੩. ਪਰਿਬ੍ਬਾਜਕਵਗ੍ਗੋ

੧. ਤੇਵਿਜ੍ਜਵਚ੍ਛਸੁਤ੍ਤਵਣ੍ਣਨਾ

੧੮੫. ਏਵਂ ਮੇ ਸੁਤਨ੍ਤਿ ਤੇਵਿਜ੍ਜਵਚ੍ਛਸੁਤ੍ਤਂ. ਤਤ੍ਥ ਏਕਪੁਣ੍ਡਰੀਕੇਤਿ ਪੁਣ੍ਡਰੀਕੋ ਵੁਚ੍ਚਤਿ ਸੇਤਮ੍ਬਰੁਕ੍ਖੋ, ਸੋ ਤਸ੍ਮਿਂ ਆਰਾਮੇ ਏਕੋ ਪੁਣ੍ਡਰੀਕੋ ਅਤ੍ਥੀਤਿ ਏਕਪੁਣ੍ਡਰੀਕੋ. ਏਤਦਹੋਸੀਤਿ ਤਤ੍ਥ ਪਵਿਸਿਤੁਕਾਮਤਾਯ ਅਹੋਸਿ. ਚਿਰਸ੍ਸਂ ਖੋ, ਭਨ੍ਤੇਤਿ ਪਕਤਿਯਾ ਆਗਤਪੁਬ੍ਬਤਂ ਉਪਾਦਾਯ. ਧਮ੍ਮਸ੍ਸ ਚਾਨੁਧਮ੍ਮਨ੍ਤਿ ਇਧ ਸਬ੍ਬਞ੍ਞੁਤਞ੍ਞਾਣਂ ਧਮ੍ਮੋ ਨਾਮ, ਮਹਾਜਨਸ੍ਸ ਬ੍ਯਾਕਰਣਂ ਅਨੁਧਮ੍ਮੋ ਨਾਮ. ਸੇਸਂ ਜੀਵਕਸੁਤ੍ਤੇ (ਮ. ਨਿ. ੨.੫੧ ਆਦਯੋ) ਵੁਤ੍ਤਨਯਮੇਵ. ਨ ਮੇ ਤੇਤਿ ਅਨਨੁਞ੍ਞਾਯ ਠਤ੍ਵਾ ਅਨੁਞ੍ਞਮ੍ਪਿ ਪਟਿਕ੍ਖਿਪਤਿ. ‘‘ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ ਅਪਰਿਸੇਸਂ ਞਾਣਦਸ੍ਸਨਂ ਪਟਿਜਾਨਾਤੀ’’ਤਿ ਹਿ ਇਦਂ ਅਨੁਜਾਨਿਤਬ੍ਬਂ ਸਿਯਾ, – ‘‘ਚਰਤੋ ਚ ਮੇ…ਪੇ… ਪਚ੍ਚੁਪਟ੍ਠਿਤ’’ਨ੍ਤਿ ਇਦਂ ਪਨ ਨਾਨੁਜਾਨਿਤਬ੍ਬਂ. ਸਬ੍ਬਞ੍ਞੁਤਞ੍ਞਾਣੇਨ ਹਿ ਆਵਜ੍ਜਿਤ੍ਵਾ ਪਜਾਨਾਤਿ. ਤਸ੍ਮਾ ਅਨਨੁਞ੍ਞਾਯ ਠਤ੍ਵਾ ਅਨੁਞ੍ਞਮ੍ਪਿ ਪਟਿਕ੍ਖਿਪਨ੍ਤੋ ਏਵਮਾਹ.

੧੮੬. ਆਸਵਾਨਂ ਖਯਾਤਿ ਏਤ੍ਥ ਸਕਿਂ ਖੀਣਾਨਂ ਆਸਵਾਨਂ ਪੁਨ ਖੇਪੇਤਬ੍ਬਾਭਾਵਾ ਯਾਵਦੇਵਾਤਿ ਨ ਵੁਤ੍ਤਂ. ਪੁਬ੍ਬੇਨਿਵਾਸਞਾਣੇਨ ਚੇਤ੍ਥ ਭਗਵਾ ਅਤੀਤਜਾਨਨਗੁਣਂ ਦਸ੍ਸੇਤਿ, ਦਿਬ੍ਬਚਕ੍ਖੁਞਾਣੇਨ ਪਚ੍ਚੁਪ੍ਪਨ੍ਨਜਾਨਨਗੁਣਂ, ਆਸਵਕ੍ਖਯਞਾਣੇਨ ਲੋਕੁਤ੍ਤਰਗੁਣਨ੍ਤਿ. ਇਤਿ ਇਮਾਹਿ ਤੀਹਿ ਵਿਜ੍ਜਾਹਿ ਸਕਲਬੁਦ੍ਧਗੁਣੇ ਸਂਖਿਪਿਤ੍ਵਾ ਕਥੇਸਿ.

ਗਿਹਿਸਂਯੋਜਨਨ੍ਤਿ ਗਿਹਿਬਨ੍ਧਨਂ ਗਿਹਿਪਰਿਕ੍ਖਾਰੇਸੁ ਨਿਕਨ੍ਤਿਂ. ਨਤ੍ਥਿ ਖੋ ਵਚ੍ਛਾਤਿ ਗਿਹਿਸਂਯੋਜਨਂ ਅਪ੍ਪਹਾਯ ਦੁਕ੍ਖਸ੍ਸਨ੍ਤਕਰੋ ਨਾਮ ਨਤ੍ਥਿ. ਯੇਪਿ ਹਿ ਸਨ੍ਤਤਿਮਹਾਮਤ੍ਤੋ ਉਗ੍ਗਸੇਨੋ ਸੇਟ੍ਠਿਪੁਤ੍ਤੋ ਵੀਤਸੋਕਦਾਰਕੋਤਿ ਗਿਹਿਲਿਙ੍ਗੇ ਠਿਤਾਵ ਅਰਹਤ੍ਤਂ ਪਤ੍ਤਾ, ਤੇਪਿ ਮਗ੍ਗੇਨ ਸਬ੍ਬਸਙ੍ਖਾਰੇਸੁ ਨਿਕਨ੍ਤਿਂ ਸੁਕ੍ਖਾਪੇਤ੍ਵਾ ਪਤ੍ਤਾ. ਤਂ ਪਤ੍ਵਾ ਪਨ ਨ ਤੇਨ ਲਿਙ੍ਗੇਨ ਅਟ੍ਠਂਸੁ, ਗਿਹਿਲਿਙ੍ਗਂ ਨਾਮੇਤਂ ਹੀਨਂ, ਉਤ੍ਤਮਗੁਣਂ ਧਾਰੇਤੁਂ ਨ ਸਕ੍ਕੋਤਿ. ਤਸ੍ਮਾ ਤਤ੍ਥ ਠਿਤੋ ਅਰਹਤ੍ਤਂ ਪਤ੍ਵਾ ਤਂਦਿਵਸਮੇਵ ਪਬ੍ਬਜਤਿ ਵਾ ਪਰਿਨਿਬ੍ਬਾਤਿ ਵਾ. ਭੂਮਦੇਵਤਾ ਪਨ ਤਿਟ੍ਠਨ੍ਤਿ. ਕਸ੍ਮਾ? ਨਿਲੀਯਨੋਕਾਸਸ੍ਸ ਅਤ੍ਥਿਤਾਯ. ਸੇਸਕਾਮਭਵੇ ਮਨੁਸ੍ਸੇਸੁ ਸੋਤਾਪਨ੍ਨਾਦਯੋ ਤਯੋ ਤਿਟ੍ਠਨ੍ਤਿ, ਕਾਮਾਵਚਰਦੇਵੇਸੁ ਸੋਤਾਪਨ੍ਨਾ ਸਕਦਾਗਾਮਿਨੋ ਚ, ਅਨਾਗਾਮਿਖੀਣਾਸਵਾ ਪਨੇਤ੍ਥ ਨ ਤਿਟ੍ਠਨ੍ਤਿ. ਕਸ੍ਮਾ? ਤਞ੍ਹਿ ਠਾਨਂ ਲਲ਼ਿਤਜਨਸ੍ਸ ਆਵਾਸੋ, ਨਤ੍ਥਿ ਤਤ੍ਥ ਤੇਸਂ ਪਵਿਵੇਕਾਰਹਂ ਪਟਿਚ੍ਛਨ੍ਨਟ੍ਠਾਨਞ੍ਚ. ਇਤਿ ਤਤ੍ਥ ਖੀਣਾਸਵੋ ਪਰਿਨਿਬ੍ਬਾਤਿ, ਅਨਾਗਾਮੀ ਚਵਿਤ੍ਵਾ ਸੁਦ੍ਧਾਵਾਸੇ ਨਿਬ੍ਬਤ੍ਤਤਿ. ਕਾਮਾਵਚਰਦੇਵਤੋ ਉਪਰਿ ਪਨ ਚਤ੍ਤਾਰੋਪਿ ਅਰਿਯਾ ਤਿਟ੍ਠਨ੍ਤਿ.

ਸੋਪਾਸਿ ਕਮ੍ਮਵਾਦੀਤਿ ਸੋਪਿ ਕਮ੍ਮਵਾਦੀ ਅਹੋਸਿ, ਕਿਰਿਯਮ੍ਪਿ ਨ ਪਟਿਬਾਹਿਤ੍ਥ. ਤਞ੍ਹਿ ਏਕਨਵੁਤਿਕਪ੍ਪਮਤ੍ਥਕੇ ਅਤ੍ਤਾਨਂਯੇਵ ਗਹੇਤ੍ਵਾ ਕਥੇਤਿ. ਤਦਾ ਕਿਰ ਮਹਾਸਤ੍ਤੋ ਪਾਸਣ੍ਡਪਰਿਗ੍ਗਣ੍ਹਨਤ੍ਥਂ ਪਬ੍ਬਜਿਤੋ ਤਸ੍ਸਪਿ ਪਾਸਣ੍ਡਸ੍ਸ ਨਿਪ੍ਫਲਭਾਵਂ ਜਾਨਿਤ੍ਵਾ ਵੀਰਿਯਂ ਨ ਹਾਪੇਸਿ, ਕਿਰਿਯਵਾਦੀ ਹੁਤ੍ਵਾ ਸਗ੍ਗੇ ਨਿਬ੍ਬਤ੍ਤਤਿ. ਤਸ੍ਮਾ ਏਵਮਾਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਤੇਵਿਜ੍ਜਵਚ੍ਛਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਅਗ੍ਗਿਵਚ੍ਛਸੁਤ੍ਤਵਣ੍ਣਨਾ

੧੮੭. ਏਵਂ ਮੇ ਸੁਤਨ੍ਤਿ ਅਗ੍ਗਿਵਚ੍ਛਸੁਤ੍ਤਂ. ਤਤ੍ਥ ਨ ਖੋ ਅਹਨ੍ਤਿ ਪਠਮਵਾਰੇ ਨਾਹਂ ਸਸ੍ਸਤਦਿਟ੍ਠਿਕੋਤਿ ਵਦਤਿ, ਦੁਤਿਯੇ ਨਾਹਂ ਉਚ੍ਛੇਦਦਿਟ੍ਠਿਕੋਤਿ. ਏਵਂ ਅਨ੍ਤਾਨਨ੍ਤਿਕਾਦਿਵਸੇਨ ਸਬ੍ਬਵਾਰੇਸੁ ਪਟਿਕ੍ਖੇਪੋ ਵੇਦਿਤਬ੍ਬੋ. ਹੋਤਿ ਚ ਨ ਚ ਹੋਤੀਤਿ ਅਯਂ ਪਨੇਤ੍ਥ ਏਕਚ੍ਚਸਸ੍ਸਤਵਾਦੋ. ਨੇਵ ਹੋਤਿ ਨ ਨ ਹੋਤੀਤਿ ਅਯਂ ਅਮਰਾਵਿਕ੍ਖੇਪੋਤਿ ਵੇਦਿਤਬ੍ਬੋ.

੧੮੯. ਸਦੁਕ੍ਖਨ੍ਤਿ ਕਿਲੇਸਦੁਕ੍ਖੇਨ ਚੇਵ ਵਿਪਾਕਦੁਕ੍ਖੇਨ ਚ ਸਦੁਕ੍ਖਂ. ਸਵਿਘਾਤਨ੍ਤਿ ਤੇਸਂਯੇਵ ਦ੍ਵਿਨ੍ਨਂ ਵਸੇਨ ਸਉਪਘਾਤਕਂ. ਸਉਪਾਯਾਸਨ੍ਤਿ ਤੇਸਂਯੇਵ ਵਸੇਨ ਸਉਪਾਯਾਸਂ. ਸਪਰਿਲ਼ਾਹਨ੍ਤਿ ਤੇਸਂਯੇਵ ਵਸੇਨ ਸਪਰਿਲ਼ਾਹਂ.

ਕਿਞ੍ਚਿ ਦਿਟ੍ਠਿਗਤਨ੍ਤਿ ਕਾਚਿ ਏਕਾ ਦਿਟ੍ਠਿਪਿ ਰੁਚ੍ਚਿਤ੍ਵਾ ਖਮਾਪੇਤ੍ਵਾ ਗਹਿਤਾ ਅਤ੍ਥੀਤਿ ਪੁਚ੍ਛਤਿ. ਅਪਨੀਤਨ੍ਤਿ ਨੀਹਟਂ ਅਪਵਿਦ੍ਧਂ. ਦਿਟ੍ਠਨ੍ਤਿ ਪਞ੍ਞਾਯ ਦਿਟ੍ਠਂ. ਤਸ੍ਮਾਤਿ ਯਸ੍ਮਾ ਪਞ੍ਚਨ੍ਨਂ ਖਨ੍ਧਾਨਂ ਉਦਯਵਯਂ ਅਦ੍ਦਸ, ਤਸ੍ਮਾ. ਸਬ੍ਬਮਞ੍ਞਿਤਾਨਨ੍ਤਿ ਸਬ੍ਬੇਸਂ ਤਿਣ੍ਣਮ੍ਪਿ ਤਣ੍ਹਾਦਿਟ੍ਠਿਮਾਨਮਞ੍ਞਿਤਾਨਂ. ਮਥਿਤਾਨਨ੍ਤਿ ਤੇਸਂਯੇਵ ਵੇਵਚਨਂ. ਇਦਾਨਿ ਤਾਨਿ ਵਿਭਜਿਤ੍ਵਾ ਦਸ੍ਸੇਨ੍ਤੋ ਸਬ੍ਬਅਹਂਕਾਰ-ਮਮਂਕਾਰ-ਮਾਨਾਨੁਸਯਾਨਨ੍ਤਿ ਆਹ. ਏਤ੍ਥ ਹਿ ਅਹਂਕਾਰੋ ਦਿਟ੍ਠਿ, ਮਮਂਕਾਰੋ ਤਣ੍ਹਾ, ਮਾਨਾਨੁਸਯੋ ਮਾਨੋ. ਅਨੁਪਾਦਾ ਵਿਮੁਤ੍ਤੋਤਿ ਚਤੂਹਿ ਉਪਾਦਾਨੇਹਿ ਕਞ੍ਚਿ ਧਮ੍ਮਂ ਅਨੁਪਾਦਿਯਿਤ੍ਵਾ ਵਿਮੁਤ੍ਤੋ.

੧੯੦. ਨ ਉਪੇਤੀਤਿ ਨ ਯੁਜ੍ਜਤਿ. ਏਤ੍ਥ ਚ ‘‘ਨ ਉਪਪਜ੍ਜਤੀ’’ਤਿ ਇਦਂ ਅਨੁਜਾਨਿਤਬ੍ਬਂ ਸਿਯਾ. ਯਸ੍ਮਾ ਪਨ ਏਵਂ ਵੁਤ੍ਤੇ ਸੋ ਪਰਿਬ੍ਬਾਜਕੋ ਉਚ੍ਛੇਦਂ ਗਣ੍ਹੇਯ੍ਯ, ਉਪਪਜ੍ਜਤੀਤਿ ਪਨ ਸਸ੍ਸਤਮੇਵ, ਉਪਪਜ੍ਜਤਿ ਚ ਨ ਚ ਉਪਪਜ੍ਜਤੀਤਿ ਏਕਚ੍ਚਸਸ੍ਸਤਂ, ਨੇਵ ਉਪਪਜ੍ਜਤਿ ਨ ਨ ਉਪਪਜ੍ਜਤੀਤਿ ਅਮਰਾਵਿਕ੍ਖੇਪਂ, ਤਸ੍ਮਾ ਭਗਵਾ – ‘‘ਅਯਂ ਅਪ੍ਪਤਿਟ੍ਠੋ ਅਨਾਲਮ੍ਬੋ ਹੋਤੁ, ਸੁਖਪਵੇਸਨਟ੍ਠਾਨਂ ਮਾ ਲਭਤੂ’’ਤਿ ਅਨਨੁਞ੍ਞਾਯ ਠਤ੍ਵਾ ਅਨੁਞ੍ਞਮ੍ਪਿ ਪਟਿਕ੍ਖਿਪਿ. ਅਲਨ੍ਤਿ ਸਮਤ੍ਥਂ ਪਰਿਯਤ੍ਤਂ. ਧਮ੍ਮੋਤਿ ਪਚ੍ਚਯਾਕਾਰਧਮ੍ਮੋ. ਅਞ੍ਞਤ੍ਰਯੋਗੇਨਾਤਿ ਅਞ੍ਞਤ੍ਥ ਪਯੋਗੇਨ. ਅਞ੍ਞਤ੍ਰਾਚਰਿਯਕੇਨਾਤਿ ਪਚ੍ਚਯਾਕਾਰਂ ਅਜਾਨਨ੍ਤਾਨਂ ਅਞ੍ਞੇਸਂ ਆਚਰਿਯਾਨਂ ਸਨ੍ਤਿਕੇ ਵਸਨ੍ਤੇਨ.

੧੯੧. ਤੇਨ ਹਿ ਵਚ੍ਛਾਤਿ ਯਸ੍ਮਾ ਤ੍ਵਂ ਸਮ੍ਮੋਹਮਾਪਾਦਿਨ੍ਤਿ ਵਦਸਿ, ਤਸ੍ਮਾ ਤਂਯੇਵੇਤ੍ਥ ਪਟਿਪੁਚ੍ਛਿਸ੍ਸਾਮਿ. ਅਨਾਹਾਰੋ ਨਿਬ੍ਬੁਤੋਤਿ ਅਪ੍ਪਚ੍ਚਯੋ ਨਿਬ੍ਬੁਤੋ.

੧੯੨. ਯੇਨ ਰੂਪੇਨਾਤਿ ਯੇਨ ਰੂਪੇਨ ਸਤ੍ਤਸਙ੍ਖਾਤਂ ਤਥਾਗਤਂ ਰੂਪੀਤਿ ਪਞ੍ਞਾਪੇਯ੍ਯ. ਗਮ੍ਭੀਰੋਤਿ ਗੁਣਗਮ੍ਭੀਰੋ. ਅਪ੍ਪਮੇਯ੍ਯੋਤਿ ਪਮਾਣਂ ਗਣ੍ਹਿਤੁਂ ਨ ਸਕ੍ਕੁਣੇਯ੍ਯੋ. ਦੁਪ੍ਪਰਿਯੋਗਾਲ਼੍ਹੋਤਿ ਦੁਓਗਾਹੋ ਦੁਜ੍ਜਾਨੋ. ਸੇਯ੍ਯਥਾਪਿ ਮਹਾਸਮੁਦ੍ਦੋਤਿ ਯਥਾ ਮਹਾਸਮੁਦ੍ਦੋ ਗਮ੍ਭੀਰੋ ਅਪ੍ਪਮੇਯ੍ਯੋ ਦੁਜ੍ਜਾਨੋ, ਏਵਮੇਵ ਖੀਣਾਸਵੋਪਿ. ਤਂ ਆਰਬ੍ਭ ਉਪਪਜ੍ਜਤੀਤਿਆਦਿ ਸਬ੍ਬਂ ਨ ਯੁਜ੍ਜਤਿ. ਕਥਂ? ਯਥਾ ਪਰਿਨਿਬ੍ਬੁਤਂ ਅਗ੍ਗਿਂ ਆਰਬ੍ਭ ਪੁਰਤ੍ਥਿਮਂ ਦਿਸਂ ਗਤੋਤਿਆਦਿ ਸਬ੍ਬਂ ਨ ਯੁਜ੍ਜਤਿ, ਏਵਂ.

ਅਨਿਚ੍ਚਤਾਤਿ ਅਨਿਚ੍ਚਤਾਯ. ਸਾਰੇ ਪਤਿਟ੍ਠਿਤਨ੍ਤਿ ਲੋਕੁਤ੍ਤਰਧਮ੍ਮਸਾਰੇ ਪਤਿਟ੍ਠਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਗ੍ਗਿਵਚ੍ਛਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਮਹਾਵਚ੍ਛਸੁਤ੍ਤਵਣ੍ਣਨਾ

੧੯੩. ਏਵਂ ਮੇ ਸੁਤਨ੍ਤਿ ਮਹਾਵਚ੍ਛਸੁਤ੍ਤਂ. ਤਤ੍ਥ ਸਹਕਥੀਤਿ ਸਦ੍ਧਿਂਵਾਦੋ, ਬਹੁਂ ਮਯਾ ਤੁਮ੍ਹੇਹਿ ਸਦ੍ਧਿਂ ਕਥਿਤਪੁਬ੍ਬਨ੍ਤਿ ਕਥਂ ਸਾਰੇਤਿ ਮੇਤ੍ਤਿਂ ਘਟੇਤਿ. ਪੁਰਿਮਾਨਿ ਹਿ ਦ੍ਵੇ ਸੁਤ੍ਤਾਨਿ ਏਤਸ੍ਸੇਵ ਕਥਿਤਾਨਿ, ਸਂਯੁਤ੍ਤਕੇ ਅਬ੍ਯਾਕਤਸਂਯੁਤ੍ਤਂ (ਸਂ. ਨਿ. ੪.੪੧੬ ਆਦਯੋ) ਨਾਮ ਏਤਸ੍ਸੇਵ ਕਥਿਤਂ – ‘‘ਕਿਂ ਨੁ ਖੋ, ਭੋ ਗੋਤਮ, ਸਸ੍ਸਤੋ ਲੋਕੋ ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ ਅਬ੍ਯਾਕਤਮੇਤ’’ਨ੍ਤਿ ਏਵਂ ਏਕੁਤ੍ਤਰਨਿਕਾਯੇਪਿ ਇਮਿਨਾ ਸਦ੍ਧਿਂ ਕਥਿਤਂ ਅਤ੍ਥਿਯੇਵ. ਤਸ੍ਮਾ ਏਵਮਾਹ. ਸਮ੍ਮਾਸਮ੍ਬੁਦ੍ਧੋਪਿ ਤਸ੍ਸ ਆਗਤਾਗਤਸ੍ਸ ਸਙ੍ਗਹਂ ਕਤ੍ਵਾ ਓਕਾਸਮਕਾਸਿਯੇਵ. ਕਸ੍ਮਾ? ਅਯਞ੍ਹਿ ਸਸ੍ਸਤਦਿਟ੍ਠਿਕੋ, ਸਸ੍ਸਤਦਿਟ੍ਠਿਕਾ ਚ ਸੀਘਂ ਲਦ੍ਧਿਂ ਨ ਵਿਸ੍ਸਜ੍ਜੇਨ੍ਤਿ, ਵਸਾਤੇਲਮਕ੍ਖਿਤਪਿਲੋਤਿਕਾ ਵਿਯ ਚਿਰੇਨ ਸੁਜ੍ਝਨ੍ਤਿ. ਪਸ੍ਸਤਿ ਚ ਭਗਵਾ – ‘‘ਅਯਂ ਪਰਿਬ੍ਬਾਜਕੋ ਕਾਲੇ ਗਚ੍ਛਨ੍ਤੇ ਗਚ੍ਛਨ੍ਤੇ ਲਦ੍ਧਿਂ ਵਿਸ੍ਸਜ੍ਜੇਤ੍ਵਾ ਮਮ ਸਨ੍ਤਿਕੇ ਪਬ੍ਬਜਿਤ੍ਵਾ ਛ ਅਭਿਞ੍ਞਾਯੋ ਸਚ੍ਛਿਕਤ੍ਵਾ ਅਭਿਞ੍ਞਾਤਸਾਵਕੋ ਭਵਿਸ੍ਸਤੀ’’ਤਿ. ਤਸ੍ਮਾ ਤਸ੍ਸ ਆਗਤਾਗਤਸ੍ਸ ਸਙ੍ਗਹਂ ਕਤ੍ਵਾ ਓਕਾਸਮਕਾਸਿਯੇਵ. ਇਦਂ ਪਨਸ੍ਸ ਪਚ੍ਛਿਮਗਮਨਂ. ਸੋ ਹਿ ਇਮਸ੍ਮਿਂ ਸੁਤ੍ਤੇ ਤਰਣਂ ਵਾ ਹੋਤੁ ਅਤਰਣਂ ਵਾ, ਯਟ੍ਠਿਂ ਓਤਰਿਤ੍ਵਾ ਉਦਕੇ ਪਤਮਾਨੋ ਵਿਯ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜਿਸ੍ਸਾਮੀਤਿ ਸਨ੍ਨਿਟ੍ਠਾਨਂ ਕਤ੍ਵਾ ਆਗਤੋ. ਤਸ੍ਮਾ ਧਮ੍ਮਦੇਸਨਂ ਯਾਚਨ੍ਤੋ ਸਾਧੁ ਮੇ ਭਵਂ ਗੋਤਮੋਤਿਆਦਿਮਾਹ. ਤਸ੍ਸ ਭਗਵਾ ਮੂਲਵਸੇਨ ਸਂਖਿਤ੍ਤਦੇਸਨਂ, ਕਮ੍ਮਪਥਵਸੇਨ ਵਿਤ੍ਥਾਰਦੇਸਨਂ ਦੇਸੇਸਿ. ਮੂਲਵਸੇਨ ਚੇਤ੍ਥ ਅਤਿਸਂਖਿਤ੍ਤਾ ਦੇਸਨਾ, ਕਮ੍ਮਪਥਵਸੇਨ ਸਂਖਿਤ੍ਤਾ ਵਿਤ੍ਥਾਰਸਦਿਸਾ. ਬੁਦ੍ਧਾਨਂ ਪਨ ਨਿਪ੍ਪਰਿਯਾਯੇਨ ਵਿਤ੍ਥਾਰਦੇਸਨਾ ਨਾਮ ਨਤ੍ਥਿ. ਚਤੁਵੀਸਤਿਸਮਨ੍ਤਪਟ੍ਠਾਨਮ੍ਪਿ ਹਿ ਸਤ੍ਤਪਕਰਣੇ ਅਭਿਧਮ੍ਮਪਿਟਕੇ ਚ ਸਬ੍ਬਂ ਸਂਖਿਤ੍ਤਮੇਵ. ਤਸ੍ਮਾ ਮੂਲਵਸੇਨਾਪਿ ਕਮ੍ਮਪਥਵਸੇਨਾਪਿ ਸਂਖਿਤ੍ਤਮੇਵ ਦੇਸੇਸੀਤਿ ਵੇਦਿਤਬ੍ਬੋ.

੧੯੪. ਤਤ੍ਥ ਪਾਣਾਤਿਪਾਤਾ ਵੇਰਮਣੀ ਕੁਸਲਨ੍ਤਿਆਦੀਸੁ ਪਟਿਪਾਟਿਯਾ ਸਤ੍ਤਧਮ੍ਮਾ ਕਾਮਾਵਚਰਾ, ਅਨਭਿਜ੍ਝਾਦਯੋ ਤਯੋ ਚਤੁਭੂਮਿਕਾਪਿ ਵਟ੍ਟਨ੍ਤਿ.

ਯਤੋ ਖੋ, ਵਚ੍ਛ, ਭਿਕ੍ਖੁਨੋਤਿ ਕਿਞ੍ਚਾਪਿ ਅਨਿਯਮੇਤ੍ਵਾ ਵੁਤ੍ਤਂ, ਯਥਾ ਪਨ ਜੀਵਕਸੁਤ੍ਤੇ ਚ ਚਙ੍ਕੀਸੁਤ੍ਤੇ ਚ, ਏਵਂ ਇਮਸ੍ਮਿਂ ਸੁਤ੍ਤੇ ਚ ਅਤ੍ਤਾਨਮੇਵ ਸਨ੍ਧਾਯੇਤਂ ਭਗਵਤਾ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੧੯੫. ਅਤ੍ਥਿ ਪਨਾਤਿ ਕਿਂ ਪੁਚ੍ਛਾਮੀਤਿ ਪੁਚ੍ਛਤਿ? ਅਯਂ ਕਿਰਸ੍ਸ ਲਦ੍ਧਿ – ‘‘ਤਸ੍ਮਿਂ ਤਸ੍ਮਿਂ ਸਾਸਨੇ ਸਤ੍ਥਾਵ ਅਰਹਾ ਹੋਤਿ, ਸਾਵਕੋ ਪਨ ਅਰਹਤ੍ਤਂ ਪਤ੍ਤੁਂ ਸਮਤ੍ਥੋ ਨਤ੍ਥਿ. ਸਮਣੋ ਚ ਗੋਤਮੋ ‘ਯਤੋ ਖੋ, ਵਚ੍ਛ, ਭਿਕ੍ਖੁਨੋ’ਤਿ ਏਕਂ ਭਿਕ੍ਖੁਂ ਕਥੇਨ੍ਤੋ ਵਿਯ ਕਥੇਤਿ, ਅਤ੍ਥਿ ਨੁ ਖੋ ਸਮਣਸ੍ਸ ਗੋਤਮਸ੍ਸ ਸਾਵਕੋ ਅਰਹਤ੍ਤਪ੍ਪਤ੍ਤੋ’’ਤਿ. ਏਤਮਤ੍ਥਂ ਪੁਚ੍ਛਿਸ੍ਸਾਮੀਤਿ ਪੁਚ੍ਛਤਿ. ਤਤ੍ਥ ਤਿਟ੍ਠਤੂਤਿ ਭਵਂ ਤਾਵ ਗੋਤਮੋ ਤਿਟ੍ਠਤੁ, ਭਵਞ੍ਹਿ ਲੋਕੇ ਪਾਕਟੋ ਅਰਹਾਤਿ ਅਤ੍ਥੋ. ਤਸ੍ਮਿਂ ਬ੍ਯਾਕਤੇ ਉਤ੍ਤਰਿ ਭਿਕ੍ਖੁਨੀਆਦੀਨਂ ਵਸੇਨ ਪਞ੍ਹਂ ਪੁਚ੍ਛਿ, ਭਗਵਾਪਿਸ੍ਸ ਬ੍ਯਾਕਾਸਿ.

੧੯੬. ਆਰਾਧਕੋਤਿ ਸਮ੍ਪਾਦਕੋ ਪਰਿਪੂਰਕੋ.

