੫. ਬੋਧਿਰਾਜਕੁਮਾਰਸੁਤ੍ਤਵਣ੍ਣਨਾ

੩੨੪. ਏਵਂ ਮੇ ਸੁਤਨ੍ਤਿ ਬੋਧਿਰਾਜਕੁਮਾਰਸੁਤ੍ਤਂ. ਤਤ੍ਥ ਕੋਕਨਦੋਤਿ ਕੋਕਨਦਂ ਵੁਚ੍ਚਤਿ ਪਦੁਮਂ. ਸੋ ਚ ਮਙ੍ਗਲਪਾਸਾਦੋ ਓਲੋਕਨਕਪਦੁਮਂ ਦਸ੍ਸੇਤ੍ਵਾ ਕਤੋ, ਤਸ੍ਮਾ ਕੋਕਨਦੋਤਿ ਸਙ੍ਖਂ ਲਭਿ.

੩੨੫. ਯਾਵ ਪਚ੍ਛਿਮਸੋਪਾਨਕਲ਼ੇਵਰਾਤਿ ਏਤ੍ਥ ਪਚ੍ਛਿਮਸੋਪਾਨਕਲ਼ੇਵਰਨ੍ਤਿ ਪਠਮਂ ਸੋਪਾਨਫਲਕਂ ਵੁਤ੍ਤਂ. ਅਦ੍ਦਸਾ ਖੋਤਿ ਓਲੋਕਨਤ੍ਥਂਯੇਵ ਦ੍ਵਾਰਕੋਟ੍ਠਕੇ ਠਿਤੋ ਅਦ੍ਦਸ. ਭਗਵਾ ਤੁਣ੍ਹੀ ਅਹੋਸੀਤਿ ‘‘ਕਿਸ੍ਸ ਨੁ ਖੋ ਅਤ੍ਥਾਯ ਰਾਜਕੁਮਾਰੇਨ ਅਯਂ ਮਹਾਸਕ੍ਕਾਰੋ ਕਤੋ’’ਤਿ ਆਵਜ੍ਜਨ੍ਤੋ ਪੁਤ੍ਤਪਤ੍ਥਨਾਯ ਕਤਭਾਵਂ ਅਞ੍ਞਾਸਿ. ਸੋ ਹਿ ਰਾਜਕੁਮਾਰੋ ਅਪੁਤ੍ਤਕੋ, ਸੁਤਞ੍ਚਾਨੇਨ ਅਹੋਸਿ – ‘‘ਬੁਦ੍ਧਾਨਂ ਕਿਰ ਅਧਿਕਾਰਂ ਕਤ੍ਵਾ ਮਨਸਾ ਇਚ੍ਛਿਤਂ ਲਭਨ੍ਤੀ’’ਤਿ. ਸੋ – ‘‘ਸਚਾਹਂ ਪੁਤ੍ਤਂ ਲਭਿਸ੍ਸਾਮਿ, ਸਮ੍ਮਾਸਮ੍ਬੁਦ੍ਧੋ ਮਮ ਚੇਲਪ੍ਪਟਿਕਂ ਅਕ੍ਕਮਿਸ੍ਸਤਿ. ਨੋ ਚੇ ਲਭਿਸ੍ਸਾਮਿ, ਨ ਅਕ੍ਕਮਿਸ੍ਸਤੀ’’ਤਿ ਪਤ੍ਥਨਂ ਕਤ੍ਵਾ ਸਨ੍ਥਰਾਪੇਸਿ. ਅਥ ਭਗਵਾ ‘‘ਨਿਬ੍ਬਤ੍ਤਿਸ੍ਸਤਿ ਨੁ ਖੋ ਏਤਸ੍ਸ ਪੁਤ੍ਤੋ’’ਤਿ ਆਵਜ੍ਜੇਤ੍ਵਾ ‘‘ਨ ਨਿਬ੍ਬਤ੍ਤਿਸ੍ਸਤੀ’’ਤਿ ਅਦ੍ਦਸ.

