੭. ਪਿਯਜਾਤਿਕਸੁਤ੍ਤਵਣ੍ਣਨਾ

੩੫੩. ਏਵਂ ਮੇ ਸੁਤਨ੍ਤਿ ਪਿਯਜਾਤਿਕਸੁਤ੍ਤਂ. ਤਤ੍ਥ ਨੇਵ ਕਮ੍ਮਨ੍ਤਾ ਪਟਿਭਨ੍ਤੀਤਿ ਨ ਸਬ੍ਬੇਨ ਸਬ੍ਬਂ ਪਟਿਭਨ੍ਤਿ, ਪਕਤਿਨਿਯਾਮੇਨ ਪਨ ਨ ਪਟਿਭਨ੍ਤਿ. ਦੁਤਿਯਪਦੇਪਿ ਏਸੇਵ ਨਯੋ. ਏਤ੍ਥ ਚ ਨ ਪਟਿਭਾਤੀਤਿ ਨ ਰੁਚ੍ਚਤਿ. ਆਲ਼ਾਹਨਨ੍ਤਿ ਸੁਸਾਨਂ. ਅਞ੍ਞਥਤ੍ਤਨ੍ਤਿ ਵਿਵਣ੍ਣਤਾਯ ਅਞ੍ਞਥਾਭਾਵੋ. ਇਨ੍ਦ੍ਰਿਯਾਨਿ ਨਾਮ ਮਨੋਵਿਞ੍ਞੇਯ੍ਯਾ ਧਮ੍ਮਾ, ਪਤਿਟ੍ਠਿਤੋਕਾਸਂ ਪਨ ਸਨ੍ਧਾਯ ਇਦਂ ਵੁਤ੍ਤਂ. ਪਿਯਜਾਤਿਕਾਤਿ ਪਿਯਤੋ ਜਾਯਨ੍ਤਿ. ਪਿਯਪ੍ਪਭਾਵਿਕਾਤਿ ਪਿਯਤੋ ਪਭਵਨ੍ਤਿ.

੩੫੫. ਸਚੇ ਤਂ, ਮਹਾਰਾਜਾਤਿ ਤਸ੍ਸ ਅਤ੍ਥਂ ਅਸਲ੍ਲਕ੍ਖਯਮਾਨਾਪਿ ਸਤ੍ਥਰਿ ਸਦ੍ਧਾਯ ਏਵਂ ਵਦਤਿ. ਚਰ ਪਿਰੇਤਿ ਅਪੇਹਿ ਅਮ੍ਹਾਕਂ ਪਰੇ, ਅਨਜ੍ਝਤ੍ਤਿਕਭੂਤੇਤਿ ਅਤ੍ਥੋ. ਅਥ ਵਾ ਚਰ ਪਿਰੇਤਿ ਪਰਤੋ ਗਚ੍ਛ, ਮਾ ਇਧ ਤਿਟ੍ਠਾਤਿਪਿ ਅਤ੍ਥੋ.

੩੫੬. ਦ੍ਵਿਧਾ ਛੇਤ੍ਵਾਤਿ ਅਸਿਨਾ ਦ੍ਵੇ ਕੋਟ੍ਠਾਸੇ ਕਰੋਨ੍ਤੋ ਛਿਨ੍ਦਿਤ੍ਵਾ. ਅਤ੍ਤਾਨਂ ਉਪ੍ਫਾਲੇਸੀਤਿ ਤੇਨੇਵ ਅਸਿਨਾ ਅਤ੍ਤਨੋ ਉਦਰਂ ਫਾਲੇਸਿ. ਯਦਿ ਹਿ ਤਸ੍ਸ ਸਾ ਅਪ੍ਪਿਯਾ ਭਵੇਯ੍ਯ, ਇਦਾਨਿ ਅਞ੍ਞਂ ਮਾਤੁਗਾਮਂ ਗਣ੍ਹਿਸ੍ਸਾਮੀਤਿ ਅਤ੍ਤਾਨਂ ਨ ਘਾਤੇਯ੍ਯ. ਯਸ੍ਮਾ ਪਨਸ੍ਸ ਸਾ ਪਿਯਾ ਅਹੋਸਿ, ਤਸ੍ਮਾ ਪਰਲੋਕੇਪਿ ਤਾਯ ਸਦ੍ਧਿਂ ਸਮਙ੍ਗਿਭਾਵਂ ਪਤ੍ਥਯਮਾਨੋ ਏਵਮਕਾਸਿ.

