੬. ਅਙ੍ਗੁਲਿਮਾਲਸੁਤ੍ਤਵਣ੍ਣਨਾ

੩੪੭. ਏਵਂ ਮੇ ਸੁਤਨ੍ਤਿ ਅਙ੍ਗੁਲਿਮਾਲਸੁਤ੍ਤਂ. ਤਤ੍ਥ ਅਙ੍ਗੁਲੀਨਂ ਮਾਲਂ ਧਾਰੇਤੀਤਿ ਕਸ੍ਮਾ ਧਾਰੇਤਿ? ਆਚਰਿਯਵਚਨੇਨ. ਤਤ੍ਰਾਯਂ ਅਨੁਪੁਬ੍ਬਿਕਥਾ –

ਅਯਂ ਕਿਰ ਕੋਸਲਰਞ੍ਞੋ ਪੁਰੋਹਿਤਸ੍ਸ ਮਨ੍ਤਾਣਿਯਾ ਨਾਮ ਬ੍ਰਾਹ੍ਮਣਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਅਗ੍ਗਹੇਸਿ. ਬ੍ਰਾਹ੍ਮਣਿਯਾ ਰਤ੍ਤਿਭਾਗੇ ਗਬ੍ਭਵੁਟ੍ਠਾਨਂ ਅਹੋਸਿ. ਤਸ੍ਸ ਮਾਤੁਕੁਚ੍ਛਿਤੋ ਨਿਕ੍ਖਮਨਕਾਲੇ ਸਕਲਨਗਰੇ ਆਵੁਧਾਨਿ ਪਜ੍ਜਲਿਂਸੁ, ਰਞ੍ਞੋ ਮਙ੍ਗਲਸਕੁਨ੍ਤੋਪਿ ਸਿਰਿਸਯਨੇ ਠਪਿਤਾ ਅਸਿਲਟ੍ਠਿਪਿ ਪਜ੍ਜਲਿ. ਬ੍ਰਾਹ੍ਮਣੋ ਨਿਕ੍ਖਮਿਤ੍ਵਾ ਨਕ੍ਖਤ੍ਤਂ ਓਲੋਕੇਨ੍ਤੋ ਚੋਰਨਕ੍ਖਤ੍ਤੇਨ ਜਾਤੋਤਿ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਸੁਖਸੇਯ੍ਯਭਾਵਂ ਪੁਚ੍ਛਿ.

ਰਾਜਾ ‘‘ਕੁਤੋ, ਮੇ ਆਚਰਿਯ, ਸੁਖਸੇਯ੍ਯਾ? ਮਯ੍ਹਂ ਮਙ੍ਗਲਾਵੁਧਂ ਪਜ੍ਜਲਿ, ਰਜ੍ਜਸ੍ਸ ਵਾ ਜੀਵਿਤਸ੍ਸ ਵਾ ਅਨ੍ਤਰਾਯੋ ਭਵਿਸ੍ਸਤਿ ਮਞ੍ਞੇ’’ਤਿ. ਮਾ ਭਾਯਿ, ਮਹਾਰਾਜ, ਮਯ੍ਹਂ ਘਰੇ ਕੁਮਾਰੋ ਜਾਤੋ, ਤਸ੍ਸਾਨੁਭਾਵੇਨ ਨ ਕੇਵਲਂ ਤੁਯ੍ਹਂ ਨਿਵੇਸਨੇ, ਸਕਲਨਗਰੇਪਿ ਆਵੁਧਾਨਿ ਪਜ੍ਜਲਿਤਾਨੀਤਿ. ਕਿਂ ਭਵਿਸ੍ਸਤਿ ਆਚਰਿਯਾਤਿ? ਚੋਰੋ ਭਵਿਸ੍ਸਤਿ ਮਹਾਰਾਜਾਤਿ. ਕਿਂ ਏਕਚੋਰਕੋ, ਉਦਾਹੁ ਰਜ੍ਜਦੂਸਕੋ ਚੋਰੋਤਿ? ਏਕਚੋਰਕੋ ਦੇਵਾਤਿ. ਏਵਂ ਵਤ੍ਵਾ ਚ ਪਨ ਰਞ੍ਞੋ ਮਨਂ ਗਣ੍ਹਿਤੁਕਾਮੋ ਆਹ – ‘‘ਮਾਰੇਥ ਨਂ ਦੇਵਾ’’ਤਿ. ਏਕਚੋਰਕੋ ਸਮਾਨੋ ਕਿਂ ਕਰਿਸ੍ਸਤਿ? ਕਰੀਸਸਹਸ੍ਸਖੇਤ੍ਤੇ ਏਕਸਾਲਿਸੀਸਂ ਵਿਯ ਹੋਤਿ, ਪਟਿਜਗ੍ਗਥ ਨਨ੍ਤਿ. ਤਸ੍ਸ ਨਾਮਗ੍ਗਹਣਂ ਗਣ੍ਹਨ੍ਤਾ ਸਯਨੇ ਠਪਿਤਮਙ੍ਗਲਅਸਿਲਟ੍ਠਿ, ਛਦਨੇ ਠਪਿਤਾ ਸਰਾ, ਕਪ੍ਪਾਸਪਿਚੁਮ੍ਹਿ ਠਪਿਤਂ ਤਾਲਵਣ੍ਟਕਰਣਸਤ੍ਥਕਨ੍ਤਿ ਏਤੇ ਪਜ੍ਜਲਨ੍ਤਾ ਕਿਞ੍ਚਿ ਨ ਹਿਂਸਿਂਸੁ, ਤਸ੍ਮਾ ਅਹਿਂਸਕੋਤਿ ਨਾਮਂ ਅਕਂਸੁ. ਤਂ ਸਿਪ੍ਪੁਗ੍ਗਹਣਕਾਲੇ ਤਕ੍ਕਸੀਲਂ ਪੇਸਯਿਂਸੁ.

ਸੋ ਧਮ੍ਮਨ੍ਤੇਵਾਸਿਕੋ ਹੁਤ੍ਵਾ ਸਿਪ੍ਪਂ ਪਟ੍ਠਪੇਸਿ. ਵਤ੍ਤਸਮ੍ਪਨ੍ਨੋ ਕਿਂਕਾਰਪਟਿਸ੍ਸਾਵੀ ਮਨਾਪਚਾਰੀ ਪਿਯਵਾਦੀ ਅਹੋਸਿ. ਸੇਸਅਨ੍ਤੇਵਾਸਿਕਾ ਬਾਹਿਰਕਾ ਅਹੇਸੁਂ. ਤੇ – ‘‘ਅਹਿਂਸਕਮਾਣਵਕਸ੍ਸ ਆਗਤਕਾਲਤੋ ਪਟ੍ਠਾਯ ਮਯਂ ਨ ਪਞ੍ਞਾਯਾਮ, ਕਥਂ ਨਂ ਭਿਨ੍ਦੇਯ੍ਯਾਮਾ’’ਤਿ? ਨਿਸੀਦਿਤ੍ਵਾ ਮਨ੍ਤਯਨ੍ਤਾ – ‘‘ਸਬ੍ਬੇਹਿ ਅਤਿਰੇਕਪਞ੍ਞਤ੍ਤਾ ਦੁਪ੍ਪਞ੍ਞੋਤਿ. ਨ ਸਕ੍ਕਾ ਵਤ੍ਤੁਂ, ਵਤ੍ਤਸਮ੍ਪਨ੍ਨਤ੍ਤਾ ਦੁਬ੍ਬਤ੍ਤੋਤਿ. ਨ ਸਕ੍ਕਾ ਵਤ੍ਤੁਂ, ਜਾਤਿਸਮ੍ਪਨ੍ਨਤ੍ਤਾ ਦੁਜ੍ਜਾਤੋਤਿ ਨ ਸਕ੍ਕਾ ਵਤ੍ਤੁਂ, ਕਿਨ੍ਤਿ ਕਰਿਸ੍ਸਾਮਾ’’ਤਿ? ਤਤੋ ਏਕਂ ਖਰਮਨ੍ਤਂ ਮਨ੍ਤਯਿਂਸੁ ‘‘ਆਚਰਿਯਸ੍ਸ ਅਨ੍ਤਰਂ ਕਤ੍ਵਾ ਨਂ ਭਿਨ੍ਦਿਸ੍ਸਾਮਾ’’ਤਿ ਤਯੋ ਰਾਸੀ ਹੁਤ੍ਵਾ ਪਠਮਂ ਏਕਚ੍ਚੇ ਆਚਰਿਯਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਅਟ੍ਠਂਸੁ. ਕਿਂ ਤਾਤਾਤਿ? ਇਮਸ੍ਮਿਂ ਗੇਹੇ ਏਕਾ ਕਥਾ ਸੁਯ੍ਯਤੀਤਿ. ਕਿਂ ਤਾਤਾਤਿ? ਅਹਿਂਸਕਮਾਣਵੋ ਤੁਮ੍ਹਾਕਂ ਅਨ੍ਤਰੇ ਦੁਬ੍ਭਤੀਤਿ ਮਞ੍ਞਾਮਾਤਿ. ਆਚਰਿਯੋ ਸਨ੍ਤਜ੍ਜੇਤ੍ਵਾ – ‘‘ਗਚ੍ਛਥ ਵਸਲਾ, ਮਾ ਮੇ ਪੁਤ੍ਤਂ ਮਯ੍ਹਂ ਅਨ੍ਤਰੇ ਪਰਿਭਿਨ੍ਦਥਾ’’ਤਿ ਨਿਟ੍ਠੁਭਿ. ਤਤੋ ਇਤਰੇ, ਅਥ ਇਤਰੇਹਿ ਤਯੋਪਿ ਕੋਟ੍ਠਾਸਾ ਆਗਨ੍ਤ੍ਵਾ ਤਥੇਵ ਵਤ੍ਵਾ – ‘‘ਅਮ੍ਹਾਕਂ ਅਸਦ੍ਦਹਨ੍ਤਾ ਉਪਪਰਿਕ੍ਖਿਤ੍ਵਾ ਜਾਨਾਥਾ’’ਤਿ ਆਹਂਸੁ.

ਆਚਰਿਯੋ ਸਿਨੇਹੇਨ ਵਦਨ੍ਤੇ ਦਿਸ੍ਵਾ ‘‘ਅਤ੍ਥਿ ਮਞ੍ਞੇ ਸਨ੍ਥਵੋ’’ਤਿ ਪਰਿਭਿਜ੍ਜਿਤ੍ਵਾ ਚਿਨ੍ਤੇਸਿ ‘‘ਘਾਤੇਮਿ ਨ’’ਨ੍ਤਿ. ਤਤੋ ਚਿਨ੍ਤੇਸਿ – ‘‘ਸਚੇ ਘਾਤੇਸ੍ਸਾਮਿ ‘ਦਿਸਾਪਾਮੋਕ੍ਖੋ ਆਚਰਿਯੋ ਅਤ੍ਤਨੋ ਸਨ੍ਤਿਕਂ ਸਿਪ੍ਪੁਗ੍ਗਹਣਤ੍ਥਂ ਆਗਤੇ ਮਾਣਵਕੇ ਦੋਸਂ ਉਪ੍ਪਾਦੇਤ੍ਵਾ ਜੀਵਿਤਾ ਵੋਰੋਪੇਤੀ’ਤਿ. ਪੁਨ ਕੋਚਿ ਸਿਪ੍ਪੁਗ੍ਗਹਣਤ੍ਥਂ ਨ ਆਗਮਿਸ੍ਸਤਿ, ਏਵਂ ਮੇ ਲਾਭੋ ਪਰਿਹਾਯਿਸ੍ਸਤਿ, ਅਥ ਨਂ ਸਿਪ੍ਪਸ੍ਸ ਪਰਿਯੋਸਾਨੁਪਚਾਰੋਤਿ ਵਤ੍ਵਾ ਜਙ੍ਘਸਹਸ੍ਸਂ ਘਾਤੇਹੀਤਿ ਵਕ੍ਖਾਮਿ. ਅਵਸ੍ਸਂ ਏਤ੍ਥ ਏਕੋ ਉਟ੍ਠਾਯ ਤਂ ਘਾਤੇਸ੍ਸਤੀ’’ਤਿ.