ਪੁਬ੍ਬੇ ਕਿਰ ਸੋ ਏਕਸ੍ਮਿਂ ਦੀਪੇ ਵਸਮਾਨੋ ਸਮਚ੍ਛਨ੍ਦੇਨ ਸਕੁਣਪੋਤਕੇ ਖਾਦਿ. ਸਚਸ੍ਸ ਮਾਤੁਗਾਮੋ ਅਞ੍ਞੋਵ ਭਵੇਯ੍ਯ, ਪੁਤ੍ਤਂ ਲਭੇਯ੍ਯ. ਉਭੋਹਿ ਪਨ ਸਮਾਨਚ੍ਛਨ੍ਦੇਹਿ ਹੁਤ੍ਵਾ ਪਾਪਕਮ੍ਮਂ ਕਤਂ, ਤੇਨਸ੍ਸ ਪੁਤ੍ਤੋ ਨ ਨਿਬ੍ਬਤ੍ਤਿਸ੍ਸਤੀਤਿ ਅਞ੍ਞਾਸਿ. ਦੁਸ੍ਸੇ ਪਨ ਅਕ੍ਕਨ੍ਤੇ – ‘‘ਬੁਦ੍ਧਾਨਂ ਅਧਿਕਾਰਂ ਕਤ੍ਵਾ ਪਤ੍ਥਿਤਪਤ੍ਥਿਤਂ ਲਭਨ੍ਤੀਤਿ ਲੋਕੇ ਅਨੁਸ੍ਸਵੋ, ਮਯਾ ਚ ਮਹਾਅਭਿਨੀਹਾਰੋ ਕਤੋ, ਨ ਚ ਪੁਤ੍ਤਂ ਲਭਾਮਿ, ਤੁਚ੍ਛਂ ਇਦਂ ਵਚਨ’’ਨ੍ਤਿ ਮਿਚ੍ਛਾਗਹਣਂ ਗਣ੍ਹੇਯ੍ਯ. ਤਿਤ੍ਥਿਯਾਪਿ – ‘‘ਨਤ੍ਥਿ ਸਮਣਾਨਂ ਅਕਤ੍ਤਬ੍ਬਂ ਨਾਮ, ਚੇਲਪ੍ਪਟਿਕਂ ਮਦ੍ਦਨ੍ਤਾ ਆਹਿਣ੍ਡਨ੍ਤੀ’’ਤਿ ਉਜ੍ਝਾਯੇਯ੍ਯੁਂ. ਏਤਰਹਿ ਚ ਅਕ੍ਕਮਨ੍ਤੇਸੁ ਬਹੂ ਭਿਕ੍ਖੂ ਪਰਚਿਤ੍ਤਵਿਦੁਨੋ, ਤੇ ਭਬ੍ਬਂ ਜਾਨਿਤ੍ਵਾ ਅਕ੍ਕਮਿਸ੍ਸਨ੍ਤਿ, ਅਭਬ੍ਬਂ ਜਾਨਿਤ੍ਵਾ ਨ ਅਕ੍ਕਮਿਸ੍ਸਨ੍ਤਿ. ਅਨਾਗਤੇ ਪਨ ਉਪਨਿਸ੍ਸਯੋ ਮਨ੍ਦੋ ਭਵਿਸ੍ਸਤਿ, ਅਨਾਗਤਂ ਨ ਜਾਨਿਸ੍ਸਨ੍ਤਿ. ਤੇਸੁ ਅਕ੍ਕਮਨ੍ਤੇਸੁ ਸਚੇ ਪਤ੍ਥਿਤਂ ਇਜ੍ਝਿਸ੍ਸਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਇਜ੍ਝਿਸ੍ਸਤਿ, – ‘‘ਪੁਬ੍ਬੇ ਭਿਕ੍ਖੁਸਙ੍ਘਸ੍ਸ ਅਭਿਨੀਹਾਰਂ ਕਤ੍ਵਾ ਇਚ੍ਛਿਤਿਚ੍ਛਿਤਂ ਲਭਨ੍ਤਿ, ਤਂ ਇਦਾਨਿ ਨ ਲਭਨ੍ਤਿ. ਤੇਯੇਵ ਮਞ੍ਞੇ ਭਿਕ੍ਖੂ ਪਟਿਪਤ੍ਤਿਪੂਰਕਾ ਅਹੇਸੁਂ, ਇਮੇ ਪਟਿਪਤ੍ਤਿਂ ਪੂਰੇਤੁਂ ਨ ਸਕ੍ਕੋਨ੍ਤੀ’’ਤਿ ਮਨੁਸ੍ਸਾ ਵਿਪ੍ਪਟਿਸਾਰਿਨੋ ਭਵਿਸ੍ਸਨ੍ਤੀਤਿ ਇਮੇਹਿ ਕਾਰਣੇਹਿ ਭਗਵਾ ਅਕ੍ਕਮਿਤੁਂ ਅਨਿਚ੍ਛਨ੍ਤੋ ਤੁਣ੍ਹੀ ਅਹੋਸਿ. ਸਿਕ੍ਖਾਪਦਂ ਪਞ੍ਞਪੇਸਿ ‘‘ਨ, ਭਿਕ੍ਖਵੇ, ਚੇਲਪ੍ਪਟਿਕਾ ਅਕ੍ਕਮਿਤਬ੍ਬਾ’’ਤਿ (ਚੂਲ਼ਵ. ੨੬੮). ਮਙ੍ਗਲਤ੍ਥਾਯ ਪਞ੍ਞਤ੍ਤਂ ਅਨਕ੍ਕਮਨ੍ਤੇਸੁ ਪਨ ਅਕ੍ਕਮਨਤ੍ਥਾਯ ਅਨੁਪਞ੍ਞਤ੍ਤਿਂ ਠਪੇਸਿ – ‘‘ਗਿਹੀ, ਭਿਕ੍ਖਵੇ, ਮਙ੍ਗਲਿਕਾ, ਅਨੁਜਾਨਾਮਿ, ਭਿਕ੍ਖਵੇ, ਗਿਹੀਨਂ ਮਙ੍ਗਲਤ੍ਥਾਯਾ’’ਤਿ (ਚੂਲ਼ਵ. ੨੬੮).

