੮. ਸਮਣਮੁਣ੍ਡਿਕਸੁਤ੍ਤਵਣ੍ਣਨਾ

੨੬੦. ਏਵਂ ਮੇ ਸੁਤਨ੍ਤਿ ਸਮਣਮੁਣ੍ਡਿਕਸੁਤ੍ਤਂ. ਤਤ੍ਥ ਉਗ੍ਗਾਹਮਾਨੋਤਿ ਤਸ੍ਸ ਪਰਿਬ੍ਬਾਜਕਸ੍ਸ ਨਾਮਂ. ਸੁਮਨੋਤਿ ਪਕਤਿਨਾਮਂ. ਕਿਞ੍ਚਿ ਕਿਞ੍ਚਿ ਪਨ ਉਗ੍ਗਹਿਤੁਂ ਉਗ੍ਗਾਹੇਤੁਂ ਸਮਤ੍ਥਤਾਯ ਉਗ੍ਗਾਹਮਾਨੋਤਿ ਨਂ ਸਞ੍ਜਾਨਨ੍ਤਿ. ਸਮਯਂ ਪਵਦਨ੍ਤਿ ਏਤ੍ਥਾਤਿ ਸਮਯਪ੍ਪਵਾਦਕਂ. ਤਸ੍ਮਿਂ ਕਿਰ ਠਾਨੇ ਚਙ੍ਕੀਤਾਰੁਕ੍ਖਪੋਕ੍ਖਰਸਾਤਿਪ੍ਪਭੁਤਯੋ ਬ੍ਰਾਹ੍ਮਣਾ ਨਿਗਣ੍ਠਾਚੇਲਕਪਰਿਬ੍ਬਾਜਕਾਦਯੋ ਚ ਪਬ੍ਬਜਿਤਾ ਸਨ੍ਨਿਪਤਿਤ੍ਵਾ ਅਤ੍ਤਨੋ ਅਤ੍ਤਨੋ ਸਮਯਂ ਪਵਦਨ੍ਤਿ ਕਥੇਨ੍ਤਿ ਦੀਪੇਨ੍ਤਿ, ਤਸ੍ਮਾ ਸੋ ਆਰਾਮੋ ਸਮਯਪ੍ਪਵਾਦਕੋਤਿ ਵੁਚ੍ਚਤਿ. ਸ੍ਵੇਵ ਤਿਨ੍ਦੁਕਾਚੀਰਸਙ੍ਖਾਤਾਯ ਤਿਮ੍ਬਰੂਸਕਰੁਕ੍ਖਪਨ੍ਤਿਯਾ ਪਰਿਕ੍ਖਿਤ੍ਤਤ੍ਤਾ ਤਿਨ੍ਦੁਕਾਚੀਰਂ. ਯਸ੍ਮਾ ਪਨੇਤ੍ਥ ਪਠਮਂ ਏਕਾ ਸਾਲਾ ਅਹੋਸਿ, ਪਚ੍ਛਾ ਮਹਾਪੁਞ੍ਞਂ ਪੋਟ੍ਠਪਾਦਪਰਿਬ੍ਬਾਜਕਂ ਨਿਸ੍ਸਾਯ ਬਹੂ ਸਾਲਾ ਕਤਾ, ਤਸ੍ਮਾ ਤਮੇਵ ਏਕਂ ਸਾਲਂ ਉਪਾਦਾਯ ਲਦ੍ਧਨਾਮਵਸੇਨ ਏਕਸਾਲਕੋਤਿ ਵੁਚ੍ਚਤਿ. ਮਲ੍ਲਿਕਾਯ ਪਨ ਪਸੇਨਦਿਰਞ੍ਞੋ ਦੇਵਿਯਾ ਉਯ੍ਯਾਨਭੂਤੋ ਸੋ ਪੁਪ੍ਫਫਲਸਞ੍ਛਨ੍ਨੋ ਆਰਾਮੋਤਿ ਕਤ੍ਵਾ ਮਲ੍ਲਿਕਾਯ ਆਰਾਮੋਤਿ ਸਙ੍ਖਂ ਗਤੋ. ਤਸ੍ਮਿਂ ਸਮਯਪ੍ਪਵਾਦਕੇ ਤਿਨ੍ਦੁਕਾਚੀਰੇ ਏਕਸਾਲਕੇ ਮਲ੍ਲਿਕਾਯ ਆਰਾਮੇ. ਪਟਿਵਸਤੀਤਿ ਵਾਸਫਾਸੁਤਾਯ ਵਸਤਿ. ਦਿਵਾ ਦਿਵਸ੍ਸਾਤਿ ਦਿਵਸਸ੍ਸ ਦਿਵਾ ਨਾਮ ਮਜ੍ਝਨ੍ਹਾਤਿਕ੍ਕਮੋ, ਤਸ੍ਮਿਂ ਦਿਵਸਸ੍ਸਪਿ ਦਿਵਾਭੂਤੇ ਅਤਿਕ੍ਕਨ੍ਤਮਤ੍ਤੇ ਮਜ੍ਝਨ੍ਹਿਕੇ ਨਿਕ੍ਖਮੀਤਿ ਅਤ੍ਥੋ. ਪਟਿਸਲ੍ਲੀਨੋਤਿ ਤਤੋ ਤਤੋ ਰੂਪਾਦਿਗੋਚਰਤੋ ਚਿਤ੍ਤਂ ਪਟਿਸਂਹਰਿਤ੍ਵਾ ਲੀਨੋ, ਝਾਨਰਤਿਸੇਵਨਵਸੇਨ ਏਕੀਭਾਵਂ ਗਤੋ. ਮਨੋਭਾਵਨੀਯਾਨਨ੍ਤਿ ਮਨਵਡ੍ਢਨਕਾਨਂ, ਯੇ ਆਵਜ੍ਜਤੋ ਮਨਸਿਕਰੋਤੋ ਚਿਤ੍ਤਂ ਵਿਨੀਵਰਣਂ ਹੋਤਿ ਉਨ੍ਨਮਤਿ ਵਡ੍ਢਤਿ. ਯਾਵਤਾਤਿ ਯਤ੍ਤਕਾ. ਅਯਂ ਤੇਸਂ ਅਞ੍ਞਤਰੋਤਿ ਅਯਂ ਤੇਸਂ ਅਬ੍ਭਨ੍ਤਰੋ ਏਕੋ ਸਾਵਕੋ. ਅਪ੍ਪੇਵ ਨਾਮਾਤਿ ਤਸ੍ਸ ਉਪਸਙ੍ਕਮਨਂ ਪਤ੍ਥਯਮਾਨੋ ਆਹ. ਪਤ੍ਥਨਾਕਾਰਣਂ ਪਨ ਸਨ੍ਦਕਸੁਤ੍ਤੇ ਵੁਤ੍ਤਮੇਵ.

