ੍ਣਕਚ੍ਛਪਪਿਟ੍ਠਿਸਦਿਸਾ ਇਮਾ ਹਤ੍ਥਪਾਦਪਿਟ੍ਠਿਯੋ, ਹਰਿਤਾਲਵਟ੍ਟਿਯੋ ਵਿਯ ਸੁਵਟ੍ਟਿਤਾ ਅਙ੍ਗੁਲਿਯੋ, ਮਧੁਰੋ ਸਰੋ’’ਤਿ ਗਿਹਿਕਾਲੇ ਸਲ੍ਲਕ੍ਖਿਤਪੁਬ੍ਬਂ ਆਕਾਰਂ ਅਗ੍ਗਹੇਸਿ ਸਞ੍ਜਾਨਿ ਸਲ੍ਲਕ੍ਖੇਸਿ. ਤਸ੍ਸ ਹਾਯਸ੍ਮਤੋ ਦ੍ਵਾਦਸਵਸ੍ਸਾਨਿ ਅਰਞ੍ਞਾਵਾਸਞ੍ਚੇਵ ਪਿਣ੍ਡਿਯਾਲੋਪਭੋਜਨਞ੍ਚ ਪਰਿਭੁਞ੍ਜਨ੍ਤਸ੍ਸ ਅਞ੍ਞਾਦਿਸੋ ਸਰੀਰਵਣ੍ਣੋ ਅਹੋਸਿ, ਤੇਨ ਨਂ ਸਾ ਞਾਤਿਦਾਸੀ ਦਿਸ੍ਵਾਵ ਨ ਸਞ੍ਜਾਨਿ, ਨਿਮਿਤ੍ਤਂ ਪਨ ਅਗ੍ਗਹੇਸੀਤਿ.
੩੦੦. ਰਟ੍ਠਪਾਲਸ੍ਸ ਮਾਤਰਂ ਏਤਦਵੋਚਾਤਿ ਥੇਰਸ੍ਸ ਅਙ੍ਗਪਚ੍ਚਙ੍ਗਾਨਿ ਸਣ੍ਠਾਪੇਤ੍ਵਾ ਥਞ੍ਞਂ ਪਾਯੇਤ੍ਵਾ ਸਂਵਡ੍ਢਿਤਧਾਤੀਪਿ ਸਮਾਨਾ ਪਬ੍ਬਜਿਤ੍ਵਾ ਮਹਾਖੀਣਾਸਵਭਾਵਪ੍ਪਤ੍ਤੇਨ ਸਾਮਿਪੁਤ੍ਤੇਨ ਸਦ੍ਧਿਂ – ‘‘ਤ੍ਵਂ ਨੁ ਖੋ, ਮੇ ਭਨ੍ਤੇ, ਪੁਤ੍ਤੋ ਰਟ੍ਠਪਾਲੋ’’ਤਿਆਦਿਵਚਨਂ ਵਤ੍ਤੁਂ ਅਵਿਸਹਨ੍ਤੀ ਵੇਗੇਨ ਘਰਂ ਪਵਿਸਿਤ੍ਵਾ ਰਟ੍ਠਪਾਲਸ੍ਸ ਮਾਤਰਂ ਏਤਦਵੋਚ. ਯਗ੍ਘੇਤਿ ਆਰੋਚਨਤ੍ਥੇ ਨਿਪਾਤੋ. ਸਚੇ ਜੇ ਸਚ੍ਚਨ੍ਤਿ ਏਤ੍ਥ ਜੇਤਿ ਆਲਪਨੇ ਨਿਪਾਤੋ. ਏਵਞ੍ਹਿ ਤਸ੍ਮਿਂ ਦੇਸੇ ਦਾਸਿਜਨਂ ਆਲਪਨ੍ਤਿ, ਤਸ੍ਮਾ ‘‘ਤ੍ਵਞ੍ਹਿ, ਭੋਤਿ ਦਾਸਿ, ਸਚੇ ਸਚ੍ਚਂ ਭਣਸੀ’’ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.
ਉਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਮਹਾਕੁਲੇ ਇਤ੍ਥਿਯੋ ਬਹਿ ਨਿਕ੍ਖਮਨ੍ਤਾ ਗਰਹਂ ਪਾਪੁਣਨ੍ਤਿ, ਇਦਞ੍ਚ ਅਚ੍ਚਾਯਿਕਕਿਚ੍ਚਂ, ਸੇਟ੍ਠਿਸ੍ਸ ਨਂ ਆਰੋਚੇਸ੍ਸਾਮੀਤਿ ਚਿਨ੍ਤੇਤਿ. ਤਸ੍ਮਾ ਉਪਸਙ੍ਕਮਿ. ਅਞ੍ਞਤਰਂ ਕੁਟ੍ਟਮੂਲਨ੍ਤਿ ਤਸ੍ਮਿਂ ਕਿਰ ਦੇਸੇ ਦਾਨਪਤੀਨਂ ਘਰੇਸੁ ਸਾਲਾ ਹੋਨ੍ਤਿ, ਆਸਨਾਨਿ ਚੇਤ੍ਥ ਪਞ੍ਞਤ੍ਤਾਨਿ ਹੋਨ੍ਤਿ, ਉਪਟ੍ਠਾਪਿਤਂ ਉਦਕਕਞ੍ਜਿਯਂ. ਤਤ੍ਥ ਪਬ੍ਬਜਿਤਾ ਪਿਣ੍ਡਾਯ ਚਰਿਤ੍ਵਾ ਨਿਸੀਦਿਤ੍ਵਾ ਭੁਞ੍ਜਨ੍ਤਿ. ਸਚੇ ਇਚ੍ਛਨ੍ਤਿ, ਦਾਨਪਤੀਨਮ੍ਪਿ ਸਨ੍ਤਕਂ ਗਣ੍ਹਨ੍ਤਿ. ਤਸ੍ਮਾ ਤਮ੍ਪਿ ਅਞ੍ਞਤਰਸ੍ਸ ਕੁਲਸ੍ਸ ਈਦਿਸਾਯ ਸਾਲਾਯ ਅਞ੍ਞਤਰਂ ਕੁਟ੍ਟਮੂਲਨ੍ਤਿ ਵੇਦਿਤਬ੍ਬਂ. ਨ ਹਿ ਪਬ੍ਬਜਿਤਾ ਕਪਣਮਨੁਸ੍ਸਾ ਵਿਯ ਅਸਾਰੁਪ੍ਪੇ ਠਾਨੇ ਨਿਸੀਦਿਤ੍ਵਾ ਭੁਞ੍ਜਨ੍ਤੀਤਿ.
ਅਤ੍ਥਿ ਨਾਮ ਤਾਤਾਤਿ ਏਤ੍ਥ ਅਤ੍ਥੀਤਿ ਵਿਜ੍ਜਮਾਨਤ੍ਥੇ, ਨਾਮਾਤਿ ਪੁਚ੍ਛਨਤ੍ਥੇ ਮਞ੍ਞਨਤ੍ਥੇ ਵਾ ਨਿਪਾਤੋ. ਇਦਞ੍ਹਿ ਵੁਤ੍ਤਂ ਹੋਤਿ – ਅਤ੍ਥਿ ਨੁ ਖੋ, ਤਾਤ ਰਟ੍ਠਪਾਲ, ਅਮ੍ਹਾਕਂ ਧਨਂ, ਨਨੁ ਮਯਂ ਨਿਦ੍ਧਨਾਤਿ ਵਤ੍ਤਬ੍ਬਾ, ਯੇਸਂ ਨੋ ਤ੍ਵਂ ਈਦਿਸੇ ਠਾਨੇ ਨਿਸੀਦਿਤ੍ਵਾ ਆਭਿਦੋਸਿਕਂ ਕੁਮ੍ਮਾਸਂ ਪਰਿਭੁਞ੍ਜਿਸ੍ਸਸਿ. ਤਥਾ ਅਤ੍ਥਿ ਨੁ ਖੋ, ਤਾਤ ਰਟ੍ਠਪਾਲ, ਅਮ੍ਹਾਕਂ ਜੀਵਿਤਂ, ਨਨੁ ਮਯਂ ਮਤਾਤਿ ਵਤ੍ਤਬ੍ਬਾ, ਯੇਸਂ ਨੋ ਤ੍ਵਂ ਈਦਿਸੇ ਠਾਨੇ ਨਿਸੀਦਿਤ੍ਵਾ ਆਭਿਦੋਸਿਕਂ ਕੁਮ੍ਮਾਸਂ ਪਰਿਭੁਞ੍ਜਿਸ੍ਸਸਿ. ਤਥਾ ਅਤ੍ਥਿ ਮਞ੍ਞੇ, ਤਾਤ ਰਟ੍ਠਪਾਲ, ਤਵ ਅਬ੍ਭਨ੍ਤਰੇ ਸਾਸਨਂ ਨਿਸ੍ਸਾਯ ਪਟਿਲਦ੍ਧੋ ਸਮਣਗੁਣੋ, ਯਂ ਤ੍ਵਂ ਸੁਭੋਜਨਰਸਸਂਵਡ੍ਢਿਤੋਪਿ ਇਮਂ ਜਿਗੁਚ੍ਛਨੇਯ੍ਯਂ ਆਭਿਦੋਸਿਕਂ ਕੁਮ੍ਮਾਸਂ ਅਮਤਮਿਵ ਨਿਬ੍ਬਿਕਾਰੋ ਪਰਿਭੁਞ੍ਜਿਸ੍ਸਸੀਤਿ. ਸੋ ਪਨ ਗਹਪਤਿ ਦੁਕ੍ਖਾਭਿਤੁਨ੍ਨਤਾਯ ਏਤਮਤ੍ਥਂ ਪਰਿਪੁਣ੍ਣਂ ਕਤ੍ਵਾ ਵਤ੍ਤੁਮਸਕ੍ਕੋਨ੍ਤੋ – ‘‘ਅਤ੍ਥਿ ਨਾਮ, ਤਾਤ ਰਟ੍ਠਪਾਲ, ਆਭਿਦੋਸਿਕਂ ਕੁਮ੍ਮਾਸਂ ਪਰਿਭੁਞ੍ਜਿਸ੍ਸਸੀ’’ਤਿ ਏਤ੍ਤਕਮੇਵ ਅਵਚ. ਅਕ੍ਖਰਚਿਨ੍ਤਕਾ ਪਨੇਤ੍ਥ ਇਦਂ ਲਕ੍ਖਣਂ ਵਦਨ੍ਤਿ – ਅਨੋਕਪ੍ਪਨਾਮਰਿਸਨਤ੍ਥਵਸੇਨੇਤਂ ਅਤ੍ਥਿਸਦ੍ਦੇ ਉਪਪਦੇ ‘‘ਪਰਿਭੁਞ੍ਜਿਸ੍ਸਸੀ’’ਤਿ ਅਨਾਗਤਵਚਨਂ ਕਤਂ. ਤਸ੍ਸਾਯਮਤ੍ਥੋ – ‘‘ਅਤ੍ਥਿ ਨਾਮ…ਪੇ… ਪਰਿਭੁਞ੍ਜਿਸ੍ਸਸਿ, ਇਦਂ ਪਚ੍ਚਕ੍ਖਮ੍ਪਿ ਅਹਂ ਨ ਸਦ੍ਦਹਾਮਿ ਨ ਮਰਿਸਯਾਮੀ’’ਤਿ. ਇਦਂ ਏਤ੍ਤਕਂ ਵਚਨਂ ਗਹਪਤਿ ਥੇਰਸ੍ਸ ਪਤ੍ਤਮੁਖਵਟ੍ਟਿਯਂ ਗਹੇਤ੍ਵਾ ਠਿਤਕੋਵ ਕਥੇਸਿ. ਥੇਰੋਪਿ ਪਿਤਰਿ ਪਤ੍ਤਮੁਖਵਟ੍ਟਿਯਂ ਗਹੇਤ੍ਵਾ ਠਿਤੇਯੇਵ ਤਂ ਪੂਤਿਕੁਮ੍ਮਾਸਂ ਪਰਿਭੁਞ੍ਜਿ ਸੁਨਖਵਨ੍ਤਸਦਿਸਂ ਪੂਤਿਕੁਕ੍ਕੁਟਣ੍ਡਮਿਵ ਭਿਨ੍ਨਟ੍ਠਾਨੇ ਪੂਤਿਕਂ ਵਾਯਨ੍ਤਂ. ਪੁਥੁਜ੍ਜਨੇਨ ਕਿਰ ਤਥਾਰੂਪਂ ਕੁਮ੍ਮਾਸਂ ਪਰਿਭੁਞ੍ਜਿਤੁਂ ਨ ਸਕ੍ਕਾ. ਥੇਰੋ ਪਨ ਅਰਿਯਿਦ੍ਧਿਯਂ ਠਤ੍ਵਾ ਦਿਬ੍ਬੋਜਂ ਅਮਤਰਸਂ ਪਰਿਭੁਞ੍ਜਮਾਨੋ ਵਿਯ ਪਰਿਭੁਞ੍ਜਿਤ੍ਵਾ ਧਮਕਰਣੇਨ ਉਦਕਂ ਗਹੇਤ੍ਵਾ ਪਤ੍ਤਞ੍ਚ ਮੁਖਞ੍ਚ ਹਤ੍ਥਪਾਦੇ ਚ ਧੋਵਿਤ੍ਵਾ ਕੁਤੋ ਨੋ ਗਹਪਤੀਤਿਆਦਿਮਾਹ.
ਤਤ੍ਥ ਕੁਤੋ ਨੋਤਿ ਕੁਤੋ ਨੁ. ਨੇਵ ਦਾਨਨ੍ਤਿ ਦੇਯ੍ਯਧਮ੍ਮਵਸੇਨ ਨੇਵ ਦਾਨਂ ਅਲਤ੍ਥਮ੍ਹ. ਨ ਪਚ੍ਚਕ੍ਖਾਨਨ੍ਤਿ ‘‘ਕਿਂ, ਤਾਤ ਰਟ੍ਠਪਾਲ, ਕਚ੍ਚਿ ਤੇ ਖਮਨੀਯਂ, ਕਚ੍ਚਿਸਿ ਅਪ੍ਪਕਿਲਮਥੇਨ ਆਗਤੋ, ਨ ਤਾਵ ਤਾਤ ਗੇਹੇ ਭਤ੍ਤਂ ਸਮ੍ਪਾਦਿਯਤੀ’’ਤਿ ਏਵਂ ਪਟਿਸਨ੍ਥਾਰਵਸੇਨ ਪਚ੍ਚਕ੍ਖਾਨਮ੍ਪਿ ਨ ਅਲਤ੍ਥਮ੍ਹ. ਕਸ੍ਮਾ ਪਨ ਥੇਰੋ ਏਵਮਾਹ? ਪਿਤੁ ਅਨੁਗ੍ਗਹੇਨ. ਏਵਂ ਕਿਰਸ੍ਸ ਅਹੋਸਿ – ‘‘ਯਥਾ ਏਸ ਮਂ ਵਦਤਿ, ਅਞ੍ਞੇਪਿ ਪਬ੍ਬਜਿਤੇ ਏਵਂ ਵਦਤਿ ਮਞ੍ਞੇ. ਬੁਦ੍ਧਸਾਸਨੇ ਚ ਪਤ੍ਤਨ੍ਤਰੇ ਪਦੁਮਂ ਵਿਯ ਭਸ੍ਮਾਛਨ੍ਨੋ ਅਗ੍ਗਿ ਵਿਯ ਫੇਗ੍ਗੁਪਟਿਚ੍ਛਨ੍ਨੋ ਚਨ੍ਦਨਸਾਰੋ ਵਿਯ ਸੁਤ੍ਤਿਕਾਪਟਿਚ੍ਛਨ੍ਨਂ ਮੁਤ੍ਤਰਤਨਂ ਵਿਯ ਵਲਾਹਕਪਟਿਚ੍ਛਨ੍ਨੋ ਚਨ੍ਦਿਮਾ ਵਿਯ ਮਾਦਿਸਾਨਂ ਪਟਿਚ੍ਛਨ੍ਨਗੁਣਾਨਂ ਭਿਕ੍ਖੂਨਂ ਅਨ੍ਤੋ ਨਤ੍ਥਿ, ਤੇਸੁਪਿ ਨ ਏਵਰੂਪਂ ਵਚਨਂ ਪਵਤ੍ਤੇਸ੍ਸਤਿ, ਸਂਵਰੇ ਠਸ੍ਸਤੀ’’ਤਿ ਅਨੁਗ੍ਗਹੇਨ ਏਵਮਾਹ.
ਏਹਿ ਤਾਤਾਤਿ ਤਾਤ ਤੁਯ੍ਹਂ ਘਰਂ ਮਾ ਹੋਤੁ, ਏਹਿ ਘਰਂ ਗਮਿਸ੍ਸਾਮਾਤਿ ਵਦਤਿ. ਅਲਨ੍ਤਿ ਥੇਰੋ ਉਕ੍ਕਟ੍ਠਏਕਾਸਨਿਕਤਾਯ ਪਟਿਕ੍ਖਿਪਨ੍ਤੋ ਏਵਮਾਹ. ਅਧਿਵਾਸੇਸੀਤਿ ਥੇਰੋ ਪਨ ਪਕਤਿਯਾ ਉਕ੍ਕਟ੍ਠਸਪਦਾਨਚਾਰਿਕੋ ਸ੍ਵਾਤਨਾਯਭਿਕ੍ਖਂ ਨਾਮ ਨਾਧਿਵਾਸੇਤਿ, ਮਾਤੁ ਅਨੁਗ੍ਗਹੇਨ ਪਨ ਅਧਿਵਾਸੇਸਿ. ਮਾਤੁ ਕਿਰਸ੍ਸ ਥੇਰਂ ਅਨੁਸ੍ਸਰਿਤ੍ਵਾ ਮਹਾਸੋਕੋ ਉਪ੍ਪਜ੍ਜਿ, ਰੋਦਨੇਨੇਵ ਪਕ੍ਕਕ੍ਖਿ ਵਿਯ ਜਾਤਾ, ਤਸ੍ਮਾ ਥੇਰੋ ‘‘ਸਚਾਹਂ ਤਂ ਅਪਸ੍ਸਿਤ੍ਵਾ ਗਮਿਸ੍ਸਾਮਿ, ਹਦਯਮ੍ਪਿਸ੍ਸਾ ਫਾਲੇਯ੍ਯਾ’’ਤਿ ਅਨੁਗ੍ਗਹੇਨ ਅਧਿਵਾਸੇਸਿ. ਕਾਰਾਪੇਤ੍ਵਾਤਿ ਏਕਂ ਹਿਰਞ੍ਞਸ੍ਸ, ਏਕਂ ਸੁਵਣ੍ਣਸ੍ਸਾਤਿ ਦ੍ਵੇ ਪੁਞ੍ਜੇ ਕਾਰਾਪੇਤ੍ਵਾ. ਕੀਵਮਹਨ੍ਤਾ ਪਨ ਪੁਞ੍ਜਾ ਅਹੇਸੁਨ੍ਤਿ. ਯਥਾ ਓਰਤੋ ਠਿਤੋ ਪੁਰਿਸੋ ਪਾਰਤੋ ਠਿਤਂ ਮਜ੍ਝਿਮਪ੍ਪਮਾਣਂ ਪੁਰਿਸਂ ਨ ਪਸ੍ਸਤਿ, ਏਵਂਮਹਨ੍ਤਾ.
