੧੦. ਵੇਖਨਸਸੁਤ੍ਤਵਣ੍ਣਨਾ

੨੭੮. ਏਵਂ ਮੇ ਸੁਤਨ੍ਤਿ ਵੇਖਨਸਸੁਤ੍ਤਂ. ਤਤ੍ਥ ਵੇਖਨਸੋਤਿ ਅਯਂ ਕਿਰ ਸਕੁਲੁਦਾਯਿਸ੍ਸ ਆਚਰਿਯੋ, ਸੋ ‘‘ਸਕੁਲੁਦਾਯੀ ਪਰਿਬ੍ਬਾਜਕੋ ਪਰਮਵਣ੍ਣਪਞ੍ਹੇ ਪਰਾਜਿਤੋ’’ਤਿ ਸੁਤ੍ਵਾ ‘‘ਮਯਾ ਸੋ ਸਾਧੁਕਂ ਉਗ੍ਗਹਾਪਿਤੋ, ਤੇਨਾਪਿ ਸਾਧੁਕਂ ਉਗ੍ਗਹਿਤਂ, ਕਥਂ ਨੁ ਖੋ ਪਰਾਜਿਤੋ, ਹਨ੍ਦਾਹਂ ਸਯਂ ਗਨ੍ਤ੍ਵਾ ਸਮਣਂ ਗੋਤਮਂ ਪਰਮਵਣ੍ਣਪਞ੍ਹਂ ਪੁਚ੍ਛਿਤ੍ਵਾ ਜਾਨਿਸ੍ਸਾਮੀ’’ਤਿ ਰਾਜਗਹਤੋ ਪਞ੍ਚਚਤ੍ਤਾਲੀਸਯੋਜਨਂ ਸਾਵਤ੍ਥਿਂ ਗਨ੍ਤ੍ਵਾ ਯੇਨ ਭਗਵਾ, ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਨ ਠਿਤਕੋਵ ਭਗਵਤੋ ਸਨ੍ਤਿਕੇ ਉਦਾਨਂ ਉਦਾਨੇਸਿ. ਤਤ੍ਥ ਪੁਰਿਮਸਦਿਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੨੮੦. ਪਞ੍ਚ ਖੋ ਇਮੇਤਿ ਕਸ੍ਮਾ ਆਰਭਿ? ਅਗਾਰਿਯੋਪਿ ਏਕਚ੍ਚੋ ਕਾਮਗਰੁਕੋ ਕਾਮਾਧਿਮੁਤ੍ਤੋ ਹੋਤਿ, ਏਕਚ੍ਚੋ ਨੇਕ੍ਖਮ੍ਮਗਰੁਕੋ ਨੇਕ੍ਖਮ੍ਮਾਧਿਮੁਤ੍ਤੋ ਹੋਤਿ. ਪਬ੍ਬਜਿਤੋਪਿ ਚ ਏਕਚ੍ਚੋ ਕਾਮਗਰੁਕੋ ਕਾਮਾਧਿਮੁਤ੍ਤੋ ਹੋਤਿ, ਏਕਚ੍ਚੋ ਨੇਕ੍ਖਮ੍ਮਗਰੁਕੋ ਨੇਕ੍ਖਮ੍ਮਾਧਿਮੁਤ੍ਤੋ ਹੋਤਿ. ਅਯਂ ਪਨ ਕਾਮਗਰੁਕੋ ਕਾਮਾਧਿਮੁਤ੍ਤੋ ਹੋਤਿ. ਸੋ ਇਮਾਯ ਕਥਾਯ ਕਥਿਯਮਾਨਾਯ ਅਤ੍ਤਨੋ ਕਾਮਾਧਿਮੁਤ੍ਤਤ੍ਤਂ ਸਲ੍ਲਕ੍ਖੇਸ੍ਸਤਿ, ਏਵਮਸ੍ਸਾਯਂ ਦੇਸਨਾ ਸਪ੍ਪਾਯਾ ਭਵਿਸ੍ਸਤੀਤਿ ਇਮਂ ਦੇਸਨਂ ਆਰਭਿ. ਕਾਮਗ੍ਗਸੁਖਨ੍ਤਿ ਨਿਬ੍ਬਾਨਂ ਅਧਿਪ੍ਪੇਤਂ.