੩੨੬. ਪਚ੍ਛਿਮਂ ਜਨਤਂ ਤਥਾਗਤੋ ਅਨੁਕਮ੍ਪਤੀਤਿ ਇਦਂ ਥੇਰੋ ਵੁਤ੍ਤੇਸੁ ਕਾਰਣੇਸੁ ਤਤਿਯਂ ਕਾਰਣਂ ਸਨ੍ਧਾਯਾਹ. ਨ ਖੋ ਸੁਖੇਨ ਸੁਖਨ੍ਤਿ ਕਸ੍ਮਾ ਆਹ? ਕਾਮਸੁਖਲ੍ਲਿਕਾਨੁਯੋਗਸਞ੍ਞੀ ਹੁਤ੍ਵਾ ਸਮ੍ਮਾਸਮ੍ਬੁਦ੍ਧੋ ਨ ਅਕ੍ਕਮਿ, ਤਸ੍ਮਾ ਅਹਮ੍ਪਿ ਸਤ੍ਥਾਰਾ ਸਮਾਨਚ੍ਛਨ੍ਦੋ ਭਵਿਸ੍ਸਾਮੀਤਿ ਮਞ੍ਞਮਾਨੋ ਏਵਮਾਹ.

੩੨੭. ਸੋ ਖੋ ਅਹਨ੍ਤਿਆਦਿ ‘‘ਯਾਵ ਰਤ੍ਤਿਯਾ ਪਚ੍ਛਿਮੇ ਯਾਮੇ’’ਤਿ ਤਾਵ ਮਹਾਸਚ੍ਚਕੇ (ਮ. ਨਿ. ੧.੩੬੪ ਆਦਯੋ) ਵੁਤ੍ਤਨਯੇਨ ਵੇਦਿਤਬ੍ਬਂ. ਤਤੋ ਪਰਂ ਯਾਵ ਪਞ੍ਚਵਗ੍ਗਿਯਾਨਂ ਆਸਵਕ੍ਖਯਾ ਪਾਸਰਾਸਿਸੁਤ੍ਤੇ (ਮ. ਨਿ. ੧.੨੭੨ ਆਦਯੋ) ਵੁਤ੍ਤਨਯੇਨ ਵੇਦਿਤਬ੍ਬਂ.

੩੪੩. ਅਙ੍ਕੁਸਗਯ੍ਹੇ ਸਿਪ੍ਪੇਤਿ ਅਙ੍ਕੁਸਗਹਣਸਿਪ੍ਪੇ. ਕੁਸਲੋ ਅਹਨ੍ਤਿ ਛੇਕੋ ਅਹਂ. ਕਸ੍ਸ ਪਨਾਯਂ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹੀਤਿ? ਪਿਤੁ ਸਨ੍ਤਿਕੇ, ਪਿਤਾਪਿਸ੍ਸ ਪਿਤੁ ਸਨ੍ਤਿਕੇਵ ਉਗ੍ਗਣ੍ਹਿ. ਕੋਸਮ੍ਬਿਯਂ ਕਿਰ ਪਰਨ੍ਤਪਰਾਜਾ ਨਾਮ ਰਜ੍ਜਂ ਕਾਰੇਸਿ. ਰਾਜਮਹੇਸੀ ਗਰੁਭਾਰਾ ਆਕਾਸਤਲੇ ਰਞ੍ਞਾ ਸਦ੍ਧਿਂ ਬਾਲਾਤਪਂ ਤਪ੍ਪਮਾਨਾ ਰਤ੍ਤਕਮ੍ਬਲਂ ਪਾਰੁਪਿਤ੍ਵਾ ਨਿਸਿਨ੍ਨਾ ਹੋਤਿ, ਏਕੋ ਹਤ੍ਥਿਲਿਙ੍ਗਸਕੁਣੋ ‘‘ਮਂਸਪੇਸੀ’’ਤਿ ਮਞ੍ਞਮਾਨੋ ਗਹੇਤ੍ਵਾ ਆਕਾਸਂ ਪਕ੍ਖਨ੍ਦਿ. ਸਾ ‘‘ਛਡ੍ਡੇਯ੍ਯ ਮ’’ਨ੍ਤਿ ਭਯੇਨ ਨਿਸ੍ਸਦ੍ਦਾ ਅਹੋਸਿ, ਸੋ ਤਂ ਪਬ੍ਬਤਪਾਦੇ ਰੁਕ੍ਖਵਿਟਪੇ ਠਪੇਸਿ. ਸਾ ਪਾਣਿਸ੍ਸਰਂ ਕਰੋਨ੍ਤੀ ਮਹਾਸਦ੍ਦਮਕਾਸਿ. ਸਕੁਣੋ ਪਲਾਯਿ, ਤਸ੍ਸਾ ਤਤ੍ਥੇਵ ਗਬ੍ਭਵੁਟ੍ਠਾਨਂ ਅਹੋਸਿ. ਤਿਯਾਮਰਤ੍ਤਿਂ ਦੇਵੇ ਵਸ੍ਸਨ੍ਤੇ ਕਮ੍ਬਲਂ ਪਾਰੁਪਿਤ੍ਵਾ ਨਿਸੀਦਿ. ਤਤੋ ਚ ਅਵਿਦੂਰੇ ਤਾਪਸੋ ਵਸਤਿ. ਸੋ ਤਸ੍ਸਾ ਸਦ੍ਦੇਨ ਅਰੁਣੇ ਉਗ੍ਗਤੇ ਰੁਕ੍ਖਮੂਲਂ ਆਗਤੋ ਜਾਤਿਂ ਪੁਚ੍ਛਿਤ੍ਵਾ ਨਿਸ੍ਸੇਣਿਂ ਬਨ੍ਧਿਤ੍ਵਾ ਓਤਾਰੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਨੇਤ੍ਵਾ ਯਾਗੁਂ ਪਾਯੇਸਿ. ਦਾਰਕਸ੍ਸ ਮੇਘਉਤੁਞ੍ਚ ਪਬ੍ਬਤਉਤੁਞ੍ਚ ਗਹੇਤ੍ਵਾ ਜਾਤਤ੍ਤਾ ਉਦੇਨੋਤਿ ਨਾਮਂ ਅਕਾਸਿ. ਤਾਪਸੋ ਫਲਾਫਲਾਨਿ ਆਹਰਿਤ੍ਵਾ ਦ੍ਵੇਪਿ ਜਨੇ ਪੋਸੇਸਿ.

ਸਾ ਏਕਦਿਵਸਂ ਤਾਪਸਸ੍ਸ ਆਗਮਨਵੇਲਾਯ ਪਚ੍ਚੁਗ੍ਗਮਨਂ ਕਤ੍ਵਾ ਇਤ੍ਥਿਕੁਤ੍ਤਂ ਦਸ੍ਸੇਤ੍ਵਾ ਤਾਪਸਂ ਸੀਲਭੇਦਂ ਆਪਾਦੇਸਿ. ਤੇਸਂ ਏਕਤੋ ਵਸਨ੍ਤਾਨਂ ਕਾਲੇ ਗਚ੍ਛਨ੍ਤੇ ਪਰਨ੍ਤਪਰਾਜਾ ਕਾਲਂ ਅਕਾਸਿ. ਤਾਪਸੋ ਰਤ੍ਤਿਭਾਗੇ ਨਕ੍ਖਤ੍ਤਂ ਓਲੋਕੇਤ੍ਵਾ ਰਞ੍ਞੋ ਮਤਭਾਵਂ ਞਤ੍ਵਾ – ‘‘ਤੁਯ੍ਹਂ ਰਾਜਾ ਮਤੋ, ਪੁਤ੍ਤੋ ਤੇ ਕਿਂ ਇਧ ਵਸਿਤੁਂ ਇਚ੍ਛਤਿ, ਉਦਾਹੁ ਪੇਤ੍ਤਿਕੇ ਰਜ੍ਜੇ ਛਤ੍ਤਂ ਉਸ੍ਸਾਪੇਤੁ’’ਨ੍ਤਿ ਪੁਚ੍ਛਿ. ਸਾ ਪੁਤ੍ਤਸ੍ਸ ਆਦਿਤੋ ਪਟ੍ਠਾਯ ਸਬ੍ਬਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ਛਤ੍ਤਂ ਉਸ੍ਸਾਪੇਤੁਕਾਮਤਞ੍ਚਸ੍ਸ ਞਤ੍ਵਾ ਤਾਪਸਸ੍ਸ ਆਰੋਚੇਸਿ. ਤਾਪਸੋ ਚ ਹਤ੍ਥਿਗਨ੍ਥਸਿਪ੍ਪਂ ਜਾਨਾਤਿ, ਕੁਤੋਨੇਨ ਲਦ੍ਧਂ? ਸਕ੍ਕਸ੍ਸ ਸਨ੍ਤਿਕਾ. ਪੁਬ੍ਬੇ ਕਿਰਸ੍ਸ ਸਕ੍ਕੋ ਉਪਟ੍ਠਾਨਂ ਆਗਨ੍ਤ੍ਵਾ ‘‘ਕੇਨ ਕਿਲਮਥਾ’’ਤਿ ਪੁਚ੍ਛਿ. ਸੋ ‘‘ਹਤ੍ਥਿਪਰਿਸ੍ਸਯੋ ਅਤ੍ਥੀ’’ਤਿ ਆਰੋਚੇਸਿ. ਤਸ੍ਸ ਸਕ੍ਕੋ ਹਤ੍ਥਿਗਨ੍ਥਞ੍ਚੇਵ ਵੀਣਕਞ੍ਚ ਦਤ੍ਵਾ ‘‘ਪਲਾਪੇਤੁਕਾਮਤਾਯ ਸਤਿ ਇਮਂ ਤਨ੍ਤਿਂ ਵਾਦੇਤ੍ਵਾ ਇਮਂ ਸਿਲੋਕਂ ਵਦੇਯ੍ਯਾਥ, ਪਕ੍ਕੋਸਿਤੁਕਾਮਤਾਯ ਸਤਿ ਇਮਂ ਸਿਲੋਕਂ ਵਦੇਯ੍ਯਾਥਾ’’ਤਿ ਆਹ. ਤਾਪਸੋ ਤਂ ਸਿਪ੍ਪਂ ਕੁਮਾਰਸ੍ਸ ਅਦਾਸਿ. ਸੋ ਏਕਂ ਵਟਰੁਕ੍ਖਂ ਅਭਿਰੁਹਿਤ੍ਵਾ ਹਤ੍ਥੀਸੁ ਆਗਤੇਸੁ ਤਨ੍ਤਿਂ ਵਾਦੇਤ੍ਵਾ ਸਿਲੋਕਂ ਵਦਤਿ, ਹਤ੍ਥੀ ਭੀਤਾ ਪਲਾਯਿਂਸੁ.

ਸੋ ਸਿਪ੍ਪਸ੍ਸ ਆਨੁਭਾਵਂ ਞਤ੍ਵਾ ਪੁਨਦਿਵਸੇ ਪਕ੍ਕੋਸਨਸਿਪ੍ਪਂ ਪਯੋਜੇਸਿ. ਜੇਟ੍ਠਕਹਤ੍ਥੀ ਆਗਨ੍ਤ੍ਵਾ ਖਨ੍ਧਂ ਉਪਨਾਮੇਸਿ. ਸੋ ਤਸ੍ਸ ਖਨ੍ਧਗਤੋ ਯੁਦ੍ਧਸਮਤ੍ਥੇ ਤਰੁਣਹਤ੍ਥੀ ਉਚ੍ਚਿਨਿਤ੍ਵਾ ਕਮ੍ਬਲਞ੍ਚ ਮੁਦ੍ਦਿਕਞ੍ਚ ਗਹੇਤ੍ਵਾ ਮਾਤਾਪਿਤਰੋ ਵਨ੍ਦਿਤ੍ਵਾ ਨਿਕ੍ਖਨ੍ਤੋ ਅਨੁਪੁਬ੍ਬੇਨ ਤਂ ਤਂ ਗਾਮਂ ਪਵਿਸਿਤ੍ਵਾ – ‘‘ਅਹਂ ਰਞ੍ਞੋ ਪੁਤ੍ਤੋ, ਸਮ੍ਪਤ੍ਤਿਂ ਅਤ੍ਥਿਕਾ ਆਗਚ੍ਛਨ੍ਤੂ’’ਤਿ ਜਨਸਙ੍ਗਹਂ ਕਤ੍ਵਾ ਨਗਰਂ ਪਰਿਵਾਰੇਤ੍ਵਾ – ‘‘ਅਹਂ ਰਞ੍ਞੋ ਪੁਤ੍ਤੋ, ਮਯ੍ਹਂ ਛਤ੍ਤਂ ਦੇਥਾ’’ਤਿ ਅਸਦ੍ਦਹਨ੍ਤਾਨਂ ਕਮ੍ਬਲਞ੍ਚ ਮੁਦ੍ਦਿਕਞ੍ਚ ਦਸ੍ਸੇਤ੍ਵਾ ਛਤ੍ਤਂ ਉਸ੍ਸਾਪੇਸਿ. ਸੋ ਹਤ੍ਥਿਵਿਤ੍ਤਕੋ ਹੁਤ੍ਵਾ ‘‘ਅਸੁਕਟ੍ਠਾਨੇ ਸੁਨ੍ਦਰੋ ਹਤ੍ਥੀ ਅਤ੍ਥੀ’’ਤਿ ਵੁਤ੍ਤੇ ਗਨ੍ਤ੍ਵਾ ਗਣ੍ਹਾਤਿ. ਚਣ੍ਡਪਜ੍ਜੋਤੋ ‘‘ਤਸ੍ਸ ਸਨ੍ਤਿਕੇ ਸਿਪ੍ਪਂ ਗਣ੍ਹਿਸ੍ਸਾਮੀ’’ਤਿ ਕਟ੍ਠਹਤ੍ਥਿਂ ਪਯੋਜੇਤ੍ਵਾ ਤਸ੍ਸ ਅਨ੍ਤੋ ਯੋਧੇ ਨਿਸੀਦਾਪੇਤ੍ਵਾ ਤਂ ਹਤ੍ਥਿਂ ਗਹਣਤ੍ਥਾਯ ਆਗਤਂ ਗਣ੍ਹਿਤ੍ਵਾ ਤਸ੍ਸ ਸਨ੍ਤਿਕੇ ਸਿਪ੍ਪਂ ਗਹਣਤ੍ਥਾਯ ਧੀਤਰਂ ਉਯ੍ਯੋਜੇਸਿ. ਸੋ ਤਾਯ ਸਦ੍ਧਿਂ ਸਂਵਾਸਂ ਕਪ੍ਪੇਤ੍ਵਾ ਤਂ ਗਹੇਤ੍ਵਾ ਅਤ੍ਤਨੋ ਨਗਰਂਯੇਵ ਅਗਮਾਸਿ. ਤਸ੍ਸਾ ਕੁਚ੍ਛਿਯਂ ਉਪ੍ਪਨ੍ਨੋ ਅਯਂ ਬੋਧਿਰਾਜਕੁਮਾਰੋ ਅਤ੍ਤਨੋ ਪਿਤੁ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਿ.

੩੪੪. ਪਧਾਨਿਯਙ੍ਗਾਨੀਤਿ ਪਧਾਨਂ ਵੁਚ੍ਚਤਿ ਪਦਹਨਭਾਵੋ, ਪਧਾਨਮਸ੍ਸ ਅਤ੍ਥੀਤਿ ਪਧਾਨਿਯੋ. ਪਧਾਨਿਯਸ੍ਸ ਭਿਕ੍ਖੁਨੋ ਅਙ੍ਗਾਨੀਤਿ ਪਧਾਨਿਯਙ੍ਗਾਨਿ. ਸਦ੍ਧੋਤਿ ਸਦ੍ਧਾਯ ਸਮਨ੍ਨਾਗਤੋ. ਸਾ ਪਨੇਸਾ ਆਗਮਨਸਦ੍ਧਾ ਅਧਿਗਮਸਦ੍ਧਾ ਓਕਪ੍ਪਨਸਦ੍ਧਾ ਪਸਾਦਸਦ੍ਧਾਤਿ ਚਤੁਬ੍ਬਿਧਾ. ਤਤ੍ਥ ਸਬ੍ਬਞ੍ਞੁਬੋਧਿਸਤ੍ਤਾਨਂ ਸਦ੍ਧਾ ਅਭਿਨੀਹਾਰਤੋ ਪਟ੍ਠਾਯ ਆਗਤਤ੍ਤਾ ਆਗਮਨਸਦ੍ਧਾ ਨਾਮ. ਅਰਿਯਸਾਵਕਾਨਂ ਪਟਿਵੇਧੇਨ ਅਧਿਗਤਤ੍ਤਾ ਅਧਿਗਮਸਦ੍ਧਾ ਨਾਮ. ਬੁਦ੍ਧੋ ਧਮ੍ਮੋ ਸਙ੍ਘੋਤਿ ਵੁਤ੍ਤੇ ਅਚਲਭਾਵੇਨ ਓਕਪ੍ਪਨਂ ਓਕਪ੍ਪਨਸਦ੍ਧਾ ਨਾਮ. ਪਸਾਦੁਪ੍ਪਤ੍ਤਿ ਪਸਾਦਸਦ੍ਧਾ ਨਾਮ, ਇਧ ਪਨ ਓਕਪ੍ਪਨਸਦ੍ਧਾ ਅਧਿਪ੍ਪੇਤਾ. ਬੋਧਿਨ੍ਤਿ ਚਤੁਮਗ੍ਗਞਾਣਂ. ਤਂ ਸੁਪ੍ਪਟਿਵਿਦ੍ਧਂ ਤਥਾਗਤੇਨਾਤਿ ਸਦ੍ਦਹਤਿ, ਦੇਸਨਾਸੀਸਮੇਵ ਚੇਤਂ, ਇਮਿਨਾ ਪਨ ਅਙ੍ਗੇਨ ਤੀਸੁਪਿ ਰਤਨੇਸੁ ਸਦ੍ਧਾ ਅਧਿਪ੍ਪੇਤਾ. ਯਸ੍ਸ ਹਿ ਬੁਦ੍ਧਾਦੀਸੁ ਪਸਾਦੋ ਬਲਵਾ, ਤਸ੍ਸ ਪਧਾਨਂ ਵੀਰਿਯਂ ਇਜ੍ਝਤਿ.