੨੬੧. ਏਤਦਵੋਚਾਤਿ ਦਨ੍ਦਪਞ੍ਞੋ ਅਯਂ ਗਹਪਤਿ, ਧਮ੍ਮਕਥਾਯ ਨਂ ਸਙ੍ਗਣ੍ਹਿਤ੍ਵਾ ਅਤ੍ਤਨੋ ਸਾਵਕਂ ਕਰਿਸ੍ਸਾਮੀਤਿ ਮਞ੍ਞਮਾਨੋ ਏਤਂ ‘‘ਚਤੂਹਿ ਖੋ’’ਤਿਆਦਿਵਚਨਂ ਅਵੋਚ. ਤਤ੍ਥ ਪਞ੍ਞਪੇਮੀਤਿ ਦਸ੍ਸੇਮਿ ਠਪੇਮਿ. ਸਮ੍ਪਨ੍ਨਕੁਸਲਨ੍ਤਿ ਪਰਿਪੁਣ੍ਣਕੁਸਲਂ. ਪਰਮਕੁਸਲਨ੍ਤਿ ਉਤ੍ਤਮਕੁਸਲਂ. ਅਯੋਜ੍ਝਨ੍ਤਿ ਵਾਦਯੁਦ੍ਧੇਨ ਯੁਜ੍ਝਿਤ੍ਵਾ ਚਾਲੇਤੁਂ ਅਸਕ੍ਕੁਣੇਯ੍ਯਂ ਅਚਲਂ ਨਿਕ੍ਕਮ੍ਪਂ ਥਿਰਂ. ਨ ਕਰੋਤੀਤਿ ਅਕਰਣਮਤ੍ਤਮੇਵ ਵਦਤਿ, ਏਤ੍ਥ ਪਨ ਸਂਵਰਪ੍ਪਹਾਨਂ ਵਾ ਪਟਿਸੇਵਨਪ੍ਪਹਾਨਂ ਵਾ ਨ ਵਦਤਿ. ਸੇਸਪਦੇਸੁਪਿ ਏਸੇਵ ਨਯੋ.