੧੯੭. ਸੇਖਾਯ ਵਿਜ੍ਜਾਯ ਪਤ੍ਤਬ੍ਬਨ੍ਤਿ ਹੇਟ੍ਠਿਮਫਲਤ੍ਤਯਂ ਪਤ੍ਤਬ੍ਬਂ. ਤਂ ਸਬ੍ਬਂ ਮਯਾ ਅਨੁਪ੍ਪਤ੍ਤਨ੍ਤਿ ਵਦਤਿ. ਵਿਤਣ੍ਡਵਾਦੀ ਪਨਾਹ – ‘‘ਕਤਮੇ ਧਮ੍ਮਾ ਸੇਕ੍ਖਾ? ਚਤ੍ਤਾਰੋ ਮਗ੍ਗਾ ਅਪਰਿਯਾਪਨ੍ਨਾ ਹੇਟ੍ਠਿਮਾਨਿ ਚ ਤੀਣਿ ਸਾਮਞ੍ਞਫਲਾਨੀ’’ਤਿ (ਧ. ਸ. ੧੦੨੩) ਵਚਨਤੋ ਅਰਹਤ੍ਤਮਗ੍ਗੋਪਿ ਅਨੇਨ ਪਤ੍ਤੋਯੇਵ. ਫਲਂ ਪਨ ਅਪਤ੍ਤਂ, ਤਸ੍ਸ ਪਤ੍ਤਿਯਾ ਉਤ੍ਤਰਿ ਯੋਗਂ ਕਥਾਪੇਤੀਤਿ. ਸੋ ਏਵਂ ਸਞ੍ਞਾਪੇਤਬ੍ਬੋ –

‘‘ਯੋ ਵੇ ਕਿਲੇਸਾਨਿ ਪਹਾਯ ਪਞ੍ਚ,

ਪਰਿਪੁਣ੍ਣਸੇਖੋ ਅਪਰਿਹਾਨਧਮ੍ਮੋ;

ਚੇਤੋਵਸਿਪ੍ਪਤ੍ਤੋ ਸਮਾਹਿਤਿਨ੍ਦ੍ਰਿਯੋ,

ਸ ਵੇ ਠਿਤਤ੍ਤੋਤਿ ਨਰੋ ਪਵੁਚ੍ਚਤੀ’’ਤਿ. (ਅ. ਨਿ. ੪.੫);

ਅਨਾਗਾਮਿਪੁਗ੍ਗਲੋ ਹਿ ਏਕਨ੍ਤਪਰਿਪੁਣ੍ਣਸੇਖੋ. ਤਂ ਸਨ੍ਧਾਯ ‘‘ਸੇਖਾਯ ਵਿਜ੍ਜਾਯ ਪਤ੍ਤਬ੍ਬ’’ਨ੍ਤਿ ਆਹ. ਮਗ੍ਗਸ੍ਸ ਪਨ ਏਕਚਿਤ੍ਤਕ੍ਖਣਿਕਤ੍ਤਾ ਤਤ੍ਥ ਠਿਤਸ੍ਸ ਪੁਚ੍ਛਾ ਨਾਮ ਨਤ੍ਥਿ. ਇਮਿਨਾ ਸੁਤ੍ਤੇਨ ਮਗ੍ਗੋਪਿ ਬਹੁਚਿਤ੍ਤਕ੍ਖਣਿਕੋ ਹੋਤੂਤਿ ਚੇ. ਏਤਂ ਨ ਬੁਦ੍ਧਵਚਨਂ, ਵੁਤ੍ਤਗਾਥਾਯ ਚ ਅਤ੍ਥੋ ਵਿਰੁਜ੍ਝਤਿ. ਤਸ੍ਮਾ ਅਨਾਗਾਮਿਫਲੇ ਠਤ੍ਵਾ ਅਰਹਤ੍ਤਮਗ੍ਗਸ੍ਸ ਵਿਪਸ੍ਸਨਂ ਕਥਾਪੇਤੀਤਿ ਵੇਦਿਤਬ੍ਬੋ. ਯਸ੍ਮਾ ਪਨਸ੍ਸ ਨ ਕੇਵਲਂ ਸੁਦ੍ਧਅਰਹਤ੍ਤਸ੍ਸੇਵ ਉਪਨਿਸ੍ਸਯੋ, ਛਨ੍ਨਮ੍ਪਿ ਅਭਿਞ੍ਞਾਨਂ ਉਪਨਿਸ੍ਸਯੋ ਅਤ੍ਥਿ, ਤਸ੍ਮਾ ਭਗਵਾ – ‘‘ਏਵਮਯਂ ਸਮਥੇ ਕਮ੍ਮਂ ਕਤ੍ਵਾ ਪਞ੍ਚ ਅਭਿਞ੍ਞਾ ਨਿਬ੍ਬਤ੍ਤੇਸ੍ਸਤਿ, ਵਿਪਸ੍ਸਨਾਯ ਕਮ੍ਮਂ ਕਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਤਿ. ਏਵਂ ਛਲ਼ਭਿਞ੍ਞੋ ਮਹਾਸਾਵਕੋ ਭਵਿਸ੍ਸਤੀ’’ਤਿ ਵਿਪਸ੍ਸਨਾਮਤ੍ਤਂ ਅਕਥੇਤ੍ਵਾ ਸਮਥਵਿਪਸ੍ਸਨਾ ਆਚਿਕ੍ਖਿ.

੧੯੮. ਸਤਿ ਸਤਿਆਯਤਨੇਤਿ ਸਤਿ ਸਤਿਕਾਰਣੇ. ਕਿਞ੍ਚੇਤ੍ਥ ਕਾਰਣਂ? ਅਭਿਞ੍ਞਾ ਵਾ ਅਭਿਞ੍ਞਾਪਾਦਕਜ੍ਝਾਨਂ ਵਾ ਅਵਸਾਨੇ ਪਨ ਅਰਹਤ੍ਤਂ ਵਾ ਕਾਰਣਂ ਅਰਹਤ੍ਤਸ੍ਸ ਵਿਪਸ੍ਸਨਾ ਵਾਤਿ ਵੇਦਿਤਬ੍ਬਂ.

੨੦੦. ਪਰਿਚਿਣ੍ਣੋ ਮੇ ਭਗਵਾਤਿ ਸਤ੍ਤ ਹਿ ਸੇਖਾ ਭਗਵਨ੍ਤਂ ਪਰਿਚਰਨ੍ਤਿ ਨਾਮ, ਖੀਣਾਸਵੇਨ ਭਗਵਾ ਪਰਿਚਿਣ੍ਣੋ ਹੋਤਿ. ਇਤਿ ਸਙ੍ਖੇਪੇਨ ਅਰਹਤ੍ਤਂ ਬ੍ਯਾਕਰੋਨ੍ਤੋ ਥੇਰੋ ਏਵਮਾਹ. ਤੇ ਪਨ ਭਿਕ੍ਖੂ ਤਮਤ੍ਥਂ ਨ ਜਾਨਿਂਸੁ, ਅਜਾਨਨ੍ਤਾਵ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ. ਭਗਵਤੋ ਆਰੋਚੇਸੁਂ. ਦੇਵਤਾਤਿ ਤੇਸਂ ਗੁਣਾਨਂ ਲਾਭੀ ਦੇਵਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਵਚ੍ਛਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਦੀਘਨਖਸੁਤ੍ਤਵਣ੍ਣਨਾ

੨੦੧. ਏਵਂ ਮੇ ਸੁਤਨ੍ਤਿ ਦੀਘਨਖਸੁਤ੍ਤਂ. ਤਤ੍ਥ ਸੂਕਰਖਤਾਯਨ੍ਤਿ ਸੂਕਰਖਤਾਤਿ ਏਵਂਨਾਮਕੇ ਲੇਣੇ. ਕਸ੍ਸਪਬੁਦ੍ਧਕਾਲੇ ਕਿਰ ਤਂ ਲੇਣਂ ਏਕਸ੍ਮਿਂ ਬੁਦ੍ਧਨ੍ਤਰੇ ਪਥਵਿਯਾ ਵਡ੍ਢਮਾਨਾਯ ਅਨ੍ਤੋਭੂਮਿਗਤਂ ਜਾਤਂ. ਅਥੇਕਦਿਵਸਂ ਏਕੋ ਸੂਕਰੋ ਤਸ੍ਸ ਛਦਨਪਰਿਯਨ੍ਤਸਮੀਪੇ ਪਂਸੁਂ ਖਣਿ. ਦੇਵੇ ਵੁਟ੍ਟੇ ਪਂਸੁਧੋਤੋ ਛਦਨਪਰਿਯਨ੍ਤੋ ਪਾਕਟੋ ਅਹੋਸਿ. ਏਕੋ ਵਨਚਰਕੋ ਦਿਸ੍ਵਾ – ‘‘ਪੁਬ੍ਬੇ ਸੀਲਵਨ੍ਤੇਹਿ ਪਰਿਭੁਤ੍ਤਲੇਣੇਨ ਭਵਿਤਬ੍ਬਂ, ਪਟਿਜਗ੍ਗਿਸ੍ਸਾਮਿ ਨ’’ਨ੍ਤਿ ਸਮਨ੍ਤਤੋ ਪਂਸੁਂ ਅਪਨੇਤ੍ਵਾ ਲੇਣਂ ਸੋਧੇਤ੍ਵਾ ਕੁਟ੍ਟਪਰਿਕ੍ਖੇਪਂ ਕਤ੍ਵਾ ਦ੍ਵਾਰਵਾਤਪਾਨਂ ਯੋਜੇਤ੍ਵਾ ਸੁਪਰਿਨਿਟ੍ਠਿਤ-ਸੁਧਾਕਮ੍ਮਚਿਤ੍ਤਕਮ੍ਮਰਜਤਪਟ੍ਟਸਦਿਸਾਯ ਵਾਲੁਕਾਯ ਸਨ੍ਥਤਪਰਿਵੇਣਂ ਲੇਣਂ ਕਤ੍ਵਾ ਮਞ੍ਚਪੀਠਂ ਪਞ੍ਞਾਪੇਤ੍ਵਾ ਭਗਵਤੋ ਵਸਨਤ੍ਥਾਯ ਅਦਾਸਿ. ਲੇਣਂ ਗਮ੍ਭੀਰਂ ਅਹੋਸਿ ਓਤਰਿਤ੍ਵਾ ਅਭਿਰੁਹਿਤਬ੍ਬਂ. ਤਂ ਸਨ੍ਧਾਯੇਤਂ ਵੁਤ੍ਤਂ.

ਦੀਘਨਖੋਤਿ ਤਸ੍ਸ ਪਰਿਬ੍ਬਾਜਕਸ੍ਸ ਨਾਮਂ. ਉਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਸੋ ਕਿਰ ਥੇਰੇ ਅਡ੍ਢਮਾਸਪਬ੍ਬਜਿਤੇ ਚਿਨ੍ਤੇਸਿ – ‘‘ਮਯ੍ਹਂ ਮਾਤੁਲੋ ਅਞ੍ਞਂ ਪਾਸਣ੍ਡਂ ਗਨ੍ਤ੍ਵਾ ਨ ਚਿਰਂ ਤਿਟ੍ਠਤਿ, ਇਦਾਨਿ ਪਨਸ੍ਸ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਗਤਸ੍ਸ ਅਡ੍ਢਮਾਸੋ ਜਾਤੋ. ਪਵਤ੍ਤਿਮ੍ਪਿਸ੍ਸ ਨ ਸੁਣਾਮਿ, ਓਜਵਨ੍ਤਂ ਨੁ ਖੋ ਸਾਸਨਂ, ਜਾਨਿਸ੍ਸਾਮਿ ਨ’’ਨ੍ਤਿ ਗਨ੍ਤੁਕਾਮੋ ਜਾਤੋ. ਤਸ੍ਮਾ ਉਪਸਙ੍ਕਮਿ. ਏਕਮਨ੍ਤਂ ਠਿਤੋਤਿ ਤਸ੍ਮਿਂ ਕਿਰ ਸਮਯੇ ਥੇਰੋ ਭਗਵਨ੍ਤਂ ਬੀਜਯਮਾਨੋ ਠਿਤੋ ਹੋਤਿ, ਪਰਿਬ੍ਬਾਜਕੋ ਮਾਤੁਲੇ ਹਿਰੋਤ੍ਤਪ੍ਪੇਨ ਠਿਤਕੋਵ ਪਞ੍ਹਂ ਪੁਚ੍ਛਿ. ਤੇਨ ਵੁਤ੍ਤਂ ‘‘ਏਕਮਨ੍ਤਂ ਠਿਤੋ’’ਤਿ.

ਸਬ੍ਬਂ ਮੇ ਨਕ੍ਖਮਤੀਤਿ ਸਬ੍ਬਾ ਮੇ ਉਪਪਤ੍ਤਿਯੋ ਨਕ੍ਖਮਨ੍ਤਿ, ਪਟਿਸਨ੍ਧਿਯੋ ਨਕ੍ਖਮਨ੍ਤੀਤਿ ਅਧਿਪ੍ਪਾਯੇਨ ਵਦਤਿ. ਏਤ੍ਤਾਵਤਾਨੇਨ ‘‘ਉਚ੍ਛੇਦਵਾਦੋਹਮਸ੍ਮੀ’’ਤਿ ਦੀਪਿਤਂ ਹੋਤਿ. ਭਗਵਾ ਪਨਸ੍ਸ ਅਧਿਪ੍ਪਾਯਂ ਮੁਞ੍ਚਿਤ੍ਵਾ ਅਕ੍ਖਰੇ ਤਾਵ ਦੋਸਂ ਦਸ੍ਸੇਨ੍ਤੋ ਯਾਪਿ ਖੋ ਤੇਤਿਆਦਿਮਾਹ. ਤਤ੍ਥ ਏਸਾਪਿ ਤੇ ਦਿਟ੍ਠਿ ਨਕ੍ਖਮਤੀਤਿ ਏਸਾਪਿ ਤੇ ਪਠਮਂ ਰੁਚ੍ਚਿਤ੍ਵਾ ਖਮਾਪੇਤ੍ਵਾ ਗਹਿਤਦਿਟ੍ਠਿ ਨਕ੍ਖਮਤੀਤਿ. ਏਸਾ ਚੇ ਮੇ, ਭੋ ਗੋਤਮ, ਦਿਟ੍ਠਿ ਖਮੇਯ੍ਯਾਤਿ ਮਯ੍ਹਞ੍ਹਿ ਸਬ੍ਬਂ ਨਕ੍ਖਮਤੀਤਿ ਦਿਟ੍ਠਿ, ਤਸ੍ਸ ਮਯ੍ਹਂ ਯਾ ਏਸਾ ਸਬ੍ਬਂ ਮੇ ਨਕ੍ਖਮਤੀਤਿ ਦਿਟ੍ਠਿ, ਏਸਾ ਮੇ ਖਮੇਯ੍ਯ. ਯਂ ਤਂ ‘‘ਸਬ੍ਬਂ ਮੇ ਨਕ੍ਖਮਤੀ’’ਤਿ ਵੁਤ੍ਤਂ, ਤਮ੍ਪਿਸ੍ਸ ਤਾਦਿਸਮੇਵ. ਯਥਾ ਸਬ੍ਬਗਹਣੇਨ ਗਹਿਤਾਪਿ ਅਯਂ ਦਿਟ੍ਠਿ ਖਮਤਿ, ਏਵਮੇਵਂ ਤਮ੍ਪਿ ਖਮੇਯ੍ਯ. ਏਵਂ ਅਤ੍ਤਨੋ ਵਾਦੇ ਆਰੋਪਿਤਂ ਦੋਸਂ ਞਤ੍ਵਾ ਤਂ ਪਰਿਹਰਾਮੀਤਿ ਸਞ੍ਞਾਯ ਵਦਤਿ, ਅਤ੍ਥਤੋ ਪਨਸ੍ਸ ‘‘ਏਸਾ ਦਿਟ੍ਠਿ ਨ ਮੇ ਖਮਤੀ’’ਤਿ ਆਪਜ੍ਜਤਿ. ਯਸ੍ਸ ਪਨੇਸਾ ਨ ਖਮਤਿ ਨ ਰੁਚ੍ਚਤਿ, ਤਸ੍ਸਾਯਂ ਤਾਯ ਦਿਟ੍ਠਿਯਾ ਸਬ੍ਬਂ ਮੇ ਨ ਖਮਤੀਤਿ ਦਿਟ੍ਠਿ ਰੁਚਿਤਂ. ਤੇਨ ਹਿ ਦਿਟ੍ਠਿਅਕ੍ਖਮੇਨ ਅਰੁਚਿਤੇਨ ਭਵਿਤਬ੍ਬਨ੍ਤਿ ਸਬ੍ਬਂ ਖਮਤੀਤਿ ਰੁਚ੍ਚਤੀਤਿ ਆਪਜ੍ਜਤਿ. ਨ ਪਨੇਸ ਤਂ ਸਮ੍ਪਟਿਚ੍ਛਤਿ, ਕੇਵਲਂ ਤਸ੍ਸਾਪਿ ਉਚ੍ਛੇਦਦਿਟ੍ਠਿਯਾ ਉਚ੍ਛੇਦਮੇਵ ਗਣ੍ਹਾਤਿ. ਤੇਨਾਹ ਭਗਵਾ ਅਤੋ ਖੋ ਤੇ, ਅਗ੍ਗਿਵੇਸ੍ਸਨ,…ਪੇ… ਅਞ੍ਞਞ੍ਚ ਦਿਟ੍ਠਿਂ ਉਪਾਦਿਯਨ੍ਤੀਤਿ. ਤਤ੍ਥ ਅਤੋਤਿ ਪਜਹਨਕੇਸੁ ਨਿਸ੍ਸਕ੍ਕਂ, ਯੇ ਪਜਹਨ੍ਤਿ, ਤੇਹਿ ਯੇ ਨਪ੍ਪਜਹਨ੍ਤੀਤਿ ਵੁਚ੍ਚਿਯਨ੍ਤਿ, ਤੇਵ ਬਹੁਤਰਾਤਿ ਅਤ੍ਥੋ. ਬਹੂ ਹਿ ਬਹੁਤਰਾਤਿ ਏਤ੍ਥ ਹਿਕਾਰੋ ਨਿਪਾਤਮਤ੍ਤਂ, ਬਹੂ ਬਹੁਤਰਾਤਿ ਅਤ੍ਥੋ. ਪਰਤੋ ਤਨੂ ਹਿ ਤਨੁਤਰਾਤਿ ਪਦੇਪਿ ਏਸੇਵ ਨਯੋ. ਯੇ ਏਵਮਾਹਂਸੂਤਿ ਯੇ ਏਵਂ ਵਦਨ੍ਤਿ. ਤਞ੍ਚੇਵ ਦਿਟ੍ਠਿਂ ਨਪ੍ਪਜਹਨ੍ਤਿ, ਅਞ੍ਞਞ੍ਚ ਦਿਟ੍ਠਿਂ ਉਪਾਦਿਯਨ੍ਤੀਤਿ ਮੂਲਦਸ੍ਸਨਂ ਨਪ੍ਪਜਹਨ੍ਤਿ, ਅਪਰਦਸ੍ਸਨਂ ਉਪਾਦਿਯਨ੍ਤਿ.

ਏਤ੍ਥ ਚ ਸਸ੍ਸਤਂ ਗਹੇਤ੍ਵਾ ਤਮ੍ਪਿ ਅਪ੍ਪਹਾਯ ਉਚ੍ਛੇਦਂ ਵਾ ਏਕਚ੍ਚਸਸ੍ਸਤਂ ਵਾ ਗਹੇਤੁਂ ਨ ਸਕ੍ਕਾ, ਉਚ੍ਛੇਦਮ੍ਪਿ ਗਹੇਤ੍ਵਾ ਤਂ ਅਪ੍ਪਹਾਯ ਸਸ੍ਸਤਂ ਵਾ ਏਕਚ੍ਚਸਸ੍ਸਤਂ ਵਾ ਨ ਸਕ੍ਕਾ ਗਹੇਤੁਂ, ਏਕਚ੍ਚਸਸ੍ਸਤਮ੍ਪਿ ਗਹੇਤ੍ਵਾ ਤਂ ਅਪ੍ਪਹਾਯ ਸਸ੍ਸਤਂ ਵਾ ਉਚ੍ਛੇਦਂ ਵਾ ਨ ਸਕ੍ਕਾ ਗਹੇਤੁਂ. ਮੂਲਸਸ੍ਸਤਂ ਪਨ ਅਪ੍ਪਹਾਯ ਅਞ੍ਞਂ ਸਸ੍ਸਤਮੇਵ ਸਕ੍ਕਾ ਗਹੇਤੁਂ. ਕਥਂ? ਏਕਸ੍ਮਿਞ੍ਹਿ ਸਮਯੇ ‘‘ਰੂਪਂ ਸਸ੍ਸਤ’’ਨ੍ਤਿ ਗਹੇਤ੍ਵਾ ਅਪਰਸ੍ਮਿਂ ਸਮਯੇ ‘‘ਨ ਸੁਦ੍ਧਰੂਪਮੇਵ ਸਸ੍ਸਤਂ, ਵੇਦਨਾਪਿ ਸਸ੍ਸਤਾ, ਵਿਞ੍ਞਾਣਮ੍ਪਿ ਸਸ੍ਸਤ’’ਨ੍ਤਿ ਗਣ੍ਹਾਤਿ. ਉਚ੍ਛੇਦੇਪਿ ਏਕਚ੍ਚਸਸ੍ਸਤੇਪਿ ਏਸੇਵ ਨਯੋ. ਯਥਾ ਚ ਖਨ੍ਧੇਸੁ, ਏਵਂ ਆਯਤਨੇਸੁਪਿ ਯੋਜੇਤਬ੍ਬਂ. ਇਦਂ ਸਨ੍ਧਾਯ ਵੁਤ੍ਤਂ – ‘‘ਤਞ੍ਚੇਵ ਦਿਟ੍ਠਿਂ ਨਪ੍ਪਜਹਨ੍ਤਿ, ਅਞ੍ਞਞ੍ਚ ਦਿਟ੍ਠਿਂ ਉਪਾਦਿਯਨ੍ਤੀ’’ਤਿ.

ਦੁਤਿਯਵਾਰੇ ਅਤੋਤਿ ਅਪ੍ਪਜਹਨਕੇਸੁ ਨਿਸ੍ਸਕ੍ਕਂ, ਯੇ ਨਪ੍ਪਜਹਨ੍ਤਿ, ਤੇਹਿ, ਯੇ ਪਜਹਨ੍ਤੀਤਿ ਵੁਚ੍ਚਿਯਨ੍ਤਿ, ਤੇਵ ਤਨੁਤਰਾ ਅਪ੍ਪਤਰਾਤਿ ਅਤ੍ਥੋ. ਤਞ੍ਚੇਵ ਦਿਟ੍ਠਿਂ ਪਜਹਨ੍ਤਿ, ਅਞ੍ਞਞ੍ਚ ਦਿਟ੍ਠਿਂ ਨ ਉਪਾਦਿਯਨ੍ਤੀਤਿ ਤਞ੍ਚ ਮੂਲਦਸ੍ਸਨਂ ਪਜਹਨ੍ਤਿ, ਅਞ੍ਞਞ੍ਚ ਦਸ੍ਸਨਂ ਨ ਗਣ੍ਹਨ੍ਤਿ. ਕਥਂ? ਏਕਸ੍ਮਿਞ੍ਹਿ ਸਮਯੇ ‘‘ਰੂਪਂ ਸਸ੍ਸਤ’’ਨ੍ਤਿ ਗਹੇਤ੍ਵਾ ਅਪਰਸ੍ਮਿਂ ਸਮਯੇ ਤਤ੍ਥ ਆਦੀਨਵਂ ਦਿਸ੍ਵਾ ‘‘ਓਲ਼ਾਰਿਕਮੇਤਂ ਮਯ੍ਹਂ ਦਸ੍ਸਨ’’ਨ੍ਤਿ ਪਜਹਤਿ ‘‘ਨ ਕੇਵਲਞ੍ਚ ਰੂਪਂ ਸਸ੍ਸਤਨ੍ਤਿ ਦਸ੍ਸਨਮੇਵ ਓਲ਼ਾਰਿਕਂ, ਵੇਦਨਾਪਿ ਸਸ੍ਸਤਾ…ਪੇ… ਵਿਞ੍ਞਾਣਮ੍ਪਿ ਸਸ੍ਸਤਨ੍ਤਿ ਦਸ੍ਸਨਂ ਓਲ਼ਾਰਿਕਮੇਵਾ’’ਤਿ ਵਿਸ੍ਸਜ੍ਜੇਤਿ. ਉਚ੍ਛੇਦੇਪਿ ਏਕਚ੍ਚਸਸ੍ਸਤੇਪਿ ਏਸੇਵ ਨਯੋ. ਯਥਾ ਚ ਖਨ੍ਧੇਸੁ, ਏਵਂ ਆਯਤਨੇਸੁਪਿ ਯੋਜੇਤਬ੍ਬਂ. ਏਵਂ ਤਞ੍ਚ ਮੂਲਦਸ੍ਸਨਂ ਪਜਹਨ੍ਤਿ, ਅਞ੍ਞਞ੍ਚ ਦਸ੍ਸਨਂ ਨ ਗਣ੍ਹਨ੍ਤਿ.

ਸਨ੍ਤਗ੍ਗਿਵੇਸ੍ਸਨਾਤਿ ਕਸ੍ਮਾ ਆਰਭਿ? ਅਯਂ ਉਚ੍ਛੇਦਲਦ੍ਧਿਕੋ ਅਤ੍ਤਨੋ ਲਦ੍ਧਿਂ ਨਿਗੂਹਤਿ, ਤਸ੍ਸਾ ਪਨ ਲਦ੍ਧਿਯਾ ਵਣ੍ਣੇ ਵੁਚ੍ਚਮਾਨੇ ਅਤ੍ਤਨੋ ਲਦ੍ਧਿਂ ਪਾਤੁਕਰਿਸ੍ਸਤੀਤਿ ਤਿਸ੍ਸੋ ਲਦ੍ਧਿਯੋ ਏਕਤੋ ਦਸ੍ਸੇਤ੍ਵਾ ਵਿਭਜਿਤੁਂ ਇਮਂ ਦੇਸਨਂ ਆਰਭਿ.

ਸਾਰਾਗਾਯ ਸਨ੍ਤਿਕੇਤਿਆਦੀਸੁ ਰਾਗਵਸੇਨ ਵਟ੍ਟੇ ਰਜ੍ਜਨਸ੍ਸ ਆਸਨ੍ਨਾ ਤਣ੍ਹਾਦਿਟ੍ਠਿਸਂਯੋਜਨੇਨ ਵਟ੍ਟਸਂਯੋਜਨਸ੍ਸ ਸਨ੍ਤਿਕੇ. ਅਭਿਨਨ੍ਦਨਾਯਾਤਿ ਤਣ੍ਹਾਦਿਟ੍ਠਿਵਸੇਨੇਵ ਗਿਲਿਤ੍ਵਾ ਪਰਿਯਾਦਿਯਨਸ੍ਸ ਗਹਣਸ੍ਸ ਚ ਆਸਨ੍ਨਾਤਿ ਅਤ੍ਥੋ. ਅਸਾਰਾਗਾਯ ਸਨ੍ਤਿਕੇਤਿਆਦੀਸੁ ਵਟ੍ਟੇ ਅਰਜ੍ਜਨਸ੍ਸ ਆਸਨ੍ਨਾਤਿਆਦਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ.

ਏਤ੍ਥ ਚ ਸਸ੍ਸਤਦਸ੍ਸਨਂ ਅਪ੍ਪਸਾਵਜ੍ਜਂ ਦਨ੍ਧਵਿਰਾਗਂ, ਉਚ੍ਛੇਦਦਸ੍ਸਨਂ ਮਹਾਸਾਵਜ੍ਜਂ ਖਿਪ੍ਪਵਿਰਾਗਂ. ਕਥਂ? ਸਸ੍ਸਤਵਾਦੀ ਹਿ ਇਧਲੋਕਂ ਪਰਲੋਕਞ੍ਚ ਅਤ੍ਥੀਤਿ ਜਾਨਾਤਿ, ਸੁਕਤਦੁਕ੍ਕਟਾਨਂ ਫਲਂ ਅਤ੍ਥੀਤਿ ਜਾਨਾਤਿ, ਕੁਸਲਂ ਕਰੋਤਿ, ਅਕੁਸਲਂ ਕਰੋਨ੍ਤੋ ਭਾਯਤਿ, ਵਟ੍ਟਂ ਅਸ੍ਸਾਦੇਤਿ, ਅਭਿਨਨ੍ਦਤਿ. ਬੁਦ੍ਧਾਨਂ ਵਾ ਬੁਦ੍ਧਸਾਵਕਾਨਂ ਵਾ ਸਮ੍ਮੁਖੀਭੂਤੋ ਸੀਘਂ ਲਦ੍ਧਿਂ ਜਹਿਤੁਂ ਨ ਸਕ੍ਕੋਤਿ. ਤਸ੍ਮਾ ਤਂ ਸਸ੍ਸਤਦਸ੍ਸਨਂ ਅਪ੍ਪਸਾਵਜ੍ਜਂ ਦਨ੍ਧਵਿਰਾਗਨ੍ਤਿ ਵੁਚ੍ਚਤਿ. ਉਚ੍ਛੇਦਵਾਦੀ ਪਨ ਇਧਲੋਕਪਰਲੋਕਂ ਅਤ੍ਥੀਤਿ ਜਾਨਾਤਿ, ਸੁਕਤਦੁਕ੍ਕਟਾਨਂ ਫਲਂ ਅਤ੍ਥੀਤਿ ਜਾਨਾਤਿ, ਕੁਸਲਂ ਨ ਕਰੋਤਿ, ਅਕੁਸਲਂ ਕਰੋਨ੍ਤੋ ਨ ਭਾਯਤਿ, ਵਟ੍ਟਂ ਨ ਅਸ੍ਸਾਦੇਤਿ, ਨਾਭਿਨਨ੍ਦਤਿ, ਬੁਦ੍ਧਾਨਂ ਵਾ ਬੁਦ੍ਧਸਾਵਕਾਨਂ ਵਾ ਸਮ੍ਮੁਖੀਭਾਵੇ ਸੀਘਂ ਦਸ੍ਸਨਂ ਪਜਹਤਿ. ਪਾਰਮਿਯੋ ਪੂਰੇਤੁਂ ਸਕ੍ਕੋਨ੍ਤੋ ਬੁਦ੍ਧੋ ਹੁਤ੍ਵਾ, ਅਸਕ੍ਕੋਨ੍ਤੋ ਅਭਿਨੀਹਾਰਂ ਕਤ੍ਵਾ ਸਾਵਕੋ ਹੁਤ੍ਵਾ ਪਰਿਨਿਬ੍ਬਾਯਤਿ. ਤਸ੍ਮਾ ਉਚ੍ਛੇਦਦਸ੍ਸਨਂ ਮਹਾਸਾਵਜ੍ਜਂ ਖਿਪ੍ਪਵਿਰਾਗਨ੍ਤਿ ਵੁਚ੍ਚਤਿ.

੨੦੨. ਸੋ ਪਨ ਪਰਿਬ੍ਬਾਜਕੋ ਏਤਮਤ੍ਥਂ ਅਸਲ੍ਲਕ੍ਖੇਤ੍ਵਾ – ‘‘ਮਯ੍ਹਂ ਦਸ੍ਸਨਂ ਸਂਵਣ੍ਣੇਤਿ ਪਸਂਸਤਿ, ਅਦ੍ਧਾ ਮੇ ਸੁਨ੍ਦਰਂ ਦਸ੍ਸਨ’’ਨ੍ਤਿ ਸਲ੍ਲਕ੍ਖੇਤ੍ਵਾ ਉਕ੍ਕਂਸੇਤਿ ਮੇ ਭਵਨ੍ਤਿਆਦਿਮਾਹ.