ਅਪ੍ਪਾਬਾਧੋਤਿ ਅਰੋਗੋ. ਅਪ੍ਪਾਤਙ੍ਕੋਤਿ ਨਿਦ੍ਦੁਕ੍ਖੋ. ਸਮਵੇਪਾਕਿਨਿਯਾਤਿ ਸਮਵਿਪਾਚਨਿਯਾ. ਗਹਣਿਯਾਤਿ ਕਮ੍ਮਜਤੇਜੋਧਾਤੁਯਾ. ਨਾਤਿਸੀਤਾਯ ਨਾਚ੍ਚੁਣ੍ਹਾਯਾਤਿ ਅਤਿਸੀਤਗਹਣਿਕੋ ਹਿ ਸੀਤਭੀਰੂ ਹੋਤਿ, ਅਚ੍ਚੁਣ੍ਹਗਹਣਿਕੋ ਉਣ੍ਹਭੀਰੂ, ਤੇਸਂ ਪਧਾਨਂ ਨ ਇਜ੍ਝਤਿ. ਮਜ੍ਝਿਮਗਹਣਿਕਸ੍ਸ ਇਜ੍ਝਤਿ. ਤੇਨਾਹ ‘‘ਮਜ੍ਝਿਮਾਯ ਪਧਾਨਕ੍ਖਮਾਯਾ’’ਤਿ. ਯਥਾਭੂਤਂ ਅਤ੍ਤਾਨਂ ਆਵਿਕਤ੍ਤਾਤਿ ਯਥਾਭੂਤਂ ਅਤ੍ਤਨੋ ਅਗੁਣਂ ਪਕਾਸੇਤਾ. ਉਦਯਤ੍ਥਗਾਮਿਨਿਯਾਤਿ ਉਦਯਞ੍ਚ ਅਤ੍ਥਞ੍ਚ ਗਨ੍ਤੁਂ ਪਰਿਚ੍ਛਿਨ੍ਦਿਤੁਂ ਸਮਤ੍ਥਾਯ, ਏਤੇਨ ਪਞ੍ਞਾਸਲਕ੍ਖਣਪਰਿਗ੍ਗਾਹਿਕਂ ਉਦਯਬ੍ਬਯਞਾਣਂ ਵੁਤ੍ਤਂ. ਅਰਿਯਾਯਾਤਿ ਪਰਿਸੁਦ੍ਧਾਯ. ਨਿਬ੍ਬੇਧਿਕਾਯਾਤਿ ਅਨਿਬ੍ਬਿਦ੍ਧਪੁਬ੍ਬੇ ਲੋਭਕ੍ਖਨ੍ਧਾਦਯੋ ਨਿਬ੍ਬਿਜ੍ਝਿਤੁਂ ਸਮਤ੍ਥਾਯ. ਸਮ੍ਮਾਦੁਕ੍ਖਕ੍ਖਯਗਾਮਿਨਿਯਾਤਿ ਤਦਙ੍ਗਵਸੇਨ ਕਿਲੇਸਾਨਂ ਪਹੀਨਤ੍ਤਾ ਯਂ ਦੁਕ੍ਖਂ ਖੀਯਤਿ, ਤਸ੍ਸ ਦੁਕ੍ਖਸ੍ਸ ਖਯਗਾਮਿਨਿਯਾ. ਇਤਿ ਸਬ੍ਬੇਹਿਪਿ ਇਮੇਹਿ ਪਦੇਹਿ ਵਿਪਸ੍ਸਨਾਪਞ੍ਞਾਵ ਕਥਿਤਾ. ਦੁਪ੍ਪਞ੍ਞਸ੍ਸ ਹਿ ਪਧਾਨਂ ਨ ਇਜ੍ਝਤਿ. ਇਮਾਨਿ ਚ ਪਞ੍ਚ ਪਧਾਨਿਯਙ੍ਗਾਨਿ ਲੋਕਿਯਾਨੇਵ ਵੇਦਿਤਬ੍ਬਾਨਿ.