ਨੇਵ ਅਭਿਨਨ੍ਦੀਤਿ ਤਿਤ੍ਥਿਯਾ ਨਾਮ ਜਾਨਿਤ੍ਵਾਪਿ ਅਜਾਨਿਤ੍ਵਾਪਿ ਯਂ ਵਾ ਤਂ ਵਾ ਵਦਨ੍ਤੀਤਿ ਮਞ੍ਞਮਾਨੋ ਨਾਭਿਨਨ੍ਦਿ. ਨ ਪਟਿਕ੍ਕੋਸੀਤਿ ਸਾਸਨਸ੍ਸ ਅਨੁਲੋਮਂ ਵਿਯ ਪਸਨ੍ਨਾਕਾਰਂ ਵਿਯ ਵਦਤੀਤਿ ਮਞ੍ਞਮਾਨੋ ਨ ਪਟਿਸੇਧੇਤਿ.

੨੬੨. ਯਥਾ ਉਗ੍ਗਾਹਮਾਨਸ੍ਸਾਤਿ ਯਥਾ ਤਸ੍ਸ ਵਚਨਂ, ਏਵਂ ਸਨ੍ਤੇ ਉਤ੍ਤਾਨਸੇਯ੍ਯਕੋ ਕੁਮਾਰੋ ਅਯੋਜ੍ਝਸਮਣੋ ਥਿਰਸਮਣੋ ਭਵਿਸ੍ਸਤਿ, ਮਯਂ ਪਨ ਏਵਂ ਨ ਵਦਾਮਾਤਿ ਦੀਪੇਤਿ. ਕਾਯੋਤਿਪਿ ਨ ਹੋਤੀਤਿ ਸਕਕਾਯੋ ਪਰਕਾਯੋਤਿਪਿ ਵਿਸੇਸਞਾਣਂ ਨ ਹੋਤਿ. ਅਞ੍ਞਤ੍ਰ ਫਨ੍ਦਿਤਮਤ੍ਤਾਤਿ ਪਚ੍ਚਤ੍ਥਰਣੇ ਵਲਿਸਮ੍ਫਸ੍ਸੇਨ ਵਾ ਮਙ੍ਗੁਲਦਟ੍ਠੇਨ ਵਾ ਕਾਯਫਨ੍ਦਨਮਤ੍ਤਂ ਨਾਮ ਹੋਤਿ. ਤਂ ਠਪੇਤ੍ਵਾ ਅਞ੍ਞਂ ਕਾਯੇਨ ਕਰਣਕਮ੍ਮਂ ਨਾਮ ਨਤ੍ਥਿ. ਤਮ੍ਪਿ ਚ ਕਿਲੇਸਸਹਗਤਚਿਤ੍ਤੇਨੇਵ ਹੋਤਿ. ਵਾਚਾਤਿਪਿ ਨ ਹੋਤੀਤਿ ਮਿਚ੍ਛਾਵਾਚਾ ਸਮ੍ਮਾਵਾਚਾਤਿਪਿ ਨਾਨਤ੍ਤਂ ਨ ਹੋਤਿ. ਰੋਦਿਤਮਤ੍ਤਾਤਿ ਜਿਘਚ੍ਛਾਪਿਪਾਸਾਪਰੇਤਸ੍ਸ ਪਨ ਰੋਦਿਤਮਤ੍ਤਂ ਹੋਤਿ. ਤਮ੍ਪਿ ਕਿਲੇਸਸਹਗਤਚਿਤ੍ਤੇਨੇਵ. ਸਙ੍ਕਪ੍ਪੋਤਿ ਮਿਚ੍ਛਾਸਙ੍ਕਪ੍ਪੋ ਸਮ੍ਮਾਸਙ੍ਕਪ੍ਪੋਤਿਪਿ ਨਾਨਤ੍ਤਂ ਨ ਹੋਤਿ. ਵਿਕੂਜਿਤਮਤ੍ਤਾਤਿ ਵਿਕੂਜਿਤਮਤ੍ਤਂ ਰੋਦਨਹਸਿਤਮਤ੍ਤਂ ਹੋਤਿ. ਦਹਰਕੁਮਾਰਕਾਨਞ੍ਹਿ ਚਿਤ੍ਤਂ ਅਤੀਤਾਰਮ੍ਮਣਂ ਪਵਤ੍ਤਤਿ, ਨਿਰਯਤੋ ਆਗਤਾ ਨਿਰਯਦੁਕ੍ਖਂ ਸਰਿਤ੍ਵਾ ਰੋਦਨ੍ਤਿ, ਦੇਵਲੋਕਤੋ ਆਗਤਾ ਹਸਨ੍ਤਿ, ਤਮ੍ਪਿ ਕਿਲੇਸਸਹਗਤਚਿਤ੍ਤੇਨੇਵ ਹੋਤਿ. ਆਜੀਵੋਤਿ ਮਿਚ੍ਛਾਜੀਵੋ ਸਮ੍ਮਾਜੀਵੋਤਿਪਿ ਨਾਨਤ੍ਤਂ ਨ ਹੋਤਿ. ਅਞ੍ਞਤ੍ਰ ਮਾਤੁਥਞ੍ਞਾਤਿ ਥਞ੍ਞਚੋਰਦਾਰਕਾ ਨਾਮ ਹੋਨ੍ਤਿ, ਮਾਤਰਿ ਖੀਰਂ ਪਾਯਨ੍ਤਿਯਾ ਅਪਿਵਿਤ੍ਵਾ ਅਞ੍ਞਵਿਹਿਤਕਾਲੇ ਪਿਟ੍ਠਿਪਸ੍ਸੇਨ ਆਗਨ੍ਤ੍ਵਾ ਥਞ੍ਞਂ ਪਿਵਨ੍ਤਿ. ਏਤ੍ਤਕਂ ਮੁਞ੍ਚਿਤ੍ਵਾ ਅਞ੍ਞੋ ਮਿਚ੍ਛਾਜੀਵੋ ਨਤ੍ਥਿ. ਅਯਮ੍ਪਿ ਕਿਲੇਸਸਹਗਤਚਿਤ੍ਤੇਨੇਵ ਹੋਤੀਤਿ ਦਸ੍ਸੇਤਿ.