ਅਥ ਨਂ ਆਹ – ‘‘ਏਹਿ ਤਾਤ ਜਙ੍ਘਸਹਸ੍ਸਂ ਘਾਤੇਹਿ, ਏਵਂ ਤੇ ਸਿਪ੍ਪਸ੍ਸ ਉਪਚਾਰੋ ਕਤੋ ਭਵਿਸ੍ਸਤੀ’’ਤਿ. ਮਯਂ ਅਹਿਂਸਕਕੁਲੇ ਜਾਤਾ, ਨ ਸਕ੍ਕਾ ਆਚਰਿਯਾਤਿ. ਅਲਦ੍ਧੁਪਚਾਰਂ ਸਿਪ੍ਪਂ ਫਲਂ ਨ ਦੇਤਿ ਤਾਤਾਤਿ. ਸੋ ਪਞ੍ਚਾਵੁਧਂ ਗਹੇਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਅਟਵਿਂ ਪਵਿਟ੍ਠੋ. ਅਟਵਿਂ ਪਵਿਸਨਟ੍ਠਾਨੇਪਿ ਅਟਵਿਮਜ੍ਝੇਪਿ ਅਟਵਿਤੋ ਨਿਕ੍ਖਮਨਟ੍ਠਾਨੇਪਿ ਠਤ੍ਵਾ ਮਨੁਸ੍ਸੇ ਘਾਤੇਤਿ. ਵਤ੍ਥਂ ਵਾ ਵੇਠਨਂ ਵਾ ਨ ਗਣ੍ਹਾਤਿ. ਏਕੋ ਦ੍ਵੇਤਿ ਗਣਿਤਮਤ੍ਤਮੇਵ ਕਰੋਨ੍ਤੋ ਗਚ੍ਛਤਿ, ਗਣਨਮ੍ਪਿ ਨ ਉਗ੍ਗਣ੍ਹਾਤਿ. ਪਕਤਿਯਾਪਿ ਪਞ੍ਞਵਾ ਏਸ, ਪਾਣਾਤਿਪਾਤਿਨੋ ਪਨ ਚਿਤ੍ਤਂ ਨ ਪਤਿਟ੍ਠਾਤਿ, ਤਸ੍ਮਾ ਅਨੁਕ੍ਕਮੇਨ ਗਣਨਮ੍ਪਿ ਨ ਸਲ੍ਲਕ੍ਖੇਸਿ, ਏਕੇਕਂ ਅਙ੍ਗੁਲਿਂ ਛਿਨ੍ਦਿਤ੍ਵਾ ਠਪੇਤਿ. ਠਪਿਤਟ੍ਠਾਨੇ ਅਙ੍ਗੁਲਿਯੋ ਵਿਨਸ੍ਸਨ੍ਤਿ, ਤਤੋ ਵਿਜ੍ਝਿਤ੍ਵਾ ਅਙ੍ਗੁਲੀਨਂ ਮਾਲਂ ਕਤ੍ਵਾ ਧਾਰੇਸਿ, ਤੇਨੇਵ ਚਸ੍ਸ ਅਙ੍ਗੁਲਿਮਾਲੋਤਿ ਸਙ੍ਖਾ ਉਦਪਾਦਿ. ਸੋ ਸਬ੍ਬਂ ਅਰਞ੍ਞਂ ਨਿਸ੍ਸਞ੍ਚਾਰਮਕਾਸਿ, ਦਾਰੁਆਦੀਨਂ ਅਤ੍ਥਾਯ ਅਰਞ੍ਞਂ ਗਨ੍ਤੁਂ ਸਮਤ੍ਥੋ ਨਾਮ ਨਤ੍ਥਿ.

ਰਤ੍ਤਿਭਾਗੇ ਅਨ੍ਤੋਗਾਮਮ੍ਪਿ ਆਗਨ੍ਤ੍ਵਾ ਪਾਦੇਨ ਪਹਰਿਤ੍ਵਾ ਦ੍ਵਾਰਂ ਉਗ੍ਘਾਤੇਤਿ. ਤਤੋ ਸਯਿਤੇਯੇਵ ਮਾਰੇਤ੍ਵਾ ਏਕੋ ਏਕੋਤਿ ਗਹੇਤ੍ਵਾ ਗਚ੍ਛਤਿ. ਗਾਮੋ ਓਸਰਿਤ੍ਵਾ ਨਿਗਮੇ ਅਟ੍ਠਾਸਿ, ਨਿਗਮੋ ਨਗਰੇ. ਮਨੁਸ੍ਸਾ ਤਿਯੋਜਨਤੋ ਪਟ੍ਠਾਯ ਘਰਾਨਿ ਪਹਾਯ ਦਾਰਕੇ ਹਤ੍ਥੇਸੁ ਗਹੇਤ੍ਵਾ ਆਗਮ੍ਮ ਸਾਵਤ੍ਥਿਂ ਪਰਿਵਾਰੇਤ੍ਵਾ ਖਨ੍ਧਾਵਾਰਂ ਬਨ੍ਧਿਤ੍ਵਾ ਰਾਜਙ੍ਗਣੇ ਸਨ੍ਨਿਪਤਿਤ੍ਵਾ – ‘‘ਚੋਰੋ, ਤੇ ਦੇਵ, ਵਿਜਿਤੇ ਅਙ੍ਗੁਲਿਮਾਲੋ ਨਾਮਾ’’ਤਿਆਦੀਨਿ ਵਦਨ੍ਤਾ ਕਨ੍ਦਨ੍ਤਿ. ਭਗ੍ਗਵੋ ‘‘ਮਯ੍ਹਂ ਪੁਤ੍ਤੋ ਭਵਿਸ੍ਸਤੀ’’ਤਿ ਞਤ੍ਵਾ ਬ੍ਰਾਹ੍ਮਣਿਂ ਆਹ – ਭੋਤਿ ਅਙ੍ਗੁਲਿਮਾਲੋ ਨਾਮ ਚੋਰੋ ਉਪ੍ਪਨ੍ਨੋ, ਸੋ ਨ ਅਞ੍ਞੋ, ਤਵ ਪੁਤ੍ਤੋ ਅਹਿਂਸਕਕੁਮਾਰੋ. ਇਦਾਨਿ ਰਾਜਾ ਤਂ ਗਣ੍ਹਿਤੁਂ ਨਿਕ੍ਖਮਿਸ੍ਸਤਿ, ਕਿਂ ਕਤ੍ਤਬ੍ਬਨ੍ਤਿ? ਗਚ੍ਛ ਸਾਮਿ, ਪੁਤ੍ਤਂ ਮੇ ਗਹੇਤ੍ਵਾ ਏਹੀਤਿ. ਨਾਹਂ ਭਦ੍ਦੇ ਉਸ੍ਸਹਾਮਿ, ਚਤੂਸੁ ਹਿ ਜਨੇਸੁ ਵਿਸ੍ਸਾਸੋ ਨਾਮ ਨਤ੍ਥਿ, ਚੋਰੋ ਮੇ ਪੁਰਾਣਸਹਾਯੋਤਿ ਅਵਿਸ੍ਸਾਸਨੀਯੋ, ਸਾਖਾ ਮੇ ਪੁਰਾਣਸਨ੍ਥਤਾਤਿ ਅਵਿਸ੍ਸਾਸਨੀਯਾ, ਰਾਜਾ ਮਂ ਪੂਜੇਤੀਤਿ ਅਵਿਸ੍ਸਾਸਨੀਯੋ, ਇਤ੍ਥੀ ਮੇ ਵਸਂ ਗਤਾਤਿ ਅਵਿਸ੍ਸਾਸਨੀਯਾਤਿ. ਮਾਤੁ ਹਦਯਂ ਪਨ ਮੁਦੁਕਂ ਹੋਤਿ. ਤਸ੍ਮਾ ਅਹਂ ਪਨ ਗਨ੍ਤ੍ਵਾ ਮਯ੍ਹਂ ਪੁਤ੍ਤਂ ਆਨੇਸ੍ਸਾਮੀਤਿ ਨਿਕ੍ਖਨ੍ਤਾ.

ਤਂਦਿਵਸਞ੍ਚ ਭਗਵਾ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤੋ ਅਙ੍ਗੁਲਿਮਾਲਂ ਦਿਸ੍ਵਾ – ‘‘ਮਯਿ ਗਤੇ ਏਤਸ੍ਸ ਸੋਤ੍ਥਿ ਭਵਿਸ੍ਸਤਿ. ਅਗਾਮਕੇ ਅਰਞ੍ਞੇ ਠਿਤੋ ਚਤੁਪ੍ਪਦਿਕਂ ਗਾਥਂ ਸੁਤ੍ਵਾ ਮਮ ਸਨ੍ਤਿਕੇ ਪਬ੍ਬਜਿਤ੍ਵਾ ਛ ਅਭਿਞ੍ਞਾ ਸਚ੍ਛਿਕਰਿਸ੍ਸਤਿ. ਸਚੇ ਨ ਗਮਿਸ੍ਸਾਮਿ, ਮਾਤਰਿ ਅਪਰਜ੍ਝਿਤ੍ਵਾ ਅਨੁਦ੍ਧਰਣੀਯੋ ਭਵਿਸ੍ਸਤਿ, ਕਰਿਸ੍ਸਾਮਿਸ੍ਸ ਸਙ੍ਗਹ’’ਨ੍ਤਿ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਿਣ੍ਡਾਯ ਪਵਿਸਿਤ੍ਵਾ ਕਤਭਤ੍ਤਕਿਚ੍ਚੋ ਤਂ ਸਙ੍ਗਣ੍ਹਿਤੁਕਾਮੋ ਵਿਹਾਰਾ ਨਿਕ੍ਖਮਿ. ਏਤਮਤ੍ਥਂ ਦਸ੍ਸੇਤੁਂ ‘‘ਅਥ ਖੋ ਭਗਵਾ’’ਤਿਆਦਿ ਵੁਤ੍ਤਂ.

੩੪੮. ਸਙ੍ਕਰਿਤ੍ਵਾ ਸਙ੍ਕਰਿਤ੍ਵਾਤਿ ਸਙ੍ਕੇਤਂ ਕਤ੍ਵਾ ਵਗ੍ਗਵਗ੍ਗਾ ਹੁਤ੍ਵਾ. ਹਤ੍ਥਤ੍ਥਂ ਗਚ੍ਛਨ੍ਤੀਤਿ ਹਤ੍ਥੇ ਅਤ੍ਥਂ ਵਿਨਾਸਂ ਗਚ੍ਛਨ੍ਤਿ. ਕਿਂ ਪਨ ਤੇ ਭਗਵਨ੍ਤਂ ਸਞ੍ਜਾਨਿਤ੍ਵਾ ਏਵਂ ਵਦਨ੍ਤਿ ਅਸਞ੍ਜਾਨਿਤ੍ਵਾਤਿ? ਅਸਞ੍ਜਾਨਿਤ੍ਵਾ. ਅਞ੍ਞਾਤਕਵੇਸੇਨ ਹਿ ਭਗਵਾ ਏਕਕੋਵ ਅਗਮਾਸਿ. ਚੋਰੋਪਿ ਤਸ੍ਮਿਂ ਸਮਯੇ ਦੀਘਰਤ੍ਤਂ ਦੁਬ੍ਭੋਜਨੇਨ ਚ ਦੁਕ੍ਖਸੇਯ੍ਯਾਯ ਚ ਉਕ੍ਕਣ੍ਠਿਤੋ ਹੋਤਿ. ਕਿਤ੍ਤਕਾ ਪਨਾਨੇਨ ਮਨੁਸ੍ਸਾ ਮਾਰਿਤਾਤਿ? ਏਕੇਨੂਨਸਹਸ੍ਸਂ. ਸੋ ਪਨ ਇਦਾਨਿ ਏਕਂ ਲਭਿਤ੍ਵਾ ਸਹਸ੍ਸਂ ਪੂਰੇਸ੍ਸਤੀਤਿ ਸਞ੍ਞੀ ਹੁਤ੍ਵਾ ਯਮੇਵ ਪਠਮਂ ਪਸ੍ਸਾਮਿ, ਤਂ ਘਾਤੇਤ੍ਵਾ ਗਣਨਂ ਪੂਰੇਤ੍ਵਾ ਸਿਪ੍ਪਸ੍ਸ ਉਪਚਾਰਂ ਕਤ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਨ੍ਹਾਯਿਤ੍ਵਾ ਵਤ੍ਥਾਨਿ ਪਰਿਵਤ੍ਤੇਤ੍ਵਾ ਮਾਤਾਪਿਤਰੋ ਪਸ੍ਸਿਸ੍ਸਾਮੀਤਿ ਅਟਵਿਮਜ੍ਝਤੋ ਅਟਵਿਮੁਖਂ ਆਗਨ੍ਤ੍ਵਾ ਏਕਮਨ੍ਤਂ ਠਿਤੋਵ ਭਗਵਨ੍ਤਂ ਅਦ੍ਦਸ. ਏਤਮਤ੍ਥਂ ਦਸ੍ਸੇਤੁਂ ‘‘ਅਦ੍ਦਸਾ ਖੋ’’ਤਿਆਦਿ ਵੁਤ੍ਤਂ.

ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸੀਤਿ ਮਹਾਪਥਵਿਂ ਉਮ੍ਮਿਯੋ ਉਟ੍ਠਪੇਨ੍ਤੋ ਵਿਯ ਸਂਹਰਿਤ੍ਵਾ ਅਪਰਭਾਗੇ ਅਕ੍ਕਮਤਿ, ਓਰਭਾਗੇ ਵਲਿਯੋ ਨਿਕ੍ਖਮਨ੍ਤਿ, ਅਙ੍ਗੁਲਿਮਾਲੋ ਸਰਕ੍ਖੇਪਮਤ੍ਤਂ ਮੁਞ੍ਚਿਤ੍ਵਾ ਗਚ੍ਛਤਿ. ਭਗਵਾ ਪੁਰਤੋ ਮਹਨ੍ਤਂ ਅਙ੍ਗਣਂ ਦਸ੍ਸੇਤ੍ਵਾ ਸਯਂ ਮਜ੍ਝੇ ਹੋਤਿ, ਚੋਰੋ ਅਨ੍ਤੇ. ਸੋ ‘‘ਇਦਾਨਿ ਨਂ ਪਾਪੁਣਿਤ੍ਵਾ ਗਣ੍ਹਿਸ੍ਸਾਮੀ’’ਤਿ ਸਬ੍ਬਥਾਮੇਨ ਧਾਵਤਿ. ਭਗਵਾ ਅਙ੍ਗਣਸ੍ਸ ਪਾਰਿਮਨ੍ਤੇ ਹੋਤਿ, ਚੋਰੋ ਮਜ੍ਝੇ. ਸੋ ‘‘ਏਤ੍ਥ ਨਂ ਪਾਪੁਣਿਤ੍ਵਾ ਗਣ੍ਹਿਸ੍ਸਾਮੀ’’ਤਿ ਵੇਗੇਨ ਧਾਵਤਿ. ਭਗਵਾ ਤਸ੍ਸ ਪੁਰਤੋ ਮਾਤਿਕਂ ਵਾ ਥਲਂ ਵਾ ਦਸ੍ਸੇਤਿ, ਏਤੇਨੁਪਾਯੇਨ ਤੀਣਿ ਯੋਜਨਾਨਿ ਗਹੇਤ੍ਵਾ ਅਗਮਾਸਿ. ਚੋਰੋ ਕਿਲਮਿ, ਮੁਖੇ ਖੇਲ਼ੋ ਸੁਸ੍ਸਿ, ਕਚ੍ਛੇਹਿ ਸੇਦਾ ਮੁਚ੍ਚਿਂਸੁ. ਅਥਸ੍ਸ ‘‘ਅਚ੍ਛਰਿਯਂ ਵਤ ਭੋ’’ਤਿ ਏਤਦਹੋਸਿ. ਮਿਗਮ੍ਪੀਤਿ ਮਿਗਂ ਕਸ੍ਮਾ ਗਣ੍ਹਾਤਿ? ਛਾਤਸਮਯੇ ਆਹਾਰਤ੍ਥਂ. ਸੋ ਕਿਰ ਏਕਂ ਗੁਮ੍ਬਂ ਘਟ੍ਟੇਤ੍ਵਾ ਮਿਗੇ ਉਟ੍ਠਾਪੇਤਿ. ਤਤੋ ਚਿਤ੍ਤਰੁਚਿਯਂ ਮਿਗਂ ਅਨੁਬਨ੍ਧਨ੍ਤੋ ਗਣ੍ਹਿਤ੍ਵਾ ਪਚਿਤ੍ਵਾ ਖਾਦਤਿ. ਪੁਚ੍ਛੇਯ੍ਯਨ੍ਤਿ ਯੇਨ ਕਾਰਣੇਨਾਯਂ ਗਚ੍ਛਨ੍ਤੋਵ ਠਿਤੋ ਨਾਮ, ਅਹਞ੍ਚ ਠਿਤੋਵ ਅਟ੍ਠਿਤੋ ਨਾਮ, ਯਂਨੂਨਾਹਂ ਇਮਂ ਸਮਣਂ ਤਂ ਕਾਰਣਂ ਪੁਚ੍ਛੇਯ੍ਯਨ੍ਤਿ ਅਤ੍ਥੋ.

੩੪੯. ਨਿਧਾਯਾਤਿ ਯੋ ਵਿਹਿਂਸਨਤ੍ਥਂ ਭੂਤੇਸੁ ਦਣ੍ਡੋ ਪਵਤ੍ਤਯਿਤਬ੍ਬੋ ਸਿਯਾ, ਤਂ ਨਿਧਾਯ ਅਪਨੇਤ੍ਵਾ ਮੇਤ੍ਤਾਯ ਖਨ੍ਤਿਯਾ ਪਟਿਸਙ੍ਖਾਯ ਅਵਿਹਿਂਸਾਯ ਸਾਰਣੀਯਧਮ੍ਮੇਸੁ ਚ ਠਿਤੋ ਅਹਨ੍ਤਿ ਅਤ੍ਥੋ. ਤੁਵਮਟ੍ਠਿਤੋਸੀਤਿ ਪਾਣੇਸੁ ਅਸਞ੍ਞਤਤ੍ਤਾ ਏਤ੍ਤਕਾਨਿ ਪਾਣਸਹਸ੍ਸਾਨਿ ਘਾਤੇਨ੍ਤਸ੍ਸ ਤਵ ਮੇਤ੍ਤਾ ਵਾ ਖਨ੍ਤਿ ਵਾ ਪਟਿਸਙ੍ਖਾ ਵਾ ਅਵਿਹਿਂਸਾ ਵਾ ਸਾਰਣੀਯਧਮ੍ਮੋ ਵਾ ਨਤ੍ਥਿ, ਤਸ੍ਮਾ ਤੁਵਂ ਅਟ੍ਠਿਤੋਸਿ, ਇਦਾਨਿ ਇਰਿਯਾਪਥੇਨ ਠਿਤੋਪਿ ਨਿਰਯੇ ਧਾਵਿਸ੍ਸਸਿ, ਤਿਰਚ੍ਛਾਨਯੋਨਿਯਂ ਪੇਤ੍ਤਿਵਿਸਯੇ ਅਸੁਰਕਾਯੇ ਵਾ ਧਾਵਿਸ੍ਸਸੀਤਿ ਵੁਤ੍ਤਂ ਹੋਤਿ.

ਤਤੋ ਚੋਰੋ – ‘‘ਮਹਾ ਅਯਂ ਸੀਹਨਾਦੋ, ਮਹਨ੍ਤਂ ਗਜ੍ਜਿਤਂ, ਨ ਇਦਂ ਅਞ੍ਞਸ੍ਸ ਭਵਿਸ੍ਸਤਿ, ਮਹਾਮਾਯਾਯ ਪੁਤ੍ਤਸ੍ਸ ਸਿਦ੍ਧਤ੍ਥਸ੍ਸ ਸਮਣਰਞ੍ਞੋ ਏਤਂ ਗਜ੍ਜਿਤਂ, ਦਿਟ੍ਠੋ ਵਤਮ੍ਹਿ ਮਞ੍ਞੇ ਤਿਖਿਣਚਕ੍ਖੁਨਾ ਸਮ੍ਮਾਸਮ੍ਬੁਦ੍ਧੇਨ, ਸਙ੍ਗਹਕਰਣਤ੍ਥਂ ਮੇ ਭਗਵਾ ਆਗਤੋ’’ਤਿ ਚਿਨ੍ਤੇਤ੍ਵਾ ਚਿਰਸ੍ਸਂ ਵਤ ਮੇਤਿਆਦਿਮਾਹ. ਤਤ੍ਥ ਮਹਿਤੋਤਿ ਦੇਵਮਨੁਸ੍ਸਾਦੀਹਿ ਚਤੁਪਚ੍ਚਯਪੂਜਾਯ ਪੂਜਿਤੋ. ਪਚ੍ਚੁਪਾਦੀਤਿ ਚਿਰਸ੍ਸਂ ਕਾਲਸ੍ਸ ਅਚ੍ਚਯੇਨ ਮਯ੍ਹਂ ਸਙ੍ਗਹਤ੍ਥਾਯ ਇਮਂ ਮਹਾਵਨਂ ਪਟਿਪਜ੍ਜਿ. ਪਹਾਯ ਪਾਪਨ੍ਤਿ ਪਜਹਿਤ੍ਵਾ ਪਾਪਂ.

ਇਤ੍ਵੇਵਾਤਿ ਏਵਂ ਵਤ੍ਵਾਯੇਵ. ਆਵੁਧਨ੍ਤਿ ਪਞ੍ਚਾਵੁਧਂ. ਸੋਬ੍ਭੇਤਿ ਸਮਨ੍ਤਤੋ ਛਿਨ੍ਨੇ. ਪਪਾਤੇਤਿ ਏਕਤੋ ਛਿਨ੍ਨੇ. ਨਰਕੇਤਿ ਫਲਿਤਟ੍ਠਾਨੇ. ਇਧ ਪਨ ਤੀਹਿਪਿ ਇਮੇਹਿ ਪਦੇਹਿ ਅਰਞ੍ਞਮੇਵ ਵੁਤ੍ਤਂ. ਅਕਿਰੀਤਿ ਖਿਪਿ ਛਡ੍ਡੇਸਿ.

ਤਮੇਹਿ ਭਿਕ੍ਖੂਤਿ ਤਦਾ ਅਵੋਚਾਤਿ ਭਗਵਤੋ ਇਮਂ ਪਬ੍ਬਾਜੇਨ੍ਤੋ ਕੁਹਿਂ ਸਤ੍ਥਕਂ ਲਭਿਸ੍ਸਾਮਿ, ਕੁਹਿਂ ਪਤ੍ਤਚੀਵਰਨ੍ਤਿ ਪਰਿਯੇਸਨਕਿਚ੍ਚਂ ਨਤ੍ਥਿ, ਕਮ੍ਮਂ ਪਨ ਓਲੋਕੇਸਿ. ਅਥਸ੍ਸ ਪੁਬ੍ਬੇ ਸੀਲਵਨ੍ਤਾਨਂ ਅਟ੍ਠਪਰਿਕ੍ਖਾਰਭਣ੍ਡਕਸ੍ਸ ਦਿਨ੍ਨਭਾਵਂ ਞਤ੍ਵਾ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ – ‘‘ਏਹਿ ਭਿਕ੍ਖੁ ਸ੍ਵਾਕ੍ਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ ਆਹ. ਸੋ ਸਹ ਵਚਨੇਨੇਵ ਇਦ੍ਧਿਮਯਪਤ੍ਤਚੀਵਰਂ ਪਟਿਲਭਿ. ਤਾਵਦੇਵਸ੍ਸ ਗਿਹਿਲਿਙ੍ਗਂ ਅਨ੍ਤਰਧਾਯਿ, ਸਮਣਲਿਙ੍ਗਂ ਪਾਤੁਰਹੋਸਿ.

‘‘ਤਿਚੀਵਰਞ੍ਚ ਪਤ੍ਤੋ ਚ, ਵਾਸਿ ਸੂਚਿ ਚ ਬਨ੍ਧਨਂ;

ਪਰਿਸ੍ਸਾਵਨੇਨ ਅਟ੍ਠੇਤੇ, ਯੁਤ੍ਤਯੋਗਸ੍ਸ ਭਿਕ੍ਖੁਨੋ’’ਤਿ. –

ਏਵਂ ਵੁਤ੍ਤਾ ਅਟ੍ਠ ਪਰਿਕ੍ਖਾਰਾ ਸਰੀਰਪਟਿਬਦ੍ਧਾਵ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਏਸੇਵ ਤਸ੍ਸ ਅਹੁ ਭਿਕ੍ਖੁਭਾਵੋਤਿ ਏਸ ਏਹਿਭਿਕ੍ਖੁਭਾਵੋ ਤਸ੍ਸ ਉਪਸਮ੍ਪਨ੍ਨਭਿਕ੍ਖੁਭਾਵੋ ਅਹੋਸਿ, ਨ ਹਿ ਏਹਿਭਿਕ੍ਖੂਨਂ ਵਿਸੁਂ ਉਪਸਮ੍ਪਦਾ ਨਾਮ ਅਤ੍ਥਿ.

੩੫੦. ਪਚ੍ਛਾਸਮਣੇਨਾਤਿ ਭਣ੍ਡਗ੍ਗਾਹਕੇਨ ਪਚ੍ਛਾਸਮਣੇਨ, ਤੇਨੇਵ ਅਤ੍ਤਨੋ ਪਤ੍ਤਚੀਵਰਂ ਗਾਹਾਪੇਤ੍ਵਾ ਤਂ ਪਚ੍ਛਾਸਮਣਂ ਕਤ੍ਵਾ ਗਤੋਤਿ ਅਤ੍ਥੋ. ਮਾਤਾਪਿਸ੍ਸ ਅਟ੍ਠਉਸਭਮਤ੍ਤੇਨ ਠਾਨੇਨ ਅਨ੍ਤਰਿਤਾ, – ‘‘ਤਾਤ, ਅਹਿਂਸਕ ਕਤ੍ਥ ਠਿਤੋਸਿ, ਕਤ੍ਥ ਨਿਸਿਨ੍ਨੋਸਿ, ਕੁਹਿਂ ਗਤੋਸਿ? ਮਯਾ ਸਦ੍ਧਿਂ ਨ ਕਥੇਸਿ ਤਾਤਾ’’ਤਿ ਵਦਨ੍ਤੀ ਆਹਿਣ੍ਡਿਤ੍ਵਾ ਅਪਸ੍ਸਮਾਨਾ ਏਤ੍ਤੋਵ ਗਤਾ.

ਪਞ੍ਚਮਤ੍ਤੇਹਿ ਅਸ੍ਸਸਤੇਹੀਤਿ ਸਚੇ ਚੋਰਸ੍ਸ ਪਰਾਜਯੋ ਭਵਿਸ੍ਸਤਿ, ਅਨੁਬਨ੍ਧਿਤ੍ਵਾ ਨਂ ਗਣ੍ਹਿਸ੍ਸਾਮਿ. ਸਚੇ ਮਯ੍ਹਂ ਪਰਾਜਯੋ ਭਵਿਸ੍ਸਤਿ, ਵੇਗੇਨ ਪਲਾਯਿਸ੍ਸਾਮੀਤਿ ਸਲ੍ਲਹੁਕੇਨ ਬਲੇਨ ਨਿਕ੍ਖਮਿ. ਯੇਨ ਆਰਾਮੋਤਿ ਕਸ੍ਮਾ ਆਰਾਮਂ ਅਗਮਾਸਿ? ਸੋ ਕਿਰ ਚੋਰਸ੍ਸ ਭਾਯਤਿ, ਚਿਤ੍ਤੇਨ ਗਨ੍ਤੁਕਾਮੋ ਨ ਗਚ੍ਛਤਿ, ਗਰਹਾਭਯੇਨ ਨਿਕ੍ਖਮਿ. ਤੇਨਸ੍ਸ ਏਤਦਹੋਸਿ – ‘‘ਸਮ੍ਮਾਸਮ੍ਬੁਦ੍ਧਂ ਵਨ੍ਦਿਤ੍ਵਾ ਨਿਸੀਦਿਸ੍ਸਾਮਿ, ਸੋ ਪੁਚ੍ਛਿਸ੍ਸਤਿ ‘ਕਸ੍ਮਾ ਬਲਂ ਗਹੇਤ੍ਵਾ ਨਿਕ੍ਖਨ੍ਤੋਸੀ’ਤਿ. ਅਥਾਹਂ ਆਰੋਚੇਸ੍ਸਾਮਿ, ਭਗਵਾ ਹਿ ਮਂ ਨ ਕੇਵਲਂ ਸਮ੍ਪਰਾਯਿਕੇਨੇਵ ਅਤ੍ਥੇਨ ਸਙ੍ਗਣ੍ਹਾਤਿ, ਦਿਟ੍ਠਧਮ੍ਮਿਕੇਨਪਿ ਸਙ੍ਗਣ੍ਹਾਤਿਯੇਵ. ਸੋ ਸਚੇ ਮਯ੍ਹਂ ਜਯੋ ਭਵਿਸ੍ਸਤਿ, ਅਧਿਵਾਸੇਸ੍ਸਤਿ. ਸਚੇ ਪਰਾਜਯੋ ਭਵਿਸ੍ਸਤਿ ‘ਕਿਂ ਤੇ, ਮਹਾਰਾਜ, ਏਕਂ ਚੋਰਂ ਆਰਬ੍ਭ ਗਮਨੇਨਾ’ਤਿ ਵਕ੍ਖਤਿ. ਤਤੋ ਮਂ ਜਨੋ ਏਵਂ ਸਞ੍ਜਾਨਿਸ੍ਸਤਿ – ‘ਰਾਜਾ ਚੋਰਂ ਗਹੇਤੁਂ ਨਿਕ੍ਖਨ੍ਤੋ, ਸਮ੍ਮਾਸਮ੍ਬੁਦ੍ਧੇਨ ਪਨ ਨਿਵਤ੍ਤਿਤੋ’ਤਿ’’ ਗਰਹਮੋਕ੍ਖਂ ਸਮ੍ਪਸ੍ਸਮਾਨੋ ਅਗਮਾਸਿ.

ਕੁਤੋ ਪਨਸ੍ਸਾਤਿ ਕਸ੍ਮਾ ਆਹ? ਅਪਿ ਨਾਮ ਭਗਵਾ ਤਸ੍ਸ ਉਪਨਿਸ੍ਸਯਂ ਓਲੋਕੇਤ੍ਵਾ ਤਂ ਆਨੇਤ੍ਵਾ ਪਬ੍ਬਾਜੇਯ੍ਯਾਤਿ ਭਗਵਤੋ ਪਰਿਗਣ੍ਹਨਤ੍ਥਂ ਆਹ. ਰਞ੍ਞੋਤਿ ਨ ਕੇਵਲਂ ਰਞ੍ਞੋਯੇਵ ਭਯਂ ਅਹੋਸਿ, ਅਵਸੇਸੋਪਿ ਮਹਾਜਨੋ ਭੀਤੋ ਫਲਕਾਵੁਧਾਨਿ ਛਡ੍ਡੇਤ੍ਵਾ ਸਮ੍ਮੁਖਸਮ੍ਮੁਖਟ੍ਠਾਨੇਵ ਪਲਾਯਿਤ੍ਵਾ ਨਗਰਂ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਅਟ੍ਟਾਲਕੇ ਆਰੁਯ੍ਹ ਓਲੋਕੇਨ੍ਤੋ ਅਟ੍ਠਾਸਿ. ਏਵਞ੍ਚ ਅਵੋਚ – ‘‘ਅਙ੍ਗੁਲਿਮਾਲੋ ‘ਰਾਜਾ ਮਯ੍ਹਂ ਸਨ੍ਤਿਕਂ ਆਗਚ੍ਛਤੀ’ਤਿ ਞਤ੍ਵਾ ਪਠਮਤਰਂ ਆਗਨ੍ਤ੍ਵਾ ਜੇਤਵਨੇ ਨਿਸਿਨ੍ਨੋ, ਰਾਜਾ ਤੇਨ ਗਹਿਤੋ, ਮਯਂ ਪਨ ਪਲਾਯਿਤ੍ਵਾ ਮੁਤ੍ਤਾ’’ਤਿ. ਨਤ੍ਥਿ ਤੇ ਇਤੋ ਭਯਨ੍ਤਿ ਅਯਞ੍ਹਿ ਇਦਾਨਿ ਕੁਨ੍ਥਕਿਪਿਲ੍ਲਿਕਂ ਜੀਵਿਤਾ ਨ ਵੋਰੋਪੇਤਿ, ਨਤ੍ਥਿ ਤੇ ਇਮਸ੍ਸ ਸਨ੍ਤਿਕਾ ਭਯਨ੍ਤਿ ਅਤ੍ਥੋ.

ਕਥਂ ਗੋਤ੍ਤੋਤਿ? ਕਸ੍ਮਾ ਪੁਚ੍ਛਤਿ? ਪਬ੍ਬਜਿਤਂ ਦਾਰੁਣਕਮ੍ਮੇਨ ਉਪ੍ਪਨ੍ਨਨਾਮਂ ਗਹੇਤ੍ਵਾ ਵੋਹਰਿਤੁਂ ਨ ਯੁਤ੍ਤਂ, ਮਾਤਾਪਿਤੂਨਂ ਗੋਤ੍ਤਵਸੇਨ ਨਂ ਸਮੁਦਾਚਰਿਸ੍ਸਾਮੀਤਿ ਮਞ੍ਞਮਾਨੋ ਪੁਚ੍ਛਿ. ਪਰਿਕ੍ਖਾਰਾਨਨ੍ਤਿ ਏਤੇਸਂ ਅਤ੍ਥਾਯ ਅਹਂ ਉਸ੍ਸੁਕ੍ਕਂ ਕਰਿਸ੍ਸਾਮੀਤਿ ਅਤ੍ਥੋ. ਕਥੇਨ੍ਤੋਯੇਵ ਚ ਉਦਰੇ ਬਦ੍ਧਸਾਟਕਂ ਮੁਞ੍ਚਿਤ੍ਵਾ ਥੇਰਸ੍ਸ ਪਾਦਮੂਲੇ ਠਪੇਸਿ.

੩੫੧. ਆਰਞ੍ਞਿਕੋਤਿਆਦੀਨਿ ਚਤ੍ਤਾਰਿ ਧੁਤਙ੍ਗਾਨਿ ਪਾਲ਼ਿਯਂ ਆਗਤਾਨਿ. ਥੇਰੇਨ ਪਨ ਤੇਰਸਪਿ ਸਮਾਦਿਨ੍ਨਾਨੇਵ ਅਹੇਸੁਂ, ਤਸ੍ਮਾ ਅਲਨ੍ਤਿ ਆਹ. ਯਞ੍ਹਿ ਮਯਂ, ਭਨ੍ਤੇਤਿ ਕਿਂ ਸਨ੍ਧਾਯ ਵਦਤਿ? ‘‘ਹਤ੍ਥਿਮ੍ਪਿ ਧਾਵਨ੍ਤਂ ਅਨੁਬਨ੍ਧਿਤ੍ਵਾ ਗਣ੍ਹਾਮੀ’’ਤਿ ਆਗਤਟ੍ਠਾਨੇ ਰਞ੍ਞਾ ਪੇਸਿਤਹਤ੍ਥਾਦਯੋ ਸੋ ਏਵਂ ਅਗ੍ਗਹੇਸਿ. ਰਾਜਾਪਿ – ‘‘ਹਤ੍ਥੀਹਿਯੇਵ ਨਂ ਪਰਿਕ੍ਖਿਪਿਤ੍ਵਾ ਗਣ੍ਹਥ, ਅਸ੍ਸੇਹੇਵ, ਰਥੇਹੇਵਾ’’ਤਿ ਏਵਂ ਅਨੇਕਵਾਰਂ ਬਹੂ ਹਤ੍ਥਾਦਯੋ ਪੇਸੇਸਿ. ਏਵਂ ਗਤੇਸੁ ਪਨ ਤੇਸੁ – ‘‘ਅਹਂ ਅਰੇ ਅਙ੍ਗੁਲਿਮਾਲੋ’’ਤਿ ਤਸ੍ਮਿਂ ਉਟ੍ਠਾਯ ਸਦ੍ਦਂ ਕਰੋਨ੍ਤੇ ਏਕੋਪਿ ਆਵੁਧਂ ਪਰਿਵਤ੍ਤੇਤੁਂ ਨਾਸਕ੍ਖਿ, ਸਬ੍ਬੇਵ ਕੋਟ੍ਟੇਤ੍ਵਾ ਮਾਰੇਸਿ. ਹਤ੍ਥੀ ਅਰਞ੍ਞਹਤ੍ਥੀ, ਅਸ੍ਸਾ ਅਰਞ੍ਞਅਸ੍ਸਾ, ਰਥਾਪਿ ਤਤ੍ਥੇਵ ਭਿਜ੍ਜਨ੍ਤੀਤਿ ਇਦਂ ਸਨ੍ਧਾਯ ਰਾਜਾ ਏਵਂ ਵਦਤਿ.

ਪਿਣ੍ਡਾਯ ਪਾਵਿਸੀਤਿ ਨ ਇਦਂ ਪਠਮਂ ਪਾਵਿਸਿ. ਇਤ੍ਥਿਦਸ੍ਸਨਦਿਵਸਂ ਸਨ੍ਧਾਯ ਪਨੇਤਂ ਵੁਤ੍ਤਂ. ਦੇਵਸਿਕਮ੍ਪਿ ਪਨੇਸ ਪਵਿਸਤੇਵ, ਮਨੁਸ੍ਸਾ ਚ ਨਂ ਦਿਸ੍ਵਾ ਉਤ੍ਤਸਨ੍ਤਿਪਿ ਪਲਾਯਨ੍ਤਿਪਿ ਦ੍ਵਾਰਮ੍ਪਿ ਥਕੇਨ੍ਤਿ, ਏਕਚ੍ਚੇ ਅਙ੍ਗੁਲਿਮਾਲੋਤਿ ਸੁਤ੍ਵਾਵ ਪਲਾਯਿਤ੍ਵਾ ਅਰਞ੍ਞਂ ਵਾ ਪਵਿਸਨ੍ਤਿ, ਘਰਂ ਵਾ ਪਵਿਸਿਤ੍ਵਾ ਦ੍ਵਾਰਂ ਥਕੇਨ੍ਤਿ. ਪਲਾਯਿਤੁਂ ਅਸਕ੍ਕੋਨ੍ਤਾ ਪਿਟ੍ਠਿਂ ਦਤ੍ਵਾ ਤਿਟ੍ਠਨ੍ਤਿ. ਥੇਰੋ ਉਲ਼ੁਙ੍ਗਯਾਗੁਮ੍ਪਿ ਕਟਚ੍ਛੁਭਿਕ੍ਖਮ੍ਪਿ ਨ ਲਭਤਿ, ਪਿਣ੍ਡਪਾਤੇਨ ਕਿਲਮਤਿ. ਬਹਿ ਅਲਭਨ੍ਤੋ ਨਗਰਂ ਸਬ੍ਬਸਾਧਾਰਣਨ੍ਤਿ ਨਗਰਂ ਪਵਿਸਤਿ. ਯੇਨ ਦ੍ਵਾਰੇਨ ਪਵਿਸਤਿ, ਤਤ੍ਥ ਅਙ੍ਗੁਲਿਮਾਲੋ ਆਗਤੋਤਿ ਕੂਟਸਹਸ੍ਸਾਨਂ ਭਿਜ੍ਜਨਕਾਰਣਂ ਹੋਤਿ. ਏਤਦਹੋਸੀਤਿ ਕਾਰੁਞ੍ਞਪ੍ਪਤ੍ਤਿਯਾ ਅਹੋਸਿ. ਏਕੇਨ ਊਨਮਨੁਸ੍ਸਸਹਸ੍ਸਂ ਘਾਤੇਨ੍ਤਸ੍ਸ ਏਕਦਿਵਸਮ੍ਪਿ ਕਾਰੁਞ੍ਞਂ ਨਾਹੋਸਿ, ਗਬ੍ਭਮੂਲ਼੍ਹਾਯ ਇਤ੍ਥਿਯਾ ਦਸ੍ਸਨਮਤ੍ਤੇਨੇਵ ਕਥਂ ਉਪ੍ਪਨ੍ਨਨ੍ਤਿ? ਪਬ੍ਬਜ੍ਜਾਬਲੇਨ, ਪਬ੍ਬਜ੍ਜਾਬਲਞ੍ਹਿ ਏਤਂ.

ਤੇਨ ਹੀਤਿ ਯਸ੍ਮਾ ਤੇ ਕਾਰੁਞ੍ਞਂ ਉਪ੍ਪਨ੍ਨਂ, ਤਸ੍ਮਾਤਿ ਅਤ੍ਥੋ. ਅਰਿਯਾਯ ਜਾਤਿਯਾਤਿ, ਅਙ੍ਗੁਲਿਮਾਲ, ਏਤਂ ਤ੍ਵਂ ਮਾ ਗਣ੍ਹਿ, ਨੇਸਾ ਤਵ ਜਾਤਿ. ਗਿਹਿਕਾਲੋ ਏਸ, ਗਿਹੀ ਨਾਮ ਪਾਣਮ੍ਪਿ ਹਨਨ੍ਤਿ, ਅਦਿਨ੍ਨਾਦਾਨਾਦੀਨਿਪਿ ਕਰੋਨ੍ਤਿ. ਇਦਾਨਿ ਪਨ ਤੇ ਅਰਿਯਾ ਨਾਮ ਜਾਤਿ. ਤਸ੍ਮਾ ਤ੍ਵਂ ‘‘ਯਤੋ ਅਹਂ, ਭਗਿਨਿ, ਜਾਤੋ’’ਤਿ ਸਚੇ ਏਵਂ ਵਤ੍ਤੁਂ ਕੁਕ੍ਕੁਚ੍ਚਾਯਸਿ, ਤੇਨ ਹਿ ‘‘ਅਰਿਯਾਯ ਜਾਤਿਯਾ’’ਤਿ ਏਵਂ ਵਿਸੇਸੇਤ੍ਵਾ ਵਦਾਹੀਤਿ ਉਯ੍ਯੋਜੇਸਿ.