੩੦੧. ਇਦਂ ਤੇ ਤਾਤਾਤਿ ਕਹਾਪਣਪੁਞ੍ਜਞ੍ਚ ਸੁਵਣ੍ਣਪੁਞ੍ਜਞ੍ਚ ਦਸ੍ਸੇਨ੍ਤੋ ਆਹ. ਮਤ੍ਤਿਕਨ੍ਤਿ ਮਾਤਿਤੋ ਆਗਤਂ, ਇਦਂ ਤੇ ਮਾਤਾਮਹਿਯਾ ਮਾਤੁ ਇਮਂ ਗੇਹਂ ਆਗਚ੍ਛਨ੍ਤਿਯਾ ਗਨ੍ਧਮਾਲਾਦੀਨਂ ਅਤ੍ਥਾਯ ਦਿਨ੍ਨਂ ਧਨਨ੍ਤਿ ਅਤ੍ਥੋ. ਅਞ੍ਞਂ ਪੇਤ੍ਤਿਕਂ ਅਞ੍ਞਂ ਪਿਤਾਮਹਨ੍ਤਿ ਯਂ ਪਨ ਤੇ ਪਿਤੁ ਚ ਪਿਤਾਮਹਾਨਞ੍ਚ ਸਨ੍ਤਕਂ, ਤਂ ਅਞ੍ਞਂਯੇਵ, ਨਿਹਿਤਞ੍ਚ ਪਯੁਤ੍ਤਞ੍ਚ ਅਤਿਵਿਯ ਬਹੁ. ਏਤ੍ਥ ਚ ‘‘ਪਿਤਾਮਹ’’ਨ੍ਤਿ ਤਦ੍ਧਿਤਲੋਪਂ ਕਤ੍ਵਾ ਵੁਤ੍ਤਨ੍ਤਿ ਵੇਦਿਤਬ੍ਬਂ. ‘‘ਪੇਤਾਮਹ’’ਨ੍ਤਿ ਵਾ ਪਾਠੋ. ਸਕ੍ਕਾ ਤਤੋਨਿਦਾਨਨ੍ਤਿ ਧਨਹੇਤੁ ਧਨਪਚ੍ਚਯਾ. ਤਂ ਤਂ ਧਨਂ ਰਕ੍ਖਨ੍ਤਸ੍ਸ ਚ ਰਾਜਾਦੀਨਂ ਵਸੇਨ ਧਨਪਰਿਕ੍ਖਯਂ ਪਾਪੁਣਨ੍ਤਸ੍ਸ ਕਸ੍ਸਚਿ ਉਪ੍ਪਜ੍ਜਮਾਨਸੋਕਾਦਯੋ ਸਨ੍ਧਾਯ ਏਵਮਾਹ. ਏਵਂ ਵੁਤ੍ਤੇ ਸੇਟ੍ਠਿ ਗਹਪਤਿ – ‘‘ਅਹਂ ਇਮਂ ਉਪ੍ਪਬ੍ਬਾਜੇਸ੍ਸਾਮੀਤਿ ਆਨੇਸਿਂ, ਸੋ ਦਾਨਿ ਮੇ ਧਮ੍ਮਕਥਂ ਕਾਤੁਂ ਆਰਦ੍ਧੋ, ਅਯਂ ਨ ਮੇ ਵਚਨਂ ਕਰਿਸ੍ਸਤੀ’’ਤਿ ਉਟ੍ਠਾਯ ਗਨ੍ਤ੍ਵਾ ਅਸ੍ਸ ਓਰੋਧਾਨਂ ਦ੍ਵਾਰਂ ਵਿਵਰਾਪੇਤ੍ਵਾ – ‘‘ਅਯਂ ਵੋ ਸਾਮਿਕੋ, ਗਚ੍ਛਥ ਯਂ ਕਿਞ੍ਚਿ ਕਤ੍ਵਾ ਨਂ ਗਣ੍ਹਿਤੁਂ ਵਾਯਮਥਾ’’ਤਿ ਉਯ੍ਯੋਜੇਸਿ. ਸੁਵਯੇ ਠਿਤਾ ਨਾਟਕਿਤ੍ਥਿਯੋ ਨਿਕ੍ਖਮਿਤ੍ਵਾ ਥੇਰਂ ਪਰਿਵਾਰਯਿਂਸੁ, ਤਾਸੁ ਦ੍ਵੇ ਜੇਟ੍ਠਕਿਤ੍ਥਿਯੋ ਸਨ੍ਧਾਯ ਪੁਰਾਣਦੁਤਿਯਿਕਾਤਿਆਦਿ ਵੁਤ੍ਤਂ. ਪਚ੍ਚੇਕਂ ਪਾਦੇਸੁ ਗਹੇਤ੍ਵਾਤਿ ਏਕੇਕਮ੍ਹਿ ਪਾਦੇ ਨਂ ਗਹੇਤ੍ਵਾ.
ਕੀਦਿਸਾ ਨਾਮ ਤਾ ਅਯ੍ਯਪੁਤ੍ਤ ਅਚ੍ਛਰਾਯੋਤਿ ਕਸ੍ਮਾ ਏਵਮਾਹਂਸੁ? ਤਦਾ ਕਿਰ ਸਮ੍ਬਹੁਲੇ ਖਤ੍ਤਿਯਕੁਮਾਰੇਪਿ ਬ੍ਰਾਹ੍ਮਣਕੁਮਾਰੇਪਿ ਸੇਟ੍ਠਿਪੁਤ੍ਤੇਪਿ ਮਹਾਸਮ੍ਪਤ੍ਤਿਯੋ ਪਹਾਯ ਪਬ੍ਬਜਨ੍ਤੇ ਦਿਸ੍ਵਾ ਪਬ੍ਬਜ੍ਜਾਗੁਣਂ ਅਜਾਨਨ੍ਤਾ ਕਥਂ ਸਮੁਟ੍ਠਾਪੇਨ੍ਤਿ ‘‘ਕਸ੍ਮਾ ਏਤੇ ਪਬ੍ਬਜਨ੍ਤੀ’’ਤਿ. ਅਥਞ੍ਞੇ ਵਦਨ੍ਤਿ ‘‘ਦੇਵਚ੍ਛਰਾਦੇਵਨਾਟਕਾਨਂ ਕਾਰਣਾ’’ਤਿ. ਸਾ ਕਥਾ ਵਿਤ੍ਥਾਰਿਕਾ ਅਹੋਸਿ. ਤਂ ਗਹੇਤ੍ਵਾ ਸਬ੍ਬਾ ਏਵਮਾਹਂਸੁ. ਅਥ ਥੇਰੋ ਪਟਿਕ੍ਖਿਪਨ੍ਤੋ ਨ ਖੋ ਮਯਂ ਭਗਿਨੀਤਿਆਦਿਮਾਹ. ਸਮੁਦਾਚਰਤੀਤਿ ਵੋਹਰਤਿ ਵਦਤਿ. ਤਤ੍ਥੇਵ ਮੁਚ੍ਛਿਤਾ ਪਪਤਿਂਸੂਤਿ ਤਂ ਭਗਿਨਿਵਾਦੇਨ ਸਮੁਦਾਚਰਨ੍ਤਂ ਦਿਸ੍ਵਾ ‘‘ਮਯਂ ਅਜ੍ਜ ਆਗਮਿਸ੍ਸਤਿ, ਅਜ੍ਜ ਆਗਮਿਸ੍ਸਤੀ’’ਤਿ ਦ੍ਵਾਦਸ ਵਸ੍ਸਾਨਿ ਬਹਿ ਨ ਨਿਕ੍ਖਨ੍ਤਾ, ਏਤਂ ਨਿਸ੍ਸਾਯ ਨੋ ਦਾਰਕਾ ਨ ਲਦ੍ਧਾ, ਯੇਸਂ ਆਨੁਭਾਵੇਨ ਜੀਵੇਯ੍ਯਾਮ, ਇਤੋ ਚਮ੍ਹਾ ਪਰਿਹੀਨਾ ਅਞ੍ਞਤੋ ਚ. ਅਯਂ ਲੋਕੋ ਨਾਮ ਅਤ੍ਤਨੋਵ ਚਿਨ੍ਤੇਸਿ, ਤਸ੍ਮਾ ਤਾਪਿ ‘‘ਇਦਾਨਿ ਮਯਂ ਅਨਾਥਾ ਜਾਤਾ’’ਤਿ ਅਤ੍ਤਨੋਵ ਚਿਨ੍ਤਯਮਾਨਾ – ‘‘ਅਨਤ੍ਥਿਕੋ ਦਾਨਿ ਅਮ੍ਹੇਹਿ ਅਯਂ, ਸੋ ਅਮ੍ਹੇ ਪਜਾਪਤਿਯੋ ਸਮਾਨਾ ਅਤ੍ਤਨਾ ਸਦ੍ਧਿਂ ਏਕਮਾਤੁਕੁਚ੍ਛਿਯਾ ਸਯਿਤਦਾਰਿਕਾ ਵਿਯ ਮਞ੍ਞਤੀ’’ਤਿ ਸਮੁਪ੍ਪਨ੍ਨਬਲਵਸੋਕਾ ਹੁਤ੍ਵਾ ਤਸ੍ਮਿਂਯੇਵ ਪਦੇਸੇ ਮੁਚ੍ਛਿਤਾ ਪਪਤਿਂਸੁ, ਪਤਿਤਾਤਿ ਅਤ੍ਥੋ.
ਮਾ ਨੋ ਵਿਹੇਠੇਥਾਤਿ ਮਾ ਅਮ੍ਹੇ ਧਨਂ ਦਸ੍ਸੇਤ੍ਵਾ ਮਾਤੁਗਾਮੇ ਚ ਉਯ੍ਯੋਜੇਤ੍ਵਾ ਵਿਹੇਠਯਿਤ੍ਥ, ਵਿਹੇਸਾ ਹੇਸਾ ਪਬ੍ਬਜਿਤਾਨਨ੍ਤਿ. ਕਸ੍ਮਾ ਏਵਮਾਹ? ਮਾਤਾਪਿਤੂਨਂ ਅਨੁਗ੍ਗਹੇਨ. ਸੋ ਕਿਰ ਸੇਟ੍ਠਿ – ‘‘ਪਬ੍ਬਜਿਤਲਿਙ੍ਗਂ ਨਾਮ ਕਿਲਿਟ੍ਠਂ, ਪਬ੍ਬਜ੍ਜਾਵੇਸਂ ਹਾਰੇਤ੍ਵਾ ਨ੍ਹਾਯਿਤ੍ਵਾ ਤਯੋ ਜਨਾ ਏਕਤੋ ਭੁਞ੍ਜਿਸ੍ਸਾਮਾ’’ਤਿ ਮਞ੍ਞਮਾਨੋ ਥੇਰਸ੍ਸ ਭਿਕ੍ਖਂ ਨ ਦੇਤਿ. ਥੇਰੋ – ‘‘ਮਾਦਿਸਸ੍ਸ ਖੀਣਾਸਵਸ੍ਸ ਆਹਾਰਨ੍ਤਰਾਯਂ ਕਤ੍ਵਾ ਏਤੇ ਬਹੁਂ ਅਪੁਞ੍ਞਂ ਪਸਵੇਯ੍ਯੁ’’ਨ੍ਤਿ ਤੇਸਂ ਅਨੁਗ੍ਗਹੇਨ ਏਵਮਾਹ.
੩੦੨. ਗਾਥਾ ਅਭਾਸੀਤਿ ਗਾਥਾਯੋ ਅਭਾਸਿ. ਤਤ੍ਥ ਪਸ੍ਸਾਤਿ ਸਨ੍ਤਿਕੇ ਠਿਤਜਨਂ ਸਨ੍ਧਾਯ ਵਦਤਿ. ਚਿਤ੍ਤਨ੍ਤਿ ਚਿਤ੍ਤਵਿਚਿਤ੍ਤਂ. ਬਿਮ੍ਬਨ੍ਤਿ ਅਤ੍ਤਭਾਵਂ. ਅਰੁਕਾਯਨ੍ਤਿ ਨਵਨ੍ਨਂ ਵਣਮੁਖਾਨਂ ਵਸੇਨ ਵਣਕਾਯਂ. ਸਮੁਸ੍ਸਿਤਨ੍ਤਿ ਤੀਣਿ ਅਟ੍ਠਿਸਤਾਨਿ ਨਵਹਿ ਨ੍ਹਾਰੁਸਤੇਹਿ ਬਨ੍ਧਿਤ੍ਵਾ ਨਵਹਿ ਮਂਸਪੇਸਿਸਤੇਹਿ ਲਿਮ੍ਪਿਤ੍ਵਾ ਸਮਨ੍ਤਤੋ ਉਸ੍ਸਿਤਂ. ਆਤੁਰਨ੍ਤਿ ਜਰਾਤੁਰਤਾਯ ਰੋਗਾਤੁਰਤਾਯ ਕਿਲੇਸਾਤੁਰਤਾਯ ਚ ਨਿਚ੍ਚਾਤੁਰਂ. ਬਹੁਸਙ੍ਕਪ੍ਪਨ੍ਤਿ ਪਰੇਸਂ ਉਪ੍ਪਨ੍ਨਪਤ੍ਥਨਾਸਙ੍ਕਪ੍ਪੇਹਿ ਬਹੁਸਙ੍ਕਪ੍ਪਂ. ਇਤ੍ਥੀਨਞ੍ਹਿ ਕਾਯੇ ਪੁਰਿਸਾਨਂ ਸਙ੍ਕਪ੍ਪਾ ਉਪ੍ਪਜ੍ਜਨ੍ਤਿ, ਤੇਸਂ ਕਾਯੇ ਇਤ੍ਥੀਨਂ. ਸੁਸਾਨੇ ਛਡ੍ਡਿਤਕਲ਼ੇਵਰਭੂਤਮ੍ਪਿ ਚੇਤਂ ਕਾਕਕੁਲਲਾਦਯੋ ਪਤ੍ਥਯਨ੍ਤਿਯੇਵਾਤਿ ਬਹੁਸਙ੍ਕਪ੍ਪੋ ਨਾਮ ਹੋਤਿ. ਯਸ੍ਸ ਨਤ੍ਥਿ ਧੁਵਂ ਠਿਤੀਤਿ ਯਸ੍ਸ ਕਾਯਸ੍ਸ ਮਾਯਾਮਰੀਚਿਫੇਣਪਿਣ੍ਡ ਉਦਕਪੁਪ੍ਫੁਲ਼ਾਦੀਨਂ ਵਿਯ ਏਕਂਸੇਨੇਵ ਠਿਤਿ ਨਾਮ ਨਤ੍ਥਿ, ਭਿਜ੍ਜਨਧਮ੍ਮਤਾਵ ਨਿਯਤਾ.
ਤਚੇਨ ਓਨਦ੍ਧਨ੍ਤਿ ਅਲ੍ਲਮਨੁਸ੍ਸਚਮ੍ਮੇਨ ਓਨਦ੍ਧਂ. ਸਹ ਵਤ੍ਥੇਭਿ ਸੋਭਤੀਤਿ ਗਨ੍ਧਾਦੀਹਿ ਮਣਿਕੁਣ੍ਡਲੇਹਿ ਚ ਚਿਤ੍ਤਕਤਮ੍ਪਿ ਰੂਪਂ ਵਤ੍ਥੇਹਿ ਸਹੇਵ ਸੋਭਤਿ, ਵਿਨਾ ਵਤ੍ਥੇਹਿ ਜੇਗੁਚ੍ਛਂ ਹੋਤਿ ਅਨੋਲੋਕਨਕ੍ਖਮਂ.
ਅਲਤ੍ਤਕਕਤਾਤਿ ਅਲਤ੍ਤਕੇਨ ਰਞ੍ਜਿਤਾ. ਚੁਣ੍ਣਕਮਕ੍ਖਿਤਨ੍ਤਿ ਸਾਸਪਕਕ੍ਕੇਨ ਮੁਖਪੀਲ਼ਕਾਦੀਨਿ ਨੀਹਰਿਤ੍ਵਾ ਲੋਣਮਤ੍ਤਿਕਾਯ ਦੁਟ੍ਠਲੋਹਿਤਂ ਵਿਲਿਯਾਪੇਤ੍ਵਾ ਤਿਲਪਿਟ੍ਠੇਨ ਲੋਹਿਤਂ ਪਸਾਦੇਤ੍ਵਾ ਹਲਿਦ੍ਦਿਯਾ ਵਣ੍ਣਂ ਸਮ੍ਪਾਦੇਤ੍ਵਾ ਚੁਣ੍ਣਕਗਣ੍ਡਿਕਾਯ ਮੁਖਂ ਪਹਰਨ੍ਤਿ, ਤੇਨੇਸ ਅਤਿਵਿਯ ਵਿਰੋਚਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ.
ਅਟ੍ਠਾਪਦਕਤਾਤਿ ਰਸੋਦਕੇਨ ਮਕ੍ਖਿਤ੍ਵਾ ਨਲਾਟਪਰਿਯਨ੍ਤੇ ਆਵਤ੍ਤਨਪਰਿਵਤ੍ਤੇ ਕਤ੍ਵਾ ਅਟ੍ਠਪਦਕਰਚਨਾਯ ਰਚਿਤਾ. ਅਞ੍ਜਨੀਤਿ ਅਞ੍ਜਨਨਾਲ਼ਿਕਾ.