੨੬੩. ਏਵਂ ਪਰਿਬ੍ਬਾਜਕਵਾਦਂ ਪਟਿਕ੍ਖਿਪਿਤ੍ਵਾ ਇਦਾਨਿ ਸਯਂ ਸੇਕ੍ਖਭੂਮਿਯਂ ਮਾਤਿਕਂ ਠਪੇਨ੍ਤੋ ਚਤੂਹਿ ਖੋ ਅਹਨ੍ਤਿਆਦਿਮਾਹ. ਤਤ੍ਥ ਸਮਧਿਗਯ੍ਹ ਤਿਟ੍ਠਤੀਤਿ ਵਿਸੇਸੇਤ੍ਵਾ ਤਿਟ੍ਠਤਿ. ਨ ਕਾਯੇਨ ਪਾਪ ਕਮ੍ਮਨ੍ਤਿਆਦੀਸੁ ਨ ਕੇਵਲਂ ਅਕਰਣਮਤ੍ਤਮੇਵ, ਭਗਵਾ ਪਨ ਏਤ੍ਥ ਸਂਵਰਪ੍ਪਹਾਨਪਟਿਸਙ੍ਖਾ ਪਞ੍ਞਪੇਤਿ. ਤਂ ਸਨ੍ਧਾਯੇਵਮਾਹ. ਨ ਚੇਵ ਸਮ੍ਪਨ੍ਨਕੁਸਲਨ੍ਤਿਆਦਿ ਪਨ ਖੀਣਾਸਵਂ ਸਨ੍ਧਾਯ ਵੁਤ੍ਤਂ.

ਇਦਾਨਿ ਅਸੇਕ੍ਖਭੂਮਿਯਂ ਮਾਤਿਕਂ ਠਪੇਨ੍ਤੋ ਦਸਹਿ ਖੋ ਅਹਨ੍ਤਿਆਦਿਮਾਹ. ਤਤ੍ਥ ਤੀਣਿ ਪਦਾਨਿ ਨਿਸ੍ਸਾਯ ਦ੍ਵੇ ਪਠਮਚਤੁਕ੍ਕਾ ਠਪਿਤਾ, ਏਕਂ ਪਦਂ ਨਿਸ੍ਸਾਯ ਦ੍ਵੇ ਪਚ੍ਛਿਮਚਤੁਕ੍ਕਾ. ਅਯਂ ਸੇਕ੍ਖਭੂਮਿਯਂ ਮਾਤਿਕਾ.