ਤਂ ਇਤ੍ਥਿਂ ਏਤਦਵੋਚਾਤਿ ਇਤ੍ਥੀਨਂ ਗਬ੍ਭਵੁਟ੍ਠਾਨਟ੍ਠਾਨਂ ਨਾਮ ਨ ਸਕ੍ਕਾ ਪੁਰਿਸੇਨ ਉਪਸਙ੍ਕਮਿਤੁਂ. ਥੇਰੋ ਕਿਂ ਕਰੋਸੀਤਿ? ਅਙ੍ਗੁਲਿਮਾਲਤ੍ਥੇਰੋ ਸਚ੍ਚਕਿਰਿਯਂ ਕਤ੍ਵਾ ਸੋਤ੍ਥਿਕਰਣਤ੍ਥਾਯ ਆਗਤੋਤਿ ਆਰੋਚਾਪੇਸਿ. ਤਤੋ ਤੇ ਸਾਣਿਯਾ ਪਰਿਕ੍ਖਿਪਿਤ੍ਵਾ ਥੇਰਸ੍ਸ ਬਹਿਸਾਣਿਯਂ ਪੀਠਕਂ ਪਞ੍ਞਾਪੇਸੁਂ. ਥੇਰੋ ਤਤ੍ਥ ਨਿਸੀਦਿਤ੍ਵਾ – ‘‘ਯਤੋ ਅਹਂ ਭਗਿਨਿ ਸਬ੍ਬਞ੍ਞੁਬੁਦ੍ਧਸ੍ਸ ਅਰਿਯਾਯ ਜਾਤਿਯਾ ਜਾਤੋ’’ਤਿ ਸਚ੍ਚਕਿਰਿਯਂ ਅਕਾਸਿ, ਸਹ ਸਚ੍ਚਵਚਨੇਨੇਵ ਧਮਕਰਣਤੋ ਮੁਤ੍ਤਉਦਕਂ ਵਿਯ ਦਾਰਕੋ ਨਿਕ੍ਖਮਿ. ਮਾਤਾਪੁਤ੍ਤਾਨਂ ਸੋਤ੍ਥਿ ਅਹੋਸਿ. ਇਮਞ੍ਚ ਪਨ ਪਰਿਤ੍ਤਂ ਨ ਕਿਞ੍ਚਿ ਪਰਿਸ੍ਸਯਂ ਨ ਮਦ੍ਦਤਿ, ਮਹਾਪਰਿਤ੍ਤਂ ਨਾਮੇਤਨ੍ਤਿ ਵੁਤ੍ਤਂ. ਥੇਰੇਨ ਨਿਸੀਦਿਤ੍ਵਾ ਸਚ੍ਚਕਿਰਿਯਕਤਟ੍ਠਾਨੇ ਪੀਠਕਂ ਅਕਂਸੁ. ਗਬ੍ਭਮੂਲ਼੍ਹਂ ਤਿਰਚ੍ਛਾਨਗਤਿਤ੍ਥਿਮ੍ਪਿ ਆਨੇਤ੍ਵਾ ਤਤ੍ਥ ਨਿਸਜ੍ਜਾਪੇਨ੍ਤਿ, ਤਾਵਦੇਵ ਸੁਖੇਨ ਗਬ੍ਭਵੁਟ੍ਠਾਨਂ ਹੋਤਿ. ਯਾ ਦੁਬ੍ਬਲਾ ਹੋਤਿ ਨ ਸਕ੍ਕਾ ਆਨੇਤੁਂ, ਤਸ੍ਸਾ ਪੀਠਕਧੋਵਨਉਦਕਂ ਨੇਤ੍ਵਾ ਸੀਸੇ ਸਿਞ੍ਚਨ੍ਤਿ, ਤਙ੍ਖਣਂਯੇਵ ਗਬ੍ਭਵੁਟ੍ਠਾਨਂ ਹੋਤਿ, ਅਞ੍ਞਮ੍ਪਿ ਰੋਗਂ ਵੂਪਸਮੇਤਿ. ਯਾਵ ਕਪ੍ਪਾ ਤਿਟ੍ਠਨਕਪਾਟਿਹਾਰਿਯਂ ਕਿਰੇਤਂ.

ਕਿਂ ਪਨ ਭਗਵਾ ਥੇਰਂ ਵੇਜ੍ਜਕਮ੍ਮਂ ਕਾਰਾਪੇਸੀਤਿ? ਨ ਕਾਰਾਪੇਸਿ. ਥੇਰਞ੍ਹਿ ਦਿਸ੍ਵਾ ਮਨੁਸ੍ਸਾ ਭੀਤਾ ਪਲਾਯਨ੍ਤਿ. ਥੇਰੋ ਭਿਕ੍ਖਾਹਾਰੇਨ ਕਿਲਮਤਿ, ਸਮਣਧਮ੍ਮਂ ਕਾਤੁਂ ਨ ਸਕ੍ਕੋਤਿ. ਤਸ੍ਸ ਅਨੁਗ੍ਗਹੇਨ ਸਚ੍ਚਕਿਰਿਯਂ ਕਾਰੇਸਿ. ਏਵਂ ਕਿਰਸ੍ਸ ਅਹੋਸਿ – ‘‘ਇਦਾਨਿ ਕਿਰ ਅਙ੍ਗੁਲਿਮਾਲਤ੍ਥੇਰੋ ਮੇਤ੍ਤਚਿਤ੍ਤਂ ਪਟਿਲਭਿਤ੍ਵਾ ਸਚ੍ਚਕਿਰਿਯਾਯ ਮਨੁਸ੍ਸਾਨਂ ਸੋਤ੍ਥਿਭਾਵਂ ਕਰੋਤੀਤਿ ਮਨੁਸ੍ਸਾ ਥੇਰਂ ਉਪਸਙ੍ਕਮਿਤਬ੍ਬਂ ਮਞ੍ਞਿਸ੍ਸਨ੍ਤਿ, ਤਤੋ ਭਿਕ੍ਖਾਹਾਰੇਨ ਅਕਿਲਮਨ੍ਤੋ ਸਮਣਧਮ੍ਮਂ ਕਾਤੁਂ ਸਕ੍ਖਿਸ੍ਸਤੀ’’ਤਿ ਅਨੁਗ੍ਗਹੇਨ ਸਚ੍ਚਕਿਰਿਯਂ ਕਾਰੇਸਿ. ਨ ਹਿ ਸਚ੍ਚਕਿਰਿਯਾ ਵੇਜ੍ਜਕਮ੍ਮਂ ਹੋਤਿ. ਥੇਰਸ੍ਸਾਪਿ ਚ ‘‘ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ ਮੂਲਕਮ੍ਮਟ੍ਠਾਨਂ ਗਹੇਤ੍ਵਾ ਰਤ੍ਤਿਟ੍ਠਾਨਦਿਵਾਟ੍ਠਾਨੇ ਨਿਸਿਨ੍ਨਸ੍ਸ ਚਿਤ੍ਤਂ ਕਮ੍ਮਟ੍ਠਾਨਾਭਿਮੁਖਂ ਨ ਗਚ੍ਛਤਿ, ਅਟਵਿਯਂ ਠਤ੍ਵਾ ਮਨੁਸ੍ਸਾਨਂ ਘਾਤਿਤਟ੍ਠਾਨਮੇਵ ਪਾਕਟਂ ਹੋਤਿ. ‘‘ਦੁਗ੍ਗਤੋਮ੍ਹਿ, ਖੁਦ੍ਦਕਪੁਤ੍ਤੋਮ੍ਹਿ, ਜੀਵਿਤਂ ਮੇ ਦੇਹਿ ਸਾਮੀਤਿ ਮਰਣਭੀਤਾਨਂ ਵਚਨਾਕਾਰੋ ਚ ਹਤ੍ਥਪਾਦਵਿਕਾਰੋ ਚ ਆਪਾਥਂ ਆਗਚ੍ਛਤਿ, ਸੋ ਵਿਪ੍ਪਟਿਸਾਰੀ ਹੁਤ੍ਵਾ ਤਤੋਵ ਉਟ੍ਠਾਯ ਗਚ੍ਛਤਿ, ਅਥਸ੍ਸ ਭਗਵਾ ਤਂ ਜਾਤਿਂ ਅਬ੍ਬੋਹਾਰਿਕਂ ਕਤ੍ਵਾਵਾਯਂ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਗਣ੍ਹਿਸ੍ਸਤੀਤਿ ਅਰਿਯਾਯ ਜਾਤਿਯਾ ਸਚ੍ਚਕਿਰਿਯਂ ਕਾਰੇਸਿ. ਏਕੋ ਵੂਪਕਟ੍ਠੋਤਿਆਦਿ ਵਤ੍ਥਸੁਤ੍ਤੇ (ਮ. ਨਿ. ੧.੮੦) ਵਿਤ੍ਥਾਰਿਤਂ.

੩੫੨. ਅਞ੍ਞੇਨਪਿ ਲੇਡ੍ਡੁ ਖਿਤ੍ਤੋਤਿ ਕਾਕਸੁਨਖਸੂਕਰਾਦੀਨਂ ਪਟਿਕ੍ਕਮਾਪਨਤ੍ਥਾਯ ਸਮਨ੍ਤਾ ਸਰਕ੍ਖੇਪਮਤ੍ਤੇ ਠਾਨੇ ਯੇਨ ਕੇਨਚਿ ਦਿਸਾਭਾਗੇਨ ਖਿਤ੍ਤੋ ਆਗਨ੍ਤ੍ਵਾ ਥੇਰਸ੍ਸੇਵ ਕਾਯੇ ਪਤਤਿ. ਕਿਤ੍ਤਕੇ ਠਾਨੇ ਏਵਂ ਹੋਤਿ? ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਪਿਣ੍ਡਾਯ ਚਰਿਤ੍ਵਾ ਪਟਿਨਿਵਤ੍ਤੇਤ੍ਵਾ ਯਾਵ ਗਣ੍ਠਿਕਪਟਿਮੁਕ੍ਕਟ੍ਠਾਨਂ ਆਗਚ੍ਛਤਿ, ਤਾਵ ਹੋਤਿ. ਭਿਨ੍ਨੇਨ ਸੀਸੇਨਾਤਿ ਮਹਾਚਮ੍ਮਂ ਛਿਨ੍ਦਿਤ੍ਵਾ ਯਾਵ ਅਟ੍ਠਿਮਰਿਯਾਦਾ ਭਿਨ੍ਨੇਨ.

