੮. ਬਾਹਿਤਿਕਸੁਤ੍ਤਵਣ੍ਣਨਾ

੩੫੮. ਏਵਂ ਮੇ ਸੁਤਨ੍ਤਿ ਬਾਹਿਤਿਕਸੁਤ੍ਤਂ. ਤਤ੍ਥ ਏਕਪੁਣ੍ਡਰੀਕਂ ਨਾਗਨ੍ਤਿ ਏਵਂਨਾਮਕਂ ਹਤ੍ਥਿਂ. ਤਸ੍ਸ ਕਿਰ ਫਾਸੁਕਾਨਂ ਉਪਰਿ ਤਾਲਫਲਮਤ੍ਤਂ ਪਣ੍ਡਰਟ੍ਠਾਨਂ ਅਤ੍ਥਿ, ਤੇਨਸ੍ਸ ਏਕਪੁਣ੍ਡਰੀਕੋਤਿ ਨਾਮਂ ਅਕਂਸੁ. ਸਿਰਿਵਡ੍ਢਂ ਮਹਾਮਤ੍ਤਨ੍ਤਿ ਪਚ੍ਚੇਕਹਤ੍ਥਿਂ ਅਭਿਰੁਹਿਤ੍ਵਾ ਕਥਾਫਾਸੁਕਤ੍ਥਂ ਸਦ੍ਧਿਂ ਗਚ੍ਛਨ੍ਤਂ ਏਵਂਨਾਮਕਂ ਮਹਾਮਤ੍ਤਂ. ਆਯਸ੍ਮਾਨੋਤਿ ਏਤ੍ਥ ਨੋਤਿ ਪੁਚ੍ਛਾਯ ਨਿਪਾਤੋ. ਮਹਾਮਤ੍ਤੋ ਥੇਰਸ੍ਸ ਸਙ੍ਘਾਟਿਪਤ੍ਤਧਾਰਣਾਕਾਰਂ ਸਲ੍ਲਕ੍ਖੇਤ੍ਵਾ ‘‘ਏਵਂ, ਮਹਾਰਾਜਾ’’ਤਿ ਆਹ.

੩੫੯. ਓਪਾਰਮ੍ਭੋਤਿ ਉਪਾਰਮ੍ਭਂ ਦੋਸਂ ਆਰੋਪਨਾਰਹੋ. ਕਿਂ ਪੁਚ੍ਛਾਮੀਤਿ ਰਾਜਾ ਪੁਚ੍ਛਤਿ. ਸੁਨ੍ਦਰਿਵਤ੍ਥੁਸ੍ਮਿਂ ਉਪ੍ਪਨ੍ਨਮਿਦਂ ਸੁਤ੍ਤਂ, ਤਂ ਪੁਚ੍ਛਾਮੀਤਿ ਪੁਚ੍ਛਤਿ. ਯਞ੍ਹਿ ਮਯਂ, ਭਨ੍ਤੇਤਿ, ਭਨ੍ਤੇ, ਯਂ ਮਯਂ ਵਿਞ੍ਞੂਹੀਤਿ ਇਦਂ ਪਦਂ ਗਹੇਤ੍ਵਾ ਪਞ੍ਹੇਨ ਪਰਿਪੂਰੇਤੁਂ ਨਾਸਕ੍ਖਿਮ੍ਹਾ, ਤਂ ਕਾਰਣਂ ਆਯਸ੍ਮਤਾ ਏਵਂ ਵਦਨ੍ਤੇਨ ਪਰਿਪੂਰਿਤਂ.

੩੬੦. ਅਕੁਸਲੋਤਿ ਅਕੋਸਲ੍ਲਸਮ੍ਭੂਤੋ. ਸਾਵਜ੍ਜੋਤਿ ਸਦੋਸੋ. ਸਬ੍ਯਾਬਜ੍ਝੋਤਿ ਸਦੁਕ੍ਖੋ. ਦੁਕ੍ਖਵਿਪਾਕੋਤਿ ਇਧ ਨਿਸ੍ਸਨ੍ਦਵਿਪਾਕੋ ਕਥਿਤੋ. ਤਸ੍ਸਾਤਿ ਤਸ੍ਸ ਏਵਂ ਅਤ੍ਤਬ੍ਯਾਬਾਧਾਦੀਨਂ ਅਤ੍ਥਾਯ ਪਵਤ੍ਤਕਾਯਸਮਾਚਾਰਸ੍ਸ.

ਸਬ੍ਬਾਕੁਸਲਧਮ੍ਮਪਹੀਨੋ ਖੋ, ਮਹਾਰਾਜ, ਤਥਾਗਤੋ ਕੁਸਲਧਮ੍ਮਸਮਨ੍ਨਾਗਤੋਤਿ ਏਤ੍ਥ ਸਬ੍ਬੇਸਂਯੇਵ ਅਕੁਸਲਾਨਂ ਧਮ੍ਮਾਨਂ ਪਹਾਨਂ ਵਣ੍ਣੇਤੀਤਿ. ਆਮ ਵਣ੍ਣੇਤੀਤਿ ਵੁਤ੍ਤੇ ਯਥਾ ਪੁਚ੍ਛਾ, ਤਥਾ ਅਤ੍ਥੋ ਵੁਤ੍ਤੋ ਭਵੇਯ੍ਯ. ਏਵਂ ਬ੍ਯਾਕਰਣਂ ਪਨ ਨ ਭਾਰਿਯਂ. ਅਪ੍ਪਹੀਨਅਕੁਸਲੋਪਿ ਹਿ ਪਹਾਨਂ ਵਣ੍ਣੇਯ੍ਯ, ਭਗਵਾ ਪਨ ਪਹੀਨਾਕੁਸਲਤਾਯ ਯਥਾਕਾਰੀ ਤਥਾਵਾਦੀਤਿ ਦਸ੍ਸੇਤੁਂ ਏਵਂ ਬ੍ਯਾਕਾਸਿ. ਸੁਕ੍ਕਪਕ੍ਖੇਪਿ ਏਸੇਵ ਨਯੋ.

੩੬੨. ਬਾਹਿਤਿਕਾਤਿ ਬਾਹਿਤਿਰਟ੍ਠੇ ਉਟ੍ਠਿਤਵਤ੍ਥਸ੍ਸੇਤਂ ਨਾਮਂ. ਸੋਲ਼ਸਸਮਾ ਆਯਾਮੇਨਾਤਿ ਆਯਾਮੇਨ ਸਮਸੋਲ਼ਸਹਤ੍ਥਾ. ਅਟ੍ਠਸਮਾ ਵਿਤ੍ਥਾਰੇਨਾਤਿ ਵਿਤ੍ਥਾਰੇਨ ਸਮਅਟ੍ਠਹਤ੍ਥਾ.

੩੬੩. ਭਗਵਤੋ ਪਾਦਾਸੀਤਿ ਭਗਵਤੋ ਨਿਯ੍ਯਾਤੇਸਿ. ਦਤ੍ਵਾ ਚ ਪਨ ਗਨ੍ਧਕੁਟਿਯਂ ਵਿਤਾਨਂ ਕਤ੍ਵਾ ਬਨ੍ਧਿ. ਤਤੋ ਪਟ੍ਠਾਯ ਗਨ੍ਧਕੁਟਿ ਭਿਯ੍ਯੋਸੋਮਤ੍ਤਾਯ ਸੋਭਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਨੇਯ੍ਯਪੁਗ੍ਗਲਸ੍ਸ ਪਨ ਵਸੇਨ ਅਯਂ ਦੇਸਨਾ ਨਿਟ੍ਠਿਤਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਬਾਹਿਤਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.