੨੬੪. ਇਦਾਨਿ ਤਂ ਵਿਭਜਨ੍ਤੋ ਕਤਮੇ ਚ ਥਪਤਿ ਅਕੁਸਲਸੀਲਾਤਿਆਦਿਮਾਹ. ਤਤ੍ਥ ਸਰਾਗਨ੍ਤਿ ਅਟ੍ਠਵਿਧਂ ਲੋਭਸਹਗਤਚਿਤ੍ਤਂ. ਸਦੋਸਨ੍ਤਿ ਪਟਿਘਸਮ੍ਪਯੁਤ੍ਤਚਿਤ੍ਤਦ੍ਵਯਂ. ਸਮੋਹਨ੍ਤਿ ਵਿਚਿਕਿਚ੍ਛੁਦ੍ਧਚ੍ਚਸਹਗਤਚਿਤ੍ਤਦ੍ਵਯਮ੍ਪਿ ਵਟ੍ਟਤਿ, ਸਬ੍ਬਾਕੁਸਲਚਿਤ੍ਤਾਨਿਪਿ. ਮੋਹੋ ਸਬ੍ਬਾਕੁਸਲੇ ਉਪ੍ਪਜ੍ਜਤੀਤਿ ਹਿ ਵੁਤ੍ਤਂ. ਇਤੋਸਮੁਟ੍ਠਾਨਾਤਿ ਇਤੋ ਸਰਾਗਾਦਿਚਿਤ੍ਤਤੋ ਸਮੁਟ੍ਠਾਨਂ ਉਪ੍ਪਤ੍ਤਿ ਏਤੇਸਨ੍ਤਿ ਇਤੋਸਮੁਟ੍ਠਾਨਾ.

ਕੁਹਿਨ੍ਤਿ ਕਤਰਂ ਠਾਨਂ ਪਾਪੁਣਿਤ੍ਵਾ ਅਪਰਿਸੇਸਾ ਨਿਰੁਜ੍ਝਨ੍ਤਿ. ਏਤ੍ਥੇਤੇਤਿ ਸੋਤਾਪਤ੍ਤਿਫਲੇ ਭੁਮ੍ਮਂ. ਪਾਤਿਮੋਕ੍ਖਸਂਵਰਸੀਲਞ੍ਹਿ ਸੋਤਾਪਤ੍ਤਿਫਲੇ ਪਰਿਪੁਣ੍ਣਂ ਹੋਤਿ, ਤਂ ਠਾਨਂ ਪਤ੍ਵਾ ਅਕੁਸਲਸੀਲਂ ਅਸੇਸਂ ਨਿਰੁਜ੍ਝਤਿ. ਅਕੁਸਲਸੀਲਨ੍ਤਿ ਚ ਦੁਸ੍ਸੀਲਸ੍ਸੇਤਂ ਅਧਿਵਚਨਨ੍ਤਿ ਵੇਦਿਤਬ੍ਬਂ.

ਅਕੁਸਲਾਨਂ ਸੀਲਾਨਂ ਨਿਰੋਧਾਯ ਪਟਿਪਨ੍ਨੋਤਿ ਏਤ੍ਥ ਯਾਵ ਸੋਤਾਪਤ੍ਤਿਮਗ੍ਗਾ ਨਿਰੋਧਾਯ ਪਟਿਪਨ੍ਨੋ ਨਾਮ ਹੋਤਿ, ਫਲਪਤ੍ਤੇ ਪਨ ਤੇ ਨਿਰੋਧਿਤਾ ਨਾਮ ਹੋਨ੍ਤਿ.

੨੬੫. ਵੀਤਰਾਗਨ੍ਤਿਆਦੀਹਿ ਅਟ੍ਠਵਿਧਂ ਕਾਮਾਵਚਰਕੁਸਲਚਿਤ੍ਤਮੇਵ ਵੁਤ੍ਤਂ. ਏਤੇਨ ਹਿ ਕੁਸਲਸੀਲਂ ਸਮੁਟ੍ਠਾਤਿ.