ਬ੍ਰਾਹ੍ਮਣਾਤਿ ਖੀਣਾਸਵਭਾਵਂ ਸਨ੍ਧਾਯ ਆਹ. ਯਸ੍ਸ ਖੋ ਤ੍ਵਂ, ਬ੍ਰਾਹ੍ਮਣ, ਕਮ੍ਮਸ੍ਸ ਵਿਪਾਕੇਨਾਤਿ ਇਦਂ ਸਭਾਗਦਿਟ੍ਠਧਮ੍ਮਵੇਦਨੀਯਕਮ੍ਮਂ ਸਨ੍ਧਾਯ ਵੁਤ੍ਤਂ. ਕਮ੍ਮਞ੍ਹਿ ਕਰਿਯਮਾਨਮੇਵ ਤਯੋ ਕੋਟ੍ਠਾਸੇ ਪੂਰੇਤਿ. ਸਤ੍ਤਸੁ ਚਿਤ੍ਤੇਸੁ ਕੁਸਲਾ ਵਾ ਅਕੁਸਲਾ ਵਾ ਪਠਮਜਵਨਚੇਤਨਾ ਦਿਟ੍ਠਧਮ੍ਮਵੇਦਨੀਯਕਮ੍ਮਂ ਨਾਮ ਹੋਤਿ. ਤਂ ਇਮਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦੇਤਿ. ਤਥਾ ਅਸਕ੍ਕੋਨ੍ਤਂ ਅਹੋਸਿਕਮ੍ਮਂ, ਨਾਹੋਸਿ ਕਮ੍ਮਵਿਪਾਕੋ, ਨ ਭਵਿਸ੍ਸਤਿ ਕਮ੍ਮਵਿਪਾਕੋ, ਨਤ੍ਥਿ ਕਮ੍ਮਵਿਪਾਕੋਤਿ ਇਮਸ੍ਸ ਤਿਕਸ੍ਸ ਵਸੇਨ ਅਹੋਸਿਕਮ੍ਮਂ ਨਾਮ ਹੋਤਿ. ਅਤ੍ਥਸਾਧਿਕਾ ਸਤ੍ਤਮਜਵਨਚੇਤਨਾ ਉਪਪਜ੍ਜਵੇਦਨੀਯਕਮ੍ਮਂ ਨਾਮ. ਤਂ ਅਨਨ੍ਤਰੇ ਅਤ੍ਤਭਾਵੇ ਵਿਪਾਕਂ ਦੇਤਿ. ਤਥਾ ਅਸਕ੍ਕੋਨ੍ਤਂ ਵੁਤ੍ਤਨਯੇਨੇਵ ਤਂ ਅਹੋਸਿਕਮ੍ਮਂ ਨਾਮ ਹੋਤਿ. ਉਭਿਨ੍ਨਮਨ੍ਤਰੇ ਪਞ੍ਚਜਵਨਚੇਤਨਾ ਅਪਰਾਪਰਿਯਵੇਦਨੀਯਕਮ੍ਮਂ ਨਾਮ ਹੋਤਿ. ਤਂ ਅਨਾਗਤੇ ਯਦਾ ਓਕਾਸਂ ਲਭਤਿ, ਤਦਾ ਵਿਪਾਕਂ ਦੇਤਿ. ਸਤਿ ਸਂਸਾਰਪ੍ਪਵਤ੍ਤਿਯਾ ਅਹੋਸਿਕਮ੍ਮਂ ਨਾਮ ਨ ਹੋਤਿ. ਥੇਰਸ੍ਸ ਪਨ ਉਪਪਜ੍ਜਵੇਦਨੀਯਞ੍ਚ ਅਪਰਾਪਰਿਯਵੇਦਨੀਯਞ੍ਚਾਤਿ ਇਮਾਨਿ ਦ੍ਵੇ ਕਮ੍ਮਾਨਿ ਕਮ੍ਮਕ੍ਖਯਕਰੇਨ ਅਰਹਤ੍ਤਮਗ੍ਗੇਨ ਸਮੁਗ੍ਘਾਟਿਤਾਨਿ, ਦਿਟ੍ਠਧਮ੍ਮਵੇਦਨੀਯਂ ਅਤ੍ਥਿ. ਤਂ ਅਰਹਤ੍ਤਪ੍ਪਤ੍ਤਸ੍ਸਾਪਿ ਵਿਪਾਕਂ ਦੇਤਿਯੇਵ. ਤਂ ਸਨ੍ਧਾਯ ਭਗਵਾ ‘‘ਯਸ੍ਸ ਖੋ ਤ੍ਵ’’ਨ੍ਤਿਆਦਿਮਾਹ. ਤਸ੍ਮਾ ਯਸ੍ਸ ਖੋਤਿ ਏਤ੍ਥ ਯਾਦਿਸਸ੍ਸ ਖੋ ਤ੍ਵਂ, ਬ੍ਰਾਹ੍ਮਣ, ਕਮ੍ਮਸ੍ਸ ਵਿਪਾਕੇਨਾਤਿ ਏਵਂ ਅਤ੍ਥੋ ਵੇਦਿਤਬ੍ਬੋ.

ਅਬ੍ਭਾ ਮੁਤ੍ਤੋਤਿ ਦੇਸਨਾਸੀਸਮਤ੍ਤਮੇਤਂ, ਅਬ੍ਭਾ ਮਹਿਕਾ ਧੂਮੋ ਰਜੋ ਰਾਹੂਤਿ ਇਮੇਹਿ ਪਨ ਉਪਕ੍ਕਿਲੇਸੇਹਿ ਮੁਤ੍ਤੋ ਚਨ੍ਦਿਮਾ ਇਧ ਅਧਿਪ੍ਪੇਤੋ. ਯਥਾ ਹਿ ਏਵਂ ਨਿਰੁਪਕ੍ਕਿਲੇਸੋ ਚਨ੍ਦਿਮਾ ਲੋਕਂ ਪਭਾਸੇਤਿ, ਏਵਂ ਪਮਾਦਕਿਲੇਸਵਿਮੁਤ੍ਤੋ ਅਪ੍ਪਮਤ੍ਤੋ ਭਿਕ੍ਖੁ ਇਮਂ ਅਤ੍ਤਨੋ ਖਨ੍ਧਾਯਤਨਧਾਤੁਲੋਕਂ ਪਭਾਸੇਤਿ, ਵਿਹਤਕਿਲੇਸਨ੍ਧਕਾਰਂ ਕਰੋਤਿ.

ਕੁਸਲੇਨ ਪਿਧੀਯਤੀਤਿ ਮਗ੍ਗਕੁਸਲੇਨ ਪਿਧੀਯਤਿ ਅਪ੍ਪਟਿਸਨ੍ਧਿਕਂ ਕਰੀਯਤਿ. ਯੁਞ੍ਜਤਿ ਬੁਦ੍ਧਸਾਸਨੇਤਿ ਬੁਦ੍ਧਸਾਸਨੇ ਕਾਯੇਨ ਵਾਚਾਯ ਮਨਸਾ ਚ ਯੁਤ੍ਤਪ੍ਪਯੁਤ੍ਤੋ ਵਿਹਰਤਿ. ਇਮਾ ਤਿਸ੍ਸੋ ਥੇਰਸ੍ਸ ਉਦਾਨਗਾਥਾ ਨਾਮ.

ਦਿਸਾ ਹਿ ਮੇਤਿ ਇਦਂ ਕਿਰ ਥੇਰੋ ਅਤ੍ਤਨੋ ਪਰਿਤ੍ਤਾਣਾਕਾਰਂ ਕਰੋਨ੍ਤੋ ਆਹ. ਤਤ੍ਥ ਦਿਸਾ ਹਿ ਮੇਤਿ ਮਮ ਸਪਤ੍ਤਾ. ਯੇ ਮਂ ਏਵਂ ਉਪਵਦਨ੍ਤਿ – ‘‘ਯਥਾ ਮਯਂ ਅਙ੍ਗੁਲਿਮਾਲੇਨ ਮਾਰਿਤਾਨਂ ਞਾਤਕਾਨਂ ਵਸੇਨ ਦੁਕ੍ਖਂ ਵੇਦਿਯਾਮ, ਏਵਂ ਅਙ੍ਗੁਲਿਮਾਲੋਪਿ ਵੇਦਿਯਤੂ’’ਤਿ, ਤੇ ਮਯ੍ਹਂ ਦਿਸਾ ਚਤੁਸਚ੍ਚਧਮ੍ਮਕਥਂ ਸੁਣਨ੍ਤੂਤਿ ਅਤ੍ਥੋ. ਯੁਞ੍ਜਨ੍ਤੂਤਿ ਕਾਯਵਾਚਾਮਨੇਹਿ ਯੁਤ੍ਤਪ੍ਪਯੁਤ੍ਤਾ ਵਿਹਰਨ੍ਤੁ. ਯੇ ਧਮ੍ਮਮੇਵਾਦਪਯਨ੍ਤਿ ਸਨ੍ਤੋਤਿ ਯੇ ਸਨ੍ਤੋ ਸਪ੍ਪੁਰਿਸਾ ਧਮ੍ਮਂਯੇਵ ਆਦਪੇਨ੍ਤਿ ਸਮਾਦਪੇਨ੍ਤਿ ਗਣ੍ਹਾਪੇਨ੍ਤਿ, ਤੇ ਮਨੁਜਾ ਮਯ੍ਹਂ ਸਪਤ੍ਤਾ ਭਜਨ੍ਤੁ ਸੇਵਨ੍ਤੁ ਪਯਿਰੁਪਾਸਨ੍ਤੂਤਿ ਅਤ੍ਥੋ.

ਅਵਿਰੋਧਪ੍ਪਸਂਸੀਨਨ੍ਤਿ ਅਵਿਰੋਧੋ ਵੁਚ੍ਚਤਿ ਮੇਤ੍ਤਾ, ਮੇਤ੍ਤਾਪਸਂਸਕਾਨਨ੍ਤਿ ਅਤ੍ਥੋ. ਸੁਣਨ੍ਤੁ ਧਮ੍ਮਂ ਕਾਲੇਨਾਤਿ ਖਣੇ ਖਣੇ ਖਨ੍ਤਿਮੇਤ੍ਤਾਪਟਿਸਙ੍ਖਾਸਾਰਣੀਯਧਮ੍ਮਂ ਸੁਣਨ੍ਤੁ. ਤਞ੍ਚ ਅਨੁਵਿਧੀਯਨ੍ਤੂਤਿ ਤਞ੍ਚ ਧਮ੍ਮਂ ਅਨੁਕਰੋਨ੍ਤੁ ਪੂਰੇਨ੍ਤੁ.

ਨ ਹਿ ਜਾਤੁ ਸੋ ਮਮਂ ਹਿਂਸੇਤਿ ਯੋ ਮਯ੍ਹਂ ਦਿਸੋ, ਸੋ ਮਂ ਏਕਂਸੇਨੇਵ ਨ ਹਿਂਸੇਯ੍ਯ. ਅਞ੍ਞਂ ਵਾ ਪਨ ਕਿਞ੍ਚਿ ਨਨ੍ਤਿ ਨ ਕੇਵਲਂ ਮਂ, ਅਞ੍ਞਮ੍ਪਿ ਪਨ ਕਞ੍ਚਿ ਪੁਗ੍ਗਲਂ ਮਾ ਹਿਂਸਨ੍ਤੁ ਮਾ ਵਿਹੇਠੇਨ੍ਤੁ. ਪਪ੍ਪੁਯ੍ਯ ਪਰਮਂ ਸਨ੍ਤਿਨ੍ਤਿ ਪਰਮਂ ਸਨ੍ਤਿਭੂਤਂ ਨਿਬ੍ਬਾਨਂ ਪਾਪੁਣਿਤ੍ਵਾ. ਰਕ੍ਖੇਯ੍ਯ ਤਸਥਾਵਰੇਤਿ ਤਸਾ ਵੁਚ੍ਚਨ੍ਤਿ ਸਤਣ੍ਹਾ, ਥਾਵਰਾ ਨਿਤ੍ਤਣ੍ਹਾ. ਇਦਂ ਵੁਤ੍ਤਂ ਹੋਤਿ – ਯੋ ਨਿਬ੍ਬਾਨਂ ਪਾਪੁਣਾਤਿ, ਸੋ ਸਬ੍ਬਂ ਤਸਥਾਵਰਂ ਰਕ੍ਖਿਤੁਂ ਸਮਤ੍ਥੋ ਹੋਤਿ. ਤਸ੍ਮਾ ਮਯ੍ਹਮ੍ਪਿ ਦਿਸਾ ਨਿਬ੍ਬਾਨਂ ਪਾਪੁਣਨ੍ਤੁ, ਏਵਂ ਮਂ ਏਕਂਸੇਨੇਵ ਨ ਹਿਂਸਿਸ੍ਸਨ੍ਤੀਤਿ. ਇਮਾ ਤਿਸ੍ਸੋ ਗਾਥਾ ਅਤ੍ਤਨੋ ਪਰਿਤ੍ਤਂ ਕਾਤੁਂ ਆਹ.