ਇਦਾਨਿ ਯਸ੍ਮਾ ਅਯਂ ਪਰਿਬ੍ਬਾਜਕੋ ਕਞ੍ਜਿਯੇਨੇਵ ਤਿਤ੍ਤਕਾਲਾਬੁ, ਉਚ੍ਛੇਦਦਸ੍ਸਨੇਨੇਵ ਪੂਰਿਤੋ, ਸੋ ਯਥਾ ਕਞ੍ਜਿਯਂ ਅਪ੍ਪਹਾਯ ਨ ਸਕ੍ਕਾ ਲਾਬੁਮ੍ਹਿ ਤੇਲਫਾਣਿਤਾਦੀਨਿ ਪਕ੍ਖਿਪਿਤੁਂ, ਪਕ੍ਖਿਤ੍ਤਾਨਿਪਿ ਨ ਗਣ੍ਹਾਤਿ, ਏਵਮੇਵਂ ਤਂ ਲਦ੍ਧਿਂ ਅਪ੍ਪਹਾਯ ਅਭਬ੍ਬੋ ਮਗ੍ਗਫਲਾਨਂ ਲਾਭਾਯ, ਤਸ੍ਮਾ ਲਦ੍ਧਿਂ ਜਹਾਪਨਤ੍ਥਂ ਤਤ੍ਰਗ੍ਗਿਵੇਸ੍ਸਨਾਤਿਆਦਿ ਆਰਦ੍ਧਂ. ਵਿਗ੍ਗਹੋਤਿ ਕਲਹੋ. ਏਵਮੇਤਾਸਂ ਦਿਟ੍ਠੀਨਂ ਪਹਾਨਂ ਹੋਤੀਤਿ ਏਵਂ ਵਿਗ੍ਗਹਾਦਿਆਦੀਨਵਂ ਦਿਸ੍ਵਾ ਤਾਸਂ ਦਿਟ੍ਠੀਨਂ ਪਹਾਨਂ ਹੋਤਿ. ਸੋ ਹਿ ਪਰਿਬ੍ਬਾਜਕੋ ‘‘ਕਿਂ ਮੇ ਇਮਿਨਾ ਵਿਗ੍ਗਹਾਦਿਨਾ’’ਤਿ ਤਂ ਉਚ੍ਛੇਦਦਸ੍ਸਨਂ ਪਜਹਤਿ.

੨੦੫. ਅਥਸ੍ਸ ਭਗਵਾ ਵਮਿਤਕਞ੍ਜਿਯੇ ਲਾਬੁਮ੍ਹਿ ਸਪ੍ਪਿਫਾਣਿਤਾਦੀਨਿ ਪਕ੍ਖਿਪਨ੍ਤੋ ਵਿਯ ਹਦਯੇ ਅਮਤੋਸਧਂ ਪੂਰੇਸ੍ਸਾਮੀਤਿ ਵਿਪਸ੍ਸਨਂ ਆਚਿਕ੍ਖਨ੍ਤੋ ਅਯਂ ਖੋ ਪਨ, ਅਗ੍ਗਿਵੇਸ੍ਸਨ, ਕਾਯੋਤਿਆਦਿਮਾਹ. ਤਸ੍ਸਤ੍ਥੋ ਵਮ੍ਮਿਕਸੁਤ੍ਤੇ ਵੁਤ੍ਤੋ. ਅਨਿਚ੍ਚਤੋਤਿਆਦੀਨਿਪਿ ਹੇਟ੍ਠਾ ਵਿਤ੍ਥਾਰਿਤਾਨੇਵ. ਯੋ ਕਾਯਸ੍ਮਿਂ ਕਾਯਛਨ੍ਦੋਤਿ ਯਾ ਕਾਯਸ੍ਮਿਂ ਤਣ੍ਹਾ. ਸ੍ਨੇਹੋਤਿ ਤਣ੍ਹਾਸ੍ਨੇਹੋਵ. ਕਾਯਨ੍ਵਯਤਾਤਿ ਕਾਯਾਨੁਗਮਨਭਾਵੋ, ਕਾਯਂ ਅਨੁਗਚ੍ਛਨਕਕਿਲੇਸੋਤਿ ਅਤ੍ਥੋ.

ਏਵਂ ਰੂਪਕਮ੍ਮਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਅਰੂਪਕਮ੍ਮਟ੍ਠਾਨਂ ਦਸ੍ਸੇਨ੍ਤੋ ਤਿਸ੍ਸੋ ਖੋਤਿਆਦਿਮਾਹ. ਪੁਨ ਤਾਸਂਯੇਵ ਵੇਦਨਾਨਂ ਅਸਮ੍ਮਿਸ੍ਸਭਾਵਂ ਦਸ੍ਸੇਨ੍ਤੋ ਯਸ੍ਮਿਂ, ਅਗ੍ਗਿਵੇਸ੍ਸਨ, ਸਮਯੇਤਿਆਦਿਮਾਹ. ਤਤ੍ਰਾਯਂ ਸਙ੍ਖੇਪਤ੍ਥੋ – ਯਸ੍ਮਿਂ ਸਮਯੇ ਸੁਖਾਦੀਸੁ ਏਕਂ ਵੇਦਨਂ ਵੇਦਯਤਿ, ਤਸ੍ਮਿਂ ਸਮਯੇ ਅਞ੍ਞਾ ਵੇਦਨਾ ਅਤ੍ਤਨੋ ਵਾਰਂ ਵਾ ਓਕਾਸਂ ਵਾ ਓਲੋਕਯਮਾਨਾ ਨਿਸਿਨ੍ਨਾ ਨਾਮ ਨਤ੍ਥਿ, ਅਥ ਖੋ ਅਨੁਪ੍ਪਨ੍ਨਾਵ ਹੋਨ੍ਤਿ ਭਿਨ੍ਨਉਦਕਪੁਪ੍ਫੁਲ਼ਾ ਵਿਯ ਚ ਅਨ੍ਤਰਹਿਤਾ ਵਾ. ਸੁਖਾਪਿ ਖੋਤਿਆਦਿ ਤਾਸਂ ਵੇਦਨਾਨਂ ਚੁਣ੍ਣਵਿਚੁਣ੍ਣਭਾਵਦਸ੍ਸਨਤ੍ਥਂ ਵੁਤ੍ਤਂ.

ਨ ਕੇਨਚਿ ਸਂਵਦਤੀਤਿ ਤਸ੍ਸਤਂ ਗਹੇਤ੍ਵਾ ‘‘ਸਸ੍ਸਤਵਾਦੀ ਅਹ’’ਨ੍ਤਿ ਉਚ੍ਛੇਦਵਾਦਿਨਾਪਿ ਸਦ੍ਧਿਂ ਨ ਸਂਵਦਤਿ, ਤਮੇਵ ਗਹੇਤ੍ਵਾ ‘‘ਸਸ੍ਸਤਵਾਦੀ ਅਹ’’ਨ੍ਤਿ ਏਕਚ੍ਚਸਸ੍ਸਤਵਾਦਿਨਾ ਸਦ੍ਧਿਂ ਨ ਵਿਵਦਤਿ. ਏਵਂ ਤਯੋਪਿ ਵਾਦਾ ਪਰਿਵਤ੍ਤੇਤ੍ਵਾ ਯੋਜੇਤਬ੍ਬਾ. ਯਞ੍ਚ ਲੋਕੇ ਵੁਤ੍ਤਨ੍ਤਿ ਯਂ ਲੋਕੇ ਕਥਿਤਂ ਵੋਹਰਿਤਂ, ਤੇਨ ਵੋਹਰਤਿ ਅਪਰਾਮਸਨ੍ਤੋ ਕਿਞ੍ਚਿ ਧਮ੍ਮਂ ਪਰਾਮਾਸਗ੍ਗਾਹੇਨ ਅਗ੍ਗਣ੍ਹਨ੍ਤੋ. ਵੁਤ੍ਤਮ੍ਪਿ ਚੇਤਂ –

‘‘ਯੋ ਹੋਤਿ ਭਿਕ੍ਖੁ ਅਰਹਂ ਕਤਾਵੀ,

ਖੀਣਾਸਵੋ ਅਨ੍ਤਿਮਦੇਹਧਾਰੀ;

ਅਹਂ ਵਦਾਮੀਤਿਪਿ ਸੋ ਵਦੇਯ੍ਯ,

ਮਮਂ ਵਦਨ੍ਤੀਤਿਪਿ ਸੋ ਵਦੇਯ੍ਯ;

ਲੋਕੇ ਸਮਞ੍ਞਂ ਕੁਸਲੋ ਵਿਦਿਤ੍ਵਾ,

ਵੋਹਾਰਮਤ੍ਤੇਨ ਸੋ ਵੋਹਰੇਯ੍ਯਾ’’ਤਿ. (ਸਂ. ਨਿ. ੧.੨੫);

ਅਪਰਮ੍ਪਿ ਵੁਤ੍ਤਂ – ‘‘ਇਮਾ ਖੋ ਚਿਤ੍ਤ ਲੋਕਸਮਞ੍ਞਾ ਲੋਕਨਿਰੁਤ੍ਤਿਯੋ ਲੋਕਵੋਹਾਰਾ ਲੋਕਪਞ੍ਞਤ੍ਤਿਯੋ, ਯਾਹਿ ਤਥਾਗਤੋ ਵੋਹਰਤਿ ਅਪਰਾਮਸ’’ਨ੍ਤਿ (ਦੀ. ਨਿ. ੧.੪੪੦).

੨੦੬. ਅਭਿਞ੍ਞਾਪਹਾਨਮਾਹਾਤਿ ਸਸ੍ਸਤਾਦੀਸੁ ਤੇਸਂ ਤੇਸਂ ਧਮ੍ਮਾਨਂ ਸਸ੍ਸਤਂ ਅਭਿਞ੍ਞਾਯ ਜਾਨਿਤ੍ਵਾ ਸਸ੍ਸਤਸ੍ਸ ਪਹਾਨਮਾਹ, ਉਚ੍ਛੇਦਂ, ਏਕਚ੍ਚਸਸ੍ਸਤਂ ਅਭਿਞ੍ਞਾਯ ਏਕਚ੍ਚਸਸ੍ਸਤਸ੍ਸ ਪਹਾਨਂ ਵਦਤਿ. ਰੂਪਂ ਅਭਿਞ੍ਞਾਯ ਰੂਪਸ੍ਸ ਪਹਾਨਂ ਵਦਤੀਤਿਆਦਿਨਾ ਨਯੇਨੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਪਟਿਸਞ੍ਚਿਕ੍ਖਤੋਤਿ ਪਚ੍ਚਵੇਕ੍ਖਨ੍ਤਸ੍ਸ. ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚੀਤਿ ਅਨੁਪ੍ਪਾਦਨਿਰੋਧੇਨ ਨਿਰੁਦ੍ਧੇਹਿ ਆਸਵੇਹਿ ਅਗ੍ਗਹੇਤ੍ਵਾਵ ਚਿਤ੍ਤਂ ਵਿਮੁਚ੍ਚਿ. ਏਤ੍ਤਾਵਤਾ ਚੇਸ ਪਰਸ੍ਸ ਵਡ੍ਢਿਤਂ ਭਤ੍ਤਂ ਭੁਞ੍ਜਿਤ੍ਵਾ ਖੁਦਂ ਵਿਨੋਦੇਨ੍ਤੋ ਵਿਯ ਪਰਸ੍ਸ ਆਰਦ੍ਧਾਯ ਧਮ੍ਮਦੇਸਨਾਯ ਞਾਣਂ ਪੇਸੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਞ੍ਚੇਵ ਪਤ੍ਤੋ, ਸਾਵਕਪਾਰਮੀਞਾਣਸ੍ਸ ਚ ਮਤ੍ਥਕਂ, ਸੋਲ਼ਸ ਚ ਪਞ੍ਞਾ ਪਟਿਵਿਜ੍ਝਿਤ੍ਵਾ ਠਿਤੋ. ਦੀਘਨਖੋ ਪਨ ਸੋਤਾਪਤ੍ਤਿਫਲਂ ਪਤ੍ਵਾ ਸਰਣੇਸੁ ਪਤਿਟ੍ਠਿਤੋ.

ਭਗਵਾ ਪਨ ਇਮਂ ਦੇਸਨਂ ਸੂਰਿਯੇ ਧਰਮਾਨੇਯੇਵ ਨਿਟ੍ਠਾਪੇਤ੍ਵਾ ਗਿਜ੍ਝਕੂਟਾ ਓਰੁਯ੍ਹ ਵੇਲ਼ੁਵਨਂ ਗਨ੍ਤ੍ਵਾ ਸਾਵਕਸਨ੍ਨਿਪਾਤਮਕਾਸਿ, ਚਤੁਰਙ੍ਗਸਮਨ੍ਨਾਗਤੋ ਸਨ੍ਨਿਪਾਤੋ ਅਹੋਸਿ. ਤਤ੍ਰਿਮਾਨਿ ਅਙ੍ਗਾਨਿ – ਮਾਘਨਕ੍ਖਤ੍ਤੇਨ ਯੁਤ੍ਤੋ ਪੁਣ੍ਣਮਉਪੋਸਥਦਿਵਸੋ, ਕੇਨਚਿ ਅਨਾਮਨ੍ਤਿਤਾਨਿ ਹੁਤ੍ਵਾ ਅਤ੍ਤਨੋਯੇਵ ਧਮ੍ਮਤਾਯ ਸਨ੍ਨਿਪਤਿਤਾਨਿ ਅਡ੍ਢਤੇਲਸਾਨਿ ਭਿਕ੍ਖੁਸਤਾਨਿ, ਤੇਸੁ ਏਕੋਪਿ ਪੁਥੁਜ੍ਜਨੋ ਵਾ ਸੋਤਾਪਨ੍ਨ-ਸਕਦਾਗਾਮਿ-ਅਨਾਗਾਮਿ-ਸੁਕ੍ਖਵਿਪਸ੍ਸਕ-ਅਰਹਨ੍ਤੇਸੁ ਵਾ ਅਞ੍ਞਤਰੋ ਨਤ੍ਥਿ, ਸਬ੍ਬੇ ਛਲ਼ਭਿਞ੍ਞਾਵ, ਏਕੋਪਿ ਚੇਤ੍ਥ ਸਤ੍ਥਕੇਨ ਕੇਸੇ ਛਿਨ੍ਦਿਤ੍ਵਾ ਪਬ੍ਬਜਿਤੋ ਨਾਮ ਨਤ੍ਥਿ, ਸਬ੍ਬੇ ਏਹਿਭਿਕ੍ਖੁਨੋਯੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਦੀਘਨਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਮਾਗਣ੍ਡਿਯਸੁਤ੍ਤਵਣ੍ਣਨਾ

੨੦੭. ਏਵਂ ਮੇ ਸੁਤਨ੍ਤਿ ਮਾਗਣ੍ਡਿਯਸੁਤ੍ਤਂ. ਤਤ੍ਥ ਅਗ੍ਯਾਗਾਰੇਤਿ ਅਗ੍ਗਿਹੋਮਸਾਲਯਂ. ਤਿਣਸਨ੍ਥਾਰਕੇਤਿ ਦ੍ਵੇ ਮਾਗਣ੍ਡਿਯਾ ਮਾਤੁਲੋ ਚ ਭਾਗਿਨੇਯ੍ਯੋ ਚ. ਤੇਸੁ ਮਾਤੁਲੋ ਪਬ੍ਬਜਿਤ੍ਵਾ ਅਰਹਤ੍ਤਂ ਪਤ੍ਤੋ, ਭਾਗਿਨੇਯ੍ਯੋਪਿ ਸਉਪਨਿਸ੍ਸਯੋ ਨਚਿਰਸ੍ਸੇਵ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਤਿ. ਅਥਸ੍ਸ ਭਗਵਾ ਉਪਨਿਸ੍ਸਯਂ ਦਿਸ੍ਵਾ ਰਮਣੀਯਂ ਦੇਵਗਬ੍ਭਸਦਿਸਂ ਗਨ੍ਧਕੁਟਿਂ ਪਹਾਯ ਤਤ੍ਥ ਛਾਰਿਕਤਿਣਕਚਵਰਾਦੀਹਿ ਉਕ੍ਲਾਪੇ ਅਗ੍ਯਾਗਾਰੇ ਤਿਣਸਨ੍ਥਾਰਕਂ ਪਞ੍ਞਾਪੇਤ੍ਵਾ ਪਰਸਙ੍ਗਹਕਰਣਤ੍ਥਂ ਕਤਿਪਾਹਂ ਵਸਿਤ੍ਥ. ਤਂ ਸਨ੍ਧਾਯੇਤਂ ਵੁਤ੍ਤਂ. ਤੇਨੁਪਸਙ੍ਕਮੀਤਿ ਨ ਕੇਵਲਂ ਤਂਦਿਵਸਮੇਵ, ਯਸ੍ਮਾ ਪਨ ਤਂ ਅਗ੍ਯਾਗਾਰਂ ਗਾਮੂਪਚਾਰੇ ਦਾਰਕਦਾਰਿਕਾਹਿ ਓਕਿਣ੍ਣਂ ਅਵਿਵਿਤ੍ਤਂ, ਤਸ੍ਮਾ ਭਗਵਾ ਨਿਚ੍ਚਕਾਲਮ੍ਪਿ ਦਿਵਸਭਾਗਂ ਤਸ੍ਮਿਂ ਵਨਸਣ੍ਡੇ ਵੀਤਿਨਾਮੇਤ੍ਵਾ ਸਾਯਂ ਵਾਸਤ੍ਥਾਯ ਤਤ੍ਥ ਉਪਗਚ੍ਛਤਿ.

ਅਦ੍ਦਸਾ ਖੋ…ਪੇ… ਤਿਣਸਨ੍ਥਾਰਕਂ ਪਞ੍ਞਤ੍ਤਨ੍ਤਿ ਭਗਵਾ ਅਞ੍ਞੇਸੁ ਦਿਵਸੇਸੁ ਤਿਣਸਨ੍ਥਾਰਕਂ ਸਙ੍ਘਰਿਤ੍ਵਾ ਸਞ੍ਞਾਣਂ ਕਤ੍ਵਾ ਗਚ੍ਛਤਿ, ਤਂਦਿਵਸਂ ਪਨ ਪਞ੍ਞਪੇਤ੍ਵਾਵ ਅਗਮਾਸਿ. ਕਸ੍ਮਾ? ਤਦਾ ਹਿ ਪਚ੍ਚੂਸਸਮਯੇ ਲੋਕਂ ਓਲੋਕੇਤ੍ਵਾਵ ਅਦ੍ਦਸ – ‘‘ਅਜ੍ਜ ਮਾਗਣ੍ਡਿਯੋ ਇਧਾਗਨ੍ਤ੍ਵਾ ਇਮਂ ਤਿਣਸਨ੍ਥਾਰਕਂ ਦਿਸ੍ਵਾ ਭਾਰਦ੍ਵਾਜੇਨ ਸਦ੍ਧਿਂ ਤਿਣਸਨ੍ਥਾਰਕਂ ਆਰਬ੍ਭ ਕਥਾਸਲ੍ਲਾਪਂ ਕਰਿਸ੍ਸਤਿ, ਅਥਾਹਂ ਆਗਨ੍ਤ੍ਵਾ ਧਮ੍ਮਂ ਦੇਸੇਸ੍ਸਾਮਿ, ਸੋ ਧਮ੍ਮਂ ਸੁਤ੍ਵਾ ਮਮ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਤਿ. ਪਰੇਸਂ ਸਙ੍ਗਹਕਰਣਤ੍ਥਮੇਵ ਹਿ ਮਯਾ ਪਾਰਮਿਯੋ ਪੂਰਿਤਾ’’ਤਿ ਤਿਣਸਨ੍ਥਾਰਕਂ ਪਞ੍ਞਪੇਤ੍ਵਾਵ ਅਗਮਾਸਿ.

ਸਮਣਸੇਯ੍ਯਾਨੁਰੂਪਂ ਮਞ੍ਞੇਤਿ ਇਮਂ ਤਿਣਸਨ੍ਥਾਰਕਂ ‘‘ਸਮਣਸ੍ਸ ਅਨੁਚ੍ਛਵਿਕਾ ਸੇਯ੍ਯਾ’’ਤਿ ਮਞ੍ਞਾਮਿ. ਨ ਚ ਅਸਞ੍ਞਤਸਮਣਸ੍ਸ ਨਿਵੁਤ੍ਥਟ੍ਠਾਨਮੇਤਂ. ਤਥਾਹੇਤ੍ਥ ਹਤ੍ਥੇਨ ਆਕਡ੍ਢਿਤਟ੍ਠਾਨਂ ਵਾ ਪਾਦੇਨ ਆਕਡ੍ਢਿਤਟ੍ਠਾਨਂ ਵਾ ਸੀਸੇਨ ਪਹਟਟ੍ਠਾਨਂ ਵਾ ਨ ਪਞ੍ਞਾਯਤਿ, ਅਨਾਕੁਲੋ ਅਨਾਕਿਣ੍ਣੋ ਅਭਿਨ੍ਨੋ ਛੇਕੇਨ ਚਿਤ੍ਤਕਾਰੇਨ ਤੂਲਿਕਾਯ ਪਰਿਚ੍ਛਿਨ੍ਦਿਤ੍ਵਾ ਪਞ੍ਞਤ੍ਤੋ ਵਿਯ. ਸਞ੍ਞਤਸਮਣਸ੍ਸ ਵਸਿਤਟ੍ਠਾਨਂ, ਕਸ੍ਸ ਭੋ ਵਸਿਤਟ੍ਠਾਨਨ੍ਤਿ ਪੁਚ੍ਛਤਿ. ਭੂਨਹੁਨੋਤਿ ਹਤਵਡ੍ਢਿਨੋ ਮਰਿਯਾਦਕਾਰਕਸ੍ਸ. ਕਸ੍ਮਾ ਏਵਮਾਹ? ਛਸੁ ਦ੍ਵਾਰੇਸੁ ਵਡ੍ਢਿਪਞ੍ਞਾਪਨਲਦ੍ਧਿਕਤ੍ਤਾ. ਅਯਞ੍ਹਿ ਤਸ੍ਸ ਲਦ੍ਧਿ – ਚਕ੍ਖੁ ਬ੍ਰੂਹੇਤਬ੍ਬਂ ਵਡ੍ਢੇਤਬ੍ਬਂ, ਅਦਿਟ੍ਠਂ ਦਕ੍ਖਿਤਬ੍ਬਂ, ਦਿਟ੍ਠਂ ਸਮਤਿਕ੍ਕਮਿਤਬ੍ਬਂ. ਸੋਤਂ ਬ੍ਰੂਹੇਤਬ੍ਬਂ ਵਡ੍ਢੇਤਬ੍ਬਂ, ਅਸੁਤਂ ਸੋਤਬ੍ਬਂ, ਸੁਤਂ ਸਮਤਿਕ੍ਕਮਿਤਬ੍ਬਂ. ਘਾਨਂ ਬ੍ਰੂਹੇਤਬ੍ਬਂ ਵਡ੍ਢੇਤਬ੍ਬਂ, ਅਘਾਯਿਤਂ ਘਾਯਿਤਬ੍ਬਂ, ਘਾਯਿਤਂ ਸਮਤਿਕ੍ਕਮਿਤਬ੍ਬਂ. ਜਿਵ੍ਹਾ ਬ੍ਰੂਹੇਤਬ੍ਬਾ ਵਡ੍ਢੇਤਬ੍ਬਾ, ਅਸ੍ਸਾਯਿਤਂ ਸਾਯਿਤਬ੍ਬਂ, ਸਾਯਿਤਂ ਸਮਤਿਕ੍ਕਮਿਤਬ੍ਬਂ. ਕਾਯੋ ਬ੍ਰੂਹੇਤਬ੍ਬੋ ਵਡ੍ਢੇਤਬ੍ਬੋ, ਅਫੁਟ੍ਠਂ ਫੁਸਿਤਬ੍ਬਂ, ਫੁਟ੍ਠਂ ਸਮਤਿਕ੍ਕਮਿਤਬ੍ਬਂ. ਮਨੋ ਬ੍ਰੂਹੇਤਬ੍ਬੋ ਵਡ੍ਢੇਤਬ੍ਬੋ, ਅਵਿਞ੍ਞਾਤਂ ਵਿਜਾਨਿਤਬ੍ਬਂ, ਵਿਞ੍ਞਾਤਂ ਸਮਤਿਕ੍ਕਮਿਤਬ੍ਬਂ. ਏਵਂ ਸੋ ਛਸੁ ਦ੍ਵਾਰੇਸੁ ਵਡ੍ਢਿਂ ਪਞ੍ਞਪੇਤਿ. ਭਗਵਾ ਪਨ –

‘‘ਚਕ੍ਖੁਨਾ ਸਂਵਰੋ ਸਾਧੁ, ਸਾਧੁ ਸੋਤੇਨ ਸਂਵਰੋ;

ਘਾਨੇਨ ਸਂਵਰੋ ਸਾਧੁ, ਸਾਧੁ ਜਿਵ੍ਹਾਯ ਸਂਵਰੋ.

ਕਾਯੇਨ ਸਂਵਰੋ ਸਾਧੁ, ਸਾਧੁ ਵਾਚਾਯ ਸਂਵਰੋ;

ਮਨਸਾ ਸਂਵਰੋ ਸਾਧੁ, ਸਾਧੁ ਸਬ੍ਬਤ੍ਥ ਸਂਵਰੋ;

ਸਬ੍ਬਤ੍ਥ ਸਂਵੁਤੋ ਭਿਕ੍ਖੁ, ਸਬ੍ਬਦੁਕ੍ਖਾ ਪਮੁਚ੍ਚਤੀ’’ਤਿ. (ਧ. ਪ. ੩੬੦-੩੬੧) –

ਛਸੁ ਦ੍ਵਾਰੇਸੁ ਸਂਵਰਂ ਪਞ੍ਞਪੇਤਿ. ਤਸ੍ਮਾ ਸੋ ‘‘ਵਡ੍ਢਿਹਤੋ ਸਮਣੋ ਗੋਤਮੋ ਮਰਿਯਾਦਕਾਰਕੋ’’ਤਿ ਮਞ੍ਞਮਾਨੋ ‘‘ਭੂਨਹੁਨੋ’’ਤਿ ਆਹ.

ਅਰਿਯੇ ਞਾਯੇ ਧਮ੍ਮੇ ਕੁਸਲੇਤਿ ਪਰਿਸੁਦ੍ਧੇ ਕਾਰਣਧਮ੍ਮੇ ਅਨਵਜ੍ਜੇ. ਇਮਿਨਾ ਕਿਂ ਦਸ੍ਸੇਤਿ? ਏਵਰੂਪਸ੍ਸ ਨਾਮ ਉਗ੍ਗਤਸ੍ਸ ਪਞ੍ਞਾਤਸ੍ਸ ਯਸਸ੍ਸਿਨੋ ਉਪਰਿ ਵਾਚਂ ਭਾਸਮਾਨੇਨ ਵੀਮਂਸਿਤ੍ਵਾ ਉਪਧਾਰੇਤ੍ਵਾ ਮੁਖੇ ਆਰਕ੍ਖਂ ਠਪੇਤ੍ਵਾ ਭਾਸਿਤਬ੍ਬੋ ਹੋਤਿ. ਤਸ੍ਮਾ ਮਾ ਸਹਸਾ ਅਭਾਸਿ, ਮੁਖੇ ਆਰਕ੍ਖਂ ਠਪੇਹੀਤਿ ਦਸ੍ਸੇਤਿ. ਏਵਞ੍ਹਿ ਨੋ ਸੁਤ੍ਤੇ ਓਚਰਤੀਤਿ ਯਸ੍ਮਾ ਅਮ੍ਹਾਕਂ ਸੁਤ੍ਤੇ ਏਵਂ ਆਗਚ੍ਛਤਿ, ਨ ਮਯਂ ਮੁਖਾਰੁਲ਼੍ਹਿਚ੍ਛਾਮਤ੍ਤਂ ਵਦਾਮ, ਸੁਤ੍ਤੇ ਚ ਨਾਮ ਆਗਤਂ ਵਦਮਾਨਾ ਕਸ੍ਸ ਭਾਯੇਯ੍ਯਾਮ, ਤਸ੍ਮਾ ਸਮ੍ਮੁਖਾਪਿ ਨਂ ਵਦੇਯ੍ਯਾਮਾਤਿ ਅਤ੍ਥੋ. ਅਪ੍ਪੋਸ੍ਸੁਕ੍ਕੋਤਿ ਮਮ ਰਕ੍ਖਨਤ੍ਥਾਯ ਅਨੁਸ੍ਸੁਕ੍ਕੋ ਅਵਾਵਟੋ ਹੁਤ੍ਵਾਤਿ ਅਤ੍ਥੋ. ਵੁਤ੍ਤੋਵ ਨਂ ਵਦੇਯ੍ਯਾਤਿ ਮਯਾ ਵੁਤ੍ਤੋਵ ਹੁਤ੍ਵਾ ਅਪੁਚ੍ਛਿਤੋਵ ਕਥਂ ਸਮੁਟ੍ਠਾਪੇਤ੍ਵਾ ਅਮ੍ਬਜਮ੍ਬੂਆਦੀਨਿ ਗਹੇਤ੍ਵਾ ਵਿਯ ਅਪੂਰਯਮਾਨੋ ਮਯਾ ਕਥਿਤਨਿਯਾਮੇਨ ਭਵਂ ਭਾਰਦ੍ਵਾਜੋ ਵਦੇਯ੍ਯ, ਵਦਸ੍ਸੂਤਿ ਅਤ੍ਥੋ.

੨੦੮. ਅਸ੍ਸੋਸਿ ਖੋਤਿ ਸਤ੍ਥਾ ਆਲੋਕਂ ਵਡ੍ਢੇਤ੍ਵਾ ਦਿਬ੍ਬਚਕ੍ਖੁਨਾ ਮਾਗਣ੍ਡਿਯਂ ਤਤ੍ਥ ਆਗਤਂ ਅਦ੍ਦਸ, ਦ੍ਵਿਨ੍ਨਂ ਜਨਾਨਂ ਭਾਸਮਾਨਾਨਂ ਦਿਬ੍ਬਸੋਤੇਨ ਸਦ੍ਦਮ੍ਪਿ ਅਸ੍ਸੋਸਿ. ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਫਲਸਮਾਪਤ੍ਤਿਯਾ ਵੁਟ੍ਠਿਤੋ. ਸਂਵਿਗ੍ਗੋਤਿ ਪੀਤਿਸਂਵੇਗੇਨ ਸਂਵਿਗ੍ਗੋ ਚਲਿਤੋ ਕਮ੍ਪਿਤੋ. ਤਸ੍ਸ ਕਿਰ ਏਤਦਹੋਸਿ – ‘‘ਨੇਵ ਮਾਗਣ੍ਡਿਯੇਨ ਸਮਣਸ੍ਸ ਗੋਤਮਸ੍ਸ ਆਰੋਚਿਤਂ, ਨ ਮਯਾ. ਅਮ੍ਹੇ ਮੁਞ੍ਚਿਤ੍ਵਾ ਅਞ੍ਞੋ ਏਤ੍ਥ ਤਤਿਯੋਪਿ ਨਤ੍ਥਿ, ਸੁਤੋ ਭਵਿਸ੍ਸਤਿ ਅਮ੍ਹਾਕਂ ਸਦ੍ਦੋ ਤਿਖਿਣਸੋਤੇਨ ਪੁਰਿਸੇਨਾ’’ਤਿ. ਅਥਸ੍ਸ ਅਬ੍ਭਨ੍ਤਰੇ ਪੀਤਿ ਉਪ੍ਪਜ੍ਜਿਤ੍ਵਾ ਨਵਨਵੁਤਿਲੋਮਕੂਪਸਹਸ੍ਸਾਨਿ ਉਦ੍ਧਗ੍ਗਾਨਿ ਅਕਾਸਿ. ਤੇਨ ਵੁਤ੍ਤਂ ‘‘ਸਂਵਿਗ੍ਗੋ ਲੋਮਹਟ੍ਠਜਾਤੋ’’ਤਿ. ਅਥ ਖੋ ਮਾਗਣ੍ਡਿਯੋ ਪਰਿਬ੍ਬਾਜਕੋਤਿ ਪਰਿਬ੍ਬਾਜਕਸ੍ਸ ਪਭਿਨ੍ਨਮੁਖਂ ਵਿਯ ਬੀਜਂ ਪਰਿਪਾਕਗਤਂ ਞਾਣਂ, ਤਸ੍ਮਾ ਸਨ੍ਨਿਸੀਦਿਤੁਂ ਅਸਕ੍ਕੋਨ੍ਤੋ ਆਹਿਣ੍ਡਮਾਨੋ ਪੁਨ ਸਤ੍ਥੁ ਸਨ੍ਤਿਕਂ ਆਗਨ੍ਤ੍ਵਾ ਏਕਮਨ੍ਤਂ ਨਿਸੀਦਿ. ਤਂ ਦਸ੍ਸੇਤੁਂ ‘‘ਅਥ ਖੋ ਮਾਗਣ੍ਡਿਯੋ’’ਤਿਆਦਿ ਵੁਤ੍ਤਂ.