ਸੀਲਵਾ ਹੋਤੀਤਿ ਸੀਲਸਮ੍ਪਨ੍ਨੋ ਹੋਤਿ ਗੁਣਸਮ੍ਪਨ੍ਨੋ ਚ. ਨੋ ਚ ਸੀਲਮਯੋਤਿ ਅਲਮੇਤ੍ਤਾਵਤਾ, ਨਤ੍ਥਿ ਇਤੋ ਕਿਞ੍ਚਿ ਉਤ੍ਤਰਿ ਕਰਣੀਯਨ੍ਤਿ ਏਵਂ ਸੀਲਮਯੋ ਨ ਹੋਤਿ. ਯਤ੍ਥਸ੍ਸ ਤੇਤਿ ਅਰਹਤ੍ਤਫਲੇ ਭੁਮ੍ਮਂ. ਅਰਹਤ੍ਤਫਲਞ੍ਹਿ ਪਤ੍ਵਾ ਅਕੁਸਲਸੀਲਂ ਅਸੇਸਂ ਨਿਰੁਜ੍ਝਤਿ.

ਨਿਰੋਧਾਯ ਪਟਿਪਨ੍ਨੋਤਿ ਏਤ੍ਥ ਯਾਵ ਅਰਹਤ੍ਤਮਗ੍ਗਾ ਨਿਰੋਧਾਯ ਪਟਿਪਨ੍ਨੋ ਨਾਮ ਹੋਤਿ, ਫਲਪਤ੍ਤੇ ਪਨ ਤੇ ਨਿਰੋਧਿਤਾ ਨਾਮ ਹੋਨ੍ਤਿ.

੨੬੬. ਕਾਮਸਞ੍ਞਾਦੀਸੁ ਕਾਮਸਞ੍ਞਾ ਅਟ੍ਠਲੋਭਸਹਗਤਚਿਤ੍ਤਸਹਜਾਤਾ, ਇਤਰਾ ਦ੍ਵੇ ਦੋਮਨਸ੍ਸਸਹਗਤਚਿਤ੍ਤਦ੍ਵਯੇਨ ਸਹਜਾਤਾ.

ਪਠਮਂ ਝਾਨਨ੍ਤਿ ਅਨਾਗਾਮਿਫਲਪਠਮਜ੍ਝਾਨਂ. ਏਤ੍ਥੇਤੇਤਿ ਅਨਾਗਾਮਿਫਲੇ ਭੁਮ੍ਮਂ. ਅਨਾਗਾਮਿਫਲਞ੍ਹਿ ਪਤ੍ਵਾ ਅਕੁਸਲਸਙ੍ਕਪ੍ਪਾ ਅਪਰਿਸੇਸਾ ਨਿਰੁਜ੍ਝਨ੍ਤਿ.

ਨਿਰੋਧਾਯ ਪਟਿਪਨ੍ਨੋਤਿ ਏਤ੍ਥ ਯਾਵ ਅਨਾਗਾਮਿਮਗ੍ਗਾ ਨਿਰੋਧਾਯ ਪਟਿਪਨ੍ਨੋ ਨਾਮ ਹੋਤਿ, ਫਲਪਤ੍ਤੇ ਪਨ ਤੇ ਨਿਰੋਧਿਤਾ ਨਾਮ ਹੋਨ੍ਤਿ. ਨੇਕ੍ਖਮ੍ਮਸਞ੍ਞਾਦਯੋ ਹਿ ਤਿਸ੍ਸੋਪਿ ਅਟ੍ਠਕਾਮਾਵਚਰਕੁਸਲਸਹਜਾਤਸਞ੍ਞਾਵ.

੨੬੭. ਏਤ੍ਥੇਤੇਤਿ ਅਰਹਤ੍ਤਫਲੇ ਭੁਮ੍ਮਂ. ਦੁਤਿਯਜ੍ਝਾਨਿਕਂ ਅਰਹਤ੍ਤਫਲਞ੍ਹਿ ਪਾਪੁਣਿਤ੍ਵਾ ਕੁਸਲਸਙ੍ਕਪ੍ਪਾ ਅਪਰਿਸੇਸਾ ਨਿਰੁਜ੍ਝਨ੍ਤਿ. ਨਿਰੋਧਾਯ ਪਟਿਪਨ੍ਨੋਤਿ ਏਤ੍ਥ ਯਾਵ ਅਰਹਤ੍ਤਮਗ੍ਗਾ ਨਿਰੋਧਾਯ ਪਟਿਪਨ੍ਨੋ ਨਾਮ ਹੋਤਿ, ਫਲਪਤ੍ਤੇ ਪਨ ਤੇ ਨਿਰੋਧਿਤਾ ਨਾਮ ਹੋਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਸਮਣਮੁਣ੍ਡਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.