ਇਦਾਨਿ ਅਤ੍ਤਨੋਵ ਪਟਿਪਤ੍ਤਿਂ ਦੀਪੇਨ੍ਤੋ ਉਦਕਞ੍ਹਿ ਨਯਨ੍ਤਿ ਨੇਤ੍ਤਿਕਾਤਿ ਆਹ. ਤਤ੍ਥ ਨੇਤ੍ਤਿਕਾਤਿ ਯੇ ਮਾਤਿਕਂ ਸੋਧੇਤ੍ਵਾ ਬਨ੍ਧਿਤਬ੍ਬਟ੍ਠਾਨੇ ਬਨ੍ਧਿਤ੍ਵਾ ਉਦਕਂ ਨਯਨ੍ਤਿ. ਉਸੁਕਾਰਾਤਿ ਉਸੁਕਾਰਕਾ. ਨਮਯਨ੍ਤੀਤਿ ਤੇਲਕਞ੍ਜਿਕੇਨ ਮਕ੍ਖੇਤ੍ਵਾ ਕੁਕ੍ਕੁਲ਼ੇ ਤਾਪੇਤ੍ਵਾ ਉਨ੍ਨਤੁਨ੍ਨਤਟ੍ਠਾਨੇ ਨਮੇਨ੍ਤਾ ਉਜੁਂ ਕਰੋਨ੍ਤਿ. ਤੇਜਨਨ੍ਤਿ ਕਣ੍ਡਂ. ਤਞ੍ਹਿ ਇਸ੍ਸਾਸੋ ਤੇਜਂ ਕਰੋਤਿ, ਪਰਞ੍ਚ ਤਜ੍ਜੇਤਿ, ਤਸ੍ਮਾ ਤੇਜਨਨ੍ਤਿ ਵੁਚ੍ਚਤਿ. ਅਤ੍ਤਾਨਂ ਦਮਯਨ੍ਤੀਤਿ ਯਥਾ ਨੇਤ੍ਤਿਕਾ ਉਜੁਮਗ੍ਗੇਨ ਉਦਕਂ ਨਯਨ੍ਤਿ, ਉਸੁਕਾਰਾ ਤੇਜਨਂ, ਤਚ੍ਛਕਾ ਚ ਦਾਰੁਂ ਉਜੁਂ ਕਰੋਨ੍ਤਿ, ਏਵਮੇਵਂ ਪਣ੍ਡਿਤਾ ਅਤ੍ਤਾਨਂ ਦਮੇਨ੍ਤਿ ਉਜੁਕਂ ਕਰੋਨ੍ਤਿ ਨਿਬ੍ਬਿਸੇਵਨਂ ਕਰੋਨ੍ਤਿ.

ਤਾਦਿਨਾਤਿ ਇਟ੍ਠਾਨਿਟ੍ਠਾਦੀਸੁ ਨਿਬ੍ਬਿਕਾਰੇਨ – ‘‘ਪਞ੍ਚਹਾਕਾਰੇਹਿ ਭਗਵਾ ਤਾਦੀ, ਇਟ੍ਠਾਨਿਟ੍ਠੇ ਤਾਦੀ, ਵਨ੍ਤਾਵੀਤਿ ਤਾਦੀ, ਚਤ੍ਤਾਵੀਤਿ ਤਾਦੀ, ਤਿਣ੍ਣਾਵੀਤਿ ਤਾਦੀ, ਤਨ੍ਨਿਦ੍ਦੇਸਾਤਿ ਤਾਦੀ’’ਤਿ (ਮਹਾਨਿ. ੩੮; ੧੯੨) ਏਵਂ ਤਾਦਿਲਕ੍ਖਣਪ੍ਪਤ੍ਤੇਨ ਸਤ੍ਥਾਰਾ. ਭਵਨੇਤ੍ਤੀਤਿ ਭਵਰਜ੍ਜੁ, ਤਣ੍ਹਾਯੇਤਂ ਨਾਮਂ. ਤਾਯ ਹਿ ਗੋਣਾ ਵਿਯ ਗੀਵਾਯ ਰਜ੍ਜੁਯਾ, ਸਤ੍ਤਾ ਹਦਯੇ ਬਦ੍ਧਾ ਤਂ ਤਂ ਭਵਂ ਨੀਯਨ੍ਤਿ, ਤਸ੍ਮਾ ਭਵਨੇਤ੍ਤੀਤਿ ਵੁਚ੍ਚਤਿ. ਫੁਟ੍ਠੋ ਕਮ੍ਮਵਿਪਾਕੇਨਾਤਿ ਮਗ੍ਗਚੇਤਨਾਯ ਫੁਟ੍ਠੋ. ਯਸ੍ਮਾ ਹਿ ਮਗ੍ਗਚੇਤਨਾਯ ਕਮ੍ਮਂ ਪਚ੍ਚਤਿ ਵਿਪਚ੍ਚਤਿ ਡਯ੍ਹਤਿ, ਪਰਿਕ੍ਖਯਂ ਗਚ੍ਛਤਿ, ਤਸ੍ਮਾ ਸਾ ਕਮ੍ਮਵਿਪਾਕੋਤਿ ਵੁਤ੍ਤਾ. ਤਾਯ ਹਿ ਫੁਟ੍ਠਤ੍ਤਾ ਏਸ ਅਣਣੋ ਨਿਕ੍ਕਿਲੇਸੋ ਜਾਤੋ, ਨ ਦੁਕ੍ਖਵੇਦਨਾਯ ਅਣਣੋ. ਭੁਞ੍ਜਾਮੀਤਿ ਚੇਤ੍ਥ ਥੇਯ੍ਯਪਰਿਭੋਗੋ ਇਣਪਰਿਭੋਗੋ ਦਾਯਜ੍ਜਪਰਿਭੋਗੋ ਸਾਮਿਪਰਿਭੋਗੋਤਿ ਚਤ੍ਤਾਰੋ ਪਰਿਭੋਗਾ ਵੇਦਿਤਬ੍ਬਾ. ਤਤ੍ਥ ਦੁਸ੍ਸੀਲਸ੍ਸ ਪਰਿਭੋਗੋ ਥੇਯ੍ਯਪਰਿਭੋਗੋ ਨਾਮ. ਸੋ ਹਿ ਚਤ੍ਤਾਰੋ ਪਚ੍ਚਯੇ ਥੇਨੇਤ੍ਵਾ ਭੁਞ੍ਜਤਿ. ਵੁਤ੍ਤਮ੍ਪਿ ਚੇਤਂ ‘‘ਥੇਯ੍ਯਾਯ ਵੋ, ਭਿਕ੍ਖਵੇ, ਰਟ੍ਠਪਿਣ੍ਡੋ ਭੁਤ੍ਤੋ’’ਤਿ (ਪਾਰਾ. ੧੯੫). ਸੀਲਵਤੋ ਪਨ ਅਪਚ੍ਚਵੇਕ੍ਖਣਪਰਿਭੋਗੋ ਇਣਪਰਿਭੋਗੋ ਨਾਮ. ਸਤ੍ਤਨ੍ਨਂ ਸੇਕ੍ਖਾਨਂ ਪਰਿਭੋਗੋ ਦਾਯਜ੍ਜਪਰਿਭੋਗੋ ਨਾਮ. ਖੀਣਾਸਵਸ੍ਸ ਪਰਿਭੋਗੋ ਸਾਮਿਪਰਿਭੋਗੋ ਨਾਮ. ਇਧ ਕਿਲੇਸਇਣਾਨਂ ਅਭਾਵਂ ਸਨ੍ਧਾਯ ‘‘ਅਣਣੋ’’ਤਿ ਵੁਤ੍ਤਂ. ‘‘ਅਨਿਣੋ’’ਤਿਪਿ ਪਾਠੋ. ਸਾਮਿਪਰਿਭੋਗਂ ਸਨ੍ਧਾਯ ‘‘ਭੁਞ੍ਜਾਮਿ ਭੋਜਨ’’ਨ੍ਤਿ ਵੁਤ੍ਤਂ.

ਕਾਮਰਤਿਸਨ੍ਥਵਨ੍ਤਿ ਦੁਵਿਧੇਸੁਪਿ ਕਾਮੇਸੁ ਤਣ੍ਹਾਰਤਿਸਨ੍ਥਵਂ ਮਾ ਅਨੁਯੁਞ੍ਜਥ ਮਾ ਕਰਿਤ੍ਥ. ਨਯਿਦਂ ਦੁਮ੍ਮਨ੍ਤਿਤਂ ਮਮਾਤਿ ਯਂ ਮਯਾ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਪਬ੍ਬਜਿਸ੍ਸਾਮੀਤਿ ਮਨ੍ਤਿਤਂ, ਤਂ ਮਮ ਮਨ੍ਤਿਤਂ ਨ ਦੁਮ੍ਮਨ੍ਤਿਤਂ. ਸਂਵਿਭਤ੍ਤੇਸੁ ਧਮ੍ਮੇਸੂਤਿ ਅਹਂ ਸਤ੍ਥਾਤਿ ਏਵਂ ਲੋਕੇ ਉਪ੍ਪਨ੍ਨੇਹਿ ਯੇ ਧਮ੍ਮਾ ਸਂਵਿਭਤ੍ਤਾ, ਤੇਸੁ ਧਮ੍ਮੇਸੁ ਯਂ ਸੇਟ੍ਠਂ ਨਿਬ੍ਬਾਨਂ, ਤਦੇਵ ਅਹਂ ਉਪਗਮਂ ਉਪਗਤੋ ਸਮ੍ਪਤ੍ਤੋ, ਤਸ੍ਮਾ ਮਯ੍ਹਂ ਇਦਂ ਆਗਮਨਂ ਸ੍ਵਾਗਤਂ ਨਾਮ ਗਤਨ੍ਤਿ. ਤਿਸ੍ਸੋ ਵਿਜ੍ਜਾਤਿ ਪੁਬ੍ਬੇਨਿਵਾਸਦਿਬ੍ਬਚਕ੍ਖੁਆਸਵਕ੍ਖਯਪਞ੍ਞਾ. ਕਤਂ ਬੁਦ੍ਧਸ੍ਸ ਸਾਸਨਨ੍ਤਿ ਯਂ ਬੁਦ੍ਧਸ੍ਸ ਸਾਸਨੇ ਕਤ੍ਤਬ੍ਬਕਿਚ੍ਚਂ ਅਤ੍ਥਿ, ਤਂ ਸਬ੍ਬਂ ਮਯਾ ਕਤਂ. ਤੀਹਿ ਵਿਜ੍ਜਾਹਿ ਨਵਹਿ ਚ ਲੋਕੁਤ੍ਤਰਧਮ੍ਮੇਹਿ ਦੇਸਨਂ ਮਤ੍ਥਕਂ ਪਾਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਙ੍ਗੁਲਿਮਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.