੩੪੫. ਸਾਯਮਨੁਸਿਟ੍ਠੋ ਪਾਤੋ ਵਿਸੇਸਂ ਅਧਿਗਮਿਸ੍ਸਤੀਤਿ ਅਤ੍ਥਙ੍ਗਤੇ ਸੂਰਿਯੇ ਅਨੁਸਿਟ੍ਠੋ ਅਰੁਣੁਗ੍ਗਮਨੇ ਵਿਸੇਸਂ ਅਧਿਗਮਿਸ੍ਸਤਿ. ਪਾਤਮਨੁਸਿਟ੍ਠੋ ਸਾਯਨ੍ਤਿ ਅਰੁਣੁਗ੍ਗਮਨੇ ਅਨੁਸਿਟ੍ਠੋ ਸੂਰਿਯਤ੍ਥਙ੍ਗਮਨਵੇਲਾਯਂ. ਅਯਞ੍ਚ ਪਨ ਦੇਸਨਾ ਨੇਯ੍ਯਪੁਗ੍ਗਲਵਸੇਨ ਵੁਤ੍ਤਾ. ਦਨ੍ਧਪਞ੍ਞੋ ਹਿ ਨੇਯ੍ਯਪੁਗ੍ਗਲੋ ਸਤ੍ਤਹਿ ਦਿਵਸੇਹਿ ਅਰਹਤ੍ਤਂ ਪਾਪੁਣਾਤਿ, ਤਿਕ੍ਖਪਞ੍ਞੋ ਏਕਦਿਵਸੇਨ, ਸੇਸਦਿਵਸੇ ਮਜ੍ਝਿਮਪਞ੍ਞਾਵਸੇਨ ਵੇਦਿਤਬ੍ਬਂ. ਅਹੋ ਬੁਦ੍ਧੋ ਅਹੋ ਧਮ੍ਮੋ ਅਹੋ ਧਮ੍ਮਸ੍ਸ ਸ੍ਵਾਕ੍ਖਾਤਤਾਤਿ ਯਸ੍ਮਾ ਬੁਦ੍ਧਧਮ੍ਮਾਨਂ ਉਲ਼ਾਰਤਾਯ ਧਮ੍ਮਸ੍ਸ ਚ ਸ੍ਵਾਕ੍ਖਾਤਤਾਯ ਪਾਤੋ ਕਮ੍ਮਟ੍ਠਾਨਂ ਕਥਾਪੇਤ੍ਵਾ ਸਾਯਂ ਅਰਹਤ੍ਤਂ ਪਾਪੁਣਾਤਿ, ਤਸ੍ਮਾ ਪਸਂਸਨ੍ਤੋ ਏਵਮਾਹ. ਯਤ੍ਰ ਹਿ ਨਾਮਾਤਿ ਵਿਮ੍ਹਯਤ੍ਥੇ ਨਿਪਾਤੋ.

੩੪੬. ਕੁਚ੍ਛਿਮਤੀਤਿ ਆਪਨ੍ਨਸਤ੍ਤਾ. ਯੋ ਮੇ ਅਯਂ, ਭਨ੍ਤੇ, ਕੁਚ੍ਛਿਗਤੋਤਿ ਕਿਂ ਪਨੇਵਂ ਸਰਣਂ ਗਹਿਤਂ ਹੋਤੀਤਿ. ਨ ਹੋਤਿ. ਅਚਿਤ੍ਤਕਸਰਣਗਮਨਂ ਨਾਮ ਨਤ੍ਥਿ, ਆਰਕ੍ਖੋ ਪਨਸ੍ਸ ਪਚ੍ਚੁਪਟ੍ਠਿਤੋਵ ਹੋਤਿ. ਅਥ ਨਂ ਯਦਾ ਮਹਲ੍ਲਕਕਾਲੇ ਮਾਤਾਪਿਤਰੋ, – ‘‘ਤਾਤ, ਕੁਚ੍ਛਿਗਤਮੇਵ ਤਂ ਸਰਣਂ ਗਣ੍ਹਾਪਯਿਮ੍ਹਾ’’ਤਿ ਸਾਰੇਨ੍ਤਿ, ਸੋ ਚ ਸਲ੍ਲਕ੍ਖੇਤ੍ਵਾ ‘‘ਅਹਂ ਸਰਣਂ ਗਤੋ ਉਪਾਸਕੋ’’ਤਿ ਸਤਿਂ ਉਪ੍ਪਾਦੇਤਿ, ਤਦਾ ਸਰਣਂ ਗਹਿਤਂ ਨਾਮ ਹੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਬੋਧਿਰਾਜਕੁਮਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.