ਓਦਹੀਤਿ ਠਪੇਸਿ. ਪਾਸਨ੍ਤਿ ਵਾਕਰਾਜਾਲਂ. ਨਾਸਦਾਤਿ ਨ ਘਟ੍ਟਯਿ. ਨਿਵਾਪਨ੍ਤਿ ਨਿਵਾਪਸੁਤ੍ਤੇ ਵੁਤ੍ਤਨਿਵਾਪਤਿਣਸਦਿਸਭੋਜਨਂ. ਕਨ੍ਦਨ੍ਤੇਤਿ ਵਿਰਵਮਾਨੇ ਪਰਿਦੇਵਮਾਨੇ. ਇਮਾਯ ਹਿ ਗਾਥਾਯ ਥੇਰੋ ਮਾਤਾਪਿਤਰੋ ਮਿਗਲੁਦ੍ਦਕੇ ਵਿਯ ਕਤ੍ਵਾ ਦਸ੍ਸੇਸਿ, ਅਵਸੇਸਞਾਤਕੇ ਮਿਗਲੁਦ੍ਦਕਪਰਿਸਂ ਵਿਯ, ਹਿਰਞ੍ਞਸੁਵਣ੍ਣਂ ਵਾਕਰਾਜਾਲਂ ਵਿਯ, ਅਤ੍ਤਨਾ ਭੁਤ੍ਤਭੋਜਨਂ ਨਿਵਾਪਤਿਣਂ ਵਿਯ, ਅਤ੍ਤਾਨਂ ਮਹਾਮਿਗਂ ਵਿਯ ਕਤ੍ਵਾ ਦਸ੍ਸੇਸਿ. ਯਥਾ ਹਿ ਮਹਾਮਿਗੋ ਯਾਵਦਤ੍ਥਂ ਨਿਵਾਪਤਿਣਂ ਖਾਦਿਤ੍ਵਾ ਪਾਨੀਯਂ ਪਿਵਿਤ੍ਵਾ ਗੀਵਂ ਉਕ੍ਖਿਪਿਤ੍ਵਾ ਦਿਸਂ ਓਲੋਕੇਤ੍ਵਾ ‘‘ਇਮਂ ਨਾਮ ਠਾਨਂ ਗਤਸ੍ਸ ਸੋਤ੍ਥਿ ਭਵਿਸ੍ਸਤੀ’’ਤਿ ਮਿਗਲੁਦ੍ਦਕਾਨਂ ਪਰਿਦੇਵਨ੍ਤਾਨਂਯੇਵ ਵਾਕਰਂ ਅਘਟ੍ਟਯਮਾਨੋਵ ਉਪ੍ਪਤਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਘਨਚ੍ਛਾਯਸ੍ਸ ਛਤ੍ਤਸ੍ਸ ਵਿਯ ਗੁਮ੍ਬਸ੍ਸ ਹੇਟ੍ਠਾ ਮਨ੍ਦਮਨ੍ਦੇਨ ਵਾਤੇਨ ਬੀਜਯਮਾਨੋ ਆਗਤਮਗ੍ਗਂ ਓਲੋਕੇਨ੍ਤੋ ਤਿਟ੍ਠਤਿ, ਏਵਮੇਵ ਥੇਰੋ ਇਮਾ ਗਾਥਾ ਭਾਸਿਤ੍ਵਾ ਆਕਾਸੇਨੇਵ ਗਨ੍ਤ੍ਵਾ ਮਿਗਚੀਰੇ ਪਚ੍ਚੁਪਟ੍ਠਾਸਿ.
ਕਸ੍ਮਾ ਪਨ ਥੇਰੋ ਆਕਾਸੇਨ ਗਤੋਤਿ. ਪਿਤਾ ਕਿਰਸ੍ਸ ਸੇਟ੍ਠਿ ਸਤ੍ਤਸੁ ਦ੍ਵਾਰਕੋਟ੍ਠਕੇਸੁ ਅਗ੍ਗਲ਼ਂ ਦਾਪੇਤ੍ਵਾ ਮਲ੍ਲੇ ਆਣਾਪੇਸਿ – ‘‘ਸਚੇ ਨਿਕ੍ਖਮਿਤ੍ਵਾ ਗਚ੍ਛਤਿ, ਹਤ੍ਥਪਾਦੇਸੁ ਨਂ ਗਹੇਤ੍ਵਾ ਕਾਸਾਯਾਨਿ ਹਰਿਤ੍ਵਾ ਗਿਹਿਵੇਸਂ ਗਣ੍ਹਾਪੇਥਾ’’ਤਿ. ਤਸ੍ਮਾ ਥੇਰੋ – ‘‘ਏਤੇ ਮਾਦਿਸਂ ਮਹਾਖੀਣਾਸਵਂ ਹਤ੍ਥੇ ਵਾ ਪਾਦੇ ਵਾ ਗਹੇਤ੍ਵਾ ਅਪੁਞ੍ਞਂ ਪਸਵੇਯ੍ਯੁਂ, ਤਂ ਨੇਸਂ ਮਾ ਅਹੋਸੀ’’ਤਿ ਚਿਨ੍ਤੇਤ੍ਵਾ ਆਕਾਸੇਨ ਅਗਮਾਸਿ. ਪਰਸਮੁਦ੍ਦਵਾਸਿਤ੍ਥੇਰਾਨਂ ਪਨ – ‘‘ਠਿਤਕੋਵ ਇਮਾ ਗਾਥਾ ਭਾਸਿਤ੍ਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਰਞ੍ਞੋ ਕੋਰਬ੍ਯਸ੍ਸ ਮਿਗਚੀਰੇ ਪਚ੍ਚੁਪਟ੍ਠਾਸੀ’’ਤਿ ਅਯਂ ਵਾਚਨਾਮਗ੍ਗੋਯੇਵ.
੩੦੩. ਮਿਗਵੋਤਿ ਤਸ੍ਸ ਉਯ੍ਯਾਨਪਾਲਸ੍ਸ ਨਾਮਂ. ਸੋਧੇਨ੍ਤੋਤਿ ਉਯ੍ਯਾਨਮਗ੍ਗਂ ਸਮਂ ਕਾਰੇਤ੍ਵਾ ਅਨ੍ਤੋਉਯ੍ਯਾਨੇ ਤਚ੍ਛਿਤਬ੍ਬਯੁਤ੍ਤਟ੍ਠਾਨਾਨਿ ਤਚ੍ਛਾਪੇਨ੍ਤੋ ਸਮ੍ਮਜ੍ਜਿਤਬ੍ਬਯੁਤ੍ਤਾਨਿ ਠਾਨਾਨਿ ਸਮ੍ਮਜ੍ਜਾਪੇਨ੍ਤੋ ਵਾਲੁਕਾਓਕਿਰਣ-ਪੁਪ੍ਫਵਿਕਿਰਣ-ਪੁਣ੍ਣਘਟਟ੍ਠਪਨ-ਕਦਲਿਕ੍ਖਨ੍ਧਠਪਨਾਦੀਨਿ ਚ ਕਰੋਨ੍ਤੋਤਿ ਅਤ੍ਥੋ. ਯੇਨ ਰਾਜਾ ਕੋਰਬ੍ਯੋ ਤੇਨੁਪਸਙ੍ਕਮੀਤਿ ਅਮ੍ਹਾਕਂ ਰਾਜਾ ਸਦਾ ਇਮਸ੍ਸ ਕੁਲਪੁਤ੍ਤਸ੍ਸ ਵਣ੍ਣਂ ਕਥੇਸਿ, ਪਸ੍ਸਿਤੁਕਾਮੋ ਏਤਂ, ਆਗਤਭਾਵਂ ਪਨਸ੍ਸ ਨ ਜਾਨਾਤਿ, ਮਹਾ ਖੋ ਪਨਾਯਂ ਪਣ੍ਣਾਕਾਰੋ, ਗਨ੍ਤ੍ਵਾ ਰਞ੍ਞੋ ਆਰੋਚੇਸ੍ਸਾਮੀਤਿ ਚਿਨ੍ਤੇਤ੍ਵਾ ਯੇਨ ਰਾਜਾ ਕੋਰਬ੍ਯੋ ਤੇਨੁਪਸਙ੍ਕਮਿ.
ਕਿਤ੍ਤਯਮਾਨੋ ਅਹੋਸੀਤਿ ਸੋ ਕਿਰ ਰਾਜਾ ਥੇਰਂ ਅਨੁਸ੍ਸਰਿਤ੍ਵਾ ਬਲਮਜ੍ਝੇਪਿ ਨਾਟਕਮਜ੍ਝੇਪਿ – ‘‘ਦੁਕ੍ਕਰਂ ਕਤਂ ਕੁਲਪੁਤ੍ਤੇਨ ਤਾਵ ਮਹਨ੍ਤਂ ਸਮ੍ਪਤ੍ਤਿਂ ਪਹਾਯ ਪਬ੍ਬਜਿਤ੍ਵਾ ਪੁਨਨਿਵਤ੍ਤਿਤ੍ਵਾ ਅਨਪਲੋਕੇਨ੍ਤੇਨਾ’’ਤਿ ਗੁਣਂ ਕਥੇਸਿ, ਤਂ ਗਹੇਤ੍ਵਾ ਅਯਂ ਏਵਮਾਹ. ਵਿਸ੍ਸਜ੍ਜੇਥਾਤਿ ਵਤ੍ਵਾਤਿ ਓਰੋਧਮਹਾਮਤ੍ਤਬਲਕਾਯਾਦੀਸੁ ਯਸ੍ਸ ਯਂ ਅਨੁਚ੍ਛਵਿਕਂ, ਤਸ੍ਸ ਤਂ ਦਾਪੇਤ੍ਵਾਤਿ ਅਤ੍ਥੋ. ਉਸ੍ਸਟਾਯ ਉਸ੍ਸਟਾਯਾਤਿ ਉਸ੍ਸਿਤਾਯ ਉਸ੍ਸਿਤਾਯ, ਮਹਾਮਤ੍ਤਮਹਾਰਟ੍ਠਿਕਾਦੀਨਂ ਵਸੇਨ ਉਗ੍ਗਤੁਗ੍ਗਤਮੇਵ ਪਰਿਸਂ ਗਹੇਤ੍ਵਾ ਉਪਸਙ੍ਕਮੀਤਿ ਅਤ੍ਥੋ. ਇਧ ਭਵਂ ਰਟ੍ਠਪਾਲੋ ਹਤ੍ਥਤ੍ਥਰੇ ਨਿਸੀਦਤੂਤਿ ਹਤ੍ਥਤ੍ਥਰੋ ਤਨੁਕੋ ਬਹਲਪੁਪ੍ਫਾਦਿਗੁਣਂ ਕਤ੍ਵਾ ਅਤ੍ਥਤੋ ਅਭਿਲਕ੍ਖਿਤੋ ਹੋਤਿ, ਤਾਦਿਸੇ ਅਨਾਪੁਚ੍ਛਿਤ੍ਵਾ ਨਿਸੀਦਿਤੁਂ ਨ ਯੁਤ੍ਤਨ੍ਤਿ ਮਞ੍ਞਮਾਨੋ ਏਵਮਾਹ.
੩੦੪. ਪਾਰਿਜੁਞ੍ਞਾਨੀਤਿ ਪਾਰਿਜੁਞ੍ਞਭਾਵਾ ਪਰਿਕ੍ਖਯਾ. ਜਿਣ੍ਣੋਤਿ ਜਰਾਜਿਣ੍ਣੋ. ਵੁਡ੍ਢੋਤਿ ਵਯੋਵੁਡ੍ਢੋ. ਮਹਲ੍ਲਕੋਤਿ ਜਾਤਿਮਹਲ੍ਲਕੋ. ਅਦ੍ਧਗਤੋਤਿ ਅਦ੍ਧਾਨਂ ਅਤਿਕ੍ਕਨ੍ਤੋ. ਵਯੋਅਨੁਪ੍ਪਤ੍ਤੋਤਿ ਪਚ੍ਛਿਮਵਯਂ ਅਨੁਪ੍ਪਤ੍ਤੋ. ਪਬ੍ਬਜਤੀਤਿ ਧੁਰਵਿਹਾਰਂ ਗਨ੍ਤ੍ਵਾ ਭਿਕ੍ਖੂ ਵਨ੍ਦਿਤ੍ਵਾ, – ‘‘ਭਨ੍ਤੇ, ਮਯਾ ਦਹਰਕਾਲੇ ਬਹੁਂ ਕੁਸਲਂ ਕਤਂ, ਇਦਾਨਿ ਮਹਲ੍ਲਕੋਮ੍ਹਿ, ਮਹਲ੍ਲਕਸ੍ਸ ਚੇਸਾ ਪਬ੍ਬਜ੍ਜਾ ਨਾਮ, ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਅਪ੍ਪਹਰਿਤਂ ਕਤ੍ਵਾ ਜੀਵਿਸ੍ਸਾਮਿ, ਪਬ੍ਬਾਜੇਥ ਮਂ, ਭਨ੍ਤੇ,’’ਤਿ ਕਾਰੁਞ੍ਞਂ ਉਪ੍ਪਾਦੇਨ੍ਤੋ ਯਾਚਤਿ, ਥੇਰਾ ਅਨੁਕਮ੍ਪਾਯ ਪਬ੍ਬਾਜੇਨ੍ਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਦੁਤਿਯਵਾਰੇਪਿ ਏਸੇਵ ਨਯੋ.
ਅਪ੍ਪਾਬਾਧੋਤਿ ਅਰੋਗੋ. ਅਪ੍ਪਾਤਙ੍ਕੋਤਿ ਨਿਦ੍ਦੁਕ੍ਖੋ. ਸਮਵੇਪਾਕਿਨਿਯਾਤਿ ਸਮਵਿਪਾਚਨਿਯਾ. ਗਹਣਿਯਾਤਿ ਕਮ੍ਮਜਤੇਜੋਧਾਤੁਯਾ. ਤਤ੍ਥ ਯਸ੍ਸ ਭੁਤ੍ਤਭੁਤ੍ਤੋ ਆਹਾਰੋ ਜੀਰਤਿ, ਯਸ੍ਸ ਵਾ ਪਨ ਪੁਟਭਤ੍ਤਂ ਵਿਯ ਤਥੇਵ ਤਿਟ੍ਠਤਿ, ਉਭੋਪੇਤੇ ਨ ਸਮਵੇਪਾਕਿਨਿਯਾ ਗਹਣਿਯਾ ਸਮਨ੍ਨਾਗਤਾ. ਯਸ੍ਸ ਪਨ ਭੁਤ੍ਤਕਾਲੇ ਭਤ੍ਤਚ੍ਛਨ੍ਦੋ ਉਪ੍ਪਜ੍ਜਤੇਵ, ਅਯਂ ਸਮਵੇਪਾਕਿਨਿਯਾ ਸਮਨ੍ਨਾਗਤੋ. ਨਾਤਿਸੀਤਾਯ ਨਚ੍ਚੁਣ੍ਹਾਯਾਤਿ ਤੇਨੇਵ ਕਾਰਣੇਨ ਨਾਤਿਸੀਤਾਯ ਨਚ੍ਚੁਣ੍ਹਾਯ. ਅਨੁਪੁਬ੍ਬੇਨਾਤਿ ਰਾਜਾਨੋ ਵਾ ਹਰਨ੍ਤੀਤਿਆਦਿਨਾ ਅਨੁਕ੍ਕਮੇਨ. ਦੁਤਿਯਵਾਰੇ ਰਾਜਭਯਚੋਰਭਯਛਾਤਕਭਯਾਦਿਨਾ ਅਨੁਕ੍ਕਮੇਨ.
੩੦੫. ਧਮ੍ਮੁਦ੍ਦੇਸਾ ਉਦ੍ਦਿਟ੍ਠਾਤਿ ਧਮ੍ਮਨਿਦ੍ਦੇਸਾ ਉਦ੍ਦਿਟ੍ਠਾ. ਉਪਨਿਯ੍ਯਤੀਤਿ ਜਰਾਮਰਣਸਨ੍ਤਿਕਂ ਗਚ੍ਛਤਿ, ਆਯੁਕ੍ਖਯੇਨ ਵਾ ਤਤ੍ਥ ਨਿਯ੍ਯਤਿ. ਅਦ੍ਧੁਵੋਤਿ ਧੁਵਟ੍ਠਾਨਵਿਰਹਿਤੋ. ਅਤਾਣੋਤਿ ਤਾਯਿਤੁਂ ਸਮਤ੍ਥੇਨ ਵਿਰਹਿਤੋ. ਅਨਭਿਸ੍ਸਰੋਤਿ ਅਸਰਣੋ ਅਭਿਸਰਿਤ੍ਵਾ ਅਭਿਗਨ੍ਤ੍ਵਾ ਅਸ੍ਸਾਸੇਤੁਂ ਸਮਤ੍ਥੇਨ ਵਿਰਹਿਤੋ. ਅਸ੍ਸਕੋਤਿ ਨਿਸ੍ਸਕੋ ਸਕਭਣ੍ਡਵਿਰਹਿਤੋ. ਸਬ੍ਬਂ ਪਹਾਯ ਗਮਨੀਯਨ੍ਤਿ ਸਕਭਣ੍ਡਨ੍ਤਿ ਸਲ੍ਲਕ੍ਖਿਤਂ ਸਬ੍ਬਂ ਪਹਾਯ ਲੋਕੇਨ ਗਨ੍ਤਬ੍ਬਂ. ਤਣ੍ਹਾਦਾਸੋਤਿ ਤਣ੍ਹਾਯ ਦਾਸੋ.
੩੦੬. ਹਤ੍ਥਿਸ੍ਮਿਨ੍ਤਿ ਹਤ੍ਥਿਸਿਪ੍ਪੇ. ਕਤਾਵੀਤਿ ਕਤਕਰਣੀਯੋ, ਸਿਕ੍ਖਿਤਸਿਕ੍ਖੋ ਪਗੁਣਸਿਪ੍ਪੋਤਿ ਅਤ੍ਥੋ. ਏਸ ਨਯੋ ਸਬ੍ਬਤ੍ਥ. ਊਰੁਬਲੀਤਿ ਊਰੁਬਲਸਮ੍ਪਨ੍ਨੋ. ਯਸ੍ਸ ਹਿ ਫਲਕਞ੍ਚ ਆਵੁਧਞ੍ਚ ਗਹੇਤ੍ਵਾ ਪਰਸੇਨਂ ਪਵਿਸਿਤ੍ਵਾ ਅਭਿਨ੍ਨਂ ਭਿਨ੍ਦਤੋ ਭਿਨ੍ਨਂ ਸਨ੍ਧਾਰਯਤੋ ਪਰਹਤ੍ਥਗਤਂ ਰਜ੍ਜਂ ਆਹਰਿਤੁਂ ਊਰੁਬਲਂ ਅਤ੍ਥਿ, ਅਯਂ ਊਰੁਬਲੀ ਨਾਮ. ਬਾਹੁਬਲੀਤਿ ਬਾਹੁਬਲਸਮ੍ਪਨ੍ਨੋ. ਸੇਸਂ ਪੁਰਿਮਸਦਿਸਮੇਵ. ਅਲਮਤ੍ਤੋਤਿ ਸਮਤ੍ਥਅਤ੍ਤਭਾਵੋ.