੨੦੯. ਸਤ੍ਥਾ – ‘‘ਏਵਂ ਕਿਰ ਤ੍ਵਂ, ਮਾਗਣ੍ਡਿਯ, ਮਂ ਅਵਚਾ’’ਤਿ ਅਵਤ੍ਵਾਵ ਚਕ੍ਖੁਂ ਖੋ, ਮਾਗਣ੍ਡਿਯਾਤਿ ਪਰਿਬ੍ਬਾਜਕਸ੍ਸ ਧਮ੍ਮਦੇਸਨਂ ਆਰਭਿ. ਤਤ੍ਥ ਵਸਨਟ੍ਠਾਨਟ੍ਠੇਨ ਰੂਪਂ ਚਕ੍ਖੁਸ੍ਸ ਆਰਾਮੋਤਿ ਚਕ੍ਖੁ ਰੂਪਾਰਾਮਂ. ਰੂਪੇ ਰਤਨ੍ਤਿ ਰੂਪਰਤਂ. ਰੂਪੇਨ ਚਕ੍ਖੁ ਆਮੋਦਿਤਂ ਪਮੋਦਿਤਨ੍ਤਿ ਰੂਪਸਮੁਦਿਤਂ. ਦਨ੍ਤਨ੍ਤਿ ਨਿਬ੍ਬਿਸੇਵਨਂ. ਗੁਤ੍ਤਨ੍ਤਿ ਗੋਪਿਤਂ. ਰਕ੍ਖਿਤਨ੍ਤਿ ਠਪਿਤਰਕ੍ਖਂ. ਸਂਵੁਤਨ੍ਤਿ ਪਿਹਿਤਂ. ਸਂਵਰਾਯਾਤਿ ਪਿਧਾਨਤ੍ਥਾਯ.

੨੧੦. ਪਰਿਚਾਰਿਤਪੁਬ੍ਬੋਤਿ ਅਭਿਰਮਿਤਪੁਬ੍ਬੋ. ਰੂਪਪਰਿਲ਼ਾਹਨ੍ਤਿ ਰੂਪਂ ਆਰਬ੍ਭ ਉਪ੍ਪਜ੍ਜਨਪਰਿਲ਼ਾਹਂ. ਇਮਸ੍ਸ ਪਨ ਤੇ, ਮਾਗਣ੍ਡਿਯ, ਕਿਮਸ੍ਸ ਵਚਨੀਯਨ੍ਤਿ ਇਮਸ੍ਸ ਰੂਪਂ ਪਰਿਗ੍ਗਣ੍ਹਿਤ੍ਵਾ ਅਰਹਤ੍ਤਪ੍ਪਤ੍ਤਸ੍ਸ ਖੀਣਾਸਵਸ੍ਸ ਤਯਾ ਕਿਂ ਵਚਨਂ ਵਤ੍ਤਬ੍ਬਂ ਅਸ੍ਸ, ਵੁਡ੍ਢਿਹਤੋ ਮਰਿਯਾਦਕਾਰਕੋਤਿ ਇਦਂ ਵਤ੍ਤਬ੍ਬਂ, ਨ ਵਤ੍ਤਬ੍ਬਨ੍ਤਿ ਪੁਚ੍ਛਤਿ. ਨ ਕਿਞ੍ਚਿ, ਭੋ ਗੋਤਮਾਤਿ, ਭੋ ਗੋਤਮ, ਕਿਞ੍ਚਿ ਵਤ੍ਤਬ੍ਬਂ ਨਤ੍ਥਿ. ਸੇਸਦ੍ਵਾਰੇਸੁਪਿ ਏਸੇਵ ਨਯੋ.

੨੧੧. ਇਦਾਨਿ ਯਸ੍ਮਾ ਤਯਾ ਪਞ੍ਚਕ੍ਖਨ੍ਧੇ ਪਰਿਗ੍ਗਹੇਤ੍ਵਾ ਅਰਹਤ੍ਤਪ੍ਪਤ੍ਤਸ੍ਸ ਖੀਣਾਸਵਸ੍ਸ ਕਿਞ੍ਚਿ ਵਤ੍ਤਬ੍ਬਂ ਨਤ੍ਥਿ, ਅਹਞ੍ਚ ਪਞ੍ਚਕ੍ਖਨ੍ਧੇ ਪਰਿਗ੍ਗਹੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋ, ਤਸ੍ਮਾ ਅਹਮ੍ਪਿ ਤੇ ਨ ਕਿਞ੍ਚਿ ਵਤ੍ਤਬ੍ਬੋਤਿ ਦਸ੍ਸੇਤੁਂ ਅਹਂ ਖੋ ਪਨਾਤਿਆਦਿਮਾਹ. ਤਸ੍ਸ ਮਯ੍ਹਂ ਮਾਗਣ੍ਡਿਯਾਤਿ ਗਿਹਿਕਾਲੇ ਅਤ੍ਤਨੋ ਸਮ੍ਪਤ੍ਤਿਂ ਦਸ੍ਸੇਨ੍ਤੋ ਆਹ. ਤਤ੍ਥ ਵਸ੍ਸਿਕੋਤਿਆਦੀਸੁ ਯਤ੍ਥ ਸੁਖਂ ਹੋਤਿ ਵਸ੍ਸਕਾਲੇ ਵਸਿਤੁਂ, ਅਯਂ ਵਸ੍ਸਿਕੋ. ਇਤਰੇਸੁਪਿ ਏਸੇਵ ਨਯੋ. ਅਯਂ ਪਨੇਤ੍ਥ ਵਚਨਤ੍ਥੋ – ਵਸ੍ਸਂ ਵਾਸੋ ਵਸ੍ਸਂ, ਵਸ੍ਸਂ ਅਰਹਤੀਤਿ ਵਸ੍ਸਿਕੋ. ਇਤਰੇਸੁਪਿ ਏਸੇਵ ਨਯੋ.

ਤਤ੍ਥ ਵਸ੍ਸਿਕੋ ਪਾਸਾਦੋ ਨਾਤਿਉਚ੍ਚੋ ਹੋਤਿ ਨਾਤਿਨੀਚੋ, ਦ੍ਵਾਰਵਾਤਪਾਨਾਨਿਪਿਸ੍ਸ ਨਾਤਿਤਨੂਨਿ ਨਾਤਿਬਹੂਨਿ, ਭੂਮਤ੍ਥਰਣਪਚ੍ਚਤ੍ਥਰਣਖਜ੍ਜਭੋਜ੍ਜਾਨਿਪੇਤ੍ਥ ਮਿਸ੍ਸਕਾਨੇਵ ਵਟ੍ਟਨ੍ਤਿ. ਹੇਮਨ੍ਤਿਕੇ ਥਮ੍ਭਾਪਿ ਭਿਤ੍ਤਿਯੋਪਿ ਨੀਚਾ ਹੋਨ੍ਤਿ, ਦ੍ਵਾਰਵਾਤਪਾਨਾਨਿ ਤਨੁਕਾਨਿ ਸੁਖੁਮਚ੍ਛਿਦ੍ਦਾਨਿ. ਉਣ੍ਹਪਵੇਸਨਤ੍ਥਾਯ ਭਿਤ੍ਤਿਨਿਯੂਹਾਨਿ ਨੀਹਰੀਯਨ੍ਤਿ. ਭੂਮਤ੍ਥਰਣਪਚ੍ਚਤ੍ਥਰਣਨਿਵਾਸਨਪਾਰੁਪਨਾਨਿ ਪਨੇਤ੍ਥ ਉਣ੍ਹਵੀਰਿਯਾਨਿ ਕਮ੍ਬਲਾਦੀਨਿ ਵਟ੍ਟਨ੍ਤਿ. ਖਜ੍ਜਭੋਜ੍ਜਂ ਸਿਨਿਦ੍ਧਂ ਕਟੁਕਸਨ੍ਨਿਸ੍ਸਿਤਞ੍ਚ. ਗਿਮ੍ਹਿਕੇ ਥਮ੍ਭਾਪਿ ਭਿਤ੍ਤਿਯੋਪਿ ਉਚ੍ਚਾ ਹੋਨ੍ਤਿ. ਦ੍ਵਾਰਵਾਤਪਾਨਾਨਿ ਪਨੇਤ੍ਥ ਬਹੂਨਿ ਵਿਪੁਲਜਾਲਾਨਿ ਭਵਨ੍ਤਿ. ਭੂਮਤ੍ਥਰਣਾਦੀਨਿ ਦੁਕੂਲਮਯਾਨਿ ਵਟ੍ਟਨ੍ਤਿ, ਖਜ੍ਜਭੋਜ੍ਜਾਨਿ ਮਧੁਰਰਸਸੀਤਵੀਰਿਯਾਨਿ. ਵਾਤਪਾਨਸਮੀਪੇਸੁ ਚੇਤ੍ਥ ਨਵ ਚਾਟਿਯੋ ਠਪੇਤ੍ਵਾ ਉਦਕਸ੍ਸ ਪੂਰੇਤ੍ਵਾ ਨੀਲੁਪ੍ਪਲਾਦੀਹਿ ਸਞ੍ਛਾਦੇਨ੍ਤਿ. ਤੇਸੁ ਤੇਸੁ ਪਦੇਸੇਸੁ ਉਦਕਯਨ੍ਤਾਨਿ ਕਰੋਨ੍ਤਿ, ਯੇਹਿ ਦੇਵੇ ਵਸ੍ਸਨ੍ਤੇ ਵਿਯ ਉਦਕਧਾਰਾ ਨਿਕ੍ਖਮਨ੍ਤਿ.

ਬੋਧਿਸਤ੍ਤਸ੍ਸ ਪਨ ਅਟ੍ਠਸਤਸੁਵਣ੍ਣਘਟੇ ਚ ਰਜਤਘਟੇ ਚ ਗਨ੍ਧੋਦਕਸ੍ਸ ਪੂਰੇਤ੍ਵਾ ਨੀਲੁਪ੍ਪਲਗਚ੍ਛਕੇ ਕਤ੍ਵਾ ਸਯਨਂ ਪਰਿਵਾਰੇਤ੍ਵਾ ਠਪਯਿਂਸੁ. ਮਹਨ੍ਤੇਸੁ ਲੋਹਕਟਾਹੇਸੁ ਗਨ੍ਧਕਲਲਂ ਪੂਰੇਤ੍ਵਾ ਨੀਲੁਪ੍ਪਲਪਦੁਮਪੁਣ੍ਡਰੀਕਾਨਿ ਰੋਪੇਤ੍ਵਾ ਉਤੁਗ੍ਗਹਣਤ੍ਥਾਯ ਤਤ੍ਥ ਤਤ੍ਥ ਠਪੇਸੁਂ. ਸੂਰਿਯਰਸ੍ਮੀਹਿ ਪੁਪ੍ਫਾਨਿ ਪੁਪ੍ਫਨ੍ਤਿ. ਨਾਨਾਵਿਧਾ ਭਮਰਗਣਾ ਪਾਸਾਦਂ ਪਵਿਸਿਤ੍ਵਾ ਪੁਪ੍ਫੇਸੁ ਰਸਂ ਗਣ੍ਹਨ੍ਤਾ ਵਿਚਰਨ੍ਤਿ. ਪਾਸਾਦੋ ਅਤਿਸੁਗਨ੍ਧੋ ਹੋਤਿ. ਯਮਕਭਿਤ੍ਤਿਯਾ ਅਨ੍ਤਰੇ ਲੋਹਨਾਲ਼ਿਂ ਠਪੇਤ੍ਵਾ ਨਵਭੂਮਿਕਪਾਸਾਦਸ੍ਸ ਉਪਰਿ ਆਕਾਸਙ੍ਗਣੇ ਰਤਨਮਣ੍ਡਪਮਤ੍ਥਕੇ ਸੁਖੁਮਚ੍ਛਿਦ੍ਦਕਂ ਜਾਲਂ ਬਦ੍ਧਂ ਅਹੋਸਿ. ਏਕਸ੍ਮਿਂ ਠਾਨੇ ਸੁਕ੍ਖਮਹਿਂਸਚਮ੍ਮਂ ਪਸਾਰੇਤਿ. ਬੋਧਿਸਤ੍ਤਸ੍ਸ ਉਦਕਕੀਲ਼ਨਵੇਲਾਯ ਮਹਿਂਸਚਮ੍ਮੇ ਪਾਸਾਣਗੁਲ਼ੇ ਖਿਪਨ੍ਤਿ, ਮੇਘਥਨਿਤਸਦ੍ਦੋ ਵਿਯ ਹੋਤਿ. ਹੇਟ੍ਠਾ ਯਨ੍ਤਂ ਪਰਿਵਤ੍ਤੇਨ੍ਤਿ, ਉਦਕਂ ਅਭਿਰੁਹਿਤ੍ਵਾ ਜਾਲਮਤ੍ਥਕੇ ਪਤਤਿ, ਵਸ੍ਸਪਤਨਸਲਿਲਂ ਵਿਯ ਹੋਤਿ. ਤਦਾ ਬੋਧਿਸਤ੍ਤੋ ਨੀਲਪਟਂ ਨਿਵਾਸੇਤਿ, ਨੀਲਪਟਂ ਪਾਰੁਪਤਿ, ਨੀਲਪਸਾਧਨਂ ਪਸਾਧੇਤਿ. ਪਰਿਵਾਰਾਪਿਸ੍ਸ ਚਤ੍ਤਾਲੀਸਨਾਟਕਸਹਸ੍ਸਾਨਿ ਨੀਲਵਤ੍ਥਾਭਰਣਾਨੇਵ ਨੀਲਵਿਲੇਪਨਾਨਿ ਹੁਤ੍ਵਾ ਮਹਾਪੁਰਿਸਂ ਪਰਿਵਾਰੇਤ੍ਵਾ ਰਤਨਮਣ੍ਡਪਂ ਗਚ੍ਛਨ੍ਤਿ. ਦਿਵਸਭਾਗਂ ਉਦਕਕੀਲ਼ਂ ਕੀਲ਼ਨ੍ਤੋ ਸੀਤਲਂ ਉਤੁਸੁਖਂ ਅਨੁਭੋਤਿ.

ਪਾਸਾਦਸ੍ਸ ਚਤੂਸੁ ਦਿਸਾਸੁ ਚਤ੍ਤਾਰੋ ਸਰਾ ਹੋਨ੍ਤਿ. ਦਿਵਾਕਾਲੇ ਨਾਨਾਵਣ੍ਣਸਕੁਣਗਣਾ ਪਾਚੀਨਸਰਤੋ ਵੁਟ੍ਠਾਯ ਵਿਰਵਮਾਨਾ ਪਾਸਾਦਮਤ੍ਥਕੇਨ ਪਚ੍ਛਿਮਸਰਂ ਗਚ੍ਛਨ੍ਤਿ. ਪਚ੍ਛਿਮਸਰਤੋ ਵੁਟ੍ਠਾਯ ਪਾਚੀਨਸਰਂ, ਉਤ੍ਤਰਸਰਤੋ ਦਕ੍ਖਿਣਸਰਂ, ਦਕ੍ਖਿਣਸਰਤੋ ਉਤ੍ਤਰਸਰਂ ਗਚ੍ਛਨ੍ਤਿ, ਅਨ੍ਤਰਵਸ੍ਸਸਮਯੋ ਵਿਯ ਹੋਤਿ. ਹੇਮਨ੍ਤਿਕਪਾਸਾਦੋ ਪਨ ਪਞ੍ਚਭੂਮਿਕੋ ਅਹੋਸਿ, ਵਸ੍ਸਿਕਪਾਸਾਦੋ ਸਤ੍ਤਭੂਮਿਕੋ.

ਨਿਪ੍ਪੁਰਿਸੇਹੀਤਿ ਪੁਰਿਸਵਿਰਹਿਤੇਹਿ. ਨ ਕੇਵਲਞ੍ਚੇਤ੍ਥ ਤੂਰਿਯਾਨੇਵ ਨਿਪ੍ਪੁਰਿਸਾਨਿ, ਸਬ੍ਬਟ੍ਠਾਨਾਨਿਪਿ ਨਿਪ੍ਪੁਰਿਸਾਨੇਵ. ਦੋਵਾਰਿਕਾਪਿ ਇਤ੍ਥਿਯੋਵ, ਨ੍ਹਾਪਨਾਦਿਪਰਿਕਮ੍ਮਕਰਾਪਿ ਇਤ੍ਥਿਯੋਵ. ਰਾਜਾ ਕਿਰ – ‘‘ਤਥਾਰੂਪਂ ਇਸ੍ਸਰਿਯਸੁਖਸਮ੍ਪਤ੍ਤਿਂ ਅਨੁਭਵਮਾਨਸ੍ਸ ਪੁਰਿਸਂ ਦਿਸ੍ਵਾ ਪਰਿਸਙ੍ਕਾ ਉਪ੍ਪਜ੍ਜਤਿ, ਸਾ ਮੇ ਪੁਤ੍ਤਸ੍ਸ ਮਾ ਅਹੋਸੀ’’ਤਿ ਸਬ੍ਬਕਿਚ੍ਚੇਸੁ ਇਤ੍ਥਿਯੋਵ ਠਪੇਸਿ. ਤਾਯ ਰਤਿਯਾ ਰਮਮਾਨੋਤਿ ਇਦਂ ਚਤੁਤ੍ਥਜ੍ਝਾਨਿਕਫਲਸਮਾਪਤ੍ਤਿਰਤਿਂ ਸਨ੍ਧਾਯ ਵੁਤ੍ਤਂ.

੨੧੨. ਗਹਪਤਿ ਵਾ ਗਹਪਤਿਪੁਤ੍ਤੋ ਵਾਤਿ ਏਤ੍ਥ ਯਸ੍ਮਾ ਖਤ੍ਤਿਯਾਨਂ ਸੇਤਚ੍ਛਤ੍ਤਸ੍ਮਿਂਯੇਵ ਪਤ੍ਥਨਾ ਹੋਤਿ, ਮਹਾ ਚ ਨੇਸਂ ਪਪਞ੍ਚੋ, ਬ੍ਰਾਹ੍ਮਣਾ ਮਨ੍ਤੇਹਿ ਅਤਿਤ੍ਤਾ ਮਨ੍ਤੇ ਗਵੇਸਨ੍ਤਾ ਵਿਚਰਨ੍ਤਿ, ਗਹਪਤਿਨੋ ਪਨ ਮੁਦ੍ਦਾਗਣਨਮਤ੍ਤਂ ਉਗ੍ਗਹਿਤਕਾਲਤੋ ਪਟ੍ਠਾਯ ਸਮ੍ਪਤ੍ਤਿਂਯੇਵ ਅਨੁਭਵਨ੍ਤਿ, ਤਸ੍ਮਾ ਖਤ੍ਤਿਯਬ੍ਰਾਹ੍ਮਣੇ ਅਗ੍ਗਹੇਤ੍ਵਾ ‘‘ਗਹਪਤਿ ਵਾ ਗਹਪਤਿਪੁਤ੍ਤੋ ਵਾ’’ਤਿ ਆਹ. ਆਵਟ੍ਟੇਯ੍ਯਾਤਿ ਮਾਨੁਸਕਕਾਮਹੇਤੁ ਆਵਟ੍ਟੋ ਭਵੇਯ੍ਯਾਤਿ ਅਤ੍ਥੋ. ਅਭਿਕ੍ਕਨ੍ਤਤਰਾਤਿ ਵਿਸਿਟ੍ਠਤਰਾ. ਪਣੀਤਤਰਾਤਿ ਅਤਪ੍ਪਕਤਰਾ. ਵੁਤ੍ਤਮ੍ਪਿ ਚੇਤਂ –

‘‘ਕੁਸਗ੍ਗੇਨੁਦਕਮਾਦਾਯ, ਸਮੁਦ੍ਦੇ ਉਦਕਂ ਮਿਨੇ;

ਏਵਂ ਮਾਨੁਸਕਾ ਕਾਮਾ, ਦਿਬ੍ਬਕਾਮਾਨ ਸਨ੍ਤਿਕੇ’’ਤਿ. (ਜਾ. ੨.੨੧.੩੮੯) –

ਸਮਧਿਗਯ੍ਹ ਤਿਟ੍ਠਤੀਤਿ ਦਿਬ੍ਬਸੁਖਂ ਗਣ੍ਹਿਤ੍ਵਾ ਤਤੋ ਵਿਸਿਟ੍ਠਤਰਾ ਹੁਤ੍ਵਾ ਤਿਟ੍ਠਤਿ.

ਓਪਮ੍ਮਸਂਸਨ੍ਦਨਂ ਪਨੇਤ੍ਥ ਏਵਂ ਵੇਦਿਤਬ੍ਬਂ – ਗਹਪਤਿਸ੍ਸ ਪਞ੍ਚਹਿ ਕਾਮਗੁਣੇਹਿ ਸਮਙ੍ਗੀਭੂਤਕਾਲੋ ਵਿਯ ਬੋਧਿਸਤ੍ਤਸ੍ਸ ਤੀਸੁ ਪਾਸਾਦੇਸੁ ਚਤ੍ਤਾਲੀਸਸਹਸ੍ਸਇਤ੍ਥਿਮਜ੍ਝੇ ਮੋਦਨਕਾਲੋ, ਤਸ੍ਸ ਸੁਚਰਿਤਂ ਪੂਰੇਤ੍ਵਾ ਸਗ੍ਗੇ ਨਿਬ੍ਬਤ੍ਤਕਾਲੋ ਵਿਯ ਬੋਧਿਸਤ੍ਤਸ੍ਸ ਅਭਿਨਿਕ੍ਖਮਨਂ ਕਤ੍ਵਾ ਬੋਧਿਪਲ੍ਲਙ੍ਕੇ ਸਬ੍ਬਞ੍ਞੁਤਂ ਪਟਿਵਿਦ੍ਧਕਾਲੋ, ਤਸ੍ਸ ਨਨ੍ਦਨਵਨੇ ਸਮ੍ਪਤ੍ਤਿਂ ਅਨੁਭਵਨਕਾਲੋ ਵਿਯ ਤਥਾਗਤਸ੍ਸ ਚਤੁਤ੍ਥਜ੍ਝਾਨਿਕਫਲਸਮਾਪਤ੍ਤਿਰਤਿਯਾ ਵੀਤਿਵਤ੍ਤਨਕਾਲੋ, ਤਸ੍ਸ ਮਾਨੁਸਕਾਨਂ ਪਞ੍ਚਨ੍ਨਂ ਕਾਮਗੁਣਾਨਂ ਅਪਤ੍ਥਨਕਾਲੋ ਵਿਯ ਤਥਾਗਤਸ੍ਸ ਚਤੁਤ੍ਥਜ੍ਝਾਨਿਕਫਲਸਮਾਪਤ੍ਤਿਰਤਿਯਾ ਵੀਤਿਨਾਮੇਨ੍ਤਸ੍ਸ ਹੀਨਜਨਸੁਖਸ੍ਸ ਅਪਤ੍ਥਨਕਾਲੋਤਿ.

੨੧੩. ਸੁਖੀਤਿ ਪਠਮਂ ਦੁਕ੍ਖਿਤੋ ਪਚ੍ਛਾ ਸੁਖਿਤੋ ਅਸ੍ਸ. ਸੇਰੀਤਿ ਪਠਮਂ ਵੇਜ੍ਜਦੁਤਿਯਕੋ ਪਚ੍ਛਾ ਸੇਰੀ ਏਕਕੋ ਭਵੇਯ੍ਯ. ਸਯਂਵਸੀਤਿ ਪਠਮਂ ਵੇਜ੍ਜਸ੍ਸ ਵਸੇ ਵਤ੍ਤਮਾਨੋ ਵੇਜ੍ਜੇਨ ਨਿਸੀਦਾਤਿ ਵੁਤ੍ਤੇ ਨਿਸੀਦਿ, ਨਿਪਜ੍ਜਾਤਿ ਵੁਤ੍ਤੇ ਨਿਪਜ੍ਜਿ, ਭੁਞ੍ਜਾਤਿ ਵੁਤ੍ਤੇ ਭੁਞ੍ਜਿ, ਪਿਵਾਤਿ ਵੁਤ੍ਤੇ ਪਿਵਿ, ਪਚ੍ਛਾ ਸਯਂਵਸੀ ਜਾਤੋ. ਯੇਨ ਕਾਮਂ ਗਮੋਤਿ ਪਠਮਂ ਇਚ੍ਛਿਤਿਚ੍ਛਿਤਟ੍ਠਾਨਂ ਗਨ੍ਤੁਂ ਨਾਲਤ੍ਥ, ਪਚ੍ਛਾ ਰੋਗੇ ਵੂਪਸਨ੍ਤੇ ਵਨਦਸ੍ਸਨ-ਗਿਰਿਦਸ੍ਸਨ-ਪਬ੍ਬਤਦਸ੍ਸਨਾਦੀਸੁਪਿ ਯੇਨਕਾਮਂ ਗਮੋ ਜਾਤੋ, ਯਤ੍ਥ ਯਤ੍ਥੇਵ ਗਨ੍ਤੁਂ ਇਚ੍ਛਤਿ, ਤਤ੍ਥ ਤਤ੍ਥੇਵ ਗਚ੍ਛੇਯ੍ਯ.

ਏਤ੍ਥਾਪਿ ਇਦਂ ਓਪਮ੍ਮਸਂਸਨ੍ਦਨਂ – ਪੁਰਿਸਸ੍ਸ ਕੁਟ੍ਠਿਕਾਲੋ ਵਿਯ ਹਿ ਬੋਧਿਸਤ੍ਤਸ੍ਸ ਅਗਾਰਮਜ੍ਝੇ ਵਸਨਕਾਲੋ, ਅਙ੍ਗਾਰਕਪਲ੍ਲਂ ਵਿਯ ਏਕਂ ਕਾਮਵਤ੍ਥੁ, ਦ੍ਵੇ ਕਪਲ੍ਲਾਨਿ ਵਿਯ ਦ੍ਵੇ ਵਤ੍ਥੂਨਿ, ਸਕ੍ਕਸ੍ਸ ਪਨ ਦੇਵਰਞ੍ਞੋ ਅਡ੍ਢਤੇਯ੍ਯਕੋਟਿਯਾਨਿ ਅਙ੍ਗਾਰਕਪਲ੍ਲਾਨਿ ਵਿਯ ਅਡ੍ਢਤਿਯਨਾਟਕਕੋਟਿਯੋ, ਨਖੇਹਿ ਵਣਮੁਖਾਨਿ ਤਚ੍ਛੇਤ੍ਵਾ ਅਙ੍ਗਾਰਕਪਲ੍ਲੇ ਪਰਿਤਾਪਨਂ ਵਿਯ ਵਤ੍ਥੁਪਟਿਸੇਵਨਂ, ਭੇਸਜ੍ਜਂ ਆਗਮ੍ਮ ਅਰੋਗਕਾਲੋ ਵਿਯ ਕਾਮੇਸੁ ਆਦੀਨਵਂ ਨੇਕ੍ਖਮ੍ਮੇ ਚ ਆਨਿਸਂਸਂ ਦਿਸ੍ਵਾ ਨਿਕ੍ਖਮ੍ਮ ਬੁਦ੍ਧਭੂਤਕਾਲੇ ਚਤੁਤ੍ਥਜ੍ਝਾਨਿਕਫਲਸਮਾਪਤ੍ਤਿਰਤਿਯਾ ਵੀਤਿਵਤ੍ਤਨਕਾਲੋ, ਅਞ੍ਞਂ ਕੁਟ੍ਠਿਪੁਰਿਸਂ ਦਿਸ੍ਵਾ ਅਪਤ੍ਥਨਕਾਲੋ ਵਿਯ ਤਾਯ ਰਤਿਯਾ ਵੀਤਿਨਾਮੇਨ੍ਤਸ੍ਸ ਹੀਨਜਨਰਤਿਯਾ ਅਪਤ੍ਥਨਕਾਲੋਤਿ.

੨੧੪. ਉਪਹਤਿਨ੍ਦ੍ਰਿਯੋਤਿ ਕਿਮਿਰਕੁਟ੍ਠੇਨ ਨਾਮ ਉਪਹਤਕਾਯਪ੍ਪਸਾਦੋ. ਉਪਹਤਿਨ੍ਦ੍ਰਿਯਾਤਿ ਉਪਹਤਪਞ੍ਞਿਨ੍ਦ੍ਰਿਯਾ. ਤੇ ਯਥਾ ਸੋ ਉਪਹਤਕਾਯਿਨ੍ਦ੍ਰਿਯੋ ਕੁਟ੍ਠੀ ਦੁਕ੍ਖਸਮ੍ਫਸ੍ਸਸ੍ਮਿਂਯੇਵ ਅਗ੍ਗਿਸ੍ਮਿਂ ਸੁਖਮਿਤਿ ਵਿਪਰੀਤਸਞ੍ਞਂ ਪਚ੍ਚਲਤ੍ਥ, ਏਵਂ ਪਞ੍ਞਿਨ੍ਦ੍ਰਿਯਸ੍ਸ ਉਪਹਤਤ੍ਤਾ ਦੁਕ੍ਖਸਮ੍ਫਸ੍ਸੇਸ੍ਵੇਵ ਕਾਮੇਸੁ ਸੁਖਮਿਤਿ ਵਿਪਰੀਤਸਞ੍ਞਂ ਪਚ੍ਚਲਤ੍ਥੁਂ.

੨੧੫. ਅਸੁਚਿਤਰਾਨਿ ਚੇਵਾਤਿਆਦੀਸੁ ਪਕਤਿਯਾਵ ਤਾਨਿ ਅਸੁਚੀਨਿ ਚ ਦੁਗ੍ਗਨ੍ਧਾਨਿ ਚ ਪੂਤੀਨਿ ਚ, ਇਦਾਨਿ ਪਨ ਅਸੁਚਿਤਰਾਨਿ ਚੇਵ ਦੁਗ੍ਗਨ੍ਧਤਰਾਨਿ ਚ ਪੂਤਿਤਰਾਨਿ ਚ ਹੋਨ੍ਤਿ. ਕਾਚੀਤਿ ਤਸ੍ਸ ਹਿ ਪਰਿਤਾਪੇਨ੍ਤਸ੍ਸ ਚ ਕਣ੍ਡੂਵਨ੍ਤਸ੍ਸ ਚ ਪਾਣਕਾ ਅਨ੍ਤੋ ਪਵਿਸਨ੍ਤਿ, ਦੁਟ੍ਠਲੋਹਿਤਦੁਟ੍ਠਪੁਬ੍ਬਾ ਪਗ੍ਘਰਨ੍ਤਿ. ਏਵਮਸ੍ਸ ਕਾਚਿ ਅਸ੍ਸਾਦਮਤ੍ਤਾ ਹੋਤਿ.