੨੮੧. ਪਾਪਿਤੋ ਭਵਿਸ੍ਸਤੀਤਿ ਅਜਾਨਨਭਾਵਂ ਪਾਪਿਤੋ ਭਵਿਸ੍ਸਤਿ. ਨਾਮਕਂਯੇਵ ਸਮ੍ਪਜ੍ਜਤੀਤਿ ਨਿਰਤ੍ਥਕਵਚਨਮਤ੍ਤਮੇਵ ਸਮ੍ਪਜ੍ਜਤਿ. ਤਿਟ੍ਠਤੁ ਪੁਬ੍ਬਨ੍ਤੋ ਤਿਟ੍ਠਤੁ ਅਪਰਨ੍ਤੋਤਿ ਯਸ੍ਮਾ ਤੁਯ੍ਹਂ ਅਤੀਤਕਥਾਯ ਅਨੁਚ੍ਛਵਿਕਂ ਪੁਬ੍ਬੇਨਿਵਾਸਞਾਣਂ ਨਤ੍ਥਿ, ਅਨਾਗਤਕਥਾਯ ਅਨੁਚ੍ਛਵਿਕਂ ਦਿਬ੍ਬਚਕ੍ਖੁਞਾਣਂ ਨਤ੍ਥਿ, ਤਸ੍ਮਾ ਉਭਯਮ੍ਪੇਤਂ ਤਿਟ੍ਠਤੂਤਿ ਆਹ. ਸੁਤ੍ਤਬਨ੍ਧਨੇਹੀਤਿ ਸੁਤ੍ਤਮਯਬਨ੍ਧਨੇਹਿ. ਤਸ੍ਸ ਹਿ ਆਰਕ੍ਖਤ੍ਥਾਯ ਹਤ੍ਥਪਾਦੇਸੁ ਚੇਵ ਗੀਵਾਯ ਚ ਸੁਤ੍ਤਕਾਨਿ ਬਨ੍ਧਨ੍ਤਿ. ਤਾਨਿ ਸਨ੍ਧਾਯੇਤਂ ਵੁਤ੍ਤਂ. ਮਹਲ੍ਲਕਕਾਲੇ ਪਨਸ੍ਸ ਤਾਨਿ ਸਯਂ ਵਾ ਪੂਤੀਨਿ ਹੁਤ੍ਵਾ ਮੁਞ੍ਚਨ੍ਤਿ, ਛਿਨ੍ਦਿਤ੍ਵਾ ਵਾ ਹਰਨ੍ਤਿ.

ਏਵਮੇਵ ਖੋਤਿ ਇਮਿਨਾ ਇਦਂ ਦਸ੍ਸੇਤਿ – ਦਹਰਸ੍ਸ ਕੁਮਾਰਸ੍ਸ ਸੁਤ੍ਤਬਨ੍ਧਨਾਨਂ ਅਜਾਨਨਕਾਲੋ ਵਿਯ ਅਵਿਜ੍ਜਾਯ ਪੁਰਿਮਾਯ ਕੋਟਿਯਾ ਅਜਾਨਨਂ, ਨ ਹਿ ਸਕ੍ਕਾ ਅਵਿਜ੍ਜਾਯ ਪੁਰਿਮਕੋਟਿ ਞਾਤੁਂ, ਮੋਚਨਕਾਲੇ ਜਾਨਨਸਦਿਸਂ ਪਨ ਅਰਹਤ੍ਤਮਗ੍ਗੇਨ ਅਵਿਜ੍ਜਾਬਨ੍ਧਨਸ੍ਸ ਪਮੋਕ੍ਖੋ ਜਾਤੋਤਿ ਜਾਨਨਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਵੇਖਨਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.