ਪਰਿਯੋਧਾਯ ਵਤ੍ਤਿਸ੍ਸਨ੍ਤੀਤਿ ਉਪ੍ਪਨ੍ਨਂ ਉਪ੍ਪਦ੍ਦਵਂ ਓਧਾਯ ਅਵਤ੍ਥਰਿਤ੍ਵਾ ਵਤ੍ਤਿਸ੍ਸਨ੍ਤੀਤਿ ਸਲ੍ਲਕ੍ਖੇਤ੍ਵਾ ਗਹਿਤਾ.
ਸਂਵਿਜ੍ਜਤਿ ਖੋ, ਭੋ ਰਟ੍ਠਪਾਲ, ਇਮਸ੍ਮਿਂ ਰਾਜਕੁਲੇ ਪਹੂਤਂ ਹਿਰਞ੍ਞਸੁਵਣ੍ਣਨ੍ਤਿ ਇਦਂ ਸੋ ਰਾਜਾ ਉਪਰਿ ਧਮ੍ਮੁਦ੍ਦੇਸਸ੍ਸ ਕਾਰਣਂ ਆਹਰਨ੍ਤੋ ਆਹ.
ਅਥਾਪਰਂ ਏਤਦਵੋਚਾਤਿ ਏਤਂ ‘‘ਪਸ੍ਸਾਮਿ ਲੋਕੇ’’ਤਿਆਦਿਨਾ ਨਯੇਨ ਚਤੁਨ੍ਨਂ ਧਮ੍ਮੁਦ੍ਦੇਸਾਨਂ ਅਨੁਗੀਤਿਂ ਅਵੋਚ.
੩੦੭. ਤਤ੍ਥ ਭਿਯ੍ਯੋਵ ਕਾਮੇ ਅਭਿਪਤ੍ਥਯਨ੍ਤੀਤਿ ਏਕਂ ਲਭਿਤ੍ਵਾ ਦ੍ਵੇ ਪਤ੍ਥਯਨ੍ਤਿ, ਦ੍ਵੇ ਲਭਿਤ੍ਵਾ ਚਤ੍ਤਾਰੋਤਿ ਏਵਂ ਉਤ੍ਤਰੁਤ੍ਤਰਿ ਵਤ੍ਥੁਕਾਮਕਿਲੇਸਕਾਮੇ ਪਤ੍ਥਯਨ੍ਤਿਯੇਵ.
ਪਸਯ੍ਹਾਤਿ ਸਪਤ੍ਤਗਣਂ ਅਭਿਭਵਿਤ੍ਵਾ. ਸਸਾਗਰਨ੍ਤਨ੍ਤਿ ਸਦ੍ਧਿਂ ਸਾਗਰਨ੍ਤੇਨ. ਓਰਂ ਸਮੁਦ੍ਦਸ੍ਸਾਤਿ ਯਂ ਸਮੁਦ੍ਦਸ੍ਸ ਓਰਤੋ ਸਕਰਟ੍ਠਂ, ਤੇਨ ਅਤਿਤ੍ਤਰੂਪੋਤਿ ਅਤ੍ਥੋ. ਨ ਹਤ੍ਥੀਤਿ ਨ ਹਿ ਅਤ੍ਥਿ.
ਅਹੋ ਵਤਾ ਨੋਤਿ ਅਹੋ ਵਤ ਨੁ, ਅਯਮੇਵ ਵਾ ਪਾਠੋ. ਅਮਰਾਤਿ ਚਾਹੂਤਿ ਅਮਰਂ ਇਤਿ ਚ ਆਹੁ. ਇਦਂ ਵੁਤ੍ਤਂ ਹੋਤਿ – ਯਂ ਮਤਂ ਞਾਤੀ ਪਰਿਵਾਰੇਤ੍ਵਾ ਕਨ੍ਦਨ੍ਤਿ, ਤਂ – ‘‘ਅਹੋ ਵਤ ਅਮ੍ਹਾਕਂ ਭਾਤਾ ਮਤੋ, ਪੁਤ੍ਤੋ ਮਤੋ’’ਤਿਆਦੀਨਿਪਿ ਵਦਨ੍ਤਿ.
ਫੁਸਨ੍ਤਿ ਫਸ੍ਸਨ੍ਤਿ ਮਰਣਫਸ੍ਸਂ ਫੁਸਨ੍ਤਿ. ਤਥੇਵ ਫੁਟ੍ਠੋਤਿ ਯਥਾ ਬਾਲੋ, ਧੀਰੋਪਿ ਤਥੇਵ ਮਰਣਫਸ੍ਸੇਨ ਫੁਟ੍ਠੋ, ਅਫੁਟ੍ਠੋ ਨਾਮ ਨਤ੍ਥਿ, ਅਯਂ ਪਨ ਵਿਸੇਸੋ. ਬਾਲੋ ਚ ਬਾਲ੍ਯਾ ਵਧਿਤੋਵ ਸੇਤੀਤਿ ਬਾਲੋ ਬਾਲਭਾਵੇਨ ਮਰਣਫਸ੍ਸਂ ਆਗਮ੍ਮ ਵਧਿਤੋਵ ਸੇਤਿ ਅਭਿਹਤੋਵ ਸਯਤਿ. ਅਕਤਂ ਵਤ ਮੇ ਕਲ੍ਯਾਣਨ੍ਤਿਆਦਿਵਿਪ੍ਪਟਿਸਾਰਵਸੇਨ ਚਲਤਿ ਵੇਧਤਿ ਵਿਪ੍ਫਨ੍ਦਤਿ. ਧੀਰੋ ਚ ਨ ਵੇਧਤੀਤਿ ਧੀਰੋ ਸੁਗਤਿਨਿਮਿਤ੍ਤਂ ਪਸ੍ਸਨ੍ਤੋ ਨ ਵੇਧਤਿ ਨ ਚਲਤਿ.
ਯਾਯ ਵੋਸਾਨਂ ਇਧਾਧਿਗਚ੍ਛਤੀਤਿ ਯਾਯ ਪਞ੍ਞਾਯ ਇਮਸ੍ਮਿਂ ਲੋਕੇ ਸਬ੍ਬਕਿਚ੍ਚਵੋਸਾਨਂ ਅਰਹਤ੍ਤਂ ਅਧਿਗਚ੍ਛਤਿ, ਸਾਵ ਧਨਤੋ ਉਤ੍ਤਮਤਰਾ. ਅਬ੍ਯੋਸਿਤਤ੍ਤਾਤਿ ਅਪਰਿਯੋਸਿਤਤ੍ਤਾ, ਅਰਹਤ੍ਤਪਤ੍ਤਿਯਾ, ਅਭਾਵੇਨਾਤਿ ਅਤ੍ਥੋ. ਭਵਾਭਵੇਸੂਤਿ ਹੀਨਪ੍ਪਣੀਤੇਸੁ ਭਵੇਸੁ.
ਉਪੇਤਿ ਗਬ੍ਭਞ੍ਚ ਪਰਞ੍ਚ ਲੋਕਨ੍ਤਿ ਤੇਸੁ ਪਾਪਂ ਕਰੋਨ੍ਤੇਸੁ ਯੋ ਕੋਚਿ ਸਤ੍ਤੋ ਪਰਮ੍ਪਰਾਯ ਸਂਸਾਰਂ ਆਪਜ੍ਜਿਤ੍ਵਾ ਗਬ੍ਭਞ੍ਚ ਪਰਞ੍ਚ ਲੋਕਂ ਉਪੇਤਿ. ਤਸ੍ਸਪ੍ਪਪਞ੍ਞੋਤਿ ਤਸ੍ਸ ਤਾਦਿਸਸ੍ਸ ਅਪ੍ਪਪਞ੍ਞਸ੍ਸ ਅਞ੍ਞੋ ਅਪ੍ਪਪਞ੍ਞੋ ਅਭਿਸਦ੍ਦਹਨ੍ਤੋ.
ਸਕਮ੍ਮੁਨਾ ਹਞ੍ਞਤੀਤਿ ਅਤ੍ਤਨਾ ਕਤਕਮ੍ਮਵਸੇਨ ‘‘ਕਸਾਹਿਪਿ ਤਾਲੇਤੀ’’ਤਿਆਦੀਹਿ ਕਮ੍ਮਕਾਰਣਾਹਿ ਹਞ੍ਞਤਿ. ਪੇਚ੍ਚ ਪਰਮ੍ਹਿ ਲੋਕੇਤਿ ਇਤੋ ਗਨ੍ਤ੍ਵਾ ਪਰਮ੍ਹਿ ਅਪਾਯਲੋਕੇ.
ਵਿਰੂਪਰੂਪੇਨਾਤਿ ਵਿਵਿਧਰੂਪੇਨ, ਨਾਨਾਸਭਾਵੇਨਾਤਿ ਅਤ੍ਥੋ. ਕਾਮਗੁਣੇਸੂਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕੇਸੁ ਸਬ੍ਬਕਾਮਗੁਣੇਸੁ ਆਦੀਨਵਂ ਦਿਸ੍ਵਾ. ਦਹਰਾਤਿ ਅਨ੍ਤਮਸੋ ਕਲਲਮਤ੍ਤਭਾਵਂ ਉਪਾਦਾਯ ਤਰੁਣਾ. ਵੁਡ੍ਢਾਤਿ ਵਸ੍ਸਸਤਾਤਿਕ੍ਕਨ੍ਤਾ. ਅਪਣ੍ਣਕਂ ਸਾਮਞ੍ਞਮੇਵ ਸੇਯ੍ਯੋਤਿ ਅਵਿਰੁਦ੍ਧਂ ਅਦ੍ਵਜ੍ਝਗਾਮਿਂ ਏਕਨ੍ਤਨਿਯ੍ਯਾਨਿਕਂ ਸਾਮਞ੍ਞਮੇਵ ‘‘ਸੇਯ੍ਯੋ, ਉਤ੍ਤਰਿਤਰਞ੍ਚ ਪਣੀਤਤਰਞ੍ਚਾ’’ਤਿ ਉਪਧਾਰੇਤ੍ਵਾ ਪਬ੍ਬਜਿਤੋਸ੍ਮਿ ਮਹਾਰਾਜਾਤਿ. ਤਸ੍ਮਾ ਯਂ ਤ੍ਵਂ ਵਦਸਿ – ‘‘ਕਿਂ ਦਿਸ੍ਵਾ ਵਾ ਸੁਤ੍ਵਾ ਵਾ’’ਤਿ, ਇਦਂ ਦਿਸ੍ਵਾ ਚ ਸੁਤ੍ਵਾ ਚ ਪਬ੍ਬਜਿਤੋਸ੍ਮੀਤਿ ਮਂ ਧਾਰੇਹੀਤਿ ਦੇਸਨਂ ਨਿਟ੍ਠਾਪੇਸੀਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਰਟ੍ਠਪਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਮਘਦੇਵਸੁਤ੍ਤਵਣ੍ਣਨਾ
੩੦੮. ਏਵਂ ਮੇ ਸੁਤਨ੍ਤਿ ਮਘਦੇਵਸੁਤ੍ਤਂ. ਤਤ੍ਥ ਮਘਦੇਵਅਮ੍ਬਵਨੇਤਿ ਪੁਬ੍ਬੇ ਮਘਦੇਵੋ ਨਾਮ ਰਾਜਾ ਤਂ ਅਮ੍ਬਵਨਂ ਰੋਪੇਸਿ. ਤੇਸੁ ਰੁਕ੍ਖੇਸੁ ਪਲੁਜ੍ਜਮਾਨੇਸੁ ਅਪਰਭਾਗੇ ਅਞ੍ਞੇਪਿ ਰਾਜਾਨੋ ਰੋਪੇਸੁਂਯੇਵ. ਤਂ ਪਨ ਪਠਮਵੋਹਾਰਵਸੇਨ ਮਘਦੇਵਮ੍ਬਵਨਨ੍ਤੇਵ ਸਙ੍ਖਂ ਗਤਂ. ਸਿਤਂ ਪਾਤ੍ਵਾਕਾਸੀਤਿ ਸਾਯਨ੍ਹਸਮਯੇ ਵਿਹਾਰਚਾਰਿਕਂ ਚਰਮਾਨੋ ਰਮਣੀਯਂ ਭੂਮਿਭਾਗਂ ਦਿਸ੍ਵਾ – ‘‘ਵਸਿਤਪੁਬ੍ਬਂ ਨੁ ਖੋ ਮੇ ਇਮਸ੍ਮਿਂ ਓਕਾਸੇ’’ਤਿ ਆਵਜ੍ਜਨ੍ਤੋ – ‘‘ਪੁਬ੍ਬੇ ਅਹਂ ਮਘਦੇਵੋ ਨਾਮ ਰਾਜਾ ਹੁਤ੍ਵਾ ਇਮਂ ਅਮ੍ਬਵਨਂ ਰੋਪੇਸਿਂ, ਏਤ੍ਥੇਵ ਪਬ੍ਬਜਿਤ੍ਵਾ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਂ. ਤਂ ਖੋ ਪਨੇਤਂ ਕਾਰਣਂ ਭਿਕ੍ਖੁਸਙ੍ਘਸ੍ਸ ਅਪਾਕਟਂ, ਪਾਕਟਂ ਕਰਿਸ੍ਸਾਮੀ’’ਤਿ ਅਗ੍ਗਗ੍ਗਦਨ੍ਤੇ ਦਸ੍ਸੇਨ੍ਤੋ ਸਿਤਂ ਪਾਤੁ ਅਕਾਸਿ.
ਧਮ੍ਮੋ ਅਸ੍ਸ ਅਤ੍ਥੀਤਿ ਧਮ੍ਮਿਕੋ. ਧਮ੍ਮੇਨ ਰਾਜਾ ਜਾਤੋਤਿ ਧਮ੍ਮਰਾਜਾ. ਧਮ੍ਮੇ ਠਿਤੋਤਿ ਦਸਕੁਸਲਕਮ੍ਮਪਥਧਮ੍ਮੇ ਠਿਤੋ. ਧਮ੍ਮਂ ਚਰਤੀਤਿ ਸਮਂ ਚਰਤਿ. ਤਤ੍ਰ ਬ੍ਰਾਹ੍ਮਣਗਹਪਤਿਕੇਸੂਤਿ ਯੋਪਿ ਸੋ ਪੁਬ੍ਬਰਾਜੂਹਿ ਬ੍ਰਾਹ੍ਮਣਾਨਂ ਦਿਨ੍ਨਪਰਿਹਾਰੋ, ਤਂ ਅਹਾਪੇਤ੍ਵਾ ਪਕਤਿਨਿਯਾਮੇਨੇਵ ਅਦਾਸਿ, ਤਥਾ ਗਹਪਤਿਕਾਨਂ. ਤਂ ਸਨ੍ਧਾਯੇਤਂ ਵੁਤ੍ਤਂ. ਪਕ੍ਖਸ੍ਸਾਤਿ ਇਮਿਨਾ ਪਾਟਿਹਾਰਿਕਪਕ੍ਖੋਪਿ ਸਙ੍ਗਹਿਤੋ. ਅਟ੍ਠਮੀਉਪੋਸਥਸ੍ਸ ਹਿ ਪਚ੍ਚੁਗ੍ਗਮਨਾਨੁਗ੍ਗਮਨਵਸੇਨ ਸਤ੍ਤਮਿਯਞ੍ਚ ਨਵਮਿਯਞ੍ਚ, ਚਾਤੁਦ੍ਦਸਪਨ੍ਨਰਸਾਨਂ ਪਚ੍ਚੁਗ੍ਗਮਨਾਨੁਗ੍ਗਮਨਵਸੇਨ ਤੇਰਸਿਯਞ੍ਚ ਪਾਟਿਪਦੇ ਚਾਤਿ ਇਮੇ ਦਿਵਸਾ ਪਾਟਿਹਾਰਿਕਪਕ੍ਖਾਤਿ ਵੇਦਿਤਬ੍ਬਾ. ਤੇਸੁਪਿ ਉਪੋਸਥਂ ਉਪਵਸਿ.
੩੦੯. ਦੇਵਦੂਤਾਤਿ ਦੇਵੋਤਿ ਮਚ੍ਚੁ, ਤਸ੍ਸ ਦੂਤਾਤਿ ਦੇਵਦੂਤਾ. ਸਿਰਸ੍ਮਿਞ੍ਹਿ ਪਲਿਤੇਸੁ ਪਾਤੁਭੂਤੇਸੁ ਮਚ੍ਚੁਰਾਜਸ੍ਸ ਸਨ੍ਤਿਕੇ ਠਿਤੋ ਵਿਯ ਹੋਤਿ, ਤਸ੍ਮਾ ਪਲਿਤਾਨਿ ਮਚ੍ਚੁਦੇਵਸ੍ਸ ਦੂਤਾਤਿ ਵੁਚ੍ਚਨ੍ਤਿ. ਦੇਵਾ ਵਿਯ ਦੂਤਾਤਿਪਿ ਦੇਵਦੂਤਾ. ਯਥਾ ਹਿ ਅਲਙ੍ਕਤਪਟਿਯਤ੍ਤਾਯ ਦੇਵਤਾਯ ਆਕਾਸੇ ਠਤ੍ਵਾ ‘‘ਅਸੁਕਦਿਵਸੇ ਮਰਿਸ੍ਸਤੀ’’ਤਿ ਵੁਤ੍ਤੇ ਤਂ ਤਥੇਵ ਹੋਤਿ, ਏਵਂ ਸਿਰਸ੍ਮਿਂ ਪਲਿਤੇਸੁ ਪਾਤੁਭੂਤੇਸੁ ਦੇਵਤਾਬ੍ਯਾਕਰਣਸਦਿਸਮੇਵ ਹੋਤਿ. ਤਸ੍ਮਾ ਪਲਿਤਾਨਿ ਦੇਵਸਦਿਸਾ ਦੂਤਾਤਿ ਵੁਚ੍ਚਨ੍ਤਿ. ਵਿਸੁਦ੍ਧਿਦੇਵਾਨਂ ਦੂਤਾਤਿਪਿ ਦੇਵਦੂਤਾ. ਸਬ੍ਬਬੋਧਿਸਤ੍ਤਾ ਹਿ ਜਿਣ੍ਣਬ੍ਯਾਧਿਤਮਤਪਬ੍ਬਜਿਤੇ ਦਿਸ੍ਵਾਵ ਸਂਵੇਗਮਾਪਜ੍ਜਿਤ੍ਵਾ ਨਿਕ੍ਖਮ੍ਮ ਪਬ੍ਬਜਨ੍ਤਿ. ਯਥਾਹ –
‘‘ਜਿਣ੍ਣਞ੍ਚ ਦਿਸ੍ਵਾ ਦੁਖਿਤਞ੍ਚ ਬ੍ਯਾਧਿਤਂ,
ਮਤਞ੍ਚ ਦਿਸ੍ਵਾ ਗਤਮਾਯੁਸਙ੍ਖਯਂ;
ਕਾਸਾਯਵਤ੍ਥਂ ਪਬ੍ਬਜਿਤਞ੍ਚ ਦਿਸ੍ਵਾ,
ਤਸ੍ਮਾ ਅਹਂ ਪਬ੍ਬਜਿਤੋਮ੍ਹਿ ਰਾਜਾ’’ਤਿ.