ਆਰੋਗ੍ਯਪਰਮਾਤਿ ਗਾਥਾਯ ਯੇ ਕੇਚਿ ਧਨਲਾਭਾ ਵਾ ਯਸਲਾਭਾ ਵਾ ਪੁਤ੍ਤਲਾਭਾ ਵਾ ਅਤ੍ਥਿ, ਆਰੋਗ੍ਯਂ ਤੇਸਂ ਪਰਮਂ ਉਤ੍ਤਮਂ, ਨਤ੍ਥਿ ਤਤੋ ਉਤ੍ਤਰਿਤਰੋ ਲਾਭੋਤਿ, ਆਰੋਗ੍ਯਪਰਮਾ ਲਾਭਾ. ਯਂਕਿਞ੍ਚਿ ਝਾਨਸੁਖਂ ਵਾ ਮਗ੍ਗਸੁਖਂ ਵਾ ਫਲਸੁਖਂ ਵਾ ਅਤ੍ਥਿ, ਨਿਬ੍ਬਾਨਂ ਤਤ੍ਥ ਪਰਮਂ, ਨਤ੍ਥਿ ਤਤੋ ਉਤ੍ਤਰਿਤਰਂ ਸੁਖਨ੍ਤਿ ਨਿਬ੍ਬਾਨਂ ਪਰਮਂ ਸੁਖਂ. ਅਟ੍ਠਙ੍ਗਿਕੋ ਮਗ੍ਗਾਨਨ੍ਤਿ ਪੁਬ੍ਬਭਾਗਮਗ੍ਗਾਨਂ ਪੁਬ੍ਬਭਾਗਗਮਨੇਨੇਵ ਅਮਤਗਾਮੀਨਂ ਅਟ੍ਠਙ੍ਗਿਕੋ ਖੇਮੋ, ਨਤ੍ਥਿ ਤਤੋ ਖੇਮਤਰੋ ਅਞ੍ਞੋ ਮਗ੍ਗੋ. ਅਥ ਵਾ ਖੇਮਂ ਅਮਤਗਾਮਿਨਨ੍ਤਿ ਏਤ੍ਥ ਖੇਮਨ੍ਤਿਪਿ ਅਮਤਨ੍ਤਿਪਿ ਨਿਬ੍ਬਾਨਸ੍ਸੇਵ ਨਾਮਂ. ਯਾਵਤਾ ਪੁਥੁਸਮਣਬ੍ਰਾਹ੍ਮਣਾ ਪਰਪ੍ਪਵਾਦਾ ਖੇਮਗਾਮਿਨੋ ਚ ਅਮਤਗਾਮਿਨੋ ਚਾਤਿ ਲਦ੍ਧਿਵਸੇਨ ਗਹਿਤਾ, ਸਬ੍ਬੇਸਂ ਤੇਸਂ ਖੇਮਅਮਤਗਾਮੀਨਂ ਮਗ੍ਗਾਨਂ ਅਟ੍ਠਙ੍ਗਿਕੋ ਪਰਮੋ ਉਤ੍ਤਮੋਤਿ ਅਯਮੇਤ੍ਥ ਅਤ੍ਥੋ.

੨੧੬. ਆਚਰਿਯਪਾਚਰਿਯਾਨਨ੍ਤਿ ਆਚਰਿਯਾਨਞ੍ਚੇਵ ਆਚਰਿਯਾਚਰਿਯਾਨਞ੍ਚ. ਸਮੇਤੀਤਿ ਏਕਨਾਲ਼ਿਯਾ ਮਿਤਂ ਵਿਯ ਏਕਤੁਲਾਯ ਤੁਲਿਤਂ ਵਿਯ ਸਦਿਸਂ ਹੋਤਿ ਨਿਨ੍ਨਾਨਾਕਰਣਂ. ਅਨੋਮਜ੍ਜਤੀਤਿ ਪਾਣਿਂ ਹੇਟ੍ਠਾ ਓਤਾਰੇਨ੍ਤੋ ਮਜ੍ਜਤਿ – ‘‘ਇਦਂ ਤਂ, ਭੋ ਗੋਤਮ, ਆਰੋਗ੍ਯਂ, ਇਦਂ ਤਂ ਨਿਬ੍ਬਾਨ’’ਨ੍ਤਿ ਕਾਲੇਨ ਸੀਸਂ ਕਾਲੇਨ ਉਰਂ ਪਰਿਮਜ੍ਜਨ੍ਤੋ ਏਵਮਾਹ.

੨੧੭. ਛੇਕਨ੍ਤਿ ਸਮ੍ਪਨ੍ਨਂ. ਸਾਹੁਲ਼ਿਚੀਰੇਨਾਤਿ ਕਾਲ਼ਕੇਹਿ ਏਲ਼ਕਲੋਮੇਹਿ ਕਤਥੂਲਚੀਰੇਨ. ਸਙ੍ਕਾਰਚੋਲ਼ਕੇਨਾਤਿਪਿ ਵਦਨ੍ਤਿ. ਵਾਚਂ ਨਿਚ੍ਛਾਰੇਯ੍ਯਾਤਿ ਕਾਲੇਨ ਦਸਾਯ ਕਾਲੇਨ ਅਨ੍ਤੇ ਕਾਲੇਨ ਮਜ੍ਝੇ ਪਰਿਮਜ੍ਜਨ੍ਤੋ ਨਿਚ੍ਛਾਰੇਯ੍ਯ, ਵਦੇਯ੍ਯਾਤਿ ਅਤ੍ਥੋ. ਪੁਬ੍ਬਕੇਹੇਸਾਤਿ ਪੁਬ੍ਬਕੇਹਿ ਏਸਾ. ਵਿਪਸ੍ਸੀਪਿ ਹਿ ਭਗਵਾ…ਪੇ… ਕਸ੍ਸਪੋਪਿ ਭਗਵਾ ਚਤੁਪਰਿਸਮਜ੍ਝੇ ਨਿਸਿਨ੍ਨੋ ਇਮਂ ਗਾਥਂ ਅਭਾਸਿ, ‘‘ਅਤ੍ਥਨਿਸ੍ਸਿਤਗਾਥਾ’’ਤਿ ਮਹਾਜਨੋ ਉਗ੍ਗਣ੍ਹਿ. ਸਤ੍ਥਰਿ ਪਰਿਨਿਬ੍ਬੁਤੇ ਅਪਰਭਾਗੇ ਪਰਿਬ੍ਬਾਜਕਾਨਂ ਅਨ੍ਤਰਂ ਪਵਿਟ੍ਠਾ. ਤੇ ਪੋਤ੍ਥਕਗਤਂ ਕਤ੍ਵਾ ਪਦਦ੍ਵਯਮੇਵ ਰਕ੍ਖਿਤੁਂ ਸਕ੍ਖਿਂਸੁ. ਤੇਨਾਹ – ਸਾ ਏਤਰਹਿ ਅਨੁਪੁਬ੍ਬੇਨ ਪੁਥੁਜ੍ਜਨਗਾਥਾਤਿ.

੨੧੮. ਰੋਗੋਵ ਭੂਤੋਤਿ ਰੋਗਭੂਤੋ. ਸੇਸਪਦੇਸੁਪਿ ਏਸੇਵ ਨਯੋ. ਅਰਿਯਂ ਚਕ੍ਖੁਨ੍ਤਿ ਪਰਿਸੁਦ੍ਧਂ ਵਿਪਸ੍ਸਨਾਞਾਣਞ੍ਚੇਵ ਮਗ੍ਗਞਾਣਞ੍ਚ. ਪਹੋਤੀਤਿ ਸਮਤ੍ਥੋ. ਭੇਸਜ੍ਜਂ ਕਰੇਯ੍ਯਾਤਿ ਉਦ੍ਧਂਵਿਰੇਚਨਂ ਅਧੋਵਿਰੇਚਨਂ ਅਞ੍ਜਨਞ੍ਚਾਤਿ ਭੇਸਜ੍ਜਂ ਕਰੇਯ੍ਯ.

੨੧੯. ਨ ਚਕ੍ਖੂਨਿ ਉਪ੍ਪਾਦੇਯ੍ਯਾਤਿ ਯਸ੍ਸ ਹਿ ਅਨ੍ਤਰਾ ਪਿਤ੍ਤਸੇਮ੍ਹਾਦਿਪਲਿਵੇਠੇਨ ਚਕ੍ਖੁਪਸਾਦੋ ਉਪਹਤੋ ਹੋਤਿ, ਸੋ ਛੇਕਂ ਵੇਜ੍ਜਂ ਆਗਮ੍ਮ ਸਪ੍ਪਾਯਭੇਸਜ੍ਜਂ ਸੇਵਨ੍ਤੋ ਚਕ੍ਖੂਨਿ ਉਪ੍ਪਾਦੇਤਿ ਨਾਮ. ਜਚ੍ਚਨ੍ਧਸ੍ਸ ਪਨ ਮਾਤੁਕੁਚ੍ਛਿਯਂਯੇਵ ਵਿਨਟ੍ਠਾਨਿ, ਤਸ੍ਮਾ ਸੋ ਨ ਲਭਤਿ. ਤੇਨ ਵੁਤ੍ਤਂ ‘‘ਨ ਚਕ੍ਖੂਨਿ ਉਪ੍ਪਾਦੇਯ੍ਯਾ’’ਤਿ.

੨੨੦. ਦੁਤਿਯਵਾਰੇ ਜਚ੍ਚਨ੍ਧੋਤਿ ਜਾਤਕਾਲਤੋ ਪਟ੍ਠਾਯ ਪਿਤ੍ਤਾਦਿਪਲਿਵੇਠੇਨ ਅਨ੍ਧੋ. ਅਮੁਸ੍ਮਿਨ੍ਤਿ ਤਸ੍ਮਿਂ ਪੁਬ੍ਬੇ ਵੁਤ੍ਤੇ. ਅਮਿਤ੍ਤਤੋਪਿ ਦਹੇਯ੍ਯਾਤਿ ਅਮਿਤ੍ਤੋ ਮੇ ਅਯਨ੍ਤਿ ਏਵਂ ਅਮਿਤ੍ਤਤੋ ਠਪੇਯ੍ਯ. ਦੁਤਿਯਪਦੇਪਿ ਏਸੇਵ ਨਯੋ. ਇਮਿਨਾ ਚਿਤ੍ਤੇਨਾਤਿ ਵਟ੍ਟੇ ਅਨੁਗਤਚਿਤ੍ਤੇਨ. ਤਸ੍ਸ ਮੇ ਉਪਾਦਾਨਪਚ੍ਚਯਾਤਿ ਏਕਸਨ੍ਧਿ ਦ੍ਵਿਸਙ੍ਖੇਪੋ ਪਚ੍ਚਯਾਕਾਰੋ ਕਥਿਤੋ, ਵਟ੍ਟਂ ਵਿਭਾਵਿਤਂ.

੨੨੧. ਧਮ੍ਮਾਨੁਧਮ੍ਮਨ੍ਤਿ ਧਮ੍ਮਸ੍ਸ ਅਨੁਧਮ੍ਮਂ ਅਨੁਚ੍ਛਵਿਕਂ ਪਟਿਪਦਂ. ਇਮੇ ਰੋਗਾ ਗਣ੍ਡਾ ਸਲ੍ਲਾਤਿ ਪਞ੍ਚਕ੍ਖਨ੍ਧੇ ਦਸ੍ਸੇਤਿ. ਉਪਾਦਾਨਨਿਰੋਧਾਤਿ ਵਿਵਟ੍ਟਂ ਦਸ੍ਸੇਨ੍ਤੋ ਆਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਾਗਣ੍ਡਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਸਨ੍ਦਕਸੁਤ੍ਤਵਣ੍ਣਨਾ

੨੨੩. ਏਵਂ ਮੇ ਸੁਤਨ੍ਤਿ ਸਨ੍ਦਕਸੁਤ੍ਤਂ. ਤਤ੍ਥ ਪਿਲਕ੍ਖਗੁਹਾਯਨ੍ਤਿ ਤਸ੍ਸਾ ਗੁਹਾਯ ਦ੍ਵਾਰੇ ਪਿਲਕ੍ਖਰੁਕ੍ਖੋ ਅਹੋਸਿ, ਤਸ੍ਮਾ ਪਿਲਕ੍ਖਗੁਹਾਤ੍ਵੇਵ ਸਙ੍ਖਂ ਗਤਾ. ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਵਿਵੇਕਤੋ ਵੁਟ੍ਠਿਤੋ. ਦੇਵਕਤਸੋਬ੍ਭੋਤਿ ਵਸ੍ਸੋਦਕੇਨੇਵ ਤਿਨ੍ਨਟ੍ਠਾਨੇ ਜਾਤੋ ਮਹਾਉਦਕਰਹਦੋ. ਗੁਹਾਦਸ੍ਸਨਾਯਾਤਿ ਏਤ੍ਥ ਗੁਹਾਤਿ ਪਂਸੁਗੁਹਾ. ਸਾ ਉਨ੍ਨਮੇ ਉਦਕਮੁਤ੍ਤਟ੍ਠਾਨੇ ਅਹੋਸਿ, ਏਕਤੋ ਉਮਙ੍ਗਂ ਕਤ੍ਵਾ ਖਾਣੁਕੇ ਚ ਪਂਸੁਞ੍ਚ ਨੀਹਰਿਤ੍ਵਾ ਅਨ੍ਤੋ ਥਮ੍ਭੇ ਉਸ੍ਸਾਪੇਤ੍ਵਾ ਮਤ੍ਥਕੇ ਪਦਰਚ੍ਛਨ੍ਨਗੇਹਸਙ੍ਖੇਪੇਨ ਕਤਾ, ਤਤ੍ਥ ਤੇ ਪਰਿਬ੍ਬਾਜਕਾ ਵਸਨ੍ਤਿ. ਸਾ ਵਸ੍ਸਾਨੇ ਉਦਕਪੁਣ੍ਣਾ ਤਿਟ੍ਠਤਿ, ਨਿਦਾਘੇ ਤਤ੍ਥ ਵਸਨ੍ਤਿ. ਤਂ ਸਨ੍ਧਾਯ ‘‘ਗੁਹਾਦਸ੍ਸਨਾਯਾ’’ਤਿ ਆਹ. ਵਿਹਾਰਦਸ੍ਸਨਤ੍ਥਞ੍ਹਿ ਅਨਮਤਗ੍ਗਿਯਂ ਪਚ੍ਚਵੇਕ੍ਖਿਤ੍ਵਾ ਸਮੁਦ੍ਦਪਬ੍ਬਤਦਸ੍ਸਨਤ੍ਥਂ ਵਾਪਿ ਗਨ੍ਤੁਂ ਵਟ੍ਟਤੀਤਿ.

ਉਨ੍ਨਾਦਿਨਿਯਾਤਿ ਉਚ੍ਚਂ ਨਦਮਾਨਾਯ. ਏਵਂ ਨਦਮਾਨਾਯ ਚਸ੍ਸਾ ਉਦ੍ਧਙ੍ਗਮਨਵਸੇਨ ਉਚ੍ਚੋ, ਦਿਸਾਸੁ ਪਤ੍ਥਟਵਸੇਨ ਮਹਾਸਦ੍ਦੋਤਿ ਉਚ੍ਚਾਸਦ੍ਦਮਹਾਸਦ੍ਦੋ, ਤਾਯ ਉਚ੍ਚਾਸਦ੍ਦਮਹਾਸਦ੍ਦਾਯ. ਤੇਸਂ ਪਰਿਬ੍ਬਾਜਕਾਨਂ ਪਾਤੋਵ ਉਟ੍ਠਾਯ ਕਤ੍ਤਬ੍ਬਂ ਨਾਮ ਚੇਤਿਯਵਤ੍ਤਂ ਵਾ ਬੋਧਿਵਤ੍ਤਂ ਵਾ ਆਚਰਿਯੁਪਜ੍ਝਾਯਵਤ੍ਤਂ ਵਾ ਯੋਨਿਸੋਮਨਸਿਕਾਰੋ ਵਾ ਨਤ੍ਥਿ. ਤੇਨ ਤੇ ਪਾਤੋਵ ਉਟ੍ਠਾਯ ਬਾਲਾਤਪੇ ਨਿਸਿਨ੍ਨਾ, ਸਾਯਂ ਵਾ ਕਥਾਯ ਫਾਸੁਕਤ੍ਥਾਯ ਸਨ੍ਨਿਪਤਿਤਾ ‘‘ਇਮਸ੍ਸ ਹਤ੍ਥੋ ਸੋਭਣੋ ਇਮਸ੍ਸ ਪਾਦੋ’’ਤਿ ਏਵਂ ਅਞ੍ਞਮਞ੍ਞਸ੍ਸ ਹਤ੍ਥਪਾਦਾਦੀਨਿ ਵਾ ਆਰਬ੍ਭ ਇਤ੍ਥਿਪੁਰਿਸਦਾਰਕਦਾਰਿਕਾਵਣ੍ਣੇ ਵਾ ਅਞ੍ਞਂ ਵਾ ਕਾਮਸ੍ਸਾਦਭਵਸ੍ਸਾਦਾਦਿਵਤ੍ਥੁਂ ਆਰਬ੍ਭ ਕਥਂ ਪਟ੍ਠਪੇਤ੍ਵਾ ਅਨੁਪੁਬ੍ਬੇਨ ਰਾਜਕਥਾਦਿਅਨੇਕਵਿਧਂ ਤਿਰਚ੍ਛਾਨਕਥਂ ਕਥੇਨ੍ਤਿ. ਸਾ ਹਿ ਅਨਿਯ੍ਯਾਨਿਕਤ੍ਤਾ ਸਗ੍ਗਮੋਕ੍ਖਮਗ੍ਗਾਨਂ ਤਿਰਚ੍ਛਾਨਭੂਤਾ ਕਥਾਤਿ ਤਿਰਚ੍ਛਾਨਕਥਾ. ਤਤ੍ਥ ਰਾਜਾਨਂ ਆਰਬ੍ਭ ‘‘ਮਹਾਸਮ੍ਮਤੋ ਮਨ੍ਧਾਤਾ ਧਮ੍ਮਾਸੋਕੋ ਏਵਂਮਹਾਨੁਭਾਵੋ’’ਤਿਆਦਿਨਾ ਨਯੇਨ ਪਵਤ੍ਤਾ ਕਥਾ ਰਾਜਕਥਾ. ਏਸ ਨਯੋ ਚੋਰਕਥਾਦੀਸੁ.

ਤੇਸੁ ‘‘ਅਸੁਕੋ ਰਾਜਾ ਅਭਿਰੂਪੋ ਦਸ੍ਸਨੀਯੋ’’ਤਿਆਦਿਨਾ ਨਯੇਨ ਗੇਹਸ੍ਸਿਤਕਥਾਵ ਤਿਰਚ੍ਛਾਨਕਥਾ ਹੋਤਿ. ‘‘ਸੋਪਿ ਨਾਮ ਏਵਂ ਮਹਾਨੁਭਾਵੋ ਖਯਂ ਗਤੋ’’ਤਿ ਏਵਂ ਪਵਤ੍ਤਾ ਪਨ ਕਮ੍ਮਟ੍ਠਾਨਭਾਵੇ ਤਿਟ੍ਠਤਿ. ਚੋਰੇਸੁਪਿ ‘‘ਮੂਲਦੇਵੋ ਏਵਂਮਹਾਨੁਭਾਵੋ, ਮੇਘਮਾਲੋ ਏਵਂਮਹਾਨੁਭਾਵੋ’’ਤਿ ਤੇਸਂ ਕਮ੍ਮਂ ਪਟਿਚ੍ਚ ਅਹੋ ਸੂਰਾਤਿ ਗੇਹਸ੍ਸਿਤਕਥਾਵ ਤਿਰਚ੍ਛਾਨਕਥਾ. ਯੁਦ੍ਧੇਪਿ ਭਾਰਤਯੁਦ੍ਧਾਦੀਸੁ ‘‘ਅਸੁਕੇਨ ਅਸੁਕੋ ਏਵਂ ਮਾਰਿਤੋ ਏਵਂ ਵਿਦ੍ਧੋ’’ਤਿ ਕਾਮਸ੍ਸਾਦਵਸੇਨੇਵ ਕਥਾ ਤਿਰਚ੍ਛਾਨਕਥਾ. ‘‘ਤੇਪਿ ਨਾਮ ਖਯਂ ਗਤਾ’’ਤਿ ਏਵਂ ਪਵਤ੍ਤਾ ਪਨ ਸਬ੍ਬਤ੍ਥ ਕਥਾ ਕਮ੍ਮਟ੍ਠਾਨਮੇਵ ਹੋਤਿ. ਅਪਿਚ ਅਨ੍ਨਾਦੀਸੁ ‘‘ਏਵਂ ਵਣ੍ਣਵਨ੍ਤਂ ਗਨ੍ਧਵਨ੍ਤਂ ਰਸਵਨ੍ਤਂ ਫਸ੍ਸਸਮ੍ਪਨ੍ਨਂ ਖਾਦਿਮ੍ਹ ਭੁਞ੍ਜਿਮ੍ਹ ਪਿਵਿਮ੍ਹ ਪਰਿਭੁਞ੍ਜਿਮ੍ਹਾ’’ਤਿ ਕਾਮਸ੍ਸਾਦਵਸੇਨ ਕਥੇਤੁਂ ਨ ਵਟ੍ਟਤਿ, ਸਾਤ੍ਥਕਂ ਪਨ ਕਤ੍ਵਾ – ‘‘ਪੁਬ੍ਬੇ ਏਵਂ ਵਣ੍ਣਾਦਿਸਮ੍ਪਨ੍ਨਂ ਅਨ੍ਨਂ ਪਾਨਂ ਵਤ੍ਥਂ ਸਯਨਂ ਮਾਲਂ ਗਨ੍ਧਂ ਸੀਲਵਨ੍ਤਾਨਂ ਅਦਮ੍ਹ, ਚੇਤਿਯੇ ਪੂਜਂ ਅਕਰਿਮ੍ਹਾ’’ਤਿ ਕਥੇਤੁਂ ਵਟ੍ਟਤਿ.

ਞਾਤਿਕਥਾਦੀਸੁਪਿ ‘‘ਅਮ੍ਹਾਕਂ ਞਾਤਕਾ ਸੂਰਾ ਸਮਤ੍ਥਾ’’ਤਿ ਵਾ ‘‘ਪੁਬ੍ਬੇ ਮਯਂ ਏਵਂ ਵਿਚਿਤ੍ਰੇਹਿ ਯਾਨੇਹਿ ਚਰਿਮ੍ਹਾ’’ਤਿ ਵਾ ਅਸ੍ਸਾਦਵਸੇਨ ਵਤ੍ਤੁਂ ਨ ਵਟ੍ਟਤਿ, ਸਾਤ੍ਥਕਂ ਪਨ ਕਤ੍ਵਾ ‘‘ਤੇਪਿ ਨੋ ਞਾਤਕਾ ਖਯਂ ਗਤਾ’’ਤਿ ਵਾ ‘‘ਪੁਬ੍ਬੇ ਮਯਂ ਏਵਰੂਪਾ ਉਪਾਹਨਾ ਸਙ੍ਘਸ੍ਸ ਅਦਮ੍ਹਾ’’ਤਿ ਵਾ ਕਥੇਤਬ੍ਬਾ. ਗਾਮਕਥਾਪਿ ਸੁਨਿਵਿਟ੍ਠਦੁਨ੍ਨਿਵਿਟ੍ਠਸੁਭਿਕ੍ਖਦੁਬ੍ਭਿਕ੍ਖਾਦਿਵਸੇਨ ਵਾ ‘‘ਅਸੁਕਗਾਮਵਾਸਿਨੋ ਸੂਰਾ ਸਮਤ੍ਥਾ’’ਤਿ ਵਾ ਏਵਂ ਅਸ੍ਸਾਦਵਸੇਨ ਨ ਵਟ੍ਟਤਿ, ਸਾਤ੍ਥਕਂ ਪਨ ਕਤ੍ਵਾ ਸਦ੍ਧਾ ਪਸਨ੍ਨਾਤਿ ਵਾ ਖਯਵਯਂ ਗਤਾਤਿ ਵਾ ਵਤ੍ਤੁਂ ਵਟ੍ਟਤਿ. ਨਿਗਮਨਗਰਜਨਪਦਕਥਾਸੁਪਿ ਏਸੇਵ ਨਯੋ. ਇਤ੍ਥਿਕਥਾਪਿ ਵਣ੍ਣਸਣ੍ਠਾਨਾਦੀਨਿ ਪਟਿਚ੍ਚ ਅਸ੍ਸਾਦਵਸੇਨ ਨ ਵਟ੍ਟਤਿ, ਸਦ੍ਧਾ ਪਸਨ੍ਨਾ ਖਯਂ ਗਤਾਤਿ ਏਵਮੇਵ ਵਟ੍ਟਤਿ. ਸੂਰਕਥਾਪਿ ਨਨ੍ਦਿਮਿਤ੍ਤੋ ਨਾਮ ਯੋਧੋ ਸੂਰੋ ਅਹੋਸੀਤਿ ਅਸ੍ਸਾਦਵਸੇਨੇਵ ਨ ਵਟ੍ਟਤਿ, ਸਦ੍ਧੋ ਪਸਨ੍ਨੋ ਅਹੋਸਿ ਖਯਂ ਗਤੋਤਿ ਏਵਮੇਵ ਵਟ੍ਟਤਿ. ਵਿਸਿਖਾਕਥਾਪਿ ਅਸੁਕਾ ਵਿਸਿਖਾ ਸੁਨਿਵਿਟ੍ਠਾ ਦੁਨ੍ਨਿਵਿਟ੍ਠਾ ਸੂਰਾ ਸਮਤ੍ਥਾਤਿ ਅਸ੍ਸਾਦਵਸੇਨੇਵ ਨ ਵਟ੍ਟਤਿ, ਸਦ੍ਧਾ ਪਸਨ੍ਨਾ ਖਯਂ ਗਤਾ ਇਚ੍ਚੇਵਂ ਵਟ੍ਟਤਿ.

ਕੁਮ੍ਭਟ੍ਠਾਨਕਥਾਤਿ ਕੁਮ੍ਭਟ੍ਠਾਨਉਦਕਤਿਤ੍ਥਕਥਾ ਵਾ ਵੁਚ੍ਚਤਿ ਕੁਮ੍ਭਦਾਸਿਕਥਾ ਵਾ. ਸਾਪਿ ‘‘ਪਾਸਾਦਿਕਾ ਨਚ੍ਚਿਤੁਂ ਗਾਯਿਤੁਂ ਛੇਕਾ’’ਤਿ ਅਸ੍ਸਾਦਵਸੇਨ ਨ ਵਟ੍ਟਤਿ, ਸਦ੍ਧਾ ਪਸਨ੍ਨਾਤਿਆਦਿਨਾ ਨਯੇਨੇਵ ਵਟ੍ਟਤਿ. ਪੁਬ੍ਬਪੇਤਕਥਾਤਿ ਅਤੀਤਞਾਤਿਕਥਾ. ਤਤ੍ਥ ਵਤ੍ਤਮਾਨਞਾਤਿਕਥਾਸਦਿਸੋਵ ਵਿਨਿਚ੍ਛਯੋ.

ਨਾਨਤ੍ਤਕਥਾਤਿ ਪੁਰਿਮਪਚ੍ਛਿਮਕਥਾਵਿਮੁਤ੍ਤਾ ਅਵਸੇਸਾ ਨਾਨਾਸਭਾਵਾ ਨਿਰਤ੍ਥਕਕਥਾ. ਲੋਕਕ੍ਖਾਯਿਕਾਤਿ ਅਯਂ ਲੋਕੋ ਕੇਨ ਨਿਮ੍ਮਿਤੋ, ਅਸੁਕੇਨ ਨਾਮ ਨਿਮ੍ਮਿਤੋ, ਕਾਕਾ ਸੇਤਾ ਅਟ੍ਠੀਨਂ ਸੇਤਤ੍ਤਾ, ਬਕਾ ਰਤ੍ਤਾ ਲੋਹਿਤਸ੍ਸ ਰਤ੍ਤਤ੍ਤਾਤਿ ਏਵਮਾਦਿਕਾ ਲੋਕਾਯਤਵਿਤਣ੍ਡਸਲ੍ਲਾਪਕਥਾ.

ਸਮੁਦ੍ਦਕ੍ਖਾਯਿਕਾ ਨਾਮ ਕਸ੍ਮਾ ਸਮੁਦ੍ਦੋ ਸਾਗਰੋ, ਸਾਗਰਦੇਵੇਨ ਖਣਿਤਤ੍ਤਾ ਸਾਗਰੋ, ਖਤੋ ਮੇਤਿ ਹਤ੍ਥਮੁਦ੍ਦਾਯ ਨਿਵੇਦਿਤਤ੍ਤਾ ਸਮੁਦ੍ਦੋਤਿ ਏਵਮਾਦਿਕਾ ਨਿਰਤ੍ਥਕਾ ਸਮੁਦ੍ਦਕ੍ਖਾਯਿਕਕਥਾ. ਇਤਿ ਭਵੋ, ਇਤਿ ਅਭਵੋਤਿ ਯਂ ਵਾ ਤਂ ਵਾ ਨਿਰਤ੍ਥਕਕਾਰਣਂ ਵਤ੍ਵਾ ਪਵਤ੍ਤਿਤਕਥਾ ਇਤਿਭਵਾਭਵਕਥਾ. ਏਤ੍ਥ ਚ ਭਵੋਤਿ ਸਸ੍ਸਤਂ, ਅਭਵੋਤਿ ਉਚ੍ਛੇਦਂ. ਭਵੋਤਿ ਵਡ੍ਢਿ, ਅਭਵੋਤਿ ਹਾਨਿ. ਭਵੋਤਿ ਕਾਮਸੁਖਂ, ਅਭਵੋਤਿ ਅਤ੍ਤਕਿਲਮਥੋ. ਇਤਿ ਇਮਾਯ ਛਬ੍ਬਿਧਾਯ ਇਤਿਭਵਾਭਵਕਥਾਯ ਸਦ੍ਧਿਂ ਬਾਤ੍ਤਿਂਸਤਿਰਚ੍ਛਾਨਕਥਾ ਨਾਮ ਹੋਤਿ. ਏਵਰੂਪਿਂ ਤਿਰਚ੍ਛਾਨਕਥਂ ਕਥੇਨ੍ਤਿਯਾ ਨਿਸਿਨ੍ਨੋ ਹੋਤਿ.