੩੫੭. ਪਿਯਾ ਤੇ ਵਜਿਰੀਤਿ ਏਵਂ ਕਿਰਸ੍ਸਾ ਅਹੋਸਿ – ‘‘ਸਚਾਹਂ, ‘ਭੂਤਪੁਬ੍ਬਂ, ਮਹਾਰਾਜ, ਇਮਿਸ੍ਸਾਯੇਵ ਸਾਵਤ੍ਥਿਯਂ ਅਞ੍ਞਤਰਿਸ੍ਸਾ ਇਤ੍ਥਿਯਾ’ਤਿਆਦਿਕਥਂ ਕਥੇਯ੍ਯਂ, ‘ਕੋ ਤੇ ਏਵਂ ਅਕਾਸਿ, ਅਪੇਹਿ ਨਤ੍ਥਿ ਏਤ’ਨ੍ਤਿ ਮਂ ਪਟਿਸੇਧੇਯ੍ਯ, ਵਤ੍ਤਮਾਨੇਨੇਵ ਨਂ ਸਞ੍ਞਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਵਮਾਹ. ਵਿਪਰਿਣਾਮਞ੍ਞਥਾਭਾਵਾਤਿ ਏਤ੍ਥ ਮਰਣਵਸੇਨ ਵਿਪਰਿਣਾਮੋ, ਕੇਨਚਿ ਸਦ੍ਧਿਂ ਪਲਾਯਿਤ੍ਵਾ ਗਮਨਵਸੇਨ ਅਞ੍ਞਥਾਭਾਵੋ ਵੇਦਿਤਬ੍ਬੋ.

ਵਾਸਭਾਯਾਤਿ ਵਾਸਭਾ ਨਾਮ ਰਞ੍ਞੋ ਏਕਾ ਦੇਵੀ, ਤਂ ਸਨ੍ਧਾਯਾਹ.

ਪਿਯਾ ਤੇ ਅਹਨ੍ਤਿ ਕਸ੍ਮਾ ਸਬ੍ਬਪਚ੍ਛਾ ਆਹ? ਏਵਂ ਕਿਰਸ੍ਸਾ ਅਹੋਸਿ – ‘‘ਅਯਂ ਰਾਜਾ ਮਯ੍ਹਂ ਕੁਪਿਤੋ, ਸਚਾਹਂ ਸਬ੍ਬਪਠਮਂ ‘ਪਿਯਾ ਤੇ ਅਹ’ਨ੍ਤਿ ਪੁਚ੍ਛੇਯ੍ਯਂ, ‘ਨ ਮੇ ਤ੍ਵਂ ਪਿਯਾ, ਚਰ ਪਿਰੇ’ਤਿ ਵਦੇਯ੍ਯ, ਏਵਂ ਸਨ੍ਤੇ ਕਥਾ ਪਤਿਟ੍ਠਾਨਂ ਨ ਲਭਿਸ੍ਸਤੀ’’ਤਿ ਕਥਾਯ ਪਤਿਟ੍ਠਾਨਤ੍ਥਂ ਸਬ੍ਬਪਚ੍ਛਾ ਪੁਚ੍ਛਿ. ਕਾਸਿਕੋਸਲੇਸੁ ਛਡ੍ਡਿਤਭਾਵੇਨ ਵਿਪਰਿਣਾਮੋ, ਪਟਿਰਾਜੂਨਂ ਹਤ੍ਥਗਮਨਵਸੇਨ ਅਞ੍ਞਥਾਭਾਵੋ ਵੇਦਿਤਬ੍ਬੋ.

ਆਚਮੇਹੀਤਿ ਆਚਮਨੋਦਕਂ ਦੇਹਿ. ਆਚਮਿਤ੍ਵਾ ਹਤ੍ਥਪਾਦੇ ਧੋਵਿਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਸਤ੍ਥਾਰਂ ਨਮਸ੍ਸਿਤੁਕਾਮੋ ਏਵਮਾਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਪਿਯਜਾਤਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.