ਇਮਿਨਾ ਪਰਿਯਾਯੇਨ ਪਲਿਤਾਨਿ ਵਿਸੁਦ੍ਧਿਦੇਵਾਨਂ ਦੂਤਤ੍ਤਾ ਦੇਵਦੂਤਾਤਿ ਵੁਚ੍ਚਨ੍ਤਿ.
ਕਪ੍ਪਕਸ੍ਸ ਗਾਮਵਰਂ ਦਤ੍ਵਾਤਿ ਸਤਸਹਸ੍ਸੁਟ੍ਠਾਨਕਂ ਜੇਟ੍ਠਕਗਾਮਂ ਦਤ੍ਵਾ. ਕਸ੍ਮਾ ਅਦਾਸਿ? ਸਂਵਿਗ੍ਗਮਾਨਸਤ੍ਤਾ. ਤਸ੍ਸ ਹਿ ਅਞ੍ਜਲਿਸ੍ਮਿਂ ਠਪਿਤਾਨਿ ਪਲਿਤਾਨਿ ਦਿਸ੍ਵਾਵ ਸਂਵੇਗੋ ਉਪ੍ਪਜ੍ਜਤਿ. ਅਞ੍ਞਾਨਿ ਚਤੁਰਾਸੀਤਿਵਸ੍ਸਸਹਸ੍ਸਾਨਿ ਆਯੁ ਅਤ੍ਥਿ, ਏਵਂ ਸਨ੍ਤੇਪਿ ਮਚ੍ਚੁਰਾਜਸ੍ਸ ਸਨ੍ਤਿਕੇ ਠਿਤਂ ਵਿਯ ਅਤ੍ਤਾਨਂ ਮਞ੍ਞਮਾਨੋ ਸਂਵਿਗ੍ਗੋ ਪਬ੍ਬਜ੍ਜਂ ਰੋਚੇਤਿ. ਤੇਨ ਵੁਤ੍ਤਂ –
‘‘ਸਿਰੇ ਦਿਸ੍ਵਾਨ ਪਲਿਤਂ, ਮਘਦੇਵੋ ਦਿਸਮ੍ਪਤਿ;
ਸਂਵੇਗਂ ਅਲਭੀ ਧੀਰੋ, ਪਬ੍ਬਜ੍ਜਂ ਸਮਰੋਚਯੀ’’ਤਿ.
ਅਪਰਮ੍ਪਿ ਵੁਤ੍ਤਂ –
‘‘ਉਤ੍ਤਮਙ੍ਗਰੁਹਾ ਮਯ੍ਹਂ, ਇਮੇ ਜਾਤਾ ਵਯੋਹਰਾ;
ਪਾਤੁਭੂਤਾ ਦੇਵਦੂਤਾ, ਪਬ੍ਬਜ੍ਜਾਸਮਯੋ ਮਮਾ’’ਤਿ.
ਪੁਰਿਸਯੁਗੇਤਿ ਵਂਸਸਮ੍ਭਵੇ ਪੁਰਿਸੇ. ਕੇਸਮਸ੍ਸੁਂ ਓਹਾਰੇਤ੍ਵਾਤਿ ਤਾਪਸਪਬ੍ਬਜ੍ਜਂ ਪਬ੍ਬਜਨ੍ਤਾਪਿ ਹਿ ਪਠਮਂ ਕੇਸਮਸ੍ਸੁਂ ਓਹਾਰੇਤ੍ਵਾ ਪਬ੍ਬਜਨ੍ਤਿ, ਤਤੋ ਪਟ੍ਠਾਯ ਵਡ੍ਢਿਤੇ ਕੇਸੇ ਬਨ੍ਧਿਤ੍ਵਾ ਜਟਾਕਲਾਪਧਰਾ ਹੁਤ੍ਵਾ ਵਿਚਰਨ੍ਤਿ. ਬੋਧਿਸਤ੍ਤੋਪਿ ਤਾਪਸਪਬ੍ਬਜ੍ਜਂ ਪਬ੍ਬਜਿ. ਪਬ੍ਬਜਿਤੋ ਪਨ ਅਨੇਸਨਂ ਅਨਨੁਯੁਞ੍ਜਿਤ੍ਵਾ ਰਾਜਗੇਹਤੋ ਆਹਟਭਿਕ੍ਖਾਯ ਯਾਪੇਨ੍ਤੋ ਬ੍ਰਹ੍ਮਵਿਹਾਰਂ ਭਾਵੇਸਿ. ਤਸ੍ਮਾ ਸੋ ਮੇਤ੍ਤਾਸਹਗਤੇਨਾਤਿਆਦਿ ਵੁਤ੍ਤਂ.
ਕੁਮਾਰਕੀਲ਼ਿਤਂ ਕੀਲ਼ੀਤਿ ਅਙ੍ਕੇਨ ਅਙ੍ਕਂ ਪਰਿਹਰਿਯਮਾਨੋ ਕੀਲ਼ਿ. ਮਾਲਾਕਲਾਪਂ ਵਿਯ ਹਿ ਨਂ ਉਕ੍ਖਿਪਿਤ੍ਵਾਵ ਵਿਚਰਿਂਸੁ. ਰਞ੍ਞੋ ਮਘਦੇਵਸ੍ਸ ਪੁਤ੍ਤੋ…ਪੇ… ਪਬ੍ਬਜੀਤਿ ਇਮਸ੍ਸ ਪਬ੍ਬਜਿਤਦਿਵਸੇ ਪਞ੍ਚ ਮਙ੍ਗਲਾਨਿ ਅਹੇਸੁਂ. ਮਘਦੇਵਰਞ੍ਞੋ ਮਤਕਭਤ੍ਤਂ, ਤਸ੍ਸ ਰਞ੍ਞੋ ਪਬ੍ਬਜਿਤਮਙ੍ਗਲਂ, ਤਸ੍ਸ ਪੁਤ੍ਤਸ੍ਸ ਛਤ੍ਤੁਸ੍ਸਾਪਨਮਙ੍ਗਲਂ, ਤਸ੍ਸ ਪੁਤ੍ਤਸ੍ਸ ਉਪਰਜ੍ਜਮਙ੍ਗਲਂ, ਤਸ੍ਸ ਪੁਤ੍ਤਸ੍ਸ ਨਾਮਕਰਣਮਙ੍ਗਲਨ੍ਤਿ ਏਕਸ੍ਮਿਂਯੇਵ ਸਮਯੇ ਪਞ੍ਚ ਮਙ੍ਗਲਾਨਿ ਅਹੇਸੁਂ, ਸਕਲਜਮ੍ਬੁਦੀਪਤਲੇ ਉਨ੍ਨਙ੍ਗਲਮਹੋਸਿ.
੩੧੧. ਪੁਤ੍ਤਪਪੁਤ੍ਤਕਾਤਿ ਪੁਤ੍ਤਾ ਚ ਪੁਤ੍ਤਪੁਤ੍ਤਾ ਚਾਤਿ ਏਵਂ ਪਵਤ੍ਤਾ ਤਸ੍ਸ ਪਰਮ੍ਪਰਾ. ਪਚ੍ਛਿਮਕੋ ਅਹੋਸੀਤਿ ਪਬ੍ਬਜ੍ਜਾਪਚ੍ਛਿਮਕੋ ਅਹੋਸਿ. ਬੋਧਿਸਤ੍ਤੋ ਕਿਰ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ – ‘‘ਪਵਤ੍ਤਤਿ ਨੁ ਖੋ ਤਂ ਮਯਾ ਮਨੁਸ੍ਸਲੋਕੇ ਨਿਹਤਂ ਕਲ੍ਯਾਣਵਤ੍ਤ’’ਨ੍ਤਿ ਆਵਜ੍ਜਨ੍ਤੋ ਅਦ੍ਦਸ – ‘‘ਏਤ੍ਤਕਂ ਅਦ੍ਧਾਨਂ ਪਵਤ੍ਤਤਿ, ਇਦਾਨਿ ਨ ਪਵਤ੍ਤਿਸ੍ਸਤੀ’’ਤਿ. ਨ ਖੋ ਪਨਾਹਂ ਮਯ੍ਹਂ ਪਵੇਣਿਯਾ ਉਚ੍ਛਿਜ੍ਜਿਤੁਂ ਦਸ੍ਸਾਮੀਤਿ ਅਤ੍ਤਨੋ ਵਂਸੇ ਜਾਤਰਞ੍ਞੋਯੇਵ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਹੇਤ੍ਵਾ ਅਤ੍ਤਨੋ ਵਂਸਸ੍ਸ ਨੇਮਿਂ ਘਟੇਨ੍ਤੋ ਵਿਯ ਨਿਬ੍ਬਤ੍ਤੋ, ਤੇਨੇਵਸ੍ਸ ਨਿਮੀਤਿ ਨਾਮਂ ਅਹੋਸਿ. ਇਤਿ ਸੋ ਪਬ੍ਬਜਿਤਰਾਜੂਨਂ ਸਬ੍ਬਪਚ੍ਛਿਮਕੋ ਹੁਤ੍ਵਾ ਪਬ੍ਬਜਿਤੋਤਿ ਪਬ੍ਬਜ੍ਜਾਪਚ੍ਛਿਮਕੋ ਅਹੋਸਿ. ਗੁਣੇਹਿ ਪਨ ਅਤਿਰੇਕਤਰੋ. ਤਸ੍ਸ ਹਿ ਸਬ੍ਬਰਾਜੂਹਿ ਅਤਿਰੇਕਤਰਾ ਦ੍ਵੇ ਗੁਣਾ ਅਹੇਸੁਂ. ਚਤੂਸੁ ਦ੍ਵਾਰੇਸੁ ਸਤਸਹਸ੍ਸਂ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਦੇਵਸਿਕਂ ਦਾਨਂ ਅਦਾਸਿ, ਅਨੁਪੋਸਥਿਕਸ੍ਸ ਚ ਦਸ੍ਸਨਂ ਨਿਵਾਰੇਸਿ. ਅਨੁਪੋਸਥਿਕੇਸੁ ਹਿ ਰਾਜਾਨਂ ਪਸ੍ਸਿਸ੍ਸਾਮਾਤਿ ਗਤੇਸੁ ਦੋਵਾਰਿਕੋ ਪੁਚ੍ਛਤਿ ‘‘ਤੁਮ੍ਹੇ ਉਪੋਸਥਿਕਾ ਨੋ ਵਾ’’ਤਿ. ਯੇ ਅਨੁਪੋਸਥਿਕਾ ਹੋਨ੍ਤਿ, ਤੇ ਨਿਵਾਰੇਤਿ ‘‘ਅਨੁਪੋਸਥਿਕਾਨਂ ਰਾਜਾ ਦਸ੍ਸਨਂ ਨ ਦੇਤੀ’’ਤਿ. ‘‘ਮਯਂ ਜਨਪਦਵਾਸਿਨੋ ਕਾਲੇ ਭੋਜਨਂ ਕੁਹਿਂ ਲਭਿਸ੍ਸਾਮਾ’’ਤਿਪਿ ਤਤ੍ਥ ਵਚਨੋਕਾਸੋ ਨਤ੍ਥਿ. ਚਤੂਸੁ ਹਿ ਦ੍ਵਾਰੇਸੁ ਰਾਜਙ੍ਗਣੇ ਚ ਅਨੇਕਾਨਿ ਭਤ੍ਤਚਾਟਿਸਹਸ੍ਸਾਨਿ ਪਟਿਯਤ੍ਤਾਨੇਵ ਹੋਨ੍ਤਿ. ਤਸ੍ਮਾ ਮਹਾਜਨੋ ਇਚ੍ਛਿਤਿਚ੍ਛਿਤਟ੍ਠਾਨੇ ਮਸ੍ਸੁਂ ਕਾਰੇਤ੍ਵਾ ਨ੍ਹਾਯਿਤ੍ਵਾ ਵਤ੍ਥਾਨਿ ਪਰਿਵਤ੍ਤੇਤ੍ਵਾ ਯਥਾਰੁਚਿਤਂ ਭੋਜਨਂ ਭੁਞ੍ਜਿਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਾਯ ਰਞ੍ਞੋ ਗੇਹਦ੍ਵਾਰਂ ਗਚ੍ਛਤਿ. ਦੋਵਾਰਿਕੇਨ ‘‘ਉਪੋਸਥਿਕਾ ਤੁਮ੍ਹੇ’’ਤਿ ਪੁਚ੍ਛਿਤਪੁਚ੍ਛਿਤਾ ‘‘ਆਮ ਆਮਾ’’ਤਿ ਵਦਨ੍ਤਿ. ਤੇਨ ਹਿ ਆਗਚ੍ਛਥਾਤਿ ਪਵੇਸੇਤ੍ਵਾ ਰਞ੍ਞੋ ਦਸ੍ਸੇਤਿ. ਇਤਿ ਇਮੇਹਿ ਦ੍ਵੀਹਿ ਗੁਣੇਹਿ ਅਤਿਰੇਕਤਰੋ ਅਹੋਸਿ.
੩੧੨. ਦੇਵਾਨਂ ਤਾਵਤਿਂਸਾਨਨ੍ਤਿ ਤਾਵਤਿਂਸਭਵਨੇ ਨਿਬ੍ਬਤ੍ਤਦੇਵਾਨਂ. ਤੇ ਕਿਰ ਦੇਵਾ ਵਿਦੇਹਰਟ੍ਠੇ ਮਿਥਿਲਨਗਰਵਾਸਿਨੋ ਰਞ੍ਞੋ ਓਵਾਦੇ ਠਤ੍ਵਾ ਪਞ੍ਚ ਸੀਲਾਨਿ ਰਕ੍ਖਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਤਤ੍ਥ ਨਿਬ੍ਬਤ੍ਤਾ ਰਞ੍ਞੋ ਗੁਣਕਥਂ ਕਥੇਨ੍ਤਿ. ਤੇ ਸਨ੍ਧਾਯ ਵੁਤ੍ਤਂ ‘‘ਦੇਵਾਨਂ ਤਾਵਤਿਂਸਾਨ’’ਨ੍ਤਿ.
ਨਿਸਿਨ੍ਨੋ ਹੋਤੀਤਿ ਪਾਸਾਦਵਰਸ੍ਸ ਉਪਰਿਗਤੋ ਦਾਨਞ੍ਚ ਸੀਲਞ੍ਚ ਉਪਪਰਿਕ੍ਖਮਾਨੋ ਨਿਸਿਨ੍ਨੋ ਹੋਤਿ. ਏਵਂ ਕਿਰਸ੍ਸ ਅਹੋਸਿ – ‘‘ਦਾਨਂ ਨੁ ਖੋ ਮਹਨ੍ਤਂ ਉਦਾਹੁ ਸੀਲਂ, ਯਦਿ ਦਾਨਂ ਮਹਨ੍ਤਂ, ਅਜ੍ਝੋਤ੍ਥਰਿਤ੍ਵਾ ਦਾਨਮੇਵ ਦਸ੍ਸਾਮਿ. ਅਥ ਸੀਲਂ, ਸੀਲਮੇਵ ਪੂਰਿਸ੍ਸਾਮੀ’’ਤਿ. ਤਸ੍ਸ ‘‘ਇਦਂ ਮਹਨ੍ਤਂ ਇਦਂ ਮਹਨ੍ਤ’’ਨ੍ਤਿ ਨਿਚ੍ਛਿਤੁਂ ਅਸਕ੍ਕੋਨ੍ਤਸ੍ਸੇਵ ਸਕ੍ਕੋ ਗਨ੍ਤ੍ਵਾ ਪੁਰਤੋ ਪਾਤੁਰਹੋਸਿ. ਤੇਨ ਵੁਤ੍ਤਂ ਅਥ ਖੋ, ਆਨਨ੍ਦ,…ਪੇ… ਸਮ੍ਮੁਖੇ ਪਾਤੁਰਹੋਸੀਤਿ. ਏਵਂ ਕਿਰਸ੍ਸ ਅਹੋਸਿ – ‘‘ਰਞ੍ਞੋ ਕਙ੍ਖਾ ਉਪ੍ਪਨ੍ਨਾ, ਤਸ੍ਸ ਕਙ੍ਖਚ੍ਛੇਦਨਤ੍ਥਂ ਪਞ੍ਹਞ੍ਚ ਕਥੇਸ੍ਸਾਮਿ, ਇਧਾਗਮਨਤ੍ਥਾਯ ਪਟਿਞ੍ਞਞ੍ਚ ਗਣ੍ਹਿਸ੍ਸਾਮੀ’’ਤਿ. ਤਸ੍ਮਾ ਗਨ੍ਤ੍ਵਾ ਸਮ੍ਮੁਖੇ ਪਾਤੁਰਹੋਸਿ. ਰਾਜਾ ਅਦਿਟ੍ਠਪੁਬ੍ਬਂ ਰੂਪਂ ਦਿਸ੍ਵਾ ਭੀਤੋ ਅਹੋਸਿ ਲੋਮਹਟ੍ਠਜਾਤੋ. ਅਥ ਨਂ ਸਕ੍ਕੋ – ‘‘ਮਾ ਭਾਯਿ, ਮਹਾਰਾਜ, ਵਿਸ੍ਸਤ੍ਥੋ ਪਞ੍ਹਂ ਪੁਚ੍ਛ, ਕਙ੍ਖਂ ਤੇ ਪਟਿਵਿਨੋਦੇਸ੍ਸਾਮੀ’’ਤਿ ਆਹ.