ਤਤੋ ਸਨ੍ਦਕੋ ਪਰਿਬ੍ਬਾਜਕੋ ਤੇ ਪਰਿਬ੍ਬਾਜਕੇ ਓਲੋਕੇਤ੍ਵਾ – ‘‘ਇਮੇ ਪਰਿਬ੍ਬਾਜਕਾ ਅਤਿਵਿਯ ਅਞ੍ਞਮਞ੍ਞਂ ਅਗਾਰਵਾ ਅਪ੍ਪਤਿਸ੍ਸਾ, ਮਯਞ੍ਚ ਸਮਣਸ੍ਸ ਗੋਤਮਸ੍ਸ ਪਾਤੁਭਾਵਤੋ ਪਟ੍ਠਾਯ ਸੂਰਿਯੁਗ੍ਗਮਨੇ ਖਜ੍ਜੋਪਨਕੂਪਮਾ ਜਾਤਾ, ਲਾਭਸਕ੍ਕਾਰੋਪਿ ਨੋ ਪਰਿਹੀਨੋ. ਸਚੇ ਪਨ ਇਮਂ ਠਾਨਂ ਸਮਣੋ ਗੋਤਮੋ ਗੋਤਮਸਾਵਕੋ ਵਾ ਗਿਹਿਉਪਟ੍ਠਾਕੋਪਿ ਵਾਸ੍ਸ ਆਗਚ੍ਛੇਯ੍ਯ, ਅਤਿਵਿਯ ਲਜ੍ਜਨੀਯਂ ਭਵਿਸ੍ਸਤਿ. ਪਰਿਸਦੋਸੋ ਖੋ ਪਨ ਪਰਿਸਜੇਟ੍ਠਕਸ੍ਸੇਵ ਉਪਰਿ ਆਰੋਹਤੀ’’ਤਿ ਇਤੋ ਚਿਤੋ ਚ ਵਿਲੋਕੇਨ੍ਤੋ ਥੇਰਂ ਅਦ੍ਦਸ. ਤੇਨ ਵੁਤ੍ਤਂ ਅਦ੍ਦਸਾ ਖੋ ਸਨ੍ਦਕੋ ਪਰਿਬ੍ਬਾਜਕੋ…ਪੇ… ਤੁਣ੍ਹੀ ਅਹੇਸੁਨ੍ਤਿ.

ਤਤ੍ਥ ਸਣ੍ਠਪੇਸੀਤਿ ਸਿਕ੍ਖਾਪੇਸਿ, ਵਜ੍ਜਮਸ੍ਸਾ ਪਟਿਚ੍ਛਾਦੇਸਿ. ਯਥਾ ਸੁਟ੍ਠਪਿਤਾ ਹੋਤਿ, ਤਥਾ ਨਂ ਠਪੇਸਿ. ਯਥਾ ਨਾਮ ਪਰਿਸਮਜ੍ਝਂ ਪਵਿਸਨ੍ਤੋ ਪੁਰਿਸੋ ਵਜ੍ਜਪਟਿਚ੍ਛਾਦਨਤ੍ਥਂ ਨਿਵਾਸਨਂ ਸਣ੍ਠਪੇਤਿ, ਪਾਰੁਪਨਂ ਸਣ੍ਠਪੇਤਿ, ਰਜੋਕਿਣ੍ਣਟ੍ਠਾਨਂ ਪੁਞ੍ਛਤਿ, ਏਵਮਸ੍ਸਾ ਵਜ੍ਜਪਟਿਚ੍ਛਾਦਨਤ੍ਥਂ ‘‘ਅਪ੍ਪਸਦ੍ਦਾ ਭੋਨ੍ਤੋ’’ਤਿ ਸਿਕ੍ਖਾਪੇਨ੍ਤੋ ਯਥਾ ਸੁਟ੍ਠਪਿਤਾ ਹੋਤਿ, ਤਥਾ ਨਂ ਠਪੇਸੀਤਿ ਅਤ੍ਥੋ. ਅਪ੍ਪਸਦ੍ਦਕਾਮਾਤਿ ਅਪ੍ਪਸਦ੍ਦਂ ਇਚ੍ਛਨ੍ਤਿ, ਏਕਕਾ ਨਿਸੀਦਨ੍ਤਿ, ਏਕਕਾ ਤਿਟ੍ਠਨ੍ਤਿ, ਨ ਗਣਸਙ੍ਗਣਿਕਾਯ ਯਾਪੇਨ੍ਤਿ. ਅਪ੍ਪਸਦ੍ਦਵਿਨੀਤਾਤਿ ਅਪ੍ਪਸਦ੍ਦੇਨ ਨਿਰਵੇਨ ਬੁਦ੍ਧੇਨ ਵਿਨੀਤਾ. ਅਪ੍ਪਸਦ੍ਦਸ੍ਸ ਵਣ੍ਣਵਾਦਿਨੋਤਿ ਯਂ ਠਾਨਂ ਅਪ੍ਪਸਦ੍ਦਂ ਨਿਸ੍ਸਦ੍ਦਂ. ਤਸ੍ਸ ਵਣ੍ਣਵਾਦਿਨੋ. ਉਪਸਙ੍ਕਮਿਤਬ੍ਬਂ ਮਞ੍ਞੇਯ੍ਯਾਤਿ ਇਧਾਗਨ੍ਤਬ੍ਬਂ ਮਞ੍ਞੇਯ੍ਯ.

ਕਸ੍ਮਾ ਪਨੇਸ ਥੇਰਸ੍ਸ ਉਪਸਙ੍ਕਮਨਂ ਪਚ੍ਚਾਸੀਸਤੀਤਿ. ਅਤ੍ਤਨੋ ਵੁਦ੍ਧਿਂ ਪਤ੍ਥਯਮਾਨੋ. ਪਰਿਬ੍ਬਾਜਕਾ ਕਿਰ ਬੁਦ੍ਧੇਸੁ ਵਾ ਬੁਦ੍ਧਸਾਵਕੇਸੁ ਵਾ ਅਤ੍ਤਨੋ ਸਨ੍ਤਿਕਂ ਆਗਤੇਸੁ – ‘‘ਅਜ੍ਜ ਅਮ੍ਹਾਕਂ ਸਨ੍ਤਿਕਂ ਸਮਣੋ ਗੋਤਮੋ ਆਗਤੋ, ਸਾਰਿਪੁਤ੍ਤੋ ਆਗਤੋ, ਨ ਖੋ ਪਨੇਤੇ ਯਸ੍ਸ ਵਾ ਤਸ੍ਸ ਵਾ ਸਨ੍ਤਿਕਂ ਗਚ੍ਛਨ੍ਤਿ, ਪਸ੍ਸਥ ਅਮ੍ਹਾਕਂ ਉਤ੍ਤਮਭਾਵ’’ਨ੍ਤਿ ਅਤ੍ਤਨੋ ਉਪਟ੍ਠਾਕਾਨਂ ਸਨ੍ਤਿਕੇ ਅਤ੍ਤਾਨਂ ਉਕ੍ਖਿਪਨ੍ਤਿ ਉਚ੍ਚੇ ਠਾਨੇ ਠਪੇਨ੍ਤਿ. ਭਗਵਤੋਪਿ ਉਪਟ੍ਠਾਕੇ ਗਣ੍ਹਿਤੁਂ ਵਾਯਮਨ੍ਤਿ. ਤੇ ਕਿਰ ਭਗਵਤੋ ਉਪਟ੍ਠਾਕੇ ਦਿਸ੍ਵਾ ਏਵਂ ਵਦਨ੍ਤਿ – ‘‘ਤੁਮ੍ਹਾਕਂ ਸਤ੍ਥਾ ਭਵਂ ਗੋਤਮੋਪਿ ਗੋਤਮਸ੍ਸ ਸਾਵਕਾਪਿ ਅਮ੍ਹਾਕਂ ਸਨ੍ਤਿਕਂ ਆਗਚ੍ਛਨ੍ਤਿ, ਮਯਂ ਅਞ੍ਞਮਞ੍ਞਂ ਸਮਗ੍ਗਾ. ਤੁਮ੍ਹੇ ਪਨ ਅਮ੍ਹੇ ਅਕ੍ਖੀਹਿ ਪਸ੍ਸਿਤੁਂ ਨ ਇਚ੍ਛਥ, ਸਾਮੀਚਿਕਮ੍ਮਂ ਨ ਕਰੋਥ, ਕਿਂ ਵੋ ਅਮ੍ਹੇਹਿ ਅਪਰਦ੍ਧ’’ਨ੍ਤਿ. ਅਪ੍ਪੇਕਚ੍ਚੇ ਮਨੁਸ੍ਸਾ – ‘‘ਬੁਦ੍ਧਾਪਿ ਏਤੇਸਂ ਸਨ੍ਤਿਕਂ ਗਚ੍ਛਨ੍ਤਿ, ਕਿਂ ਅਮ੍ਹਾਕ’’ਨ੍ਤਿ ਤਤੋ ਪਟ੍ਠਾਯ ਤੇ ਦਿਸ੍ਵਾ ਨਪ੍ਪਮਜ੍ਜਨ੍ਤਿ. ਤੁਣ੍ਹੀ ਅਹੇਸੁਨ੍ਤਿ ਸਨ੍ਦਕਂ ਪਰਿਵਾਰੇਤ੍ਵਾ ਨਿਸ੍ਸਦ੍ਦਾ ਨਿਸੀਦਿਂਸੁ.

੨੨੪. ਸ੍ਵਾਗਤਂ ਭੋਤੋ ਆਨਨ੍ਦਸ੍ਸਾਤਿ ਸੁਆਗਮਨਂ ਭੋਤੋ ਆਨਨ੍ਦਸ੍ਸ. ਭਵਨ੍ਤੇ ਹਿ ਨੋ ਆਗਤੇ ਆਨਨ੍ਦੋ ਹੋਤਿ, ਗਤੇ ਸੋਕੋਤਿ ਦੀਪੇਤਿ. ਚਿਰਸ੍ਸਂ ਖੋਤਿ ਪਿਯਸਮੁਦਾਚਾਰਵਚਨਮੇਤਂ. ਥੇਰੋ ਪਨ ਕਾਲੇਨ ਕਾਲਂ ਪਰਿਬ੍ਬਾਜਕਾਰਾਮਂ ਚਾਰਿਕਤ੍ਥਾਯ ਗਚ੍ਛਤੀਤਿ ਪੁਰਿਮਗਮਨਂ ਗਹੇਤ੍ਵਾ ਏਵਮਾਹ. ਏਵਞ੍ਚ ਪਨ ਵਤ੍ਵਾ ਨ ਮਾਨਤ੍ਥਦ੍ਧੋ ਹੁਤ੍ਵਾ ਨਿਸੀਦਿ, ਅਤ੍ਤਨੋ ਪਨ ਆਸਨਾ ਵੁਟ੍ਠਾਯ ਤਂ ਆਸਨਂ ਪਪ੍ਫੋਟੇਤ੍ਵਾ ਥੇਰਂ ਆਸਨੇਨ ਨਿਮਨ੍ਤੇਨ੍ਤੋ ਨਿਸੀਦਤੁ ਭਵਂ ਆਨਨ੍ਦੋ, ਇਦਮਾਸਨਂ ਪਞ੍ਞਤ੍ਤਨ੍ਤਿ ਆਹ.

ਅਨ੍ਤਰਾਕਥਾ ਵਿਪ੍ਪਕਤਾਤਿ ਨਿਸਿਨ੍ਨਾਨਂ ਵੋ ਆਰਮ੍ਭਤੋ ਪਟ੍ਠਾਯ ਯਾਵ ਮਮਾਗਮਨਂ ਏਤਸ੍ਮਿਂ ਅਨ੍ਤਰੇ ਕਾ ਨਾਮ ਕਥਾ ਵਿਪ੍ਪਕਤਾ, ਮਮਾਗਮਨਪਚ੍ਚਯਾ ਕਤਮਾ ਕਥਾ ਪਰਿਯਨ੍ਤਂ ਨ ਗਤਾਤਿ ਪੁਚ੍ਛਤਿ.

ਅਥ ਪਰਿਬ੍ਬਾਜਕੋ ‘‘ਨਿਰਤ੍ਥਕਕਥਾਵ ਏਸਾ ਨਿਸ੍ਸਾਰਾ ਵਟ੍ਟਸਨ੍ਨਿਸ੍ਸਿਤਾ, ਨ ਤੁਮ੍ਹਾਕਂ ਪੁਰਤੋ ਵਤ੍ਤਬ੍ਬਤਂ ਅਰਹਤੀ’’ਤਿ ਦੀਪੇਨ੍ਤੋ ਤਿਟ੍ਠਤੇਸਾ, ਭੋਤਿਆਦਿਮਾਹ. ਨੇਸਾ ਭੋਤੋਤਿ ਸਚੇ ਭਵਂ ਸੋਤੁਕਾਮੋ ਭਵਿਸ੍ਸਤਿ, ਪਚ੍ਛਾਪੇਸਾ ਕਥਾ ਨ ਦੁਲ੍ਲਭਾ ਭਵਿਸ੍ਸਤਿ, ਅਮ੍ਹਾਕਂ ਪਨਿਮਾਯ ਅਤ੍ਥੋ ਨਤ੍ਥਿ. ਭੋਤੋ ਪਨ ਆਗਮਨਂ ਲਭਿਤ੍ਵਾ ਅਞ੍ਞਦੇਵ ਸੁਕਾਰਣਂ ਕਥਂ ਸੋਤੁਕਾਮਮ੍ਹਾਤਿ ਦੀਪੇਤਿ. ਤਤੋ ਧਮ੍ਮਦੇਸਨਂ ਯਾਚਨ੍ਤੋ ਸਾਧੁ ਵਤ ਭਵਨ੍ਤਂ ਯੇ ਵਾਤਿਆਦਿਮਾਹ. ਤਤ੍ਥ ਆਚਰਿਯਕੇਤਿ ਆਚਰਿਯਸਮਯੇ. ਅਨਸ੍ਸਾਸਿਕਾਨੀਤਿ ਅਸ੍ਸਾਸਵਿਰਹਿਤਾਨਿ. ਸਸਕ੍ਕਨ੍ਤਿ ਏਕਂਸਤ੍ਥੇ ਨਿਪਾਤੋ, ਵਿਞ੍ਞੂ ਪੁਰਿਸੋ ਏਕਂਸੇਨੇਵ ਨ ਵਸੇਯ੍ਯਾਤਿ ਅਤ੍ਥੋ. ਵਸਨ੍ਤੋ ਚ ਨਾਰਾਧੇਯ੍ਯਾਤਿ ਨ ਸਮ੍ਪਾਦੇਯ੍ਯ, ਨ ਪਰਿਪੂਰੇਯ੍ਯਾਤਿ ਵੁਤ੍ਤਂ ਹੋਤਿ. ਞਾਯਂ ਧਮ੍ਮਂ ਕੁਸਲਨ੍ਤਿ ਕਾਰਣਭੂਤਂ ਅਨਵਜ੍ਜਟ੍ਠੇਨ ਕੁਸਲਂ ਧਮ੍ਮਂ.

੨੨੫. ਇਧਾਤਿ ਇਮਸ੍ਮਿਂ ਲੋਕੇ. ਨਤ੍ਥਿ ਦਿਨ੍ਨਨ੍ਤਿਆਦੀਨਿ ਸਾਲੇਯ੍ਯਕਸੁਤ੍ਤੇ (ਮ. ਨਿ. ੧.੪੪੦) ਵੁਤ੍ਤਾਨਿ. ਚਾਤੁਮਹਾਭੂਤਿਕੋਤਿ ਚਤੁਮਹਾਭੂਤਮਯੋ. ਪਥਵੀ ਪਥਵੀਕਾਯਨ੍ਤਿ ਅਜ੍ਝਤ੍ਤਿਕਾ ਪਥਵੀਧਾਤੁ ਬਾਹਿਰਪਥਵੀਧਾਤੁਂ. ਅਨੁਪੇਤੀਤਿ ਅਨੁਯਾਤਿ. ਅਨੁਪਗਚ੍ਛਤੀਤਿ ਤਸ੍ਸੇਵ ਵੇਵਚਨਂ, ਅਨੁਗਚ੍ਛਤੀਤਿਪਿ ਅਤ੍ਥੋ, ਉਭਯੇਨਾਪਿ ਉਪੇਤਿ ਉਪਗਚ੍ਛਤੀਤਿ ਦਸ੍ਸੇਤਿ. ਆਪਾਦੀਸੁਪਿ ਏਸੇਵ ਨਯੋ. ਇਨ੍ਦ੍ਰਿਯਾਨੀਤਿ ਮਨਚ੍ਛਟ੍ਠਾਨਿ ਇਨ੍ਦ੍ਰਿਯਾਨਿ ਆਕਾਸਂ ਪਕ੍ਖਨ੍ਦਨ੍ਤਿ. ਆਸਨ੍ਦਿਪਞ੍ਚਮਾਤਿ ਨਿਪਨ੍ਨਮਞ੍ਚੇਨ ਪਞ੍ਚਮਾ, ਮਞ੍ਚੋ ਚੇਵ, ਚਤ੍ਤਾਰੋ ਮਞ੍ਚਪਾਦੇ ਗਹੇਤ੍ਵਾ ਠਿਤਾ ਚਤ੍ਤਾਰੋ ਪੁਰਿਸਾ ਚਾਤਿ ਅਤ੍ਥੋ. ਯਾਵਾਲ਼ਾਹਨਾਤਿ ਯਾਵ ਸੁਸਾਨਾ. ਪਦਾਨੀਤਿ ਅਯਂ ਏਵਂ ਸੀਲਵਾ ਅਹੋਸਿ, ਏਵਂ ਦੁਸ੍ਸੀਲੋਤਿਆਦਿਨਾ ਨਯੇਨ ਪਵਤ੍ਤਾਨਿ ਗੁਣਪਦਾਨਿ. ਸਰੀਰਮੇਵ ਵਾ ਏਤ੍ਥ ਪਦਾਨੀਤਿ ਅਧਿਪ੍ਪੇਤਂ. ਕਾਪੋਤਕਾਨੀਤਿ ਕਪੋਤਕਵਣ੍ਣਾਨਿ, ਪਾਰਾਵਤਪਕ੍ਖਵਣ੍ਣਾਨੀਤਿ ਅਤ੍ਥੋ.

ਭਸ੍ਸਨ੍ਤਾਤਿ ਭਸ੍ਮਨ੍ਤਾ, ਅਯਮੇਵ ਵਾ ਪਾਲ਼ਿ. ਆਹੁਤਿਯੋਤਿ ਯਂ ਪਹੇਣਕਸਕ੍ਕਾਰਾਦਿਭੇਦਂ ਦਿਨ੍ਨਦਾਨਂ, ਸਬ੍ਬਂ ਤਂ ਛਾਰਿਕਾਵਸਾਨਮੇਵ ਹੋਤਿ, ਨ ਤਤੋ ਪਰਂ ਫਲਦਾਯਕਂ ਹੁਤ੍ਵਾ ਗਚ੍ਛਤੀਤਿ ਅਤ੍ਥੋ. ਦਤ੍ਤੁਪਞ੍ਞਤ੍ਤਨ੍ਤਿ ਦਤ੍ਤੂਹਿ ਬਾਲਮਨੁਸ੍ਸੇਹਿ ਪਞ੍ਞਤ੍ਤਂ. ਇਦਂ ਵੁਤ੍ਤਂ ਹੋਤਿ – ਬਾਲੇਹਿ ਅਬੁਦ੍ਧੀਹਿ ਪਞ੍ਞਤ੍ਤਮਿਦਂ ਦਾਨਂ, ਨ ਪਣ੍ਡਿਤੇਹਿ. ਬਾਲਾ ਦੇਨ੍ਤਿ, ਪਣ੍ਡਿਤਾ ਗਣ੍ਹਨ੍ਤੀਤਿ ਦਸ੍ਸੇਤਿ. ਅਤ੍ਥਿਕਵਾਦਨ੍ਤਿ ਅਤ੍ਥਿ ਦਿਨ੍ਨਂ ਦਿਨ੍ਨਫਲਨ੍ਤਿ ਇਮਂ ਅਤ੍ਥਿਕਵਾਦਂਯੇਵ ਵਦਨ੍ਤਿ ਤੇਸਂ ਤੁਚ੍ਛਂ ਵਚਨਂ ਮੁਸਾਵਿਲਾਪੋ. ਬਾਲੇ ਚ ਪਣ੍ਡਿਤੇ ਚਾਤਿ ਬਾਲਾ ਚ ਪਣ੍ਡਿਤਾ ਚ.

ਅਕਤੇਨ ਮੇ ਏਤ੍ਥ ਕਤਨ੍ਤਿ ਮਯ੍ਹਂ ਅਕਤੇਨੇਵ ਸਮਣਕਮ੍ਮੇਨ ਏਤ੍ਥ ਏਤਸ੍ਸ ਸਮਯੇ ਕਮ੍ਮਂ ਕਤਂ ਨਾਮ ਹੋਤਿ, ਅਵੁਸਿਤੇਨੇਵ ਬ੍ਰਹ੍ਮਚਰਿਯੇਨ ਵੁਸਿਤਂ ਨਾਮ ਹੋਤਿ. ਏਤ੍ਥਾਤਿ ਏਤਸ੍ਮਿਂ ਸਮਣਧਮ੍ਮੇ. ਸਮਸਮਾਤਿ ਅਤਿਵਿਯ ਸਮਾ, ਸਮੇਨ ਵਾ ਗੁਣੇਨ ਸਮਾ. ਸਾਮਞ੍ਞਂ ਪਤ੍ਤਾਤਿ ਸਮਾਨਭਾਵਂ ਪਤ੍ਤਾ.

੨੨੬. ਕਰਤੋਤਿਆਦੀਨਿ ਅਪਣ੍ਣਕਸੁਤ੍ਤੇ ਵੁਤ੍ਤਾਨਿ. ਤਥਾ ਨਤ੍ਥਿ ਹੇਤੂਤਿਆਦੀਨਿ.

੨੨੮. ਚਤੁਤ੍ਥਬ੍ਰਹ੍ਮਚਰਿਯਵਾਸੇ ਅਕਟਾਤਿ ਅਕਤਾ. ਅਕਟਵਿਧਾਤਿ ਅਕਤਵਿਧਾਨਾ, ਏਵਂ ਕਰੋਹੀਤਿ ਕੇਨਚਿ ਕਾਰਾਪਿਤਾ ਨ ਹੋਨ੍ਤੀਤਿ ਅਤ੍ਥੋ. ਅਨਿਮ੍ਮਿਤਾਤਿ ਇਦ੍ਧਿਯਾਪਿ ਨ ਨਿਮ੍ਮਿਤਾ. ਅਨਿਮ੍ਮਾਤਾਤਿ ਅਨਿਮ੍ਮਾਪਿਤਾ. ਕੇਚਿ ਅਨਿਮ੍ਮਿਤਬ੍ਬਾਤਿ ਪਦਂ ਵਦਨ੍ਤਿ, ਤਂ ਨੇਵ ਪਾਲ਼ਿਯਂ, ਨ ਅਟ੍ਠਕਥਾਯਂ ਸਨ੍ਦਿਸ੍ਸਤਿ. ਵਞ੍ਝਾਤਿ ਵਞ੍ਝਪਸੁਵਞ੍ਝਤਾਲਾਦਯੋ ਵਿਯ ਅਫਲਾ, ਕਸ੍ਸਚਿ ਅਜਨਕਾਤਿ ਅਤ੍ਥੋ. ਏਤੇਨ ਪਥਵੀਕਾਯਾਦੀਨਂ ਰੂਪਾਦਿਜਨਕਭਾਵਂ ਪਟਿਕ੍ਖਿਪਤਿ. ਪਬ੍ਬਤਕੂਟਾ ਵਿਯ ਠਿਤਾਤਿ ਕੂਟਟ੍ਠਾ. ਈਸਿਕਟ੍ਠਾਯਿਟ੍ਠਿਤਾਤਿ ਮੁਞ੍ਜੇ ਈਸਿਕਾ ਵਿਯ ਠਿਤਾ. ਤਤ੍ਰਾਯਮਧਿਪ੍ਪਾਯੋ – ਯਮਿਦਂ ਜਾਯਤੀਤਿ ਵੁਚ੍ਚਤਿ, ਤਂ ਮੁਞ੍ਜਤੋ ਈਸਿਕਾ ਵਿਯ ਵਿਜ੍ਜਮਾਨਮੇਵ ਨਿਕ੍ਖਮਤੀਤਿ. ‘‘ਏਸਿਕਟ੍ਠਾਯਿਟ੍ਠਿਤਾ’’ਤਿਪਿ ਪਾਠੋ, ਸੁਨਿਖਾਤੋ ਏਸਿਕਤ੍ਥਮ੍ਭੋ ਨਿਚ੍ਚਲੋ ਤਿਟ੍ਠਤਿ, ਏਵਂ ਠਿਤਾਤਿ ਅਤ੍ਥੋ. ਉਭਯੇਨਪਿ ਤੇਸਂ ਵਿਨਾਸਾਭਾਵਂ ਦੀਪੇਤਿ. ਨ ਇਞ੍ਜਨ੍ਤੀਤਿ ਏਸਿਕਤ੍ਥਮ੍ਭੋ ਵਿਯ ਠਿਤਤ੍ਤਾ ਨ ਚਲਨ੍ਤਿ. ਨ ਵਿਪਰਿਣਾਮੇਨ੍ਤੀਤਿ ਪਕਤਿਂ ਨ ਜਹਨ੍ਤਿ. ਨ ਅਞ੍ਞਮਞ੍ਞਂ ਬ੍ਯਾਬਾਧੇਨ੍ਤੀਤਿ ਅਞ੍ਞਮਞ੍ਞਂ ਨ ਉਪਹਨਨ੍ਤਿ. ਨਾਲਨ੍ਤਿ ਨ ਸਮਤ੍ਥਾ.

ਪਥਵੀਕਾਯੋਤਿਆਦੀਸੁ ਪਥਵੀਯੇਵ ਪਥਵੀਕਾਯੋ, ਪਥਵੀਸਮੂਹੋ ਵਾ. ਤਤ੍ਥਾਤਿ ਤੇਸੁ ਜੀਵਸਤ੍ਤਮੇਸੁ ਕਾਯੇਸੁ. ਨਤ੍ਥਿ ਹਨ੍ਤਾ ਵਾਤਿ ਹਨ੍ਤੁਂ ਵਾ ਘਾਤੇਤੁਂ ਵਾ ਸੋਤੁਂ ਵਾ ਸਾਵੇਤੁਂ ਵਾ ਜਾਨਿਤੁਂ ਵਾ ਜਾਨਾਪੇਤੁਂ ਵਾ ਸਮਤ੍ਥੋ ਨਾਮ ਨਤ੍ਥੀਤਿ ਦੀਪੇਤਿ. ਸਤ੍ਤਨ੍ਨਂਤ੍ਵੇਵ ਕਾਯਾਨਨ੍ਤਿ ਯਥਾ ਮੁਗ੍ਗਰਾਸਿਆਦੀਸੁ ਪਹਟਂ ਸਤ੍ਥਂ ਮੁਗ੍ਗਰਾਸਿਆਦੀਨਂ ਅਨ੍ਤਰੇਨ ਪਵਿਸਤਿ, ਏਵਂ ਸਤ੍ਤਨ੍ਨਂ ਕਾਯਾਨਂ ਅਨ੍ਤਰੇਨ ਛਿਦ੍ਦੇਨ ਵਿਵਰੇਨ ਸਤ੍ਥਂ ਪਵਿਸਤਿ. ਤਤ੍ਥ ‘‘ਅਹਂ ਇਮਂ ਜੀਵਿਤਾ ਵੋਰੋਪੇਮੀ’’ਤਿ ਕੇਵਲਂ ਸਞ੍ਞਾਮਤ੍ਤਮੇਵ ਹੋਤੀਤਿ ਦਸ੍ਸੇਤਿ. ਯੋਨਿਪਮੁਖਸਤਸਹਸ੍ਸਾਨੀਤਿ ਪਮੁਖਯੋਨੀਨਂ ਉਤ੍ਤਮਯੋਨੀਨਂ ਚੁਦ੍ਦਸਸਤਸਹਸ੍ਸਾਨਿ ਅਞ੍ਞਾਨਿ ਚ ਸਟ੍ਠਿਸਤਾਨਿ ਅਞ੍ਞਾਨਿ ਚ ਛਸਤਾਨਿ. ਪਞ੍ਚ ਚ ਕਮ੍ਮੁਨੋ ਸਤਾਨੀਤਿ ਪਞ੍ਚ ਕਮ੍ਮਸਤਾਨਿ ਚ, ਕੇਵਲਂ ਤਕ੍ਕਮਤ੍ਤਕੇਨ ਨਿਰਤ੍ਥਕਂ ਦਿਟ੍ਠਿਂ ਦੀਪੇਤਿ. ਪਞ੍ਚ ਚ ਕਮ੍ਮਾਨਿ ਤੀਣਿ ਚ ਕਮ੍ਮਾਨੀਤਿਆਦੀਸੁਪਿ ਏਸੇਵ ਨਯੋ. ਕੇਚਿ ਪਨਾਹੁ ਪਞ੍ਚ ਕਮ੍ਮਾਨੀਤਿ ਪਞ੍ਚਿਨ੍ਦ੍ਰਿਯਵਸੇਨ ਭਣਤਿ. ਤੀਣੀਤਿ ਕਾਯਕਮ੍ਮਾਦਿਵਸੇਨਾਤਿ. ਕਮ੍ਮੇ ਚ ਅਡ੍ਢਕਮ੍ਮੇ ਚਾਤਿ ਏਤ੍ਥ ਪਨਸ੍ਸ ਕਾਯਕਮ੍ਮਞ੍ਚ ਵਚੀਕਮ੍ਮਞ੍ਚ ਕਮ੍ਮਨ੍ਤਿ ਲਦ੍ਧਿ, ਮਨੋਕਮ੍ਮਂ ਉਪਡ੍ਢਕਮ੍ਮਨ੍ਤਿ. ਦ੍ਵਟ੍ਠਿਪਟਿਪਦਾਤਿ ਦ੍ਵਾਸਟ੍ਠਿ ਪਟਿਪਦਾਤਿ ਵਦਤਿ. ਦ੍ਵਟ੍ਠਨ੍ਤਰਕਪ੍ਪਾਤਿ ਏਕਸ੍ਮਿਂ ਕਪ੍ਪੇ ਚਤੁਸਟ੍ਠਿ ਅਨ੍ਤਰਕਪ੍ਪਾ ਨਾਮ ਹੋਨ੍ਤਿ, ਅਯਂ ਪਨ ਅਞ੍ਞੇ ਦ੍ਵੇ ਅਜਾਨਨ੍ਤੋ ਏਵਮਾਹ. ਛਲ਼ਾਭਿਜਾਤਿਯੋ ਅਪਣ੍ਣਕਸੁਤ੍ਤੇ ਵਿਤ੍ਥਾਰਿਤਾ.