ਰਾਜਾ –
‘‘ਪੁਚ੍ਛਾਮਿ ਤਂ ਮਹਾਰਾਜ, ਸਬ੍ਬਭੂਤਾਨਮਿਸ੍ਸਰ;
ਦਾਨਂ ਵਾ ਬ੍ਰਹ੍ਮਚਰਿਯਂ ਵਾ, ਕਤਮਂ ਸੁ ਮਹਪ੍ਫਲ’’ਨ੍ਤਿ. –
ਪਞ੍ਹਂ ਪੁਚ੍ਛਿ. ਸਕ੍ਕੋ – ‘‘ਦਾਨਂ ਨਾਮ ਕਿਂ, ਸੀਲਮੇਵ ਗੁਣਵਿਸਿਟ੍ਠਤਾਯ ਮਹਨ੍ਤਂ. ਅਹਞ੍ਹਿ ਪੁਬ੍ਬੇ, ਮਹਾਰਾਜ, ਦਸਵਸ੍ਸਸਹਸ੍ਸਾਨਿ ਦਸਨ੍ਨਂ ਜਟਿਲਸਹਸ੍ਸਾਨਂ ਦਾਨਂ ਦਤ੍ਵਾ ਪੇਤ੍ਤਿਵਿਸਯਤੋ ਨ ਮੁਤ੍ਤੋ, ਸੀਲਵਨ੍ਤਾ ਪਨ ਮਯ੍ਹਂ ਦਾਨਂ ਭੁਞ੍ਜਿਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਾ’’ਤਿ ਵਤ੍ਵਾ ਇਮਾ ਗਾਥਾ ਅਵੋਚ –
‘‘ਹੀਨੇਨ ਬ੍ਰਹ੍ਮਚਰਿਯੇਨ, ਖਤ੍ਤਿਯੇ ਉਪਪਜ੍ਜਤਿ;
ਮਜ੍ਝਿਮੇਨ ਚ ਦੇਵਤ੍ਤਂ, ਉਤ੍ਤਮੇਨ ਵਿਸੁਜ੍ਝਤਿ.
ਨ ਹੇਤੇ ਸੁਲਭਾ ਕਾਯਾ, ਯਾਚਯੋਗੇਨ ਕੇਨਚਿ;
ਯੇ ਕਾਯੇ ਉਪਪਜ੍ਜਨ੍ਤਿ, ਅਨਾਗਾਰਾ ਤਪਸ੍ਸਿਨੋ’’ਤਿ. (ਜਾ. ੨.੨੨.੪੨੯-੪੩੦);
ਏਵਂ ਰਞ੍ਞੋ ਕਙ੍ਖਂ ਵਿਨੋਦੇਤ੍ਵਾ ਦੇਵਲੋਕਗਮਨਾਯ ਪਟਿਞ੍ਞਾਗਹਣਤ੍ਥਂ ਲਾਭਾ ਤੇ ਮਹਾਰਾਜਾਤਿਆਦਿਮਾਹ. ਤਤ੍ਥ ਅਵਿਕਮ੍ਪਮਾਨੋਤਿ ਅਭਾਯਮਾਨੋ. ਅਧਿਵਾਸੇਸੀਤਿ ਅਹਂ ਮਹਾਜਨਂ ਕੁਸਲਂ ਸਮਾਦਪੇਮਿ, ਪੁਞ੍ਞਵਨ੍ਤਾਨਂ ਪਨ ਵਸਨਟ੍ਠਾਨਂ ਦਿਸ੍ਵਾ ਆਗਤੇਨ ਮਨੁਸ੍ਸਪਥੇ ਸੁਖਂ ਕਥੇਤੁਂ ਹੋਤੀਤਿ ਅਧਿਵਾਸੇਸਿ.
੩੧੩. ਏਵਂ ਭਦ੍ਦਨ੍ਤਵਾਤਿ ਏਵਂ ਹੋਤੁ ਭਦ੍ਦਕਂ ਤਵ ਵਚਨਨ੍ਤਿ ਵਤ੍ਵਾ. ਯੋਜੇਤ੍ਵਾਤਿ ਏਕਸ੍ਮਿਂਯੇਵ ਯੁਗੇ ਸਹਸ੍ਸਅਸ੍ਸਾਜਾਨੀਯੇ ਯੋਜੇਤ੍ਵਾ. ਤੇਸਂ ਪਨ ਪਾਟਿਯੇਕ੍ਕਂ ਯੋਜਨਕਿਚ੍ਚਂ ਨਤ੍ਥਿ, ਮਨਂ ਆਗਮ੍ਮ ਯੁਤ੍ਤਾਯੇਵ ਹੋਨ੍ਤਿ. ਸੋ ਪਨ ਦਿਬ੍ਬਰਥੋ ਦਿਯਡ੍ਢਯੋਜਨਸਤਿਕੋ ਹੋਤਿ, ਨਦ੍ਧਿਤੋ ਪਟ੍ਠਾਯ ਰਥਸੀਸਂ ਪਞ੍ਞਾਸਯੋਜਨਾਨਿ, ਅਕ੍ਖਬਨ੍ਧੋ ਪਣ੍ਣਾਸਯੋਜਨਾਨਿ, ਅਕ੍ਖਬਨ੍ਧਤੋ ਪਟ੍ਠਾਯ ਪਚ੍ਛਾਭਾਗੋ ਪਣ੍ਣਾਸਯੋਜਨਾਨਿ, ਸਬ੍ਬੋ ਸਤ੍ਤਵਣ੍ਣਰਤਨਮਯੋ. ਦੇਵਲੋਕੋ ਨਾਮ ਉਦ੍ਧਂ, ਮਨੁਸ੍ਸਲੋਕੋ ਅਧੋ, ਤਸ੍ਮਾ ਹੇਟ੍ਠਾਮੁਖਂ ਰਥਂ ਪੇਸੇਸੀਤਿ ਨ ਸਲ੍ਲਕ੍ਖੇਤਬ੍ਬਂ. ਯਥਾ ਪਨ ਪਕਤਿਮਗ੍ਗਂ ਪੇਸੇਤਿ, ਏਵਮੇਵ ਮਨੁਸ੍ਸਾਨਂ ਸਾਯਮਾਸਭਤ੍ਤੇ ਨਿਟ੍ਠਿਤੇ ਚਨ੍ਦੇਨ ਸਦ੍ਧਿਂ ਯੁਗਨਦ੍ਧਂ ਕਤ੍ਵਾ ਪੇਸੇਸਿ, ਯਮਕਚਨ੍ਦਾ ਉਟ੍ਠਿਤਾ ਵਿਯ ਅਹੇਸੁਂ. ਮਹਾਜਨੋ ਦਿਸ੍ਵਾ ‘‘ਯਮਕਚਨ੍ਦਾ ਉਗ੍ਗਤਾ’’ਤਿ ਆਹ. ਆਗਚ੍ਛਨ੍ਤੇ ਆਗਚ੍ਛਨ੍ਤੇ ਨ ਯਮਕਚਨ੍ਦਾ, ਏਕਂ ਵਿਮਾਨਂ, ਨ ਵਿਮਾਨਂ, ਏਕੋ ਰਥੋਤਿ. ਰਥੋਪਿ ਆਗਚ੍ਛਨ੍ਤੋ ਆਗਚ੍ਛਨ੍ਤੋ ਪਕਤਿਰਥਪ੍ਪਮਾਣੋਵ, ਅਸ੍ਸਾਪਿ ਪਕਤਿਅਸ੍ਸਪ੍ਪਮਾਣਾਵ ਅਹੇਸੁਂ. ਏਵਂ ਰਥਂ ਆਹਰਿਤ੍ਵਾ ਰਞ੍ਞੋ ਪਾਸਾਦਂ ਪਦਕ੍ਖਿਣਂ ਕਤ੍ਵਾ ਪਾਚੀਨਸੀਹਪਞ੍ਜਰਟ੍ਠਾਨੇ ਰਥਂ ਨਿਵਤ੍ਤੇਤ੍ਵਾ ਆਗਤਮਗ੍ਗਾਭਿਮੁਖਂ ਕਤ੍ਵਾ ਸੀਹਪਞ੍ਜਰੇ ਠਤ੍ਵਾਵ ਆਰੋਹਨਸਜ੍ਜਂ ਠਪੇਸਿ.
ਅਭਿਰੁਹ ਮਹਾਰਾਜਾਤਿ ਰਾਜਾ – ‘‘ਦਿਬ੍ਬਯਾਨਂ ਮੇ ਲਦ੍ਧ’’ਨ੍ਤਿ ਨ ਤਾਵਦੇਵ ਅਭਿਰੁਹਿ, ਨਾਗਰਾਨਂ ਪਨ ਓਵਾਦਂ ਅਦਾਸਿ ‘‘ਪਸ੍ਸਥ ਤਾਤਾ, ਯਂ ਮੇ ਸਕ੍ਕੇਨ ਦੇਵਰਞ੍ਞਾ ਦਿਬ੍ਬਰਥੋ ਪੇਸਿਤੋ, ਸੋ ਚ ਖੋ ਨ ਜਾਤਿਗੋਤ੍ਤਂ ਵਾ ਕੁਲਪ੍ਪਦੇਸਂ ਵਾ ਪਟਿਚ੍ਚ ਪੇਸਿਤੋ, ਮਯ੍ਹਂ ਪਨ ਸੀਲਾਚਾਰਗੁਣੇ ਪਸੀਦਿਤ੍ਵਾ ਪੇਸਿਤੋ. ਸਚੇ ਤੁਮ੍ਹੇਪਿ ਸੀਲਂ ਰਕ੍ਖਿਸ੍ਸਥ, ਤੁਮ੍ਹਾਕਮ੍ਪਿ ਪੇਸੇਸ੍ਸਤਿ, ਏਵਂ ਰਕ੍ਖਿਤੁਂ ਯੁਤ੍ਤਂ ਨਾਮੇਤਂ ਸੀਲਂ. ਨਾਹਂ ਦੇਵਲੋਕਂ ਗਨ੍ਤ੍ਵਾ ਚਿਰਾਯਿਸ੍ਸਾਮਿ, ਅਪ੍ਪਮਤ੍ਤਾ ਹੋਥਾ’’ਤਿ ਮਹਾਜਨਂ ਓਵਦਿਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਰਥਂ ਅਭਿਰੁਹਿ. ਤਤੋ ਮਾਤਲਿ ਸਙ੍ਗਾਹਕੋ ‘‘ਅਹਮ੍ਪਿ ਮਹਾਰਾਜਸ੍ਸ ਮਮਾਨੁਚ੍ਛਵਿਕਂ ਕਰਿਸ੍ਸਾਮੀ’’ਤਿ ਆਕਾਸਮ੍ਹਿ ਦ੍ਵੇ ਮਗ੍ਗੇ ਦਸ੍ਸੇਤ੍ਵਾ ਅਪਿਚ ਮਹਾਰਾਜਾਤਿਆਦਿਮਾਹ.
ਤਤ੍ਥ ਕਤਮੇਨਾਤਿ, ਮਹਾਰਾਜ, ਇਮੇਸੁ ਮਗ੍ਗੇਸੁ ਏਕੋ ਨਿਰਯਂ ਗਚ੍ਛਤਿ, ਏਕੋ ਦੇਵਲੋਕਂ, ਤੇਸੁ ਤਂ ਕਤਮੇਨ ਨੇਮਿ. ਯੇਨਾਤਿ ਯੇਨ ਮਗ੍ਗੇਨ ਗਨ੍ਤ੍ਵਾ ਯਤ੍ਥ ਪਾਪਕਮ੍ਮਨ੍ਤਾ ਪਾਪਕਾਨਂ ਕਮ੍ਮਾਨਂ ਵਿਪਾਕਂ ਪਟਿਸਂਵੇਦਿਯਨ੍ਤਿ, ਤਂ ਠਾਨਂ ਸਕ੍ਕਾ ਹੋਤਿ ਪਸ੍ਸਿਤੁਨ੍ਤਿ ਅਤ੍ਥੋ. ਦੁਤਿਯਪਦੇਪਿ ਏਸੇਵ ਨਯੋ. ਜਾਤਕੇਪਿ –
‘‘ਕੇਨ ਤਂ ਨੇਮਿ ਮਗ੍ਗੇਨ, ਰਾਜਸੇਟ੍ਠ ਦਿਸਮ੍ਪਤਿ;
ਯੇਨ ਵਾ ਪਾਪਕਮ੍ਮਨ੍ਤਾ, ਪੁਞ੍ਞਕਮ੍ਮਾ ਚ ਯੇ ਨਰਾ’’ਤਿ. (ਜਾ. ੨.੨੨.੪੫੦) –
ਗਾਥਾਯ ਅਯਮੇਵਤ੍ਥੋ. ਤੇਨੇਵਾਹ –
‘‘ਨਿਰਯੇ ਤਾਵ ਪਸ੍ਸਾਮਿ, ਆਵਾਸੇ ਪਾਪਕਮ੍ਮਿਨਂ;
ਠਾਨਾਨਿ ਲੁਦ੍ਦਕਮ੍ਮਾਨਂ, ਦੁਸ੍ਸੀਲਾਨਞ੍ਚ ਯਾ ਗਤੀ’’ਤਿ. (ਜਾ. ੨.੨੨.੪੫੧);
ਉਭਯੇਨੇਵ ਮਂ ਮਾਤਲਿ ਨੇਹੀਤਿ ਮਾਤਲਿ ਦ੍ਵੀਹਿ ਮਗ੍ਗੇਹਿ ਮਂ ਨੇਹਿ, ਅਹਂ ਨਿਰਯਂ ਪਸ੍ਸਿਤੁਕਾਮੋ ਦੇਵਲੋਕਮ੍ਪੀਤਿ. ਪਠਮਂ ਕਤਮੇਨ ਨੇਮੀਤਿ. ਪਠਮਂ ਨਿਰਯਮਗ੍ਗੇਨ ਨੇਹੀਤਿ. ਤਤੋ ਮਾਤਲਿ ਅਤ੍ਤਨੋ ਆਨੁਭਾਵੇਨ ਰਾਜਾਨਂ ਪਞ੍ਚਦਸ ਮਹਾਨਿਰਯੇ ਦਸ੍ਸੇਸਿ. ਵਿਤ੍ਥਾਰਕਥਾ ਪਨੇਤ੍ਥ –
‘‘ਦਸ੍ਸੇਸਿ ਮਾਤਲਿ ਰਞ੍ਞੋ, ਦੁਗ੍ਗਂ ਵੇਤਰਣਿਂ ਨਦਿਂ;
ਕੁਥਿਤਂ ਖਾਰਸਂਯੁਤ੍ਤਂ, ਤਤ੍ਤਂ ਅਗ੍ਗਿਸਿਖੂਪਮ’’ਨ੍ਤਿ. (ਜਾ. ੨.੨੨.੪੫੨) –
ਜਾਤਕੇ ਵੁਤ੍ਤਨਯੇਨ ਵੇਦਿਤਬ੍ਬਾ. ਨਿਰਯਂ ਦਸ੍ਸੇਤ੍ਵਾ ਰਥਂ ਨਿਵਤ੍ਤੇਤ੍ਵਾ ਦੇਵਲੋਕਾਭਿਮੁਖਂ ਗਨ੍ਤ੍ਵਾ ਬੀਰਣੀਦੇਵਧੀਤਾਯ ਸੋਣਦਿਨ੍ਨਦੇਵਪੁਤ੍ਤਸ੍ਸ ਗਣਦੇਵਪੁਤ੍ਤਾਨਞ੍ਚ ਵਿਮਾਨਾਨਿ ਦਸ੍ਸੇਨ੍ਤੋ ਦੇਵਲੋਕਂ ਨੇਸਿ. ਤਤ੍ਰਾਪਿ ਵਿਤ੍ਥਾਰਕਥਾ –
‘‘ਯਦਿ ਤੇ ਸੁਤਾ ਬੀਰਣੀ ਜੀਵਲੋਕੇ,
ਆਮਾਯਦਾਸੀ ਅਹੁ ਬ੍ਰਾਹ੍ਮਣਸ੍ਸ;
ਸਾ ਪਤ੍ਤਕਾਲੇ ਅਤਿਥਿਂ ਵਿਦਿਤ੍ਵਾ,
ਮਾਤਾਵ ਪੁਤ੍ਤਂ ਸਕਿਮਾਭਿਨਨ੍ਦੀ;
ਸਂਯਮਾ ਸਂਵਿਭਾਗਾ ਚ,
ਸਾ ਵਿਮਾਨਸ੍ਮਿ ਮੋਦਤੀ’’ਤਿ. (ਜਾ. ੨.੨੨.੫੦੭) –
ਜਾਤਕੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.