ਅਟ੍ਠ ਪੁਰਿਸਭੂਮਿਯੋਤਿ ਮਨ੍ਦਭੂਮਿ ਖਿਡ੍ਡਾਭੂਮਿ ਵੀਮਂਸਕਭੂਮਿ ਉਜੁਗਤਭੂਮਿ ਸੇਕ੍ਖਭੂਮਿ ਸਮਣਭੂਮਿ ਜਿਨਭੂਮਿ ਪਨ੍ਨਭੂਮੀਤਿ ਇਮਾ ਅਟ੍ਠ ਪੁਰਿਸਭੂਮਿਯੋਤਿ ਵਦਤਿ. ਤਤ੍ਥ ਜਾਤਦਿਵਸਤੋ ਪਟ੍ਠਾਯ ਸਤ੍ਤਦਿਵਸੇ ਸਮ੍ਬਾਧਟ੍ਠਾਨਤੋ ਨਿਕ੍ਖਨ੍ਤਤ੍ਤਾ ਸਤ੍ਤਾ ਮਨ੍ਦਾ ਹੋਨ੍ਤਿ ਮੋਮੂਹਾ. ਅਯਂ ਮਨ੍ਦਭੂਮੀਤਿ ਵਦਤਿ. ਯੇ ਪਨ ਦੁਗ੍ਗਤਿਤੋ ਆਗਤਾ ਹੋਨ੍ਤਿ, ਤੇ ਅਭਿਣ੍ਹਂ ਰੋਦਨ੍ਤਿ ਚੇਵ ਵਿਰਵਨ੍ਤਿ ਚ. ਸੁਗਤਿਤੋ ਆਗਤਾ ਤਂ ਅਨੁਸ੍ਸਰਿਤ੍ਵਾ ਅਨੁਸ੍ਸਰਿਤ੍ਵਾ ਹਸਨ੍ਤਿ. ਅਯਂ ਖਿਡ੍ਡਾਭੂਮਿ ਨਾਮ. ਮਾਤਾਪਿਤੂਨਂ ਹਤ੍ਥਂ ਵਾ ਪਾਦਂ ਵਾ ਮਞ੍ਚਂ ਵਾ ਪੀਠਂ ਵਾ ਗਹੇਤ੍ਵਾ ਭੂਮਿਯਂ ਪਦਨਿਕ੍ਖਿਪਨਂ ਵੀਮਂਸਕਭੂਮਿ ਨਾਮ. ਪਦਸਾਵ ਗਨ੍ਤੁਂ ਸਮਤ੍ਥਕਾਲੋ ਉਜੁਗਤਭੂਮਿ ਨਾਮ. ਸਿਪ੍ਪਾਨਂ ਸਿਕ੍ਖਨਕਾਲੋ ਸੇਕ੍ਖਭੂਮਿ ਨਾਮ. ਘਰਾ ਨਿਕ੍ਖਮ੍ਮ ਪਬ੍ਬਜਨਕਾਲੋ ਸਮਣਭੂਮਿ ਨਾਮ. ਆਚਰਿਯਂ ਸੇਵਿਤ੍ਵਾ ਜਾਨਨਕਾਲੋ ਜਿਨਭੂਮਿ ਨਾਮ. ਭਿਕ੍ਖੁ ਚ ਪਨ੍ਨਕੋ ਜਿਨੋ ਨ ਕਿਞ੍ਚਿ ਆਹਾਤਿ ਏਵਂ ਅਲਾਭਿਂ ਸਮਣਂ ਪਨ੍ਨਭੂਮੀਤਿ ਵਦਤਿ.

ਏਕੂਨਪਞ੍ਞਾਸ ਆਜੀਵਸਤੇਤਿ ਏਕੂਨਪਞ੍ਞਾਸ ਆਜੀਵਵੁਤ੍ਤਿਸਤਾਨਿ. ਪਰਿਬ੍ਬਾਜਕਸਤੇਤਿ ਪਰਿਬ੍ਬਾਜਕਪਬ੍ਬਜ੍ਜਸਤਾਨਿ. ਨਾਗਾਵਾਸਸਤੇਤਿ ਨਾਗਮਣ੍ਡਲਸਤਾਨਿ. ਵੀਸੇ ਇਨ੍ਦ੍ਰਿਯਸਤੇਤਿ ਵੀਸ ਇਨ੍ਦ੍ਰਿਯਸਤਾਨਿ. ਤਿਂਸੇ ਨਿਰਯਸਤੇਤਿ ਤਿਂਸ ਨਿਰਯਸਤਾਨਿ. ਰਜੋਧਾਤੁਯੋਤਿ ਰਜਓਕਿਰਣਟ੍ਠਾਨਾਨਿ. ਹਤ੍ਥਪਿਟ੍ਠਿਪਾਦਪਿਟ੍ਠਾਦੀਨਿ ਸਨ੍ਧਾਯ ਵਦਤਿ. ਸਤ੍ਤ ਸਞ੍ਞੀਗਬ੍ਭਾਤਿ ਓਟ੍ਠਗੋਣਗਦ੍ਰਭਅਜਪਸੁਮਿਗਮਹਿਂਸੇ ਸਨ੍ਧਾਯ ਵਦਤਿ. ਅਸਞ੍ਞੀਗਬ੍ਭਾਤਿ ਸਾਲਿਯਵਗੋਧੁਮਮੁਗ੍ਗਕਙ੍ਗੁਵਰਕਕੁਦ੍ਰੂਸਕੇ ਸਨ੍ਧਾਯ ਵਦਤਿ. ਨਿਗਣ੍ਠਿਗਬ੍ਭਾਤਿ ਨਿਗਣ੍ਠਿਮ੍ਹਿ ਜਾਤਗਬ੍ਭਾ, ਉਚ੍ਛੁਵੇਲ਼ੁਨਲ਼ਾਦਯੋ ਸਨ੍ਧਾਯ ਵਦਤਿ. ਸਤ੍ਤ ਦੇਵਾਤਿ ਬਹੂ ਦੇਵਾ, ਸੋ ਪਨ ਸਤ੍ਤਾਤਿ ਵਦਤਿ. ਮਾਨੁਸਾਪਿ ਅਨਨ੍ਤਾ, ਸੋ ਸਤ੍ਤਾਤਿ ਵਦਤਿ. ਸਤ੍ਤ ਪਿਸਾਚਾਤਿ ਪਿਸਾਚਾ ਮਹਨ੍ਤਾ, ਸਤ੍ਤਾਤਿ ਵਦਤਿ.

ਸਰਾਤਿ ਮਹਾਸਰਾ. ਕਣ੍ਣਮੁਣ੍ਡ-ਰਥਕਾਰ-ਅਨੋਤਤ੍ਤ-ਸੀਹਪਪਾਤਕੁਲ਼ਿਰ-ਮੁਚਲਿਨ੍ਦ-ਕੁਣਾਲਦਹੇ ਗਹੇਤ੍ਵਾ ਵਦਤਿ. ਪਵੁਟਾਤਿ ਗਣ੍ਠਿਕਾ. ਪਪਾਤਾਤਿ ਮਹਾਪਪਾਤਾ. ਪਪਾਤਸਤਾਨੀਤਿ ਖੁਦ੍ਦਕਪਪਾਤਸਤਾਨਿ. ਸੁਪਿਨਾਤਿ ਮਹਾਸੁਪਿਨਾ. ਸੁਪਿਨਸਤਾਨੀਤਿ ਖੁਦ੍ਦਕਸੁਪਿਨਸਤਾਨਿ. ਮਹਾਕਪ੍ਪਿਨੋਤਿ ਮਹਾਕਪ੍ਪਾਨਂ. ਏਤ੍ਥ ਏਕਮ੍ਹਾ ਸਰਾ ਵਸ੍ਸਸਤੇ ਵਸ੍ਸਸਤੇ ਕੁਸਗ੍ਗੇਨ ਏਕਂ ਉਦਕਬਿਨ੍ਦੁਂ ਨੀਹਰਿਤ੍ਵਾ ਨੀਹਰਿਤ੍ਵਾ ਸਤ੍ਤਕ੍ਖਤ੍ਤੁਂ ਤਮ੍ਹਿ ਸਰੇ ਨਿਰੁਦਕੇ ਕਤੇ ਏਕੋ ਮਹਾਕਪ੍ਪੋਤਿ ਵਦਤਿ. ਏਵਰੂਪਾਨਂ ਮਹਾਕਪ੍ਪਾਨਂ ਚਤੁਰਾਸੀਤਿਸਤਸਹਸ੍ਸਾਨਿ ਖੇਪੇਤ੍ਵਾ ਬਾਲਾ ਚ ਪਣ੍ਡਿਤਾ ਚ ਦੁਕ੍ਖਸ੍ਸਨ੍ਤਂ ਕਰੋਨ੍ਤੀਤਿ ਅਯਮਸ੍ਸ ਲਦ੍ਧਿ. ਪਣ੍ਡਿਤੋਪਿ ਕਿਰ ਅਨ੍ਤਰਾ ਸੁਜ੍ਝਿਤੁਂ ਨ ਸਕ੍ਕੋਤਿ, ਬਾਲੋਪਿ ਤਤੋ ਉਦ੍ਧਂ ਨ ਗਚ੍ਛਤਿ.

ਸੀਲੇਨਾਤਿ ਅਚੇਲਕਸੀਲੇਨ ਵਾ ਅਞ੍ਞੇਨ ਵਾ ਯੇਨ ਕੇਨਚਿ. ਵਤੇਨਾਤਿ ਤਾਦਿਸੇਨ ਵਤੇਨ. ਤਪੇਨਾਤਿ ਤਪੋਕਮ੍ਮੇਨ. ਅਪਰਿਪਕ੍ਕਂ ਪਰਿਪਾਚੇਤਿ ਨਾਮ ਯੋ ‘‘ਅਹਂ ਪਣ੍ਡਿਤੋ’’ਤਿ ਅਨ੍ਤਰਾ ਵਿਸੁਜ੍ਝਤਿ. ਪਰਿਪਕ੍ਕਂ ਫੁਸ੍ਸ ਫੁਸ੍ਸ ਬ੍ਯਨ੍ਤਿਂ ਕਰੋਤਿ ਨਾਮ ਯੋ ‘‘ਅਹਂ ਬਾਲੋ’’ਤਿ ਵੁਤ੍ਤਪਰਿਮਾਣਂ ਕਾਲਂ ਅਤਿਕ੍ਕਮਿਤ੍ਵਾ ਯਾਤਿ. ਹੇਵਂ ਨਤ੍ਥੀਤਿ ਏਵਂ ਨਤ੍ਥਿ. ਤਞ੍ਹਿ ਉਭਯਮ੍ਪਿ ਨ ਸਕ੍ਕਾ ਕਾਤੁਨ੍ਤਿ ਦੀਪੇਤਿ. ਦੋਣਮਿਤੇਤਿ ਦੋਣੇਨ ਮਿਤਂ ਵਿਯ. ਸੁਖਦੁਕ੍ਖੇਤਿ ਸੁਖਦੁਕ੍ਖਂ. ਪਰਿਯਨ੍ਤਕਤੇਤਿ ਵੁਤ੍ਤਪਰਿਮਾਣੇਨ ਕਾਲੇਨ ਕਤਪਰਿਯਨ੍ਤੋ. ਨਤ੍ਥਿ ਹਾਯਨਵਡ੍ਢਨੇਤਿ ਨਤ੍ਥਿ ਹਾਯਨਵਡ੍ਢਨਾਨਿ. ਨ ਸਂਸਾਰੋ ਪਣ੍ਡਿਤਸ੍ਸ ਹਾਯਤਿ, ਨ ਬਾਲਸ੍ਸ ਵਡ੍ਢਤੀਤਿ ਅਤ੍ਥੋ. ਉਕ੍ਕਂਸਾਵਕਂਸੇਤਿ ਉਕ੍ਕਂਸਾਵਕਂਸਾ, ਹਾਪਨਵਡ੍ਢਨਾਨਮੇਵੇਤਂ ਵੇਵਚਨਂ. ਇਦਾਨਿ ਤਮਤ੍ਥਂ ਉਪਮਾਯ ਸਾਧੇਨ੍ਤੋ ਸੇਯ੍ਯਥਾਪਿ ਨਾਮਾਤਿਆਦਿਮਾਹ. ਤਤ੍ਥ ਸੁਤ੍ਤਗੁਲ਼ੇਤਿ ਵੇਠੇਤ੍ਵਾ ਕਤਸੁਤ੍ਤਗੁਲ਼ਂ. ਨਿਬ੍ਬੇਠਿਯਮਾਨਮੇਵ ਪਲੇਤੀਤਿ ਪਬ੍ਬਤੇ ਵਾ ਰੁਕ੍ਖਗ੍ਗੇ ਵਾ ਠਤ੍ਵਾ ਖਿਤ੍ਤਂ ਸੁਤ੍ਤਪਮਾਣੇਨ ਨਿਬ੍ਬੇਠਿਯਮਾਨਂ ਗਚ੍ਛਤਿ, ਸੁਤ੍ਤੇ ਖੀਣੇ ਤਤ੍ਥ ਤਿਟ੍ਠਤਿ ਨ ਗਚ੍ਛਤਿ. ਏਵਮੇਵਂ ਵੁਤ੍ਤਕਾਲਤੋ ਉਦ੍ਧਂ ਨ ਗਚ੍ਛਤੀਤਿ ਦਸ੍ਸੇਤਿ.

੨੨੯. ਕਿਮਿਦਨ੍ਤਿ ਕਿਮਿਦਂ ਤਵ ਅਞ੍ਞਾਣਂ, ਕਿਂ ਸਬ੍ਬਞ੍ਞੁ ਨਾਮ ਤ੍ਵਨ੍ਤਿ ਏਵਂ ਪੁਟ੍ਠੋ ਸਮਾਨੋ ਨਿਯਤਿਵਾਦੇ ਪਕ੍ਖਿਪਨ੍ਤੋ ਸੁਞ੍ਞਂ ਮੇ ਅਗਾਰਨ੍ਤਿਆਦਿਮਾਹ.

੨੩੦. ਅਨੁਸ੍ਸਵਿਕੋ ਹੋਤੀਤਿ ਅਨੁਸ੍ਸਵਨਿਸ੍ਸਿਤੋ ਹੋਤਿ. ਅਨੁਸ੍ਸਵਸਚ੍ਚੋਤਿ ਸਵਨਂ ਸਚ੍ਚਤੋ ਗਹੇਤ੍ਵਾ ਠਿਤੋ. ਪਿਟਕਸਮ੍ਪਦਾਯਾਤਿ ਵਗ੍ਗਪਣ੍ਣਾਸਕਾਯ ਪਿਟਕਗਨ੍ਥਸਮ੍ਪਤ੍ਤਿਯਾ.

੨੩੨. ਮਨ੍ਦੋਤਿ ਮਨ੍ਦਪਞ੍ਞੋ. ਮੋਮੂਹੋਤਿ ਅਤਿਮੂਲ਼੍ਹੋ. ਵਾਚਾਵਿਕ੍ਖੇਪਂ ਆਪਜ੍ਜਤੀਤਿ ਵਾਚਾਯ ਵਿਕ੍ਖੇਪਂ ਆਪਜ੍ਜਤਿ. ਕੀਦਿਸਂ? ਅਮਰਾਵਿਕ੍ਖੇਪਂ, ਅਪਰਿਯਨ੍ਤਵਿਕ੍ਖੇਪਨ੍ਤਿ ਅਤ੍ਥੋ. ਅਥ ਵਾ ਅਮਰਾ ਨਾਮ ਮਚ੍ਛਜਾਤਿ. ਸਾ ਉਮ੍ਮੁਜ੍ਜਨਨਿਮ੍ਮੁਜ੍ਜਨਾਦਿਵਸੇਨ ਉਦਕੇ ਸਨ੍ਧਾਵਮਾਨਾ ਗਹੇਤੁਂ ਨ ਸਕ੍ਕਾਤਿ ਏਵਮੇਵ ਅਯਮ੍ਪਿ ਵਾਦੋ ਇਤੋ ਚਿਤੋ ਚ ਸਨ੍ਧਾਵਤਿ, ਗਾਹਂ ਨ ਉਪਗਚ੍ਛਤੀਤਿ ਅਮਰਾਵਿਕ੍ਖੇਪੋਤਿ ਵੁਚ੍ਚਤਿ. ਤਂ ਅਮਰਾਵਿਕ੍ਖੇਪਂ.

ਏਵਨ੍ਤਿਪਿ ਮੇ ਨੋਤਿਆਦੀਸੁ ਇਦਂ ਕੁਸਲਨ੍ਤਿ ਪੁਟ੍ਠੋ ‘‘ਏਵਨ੍ਤਿਪਿ ਮੇ ਨੋ’’ਤਿ ਵਦਤਿ, ਤਤੋ ਕਿਂ ਅਕੁਸਲਨ੍ਤਿ ਵੁਤ੍ਤੇ ‘‘ਤਥਾਤਿਪਿ ਮੇ ਨੋ’’ਤਿ ਵਦਤਿ, ਕਿਂ ਉਭਯਤੋ ਅਞ੍ਞਥਾਤਿ ਵੁਤ੍ਤੇ ‘‘ਅਞ੍ਞਥਾਤਿਪਿ ਮੇ ਨੋ’’ਤਿ ਵਦਤਿ, ਤਤੋ ਤਿਵਿਧੇਨਾਪਿ ਨ ਹੋਤੀਤਿ ਤੇ ਲਦ੍ਧੀਤਿ ਵੁਤ੍ਤੇ ‘‘ਨੋਤਿਪਿ ਮੇ ਨੋ’’ਤਿ ਵਦਤਿ, ਤਤੋ ਕਿਂ ਨੋ ਨੋਤਿ ਤੇ ਲਦ੍ਧੀਤਿ ਵੁਤ੍ਤੇ ‘‘ਨੋ ਨੋਤਿਪਿ ਮੇ ਨੋ’’ਤਿ ਵਿਕ੍ਖੇਪਮਾਪਜ੍ਜਤਿ, ਏਕਸ੍ਮਿਮ੍ਪਿ ਪਕ੍ਖੇ ਨ ਤਿਟ੍ਠਤਿ. ਨਿਬ੍ਬਿਜ੍ਜ ਪਕ੍ਕਮਤੀਤਿ ਅਤ੍ਤਨੋਪਿ ਏਸ ਸਤ੍ਥਾ ਅਵਸ੍ਸਯੋ ਭਵਿਤੁਂ ਨ ਸਕ੍ਕੋਤਿ, ਮਯ੍ਹਂ ਕਿਂ ਸਕ੍ਖਿਸ੍ਸਤੀਤਿ ਨਿਬ੍ਬਿਨ੍ਦਿਤ੍ਵਾ ਪਕ੍ਕਮਤਿ. ਪੁਰਿਮੇਸੁਪਿ ਅਨਸ੍ਸਾਸਿਕੇਸੁ ਏਸੇਵ ਨਯੋ.

੨੩੪. ਸਨ੍ਨਿਧਿਕਾਰਕਂ ਕਾਮੇ ਪਰਿਭੁਞ੍ਜਿਤੁਨ੍ਤਿ ਯਥਾ ਪੁਬ੍ਬੇ ਗਿਹਿਭੂਤੋ ਸਨ੍ਨਿਧਿਂ ਕਤ੍ਵਾ ਵਤ੍ਥੁਕਾਮੇ ਪਰਿਭੁਞ੍ਜਤਿ, ਏਵਂ ਤਿਲਤਣ੍ਡੁਲਸਪ੍ਪਿਨਵਨੀਤਾਦੀਨਿ ਸਨ੍ਨਿਧਿਂ ਕਤ੍ਵਾ ਇਦਾਨਿ ਪਰਿਭੁਞ੍ਜਿਤੁਂ ਅਭਬ੍ਬੋਤਿ ਅਤ੍ਥੋ. ਨਨੁ ਚ ਖੀਣਾਸਵਸ੍ਸ ਵਸਨਟ੍ਠਾਨੇ ਤਿਲਤਣ੍ਡੁਲਾਦਯੋ ਪਞ੍ਞਾਯਨ੍ਤੀਤਿ. ਨੋ ਨ ਪਞ੍ਞਾਯਨ੍ਤਿ, ਨ ਪਨੇਸ ਤੇ ਅਤ੍ਤਨੋ ਅਤ੍ਥਾਯ ਠਪੇਤਿ, ਅਫਾਸੁਕਪਬ੍ਬਜਿਤਾਦੀਨਂ ਅਤ੍ਥਾਯ ਠਪੇਤਿ. ਅਨਾਗਾਮਿਸ੍ਸ ਕਥਨ੍ਤਿ. ਤਸ੍ਸਾਪਿ ਪਞ੍ਚ ਕਾਮਗੁਣਾ ਸਬ੍ਬਸੋਵ ਪਹੀਨਾ, ਧਮ੍ਮੇਨ ਪਨ ਲਦ੍ਧਂ ਵਿਚਾਰੇਤ੍ਵਾ ਪਰਿਭੁਞ੍ਜਤਿ.

੨੩੬. ਪੁਤ੍ਤਮਤਾਯ ਪੁਤ੍ਤਾਤਿ ਸੋ ਕਿਰ ਇਮਂ ਧਮ੍ਮਂ ਸੁਤ੍ਵਾ ਆਜੀਵਕਾ ਮਤਾ ਨਾਮਾਤਿ ਸਞ੍ਞੀ ਹੁਤ੍ਵਾ ਏਵਮਾਹ. ਅਯਞ੍ਹੇਤ੍ਥ ਅਤ੍ਥੋ – ਆਜੀਵਕਾ ਮਤਾ ਨਾਮ, ਤੇਸਂ ਮਾਤਾ ਪੁਤ੍ਤਮਤਾ ਹੋਤਿ, ਇਤਿ ਆਜੀਵਕਾ ਪੁਤ੍ਤਮਤਾਯ ਪੁਤ੍ਤਾ ਨਾਮ ਹੋਨ੍ਤਿ. ਸਮਣੇ ਗੋਤਮੇਤਿ ਸਮਣੇ ਗੋਤਮੇ ਬ੍ਰਹ੍ਮਚਰਿਯਵਾਸੋ ਅਤ੍ਥਿ, ਅਞ੍ਞਤ੍ਥ ਨਤ੍ਥੀਤਿ ਦੀਪੇਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਸਨ੍ਦਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਮਹਾਸਕੁਲੁਦਾਯਿਸੁਤ੍ਤਵਣ੍ਣਨਾ

੨੩੭. ਏਵਂ ਮੇ ਸੁਤਨ੍ਤਿ ਮਹਾਸਕੁਲੁਦਾਯਿਸੁਤ੍ਤਂ. ਤਤ੍ਥ ਮੋਰਨਿਵਾਪੇਤਿ ਤਸ੍ਮਿਂ ਠਾਨੇ ਮੋਰਾਨਂ ਅਭਯਂ ਘੋਸੇਤ੍ਵਾ ਭੋਜਨਂ ਅਦਂਸੁ. ਤਸ੍ਮਾ ਤਂ ਠਾਨਂ ਮੋਰਨਿਵਾਪੋਤਿ ਸਙ੍ਖਂ ਗਤਂ. ਅਨ੍ਨਭਾਰੋਤਿ ਏਕਸ੍ਸ ਪਰਿਬ੍ਬਾਜਕਸ੍ਸ ਨਾਮਂ. ਤਥਾ ਵਰਧਰੋਤਿ. ਅਞ੍ਞੇ ਚਾਤਿ ਨ ਕੇਵਲਂ ਇਮੇ ਤਯੋ, ਅਞ੍ਞੇਪਿ ਅਭਿਞ੍ਞਾਤਾ ਬਹੂ ਪਰਿਬ੍ਬਾਜਕਾ. ਅਪ੍ਪਸਦ੍ਦਸ੍ਸ ਵਣ੍ਣਵਾਦੀਤਿ ਇਧ ਅਪ੍ਪਸਦ੍ਦਵਿਨੀਤੋਤਿ ਅਵਤ੍ਵਾਵ ਇਦਂ ਵੁਤ੍ਤਂ. ਕਸ੍ਮਾ? ਨ ਹਿ ਭਗਵਾ ਅਞ੍ਞੇਨ ਵਿਨੀਤੋਤਿ.

੨੩੮. ਪੁਰਿਮਾਨੀਤਿ ਹਿਯ੍ਯੋਦਿਵਸਂ ਉਪਾਦਾਯ ਪੁਰਿਮਾਨਿ ਨਾਮ ਹੋਨ੍ਤਿ, ਤਤੋ ਪਰਂ ਪੁਰਿਮਤਰਾਨਿ. ਕੁਤੂਹਲਸਾਲਾਯਨ੍ਤਿ ਕੁਤੂਹਲਸਾਲਾ ਨਾਮ ਪਚ੍ਚੇਕਸਾਲਾ ਨਤ੍ਥਿ, ਯਤ੍ਥ ਪਨ ਨਾਨਾਤਿਤ੍ਥਿਯਾ ਸਮਣਬ੍ਰਾਹ੍ਮਣਾ ਨਾਨਾਵਿਧਂ ਕਥਂ ਪਵਤ੍ਤੇਨ੍ਤਿ, ਸਾ ਬਹੂਨਂ – ‘‘ਅਯਂ ਕਿਂ ਵਦਤਿ, ਅਯਂ ਕਿਂ ਵਦਤੀ’’ਤਿ ਕੁਤੂਹਲੁਪ੍ਪਤ੍ਤਿਟ੍ਠਾਨਤੋ ‘‘ਕੁਤੂਹਲਸਾਲਾ’’ਤਿ ਵੁਚ੍ਚਤਿ. ‘‘ਕੋਤੂਹਲਸਾਲਾ’’ਤਿਪਿ ਪਾਠੋ. ਲਾਭਾਤਿ ਯੇ ਏਵਰੂਪੇ ਸਮਣਬ੍ਰਾਹ੍ਮਣੇ ਦਟ੍ਠੁਂ ਪਞ੍ਹਂ ਪੁਚ੍ਛਿਤੁਂ ਧਮ੍ਮਕਥਂ ਵਾ ਨੇਸਂ ਸੋਤੁਂ ਲਭਨ੍ਤਿ, ਤੇਸਂ ਅਙ੍ਗਮਗਧਾਨਂ ਇਮੇ ਲਾਭਾਤਿ ਅਤ੍ਥੋ.

ਸਙ੍ਘਿਨੋਤਿਆਦੀਸੁ ਪਬ੍ਬਜਿਤਸਮੂਹਸਙ੍ਖਾਤੋ ਸਙ੍ਘੋ ਏਤੇਸਂ ਅਤ੍ਥੀਤਿ ਸਙ੍ਘਿਨੋ. ਸ੍ਵੇਵ ਗਣੋ ਏਤੇਸਂ ਅਤ੍ਥੀਤਿ ਗਣਿਨੋ. ਆਚਾਰਸਿਕ੍ਖਾਪਨਵਸੇਨ ਤਸ੍ਸ ਗਣਸ੍ਸ ਆਚਰਿਯਾਤਿ ਗਣਾਚਰਿਯਾ. ਞਾਤਾਤਿ ਪਞ੍ਞਾਤਾ ਪਾਕਟਾ. ਯਥਾਭੁਚ੍ਚਗੁਣੇਹਿ ਚੇਵ ਅਯਥਾਭੂਤਗੁਣੇਹਿ ਚ ਸਮੁਗ੍ਗਤੋ ਯਸੋ ਏਤੇਸਂ ਅਤ੍ਥੀਤਿ ਯਸਸ੍ਸਿਨੋ. ਪੂਰਣਾਦੀਨਞ੍ਹਿ ‘‘ਅਪ੍ਪਿਚ੍ਛੋ ਸਨ੍ਤੁਟ੍ਠੋ, ਅਪ੍ਪਿਚ੍ਛਤਾਯ ਵਤ੍ਥਮ੍ਪਿ ਨ ਨਿਵਾਸੇਤੀ’’ਤਿਆਦਿਨਾ ਨਯੇਨ ਯਸੋ ਸਮੁਗ੍ਗਤੋ, ਤਥਾਗਤਸ੍ਸ ‘‘ਇਤਿਪਿ ਸੋ ਭਗਵਾ’’ਤਿਆਦੀਹਿ ਯਥਾਭੂਤਗੁਣੇਹਿ. ਤਿਤ੍ਥਕਰਾਤਿ ਲਦ੍ਧਿਕਰਾ. ਸਾਧੁਸਮ੍ਮਤਾਤਿ ਇਮੇ ਸਾਧੂ ਸੁਨ੍ਦਰਾ ਸਪ੍ਪੁਰਿਸਾਤਿ ਏਵਂ ਸਮ੍ਮਤਾ. ਬਹੁਜਨਸ੍ਸਾਤਿ ਅਸ੍ਸੁਤਵਤੋ ਚੇਵ ਅਨ੍ਧਬਾਲਪੁਥੁਜ੍ਜਨਸ੍ਸ ਵਿਭਾਵਿਨੋ ਚ ਪਣ੍ਡਿਤਜਨਸ੍ਸ. ਤਤ੍ਥ ਤਿਤ੍ਥਿਯਾ ਬਾਲਜਨਸ੍ਸ ਏਵਂ ਸਮ੍ਮਤਾ, ਤਥਾਗਤੋ ਪਣ੍ਡਿਤਜਨਸ੍ਸ. ਇਮਿਨਾ ਨਯੇਨ ਪੂਰਣੋ ਕਸ੍ਸਪੋ ਸਙ੍ਘੀਤਿਆਦੀਸੁ ਅਤ੍ਥੋ ਵੇਦਿਤਬ੍ਬੋ. ਭਗਵਾ ਪਨ ਯਸ੍ਮਾ ਅਟ੍ਠਤਿਂਸ ਆਰਮ੍ਮਣਾਨਿ ਵਿਭਜਨ੍ਤੋ ਬਹੂਨਿ ਨਿਬ੍ਬਾਨਓਤਰਣਤਿਤ੍ਥਾਨਿ ਅਕਾਸਿ, ਤਸ੍ਮਾ ‘‘ਤਿਤ੍ਥਕਰੋ’’ਤਿ ਵਤ੍ਤੁਂ ਵਟ੍ਟਤਿ.

ਕਸ੍ਮਾ ਪਨੇਤੇ ਸਬ੍ਬੇਪਿ ਤਤ੍ਥ ਓਸਟਾਤਿ? ਉਪਟ੍ਠਾਕਰਕ੍ਖਣਤ੍ਥਞ੍ਚੇਵ ਲਾਭਸਕ੍ਕਾਰਤ੍ਥਞ੍ਚ. ਤੇਸਞ੍ਹਿ ਏਵਂ ਹੋਤਿ – ‘‘ਅਮ੍ਹਾਕਂ ਉਪਟ੍ਠਾਕਾ ਸਮਣਂ ਗੋਤਮਂ ਸਰਣਂ ਗਚ੍ਛੇਯ੍ਯੁਂ, ਤੇ ਚ ਰਕ੍ਖਿਸ੍ਸਾਮ. ਸਮਣਸ੍ਸ ਚ ਗੋਤਮਸ੍ਸ ਉਪਟ੍ਠਾਕੇ ਸਕ੍ਕਾਰਂ ਕਰੋਨ੍ਤੇ ਦਿਸ੍ਵਾ ਅਮ੍ਹਾਕਮ੍ਪਿ ਉਪਟ੍ਠਾਕਾ ਅਮ੍ਹਾਕਂ ਸਕ੍ਕਾਰਂ ਕਰਿਸ੍ਸਨ੍ਤੀ’’ਤਿ. ਤਸ੍ਮਾ ਯਤ੍ਥ ਯਤ੍ਥ ਭਗਵਾ ਓਸਰਤਿ, ਤਤ੍ਥ ਤਤ੍ਥ ਸਬ੍ਬੇ ਓਸਰਨ੍ਤਿ.

੨੩੯. ਵਾਦਂ ਆਰੋਪੇਤ੍ਵਾਤਿ ਵਾਦੇ ਦੋਸਂ ਆਰੋਪੇਤ੍ਵਾ. ਅਪਕ੍ਕਨ੍ਤਾਤਿ, ਅਪਗਤਾ, ਕੇਚਿ ਦਿਸਂ ਪਕ੍ਕਨ੍ਤਾ, ਕੇਚਿ ਗਿਹਿਭਾਵਂ ਪਤ੍ਤਾ, ਕੇਚਿ ਇਮਂ ਸਾਸਨਂ ਆਗਤਾ. ਸਹਿਤਂ ਮੇਤਿ ਮਯ੍ਹਂ ਵਚਨਂ ਸਹਿਤਂ ਸਿਲਿਟ੍ਠਂ, ਅਤ੍ਥਯੁਤ੍ਤਂ ਕਾਰਣਯੁਤ੍ਤਨ੍ਤਿ ਅਤ੍ਥੋ. ਅਸਹਿਤਂ ਤੇਤਿ ਤੁਯ੍ਹਂ ਵਚਨਂ ਅਸਹਿਤਂ. ਅਧਿਚਿਣ੍ਣਂ ਤੇ ਵਿਪਰਾਵਤ੍ਤਨ੍ਤਿ ਯਂ ਤੁਯ੍ਹਂ ਦੀਘਰਤ੍ਤਾਚਿਣ੍ਣਵਸੇਨ ਸੁਪ੍ਪਗੁਣਂ, ਤਂ ਮਯ੍ਹਂ ਏਕਵਚਨੇਨੇਵ ਵਿਪਰਾਵਤ੍ਤਂ ਵਿਪਰਿਵਤ੍ਤਿਤ੍ਵਾ ਠਿਤਂ, ਨ ਕਿਞ੍ਚਿ ਜਾਤਨ੍ਤਿ ਅਤ੍ਥੋ. ਆਰੋਪਿਤੋ ਤੇ ਵਾਦੋਤਿ ਮਯਾ ਤਵ ਵਾਦੇ ਦੋਸੋ ਆਰੋਪਿਤੋ. ਚਰ ਵਾਦਪ੍ਪਮੋਕ੍ਖਾਯਾਤਿ ਦੋਸਮੋਚਨਤ੍ਥਂ ਚਰ ਵਿਚਰ, ਤਤ੍ਥ ਤਤ੍ਥ ਗਨ੍ਤ੍ਵਾ ਸਿਕ੍ਖਾਤਿ ਅਤ੍ਥੋ. ਨਿਬ੍ਬੇਠੇਹਿ ਵਾ ਸਚੇ ਪਹੋਸੀਤਿ ਅਥ ਸਯਂ ਪਹੋਸਿ, ਇਦਾਨੇਵ ਨਿਬ੍ਬੇਠੇਹਿ. ਧਮ੍ਮਕ੍ਕੋਸੇਨਾਤਿ ਸਭਾਵਕ੍ਕੋਸੇਨ.

੨੪੦. ਤਂ ਨੋ ਸੋਸ੍ਸਾਮਾਤਿ ਤਂ ਅਮ੍ਹਾਕਂ ਦੇਸਿਤਂ ਧਮ੍ਮਂ ਸੁਣਿਸ੍ਸਾਮ. ਖੁਦ੍ਦਮਧੁਨ੍ਤਿ ਖੁਦ੍ਦਕਮਕ੍ਖਿਕਾਹਿ ਕਤਂ ਦਣ੍ਡਕਮਧੁਂ. ਅਨੇਲਕਨ੍ਤਿ ਨਿਦ੍ਦੋਸਂ ਅਪਗਤਮਚ੍ਛਿਕਣ੍ਡਕਂ. ਪੀਲ਼ੇਯ੍ਯਾਤਿ ਦਦੇਯ੍ਯ. ਪਚ੍ਚਾਸੀਸਮਾਨਰੂਪੋਤਿ ਪੂਰੇਤ੍ਵਾ ਨੁ ਖੋ ਨੋ ਭੋਜਨਂ ਦਸ੍ਸਤੀਤਿ ਭਾਜਨਹਤ੍ਥੋ ਪਚ੍ਚਾਸੀਸਮਾਨੋ ਪਚ੍ਚੁਪਟ੍ਠਿਤੋ ਅਸ੍ਸ. ਸਮ੍ਪਯੋਜੇਤ੍ਵਾਤਿ ਅਪ੍ਪਮਤ੍ਤਕਂ ਵਿਵਾਦਂ ਕਤ੍ਵਾ.

੨੪੧. ਇਤਰੀਤਰੇਨਾਤਿ ਲਾਮਕਲਾਮਕੇਨ. ਪਵਿਵਿਤ੍ਤੋਤਿ ਇਦਂ ਪਰਿਬ੍ਬਾਜਕੋ ਕਾਯਵਿਵੇਕਮਤ੍ਤਂ ਸਨ੍ਧਾਯ ਵਦਤਿ, ਭਗਵਾ ਪਨ ਤੀਹਿ ਵਿਵੇਕੇਹਿ ਵਿਵਿਤ੍ਤੋਵ.

੨੪੨. ਕੋਸਕਾਹਾਰਾਪੀਤਿ ਦਾਨਪਤੀਨਂ ਘਰੇ ਅਗ੍ਗਭਿਕ੍ਖਾਠਪਨਤ੍ਥਂ ਖੁਦ੍ਦਕਸਰਾਵਾ ਹੋਨ੍ਤਿ, ਦਾਨਪਤਿਨੋ ਅਗ੍ਗਭਤ੍ਤਂ ਵਾ ਤਤ੍ਥ ਠਪੇਤ੍ਵਾ ਭੁਞ੍ਜਨ੍ਤਿ, ਪਬ੍ਬਜਿਤੇ ਸਮ੍ਪਤ੍ਤੇ ਤਂ ਭਤ੍ਤਂ ਤਸ੍ਸ ਦੇਨ੍ਤਿ. ਤਂ ਸਰਾਵਕਂ ਕੋਸਕੋਤਿ ਵੁਚ੍ਚਤਿ. ਤਸ੍ਮਾ ਯੇ ਚ ਏਕੇਨੇਵ ਭਤ੍ਤਕੋਸਕੇਨ ਯਾਪੇਨ੍ਤਿ, ਤੇ ਕੋਸਕਾਹਾਰਾਤਿ. ਬੇਲੁਵਾਹਾਰਾਤਿ ਬੇਲੁਵਮਤ੍ਤਭਤ੍ਤਾਹਾਰਾ. ਸਮਤਿਤ੍ਤਿਕਨ੍ਤਿ ਓਟ੍ਠਵਟ੍ਟਿਯਾ ਹੇਟ੍ਠਿਮਲੇਖਾਸਮਂ. ਇਮਿਨਾ ਧਮ੍ਮੇਨਾਤਿ ਇਮਿਨਾ ਅਪ੍ਪਾਹਾਰਤਾਧਮ੍ਮੇਨ. ਏਤ੍ਥ ਪਨ ਸਬ੍ਬਾਕਾਰੇਨੇਵ ਭਗਵਾ ਅਨਪ੍ਪਾਹਾਰੋਤਿ ਨ ਵਤ੍ਤਬ੍ਬੋ. ਪਧਾਨਭੂਮਿਯਂ ਛਬ੍ਬਸ੍ਸਾਨਿ ਅਪ੍ਪਾਹਾਰੋਵ ਅਹੋਸਿ, ਵੇਰਞ੍ਜਾਯਂ ਤਯੋ ਮਾਸੇ ਪਤ੍ਥੋਦਨੇਨੇਵ ਯਾਪੇਸਿ ਪਾਲਿਲੇਯ੍ਯਕਵਨਸਣ੍ਡੇ ਤਯੋ ਮਾਸੇ ਭਿਸਮੁਲ਼ਾਲੇਹੇਵ ਯਾਪੇਸਿ. ਇਧ ਪਨ ਏਤਮਤ੍ਥਂ ਦਸ੍ਸੇਤਿ – ‘‘ਅਹਂ ਏਕਸ੍ਮਿਂ ਕਾਲੇ ਅਪ੍ਪਾਹਾਰੋ ਅਹੋਸਿਂ, ਮਯ੍ਹਂ ਪਨ ਸਾਵਕਾ ਧੁਤਙ੍ਗਸਮਾਦਾਨਤੋ ਪਟ੍ਠਾਯ ਯਾਵਜੀਵਂ ਧੁਤਙ੍ਗਂ ਨ ਭਿਨ੍ਦਨ੍ਤੀ’’ਤਿ. ਤਸ੍ਮਾ ਯਦਿ ਤੇ ਇਮਿਨਾ ਧਮ੍ਮੇਨ ਸਕ੍ਕਰੇਯ੍ਯੁਂ, ਮਯਾ ਹਿ ਤੇ ਵਿਸੇਸਤਰਾ. ਅਞ੍ਞੋ ਚੇਵ ਪਨ ਧਮ੍ਮੋ ਅਤ੍ਥਿ, ਯੇਨ ਮਂ ਤੇ ਸਕ੍ਕਰੋਨ੍ਤੀਤਿ ਦਸ੍ਸੇਤਿ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਯੋਜਨਾ ਵੇਦਿਤਬ੍ਬਾ.

ਪਂਸੁਕੂਲਿਕਾਤਿ ਸਮਾਦਿਨ੍ਨਪਂਸੁਕੂਲਿਕਙ੍ਗਾ. ਲੂਖਚੀਵਰਧਰਾਤਿ ਸਤ੍ਥਸੁਤ੍ਤਲੂਖਾਨਿ ਚੀਵਰਾਨਿ ਧਾਰਯਮਾਨਾ. ਨਨ੍ਤਕਾਨੀਤਿ ਅਨ੍ਤਵਿਰਹਿਤਾਨਿ ਵਤ੍ਥਖਣ੍ਡਾਨਿ, ਯਦਿ ਹਿ ਨੇਸਂ ਅਨ੍ਤੋ ਭਵੇਯ੍ਯ, ਪਿਲੋਤਿਕਾਤਿ ਸਙ੍ਖਂ ਗਚ੍ਛੇਯ੍ਯੁਂ. ਉਚ੍ਚਿਨਿਤ੍ਵਾਤਿ ਫਾਲੇਤ੍ਵਾ ਦੁਬ੍ਬਲਟ੍ਠਾਨਂ ਪਹਾਯ ਥਿਰਟ੍ਠਾਨਮੇਵ ਗਹੇਤ੍ਵਾ. ਅਲਾਬੁਲੋਮਸਾਨੀਤਿ ਅਲਾਬੁਲੋਮਸਦਿਸਸੁਤ੍ਤਾਨਿ ਸੁਖੁਮਾਨੀਤਿ ਦੀਪੇਤਿ. ਏਤ੍ਤਾਵਤਾ ਚ ਸਤ੍ਥਾ ਚੀਵਰਸਨ੍ਤੋਸੇਨ ਅਸਨ੍ਤੁਟ੍ਠੋਤਿ ਨ ਵਤ੍ਤਬ੍ਬੋ. ਅਤਿਮੁਤ੍ਤਕਸੁਸਾਨਤੋ ਹਿਸ੍ਸ ਪੁਣ੍ਣਦਾਸਿਯਾ ਪਾਰੁਪਿਤ੍ਵਾ ਪਾਤਿਤਸਾਣਪਂਸੁਕੂਲਂ ਗਹਣਦਿਵਸੇ ਉਦਕਪਰਿਯਨ੍ਤਂ ਕਤ੍ਵਾ ਮਹਾਪਥਵੀ ਅਕਮ੍ਪਿ. ਇਧ ਪਨ ਏਤਮਤ੍ਥਂ ਦਸ੍ਸੇਤਿ – ‘‘ਅਹਂ ਏਕਸ੍ਮਿਂਯੇਵ ਕਾਲੇ ਪਂਸੁਕੂਲਂ ਗਣ੍ਹਿਂ, ਮਯ੍ਹਂ ਪਨ ਸਾਵਕਾ ਧੁਤਙ੍ਗਸਮਾਦਾਨਤੋ ਪਟ੍ਠਾਯ ਯਾਵਜੀਵਂ ਧੁਤਙ੍ਗਂ ਨ ਭਿਨ੍ਦਨ੍ਤੀ’’ਤਿ.

ਪਿਣ੍ਡਪਾਤਿਕਾਤਿ ਅਤਿਰੇਕਲਾਭਂ ਪਟਿਕ੍ਖਿਪਿਤ੍ਵਾ ਸਮਾਦਿਨ੍ਨਪਿਣ੍ਡਪਾਤਿਕਙ੍ਗਾ. ਸਪਦਾਨਚਾਰਿਨੋਤਿ ਲੋਲੁਪ੍ਪਚਾਰਂ ਪਟਿਕ੍ਖਿਪਿਤ੍ਵਾ ਸਮਾਦਿਨ੍ਨਸਪਦਾਨਚਾਰਾ. ਉਞ੍ਛਾਸਕੇ ਵਤੇ ਰਤਾਤਿ ਉਞ੍ਛਾਚਰਿਯਸਙ੍ਖਾਤੇ ਭਿਕ੍ਖੂਨਂ ਪਕਤਿਵਤੇ ਰਤਾ, ਉਚ੍ਚਨੀਚਘਰਦ੍ਵਾਰਟ੍ਠਾਯਿਨੋ ਹੁਤ੍ਵਾ ਕਬਰਮਿਸ੍ਸਕਂ ਭਤ੍ਤਂ ਸਂਹਰਿਤ੍ਵਾ ਪਰਿਭੁਞ੍ਜਨ੍ਤੀਤਿ ਅਤ੍ਥੋ. ਅਨ੍ਤਰਘਰਨ੍ਤਿ ਬ੍ਰਹ੍ਮਾਯੁਸੁਤ੍ਤੇ ਉਮ੍ਮਾਰਤੋ ਪਟ੍ਠਾਯ ਅਨ੍ਤਰਘਰਂ, ਇਧ ਇਨ੍ਦਖੀਲਤੋ ਪਟ੍ਠਾਯ ਅਧਿਪ੍ਪੇਤਂ. ਏਤ੍ਤਾਵਤਾ ਚ ਸਤ੍ਥਾ ਪਿਣ੍ਡਪਾਤਸਨ੍ਤੋਸੇਨ ਅਸਨ੍ਤੁਟ੍ਠੋਤਿ ਨ ਵਤ੍ਤਬ੍ਬੋ, ਅਪ੍ਪਾਹਾਰਤਾਯ ਵੁਤ੍ਤਨਿਯਾਮੇਨੇਵ ਪਨ ਸਬ੍ਬਂ ਵਿਤ੍ਥਾਰੇਤਬ੍ਬਂ. ਇਧ ਪਨ ਏਤਮਤ੍ਥਂ ਦਸ੍ਸੇਤਿ – ‘‘ਅਹਂ ਏਕਸ੍ਮਿਂਯੇਵ ਕਾਲੇ ਨਿਮਨ੍ਤਨਂ ਨ ਸਾਦਯਿਂ, ਮਯ੍ਹਂ ਪਨ ਸਾਵਕਾ ਧੁਤਙ੍ਗਸਮਾਦਾਨਤੋ ਪਟ੍ਠਾਯ ਯਾਵਜੀਵਂ ਧੁਤਙ੍ਗਂ ਨ ਭਿਨ੍ਦਨ੍ਤੀ’’ਤਿ.

ਰੁਕ੍ਖਮੂਲਿਕਾਤਿ ਛਨ੍ਨਂ ਪਟਿਕ੍ਖਿਪਿਤ੍ਵਾ ਸਮਾਦਿਨ੍ਨਰੁਕ੍ਖਮੂਲਿਕਙ੍ਗਾ. ਅਬ੍ਭੋਕਾਸਿਕਾਤਿ ਛਨ੍ਨਞ੍ਚ ਰੁਕ੍ਖਮੂਲਞ੍ਚ ਪਟਿਕ੍ਖਿਪਿਤ੍ਵਾ ਸਮਾਦਿਨ੍ਨਅਬ੍ਭੋਕਾਸਿਕਙ੍ਗਾ. ਅਟ੍ਠਮਾਸੇਤਿ ਹੇਮਨ੍ਤਗਿਮ੍ਹਿਕੇ ਮਾਸੇ. ਅਨ੍ਤੋਵਸ੍ਸੇ ਪਨ ਚੀਵਰਾਨੁਗ੍ਗਹਤ੍ਥਂ ਛਨ੍ਨਂ ਪਵਿਸਨ੍ਤਿ. ਏਤ੍ਤਾਵਤਾ ਚ ਸਤ੍ਥਾ ਸੇਨਾਸਨਸਨ੍ਤੋਸੇਨ ਅਸਨ੍ਤੁਟ੍ਠੋਤਿ ਨ ਵਤ੍ਤਬ੍ਬੋ, ਸੇਨਾਸਨਸਨ੍ਤੋਸੋ ਪਨਸ੍ਸ ਛਬ੍ਬਸ੍ਸਿਕਮਹਾਪਧਾਨੇਨ ਚ ਪਾਲਿਲੇਯ੍ਯਕਵਨਸਣ੍ਡੇਨ ਚ ਦੀਪੇਤਬ੍ਬੋ. ਇਧ ਪਨ ਏਤਮਤ੍ਥਂ ਦਸ੍ਸੇਤਿ – ‘‘ਅਹਂ ਏਕਸ੍ਮਿਂਯੇਵ ਕਾਲੇ ਛਨ੍ਨਂ ਨ ਪਾਵਿਸਿਂ, ਮਯ੍ਹਂ ਪਨ ਸਾਵਕਾ ਧੁਤਙ੍ਗਸਮਾਦਾਨਤੋ ਪਟ੍ਠਾਯ ਯਾਵਜੀਵਂ ਧੁਤਙ੍ਗਂ ਨ ਭਿਨ੍ਦਨ੍ਤੀ’’ਤਿ.

ਆਰਞ੍ਞਿਕਾਤਿ ਗਾਮਨ੍ਤਸੇਨਾਸਨਂ ਪਟਿਕ੍ਖਿਪਿਤ੍ਵਾ ਸਮਾਦਿਨ੍ਨਆਰਞ੍ਞਿਕਙ੍ਗਾ. ਸਙ੍ਘਮਜ੍ਝੇ ਓਸਰਨ੍ਤੀਤਿ ਅਬਦ੍ਧਸੀਮਾਯ ਕਥਿਤਂ, ਬਦ੍ਧਸੀਮਾਯਂ ਪਨ ਵਸਨ੍ਤਾ ਅਤ੍ਤਨੋ ਵਸਨਟ੍ਠਾਨੇਯੇਵ ਉਪੋਸਥਂ ਕਰੋਨ੍ਤਿ. ਏਤ੍ਤਾਵਤਾ ਚ ਸਤ੍ਥਾ ਨੋ ਪਵਿਵਿਤ੍ਤੋਤਿ ਨ ਵਤ੍ਤਬ੍ਬੋ, ‘‘ਇਚ੍ਛਾਮਹਂ, ਭਿਕ੍ਖਵੇ, ਅਡ੍ਢਮਾਸਂ ਪਟਿਸਲ੍ਲਿਯਿਤੁ’’ਨ੍ਤਿ (ਪਾਰਾ. ੧੬੨; ੫੬੫) ਏਵਞ੍ਹਿਸ੍ਸ ਪਵਿਵੇਕੋ ਪਞ੍ਞਾਯਤਿ. ਇਧ ਪਨ ਏਤਮਤ੍ਥਂ ਦਸ੍ਸੇਤਿ ‘‘ਅਹਂ ਏਕਸ੍ਮਿਂਯੇਵ ਤਥਾਰੂਪੇ ਕਾਲੇ ਪਟਿਸਲ੍ਲਿਯਿਂ, ਮਯ੍ਹਂ ਪਨ ਸਾਵਕਾ ਧੁਤਙ੍ਗਸਮਾਦਾਨਤੋ ਪਟ੍ਠਾਯ ਯਾਵਜੀਵਂ ਧੁਤਙ੍ਗਂ ਨ ਭਿਨ੍ਦਨ੍ਤੀ’’ਤਿ. ਮਮਂ ਸਾਵਕਾਤਿ ਮਂ ਸਾਵਕਾ.

੨੪੪. ਸਨਿਦਾਨਨ੍ਤਿ ਸਪ੍ਪਚ੍ਚਯਂ. ਕਿਂ ਪਨ ਅਪ੍ਪਚ੍ਚਯਂ ਨਿਬ੍ਬਾਨਂ ਨ ਦੇਸੇਤੀਤਿ. ਨੋ ਨ ਦੇਸੇਤਿ, ਸਹੇਤੁਕਂ ਪਨ ਤਂ ਦੇਸਨਂ ਕਤ੍ਵਾ ਦੇਸੇਤਿ, ਨੋ ਅਹੇਤੁਕਨ੍ਤਿ. ਸਪ੍ਪਾਟਿਹਾਰਿਯਨ੍ਤਿ ਪੁਰਿਮਸ੍ਸੇਵੇਤਂ ਵੇਵਚਨਂ, ਸਕਾਰਣਨ੍ਤਿ ਅਤ੍ਥੋ. ਤਂ ਵਤਾਤਿ ਏਤ੍ਥ ਵਤਾਤਿ ਨਿਪਾਤਮਤ੍ਤਂ.

੨੪੫. ਅਨਾਗਤਂ ਵਾਦਪਥਨ੍ਤਿ ਅਜ੍ਜ ਠਪੇਤ੍ਵਾ ਸ੍ਵੇ ਵਾ ਪੁਨਦਿਵਸੇ ਵਾ ਅਡ੍ਢਮਾਸੇ ਵਾ ਮਾਸੇ ਵਾ ਸਂਵਚ੍ਛਰੇ ਵਾ ਤਸ੍ਸ ਤਸ੍ਸ ਪਞ੍ਹਸ੍ਸ ਉਪਰਿ ਆਗਮਨਵਾਦਪਥਂ. ਨ ਦਕ੍ਖਤੀਤਿ ਯਥਾ ਸਚ੍ਚਕੋ ਨਿਗਣ੍ਠੋ ਅਤ੍ਤਨੋ ਨਿਗ੍ਗਹਣਤ੍ਥਂ ਆਗਤਕਾਰਣਂ ਵਿਸੇਸੇਤ੍ਵਾ ਵਦਨ੍ਤੋ ਨ ਅਦ੍ਦਸ, ਏਵਂ ਨ ਦਕ੍ਖਤੀਤਿ ਨੇਤਂ ਠਾਨਂ ਵਿਜ੍ਜਤਿ. ਸਹਧਮ੍ਮੇਨਾਤਿ ਸਕਾਰਣੇਨ. ਅਨ੍ਤਰਨ੍ਤਰਾ ਕਥਂ ਓਪਾਤੇਯ੍ਯੁਨ੍ਤਿ ਮਮ ਕਥਾਵਾਰਂ ਪਚ੍ਛਿਨ੍ਦਿਤ੍ਵਾ ਅਨ੍ਤਰਨ੍ਤਰੇ ਅਤ੍ਤਨੋ ਕਥਂ ਪਵੇਸੇਯ੍ਯੁਨ੍ਤਿ ਅਤ੍ਥੋ. ਨ ਖੋ ਪਨਾਹਂ, ਉਦਾਯੀਤਿ, ਉਦਾਯਿ, ਅਹਂ ਅਮ੍ਬਟ੍ਠਸੋਣਦਣ੍ਡਕੂਟਦਨ੍ਤਸਚ੍ਚਕਨਿਗਣ੍ਠਾਦੀਹਿ ਸਦ੍ਧਿਂ ਮਹਾਵਾਦੇ ਵਤ੍ਤਮਾਨੇਪਿ – ‘‘ਅਹੋ ਵਤ ਮੇ ਏਕਸਾਵਕੋਪਿ ਉਪਮਂ ਵਾ ਕਾਰਣਂ ਵਾ ਆਹਰਿਤ੍ਵਾ ਦਦੇਯ੍ਯਾ’’ਤਿ ਏਵਂ ਸਾਵਕੇਸੁ ਅਨੁਸਾਸਨਿਂ ਨ ਪਚ੍ਚਾਸੀਸਾਮਿ. ਮਮਯੇਵਾਤਿ ਏਵਰੂਪੇਸੁ ਠਾਨੇਸੁ ਸਾਵਕਾ ਮਮਯੇਵ ਅਨੁਸਾਸਨਿਂ ਓਵਾਦਂ ਪਚ੍ਚਾਸੀਸਨ੍ਤਿ.

੨੪੬. ਤੇਸਾਹਂ ਚਿਤ੍ਤਂ ਆਰਾਧੇਮੀਤਿ ਤੇਸਂ ਅਹਂ ਤਸ੍ਸ ਪਞ੍ਹਸ੍ਸ ਵੇਯ੍ਯਾਕਰਣੇਨ ਚਿਤ੍ਤਂ ਗਣ੍ਹਾਮਿ ਸਮ੍ਪਾਦੇਮਿ ਪਰਿਪੂਰੇਮਿ, ਅਞ੍ਞਂ ਪੁਟ੍ਠੋ ਅਞ੍ਞਂ ਨ ਬ੍ਯਾਕਰੋਮਿ, ਅਮ੍ਬਂ ਪੁਟ੍ਠੋ ਲਬੁਜਂ ਵਿਯ ਲਬੁਜਂ ਵਾ ਪੁਟ੍ਠੋ ਅਮ੍ਬਂ ਵਿਯ. ਏਤ੍ਥ ਚ ‘‘ਅਧਿਸੀਲੇ ਸਮ੍ਭਾਵੇਨ੍ਤੀ’’ਤਿ ਵੁਤ੍ਤਟ੍ਠਾਨੇ ਬੁਦ੍ਧਸੀਲਂ ਨਾਮ ਕਥਿਤਂ, ‘‘ਅਭਿਕ੍ਕਨ੍ਤੇ ਞਾਣਦਸ੍ਸਨੇ ਸਮ੍ਭਾਵੇਨ੍ਤੀ’’ਤਿ ਵੁਤ੍ਤਟ੍ਠਾਨੇ ਸਬ੍ਬਞ੍ਞੁਤਞ੍ਞਾਣਂ, ‘‘ਅਧਿਪਞ੍ਞਾਯ ਸਮ੍ਭਾਵੇਨ੍ਤੀ’’ਤਿ ਵੁਤ੍ਤਟ੍ਠਾਨੇ ਠਾਨੁਪ੍ਪਤ੍ਤਿਕਪਞ੍ਞਾ, ‘‘ਯੇਨ ਦੁਕ੍ਖੇਨਾ’’ਤਿ ਵੁਤ੍ਤਟ੍ਠਾਨੇ ਸਚ੍ਚਬ੍ਯਾਕਰਣਪਞ੍ਞਾ. ਤਤ੍ਥ ਸਬ੍ਬਞ੍ਞੁਤਞ੍ਞਾਣਞ੍ਚ ਸਚ੍ਚਬ੍ਯਾਕਰਣਪਞ੍ਞਞ੍ਚ ਠਪੇਤ੍ਵਾ ਅਵਸੇਸਾ ਪਞ੍ਞਾ ਅਧਿਪਞ੍ਞਂ ਭਜਤਿ.

੨੪੭. ਇਦਾਨਿ ਤੇਸਂ ਤੇਸਂ ਵਿਸੇਸਾਧਿਗਮਾਨਂ ਪਟਿਪਦਂ ਆਚਿਕ੍ਖਨ੍ਤੋ ਪੁਨ ਚਪਰਂ ਉਦਾਯੀਤਿਆਦਿਮਾਹ. ਤਤ੍ਥ ਅਭਿਞ੍ਞਾਵੋਸਾਨਪਾਰਮਿਪ੍ਪਤ੍ਤਾਤਿ ਅਭਿਞ੍ਞਾਵੋਸਾਨਸਙ੍ਖਾਤਞ੍ਚੇਵ ਅਭਿਞ੍ਞਾਪਾਰਮੀਸਙ੍ਖਾਤਞ੍ਚ ਅਰਹਤ੍ਤਂ ਪਤ੍ਤਾ.

ਸਮ੍ਮਪ੍ਪਧਾਨੇਤਿ ਉਪਾਯਪਧਾਨੇ. ਛਨ੍ਦਂ ਜਨੇਤੀਤਿ ਕਤ੍ਤੁਕਮ੍ਯਤਾਕੁਸਲਚ੍ਛਨ੍ਦਂ ਜਨੇਤਿ. ਵਾਯਮਤੀਤਿ ਵਾਯਾਮਂ ਕਰੋਤਿ. ਵੀਰਿਯਂ ਆਰਭਤੀਤਿ ਵੀਰਿਯਂ ਪਵਤ੍ਤੇਤਿ. ਚਿਤ੍ਤਂ ਪਗ੍ਗਣ੍ਹਾਤੀਤਿ ਚਿਤ੍ਤਂ ਉਕ੍ਖਿਪਤਿ. ਪਦਹਤੀਤਿ ਉਪਾਯਪਧਾਨਂ ਕਰੋਤਿ. ਭਾਵਨਾਯ ਪਾਰਿਪੂਰਿਯਾਤਿ ਵਡ੍ਢਿਯਾ ਪਰਿਪੂਰਣਤ੍ਥਂ. ਅਪਿਚੇਤ੍ਥ – ‘‘ਯਾ ਠਿਤਿ, ਸੋ ਅਸਮ੍ਮੋਸੋ…ਪੇ… ਯਂ ਵੇਪੁਲ੍ਲਂ, ਸਾ ਭਾਵਨਾਪਾਰਿਪੂਰੀ’’ਤਿ (ਵਿਭ. ੪੦੬) ਏਵਂ ਪੁਰਿਮਂ ਪੁਰਿਮਸ੍ਸ ਪਚ੍ਛਿਮਂ ਪਚ੍ਛਿਮਸ੍ਸ ਅਤ੍ਥੋਤਿਪਿ ਵੇਦਿਤਬ੍ਬਂ.

ਇਮੇਹਿ ਪਨ ਸਮ੍ਮਪ੍ਪਧਾਨੇਹਿ ਕਿਂ ਕਥਿਤਂ? ਕਸ੍ਸਪਸਂਯੁਤ੍ਤਪਰਿਯਾਯੇਨ ਸਾਵਕਸ੍ਸ ਪੁਬ੍ਬਭਾਗਪਟਿਪਦਾ ਕਥਿਤਾ. ਵੁਤ੍ਤਞ੍ਹੇਤਂ ਤਤ੍ਥ –

‘‘ਚਤ੍ਤਾਰੋਮੇ, ਆਵੁਸੋ, ਸਮ੍ਮਪ੍ਪਧਾਨਾ. ਕਤਮੇ ਚਤ੍ਤਾਰੋ? ਇਧਾਵੁਸੋ, ਭਿਕ੍ਖੁ, ਅਨੁਪ੍ਪਨ੍ਨਾ ਮੇ ਪਾਪਕਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤਿ. ਉਪ੍ਪਨ੍ਨਾ ਮੇ ਪਾਪਕਾ ਅਕੁਸਲਾ ਧਮ੍ਮਾ ਅਪ੍ਪਹੀਯਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤਿ. ਅਨੁਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ ਅਨੁਪ੍ਪਜ੍ਜਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤਿ. ਉਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁਨ੍ਤਿ ਆਤਪ੍ਪਂ ਕਰੋਤੀ’’ਤਿ (ਸਂ. ਨਿ. ੨.੧੪੫).

ਏਤ੍ਥ ਚ ਪਾਪਕਾ ਅਕੁਸਲਾਤਿ ਲੋਭਾਦਯੋ ਵੇਦਿਤਬ੍ਬਾ. ਅਨੁਪ੍ਪਨ੍ਨਾ ਕੁਸਲਾ ਧਮ੍ਮਾਤਿ ਸਮਥਵਿਪਸ੍ਸਨਾ ਚੇਵ ਮਗ੍ਗੋ ਚ, ਉਪ੍ਪਨ੍ਨਾ ਕੁਸਲਾ ਨਾਮ ਸਮਥਵਿਪਸ੍ਸਨਾਵ. ਮਗ੍ਗੋ ਪਨ ਸਕਿਂ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਮਾਨੋ ਅਨਤ੍ਥਾਯ ਸਂਵਤ੍ਤਨਕੋ ਨਾਮ ਨਤ੍ਥਿ. ਸੋ ਹਿ ਫਲਸ੍ਸ ਪਚ੍ਚਯਂ ਦਤ੍ਵਾਵ ਨਿਰੁਜ੍ਝਤਿ. ਪੁਰਿਮਸ੍ਮਿਮ੍ਪਿ ਵਾ ਸਮਥਵਿਪਸ੍ਸਨਾਵ ਗਹੇਤਬ੍ਬਾਤਿ ਵੁਤ੍ਤਂ, ਤਂ ਪਨ ਨ ਯੁਤ੍ਤਂ.