ਏਵਂ ਗਚ੍ਛਤੋ ਪਨ ਤਸ੍ਸ ਰਥਨੇਮਿ ਵਟ੍ਟਿਯਾ ਚਿਤ੍ਤਕੂਟਦ੍ਵਾਰਕੋਟ੍ਠਕਸ੍ਸ ਉਮ੍ਮਾਰੇ ਪਹਤਮਤ੍ਤੇਵ ਦੇਵਨਗਰੇ ਕੋਲਾਹਲਂ ਅਹੋਸਿ. ਸਕ੍ਕਂ ਦੇਵਰਾਜਾਨਂ ਏਕਕਂਯੇਵ ਓਹਾਯ ਦੇਵਸਙ੍ਘੋ ਮਹਾਸਤ੍ਤਂ ਪਚ੍ਚੁਗ੍ਗਮਨਮਕਾਸਿ, ਤਂ ਦੇਵਤਾਨਂ ਆਦਰਂ ਦਿਸ੍ਵਾ ਸਕ੍ਕੋ ਚਿਤ੍ਤਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ – ‘‘ਅਭਿਰਮ, ਮਹਾਰਾਜ, ਦੇਵੇਸੁ ਦੇਵਾਨੁਭਾਵੇਨਾ’’ਤਿ ਆਹ. ਏਵਂ ਕਿਰਸ੍ਸ ਅਹੋਸਿ – ‘‘ਅਯਂ ਰਾਜਾ ਅਜ੍ਜ ਆਗਨ੍ਤ੍ਵਾ ਏਕਦਿਵਸੇਨੇਵ ਦੇਵਗਣਂ ਅਤ੍ਤਨੋ ਅਭਿਮੁਖਮਕਾਸਿ. ਸਚੇ ਏਕਂ ਦ੍ਵੇ ਦਿਵਸੇ ਵਸਿਸ੍ਸਤਿ, ਨ ਮਂ ਦੇਵਾ ਓਲੋਕੇਸ੍ਸਨ੍ਤੀ’’ਤਿ. ਸੋ ਉਸੂਯਮਾਨੋ, ‘‘ਮਹਾਰਾਜ, ਤੁਯ੍ਹਂ ਇਮਸ੍ਮਿਂ ਦੇਵਲੋਕੇ ਵਸਿਤੁਂ ਪੁਞ੍ਞਂ ਨਤ੍ਥਿ, ਅਞ੍ਞੇਸਂ ਪੁਞ੍ਞੇਨ ਵਸਾਹੀ’’ਤਿ ਇਮਿਨਾ ਅਧਿਪ੍ਪਾਯੇਨ ਏਵਮਾਹ. ਬੋਧਿਸਤ੍ਤੋ – ‘‘ਨਾਸਕ੍ਖਿ ਜਰਸਕ੍ਕੋ ਮਨਂ ਸਨ੍ਧਾਰੇਤੁਂ, ਪਰਂ ਨਿਸ੍ਸਾਯ ਲਦ੍ਧਂ ਖੋ ਪਨ ਯਾਚਿਤ੍ਵਾ ਲਦ੍ਧਭਣ੍ਡਕਂ ਵਿਯ ਹੋਤੀ’’ਤਿ ਪਟਿਕ੍ਖਿਪਨ੍ਤੋ ਅਲਂ ਮਾਰਿਸਾਤਿਆਦਿਮਾਹ. ਜਾਤਕੇਪਿ ਵੁਤ੍ਤਂ –
‘‘ਯਥਾ ਯਾਚਿਤਕਂ ਯਾਨਂ, ਯਥਾ ਯਾਚਿਤਕਂ ਧਨਂ;
ਏਵਂਸਮ੍ਪਦਮੇਵੇ ਤਂ, ਯਂ ਪਰਤੋ ਦਾਨਪਚ੍ਚਯਾ;
ਨ ਚਾਹਮੇਤਮਿਚ੍ਛਾਮਿ, ਯਂ ਪਰਤੋ ਦਾਨਪਚ੍ਚਯਾ’’ਤਿ. (ਜਾ. ੨.੨੨.੫੮੫-੫੮੬) –
ਸਬ੍ਬਂ ਵਤ੍ਤਬ੍ਬਂ. ਬੋਧਿਸਤ੍ਤੋ ਪਨ ਮਨੁਸ੍ਸਤ੍ਤਭਾਵੇਨ ਕਤਿਵਾਰੇ ਦੇਵਲੋਕਂ ਗਤੋਤਿ. ਚਤ੍ਤਾਰੋ – ਮਨ੍ਧਾਤੁਰਾਜਕਾਲੇ ਸਾਧਿਨਰਾਜਕਾਲੇ ਗੁਤ੍ਤਿਲਵੀਣਾਵਾਦਕਕਾਲੇ ਨਿਮਿਮਹਾਰਾਜਕਾਲੇਤਿ. ਸੋ ਮਨ੍ਧਾਤੁਕਾਲੇ ਦੇਵਲੋਕੇ ਅਸਙ੍ਖ੍ਯੇਯ੍ਯਂ ਕਾਲਂ ਵਸਿ, ਤਸ੍ਮਿਞ੍ਹਿ ਵਸਮਾਨੇਯੇਵ ਛਤ੍ਤਿਂਸ ਸਕ੍ਕਾ ਚਵਿਂਸੁ. ਸਾਧਿਨਰਾਜਕਾਲੇ ਸਤ੍ਤਾਹਂ ਵਸਿ, ਮਨੁਸ੍ਸਗਣਨਾਯ ਸਤ੍ਤ ਵਸ੍ਸਸਤਾਨਿ ਹੋਨ੍ਤਿ. ਗੁਤ੍ਤਿਲਵੀਣਾਵਾਦਕਕਾਲੇ ਚ ਨਿਮਿਰਾਜਕਾਲੇ ਚ ਮੁਹੁਤ੍ਤਮਤ੍ਤਂ ਵਸਿ, ਮਨੁਸ੍ਸਗਣਨਾਯ ਸਤ੍ਤ ਦਿਵਸਾਨਿ ਹੋਨ੍ਤਿ.
੩੧੪. ਤਤ੍ਥੇਵ ਮਿਥਿਲਂ ਪਟਿਨੇਸੀਤਿ ਪਟਿਨੇਤ੍ਵਾ ਪਕਤਿਸਿਰਿਗਬ੍ਭੇਯੇਵ ਪਤਿਟ੍ਠਾਪੇਸਿ.
੩੧੫. ਕਲ਼ਾਰਜਨਕੋਤਿ ਤਸ੍ਸ ਨਾਮਂ. ਕਲ਼ਾਰਦਨ੍ਤਤਾਯ ਪਨ ਕਲ਼ਾਰਜਨਕੋਤਿ ਵੁਤ੍ਤੋ. ਨ ਸੋ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜੀਤਿ ਏਤ੍ਤਕਮਤ੍ਤਮੇਵ ਨ ਅਕਾਸਿ, ਸੇਸਂ ਸਬ੍ਬਂ ਪਾਕਤਿਕਮੇਵ ਅਹੋਸਿ.
੩੧੬. ਸਮੁਚ੍ਛੇਦੋ ਹੋਤੀਤਿ ਏਤ੍ਥ ਕਲ੍ਯਾਣਵਤ੍ਤਂ ਕੋ ਸਮੁਚ੍ਛਿਨ੍ਦਤਿ, ਕੇਨ ਸਮੁਚ੍ਛਿਨ੍ਨਂ, ਕੋ ਪਵਤ੍ਤੇਤਿ, ਕੇਨ ਪਵਤ੍ਤਿਤਂ ਨਾਮ ਹੋਤੀਤਿ ਅਯਂ ਵਿਭਾਗੋ ਵੇਦਿਤਬ੍ਬੋ. ਤਤ੍ਥ ਸੀਲਵਾ ਭਿਕ੍ਖੁ ‘‘ਨ ਸਕ੍ਕਾ ਮਯਾ ਅਰਹਤ੍ਤਂ ਲਦ੍ਧੁ’’ਨ੍ਤਿ ਵੀਰਿਯਂ ਅਕਰੋਨ੍ਤੋ ਸਮੁਚ੍ਛਿਨ੍ਦਤਿ. ਦੁਸ੍ਸੀਲੇਨ ਸਮੁਚ੍ਛਿਨ੍ਨਂ ਨਾਮ ਹੋਤਿ. ਸਤ੍ਤ ਸੇਖਾ ਪਵਤ੍ਤੇਨ੍ਤਿ. ਖੀਣਾਸਵੇਨ ਪਵਤ੍ਤਿਤਂ ਨਾਮ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਮਘਦੇਵਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਮਧੁਰਸੁਤ੍ਤਵਣ੍ਣਨਾ
੩੧੭. ਏਵਂ ਮੇ ਸੁਤਨ੍ਤਿ ਮਧੁਰਸੁਤ੍ਤਂ. ਤਤ੍ਥ ਮਹਾਕਚ੍ਚਾਨੋਤਿ ਗਿਹਿਕਾਲੇ ਉਜ੍ਜੇਨਿਕਰਞ੍ਞੋ ਪੁਰੋਹਿਤਪੁਤ੍ਤੋ ਅਭਿਰੂਪੋ ਦਸ੍ਸਨੀਯੋ ਪਾਸਾਦਿਕੋ ਸੁਵਣ੍ਣਵਣ੍ਣੋ ਚ. ਮਧੁਰਾਯਨ੍ਤਿ ਏਵਂਨਾਮਕੇ ਨਗਰੇ. ਗੁਨ੍ਦਾਵਨੇਤਿ ਕਣ੍ਹਕਗੁਨ੍ਦਾਵਨੇ. ਅਵਨ੍ਤਿਪੁਤ੍ਤੋਤਿ ਅਵਨ੍ਤਿਰਟ੍ਠੇ ਰਞ੍ਞੋ ਧੀਤਾਯ ਪੁਤ੍ਤੋ. ਵੁਦ੍ਧੋ ਚੇਵ ਅਰਹਾ ਚਾਤਿ ਦਹਰਂ ਅਰਹਨ੍ਤਮ੍ਪਿ ਨ ਤਥਾ ਸਮ੍ਭਾਵੇਨ੍ਤਿ ਯਥਾ ਮਹਲ੍ਲਕਂ, ਥੇਰੋ ਪਨ ਵੁਦ੍ਧੋ ਚੇਵ ਅਹੋਸਿ ਅਰਹਾ ਚ. ਬ੍ਰਾਹ੍ਮਣਾ, ਭੋ ਕਚ੍ਚਾਨਾਤਿ ਸੋ ਕਿਰ ਰਾਜਾ ਬ੍ਰਾਹ੍ਮਣਲਦ੍ਧਿਕੋ, ਤਸ੍ਮਾ ਏਵਮਾਹ. ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋਤਿਆਦੀਸੁ ਜਾਤਿਗੋਤ੍ਤਾਦੀਨਂ ਪਞ੍ਞਾਪਨਟ੍ਠਾਨੇ ਬ੍ਰਾਹ੍ਮਣਾਵ ਸੇਟ੍ਠਾਤਿ ਦਸ੍ਸੇਤਿ. ਹੀਨੋ ਅਞ੍ਞੋ ਵਣ੍ਣੋਤਿ ਇਤਰੇ ਤਯੋ ਵਣ੍ਣਾ ਹੀਨਾ ਲਾਮਕਾਤਿ ਵਦਤਿ. ਸੁਕ੍ਕੋਤਿ ਪਣ੍ਡਰੋ. ਕਣ੍ਹੋਤਿ ਕਾਲ਼ਕੋ. ਸੁਜ੍ਝਨ੍ਤੀਤਿ ਜਾਤਿਗੋਤ੍ਤਾਦਿਪਞ੍ਞਾਪਨਟ੍ਠਾਨੇਸੁ ਸੁਜ੍ਝਨ੍ਤਿ. ਬ੍ਰਹ੍ਮੁਨੋ ਪੁਤ੍ਤਾਤਿ ਮਹਾਬ੍ਰਹ੍ਮੁਨੋ ਪੁਤ੍ਤਾ. ਓਰਸਾ ਮੁਖਤੋ ਜਾਤਾਤਿ ਉਰੇ ਵਸਿਤ੍ਵਾ ਮੁਖਤੋ ਨਿਕ੍ਖਨ੍ਤਾ, ਉਰੇ ਕਤ੍ਵਾ ਸਂਵਦ੍ਧਿਤਾਤਿ ਵਾ ਓਰਸਾ. ਬ੍ਰਹ੍ਮਜਾਤਿ ਬ੍ਰਹ੍ਮਤੋ ਨਿਬ੍ਬਤ੍ਤਾ. ਬ੍ਰਹ੍ਮਨਿਮ੍ਮਿਤਾਤਿ ਬ੍ਰਹ੍ਮੁਨਾ ਨਿਮ੍ਮਿਤਾ. ਬ੍ਰਹ੍ਮਦਾਯਾਦਾਤਿ ਬ੍ਰਹ੍ਮੁਨੋ ਦਾਯਾਦਾ. ਘੋਸੋਯੇਵ ਖੋ ਏਸੋਤਿ ਵੋਹਾਰਮਤ੍ਤਮੇਵੇਤਂ.
੩੧੮. ਇਜ੍ਝੇਯ੍ਯਾਤਿ ਸਮਿਜ੍ਝੇਯ੍ਯ, ਯਤ੍ਤਕਾਨਿ ਧਨਾਦੀਨਿ ਪਤ੍ਥੇਯ੍ਯ, ਤਤ੍ਤਕੇਹਿਸ੍ਸ ਮਨੋਰਥੋ ਪੂਰੇਯ੍ਯਾਤਿ ਅਤ੍ਥੋ. ਖਤ੍ਤਿਯੋਪਿਸ੍ਸਾਸ੍ਸਾਤਿ ਖਤ੍ਤਿਯੋਪਿ ਅਸ੍ਸ ਇਸ੍ਸਰਿਯਸਮ੍ਪਤ੍ਤਸ੍ਸ ਪੁਬ੍ਬੁਟ੍ਠਾਯੀ ਅਸ੍ਸ. ਨੇਸਂ ਏਤ੍ਥ ਕਿਞ੍ਚੀਤਿ ਨ ਏਤੇਸਂ ਏਤ੍ਥ ਕਿਞ੍ਚਿ.
੩੨੨. ਆਸਨੇਨ ਵਾ ਨਿਮਨ੍ਤੇਯ੍ਯਾਮਾਤਿ ਨਿਸਿਨ੍ਨਾਸਨਂ ਪਪ੍ਫੋਟੇਤ੍ਵਾ ਇਧ ਨਿਸੀਦਾਤਿ ਵਦੇਯ੍ਯਾਮ. ਅਭਿਨਿਮਨ੍ਤੇਯ੍ਯਾਮਪਿ ਨਨ੍ਤਿ ਅਭਿਹਰਿਤ੍ਵਾ ਤਂ ਨਿਮਨ੍ਤੇਯ੍ਯਾਮ. ਤਤ੍ਥ ਦੁਵਿਧੋ ਅਭਿਹਾਰੋ ਵਾਚਾਯ ਚੇਵ ਕਾਯੇਨ ਚ. ‘‘ਤੁਮ੍ਹਾਕਂ ਇਚ੍ਛਿਤਿਚ੍ਛਿਤਕ੍ਖਣੇ ਮਮਂ ਚੀਵਰਾਦੀਹਿ ਵਦੇਯ੍ਯਾਥ ਯੇਨਤ੍ਥੋ’’ਤਿ ਵਦਨ੍ਤੋ ਹਿ ਵਾਚਾਯ ਅਭਿਹਰਿਤ੍ਵਾ ਨਿਮਨ੍ਤੇਤਿ ਨਾਮ. ਚੀਵਰਾਦਿਵੇਕਲ੍ਲਂ ਸਲ੍ਲਕ੍ਖੇਤ੍ਵਾ ‘‘ਇਦਂ ਗਣ੍ਹਥਾ’’ਤਿ ਤਾਨਿ ਦੇਨ੍ਤੋ ਪਨ ਕਾਯੇਨ ਅਭਿਹਰਿਤ੍ਵਾ ਨਿਮਨ੍ਤੇਤਿ ਨਾਮ. ਤਦੁਭਯਮ੍ਪਿ ਸਨ੍ਧਾਯ ‘‘ਅਭਿਨਿਮਨ੍ਤੇਯ੍ਯਾਮਪਿ ਨ’’ਨ੍ਤਿ ਆਹ. ਰਕ੍ਖਾਵਰਣਗੁਤ੍ਤਿਨ੍ਤਿ ਰਕ੍ਖਾਸਙ੍ਖਾਤਞ੍ਚੇਵ ਆਵਰਣਸਙ੍ਖਾਤਞ੍ਚ ਗੁਤ੍ਤਿਂ. ਯਾ ਪਨੇਸਾ ਆਵੁਧਹਤ੍ਥੇ ਪੁਰਿਸੇ ਠਪੇਨ੍ਤੇਨ ਰਕ੍ਖਾ, ਸਾ ਧਮ੍ਮਿਕਾ ਨਾਮ ਸਂਵਿਹਿਤਾ ਨ ਹੋਤਿ. ਯਥਾ ਪਨ ਅਵੇਲਾਯ ਕਟ੍ਠਹਾਰਿਕਾਪਣ੍ਣਹਾਰਿਕਾਦਯੋ ਵਿਹਾਰਂ ਨ ਪਵਿਸਨ੍ਤਿ, ਮਿਗਲੁਦ੍ਦਕਾਦਯੋ ਵਿਹਾਰਸੀਮਾਯ ਮਿਗੇ ਵਾ ਮਚ੍ਛੇ ਵਾ ਨ ਗਣ੍ਹਨ੍ਤਿ, ਏਵਂ ਸਂਵਿਦਹਨ੍ਤੇਨ ਧਮ੍ਮਿਕਾ ਨਾਮ ਸਂਵਿਹਿਤਾ ਹੋਤਿ. ਤਂ ਸਨ੍ਧਾਯਾਹ ‘‘ਧਮ੍ਮਿਕ’’ਨ੍ਤਿ.
ਏਵਂ ਸਨ੍ਤੇਤਿ ਏਵਂ ਚਤੁਨ੍ਨਮ੍ਪਿ ਵਣ੍ਣਾਨਂ ਪਬ੍ਬਜਿਤਾਨਂ ਪਬ੍ਬਜਿਤਸਕ੍ਕਾਰੇਨ ਸਮੇ ਸਮਾਨੇ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਮਧੁਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਬੋਧਿਰਾਜਕੁਮਾਰਸੁਤ੍ਤਵਣ੍ਣਨਾ
੩੨੪. ਏਵਂ ਮੇ ਸੁਤਨ੍ਤਿ ਬੋਧਿਰਾਜਕੁਮਾਰਸੁਤ੍ਤਂ. ਤਤ੍ਥ ਕੋਕਨਦੋਤਿ ਕੋਕਨਦਂ ਵੁਚ੍ਚਤਿ ਪਦੁਮਂ. ਸੋ ਚ ਮਙ੍ਗਲਪਾਸਾਦੋ ਓਲੋਕਨਕਪਦੁਮਂ ਦਸ੍ਸੇਤ੍ਵਾ ਕਤੋ, ਤਸ੍ਮਾ ਕੋਕਨਦੋਤਿ ਸਙ੍ਖਂ ਲਭਿ.
੩੨੫. ਯਾਵ ਪਚ੍ਛਿਮਸੋਪਾਨਕਲ਼ੇਵਰਾਤਿ ਏਤ੍ਥ ਪਚ੍ਛਿਮਸੋਪਾਨਕਲ਼ੇਵਰਨ੍ਤਿ ਪਠਮਂ ਸੋਪਾਨਫਲਕਂ ਵੁਤ੍ਤਂ. ਅਦ੍ਦਸਾ ਖੋਤਿ ਓਲੋਕਨਤ੍ਥਂਯੇਵ ਦ੍ਵਾਰਕੋਟ੍ਠਕੇ ਠਿਤੋ ਅਦ੍ਦਸ. ਭਗਵਾ ਤੁਣ੍ਹੀ ਅਹੋਸੀਤਿ ‘‘ਕਿਸ੍ਸ ਨੁ ਖੋ ਅਤ੍ਥਾਯ ਰਾਜਕੁਮਾਰੇਨ ਅਯਂ ਮਹਾਸਕ੍ਕਾਰੋ ਕਤੋ’’ਤਿ ਆਵਜ੍ਜਨ੍ਤੋ ਪੁਤ੍ਤਪਤ੍ਥਨਾਯ ਕਤਭਾਵਂ ਅਞ੍ਞਾਸਿ. ਸੋ ਹਿ ਰਾਜਕੁਮਾਰੋ ਅਪੁਤ੍ਤਕੋ, ਸੁਤਞ੍ਚਾਨੇਨ ਅਹੋਸਿ – ‘‘ਬੁਦ੍ਧਾਨਂ ਕਿਰ ਅਧਿਕਾਰਂ ਕਤ੍ਵਾ ਮਨਸਾ ਇਚ੍ਛਿਤਂ ਲਭਨ੍ਤੀ’’ਤਿ. ਸੋ – ‘‘ਸਚਾਹਂ ਪੁਤ੍ਤਂ ਲਭਿਸ੍ਸਾਮਿ, ਸਮ੍ਮਾਸਮ੍ਬੁਦ੍ਧੋ ਮਮ ਚੇਲਪ੍ਪਟਿਕਂ ਅਕ੍ਕਮਿਸ੍ਸਤਿ. ਨੋ ਚੇ ਲਭਿਸ੍ਸਾਮਿ, ਨ ਅਕ੍ਕਮਿਸ੍ਸਤੀ’’ਤਿ ਪਤ੍ਥਨਂ ਕਤ੍ਵਾ ਸਨ੍ਥਰਾਪੇਸਿ. ਅਥ ਭਗਵਾ ‘‘ਨਿਬ੍ਬਤ੍ਤਿਸ੍ਸਤਿ ਨੁ ਖੋ ਏਤਸ੍ਸ ਪੁਤ੍ਤੋ’’ਤਿ ਆਵਜ੍ਜੇਤ੍ਵਾ ‘‘ਨ ਨਿਬ੍ਬਤ੍ਤਿਸ੍ਸਤੀ’’ਤਿ ਅਦ੍ਦਸ.
ਪੁਬ੍ਬੇ ਕਿਰ ਸੋ ਏਕਸ੍ਮਿਂ ਦੀਪੇ ਵਸਮਾਨੋ ਸਮਚ੍ਛਨ੍ਦੇਨ ਸਕੁਣਪੋਤਕੇ ਖਾਦਿ. ਸਚਸ੍ਸ ਮਾਤੁਗਾਮੋ ਅਞ੍ਞੋਵ ਭਵੇਯ੍ਯ, ਪੁਤ੍ਤਂ ਲਭੇਯ੍ਯ. ਉਭੋਹਿ ਪਨ ਸਮਾਨਚ੍ਛਨ੍ਦੇਹਿ ਹੁਤ੍ਵਾ ਪਾਪਕਮ੍ਮਂ ਕਤਂ, ਤੇਨਸ੍ਸ ਪੁਤ੍ਤੋ ਨ ਨਿਬ੍ਬਤ੍ਤਿਸ੍ਸਤੀਤਿ ਅਞ੍ਞਾਸਿ. ਦੁਸ੍ਸੇ ਪਨ ਅਕ੍ਕਨ੍ਤੇ – ‘‘ਬੁਦ੍ਧਾਨਂ ਅਧਿਕਾਰਂ ਕਤ੍ਵਾ ਪਤ੍ਥਿਤਪਤ੍ਥਿਤਂ ਲਭਨ੍ਤੀਤਿ ਲੋਕੇ ਅਨੁਸ੍ਸਵੋ, ਮਯਾ ਚ ਮਹਾਅਭਿਨੀਹਾਰੋ ਕਤੋ, ਨ ਚ ਪੁਤ੍ਤਂ ਲਭਾਮਿ, ਤੁਚ੍ਛਂ ਇਦਂ ਵਚਨ’’ਨ੍ਤਿ ਮਿਚ੍ਛਾਗਹਣਂ ਗਣ੍ਹੇਯ੍ਯ. ਤਿਤ੍ਥਿਯਾਪਿ – ‘‘ਨਤ੍ਥਿ ਸਮਣਾਨਂ ਅਕਤ੍ਤਬ੍ਬਂ ਨਾਮ, ਚੇਲਪ੍ਪਟਿਕਂ ਮਦ੍ਦਨ੍ਤਾ ਆਹਿਣ੍ਡਨ੍ਤੀ’’ਤਿ ਉਜ੍ਝਾਯੇਯ੍ਯੁਂ. ਏਤਰਹਿ ਚ ਅਕ੍ਕਮਨ੍ਤੇਸੁ ਬਹੂ ਭਿਕ੍ਖੂ ਪਰਚਿਤ੍ਤਵਿਦੁਨੋ, ਤੇ ਭਬ੍ਬਂ ਜਾਨਿਤ੍ਵਾ ਅਕ੍ਕਮਿਸ੍ਸਨ੍ਤਿ, ਅਭਬ੍ਬਂ ਜਾਨਿਤ੍ਵਾ ਨ ਅਕ੍ਕਮਿਸ੍ਸਨ੍ਤਿ. ਅਨਾਗਤੇ ਪਨ ਉਪਨਿਸ੍ਸਯੋ ਮਨ੍ਦੋ ਭਵਿਸ੍ਸਤਿ, ਅਨਾਗਤਂ ਨ ਜਾਨਿਸ੍ਸਨ੍ਤਿ. ਤੇਸੁ ਅਕ੍ਕਮਨ੍ਤੇਸੁ ਸਚੇ ਪਤ੍ਥਿਤਂ ਇਜ੍ਝਿਸ੍ਸਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਇਜ੍ਝਿਸ੍ਸਤਿ, – ‘‘ਪੁਬ੍ਬੇ ਭਿਕ੍ਖੁਸਙ੍ਘਸ੍ਸ ਅਭਿਨੀਹਾਰਂ ਕਤ੍ਵਾ ਇਚ੍ਛਿਤਿਚ੍ਛਿਤਂ ਲਭਨ੍ਤਿ, ਤਂ ਇਦਾਨਿ ਨ ਲਭਨ੍ਤਿ. ਤੇਯੇਵ ਮਞ੍ਞੇ ਭਿਕ੍ਖੂ ਪਟਿਪਤ੍ਤਿਪੂਰਕਾ ਅਹੇਸੁਂ, ਇਮੇ ਪਟਿਪਤ੍ਤਿਂ ਪੂਰੇਤੁਂ ਨ ਸਕ੍ਕੋਨ੍ਤੀ’’ਤਿ ਮਨੁਸ੍ਸਾ ਵਿਪ੍ਪਟਿਸਾਰਿਨੋ ਭਵਿਸ੍ਸਨ੍ਤੀਤਿ ਇਮੇਹਿ ਕਾਰਣੇਹਿ ਭਗਵਾ ਅਕ੍ਕਮਿਤੁਂ ਅਨਿਚ੍ਛਨ੍ਤੋ ਤੁਣ੍ਹੀ ਅਹੋਸਿ. ਸਿਕ੍ਖਾਪਦਂ ਪਞ੍ਞਪੇਸਿ ‘‘ਨ, ਭਿਕ੍ਖਵੇ, ਚੇਲਪ੍ਪਟਿਕਾ ਅਕ੍ਕਮਿਤਬ੍ਬਾ’’ਤਿ (ਚੂਲ਼ਵ. ੨੬੮). ਮਙ੍ਗਲਤ੍ਥਾਯ ਪਞ੍ਞਤ੍ਤਂ ਅਨਕ੍ਕਮਨ੍ਤੇਸੁ ਪਨ ਅਕ੍ਕਮਨਤ੍ਥਾਯ ਅਨੁਪਞ੍ਞਤ੍ਤਿਂ ਠਪੇਸਿ – ‘‘ਗਿਹੀ, ਭਿਕ੍ਖਵੇ, ਮਙ੍ਗਲਿਕਾ, ਅਨੁਜਾਨਾਮਿ, ਭਿਕ੍ਖਵੇ, ਗਿਹੀਨਂ ਮਙ੍ਗਲਤ੍ਥਾਯਾ’’ਤਿ (ਚੂਲ਼ਵ. ੨੬੮).
੩੨੬. ਪਚ੍ਛਿਮਂ ਜਨਤਂ ਤਥਾਗਤੋ ਅਨੁਕਮ੍ਪਤੀਤਿ ਇਦਂ ਥੇਰੋ ਵੁਤ੍ਤੇਸੁ ਕਾਰਣੇਸੁ ਤਤਿਯਂ ਕਾਰਣਂ ਸਨ੍ਧਾਯਾਹ. ਨ ਖੋ ਸੁਖੇਨ ਸੁਖਨ੍ਤਿ ਕਸ੍ਮਾ ਆਹ? ਕਾਮਸੁਖਲ੍ਲਿਕਾਨੁਯੋਗਸਞ੍ਞੀ ਹੁਤ੍ਵਾ ਸਮ੍ਮਾਸਮ੍ਬੁਦ੍ਧੋ ਨ ਅਕ੍ਕਮਿ, ਤਸ੍ਮਾ ਅਹਮ੍ਪਿ ਸਤ੍ਥਾਰਾ ਸਮਾਨਚ੍ਛਨ੍ਦੋ ਭਵਿਸ੍ਸਾਮੀਤਿ ਮਞ੍ਞਮਾਨੋ ਏਵਮਾਹ.
੩੨੭. ਸੋ ਖੋ ਅਹਨ੍ਤਿਆਦਿ ‘‘ਯਾਵ ਰਤ੍ਤਿਯਾ ਪਚ੍ਛਿਮੇ ਯਾਮੇ’’ਤਿ ਤਾਵ ਮਹਾਸਚ੍ਚਕੇ (ਮ. ਨਿ. ੧.੩੬੪ ਆਦਯੋ) ਵੁਤ੍ਤਨਯੇਨ ਵੇਦਿਤਬ੍ਬਂ. ਤਤੋ ਪਰਂ ਯਾਵ ਪਞ੍ਚਵਗ੍ਗਿਯਾਨਂ ਆਸਵਕ੍ਖਯਾ ਪਾਸਰਾਸਿਸੁਤ੍ਤੇ (ਮ. ਨਿ. ੧.੨੭੨ ਆਦਯੋ) ਵੁਤ੍ਤਨਯੇਨ ਵੇਦਿਤਬ੍ਬਂ.
੩੪੩. ਅਙ੍ਕੁਸਗਯ੍ਹੇ ਸਿਪ੍ਪੇਤਿ ਅਙ੍ਕੁਸਗਹਣਸਿਪ੍ਪੇ. ਕੁਸਲੋ ਅਹਨ੍ਤਿ ਛੇਕੋ ਅਹਂ. ਕਸ੍ਸ ਪਨਾਯਂ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹੀਤਿ? ਪਿਤੁ ਸਨ੍ਤਿਕੇ, ਪਿਤਾਪਿਸ੍ਸ ਪਿਤੁ ਸਨ੍ਤਿਕੇਵ ਉਗ੍ਗਣ੍ਹਿ. ਕੋਸਮ੍ਬਿਯਂ ਕਿਰ ਪਰਨ੍ਤਪਰਾਜਾ ਨਾਮ ਰਜ੍ਜਂ ਕਾਰੇਸਿ. ਰਾਜਮਹੇਸੀ ਗਰੁਭਾਰਾ ਆਕਾਸਤਲੇ ਰਞ੍ਞਾ ਸਦ੍ਧਿਂ ਬਾਲਾਤਪਂ ਤਪ੍ਪਮਾਨਾ ਰਤ੍ਤਕਮ੍ਬਲਂ ਪਾਰੁਪਿਤ੍ਵਾ ਨਿਸਿਨ੍ਨਾ ਹੋਤਿ, ਏਕੋ ਹਤ੍ਥਿਲਿਙ੍ਗਸਕੁਣੋ ‘‘ਮਂਸਪੇਸੀ’’ਤਿ ਮਞ੍ਞਮਾਨੋ ਗਹੇਤ੍ਵਾ ਆਕਾਸਂ ਪਕ੍ਖਨ੍ਦਿ. ਸਾ ‘‘ਛਡ੍ਡੇਯ੍ਯ ਮ’’ਨ੍ਤਿ ਭਯੇਨ ਨਿਸ੍ਸਦ੍ਦਾ ਅਹੋਸਿ, ਸੋ ਤਂ ਪਬ੍ਬਤਪਾਦੇ ਰੁਕ੍ਖਵਿਟਪੇ ਠਪੇਸਿ. ਸਾ ਪਾਣਿਸ੍ਸਰਂ ਕਰੋਨ੍ਤੀ ਮਹਾਸਦ੍ਦਮਕਾਸਿ. ਸਕੁਣੋ ਪਲਾਯਿ, ਤਸ੍ਸਾ ਤਤ੍ਥੇਵ ਗਬ੍ਭਵੁਟ੍ਠਾਨਂ ਅਹੋਸਿ. ਤਿਯਾਮਰਤ੍ਤਿਂ ਦੇਵੇ ਵਸ੍ਸਨ੍ਤੇ ਕਮ੍ਬਲਂ ਪਾਰੁਪਿਤ੍ਵਾ ਨਿਸੀਦਿ. ਤਤੋ ਚ ਅਵਿਦੂਰੇ ਤਾਪਸੋ ਵਸਤਿ. ਸੋ ਤਸ੍ਸਾ ਸਦ੍ਦੇਨ ਅਰੁਣੇ ਉਗ੍ਗਤੇ ਰੁਕ੍ਖਮੂਲਂ ਆਗਤੋ ਜਾਤਿਂ ਪੁਚ੍ਛਿਤ੍ਵਾ ਨਿਸ੍ਸੇਣਿਂ ਬਨ੍ਧਿਤ੍ਵਾ ਓਤਾਰੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਯਾਗੁਂ ਪਾਯੇਸਿ. ਦਾਰਕਸ੍ਸ ਮੇਘਉਤੁਞ੍ਚ ਪਬ੍ਬਤਉਤੁਞ੍ਚ ਗਹੇਤ੍ਵਾ ਜਾਤਤ੍ਤਾ ਉਦੇਨੋਤਿ ਨਾਮਂ ਅਕਾਸਿ. ਤਾਪਸੋ ਫਲਾਫਲਾਨਿ ਆਹਰਿਤ੍ਵਾ ਦ੍ਵੇਪਿ ਜਨੇ ਪੋਸੇਸਿ.
ਸਾ ਏਕਦਿਵਸਂ ਤਾਪਸਸ੍ਸ ਆਗਮਨਵੇਲਾਯ ਪਚ੍ਚੁਗ੍ਗਮਨਂ ਕਤ੍ਵਾ ਇਤ੍ਥਿਕੁਤ੍ਤਂ ਦਸ੍ਸੇਤ੍ਵਾ ਤਾਪਸਂ ਸੀਲਭੇਦਂ ਆਪਾਦੇਸਿ. ਤੇਸਂ ਏਕਤੋ ਵਸਨ੍ਤਾਨਂ ਕਾਲੇ ਗਚ੍ਛਨ੍ਤੇ ਪਰਨ੍ਤਪਰਾਜਾ ਕਾਲਂ ਅਕਾਸਿ. ਤਾਪਸੋ ਰਤ੍ਤਿਭਾਗੇ ਨਕ੍ਖਤ੍ਤਂ ਓਲੋਕੇਤ੍ਵਾ ਰਞ੍ਞੋ ਮਤਭਾਵਂ ਞਤ੍ਵਾ – ‘‘ਤੁਯ੍ਹਂ ਰਾਜਾ ਮਤੋ, ਪੁਤ੍ਤੋ ਤੇ ਕਿਂ ਇਧ ਵਸਿਤੁਂ ਇਚ੍ਛਤਿ, ਉਦਾਹੁ ਪੇਤ੍ਤਿਕੇ ਰਜ੍ਜੇ ਛਤ੍ਤਂ ਉਸ੍ਸਾਪੇਤੁ’’ਨ੍ਤਿ ਪੁਚ੍ਛਿ. ਸਾ ਪੁਤ੍ਤਸ੍ਸ ਆਦਿਤੋ ਪਟ੍ਠਾਯ ਸਬ੍ਬਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ਛਤ੍ਤਂ ਉਸ੍ਸਾਪੇਤੁਕਾਮਤਞ੍ਚਸ੍ਸ ਞਤ੍ਵਾ ਤਾਪਸਸ੍ਸ ਆਰੋਚੇਸਿ. ਤਾਪਸੋ ਚ ਹਤ੍ਥਿਗਨ੍ਥਸਿਪ੍ਪਂ ਜਾਨਾਤਿ, ਕੁਤੋਨੇਨ ਲਦ੍ਧਂ? ਸਕ੍ਕਸ੍ਸ ਸਨ੍ਤਿਕਾ. ਪੁਬ੍ਬੇ ਕਿਰਸ੍ਸ ਸਕ੍ਕੋ ਉਪਟ੍ਠਾਨਂ ਆਗਨ੍ਤ੍ਵਾ ‘‘ਕੇਨ ਕਿਲਮਥਾ’’ਤਿ ਪੁਚ੍ਛਿ. ਸੋ ‘‘ਹਤ੍ਥਿਪਰਿਸ੍ਸਯੋ ਅਤ੍ਥੀ’’ਤਿ ਆਰੋਚੇਸਿ. ਤਸ੍ਸ ਸਕ੍ਕੋ ਹਤ੍ਥਿਗਨ੍ਥਞ੍ਚੇਵ ਵੀਣਕਞ੍ਚ ਦਤ੍ਵਾ ‘‘ਪਲਾਪੇਤੁਕਾਮਤਾਯ ਸਤਿ ਇਮਂ ਤਨ੍ਤਿਂ ਵਾਦੇਤ੍ਵਾ ਇਮਂ ਸਿਲੋਕਂ ਵਦੇਯ੍ਯਾਥ, ਪਕ੍ਕੋਸਿਤੁਕਾਮਤਾਯ ਸਤਿ ਇਮਂ ਸਿਲੋਕਂ ਵਦੇਯ੍ਯਾਥਾ’’ਤਿ ਆਹ. ਤਾਪਸੋ ਤਂ ਸਿਪ੍ਪਂ ਕੁਮਾਰਸ੍ਸ ਅਦਾਸਿ. ਸੋ ਏਕਂ ਵਟਰੁਕ੍ਖਂ ਅਭਿਰੁਹਿਤ੍ਵਾ ਹਤ੍ਥੀਸੁ ਆਗਤੇਸੁ ਤਨ੍ਤਿਂ ਵਾਦੇਤ੍ਵਾ ਸਿਲੋਕਂ ਵਦਤਿ, ਹਤ੍ਥੀ ਭੀਤਾ ਪਲਾਯਿਂਸੁ.